بسم الله
دق بابي ورحــــل !
تـــاركــــاً أوراقـــــة . .
قـــــارورة حــــــبــــــرهـ . .
وأمــــانيــــه الجــمــيـــلــــه . .
ألقى بها
فـ ألتقطتها يــــد القــــمـــــر . .
راح يرنو يبحث بين العُشبِ عن بقايـــا مطــــر . .
ولا مطــــر !!
عن زهـــرة العُـــــمــــر
حمـــراء فتــيـــة . .
عن بــــراعــــم حُـــــبٍ
لم تلوثها ضغائن البشـــر . . !!
وبقيت وحــــدي . .
أرقب النّجــــم . .
أنتظر الخبـــر . .
ولا خــــبـــــر . . !!
فـ خرجت أسأل الدروب عن قلب صغيـــر . .
تمـــرد فجـــأة . . !!
وعنـــا وأستعـــر . . !!
فأجابتني
إنّه هُنــــاك . . !!
مخبـــوء هُنــــاك . . !!
في دعة تحت الظلال . .
قد أعياه السَهر . .
وهدهُـ طـــــول السَـــــفـــــر . . !!
***
****
***
****
ركضت بسرعه تحت الطاوله واندست تحتها
وهي كاتمه نفسها بيدها
دخل الصاله وجلس بهدوء وهو يتصفح الكتاب
وهو معقد حواجبه
رفع نظره على الصاله وهو يحس احد معه بالصاله
حط الكتاب جنبه على الكنبه بهدوء
وقف وبعدها تقدم بإتجاه الطاوله
ابتسم وهو يشوف راسها مندس تحت الطاوله
وباقي جسمها طالع ناداها : ساره !
ردت بصوت منخفض حتى ما تنكشف : انا مو هنا مو هنا !
تقدم منها وسحبها من فستانها مع دخول سلمان وهو ينط : شفتك شفتك !
رفعت رأسها بإحباط : غش
عزام ناظرها وهو رافع حاجب : انت ما عندك بيت !
جالسه تناقزين من بيتنا لبيت جدي لبيت خالي !
وبأمر : يلا ارجعي على البيت
ولا تلعبين مع العيال فاهمه !
حركت شفتها ترد
قاطعها بحده : بدون نقاش
يلا بسرعه على البيت
هزت رأسها بدون اعتراض وتوجهت للخارج
جلس الكنب وهو يكلم نفسه : فاتحين البيت ملعب للبزران !!
طلعت وناظرت سلمان وهو يدور على العيال
اشرت له مكان عمار وهي تبتسم
طالع مكان ما اشرت وابتسم بفرح وبسرعه ركض له وهو يصرخ : شفتك شفتك!!
نزل عمار عن الشجره وهو يصرخ بإعتراض،: غش غش غش
ساره هي للي قالتلك !!
هز راسه سلمان : لا لا انا شفتك
والحين اروح اشوف عبد الرحمن
عمار بقهر : والله الا تعيدون اللعبه
وتقدم من ساره وشد اذنها بقوه: يالفتانه ليه تقولين مكاني !
حطت يدها على فمها تكتم ضحكتها بس ما في فائده
انقهر منها ودفها بقوه
وقعت على الارض تقدم سلمان منها واستغرب وهو يشوفها تضحك بقوه وجهها احمر من الضحك !
ناظرها عمار بغيض : الله يأخذك انت وليان وجودي الفتنه تمشي بعروقكم !!
تركها وهي مستمره بالضحك ومشى مع سلمان : مجنونه هذي قاعده تضحك
ورجع التفت لها وهي مستمره بالضحك
عمار بقهر : روح شوف عبدالرحمن وفكنا من هبلها !!
ناظرتهم وهم يبتعدون عنها
وقفت وتوجهت لبيت ام محمد وهي تضحك
جلست باب البيت لانه ام محمد طالعه وقفلت الباب والمفتاح معها
واخذت نفس ما تدري ليه تضحك
ناظرت يدها تجلطت لما دفها عمار
مطت شفتها بحزن وبدت دموعها تنزل
ما تدري ليه تبكي بس في شيء بداخلها يحثها على البكاء!!
اي موقف يذكرها بجدتها ام سعيد وعائشه !
تتمنى تشوفهم وتشبع عيونها للي انحرمت شوفتهم
وخاصه عائشه تتمنى تشوفها بعد ما انتقلت لمدرسه ثانيه !
مسحت دموعها وقررت تروح لبيت خلف عند ليان وجودي
**
**
**
**
ابو راكان كان يراقبهم من الشباك
هز راسه وطلع لباب البيت وهو ينادي عليهم
سلمان ناظر جده وهو ينادي عليه طالع عمار ومط شفته : يا رب ما تكون محاضره !
عمار مشى و هو عابس مو.وقت جده !!
ابو راكان ناظرهم بحده لما وصلوا له : انتم ما تستحون على وجهكم الواحد فيكم طول الباب
وتراكضون مثل البزران !
عمار بدفاع : يا جدي خلينا نعيش حياتنا باكر نكبر ونقرف الدنيا من
قاطعه وهو يسحب إذنه بقوه : انت بالذات تسكت !
ليه تضرب عمتك يا قليل الادب !
عقد حواجبه بعدم فهم : عمتي ؟!
انا ما
وانفجر بالضحك لما فهم قصد جده : تقصد ساره !!
ورجع يضحك وسلمان معه يضحك
ضرب عمار كفه بكف سلمان وهو يضحك بسخريه : قال عمتي !!
قاطعه ابو راكان وهو يصفعه على وجهه : لذي الدرجه ما لي احترام بينكم !
ناظر جده بصدمه ما توقع الكف وفتح فمه من اثر الصدمه !
سلمان لما شاف ملامح جده بلع لسانه وسكت
ناظرهم بملامح ناريه: وقسم بالله لو اشوفكم تراكضون مثل البزران الا
قاطعه سلمان حتى ما يحط لهم عقاب : والله ما نعيدها
طالعهم باستخفاف وهو يحس نفسه صدق يكلم برزان
تركهم وتوجه للداخل معصب من حركاتهم الصبيانيه !!
**
**
**
**
واقفه تناظر وصوتهم يرتفع بقوه
كل واحد يرد على الثاني بصوت أعلى
تسأل نفسها امها وأبوها عايشين معقول تكون حياتهم كذا كلها مشاكل !
خلف اشر اصبعه بقرف : انت ما تتدخلين بالموضوع !!
ام عمار وتحس الشياطين تناقر فوق راسها : انت مجنون ؟!
هذي ابنتي تبغاني اشوفك تهدم حياتها وانا مكتف يديني !
بس بعيده عن شاربك !
خلف بدون اكتراث لتوعدها : انا اعطيت الرجال كلمه وانتهى الموضوع !
فتحت عيونها باستنكار : انت من وش مخلوق !
البنت صغيره
قاطعها ؛ انا ما اشوفها صغيره !
أطول منك واختصري ترى صوتك يجيبلي الاكتئاب !
تركها وطلع وهي تندب حظها على هالزوج
وبسرعه لبست شيلتها بإهمال وطلعت مثل المجنونه من البيت !!
جودي طلعت من المطبخ وخلفها ليان وملامحهن باهته من كلام خلف !
طالعتهم ساره بفرح : رح تصيرين عروس !!
جودي مخنوقه من كلام ابوها كيف يزوجها و هي صغيره ما كملت 14
صارت دموعها تنزل بغزاره
ساره باستغراب : ليه تبكين !
جودي انفجرت فيها : انقلعي من وجهي
الله يأخذ هالعيشه !
وتوجهت لغرفتها وخلفها ليان
ناظرتهم بإستغراب ليه معصبين !
هزت كتوفها وطلعت من البيت ما تدري وين تروح !!
ركضت لما شافت عزام طالع من بيتهم
وقفت عنده وهي تلهث : عمي
ناظرها وهو يلعب بمفتاح السياره : نعم !
ساره بفرح : جودي رح تصير عروس
اخوي خلف الحين قال خلاص زوجها !
عقد حواجبها مو مستوعب الكلام !!!
ما انتبهت على للي كان واقف قريب وسمعها
وهي تخبر عزام
ما حست فيه الا وهو يلفها له بقوه : وش تقولين !!
رفع عزام راسه : يبه !!
ابو عزام بغضب علق على كلام ساره: اكيد استخف هالخلف !!
وتوجه بسرعه لبيت ابوه يشوف وش هالسالفه !!
وخلفه عزام مستعجل !
ناظرتهم باستغراب ليه عصبوا ؟!!!
**
**
**
**
**
ابو راكان بعصبيه : مو على كيفك تزوجها !!
رد ببرود : والله ابنتي وازوجها على كيفي !!!
ابو راكان بغضب من اسلوبه : خلف لا تتكلم كذا تفهم !!
لوى بوزه باستخفاف : والله!!
يعني متصل وتصرخ بوجهي وكأني بزر
مو رجال
وبنغزه يقهره : وسنة زمان واكون جد!!!
قاطعه : خلف لا تقهرني !!
خلف بأعصاب بارده : يا عمي هبيت فيني قبل ما تعرف مين الشخص للي رح ازوجه !!!
ابو راكان بسخريه : ومين تعيس الحظ!
خلف بخبث : تعيس الحظ
**
**
**
**
نهى بتوعد : وقسم بالله لأخبر بابا عنك طالعه تلعبين برا !
طالعتها من فوق لتحت وبغرور يتخلله الثقة : عادي قولي له !
وبإستهزاء: اذا قدرت ترفعين راسك وتناظرين فيه !!
انقهرت من ردها : والله لاخبر ماما عنك
قاطعتها بسخريه لاذعه: دوبك تبغين تخبرين بابا !!
وبغرور: بابا قا لي ألعب برا وسامحني !!
وحركت حواجبها بطفوله تقهرها !
هزت نهى راسها بتوعد : الحين تشوفين
وتوجهت لغرفة امها بسرعه
دخلت بعد ما إستأذنت : ماما مو انت قلتي لعائشه ترتب غرفتها !
هزت راسها ام سعود
تابعت نهى بمكر : ولا عملت شيء!!!
لو تشوفين الغرفه يا ماما
عائشه ناظرت نهى بغيض والتفتت لامها: والله نسيت !
ام سعود وبيدها الجوال ناظرتهم لثواني ورجعت تقلب بالجوال
نهى انقهرت من رد فعل امها : ماما !!
ردت وعيونها بالجوال : همممم
عائشه ضحكت بنصر على شكل نهى
وسرعان ما عقدت حواجبها وهي تسمع نبرة الامر من امها : عائشه بسرعه رتبي الغرفه قبل ما اقوم
ضربت الارض برجلها وهي تشوف نهى المنتصره عليها
**
**
**
*
جلس على الكنبه وهو يزفر بقهر : حسبي الله عليه قهرني !
ام راكان : لوكلمت اخوه محمد
قاطعتها ام عمار بسخريه : يا حظي ما يكلمون بعض !!
ابو راكان : اما للي قهرني زود يتكلم بثقه،وكأنه هالعريس
ابو عزام قاطعه باستفسار : من وين استدل عليه هالخلف ؟!
ابو تالا بهدوء : يا جماعه الموضوع انتهى !
وبعدين هالرجال للي خطبها ما يعيبه شيء !!
عزام بإستنكار : انت ناسي الفرق بالعمر ؟!!
ام عمار بكره لخلف : شاف الرجال معه فلوس
وما لقى الا ذي الطريقه !
ام عزام ما حبت يعيدوا ويزيدوا بالكلام : دام السالفه انتهت وعمي كلم الرجال بنفسه وليه الحين شادين اعصابكم ؟!
ام عمار بغيض من تصرفات زوجها : لاني ما اضمن يطلع بسالفة الزواج مره ثانيه !!
ابو راكان بثقه : ما رح يقدر يكررها
عم الصمت بالمكان
واقفه تسمع كلامهم بهدوء وداخلها احباط انه زواج جودي انلغى !!
ابو تالا ناظرها وهو يؤشر: هذي 24 ساعه عندنا !!
كل الانظار تحولت لها حست بالاحراج الكل يناظرها
ام راكان : والله ما اضمن خلف يحطها جاسوسه علينا تنقل له كل اخبارنا !!
ابو راكان ابتسم لساره وهو يؤشر لها تجلس جنبه : تعالي
توجهت له بتوتر واحراج
جلست وهي تناظر الارض مسح على رأسها بحنيه : وين خالتك ام محمد ؟!
رفعت عيونها له وابتسمت بخجل :نايمه !!
عزام بصراحه : والله جدتي اسم عايشه عندها !
طول الوقت هنا او عندنا
قاطعه ابو عزام : وش للي حارك ؟!
خلها على راحتها
ام عزام بتأييد : نكسب اجر باليتيمه !
ابو تالا : ما ارتاح لها أحس خلف دازها عندنا !
وبتنبيه : لا يغركم مظهرها الطيب !
ابو راكان بلامبالاه : وافرض خلف دازها !
خلها تنقل للي تبغاه ما في شيء نخبيه !
وانحنى وقبل خدها : صح يا ساره !
طالعته وابتسمت وهزت راسها
عزام بانفعال : انا ما تقهرني الا لما تقعد تتبسم وتضحك !!
على وش تضحكين يا حظي !!
وبصوت منخفض حتى ما تسمعه امه : متخلفه مثل اخوانها !!
ابتسم ابو تالا على تعليقه !!!
ام عزام : لا تنسى يا عزام تطلعنا للسوق
اسيل تبغى تجهز لعرسها ما بقى عليه شيء !!
لوى بوزه يحس نفسه سواق عندهم !!
**
**
**
تنظف باب البيت وشعرها واقف وتثاوب بنعاس
التفتت على صوته الغاضب : يا سلام اشوفك غايبه عن المدرسه ؟!!
ردت ام محمد وهي طالعه من الباب: وش اعمل فيها؟!
عجزت فيها ما تحب المدرسه !
تطلع روحي لما اصحيها !
ناظرتها ساره بعيون مستنكره ما تدري من وين تجيب هالكلام؟!
غصب عنها تغيبها عن المدرسه !!!
عزام سحبها من إذنها بتوعد : لو اسمع انك غايبه الا اكسرك !!! تبغين تطلعين غبيه مثل اخوانك !
قاطعته ام محمد بزعل : عزام !!
ترك اذن ساره وابتسم : ما عندكم قهوه!!!
ام محمد حاست بوزها: ايه عندنا قبل شوي جهزتها !
تركت ساره المكنسه بحماس : الحين اجيبها !
عزام كشت نفسه ما يدري ليه ينقرف منها
استأذن قبل ما ينحرج من جدته بالقهوه !!
طلعت ساره وشافته وهو متوجه لبيتهم نادته : عمي عزام
التفت لها وابتسم عمره ما شاف بنت خدومه مثلها !
**
**
**
***
مجتمعين على سفره الاكل باستثناء ابو سعود للي نادرا ما يجتمع معهم منشغل بالدراسات العليا
نهى : السنه هذي مرتاحين من شيء اسمه ساره !!
اسماء ابتسمت وبتأييد : صادقه زمان ذبحتينا بساره !!
عائشه طالعتهن بعد ما مطت شفتها : وش دخلك انت وإياها !
وبنغزه : نوافووووووووو
ام سعود بعصبيه من ذي السيره : عائشه !!
وش هالكلام ؟!
وقسم بالله لو اسمع هالكلام ما يصير لك خير !!!
نهى وقفت بزعل
ام سعود نهرتها بحزم: وانت الثانيه اجلسي اشوف !
لا تعملين فيها الزعلان !
عارفك علشان تهربين من الجلي
اجلسي اشوف !!
جلست نهى وهي ماده البوز نفسها تمسك هالعائشه وتكسرها تكسير !!
عائشه بدلع تقهر نهى : ماما باكر عندنا اجتماع الامهات
قاطعتها ام سعود قبل ما تكمل : ان شاء الله
عائشه بتأكيد : ماما لا تنسي لانه
قاطعتها ام سعود بضجر : خلاص قلت لك طيب
عائشه : والله اذا نسيت
ام سعود بغضب : وبعدين!!!
**
**
***
***
***
**
تكلمت بإحباط : باكر اجتماع المعلمات
اسيل : سمعت جدتي ام محمد تبغى تحضره
رفعت عيونها لها وبخجل : كل الطالبات امهاتهم صغيرات الا خالتي عجوز !
وبتردد تعالي انت !!
وناظرت بفجعه خلفها وهي تشوف ام محمد خلفها تردح : مستعره مني !!
انا الحين افشلك يا .....
انا عجوز يا ابنة الشايب ؟!!!!
انا للي مضيع وقتي علشان احضر لك وما احسسك بفقدان امك !
هذي جزاتي !!!
ام عزام باستغراب دخلت؟ وش فيه ؟؟
خبرتها ام محمد وهي مثل الثور الهايج
ورجعت تناظر ساره بنظرات ناريه تفلت عليها
وبصراخ : امشي معي اشوف !!
هزت رلسها بتوتر وخوف من صراخها
ام عزام بترقيع : يمه مو قصدها ساره !
اسيل ترقع خافت على ساره من جدتها : يا جده فهمتيها غلط
قصدها ما تبغى تحرجك وتتعبين
قاطعتها ام محمد : لاترقعين!
اسيل بكذب : دوبني أسألها مين تحبين اكثر شخص
قالت خالتي ام محمد !
ام محمد لانت ملامحها شوي وابتسمت بخبث
وبخاطرها انها ما تخليها تدوام : خلاص سامحتها
وناظرت ساره: انا راجع البيت لا تتأخرين !!
هزت ساره راسها بهدوء وقلبها يدق طبول من الخوف
بعدما طلعت ام محمد انسدحت اسيل تضحك
وهي تتخيل شكل جدتها وهي تبربر
ام عزام بحده : وبعدين مع هالضحك هذا !!!!
ما عبرت احد وهي مستمره بالضحك وساره
تناظرها وتبتسم على ضحكها
**
**
**
**
مرت الايام وساره تنتقل من بيت ابو عزام لبيت ابو راكان
وتحس بالفرح بتواجدها معهم بالرغم من وجود منغصات من ام محمد
جالسه عند اسيل وتضحك بفرح وهي تسمع كلام اسيل : رح اشتري لك فستان كبير
وتعملين تسريحه واقول لهم يحطون لك مكياج
علشان تكونين اجمل وحده
ساره بعدم تصديق : والناس تقول هذي احلى بنت بالعالم !!
قاطعها عزام بسخريه : خلي عنك يا صنوايت !!!
ساره ما اهتمت لكلامه وناظرت اسيل : متى رح تشترين لي !!
اسيل بتفكير : باكر ان شاء الله
عفست ملامحها بإحباط : بس باكر انا مو هنا رايحين لاخوي نادر !
ابتسمت لها : عادي اكيد رح ترجعون قبل الزواج رح احطه عند عمتي ام عمار
قاطعهم بإعتراض : وليه رايحه مع جدتي ؟)!!
اتوقع عندك مدرسه !!
وجدتي رح تجلس كم يوم !!
اجلسي عند عمتي ام عمار لوقت رجوع جدتي!!
رح احش رجولك اذا رحت على خالي نادر!
ما نطقت بشيء بس هزت راسها بطاعه
رجعت لام محمد للي خبرتها تجهز اغراضها
حركت شفتها تخبرها عن رفض عزام
بس سكتت لما صرخت ام محمد : ولا كلمه !
في اليوم الثاني توجهت لسياره خلف وهي تتلفت حولها خايفه يشوفها عزام
ركبت وقلبها يدق طبول وهي تتمنى خلف يحرك بسرعه !
حرك ساره وابتعد عن البيت وتنفست براحه
واستمعت لكلام خلف المعترض : ما ادري ليه رايحه لنادر !!
ام محمد مو عاجبها اسلوب التحقيق : والله ولدي ومشتاقه له فيها شيء ؟!!!
خلف ناظرها لثواني بعدم تصديق : ايه مشتاقه !وليه ما ييجي هو ويزورك ؟!!
ام محمد بقهر : من وين يزورني وهو مفلس
قاطعها : مفلس،!!
وصدقتيه ؟!
تراه كذاب عنده فلوس بس يتظاهر بالفقر حتى ما احد يطلب منه
كله من العقرب زوجته للي تحركه على كيفها !!
ام محمد : وانت وين فلوسك دوم تشكي الفقر !!
خلف بتبرير : فلوسي !
الله يكون بالعون بجل ما تساعديني وتقولين ولدي مطفر
قاطعته تسكر عليه الطريق وهي تستغفر بصوت عالي
**
**
**
**
**
**
**
**
**
دخلت خلف ام محمد وهي تناظر ومستغربه
الغنم مو موجود
سلمت عليهم وفي بالها اسئله كثيره
ركزت سمعها لكلام ام محمد وهي تستفسر : وين الحلال ما اشوفه !!
نادر حك رقبته بكسل وهو يناظر مها : اي حلال؟!
بعته كله
قاطعته بدهشه : وليه تبيعه !!
اشر لها بالدخول وهو يتكلم : يا يمه انا مو مسؤولية حلال تعبوني وانا اراكض خلفهم
مها ابتسمت : تدرين يا خالتي نادر باع الحلال من ثاني يوم رجعتم فيه !
كانت ساره قايمه عنه حمل !
ام محمد : خلاص خلي ساره هنا تعيش واشتري حلال
قاطعها يلغي الفكره : انسي مستحيل اشتري حلال
وطالع ساره وش رايك تعيشين عندنا !
ابتسمت وما ردت وبداخلها ما تبغى تعيش هنا
بس استحت ترفض
ام محمد : اترك ساره وخبرني وش تشتغل الحين !!
نادر رفع حاجب بتذكر : خلف للي وصلكم وليه ما دخل يسلم ؟!
ام محمد بترقيع: عنده شغل ضروري
وبداخلها قهر من عيالها وحالهم كل واحد مقاطع الثاني و لا احد يسأل
أخوتهم مثل الزفت !
****
***
****
*****
ناظرها بكره : كله من تحت راسك والا كان الحين نلعب بالفلوس لعب !!!
غمت عيونها لثواني تكتم غيضها وبغضها له : ترمي ابنتك علشان الفلوس ؟!!
ناظرها باحتقار : انت اصلا وش تفهمين بالدنيا ؟!
ربي بلاني فيك !!
تدرين اني اكره اليوم للي صرتي زوجتي فيه !!!
ناظرته ببرود وبداخلها مجروحه : شعور متبادل !
لولا العيال ما كملت معك هالحياه !!
رد بقرف : من زين عيالك !
لا تتحججين بالعيال خذيهم وانقلعي لبيت اهلك !
وارجعي لي المهر للي دفعته لخشتك للي ما تسوى فلس !
تحاول تكتم غيضها وتتظاهر بالبرود بس صعب عليها شين وقوي عين هي للي ضيعت عمرها معه انسان همجي غبي وبخيل
ناظرها باستصغار : ادري متلزقه فيني خايفه اذا طلقتك ما احد رح يطلع بخشتك ويتزوجك!!
ابتسمت بمراره على حظها : ذكي ما شاء الله عليك !
خلف بأمر : اقول روحي اعملي شيء يعدل مزاجي
وشوفي ولدك الهايت وين طس ؟!
بدل ما يشوف شغل يساعدني ويترك هالمدرسه للي ما في فائده منها !!
وقفت وما ردت على كلامه .......
**
**
***
**
اسيل ضحكت على كلام امها : وش يخلصك من امي !
ام عزام بجديه: انا حلفت اذا اعجبتني بنت بزواج اسيل إلا اخطبها لك!!
عزام ابتسم على انفعال امه : يصير خير !
سلمان :-انا يمه اخطبي لي !
ام عزام ناظرت عزام : ترى سلمان ما فتح ولا كتاب !!!
سلمان بلع ريقه وهو يشوف نظرات عزام
وبسرعه ركض لغرفته
عزام بقهر : كله من هالعمار طول وقته معه
ويتعلم منه الكسل
اسيل بدفاع :-عمتي تقول انه شاطر بالمدرسه
قاطعها : عمتي ما تدري عن حالها اصلا عمار
طول السنه غايب !
اكيد رح يطلع لاعمامه !
سبحان الله الغباء عندهم وراثه!!
ام عزام بزعل: يكفي انت الذكي والباقي اغبياء
يكفي غرور انت واعمامك
شايفين حالكم على الناس !
عزام بترقيع : مو كذا قصدي
طنشته وطلعت من الصاله !!
***
****
****
***
****
***
مر ايام الأسبوع بسرعه وساره متشوقه ترجع
ام محمد بأمر : بسرعه روحي اشتري لي من البقاله ......
هزت راسها بحماس: ان شاء الله
طلعت تركض بسرعه وصلت البقاله واشترت بسرعه تخاف بأي لحظه ييجي خلف وما تبغى تتأخر عليهم
طلعت من البقاله تمشي سريع وانفجعت لما شافت السياره باب بيت نادر وتحركت
ركضت بسرعه وهي تصرخ بأعلى صوتها : وقف
ان تبتسم دائما لايعني انك لاتحمل هموما واحزان
«»
«»
«»
«»
»«
مرت الايام والسنين بحلوها ومرها
والصغير كبر وصارت الايام الماضيه مجرد ذكريات عابره ....
ذكريات نتمنى ترجع من جديد حتى لو كانت قاسيه ومؤلمه ....
الطفوله اجمل مراحل الحياه ويذبحنا الحنين لتلك الطفولة .......
**
**
**
**
هزيت رأسي و انا اطرد ذكرى يوم زواج اسيل لانها بتنعاد اليوم
خلاص حفظت السيناريو
لما تصير اي مناسبه وزواج فجأة تدب بخالتي ام محمد صلة الارحام وبتتذكر نادر
ولازم تزوره )!
كل هالفلم حتى ما أحضر العرس بالضبط نفس للي صار بزواج اسيل تركتني عند نادر
ولما انتهى الزواج أرسلت عمي عزام والحمد لله قام بالواجب وزياده زفني طول الطريق على اساس خبرته خالتي اني رفضت ارجع معها :/
زفرت بضيق هذا الاسبوع زواج جودي وليان ربنا رزقهم بإخوان توأم !!
وقفت على طولي وانا اسمع صراخ خالتي تستعجل فيني !
كل شيء عندها بالغصب بحياتي ما شفت انسانه متسلطه مثلها !!
ادري الحين تفكرون اني تغيرت وشخصيتي قويه
وساره الهبله ماتت !!
ابشركم ساره الخبله على قولتهم بعدها عايشه وتسلم عليكم
حملت اغراضي بسرعه وطلعت قبل ما تطلع وتذبحني افففف نيرانيه ما عندها شيء اسمه هدوء !
مثل ما توقعت واقفه متخصره وتناظرني كأني ذابح اهلها : سنه حتى تجهزين !!!
من زين خشتك عاد !!
قاطعتها بإعتذار : اسفه خالتي
مطت شفتها بقرف وهي تناظرني بتقييم : يخلخل عظامك قولي آمين !
ابتسمت على جملتها للي دوم احفظها غيبا : امين
أعطتني نظره قويه : تلقي وعدك
عزام للي رح يأخذنا !!
شهقت وانا امشي للخارج بسرعه يا فضيحتي الحين ألقاه نار مشتعله فتحت الباب بسرعه بدون ما اناظره وقلبي يدق بسرعه
نقزت على صرخته : مثل الهبله مدرعمه عندي
!!
روحي قفلي باب البيت تاركيته مفتوح !
ناظرت خالتي وهي تبتسم جاز لها صراخه علي
وبسرعه ركضت بإتجاه البيت لما صرخ : تحركي !!
***
***
***
ضربت الدريكسون بعصبيه : يعني يا جده ما يصير هالكلام صار لي نص ساعه بالسياره انتظر !!
ردت جدتي بمسكنه : والله يا وليدي انا جاهزه من زمان بس ذي العوبا اخرتنا !!
ناظرت ساره وهي متوجه لنا مستعجله
يا اخي مشيتها تضحك ما ادري كيف تمشي !!
يمكن اقرب تعبير تمشي بطريقه عبيطه يدينها يتحركن مع رجولها بطريقه ملفته للانتباه !!!
هالبنت مسكينه وقلبها طيب وخبله احس فيها
عرق هبل لا تناظروني كذا !
دوم تضحك وتبتسم غريبه عجيبه ما عندها مصطلح كشره او حزن !!
ناظرتها بالمرايه بعد ما ركبت ناظرتني وابتسمت : انا اسفه عمي !!
ابتسمت بسخريه للحين تناديني بعمي مع انها خالتي !
مو قلت لكم خبله !!
حطت جدتي يدها على كتفي : حرك يمه ولا تلتفت لها بنت (ابنة)الشايب
شفتها تناظر جدتي وتبتسم شبح ابتسامه
احسها تتحسس من هذا اللقب مع انها ما عمرها تكلمت !
حركت وانا اسمع سوالف جدتي المكرره ما في شيء جديد
وكل فتره استرق النظر لها تناظر من الشباك وساكته احسها ما زالت طفله صغيره بتصرفاتها العفويه الكل يحبها ما عدا شخص واحد
اكيد عرفتوها
جدتي الله يسامحها !!!
**
**
**
**
جلست على السرير بضجر كان اليوم متعب بالمدرسه !!
متى اتخرج من المدرسه وادخل الجامعه !!
البيت ممل هذي الايام !
ماما اغلب وقتها مجتمعه مع حريم اعمامي !
ونهى و اسماء تزوجوا !!
لا تنصدموا !
احسهم بسرعه طاروا من البيت يا حظهم !
اخخخ لو يسمعني بابا إلا يعلق حبل مشنقتي
بنات اخر زمن
نرجع لسالفتنا : طبعا بابا كمل دراسات عليا
والحين دكتور بإحدى الجامعات !!
يا خوف قلبي بعد وقت يتزوج على ماما ويقول ابغى وحده بمستواي العلمي !!
تتوقعون ابو سعود يعملها ؟!
تدرون يمكن يتحجج بالعيال بما انه ماما ما خلفت الا سعود !
اكيد يبغى اخ لسعود !
حطيت يدي على راسي مكان الضربه وعفست ملامحي بتفاجئ : ماما
ردت ماما بغضب لانها سمعت كلامي ما شاء الله علي اتكلم بصوت عالي : جعلك تعرسين وزوجك يطق فوقك ثلاث !!
فتحت عيوني باستنكار : لاااااا حرام عليك ماما
اسحبي الدعوه !
ردت علي بغضب : أجل جالسه تطلعين لابوك اعذار علشان يتزوج !!!
حكيت راسي وانا مبوزه : يا ماما انا اتوقع للمستقبل بس انت فهمت غلط
اشرت علي وهي عافسه ملامحها : خلاص اسكتي !!
وبسرعه نظفي المطبخ قبل ما ادخله لاني ما رح اسكت لك !
ابتسمت بشقاوه : نظفت المطبخ يلمع لمع !
وغمزت لها !
خزتني بعيونها بعدم تصديق: ولا ملعقة ابغى اشوف
لميت كتوفي وانا اتمسكن : بس ملعقه وصحن
شفتها سكتت وهي تتحلطم : مستحيل تكملي شغلك لازم
قاطعتها بابتسامه : انا يا ماما لما اترك شوي من الجلي علشانك لما تتدخلي المطبخ تلاقي شيء تتسلين فيه
وبسرعه ركضت قبل ما تضربني بالنعال
سمعتم وش قلت ؟!!
بالنعال !!
لا والمشكله يطلعون بالتلفاز يغنون : يمه يا نبع الحنان ...
اتوقع خربطوا بالكلمات لازم يغنون يمه يا نبع
الاجرام !!!
لا تطالعوني كذا ترى امزح بس لحظه سؤال
كيف يجتمع الحنان مع الضرب بالنعال !!!!!
***
**
***
***
وقفت السياره باب بيت خالي نادر
نزلت بحماس ولفت تناظرني : تفضل حياك !
طالعتها وانا أقرص بعيوني للي يشوفها يقول صاحبة البيت !!
توسعت ابتسامتها بعد نظرتي : تعال اشرب فنجان قهوه !
رديت ما لي نفس اتكلم : للي يسمعك يقول بيتك قاعده تعزمين فيني !!
سكتت وما ردت هذي عادتها واكتفت بإبتسامه بارده
تدخلت جدتي : هذي البنت تحشر انفها بكل شيء
وعامله نفسها صاحبة بيت نادر وبيتكم وبيتي وبيت ابو راكان وبيت خلف
تتكلم وكأنها هي صاحبة هالبيوت كلها
ما تدري انها مجرد حشره بذي البيوت !!
ولفت وجهها جدتي ودخلت وهي تبربر على ساره !
ناظرت ساره للي تنزل الاغراض ولا كأنه احد يتكلم عليها والموضوع ما يهمها ابدا
طالعتني باستغراب لما شافتني اناظرها ابتسمت بخجل : فيه شيء ؟!!
عقدت حواجبي باستنكار بالله هذي انسانه ؟!
ما عندها احاسيس ؟!!
جدتي تسمعها كلام وهي ولا على بالها تكلمت بقهر من وضعها : وش تحسي فيه لما تتكلم جدتي عليك كذا ؟!
نرفزتني لما ضحكت ضحكة قصيره وكملت بفرح : ما يهمني كلامها !!
اهم شيء عمي أبو راكان واهله وعمي ابوعزام يحبوني هذا يكفيني !!
لأنهم أهلي !!
استغربت منها واثقه من حبهم لها !!
اقتربت منها انزل منها الاغراض بدون تعليق !
لو 100 اهل ما اسكت عن احد يهيني !!
بس ذي البنت تفكيرها غريب !!
***
***
***
***
كملت تنزيل الاغراض وبداخلي ضيقه ما يعلم فيها الا ربي !!
يظنون اني بدون احساس او مشاعر لأني اسكت وما ادافع عن نفسي !
كلامها يجرحني بالصميم خاصه اذا كان في احد موجود !!
بس ما اقول الا عجوز وربي يصبرني عليها !
ناظرت عمي عزام وابتسمت له : ادخل !!
رد بنرفزه : مو فاضي
غريب هالانسان يعصب فجأة ويخوف
مع ذلك احبه من صغري بالرغم من حدته احيانا معي !
تنهدت بتعب لما شفته حرك السياره وغادر المكان
وبعفويه لوحت بيدي له وبسرعه نزلتها لما تذكرت انه يولع من ذي الحركه !
ما اضمن يرجع ويكنس بشعري الارض !
ناظرت الاغراض احملهن بسرعه لما شفت
ولد ام مصلح عقله مو طبيعي ما ادري من وين يطلع لي
اخاف تطلع خالتي وتعمل لي فلم مثل ذيك المره مع انه مجنون بس خالتي تدور الزله !
صابون نابلسي ما يخلصني منها !!
تبغى بس الزله علي !
دخلت وسلمت على مها بحراره وهي بادلتني الشعور
وبغيت أجلس بس سرعان ما فزيت لما صرخت خالتي :قومي جهزي الغداء مع مها !!
ردت مها وهي تؤشر لي اجلس : والله ما تساعديني !
اجلسي دوبك جايه ارتاحي
مطت شفتها خالتي ما عجبها : طيب روحي نادي نادر من البقاله نبغى نتغدى بسرعه !!
شفتم ما تطيق تشوفني جالسه ومرتاحه هزيت رأسي بطاعه : ان شاء الله
طلعت لبقاله نادر ما خبرتكم انه فتح بقاله
احس هالشغل يناسب نادر يبقى جالس طول وقته !!
دخلت البقاله وكان جالس ويدخن اقتربت له وانا ابتسم : سلاااااام
رد لي وهو يبتسم : هلا والله !
وانا اقول القريه نورت !!
ابتسمت بخجل : منوره بوجودك !
غمز عينه وهو يبتسم : اكيد امي ارسلتك علشان نتغدى!!
هزيت رأسي وانا اناظر محتويات البقاله
وقف جنبي وبصوته الحاني : خذي اي شيء نفسك فيه
البقاله تحت امرك !
هزيت رأسي بالرفض ما احب استغل احد حتى لو من طيب نفسه
هذا الدخل الوحيد له ربنا يبارك له !!
طنشني وصار يختار لي على ذوقه وهو يتكلم : اذا على امي لا تهتمي كلي هنا بالبقاله
انحرجت ما احب اغلب احد : والله ما ابغى
اعطاني الكيس وبحرص :والله ما اخبر امي !
ابتسمت له بامتنان الزياره الماضيه لما جيت البقاله
واعطاني نادر خالتي فضحت الدنيا !!!
وكأني سارقهم من البقاله !!
تنهدت بضيق متى اخلص من خالتي ام محمد
مسك يدي تعالي نرجع وكلي وانت بالطريق
طلعنا وانا اكل بسرعه قبل ما نوصل
وللي يشوفني يقول مفشوحه عمرها ما شافت خير !!
**
**
**
**
نفث الدخان بعصبيه وناظرني والشرار يطلع من عيونه : مو على كيفه ابوك يآخذ المهر !!!
طالعته بهدوء عكس القرف والكره للي بداخلي : هذاك ابوي روح كلمه انا وش دخلني ؟!
فتح عيونه بغيض وهو يشد قبضه يده : نفسي تكونين بين يديني واكسرك تكسير !!
ابتسمت بقلب ميت على كلامه بس شغل تهديد وتوعد وما يعمل شيء : تفكر الدنيا سايبه عندك؟!!!!
للي يسمعك يقول ما عندي اهل وعزوه !!
عفس ملامحه بقرف : من زين اخوانك عاد !!!.
عقدت حواجبي باستنكار مو عاجبه إخواني للي الكل يتكلم عن سمعتهم الطيبه ووظائفهم المرموقه!
ييجي هذا الداشر ويتكلم عليهم رديت عليه بحده : على الاقل اخواني يخافون ربنا
قاطعني بنفس الحده : وش قصدك ؟!
رديت وانا اناظره بنظره تقييم : انت مال اليتيمه ما سلم منك !!
على بالك ما ادري انك مقدم اسمها بالجمعيات الخيريه للايتام وكل الفلوس للي تطلع لها تأكلها !!
بس خلي في بالك ترى للي يأكلون مال اليتيم
قاطعني بصرخه والشرار يطلع من عيونه : خلي هالسالفه تطلع من هنا !
وقسم بالله ما يحصل لك خير فاهمه !
زميت شفتي بقرف وقهر منه ما علقت
خليه يطلع من البيت وارتاح من خشته !
عمركم سمعتم بوحده تتمنى زوجها يطلع من البيت ؟
ايه انا اتمنى يغيب عن عيني طول الحياه وارتاح منه !!
بعد ما طلع قصدي انقلع دخلت جودي وهي تناظر الباب ومتخوفه يرجع مره ثانيه حبيت اطمئنها : خلاص راح اجلسي
جلست وهي تزفر بضيق : مخنوقه !!
عقدت حواجبي: ليه يا جودي ؟!،
الاسبوع الجاي زواج
قاطعتني وعيونها تلمع بالدموع: مخنوقه عليك يا ماما كيف تجلسين بالبيت لوحدك !!!!
ضحكت على كلامها : للي يسمعك يقول طول الوقت بالبيت !!
وبالنسبه لابوك لا تهتمي تراه بس شغل حكي !!
جودي بإقتراح : ليه ما تخلي ساره تعيش عندك
قاطعتها : اسكتي لتسمعك جدتك
ما ادري نازل عليها الحنان تقول ما تطلع ساره من عندها الا لبيت زوجها !!
جودي لوت بوزها : عزالله ما عمرها ساره بتتزوج !!
وبتردد ناظرتني : ماما
امممم البارحه سمعت جدتي تكلم بالجوال وتقول البنت بعدها صغيره خلاص اشوف اخوها وارد خبر !!
مين تقصد جدتي بكلامها معقول ساره ؟؟؟!
سكتت افكر بالكلام واضحه ما يبغى لها تفكير !
بس مين للي خطبها ؟!
اذا على خلف اكيد رح يزوجها اذا في فلوس !
احس نفسي حامل هم هالساره متى تتزوج وتستقر !
لو اعرف احد كان دليته عليها لا تقولون صغيره
ما شاء الله للي يشوفها يظنها بالعشرين !
لازم اعرف السالفه بالضبط قبل ما توصل لخلف !!!
**
**
**
**
بعد العصر
ابتسمت مجامله لام هزاع اليوم جايه تسلم على خالتي
احس ما حد يعبي راس خالتي علي غيرها
قررت اقوم اشتغل اي شيء بس وقفتني بصوتها النشاز : وقفي يا بنت الشايب !!
طالعتها وانا ابتسم إلتم المنحوس مع خايب الرجاء الله يستر وش تبغى مني
: اعوذ بالله حشى تقول انها ناقه واقفه!!
خالتي بتأييد : طولها طول النخلة وعقلها عقل صخله!!
ام هزاع تناظر خالتي : هذي اذا وصلت سن العشرين كم رح يوصل طولها ؟!!
قاطعتهم مها وهي تدخل وتتربع : قل اعوذ برب الفلق !!
قولن ما شاء الله لتصكن البنت عين !
ضحكت على رد فعلهن بنفس الحركه مطن شفتهن بجعرفه !
مها بنغزه : انا اقول يا ام هزاع انك تغارين من طول ساره !
لانك قصيره وكلك على بعضك شبر !
فتحت عيونها : انا
بعدها ارخت ملامحها وبنغزه : ترى البنت الطويله مو مرغوبه
الناس لما تخطب لولدها تختار البنت القصيره او للي طولها وسط !
وتكون نحيفه مو متينه !
تدرين الاسبوع للي طاف حرمه سألتني عن عروس وقلت لها عن ساره
تدرين وش قالت ؟!
قالت احد يخطب لولده زرافه !!
وفوق هذا دبه !!
حتى ولد زليخه كان يدور على عروس وقالت له امه عن ساره قال هذا الناقص اتزوج عمود كهرباء مطفي
قصده انها مو حلوه !
ناظرتها مها بحده : والله انها حليوه وشخصيه وطولها مناسب بس ا لغيره تعمي العيون احيانا
ناظرتهن يتجادلن بسببي ابتسمت بألم
لذي الدرجه طولي بشع!!!
تركت المكان وطلعت وانا مخنوقه !!
وكلام خالتي ام محمد يتعشعش براسي
مين للي رح يخطبني !!
رح ابقى عله على قلبها حسب كلامها !
تدرون اني ما عندي ثقه بنفسي ولا واحد بالمئه ؟!!
خالتي زعزعت الثقه بنفسي دائما اشوف نفسي ناقصه عن الناس بكل شيء !!
تدرون اني استحي اناظر نفسي بالمرايه!
واذا ناظرت بسرعه نزل عيوني !!
مع انه مها تقول لي اني بفتره المراهقه
وكل الحبوب للي بوجهي رح تختفي
وطلبت من خالتي تأخذني للدكتور ردت بكل بساطه
«الشين شين يعني الدكتور رح يحط لها جلد جديد !!»
لا والمشكله قدام ام راكان وام عزام تقول اني رافض اروح للدكتور وتجلس تشكي عن عنادي !!
حتى ما احد يلومها بالتقصير !
تحسست الحبوب للي بجبهتي وبدون شعور فركتهم بقوه اطلع قهري فيهم !!!
نفسي اغمض عيوني وافتحهم ألاقي
: ساره يا ساره جعلك ما تسمعين ان شاء الله
شفتم حتى احلامي تقاطعها اروح اشوف خالتي وش تبغى احسن من الاحلام للي ما تقدم ولا بتأخر !!
دخلت وانا احاول اكون طبيعيه انفجعت اول ما رفعت نظري ....
قال رسول لله صلى الله عليه وسلم: لا يلدغ المؤمن من جحر مرتين،
وتقول حكمة الأجداد: إن خدعك أحد مرة فأنت طيب، وإذا كرر خداعه فأنت أحمق.
المؤمن كيس فطن قد يخدع مرة لحسن ظنه أو كرم طبعه لكنه أبداً ليس بالغر الساذج.
تعلم الذكاء الحاضر والإدراك والنضج الإجتماعي الذى يعطينا القدرة على استيعاب التجارب السابقة.....
)(
()
)(
()
)(
()
تحسست الحبوب للي بجبهتي وبدون شعور فركتهم بقوه اطلع قهري فيهم !!!
نفسي اغمض عيوني وافتحهم ألاقي
: ساره يا ساره جعلك ما تسمعين ان شاء الله
شفتم حتى احلامي تقاطعها اروح اشوف خالتي وش تبغى احسن من الاحلام للي ما تقدم ولا بتأخر !!
دخلت وانا احاول اكون طبيعيه انفجعت اول ما رفعت نظري همست : محمد
استغربت محمد اخوي هنا !!
غريبه صاير بالدنيا شيء حتى ييجي خلفنا
: سلمي على اخوك يا قليله الحيا !
الفجعه نستني اسلم عليه تقدمت وانا ابوس يدينه وراسه حسب اوامر خالتي لازم اسلم على محمد كذا !
انا ما اتضايق بالعكس محمد بمقام ابوي وانا من عمر عياله واصغر !
جلست والفضول ذابحني اعرف سبب الزياره طالعت خالتي وهي تسأل محمد بقلق: غريبه جاي لهنا وش فيه ؟!
صاير شيء ؟!
وبملامح مرعوبه :في احد مات ؟!
تكلم !!
شفتم خالتي مثل الغراب ما تنعق الا للخراب
يعني لازم احد يموت علشان ييجي محمد !!
رد عليها وهو مبتسم على خوف امه : بعيد الشر يا يمه ..
الكل بخير
سكت لثواني وبعدها اردف كلامه بهدوء : ناسيه هذا الأسبوع زواج بنات خلف ولازم احضر
ما لقيتك بالبيت وجيت اسلم عليك هنا ؟!
وباستغراب وهو يناظر المكان بجدرانه القديمه : ليه جايه هنا ؟!
ما تبغين تحضرين عرس البنات !!
ردت خالتي بطيبه : والله يا ولدي ابغى احضر
بس جيت اسلم على نادر قلبي متوله عليه !!
اخخخخ ذبحتني حنيتها مسكينه متوله على نادر مو كأننا قبل اسبوعين كنا عندهم !!
محمد بانتقاد : وليه تزوريه انت ؟!
بدل ما ييجي هو لك ويسلم عليك
قاطعته خالتي بدفاع : يعني اخوك باب رزقه هالبقاله يسكرها علشان يزورني ؟!
ما عندي شيء انا ازوره !!
الظاهر ما عجبه ردها كمل كلامه بهدوء : تراني توصلني اخبارك كل أسبوعين حامله عفشك ورايحه لنادر
قاطعته خالتي بحده : وش رأيك يا محمد كل ما ابغى أطلع من البيت استأذن منك والا من زوجتك ؟!!
فتح عيونه باستنكار : وش دخل زوجتي !!
وبتبربر يمه انا مو عاجبني هالحال كل شوي ساحبه هالبنت خلفك مثل النعجة
واشر علي
محمد يقصدني !!
والله ما دريت اني نعجه والله حاله !!
طالعتني خالتي بحقد انا والله ما لي دخل ليه تناظرني كذا
: أكيد هي للي تنقل لك اخباري !!
ناظرتها باستنكار لازم كل شيء تحطني فيه !
محمد بسخريه : ايه ساره تنقل لي من جوالها للي اشترته الأسبوع الماضي
طالعته باستنكار من وين يطلعون الكذب هذا
شفت نظرات خالتي الناريه وهي تكلمني : يا قليله الحياء جوال مره وحده من وراي !!
مين جابه لك ؟!
ضحك محمد بصوت عالي وهو يناظر خالتي : هههههههه خلف للي اشتراه لها
ارتخت ملامحها وطالعت محمد : ما لقيت الا ذي الكذبه !!
محمد بلوم : يعني يمه لما اتصل معك تتحججين الف حجه علشان ما اكلم ساره ؟!
انت من عقلك كيف ساره هي للي تنقل لي الاخبار ؟!!
وبجديه : انا قررت ساره تيجي معي ما لها قعده معك
نقز محمد من رد فعل خالتي وهي تقاطعه بصوتها للي يرعد ويدينها تشبر : وقسم بالله لو تأخذها لساني ما يناطق لسانك ولا انت ولدي ولا انا اعرفك !
وش قصدك بكلامك تشكك بتربيتي لها !!
انا اخذتها وهي شبر صغيره وربيتها على يديني علمتهاالصلاة والصيام وما قصرت بشيء
تيجي انت وتشك بتربيتي ؟!
انفجع محمد من العاصفه للي هاجمته : خلاص خلاص هدي
اعوذ بالله هبيتي فيني كذا !
خذيها واشبعي منها !!
زفر بضيق وسكت والظاهر مخنوق من امه للي للحين تبربر !!
محمد بجمود : خلاص فكيني من هالسالفه علقتي عليها !
ما ابغى ساره خليها عندك
الحين حنا بموضوع العرس
ترجعين معي والا مع نادر ؟!
ابتسمت على سؤاله لأن الاجابه معروفه !
خالتي بزعل : قبل الزواج بيوم ارجع مع السواق !
عقد حواجبه محمد وما عجبه الرد: ونادر ؟!
خالتي وهي ماده البوز يقال انها زعلانه : نادر ما رح يحضر !
وقبل ما تفتح فمك بكلمه مو مستعد يقفل باب رزقه علشان
قاطعها بسخريه : لا تبررين !
من متى نادر يفهم بالواجب ويقدر احد !
يمه تراه عم البنات كيف ما يحضر ؟!
طول عمرنا رح نبقى مسخره لعمي ابو راكان وعياله
والفضل يعود لعيالك المتخلفين !
قاطعته خالي بحده : قول لنفسك ما تكلم خلف ولا تسلم عليه !
ركضت خلف كلام زوجتك وقاطعت اخوك
قاطعها بقهر : هو قال لك هذا السبب ؟!
ما قال لك حضرته هو للي قاطعني وما يكلمني من سنين
ام محمد بعدم تصديق: .ليه خلف يقاطعك
تبغى تقنعني ماخذ خاطر لام عمار تراني اقولها بوجهك
تراه مو مثلك خروف
هز راسه بقهر : مو هذا السبب !
السبب يمه ابنك قبل سنين يبغاني اخطب جودي لولدي مهند وانا رفضت
وقلت له مهند خاطب وهو معند راسه يبغى مهند يفك خطبته بالله هذا كلام ؟!
وراح لولدي خالد علشان يتزوج جودي وخالد رفض قال له يا عمي انا مرتاح مع زوجتي وهو معند !
علشان كذا قاطعني ولدك وما يكلمني لاني رفضت بناته
تنهدت خالتي والقهر واضح بملامحها ما تدري وش تدافع عن خلف : والله ما ادري وش اقول ؟!
ترى وقسم بالله تقهروني اخوان بس بالاسم ؟!
محمد ينهي الحديث : لا تلوميني قولي لعيالك
هم للي يبغون القطاعه !
خلف مقاطعني ومع ذلك جبرت نفسي وجيت احضر الزواج حتى ما يتشمت فينا احد !
وولدك الثاني نادر ولا كأنه عنده اخوان فضحنا وهو داير من مكان لمكان والناس تتصدق عليه
قاطعته مها وهي تدخل ومتكتفه : والله متى ما جاء نادر ومد يده لكم وقتها تعال تكلم !
وحنا حرين في حياتنا ما لاحد دخل فينا
قاطعتها خالتي : ام هزاع روحت ؟!
ابتسمت على سؤال خالتي حنا وين وهي تسأل عن ام هزاع !!
مها مو فاضيه لسؤالها ردت على عجاله : ايه انقلعت
والتفتت على محمد تكمل : ولا تتكلم عن الأخوه ما شفتك يوم قلت اساعد اخوي
قاطعها محمد بتهجم : وين راح زوجك بالورث للي اخذه ؟!!
ما عندكم عيال ولا بنى زوجك بيت ولا دراسه ولا مصاريف وين صرفتم الورث للي طلع لكم وين ؟؟!!
لوت مها بوزها وردت بسخريه : والله نسينا نستأذن منك قبل ما نصرف اي فلس !!
وتغيرت ملامحها للحده :وش دخلك وين صرفنا الفلوس ؟؟!!
ترى حنا فاتحين بيت ونصرف على اربع اشخاص
بدل ما تساهم بمصروف امك للي كل يوم ناطه بخلقتي !
والا اكلها ببلاش ؟!
وقفت خالتي والشر يطلع من عيونها : تعايريني بلقمتي !
صدق انك قليله اصل !
وبعدين انا اجلس في بيت ولدي مو بيتك !!
مها ردت بطريقه مستفزه : والله للي قال لك انه هذا بيت ولدك تراه يضحك عليك ! ا
البيت هذا اشتريته من فلوسي
محمد بتكذيب : من وين لك الفلوس ؟!
وبسخريه اوه نسيت انه ابوك كان عنده اكبر الشركات !
وبحده : لا تنسين اصلك
اكبر خطأ انه ابوي وافق على زواج نادر من وحده منتفه زيك !
ردت مها بقوه : ومين بترضى بواحد عقيم مثل اخوك!!
وبردح تابعت كلامها : وبعدين لا تتكلم عن الاصل والنسب روح شوف اخوك خلف للي الكل يتكلم انه اكبر نصاب بالعالم !
وش الفائده من الاصل وهذا حاله !
ومتزوج بنت العم للي الكل يتكلم بمناصبهم العاليه !!
وش استفاد من بنت الاصل ؟!
وبنظره حاده تابعت : للمعلومه ترى ابو راكان يتفشل منكم يا عيال ابو محمد لانه سيرتكم تنزل الرأس
قاطعها بعصبيه : رأسنا مرفوع غصب عنك !
قولي انك لحستي عقل نادر وشفطتي فلوسه
: وش فيه صوتكم طالع بكل الحاره ؟!
مها ناظرت نادر : تعال شوف اخوك للي متهجم علينا !
محمد بحده : لا تزودي كلام من عندك أحسن لك !!
نادر اعطى محمد نظره قويه : جاي تهدد زوجتي ؟!!
وقدامي بعد !!
محمد بسخريه : لا تعمل فيها القوي وانت خروف قدامها !
اكيد رح توقف معها ضدي وضد امي وضد كل الناس !!
يا حيف على الشوارب للي تمشيك حرمه على كيفها !
مها رفعت حاجب بنغزه : قول هذا الكلام لنفسك الكل يقول انك طرطور لزوجتك
قاطعها بقرف : انت بالذات تخرسين !
وتركهم وطلع وهو ما يشوف الضوء قدامه
وقفت خالتي وهي تعدل الشيله وناظرتني بغضب : انقلعي وقفي محمد انا راجعه معه ما لي قعده هنا !
هزيت رأسي بفرح واخيرا رح نرجع وطلعت خلف محمد
الحمد لله واخيرا رح أحضر زواج بنات خلف
صرخت بأعلى صوتي وانا اشوفه متحرك بسرعه
ما رح استسلم هذي فرصتي
ركضت لعلي ألحق عليه
انقطع نفسي وما في فائده المسافه بيننا كبيره
وما رح يسمعني !!!
اوووووه احس قلبي رح يطلع من مكانه بسبب الركض
اختفت سياره محمد عن نظري وطارت فرصه رجوعي !
يا كرهي لذا المكان
: اول مره اشوف ناقه تركض وتصرخ كذا !!
: وقسم بالله حسيت بهزه ارضيه وهي تركض
اكيد عرفتم سبب كرهي لذي القريه عيال ام هزاع ما يتركوني بحالي اتمنى تكون عندي القوه وامسح فيهم الارض
طنشتهم وتوجهت لبيت نادر وهم يمشون خلفي
ويتمسخرون علي
دخلت البيت وقفلت الباب وانا ازفر براحه
سرعان ما رجع قلبي يدق بقوه من صرخة خالتي : وين محمد !!
حسبي الله على عدوها خرعتني اخذت نفس ورديت بخيبه : لما طلعت كان متحرك حاولت انادي عليه بس ما سمعني !
ناظرتني بغضب: خلاص قفلي حلقك الحين اتصل بالسواق ييجي يأخذني ما لي قعده هنا
نادر بقله حيله : يا يمه خلينا نتفاهم
ردت عليه بعصبيه وهي تحط الجوال على اذنها : دام هالكلبه الو .....وينك .....تعال علي....وقسم بالله اذا ما جيت الحين الا اسفرك ...اقولك بسرعه ...ايه بيت نادر ...تحرك بسرعه
قفلت الخط وعيونها ترسل نظرات ناريه
_اعوذ بالله وقسم بالله نظراتها تخوف
بدأت ترعد من جديد : انا اخر عمري وحده قليله اصل تطردني !!
وقسم بالله إلا تندم !
نادر بضيق :يمه
زفر بضيق وبترقيع : يمه انا اعرف مها ما تغلط على احد
دفته خالتي من كتفه بحسره : يا خساره تربيتي فيك يعني انا للي غلطت عليها؟!
وزوجتك منزله من السماء ما تغلط !
الله يكثر خيرك
_ طالعت نادر بحزن احسه متورط ما يدري مع مين يوقف !
بس مستغرب تصرف مها اول مره اشوفها كذا مفترسه يمكن
: انت ما تسمعين ؟!
بسرعه جهزي اغراضي ما لي قعده هنا !
فزيت مثل البرق اجهز الاغراض قبل ما تصب غضبها علي !!!
**
**
**
**
جلست بضيق من هالموقف انا متوهق بين زوجتي وأمي !
طالعت امي بنظره رجاء
_ لا تطالعني كذا !
لو انك رجال كان كسرت رأسها !
انسى اذا عندك أم دام هذي على ذمتك !
لما تطلقها وقتها تلاقي رضاي
قاطعتها بضيق وانا اشوفها تصعب الموقف : لو طلقتها وين اروح ؟!!
طالعتني امي شوي وتلطم : انت مو رجال تقول هالكلام ؟!،-
قاطعتها بتذكير : البيت بإسمها
قاطعتني وهي تشد على اسنانها : من خبالك الزائد يا مغفل !
طلقها وتعال اسكن عندي
ابتسمت بألم : مين ترضى بواحد عقيم !
رجعت امي تردح : الف وحده تتمناك انت
ضحكت بمراره : الف وحده ؟!
يمه الله يهديك مين ترضى بواحد كبير بالعمر مطفر ومتزوج وعقيم ؟!
وبجديه حسمت الامر حتى اقفل الموضوع : يمه انا عن مها ما اتخلى !
لو ابعد عنها ساعه امووووت لأني أحبه..
قطعت كلامي وانا اتحسس جبهتي مكان الضربه !
ضربتني بالمفتاح وعيونها مشتعله من الغضب !
_ حبك قرد يا متخلف ! وش عاجبك فيها هالجوكر ؟!
دخلت مها وهي متكتفه : مثل ما عمي الله يرحمه كان على عيونه غشاوه وانعجب فيك !
ردت امي وهي ناويه الشر : وش قصدك ؟!
ابتسمت مها ببرود : نفس قصدك بكلامك عني !
ناظرت مها وانا اغمز لها تمشي الموضوع
وانا متوهق بينهم
ما ادري وش للي قلب حالهم بذا الشكل ؟!
**
**
**
**
**
تحس بالفرح مجتمعه مع اخواتها تحب تشوفهم وتجلس معهم
بعد زواجهم تحس بالوحدة بالبيت
ابتسمت على شكل نهى وهي معصبه : الله ينكد عليه !!
إذا ما نكد علي ما يرتاح !
المفروض يسمونه نكد حسبي الله ونعم الوكيل !!
عائشه حافظه سيناريو نهى دائما : وش صاير ؟!
نهى وهي تناظر إصبعها احمر : شوفي إصبعي كيف صار ؟!
ربي لطف والا انكسر !
اسماء وهي تحط يدها تحت خدها : نفس السبب ؟!
عائشه بحكمه : يأ اختي ليه استيعابك ضعيف ؟!
زوجك يغار عليك وما يبغى يبان منك شيء
خلاص احفظي هالدرس !!
نهى وهي تشبر بيدينها : خلاص أنا وصلت درجه الانفجار !
فقع مرارتي !
والله ما ظهر الا طرف اصبعي بالغلط
عائشه بحالميه : يا حظك تزوجتي واحد يغار عليك ومهتم فيك
قاطعتها نهى بقرف : الله يقطعه من حظ !
ونزلت رأسها تندب حظها : أنا طول حياتي وانا اتمنى زوج فري
اسماء ناظرتها وضحكت بصوت عالي : تتذكرين يا نهى اول ايام بالزواج
ابتسمت بمرارة نهى وهي تتذكر ذاك اليوم : انا على بالي تزوجت خلاص تخلصت من حكم ابوي ورح اعيش على كيفي !
وأنا مصدقه نفسي عروس ونبغى نطلع نتعشى بمطعم
ما خليت شيء الا وحطيته بوجهي
ويمكن علبة العطر رشيتها مشفوحه مكياج وعطور
عائشه باهتمام : انا ما ادري عن ذي السالفه ؟! طيب زوجك كيف رضي تطلعين كذا ؟!!
اشرت لها نهى بيدها : انتظري اكمل هالفلم الرومنسي !
طبعا طلعت من الباب وانا كاشفه وجهي خلاص قررت اترك النقاب وكنت مبسوطه على هذا القرار وحاسه نفسي الحين رح اعيش حياتي !
يا ارض اشتدي ما عليك احد قدي !
وكان المحروس (حسبي الله عليه ) مو منتبه لي متقدم مني كم خطوه
فحبيت ألفت نظره تكلمت بدلع مع مرور رجال من جنبنا : حبيبي
التفت لي وكأنه جن تلبسه سحبني للجناح
وعيونك ما تشوف النور !
عمري ما رح انسى ذاك اليوم شبعت من الضرب
وانتهت الليله وكان احلى عشاء مشبع بالكفوف وشد الشعر والشتائم
تبغون الصراحه ما خلت السالفه من المرطبات علشان ترطب مكان الكف وخدي ما يصيبه جفاف
حسبي الله كل كلمه بعدها يتفل بوجهي !!
كتمت عائشه ضحكتها بكفها وهي تتخيل شكلها
اسماء بابتسامه : احمدي ربك ما قال لابوي كان كنت بخبر كان !!
نهى عضت شفتها بقهر : ابوي ما لقى الا هالمتخلف وزوجني إياه !!
لكن دواه عندي
والله ما ارجع له واذا ما خليته يبوس الارض علشان ارجع له ما اكون نهى !
عائشه : وابوي ؟!
نهى بقوه : مو خايفه من احد !
ورجعه مو راجعه )
اسماء بسخرية : حرام عليك ابنتك صغيره كيف تحرميها من ابوها !
وبضحكه مكتومه : والجنين للي بعده ما شاف الدنيا يطلع ما يلاقي ابوه
نهى انقهرت من سخريتها : خليك بكرشتك احسن لك !
عائشه قطعت كلامهن : صوت بابا وصل ؟!
نهى بأمر لعائشه : قومي قولي لابوي اني مو راجعه لزوجي !
واذا جاء زوجي يصرفه لاني مو طايقه اسمع اسمه !
عائشه ابتسمت وهي تحرك حواجبها : هذا بابا جاء قولي له
دخل ابو سعود ورد السلام برسميه وناظر نهى بأمر : زوجك ينتظرك برا بسرعه اطلعي ولا تأخرينه !
فزت نهى على حيلها : ان شاء الله يبه !
قرصتها عائشه بعيونها : يالقويه !
وين كلامك قبل شوي !
نهى اعطتهن نظره قهر بعد ما لبست وحملت ابنتها النائمه على الكنبه
ابتسمت اسماء بسخريه عليها سرعان ما نقزت لما كلمها ابو سعود : وانت وين زوجك ؟!
اسماء وقلبها يدق : راح مع ربعه
هزراسه ابو سعود وتوجه لغرفته بعد ما طلعت نهى !
تنهدت اسماء براحه : يعاملنا وكأننا طلاب عنده بالقاعه !
كل يوم يزيد جديه
وبهمس وهي تبتسم : ويزيد بخل !
قرصتها عائشه بلوم :ما يصير تقولين كذا
هذا ابونا!
دخلت ام سعود وناظرت اسماء بابتسامه : هلا نور البيت؟!
وين نهى ؟!
طالعت عائشه اسماء وضحكت على نهى !!
طلعت من بيت نادر وهي تتذكر كلام خالتها : انت انطقي عند اخوك مالك رجعه معي !
كانت متأمله تحضر زواج بنات خلف بس كل آمالها طارت !
طرقت الباب ب هدوء وما انتظرت احد فتحته دخلت وهي ماده البوز
_ يا عيني وكاله من غير بواب !
ساره ابتسمت بدون نفس وهي تشوفها جالسه بالحوش : وش تعملين هنا !
سعديه بملل : والله ما ادري وش اعمل طق قلبي
غريبه جايه هنا ؟!
وبلقافه : وش صاير عندكم يقولون صوتكم واصل بكل الحاره !
فتحت عيونها ساره باستنكار من هذي القريه لقافتهم غير طبيعية بجمع الاخبار
هذا الشيء ما حسته موجود لما تكون عند بيت ابو راكان الجيران كل واحد بحاله وما يتدخل بالثاني
عكس ذي القرية للي تحس انهم يتصنتون على بعض حتى يعرفون اخبار بعض وينشرونها !
سعديه وهي تحك ذقنها بملل :علامك منصدمه !
ويقولون في ناقه هاربه من أهلها وتركض بالشوارع مثل المجنونه
فتحت عيونها ساره بتصديق لكلام سعديه
اردفت سعديه كلامها بابتسامه خبيثه : ويقولون هذي الناقه تركض وتصرخ وقف وقف
محمد وقف
عضت شفتها ساره وهي تقرص سعديه بعيونها بعد ما عرفت انها المعنيه : سخيفه !
اشرت لها سعديه بيدها الصغيره المائله للاسمرار: اجلسي اجلسي
جلست ساره بإحباط : وش عرفك ؟!
ضحكت سعديه : وقسم بالله حتى لما تجلسين نفس الناقه
وغطت وجهها بكفيها تكتم ضحكاتها
ناظرتها ساره بملل من ذي السالفه للي ولدت عندها عقده من الطول : جعل الناقه ترفسك يالقزم !
فتحت سعديه عيونها الصغيره باللون البني الغامق : انا قزم ؟!
وبفخر : يا ناقه تراك انت للي متخلفه عن بنات جيلك
انا نفس طول البنات بالصف وما في بالصف غيرك عمود
ساره قلبها مو رايق : اسكتي
سعديه ابتسمت : خليني احزر العجوز الشمطاء تركتك وهجت !؟!
ساره بقهر وشوي تبكي : وعدت البنات احضر زواجهم !
مسحت سعديه حبات العرق من جبهتها من حراره الجو بالرغم من قرب قرص الشمس للمغيب : دامك مو قد كلامك ليه تتفلسفين ؟!!!!
وبتفكير: وش رأيك نعمل لك مثل ساندريلا ؟!
تحضرين الحفلة غصب عن خالتك ؟!
مدت بوزها ساره : مو ناقصه سخافتك تراها واصله هنا
واشرت على انفها !
سعديه : انا مو عارفه ليه انا بس للي تفردين عضلاتك علي ؟!!
قدام خالتك مثل الارنب !
ساره ابتسمت بدون نفس : لا تنكرين حتى انت تخافين من نظراتها ؟!
سعديه مطت شفتها : اعوذ بالله مثل عيون البومه ؟!
المهم خلينا بالعرس وش رأيك تحضرين ؟!
ساره بسلبيه : ما ابغى احضر اخاف تشوفني خالتي !
تراها نبهت علي اذا رجعت رح أحصل شيء ما يعجبني !
سعديه تربعت وهي ترفع يدينها بالدعاء : جعلها تحصل سياره تدهسها وتخلصنا منها!
تضايقت ساره من الدعاء : حرام عليك !
دفتها سعديه وهي عافسه ملامحها : تدرين ام محمد قليله عليك !
انت لازم تعيشين عند وحده تحرقك حرق !
تنهدت ساره وابتسمت وهي تناظر سعديه
كيف ملامحها متجهمه !
ما تنكر تأثرها بتصرفات سعديه تقلدها بكل شيء
طريقه المشي ،طريقه الاكل ،طريقه الكلام ،
تحس نفسها كوبي بيست عنها !
كيف ما تقلدها وهي من اصدقاء الطفوله بالنسبه لها !
تحب الصداقه وتقدس شيء اسمه
ا ل ص د ا ق ه
للحين تتذكر عائشه وتتمنى تشوفها وتجلس معها !
ما تدري كيف صار شكلها الحين ؟!
معقول كبرت وصارت طويله مثلها ؟!
يمكن بعدها صغيره وقصيره مثل سعديه !
يمر بخاطرها تساؤلات عن شخصية عائشة
واهم سؤال
معقول بعدها تتذكرها وتحن لها مثل ما هي تحن لها وتتمنى تشوفها ؟!!
**
**
**
**
**
جالسات بالحديقه بشكل دائري والاجواء تبعث بالنفس الارتياح مع مغيب الشمس
ويتكلمون بأمور حفلة الزفاف بكل اهتمام
استغربوا رجوع سياره ام محمد
اشرت ام راكان بيدها لام محمد وهي مستغربه
من رجوعها الحين ؟!
ام عزام بهمس : غريبه راجعه الحين ؟!
جودي بضيق : شفتي ساره ما رجعت !
تقدمت ام محمد ووجهها احمر منتفخ من القهر
تحس بداخلها قهر المفروض فرغته قبل ما ترجع
سلمت بدون نفس وجلست
- غريبه راجعه الحين ؟!
ام محمد وهي عافسه ملامحها وشوي تنفجر : ما الغريب الا الشيطان !
ام عزام ابتسمت : بس انت قلتي يمه يوم العرس راجعه ؟!
ام محمد وجهها محتقن باللون الاحمر : قلت ارجع واجلس مع البنات قبل الزواج ونودعهن !
جودي : وساره ليه ما رجعت ؟!!!
ام محمد بغبن : الكلبه رفضت ترجع تبغى تجلس عند سعديه
ام راكان بانتقاد : ليه تخليها تمشي مع هالاشكال ؟!
شوفي حركاتها وتصرفاتها همجيه تفشل !!!
ام محمد لوت بوزها : غصب عني تمشي معها !
البنت عنيده وما تسمع الكلام لا يغرك طيبتها المزيفه
تراها تمثل
ام عمار بعدم اقتناع : والله احس ساره مسكينه وعلى نياتها !
خلود بعتب : الله يسامحك يا جده كان رجعتيها غصب والله وجودها يريحني
ام عزام : هذا للي تبغينه تجلسين والناس تبتلش بعيالك
ام عمار بخبث : سمعت انه في عريس متقدم لساره ؟!
ام محمد مطت شفتها بقرف وهي توقف : ما ادري مين للي على عيونه غشاوه ويتزوجها ؟!
انا رايحه اريح شوي من تعب المشوار عن إذنكم
ام راكان بهدوء غامض : إذنك معك !
ناظرت الموجودات بعد مغادره ام محمد : اقص يدي اذا ما كانت فيه سالفه عندها !
**
**
**
**
*
زفر بضيق بعد ما قفل الجوال : اففففف هالحريم غثاء ووجع رأس !
ا بتسم عزام : تنصحني ما اتزوج ؟!
مناف بضيق : قسم بالله يرفعون الضغط !
عليهم افكار غبيه !
كلهم مثل بعض !
لا يغرك بالحريم حتى لو كان معها شهاده دكتوراه
لانه مهما وصلوا درجات بالتعليم يبقى عقلهم ناقص !
وبغضب : تخيل تبغى تنزل للسوق وتشتري فستان ثاني للبنت لانها اكتشفت انه بنت خلود عندها نفس الفستان !
شفت لأي درجه وصل تفكير الحريم !
عزام بابتسامه : مو كل الحريم واحد !
انا من الاول نصحتك ما تأخذ من هالبيت بس انت عاندتني !
وحاولت توقعني معك واتزوج اختها!
ابتسم مناف : الله نجاك يقولون مطلعه الشيب برأس زوجها !
عزام : امي حالفه يمين اذا شافت بنت واعجبتها الا تخطبها وترمي شروطي بعرض الحائط !
مناف هز راسه بتفهم : حتى ولي
قاطعه عزام : الله يكون بالعون
وابتسم بتذكر : تخيل ساره تدور لي عروس من القريه !
رفع حاجب وابتسم لذكراها : وش اخبارها بنت العم ؟!
نفسي اشوفها دائما لما ازور اهلي تكون بالقريه !
بس اكيد رح اشوفها هذي المره
عزام : ولا رح تشوفها لأنها ما رح تحضر الزواج
جدتي رجعت لوحدها !
مناف بخيبه : على حظي !
عزام متنرفز من جدته : ما ادري كيف تتركها عند خالي نادر !
تدري افكر ارجع للقريه واجرها من شوشتها
مو على كيفها تتصرف !!
مناف :هدي يا رجال البنت عند اخوها وانت وش دخلك!
رد وكأنه مستعر : تراها خالتي !
ضحك مناف بصوت عالي وللي بالمطعم يناظرونه : تدري هذي لوحدها نكته !
وحده شبر وتكون خالتك !!
عزام رفع حاجب : شبر ؟!!
خليك على عماك انت والشبر تبعك !!
الحين اتركني من سيرتها وخبرني عن شغلك ومتى ناوي تستقر هنا !
هز مناف راسه وهو يرتشف من كوب القهوه وبدأ الكلام عن شغله .....
**
**
**
**
**
يوم الزواج
ساره بعدم اقتناع : الظاهر انك مجنونه رسمي !
كيف اروح للحفله ؟!
حتى ملابس للزواج ما جبت !
سعديه دقت صدرها بثقه : لا تخافين
انا ادبرهاورح اخليك تحضرين الحفله غصب عن هالعجوز !
واخلي كل الموجودين ما يعرفونك!
ساره خزتها بعيونها : انت قلم كحله ما عندك ولا تعرفي تحطينه!
سعدية عفست ملامحها : اعوذ بالله منك !
تفكرين اني عبيطه مثلك وما اعرف احط مكياج !
يالغبيه ترى تعلمت عند أروى وعلمتني كيف احط مكياج!
فتحت ساره عيونها بتعجب وبلوم : يا لئيمه ليه ما قلتي لي اتعلم معك !
سعديه بسخريه : انت تتعلمين ؟!!
لو تجلسين الف سنه ما تعرفين تحطين كحله !
انت ما تنفعين الا للغسيل والجلي والتنظيف
مو مثلي !
تصدقين اروى انبهرت من مهارتي تقول وين
مخبيه هالمواهب !!
المهم اتفقنا خلاص رح تحضرين زواج البنات !
ساره ناظرتها باستخفاف : تمزحين !
كيف
قاطعتها سعدية بحماس : انا اتكلم جد !
اليوم رح تحضرين الزواج ورح تستانسين وتدعين لي !
سكتت ساره وداخلها خوف وتردد من جنون سعديه : ونادر وش اقول له ؟!
سعديه ضربتها على كتفها بطريقه شبابيه : لا تشيلين هم نادر لانه وجوده وعدمه واحد !!!!
ساره دفتها : ظهري ابغاه يا حماره !
سعديه بفرح من خططها : اقول تعالي عندنا شغل كثير : )
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!