رواية العنب_العنب_العنب الفصل الرابع 4 - بقلم ورود الخالدي

#العنب_العنب_العنب

البارت4

ورود الخالدي

خالد العصر جبت فاطمة وامي واختي زينب من الصالون وطلعت ..بس الحجية صاحتلي لان البنات هواية سادات الطريق..افتريت من باب المطبخ الى ورة البيت:

ها يمه خو ماكو شي؟؟

لا بعد امك بس ردت اكلك البنات راح يباتن كلهن وياي يم بيت ام محمد؟

يمه عيب تباتن كلجن ضلي بس انتي وزينب على الاقل زينب متزوجة وانتي امها!!

يمة والله ام محمد خابرت كالت كلجن تباتن واستحيت اكلها لا..

بكيفج يمه..

امي دخلت خلت باب المطبخ مردود سمعت اختي رقية تحجي ويه بت عمي تكلها:

شبيج نريمان ليش بطلتي ماترحين ويانه امس كلتي اروح اليوم شتبدل؟؟

ماكو شي والله بس ما الي خلك اروح..انتن روحن اني ابقة هنا الم الصالة والمطبخ لتخافين مضايجة اصلا باجر امي تجي من بغداد حيل مشتاقتلها..وفرحانه بجيتها..

بس ردناج تروحين ويانا بالزفة

روحن انتن اني ما اروح..ابقة هنا..

بكيفج خيتي..

بعد ما سمعت حجيهن رحت كعدت بسيارتي افكر..امس سمعتها تسولف ويه الحجية تكلها اروح وياجن هسه بطلت شبيها هاي..طلعت من سيارتي رجعت للمطبخ سويت روحي اخذ ماي من الثلاجة جانت بالمطبخ لابسه دشداشه يعني مامبدلة للزفة مقررة ماتروح..هيه مدنكة تصب شربت بالكلاصات باوعتلها خطية مغثوثة مبينه..اكيد ..انه امس زودتها وياها..اول مرة تكسر خاطري طلعت من المطبخ..ماحاجيتها..بس ضجت على مودها.. شويه واجت الزفة..طلع ابوي زت فاطمة للباب..وراحت الزفة البيت فرغ..محد بيه بس ابوي شفته مدنك..ويمسح عيونه بجماغة ركضتلة:

بويه على بختك ..صدك جذب فطومة راحت لنصيبها افه عليك بويه تبجي تالي شيباتك..

بويه بنيتي هاي..طلعت من بيتي..مو سهلة بناتي كلهن عزيزات

بويه قابل وين راحت كل البنات تعرس..ومصيرالبت للرجل..

اي بويه ادري بس كلبي يوجعني
عليها باجر تعرس وتخلف وتزف بنيتك وتشوف البت شكدعزيزة
يالله بويه كافي انت رجال مريض..موزين تقهربروحك دفوتنه جوه...هسه اليشوفك كاعد بالحوش وتمسح بدموعك شيكول؟؟

طببت ابوي ضلينه نسولف..وبعدين ابوي نام بس اخذ دواه..طلعت من غرفته لكيتها مدنكة تلم..كواغد مال جكليت وتنظف شالها على متونها وشعرها على ظهرها جنه خيوط ذهب..كحيت حتى تحس بيه جاي..اول ما سمعت صوتي خلت شالها على راسها وركضت للمطبخ.كلش ضجت اشوفها مغثوثة وادري انه الغاثها بقيت كاعدبالصالة كلت هسه بس تطلع من المطبخ احاول احجيها..بقيت كاعد نص ساعة ماطلعت..رحت وراها للمطبخ جانت دايره وجهها تغسل كلاصات..كلت:

نريمان
ماجاوبت

مواسمج نريمان لوانه متوهم؟؟

هم ماجاوبت

ضجت اكثر

انه مو احجي..وياج.شني تخورستي؟

افترت وادنت يمي

شتريدخالد؟؟

يعني شريد..قابل افصل على طولج ..جوعان اريد اكل؟؟

جوعان؟؟

اي جوعان شني ماسامعه واحد يجوع؟؟

اي واذا جوعان اني شعليه؟؟

ليش اكو احد غيرج بالبيت يسويلي اكل هسه؟؟

اووف وشتريد اسويلك اكل؟؟اكو كباب اكليلك كباب وطماطة تاكل؟؟

لا ما اريد لا كباب ولاطماطة؟؟

لعد شتريد؟؟

اريد عنب؟؟

تريد عنب؟؟

اي اريد عنب..احمر..اخضر..اصفر؟؟

دارت وجهها ورجعت للكلاصات ترتب بيهن!!

انت ..مو جوعان..انت جاي تصنف عليه

اي اصنف شكو بيها..عندج مانع؟؟

خالد..يعني شنو لزمتها عليه لزمة؟؟كافي عاد

اي لزمتها عليج..ها..نسيت اكو بعد نوع رابع مال عنب..لابس اسود ابو النجوم..وعيونه شهل..يملخن..تملخ؟؟؟

التفتت عليه ضلت تباوع بعيوني ما مصدكة..بت الاوادم موعيون شايلة تكول لايتات استحي اركز بيهن..ابتسمت الها..هي هم تبتسمت ودنكت وطلعت بسرعة من المطبخ..

.صعدت الغرفتي ارتاحيت من شفتها تبسمت وركضت ..يعني..هم لازم ..اكسر واجبر..هي هم
هم..بشر مايصير اطب واطلع بس احجي عليها من جبتها من بغداد لهسه بس صياح ونتر..واخلس بيها..وماسمعتها فد يوم كلمة بيها حظ..

ناريمان::

شكد بجيت البارحة من ورا خالد وحجيه الي مثل السم حتى للعرس مرحت لان العبرة خانكتني وحيل مقهورة...بس من اجه للمطبخ..وحجه ويايه حسيت مجاي يغثني جاي يلطف الجو...خرب حضي عود هم يصجم...حتى التصجيم مالته..تصنيف..

ثاني يوم رجعت..الحجية والبنات..ومر اليوم زهراء اخت خالد الزغير ةكلتلي ؟؟

فداوي..نريمان..انطينه مبايلج نطلع صور ..امس ابيت ام محمد كل البنات عدهن مبايلات شفنه صور تخبل..وحتى اخت محمد علمتني ع المبايل..

انطيتهن الموبايل ودخلت نمت..الصبح كعدنا على صوت الحجية تقريبا ساعة7الصبح..

ولجن لاعجين..عاجنات ولا خابزات  للصبح كاعدات على هذا  الشيسمونه وتتمضحكن..خايب يمه خالد انزل..انزل..اكتلهن موتني...

نزل خالد بسرعه؟؟

يمه شصاير شبيج تجعرين..ابوي ترة ماله خلك؟؟
.يمه موتني خواتك للصبح لازمات هذا المبايل مدري شسمة الجابته بت عمك ..ويضحكن  ويسولفن خايب يمه لاعجين..لاخبز..لاريوك..الدنيا الضهر..صارت
جان خالد يدخل الغرفتهن ويطلع بيده الموبايل مالتي وشمره عليه::

هاج خاتون هذا موبايلج مو حذرتح كبل وكتلج لاتعلمين اخواتي على سوالفج التعبانه لو ما تمشين الا بالاهانه..

ياسوالف تعبانه خالد..شنو هالحجي..هو مجرد موبايل؟؟

اي عندج هذا الحجي ماشي تكضين موبايل
تكنكين الله اليعلم شتسوين بس خواتي ما اريدهن يصيرن مثلج..خواتي عدهن شغل..وبيت وخطاطير رايحه مارادة...انه حذرتج مرة وهاي الثانيه وبالثالثة ماتدرين شيصير..

وعافني واكفه  وطلع..

هم خنكتني العبرة وردت ابجي بس كلت النفسي البجي شيفيدني هو هذا طبع خالد ميتغيير..لسانه متبري منه.ويكرهني..وقررت ما احجي وياه ابد الى

ان تجي امي وتشوفلي حل..بس امي تأخرت ع اساس تجي من البارحة فكلت خلي اخابرها خابرتها كالت:

يوم عكب باجر اجي لان عندي شغل بالكليه مالتج؟؟

يوم شنو من شغل انتي هوايه تأخرتي عليه؟؟

ماما من اجي احجيلج..
زين يوم..وسديت الموبايل اخاف يخلص الرصيد وما اكدر اكول لخالد اشتريلي..

صار العصر الجو صاير كولش بارد..والدنيا مغيمة وكامت تنكط زينب منتظرة زوجها يجي ياخذها مبدلة لجهالها ومحضرة جنطتها..سمعتها تتأفأف:

اووف وين صار سعد هسه الدنيا كامت تنكط وراح يصير الدرب طينه وما تطلع السيارة..

تذكرت شارة ملابسي بره وهسه يتبللن طلعت الم الملابس شفت ولد غريب..دخل من الباب.همزين لابسه شالي شيخلصني من خالد اذا شافني بدون شال برة..الولد دخل للبيت ضل يباوعلي من فوك لجوة ابد مرتاحيت لنظراته جنه..مشايف نسوان كلت الم الملابس وادخل بسرعة بهالاثناء طلعت زينب:

صدك جذب..وين صرت لهسه سعد الدنيا راح تصب مطر..

مني هاي البت العدكم اول مرة اشوفها:
التفتت :
هاي نريمان بت عمي حسين..جانت ابغداد وجبناها تعيش عدنا..

هااا..اكلج..الليلة ضلي يم اهلج من حيث ابوي مااله خلك وراح ابات يمه كلت ليش تضلين وحدج بالحوش ضلي الليلة عند اهلج باجر العصر اجي اخذكم..

هااااصلوات..شعجب تكلي ضلي يم اهلج..بس احسن الدنيا باردة والفريخات.. نايمين بحضن الحجية..

اني دخلت وعفتهم يسولفون...ابد مرتاحيت الرجله احسه مو خوش ادمي..

ثاني يوم العصر جنا بالمطبخ نسولف اني ورقية وزينب..سمعت اجه رجلها وكاعد ينتظرها  بالمضيف تحضر جهالها..اشو ورة عشر دقايق سمعت باب المطبخ الورة تندك كامت زينب فتحتها:

ها..سعد شو جاي للمطبخ:

خايبة الجاي تبدة على دشداشتي تعالي مسحي بوصلة بماي بدهر اسود..

اي هسه اجيب وصلة

دخلت جوه هو ضل يخازر بيه ويبتسم حته من

رقيه ما استحة ما كدرت اكوم جنه تفلس حمص..اني ورقية بس همزين بسرعة اجت زينب بللت القماش وكامت تمسح بالجاي بس هو عينه مانزلها واحد صلف..اني دنكت..بس زينب انتبهت لرجلها..وصاحت بيه:

مو اكول شعجب تكلي ضلي يم اهلج اثاريك حاط عينك ع البت..وعلي اليوم لو كاتل لومكتول..

ولج شبيج زنيبه هسه انه شمسوي:

مسوي حجتك الجاي..وملتهي تتبسم وتباوعلها حسبالك انه هايشه ما افتهم..

زينب ما سكتت كامت تصيح اجه عمي من .طلع سعد بره..همزين خالد مموجود جان الله يعلم شسوه.. وره عشر دقايق من طلعة رجع عمي::

ولج زنوبه اخذي بزرتج..وروحي للسيارة رجلج متانيج:

بويه ما اروح وياه هذا ابو النسوان شفته بعيني.

بويه لا تكبرين السالفة وتسوينه مكصة للوادم ردي ويه رجلج لحوشج هو حاجاني كال مامسوي شي ومو قصدي بس بتك تغار وتسوي الحبايه كبايه

كلي..

بويه انتي روحي لغرفتج

اي عمي رايحة

جنت كولش خايفة من صياح زينب..سديت الباب عليه وره شويه زينب دفعت الباب  وجنطتها بيدها وشايلة ابنها:

ولج..انتي مو شريفه..لو شريفة ماجان رجلي يباوع عليج جابوج من بغداد حته ماتهجمين بيت ابن خالتج..اجيتي هنا تريدن تهجمين بيتي..بس الله فضحج

كالت هذا الحجي وخلت ومشت اني شبعت بجي وكلت باجر تجي امي وارجع وياها البغداد لو اعرف ابات بالشارع..

خالد::

جنت بالقلعة يم ولد صديقي..ورجعت للبيت  وكت العشه ابوي وده عليه رقيه رحت يمه..كعد يسولفلي شصار ويه سعد وزينب ونريمان روحي شاطت كتله:

والله اليوم سعد موته على ايدي؟؟

بويه احنا ليش نكض السالفة من ذيلها سعد يكول ما مسوي شي يحلف ويتكفر والبت جانت بالمطبخ قابل واكفه وياه بويه شلنا بالطلايب والفضايح بت عمك ضلتها بنص الحوش ماترهم..

والحل شني بويه

بويه..هذا المشتمل الكاعد بيه الحارس..بيه غرفة

وصاله وتخاريج..بس نصبغة ونخليلهن بي غراض ونديرهن هيه وامها بيه؟؟

بويه بس امها دوم ابغداد تجي يومين بالاسبوع قابل تضل وحدها بالمشتمل؟؟

اي بويه شعليها..هو المشتمل بداخل سياج بيتنا..يعني محد يوصللها..واذا ع الاكل والشرب امك توديله ونخلص من الطلايب كلها

فكرت كلت احسن..خليها تكعد وحدها حتى اخواتي هم ما يختلطن بيها هواي ويتعلمن ع الموبايل وغير شغلات وهي هم تاخذ راحتها تلبس هدومها بكيفها تنزع حجابها شعلينا بيها اني هم احس روحي متقيد وكلما اطب لو ادك الباب لو اصيح يالله ..يالله.. باجر اصبغ المشتمل واشتري جم شغلة اخليها بي واديرهن..وارتاح فرد نوب

انتظروا بارت5♡♡♡♡