رواية أكابر و اقول فراقه عادي و انا في داخلي اصرخ تكفون جيبوه الفصل السادس عشر 16 - بقلم HaboOoshy

بــــيـــت ابــوســلــمــان
جـــنــح ســـلــمـان و حــلا

دخل سلمان وهو يحط الشناط ع الارض:تفضلي
دخلت حلا وهي تناظر الشقه كانت عباره عن صاله واسعه ومطبخ مكشوف ع الصاله وفيه 3 ابواب الاول كانت غرفتهم وداخلها حمام والغرفه الثانيه مجلس بسيط وفيه تلفزيون والغرفه الاخيره فيها غساله ملابس اتوماتيك ونشاره طلعت من اخر غرفه وهي تقول:ابي انام
هز راسه سلمان ببرود:طيب نامي بالغرفه
حلا وهي تناظره:اا وانت؟
ناظرها سلمان ببرود بعدين قال:انا بطلع
ناظرته حلا بصدمه وشلون له خلق بس جاي من سفر وطياره وبهذله ولا بعد يطلع صدت عنه ودخلت الغرفه علقت عبايتها وطرحتها ع الشماعه وفتحت شنطه الملابس وسحبت بجامه ناعمه رمت البلوزه وبدأت تغير

عند سلمان لما وصل لسيارته الموقفه بالحوش ضرب راسه : اف وش هذا الغباء نسيت اخذ المفاتيح من الغرفه (هو حاط المفاتيح من قبل مايسافر بغرفه نومهم) (لف وجهه وراح يركض لفوق فتح باب الغرفه بدون مايطق الباب ووقف)
نزت من الخوف ولفت له وماقدرت تسوي أي شي من الصدمه بس لما استوعبت صرخت :براااا
هز راسه وطلع بسرعه وهو يسكر الباب ووقف مصدوم
اما حلا اركضت وقفلت الباب""ياربي وش هذا الاحرااج اااف انا غبيه ليش ماقفلت الباب اف"""
وقف سلمان شوي بعدين اخذ نفس وطق الباب بهدوء:حلا عطيني مفاتيح سيارتي من ع التسريحه
لفت حلا وناظرت المفاتيح سحبتها وفتحت الباب مدت له المفاتيح وهي منزله راسها
سلمان وهو يحك خشمه بخجل سحبه ولف وجهه بس وقف ولف ناظرها:حلا
رفعت عيونها له:هلا
سلمان: اسف ما كنت اقصد
حلا وهي تنزل راسها وبهمس:حصل خير
هز راسه وطلع وهو مرتبك حيل
تنهدت حلا ودخلت الغرفه وشالت ملابسها الوسخه ورمتها بسله محطوطه بغرفه الغسيل ورجعت لسرير ورمت نفسها عليه وثواني وهي رايحه بسابع نومه

مــســتـشــفــى الانــتــمــاء

بــصــالـــه خــاصــه للحــفــلات

وقف رامي ع المنصه:السلام عليكم
الكل لف عليه وصاروا يناظرونه
صار رامي يتامل الطلاب اللي قاعدين بالكراسي الاوليه وناظر اميره بنظره خاصه:اليوم بتروحون من هنا بس اليوم بتبدون الجد اليوم راح تنسمون دكاتره واطباء وطبعا كل واحد ع حسب اختصاصه (ابتسم ابتسامه واسعه) بالنسبه لي كنتوا دفعه غير غيرتوا نظرتي لاشياء كثيره مثل ماتعلمتوا مني انا بعد تعلمت منكم كثير(نزل راسه بعدين رفعه وضحك) شكلي بفقدكم
اطلق الكل ضحكه سواء كانت بسيطه او لا
ابتسم رامي وناظر اميره:جد بفقدكم واتمنى من الله يووفقكم بالدنيا والاخره وتقدرون تساعدون أي شخص يحتاج لكم بيوم وبالنسبه لطلابي كلكم نجحتوا بااخر اختبار توقعت بعضكم مايتعداه بس انتوا ماخيبتوا املي وامم ابي انادي بااسماء طلابي (صار يعددهم وكل شخص يتقدم عنده يمده له شهاده تقدير وهديه مغلفه لين ماجاء دور اميره)
تقدمت اميره ووقفت قباله
تاملها ثواني ومد لها الشهاده:تفضلي
سحبتها وهي منزله راسها وبهمس:مشكور
ابتسم ومد لها الهديه:ماراح انساك
اخذتها وكانت بتمشي بس وقفت ولفت له بس ع طول رجعت ومشت وهي تنزل من المنصه

بـــيـــت ابـــوفــهـــد
غـــــرفـــــــه فـــهـــــد
مشاري وهو يسحب الكرسي ويجلس عليه:فهد اجازتك بكرا تخلص يعني بعد بكرا لازم ترجع للشغل
سكت فهد شوي بعدين قال بهدوء:طيب
مشاري بقهر: فهد لاتجلطني قلي وش اللي براسك وش تفكر فيه؟
فهد ببرود:ولاشي
مشاري وهو يسحب اللاب اللي قدام فهد وصار يناظر شاشه اللاب كانت الخلفيه صورتهم فهد ومشاري وقمر تنهد ولف الشاشه لفهد:ولا شي؟
تنهد فهد وسكت شوي بعدين قال:وش تبي مني يامشاري انساها كذا بسهوله مااقدر انت ماجربت الحب
صار يتامله مشاري ""الا  جربته يافهد وربي جربته"" تنهد وجلس جنب فهد وسكر شاشه اللاب:لازم لازم تنساها فهد انت وين وهي وين مستحيل بيوم تكون لك حتى انا فقدته اه ايه فقدت فارس حيل فقدته مو بس انت حتى عمي شفته اللي بس يسبه مشتاق له وجدتي وعمتي وامك الكل مشتاق له هو اقصد هي تركت مكان ناقص بقلوبنا كلنا
رفع عيونه فهد لمشاري وبلهجه ضعف: وش اسوي؟

مشاري اللي سكت شوي بعدين قال:اصبر واكيد بيجي يوم وتلقى فيه فرصه تاخذها
سكت فهد وناظر مشاري تنهد وصد عنه وقال:مااتوقع بقدر اصبر لين تجي الفرصه
مشاري وهو يقرب لفهد:لازم تنتظر لازم تصبر
غمض عيونه فهد بالالم وفتحها وناظر مشاري وهز راسه بايجاب
ابتسم مشاري وطبطب ع كتف فهد وتنهد

شــــركـــه ابــوضــاري
وقف بصدمه وناظر عبدالعزيز:ايش؟
بلع ريقه عبدالعزيز واخذ نفس:عمي انا اسسف ادري اني طحت من عينك (رفع راسه وقال بسرعه) مستعد لاي شي تسويه أي شي حتى لو بتوديني الشرطه وتسجني وفلوسك برجعها كلها لك وو
قاطعه ابوضاري بكف حامي:ياحيوان هذا جزاتي امنتك ع حلالي وبيتي(وكانه تذكر شي) ونوف بنتي اللي تعلقت فيك (حس انه ماقدر يتوازن)
ناظره عبدالعزيز بصدمه ومسكه وجلسه:عمي؟
ابوضاري بهمس:اطلع اطلع
عبدالعزيز اللي يحس بيصيح:عمي تحس بشي؟
ابوضاري وهو يدف عبدالعزيز بقوه وبهمس كانه يكلم نفسه وهو يمسك راسه بيدينه:وش بقول لنوف وشلون بقولها ان زوجها طلع كذاب وبكرا زواجها وش اقول لضاري وش اسوي؟
قعد ع ركبه عبدالعزيز وباس يد ابوضاري:سامحني انا كنت مجرووح كننت ابي فلوس كان ع باللي هي اللي بتجيب لي السعاده (بدا يصيح) بس طلعت هي السبب بتعاستي اختي مدري وينها والاهل الوحيدين اللي اعرفهم رافضين لاتزيدها علي يا عمي تكفى ابوس رجولك اشتكي عليي جيب الشرطه خلهم يدخلوني السجن تكفى يا عمي مابي منك الا انك تسامحني
تنهد ابوضاري وناظر عبدالعزيز بتامل شوي:وشلون بسامحك ليش توك تتكلم انت تدري ان بكرا زواجك من نوف تدري؟
تنهد عبدالعزيز ونزل راسه للارض بعدين رفعه وبهمس: ادري عشان كذا ماقدرت اكمل بكذبتي انا تحت امرك بااللي تبيه لو تقولي ارم نفسك بالنار رميت نفسي
تنهد ابوضاري وناظر عبدالعزيز وهو مضيق عيونه

بـــيـــت خــالـــد الـــراســـي
يـــــوم الــعـــزيــــمه
دخلت ساره جناح اميره وانصدمت وهي تشوفها جالسه ع السرير:انتي مالبستي ولا تزينتي؟
تنهدت اميره وبصوت هادي:الحين بقوم
ساره وهي تقرب لها:اميره فيك شي؟
رفعت عيونها اميره لساره وصارت تتذكر اللي صار امس بالحفل

ااااااامــــــٍسسسس
كانت طالعه من الحفله للسياره بس وقفها صوت لفت وهي تشوف الدكتور الوليد استغربت بس وقفت:هلا دكتور فيه شي؟
قرب لها الوليد سكت شوي بعدين قال:اقدر اطلب منك طلب؟
اميره باستغراب:تفضل
الوليد:ااه بعدي عن رامي
انصدمت اميره من كلمته:ايش؟
الوليد:اسمعيني انا مو قصدي شي بس لاززم كل اللي بينك وبين راامي ينتهي
اميره اللي انقهرت من اسلوبه وكانها لها علاقه حميمه معه: انت عن أي علاقه تتكلم مابيني وبين رامي أي شي
الوليد وهو يرفع حاجب:وشلون مابينكم شي وانا امس شايفكم ضامين بعض ولا بعد بالممر ااه اسمعي راامي يبيك يحبك بس هو مايعرف ازهار حامل
حست وكان كف حامي انطبع ع خدها:ايش؟
الوليد: ايه حامل بشهرها الثالث ورامي لازم يرجع لها اكيد انك ماترضين ان هالولد يتشتت بكرا وبعدين انتي توك صغيرة والف واحد يتمناك واكيد بتلقين الا احسن من رامي ويناسبك اكثر تكفين بعدي عنه دوري لك أي مستشفى ثاني تشتغلين فيه كملي دراستك واكيد بتلقيني اللي يناسبك و رامي ناوي يخطبك ااه بيتنا كله رافض الفكره وزعلانين عليه بس متمسك فيك تكفين اذا ماترضين للبيوت انها تنهد ارفضيه خليه يقتنع ان الرفض منك ادري انه مالي حق اطلب منك هذا الطلب بس فكري بالولد او البنت اللي بتتشتت بكرا..
ماعرفت وش تقول تفرح لانه بيخطبها ولا ترفض عشان الكلام اللي يقوله ولا تسوي ""لحظه ازهار حامل"" صدت عن الوليد ومشت وهي تركب السياره بصدمه ..

رجعت للواقع وهي تاقف من السرير: اذا خلصت العزيمه اقولك
ساره اللي حدها مستغربه:طيب (وبمحاوله تخفيف عن اميره) الا اقولك اختك اسم ع مسمى مو اسمها قمر؟؟
ضحكت اميره بخفه: حلوه بس يعني مو جميله ناعمه بعدين الحين بتشوفينها
ساره:اففف حدي متحمسه
اميره وهي ماسكه باب الحمام:تتدرين ان وسن تزوجت تركي ولد عمها وبتجي اليوم؟
شهقت ساره بصدمه:اااه متى وليش ماحضرنا الزواج؟
هزت كتفها اميره باستغراب:مدري تعرفين ابوها نفسيه حيل يلا باخذ لي شور واطلع
ساره وهي تاقف:اجل انا بنزل لخواتي تحت ..

جــــنـــاح الـــضـــيـــوف
نادر: تكفين ياقمر عشان خاطري اطلعي
قبل ماتتكلم قمر انطق الباب: ادخل
دخلت ام ناصر وهي مبتسمه:ليش حبيبتي مالبستي لايكون ذوقي مااعجبك؟
ناظرت قمر ام ناصر بتتامل""ياترى هي صدق طيبه ولا تتصنعها؟"" سكتت وماردت وهي تلف و جهها
تنهدت ام ناصر وقعدت ع طرف السرير: نادر قوم روح للرجال ناصر يسال عنك
هز راسه نادر وهو ياقف بس بعد ماضغط ع يد قمر وطلع
لفت ام ناصر لقمر ومسكت يدها:اسمعيني حنا اهلك الوحيدين وهذا الشي لازم لازم تقتنعين فيه يبقى ابوك مهما غلط (ابتسمت باألم وهي تنزل راسها شوي بعدين رفعته وهي تتامل قمر) تتدرين انك تشبهين امك؟
ناظرتها قمر بصدمه:انتي شفتي امي؟
هزت راسها ام ناصر:ايه شفتها مرا كانت هي وابوك يمشون ع البحر كنت اعشق خالد (ابتسمت وهي تناظر قمر) ماانسى احساسي بذيك اللحظه انجرحت بس ظليت اقول بنفسي دامه مبسوط براحته ااه وما اكذب عليك لما طلق امك انبسطت (وقالت بقهر) تتدرين طول هالسنين كم مره غلط باسمي ويناديني عبير؟
بلعت ريقها قمر بااسف وعطف ع ام ناصر وسكتت
ام ناصر:استحملت والى الحين استحمل ااه خالد ماعمره حبني طول عمره كان يحب عبير يمكن لو وحده غيري كان اكرهتك ياقمر بس انا لا
قمر بسرعه:ليش؟
سكتت ام ناصر شوي بعدين قالت وهي تهز كتفها:مدري انتي مالك دخل انتي ضحيه حالك من حالي انتي بعمر عيالي مستحيل ااذي انسان اصغر مني (رفعت لها وابتسمت لقمر) قمر حبيبتي سامحي ابوك ادري انه غلط بحقك وحق امك واخوك بس يبقى ابوك سامحيه
قمر بقهر:لو عقلي سامحه قلبي مستحيل يسامحه ماقدر مااقدر صديقني حاولت حاولت بس ماقدرت اكرهه ايه اكرهه واحقد ع عبدالعزيز تمنيت اقدر اكرهه بعد بس اه
سكتت ام ناصر شوي بعدين قالت:الزمن كفيل انه ينسيك الحين اذا كان لي خاطر عندك البسي واطلعي (وقفت وطبطبت ع كتف قمر وطلعت)
صارت قمر تتامل ام ناصر لين طلعت من الجناح تنهدت ورجعت راسها لحافه السرير وهي تغمض عيونها طلعت جوالها ودقت ع نور وقالت لها كل اللي صار لها وبعد ماسكرت وقفت وصارت تناظر الفستان الناعم كان لونه ابيض لبسته و تنهدت وهي تناظر شنطه المكياج حطت حكله فرنسيه ومسكرا وروج وردي ناعم وشوي بلشر"""ياربي شعري وش اسوي فيه"" صارت تتحوس بالاغراض اللي جابتها ام ناصر سحبت الجل وبعثرت شعرها فيه ومسكته من قدام ببكله صغيره حيل ع شكل فراشه وقفت وهي تتامل نفسها اخذت نفس عميق ولفت وجهها وطلعت ..

بــــيــــت نــــــور
قعدت نور بصدمه من كلام قمر وطبعا هدتها وقالت لها اطلعي لهم نزلت تركض مع الدرج:يمه بروح لمنيره
ام فواز:طيب بس لاتتاخرين
نور:لا يمه يمكن انام هناك
ام فواز:طيب بس كلميني
هزت راسها نور وراحت تركض وهي تلبس نقابها وطلعت

بــــيــــت مـــنــيـــره
دخلت نور وهي تسلم ع ام منيره وراحت تركض لغرفه منيره دخلت وهي تسلم عليها وصارت تقولها اللي صار لقمر
منيره بقهر:ياحياتي هالبنت مالها حظ بالدنيا يوم انبسطت وكانت بتتزوج فهد صار لها كذا
نور: ايه اجل لو تتدري بعبدالعزيز وش تسوي (عضت ع شفايفها انها جابت طاريه عند منيره وبهمس) اسفه حبيبتي
تنهدت منيره:لا عادي مانتي ناويه نقول لقمر؟
نور بسرعه:لالا ياعمري هي اللي فيها مكفيها ..
تنهدت منيره وهي تناظر من شباكها حارتهم:ليش مكتوب لنا الضيق؟
سكتت نور شوي بعدين قالت:ماتتدرين يمكن هالضيق خيره لنا؟

بــــيـــت خــالــد الــراســـي
صارت تسمع الاصوات اقرب لها وقفت وهي تاخذ نفس لفت للمرايه المعلقه ع الجدار وصارت تناظر نفسها بس نزت ع صرخه من وراءها
وسن:قمر
لفت قمر وهي تشوف وسن انبسطت حيل وضموا بعض بقوة

كانت اميره توها نازله من الدرج واستغربت ضمه وسن لقمر يعني وش عرفهم لبعض؟
وسن وهي تضم قمر بقوه:اشتقتلك موت
قمر:وانا اكثر ياقلبي (بعدت عن وسن) وش صار عليك؟
وسن: يوه سوالف (ابتسمت بالالم وهي تشد ع يد قمر) اسفه ع اللي صار لك
هزت قمر راسها بلا: اه امشي الحمد لله انك جيتي كنت خايفه ادخل لحالي
هزت راسها وسن ودخلوا وبدوا يسلمون وقمر حيل مرتبكه
ام ناصر:قمر تعالي جنبي
راحت قمر جنب ام ناصر وقعدت بهدوء ..

ام ناصر:اعرفك هذي جدتك
رفعت عيونها قمر لها بس نظره الجده ابدا ماعجبتها صدت عنها
ام ناصر:وهذي مرة عمك محمد وهذي عمتك ابتسام وهذي عمتك فوز وهذي بنتي اميره تعرفينها وهذي سديم اكبر بنات عمك وهذي ساره اللي بعدها ع طول وهذي ريوف اللي بعد ساره وهذي ريناد واخر وحده رغد وهذي وسن بنت عمتك
سكتت قمر وهي تناظرهم ببرود وصدت بهدوء
كانوا يتكلمون مع بعض وهي ساكته ونظرات الجده لها حيل مربكتها
اميره وهي تنزل جوالها:يمه ابوي يقول ان جدي وعمي بيدخلون
تغطوا الحريم ودخلوا الرجال
قرب خالد لقمر ولف يده حول كتوفها:هذا ابوي
دفت قمر يده بقوه وحركه ملحوظة للكل وناظرت الجد بهدوء وسلمت عليه ببرود
انقهر خالد من حركتها بس بلعها:وهذا عمك
سلمت عليه بنفس البرود وقعدت
دقايق وقالت ريوف:بنات قوموا نروح للمجلس الثاني (قربت لقمر) قمر تروحين معنا؟
اشرت لها وسن انها تقوم
هزت راسها وقامت وراحوا للمجلس الثاني

بـــــيـــت حـــمـــــد
كان منسدح ع الكنب وحاط يدينه تحت راسه ومهند يلعب بالتركيبات ع الارض ناظر ولده وغمض عيونه ""بايش كنت افكر هي وين وانا وين اللي يصلح لها هو ثامر بنفس مستواها الاجتماعي وحلو ويحبها اما انا ماعندي غير حبها بس ماراح اقدر اعيشها بنفس مستوى اللي تعيشه هي الحين اااه ااف خلاص بكرا بروح للعم واطلب منه نقل ايه بنقل من كل الشركه بروح للفرع الثاني ماراح اقدر استحمل اشوفها ليش حظي كذا؟ كل ماحب وحده تنكتب لغيري ااه يارب صبرني وسكر ع قلبي خلاص ماعاد ابي احب أي وحده شكلي مالي الا اربي ولدي واقعد عزوبي طول عمري لان سديم مستحيل تكون لي"""

بـــيــــت ابــومــعــاذ
معاذ وهو يدخل الصاله:انا طالع
يارا وهي تركض:لحظه لحظه بنروح معك انت بتروح للعزيمه حقت الراسي؟
معاذ:ايه
يارا:ايه بنروح معك اجل بدال مانروح مع السواق
معاذ:يلا تاخرنا بسرعه البسوا عبايتكم
جت سما ووراءها امها وهم لابسين وراحت يارا لبست بسرعه وهي تاخذ مجموعه كتب
سما وامها صاروا يمشون سابقين معاذ ويارا
معاذ:انتي صاحيه فيه احد يروح لعزيمه بكتب؟
يارا:لا هذي مو كتبي هذي كتب ريوف انا اخذتها منها ذاك اليوم
معاذ بفهاوه:ريوف تقرا كتب؟
يارا بحماس:ياي زيي بالضبط وه بس واخيرا لقيت احد يفهمني عاد هالمره برجع كتبها وبعطيها كتاب حلو توني مخلصته
سكت معاذ شوي بعدين قال وهو يناظر سيارته:يعني هي ماتهتم بااشياء البنات زي سما المكياج واللبس؟
يارا اللي ماركزت ان معاذ يسال عن ريوف:لالا اقولك زيي بالضبط اكثر شي تعشقه الكتب
سكت وهو يفتح باب السياره ويركب وركبوا كلهم ومشوا وباله مشغول بكلام يارا..

بــــيـــت خـــالــد الــراســـي
دخلوا البنات المجلس الجانبي وقعدوا
سديم:قمر
لفت لها قمر بهدوء وناظرتها
سديم بابتسامه:انتي أي سنه؟
سكتت قمر شوي بعدين قالت:انا ماكملت دراسه
سديم:اها وين وصلتي فيها؟
قمر:ثالث ثانوي
ابتسمت سديم بتامل:باذن الله تكملينها
ناظرتها قمر بهدوء ولفت وجهها
ساره بحماس:امور تعالي صح امس خلاص اخر يوم تتطبيق؟
اميره بابتسامه:ايه
ريوف:وسن سامحيني ياقلبي نسيت ابارك لك
وسن بابتسامه:لا عادي الله يبارك فيك ههه
ريوف: وين عايشين الحين انتي وتركي؟
وسن:بشقة لتركي
ريوف:اها الله يوفقكم يارب
وسن بهدوء:امين
قمر بهمس لوسن:وسن وش صار؟
وسن بنفس الهمس:بعدين اقولك
قطع كلامهم دخول سما ويارا وقام الكل يسلم
سما:ماعرفتونا ع الحلوات؟
ابتسمت ريناد وهي تاشر:هذي بنت عمي خالد قمر وهذي وسن بنت عمتي ابتسام
سما بصدمه وهي تناظر اميره:اختك؟
يارا:يا دبا ماقلتي لنا انو عندك اخت؟
تلاقت عيون اميره بعيون قمر سكتت اميره شوي بعدين قالت: مدري ههه ماحصل فرصه
ساره بترقيع لاميره: ايه يعني هو ان قمر اخت اميره بس من الابو
سما اللي حست انها احرجتهم:اها
بدوا يسالفون البنات مع سما ويارا ماعدا قمر ساكته وتلعب باصابعها بهدوء
وقفت ريناد وبابتسامه:قمر؟
رفعت راسها قمر لريناد:هلا
ريناد: تروحين معي بجيب شي من شنطي فوق؟
سكتت قمر شوي""خليني اروح"" وقفت:طيب
وسن:وين؟
قمر:بروح مع ريناد
هزت راسها وسن ولفت تكمل سالفتها مع سما ..

بـــيـــت ابــوســلــمــان
جــنـاح ســلــمـان و حــلا
فتحت عيونها حلا بتعب ناظرت ساعتها شقهت وهي تشوفها الساعه 10 بالليل ""االله اوه كل هذا نوم؟"" وقفت وراحت للحمام وتوضت وصلت وقفت وطلعت للمطبخ فتحت الثلاجه ابتسمت وهي تشوفها معبيه من العصيرات والغازيات والشوكولاته""ياحليل خالتي"" سحبت عصير تفاح وجالسكي مكسرات وقعدت ع الكنب قدام التلفزيون وهي تحط رجولها ع الطاوله القزاز اللي قدامها وقاعده تتفرج ع التلفزيون ساعه وساعتين بعدين وقفت"" ااف زهق (ناظرت ساعتها شافتها 2 بالليل) هذا وينه من فجر الله وهو طالع لين الحين مارجع ااف ""اخذت جوالها"" وربي اني غبيه ماعندي حتى رقمه اطلبه من خالتي اوه فشله عاد وش اسوي كذا ولا كذا بالاخير بطلبه منها خليني انزل لها بس قبل اغير ملابسي""غيرت ملابسها ونزلت ..

ســيــارة عـبــدالـعــزيــز
مركي يده ع الدركسون ومشغل ميوزك هادي ومعقد حواجبه ""اااه ياربي وشلون بقول لنوف وشلون االله يهديك ياعمي ااه بس""وقف السياره ع جنب وغمض عيونه وهو يتذكر اللي صار بالمكتب

مـــكــتـــب ابــوضــاررري
وقف ابوضاري وهو يرجع وراء المكتب وبلع ريقه ورفع اصبعه بتهديد:شوف ياعبدالعزيز ماابي منك الا شي واحد بس انك تروح الحين لفلتي وتقول لنوف كل شي فاهم انا ماقدر اقول لبنتي كذا وعشان تقبل وتصدق ابيها تسمع منك
عبدالعزيز بصدمه:عمي بس انا
قاطعه ابوضاري:ولا كلمه احمد ربك اني عشان العشره والملح اللي بيننا بتركك تروح كذا وكل قرش اخذته مني حلال عليك وماراح ادخلك السجن بس روح لنوف وقلها ولا ابي اشوف وجهك ثاني مره هنا يلا قوم اطلع لاتخليني اجيب الامن يشيلونك
وقف باالم ومشى طالع من المكتب..تنهد وهو يفتح عيونه وحرك السياره دقايق ووقف قدام القصر وهو يتامله ضرب بيده الدركسون بقهر ""الله يلعن الفلوس الله يلعنها"" فتح الباب بعد ماخذ نفس ونزل ..

بــــيـــت خـالــد الــراســـي
جـــنـــاح امــيـــره
دخلت ريناد ووراءها قمر اللي تناظر الجناح بتامل وتدقيق
نزلت ريناد لشنطتها اللي حطتها ع سرير اميره وفتحتها طلعت علبه ماكنتوش اكبر حجم ولفت لقمر وهي تبتسم بنعومه وتهز العلبه:احلى شوكولاته بكل العالم
ضحكت قمر بخفه وسكتت:ههه
قعدت ريناد ع السرير:امم قمر؟
لفت لها قمر وسكتت
ريناد اللي مو عارفه وشلون تبدا:اممم ترى ايه ترا عمي حيل طيب وانا متاكده انه يحبك حتى عمتي (تقصد ام ناصر) حنونه وتخاف ربها مرا يمكن تقصر بعض الاحيان بحق اولادها بس هي تحبهم بشكل ماتتصورينه واميره بعد طيبه بس يمكن هي خايفه او مصدومه يعني (ناظرت عيون قمر) صعبه صح لما تتطلع لك اخت فجاه ماراح تقبلين الموضوع بسهوله بس اكيد بتتقبله
ابتسمت قمر وكتفت يدينها وصارت تتامل السماء من شباك اميره الكبير اللي بحجم الجدار كله:انا انا مااكرههم انا مااكره الا شخص واحد لو الكل قاال انه طيب وان كل صفات الخير فيه مستحيل احبه هو ماجرحني بس (عقدت حواجبها بعلامه ضيقه) هو دمر حياتي هو جرح امي وجرح اخوي هو جرح طفولتي هو جرح مراهقتي هو السبب بكل الم ودمعه بيوم نزلت ع خدي (هزت راسها بعلامه ناكره) انتي ماحسيت باليتم انتي ما عشتي بالفقر ماعشتي تحطين يدينك ع بطنك اللي يوجعك من الجوع وتضحكين بوجه الغالين وتقولين شبعانه (ابتسمت باستسخفاف) ماعشتي تبنين احلام واحلام وفجاه كلها تنهار ماعشتي تتالمين وماتقلين الحضن اللي تبينه ماعشتي كل ماغمضتي عيونك عشتي بااسوء كوابيس (رفعت راسها لريناد) خلصتي ننزل؟
اما ريناد اللي فاتحه فمها بصدمه وتناظر قمر بذهول وتفكر بحياه قمر"" ياترى هذا القليل بس مالومها يوم تكره عمي هو السبب مسكينه كيف عاشت حياتها حنا هنا مبسوطين وكل شي نبيه يجينا وهي"" صحت ع يد قمر اللي صارت تحركها قدام وجهها
قمر:ماتسمعين؟
وقفت ريناد وهي تناظر ظهر قمر الطالعه من الجناح وتفكر قد ايش قمر قويه سحبت العلبه ونزلت تركض وراء قمر

بــــيــــت ابــوســلــمــان
جـــنــاح ســلــمــان و حــلا
دخلت جناحها وهي تناظر رقمه اللي اخذته من خالتها ""ادق والا لا خلني ادق"" دقت وسكتت تنتظر رده

ســـيـــاره ســلــمــان
سحب جواله وهو دايخ قرب للبيت مايبي الحين الا سريره رد بدون مايشوف الرقم وبصوت باين انه نعساان:الو

جــنــاح حــلا و ســلــمـان
وقفت بذهول وصدمه تغلط بكل الاصوات الا صوته تعرف صوته بكل حالته الحين هو نعسان لحظه معقوله اللي تفكر فيه صح معقوله سلمان هو نفسه حبيبها لالا حاولت تطرد هذي الافكار مستحيل اكيد انها تتخيل صوته سكرت السماعه بسرعه وهي تناظر الرقم وبهمس:مو نفس الرقم حتى (جت ببالها تتدق ع رقم سلمان حبيبها دقت بسرعه لانها حافظته عن غيب قعدت ع الكنب من الصدمه وهي تسمع الخط الثاني يقول الخط مفصول) بهمس:يعني ايش يعني حبيبي كان معي طول الوقت وانا مدري لالا مستحيل مستحيل (رجعت تتدق ع سلمان وهي مركزه كل جوارحها ع اذونها)

ســـيـــارة ســلــمـــان
استغرب من اللي سكر بعد الجوال على اذنه وهو يشوف رقم رمى الجوال بالمرتبه الثانيه ودخل البيت بسيارته ولما وقف دق جواله ثاني مره اسحبه ورد:الو
سكتت حلا شوي ""خلني اتكلم عشان اتاكد"" ونبره مرتبكه:الو؟
سلمان اللي عقد حواجبه:من؟
حلا بهمس:انا حلا
بلع ريقه بصدمه طبعا راح عن باله حلا زوجته وطرى بباله حلا حبيبته:هاه؟
حلا:حلا حلا زوجتك
رد باسلوب جاف:هلا انا داخل البيت يلا(وسكر بدون مايسمع ردها حتى)

جــنـاح حـــلا و ســلــمـان
بلعت ريقها وهي تبعد السماعه عن اذونها وماسكه الجوال بيدينها الثنتين وحاطته بحضنها
انفتح الباب ودخل سلمان وهو يسكر الباب:كنتي تبين شي؟
رفعت عيونها ببطء له وهي تتامله ""معقوله هذا هو حبيبي معقوله هذا هو قدامي""
استغرب سلمان من نظراتها:هيه حلا فيك شي اكلمك انا
حلا بدون شعور:لبيه
بلع ريقه بصدمه وتفشل:هاه؟
حلا اللي وقفت بارتباك:هاه لا وش كنت تبي اقصد وش تقولةسلمان وهو يحك خشمه بارتباك:ا كنت اقول تبين شي داقه؟
حلا وهي تحرك جوالها بيدينها بارتباك:لا لا كنت بس ابي اشوفك  اقصد يعني انك تاخرت بس ( رفعت راسها وهي تتامل عيونه)
سلمان وهو يرفع راسه بس قبل مايتكلم تلاقت عيونه بعيونها وصار يتاملها ثواني
حلا اللي ماقدرت تبعد عيونها عنه ماهي مصدقه ان حبيبها هذا هو قدامها
قرب سلمان لها وبحركه سريعه وغير اراديه مسك وجهها وباسها
فتحت عيونها حلا بصدمه ذهول
بعد عنها سلمان ع طول وهو يحك شعره: اسف اسف ماكنت اقصد هو يعني اا
حلا وهي منزله عيونها بالارض وبهمس:حصل خير
بلع ريقه وسلمان ودخل الغرفه بسرعه وسكر الباب
ابتسمت بخفه بعد ماسكر الباب رمت نفسها ع الكنبه وراءها وغمضت عيونها وحطت يدينها ع قلبها وبهمس:احبك ..

بـــيـــت ابــوضــــاري

اخذ نفس عميق وهو يدخل الصاله ناظر الخدامه:روح نادي نوف
هزت راسها الخدامه وراحت بعد ربع ساعه جاءت نوف وهي تبتسم:حبيبي تتدري انو مايصير اشوفك ههه بكرا زواجنا
ناظرها بتامل ""وشلون قدرت اجرحها هي مالها ذننب ااه"":اا اجلسي بقولك شي
ناظرته باستغراب وقعدت ع طرف الكنبه وهي تناظر له:خوفتني بيبي وشفيه؟
سكت شوي عبدالعزيز بعدين قال:اا اااا انا
نوف:ايه انت ايش تكلم
عبدالعزيز وهو يناظرها:اا اا انا ااه انا كذبت عليك
نوف بصدمه واستغراب:كذبت علي باايش؟
عبدالعزيز بسرعه: بكل شي بكل شي ااا حتى اسمي اا انا واحد فقير ااه (صد بعيونه عنها مايبي يناظر عيونها) كنت واحد عايش حالي حال كل الناس كنت فقير ويتيم كان عندي ام واخت ااه كنت اصرف عليهم بالمكافاه اللي بالجامعه وبيوم ماتت امي ماقدرت استحمل العيشه امي ماتت لانو ماعندنا فلوس ماقدرت اقابل اختي اختفيت عنهم ووو اا وو تعرفت ع شباب و اتفقت معهم نلعب ع واحد غني واخترنا ابوك زورت كل شي الشهادات واسمي وبديت اكسب ثقة ابوك (رفع راسه وناظرها وهو يحرك يدينه بالالم) صدقيني انتي ماكنت بمخططي صدقيني ماكان قصدي اجرحك بس كذا جت حبي للفلوس اعماني عن كل شي كل شي (نزل راسه وبقهر) وخسرت كل شي اختي واهلي واصدقائي وعمي وضاري وانتي نوف تكفين سامحيني ااه (رفع راسه وناظرها) نوف انتي طالق طالق
غمضت عيونها بالالم والدموع تنزل منها وكلمته تتردد بداخلها""معقوله كل هالسنتين اللي عاشتها بالهحب كذبه معقوله يعني هو كان يستغلها"" وقفت ماقدرت تستحمل بس حست كل الدنيا تتدور فيها
ركض لها عبدالعزيز ومسكها قبل ماتاصل للارض:نوف نوف ردي علي نوف (صار يصارخ ع الشغاله وجابت ماء رشه عليها بس ماصحت)
صررخ:جيبي عبايتها بسرعه

بـــيـــت خــاللــد الـراســـي
جــــنـــاح الــضــيـــوف
دخلوا قمر ووسن وصاروا يقولون لبعض كل اللي صار لهم من اول ماتفارقوا لين اخر لحظه
وسن وهي تمسك يد قمر بقوه:اصبري حبيبتي اصلا مالنا غير الصبر شوفي اناا ااه وشلون عايشه مع تركي
هزت راسها قمر بياس:تتدرين ياوسن وش اصعب شي علي؟
وسن باهتمام:فراق فهد؟
هزت راسها قمر بلا:لا اني كل ماناظر ابوي اتذكر امي (بدت دموعها تنزل) وسن ابي اموت وارتاح محد بيفقدني مااحد بيهتم
وسن بغضب: وانا وش هذا الكلام من لي من بعدك ياويلك ياقمر ان سمعتك تقولين كذا مره ثانيه فاهمه؟
انفتح الباب بقوة ..

دخلت ساره بهجوم:بسرعه قوموا بنرروح للسوق
دخلت ريوف وراءها وهي تبتسم بخجل: اعذروا اختي الغبيه ترا ماعندها ذوق (ولفت لساره) مره ثانيه طقي الباب
ابتسمت قمر غصبا عنها ع اشكالهم وبالذات ساره اللي مستحقره كلام ريوف ومسحت دموعها وناظرت وسن:تروحين؟
وسن: ايه
ساره:بسرعه اجل ترا حنا بالسياره
ريوف وهي تمشي وراء ساره:بلا كذب تونا حتى مالبسنا عبايتنا
ساره بصراخ: فكي عني يرحم امك
ضحكت قمر:ههههه ياحليلهم
ابتسمت وسن بفرحه عشان قمر ضحكت:اجل دايم بجيب لك ساره هالخبله
ضحكت قمر ووقفت:بس صح
وسن باستغراب:ايش؟
قمر:ماعندي عبايه
وسن: مو مشكله ثواني واجيب لك
الـــصـــالـــه
ام ناصر: يا بنات خذوا قمر معكم
ساره وهي تسكر عبايتها:ايه خالتي بتروح معنا
ام ناصر: زين اسمعي رغد حبيبتي روحي نادي قمر ابيها
هزت راسها رغد وراحت تركض ونادت قمر
دخلت قمر بهدوء:هلا
ابتسمت ام ناصر واشرت لها تجي جنبها
اقعدت قمر جنبها وسكتت
ام ناصر:بتروحين معهم صح؟
قمر بهدوء: ايه
مدت لها ام ناصر بطاقه بنك:خوذيها
ناظرتها قمر باستغراب وبعزه نفس:لا مشكوره معي
ام ناصر:اولا هذي مو مني هذي من ابوك وثانيا ابوك كل واحد من عياله معه زي هالبطاقه وهذا حقك ماهو عيب تاخذينه
صا رت تتامل البطاقه بتركيز ""الحين ابوي وعبدالعزيز باعوني عشان بطاقه زي هذي بس هذي البطاقه الخفيفه الصغيره فيها ملايين ااه"" وقفت وهي تشوف وسن تاشر لها:قولي له مابي منه شي مايكفيني ان اسمه مرتبط بااسمي (ومشت سحبت العبايه من وسن ومشت)

اميره بصراخ:بسرعه
وقفت قمر ولبست العبايه ولما جت بتلف الطرحه ابتلشت حست نفسها كانها اول مره تلبسها
وسن وهي تكلم بالجوال وبعيده عنهم
قمر: وسن تعالي ساعديني
وسن اللي اشرت لها بيدها يعني لحظه وتتكلم بعصبيه:انا مو ماخذه اذنك فاهم؟
قمر وهي تصد:اااف
قربت لها اميره:اساعدك؟
ناظرتها قمر بهدوء ولفت تناظر المرايه بعدين ناظرت اميره:طيب
قربت اميره من قمر وصارت تلفها لها بعدين مدت لها النقاب
سحبت قمر ولبسته:مشكورة (لفوا كلهم ومشوا صارت تحرك النقااب تحس انها مختنقه ""اف ياربي من زمان مالبسته"" لفت لوسن):وشفيك من كنتي تكلمين؟
وسن وهي تركب وبعصبيه:تركي الزفت
ضحكت قمر وركبت جنبها
ساره وهي تصفق:راجو شغل اغننيه راشد اه منك منقهر وامش للسوق بسرعه
هز راسه راجو:حاضر ماما يبي اه منك؟
ساره:ايه بسرعه
هز راسه وشغل الاغنيه ومشى
صاروا البنات يصفقون ويغنون ماعدا وسن اللي مكتفه يدينها وصاده تناظر من الشباك وقمر الهاديه وهي تتاملهم بهدوء

مــــجـــلـــس الــرجــــال
باخره كان جالس خالد وجنبه ابوسديم ويتكلمون بهمس
خالد وهو يتنهد:ااخ يامحمد مدري وش اسوي مع هذي البنت مو طايقتني حتى البطاقه رجعتها ولا تخيل تقول مابي منه ومايكفيني ان اسمه مرتبط باسمي لهدرجه كارهتني حتى اسمي ماتبيه؟
تنهد ابوسديم وحط يده ع يد اخوه:هونها يااخوي هي مرت بايام صعبه ومستحيل تقدر تنساها بسهوله بس انا متاكد انه مع الايام بتسنى وبتحبك وبتقول محمد قاله
هز راسه بلا وهو يناظر لبعيد:مااظن مااظن

 

الـــمـــــول
نزلوا البنات من السياره ودخلوا المول
ريناد وسما:حنا بنروح لمحل ومن سكرت
ساره: وع وش تبن بالبجامات؟
سما:عاد نبيها يلا ريناد
ريناد:يلا(لفت لساره) اذا جيتوا تتطلعون دقوا علينا
ساره:طيب
ريوف:يارا خلينا نروح لجرير(جرير موجوده بنفس المول)
ساره:انا بصراحه مالي خلق ابي بس ابلع واتفرج ع الناس
اميره:ههههه زيي
سديم:مالت عليكم من يروح معي لهذاك المحل ابي اشوف لي صندل حلو؟
وسن وهي تناظر قمر:تروحين (قصدها مع سديم)
قمر بهدوء: لا مالي خلق امشي
وسن:طيب (لفت لسديم) بروح معك
سديم:يلا
ساره:مابقى الا حنا الثلاثه امشوا فوق (بقى اميره وساره وقمر)

الـــمــســتــشــفـــى
جاء ابوضاري يركض ووقف بخوف: وين بنتي وش صار لها؟
عبدالعزيز بخوف:مدري مدري
طلع الدكتور وركضوا له:هي بخير الحين (تنهد عبدالعزيز براحه) بس جاها انهيار عصبي شديد ولازم ماتتعرض لصدمه او تتضايق
ابوضاري بتشتت:اقدر اشوفها؟
الدكتور:اكيد تجلس اليوم عندنا وبكرا تتطلع
هز راسه ابوضاري وجاء بيدخل لف لعبدالعزيز اللي كان بيدخل معه حط يده ع صدر عبدالعزيز وبغضب:انقلع روح ماابي اشوف وجهك ثاني مره ارجع لزباله اللي جيت منها انقلع
هز راسه عبدالعزيز ولف وجهه ومشى عيونه بالارض ويمشي بدون هدف وكل شوي يصدم احد مشى لين طلع من بوابه المستشفى جلس ع الكراسي اللي عند الباب غطى وجهه بيدينه ""وينك ياقمر وينك انتي مرتاحه والا لا ااه تعالي محتاج لك محتاج اضمك لصدري اشتقت ادخل واشوفك مستقبلتني واضمك واطير فيك بالهواء .. انا اللي ضيعت هذيك السعاده بيديني (مد يدينه وصار يتاملها) بهذي ضيعت نفسي ااه وين اروح ولمن من اللي بيستقبلني فواز لا ااه هو لسى زعلان علي مانسى اللي سويته لهم ااخ بس لو يرجع الزمن لوراء كان ماسويت اللي سويته ااه ""وقف فجاه من اللي طرى بباله"" اروح له بس وش اقوله؟ا اقوله انا ولدك واذا مااستقبلني لا لا ااه وين اروح ""

بـــيـــت ابــوفــهـــد
مشاري وهو يسحب فهد:قلت قوم انا والبنات بنروح تجلس انت لحالك ليش؟
فهد:اااف مشاري بعد عني قلت لك مو رايح
ام فهد وهو واقفه عند الباب وبضيقه:واذا قلت لك عشاني ياوليدي؟
ناظر امه بتمعن""يمه حسوا فيني افهموني اعشقها احس اني ودعت الفرح من بعدها"" سكت وبعد عيونه عن امه:طيب
ابتسمت ولفت وجهها ومشت ""حااسه فيك يمه ادري وش قاعد يصير بداخلك بس استحمل استحمل""

غـــرفـــه مـــنـــى
نواره:احسن شي اننا بنطلع ااف احس البيت حده كئيب
منى وهي تسكر عبايتها:صادقه وين مها؟
خوله:تلبس عبايتها اووه ماتوقعتها توافق تتطلع
نواره بضيقه:الله يعينها بصراحه شي مو سهل ااه امشوا امشوا مشاري وفهد ركبوا السياره
طلعوا البنات وركبوا السياره

الــــمـــــول
ســــتــار بــكـــس
كانوا البنات جالسين وهم يسالفون ماعدا قمر ساكته
ساره:اقول امور يعني خلاص الحين رسميا انتي الدكتوره اميره؟
اميره:ههههه ايه خلاص رسمياا
لفت قمر لها بصدمه ""دكتورة ااه يالدنيا حلمي اللي ياما حلمت فيه من صغري يصير لاختي وانا؟؟"" نزلت عيونها بعدين صدت وهي تتامل الناس الرايحه والجايه هذي ام ماسكه اولادها اللي يركضون من مكان لمكان وهذي مجموعه بنات يضحكون ويسالفون وهذا رجال مع مرته يتمشون وماسكين يدين بعض وهذولاء شباب قاعدين يغازلون بنات اطلقت اه مسموعه بدون ماتحس
ناظروها اميره وساره بعدين ناظرن بعض وسكتن
ساره وهي تاقف:هاه وش تبون؟
اميره:اممم انا ابي كافي ميت بس حار وامم ابي شيز كيك
ساره:وانتي قمر؟
قمر بهدوء:ولاشي
ساره:لا عاد لازم تتطلبين (وقبل ماتتكلم قمر) مافيه لاترفضين راح تتطلبين يعني تتطلبين
سكتت قمر شوي ""اصلا انا مااعرف كنت مره باالسنه عبدالعزيز هو اللي يتشري لي بس الحين"" تنهدت:ع ذوقك
هزت راسها ساره ومشت
صارت اميره تتامل قمر وعيونها بتدقيق ""نفس عيون ابوي بالضبط صغيره بس حاده اممم ماهي جميله بس ملامحها ناعمه يعني كانها يابانيه والا كوريه كل شي فيها صغير حتى جسمها وقصيره وو(قطع افكارها كلمته قمر)
قمر:مضيعه شي بوجهي؟
اميره اللي تفشلت صدت عن قمر وسكتت ثواني وطلعت الايفون حقها وصارت تضغط فيه

بـــــنـــفـــس الــــمـــول
دخلوا فهد ومشاري و وراءهم البنات وهم يمشون ويسالفون ماعدا اثنين فهد ومها هاديين
نواره:ترا مانبي نتسوق خلونا نصعد فوق ع طول
خوله:لاحبيبتي تكلمي عن نفسك انا ابي اشتري ثوب عشان العيد مابقى عليه شي
منى:صادقه مابقى الا شهرين تعالوا السبت تبدا اختبارتكم صح؟
نواره: اف يعني لازم تذكرينا؟
خوله:صادقه ندري
مشاري:يعني مابقى الا 3 ايام بس
نواره: ايه اقول لاحقين ع الملابس خلونا نصعد جوعانه
ابتسم مشاري:يخسى الجوع وانا اخوك امشي
ضحكت نواره:وه بس يالبى اخوي بالله وين القى زيه؟
خوله:مشاري تصير اخوي؟
مشاري:هههههههه
(ركبوا السلم الكهربائي ودخلوا جهه المطاعم)

عــــنـــد الــبـــنــات
ساره وهي تنزل الكافي والاكل:وه ياكثر الاوادم ماتقولين بعد 3 ايام تبدا الاختبارات
اميره وهي تنزل الايفون:هههه هو عشان كذا تلقين كل واحد يقول بطلع اخر طلعه قبل الاختبارات
ساره:هههه صادقه
وقفت قمر وبهدوء: وين الحمام؟
ساره وهي تاشر:بيدها هناك
هزت راسها قمر سحبت شنطتها ومشت وعيون البنات تراقبها
كانت تمشي وعيونها بالارض حست انها صدمت احد مابعدت عنه ولا تحركت ولا حركه لانها تعرف لمسته تعرف ريحه عطره رفعت راسها شوي شوي وناظرته

كان يمشي ووقف وحس بااحد صدمه لف للبنت صار يتاملها عرفها يعرفها من بين مليون بنت حتى لو هي متغطيه قلبه يدق لما تقرب منه ولما تلاقت عيونه بعيونها حس وكان الزمن توقف وكان كل الناس اللي بالارض اختفوا ومابقى الا هو وهي ابتسم وتنهد وهو يرمش بعيونه ويتاملها

دمعت عيونها وهي لسى لاصقه فيه ماقدرت تبعد ولا خطوه تمنت الزمن ياقف هنا ولا يكمل ولما اطلق اه تعب او يمكن شوق شهقت ماقدرت تستحمل شدت ع شنطتها بقوة

ابتسم وبهمس:قمر قمر
شهقت وبهمس:فهد

كانوا مشاري والبنات واقفين بذهول ماتوقعوا ابدا يشوف قمر وبالذات مها
وساره واميره ماهم اقل منهم صدمه ويناظرون لهم

نزلت عيونها بالارض قمر وهي تبعد خطوه عنه وصارت بينهم مسافه بسيطه وبهمس:اشتقت لك اشتقت تقولين انا هنا ( رفعت راسها وصارت تحرك عيونها ع ملامحه وكانها تبي تنسخها تبي تحفظها زين)
ابتسم وقال ببحه وصوت اقرب للهمس:انا هنا قمر يكفيني انك تتنفسين الهواء اللي اتنفسه احمد ربي اني قدرت اشوفك الحين
هزت راسها قمر:ليش نحفان ووجهك اصفر؟
فهد:عشانك
قمر وهي تمسح دموعها:لا تراني اتعذب لاتزيدها علي تكفى اذا تحبني صدق لاتسوي كذا بنفسك تراني اموت
لاشعوريا مد يده وحطها فوق فمها وتوسعت عيونه:لاتقولين هذي الكلمه فاهمه تراني اموت مليون مرة اذا قلتيها
ناظرته بفهاوه غمضت عيونها هزت راسها وهي تبعد يده:بسم الله عليك (سكتوا مايدرون وش يسوون يبكون والا يفرحون يودعون ولا يتواعدون ؟)
مشاري بابتسامه شوق:وشلونك؟
لفت لمشاري وابتسمت بقوه:انا بخير انت وشلونك؟
مشاري:بخير
لفت قمر للبنات اللي يناظرون لها:لازم اروح (صارت تتامل فهد ولفت بس حست بيد مسكت معصمها غمضت عيونها  ولفت بس تمنت انها ماتت ولا شافته كذا كان منزل راسه وخصلات شعره مغطيه عيونه طاحت عيونها على يده الممدوده وماسكه معصمها انصدمت وهي تشوف سلسالها لفه بشكل اسواره جرحها منظره ):ااه اه فهد ااه
كان منزل راسه مايبي يبين ضعفه وبهمس:لاتروحين
قمر وهي تحط يدها فوق يده وضغطت بقوه ع السلسال وكانها تقول حافظ عليه وبعدت يده وبصوت مبحوح من البكي: ياليت مااروح ياليت اقدر ابقى جنبك طول عمري بس ماقدر مااقدر (لفت وجهها ومشت وهي تبكي نزلت بسرعه من السلم ولحقوها البنات بسرعه)

اما هو شد ع قبضه يده ولف وجهه ومشى ولحقوه مشاري والبنات

بـــيــــت ابـــوفـــهـــد
غــــرفـــه فـــهــــد
دخل وضرب التسريحه بقوة وقهر
مشاري: فهد تكفى اهدا
فهد بقهر:مشاري انا وعدتها اني ماتخلى عنها و وعدتها اني مااصير زي ابوها وعبدالعزيز وشلون اخون بوعدي اااخ(ضرب الدرج بقبضة يده)
مشاري وهو يمسك يد فهد: فهد خلاص هي تتدري انك ماتخليت عنها  بس هذي الظروف هذا نصيبكم
سكت وقعد ع السرير بقوة وعيونه مصوبه للفراغ ""معقوله هذا نصيبنا ياقمر معقوله هذا حظنا؟""

ســـيـــاره الــبــنــات
كان جو السياره مكهرب وهم مستغربين بس يدرون ان فيه شي صاير بس محد تجرا وقدر يسأل نزلوا يارا وسما ببيتهم بعدين مشوا لبيت اميره
وقفوا ونزلوا وهم يدخلون البيت اول وحده نزلت قمر وفصخت نقابها بس وقفت بصدمه وهي تشوف السياره اللي موجوده بالحوش ""لحظه هذي مو سياره عبدـ ـ"" توسعت عيونها بصدمه وذهول لفت للبيت وهي تتامله
سديم باستغراب:من سيارته هذي؟
ريناد:غريبه اول مره اشوفها
ريوف:اميره هذي حقت ناصر؟
اميره باستغراب:لا اول مره اشوفها
كلهم لفوا لقمر اللي ركضت لداخل وكانها تبي تتاكد فتحت باب الصاله وطاحت طرحتها ع كتوفها وهي تشوفه ولسى ماسكه الباب بيدها
وقف خالد وقرب لها: قمر
بعدته عن وجهها ومشت له (بهذا الوقت دخلوا البنات وهم مستغربين)
وقفت قدامه وهي معقده حواجبها وصدرها يرتفع وينزل وتنتقل بعيونها بين ملامحه
عبدالعزيز بخوف وهمس:قـ
بس قبل مايكمل اسمها عطته كف قوي وصرخت:بس بس لاتقول اسمي (شهقت والدموع تنزل ع خدودها لفت وهي تتدور حول نفسها بضياع وصارت تكلم نفسها) انا وش سويت بحياتي وش سويت عشان اشوف اكره اثنين ع قلبي قدامي وش سويت ااه ياربي وش ذنبي ليش تحرمني منه وتعطيني اياهم ليش ااه كنت مبسوطه (حركت عيونها بضياع) كان ع بالي ان كل الايام السودا خلاص راحت ليش (هزت راسها بالنفي غمضت عيونها وحطت يدينها ع اذونها) هذا حلم ايه ايه حلم بصحى بصحى منه (طاحت ع ركبها وصرخت) بصحى ..

عبدالعزيز وهو يصيح ونزل لمستواها ومسكها من كتوفها: قمر
صارت تضربه بقوة وبشكل مو طبيعي:اتركني اتركني
ركضت لها وسن وهي تبعد عبدالعزيز وضمتها: بس قمر
صارت قمر تبعدها عنها واللي يشوفها يقول مجنونه !
قمر بصراخ وهي تتدف وسن بقوة: بعدوا عني اتركوني اتركوني
خالد وهو يقرب لها: بس يبه بس تكفين اهدي
صارت تصرخ بشكل مرعب وتصارخ او تبكي بشكل مخيف وتضرب نفسها وتقول كلام مو مفهوم ابداا
الكل صار واقف بعيد ويناظرها بصدمه ماعدا عبدالعزيز ووسن اللي يبكون خوف ع قمر اللي كانها انجنت
بس صوت الكف اللي صدع بكل البيت خلى الكل يششهق بصدمه
اميره وهي تنزل يدها عن خد قمر وتناظر لها بصدمه وهي ترمش وبصوت قصير مايل للهمس:اهدي
رفعت عيونها قمر لاميره وهي حاطه يدها ع خدها بصدمه وسكتت وصدرها يرتفع وينزل وعيونها تتحرك بضياع
خالد بعصبيه ويكلم اميرة: ليش تضربينها؟
اميره وهي تناظر ابوها:لانها مو حاسه بعمرها لانها بحاله صدمه ولازم تصحى
لفوا كلهم وناظروا قمر اللي تهاوت للارض بس يدين عبدالعزيز الاقرب لها ومسكها وهو يطق خدها:قمر قمر اصحي قمر
قمر وهي تحس بنفسها كيف تهاوت للارض وصوت عبدالعزيز البعيد نزلت دمعه من عيونها وابتسمت ع خفيف ""يارب يارب اني مااصحى يارب اني اموت  فهد سامحني برحل من هذي الدنيا لانها ماتسوى اعيشها بعيدة عنك يمه بجيكي انتظريني يمه ""غمضت عيونها وماعادت تحس باي شي

بـــــيـــت ابــوســلــمــان
جــــنــاح حـلا و ســلــمــان
فتح عيونه ع خفيف بس ع طول عقد حواجبه وتعدل بسرعه وناظر حلا بصدمه وهو يشوفها واقفه فوقه وتناظره بصوت كله نوم:فيك شي؟
استوعبت حلا انها قام لفت وجهها:هاه ايه اذن الظهر
ناظرها ببرود ووقف ودخل الحمام
تنهدت وقعدت ع نفس الجهه اللي كان نايم عليها وصارت تحرك يدها عليها كانت دافيه ""اعشقك واموت فيك معقوله القدر جمعنا كذا بس وشلون اتاكد انه صدق هو نفسه يمكن بس تشابه اصوات ايه لقيتها"" وقفت بسرعه واتجههت للتسريحه لانها سمعت صوت فتحت باب الحمام وهي تعدل شعرها:سلمان
لف لها وهو ينشف وجهه بالفوطه وبدون مايقول أي كلمه
حلا:بروح لبيت خالتي عازمتني
سلمان ببرود:طيب متى تبين تروحين؟
لفت له:عادي الحين؟
سلمان بذهول:الحين الدنيا ظهر
حلا بابتسامه:ايه ادري يعني اتجهز مع بنت خالتي احسن من قعدتي لحالي هنا
سلمان:طيب البسي بسرعه عشان انزلك بطريقي
حلا بسرعه:ليش وين بتروح؟
رفع حاجب:لاتساليني هذا السؤال ثاني مره فاهمه وبسرعه تجهزي
كشرت بوجهها وهي تشوفه يطلع برا الغرفه """اااف"" فتحت الدرج وطلعت لها ملابس اللي بتلبسها بالعزيمه بكيس فتحت الباب وطلعت:خلصت
لف لها ووقف وهو يناظرها بتامل ""صح لبسها بسيط بس طالعه تخق"" : يلا امشي
ابتسمت ع خفيف ولبست عبايتها بسرعه ونزلوا

الـــمــســتــشــفـــى
وقف عبدالعزيز وابوه وهم يشوفون الدكتور طلع من عند قمر ركضوا له
عبدالعزيز بخوف:طمني دكتور
الدكتور بهدوء:انهيار عصبي شديد (ولف لخالد>>هذا الدكتور هو نفسه اللي جاهم بالبيت قبل<<) وانا نبهتك قبل انها مو مفروض تتعرض لمواقف تضايقها او تعصبها
تنهد خالد وصد بضيقه
عبدالعزيز:اقدر اشوفها
سكت الدكتور شوي بعدين قال:لا
لف خالد وناظره بصدمه ماهي اقل صدمه من عبدالعزيز وبصوت واحد:ليش؟
الدكتور: المريضه رافضه تشوف احد حاليا وحنا مضطرين نسمع كلامها الحين ع الاقل لين تهدى نفسيتها
خالد بخوف:يعني بتنام عندكم دكتور؟
الدكتور:اكيد ع الاقل اسبوع عن اذنكم
خالد بهمس:اذنك معك
قعد عبدالعزيز ع الكرسي بصدمه ومسك راسه:انا السبب انا السبب لهدرجه كرهتني لهدرجه ماتبي تشوفني
قعد خالد وهو يتنهد وحط يده ع كتفه:اا
دف عبدالعزيز يده ووقف بعصبيه:لاتلمسني انت السبب بكل اللي صار ايه انت السبب لو انك ماتخليت عنا كان ماصار اللي صار (صرخ) لو انت مارحت كان انا بعد مارحت (هدا صوته وهو يهز راسه بالنفي) لا لا انت صح غلطت بس انا بعد غلطت وغلطت ع الاقل انت قمر ماعرفتك بس انا وشلون قدرت اسوي فيها كذا وشلون طاوعني قلبي وشلون ..
وقف خالد وهو يحس بغصه سحب عبدالعزيز وضمه لصدره وبهمس:سامحني وانا ابوك شتتكم وضيعتكم معي سامحني سامحني
لف يدينه بقوة حول ابوه وكانه رجع الطفل اللي يتمنى هذا الحضن وبهمس باكي:قمر ماراح تسامحنا اعرفها اعرفها هي تربيتي ماراح تسامحنا يا يبه ..
نزلت دمعه حرقت خده وغمض عيونه وهو يشد ضمته لولده هو وش سوى وشلون ضيعهم كذا اااه لو الزمن يرجع كان ماصار اللي صار!!!

شـــقـــه تـــركــي ووســــن
دخلت وسن وهي ترمي شنطتها بضيق واتجهت لغرفه النوم وهي تتدخل وتقفل الباب شهقت وهي تحط يدها ع فمها ماتبي صوت شهقاتها تاصل له طاحت ع الارض ومسنده ظهرها ع الباب وتصيح ""ليش حنا ياقمر ليش حنا من بد كل هالبنات انكتب لنا نتعذب ااه اااه صبرت وصبرت بس مافاد ااه اااه ابي ارجع زي قبل ابي ارجع زي قبل ااه اااه اااا"" نزلت للارض وهي تضم يدينها الصغيره لصدرها وبهمس وهي تشد بغمضتها لعيونها:ابي ارجع زي قبل بين امي وابوي والجوري ااه  ليش؟

الـــصـــالـــــه
قعد ع الكنب بقوة وهو يتنهد وشد شعره بيده ""ماتوقعت حياتنا بتكون بهذي الصعوبه ااف بس هي بعد تنرفز وشلون تروح للسوق بدون اذني بعدين انا غبي اول ماركبت السياره صرت اصارخ عليها واهاوشها ومادريت انها متضايقه عشان قمر اااف بس بعد الغلط عليها هي اللي صارت تهاوش وسكرت السماعه بوجهي اااه ااااااف""

بــــيـــت خـــالــه حــلا
غـــرفـــه شـــهـــد
حلا: وقسم هذا اللي صار
قعدت شهد بصدمه:يعني تتوقعين ان سلمان زوجك هو نفسه
ابتسمت حلا:انا اتوقع بس (اختفت الابتسامه) اقول بعض الاحيان اني يمكن غلطانه بس عندي طريقه اتاكد منها
شهد بسرعه:وشلون؟
حلا:اسمعي تتذكرين يوم انتي شريتي شريحه موبايلي بس بعدين تركتيها وشريتي سوا؟
شهد باستغراب:ايه بس ليش تسالين؟
حلا:هي عندك الحين؟
شهد وكانها فمهت حلا وش ناويه تسوي:هيه هيه انتي لايكون ناويه تكلمين ع اساس انك حلا حبيبته؟
حلا:ايه (وبسرعه عشان شهد ماتهاوشها)وبس عشان اتاكد
شهد بخوف:بس حلا ـ ـ
قاطعتها حلا: اف شهد لو ماتاكدت راح انجلط اذا هي عندك قومي جيبيها بسرعه
شهد وهي تاقف وتهز راسها:عنيده (جابتها ومدتها لحلا) خوذي
سحبتها حلا ودخلتها بجهازها ودقت ع رقمه وعيونها ع شهد بخوف وقالت بتردد: الو

سلمان اللي كان قاعد بكافي ووقف بصدمه وبعد السماعه عن اذنه بس قعد بسرعه:من معي؟
حلا بهمس:نسيت صوتي؟
بلع ريقه سلمان:من؟
حلا:حلا
تورط سلمان مايدري هي حلا زوجتها والا حلا حبيبته: حلا
حلا:ايه حلا(وقالت بسرعه) والا عشانك تزوجت نسيتني؟
عرف انها حلا حبيبته سكت شوي بعدين قال: من قالك اني تزوجت؟
حلا بهدوء:عرفت
سكت سلمان شوي بعدين قال:ايه وانتي؟
حلا:لا ماتزوجت
سلمان باهتمام:ليش؟
حلا بسرعه:مبسوط معها تحبها؟
سكت سلمان وبضيق:تتدرين انه اسمها حلا؟ (ضحك باستهزاء) اصلا اول ماقلتي الو ع بالي هي
سكتت حلا شوي بعدين قالت:صدق؟
سلمان:ايه صدق ع بالي انك هي
حلا:لا اقصد صدق اسمها حلا؟
سلمان: ايه شفتي وشلون؟
حلا ""خلاص تاكدت انه هو"" : ايه تحبها؟
سكت سلمان شوي بعدين قال: لا
ماتتدري ليش انقهرت مع انها تتدري انها يحبها بس يعني مايحبها ع انها زوجته :ليش؟
سلمان بهمس:لاني احبك
سكتت وهي تبلع ريقها:بس انت متزوج الحين وغيرت رقمك وماسالت عني
سلمان بسرعه:وانتي بعد غيرتي رقمك صح؟
حلا:ايه
سلمان:ليش عشان مااكلمك؟
سكتت شوي بعدين قالت:ايه انت متزوج
سلمان بشويه عصبيه:اجل ليش داقه الحين؟
سكتت شوي بعدين قالت:مدري(بهمس) يمكن اشتقت لك
بلع ريقه وهو يتنهد:مدري وشلون برجع واشوفها كل مااشوفها اتذكرك اقول نفس الاسم ياترى حلا حبيبتي تشبها والا لا ياترى فيهم صفه مشتركه والا لا تعبت وربي تعبت
حلا وهي تتنهد:بس هي ع ذمتك (بحده)حرام علي اكلمك وهي مالها ذنب
سلمان:ايه انا اقول كذا هي مسكينه مالها دخل الا انها تزوجت واحد مايحبها ااه بس انا مستغرب
حلا بسرعه واهتمام:من ايش؟
سلمان وهو يفكر:يعني هي ماستغربت اني ماقربت منها ولا حتى اهتميت؟
سكتت حلا بخجل خفيف:هاه ليش؟
ابتسم سلمان وهو ينزل كوب العصير: مدري بس اكيد مستغربه بس مابينت لي
حلا:هاه ايه يمكن
سلمان باستغراب:وشفيك كانك ارتبكتي ؟
حلا:لالا عادي مارتبكت  اكلمك بعدين خلاص
سلمان بسرعه:اكيد مع السلامه حبي
حلا بهمس:مع السلامه (سكرت وهي تتنهد)
شهد باهتمام:هاه بشري هو؟
هزت راسها حلا وهي ضايقه:ايه
شهد باستغراب:وشفيك ع بالي بتقومين ترقصين من الفرحه؟
تنهدت حلا وناظرت شهد:خايفه ياشهد
قربت شهد لها وشدت ع يدها:لاتخافين حبيبتي سوي اللي يقوله لك قلبك وكل شي بيصير بخير
هزت راسها حلا باايجاب:الله يعين (وصارت تناظر بنظره بعيده لامل جديد!!)

عـــبـــدالـــعـــزيـــز
كان يمشي ع اطراف البحر وهو مدخل يدينه بجيوب بنطلونه ""اااه وشلون قمر بتسامحني ياترى نوف بتسامحني ع اللي سويته فيها ااه وابوضاري وفواز اااه انا وش سويت بنفسي وحياتي وش خسرت وش كسبت اااه ""جلس ع الرمل وهو يتامل البحر لم رجوله لصدره وهو يتذكر وشلون جاء لابوه ..

وقف بسيارته قدام القصر نزل وهو يتامله بتمعن ماكان اقل من قصر ابوضاري ""ااه معقوله لو ان ابوي ماتخلى عنا كان الحين هذا قصري ياترى لو ماصار اللي صار كان أي شباك من هذي الشبابيك هو شباك غرفتي اه راح ادخل واقوله واللي فيها فيها ""سكر باب السياره ووقفه الحارس:ابي خالد الراسي
الحارس:ثواني (سحب سماعه جنبه وتكلم فيها شوي بعدين لف لعبدالعزيز وفتح البوابه):تفضل
دخل عبدالعزيز وهو يمشي بارتباك ويتامل القصر
ناصر وهو رافع حاجب:نعم اخوي؟
ناظره عبدالعزيز بنظره غريبه:وين خالد؟
ناصر وهو يناظر عبدالعزيز من فوق لتحت:موجود بس من اقوله؟
عبدالعزيز بثقه:عبدالعزيز الراسي
ابتسم ناصر :اها انت اخو قمر صح ؟
حس عبدالعزيز نبره الاستحقار بصوت ناصر انقهر واستغرب انه يعرف قمر بس قال:ايه ناده لي
لف ناصر وهو يمشي:امش معي
مشى وراء عبدالعزيز ودخلوا مجلسين متقابلين بس واحد مرتفع عن الثاني وفخم
ناصر بدون نفس:تفضل (لف وجهه وطلع ثواني وجاء خالد ومعه ابوسديم)
وقف خالد بصدمه وهو يتامل عبدالعزيز وبهمس:عبدالعزيز؟
رفع عيونه عبدالعزيز ووقف وهو يتامل ابوه بهدوء
تقدم خالد وضمه بقوه وهو يغمض عيونه وبلع ريقه بعد عن عبدالعزيز وهو ماسك كتوفه ويتامل ملامحه بس لحظه عقد حواجبه:اا اا""مو ااا( توسعت عيونه بصدمه لانه تذكر انه شافه عند ابوضاري) شفتك عند ابوضاري صح؟
ناظره عبدالعزيز بتامل نزل راسه شوي بعدين ارفعه:ايه
خالد وهو يتذكر لما قراء اسمه:بس اسمك اسمك كان ـ ـ
تنهد عبدالعزيز وهو يقاطعه:هذي سالفه طويله (رفع راسه وناظر ابوه بتدقيق) اقدر اطلب منك طلب؟
ابتسم خالد وهو يبلع ريقه وبحب:انت تامر وانا ابوك مو تتطلب
نزل عيونه للارض بعدين رجع رفعها ""ياالله قد ايش كنت اتمنى اسمع هذي الكلمة طول عمري تمنيتها"": ابي ادور على اختي قمر بس ابيك تساعدني
قاطعه خالد: قمر عندي
توسعت عيونه بصدمه:ايش وشلون من متى؟
سكت خالد شوي بعدين قال:بعد هذي سالفه طويله اقولك اياه اما متى جتني يمكن من اسبوعين كذا
قاطعه عبدالعزيز بلهفه:ووينها وينها ابي اشوفها
خالد:ايه طبعا حبيبي بس هي الحين مو موجوده
حس بخيبه الامل وجلس رفع عيونه لابوه:ماقلت لي وشلون قمر جتك؟
جلس خالد جنب عبدالعزيز وبدا يقوله

تنهد وهو يرجع للواقع ""من هذا ياقمر وبتسامحيني والا لا؟ معقوله هو السبب بكل اللي يصير لك والا انا من المظلوم ومن الظالم وانا اخوك من اللي اخطى انا ولا ابوي والا امي ولا انتي جاوبي اخوك"" غمض عيونه وشد بيدينه داخل الرمال وبكل بقوه وصرخ بقهر:يمه تعالي
محتاجينك انا وقمر  يمه (نزل راسه وبكى)

شـــركـــه ابــوســديــم
مــكــتــب ابــوســديــم
وقفت سديم بصدمه من الكرسي:ايش؟
ابوسديم باستغراب:وشلون هو ماقالك انا قلت له لازم ياخذ اذن منك وقال طيب ع بالي اخذ اذن
لفت لابوها وهي لسى مصدومه:وشلون وليش بينقل؟
تنهد ابوسديم:والله مدري انا سالته وقلت له اننا بنفقد شخص ملتزم بشغله زيه بس هو تعذر بأن هذاك الفرع اقرب لبيته وان ولده محتاجه وافقت له بس قلت له كلم سديم اول قال طيب وطلع
ابلعت ريقها سديم:وهو وينه الحين؟
ابوسديم:مدري يمكن بمكتبه
هزت راسها وطلعت وهي معصبه دخلت مكتبها ونادت السكرتيره:نادي حمد بسرعه
السكرتيره اللي اول مره تشوف مزاج سديم معكر كذا هزت راسها وراحت تركض تنادييه

الـــمــســتــشــفــى
غـــرفــــه قـــمـــر
دخلت وسن وهي ماسكه باقه ورد نزلتها ع الكومدينا وناظرت ام ناصر وبهمس:ماصحت؟
ام ناصر وهي تناظر قمر وتتنهد:صحت شوي وعصبت انها شافتني بس ماقالت شي ورجعت نامت
تنهدت وسن و مسكت يد قمر بقوه وهي تتامل قمر بحزن:ااه الدكتور قال انها ماتبي تشوف احد خلونا نتركها ع راحتها
ام ناصر وهي تهز راسها:صادقه انتي وشلونك وشلون رجلك؟
سكتت من طاري تركي بس رفعت راسها وابتسمت:بخير ماعلينا
ابتسمت ام ناصر ولفت تتامل قمر
دخلت اميره وبهمس:ماصحت؟
ام ناصر:لا
لفت اميره وسلمت ع وسن:سوري ياحياتي ماشفتك
وسن:لا عادي هاه اميره وش قال الدكتور؟
اميره وهي تجلس:نفس الشي ااه
لفت وسن وهي تتامل قمر وشدت ع يدها ""اصحي ياقمر اصحي مو عشانهم لا عشاني عشان فهد اصحي""
اميره:قوموا خلونا نطلع مو زين اذا صحت تشوفنا
هزوا روسهم ام ناصر ووسن ووقفوا وطلعوا

ســـيــاره ســلــمـــان
سلمان بهدوء:وشلون العزيمه؟
حلا وهي تتامل الشوارع:حلوه
سكت سلمان وهو يتنهد بضيقه
لفت وناظرته بتامل ""ليش تتنهد عشانك معي انت من تبيتبي حلا والا اااه وشفيني انجنيت مو انا نفس الشخصيه سواء كنت حلا زوجته ولا حلا حبيبته المهم اني ااااف"""
وعيونه مركزه ع قدام:مضيعه شي بوجههي؟
ناظرته بضيقه وصدت شوي بعدين قالت وهي لسى تناظر الشارع:عمرك حبيبت سلمان؟
حس ان السؤال صدمه بقوه:اا ااا لا (وبتردد وهو يناظرها ثواني ورجع يناظر الطريق) وانتي؟
حلا بنفس الهدوء:لا
سكت شوي بعدين قال:وليش السؤال؟
لفت وناظرته وهي رافعه حاجب:لا مافيه سبب معين بس مااحسك تعاملني كاني عروس
ناظرها بطرف عينه ومارد عليها ولف يناظر الطريق وهو معقد حواجبه ""اااف هي وش تبي مني خلاص مايكفيها اني قاعد احس باالذنب اني كلمت حلا اليوم اااف ايش هذي الحياه لين متى بظل كذا""
حلا""خلاص مالي الا اسوي اللي ببالي ااه يارب ساعدني""

شـــــركـــه ابــوســـديــم
اخذ نفس قبل مايطق الباب وطقه ثانيه وحده بس وسمع صوتها وهي تقول ادخل:السلام عليكم
سديم بعصبيه وهي تحاول تمسك اعصابها:وعليكم سكر الباب
لف حمد وسكر الباب بهدوء وقف قبال المكتب:نعم
سديم وهي تناظره باستغراب: حمد وشفيك ليش تتكلم معي كذا برسميه انا سويت لك شي ليش طالب نقل من ابوي  طيب دامك تبي ليش ماقلت لي وش السبب اللي يخليك تنقل؟
رفع راسه وصار يتامل عيونها ""وش اقولك اقولك انتي ايه انتي السبب خلاص ماعاد اقدر استحمل اشوفك وانا ادري انه مستحيل تكونين لي""صد وجهه عنها وسكت
سديم بقهر وهي تضرب المكتب بقبضه يدها:تكلم ليش ساكت (دمعت عيونها وبصوت هامس) انا سويت لك شي فيه شي ضايقك مني؟
لف بسرعه وهو يناظرها لما سمع صوتها الضعيف توسعت عيونه وهو يشوف الدموع بعيونها لا الا هي مايقدر يشوف دموعها شد ع يده بقهر:لاتبكين سديم علي انا مااستاهلك روحي وشوفي من اللي يحبك صدق
وقفت بعصبيه وهي تتدف الاغراض اللي ع المكتب بقهر:من تقصد انا ماابيهم انا (وبدون شعور) ماابي الا انت
ناظرها بصدمه وذهول وبهمس:سديم
شهقت بقهر وهي تمد يدها للباب:اطلع برا خسارة اني حبيتك
تنهد وبغصه:سديم انتي تحبيني؟
سديم: لا اطلع قلت لك
تقدم لها ووقف قبالها:اذا انتي تحبيني انا اعشقك بس انا غير وانتي(نزل عيونه بعدين رجع رفعها لها) انتي غير
ناظرته بصدمه وهي تحاول تستوعب انه اعترف الحين انه يحبها: ايش؟
تنهد حمد ولف يناظر المكتب وكانها مايبي يتعلق بعيون سديم:خوذي ثامر هو اللي يناسبك يحبك وغني ووسيم وماهو مطلق وعنده ولد سديم انا ماقدر اعيشك ربع ربع العيشه اللي انتي عايشتها
شهقت سديم حست وكان كل الكلام ضاع
ابتسم ومد اصبعه ومسح دمعه نزلت من عينها:لاتبكين مع الايام بتنسيني وبتنسين حبك لي(لف وجهه ومشى وهو ماسك مقبض الباب)
سديم:غبي
لف وناظرها باستغراب:ايش؟
سديم بصرخه: غبي  انت انا ماافكر بالفلوس ولا تهمني وو انا اكره ثامر (حست بخجل وصدت عنه) بعدين من قال اني احبك هاه انا احب مهند وتعودت عليه مابي افارقه (نزلت عيونها للارض بعدين ارفعتها وناظرته)
ابتسم بقوه وضحك بخفه:ههه ايه صح
سديم بقهر:هيه هيه وش قصدك اني اكذب يعني؟
ضحك حمد:لا ماقلت شي
سديم بعصبيه:ماراح اوقع ع نقلك ومااراح اسمح لك فاهم؟
حمد بهدوء وهو يتاملها:ايه فاهم بس عندي شرط عشان اجلس
سديم باستغراب:شرط ايش هو؟
حمد بابتسامه تتدوخ:تروحين تتعشين معي انا ومهند وتجبين رغوده
ناظرته بتامل ابتسمت ع خفيف وهي تسوي عمرها تفكر:اممم طيب
ضحك عليها وطلع بس قبل مايسكر الباب:سديم
لفت له بهدوء ماقالت أي شي
حمد بهمس:احبك
حست بخجل مو طبيعي وارتبكت مرا
ضحك عليها وطلع وهو يسكر الباب ..

بـــــيــــت ابـــوفــهـــد
كان ماسك جواله ويمكن هذي المره المليون اللي يدق فيها ونفس الشي لارد شد ع الجوال بقبضه يده بقهر
مشاري بهدوء:فهد
لف فهد له وبعصبيه:ماترد اكيد فيها شي من امس وهي ماترد اكيد صار لها شي
سكت مشاري شوي بعدين قال:كلمني رامي قبل شوي
فهد بعصبيه:انا وين وانت وين
كمل مشاري ولا كانه سمع فهد:وحنا نسولف قال لي صديقكم اللي طلع بنت عندنا وقالي انه درى انها تتطلع بنت خالد الراسي ـ ـ
رفع راسه بفهاوه وهو يقاطعه:ايش قمر بالمستشفى ليش وشفيها؟
مشاري بتنهيده:يقول انهيار عصبي والله ان حال فارس اقصد قمر مو عاجبني
قعد ع الارض وهو يقرب رجوله لصدره بذهول وهو يتذكر لما كانت عنده كانت تضحك والابتسامه ماتفارق وجهها صار يتذكر لما كانوا يلعبون عند البحر وصوت ضحكاتها يتردد باذونه والحين قال بهمس:مستشفى انهيار ليش؟
مشاري وهو يقعد جنب فهد:مدري بس رامي قال لي ان الدكتور المسوؤل عن حالتها يقول انها ماتبي تشوف احد اااه(ناظر فهد) قمر تروح منا يافهد
غمض عيونه بقوة ووقف بسرعه وهو يضرب الجدار بقبضات يدينه
وقف مشاري بسرعه وهو يمسكه: فهد  وشفيك اهدا
فهد وهو يدف يدين مشاري عنه:اتركني بروح لها
مشاري بصدمه:ايش مجنون انت؟
ناظره فهد بنظره حاده:من اليوم اللي (وضرب قلبه بقوه) هذا نبض لقمر صار مجنون (لف وجهه ومشى)
وقف مشاري بذهول لثواني بس صرخ بصوت عالي باسم فهد وراح يركض وراء: ففففهههد

الــمــســتــشــفـــى
مـــكـــتـــب رامـــــــي
وهو مركي يدينه ع المكتب: هذا وقته تمرض اختها استغفرالله كنت ناوي اليوم اروح لبيتهم (ابتسم بقوه) بس يكفي اني شفتها اليوم يالبيه ياهي ههههه (تنهد براحه ورجع ركى جسمه ع الكرسي) هانت يااميره هانت
دخل الوليد وباستغراب:من تكلم انت؟
ابتسم رامي:محد
الوليد:استغفرالله صدق مجنون اشوا اشوفك غيرت رايك ومارحت تخطب
رد بابتسامه واسعه:من قال اني غيرت راي بس اختها مريضه بنتظر لين تتطلع من المستشفى وبروح لهم
الوليد بشويه عصبيه:رامي انسى هذي البنت وازهار؟
رامي بعصبيه:اااف الوليييد قلت لك لاتجيب سيره هالبنت خلاص اللي بيني وبين ازهار انتهى
الوليد بقهر وهو ياقف:لا ماانتهى انا ماكنت بقولك بس الحين بقولك ازهار حامل ياحبيبي فاهم وشلون يعني حامل؟
ناظره بصدمه وذهول وبهمس:حامل؟
الوليد:ايه وشفيك استغربت ايه حامل
ماترك ولا شي فيه حتى رموشه بقت ثابته من هول الصدمه اللي وقعت عليه!!!!! حامل ...

 
#يـــتـــــبـــع...