رواية أكابر و اقول فراقه عادي و انا في داخلي اصرخ تكفون جيبوه الفصل السادس 6 - بقلم HaboOoshy

شــركـــه الــراســـي ..

مــكــتــب ســديـــم
كانت تحوس بالارواق ومندمجه بقوه قطع اندماجها صوت طق الباب:تفضل
دخل حمد وبهدوء:السلام عليكم
سديم وعيونها ع الاوراق:وعليكم السلام
حمد:انسه سديم لازم نجهز للمؤتمر
رفعت راسها وناظرته اشرت ع الكرسي: تفضل
قعد حمد وهو ساكت
سديم وهي تتنهد حطت يدينها ع راسها: اف ياربي والله مافهمت شي فتحت الملف وماقدرت اعرف أي شي
ابتسم حمد: انا معك ايش اللي مافهمتيه؟
سديم: كل شي ليش هالمؤتمر؟ وكم عدد الحضور؟ واشياء كثيره
حمد:اول شي لازم نسويه نروح نحجز قاعه
سديم:طيب خلاص روح احجز قاعه
حمد وهو يناظرها ببرود:لازم انتي تكونين فيه وتشوفينها
سديم:ضروري؟
حمد:طبعا اذا تبين نروح الحين
ناظرت سديم ساعتها شافتها 9 الصباح: اممم طيب بس خلني اكلم السواق
حمد بنفس بروده: روحي معي بسيارتي
ناظرته سديم بصدمه:هاه؟
ابتسم حمد ع شكل عيونها اللي طارت: اقصد يعني ليش كل واحد يروح بسياره وبعدين بنرجع للشركه
سديم وهي تتطلع جوالها:لا خلني اركب مع السواق
هز راسه بعدم اهتمام:براحتك

الــبــقــالــــه ..

كانت قمر قاعده وتتصفح الاوراق اللي اخذتها وبعض الصور دخلتهم بملف وحطتهم تحت وسادتها وطلعت وهي تقعد ع مكانها وراء الكاشير
دخل عبدالعزيز ومعه شاب:السلام عليكم (واتجهوا للثلاجات)
صارت قمر تناظر بقهر:وعليكم السلام (طلعت جوالها وفتحت الكاميرا وخلته بيدها)
حطوا اغراضهم ع الطاوله وصاروا كل واحد منهم يقول انا ادفع
عبدالعزيز:يا رجال خلني ادفعها ترا كلها 50 ريال
ناظرته قمر بتامل وابتسمت باستهزاء ""الله ياعبدالعزيز نسيت ايام كانت العشره لها قيمه عندنا االله يرحمك يايمه"" صارت تناظر بوكه كيف باين قيمته فيه وساعته الالماس والجلد
نزل الفلوس وطلعوا وقفت بسرعه وصارت تصور السياره لين اختفت حطت جوالها بجيبها ورجعت مكانها ..

الــــشــــركـــــه ..

وقفت سديم وطلعت من مكتبها باتجاه المصعد ووراءها حمد دخلوا المصعد مع بعض
دق جوال حمد وطلعه وصار يناظر له تافف ورد:الو
صارت سديم تراقبه وهو يتكلم
حمد:طيب بابا انا مشغول اكلمك بعدين خلاص حبيبي؟ههه اجيب لك شوكلاته (قالها بدلع وكانه يقلد اللي يكلمه وفجاه تحول كلامه لجديه) خليه يتجهز الساعه 7 بمره (وبصوت عالي شوي) انتي وش دخلك؟(وسكر السماعه بسرعه ودخل الجوال بجيبه)
صارت تناظر سديم بخوف ""مقعوله يكلم زوجته؟ متزوج؟ احسه مو باين""
وقف المصعد وطلعوا
حمد وهو يفتح باب سيارته:خليك وراءي
سديم وهي تفتح باب سياره سواقها:طيب ..

شــركــه خـالد الـراســي ..

خالد له شركه خاصه فيه غير عن شركه ابوه واخوه
مــكـــتـــب خــالـــد
وقف بعصبيه وهو يرمي القلم اللي بيده: وشلون مالقيتهم يعني اختفوا ؟
الرجال وهو يبلع ريقه بخوف: والله طال عمرك مالقيتهم رحت وسالت مالقيت شي
خالد وهو يقعد على كرسيه الضخم وبلع ريقه وهو مغمض عيونه دخل يدينه بشعره وبهمس:وينكم اه وينك ياعبير؟ (ام قمر) وينك؟ ااه (وبصوته العادي) تقدر تروح
هز راسه الرجال وطلع
وقف ومشى للشباك الكبير ووقف يناظر السيارات المنطلقه بالشوارع ""بس ابيك تسامحيني بس ابي اشوف عيالي""

** فــنــدق الــشـيرتون ..

سديم وهي قاعده باللوبي وزهقانه
جاء حمد وهو يقعد بتعب:كل القاعات محجوزه
سديم: اف رجولي عورتني من فندق لفندق
حمد:طيب والحين؟
سديم:اف يعني وش لنا غير ندور
حمد وهو ياقف: يلا اجل نمشي
هزت راسها سديم ووقفت وطلعوا مع بعض ..

** بـــيــت ابــوســديـــم ..

ساره وهي تمشي ع الدرج انتبهت لناصر اللي قاعد بالصاله ابتسمت: مرحبا
لف لها ناصر:اهلين
قعدت ساره: ليش قاعد لحالك كان قلت لاحد الشغالات تنادينا
ابتسم ناصر:لاعادي اصلا انا انتظر عمي هو قال لي تعال
ساره:اها وين اميره اكلمها ماترد؟
ناصر: بالمستشفى ع مااظن

وقفت قمر بتافف: اف وش هذا الزهق؟
دخل البقاله مشاري وهو يتلفت:مرحبا
قمر وهي تبتسم بقوه:مراحب وينكم يارجال قسم طفشت لحالي
مشاري:ههههه وش نسوي دوامات عاد تعرف نجي وننام والله توني قايم فهد ماجاء؟
قمر:لا
مشاري وهو يقعد سكت وشكله متضايق
قمر باستغراب صح انها مالها فتره طويله مرا معهم بس عرفت شخصيه مشاري زين: فيك شيء؟
رفع راسه وهزه بعلامه لا وابتسم:ولا شي
قمر وهي تبتسم:اعرفك قول وش فيك والا ماتثق فيني؟
مشاري بسرعه:لا والله مو كذا بس ااه مدري وش اقولك
قمر وهي تبتسم:قول
مشاري وهو يتعدل بالكرسي وشكله قلب وصار كانه مستحي:احمم
قمر وهي تبتسم وملاحظه حركات مشاري ماتدري ليش حست ان وراء الموضوع بنت:تحب؟
ناظرها مشاري بصدمه:وش دراك؟
قمر:هههههههه يعني جد كلامي؟
مشاري وهو يبتسم:ايه
قمر:ومنهي سعيده الحظ؟
تنهد مشاري بضيق:ياليتها تظن نفسها سعيده حظ
قمر باستغراب:ليش؟
مشاري:هي ماتحبني
قمر بحنيه وحب صديق:اكيد انها غبيه والا فيه بنت ماتحبك
رفع راسه مشاري وناظرها بتردد:جد فارس كل بنات جماعتنا يحبون فهد يعني او معجبين فيه اما انا لا
قمر : يمكن يعجبهم شكل فهد بس هم مايعرفون قلبك
ناظرها مشاري وابتسم:ياليتها هنا تسمع وش تقول
ضرب برجله حافه الباب لفوا كلهم له بخوف
مشاري باستغراب: وش فيك؟
فهد وهو يخز قمر بقوه وقعد: ولا شي
ناظرته قمر باستغراب """هذا وشفيه؟ ""
فهد بحده:فارس قوم جيب لي بيبسي
مشاري اللي عيونه طلعت:ليش ماانت تقوم؟
وقفت قمر وبارتباك:لا عادي مشاري مافيها شي لو رحت (وراحت)
فهد بعصبيه:ليش خايف ع مشاعره ؟
ناظره مشاري باستغراب:انت وش فيك ؟ ماانت صاحي
لف وجهه فهد عنه وهو عاض ع شفايفه بقهر
وقفت قمر ومدت له العلبه بس شهقت بخوف وهي تشوف فهد اللي وقف ودف العلبه اللي طاحت ع الارض ودفها بقوه وطلع
وقف مشاري بعصبيه:هذا وش فيه ؟
قمر وهي تناظر فهد باستغراب: اتركه
ناظرهم بقهر وركب سيارته وشحط فيها بقوه
ناظرت قمر الارض:بمسحها
ناظرها مشاري:تبي اساعدك؟
قمر بسرعه:لالا عادي (راحت جابت فوطه وصارت تمسحه)
مشاري:فارس انا اعتذر عن تصرف فهد بس اكيد هو معصب
ابتسمت قمر وهي تناظر مشاري:عارف عادي صدقني مشاري ماصار شي (وضحكت بمزح وخفه) ههه لو اني بنت كاني تزوجتك
ضحك مشاري:ههههههه لو انت بنت اه بس ياليت اللي بقلبي تشوفني
وقفت قمر:طيب ممكن اعرف من هي؟
مشاري وهو مدخل يدينه بجيوبه ويناظر الشارع بتامل:مها بنت عمي
قمر:اخت فهد؟
مشاري:ايه
قمر:حاولت تبين لها انك تحبها او جربت تخطبها؟
مشاري وهو يضحك باستهزاء:تدرين لما قالت لها اختي اني احبها ضحكت باستهزاء وقالت ياحليله مشاري يعرف يحب؟ (بلع ريقه بقهر وقال بغصه ولف لقمر وبنظره انكسار) وشفيني ليش ماتحبني جاوبني فارس ليش؟
انقهرت قمر بقوه من كلمه مها:ماعليك منها صدقني بكره بتعرف هي ايش خسرت
لف لها مشاري وابتسم:تتكلم وكانك واثق
ابتسمت قمر:ايه واثق صدقني بكره بتندم وبتقول فارس قال
ابتسم مشاري:تدري مع اني ادري انها ماتحبني بس كنت اقول ع الاقل مافيه احد بقلبها بس
ناظرته قمر باستغراب:بس ايش؟
مشاري:اليوم دخلت البيت ابي اسلم ع جدتي سمعتها بالحوش وهي تكلم خوله وتقول لها امس الصبح شفته وانا بالسياره كان شكله خق بالصبح (لف لقمر بقهر) صارت تتعزل فيه بكل شي فيه صارت تردد انها تحبه ابي اعرف من هو وشلون شافته لو غيري يافارس كان دخل وضربها ومسح فيها البلاط وما اسمح لها تقول شي زي كذا بس (وضحك باستهزاء وخفف من نبره صوته) عشاني احبها ماقدرت احرك ساكن
ناظرته قمر باسى وقهر:مشاري خلاص انساها واللي مايحبك لاتحبه صدقني هي ماتستاهلك
لف لها مشاري وابتسم بالالم:ياليت الموضوع كذا سهل يافارس انت ماجربت تحب لو جربت صدقني مابتقول لي كذا انا من كنت صغير وانا احبها من انولدت هي كنت احبها واحميها من كل شي واساعدها من هذا اللي يجي بعد كل شي سويته ياخذها بسهوله ليش ماتشوفني رجال ليش لسى تشوف فيني المراهق الصغير مع اني اكبر منها يمكن لاني كنت اصغر عقلي لما اكون معها ...

ناظرت قمر وهي مقهوره من مها وتصرفاتها تمنت تلقى شخص يحبها زي مشاري: مشاري صدقني بتجي يوم وبتندم وبتلاحقك وبتطلب منك السماح
تنهد مشاري وابتسم ع جنب: واكيد اذا جاء هذاك اليوم برضى ع طول
ابتسمت قمر : يمكن انا ماجربت الحب بس اللي اعرفه ان اساس الحب التسامح
ناظرها وضحك وهز راسه:ههه صادق يلا ضايقتك معي
قمر: وش هذا الكلام لاتقول كذا حنا اصدقاء والا يعني بس كلام؟
مشاري بسرعه:لا حشى والله انك اخو مو صديق
ابتسمت قمر وسكتت
مشاري وهو يناظر ساعته:امش عازمك ع مطعم
قمر بخيبه امل:اسف ماقدر اترك البقاله
مشاري: ياشيخ الحين عمي يجي
قمر: لا صعبه اذا جاء طيب
دخل ابوفهد:السلام علـ ـ ـ
قاطعه مشاري وهو يصرخ:هاه هذا عمي جاء
ضحكت قمر ع تعابير ابوفهد المستغرب
ابوفهد:وش فيه؟
مشاري:هههه لا بس ابي اخذ فارس ويقول ماقدر اترك البقاله قلت الحين عمي يجي
ابتسم ابوفهد:لا ياوليدي خلاص روح انا هنا
ابتسمت قمر:طيب يلا مع السلامه عمي
ابوفهد:مع السلامه
طلعوا مشاري وقمر وهم متجهين لمطعم

** بـيـت صـقــر الـراســـي ..

كان صقر ومرته وابتسام وبناتها وسن والجوري قاعدين
الجده مزنه وهي ماسكه بيدها فنجان القهوه وبجلابيتها الفخمه وشعرها الكثير المسويه فيه تسريحه وكانها عمرها40 مو 60 وبهدوء ممزوج بشويه غرور:ابتسام متى ناويه ترجعين لزوجك ترا خلاص ماصارت زعل
طاح كوب العصير من يد وسن
لفوا كلهم لها وقفت ابتسام بسرعه وركضت لبنتها ومسكتها: انتي بخير حبيبتي؟
وسن وهي تبلع ريقها وبهمس:ايه
الجده مزنه باستغراب:فيك شي وسن؟
وسن بسرعه:لا بس شكل الكوب زل من يدي
ابتسام وهي تضم بنتها من الجنب: ماصار شي حبيبتي الحين تجي الشغاله وتمسحه اقعدي
وسن بهمس:لا يمه ابي اروح غرفتي
ابتسام بحنيه:اقعدي وانا امك معي ابيك جنبي
ناظرت امها بنظرات بارده و وجهها خالي من أي تعبير:طيب
الجد صقر:اليوم جاني رجلك ويقول يبي يرجعك
ابتسام بحده:وانا مابي ارجع له
الجده مزنه بعصبيه:طيب قولي لنا وش السبب؟
ابتسام وهي تلف وجهها:شي خاص فيني ويبه اذا جاءك باي وقت ثاني قله اني ابي الطلاق
ضربت الجده صدرها:وش قاعده تقولين بعد هالعمر تبين تتطلقين؟
ناظرت وسن امها بتامل وضغطت ع يد الجوري وكانها تبي منها القوه ""بسببك مو بس حياتي تدمرت بسببك حياه امي والجوري تدمرت اكرهك اكرهك"""
ناظرت الجوري اختها وضغطت ع يدها بيدينها الصغيره
ابتسام:ايه يمه ابي اتطلق انا مو محتاجه له
الجد صقر بهدوءه:طيب يابنتي فهميني قوليلي ليش تبين تتطلقين ؟
ابتسام وهي تبلع غصتها:يبه قلت لك سبب ماراح اقدر اقوله لاحد
تنهد الجد صقر:انا ماقدر اغصبك وانتي ماعدتي مراهقه عشان اعلمك الصح من الخطاء خلاص بكرا اكلمه واقول له انك تبين الطلاق
الجده مزنه بقهر:انت من جدك تتكلم تبي البنت تتطلق بعد هالعمر وبدون مانعرف السبب
الجد صقر بحده:خلاص انا قلت البنت مو صغيره وتعرف تميز الصح من الخطا واذا هي تبي الطلاق بكيفها
الجده مزنه سكتت بقهر لانها ماتقدر تقول كلمه زياده بعد كلام زوجها  

في المــطـــعــم دخلوا مشاري وقمر
مشاري وهو يناظر المنيو:هاه وش تبي؟
قمر بابتسامه:عادي أي شي
رفع راسه وابتسم:لا حدد وش تبي؟
قمر وهي تبتسم بقوه:جد عادي اصلا ماعرف وش احلى شي
ابتسم مشاري:طيب خلاص بطلب لك زي

دخل فهد ووراءه سلمان بس فهد وقف
سلمان وهو يضرب ظهر فهد: وشفيك وقفت؟
ناظر فهد بقهر قمر ومشاري وهم قاعدين ويضحكون وياكلون حس بشعور غريب شعور وده يضربهم ضغط ع يده ""وشفيك يافهد (تذكر لما دخل البقاله وطاحت عينه ع قمر كلامها عن مشاري حسها تفضل مشاري عليه مع انه هو اللي واقف معها ويساعدها حس بقهر مو طبيعي ماقدر يتمالك اعصابه وطلع ماحب يفكر بالموضوع فدق ع سلمان وقال له خلنا نروح المطعم بس من حظه السيء نفس المطعم اللي فيه قمر ومشاري) تقدم لهم وابتسم ع جنب بقهر:اها وصرتوا تتطلعون من وراءي ولا تقولون لي (وناظر قمر بنظره خاصه)
تعدلت قمر بخوف من نظرته
ابتسم مشاري بهدوء: اقول اقعد بلا رسميات (ووقف يسلم ع سلمان)
قعد فهد بسرعه جنب قمر وبهمس:اوريك بعدين
ناظرته قمر باستغراب وخوف تاففت بصوت مسموع ""هذا وشفيه علي؟؟""
ناظرها فهد بطرف عينه ولف وجهه
قعدوا وصار سلمان ومشاري يسولفون اما فهد ساكت وهو معصب وقمر مكتفه يدينها ومنقهره من تصرف فهد
انفتح باب المطعم لفت تشوف من اللي دخل بلعت ريقها ودون شعور شدت ع يد فهد اللي منزله ع فخذه وهي تناظر للي دخل
لف فهد لها بسرعه وهو مستغرب بس انتبه لعبدالعزيز اللي دخل ومعه شاب
قمر وهي تتامله وشلون يضحك ومبسوط ويتكلم وهو يحرك يدينه و واقف يطلب حست بغصه هي هنا تتعذب وهو مبسوط بحياته"" كيف هنت عليك ياعبدالعزيز قلي تكفى وشلون قدرت تنساني ليش انا ماقدرت انساك؟"" ..

اخذوا عبدالعزيز والشاب اللي معه طلباتهم وطلعوا
وقفت قمر بسرعه وراحت وراءهم
مشاري باستغراب: وين راح؟
وقف فهد:انا بلحقه

طلعت قمر و وقفت وهي تشوف عبدالعزيز يركب سيارته بس اللي صدمها البنت اللي قاعده قدام وهي تشوف يد عبدالعزيز اللي تلامس يد البنت
وقف فهد وراءها: قمر؟
لفت لفهد بسرعه ومسكت معصمه:امش لسيارتك بسرعه
فهد باستغراب:ليش؟
قمر بصراخ: مو وقته امش
ركبوا فهد وقمر سياره فهد
لف فهد لها بس قبل مايتكلم قاطعته قمر وهي تقول:بسرعه الحقه
فهد:قمـ ـ ـ
قمر بصراخ:الحقه
مشى فهد بسرعه وصار يلحقه بس وقفوا وهم يشوفون سياره عبدالعزيز وقفت قدام قصرر ضخم ونزل هو البنت والشاب الثاني ودخلوا
نزلت قمر من السياره وصارت تناظر له ونزلت دموعها ع خدها
نزل فهد بسرعه وركض لها وقف قدامها:قمر؟
رفعت راسها لفهد وابتسمت هزت كتفها:تدري خلاص انا بنساه تدري ليش (اشرت ع البيت) لاانه اختار الفلوس علي اختار يتخلى عن الماضي (واشرت ع نفسها بقوه) وانا من الماضي (هزت راسها بلا) لا لا هذا مو اخوي لا مو قادره اصدق عبدالعزيز الفلوس مو همه لا(نزلت راسها وصارت تشاهق بقوه) من هذي البنت وشلون هو عايش بهذا البيت وشي اللي سواه هو حتى جامعه ماكمل وشي اللي قاعد يلعبه (وبهمس مختلط بشهقات) ااه اا خايفه عليه ااه هو مو قد هذولاء الناس (صرخت بصوت عالي) شوف البيت شوف شكل البنت هو مو منهم هو مو قدهم وشي اللي قاعد يسويه (لفت وجهها وركبت السياره وهي عاضه ع شفايفها وتناظر الشباك)
ناظرها فهد ضغط ع يده بقوه تمنى يقدر يدخل البيت ويضرب عبدالعزيز لين يشبع هز راسه بقهر وركب السياره ومشى ..

شركـــه ابــوسديــم

الــــســ7:30ص ــاعــــه
دخلت سديم وهي مستعجله بس وقفها كلمه من احد الموظفين وهو يقول باستهزاء: هذا اكيد استخف ولا فيه واحد يعطي بزر ماتعرف شي موتمر زي كذا هذا مؤتمر يرفع الشركه والا ينزلها
تبعها ضحكات من اللي يتكلم معه وهو يقول:عشانه بنته بس لما يخسر يمكن يطردها من الشركه (وصاروا يضحكون باصوات عاليه)
شدت ع يدها سديم بقوه وقهر من استهتارهم لها بس قطع سرحانها صوت من وراءها
بعصبيه:يلا كل واحد ع شغله
لفت وشافت حمد وهو يقرب لها ووقف جنبها ودون مايناظر لها:عندنا شغل كثير اليوم (ومشى خطوه بس لف وهو يشوف سديم لسى واقفه ناظرها بنظره وهو رافع حاجب وكانه يقول يلا امشي)
بلعت ريقها سديم ومشت ركبوا المصعد وهي ساكته طلعوا ودخلوا مكتب سديم قعدت سديم ع المكتب وهي ساكته
حمد: انسه سديم ماعليك من كلام الموظفين بتشوفين كثير من هذا كل يوم
سديم وهي تناظر قدام وبحساسيتها المعتاده:لا هم صادقين انا ماعرف كيف اسوي هذا المؤتمر بعدين انا ماكنت ادري انه بيفيد شركتنا كذا (وقفت) انا بروح اقول لابوي يعطي سالفه هذا المؤتمر لاي احد
حمد:لحظه
لفت سديم له قبل ماتمشي بس دون ماتتكلم
قرب لها حمد:اول مره شفتك توقعتك واثقه بنفسك ومافيه شي يهزك بس طلعتي عكس وبعدين هذا اول اختبار لك تبين تتطلعين منه ساقطه؟
ناظرت وهي تنتقل بين عيونه بنظارات الواثقه وهدوء ملامحه:اا اا اه مدري
حمد وهو يفتح الاوراق ويحطها ع المكتب وبهدوء: لقيت قاعه حلوه بفندق الماريوت كبيره وفيها كل اللي نبي (رفع راسه) تبين نروح لها؟
ناظرت سديم بصدمه وبدون شعور:كيف تصير بارد كذا؟
ابتسم ع جنب ونزل راسه للاوراق:انا كذا
عضت سديم شفتها السفليه وبهمس:اسفه ماكنت اقصد
حمد وهو لسى عيونه ع الاوراق:عادي ماصار شي
سديم وهي تبي تضيع الموضوع: طيب يلا خلنا نروح
حمد وهو يشيل الارواق:يلا ..

في المـســتــشــفــى دخلت اميره وهي مستعجله زي العاده لانها متاخره حست انها صدمت شي وتناثرت اوراقها:يوه اسفه

نور اللي كانت تمشي وهي شايله ملفات المرضى حست نفسها صدمت شي تناثرت اوراقها رفعت  راسها للبنت وابتسمت:لا عادي
اميره وهي تضرب راسها:اف انا دايم يصير لي كذا ..
نور وهي تبتسم وتاخذ ملفاتها وتجمع الاوراق اللي تناثرت منها
رفعت راسها اميره وناظرت نور:اسفه ثاني مره (قالتها وراحت تركض)
ناظرتها نور بصدمه وهي لسى بالارض
منيره وهي تحط يدها ع كتف نور:وشفيك ؟
نور وهي ترفع راسها لمنيره واشرت بيدها ع البنت: البنت
منيره باستغراب:وشفيها؟
نور وهي تاقف: نفس عيون قمر
منيره وهي ماتشوف ظهر اميره هزت كتوفها بعدم اهتمام:طيب عادي؟
نور وهي معقده حواجبها وتحس بشعور غريب: لا هذي شلون افهمك حسيت كاني اشوف عيون قمر وهي لابسه النقاب
منيره وهي تضحك:هههه شكلك مشتاقه لقمر عشان كذا يلا امشي بسرعه تاخرنا وراءنا مرضى
هزت راسها نور ومشت مع منيره ..

دخلت اميره مكتب رامي بسرعه جنونيه : اسفه ع التاخير
رفع راسه رامي وناظرها ببرود:متى اصلا انتي تكرمتي وجيتي زي الطلاب الثانين؟
جت بتتكلم اميره بس انتبهت لمراه وبنت بعبايتها الكتف المزخرفه بكل لون وكاشفه تفشلت: اا
هز راسه رامي باسف:هاتي اشوف انجازك لهذا الاسبوع وبتنقصين ترا
ناظرته اميره بقهر ومدت له الاوراق
صار يناظر الاوراق باستغراب رفع راسه:تستهبلين انتي؟
اميره بصدمه وهي تاشر ع نفسها: انا؟
رامي بعصبيه: لا انا
اميره بعصبيه:لاتصرخ علي
ناظروا المراه والبنت لاميره بصدمه
انقهر رامي وهو يرمي الورقه عليها: جايبه لي ورقه من ملف مريض وتصارخين بعد
اميره:ايش؟ ( سحبت الورقه وتذكرت لما تصادمت مع البنت ""اف اكيد لما تصادمت مع هذيك الممرضه تخربطت اوراقي باورااقها ياليل"") انا قبل شوي ..
قاطعها رامي بعصبيه:اطلعي برا ما ابي اسمع اعذارك بسرعه برا
اميره بقهر وبغرور: انا مايشرفني اقعد بمكتبك (طلعت وسكرت الباب بقوه ومشت وهي معصبه)

عند نور قعدت بغرفه الممرضات وهي تتصفح ملفات المرضى عقدت حواجبها باستغراب لورقه غير عن كل الاوراق ""ايش هذي"" سحبتها بس اول ماقرت الاسم طاحت الورقه من يدها بصدمه ..

بـــعــد اســبــوع ..

بـيـت صــقـر الــراسـي

الجد وهو يمد ورقه الطلاق لابتسام: تفضلي
اخذت الورقه وهي تحس بغصه وصعدت ع غرفتها ع طول
صارت وسن تناظر امها ضغطت ع يدها بقهر ""ليش يبه تركتنا بهذي السهوله لهدرجه تحبه اكثر منا ""

بـــيــت نـــور ..

كانت نور ع المرجيحه اللي بالحوش وهي سرحانه
قعد جنبها بالمرجيحه الثانيه فواز وهو مبتسم:وشفيك؟
رفعت راسها وناظرت هزت راسها وهي تتنهد:ولا شي
هز راسه بعلامه ايه: اممم باين
ناظرته وابتسمت:اظ فواز بسالك
فواز: تفضلي
نور: لو عندك صديق
فواز:ايوه
نور:وانت اكتشفت بيوم انه عنده اخ وهو مايدري (لفت لفواز) بتقوله مع انك متاكد ان هذا بيجرحه والا بتخليه زي ماهو؟
ناظرها فواز وابتسم هز راسه: بصراحه شي صعب ع حسب
نور باهتمام:كيف ع حسب؟
لف فواز لها:يعني انا متاكد انه بيتقبل اخوه بقوله بس اذا لا ماراح اقوله
تنهدت نور وسكتت وهي معقده حواجبها وبهم:بس انا مدري اذا هي بتتقبل صديقتي او لا او العكس ااه محتاره
ناظرها فواز وابتسم ضغط ع يد نور: كل شي بوقته حلو خلي الايام هي اللي تكشف لك لاتقولين لصديقتك شي
هزت راسها بايه وابتسمت:فواز
فواز وهو يناظر السماء:عيونه
نطت وباست خده وهي تقول بحب: انت احلى اخ بالدنيا (قالتها وراحت تركض داخل)
ابتسم لاختها ووقف وطلع ..

بيـت صـقـر الـراســي ..

كانوا كل العيله متجمعه والبنات بجهه والجد وابوناصر وابوسديم وناصر بجهه لحالهم والحريم بجهه ومعهم فوز والجوري ونادر يلعبون بلاستيشن اما وسن جالسه لحالها بكرسي منفرد

اميره بقهر:قسم بالله ودي اذبحه شايف نفسه بس ع ايش ما ادري
ريوف بهدوء:اميره تبين الصراحه انتي الغلطانه تجيبين له ورقه مو ورقتك ولا بعد متاخره عن الطلاب اكيد بيعصب
اميره بنرفزه: اف بس اسلوبه معي ينرفز اصلا قبل مانجي والبنات كانوا يقولون انه يكره الحريم وعنده عقده منهم
ساره بحماس:ليش؟
اميره وهي تلف وجهها بقرف من سيره رامي:مدري عنه نفسيه قسم اقول قوموا خلونا نروح للمجلس الداخلي
ريناد وهي تناظر وسن وبهمس:بنات ننادي وسن حرام شكلها يكسر الخاطر
لفت اميره وناظرت وسن وبصوت عالي شوي: وسن تجين معنا؟
وسن بهدوء:لا ابي اقعد هنا
هزوا روسهم لانها اصلا اجابه متوقعه من وسن وصاروا يمشون باتجاه المجلس
اميره:اجل سديم مسويه فيها نائب المدير وبالشركه الحين؟
ساره:هههه ايه مسكينه
اميره:طيب رغد وينها؟
ريناد:رغد اصرت تروح مع سديم عيت تجي معنا
اميره وهي تفتح باب المجلس: ههه ياحليلها والله لها فقده ..

الــشـركــــه مـــكــتـــب ســديـــم ..

كانت جالسه بالارض من زود الحماس والاوراق والملفات متبعثره حولها بشكل دائري وراميه عبايتها ولابسه بجامه ((عشان اليوم الاربعاء والساعه 8 بالليل والشركه فاضيه))
اما رغد فقاعده كنب كلاسيكي وتناظر تلفزيون البلازما وتتابع افلام الكرتون وقدامها ع الطاوله الصغيره حلويات وعصيرات
سديم وهي تفرك شعرها بقهر: اف لازم ارتب كل واحد ع حسب مكانتها  اااف (فجاه حست بصوت حركه لفت لرغد اللي ناظرت لها وكانها تقول لها حتى انا اسمع وقفت ع طول وقفلت باب المكتب ولبست عبايتها وسحبت جوالها بس قبل ماتكمل طق الباب) ..

الــبــقــالـــة ..

قمر وهي حاطه يديها تحت خدها وتفكر بملل ""اليوم لا فهد ولا مشاري جاء ولا حتى عمي اف . ""طرى ببالها كلام مشاري عن مها فجاه فتحت فمها وهي تتذكر كلام مشاري لما قال انها تحب واحد شافته الصبح"" ااااه
اوقفت ع طول""لالا معقوله (تذكرت لما شافت مها الصبح بالسياره مع فهد بنفس اليوم قال لها مشاري""
معقوله لالا مستحيل تكون تحبني اف ياليل انا مو ناقصه مشاكل بعد اصلا وش فيني ينحب بالله لا ولد انحب ولا بنت انحب اف لالا ان شاء الله اللي افكر فيه يكون غلط ايه اكيد اصلا انه غلط""

بيت صــقر الــراسـي ..

لفوا كل اللي قاعدين بالصاله ع اصوات الصراخ
وقفوا باستغراب وصاروا يناظرون بعض ..
الحارس وهو يحاول يمسكه:مايصير تدخل كذا يا عم
دفه بقوه ودخل: اقول بعد
ابوناصر بقهر وهو يناظر (زوج ابتسام): خير وين داخل انت بيت ابوك
(لف لابتسام) ادخلوا داخل
ناظرهم باستهزاء:وسن الجوري وقفن
تمسكن بامهن بقوه كل واحد من جهه وناظرن امهن بخوف
ابوسديم:وش تبي ؟

الــمــجــلــس
كانوا البنات فاتحات الباب ويناظرن كل الموقف وهن خايفات

الــصــالـــه
صقر بثقه وقوه:ادخلن داخل
دخلن الجده وفوز داخل ونادر وام سديم وام ناصر بس بقى ابتسام وبناتها وابوسديم وابوناصر وناصر ..

صقر:وش تبي ؟
ابووسن تقدم ومد ورقه للجد وراسم ابتسامه ع شفايفه:تفضل
صقر وهو يناظر الورقه باستغراب:ايش هذي؟
ابووسن: افتحها
فتح صقر بهدوء وبلع ريقه وهو يقراها رفع راسه:والمطلوب؟
سحبت ابتسام الورقه من يد ابوها وانصدمت وهي تشوف امر من المحكمه بانه ياخذ بناتها صرخت بقوه وهي تضم بناتها لها:لا احلم تاخذهن فاهم؟
ابوسديم وهو يهدي ابتسام:ابتساام هدي
ابوناصر بعصبيه: اطلع برا
ابووسن: ماني طالع الا بناتي معي
الجد صقر بحده: والبنات مايطلعون من هنا
ابووسن: الشرطه واقفه برا فعطوني هن بالطيب وبلا فضايح لكم (وناظر ابوسديم) تراك داخل ع شي قوي والفضحيه بتخسرك (ومد يدينه وكانه يسوي اعلان) بيت الراسي يقتحمه الشرطه (وصار يضحك) هههه هاه وشرايكم؟
ناصر بقهر وهو يتقدم بس يدين ابوه مسكته:اطلع برا والا والله لاامسح فيك البلاط
لف ابوسن يبي ينادي الشرطه بس الجد وقفه:للحظه
لف ابو وسن وابتسم بهدوء
صقر وهو يلف لابتسام:اتركيهن يروحن مع ابوهن
انصدمت ابتسام ورجعت خطوه وهي تضم بناتها بيدينها لصدرها اقوى:لا مستحيل
صارن وسن والجوري يصيحن: يمه لاتخلينا
ابووسن وهو يتقدم وصار يسحب وسن:امشي
وسن وهي تصارخ باقوى شي وبانفعال وتتمسك بامها:لالالالا اتركني يمه
ابتسام وهي تسحب وسن بقوه وتبكي وتحاول تمسك الجوري: اتركها
صقر وهو يسحب ابتسام:ابتسام اتركيهن اتركيهن و اوعدك اجيبهن لك اتركيهن
الجوري وهي تصارخ لان ابوها شالها بيد واحده ورفعها وهي تضرب يدين ابوها: يمه يمه ما ابي اروح يمه
ابووسن اللي ماسك وسن بقوه من معصمها ويسحبها وبيده الثانيه شايل الجوري: اقول امشن
ابتسام وهي تحاول تفلت من يدين اخوها اللي ماسكها
تقدم ناصر بس جده مسكه بقوه ناظر ناصر جده وهو يهز راسه بلا ولف ناظر لمنظر وسن والجوري كان من جد يقطع القلب
وسن وهي تحاول تتفلت:يمه لالا اذبحيني بس ماابي اروح هناك يمه
طاحت ابتسام ع الارض وهي تحاول تبعد يدين اخوها بس متسحيل تقدر: اتركوني ااه لاااا لااااااا

** الــمــجــلــس ..

كانوا البنات يناظرون المنظر بصدمه كان منظر بجد يقطع القلب وشكل عمتهم ابتسام وهي تطيح ع الارض وتوسلات وسن والجوري وكيف طلعهن بالقوه حتى دون عبايه ولا ملابس من جد موقف مؤثر
ريناد وهي ترمش بصدمه ودموعها تنزل:هذا مو اب ليش يسوي كذا؟
ريوف وهي مصدومه: مو فاهمه شي
ساره وهي تبلع ريقها وتضغط ع ذراع اميره اللي قدامها بخوف من الموقف
اما اميره حست بشعور غريب ""بس ليش يسون كذا يعني هذا ابوهن اصلا حنا ماندري ليش عمتي ابتسام زعلت من زوجها فجاه مع انهم كانوا زي العسل علاقته (تذكرت وسن قبل لما تتكلم عن ابوها وكيف تمدحه) شلي تغير بكم شهر ايش السبب القوي اللي يخلي عمتي ابتسام تتطلق و وسن والجوري يكرهن ابوهن كذا وتغير وسن المفاجي خوف الجوري الغريب فيه سر بس ايش هو؟

الــشـــــركـــــــة

سديم بخوف وبصوت يرجف:من؟
حمد باستغراب:انسه سديم انتي موجوده
تنهدت براحه ونزلت الجوال وفتحت الباب باستغراب:حمد شو اللي جابك بهذا الوقت؟
ابتسم حمد وهو يحك شعره:ههه ماتوقعت فيه احد قلت اسوي كم شغله عشان الوقت وانتي؟
سديم:ههه نفس الشي
حمد وهو يناظر رغد باستغراب:معك ضيوف؟
ابتسمت سديم:ايه
حمد وهو يبعد ويبتسم للوراء :اجل حتى انا معي ضيوف
سديم وهي تبتسم بقوه للولد كان جميل بمعنى الكلمه صغيره يمكن عمره 4 او 5 دبدوب وشعره بني لين كتفه وناعم وعيونه واسعه وخدوده حمر يعني يهبل نزلت سديم لمستواه ومسكته من خصره: يدنن ههه وش اسمك ياحلو؟
سكت شوي بعدين رفع راسه وناظر حمد بعدين ناظر سديم وحط اصبعه بفمه
سديم وهي تضمه:ههههه رغوده تعالي شوفي
رغد وهي تبتسم وتمسك يده:وش اسمك؟
حمد وهي يبتسم بقوه:مهند
سديم وهي تبعد عن الباب: تفضلوا (قالت وهي متفشله) هههه سوري ع الحوسه
حمد وهو يجمع معها الاوراق:لا عادي
سديم وهي تناظر له كان لابس بنطلون جينز وبلوزه من ماركه بولو لونها اصفر """اول مره اشوفه بغير الثوب يهبل"" بعدت عيونها : اخوك؟
رفع راسه حمد باستغراب استوعب انها تقصد مهند ناظر له: ههه لا ولدي
رفعت راسها بصدمه صح انها كانت متوقعه انه متزوج من ذيك المكالمه اللي سمعتها بس ماتدري ليش انصدمت : اها ههه ما دريت انك متزوج (قالتها وهي تاقف وتحط الاوراق ع المكتب)
حمد وهو ينزل باقي الاوراق ع المكتب وبهدوء:ما اني متزوج
ناظرت سديم بصدمه وبفهاوه
ضحك حمد ع شكل عيون سديم: هههه وشفيك فهمتي غلط انا مطلق
سديم اللي تفشلت ولفت وجهها وتحاول ترقع لنفسها: من قال اني فهمت غلط اصلا عرفت انك مطلق ع طول
حمد وهو يهز راسه: ايه باين
ناظرت سديم بطرف عينها
حمد:هههه اقول خلينا نكمل شغلنا
سديم وهي لسى تناظر له: يكون احسن (قعدوا ودقايق واندمجوا بالشغل ورغد مبسوطه مع مهند)..

ســـيــاره ابــوســـن ..

كانت وسن لسى تبكي وتحاول تفتح الباب اللي مقفل بعكس الجوري اللي ساكته ودموعها تنزل ع خدودها الناعمه ع وجهها الطفولي اللي مايعرف ليش يصير لها كذا وشي اللي سويته عشان يصير كل هذا ياترى لها باللي يصير يد كانت هذي كلها افكار الجوري ليش ومتى وكيف؟
ابووسن وهو يدخل بيت اهله اللي مايقل عن بيت صقرالراسي باي شي وقف ولف لوسن والجوري: يلا انزلوا
وسن بقهر وبصراخ:مااحنا نازلين و ودنا عند امي (وبصوت عالي اكثر) حنا نكرهك نكرهك ..
شهقت الجوري بصدمه لان ابوها عطى وسن كف قوي نقزت الجوري ومضت وسن وهي تبكي: وسن؟
كانت ساكته بصدمه وعيونها مثبته للفراغ ودموعها تنزل منها بغزاره بس ثواني وتحولت نظاراتها لحقد وغضب مكتوب (مدت يدها لابوها بتهديد) صدقني بتدفع ثمنه غالي غالي
ناظر بنته بصدمه وبلع ريقه كل حياته تلبخطت هز راسه بقهر وضغط ع يده بقوه تمنى انه مسك اعصابه ولا ضربها بس ما استحمل بنته تقول له اكرهك تنهد ونزل وفتح الباب اللي عند وسن وبهدوء: انزلوا
نزلت وسن بعد ماعطته نظره قويه وهي ماسكه يد الجوري بقوة ..

الــشــركــــه ..

حمد وهو يناظر الساعه شهق: اف الساعه 12 ماحسينا بالوقت
وقفت سديم:ايش 12 ؟ (اسحبت جوالها من شنطتها وشافت مكالمات من امها وابوها وخواتها واميره ""اااف قسم بيذبحوني ياليتني ماحطيت جوالي سايلنت"" لفت وابتسمت بقوه) : شوف
لف لحمد وضحك ع شكل رغد ومهند اللي نايمين رغد نايمه ع جهه ومهند ع الجهه الثانيه ورجلينهم متلاصقه ببعض:هههه يلا اجل خلينا نمشي
سديم وهي تتجه لرغد:يلا (صارت تحرك كتف رغد)رغد رغوده يلا قومي
صارت رغد تفرك عيونها بقوه:طيب
اما حمد رفع مهند لصدره دون مايصحيه وطلعوا ركبوا المصعد مع بعض تكلمت سديم: حمد
لف لها حمد:هلا
سديم: ممكن تقول لي سديم حاف يعني سالفه انسه هذي ما أحبها
حمد وهو يبتسم: طيب سديم
ناظرته وابتسمت ولفت وجهها ..

الــبــقـالـــه ..

وقف قدام الباب وصار يناظر بين الحدايد ""معقوله نايمه يمكن عشان كذا ماترد ع اتصالاتي اكيد"" لف وجهه ومشى

الــمــخــزن ..

وقفت قمر وهي تترنح من التعب ماكلت أي شي اليوم حاولت تتوازن بوقفتها عشان تاصل لجوالها بس ماقدرت طاحت وتراكت ع الجدار وهي تناظر جدران المخزن حستها تدور فيها وتدور غمضت عيونها وبلعت ريقها وبهمس:يمه (ثواني وصارت كل الدنيا بعيونها سودا) ..

بـــيــت ابــوفــهــد
الـــســ7:00ص ـاعـــه
فهد وهو يقوم من الفطور:الحمدلله يلا يابنات
وقفوا منى ومها وخوله ونواره
فهد باستغراب:خوله ونواره ع وين مدرستكم مو ع طريقي
خوله:اجل مع من نروح الباص راح وخلنا
نواره: ومشاري مدري وينه
فهد: اف يلا يلا اجل بسرعه كان قلتوا قبل الحين كذا بتاخر ع دوامي امشوا
طلعوا البنات وركبوا سياره فهد

الــبـــقــالـــه ..

وقف سيارته مشاري وعقد حواجبه باستغراب ""ليش فارس مافتح البقاله بالعاده 6 ونص وهو فاتحها ""

مر فهد بسيارته من جنب البقاله انتبه لمشاري الواقف قدام باب البقاله واللي استغرب منه ان البقاله مسكره رجع و وقف وطلع راسه من الشباك:مشاري
لف وجهه مشاري وهو يبعد الجوال عن اذنه: هلا فهد وين فارس اكلمه مايرد؟
فهد وهو ينزل:مدري ..(طلع جواله ودق بس قمر ماردت ""لايكون صار لها شي""
طلع مفتاح البقاله اللي عنده وفتحه)
نزلت مها وهي حاطه يدينها ع قلبها بخوف
منى: مها ادخلي السياره بسرعه لايهاوشونك
مها وهي تبلع ريقها ولفت لمنى: خايفه عليه
خوله: مافيه الا العافيه امشي اركبي
هزت راسها مها وركبت وهي خايفه ع فارس

** داخـــل الــبــقــالـــه ..

دخلوا فهد ومشاري بسرعه لغرفه قمر
فهد بصدمه وهو يركض لقمر اللي بالارض لف يده تحت رقبتها بس قبل مايقول أي كلمه
صرخ مشاري: شيله خلنا نوديه المستشفى
هز راسه فهد وشالها بين يدينه وهو يتامل ملامح وجهها اللي لونها صار باهت وخصلات شعرها اللي متبعثره ع وجهها ..

ســيــاره فــهــد
شهقوا البنات وهم يشوفون فهد شايل فارس نزلت مها بسرعه وهي تركض لهم: وش فيه؟
ناظر لها مشاري بس ع طول قال: فهد ركبه معي
فهد وهو يحطها بسياره مشاري:عطني مفتاحك
استغرب مشاري بس ماهو وقت نقاش رمى المفتاح ع فهد وفهد عطاه مفتاح سيارته
مشاري وهو يركب سياره فهد وركبت مها قدام
مها وهي تبكي تمسكت بيدين مشاري: مشاري تكفى الحقهم مانبي نروح للبيت
ناظر لها مشاري بصدمه ""ليش تبكي معقوله لالا""
حرك السياره بسرعه ومشى وراء فهد ..

في المـــســتــشــفـــى ..

دخل فهد وهو شايل قمر:احد يساعدني
لفت نور وانتبهت لفهد ""هذا فهد ""
شهقت بسرعه سحبت سرير وهي تقرب لفهد:وش فيها ؟
رفع راسه فهد بعد ماحط قمر ع السرير وماعرف من البنت:ايش؟
نور وهي تدف السرير ولفت للممرض:ناد
قاطعها فهد: نبي الدكتور رامي
هز راسه الممرض وراح يركض ينادي رامي
فهد:من انتي؟
نور وهي تلمس وجه قمر:وشفيها؟
فهد: مدري انا جيت للبقاله ولقيتها مغمي عليها
نور وهي تحاول تستجمع قوتها سحبت السماعات وحطتها وهي تسمع نبضات قمر
دخل رامي بسرعه:فهد؟
لف فهد بسرعه لرامي:رامي شف قمر
هز راسه رامي وهو يحط يده ع كتف فهد:انتظرني برا فهد
فهد باصرار:لا ببقى هنا
سكت رامي وبدا يفحص قمر بمساعده نور ..

دخلوا مشاري المستشفى و وراءه البنات
مشاري وهو ياشر بيده للبنات: اقعدوا هنا
قعدن البنات ومها ميته بكي ومنى ضامتها
ناظرها مشاري بصدمه لف لغرفه الكشف وهو يشوف فهد واقف ومعطيه ظهره ومغطي ع قمر ورجع ناظر مها وصار يتذكر كلامها ""لالا مستحيل تحب صديقي مستحيل اجل ليش تبكي ""
(غمض عيونه بقوه وشد ع يده بقهر)

#يــتـــبــــع.....