احفاد السيد : الثار ( بأجزائها الإثنين ) الفصل الخامس وسبعون 75 - بقلم ​رُقَيَّةُ الْأَكْبَرُ

﴿ وَالْبَاقِيَاتُ الصَّالِحَاتُ ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد

مُتابعة لحســابي حتــى ندخل رقم جديد

التعب علينا والتفاعل عليكم

🛑🛑🛑 وَزاتيّ ميصير هيج البارت ماجاي يصعد ١٠٠ تصويت وانا ماجاي اقصر بشيء وياكم بالسرد و بالتنزيل وبالترتيب ومحد مثلي تنشر كل بارت 10الاف كلمة فما فوق يعني كاتبات ينشرن بس أربع آلاف كلمة والتفاعل نار وياهم شنو المووضوع؟؟؟

التصويت والتعليق أبين الفقرات كلش مهمةهو الدعم للقصة وهو الينسي الكاتب التعب التصويت كلش ما عاجبني مو حلو ...
والمصممات لا تقصرن 🎀🌸

الما تصوت للبارت وتعلق على الفقرات كون تطلع حباية بخشمها( الا هيچ ياالله تجن وياي )

متابعة لحسابي ندخل رقم جديد

- انا بفترة غرامك
كُلشي ما خليت
بعت كُل اليغثك خاطر العشره
وعفتني انت بحر مابي جرف ينشاف
بلعت الموس هسه وحاضن الجمره
وجع روحي انفضح ليش استر السويت
بـ الحر ما تذله وينتقص قدره
ابرگع عيني من يفوت غيرك جان
وكت هسه عليَ تستحسف النظره؟

﷽
اللهم صلّ علىٰ محمد وآل محمد
~~~~~~~
٭٭ ألفاروق الأعظم ٭٭

صرت اتقرب شوية شوية من الماي وصرت امشي لجوة جنت اريد اشمر روحي ورة الهوية و ورة التليفون واخلص من روحي صرت اصيح بصوت عالي والماي جان ماخذ نص رجلية

:- البشير قيصر سيد صفاء الحسن يا علوية يا أم البنين كلكم مشكورين واحد بنى لي قصر من جذب ووحدة هدمته بحقارة صدك من اليوم لا أنا ابنكم ولا أنا حبيبكم أنا ابن الگاع وابن الضياع

فجأة سمعت صوت سيارة تمشي سريع وراي وصوت البشير قيصر و المرتضى الأمير من بعيد يصيح

البشير قيصر :- فارووووق لا تسويها يا خويه فدوة لاسمك ارجع

المرتضى الأمير :- شمالك فاروق شنهي جااهلل شمالكك ولك..؟؟ ارجععع

التفتت عليهم نص التفاتة وجهي جان خالي من أي تعبير عيوني جانت جمر مطفي رفعت إيدي إله بحركة بسيطة وقبل لا يوصل بامتار همست لنفسي

:- ألفاروق الأعظم أخوكم مات هسة راح يبدي الحساب

وبدون تردد وبكل هدوء شمرت روحي بوسط المي مو بنية الموت بس بنية الغسل من كل گطرة دم عبالي تنتمي الهم

وبين ما المي يغمر راسي وصوت البشير قيصر و المرتضى الامير يختفي شفت صورة أم البنين وهي تبتسم الي بس هالمرة أنا اللي جنت أضحك لأن الجذبة انتهت واليوم بس بدت الحقيقة المرّة

غطست.. والظلمة اللي بصدري أخيراً لكت مكان يشبهها

المي غسلني بس ما طهرني طلعت من الشط وجسمي يختض من البرد بس الجمر اللي بگلبي جان كفيل يذوب الثلج البشير قيصر والمرتضى الأمير جانوا واكفين يمي وجوههم تتوسل بــ كلمة عفو وأنا عيوني جانت تدور على شي واحد جانت تدور على الحقيقة المذبوحة بباب بيت السيد صفاء الحسن.

أول ما طلعت اجوني إخواني يردون يحجون وياي دفعتهم ومشيت عنهم محد لحگني لأن يعرفون اخبالي اذا طگت عليهم ما أرحم واحد بيهم لهذا من شافوني طلعت بخير محد فكر يلحكني صعدت سيارتي ورجعت للبيت مو بيت أبوي السيد صفاء لا.. رجعت للبيت اللي عشت بيه خمسة وثلاثين سنة وانا مضحوك علية دخلت والماي ينكط من هدومي على هذا البيت جنت أمشي بيه بهيبة السيد تالي أطلع مجرد أبن روحي انباعت واشتريت بفلوس

كعدت بالبراني ما دخلت لجوة البيت ماريد أشوف عمتي ولا اشوف ام البنين بعدها بساعة دخلوا البراني المرتضى الأمير و البشير قيصر والبشير قيصر واكف كبالي مدنك راسه المرتضى الامير صار جان يروح ويجي يفرك بإيديه

حطيت وجهي بين ايدية وهتفت وياهم

ألفاروق الأعظم :- يا شيخ السادة تعرف الماي اللي دخل بريتي بالشط صحى عقلي أم البنين كالت كلمة وذيج الكلمة جان وراها سر أكبر من مجرد تبني السيد صفاء الحسن الله يرحمه جان أطهر من إنه يربي طفل ويضم عليه أصله إلا إذا جان اكو طرف ثاني بالموضوع احجي.. والعباس إذا جذبت بكلمة أحرك البيت بمن بيه

البشير قيصر صار يتنوع الي وعيونه جانت حمرة وبصوت مخنوك كال

البشير قيصر :- فاروق السالفة مو بس تربية السالفة جانت حماية لك وحماية لأمي فدوة الك اروح انا

- ابوي وين ابوي امي وينهم؟

:- أمك ميتة بس أبوك..

- كمللل ابوي وينة ابوي الحقيقي ميت لو عايش احجيي ولا تظل هيج تسوي وياي احجي بشير احجيي

:- أبوك الحقيقي عاايش مو ميت

هاي الكلمة نزلت على راسي مثل الصاعقة وكفت على حيلي كمت ولزمت ياخته وصحت بيه

ألفاروق الأعظم :- شكلت؟ أبوية عايش؟ ولك شلون عايش وأنا طول عمري عايش وياكم وين عني هوة واصلا منو هو وين جان؟

البشير قيصر :- أبوك هو يشتغل سايق تكسي من توفت أمك أثناء ولادتك هو انهار كال ما أكدر أربي طفل وأنا فقير ومنتهي ذبك بالميتم بليلة ظلمة والسيد صفاء الحسن جان محتاج طفل من عمرك ومن شافك بالميتم كلبه انكسر عليك راح جابك وسماك الفاروق الأعظم وانطاك اسمه ونسبه حتى تعيش

ضحكت ضحكة هستيرية ضحكة وجع خلت المرتضى الأمير يغمض عيونه من الهضم ويدير وجه عننا وانا تخصرت واستمريت احجي وي البشير قيصر

- زين وشلون شلون اتحمل يضل بعيد عني هلكد؟ ولا مرة من المرات شافني ولا اجه على راسة يجي يحجي وياي حتى لو مسوي روحة غريب ويجيني بشير احجي لا تفطر كلبي وتكسر ظهري احجي

:- ابوك استغل هلشيء هو جان يعرف السيد صفاء الحسن مايريد أحد بهلدنيا يعرف أنتَ مو أبنه حتى لا تطلع عليك كلمه منا لو منا اثناء عصبية لو عركة ماجان يريد أحد يكلك اليتيم لو يكلك فد كلمة أبوك عرف هذا الشيء لهذا صار ياخذ فلوس من أبوي على سكوتة وعلى أن ما يتگرب منك

- الفلوس؟ يعني الفلوس الجانت تطلع من حسابات محلاتنا الفلوووس المبالغ الجبيرة وأنت تكول هاي صدقات جارية؟جانت ثمن سكوت هذا الي انا من صلبة!!!

:- أبوك جان يعرف إن السيد يحبك أكثر من روحه استغل هذا الحب صار يهدد السيد كل فترة يكول
راح أحجي الحقيقة وأفضحكم وأكول الفاروق ابني ومو سيد
السيد جان يخاف عليك يخاف تنكسر فجان ينطيه فلوس جان يشتري سكوت أبوك بفلوسنا حتى تبقى أنت السيد اللي يرفع الراس

- عندك عنوانه؟

:- فاروق أنتَ اخوي أنتَ الوحيد بقيت الي الله يخليك لا تروحله لا تسوي هيج بيه يابعد اخوك مالي غيرك لا تكسرني لا تظلمني والحسين سويت هيج وماحجيت لخاطرك مااريد اخسرك كاافي علية فراك مؤمل و تحرير الي لحد هسة اتحلم بيهم كاافي عليه هذول مابية بعد اخسرنك أنتَ هم فاروق

- انطيني عنوانه بشير

:- فاروووق

المرتضى الأمير :- بشير فاروق جبير مو طفل انطي عنوان أبوه خلي يشوفه خلي يحجي وياه ويرجع النا لأن راح يعرف إحنا أهله موش الي يبيعة علمود كم فلسس

- بشير انطيني العنوان

:- شراح يصير اذا انطيت الك العنوان؟

- أبوي وانا اتصرف وياه انطيني العنوان كاافي ماريد صوتي يعلى اكثر لا تسمع عمة السادة وشيخلصنا بعد

:- خوشش انطي الك بس توعدني؟

- انطيني بشير العنوان وبعدها الله كريم لكلشي

:- لا إله إلا الله

اخذت العنوان من البشير قيصر وضغطت علية يروح وعفتهم ودخلت لجوة لمن صعدت أريد أروح لغرفتي لكيت أم البنين ماخذة حيدرة من غرفة حامد المتقين وتريد تروح لــ غرفتها

عفتها وردت اروح بس ما سكتت هية وهتفت وياي

أم البنين :- انا آسفة

التفتت الها واتقربت منها وهتفت وياها

ألفاروق الأعظم :- آسفة؟؟؟

:- ماكدرت اسكت لمن عرفت!!

- هههههههههه شكراً الچ

:- فاروووق لا تفكر انا رافضتك بسبب هلشيء ترى انا حالي من حالك لو ما زلة السان وهج الطف قبل يومين جان ما عرفت والله

- مو مهم مو مهم انتهتت وداعتچ

:- انطيك حل يريحك؟

- ههه شنو بلة؟

:- لا تظل هنا كلهم جذبوا عليك عوفهم وروح ولا تسمع ولا واحد بيهم أنتَ مو جاهل ماجان لازم هيچ يتعاملون وياك كـ طفل خلي يخسرونك عوفهم وروح ولا تسأل عليهم ولا تخليهم يعرفون وين أنتَ أصلاً

- وين أروح؟

:- انا أكلك وين تروح بس بشرط محد يعرف شيء عنك وتروح والروحة روحة لا توصل خبر الهم ولا شيء وخليهم بنارهم عايشين مايدرون أنتَ ميت لو عدل

- يصير خير

عفت أم البنين بعد ما كالتلي وين أروح ورجعت لغرفتي سديت الباب ولكيت الدولكة مال الماي على الميز ويمة الكلاص رحت واخذت الكلاص شربت الماي كلة وشمرت الكلاص بالكاع كسرتة وضليت اباوع للكزاز المنثور وكلت بصوت عالي

ألفاروق الأعظم :- آسسسف .. هههههه والله انا آسف لان كسرتك ماجان قصدي اكسرك اسسف ححيل اسف شفتت شفت هذا كسرك كلة وشلون الكزاز مالتك أنثر بالكاع بكلمة آسف مني رتح تتصلح انا اعرفنك زين هم ذول البشر يكسرون كلشي بينه ويخلوننا منثورين مثل الكزاز هذا بالضبط ويكوولون آسف ههههههههههههههه يااالله ياالله ياالله ياالله ياعلييي دخيلك ياابو الحسنين دخيلك يابو طلبة دخيلك اااخ يمةة ولج يمة وين لگيتي ابوي واخذتيي وين شوفي شلون باعني لچ يمة ياريت انا المتت بذاك اليوم ولا أنتِ يمااااه

وكعت بالكاع ابچي والطم الكاع وكمت سحبت السجادة وانا ملابسي كلها ماي من الشط ولا توضيت اخذت وسجدت عليها وبقيت ساچد وابجي بكل ماعندي طاقة لحد ماا خلص ماعندي صبر فقدت الوعي وانا على السجادة

ولمن صحيت باوعت للشباچ لكيت الضوة جاي يطلع ما اكدر انتظر أكثر من هيج بلش الصبح يطلع اخذت مفاتيح السيارة وطلعت من الغرفة اركض لجوة طلعت من البيت و ركبت السيارة والدموع تحرك عيوني مو حزن دموع أحس ب حقارة ابوي بهذا الموقف

طلعت العنوان اللي نطاني اياه البشير قيصر جان بمحافظة بغداد منطقة شعبية بأطراف المحافظة صرت امشي على ٢٠٠ مثل البايع روحة ومايريدها وجنت اباوع للطريق وما ارمش جنت صافن اصلا ومو يم الشارع ولا السيارات وبعد ساعتين دخلت المحافظة ورحت للعنوان دخلت المنطقة وجانت بيوتها تعبانة وريحة الفقر والظلم يملي الهوى

وكفت كدام بيت قديم متهالك بابه خشب مأكول نزلت من السيارة بملابسي اللي دخلت بيهن للشط ماغيرتهن كلهن طين يابس وشكلي اللي يوحي بمصيبة دكيت الباب بكل قوتي
طلع لي رجال جبير الشيب تارس لحيته بس عيونه بيها مكر غريب أول ما شافني جمد بمكانه اظن عرفني عرف الملامح اللي ضيعها بالميتم قبل ثلاثين سنة

:- اتفضل أبني؟

الفاروق الأعظم :- هههههه إبنك حلوة هاي الحچاية

:- شنو أبني منو حضرتك؟

- لو بس شوية صايبك فضول تشوفني وتعوف الفلوس جان عرفتني وما استغربت شكلي

:- مااحب الالغاز عندك شيء يمي احجي ماعندك الله وياك

- اسمي الفاروق الأعظم صفاء الحسن

:- فاروق؟

- لا تكول فاروق هذا الاسم اشتراه السيد صفاء الحسن بفلوسه من حثالة مثلك.؟

:- أنتَ شجابك هنا؟

- أنتَ اللي بعتني؟ أنتَ اللي جنت تاخذ ثمن سكوتك من تعب الرجال اللي رباني؟

:- تعال وين رايح؟؟

دفعته ودخلت للبيت جان البيت متروس أغراض غالية شاشات حديثة وأثاث ما يشبه فقر المنطقة ولا مناضر البيوت الي شفتها برة عرفت هاي الفلوس منين عرفت هاي فلوس سكوتة هاي فلوس ذلي
صرت اباوع للبيت واتلفت وانداريت إله لكيتة ساد الباب وواكف يباوعلي هتفت وياه بحرگة كلبي

ألفاروق الأعظم :- ولك شلون شلون گلبك طاوعك؟ تذبني بالميتم وأنا لحمة حمرة وتالي من تشوفني صرت سيد وبيدي خير تگوم تبتز الرجال اللي ستر عليك وعلى أبنك ولك السيد صفاء الحسن جان يشوفك إبنه وأنتَ جنت تشوفه بنك!

:- أنا ما بعتك أنا أمنت مستقبلك لو بقيت يمي جنت راح تطلع سايق مثلي تمسح جام السيارات أنا خليتك تلبس الحرير وتكعد بصدر الدواوين والناس تبوس إيدك هذا مو ثمن؟ هاي الفلوس اللي جنت آخذها هي حقي حق السنين اللي حرمت روحي منك بيها!

اتقربت منه وفتح ذرعانة عبالة راح احضنة صفنت بوجه واخذت قراري بسرعة ورفعت ايدي وضربته بوكسي بكل قوتي وكع بالكاع وهو يصيح

ألفاروق الأعظم :- حقك؟ ولك يا حق؟ أنتَ بعت شرفك وبعت ابنك أنا اليوم ميتَ مرتين مرة من عرفت إني مو سيد ومرة من عرفت إن دمي جاي من واحد نذل مثلك تدري السيد صفاء الحسن شكد جان يتألم كلما يوقع صك الك؟ جان يحس بالذنب تجاهي عباله هو جاي يظلمني وهو جان جاي يحميني من قذارتك ولك أنتَ ما تحسب على الآباء أنتَ ازبالة أنتَ قذر وقنــــد** أبن الحرام لكك كفر أبقى هنا يم أبن حرام و زنا مثلك

ما انتظرتة يرد عليه دفعته حيل للكاع وأنا أحس بقرف ماله أول من آخر تفلت على الكاع كباله وطلعت من البيت وأنا أحس بروحي جاي تتقيأ كل ذرة دم منه ركبت سيارتي وشخطتها بكل سرعتي والمنطقة الشعبية بدت تصغر بالمرايا مثل ذكرياتي اللي تلاشت بلحظة عيوني جانت تغوش من القهر بس هالمرة مو قهر الضعيف لا قهر السبع اللي غدروا بيه أهله

فتحت الجامة الهوى البارد مال بغداد طگ بوجهي بس ما برد الجمر اللي بصدري

:- بعد ماكو فاروق السيد بعد ماكو ابن السادة اليوم ولد الفاروق الجديد المگطوع من شجرة اللي ماله أصل غير ذرعانة

تذكرت كلمات أم البنين وهي واكفة بالممر عينها جانت بيها نظرة غريبة مو نظرة شماتة ولا نظرة شفقة جانت نظرة خلاص

:- كالتلي عوفهم كالتلي خليهم بنارهم وكالتلي تروح والروحة روحة أي والله يا أم البنين طلعتي أنتِ الأصدق بيهم لأن وجهچ جان مكشوف من البداية مو مثلهم وجوههم ملائكة وكلوبهم مخازن أسرار

رجعت للمحافظة بس ما دخلت للبيت وكفت سيارتي بعيد بمكان أظلم انتظرت لحد ما صار الليل والناس هودت نزلت تسللت للبيت مثل الغريب أنا اللي جنت أمشي وصوت جدمي يرج الكاع اليوم أمشي على طارف أصابعي خاف البشير قيصر يسمعني ويجي يذب روحه جوه رجلي بكلمة خوية لو عمتي تجيني بدمعتة لو بسمة تحاول تحجي وياي

دخلت للبيت وصعدت لفوك دخلت لغرفتي ما شعلت ضوة فتحت جنطة صغيرة شمرت بيها هدوم سادة عفت الدشاديش وعفت كلشي يربطني بـ السيد أخذت فلوسي الخاصة اللي جمعتها من تعبي ومحلاتي وأخذت سلاحي هذا الوحيد اللي راح يحميني بالطريق
ردت أطلع وشفت صورة السيد صفاء الحسن معلكة بالحايط مال غرفتي وكفت كبالها عيوني غركت بالدموع

:- ليش يا بوية؟ لو كايل لي أنا ابن زنا لو كايل لي لكيتك بالشارع ولا تخلي هذا النذل يبتزك بسببي أنتَ عبالك تحميني؟ أنتَ ذبحتني بسجين عمية أنتَ ربيتني على العز وأصل أبوي تكسي يبيع ابنه بخمسة آلاف مشكور يا سيد مشكور على كل جذبة عيشتني بيها.

نزلت الدرج وجان البيت هدوء بس أحس الحيطان تهمس باسمي وصلت يم باب المطبخ سمعت صوت حركة جمدت بمكاني غمضضت عيوني وخفت لا يطلع واحد من الميرزا لو عمة السادة ماجنت اريد واحد يشوفني وانا بيدي الجنطة طلعت أم البنين جانت لابسة حجابها وكاعدة تسوي ممة لـ حيدرة صفنت بية وباوعت الي من فوك لجوة وهتفت وياي

أم البنين :- ردت تروح بلا ما تودعني؟

ألفاروق الأعظم :- الوداع للي عنده أهل يرجع الهم أنا رايح لمكاني الحقيقي

دنت يمي وهتفت وياي

أم البنين :- روح لـ سوريا لــ منطقة السيدة زينب محد راح يعرف بيك من السادة ولا يجي براسهم أنك ممكن تروح هناك غير اسمك غير شكلك وابدي من جديد هناك محد يگلك سيد ولا محد يگلك ابن الميتم

بست راسها مو حباً بس تقديراً لأنها الوحيدة اللي خلتني أواجه الحقيقة المرة

ألفاروق الأعظم :- أم البنين حيدرة بركبتچ لا تخلينه يطلع مثليي لا تخلينه يعيش بجذبة بس يوعه كليلة ابوك ميت لا تكليله مسافر

- دربك أخضر ان شاءالله بحق محمد وآل محمد

:- استودعتج الله ياشمامة گلبي المُستحيل الي

عفتها وطلعت من الباب طلعت من المجمع وركبت سيارة جنت مخليها بعيدة عن المجمع وتوجهت لـ طريق النخيب الطريق اللي يودي للحدود

الليل جان موحش والبادية جبيرة بس مو بكبر الفراغ اللي بصدري وصلت للمطار الفجر الجو جان يگص كص من البرد وكفت السيارة ونزلت باوعت لــ أرض العراق وضحكت بوجع

ألفاروق الأعظم :- يا كاع العراق شكد شلتي مظاليم وشكد شربتي دموع اليوم أترك لچ السيد الفاروق وأخذ وياي الجابر وبس يا إخواني لا تدورون عليّ أنا متت بذاك الشط واليوم أنا مجرد طيف راح يطاردكم بكل زاوية بهذا البيت اللي بنيتوه على جثتي

رحت للمطار وصعدت الطيارة وطارت والظلمة بدت تنجلي دخلت الأراضي السورية وأنا أحس بريتي هوى غريب مو هوى بلدي بس هوى الحرية من الجذبة

نزلت بالعاصمة دمشق ورحت لمنطقة السيدة زينب الزقاق جان ضيج والريحة تشبه ريحة الكاظمية خلت كلبي يوجعني
ضليت اتلفت مثل الغريب ولمن لكيت بيت مكتوب علية للاجار وحاطين رقم اتذكرت ماعندي تليفون لازم اشتري ولازم اسوي سيم كارت سوري باوعت لارجاء المنطقة لكيت كشك صغير رحت ليمة وطلبت منه تليفون وانطاني الرجال ما قصر اتصلت على ابو البيت وضليت بالشارع منتضرة لمن اجاني واتفقنا عليه وجان جايب المفاتيح وياه طلعت له فلوس من الجنطة وطلبت منه يحولهن بالمصرف من عملة عراقية للعملة السورية وفتحت باب البيت ودخلت جان مترب هدوء بيه يشبه روحي

شمرت الجنطة بالكاع وكعدت بالمصطبة الخشب القديمة

اتذكرت صوت أم البنين وهي تكلي :- نحار الحقيقة تكتل بس تعيشك زلمة لا ترجع إلا وأنتَ صاير النار اللي تحرگ كل واحد استصغرك

ضليت اصرخ منكسر

:- سمعتوني؟ أنا هنااااا يا سيد صفاء يا بشير يا أبوي النذل أنا هنا بدت حياتي راح أربي نفسي من جديد وأصقل سيف صبري والايام الجاية هي الحكم

طلعت السجادة مال الصلاة من الجنطة وحطيت التربة مالتي والمسبحة والقران وكتاب الأدعية سجدت وبجيت بجيت لحد ما نشفت عيوني

:- يا علي أنا ما جيتك سيد من سلالتك أنا جيتك إنسان مكسور الظفر لا تخليني أحتاج لواحد منهم ارفع راسي بغير اسمهم وبغير فلوسهم ياعلي دخيلك ودخيل بخت بنتك زينب

مرت الليالي وصار الفاروق الأعظم يشتغل بالمنطقة يلملم جروحه ويبني كيانه بعيد عن السادة الي جانوا يدورون عليه شبر شبر بالعراق أما ألفاروق الأعظم جان يباوع للمراية كل يوم ويشوف ملامحه تتغير القسوة بدت ترسم خطوطها على وجهه

وبليلة من الليالي وهو كاعد بالسطح يباوع لمنارات السيدة تذكر أبوه الحقيقي وهتف وي نفسة وهو يدخن

ألفاروق الأعظم :- الفلوس اللي جنت تاخذها يا نذل راح ترجعها دم والاسم اللي اشتراه السيد صفاء الحسن راح أسويه اسم يهز الشام والعراق بس هالمرة باسمي أنا الجابر وبس

نزل من السطح سد الباب وراه ومن ذيج الليلة انگطع خبره عن العراق صار الغريب للي الكل يهابه والكل يسأل عن أصله ومن وين جاي وليش اجه وهو جوابه واحد

:- أنا ابن الكاع وابن الضياع اللي رجع من الموت حتى يحاسب الحي

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُبر ٭٭

بعد ما گضة اسبوع بدون خبر من البنية اتصلت بواحد من جماعة عمي علي الباقر وطلبت منه معلومات عن حوراء ودزيت له صورة الها من صورة جماعية ماخذيها علمود يشوفها بكل مكان ويعرفلي وين هَيّ مو لشيء بس خاطر يرتاح گلبي

وطلعت من البيت وي صفوان ونحن نمشي بسيارة و بالازدحامات وكفنا من الملل صرت أقرأ

شُــبر :- عَلِيٌّ أَمِيرِي وَنِعْمَ الأَمِيرْ
بِنُورِ الهِدَايَةِ طَهَ اسْتَنِيرْ
نَصِيرُ النَّبِيِّ وَخَيْرُ النَّصِيرْ
إِذَا اشْتَدَّ كَرْبٌ وَعَزَّ المَسِيرْ
أَبُو الحَسَنَيْنِ وَزَوْجُ البَتُولْ
وَبَابُ العُلُومِ وَصِهْرُ الرَّسُولْ
بِحُبِّكَ يَا حَيْدَرُ نَسْتَقِيمْ
وَنَرْجُو بِهِ جَنَّةً وَالنَّعِيمْ
وَوَارِثُ طَهَ وَأَغْلَى وَزِيرْ
وَمَنْ كَانَ لِلْحَقِّ سَيْفاً شَهِيرْ
شُجَاعٌ مَهِيْبٌ إِذَا مَا صَالَ
وَغَيْثٌ هَمُولٌ إِذَا مَا جَالَ
لَهُ فِي المَحَافِلِ نُورٌ جَلِيّ
فَمَنْ كُنْتُ مَوْلاهُ فَهَذَا عَلِيّ
سَلامٌ عَلَيْكَ أَبَا الأَوْصِيَاءْ
صَلاةً تُعَانِقُ عَرْشَ السَّمَاءْ

بس سكتت صاح صديقي صفوان

صفوان :- لكك عاااش ويسلملي هذا الصوت

- حبيبي

:- صدك شبربر

- ها؟

:- عرفتوا شيء عن حوراء؟

- لا والله لهسة ماكو شيء

:- الله يرجعها بالسلامة

- ذو الفقار مايحبها

:- شلون؟

- ذو الفقار ما يحب حوراء

:- شدخلل؟ منو كالك؟

- انا أكلك الله ما نشاف بالعقل انعرف لك ماتشوفة مامهتم لعدم وجودها عايش براحة وكان ماكو شيء و حوراء خلصت إجازتها وانتبهت الأساتذة صاروا يسجلون عليها الغيياااب!!بس غادي كاتلة روحها عليها وخايفة صدك والشفية ذو الفقار يصير زلمة بس چدام حَوراء وهسة محتارلي بالحبيبات

:- ماتعرف أنتَ شنو جوة صدرة

- اگص أيدي من شلشها اذا طلع يحبها لك جان بس يعاندني بيها مو حب الها وحگ جدي النبي

:- معقولة هيچي؟

- اي معقولة وهاي الثولة الزركة مشت وياه وعبالها يحبها وخايف عليها عايشة وياه بحلم الغبية تركتني علمودة

:- على فكرة اذكرك خاف نسيت ترى ماصار بينكم شيء حتى تكول تركتني

- راد يصير للحظة جان راح يصير كلشي لو ماهو ذو الفقار حاشر روحة وخلاها تتخاصم وياي جان كلشي راح يصير وجان المرحلة الثالثة بلشناها ونحن لابسين حلقات بسس اخخخ من غبائهااا بنت ستار مهدي

:- وعلي بطرانين أنتم الإثنين ويلا هسة البنية لا حظت بيك سيد شبر ولا اخذت ذو الفقار أخبارها وضايعة وماتعرفون عدلة ميتة اثرها ماتعرفون وين الله حاطة

- مو الي هية وعمرها ماتصير الي أدري بحظييي

:- سلملي على حظك وبوسة حيل اذا صارت من قسمتك هسة شني وحاط راسك وياها باوع لنفسك أنتَ وين هي وين أول مرة اشوف واحد يباوع لچوة

- وأصل سلامك عود وبعدين موكلشي بالدنيا فلووس فلووس كافي لعبان نفس

:- اكووول نزلني هنا كدام هذا المحل اشوفة

نزلت صفوان ورحت عنة اتشمى وأنا بالطريق اتصل علية الرجال وهتف وياي

شبر :- هااا بشرني شصار وياك؟

:- خوية لكيت حادث قبل أسبوع وصل لمستشفى سامراء هو عبارة عن حادث سيارة على الطريق السريع رجال واحد ووياه إثنين نسوان الي عرفوا المستشفى من الهوية الي لكوها الرجال أسمة ستار مهدي جبر بس النسوان ماكو الهن هوية

- هوووة هوو ابوهاا يعني بيوم الي سافروا سوو الحادث

:- اي الحادث قبل أسبوع

- زين زين شلونهم شلون وضعهم؟؟

:- الرجال انتقل لرحمة ربك والسنوان الإثنين هم وحدة ماتت ووحدة دخلت غيبوبة كل هي الفترة وأمس ياالله كعدت منها

- دزلي العنوان مال المستشفى ووين مخليهم بسرعة!

:- تمام

سديت التلفون وبدون تردد اخذت طريقي ورجعت للبيت طبيت أركض صعدت اخذت قمصلتي وفلوس ونزلت اركض وكفتني أمي وهتفت وياي

جميلة :- خيرك وين راييح هيج مخترع احد من عمامك صاير له شيء؟ وصل الكم خبر من الفاروق الأعظم؟
شبرررر مو احجي ويااك ؟؟

وكفت والتفتت الها وحجيت وياها

شبر :- رايح لــ سامراء

- شنوو شكوو رايح هناك بهذا الوقت وهاي الأجواء شنو بايع نفسك ما تسمع الانواء الجوية شنو تكول لازم تأجل السفر والطلعة بهي الأجواء يمةة

:- ميهمني ميهمنييي الي يهمني هسة أروح لــ سامراء واشوفنها

- ليش ما تقتنع بس الكاتبة ربك يصير ليش ما تنتضر حكمة ربك ياااابنيي لا تتعبني ولك كاافي أنتَ وأخوك

:- البنت الي اختارها كلب ابنج هسة هي هناك ولازم يروح الها لازم يمة لأن تخسرين ابنج وللابد اذا ماشافها هسة صدكيني

- ولككك شبرر

صعدت سيارتي وفريتها وطلعت وهية تصيح علية من وراي رحت وماهتميت لكلامها وصدك رغم قسوة الجو وياي

وعطلت السيارة علية بنص الطريق وضليت جوة العاصفة الي جانت بس هوى عالي بارد لا مطر ولاشيء

الله كتب تمر سيارة على الطريق بعد ساعة كاملة من وكفتي على الشارع يم سيارتي العطلانة

وكف الي وصعدت وي أبن الحلال ماقصر وياي اخذ العنوان مني ووصلني للمكان الي أريدة صدك الله يسخر ولد حلال بوقت الشدة

الساعة 5 الفجر ...

طبيت للمستشفى وسألت سألت ياالله عرفت رقم غرفتها وجنت متأمل خير ان تكون البنت الي ضلت من الحادث هية حوراء موش أمها ابد ما اجت فكرة على راسي ان تكون حوراء هي الماتت

رحت مفرفح للغرفة جنت امشي مثل الطفل الي شاف لعبة ويريد يوصل الها بكل سرعتة ... طبيت للغرفة بلا ما أدك الباب

ياريت ما طبيت ... ياريت مارحت الها ... ياريت مافكرت بيها ... ياريت ما اهتميت الها هلكد ... ياريت بقيت المتكبر المغرور ومانزلت روحي الها ... ياريت ... وياريت

حسيت مثل الشيء الي تكسر جوة صدري لمن دخلت للغرفة ولكيتها نايمة على السدية ويمها على الكرسي نايم ولازم أيدها وهية هم لازمة أيده وهو ذو الفقار

أي شخص بمكاني جان يمكن راح يبقى ويخليها تشوفة او جان يريد جواب لكل سؤال اندار براسة

شعرفة ذو الفقار؟
شوكت اجه لهنا؟
اذا مايحبها ويريد يغثني وبس ليش جاي يهتم هلكد؟
ليش جاي يخليها تتعود عليه؟

ما اهتميت لكلشي أخذت بخاطري وطلعت من الغرفة ومن المستشفى وانا بالطريق اتصلت على محمد الميكانيكي نطيتة عنوان سيارتي و المكان الخليت بيه مفاتيحها وراح الها حتى يصلحها ويرجعها لهلي أما أنا أخذت سيارة تكسي من الكراچ وطلعت بيها لــ المحافظة والحزن و الكسرة بعيني

رغم مسافة مو بعيدة كلش علية أشوف القبة مال ضريح الإمامين العسكريين بس مارحت يمهم ولا زرت ولا حتى سلمت عليهم من بعيد جنت أحس روحي مو طاهر مو كد أوصل لهيچ طهر

وصلت للبيت ودخلت وتلگتني أمي عافت جهاد الحسين يلعب واجتني قبل لا تحجي كلمة وحدة تركتها وصعدت لغرفتي قفلت الباب علية وشمرت روحي على الفراش نمت على وجهي

غمضت عيوني حيل ردت أطرد صورتهم من بالي بس الوجع جان أكبر من مجرد غيرة جان استصغار لروحي آني السيد شُبر الصادق اللي ما طخت راسي لأحد تاليها أركض بليلة ظلمة وعاصفة وأعرض حياتي للخطر علمود وحدة غافية وإيدها بحضن غيري؟

ضحكت ضحكة ميت ضحكة اللي يستهزئ بحظه المصخم

:- هنيالك يا ذو الفقار أخذت منها الما كدرت آخذه آني وأخذت منها الوعد الما انكتب لغيرك مبروك عليك السمرة ومبروك عليه خيالها اللي راح يظل يلحگني بكل مكان واشوف عيونها بعيون الناس بس وحك حيدر الكرار هاي اللحظة جانت الفاصلة اليوم شبر القديم مات بجرح غيرة واندفن بسامراء وراح تشوفون الوجه الجديد يا حوراء ويا ذو الفقار

صوت أمي جان يوصلني من ورا الباب وهي تدك وتصيح باسمي بس الجواب جان محبوس بصدري وغاص بيه شمرت القمصلة بالكاع ذيج اللي شالت ريحة تراب الطريق ودموع الفشل

:- يا حوراء رخصتي روحي وحسبتج غالية وتاليها طلعتي أرخص من حلم ضاع بفجرية باردة لا أنتِ الي ولا آني الج ولا الحظ يفرش النه بساط روحي عسى ذو الفقار يلم جروحج لأن آني بعد اليوم حتى جرحي ما ألمه أخليه ينزف لحد ما ييبس ويصير أثر حتى لا أنسى بيا يوم ذلني گلبي

سحبت اللحاف على راسي ردت أختفي ردت الدنيا توكف بس هي ما توكف تدور وتدوس على المكسور لحد ما تسحكه نمت وأني أردد بيني وبين روحي

:- ههه والله ياالله العتب مو عليج العتب على المايعرف قدر نفسه وينزلها للي ما يسوى

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ حَوراء ٭٭

گلبي من البداية جان مقبوض من السفرة هي لكن بابة مقبل يسمع مني ورحنا بيها السفرة المشوؤمة ونحن على الطريق مطرت الدنيا وعلى سرعة ابوي الزايدة وعلى الضباب صار الحادث الي اتذكرة سيارة دخلت بينا جانت جاية علينة ونحن رايحين عليها وماكدرنا نشوفها بسبب الضباب

ولأن ابوي جان يسوق وامي كاعدة يمة همة الي تأثروا اكثر وراحوا بيها وانا ماصار بيه شيء بس رجلي تاذت ودخلت غيبوبة بسبب قوة الضربة على راسي ولمن كعدت اتذكر الصار كأن البارحة انطوني تليفون ابوي بعد ما جذبوا علية أهل المستشفى وكالولي امي وابوي مثلي بغيبوبة ولازم أتصل على واحد من اهلي حتى يجي النا همة كالولي أهلي بخير خوفاً علية من الصدمة

أخذت تليفون ابوي من الدكتور وأول شخص اجه على بالي اتصل علية واحجي وياه واطلب منه يجي هو ... ذو الفقار وصدك حجيت وياه واجاني وبعد ما خلصت أول يوم وانا أحاول استعيد نفسي و ذو الفقار يمي كلشوي ينطيني ماي ويخليني أكل اخذت مهدأ و نمت...

ولمن كعدت لكيت ذو الفقار نايم جنت منتضرة وصول عمي النا لأن خليت ذو الفقار يتصل عليه متأخر... بقيت اباوع لــ ذو الفقار النايم واخذت اللعب بشعرة على كيف وانا عيوني فاتحتهن بعودان لأن الدوخة حلفت تلازمني وما تعوفني
بقيت اباوع لحد ما مكعد باوع الي واخذ ايدي باسها وهتف وياي

ذو الفقار :- صح النوم و الحمد الله على سلامتچ؟

حَوراء :- الله يسلمك ان شاءالله

:- أحمد ربي ألف مرة انچ بخير

- صدك شلونك شلونها الجامعة؟

:- شلوني بدونچ؟ والجامعة ناقصها أنتِ

- أهلي شلونهم سألت عنهم لمن نمت أنا

:- اااءءء ااييي سألت يروحيي ولا تخافين هم بخير الحمدالله بس بغيبوبة تعرفين يعني!

- ههفف شوكت نطلع ونرجع لحياتنا

:- عمج وابن عمج على الطريق جايين الج ان شاءالله

- ايي زين

:- يوصلون بالسلامة

العم بعد الأبو سند هوه الأمل يصير لبنت أخوه جنت اشوف عمي محمد أكثر من هيچ بعد ما عرفت بخبر وفاة اهلي بأول ساعات وصولة عمي ماجان يعرف ان ذو الفقار و الدكاترة مجذبين عليه بخصوص موت اهلي ودفنهم بمقبرة سامراء

بعد ما وصلوا عمي محمد وابنه حگم دخلوا عليه للغرفة وجان محد موجود لا دكتور ولا ممرضة ولا ذو الفقار جان طالع حتى يجيب الي ماي

محمد :- حورائيي

حَوراء :- عمييي

اجاني وضماني لصدرة وهو يبجي ويكول :

محمد :- اااخخخخ ياريحة الغاليي ياعطر أخوية أنتِ اخخخخ

:- شلونك عمي؟

محمد :- شلوونيي تسألينيي على لوني يابنت اخووي وانا عرفت ظهري نكسر على موتت ستاار ياا لون يضل ياعزيزة عمچ يا لوون يضلل؟؟؟

انا هنا صرت اباوع لــ حگم و ادير عيني لـ عمي وانا مستغربة من الكلام الي يكولة وهو انتبه علية وهتف وياي

محمد :- ليش تباوعين هيچ ولو حقج يروحيي مصدومة امج وابوج ماتوا وياج ووبيوم واحد ابجي حبيبتي ابجي

:- دقيقة عمي منو المات وياي؟ امي وابوي حالياً بغيبوبة فاهم غلط أنتَ عميي هم عدلين مو ميتين وأسأل الدكاترة والممرضين

حگم :- عمي ستار و امچ ماتوا من يوم الحادث واندفنوا هم لان المستشفى ماكدرت تخليهم اكثر من هيج لهذا دفتهم بمقبرة سامراء يا غيبوبه التحجين عنها؟؟

:- أنتم اليي شجاااي تحجوون؟؟ امي وابوي اناا عايشين همة بغرفة بعيدين عني لأنهم بغيبوبة همة مو بوعيهم وراح يكعدون مثلييي انا هم جنت هيج انا جنت بغيبوبة وامس كعدت واهلي هممم راح يكعدون لا تحجون عن شيء وأنتم ما سألين

محمد :- لا عميي ماكو هيجي حجي أنا سألت عليكم قبل لا اجيج وكالولي من عرفوا انا عمچ كالوا أخوي كسر ظهرري اخخخ ياخووية اخخخ

بعد هاي الكلمات ضليت أصيح وابجي والطم راسي وهنا طب ذو الفقار وعرف انا عرفت ضل يصيح على عمي وابن عمي وطلعهم من الغرفة وبسبب الحالة من الإنهيار الي وصلت الها وشلون ضليت أصيح والطم صدري اجتني الممرضة تركض وانطتني أبرة منوم وخلتني انام ومادري بالدنيا من حواليني ....

----

طلع ذو الفقار خارج غرفة حوراء بعد ما تأكد هية نامت وصار يصيح على عمها وكال الة

ذو الفقار :- ليششش كلت الها أهلها ماتوو ماتخاف من ربك أنتَ تشوف هاي الحالة تسمح الها تكللها هيچي خبر؟؟

محمد :- أجيت مكسور على أخوي مادري أنتم مجذبين عليها بخبر اهلها

:- نحن كلنا الها ان أهلها بغيبوبة على الأقل لمن تصير حالتها زينة وتستقبل الصدمة بس مو بهاي الحالة!

حگم :- أول وتالي جانت راح تعرف

:- تعرف هية تعرف مو ما تعرف لكن مو بهيج طريقة ولا هيجي وضع تعبانة

حگم :- أكول لا تسوي بيها الخايف هااا ترى بنت عمي هية وأنتَ غريب عننا لهذا لا تدخل هسة تكعد راح تبجي تلطم شسوي يعني تاليها تتقبل وبكلمتين راح تهدأ!!

:- لا ننسى انتم أهلها بس أهلها موصيني عليها لأن يعرفون أنتم شنو لهذا خلي الحجي مستور ولا يطلع خوووش رايح اشوف الدكتورة ...

راح ذو الفقار وترك محمد وابنه برة الغرفة ...
بعد ما كعدت حَوراء و محمد وحگم كعدوا كدامها وهية ما متقبلة فكرة موت اهلها ولا متقبلة الشيء الصار وياها

حَوراء :- أحس انا بكاع غريبة اسرح بلحظات ترجعني للماضي الي هو قبل شهر أتأمل بيه يوم يدخل ابوية يضحك اريد اسمع صوتة اريد اسمع كلام امي التواسيني بكل مرة اشتاقيت اسمع كلمات ابوي ماااتوا من بين كل الناس اهلي ماتوا وعافوني لوحدييي

ذو الفقار :- حَوراء أنتِ بخير؟؟

بقيت أباوع بوجوههم وجه عمي محمد المصبوغ بحزن ما أدري صادق لو لا ووجه حگم الجامد وذو الفقار الواكف بالركن وعيونه تايهة بيني وبينهم الغرفة صارت ضيگة النفس ضاك بصدري أحس الهوا صار ثگيل جنه تراب كاعد يدخل لريتي ويخنكني حيلل صحت بيهم

حوراء :- جذب والله العظيم جذب عمي أنتَ تعبان من الطريق وجاي تتوهم حگم أنتَ ما تدري بشيء ذو الفقار مو أنتَ كلت لي هسة يكعدون؟ مو كلت لي بغيبوبة؟ ليش ساكت؟ احجي! كللهم ولك احجي ليش ساااكت هيچي ؟؟؟

ذو الفقار تقرب مني راد يلزم إيدي بس سحبتها بقوة وجسمي كله يختض

ذو الفقار :- حوراء يروحي اهدي الله يخليج اهدي الصدمة قوية أدري بس هذا قضاء الله

حوراء :- يا قضاء؟ يا قدر؟ بابا وعدني بابا كال هاي السفرة نغير بيها جو ما كال نروح وما نرجع ماما جانت محضرة لرجعتنا جانت مجرد اسبوع ونرجع جانت امي جانت تكول راح نرجع وننظف البيت شلون يعوفوني؟ شلون ينامون بالتراب وأنا هنا؟ لا تكلولي ماتوا والقرآن جاي أسمع صوت بابا هسة هسة سمعته يصيحني حوراء انااا سمعته!

كمت ألطم على خدودي بكل قوتي أضرب راسي أريد هذا الكابوس يخلص أريد أصحى وألكي نفسي بالسيارة قبل الحادث أريد أصيح ببابا أوكف لا تسرع بس الوقت فات الوقت وكف بذيج اللحظة المشؤومة

محمد :- يا بنتي استغفري ربچ الموت حق وإحنا سندج أنا بمكان أبوج اصير ان شاءالله وحگم أخوچ

حوراء :- أنتَ بمكان أبوي؟ هه أبوي ما جان يكسر خاطري أبوي ما جان يجي يبشرني بموت أغلى ما عندي بدم بارد وخروا عني كلكم وخروا بابا كاعد ينتظرني أكيد هو بغرفته ومحتاجني أكيد ماما عطشانة وتريد ماي

حاولت أكوم نسيت رجلي المكسورة نسيت الضربة اللي براسي الوجع اللي بگلبي جان أقوى من كل وجع جسدي
ذو الفقار لزمني من جتفي يحاول يثبتني ع السرير

ذو الفقار :- حوراء بس اسمعيني لخاطري راح تأذين نفسج هچي لا تسوين الجرح بعده ما طاب!

دفعتة عني وصحت بيه وانا ابجي حيل

حوراء :- لك ياجرح؟ جرحي بگلبي يا ذو الفقار عوفني أروح لستار عوفني أروح لامييي يمةةةة يمة وينج؟ تعالي شوفي بنتح شيسوون بيها يكولون عنج ميتة يمة يكولون نمتي بكبر بارد وأنتِ تخافين من الظلمة بابا كوم بوية كوم لا تخليهم يذلوني كسروا ظهري يا بوية وأنا بعدني بعز شبابي!

بديت ألطم على صدري حيل أحس صدري انمرد النفس مايدخل بعد شفت الكانونة بإيدي شفت المغذي كاعد ينكط على گيف كرهته كرهت كل شيء يربطني بالحياة وهمه ماكو

حوراء :- ما أريد أعيش إذا همة مو هنا أنا شلي بالدنيا؟

وبحركة سريعة و مجنونة سحبت ايدي بقوة طكت الكانونة الدم طفر على الچرچف السرير الأبيض صار لونه أحمر يخوف مثل لون الحادث مثل لون الضوء الوردي مال سيارة الإسعاف اللي جان يرمش بعيوني قبل لا أغيب

ذو الفقار :- حوراء إيدج لج مخبلةةة الدم!

ما اهتميت وكفت على رجلي وصحت بيهم وجان الوجع يشل حركتي بس الدفع مالي جان أقوى

:- وخرواااا راح أروح لهم بسامراء بالنجف وين ما جانوا راح احفر الكبر بإدية وأكعد بصفهم بابا يغطيني بعباته وماما تنيم راسي على رجلها أنتم جذابة أنتم تريدون تخلصون مني بابا ما يعوف حوراء بابا كال أنتِ النفس مالي شلون يعيش بدون نفسه؟

الممرضة دخلت تركض على صوت الصياح شافت المنظر الدم والانهيار وعمي واكف مبهذل ما يعرف شيسوي وحگم يباوع ببرود جنه كاعد يشوف فلم صرت انا ابباوع للسگف واحجي مثل المخبلة

حوراء :- بابا شفت؟ شفت شيسوون ببنتك؟ تعال أخذني الله يخليك لا تخليني يمهم يمة رااسيي جاي يوجعنييي تعايي مشطي شعريي ألي يمة مثل كل يوم يمة بويةة ردي علية ليش ساكتين؟

فقدت التوازن بدت الدنيا تدور بية وجه ذو الفقار صار بعيد وصوت عمي صار وشوشة الممرضة لزمت إيدي تريد تسيطر على النزف وأنا بس أتمتم بكلمات

:- يمةةة بويةة أخذوني وياكم لا تعوفوني لوحدي لا تعوفوني الله يخليكم اخذونييي مو انا الوحيدة عدكم شلون تعوفها وهي وحيدة ؟؟؟

بين ما الممرضة تحاول تسيطر على إيدي والدم اللي ترس الچرچف وذو الفقار لازم جتفي وهو يتوسل بية أهدا أنا جنت بعالم ثاني عالم ما بي بس ريحة بابا وطيبة ماما

:- والله ما أعوفهم عوفوني أروحلهم بابا جاي يشوفني هسة جاي يگلي حورائي لا تبجين شلون ما أبجي وأنتَ عفتني بنص الذيابة؟ يمة ولج يمة ريحتج بعدها بشاليي شلون يگولون صرتي تراب؟ أنتم جذابة كلكم جذابين وخروا عني يالجذابيين

بدت الدنيا تدور بية صدك وحيل هم الوجع اللي برجلي والضربة اللي براسي صاروا مثل الناار بس وجع گلبي جان أقوى جان ياكل بضلوعي أكل حاولت أدفع ذو الفقار بكل ما أوتيت من قوة وأنا ألطم على صدري حيل حتى لمن طگت الكانونة وطلع الدم ينسل على إيدي ما حسيت بوجعها حسيت بروحي هي اللي جاي تنزف

ذو الفقار :- ولج حوراء كافي راح تموتين بيدي استغفري ربج البقية بحياتج يروحي والله أنا سندج أنا أهلج كلهم

حوراء :- يا سند يا أهل؟ ذو الفقار أنتَ جذبت عليه كلت لي همة بخير ليش خليتني أحلم؟ ليش نطيتني أمل وأنا ميتة من يوم الحادث؟ عوفني عوفني أروح لسامراء أريد أنام بصفهم التراب أرحم لي من وجوهكم وخروا عنييي

حاولت أگوم ردت أمشي على رجلي المكسورة ردت أوصل للباب بس جسمي خانني الوجع شل حركتي والدم اللي طلع من إيدي خلى راسي يثكل بزيادة التفتت لعمي محمد اللي جان واكف يمسح بدموعه وحگم الواكف وراه جنه غريب مو ابن عمي

حوراء :- عمي إذا صدگ أنتَ عمي اخذني لستار! أخذني لأخوك! لا تخليني هنا انا أخاف من المستشفى أخاف من الليل بدون صوت بابا يمةةةة يمة وينج؟ تعالي شوفي بنتج شيسوون بيها يمة كسروا ظهري وأنا بعدني غصن

الممرضة جابت الإبرة المهدئة بسرعة وذو الفقار جان لازمني ويحاول يكعدني وهو يبجي وياي أول مرة أشوف دموعه

حوراء :- بابا لا تسد الباب أنا جاية جاية وياكم لا تروحون وتخلوني لا ترحون حبابين انتضروا وحيدتكم انتضرونييي

حسيت بشكة الإبرة بچتفيي وبدت الدنيا تسود تدريجياً
أصواتهم بدت تبعد صياح ذو الفقار على عمي وبجي الممرضة وكلام حگم البارد كله صار وشوشة آخر شيء شفته قبل لا تغمض عيوني هو خيال بابا يبتسم لي ويمد إيده

غبت عن الدنيا وأنا أتمنى هاي المرة ما أصحى أبداً أتمنى تكون هاي غيبوبة اللقاء مو غيبوبة الفراق

بعد ماكعدت لكيت عمي محمد طالب من ذو الفقار يروح خلص وهو يبقى وياي بقيت يومين بالمستشفى على المهدئات وبعد اليومين طلبت منهم يخرجوني ...

سمعوا كلامي وطلعوني وجانوا يريدون نرجع للــ المحافظة بس طلبت منهم نروح للمكان الي دفنوا بيه أهلي وسمع كلامي عمي محمد وراحنا لهناك

وصلنا لمقبرة سامراء المكان اللي جان المفروض يكون محطة بسفرتنا ونمر نزور صار هو المحطة الأخيرة لأعز ما عندي نزلت من السيارة وأنا أجر برجلي المكسورة جر وعمي وحگم يسندوني بس والله الوجع اللي برجلي ما يجي ذرة يم الوجع اللي بگلبي

شفت الگبور تراب جديد ريحته بعد هي ريحة الموت ذبيت روحي ذب على گبر أبوي وحضنت التراب بكل قوتي ردت أفتحه ردت أطلع ستار اللي جان يملي البيت بضحكته

حوراء :- بويةةة ستار يالنفس مالي هيج تسوي بحوراء؟ هيج تعوفني بنص الغربة؟ ولك يابة گوم گوم شوف بنتك شصاير بيهه مو جنت تگول حوراء لؤلؤة عيني؟ شلون تخلي اللؤلؤة تنداس بالتراب؟ بوية والله المكان بارد عليك أنت تحب الدفو تحب لمتنا گوم نرجع لبيتنا عوف السفرة عوف كل شي بس گوم وياي

التفتت لجهة گبر أمي صرخت صرخة أحس ضلوعي انكسرت بيهه وصوتي انبح

:- يمةةة اااخخ يالعزيزة يمة منو يمشط شعري؟ منو يگعدني الصبح بدعاءه؟ يمة هدومج بعدها بريحة عطرج بالبيت شلون أرجع والبيت فارغ منج؟ يمة ذو الفقار جذب عليه گال غيبوبة وأنا صدگت عبالي راح ترجعين وتسوين جاياتج وضحكاتج يمةةة حفروا الكبر ونمتوا سوا وعفتوني وحدي أصارع الذيابة؟ ولكم صحيح الموت حق بس مو هيج مو بهيج غفلة

بقيت أملخ بنفسي ألطم على صدري لحد ما فقدت الصوت صار بس ونيين يطلع من جوة الروح عمي محمد وحگم واگفين فوك راسي وجوهم ما بيها ذرة رحمة ولا مهتمين بس جانوا مستعجلين يردون نرجع اليوم قبل باجر

محمد :- كافي يا بنتي كافي فضحتينه بالمقبرة الميت ما ترجع له الروح بالبجي گومي خل نرجع للمحافظة ورانا طريق وطويل

حوراء :- شلون أعوفهم عمي؟شلون أخلي جثثهم جوة هذا التراب وأمشي عوفوني هنا أدفنوني وياهم ما أريد أعيش بدونهم

حگم :- حوراء كافي دراما الناس تباوع علينا گومي لا تسوين روحج كلشش هم ماتوا وهذا نصيبهم

:- مااريد مااريد وخروا عني اريد أبقى يم امي و ابوي اريد ابقى يمهم اريدهم

محمد :- اكوول كااافي عاد يلااا كومييي حگم ساعدني بيها

:- لاااا لااا العباس عليكم لااا مااريد ماارييدد عوفوني وياهم شوية بس شوية حبابين والله بس شوية بوووويةةة ليش هيچ عفتني لا تخليهم يبعدوني عنك بوية كوم صيح بيهم بووية

كوموني غصب عليه وبالقوة كلش هواي ماكدرت اسيطر عليهم شالني حگم و شمرني بــ السيارة بالقوة وأنا عيوني ما فارگت الگبور لحد ما اختفت ورا تراب الطريق من سرعة السيارة

الطريق كله كنت أتمتم بكلماتهم أتذكر تفاصيل الحادث الضباب وصوت الارتطام اللي نهى حياتي وأنا عايشة
وصلنا لبيتنا بالمحافظة البيت اللي جان جنه صار خرابة بعين صاحبتة الي بقت وحيدة بيه دخلت وأنا أتوجع ذبيت روحي بصالة البيت المكان اللي جان أبوي يگعد بيه ويشرب جاي الصبح

عمي محمد گعد على القنفة مالت أبوي وبكل عين صلفة حط رجل على رجل وصاح وانا ابجي هو صاح

محمد :- حوراء اسمعيني زين إحنا جينا ووصلناج والبيت هسة صار مسؤوليتي أنا وحگم لأن أنتِ بنية وما تكدرين تديرين أمورج

:- عمي باجر لازم نسوي فاتحة لأبوي وأمي اكيد الناس بدت تسأل على غياب وأبوي لازم نسوي له عزاء خاطر يعرفون الصار ويترحمون لأبوي واميي ونسوي ألهم ثواب

عمي محمد هنا تغيرت ملامح وجه وخزرني وصاح بصوت كلة بعصبية على شنو مااعرف اليسمع يكول انا سبيتة

محمد :- يا فاتحة يا بطيخ؟ أنتِ تدرين الفاتحة شكد تكلف؟ ذبح وطبخ وگهوة وصيوان منين أجيب انااا مااعندي ترى أنا ما عندي هاي الفلوس أذبها بالشارع أبوج مات واندفن كافي عليه الفاتحة اللي قرأناها بالمقبرة

انصدمت لكلامة كمت على حيلي مسحت عيوني بحجابي وهتفت وياه بحلك يابسس وشفايف متفطرة وصوتي جان مثل اليطلع من صحراء من كد البجي والصياح جان مبحوح كلششش

حوراء :- شنو عمي هذا أخوك ستار أخوك اللي جان يشيلك من توگعع شلون تگول ما أسوي له فاتحة؟ والفلوس موجودة أبوي عنده كاع وعنده فلوس أكيد تكفي واذا ما كفت موجود ذهب امي فووك ونحطة وياه

محمد :- الفلوس هاي نضمها للوقت الصعب مو تروح ببطون الناس وبعدين أنتِ منو سمح لج تحجين بالفلوس؟ أنا الوصي عليج وعلى حلال أبوج وسدي هذا الموضوع ماكو فاتحة بالبيت اللي يريد يعزي يجي يسلم ويمشي وعود لا تخافين انا اطش بالمنطقة ستار مهدي ماات بالحادث وضلت بس حويرة بنته

بقيت مبهوتة هذا عمي اللي جان يبجي بالمستشفى؟ وين راح السند؟ وين راحت كلماتة كدام الدكاترة و ذو الفقار من كال أنا بمكان أبوج؟؟

حگم تدخل وگال وهو يباوع للبيت ويلف راسة

حگم :- بعدين حوراء لا عبالج كاعدة هنا ام البيت أنتِ وتتبجين علينا البيت وصخ باجر من الصبح تگومين تنظفين البيت كله بس هسة تكومين وتطبخين لنا عشة معتبر أنا وأبوي تعبنا من الطريق

حوراء :- حگم أنا رجلي مكسورة الضربة اللي براسي بعدها تأذيني شلون أگوم أطبخ وأنظف؟ أنا بعدني بدموعي على أهلي

محمد :- ما علينا بهالاعذار الحركة زينة للجرح تگومين وتشتغلين مثل المرة المعدلة والبيت أريده يلمع صدك على طاري امج مساع جبتي ملابس أمج وذهبها طلعيهن كلهن حگم يحتاج يبيعهن حتى ندبر أمورنا وأنتِ ما تحتاجين ذهب وأنتِ حزينة

بذيج اللحظة عرفت إن الحادث ما ذبح بس أبوي وأمي ذبح الأمان اللي جنت أعيش بيه ذو الفقار جان عنده حق من خاف عليّ من أهلي عمي محمد طلع مو سند طلع چلب فلوس وحگم نسخة مصغرة منه

باوعت لصور أهلي الي على الطبلة الي يم القنفة وحسيت بغصة خنگتني عافوني وطلعوا هم الإثنين بقيت بس أنا بالبيت وسمعت صوت القفل قفلوا عليه البيت رحت اخذت صورة ابوي من على الطبلة وحجيت وياه وانا ابچي

حوراء :- بوية شفت السند اللي عفتني عنده؟ بوية ذول مو أهلي ذول غربة نهشوا بجسمي قبل لا يبرد ترابك

وكفت بصعوبة ساندة روحي على الحايط والدمعة بعيني رحت للمطبخ وانا اتذكر شلون يردون يبيعون وياخذون ولا يكلك أبوي ما صار له أسبوع جوة التراب اااخ يا وكت اغبر

الدنيا دارت بية وحسيت نفسي وحيدة بصدگ لا أب لا أم ولا عم بيه خير بس ربي موجود وهو الوحيد اللي يعرف شراح يصير ويعرف شلون ينقذني منهم

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ غدير الله ٭٭
كعدت الصبح مرتاحة وبمزاج يخبل لأن شنو؟ اليوم جمعة
ياربي شكد أموت على هذا اليوم كون كل الأيام مثلك يابعد روحي

باوعت للساعة أووو بــ ١٢ الظهر وين نايمة انا عود اشتهيت اتريك وي العائلة الكريمة الجامعة بايگتني منهم بس يلاا عادي نعوض

نزلت غسلت وجهي واخذني الواهس الماااي دافيي غسلت شعري بالمغسلة حطيت راسي وغسلت شعري ولفيتة بالخاولي وطلعت لكيت طيبة الزهراء كاعدة بالهول هية و كتبها وصوت طكطكة وهوسة جاية من المطبخ وكفت يمها وهتفت وياها

غدير الله :: هيووو طيبووو!!

طيبة الزهراء :- شتردين

- شنو هاي الهوسّة؟؟

:: كالعادة اليوم جمعة والعلوية حاصرة إخوانچ بالمطبخ على الينظف على اليطبخ

- علي الصادق موجود؟

:: لا بالدوام

- اهااا شرد منهاا

:: هههههههه لا يمعودة حتى لو موجود مايشارك موش ذيچ الچمعة كاعد بالغرفة ومحد حجة وياه

- عيعع الله يساعدچ شلون صالچ ثلاث سنوات مدري أربعة تنامين وياه بنفس الغرفة؟

:: ترى ماكو منه

- بالضرب موو؟

:: غيمة

- والله ياالله انا سامعة القرد بعيون امة غزال بس اول مرة ادري القرد بعيون مرتة ذيب

:: امجبي لا اكوم الج طولتي لسان هواي وياي عابتلج

- قابل جذبت؟؟

هنا اجه علينا علي الرضا شايل المكنسة الكهربائية وهتف ويانه وهو يلهث وملابسة بيهن ماي وتعبان

علي الرضا :- والله وكت الزلم تركض بشغل البيت والنسوان يگرگرن بالسوالف وين لاگيات هيچي دلال حفيدات أحمد الصادق

طيبة الزهراء :- كواك الله كلة محسوب أجر وثواب عليك

:: ادري محسوب يم ربي من قبل لا اشوف وجهج

- عاابت موش صوچك صوچي

غدير الله :- شتريد تسوي هسة؟

:: والله يا اووختيي في الاسلام الصالة مالتكم حيل عجبتي واجه بخاطري اسويها ملعب ورهمت بس معتاج گولچي تصيرين؟

غدير الله :- عيعع شثگل دمك

:: عمية ماتشوفين أريد أنظف وهساع روحي عن وجهي لا اكشچ بالمكنسة وأنتِ طيبات يلااا أنتِ وغراضچ

طيبة الزهراء :- وين أروح؟؟؟

:: ماادري طيري عنيي ارمش ماالكاچ جدامي بسرعة يلا تبخرريي

غدير الله :- إخبال والله هلكوا يكولون لاتخلون الزلم بالبيت حقهم جان ماضلل زلمة بالعراق صااحي

عفت علي الرضا و طيبة الزهراء ورحت للمطبخ لكيت العلوية كاعدة على الطبلة وتسوي الخضرة
و علي الكاظم واكف على السنگي يغسل المواعين
و علي السجاد يطبخ
وجان كاعد على الكاع علي الباقر و كدامة طاسة الماي ومعجانة العجين وصينية طحين جان علي الباقر يشنگ العچين حتى يخبز ونأكل خبز حار على الغدة

كعدت يم أمي على الطبلة وسبحان سرعة الاقتران عند العلوية عندها أسرع من البرق انطتني السجينة والتختة وگربت مني الخيار و الطماطة و كالتلي :-

غدير الله :- صباح الخير

علي الباقر :- ياهلا وغلا وعسى الله مايبين غلاج ياصمام كلبي هسة اشتغل ضوة المطبخ وندليت دربي يابعد نحري ودربي وراس كلبي

:: حبيب روحي وصديقي

العلوية :- هاچ سوي زلاطة راح يأذن الظهر

:: خو أنتِ يمة سرعة الاقتران عندچ ماشاءالله

علي الكاظم :- هسة الله عباد الله يقبلوها عريس يوكف يغسل المواعين؟

العلوية :- بعد أحسن چا شنهي تريد تجيني المرة اتكلي مطيتني أفگاگة وأنتَ على عينك خاطبلي طفلة

ضحكت من كل گلبي على منظره وهو واكف على السنك حاط خاولي صغير على چتفه ومجتف الردن ومخبوص بالماي و الزاهي التفتت عليه وكتله وأنا أثرم الخيار

- يا عريس يا بطيخ عليوي؟ عيني أنتَ علي الكاظم اللي جان قبل شهر يبجي يريد بس يتزوج ومستعد يشيل البيت كلة هسة صرت عريس وتستنكف من المواعين؟

- غديرة وحق جدج إذا ما تسكتين أجي احط وجهج بهذا الزاهي شوفي يمة شوفي خلفتج بس لسان لا تعين ولا تعاون

العلوية :- ولك أگظيم اطبك حلكك وركز بالماعون لا تكسرليي شيء وأنتِ غديرة كملي الزلاطة أخوج علي الباقر راح يخلص الخبز وأنتِ بعدج بالخيار

علي الباقر :- عوفيها يمة غديرة شمعة البيت بس كون الشمعة ما تحرك السفرة بلسانها ههههه يابة شوفي الخبز اليوم راح تاكلون خبز باقري يخليكم تنسون الصمون كله

ضحكت وكمت أثرم الطماطة وأنا أسمع صوت المكنسة مالت علي الرضا بالصالة وصوت طيبة الزهراء وهي تدردم لأن طردها من مكانها البيت جان متروس ريحة عجبن مختمر زايد وريحة مرك فاصوليا وتمن عنبر علي السجاد اللي جان واكف يم الطباخ جنه شيف عالمي بس الفرق لابس دشداشة ومخسوف خصرها بالحزام هههههه بعد ما كمل المرگة فتح القبق واخذ يضوگ المركة بالخاشوگة ويغمض عينه عود يعني خنفشارية وكذا

- الله يابة اللي يريد يتزوج يجي يتعلم الفن مني يمة هاي المرگة إذا ضاگوها بيت عمران يطلكون علي الكاظم ويجون ياخذوني أنا عمي والله أبيع غديرة علمود هاي المرگة يباااه

غدير الله :- عزززة العزاك صدك جذب تريد تبيعني علمود فاصوليا؟هاي تاليها؟ تعبي وسهري وي ولدك هيج يروح؟

علي السجاد :- غديرة بنيتي بالبطون تعمى العيون هسة أنتِ سوي الزلاطة وأريد الليمون بيها يطك بالرأس مو تسويها فاهية مثل حجي علي الكاظم

علي الكاظم :- اشمرك بالزاهي هسة محترمك لأن الجبير ترى هييي

بدت الأجواء تحمى بيناتهم وصوت الأذان بدأ يرتفع من الجامع القريب من المجمع علي الكاظم خلص المواعين وكعد يمسح إيديه وهو يتبختر وعلي الرضا دخل علينا وهو يلهث وجهه أحمر من التعب

علي الرضا :- يمة الصالة صارت تلمع بس ذمة بركبتج إذا شفت واحد من ذولة العليويين شمر حباية رگي بالگاع أحرك البيت بيهم

العلوية :- كواك الله يمة روح اسبح وبدل والبس دشداشتك اليوم جمعة وأريد وجوهكم تفتح النفس يلا حبيبي أنتَ

أنا بهاي الأثناء كملت الزلاطة وسويتها تشكيلة تخبل رتبتها بمواعين صغار وحطيت فوكها نعناع مجفف رحت للصالة لكيت طيبة الزهراء كاعدة بزاوية ومنزلة راسها بالكتب ضربتها على راسها وكعدت يمها وهتفت وياها

- طيبو عوفي الكتب ريحة الخبز مال علي الباقر وصلت لسابع جار وأنتِ بعدج يم الكتب كومي عاونيني ننقل المواعين

طيبة الزهراء :- غدير والله مالي خلك علي الرضا طير المعلومات من راسي بصياحه ومكنسته عبالك جاي يحارب مو جاي ينظف

ضحكت وجريتها من إيدها وصحت بيها

:- دگووميي عادد يلاا

بدأنا ننقل الأكل من المطبخ للصالة علي الباقر جاب صينية الخبز الحار البخار يطلع منه وريحته ترد الروح وعلي السجاد شايل جدر التمن والحرارة طالعة منه التمينا كلنا بالصالة فرشنا السفرة بالنص والعلوية كعدت بصدر السفرة مثل الملكة

بدأنا ناكل وجان الجو يخبل الهدوء ما دام أكثر من دقيقتين لحد ما بدأ علي الكاظم يتحرش بعلي الرضا

علي الكاظم :- أگول روضيي شو اليوم نظفت الصالة بضمير لا يكون تريد تتزوج؟ حاط عينك على وحدة من المجمع هااا وتريد العلوية تحن عليك وتزوجك!

علي الرضا :- انجب ولك أنا أنظف لوجه الله ولرضا العلوية مو مثلك غسلت المواعين وأنت عينك على المبايل خاف خطيبتك الطفلة تراسلك

العلوية :- بسسس لا تخلوني أگوم هسة وأخلي الخاشوگة تحجي على راسكم اكلوا وانتوا ساكتين السفرة الها حرمة

غدير الله :- يمة عوفيهم هذولة إذا ما يتناگرون ما يهضمون الأكل بس صدك يمة اليوم الأكل غير شكل يمكن لأن علي السجاد طبخ؟

علي السجاد :- والله أنا لو أدري الطبخ هيج يخليكم تسكتون وتمدحون بيه جان من زمان استلمت المطبخ وطلعتج أنتِ وطيبات تگشرون بصل بالمنور

طيبة الزهراء :- هلوو هلوو هسة صرنا نگشر بصل؟ وگل ابنك عدل لا يغص اكول أحسن شيء

الضحك ملى البيت رغم الهوسة ورغم الجامعة والدوام اللي مخلص عمرنا وما خلص بس هاي اللحظة تسوى الدنيا وما بيها

ورا ما خلصنا وطبعاً المعركة الكبرى بدت على منو يلم السفرة علي الكاظم شرد بحجة عندي مكالمة مهمة وعلي الرضا كال أنا نظفت الصالة قبل الأكل يعني حصتي خلصت صفيت أنا وطيبة الزهراء والعلوية

العلوية :- يمة غديرة سوي چاي مهيل أريده ثگيل يطرد النعاس وأنتِ طيبة الزهراءيمة لمي السفرة وعاوني أختج

طيبة الزهراء :- ان شاءالله يمة تدللين

رحت انا للمطبخ حطيت القوري على نار المطبخ جان دافي وكفت يم الشباج أباوع على الحديقة الصغيرة مالتنا شفت علي الباقر كاعد بالفي يرش بالماي وعلي الكاظم دخل للمطيخ وهتف وياي

- غديرة سويلي استكان چاي أوو خلي نص استكان ولا تخلين شكر تديرين بالج على رشاقتي وراي زواج

:- رشاقة؟ ولك أنتَ من ورا مركة علي السجاد اليوم صرت جنك برميل نفط مهرب روح منا لا أحركك بالچاي

ضحك وطلع وهو يغني صببت الچاي بذاك الاستكان ابو الخصر ووديت الصينية للصالة جانت العلوية مادة رجليها ومرتاحة وطيبة رجعت لكتبها بس هالمرة وهي تبتسم وانطيت الجاي للزلم واجيت يم امي

غدير الله :- ها يمة شلونه الچاي؟

العلوية :- يروح روحج يمةعاشت إيدج

:- بعد كلبيي والله فد تونست حيل اليوم مدري احس صدري منشرح

- يا ربي دوم هالفرحة والراحة ودوم هالضحكة بالبيت كون الله يحفظكم إلي ويستر عليكم واحد واحد

كعدت يم رجلين أمي وحسيت براحة ما تتوصف صدك اليوم جمعة،وصدك المزاج يخبل وصدك عائلتي هم أحلى شي بحياتي رغم خبالهم ورغم لسانهم الطويل بس يخبل كلش هواي إخواني طلعوا كلهم وراحوا لــ البراني وانا بقيت نايمة على رجلين امي وهي تلعب بشعري وبالي فارغ مابيه شيء غير دراستي وفرحتي وسط أهلي

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُبيرْ ٭٭
أبوي خبص روحة خبص على عمي الفاروق الأعظم بعد ماعرفنا أن هو راح وماندري گاعة وين!

وعمتي فاطمة الزهراء شالت البيت ما كعدتة على شلون يتصرف من راسة وانا لأن مابية اتحمل الوضع هيج طلعت من البيت ورحت للمحل عود اغير جوو بس منين اتلكاها من اهلي! من زَمُرد

دخلت للمحل لكيت زَمُرد لوحدها وكفت كدامها وهتفت وياها

زَمُرد :: أهلاً وسهلاً شبير

شبير :- عصام وين؟

- دزلي رسالة كالي مايجي اليوم ماخذ برد خطية لهذا باقي نايم بالبيت

:- وليش ما انطاني الي خبر؟

- والله ماعرف أتأخر اتصلت عليه انا اشوفة كالي مااجي تعبان

:- خير ان شاءالله هي صارت كلمن يتصرف من راسة

- بيك شيء؟

:- لاا

- أحسك ضايچ ومختنك

:- زَمرد اطلب منج طلب

- شسالفة ما بيناتنا طلبات كول شنو تريد؟

:- خلي نسد المحل ونمشي

- وين نمشي؟

:- للحديقة للكنيسة لــ حي الله مكان ماتردين ترحين تمام اقفل المحل اروح لوحدي وأنتِ روحي لبيتكم إجازة اليوم

- شبير

:- خلص زَمُرد خلي اقفل المحل

- ماشي خلي ألم غراضي

سدينا المحل والتعب طااغي حيل على ملامحي ركبت بالسيارة وزَمُرد صعدت بصفي لأول مرة جانت تكعد بالخلف هسة تقدمت خطوة كعدت بالصدر و جانت تباوعلي بنظرات عيونها تحجي جانت تتسائل شنو البية وتريد تعرف بس ماتريد تضغط عليّ حركت السيارة وبدون وعي لكيت نفسي أمشي بالشوارع تايه مادري وين أروح ؟ وين انزل وجنت على طول الطريق ساكت ماطلع مني حرف بس صوت الانفاس نسمع لحد ما هي كطعت السكوت بصوتها وكالت الي

- شبير أمشي للكنيسة الرحنا الها ذاك اليوم هناك الجو هادئ والناس تروح تذب همومها يم الرب وبابه مفتوح للكل

هزيت راسي بــ نعم وفريت السيارة وتوجهت للكنيسة وصلنا نزلت وهي وياي الكنيسة جانت باردة الشموع تملي المكان وصوت الهدوء يطرد الهوسة اللي جانت براسي كعدنا على واحد من المقاعد كدام الصليب والصور الي مخليهن بالصدر مال الكنيسة بقيت مدنك راسي أحس حمل فوك جتفي اكثر من حملي

زَمُرد تدرجت بالكلام حطت ايدها على طرف المقعد وكالت بصوت همس ودافي

- شبير الخاطر المودة الي بيناتنا احجي لا تخلي الغصة تاكلك من دخلت للمحل وأنا شفت عيونك مليانة حزن مو بس ضوجة صاير وياك شيء بالبيت؟

اخذت حسرة شكبرها ورفعت راسي للسكف زفرت النفس وردت عليها

:- زَمُرد البيت احترك ناره وما طفت أبوي ضاع منه حيله

- ليش أسم الله شبيك؟

:- تدرين شنو يعني الفاروق الأعظم يروح؟

- هذا عمك موو؟

:- موش بس عمي موش بس أخو أبوي هذا جان سند ابوي جان ظله

- جا شبي؟

:- راح وما خله أثر فص ملح وذاب

- سودة علية ليش هيج سوة زين وابوك شنو سوة؟

:- هههه أبوي ااخخ يا ابوي ... ابوي من عرف الخبر خبص روحه خبص كام يلوم بنفسه يلوم الدنيا يلوم الحظ
وعندج عمة السادة همزين ما تعرفيها لسانها والغلط شالت البيت وركعته تلوم أبوي شلون خلاه يروح شلون ما منعه شلون تصرف من راسه هذا البية أنا شسوي؟ اصير ويه أبوي المنكسر لو ويه عمتي المحروك كلبها؟ لو ويه عمي اللي ما ندري بأي كاع هو هسه؟ طكت روحي زَمُرد حسيت المكان خنگني لهذا جيت للمحل عبالي ارتاح بس شفت الدنيا كلها صايرة كلمن براسه حتى عصام ما انطاني خبر حسيت نفسي غريب بوسط ناسي

زَمُرد بقت تسمعني وعيونها صارت بيها دموع كالتلي بخنگة وتحاول وياي حتى تهديني

- شبير الفاروق الأعظم يمكن يكون والوجع عليه جبير وراد يبتعد حتى يرتاح شوية وبعدها يرجع لاتشيلون هم اكبر منكم وأنتَ هم إنتَ عمود البيت هسه أبوك يحتاجك تسنده مو تنهزم منه عمتك كذالك من حركتها تحجي والنسوان مالهن غير اللسان بوقت المصيبة اصبر الله ما يضيع واحد وعمك الفاروق الأعظم جبير وما يضيع

بقينا نسولف فتحت الها كلبي عن خوفي على مستقبلنا عن خوفي على أبوي لا يوكف كلبه من الحزن وعن الضياع اللي حاس بيه حجيت وحجيت لحد ما حسيت صدري خف شوية
مر الوقت وصار لازم أرجعها وصلتها لبيت أهلها نزلت وكالتلي وهي تودعني

- دير بالك على نفسك شبير وعلى أبوك وبشرني أول ما يوصل خبر عن عمك

هزيت راسي وما جاوبتها وحركت السيارة ورجعت للبيت وصلت للفرع شفت سيارة أبوي بالباب دخلت ولمن وصلت للبراني فتحت الباب ودخلت وجان الموقف يكسر الظهر

أبوي كاعد بالكاع القران بين ايديه والبيت ميت بس صوته هو يرتل الآيات جان يقرأ بصوت شجي صوت متروس غصات ومن يوصل لآيات الصبر أحس صوته ينشحط لمحة البجي واضحة بنبرته

جان يبجي دموعه تنزل على لحيته وهو يقرأ جانت القراءة مو بس عبادة جانت استغاثة جان يصيح يا رب رجعلي أخوي يا رب احفظ الفاروق الأعظم وكفت بالباب ما كدرت أدخل وأگاطعه شفته شلون يمسح دموعه بطرف غترتة ويرجع يكمل وصوته يتردد

﴿ فَصَبْرٌ جَمِيلٌ وَاللَّهُ الْمُسْتَعَانُ عَلَىٰ مَا تَصِفُونَ ﴾

عرفت ذيج الساعة أن الوجع أكبر مني ومن عمتي ومن الكل أبوي جان يودع گطعة من روحه وأنا مالي غير أنتظر رحمة الله ترجع لنا الغايب

﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ عَليي السجاد ٭٭

رحت للمدرسة يوم الأحد بعد ما تركت دراسة الإعدادية و المتوسطة صرت أدرس ابتدائية وجانت يوم سفرة عدهم صف خامس ابتدائي لهذا صرت انا مسؤول عن الكوستر مال الشعبة الي انا مشرف عليهم

ونحن بالطريق ردت أحمس الطلاب شوية وكفت الهم بالممر بعد ما تأكدت الكل كاعد ومرتاح صحت بيهم

علي السجاد :- يلا حبايبي وياي على ما نوصل كلنا بصوت واحد

:- اييي استاذ شنو؟

علي السجاد :- لو دينك لو بعد مارايد دين أنتَ القبلة وعليك اهلي مصلين

:- علييييييي

علي السجاد :- مو بس إحنا يحيدر صلينة .. صلى الله عليك ياابو حسين

:- علييييي

علي السجاد :- باسمك تِـعـلى وتـرفـرف رايـتـنه
يا حيدر بـيك انـشـدَّت غـايتـنه
لو ضـاگت يبو الوكفات دنـيـتـنه
بـس نـنـادي عـلـي وتـنـحل شـدتـنه

:- عـلـييييييي

علي السجاد :- يـا أول نـفـس بـالـكون صـاح الـله
عـلـي ومـن مـسـتـقر الـعرش تـتـجـلى
الـيـحـبـك يـا عـلي مـا يـعـرف الـذلـة
بـالـمـحـشر لـواء الـحـمـد تـحـتـله

:- عـلـييييييي

علي السجاد :- مـو بـس إحـنـا بـإسـمك صـحـنـه يـا مولاي
جـبـريـل بـسـمـاك يـنـادي يـالـعـالي
يـا نـبـض الـگـلـب والـفـكـر والـبـالـي
دورة فـلـك بـإسـمـك يـبـو الـتـالـي

:- صـلى الله عـلـيـك يـا بـو حـسـيـن

علي السجاد :- نكلب الدنياااا

:- على الوهاابيةةة

ضحكت من كل گلبي واني أشوف وجوههم بريئة وصيحاتهم هذولة بيهم بذرة حب حقيقية والفطرة مالتهم بعدها خضرة
عدلت ياخة قميصي والسايق أبو جاسم يباوعلي بالمراية ويضحكلي كال

:- عليك بيهم يا أستاذ علي ذولة جيل حيدر الكرار لخليهم يزلزلون الشارع

كتلهم بصوت عالي

علي السجاد :- عفيه عليكم يا سباع هااا.. شو جنكم تعبتوا؟ لو بعدكم تريدون؟

:- لااااا أستاذ بعد بعد نريد نهوس!

واحد من الطلاب وكف على الكرسي رغم أدري السفرة ممنوع بيها الوكفة هيج لان ممكن ندخل بطسة لو شيء فـ خطر على الطلاب بس الفرحة ما تنلزم وبدأ يدك على جامة الكوستر والطلاب كلهم وياه

:- يا علي يا علي يا علي

حبيت أربط فرحتهم بشي يعلمهم القوة ويقويهم صرت أمشي بالممر مال الكوستر اباوع عليهم يمنى ويسرى

علي السجاد :- اسمعوا هاي يا ولد على عناد اليكرهك رافعين الراس بإسمك ياعلي نذل الصعوبات
الما والى حيدر خل يشيل وشال
إحنا وياه حد الموت والآهات
يوم الحشر يوكف هوَّ الشفيع
يشفع للمحب ويغفر الزلات

:- ياااااا علي

بعد هذا الصياح تعبت حيل هههه كعدت بمكاني شوي أخذ نفس والطلاب بدوا يلعبون بيناتهم لحد ما نوصل باوعت عليهم شفت واحد منهم كاعد وحده بالاخير اسمه مرتضى تغير ملامح شكلة وبين ضاج لأن عزل نفسة وكعد بالاخير وجان يباوع من الشباچ وساكت رحت يمه كعدت بصفه بالكرسي وهتفت وياه

علي السجاد :- مرتضى شو صافن؟ الفرحة والضحكة وين راحت؟

مرتضى :- ههه لا أستاذ موجودة بس جنت أفكر

- بشنو يفكر أبني المجتهد؟

:- اكول صدك الإمام علي يحبنا إحنا الصغار؟

أخذت صفنة ثواني بوجه ولزمت أيده بستها شنو هذا السؤال وشنو جابة على راسة هسة بس مااخذت هواي الا وهتفت وياه

- ولك يا بعد روح أستاذك علي هو أبو اليتامى وأبو المساكين وصديق الأطفال تدري جان يشيل الخبز والتمر على ظهره بالليل ويروح يوزعه؟ جان ينزل لمستوى الطفل ويلعب وياه حتى يضحكه إحنا من نصيح يا علي مو بس كلمة إحنا نطلب المدد من أبو الحسنين اللي ما رد سائل بيوم

عيون مرتضى لمعت وابتسم طلع نستلة من جيبه فتحها وانطاني نصها ضحكت وكتله

:- أخذها مني استاذ

- هاي أخذها منك بس بشرط

:- شنو هوة أستاذ ؟

- ترجع تصيح ويا ربعك بصوت اريد الي برة بالشارع يسمعون

ما انتضر مرتضى اخلص كلامي كبل وكف وصاح بجماعتة الطلاب

:- علي بالشدة يحضر

علي السجاد :- وإذا كالوا شيعي؟

:- نرفع راسنا للسماء

علي السجاد :- وإذا ضاكت بينا؟

:- ننادي ياااا علي

بدينا نقترب من مكان السفرة المدينة الترفيهية نزلت الجامة شوية الهوا البارد طخ بوجهي وحسيت براحة رغم تعب الطريق وصداع الجهال بس فرحتهم تسوى الدنيا

كمت وكفت بالنص صرت كبالهم كلهم كتلهم بالقائمة لان راح نوصل وهلشيء بكل مرة نحجي بيه

علي السجاد :- يا أبطالي المُجتهدين هسة راح نوصل أريدكم تبيضون وجهي كدام المدير وكدام المعلمين الباقين النظام أهم شي ما اكللكم لا تتونسون لا تونسوا بكيفكم أي لعبة تريدوها أنا وياكم بس بشرط ما تاذون نفسكم ولا تركضون وهواي واهم شيء قبل لا ننزل نصلي على محمد وآل محمد بأعلى صوت

الكوستر كله صار صوت واحدة

:- اللهم صلِ على محمد وآل محمد

نزلنا من الكوستر واحد واحد واني واكف يم الباب أحسبهم وأشاقيهم من نزل آخر واحد مرتضى باوعلي وضحك وكالي

مرتضى :- أستاذ علي أنت أحسن مشرف بالعالم

علي السجاد :- هههه وليش بلة؟

- امم يمكن لأن خليتنا نحس إنو الإمام علي ويانا بالسفرة

حطيت ايدي على شعرة و مسحت على راسه وكتله

:- هو ويانا بكل خطوة يا بطل يلا اركض الحك لأصدقائك

وكفت أباوع عليهم وهم يركضون طلعت جگارتي ورثتها وأخذت نفس طويل واني أبتسم للدنيا ولليوم اللي قررت بيه أدرس ابتدائي وأعيش هاي اللحظات

دخلنا للمدينة الترفيهية والجهال جنهم عصافير تركض منا وتطفر منا وأنا أمشي بيناتهم

:- ولكم يا ولد على كيفكم لا يضيع واحد
حسين، عبود، مرتضى اصطفوا يمي

صفيتهم سرة واحد ورا الثاني والمدير يباوعلي من بعيد ويضحك وصاحلي بصوت وكالي

:- سيد ذولة أمانة بركبتك لا تسويلنا طلابة

علي السجاد :- أستاذي ذولة ولدي لا تخاف عليهم

أخذتهم للعبة السفينة جانت جبيرة وتخوف شوية شفت مرتضى وجهه صار أصفر لزمت إيده وكتله

:- خايف يا بطل؟ولك أنتَ مو قبل شوية جنت تنادي يا علي اللي بگلبه علي ما يخاف من هزّة سفينة

باوعلي وابتسم و صعدنا كلنا وأنا كعدت بالنص بينهم بدت السفينة تصعد وتنزل والصرخات مالتهم ترست المكان وأنا أصيح وياهم على الواهسّ خلصت اللعبة ونزلوا يضحكون واحد يطك بالثاني من الدوخة أخذتهم للمطعم مال المتنزه أخذت منه أكل وبعدها طلعت الهم كعدنا بفيّ شجرة طلعت السفرة وبدوا يوزعون الأكل بيناتهم وكعدت وياهم وصرت اشوفهم هذا ينطي لگمة لذاك وهذا يگسم صمونته بالنص من شفتهم هيج واحد ينطي للثاني ومتعاونين ومحد ضوج الثاني ضحكت الهم وصحت وياهم

علي السجاد :- تدرون الإمام علي شجان يكول؟

:- شيكول أستاذ

علي السجاد :- يكول الناس صنفان: إما أخ لك في الدين أو نظير لك في الخلق يعني الكل إخواننا والكل نحبهم والمهم هو الصراحة والوفاء

واحنا كاعدين مروا شباب من مدرسة ثانية جانوا شوية وكحين وبدوا يشمرون حجي على طلابي الصغار ويضحكون على لبسهم البسيط أنا هنا دمي فار كمت رحت عليهم وكفت كبالهم وصحت

علي السجاد :- خير يا ولد شكو تضحكون؟

:- هههههه أستاذ ذولة طلابك شكلهم يضحك

لزمته من جتفه وضغطتة حيل وكتله بصوت ناصي

:- اسمع لك ذولة اللي تضحك عليهم باجر يصيرون زلم نصهم يعالجك ونصهم يحمون ظهرك هسة تعتذر منهم واحد واحد لو أخلي المتنزه تنكلب عليكم مناحة؟

الشباب شافوا عيوني شلون صارت حمرة والطلاب وراي كلهم وكفوا وكفة وحدة جنهم حرس اعتذروا وانسحبوا بسرعة التفتت لطلابي لكيتهم يباوعولي ويضحكون وحسين صاح

:- عاش أستاذ علي سبع والله

سمعنا صوت الأذان مال الضهر وصاحوا بأسم مدرستنا والجو صار يجنن لمينا غراضنا ورجعنا للكوستر هالمرة الكل جان تعبان بس الروح بعدها مرفرفة صعدنا وأبو جاسم السايق شغل لنا قصيدة هادئة هدأ النفوس وخلانا نعيش لحظة تأمل

طالب من الطلاب نام على جتفي وصلنا لباب المدرسة والأهالي جانوا ينتظرون نزلتهم واحد واحد أسلمهم لآبائهم وأمهاتهم وأوصيهم عليهم فرغ الكوستر وبقيت بس أنا وأبو جاسم وكفت بباب المدرسة الفارغة
طلعت موبايلي شفت الصور اللي صورناها صورتنا وأنا بالنص وهم محوطيني جنهم سور اخذت حدتت الصور كلهن ودزيتهن على كروب الطلاب بالواتساب خاف أرجع للبيت وأنسى رحت صعدت سيارتي ورجعت للمجمع ولمن وصلت وكفت بداية المجمع تركت سيارتي هناك مشيت لبيتنا مشي وأنا أردد
أنا الـ هويتك ياعلي وبإسمك تعليت
أنا الـ زرعتك بالگلب وبحبك ربيت

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ عَزيزة ٭٭
البيت جان كلش هوسة وانا مصگوعة مابين زوجي حامِد المتقين وأطفالي در الشام و در النجف ومابين العلوية عمة السادة الي كامت ماكعدت من عرفت ان الفاروق الأعظم شمع الخيط واختفى

هاي غير هوسة زواج السيد علي الكاظم الي باقي الة أقل من ٨ أيام وانا اركض بين هاي وذيج واتحمل عصبية العلوية اذا عصبت وابلع الموس

جنت بالمطبخ أمسح بالمطبخ واجاني صوت المرتضى الأمير من الهول يصيح ويكول :

المرتضى الأمير :- فدوة لأيديچ أم الدرر چاي من ايدج

عزيزة :- صاار

شمرت الوصلة من ايدي ومسحت ايدية وطلعت القوري حطيت بية ماي وحطيتة على الطباخ و وچيت النار تحتة وكعدت اسوي چاي خفيف مهيل وي ورد محمدي مثل ما تحبة عمة السادة وحطيت القوري بالصينية وحطيت الستكانات والشُگر وطلعت الهم بعد ما عدلت ملابسي و حجابي ونزلت أرداني

كعدت يم عمتي وكدامي جان المرتضى الامير صبيت چاي لـ مرتضى الامير ووهتفت وي عمتي

المرتضى الأمير :- عسى هاي الايدين ما يمسهن نار ان شاءالله

عزيزة :- تاج راسي خوية ... عمة تردين چاي؟

فاطمة الزهراء :- ماااريد شيء

:- ليش عمة حبابة اشربي جاي وهودي راسج شنهي راح تشيلين نفسج فوك طاقتها!!

- عزيزة كتلج ماريد شيء لا تلحين

المرتضى الأمير :- عزيزة ...

باوعت لـ المرتضى الأمير أشر الي بمعنى عوفيها براحتها بس انا ماعجبني الوضع كلش انغثيت يعني اذا عمة السادة ضاجت خلص البيت كلة لازم يدخل إنذار هاي غير صحتها الي ما تهمها

عزيزة :- لااا ما أسكت عمة مايصير هيج لا عبالج أنتِ صغيرة ترى جبيرة وصحتج الها حق عليج حرام الجاي تسوية بنفسج لو بيج حيل جان كضيتي أبن أخوج مو هيج كاعدة ومدخلتنا إنذار...

الخوفة اللي بگلبي خلتني أحچي وما أثمن كلماتي رغم أعرف عمة السادة كلمتها سيف بس القهر أكل روحي عليها وعلى حال البيت اللي صار السجن

كملت كلامي وانا احط أيدي على چتفها وصوتي بي خوف واضح لأن شفت خزرة عيونها علية واستغربت شلون ما مدت أيدها بلعت الموس وكمللت

عزيزة :- عمة وحق جدي الكرار مو قصدي أطول لساني بس البيت بلا ضحكتچ وبلا شورتچ أظلم الفاروق الأعظم غاب وهذا أمر الله بس مو معناها نهد حيلنا والزلم عيونها علينا السيد علي الكاظم عرسه ماباقي له أيام والناس شتگول يگولون بيت السادة انكسر

باوعت للمرتضى الأمير شفته نزل راسه وگلب ماعون استكان الچاي بيده جنة كلامي غثه وبنفس الوقت ضل ساكت عمتي دارت وجها عني صدتني بس شفت شفتها ترجف عرفتها بدت تلين بس الكبرياء يمنعها

عزيزة :- فدوة لشيلتچ يا عمة اشربي شوية خليني اجيبلج أكل لو هذا الچاي لعيونچ والله سويته مهيّل وبيه ورد مثل ما تشتهين لخاطر در الشام ودر النجف هودي بذكر الله والغايب عذره وياه والحي أحق بالرعاية

گمت من مكاني دنّيت الصينية يمها وبست راسها من فوك الربطة التفتت على المرتضى الأمير وكلت له

عزيزة :- خوية مرتضى الامير أنتَ هم گوللها كلمة الحزن إذا طال ياكل صاحبه واحنا ورانا هوسة وعالم وبيت حسين كاظم لازم يظل مفتوح للغريب قبل القريب

وگفت أنتظر ردها وكلبي يدگ
يا ترى راح تنهرني؟
لو راح تحط الاستكان بحلگها وتطفي نار هالهوسة؟

بهي الاثناء سمعنا طربگة الباب مال الحوش انخمش كلبي دخل البشير قيصر مع احتراماتي إله بس مثل الثور الهايچ وبيدة سلاح وصاح بعلوا صوتة وجان وراه حامِد المتقين

وكف كدامنا البشير قيصر وحامد يحاول يهدي وكفت عمتي وهتفت وياه

البشير قيصر :- وووينننهاااا؟؟

فاطمة الزهراء :- شنهي ولك هاد على منهو؟

البشير قيصر :- عمة أنتِ خليج بعيدة بنتج وينهاااا ام البنين وين ؟

- بنتي تاج راسك فوك بغرفتها شنهي تريد منها ولك؟

:- اليوم انا چتالها ...

المرتضى الأمير :- بشير أحترم نفسك

حامد المتقين :- بشيررر كتلك أعصابك اكسر ايدك اذا مسيت أم البنين لا تنسى هية أختي

:- أختك بنتج اليوم انا جتالها وروح الحسين ما اخليها هچمت بيتي

فاطمة الزهراء :- اوكف بمجانك ولك شنهي الدنيا هيتة عندك لو حسبالك كبرت؟

هنا البشير قيصر دفع حامِد المتقين وراد يصعد لفوك عرضت كدامه عمتي فاطمة الزهراء وهم دفعها على كيفة زاحها عن طريقة وسحب اقسامة بسلاحة وصعد الدرج صار يركض ويعصد بايتين وركضوا وراه حامِد المتقين و المرتضى الأمير بس هو طار بالصعدة مثل البرق لغرفة أم البنين .....

﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ حَوراء ٭٭
المطبخ اللي جان يفوح بريحة أمي صار اليوم سجن ضيگ واگفة على رجلي الوحدة واللخ المكسورة أحسها نار وتوجعني بس الوجع اللي بصدري جان يطغى على كل شي الدمعة بعيني محبوسة خايفة تنزل ويشوفونها ضعف وأنا اللي صرت غريبة ببيت أبوي

جنت أحاول أسوي عشة وحركتي جانت كلش ثكيلة أجر بروحي جر رفعت جدر المركة أريد أخليه على الطباخ وبذيج اللحظة حسيت بخيال وراي وبأنفاس قريبة كلش مني جمدت بمكاني الرجفة سرت بجسمي من فوگ ليجوة

حگم جان واگف وراي وما چنت أسمع له صوت مثل الحية جاي الي لا حس ولا صوت حسيت بإيده الخشنة تلمست ظهري وصعدت على كيف جانت ايده وحركتها مستفزة همس بصوت بي بحة قذارة من كلشي شفتة منهم من أول يوم

حگم :- عاشت إيدج حوراء البيت من غيرج ما يسوى وأبوي طالع يگضي شغله يعني صرنا وحدنا لا تخافين والوكت كفيل ينسينا الوجع مو بالله؟

التفتت عليه عيوني وسعتهن من الصدمة ردت أدفعه ردت أصيح بس لساني مايطلع صوت بعد هو تقرب أكثر عيونه جانت تباوع لي بنظرة ما بيها ذرة رحمة ولا صلة رحم نظرة ذيب لگى فريسة سهلة ومكسورة

حوراء :- وخر عني حگم استحي على شيبات أبوك ترى أهلي بعدهم ما برد ترابهم وأنا امانة عدكم شنهي أنتَ ابن عمي لو غريب وجاي تنهش بية؟

ضحك ضحكة خفيفة إيده بعدهي تمسح على ظهري بقرف وتقرب أكثر لحد ما صار وجهه بوجهي

حگم :- ابن عمج وسندج واليوم أنا الآمر والناهي هنا ستار راح وأبوي انطاني الضوء الأخضر أدير بالي عليج وراح اسوي هيج ادير بالي عليج وكلش هواي بس بطريقتي الخاصة

ما تحملت القرف والوجع والخوف انفجرت بيه صيحة مكتومة و بحركة سريعة فقدت السيطرة على إيدي جدر المركة الحار فلت مني ووگع بالگاع بصوت رگعة المركة طفرت على رجلي وعلى هدومه استغليت لحظة فزته وصيحتة من حرارة المركة اللي حاشت رجله وشلت روحي شيل ركضت والوجع برجلي المكسورة جان يخليني أعرج وأتعثر

بس الخوف جان يدفعني دفع صعدت الدرج وأنا ألهث أحس گلبي راح يطلع ودموعي أخيراً نزلت تحرگ خدودي
دخلت لغرفتي وقفلت الباب وراي بكل قوتي ذبيت روحي ورا الباب أسمع دگات گلبي مثل الطبل براسي ما مرت ثواني ولحگني سمعت خطواته على الدرج وهو يركض

ضرب الباب بجتفه بكل قوته الباب الخشب جان يهتز وأنا لازمة القفل بإيدية الترچف أبجي وأتوسل بصوت مخنوگ

حوراء :- حگم عوفني الله يخليك لا تسوي هيج أنا عرضك أنا أمانة برگبتكم يمةةة بويةةة وينكم شوفوا شيسوون بحوراء

حگم :- افتحي الباب ولج عبالج تنهزمين مني؟ البيت بيتي وأنتِ ملكي أبوج مات وراح محد يخلصج مني اليوم افتحي لا أكسره على راسج

ضرباته صارت أقوى وصوت القفل بدأ يطگطگ جان يضرب الباب برجليه وبأيديه مستغل غياب أبوه ومستغل ضعفي وكسرة جناحي أنا جنت گاعدة بالگاع ضامة رجلي لصدري وأباوع للباب اللي كاعد ينخلع كدام عيني

فجأة ويه وحدة من ضرباته القوية القفل طگ والباب انفتح وشفت عيونة الحمرة تباوع لي بحقد وشهوة غريبة

حوراء :- يااااا ربييييي انقذنيييي يابةةةة وينكككك؟

يــــتــــبـــع

- وأمد شعري على أجتافكَ أطرز سوالفي بعينك

متابعة لحسابيي الواتباد ندخل رقم جديد
قناتي التلكرام وبيها الابطال وننشر كلشي // oo_ll13
حسابي انستكرام + تيك توك // o.oll13

لهنا وانتهى المُنْعَطف التــاسِع 🌊🌊
رأيكم وَزاتيّ وتعليقاتكم الحلوة وتفاعلكم الي أحبة وتصميمكم ونشركم عن الرواية أهم شيء التصاميم والنشر حسب التفاعل اني حيل جاي اتعب بالكتابة وابسط شيء التصويت ماجاي تصوتون التفاعل ما عاجبني حيل 👎🏻👎🏻👎🏻

وإن شاءالله اشوفكم بــ مُنْعطف جديد

11,029 كلمة

اللهم صلّ علىٰ محمد وآل محمد

- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ

- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد