رواية أكابر و اقول فراقه عادي و انا في داخلي اصرخ تكفون جيبوه الفصل العشرون 20 - بقلم HaboOoshy

الـــمــســتــشــفـــى
كان مشاري رايح جاي قدام غرفه العمليات بخوف وتوتر دق جواله رد بدون مايشوف الاسم:الو
قمر بسرعه:مشاري وين فهد؟
بلع ريقه مشاري:قمر؟
قمر:ايه وشفيك (بخوف) فهد فيه شيء تكلم
مشاري:اا اا قمر اا
قمر اللي بدت تبكي:مشاري لاتخبي علي قولي تكفى
مشاري:اا اه فهد بالعمليات
توسعت عيونها بصدمه:العمليات ليش وش صار؟
مشاري بضيقه:مروان طعنه بس اكيد بيكون بخير
شهقت قمر بقوه:ااه ااه أي مستشفى؟
مشاري بصدمه:قمر بتجين؟
قمر بصراخ خفيف:اكيد هذا فهد يامشاري
مشاري:اا طيب مستشفى ـ ـ ـ
قمر:طيب مع السلامه (سكرت بسرعه وهي تركض لداخل سحبت عبايتها وركبت مع السواق وهي تقوله المستشفى دعت من كل قلبها ان محد يفقدها)

الـــمــســتــشــفـــى
رامي وهو يناظر الاشعه ويتكلم مع الدكتوره:ايه زي ماتوقعت شعر
الدكتوره:ايه تتقدر تاخذ المدام
لف رامي وابتسم بوجهه اميره اللي تفشلت لما قالت الدكتوره المدام:سمعتي ياالمدام؟
رفعت راسها وناظرته وصدت بتوتر
تقدم وضغط على يدها بقوه
لفت له باستغراب وصدمه وهي تناظر يدها بعدين ناظرته وبهمس:رامي
رامي وهو يبتسم:احبك

الـــمــســتــشــفــــى
غـــرفـــة الــعــمــلــيــات
وصلت قمر وصدرها يرتفع وينزل:مشاري
لف لها مشاري:قمر
شهقت وهي تقرب حطت يدها على باب الغرفه:تاخروا
مشاري وهو يتنهد ويقعد:ايه اجلسي
هزت راسها بلا:ماابي
وصل ابوفهد وهو يركض وماانتبه لوجود قمر:وينه وشفيه؟
مشاري بارتباك: اجلس عمي الحين يطلع
لف وجهه ابوفهد وناظر قمر باستغراب:من انتي؟
قمر بخوف وارتباك:اا اا عمي ا
توسعت عيونه بصدمه ولف لمشاري وهو ياشر عليها:وهذي وش جابها هنا
مشاري وهو يوقف:عمي اسمع
ابوفهد بعصبيه وهو يلف لقمر:انقلعي عن وجهي بسرعه بعدي عن ولدي خلاص انتي ماتفهمين انا متاكد انه هنا بسببك
شهقت قمر بقوه:ااه عمي لاتقول كذا انا مالي ذنب
ابوفهد بعصبيه:اووص ولا كلمه وانقلعي اشوف (مسكها من ذراعها ودفها بقوة) خلاص اطلعي من حيااتنا انتي ماتفهمين شوفي ولدي وش صار فيه كله من وراء راسك
مشاري بقهر:عمي (ركض لقمر) فيك شيء؟
قمر وهي تشهق:طيب اا بس خلني اشوفه بس ابي اتطمن عليه
ابوفهد بصراخ:انتي غبيه اقولك انقلعي لاوالله لاوريك نجوم الظهر
هزت راسها بايه وهي تشهق لفت وجهها وهي تبكي بقوه احساس غريب الالم اهانه قهر وذل وخوف حطت يدها على فمها تمنع شهقاتها تتطلع و ركبت السياره:روح للمزرعه ااه ااه

الـــمـــزرعــــــه
ناصر وهو يدخل بالدباب:هيه سدديم
لفت سديم وهي على الدباب ومعها نور:هلا
ناصر:يلا جيبوا الدبابات خلص الوقت
سديم:طيب بس مدري وين البنات؟
كان بيتكلم بس قطع عليه صوت جواله ورد:الو..هلا يبه..ايشش؟..متى وين..اها طيب جاي يلا
سديم بخوف:وشفيه؟
ناصر:يقول ان اميره طاحت واخذها رامي للمستشفى وطلع عندها شعر
سديم:ياعمري وانت بتروح لهم؟
ناصر:ايه وقولي للبنات يرجعون الدبابات لعبدالعزيز عشان يوديها لراعيها
سديم:حاضر (لفت لنور) ياحياتي يااميره مادرينا عنها
نور وهي تتامل ناصر:ايه ياقلبي هي خلينا نروح ندور البنات ونشوف عبدالعزيز
سديم وهي تمشي:يلا

ســـيـــاره تـــركـــــي
وسن وهي ميته بكى:ااه اااه اسرع تركي
تركي وهو يتلفت يحاول يدور السياره: اف
وسن بسرعه وهي تاشر:شوف هذيك هي
لف تركي لجهه السياره واسرع يمها

ســـيـــاره فــــارس
وقف بسرعه:انزلي
ناظرته ساره بحقد ونزلت بسرعه وهي تشوفه يمشي بااسرع ماعنده
وقفت سياره تركي ونزلوا
وسن وهي تضم ساره:فيك شيء سوا لك شيء؟
تركي وهو يصارخ:اركبن بسرعه بنحلقه
ساره بتعب:لا تركي اتركه
تركي بعصبيه:وش اتركه اركبن بسرعه
ساره:قلت لا ماسوى لي شيء ااه
وسن وهي تناظر تركي هزت راسها بايه وضمت ساره:ياروحي اركبي تعالي ( فتحت لها باب السياره الخلفي وركبتها)
تركي بهمس:مايصير اتركهم
وسن:خلاص ااه انا بعد تعبانه وكيفهم نبلغ الشرطه عن رقم السياره وانتهينا
هز راسه بايجاب مع انه كان وده يحلقهم ويوريهم شغلهم:اركبي
ساره بهدوء:تركي ووسن تكفون لااحد يدري ااه
تركي:ابشري
وسن وهي تتلفت وتتامل ساره اللي عيونها معلقه بالشباك بهدوء تنهدت ورجعت لفت لوجهها وحطت يدها فوق يد تركي وهي تضغط عليها
لف لها تركي باستغراب بس حس انها خايفه ضغط على يدها بقوه وابتسم لها
ناظرته وسن واخذت نفس عميق بتعب ..

الــمـــزرعـــــه
دخلت قمر وهي تغسل وجهها واستغربت الهدوء دخلت الصاله وشافتهم متجمعين:فيه شيء؟
نور وهي تاقف:انتي وينك؟
قمر بهمس:بعدين اقولك وشفيه؟
نور:اميره طاحت من الدباب وصار فيها شعر والحين بتجي بالطريق ووسن وساره ماندري وينهم
دخلوا وسن وساره ويحاولن يكونون طبيعات:السلام عليكم
ام سديم:انتن وينكن؟
وسن بسرعه:رحنا مع تركي نتمشى شوي حول المزرعه وجينا
سديم:طيب اجلسوا
ساره بارهاق:انا بروح انام
سما:ماانتي منتظره اميره؟
ساره باستغراب:وشفيها؟
سما:طاحت وصار فيها شعر الحين بتجي
ساره:اها طيب اجل بروح اتروش واغير واجي

غـــرفــــه الــبــنـــات
وقفت وهي تفصخ عبايتها وترميها بقوة ع الارض بقهر شقهت وهي تحط يدها على فمها طاحت على ركبها وهي تناظر المرايه قدامها وشلون بلوزتها منقطعه مسكتها بيدها ودخلت الحمام تركض شغلت الدش بسرعه وصارت تحته وهي لامه يدينها لجسمها بقوه وهي تشهق وتمسح فمها بقوة لين صار احمر وهي ترجع تتذكر اللي صار

طاحت ساره على الارض من الصدمه وهي تفرك فمها
بلع ريقه ووقف تقدم لها ومسكها ويتفدا يدين ساره ورجلينها اللي تتحرك بكل جهه لصق ساره بالجدار
ساره وهي تتدفه بااقوى ماعندها صرخت بقهر :اتركني
وقف وصدره يرتفع وينزل وعيونه عليها بتتدقيق
حاولت تلم عبايتها وهي تسكرها
تقدم لها ومسك وجهها بقوه ورفعه له وصار وجهه قريب حيل لوجهها لدرجه انه انفاسهم تخالطت:طول عمري البنات يرتمون تحت رجولي وانا امشي واخليهم(عقد حواجبه) بس انتي اول وحده ترفضني (دفها بقوه على الارض) وانا اا(بلع ريقه) مااجي وحده ماتبيني بس (رفع حاجبه) حبيت اعلمك من انا واكسر راسك (ناظرها وبسرعه مسكها من ذراعها وركبها السياره وسحب طرحتها اللي بالارض ورماها عليها وركب ومشى بكل سرعته)

صحت وهي تشهق نزلت للارض وترجف بقوه لمت جسمها وغمضت عيونها:ااه اااه ااه انا بخير الحمد لله

الـــمــــزرعــــــه
الــصـالـــه
ماكان يتكلم الا الحريم الكبار اما البنات فكل وحده مشغوله بتفكيرها
قـــمـــــر
كانت معقده حواجبها والدموع تغارق بعيونها """ياترى طلع من العمليات والا لا هو بخير والا لا وش صار عليه ياربي ااه ياليتك ياعمي بس تركتني اتتطمن عليه بس اشوفه لو من بعيد ااه لازم اكلم مشاري واتتطمن عليه""

ريـــنـــاد
وهي تبتسم"""وه بس يالبيه هو وغيرته يخق ااه معقوله يبادلني الشعور اف وشلون طيب ادري اذا يحبني او لا طيب لو طلع مايحبني (تحولت ملامحها للخوف) لالالا اكيد يحبني اكيد ااف لا مو اكيد ياربي""

ريــــوف
"""انا وش ذنبي عشان يهاوشني اصلا انا الوحيده اللي كنت رافضه الفكره ااف من جد سخيف بس (ابتسمت بخجل) كان يجنن يوم اعتذر لي ااه يحبني ايه اكيد ااه واخيرا ياريوف صار فيه احد يحبك ومو أي احد معاذ اااه فديته (ضحكت بينها وبين نفسها)""

وســــــــــن
"""اااه لين متى بنظل انا وتركي كذا هو يحبني وانا بعد احبه (ابتسمت وهي تتذكر وشلون اول مالقاها صار يضمها ويبوسها بخوف عليها) خلاص لين متى بخاف لين اخسره؟ (خافت من فكرة انها تخسره) لالا بااذن الله بتغير كل شيء""

نـــــور
""ااه مؤدب وهادي وخجول ومغرور (ابتسمت بقوه) وحلو كل الصفات اللي ابيها فيه اه فديته بس لحظه يانور انتي وين وهو وين ااه لاتحلمين كثير بس وش اسوي بقلبي اللي حبه ""

مـــنـــيــــره
تنهدت وهي تتذكر موقفها مع عبدالعزيز لما رجعت الدباب
نزلت منيره ريناد عند المدخل ومشت ترجع الدباب نزلت بهدوء منه وهي تشوفه
عبدالعزيز وهو يحط يده فوق يدها اللي كانت توها على الدباب
رفعت راسها له بصدمه:اا اا
كان يناظر عيونها بتدقيق:منيره لو قلتك سامحيني وانا ابي اتزوجك بتوافقين؟
حست وكان احد عطاها كف بلعت ريقها بقهر وسحبت يدها بقوة ومشت وخلته
"""وش قصده انه راحمني عشاني احبه اشفق علي قال اتزوجها اه لا ياعبدالعزيز انا مو سهله كذا وراح اوريك منيره الجديده عشان تعرف وشلون تتعامل معي كذا""عضت على شفايفها من القهر ..

ســـديــــم
وهي ماسكه جوالها وتتامل صورة مهند""وين رحت ياحمد معقوله قلبك رضى يتركني كذا اه تتركني لواحد نذل ااه تكفى ارجع ارجع""

دخلت اميره ومعها ناصر اللي تنحنح وتغطوا وقفوا كلهم وبدوا يسلمون عليها
وجلسها ناصر
نزلت ساره اخذت نفس ""لازم اصير طبيعيه لازم"" ابتسمت وهي تضم اميره:ياحياتي انتي
ضحكت اميره وصاروا يسالفون بحادثه اميره ويسالونها ماعدا ساره اللي ساكته بهدوء
جلست وسن جنبها وبهمس:فيك شيْ؟
ابتسمت ساره:لا
وسن وهي تتنهد:اكيد مااسوى لك شيء؟
ساره وهي تهز راسها:اكيد
ابتسمت وسن وهي تضغط على يدها:الحمدلله

بــــيـــت ابـــوســلــمــان
غــــرفــــه حـلا
شهد بزعل:طيب يمكن هم كذا متعودين؟
حلا بقهر:يعني ماشاء الله متعودين يبسون بعض؟
شهد وهي تبتسم:ياالله كل هذا غيرره؟
حلا وهي تاقف وهي تكتف يدينها:ايه غيره هو حبيبي وزوجي ماكان مفروض يسوي كذا
شهد:وهو وش دراه انتي قلتي له؟
حلا وهي تتنهد:لا
شهد:خلاص شوفي انا مااقول ارضي بسرعه بس تفاهمي معه وشوفي وش عنده ووش ماعنده (ابتسمت ومسكت حلا من كتوفها ولفتها لها) حبيبتي جربي وش راح يضرك اذا شفتي وش عنده تكفين طيب عشان خاطري؟
تنهدت حلا وهي ماده بوزها وتتامل شهد هزت راسها:طيب
ابتسمت شهد وضمتها بقوه:ياروحي انتي (تركتها) اجل بروح اقول لخالتي (و نزلت)
هزت راسها حلا وقعدت على السرير: اه يارب ساعدني (غمضت عيونها وانسدحت بتعب وتفكير)

الـــمــــزرعـــــه
كانوا يجهزون اغراضهم ويحطونها بالسيارات وكلن يجمع اغراضه عشان بيرجعون
ام ناصر:والله انبسطنا حيل باذن الله نعيدها ثاني مره
ام فواز:ايه والله صادقه ماشاء الله انتوا ناس ماينمل منكم ابدا
وصاروا يسالفون الحريم
بعدت قمر وهي تتدق الارقام بسرعه:هاه مشاري بشر؟ (تنهدت براحه ودمعت عيونها) الحمدلله تكفى مشاري لاتقوله اني جيت
مشاري بصدمه:ليش؟
قمر:ماابيه يتضايق عشان ابوه تكفى
مشاري وهو يتنهد:طيب براحتك عاد انا بروح اشوفه تبين شيء؟
قمر:انتبه له
ابتسم مشاري:ابشري يلا مع السلامه
قمر:مع السلامه (سكرت وضمت الجوال لصدرها ""ياترى بنلتقي والا لا ياترى بنتزوج والا لا اه"")

الــمــســـتــشــفـــى
كانوا كل اهل فهد موجودين ويسالفون بهدوء الا هو ساكت ومعقد حواجبه ""معقوله ماسالت لالا اكيد كلمت مشاري اكيد اااه""
ابوفهد بعصبيه:الكلب ترا بمركز الشرطه وبيجي الضابط بعد شوي ياخذ اقوالك
ام فهد بضيق: بس لو تقول لنا ياوليدي على ايش تهاوشتوا؟
تنهد فهد وسكت بهدوء
ابوفهد بعصبيه:اكيد عشان بنت الشوارع والا ولدي متى عمره عرف هالسوالف
غمض عيونه فهد بضيق
ام فهد وهي تناظر ابوفهد بمعنى اسكت وسكت
فهد""انا محتاجك ياقمر محتاجك""

الـــمـــزرعـــــــــه
كل عيله ركبت السياره والهدوء والتعب هو سيد الموقف كل واحد مشغول بشيء ياانه نايم او دايخ او يفكر !

ســـيـــاره تـــركــــي
وسن وهي تلتفت لجوري اللي نايمه بالكرسي الخلفي ابتسمت ورجعت لفت لقدام:اا اا
ناظرها تركي باستغراب:وشفيك؟
وسن بخوف:لالا مافيه شيئ هههه (صدت""الله يأخذني وشفيني سكت اااف"")
وقفوا عند الاشاره وكانت زحمه شوي عقدت حواجبها وسن وهي تحس فيه شيء غريب لفت لجهه تركي اللي يناظر وشافت بنات راكبات مع سواق وفاتحين الشبابيك ووحده منهن حاطيه يدينها على الشباك ومراكيه راسها عليه وكاشفه كانت مزيونه تهبل وتضحك وغمزت لتركي وصاروا اللي معها يصارخون ويغنون
وسن بعصبيه: وش تناظر؟
لف لها تركي:ولا شيء
وصلوا البيت نزلت وسن بسرعه وعصبيه
استغرب تركي:وشفيها؟ (نزل وشال الجوري وودها فوق ورجع ياخذ الاغراض ونزلها وطق باب الغرفه) وسن وسن
وسن بقهر: وش تبي؟
تركي:ابي اتكلم معك
وسن:روح تكلم معها كان اخذت رقمها احسن
تركي باستغراب وصدمه:من هي (فجاه تذكر) قصدك البنات؟(ابتسم بفهاوه)تغارين علي؟
انقهرت وسن وبخجل:لا روح مااني فاتحه الباب
ابتسم تركي وبصوت يخق:اقولك شيء؟
بلعت ريقها وسن وهي تقرب لباب:امم لا(وهي تبتسم""قول قول"")
تركي بابتسامه:اها اجل براحتك ..

وسن وهي تفتح الباب وتشوفه مشى كم خطوه:تعال قول
لف لها وابتسم قرب لين صار قدامها وقرب اكثر وهو يناظر عيونها وقرب لين لصقت هي بالباب وحط يدينه حولها:ماتملى عيوني من البنات الا انتي ومايلفت انتباهي من كل بنات الدنيا الا انتي وماتمنيت اكون زوج الا لك (ويناظر لها بنظرات تخق وابتسامه تذوب)
وسن بصدمه وفهاوه وخجل:جد؟
هز راسه تركي:ايه جد
بلعت ريقها وسن بتوتر وهي تنزل راسها تحبه ايه بس ماتبي قربه وبنفس الوقت تبيه هي تبيه بس شيء داخلها يتقرف او مايحب قربه
نزل راسه تركي لشفايفها بهدوء
بس وسن لفت وجهها وهي تبلع ريقها
بعد وجهه وعض على شفايفه السفليه وبهمس:اسف
هزت راسها وسن بلا: لا
انصدم من صوتها المبحوح:وشفيك؟
وسن وهي تناظر له:انا اللي اسفه ابيك بس شيء دااخلي ااا (وبدت دموعها تنزل) اتذكر الماضي اا
حط يده على فمها:اش (ابتسم ومسح دموعها بيدينه ومسك خدودها بين يدينه) عادي انا مستعد انتظرك طول العمر راح انتظرك لين تكونين جاهزه
ناظرت عيونه وسن بهمس:جد؟
تركي وهو يوسع ابتسامته:طبعا جد
هزت راسها وسن وابتسمت بقوة

بـــــعـــد مــرور يــومــيــن

بـــيــت خـالــد الــراســي
جـــنـــاح قـــمـــــر
كانت ماسكه جوالها ورايحه جايه فيه هذا ثاني يوم يمر وفهد مايرد عليها قعدت تبكي مسكته ثاني مره ودقت و وقفت وهي ملهوفه:فهد وينك ماترد علي
تنهد فهد وسكت شوي بعدين قال:اشوفك تفقديني والا لا؟
انصدمت قمر وبفهاوه:فهد وش قاعد تقول انت تتدري اني مقدر اعيش دونك
تنهد فهد:ايه
قمر بقهر:فهد وشفيك؟
فهد بعصبيه:دخلت المستشفى وطلعت ولا فكرتي تسالين وتقولين لي وشفيك؟
قمر بعصبيه وبلحظه كانت بتقول انها جت:انااا  (سكتت شوي بعدين قالت) ماقدر اجيك بعدين انا كلمت مشاري وتتطمنت منه
فهد:انا يوم دخلتي المستشفى رميت كل الناس بالجدار وجيت يعني انا مستعد اضحي بنفسي وانتي لا؟
قمر وهي تغمض عيونها ""خلاص يافهد خلاص"": انا اسفه اسفه كذا يرضيك؟
فهد وهو يبلع غصته:لاتبكين
شهقت قمر بقوة وبقهر:تبكيني وتقول لي لاتبكين
فهد بندم:خلاص حبي بس كنت ابي اعلمك لاني كنت منقهر منك تكفين خلاص اسكتي
شهقت قمر بقوة وهزت راسها:طيب
تنهد فهد وابتسم:طيب وش سويتوا بالمزرعة ؟
قمر: فهد ليش تضاربت مع مروان عشاني؟
تنهد فهد:ايه طلع هو اللي علم ابوي عنك
قمر بقهر:جد نذل
فهد:ايه
قمر:بس ماكان مفروض تسوي كذا لو لاسمح الله صار لك شيء انا وش اسوي بدنيتي؟
ابتسم فهد وبمزح:تموتين؟
ضحكت قمر بقوة:هههههه يااي ياالواثق
فهد:ههههههه فديت هالضحكه
ابتسمت قمر بخجل:ايه هههههه

بـــــيــــت ابــوحــلا
الـــمــجــلـــس
وقف سلمان وهو يشوف حلا وابوحلا يدخلون
ابتسم ابوحلا:انا بتركم تتفاهمون مع بعض (وطلع وهو يسكر الباب)
تقدم سلمان لحلا وهو يبتسم:اشتقتلك
ناظرته حلا بقهر وكتفت يدينها:ايه
سلمان وهو يبتسم وبهمس:ماشتقتي لي؟
حلا بدلع:لا
سلمان:افا
سكتت حلا وماردت عليه
تنهد ومسكها من كتوفها:حلا
رفعت عيونها وناظرته بهدوء
سلمان بخقه:احبك
ناظرته حلا بلحظه كانت بتضعف بس بعدت يدينه وقعدت:لا انت ماتحبني انت تحب بنت عمتك هذيك روح لها(بقهر) وبعدين يوم كنت ببيتك ماحبيتني بس لما صرت ببيت اهلي حبيتني؟
تنهد سلمان وجلس:حلا انا دريت انك حلا حبيبتي
رفعت راسها له بصدمه وفهاوه:هاه؟
سلمان وهو يناظر عيونها هز راسه ومسك يدها:انا اسف واسف لاني ضايقتك بس حنا متربين وكذا متعودين بصراحه بس عشان هالعيون والله مااعاد اقرب لهم(ابتسم) انا اعشقك حلا واموت فيك ولا وحده فيهن تسوى ظفر رجلك (ابتسم) الصغير بعد
ضحكت حلا بخفه وسكتت
سلمان وهو يبتسم:هاه حبي ترجعين ونفتح صفحه جديده؟
حلا وهي تبتسم:ايه
توسعت ابتسامة سلمان وباس يدها بقوه:يلا جهزي اغراضك وخلينا نروح لبيتنا
هزت راسها حلا وطلعت تتجهز ..

بــــيــــت ابـــوســديـــم
ططططاااااخ
كان صوت الكوب اللي كان بيد سديم وهي تسمع كلام ابوها ويتكرر براسها ""ملكتك الخميس الجاي""
ام سديم بخوف:بسم الله عليك يمه (وهي تمسك بنتها)
ابوسديم:وشفيك؟
تجمعت الدموع بعيون سديم وراحت تركض لجناحها ولحقوها خواتها

الـــــفـــنـــــدق
دخلوا سلمان وحلا وهي تلتف له:ماشاء الله يعني كنت واثق اني بوافق؟
ضحك سلمان وهو يفتح باب غرفه النوم:طبعا
حلا وهي تتدخل:ههههه ومزينه بعد (كانت كل الغرفه ورد احمر جوري وعلى السرير قلب ابيض مكتوب داخله بالورد الجوري اسف حلا) واثق حيل؟
ضحك سلمان وهو يقرب لها:وفيه احد صاحي يرفض يجي معي؟
ضحكت حلا بدلع:هههه مغرور
قرب لها ولف يدينه حول خصرها ورفعها بحيث يصير وجهها فوق وجهه:احبك
ابتسمت حلا بقوه:وانا بعد ..

بـــيـــت خــالــد الــراســـي
مــكــتــب خــالــــد
دخلت اميره وهي تبتسم:هلا يبه
خالد وهو يوقف ويمسك يدها ويساعدها تجلس:هاه وشلون رجلك اليوم؟
اميره:احسن امر يبه وش بغيت؟
خالد: رامي خطبك مني ثاني مره هاه وش قلتي؟
سكتت اميره بتوتر وقلق وخوف وارتباك
خالد:شوفي يابنتي الرجال مايخطب مرتين بنت رفضته ويذل نفسه الا انه يبيها بجد وشاريها هاه وش قلتي؟
رفعت اميره راسها لابوها:موافقه
ابتسم خالد ووقف وطلع من وراء المكتب وضمها بقوه وباس راسها:مبروك يابنتي هههه والله وكبرتي يااميره وبتتزوجين (مسكها من كتوفها) ياالله قسم اتذكرك وانتي عمرك 3 سنوات وتركضين (نزل راسه)ااه دنيا
ضحكت اميره وضمت ابوها:عقبال ناصر وعبدالعزيز
ضحك خالد:وقمر بعد ان شاء الله اما عبدالعزيز وناصر شكلي بحاشرهم واخطب لهم
اميره وهي تبعد:هههههه

بـــيــت ابــوســديـــم
جــنــاح ســـديــــم
كانت تبكي وضامتها ريوف بقوه:بس ياروحي خلاص قطعتي قلبي
سديم وهي تشاهق: ااه الله ياخذ روحي قبل ماادخل عليه
شهقوا ريناد وريوف اما ساره كانت ملتزمه الهدوء
ريناد:مجنونه انتي بسم الله عليك جعله هو اللي باحادث
ساره وهي تاقف تبي تتطلع
ريوف بقهر:ساره وين رايحه؟
ساره وهي تلفت:كم مره انا نبهتكم لاتحبون الرجال بس وحوش متعطشه للحريم كل وحده حبت تتحمل اللي بيجيها (وكملت طريقها وهي تصفق الباب وراءها)
ريناد بقهر:هذي وش جاها (لفت لسديم) لاتهتمين سدومه ساره تقول كذا عشانها منقهره عليك
ريوف:ايه صادقه ريناد (وضمت سديم بقوة)

بـــرا جــنـــاح ســديـــم
كانت مراكيه ظهرها على الباب ومغمضه عيونها ""تقولون كذا ياخواتي لانكم ماشفتوا اللي انا شفته ماكان بيني وبين ضياعي الا شعره وحده اااه مافيه حب مافيه كله كلام وبس "" صارت تمشي بغضب لجناحها وهي ماسكه دموعها لاتنزل""ماراح تنزل دموعي عشان واحد تافه زي هذا ماراح تنزل""

بــــيـــت خــالــد الــراســي
جـــنـــاح امــيــرة
دخلت قمر وهي تتلوش باستهبال:كلوش الف الف مبروك يابطه
اميره:هههههههه اسكتي فضحتينا
قمر وهي تضحك ضمت اميره:مبروك يابعدي ههههه واخيرا مابغيتوا
اميره:هههههه
دق جوال قمر برساله فتحتها وهي تبتسم بس الابتسامه اللي كانت على شفايفها اختفت
اميره وهي تعقد حواجبها:وشفيك من اللي مرسلك؟
قمر وهي تبلع ريقها وتقرا الرساله""انتي مصدقه ان فهد يحبك فهد بس يبي منك سـ ـ ـ ويرميك بعدها وتراه بيتزوج الشهر الجاي ويحب خطيبته واذا مو مصدقتني بكرا الساعه 4 العصر برسلك صورته مع خطيبته"""
سحبت اميره الجوال وهي تقرا وبفهاوه:من مرسلك هالرساله ومعقوله صدق؟
قمر وهي تبلع ريقها وتهز راسها بلا:لا مستحيل فهد يسوي كذا هذا اكيد احد يكره فهد او يكرهني
اميره وهي تمسك يد قمر بقوه:ايه حبيبتي اكيد
مسحت الرساله قمر بسرعه وهي مقهوره ومتوتره
اميره:بتقولين لفهد؟
قمر:لا
اميره باستغراب:ليش؟
قمر:هو درى عن مروان بغى يروح من يديني تبيني اقوله بعد ويسوي شيء؟
اميره باستغراب: من مروان وشلون يروح من يدينك؟
صارت قمر تقول لاميره كل السالفه

الــــفــــنـــــدق
الـــســـ8:00 ص ــــاعـــــه
ابتسمت حلا وهي تحس بسلمان اللي يسحبها لحضنه ويضمها بقوة:اصحي
حلا وهي تفتح عيونها بتعب:حبيبي؟
ابتسم سلمان وهو يلعب باصابعها:عيونه وقلبه وروحه وكله
حلا بخفه:هههههه
سلمان:ماتوقعت بيوم اني باخذك
ابتسمت حلا:ولا انا
سلمان:احبك واعشقك وو
حطت اصبعها على فمه وبدلع:بس
ضحك وضمها بقوة:ياالبى اللي يستحوون فديتك ..

بــــيـــت ابـــوســـديــــم
رغد وهي تركض وتصارخ:خواتي
طلعوا يركضون من اجنحتهم بخوف ووقفوا بالممر:وشفيك؟...وش صاير؟..تكلمي
رغد وهي تناظر لهم ببرود:اميره انخطبت ووافقت وفيه عزيمه ببيتهم تجهزوا
ريوف بفرحه:جد (وبمزح مع رغد) وليش تصارخين كذا تعالي(صارت تحلقها وهي تشيلها وتتدور فيها)
ابتسمت ساره ابتسامه باهته ولفت لسديم اللي ساكته وباين التعب عليها بس لما طاحت على شكل ريناد ماقدرت تمسك نفسها من الضحك: ههههههه وش مسويه بعمرك انتي؟ (مسكت بطنها وهي تتطيح على الكنب وراءها)
لفت ريوف وهي شايله رغد للريناد وضحكوا:هههههههههه
حتى سديم ابتسمت بقوة وضحكت:هههه رنوده وش هذا؟
ريناد بعصبيه وهي تناظر نفسها كانت لابسه شورت ابيض ومبقع بلون بيج غريب!ورافعه نص شعرها بربطه ومنتفش والنص الثاني مستشور بنعومه وبين كل اصبع برجولها والثاني قطنه وحاطه خلطه بيضاء على وجهها وماسكه بيدينها علبه المناكير مدت بوزها:خرعتني رغد كنت اتزين
ساره وهي تسمح دموعها من الضحك:هههه هه اه اه طيب تتزينين ليش شورتك قلب لونه كذا؟
ريناد وهي تمد لسانها لساره:عشاني بنت ذوق واتكيت مخصصه لبس معين للخلطات وماتتوسخ ملابسي
سديم:هههه طيب هذي فهمناها ياالذوق علبه المناكير شايلتها معك ليش؟
ريناد وهي تناظر للعلبه اللي بين يدينها:هاه مدري كنت ماسكته ولما صرخت رغد ركضت دون ماانتبه
ريوف:هههههه وشعرك بسم الله وشفيه كذا؟
ريناد:قاعده استشور  سخيفات (دخلت جناحها وهي تصفق الباب بكل قوتها)
ناظروا بعض وبخوها ضحك وبدوا يعلقون على ريناد
اللي فتحت الباب:هيه تراني اسمعكن
ساره:واذا تسمعينا؟ههههه
ريناد بعصبيه:ساره والله اضربك
ساره وهي تقلد صوت ريناد:ياربي تضربني تعالي
ضحكت ريناد بمكر وسحبت بااصابعها من الخلطه اللي بوجهها وصارت تلحق ساره
صرخت سارة وهي تركض: يع ريناد بعدي عني
سديم:ههههههههه تستاهلين من قالك تهايطين؟
نقزت ساره فوق الطاوله بس زلت وطاحت:اااااح
ركضوا كلهم لها:ساره
مسكت رجلها:ههههه اي ..
صاروا يضحكون على شكل ساره اللي بالارض والطاوله مقلوبه جنبها

شــقـــه تــركـــي و وســــن
تركي : وسن ماخلصتي (ودخل) وشفيك؟
وسن وهي تلف له:هاه لا بس عجزت اسكر السحاب
حك تركي شعره بارتباك:تبين اسكره؟
وسن بسرعه:لالا بروح اغيره (مشت خطوه ووقفت وهي تاخذ نفس لفت وهي تشوفه بيطلع) تركي
لف لها باستغراب بس شافها عطته ظهرها قرب لها لين صار وراءها بالضبط وسكره بسرعه وبعد كم خطوه لوراء
لفت وسن وهي تبتسم:هاه وش رايك حلو؟
ابتسم وهو يشوفها بالفستان الاسود الساده  ابتسم بقوة:يهبل (تنحنح وهو يزين شماغها وغمز لها ) وانا؟
ضحكت وسن بخفه:تهبل
ضحك وهو يمد يده:نمشي؟
ناظرت يده وناظرته وهي تهز راسها ومسكت يده وهي مبسوطه

بـــيـــت خــالــد الــراســـي
مــجــلــس الــرجــال
ناصر:كلمت فواز واهله؟
عبدالعزيز:ايه كلمتهم وخالتي (يقصد ام ناصر) كلمت ام منيره
ابتسم ناصر:عاد الحبيبه لازم ههههه
ضربه عبدالعزيز بكوعه:هههه كل تبن
ابتسم خالد وهو يتاملهم من اول المجلس وهم يضربون بعض ويضحكون
ابوسديم:ههه عاجبينك؟
لف خالد لاخوه:هههه حيل واخيرا ارتحت وانا اخوك
ابوسديم وهو يطبطب على يد اخوه:جعله دوم
خالد:امين

مــجــلــس الــحــريــــم
كانوا حاطين دي جيه ومشغلين اغنيه هزي هزي اعلى شيء
صرخوا البنات وهم يغنون ويستهبلون معه
وقفت ريناد وهي تربط ربطه مصريه وعليها دنانيش<<اللي تتطلع اصوات>>
صاروا يصارخون لريناد اللي بدت تهز بدلع وغنج سحبت ريناد وسن:يلا يلا
وسن:ههههههه لالا
ريوف:يلا وسن
ضحكت وسن وهي تشوف قمر تربط عليها طرحه:هههه مشتغله اليوم قمر رجال عندنا
قمر:هههههه خبره
وسن وهي تبدا تهز بخصرها بنعومه وشاركتها ريناد وهن يستهبلن
ساره وهي تسوي نفسها اغمى عليها وتتطيح على اميره وتتدفها اميره وتصارخ
اميره:ههههه ساروه قومي مو من خفك
ساره: انا خاقه الحين
سديم:ههههه خقي بعيد
منيره وهي تضحك:ههه سارونه تعالي خقي عندي
ساره وهي تركض لمنيره وتضمها:يالبيه شوفوا الذوق

وكملوا كل السهره مابين استهبال ورقص ووناسه

بــــــيــــت ابــوفـــهــــد
ماكانوا اقل وناسه من بيت خالد لان بكرا ملكة مها ومشاري واللي يركض يرتب ومشغلين البنات الاغاني ويضحكون ويسالفون ويعلقون على مها اللي مابين تهاوشهن او تضحك بخجل
دخل فهد وهو يضم مها:مبروك ياروحي
مها:الله يبارك فيك عقبالك
ابتسم فهد ابتسامه باهته:وابوك يرضى؟
حزنت مها على اخوها:الله كريم
هز راسه بايه:الله كريم (ابتسم وبمزح) اهم شي انبسطي ترا بكرا بتتدخلين بيت الزوجيه وكله كرف وطبخ وهواش وو
نواره:ياويلي هذا انت مو اخوي وه بس فديت قلبه والله لايدلعها
فهد وهو يبي يقهر نواره:تعلميني بااخوك اعرفه قبل ماانتي تعرفينه؟
ضحكوا البنات على نواره اللي وقفت بحماس: فهد لاتسب مشوري
فهد:هههه من زينك انتي ومشوري اخوك احمدوا ربكم عطيناكم اختنا (وضم مها من الجنب)
نواره:عشتوا من زينك انت واختك (وكشت عليهم)
ضحكوا بقوة على حركة نواره اللي من قلب
فهد:هههه ياحليله مشاري مستانس هناك يرقص لحاله نفس تركته ههههههه
نواره:يالبيه ياخوي شفت وشلون يحب مهاوي؟
ابتسمت مها بخجل""الله يخليه لي يارب صدق اني كنت غبيه وشلون كنت بضيعه من يديني"""

كانت واقفه بمسافه بسيطه عنهم وهي تناظر لهم عدلت فستانها الضيق و دخلت وهي تسوي نفسها ماشافت فهد:السلام ااه
لفوا كلهم لها وحتى فهد وناظرها من فوق لتحت ولف وجهه وطلع
نواره بعصبيه:نجوى ماشفتي فهد؟
نجوى بدلع وكانها مصدومه:لا والله ماشفته يوه فشله لايكون شافني؟
ناظرتها منى من فوق لتحت وبهمس:ياكرهي لها
خوله:وانا بعد ااف

الـــمـــطـــــــــار
وقف وهو يسمع النداء الاخير لرحلته للندن تنهد وهو ماسك بيده التذاكر وقف وهو يمدها للموظف:شكرا
ابتسم له الموظف:تفضل
مشى خطوه ووقف ولف وهو يتامل الديره اللي مايدري متى بالضبط بيرجع لها تنهد """مع السلامه سديم"" مشى بالممر اللي يؤدي للطايره وهو يناظر صورة مهند ابتسم بقوى ""برجعك بابا بس لما اصير جاهز"" تنهد وهو يدخل الصورة ببوكه ويدخل الطايره جلس بمكانه وهو يتامل المطار من النافذه:انتبهي عليها يالشرقيه انتبهي عليها تراك فيك اغلى اثنين على قلبي

بـــيـــت خــالــد الــراســـي
جــنــاح قــــمــــــر
كانت جالسه على السرير ناظرت ساعتها شافتها 4 بالضبط تنهدت وصارت تتامل جوالها اللي على التسريحه بلعت ريقها وهي تسمع صوت رساله وقفت بتوتر وخوف تقدمت وسحبته فتحت الرساله وصارت ترمش بصدمه وذهول
دخلت اميره مستعجله وهي ماسكه بيدينها فستانين:قمر البس هذا والا هذا بملكتي؟ (رفعت راسها واستغربت وجهه قمر)وشفيك كان مافيه دم بوجهك؟
بلعت ريقها قمر وناظرت اميره ومدت لها الجوال
نزلت الفساتين بسرعه وسحبت الجوال انصدمت وهي تشوف صورة فهد وهو قاعد مع بنت بالمطعم وماسك يدها ومبتسم:من هذي؟
قمر والدموع تنزل على خدودها: هذي منى بنت عمته
اميره اللي مو قادره تستوعب:يعني وشلون هم مايتغطون عن بعض؟؟
قمر بصراخ: الااا ليش ليش (بدا صوتها يهدى) ليش يسوي فيني كذا؟
اميره وهي ترمي الجوال على السرير ومسكت قمر من كتوفها:اهدي حبيبتي ماتدرين يمكن مو صدق كلميه وشوفي وش عنده اساليه
قمر وهي تهز راسها بلا:لا انا لازم اقابله ايه لازم اشوفه
اميره:وشلون تشوفينه؟
قمر بصراخ:باي طريقه انا مو قادره ااقف كذا وماسوي شيء(اشهقت) اميره انا خسرت كثير بحياتي مااني مستعده اخسره
اميره بضيقه على اختها ضمتها:لاتقولين كذا حبيبتي ماراح تخسرينه ان شاء الله
شهقت بقو وهي تضرب صدرها:بس ليش هذا(تقصد قلبها) يقول لي غير كذا؟
اميره:بس ياروحي هذا كل افكارك وبعدين هذا اللي مرسله يبي يخرب بينكم بس شوفي (بعدته عنه) انا بقول لابوي اننا بنروح ندور لنا فستان وانتي كلميه وخليه يجي للسوق وش رايك؟
هزت راسها قمر:ايه
مدت لها اميره جواله:خوذي
سحبت قمر جوالها اخذت نفس وكلمته ..

بـــيـــت ابـــوفــهـــد
كان نازل من الدرج وهو مبسوط ويغني ماهو مصدق انه بيشوفها
مها وهي تبتسم:ماشاء الله وش هالزين كانك عريس
ضحك فهد:ههههه جد شكلي زين؟
مها وهي تقرب له وهي مبتسمه:ايه والله بس على وين ان شاء الله؟
قرب لها وهمس باذنها:بشوف قمر
مها وهي تشهق:جد؟
هز راسه فهد بحماس:ايه
مها وهي تبتسم بقوه لاخوه:اشوا انبسط
غمز لها:هههه لاتوصين يلا باي
مها:باي فهد لاتتاخر ترى (وبخجل) اليوم ملكتي
ضحك فهد:هههه لالا لاتخافين ماراح اتاخر
صارت تتامل اخوها وهو طالع حست بضيق ""الله يحنن قلب ابوي عليك""

لـــنــــدن
طلع جواله وهو يدق على وجد:الو
وجد:اهلين
حمد بهدوء:وشلونك وشلون مهند وسلطان؟
وجد:كلنا بخير انت وشلونك؟
حمد:بخير وين مهند ابي اكلمه
وجد:طيب لحظه (نادت ولدها)خذه
ابتسم حمد:هنودي
مهند وهو ماد بوزه:بابا انت وينك تاخرت علي انت مو قلت لي انك بتجي وبنروح نلعب؟
بلع ريقه بضيق:شوف بابا انا مسافر بشغل بس ماراح اطول برجع خلاص حبيبي انت اجلس عند ماما وعمو سلطان
صار يصيح:بابا انا ابيك تعال
حس بضيقه:خلاص حبيبي خلاص
سحبت الجوال وجد من ولدها:هلا حمد
حمد:يصيح لحد الحين؟؟
ناظرت ولدها اللي يصيح بحضنها:ايه(تنهدت) حمد يمكن ماصارت لي فرصه اقولك قبل بس انا اسفه على كل لحظه جرحتك فيها
حمد وهو يبتسم:ماعليك معذوره المهم انتبهي لمهند زين مع السلامه
وجد:ابشر مع السلامه
تنهد وهو يسكر السماعه دخل جواله بجيبه وشد على جكيته وهو يشوف الناس الرايحه والجايه جلس على كرسي قريب ابتسم لحاله وهو يتذكر يوم يكلم صديقه امس وقاله ان ملكة سديم الخميس ""يعني خلاص مابقى الا يومين وتكونين له اه ابي انسى بس وشلون اطلعك من قلبي ياسديم""عقد حواجبه بقهر ووقف وهو يمشي واخفتى بين مدينه الضباب ..

الـــمــــول
كانت قاعده قمر بالكبينه ومعها اميره وهي حاطه يدها فوق يد قمر:شوفي حبيبتي تفاهمي معه بالهدوء لاتعصبين خلاص؟
هزت راسها قمر ودق جواله:الو كبينه رقم 5
وقفت اميره:انا برا خلاص اذا بغيتي أي شيء تعالي (وطلعت)
ثواني ودخل فهد وهو مبسوط حده:قمور (كان بيضمها بس هي حطت يدها بينهم بلع ريقه وسكت وجلس:وشفيك؟
تحس دموعها بتخونها مدت له جوالها:ايش هذا؟
سحب جوالها وهو يتامل الصوره: قمر لاتفهمين غلط
قمر بعصبيه:وشلون ما افهم غلط فهد لاتنرفزني
عصب فهد:وشفيك لايكون شاكه فيني؟
قمر بغصه:مو شاكه لا مدري تكفى قولي هذي الصوره صدق والا لا؟
تنهد فهد وهو يشد على قبضة يده: ايه صدق بس انا توقعت انك ناديتيني عشانك مشتاقه لي
قاطعته قمر بفهاوه:صدق وشلوون؟
تنهد فهد:قمر وشفييك تشكين فيني كانت بدون قصد كنت عازم البنات على عشاء امس عشان ملكه مشاري ومها وقاموا البنات كلهم للحمام ومابقى الا منى وجاء ولد صغير ودف كرسي منى ومسكت يدها عشان ماتتطيح بس
قمر بعصبيه:ايه مو انت ماشاءالله منقذ
فهد بقهر:قمر
تجمعت الدموع بعيونها:انا بصراحه مقهوره ومليت من حياتنا كذا
قاطعها فهد بقهر:مليتي ااها قصدك مليتي مني؟
قمر بصدمه:لا مو كذا قصدي اقصد انو طريقة حياتنا كذا مدري
قطع كلام فهد دخول اميره ناظرت فهد ولفت لقمر:قمر ناصر دق ويقول انا بجيبكم امشي بسرعه
هزت راسها ووقفت:انا بروح
رجع ظهره على الكرسي وحرك يدينه بمعنى روحي وهو يصد
تنهدت وهي تتامله وطلعت
ضرب بيده بقوة على الطاوله: اخ هذي وشلون جابت هالصوره ومن صورنا اصلا اف لين متى بنظل كذا اه (ناظر ساعته شافها 7 المغرب وقف بسرعه عشان يلحق الملكه وطلع وهو معصب ومتوتر وخايف من الجاي)

بـــيــــت ابــوفــهــــد
دخل المجلس وهو يسلم ووقف جنب ابوه
ابوفهد:وشفيك تاخرت؟
تنهد فهد وبهمس:كان عندي شغل (وجلسوا وهم يتكلمون مع الشيخ)

شــقـــه تــركـــي و وســــن
تركي وهو يقعد ويناظر التلفزيون جلست على الكرسي الثاني وسن وهي ماسكه صينيه فيها صحن كبير فشار وكوبين بيبسي وفصفص وشوكولاته نزلتها على الطاوله وقعدت على كنبه منفصله:بدا الفلم؟
تركي وهو ياخذ الكوب:هذا هو بدا
كانت وسن تتابع الفلم بهدوء وتاكل شوكولاته بس عقلها ماهو مع الفلم مع عيون تركي اللي من بدا الفلم وهو يناظر لها لفت له وناظرته
ابتسم تركي بهدوء:ودي اقولك شيء
سحبت الريموت وقصرت الصوت:قول
تنهد تركي وعدل جلسته:بس ماابيك تتضايقين خلاص؟
عقدت حواجبها باستغراب:جوري فيها شيء؟
تركي بسرعه:لالا
وسن بتوتر:اجل ايش؟
تركي وهو يراقب عيونها وكانه بيشوف ردة فعلها:وش رايك تروحين لدكتوره نفسيه؟
ناظرته بصدمه:ايش؟
تركي بسرعه وهو يوقف ويقعد على الارض عند رجولها ومسك يدينها:شوفي ماهو عيب انك تروحين لدكتوره نفسيه وبعدين انا سالت ولقيت وحده زينه مرا وتفهم بمشكلتك كثير تكفين وسن نبي نعيش مثل كل اثنين يحبون بعض (شد على يدينها وهو يناظر عيونها) ادري انك تحبيني بس تخافين مني والذكرى اللي سببتها لك ماهي قادره تختفي من بالك المشكله ماراح تختفي كذا فجاه لا اخاف تزيد تكفين وسن
بلعت ريقها ونزلت دموعها وهزت راسها:طيب
ابتسم بقوه وهو يوقف:جد موافقه؟
هزت راسها:ايه
ضمها وهو يدنق عليها بقوه:احبك
بلعت ريقها وسكتت
بعد عنها وهو يبتسم بقوه سحب الفشار وصار ياكل وهو يبتسم لها بقوه
ناظرته بتامل""لهدرجه تحبني اه هو صادق انا لازم لازم اتعالج مو بس عشانه لا عشاني بعد""

بـــيـــت ابـــوفـــهـــد
دخل فهد مجلس الحريم وهو يمد الكتاب لمها:وقعي
ابتسمت مها بارتباك ووقعت وهي تسمي
صار الكل يبارك لها ويضحكون ويسالفون
طلع فهد وصاروا الرجال يسلمون على مشاري قعد يتامل مشاري ""بيجي اليوم اللي اصير بمكانه اه وتكون عروستي قمر ياليت ياليت"""

بــيــت ابــوســديــم
مــلــكــة ســديــــم
كانوا كل البنات حولها ويحاولون يغيرون جوها بس هي ساكته بهدوء غريب
ساره بضيقه وهي تلف يدينها حول كتوف سديم:تكفين سدومه قولي شي ريحي اللي بداخلك صارخي سوي أي شيء بس لاتسكتين كذا
اميره وهي تسحب ساره:اتركيها
ناظرت ساره اميره بضيق وطلعت للحديقه

مـــجــلـــس الــرجــال
كان طالع فواز للمغاسل ووقف يزين شماغه
كانت ريناد تمشي وراء الشغاله اللي ماسكه صينيه:ايه حطيه هنا ونادي احد هالقوجيين خليهم ياخذونه
هزت راسها الشغاله ثواني ودخل هندي قهوجي وهو يشيل الصينيه
عصب فواز وتقدم لها وسحبها بقوه من ذراعها
انصدمت ريناد من اللي يسحبها كذا ناظرت لفواز بصدمه وهو تشوف ذراعها وجنبها اليمين لاصق فيه:اا ااا
بلع ريقه وهو يشوف نعومتها قمه في الانوثه:انتي متعوده تتطلعين لكل من هب ودب كذا؟
ريناد بخوف وهي تتكلم بسرعه وصوت يرجف:لالا بس هذا عاملنا و متعوده عليه بس والله
ناظرها فواز بتامل فيه شيء داخله ماوده يتركها ولا يبي تبعد عنه كان متمسك فيها لدقيقه وفكها ومشى
لفت يدها الثانيه حول ذراعها وهي تتامله لين دخل المجلس بفهاوه وهي ترمش بعدم تصديق

الـــحـــديـــقـــــه
كانت قاعده ساره على مرجيحه وهي تتنهد بضيق ""ياربي ليش يصير لنا كذا اه ليش نحب سديم حبت وماقدرت تاخذ اللي تحبه وقمر بعد وريوف ويمكن ريناد؟؟""
ابتسمت قمر وهي تضمها من وراء:وشفيها العسوله؟
ابتسمت ساره لقمر:ااه ياقمر صعب الحب
هزت راسها قمر وهي تقعد على المرجيحه الثانيه جنبها:صح صعب بس (ابتسمت وهي تناظر ساره) حلو
ساره:ايه حلو لما تاخذين اللي تحبينه بس لما ماتاخذينه يصير(سكتت شوي كانها تتدور كلمه مناسبه) يصير مر وبعض الاحيان ماله طعم
سكتت قمر شوي وهي تتامل المسبح هزت راسها:صح بس هذا قضاء وقدر ولازم نرضى فيه (لفت لساره) ايه بنتعب ويمكن نموت بس مابيدنا شيء ساره
هزت راسها ساره:ادري وعشان كذا انا متضايقه مااقدر اسوي شيء لسديم ولا حتى ريناد ولا حتى ريوف اللي مدري وش اللي يدور داخلها
تنهدت قمر ومسكت يد ساره:ماتقدرين ياساره تمسكين قلب احد عن الحب
وقفت ساره بعصبيه:وليش نسمح لقلوبنا تحب رجال تافهين مايبون منا الا شيء واحد؟
وقفت قمر بصدمه:ساره وشفيك هدي وبعدين مو كل الرجال كذا تفكيرهم
ساره بعصبيه:الا كلهم اصلا انتوا غبيات(لفت وجهها وهي تمشي بعصبيه)
تنهدت قمر وهي تتاملها كتفت يدينها""يمكن صادقه ياساره حنا غبيات يوم حبينا بس وش نسوي اه يافهد معقوله انت منهم معقوله انت ماتبي من الا ... لالا مستحيل ولو كان يبيها كان عنده فرص كثيره وكان يقدر يستغلها بس هو يحبني ااه مدري ""

بـــيـــت ابـــوفــهـــد
صار فهد يسلم على مشاري:الف الف مبروك
مشاري بفرحه:الله يبارك فيك عقبالك
ابتسم بالالم:ان شاء الله
وقف ابوفهد:لحظه يالشيخ ابيك تملك لولدي
لفوا كلهم بصدمه لابوفهد واولهم فهد اللي قال:ايش؟
ابوفهد:ايه وشفيك؟(مسكه من ذراعه وبصوت قصير) لاتفشلني قدام الرجال املك على بنت خالتك نجوى
فهد بصدمه:يبه انت وش تقول مستحيل
ابوفهد:يعني تبي تصغرني قدام الرجال؟
فهد بضياع وصدمه:لا بس
ابوفهد:لا بس ولا شيء شوف يافهد اذا ماتزوجت الحين بنت خالتك تراك لا انت ولدي ولا اعرفك
بلع ريقه بفهاوه وصدمه الموقف اكبر منه هو الحين محصور بين ابوه وقمر
ياترى من بيختار رضى الوالدين والا رضى الحبيبه؟

بـــيـــت ابــوســـديـــم
دخل ابوسديم مجلس الحريم وهو ماسك الكتاب قرب لسديم وهو يبتسم باس راسها:الف مبروك حبيبتي وقعي هنا
اخذت نفس قوي ورفعت راسها شافت خواتها وامها وكل البنات وعمانها وخوالها واهل ثامر مسكت القلم بتوتر وهي تتامل اسم ثامر وصارت تمر كل لحظه عاشتها مع حمد وصوته يرن بأذنها شهقت وهي تبكي
ناظروا لها باستغراب اهل ثامر
توتر ابوسديم:ههههه دلع هالبنات يلا حبيبتي وقعي لاتخافين
قربت القلم للمكان التوقيع شهقت وهي تاقف وترمي القلم:مقدر مااقدر(مسكت فستانها وهي تمشي بسرعه)
لحقوها البنات بسرعه
صاروا اهل ثامر يتكلمون بصدمه وهم يتناقشون بصدمه من حركة سديم
ابوسديم باحراج:هههه تعرفون حياء البنات (ناظر مرته بقوة) روحي ناديها قولي لها الدين مافيه حياء
هزت راسها ام سديم ووقفت بسرعه وهي تركب المصعد بتوتر ..

الــــفـــنــــدق
حلا وهي تمد بوزها بدلع:بيبي قولي بس وين بنسافر؟
سلمان وهو يضمها بقوه من وراء وباس خدها:قلت لك مفأجاة يلا مابقى الا ساعه ونص على ماناصل المطار
هزت راسها بدلع: اوك خلصت (سحبت عبايتها وهي تلبسها) يلا
ابتسم بقوة ومسك يدها وهو يشد عليها وطلعوا

شـــالـــيــــه
كان قاعد على الكرسي ويتامل البحر وماسك بيده بيبسي""ليش مو قادر اطلعها من بالي مع اني شفت الالاف البنات واجمل منها بس ااه فيها شيء غير عنهن كلهن فيها مدري يمكن شريفه بمعنى الكلمه وشفيني وش دراني يعني انها شريفه مرا وحده يمكن تكلم يمكن عندها حبيب اف انا لازم اجيب خبرها لازم""
:فارس تعاال يااخي اجلس معنا جو المزز من زمان وانت ولا حسيت
لف له بضيق:ماابي اجي (وقف وهو ينزل البيبسي وسحب مفاتيح سيارته وطلع"" وشفيني اول مره اترك حفله اف""شغل سيارته ومشى بكل سرعته)

بــــيـــت ابــوســديـــم
جــنــاح ســـديــــم
ام سديم وهي تمسك يدين بنتها:ياروحي انتي لاتفشلينا مع الناس قومي يلا حبيبتي قومي وقعي
شهقت سديم وهي تاقف:يمه ليش ماتحسين فيني قلت لكم ماابيه ماابيه
قربت لها وسن وهي تضمها:بس ياروحي بس (وطاحت عينها بعين قمر بتوتر)
ساره بعصبيه:خلاص يمه قالت ماتبي يعني ماتبي
ام سديم بعصبيه:انتي اسكتي ولا كلمه
ساره:لا ماراح اسكت وبنزل الحين واقولهم سديم ماتبي
ام سديم وهي تمسك ساره من ذراعها بقوه:ياويلك لو سويتيها ياساره ترى ابوك بيذبحك ..

مــجـــلـــس الــرجـــال
ثامر:ماكانهم تاخروا؟
ناصر وهو يوقف:لحظه اشوفهم لك (وطلع من المجلس)

عبدالعزيز بهمس:فواز ابيك بموضوع
فواز بهدوء:ايش؟
عبدالعزيز: ابي اتزوج منيره
ناظره فواز بقوه:ايش وليش ان شاءالله؟
سكت عبدالعزيز بعدين قال:لاني اا اه ابي اعوضها كل لحظه المتها فيها ادري انها تحبني بس ماراح اكذب عليك واقولك انا بعد احبها بس بنفس الوقت مااكرهها بس انا متاكد اني اذا عرفتها زين بحبها وش رايك؟
سكت فواز شوي بعدين قال:شوف عبدالعزيز انا يمكن ماصرت اضمنك بس انا بقول لنور تقولها واذا وافقت زين على زين واذا ماوافقت توعدني انك تبعد عنها
ابتسم عبدالعزيز بقوة :اوعدك

بـــيـــت ابــوفـــهـــد
الشيخ:مبروك ياوليدي
وقف الكل وصاروا يسلمون على فهد اللي لون وجهه مخطوف
ماعدا مشاري اللي واقف بعيد ويتامل اخوه وصديقه وولد عمه بضيق """هذا حظك يافهد وش بتسوي؟ "" قرب له وبهمس:ااه مدري ياخوي ابارك لك والا لا؟
فهد بهمس:عزني يامشاري
ضمه مشاري وهو يطبطب على ظهره وبعد عنه:هونها ياخوي وتهون
فهد بعصبيه بس مقصر صوته عشان الرجال:وشلون اهونها انا اخذت غيرها يامشاري انا خنتها
مشاري:لا لاتقول كذا قمر اكيد بتتفهم الوضع
هز راسه بضيق:لا مااظن (وقف وجاء بيطلع بس ابوه مسكه بعد يد ابوه بقهر) وش تبي اكثر خلاص سويت اللي انت تبيه واخذت اللي انت تبيها بس ابيك تعرف شيء واحد انك ضيعتني يبه (مشى بعصبيه وهو يطلع برا البيت بكبره)

عـــنـــد الــحــريـــــم
كانت نجوى مبسوطه حيل ماتوقعت الموضوع بيمشي بالهسرعه وزي ماتبي ابتسمت بخبث ""مابقى الا شيء واحد بس وخلي اللي بين فهد وقمر ينتهي للابد""

بــــيـــت ابــوســـديــــم
جــنــاح ســديــــم
سديم وهي تلف لساره:انا اللي بقولهم ياساره (نزلت بسرعه من الدرج وامها تلحقها وتناديها والبنات يركضون وراءها)
وقفت سديم بنص الدرج:اناا ماابي ولدكم
لفوا لها اهل ثامر بصدمه
مسكتها ام سديم وهي متفلشه:لالا سديم ماتقصد كذا
سديم بقهر وهي تبعد يد امها:الا اقصد
ام ثامر بعصبيه:وش هالكلاام ام سديم شايفنا لعب بيديكم؟(لفت لبناتها) يلا امشوا
لحقوهم ام سديم وام اميره وام وسن
لفت سديم بعصبيه وهي تصعد الدرج وهي تمر من عندها ودخلت جناحها وهي تقفل الباب

تنهدت قمر وهي تسمع صوت رساله بجوالها سحبته وهي مصدومه من الصوره بلعت ريقها وهي تحط يدها على راسها تحس الدنيا كلها تتدور فيها
انتبهت لها وسن وصرخت:قمر
صدمت الارض وكل شيء صار اسود بعيونها ..

#يـــتـــــبـــع...