أهُنتُ عليك؟ الفصل الحادي والعشرون 21 - بقلم نهى

أهُنتُ عليك؟

للكاتبةNuha-d-h

رفل
سولاف. راح اتخبل اختي فص ملح وذاب مالگيت الهة اثر وين انطي وجهي وضميري راح يموتني احس اني
والدنيا صرنا عليهة گليلي وين الگاهة معقولة رجعت للناس الي سوت وياهم العقد
المشكلة هي كلشي ماحجت لي عن الفترة الي قضتهة وية الرجال وشنو هي جابت ولد لولا عفية سولاف دبريني
سولاف -شوفي حبيبتي اني راح اشمشم لج اخبار عنها وبلكي اجيبلج عنوان الناس الجانت عندهم بفترة زواجها بس شوية يحتاج وقت تعرفيهم الجماعة غامضين مايطلعون الكلمة الاباطلاع الروح
يعني حفظ السرية لعملائهم
رفل بلهفة -عفية حبوبة تسويلي فضل ما انساه الج

رسل
حضرت سنوية المرحوم زامل وجان يوم جداً مؤثر وكسرت خاطري خالتي وبنات زامل شكد فقيرات ومبين عليهن لاحول ولاقوة وهادئات مو مثل امهم العگربة
خطية البنات من شافوا حسن وحسين اتخبلو عليهم واباوعلهم فرحانات بخوانهم
وبقو حسن وحسين كلة بيد اسراء وعُلا ما وگعو من ايدهم وعلياء تشيل بغراضهم لو كلساعة طالعة مشتريتلهم شغلة لو جبس لو نستلة
احس بيهن استلمن المسؤلية عن اخوتهم الصغار
حتى من ردت اسوي رضعة لحسوني العنودي ماقبلت علياء وطلبت مني هي تسويهَ الة
حبيت اهتمامهن باخوانهم وفرحت من قدمت على هيج خطوة واتخذت قرار زيارت البنات

ورة ماخلص مجلس العزاء الي مسوينة لثواب المرحوم
(مجلس يُقرأ فية القران ويوزع فيه الثواب هدية الى الميت)
اجت سهير هجمت علية جنها مخبلة وضربتني راشدي على وجهي ودفعتني وگعت بالگاع جنت مصدومة واني كبل استجمعت قوتي وگمت
رسل -ما راح ارد على تصرفج بنفس التصرف لان اني مو حيوانة تصرفج كان مال حيوانات وراح اتجاوزج بأخلاقي
سهير -ولج ساااا ق--ة انتي تالي وكت تتحكمين بمصرفي اني وبناتي وتجبريني اخلي بناتي يجون يفشوفون اولادج حتى تشغلينهم عندج خدامات لحضرتج
رسل -هاي جانت وصية المرحوم ان اولادة وبناتة يبقون على تواصل مع بعض
ام زامل-شبيج سهير تخبلتي
ولج حتى الغريبة حنت على حال زامل
وانتي گوية عين ما يكسرج شي
روحي الله لايرضى عليج
ولج بيوم سنويتة وما افتك من السانج
سهير بتًّوعد- هيّن بابنت الشوارع اذا ما اردج منين ما اجيتي وگولي گالت سهير
اجت رواء ووخرتني من يم سهير-
-تعالي ماعليج بيهة اتخبلت
رشا-الله يفكنة منهة
روان-وهي شايلة حسن ورنا شايلة حسين وتهز بي
والله هاي خارمة مو بعقلة جرت البنات جر وضربت علياء الصغيرة علمود گالت اريد ابقى عند بيت جدو
وگامت تغلط على اسراء لان طلبت ان تبقى حتى تسافر هي وخواتة تزور قبر ابوهة
روان ماگدرت تكمل كلامهة وغصت بجيتهة على اخوهة وبناتة

رنا كملت - اشو هاي اتخبلت اخذت بناتهة وطلعت وگالت حتى زيارة قبرة ما اخليجن توشفنة
ام زامل-الله لايوفقهة حتى وهو بگبرة معذبتة من وراهة
وبعدها من خلص مجلس العزاء بساعتين
صار الكل يجهز نفسة حتى يطلعون للنجف
شفت بيت عيالي وبيوت عمامهم جهزوا نفسهم وسياراتهم واني حضرت جنطتي اني والاولاد وكلفتتهم بالملابس خاف يتمرضون
ولو الله يرضى عليهن عمات الاولاد
ماخلوني احس بتعبهم خطية
يكولون واولاد اخونا الغالي
فدوة صايرين يشبهونة

اتصلت على جراح حتى اشوفة يقبل اسافر وياهم
وافق ما اعترض
جراح -اي طبعا ترحين انتي والاولاد حتى انة راح اسافر وياكم
واتجمعت السيارات گبال بيت عيالي وصاروا كلمن وسيارتة وعائلة
فعزام ركبت بسيارتة خطيبتة رشا وخالتي وراء وياهم
ورنا وروان كل وحدة وية زوجهة وجهالها
والولد جاسم وقصي اثنينهم بسيارة وحدة عاليه همة وعائلتهم
وجراح ركبت بسيارتة امة وسلوى وبنتهة وصابرين
اباوع لعيون جراح احتار ويامن يركبني
شكله مكان حاسب احسابنا
هنا حسيت بروحي دخيلة عليهم ومفروضة على الكل
بس مهما كان ماراح اخلي هذا الموقف يضعفني اني رسالتي صارت اولاد وبنات زامل رفعت راسي بكل فخر
وجان يجي
نواف
- جراح ام حسن وياي تركب بسيارتي
ترة بس انا والوالدة بالسيارة
اطمن فارغة وعالية ما يتعبون من الطسات

حسيت على وجه جراح ظل ينطي الوان احس بي الا شوية يگلي بطلي ماتسافرين ويانة ما اعرف ليش احس يدور علية حجج ويتمنى يلزمزعلية الزلة
فرحت وصعدت اني والاولاد بسيارة
نواف
وهو خطية كعد يساعدني بالغراض
كانت نظرات جراح نار تراقبني بتمعن
اهووو هسة اني شبية هلكد مهتمة بي
انتهبت عليه اتسعت عيونة
شفتة گبل نزل من السيارة واتوجه لسيارة
نواف وفتح باب السيارة علية
فشافني لابسة جبة
- هاي شلابسة
والله انعل والديج اذا تطلعين بهاي الجبة ترحين هسة تفوتين گدامي تلبسين عباية راس سامعة يالله بسرعة اتأخرنا ترة والله نسافر واعوفج بالبيت
نزلت من السيارة ورحت على بيت عيالي واخذت عباية من كنتور خالتي ام زامل
عندها هواي عبايات
مناقشتة ابد لان مالي خلك مشاكل وما اريد اشمت البنات بية واضحكهم علية

فشنو يطلب مني اگلة تم حتى لو على عمة عيني
ورجعت وركبت ورة بسيارة نواف
وخطية اباوع عالولد گام بينة بالصلوات رغم اني شريجت بنتهم سلوى
بس ما حسسوني بأي شي وحتى
ام نواف- خالة انطيني عنج واحد خطية شلعوا گلبج
رسل-فدوة رحت لگلبج خالة هاج اخذيه علواه

نواف -لا لا يمة عوفي انة اخذة اخلي بحضني وانة اسوق حتى اتونس وياه
رسل -لاخوية خاف ماتسيطر عليه وانت تسوق
نواف ببتسامة وهو ينظر عليهَ من مراية السيارة-
-شنو السالفة ترة انة متعود على اولاد خواني كلة اسوق وهمة بحضني
فمديت طولي وناوشتة حسن لان مايستغرب
هذا الحجي نحجي وهو يسوق بالسيارة ولزمنا طريق السريع وانطيتة حسن وحطاه بحضنة واني بس اضحك على حسن شلون كلساعة يهد على الستيرن مالت السياقة
ويسوي حركات ويدردم شكلة كان يضحك حبيبي عندة هذا شي غريب لاول مرة يشوف هيج شي
سمعت نقالي وصل صوت رسالة فما اهتميت
لان متعودة على شركة الاتصال دائما تدزلي رسائل مرات مافتحهن
ونواف-هذا طالع على المرحوم يموت على السيارات
صدك لو گالو ابن الوز عوام
صدك تونست وية نواف امة جانو كلش حبابين حسيت بيهم مكسور خاطرهم علية اني واولادي
وشفت بعيون نواف حنان التمستة من خلال نضراتة
بتجاهي
بعدين وقف السيارة بالطريق قرب مطعم يصير ببداية الطريق وگبل اول ما وگفت السيارة
گبل دك نقال نواف وكان المتصل جراح
-شنونواف خير ليش وكفت السيارة خو ماكو شي
-لا والله وكفتهة اريد اشتري حلويات وكيك وجبس للجهال جواعة وخطية رسل صار عندهة دوار السفر فبس اشتريلهم واجي وراكم انتو اتوكلوا لانتتظروني اني الحك عليكم ما اتأخر
خلص الاتصال ونزل نواف يشتري غراض ونزلت امة وياه للحمام
شهكت من انفتح باب السيارة فجاءة من صفحتي وصار جراح بوجهي والله اجة يوگف گلبي من الكمزة
لزمني حيل من زندي
شوفي ولج عدلي نفسج وراقبي تصرفاتج
ولج بعدج ما صاعدة وية الولد ساعة وخبلتيه
اليوم احرك عشيرتك
انتبهي على روحج اشو بس تتمضحكين وياه وعيونكم ما نزلت من المراية وخوش حجة الجهال بس خلي افرغلج واعلمج شغلج ونقالج تفتحينة من تجيج رسالة
رسل
بين الصدمة وبين المستغربة هذا شدراه بالي يصير بالسيارة شنو گاعد ويانة
والله ما اعرف شبي گام علية هسة انة هم عايلة بي فوك ما الولد گايم بينا بالصلوات هيج يجازيه خرب حظي
شفتة اتوجه للمحلات
والتقى بنواف وحجة وياه والتفت علية وخزرني
فرجع نواف وامة وبيدة علاكة حلويات
للجهال وانطاني حبوب مالت دوار سفر وبطل ماي

جراح
اتجمعت السيارات بباب بيت عمي وكلهة صعدت وية عوائلهة باوعت على رسل ظلت تباوع بعيونهة محتارة وين تركب حسيت بيهة مثل المستحية
ونوب بعدين طلعلي العلة نواف ما ادري منين
وعرض علية كدامهم ان ياخذ رسل والاولاد حسيت الدخان گام يطلع من اذاناتي ما اعرف شبية
وركبت وياه بالسيارة
بعد ماشافت التردد بنظراتي وكأن تتحداني ارفض عرض نواف
وانة ظليت الوب عبالك جمر بگلبي
فردت بس حجة اطلع حرگتي بيهة وانتبهت عليهة لابسة جبة وانة اتخبلت وكأن اجتني من الله حجة حتى اطلع حرگت گلبي نزلت عليها ورزلتهة وهي ابد ما حجت شي نزلت لبست عباية راس ورجعت ركبت بسيارة نواف

اتمنيت منها بس تجاوبني وتراددني
حتي بالقران گبل افر السيارة وارجعها للملحق واقفل عليه الباب
واروح للزيارة وانة مرتاح ولا هذا حرب الاعصاب الي جاي اعيشة بوجودهة قرب نواف

شفتهة شلون تضحكلهة وهو ويباوع عليها بالمراية
والمطي يضحك وياهة مامصدك نفسه وهي مدت طولهة علية وناوشتة حسن
چا غير اتخبلت احس صرت نار كمت ما اشوف الطريق عدل
احترگو عشيرتك جراح هاي وين چانتلك دوخت الراس

انة صرت كلش حريص اسوق قريب على سيارتهم
من طبكت سيارة نواف وعرفت ليش طبگهة ما اتمالكت نفسي رجعت عليهم وطبكت سيارتي
سلوى -ليش وگفنا جراح
جراح_لاهيج راح اجيب شغلات لزينة والج خاف تجوع علينا بالطريق واجيب كم بطل ماي
والله رحت وانطيتهة المقسوم واشوف الحيرة بعيونهة
ماتعرف شبيه
حقهة ماتعرف شنو شبية
لان هو انة نفسي ما اعرف شجاي يصير بية

وصلنا للنجف
وزرنا مرقد الامام علي عليه السلام ورحنا زرنا المرحوم زامل امة وخواتة ذبن روحهن على گبره
وشفت نواف شايل واحد من التوم
وقرب حسن على قبر زامل وهي راحت اتقربت بحسين على قبر زامل
اقتربت منهم وسمعتهة تحجي وية القبر

رسل
زامل لاتشيل هم وارتاح بقبرك
ما راح اترك بناتك والاولاد يتشتتون راح ابذل مابوسعي حتى اجمع شملهم سوية بس انتة ادعيلي بان الله يمكني ويقدرني على حمل الامانة
وگامت تحجي وتبجي
مودع بالله يابوية اي انتة ابوية اللي ماكتبلي الله اشوف حضنة وحنانة
وبجاهك انت حسيت بحض الاب وحنانة روح الله يرضى عنك ويوسع قبرك ويسكنك فسيح جناته

أهُنتُ عليك؟

للكاتبةNuha-d-h

لاتبخلو علية في تعليقاتكم

اتمنى لكم قراءة ممتعة