رواية أقدار~للكاتبة ضاقت أنفاسي الفصل العشرون 20 - بقلم BlackButterfly002

بارت 22

زفرت بضجر من هالسالفه : عمار وبعدين معك ؟!
حرك ملامحه برفض غاضب وهو يضرب على طاولة السفره اهتز كوب الشاهي امامها : لا ما انتهينا !!
سياره اجره بالنهار سلكتها اما تركبين سياره اجره بالليل مستحيل اسلكها !
تراه عقلك ضارب !
واشر على عقلها بإصبعه
زفرت بملل وهي تبعد اصبعه عن شعرها : تراني ماني لوحدي بناتي معنا !
انفجر بوجهها :ساره لا تجنيني اي بنات تتكلمين عنهم !
وبعدين كيف ترجعين مع خالي مناف ؟!!
بدل ما ترجعين مع عزام المحرم لك
قاطعته بحده : هذا انا رجعت مع مناف ما اكلني !
طالعها بقرف من تفكيرها : صدق متخلفه !
وبحزم : رجاء يا ساره هالتصرف ما يتكرر !
ما ابغى تركبين مع احد من اخوالي !
محارمك واجد
تبغين تطلعين
معي او سلمان ،عبدالرحمن ، عزا
قاطعته بغضب وهي تشوف تماديه يبغى يفرض سيطرته عليها : لا تتدخل اركب مع إلي ابغى !
تراك صجيت راسي بذي السالفه
خلاص سالفه البارحه وانتهت
والا عزام مطرشك عندي
قاطعني بقهر : وقسم بالله الا تصيبني جلطه
والسبب اهل ابوي !
وقسم بالله ترفعون الضغط !
وتركني وطلع من المطبخ !
زفرت براحه من خروجه !
جلست على الكرسي وانا افكر
كلامه صحيح
اكبر غلط اركب سياره اجره بالليل لوحدي
الدنيا ما لها امان !
عفست ملامحي وانا اشوف خالتي داخله المطبخ ومتجهمه
جلست مقابل لي تقشر حبة البرتقال وتناظرني بتقييم : علامك تطالعين فيني ؟!
رديت بسخريه : معجبه فيك يا بعدي !
عفست ملامحها بكره : يا كرهي لك ! وناظرتني باستفزاز : ترى اميره مولعه منك !
كذا تستقبلين ابنتها الدكتوره مها !
ونفشت نفسها بافتخار !
حطيت اصبعي بتمثيل على شفتي: اووووه نسيت اخذها بالاحضان !
طالعتني بقهر وسرعان ما غيرت مودها وهي تبتسم باستفزاز: قولي غيرانه من الدكتوره مها !
ما شاء الله جمال واخلاق وعلم !
اكثر من حرمه كانوا يبغون يخطوبنها
ما يدرون انها متزوجه وعندها عيال !
عاد انا قلت اكسب فيك اجر
وقلت للحريم للدكتوره مها خالة اذا تبغون تخطبونها
اصابهم الفزع يقولون ما بقى نخطب الا ارمله ومطلقه من ولد عمها
وفوقها متزوجه مجنون وعندها عيال !
قلت لهم تراها بأول العشرين وصغيره
رفضوا قالوا ما بقى نخطب الا الناقه
رفعت نظرها تشوف رد فعل ساره
انقهرت وهي تشوف السماعات بإذنها
وساره بعالم اخر ومعطيتها طاف !
شدت على السكينة من الغضب
وسرعان ما فزعت وهي تشوف الدم ينزل من اصابعها !
طالعتها ساره ببرود وبداخلها «تستاهلين»
ام محمد بفزع : روحي جيبي لي شيء اوقف الدم
طنشتها ساره ولا كأنه احد يكلمها !
لفت اصبعها بقطعه قماش وبخوف : انا الحين طالعه لمستشفى اخوي !
ردت ساره ببرود :بقلعتك
صرخت ام محمد بغضب : والله لتندمين يا ....
مطت شفتها بلامبالاه وسرعان ما فزت على حيلها وهي تتذكر سعديه تشتغل بالمستشفى !
تخاف تقابل خالتها وهذا الشيء المستحيل إلي تقبله وبمحاوله لردعها : تراه ما يحتاج مستشفى انطقي مكانك وبدون مبالغه وتمثيل !
طالعتها ام محمد بغضب : ايه تبغين يخلص دمي واموت وترتاحين مني !
لكن حامض على بوزك الحين طالعه للمستشفى!
تكلمت ساره بسرعه :انا جايه معك
ما يصير تروحين لوحدك!
ام محمد بغضب وكره لابغض مخلوقه على وجه الارض بالنسبة لها : انقلعي من وجهي!
والله ما ترافقيني!
~~
~~
ساره تتلفت حولها وبهدوء تكلمت : تعالي على الطوارئ !
ام محمد طالعتها بكره غصب عنها جاءت معها : ما يخصك !
الطوارئ لاشكالك !
وتوجهت للاستعلامات ثواني ورجعت لساره وهي ضاغطه على اصبعها بقوه : انتظري هنا الحين ارجع !
ساره حركت حواجبها بالرفض : نو نو
اعطتها نظرات ناريه واشرت على التوأم:ذول ليه جايبيتهم معك؟
ناقصنا بزران!
وتركتها وتوجهت للمصعد وساره خلفها متمسكه بالتوأم إلي يناظرون المكان بتحديق خاصه لما دخلوا المصعد !
عقدت ساره حواجبها باستنكار لما فتح المصعد: قسم الجراحه؟!
ليه جايه هنا؟!
ام محمد بكشره وهي تمشي:ما يخصك!
سوار باندهاش طفولي وهي تشد بعبايه امها : ماما مستشفى كبير!
ساره مطت شفتها بقرف : امحق مستشفى !
رن جوالها طلعته من شنطتها البسيطة السوداء !
عقدت حواجبها بضجر وهي تشوف اسم عمار !
نكد عليها من الصبح !
ما حترد عليه !
حطت الجهاز صامت ودخلت خلف خالتها بدون ما تنتبه للمكان !،
قفلت الشنطه ورفعت راسها بصدمه !
رجعت خطوه للخلف بحرج !
بس اضطرت تدخل لما رفع راسه وشافها !
تكلم سعود ببرود : هلا عمتي !
عسى ما شر جايه المستشفى !
ابو وليد باستغراب من وجود اخته هنا : صاير شيء ؟!
جلست على الكنبه ام محمد شوي وتبكي : السكين شوي وتقطع اصبعي !
سوار بانتقاد تقدمت : خطأ تمسكين السكينه !
ام محمد طالعتها شوي وتذبحها : انت لا تتدخلين مثل امك تحشرين أنفك بكل شيء !
طالع ابو الوليد ساره الواقفه اقرب للباب
عفس ملامحه وطالع اخته إلي يكلمها ولده
سعود بدون نفس ؛ يا عمتي اتركي البزر وكلميني !
ام محمد بمجامله : لا تواخذني بس الام وبزرانها يرفعون الضغط !
سعود هز راسه وهو يناظر عمته وما إلتفت لاحد: طيب اذا الجرح عميق انزلي على الطوارئ
ابو وليد رافع خشومه بكبره وهو يناظر ساره بنغزه : خذيها للطوارئ بما انه لك خبره بالمستشفى!
ما فات ساره نغزته وبثقه ردت : اكيد لي خبره !
انقهر من ثقتها واعتزازها بشغلتها عفس ملامحه وطالع اخته : على الطوارئ يا ام محمد
قاطعته ام محمد برفض :لا
مستحيل انزل للطوارئ!
ويمسكون يدي والدكتور ما هو محرم لي!
وعيال اخوي واختي هنا محرم لي
مطت ساره شفتها بسخريه وهي تكلم نفسها «شيخه ما شاء الله عليك »
ما فاتت أبو الوليد و سعود حركتها الساخره
رد ابو الوليد وكأنه يقصد الكلام: صادقه يا ام محمد يا ليت بنات هالايام يأخذون من هالحياء او الستره
الله يستر على عباده،!
حست ساره انه يقصدها بالكلام بس ما تغيرت ملامحها لانها واثقه من نفسها !
عمرها ما مشت طريق الرذيله !-
سعود بطريقه عمليه : اعطيني اشوف يدك يا عمتي !
مدت ام محمد يدها وهي عافسه ملامحها بوجع !
عقد حواجبه سعود بضجر : لا حول ولا قوة الا بالله !
ام محمد بخوف : رح تقطعونه؟؟!!
سعود بملل : يا عمتي تراه جرح سطحي حتى لاصق طبي ما يحتاج !
متعنيه وجايه على المستشفى !
ابو الوليد مط شفته بكره : العتب على إلي معك يا ام محمد ومرافقينك على الفاضي !
ام محمد باحراج لما قال انه جرح بسيط وسطحي،: الله يسامحك يا سوير انا ما ابغى اتعنى للمستشفى
بس وش اقول جرتني بالغصب
تظن المستشفى رحله أو متنزه !
عقدت ساره حواجبها وهي تناظر ابو الوليد بحده من لما سكنت عند عمار لما يشوفها ينغز بالكلام عليها !
وش يبغى منها ؟!!!
إلتفتت للخلف وهي تشوف وليد داخل كالعاده مبتسم : عمتي هنا
يا مرحبا يا مرحبا !
وقف قريب من ساره : اخبارك يا ام سوار ؟!
رفعت ساره نظرها وقبل ما ترد لمحت وجه ابو الوليد منتفخ وغاضب وهو يناظر وليد !
مطيت شفتي بسخريه الظاهر خايف على عياله مني !!!
صدق دكتور بس عقله متخلف !
وببرود رديت بهمس: بخير
طالعتها ام محمد بانتقاد : اشوفك هنا تهمسين وصوتك بالبيت كأنه سماعة مسجد !
وبعدين ليه واقفه مثل العمود
خلاص خذي بزرانك واطلعي انتظريني عند السياره
ابغى اجلس مع اخوي !
أعطتها ساره نظره حاده وهي تشوفها مستقويه بوجود ابو الوليد وبعناد
توجهت للكنبه وجلست مقابل لها
واعطتها نظرة تحدي !
وليد يصب القهوه يضيفهم !
مد الفنجان لساره
حركت يدها بالرفض
وليد يلزم عليها : يا ابنة الحلال ما يصير تدخلين المكتب وما نض
قاطعه ابو الوليد الغاضب : وليد ؟!
طالع ابوه وابتسم بعد ما فهم نظراته !
حط القهوه وجلس جنب عمته ويبتسم للتوأم !
ام محمد طالعت سعود وبخبث : سمعت انك تبحث عن عروس ؟!!!
بو الوليد بخبث اكبر : ايه ندور عن
عروس !
خلاص يكفيه عزوبيه إلي بعمره عنده عيال !
ابتسم سعود : حسستوني عانس !
ابو الوليد يكمل خبثه : شيخ كل البنات يتمنون نظره منك !
واعطى نظره لساره وكأنه يقصدها بكلامه !
تابع كلامه وهو يشوف البرود من جهتها
لازم يوصل لها رساله غير مباشره
طالع اخته : عاد سعود عنده شروط بالعروس ورافض يتنازل عن اي شرط !
ام محمد : وش شروطه وكاد اشوف وحده نفس شروطه واخبركم فيها ؟!
ابو الوليد بغرور : اول شيء يبغاها
بنت عالم وناس اصلها معروف من جهة الاب والام
نطق حرف الميم وهو يشد عليه وعيونه على ساره !!
ما حركت ساره ساكن وهي تستمع بصمت تشوف اخرتها معه !
تابع كلامه : الشرط الثاني
تكون مؤدبه وخلوقه والكل يتكلم عن اخلاقها وحياءها
ما يبغى يبان منها ظفر واحد
ماتكون مثل بعض ناس ساعه تلبس نقاب وساعه تخلعه !
الشرط الثالث : تكون حلوه حنطيه ما يبغاها بيضاء !
وطولها متوسط
ما يبغاها تكون قصيره ولا
قاطعته ام محمد بخبث : ولا تكون ناقه وطالعت ساره !
ابو الوليد ابتسم : بالضبط ما تكون ناقه !
مع انه سعود طويل بس كذا شرطه !
الشرط الرابع والاهم تكون متعلمه مو مهم التخصص المهم تكون متخرجه من جامعه معترف فيها
والاهم ما يبغاها متوظفه يبغاها تجلس في البيت !
واخر شرط والاهم تكون «عزباااااء» و يكون عمرها فوق 23 على الاقل !
ام محمد : ان شاء الله يلقى البنت إلي تحفظ بيته
وتكون فال طيب له مو فال نحس !
الله لا يبلانا !
جالسه تسمع كلامهم إلي تحسه ضربها بالصميم !
متآكده كل شرط يقصدها
امها إلي تجهل هويتها واهلها !
بلعت ريقها وهي ترفض الفكره إلي زارتها !
ليه ما تعرف شيء عن اهل امها شيء ؟!
ليه كانت عايشه مع جدتها ام سعيد لوحدها ؟!
دوم كانت جدتها تصف لها أمها حتى تخيلتها ملاك على وجه الارض!
ليه الغموض يحيط بحياتها وخاصه اهل امها؟!
ما احد يعرف امها او قابلها ؟!!
متى ينكشف الغمام ويبان كل شيء ؟!
رددت بنفسها «وينك يا خلف»
اخذت نفس وهي تحس بغليان بداخلها من خلف !
تتمنى يكون قدامها وتطلع كل قهرها بالسنين إلي فاتت !
انسان بلا ضمير !!
طالعت التوأم جالسات بهدوء تحس قلبها ينذبح ألف مره لما تناظرهم !
رفعت نظرها لابو الوليد إلي يكلمها : عسى تعرفين احد بذي المواصفات !
ساره ببرود عكس النار إلي بقلبها : ايه اعرف وحده بذي المواصفات
تراها قريبه منكم حيل !
«ليلى»
زمجر بغضب ابو الوليد: تخسين !
ضحك وليد يلطف الجو : الله يهداك يا ساره وانا على بالي عندك سالفه !
ام محمد مستقويه : صدق وقحه
الحين ليلى الشغاله السوداء إلي ما ينعرف من اي بلاد تأخذ سعود !!
قولي مقهوره لانه كل شروطه ما هي عندك
ومقهوره لانهم مستحيل يخطبونك
قاطعتها ساره بتحقير لكلامها بدون ما تناظر سعود : صدق انك متخلفه وما ادري وش نعمل لعقلك المصدي!
تراني يا متخلفه متزوجه !
تعرفين وش يعني متزوجه ؟!
وحتى لو كنت عزباء لو ما بقى رجال بالعالم ما وافقت على احد يقرب لك وفيه صلة دم فيك !
لانه يحمل دمك الخبيث !
انخطف وجه وليد وما تكلم !
ابو الوليد يبغى ينفجر من كلامها
بس مسك نفسه لاخر لحظه
مو بزر تستفزه بهذي السهوله
وببرود ظاهري رد : خليك بمجنونك افضل لك واتركي امور الزواج لانها ما تخصك !
وبطريقة مستفزه تابع كلامه : بالمناسبه اذا تحتاجين مساعده اقدر ادبرلكم بطاقه للعلاج بالمجاني
مراعاه لوضع زوجك،!
الا ما قلتي لي بأي مستشفى نفسي حتى اوصي عليه معارفي !!
حتى بناتك رح اصرف لهم بطاقه مجانيه للعلاج لوجه الله تعالى !
ام محمد مستمتعه ؛ ايه تكسب أجر بالمجنون !
جالسه ببرود بالرغم من كلامه المستفز
لانها تؤمن بعباره «الحقران يقطع المصران» مسحت على رأس سوار بهمس مسموع قاصده توصله: الحين نروح لبابا بس تكمل هذي ثرثرتها !
سوار بحماس : بسرعه ماما نروح لبابا اشتقت له ؟!
حور بنفس الحماس: احبه كثير ونلعب عنده !
ام محمد مطت شفتها بسخرية: تلاقينه عند الاشاره يلف على السيارات !
ابو الوليد بتحذير : اتمنى يا ساره تنتقي ألفاظك قبل ما تغردين لاني ما
قاطعته ساره بلامبالاه وهي توقف : إلي يدق الباب يسمع الجواب !
وإلي بيته من زجاج ما يرمي بيوت الناس بحجاره !
وبنبره افزعت ام محمد : قومي خلصيني !
وليد رفع حاجب بانتقاد : ليه تكلمينها كذا ؟!
تراها ما هي بزر من بزرانك !
ام محمد تونست بدفاعه عنها : شفت بعينك كيف تكلمني
ما تحترم احد ولا تحشم احد !
ساره بتحذير : مجنوني وبناتي خط احمر ادوس على إلي
قاطعها وليد بتنهد : يا حظ مجنونك
طنشته ساره وهي توجه كلامها لام محمد : اذا وصلت السياره وما كنت خلفي ما رح انتظرك
وبسخريه شوفي محارمك يوصلونك !
تركتها وطلعت ولسان حالها يقول
«يا أرض اشتدي ما احد قدي »
ابو الوليد طالع اخته إلي همت بالخروج بسرعه خلف ساره وبزجر :تراها سيارتك والسواق لك وتتحكم فيهم هالبزر؟!!
وين عقلك ؟!
تخافين منها هالبزر ؟!!
ام محمد بعجز : فكني منها
الله يأخذها لسانها يوطوط وما يسكت !
اروح ألحق عليها قبل ما تنقلع !-
طلعت بسرعه تلحق عليها !
ابو وليد ضرب على المكتب بغضب
سعود بهدوء: يبه
ابو الوليد بغضب: انت يالجليد ما تتكلم !
يا برودك ما تشوف كيف تنرفز الواحد
وانت هادي!
وطالع وليد بغضب : وانت طاق الميانة معها !
هذي البنت بالذات ما ابغى تقترب منها !
واذا تفكر مجرد تفكير فيها صدقني ما يصير خير لك !
تفهم !
وليد هز راسه بطاعه ما يقدر يعارض ابوه بشيء !
دائما ابو وليد إلي يرسم ويخطط مثل ما يبغى
وما يطلعون من شوره ابدا !!!
سعود رفع حاجب ببرود بعد ما طلع ابوه : انت من عقلك ناوي تخطبها ؟!
وليد يناظر جهة الباب يتأكد انه ابوه طلع : لو معها شهاده فيها نظره !
سعود يناظره باستخفاف : من جدك ؟!!
تراها متزوجه وعندها عيال ؟!!
وليد بضجر : يا سخفك يا سعود !
تراني ادري انها متزوجه
بس مصادري الخاصه خبرتني رح تتطلق قريب
ومحمد اخوها نازل قريب ينهي سالفتها
إلي الناس ما عندهم الا سالفتها
تخيل زوج اميره متصل بمحمد وينقد عليه كيف متزوجه مجنون
ما يبغى عديله يكون مجنون !
وانت تعرف زوج اميره له مركزه بالمجتمع
وما هي حلوه بحقه عديله مجنون !
واذا ما تصرف محمد رح يتصرف بنفسه!
سعود بهدوء : واكيد اخبارك هذي من مها ؟!
وليد هز راسه : اكيد
تابع سعود كلامه : اتوقع اذا كانت تبغى زوجها ما ظنيت تقبل بالطلاق
شكلها عنيده ويبغى لها تكسير رأس !
وليد ابتسم بحماس : يعني حنا على وجه واقعه حماسيه !
وباستدراك : بس احسها تحترم محمد وتسمع كلمته
اكيد ما رح تعارضه !
سعود هز كتوفه :ما شفت البنات كيف متعلقات بالمجنون
ومتشوقات له !
وهي بعد تروح له وتزوره !
وليد بحيره: ما أدري وش سبب تعلقها
بالمجنون ؟!!!
سعود بسخريه : واضحه
طالعه نازله وما احد له كلمه عليها !
واذا احد فتح حلقه بكلمه ترد
تراني متزوجه وما احد له كلمه علي !
وليد بدفاع : انت لما رجعت من السفر يمكن داومت كم مره انا اعرفها
من وقت
محترمه وما تعطي احد وجه !
صحيح كان عليها مواقف بايخه
قاطعه سعود : انا ما قصدت الأخلاق
وبملل : ما ادري يا اخي عيال عمتي كلهم ما يدخلون بعقلي !
وليد هم بالخروج : انت ما ادري مين داخل عقلك !
تراك مثل ابوي رافع خشومك للسماء
شوي من التواضع يا اخي !
**
**
**
يمشي بالممر رن بإذنه «عمي عزام »
للحظه ظن انه يتوهم !
رجعته صدى هالكلمه للماضي !
حس بالحنين لذيك الايام لما كانت تترك كل شيء بيدها
وتركض له مبتسمه وتناديه «عمي عزام»
ماينكر صدى هالكلمه فجر ينابيع الشوق لذيك الايام !
اشتاق لساره الطفله البريئه !
كان يشعر بالغرور من اهتمامها المبالغ فيه
بالرغم من الحزم إلي يعامله فيها
الكل يستغرب حبها واهتمامها فيه !
يعترف لنفسه لاول مره
ساره الطفله إلي احب طفولتها و براءتها !
يتظاهر بعدم الإهتمام
عاملها بحزم يبغى يغير من غبائها
بس تفاجئ من تصرفها إلي صدمه !
ما توقعها خبيثه كذا !
ما يدري الحين صوت سوار رجعه للماضي وحن لذيك الايام !
تنهد وناظرها تمشي بهدوء وسوار تركض لجهته بابتسامه : عمي عزام !
عزام بابتسامة : نعم !
سوار تتلفت بطفوله : لجين معك؟!!!
مسح على راسها بهدوء بعد ما نزل لمستواها : لا مو معي
سوار بتساؤل :وش تعمل هنا !
عزام ونظره على ساره إلي اقتربت منهم:انا دكتور بالمستشفى!
ساره بهدوء اشرت لسوار تمشي قدامها !
هزت بالموافقة بدون عناد وابتعدت عنه بإتجاه امها!
سلط عيونه تراقبها بصمت وهي تغادر المكان بهدوء ولا كأنه واقف قدامها
سبحان المغير الاحوال !
حس بالشفقه على سوار إلي تكلم ساره باعتراض وصوتها يهتز دليل على البكاء: ماما ليه ابو لجين دكتور
وابو ندى صيدل«صيدلاني»
الا حنا ابونا مجنون
حور تكمل اللحن : ندى دوم تقول لنا بنات المجنون !
استغرب إكمالها للطريق وما اهتمت لكلام التوأم !
لازم يتحرك ويساعدها بس ما يدري كيف ؟!!
لازم يكلم خاله محمد ويتحرك وينهي هالمهزله !!!
قاطعته : عزام !
انفزع من طريقتها عدل ملامحه : هلا جدتي !
ام محمد باستغراب : متى انتقلت هنا ؟!!
خبري فيك تشتغل بمستشفى
قاطعها : جاي زياره
وش صاير اشوفك بالمستشفى ؟!!
ام محمد بتمسكن : والله يا وليدي
السكينه جرحت اصبعي
قاطعها بلقافه : ساره جايه معك ؟!!
ام محمد بحنق : حسبي الله عليها
بسببها انجرحت بالسكين !
عزام بتنبيه: ترانا بمكان عام وطي صوتك !
ام محمد اشرت على راسها : هذي البلوه ما تركت براسي عقل
اروح الحق عليها قبل ما تنقلع !
اشوفك بعدين !
تركته وطلعت مستعجله !
لف وجه يروح لوليد عقد حواجبه باستغراب
وهو يشوف عمه عبدالله واقف ويناظر
جهة البوابه الخارجيه !
ما يدري صدفه او حركه متعمده!
قبل ما يتحرك انفزع من جدته وهي تقترب منه تلهث وتدعي : حسبي الله عليها انقلعت وتركتني !
زفر بضجر من حركات ساره !
تركت عزام واقتربت من ابو وليد إلي ناوي يطلع من المستشفى : شفت هالزفته تركتني وانقلعت لا بارك الله فيها !
كيف ارجع الحين ؟!
ابو الوليد كتم غيضه من تصرف ساره : انا راجع للبيت تعالي معي !

جالسه بالحديقه على المقعد تراقب بالتوأم يلعبون !
بالرغم من حراره الجو
لكن الحرارة والنار إلي بقلبها طغت على حرارة الشمس !
سمحت لدموعها بالنزول
لتشكي حالها !!
يوجعها كلام الناس !
مهما كابرت هي بشر ولها احاسيس ومشاعر !!!
ما زالت صغيره
لكن مصطلح الزواج والاستقرار محرم عليها !
زادت دموعها وهي تتذكر كلام سوار إلي هزها !!
ليه ابوها مجنون ؟!
ليه يسآلونها ؟!
هذا السؤال المفروض ينطرح
لخلف !
وإلي زاد عليها لما لمحته بالمستشفى واقف ويناظرهم!
ما في كلمه توصفه !
كل يوم تزيد مشاعر الكره لعبدالله !
مسحت دموعها بكفوف يدينها
وهي تشوف حور متوجه لها وتركض بفرح : ماما انا احب هالبابا
وناظرت حولها بإعجاب !
هزت راسها على غباءها خبرت التوأم اسم هالمكان «بابا»
إلي يسمعهم يظن انهم يزورون ابوهم !
طلعت منها شهقه غصب عنها من استغفالها للتوأم !!
حور بصدمه : ماما تبكي ؟!!
ساره ما قدرت تكورت على نفسها
وانفجرت من البكاء
تبغى تطلع كل الكبت إلي بداخلها !
قهروها !
حرموها من كل شيء حلو بالدنيا !!!
تتمنى الموت وترتاح من هالحياه !
قلبها اوجعها ما تدري وش نهاية هالطريق ؟!!
يلومون اسلوبها لانهم ما عاشوا ظروفها !!!!
تعزي نفسها
«الغد سيكون اجمل !!»
***
***
***
زفرت بضيق وهي تشوف 20 مكالمه من عمار غير الرسائل الغاضبه من تطنيشها له !
حست بحبات العرق تسيل بظهرها من شدة الحراره !
طالعت المكان وهي تحس بجنونها !
اشرت للتوآم !
قررت ترجع وتأخذ شاور الحراره صهرتها !
زاد تأنيب ضميرها وهي تشوف
خدود التوأم حمراء من وهج الشمس!
مسحت على شعرهم بحنيه وصوتها مبحوح من كثر البكاء:يلا ماما نرجع !
اي احد يسألكم وين كنتم وش تقولون؟!!
التوأم بصوت واحد للاجابه برد حفظوه عن ظهر قلب : كنا عند البابا !
هزت راسها وتوجهت خارج الحديقه
تبحث عن سياره اجره
لانها نزلت قريب من الحديقه وطلبت من سواق خالتها يرجع !
طول الطريق عيونها على الطريق ماترتاح !
نزلت من سياره الاجره وتوجهت للداخل !
دخلت البيت وتفاجأت من وجود ابو الوليد مع خالتها !
طالعها عيونها فيهم اثر بكاء وخدودها مكتسيه باللون الاحمر من وهج الشمس !
زاد جمالها اضعاف مضاعفه !
يخاف على عياله منها وبحده تكلم وهو يناظر التوأم نفس ساره الخدود باللون الاحمر : اخيرا شرفتي ؟!
وين باقيه ؟!!
طالعته ساره برفعت حاجب بسخرية : انتظر أشوف اسمك موجود بدفتر العائله !
ابو وليد بتسلط : تتمسخرين علي ؟!!
ساره وهي متوجه لغرفتها : ياليت ما تتدخل بآمور ما تخصك لانه ردي ما رح يعجبك !
****
***
***

قفلت ستارة الشباك بضجر !
توجهت للمرايه وناظرت نفسها
بإحباط
يقال انها «عروس »
صلت الفجر وبعدها ما رجع للفندق
ناظرت ساعتها قريب المغرب !!
وين طس من الصبح ؟!
تنهدت بعجز لاصلاح كل المشاكل !
دوم تعطي نصائح لاسماء ونهى
وعند اهم شيء بحياتها فشلت
ووقفت عاجزه
محتاجه احد يرشدها لطريق الصح !
رجعت جلست على طرف السرير
وهي تفكر بإصلاح الوضع
حاولت تفركش الزواج بس باءت محاولاتها بالفشل !
وبما انه تم الزواج وبدأت حياة جديده
لازم تسعى للاصلاح وترضى بنصيبها
ما تدري وين الخير !!
لازم تعامل ماجد بإسلوب حلو وتنسى الماضي
وتحترمه وتقدره بما انه زوجها !
وما حتنسى معنى الحديث من نامت وزوجها غضبان عليها
قطعت افكارها لما شافته واقف فوق راسها !
طالعته وهي تشجع نفسها على التغيير «ابتسمي له تشجعي»
وبصعوبه ابتسمت ما تطيقه بس رح تضغط على نفسها وتكلمت مع ابتسامتها : هلا ماجد جيت ؟!
طالعها بسخريه وهو يتكتف: لا هذا خيالي بعدني على الطريق !
مسكت نفسها وهي تعد للعشره من سخافته
تابع كلامه بفوقيه : قومي جهزي نفسك نرجع لبيت اهلي !
وقفت بهدوء وطنشت نظرته الفوقيه : ان شاء الله
جهزت الاغراض بصمت وهي تفكر كيف تقابل اهله بعد سالفة البارحه؟!
دخل بعد ربع ساعه وهي تعدل النقاب
تكلم بكشره : خلصيني !
من زينك واقفه تطالعين نفسك ! لاخر لحظه مسكت لسانها و بداخلها
«احلى منك يا جوكر »وبنبره هاديه : ان شاء الله انا جاهزه !
طلعوا من الفندق وحرك السياره وطول الطريق ما فتح حلقه بكلمه !

وصلوا لبيت ابو راكان وقلبها يدق طبول !!
قبل ما ينزلوا مسك يدها بقوه : وقسم بالله كلمه زايده او تقللين من احترام اهلي الاتشوفين وجهي الثاني !
فقدت اعصابها وسحبت يدها بقوه : محترمه قبل اشوف رقعة وجهك!
هز رأسه بتوعد : يصير خير !
نزلت من السياره بلامبالاه نزل معها وهو متوعد فيها !!!
***
***
***
ام ماجد بقهر : خلاص يا راما خلي اليوم يتم على خير !
يكفي ولدي الوحيد وما فرحت فيه !
راما بانزعاج من كلام امها: يعني حنا خربنا الزواج والا حضرتها !
ام محمد بدفاع : يا راما تراه زواجها كيفها تعمله مثل ما تبغى
مطت شفتها ساره بسخريه«حكيمة زمانها تؤبر ألبي ..مالت عليك »
ام راكان مؤيده: أم محمد صادقه
البنت ما تسمع اغاني بكيفها
المفروض ما تتدخلين !
وانت يا ام ماجد انسي إلي صار امس
ما له داعي وضع حزازيات من الحين !
شروق بنيه صافيه: الله يهدي النفوس
دخلت عائشه بثقه عند الحريم
وهي ناويه تفتح صفحه جديده
سرعان ما عفست ملامحها لما شافتها جالسه بين الحريم !
حست الضغط ارتفع الف !
ما تدري شعور الغيره او التملك ؟!

دخلت عائشه بثقه عند الحريم
وهي ناويه تفتح صفحه جديده
سرعان ما عفست ملامحها لما شافتها جالسه بين الحريم !
حست الضغط ارتفع الف !
ما تدري شعور الغيره او التملك ؟!!
أخذت نفس عميق تهدي نفسها
ما رح تكون من الحريم الناقصات عقل
حتى لو يحبها ماجد كله مجرد كلام دامه متزوج وهي متزوجه
يعني اجتماعه فيها حاليا
مستحيل !!
ليه تذبح نفسها لامر مستقبلي ؟؟!!
تقدمت بابتسامه وبجرأة وهي تشوف اغلب الموجودين وقف للسلام عليها
تنفست براحه
خطوه حلوه !
تقدمت من ام راكان وهي تسلم عليها بتقدير واحترام وتسألها عن حالها
وزينت كلامها بابتسامه جميله !
وبعدها على ام محمد بنفس السلام !
تقدمت من ام ماجد بابتسامه ازاحت كل الزعل و العتب إلي كان بقلب ام ماجد !
إلتفتت لراما إلي جالسه وما هي ناويه
توقف بوجهها !
مدت يدها راما بفوقيه سرعان ما سحبتها عائشه بابتسامه : يا حلوه تبغين واسطه علشان تسلمين علي !
راما تخربطت ما توقعت تصرف عائشه كذا !!
بدون اراده ابتسمت لها !
قبلتها عائشه باستهبال : اموااااه يا اختي على الناس الحلوين !
جالسه تناظرها تسلم على هذي وذيك وتبتسم وتمزح وكأنها تعرفهم من سنين !!
نزلت نظرها للجوال تطقطق عليه
غصبت نفسها تيجي حتى تشوف عائشه !
بالرغم من الجفاء إلي شافته منها لكن بداخلها حنين يجبرها تحضر
وتشوفها !
رفعت راسها على صوت ام راكان :،سلمي على حرمة ماجد !!
ام محمد تحشر خشمها : لعنبوووو هالجوال 24 ساعه تطقطقين عليه !
اعطت ساره نظره لام محمد بمعنى
«انكتمي»
وبعدها طالعت عائشه إلي ماده يدها
وباين عليها الضجر عكس سلامها على الباقي !
مدت يدها ساره ببرود عكس المشاعر إلي بداخلها !!
وسحبت يدها بسرعه ورجعت تطقطق بالجوال
وهي تحس الرؤيه صارت ضبابيه من تجمع الدموع !
حمدت ربها انها لابسه نظارتها الطبيه
تخفي شيء من الاحزان !
تسترق النظر على عائشه بين كل وقت
لابسه فستان ذهبي طويل بأكمام طويله وشعرها على طوله
ومكياج خفيف جدا
كانت انيقه وجميله !
استغربت انها تناظرها بين كل وقت !
مثلها بالضبط !
بس نظرتها مختلفه عنها !
تناظرها وكأنها تبغضها وما تطيقها !
عكس نظراتها شوق وحنين !!!
وش عملت لها حتى تعاملها كذا ؟!
نسيت اجمل ايام الطفولة إلي عاشتها معها ؟!!!
تنهدت واكتست ملامحها بالحزن !!
ضاق صدرها بزياده وهي تشوف نجمة الجلسه
«عائشه»
الكل يكلمها ومهتم فيها
ولا كأنها نفسها إلي خربت زواجهم
نسوا سواتها البارحه ؟!!
وقابلوها بالاحضان !
اما هي قابلوها بالاهانه والضرب بدون ذنب !
وحتى لما تم الصلح الجمود والبرود يمثل علاقتها فيهم !!
صدق الناس حظوظ !
من يومها منحوسه وما لها حظ،!
تداركت نفسها بالاستغفار
«اللهم لا اعتراض »
نسرين بآناقتها المعهوده تقدمت : إلبسوا جدي وعمي ابو ماجد يبغون يدخلون يسلمون على العروس !
طالعتها ساره وما تحركت لأنها دائما بعباتها والشيله !
بعد وقت قصير
دخلوا بهدوء !
تقدمت عائشه من ابو راكان وسلمت عليه بابتسامه : كيفك يا جدي عساك بخير !
ابو راكان يطالعها بإعجاب : الحمد لله !
تعرفين التقدم بالسن
قاطعته بمديح : بعدك شباب يا جدي !
وش رايك نشوف لك الثانيه
وطالعت ام راكان وابتسمت بغمزه : وش رايك يا جدتي ؟!!
ام راكان خزتها بمزح : يا العوبا
دوبك دخلت بيتي وتبغين تخربينه.!
ضحكت عائشه وبانت اسنانها !
ابو راكان مبسوط عليها : انا ام راكان ما ابدلها بكل حريم العالم !
وبتذكر: نسيت ابارك لك !
عائشه بغمزه : جدتي ام راكان ماخذه عقلك يا بختها !
ابو راكان يتقدم من زوجته ويجلس : ربي يحفظها لي !!
عائشه من قلب : امين
وبعدها تقدمت من ابو ماجد !
ابو ماجد بابتسامه : توقعت ييجي دوري بالسلام باكر الصباح !،
مبارك الزواج !
عائشه ومودها عالي ما توقعت هالاستقبال : الله يبارك فيك
وطالعت ام ماجد وهي تغمز : اقول عقبالك ؟!
ام ماجد بيدها فنجان القهوه وبمزح : علشان اهفك بهذا !
واشرت على الفنجان إلي بيدها !
¶
جالس يطالع عائشه ومبتسم عليها
ويحمد ربه انها طلعت من نصيب ماجد !
وزع نظره على حفيداته و زوجات عياله وتبسم براحه لما يشوفهم !
وقع نظره عليها جالسه جنب مريم وعيونها على عائشه
وملامحها تصرخ من شدة الحزن !
حزينه وتحس كل هموم العالم فوق راسها !!
تغيرت ساره إلي كان يرعاها في بيته !
بدت له الحين وكأنها غريبه
وشخصيه مختلفه جدا
عن إلي عرفها !
عنده تساؤلات كثيره ولازم يجلس معها
ويفهم امور كثيره
لكن في شيء بداخله يرفض بشده !
زفر بضيق وهو يشوفها بعيونه
تذبل يوم عن يوم !!
**
**
**
تناظر عائشه وبداخلها عشعش شعور الغيره
وهي تشوفها تمزح وتضحك مع عمها ابو راكان !
آنت بداخلها من الوجع
عمها ابو راكان إلي كانت صدى ضحكاتها معه تملئ المكان !
ما ترتاح الا لما تشوفه وتكلمه !
والحين انقطع حبل الموده بينهم
ويعامل الغريبه عائشه افضل منها ؟!
اوجعها الهجران !
ربما لانها كانت تعتبر ابو راكان ابوها
إلي طلعت من الدنيا وماشافته !
ولا احد خبرها عنه !
صعب هجران من كنت تراه ابوك !
مطت شفتها بألم وهي
تشوف نظرات الاعجاب والفرح بعيون عمها ابو راكان وهو يطالع عائشه ويكلمها !!
اخذت نفس تحاول تزيل الغصه إلي تجمعت بحلقها !
يذبحها الاهتمام الزايد بعائشه !
ما تقدر تتحمل تجلس هنا دقيقه وحده !
وقفت بهدوء ناويه تغادر قاطعتها ام محمد : وين طالعه الحين ؟؟!!
طنشتها ساره وغادرت المكان
زادت الطعنه ما أحد طلب منها تجلس !
لذي الدرجه ثقيله عليهم !
لولا فضولها لرؤيه عائشه ما طبت بيتهم !
حتى ام راكان انشغلت بعائشه ولا كأنها تعرفها !
تحس مشاعر الحقد والكره بدأت تتجمع وتخيم على قلبها
وعقلها !
طلعت من البيت وتقدمت من التوأم يلعبون مع ندى
وبكل كره نطقت بتعنيف للتوآم : هذي البنت كم مره قلت لكم ما تلعبون معها ؟!!
قدامي على البيت اشوف!
قاطعها من خلفها كالعاده بلهجته البارده : بحاجه كورسات لتربيه الاطفال !
ليه تغرسون خلافاتكم بالاطفال؟!
وتعلمونهم على الحقد والكره ؟!!
ت
قاطعته ساره بحده بدون ما تناظره : انت لا تتدخل !
وبناتي اربيهم مثل ما ابغى!
سحبت البنات وتجاوزته بخطوات وهي مفوره من الغضب من تدخل سعود !
بس وقفت وكلام ندى يرن بإذنها: بنات المجنون !!
يا حرام ابوهن مجنون بالشوارع !!
رجعت بخطوات هاديه لندى
وسرعان ما استقر كف يدها على خدها : عيدي هالكلام مرة ثانيه
وشوفي وش رح يصير !
وقولي للي علمك هالكلام ترى هالمجنون يسواك ويسوى عشره من امثالكم يا حقودين يا
قاطعها بهدوء وهو يشوف ندى غادرت وهي تبكي : من عقلك مفتخره بالمجنون ؟!!
ردت وهي تغادر : هالمجنون مثل المويه ما نستغني عنها !!!!
تركته وهو محتار من امرها اول مره يشوف وحده متعلقه بزوجها ومجنون؟؟؟!!!
تأكد الحين انه عقلها ناقص ولو تراجع بالمستشفى النفسي الا يستقبلوها !!!
***
**
**
**
دخلت ندى بالصوت كله تبكي
وافزعت من حولها من قوة البكاء !
عبدالله وقف على حيله : وش فيك تبكين ؟!!
ندى من بين شهقاتها : ضربتني ام سوار !
عصب عبدالله وبنبره غاضبه : جعل يدها للكسر ان شاء الله !
ماجد بنبره اغاضت عبدالله : قبل ما تدعي اعرف بالاول وش هببت هالندى !
عبدالله ناظر بنظرات ناريه: انت لا تتدخل احسن ما ادفنك بمكانك !
ماجد بمزاج رائق: تدفني ودوبني عريس ؟!
وبمزح :يا ويليييييي وينك يا امي تعالي شوفي عمي يبغى يدفن وحيدك!
سلمان بضحكه : نزوج ابوك وتجيب لكم 3عيال بدالك !
ماجد بخبث : موافق بس بشرط ساره العروس !
سلمان بغمزه: حلوه هذي
بس باين انها مثل امك تجيب بنات بس
ابو الوليد بنبره غاضبه : بس إنت واياه !
ما في احترام وتقدير لنا ؟!
وش هالسوالف الماصخه !
عبدالله بتشفي : إلي ما يعرف يتكلم يا ليت يبقى ساكت !
ماجد بسخريه : ان شاء الله عمي!
عبدالله انتفخ وجهه من ماجد
وتمنى يصفقه كم كف يشفي غليله من وقاحته !
ابو الوليد ينقل نظره بينهم : عمار وينه ؟!!
سلمان حاس بوزه : عند خطيبته يا بخته !
ابو عزام اعطاه نظره خلته يعدل جلسته : صير رجال مثل العالم والناس
وقتها ابشر بإلي يسرك !
وسكت وهو يناظر عبدالله يكلم بالجوال : هذي المره رح اتغاضى لكن قسم بالله مره ثانيه الا اعمل شيء ما يعجبك .....ما لك وش ابغى اعمل ....اعتبره تهديد ....تراها زودتها وانا ساكت لها تبغى تطلع حرتها بالبنت ؟!! ........انا ما زودت حكي وكلمني زين تراني خالك يا عمار .....المطلوب اذا مدت يدها على ندى اكسر يدها
ازاح الجوال وطالعه بصدمه لما قفل الخط بوجهه !
مناف ضحك بشماته : ياصغر عقلك تدور خلف السوالف مثل الحريم ؟!!
وليد بعقلانيه: يا اخي انت قومت الدنيا لانها ضربتها
يا اخي إسأل
الله اعلم هالندى وش مهببه ؟!!
عبدالله عفس ملامحه بقرف : يا اخي انت ليه تحب الفلسفه الزايده !
ماجد بتدخل : خالي وليد صادق
شوف ابنتك وش مهببه !
عبدالله طالعه بنظره «انكتم» وبعدها طالع ندى بلطف: ليه ضربتك ام سوار ؟!
ندى وهي تمسح دموعها : ما تبغاني ألعب مع ثوار !
قلت لها بنات المجنون
ابو الوليد بضجر : صجيتم راسي بذي السالفه !
والبنت صادقه بنات مجنون !
مناف ما عجبه الكلام : يا خال ما يصير هذا الكلام يتداول حرام البنات باكر يتعقدن من هاللقب !
وتستاهل ندى الضرب لسانهاطويل !
عبدالله ناظره بعدم رضى مسك يد ندى وتحرك طالع : نسينا انك ما ترضى على حبي
والا بلاها نكمل !
تجاهل الاغلب كلامه تفادي للمشاكل !!
**
***
**
**
**
نزلت بداخلها ضيق من تصرفات ماجد معها !
متجاهل وجودها ولا كأنها موجوده واذا كلمها من رؤوس خشومه !
ما توقعته حقود لذي الدرجه !
ام ماجد نادت عليها : عائشه !
ابتسمت مجامله : هلا عمتي !
ام ماجد : وش رايك نروح عند اهلي نغير جو !
عائشه بتردد : بس انا اعرف العروس ما تطلع من البيت
قاطعتها ام ماجد بلامبالاه : هذا كلام قديم
وبعدين بيت اهلي هنا ما في بيننا الا باب !
هزت راسها بهدوء وتقدمت بخطوات هاديه
اشرت لها ام ماجد للبوابه عند السور ما تحتاج تطلع للشارع الرئيسي !
دخلت معها وهي تناظر بيت ابو الوليد بإعجاب من الخارج
اكبر من بيت ابو راكان واجمل !
ام ماجد :تلاقينهم قاعدين الحين بالحديقه بين بيت عمار وبيت اهلي !!
تقدمت وعيونها تجول حولها بانبهار !
قاطع تأملها صوته الضاحك : لا لا حرام عليك !
تقدمت بخطوات وهي تشوفه يضحك معها !
ساره بنرفزه :،صدق انك وقح !
يا اخي اترك البنات بحالهم !
ماجد بضحكه : نووووووو
يا حرام سوار معها ساقويد !
سوار تبكي : ماما شوفي وش يقول !
تناولت ساره دلة القهوه : وقسم بالله اهفك بهذا !
ماجد بتلقائية :-واهون عليك ؟!!
طالعته عائشه وهي تغلي «يهون عليك الزفت طاق معها الميانه وانا يكلمني من رؤوس خشومه »
ماجد يدندن: ساقويد ساقويد
شهق لما حس بالمويه بنص وجهه !
ام راكان بضجر : وبعدين مع ذي الجلسه ؟!!
ماجد وهو يمسح المويه : حسبي الله على شيطانك !
ام راكان لمحت عائشه وام ماجد : حيالله العروس !
وانا اقول المكان نور !
استغربت ساره لما همس ماجد «اظلمت»
بعد ما جلست عائشه وقف ماجد بكشره : انا طالع مواعد عمار !
ساره اشرت له على سوار بامر حازم : مثل ما بكيتها راضيها !
اشرلها ماجد على خشمه بابتسامة : يلا على البقاله !
حور وقفت بحماس : وانا بعد !
ماجد حرك حواجبه بخبث : بس إلي معهم «ساقويد»
رجعت سوار تبكي من جديد !
ساره مسحت دموعها بضجر من ماجد
: يا ماما كلنا معنا «ساقويد»
اشرتها على رجلها هذي «ساق »
واشرت على يدها وهذي «يد»
صاروا «ساق و يد»
يلا يا ماما روحي معه للبقاله !
سوار بزعل مدت بوزها والدموع بعيونها اشرت على ماجد: ما احبه !
ساره وهي ترتب فستان سوار : ادري به غثيث
انتبهي على اختك !
ماجد مسك يد سوار : تعالي يا حلوه !
ام ماجد ما عجبها الوضع وخاصة بعد ما شافت نظرات عائشه : ماجد
طالعها ببراءة : نعم يمه !
ام ماجد بحده : لا تطلع واتركنا من البقالة وعمار تراك عريس !
واشرت بعيونها على عائشه !
ساره بقوه : يسحب على البنات لا !
وبأمر خذ البنات للبقاله !
ماجد بابتسامه : حاضر يا عمتي !!
ام ماجد بقهر : ماجد !
ام راكان تلطف الجو : روح يا ماجد
حرام البنات متحمسات للبقاله !
حاست ام ماجد وما عجبها تصرف ولدها
على الاقل يحترم زوجته !
طلع ماجد والتوأم !
ام ماجد تسأل امها : عمتي ام محمد
ما اشوفها ؟!!
ام راكان : راحت زياره ...الا كيفك يا عائشه !
عائشه بضيق من ماجد وتصرفاته
حتى قدام عينها ما يحترمها
مطيح الميانه مع حبيبة القلب
وشايل بناتها بعد وزاد قهرها وهي تشوف ساره تناظر ماجد : بخير الله يسلمك !
¶
عيونها على التوأم ومتحمسين للبقاله !
رددت بداخلها «اللهم إني استودعك التوأم»
ما تقدر تعيش بدونهم تحس روحها معلقه فيهم !!
ام ماجد بخبث تكلمت : سمعت زوج اميره يهدد ومعصب !
إلتفتت على ام ماجد لما شدها اسم «اميره»
ام راكان ما تبغى هالسوالف : اقول صبي قهوة وفكينا من هالسوالف !
عائشه تتجاهل ضيقها من وجود ساره وتحاول تكون طبيعيه : مين اميره يا عمتي ؟!!
ام ماجد : اميره تكون اختها !
واشرت على ساره !
ناظرتها ساره وما علقت وهي تشوف نظرات التقييم من عائشه !
عائشه عقدت حواجبها : مين يهدد ؟!
ام ماجد ابتسمت لعائشه : هذا يا حلوه
اميره متزوجه واحد له منصب وعنده خير
وله سمعته بالمجتمع
ما ادري كيف وصل له انه عديله مجنون !
وما يبغى يكون عديله مجنون
واتصل بمحمد اخوها واعطاه حد اقصى وتكون مطلقه من المجنون !
حتى البنات ترميهم على ابوهن !
طالعتها ساره باستخفاف لكلامها : ومين يكون حضرته زوج اميره ؟!
وش دخله فيني
ابوي
زوجي
اخوي
عمي
خالي
وبغضب : وش دخل ام امه بالسالفه ؟!!!
وكلام يوصله حامض على بوزه !
طلاق مستحيل يتم !
واشوف كيف رح يطلقني بالغصب ؟!!
ام راكان تتلفت حولها : خلاص اسكتي
فضحتينا !
ساره بحده : لا ما انتهينا !
ام وليد ساكته من البدايه تكلمت بهدوء : زوج اميره صادق وشهوله
تضيعين عمرك مع مجنون !
ساره : مجنون وعاجبني !
ام ماجد بانتقاد : يعني متمسكه بالمجنون جكر لبيت عمي ابو راكان !
ساره بملامح حاده : افهميها مثل ما تبغين !
عائشه بانتقاد : انت
قاطعتها ساره بهجوم : انت انكتمي وما تتدخلين بأمور ما تخصك !
ملقوفه !
ام الوليد بانتقاد : عيب تكلمينها كذا !
ما قالت شيء وأكلتيها ؟!!!!
ساره بتهكم : رجاء لا تتدخلين بيني وبينها !
عندها لسان وش طوله ما هي بحاجه لدفاعك عنها !،
عائشه بهدوء : صادقه انا الملقوفه إلي تتدخلت بأمر ما يخصني !
«من حسن اسلام المرء ترك ما لا يعنيه »
زفرت ساره بضيق ما تدري كيف هبت بعائشه كذا !
عائشه من الاشخاص إلي عقلها رافض نسيانها !
من الغدر والخيانه تنسى الايام الحلوه إلي جمعتها فيها !
حركت شفتها تتكلم بس سرعان ما سكتت وهي تشوف ابو راكان متوجه لهم وجهه ما يبشر بخير !!!
تقدم ابو راكان وعيونه عليها وهلفه ابو عزام وابو ماجد !
ام الوليد : تفضل يا ابو راكان !
ابو راكان بقهر طالع ساره مطنش ترحيب ام الوليد : تعالي ابغاك دقيقه !
ام راكان بقلق من ملامحهم ما تبشر بخير : وش فيه يا ابو راكان !!
ابو راكان ما له خلق احد : فكينا من هالتحقيق !
وانت تعالي !
طالعته سارة وببرود : ما في بيننا كلام !
ابو ماجد بحده : قومي الله يآخذك انت واخوا
قاطعته ساره بحده وهي تؤشر بإصبعها : احترم نفسك وعن الغلط !
ابو عزام بهدوءاشر على بيت عمار : ننتظرك هناك !
ملامحهم إلي تدل على وجود مصيبه حفزتها تقوم خلفهم
وتشوف اي نوع من المصايب حملوا لها؟؟؟

ملامحهم إلي تدل على وجود مصيبه حفزتها تقوم خلفهم
وتشوف اي نوع من المصايب حملوا لها؟؟؟؟
دخلت خلفهم بخطوات هاديه وقلبها
يدق بقوه ما هي مرتاحه
همست لنفسها «الله يستر »
وقف ابو راكان بوسط الصاله ويحاول يمسك اعصابه وسلط نظره عليها وبنبرة اتهام : وش مهببه من خلفنا ؟!!
طالعته ساره وتكتفت وهي رافعه حاجب بهدوء : نعم ؟!!
ابو ماجد يغلي من عيال عمه كلهم وبانفعال : نعامه ترفسك !
جاوبي على السؤال !
ساره بحده رفعت اصبعها لجهته : للمره الأخيره أقول لك احترام نفسك !
وبعدين انت ما لك كلام عندي
ليه جاي ؟!!
رجاء لا تتدخل !
وطالعت عمها : عندك كلام تكلم
بصريح العبارة بدون هالالغاز!
هز راسه ابو راكان بقهر : وتتكلمين بقوة عين ؟!!
الشرطه قبل ساعه جايين طالبينك بالاسم !!
فتحت فمها للحظات تستوعب الكلام !
«الشرطه» ؟؟؟؟!!!
ما عملت شيء حتى يطلبونها ؟!!
ابو راكان بغضب وقهر : وش مهببه ؟!
أبو عزام بهدوء : يا ساره اذا في شيء صار معك خبرينا يمكن نقدر نساعدك !
طالعته ساره باستخفاف وبنفسها تردد «يساعدونها»؟؟؟!
ابو راكان زاد غضبه من سكوتها : تكلمي يا
قاطعه دخول عزام وخلفه ابو الوليد إلي استأذن قبل ما يدخل !
¶¶
ابو الوليد تقدم من ابو راكان لما شاف ملامحه وسحبه لاقرب كنبه : ارتاح يا رجال وكل شيء ينحل بالتفاهم !
ابو راكان وجهه اسود : اي تفاهم ؟!
عزام وجهه ما يبشر بخير : ارتاح يا جدي عرفنا وش القضيه !
طالعته ساره بعدم تصديق
ذول من عقلهم يتكلمون اي قضيه ؟!!!
أبو راكان بخوف بان بصوته : وش القضيه ؟!!
عزام زفر بقهر : شيكات !!
ابو عزام عقد حواجبه باستنكار : شيكات !!!
ابو ماجد طالعها لويطلع بيده يكسرها : ما شاء الله شيكات !
هذي اخرتها !.
إلتفت لأبوه يخفف عنه :هذي حلها بسيط !
غمض عزام عيونه بعجز : بسيط ؟!!
ابو الوليد طالع ساره بقهر : وين صرفتي كل هالفلوس ؟!!
من متى الحريم يوقعون شيكات ؟!!
بس ما اقول العتب الا على عمك هذا
إلي ترك لك الحبل طالعه نازله لا سائل ولا مسؤول !
ابو راكان مو ناقصه كلام زايد وبنبره تدل على مدى ضيقه : كم المبلغ ؟!!
عزام طالع ابو وليد ويتمنى يتكلم عنه هالمبلغ !
تكلم ابو الوليد بعد ما زفر : حضرتها موقعه شيك يا ابو راكان بمقدار «........»
توجهت الانظار المكذبه لابوالوليد !
ابو راكان بهمس ضعيف : حسبي الله عليكم يا عيال اخوي !
ابو ماجد بغضب : لو نذبحك ما أحد يلومنا !
من وين تحصلين هالمبلغ الحين ؟!!
وليه توقعين على شيكات من الاصل ؟!!
ساره بقوة مزيفه : ما يخصكم وين صرفتهم !
متى ما طقيت بابكم ساعدوني وقتها
تعال تفلسف !
ما انتظرت منهم جواب وتوجهت لغرفتها
تحت نظرات الدهشه ولسان حالهم يقول
«شين وقوي عين »
**
**
**
**
في بيت ابو راكان
ام راكان بهمس لام وليد بما انه الموضوع عليه تكتمات من ابو راكان : قلبي قارصني على ابو راكان
لو تشوفينه كيف صار فيه بعد هالسالفه ؟ !!
ام وليد باستنكار : ساره من وين تعرف الرجال حتى توقع على شيك له !
ام راكان بقهر : هذي المشكلة لما تركوها على كيفها وهي بعدها بزر !
انا سمعت انها موقعه على شيك قبل 5 سنوات
والرجال قبل فتره مات
والحين الورثه يبغون الفلوس !
اما وش علاقتها بالرجال ما ادري ولا احد مخبرني بشيء !
طلعت روحي حتى عرفت ذي المعلومات
وساره رافضه تتكلم او تقول وش علاقتها بالرجال
بس محمد يقول من اهل زوجها !!!
والمبلغ محمد تكفل فيه والقضيه محلوله !
بس إلي قاهر ابو راكان اخر عمره ابنة اخوه تكون مطلوبه على قضيه شيكات !
ام وليد مطت شفتها : انا بعد ذي السالفه قلبي مو مرتاح لها
ام راكان هزت كتوفها : نرجع ونقول الله اعلم وش الظروف إلي حكمتها توقع شيك !!!
ام وليد بتأييد : في ذي صادقه الله اعلم وش الظروف إلي صادفتها حتى توصل فيها الحال لهذي الدرجه !!!
اشرت ام راكان بعيونها لام وليد تسكت لما شافت نوره داخله عليهم
**
**
**
**
جالسه وتناظر للبعيد من الشباك !
تحاول تتذكر هالشيك متى وقعته ؟!!
ما هي قادره تتذكر !!
اكيد خلف بالسالفه !
ما تقدر توصف نذالته !
تنهدت بضيق
حملت محمد فوق طاقته
وش دخله يدفع هالمبلغ ؟!!
ما تدري وش يحمل لها خلف مصائب
فوق المصائب إلي عندها !
متى تعيش باستقرار وبدون مخاوف !
كل يوم يضيق صدرها بزياده !
لمن تشكي وتفضفض إلي بقلبها !
تسلسلت دمعة قهر على خدها
سرعان ما مسحتها لما دخل عليها عمار
متجهم !
حمل كرسي وتوجه لجهة الشباك وجلس مقابل لها وبعيونه اسئلة كثيره !!
ما ناظرته ولا كأنه موجود عيونها للخارج تبغى تطلع من قوقعة الحقيقه !!
عمار بنبره فيها حده مهما حاول تكون رقيقه : ساره !
تابع كلامه متجاهل تطنيشها له : ساره لمتى هالحال ؟!!
أنا ولد اخوك لكن احس اني بعيد عنك كثير !
انا ما اعرف شيء عنك وعن حياتك الماضية !
احس نفسي مثل الاطرش بالزفه !
ابغى اعرف وش صار بعد طلاقك من خالي عبدالله !
ابغى اعرف كيف تزوجتي المجنون ؟!!
ابغى اعرف عمي نادر كيف مات ؟!!
زوجته وين راحت!
خلف وينه مختفي من سنوات!
وش إلي حملك توقعين شيك!!
والسؤال الاهم
التوأم مين امهم وابوهم؟؟؟؟
تناظر وتستمع لاسئلته المتكرره بملل
بس
اخر سؤال
حست جسدها تشنج منه !!
«التوأم مين امهم ؟!! »
وبملامح باهته ناظرته : وش تقصد ؟!!
عمار يحاول يمسك اعصابه : تراها ما هي داخله عقلي انك متزوجه وعندك عيال !
شوفي البنات ما يشبهونك ابدا !
جاوبيني على سؤال واحد وريح قلبي !
التوأم بنات عمي نادر ؟؟!
زفرت بضيق ورجعت تناظر من الشباك : ليه تتوقع انهم بنات نادر ؟؟!
وليه مو مصدق انه التوأم بناتي ؟!!
مشكلتكم تذبحون القتيل وتمشون بجنازته !!
ابغى اريحك التوأم ما هم بنات نادر !
قاطعها عمار : بس زوجته كانت حامل !،
ساره على نفس الحال : ما اكتمل حملها ونزلت !
سلط نظره عليها يبغى يعرف شيء من الحقيقه : اجل بنات مين ؟!
طالعته بحده : التوأم بن
قاطعها دخول ام محمد تردح : انت هنا وانا انتظرك تأخذني للسوق !!!
طالعها عمار بقهر ما هو وقتها الحين وبضجر رد : خلاص الحين ألحقك اسبقيني للسياره!
ام محمد برفض : قدامي اشوف
ما رح اطلع الا وانت معي !!!
وقف بضجر : هذا انا جيت !
تنهدت بعد خروجه ورجعت تطالع من الشباك !
ابتسمت بألم وهي تشوف التوأم
يلعبون بالحديقه !
**
**
**
**
بالصاله
عائشه بابتسامة : تفضل عمي !
ابو ماجد للحين متضايق من سالفة ساره : يزيد فضلك يا ابنتي !
ماجد وهو رافع خشومه وهو يدخن : قومي جيبي لي مويه !
طالعته عائشه بهدوء عكس النار إلي بداخلها : ان شاء الله !
دخلت للمطبخ وتحس نفسها تبغى تبكي
تحسه يحاول ينرفزها ما تدري كم رح تصبر على اسلوبه هذا !!
طلعت من المطبخ وصوتهم مرتفع : ما في أي ظرف يجبرها توقع على شيكات !!!
ماجد بدفاع : يا يبه البنت متزوجه مجنون واخوها خلف ما تدري وش الضغط إلي واجهته ذاك الوقت !!
انت ما تشوف كيف تحس الانكسار بعيونها ؟!!
عائشه بنفسهابسخريه «يقبرني شو حنون !!
يقرأ لغة العيون ما شاء الله عليه »
تابع ماجد كلامه : احسكم تعاملونها وكأنها عجوز !
تراها صغيره وما تحسن التصرفات
!
تدري يبه انها من عمر عائشه زوجتي !!
جيلها دوبهم يدرسون ويتزوجون
وهي تحمل همها وهم زوجها المجنون وهم بناتها !
اتقوا الله باليتيمه يكفيها الظلم إلي حصلته منكم!
وجايين تحاسبونها بعد ما طردتوها وخذلتوها !
بدل ما تمد يد المساعده لكم وتطلبها منكم مدتها لذاك الرجال !!!
مشكلتنا نتعامل مع الامور بمثاليه زايده !
الواحد قبل ما يحكم على شيء المفروض
يحط نفسه مكان هالشخص وبعدها يحكم !!!
لا تضغطوا عليها ولا تحاسبوها على امور انتم كنتم سبب فيها !!!
واستأذن وطلع من البيت مخنوق على حال ساره
صحيح بالماضي كان يضايقها بالكلام مع سلمان
بس كان كله مزح !
يضحك على ابتسامتها العفويه
والبريئة
عكس الحين ما في غير ملامح كسرها الزمن
وانمحت الابتسامه من ملامحها !
ملامح اثقلتها الهموم والاحزان !
لو يطلع بيده الا يصفق عمه عبدالله كفوف يطلع حرته فيه
لانه السبب بكل تعاسة «ساره»
**
**
*

مرت ايام العطله بسرعه بنفس الروتين !
وبدأت أيام الدراسه
دخلت القاعه بهدوء وجلست بالمقاعد الاخيره !
تكتفت وارخت جسدها على المقعد !
وتناظر دخول البنات للقاعه
بأشكال وألوان بما انه اليوم الاول للدوام !
لفت نظرها البنت إلي قدامها تناظر بالمرايه وتضبط امورها !
ما تذكر متى ناظرت نفسها بالمرايه !!!
تحسست نظارتها تعدلها ورفعت الجوال تناظر نفسها على شاشته !
لانها تفتقد« المرايه »
حاست بوزها الرؤيه ما هي واضحه !
عدلت جلستها وإلتفتت للبنت إلي جلست جنبها !
تلاقت عيونهم
وسرعان ما صدت كل وحده للجهة الثانيه بقرف!
ساره بأمر : يا كثر المقاعد الفارغه
تفضلي هناك !
عائشه بتمثيل تشيل كتبها وتناظر المقعد بدقه : ما هو مكتوب عليه اسمك !
غريبه وانا على بالي المقاعد مسجله بإسمك !
لو مكانك اروح واشتكي عليهم ما سجلوا هذا المقعد بإسمك !
ساره عفست ملامحها : يا سخفك !
ترى كلامي واضح !
اذا ما تفهمين عربي
قاطعتها عائشه وهي تعدل كتبها وتحط رجل على رجل : الظاهر اني ما افهم عربي !
قولي وش تبغين بالفرنسي يمكن افهم عليك !
وبحده طالعتها : مو عاجبك غيري مكانك !
ادخل القاعه واجلس بالكرسي إلي يعجبني !
وصدت عنها وهي عافسه ملامحها !!
تنهدت ساره وشيء بداخلها اجبرها
تسكت !
بالرغم من قربها بالمنزل من بيت عائشه ومع ذلك ما شافتها كثير !
من بعد سالفة الشيكات انغلقت على نفسها اكثر !!
¶¶
صدت للجهة الثانيه وبداخلها ضيق
من إلي جالسه جنبها !
هي إلي مخربه حياتها !
احيانا يجتاحها شعور لمواجهة ام سوار بكلام ماجد وعن الحب إلي بينهم !
وتنصحها تبتعد عن ماجد وعن حياتها البائسه !
بالرغم من تقبلها من الحياه مع ماجد والرضى بالقدر !
لكن ماجد تحسه للحين ما هو متقبلها
ويتجاهل وجودها تماما !!
يطلع من الصبح للدوام بعد الدوام يجلس مع امه شوي او بيت جده وبعدها يطلع مع اصحابه
وما يرجع الا وقت متأخر !
متأكده للحين حاقد عليها ويعاقب فيها
بأمور مرت وانطوت مع الايام !!!!
ليه ما هو راضي ينسى كله علشان حبيبة القلب !!!
من حياتها مع اهل ماجد
اخذت لمحه من مشاعرهم تجاه ام سوار !
اغلبهم ما يحبونها او بالاحرى
خالات ماجد ما يحبونها !
اما اهل ابو راكان يطغى على شعورهم عدم الرضى عن تصرفاتها !
قطعت افكارها لما دخل الدكتور بثقه !!
ساره رفعت نظرها للدكتور
وسرعان ما إلتفتت لعائشه
وبصوت واحد نطقت كل وحده «سعود»
ابعدت عائشه نظرها بعد التقت نظراتهم !
تنهدت ساره ماتدري سبب كره عائشه لها
وبسرعه نزلت النظاره وتلثمت بهدوء
ومسكت القلم ترسم بملل على الدفتر وهي تسمع سعود يعرف نفسه !
عائشه طالعتها باستغراب لحركتها و تذكرت على حسب معلوماتها من ام محمد انهاجاهله وما تدرس وبهمس سألتها : انت تدرسين هنا ؟؟!!
ساره طالعتها باستخفاف : لا أنظف هنا!
وصدت عنها !!
عائشه بفطنه سألت : ما احد يدري انك تدرسين هنا صح ؟؟!
كذا يمكن يكشف سرك سعود ويعرفك !!
ساره بلامبالاه: ما يهمني احد ولا اسأل عن أحد !!
لا تحشري انفك مرة ثانيه !
انقهرت عائشه من ردها : دام انك مو مهتمه ليه تلثمتي ؟!!
ساره وهي تمط الكلام بهمس : ما يخصك !!
عائشه بانفعال : جعلهم يكشفونك
ويطردونك من الجامعه من شوشتك !
دفنت وجهها ساره بالمقعد وردت بصوت هامس : سخيفه !!
_ رجاء المقاعد الخلفيه ما نبغى صوت !
وإلي جاي ينام هنا نقول له مع السلامه
تراه ما هو مكان للنوم !!
كشت ساره عليه بطريقه عفويه بدون ما يشوفها وبهمس : مالت عليك !!
رفعت نفسها عن المقعد وهي تطالع عائشه إلي كاتمه ضحكتها : على وش تضحكين يالطرمه !
تذكرت ساره انها بالمحاضره وسرعان ما إلتفتت على سعود إلي اعطاها نظره ناريه
خلتها تبلع ريقها وتنكتم لاخر المحاضره !
انتهت المحاضره وبدأت القاعه تفضى من الطلاب !
وساره على جلستها وجنبها عائشه إلي رن جوالها !
ردت بهدوء : هلا ماما ....الحمد لله تمام ...كيفك وكيف بابا ؟!! ....ان شاء الله قريب ازوركم ..... اشوف ماجد وارد لك خبر ! .....ان شاء الله ....ايه عندي محاضره .....مع السلامه !!
قفلت الخط والدموع تلمع بعيونها
من لما تزوجت مره وحده زارتهم !!
حتى عن اهلها مانعها وساكته تشوف اخرتها معه !
استغربت ساره الدموع إلي لمعت بعيون عائشه !
ترجمتها ساره دموع شوق لاهلها !
تنهدت ساره بألم وش تقول لاهل حتى ما شافتهم !
على الاقل عائشه تزورهم وتكلمهم بالجوال !
اما هي ؟!!!
رجعت دفنت وجهها على المقعد بضيق !!

***
***
***
***
انتهت محاضراتها وطلعت من الجامعه ورجعت على البيت بعد ما اخذت التوأم !!
دخلت من البوابه الخارجيه وعقلها سارح'« بعائشه »
كيف جمعهم الزمن مره ثانيه ؟؟!!
لكن بطريقه وحال مختلف !!!!
تتمنى ترجع طفله همها الوحيد
«تلعب مع عائشة»
استغفرت بهمس على صوت ابو الوليد المنتقد : من طلعتها لغيبتها لا سائل ولا مسؤول !
طالعته ساره وهو جالس بالحديقه الاماميه للبيت وبيده كتاب وقدامه كوب من القهوة قررت تطنشه وما ترد عليه !
اردف كلامه بنغزه : عسى مجنونك بخير ؟!!
ساره ببرود : طيب ويسلم عليك !!
ابو الوليد هز راسه بانتقاد : يا حيف على الرجال إلي حولك ما هم قادرين يوقفون بوجهك !
طالعه نازله بالبنات استعراض !
لو لي سلطه عليك
قاطعته ساره بسخريه: اذا جاء هاليوم لا تقصر !!
دخلت بهدوء وهي تشوف ام عمار بالصاله مع عمار !
ردت السلام بهمس وناويه تروح لغرفتها !.
وقفها صوت عمار : ساره تعالي !
طالعته بضجر راسها يلف من دوام الجامعه وما لها خلق لاحد !!
تقدمت بضجر : وش تبغى !
اشر لها تجلس !
طالعت التوأم : سوار خذي اختك وعلى الغرفه الحين ألحقكم !
وبعدها جلست وطالعت عمار : نعم ؟!
عمار بهدوء : الله ينعم عليك !
نهاية الاسبوع طالعين تغيير جو !
رفعت ساره حاجب : مع مين،؟!!
عمار : بيت جدي ابو راكان وبيت خالي ابو الوليد !
وش رأيك تروحين معنا ؟!!
ساره : اكيد لا !
ام عمار بهدوء : خلي البنات يطلعون احسن من حشرة البيت !
تأملتها ساره للحين قلبها متحامل عليها ومستحيل تسامحها : حشرة البيت احسن من مقابلة بعض الوجوه
قاطعها عمار قبل ما تزيد الحكي : ساره ما له داعي هالكلام !
ام عمار : لا تتكلمي كذا فوق ما تغاضينا عن افعالك الماضيه
وفتحنا صفحه جديده معك
تكلمينا كذا ؟!!
وقفت ساره وهي تناظرها بحده : اي صفحات تتكلمين عنها ؟!!
انا مستحيل افتح صفحه جديده مع امثالكم !
ام عمار بانفعال : لانك حقوده !
ساره بحده :ايه حقوده وقلبي اسود مثل هذا !
واشرت على عبايتها !
ام عمار : دامه قلبك اسود وحاقد ليه ترجعين تدخلين بيتنا ؟!
ساره : لولا محمد وعمار ما قبلت هالصلح الفاشل !
ودخلت بيتكم لانكم ما تعنون لي شيء ولا تهموني !
تتكلمون عن الاخلاق والطيبه وقلوبكم سوداء حقوده !
ابوك اكبر منافق بالعالم
صرخ عليها عمار بانفعال : ساره !
إلزمي حدودك وجدي ما تتكلمين عليها بالشينه !
ام عمار بقهر : خلها تتكلم مثل ما تبغى !
هذا جزاء إلي مد لها يده بطفولتها واحتضنها !
غدرت فيه وعضت يده إلي احسن لها فيها !
ساره بسخريه : احسان ؟!!
اي احسان واحتضان وما قدر يحميني من خالتك وخلف واخوك !
دمرتم مستقبلي وحياتي !
اعيش بالكون نكره ما لي اهل وعزوه !
استكثرتم تكلموني عن ابوي،!
ولا عرفتموني بأهل امي !
ما اعرف شيء عنهم
وكآني «لقيطه»
اي معامله تتكلمين عنها ؟!
متى وقف بوجه خالتي وقال لها هذي ابنة اخوي ابعدي شرك عنها ؟!
منعتني من الدراسه ما شفت احد وقف معي اكمل تعليمي غصب عن خالتي !
اي احسان تتكلمين عنه ؟!!
طلقتوني بدون ذنب وحملتوني
ذنب خلف !
ولبستوني بسالفه اوراق ما ادري وش هي ؟!
وش دخلها بالسالفه ؟!
حطيتوا الاوراق حجه حتى تتخلصوا مني للابد !
اذا خلف غلط عليك واصابك الضرر منه !
انا وش ذنبي اتحمل اخطاء خلف؟!!!
يكفي إلي شفته من خلف !
ارحمووووووني !!
واتقوووووا شري !
وتركتهم وتوجهت لغرفتها
تحت انظار عمار وامه !!!
**
**
**
**
دخلت الغرفه ورمت نفسها على السرير
وسمحت لدموعها بالنزول لعلها تغسل قهر السنين إلي بقلبها !!
قطعت سوار لعبها وتوجهت لساره بفزع
وخلفها حور !
سوار والدموع تنذر بالنزول : ماما ليه تبكي ؟!!
حور تبكي على بكاء ساره : ماما زعلانه مني !
ماما انا احبك وما رح اعمل اخطاء
صح سوار !
سوار هزت راسها بطفوله
وبدأت تنزل دموعها : ماما مين ضربك ؟!!
زفرت ساره بضيق وسوار تمسح الدموع عن خدودها : ماما لا تبكي !!!!
ناظرت ساره التوأم من حولها بوجع والدموع رافضه التوقف !
يتقطع قلبها لما تشوف التوأم !!
كل حياتها مخربطه !!
تحس بالحمل يثقل على اكتافها !!
عضت على شفتها بقهر وعجز
وحال لسانها يقول
«وينك يا خلف »
**
**
**
جهزت الاكل له بهدوء : تفضل !
ماجد بدأ بالاكل بنفس الهدوء !
تنهدت عائشه قبل ما تتكلم : ماجد!
رفع حاجب وطالعها قبل ما يحط اللقمه بحلقه : نعم ؟!
عائشه بهدوء : امي اليوم اتصلت علشان
قاطعها بحزم : روحه لأهلك احلمي !
قاطعته بانفعال خلاص اكثر من كذا ما تتحمله : ما هو على كيفك !
ماجد ببرود : اذا طلعت ما ترجعين !
عائشه بقهر : هذا مناي اطلع وما ارجع !
لا تفكر ميته عليك !
تراك واقف لي بالزور هنا !
_واشرت على بلعومها _ ماني قادره ابلعك ولا اطلعك !
هز راسه : ايوه كذا اطلعي على حقيقتك ولسانك الطويل !
ترى التمثيل مو لايق عليك !
قاطعته بغضب : ابغى ازور اهلي !
ماجد ماسكها من اليد إلي توجعها مستحيل تطلع من البيت بدون اذنه ..ما ينكر إلتمس جمال هالخلق فيها ما تطلع بدون اذنه
بس هو رح يطلع الأيام الماضيه من عيونها وببرود نطق : انا قلت لا !
عائشه قبضت على يدها بقهر وبهمس خرج عن ارادتها وصل لمسامعه : اكرهك
رد ماجد باستمتاع وهو يشوف القهر بملامحها
ضرب عصفورين بحجر قهر الاب وابنته !!
ابو سعود ازعجه وهو يطلب زياره عائشه لهم !
شعور جميل تشوف الاشخاص إلي تكرهم يغلون من القهر : شعور الكره متبادل بيننا يا حياتي !
وقفت بغضب بعد ما ضربت الطاوله بكل قهرها : جعل حياتك تتحول لجحيم !!
واليوم طالعه لاهلي غصب عنك وتشوف !
وتركته وهي تغلي من صدى ضحكاته بالمطبخ !

ايو سعود بغضب : مو على كيفه مانع البنت من زيارتنا !
ام سعود بقهر : مو هذا إلي عندت الا تزوجه لعائشه !
قاطعها بغضب مو ناقصها ؛ اتركي اللوم عنك تراها واصله هنا !
واشر على انفه !
الحين اراويه هالزفته !
طلع الجوال من جيبه وقرر يتصل بأبو ماجد يحل هالمهزله !!
نهى مطت شفتها بغيره وهمست لاسماء : سبحان الله لو نغيب اشهر ما سأل عني ولا عنك !
اسماء بنفس الغيره :« العز للرز والبرغل شنق حاله »
رجعتي عليه مكسره من الحمار زوجك
ورجعك معه بنفس اليوم ولا اهتم!
وعائشه لانها ما زارته قام الدنيا اقعدها !
نهى: صرت اكره عائشه بسببه !
الحين تلاقينها مولعه من هالحصار
تراها مدلعه وكل شيء تبغاه تناله !
اسماء بشماته : نفسي اشوف رايات الاخلاق إلي صدعت راسي فيها طبقتها والا رمتها !
نهى : تراها تحب الفلسفه الزايده !!
**
**
**
دخل ماجدالبيت وابتسم بانتصار لما شافها جالسه مع امه بالصاله
جلس جنب عائشه بعد السلام وبهمس استفزازي : اشوفك هنا !!
وقلدها بصوتها :«غصب عنك»
اخذت نفس وطالعت ام ماجد إلي تتكلم بالجوال !
وبعدها طالعته لثواني ووقفت وقبل ما تمشي مسك يدها بابتسامه نصر : وين ؟!
ردت وهي ماسكه نفسها : اشرب مويه !
والا ذي تحتاج اذن ؟!
ضحك باستفزاز وبعدها تكلم : امممم افكر اضيفها للقائمه !
نفضت يدها وتوجهت للمطبخ تشرب مويه لعلها تطفئ النار إلي بداخلها !
بعدها طلعت ورجعت للصاله لما شافت ابو ماجد جالس معهم !
توجهت وجلست بعيد عن ماجد وتحاول تكون طبيعيه !
ابو ماجد يكلم ماجد : انت مانع عائشه عن اهلها ؟!!
ماجد ببراءه : انا ؟!!
ابو ماجد هز رأسه بتأكيد : ايه انت ابو سعود دوبه مكلمني ويشتكي منك !
ماجد : يتصل فيني ارسل له ابنته وانا بوسط دوامي
وحضرتها بدوامها !!
وبعدين ماسكني كل يوم يبغى ابنته تزوره !
تراني متزوج وابغى لما ارجع من الدوام ألقى زوجتي بالبيت !
دام ما يقدر يبعد عنها ليه يزوجها !
كان حطها بعلبة وخللها احسن له ولنا !
ام ماجد بانتقاد : ماجد وش هالكلام ؟!!!
ماجد بانفعال : جنني ابغى البنت !
روحي لاهلك وفكينا من هالسالفه !
ابو ماجد اعطاه نظره قويه : انا الحين اسأل انت مانعها من اهلها ؟!
ماجد طالع عائشه: تبغين تروحين لاهلك روحي !
واعطاها نظره الرفض وعدم الرضى !
عائشه طالعت عمها بخبث : اذا ماجد يقبل الحين ازور اهلي وانام عندهم ليله ما عندي مانع !
ابو ماجد بثقه : اكيد ما رح يرفض ماجد وبأمر !
قوم يا ماجد ودي زوجتك لاهلها !
ماجد احتقن وجهه من الغضب مستحيل تمشي كلمتها عليه : بس
الحين تأخر الوقت
ابو ماجد : تراهم بيت اهلها وما يهم اي ساعه تروح لهم !!
قوم ودي زوجتك لاهلها !!
ماجد بطاعه : ان شاء الله يبه!!
وناظر عائشه ؛ انتظرك
طالعته عائشه بانتصار وبعدها إلتفتت لعمها : ما اقدر اليوم ازورهم عندي تحضير ومضغوطه بالدراسة !
مره ثانيه ان شاء الله !
ناظرت ماجد إلي ارتاحت ملامحه
و بداخلها وجع مستحيل تطلع وزوجها مو راضي عنها !
ما تدري وش نهاية الطريق مع ماجد !!!

***
***
****
دخلت المحاضرة وجلست جنب عائشه في شيء غصب عنها يجذبها تجلس جنبها !
طالعتها عائشه وهي رافعه حاجب
شخصية ساره بالنسبه لها غريبه
ما تركب بعقلها وكعادتها ما تعرف تسكت اذا ما عجبها الشيء : تراها ما تركب ابدا دايره بالاسواق ومن حاره لحاره كاشفه
وبالجامعه تتغطين ؟!
تراها ما تركب هنا !
واشرت على عقلها !
حطت كتبها ساره وناظرتها وهي عافسه ملامحها : يا شين اللقافه !
عائشه باستغراب : وش تحسين فيه
قاطعتها ساره بضجر :احس بثقل طينتك !
وش دخلك فيني ؟!!
تنهدت عائشه وناظرت للامام : طالعه معهم بالرحله ؟!!
ساره طالعتها : اكيد لا !!
وانت ؟!!
عائشه بصراحه اوجعت ساره : اذا كنت موجوده بالرحله ما رح اروح !!!