الثـــاني عشر ⚔️🔥
تاتيكم رواية احفاد السيد : الثار
بالجزء الثاني : مُنْعَطف السادة
بقلمي انا الكاتبة ⚜️ رُقـَـيّــة الأكـَـبــر ⚜️
✨ التعب علينا والتفاعل ✨
✨ عليكم التصويت والتعليق أبين الفقرات ✨
✨ هو الدعم للقصة وهو الينسي الكاتب التعب ✨
﴿ الْبَاقِيَاتُ الصَّالِحَاتُ ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد
مُتابعة لحســابي حتــى ندخل رقم جديد @oo_ll13
اللَّهُمَّ صَلِّ عَلَى مُحَمَّدٍ وَعَلَى آلِ مُحَمَّدٍ، كَمَا صَلَّيْتَ عَلَى إِبْرَاهِيمَ وَعَلَى آلِ إِبْرَاهِيمَ، إِنَّكَ حَمِيدٌ مَجِيدٌ
لنبدأ بالغوص في داخل
المنعطف الثاني عشر : بِسْمِ اللَّهِ الرَّحْمَنِ الرَّحِيمِ
───────── ⋆⋅☆⋅⋆ ─────────
٭٭ تذكير بــ الذي حصل في المُنْعَطف السابق ٭٭
طلع عمي محمد من الغرفة وانا كمت قفلت الباب وضليت ارجف شنو اسوي مااعرف! رحت شلت تليفوني وماجان عندي بس هذا القرار على طول هاي الخمس ايام جان بين فترة وفترة شبر يتصل عليه وانا ما ارد بس هسة مابيها مجال قوة شبر الوحيدة الي توكف عمي عند حدة اتصلت عليه ولمن رد عليه
شُبر :- الوو؟؟
حَوراء :- شبر وين أنتَ ؟
- خير شبيج
:- تعال الي بسررعة الله يخليك
- بس فهميني ذو الفقار شبي صاير شيء وياج؟
:- ولك ياا ذو الفقار انا بيت عمي وراح يجيب رجال مدري منين ويريدة ياخذني
- شنهي رجال ياخذج غير أنتِ مرة ذو الفقار؟
:- مااكدر اطول بالحجي الله يخليك هذا عمي راح يبيعني تعالل والله راح اروح بيها مالي غيرك ابد والله
- خلص دقائق وانا يمچ بس دزيلي العنوان
:- صاار
- لا تخافين وهدي نفسچ
سديت التليفون وصرت انتضر واباوع بالشباج واريد اشوف سيارة شبر توكف ببابنا حتى كلبي يرتاح واكول صرت بأمان بس مر وقت هواي و شبر تاخر وكلت ماراح يجي وصلا ليش يجيني وانا سويت بيه كلهذا
بعد ما تاخر شبر عميي صار يدك بالباب مثل المخبل وانا واكفة كدام الباب و الجرباية وراي و اصيح عليه واكله ماراح اطلع وبعد ربع ساعة قرر يكسر الباب
ما وخرت وغيرت مكاني لا بقيت واكفة مثل وكفتي كدام الباب ووراي الجرباية وعمي يدفر بالباب ما احس الا الباب نخلع من مكانة واندفر باتجاهي وكعت على الجرباية ووكع الباب على رجلي اليسرى ضليت اصرخ من الوجع
وهو معصب مني اجه لزمني من شعري وضربني راجدي لان كسرت كلمتة والزلم راحو لان تاخرت عليهم ووكع ضرب بيه وهو يصيح ويكلي
محمد :- تردين تخسريني الفلوس ولج فوك الفلوس مال سيف علي الرجعتيهن وهسة اجيتي لهذا! ولج راح اخذ الفلوس وتخلصيني من شرج
هو يحجي وياي ولازمني من شعري انا ابجي ومغمضة عيوني للحظات صوت محمد اختفى وأيده انشالت عن شعري والباب انشال عن رجلي وشيء من القماش صار على وجهي عطره غريب
فتحت عيوني لكيت كدامي شُبر وشماغة غطة شعري وجان عمي محمد واكع بالكاع ودمه نازل من راسه مادري بيه مات لو لا جان شُــبر ضاربة على راسة بطرف سلاحة
باوعت عليه وهو يبتسم الي وهتف وياي
شُــبر :- أنتِ بـ أمان شُــبر الصادق و ....
صوته بدأ يتلاشى لان خلصت طاقتي من وجع رجلي و راسي مال شعري وكعت لورة على الجرباية واغمى عليه ....
───────── ⋆⋅☆⋅⋆ ─────────
٭٭ شُـــبِــر٭٭
سديت الاتصال ولبست قمصلتي واخذت الشماغ مالتي خليته على ركبتي ورحت لغرفة ابوي اخذت المسدس مالتة وخطيتة بحزام بنطروني وطلعت عرضتلي امي وهتفت وياي
جميلة :- شنو الي شفتة اناااا وين ماخذ سلاح ابوك
شُــبر :- يمة راح ياذوها
- تعال ياذون منو شبر لا تجلطني
- من ارجع نحجي يمة
- اووكف شبرر ولك اوكف لا تخليني هيجي اركض وراك ولك شبر؟؟؟
- يمة البنت اذا تاخرت عليها تروح بيها ماكدر
- شبرر
طلعت من البيت وركبت سيارتي ووصلتني رسالة بيها العنوان البيت يبعد عن بيتنا مشي بالسيارة وعلى اخر سرعة تقريب الـ 35دقيقة مشيت على ١٨٠
حاولت كد ما اكدر استعجل بعد الاتصال الدار بيني وبين حَوراء بس لان مطر و ازدحام اتاخرت وهلشيء خلاني حتى اعصابي افقدهن من نبرة صوتها و خوفها كل جسمي جان يرجف
وين ذو الفقار ؟
ليش حَوراء هيج خايفة ؟
شنو الجاي يصير! مو هية نفسها الكالتلي حتى اذا طلبت منك مساعده لا تسمع مني ولا تساعدني؟ مو جانت شاده ظهرها بـ ذو الفقار وكسرتني كدامه شنو الكلب الموازين هسة؟
وصلت للبيت الدزت عنوانه الي ودكيت الباب فتح الي شاب بالبداية من عمرة صحت بيه!
شُــبـر :- حَوراء وينن؟؟
حكم :- فووك
هنا سمعت صوت صياح جاي من فوك فقدت اعصابي اكثر سحبت روحي وركضت باتجاه الدرج وصعدت اركض رحت باتجاه الصوت ولمن وصلت لكيت غرفة الباب مالتها مشلوع دخلت جان منضر بعمري ماريد اشوفه واصلا ً بعمري ما شايفة رجال هيجي مطلع قوته على مرة؟؟؟؟؟
ما تحملت رحت وضربتة بالمسدس على راسة بس حتى يكف عنها لان واقعياً جنت ماكدر اتواجه وياه اطول مني واضخم ماجنت راح اكدر عليه وجنت اعرف اذا تواجهنا راح انجبر استخدم السلاح وانا ضد العنف عكس شبير لهذا بس ضربته على راسه حتى يوكع شوية ونكدر نخلص من شرة
بعد الحالة الي شفت حَوراء بيها حطيت الشماغ على راسها غطيت شعرها وما انسى لحظة شلون صفنت بوجهي وانكلبن عيونها عرفتها راح يغمى عليها بس ماكدر اتحرك ضليت اباوع عليها وعمها واكع ودمه بالكاع وكعت حَوراء على الجرباية
ماجان كدامي كدامي غير اشيلها دنكت شلت سلاحي حطيته بالحزام ورحت الها ثبتت الشماغ على شعرها وشلتها ونزلت بيها وهتفت وي حكم الجان بالصالة لا يهش ولا ينش
شُـــبر :- اصعد شوف ابوك بس لا تخاف ما مات
حكم :- ادري ماراح يصير بيه شيء الموت ياخذ بس الزين المهم أنتَ هسة اخذ حَوراء للمستشفى
- ماعليك بامان صارت تليفون حَوراء بقى فوك اخذ رقمي منه واتواصل وياي محتاجك
- بس انتبه عليها
- لا تفكر
طلعت وفتحت السيارة كعدت حَوراء بالصدر وربطت حزام الأمان وانا رحت صعدت ومشيت وكفت على الطريق كدام محل نزلت واشتريت ماي و عصير ورحت صرت اذب ماي على وجها لحد ما كعدت وصارت تباوعلي
ولمن صحصحت وادركت وين هية وتذكرت الي صار وياها صارت تباوعلي بحالة صدمة وبلشت تبجي وتصيح
وانا هنا ما حجيت وياها شيء ولا سالتها على شيء بقيت ساكت وخليتها تطلع كلش بداخلها ولمن تعبت من البجي ضربتني على صدري وصااحت :
حَوراء :- ليشش ضربته عَلى رأسه ؟
شُــبر :- موتت الجلاب السود
- شبر ليش سويتتت هيج؟
- وشتردين يعني اوكف واصفك اله واكله اي عفية يلا كمل اضربها بعد لحد ما تموتين؟ هذا تريدني اسوي
- شبر شبر ياالله اااخخخ
- خلص أهدي خلصتي منه لو تموتين ما ترجعين لرحمة هذا الچلب
- لا ما خلصت ولا راح اخلص بعد الي سويته أنتَ بس أريد اعرف انا شجاني واتصلت عليك هو جان راح يضربني يضربني ويروح بس انا لاا شلون الا اتصل نسيت بيك ممخبل
- شووفي والحسين الشهيد هسة اتسودن صدك وارجع افرغ المسدس براسه وااكطع اللحم مالته واشمرهن للجلاب هم ياالله شوية تهدا النار الي بكلبي شاعلة منه هسة
- شبر
- اششش ولج اناا اناا ما تجرأت اشوف شعرج ولج تعرفين شنو صار بيه من بسس لزمتي ايد ذو الفقار جنت اريد اشرب من دمه منو هذولي هسة الي يردون يجيسونج والحسين اذبح شكو واحد يتمادة هيج وياج
- معقولة مات؟؟؟
- يااريت الله يسمع منج بس ما اتوقع لان مايتشرف الموت ياخذ عاار
- شبررر احجي صدك انا بلا كلامك هذا
- اي والله هذا الصدك شفتي بحياتج عار مات؟ هاي طن عارات بالدنيا لا مظاهرات لفتهم ولا كورونا ولا أيدز ولا اي شيء بيهم اصحى مني ومنچ
- شبر ترى اذا كعد ماراح يعوفنا بحالنا هاي اذا ما اشتكى عليك
- واني منتضرة
- شنو يعني
- يعني خلي يوصل النا واني اتصرف
- زين هسة وين نروح وين توديني؟
- ماعندج أحد؟
- لااا
- ذو الفقار وين؟؟
- مادري عنه
- مو تزوجتوا؟
- بيوم العرس وانا بالصالون هو طلكني وراح اختفى مادري بيه وين وهسة لو ماهاي المشكلة جان كتلك اخذني لبيت عمي سيف علي بس ماريد ادخلهم بعد الصار
- ههههههه سواها وسافر!
- شعرفك سافر؟
- قبل عرسكم كالي راح يسافر بس جان ببالي أنتِ راح تسافرين ويااه مادري بيه هيج راح يسوي
- وليش ما كتلي؟
- هااا بعد ما شكيتي الرقم مالتي وسمعتيني ذاك الحجي ترديني ارجع واكلج والله ذو الفقار براسه يسافر شنهي مسودنة أنتِ
- مادري شجنت احس
- مخبلة والمخبل معذور
- يعني ما زعلان من كلامي وياك؟
- لا جان مخبل يحجي وعاقل يسمع لهذا لا تفكرين بالراح وهسة خلينا نفكر بس بيج
- التفكير بيه وين نروح هسة؟
- اذا ماعندج احد فـ حالياً أمن مكان الچ هو بيتنا تجين وياي وتضلين يم امي معززة مكرمة
- لااا مُستحيل ماكدر
- ليش ماتكدرين؟ شوفي إحنا نقلنا كل اغراضنا لمجمع بيه كل عمامي باقي بس الخفيفات باجر باذن الله احنا بالبيت الجبير يعني يعني ماراح تضلين وي امي وبس راح تشوفين عماتي تحطيهن بكلبج وتسدين عليهن
- شبر ماكدر اهلك شيكولون عليه؟
- وعيونج ماراح يكولون شي بس خليج وياي هاي المرة ولا انس راح يوصلج
- خايفة عليك من عمي والله حيل خايفة
- واثقة بيه؟
- ماعندي غيرك هسة
- وانا ماصار عندي غيرج تحطين!
ضيكت عيونها عرفتها رجعت داخت لان الضرب الي اخذته كلش مو قليل قاطعت كلامها واني ارجع الكرسي مالها للخلف
- شُــبر
- اششش لا تحجين ياروح شُــبر غمضي عيونچ ارتاحي على ما نوصل
شغلت السيارة ومشيت كلت احنا هيج هيج باجر منتقلين للمجمع يم عمامي لهذا ختاريت اخذها لبيت جدتي العلوية فاطمة الزهراء تبقى يم البنات علما ننتقل باجر وتتحول لبيتنا ونشوف وين تاليتها
وصلت للمجمع ووكفت كدام بيت جدتي نزلت وفتحت باب الصدر هتفت وياها وماكو رد ضربت على خدها عرفتها فاقدة الوعي مرة ثانية رجعت وشلتها وضربت على الباب
- حَوري يلا بوية انزلي وصلنا ، حَوري! بوية؟ شبيج خايبة حَوراء، لا إله إلا الله
ضربت على الباب وهية بين ايديه فتحلي الباب عمي حامِد المتقين اول ما شافني شايلها فتح الباب على كبرة ورجع عني حتى ادخل وهو يردف وياي
حامِد المتقين :- شنو هاي، شُبــر!!
مارديت عليه اخذت خطواتي الثكيلة ودخلت لجوة لكيت جدتي كاعدة بالهول تشرب چايها ومرة عمي عزيزة كاعدة يمها رحت وحطيت حَوراء على الكنبة يمهن صفنت عليه وهتفت وياي بصوت كلة استغراب
فاطمة الزهراء :- منهي هاي ولك شُبر؟
- علوية هاي بنت وياي بالجامعة
حامِد المتقين :- وشنو تسوي عدنا بالبيت شبر تعرف القانون بهاي الحالة شنو يسوي يلعب بيك لعب
- عمي الله يخليك دم المحامي الي بداخلك وكفة شوية ولا تحجون شيء وانتم ما فاهمين السالفة
فاطمة الزهراء :- لا تصيح، وشنو يعني اذا حجيت السالفة يتغير شيء الغلط غلط لو تصبه بماي الذهب يبقى غلط يا ابن شيخ السادة
- عمة هاي البنت انا احبنها واهلها ماتو وزوجها عافها بيوم عرسها وياي بالجامعة هية وشوفي وضعها هذا كلة بسبب عمها وكع ضرب بيها بس لان ما قبلت تروح وي الزلمة الي هو جابها الها عمها كعد يبيع بعرضها
عزيزة :- هذا كلة صاير بيها وبعدك تحبها؟؟؟؟ تتخيل ابوك يقبل تاخذها وهية هيچي؟؟
- اخذها ما اخذها تقبلون ما تقبلون ما يهمني اليهمني هسة هية تكون بخير وسلامة
فاطمة الزهراء :- وانا خلفتها ونسيتها؟ ما تروح لخوالها شفت بيت السادة صالة سبوع هادى لا مشاكل ولا طراگيع ما تكعدون صرتو تبزون الا تجيبون مصيبة على راسكم! لا الولد بيهم خير ولا ولدهم ولا واحد طلع عااقل يعنيييي من ذرية ابوي ولا واحد
- علوية لا تقسين كلبج بس الليله تبقى عدكم وباجر احنا ببيتنا الجديد هذا اليمكم راح تتحول النا
حامِد المتقين :- ابوك يدري ولك؟
- لا
حامِد المتقين :- هنا الحچي هل اكول البشير قيصر شلون سكت عنك؟
- هسة انا رايح للبيت وراح اكعد وي ابوي واحجي وياه علوية الله يخليج شوفي بيها ام البنين ، عزيزة ، وهج الطف اي وحدة من بناتج الله يخليج علوية حنني كلبج عليها بس الليله هاي
فاطمة الزهراء :- وين رايح أنتَ ؟
- رايح لبيتنا احجي وي ابوي
فاطمة الزهراء : استغفر الله نشوف تاليتها وين عزيزة ..
عزيزة :- ها عمة؟
فاطمة الزهراء :: روحي صيحي لام البنين و صعدن البنية لغرفتي وحاولن تكعدنها وأنتَ روح احجي وي ابوك وشوف شيسوي
- ان شاءالله عمة
طلعت من بيت جدتي العلوية وروحي ممرودة مرد وبقيت واكف بالشارع شوية والمطر الخفيف ينزل على راسي بوجهي لزمت السلاح بحزامي اخذت نفس ورحت ركبت السيارة وحركت بسرعة باتجاه بيتنا الطريق جان طويل بفكري الف سالفة وسالفة اجت بالي
ابوي شلون راح يتقبل الموضوع شلون راح يقتنع بوجود بنية غريبة ببيتنا ومنو هي؟ حوراء اللي كسرتني وكسرت كلبي كدامهم والكل شاف ضعفي بيوم عرسها هسة هي بركبتي وركبته
وصلت للبيت نزلت دخلت لكيت ابوي كاعد وامي كاعدة يمه وابوي مخلي جهاد الحسين بحضنة ويلعب وياه اول ما دخلت جهاد الحسين عاف ابوي وركض الي حضني حيل من رجلية شلتة وضميته لصدري وبسته بنحرة و رجعت نزلتة ودزيته على امي راح وكعد بحضنها ورجع يلعب واردفت وياهم بصوت متروس تعب وبالكوة يطلع مني :-
شُبر : السلام عليكم بوية
البشير قيصر :: وعليكم السلام والرحمة هاي شبي وجهك ومنين هذا الدم ال على قمصلتك؟
جميلة :: ولك يمة احجي شسويت لا تكول ذبحت واحد
- يمة اهدي
البشير قيصر :: احجي ورد على امك منين الدم ال على قمصلتك
- بوية السالفة طويلة، وانا جيتك وأنتَ ما رديتني يوم بحاجة
البشير قيصر :: وماراح ارد واحد من دمي كول؟
كعدت كباله نزلت راسي للحظة وبعدين رفعت عيوني بعيونه حجيتله كل شي من مكالمة حوراء لروحتي لبيت عمها للمنظر اللي شفته لضربة السلاح اللي انطيتها لمحمد لحد ما وصلتها لبيت العلوية وهم حجيت اله عن حبي الها وشلون ماكدرت اتخطاها وتمرضت بس لان تخيلتها راح تصير لغيري وماكدر اعوفها هسة وانا اشوفها ممكن تصير الي بعد ما خلصت كلامي ،
ابوي بقى ساكت بس هذا السكوت مالته يذبح اصعب من كلشي وبعدها هتف وياي بصوت ناصي وجان هادى حيل عكس رد الفعل الي تخيلتها
البشير قيصر :: يعني هسة البنية ببيت عمتي وعايف عمها طايح بدمه وأنتَ جايبها بحجة احبها شبر أنتَ تدري احنا مجتمع بيه دولة وبيه عاشئر و هاي السالفة بيها عرض وبيها دم أنتَ تدري بهذا تصرفك لو عمها محمد كعد وما مات راح يكلب الدنيا علينا عشاير وقانون
- بوية محمد جان يبيعها جان يضربها ضرب مال موت تريدني اعوفها تموت كدام عيني لان خايف من عشيرة لو خايف من قانون هو أصلاً القانون مكسور بفعل عمها ماله حق بوية أنا شبر الصادق ما ربتني جميلة حتى اصير جبان وأشوف الظلم واسكت
جميلة :: ولك يمة ياريتتت ما ربيتك ياريت ماربيتك تريد تضيع من ايدي لخاطر ناس ما نعرفهم ؟ وبعدين أنتَ مو كلتلي هاي البنية صارت مرة واحد وياكم بالجامعة شلون تاليها تصير ببيتنا؟
- يمة ذو الفقار عافها وانهزم ذو الفقار طلكها بالصالون وتركها لذيابة امثال عمها أنا ما جبت وحدة غريبة هاي البنية جانت راح تروح بيها ولو ما انا جان هسة هي مبيوعة لواحد ما يخاف الله
لا والله ما سويتها ولا راح اسويها واسكت واخليها لو اعرف أطيح ميت تحت رجليها
ابوي لزم جتفي وضغط عليه بقوة واردف وياي :-
- باجر الصبح ننتقل للمجمع البنية تبقى ببيت العلوية الليلة يدارنها وباجر من نتحول حوراء تدخل بيتنا دخيلة تحت حمايتي أنتَ مالك غرض ولا تدخل بشيء واذا محمد تحرك انا وعمامك اللي نوكف بوجهه مو أنتَ
شُبر :- تأمر بوية الماتريده ما يصير
عفتهم وصعدت لغرفتي شلت التليفون، لكيت رقم غريب متصل عليه رجعت واتصلت اريد اعرف منو ومن رد عرفت المتصل هو حكم ابن عم حَوراء
شُبر :- حكم.. ابوك شلونه؟
حكم :- شبر اتصلت حتى اكلك ابوي كعد بس راسه مخيطينه خياط ضل يغلط ويصيح وحلف يمين إلا يكتلك ويكتل حوراء شبر دير بالك ابوي مو سهل وعلاقاته واصلة
- خلي يوصل حكم أنتَ زلمة وطلعت بيك غيرة حكم أريدك يمي اريدك تشهد على الصار إذا وصلها ابوك للقانون
- وانا مستعد اشهد وتبشر بالخير والله اجيك اريد اصلح كلشي وي حَوراء ومستحيل اقبل عليها الذله مرة ثانية
- مأصل
- انتبه لنفسك والها تراهي امانه
- وصاينها بدمي وعمري
سديت الخط ونمت وأنا افكر حوراء شسوي اذا كعدت و فتحت عيونها وما لكتني وتلكى نفسها ببيت العلوية ناس ما تعرفهم خايف عليها من ذكرياتها خايف عليها من وجعها بس ان شاء الله بس ينطيني الزمن فرصة وحدة بس وعلي استغلها واعوضنها عن كلشي بس انطيني فرصة ياازمن انصفني مرة وحدة بس
انكطعت افكاري بوقتها لان غلبني النوم
الشمس طلعت والجو صفى بعد المطر بس الدوخة بداخل عقلي ما صفت شلنا غراضنا وانتقلنا بشكل نهائي المجمع جبير بيوت عمامي كلها بصف واحد جنه قلعة للسادة وهناك ناس هم غيرهم ومبين كلهم خوش ناس يعني مجمع الكل يتمناه ناس تخاف على ناس
رحت لبيت جدتي العلوية قبل لا ادخل غراضنا لبيتنا الجديد لكيت عمتي وهج الطف واكفة بالحوش سلمت عليها
شُبر :- شلونج عمه
وهج الطف :- هلا شبر هلا حبيبي
- بشري حوراء كعدت؟
- اي كعدت و عمتي يمها بس البنية منتهية
- شكوو محتاجة دكتور؟؟
- لااا مو قصة دكتور بس تبجي وتصيح باسمك وباسم ستار مهدي عمتي ضلت تقرا على راسها لحد ما نامت
- صبرك ربي صبرك
- شبر هاي البنية شنو قصتها اول ماكعدت الصبح انطيتها ملابس حتى تغير الابستهن كلهن دم جسمها كله ازرك و احمر يخرررعع
- العباس عليج عمة لا تمردين كلبي اكثر ،
- راح تبقى هنا؟
- لااا شوي بعد وننقلها لبيتنا امي حضرتلها الغرفة الفوك
- يعني بشير عرف بيها
- ايي
- خطية بعدها صغيرة على هذا الوجع كلة دير بالك عليها
- ان شاءالله
بعد ساعات البيت الجديد كمل بيتنا جبير هو صح مو مثل الجنا كاعدين بيه مو نفس مساحتة ولا كبرة بس كـ مجمع وبيت بهيج مساحة كلشش زين ولاحظت كل البيوت نفس التصميم صعدت لغرفة حوراء جانت امي مجهزتها بكلشي امي تريد تبين طيبة خاطرها كدام ابوي بس هي بداخلها بعدها خايفة عليه حيل
اخذت حوراء من بيت العلوية فاطمة الزهراء جانت ذبلانة ووجها اصفر دخلتها لبيتنا صعدت الدرج وكل خطوة اخطيها احس كاعد انا اصفي حياتها وجاي اخلي حايط صد بينها وبين ماضيها الاسود
اخذتها امي ونومتها على الجرباية وغطتها كعدت بالكاع بصف الجرباية واخذت لزمت ايدها جانت باردة وهتفت وياها وعبالي نايمة لو دايخة :-
شُبر :: حورية تسمعيني
- اييي اسمع
- أنتِ هسة ببيتي والله وحك شيبة ابوي ما يمسج ضرر وأنا اشتم الهوى اللي صار جان حلم وراح وهسة أنتِ بحمة شبر الصادق
- شبر ليش جبتني هنا ليش ما خليتني اموت ببيت عمي
- ليش تكولين هيج؟
- فكر بيها انا بنت داخل بيت ناس غربة رجال جبير و عده ثنين شباب بعمر الورد عزابية ترى الفضيحة راح تلحكني وتلححكم
- يا فضيحة ولج أنتِ مظلومة انتِ هسة حرمة بيت الشيخ البشير قيصر اللي يحجي بكلمة عليج لسانة اكصه
- زين وذو الفقار؟
- ذو الفقار اختار طريقه سافر وعاف الجمل بما حمل حوراء لا تذكرين اسم واحد باعج بنص الطريق لا تسودنيني يابنت الاجاويد كااافي ارحمي كلبي وكلبج وانسسيي
سحبت ايدها من ايدي وكامت تحاول تكعد بس وجع رجلها خلاها تصرخ
- يولييي على كيفج لا تتحركين بعد شوي نروح لـ دكتورة تشوف رجلج اخاف بيها كسر
- لا مايحتاج
- اكرميني بسكوتج ما ماخذ رأيج
- شبر لا تعاملني هيجي
هنا دخلت امي وهية مسوية اكل وكعدت على الجرباية كدام حَوراء وحطت الصينية وصارت تجبرها على الاكل انا عفتهم وطلعت
و ما مر اليوم على خير العصر دخلت سيارتين للمجمع ونزل حكم و محمد لاف راسه بشاش وصياحه وصل لآخر المجمع وعرفت ماخذ العنوان من ابنه عن مكان حَوراء هل اجو علينا
محمد :: يا سادة وينكم اطلعولي طلعوا لي شبر طلعوا لي الحرامي البايك بتنا
ابوي طلع للشارع وكف عمامي كلهم طلعوا حامد المتقين و المعتز باالله و علي الصادق و علي الباقر و المرتضى الامير و اصفاد الحق واخوي شبير والشباب انا نزلت اركض السلاح بيدي والدم يغلي بجسمي طلعت ولزمني بالباب عمي حامِد المتقين وابوي تفاهم وياه
البشير قيصر :: اهلاً بيك محمد تعال ادخل للبراني الصياح مو من شيم الزلم
محمد :: ما ادخل برانيتكم ابنك شبر هجم على بيتي ضربني على راسي وباك بت اخوي المخطوبة هاي يسموها خطف
ما انتضرت ابوي يرد وحتى لو جان يريد يحجي وانا قاطعتة ماعرف لان كلش متت من الحركة وصحت بيه
شُبر :: ولك يا خطف أنتَ جنت تبيعها جنت تكتلها وحكم ابنك موجود ويشهد
محمد :: حكم فرخ ما يعرف السالفة حوراء مرة ليث على سنة الله ورسوله
هنا الدنيا دارت بية شنو حوراء مرة ليث حوراء جانت لـ ذو الفقار صحت بيه وجنت اريد اتقدم واضربة بس لزمني عمي اصفاد الحق مادري ليش عمامي كلهم جانوا هادئين ويباوعون لابوي
شُبر :: والكاظم جذاب ولك أنتَ شكد عار البنية جانت بذمة رجال شلون هسة هية متزوجة؟
محمد :: ذو الفقار طلكها وليث اجه وستر عليها باليوم الي أنتَ خطفتها وهو عققد عليها بمحكمة وسيد وعندي الورقة
ابوي اندار الي و باوعلي بنظرة عمري ما انساها ورجع التفت لمحمد وكال :-
البشير قيصر :: إذا عندك ورقة القانون ياخذ حقك بس حوراء ببيتي وما تطلع إلا نشوف الورقة ونسأل البنية وإذا طلعت جذاب يا محمد والله لسانك هذا اخليه عبرة لكل واحد يتطاول على السادة
هنا الچلب محمد طلع ورقة من جيبه وشمرها بالكاع وصاح
محمد :: هاي الورقة وباجر المركز يفضها بيناتنا
راحوا وبقيت انا واكف احس الدنيا صغرت بعيني دخلت لجوة وركضت لغرفة حوراء فتحت الباب بقوة لكيتها كاعدة وتبجي رحت واردفت وياها
شُبر :: حوراء احجيلي الصدك هذا منو ليث الي عاقد عليج اكو هيج شي؟ لو سالفة من عمج هاي؟؟ أنتِ عاقد عليج احد بعد ذو الفقار؟
باوعتلي وهزت راسها بالنفي وهي تلطم على صدرها وتبجي واردفت وياي
حوراء :: والله جذاب والله ما شفت وجه احد ولا عقد عليه احد ولك هو اصلا كعد يضربني بس لان ما نزلت الهم وما تزوجت الي يريدة شبر صدكني هاي جذبة حتى يرجعني ويذبحني
لزمت راسي بايديه السالفة تعقدت محمد مو بس راد يبيعها راد يشرعن وجودها عنده حتى يكسرها اكثر ويكدر يتحكم بيها
شُبر :: حوراء يمكن راح نمر بمحنة جبيرة اريدج قوية ابوي ما راح يسلمج لا تخافين أنتِ بامانه
- وأنتَ ؟
- شبيه انا؟
- مو جنت بامانك؟ بامان شُــبر الصادق اشو هسة صرت بحماية أبوه
- لا مو هيج
- چا شنو؟؟
- أنا، انااا لو تنطبك السماء على الارض ما اخليج ترجعين لهل نذل
طلعت من الغرفة لكيت ابوي واكف بالهول وعمامي حوالينه وهتف وياي
البشير قيصر :: شبر الورقة صحيح بيها ختم محكمة وسيد بس السالفة بيها تزوير بس. وإذا طلعت البنية مجذذبة عليك يا شبر أنتَ تدري حسابك عندي شنو
شُبر :: بوية أنا واثق بيها اكثر من نفسي ومحمد راح ينكشف
حامِد المتقين :: يمكن اكون انا عندي الحل لهاي المشكلة
البشير قيصر :- الي هو؟
- باجر انا أروح واتاكد من هاي الورقة واني اكلكم السالفة التدور براسي
شبر :: صاعد لغرفتي انا
رجعت لغرفتي كلبي جان ياذيني حيل بس المهم عندي جان هية حوراء تخلص لو كل العالم صار ضدها انا اصيرلها عالم ووحدي اوكف بوجههم كلهم واحد واحد ما اخليها لوحدها ابد
نمت وانا كلي امل بـ فكرة عندي عمام تطلع الحق من حلك السبع
أمنت ....
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ مَـــلاك ٭٭
بعد ما مر سبوع من عرسي جان كلش هادى لان بعدني عروس و احس احس علي الكاظم بلش يندم على قرار زواجه مني بعد كليوم يكتشف شيء جديد بشخصيتي ههههه واذا ما طلگني فــ مايطول ويروح لمستشفى المجانين
وجان اكعد من النوم وجانت الشمس طالعة صرت اباوع لكيت علي الكاظم يشخر يمي ما حبيت الوضع شنو بس انا اكعد لوحدي حطيت ايدي على جتفة وهتفت وياه :-
- كظيم! هَيّ كظييممم كووم كاافي نوم شنوو دنبل مال نوم كوم عاد
انا روحي جانت رايحة لان توني كاعدة وهذا عبالك ميت لا صدقاً اني جنت اهز بجثة مو بانسان طبيعي ولان جنت اريدة يكعد لزمت دولكة الماي وجفيتها عليه طفر من فراشه وشهك ،،، لزم فانيلتة وخزرني واني رجعت الدولكة على الميز وهتفت وياه
- صح النوم سيدنا
علي الكاظم :: شسويتيي!!؟
- كعدتك شسويت؟
- اكوو مخلوق الله خالقة ومنطي عقل هيچي يكعد!
- أوووبسيي
- عبسسي بعينج كون
- اوبسي مو عبسي منين تسمع أنتَ
- طورمتي اذاني الماي اخترق الطبلة
- آسفة والله كعدتك بكل رُقة وحُب بس ما سمعت صوتي الانثوي كلت خلي تشتغل ايد جبوري
- استغفر الله
- يلااا هسة لا تسويها معضلة ترى كلها كم كطرة ميه أولاً كلفت عليك ما تحتاج تغسل وجهك بعد شايف هيج دلال بفراشك وغسلت وجهك
- سبحتيني موش بس غسلتي وجهي
- هاي عَجل بعد شتريد والله انطيهم مليون اليريد يسبحني دلال وين محصلة
- تردين اسبحچ؟
- ءءءءء عمتيييي
- يااا عمتج؟
- العلوووية صووتها هذا
- ماجاي اسمع شيء!
- هههه اي مووو الماي اخترق الطبلة مالتك فـ ما تسمع انا نازلة اشوف عمتيي وامي واغسل
- وانااا؟؟
- أنتَ مايحتاج تغسل انا غسلتك يلاا سيووو
طفرت من الفراش ولبست حجابي وطلعت واني اريد انزل شفت علي الباقر شايل منة المنان وحاط الممة بحلكها رحت يمه وهتفت وياه
- صباح الخير
علي الباقر :- صباحج نور
- محتاج منة المنان؟
- محتاجة شيء؟
- اييي محتاج منه المنان؟؟
- ايي محتاجها
- شسالفة شسوي بيها ترى عيع عيع محلوة انطيناها
- لا والله
- اي والله شسالفة حسرة عليه اخذها الا وتجي أنتَ شبيك شبيك ماشايف أطفال
- اي ما شايف ليش انا وين شايف اطفال؟
- يلا علي الباقر
مديت ايدي اريد اخذها هو ابتعد وهتف وياي
- وخررريي لا ...
- لاا شنوو شتريد تسوي والله اصيح صوت لعلي الكاظم
- طيري يلا أنتِ و كاظمچ
- يعني انا زوجة اخوك و صغيرة وبعدني جديدة هنا وعايفة اهلي علمود هذا أخوك وعايشة وياكم وتزعلني؟
- سمعتي صوت
- صوت شنو؟
- كلبي انكسر عليج وهاي شوفي عيوني كطرت دمعات على حالج
- صدددك يلا عجل انطيني مَنّوشة
- صدكتت خاب دييي يلاا
- يحح عاابت اي والله اني اعلمك والله الي اخلي العلوية تاخذها منك وتنطيها الي
- طيري للعلوية يلا دي
تركت علي الباقر ورحت واني احجي وي روحي بهمس
:- بس اريد اعرف هاي المكموعة سُكرة شني الشافته بيه وطاحت على وجها هم هاي خلقة الواحد ينعجب بيها ويحبها غثيث دمة اثكل من وزن ام مازن اني اعلمة
ونزلت لجوة واني ضايجة لكيت أريج الله و العلوية كاعدات بالهول يسولفن و نور الحسن و شمس الحسين كاعدين بالنص يلعبون رحت غسلت و رجعت كعدت يم العلوية انتبهت عليه أريج الله ان انا كعدت لا سلام ولا كلام اردفت وياي
اريج الله :: خير ان شاء الوجه معقوج
العلوية :: يمة شنهي شبيج منهي مزعل مليكاتي؟
ملاك :: ماااا
اريج الله :: ههههه احجي ولج شنو ماا
- ماا ماكول شيء
العلوية :: ياا عمت عيني تزعلين وعمتج موچودة؟
- ماااااااا مااااااااا
اخذت العلوية ايدي وحطتها وسط ايدها ولزمتها حيل وايدها الثانية مشتها على خدي وصارت تردف وياي
العلوية :: منهي حلوتي؟
- ملاك عمران
العلوية :: منهيي اميراتي؟
- ملاك عمران
العلوية :: ياهي الي احبها ونايمة بوسط كلبي!
- طيبة الزهراء
اريج الله :: هههههههه يايمةةة
العلوية :: ها ولچ؟
- اي والله عمتي ليش الجذب تموتين على طيبة الزهراء أنتِ
العلوية :: بس هم اموت عليج
- لا عمة مرة جبيرة أنتِ عيب الجذب لو اكلج انا لو طيبة الزهراء شنو تختارين؟
العلوية :: طيبة الزهراء اكيد
- شوفي لهذا هية الي ساكنة وسط كلبج وتموتين عليها مو انا
اريج الله :: هسة سولفيلنا شنو بيج
- هذااا اخوووج مايستحي يزعلني!
أريج الله :: علي الكاظم!
العلوية :: صدك ما يستحي الي يزعل ملاكي مليكة هسة اكوم وادكه الج دك تدللين لحد ما أنتِ تكليلي كاافي
- لااااع ما اقصد على كعكي
العلوية :: چا ياهو يزعلج؟
- علي الباقررر
اريج الله :: هههههه أنتِ شبيج مستلمة علي الباقر من اجيتي النا لهسة
- هااا شووفي عمة لان اخوها حطت السالفة براسي انا شعلي هو أخوچ يعرضلي ويزعلني وخرو عني كلكم ما احبكم
العلوية :: بس كليلي شبيه وياج هلمرة؟
- يرضع بـ منة المنان اروح لعنده وصدكيني بكل ادب و اخلاق و هدوء طلبت منه ينطيني مَنّوشة وهو كالي طيري ودي ومدري شنو
اريج الله :: ماعرفتچ أم الهدوء والأدب
التفتت على أريج الله وخزرتها وحطيت إيدي على خصرِي وبوزت بشفايفي واردفت وياها عود بريئة
- هااا عيني أريجات صرنا ما نعرف الهدوء ليش هو أكو أهدأ مني بهالبيت لو بس لأن علي الباقر أخوچ صرتي بصفه عمتي شوفيهه شوفيها شلون تدافعله وهو كاسر كلبي وميخليني أشيل مَنّوشة شووفييي
اريج الله :: شسوين بـ مَنّوشة هاج اخذي أم الحسن
- لا تحجين وياي اخت اخوهااا مااا لا تحجين وياي وحتى بنتج ما اشيلها عليها على كلبج
العلوية هنا ضحكت وهزت راسها سحبتني لصفها أكثر وهتفت
العلوية :: ولج يمة ملاكي علي الباقر ميت بـ منة المنان تدرين بيه يموت ويحب الجهال عوفي يلاعبها شوية
- لا عيني عمتي شنو ما يعوفها ادري هي بنته لو بنت طيبات لو بنته شنو يسوي بعدين هو كالي طيري عمممة بالله هاي حجاية تنكال لعروس جديدة هاي الحچاية تنكال لـ ملوكة والله لو يدري علي الكاظم جان سواه وصلتين
العلوية :: علي الكاظم خلي يشيل روحه علمود يسويلج علي الباقر وصلتين
- هم صدك هذا الشفية مساع اكعد بيه ولا يكعد طلع روووحيي لحد ما جفيت عليه ماي
أريج الله فطست من الضحك والعلوية صفنت عليه بصدمة اول وحدة ببيتهم هيج تسوي وهتفت وياي أريج الله :-
أريج الله :: ولج انتِ صاحية أحد يكعد واحد بـ مي بارد بالفجرية؟
- أولاً مو فجرية مساع قبل عشر دقايق الشمس جانت بنص السمة ثانياً هذا دلال بدال ما يكوم يغسل وجهه ويتعاجز أنا قمت بالواجب وهو بمكانه هاي يسمونها موهبة بس أنتم ما تقدرون المواهب المدفونة اللي عندي شسويلكم!
العلوية :: بروح امج خلي المواهب هاي مدفونة لا تنبشين الكبور
- حتى أنتِ عمة ما تردين اطلع مواهبي؟
العلوية :: لا يبعد روحيي طلعيهن هاي هية نكدر نحجي وياج
- حكوم اشوف شيء اكلة
كمت من يم العلوية رحت للمطبخ أدورلي على شي أكله لأن عصافير بطني بدت تزقزق و من ورا علي الباقر وعلي الكاظم وعشيرة العلي كلها جعت اكثر
وأنا بالمطبخ سمعت صوت وراي التفتت ولكيت علي الكاظم واكف بالباب شعره مخربط وعيونه مورمة من النوم والماي ولابس دشداشته وبيده المنشفة يمسح بوجهه
علي الكاظم :: ها ست سلسبيلي
- هاا كعكيي!
- امي تكلي مرتك تشتكي من علي الباقر شهل صلافة هاي
- شنوو يا صلافة شسويت انااا؟؟
- تروحين تشتكين على الباقر وأنتِ مسوية بيه هالجريمة؟
- هاي ياا جريمة أنتَ شبيك سيدنا الماي طهور وأنا ردت أطهرك من النعاس بعدين روح شوف أخوك الباقر شلون يطرد بمرتك ويبجيها
التفتت اكمل تجهيز الصينية مال الريوك مالتي وهو تقرب مني ووكف وراي مباشرة حسيت بأنفاسه قريبة من شعري همس بصوت ناصي بأذاني
علي الكاظم :- مــلاكي تدرين لو ما العلوية هنا واختي بالهول وقريبات علينا جان شسويت بيج؟
التفتت عليه بسرعة وحطيت إيدي على صدري وسويت روحي خايفة عود وفتحت عيوني وهتفت وياه
- يمة الحكلي عمران بنتك راح تروح بيها، شتسوي يعني تسبحني بمي بارد تفضل الماي موجود والحنفية تشتغل
- هااا اسبحج هسة؟
- بس بشرط
- الي هو!
- تسويلي ريوك هسة لأن جوعانة وبعدين دير الماي البارد عليه
علي الكاظم صفن بوجهي وراها ضحك ورد عليه
علي الكاظم :: والله أنا ما أدري شلون فكرت بيچ أنتِ مو بشر
- اييي انا جنيةةة
- أنتِ قنبلة
- اااععع تزوول علييكك
- ها فرحتي؟؟
- اييي قنبلة غير يعني صاكة واطك بالكاع؟؟
- لا لج أنتِ قنبلة طاقة ومشاكل
- والنبي مو صوجك وخر لا ادير الصينية على راسك مو ماي هلمرة
- هههههه روحي
- وين؟
- روحي كعدي يم العلوية أنا راح أسوي الريوك
- شكراً
- بس حسابج يمي بعدين
- سييووو كعكي لا تنسى تكثر الجاي أحبه ثكيل مثل طبع اخوك
طلعت من المطبخ وأنا أضحك رجعت للهول لكيت أريج الله بعدها تضحك ونور الحسن وشمس الحسين يلعبون كعدت بالنص بينهم وبديت ألعب وياهم وأنا أفكر بـ علي الباقر لازم أردله الصاع صاعين ما اسكت اله والله
بعد شوية نزل علي الباقر وهو شايل منة المنان جانت تضحك بحضنه وهو يغني لها بصوت ناصي أول ما شافني سكت ورفع حاجبه عبالك ما عاجبة يعني هنا العلوية هتفت وياه
العلوية :: ولكك باقررر شنو مسوي وي مرة أخوك؟؟
علي الباقر :: ها ملاك ركضتي و رحتي اشتكيتي؟
- اي عيني اشتكيت والحكم طلع وبانتظار التنفيذ
علي الباقر :: يا حكم هذا؟
- الحكم يكول إنك لازم تنطيني منوشة هسة وتعتذر مني كدام الكل وتكولل سبع مرررراات مَــلاك هي أحسن وحدة بالبيت
العلوية جانت تباوعلنا وتبتسم ابتسامة حنينة بهالأثناء دخل علي الكاظم وبيده صينية ريحة البيض والجبن والجاي المهيل ترست المكان حط الصينية بالكاع وكال
علي الكاظم :: يلا كولوا يا الله وتعالوا تريكوا وأنتِ ملاك تعالي كعدي يمي هنا حتى لا تمدين إيدج على مواعين الباقر وتسويلنا مشكلة ثانية
رغم كلهم متريكين بس لان ضغط عليهم علي الكاظم حيل لان سوة للكل لهذا ما رفضوا طلبة كعدنا كلنا حول الصينية ونزلو علي الرضا و علي الصادق وهم كعدو ويانه و غدير الله و طيبة الزهراء جانن بالجامعة
الجو جان يجنن صدك هوسة وضحك بس تحس بالدفء العائلي اللي جنت محتاجته لزمت خبزة وغمستها بالدهن الحر وباوعت لعلي الباقر اللي جان كاعد كبالي ومستمر يلاعب منة المنان وما تخلي ياكل بهدوء وهو يلعب وياها هتفت وياه
- علييي الباقر انطيني البنية ودوختها تلغي فوك راسها
علي الباقر :: ملاك كملي ريوكج وأنتِ ساكتة لا أجفي عليج قوري الجاي هسة وأخلي الكاظم يبتلي بيج
علي الكاظم :: لا ملاك تكفيها رشة ماي
الكل ضحك وأنا بقيت أباوعلهم وبلحظو غفلة من علي الباقر مديت إيدي سحبت منة المنان من علي الباقر وحضنتها حيل
- هاااا أخذتها ممموت قهر علي الباقر
منة المنان بدت تضحك بصوت عالي والباقر سد عيونه بيأس والكل بلش يضحك علينا وخلصنا ريوك صعدت قبل علي الكاظم للغرفة سويت جنت اريد أرتب الفراش بس عقلي جان يشتغل أريد أردله سالفتة من رد على علي الباقر وبدال ما يدافعلي لااا كال ملاك تكفيها رشة ماي خووش اني اعلمك علي الكاظم
طلعت من غرفتي ورحت لغرفة غدير الله لكيت الباودر الي هية بودرة الأطفال مال مَنة المنان على الميز ولكيت لاسق عريض شفاف من شفت الباودر و الاصق خطرت ببالي فكرة أذا ما أخلي علي الكاظم يحجي وي روحه ما أسمي ملاك
أول شي رحت لباب الغرفة انا اعرف طول علي الكاظم 189م لهذا رحت جبت الفيتة وحسبت على الباب وصعدت على الدبة ولزكت الاصق من الحايط للحايط على حد وجه علي الكاظم يعني بارتفاع وجهه بحيث من يدخل يلطش وجهه بيهن وراها رحت لجهته من الفراش وذبيت فوكاه باودر هواي بحيث من يكعد تعرفون شيصير بيه
والضربة القاضية الي جنت ميته عليها وماكو فايدة لكل هذا الي سويته اذا ماسويت هاي الخطوة الي هية أخذت موبايله اللي جان على الشحن فتحته وغيرت اسمي بجهات الاتصال من سلسبيل حياتي إلى الحالات المستعصية
وخليت نغمة الرنين صرخة رعب قوية
سمعت صوت من برة خليت باب الغرفة مفتوح حتى بسرعة يفوت ومايلاحظ الاسق و طفرت للفراش غطيت وجهي وسويت نفسي رجعت و نمتتت
سمعت صوته وهو قريب من الغرفة يصيح عليه ما جاوبت سويت نفسي غاركة بالأحلام وجنت موجه راسي باتجاه الباب وفاتحة عيوني بالنص ما مبينه جنت أراقبه لمن تقرب مننا جان منزل عيونه ويمشي ولطششتت بالاسق سمعت صوت علي الكاظم وهو يكول
- أخخخ ملاك هاي شنو ولج هاي شنو مخلية بالباب؟
أنا بقيت ساكتة كوة لازمة الضحكة اجاني للفراش حتى يسولف وياي على موضوع الاسق اجه لاتجاهي و حط ايده على جتفي
- ملللاكك كوومييي لا تسوين روحج نايمة ولج
رفعت راسي وحاولت لازم اخلي ينام يمي حتى تكمل سالفة الباودر لزمت ايده وبديت اتنغوووص بين قوسين ادلع عوود بس مو جووي
مَـــلاك :: هاا حبيبي؟؟
رفع حواجبة الإثنين عوود يعني يلا يلا انا مصدكچ ان أنتِ توچ كعدتيي صار يباوع للباب ويرجع يباوع الي وهتف وياي وهو ياخذ نفس طويل وهدا نفسي
علي الكاظم :: ليش ملزكة هيچي على الباب؟
حطيت ايدي على راسي وسويت روحي دايخة وهتفت وياه
مَـــلاك :: تعال نااام هناا يمي فدوة اريد احط راسي على صدرك حيل تعبانة وعوف الباب اسفة عليه
- شنهي شبيچ؟
- مدري حيل دختت تعال نااام بسرعة وانا اصير زينة
اجاني وما نام مثل الاوادم شمر روحه شمر على الفراش وهذا الجنت الي اريدة طار غبار الباودر وترس وجهه وشعرة هنا هو فقد صاح عليييه واني طفرت من الفراش ميته من الضحك
- ملللااااك هاااي شنوو؟؟؟؟
- هاا خير سيدنا شبيك يا ستار شنو هذا صاير نوراني بزيادة اليوم
- نوراني بعينج ولج هاي بودرة لو طحين سبحتيني بـ مايي الصبح وهسة طحين ناوية تسويني كليجة؟
- والله يا سيدنا أخاف بشرتك تتهيج من الماي البارد حطيتلك بودرة أطفال حتى تصير ناعمة
كام وتقرب مني وشكله يموت ضحك وهتف
علي الكاظم :: تعاليي تعالي خل اشوفج النعومة شلون تصير
أنا ردت أشرد بس لزم ايدي حيل وطبگني على الحايط ووكف كدامي وقرب وجهه من وجهي وهتف وياي
علي الكاظم :: ناوية تخبليني؟ شتردين وتوكفين عن هاي سوالفج شوكت تكبرين؟
مَــلاك :: اممممم اكبر من اصير ام
- معناها تكليلي أيس يا علي هسة
- ههههههه ايييييي
دفيته من صدرة ورحت عنه يم المراية واخذت تليفوني بهاللحظة اتصلت بموبايله من موبايلي اللي جان على الميز
الغرفة فجأة انترست بصوت صرخة الرعب علي الكاظم طفر من مكانه لزم الموبايل وشاف الاسم باوعلي بنظرة لو جانت تذبح جان هسة أنا بـ وادي السلام
علي الكاظم :: حالات مستعصية ملاك أنتِ صدك يرادلچ مستشفى بس مو مال مجانين يرادلچ حجر صحي عن البشر حتى يخلصون لان راح تخبلين حتى المخابيل
أنا متت ضحك كمت أطفر على الفراش لان اجة باتجاهيي وصرت اصيح عليه واهتف
- هاااا هاي حتى تعرف سيدنا إن ملاك ما تسكت عن احد وحدة بوحدة مو أنتَ ما دافعتلي كدام اخووك خووشش البادي أظلم
علي الكاظم ذب الموبايل على الفراش وهجم عليّ يريد يلزمني طفرت من الفراش أنا وصرت أشرد منه بالغرفة وأصيح
- علووووية الحكيليييي علي الكاظم يريد يكتلنييي
- والله اليوم لو تصيحين العشيرة كلها ما أفكج إلا أسويج طحين صفر مثل هذا المخليتة على الفررااشش
حصرني بزاوية الغرفة لزم إيدي وهو يضحك من كل كلبة رغم عصبيته وهتف وياي
- ولج والله لو ما حبي الج هو المخليني اصبر على لسانج ومقالبج بس وحق جدي هاي مالت الباودر ما تمر على خير
- شسوي يعني تطلكني؟
علي الكاظم مسح خدي بإصبعه واتقرب أكثر وهمس وياي
علي الكاظم :: أطلكج وأنا وين ألكي وحدة تخبلني وتضحكني بنفس الوقت
- جا شبيك عصبت مني
- لا أنتِ تزوديها مرات
- بس احبك اناا
- وانا اموت عليج سلسبيلي
- يعني تتحملني!
- اكوول كوومي نظفي هالهوسة قبل لا تجي العلوية وتشوف
هنا وأنا جاي أحاول أتملص من إيده واريد اوخر عنه وأضحك انفتح باب الغرفة دخلت العلوية مخترعة من ورا صياحي الي وصل لسابع جار بس من شافتنا العلوية جمدت بمكانها باوعت لعلي الكاظم اللي وجهه ولحيته ودشداشته عبارة عن طبقة بيضة من الباودر وباوعتلي وأنا محصورة بالزاوية وكفشتي واكفة واضحك من كل كلبي
العلوية :: يمة يا ستار ياهو الصابغك يمة, شصاير بيك؟
- يمة شوفي چنتچ صبحت عليّ بماي بارد وهسة طحنتني بالباودر وغيرت اسمها بالموبايل لـ الحالات المستعصية يمة هاي مو عروس هاي عبسي متنكر بهيئة ملاك
أنا طفرت من وراه ورحت لزكت بظهر العلوية لزمت ثوبها الاسود وهتفت
- عمةةة شوفيه شلون يتبلى عليّ هو راد يصير نوراني وأنا ساعدته و أصلاً هاي التصرفات مريحة للأعصاب هو عصبي ويحتاج تهدئة
العلوية :: ولج ملوكة يمة هذا رجلج مو هيجي خطية بس تريد الصدك يمة والله طالع جنه كمر بليلة عشرة البياض لايك لك
مَــلاك :: لا يمة طالع جنه بابا نويل بس ناقصه الغزلان والجرس
- خووش ملااكك احتمي بظهر امي هسة ..
العلوية :: شسوي الها اشحتك من البيت اذا طخيت شعرة منها
- مادرييي عمران شلون سماچ ملاك؟ وين الملائكة بالموضوع مادري اول مرة اشوف أسم مو على مسمى
رفعت حاجبي وصرت اقلد على كلامة
مَـــلاك :: نانانا نينيي
- اكول نضفي هاي الهوسة وغيري الفراش لا اخليج بلسانج تشيلين الباودر هاي كلها
ضحكت وشمرت عليه بوسه بالهوى وطلع من الغرفة واني اصيح وراه
- سيوووو كعكي نظف وجهك زين لا تطلع للناس تروح هم يرحون لمستشفى المجانين مخترعين منك
العلوية ربتنني على جتفي بشقة وطلعت ورا علي الكاظم وانا سديت الباب ورحت انضف الغرفة الي صارت كلها باودر وشلت الفراش من الجرباية وواناا كلي راحة
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ رحمة الزهراء ٭٭
جانت الدنيا ليل وتقريب الساعة ٩ وجانت حيل مغيمة ووياها كلبي مغيم زُبــيـر طالع مدري وين صاير ما يحجيلي كعدت بالصالة وصرت اباوع لـ ألعاب أحمد الدر الي مشمورة هنا و هنا كمت جبت الدبة وصرت المهن بيها وصرت اصيح بأسمة
رحمة الزهراء :: حموديي، حمدمد، أحميدد، وييينك امي؟؟؟
هنا نزل أحمد الدر يركض واجاني وكف كدامي حط ايده على خصرة مثل ما يشوف أبوه يسوي كلما اصيح عليه
وهتف وياي
احمد الدر :: شككوو شنوو تردين؟ تصيحين بأسمي هيچ شنوو لان أسمچ شيخة تشيخين علية
اتنوعت عليه وجنت محتارة مادري اضحك مدري اعصب عليه شلون حافظ كلام أبوه وحتى ضبط الوكفة مال زُبير وحركة الحلگ
رحمة الزهراء :: أمك انا احترم نفسك وياي
أحمد الدر :: وأنتِ زوجة ابوي ليش مايحترم نفسة وياچ؟
- أبوك يتشاقة وياي
- وانا هم اتشاعة وياچ!
- لا انا امك اتشاقة وياي بغير شيء مو هيج ترفع حسك عليه
- أنتِ تعرفيني اشاعة مو صدك
- عوفك هسة من هاي السالفة ، تعال سولفلي شنو تحاضيرك بالروضة شنو نطوك ما سولفتلي اليوم
- مااكو شي ماكو دوام باجر
- ليش ماكو.؟
- مدريني
- اتصل بـالميس اشوفها؟
- اتصلي وشوفيي
- چا تعال يلا اكعد يمي ماريد ابقى لوحدي
كعد يمي أحمد الدر هذا الولد نسخة طبق الأصل من زُبير مو بش بالشكل حتى بالسلوب سحب الدبة مالت الألعاب من أيدي وگعد يفتش بيها التفتت عليه
أحمد الدر :: انطيني هاي من أيدچ
رحمة الزهراء:: ولك يمة أنتَ لسانك شطوله طالع على أبوك بالحرف الواحد باچر إذا كبرت هم تگوم تسويلي هيج وهيج وتوزع أوامر مادام اولها هيچ معروف تاليها
- غير أنا زلمة البيت بغياب أبوي لازم أصيرن شديد وياچ حتى احافظ عليج
متت ضحك عليه وسحبته لحضني شبعته بوس وهو يتلوى بين أيدي ويگولي
- يمة عيب أنا چبير
بهاي الأثناء انفتح الباب الخارجي وسمعت طگة المفتاح فز كلبي وهتفت
رحمة الزهراء :: باب الشارع نفتح منو دخل؟
احمد الدر :: لا تخافين انا يمج
- اششش أحمد لا تحجي شيء السالفة صارت صدك انتضر ثواني
لزمت أحمد الدر حيل من ايدة وصرت اباوع للباب حسيت زُبير هو الي أجه وصدك ثواني دخل للصالة وبيدة المفاتيح لابس قمصلته السودة وشعره شوية متناثر
زُبير :: ها يابة
أحمد الدر طفر من حضني وركض عليه وهتف
أحمد الدر :: بووووية هاي رحمة الزهراء تريد تتصل للميس تفتش وراي عبالها أنا چذاب واكو دوام باچر
زُبير باوع علية وغمز ذب مفاتيحه على الميز وتقرب يمي لزم أيدي وباسها وكعد بصفنا واردف
زُبير :: ولك بوية أمك تخاف عليك وبعدين أنت تدري بيها شيخة والشيخة كلمتها تمشي على الكل حتى عليَّ أنا الما أهاب أحد
- شفت زُبير شكد اكلك لا تحجي يم الولد شي هاايي شوف ابنك صاير يقلد حتى وكفتك وحچيك والله حيرني وياه
زُبير :: طالع لأبوه يعشگ التمرد بس ها انا كايل اله وياچ أنتِ يكسر السلاح مو هيچ يابة حمودي؟
أحمد الدر :: اي هيج هيج بابا
صرنا نسولف ونضحك، وزبير كام يعاندد و يشاقه وياي بكلمات تخليني استحي كدام أحمد الدر يدري بيه ماريد هلشي كدام الطفل و أحمد الدر جان يباوعلي ويضحك ويسوي روحه يلعب بالالعاب
بعدها بشوية سمعنا صوت قوي جاي من الطرمة جان صوت زخ الطر أحمد الدر ما جذب خبر طفر مثل الغزال وفتح باب الصالة ريحة التراب المبلل دخلت الناي ترد الروح
أحمد الدر :: بوية مطررررر
وبلمحة بصر طلع ابني يركض للحوش صار جوة المطر يطفر ويضحك وكتم زبير وكف بباب الصالة صار يشوف ابني شلون يركص جوة المطر وصار يصيح عليه لان زبير مايحب المطر
زُبير :: ولك أحمد ارجع يابة لاا تتمرض الجو بارد وهسة تتبل وتنشل علينا تموت
رحت وكفت بصف زُبير عند الباب شفت منظر أحمد الدر وهو يضحك والمطر يصب عليه رجعت بذاكرتي سنين ليورة تذكرت لماتنا بيت جدي أنا وبنات عمي من جانت تمطر ننزع قنادرنا ونركض حفايا نغني للمطر ونركص ونهوس ويجونا عمامي و اولادهم يركصون ويانه ونغني
يا مطر يا حلبي
عبر بنات الچلبي
يا مطر يا شاشا
عبر بنات الباشا
دمعت عيوني جانت الدنيا بسيطة والضحكة من الكلب اتمنى لو ترجع لحظة وحدة بس ارجع ذيج الطفلة صاحبة ٧ سنوات ابيع العندي والماعندي خاطر ارجع واعيش بحضن جدي من جديد
التفت زُبير علية وضحك من شافني وانا هنا أردفت وياه
رحمة الزهراء :: زُبير تذكرت من چنا صغار تذكرت من نركض جوة المطر وشلون چنا نركص ونتبلل وأمهاتنا يركضن ورانا ههههه عوف أحمد الدر يسوي لنفسة ذكريات يتذكرهن بس تصيبه لعنة الوعي خلي يفرح هسة و المطر رزق وبركة
زُبير صار يباوع عليّ ومبتسم الي سحبني من أيدي وهتف
زُبير :: والله يا علويتي شكلچ أنتِ هم اشتهيتي المطر يابة لا تخلينها بنفسچ خل نصير جهال لليلة وحدة تتعاااييي ههههه
طلعنا أنا وزُبير وبدال ما نرجّع أحمد الدر صرنا نلعب وياه زُبير لزم أيدي وصرنا ندور ونركص بنص الحوش والمطر يبلل ملابسنا أحمد يطفر بينا ويصيح وانا ميتة من الضحك وهنا صاح زبير بيه وهتف
زُبير ::ولچ علويتي طالعة مثل الوردة اللي توها انفتحت ومتبلله بندى الفچر
بقينا نضحك ونلعب والهموم اللي جانت مغيمة على گلبي كلها انغسلت وية زخات المطر بعد ما شبعنا ركص ومطر ولعبنا لعب الجهال بنص الحوش المطر اشتد وصار الهوا يضرب بوجوهنا زُبير لزم جتفي وسحبني لداخل الصالة وهو يهتف
- يلا يابة كافي لهنا راح نغرك ونتمرض
دخلنا والماي ينكط من ملابسنا ركضت بسرعة جبت المناشف سحبت أحمد الدر اللي جان يرجف من البرد ويضحك لفيته بالمنشفة البيضة وصرت أنشف بشعره بقوة وهو يحاول يفلت من أيدي ويصيح عليه
أحمد الدر :: يمة كافي والله صرت ناشف والله خلص نشفت وخري
رحمة الزهراء :: أشش ولا كلمة تريد تتمرض وتكعدنا بالليل باچر إذا نشفت حنجرتك لا تكول يمة الحكيلي بلعومي يوجعني
خلصت من أحمد الدر الي عافني وركض حضن الصوباية التفتت لزُبير جان واكف ينزع قمصلته المبللة وشعره نازل على عيونه والماي ينكط منه منظره جان مثل الطفل ما اصدك هذا زلمة وابو هههه تقدمت عليه شمرت المنشفة على راسه وصرت أنشف شعره مثل ما سويت وي أحمد الدر زُبير ضحك وضلت عيونه تباوعلي وهتف وياي
زُبير :: ها صرتي تعامليني مثل معاملتج لـ أحمد الدر
- ايي لا تباوعلي هيج أنتَ هم ابني الچبير يلا نشف شعرك زين لا تتمرض عليه وتكعد باچر مابيك تكوم منو لنا غيرك؟
زُبير لزم أيدي وهي على راسه سحبها وباس باطن چفي بقوة وهمس وياي
- أنا ابنچ وأنا أبوچ وأنا زلمتچ ومريض بيچ قبل لا يمرضني المطر علويتي
- يلا عيني كافي غزل روحوا بدلوا ملابسكم وأنا راح أسويلكم حليب حار يهدي صدركم بيه وتدفون زين
صعدت غيرت ملابسي وجففت شعري وزُبير أخذ أحمد الدر حتى يساعدة يغير ملابسة نزلت للمطبخ حطيت الماي على النار وصرت اسويلهم حليب ابيض وي ككو لان الأب و الإبن يموتون على هذا المشروب وبعد ما انطيت لكل واحد بيهم الكوب مالتة شربوه وكلـ واحد راح لغرفتة و زُبير مادخل للغرفة لحد ما تاكد نام أحمد الدر وغطاه يلا اجاني
الغرفة جانت دافية حيل زُبير جان كاعد على طرف الجرباية يباوع لتلفونة ردت أسأله عن أمه وشنو صار وياها بس تجاهلت هذا السؤال ماريد اخلي يضوج لو يعصب تقربت منه كعدت بصفه حط إيده على جتفي وسحبني لصدره شم شعري وهتف وياي
- تدرين علويتي شيء
- شنو يروحي؟
- ليلة مثل هاي الليلة تسوة عندي الدنيا وما بيها ضحكتچ أنتِ وأحمد الدر نستني تعب النهار كله الله لا يحرمني منكم ياكلي
- ولا يحرمني منك، زُبير أنتَ الخيمة اللي لامتنا
زُبير باس راسي ورفعة عن صدره حط عيونه بعيوني وهتف وياي
- صار لازم تنامين يروحي!
- وأنتَ ما تنام؟
- لايبعد روحي هاي اجيتج نايم يمج
- مد ايدك انام عليها
- تعاي ناامي عساه نوم الهنا يا غالية
تغطيت بحضنه وغمضت عيوني ورحت لغير عالمي الخير جاي ينزل على بيتنا والخير الحقيقي و كلة انا نايمة يمه نعمتي الي مالي غنى عنها
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
ومُطرت الدنيا و نِسيت اني نِسيت
وصُوت أصاله يخلي ابو الحق يَعتذر
أشتكت الك تحت المطر
بس انته وَين بَينك و بَيني مسافات وفقر
و المطر من لأحني سَمعني صُوت
جنه صَوت الماي اذا لاح الجمر
وهذا الشتا و هذا أنا وهَذا السؤال
ليش و شلون الشتا بدونك يُمر ؟؟
وبَين عَقلي و كلبي متحير بُقيت
ردت اجيك و خَاف اجيك و انكسر
وكَام كلشي بغُرفتي ينطيني راي
ومُجبر اسمع كلشي ما أخفيك سِر
الحَايط يكلي أنتظر يُمكن يجيك
السَاعه كالت ما يجي لا تِنتظر
البَاب كَلى اكعد بَعد مالك أمان
وصُوت اجاني من السَكف كَلي أنتحر ..
ورَحت ابدل و افتحت كنتوري حَييل
بَاقي بهدوم الشِته منك عُطر
والقَميص البي شبكتك من بِجيت
لَسه شايل دَمعتك فوك الصدر
رِدت ألبسه وكبريائي يكلي لا
عِفته يحجي وجَيتك اركض مِنتصر
كتلك اشتاكيتلك كتلي شتريد !!
ورُوحي كالت ما تموت شمنتظر ؟
من الصفر بَادي ووصلت الانتحار
المصيبة شلون ارجع للصِفر ؟
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ أريــــچ الله ٭٭
صعدت اتفقد اولادي لان انكطع حسهم ضل بالي يمهم فتحت باب الغرفة لكيتهم نايمين على الكاع وهمة يلعبون نور الحسن نايم و شمس الحسين مخلي راسة على بطن اخووه هزيت راسي على وضعيتهم وخفت لا تكسر رقبة شمس الحسين رحت بسرعة وشلتة من على أخوه وحطيته بفراشة وبستة براسة وغطيته ورجعت لـ نور الحسن وهم حطيته بفراشة وبسته براسة وطلعت بهدوء بعد ما رتبت غرفتهم كلها حتى اذا فزو بليل ونزلو من فراشهم ما تتاذة رجليهم بالالعاب السيارات والتماثيل الصغيرة سديت الباب وراي ونزلت طفيت الاضوية والصوبة بالهول واتاكدت الغاز منطفي ومكملة كلشي صعدت للغرفة
دخلت لكيت حَيرام شايل أم الحَسَن ويفتر بيها وهية غاطة بالنوم بين ايديه اول ما شافني راح وحطاها بالمهد وغطاها انا سديت الباب وكعدت على الجرباية هو خلص واجه كعد يمي واردف وياي وهو يباوع لمهد أم الحَسَن
حَيرام :: نامت عزيزة كلب ابوها
أريج الله :: لو ادري راح تنام على ايدك جنت كمطتها حبيبة روحي نامت بلا كماط
- عوفي البنت هيج نايمة ومرتاحة لو الا تقيديها؟
- لا حَيرام مايصير ترى عمرها بس اشهر لازم تتكمط
- لازم؟
- اي لازم
- ما مقتنع بس على العموم هسة ميمي نامت تردين تكعديها علمود خيط تربطيها بيه؟
- لا شسالفة ماصدكت على الله نامت اروح واكعدها
- زين أنتِ شبيچ؟
- شبية؟
- مادري عنج وجهج اصفر!
- يمكن لان صايرة ما انام هواي نومي متكسر
- وليش ياهدوتي صايرة ما تنامين؟
- اخاف
- اوفف ومن شنو الخووف اريجاتي؟
- اخاف انام وتكعد ميمي وما اسمع صوتها
- أنتِ صرتي هيچ من بعد كلام الدكتورة أريج كاافي فدوة كافي تفكرين بكلامها شنوو ماعندج أيمان بقضاء الله؟؟
- لا عندي بس شلون ما تريدني أفكر حَيرام بنتي الوحيدة هاي الي شلعت كلبي تسع شهور خلتني اعقد شلون تعلعت ياالله اجتني تريدني مااخاف عليها ويضيع تعبي بيها؟ شلون ما افكر
- ليش محسستني أنتِ خلفتيها من فطر الحايط ترى اذا أنتِ أمها انا هم أبوها واخاف عليها واشيل همها أكثر منج
- حَيرام
- رحمة لهلچ أريج رحمة لهلچ
- انا ما حجيت شي شبيك نكلبت بوجهي
- ما انكلبت بس تصرفاتچ هيج تحجي حتى لو شفايفچ ماحجن
- لا تصرفاتي ولا شفايفي يكولن هيچي تعرف ليش؟ لأن من الأساس عقلي مايفكر بهل شيء أنتَ من فرط تفكيرك بموضوع أنتَ مقصر ويانه صرت تتحسس من أي تصرف اسوي وتحسة يقصدك ويمسك وبالتالي انا بهاي الحالة لازم اشيل همك وهم اولادك
- انا ادري حملتچ فوق طاقتج
- حَيرام أنتَ زلمتي وفخري وهيبتي انا استمد قوتي منك لهذا ما تحملني فوك طاقتي
- خلص هدوة روحي ومُنقذتي لا تفكرين بــ أم الحَسَن صدگيني راح تصير بخير
- بس الدكتورة كالت إحتمال عين من عيونها ما تشوف بيهن!
- أريج الله سمعتيها إحتمال كالت! وبعدين مشيئة رب العالمين اكبر من هاي الاحتمالات وكلام الدكتورة ربچ هو كاتب كلشي لطفلتنا
- معصور كلبي وعلي
- وانا اكثر منج بس مانكدر نسوي شي بس ندعي تعاي يابعد هدوتي واروح لعيونج الرصاصية فدوة
اخذ ايدي وضمني لصدرة وصار يمشي أيده على شعري ويحاول يهديني جنت حيل خايفة على بنتي بالخصوص بعد ما ولدت بنتي أم الحسن طلعن عيونها لون و لون
عينها اليسرى لونها أخضر
وعينها اليمنى لونها أزرق
وأول ما شافتها الدكتورة كالت النا إحتمال ما تشوف بوحدة من عيونها لان هيچ حالات يطلعون يشوفون بلون واحد!
وجفلتني من يوم السمعت هلشي مارتاحيت منتضرة تكبر شوية حتى يفحصوها
بهذا الوقت صرت اسمع شيء يضرب على الشباج عفت حَيرام وعفت حضنة وكمت رفعت البردة وشفت شلون المطر يضرب على الشباچ اخ يا مطر كانون الثاني فتحت الشباچ وصار المطر والهوى العالي يدخل واشم هوى وابچي واندعيت ربي بذاك اليوم لبنتي اتحمل كلشي الا تختبر صبري باولادي ياربي كلشي تحملت بس مو اطفالي دخيل اسمك
كام حَيرام وحسيت بيه وكف وراي صار صدره ظهري ولزم عضد ايديني من الخلف وضمني حيل لصدرة وحاوطت ايديه بطني وحنچة صار على چتفي وهتف وياي
حَيرام :: الله يخبر العبد اليحبه يريد يسمع دعائة هواي لا تفكرين الله جاي يعاقبچ ما مسويه شيء مو زين ويمكن الله جاي يعاقببني الي بيكم على كلشي جنت اسوي
أريج الله :: شنو ذنبي اتحمل كلهذا شنو؟
- ذنبچ تزوجتي داسِم هذا ذنبج جنت تعرفين من الممكن الله يعاقبني وبكل الاحبهم ومع هذا ضليتي وياي
- خلي يعاقبك بيه بس موش باطفالي حَيرام موش أطفالي
- ااااششششش أنتِ لا احن ولا أرحم من الخلقهم عليهم اسكتي وهذا الخير جاي ينزل ادعي ربچ ينزل علينا الخير اهدي يروحي
غمضت عيوني جان صوت حَيرام بظهري مثل السد اللي يحميني من جروحي وتفكيري نزلت دمعتي وسلمت امري لله
التفتت عليه ودفنت راسي بصدره وحطيت ايديه فوك ايديه اللي حاضنة خصري وهتفت وياه
أريج الله :: لا تكول ذنبك ولا تكول عقاب أنتَ حزامي وضلعي الما يميل وأنتَ خيمتنا لو يرجع بية الوكت ألف مرة هم أختارك وهم أرضى بقسمتي وياك أم الحسن واولادي همَّ رويحتي والله ما يضيع وداعة ربي أرحم بيها مني ومنك وهو اللي رسم لون عيونها وهو القادر يخليها تشوف بيهن الدنيا أحلى من عيوني الرصاصية
سكتت شوية وأسمع دگات كلبه رفعت راسي وبسته من جتفه وهمست وياه كملت كلامي
- خلنا ننام يا بعد هلي راح تكبر ميمي وتملي البيت بضحكتها وتشوفنا بعيونها الاثنين وحدة بلون الحشيش ووحدة بلون البحر وتصير هي الدنيا كلها بعيونا
سحبني بيده غطاني ونام يمي وجان خوفي موجود بس بقيت متيقنة واهمس لروحي إنُّ كلشي راح يكون بخير لأن الله موجود وحَيرام سندي موجود وحتى اذا طلعت ام الحسن ما تشوف بعين وحده هيا عدها عيون اهلها اربعة بدال الوحدة
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ مَـــــلاك ٭٭
علي الكاظم طلع للـ الشغل واني طك كلبي بالغرفة حسيت هيج الخنگة راح تخنگني وهم علي الكاظم أخذ التليفون مني مدري ليششش يعني خلاني هيج لا تليفون ولا شي طلعت من غرفتي ونزلت للصالة لكيت طيبة الزهراء كاعدة وي علي التقي و علي النقي بعد ما علي الباقر أخذ منة المنان وطلع كعدت يمها وهتفت وياها
مَـــلاك :: شلونچ؟؟
طيبة الزهراء :: ياهلا بملاك البيت
- فارغة؟
- شنو تشوفين؟
- أشوف كاعدة وساكتة
- يعني ماعندي شي شتردين يروحي؟؟
- طيبات طاك كلبيي خلي نسوي فد شغلة نتونس بيها؟
- اممم بلا وياج بس شنو تردين نسوي؟
اول ما ردت احجي طيبة الزهراء حطت ايدها على بطنها وركضت للحمام رحت وراها حتى اشوف شبيها لكيتها تتقيئ حطيت ايدي على ظهرها وردت اصيح للعلوية بس هيا منعتني
مَـــلاك :: يا اسم الله هاي شبيچ طيبات؟؟؟
طيبة الزهراء :: مااكو شي لعبان نفس عادي يصير
- أصيح للعلوية تشوفچ؟؟
- لاااا لا تصيحين لأحد عوفي العلوية مرتاحة بغرفتها وبعدين كتلچ مابيه شي خلص ارتاح واصير زينه
- اصعدي لغرفتج ارتاحي
- عينج على الولد
- مو صغار هم لا تفكرين بيهم اصعدي وبالج لنفسج واذا حسيتي بدوخة لو شي صيحيني
- ان شاءالله
- اصعدج؟؟
- لاا ملاك مايحتاج مابيه شيء
عافتني طيبة الزهراء وصعدت لفوك ما رتاحيت لوضعها ابد انداريت لكيت علي التقي و علي النقي يلعبون كعدت يمهم لعبت شوية وضحكت والله عليهم بس هم شوية وطگتني كأبة خلتني اعوفهم واروح للمطبخ باوعت على الثلاجة وهتفت وي نفسي
مَـــلاك :: الكآبة تروح وي الطبخ خليني اسويلي شغلة اكلها واطلع ضوجتي بيها ... اووو لاااا ماريد شيء مسدودة نفسي اهههه وين أروح هسة يعني علي الكاظم إلا يروح للشغل!!!
طلعت من المطبخ وهتفت وي اولاد علي السجاد علي التقي و علي النقي بصوت عالي حتى يسمعوني لان اعرفهم ينسون روحهم وهمة يلعبون
مَــلاك :: تقي ونقي انا صاعدة لفوك حدكم الصالة وفوك غرفتكم باب الصالة ما تتعدونة وباب المطبخ ما توصلون اله فهمتوو؟؟
علي التقي :: صار عمة
رفعت حاجبي اله وعلي النقي صار يضحك وهتفت وياه
مَــلاك :: عمة بعينك هزيت كاروكك كمطتك حتى تكلي عمة؟؟ ترى فرق بيناتنا ٨ سنوواتتت
علي النقي :: بس أنتِ مرة عمنا غير نصيحلج عمة؟؟
- لااااا صيحولي ملاك
علي التقي :: بس باابا ما يقبل هو علمنا نكول لعمامي كلهم عمي ونكول لعماتي عمة
- وانا مو عمتك! صيحلي ملاك ومعليك بحجي ابوك عود عمة غدير الله كللها عمة بس انا شنوو اسمي؟
علي النقي :: عمة ملاك
- راح انزع الي برجلي ترى لا ترفزووني اسمي ملاك
ملاك ميم لام الف كاف بلا عمة خووش عمة لاااا ملاك اييي
علي التقي :: صار عمة
- انززززع؟؟؟؟
علي النقي :: لاااا عمة حبابة
- يااااااا ناوين عليه انتم؟؟؟
علي التقي :: والله عمة نحبج
- حبكم ربكم انا احبكم من تصيحولي ملاك او ملوكة بكيفكم حتى لو تسموني سعلوة بس عمة لاا؟؟
علي النقي :: هاي هية عــ...
قاطعت كلامة بصوت عالي وهتفت وياه
- اششش كاافي اسكت لا تكمل هاي هية واسكت مايحتاج تكمل كاافي صاعدة لفوك جلطتوني ومثل ما كلت الكم لا باب الصالة ولا باب المطبخ تعتب رجلكم عليه
التفت اريد اروح صوب الدرج سمعت علي التقي هتف وياي
علي التقي :: صار عمة
حطيت ايدي على راسي ردت اندار وابسطة حتى يتعلمون بس ضحكت وهزيت راسي وكملت طريقي صعدت لفوك ولان الملل يقرأ الف عندي رحت لغرفة غدير الله بلكي تطلع فارغة وشوية نغير جو انا وياها بس اول ما دكيت الباب ودخلت عليها لكيتها كاعدة تدرس كعدت يمها وهتفت وياها
مَـــلاك :: شكاعد تسوين؟
غدير الله :: جاي أسبح تسبحين وياي
- لا دادة عيب
- لا حبابة تعاي
- لا والله اعع ماريد اسبحي لوحدج
- كومي اطلعي برة لا بلملزمة على راسچ
- غيمة والله ضايجة شبيج؟
- مليكة شوفيي عيوني بالكوة حاصرة البچية لا دراسة ولا نفسية بقت عندي خليني اقرا لا اكعد ابجي
- زين ارتاحي شوية من الدرسة وخلينا نلعب شوية؟
- ولج عندي متحان
- اهووو لا أنتِ ولا طيبات فارغاتلي وين انطي وجهي؟
- چا طيبات شبيها ما تلعب وياج حتى دراسة مغلسة عليها
- مدري شبيها تتقيئ
- تتقيئ؟؟؟
- اي رحت الها جاي احجي وياها طفرت للحمام وخلتني وصعدت لغرفتها وطلبت مني مااحجي لأحد تكلي شيء عادي
- خاف حامل؟؟
- انا هم شكيت بهل شي ومن شفتها ما حجت وطلبت ماكول لأحد كلت خاف تريد تتأكد وبعدين تسوي سبرايز الكم
- الله يتمم عليها وعلى اخوي اذا صدك طلعت حامل بلكي تهيد علاقتهم اكثر
- بس كولي خاف ناتج الطفل مثل منة المنان؟ لا من ابوها ولا من امها
- لا أن شاءالله لااا
- ان شاءالله
- هسة ترديني العب وياج؟
- والله ياريت
- تعرفين اني ادري بيچ شنو تردين هوا من علي الكاظم اخذاه منج وأنتِ صايرة مدري شلونج؟
- شنو هو؟؟
التفت ومدت ايدها لجوة المخدة وطلعت الي تليفونها فتحت الرمز وانطتني ياه وهتفت وياي
غدير الله :: يلا هاچ التليفون وطيري عني اريد ادرس
- ههههههه فدوة لليفهمنيي بسس شنوو
- هاا شنو بعد؟؟
- شكد الرمز مالتج؟
- ليش يمة مو فتحتة الج؟
- مو خاف ينقفل خو ما ترديني كلشوي اجي واكلج فتحي!
- الرمز ٢٠٢٠
- اممم شُكراً.
- عفواً سدي الباب عدل وراچ
- صار يالصاكة
أخذت التليفون منها وضحكت، بستها بخدها وطلعت وركعت الباب وراي وصارت غدير الله تصيح وراي
- سديييه عل كيفج ولجج الباب اريدةة
ركضت لغرفتي دخلت وقفلت الباب شمرت روحي على الجرباية واني حاضنة التليفون أخيراً تنفست
- والله علي الكاظم لو يدري غيمة انطتني تليفونها الا يتخبل علينا ههههههه بس شسوي طك كلبي حابسني لا تليفون ولا طلعة عبالك ساجنني مو مرته اععع
فتحت الرمز ٢٠٢٠ ودخلت رأساً على اليوتيوب كلت خليني اغير جو واشوفلي كم فيديو وبعدها دخلت على الواتساب كلت اراسل اخواتي بلكي وحدة منهن كاعدة واضل احجي وياها واغير جوي
بس بالي ضل يم طيبة الزهراء يا ربي صدك تطلع حامل؟ إذا حامل معناه راح تصير هوسة وجهال جدد بالبيت وعلي التقي وعلي النقي راح يصير عدهم أخو لو أخت ويجوز هم يطلعون نسخة طبق الأصل من عدهم ويجلطوني بكلمة عمة لاا ماريد لا تخلف طيبة الزهراء ما عايزين اطفال
كطعت سيل افكاري وتمددت شغلت فيديوات ضحك وبقيت أباوع وأضحك ويه روحي نسيت الضوجة ونسيت الملل صدك لو كالوا الممنوع دائماً مرغوب جان تليفوني عندي وشامرتة هسة لان مايريدني علي الكاظم الزمه ، التليفون هسة صار عندي أغلى الذهب
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ سُـــكرَ ٭٭
طگت روحي من هلموضوع وانا اشوف البنات الي بعمري يدرسن وينجحن وانا كلـ سنة مكابلة الــ أربع حياطين وشنو ابوي مايريد مدرسة مستقبلي هذا يعني هوا مادايملي باجر لو عكبة الموت يلفي وين اضل انا؟
لا شهادة ولا تعليم منو يعترف بيه اصير خدامة ببيت رجلي!!.
حجيت وي اهلي هواي بهذا الموضوع وبكل مرة ابوي يسوي رةحه معصب ويسد السالفة بس ماكو عصبية بشيء هو حق وياريت مسوين شيء غلط واكول حقة يمنعنا من الدراسة اشو منطينا التليفونات وما مخلينه نلبس حجاب الا بقناعتنا ونطلع ونطب بالوقت اليعجبنا وباللبس الي نريدة منفتح لهاي الدرجة بس من يوصل الموضوع يم المدرسة ابوي يصير من العصر الجاهلي!
مسحت دموعي وشمرت المخدة من أيدي ونزلت للمطبخ لكيت امي تسوي الغدة رحت وكفت يمها وضربت على الكاونتر وصاحت بوجهي
- خييررر شبيچ؟؟
سُــكرَ :: مو خالة هاي ترى أنتِ آمنا اذا متحجين وي ابوي منو يحجي وياه؟؟
- تردين شيء هذاك ابوج روحي وحاجي لا تجين تنگين على راسي بشي أنتِ تعرفينا مو بيدي
- شلون يعني مو بيدچ!! شلووون فهميني مستقبلي هذا مو كافي السننين الضاعت يعني المفروض أنتِ اول وحدة توكفين بوجه ابوي بقرار المدرسة وتهددي حتى
- اهدد أبوچ؟ سكر ليش تحجين وكان ما تعرفين عمران
- يمةة ابوس ايدج افهميني ابوس ايدج
- كارولين أنتِ افهمينيي تردين شي روحيييي احجي وي أبوچ انا حجيت وياه لحد ما طك راسي يعني عبالج عاجبني وضعج و وضع نوف وانا اشوف كل بنات المجمع دراسة وجامعة الا انتن كاعدات على الرغم من ذكائچ وشطارتچن بس يمة والله مو بيدي ماكدر على ابوچ
- ماراح تكدرين ولا راح نكدر إحنا لان خلص تسلط
- سُكرَة امسحي عيونج وغسلي وجهج وتعاي حبيبتي ساعديني خلصت خلينا نصب غدة
ضليت صافنة على امي انا وين وبيا حال وهيا محتارة بالغدة وانا محتارة بمستقبلي الجاي يضيع كدامي ضربت مرة ثانية على الكاونتر ونترت وياها
سُـكرَ :: مااريد انا صيحي لـ نوف هيا تساعدچ
- ما تاكلين؟
- ماريد ازقنب
عفت امي وطلعت من المطبخ ورجعت لغرفتي طبيت وقفلت على نفسي الباب وصرت ابجي بكل حيلي ماعندي طريقة بعد امس بليل حجيت وي ابوي لحد ما يبس حلگي وصلت مرحلة ابوس أيده وما طخ الي ولا حن كلبه علية وامي لا تهش ولا تنش شنو البقة لازم اسوي؟؟؟
حطيت المخدة على وجهي وبقيت ابجي حيل ومادري الوقت الي مر نمت بلا ما احس بروحي وانا ابجي ورجعت كعدت والدموع بعيوني على صوت دك الباب وصوت يجيني من ورة الباب
نــوف :: سكرااتي ،، سكروو حبيبييي تسمعيني كاعدة؟؟
رفعت راسي بالكوة باوعت للباب بودي افجر البيت كلة وهتفت وياها وانا بالكوة يطلع صوتيي
سُــكرَ :: شتردين نوف مالي خُلك!!
- بكيفج هيا مالچ خلك من لي غيرج حتى تحبسين رةحج بالغرفة كافي اطلعي وياي يلا خلنروح لـ ملاكو نشوفها
- روحي وي امي مالي خلك انا
- من يمتا مالچ خلك ترحين لبيت السادة احم احم
نوف هنا نصت صوتها وصارت تهمس من ورة الباب وكملت كلامها
- ترى سكروو السيد علي الباقر موجود ترى بالبيت
حطيت ايدي على كصتي ومسحت وجهي بأثنين ايديه ورفعت شعري وهتفت وياها
- روحن نوف مابيه اكوم تعبانة واريد انام
- سكررةة
- نوووف كاافي رحمة لربچ روحيي عنييي
- يووو عابتلج مو صوجج ضلي تصير بيج حالة نفسية ونشمرج بالمستشفى ترى لا عبالج نبقى نغير جوج ونبتلي بيج هنا
- خووش خووش روحي يلا
اختفى صوت نوف كلش عرفتها عافتني وراحت اخذت تليفوني وصرت اكلب بالبرامج لكيت غدير الله مراسلتني على الواتساب وانا نايمة بس من فتحت الرسائل لكيت ملاك مراسلتني من رقمها قريتهن وما جاوبت شاهدت ستوري علي الباقر على الواتساب جان ناشر صورتــه وكاتب جوه
( رغم كل ما حدث ما زلت ألمعو لم أكف يومًا عن مد ضوأي لكل من طرقه بابي منطفئاً )
استغربت للملاء مالته اخذت واتصلت عليه رغم جنت اكدر ارد على الستوري بس انا هيج احب اتحجج واتصل عليه واول ما فتح الخط هتف وياي
علي الباقر :: عليكم السلام
- شلونك سيد شخبارك؟
- بخير الحمدالله وأنتِ شلونج بوية ؟
- بنعمة وخير انا
- صوتج ما يكول هيج؟
- مو مهم .
- خيرج متصلة محتاجة شي بيج شي؟
- لا ما محتاجة بس اتصلت علمود ارد على الستوري المخلي على الواتساب
- شبي؟
- سيد املائك بيه كلة خطأ بـ خطأ
- صدك ما منتبه هذا الاقتباس انا حافظه وكتبته على السريع
- حلو كلش لايك وي صورتك بس عندك كلمة طرقه هيا طرقَ وعندك كلمة المعو لم هيا المع و لم وكلمة ضوأي هيا تكتب بكسرة الياء يعني ضوئي
- مُدرسة لغة عربية مَاشاء الله عليچ
- ياريت ههههههه
- هسة راح اعدله
- اي حرامات تروح هيبة صورتك بالخطأ هذا
- عادي بوية
- اعوفك براحتك
- شبيج بوية؟
- مابيه شي
- لا احس بيج وصوتج مو تمام مخنوكه
- سيد اطلب منك طلب؟
- اطلبي
- هسة اجيكم واحجي وياك
- على راحتج
- شُكرًا.
سديت الخط وكمت غيرت ملابسي لبست بنطرون وقميص نهايته ربطته يعني خليت القميص كصير حيل وشلت شعري نص الفوك شديته بقرتيلة وخليت الباقي نازل ورحت غسلت وجهي ورجعت للمراية حطيت كحلة ورسمت عيوني شوية على تينت و كلوز وأخذت تليفوني وطلعت لكيت نوف وامي رايحات ما اهتميت رحت وراهن
اول ما سديت باب بيتنا عبر من يمي رجال اول مرة اشوفه عرفتة مو من المجمع مالتنا يعني جاي لواحد هنا واول ما مر من يمي وشافني هتف وهو يباوع لــ رجليه وهتف
- اويلي يالكعبة شنو هذا الطير الطازچ اليخبل لو تصير بين ايديه اخخخخ
ودار وجه راد يكمل طريقه بس اتنرفزت حيل باوعت لبابنا لكيت طابوكة شلتها بيدي ورحت وراه هتفت وهو يمشي
سُكرَ :: بس ثواني يا حلوو اوكف
اندار الرجال عليه وكفت كدامة وربتت الطابوكة براسة وهتفت وياه
سُكرَ :: هذا الطير الطازچ صار بين ايديك شفته شكد يأذي!
عفت الرجال واكع بالكاع حاط ايده على راسه و دمة بطوله ورحت لبيت السادة دكيت الباب فتح الي علي الباقر ودخلت جوة
باوع لعيوني واني بالطارمة هتف وياي
علي الباقر :: شبيچ؟
سُكرَ :: مخنوكة!
- اسم الله عليج من الخنكة خيرج تكدرين تحجين لو شي خاص؟
- لا انا اجيتك لهذا الموضوع اريدك تساعدني
- ابشري راح اسوي الي اكدر عليه واعين واعاون
- سيد تكدر تحجي وي ابوي
- بخصووص؟
- بخصوص المدرسة اريد ارجع ادرس وهو رافض الفكره
- بس مو اختج ملاك راح ترجع السنة الجاي للمدرسة خارجي وعادي عنده ليش وياج رفض الفكرة؟
- ملاك راح ترجع لان زوجها يريد هلشي لهذا ابوي ما تدخل بس انا مايقبل لا انا ولا نوف لاننا بعدنا ببيته يكللنا من تزوجن واذا ازواجكم رادو يرجعونكم للمدرسة بكيفهم زين انا شنو يضمن زوجي يطلع رجال خير؟ شيضمن يطلعلي نفس علي الكاظم وما يطلع چلب ابن سطعش چلب واتورط وياه ويخليني خدامة اله ولهله؟
- لا تحجين هيج ان شاء الله تاخذين ابن حلال واوادم وأنتِ غير تشوفين وتختارين الزلمة التردينه وتحبينه اكيد يطلع خوش
- ترى سيد محد يجيني من اول يوم ويكلي السلام عليكم سكرة ترى انا حيوان و اجلب مني ماكو كلهم يطلعون ملائكة وبعد العرس يبدلون وجوه وهم يبدلون البدلة
- هسة ترديني احجي وي الوالد بخصوص المدرسة بس؟
- ايي بس لا تكلة انا كتلك حباب
- جا يكلي ليش تدخل ببيتي وبناتي؟
- شوف سيد انا اعرف طريقتك التخبل بالكلام والاقناع جيبه بالكلام كلو على اساس أنتَ تحجي وي ملاك وملوكة حجت الك طبع ابوي وتفكيرة على المدارس ولهذا أنتَ من يمك اجيت تحجي وياه لان تفكيرة خطأ بالخصووص احنا ما طلع من عدنا شيء مو زين درجاتنا عالية بس هوا عندة قانون خلصتي ابتدائية خلص تكعدين بالبيت
- اذا بس هيج تدللين
- تحجي وي ابوي؟
- ان شاءالله هسة طالع انا واتصل عليه ونطلع نتمشى واحجي انا وياه
- ماعرف شلون أشكرك
- لا شنو السالفة أخت چنتنا أنتِ تدللين علينا
- تسلملي سيد
- هسة يلا فوتي جوة واكعدي
اندار حتى يروح اتذكرت المفشوخ برة حطيت ايدي على حلكي وهتفت وياه
سُكرَ :: صدك سيد ثانية
- عيوني
- بس سيد اذا طلعت اكو رجال واكع برة وجاي ينزف من راسه
- منووو؟
- مااعرفنه انا ضربتة بالطابوكة فجيت راسه
- تخبلتي؟؟
- خيولي هو ذب كلام عليه واني راويته اليتغزل بيها
- تروح وتفچ راسه
- وادفنه بكاعه محد يحط كلااام عليه اذا لكيته ميت وصللي خبر حتى اهلهل
- وتجي الشرطة تهلهل على راسج وراس الخلفچ تدللين عليهم
- خيولي
- سكرة ترى محد راح يلومة ليش اتحرش بيج أنتِ طالعة بهاي الشاكلة والرجال من خلق ربة طن شهوات بيه وأنتِ ماشاء الله الشعر اصفر وبنطرون والقميص مال اطفال
- يعني هسة انا الغلطانه مو هوا المريض والقذر
- غلطانه من ناحية شكلج بس هوا صدك مريض وقذر وكلشي بس أنتِ هم
- صدك تحجي سيد؟
- الإمام علي ( ع ) يكول ( لو علمت المرأة معنى نضرة الرجل لها حين تخرج لغلفت نفسها بالحديد وخرجت ) رايح اشوف الرجال
عافني السيد علي الباقر وراح وانا بقيت افكر بكلامه ورحت دخلت للصالة لكيت العلوية و طيبة الزهراء و غدير الله وملاك وأمي واختي كلهن كاعدات وهم وياهن جانت العلوية فاطمة الزهراء الي تموت عليه واموت عليها ركضت عليها وحضنتها وهتفت وياها
سُكرَ :: يويلي شكد مشتاقتلچ
فاطمة الزهراء :: وانا هم صايرة ما اشوفج هواي
- هاي اجيييتتت
- تعاي اكعدي يميي تعاي شنو هاي الشعرات الحلوة ربانزل شنو
- ههههههه اخذيهن
- يا سبع فدوات الهن.
بقيت اسولف واضحك وياها وهية ايدها على شعري تلعب بيه ودخلت علينا أم البنين وهيا شايلة حيدرة و دخلت وراها عزيزة وي اولادها ومن العلوية شافت الوضع هيج صار تجمع خلت علي التقي يروح لبيت وهج الطف ويصيح لوهج الطف و بسمة ودزت علي النقي حتى يصيح لـ أريج الله وهيج نصير كلنا كاعدين ونسولف ونضحك وجانت يوم من العمر والله نسيت الرجال وراسه ونسيت هم الدراسة وي أصواتهن وصرت انتظر أشوف علي الباقر شراح يسوي وي ابوي وشنو رد فعله
﹉﹉﹉﹉﹉﹉﹉﹉﹉﹉﹉﹉﹉﹉﹉﹉﹉
٭٭ شُـــبـر ٭٭
بعد ما رجعت لغرفتي وكلبي جان ياذيني حيل بس المهم عندي جان هية حوراء تخلص لو كل العالم صار ضدها انا اصيرلها عالم ووحدي اوكف بوجههم كلهم واحد واحد ما اخليها لوحدها ابد
نمت وانا كلي امل بـ فكرة عندي عمام تطلع الحق من حلك السبع
ما خفت من تهديد عمها محمد ولا من أي شيء راح يصير بس بعد ما نمت فزيت من النوم وباوعت لكيت الدولكة فارغة مال الماي مسحت عيوني وورفعت البطانية عني ونزلت للمطبخ لكيت الضوة طالع باوعت للساعة لكيتها ٦ الصبح
ماجنت اعرف بهذا اليوم شراح يصير؟
محمد راح يكدر ياخذ حَوراء لو رسمياً حَوراء تصير الي وعلى عين الكل
شربت الماي وطلعت من المطبخ وانا بالي مشوش ومادري شنو يصير ردت ارجع واصعد بس سمعت صوت حَوراء لمن طلعت لبرة لكيتها كاعدة بالحوش وتبجي صوت شهگتها گطع نياط گلبي.
وكفت وراهاردت أمد إيدي على جتفها وأگولها أني يمج بس إيدي خذلتني خفت لا أفززها وخفت أكثر من باجر الشايللنا وياه مصايب ما يعلمه إلا الله بس ماكدرت وهتفت وياها
شُبـر :: حوري كافي بوية
التفتت عليه وعيونها غرقانة بالدمع وجهها ذبلان حيل وسفة اشوف الوردة بهذا الحال وردت عليه
حوراء :: شبر أحس الموت جاي يركض وراي عمي ما يعوفني والله يذبحني ويغسل عاره بدمي وهو العار بكبره
ردت أحجي ردت أطمنها ردت اخذ وانطي وياها حتى ترتاح بس فجأة انشگ سكون گلبي وعقلي بصوت هورنات وسيارات وكفت بالمجمع جان صوتهن كانهن وياي بالبيت كلبي لچمني ركضت للباب الخارجي وحوراء وراي ترجف بعدني ما لحگت افتح الباب الا بالباب يندفع بقوة ودخل محمد ووياه زلم ثنين وصار يصيح بعلو صوته
محمد :: وين الشريف وين السادة اليوم آخذ حقي بيدي والقانون بجيبي
أبوي طلع يركض من البيت وبالشارع طلعوا عمامي ووياهم جيران على صوت الصياح بس محمد جان أسرع من الكل قبل لا أمد إيدي هجم مثل الذيب المسعور دفعني بكل قوته وشمرني على الحايط ولأن جان غادرني اختل توازني للحظة
بهاي اللحظة مد إيده القذرة ولزم حوراء طاح الحجاب مالتها راح ولزمها من شعرها سحلها سحل وهي تصيح
حَوراء :: شُبرررر دخيلك
محمد لف شعرها على إيده وصار يسحل بيها بالگاع باتجاه الباب وهي تتوسل وتنازع بين إيديه ووجهها انملى تراب ودموع ولمن نزل ابوي يريد يدخل رفع ايده الثانية محمد باتجاه ابوي وصاح بيه
محمد :: ما انصحك سيد تدخل لان هذا عرضي وهذا العقد واليوم حوراء تموت ببيتي والي يتقرب خطوة وحدة أفرغ المسدس براسها وبالقانون محد يحجي وياي
وكفت بمكاني السلاح بيد ابوي يرجف عيوني صارن دم وأبوي صاح بيه
البشير قيصر :: ولك محمدد نززل إيدك
بس محمد ما اهتم سحبها من شعرها وطلعها لحد ما وصلوا للسياره وشمرها بصدر السيارة وهي تباوعلي نظرة أخيرة احسها جانت نضرة وداع عيونها جانت تكلي ضعت ضعت وضيعتني وياك
صعد السيارة وحركها بسرعة وأنا واكف بمكاني والدنيا صارت سودة بعيني رفعت راسي لسماء وصحت بصوت وي طيحة دمعتي
شُبـر :: والحسين الشهيد محمد إذا شعرة منها انمست لخلي جثتك تصير لجلاب الشوارع ولو كلفني الأمر عمري كله اخذ اعدام بيك
التفتت على أبوي وعمامي والدموع تنزل من عيوني رحت اخذت السلاح من الدي و شلتة ووجهته للسماء ورميت طلقة وحدة وهتفت وانا امسح دمعتي وشياطين الارض جانت تطفر كدامي
شُــبر :: بوية اليوم لو تطلع حوراء من بيت هذاك الحيوان لو تطلع بجنازة شبر مالي كعدة بهل بيت وعرضي يسحلونه بالشارع كدام عيني
اصفاد الحق :: هلا بطگ الفشگ
ألمعتز باالله :: وحگ حرگ خيم زينب نسبيهم سبي ونطفي شمعة شبابهم بس أشرو
يــــتـــبــع
- گُمت أتخَيلك ترجَع وأحاچيك
وأسولِفلك الصاير مِن عِفتني
عَلى يا هيّأعِذرَك ؟
صارَن ،هواي ..
بَس حچاية أكلك ضَيعتني
متابعة لحسابي الواتباد فضلاً
وهم ليش عود التصويت ماجاي تصوتون التفاعل ما عاجبني حيل ترى مو بفلوس والله شسالفة بنات؟؟ يعني انشر بارت شطولة ما يوصل التفاعل والتصويت بيه ١٠٠؟؟ عاجبجن هيجي؟؟
متابعة لقناتي على التلكرام وبيها موجودين كل الابطال وانشر تغشوشات وكلشي نسولف بيه عن البارت
وهذا حسابي انستكرام
وإن شاءالله اشوفكم بــ مُنْعطف جديد
11,307 كلمة
اللهم صلّ علىٰ محمد وآل محمد
- اسْتَكْثِرُوا مِنَ الْبَاقِيَاتِ الصَّالِحَاتِ : التَّسْبِيحُ وَالتَّحْمِيدُ وَالتَّهْلِيلُ وَالتَّكْبِيرُ وَلَا حَوْلَ وَلَا قُوَّةَ إِلَّا بِاللهِ
- ﴿ وَالْبَاقِيَاتُ الصَّالِحَاتُ خَيْرٌ عِندَ رَبِّكَ ثَوَابًا وَخَيْرٌ أَمَلًا ﴾
- سُبحــانَ الله
- الحمــــدُ لله
- لا إلهَ إلا الله
- اللهُ أكبـــر
- لا حَول ولا قوة إلا بالله
- سُبحــان الله العَظيــم
- سُبحــان الله وبِحَمـده
- أستَغفِــر الله وأتوبُ إليه
- اللهُمَّ صلِ علّى مُحمد وآل مُحمد
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!