رواية الامارة الفصل العشرون 20 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

هَسة سولفيلي على لوَن عيونچ
بَعده يخجَل مِن يُمر بيهَن
ربيع !
بَعده اليباوِع على عيونچ
يَضيع ؟ 💙

━━━━━━ ♛ ━━━━━━

"حبيبــة"
گعدت على الدرج رجلي ما تحملني ويه صياح مرة ابوي على الامير تمنعه ما راضية على تصرفه بس ماكو مبين راكب راسه واستمر بالصياح..

-الامـير علي: لووو امييي هم افتشهاا واعررررف ياهييي تريدددد تسووودن مرررريتييي!!! جيبننن الجنططط ونفضن عبيچن اليوووم لووو انا لووو العاار المسووي روحه فحلل وجاي يتلااعب ويااي!!

افتر بالصالة وشاف جنطتين على التخم محطوطات شالهن ومرة عمي صمد عاطت محترگ دمها..

-رجعع جنطتيي

-الامـير علي: حبيببة نزليي لمي الجنط بسااع

بقيت متصنمة بمكاني ماعرف شسوي، صاح بيه مرة ثانية بصوت اقوى ياله نزلت اخذت جنطهن مفتشلة وغاطة بهدومي بينما هو بقى يراقب حركتهن من بعيد..

على صوت الصياح نزلن خالة تَـمني وتالة من فوگ يدورن بالوجوه على تَـمني..

-حنين: شديصيرر تَـمني وينهاا؟؟

محد جاوب ومن ما لگنها بيناتنا رجعن صعدن هي وتالة فوگ ثنينهن يدورنها بغرفتها، ضحكت عمة ابتسام بصوت عالي من شافتهن راحن وحچت بحرگة..

-ابتسام: ياا عيبة العيببة يا خووي ننهان ببيتك من وره فررخه

-شيخ علي بهدوء: مسحيها بوجهي بعد اخوچ امير مختاض على مريته وضعها ما يبشر بخير

-فراقد: شنيي اول واحد يتزووج اول واحد يعشگ وهيج خبص الدنياا!!

-شيخ علي: مسحيها بهاللحية ام فرقد، امير بوية تعال اريدك

-الامـير علي: بوية اعذرني هالمرة اكسر چلمتك اليوم لو اناا لو ابن الحرام الجاي يأذينا

-ابتسام: شگد خززي بيت شيوخ ويصير بي كل هالاتهامات چا شخلينا للناس المخربطة!!

-الامـير علي: چا مو خززي من جبنا بت من غيير محافظة وطبت چنه لبيت الشووخ وتنهاان وينلعب بعقلهاا

-زهرة: واحنه شعلينا؟ وصلت بيك تشك بأهلك يا روح عمتك ليش اموري ليش تذلنا مو احنه دايسين بيتك ونحب مريتك ليش تسوي بيناتنا حساسية

-الامـير علي: محشومة من الذلة عمة بس الجاي يصير بـ تَـمني يخليني اشكن حتى بروحي الله لا يضوگم الناار المشعولة بصدري

-غزوة: خلن الزلمة يفتش براحته شنيي راح ينقص من عدچن شي؟؟ لو بناتچن يلعبون بعقلهن هم تسكتنن؟؟ احچنننن

سكتن كلهن وابوي چلمة ما حچى باقي واگف ويتفرج من بعيد على سير الامور بس شكله كللش منزعج وما عاجبه الوضع، تقدمت عمة غزوة على الامير وشالت جنطتها وحطتها بحضنه وگالت بثقة..

-فتش يمة فتش خلي يرتاح افادك حگك وانا وياك شتسوي وشيصدر منك وياك وما ازعل عليك

هز راسه ساكت واخذ جنطتها وكل الجنط البيدي شايلتهن، صاحلي انا افتشهن ما رضى لا امي ولا امه تفتش وهو بقى واگف منطيني ظهره يراقب تحركاتهن چنه خايف لا وحدة بيهن تصدر منها حركة غريبة..

گعدت على القنفة افتش بالجنط وروحي رايحة اول مرة بحياتي هيچ استحي وجهي انطعن وبوخت گوة افتش ايدي ترعش ما ثبتت..

ذبيت جنطة عمة غزوة مابيها شي غير علچ ماي وفلوس وكلينس، اخذت جنطة عمة زهرة وهم فارغة بس كلينس حتى فلوس مابيها وباقي الجنط ظليت افتش بيهن الى ان وصلت لجنطة فراقد فتحتها وشفت شريط حبوب منع حمل بيها بلعت ريگي افكر شتسوي بي فراقد وزلمتها ميت؟

-فراقد: شريته لبنيتي

رفعت عيوني عليها انتبهتلها مركزة وياي، استحيت ورجعته بالجنطة اكمل افتح باقي السحابات مابيهن شي.. سديت الجنط وگمت على حيلي وگلت..

-مابيهن شي الجنط

-الامـير علي: نفضن العباه

-شيخ علي: اميييير!!!

-الامـير علي: بووية انااا هسة عقلل ما ظال براسيي تريد تحاسبني؟؟ بعدين حاسبني واشبع بس مال بعد اغلس على السالفة لاااا اسمحلي صار شگدد ساكت ومتحمل بعدد وصلت حدهاا وياي

ويه جملته دخل علي الحـق سلم وسأل شديصير انتبهت لامي تهمسله تسولفله وتضرب على خدها خفيف مفتشلة.. هز راسه بدون تعليق وتقدم يگعد وبس اشر بيده لـ عبق بطريقة "اريد ماي"..

هزت راسها عبق وراحت للمطبخ تجيبله والامير استمر بحملة التفتيش بس عبث كلشيي ما لگينه نفضن عبيهن نفض وفراقد حتى شيلتها فتحتها وشگت زيجها گدامه متعصبة ونزعت جواريبها خاف يشك بيها ضامتهن هنا ما اهتم امير لعصبيتها وگال وحاجبه مرفوع..

-اليوم ما گدرت اعرف منو وره هالسالفة بس وعلي والسماني عليي لو شفت تَـمني بعد دااايخة لو صاحت رااسي مصدع هالبيت احرررگه اسوي ويه الگاع اگلبه رماد!!

سكت الكل محد علق بشي وفراقد وعماتي رادن يطلعن من البيت زعلانات وابوي وگفهن واخذهن لغرفته يحاچيهن، امي رسمية بقت خازرة الامير ما راضية على تصرفه بادلها نظرة حزينة وصعد فوگ وصاحلي وياه..

-حبيبة: ها امير

-تعاي اريدج حبيبة وصيحيلي عبق

-صار

رحت للمطبخ عبق رجعتله وره ما جابت لـ حق ماي اعرفها ما تحب تدخل بشي ودائماً تعتكف وحدها ولا تنطي رأيها الا من اسئلها، صحتلها من المطبخ الحار شفتها گاعدة بالگاع صافنة..

-عبيقة يريدنا امير

-تعالي حبيبة اريد اگولچ شي

-شنو شبيچ

طبيت للمطبخ الحار وجرتني للنهاية، حطتنا بوجهها تضم جسمها بيه وهمست بخفوت وهي تطلع كلينسه من صدرها وتفتحها..

-باعي اني ماحب أتدخل والله ولا احط روحي بيناتكم بس من امير گال تَـمني دايخة اني اجه ببالي ليش ما ادور بالحاوية يمكن اللگه شي وصدگ لگيت هاي

مدتلي الكلينسة وطلعت منها شريط فارغ مال حبوب مگصوص على حجم حبة وحدة وفارغ حتى الاسم ما يبين مشلوع..

-عبق: لگيتها بالبداية يعني مال شخص هستوه ذابها

-حبيبة: صخاام!

-استغفر الله استغفر الله اني شكيت بفراقد بالبداية بس بعدين گلت فراقد اصلاً ما گامت من الصالة ولا طلعت منها واذا چانت هاي الحبة هي السوت بـ تَـمني هيج فـ معناها الموضوع مرتبط بوحدة من عماتج او مرة عمچ صمد لان هنه اجن للمطبخ يگلمن البانية ويانه

-بس هاي حبة على صحيتها مستحيل تكون تَـمني بالعتها وما حاسة!

-عبق: يجوز طحنوها مندري احنه بالنا مچان وياهن ممركزات

-عبق كارثة هااي لو صدگ

-اي والله بس تره كل عماتج يحبن تَـمني حتى مرة عمو صمد لطيفة ماعدها اذية على احد

-هسة تعاي نروح للامير ونفهمه السالفة

-امانة لا تگليله اني فتشت الحاوية خلي الموضوع كأنما انتِ اكتشفتي

-ليش ولج

-ماريد حبيبة حبابة انتِ گليله

هزيت راسي وصعدنا انا وياهة فوگ، دگينا باب غرفتهم وسمحلنا ندخل الغرفة مظلمة وضوه اصفر خفيف معلوگ.. تَـمني متمددة بس چنها مو نايمة نوم عميق وامير گاعد بصفها على الچرباية..

-الامـير علي: تعالن بنات

طبينا جوه وقبل لا اخلي يسولف طلعتله الشريط الصغير وشرحتله شنو صار بالضبط بس ما جبت طاري عبق ظل يلح وياي شلون عرفت وليش اجه ببالي ادور بالحاوية وعينه على عبق الصارت تفرك بيدها..

-الامـير علي: عبق انتِ لگيتي؟

-عبق: صدگني ظل بالي على تَـمني مقصدت اتدخل اني

-چا ليش ردتي حبيبة تسولف بدالچ؟ لا تستحين وتعلمي شنو عندج تعاي احچيلي

هزت راسها ساكتة وهو ضم الشريط بجيبه واللتفت على صوت تَـمني تون وفجأة حطت ايدها على بطنها وبچت، انتفض امير بطريقة غريبة ووخر ايدها من بطنها يحطها بين ايده چنه قرا افكارها لو عرف ليش هيج سوت..

-تَـمني ببكاء: ابني

گالتها وبچت تعصر بعيونها بدون دموع، توترت من تصرفها ودرت عيني على عبق الي ابتسمت، طبطب امير على ايدها وهمس..

-تَـمني نامي بوية

-ابني مات

تهذي وتمط بكلمتها مال وحدة خدرانة، مسح اموري على وجهها وشعرها ونزل يهمس بصوت ناصي كلش يم اذنها ما سمعنا شگال بس سمعناها من جاوبته وگالت..

-تَـمني: بچيت.. بچيت من مات.. بچيت بس ما گلتلكم

مسح على وجهها مرة ثانية وهمس بخفوت..

-الله يعوض ابوي انتِ كافي لا تزعلين روحچ

-اميير

-يراحته

-لا تعوفني ابد

-ما اعوفج امنية نامي وارتاحي انا بـ سدچ وبظهرچ لا تخافين من بشر ما دامني يمچ

جرت ايدها تحطها جوه حنچها ورخت عصرة عيونها، اللتفت الامير علينا مبين عليه التعب تنهد وحرك راسه نافي الوضع الي همه بي..

-الامـير علي: بنات اريد عينچن تبقى مفتحة وما تغفلن عنها دقيقة ادري راح ازحمچن واضوجچن وراح تگولن شني جاهلة هي ونظل وراهة بس بعد جاي تشوفن بعيونچن شجاي يصير بحالها من وره چم حاقد

-حبيبة: صدگ چذب يمعود لا تحچي هالحچي بعيوننا نخليها لا تخاف

-عبق: هي صديقتنا ونخاف عليها الديصير وياهة مو طبيعي ويمكن مو بس يخدرها يجوز يأثر على صحتها المستقبلية

رفع عيونه على عبق وچن نبهته على شي غافل عنه، همس سرحان همس شفايف "يأثر على صحتها المستقبلية؟" وبقى على الصامت..

-حبيبة: يجوز امير كلام عبق صحيح يعني شنو يستفادن من يخدرنها وشنو الغاية وهي محاوطة بيناتنا

-الامـير علي: شون فاتتني هاي

-عبق: زين ليش منبلغها هي متاكل من احد غيرنا حتى تحتاط مو احسن؟

-الامـير علي: لاا لا لا لاا لااا ابد لحد يگللها شي لاا

-حبيبة: بس ليش؟؟

-الامـير علي: لان ما راح ترضى تبقى هنا بعد وراح تخاف انا اعرفها شون تفكر راح تگلي رجعني لبغداد وبغداد مو امان الها صارتلها مصايب هناك.. خليها على جهلها بالسالفة هنا گدام عيني واشوفها كل يوم وبنفسي اتأكد هي بخير خاطر ارتاح وهي ترتاح

-حبيبة: خوب انتَ استقر وياهة ببغداد چم يوم

-خلصت الچم يوم وبعدين؟

-لا اقصد ابقى هناك فد فترة

-والديوان؟ والگعدات؟ والشغل؟ وابوي ياهو يشيل عنه ويتلگه خطاره؟

-صحيح

سكتنا كلنا صافنين عليها، ترخصت عبق تطلع وانا بقيت يمهم شوية ردت اسأله شنو اجاوب عبق اذا سألتني تَـمني شقصدت من حچت بـ حملها بس ما لحگت لان متت ضحك من فجأة گعدت تَـمني على حيلها وفتحت عيونها تفركهن..

-الامـير علي: صح النوم

-تَـمني: وخر عني مزاعلتك

-ها خير ان شاء الله

-تَـمني: هاي شنو

-شنو؟

-هاي هاي

بعده لسانها ثگيل وتحجي بصعوبة مبين بعده التأثير بيها، اشرت على ياخة دشداشة امير وعلى الدگم بالتحديد، نزل عيونه يشوفهن وجاوبها..

-دگم ذني

-يلعبن نفس

-خوشن

-يشبهن عيونك الچقل

-الامـير علي: رحم الله والديج

-حبيبة: هههههههههههه

-تَـمني: انتِ منو شكو جاية لبيتي؟؟

-حبيبة: انا حبيبة ولج

-تَـمني: وشسويلج؟؟

خطية تقهر بس ما تحملت ما اضحك والامير گوة كاض ضحكته ويعاينلها، رجعت تحط راسها على المخدة وفركت وجهها بالفراش وونت لازمة راسها..

-الامـير علي: راسچ يوجعچ نوومه

-تَـمني: اييي كله من وراك

-الامـير علي: عاد انتِ لو عطستي هم تگولين كله من وراك

طلعت رجليها من اللحاف وفتحتهن تشمرهن كل وحدة من جهة ونامت على بطنها وفتحت ايديها، وهالمرة امير ما گدر يسكت وغيرت كل مزاجه وخلته يضحك من كالت بصوت نعسان..

-حتى متنام يمي وتترعن

بدت الامور تخرج عن السيطرة وفلتت من الغرفة اعوفهم، نزلت جوه شفت عماتي بعدهن ويه ابوي بالغرفة بس مرة عمي صمد جاي تطلع من الحمام..

-وسفه الصار حبيبة ما ظنيت بيوم ننذل ببيتكم

-حبيبة: عمة عذرينا بس وضع تَـمني ما يفرح البت عقلها رايح تنگلب چن طفلة صغيرة

-هي من اول تتنعوص كلشي مابيها

-لا عمة لا انتِ تحچين هيچ عبن ما شايفتها عيونها ما تثبت وتظل تتگلب وتكض راسها يوجعها وتهذي بحچي ما مفهوم

-يا يممة صدگ؟؟

-اي وانا شايفتها بعيني چم مرة صارت بيها

-يا ستار خاف سحر حبيبة؟

نفيت براسي ساكتة وشتتني دخول علي الدر سلم علينا وفات لغرفته، انتظرته يبدل ويرتاح شوي ورحت وراه دگيت الباب وسمحلي اطب..

-حبيبة: الله يساعدك، عندك وقت نحجي شوي حبيبي؟

-علي الدر: حتى لو ماعندي افرغلچ تعاي بنياتي

ابتسمت وطبيت ابرار متمددة ومغطية عيونها بمعصم ايدها ودر گاعد يمها الظاهر چان يسأل عن حالها، ترددت افوت واقاطعهم وهمستله من بعيد همس شفايف..

-الموضوع يخص عبق

هز راسه بسكوت وگام حتى يطلع ويايه من الغرفة لان لو حچيت بـ عبق گدام ابرار هسة تنجلط من الغيرة وهو يعرفها فـ ما يحچي گدامها.. چان حاچيته بوقت مختلف واصلاً مو وكتها هسة بس در صعب يتحصل واظن باجر يلتحق بعد وين اللگاه..

بعده ما عابر جهة ابرار وفزت تباوعله تتبعه بعيونها وهو يبتعد عنها، دارت عينها عليّ ونترت بحرگة..

-شنو السالفة حبيبة؟؟

-حبيبة: سالفة تخصني بس احاچي اخوي شوي وارجعه الج لا تخافين ههههه

-ابرار: السالفة التخصچ عبق مو؟؟؟

-علي الدر: ابرار!!!

-ابرار: شبيك ابوي انتَ لا تعصب انا بس اگول ليش ما تسولفون گدامي وانا ادري راح تحچون بـ عبق حبيبة بداعتي سولفي هنا ولا ترحون

-حبيبة: صار من عيوني.. علي الدر عبيقة هواي جاي تعاني بالمدرسة وچم مرة طلبوا ولي امرها مرة راحت للمدرسة متأخرة والمديرة سوتلها ذيج السالفة ومرة نامت بدرس العربي والمدرسة استلمتها والبنات يضحكن عليها

-علي الدر: هاي لان ما يشوفون وراهة احد ولنها ولية

-ابرار: شني قابل بس عبق اهلها ماكو تلگين نص البنات اهلهن ما مگلبيهن وما يهتمون ولا يوصلون خليها هي تقوي روحها ولا تعتمد على احد بهالدنيا محد تره يفيدها وعلي

باوعلها در صفح ما عاجبه كلامها چنه بسمار اله وتعجبت شلون ما ضاجت من موضوع عبق احس بيناتهم شي وهي ضايجة منه..

-حبيبة: اي انا هم گلتلها بس هالمرة ما هان عليّ زعلها مكسورة ومقهورة عبنها تفشلت بالدرس، تگدر تروح تشوف شني السالفة وتتفاهم ويه المديرة وتشرحلها وضع عبق؟

-علي الدر: صار خوية باجر اروحن ان شاء الله

-ابرار: اي خوية روح رووح معروفين انتم جسر للطيبين

-علي الدر: ابرار وصلت ويااي لهنااا (ويأشر على خشمه) لو ما سكتيي بعلي هسة ا...

-لو ما سكتت على شنووو علي الدر؟؟؟ على شنووو؟؟؟ لا تخلينيي احچي واطلععع المضمووم رووح ويه اختك عااد هاي تستااهل مو الساقاطاات الاستغلالياات

-لاااا تظلين تلغيين ابررار انتِ يمته تتوبين يمته مو والله بززعت روحي منج

-اييي طبعاً تبزع رووحك ليش انا شنيي؟؟ قابل انا عندي شهاادة لو مثقفة واعرف اسولف واعجبك؟؟ اناا شنووو بالضبطط كلي خلگ وحددة مگطووعة من شجرة لا اهل ولا سند وباقية يمك خداامة جوه رجليك ورجلين اهللك طبعااً تكررهني وما تريدني انتَ تررريد من مستوااك وانا مو من مستوااك

خفت تگب اكثر بيناتهم وجريت در من ايده اطلعه من الغرفة ما رضى ورجع يريد يجاوبها بكلام اكيد راح تنجرح منه مهما چان تافه ظليت اتوسل بي لحدما طلعته من الغرفة بملابسه مال الطلعة ما مبدل بعده..

رجعت لـ ابرار للغرفة لگيتها اموته روحها من البچي، ركضت اگعد بصفها ما رضت حتى اهديها لزمت وجهها ملخته تملخ تضرب على صدرها ووجهها منهارة وتصيح..

-شسوووي ويحبني شسووووي

-يحبچ هو ابرار وحق الله يحبچ ليش عبالج علي الدر ما يحبج لشوكت تقتنعين هو طبعه بارد وهادئ حتى ويانه

-لاا لاا انا اشوفه شون يعاملج ولج اشوفه شون يعامل نسوان اخوته بكل نعومة واهتمام چا شمااله حظيي الخايس شمااله

-كاافي زلغتي روحچ تزلغ انتِ بس بطلي تستنقصين من روحچ حياتچ تتغير لا تظلين تگليله انتَ احسن مني وانا منو واعجبك حتى لو ما منتبه على سلبياتچ راح تخلي ينتبه ويشوفچ بـ تك عين

-حبيبة والله مليت تعبت طگت روحي صار عمرر عايشة وياه عمرر وما حبني ما يريدني اتوسل بي تواسيل خاطر يجيني ما يريدددني

-عبنچ مرخصة نفسچ خلي على هواه عجبه هلا ما عجبه خلي على راحته وانتِ ظلي اهتمي بنفسج ولا تحسسي انچ مكسورة ومقهورة

-بس انا صدگ مكسورة حبيبة وكسري يوم عن يوم يكبر.. كل يوم اگولن خلص ابرار خلي براحته لا تچلبين بي وتتسوندين عليه عندج حيدر كافي بس ماكدر والعباس ابو راس الحار ماگدر انا احبه واعششگ التراب اليمشي عليها اريد ارضي بأي شي اريد اشبع عيونه بيه

نزلت عيوني مادري شسولف صار سنين على هالرنة احنه ابرار لو شگدما تكبر تحس بنقص وياه وتشوفه احسن منها وتحجي على روحها گدامه وعلي الدر يكره هالصفة لدرجة ملت روحه وبزع شگد امي حاچته وگلتله هالشي مو بيدها وانتَ احتويها وحسسها بقيمتها بس ما جاي ترهم علاقتهم..

-والله العظيم يا حبيبة مو عيني ضيگة ولا اقصد حسد والفف ما شاء الله عليهم وقل اعوذ برب الفلق بس ذولة بدر وشمس غرفتهم لززگ ويه غرفتنا ولج للصبح ما ينامون للصبح همه على سوالف وضحكة شمس تررن رررن لا يهتم عنده دوام ولا شي كل يوم للثلاثة الفجر همه سهرانين سوه وما يخلون شي بنفسهم چا شماله العندي!!

-ابرار بدون حساسية ويشهد الله ما اقصد شي بس انتِ شايفة شمس؟ شايفة دلعها ومياعتها على بدو تفرر راسه فررر بالعباس چن شيشة عطر ونايمة بصفه المكياج والترتيب والنزاكة انا اوقات امي رسمية تگلي طبيلها للغرفة گعديها من النوم لان شوي شمس نومتها ثگيله اطبن للغرفة ما يعجبني اطلع على ريحة العطر والترتيب يصير عندي فضول كلل يوم اروح لغرفتها واتحمس اعرف يا فرشة اليوم فارشة على الچرباية وشلابسة شموسة

-انا هم اسوي بس هو ما يعجبه.. لا لا هو بدر غير والله غير عن در صح توم بس غيير شخصيات

-ابرار لا تظلمين بختچ انتِ بنفسچ تگليلي علي الدر كلما يفتح وياي موضوع اظل صافنة بوجهه ماعرف اجاوب لو انكد عليه.. وتحچين على بدر هو بدر لوما شايف دلال من شمس يصير هيج وياهة؟ هم يعاملها هالشكل ويداريها مثل الماي بالصينية؟ من تزوجوا لليوم هي ما تصيحله علي البدر كله "بَدري" لو "البدر مالتي" لو "النَفس" لو "عشگي" وهو نفس الشي.. هو هذا الزواج اخذ وانطي مو كله اخذ

سكتت ما تجاوب وانا ماحب اضوجها بالكلام بس لازم افهمها واراويها الاختلاف بين العلاقات، دائماً العلاقة التنبني على حب ومودة من بدايتها تدوم، شي طبيعي كل الزواجات تصير بيها مشاكل وهالشي وارد مثل ما يگولون بهارات الحياة هاي بس ما يصير تدوم هالمشاكل ونظل نعوم بنفس المكان لازم نجازف ونبحر لمكان ثاني ونلگه حلول سوه الرجال والمرة ثنينهم يتساعدون على هالقضية ويلگون حل ويه بعض..

عفتها ترتاح ماكدر ادوس بالحچي وياهة هي حامل ونفسيتها تعبانة وابرار دومها عبالها علي الدر يخونها وما اللومها در شغله وراتبه وشكله وشخصيته كلها ممتازة وتجذب كل بنية بس انا ابصم بالعشرة در ما يخونها وما عنده هيج سوالف لان اصلاً شخصيته من النوع ما يدور عشگ وتمعشگ ولو چان حاب على ابرار ورايد وحدة ما راح يتردد لو يستحي ويروح بوجهه لامي يگللها خطبيها الي..

طلعت ادوره بالبيت بلكي ما طالع والحمدلله من لگيته واگف ويه علي الحـق بالساحة يدخنون ويسولفون بشي.. وگفت بصفهم وگدام حق حچيت ما مهتمة..

-در مريتك حامل تدري بهالشي؟

صفن بوجهي وعگد حاجبه مستغرب بس بالنهاية هز راسه "اي" وذب الجكارة من ايده..

-حبيبة: وتعرف النساة "وحام" و هرمونات الحمل شگد تگلب حال المرة وتاخذ حيلها مو؟

-علي الدر: حبيبة وين تردين توصلين؟

-اريد اطلب منك واحلفك بداعتي ترجع تراضي ابرار وما تخليها تاكل روحها بروحها والله هالبت تحبك وتخاف لا تضيع من ايدها و...

ما كملت جملتي وانفجر بوجهي وناادر در يعيط بيه..

-اضيييع ويييين!! وين ارووح وينن اولييي لييش انا شااايف دربي حتى اروووح اعشگ عليهااا؟؟ ملييييت من هالسالفة ملييييت هي عبالها ماا ادري كل يوم تفتش موبايلي من انام؟؟ لو تظل تدور بجيوبي وتشم بملابسي؟؟

-علي الحـق: وانتَ ليش موصلها لهاي المرحلة؟

اللتفتله در مبحلگ عيونه ما توقع حق راح يگول هيج وفرحت لانه تدخل واكييد راح يذبله فد قنبلة تصحي در بيها عاد حقوق ولا عنده بريك..

-علي الدر: يعني شني؟؟

-علي الحـق: يعني المرة ما توصل لهاي المرحلة الا اذا چان الزلمة هاملها وما دايرلها بال

-علي الدر: ولك اناا هاملها اناا؟؟؟

-علي الحـق: شوف در انا اخوك الصغير وماكو مرة تدخلت بيها بحياتك بس ابرار عزيزة عليّ وكبرت وهي گدام عيني چن اختي وعرفت طبعها وشخصيتها شني صحيح انتَ مجبور على زواجك منها بس يا خوية البت هالكة نفسها لخاطرك مداريتك ومدارية امك وابوك ومرة ابوك مثل الماي بالصينية ليش ما تقدر هذا الشي؟

-منو گالك ما مقدر بس هي شكاكة!!

-خوش شكاكة انتَ دور الخِلة وين وليش جاي تشك بيك؟ شني تصرفاتك تبين انتَ تخون لو چلامك؟ اعرف وين المشكلة وحلها لا تظل تتهرب من السالفة خوية هالبت صارلها وياك عمر مو يوم ويومين

-هسة انا شمسوي والله خبلتونيي

-علي الدر من الاخير انتَ لو زلمتي فلا ابقى وياك

ضحكت ودر هم ضحك ينطي لحق راشدي خفيف، ابتسم وكمل بجدية..

-علي الحـق: والله لا حچاية ولا رواية شني هو الزواج بس اسقاط فرض؟ لا عشگ ولا ونسة ولا أُلفة بيناتكم حايرين بالمشاكل وحاير بأبنك ومراقبه على الدعسة بوية انطي وكت لنفسك ولمريتك عاملها حلو سولف وياهة حاچيها بشنو تحس وفضفضلها مشاكلك حتى لو هي ما تفتهم وحتى لو ابرار مو على هواك انتَ شكلها وغيرها انتَ خذيتها صغيرة وچان گدرت تسويها مثل ما تريد بس انتَ ما استغليت الفرصة

-حبيبة: بعدها الفرصة موجودة ابرار بگلب وعقل طفلة والله العظيم بنستلة تفرح تتذكر گبل چم يوم من وديتلها علبة بقلاوة لو تعرف شنو سوت؟

-علي الدر: شسوت

-الگاع ما شالتها من الفرحة كل شوي تروح تفتحها وتضحك ويه روحها وتگعد، والله فرتها على البيت كله تگللهم عاينوا در شجابلي الفطيرة وامي مكيفة وياهة ومرة ابوي تگللها لوما عاشور چان هلهلت ودبچتلكم من الفرحة چن مادري شجايب

-شسالفة حبيبة اليشوفها يگول حارمها!

-علي الحـق: ما حارمها خوية بس يجوز ما تخصها بشي، انتَ دومك من تجيب توزع للكل وهي من ضمننا ما تجيبه بس الها وهالشي يفرق

-علي الدر: مادري مو ببالي

-علي الحـق: چا هسة عرفت وخليها ببالك منا وجاي صون بيتك در وحافظ على الجوهرة العندك، صعب تتحصل بت ما تشوف بعيونها غيرك هالوكت وصعب تحصل زلمة يكتفي بمرة وحدة.. العنده بنية نفس بنياتنا لا يفرط بيهن

-صاير يعرف يسولف بالزواج الخايس

-علي الحـق: اي ولك شو انا هم مصدوم بروحي هاي ذيچ الوحدة لاعبة بأعداداتي اشتعلت صفحتها

ضحك در وضرب على ظهر حق يهز براسه اي ومن گدما علي الدر ما يهتم وبارد حتى ما يسأل منو هاي الوحدة وهاي شخصيته ويه الكل لا يحب يدخل روحه بشي ما يعني ولا يفرض شي على بشر وابرار صارلها سنين عايشة وياه وما جاي تستوعب هذا طبع وابو طبع كللش صعب يغير طبعه..

راح علي الحـق يطب جوه وانا بقيت ويه در الظل صافن يعاين للورود الي بالساحة، ابتسمت اباوعله وبداخلي فرحة اظنه جاي يفكر بكلامنا من شوي..

-حبيبة بهمس: انا اگول روح صالحها

اللتفتلي يعاين لعيوني ثواني وابتسم بدون لا يحچي شي، تشجعت وكمشت بيده واردفت بحماس..

-اشتريلها ورد راح تفرح هوواي

-الله كريم

-علي لا تسوي هيج خطية تعوفها زعلانة اشتريلها حتى لو وردة واكتبلها رسالة صغيرونة تفرحها

من شفته ساكت وما يجاوب تركته براحته ورجعت للبيت خلي يفكر وحده ويحل الموضوع بطريقته.. طلعت للصالة شفت عماتي طالعات وگاعدات طبيعي يضحكن ويسولفن چن ما صار شي واضح مفعول ابوي قوي..

-فراقد: تعاي شيخة ما شفناچ اليوم

-حبيبة: اجيت خالة

گعدت وياهن بصف مرة ابوي وحضنتني نص حضنة تبوس براسي وتغنيلي..

-بنيتي بت ابوها وعشرة يتخاطبوها واحد يگل للثاني انا عبد لابوها.. وبنيتي بت ابوها وعشرة يتخاطبوها واحد يگل للثاني انا عبد لابوها

-شيخ علي: ههههه رسمية خليها وره صفر خليها

انخمش گلبي ولزمتني رجفة الوجوه تضحك وفراقد تضحك فرحانة ماعندي الجرأة اسأل شنو الموضوع وبقيت ملتزمة الصمت..

-شيخ علي: خابرني صمد گلي اجوا يخطبون بنيته زهراء ومنطيهم موافقة گتله چا شني متوازي ترجعلهم موافقة بـ صفر

ضحكت مرة عمو صمد خجلانة وگالت بتبرير..

-لا ابو علي احنه خو ما راح نعقدلها بصفر بس الناس خوش ناس وصمد گاللهم على فرحة الزهرة ان شاء الله المهر احترام لاربعين الحسين (ع)

-شيخ علي: شايفين الخير ان شاء الله

يسولفون وانا على الصامت انوب جابوها على خطبة ليلة وفراقد تضحك وتگول..

-شمالها الوادم انچلبت تخطب بـ صفر هههههه

جاوبتها عمة زهرة وبنص حچيهن نزل الامير كاشخ على اخر حباية، الدشداشة والبشت والعگال والسبحة تطگطگ بيده والعطر يهفهف كلهن سكتن يعاينن عليه، سلم وعبرهن بعده ما طالع من الصالة ووگفه صوت ابوي..

-الامير!

رجع چم خطوة واندار لابوي يواجهه، حرك ابوي راسه بأستفسار وسأل..

-وين رايح بوية؟

-الامـير علي: خابرني ابو كربله على گوامه ورادني احضر واجهة

-شيخ علي: تعال اريدك

گام يتچي على العوچية ودخل غرفته، راح امير وراه طبوا للغرفة شوي وعماتي وفراقد يلوبن يردن يعرفن شكو ووحدة تباوع للخ ومرة ابوي ولا تحركت ولا بررت موقفه..

-ابتسام: ما سمعنا صوتچ رسمية چنچ راضية على تصرف ابنچ

-رسمية: الامـير علي مو جديد عليكم ما يخطي خطوة الا يكون دارسها ولوما متأكد من حسبة براسه ما يجازف

-ابتسام: بعدچ واگفة ويااه؟؟

ما لحگت تجاوبها وطلع الامير من غرفة ابوي، وگف گدام عمتي غزوة وبوسها يتعذر منها بس وجهه ثگيل عرفت ابوي راح يخلي يتعذر من عماتي خاطر ما يزعلن منه وهنه هم كلش يحبنه ورضن بساع وشبعنا بوس..

-زهرة: والله خفنا اموري گلنا احنه شمسويات وهيج شَك بينا

-الامـير علي: من رخصتچ عمة بس الصار ما ينسكت عنه وراح ابقى ادور وما يرتاحلي بال الا اعرف منو وره هالسالفة.. مع السلامة

ودعهن وطلع ورجعن يگعدن كلهن يحچن بالسالفة متعجبات اكثر من عدنا وظل بالهن على تَـمني، من راح ابوي للديوان ضحكت عمة ابتسام ودارت عينها الي تگول من طرف خشمها..

-چا ليش ما گلتيله على عبق حبيبة لو بس احنه تفتشين جنطنا!

-سلوى: شنو شبيها عبق؟؟

-ابتسام: تگووووول لگت كاغد حبة مكسور بالحاوية تگوووول شافته بعد ماعرف صدگ شافته لو هي حطته هناك خاطر تتملص من السالفة

انتفضت من مكاني وامي هم وجهها انبلع بلعع وركضت للمطبخ، وگفت بنصهن وقسمت قسم عبق لگتها وحچيتلهن الصار بالضبط بدون زيادة ولا نقصان..

-حبيبة: والامير علي شااهد!!!

فزيت على صوت صياح عبق جاي من المطبخ، ركضت اشوف شكو وامي رسمية وعماتي اجن ورايه شفنا امي لازمتها من شعرها تعت بيها وبيدها جداحة تريد تحرگ دشداشتها..

-حبيبة: يممممةةةةة هددديهااااا

ركضت افلت عبق من ايدها وضربتني بوكس بصدري طلعت روحي بيها، عاطت بيها مرة ابوي وامي متخبلة عقل ما ظال براسها شبعت عبق كتل الراشديات ما سكتن شمرتها بالگاع ترفس ببطنها وتفشر عليها وتملخ بروحها..

-سلوى: ووولج انااا تسودين وجهييي گدامهمم انااا الجبتچ لهالبيت وعيشتچ حياااة بالاحلاام ما تحلمين بيهاا

تحجي وترفس بـ عبق الي اختفى صوتها من الكتل، استرجعت قوتي وجريت امي من ايدها ودفعتها بكل قوتي وصحت بيها..

-والزهرررة هسة اروح اصيح لابووي واخلييي يحطلج حَدددد كاااافي گدرررتچ على هاليتيممة يمممة كاااافي فشلتينييي وياهة وويه مرة ابوووي واخوتي كاااافي

-سلوى: توكفين وياهة ضدددي ولج حبيبة وصلتت بيج تهددين بأممج ماا اكول غير يااا حيف ربااي وتعبي علييج

-رسمية: صميي حلگچ للچ!! ما شفت بت بارة بأمها مثل بنيتچ بالعة موس وسااكتة صارلها سنيين على فواينچ ومصايبچ تتوسل بيه وبأبوهاا نعديلچ سوالفج وما نطرردچ من هالبييت ونهيتچ بالشووارع منيين ما اجيتيناا

نزلت اشيل عبق من الگاع احضنها وابچي على بچيها، ابوس براسها ووجهها ووين ما كتلتها امي واتعذر منها.. على اثر الصياح والهوسة طبوا علي الكـرار وسور ونور وياه يتسائلون شكو شصاير..

-ابتسام: لااا تظلين تدافعيلها حبيبة چا هي وحدد وما تغلط؟؟؟

-حبيبة: جاي اگلچ البت بررريئة

-علي الكـرار: شكوو شصاير من الظهرر البيت مخبووص شبيچننن

-ابتسام: تعاال كرار تعاال شوف اهللك الغربة صاروا احسن من عدناا

-علي السور: هسة غير يحچن ونفتهم شكوو

-فراقد: بدون لا تحچين ابتسام انا هم اشوفها بريئة عبيقة ما تطلع منها هالسوالف

-ابتسام: لييش هي الوحيددة لگت الحبة بالحاوية؟؟ وليش راحت تدور بالحاوية من البداية لووماا خايفة وبنصص عركتنا فلتت للمطبخ وراحت تسوي هالسالفة چاان ما شكينا بيهاا بس عببق هي الدمرت مرة الاميرر وهي السبب بكلشيي جاي يصير احلفف على هالبت سوووسة

-علي الحـق: واناااا اقسملچ قَسسم واحلفلچ براس وشيبة ابوووي انتِ تغاارين من هالبت!!

سكت الكل ويه دخول علي الحـق للمطبخ وصوته العالي والگاله بكل ثقة..

-ابتسام: اناا اغارن من فرخة؟؟؟

-علي الحـق: والله مادري سألي روحچ عمة؟ صار الي يلگه دليل ويروح ينطي للي جاي يحقق بالقضية مجرم؟!!

-ابتسام: لا تظل تحچي ويااي حچي ضباطط!!

-علي الحـق: احاچيچ بلي يعجبچ وباليرضيچ بس انطيني دلييل وااحد يثبت السوته عبق غلط؟!!

-ابتسام: چا مو...

-علي الحـق: البت عايشة ويانه سنيين ما شفنا خيالها ما شفنا عليها شي غلط تمشي ويه الحايط ما يطلع حسهاا نايمة بمخزززن كله جريديية وبريعصيية وما تفتح حلگها وتطالب بشييي من مستواهاا وفوگ هالضيم جايه انتِ تتهميها هي السبب بالصار بـ تَـمني؟؟ ليش بووية شتستفاد لو خبلتها شنوو التحصله؟؟

-ابتسام: مادري اسئلها الها

-علي الحـق: لا اسألچ الچ!! لانچ انتِ التهمتيها باطل وسببتي كل هالمشكلة! انا لو بمكان عبق والله فلاا اسكتلكم خااف شفتوها فقيررة وما تحچيي اناااا موجود واخذ حگهااا لو اعرررف اعاددي البيت كله!!!

يضرب على صدره ويحچي بثقة خله الكل ينلصم على حلگه حتى امي سكتت ودارت وجهها، عفتهم وياه وخذيت عبق صعدتها لغرفتي ما رضت والا تريد تروح للمخزن خليتها براحتها ودخلتها جوه.. گعدت يمها ونزعتها الربطة وعدلت شعرها التهلس سودة بوجهي عيونها ما نشفت من دموعها..

-روحي حبيبة لا تبقين يمي هسة امچ تأذيج

-معليج انا اتصرف ويه امي انتِ هسة ارتاحي ولا تظلين تفكرين زايد

بچت بحرگة تضم وجهها بين ايدها وجسمها يهتز، مسحت على ظهرها اواسيها على حظها المو راضي يتعدل وانكسر گلبي من گالت بشهگة..

-متعود جسمي على الكتل عادي بس راح اموت قهر لان كتلتني گدامهن

حضنتها اخفف عنها واسولف وياهة واحلفلها ما اسكت لتصرف امي ومثل العادة حلفتني ما احچي لاحد وما اوصلها لابوي راح تخبلني، رزلتها افتهم سالفتها وسكتت ويه صوت علي الحـق الاجه من وره الباب يصيحلي، مسحت عبق وجهها وجرت الربطة تلبسها وانطته گفاهة خاطر مايشوف وجهها الاحمر..

-تعال حق

فتح الباب وطب للمخزن، عافه مفتوح وتقدم يوگف مقابيلنا ضبط عيونه ما نزلت منها ما وخرهن ولا رمش، ما طلب منها تحاچي ولا طلب منها تديرله وجهها حتى يشوفها گنبص بمكانه حتى يصير بمستوانه وسند عكوس ايده على ركباته وذب حسرة..

-علي الحـق: منو بيهن طگتچ؟

ما جاوبت كرر سؤاله اكثر من مرة وما ترد عليه باقية بس تشهگ اثر البچية، هز راسه اي وگام وهو يگول..

-اليوم لو انا لو هنه..

فزت عبق من مكانها وگامتله واول مرة اشوفها بهالحال، لزمت معصم ايده فوگ القميص وحچت متوسلة..

-الله يخليك لا تسوي شي بداعة امك لا تعادي اهلك محد يفيدك غيرهم اني ادعي ربي ياخذ حقي بس انتَ لا تسوي مشاكل وتزيد الطين بله

-اذا انتِ ترضين على الذل انا ما ارضاها! يتجاوزون على وحدة دايسة بيتنا ومحتمية بينا؟؟ لييش ترضين بالاهانة؟؟

-معليك حباب معليك بيهن عوفهن الله يوفقك

لزمها بثنين ايديه من خدودها وقربها منه يگول بحرگة..

-مسودنة انتِ؟؟ وولج عبق لا تخبليني ترره عقلل ما ظال برراسي هسة اناا

انتفضت توخر ايده منها وانتبهت لروحها كاضة معصم ايده هم هدته، ابتعدت چم خطوة تبتعد منه وهمست بتردد..

-اذا.. اذا سويت مشكلة لا اعرفك ولا تعرفني بعد

-غبييية انتِ؟؟؟ ماعندج كرررامة؟؟؟ ليش تسكتين على حگگچ!!!

-اني بعد گتلك وانتَ بكيفك

انطته ظهرها تنهي النقاش واخوي تخبل ظل يشيل روحه ويرگعها ويدفر بباب مخزنها عوجه تعوج وطلع من المخزن، بعدني ما فكيت حلگي اعاتبها وسبقتني وگالت..

-لا تحاچيني حبيبة محد يحس بالدا اعيشه لا تضغطون عليَّ اكثر كاافي

عصبت منها اكثر وطلعت من المخزن اعوفها وحدها ورحت لغرفتي مليت من هاليوم الكله مشاكل ومو راضي يخلص شنو هالقهر ربي!

لزمت موبايلي شفت اشعارات جايتني من "حور" اخت حاكم مالي واهس ارد عفتهن ورحت على رقم منتصر فتحت صورته الشخصية وصفنت بيها اتأملها وگلبي يتگطع شوكت يحس بيه وشوكت يصير البالي..

لليل ياله نزلت وتفاجأت من شفتهن بعدهن هنا والله گلت راح يطلعن وره الصار بس ولا عبالك اكو شي الضحك والونسة واللتمن على السفرة يسولفن منطلقات.. نفسي انسدت واول مرة تراودني مشاعر غريبة تجاه عماتي كل عمري احبهن بس هسة ضوجتي جاي تتغلب على مشاعري..

رحت للمطبخ شفت ابرار تضحك وتغسل بالمواعين هيج وحدها تضحك ورايحة لغير عالم، وگفت بصفها مبتسمة وچنها چانت تنتظرني لانها اللتفتت عليّ وگالت بحماس..

-حبيببة همزين اجيتي تعالي اشوفچ شي

جرتني من ايدي واخذتني لغرفتها، طبت وطبگت الباب وراهة وراحت تركض تفتح كنتورها، طلعت منه بوكيه ورد وردي چبير يخبل بس شفته ضحكت وياهة..

-ابرار: ولج علي الدر اجه راضاني وجابلي هذاا شوفيي

-الله الله الله منو گددچ عيني باع الورد يخبل

-هههههههه وباعي شنو بي هم

مدتلي كارت صغير مكتوب بي "ما اگدر على زعلچ حبيبتي ام حيدوري.. احبچ" قريته چم مرة والضحكة شاگة وجهي ووجهها، تطفر بمكانها مثل المراهقات السعيدات نست روحها حامل..

-ولج اوول مرة يكتبلي هيج هااي اول مررة تدرين صار شكد ما گايلي احبچ تدرين؟؟؟

-ههههه اشش سكتي لا يسمعچ احد ويطگچ عين

-حبيبة فرحتي ماانطيها لاحد وانتِ اول وحدة بشرتها فضلچ ما انساه طول عمري

-ولج انا شكو تشكري منه من يرجع ولبسيلچ شي حلو وتعطري وسوي فد سهرة حلوة تغيرين جو بيها

-اي اي بس ماعرف شسوي ومحتارة حبابة ساعديني

-لا خية استحي انا شوفي شمسه

-ولج شمس ببيت اهلها راحت العصر البيت گاب وما تنازلت عن روحة اهلها الفايخة

-والله تفتهم

ضحكت وياي وراحت تفتح كنتورها تگلب بي ما تعرف شتلبس، شوية واللتفتت عليّ وگالت بحماس..

-لو نشوف تَـمني تساعدنا؟

-تَـمني اظن بعدها نايمة

-لا گعدت من شوي نزلت ولا چن بيها شي بس گالت راسي يوجعني واظن محد حچالها

-مرة ابوي وصتهن ما يسولفنلها بشي وامير موصي خالتها وتالة

-خوش چا نروحلها يلا

صعدت وياهة هم حتى اتطمن عليها ودگيت باب غرفتها، سمحتلنا نطب وشفنا يمها گاعدة تالة وبيدها كارتونة مال موبايل افتهمت تَـمني مشتريته الها وفرحانة بي كلش، تطمنت على توتة وضعها زين بس شوية عيونها ذبلانة طلبت منها ابرار تساعدها بسهرة ورضت بساع ونزلت ويانه..

-تَـمني: اني اگول لبسي شي حلو وهيج مغري وخلي يكون اسود

-ابرار: ماعندي ولج بس اتگ

-تَـمني: يااا اتگ شنو يمعودة اوگفي اشوف شنو عندي واجيچ

صعدت شوية ونزلت بيدها دشاديش وسيتات نوم جدد يخبلننن بعدهن بالعلامة ما شايلتهن، حطتهن على فراش ابرار وگالت..

-اني وياچ نتلابس اختاري واحد منهن

-ابرار: لا خية ذني مالتچ ما يصير

-تَـمني: والله بعدني ملابستهن وممحتاجتهن واحسهن يلوگن الچ كلش

-ابرار: چا تعلميني وحارمة زلمتچ ليش ولج

ابتسمت تَـمني منحرجة وشالت دشداشة تول وحطتها بيد ابرار وگالت..

-هاي حلوة لبسيها والمكياج خلي خفيف انتِ ميرهملچ ثگيل

گعدت تشسور شعرها وتمكيجلها واحتارت بيها حتى النمنمات هي حضرتهن وانا وياهة رتبنا غرفتها وعطرناها وابرار باقية فرحانة وتفتر بيناتنا ما تعرف شتسوي..

من سمعنا صوت علي الدر بره فلتنا انا وتَـمني نطلع نعوفها وحدها، صعدت تَـمني فوگ وانا رحت اسوي لعماتي چاي.. وگفت بالمطبخ ارتب بي وانتظر الچاي يتهدر وطب الامير سلم عليّ بس عيونه تطاير منا ومنا..

-حبيبة

-ها

-اريدج هسة تركضين تلمين جنط عماتچ ومرة صمد وتاخذيهن لغرفة ابوي بس لا تخلين احد يحس عليج

-امير هم راح تفتش

-اي! يلا حبيبة منتظرج انا

عافني حايرة وراح قبلي لغرفة ابوي، استغليت فرصة هستوهن كملن عشا وراحن يغسلن وركضت على جنطهن كفيتهن كلهن وركضت لغرفة ابوي چني حرامية..

حطيتهن على الجرباية وهو نزع شماغه وعگلاه ولم البشت يحطه على جهة وگعد يفتش بوحدة وحدة، وصل لجنطة عمتي غزوة وسأل..

-جنطة منو هاي؟

-عمة غزوة

-هذا چان موجود اليوم من فتشتيها؟؟

طلع منها شريط حبوب لونه ابيض مكسور منه حباية، هزيت راسي لا مسطورة سطررر ويه ما طلع الامير كاغد الحبة الصغير وقارنه بيها اجت فيييت وياهة..

-حبيبة: لا اموري لاا لاا اظن احنه غلطانين تره هاي الحبة الصغيرة اسمها ما نعرفه ما مبين كلش لو...

تعبت ماعرفت شحچي وهو ما انطاني مجال طلع موبايله طگلهن صورة ودزهن لشخص وانتظره يجاوبه، دقيقتين وشفت فكه ينقبض وعيونه طلعت من مكانها.. كتب شي بالموبايل وتخبل من وصله الجواب من الطرف الثاني..

لزم الشريط بين ايده مرده مررد وطلع من الغرفة يهف، راحلهن شافهن متجمعات بالمطبخ يسولفن بموضوع وبدون نقااش وبدون صوت عالي جر عمتي غزوة من ايدها واخذها للساحة بره جوه انظار الكل..

-فراقد: شصاير؟؟

طلعن كلهن وراه وانا وياهن واشوفه منگلب بركااان حاط الشريط گدامها ويصيح بكل صوته ويعاتب مقهور..

-لييييش عمــة لييييش توقعتها من الكل ولااا منچ! شمسووويلچ اناا شنووو صدررر مني وتكرهينييي لهدرررجة؟؟؟؟

-غزوة: اميير شنو شبييك هذا شنووو

-الامـير علي: صخااام وجه هذااا دمااار عيشة هذااا طيحااان حظظظ هذاا!! انتِ تكرهينيي اليي مريتييي شعليهااا تَـمني شعليهاااا تخبليهااا وتمردين برحمهااا شعليهااااا

شهگت ضامة حلگي من گال "تمردين رحهما" بقت عمة غزوة مصدومة مبحلگة عيونها چن انسطرت وضغطها علگ..

-من وكتتت سااالفچ ويااهة ببيت نعمممة وطببتيني لبيتها على اسااس اناا معتدي عليهاا وما اناا مچذذب الكل ومصدگچ!! وبقيتتت مچذبهم ومصدگچ وماا انطيت بيچ هالگددد! بس هسة تغير الوضع غزوة!! ومال تلعبييين على الامـير علي وتمشينن كلاواتچ عليه؟؟ لااا وعلي ما اگعدچ دقيققة وحدة ببيتي ولوما عمتيي ومرجوعچ الناا افضحچ واشهررچ بديواان اخوچ اخلي الغريب گبل القرريب يعررف بفواينچ!!

-غزوة: مو.. مو انا.. انا معليه انا انا..

تحجي متوترة وترجف تجمعت الدموع بعيونها واول مرة اشوف عمتي بهالوضع! غزوة جبل!! شامخة وراسها دائماً مرفوع عالي ما نصته حتى من ماتوا اخوانها بقت على شخصيتها وقوتها وهاي اول مرة اشوفها بهالانهيار..

-طلعيييي برررره ماااريد اشوف وجهههچ

سحلها سححل من ايدها وشمرها بالطارمة الثانية تطلع من الباب الثاني وصاح بيه اوديلها عبايتها، ظلت تصيح عليّ وتدعي على الكل وصوتها يلعلع..

-الامـير علي: سكتوووووهاااا لا اروووح ادفنهاااا بمچااانهاا

ركضتلها عمة زهرة تسد بحلگها متخليها تحجي وتزيد القهر قهرين وطلعت اختها من البيت وصوت غزوة ما هدأ، بقت على صياحها تصيح وتهدد، رجعت عمة زهرة لداخل البيت وره ما طلعتها وگالت بزعل..

-زهرة: غلطت اموري من طلعت عمتك هالشكل مكسورة خاطر غلطت!

-الامـير علي: غلطت لان طردت وحدة حاقدة؟؟ اليوم تَـمني بااچر كلناا تخبلنا!

-ابتسام: لا تلومي زهرة الصابهم مو سهل صح غزوة السوتها بس اكيد اكو سوسة جاي توز براسها!!

نترتها نتر وباوعت لـ فراقد العگدت حاجبها ما راضية على الحجي، رغم غزوة وفراقد عداوة بس مبين متأثرة بالصار وما راضية عليه كلهن اخذن عبيهن وطلعن من البيت وبقينا وحدنا..

-الامـير علي: غلطت من فتحت الموضوع الظهر گدام ابوي.. لا توصلوها اله ما راح يتحمل هيج صدمة صحته ما تساعد

-رسمية: الله يساعدك يمة همّك يهد الحيل

نزل راسه يفرك بي وصعد فوگ يعوفنا نضرب اخماس بأسداس، شفت الشريط بعيني بجنطة عمة غزوة وكل اصابع الاتهام متوجهة عليها.. ليش ما شكينا بيها من الاول؟ اول مرة تخدرت بيها تَـمني چانت ببيت نعمة من رادوا صلاح يعتدي عليها وعمة غزوة الچانت موجودة بيومها..

**

"تَـمني"
تعودت على وضعي المخربط صايرة ماعرف شوكت انام وشوكت اگعد ويومي كله يتغير عليَّ بسبب هالشي.. طفيت المكنسة الكهربائية وفرشت الفرشة الوردية الجديدة الي اشتريتها البارحة ورحت للشمعة المعطرة شعلتها، ردت عطر اضافي للغرفة وعطرتها بمعطر جو يشبه عطر الشمعة صارت الغرفة تخبل تفتح الگلب.. رن تلفوني برسالة جديدة شلته من الميز افتحه وابتسمت من شفت الرسالة من رفل، كاتبة..

"لو تعرفين شصار اليوم يبووووو"

جاوبتها بسرعة..

"شصار؟؟"

"اليوم اجو خطابة على ليلة وابا الحسن علي لعب لِعب!!"

"شسوه بله؟؟"

"اجيچ ونسولف بس خلي ينامون اهلي خاطر اشرد"

"ههههه ولج لا تطلعين بالليل وحدج خاف يصيرلج شي"

"سبعة انا لا تخافين عليّ"

ابتسمت ونزلت تلفوني، علاقتي بـ رفل حلوة وهي شخصيتها تونس مو مملة وتموت على القشب شگد اكللها بطلي وصيري ادمية وتجاوبني "منو گلج انا ادمية" وتظل مستمرة..

اخذت ملابسي ودخلت للحمام اسبح، كملت وطلعت امشط شعري گبال المراية وشسورته على الواگف، لميته بكبة مهووسة عالية ورحت للكنتور احضر ملابسي مال دوام باجر..

ذبيت التنورة من ايدي ويه ما دخل الامير للغرفة، سلم ببرود واخذ منشفة ودخل للحمام اهووو تذكرت احنه ما تصالحنا بس ليش ما صالحني شبي ويايه والله توقعت راح يراضيني شو متغير ابو البورگ عليَّ؟

بقيت ارتب بملابسي واسوي روحي مشغولة وعيني على باب الحمام شوكت تنفتح ويطلع، طول عشر دقايق وطلع لاف منشفة على خصره فزيت وانطيته ظهري مرتبكة واخربط بالملابس..

-الامـير علي: تعشيتي؟

-امم

-باجر ماعندج امتحان مو؟

-امم

-تراكي النيلي وين غاسلته؟

-امم

-ووجعة امي بيه! شبيچ ولج

-اتوقع اتوقعع اذا ذاكرتي متخوني يعني اتوقعع احنه متزاعلين

-چا مو تراضينا

-هاي شوكت عيني؟

-اليوم تراضينا بس چنچ ناسية

ذبيت الملابس وگمت على حيلي مستغربة شوكت تراضينا؟ بس يمكن هاي وحدة من اللاعيبه حتى انسى الزعلة..

-امير شوكت تراضينا متمشي عليَّ سوالفك تره

ضحك خفيف وتقدم يوگف مقابيلي وگال بكل ثقة..

-خايبة تراضينا وبستچ وبستيني ونمنا يم بعض وسولفنا ونمتي بحضني..

بآخر كلماته جرني من خصري يحاوطه، بلعت ريگي مرتبكة وفوراً صار گلبي يدگ قوي ومن قوته خفت يحس بي.. توترت ودفعته بخفه من صدره العاري وگلت بصوت ناصي..

-كذاب ما صار هيج

-وعلي صار

-لا ما صار

-والحسين صار

-لا لا

-والزهرة ام الحسن صار

-لا تظل تحلف حرام

-لا عليچ العباس؟

ضحكت على عناده وهزيت راسي مأيسه منه..

-لا تستهزأ امييير

ضحك بصوت عالي وحضني لصدره يممة گلبي والله راح يوگف هاي شبييه، زفرت نفس لا ارادي من باس خدي وگال..

-ما جاي استهزأ فهااووي

-بعد بكيفك انتَ تتحاسب مو اني

-هههههه عدنا يجوز الحلفان لا تخافين ماروح للنار

-اممم نسيت

ضرب راسي براسه كله خفيفة وهمس بيناتنا..

-لا تنسين بعد

-بهمس: ما راح انسى

-وهسة اقتنعتي احنه متراضين؟

-لا

-انتِ لو يجي مادري منو هم ما تقتنعين ام راس اليابس

ضحكت بصوت عالي من ضرب راسي بكلة اقوى ولا ارادي حطيت ايدي على صدره لان انرگعت ليوره وانضرب ظهري بظهر الكنتور..

-اللبس ملابسك كافي عيب هالسوالف

-چا ما تطلعيلي سلابات اللبسهن

دا اريد اجاوبه وفزيت ويه فتحة باب غرفتنا على وسعها ودخول رفل علينا فحطانة، انوب من الصدمة لا اني تحركت ولا هو وبقينا على وضعنا..

-رفل: احاااااا

دفعته عني ودرت وجهي مستحية وهو رجع للحمام يمشي بخطوات سريعة ويدردم عليها بصوت عالي..

-الامـير علي: بتت الوجعااان هو هييچ يطبوون للغرفة

-رفل: اسكت اسكتت عسااني بالعمى ولا شفت الشفته

غمزتلي من گالتها انوب وجهي اشتعل وكلمة ما نطقت، گعدت على الفراش تضحك وتتنفس سريع، حطت ايدها على عيونها وگالت بصوت ناصي..

-ااااخ عيوني تحرگني المنظرر ما جاي يروح من راسيي اووووخ

-ياا رفل شبيچ تره كلشي ماكو

ضحكت وهمست بخفوت..

-كلشي ماكو وواحد لاطش بالثاني اويليييي والله اجواء حرامات حرمتكم منها

-انچبي ولج متستحيين

-ههههههههه تره صوچچ ما گلتيلي انتوو احممم چان ما اجيت

صميت حلگها اليضحك بيدي وتذكرت ما وديتله ملابس وما انتبهت الا من هو صاح من الحمام..

-نووومه هدوميي رحممة لاهلچ

هديت رفل وطلعتله التراك واخذته للحمام، رجعتلها وبعدها تضحك وترگص بحواجبها..

-كافي اشش كافيي اصلاً انتِ شلون تدخلين علينه هيجي ولج متستحين

-اي والله ادري بروحي ما استحي بس لگفني علي الحـق وردت اشرد منه گبل لا يلزمني تحقيق وچفتت عليكم

طلع الامير من الحمام يرتب شعره بأصابعه وگال ورافع حاجبه..

-الامـير علي: حتى تتوبين وما تشردين من بيت ابوچ وتبليني وياچ

-رفل: ما جاية علمودك عينيي جاية لـ نوومتك

-تَـمني: معليج بي معليج سولفيلي شصار ويه ليلة

-الامـير علي: ولج سوسة لا تطلعين عين مريتي

-رفل: اموري لوما گلبت هالفاهية على البطانة مااا اتسمى رفل

ابتسم يباوعلها من المراية ورفع مگص يگص اطراف شواربه، حسيت بي ضايج ومو مثل عادته كل يوم حتى من حچه ويايه قبل شوية حسيته تعبان ومابي حيل..

-رفل بهمس: شبي زلمتچ؟

-تَـمني بهمس: مادري تحسين بي ضايج مو بله؟

-رفل: اي مبين عليه

اللتهى هو على المراية ورفل فتحت جنطتها وطلعت منها شي وگامت تراوي مديت راسي اشوف شنو وضحكت على ردة فعل الامير من فتح عيونه وگال..

-اياا بت العاار مشتريه ڤيب؟؟

-رفل: ووييع جبته الك هاي شبيك

-اي صدگتچ جبتي الي صدگت

-والعباس ليش ما تصدگ طلعنا انا وامي اول البارحة وشفت واحد مفتح يبيع منهن خذيتلك واحد اعرفك تحب هالنكهة

ابتسم واخذه من ايدها وفتحه من العلبة، حك طرف خده شوية وهي طگت روحها ولزمته من ايده تريده يستعجل..

-ولج لا تكضينيي لاا تكضينيي

كفخها بعكسه على راسها وبقوا يتداهرون سوه، بلعت ريگي اباوعلهم ومادري ليش حسيت روحي طرف ثالث بصداقتهم..

-الامـير علي: بيش اشتريتيها؟

-شعليك كتلك هدية

هز راسه وسحب منها نفس وزفره على كيفه ابتسم راضي بالنتيجة وهي بادلته ابتسامة، ثواني ما صبرت ولگفتها من ايده تدخن بيها..

-خرررب اهلچ جيبيها

-نففس واحد نفسسس حبااب

حسيت بشعور مو حلو شعور كللش ازعجني مو شلون مچان، واگفين يضحكون سوه ويتعاركون على الڤيب رفل تريد تدخن وهو ميقبل وواحد يحچي على الثاني هاي من غير قربهم على بعض شوية وتطخ بي..

بلعت ريگي واحس بگلبي صارت بي نغزات وجعتني، لبت بمكاني ومادري ليش فتحت الكبة وعفت شعري مفتوح وبقيت اباوعلهم من المراية سوه يسولفون.. صح الامير يشاركني وياهم بالحديث ويباوعلي من المراية بس والله ولاا گدرت اجاوبه..

-رفل: كافي لا تگص بعد حلوة الشوارب الطويلة عليك

انتبهت لروحي رافعة حاجبي واباوعلهم من جوه الجوه، عدلت وجهي وگمت على حيلي ورحت اوگف بصفهم وبحركة لا ارادي مني درت الامير عليَّ خليتنا نتواجه واخذت المگص من ايده وگلت..

-لا بعد قصرهن.. شو بله

ثبت بمكانه يخليني اقصر شواربه بيدي، بالحقيقة الشوارب الطويلة احلى عليه ولايگاتله بشكل بس مادري شبيه گلت عكس كلامها وگصيت اطراف شاربه بيدي..

-تَـمني: تخبل هيج

ابتسم ودار وجهه يباوع للمراية وهز راسه راضي، صاحتله رفل خلته يلتفت عليها يواجهها وبحركة غريبة جديدة مني جريته عليَّ ما اخلي يدور وجهه الها وكمشت بزنده بأظافري..

-تَـمني: والله حلوات

-اي انا هم حبيتهم

-رفل: والله الطوال احلالك اموري

-تَـمني: لا اموري لاا القصار احلى

-رفل: ولج الشوارب الطويلة تنطي هيبة

-تَـمني: هو مهيوب من گاعه ميحتاج شوارب حتى تزيده هيبة

-رفل: ههههه معاندة الفرخة

-تَـمني: اني احبه هيج رفل هو مگابلني الي لو الج

حچيتها بالضحك بس والله اعنيها واعنيها من كللل گلبي، باوعت للامير شفته ساكت وملامحه جامدة، ضحكت رفل على جملتي وگالت..

-رفل: بهاي حگچ واعلن استسلامي انتِ المگابلته كل يوم

-تَـمني: اممم تعال احطلك عطر بعد

صفنت وره جملتي اللوم بروحي! شبيچ تَـمني شبيچ تخبلتي؟؟ شكو تعطري شنو طفل هو؟؟ مو حتى الرجال راح ينجلط من تصرفاتچ الثولة!

رشيتله عطر بأيد ترجف وابتسمت اباوع لرگبته ماعندي جرأة اصعد نظراتي لعيونه..

-تَـمني: الله يجننن احب هالعطر

-رفل: حتى انا يذكرني بأيام گبل تتذكر اموري هههههه

-الامـير علي: ا....

-تَـمني: ههههه اي هو صح حلو بس عطر عرسنا احلى بهوايه لو شتگول اموري؟

-الامـير علي: اي انا هم احب عطر عرسنا وكلما ارش منه اتذكرج

هسة ليش الضحكة شگت وجهي مادري؟؟ ليش وجهي تشنج ومدا اگدر ارجعه طبيعي مادري! ليش ضربته على صدره خفيف وحضنته نص حضنه بأيد وحدة گدام رفل بكل استهتار مادري!!

-رفل: احم.. انا بعد اروحن گبل لا انطرد

-تَـمني: اووه لا رفولة ليش ترحين خلينا ننزل جوه ونعوف امير ينام براحته

-الامـير علي: ما نعسان

-تَـمني: لا لازم تنام وترتاح شيخي ميصير

-ما جايني نوم

-لا لا الشيخ لازم ينام زين هو اسد العشيرة وميصير يسهر مو زين عليه

-رفل: اودعناك يا اسد العشيرة

گالتها بضحكة وطلعت من الغرفة بقينا اني وياه، فلتت ايدي منه وردت انزل وراهة ورجعت لمكاني من سحبني من ايدي ودفعني على الحايط، بطني خبطت ومعدتي گامت توجعني گلبي دگاته احسهن بچعب رجلي وعيوني گامت تغوش من همس بصوت ناصي..

-نامي يمي

-اءء هاي.. احم هذيج شسمها.. عيب عيب اعوفها شسمها نسيتهاا

-رفل

-اي هي رفل.. عيب عيب ميصير امير ميجوز اعوفها وحدها حرام

-اللهم صل على محمد وال محمد على وگفتها سوتلها حكم شرعي

-مو عيب هي ضيفة ميصير.. وشو احسك يمكن ضجت لان رفل صعدت للغرفة بعد المرات الجاية اني انزللها

-لا ما ضجت

-ضجت!

-ما ضجت تَـمني

-لا لا ضجت!!

-انا متعود على رفل احنه..

-اخوان! اي ادري يلا باي باي اروح اني

-وما احصل شي؟

افتهمت قصده بس استغبيت، هزيت راسي مبتسمة ودفعته عني شوية اسويلي مجال ورحت للميز فتحت جنطتي مال الدوام وطلعت منها چكليته وانطيتها اله..

-شنهاي

-چكليته

-صدگ والله؟

-اي وهالنوع طيب اني كلش احبه ومانطي بس للاعزاز

-عاد چانت بالشسمه لو لا؟

عرفت قصده الفاسق وحطيت الچكليته بيده وگلت..

-چانت بجنطتي طلعتها من جنطتي!

-يا ظالمة النفس عايفتها هيچ تستبرد بدون حنية

دفعته وفلتت اطلع من الغرفة گوة لازمة ضحكتي يارربي شكد فاسق هالرجال والله هو مو هيج ويه اهله عبالك يصير غير واحد ويايه حتى نبرة صوته تتغير...

**

"عـــبق"
افتر بساحة المدرسة وأفكر بالصار البارحة وبفشلتي من سلوى ضربتني گدامهن، شگد تمنيت اتعارك وادافع عن نفسي وأكلها بأسناني بس اااخ من هالحية اااخ لازمتني من ايدي التوجعني..

نزلت دمعتي ومسحتها بسرعة وذكرت روحي سبب وجودي بذاك البيت شنو.. سبب وجودي اكمل سادس وادخل جامعة وارجع اعيش ويه امي وطزز بكلشي ثاني لازم اذكر نفسي بهالشي وما انساه بلحظة ضعف..

حطيت ايدي بجيب الصدرية وتحسست شي بيها، استغربت وطلعت ايدي اشوف شنو هاي وانصدمت من شفتهن فلوس! ذني فلوس بجيب صدريتي منين ذني؟ وشجابهن بجيبي؟

على وگفتي حسبتهن يطلعن 100 الف فكيت حلگي صافنة بيهن ورجعتهن لجيبي فازه ويه صوت صديقتي تحجي بظهري..

-عبق وينج صار شگد ادورچ

انداريت الها شفت بيدها نستلة ومبتسمة، فتحتها على وگفتها وقسمتها بالنص وانطتني النص الثاني حتى اكلها..

-سمية: هاج اشتهيتها الج

-لا ما اشتهي

-سمية: اكلي عبق والله تضوجيني من ما تقبلين تاخذين مني شي

استحيت منها واخذت النص وهي اكلت النص الثاني، لفيت ايدها بين ايدي واجت تفتر ويايه بالساحة وتسولفلي على مادري شنو عقلي مو وياهة ودا افكر بالفلوس.. حبيبة محلفتها على القران متنطيني فلوس فـ استبعدها ولو علي الحـق حاطهن چان كتبلي نوت مثل العادة..

-شبيچ حب شو اليوم عبالك مابيج حيل حتى بالامتحان ما جاوبتي شصاير؟

-عبق: مشاكل بالبيت

-اهووو هالبيت شوكت تخلص مشاكله طنشي الكل وگعدي بغرفتج وادرسي احنه سادس لا تضيع عليج السنة حرامات

-اي هو هم هيج

-چا شبيهن ايدج مجرحات هم مستعلمه قاصر؟

-اي ما احب اشتغل الا بالقاصر

قاطع حديثنا صوت بنية ورايه تصيح بأسمي، اللتفتت شفتها وحدة من زميلاتي بالصف..

-عبق ام العربي تريدج بالادارة

خفت من هالجملة وهمست بگلبي يا ستار يا ربي، سمية گالت تجي ويايه بس ماريد اورطها خاف هم تترزل على الواهس.. شديت حبل صدريتي حيل من التوتر ورحت للادارة بس شافتني ام العربي گامت على حيلها..

-عبق: نعم ست ردتيني؟

تمشيت ادخل بنص غرفة المدرسات وشفتهن يحچن بشي ويضحكن، هزت راسها ام العربي وگالت بأبتسامة غريبة..

-اي عبق.. هسة اجو اهلچ عليج وحاچوني على ظروفچ

عگدت حاجبي متسائلة اجو اهلي؟ منو اهلي؟ بقيت مركزة وياهة من گالت بـ شَك..

-هو ضابط يعودلچ مو؟

فوراً طخ ببالي علي الحـق ولزمتني الرجفة، ماعرف شلون تيهت اسمه من عقلي وگلت بداله..

-علي الدر؟

-اي اسمه علي الدر وگال انتِ عايشة وياهم همه گرايبچ

-اي صح

نبزت ام الاحياء وگالت بمكر وهي گاعدة..

-شو ما گلتيلنا انتِ مخطوبة

بهتت من الصدمة والمدرسات كلهن كهكهن وبدن يحچن بالموضوع صرت حديث الساعة..

-ام العربي: شنو تخافين من العين؟

حچتها بضحكة تداهرني وجاوبتها ام الاحياء كللش صلفة عدنا ام الاحياء وماعدها بريك..

-عمي حگچ تخافين من العين شون شاب اللهم صل على محمد وآل محمد

-عبق: علي الدر مو خطيبي هو اصلاً متزوج وعنده ولد چبير

-ام العربي: لا عيني مو علي الدر الثاني ابو عيون خضر الله يحفظه لشبابه

-ام الاحياء: شبيچ شو عبالك مصدومة بس لا تردين تسويها مفاجأة ههههههه

ضحكت مدرسة الكيمياء وهزت راسها ما راضية على ام الاحياء وتصرفها، من الصدمة ظليت صافنة كللشي ماحچيت علي الحـق جاي هنا وگايللهم هو خطيبي؟!!

-ام العربي: اجه وگال انا وعبق خاطبين وعلى فرحة الزهرة مهرنا وانطه رقمه للمديرة بمكان ولي امرچ وگاللها شنو يصير وياچ او تحتاجين نتصل بي هو

-ام الاحياء: افتهمنا بي ضابطط عيني

ضجت من حركاتها وضحكها وما انطيتها اهمية، ترخصت منهن وطلعت من غرفة المدرسات ولحگتني ام العربي للساحة تگول بصوت ناصي..

-شنو تحتاجين حبيبتي عبق بس گليلي انا بالخدمة

-شكراً ست متقصرين

-خطيبچ منين؟

-ها؟

-منين خطيبچ منا؟

-اي منا

-شگد عمره بله؟

ارتبكت من صارن البنات يتلفتن عليَّ يباوعن لام العربي وعليَّ وسمعن حديثنا، شافتني المدرسة متوترة ضحكت ولزمت ايدي وگالت..

-الله يسعدكم حبيبتي انتِ خوش رجال مبين عليه

غديت طماطة من المستحى ثانياً ام العربي من شوكت حبابة ويايه وتحاچيني بهالاسلوب اللين؟ هي من يوم يومها تكرهني وتعيط بيه لو هيجي تأثير العگروگ قوي وسحرهن بعيونه التمساحية!

-سمية: ولج عببق انتِ مخطوبة وما تحچين لييش ولج ليش مو انا صديقتج

-عبق انتِ مخطوبة؟

-عبق چا ليش ما لابسة حلقة؟

-صدگ خطيبچ ضابط؟

-شنو رتبته؟

-انتِ مخطوبة؟

-طبعاً مبين عليج مخطوبة بس ما تحچين سمعت ام الاحياء تگول عنه صاك وتخافين من العين

كل هالاسئلة من بنات متفرقات تجمعن حواليه ماعرف شلون عرفن كل هالمعلومات بهالسرعة والزادها عليَّ من اجت فاتن "ام المخدرات" وگالت بشهگة..

-علي الحـق خطبچ!!

-سمية: اسمه علي الحـق؟

-فاتن: ولج ولا توقعت بيناتكم شي ياا ملعونة والله صيدة صدتيها

-عبق: احچي عدل فاتن شكو اصيده تره رجال هو مو طير!

-فاتن: اووووف شون طير هوو

-عبق: كااافي عااد

-فاتن: يمووت بنات اخذوها مني و *******.....

فتحت عيوني شاهگة على صلافتها تحجي بكلشي بيي فلسته تفلس وحچي كله +18 والبنات منسجمات اتعب واني اگول اني بأتعس مدرسة بالعراق لا من مديرة ولا من طالبات!

-عبق: احتررمي نفسج وانلصميييي عااد كااافي مصختيها انتِ ماعندج ادب؟؟

-فاتن: چا مو عيب من نايمة ببيته وبـ... اماكن اخرى؟

-عبق: شووف التفكير المقرف سمعي ولج فاتن اني روحي طالعة كلمة زيادة واسحلچ هنا اسويچ فرجة للمدرسة!!

اول مرة اعلي صوتي واتجاوز بالمدرسة دائماً ابلعها واسكت بس هسة طفح كيلي ويه هالمسمومة تريد تشوه سمعتي بين البنات من وره غيرتها؟؟ والله ولا اسكتلها!!

-فاتن: هو انتِ كلچ خلگ خدامة ببيته الله يعلم شمسويتله وهيج گلبتي راسه مادري لبستيله الاحمر لو الاسود بتوالي الليل و....

ما كملت جملتها وسحلتها من شعرها اوگعها على الصبة ورگعت راسها بالگاع، عاطت بصوتها العايق ولصمت حلگها بيدي وانطيتها كم راشدي فوخت گلبي بيها.. گبت والبنات حوالينا قسم يشجعوني لان يكرهون فاتن المكروهه وقسم ميقبلن ويردن يفلتنها من ايدي..

-عبق: هديني سمييية خليني اربيهاا ام الولددد هاااي

-فاتن: بت ال**** بووواگة الززززلم

دفعتني عنها وجرتني من حجابي هلستني واني لزمت بشعرها گطعنا بعض والبنات بيناتنا يفاككن، هي تسب وتفشر واني اجاوبها..

-عبق: ام الگمللل التتفاخرر بطيحان حظهاا وين مترووح مشهورة ومكييفة على الووضع ما خليتي وحدة ما خربتيهاا ما خليتي وحدة ما جريتيها لأنحطااطچ

-فاتن: اجرهنن وبكيفيي انتِ شكوو حارگة حمامچ اهتمييي بـ علي الحـق مالتچ الورطتي بييچ يالخداامة

-عبق: ههههههههه اي يلاا خداامة وخطبني انتِ منوو گلبچ ام المخدرااات؟؟؟

سكتت فاتن وفجأة لزمت راسها تبچي درت وجهي اشوف شكو ورايه وانهبطت من شفتها المديرة والمرشدة التربوية مادري منو صايحتلهن.. عاطن بينا وانسحلنا اني وفاتن ثنينا للمديرة وسألتنا على الصار سولفتلها من البداية وماهتميت گلتلها اني السحلتها من شعرها اول مرة وره ما بدت تفشر وتحجي بشغلات غير اخلاقية..

-المديرة: وتطگيها؟

-عبق: ست اني ما امد ايدي الا اذا وحدة تجاوزت حدودها ويايه من تحچي بجسم خطيبي گدام البنات ترديني اسكتلها؟

-المديرة: تجين تبلغيني واحنه نتفاهم وياهة!! مو تطگيها وين گاعدات بمدرسة انتن لوو بالشارع؟!!

-فاتن: شفتيها ست شلون ملختني حتى راسي صدع من الضربة

-المديرة: انتِ اخر وحدة تحجي فاتن ام المصايب كل يوم مسويتلج عركة ويه وحدة الا افصلچ واخلص منچ!

-فاتن: فصليني بعد أحسن اخلص من هالمدرسة الخايسة

شااطت المديرة منها وارجع واكول هالبنية ميگدرلها غير الله انسانة صلافتها تُدررس وعدها كلشي مباح ومتهتم مدمرة المدرسة دمار وكلما تريد تنقلها المديرة يجي ابوها يحجي وياهة ولان ابوها معروف وثگيل يسامحوها ويرجعوها..

-المديرة: ثنينچنن اكتب بيچن فصل حتى تتربننن وتتأدبن!! كاافي مصختنها يتعاركن على زلممة طايحات الحظظ

متت قهر وگوة لزمت روحي ما اكفش فاتن وادوس ببطنها، كتبت بينا فصل اسبوع ثنينا واتصلت بأولياء امورنا والحظ الفگر منو ولي امري صار؟ علي الحـق!!

رجعت للصف اللم جنطتي وكتبي وهي اجت تضحك مكيفة راح ترتاح اسبوع وتعتبرها اجازة الها، لزمت ايدي سمية مقهورة وحضنتني تواسيني بس حاولت ما ابين قهرتي گدام باقي البنات..

طلعت اگعد بالادارة واجت المرشدة التربوية تحجي ويانه شوية وگالو اجه ابو فاتن خليها تطلع، راحتله مكيفة تگعد بالسيارة ونزل ابوها للمديرة يحجي وياهة اسمع اصواتهم عالية، ابوها مثلها هم عايق ومينطي مجال اسمعه يگول لازم يفصلوني نهائي من المدرسة على السويته والمديرة تهدأ بي انوب ظل يعيط ويصيح..

-ووووينهم اهلهااا انا اتفاهم وياااهم

-المديرة: يا ابو فاتن البت يتيمة وماعدها احد

-يتيمة على رووحهاا چا اليتيم يخلي قرآنه ومصلايته ويدعي ربه يعووضه مو يكتل ببنات العالم!!

-المديرة: فاتن هم تجاوزت و...

كملت تفهمه السالفة وهو ابدد ماكو قفل الا يفصلوني متت خوف اذا انفصلت معناها احلم اكمل بعد والله سلوى تكسرني وتگعدني يمها..

دگ گلبي بقوة ونهضت اوگف على حيلي من دخل علي الحـق للادارة، باوعتله من بعيد بعيوني وهو بادلني نظرة ودخل لغرفة المديرة وابو فاتن موجود يبوووو علگت..

-ابو فاتن: انتَ ولي امرها؟؟؟

-علي الحـق: اي شصاير حجي؟

-ابو فاتن: علي الحـق احننه گرابة ومن سلف وااحد بس اختتك تجاوزت على بنيتي وطگتهاا هاي تربيتكمم؟؟؟

-علي الحـق: ما راح اعلق بأي شي الا اسمع القصة كاملة وافتهم الصار بالضبط

گعد ويه المديرة بغرفتها تشرحله الصار بس الحظ مگلتله شنو حچت فاتن بالضبط تخاف عليها من ابوها گلتله بس تجاوزت بالكلام وعبق ضربتها..

-علي الحـق: طگتها هيج منا والدرب؟؟

-المديرة: لا يعني فاتن تفوهت بأمور يعني....

-علي الحـق: شگالت بالضبط؟

-ابو فاتن: خووية شعلينا شگالت المهم رضيعتك طگتهاا

-علي الحـق: هالبت مو رضيعتي هي خطيبتي!! واريد اعرف شنو حچت بنيتك حتى اعرف اتصرف حجي!

-ابو فاتن: لو شماا گايله ما يحگلها تمد ايدها!

-علي الحـق: يعني فرضاً لو چانت مفشرة تريدها تروح تبوسها؟؟ لو تتشكر منها؟!

-المديرة: يمعودين صلوا على محمد احنه نريد نحل المشكلة ما نأججها

-ابو فاتن: انا ما ارضى الا تنفصل هالبت!

-علي الحـق: تفصلها سنة كاملة عبنها طگتها چم راشدي وبنيتك بدت بالتجاوز؟ هذا مو عدل!

-ابو فاتن: اي انا ما ارضى الا بهالطريقة

-علي الحـق: عساك لا رضيت! المديرة گاعدة وهي القاضي هنا هي تقرر شنو المناسب مو احنه الما شهدنا شي!

-ابو فاتن: بعلي حتى المديرة افصلهاا ولكم تعرفووون انا منو

-علي الحـق: ومانريد نعرف تفصلهاا منا ارجعهاا بنفس اللحظة لا تظل تبرز عضلاتك على الرايح والراد! يجوز عضلاتك ويه غيرك تطلع فاشوش!

-ابو فاتن: يعني تتحداني؟؟؟!

-المديرة: يا جمااعة صلووا على محمد

-علي الحـق: عاين حجي انتَ تطلع بعمر ابوي وماريد اتجاوز وياك احتراماً لشيباتك خلينا نحلها بالطيب ولا نظل نتحده بعض.. بنيات وصارت مشكلة بيناتهن كلمن يكض بنيته ويحاسبها ونفضها لا نظل نطولها وهي گصيرة

-ابو فاتن: اطووولهاا واطوووولهااا مااا اطلع مناااا الا هاااي البت تنفصلللل فهمتتت لو افهمك غصبببب

-علي الحـق: كضيت روحي بما فيه الكفاية بس چنك مو مال احتراام تحب الاهاااين ومتعود عليها! اگصص ايدددي لو ما بتك الباعرتهاا من البدااية ماااريد اتدخل بسوالف النسوان بس نعررفها بنيتك ما شاء الله لسانهاا بطولهاا

گبت ذيچ الگبة بيناتهم وابو فاتن لا استحى ولا اهتم لكلام حق وبقى يحجي عليَّ ويگول اني المو خوش وحق تسوودن گووم الادارة ما گعدها واكثر شي قهرني من گال ابو فاتن..

-ابو فاتن: حرامات عليك شون شاب شجاك ووگعت على هيچ بت

متت متتت بدمي شحالني صرت گلبي صار هالكبره ودموعي من وحدها گامت تنزل من اسمع علي الحـق يدافعلي ويرد ابو فاتن بكلام اقوى..

-ابو فاتن: انا ما اأمن بنيتي تبقى ويه هيچ بت بنفس المدرسة اخاف على اخلاقها وسمعتها

-علي الحـق: لااا تظل تخووط بصف الاستكاان حجي بنيتك صايررره علم للرايح والجاي تحللممم توصل لررربع من اخلاق مريتي وادبهاا وحشمتهاا بالعباااس حچاية زايددة احطك وادوووس بگلبك لاا عمرك يشمفعلك ولااا شيبااتك الضاامهن بصبغغغ قناادر اسووود

ظل ابو فاتن يحچي بشرف بنته وبسمعتها الطيبة توقعت علي الحـق يبلغه على سوالف المخدرات مال فاتن وزحفها على الولد ومن ضمنهم اخوته دگت روحها بالصوندة على علي الكـرار وكلنا شاهدين على رسائل الحب وبوكسات الحلويات الچانت تدزهن اله بس تريده يجاوبها وهو مغلس عليها، ورغم عصبيته بس ما ذكرهن حق ورزل ابوها رزايل غلس ولبس واخذني وطلع من الادارة..

ركبت سيارته واحس روحي شگدوتني فد خجلانة ومفتشلة منه، لبس نظاراته الشمسية وحرك السيارة بدون لا ينطق حرف بس تنفسه السريع واضح عليه شگد معصب وضايج.. مشى بينا مسافة واني كاعدة على نار بس اريده يحچي ويايه حتى افهمه الصار كله بس ما حچى..

نزلت راسي اللعب بأظافري مرتبكة راح نوصل للبيت وراح تطلع روحي غيير يفتح حلگه ويگول شي! ثواني وفزيت رافعة راسي اله من گال..

-ليش طگيتيها؟

ذبيت نفس مرتاحة وحلفت بداخلي ما اضم شي ابد واسولف الموضوع من البداية للنهاية..

-عبق: تجاوزت هوايه وتحچي حچي يخزي

-عليج؟

-لا

-چا عليمن

-حچت حچي على شخص يهمني وبس

-هممم

هز راسه ساكت وسفط السيارة على جهة من الرصيف گبال ابو العصاير والمرطبات، نزل اشترالي عصير برتقال ورجع للسيارة انطاه الي وگال من وره خشمه..

-شربي

-ماريد

-خوش

اخذه اله يشرب منه وكمل يسوق شگد ضجت من تصرفه بس ماحچيت، حط العصير بيني وبينه بحاملة الاكواب وگال..

-ذيچ البر*** حچت على حبيبة مو؟

-لا

نز ودار وجهه عليَّ نزل نظاراته عن عيونه خازرني، سويتله بيدي حركة "شبيك" ونتر بيه..

-چاا منووو الزماال اليهمچ؟؟

-هسة انتَ شفهمت وعصبت

-لان اناااا كاتل روووحي عليج اعااارك ذبااان وجهييي وراااح اموووتن من القهررر لان واااحد **** ابن **** جاااب طارريچ وانتِ مااا تهتمينن دااائماً حاطتني اخررر اهتماماتچ عبق!!!

-وانتَ شلون عرفت حاطتك اخر اهتماماتي شلون استنتجت هالشي!!

-كلللشي بيچ يبيين تصرفااتچ كلااامچ افعااالچ كلللشييي يبين انتِ مااا مهتمة لهاي العلاقة ومااا ترديهاا وانااا المطييي ميتتت على طييفچ!!

-علي الحـق لااا تحچي بأشيااء انتَ جاهلهاا

-چااا نورينيي عببق سولفيلييي علمينييي ولا تخليني ابقى عااايش بجههل وياااچ دكتوورة يجووز نطلع مو من مستوااچ ومو الي تطمحيله احچييي وصارحينيي

-انييي تعاركت علموودك تكااتلت وانفصلتت لان وحدة زباالة حچت بيييك وتغزززلت بحچيي يخزززي گدام كل البنااات عناااد بيه تريد تحرگ گلبييي

ضرب الستيرن بيده ودار وجهه يواجه الشارع يسوق ويتنفس سريع مدخن، لزم الستيرن بأيد وحدة وطلع جگارة من جيبه حطها بحلگه وشعلها يدخن بس روحه طافرة..

-علي الحـق: تردين تقنعنيني سويتيلچ عركة شكبرها لان وحدة تغزلت بيه؟!

درت وجهي للجامة و ما جاوبته، كرر سؤاله ونغزني بباكيت الجگاير بأيدي يريدني ارد..

-اي!

-چذابة

-والله العظيم اييي سحلتهااا سحل هم!!

-ما اصدگ

-لاا تصدگ خوش؟؟

ضم شفايفه لحلگه يبلع ضحكته ونزع نظاراته يذبهن بصفه، اخذ كلينسه يمسح على وجهه عرگان رغم الجو مو حار.. هز راسه اي كم مرة وفاجأني من گال..

-انا الفجر طالع لبغداد واتأخر هالمرة لوره فرحة الزهرة

گلبي انخمش ماعرف ليش بس حاولت ابين روحي طبيعية، اجه ببالي سؤال شعنده مطول ببغداد بس ما سألت وبقيت ملتزمة الصمت لحدما وصلني للبيت..

-متنزل لعد؟

-لا

-وين رايح؟

-عندي شغل مهم

يحچي بتعب ويمسح وجهه بالكلينسه، هزيت راسي اي وسديت باب السيارة ودخلت للبيت بالي بقى يمه وافكر شبي وليش احسه بعده زعلان من الصار؟ معقولة مصدگني من گتله دافعت عنك؟ معقولة هو عباله اني اكرهه وماريده؟ معقولة اني صدگ مصختها وياه ومزودتها بسوالفي؟ يربي شلون بيه شلووون..

دخلت للبيت وبداخلي مقررة اليوم اسوي كيكة بالجوز واضمله منها عود اخلي حبيبة تصعدها اله خاف يگول عني خفيفة اي اي.. عود بس الچاي اني اودي واكيد هو راح يحچي ويايه على الصار اليوم وارجع افهمه من اول وجديد بس خاف يترعن واني من اشوفه مادري شيصير بيه اظل ارجف يخوف هالتمساح الزاحف ما أمن بي..

دخلت للبيت وضحكت على افكاري عبرت الصالة اصعد فوگ ووگفت على الدرج ويه طلعة سلوى من غرفتها وگالت بأبتسامة غريبة عكس العادة..

-عبوقة نزلي جيبي ضيافة عدنا خطار ماما

-عبق: هاي وياي؟

-اي يلا بنيتي يلا

ابتسمت واحس بگلبي رفرف ويه كلماتها، ذبيت جنطتي اضحك وطرت للمطبخ طلعت صينية وصبيت عصير بگلاصات توقعت جايين قليلين فـ حطيت بس لـ اربع نفرات وطلعت كيكة مال البارحة وشلت الصينية اوديها لـ سلوى..

-سلوى: انا ماكدر جاي ابدل روحي انتِ قدميلهم هي مره

-تمام

-راح نطلع قراية بعد شوي عود تعاي وياي انتِ والبنيات احسن من گعدتچن بالبيت

ابتسمت مكيفة وهزيت راسي اي وتقدمت للاستقبال، دگيت الباب خفيف واجاني صوت رسمية تگلي تفضلي.. دخلت للاستقبال مبتسمة بدون لا اباوع على احد رفعت راسي ويه صوت مرة تگول..

-ما شاء الله عليج حبيبتي.....

يتبع 👑....

━━━━━━ ♛ ━━━━━━

هاا تَـمني هاا شنو هالحركات عيني ما عرفناچ 😉

وعبق فوختي گلبي بـ فاتن 🙂
+ چنه علي الحـق راح يمارس الصمت العقابي على عبق 😂

توقعاتكممممم 👀🩷🩷🩷🩷🩷