رواية أقدار~للكاتبة ضاقت أنفاسي الفصل الثاني والعشرون 22 - بقلم BlackButterfly002

~~
~~
~~
~~

طلع ماجد و خلفه عمار وسلمان
ابو راكان جالس يناظرهم بصمت لدقائق
وبعدها تكلم وهو يناظر ابو الوليد : وش رأيك فيها يا ابو الوليد ؟!
انا اقول تقدر تروضها
تحدقت كل العيون عليه بصدمه من هالكلام !!
تكلم عبدالله بانفعال : انا مستعد ارجعها
قاطعه عزام بصوت غاضب : جدي وش تقول ؟!
ابو راكان طالعهم باستغراب: علامكم تناظروني كذا ؟!!!
ابو الوليد بزعل : خلاص ما ابغاها اعرف واحد وعدني قريب بمهره
قاطعه وليد وهو رافع حاجب : الحين تتكلمون عن الخيل ؟!!!
ابو راكان عقد حواجبه : لا عن القرود !
وطالع ابو الوليد : خلاص انا قررت اعطيك إياها !
وخلي العمال ينقلوها للاسطبل
تنهد وليد والاغلب براحه !!
راح تفكيرهم لساره !
استأذن عبدالله وطلع وحمد ربه ما احد علق على كلامه !
يمكن ما احد انتبه لها !!
توجه للبزران لما شافهم متجمعين يلعبون !
رفعت ندى راسها بفخر: بابا
اقترب منهم وعيونه على التوأم يتأمل بهدوء !
ما يشوف اي تشابه بينهم وبين ساره !
لو تمم زواجه منها كان ذول بناته !!
طرد فكرة ارجاعها لذمته لانها
«مستحيله»
ندى بدلع مسكت يده : بابا شوف لجين تبغى تلعب مع ثوار وما تلعب معي !
سوار تخصرت بطفوله : غشاشه وما نبغى نلعب معك !
لجين مسكت يدها بتأييد : ايه مانبغى نلعب مع غشاشين !
ابتسم على جنب بناتها عاملات احزاب هنا!
وبحزم تكلم : ليه تغشين يا ندى!
ندى مطت شفتها بزعل : انا ما غشيت حور قالت اني غشيت !!
طالع التوأم بحيره ما يدري اي وحده حور !!
اشرت سوار على اختها : هذي حور
وانا سوار !
اختي ما تكذب !
ندى الكذابه والغشاشه
صح يا بنات !
اغلب البزران هزوا راسهم بتأكيد !
تضايق وهو يشوف ندى تبكي وكيف قلبت البزران ضد ابنته !
وبحده : سوار
قاطعته من خلفه بحده اكبر : لا تكلم بناتي كذا !
إلتفت للخلف وطالعها وبعدها وقف
وطالعها بحده : هذي الاحزاب ما ابغى اشوفها هنا !
قلبت البزران ضد هالبنت !
ترى
طنشت كلامه وهي تناظر التوأم : يلا للداخل !
وبطاعه غادروا معها !
إلتفت على زولها لثواني
وصد عنها
وايام الخطوبه تتراقص قدامه !!!!
***
***
***
دخلت عند الحريم بهدوء !
ام وسيم تناظرها بابتسامة دافئه : ما شاء الله ذول بناتك ؟!!
ساره وهي تجلس مقابل لها : ايه بناتي !!
تأملت التوأم : يشبهون
قاطعتها ساره بهدوء : بناتي ما لهم شبيه !
أم حمد تناظر ساره : الله يحفظهم !
ساره بهدوء : امين ويحفظلك عيالك !
ام وسيم بتأمل : انت فيك شبه كبير من مها ابنة اميره !
ام حمد بتأييد : الشبه كبير اول ما شفتها ظنيت انها مها !
حتى الطول نفسه !
بس يمكن مها جسمها ممتلئ اكثر !
ام وليد تطالع ساره بصمت وبداخله تتمنى يتم الموضوع حتى ترتاح شروق من الكابوس !
ام وسيم باستغراب : ماكنت ادري انه لاميره اخت صغيره !
حتى لما نجلس ما تتكلم عنكم كل كلامها عن زوجها وعيالها !
ام وليد : كم سنه لها ساره ما شافت اختها ؟!
اميره طول وقتها بالسفر وساره تزوجت وكل وحده بطريق !
ولا تنسي فرق العمر
ترى ساره اصغر من عيال اميره !
ام حمد هزت رأسها: صادقه !
وطالعت سوار بابتسامة : وش اسمك يا حلوه ؟!
سوار اشرت على نفسها : انا سوار وهذي حور !!
ام بهاء طالعت ساره : يمكن اول مره تشوفينا ؟!
هزت ساره راسها:ايه اول مره اشوفكم !
دخلت نوره وطالعت ساره وهي رافعه حاجب : إخواني يبغون يدخلون يسلمون على خالاتي !
واشرت لساره تطلع !
ساره وهي تعدل جلستها : انا مو متحركه من هنا !
والا خايفه على وليد يستحي مني ؟!
نوره انقهرت منها وطالعت امها إلي تكلمها : خلهم يدخلون ما في احد غريب !
مطت شفتها وطلبت منهم يدخلون ! اشغلت نفسها بالجوال وهي وتسمع وليد يتكلم مع خالاته بمرح !
عكس سعود ما سمعت صوته الا بالسلام !
تذكر اول ما دخل المستشفى كان عصبي لحد لا يطاق
لكن الحين العكس بارد لدرجه لا تطاق !!!
ام بهاء بابتسامه : كيف التدريس بالجامعه يا سعود ؟!
سعود بهدوء : الحمد لله
بعض الطلاب النشيطين يرفعون الراس
وتفتحر فيهم
وبعض طلاب فاشلين يجيبون المرض-
الدراسه بصوب وهم بصوب !
رفعت راسها وحست كأنه يقصدها !
إلتقت عينها بعينه وسرعان ما نزلتهم وهي تفكر
معقول عرفها ؟!
يمكن صدفه !
اخذت نفس وطالعت ام بهاء تكلم سعود : عسى عجبتك وحده من هالبنات ؟!
ابتسم سعود : ان شاء الله خير
قريب تسمعون الاخبار الحلوه !
نزلت نظرها وتضايقت ما تدري ليه !
ماهمها سعود بس ليه تضايقت ؟
يمكن حتى ما تشوف نظرات ابو الوليد بعد ما يخطب وهو يقول «شوفوا خطيبةسعود» وانها ولا شيء بنظرهم !
او
ما تنكر سعود الشخص إلي تتمنى بقلبها ترتبط فيه !
حتى تثبت لهم انها تقدر تتزوج واحد اعزب وشاب وشخصيه وله منصب بالمجتمع !
تداهمها احيانا افكار توقع واحد من عيال ابو الوليد بشباكها
ولما يتقدم لها ترفضه
حتى تقهر ابو الوليد !
بس تتوقف عن هذي الطريقه
لانها اسمى وارفع من مطارده الشباب !
نصيبها رح تأخذه غصب عن الراضي والزعلان !
رفعت نظرها بضيق على كلام ام حمد : وش رأيك بالرجال إلي يتزوج على حرمته !
ما كانت تسمع كلامها وقع نظرها على وليد إلي يدافع عن رأيه : الشرع حلل اربعه !
نخفف من العنوسه !
ام حمد طالعت ساره باهتمام : انت وش تقولين بذا الموضوع ؟!
طالعت وليد ولاول مره ابتسمت له : إلي عنده قمر يناظر الكواكب !
عندك مريم قمر وش تبغى بوجع الراس ؟!!!
ابتسم اول مره تعطيه وجه : نخفف من العنوسه !
ام الوليد كشت عليه : اقول انكتم بلا عنوسه بلا خرابيط !
خفف من العنوسه وشوف لاخوك عروس نفرح فيه !
وليد طالع سعود وغمز: لا تخافين يمه تراه مضبط وضعه!!
ام بهاء خزته : الظاهر إنها عروستك جاهزه ؟!!!
تخبي علينا ؟!!
ضحك سعود بضحكه قصيره : للحين ما صار شيء !
ام حمد بلقافه : كم عمرها ؟!
طالعها بتفكير وناظرها بابتسامه :عمرها 24سنه !
حست ساره بمويه بارده انكبت فوق راسها
كان عندها امل تكون هي !
وتثبت للجميع انها مثل باقي البنات الناس تخطبها !
ام بهاء بلقافه : تدرس والا تشتغل ؟!
سعود بابتسامة : افف تحقيق !
خريجه هذا الفصل من كليه الطب !!
واهلها واخوانها مناصب والكل يمدح بأخلاقهم !!
والبنت مؤدبه ومحترمه !
لهذي اللحظه كرهته وهي حاسه انه يقصدها !
الكل يعيرها بإخوانها !!!
حست المكان يضيق عليها ويخنقها !
وخاصه بعد كلمة نوره المقصوده : الاهم تكون «عزباااء»
سعود بتأكيد : هذا اهم شيء !!
ام بهاء ذبحتها اللقافه: كيف شكلها
قاطعها : الظاهر ما رح اطلع الا لما تعرفون بنت مين وكل مواصفاتها !!
وطالع وليد إلي عيونه على ساره المنشغله بالجوال : قوم نطلع
وليد عدل نظراته : خلينا شوي !
خزه سعود بحده : قوم اشوف !
وقف وليد بانصياع : تفضل يا دكتور سعود !
رفعت نظرها على خروجهم وحست بشيء ارعبها
قاطعتها ام الوليد : شوفي البنت نامت
واشرت على سوار على الكنبه جالسه ونايمه !
وقفت بهدوء وحملتها بشويش وطلعت من المكان
تجمدت مكانها وهي تسمع المشاده الكلاميه بينهم
_ قسم بالله مسختها تناظرها وكأنها وحده من محارمك !
وليد بانكار : انا ؟!
انا ما ناظرتها كنت اناظر التوأم !
سعود بنبره حاده : ما بقى الا اخت النصاب تناظرها !
الافكار إلي معششه براسك طيرها
لو يدري ابوي عنها الا
قاطعه وليد بضجر : اي افكار !
تراك تتوهم !
لو بغيت اخطب على زوجتي
اخطب بكر وبنت عالم وناس
العرس دساس وما اقبل خلف يكون خال عيالي !
سعود تكتف : وش تفسر نظراتك ؟!
وليد : تقدر تقول تسليه
قاطعه بتحذير : انتبه منها الظاهر مو هينه هالبنت
دوبني شفتها واقفه مع عب
وغابت اصواتهم عنها !!!
اوقح من كذا ما شافت !!
سعود إلي كانت تشوفه محترم وما يتدخل بأحد يتكلم عليها كذا ؟!!!
عضت شفتها بقهر لازم مسحت فيهم الارض !
قررت تحط سوار بالغرفه وبعدها تجمع افكارها من جديد !
صعدت وتحس النار مشتعله بداخلها !!
غطت سوار بشويش وطلعت من الغرفه
تشوف حور يمكن نامت وبعدها يصير خير !!
قبل ما تدخل وقفها كلام ام وسيم : والله خالتي رفضت لما عرفت انها اخت اميره !
تقول يكفي وحده رافعه خشمها للسماء
حتى نبتلش بالثانيه !
ام وليد باستغراب : اميره علاقتها بأهل زوجها مو زينه ؟!!
ام وسيم : الله يصلحها رافعه خشومه بزياده !
عاد انا قلت لخالتي والله البنت حبوبه وحلوه مو مثل اميره
بس مااقتنعت بالكلام تقول اخت اميره ما نبغاها !!
تحس خلص الاكسجين خلص من حولها
وين ما تروح مرفوضه
والسبب
اخوانها !!
حتى المتزوج 3 يدلل عليها ؟!
غادرت المكان بضيق وهي تشتم نفسها
ليه تسمح لنفسها تفكر بذي الامور !
مو كانت حازمه بأمر الزواج ورافضه الفكره نهائيا !
ليه دندنت اذانها لذي السوالف ؟!!
قبضت على قلبها بوجع
بعمر الزهور وانحرمت من الاستقرار
مثل باقي البنات !
جلست بالحديقه على العشب
وهي تجدد الكره
لجنس الرجال
خلاص ما تبغى الزواج ورح تكتفي
بالتوأم !
نزلت رأسها بضعف وهي تبرر لنفسها
فتحت اذانها لذي السوالف
حتى تثبت لمن حولها في من يبغاها
وما هي منبوذه مثل ما يردد من حولها !
نزلت دمعه وحيده تشكي حالها !
سرعان ما مسحتها لما حست
بأحد فوق راسها !
جلس عندها بعد ما نزلت راسها وما علقت على وجوده !
تنهد وسحب يدها حتى تلتفت عليه : علامك جالسه لوحدك ؟!!
ما رفعت راسها وما ناظرته وهي تحس بالغصه بحلقها !
شدها بالخفيف لجهته بتلقائيه ناظرته لثواني وصرفت نظرها !
استغرب الدموع المتجمعه بعيونها وبلهجه حانيه ما تعودت عليها منه : سوير !
وش فيك ؟!
احد ضايقك ؟!!
ما شاف منها اجابه !
اقترب منها وحضن راسها وبصوت كله حنيه : مين زعلك ؟!!
وقسم بالله الا امسح فيه الارض وما اسكت له ؟!
حاولت تبعد عنه بس هو شد باحتضانها : تكلمي وما تحطين بقلبك !
تراك غاليه على قلبي !
حتى لو عاملتك بحزم وجفاء
ترى لك مكان بقلبي من طفولتك !
قولي من زعلك ؟!!
خفف من احتضانها لما حس إنها رح تتكلم !
رفعت راسها وسيل الدموع يجري على خدها تكلمت بصوت باكي : حتى لو كانت احب مخلوق على قلبك تأخذ حقي منها ؟!
طالعها ومسح دموعها وكأنها طفله : حتى لو من نفسي الا اخذ حقك !
تكلمت وهي تمسح الدموع من جديد : نوره !
رفع عيونه وطالعها : نوره ؟!
هزت راسها بتآكيد : نوره ما تخليني بحالي
سكت لثواني وبعدها تكلم : وش قالت نوره !
ساره طالعت عزام : إسأل اسيل !
حتى اخوها الزفت سعود سمعته يقول لاخوه ينتبه مني اني مو مضبوطه
يقول شافني واقفه مع عبدالله !!
قاطعها بغضب من كلام سعود :،سمعتيه بإذنك والا احد نقل لك !
ردت بتأكيد : سمعته بإذني بدون ما يشوفوني !
مسح دموعها لما شاف ماجد يقترب منهم : قفلي على الموضوع وانا اتفاهم معهم !
وصدقيني ما تشوفين الا إلي يسرك !!
لبست نظارتها وهي تمسح وجهها تخفي اثار البكاء !
اقترب ماجد بضحكه : ما شاء الله ما اصدق عيوني
عزام وساره !
عزام رفع حاجب : وين سلمان وعبدالرحمن عنك ؟!
رد قبل ما يجلس : رجعوا مو عاجبهم الجلسه هنا !
ملل!
حتى عمار رجع عنده مناوبه !
جلس وانتبه لوجه ساره المنتفخ وإلي يدل على البكاء : لا تقول طقيتها
لك بالعاده تطقها !
عزام طالعه وهو رافع حاجب : خالتي واطقها مثل ما ابغى !
وطالع ساره بابتسامة صح ؟!
حاولت تبتسم ما قدرت ونزلت دمعه خانتها !
مسحتها بهدوء،!
ماجد طالعها : يمكن اول مره اشوفك تبكين ؟!
وقف عزام ومد يده لها : تعالي وفكي نفسك من هالمتخلف !
استغرب لما مدت يدها له وقامت معه !
يحس فيها تغيرات !
بدأت تلين له وتنسى الماضي
مستحيل يفرط فيها مره ثانيه
وخاصه بعد ما كل شكوكه تقول انها بريئه من سالفه الورق !
متأكد السنين إلي مرت فيها كانت ثقيله عليها !
لازم يحاول يعوضها عن الماضي !
واكبر دليل انها تبكي قدامه !
اكيد ما بكت الا انها قاربت على الانفجار من الكبت إلي بداخلها !!
غادروا المكان تحت اندهاش ماجد إلي يناظرهم
ويحس في شيء !
كيف يعرفه ؟!
عزام ما يعطيه وجه ؟!
وساره ما تتكلم وتبوح بأسرارها !
نقز لما حس بضربه خفيفه على راسه !
سرعان ما عفس ملامحه : انت ؟!
جلست بإحباط عنده وبقهر وهي تشوف عيونه على زول ساره : ايه انا !
يقال اني زوجتك وانا من لما دخلنا هنا ما شفتك !!
ما تتفقدني
قاطعها بقرف : هذي انت لسانك وش طوله !
ما ينخاف عليك !
عدل جلسته وهو يخزها :،على حساب ما تطيقين وجهي
اشوفك الحين
قاطعته بضيق : انت ما تنسى
قاطعها : لا ما انسى !
وبعدين لا تتأملين الطلاق حاصل حاصل
بس يبغى له وقت
قاطعته بضيق : تطلقني وتتزوج ام سوار ؟!!
ابتسم وهو يسمع نبرتها :،عليك نور !
اطلقك من هنا واتزوجها لما تنتهي عدتها !!
طالعته بهمس حزين : وانا ؟!!
طالعها بقوه : مو انت إلي وجعتي راسي وانت تطلبين الطلاق
قاطعته بصوتها الهادي الناعم : هذا بالخطوبه اما الحين لا ما ابغى الطلاق
حرك حواجبه بالرفض : طلبك مرفوض
ورح اطلقك واتزوج وانت تتحسرين على تفريطك فيني !
تذكرين لما قلت لك هذي الجمله قلت انت طلق وما عليك مني !
وانا رح اطلق وما علي منك !
همت توقف بتوعد : كلامك هذا عند عمي ابو ماجد !
وقسم بالله الا اقول له يبغى يخطب ام سوار ويطلقني !
قبل ما تسند نفسها وتوقف
سرعان ما حست نفسها بالارض لما سحبها : مجنونه !
وقسم بالله لو توصل لابوي السالفه
قاطعته بقوه : رح اوصلها مو هامني احد !
تبغى تتزوج علي وتطلقني واسكت لك !
بآحلامك !
الحين رح تشوف !
اذا ما فضحتك قدام اهلك كلهم
تحب
قاطعها وهو يمسكها من معصمها بقوه يخاف توصل السالفه لابوه وبعدها وش يفكه ؟!
وبنبره حاول يجمع كلامه لاقناعها : وقسم بالله امزح معك !!
عائشه بعدم اقتناع : كذاب
قاطعها وهو يشد على يدها بأقوى،: مين الكذاب ؟!
تراني حلفت !
طالعته بتشكيك : وليه تقول هالكلام ؟!
هز كتوفه : بغيت اقهرك بصديقتك !
حاولت تفك يدها بقوه : ومين قال انها صديقتي ؟!
رفع حاجب : الحين ساره ما هي صديقتك ؟!
عقدت حواجبها : مين ساره !
دفها من الغباء إلي فيها : مين ساره ؟!
ام سوار يا غبيه !
كيف تنكرين انها صديقتك وهي قالت انها صديقتك بالابتدائي
وجيران
عقدت حواجبها تجمع هالمعلومات : جيران !
الحين ساره هي ساره
ضربها على راسها بخفه : الظاهر فيوزاتك ضاربه !
وقف بتهديد : وقسم بالله لو اسمع انك ناشره اشاعات من هنا او من هنا
ما يصير خير !
صيري حرمه عدله وامسكي لسانك !
وتركها تحت صدمتها !
الحين
صديقة الطفوله نفسها ام سوار !
الحين عرفت سبب لما سمعت ضحكتها بالجامعه
حست بإحساس ارجعها لايام الطفوله !!
ياه الدنيا عجيبه وغريبه !!!!
*•
**
****
***
جالسه بالغرفه وتسمع ثرثره نسرين وتحس بالانتعاش ما توقعت عزام يبرد حرتها فيهم !
نسرين باستغراب : ما احد يدري سبب المشكله بين عزام وسعود !
لولا تدخل اعمامي كان تشابكوا بالايدي !
عاد تعرفين عزام لما يعصب ما يشوف قدامه !
بس غريب نوره ما شفتها معتكفه بغرفتها !!
لاول مره تشعر بالسعاده كذا !
غمضت عيونها بتفكير المفروض قالت عن وليد وابوه !
بس لا حبه حبه
اذا ما خربت العلاقه بين بعض ما تكون ساره !
لحظه !
حست بتأنيب الضمير ما تبغى تكون سبب المشاكل والقطاعه !
وبداخلها شعور يقول لا خلهم يستاهلون !!
زفرت بحيره !
المفروض اخذت حقها بنفسها وما لجأت لعزام !!
ما تدري وش تعمل بهبلها !
بعد كلامه ذاب بعض الحقد والكره إلي كان بقلبها له !
وكلماته الاخيره قبل ما تتوجه لغرفتها
«سامحيني قصرت بحقك »
ما تدري ما تبغى تلومه لانها تعرف طبعه اذا عصب ما يدري عن نفسه !
يبقى السؤال
«هل اعتذاره يغير الواقع ؟!!! »
همست لنفسها بوجع ما يغير شيء !!!
قاطعتهم اسيل وهي تدخل : يلا يا حلوات وقت الرجعه !
نسرين فتحت عيونها : ليه ؟!!
هزت اسيل كتوفها : ما ادري هالطلعه كلها نكد بنكد !!
وقفت ساره بحماس : احسن نرجع !
ضاق خلقي هنا !!

وقفت جنب أسيل بهدوء واستغربت لما طالعها سعود بقرف
وصد عنها !
ابتسمت اكيد عرف انها إلي خبرت عزام !
توسعت ابتسامتهاوهي تشوف نوره واقفه عند اهلها واسيل تهمس لها : تدري عزام راح وترك نوره هنا وعياله !!
ساره تعمل نفسها ما معها خبر شيء : صاير شيء بينهم !
اسيل بهمس : سألني عزام عن نوره وش قايله لك !
طبعا محسوبتك القديم والجديد كله طلعته له !
والظاهر انه برد حرتي فيها !
ساره بضحكه مرتفعه شوي تحمل كل انواع الشماته !
طالعها سعود كان قريب منها بنفس النظره !
ابو الوليد اعطاها نظره بمعنى «قلة ادب»
صدت بوجهها بغرور وطالعت اسيل وهي تبتسم !!
اسيل بابتسامه : اروح اجمع عيالي ابوي يبغى يحرك !
يلا اشوف وجهك باكر !
اعتدلت بوقفتها وبتنبيه للتوأم : لا تتحركون من هنا
سوار : ماما ابغى الحمام !
عفست ساره ملامحها : امشي بسرعه
الحين تذكرت الحمام !
تعالي يا حور ادخلي على الحمام بسرعه !
دخلت الحمام مع البنات بعجله حتى ما تتأخر !
طلعت للخارج وتفاجأت المكان فاضي ما فيه احد !
كيف راحوا ونسيوها !
حور تبغى تبكي : ماما راحوا
ساره مو ناقصها الا بكاء حور : عمار الحين ييجي ويأخذنا !!
ناظرت حولها حتى ما كلفوا يقفلوا المكان وراهم الا اذا
حست بالرعب امتلكها الا اذا كان في حارس او عمال هنا بالمكان
بعد ما يطلعون يدخلون
وبسرعه بلعت ريقها وشدت مشيتها مع التوأم لخارج الشاليه
وقفت على الشارع وقلبها يدق طبول !
رفعت الجوال وبسرعه اتصلت على عمار ويدينها ترتجف من الافكار إلي داهمت عقلها !!
ما رد عليها !
تتمنى يكون قدامها وتطلع حرتها فيه !!
اتصلت على ام محمد ونفس الشيء ما ترد !
وش تعمل الحين !
لو كانت بروحها كانت دبرت روحها
بس البنات !
حست بحركه داخل الشاليه حست الدم نشف بعروقها !!
فتحت قائمه الاسماء
اتصلت على اسيل وعلى اخر رنه ردت : الو
ساره برعب : وينكم ؟!!
اسيل باستغراب : ليه ؟!
ساره شوي وتبكي من الرعب : انا بالشاليه وما في احد !
اسيل بانفعال : كيف ؟!
خليك مكانك الحين اشوف ابوي !
قفلت الخط وساره شعرت بالاحباط لما اعطاها تنبيه «البطاريه منخفضه»
عضت على اصبعها برعب
سرعان ما صرخت لما حست بأحد يمسك بطرف عبايتها !
حطت يدها على قلبها وهي تشوف انها سوار !
حست بحركه داخل الشاليه
وبسرعه سحبت التوأم
باتجاه حاويه كبيره واندست خلفها مع التوأم
وهي تؤشر لهم بالصمت !!
حست بالبوابه الخارجيه تنفتح !
وقف قلبها من الرعب !
عز الله رح تنذبح هي وبناتها بدم بارد !
حاولت تكتم الجوال بسرعه إلي يرن بصوت مرتفع
حتى مايسمع الجوال
فتحت الخط وصرخت وهي تحسه وقف مقابل لها !!
وقع الجوال من يدها من الرعب !
إلتقط الجوال وطالع الاسم وبعدها رد بهدوء : الحين طالعين !
اسيل بشك وعدم راحه : وش عملت لها
قفل الخط بوجهها !
وطالعها بنظرات حاده : ما ادري هذي حركات لفت النظر !!
لنا ساعه ننتظرك !!
بلعت ريقها بخوف وطالعت التوأم وقلبها للحين يدق طبول !
اخذت نفس وللحين مرعوبه !!
تنهدت وبعدها تكلمت والرجفه واضحه بصوتها : مو راجعه معك !
الحين اتصل بعمار !
وقف ببرود : بكيفك !
اجلسي بالشاليه وحدك ساعه حتى يصلك عمار !
وغادر ببرود !
فزت على حيلها برعب من الفكره تجلس لوحدها !
دخلت خلفه وناظرت المكان وحست قلبها وقف للحظه تراجعت للخلف خطوه بخوف : تكذب علي ؟ !
وين خالتي ؟!!
وين السياره ؟!
حتى اغراضي وين ؟!
إلتفت لها بقرف لما حس بلهجتها اتهام شين : افكارك المريضه هذي طلعيها من عقلك المريض!
وبسخريه ما بقى الاانت !
خلصيني امشي مو فاضي لهذرتك !!
تركها وغادر المكان !
قلبها ما ارتاح تخاف من إلي حولها !
مستحيل تدخل خلفه
وخاصه انه دخل الشاليه نفسها !
طالعت التوأم وبدأ الخوف يرتسم على ملامحهم بعد ما غابت الشمس !!
نقزت على صراخ خالتها لما طلعت لها : تبغين جاهة !
خلصيني اخرتينا !!
تنهدت براحه لما شافتها !
وسرعان ما رجع لها الوسواس وش يضمن لها انها خالتها مو متفقه معهم !
يكرهونها !
اكيد هذي مصيده لها !
ليه ما تشوف السيارات هنا !!
ليه مصممين انها تدخل للداخل !
رجعت خطوه للخلف
وبسرعه رجعت تتصل بعمار !
يرن الجوال وما احد يرد عليها !
بلعت ريقها وهي تشوف خالتها تتقدم نحوها !
لحظه معها سكينه والا تتوهم !
اكيد يبغون يذبحونها !
بلعت ريقها وهي ترجع للخلف
حست بصوت عمار لما رد عليها : الو
صرخت من كل قلبها : إلحقنييييييي
بيذبحوني خالتي وسعود
سرعان ما انسحب الجوال من يدها
وتكلم ببرود : هلا عمار ....ما في شيء ....خلاص لما نوصل اتصل فيك ....مع السلامه !
قفل الخط وطالعها بنظرات غاضبه : خمس دقائق اذا ما كنت بالسياره الا احرك !
وجعلك للحريقه !!
الظاهر حاضره فيلم وجايه تطبقه عندي !
تركهم وغادر!!
ام محمد طالعتها بغضب : عجبك ؟!
الرجال له ساعه ينتظرنا !
وطالعت التوأم : قدامي اشوف !
تنهدت واشرت للتوأم يمشون
تحس قواها خارت !
رفعت نظرها بضعف على خالتها والتوأم إلي غادروا المكان !
اجتاحها شعور الغربه !
حضنت يدينها لصدرها وقلبها يدق بقوه للحين !
رعب ذاقته خلال دقائق !
هبت نسمات هواء خفيفه اصدرت حركه من حولها !
نقزت على حيلها من الخوف وتوجهت خلفهم والرعب رجع تملكها من جديد !!
***
***
***
فتحت باب السياره بهدوء
الحين فهمت السالفه الظاهر خربطت وطلعت من البوابه الثانيه !
علشان كذا ما شافت سيارات واغراضها لما طلعت !!
قبل ما يتحرك ناظرها من المرايه وهي مغطيه وجهها كامل مو باين منها شيء !
مط شفته من هالسخريه !
ساعه تتغطى وساعه تكشف !!
تحركت السياره وهي مسنده راسها على الشباك
وسمحت لسيل الدموع بالنزول !
ام محمد بضجر : والله حاله !
الاغلب يمكن وصل البيت الا حنا دوبنا نطلع !!
رن جوال سعود رد بهدوء : الو ....ايه حركنا ....لا ما في شيء .....انتظر دقيقه !
إلتفت للخلف شافها متسنده على الشباك كلم عمته : اعطيها الجوال تكلم عمار !
اخذت ام محمد الجوال وإلتفتت لها : خذي كلمي عمار !!
افف وبعدين !!
مدت يدها بهدوء وتناولت الجوال بهدوء وبصوت هامس باكي : الو .....ايه ... ايه .....بعدين .... ما في شيء ...ان شاء الله ...سلام !
قفلت الخط واعطت سوار الجوال بهمس :،رجعيه
اخذ الجوال من سوار ما سمع وش قالت لعمار
حتى يشك اذا كلمته من الاصل !
رن جواله مره ثانيه رد بهدوء : هلا يبه ....صرت عند محطة «.....» .....لا مو متأخرين ....يصير خير ...مع السلامه !
ام محمد ناظرته : ابوك ؟!
هز راسه ببرود :،ايه !
ام محمد طالعت للخلف بكره : اكيد تأخرنا بالرجعه كله بسببها !
اذا ما اتصلت بمحمد وخبرته بسواد وجهك ما اكون ام محمد !
فشلتينا قدام الرجال !
رجعت إلتفتت على سعود : هالبنت رح تبقى شوكه بحلقي طول حياتي !
مات وتركها شوكها بحلقي !
سكتت لما رن جوال سعود
طالع الجوال واعطاه مشغول !
وبعدها عم المكان الصمت والسكون
بعد وقت دخل البوابه وانتظر نزولهم !
نزلت ام محمد بعجله : انا نايمه عندكم اليوم !
وتركت المكان وتوجهت لبيت ابو الوليد
تنهد وإلتفت لما ما حس بأي حركه !
طالع التوأم نايمين وساره الظاهر نايمه !
زفر بضيق كيف يصحيها وبصوت هادي تكلم : ام سوار يا ام سوار
نهضت نفسها وهي تحس جسمها مكسر !
حاولت تطق رقبتها نومتها ما كانت مريحه !
رفعت راسها على صوته : وصلنا !
ناظرت التوأم وتنهدت هزت سوار بالخفيف : سوار سوار
فتحت سوار عيونها وعفست ملامحها بطفوله : يلا سوار وصلنا !
بدت سوار تبكي تبغى تنام
فتحت ساره باب السياره وسحبتها بشويش : تعالي يا ماما !
وقفتها خارج السياره : وقفي اجيب اختك !
لفت للباب الثاني وفتحته بهدوء
قررت تحمل حور تعرف نومها ثقيل !
نزل من السياره ونزل أغراضهم من السياره !
وقفل السياره وتركهم وتوجه لبيتهم
وهو مو طايقها بعد هالموقف ومتأكد ما شيش عزام عليه غيرها !!
دخلت التوأم للغرفه وبعدها طلعت تدخل الاغراض من الخارج !
***
***
***
***
بعد ما نقلت ام محمد الحدث كامل طالعت اخوها تشوف رد فعله !
ناظر ابو الوليد ولده سعود وكأنه يسأله عن صحة هالكلام !
وقف سعود بهدوء : عن إذنكم !
أبو الوليد استغرب عدم رده وبهدوء : باكر ابغاك انت ووليد بموضوع !
وطالع وليد للتأكيد !
استغرب وليد وش الموضوع : ان شاء الله يبه !
ام وليد عقدت حاجبها :-يعني سوير خايفه على نفسها من ولدي !
صدق نكته !
الظاهر المجنون اثر على عقلها
ما بقى الا سعود يناظرها !!
لو انها عزباء كان قلت فيها نظره !
قاطعها ابو الوليد بغموض : اتركي هالمجنونه بحالها !
الحين أبغى انام !
طلع ابو الوليد وبعدها طالع وليد ام محمد : وسعود وش قال لها ؟!
اتصلت عليه واعطاني مشغول !
ام محمد عقدت حواجبها لما شافت ندى تركض على الدرج : هذي وش تعمل هنا ؟!
ام وليد بضيق: ما أدري نوره هنا والظاهر زعلانه رجعت معنا
بعد ما تركها عزام
ونسألها وش فيه ما ترد !!
ام محمد ذبحتها اللقافه تعرف السبب !!
****
***
***
***
*
ابو عزام وهو ماسك اعصابه : عزام روح جيب زوجتك وفكنا من المشاكل !
طالعه عزام وبهدوء : انا ما طردتها علشان ارجعها !
راحت لوحدها ترجع لوحدها !
ام عزام ما تبغى مشاكل : طيب وش صار بينكم ؟!
طول وقتكم سمن على عسل وش إلي تغير ؟!!
رد بنفس نبره الهدوء : ما صار شيء !
والحين اسمحوا لي ابغى انام !
أبو عزام كلمه قبل ما يغادر : تفاهم مع جدك اذا وصلت له السالفه !
هز راسه وغادر بهدوء !
ام عزام متأكده اسيل بالسالفه بس ما حبت تعصب زوجها على اسيل !
اضطرت تسكت وتسأل اسيل وتفهم منها السالفه بالضبط !
**
**
**
**
صلت المغرب والعشاء واخذت وقت وهي جالسه على السجاده
ما فيها قوة تقوم !
خلعت ثوب الصلاه وهي جالسه !
كل قوتها خارت اليوم !
ما توقعت انها خوافه لذي الدرجه !
تنهدت وعقلها يستذكر الاحداث
كيف خوفها اخرسها وسكتت عن سعود وكلامه !
للحين ترن بإذنها كلامه «حركات لفت النظر »
وش يقصد بكلامه !
الحين قاصده هالحركه حتى تلفت انتباه الدكتور سعود !
عفست ملامحها بقرف !
غبيه وبداخلها استلطفته هذي نتيجة الاستلطاف !
لكن اذا ما طلعت هالكلام من عيونه
قطع سرحانها وهو يحرك يدينه قدام عيونها : الحلو وين سرحان ؟!
طالعته وهي عافسه ملامحها وما تكلمت !
جلس قدامها وبابتسامه : يا خوافه !
ما كنت ادري انه سوير الضبعه تخاف !
كلمته بخفوت : مو فايقه لك !!
عمار دف راسها بإصبعه : فشلتينا قدام سعود وش إلي هببتيه !
طالعته من ذكر سعود : مين خبرك ؟!
عمار بابتسامة : كلمته يقول الظاهر انك مخربطه بالبوابه وظنيت الكل راح !
تدرين وقعتي قلبي لما اتصلتي ما فهمت منك الا خالتي وسعود !
وش السالفه ما دريت !!
تكلمت ساره وتجمعت الدموع بعيونها وبأمر: لو تموت ما اطلع مع احد غيرك تفهم !
ليه ما قلت انك راجع ؟!!
استغرب من حالها وبشك : صار معك شيء ؟!!
هزت راسها بالرفض : خلاص اتركني !
هز راسه وما حب يضغط عليها : مثل ما تبغين !
وبتذكر ضربها على راسها : ودراسه من خلفنا ؟!!!
ليه ما خبرتيني بدراستك ؟!
والا خايفه احسدك يالدافوره!
ابتسمت بدون نفس والدموع تلمع بعيونها
طلع جواله بانبهار: لحظه لحظه
فتح الكاميرا
بالله عيدي هالحركه !
عقدت حواجبها مو فاهمه شيء : عمار بلا سخافه !
اي حركه !
عمار طالعها بحماس : ابتسمي شوي !
ابتسمت على حركته مو فاهمه وش يبغى !
وبسرعه إلتقط صوره لها !
فتحت عيونها باستنكار لما فهمت قصده :،عمار يا زفته !
حاولت تسحب منه الجوال : هات الجوال
احذفها يا غبي !
بعدها وهو يقفل الجوال ويحرك حواجبه : نو نو
انقهرت منه : افرض احد من اصحابك فتح جوالك !
طنشها وطلع من الغرفه !!
ناظر الصوره بعد ما فتح الجوال
ما توقع تضبط معه الصوره
تبتسم وعيونها تلمع بالدموع !
وشعرها الأسود المنسدل يعكس بياض بشرتها !
ردد بداخله «ما شاء الله »
**
**
**
**
جالس بالمكتب مع ابوه ووليد !
ينتظر ابوه يتكلم بالموضوع إلي يبغى يتكلم فيه !
ابو الوليد بتفكير : عاجبكم وجود ساره هنا ؟!
وليد ناظر ابوه وتكلم : وش تقصد يبه ؟!
ابو الوليد تنهد : انا مو مرتاح لوجودها
هنا
وخاصه قريب من عبدالله !
ما شفتم شروق اليوم كيف جاءت من الصبح وحالتها حاله !!
ترى عبدالله مو خالي اذا ما كان حاط ساره في باله راجعوني
واكبر دليل بالشاليه
اتوقع سمعتم كلامه
انا طنشت الكلام واظهرت اني ما سمعت كلامه !
وطالع عياله : سمعتم كلامه ؟!!
سعود هز راسه : سمعت يبه وكلامه للحين في بالي !
لكن سكتت دامه مو متحرك مقدر اكلمه !
ابو الوليد بغضب : وننتظره حتى يتحرك ؟
البنت قدامه وقريبه منه وبدون زوج
وفوق هذا جمال
والاهم انه من قبل شروق اختار ساره بنفسه
وضغط على الجميع حتى يخطبها !
يعني ما اضمن يمكن للحين في باله
وليد بتأكيد : صادق يبه !
حتى سعود بالشاليه شافهم مع بعض واقفين !
ابو الوليد بقهر : حتى امك تقول انها ساره تقول تبغى ترجع لعبدالله !
وليد باستنكار: قالت كذا !
ابو الوليد : ما صرحت بس معنى كلامها كذا !
الحين نبغى نفكر بحل نبعدها من المكان كله !
وليد بتفكير : ما في حل الا تتزوج
ابو الوليد بقرف : ومين يرضى يتزوجها ومعها عيال ؟!
وليد : ماعندنا حل الا كذا
من هنا لوقت نهاية العده نكون دبرنا لها عريس يشيلها مع البنات
انا اشوف معارفي وانت يبه وسعود
الا نلاقي شخص يبغى عروس !
حتى لو شايب اكيد رح توافق ساره
اذا اخذ معها بناتها !
ابو الوليد :ما نبغى شايب شهر ترجع لنا ارمله !
عموما
نشوف شخص مناسب بأسرع وقت !
حتى نضمن ما نشتبك مع عيال عمتك وخاصه عبدالله !!!
الحين خلو الوضع طبيعي وما تظهرون شيء لعبدالله
اما شروق انا اتفاهم معها !!
وليد رفع حاجب : وش رح تعمل لنوره !
ابو الوليد بهدوء : كلمت عزام والرجال ما عليه حق
أختك لسانها طويل وتتدخل بأمور ما تخصها!
خلها تتأدب حتى مره ثانيه ما تتدخل بأحد !
سعود عقد حواجبه : ما رح ترجعها يبه ؟
ابو الوليد بحزم ؛ لا
لما تحفظ لسانها وقتها ارجعها
انا اخر عمري ييجي زوج ابنتي يشتكي منها !
صدق ما ربيت
وليد : يمكن الغلط من عزام
سألتها ؟
هز راسه : ايه سألتها والحق عليها !
المهم
طالع سعود : وش بينك وبين عزام ؟
ناظره سعود ما له مزاج يتكلم
حول نظره لوليد : وش السالفه ؟
وليد طالع سعود وبعدها لابوه : ما أدري مين خبر عزام انه سعود يتكلم على سوار انها مو مضبوطه وتكلم عبدالله
ابو الوليد طالعهم : ومين إلي نقل السالفه ؟
سعود بقرف : اكيد سوير لاني كلمت وليد وحنا طالعين من عند الحريم !
وانا سألت امي مين طلع بعدنا
قالت ساره !
ما احد غيرها خبره !
ابو الوليد بتنبيه :- انتبه للمكان إلي تتكلم فيه
ما تسمع يقولون
للحيطان آذان
وبعدين كلامك ثقيل وهي خالته !
ما نبغى نصطدم مع عيال ابو راكان
اتفقنا !
**
**
**
**
طلع من مكتب ابوه وهو ناوي يطلع للجامعة !
لفت نظره واقفه مع عمار وعبدالله متوجه لهم !!
حس السالفه خلاص مسخت !
توجه لهم وما هو ناوي على خير !
*

طلع من مكتب ابوه وهو ناوي يطلع للجامعة !
لفت نظره واقفه مع عمار وعبدالله متوجه لهم !!
حس السالفه خلاص مسخت !
توجه لهم وما هو ناوي على خير !
للحظه خفف من سرعته !
وهو يفكر كيف هالبزر طلعته من بروده !
اخذ نفس رح يبعدوها عن عبدالله بطريقه خفيه !
ما في داعي للانفعال الحين
خلها تكلم عبدالله من اليوم لباكر
الاهم انها ما رح ترجع لعبدالله !
مستحيل ترجع له !
لما شافت عبدالله متوجه لجهتها همت بالمغادره
سرعان ما غيرت رايها لما شافت سعود !
جكر فيهم ما تحركت من مكانها !
عمار بهمس لها اختصار للمشاكل : ادخلي !
رفعت حاجب وطالعته وقبل ما ترد
تقدم عبدالله بالسلام : السلام عليكم !
رد عمار السلام : وعليكم السلام !
اشوفك هنا اليوم ؟!
عبد الله طالع بيت خاله : انتظر شروق طالعين !
كمل جملته وطالع ساره يشوف رد فعلها !
استغرب البرود وعدم الاهتمام
معقول ما تغار او تتضايق !
الا اذا نسيته وطوته من حياتها !
رجح الاحتمال الثاني !
ملامح الكره واضحه بعيونها حتى السلام ما كلفت على نفسها وترد !
زفر بإحباط وطالع سعود إلي تقدم منهم ببرود : أشوف اجتماع عالمي هنا !
عبدالله هز كتوفه : انتظر اختك تشرف !
هز راسه بتفهم الحين عرف سبب تواجده !
طالع عمار : متى طالع للدوام ؟!
عمار بابتسامه : اليوم اخذت إجازه !
عقد حواجبه : صدق ؟! عسى خير ؟!
عمار بابتسامه : الخير بوجهك
بس طالع مع عمتي نغير جوووو !
ما يدري ليه قصد يقول «عمتي » حتى يستفز عبدالله !
طالع سوار واشرلها : يلا تأخرنا !!
عبدالله رفع حاجب يبغى يعترض
بس سكت وما قدر يتكلم بوجود سعود إلي رح يفسر كلامه على مزاجه !
سعود رفع حاجب : عمتي داخل ما رح تروح معكم ؟!
عمار بانحراج ما عرف وش يقول ؟!
ردت ساره وهي تسحب عمار بهدوء : لا مو معنا !
طالعين نغير جو مو ننكد أنفسنا بشوفتها
صح عمور !
وابتسمت له بغمزه !
طالعها متوهق ما يبغى مشاكل اذا وصلت السالفه لجدته!
وبتصريف تكلم: نشوفكم على خير !
وتركهم وغادر وساره ماسكه يده وكأنه طفل صغير خايفه يضيع !
عبدالله حس الضغط وصل الف من وقاحتها : انا ما يقهرني الا هالخروف إلي ساحبيته معها !
سعود ببرود تكلم : هذي شروق طلعت !
وتركه وتوجه لسيارته بهدوء !
اقتربت شروق بهدوء من عبدالله !
طالعها عبدالله ما ينكر لها مكان بقلبه
بس ظهور ساره بالوقت هذا
مايدري وش يعبر او يقول !
شروق باين البكاء بعيونها : تأخرت عليك ؟!
اشر لها عبدالله لسياره : لا عادي !
حس بتأنيب الضمير
مستحيل يجرح شروق
ما قصرت بحقه من أول ما تزوجها !
الا بظهور ساره تنقلب وتفتحها مناحه
تخاف يرجع ساره !
يحس نفسه مكبل وما يقدر يتخذ قرار سليم !!
**
**
**
**
طول الوقت جالسه بالحديقه تنتظر رجوعهم
وبداخلها نار !
كيف عمار يطلع وما يأخذها ؟!
ام الوليد وقفت فوق راسها : وش تبغين فيهم من ساعات وانت جالسه هنا ؟!
شوفي الساعه 9:00 !
ام محمد بغضب شوي وتبكي : بدل ما يقول جدتي وحيده ما لها احد
اطلعها تغير جو !
يروح يأخذ الزفته ؟!
طلع وجلس جنبها : اذا تبغين الحين اطلعك !
ام محمد : مشكور يا اخوي ما تقصر !
ابوالوليد بهدوء وبداخله ما عجبه تصرف عمار : ليه تحرقين اعصابك علشان هالبزران ؟!!!
ام محمد : تحز بخاطري هالحركه !
والزفته ربيتها وطولها شبر حتى صارت طول الناقه
وتعمل كذا !
هذا جزاء رد المعروف !
طلعت نوره وطالعتهم : وش فيه ؟!
طالعها ابو الوليد وصد عنها !
اوجعها بالحركة ذي !
زعلان منها وما هو راضي يكلمها !
تبغى ترجع لعزام حتى ترضيه
بس رافض رجوعها ما يدري وش يفكر ابوها فيه !!
طالعت امها بضيق وما تكلمت !
اشرت لها ام الوليد بعيونها تقفل على الموضوع حاليا !
ابو الوليد يكلم اخته : الحين اذا شافتك جالسه تنتظري هنا
رح تفسر حركتك إنك مقهورة
ادخلي الحين وطنشيهم ورح اطلع هالحركه من عيونهم الاثنين !!
واخلي عمار كيف يحترمك ويقدرك مره ثانيه !
طالعته بفرح : صدق تبرد حرتي فيهم ؟!!
هزراسه بتأكيد : ادخلي الحين وما عليك !
بعد ما دخلت مع ام الوليد
كلمت نوره ابوها بنبره راجيه : يبه !
اشر لها بيده بحزم : ولا كلمه !
تركها وتوجه للداخل !
ضربت الارض برجلها بقوه ودخلت خلفه وهي تشتم ساره لانها سبب المشكله !!
**
**
**
وقف السياره وطالعها وهي جالسه بالسياره وما هي ناويه تنزل : سوير !
طالعته ومطت شفتها بفقدان امل !
عمار بوعد : اوعدك اني احاول مع خالي ابو الوليد اعرف مكان اهل امك !!
هزت راسها بإحباط متأكده جكر فيها ما رح يخبرهم بشيء !
اخذت نفس وطالعته بامتنان حتى لو ما حصلت على إلي تبغاه
على الاقل حاول يساعدها : شكرا عمار !
ما رح انسى
ضربها على كتفها بشويش : اقول انزلي مو لايق عليك دور المؤدبه !!
وقلدها بسخريه «شكرا عمار»
الحين شكرا وبعد ساعات تردحين لي وما تحترمين اني اكبر منك !
طالعته بدون نفس : البنات نايمات
احمل سوار وانا حور !
طالعهاوابتسم : ان شاء الله عمتي !!
جالس على شرفة غرفته بالظلام
وعيونه عليهم !
طالع ساعته وهز اكتافه بسخريه الساعه 12:15
ما توقع عمار شخصيته ضعيفه كذا !!
وساره رح تتحكم فيه !
من الصباح طالع معهاوما رد الا الحين،!!
اي طلعه لهذا الوقت ؟!

***
***
**
جلست بالقاعة ومسكت كتابها تطالع فيه
وافكارها تأخذها للبارحه
لما اخذها عمار لبيت صالح بمحافظه ثانيه !
قطعت افكارها وهي تحس بعائشه تحط أغراضها جنبها !
رفعت نظرها لها وبعدها صدت تناظر بالكتاب إلي بيدها !
تنهدت عائشه وبهدوء : السلام عليكم !
ردت ساره بدون ما تناظرها : وعليكم السلام !
طالعتها عائشه لثواني وبدون تردد
سحبت نقاب ساره!
طالعتها ساره باستنكار : نعم !
وش قلة الادب هذي ؟!
عائشه بطريقه عبيطه : تعرفيني ؟!
رفعت حاجب ومتأكدة عقل عائشه ضارب : نعم ؟!!
عائشه بابتسامه بانت بعيونها : تعرفيني ؟!!
هزت ساره بسخريه : ايه اعرفك
وحده ملقوفه وتتفلسف كثير
زوجة المخبول ماجد !
طالعتها عائشه عقدت حواجبها وبحيره كيف تصيغ السؤال : قصدي
تذكر
قاطعتها ساره بجديه وهي تغطي وجهها : الدكتور دخل
مو فاضيه لثرثرتك !!
طالعتها لثواني وبعدها طالعت الدكتور بإحباط مو وقته الحين !
لازم تتأكد من كلام ماجد !!!
نقزت لما سمعت اسمها على لسان الدكتور : عائشه !
ناظرت حولها وبعدها وقفت لما شافت نظرات الدكتور عليها : نعم دكتور !
سعود بهدوء : تفضلي على المقاعد الاماميه !
انت وإلي عندك !
وبعدها وزع نظراته بالقاعه : المقاعد الاخيره يا ليت تتركونها
دامه بالامام والوسط مقاعد فارغه ليه تتفرقون كذا !!
عائشه جمعت اغراضها : ان شاء الله دكتور !
وطالعت ساره : قومي نجلس بالمقاعد الاماميه !
ساره بعدم اكترث لكلامه : ما رح اتحرك !
هزت كتوفها بهدوء : بكيفك !!
تركتها وتوجهت للوسط وجلست بهدوء !
ناظرت ساره البنات إلي غيروا المكان !
ما بقى بالمقاعد الاخيره غيرها !
القاعه كبيره وعدد البنات قليل !
رجعت تطالع بالكتاب وطنشت كلام سعود !
رفعت نظرها بالغلط وحست قلبها رجف من نظرته الحاده لها !
اخذت نفس تشجع نفسها وما رح تهتم له !
مسكت القلم ترسم على الكتاب
وكأنها طفله صغيره
قلب حب وبداخله
ماما وبابا
تحس كلما كبرت تحن لهم اكثر !!
رفعت راسها على صوت سعود : الاخت إلي بالخلف جاوبي على السؤال !!!
طالعت حولها وبعدها طالعته وهو يكلمها : عندك إجابه على السؤال يا ساره !
بلعت ريقها وهو ينطق اسمها بكل صراحه !
اخذت نفس بما انه عرفها ما في داعي للتخفي وبصوت هادي : ممكن تعيد السؤال مره ثانيه ؟!!
طالعها ما هي من عادته يعيد السؤال
مره ثانيه !
طنشها ورجع للشرح مره ثانيه !!
تنهدت وقلبها يدق طبول ما تدري وش السبب !!
حاولت تستمع للمحاضره بدون ما ترفع راسها !
مر الوقت بسرعه تنهدت بعد خروج سعود !
جمعت اغراضها بملل !
رفعت نظرها لعائشه إلي تكلمها : الدكتور يعرفك ؟!!
رجعت تلم اغراضها بعدها وقفت وطالعتها : وانت يعرفك ؟!
عائشه :،ايه يعرفني لا تنسي تراه خال ماجد
وعمي ابو ماجد وصاه علي !
اما انت كيف عرفك ؟!
طالعتها ساره باستخفاف : ترى اسمي بالكشف عنده واكيد ميز الاسم !!
عائشه رفعت حاجب : اوكي يعرف انك تدرسين بالقاعه !
السؤال كيف ميزك بين هالبنات وانت متغطيه ؟!!!
الا اذا
قطعت كلامها : خلاص انسي !!
المهم عندك محاضره الحين صح ؟!!
ساره وهي تتعداها بهدوء : ايه !
تركتها وهي مستغربه من تصرفات عائشه !!
وكلامها يدور برأسها كيف عرفها بين البنات ؟!!!
تنهدت تحس عقلها دوامها الف موضوع يدور برأسها !
رفعت نظرها وشافته واقف مع مجموعه طلاب يكلمهم !،
نزلت نظرها وكملت طريقها وهي تعدل النظاره !
تعودت عليها ونادرا ما تخلعها !!
بعد يوم شاق انهت محاضراتها !
وفتحت الشنطه تتصل بعمار يمرها !
عقدت حواجبها !
الجوال مو موجود !
غمضت عيونها لثواني ما تركت شنطتها
ولا تذكر انها مسكته اليوم !!
معقول انسرق ؟!
بس الشنطه طول اليوم معها !!
وين الجوال ؟!!
كيف تتواصل مع عمار الحين ؟!!
طالعت ساعتها الوقت تأخر بسبب البحوث !
والشمس قاربت على المغيب !
زفرت بضيق
ورجعت تبحث عنه بالشنطه مره ثانيه!!
ما في فائده الجوال ما هو موجود !
ما في حل الا سياره الاجره !
عدلت لباسها وطلعت باتجاه بوابه الجامعه !
**
**
**
**
كمل صلاة المغرب
و ناظر ساعته وعقد حواجبه باستغراب
تأخرت وما اتصلت !
وجوالها مغلق !
اجتاحه شعور عدم الراحه !
قرر يطلع ويشوف وين طست !
كيف يلقاها وجوالها مغلق !
طلع من البيت واستغرب صوت ابو الوليد مرتفع : لهنا وكافي !!
وطالع عمار بغضب : تعال شوف حل لعمتك !
تقدم عمار وطالع ساره وبعدها ابو الوليد : وش صاير ؟!
ابو الوليد بنبره غاضبه : اتوقع اتفقنا حضرتها ما تركب سياره اجره !
اشوفها تنزل من السياره والوقت متأخر !
بالاول قلتم عند زوجها !
والحين مطلقه وين طاسه لهذا الوقت ؟!!
انا بناتي ومتزوجات ما اسمح لهم بالتأخير لهذا الوقت !
العصر كل وحده تكون في بيتها !
لكن إلي اشوفه تسيب فوق العاده !
وما رح اسكت ابدا !
تنهد عمار وما يدري وش يقول لانه ما يدري وش صار عليها وبترقيع : كانت عند صديقتها وانا تأخر
قاطعته ساره بحده : ليه تبرر له ؟!
تراه ما هو مسؤول عني وعنك !!
والبوابه إلي يذلنا فيها !
من باكر افتح لنا باب خاص وانتهينا !
جنن ام امي بالسمعه !
خلاص الوضع ما ينطاق !!
تراني ساكته من الاول ومحترمه كبر سنك !
على عيني وراسي !
بس تتدخل بأمور ما تخصك !
اسمح لي ما اقبل نهائيا !
اخوي محمد موجود وغيره ما أسمح لاحد يفرض كلمته علي !
لا انت ولا غيرك !!
قاطعها صوت حاد : حدك ابو الوليد !!
طالعت عمها ابو راكان إلي يتقدم لجهتهم !
ما انتبهت اذا كان موجود من الاول او لا !
اقترب بحده : انت ما تحشمين احد ؟!!
بس الحق على إلي تركك على هواك !
لا سائل ولا مسؤول !
الحين تلمين اغراضك وترجعين عندي !
رفعت حاجب : بصفتك ايش تأخذني عندك !
فتح عيونه باستنكار : بصفتي ؟!!
انا عمك يا محترمه !!
طالعته بأسف مرير : للاسف ما عندي لا اعمام ولا اخوال ولا اب ولا ام
انا ما اعترف الا
بأخوي محمد وبس !
والباقي حاله من حال الغريب إلي بالشارع !
اذا نسيت الماضي انا ما نسيت !
فلا تفرض نفسك وخليك على موقفك الاولي يكون احسن !
مو محتاجين لك !
ربي يغنينا عن شر خلقه !
اعطته نظرات كره وشدت نفسها باتجاه بيت عمار !
والتوأم خلفها يراكضون !
***
**
**
ابو الوليد طالعه وهو يزم شفته مو عاجبه : سمعت كلام ابنة اخوك بإذنك !!
ابو راكان هز راسه بهمس : سمعت !
وطالع عمار : عاجبك كلامها ؟!!
زفر عمار وطالع جده وبعدها عيال ابو الوليد إلي يستمعوا من بعيد !
ما يدري وش يرقع عنها وش يبرر : اعتذر يا جدي بالنيابه عنها !
تراهاما تقصد !
هي متضايقه اتصلت فيني اكثر من مره
وانا نسيت أمرها عند صديقتها !
وتأخر الوقت والظاهر اضطرت ترجع بسياره اجره !
واقف يسمع تأليف كذب عمار !
كيف اتصلت فيه وجوالها للحين معه !!
ليه عمار واقف لها مثل السيف بالدفاع !
ويبرر ويغطي على تصرفاتها !!
ابو راكان بغضب من ساره وما اهتم لتبرير عمار : خلها تطلع بالطيب احسن ما أتصرف تصرف ما يعجب احد !
ابو الوليد تدخل ما عجبه تعيش ساره في بيت ابو راكان : اتركها يا ابو راكان الحين عند عمار !
وقبل ما يعترض أبو راكان مسك يده ابو الوليد : اتركها !
وخلينا الحين بسالفه عزام ونوره يكون افضل !!
تنهد ابو راكان وهز راسه بعدم رضى
وتوجه لمكانه بهدوء !
طالع ابو الوليد عمار : اتمنى ما يتكرر هالتصرف مره ثانيه
وتركه وغادر !
تنهد عمار بدون ما يناظر احد
وتوجه لبيته !
**
**
**

زفرت من ثرثرته فوق راسها : وبعدين !
اقولك ما ادري وين الجوال !
ما اذكر وين تركته ؟!
عمار عقد حواجبه : كيف ما تدرين وين جوالك ؟!
انا ما أدري عقلك هذا كيف يفكر ؟!!
غطت سوار وإلتفتت له : ما توقعتك كذا ؟!
وش دخل ابو الوليد فينا ؟!
كم مره اقول لك هالكلام بس ما تسمعني ؟!!
ذلنا على هالبوابه !!!
وبعدين فكر بعقلك !
انا مو دايمه هنا !
فتره واطلع من بيتك !
بس انت باكر تتزوج وكلما طلعت زوجتك
رح يفتح هالموال ؟!!
الحين عرفت ليه انفه طويل !
لانه يحشره بكل شيء !
لو فيك عقل
من باكر تفتح بوابه خاصه وكل في حاله !
واكتب على البوابه
«منزل عمار خلف »
واكتب ملاحظه بيت ابو الوليد جنبنا !!
طالعها وابتسم على انفعالها تتكلم وهي تشبر : انتبهي لا يطقلك عرق !!
زفرت وهي تتكتف : تراك تقهر بتصرفاتك !
قدامهم نعامه وعندي اسد !
وقسم بالله ترفعون الضغط !
عمار بروقان : تدرين وانت معصبه أحلى!!!
باكر اشتري لك خط وجوال !
طالعته بقرف وطلعت من الغرفه وهي تحاول تتذكر وين الجوال ؟!!!
**
**
**
**
دخل ابو الوليد بغضب البيت
وطالع زوجته : ما احد لعب بعقل عمار غيرها !
ام الوليد عقدت حواجبها : وش صاير ؟!!
ابو الوليد وهو يجلس : نزل عمال يعمل بوابه خاصه فيه !
سعود تقدم منهم بهدوء : هذا المفروض
يصير من اول !
باكر يتزوج وزوجته غريبه علينا !
ام الوليد بتأييد : صادق هذا المفروض يصير !
ابو الوليد : انا ما همتني البوابه انا إلي يقهرني بزر تحركه وينفذ كلامها ؟!!
زفر وطالع زوجته : وين ام محمد ؟!
ام الوليد : اميره راجعه من السفر
وتبغى تزورها !
ابو الوليد بقهر : واكيد الجنيه معها !!
ام الوليد : ما ادري عنها !
وش عليك منها ؟!!
ابو الوليد : تقهرني بتصرفاتها وكأنه ما في والي عليها !
ام الوليد : الله يصلحها !
متى ناوي نروح نشوف عروس سعود ؟!
ابو الوليد طالع سعود وبعدها طالع زوجته : الوقت إلي يناسبكم !!!

وقفت السياره طالعت بيت أختها
جميل وراقي !
اول مره تدخل بيتها !!
نزلت خلف ام محمد وهي تناظر المكان بتمعن راق لها !
ام محمد بنهر : امشي خلصيني !
طنشتها وهي تمشي بشويش وتناظرحولها !
سوار تركض بطفوله وتلف حول نفسها مع الفستان الفستقي !
اميره واقفه عند البوابه الداخليه تنتظرهم !!
سلمت ام محمد على اميره ودخلت !
شدت خطواتها ساره للداخل واقتربت من اميره بتردد علاقتها بأميره منقطعه
مرات قليله إلي قابلتها فيها !
حتى عيالها ماتعرف الا مها إلي عرفتها بالفتره الأخيره !
استقبلتها اميره بابتسامة مريحه : هلا والله !
نور البيت !
ردت لها ساره الابتسامه : منور بآهله !
اميره نزلت لمستوى التوأم : ربي يحفظكم !
انت وش اسمك ؟!
سوار كالعاده هي إلي تتكلم : انا سوار وهذي حور !
وقفت اميره : يشبهون بعض كثير !
هزت ساره رأسها بهدوء وهي تدخل !
اميره بابتسامة: خذي راحتك ما في احد بالبيت !
ساره هزت راسها بالرفض : مرتاحه كذا !
ام محمد عفست ملامحها وهي تشوف ساره داخله !
جلست اميره جنب امها : كيفك يالغاليه ؟!
اخبارك ؟!
عساك بخير ؟!
ام محمد مطت شفتها : أي خير واختك مقابل وجهي كل يوم !
اذا قلت لها بم تقول سم !
ناظرت اميره ساره : انتم للحين ما في وفاق بينكم ؟!!
وسألت لتغيير السالفه : اخبارك يا ساره عساك مرتاحه !
ساره بهدوء : الحمد لله
اميره بابتسامة : لو شفتك بالصدفه كان ما عرفتك !
متغيره كثير !
نحفانه وقصرانه !
ابتسمت ساره : نحيفه إيه !
بس قصيره كيف صارت ذي ؟!
اميره : يمكن قبل كان جسدك مليان اعطاك حجم اكبر !
اما الحين لانك نحيفه مو باين طولك !
يعني طولك عادي حلو ومناسب !
مثل مها !
عفست ساره ملامحها بقرف !
ضحكت اميره على شكلها : ادري فيكم ما تواطنون بعض !
يقول تشبهون بعض !
بس ما اشوف شبه بينكم !
ام محمد مستقويه بوجود اميره : وش جاب مها لهذي!
ساره رفعت حاجب : انا ما لي شبيه !
وباسلوب استفزازي كملت : ماما ما جابت الا نسخه وحده بس !
ناظرتها اميره برجاء تقفل السالفه : وين عمار ما جاء معكم ؟!
ام محمد : مشغول شوي !
ورفعت نظرها للي داخله تتمختر بمشيتها : واو جدتي الحلوه عندنا !
عفست ساره ملامحها وبداخلها تردد «يا شين السرج على البقر »
ام محمد وقفت تسلم عليها : ايه ذي الوجوه إلي تفتح النفس !
مها بدلع : تسلمي يا جدتي !
وبعدها طالعت ساره بتقييم وتقدمت ومدت يدها !
طالعتها ساره وهي جالسه ومدت يدها ببرود !
اميره هزت راسها ما عجبها هالتصرف : مها وش هالسلام بينكم !
عيب تراها خالتك !
مها وهي تجلس : دخيلك يمه لا تقولين خالتي ترى يصيبني غثيان !
ناظرتها اميره بزعل وصدت عنها !
ساره بلامبالاه : خلها تقول إلي تبغى
احترام لك سلمت !
ما ادري على وش متحومه فيها ؟!!
مها بانفعال غاضب: يمه سامعه وش تقول اختك !!
رفعت حواجبها ساره تغيزها : تراني خالتك !
مها عفست ملامحها : ما بقى الا انت اقولك خالتي !
اميره طالعت مها : بعدين معك ؟!
تراها خالتك !
واحترامها من احترامي !
ولا تنسي انها في بيتي ومجبوره تحترميها غصب عنك !
ام محمد مطت شفتها : ما هي مجبوره تحترمها !
اميره بلوم : يمه
ساره قاطعتها تغير السالفه لانها مها بكبرها ما تهمها : ناويه تستقرين هنا ؟!!
اميره بهدوء : للحين ماادري !
لو بيطلع بيدي ما سافرت
هنا قريب على اهلي واهله احسن من الغربه !
ام محمد طالعتها بانتقاد : إلي يسمعك يقول مقطعه نفسها بزياره اهلها واهل زوجها !
لعنبووو ابليسك حماتك تشتكي منك
بيتها جنبكم ما تشوفك ولا اتصال تتصلين فيها !
اميره مطت شفتها : ترى حماتي تكبر السوالف !
وبعدين انا مو الكنه الصغيره إلي تقدس كل يوم في بيت حماها !
تراني صرت جده !
وبعدين طول وقتي مسافره ولو رجعت كم يوم وارجع اسافر !
بالعقل ما اقدر اقضي الوقت كله عندهم !
ما ادري كيف يفكرون ؟!
مها بانتقاد : يا يمه لولا انها تعزك كان ما طلبت جلوسك عندها !
ترى صديقاتك اخذن كل وقتك !
وجدتي معها حق !

**
**
**
جالس بمكتب وليد يناظر وليد إلي يحرك القلم بأصابعه يمين يسار !
وليد وعيونه على القلم : سمعت عمار فتح بوابه خاصه لبيته !
عبدالله ويتابع حركه القلم : شفت العمال الصبح !
خالي ابو الوليد طلب منه ؟!!
وليد وعيونه مسلطه على القلم : لا !
بس الظاهر عمته ساره تبغى كذا !
وطالعه يشوف رد فعله !
عبدالله بملامح خاليه من اي تعبير : وين المشكله ؟!!
وليد بروقان هز كتوفه : ما في مشكله !
متى محمد رح يرجع ؟!!
يقولون رح يأخذها عنده !
خالتي كانت تبغى تخطبها لسلفها
بس حماتها رفضت !!
عبدالله بحده : ومين طلب منها تخطبها ؟!!
رفع حواجبه وليد : هذي جزاتها تبغى تزوجها رجال يلمها مع بناتها !
عبدالله بحده اكبر : ومين قال لك انها رح تتزوج !
قول لخالتك لا تتدخل بأمور ما تخصها !!
وليد تحولت نظراته للجديه : انت ليه حارق اعصابك ؟!
وش يخصك بالموضوع ؟!
وبعدين لازم تنبسط لو صار نصيب
ترى العريس «ابو نورس »
فتح عبدالله عيونه بصدمه وهو يرد بهمس : ابو نورس !!!
**
**
**
**
دخلت اميره بابتسامة وطالعت ساره : ابو ليث يبغى يدخل ويسلم على امي !!!
عفست ساره ملامحها هذا اخر شخص تتمنى تشوفه !
كرهته قبل ما تشوفه من تدخلاته !
دفعها شيء تتغطى عنه
بس مو حلوه وهي اصلا جايه كاشفه !
ام محمد : شايفيتها لابسه العبايه
ما في داعي تستأذني !
مها رفعت حاجب ما عجبها ملامح ساره !
بس ما تكلمت اكتفت بنظره استصغار !!
دخل ابو ليث بهيبته واقترب من ام محمد يسلم عليها !
ما تدري ليه تحس وجههاولع من الاحراج !
ما تدري كيف رح يستقبلها ؟!
متأكده ما يطيقها مثل ابو الوليد !
رفعت رأسها وهي تسمع صوته: كيف حالك يا ساره ؟!
ردت بصوت اقرب للخفوت : الله يسلمك !
ونزلت عيونها للارض بهدوء،!
ام محمد : اخبارك يا ابو ليث عساك طيب !
ابو ليث بهدوء : الحمد لله ؟!
اشر على التوأم جالسات جنب ساره : ذول بناتك !
ام محمد بشماته : ايه بنات المجنون !
هز راسه بثقل وما تكلم !
تحس الجو حولها يخنقها مو مرتاحه بالجلسه !
ناظرت مها تكلم ابوها باندماج !
اوجعها التمني !
تتمنى امور كثيره لكن للحين ما تحقق شيء منها!
اشرت بعيونها لخالتها يرجعون !
ام محمد قاصده تكلمت بصوت عالي : علامك تناظريني كذا !
مستعجله اتصلي بعمار يرجعك !
اميره من مده ما شفتها ومشتاقه لها !
اميره طالعتها باستغراب : علامك مستعجله ؟!
ساره تنهدت الكل يطالعها : مره ثانيه نرجع !
ابو ليث طالعها : ما في طلعه الا لما تتعشون معنا !
اول مره تدخلين البيت وما
قاطعته بلعثمه : الله يكثر خيركم بس
قاطعها بحزم: ما في مهرب !
تتعشون معنا يعني تتعشون معنا !
سكتت ما تدري من وين طلع لها كرم حاتم !
ما توقعت استقباله كذا !
عكس الكلام إلي كانت تنقله ام محمد لها !
الا اذا كان ابو وجهين !!
ابو ليث طالع اميره بابتسامة :،سبحان الله الشبه بين مها وبين أختك !!
مها عفست ملامحها بقرف : لااااا حرام عليك انا تشبهني هذي ؟!!
ابو ليث رفع حاجب : ليه كل هالغرور ؟!
صحيح في شبه بينكم !
بس خالتك اجم
قاطعته ام محمد بعد ما عفست ملامحها : وين الشبه ؟!!
ابو ليث طنشها وهو يتأمل التوأم :،بس التوأم ما في شبه بينكم !
ما ادري شكلهم مألوف لي !
بس مو متذكر !
اميره طالعي من يشبهون ؟!!
اميره طالعت التوأم وابتسمت : ما ادري !
انا اقول يمكن في لمحه من ساره ؟!
هز راسه بالنفي : لا لا
سكت وهو يحاول يتذكر !!
ما علقت ساره على الموضوع واكتفت بالسكوت !!
***
***
***
***
***
في اليوم الثاني بالجامعه !
عائشه بتحقيق غاضب : تدرين اني عائشه صديقتك وما تتكلمين ؟!!
وانا الغبيه اخر من يعلم ؟!!
تكتفت ساره وهي رافعه حاجب : وهذي انت عرفت وش صار ؟!!!
دفتها على كتفها بقهر : يا برودك !
لذي الدرجه ما تهمك صداقتنا ؟!
ساره بملل ونظره بائسه للحياه ما تدري اليوم صحيت واليأس مسيطر عليها : انا ما يهمني احد !
انا نفسي ما تهمني !
مو طايقه نفسي !
اتركيني بحالي !
عائشه طالعتها ومدت بوزها : الحق علي جيتك مشتاقه تقابليني كذا !!
يا ليت جدتك للحين عايشه وتطقك حتى تحترميني مره ثانيه !
تنهدت ساره واجتاحتها موجة حنين لجدتها الراحله،!
عائشه مسكت يدها بحنان : الله يرحمها !
مشتاقه لها ؟!!
طالعتها ساره و امتلأت عيونها بالدموع !
طالعتها عائشه وهي تشوف عيونها تشكي حالها وضيقها
ساره بصوت مخنوق : عائشه اتركيني بحالي
وانسي انك تعرفيني من قبل يكون احسن !!
وحملت اغراضها وغيرت مكانها !!!
***
***
**
***
***
***

مرت الايام بنفس الروتين من بعد البوابه
احتكاكها في بيت ابو الوليد اصبح معدوم !
حتى ابو راكان ما تزوره ابدا !
اليوم عندها امتحان قررت تطلع قبل الامتحان تراجع الماده !
وقت الامتحان دخلت القاعه وقلبها
يدق طبول !
تحس كل إلي درسته يتبخر من عقلها !!
اخذت نفس تشجع نفسها وهي تردد بعض الادعيه !
ناظرت عائشه وهي تدخل صدت عنها !
من بعد ذاك الموقف كل وحده بطريق !
خلاص قلبها اوجعها !
ما تبغى تفتح قلبها وبعدها تنصدم بمواقف تجرحها !
إلي فيها كافيها !
يكفي زوج أميره إلي يخطط يخطبها لاخوه !!!
والمشكله محمد ساكت يقول كل شيء بوقته حلو !
رجف قلبها بدخول سعود ومعه الاوراق !
عفست ملامحها للحين محبطه بعد ما خطب !
كم تمنت تقهر ابو الوليد !
بس مو كل شيء تتمناه يتحقق !!
زفرت وطالعته وهو يغير اماكن الطالبات ويوزعهم !
رددت بنفسها «يا رب ما يقولي قومي»
عفست ملامحها بإحباط :،ساره اجلسي على مقعد رقم 12
هزت راسها وهي مستغربه بالرغم من معرفته بدراستها ما خبر احد عنها !!
غريب سعود انسان هادئ وما يتدخل بآحد !
الا يوم الشاليه لما تكلم عليها ومن بعدها ما تدخل !
يمكن خاف على اخوه واخته منها !
لحظه الشاليه !
الشاليه
«الجوال »
الحين تذكرت اخر مره كان معها بالشاليه !
اكيد نسيته هناك !!
قررت بعد الامتحان تتصل بعمار يكلم ابو الوليد !
رفعت عينها لما تكلم : علامات المشاركه نزلتها !
تحمست تكمل الامتحان وتشوف كم حط لها بالمشاركه !!
بعد وقت طويل كملت وبداخلها خوف من الرسوب !
رفعت راسها واستغربت ما بقى غيرها بالقاعه !
جمعت اغراضها وتوجهت تسلم ورقتها !
حطت الورقه وهمت بالمغادره بس وقفها صوته الهادي : ساره
طالعته وقلبها يرقع طبول تتعامل معه هنا برسميه وبطريقه مختلفه هنا دكتورها اما بالبيت يختلف الوضع : نعم دكتور ؟!!
سعود وهو يعدل النظاره : صحيح في معرفة بيننا
بس هذا الشيء ما يحملك تهملين دراستك !
علاماتك متدنيه فلا تتأملي النجاح !
انا اعطي كل طالب حقه !
اتمنى تكونين جاوبتي زين بالامتحان !
حتى تحصلي على علامة النجاح !
تحس وجهها انتفخ وهي تسمع كلامه
وبحده ردت : متى ما طقيت مكتبك وقلت لك يا دكتور نجحني وقتها تعال تفلسف !
العلامه إلي من جيبتك ما ابغاها
ناظرته بغضب وطلعت من القاعه وهي تشتم فيه بنفسها !!!
*
**
**
**
جلست على احد المقاعد وفتحت النت تشوف علامة المشاركه !
تهز رجلها وللحين متنرفزه منه !
غمضت عيونها لثواني وفتحتهم بعدم تصديق
وهي تشوف علامة المشاركه «4»
تبغى تكسر الجوال بيدها !
لمعت الدمعه بعينها من القهر !
كيف يحط لها كذا !
ولا مره تغيبت عن محاضراته !
صحيح ما تشارك بس
قطعت افكارها وهي ناويه تتصل بعائشه !
لازم تعرف كم علامتها حتى تعرف تتفاهم معه !
لحظه من وين تجيب رقمها !