رواية أقدار~للكاتبة ضاقت أنفاسي الفصل الثامن 8 - بقلم BlackButterfly002

متربع على السرير والاوراق مبعثره قدامه
ويكلم بالجوال : الحمد لله بخير !
صالح بضحكه : شفت ولد خالك وش منزل على صفحته ؟ !
عزام عقد حواجبه باستغراب : مين ولد خالي ؟!
صالح : علامك مسطول مهند ولد خالك محمد !!
هز راسه : وش منزل اصلا ما ادخل صفحته !
صالح بضحكه صغيره،: تراه ولد خالك انهبل نزل صورة خالتك على صفحته
قاطعه وهو معقد حواجبه باستنكار : وش تقول ؟!!!
خالتي !!!
وخالي محمد يدري وزوج خالتي اميره يدري ؟!
وبعصبيه كيف ينزل صورتها هالديوث ؟!
عقد صالح حواجبه باستغراب : زوجها ؟!
اي زوج ؟!
عزام بغضب : تراها متزوجه وعندها عيال !
قاطعه صالح بضحكه : وين راح تفكيرك،؟!
ترى انا اقصد خالتك الصغيره!
عزام بإنكار : انا ما عندي خاله صغيره !
ما في غير خالتي اميره !
رد باستغراب : مو جدك تزوج وعنده بنت صغيرة !
ضحك عزام بسخريه : قصدك ساره !
بس هذي مو خالتي !
صالح عقد حواجبه : كيف مو خالتك ؟!
يا غبي خالتك ! علامك اليوم مسطول !
قاطعه عزام : يا غبي مو خالتي !
انت للي مسطول !
وقسم بالله لو تطلع خالتي لأنتحر !
وضحك بسخريه
صالح بتحليل : يا غبي
الحين امك رضعت من ام محمد صح ؟!
عزام يكمل معه بسخرية: ايه
صالح يتابع : وصارت اخت لعيال ابو محمد
من الرضاعه !
عقد حواجبه عزام وهو عافس ملامحه: طيب!
صالح : الحين هذي الصغيره تكون أخت امك يا خبل !!
عزام بنرفزه من غباء صالح : وش مفطر اليوم انت ؟!
هذا انت قلتها امي رضعت من جدتي ام محمد
مو من ام ساره علشان تكون أختها !
صالح متأكد وبتحدي : روح إسأل أي شيخ
وبتشوف اذا ما كانت أخت امك!
عزام بنرفزه : اقول طير من هنا تراك نرفزتني بكلامك
سلام
وقفل الخط وهو يفكر بكلام صالح بس مستحيل تكون خالته
لان ام محمد هي للي ارضعت امه مو ام ساره !!
جمع الاوراق وهو يفكر بذي السالفه
تذكر انه مهند نزل صوره لساره
أصابه الفضول يشوفها
فتح جواله وأصابته الصدمه وهو يشوف الصوره
ساره حاظنه الغنمه ومبتسمه ولافه الشال على رأسها ولابسه فستان لنصف الساق تحته بلوزه لنصف الساعد
ضرب جبهته بقهر : الله يأخذك يا مهند على ذي الصوره فشلنا !!!
عدل قميصه وقرر يطلع يكلم امه بكلام صالح !!!!
***
***
***
مر الاسبوع على ساره وهي تشعر بالفرح وتقضي وقتها مع الغنم
ام محمد ومها طول وقتهم عند الجيران
ونادر طول وقته نوم وأكل !
نادر مستلقي تحت الشجره وهي تراكض خلف الغنم وتسرح فيه
اقتربت من الغنمه ومسكتها وهي تكلمها : انا زعلانه منك ليه ما تجلسين مع صديقاتك ؟!
اشرت بيدها الصغيره : شوفي صديقاتك مؤدبات وما يبعدن عني !
قاطعتها الغنمه : ماااااع مااااااع ماااع
ساره عقدت حواجبها : تبغين مويه ؟!
بحركه سريعه ركضت الغنمه عنها فتحت ساره عيونها باستنكار
قاطعها صوت نادر : ساره يا ساره
ناظرت وركضت باتجاه نادر بحماس : نعم !
نادر اشر جنبه بكسل: اعطيني علبة المويه !
ناظرت ساره العلبه جنبه لو يمد يده يمسكها
بحياتها ما شافت بكسله وخموله
اعطته العلبه بابتسامه : تفضل !
نادر وهو يتثاوب : اسمعي ارجعي البيت وجيبي الغداء هنا
والا أقول لك خلاص جيبي هالخبلات وتعالي
اشر على الغنم بسرعه !
هزت رأسها وراحت تركض بحماس
ونادر يناظرها باستغراب من وين تجيب الطاقه والحماس !!
ما في كلمة كسل بقاموسها !!!
**
**
**
**
**
**
ابو عزام باستغراب : والله سألت مشايخ كثير و قالوا إنها اخت ام عزام !
ابو راكان : والله انا مو داخله برأسي كل الوقت وانا احسب انها مو اختها !
لانها راضعه من ام محمد !
وناظر ام عزام : وش شعورك والحين طلع لك أخت !
ام عزام ابتسمت : اهم شيء خلف ما يدري
عز الله الا يرميها علي !
عزام وهو ينافخ :،يا ليتك ما شربت هالحليب للي ربطك بالعائلة المتخلفه !
سلمان باعتراض : والله لو تموت ما اقول لها خالتي !
انا اكبر منها !
اسيل بابتسامه : والله طلعت ساره خالتي !!
ام راكان مو عاجبها : لو تسألون مره ثانيه !
ابو تالا : يا يمه يعني نسأل ألف شيخ علشان تقتنعين ؟!!
ام تالا بضحكه تناظر ام راكان : ليه متضايقه يعني كنت راسمه تزوجيها لعيال ابو عزام !!
ام راكان عفست ملامحها : هذا الناقص نأخذ أخت المتخلفين !
والا البنت ما عليها كلام حبوبه وهاديه !
طالع عزام جدته وهو منقرف من سيرتها
اسيل بتأييد : صادقه يا جدتي البنت حبوبه
صح ماما ؟!
هزت ام عزام راسها بهدوء بدون اي كلمه !!
ابو راكان : مسكينه هالبنت بس تبغى تعيش
تركض خلف الحنيه !
تبغى اهتمام بس حظها رماها على إخوان فاشلين !!
عزام بسخريه : وش رح تطلع يعني !!
اكيد فاشله وغبيه مثل إخوانها !
ابو راكان وهو يناظر للبعيد : عندي إحساس غير !
بتشوف هذي البنت رح يكون لها مستقبل باهر
بس انتظر ورح تشوف بعيونك !
ابو عزام هز كتوفه : هذي دنيا كل شيء فيها جايز !!
ام راكان تطالع زوجها : وش قلت خلينا نروح نزور اختي محمد !
ابو راكان وهو ماسك اعصابه : وبعدين ؟!
انا لو يطلع بيدي كان تبريت منهم وانت تراكضين خلفهم ؟!
وتركهم وطلع حتى ما يفتح باب النقاش
عبست ملامحها عندها فضول تروح لذي القريه
ناظرت ولدها ابو عزام وكأنها تشكي له
هز رأسه بتفهم : رح احاول اقنعه بس ما اوعدك !
وتركهم وطلع بهدوء خلف ابوه !
**
**
**
**
ام محمد جالسه بإستمتاع طول وقتها عند جارتها ام هزاع جازت لها سوالفها
وما تعجبها الا الجلسه معها وما تمل منها
عندها سوالف وقصص غصب عنها تنجذب لها
هزت رأسها بإنصات لام هزاع وهي تلومها : خبله وليه تركتيها من البدايه عند إخوانها ؟!
خذيها إنت وخليها تشوف نجوم الظهر !
وخليها تخدمك طول عمرها !
ام محمد بخبث : ومين قالك رح ارجعها لاخوانها؟!
تراني حلفت بنفسي الا اخذ حقي من امها عن طريقها !
وأطلع كل القهر والوجع للي بداخلي فيها !
حطت ام هزاع يدها على فخذ ام محمد وتكلمت بوجع : جايه تقولي لي هذا الكلام ؟!
تراني جربت الطبينه ووجعها !
للحين ما نسيته محفور بقلبي !
واشرت على قلبها !
ام محمد بحقد : حسبي الله على الرجال
ام هزاع :،ما قلت لي من وين تعرف زوجك على ام ساره ؟!
ام محمد عفست ملامحها بكره : الله يأخذها
والله ما عرفت كيف لعبت بعقله وتزوجها !!
ام هزاع بحماس : وش كان رد فعلك لما سمعت بزواجه ؟!
ام محمد وهي تناظر للجدار وكأنه الماضي ينعاد قدامها : لما وصلني الخبر كان له متزوج شهرين
انجنيت قلبت الدنيا فوق تحت
حتى زوجي ما كان عنده الشجاعه يرجع البيت على سواد وجهه
بعد يومين عمل حادث ومات .
ام هزاع ضحكت بشماته : ما تهنى بالعرس !
ام محمد بحقد : خله حرق قلبي قبل ما يموت
وبنبره حزينه : تبغين الصدق قلبي محروق على فقدانه للحين!
حسبي الله عليها خربت علينا حياتنا !
ام هزاع : طيب وش صار على ضرتك ؟!
ام محمد بخبث : ارسلت لها اخوي
الله يرحمه
وهددها اذا ما تنازلت عن كل شيء الا نأخذ للي في بطنها !
وتنازلت بدون اعتراض !
وسمعت انها ماتت بعد الولاده وفي ناس قالوا
انها تركت البنت عند امها وهربت
ما احد يدري وش الصحيح !!
وحنا ما سألنا ولا فتشنا لانها ما تهمنا
اهم شيء انها تنازلت وما لها شيء عندنا !
تابعت كلامها بزفره : حتى سمعنا انه عمرها اقل من 14 سنه
مطت شفتها بقهر : شفتي المسخره ؟!!!
صرت علكه بحلوق الحريم !
حسبي الله عليها !!
ام هزاع : وش تحس فيه الحريم لما يسرقون الرجال من زوجته ؟!
**
**
**
**
في اليوم الثاني
سمعت صوت سياره استغربت وطلعت وقفزت بفرح : خالتي ام راكان
وركضت على السياره قبل ما توقف
سحب بريك ونزل من السياره وهو معصب : الله يأخذك !
الله ستر والا كنت تحت العجل !
غبيه انت تركضين على السياره قبل ما توقف ؟!
نزلت راسها للحظات للارض وحز بخاطرها كلامه
من شوقها لهم ما انتبهت
اخذت نفس ورفعت راسها وابتسمت بطفوله : اسفه عمي عزام !
وركضت له وحضنته بقوه : كيف حالك ؟!
ناظرها وهي حاضنيته بقوه مسح على رأسها وهو منقرف بس ما حب يكسر بخاطرها
اسيل خلفهم : ما تبغين تسلمين علي ؟!
ابتعدت عن عزام وتقدمت لها بلهفه وشوق
سلمت عليهم بفرح : تفضلوا خالتي داخل ؟!
ام راكان رافعه حاجب : من صدقها ام محمد تاركه العالم وجايه لذي الخرابه ؟!
دخلوا وساره تبغى تطير من الفرح بشوفتهم : وين خالتي أم عمار ؟!
جودي وهي تناظر المكان : ماما رفضت تيجي،!
ليان : كيف عايشه هنا :!
غبيه ارجعي معنا ؟!
ساره تبغى تهرب معهم بس ام محمد جالسه لها بالبلعوم ردت بفرح عكس للي بداخلها : عادي
حلو الجو هنا !!
ام راكان عجبها مناخ هالقريه وطبيعتها وتفكر تقنع زوجها يبني بيت كبير بذي المنطقه !
**
**
**
**
جالس بالحوش ويناظرها وهي تنظف بزريبه الغنم ابتسم بسخريه وبنفسه متعوده ساره على حياه الفقر !
ورجع يكمل مكالمته بمسخره : لو تدري انا وين ؟!
رد الطرف باستغراب : وين ؟!
ابتسم وهو يفتح الكاميرا ويصور المكان مباشره : شوف هذا بيت ولد عمك نادر !!
وعلق بسخرية : على فكره خالي نادر حسسني انه مشتري فيلا !
رد وهو مستغرب من المكان: من جدها خالتي ساكنه هنا ؟!
عزام وقف : خليني اراويك خالتي الصغيره !
اقترب من ساره : وش تعملي !!
ناظرته ساره وابتسمت : انظف !
تبغى شيء اجيبه لك ؟!
عزام رجع يتكلم :،شفتها
قاطعه وهو يضحك : قول قسم هذي خالتك ؟!
كذاب !!
مستحيل !
ورجع يضحك من جديد
عزام : حتى تتأكد شوف
ناظر ساره : وش اسمك ؟!
ردت ببراءه وبابتسامه :عمي عزام ناسي اسمي ؟!
عزام هز راسه : ايه ناسي
بلا قولي وش اسمك ؟!
واسم إخوانك !!
ساره ناظرته باستغراب وابتسمت : اسمي ساره
اخواني
خلف ومحمد ونادر وفي كمان اخت
حطت اصبعها في فمها : نسيت اسمها !
وبنبره ضياع : بس ذول للي اعرفهم !
رجع يتكلم : صدقتني الحين !!
ضحك باستغراب : والله مو مصدق !
ونادى بصوته : عبود تعال شوف عزام وش يكذب !
عزام قاطعه : جعلكم ما صدقتم !
اتصلوا بجدتي ام راكان وإسألوها !!
الحق علي اكلمك وانت تكذبني !
انقلع
وقفل الجوال
وعفس ملامحه بقرف وهو يشوفها تنظف وسخ الغنم وريحة الغنم تفوح
يعد بالثواني يرجع مل من المكان وقرفه
زفر بضيق ودخل عند جدته وهو عافس ملامحه !!
**
**
**
**
جودي ملتصقه بجدتها ام راكان بخوف وهي تناظر الغنم : يمه تخوف !
ساره وهي تمسح على ظهر الغنمه وتضحك : ما تخوف !!
ليان عفست ملامحها بقرف : يعووووووو
ام عزام وقفت بعيد عن الباب بخوف : ساره ابعدي عنها يمكن فيها امراض ؟ !
ام محمد واقفه جنبها بتمني : ان شاء الله يمكن تفطس هالساره وأبرد حرتي فيها !
ام عزام بضيق : حرام عليك يمه !
وش رايك اخذها عندي ؟!
ام محمد وهي تناظر ساره بحقد : انسي سالفه انها اختك انسيها !
ترى كل السالفه مو داخله عقلي،!،
هذا الناقص انا ارضعك واتعب عليك وتصيرين أخت هالخبله ؟!
والتفتت لها بحزم : انسي مجرد تفكير تأخذينها او واحد من اخوانك !
خلاص صارت ساره تحت مسؤوليتي وانا المسؤوله عنها !
ام عزام كتمت وما حبت تجادل
وسلطت نظرها على ساره تحاول تقنع جودي وليان يقتربوا من الغنم !،
عزام ناظر جدته ام راكان : تأخرنا يا جده
نحتاج وقت حتى نوصل !
ام محمد تقدمت باعتراض : انتظر ابغى اعرفها على ام هزاع !
عزام سحب يد ام راكان : عز الله راح ننام هنا !
امشي يا جدتي على السياره !
تركت ساره للي بيدها وطلعت من الزريبه لما سمعت انهم رايحين
تحس قلبها انتفض تبغى ترجع معهم !
من لما جاءت هنا ما لعبت كل وقتها مع الغنم
وتنظف البيت !
ركضت خلفهم لعند السياره تبغى تدس نفسها بين البنات وتطلع
قاطع خطتها يد عزام بعدتها عن السياره : وين ؟!
ناظرته والغصه بحلقها تبغى تبكي تصرخ
ما تبغى هالمكان شجعت نفسها تعبر عن للي بداخلها وتقول له يأخذها معهم : انا ابغى
بس في شيء قاطع كلامها وهي تطبع اصابعها على خدها الصغير : ومن منى لك راي ينسمع ؟!
انقلعي داخل اشوف !
ناظرت زوجة ابوها وداخلها مخنوقه من تحكمها فيها !
ممنوع تبدي رأيها او تقترح او تبرر !
لازم تنفذ بدون اعتراض !
ام راكان تنرفزت من ام محمد : ليه ضربتيها خلها تقول!
وناظرت ساره : وش تبغين ؟!
اخذت نفس ساره وهي تعود نفسها يكون الوضع ريلاكس !
ولامت نفسها وهي تستحقر نفسها مين هي حتى تطلب او تقرر الروحه من نفسها !
ابتسمت بس مهما كابرت تظهر ابتسامة الالم والقهر فيها : ابغى اقولكم مع السلامه !!!
سحبتها ام محمد من فستانها بتحقير : جايه تركضين علشان كذا ؟!
صدق انك مختله عقليا !
غبيه خبله !
انقلعي اشوف للداخل !!
اقتربت ام عزام سلمت على ساره وباستها على جبهتها : مع السلامة
اسيل ابتسمت واشرت لها : سي يو
جودي : تعالي معنا
قاطعها عزام وهو معصب ومستعجل : انقلي داخل السياره !
هذا الناقص علي !
تنثبر هنا !
وتوجه للسياره مستعد يتحرك !!
ناظرتهم وهم يبتعدون تحس قلبها طلع من مكانه تبغى تلحقهم !
سحبتها ام محمد للداخل : بسرعه نظفي الغرفه !
هزت راسها بطاعه بدون ما ترد لو فتحت فمها
رح تبكي وما رح تمسك نفسها !!
هذا قدرها تعيش مع زوجة ابوها !
***
**
****
***
***
جالس بمكتبه يقلب بالاوراق قاطعه رنين الجوال
رد بهدوء وهلال ثواني انقلبت ملامحه وهو يسأل :ايش اي طريق؟!
وانقطع الاتصال .....

في سما دنياي انت احلى بدر
ومن هموم الكون تصبح لي صدر
تزرع الافراح تمنعني الكدر
انت نور بدنيتي واحلى قدر
انت رحمة من اله العالمين
في حياتي بلسم جروح السنين
من عرفتك تمسح دموع الانين
انت نور بدنيتي واحلى قدر
من هو غيرك يايبه في طيحتي
يمسك ايديني تهمه فرحتي
انت انقى لون يرسم لوحتي
انت نور بدنيتي واحلى قدر
قسوتك تعليم يانبع الوفا
درع يحمي لي ظلالي والدفا
شوفتك قربي حبيبي لي شفا
انت نور بدنيتي واحلى قدر
يانديم الروح ماتشكي سهر
تتعب وتتحمل انواع القهر
انت عنوان السعادة والطهر
انت نور بدنيتي واحلى قدر
كم غلطت بحق نبراس الغلا
اسف اسف يابعد كل الملا
مابي غيرك ابو ولا فلا
انت نور بدنيتي واحلى قدر

جالس بمكتبه يقلب بالاوراق قاطعه رنين الجوال
رد بهدوء وخلال ثواني انقلبت ملامحه وهو يسأل :ايش اي طريق؟!
وانقطع الاتصال ...
وقف بقلق وهو يشوف ساعته قريب أذان المغرب
قلبه قارصه من هالمشوار!
وبسرعه بحث هلى رقم اسيل واتصل
**
**
**
**
طلعت من البيت بحرص وهي تشد على الورقه
بقوه حسب التعليمات
شافته واقف قريب من البقاله وأشر لها بيده ابتسمت له وتوجهت بدون ما تنتبه للعيون للي لمحتها
وقبل ما تقطع الشارع سحبها من الخلف من كتفها ولفها لها وهو مستغرب خروجها وقت المغرب حتى ما انتبهت له سألها بتحقيق : وين رايحه ؟!
ارتبكت لما شافت ابوها وبسرعه خبت الورقة خلف ظهرها : للبقاله !
شك بحركتها وحس انها تخبي شيء عنه وبحزم : وش معك ؟!
هزت راسها: ولا
قاطعها قبل ما تكمل وهو يسحب يدها بقوه
وفتحها !
عقد حواجبه وهو يشوف ورقه بيضاء مطويه
معطره !!
وما ترك مجال للتفكير عن محتواها
بسرعه فتحها
وبدأ وجهه يتغير ويتحول للاحمر من اول حرف الى اخر حرف بالرساله !
يحس الدنيا اظلمت بوجهه والسماء اطبقت فوقه
فتح اول زر من قميصه وهو يحس بالاختناق
كيف صار هذا الشيء ؟!
من متى ؟!
لذي الدرجه مغفل ؟!
قبض كف يده وعصر الورقه وكل الغضب
تلبسه
ناظرها بصوت غاضب وعيون تقدح شرار : لمين هذي الورقه ؟!
رجعت للخلف خطوه وهي تشوف نظرات ابوها اول مره تشوفه كذا !
ما تدري وش بالورقة حتى حولته كذا ؟!
ردت بخوف لما هزها بقوه حتى تجاوب : نهى اعطتني اياها قالت لي اعطيها لنواف
وأشرت على مكانه قبل شوي
بس استغربت لما ما شافت احد
وقبل ما تلتف لابوها صرخت وهي تحس يدها رح تنقطع وهو يسحب فيها بإتجاه البيت !
بكت بصوت راجي انه يتركها ...
بس ابو سعود سيطر عليه غضبه وما عاد يميز شيء !
دخل البيت واول ما وصل الصاله
رماها على الأرض بقوه
ونزل فيها ضرب وعائشه تصرخ وتبكي وتستنجد بأمها
طلعت ام سعود على صراخهم وانفجعت وهي تشوف زوجها يضرب بعائشه
حاولت تبعده عنها صرخ عليها ؛ اتركيني اقولك !
صرخت ام سعود وهي تشوف صغيرتها تسقط على الارض لا حول ولا قوه لها
وبسرعه دفت زوجها وحضنتها وهي تمسح على وجهها : ماما قومي !
أبو سعود بدون رحمه صرخ: جعلها تموت وهي واخواتها وارتاح منهن
وبصرخه اقوى نادى : نهى نهى
كانت واقفه قريب من الصاله بس من الخوف ما قدرت تتحرك
شخصت عيونها وهي تشوف ابوها
فوق راسها
وما ترك لها فرصه تحكي او تبرر
كل شيء واضح قدامه !
وهو المغفل للي المويه تمشي من تحتيه وما يدري عنها !
سحبها للغرفه وقفل الباب وهو يشوف اسماء بالغرفه !
زفر بقهر وغضب وهو يتوعد فيهن !
يبغى يبكي من القهر اصعب شعور العرض
لما تحافظ على بناتك وتتفاجئ بتصرفات طايشه
تنزل راسك بالارض !
صرخ صرخة موجوع بأعلى صوته : والله ما ارحمكن !!!

**
**
**
**
ام سعود تعرف حركات عائشه تتظاهر انها فقدت الوعي لما تقع بذي المواقف
هزتها بخفه : قومي ماما ا بوك راح !!
قومي بسرعه !
فتحت عيونها وما قدرت تكتم شهقاتها
غطت وجهها بصدر امها وبدأت تبكي
وام سعود تمسح على رأسها : خلاص يا ماما
قلبها قارصها حاسه انه في مصيبه لانه زوجها عمره ما ضرب البنات بذا الشكل !
عائشه من بين شهقاتها : ماما يدي توجعني !
طالعت ابنتها وكيف مكان الضرب بدأ ينفخ
ويتلون : اشوف يدك !
مدتها ودموعها تنزل بغزاره
غمضت عيونها ام سعود بوجع وهي تشوف يد عائشه منفوخه !
وبتردد سألت خايفه من الاجابه تكون صادمه: ليه ضربك ؟!
عائشه بصوت مبحوح من البكاء : اعطتني نهى ورقه اعطيها لنواف وقالت لي رح يعطيك حلاوه
وبابا مسك الورقه وشافها
ورجعت تبكي من جديد بطفوله : انا وش دخلني ؟!
ام سعود بهتت ملامحها وش هالفضيحه ؟!
نهى للي بعينها طفله تعمل كذا ؟!
عمرها ما قصرت معها ليه تجازيها كذا ؟!
وما لقت الا نواف ؟!،
امه عباره عن اذاعه رح تصير سالفتهم على كل لسان !
ضربت على جبهتها بقوه وش هالمصيبه؟!
وقفت لما شافت ابو سعود طالع من الغرفه
وكأنه بركان ثاير
ابعدت عائشه عنها بسرعه وركضت له :وين رايح ؟!
ابو سعود بغضب : والله لأذبحه
ام سعود تحس الروح تطلع منها : فكنا من الفضايح
تعال خذ البنت للمستشفى
قاطعها وهو يناظر عائشه بكره وحقد : جعلها تموت ونرتاح من لسانها للي ما ييجي منه الا المصايب
وطلع بعد ما ضرب الباب بقوه !
جالسه تناظر المشهد ونظرات ابوها واسلوبه ينعاد قدامها !
غمضت عيونها بوجع من اسلوب ابوها
ومن وجع يدها للي تحسها انشلت مو قادره تتحمل الوجع
وبدون شعور صرخت بقوه وبعدها احتضنت الارض بلا حراك !!
***
**
**
**
**
ضرب كفر السياره برجله بقهر : افففف وقتك !
ام راكان بضجر : وبعدين معك ؟!
اذكر الله !
عزام بغضب مكتوم : والنعم بالله !
بس انت شايفه الشمس قريب تغرب
اسيل وهي متربعه وجالسه جنب أمها : الجو حلو يجنن !
عزام عفس ملامحه : يجنن !
الحين نشوف لما تغيب الشمس ويحل الظلام
وانت جالسه ما تشوفين الا الضبع هاجم عليك !
اسيل وهي تحصن نفسها : اعوذ بكلمات الله التامات من شرما خلق !
ام عزام بنهر : ترى مو ناقصين ذي السوالف !
تراني والله خايف
قاطعتها ام راكان : تعوذي من الشيطان !

ولا تخليه يلعب فيك !
ما في شيء يخوف واذا طلع ضبع !
خير يا طير ؟!
الا اضربه بحجر بنص عيونه اخليه ما يشوف دربه من الخوف !
عزام ناظر خلفهم وجحظ عيونه بخوف وصوته يرتجف : بسرعه على السياره فيه ضبع جاي لجهتنا يركض
قاطعته صرخات ام راكان وهي تقفز وتركض للسياره : اويلي اويلي
لا بالله خلاص هذي نهايتي !
يا حسرتي على شبابي !
ودخلت السياره وهي تقفلها وجسمها ينتفض نفض !
جلس عزام على الارض وهو يضحك بقوه وماسك بطنه من الوجع : اه يا بطني
ورجع يدخل بنوبة ضحك
وساره جنبه تضحك : ششش شفت هههههههههه
ام عزام انقهرت منهم وقلبها يدق طبول : هذا مو مقلب ؟!،
ما تستحون على وجهكم !
احمدوا ربكم انه بنات خالك نايمات بالسياره
والا كان انهبلوا !
شوف جدتك يا ...
ضحك على امه المعصبه وناظر جدته وهي تنزل من السياره
معصبه بعد ما عرفت انه مقلب : لا تكلمني يا عزام !
جلست عند ام عزام : وقسم بالله للحين قلبي يدق بقوه احسه رح يطلع من مكانه !!
اسيل وهي تضحك : وين دروس الشجاعة ؟!
ورجعت تضحك وهي تتخيل شكل جدتها
ام راكان بقهر : ادري انه كله من تحت راسك
فتحت اسيل عيونها بدهشه : انا ؟!
حرام عليك يا جده هو غمز لي
قاطعها عزام بخبث: لو تدرين يا جده انها صورتك بالجوال !!!
ام راكان بنهر : انت ما في وجهك حياء؟،
وبتوعد وقسم بالله الا اقول لابوك واذا ما خليته يلغي خطوبتك ما اكون ام راكان !
والله لأطلع هالضحك من عيونك !!!
اسيل عفست ملامحها وشوي وتبكي : انت يا جده ليه تفرقي بين العيال والبنات ؟
حرام عليك !
يعني عزام للي عمل فيك مقلب وحطيتي حرتك فيني
كل هذا لانه ولد ؟
ام راكان بتهكم : ايوه لانه ولد !
تراني اكره البنات ولما اسمع فلانه جابت بنت احسه يوم عزاء !
وازيدك من الشعر بيت ترى لما امك جابتك وجابت خوله يومها عزيتها وقلبت البيت مناحه !
ابغى عيال مو بنات !
ولوت بوزها مو عاجبها !
اسيل بقهر من كلامها : الظاهر يا جدتي نسيتي انك بنت !!!
ما ادري ليه تميزون العيال ما ييجي من عندهم الا المشاكل !!!
ام راكان ابتسمت : يا زين العيال شوفتهم تفتح النفس!
واشرت على عزام !
مو مثلك انت وبنات عمك تسدون النفس!!!
اسيل لوت بوزها : دامني اسد نفسك خلاص كل وجبه تلقيني بوجهك علشان تنسد نفسك
وتنحفين
ورفعت حاجب بخبث : علشان جدي ما يعمل مثل جدي ابو محمد ويتزوج الثانيه علشان يجدد شبابه !
ام عزام بنهر : اسيل وش هالكلام ؟!
انكتمي احسن لك !
ام راكان وقلبها مولع بس مجرد فكره انه يتزوج عليها بس الكبرياء جبرها ترد على اسيل ببرود : عادي خله يتزوج !
وبثقه لانه ما رح يلاقي مثلي واصلا مستحيل جدك يعملها
زفر عزام بضيق من ذي السوالف وناظر ساعته قلبه مو مرتاح لهذا المكان : علامهم تأخروا
ام عزام : قريب يوصلون لا تحاتي يا ولدي !!!
،،،
،،،
،،،
،،،
،،،
مها ناظرت ساره جالسه والسكوت مخيم عليها
جلست جنبها على الارض ومسحت على شعرها بحنيه : وش فيك ساكته ؟!
رفعت راسها وناظرتها ورسمت شبح ابتسامه : وش اقول ؟
ابتسمت لها وحست انها متضايقه تبغى تروح مع راكان لانها من لما غادروا وهي على جلستها وساكته : تبغين تروحين معهم ؟!
ردت وصوتها مخنوق بس تحاول ما تظهر : ما ابغى اروح ما اقدر اترك خالتي هنا ؟!
سألتها حتى تعرف مين للي منعها تروح : طيب ما قالوا لك ترجعين معهم ؟!
ردت بصوت مخنوق وحابسه الدمعه : جودي قالت اروح معهم بس
عمي عزام رفض
سكتت وهي تزم شفايفها حتى ما تبكي !!
قاطعهم دخول ام محمد وهي توجه كلامها
لساره : صليتي المغرب !
هزت راسها بالرفض
ام محمد بنهر : قومي لا بارك الله فيك
مها ناظرت ام محمد بلوم : مو كذا الاسلوب ! انت تنفريها من الصلاه !
لازم بإسلوب
قاطعتها ام محمد باستخفاف : اقول اترك عنك السوالف
وقومي صلي انت الثانيه الحين يفوت وقتها !
مها: ترى يا خالتي للحين ما اقام الصلاه !
ومسكت يد ساره : تعالي نصلي
وقبل ما تطلع تكلمت بنغزه : قبل ما تحاسبي هالصغيره على الصلاه شوفي
ولدك نايم ما صلى !
ام محمد بفجعه : هالكذاب يقول لي صليت !
الحين اراويه يكذب علي
وطلعت متوجه لنادر وهي تتحلف فيه !
،،،
،،،
،،،
،،،
،،،
ناظرت امها جالسه تنتظر يكملون تجبير يدها
ودموعها تنزل بهدوء
الدكتور بلطف : لا تبكين يا حلوه !
ما ردت عليه ودموعها مستمره بالنزول
خال عائشه : انتبهي مره ثانيه وانت تنزلين الدرج
شوفي كيف صار فيك !
ام سعود زفرت بضيق وقلبها قارصها
زوجها طلع من البيت وتتصل فيه وما يرد عليها !!
حتى اخوها كذبت عليه وما قالت له السالفه
ما تبغى تزيد فضيحة بناتها
ولما يكبرن مين يتزوجهن !!
رددت بنفسها يا رب استر على بناتي
ناظرت الدكتور لما كمل : سلامتها
ومسح على شعر عائشه وابتسم : انتبهي مره ثانيه علشان ما تتعورين !
وتركهم وطلع
ام سعود والضيق باين بصوتها : يلا يا عائشه
اخوها يخفف عليها : لا تضايقين نفسك
شوفيها ما فيها الا العافيه !
هزت راسها بقلب ميت وبداخلها اي عافيه
ونهى واسماء ما تدري وش حالهن
حملت عائشه مثل المجنونه بعد ما فقدت الوعي
وقفت عائشه بتردد ما ابغى ترجع البيت تخاف ابوها يطقها مره ثانيه
بس امها ما تركت لها مجال مسكت يدها السليمه وتوجهت خارج المستشفى !!!
ابو سعود وهو ماسك الولد من ثوبه والناس إلتمت حولهم : والله لأذبحك واشرب من دمك
الولد يحاول يفلت نفسه
وبمساعده الناس للي فكت بينهم أفلت من قبضة. ابو سعود بأعجوبه !!
ابو سعود بصراخ وهو يحاول يفلت نفسه من الرجال للي ماسكينه : اتركوني عليه
نواف يتكلم بقوه عين : روح ربي ابنتك للي تراكض خلفي !
ابو سعود جن جنونه وللي ذبحه الرجال للي ماسكينه
وش هالفضيحه هذي ؟!
وقف رجال محايد : ترى يا ابو سعود الغلط عليك
انا اكثر من مره اشوف ابنتك الصغيره تتلصق فيه
المفروض تنتبهون لها !
وناظر نواف : وانت بنت صغيره عيب عليك تستغلها
نواف يبغى يفضحها خاربه خاربه : مو الصغ
عرف ابو سعود انه يبغى يقول الكبيره ويفضح ابنته بعد ما اكتشف انه الناس تفكر عائشه للي تلاحق نواف
وبقوه ما يدري من وين دبت فيه
هجم بقوه بعد ما حرر نفسه من الرجال
وضرب نواف بوكس على فمه وبصراخ : انكتم انكتم
فرقوا الناس بينهم وغادر نواف المكان وهو يهدد ويتوعد والدم ينزل من فمه
،،،،
،،،،
،،،،
دخلت البيت وبعدها بدقائق. دخل ابو سعود
مثل الثور الهايج : وين كنت ؟!
ام سعود بصبر : للمستشفى
واشرت على يد عائشه
اقترب وعيونه تقدح شرار : ليه تأخذينها ؟!
جعلها تموت هي والخنزيرات للي بالداخل !!!! وبصراخ اشر لعائشه : انقلعي على الغرفة ما ابغى اشوف وجهك !
ركضت عائشه للغرفه قبل ما يكمل ابوها كلامه
ناظر زوجته : عجبك اخر تربيتك ؟!
ردت بحده : لا تكلمني كذا؟!
كأني مسكت يدها راسلي. فلان وعلان !!
رفع اصبعه بإتهام : انت السبب طول وقتك على الجوال
او دايره من بيت لبيت !
ناسيه انه عندك بنات لازم مراقبه
قاطعته بتهجم : قول لنفسك طول الوقت على الزفت او نايم او طالع ......

ويبقى السؤال
مين الشماعه للي نعلق عليها الغلط
الام او الاب او المجتمع ؟؟!!!!!!

عشرون عاما قد مضت .. عام مضى من بعد عام
واليوم لم يثبت لنا .. من ودنا غير السلام

ومشاعر مكتومة .. إخراجها منا حرام
ما خان أو خنا ولكن .. الزمان لك احتكام

يا صاحبي إن أسدلت من بيننا ستر الظلام
فلأنت نور مشرق .. يجلو عن العين القتام

إن يحجبوك عن العيون .. فأنت في جفني تنام
الشمس نبصر نورها .. بالرغم من كثب الغمام

سأراك في البسمات في النسمات في بدر التمام
وأدراك صوت بلابل .. وشذا يفوح به الخزام

يا أيها الطير الذي .. جاب دنيانا وحام
بلغ أخيّ محبتي .. بلغه ما عشت السلام
####
###
##
#
يتبع بارت 8

بعد مرور اسبوع ناظرته بقهر من اسلوبه : مو طالعه من هذا البيت !!
تابع كلامه وما اخذ اعتبار لاعتراضها واكمل كلامه بنبره امر حاده : اليوم بعد العصر رح ننقل الاثاث
وخبري الكلبات للي بالداخل يجهزن
قاطعته بعصبيه من تطنيشه لها : وبعدين مع ذي الحياه ؟!!
وضربت كف بكف خلاص انا قرفت الحياه هنا !!
صار لنا اسبوع عايشين بجحيم !
قاطعها و هو يكتف يدينه ببرود ظاهري ومن داخله نار مو راضيه تنخمد : البركه ببناتك !
ردت بغضب : هذا انت قلتها بناتي مو انا ؟!
طول الاسبوع تكلمني وكأني انا للي قلت لها راسلي ؟!
وبنبره رجاء : خلاص انسى هالسالفه
قاطعها باستنكار : انسى ؟!!!
مستحيل !!!
وبتعجب تابع كلامه : كيف تبغيني انسى
وكلام الناس يذبحني !
تدرين انه الناس يظنون عائشه هي للي تراسل نواف الزفت ؟!
تابع بغصه يقولون هذي وهي صغيره تعمل كذا
عيل لما تكبر وش رح تعمل ؟!
ما يدرون انه البقره الكبيره هي للي
زفر بضيق وما كمل كلامه
تنهدت ام سعود والضيق مو راضي يفارقها من اسبوع : الناس باكر رح تنسى لا تكدر خاطرك !
ناظرها بسخريه : هه الناس تنسى ؟!!!
الناس تنسى كل شيء الا الشرف مستحيل ينسون هذي السوالف !
وبندم : اناالحمار للي سكنت بهذا الحي وتركت اهلي
لانه هنا الايجار ارخص !!
وش استفدت من الفلوس ؟!
رح نرجع لمنطقة اهلي ونسكن قريب منهم
قاطعته بتحذير : بس من الحين هذي السالفه اهلك لا يدرون عنها ل
قاطعها بقرف من هالسيره : مو مجنون اروح افضح نفسي
وناظرها باستفزاز قولي هذا الكلام لنفسك واقضبي لسانك
عن اخواتك واهلك
**
**
**
**
مسكت حجر من نوع الطابشور ورسمت على جدار البيت رسمات طفوليه بعمرها
تعبر عن الافكار للي بداخلها
قاطعتها ام محمد بسخريه : وش ترسمين يالطرمه ؟!!
ناظرتها وابتسمت بطفوله
ام محمد ميلت شفتها بسخريه وهي تشوف
رسوماتها اقرب للخربشه اشارت على رسمة بنت بشعر قصير : هذي انت تشبهك سبحان الله !
وتابعت وهي تمط شفتها بقرف : تقرفين مثلها !
ونقلت نظرها لرسمة رجال كاتبه فوقه بابا
ضحكت بسخريه : هذا ابوك ؟!
تراك مخربطه و سحبت من يدها الحجر ورسمت شايب بس ما اتقنت الرسمه ما تعرف تستخدم الطابشور : هذا هو ابوك شايب عايب انجن على اخر عمره
وجاب بنت اصغر من احفاده !!!
وإلا أقولك شوفي ذاك الشايب أبوك مثله بالضبط !
لا تظنين أبوك صغير بعمر نادر
تراه كان شايب على حفة قبره وتشبشب على اخر عمره
ركزت نظرها على الشايب وهي تسمعها تثرثرفوق راسها !!!
مو قادره تستوعب انه ابوها شايب !!!
ليه هي الوحيده ابوها شايب ؟!
ما شافته ولا جلست بحضنه مثل باقي الاطفال !!!
حتى أمها ما شافتها ولا تعرفها ؟!!
تركوها
قاطعتها ام محمد وهي تشدها للداخل : ادخلي
اعملي شيء نشربه قبل ما اروح لام هزاع
هزت راسها بطاعه ودخلت بهدوء وبداخلها بضيقه وحزن وشعور بالنقص انه أبوها شايب !
حتى بالقريه ينادونها بنت (ابنة ) الشايب !!!
تكره هاللقب ويشعرها بالنقص عن باقي جيلها
ومع ذلك تسكت لأنها ما تملك شجاعه وقوة شخصيه ترفض هاللقب للي إلتصق فيها !!
**
**
**
**
**
ضحك من قلبه على كلامها : الله يسامحك يا خالتي !!
ام محمد : هذا انت كم سنه ما شفتك وانت بذيك الديار وشهوله تنتقد وجودي بذي القريه ؟!!
ابتسم : يا خالتي من عقلك تاركه بيتك ورايحه لذي القريه ؟!!
اكيد عيال عمي غسلوا مخك !
ام محمد بضيق وهي تحس بكلامه سخريه لعيالها وهذا الشيء بحد ذاته يضايقها : وبعدين معك ؟!
ضحك بهدوء : الله يهديك يا خالتي وانا متصل فيك اطمئن عليك بعد ما شفت المكان للي عايشه فيه !!
ام محمد : عزام هو للي صور المكان ؟!
ابتسم : تبين الصدق ايه عزام صور لي المكان
وبصراحه ما صدقت انك راضيه تعيشين هنا ؟!
ردت بنرفزه : ترى هالعزام رافع خشومه وشايف نفسه وانت بعد مثله !
قاطعها بتذكير لماضيها : ترى طالعين لك
بس الظاهر من عاشر قوم اربعين يوم صار منهم
ردت بضيق وهي تحس انها تسرعت بقرار تواجدها هنا وكيف تخلت عن برستيجها وبتبرير للموقف : ترى مو مطوله هنا
بس العطله ووقت المدارس رح نرجع بإذن الله !
يعني اعتبرها طلعه لتغيير جو !!
رد بتفهم : اها
و كيف ابنة عمي عندك ؟!
اخاف تشتغلي لها شغل زوجات الاب ؟!!
رفع ضغطها بذي المكالمه : لا تخاف تراها حيه تشتغل من تحت لتحت !!
مثل عمك الشايب واكيد امها
قاطعها يغير السالفه : الله يرحم الموتى وعمي الله يرحمه
والبنت نصيبها تيجي لذي الدنيا
ام محمد بهدوء : كل شيء نصيب
كيف دراستك ؟!
واخوانك وش اخبارهم ؟!!
ابتسمت بفرح وهي تسمعها تقول رح يرجعون
لما تخلص العطله
واخيرا رح ترجع عند اهل ابو راكان وابو عزام
**
**
**
**
**

ام راكان بيدها السبحه وتناظر الموجودين بهدوء
سلمان بنرفزه : جده شوفي تالا تبغى تيجي معنا !!
ام راكان : وين امها ؟!
عبد الرحمن : طلعت فوق
ام راكان وقفت بضجر : وقتها تترك هالعله
هنا
مسكت تالا من يدها : اجلسي هنا
تالا ترافس برجلينها وتبكي وتبربر بكلام مو مفهو م
ام راكان وهي ماسكه يدها : اقول اجلسي وبلا ثقل دم !
لو انك ولد كان سكتنا عنك
اما بنت وتتدلعين !!
ام عزام ابتسمت على كلامها : نادوا امها والله ذبحت رأسي بصراخها !!
دخلت ام تالا واخذت تالا وهي تهدي فيها
ام راكان بقرف : خذيها بعيد تتدلع علينا !!!
ام تالا ما عجبها الكلام اخذتها وطلعت ما تدري ليه يفرقون بين البنت والولد ؟!!!!
ام عزام وتحس المكان عم بالهدوء : ايوه كذا
وبتذكر خليني اتصل بعزام اذكره
امي اليوم راجعه
ام راكان : البارحه كلمتها وقالت تبغى ترجع ما بقى على المدارس الا ايام !!
ام عزام باستغراب : احس العطله مرت بسرعه !!
مسكت الجوال واتصلت عليه : السلام عليكم ......وينك ؟!! .......ما ابغى شيء بس ابغى اذكرك ما اتنسى تجيب جدتك .......متى اتصلت فيها ؟!! .....طيب خلاص مع السلامه
قفلت الخط وناظرت ام راكان للي تنتظرها تتكلم: يقول مشغول اليوم واتفق معها باكر يجيبها
ام راكان هزت راسها : ما ادري كيف امك تحملت تعيش هناك طول مده العطله الصيفيه ؟!!
انا اعرفها في راسها موال بس ما ادري وش هو بالضبط !!!
ام عزام بلامبالاه : بكيفها
وابتسمت بهدوء
ام راكان بلقافه : وش فيك تتبسمين ؟!!!!
ام عزام توسعت ابتسامتها : تذكرت امي لما قلنا لها ساره تكون اختي بالرضاعه
ضحكت ام راكان : تتذكرين وقفت بصراخ والله ما تكون اختك انا للي رضعتك وشهوله الكلبه تصير اختك ؟!!!
كملت ام عزام بضحكه قصيره : تتذكرين لما قالت حليبي وحره بكيفي ما ابغى تكون اخت لك
ام راكان ابتسمت : الله يهديها تراها متى ما ضرب عقلها ما ترسل ولا تستقبل !!

**
**
**
**

طالعتها مها وهي عافسه ملامحها من لما اتصل فيها الظهر عزام وقال لباكر رح ييجي يآخذها والحين بعد العصر وهي نفس الجلسه وقالبه بوزها
ام محمد بوحشيه : علامك تناظريني اول مره تشوفيني ؟!
ابتسمت مها بنعومه : يا خالتي خلي ختامها مسك !!
ام محمد وانفجر صبرها : اي مسك !!
ترى اذا ما رجعت اليوم بموت خلاص !!
مها عقدت حواجبها باستغراب : الحين حنت الرجعه !!!
طول العطله وانت مبسوطه وش قلبك ؟!
ام محمد وملامحها عابسه : خلاص طقت الرجعه ا لحين ما ادري كيف جلست هنا ؟!
وين كان عقلي؟!!
وبقهر تابعت : ولا استفدت شيء من الجلسه هنا !!!
مها بعدم فهم : تستفيدي ؟!!!
وش قصدك ؟!
ام محمد بكشره : ما يخصك
وين الزفته ما اشوفها ؟!!
مها عرفت مين تقصد : راحت للبقاله
قاطعتها تبغى تطلع حرتها بأي شيء : طول وقتها بالبقاله ما تشبع من السم للي تشتريه !!
ما خربها الا نادر ما يعرف يخبي فلس بجيبته !!
مها ابتسمت : يا خالتي خلينا نأخذ اجر بهذي اليتيمه
قاطعتها بحده : ذبحتينا بذي الكلمه يتيمه يتيمه
ترى و انا بعد يتيمه ام وابوي ميتين !!
ضحكت بخفه على عقل وتفكير حماتها : خلاص الحين اعطيك تشتري من البقاله
ناظرتها ام محمد بانتقاد : تتمسخرين علي !!!!
مها بنغزه: والله يا خالتي ما ينفهم لك
ذاك اليوم تتصدقين وتمسحين على رأس ابنة ابو عقاب لانها يتيمه وتقولين نبغى الاجر
وساره عندك مو يتيمه ؟!
والا لانها ابنة ضرتك
قاطعتها ام محمد بتهجم : اشوف فيك يوم
ويتزوج عليك نادر بدل الوحده ثلاث
مها بطريقه مستفزه : مستحيل نادر يعملها !!
ام محمد ناظرتها ببغض : انا متأكده انك ساحره ولدي وصار مثل الخروف بيدك !!
ابتسمت مها : صادقه يا خالتي تراني سحرت ولدك
بالسحر الحلال !!
وبجديه : لا تفكري انه الفلوس والعيال أساس السعاده !!
انا ونادر ما عندنا فلوس وعيال ومع ذلك عايشين حياتنا بسعاده وانت شفتي بعينك!
ام محمدقاطعتها : كيف سعاده وما معك فلوس ولا عيال !!
مها ابتسمت وبنغزه : هذي انت يا خالتي معك فلوس وبيت وعيال
بس ما اشوفك مبسوطه!!
وفوق هذا زوجك تزوج عليك !!
وعيالك ما اشوفهم حولك كل واحد بجهة
وانت تراكضين خلفهم وما حد عبرك !
قولي لي متى اميره زارتك !!!
خلف للي داير على راسه و ما يعبر احد
والا محم
قاطعتها بضيق من حال عيالها : خلاص اسكتي !
انا ما يهمني لا زوج ولا عيال و لا شيء
اهم شيء نفسي وبس !!!
وجعل الباقي بالحري..
وسكتت قبل ما تكمل لانه هالكلام مو من قلبها
بس مقهوره من حال هالدنيا
نفسها عيالها يكونون حولها لكن للاسف كل واحد لاهي بحياته بعيد عنها !
قاطع افكارها رنين جوالها ردت باستغراب : هلا عزام !!
***
***
***
***
واقف باب البيت بضيق ما خبر جدته انه جاي يأخذها متأكد رح تزعجه من كثر الإتصالات وين صرت !!
فقرر ييجي بدون ما يخبرها
اقترب وسلم عليها بهدوء
ام محمد بعتاب : علامك ما اعطيتني خبر !!
عزام بنفسه يا ليل ابو لمبه : ما بغيتك تقلقين علي !
هزت راسها بتفهم : خلينا نطلع الحين
تعال احمل معي الاغراض لاني مستعجله
ابغى اطلع من هذا المكان !!
دخل خلفها بهدوء وأخذ الاغراض ووضعهم بالسياره
وفتح باب الامامي لجدته
وجلس مكانه وقبل ما يحرك طلعت مها تركض من البيت : انتظر انتظر
فتحت الباب مها وهي تلهث : علامك يا خالتي ناسيه ساره!!
ام محمد ضربت جبهتها : نسيتها من السرعه !!
وينها الحين ؟!
مها هزت كتوفها : ما ادري بعد الغداء طلعت للبقاله وما رجعت !!
ام محمد بتفكير : يمكن راحت عند نادر
قاطعتها بنفي : لا نادر اخذ الغنم وراح مع جارنا
وقال لها ما تلحقه !
نزل بعصبيه من السياره هذا للي ناقصه : وين ألقاها الحين ؟!!!
مها رفعت حاجب : هدي لا يطق لك عرق !!
طالعها بدون كلام محترم انها زوجة خاله
ضحكت مها على نظراته : ادري الحين تقول يا ثقل دمها !
ام محمد : رحم الله امرئ عرف قدر نفسه !!
عزام بنفاذ صبر : وين ألقاها الحين ؟!!
مها : شوفها عند البقاله للي عندالزاويه !!
واذا ما لقيتها في بقاله بالجهة
قاطعها بضجر : خلاص
وتركهم وراح
مها مدت بوزها : علامه يكلمني من رؤوس خشومه !!
ام محمد بشماته : هو كذا اسلوبه مع للي طينتهم ثقيله !!!

**
**
**
**
واقفه عند باب البقاله وتشرب عصير وتناظر العيال للي يلعبون قريب منها
وتبتسم تحس بالفرح بداخلها ام محمد قالت باكر رح يرجعون
خلاص رح تترك هالمكان وتفارق مها ونادر
كانوا معها طيبين
وما حرموها من شيء حتى ام محمد وقت الاكل تجبرها تأكل كثير
رح تشتاق للغنم للي قضت اغلب اوقاتها
وهي تراكض خلفهن
قربت المدرسه ورح تلتقي بعائشه مشتاقه لها
كثير
رح تخبرها عن القريه وعن الغن
قطعت افكارها وهي تحس بشخص يسحبها وبعصبيه كلمها : وش تعملين هنا ؟!!
ناظرته وابتسمت بفرح لشوفته : عمي عزام
عزام يحس روحه بأنفه وهو يدورها وبحده : ليه تروحين للبقاله البعيده !!
وكم مره قلت لك ما تدخلين بقاله !!
وليه واقفه عند العيال !!
وما ترك لها فرصه ترد سحبها بقوه متجه للسياره
تبغى تصرخ وتقول له فك يدي
بس ما عندها قوه تقول له
لما اقترب من السياره ترك يدها : انقلعي اركبي !
بدون ما تطالعه ركضت للسياره
وما انتبهت لوجود مها !
اقتربت مها وناظرت عزام من فوق لتحت وفتحت باب السياره واقتربت من ساره
قبلت راسها وابتسمت لها : انا ونادر رح نشتاق لك !!
ام محمد جالسه بالكرسي الامامي وبسخريه : على وش تشتاقين يا حسره !!
مها طنشتها ومسحت على راس ساره : مع السلامه !!
ابتسمت لها ساره والدموع تلمع بعيونها : مع السلامه
عزام بخلق ضايق : خلصوني !
وقفت مها وكشت عليه : مالت عليك يالعصبي
ابتسم على كلمتها وعلى طريقتها بالكلام
وركب السياره
و حرك بهدوء تنهدت ساره براحه
بس سرعان ما نقز قلبها لما تكلمت ام محمد : ليه تأخرتي بالبقاله ؟!!
مو دايم اقولك اشتري وارجعي على طول !!
ناظرتها وهي ترفع حواجبها باستنكار أول مره تسمع بذي السالفه !
ناظرها بالمرايه بتوعد : انا كم مره قلت لك لا تدخلي البقالة ؟!
ناظرته بتوتر وهي تفرك يدينها : اسفه
نقزت على صرخته : هذا الشاطره فيه(اسفه )
تعملين السبعه وذمتها وبالاخير تقولين اسف !!
وش ابغى بأسفك ؟!
وبتوعد حسابك بالبيت لما نوصل !
بلعت ريقها بخوف وما علقت
ابتسمت ام محمد بنصر تعمدت تقول كذا لانها تعرف عزام لما يعصب !!
زفر بضيق وناظرها وهي منزله راسها وتناظر بالارض
حس قلبه عوره من منظرها وبصوت حاول يكون هادي : ساره !!
رفعت رأسها وابتسمت له : نعم !!
استغرب منها توقعها تبكي بس الظاهر انها عديمة احساس
ام محمد بكره : نعامه ترفسك
عزام ناظر جدته ورجع ناظر ساره متغيره خلال هالعطله صارت اطول وامتن : الظاهر إنك طول العطله تأكلين برسيم ؟!
والتفت على جدته و ابتسم
ام محمد : هذي البنت مو طبيعيه تقول انها طالعه من مجاعه تأكل اكثر من 6 وجبات باليوم وبالغصب نبعدها عن الاكل !!!
طالعتها ساره باستنكار ما تدري من وين تجيب هالكلام !!
كل يوم غصب عنها تخليها تأكل كثير !!
عزام رجع ناظراها بالمرايه : لازم تخففي عنها الاكل باكر تصير بحجم البرميل !!
شوفي كيف متنانه ما كانت كذا!!
تدرين لما كنت ادورها بالبدايه ما عرفتها !!
ساره ابتسمت وسألته بطفوله: نسيت شكلي ؟!!
ضحك ضحكه قصيره وناظر جدته : أحد ينسى القمر المخسوف واشر على ساره !!
ضحكت ساره بفرح وهو يقول عنها قمر !!
ام محمد بتذكر : انت مصورها لعمك مناف !!
ابتسم وهو يتذكر التعليقات : ايه صورتها له !!
تدرين خطيبته ما صدقت انها ابنة عمه !!
ام محمد : ليه ما تخطب اخت خطيبه عمك مناف !!
يا عليها جمال ذباح !!
ترى مناف كان مثلك حاط مواصفات خرافيه ولما شاف خطيبته تخرفن وبنفس الاسبوع خطبها !!
وش رأيك
قاطعها بكشره : ما احب اخوانها !
فتحت عيونها بإستنكار : وش دخلك بإخوانها ؟!!
اهم شيء البنت !
رد ينهي الموضوع : ما اطيق اخوانها تبغين يكونون اخوال عيالي !!
هزلت والله !!
طالعته ام محمد بجعرفه : اشوف ست الحسن للي رح تتزوجها !
ابتسم وما رد
**
**
**
**
**
**
**
اول ما نزلت تبغى تركض مشتاقه لهم كثير
بس وقفها عزام وهو يمسكها من كتفها : تعالي خذي اغراضك وبسرعه على البيت وتسبحي
لانه ريحتك قتلتني
حشى انت تنامين عند الغنم !!
ردت ببراءه : لا انام بغرفه خالتي
ام محمد بحده : بسرعه على البيت يا ويلك اذا رحتي هنا او هنا بدون علمي !!
هزت راسها بطاعه : ان شاء الله
اقتربت من بيت ام محمد ونزلت الاغراض وركضت لبنات خلف وسلمت بحراره
جودي بابتسامه : واخيرا رجعتم !
ليان : الحمد لله على السلامه !
متغيره كثير
وناظرت جودي لتأكيد كلامها : صح
جودي هزت راسها بتأييد : ايه صح
ساره ما علقت على كلامهم وبلهفه : وين عمار؟!
وخالتي ام عمار ؟!!
جودي : امي شوي وتيجي مع جدتي ام راكان
اما عمار طالع
قاطعتها صرخة ام محمد : ادخلي لا بارك الله فيك
وبسرعه توجهت للداخل وهي تسمع ام محمد تبربر
**
**
**
القلوب أوعية، والشّفاه أقفالها، والألسن مفاتيحها، فليحفظ كلّ إنسان مفتاح سرّه.

•••
•••
•••
•••

ابو راكان يمسح على راسها بحنيه : كيف العطله كانت ؟!
ابتسمت بحماس : حلوه
ام راكان ابتسمت بسخريه : ما ادري وش الحلو وانت جالسه بمكان يقرف !
ساره ببراءه : ما عجبتك الغنم !!
ابو راكان بضحكه قصيره على شكل ام راكان !
ام عمار ابتسمت : انا لو يقرب مني الغنم خطوه انهبل !
ساره متحمسه وفرحانه بشجاعتها : لا تخافي من الغنم لأنه حيوان أليف !
اسيل عفست ملامحها بقرف :،يعوووووو
سلمان كش على اسيل : مالت عليك يقال برستيج !
وبدآ ينفخ صدره ويمدح نفسه : انا ما اخاف من الغنم !
مستعد اذبح الغنم وانا مغمض عيوني !!
دخلت جودي بعجله وهي تناظر ساره : جدتي تدور عليك ومتحلفه فيك !
فزت بخوف وطلعت وهي تركض
بإتجاه بيت ام محمد
وبلعت ريقها وهي تشوفها واقفه عند الباب والشرار يطلع من عيونها !!
تقدمت وبخوف : نعم خالتي !
ام محمد بشراسه : يخلخل عظامك قولي امين !
انا ادورك من ساعه وين طاسه ؟!
ساره تبغى تبرر موقفها
بس قاطعتها ام محمد وهي ترفع اصبعها بتهديد:ولا كلمه !!
ما ابغى اسمع اي تبرير فاهمه !
هزت راسها بطاعه : ان شاء الله
ام محمد اشرت لها تدخل خلفها
اخذت نفس ودخلت خلفها بخطوات هاديه !
ام محمد : صحيت من النوم ناديتك وما رديت ؟!!
ساره بإعتذار : اسفه ما سمعتك!!
بغيتي شيء مني ؟!
ام محمد تجلس على الكنبه : ايه ابغى مويه
واعملي شاهي رأسي مصدع !
وبعدها انقلعي برا
هزت راسها متحمسه حتى تكمل بسرعه وترجع لبيت ابو راكان !!
جهزت كل شيء وحطته قدامها : تفضلي !
ام محمدوهي مستلقيه على الكنبه : اسمعي روحي عند عمك ابو راكان يبغى يأخذك للسوق وتشترين اغراض للمدرسه !!
وقفت بفرح : الحين اروح
وطلعت تركض بفرح مو مصدقه طالعين للسوق !
رح تشتري ملابس للمدرسه والوان ودفتر رسم !
دخلت مبتسمه-: السلام عليكم
ام راكان : رجعتي ؟!!
وبنفسها صدق انها ما تنعطى وجه !
تتلزق بالواحد !
ساره اخذت نفس تعبت من الركض : خالتي قالت لي علشان اروح معكم واشتري
ام راكان رفعت حاجب وهي عارفه بخل أختها : معك فلوس ؟!
انحرجت ساره وقبل ما ترد تكلم ابو عزام : انا قلت لام محمد ترسلها واشتري لها على حسابي مع بنات خلف!
ام عمار بانحراج :،ليتك سالم يا يبه!
لو يطلع بيدي ما اخذت منك فلس بس المشكلة هالبخيل وش الحل معه ؟!!!
ما ابغى بناتي يشعرن بالنقص
قاطعها : لا تهتمي
نبتغي الاجر من عند ربنا !
ام راكان لوت بوزها ما تهمها الفلوس بس تنقهر من خلف البخيل : المفروض غصب عنه ينفق على البنات مو على كيفه !
لو تسمعون مني وترفعين نفقه عليه
خله يصرف ورجله فوق راسه !!
ابو راكان اشر بيده بإستخفاف : شوفوا هذي للي تبغى تفضحنا بين الناس !
ارفع قضيه نفقه على عيال اخوي !
وش تبغين الناس تقول
قاطعته ام راكان بضجر : يا هالناس للي ذبحتنا فيهم !!
ابو راكان بنبره غاضبه : وبعدين معك !!
انا ابغى اصرف على حفيداتي وما احد له عندي !!!
ام عمار خافت تصير مشكله بينهم : صلوا على النبي !!
عم المكان بالصلاه على الرسول عليه الصلاة والسلام..
ابو راكان الحين أتصل بعزام يأخذكم بعد المغرب
ام عمار بانحراج : ان شاء الله
***
**
**
جالس بالسياره ينتظر وينافخ بعصبيه ويكلم بالجوال : انا الحمار للي جلست هنا !
لو سافرت ادرس برا كان ارتحت !
عزام تعال عزام روح وكأني سواق عندهم !!
ليت يدي انكسرت قبل ما اتعلم السواقه !
يا حظك انت واعمامي مرتاحين !!
افففف شيء يرفع الضغط !
ضحك على انفعال عزام : هدي يا ابو الشباب ما في شيء يستاهل كل هالعصبيه !!
زفر بضيق : يعني خالي خلف داير وتارك زوجته علينا !
نغزه بتذكير : ترى انت تتكلم على اختي !
وش فيها لو اخذت عمتك للسوق !!
عزام ارخى رأسه على المقعد : اوكي عمتي اخذها على عيني ورأسي !
بس بنات خالي مو ملزوم فيهن !
ولا ملزوم بأخته ساره !!!
وعفس ملامحه بقرف !
قاطعه وهو ماسك ضخكته : لا تنسى تراها خالتك !
تنهد بقرف : يا اخي لا تذكرني
وقسم بالله شوفتها تغثني !
احس نفسي اناظر خلف !،
سكت وهو يسمعه يضحك بقوه
ابتسم عزام شبح ابتسامه : اشوفك تضحك !!
انهى ضحكته بابتسامه : والله ضحكتني
خلف مره وحده !
ترى انا شفتها وش جابها لخلف الضخم !
وبتساؤل صحيح كل عيال عمي عليهم طول وضخامه !
عزام مط شفته : واكيد ساره رح تطلع مثلهم بالشكل والتصرفات
رد باستبعاد : مو شرط تطلع مثل اخوانها بالتصرف !
لا تنسى الفرق بالسن بينهم والناس الحين تطورت
وكل شيء تغير !
وحياة زمان اختلفت !!
عزام بابتسامة وهو يناظرها تركض للسياره بحماس : جبنا سيره القط اجى ينط !
وقفت عند شباك السياره وبفرح : اخبارك يا عمي !
عزام بضجر : يا ليل ما اطولك
ورجع يكمل مكالمته : للي يسمعها تسآلني عن اخباري يقول صار لها سنين ما شافتني !
مو كآنها كل شوي ناطه بوجهي اخبارك يا عمي !
ضحك بقوه على انفعال عزام وطريقه كلامه
عزام :،اضحك وش عليك !
ما اقول الا يا رب تيجيك بنت نسخه من ساره
ووقتها علشان اضحك عليك من قلبي!
رد مناف باستبعاد : كيف تيجي وانا حلو وانيق وزوجتي مثلي
عزام بغبن : على سابع جد جابت ثور ابرق !
ساره بحماس كلمته : اركب السياره !
عزام يشكي لمناف : اكره ما علي تركب سيارتي لأني لازم بعدها اروح وانظفها تنظيف !
عقد حواجبه باستغراب : لذي الدرجه قذره !!
عزام هز كتوفه : ما ادري انا اشوفها قذره
مناف بحماس : بالله بالله يا عزام صورها الحين
عندي فضول اشوفها الحين !
عزام بكسل : طير مو فاضي لك !
هذي عمتي ام عمار جاءت اكلمك بعدين !!
قفل الخط وناظر ساره وابتسم لها : تفضلي يا ساندريلا اركبي !
توسعت ابتسامتها : ان شاء الله
ركبت وناظرت عزام بحماس: متى نوصل للسوق !!
إلتفت لها وبتعجب : حنا حركنا علشان توصلين !
ابتسمت بانفعال : متحمسه اروح اشتري للمدرسة !
ابتسم على حماسها وا علق وهو يشوف ام عمار تركب من قدام
جوي وليان فتحوا باب السياره ويتشاجرن : انا رح اجلس عند الشباك وانت اجلسي بالوسط !
ليان بردح : لا والله ما تجلسين !،
جودي حاولت تسحب ليان للي متمسكه بالباب
صرخ بعصبيه :-وبعدين مع هالحركه ؟!،
متى تكبرن مثل البزران !!
ليان بقهر:-أنا سبقتها !
طالع عمته : خلصوني وقسم بالله 5 ثواني
اتحرك واتركهن !
ام عمار التفت بعصبيه : جودي وليان بعدين !

جودي بعناد : والله الا انا اجلس عند الشباك !
ناظرها عزام بنظرات ناريه : يا جعل الشباك يخنقك !!
انقلعي اركبي !
حركت حواجبها بالرفض : والله ما اجلس بالوسط !
نزل من السياره بعصبيه : وش رايك تجلسين مكاني !
نزلت ساره اختصار للمشاكل : خلاص انا اجلس بالوسط !
عزام برفض : لا اجلسي مكانك
قاطعته ام عمار : خلاص يا عزام مشيها
وساره تجلس بالوسط
ناظر ساره للي هزت رأسها بالموافقه
زفر بقهر : انقلعن واركبن
ليان دفت جودي : انقلعي انا من هذي الجهة !
جودي تتخصر : لا والله
قاطعهم صرخت عزام : وبعدين !!
خلال ثواني كل وحده جلست مكانها من صرخته المرعبه !
حرك السياره وهو مولع : والله ما يركبن معي هالزفتات مره ثانية !
هذي المره طوفتها علشانك يا عمه
ام عمار : متى يكبرن ويعقلن !
والله ساره اصغر منهن وفيها عقل اكثر منهن !
لوت جودي وليان كل وحده شفتها مو عاجبهم كلام امهم
ام عمار ناظرتهن : وقسم بالله ساره احسن منكم
يا ليت عندي بنت مثلها
ناظرها عزام من المرايه : صادقه يا عمتي انها احسن وحده بالبنات
بس احس فيها عرق خبل وهبل
صح يا ساره !
ابتسمت ساره بخجل وهم يمدحون فيها
ام عمار بصدق :ما شاء الله عليها
ما عندها مشاكل ومسالمه وسنعه
والله لو تشوفها لما اكون بالمطبخ تذبح حالها علشان تساعدني
مو مثل هذا الجوز يهربون من الشغل !
عزام بقهر من بنات خاله : بعين الله !
وطالع ام عمار : وش رأيك تأخذين بناتك وتتسوقين على كيفك
وانا اخذ ساره واشتري لها ؟!
ام عمار بتردد : يمكن ما تعرف مقاس
قاطعها : يا عمه هي اختراع صاروخ !!
ما عليك انا اخذ ساره وأتصل فيك بعد ما اكمل !!
**
**
**
**
**
نزلت من السياره وهي تحس بالامتنان لعزام
ما خلى شيء والا جاب لها منه !
حط لها الاغراض على الابواب ابتسمت له :،شكرا
طالعها وابتسم وزادت ابتسامته باستغراب
وهي تكمل كلامها بخجل : انا احبك هالكبر
وفتحت يدينها توصف مقدار حبها له !!
قاطعتهم ام محمد بزجر : انت ما تستحين على وجهك تقولين هذا الكلام !!
عيب هذا الحكي !
عزام ابتسم على كلام جدته
ام محمد ناظرته باستنكار : اشوفك تبتسم عاجبك هالحكي !
علشان باكر تتعود هالكلام تحكيه للطالع والنازل وتفضحنا عند العربان !
رفع حواجبه باستنكار ما صار شيء وجدته كبرت الموضوع !
ام محمد بغضب : ادخلي لا بارك الله فيك !!
ناظرتها ساره بخوف ودخلت بدون اعتراض !
عزام بعتاب: ترى هي خالتي يا جدتي وكلامك
قاطعته بحده : مو خالتك !
لاتصدق هالكلام ...
تكلم ينهي السالفه : تصبحين على خير
وتركها وهو يحس بضيق من كلام جدته
زفر بضيق واشغل نفسه بالاستغفار
**
**
***
ام محمد مسكت ساره من اذنها وبتأنيب : إنت ما تستحين على وجهك تقولين هالكلام !
وبتهديد قسم بالله لو اسمعك تقولين هالكلام الا احرق لسانك القذر !
هزت راسها بخوف بدون ما تتكلم!
ام محمد جيبي الاكياس اشوف وش اشتريتي؟!!
هزت راسها بحماس وضحكت
حطتهم قدامها وبدأت تفتح الاغراض وتطالع ام محمد تشوف انطباعها عن الاغراض
وام محمد تناظر وتهز راسها بهدوء
كملت ساره عرض اخر قطعه وشاقه الابتسامه
تنتظر تعطي ام محمد اعجابها
بس استغربت لما شافتها اخذت معظم الاغراض وبحزم : ذول رح اخبيهم للايام الجايه
مو قاعده على بنك كل يوم اشتري لك !
ناظرت ساره الاغراض للي على الارض
وبرضى : ان شاء الله
وبحماس لملابس المدرسه الجديده : خالتي اروح ألبس ملابس المدرسه علشان
قاطعتها بتحطيم : ما له داعي !
وش رح تطلعين يا حظي !
قرده لابسه ثوب ازرق !
بالله روحي شوفي وجهك مثل البومه !
وبأمر : خذي الأغراض وحطيهم بغرفتك بسرعه !
ردت بنبره محطمه : ان شاء الله
**
**
**
**
جالسه بالغرفه وتسمع لنهى واسماء بملل
نهى بإحباط : كان نفسي اشتري اغراض المدرسه بنفسي !!
اسماء ناظرتها بقهر : كله بسبب وقاحتك !!
فتحت نهى عيونها : ناسيه انه انت الراس المدبر
طول الوقت تقولين لي
شوفي شوفي يناظرك يحبك معجب فيك !!
اسماء هزت كتوفها وناظرتها بسخريه : لانك خبله كنت اضحك عليك وانت صدقتي !!
تنهدت نهى وناظرت عائشه وبجديه : كل بسبب عائشه غبيه اعطت بابا الورقه !
ناظرتها عائشه بقرف وبنبرتها الطفوليه : تستاهلين ليته للحين يطقك !!
نهى رفعت حاجب بغرور : عادي !
تدرين هنا نقلنا افضل
واقتربت وهمست لاسماء : شفتي ولد الجيران
قاطعتها اسماء بوعيد : جربي تعيدينها وقسم بالله الا اخبر بابا انا !
لوت بوزها : امزح معك كل شيء تصدقيه !!
ناظرتها اسماء بتكذيب بس سلكت لها :اه صدقتك !!
نهى بملل : تدرين كل الضرب للي حصلته بكفه والدروس للي يعطينا إياها كل يوم بكفه !
مليت ساعه كامله محاضرته
حسسني وكأني بخطبه الجمعه !
جالسين ممنوع نتحرك ونتكلم !
اسماء بتأييد : متى يعتقنا من الدروس هذي !!!
يتعامل معنا وكأننا طلاب بالمدرسه ممنوع نتنفس !
وبهمس حتى ما تسمعهم عائشه : دروس بابا ممله الله يعين طلابه اكيد يطقون بالحصص !!
مطت نهى شفتها وهي تهز رأسها بتأييد !!
وقفت عائشه وطلعت من الغرفه بملل من سوالفهم
أبوها تغير عليهم من بعد ذيك السالفه
انحرمت من اللعب برا بسبب ذيك السالفه !!
جلست عند امها بالصاله بضجر
ناظرتها ام سعود وابتسمت وهي تشوف ملامح الملل مرسومه على وجهها : وش فيك يا ماما ؟!
ناظرتها عائشه بطرف عينها بعد ما تكتفت : تعملين نفسك ما تدرين ؟!!
ضحكت ام سعود ضحكه قصيره : وش اعمل رأس ابوك متنح مو راضي تطلعين تلعبين!!
عائشه شوي وتبكي : كل الاطفال يلعبون الا انا ؟!!
ام سعود ابتسمت وبداخلها راحه الايام للي مضت كانت بالنسبه لها عذاب
مع الايام ابو سعود خفت عصيبته ورجع يكلم البنات بس بحدود
وللحين عامل عليهم حصار ممنوع يطلعن الا للضروره !!
عائشه تناظر امها بنرفزه : ماما انا اكلمك !!
ام سعود هزت كتوفها ما يطلع بيدها شيء : روحي لأبوك وقولي له هالكلام اما وش دخلني !!
عائشه خزتها بطفوله : انت وش دخلك ؟!!
وبعدين انا زوجك هذا ما اكلمه لو اموت ما تكلمت معه !
هوالخسران !!
ضحكت ام سعود عليها : يا شيخه طول الوقت تقولين حلال وحرام
والحين ما تكلمين ابوك ؟!!
زمت عائشه شفايفها وعيونها تلمع بالدموع : الابو ما يكسر يدين ابنته !!
ام سعود طالعتها : يالحقوده للحين مو راضيه تنسي هالسالفه !
وبعدين بابا ضربك لأنك غلطتي
ردت على امها بقهر : يقوم يكسر يدي !
انا وش دخلني الزفته قالت لي اعطيها له علشان يعطيني حلاوه !!
ام سعود بتنبيه : مره ثانية ما تعملين شيء الا لما تخبريني فاهمه !
عائشه بضجر : طيب خلاص فهمت قلتي لي الف مره حلاص ما تملين من ذي السالفه !
الحين ابغى اطلع ألعب !!
بلعت لسانها لما شافت ابوها دخل البيت
قلبها يدق بقوه تخاف يكسر يدها مره ثانية
رد السلام بحزم وبداخله يكتم ضحكته على عائشه بعد ما سمع كلامها وهو واقف عند الباب
ام سعود ابتسمت له :، وعليكم السلام
جلس ابو سعود بهدوء
وبدأ يتكلم مع ام سعود
وهي جالسه تفكر وتفكر توصلت انها تطلع من الصاله
وقفت بهدوء ومشيت خطوات هادئه
قبل ما توصل لابوها
ناظرته وقلبها يدق مشتاقة له زمان ما جلست معه تكلمه
وبدون سابق انذار ألقت نفسها بحضنه وهي تبكي بصوت عالي وتردد : اسفه يا بابا
والله ما اعيدها !!
تفاجئ ابو سعود من تصرفها وناظر زوجته للي هزت له رأسها وابتسمت
هز رأسه وحضنها بقوه وهو يمسح على راسها
يدري انها صغيره وما تدري عن شيء وما تفهم بس غضبه اعماه وقتها
وخلاه يتصرف بدون وعي
وبنفس الوقت يبغى يكون حازم مع البنات لانه هالزمن يخوف
بعد وقت ابعدت نفسها عن حضنه وهي تمسح عيونها وبصوت مبحوح : سامحتني ؟!!!
هز ابو سعود رأسه : ايه سامحتك !
ابتسمت وبحماس وقفت : اروح ألعب !!
فتح عيونه : صدق انك مصلحجيه!!!
وبحزم : بسرعه على غرفتك
ام سعود ابتسمت : علشاني خلها تطلع تلعب
ابو سعود ناظر ام سعود وهي تغمز له تكلم بحزم : نص ساعه تنزلي تلعبين مع بنات عمك !
واذا شفتك بالشارع احش رجولك فاهمه !
هزت راسها بفرح وبحماس : ان شاء الله
وطلعت تركض قبل ما ابوها يغير رايه !!!
**
**
**
**
بحماس تنظف الطاوله
اسيل باستغراب : ما شاء الله سنعه هالبنت !
خوله تناظر بدهشه : والله انها اشطر مني شوفي كيف تنظف. !!
ام عزام بضيق ما تبغى تثقل على ساره : خلاص يا ساره اتركي هذي اسيل تكمل !
ساره رفعت راسها وغرتها نازله بعشوائيه وتبتسم وهي تنظف : عادي يا خالتي انا احب اشتغل !
اسيل بكسل : البنت متحمسه يمه خلها تشتغل !
ساره بحماس : اعرف أشتغل كل شيء !
دخلت ديما : ماما ابغى الحمام!!
خوله بتعب وبطنها بارز : اففف وقتك الحين !!!
ساره تعرض المساعده : انا أخذها عنك !
خوله بتردد : تعرفين
قاطعتها ضحكت اسيل : تقول تعرف كل شيء
وحطت يدها على فمها تكتم ضحكتها
ام عزام : خوله قومي على ديما
قاطعتهم ساره وهي تمسك يد ديما : خلاص انا اخذها !
وما تركت لام عزام مجال تعترض !!!
اسيل بمحبه : يا حليلها ساره مطيعه !
خوله : يا ليت بناتي مثلها !
ما غير مطلعين المر بحلقي !
اسيل بتذكر : ترى جدتي ام راكان تقول اذا خلفتي بنت ما رح تيجي وتشوفها !
خوله بقرف من سوالف جدتها : فكينا منها ومن سوالفها !
ام عزام رفعت عينها عن الجوال واعطتها نظره : خوله !
خوله لوت بوزها : يعني يمه جدتي والله تزيدها
شوي !
رجعت ساره ومعها ديما : غسلت لها يدينها !!
خوله وهي حاطه ايدها تحت خدها :،شطوره
ساره بدأت تنظف بالارضيه : خالتي ابغى امسح الارض علشان تبقى تلمع !
اسيل اعطتها نظره فكاهيه : هي ترى انت بتهيني شغلي
تراني الصبح نظفتها !
ام عزام : والله انه شغلها احسن من شغلك !
اسيل لوت بوزها : وقتكم الحين تسفروا الشغاله !!
ام عزام بحده : قومي جيبي قهوه احسن من هذرتك هذي !
وقفت ساره : انا اروح اجيب القهوه
وركضت بإتجاه المطبخ
وام عزام وبناتها يناظرن بعض لا تعليق !!!!
**