رواية العنب_العنب_العنب الفصل الثالث 3 - بقلم ورود الخالدي

#العنب_العنب_العنب

البارت3

ورود الخالدي

ناريمان واجه اسبوع العرس مال فاطمة خطية هي كولش حبابه..وفطيرة تكولي:

فداوي نريمان عندي نواقص اريد اشتريهن من الولاية..روحي ويانة اني وامي راح نروح؟؟

اي اروح وياج شكو بيها بس شوفي خالد خاف ميقبل!!

خيه ماعليج  بخالد الحجية تحجي وياه مايكول شي..

عادي اروح ليش لا؟؟

خايبة رحتلج فدوة اريدج تشتريلي على ذوقج من ذني هدوم النوم..تره انه كديشه كلشي ما اعرف؟؟

ههههه كديشه..شنو؟؟
شمدريني امي  تكلي كديشة يعني ماعرف شي..

هااا فهمت..هههههه والله تضحك سوالف الحجية

وفعلا رحنا اني وفاطمة والحجية للولاية اخذنا خالد بسيارته وطول الطريق يخازر بيه :

عدلي حجابج اذا طلعت شعره اصفكج طراك افر اذانج؟؟

اي..اي..
نزلنا اشترينة ملابس..ومكياج..وشبشب حمام وشغلات و نواقص عرس..والحجية طلعت من جزدانها فلوس تكلي :

يمه..نرمان..والله اسمج صعب..

سميني..اي اسم حجية
مريم..راح اسميج ما اعرف اكول اسمج

بكيفج حجية
يمة مريم هاج اشتريلج دشداشه حلوة باجر حنه فطومة..

لا حجية ما اريد شي عندي  فستان حلو باجر البسه جبته ويه ملابسنا

مايخالف بتي اخذيلج دشداشة دشداشتين تبدلين بيهن صارلج اسبوع بهدوم..فاطمة تلبسين..خاف ما يعجبنج

لا حجية شكرا ما اريد شي..الله يطول عمرج..ويخليج..

طلعنا من المحلات..وصلنا للسيارة..قبل منصعد الحجية كلت..لخالد

اووف شلعت كلبي بت عمك اكلها خايبة اخذيلج دشداشة اثنين ثلاثة مارضت حسبالك غريبة عليها انه..

هههههه يمه انتظرن بالسيارة انتي وفاطمة هسه نجي..

وصاح بيه..تعاي امشي وياي..

اي

مشيت بصفه..

باوعلي اوف عيونه مثل عيون الصكر.:

شبيج تتلفتين عيونج كدام..

اي..بعد ما التفت...صار..
وصلنا للمحل كلي:

يالله اخذي هدوم..

بس اني ما..اريد..امي تجيبلي من

بغداد!!

فوك ما فشلتي الحجية وماخلتيها تشتريلج..لسانج شطوله..اشتري..بسرعة تره مالي خلكج..ولا تعطليني عندي روحة للقلعة..وروحي طافرة..

اي هسه اشتري؟؟

اخذت دشداشه جويتي ودشداشه ماروني
ومشيت كدامه عبالك اسيرة..شكد مكروه شكد شايف نفسه حجية كله نتر..وتزمخ..

صعدنا بالسيارة حركت السيارة الحجية تفرجت ع الدشاديش:

خوش والله خالد بساع قنعج..واشترالج..جا شبيه انه ما قبلتي اشتريلج؟؟

العفو حجية مبيج شي والله

وسمعته يضحك

ههههه تركيها حجية..لا تنتفخ علينا..لا تكبربن راسها!!

الحجية الطريق كولة تسولف ويه فاطمة اني مدنكة خاف خالد يخزرني لو يذبلة حجاية ..رفعت راسي..صارن عيوني بعيونه استحيت ودنكت..مرة ثانية..

فاطمة كالت:

خويه خالد..انت وين راح تروح؟؟

عندي روحة للقلعة ليش فاطمة تردين شي؟؟

لاخوية ..بس حسبالي ماعندك طلعة؟؟

عادي ما اروح كولي تردين شي؟؟

خويه من رخصتك عود ردتك تاخذني للصالون...استحي اكل لام محمد عمتي تأجرلنا سيارة؟؟

اي..اخذج..بعد اخوج..بس ياهي تروح وياج؟؟

امي..ونريمان؟؟

اخذج.بس انتي وامي هاي المن ماخذاتها وياجن؟؟

حصرتني الدمعه هذا شعنده ويايه ليش هالكد يكرهني شمسويتلة فكلت:

ومنو كال اني اريد اروح اني راح ابقة وي البنات نرتب شغلات الحنه..

باوعلي من المرايه مبتسم بخباثة:
.خفة وراحة؟؟
نزلنا للبيت..وره ساعتين خالد اخذهن للصالون..واني والبنات رتبنا الصالة صالتهم جبيرة وبيتهم دبل فاليوم..يعني الغرف الفوك كولة اطل ع الصالة..حضرنا العصاير والجوكليت وجابو كيكة جبيرة جاهزة بس اني كلت للبنات اسوي كيك يخبل سويت 3كيكات..وخلينه.ديجي بيه مكبر صوت وهنه عدهن رام بيه اغاني هم خلنه..جهزنا كولشي دخلنا نبدل..عندي فستان اسود وبيه نجوم كريستال كولش حلو..مرتب طويل وبيه جاك واصل

للركبة..والصدر مالته كوله نجوم وفتحت شعري خليت مكياج خفيف وبدن البنات يجن صديقات فاطمة وبنات خالاته..واختها..الجبيرة جابها زوجها..بس مدخل للبيت من بره وراح..وبعدين..جتي فاطمة والحجية من الصالون وشفت خالد يصعد لغرفته سمعت الحجية تكوله:

يمة نام بالمضيف..الحنه بالصاله لا تصعد كدام النسوان:
يمه رحمه لبوج..اريد انام ما اكعد الا نص الليل والمضيف اطك بالشبابيج الشمس وتطير نومه عيني..شلي غرض بيجن سون حنه..جني ما موجود

خوش اصعد نام بس لاتطلع بعد ومو تكول المسجل عالي وتسويلنه صيه!.

لا تخافين بعد ما..اطلع منالباجر الصبح

اني جنت خاتلة وره باب المطبخ اخاف يشوفني بالفستان وملابسه حجاب ويضل يعيط علية ويفشلني..خليته صعد وسد باب غرفته وطلعت..

واهل العريس جوي اخواته وامه وبنات عماته وبنات خالاته ونسوان اخوته وكامن يذبن كولات ويركصن وشغلن رعد الناصري صوت السماعات عالي..وبنات عمي ع اساس يركصن يفرحن اختهن خطية ميعرفن بس ادبج..فاطمة شاورتني:

تعرفين تركصين نريمان:

اي اعرف بس مو على هاي الاغاني

ياا غيرهذا رعد الناصري عليمن تركصين جا..

كتلها اصبري..طلعت رام من جهازي بيه اغاني مصرية حلوة..وشكلته بالمكبر..طلعت اغنية سعد الصغير

العنب..العنب..العنب..احمر..واخضر..واصفر..فكهاني وبحب الفاكهه.واااو..واااو
شديت شال وكمت اركص اني احب الركص المصري وركصي كولش حلوو

خالد::

جنت نايم بغرفتي ومخلي الموبايل ع المخدة هزاز دوخني..بس يون ردت ارد ع المكالمة لكيته صاحبي البلقلعة ردت اتعذر منه واكلة صار عندي شغل وما اجيتك..بس فتحت خط طفه الجهاز..اهووخلص شحن هسه يزعل يكول فقله بوجهي..دورت ع الشاحنه..شو ماكو اني معلكها بالبكرة مالكيت لا البكرة ولا الشاحنه..اخ..هاي شلون ورطه....اسمع صوت اغاني عاليه من الشباج..
فتحت البردة شويه بلكي وحدة من اخواتي واكفة بالممر الفوك واكلها جيبلي الشاحنه..اخ.. لو ادري ما فاتح البرده..بووويه شني هاي..الطركاعة السوده ..بووويه مو بت هاي..شفتها لابسه ثوب..اسود لازك عليها والصدر نصه طالع..ابيض يشع من بعيد..والثوب بيه فتحة من الصفحة وشادة وصله وتهز وهذا ..يغني..مصري العنب ..العنب..العنب..احمر..واصفر وهاي تهز هز فلك...فلك..شكد شفت يركصن بس مثلها ماشفت..تهز ورك..ومتون والصدر يهز البطن تهز الورك يهز فلك طرها ودهر صابها وصاب الخلفوها!!شني هذا..الجسم شني هذا الجمال..والنوب الحركات والركص يكعدن الموته من الكبور..عوينة ابو اصلي..ضليت فاهي صافن اباوع من البردة ادري عيب ومايصير اباوع ع البنات بس ما اكدر اشيل عيوني خذت روحي هالكلبة بت الكلب..خلصت الاغنيه سديت البردة بساع..كعد على جربايتي هاي وين رابيه..وشلون هيج تركص وين تعلمت..اول مره جنت مشدوه بيها ومتعجب..بعدين فكرت غير تفكير..هاي البت مو سهلة مو شغله بت بغداد وهاي هيه لا السالفة اكبر مبينه شايفة اشكال والوان خفت على اخواتي  منها خواتي فقيرات وما طالعات وهاي تربيتها زبالة واخاف تعلمهن هاي سوالف الركص والاستهتار..
ما طلعت من الغرفة لثاني يوم..كعدت الصبح..مالازم اسكت لازم اسوي شي

ناريمان ::

كعدت الصبح..سمعت دكات على باب غرفتي استغربت لبست شال..فتحت..الباب  فزيت شفته كبالي؟؟

خالد؟؟..فززتني؟؟

اخ يمه....خرعتج خاتون

اي فزيت..متوقعتك انت..خير خالد خو ماكو شي؟؟؟

لا مو خير ابد؟؟

ياستار شصار؟؟

شوفي خاتون..هاي الحركات مال الاستهتار..بطليها وما اريد اخواتي بتأثرن بيج ويتعلمن منج..اخواتي فطيرات وما طالعات..ومايعرفن شي..مو مثلج مكسرة كحوف الدنيا على راسج!!!

شنو..هالحجي خالد شنو حركات شنو استهتار..شنو كحوف الدنيا؟

ليش اني شمسويه بالضبط....

شمسوية مو؟؟
وكام يهز بمتونه مثل اليركص وكال:
شمسويه جا والبارحة الفلك الذبيتيه والعنب..العنب...العنب

وتذكرت حنه فاطمة فهمت قصده وكلت:

هااااه..وانت شمدريك..وين شفتني اوين سمعتني؟؟

ماعليج وين شفتج اوين سمعتج انه حذرتج..هاي السوالف ماتصير عدنا واذا شفت اي وحدة من خواتي تقلدج ماتلومين الاروحج..وحك..ربج اراويج الوجه الثاني مال خالد

ورأسا جرن دموعي على خدودي ::

ليش عندك بعد وجه اسوء من هذا الوجه؟؟

انتي اشايفه من خالد وحك لا اله الا الله اخليج تمشين وتسولفين ويه روحج هاا وصلتج الفكرة؟؟افتهمتي؟؟

اي هزيت راسي وكعن دموعي بالكاع:

اي فهمت!!

اهووووه كامت تتبجبج..شوفي مو حسبالج انه ابن ريف..ومدمغ وكلشي ماشايف..تره سوالف البواجي..والتنغوص..ماتعبر عليه ترة بهاي السوالف بايع فرارات وخبز يابس..يعني مفتش باللبن..صار معلوم؟؟

انتظروا بارت4