رواية أخطاء لايُمحيها الزمن الفصل الثاني عشر 12 - بقلم أنثى 🪽 ملائكية

آنثى 💜 ملائكيه

اخطاء لايُمحيها الزمن

منو عنده ملح بيه خير
هذا اليفشل # العندي
اشو كلما تظوكه الناس
تنسه وتنكلب # ضدي

جوري .... كملي وبعدين ترى فتيتي گلبي ...

ازهار .... صديقتي اسراء هيه شمسويه دازه صورتي لـ حبيبها حسن وتكله هاي اني وهيه متدري بي ديضحك عليها  ومهددها وعلساس رايح وناشر صوره وهسا تريد مني مبلغ فلوس....

جوري ...فتحت اعيوني على وسعهن وضربت خدي ....عزه عزاج ازهار ع هاي سالفه تالي شصار ولج ....

أزهار ... تبجي وتحجي برتباك ...  اني بعد مارحت للمدرسه وصديقتي حضرتها بس شو ثاني يوم اجت وحده وكالت ماما علساس بنتج منشوره صورتها وماما لزمتني موتني كتل وخايفه ابويه لايعرف والله يذبحني. ....

جوري ...تنهدت وسحبتها لحضني ...حبيبتي بهذا وكتج لاتثقين باي شخص لو مو صديقتج بس مكتيلي ويامن جنتي تحجين ...

أزهار ... ويه حبيبي برهوم...

جوري ...طلعت موبايلها وشوفتلي صورته اباوعه صحيح هو حلو وشخصيه بس شمدرينه شنو خاف هذا لايضحك عليها صراحه حيل خفت ع اختي ولاتخاف تتقشمر كعدتها كبالي وحجيت بحزم هاي التصرفات يامه ودت بنات للگبر بسبب تصرفات طايشه نحكم عليهن بالموت ولازم اخليها كدام أمر الواقع.....

.... شوفي حبي زوزو انتي لجايه تسوي مو صحيح ولازم تفكرين بنفسج وتخافين ع روحج ولد الحرام هواي حبيبتي ومتعرفين منو يوكعج بمشكله يتهمج هسه انتي بمجرد ما وثقتي بصديقتج ودزيتيلها صورتج راحت نطتها لحبيبها شلون بعد تتأمنين باشخص متعرفين اصله من فصله وتحجين ويا خلف الكيبورد حبي اذا ماتفكرين بنفسج فكري باهلنه شكد تعبو علينه وربونه وكبرونه غير هسه المفروض يفتخرون بينه حبيبتي بعد بدراستج وبس عوفي هلسوالف مراح تفيدج هسه اني اختج كدامج خلي اكون عبره الج شفتي شصار وياي بذيج فتره ولمن تركت دراستي وفضلت زواج تالي مصيري شنو بس جبت الاذيه روحي و من زوجت لليوم ماشفت راحه

....وهسه اعظ اصبعي من ندم لان عفت دراستي و شي ثاني تعرفين حاليا اني صارت عندي قاعده بحياتي وبلاخص بعد تجربتي انو دائما من اسوي شي خطأ والي ميرضه بي الله سبحانه وتعالى انكشف واوكع بمشاكل واذيه مامنها مفر وحتلو ضميتي هلشي بداخلج ومحد يعرف بي بس صدكي تنكشفين سنه ولو الف سنه فخليج حذره ماشي حبيبتي....

باوعتلي ازهار وتبجي حسيت اكو بعيونها ندم وحزن ع الي سوته هواي قهرتني واكول حقها لان نفس شي الي مريت بي. ومرات نتصرف تصرفات بدون تفكير مشاعرنا تقودنا ونغلط ونسوي اشياء بعدين تندم عليها. نطتني وعد ازهار انو تعوف كلشي وترجع تهتم لدراستها.....

نزلنه شفت امي تسوي عشه وكفت اساعدها ...

ام جوري.... بنتي ليش متراجعين دكتوره ع حمل...

جوري ...اهو عفيه ماما لاتذكرين والله مليت من مراجعت وهسه كل دكتورات بغداد عرفني فمااريد اروح احسن بس صرف فلوس كلشي ماكوو ..

ام جوري ... ليش يمه كولي يالله ويكلك ياعبدي اسعه واني اعينك احنه نسعي والباقي ع الله كالولي ع دكتوره ايمان كلش زينه شتكولين باجر اخذج لها....

جوري ... بقلة حيله ... مادري الله كريم اشوف علي اكوله واردلج خبر....

..كملنه عشه وكعدو ياكلون وبعدين غسلنه مواعين اني واختي تقريب لل10بليل ورجعت للعيالي اول مدخلت المطبخ انصدمت يبو اباوع مواعين صايرات جبل يعني ماكو غيري يغسلهن صعدت بدلت ونزلت اغسلهم لان عمتي تحجي اذا شافتني اغلس عليهم....

.. اجه علي وكتله ع دكتوره وافق ورحت ثاني يوم اخذت امي جان ماكو ازدحام بسرعه دخلتني سكرتيره سلمت ع دكتوره وكتلها صارلي 4سنوات ولحد الان حمل ماكو ...

دكتورة ....بنتي شكد عمرج ...

جوري ... 15سنه ...

دكتورة ... بعدج صغيره احتمال يصير عندج من دخلين 18يله كومي اسويلج سونر دنشوف...

جوري ... نمت ع سديه خلت سونر ع بطني ..

دكتورة.... اخر مرة شوكت اجت ...

جوري ... صار اكثر من شهرين واحلل ماكو حمل...

دكتورة ... ياعيني شلون تخليها هيج موزين بنتي صاير عندج تكيس ع مبايض راح اكتبلج علاج تنزل  وتبدين تاخذين مساعد سكر ومقويات وعلاج للتكيس واريد تسويلي تحليل هرمونات ومن غيرها واريد زوجج يسوي تحليل ارد اعرف نسبته شكد...

جوري ...  اخذت راجيته ونزلنه ناخذ علاج نوب كلش كلفنه الدوه واني خلصت فلوس وخطيه امي دفعت فلوس علاج وطلعنه رجعت للبيت وكتله دكتوره طلبت منك تحليل اشو احتقن وعقد حاجبه ...

علي ...  ميحتاج كلشي مابيه فااهمه وسدي الموضوع ...

جوري ... اقتربت منه وحجيت بهدوء ... ادري ياعيني بس لازم تسوي للاحسن... حاولت اقنعه وامه اسمعها تكله روح سوي تحليل حته لايكولون صوج منك ميصير عندك خلفه گوا راح سوه تحليل لثاني يوم اخذت تحاليلنه ورجعت للدكتوره اشوفلياها باوعتهن فرت براسها ...

دكتورة....بأسى ...  حبيبتي نسبة زوجج صفرر تعرفين شنو صفر. وانتي تحليل عندج واحد منهم هرومون الحليب صاعد وهلشي هم يمنع الحمل هسه اثنينكم يحتاجلكم علاج ....

جوري ...كتبتلي بلراجيته ونطتني موعد وطلعت نوب علاجه هو كلش غالي بس المقويات ب50وباقي علاجه كلهن 100 وعلاجي كلفني 75 ماخذته كله اخذت نصه وطلعت الله لايسلط لاحاكم ولاحكيم كوه مدبرين حالنه واني اروح اذب فلوس كلها للدكاتره.  رجعت اخذت دوه وكلاص ماي حته يشربه شافني فتح عيونه متفاجئ ...

علي ....هاي شنووو ...

جوري ... علاجك... باوعلي بنظرة غضب و دفر كلاص بوجهي وعافني وطلع حيل ضجت من تصرفه عرفت مراح ياخذه حتى تركته لان تعبت احجي ويا واقنع وميفيد.

اجه يوم الي اسمع اختي جايها خطابه وابويه يريد يزوجها غصب اني تخبلت لبست عباتي ع سريع ورحت لأهلي. بعدني مادخلت واسمع عمامي وابويه وبيبي صياحهم واصل لسابع جار دخلت واشوف زهراء حاطه ايدها وتبجي رحت اركض عليها لج شبيج زوزه حبيبتي باوعتني وحضنتي وتبجي....

أزهار ...بنحيب ....جوري كون الله يموتني ولاازوج هذا شفيه اكرم ....

جوري ...تفاجأت لج أكرم مو غيره...

ازهار ... اي وهذا ثاني الدبه الي يتسمه بلاال جاي ابو يخطبني وبابا رافض يريدني لـ احمد وبيبي مقابله ع احمد تكله تريد تزوجها لواحد ابن شارع  وبعدين بابا رجعله خبر الابو بلال وكله ماكو نصيب  وابو بلال خيره اذا ماتنطوها ابني عمار ابن اختي يتزوجها وهسه بابا متخبل وبيبي تكله هاهيه شوف خير وعمو يوسف شفتي كالعاده رافض يكله لا هذا ولاهذا يريدني الابنه باوعتها

جوري ... وهذا شعليه عمي بكلشي مدخل روحه ذيج مره وكف بقسمتج من دريد هلمره هم بس علمود تصيرين الابنه بس اوكفي.. كمت ع حيلي ورحت ليمهم اشوفهم بس يتصايحون ضربت الباب حتى يسكتون

كلهم باوعلي ومتفاجأين بتصرفي اني هنا صرت اعصاب باوعت ع بابا واني دموعي تلالي بعيني صرت ارجف واحجي ....متكلي انته كم بنيه عندك هااا لو عندك عشره جان سويت اذا عندك بس بنيتين2 وتريد بس تزوجهن بابا تره حرام عليكشنو انته متريد سعادتنه تروح تزوج بنتك غصب وعبالك هيج راح ترتاح هم الله يقبلها كلي ليش متفكر بينه وتكول خطيه شافن بحياتهن حته دزوجهن وهنه صغار ونوب غصب يعني مصرت اني كدامك عضه هاك اني مو كل يوم وثاني جايتكم زعلانه ليش كلي ليش فهمني بابا اتراجك لاتعيد الغلط خلي اختي هيه تختار شريك حياتها هيه راح تزوجه وتعيش ويا مو انتو سحبني عمو لحضنه وكمت ابجي...

... كافي عمو شحده يزوجها غصب واني موجود...

جوري ...رفعت اعيوني اباوع بابا شلون غضب بين ع شكله كلشي مجاوبني نفر من مكانه وكلها بيبي...

... هاهيه شوفي خير والله كريم.بس هو صاير اعصاب طلعت للمطبخ واسمع ماما تحجي ويه اختي تكلها تقبلين بواحد سكراب وماعندهم غير بس الامراض الوراثيه واسمعها شلون طلعت عيوبه للولد واختي قابله تزوج عمار ولاتزوج اكرم او بلال. دخلت عليهن كتلها....

... ماما بس عاد خليها براحتها ميكفي ابويه هسه انتي لو تزوجها عمار لو تبقه متزوج والخيار الها....
باوعتني اختي وابتسمت وتشكرتني وبيبي راحت خابرت ع ام عمار وشوفو خير. اجو اخوني يبجون شفتهم ورحت احضنهم شبيكم حبايب ليش هلبجه...

أحمد.... لاتزوج أزهار وتعوفنه وحسن هم ميريدها تزوج ...

جوري ...وحقدو ع ابو بلال يكولون من عنده صوج ولحد الان يذكروها ولاراضين ع زواج اختي من عمار ثاني يوم اجوي ام عمار وخالاته واخواته جايبين نيشان ويشوفون اختي فـ اني رحت اقدم الهن فواكهه اول مدخلت شافتني ام عمار وتصلي ع محمد وتكول بعد شتريد عمار اجتك وحده صاكه رمشت عيوني وباوعت وراي ماكو احد ...

بيبي.... عيوني ام عمار هاي جوري اخت ازهار   وينها اختج غير هيه تجي تقدم....

جوري ...  والله بيبي بعدها فوك لسا منزلت...

بيبي....  دروحي صيحيها ع سريع...

جوري ... خليت فواكهه ع طبله رفعت عيني وجان تصير ام كرار كدامي سلمت عليها طبعا هيه وحيده الي عرفتها لان تجي يم عمتي تصير بنت خالتها وصديقتها مقربه فلهذا اعرفها اشوفها تباوع صفح ع اختها ام عمار بعدين الي عرفتها هيه ام كرار كايله

اختها انو بنات ابو احمد حلوات روحي اخطبي منهم واجوي ع اختي المهم طلعت شفت ازهار نزلت باوعتها لابسه فستان وردي وشعرها مسويته شلون مجان .... خرب بيومج ازهار تعاي ارتبج شوي... اخذتها بغرفة اهلي عدلت شعرها وخليت الها مكيب خفيف وراحت يمهن اباوعلهن من بعيد شلون يباوعن ع اختي ويعوجن بحلكهن ومعاجبهن العجب

ام عمار ....حجيه باجر يجي ابني يشوفها ونقرر بعد للعقد ...

بيبي ...هاهيه عيني انشالله خير...

. طبعا هنا بابا وماما محجو شي لان خلوهم كدام امر الواقع بس ابد ماراضين وحتى اخواني بس هذا حكم بيبي وابن اختها ابو بلال . المهم اجه يوم ليشوفها

. عمار هوا من مواليد 94 تارك دراسته عنده محل غذائيه يشتغل بي. شخصيته حلوه ضخم وعنده عضلات وجسمه حلو مرتب عيونه خضر شعره لونه جوزي بحيث اغلب البنات من يشوفنه يزحفن عليه....

  اجوي واني رحت لاهلي علمود اختي ادري بيها كلشي متعرف طينه فـ اروح ارتبها وشوي اقتمص شخصيه جويل سويتلها ماسكات لبشرتها نوب اختاريت الها قميص سلفي وجينز ، ومكيب خفيف بناتي ولفيت الها شاال طلعتها تخبل نزلت وراحت سلمت عليهم. وشوي ورجعت وهيه خجلانه غمزتلها ....ها شلونه عاد حلو لا ...

ازهار ...  لج يجنن فدوه بس عيونه تكتل ...

جوري ...  جذب ..

ازهار ... هههه والله ...

جوري ... اكلج زين هاي لبنيه لوياهم منو عبالك تطلع بكدنه ...

أزهار ...اخته فاطمه....

جوري ...  ها.... ضلو لليل ورحنه وصينه عشه سفري وتعشو ورى شوي اسمع بابا يصيحلي ...

ابو جوري ...جوري وينج جيبي فواكهه ...

جوري ...اخذت فواكهه ودروح وهنا يصير عمار بوجهي عزه متت خجل ورتبكت دنكت راسي ومشيت وهو اشوفه صافن عليه نوب رجع التفت عليه وديت فواكهه ع سريع ورجعت خرب مردته يشوفني. لحد مطلعو حسب مسولفتلي اختي تكول اول ماشافني عمار كايلها امه ليش مخطبتيلي ام زيتوني. جنت بوكتها لابسه فستان زيتوني كالتله يا لك غير هاي اختها جوري ومتزوجه. واني مثلك اول مشفتها عبالي هيه الك تفاجات من شفت اختها ابد متشبها وهنا اختي رادتت تنفجر من الغيره اتفقو العرس يكون ورى العيد بس يسون عقد قران....

.. بعد مرور سبوع صار العقد فـ اني بوكتها جنت مخبوصه شنو البس ومحتاره حتى مشتريت لان ملحكت اخذت فستان الاصفر من اختي اني وياها نتلابس لان هواي ضعفت وبل اخص من تركت المنشطات وبعدين سوتلي ام صالون تسريحه بسيطه نوب ياهو تشوفني عبالها اني العروس رحت كعدت يم اختي وجان تصيحني ماما ف رحت. اجت ورايه من كرايب عمار وكعدت يم ازهار ...

... ازهار اكلج هاي جانت يمج جنها كمر اريدها لـ ابني ينطوها ...

أزهار ...گلبت اعيونها بملل .... اول شي هاي اختي جوري وثاني شي هيه متزوجه....

... يا حرمات عبالي مامزوجه بس تعاي معقوله انتن خوات شو متشبهج....

جوري ... رجعت اني وشفتها تحجي ويه اختي سلمت وكعدت اشوفها تباوعلي من فوك ليجوه حجيت بداخلي يا عزه هاي شبيها شافت بيه اكلتني اكل بنظراتها راحت وبقينه اني واختي ناخذ سلفيات وكذا ...

ازهار... اجتي خطبتج  بس اني رفضت من يمي ....

جوري ... يا ولج منو ..

ازهار ... عشتوو ام حسن تريدج لأبنها .....

جوري ...خرب حظي مناقصني غيرها...

.. فـ اجني خواته عريس ضحى وفاطمه تعرفت عليهن فطومه دمها محبوب تسولف وتضحك وطلعت من مواليد 2002يعني قريبه ع اعمارنه اما ضحى حسيتها نوعاً ما متكبره ومحبيتها المهم سولفنه وبعدين اجه سيد وعقدو ورها دخل عمار لبسها ذهب وقطعو الكيك وطلع فـ اني اخذت صينيه الكيك انطيهم للمعازيم لمن رجعت للمطبخ حسيت بدوخه لزمت راسي وجعني حيل واحس حراره تنزل من خشمي خليت ايدي ع خشمي واشوف دم يجري نوب غوشت عيوني وبعد محسيت بشي....

... لحد مصحيت واني اشوف امي ونسوان فوك راسي ويذبن عليه ماي ...

ام جوري.... بفزع ...هاي يما شلون صرتي واسمع ..

واسمع نسوان يكللها عين وماصابتها كلهن يكولن شحلوه عبالك هيه لعروس مرت عمي تكلها امي بنتج ماتتحمل عين روحي نشريلها حرمل والله عاد امي جابتلي حرمل وتقره عليه معوذات بس ماعرف من ذاك اليوم لحد شهر كامل اني ماشفت العافيه من طبيب الى طبيب ومحد عرف شبيه حالتي حاله ويوميه واكعه ...

...تالي وحده كالتلها امي اخذيها بيت جواهري معروفين ايدهم شفاء فـ اخذتني امي جانت اسمها ام منتظر اول مشافتني ضلت تثاوب تكلها امي بنتج شكد محسوده لعد وعليها عين هواي ومسويلها سحر على كلشي متشوف راحه ولاصير عندها خلفه ولاترتاح ويه زوجها وعندها همين تابعه باوعتلي واني متفاجئه...

..حبيبتي دائما اقري سوره البقره او شغليها بلموبايل صدكي تتغير حياتج درجه 90% متعرفين القران شكد بي شفاء للانسان اقري المعوذات سوره صافات الدخان ...

...وضلت تعددلي الايات الاقراهم نوب نطتني تراب اغتسل بي وكتبتلي شغلات اعشاب علمود الحمل وهواي امور كالتلي عليها بعد تعب رجعنه وسويت كالتلي عليه بعد مرور ايام احس عندي وجع بطني مو طبيعي واحس عندي التهابات فـ رحت للدكتوره هند سعران هواي يمدحون بيها لحد مرحت والكه كومة ازدحام ونوب يدخلن 10 خمسه جوه يم دكتوره وخمس قبل دخول ابد ماحبيت هلوضعيه

ابد ماحبيت هلوضعيه بس تكول سكرتيره منلحك عالم هواي يكعدون من صبح لليل ومعاينتها 15 وهيه خوش دكتوره فلهذا ازدحام لحد ماوصلت سراي بالف ياعلي دخلت وحجتلها حاالتي للدكتوره فـ نمت ع سديه سوتلي فحص...

...  عندج التهابات...

.. نوب سونر طلعن عندي مبايض وحده حجمها 13وثانيه 12 ..

...قبل لاابديلج علاج اريد منج اشعه ملونه خاف عندج انسداد بالانابيب...

...  وشسوي هاي اشعه فدوه دكتوره خاف اتئذي...

.. ك الاشعه متئذي اذا ماكو انسداد بس اذا اكو شوي وينتهي كلشي بس اني دكلج تسويها لان هواي حبلن عليها بلكن الله انتي تجيني شهر جاي حامل...

..ابتسمت ...انشاءلله دكتوره كتبتلي ورقه والعنوان مكان عند دكتوره ايمان بشارع السعدون بلكراده اخذت ورقه وطلعت وصلت للبيت واشوف علي يسولف وي تبارك بس المن مادري وره شوي سد الخط ...

علي ... سجاد خطب حبيبته سجى...

جوري .. صدك... كلش فرحتله خطيه ..

علي .. اي والعقد الخميس...

جوري .. خطيه الله يسعدهم.... نوب حجيتله ع دكتوره طلبت مني اشعه ...

علي .. انشالله سالفه جديده شني هاي ...

جوري....تنهدت بحزن ..  تكول تحبلين عليها نروح ونشوف ...

علي ... هسه الله كريم دروحي نزلي سويلي لكمه اكلها...

جوري ... نزلت سويتله اكل بعدين اجت امه...

يسر .... رحتي دكتوره وشكالت بيج امل تحبلين لو نفس حال مريم متخلفين شلون بالله هالبيت ميصير بي احفاد من وراجن...

جوري ...  باوعتها وغصيت بلكمه وكتلها.... عمه كولي يالله اتفائلو بلخير تجدو واني دكتوره طلبت مني اشعه وكالت انشالله تحبلين عن قريب ....

يسر...ضربت على صدرها.... يا ولج هاي اشعه مال عقم مو اكلج حالج حال مريم هم مخلت شي مسويته ومصار عندها ....

جوري ...متحملت كلامها عفتها وصعدت دائما تذبلي كلام وتخليني ابجي ليش ماخلف قابل بكيفها بيد الله....

فـ اجه يوم الخميس وسجاد كله علي خلي تجي مرتك والوالده للعقد رحنه اني وعمتي ...

يسر .....علي ساعه وتعال النه عندي درس يادوب الحك. ...

جوري ..واني مصدكت اريد بس اطلع اختنكت من كعدت بيت حسبالك سجن ابو غريب وهسا طلعت لو دكتورا لو اهلي كلشي مامفتهمه من حياتي رحنه واشوف عروس حلوه تسريحتها بسيطه وفستانها نازك كعدنه. واجه العريس اباوعلهم حلوين وهو شكد مكيف بيها لبسها الذهب وكعدو بس العروس مدري وين شايفتها مداذكر هنا عمتي كمزت كالت صار وكت درسها اتصلت ع علي...

يسر ...  تعال النه...

جوري ... احنه كمنه ورحنه يم عرسان عمتي باركت لسجاد ونوب لـ سجى بوستها واني ضليت واكفه مستحيه باوعلي سجاد هوو عرفني استحي...

سجاد... شلونج اختي ...

جوري .. بصوت ناصي... هلا خويه شايفين كل الخير...

سجاد....  تسلمين عيني رحمه الله ولديج ...باوعت لسجى ... اعرفج على جوري مرت صديقي علي..

جوري .. باوعتلي وابتسمت رحت ليمها بوستها وتباركتلها وشوي وترخصنه وطلعنه لكينه علي ينتظرنه بلسياره ركبنه ...

علي.....يمه اخذيها اليوم وياج لان محد موجود بلبيت واني راح اطلع صار عندي شغله ...

جوري ....عادي علي اروح اهلي..

علي .... وين اهلج طلعو كربلاء الصبح ...

جوري ....عاد والله رحت ويه عمتي نزلنه اباوعها هاي عبالك مثل المدرسه دخلنه وشافتنه معلمات سلمت عمتي ويباوعلي ويكللها عمتي هاي بنتج وين جنتي ضامتها عنا شكد حلوه....

يسر.... لاعيني هاي مرت ابني وجبتها اليوم وياي مضطره...

.. مديره.. ام علي ليش متسجليها تدوام ...

يسر...فدوه ام حسين هيه دراستها عافتها بعد تجي تدرس هنا

جوري ... حجيت بداخلي يبوه هاي تخزيني اليوم ياريت لو مجايه باوعتلي مديره...

مديرة ...  ليش يحلوه عفتي دراستج حرمات رجعي درسي افضلج ...

جوري ...ابتسمت الها وكتلها ...انشاءلله ...المهم رحت وياها للصف اباوع البنات مقسميهم ع اعمار صغار والكبار وحد. عمتي جرت كرسي وكالت اخذي واكعدي يم صبوره اني هم رحت كعدت ومثل مستمعه بس بنات كلهم متفاجئين وانتبهت ع طالبه تباوعلي وتضحك كلت بداخلي يا هاي شبيها شافت كبالها سينما بعدين عابت اجت طالبه وكالتلها عمتي تريدج المديره فـ راحت عمتي وبقيت اني كاعده ويه طالبات كمت اخذت مساحه امسح بلصبوره واسمع وحده تصيح باسمي التفتت واباوع نفس هاي لبنيه جانت تضحكلي ... نعم شرايده...

... ولج معرفتيني

جوري ... لا ولاصغراً بيج ...

ولج اني هدى صديقتج جنتي بصفي..

جوري... صفنت وتذكرت صحيح جانت عندي صديقتي هدى كتلها... ولج معقوله انتي شكد متغيره اجت ليمي ..

هدى ... مشتاقتلج بذاته وهاي ليش هلكد انتي ضعفانه جوري ام خدود صايرا معصعصه ...

جوري ...جريت نفس وحجيت بكلبي اي من القهر بس اني مبتسمه وكتلها... مو احلى غير المودة صارت ...

هدى... بس صدكين طالعه تخبلين انطيني رقمج حته نضل ع تواصل ...

جوري .. ماعندي موبايل بس عادي انطيج رقم امي نتواصل عليه... وكتبتلها رقم بورقه ....شعجب هنا درسين...

هدى ...  ضروف وع اقرب همين...

جوري .. ها

هدى ..اي ماگلتي المعلمه شتصير منج ..

جوري . غير عمتي و ام زوجي شوفي راح امثل دور عمتي من درسكم.... اخذت المسطره من الطالبه والكتاب هنا عطت بلبنات خطيه جفلن من تصرفي ...بسس سكتن عاد بله لغوه اسمعني دشرح..اخذت دور وصرت امثل واقلد تصرفات عمتي من تشرحلهن والطالبات فطسن ضحك واني هم اضحك وياهن بس صدك تونست و سويت الصف مهرجان اجت عمتي تعاركت وياهن وباوعتلي الي وخنزرت بوجهي وعاطت بيه ...

يسر.... شكو تخليهن يضحكن امشي ولي كعدي...

جوري ...تمشيت مثل طالبه المؤدبه كعدتت بدون كلام واني كوه كاتمه ضحكتي كذلك البنات رجعت درسهن وهنه يباوعلي ويضحكن خرب بيومهن خايفه يفضحني ويكللها تضحك عليج المهم كمل الدرس نوب اجوي طالبات يلتمن ع عمتي يكللها دخلي جوري ويانه بلكروب عمتي تخبلت ...

يسر .... انجبن ولن مني شسون بيها لادفع ولانفع ومتستفادن منها شي...

جوري ...حزت بنفسي وهي تحجي وهنه واكفات ويتوسلن باوعتلهن ... بنات بسس تره اني ماعدي موبايل منين احجي وياجن... نوب كامن يكللي لعد تعاي كل يوم كتلهن انشالله طلعنه وهاي عمتي صايره بارود ودردم عليه تكلي ...

يسر.... شسويتي ورايه وخليتهن بس يضحكن ...

جوري .. الضحك صار جريمه ...عمه ذبيتلهن نكته وضلن يضحكن مثل سفيهات وميصدكن واحد يضحكهن....

يسر... تباوع صفح ...ي والله هم صدكتج...

وصلنه للبيت....

علي ....جوري هم تعرفتي ع سجى ...

جوري...  اي وتباركتلها ليش ...

علي ... لعد هذا سجاد ليش يسالني كايلتله خطيبته عبالك اعرفها من سنين....

جوري ... يا منين تعرفني بس اوكف لحظه..

علي ...  شنو شبيج...

جوري ..  شنو اسم ابوها خاف هم تطلع جانت بصفي من جنت ادرس...

علي .. بنت ميثم..

جوري .. صفنت والله اعرفتها هسه واكول وين شايفتها شنو اليوم عالم استرجاع طفوله و الصديقات شهلصدفه شفت صديقتي هدى واليوم اعرفت صديقتي سجى ياربي شكد مشتاقتلهم نوب من كبرنه تغيرت ملامحنه ومنعرف بعض هواي حنيت لايام دراسه باوعت لعلي وحجيت برجاء ... علي اشتريلي موبايل حته اتواصل وياهن وعد مني ماسوي شي حتلو نزلي بس فايبر فدوه ...

علي .. باوعتلها بطرف عيني...  بس انتي متستاهلين
كلشي ...

جوري .. من كلي هذا كلام نجرحت منه ودنكت راسي ودمعه بعيني ..

علي ...وبعد لي سويتي هم الج عين وتحجين وتكولين اريد موبايل....

جوري ... باوعت عليه واني مدمعه ولامه شفايفي ....حبيبي ليش متسامحني والمسامح كريم...لزمت ايده وعصرتها خفيف واني مستمرة اباوع بعيونه ... وهسه دكلك وعد مني ومراح اخلف بوعدي جربني وشوف ...

علي ... اخذ نفس ....اعذريني ماكدر شي نكسر وبعد ماكدر اصلحه انتهت ثقتي بيج مكافي بلاوي الفاتت ...

جوري ...دنگت راسي خجلانه وحجيت برتباك ...علاوي حقك وشي صعب الي سويته واعرف نفسي اني غلطانه بس والله بعد ماعيدها توبه تعرف بيه شكد احبك...شديت على كلمة احبك ... رغم انته مبتعد عني واحسك حتى تكرهني وكل هذا واني باقيه احبك شوكت تحس بيه وتهتم بيه  ....

علي ...بأسى ... انتي بسببج تخليني انفر منج راجعي نفسج وارح تعرفين سبب ويله طالع ...

جوري ...كام من مكانه دايطلع وكفته لزمت ايده وخليت ايدي ثانيه وره ضهرهه رفعت راسي لان هو طويل وجان ابوسه بشفته خفيف وخدودي اشتعلن نار مغمضه عيوني احضنه وخليت راسي بصدرة اريد اختل بين ضلوعه دموعي گامت تجري بللت قميصه  بشهكه ...الله يخليك سامحني ...

علي ... گلبت عيوني بملل ...بلا دراما وخري عني ولاتقشمريني بهاي سوالفج صدگ لوگالو كيدهن عظيم ...

جوري ... مثل الي واكف بنص نار وشمرو عليه مي كلاماته فززتني وخلتني اصحه عقدت حاجبي وابتعدت عنه وحجيت بحرگة گلب ....علي لهنا وبس ضاهر اني هواي نزلت نفسي ودست ع كرامتي بس علمود ارضيك وسويت وياك المستحيل وكله هذا ماوكف بعينك اعرف بيك انته كارهني وحته مطايقني خليك هيج بس مره حسسني بلاهتمام ماريده منك حب ع اقل حسسني كـ زوجه هو اني شفت منك كلي من زوجتك لليوم بس تتعارك وياي وتضربني تره اني هم هواي اتحملتك.... قاطعني وحجه ....

علي ....بعصبيه ...كله من ايدج انتي تخليني اضربج وانتي تخليني اصيح عليج كم مره كايلج ومن قبل لاتعاندين اسمعي كلام عوفي تصرفاتج المزعطه ولا نوب وكعتي بلخطأ الاكبر خليتني اكثر اتنرفز منج ....

جوري ...  ادري بيك كلشي معاجبك بيه لاتصرفي لاسلوبي ولاكلشي بس تعرف غيرك تعجبه تصرفاتي وغيرك عرف شلون يهتم ويحبني وغيرك يعرف يدللني وخليني عايشه ملكه....

علي ...  صكيت سنوني وضجت حيل من كلامه الاذع ...

جوري ... ادري بي ضاج بس اريد احسسه تعبت منه بس متوقعت راح يمد ايده عبالي يبقه يتفاهم وراح يفهمني ماشوفه اله ضربني راشدي حيل فر وجهي وعاط بيه

علي ...كاااافي ادبسززز ..

جوري ...نوب لزم شعري وعته صار وجها ومقابيل وجهي حرارت انفاسه تضرب وجهي احس فتحت عليه باب جهنم ....

علي...وشياطين ترگص فوك راسي ...  لج جلبه اعرفي احجي عدل لااكصه لسانج هيج تحجين وياي مو تقارنين الكووووا ....وياااي ...

جوري .... لزمني دك بحيث شاغت روحي حتى بلاعيمي تجرحت من صريخ والبجي اخر شي كمت ارجع ليورا اسحل بنفسي اريد بس اتخلص منه كمت وكتله بصياح وعصبيه دموعي تجري وعضامي تون احس راسي يريد ينفجر ..... عووفني ولهنا وينتهي كلشي رايحه اهلي وبعد لاشوفك ولاتشوفني ....

يتبع ..

3500كلمه هم كولو مقصرا 😭😂😂

احبكم هواي بس جثرولي تصويتات ولايكات شني ماستاهل ⁦☹️⁩😂😂

شنو رائيكم بتصرفات جوري

وعلي راح يتغير لو لا 😣