رواية أقدار~للكاتبة ضاقت أنفاسي الفصل الثالث والعشرون 23 - بقلم BlackButterfly002

بارت 25

جلست على احد المقاعد وفتحت النت تشوف علامة المشاركه !
تهز رجلها وللحين متنرفزه منه !
غمضت عيونها لثواني وفتحتهم بعدم تصديق
وهي تشوف علامة المشاركه «4»
تبغى تكسر الجوال بيدها !
لمعت الدمعه بعينها من القهر !
كيف يحط لها كذا !
ولا مره تغيبت عن محاضراته !
صحيح ما تشارك بس
قطعت افكارها وهي ناويه تتصل بعائشه !
لازم تعرف كم علامتها حتى تعرف تتفاهم معه !
لحظه من وين تجيب رقمها !
لمعت بعقلها نسرين اكيد معها الرقم !
وبحركه سريعه ارسلت لها رساله !
خلال دقائق وصلتها الرساله !
تحرك اصابعها بآليه اتصلت على عائشه وقلبها يدق طبول !
اخذت نفس وهي تسمع صوتها الهادئ : الو
ساره بانفعال : عائشه كم اخذتي بالمشاركه عند سعود ؟!
عائشه بضيق : 6 ليه تسألين ؟!!
ردت ساره بانفعال : حسبي الله عليه !
عائشه بإحباط : تراه خسف اغلب القاعه بالمشاركة !
انت وينك ؟!
ساره بقهر وصفت لها المكان !
اخذت نفس تهدي نفسها وهي تشوف عائشه !
جلست عائشه بطفش من الامتحانات : الله يستر ما احمل مواد !
ساره بقوه : لازم ما نسكت له وغصب عنه يحط لنا علامه مثل العالم !
والا نمسح فيه الارض!
عائشه بإحباط : ما جاءت على سعود
ترى اخذت علامة مشاركه بماده ثانيه
تخيلي 3
اعلى علامه بالقاعة 5
يا كرهي لهذا الدكتور يتحدى الطلاب احد يحصل عنده علامه !!!
وكأنه يوزع العلامات من جيبه!!
ساره عقدت حواجبها : غريبه هذا الفصل علاماتك متدنية ؟!
كنت الاولى على القسم وش إلي تغير ؟!
زفرت عائشه بقرف : يقطع الزواج وسنينه !
ساره رفعت حاجب : مو مرتاحة مع ماجد ؟!
عائشه خزتها : ليه تسألين ؟!!
ساره بأريحيه ترد : احسك مو مرتاحه معه !
وما في تفاهم بينكم ؟!
واكبر دليل تراجع مستوى دراستك ؟!
عائشه زفرت بإحباط : اتركيني بهمي
اليوم زفني بابا زفة محترمه !
يقول وين إلي تبغى تكون امهر طبيبه ؟!
وين وين وين ؟!
بغيت اقول له «وين وين رميتني »
ساره بعفويه : غريبه مع انه ماجد حبوب !
خزتها عائشه بعيونها : وقدامي تقولينها ؟!
حبتك القراده يالبعيده !!
ابتسمت ساره على تعليقها : مو قصدي
ماجد اعتبره مثل عمار وسلمان !
خلينا بسالفة الدراسه !
وابن عمي العميد ما علق على مستواك ؟!
عائشه بضيق : زعلان مني !
يقول مقصره بدراستي !
ما يدري انه ولده يسد النفس عن الدراسه ؟!!
وبتحقيق : انا متزوجه وإلي عندي اقرفني حالي وقصرت بالدراسه !
وانت ليه علاماتك كذا ؟!!
تنهدت ساره بوجع وبعدها أشرت على راسها : اذا هذا مشغول 24 ساعه كيف يركز بالدراسة ؟
عائشه بإسلوب مرح : وش شاغلك يا بعد عمري ؟!!
يا حظك ما عندك زوج ينكد عليك !
الا اذا للحين عايشه على أطياف ابو العيال ؟!
وبفضول : كيف كانت حياتك معه ؟!!
لو تشوفينه الحين وش تكون رد فعلك ؟!
والاهم حبتيه ؟!
ساره بدون نفس : يمه من فضولك !!
اشوفه ؟!
مستحيل !!
عائشه عقدت حواجبها : ليه مستحيل ؟!
مو كنت تزورينه قبل الطلاق ؟!
والا هاجر من المنطقه كلها ؟!!
ساره بغموض : مستحيل اشوفه او التقي فيه !
عائشه مطت شفتها : تحبينه ؟!
سرحت بالسؤال وظلال الماضي تلوح قدامها !
إلتفتت بغموض : صفحة انطوت ليه نفتحها ؟!!
وبداخلها تصرخ مستحيل تنطوي حتى تحط النقاط على الحروف !!
**
**
**
**
ام عزام ما هي مقتنعه : انا اقول لو زوج اميره يطلع من السالفه يكون افضل !
نوره تبغى الفكه من ساره : اكيد يبغى مصلحتها بالزواج !
تراه ما هو متهور او يبغى يزوجها لمصالح له !
يبغى مصلحتها وللحين ما كلم اخوه ولا اهله
يبغى يفكر زين وبعدها يعرض الفكره على اهله !
نسرين :،بس ساره ما تبغى الزواج !
وما رح تسمح لاحد يدمر حياتها اكثر !
ام عزام : مو شرط يمكن تعيش مرتاحه بعد الزواج !
يكون لها بيت خاص لها وزوج مجبور ينفق عليها !
الحين محمد يرسل لها الله يطول بعمره
ما احد يضمن المستقبل !
ترى العيشه عند زوجة الاخ ما هي حلوه !
للحين اذكر ويوجعني قلبي لما كل وحده قفلت بابها ورفضت دخولها عناد بالثانية !
والضحيه ساره !
ان شاء الله ربي يعوضها بالزوج إلي يسعدها !!
نوره من قلبها : امين وبنفسها «زوج غير عبدالله»
ام عزام باستغراب : يقولون سعود تفركشت خطبته ؟!!
نوره هزت راسها : ايه البارحه ؟!
ام عزام : وش السبب ؟!
نوره مطت شفتها : ولد عمها المسافر حجر عليها !
واهلها اعتذروا
قاطعتها ام عزام : قولي الحمد لله ما ملك عليها !
نوره وهي تشرب العصير: الحمد لله
**
**
**
**
**
شروق بقلب ميت ناظرت امها : متى اتخلص منها ؟!
من يوم ما قالوا طلقها المجنون وهو طول وقته ساكت وسرحان !
وقسم بالله لو يرجعها لذمته الا انجلط !
ابو الوليد بهدوء : بعيد عنك الشر !
لا تفكري بذي السالفه وتخربين بيتك بيدك !
ولا تفتحين مجال لزوجك يفكر بغيرك بإسلوبك السيء !
امسكي نفسك واهتمي بزوجك وعيالك وما عليك من احد !
والحين ارجعي للبيت واستقبلي عبدالله بابتسامه جميله وبدون كشره ونكد واسئله ما لها داعي !
شروق بوجع : ان شاء الله يبه !
ام الوليد تناظر شروق بعد ما طلعت مع عيالها : والحل مع هالسالفه ؟!
راسي صدع من هالموال !!
ابو الوليد وهو يطالع سعود : ولد اختي حاطها براسه مثل ما اشوفكم!
لكن حريمته يوصل لها !
وبجديه اكبر : سعود وش رايك فيها ؟!!
فتحت ام وليد عيونها بعدم تصديق : انجنيت ؟!
ابو الوليد بحده : عاجبك وضع ابنتك كل يوم تذبل ؟!!
ام الوليد باستنكار : تعدل وضع شروق على حساب سعود ؟!
ابو الوليد رفع حاجب : البنت ما هو قاصرها شيء !
واذا على اخوها خلف لا تحمل منها !
ام وليد بمقاطعه : تبغى ولدي ما يشوف العيال
قاطعها بضجر : يا ليت تفهمين قبل ما تقاطعين !
رح يتزوج وحده ثانيه يختارها بنفسه !
ومن الحين تعدل بينهم يا سعود !
اذا مو قد هالمسؤوليه ما رح نقدم على ذي الخطوه !
وش رأيك ؟!!
تنهد سعود وطالع ابوه بهدوء : كنت ابغى افاتحك بالموضوع قبل ما تتكلم !
اتزوجها اريح نفسية شروق وبنفس الوقت اكسب اجر بالتوام !
ام الوليد ما عجبتها الفكره : مثل ما ارضى لبناتي ما ارضى عليها !
تبغى تتزوجها بس لا تحط فوق راسها ضره !
ابو الوليد بهدوء حازم : رح نحط فوق راسها ضره وبرضاها بعد !
وبعدها إلتفت لسعود : انا اضبط الموضوع بس اتمنى ما تطلع السالفه من هنا !!
وخاصه انت يا ام الوليد !
**
**
**
**
طلعت تركض وهي تلحق خلف سوار بسرعه
مسكت طرف فستانها الخلفي
وامسكت فيها وسحبت منها الجوال وبحزم : كم مره قلت لك ما تمسكين الجوال ؟!!
سوار تكتفت بزعل : ليه انا ما عندي جوال ؟!
خزتها ساره : وش تبغين بالجوال ؟!!
سوار حاست بوزها بطفوله : اكلم صديقتي !
ضحكت ساره على تعليقها : مين صديقتك ذي ؟!
اعطيني رقمها ؟!
سوار بزعل : ما يخصك !
اعطيني الجوال اكلمها الحين؟!
ضحكت ساره على اسلوبها : وتتأمرين بعد !
وصلها صوته من خلفها : دوم هالضحكه !
إلتفتت له وبروقان : هلا سلمان !
سلمان يقرص خدود سوار : تبغين جوال ؟!
رفع نفسه وهو يغمز لساره : هالبنت مو مضبوطه من الحين تبغى جوال وحركات !
ساره بتهديد مازح : ترى ما اسمح لك !
سلمان بطفش : وين جدتي؟!
ردت بدون نفس : دورها بالبيوت تلاقيها من بيت لبيت !
سلمان بكسل : صادقه جدتي ما تجلس بالبيت !
وش رأيك تتغدين معنا بالبيت !
ترى امي مشتاقه لك !
وحضرتك مو مستعده تزورينا !
جيبي قردتك الثانية وامشي معي
قاطعته سوار : انا مو قرده !
سلمان يضرب على صدره بتمثيل: يمه يمه من هالجيل !
يفهمون اكثر مني!
ساره دفته بخفه : على بالك بناتي غبيات مثلك !
رد بابتسامة : احم احم بصراحة توقعت يكونوا التوأم نفس الغباء إلي كنت فيه !!!
مسح مكان الضربه على كتفه : أهون عليك تضربيني ؟!!
خزته بعيونها : اقول تلايط من هنا
مسكها من يدها : والله والله الا تتغدين معنا اليوم !
طالعته بقلة حيله : انتظر اقفل البيت دقيقه !
نادت على حور وقفلت البيت وطلعت لسلمان إلي ينتظرها !
سلمان اشر بيده : تعالي من هنا ما في داعي نطلع من الشارع !
ساره بعناد : لا نطلع من البوابه على الشارع وبعدها نروح لبيتكم !
اشر لها وهو عافس ملامحه من عنادها : تفضلي يا سندريلا !
**
**
**
عفست ملامحها اول ما شافت ساره داخله مع سلمان ومندمجين مع بعضهم !
عدلت ملامحها لما تذكرت وجود عزام !
ما تبغى يصير بينهم زعل مثل ذيك المره !
ضاعت بين زوجها وابوها وإلي متأكده متفقين مع بعضهم ضدها !
وبطلوع الروح حتى وافق عزام يرجعها
بعد ما وعدته ما تتكلم على ساره وما تشتكي منها ساره !
اضطرت بالغصب توافق على شرطه !
وانقهرت بزياده لما شافت عزام يبتسم لساره : هلا والله بسوير القاطعه !
ساره سلمت على عزام بهدوء : انت القاطع ما تزور خالتك !!
كش عليها بمرح : ما بقى الا انت تكونين خالتي !
تراني عمك عزام اذا نسيت اذكرك !
وغمز لها بابتسامة !
سلمان بمرح : تراها ماخذه بنفسها مقلب !
ساره سلمت على ام عزام : شوفي عيالك ما يحترموني !
ام عزام ضحكت وما تكلمت !
بعدها سلمت ساره على نوره بسرعه وإلتفتت على سلمان : عيالي طولي
قاطعتها نسرين بابتسامه وهي تدخل : خالتي الحلوه عندنا !
اشرت عليها ساره : هذي الناس الفهمانه يا عالم !،
تعالي اعطيك بوسه !
ضحكت نسرين بعفويه : استحي !
وبتحقيق : غريبه جايه هنا
تنازلت ودخلت بيتنا ؟!
ساره جلست جنب أختها : عزمني ولد اختي على الغداء !
وين اسيل وخوله
قاطعها عزام : مو شايفه مرتاحين من بزرانهم !
طالعت ساره التوأم يلعبون مع عيال عزام : وبزرانك
قاطعتها ام عزام بابتسامة : عيال عزام ما يتقارنون بأحد !
سلمان تنرفز : ليه تحبين عيال عزام اكثر شيء !
وقسم بالله لما اتزوج اذا فضلتي عيال عزام على عيالي الا
نسرين بضجر: تزوج الحين وبعدين فكر بالعيال وغلاتهم
قاطعها بقرف : انت لا تتدخلين !
وين ابوي الحين ترى عندنا ضيوف وانا عازمهم على الغداء !
واشر على ساره !
ام عزام بنبره عاتبه تطالع ساره : ساره من أهل البيت وما هي ضيفه !
ما ادري ليه مصممه تجافينا كذا ؟!!
حركت شفتها ترد بس سبقها عزام : لا تبررين ترى الحق عليك !
امي اختك الكبيره المفروض تزوريها كل يوم او بين فتره وفتره تشوفينها
ام عزام تقفل الموضوع : اتركها على راحتها يا عزام !
**
**
**
**
انتهت ايام الامتحانات بعد تعب وعناء !
رفعت شعرها بالرباط وطالعت عمار وهو داخل البيت رد السلام بدون نفس !
عدلت شعرها وردت السلام وهي رافعه حاجب : وعليكم السلام !
جلس مقابل لها بطفش ومسك الريموت يغير القنوات !
عيونها تراقب حركاته مستغربه كم يوم متغير في شيء شاغل فكره !
واذا سألته وش فيه يرد عليها ببرود ما في شيء !
تكلمت وهي تحوس بوزها : يقال مندمج بالتي في!
طالعها بغموض وتنهد : وش تبغين ؟!
ساره بهدوء،: احس عندك سالفه تخصني ومخفيها عني !
صفر بإعجاب ساخر : واوووو عندك الحاسه السادسة ما شاء الله !!!
احتدت نظراتها : بدون سخريه انا اتكلم بجديه !
والحين تكلم وش فيه ؟!!
طالعها بجديه لثواني : ومستعده تسمعي كلامي وبدون ردح ومقاطعه ؟!
ساره بلقافه وقلبها يدق متخوفه لانه الشيء يخصها : تكلم وما عليك !
تنهد وهو يناظرها : رح اكلمك بالموضوع من باب الفضفضة !
والا الموضوع بالنسبة لي منتهي ومستحيل يتم !
ساره انحرقت اعصابها من مقدمته : إلي هو
عمار طالعها وابتسم بدون نفس على انفعالها وحب يثير اعصابها : افكر اغير أثاث المطبخ قبل ما اتزوج
سكت وهو يتصدى بيده الخداديه : عمار يا زفت !
تكلم مثل العالم والناس !
تكلم بعد ضحكه قصيره : اعصابك يا حلوه !
طالعته بحده : خلصني وقول إلي عندك !
عمار تحولت ملامحه للجديه : اسمعي يا ساره !
خالي ابو الوليد كلم محمد يبغى يخطبك لسعود
قاطعته بعدم استيعاب : نعم ؟!!!
عمار يعيد الكلام بطريقه بطيئه: يبغى يخطبك للدكتور سعود !
ساره تحس نفسها مو مستوعبه الكلام
ردت بغضب : خطبه القرد ان شاء الله !
اففف من هالخال الغثيث يظن الناس تمشي على هواه !
قاطعها وهو يؤشر بيده : وطي صوتك !
وبحده : انا وش قلت لك ؟!
ما ابغى ردح !
ما تفهمي الكلام ؟!!
اخذت ساره نفس عميق وعيونها على عمار إلي يتكلم : قلت لك مستحيل يتم الموضوع وخبرتك حتى يكون عندك علم وما تكونين مثل الاطرش بالزفه !
رفعت حاجب : و ليه رافض انت سعود ؟!!
عمار بهدوء : انا مو رافض سعود !
انا رافض الموضوع كله !
لا سعود ولا غيره !
قاطعته ساره بردح : نعم ؟!
وش علاقتك حتى ترفض الموضوع ؟!
هذا الشيء يخصني انا !
و حط خط احمر تحت «انا »
اذا بغيت اتزوج رح اتزوج وما حنتظر موافقتك !
هذي حياتي وانا ارسمها مثل ما ابغى
عمار تنرفز منها : صدق ما تستحين على وجهك !،
قدامي تقولين هالكلام !
انسي سالفه الزواج واهتمي بالتوأم !
ما هو ناقصنا الا الخامس يشرف !
حتى نصير علكة بحلوق الناس !
وقفت ساره بانفعال : الحين رح اكلم محمد
قاطعها وهو يسحبها بطريقه سريعه ويرجعها لوضع الجلوس : محمد ما يبغى توصلك السالفه !
بس انا لساني طويل !
الحق علي اذا خبرتك بشيء مره ثانيه !
زفرت بقهر وطالعته : عمار للمره الأخيره انبهك !
لا تتدخل بأمور حياتي !
هذا انت خطبت وما تدخلت بشيء بالرغم اني عمتك !
رجاء لا تتدخل بحياتي وما تتخذ قرارات بالنيابه عني !
فتح عيونه بشك : انت تبغين سعود وموافقه عليه ؟!!
حاولت تظهر قناع البرود : موافقه او رافضة هذا شيء راجع لي وما يخصك !
تركته وتوجهت لغرفتها !
تنهد وهو يفكر بحالها !
معقول موافقه على سعود ؟!!
ما يستبعد عنها بعد ما اخذت عنده ماده !
افكار البنات بالنسبه له غريبه!
عقليا لو بنت ناضجه مرت بالحياه إلي شافتها ساره الا عافت الزواج وسنينه !!
ما يقدر يفهمها كل ساعه لها حال !!!
**
**
**
قفلت الباب بقهر من عمار ومن ابو الوليد !
وش دخلهم بحياتها !
متأكده ابو الوليد يبغاها لسعود حتى تكون له سلطه عليها ويذوقها الويل !
بس مستحيل تحقق له مناه !
ورح تبقى شوكه بحلقه وحلق اخته !
للحين عقلها مو قادر يستوعب !
سعود يخطبها ؟!!
تمنت هالخطوه حتى تقهر ابو الوليد !
لكن الحين مو مرتاحه من هالسالفه
وقلبها قارصها !
اكيد عندهم شيء !
والا ما تنازلوا وخطبوها !
لازم تكلم محمد وتفهم السالفه منه !
ما رح تستعجل متآكده محمد اليوم والا باكر رح يتصل فيها ويخبرها !
لذاك اليوم لازم تجهز الرد إلي يبرد حرتها بابو الوليد !!
المشكلة ما احد خبرها او لمح عن ذي السالفه ؟!!
تأففت بضجر من تزاحم الافكار المتضاربه بعقلها !
الا شيء واحد اجمعت عليه هالخطبه مستحيل تتم !
**
**
**
**
عائشه بضجر من الجلسه بالبيت
كل شيء عنده لا !
وبفكره طرت لها وبسرعه ابتسمت مجامله وهي تشوفه ناوي يطلع : ماجد!
طالعها بضجر : نعم !
عائشه بنفسها «مالت عليك انت وهالكشه» وبمجامله :ينعم حالك !
امم عندي طلب !
ماجد بضجر اكبر : يا كثر طلباتك ؟!
خزته بقهر : وكلها مرفوضه !
قاطعها بملل : وش طلبك ؟!
عائشه بابتسامة : خاطري ازور ساره واجلس معها !!
ماجد رفع حاجب بابتسامة يغيضها : خلاص نويتي تخطبينها لي ؟!!
عائشه بغضب : ماجد !
ضحك على وجهها إلي تحول احمر من الغضب : اعصابك !
اقول اجلسي بالبيت يا زين الجلسه بالبيت !
ليه ما تزورك حضرتها ؟!
والا حضرتها سندريلا والكل يراكض خلفها !
طالعته وهي رافعه حاجب : علامك قالب عليها ؟!
طول وقتك محامي دفاع عنه !
الظاهر الشهر هذا ما دفعت لك اجرة المحاماه !
قاطعها وهو يدفها للخلف بخفه : بالضبط ما دفعت لي اجره !
جكر بلسانك الطويل ما رح تطلعين !
مع اني كنت ناوي تروحين لها !!
قاطعته بقهر : ما ابغى اروح !
وتركته وتوجهت للغرفة !
تكلم بصوت ساخر مرتفع : حركاااااات !
دخل خلفها وطالعها جالسه على كرسي التسريحه : كل شيء ولا زعلك !
تراني اموت لما اشوفك زعلانه والكشره مرسومه على وجهك !
علشان كذا
انا حطيت لك ملابس تبغى كوي !
تتسلين فيهم لوقت رجوعي حتى ما تملين يا زوجتي العزيزه !
وضحك بصوت مستفز وطلع من الغرفه !
قبضت يدها بقوه وهي ماسكه نفسها ما تكسر راسه !
**
**
**
**
ام الوليد طالعت حولها وبعدها إلتفتت على زوجها بصوت هامس : وش رد عليك محمد ؟!
ابو الوليد مط شفته بسخريه : تعرفين البنت اول مره يزوجونها ويبغون وقت !
ام وليد عقدت حواجبها : ذول من عقلهم يبغون وقت للتفكير ؟!!
طيب محمد موافق ؟!
ابو الوليد هز كتوفه : ما ادري عنه !

قال يفكر ويرد لي الخبر !!
ام الوليد بضيق : اخاف تظلم ولدي وساره بذي الزواج !
ابو الوليد بهدوء واثق : سعود قدها وما رح يظلم احد !
وتحمد ربها احد يأخذها مع بناتها !
ام الوليد : انا اقول تتريث بالموضوع ترى ابو الليث يبغى يخطبها لاخوه
اذا خطبها كذا ترتاح شروق وما تظلم سعود بهذا الزواج !
بو الوليد طالعها بسخريه : ومين قال انه اخوه يوافق عليها !
تراهم يهمهم المناصب !
وانت خالتك تعرفينها اكثر مني !
تهمها المظاهر كثير !
كم مره قالت لك انها طلبت من ابو الليث يطلق اميره
علشان اخوانها ؟!
بس اميره لها مكان بالمجتمع
يجبر الجميع يحترمها!
اتوقع ابوالليث يبغى يزوجها حتى يضمن عديل متخلف او مجنون !
كذا تكون قريبه من عينه !
ام الوليد بحيره من كلامه : تتوقع محمد يوافق على سعود والا على ابو نورس ؟!
ابو وليد بتآكيد : رح يختار ابو نورس بدون شك !،
تراه ما يقدر يرفض طلب لزوج اميره !

طلعت للحديقه وهي رايحه جايه !
نفسها تروح وتمسح فيه الارض !
الحين كرهته من قلب
متأكده جاوبت زين بالامتحان النهائي !
ينزل لها علامه على حفه !
علامه وترسب ؟!!
بعد سواد وجهه جاي يخطبها !
اخخ لو تروح وتمسح فيه الارض ؟!!
مترددة على ذي الخطوه !
تحس نفسها تموت لو ما طلعت حرتها فيه !
تقدمت خطوات بهدوء وابتسمت بنفسها وهي تشوف سوار واقفه مع سعود !
بدون ما تقترب كلمت سوار بحده : كم مره قلت لك ما تكلمين ناس غريبه !!
تعالي هنا !
مسك يد سوار بلطف وتوجه لساره بهدوء وبإسلوب ناقد : دامك خايفه على البنت من الناس الغريبه ليه تاركيتها تلعب في بيتنا !!
ساره بحقد : يا حبك للفلسفة !
لا تمثل دور الاب الحنون ترى مو لايق عليك الدور !،
يالظالم !
والله ما اسامحك على ذي العلامات !،
اذا كنت تكرهني تحط حرتك بعلاماتي ؟
سعود ببرود : انا احط للطالب العلامه إلي يستحقها !
بعيد عن العلاقات الشخصيه !
وهذا مستواك وعلامتك إلي تستحقينها !
الا اذا كنت تنتظرين احل الامتحان عنك !
هذا شيء ثاني !
انقهرت من اسلوبه حسسها انها غبيه : ما بقى الا انت تقيم مستواي !
زاد قهرها لما تركها وغادر المكان بهدوء !!
طالعت سوار بتهديد : اذا شفتك تكلمين هذا اذبحك بيديني !
نوت ترجع لكن حست رجلها ثبتت بمكانها وهي تشوف عمار ومعه ومحمد !

جالسه وما هي مرتاحه لرجوع محمد
بهذا الوقت !
ام محمد بعد السؤال عن الحال والاحوال سألت محمد باستغراب : غريبه راجع
لوحدك بهذا الوقت ؟!!
محمد بهدوء بدون ما يناظر ساره : عندي شغل هنا وراجع ان شاء الله !
ام محمد اشرت على ساره : بما انك هنا
علم أختك تحترمني وما تفشلني قدام الناس !
وكاد تسمع منك الكلام !
قاطعها محمد بهم : ان شاء الله !
ساره باعتراض :أ
محمد بمقاطعه : ساره خلاص فكينا من هالسالفه !
وطالعهم بجديه وخاصه امه: على فكره ساره رح تسافر معي وتستقر عندي !
طالعته ساره بصدمه من كلامه !
ام محمد اعترضت : نعم ؟!!
ليه تأخذها ؟!!
خلها تنطق هنا افضل لها !
وش جابرك تتحمل بناتها بعد !!
محمد بحزم : خلاص قررت وانتهينا
تركتها هنا وكانت هذي نهايتها !!
من باكر اجهز اوراقها وبعدها تسافر معي !
حست الصدمه ألجمت لسانها ...
كيف تسافر ودراستها والبنات ؟!!!
طالعته وعلامات الصدمه للحين آثارها على ملامحها....
على بالها رجع يزوجها
إما لأبو نورس او سعود ؟!!
أما تسافر معه ما خطر في بالها هذا الشيء !
حولت نظرها على عمار إلي يتكلم
بدون مبالاه من وجود ام محمد ما عاد يهمه سرية خطوبة سعود : وخطبة سعود يا عمي ؟!
محمد بحزم طالع عمار وبعدها ساره: انا ما رح احرمك من الزواج !
لكن تتزوجين واحد يقرب لنا
او تنضغطين يا ساره بالموافقه علشان بناتك
مستحيل يتم هذا الشيء !
قاطعته ام محمد بعد ما استوعبت الكلام : الحين الدكتور سعود يخطب هذي ؟!!
محمد بفخر : ايه خطب ساره !
له الشرف يخطبها !
ام محمد بعدم استيعاب طالعته وبزجر: كيف ترفض ولد اخوي !
محمد بلامبالاه : كل شيء قسمه ونصيب !
تركت المكان بعدم تصديق للكلام إلي سمعته !
زفرت ساره بضيق بعد خروج ام محمد وبنبرة اعتراض : ودراستي ؟!
محمد بثقه : رح أخذ اوراقك واضبط امورك تكملين دراسة برا !
هزت راسها بالرفض : بس انا ما ابغى اسافر الحين الا بعد الدراسه !
محمد بحزم : كلامي يتنفذ بالحرف !
انا ابغى مصلحتك !
اخاف باكر زوج اميره يخطبك رسمي لابو نورس !
وما نقدر نرفض !
انا ابغى اضمن لك مستقبلك عندي بعيد عن إلي حولك !
تبدين حياه جديده مع ناس جديده !
ما في صفحات ماضي سوداء بينكم !
صدقيني احيانا العيش بعيد عن الأهل افضل !!
بعض الاقارب ما تحصل من خلفهم الا وجع الراس !!
علشان كذا انا حزمت امرك
قبل ما تتكلم قاطعها جرس البيت !
طالع محمد عمار باستغراب : مين يجينا هالحزه ؟!
هز عمار كتوفه بعدم معرفه وتحرك يفتح الباب !
وقف محمد وهو يشوف خاله ابو الوليد داخل ومعه ابو راكان !
بعد السلام جلس ابو الوليد وجهه ما يبشر بخير وبنبره عاتبه : وش هالكلام إلي وصلنا يا محمد ؟!
تأكد محمد ان امه نقلت السالفه ومن المؤكد مع بعض البهارات !
وبهدوء تكلم : وش وصلك يا خالي !
أبو الوليد عيونه فقط على محمد : ترفضون سعود ؟!!
وش ينقص ولدي حتى ترفضونه ؟!
ردت ساره بتلقائيه وبداخلها انتعاش بعد هالرفض : للاسف الشروط إلي حاطها ولدك ما هي موجوده عندي !
طالعها بنظره قويه وبعدها طالع ابو راكان إلي تكلم بهدوء حازم : اتوقع ابو وليد وجه كلامه لمحمد !
محمد بهدوء طالع ساره : اتوقع الموضوع يخصها وهي اولى ترد !
ابو راكان بنفس الهدوء : ممكن نعرف اسباب الرفض بالرغم انه سعود ما يتعوض وفرصه ممتازه لاختك !
محمد تنهد بحرج : سعود ما يعيبه شيء !
بس ما اشوف تناسب بينه وبين ساره !
وباختصار انا ما ابغى ازوجها الحين !
ابو راكان بحزم : انا عمها وموافق على سعود !
وش تقول بعد كلامي يا محمد !
محمد بضيق : يا عمي انا
قاطعه بو راكان بنبره غاضبه : تقول لي انت عمي وكلمتك مسموعه !
وانت بمقام ابوي والحين اشوف العكس !
محمد انقلب وجهه : يا عمي انت على العين والرأس !
بس هذا الموضوع خاص بساره وما رح احد يقرر عنها
قاطعته ساره بهدوء : انا موافقه على سعود !
بس عندي شروط !
محمد طالعها بغضب ما يبغى يزوجها لسعود : ساره
عمار باعتراض غاضب ما يقل عن محمد : مستحيل يتم هالموضوع
ابو الوليد طالعهم وهو رافع حاجب : اشوف ولد أختي إلي رافض نسبنا ؟!!
محمد بترقيع : ما تفهم قصدي خطأ يا خالي !
ابو وليد بزعل : وش تقصد بعد هالكلام ؟!
محمد والضيق باين بوجهه : انا ما ابغى ازوجها لاحد يقرب لنا !
«الدم ثقيل على بعضه »
وما ابغى ترجع القطاعه مره ثانيه !
خلينا كذا حبايب بدون نسب !
ابو راكان بتدخل : عبدالله شيء وسعود شيء !
واصابع يدك مختلفه !
فلا تربط السالفه هذي بالماضي !
وطالع ساره بهدوء : وش شروطك ؟!!
ابو وليد انتفخ وجهه وبداخله «تتشرط بعد»
ساره طالعت محمد الغاضب وبهدوء تكلمت : الحين خطبه بس بدون ملكه!
والزواج بعد سنه ونص !
ابو الوليد باعتراض : سنه كثير
قاطعته ساره بهدوء غامض : عادي ماجد استمرت خطبته اكثر من 5 سنوات !
ابو راكان باعتراض : بس ماجد ملك عليها !
ما هو مجرد خطبه !
كيف الناس تعرف انك لسعود ؟!!
الا في حاله نعمل عزيمه كبيره ونعلن الخطوبه !
ابو الوليد باعتراض : ولدي مستعجل على الزواج !
وشهوله ينتظر سنة ونص !
ساره ببرود : ما رح اوقف بطريقه
يقدر يتزوج وحده ثانيه !
وانا بعد سنة ونص نتزوج !
طالعها محمد بغضب من طلباتها ووقاحتها بالكلام عن الزواج وكيف تقبل بالضره : وش هالكلام ؟!
ردت بنفس البرود : وش فيها ؟!
مو اول وحده ولا اخر وحده زوجها يتزوج 2
عمار وقف بغضب: ترى باخت السالفه !
هذا إلي نحصله لما نوكل البزران بالكلام !
ابو وليد جاز له كلامها ما توقع تكون بذي السهوله السالفه
ساره طالعته بحده : عمار لا تتدخل !
اتوقع الموضوع يخصني انا !
لا تتدخل وانا اتحمل نتائج اختياري !
طالعها محمد وحس انه بدأ يفهم عليها
وسبب كلامها هذا !!
ما توقعها خبيثه كذا !
قرر يسكت ويشوف اخر هالتمثيليه !!!
**
**
**
طالع جده بعدم استيعاب : وش تقول ؟!
ابو راكان بهدوء مع التحفظ على بعض كلام ساره : سعود خطب ساره !
واخر الاسبوع رح يكون عزيمه اعلان الخطوبه !
ماجد بعدم تصديق : خالي سعود خطب ساره ؟!
وبضحكه : الظاهر خالي وقع بصراحه ما ينلام !
قطع ضحكته وهو يشوف عبدالله يناظره بغضب !
ابو ماجد وهو يلعب بالسبحه : ترى هالسعود ما هو بعقله !
اعزب وتزوجها ؟!
ابو راكان بهدوء موجوع : ابو ماجد اتمنى ما تتدخل أو تعلق بشيء ما يخصك !
وبنت عمك ما ينقصها شيء !
سلمان باعتراض مازح : خالتي تنخطب وما احد يستشيرني ؟!!!
ابو عزام خزه : سلمان !
مسلسل السخافه ما نبغى نحضره !
كون جدي بذي المواقف !
سلمان بمزح : والله ما تضبط اكون جدك تراك ابوي اذا نسيت!
بلع ريقه لما شاف نظرات ابو راكان الغاضبه!
ابو تالا بهدوء : محمد موافق والا ساره ؟!!
ابو راكان بهدوء : محمد وعمار رفضوا بشده !
بس ساره موافقه واعطتنا الموافقه بنفس الجلسه !
حس عبدالله وجهه قلب احمر وغادر المكان !!
ماجد بضحكه شامته تكلم حتى يسمعه عبدالله : يمه جيل بعبع!
ما يعرفون الوفاااااااء
ابو ماجد بنهر بعد ما طلع عبدالله : انت وش تبغى من عمك ؟!
كلما تشوفه تبدأ بالنغزات ؟!
ماجد بجدية : لانه ضيعها من يده وفرط فيها !
والحين انبسط لما أشوف علامات الندم بوجهه !
ابو راكان بحزم : ماجد فكنا من المشاكل !
واترك المركب يسير !!!
عزام وقف وهو مقرر يروح ويسمع الموافقه بإذنه !
المره هذي مستحيل يقبل انها تنجبر هلى زواج ما تبغاه !!!،
**
**
**
نوره وبداخلها نار صحيح تمنت زواج ساره بس ما يكون العريس أخوها : انت كيف وافقت عليها ؟!
ترى متزوجه قبلك 4 !!
وفوق هذا عندها عيال،!!
ام الوليد طالعتها : خلاص خطبها وانتهينا !
قفلي حلقك وخاصه قدام عزام تراها خالته !
شروق حست بتأنيب الضمير : وش ذنبك تربط نفسك فيها علشاني ؟!!!
وليد بمزح : تراك ماخذه بنفسك مقلب !
اقول لك اخوك وقع بشباكها !
طالعه سعود وابتسم بدون نفس : يا سخفك !
وليد بضحكه : اعترف كم مره مسكتك ترسم قلب الحب واسمك واسمها ؟!
وبطريقه مضحكه : ترى ابغى انبهك
انها طريقه قديمه لتعبير عن الحب وخرابيطه !!
ام الوليد ما عجبها كلامه : يا سخفك يا وليد وش هالكلام؟!
هذا الكلام تقوله لنفسك مو لسعود تراه رزين وثقيل وما عنده حركات المراهقين !
وخزته بعيونها !
ضحك بصوت عالي وبتبرير : حرام عليكم !
تراكم ظالميني !
الحمد لله زوجتي ما هي جالسه وإلا طلقتني !!
ام ماجد ما هي رايقه لسوالف وليد !
مقهوره من الخطبه !
كيف تقول قدام معارفها هذي زوجة اخوها ؟!
مستحيل تعملها !
بس الكل رح يعرف بالموضوع !،-
وإلي يقهرها أبوها وابو راكان إلي حركوا هالخطبه !
كله من شروق ومن دلعها ومساختها الزايده !
اكيد خطبوها حتى ما ترجع لعبدالله !
والضحيه سعود !
وش ذنبه ؟!
طالعت سعود يستمع لكلام وليد ويبتسم بهدوء !
ما في على وجهه اي علامه للرفض او ضيق من الموضوع !
معقول سعود يبغاها واستغل هالفرصه ؟!!!
***
**
**
**
**
* فتحت عائشه عيونها بصدمه : خالك خطب ساره ؟!!
ماجد ابتسم :علامك منصدمه كذا ؟!!
مو مصدقه ؟!
عائشه جلست على الكنبه : بصراحه مو مصدقه !
ما ادري
يعني كيف
قصدي
سكتت ما هي قادره تجمع جمله صحيحه !
ماجد بضحكه : علامك فصلتي؟!
تنهدت وطالعته وللحين مو مستوعبه مع انها شاكه بميل سعود لساره : بصراحه تفاجأت شوي !
متى الخطوبه والزواج ؟!
وبسرعه وقفت : اتصل ابارك لها !
وتركته وتوجهت لغرفة النوم تكلم ساره !
**
**
**
**
اميره تطالع الصاله وبعدها سلطت نظرها على ساره تتأملها وتتأمل الجلابيه البسيطه عكسها تماما تحب الملابس احدث الموديلات بالرغم من كبر سنها !!!
تناولت القهوه من ساره و تكلمت بهدوء : ترى ابو الليث تضايق !
كان يبغى يخطبك لاخوه ابو النورس !
بس تبغين نصيحتي سعود فرصه حلوه
واحسن من ابو نورس بألف مره !
يكفي انه اعزب !
وتقدري تكسبينه بصفك !
اما اخو زوجي اعوذ بالله متسلط والحريم عنده مثل العبيد !
حتى اخوان زوجي كلهم نفس التسلط
ابو الليث اخف منهم بالتسلط !
متفهم اكثر منهم !
يعني بين قوسين اذا اخذت منهم لازم تكون شخصيتك قويه وما ترمين لهم واطي !
والا يستعبدوك !
وانت شخصيتك ما تناسبهم طيوبه وقلبك يلين حتى لو حقد !!
طالعتها ساره بقلب ميت : ما تفرق معي !
انا قرفت الحياة كلها !
اتمنى ألحق امي وابوي وارتاح !
ما ني قادره احصل على الراحه ؟!
وكأنها محرمه علي !
اميره تنهدت : صدقيني رح يسعدك سعود !
ترى اعرفه رجال اجودي ورح ترتاحين معه ،!
قاطعتها بقرف : اي راحه وخالك هو المتحكم !
بدون ما اكون لولده وهو يحاول يفرض سيطرته علي !
كيف الحين !
بس ما اقول الا الله يعيني على السنه والنص وبعدها افتك منه !
قاطعتها اميره بشك : وش سالفه السنه والنص هذي !
ساره انت ناويه
قاطعتها ساره وهي تهز راسها بحقد : ايه ناويه افركش الخطوبه بعد سنه ونص !
اميره تحاول تفهم خطط ساره : طيب ليه هالمده بالضبط ؟!!!
اصلا ارفضي اذا ما كنت مقتنعه وما احد يجبرك على الزواج !
ساره مطت شفتها بقرف : وزوجك المتسلط وش يضمني ما يضغط على محمد ويزوجني لأخوه !
واكيد رح انحرج من محمد وما اقدر ارده !
انا ما ابغى اتزوج خلاص اخذت نصيبي من الدنيا !
اميره بتفكير : تظني بعد هالمده حلوه حركتك ؟!!
طالعتها ساره بعجز : اعطيني حل ؟!
انا ما ابغى اتزوج ولا ابغى اسافر !
انا ما ابغى الا خلف !
تابعت كلامها بوجع : انا احس نفسي ضايعه !
اخاف اتكلم بأمور وتنقلب على رأسي !
انا ما ادري وش أتصرف ؟!!
اميره عقدت حواجبها بحيره من وضعها : ساره تكلمي وش السالفه ؟!!
طالعتها ساره تبغى تتكلم لعله الحمل الثقيل على صدرها يزول !
بالرغم من المرات القليله إلي جلست مع اميره بحياتها !
لكن تحس بالراحه بالجلسه معها وشيء بداخلها يدفعها تبوح بكل ما في داخلها : انا
سكتت لما دخل عمار وماد بوزه شبرين !
سلم على اميره وجلس يطالعهم : علامك سكت لما دخلت !
اميره بانتقاد : علامك داخل وماد البوز 3 امتار !
اذا وجودي مضايقك
قاطعها وهو يغصب نفسه هلى الابتسامه : لك صدر البيت يا عمتي !
بس بعض ناس
قاطعته ساره بحده : جالسه هنا على قلبك وما رح اتزحزح !
تظن ما ادري انك إلي اتصلت بمحمد يأخذني عنده !
علشان حضرتك تتزوج وتأخذ راحتك مع المدام !
لكن خذها على بلاطه جالسه على قلبك !
وما رح اسافر !
ابتسم بدون نفس على ملامحها المنفعله : صدق متخلفه !
تكذب الكذبه وتصدقها !
انا ابغى بس تحلفين بالله اني تواصلت مع عمي محمد وقلت له كلامك السخيف هذا !
اميره بدفاع : حرام عليك تظلمين عمار !
ترى ما له علاقه بالسالفه !
ومحمد رجع من نفسه ما يبغى سالفة الزواج كلها !
عمار بحنق مظلوم : والله ما اسامحك على ظنك السيء !
ساره بحده اقوى : ولا انا اسامحك على ظنك !
وقلدت صوته بسخريه « قولي تبغين سعود وفكينا »
عمار للحين مقهور من سالفة الخطوبه : خلاص قفلي الموضوع ترى للحين مو طايقك !
إلي يسمع يقول مو لاقيه لقمة الخبز حتى تتزوج كذا ؟!
وش قصرنا انا وعمي محمد حتى تدفني نفسك عند خالي ابو الوليد!
وقسم بالله الا يحرمك تشوفين النور !
والدكتور سعود ما يرفض كلمه لابوه !
صدق هذي العيشه والا بلاش !
وبنبره متوعده : وقسم بالله اذا جيتي تشكين لي الحال الا
قاطعته اميره : عمار !
ابغى افهم ليه انت منفعل زياده !
عمار وبداخله نار : الناس العاقله تستشير الاكبر منها بذي المواضيع !
وانا وعمي قلنا لها لا !
ومع ذلك بقوة عين وافقت !
غبيه وطول عمرك رح تبقين غبيه !
على بالك خطبوك معجبين بجمالك الفتان ؟!
ترى خطبك ابو الوليد حتى يبعدك عن خالي عبدالله إلي للحين عايش على اطيافك !
ما شفتي جدي ابو راكان مشى بهذا الموضوع بالرغم انك كنت خطيبة ولده !
ومع ذلك مشى بالموضوع لانه يعرف رجوعك لعبدالله رح يدمر ويخرب أكثر من بيت !
كذا ضحى بعبدالله وقطع اي طريقه يرجعك فيها !
وما انتهينا هنا !
على بالك فرحانين بنسبك وانك زوجة ولدهم الدكتور الاعزب ؟!
لا يا حلوه فترة قصيره ويتزوج بنت الحسب والنسب ..
وانت ؟!!
رح تكونين مثل الجدار مالك وجود بحياتهم !
قاطعته ساره ببرود : وانا موافقه اكون جدار !
طالع عمته اميره والدخان يتصاعد من راسه : هذي إلي ابغى اذبحها واشرب من دمها !
اميره بهدوء : اتركها يا عمار !
تراها مو صغيره !
طول عمرها الكل يحركها يمين ويسار
بدون اراده منها !
اتركها لمره وحده تتخذ قرار بنفسها !
انت نصحتها وإلي عليك عملته !
طالع ساره يبغى يذبحها من الغباء إلي ملتصق فيها بنظره !
ناظرته بابتسامه مستفزه !
عمار بغضب صرخ : شفتي بعينك حركاتها !
اميره صفقت يد بيد : لا حول ولا قوة الا بالله !
انتم بزران ؟!
انا وش إلي جابني هنا !
وجعتم رأسي !
اروح اجلس مع امي في بيت خالي ابو الوليد احسن لي !!!
***
***
***
بعد مرور يومين
جالسه بالحديقه لوحدها تطقطق بالجوال والتوأم حولها منشغلين باللعب !
من لما رجع محمد من السفر ما تشوفه كثير
منشغل مع صديق له بالعمل !
ما غابت عنها نظرات عدم الرضى على تصرفاتها !
اخذت نفس ورفعت نظرها عن الجوال
وابتسمت تلقائيا لما شافت عائشه متوجه لها !
ما احد يتغطى بالعائله الا عائشه ونوره !
اقتربت عائشه بفرح وناظرت حولها : اخوك و ولد اخوك هنا ؟!
توسعت ابتسامة ساره : ما في احد خذي راحتك !
جلست متربعه وتناظر حولها : اخاف اكشف ويطلع بوجهي واحد من اخوال ماجد !
ساره بهدوء اشرت لها : اجلسي كذا
حتى لو طلع واحد منهم ما يشوفونك !
عائشه بعد ما عدلت جلستها ابتسمت بغمزه : حركات والله ؟!
وضبطتي الدكتور سعود !!
ساره بهدوء تغير السالفه : وش صاير بالدنيا وزرتيني ؟!!
عائشة مطت شفتها بقرف : جلطني !
طلعت روحي حتى وافق على هالزياره !
المشكلة انه ما هو مستوعب اني من لما عرفت انك ساره وقلبي مشتاق للجلسه معك !
بس انت سخيفه مو معبريتني !
ساره بإتهام : قول هالكلام لنفسك ما تركتي فرصه اكلمك !
من اول مره شفتك وانت تتعاملي معي بفوقيه وكأني اكلت حلالك !
مطت شفتها عائشه : كله من هالماجد !
وحكت لها عائشه السالفه !
فتحت ساره عيونها بصدمه: صدق إنه وقح !
ما بقى الا هالغبي اناظره !
خزتها عائشه : صحيح انه جالطني وحاط المر بحلقي !
بس ما اسمح لك تشتمين زوجي !
ساره بضحكه : وصرنا ندافع !!
عائشه بإحباط : الحياة تبغى كذا !
لازم نرضى بنصيبنا !!!
وكل شيء قدره ربنا لنا نرضى فيه !
لأنه الوضع الافضل لنا !
لو اطلعنا على الغيب لاخترنا هذا الحال إلي اختاره لنا ربنا !
هزت راسها بموافقه : الحمد لله على كل حال !!!
***
***
***
***
***
ام محمد للحين النار بقلبها كيف ساره تتزوج سعود ؟!
وبعيون حاقده : خلاص رضختي لهذا الزواج ؟!!
اول بخته ويتزوج ساره المطلقه الارمله ؟!!
طول عمرك يهمك المظاهر ... كيف تقبلين زوجه لولدك !
الناس وش رح تقول عنك ؟!!
ام الوليد بهدوء : قولي هالكلام لاخوك !
ما احد حط سالفة الخطوبه غيره !
وما احد سامع لاعتراضاتي !
وحتى سعود وكأنه ما صدق ابوه يعرض عليه وعلى طول وافق !
ام ماجد بقهر ؛ لا تتكلمي بهذي السوالف ترى احس ضغطي يرتفع !
وش فيها شيء مميز عن باقي البنات ؟!
ام راكان طالعتها :لانك ما تحبينها ما تشوفين شيء مميز فيها !
دام سعود موافق عليها ليه الكلام الزايد الحين ؟!
الله يوفقها ويسعدها !
ام محمد بكره وحسد : لو يتم هالموضوع الا انجلط !
ام راكان بحق : اتركي البنت بحالها وش تبغين فيها ؟

ابو الليث طالع امه : هذي البنت انخطبت لو سمعتي كلامي وافقتي عليها ؟!
مطت شفتها بفوقيه ما تبغى شيء يقرب لاميره : الله يوفقها !
وبعدين ابو نورس ما يعجبه اي بنت
ويبغاها بنت في بيت اهلها !
ابو الليث والسبحه بيده بسخريه : ويتشرط بعد !
تراها الرابعه !
ردت بنفس النبره المغتره : الرجال ما يعيبه شيء !
شوفه عنده 3 حريم ولا وحده تقدر ترد له الحرف !
وبعض ناس متزوجين وحده وما هم قادرين عليها !!!
ابتسم على مقصدها : وين عيالك ما اشوف احد هنا ؟!!
وابو الحريم ما اشوفه !
ردت بدفاع : عنده مشاغل !
هز راسه بتفهم : وعيالك العوانس متى ناويه تزوجينهم ؟!!
هزت راسها بعجز : ذبحوني ما احد سامع كلامي !
واحد ما يفكر بالزواج يبغى يعيش حياته
والثاني يقول ما هو مستعجل على غث الحريم !!
ابو الليث وقف بهدوء : خلليهم !
اروح أجهز نفسي للخطوبه !
رفعت حاجب : غريبه ام الوليد ما عزمتني على الخطوبه !
ابو الليث بهدوء : ما في حريم بس عشاء للرجال !
طالعته بتفكير : ما أذكر اني شفتها من قبل !
رد بدون اهتمام : هي ما تحضر حفلات وهذي الخرابيط !
إستأذن وطلع من عندها !
وهي تحاول تستذكر اذا شافتها من قبل او لا !
حتى الحفلات إلي تحضرها ام محمد تكون لوحدها !
اخر زواج لهم كان لابن ام ماجد !
اميره ما حضرته !
لحظه مها كانت موجوده !
بس ما شافتها وقفت مع احد غريب !
او يمكن وقفت وما انتبهت !
هزت رأسها بالرفض ليه تفكر فيها من اصل !
يمكن الفضول ذبحها تشوفها لانها ام وسيم كلمتها عنها !

**
**
**
**

يوم العزيمه اجتمع أغلب المدعوين في بيت ابو راكان !
محمد يناظر المتواجدين بهدوء بعد ما اعلنوا الخطوبه ويحس بضيق مو مرتاح لهذا الموضوع !
طالع سعود راسم ملامح الرضى على وجهه !
اما ابو الوليد مبتسم !!
تنهد وهو ناوي يكمل مراسيم هالخطوبه ويرجع يسافر !
حاول يبعدها عن الزواج بس اصرت !
رح يتركها تتخذ قرارها بنفسها !
رفع عيونه على الداخل بملامح ما تبشر بخير نطق بثقل ورزانه : السلام عليكم !
وقف اغلب الحضور للترحيب فيه
ابو راكان بترحيب مبالغ فيه : يا هلا يا هلا بأبو فهد !
ابو الوليد بترحيب واشر على صدر المجلس : تفضل تفضل !
طالع الموجودين وبعدها بنبره قويه وجه كلامه لمحمد وابو راكان: ما كانت هذي سلومنا يا ابو راكان !
طالعوه بعدم فهم !
وجه كلامه مباشره لمحمد : من متى يا ابو خالد الحرمة المتزوجه تنخطب وهي على ذمة زوجها !
ابو راكان عفس ملامحه : وش تقصد بكلامك ؟!
طالع ابو الوليد بنبره غاضبه: ترى إلي خطبتها لولدك واعلنت خطوبتها
تكون زوجتي على سنة الله ورسوله
قاطعه سلمان المندفع : كذاب !
توجهت انظار المجلس لسلمان بانتقاد على كلامه !،
كيف يقول لابو فهد هالكلام !!
ابو الليث وقف بحزم : احترم ألفاظك يا سلمان
سلمان ما اهتم لنظرات من حوله ولكلام زوج اميره وطالع ابو فهد بتكذيب : معك اثبات
قاطعه ابو راكان بنهر :،سلمان !
تقدم كم خطوه وهو يمد بورقه العقد لابو راكان !
تناول ابو راكان الورقه وبعدها
غمض ابو راكان عيونه لثواني وتحول وجهه للاسود بعد هالفضيحه !
محمد لا يقل عنه يحس نفسه بدوامه والدنيا تلف فيه !
وش هالموقف المخزي والمحرج بنفس الوقت !
يزوج اخته المتزوجه !
وش تقول الناس عنه !
والمصيبه ما توقع ابو فهد زوجها !
وين المجنون إلي تكلموا عنه !
وبنبره ضعيفه يبرر موقفه قدام المتواجدين : بس انت طلقتها !
ابو الوليد ما هو قادر يستوعب ابو فهد متزوج ساره !!
ناظر من حوله وعلامات الدهشه والاستنكار بنفس الوقت مرسومه على ملامح اغلبهم !
وبنبره هاديه : تفضل اجلس خلينا نفهم السالفه !
رد بعدم رضى : اي تفاهم ؟!
تحرك محمد يجر اذيال الخزي من هالموقف وش يبرر لهم ؟!
كيف كذبت عليه ساره وقالت له انه زوجها ميت !
لذي الدرجه مستخفه فيه ؟!!
كيف لعبت عليه وصدقها !
ابو الوليد ما هو مستوعب شيء: بس البنت انت طلقتها وعدتها خلصت !
طالعهم بقوه : ومين قال اني طلقتها ؟!
محمد وقف يبرر بكذب: انا وقفت محامي للقضيه
وخبرني انه طلقها انا
قاطعه بحزم : قول لاختك تجهز نفسها ترجع معي الليله !
هز محمد راسه وطلع من المكان يأخذ هواء بعد الاختناق إلي حصله !!!
ابو ماجد حلف عليه الا يجلس بعد خروج محمد !
ابو الليث طالعه بعدم استيعاب للموضوع !
عمار بهدوء حاول يرد الاحراج إلي حصلوه : دامها زوجتك للحين !
ليه تاركها طول هالسنين وما سألت عنها ؟ !
هذي هي سلوم العرب ؟!
رد بثقه : سلوم العرب ما تتدخل بين الحرمه وزوجها !
وقف عمار وجهه منتفخ وبهمس متوعد : يصير خير !
ابو راكان يحس نفسه متغيب عن إلي حوله !
كل اللوم عليها وعلى محمد وعلى المحامي النصاب !
اخذ نفس وبإعتذار : بإسمي وبإسم عيال اخوي نعتذر لك عن هالغلط !
حسبي الله على المحامي كيف كاد يعمل فتنه بين العائلتين !
هذا حال بعض المحامين النصب حتى يحصل كم فلس !
ابو الوليد يكمل : وانا وسعود نعتذر لك !
ما كان عندنا علم سابق انه للحين على ذمتك !
رد بهدوء وبداخله غضب كيف يخطبونها وهي على ذمته ؟!
حتى لو ما تعني له شيء
تبقى من ممتلكاته وما يسمح لاحد يتعدى عليها !
للصدفه سمع عن خطبة سعود من امه والا كان مثل الاطرش بالزفه !!!
***
***
***
مستلقيه على السرير بارتخاء وتتصفح كتاب وعقلها بالخطوبه !
تتخيل لوفعلا كانت حقيقه !
وتكون عروس مثل باقي البنات !
قطعت افكارها على دخول محمد !
جلست على السرير بعد ما حطت الكتاب جنبها !
استغربت لما توجه لها وملامحه ما تبشر
بخير
قبل ما تكمل تأمل بملامحه تفاجأت بالكف على خدها وبصوت غاضب : ليه تضحكين علي ؟!!!
ليه تخليني مسخره بالمجلس للي يسوى وإلي ما يسوى !
خليتني بحجم النمله !
ما اقدر ارفع رأسي !
ليه ليه جاوبي !
فاتحه عيونها باستنكار محمد يضربها ؟!
وعلى ايش تجاوب ؟!
ما هي فاهمه شيء !
ردت بحيره والدموع بدأت تتجمع بعيونها : ماني فاهمه عليك ؟!
تكلم والنار تغلي بداخله : كيف قلتي زوجك ميت ؟!
على اساس انك ارمله ؟!
اخخخخخ ذبحتيني يا ساره !
فشلتيني !
وش الذنب إلي اقترفته بحقك حتى تجازيني كذا ؟!!
وبصرخه ؛ وش ذنبي ؟!
بلعت ريقها وهي تناظره ما تدري وش سبب ثورانه وش دخل زوجها الميت بالسالفه !
وبصوت هادي : انا ما كذبت زوجي ميت
قاطعها بقهر وهو يهزها من كتوفها وإلي يقهره اخو زوجها خاطبها وما تكلمت وبغضب : انا الغبي إلي ما سألت مين زوجك بالضبط !
قالوا مجنون وصدقت هالكذبه !
هزها بأقوى : دامه زوجك ميت ابغى اعرف وش اسمه ؟!
طالعته وهي تشوف ملامحه الغاضبه !
شد على كتفها بقوه حاولت تفلت نفسها وبصراخ ردت : اتركني !
زاد من قوة القبضه : مين زوجك ؟!
حاولت تفلت منه وبحده : ما اعرف ما اعرفه !
روح إسأل اخوك الزفت لمين زوجني !
انا ما اعرف حتى اسمه !
انا ما اعرف شيء عن هالمجنون السكير !
ما اعرف الا انه مات وارتحت منه وجعلني قريب ارتاح منكم كلكم !
وابعدته بقوه وبصراخ : اتركوني بحالي !
جلست على الارض وعيونها بالارض
ودموعها تنزل بغزارة !
محمد بغضب : لا تجننيني زوجك في بيت عمي ابو راكان جاء وفضحنا بين المعازيم !
رفعت راسها بعدم استيعاب : كيف ؟!
خلف قال انه مات ؟!!
الميت ما يرجع
محمد جلس على الكرسي ويحس خلاص ما بقى شيء على جلطته : الله يأخذ خلف !
اسمعي ترى زوجك جاء يأخذك جهزي نفسك !
ضحكت وسط دموعها : وين يأخذني للمقبره !
دق محمد على صدره بقهر: على وش تضحكين يا حظي !
يحس نفسه كان مغفل طول هالسنين !
جلس على الارض مقابل لها : ابغى اسمع السالفه كامله من بعد طلاقك من الزفت عبدالله !
فاهمه !
طالعته وعيونها تنذر بسيل دموع جديد : خلاص انا مليت !
خلف يقول انه ميت !
وانت تقول زوجك في بيت عمي ابو راكان !
الظاهر كلما شفتم مجنون حسبتوه زوجي !!
دف راسها بخفه : ما لقيت الا هذا تقولين عنه مجنون !
والله انت المجنونه !
ابتسمت والدموع تلمع بعيونها : إلي يعيش معكم يبقى فيه عقل ؟!!!
محمد يحثها على الكلام : تكلمي ترى اعصابي محروقة والدم يغلي بعروقي !
هزت راسها وطالعت لجهة الشباك وعقلها يستذكر ذيك الايام