رواية الامارة الفصل الحادي والعشرون 21 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

شحلاتك من تمر على البال وكلها تصيح بالك وين.. ♥️

━━━━━━ ♛ ━━━━━━

"حــبيبة"
چتفي راح من گرصات امي راح تنجلط ومرة ابوي وجهها اصفر ومغشية روحها بالشيلة وفراقد تعض بأصبعها وتشمر بيدها عليَّ وتگول..

-فضحتينا يمعزااية فضحتيناا

غمضت عيوني طالعة روحي منتظرة مفعول الابرة يمشي بيه، غلست عنهن اريد انسى ابوي واخوتي ومنتصر وحاكم واگفين بره اريد انسى انا انفضحت وانشهرت وخليني مركزة بالوجع اشرفلي..

كضت ايدي حور تواسيني على رزالات امي ما سكت لسانها وهي تغرد..

-سلوى: ماعدها مستحه مااكو الحياء نقطة وشلتيها من گصتچ موو يمة؟؟ مو يا بت ابوچ موو؟؟

-حبيبة: يمة مابيه احجي

-سلوى: شتحجين ولج شتحجين ابوج واخوتچ وجههم هاگدوته صار گدام الزلم عمتت عينج يا سلوى بنيتچ فضحتج وخزتج

-حور: خالة انتِ لو شفتي حالتها متحچين هالحچي والله متنا خوف عليها واخوية مقبل يرجعها للبيت من شافها هيج تخربطت

لطمت امي رسمية على رجلها وفراقد رجعت تشمر بيدها عليّ وعلى حور هالمرة، اشرت لـ حور وهمستلها "ميخالف" خاطر ما تزعل بس البت زعلت واخذت على خاطرها هي شعليها فراقد استلمتها..

ضجت وگمت وره ما حسيت روحي احسن ولفتني امي بعباتها وتگرص بيدي وانا منزلة راسي مالي عين اعاين لوجوه الزلم الواگفين.. طلعت منزلة راسي ورفعته ويه صوت اخر بشر متوقعة اشوفه..

-غفار: عمييي ليش تچذبون عليّ ليييش چا مو هاي حبيبة طلعت مرريضة

نزيت انا وحور من سفطه الامير على الحايط مفلحم من العصبية، كضه من ياخته مخنزر ونتر بي..

-گلناا مابيهاا شي لااا تلححح

-غفار: شبيك عصبي غير تفهموني شبيها تحچوون لا اروحن للطبيب افتهمم

-الامـير علي: انتَ روووح خاطر ارجععك لابووك مگصبب

عبرناهم وسور ونور اجوا ورانه، عاينت بطرف عيني منتصر واگف وما يباوعلي وحاكم على بُعد منه جاي ينتظر اخته.. راحتله حور كضت ايده وطلعوا يمشون گدامنا وانا صرت وراهم..

ركبت سيارة سور وامي تلفلف بيه بعباتها وما ملحگة وانا اضمضم بوجهي عنهم، گعدت بالكراسي الوره بس سور ما طلع بينا بقى يسوي شي بتلفونه، طگت روحها لفراقد ونترت بي..

-ماا تطلعوون شبيكم حنفصتووا

-علي النور: حنفصتوا شني لو هاي چلمة جديدة منچ؟

-فراقد: اطلع اطلع ابن الهاير

-علي السور: خالة بلا زحمة عليج فد قاموس خاطر نفتهم شتحچين هم حگنا هذا نخاف لا جاي تفشرين علينا

يحچون طبيعي احسهم ما يدرون شبيه وشوي صار عندي امل يكونون الباقين هم ما يدرون شكو وعبالهم بس متخربطة، ارتاحيت اكثر من اللتفت سور عليّ وگال بزعل..

-بالعباس ما ادري بيج مريضة هيج چان اجيتچ وطز بأبو الجملة

-سلوى: لا لا مابيها شي لا شنيي

-علي السور: عايني وجهها اصفر ليمونة عمت عيني شني مابيها شي

عصر ايدي بين ايده مقهور ورجع يگعد عدل بكرسيه من مروا من يمنا حور وحاكم، يماااا غصت بهدومي من فتح سور الجامة مالته وصاح..

-رحم الله والديك دكتور حاكم زحمناك خوية

تقرب حاكم من سيارتنا مبتسم ووگف قريب جامتي يا يممة يا بوية راح اموتن وعلي، عكس عينه يعاينلي ورجع يباوع لـ سور..

-حاكم: لا خوية شسويت قابل الف سلامة عليها

-حور: شكراً لان اجيتوا عليها خطية هوايه توجعت

بهت حاكم يباوع لاخته النبزت تحط روحها بالنص وسور ونور ظلوا صافنين، ضميت وجهي بين ايدي ابلع ضحكتي سودة عليّ هاي خاف عبالها انا مضطهدة بالبيت واهلي ما يهتمون من يسمعون بيه مريضة وما يجوني..

ابتعدت بسرعة تركض لسيارتهم وحاكم رفع ايده يسلم على اخواني وراح، باوعتلهم منا اشوفه مبين جاي يدردم عليها على الموقف الصار لان ظلت تضحك وضامة وجهها بيدها مستحية..

-علي السور: هاي البت وياچ بالجامعة حبيبة؟

-حبيبة: اي

-علي السور: تصير اخت الدكتور؟

-علي النور: شكو شكو كل هالاسئلة بس لا تنازلت عن رهف؟؟

-علي السور: فحطتني بـ رهف خووية ماا احبهاا مو ببالي مااا رايدهاا

-رسمية: ولك نور انا چم مرة گتلك توب من سالفة رهف!

-فراقد: عوفكم من رهيفة شني اليوم ما ترجعونا للبيت مو خسنا هنا

-علي النور: جاي ننتظر حويدر

-سلوى: وين تگعدون حويدر بحضني

-رسمية: اي بعلي هو احنه هنا ووحدة بحضن الثانية صايرات وين نودي حيدر

-علي النور: هذا طلع هذا

اللتفتت اشوف حيدر جاي يطلع من المستشفى وبيده چيس مادري شحاط بي، ضربت فراقد على كرسي علي النور وگالت بصوتها الخشن الينزز..

-امشيي عوفه وامشي

-علي النور: خايبة شني نعوفه هذا الضلع الما ينشلع ما اعوفه

-فراقد: سوير تعوفوه لو اخزيكم؟؟

-علي السور: دخيل علي بس لا تريعين هنا وترجين المستشفى والبيها

حرك السيارة بسرعة لان نعرف فراقد ما تتشاقه وتسويلها سالفة تفشلنا هنا، طلع من الكراج وحويدر يصيح من بعيد..

-هيووووو هيووووووو سوووور اجيت اناا اجيييت

طلع سور راسه من الجامة يجاوبه بصوت عالي..

-اعذرنااا يابن اخوي حكم القوي على الضعيف فراقد السحارة وياانه

-فراقد: سحارة بعينك ابن الفايخة

-حيدر: چا معذوورين خوية رووحوا وداعة الله

طلع بينا سور للبيت واني بوجهي لغرفة امي رسمية مابيه اصعد فوك، نمت بفراشها ولفلفت روحي مستحية ماريد اشوف اخوتي ولا احط عيني بعينهم بعد.. غمضت عيوني وبساع خذاني النوم ورجعت حسيت على ايد حنونة تمسح على راسي وبوسة خفيفة تنطبع على گصتي، عرفته ابوي من عطره وماكدرت افتح عيوني من الفشلة..

-سلوى: ابو علي مابيها شي والله

-شيخ علي: ليش طگيتيها بالمستشفى سلوى؟؟

-سلوى: هاا؟ انا؟ انا طگيتها؟؟ لا ابد يمته هاي

-شيخ علي: حسبالج ما شفت وانتِ تگرصين بيدها؟؟ انتِ شوكت تتوبين سلوى شووكت!

-سلوى: فضحتنا علي غير اربيها چا مو انا امها

-شيخ علي: شتربين منها ولج؟؟ البت تخربطت وخذوها للمستشفى لاا تظلين تحمليها مسؤولية شي مو بيدها!

دمعت عيوني وانا اسمعه يحجي بالهمسة ويه امي واعرف اجه هنا يحجي بالتحديد خاطر اسمع وما استحي منهم واظل اكل بروحي، اروح فدوة لحنيتك يا بوية..

-سلوى: انا بس ما ردتها تخزيك بين الوادم

-ولج بنيتي تشرفني ما تخزيني! ماكو يوم نزلت راسي لا تلوصين بالحجي!

-سلوى: شيخ الصار جبير وادري بيك تفشلت ومقهور وحازة بگلبك شفت وجهك هناك شون تغير ليش تدوس على نفسك لخاطرها وتحمل روحك اكثر من طاقتك

-استحيت وتفشلت عبن بنيتي مرت بهيج موقف زين وبعدين؟؟ جاوبيني وبعدين؟ شني اذبحها؟؟ لو اغسل عارها؟؟ ولج هي شسووت؟

-مادري مادري

-سمعي يا سلوى وعلي وراس ويلادي علي لو سمعت لو حسيت بيچ طاگة حبيبتي بالعباس ابو فاضل اردچ لهلچ لا تكولين ما گلت!

-تردني لاهلي الباعوني علي؟؟ ما غزرت بيك العشرة ما غزر وياك تعبي وخدمتي والضيم الكليته من خواتك من يوم طبيت بيتك!

-وانتِ ما غزر وياچ شي انا عزيتچ وجبتچ لهالبيت مو دخيلة انا جبتچ مرة! دست على ام ويلادي الحاربت الدنيا لخاطرها خاطر ما اطلعج من بيتي مذبوحة! ما غزر بيج هذا ولعبتي لِعب ببيتي وشفتي نفسچ على الباقيات وعلى اهلچ الي هم اقرب الناس الج!

-سلوى: هَلي باعوني برخيص وانتَ شريتني بغالي لا تندم علي ابوس ايدك لا تندم لان تزوجتني

نزلت على ايده تبوس بيها وعلى رجله هم اكدر احس شنو جاي يصير بدون لا افتح عيوني، حسيت بنفضة ابوي يشيلها من يم رجله ما راضي..

-كافي سلوى لا تسوين هيج

-محد وگفلي مثل وگفتك ما انسى فضلك وياي للموت.. اختي باعتني وتهمتني باطل وانتَ سكتت حلوچ الوادم وثبتلهم انا بت وشريفة

-لا تبچين سلاوي مسحي دموعچ ام حبيبة لا تحس بنيتج وتخترع

-اعشگك انا علي لا تبيعني بيوم بالعباس اذبح روحي واسگي ساحة بيتك بدمي

-اسم الله لا تكولين هيج بوية ما يصلح

-اختي الي هي من دمي ولحمي واقرب بشر عليّ باعتني وانتَ السترت عليّ

-باعتچ وانتِ ربيتي بنيتها عبق وما خليتيها حايرة جبتيها هنا يمچ وحافظتي عليها وين اكو مثل گلبچ ما تگليلي؟ چا شبيچ ويه حبيبة تزعليها

-ما ازعلها التوبة بعد

-عفية سلوتي كلشي ولا حبيبة ابوها گلبي يوجعني من اشوفها ضايجة شون لو افتهمت بيها انطگت بعلي ما اسكت المرة الجاية وانا حلفت..

نزل على راسي يبوسني مرة ثانية وطلع من الغرفة وامي اجت تبوسني، كل هذا وما گعدت ولا بينت انا سمعت حديثهم الصدمني.. ام عبق هي الفضحت امي! هي الخلتها تطلع من بيت اهلها شبه عريانه! هي السبب الخلت جدي ابو امي يريد يدفنها وهي عايشة!

صح امي تصالحت ويه اهلها واكبر دليل خطبت بت خالتي شمس لـ علي البدر بنفسها بس بقى جدي ما تحچي وياه وهو ما يعاين لوجهها، رجعت علاقتها بخواتها واخوتها بس جدي ما يطيقها وحتى انا ما يحبني..

غفيت من التفكير وگعدت على صوت امي رسمية تگومني وجايبة صينية بيها شياش معلاگ وگلاص عصير برتقال، دخلت مبتسمة وگالت..

-الامير جابه الچ مخصوص

لطمت على وجهي گدامها وهي ماتت ضحك، حطت الصينية يم راسي وگالت وعيونها مدمعة من الضحك..

-رسمية: ولج تخزينا خزي اليوم تجرصنا بالسلف

-حبيبة: شكد عيبب يمة راح اموتنن

-رسمية: يلا يمة انگضت لا تفكرين بيها، اموري طلع جاب چبدة ومعلاگ وحطهن على الميز وگال سووهن لـ حبيبة ههههههه حچاهة مدنگد راسه وركض يصعد لغرفته

-حبيبة: يمااا وين اودي وجهي منه

-رسمية: خايبة بس الامير وابا الحسن وبدر عرفوا الباقين ما يدرون حسبالهم متخربطة من فقر الدم

سكتت ما حجيت شحچي شگول خليني مچبوبة وكاعدة هنا اشرفلي، سوتلي لفات وجبرتني اكل بس وين اكل وانا نفسي ما طايقتها هسة تعبانة والوجع رجعلي.. كملت اكل وانمطلت بمكاني اغطي راسي جوه البطانية وجريت موبايلي اشوف شكو ماكو..

تنرفزت من دورت بين الاشعارات وما شفت رسالة من منتصر مادري ليش تخيلته راح يراسلني يسأل عني بس ماكو كلشييي ماكو.. سديت الموبايل ما مهتمة لرسايل احد ثاني وگعدت گالبة وجهي والوجع يفور بگلبي..

طنطن تلفوني بأشعار جديد من حاكم على الماسنجر، انا منا ضايجة وطاگة روحي ومنا رسالته طلعت بوجهي و كاتبلي..

"وينچ حبيبة؟؟؟؟؟؟؟"

"؟"

"؟"

"؟"

"؟"

"؟"

"؟"

"؟"

"؟"

"؟"

دزولي وراهة برسائل منفردة علامات استفهام نرفزنيييييي، فتحت رسالته وشفت خمس رسائل فوگ كاتبلي عفتهن كلهن وكتبتله..

"شكووو!!!"

"انتِ بخير؟"

"شعليك؟؟؟"

شاف الرسالة وما جاوب، شمرت التلفون ضايجة من نفسي ومن جوابي الناشف ومن منتصر! عود ليش ما راسلني؟ ليش ما مهتم؟ معقولة لهدرجة انا ما اهمه؟... زين لحظة انا شبيه ضايجة ومقهورة يجوز الزلمة خجل وما راسل خاطر لا يحرجني.. اي اكيد ما راد يحرجني عيب لو راسل شني وين گاعدين احنه..

ضحكت على روحي بهالحجي ورجعت لموبايلي اشوف باقي الاشعارات من صديقاتي ومن تَـمني وتالة و حور هم مراسلتني هواي تسأل عن وضعي، فتحت رسالتها وجاوبت..

"انا زينة حبي لا تخافين"

هم فتحت الرسالة وما جاوبت شكيت بشي بس استبعدته بساع وگمت لغرفتي، سبحت وبدلت ملابسي وفتحت ملازمي اقرا شوي قفلت الباب على روحي عندي امتحان مهم هو بقى بس باجر واعطل انطونا عطلة زيارة الاربعين..

شوي واجوني البنات يتطمون عليّ ضحكوني كل وحدة جايبة بيدها شي، عبق بيدها عصير برتقال وتَـمني بيدها نساتل وتالة وشمس جايبات حب وابرار صعدت نفسها تلعب بعدها هستوها گاعدة وتقيأت على فراشي..

انخبصنا بيها وما رضت تبقى نزلت تكول تريد تنام، من شافوني البنات كاعدة اقرا عافوني وكلمن رجعت لغرفتها تگابل ملازمها وعبق امي صاحتها خاطر تنظف السطح..

-حبيبة: والله لو بيه حيل اجي وياچ عبيقة

-عبق: لا يمعودة شينرادله هسة بسرعة اكمل ما اطول

نزعت ربطتها ولفتها ليوره مثل عادتها من تشتغل وطلعت من غرفتي، كملت قرايه تعبت وعطشت ونفسي ما تريد عصير محتاجة ماي.. طلعت من غرفتي اتسحب على اطراف اصابعي ماريد اتواجه ويه اخوتي بس سمعت اصوات سور ونور وحويدر ومرة ابوي وفراقد جاي من جوه..

-علي النور: شون صارت حبيبة

-رسمية: زينة جاي تقرا فوگ

-علي السور: يمة والله انا اگول لو نسفرها خاطر نتطمن شو الطبيب هذا ما صدگت بي احس بيها شي

-رسمية: لا يمة ما يحتاج

-حيدر: حبوبة شني ما يحتاج وجهها اصفر مال موته خفت عليها وعلي اليوم كله افكر بيها

-علي النور: حتى انا خصوصاً من شفت دكتور حاكم ما يحط عينه بعيونه حسيت بيها شي وما يسولف

-علي السور: ولك انا هم انتبهت ومنتصر وجهه غادي دم ويضرب صفنات گلت ذول اطباء ويفهمون اكثر من عدنا

-حيدر: حبوبة كل هذا وتردون تسكتون؟؟ شنييي ننتظرها تموووت

-رسمية: ولكم كاافي مابيها شي البت لا تفاولولها

-حيدر: يا العباس دخيلك عمتي الحبيبة لو ماتت ياهو يوگف بوجه امي من انكتل بعد

-علي السور: يمة لازم نسفرها وناخذها للبنان لازم

-علي النور: اي يوم خاف يطلع بيها سرطان واحنه ما ندري وتموت حبيبة تروح بعد ماعدنا حبيبة

-حيدر: حبوبة هسسسة تحضرون الجنط وتاخذوها هسةة وينه جدي اليوم ما اسكت اليوم..

-رسمية: ووجعععع انچبووا كاافي بزعتونه

گمز حيدر بنصهم معصب ويأشر بأصبعه..

-حيدر: هذا هذا عمي بدر اجه هذا تعال اسمع عمي حبوبتي ما تريد نعالج حبيبة!!

-علي البدر: نعالج حبيبة؟؟ ليش شبيها؟؟

-حيدر: سرطان

-علي البدر: ياااا عليييي

-رسمية: سمم الحسن ابن الغبرة سرطان بعدوينها ان شاء الله

-علي البدر: فهمونا السالفة يمعودين!

-علي السور: بدر اظن حبيبة مريضة اليوم وگعتها ما عجبتني وخذت حيلي وياهة

-علي البدر: مابيها شي لا تحطون ببالكم

-علي النور: عااين المن حچيناا لبدر الصخررر

-علي البدر: ولكم.. ولكم اششش يلا ولو هناك لا تلغون لا يجي احد

-علي السور: واذا اجه احد؟ حتى بالسرطان صرتوا تستحون منه!

-علي النور: انتم من باا ملة انتممم حرررام الله يرزقكم ببنات حررااام تعوووفوهن هييج

-فراقد: ولكمم عليها الشسممه ذييج ذيييج مال النساوين

لطمت على وجهي حيل ومديت راسي اشوفهم منا بشكل اوضح، فجرتها فراقد بوجوههم عفية هالمرة ولا تستقر وتلصم حلگها انوب اخوتي ظلوا واحد يعاين للثاني وحويدر بعده ما مفتهم السالفة..

-حيدر: يعني شني

-علي السور: لا بروح امچ!

-فراقد: اي كافي طولتوها وهي گصيرة

-علي النور: وهاي امة لا اله الا الله وحاكم ومنتصر ما يحطون عيونهم بعيوننا عبنهم يعرفون؟؟؟

-فراقد: اي

-علي السور: ولك گابلني نووور گابلنييي احوووو احووووو

-علي النور: لطمننن حيل ويااانه.. حووو حووووو

تگابلوا يلطمون على چتافهم ويطفرون مثل لطم النسوان وعلي البدر يفر بيده ويغم بيهم وحويدر ما يدري شكو بعده ما واصلتله الاشارة بس شاركهم باللطمة..

-حيدر: لطمن خايبات لطمن.. لطمن حيييل كلچن ريحة زباالة لطمن حييل

-فراقد: زبالة ريحتك يا خايس رسمية شمالج ما تحاچيهم ذول البريعصية

-رسمية: راسي دايخ مالي خلگهم بدر گوملهم كلمن رگعه نعالين واشمرهم بالساحة

-علي السور: ولج يمة يبووووووو انفضحنااا يبوووووو

-علي النور: شلون اعاين لوجه منتصر بعد يبوووووو

-حيدر: دخيلكم لحد يذبحها راضي يصيحولي المگرن وين ماروح بس اليمد ايده على حبيبة اكسرهاا وعلي

-فراقد: عاين هذا الصرصور عاين ليش نذبحها ولك شمصخمة البت

احس حرارتي صعدت والله گوة رجلي حاملتني، شردت لغرفتي وحبست روحي هنا لحد ثاني يوم طلعت ويه علي الكـرار ولابسة مناظر شمسية خاطر ما يشوف عيوني ولا انا اركز بعيونه..

وصلنا للجامعة ونزلت اول وحدة اركض، طبيت للقاعة حضرت محاضرتي وطلعت لحديقة القسم انتظر حور اليوم ما تلاگينا الصبح.. شفتها من بعيد تمشي ويه وحدة من بنات قسمها بعدها جديدة على المكان وما كونت صداقات بس فرحت من شفتها تمشي ويه وحدة..

رحتلها مبتسمة ولابسة جنطتي على ايدي وملازمي بالايد الثانية، وگفت گبالها ضبط وسلمت بحرارة..

-هلو حبي شلونچ شو ما شفتج اليوم

-حور: هلو

-كملتي محاضراتج؟

-لا

-چا زين خاطر اعزمچ على لفة گص ومقبلات هنا لفاتهم تخبل

-لا شكراً

انتبهت لجوابها بارد چن ما تريد تحچي وياي، استغربت وحزت بنفسي بس خليتها براحتها.. ابتسمت طبيعي وودعتها ورحت اگعد ويه صديقاتي بس عقلي كله وياهة شبيهة؟ معقولة ضاجت من ردة فعل فراقد امس من عاطت بوجهها لو اكو شي ثاني شاغل بالها؟

طبيت للمحاضرة الثانية وما تحملت ابقيها بگلبي واغلس، يجوز الغلط مني خاطر اعتذر منها ابوي دائماً معلمني الاعتذار من شيّم الكبار وما يصير نخجل من كلمة اسفة بالعكس تكبر شاننا وتسهل حياتنا..

ادري بيها عدها محاضرة بكتريا اليوم وبقاعة رقم 4 بالتحديد يحضروها جماعة المرحلة الثانية، وگفت انتظرها علما بدوا الطلاب يطلعون من القاعة وشفتها تطلع بس وجهها مگلوب..

-حور

اللتفتت تدور ياهو يصيحلها ومن شافتني ضحكت فرحانة بس بساع خفتها چنها تذكرت شي وهنا تأكدت هي ضايجة من موقف صار امس..

-اگدر احاچيچ حور؟

-اي

تمشيت انا وياهة لنادي القسم، اشتريتلنا گهوة وگعدنا على طاولة، ما مدت ايدها على كوب السفري مالتها ولا لمسته لحدما سألتها..

-شو احسچ اليوم ضايجة صاير شي مزعلچ حور؟

-تردين الصراحة؟

-اي

-اي اكو

-خير ان شاء الله

-حبيبة البارحة كلش انقهرت من رسالتج حسيت بأحساس كلش مو حلو

-يا رسالة؟

-تطولين بالحروف عبالك دتنترين بالحجي ومزعوجة واني بس ردت اتطمن عليج

-هاي يمته؟؟

-البارحة من كتبتلي "شكووو" و "شعلييييك" هذا مو حاكم الديراسل هاي اني وحاكم چان گاعد بصفي يشوف ردچ وشفت وجهه كلش انقهر حسيته خجل

بهتت ملامحي ساكتة، عرگ وجهي وايدي من الخجل ونبرة صوتها وشلون تحجي بزعل زادت وضعي سوء.. اردفت بصوت ناصي تگول بأبتسامة خجل..

-حبيبة حاكم معليه وگلي لا تراسليها من تلفوني بس من شفتچ متجاوبيني ظل بالي وگلت يمكن تجاوبين حاكم بسرعة لانه رجال وتستحين منه..

-حور انا اسفة والله مادري هاي انتِ

-ماشي حبي اني طز بيه بس والله يا حبيبة اخوية رجال محترم درس وتعب على نفسه وعلينا وهاي اول مرة اشوف بنية تحچي وياه بهالطريقة خصوصاً والرسالة المكتوبة من حسابه واضح مال انسان قلق وظل باله

غطيت بهدومي اول مرة اعجز اجاوب بشر، فتحت حلگي اريد انطق اريد اسولف بس ماكو ظليت امطمط بالحجي..

-صح كلامچ حور وحگكم عليّ انا بس چنت تعبانة كلش و.. و..

-حور: لا حبي عادي لو انتِ حاچية ويايه هيجي اصلاً ما ازعل بس لان اخوية وشفته شگد انكسر وره رسالتج واعرف حاكم شگد گلبه طيب وتظل الحجاية تحوس بگلبه ويفكر بيها

هزيت راسي ساكتة ماعرف شسوي، اعتذر منه؟ بس اذا اعتذرت خاف تبين غير شكل وخاف نظل ناخذ وننطي بالحجي وتمصخ السالفة بس هم اذا سكتت فشلة..

-حور: شوف ابن الحلال بذكره هذا حاكم ديتصل بيه اجاني، باي

-حور

-ها حبي

-تكدرون توصلوني؟

مادري ليش طلعت من حلگي وشنو هالجرأة مني امس متخربطة گدامه وفاضحة روحي ومضوجته واليوم اريده يرجعني للبيت!، هزت راسها حور مبتسمة واشرتلي بيدها حتى اگوم وما ترددت شلت جنطتي وملازمي ورحت وياهة بدون لا اتصل بأخوتي وابلغهم وهالشي بحيااتي ما مسويته..

ركبت حور بالصدر وانا وگفت بره مترددة هسة ياله استوعبت صخام وجهي شموديني وياهم خرب راسج المحجرر حبيبة، استسلمت بالاخير ودخلت سلمت ورد السلام بهدوء ونصى القصيدة الچان فاتحها بمسجل السيارة..

-حور: حاكم نوصل حبيبة لبيتهم عفية

-حاكم: تمام

-حبيبة: راح ازحمكم خوية

-حاكم: لا

جاوبني بس بهالكلمة ومن وره خشمه يبووو هذا منفوخ عليّ صدگ چذب هو انا محتاجة واحد يراضيني مو اگعد اراضي بالوادم..

-حور: حكومي طلعت حبيبة تعرف هاي اني الراسلت من حسابك تگول عرفت اسلوبج هههههههه

ابتسمت ممتنة لانها دافعتلي بس حاكم سكت وما انطى ردة فعل وحور هم سكتت، اكيد جاي يگول بعقله شون عرفتها وانا كتبت "شعليك" بصيغة مذكر؟..

-حور: حبيبة ملازم الفسلجة مجبتيهن مو؟

-حبيبة: لا والله نسيت باعي اذا تردين نزلي وياي لبيتنا انطيهم الج وتغدي يمنا فرد نوب

-حور: اي ايي اجي خليني اروح يمهم حاكم

-حاكم: لا

-حور: حباب حباب هاي لييش اريد الملازم

-حاكم: ماكو داعي

-حور: لعد شلون ادرس

-حاكم: عود اني اجيبلچ غيرهن

سكتت حور واندارت الي تعاينلي، هزيت راسي متفهمة ضوجته وحچيت من مكاني..

-دكتور حاكم انتم راح تستقرون هنا؟ لان سألت حور وتگول ما تدري الموضوع وراك عايفي

-حاكم: مادري

-حور: حبيبة دتسأل علمود جامعتي تگول غلط اذا ابقى اتنقل بين الجامعات راح تتيه عليَّ المواد وتتخربط

بين كلامها واهتز موبايلي بيدي بأسم "منتصر" شهگت جوه انفاسي وجاوبت بساع وبنفس اللحظة حاكم رفع عيونه للجامة يسألني..

-حاكم: ليش تتخربط عليها المواد؟

حرت مادري اجاوبه لو اجاوب منتصر الظل يصيح "الو" بالموبايل، اشرت لـ حاكم بأصابعي بحركة انطيني ثواني وجاوبت منتصر..

-حبيبة: هلو منتصر

-منتصر: شلونچ حبيبة؟ ان شاء الله بخير

-بخير تسلم وانتَ شلونك

-انا زين وجايين لبيتكم اليوم على الغدا

-صددگ؟

-اي وگلت اتصل بيج اشوف تلحگين علينا لو بعدج بالدوام

-لا لا هاي انا بالطريق هسة جاية، اگلك بناتك وخواتك وياك؟

-اي كلنا جايين

-هلا بيكم

-هلا بيج ام راس.. يلا لا تتأخرين جاي ننتظرج

-هههههه خوش مسافة الطريق وانا يمكم

ودعته وانتبهت لضحكتي من الاذن للاذن وحور دايره عيونها عليَّ وتضحك بالهمسة، دارت عينها لاخوها العاگد حاجبه وساكت ورجعت عيونها عليَّ، غمزت وگالت بأبتسامة..

-وجهچ يضحك حبيبي

عضيت على شفتي ونزلت عيوني للموبايل اضيعهن من نظراتها ونظرات حاكم الي صار يباوعلي من المراية، الطريق اخذناه على الصامت لحدما وصلني للبيت تشكرت منهم ونزلت اركض وتلگني بنات منتصر بالساحة يلعبن..

ركضت اسلم عليهن وابوسهن بس ما يحبني وهالشي كلش يزعلني، طلعلنا منتصر وامي والامير وابوي بره سلمت عليهم وگضيت باقي الوقت كله ويه بنات منتصر شبعتهن حلويات ولعب وما طلعتهن من البيت الا خليتهن يبوسني ويحضنني ويگولن "احبچ".. صدگ لو گالو الجاهل يتقشمر بساع..

مشت الايام سريعة وخالة تَـمني انتقلت لبيتهم الجديد وتَـمني اغلب وقتها ويه خالتها حتى الامير ما يشوفها زين واخذتلها اربعة ايام تبات وياهن خاطر يرتبون البيت بس شنيي الامير لو اكضه ينفجر من القهر والمشكلة ما يگدر يمنعها لان محتاجات مساعدتها..

وگف ابوي على حيله وصار ما يحتاج عكازة يوم 17 صفر وياا فرحتنا ويا سعادتنا، رجع لهيبته وكشخته وحياته القديمة واخذ الديوان حاصل فاصل فرحان برجعته ونوى باچر نقرا ببيتنا ونسوي قراية..

بدينا نحضر نركض ركض ما نلحگ ماكو وكت وابوي مُصر الا باچر المجلس، خابر اخوتي الملتحقين ورجعهم غصب من واجبهم ومادري شلون رهموها بأجازة ليومين بدون لا يحصلون عقوبة..

اجتمعنا كلنا بالصالة من دون امي وابوي ملتمين وفرحانين بجيتهم، افترت شمس على الكل تنطي گلاص عصير والضباط بعدهم ينگون..

-علي الدر: وكت مجلس هسة؟ كلش ما مناسب روحي طلعت محد يرضى على الاجازة

-علي التـقي: چا الذروة هاي انذار ليل نهار، من رحنا للواء حسين صار يقسملنا وعلي الحق الچلب دگله اليتيمة گاله ابوي موات ولازم ننزل

-علي الحـق: چا غير اخافن على صحة ابوي لا ترجع تنتكس اذا ما اجينا

-علي التـقي: شگد چذاب اليسمعه يصدگ جاي لخاطر ابوي

-علي الحـق: اي جاي لابوي چا المن.. اگلج حبيبة چا قبق وينهي؟

-حبيبة: قبقك ببيت عمي ناصر راحت من الصبح

-علي الحـق: شتسوووووي هنااااك بسيطة يا عنقق بسيطة!!

-علي التـقي: الله يساعدها لـ عنق كل شوي مخترعلها اسم كرهتها حياتها

گام حق ما مهتم من كل عقله يريد يروح لبيت عمي ناصر يشوفها وبنفس اللحظة كرار طلع من غرفته يگرط بخيارة ويگول..

-علي الكـرار: شني هذا وين راح حق بنص الليل؟

-حبيبة: لبيت عمي ناصر يجيب القبق مالته

-علي الكـرار: چا شوكت انا يصير عندي قبق واتلهف على شوفتها

ضحك علي الدر وهمس بصوت ناصي بشي لـ بدر وذاك ضحك واشرله بأصبعه علامة "لا" واشر على شمس افتهمت جاي يحچون على الحب بس محد ركز على حركاتهم غيري انا وابرار الي وجهها تغير..

-ابرار: من رخصتكم

-علي الدر: وين ام حيدر؟

-ابرار: تعبانة رايحة انامن

انتشر الصمت بالصالة من طبت لغرفتها ابرار چن حسوا بيها شي، باوعلي در واستغليت نظرته عليّ واشرتله يروح وراهة للغرفة دار وجهه بساع يسوي روحه يلعب بموبايله دقايق وترخص وگام لغرفتهم..

-علي الكـرار: حسيت روحي بمسلسل تركي وتزاعلوا العشاگ

-علي السور: ومن گام در لغرفته خلصت الحلقة ولازم ننتظر الحلقة الجاية من يطلع

-علي النور: بس خاف تگب العيطة جوه وبساع يطفرونه للحلقة الاخيرة؟

-حبيبة: فال الله ولا فالك خلينا ننتظر الحلقة باجر.. يله گومو ننام

-علي البدر: اي والله نعسنا

اشر لـ شمس وگامو لغرفتهم وزوج المشاكل صفنوا على باب غرفتهم يتهامسون بصوت مسموع بيناتهم..

-علي السور: اظن شمس شايلة خرزة

-علي النور: لو مسويتله سحر محبة؟

-الامـير علي: بعد شيسكتهم وشيطفي عيونهم

-علي السور: خوية چنك مضروب بوري انتَ مريتك استقرت ببيت خالتها يساعدك الله

-علي النور: حلوين الجماعة هنا ما تعبونه بساع طفروا على الحلقة الاخيرة واتطلگو

نصى الامير على نعاله ينزعه من رجله وتطافروا سور ونور يركضون خايفين بس هم انشمر تك على كل واحد بيهم وحصلوا المقسوم..

-الامـير علي: ادبسزززية خليني اشوووف چهرة واحد بيكم هنااا بعدد

عفتهم ىصعدت فوگ اضحك على وجوههم الامير منفوخ معصب وابا الحسن ما يتحچى وعلي التقي ماخذله ركن يضرب صفنات وعلي الكرار گاعد ويجر حسرات وحيدر نايم على القنفة وحاط الكوشة على راسه..

ثاني يوم رجعن عبق وتَـمني واجن تالة وخالتها خاطر القراية وبنات عمي كلهن وبنات خالتي هم اجن واللتمينا، فاتحين بالمسجل قصيدة "احنه غير حسين ما عدنا وسيلة" وملتهيات نرتب الاستكانات والصواني ونحضر قواري الچاي..

طب حويدر للمطبخ فدوة لطوله لابس دشداشة سودة وشماغ لافه على شكل چراوية على راسه وجايب بيده كراتين ماي، نزلهم بالگاع ووگف بصفي يم الكاونتر يهمسلي..

-حبيبة علي النور مزاعلني واريدن اراضي

-حبيبة: شمسوي؟

-حيدر: فد شغلة صارت بيناتنا وهو زعل مني

-يعني انتَ تشوف نفسك غلطت بحگه؟

-اي اظن

-چا راضي نور ماكو اطيب من گلبه بساع يرجع يصاحبك

ابتسم وهز راسه فرحان، عصرني بحضن وباسني بخدي حييل وظل يشمشم بيه مثل الچلب..

-حبيبة: چلب مثل الچلب بالضبطط يشمشم

-حيدر: افييييش چكليت وعليي

-روح ولك

-مو بت ضيييييم

-ههههه يا ادبسز خلي يسمع ابوك

-والعباس لو تسمع امي تطيح حظي تگول تتغزل ببنات الدنيا كلها وامك عايفها مثل الصخلة الزهگانة

-خطية حيدوري شوي شوي على امك لا تزعلها

-ما ازعلها والله بس يا حبيبة امي تغار من الذبانة لو غمزتلها شسوي انا

-ابرار ماعدها غيركم انتَ وابوك ومستعدة تقدم حياتها فدوة لخاطركم

-ادري وانا احبها واعشگها واروحن فدوة لتراب رجليها والعباس الا اروح أشفطها هسة

عافني وراحلها للغرفة وانا من فضولي ما اكدر افوت هيج مشهد حلو الا اشوفهم واتونس على حبهم، رحت وراه ومتت ضحك على سوالفه وعلى ضحكة ابرار ترن رن وحيدوري يتحارش بيها ويبوس بيدها ورجليها ويجعصها بحضنه..

-ابرار: ههههههه ولك مخبل شبيك

-حيدر: احبج يمة تروحلج فدوة مرتي المستقبلية

-ابرار: يا بعد امك انتَ يا روحها وتعبها

-حيدر: يوم اذا اجه هذا الفريخ الخايس بس لا تحبوا اكثر مني؟

-ابرار: ولك انتَ الاصل حويدر ياهو يجي مچانك

بوسته بخدوده ثنينهن وحطت راسه بحضنها تلعب بشعره بس هذا وين بهيد حويدر چنه سبرنگ ينطط كل مكان گومها وطلعها بره لان يعرفها معتكفة وگاعدة وحدها مثل عادتها من ننجمع كل البنات، حضنها لصدره يمشيها ويسولف لحدما طلعوا للصالة..

-ابرار: اي يمة راضي عمك، نور وين اكو منه ليش تزعله وتضوجه منك حيدوري

-حووووووووويدررررررر

فزينا كلنا على صوت علي الدر اليرعد جاي من بره، جفل حيدر بمكانه ما يعرف شيسوي وامه بساع ضمته بظرها خايفة عليه، طب در ووراه بدر والامير وتقي وابا الحسن منفعلين..

-علي الدر: ابننننن الچلبببببب ويننننك ولللك

-الامـير علي: درر عوف ابنننك بعدين تفاهم ويااه

-علي الدر: اليوووم انعل والدددديك اليوووم رووووحك اطلعهااا

-ابا الحسن علي: علي الدر لااا تخجله گدام البنياات عيبب ابنك صار شاب!

بس ماكو علي الدر عيونه صارت بگصته فاقد وهذا عيب اخوتي من يعصبون ما يشوفون بعيونهم بعد، نزع حزامه من بنطرونه وراد يهجم عليه وحضنه بدر يمنعه يتقدم على حيدر.. منعه بكل اصرار والامير كضه من وره يصيح..

-الامـير علي: بداعة امك لااا تسويهاا

-علي الدر: هددددني لااا تكضنييي

-الامـير علي: ماااا اسمحلك تططططگه مااا ارضى والعباااس اخذذ حگه والعباااس

-علي البدر: دررر لا تتسودن الموضوع ما يستاهل لاا تفشل ابننك

حيدر مهبوط ووجهه انبلع ما يدري شمسوي وخلى ابوه بهالحال، تجمعن البنات كلهن بباب المطبخ حاطات ايدهن على حلگهن خايفات واجت امي رسمية تركض تريد تفهم شكو..

-علي الدر: ولللك انا تسوود وجهييي گدااام مدير مدرستك والمدرسيين انااا اخلي واااحد ما يسوووه نعااالي يحچي عليّ يگول ماا عرفت تربي ابنننك وابنك يشرد من المدرسة كل يوووم يطفر من الحايط ويه ولدد زايعتهمم الدنياا ومصفرريك بكل امتحاناتك!! ولك اناااا!!!!

-حيدر: چذب والزهرة چذب بوية وراس امي چذابين هي مرة.. مـ.. م

ما لحگ يكمل الكلمة ودفع در اخوتي عنه وصلخ رجلين حيدر خلاه يطفر يصيح من الوجع، اجوا اخوتي الباقين يتراكضون وسور صد الضربة الثانية عن حيدر اجه الحزام بي..

-ابرار: لاااا تطگه وخررر عنه وخررر

-علي الحق: علي الدررر هذااا وحيييدك اصحححى

-ابرار: اذا تطگه طگنييي وياه وولك طگنييي

صارت تضرب على وجهها وعلي الدر لزمته رجفة العصبية، جروه اخوتي عن حيدر وايده تهتز كضه بدر من ياخته يهز بي ويصيح بوجهه خاطر يعوف ابنه وحيدر وجهه انطعن احمر وحتى عيونه دمعن گدام البنات يممة روحي راحت من نزلت دمعته ودار وجهه عنهن..

-حيدر: والله العظيم بس مرة وحدة طفرت و...

-علي الدر: شاااالك الله!! شاااالك الله يا حيدر وخلصني من ضيييمك شاااالك الله!!!

-رسمية: لااا تدعي على وليددك ووولك لا تدعيييي

ضربته على صدره ضربات متتالية وابرار تبجي بحرگة ميتة قهر على الصار بأبنها گدام الكل وفشلته گدام البنات، راحن البنات للمطبخ كلهن وطلع در من البيت ومحد من اخوتي راح وراه كلهم ما طايقين تصرفه حتى توأمه بدر..

تقدم الامير شبگ حيدر ويبوس براسه وحيدر طگ بچي صار عنده انهيار وجسمه كله يهتز، متت بچي وياه وامي رسمية تضرب على رجليها وابرار تشهگ..

-الامـير علي: لا تبجي بعد عمك لا تبجي حويدر زلمة انتَ زلمة يا رويحتي

-حيدر: طگني عمي.. طگني ابوي گدامهن وفشلني

-الامـير علي: يخسى اليفشلك وانا عمك يخسى عزك الله وليدي انتَ امسح دموعك ابوي.. امسحهن عمي امسح

مسحله دموعه بيده وبوسه بخدوده وكل اخوتي حاوطوه يسولفون وياه وبدر كضه يحضنه حييل ويبوس براسه، همسله شي بأذنه وحيدر يهز براسه اي..

طب للغرفة شوي وامه راحت وياه والولد طلعوا من البيت راح تبدي القراية ويوصلون الناس، رجعت للمطبخ والبنات كلهن طبيعي ولا چن صار شي محد بيهن فتحت الموضوع..

-تَـمني: بنات هاي اجن نسوان بالحديقة واگفات

-حبيبة: اي رايحة افتح باب الاستقبال

فتحت باب الاستقبال الهن وبدن النسوان يجن وحدة وره الثانية لحدما انترست الاستقبال وفتحنا الهول "غرفة علي الكرار الحالية" خطية فرغها ودنه چربايته خاف ما تكفي الاستقبال وصدگ ما كفت وبنات البيت وگرايبنا القريبين كلنا گعدنا بالصالة حضرنا القراية..

**

"تَـمني"
الاجواء حزينة وتجنن لبست فستان اسود طويل رداناته تول وحطيت شال على راسي وگعدت استمع للمحاضرة مال المُلا.. ما شاء الله ملا وره ملا قرن گالو ذني يعرفن شيخ علي ومن صارت بي الجلطة نذرن اذا گام بالسلامة يقرن ببيته بأسم الامام الحسين (ع)..

گمت سلمت على حور جايه وياهة اختها حلا يصيرن خوات حاكم، اخذتهن حبيبة وفرتهن فر واجن باقي صديقات حبيبة واللتهت كل وقتها وياهن..

-عبق: تَـمني الزلم يردون چاي اني گايمة اصب تجين ويايه؟

-تَـمني: اي اجي

گمنا سوه واجن ويانه رفل وليلة وكم وحدة من بنات خال الامير يساعدن، ودينا للزلم ورجعنا للصالة نقدّم للنسوان.. تعبنا اني وعبق من الصبح نشتغل فـ جبرتها نگعد نرتاح شوية والبنات ياخذون مكاننا، غشيت وجهي بالشال لان شفت الكل مسوي هيج من بدت الملا بالنواعي تقرا بطور حززين يگطع الگلب خلتنا غصب نبجي..

-المُلا: زيّنب رجعت لكربلا يتيمة رجعت وحيدة رجعت هالجبل الشامخ هي وايتام الحسين.. رجعت بت علي مكسورة خاطر مكسورة جناح من دون وليانها بدون چافلها.. بت علي فحل الفحول هيج يصير بيها؟ هيج يأذوها؟؟ هيج يسبوها؟ هيج يمشوها بطرقات الشام وبين الزلام هي وبنياتها؟...

النسوان يبچوون بچي وبصوت عالي ويلطمن على رجليهن حييل وهاي التصيح سودة بوجهي وذيج التصيح عمت عيني عليج يا زيّنب وغيرها التگول اروحلج فدوة بت علي.. مسحت طرف عيوني من الدموع ورفعت راسي اباوع للملا من قرت شلون القصيدة بس بدون لطم وصوتها ما شاء الله شكد ما اكول حلو وحنين اكون مقصرة..

"هنا يالنازلين هنا ... بگبر حسين دلوني
هنا يالنازلين هنا ... بگبر حسين دلوني

وتاليّ للمسنايه .... راعي الجود والرايه
اريد اروح شچاية ... واگله يابدر سعدي
رضيت الگوم يسبوني.. رضيت الگوم يسبوني!"

بدوا النسوان يقرون وياهة بطور حنين حزين خلاني ابچي هووايه كللش هوايه على كلماتها واتخيل السيدة زينب فعلاً دتگول هاي الكلمات ولمست حيرتها والوجع الحاوطها بفقدان اخوتها واحبابها، لمست الحزن والغصة الي بگلبها وهي چانت معززة مكرمة اميرة عند اهلها وبنت واخت رجال معروفين بقوتهم وشجاعتهم وغيرتهم تاليها هيج يصير بيها وهيج تنگلب حياتها؟..

"طاحت من عله الناگه ، تبعتها خوات أحســين
تتعثر وهَي تنادي ، يخويه أحسين گبرك ويـــن
جيتك باليتامى أگعد ، تلَگانه يا نور العــــــين
خويه يل متت ضامي ، دِگعد جيت بإيتــــامي
شوف إنتحلت إعظامي ، تراني من السهر يحسين
متشوف الدرب عيني ، متشوف الدرب عينــــــي"

نهت القراية بهاي الابيات الحزينة واجت ملا وراهة تقرا واني بقيت.. بقيت ابچي وابچي من كل گلبي لدرجة عيوني گمت ما اشوف بيها گعدت بزاوية بس ابچي مقهورة واحس بگلبي غصة ماعرف هالشعور بسبب اجواء القراية الي اول مرة احضرها لو بسبب المريت بي والجرالي وهاي القراية اجتني فرصة اطلع طاقتي وكل الحزن من گلبي..

كملت المُلا وبدن النسوان يطلعن وصار الوقت نوزع العشا، صح تعب بس تعب حلو ومابي ملل، ابتسمت من سألوا عني النسوان وخالة گلتلهم اني مرة الامير و سنية وحبيت احضر القراية صارت كل التتعده من يمي تمسح على بطني وتگول..

-تنطيچ مرادچ زيّنب

-يوم نشوف وليد الامير بحضنج السنة التجي

-عسى دمعتج تطفي نار جهنم يا بعد عيني

-عسى ما تشوفين غير السعادة ويه وليدنا الشيعي

تشكرت منهن وخالتي هم تتشكر منهن فرحت بكلامهن وفرحت ان محد جابت طاري اني ارملة عمه وهاي اول مرة اطلع لجمعة بمكان وميسألون عن هالشي بس... بس چني تأملت وفرحت زايد لان قريب لا يطلعن كل النسوان گعدن نسوان ويه خالة رسمية يحچون عن الموضوع وافتهمت بيهن يصيرن گرايبها..

-چا ما تزوجينه رسمية؟ خطية تورط بهالبت ولا هي الحبلت وجابتله فريخ ولا هي اللهلوبة ومكفيته شجاچ خية ما تدورين راحة وليدج

عبرت من يمهن اسوي روحي ما سمعت وفرحت كلش من خالة دافعتلي متقبل على كلامهن، دخلت للمطبخ احط الاستكانات بالمغسلة وغسلتهن ويه البنات شوية ورجعت للصالة اللملم اخر شي باقي بيها وشفت خالة رسمية گاعدة ويه مرة اخوها وبيدها موبايلها تراويها شي بي، بطني مغصتني من مرة اخوها گالت بصوت مسموع..

-شحلاتها اللهم صل على محمد وال محمد من جرمنها كتلتي روحچ خاطر ياخذها

-رسمية: اششش اي خايبة اي

سدت موبايلها وضمته وره ظهرها، عيني تعلگت هناك ما گدرت ابعدها صرت انظف بالصالة والف وسواس صار بگلبي بس اريدها تگوم اريد اشوف شنو بتلفونها.. اوووف لا تَـمني لا عيب شعليج انتِ شبيچ كلشي وربطتي بيج انتِ شعليج؟؟

نصيت امسح المي الوگع على الزولية وافكر بتصرفات خالة رسمية، سوت نفس الحركة ويه الامير هم راوته شي بالتلفون والامير انخطف لونه من اجيت وهسة نفس الموقف انعاد رسمية لازمة تلفونها ومن شافتني اجيت گلتلها اششش!..

ذبيت الوصلة من ايدي ورفعت راسي اشوف جهة الاستقبال اخيراً گامت خالة تودع اهلها وعافت تلفونها بنفس المكان، فكرت اروح اخذه بس شلون اللحگ ادور بي خاف تحس بيه؟

-شبيچ

عطت مخترعة ويه صوت رفل الهمسته قريب اذني، دفعتها عني اضربها على راسها وهي طگت ضحك..

-رفل: اااخ بت الفاهية شبيچ عيونج تطاير وراح تطلع من وجهج

-تَـمني: اختررعت

-رفل: اووووي

-اهوو وخري رفل

-شبيج وجهچ مگلوب؟

-ولاشي دا افكر بشغلة

-سريني وما اگول لاحد

-لا مو سر هو

-چا؟

-رفل خالة رسمية متغيرة لو بس اني دا احس بهالشي

-امممم.. لا صدگ متغيرة واحس وراهة سالفة رسمية مو خالية

-سالفة مثل شنو؟

-اظن والله اعلم تريد تخطب لواحد من الولد واظنن والله اعلم هالولد علي الحـق لان شفت مرية شيخ محمد هنا وخالة رسمية چانت تحاچيها

انهبطت بالزايد وبدون لا احس حطيت ايدي على گلبي، انتبهتلي رفل وعگدت حاجبها مستفسرة عن حركتي..

-رفل: شبيچ توتة

-تَـمني. مبيه شي.. مبيه اگلچ اني راح اصعد فوگ اريد ابدل احس احتريت

عفت الوصلة بيدها وركضت اصعد لغرفتي افتر بيها، افتر واعصر بأصابعي افكر شنو ديصير؟ معقولة خالة رسمية راح تخطب بت شيخ محمد لـ علي الحـق لو لغير واحد من الولد؟؟

شتت افكاري صوت الولد صعدوا فوگ وصوت رجليهم يدبچ على درج السطح مبين راحوا هناك، ثواني واجتني عبق للغرفة دخلت بدون لا تدگ الباب مثل عادتها..

-عبق: تَـمني

-شبيچ عبق ليش وجهچ مخطوف؟

-عبق: تَـمني.. تَـمني شفت خالة رسمية تحچي ويه مرة شيخ محمد وسألتها على بتها

-اي؟؟

-ايي احس.. احس مادري

-احجي ولج

-احس راح تخطبلها لعلي الحق

حچتها وشهگت ودموعها صارت تنزل دمعتين دمعتين من عيونها، صفنت بوجهها عاجزة انطي ردة فعل سريعة بس بعدين انتبهت لنفسي وحضنتها لصدري اخليها ترتاح وتبجي على راحتها حتى افتهم منها شلون عرفت بالضبط راح تخطبها لـ حق..

-عبق: سمعتها.. گالت لو اجيناكم وره صفر وخطبنا بنيتكم تنطوها؟؟

وخرتها من حضني اباوع لعيونها الكبار، مسحت دموعها بأصابعي وهمست بخفوت اطمنها..

-تَـمني: عبق علي الحق يحبچ ومستحيل يبدلچ بوحدة ثانية

-بس اني سمعتها

-يمكن مو لعلي الحق تريد تخطبها

-لعد المن

-مادري.. مادري عبوقة حالي من حالج محتارة اتوقع لازم نصبر ونتفاجئ بالراح يصير وره صفر

-والقران بس يتزوج حق اني اطلع من هالبيت.. والله العظيم ما ابقى هنا والقراان ما ابقى تَـمني ورووحه لابوية

-كافي حبي لا تبجين عبوقة صدكيني ميتزوج! ولج مخبلة هو نزل من دوامه واجاچ نص الليل لبيت عمو ناصر بس حتى يشوفچ وما فكر يرتاح لو ينام ببيته تتوقعين هالرجال يعوفچ؟

-واني غبية.. غبية

-ليش غبية؟

-هو اجه وظل شكدد واكف بالباب بس يريد يشوفني واني الغبرة حتى ما طلعتله ولا خليته يلمحني مادري شبيه انچلبت واستحيت من البنات

-عادي حبي هو يعرفج خجولة واكيد ما زعل منج

-تَـمني والله 55 دقيقة ظل واكف ينتظرني اشوفه من شباك غرفة رفل واكف بالحديقة يشيل رجل ويحط رجل من تعب واني ما طلعتله

-عادي عادي هو يحب دلالچ عليه

ضحكت من بين دموعها ومسحتهن بيدها، جرت خشمها بالكلينسه وگالت بأبتسامة خجل..

-صدگ تتوقعي يحب هالشي؟

-طبعاً يحب واني لاحظت شخصيته ميحب التذب روحها عليه هو من النوع عنيف ويحب الحرب بكلشي يتونس من يظل يقاتل على الشي حتى يحصله وانتِ اجيتي بالضبط على مرامه متشوفي مستقتل عليج؟

ضحكت فرحانة وتغيرت مية وثمانين درجة عبالك مسحت على گلبها وريحتها بكلامي واني ارتاحيت على راحتها، نزلنا سوه جوه وشفت باقية كم مرة بالهول گاعدات يسولفن وشفت الموبايل بنفس مكانه وخالة رسمية بالمطبخ.. ايي هاي فرصتج تَـمني!!

عفت عبق وركضت على التلفون اخذته وطبيت للحمام وقفلته ورايه، سويت الموبايل صامت وفتحت التلفون لان ماعدها رمز واول ما سحبت الشاشة طلعلي الأستوديو ومفتوح على صورة بنية بالتحديد..

صورة بنية شگرة وعيونها زرگ بحررر وعبارة عن كتلة من البياض والجمال، گلبي گام يوجعني من شفتها وگلبت بباقي الصور لگيتلها صورتين بالحجاب وبعباية وماكو قطرة مكياج بوجهها مبين ملتزمة كلش.. البنية شگدما حلوة عبالك جايبين الصورة من النت..

ايدي لا ارادي طلعتني من الستوديو واخذتني للواتس اب مالتها، دورت على اسم مرة شيخ محمد بس ماعرف اسمها شنو وما كدرت اللگاهة.. بقيت محتارة ماعرف المن ادور والمن اروح وخفت لا انلگف قررت ارجع التلفون لمكانه خاف تصيرلي مشاكل..

**

"احنه غير حسين ماعدنا وسيلة.. والذنوب هواي چفتها ثجيلة
وغداً يبدو لنا سداً منيعا... هذهِ آرائُنا فيهِ جميعا..
والذنوب         هواي چفتها         ثجيلة.."

حِس الرادود الحنون يدوي بالديوان وصوت لطم الزلم على صدورهم يرج بالبيت يقشعر الابدان، اضرب على فخذي بخفة واستشعر القصيدة والاجواء الحسينية ما بقى شي لزيارة الاربعين وللاسف ما نگدر نروح لكربلاء بسبب حالة ابوي ذيج المرة من رجع من النجف اجانه متخربط فرد نوب من الطريق فـ قرر يسوي مجلس للرجال بالمنطقة بالديوان حتى يبقى ذكر الحسين (ع) وما يموت..

اسمعله ورايحة بغير عالم ابتسمت لا ارادي مركزة بي.. اختلاف شاسع بين اسلوبه من يقرا قصايد ويكون بشخصية الرادود وبين شخصيته المرحة ويه ابوي واخواني.. ااخ يا منتصر لو بس تعرف شگد احبك وگلبي يفز على صوتك..

-شيخة.. وينها الشيخة؟؟

طلعني من جو القصيدة صوت ابوي يطب للبيت بهيبته ورزة شيوخ كاف عباته ولافها على خصره وسبحته تطگطگ بيده، عدلت الشال على راسي وطلعتله اركض..

-ها بوية صحتلي؟

-اي بوية وينهم الصايعين؟

-فوگ بوية

-شيسوون فوگ؟ شني هاي العالم كلها مو بعينهم ولد الزمال؟؟

-مادري بوية يمكن مشغولين؟

-مشغولين شني؟؟ ينرگلون اكيد انه الهم هالطايحين الصبغ

نزع عباته لا تتعقچ ولبسها الي، ابتسمت على حركته بادلني ابتسامة وباس راسي، رغم منزعج وجاي يرجف من العصبية بس ما ينسى يبوس راسي ويگول..

-شيخة الشيخات

-تروحلك فدوة بوية

-اخوانچ الصايعين يرحون فدوة لهالحسن..

طلعت امي وچم مرية گاعدة بالهول ما اهتملهن، عافنه وراح يوگف بنص الصالة ورفع راسه لمحجر الدرج يصيح منا بصوت قوي عصبي دب الخوف بگلوب امي وباقي النسوان..

-ولك علي الدر! علي البدر! علي الحق! علي التقي! علي الكرار! الامير علي! ابا الحسن علي! علي النور! علي السور!!

صاح لأخواني التسعة الي متأكدة مليون بالمية هسة گاعدين بالسطح ينرگلون ويتابعون مباراة ريال مدريد، ثواني وما اسمع غير ركضة حصونة صارت بالسطح ضحكت من اجو كلهم يمدون روسهم من المحجر واحد صار فوگ الثاني وجاوبوا كلهم بصوت واحد..

-نعم بووية؟؟

-شيخ علي: و تتتفگ وينكم ولكم هتليية

-علي الدر: بوية چنه نصلي مو شباب؟

-علي الحق: اي بوية

-شيخ علي: شتصلون بالتسعة بالليل؟

-علي السور: شيخنا صلاة الليل شمالك ما تشوف السبحة بيدي

-ابا الحسن علي: عوفه علاچي محد يقدر انفاسنا وجهودنا واحنه واگفين ندعيلهم بنصاص الليالي وعايفين اشغالنا

-علي السور: بوية انه گطعت صلاتي لخاطرك واجيت شني هاي

-شيخ علي: اي و...

صاح علي البدر يقاطع ابوي يسوي روحه ما يسمع..

-علي البدر: شباب سمعونا صلوات بنية التعجيل.. اللهم صل على محمد وال محمد وعجل فرجهم يا كريم

-شيخ علي: ولـ....

-علي التقي: الثااانية على حب الحسن والحسيننن

-الولد كلهم: اللهم صلِّ على محمددد وال محممممددد

-علي الكرار: الثالثة على حب....

-شيخ علي: و تتتفگ انچلبوو ولد الفايخخة

-رسمية: ابو علي ليش تحچي عليَّ شمالك

-شيخ علي: مرمروني ولدچ العارات، نزلوا لا اصعدلكم بالحزام.. وينه علي؟؟؟

-علي الحق: نعم بوية

-علي الدر: ها بوية هنا

-علي البدر: هاا هاا

-شيخ علي: وجعع مو انتوو وينهم ذولاك علي السور وعلي النور؟؟

-علي السور: انه هنا چا مو صارلي ساعة انهق بس تَكي ضايع

صارو واحد يباوع بوجه الثاني يدورون على تك علي السور الشال گلوبنا، عدل علي الكرار العرقچين الي على راسه وسأل مستغرب..

-شباب وينه هذا؟ اليوم كله ما شفته؟ ووينه الامير...؟

بعده علي السور جاي يجاوبه وما نسمع غير صوت الصياح يجي من بره البيت، هرول ابوي وانه وياه ونزلو اخواني يتراكضون، طلعنا للحديقة ووگف گلبي وانه اشوف الامير علي شايل بيده واحد مدمى من فوگ ليجوه، لطمت على وجهي اصيح وابوي يرعد..

-شيخ علي: وللللك علييييي شصااااير علييييي

-الامير علي: وعلي والسمااني علي اليوووم اشرررب من دمهممم وروحه لعزيز گلبيي المغدوور!!

ركضله علي الحق يفتهم منه واخذ الجثة الي بين ايده، جحظت عيونه وعاط متخبل حرگ البيت حرگ بصياحه، اجو الزلام يتراكضون من الديوان طببوني جوه غصب املخ بروحي اللطم لطم على وجهي وگابلت امي الوگعت من طولها، اسمع لوعيد اخوي وگلبي ينزف.. وعيد خسف گلبي وعيد يكسر روس وخشوم..

-مااا نرضى الا بدددم لا فصلييية ولا فصصصل وعلي دممم بدممم انععل عشيررتهم واحرگ الاماارة على روسهمم واجيب راااس شيخهم وادوووسه بالقندرة!!

انهاريت متت تخبلت عقلي فصل صرت ما اشوف بعيوني وانا اشوفن حيدر مدمى بيد الامير، اجت ابرار تركض تشوف شكو ما كدرت احچي ما گدرت اتنفس انبح صوتي ويه صوت علي الدر يصيح بحِس شلع گلبي شلع من مكانه..

-حيييييدر ووولك حوووووووويدر بوووووية حيييييدر جااااوبنيييي حييييييدر يا بعد عينييييي وووولك بوووووية....

**

"عـــبق"
الصدمة اخذت حيلي وگعت بالگاع فاتحة عيوني ما مستوعبة، طلعت ابرار مثل المخبلة من البيت بدون حجاب والزلم تارسين الحديقة، قويت نفسي وگمت وراهة اسندها واجانه حق يركض يرجعها بس متقبل وگعت بالگاع ولطم لطم لطم لطم لطم على وجهها طفت عينها طفي..

-علي الحـق: رجعييييي للبيت رجععععن عببق اخذيهاااا

يصيح منهار وهي بغير عالم واني بغير عالم، مدا اكدر اركز بشي مدا انتبه على شي عيوني على علي الدر النايم فوگ ابنه ويضرب على راسه ويبجي بكل حيله صوته وصريخه حسيته طلق وطب بنص راسي..

-شيخ علي: ولك ااااااااااااخ يا حيدر اااااااخ يا جرح گلبيي

طلعوا الزلم الغربة من الحديقة من شافونا وطلعت حبيبة ويه امها وخالة رسمية مملخات نفسهن و عمو علي نزع عگاله بالگاع ويضرب على راسه روحه راح تطلع، لزمه علي الكرار يرجف وياه وسور نايم ويه در على حيدر ميقبلون يتحركون.. اجاهم تقي يريد يگومهم بس انهار من شاف وضع حيدر ظل يضرب على صدره ويصيح..

-علي التـقي: ياا بوية يا وحيدنا حيدر انتَ تجينه سابح بدمك.. ولك حيدر ابو ضحكة الحلوة وليدي ابو الفزعات گوووم حيييدرر..

ويه صوت الصايح والدموع ظهر من وره الباب علي النور، اجه والدم مغطي من راسه لرجليه اجه يعرج برجله گوة يسحل بروحه وگع بالباب يلطم على راسه وصدره ويصيح..

-من وراااي راااح من ورااااي اجه يراضييينيي

انخبصوا خبص الدنيا اشتعلت شعل والبيت ينزف حزن على حيدر.. على وحيد بيت شيخ علي المدلل من عمامه والماكل كتل من ابوه چان يريده دائماً يكون مثالي ميريده يغلط وميريده يعاني بحياته يريده يعيش وراسه مرفوع ومرتاح ومحبوب وين ميروح..

-منتصر: وخرووو سووا مجاال سوولييي مجااال حاكم وووينك

-حاكم: اجيت اجييت

دفع الكل منتصر وطب بنصهم، جر حيدر من ابوه جر ومدا يفلته شكد رادوا عالجوا وياه ميقبل فاقد ويحضن ويشم بأبنه، لزمه علي البـدر من ياخته گلبه متوجر ويصيح بوجهه..

-دررر ارجع لووعيك يا خووية خليهم يشوفون وليدك علي الدرر

-منتصر: خلينيي اجس نببضه بسسس انطونيي مجاال

-حاكم: لا احد يحركه هده علي الدر لا تحرك الولد يمكن يطلع بي نببض

نزل منتصر على ركباته يفحص نبض حيدر والدنيا متجمهرة فوگ راسه، شيخ علي وگع على علي الكـرار والامير اختفى من البيت ما شفناه بعد بس جاب حيدر وطلع هو وابا الحسن واخذوا ولد عمو ناصر وعمو صمد وياهم..

-منتصر: جااي احس بشي.. نبض خفيف كللش.. چنه...

سكت مركز كلش وكزبر جسمي ويه صوت علي البدر العالي فتح دگم دشداشته مختنگ وگعد بصف علي الدر ويدعي..

-علي البدر: دخييلك يا ربي.. دخيل علي واهل بيته دخييلك يا حسين بجاهك وجاه هاليوم بجاه زينب وستر زينب.. بجااه العباس عضيدك والاكبر حبيبك لاا تفجع گلوبنا بوحيدناا دخيلك يا علي..ياا ربي دخييلك يااا ربب

لا ارادي صرنا نردد وياه "دخيلك يا رب" ودموعنا تجري، كلنا مركزين ويه منتصر اليتلمس بمعصم حيدر يتابع نبضه وحاكم الي گعد گباله وصار يدوس على صدره بيده يسويله انعاش قلبي..

-منتصر: ياا علييي بي نبض بيي نبض بسيطط لازم نلحگ عليه گبل لا نضيعه هسة ضروووي

-علي البـدر: سمعتت؟؟ در سمعتته بي نببض بيي نبض ما مات ووولك دررررر

رگعه راشدي وهذاك بغير عالم صايبه انهيار، بس علي التـقي وعلي الحق سباع وما قبلوا يظلون يتفرجون اتصلوا بالاسعاف يجون بس بعد ما گدرو يتحملون تگابلوا على حيدر ويه حاكم يشيلوه على كيييفهم كلش وحاكم يوجههم شلون يدخلوا السيارة يخافون ميلحگون عليه اذا ينتظرون الاسعاف..

الحمدلله بلمحة بصر وصلت الاسعاف چانت قريبة علينا، نزلوا يركضون يشيلون حيدر ونقلوه بيها واخذوا وياهم علي البدر وتقي علي الدر هالجبل البارد هسة انهار ومدا يكدر يگوم من مكانه..

-علي الكـرار: بوووية گووم بوية طالعين للمستشفى گوووم حيدر بي نبض يمكن نلحگ عليه

كرار گوّم ابوه وحق گوّم در يسنده وسور راح على نور الي لسه محد افتهم سالفته، ركضن حبيبة وامهاتها يردن يروحن وياهم ومحد اعترض لبسن عبيهن وطبن واني بالسكتة صعدت وياهن بدون صوت بس دموعي تجري ما اكدر ابقى هنا انتظر احد يطمني مااكدر گلبي مينطيني حيدر عزيز گلوبنا كلنا..

اندحسنا كلنا وره وطار بينا حق طيوور للمستشفى وعلي الدر ما سكت لسانه عن..

-كسر بيدي يا بوية.. طگيتك؟ قهرتك؟ كسرر بيدي عساها بالكسر عساها شلل يا وحيدي

يحجي ويبجي جسمه يهتز وصوت نحيبه عاالي بچه السيارة كلها حتى علي الحـق يسوق ويمسح بدموعه وهاي اول مرة اشوفه يبچي، علما وصلنا للمستشفى رواحنا طلعت نزلنا نركض وكرار هم طبگ ينزل ابوه واخوته الباقين، الاسعاف طلعت واصلة قبلنا ودخلوا حيدر للانعاش بسرعة..

-علي الحـق: بشروو

جاوب بدر بعيون عبارة عن فصوص حمر من البچي، عصر عيونه بين اصابعه ولزم حق على جهة يحجي وياه حتى ميسمع علي الدر..

-علي البدر: مرتين گلبه وگف بالاسعاف وصعقوه بصعقات كهربائة

حط حق ايده على راسه حاير ووگف على جهة ما نطق كلمة، اباوعله واگف على بُعد مترين مني بس عبالك بغير عالم الصار هد حيل الكل..

-علي التـقي: منو جاي يحصل الامير؟؟ ما يجاوب على اتصالاتي لا يروح يسويلنا طرگاعة!

جاوب شيخ علي وهو گاعد على الكرسي منزل راسه ما رفعه..

-خلي يسوي

-علي التـقي: بوية صدگ تحجي؟؟

رفع عيونه الشيخ مخنزر على تقي، وگف على حيله ونتر بحقد وغضب..

-ما راحلنا چلب! لو حيدر صارله شي بالعباس ابو فاضل بداال الواحد ناخذ عشرة!!

سكت تقي يعوف ابوه يعرفه عصبي وما واعي على كلامه لان شيخ علي مستحيل ينسى دينه وديانته ويقتل عشر زلم بدم بارد بدال حيدر، مهما چان حفيده عزيز عليه بس دينه ومخافته من الله اعز..

مرت ساعة ومحد طلع يطمننا على حيدر گلوبنا راح توگف من الخوف والكل شاد على اعصابه، علي النور گاعد وينزف ما قبل حتى طبيب يشوفه الا يتطمن حيدر مابي شي، گاعد يبچي ويعض بأصابعه من الندم ويگول..

-ااااااخ كله منيي كللله مني اجه وراي عباله مزاعله اااااخ

-علي الكرار: فهمنا شصار؟؟ منو السبب بكل هذاا فضناا احچي!!

-علي النور: بيت مسعود! بيت مسعود نصبولنا كمين....

**

"ســـبأ"
گاعدة بغرفة امي اخيط وياهة ورهف متمددة على الچرباية تلعب بموبايل امي، سخرتني امي احيبلها بكرة سودة وگمت اجيبها من قوطية الابر حاطيها فوگ الثلاجة، فتحتها ادور بيها وطاحت من ايدي بالغلط..

-صابرين: ثوووول الفاهية طاح حظج هاي ما دبرتيها

سكتت ما جاوبت لان اندگت باب الحوش وطلعت امي تفتحها، طبت فراقد تدردم وتحجي علينا مادري ليش تجينا اذا هي ما تحبنا وما تطيق بيتنا ولا ابوي يطيق شوفتها ويتخبل اذا افتهم بيها هنا مستعد يذبحها بمكانها..

-فراقد: بت الكربة ما تفتحين الباب لو الا يروح حيلي ياله تجين

-صابرين: ما سمعت الباب شبيچ

-فراقد: سبأ جيبيلي گلاص ماي الله يزوجچ

-سبأ: صــ....

گطمت حچايتي وصحت بصياح معزايات ميتة خوف على صوت الرمي الصار يجي من بره بيتنا، امي وفراقد تسودنن وصارت امي تصيح وتلطم على وجهها مثل المخابيل..

-راااح يوووگع البيت عليناااا لحگووونااا يا اهل الغيييرة

-فراقد: ولچننن شنييي هاي شصاااير

تخبلناا چن گاعدين بجبهة مطر مطرر الچيلات ترمي واجهة بيتنا والجام يتكسر علينا، صرخت خايفة من طبت طلقة ضربت كتائب الشباك انرج الشباك كله ورن رنين يخوف..

-سبأ: يوووم يمممةة شنو جاااي يصير يمممةةة

-صابرين: وووينهم اخووتچ ولججج روووحي خابرريهم لااا يطبون عليناا

روحي انخمشت وعيوني مبحلگة گلبي راح يوگف خايفة خاايفة مرعوبة بيتنا راح يوگع على روسنا انخل نخل الطلق ما وگف واخوتي مو بالبيت ووحدنا بس نساوين گاومونا واحنه وحدناا استفردوا بينا يا علي..

-فراقد: كللل هذااا لخاطر مررررة ووولكممم مرررررة تمسححح بشواربكمم الدواووين يولد الانجااااس

-صابرين: تففففف على غيرتكممم تهدووون على نساوييين تفوووو على شواربكمممم

ظلن وحدة تصد والثانية ترد وفراقد متأكدة الي بره هدوا علينا بسبب واحد من اخوتي يكون مصخمها ويه بت من العشاير واجوا اهلها يگاومونا ياخذون بحگها..

-فراقد: بيييكم خيير برگعووو نسوانكممم كضووهنن ولا تخلووهن فررجة للرايح والرااد السلف كله يحچييي بيهننن

تصرخ وترزل بيهم وهي ما مفتهمة شكو، اجتنا رهف تركض وجهها اصفر وتسأل ما تدري شصاير، مجد جاوبها وجرتنا امي وفراقد يطلعونا من المطبخ نتراكض وطببتنا لحمام غرفتها.. گعدت بالكاع ارجف رجليه ما تحملني احس لساني انبلع من الخوف، شبگتني رهف لصدرها وعيونها على امي الكاضة موبايلها تدگ على اخوتي..

-صابرين: ووينكممم ولكم هدوووا علينا ولد الحرااام راااح نمووووت لحگونااا

-رهف: تهديد.. تهديد يوم هذا تهدديد

-سبأ: يـ.. يعني.. يعني شني؟

-رهف: يعني الله يعلم ابوي واخوتي شمسوين وهدوا على بيتنا يرمونه! معناها ما راح يسكتولنا!

-فراقد: همه ابووج واخوتج شجايبيلنا غير القهررر

-سبأ: وگف الصوت.. وگف.. وگف مو؟؟ بطلوا وراحوا مو؟؟

ثواني ورجع الطلق صلي على بيتنا وصوت زلم تصيح بره يهددون، صحت بكل صوتي اضم راسي بين رجليه من تكسر جام الحمام علينا انتهيت حيلي باد وردت اطيح مجلوطة.. بقوا يرمون فوگ النص ساعة واحنه ميتات من الرعب.. خبصة وهوسة وخووف وهلع كلشي عشناه هالليلة..

گبت بره وصوت عاصف مبين بيانتهم جريت نفس مرتاحة من رجعوا اخوتي وفراقد لمت عباتها وطلعت من الباب الوره گبل لا يشوفها واحد منهم راحت ام المصايب! راحت ام البلاوي راحت ام المشاكل كلها!، طلعت امي من الحمام تجرنا وراهة ترعش وعيونها راح تطگ.. راحت للمطبخ تدور وتصيح..

-صابرين: وووينهم.. وينهمم ويلاددي

-سلطان: هناا احنه يمة.. يوووم وينها مرتييي وينهااا

-صابرين: مو هنا ببيت اهلها لا تخبصنااا وحير بيناا

-سيف: يمة بيت عليي ذول بييت عليي بالعباااس الا اهد على نسوانهم **** عليهنن

-صابرين: رووح يمة رووح ورجع حگنا وحگ خواتك

طبوا عاصف ورزاق يتصايحون وبيدهم سلاح واجه ابوي وراهم العيون تتجادح وروحه طافرة، كض سيف من ياخته وشمره بالگاع وصار يدوس بگلبه وببطنه برجله بكل حيله..

-صابرين: لااا تكتل ابنننك مسعوود وخررر عنه وخرررر

-مسعود: امشيي هناااك لا اطلع ضيمي بيج.. وولك انتَ لشوووكت تبقى غبييي لشوووكت

جروه عاصف وسلطان وباقي اخوتي عنه وابوي يشيل روحه ويرگعها، هد على سيف مرة ثانية وسيف وگف يتصايح وياه ويهدد يذبحهم كلهم وابوي ما تحمل شاف گلاص چبير محطوط على المجمدة شاله ورگعه براس سيف كسره عليه..

-صابرين: يممممة ابنييي

-مسعود: ابنننچ ال**** ورطنااا ويه عليي ورطنااا والله يستر لووو مات ابنهم من ورانه بالحسييين بالعباااس بعلي راااسك انطي الهم يا سييف بدديل لابنهم!!

-صابرين: تقدم وليدك فدوووة لابن عدونا؟؟؟

-مسعود: ***** من وليدي الماا يعرف يتصرررف انا دزيتك تكتله تتعاررك ويااه مو تذبحه وتشرررد وللك هسة لووو وگعووا البيت على روسنا وطبوا على نسوانه هم مااا نكدر نفك حلوچناا

عافهم ابوي وطب جوه يصعد للسطح يشوف شنو تضرر، عنده بضاعة يخليها فوگ ويخاف عليهن لا يصير بيهن شي..

-سيف: رااح الجبان راح خايف على بضاعته! منو يجي وياي نرجع حگنا من بيت علي؟!

-زيد: انتَ مخبل؟؟ وره الصار بعدك تريد تاخذ حگنا؟؟

-سلطان: اگعد سيف لا تبلينا اگعددد!

-سيف: ما يهمني وانعل ابوو غيرتكم الديااثة گامت تطافر منكم! اروحن انا ماطول زلمهم بالمستشفى و**** الخلفهم

-عاصف: ووين ترووح ولك لا تتسوودن

-سيف: اروحن وعلي واطبن من شباك غرفة مرة الامير واحرگ بيتهم عليهم وو*****.....

نزل اشكال فشاير عليهم ويهدد شنو راح يسوي ظلينا انا ورهف نتطاگطگ ووحدة تعاين للثانية خايفات ومتنا رعب من طلع سيف من البيت ناويها.. ناوي يعتدي على نسوان بيت شيخ علي ويحرگ بيتهم وهنه بي!

**

"تَـمني"
بقينا اني وشمس ويه ابرار بالبيت والمسكينة لا ايد ولا رجل هبط ضغطها وغابت عن الوعي خالتي فوگ راسها وتالة وبنات عم وخال حبيبة مخبوصات هاي التبچي وذيچ التنوح..

فزيت من مكاني ويه صوت الامير جاي من الصالة وصوت ابو كربله وزلم وياه يحچون..

-ابو كربله: نخلنا البيت نخلل عد عينااك يا خوي تريد نطب نجرهم من نحورتهم ونذبهم حدر رجليك؟؟

-ابا الحسن علي: لا امير كافي لهنا خلينا نرجع للمستشفى حيدر بي نبض بجاه الله ورسوله يرجعلنا!

-الامـير علي: روحوا گدامي ابدل واللحگكم

صح ارتاحينا من عرفنا حيدر بي نبض بس الخوفة ما راحت من گلوبنا، خابرنا سلوى وگالت الدكاترة گالو موات واذا نجى منها فـ يمكن يعيش بـ عِلة تهدم شبابه..

اختفى صوت الزلم ومديت بس راسي اشوف الصالة فرغت منهم، طلعت من غرفة ابرار وصعدت فوگ اركض لغرفتنا اشوف الامير اريد افتهم منه شنو صار.. دخلت للغرفة وشفته نازع ملابسه وشامرهن قريب باب الحمام كلهن دم..

درت وجهي خجلانة بعدني استحي اشوفه بهالحال بس هو عبالك ما انتبه لوجودي لانه دخل للحمام يسبح، رحت للكنتور طلعتله ملابس وحطيتهن على الچرباية انتظره يطلع، دقايق ما اتأخر وطلع من الحمام وهم ما حچى شي وما انتبه اني مطلعتله ملابس راح للكنتور يريد يطلع منه..

-محضرتلك ملابس امير

اللتفت يباوع وينهن وهز براسه اي واخذهن يوكف ورايه يبدل، عفته على راحته يبدل واني دايرة وجهي حچيت..

-شصار امير؟ بشر حيدر شلونه؟

-مادري

-يعيش؟

مجاوبني بس ذب حسرة عالية، درت طرف عيني اشوفه لگيته مكمل وديريد يلبس القميص گمت من مكاني ورحت اوگف مقابيله مباشرة اباوع لوجهه مطعون وعيونه دم من حبس الدموع وايده ترجف تلفانة اعصابه..

هستوني دا احچي وقاطعني رنة تلفونه بجيب دشداشته المدماية، ركضت اني اجيبه شفت المتصل "ابو كربله" يممة گلبي گام يوجعني وهو هم حسيت روحه راح تطلع من الخوف..

-جاوب امير

-اخاف

-جاوب حباب ان شاء الله خير

رص على اسنانه والنفس يرگص بصدره، بلع ريگه وفتح الاتصال فتح مكبرة صوت..

-الامـير علي: ها

-ابو كربله: البشااارة اريددن البشااارة اميرر نجحت عملية حّيددر رجعلناا الوليدد

شهگ الامير ووگع على ركباته، حط ايده على وجهه وجسمه صار يهتز يبچييي، يبچي بنحيييب وصوت عالي گطع گلبي گعدت وياه بالگاع اضحك وابچي فرحانة ومتأثرة اخذت التلفون منه وسديت الخط من ابو كربله ولزمت ايد امير اهني..

-الحمدلله على سلامته الحمددد لله والشكر الحمدلله...

هز راسه بـ اي بدون لا يوخر ايده عن وجهه، جريت ايده اريد ابعدها ما خلاني وسحبني عليه يحضني ويدفن وجهه برگبتي ويبچي من كل گلبه، بادلته حضن حنون وامسح على شعره من وره واسولف وياه..

-امير حيدر مابي شي الحمدلله رب العالمين لطف بينا الحمدلله من رجعلكم ورجع لاهله دعيت هووايه والله العظيم هوووايه دعيتله

وخر وجهه عن رگبتي يلهث يتصارع ويه النفس عبالك صارله سنين ما متنفس، ضحكت من لزم وجهي يبوس بوجهي وراسي ورگبتي وخدودي وكل مكان يگدر يلوحه اكلني اكل هو مخبوص بيه واني اضحكك من كل گلبي سعيدة ما اتخيل فرحة ابرار شنو هسة..

وخر عني والدموع تجري من عيونه ولا نشفت، اخذ تلفونه وگعد على الچرباية وظل فترة يتصل من واحد لواحد ويبشروه العملية نجحت بس شنو اضرارها بعدهم ميعرفون الا يفيق من البنج..

-الامير علي: الحمدلله والشكر ربي ما قصر ابو الحسنين ما قصر

-تَـمني: الحمدلله والله حيدوري ماكو منه گرة عينكم اموري

باوعلي مبتسم والدموع بعدها تنزل منه، تجرأت ومديت ايدي امسح عيونه وخدوده ولحيته من الدموع وهو جر ايدي يبوس بطنها وظهرها وصدمني من هِمس هَمس شفايف كلمة..

-احبچ

جفلت وبلعت ريگي اباوعله ماعرف هو گال احبچ لو خايلي، اضطرب تنفسي وبقت ايدي بين ايده ما حچى ويايه شي بعد ولا باوع لعيوني سرح بعقله كأنه ديفكر بحيدر.. الف لوبة صارت بيه اريد اتأكد هو گال احبچ؟ وبهيجي ظروف بالتحديد لو اني تخيلت؟ بله اسأل لو اغلس؟ بس لا لا كللش مو وكتها هسة تسألين تَـمني مو وكتها!

-راح اروحن للمستشفى لا ترجعين لبيت خالتچ امنية

-لا ما اروح

-انتبهي على ابرار ابوي وشنو تحتاجن اتصلي بيه

-صار

ذب نفس وعصر راسه بين ايده متأكدة ضغطه صاعد لان وجهه كلش احمر وخشمه من جوه عبالك بي دم، گمت جبت كلينس وحطيته على خشمه وهمست بصوت ناصي..

-اسويلك عصير ليمون تشربه قبل لا تروح؟

-لا لا

-زين ارتاح شوية لا تتخربط وانتَ تسوق حباب لا تروح وحدك وانتَ بهالحال

-لا اروح گلبي نار

-تمدد شوية كم دقيقة وگوم بس خلي يستقر ضغطك

بعد اللحاح مني قبل يتمدد بمكانه بس ما قبل يحط راسه على المخدة جرني من ايدي نيمني بصفه ونام على صدري الراح ينفجر من دگات گلبي المضطرب..

-تَـمني

-همم

سكت ما جاوبني بسرعة، اخذله دقايق على الصامت قبل لا يهمس بخفوت..

-انتبهي على نفسج

-بعيني

-لا تباتين بره بيتي بعد

-تمام

-ولا تعانديني بعد

-امم

-ولا تحمضين بعد

-اهووو

رفع راسه يباوع لوجهي مدلغم، ابتسمت اجعص خده الايمن بأصبعي وگلت بهدوء..

-گتلك ارتاح ولا تفكر بشي وانتَ الله يسلمك ما خليت شي ما فكرت بي

-ترديني ارتاح؟

-اكيد

-تدورين راحتي؟

انلصمت ماعرفت شحجي هو قريب مني ونظراته تتوزع على وجهي كلش ارتبكت، بلعت ريگي اوخر شعري عن وجهي وگلت بثقة..

-اي امير اكيد اريدك تكون مرتاح وسعيد بحياتك

هز راسه ساكت بس مدا اعرف بشنو يفكر عجزت اقرا تعابير وجهه، گام من الفراش ومسح الدم السال من خشمه واني هم سندت نفسي على ايدي دا اگوم وفجأني من جرني عليه وباسني على خدي و........

الدنيا دارت بيه ولثواني نسيت كلشي، نسيت وعقلي فصل ويه همسته وهو يگول بلوعة..

-انا الچان يدري عيونچ تطيحه وعشگتچ

غرگت بجملته وغرگت ناسية ولوما تلفونه يدگ چان رحنا بعيييد كلش بعيد بدون لا احس على نفسي.. انتبهت لروحي وفزيت ادفعه عني بسرعة ودرت وجهي اتنفس سريع وحاطة ايدي على گلبي..

گام هو بسرعة يفرك بوجهه ونزل شال تلفونه وطلع من الغرفة بدون لا يحجي شي ويايه، باوعت لظهره وهو يبتعد واحس ببطني گطعتني من الخجل ماكدرت حتى اگوم من مكاني وبقيت هنا فترة استوعب الصار.. عزا بعينج تَـمني عزا بعينج! عزااا بعينج الله سترچ وتلفونه نقذچ!

انتبهت لنفسي وتذكرت ابرار، نفضت راسي انسى الصار وگمت غسلت وجهي كم مرة بلكي الرجفة تخف مني، اخذت شهيق وزفير اطمن روحي كلشي ما صار كلشي بعده بمكانه.. طلعت من الغرفة اسوي نفسي طبيعية ولا كأن راح اتقيء من الرعب العشته قبل دقايق..

بطلعتي من الغرفة سمعت صوت طگطگة اجت من غرفتي القديمة طگطگة كأن اكو احد بيها، غلست عنها ومشيت اعبر صالة الطابق الثاني ونزيت على صوت جام يتكسر من الغرفة..

اخترعت خفت تكون تالة بيها و ركضت فتحت باب الغرفة وشهگت من عمق روحي من شفته ابن عمهم سيف هنا وبيده مسدس ودايرلي ظهره ملتهي ويه الجام المتكسر..

عضيت لساني ما اعيط وانبهه بوجودي وقررت اهرب بس ما لحگت.. ما لحگت اشرد لانه انتبهلي وركض ورايه جرني من شعري من وره وشمرني بالگاع وصار يجرني من رجلي يسحلني يدخلني للغرفة..

-لااااااااا لااااااااا هدددنييي لااااااا

لصم حلگي بيده يلهث ويحچي بأنفاس حارة كلها خبث وحقارة..

-سيف: ايييي اخيراً!! تعبناا وياچ اشكاال حاولنا نطيحچ ونلعب بيج وبكل مرة تطلعين منها ويستر عليج العاار بس وعليي هالمرة ما اطلع الا واناا متممها وكاسر عينه!!

-هددددني حقييير متخاااف الله انتَ هدددني

-اليوم ***** بت ال*** بيوم الحاادث ما لحگت اسويلچ شي لحگتچ سبأ.. سبأ سترت عليج بس اليووم ياهوو يجيچ ياهووو اليوم **** بعرض الامير وشررفي

صحت من كل گلبي من حط ايده على رگبتي بدون لا يخنگني، صحت وصياحي غطى على صوت شمس الاجه من جوه تعيط وتگول "ناار، احترگناا شبببت نااار بالبيت"..

-تَـمني: هدددني وووولك عووفنييي اميييييير اللحگنييي امييييييييير امييييييييير

اصيح مثل المخبلة بكل صوتي والنذل يدوس بالمسدس بخاصرتي، صرخت واحس الدنيا سودت بعيوني، صحت مستنجدة بالمجهول مستنجدة بأسم ميوگع من لساني من اكون بمصيبة صحت بأسمه ومااعرف شلون راح يجيني هالمرة ويطلعني من هالمصيبة.......

يتبع 👑....

━━━━━━ ♛ ━━━━━━

نسكت والسكتة اوله... 🥲