رواية أقدار~للكاتبة ضاقت أنفاسي الفصل التاسع عشر 19 - بقلم BlackButterfly002

البارت 20
**
**
***
**
ام محمد جالسه بالصاله ورافعه حاجب وهي تشوفها طالعه مع بناتها
ماتقدر تفتح حلقها قدامها تحسها مجنونه رسمي !
تخاف تطلع جنونها فيها !
مطت شفتها بقهر انتقلت هنا حتى تقهرها
بس للحين ما طلعت حرتها فيها !
وعمار واقف محامي لها !
مر ايام على وجودها بس للحين ما طلعت حرتها !
قررت تطلع لام وليد تجلس معها تضيع وقت افضل لها !!
**
**
**
**
طلع من البيت وهو يبتسم على شكل سعود إلي استلمته امه بتحصين نفسه !
رن الصوت بإذنه
_حور انتظري!
وبسرعه إلتفت لجهة الصوت !
مستحيل ينسى هالصوت !
تقدم بخطوات واسعه نحوها وبتوجس: ام سوار ؟!!
إلتفتت ساره له ورفعت حاجب بمعنى خير من ايام المستشفى ما تطيقه والحين تقابله هنا !
وليد ما عرفها الا عن طريق صوتها لانه ما يعرف شكلها اصلا
اول مره يشوفها وبتردد : مو انت إلي كنت تشتغلين بالمستشفى بالتنظيف
قاطعته ساره بحده : ايه!
عندك صدقه وتبرعات وجاي تعطيني إياها هنا ؟!!
قاطعها من خلف وليد بحده : انت للحين لسانك طويل ؟!
طالعته باستخفاف بعد ماتكتفت : وش رايك تطردني من هنا بعد ؟!!!
ابو الوليد ما كان يدري انها نفسها إلي بالمستشفى: ما رح اعتب على طريقتك دام خلف اخوك !
شهقت وهي تسمع الحوار : تشتغلين بالمستشفى ؟!!
سود الله وجهك ؟!
تبغين تفضحينا فوق سواد وجهك ؟! لو يدري محمد عنك وش رح يقول ؟!
اخته تنظف المستشفى ؟!
لو يدري عمار والا عزام والا عمك ابو راكان
قاطعتها ساره بثقه ما يهمها احد : خلهم يدرون ما يهمني احد !
ترى الشغل مو عيب !
اشتغل بعرق جبيني ولا امد يدي للناس !
ماني مستعره من شغلي !
عمر الشغل ما كان عيب او حرام !
وازيدك من الشعر بيت
تراني كنت اشتغل بمول بعد !
وحفيدك الموقر عزام جاء واشترى من عندي !!
واثقه من نفسي وما رح اسأل عن احد !
هذي حياتي امشيها مثل ما ابغى وإلي ما يعجبه يطق راسه بأقرب طوفه !
اعطتهم نظره قبل ما تطلع
ولحظات وغابت عن انظارهم !
ام محمد إلتفتت لاخوها : انت تدري انها تشتغل كذا وساكت ؟!
والله لو يدري عمها ما رح يسكت
ابو الوليد قاطعها بخلق ضايق : هذي هي متزوجه مجنون وما أشوفه متحرك !
الحين تعملون بلبله على شغلها بالمستشفى ؟!!!
وليد للحين مو مستوعب : وبعدين حنا ما ندري انها ابنة زوجك!!
ام محمد بخبث تفكر : ادري بها اكيد اشتغلت كذا حتى تسيء لعمها
ابو الوليد قاطعها وهو يتوجه للسياره : وليه ما تقولين من الفقر اضطرت تشتغل حتى تصرف على البنات والمجنون إلي متزوجيته ؟!!
وين عمها من زمان ؟!!
وليد هز رأسه بتأييد لكلام ابوه : اكيد رح تشتغل حتى تصرف ولا تنسي ما معها شهاده ما رح تلاقي وظيفه الا كذا!!
وتركها وتحرك خلف ابوه وهو يفكر بساره
عمره ما توقع انها تكون نفسها ام سوار !!!!!!
**
***
**
**
بعد ما وصلته الاخبار جالس بمكتبه ويشد على قبضة يده بقهر
بس يحاول يتظاهر بالبرود !
ابو عزام بحيره : حسب الكلام إلي وصل لنا انها اشتغلت كذا حتى تسيء لك
ابو ماجد قاطعه : انا اتصلت بخالي ابو الوليد وما عجبني كلامه يقول« رمتوها طول هالسنين والحين جايين تحاسبونها على افعالها ..تراها جاهله وصغيره »
وحضرة وليد صوته طالع من السماعه
يقول «طلقتوها يوم الزواج والحين يهمكم سمعتكم وسمعتها ؟؟؟!»
عبدالله عفس ملامحه : يا لطيف وش يحب الفلسفه هالوليد !!!
ابو تالا وهي يعدل جلسته : وليد صادق !
تشتغل هالشغله ولا الطلاق يوم الزواج إلي الناس حطت فوقه ألف علامة استفهام!!
اعطاه نظره عبدالله بس طنش نظراته وتابع كلامه : دامك يبه تبريت منها ومن إخوانها ما لنا حق نحاسبها على افعالها !
اخوها موجود !
ابو عزام بتأييد : وانا اقول كذا ما لنا حق نحاسبها !
عبدالله بانفعال : مو نحاسبها الا نكسر راسها !
ابو راكان اشر له بالهدوء وهو يشوف ثورانه : اجلس اجلس اشوف !
انت بالذات ما ابغى تتدخل بالموضوع!
ترى وضعك حساس وزوجتك حساسه بلاه تفسر الامور بشكل اخر !
وحنا مو ناقصين مشاكل !
ترى خالك ابو الوليد ما يرضى على بناته
ومثل ما قلت من قبل ما لنا فيهم
انا ما عندي عيال اخ !
**
**
**
**
**
بعد عدة مكالمات من محمد طنشت اتصالاته
ما تبغى تشتت فكرها بعد الامتحان رح تكلمه !
الحين امتحانات نهائيه وتحتاج فقط التركيز !
وتتخطى السنه الثالثه وتنتقل للسنة الرابعه بكل سلام !
حاولت طول الامتحان عقلها يركز فقط بالامتحان وطردت اي فكره قد تشتت فكرها !.
انهت الامتحان وتوجهت تبحث عن مكان منعزل تكلم محمد فيه !
اخذت نفس واتصلت فيه
وصلها صوته الهادي بعد عدة رنات : آلو !
ساره بهدوء: مرحبا ...اخبارك عساك طيب ؟!
محمد بنبره هاديه : هلا ...الحمد لله بخير !
كيف حالك وحال البنات ؟!!!
ساره بترقب لسبب اتصاله مع انها بقرار نفسها تعرف سبب الاتصال : الحمد لله بخير
محمد بعتاب: اتصلت فيك وما
قاطعته ساره بتبرير،: عندي امتحان ودوبي طلعت منه واتصلت فيك
سآل باهتمام : كيف امتحانك ؟!
ساره بإحباط لانه تجميعها بالشهر الاول والثاني مو ذاك الزود : الحمد لله !
محمد بهدوء : إن شاء الله خير!
إلا بغيت اسألك وش قصة هالوظيفه إلي تتكلم عنها امي ؟!!!
مثل ما توقعت ساره سبب الاتصال : اليوم الصبح تقابلت مع خالك وولده !
للصدفه كنت اشتغل بنفس المستشفى !
قاطعها محمد مو عاجبه : وتشتغلين بالنظاف
قاطعته ساره باقناع: اشتغل بكرامتي ولا امد يدي للناس واعيش على الصدقه !!
اذا ما اشتغلت من وين اصرف على
قاطعها بتفهم وبضيق تكلم : الله يأخذ إلي كان السبب !
حسبي الله والنعم الوكيل !
وإن شاء الله ربنا يكرمك وتتخرجين على خير
وتدخلين المستشفى افضل دكتوره بالعالم !
بس انت شدي حيلك وأي شيء تحتاجينه بس اتصال
وطنشي الكلام إلي حولك وبالذات أمي وما عليك من كلام احد !
ساره بامتنان : الله يكثر خيرك ...ما قصرت !
محمد وشعور تأنيب الضمير يرافقه
لو اخذها عنده ما كان هذا حالها!!
بس ما يقدر يقول الا كل شيء مكتوب ومقدر !
وما يقدر يغير الاقدار !!!
***
***
***
جالس بالحديقه ينتظرها على نار
وام محمد تزيد الحطب على نار !
رفع عيونه وبسرعه وقف لما شافها دخلت مع بناتها !
مطت شفتها بقرف لشوفته وتقدمت بهدوء ولا كأنه موجود !
وقفها بصوته المشتعل : الحمد لله على سلامتك !
واخيرا شرفت ؟!
عسى مجنونك بخير ؟!
طالعته بطريقه نرفزته فيها :،مجنوني بخير ويسلم عليك
عزام شد على قبضة يده قبل ما يسددها على وجهها : ما شاء الله متزوجه مجنون وتشتغلين وظيفه مثل وجهك !!
و فوق هذا بنات المجنون معك !
شيء يرفع الرأس !
انا اذا ما دفنتك هنا ما اكون عزام !
ساره ناظرته بكره وشراسه : جرب تدفني حتى يكون اخر يوم بحياتك !
اتقي شري وابعد عن طريقي يكون
قاطعتها ام محمد مستقويه بعزام : يا قليله الحياء !
تكلمين عمك عزام كذا !
ما تحترمين احد !
طالعتها ساره : إلي يستحق الاحترام احطه على رأسي!
و إلي ما يستحق الاحترام امسح فيه
الارض!
عزام يحس النار بقلبه رفعت ضغطه تتكلم معه كذا ؟!
يرحم ايام زمان ؟!
طالت وشمخت هالساره ؟!
رفع يده بأمر : الحين تلمين قشك وتيجي معي غصب عنك !
رح تعيشين عندي
ما ييجي منك الا سواد الوجه !
هذي اخرها تشتغلين كذا !
قاطعه عمار المتقدم بهدوء: عزام ؟!
ام محمد تقدمت منه : واخيرا شرفت حضرتك تعال شوف عمتك سودت وجيهنا
عمار بهدوء تقدم ومسح على شعر حور وسوار إلي واقفات يناظرن الموقف بهدوء : ساره اشتريتي للبنات من البقاله ؟!
سارة تنهدت وردت بهدوء : لا كنت مستعجله !
عزام ولع منه ؛ يا برودك !
ما تستحي تسألها راحت للبقاله او لا؟!
بدل ما تكسر رأسها على دخولها للبقاله ؟!
عمار طالعه وهو رافع حاجب : وش فيها ؟!!
تراكم عاملين بلبله للموضوع اكبر من حجمه !!
اشتغلت او دخلت البقاله وين المشكله ؟!!
عزام بغضب : المشكله انه عقلك صاير مصدي !
عمار رفع اصبعه بحده: عزام احترم نفسك عن الغلط !
للحين ساكت لك !
انت ما لك دخل فيها !
تراها عمتي واخوها موجود وما تكلم او اعترض!
تيجي انت وعمك تتفلسفون فوق راسي !
ما اسمح لك تفهم !
عزام اقترب ودفه بقرف : إلي افهمه
انك ترفع يدك عنها
وطالع ساره بغضب : انقلعي جيبي اغراضك وامشي قدامي !
عمار بدأ يفقد اعصابه : مو على كيفك !
انت انقلع من هنا احسن ما أدفنك !
عزام بصراخ: انا إلي رح ادفنك هنا يا عديم الرجوله !
واقفه تناظرهم ببرود لما تشابكوا بالأيدي
وصراخهم امتلئ بالمكان !
بوقت قصير اجتمع ابو الوليد وعياله
وفرقوا بينهم بالقوة
عمار يحاول يفلت من قبضة سعود : اتركني اعلمه مقداره !
أبو الوليد بغضب : وش هالمسخره هذي ؟!
ام محمد اشرت على ساره : حسبي الله عليها
كل منها هالناقه !!
اجتمعت الانظار على ساره إلي واقفه وهي متكتفه وتناظر عزام بحقد !
ابو الوليد بغضب وجه كلامه لساره : انت وين ما تروحين تسببين مشاكل !
متى تعقلين ؟!!
لعنبووو ابليسك بناتك طولك ما تحشمين احد ؟!!
عزام زفر وصدره يرتفع ويهبط : بسرعه جيبي اغراضك وامشي قدامي !
احسن ما اجرك من شعرك !
عمار حاول يفلت من قبضة سعود : اتركني اراويه كيف يجرها من شعرها !
من تحسب نفسك ؟!
لا تتدخل فيها !
ما لك سلطه او كلمه عليها !
عزام وهو يبعد وليد عنه بقوه وهو ناوي على عمار بس وقفه ابو الوليد بنبره غاضبه : عزام !
انت ما تحشم احد ؟!
وش تبغى فيها ؟!
جالسه في بيت ولد اخوها وش إلي حارك ؟!
عزام زفر بغضب : إلي حارني انها طالعه نازله وتاركها على هواها
قاطعه عمار : وش دخلك انا سامح لها وما احد له عندي !
عمتي وانا معطيها الضوء الاخضر تروح وتشتغل إلي تبغى ما له احد فيها !
ويا ليت تحط حلقه بإذنك تراها متزوجه متزوجه ما لك كلمه عليها !
اهلين خالتي بالرضاعه !
يا خال جدتي حك ظهري !
اقول طس من هنا احسن لك !
عزام بتوعد طنش عمار وناظر ساره : وقسم بالله لاطلقك من هالمجنون إلي مبسوطه عليه !
واذبح هالمجنون بيديني !
قبل ما ترد ناظرت حور إلي جلست على الارض وتبكي بصوت عالي !
ابو الوليد بغضب : حسبي الله عليكم
خرعتوا البنات !
تقدم من البنات وحمل حور إلي مستمره بالبكاء : ليه تبكين يا حلوه ؟!!
سوار واقفه تناظره وهو حامل اختها والدموع تلمع بعيونها
اقترب من سوار ومسح على شعرها بحنيه
حور وهي تمسح دموعها بطفوله : يبغى يذبح بابا !!
ابو الوليد طالع عزام بنظرات غاضبه وبعدها إلتفت لحور : ما يقصد ابوك
سوار قاطعته بطفوله : إلا قصده عن بابا لانه يقول المجنون
ابو الوليد بعفويه : يعني ما فيه مجنون الا ابوك !
طالع ساره بهدوء : خذي البنات للداخل !
تقدمت ساره واخذت البنات بهدوء
ما لها خلق تشوف عزام او تسمع مشاكل !
ابو الوليد طالع عزام بحزم : وانت اترك البنت هنا ترى عمار اقرب لها منك !
وابوك ما يحل لها يعني هنا تأخذ راحتها !
وفكنا من المشاكل !
ام محمد تبث سمومها : الحين عزام خايف عليها هذي جزاته تقول فكنا من المشاكل !
ابو الوليد بغضب : وقسم بالله كلمه زياده ما يحصل خير !
ام محمد لا تتدخلين تراها واصله معي لهنا !
واشر على انفه !
ام محمد دق قلبها من الخوف : انا وش قلت ؟!!
وليد مسك يد عزام : امشي معي !
اشر له ابو الوليد بعيونه بمعنى يختصر المشاكل ويغادر !
هز راسه وناظر عمار بتوعد وغادر مع وليد !
ابو الوليد طالع عمار بهدوء: يا عمار ما تنحل الامور كذا !
عمار للحين مقهور من عزام : يا خال ترى كلامه يقهر !
جاي يآخذها عند بيت جدي ابو راكان إلي طردوها وتبروا منها !
وش يبغى فيها ؟!!
ابو الوليد اشر له يهدي : تعوذ من الشيطان !
وساره ما رح تطلع من هنا الا بأمرك وامر اخوها محمد !
وترى عزام يتكلم من رأسه لأنه
جدك ابو راكان للحين رافض وجودها
وما يبغى يشوفها !
فلا تفكر وتعطي الموضوع اكبر من حجمه !
وطالع اخته بحده : انت لا تتدخلين بينهم !
ام محمد بخوف من نظراته : ان شاء الله !
***
***
***
***
اول ما ركب السياره ضرب فخذه بقبضة يده : الكلب !
وليد حرك السياره بهدوء : اعصابك ترى السالفه
قاطعه عزام بغضب : ترى عمار ما هو قد المسؤوليه !
انت متخيل تراها صغيره وحلوه وتشتغل بمستشفى
وعيال الحرام
قاطعه وليد من أفكاره : لا يروح ذهنك بعيد !
ترى خالتك ذيبه اعرفها بالمستشفى !
لا تهتم لذي النقطه !
ترى محمد راجع هالايام زياره ورح يحل الإشكال !
عزام زفر بقهر: تدري وش اتمنى الحين ؟!
اتمنى تكون هالساره قدامي واصفقها كفوف
لا والأخت كاشفه والامر عندها عادي
وليد ابتسم : وش فيها ترى عيلتنا وعيلتكم ما يلبسون النقاب وين المشكله ؟!
عزام رجع لفورانه من جديد: المشكله انها ساعه تلبسه وساعه تخلعه !
الوليد بهدوء : اصلا امي تقول انها تركت النقاب جكر بعمتي ام محمد !
وبضحكه قصيره : بغيت افطس من الضحك لما اشرت عمتي عليها وقالت عنها ناقه !
عزام تنهد وابتسم بدون نفس : وهي صادقه جدتي !
وليد طالعه وهو رفع حاجب : وحد الله يا رجال !
هذي ناقه ؟!!!
عزام طالعه بحده : وليد !
ضحك وليد : لا يروح ذهنك بعيد تراني متزوج
قاطعه عزام : متزوج وتدور على الثانيه والثالثه والرابعه !
وليد اكتفى بابتسامه : الله يسامحك !
****
****
***
**
بعد ما دخلت ما ارتاحت من أسئلة التوأم : ماما يبغى يذبح بابا ؟!
_ ماما مو قلتي بابا راح وما يرجع
كيف رح يذبحه !
_ بابا قوي ويذبحه ؟!
_ انا رح اذبح هالوحش اذا قرب على بابا !
_ ايه حنا نحب بابا
زفرت بضيق : حور سوار ما ابغى اسمع كلمه وحده الحين !
بعدين نتكلم !
الحين وقت تجهيز الاكل اتفقنا !
وتركتهم وتوجهت للمطبخ والاحداث تتكرر قدام عيونها !
اخر شيء تتوقعه عمار يدافع عنها بهذي الصوره !
كل شيء تغير سبحان الله عمار إلي كان يطقها وهي صغير ويفتن عليها
الحين يدافع عنها وما يسمح لاحد يتكلم عليها !
رسمت شبح ابتسامه وهمست بوجع : اكيد يكفر عن خطايا ابوه !
زفرت بوجع للماضي !
حست بدخول عمار للمطبخ تابعت شغلها بدون ما تلتفت عليه !
استند على الثلاجة وتكلم بهدوء: ساره
لازم تتطلقين من هالمجنون
قاطعته بدون ما تناظره : عمار انسى الموضوع
عمار بقهر لحالها : ليه تضيعين عمرك مع هالمجنون ؟!
ليه تخلينهم يتشمتون فيك !
هذا هو متزوج وعنده عيال ومبسوط بحياته
وانت دافنه نفسك مع هالمجنون !
ساره بهدوء : ما يهمني احد
قاطعها بغضب: ساره اصحي على نفسك !
متى تصحين على نفسك وتنتبهين على عمرك إلي يمشي
رجعت تكمل شغلها وردت بنبره ما قدرت تخفي نبره الالم فيها : عمار شيء ما تعرفه لا تتكلم فيه !!
استغرب نبرتها وقرر يقفل الموضوع الحين بس ما رح يسكت كثير : لا تنسين اخر الاسبوع علشان تروحين معي نشوف البنت
ساره بهدوء : الله يبارك لك !
بس اعذرني ما اقدر اروح
بناتي ما اقدر اتركهم !
عمار طالعها بعدم تصديق : ما تبغين تروحين علشان امي واخواتي ؟!
ساره بلامبالاه: بغض النظر عن السبب ما ابغى اروح وانتهينا !
تنهد : بكيفك الحين لكن اذا تم النصيب غصب عنك رح تروحين !
ساره بتذكر : وش اخبار اميره ؟!
عمار هز كتوفه : خبري فيها مسافره من سنين !
ما اذكر اخر مره شفتها !
المهم الحين طالع تبغين شيء ؟!
هزت راسها بالرفض
ورجعت تكمل شغلها !
***
***
***
مرت الايام بنفس الروتين
بس اليوم غير
محمد على وصول الحين
صحيح متشوقه لشوفته بس بنفس الوقت مو مرتاحه
خايفه من كشف اوراق الماضي !
حور متحمسه: الحين نشوف خالي
سوار بحماس اكبر : ماما صح معه هديه كبيره !
هزت راسها ساره وهي متوجه للصاله : صح يا ماما
عفست ام محمد ملامحها لما شافتها وما تكلمت !
ناظرت جهة الباب
لما دخل عمار وخلفه محمد وعياله !
اقتربت بهدوء وسلمت على محمد
تفاجأت لما سحبها وحضنها بحنان : كيفك يا الغاليه !
ساره باحراج : بخير الله يسلمك
نزل لمستوى التوأم : ما شاء الله
ربي يحفظهم!
سوار وحور بصوت واحد : الحمد لله على سلامتك يا احلى خال بالدنيا !
ضحك محمد من قلب : يجننون !
ام محمد اقتربت : اشوف ناسي اذا لك ام
قاطعها محمد ويقترب : احد ينسى امه واقترب وسلم عليها
تقدمت ام خالد بابتسامة وسلمت على ساره بإعجاب : ما شاء الله متغيره !
رفعت نظرها ساره لما حست بضربه على راسها : عمتي الحلوه كبرت!
خالد من خلفه : مهند وبعدين معك ؟!
متى تعقل ؟!
مهند بمزح : انتم تخلون بالواحد عقل
خبري فيها شبر
الحين ارجع واشوفها طولي وعندها درزن عيال !!
ساره طالعته : حرام عليك درزن مرة وحده !
بعد السلام جلس الكل بالصاله !
خالد بابتسامة : ما شاء الله بناتك حلوات مثلك
محمد زاد قهره بعد ما شافها صغيره وهذا حالها ومع ذلك ما اظهر
ام خالد : احسهم يشبهون ولد مهند !
مهند طالعهم : لا ارجوكم ولدي المزيون ما له شبيه !
ساره خزته : وينه ولدك المزيون ؟!!
مهند : تركته مع امه اخاف تصكينه عين !
ام محمد مطت شفتها : قطوع وعاق مثل ابوك ولا مره شفت عيالك
محمد : والله يمه انت إلي بايعيتنا !
كم مره زرتك وانت مسافره في بيت خالي ابو الوليد
وحاولت فيك تجلسين عندي
بس رفضتي وبقوه
ام محمد مطت شفتها واعطت ام خالد نظره : تعرف السبب فلا تتفلسف فوق رأسي !
محمد طالع عمار : وش اخبارك ؟!
عمار بابتسامة حس بالسعاده لما شاف عمه محمد وعيال عمه يحس نفسه ما هو وحيد
صحيح جده ابو راكان واخواله ما قصروا معه بس الاحساس إلي يحسه بوجود عمه غير : الحمد لله بخير يا عمي !
خالد بوجه بشوش : متى الملكه ان شاء الله ؟!!
عمار ابتسم : بعد يومين بإذن الله !
ام محمد طالعت محمد : ومتى ناوي تصلح بينك وبين عمك ؟!
محمد بهدوء: اليوم اكلم خالي ابو الوليد وان شاء الله خير !
عمار حلقة وصل بيننا كيف نحضر الملكه وحنا ما نكلم بعض؟!
والكل مهم حضوره سواء انا او عمي ابو راكان !

عدل الشماغ وهو يناظر زوجته : اروح اشوف وجه النحس
قطع كلامه لما دخلت عائشه
ابتسمت بألم ابوها من خلفها يتكلم كذا
ليه يدبسها فيه ؟!!!
ام سعود كل هالخطوبه مو داخله رأسها : وأخيرا شرف العريس المنتظر !
ابو سعود بانتقاد : بدل ما تتكلمين قومي واعملي الواجب نستقبله ونتحمد له بالسلامه !
احسن من الثرثره إلي ما تودي ولا تجيب
ام سعود مطت شفتها بقهر : ماني طالعه من البيت !
تبغى تقوم بالواجب روح بحالك
ترى للحين مقهوره من هالماجد
رابط هالبنت سنوات وكأنه ولد عمها !
ابو سعود طالعها : تراها منتقده
خطيبها جاي وما تروح تسلم عليه
ام سعود حطت رجل فوق رجل : هذي هي خلها تروح معك
ابو سعود انقهر منها : كيف تروح وانت مو معها ؟!!!
تبغينها تدخل على الناس لوحدها ؟!!!
ام سعود بلا مبالاه: إلي عندي قلته
بعد كم يوم افكر اروح نتحمد له بالسلامه !
ابو سعود بنبره غاضبه : عمرك لا رحتي !
وتركهم وطلع من البيت !
ام سعود بقهر : هذا ابوك رح يقهرني !
ملتزق بابو ماجد !
ويمشيه على كيفه !!!
وانت الحين مبسوطه على روميو إلي رجع لك ؟!!
عائشه تنهدت بضيق وبابتسامه ساخره: شوفيني ابغى اقوم ارقص من الفرح !
ام سعود بغضب: يا برودك !
من الحين اقولك ما رح نروح الا بعد اسبوع
ويمكن بعد شهر !
عائشه بلا مبالاه : بعد سنه يكون افضل !
وقفت ام سعود بحسره : ما ادري وش حظ النحس على بناتي !
ولا وحده اخذت زوج مسعد !
كله ازفت من بعض !
زفرت بضيق وهي تناظر امها متوجه لغرفتها !
رفعت عيونها للسقف بعد ما استلقت على الكنبه !
الحين ماجد رجع ما تدري وش وضعهم الحين ؟!
مرت السنين بهدوء وما في جديد
الا دراستها إلي انشغلت فيها !
ما تدري ماجد بعده على نفس الكلام
يبغى يطلقها ؟!
او تراجع ؟!
ابتسمت بدون نفس وهي تتخيل يصير معها نفس القصص
يرجع ومعه زوجته وولده !!
ما تستبعد شيء عن ماجد
حجة انه كمل دراسه برا ويشتغل
مو داخله رأسها !
طول عمر الشاب اذا كان خاطب ويبغى يشتغل برا يتزوج وبعدها يسافر مع زوجته !
بس ماجد سافر وما رجع
الا الحين !
إلي فهمته من الكلام ابوه وجده اجبروه على الرجعه !
والا الاخ مو ناوي يرجع !!
رح تحط كل الاحتمالات
واقوى الاحتمالات يرجع ابوها
حامل لها خبر الطلاق !
وش رح يكون شعورها اذا طلقها ؟!
همست بصوت هامس «لعله خير»
رح تلتزم الصمت وتشوف اخر هالمهزله!!!!
***
***
***
الليله رح تكون حاسمه اما يتم الصلح او ينرفض !
ما يهمها كل الصلح وما تبغى تصالح احد !
مر طيف عزام امامها
من ذاك اليوم ما رجع ولا شافته !
صحيح استانست برؤيه محمد وعياله !
بس الراحه عيت تزورها !
تذكرت ابو الوليد كيف خاف على بناتها !
نفضت راسها كله تمثيل
كل الناس كذابه ما في حنيه واهتمام وحب بالحياه !
ابو راكان كان يمسح على راسها وهي صغيره
بس كله كذب وتمثيل
كان يكرها !
ما تثق بأحد بالدنيا !
سعديه
كانت بصغرها تشوفها الصديقه الوفيه
كانت قدوتها بكل شيء
تقلدها حرفيا !
لما كبرت اكتشفت انه ما في شيء اسمه
«صداقه »
كله كذب ونفاق وتمثيل !
حتى محمد صحيح ما قصر معها
لكن ما تثق فيه كل الثقه !
حتى عمار
حتى لو تطاوش مع عزام من اجلها
ومع ذلك ما تثق فيه !
فقدت الثقه بالناس
ومستحيل ترجع الثقه من جديد !
ورح تحذف كلمه الثقه بقاموس التوأم !
زمن الطيبه راح وما يرجع !!!!
الكأس إلي ذاقته مستحيل تترك التوأم يشربونه!
***
**
**
سلمان يجهز نفسه بعد ما رجع من رحلته مع ربعه هو وعبدالرحمن
واستغربوا تطور الاحداث: ساره رجعت ؟!
والله اشتقت لها الدبه !
عبدالرحمن يعدل الشماغ : لا تنسى للحين الحصار موجود وممنوع نكلمها !
سلمان ناظره : اقول طير من هنا !
يقال اني ملتزم بكلام جدي !
انا لو كنت اعرف مكانها من قبل كان زرتها !
واليوم ان شاء الله بعد ما تنتهي مراسم استقبال السيد ماجد رح اكون فوق راسها
عندي فضول أشوف عيالها !
عبدالرحمن ضحك بسخريه : والله مسخره
مو قادر اتصور ساره عندها عيال !
سلمان ابتسم : تخيل شكلهم مثل ساره بصغرها !!
وبضحكه : انا متأكد ماجد رجع لما سمع برجوع ساره !
عبدالرحمن رفع حاجب : صدق ؟!!
سلمان بضحكه :امزح معك !
بس تراه يعزها كثير !
صحيح كان يطقطق عليها ويتمسخر
بس كان يقول لي لها معزه مثل اخواته
وخاصه بالحادثه الاخيره
يقول انظلمت بدون سبب !
عبدالرحمن هز راسه بتأييد : صادق عمي عبدالله ظلمها بطلاقه لها !
شوقتني اشوفها !
غمز له سلمان بابتسامه: خلاص نروح لخالتنا!

سام للجميع : )
قبل ما انزل البارت بدي اوضح نقطة الرضاعه
بما انه بعض المتابعات عندهم إشكال فيها

هلا ام محمد ارضعت ام عزام
وصارت ام عزام ابنة ام محمد بالرضاعه
وابو محمد ابوها بالرضاعه
اولاده إخوان لام عزام
حتى لو كانوا من زوجه ثانيه
وساره من زوجه ثانيه ومع ذلك اخت ام عزام
بالرضاعه
وانا قرأت بعض التعليقات وضحت المسأله وفما له داعي اعيد نفس الكلام
بس حبيت تأكيد انه ساره خالة عزام *_^

^^^^^
^^^^^
^^^^
يتبع بارت 20

ما ترك احد الا وعزمه بمناسبة رجوع ماجد ولده البكر !
عم الحديقه بشخصيات مرموقه !
اجواء المكان توحي بالراحه مع الاضاءة إلي زادت المكان جمال !
طالع المكان بإعجاب من حظ ابنته تعيش بهذا المكان
وقف قريب من ابو ماجد و يشعر بالفخر بما انه نسيبه وقريب من ابو ماجد !
ما ينكر استفاد كثير من هالخطوبه !
ومستحيل يفرط بهذا الخير !
بغض النظر عن ماجد إلي ما يطيقه لا من باب ولا من طاقه
بس مضطر يجامله مقابل مصلحته !
رفع نظره لما دخل ماجد نافش ريشه
يسلم على المعازيم
لما وصل عنده سلم عليه وبنبره اقرب للسخرية : هلا بعمي
ابو سعود «يا كرهي لك » وبمجامله: الحمد لله على سلامتك !
ما بغيت ترجع
انقلب وجه أبو سعود وهو يشعر بالاحراج لما شافه تركه يكمل السلام على باقي الرجاجيل بدون ما يعبره !
~~
~~
~~
انقلب وجه ابو راكان لما شاف محمد وعياله يدخلون
إلتفت لابو الوليد ومتأكد كله تخطيط من تحت راسه !
اشاح ابو الوليد وجهه ببراءه ولا كأنه عمل شيء !
اضطر ابو راكان يبلع غضبه
ما يقدر يتكلم بحرف دام الرجال موجودين الحين !
واضطر يسلم مجامله على محمد وعياله !
محمد ينتظر ينتهي العشاء ويغادر الرجال
ويتكلم مع عمه !
ويحط النقاط على الحروف
بعد مرور وقت ما بقى بالمكان
الا ابو راكان وعياله وابو الوليد وعياله !
ابو الوليد وقف بهدوء وتكلم بنبره واثقه : يا ابو راكان !
طالعه ابو راكان بغضب بس ما تكلم !
تابع حديثه ابو الوليد : صل على النبي قبل ما ابدأ كلامي !
عم المكان بأصوات متفرقه بالصلاه على النبي !
ابو الوليد يوزع نظره على الموجودين :
قال تعالى : ( لا خَيْرَ فِي كَثِيرٍ مِنْ نَجْوَاهُمْ إِلا مَنْ أَمَرَ بِصَدَقَةٍ أَوْ مَعْرُوفٍ أَوْ إِصلاحٍ بَيْنَ النَّاسِ وَمَنْ يَفْعَلْ ذَلِكَ ابْتِغَاءَ مَرْضَاةِ اللَّهِ فَسَوْفَ نُؤْتِيهِ أَجْرًا عَظِيمًا ) النساء/114
وبهذا الموقف نسعى للاصلاح عسى ربنا يكتب لنا اجر الاصلاح !
حدد نظره على ابو راكان :
يا ابو راكان اسمع هالحديث إلي درسناه ايام المدارس
واغلب الناس تحفظه بس قليل من يطبقه !
عن أبي هريرة رضي الله عنه قال : قال النبي صلى الله عليه وسلم : ( لا تَبَاغَضُوا ، وَلا تَحَاسَدُوا ، وَلا تَدَابَرُوا ، وَكُونُوا عِبَادَ اللَّهِ إِخْوَانًا ، وَلا يَحِلُّ لِمُسْلِمٍ أَنْ يَهْجُرَ أَخَاهُ فَوْقَ ثَلاثَةِ أَيَّامٍ ) رواه البخاري (6065) ومسلم (2559) .
ما يحل تهجر اخوك اكثر من ثلاث ايام
فكيف إلي هجر والقطاعه استمرت سنوات !
ترى هالحال ما يرضي رب العباد
وهذي خطوات شيطان زينها في قلوبنا
بعد ما امتلئ القلب بالحقد والبغضاء !
ايام عدت وانتهت وأنهت الماضي
إلي مستحيل يتغير ويعود
وحنا بعدنا واقفين على نفس السالفه !
عيال اخوك من لحمك ودمك انت شيخهم وعزوتهم !
الظفر ما يطلع عن اللحم !
وعمر الدم ما صار مويه !
من الليلة اتمنى يندفن الماضي ونعيش
الحاضر بدون عتابات وفتح صفحات الماضي !
وخلاص نرجع مثل ايام قبل لا حواجز ولا مشاكل
ونكون بيت واحد !
هذا ابو خالد من الليله يبغى الصلح
وينمحي الاسى بين العائلتين !
واتمنى ما تفشلنا يا ابو راكان !
ابو راكان بملامح جامده : بس خلف ما قصر فينا كيف نن
قاطعه محمد بصوت قوي : يا عم لمتى هالقطاعه والسبب خلف ؟!!
خلف الله يستر على عباده
ما احد سلم من شره !
اغلب الموجودين وصلهم ضرر من خلف
خالي ابو الوليد وعياله وعيال عمي
وحتى ام عمار تضررت منه كثير
وعلى راس القائمه بالضرر
«أختي ساره»
ابو راكان بتهكم : بس ساره مشتركه معه بالمشكلة الاخيره
ولولا الاوراق إلي اعطتها لخلف
كان ما صار إلي صار !
محمد هز راسه بتفهم : انا السالفه كلها ما كنت موجود عليها ولما اتصلت فيني يمكن اخطأت بالرد
بس انا انفجرت من كثر الشكاوي إلي تصلني بسببه !
بس انا متأكد ساره
قاطعه ابو الوليد : ما نبغى نفتح صفحات الماضي يا ابو خالد !
ترى ما صارت هالفتنه الا من هالنصاب خلف !
وبعدين يا ابو راكان سبحان الله يمكن السالفه إلي صارت خير
ربنا فك ام عمار منه وتزوجت
مهند انتفخ مو عاجبه كل هالموضوع : سبحان الله خير ام عمار انفكت منه
وعمتي تطلقت بيوم زواجها
بعد خير
قاطعه محمد بحزم : مهند !
ابو الوليد يلم الموضوع : يا جماعه ما نبغى نفتح صفحات الماضي !
عبدالله طالع مهند بنظرات بارده
وما علق على الموضوع !
ابو الوليد : والحين خلاص نبغى الصلح !
ابو ماجد بنبره جاده تحمس للصلح : وانا مع الصلح !
وما ننسى الحديث «وخيركم الذي يبدأ بالسلام »
ابو عزام بتأييد : وانا مع ابو ماجد الصلح خير
وحنا عيال عم !
عزام طالع ابوه باستغراب ما كان كلامه كذا !
ابو الوليد طالع ابو راكان يحثه على الصلح !
ابو راكان وقف بعد ما تنهد يحس حطوه بالامر الواقع : على خير
بس خلف وساره ما ابغى اشوف رقعة
قاطعه ابو الوليد : مالك لواء يا ابو راكان !
خلف كلنا معك ما أحد يبغى يشوف رقعة وجهه
بس ساره لنفترض انها فعلا هي إلي اعطت الاوراق لخلف
تراها بذاك الوقت صغيره جاهله
ويمكن خلف استغفلها
ما تدري وش الوضع كان بالضبط !
وكلنا نعرف طبع خلف غني عن الوصف !!
البنت الحين كبرت وعندها عيال
وانت عمها المفروض تكون جنبها
حتى لو غلطت تعلمها الصح من الغلط !
ابغى الصلح يكون للكل !
وام الوليد تولت صلح الحريم !
وان شاء الله ترجع المياه لمجاريها !
ابو ماجد طالع محمد : المفروض ساره تيجي هنا وتصلح ابوي وتعتذر منه !
مهند عفس ملامحه بقرف وبنفسه «اقول تلايط من هنا ....تصلح ابوي وتعتذر منه»
ابو الوليد بتأييد : وهذا إلي رح يصير تراه عمها
وما ينقص قدرها بالاعتذار
بالعكس عمها وله حق عليها !
ناظر عمار : ادخل للحريم وخلي ساره تيجي هنا !
عمار بتردد : ساره ما جاءت لهنا!
ابو الوليد ناظر محمد بنظرات معناها مو هذا الاتفاق !
محمد بترقيع : وحده من البنات عليها حراره
وما قدرت تيجي،!
لكن الحين اروح اجيبها يمكن البنت تحسنت !
وقف عمار استأذن وطلع بعد محمد !
مهند همس لخالد : لو فيها خير ترفض هالصلح !
خالد بذات الهمس : انت لا تتدخل
***
**
***
***
عند الحريم
بعد ما تم الصلح ام محمد بانتقاد لحفيداتها : صدق ما تستحن مقاطعيني
ام راكان مستانسه بالصلح : خلاص يا ام محمد
جودي بتبربر : حنا ما قاطعناك يا جدتي
بس انت إلي هجيتي وما رجعت الا قبل فتره !
ليان : الواحد عنده مشاغل
ام الوليد بابتسامه : والله ما في اجمل من الصلح !
والقلوب تكون صافيه مو حقوده !
ام محمد وهي تؤشر على نفسها : الحمد لله ماني بحقوده وقلبي ابيض
مو مثل سوير الناقه !
رفضت الصلح وما تبغى تشوف رقعة وجه احد فيكم !
جودي لوت بوزها : يقال ميتين عليها هالناقه !
ليان بترفع : حتى لو جاءت خاطر لخالتي ام الوليد اسلم عليها
والا هي تستحق أتفل عليها
ام عمار بهدوء : ليان !
ليان طالعت امها : اشوفك حنيتي على الناقه ؟!!
مو كأنها هي إلي
قاطعتها ام عمار : خلاص قفلي هالموضوع !
جودي بشماته : سبحان الله اخذت جزاها
طلاق بيوم الزواج وتتزوج واحد مجنون !
ام عمار بتأنيب : ما نبغى الشماته يا جودي !
ام ماجد هزت راسها بتأييد : جودي صادقه
ظلمتك بالاوراق
ام راكان تكدر خاطرها : استغفر الله !
والله قلبي متقطع عليها ومشتاقه لها !
شروق طالعت عمتها وكتمت قهرها
كل هالصلح ما تبغاه بس وش يطلع بيدها ؟!!
ام الوليد : الله يصلح الوضع بينهم !
وباستغراب : اقول يا ام ماجد كنتك ما اشوفها جاءت تتحمد لخطيبها بالسلامه ؟!!
ولا امها كلفت نفسها تيجي،!
حتى الحريم يسألون عنها ما دريت وش ارقع عنها !
ام ماجد بترقيع : امها تعبانه وما تقدر تحضر بدون امها
الناس تنقد عليها !
ام راكان هزت رأسها : صادقه الناس تنقد عليها جايه لبيت خطيبها لوحدها !
ام محمد بضربه : هذي الناس إلي تفهم بالاصول والعادات
مو مثل ساره 24 ساعه كانت في بيت ابو راكان
قاطعتها ام راكان بزعل وهي تشوف وجه شروق إلي انقلب وصار بالالوان : وش جهزتم لملكة عمار ؟!!!
***
***
***
***
محمد ما توقع ردها : كيف يعني رافضه الصلح ؟!
ساره اعتدلت بجلستها بهدوء وبداخلها نار متأججه : محمد الله يرضى عليك لا تحملني فوق طاقتي !
ما اقدر اقابلهم او اسلم عليهم !
ادري انه الصلح خير وما يجوز الهجران اكثر من 3 ايام
بس انا حاليا ما اقدر !
يمكن مع الايام تتغير النفوس بس حاليا
مستحيل !
محمد جلس مقابل لها وبمحاوله إقناع: انا الحين طالع من الرجال ومتكلم قدامهم ينتظروني راجع وانت معي !
كيف ارجع واقابلهم ؟!
وانا إلي سعيت للصلح وكلمتي ما تمشي على اختي الصغيره ؟!
تبغين تصغريني بينهم ؟!
ويتشمتون فينا ؟!
ليه نسمح لهم دوم يقولون عيال ابو محمد يفشلون وما في ترابط بينهم ؟!
قاطعته ساره وهي تناظر الشيب غزى شعره
زفرت بضيق ونزلت نظرها : قدرك كبير وعالي عندي
واطلب أي شيء ورقبتي سداده
الا هذا الطلب !
ما اقدر !
احس لو اشوفهم رح اذبحهم وما امسك لساني !
مستحيل ادخل بيت انطردت منه !
انت ما شفت كيف طلعت منه مذلوله بعد ما مسحوا بكرامتي الارض !
طردوني وكأني طراره عندهم ؟!
وش ذنبي بخلف وافعاله ؟!!
ما ابغى اشوفه ولا ابغى صلحه !
ضاق صدره محمد : كيف ارجع الحين ؟!
ساره فقدت اعصابها تكلمت بغضب : ما ادري وش تبغى بهذا الصلح !
ناس حقوده !
محمد طالعها : اول شيء الصلح خير
ثاني شيء عمار !
تدرين انه من اسباب رفضه الزواج هذي النقطه !
يقول كيف اخطب واهل ابوي ما في احد موجود منهم !
لمتى هالقطاعه ؟!
خلاص انسي الماضي وافتحي صفحة جديده!
خلي قلبك ابيض مثل زمان !
وبعدين انا ما ابرر تصرف عمي وعياله
لكن تصرفهم رد فعل !
كانت تصرفاتهم بدون وعي
وزاد الامر تفاقم لما وصلهم خبر انك اعطيت خلف الأوراق
مطت شفتها بقرف وما علقت !
محمد رفع حاجب بتساؤل: وش سالفه الاوراق ؟!
ساره بقلب ميت لاحداث الماضي : انسى سالفه صارت وإلي انكسر مستحيل ينجبر
محمد قاطعها بتحدي : بينجبر يا ساره !
بس انت افتحي باب الفرص !
ساره طالعته بعيون لامعه : قلبي كان زجاج رقيق شفاف مفتوح للكل
كسروه بقلب بارد !
مستحيل يرجع
قاطعها وهو يمسك يدها يحثها على الوقوف : ساره بلا فلسفه
بلا زجاج بلا بطيخ
ساره تسحب يدها منه : محمد
محمد تكتف بزعل: خلاص براحتك يا ساره !
كل هذا حتى ما تشوفين عبدالله ؟!
عقدت حواجبها بانزعاج من كلامه : عبدالله ؟!
محمد بتأكيد لكلامه : اكيد الكل رح يقول ما عندك الشجاعه تقابلي عبدالله
يمكن للحين تبغينه
قاطعته ساره : يخسى !
ما بقى الا عبدالله !
محمد باسلوب يحثها : قومي واثبت لهم انه طلاقه ما همك !
وانك
قاطعته ساره بحزم : ما أبغى اشوف احد فيهم !
محمد بالله لا تزعل مني
بس انا
قاطعها بتفهم : براحتك !
وتركها وطلع !
ناظرت عمار إلي واقف قريب منهم مستمع فقط !
ثواني واقترب منها :ساره !
بالله انك تقومين وتكسري هالحاجز إلي بيننا !
ساره انا ساكن في بيت بروحي
وانت عمتي وملزوم فيك !
وبنفس الوقت
امي واخواتي يبغون زيارتي !
كيف تجتمعون ؟!
ساره ببرود : ما احد مانعهم
قاطعها : امي ما تدخل البيت بوجودك
بس اذا تم الصلح رح تدخل
ساره قاطعته : خلاص انا اطلع من هنا
قاطعها بغضب : ساره لا تجلطيني !
انت تثبتين الكلام إلي وصلنا !
بعدك للحين عايشه على ذكرى خالي عبدالله
قاطعته بغضب : يخلخل عظام عدوينك !
انتظر دقيقه وانا معك يا غبي !
فتح عيونه بعدم تصديق !
***
***
***
دخل محمد بحرج وهو يناظر الموجودين !
طالعه ابو الوليد بتساؤل !
اشر له بعيونه عن رفضها للصلح !
ما غابت هالحركه عن عيون اغلب الحاضرين
وخاصه ابو راكان إلي حس بمويه بارده
انكبت بين ضلوعه
بزر ترفض تصالحه !
اي اهانه وجهتها ساره له ؟!
ابو ماجد ما عجبه هالتصرف وبانتقاد : وين ساره يا ابو خالد ؟!
والا تنتظر ابوي بنفسه يروح يصالحها !
عبدالله بسخريه مبطنه :،يمكن ابنتها بعدها تعبانه !
اذا لزم الامر ترى اغلب الموجودين طب يقدرون يكشفون عليها !
انهى جملته وهو يبتسم بغرور !
مهند رد بغرور اكبر : ليه تكشفون وامها موجوده !
ما احد فهم معنى تعليقه باستثناء خالد ومحمد !
سلمان وقف بابتسامه مرحه ؛ اروح اطمئن على ابنة خالتي ساره !
اعطاه ابو راكان نظره ناريه حارقه !
وبعدها إلتفت على محمد : انا ما بغيت صلحها لكن وافقت بعد ضغط واحراج منكم !
إلي يهمني الحين صلح الرجاجيل
قاطعه محمد : الله يسامحك يا عمي
مين قال انها رافضه الصلح !
انا ما حكيت ولا تكلمت !
وليد بتأييد : صادق يا ابو خالد
انت ما تكلمت للحين !
وبنخوه : اذا البنت تعبانه انا جاهز اكشف عليها !
سعود بهمس ساخر: ذابحيتك النخوه !
وليد بذات الهمس: افضل منك يالجليد !
عزام : اذا ساره جايه انا اقول تدخل عند الحريم وبعدها جدي يسلم عليها
ابو الوليد: ما في احد غريب يا عزام
عيال عمها
وعيالي بحسبة اخوانها !
سكت عزام وما عجبه دخولها كذا عندهم !
بس بنفس الوقت ابتسم بسخريه لانه متأكد ما حتيجي بعد ما شاف نظرات محمد الخائبه !
استغرب وهو يشوف عمار متوجه لهم وماسك بيد ساره !
تسلطت الانظار عليهم !
اقترب عمار وهو يرحب بشكل مبالغ فيه : نور المكان !
تفضلي يا احلى عمه بالدنيا !
تقدمت ساره بهدوء وناظرت محمد إلي استبشر بوجودها وسرعان ما وقف وتقدم منها : تعالي يا ساره !
مسك يدها بهدوء
وتوجه لناحية ابو راكان إلي يطالع حوله الا ساره
ما يبغى يشوف رقعة وجهها !
طالعت عمها إلي جالس وبالغصب رفع عيونه لها !
فتح عيونه وبانت الصدمه على ملامحه
وقلبه يعتصر من الالم !
طول السنين ابتعد عنها ورفض شوفتها حتى ما يضعف ويرجعها لجناحه!
بس الحين إلي يشوفه كسره !
هذي ساره ؟!
يا ويل حاله عليها ...اي مجاعه اصابتها
حتى صارت بهذا النحف ؟!
اي سنين عجاف عاشتها ؟!!!!
وين الخدود الموردات ؟!!
ما يشوف الا ظل لساره القديمه
نحف وشحوب تجهم حقد وكره!!!
نعم نظراتها مليئه بالحقد والكره ؟!
ما توقع نظرات ساره له كذا !
الطفله إلي احبها وحاول يعوضها عن فقدان أبوها
تناظره كذا ؟!
اي صلح هذا والقلوب باللون الاسود امتزجت ؟!!
قطع افكاره محمد : يا عمي سلم على ساره !
عدل ملامحه وتحولت للجمود مد يده يسلم عليها
انصعق من كتلة البرود إلي حاوطت يده !
وسرعان ما سحبت يدها بسرعه
بس وقفها صوت وليد : هذ ما يعتبر سلام !
حبي راس عمك يا ام سوار !
ابو راكان بعبوس : والله ما ادري وش هالصلح
جايه وماده البوز تناظرنا وكأننا ماكلين حلالها !
ساره طالعته وبعدها ناظرت محمد إلي بنظراته يتوسل لها تتم الصلح على خير تكلمت وهي تناظر التوأم : اي صلح والحقوق ما رجعت لاهلها
رفعت نظرها لعمها بنظره قويه متحديه !
ابو راكان بعد نظراتها رد بغضب: اي حقوق تتكلمين عنها !
صدق المثل شين وقوة عين !
فوق إني تغاضيت عن غدرك وخيانتك لنا
جايه تبغين حقوق ؟!
انا لو ابغى احطك برأسي كان رفعت عليك قضيه سرقه !
بس سكتت وبلعت قهري احترام لاخوي إلي تحت التراب
المفروض من زمان تيجي وتعتذرين لام عمار إلي تعرضت لجنون اخوك
بسببك !
والحين جايه تتكلمين عن الحقوق !
اي حقوق تبغينها !
وبقهر كرر : اي حقوق ؟!!
رددت بصوت بارد : «حقوق المظلوم »
عقد حواجبه بعدم فهم وقبل ما يتكلم تقدمت منه وقبلت راسه وبهمس: رح اكون افضل منكم واقابل السيئة بالحسنه !
طالعها بدون اي كلمه !
تقدم منها سلمان وسحبها لجهته يسلم عليها : هلا والله بخالتي !
عبدالرحمن بابتسامه سلم عليها : اخبارك يا حلوة !
ماجد وقف بجانبهم : هلا والله بسارونه
وبمزح : وانا اول ما دخل عمار اناظر خلفه ادور على الناقه !
طلعت الناقه صايبيتها مجاعه !
وطالع بناتها : يا عمري على الجمال !
الظاهر ابوهم مز
قاطعه سلمان وهو يمسح على رأس التوأم: ساره كيف تميزين بين التوأم !
وقف أبو ماجد بانتقاد : مطولين سوالف واقفين وك
قاطعه ماجد : السموحه يبه بس شوفة ساره كانت مفاجئه حلوه !
ما انتبه على العيون إلي تناظره بغضب !
ابو الوليد بهدوء : بهذي المناسبه ترى عشاكم باكر عندي !
ابو راكان وملامحه لا تفسر : على هير ان شاء الله
محمد : وين خالتي ام راكان نسلم عليها ؟!
ابو راكان بهدوء اشر لسلمان إلي واقف يهمس لساره : سلمان نادي جدتك ام راكان وام محمد
هز راسه وغادر !
ابو تالا بهمس لابو عزام : سبحان الله
لو شفتها بالشارع ما عرفتها !
ابو عزام : الله يوفقها !
ابو الوليد يغتنم الفرصه : والحين نبغى نصالح عزام وعمار !
عمار بهدوء : انا مو حامل عليه شيء !
ابو الوليد : مو مشكله ابغى تسلمون على بعض !
ابو راكان هز براسه لعزام يحثه على السلام !
بعد السلام تكلم وليد بابتسامه : ام سوار وعزام لازم يتصالحون بعد !
انقلبت ملامح ساره من لقافة الوليد
حاشر نفسه بكل شيء !
عكس سعود جالس وما تدخل لو بكلمه !
المره الثالثه ما ح تسكت له حتطقه على راسه !
استغربت لما بادر عزام بالسلام وتقدم منها !
سلمت عليه ببرود للحين قلبها ما هو صافي له !
همس لها بأمر : قبل ما ترجعين ابغاك بسالفه !
طالعته ورفعت حاجب : ما عندي وقت !
وتركته وتوجهت عند عيال محمد وجلست بينهم !
همس لها مهند بقهر : غبيه !
حسبتك قد كلمتك وما ح تيجين !
تنهدت ساره وبذات الهمس :ما حبيت افشل ابوك بالمجلس
واخلي إلي يسوى وما يسوى يتكلم على محمد
و كسر خاطري عمار !
مهند مط شفته : عجلي بدراستك
وتعالي عندنا صدقيني ح تنبسطين هناك !
ساره همست : يصير خير

يسترق النظرات لها وعقله مو قادر يصدق هذي ساره !
نغزه ماجد بهمس ساخر : لا تناظر يا عمي
وتتحسر خلاص طارت منك !
طالعه بنظرات ناريه وبهمس : انكتم
شايفني ذابح نفسي عليها ؟!
ماجد بسخريه همس: وليه تسترق النظر عليها ؟!
فتح عيونه عبدالله الظاهر ماجد جالس له مراقبه وبهمس رد : فضول اشوف شكل الناقه بعد هالسنوات !
ماجد بذات السخريه : ترى هالناقه
ما عبرتك ولا هي مهتمه اذا انك موجود او لا !
عبدالله انتفخ من كلام ماجد وبهمس: تراك مسختها وانا اعطيتك وجه !
عندي إلي تسواها وتسوى عشره من امثالها !،
فلا تجلس تطلع كلام من عقلك !
ماجد بخبث بهمس: شوف خالي وليد كل شوي يطالعها الظاهر رسم عليها !
تراه يبحث عن الثانيه !
عبدالله متأكد ماجد يبغى يستفزه
وببرود رد : الله يوفقه
بس قبل ما يخطبها يطلقها من المجنون !
ابو الوليد باقتراح : انا اقول ام سوار ادخلي عند الحريم
محمد بهدوء: تسلم على خالتي بالاول
وبعدها تدخل عند الحريم !
ناظرت ساعتها ما هي طايقه الجلسه هنا !
تحس بالاختناق والانظار تسترق لها !
حتى عمها ابو راكان اكثر من مره جاءت عينها بعينه !
سرعان ما يبعد عيونه عنها بملامح جامده !
تحس بعيونه كلام بس اختصره !
لفت نظرها ماجد إلي اشر لها بابتسامه !
زاد ضيقها وهي تشوف عبدالله جنبه ويناظرها بتقييم !
عفست ملامحها بقرف«ما بقى الا عبدالله يقيمها ..مالت
عليك يا متخلف »
سبحان الله كل الحب والموده إلي كانت تحمله له
تحول لكره وحقد !
طنشت ماجد مو فايقه لسخافته
ما تنكر ما تحمل بقلبها حقد او كره
لسلمان وماجد وعبدالرحمن
لكن قلبها ميت وما لها خلق لاحد !

***
***
***
***
دخل سلمان بعد ما استأذن :
يا جدتي يقولك جدي تعالي سلمي على خالي محمد وعياله !
وطالع ام محمد : وانت يا جده تعالي بعد !
ام خالد بابتسامه : وحنا ما لنا دعوة !
سلمان هز كتوفه وهو يمثل انه يطالع ورقه بيده : والله هذا المكتوب بالورقه
ام محمد وام راكان وبس !
ويمكن يسمحون لعمتي ام عمار بالدخول !
وقفت ام عمار بعد ما كشت عليه : مالت عليك !
ومين قالك اني انتظر موافقه علشان اروح ؟!
وناظرت امها : قومي يمه نروح عندهم !
سلمان بتنبيه : ترى ساره برااا!
جودي عفست ملامحها بتكبر !
كش عليها سلمان : انتبهي ليطق لك عرق !
عفستي ملامحك مثل البقره لما يمنعون عنها البرسيم !
جودي طالعته : صدق انك وقح وما تحترم احد !
ام عزام : سلمان متى تحترم بنات خالك ؟!!
تراكم كبرتم مو بزران !
ام راكان متحمسه : فكونا منكم ويلا نطلع لهم !
شروق عفست ملامحها من القهر وهمست لنوره : وش جابها هالزفته !
الحين تلاقينه جالس يطالعها !
نوره : وين ثقتك بزوجك ؟!
لا تخلين هالبزر تزعزع هالثقه !
اذا استمريت على هذا التفكير رح تخربين بيتك !
شروق بخنقه : اخاف يحن لها بعد هالسنين !
لو متزوجه واحد عدل كان قفلت حلقي !
اكيد اخوها حيطلقها من المجنون !

بنفس المكان
ام تالا عفست ملامحها بعد ما رجع لها هالكابوس !
ساره اكبر كابوس !
بالرغم انها انجبت ولدين الا انها ما هي مرتاحه
تخاف زوجها يرجع لها مره ثانيه !
وش رجعها بعد هالسنين ؟!!!
زفرت بضيق وهي تردد بنفسها «يا رب تطلعها من عقل زوجي »
**
**
**
**
وقف محمد لما شاف خالته اقتربت منهم !
ابتسم بهدوء وتقدم منها وسلم عليها بمحبه !
وبعدها عياله تقدموا منها وسلموا عليها
وبالمقابل سلمت ام محمد على عيال ابو راكان !
وقفت ساره وسلمت على ام راكان
وكأنها ما تعرفها !
حز بخاطرها ام راكان هالسلام
حتى ما كلفت نفسها تسألها عن حالها !
ومع ذلك ابتسمت ام راكان : عساك بخير يا ابنتي !
ساره بهمس يا دوب وصل لمسامعها : بخير
ام راكان انحنت على بنات ساره ملتصقات فيها : ما شاء الله ذول بناتك !!
ربي يحفظهم يشبهون بعض كثير !
وبعدها ناظرت ساره وقلبها يعتصر نفس ابو راكان وش إلي شافته حتى تفقد وزنها وتصير بهذا النحف ؟!
ما تنكر انها صارت أجمل !
بس قلبها تقطع وهي تفكر بالمصاعب إلي واجهتها حتى صارت كذا !
تنهدت بضيق ام راكان والغصه بحلقها
والدموع تنذر بالنزول : تعالي يمه عند الحريم !
هزت راسها بدون نفس بس وقفها الكلام : انا ابغى ساره تجلس عندي