الامارة الفصل الرابع وأربعون 44 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

إنهجَم گلبي وعساهَا أبيتكُم كون
نَفس هِجمّان گلبي البَيت مَهجُوم!

━━━━━━ ♛ ━━━━━━

"تَـمني"
طفر الامير من مكانه مخبوص خبص بعد ميعرف شلون يلبس دشداشته ونزل بشعر يقطر مي، لبست بسرعة صايتي وحطيت شال على راسي وركضت وراه اريد اعرف شصاير ومنو هالبنية الدتصيح لعمو علي بعياط وصللنا..

هرولت اطلع من غرفتي وطلعن عبق وحبيبة والولد الي غرفهم بالطابق الثاني كلهم يتركاضون يشوفون شسالفة.. علما وصلنا لمحجر الدرج اني روحي مخموشة وگلبي يوجعني خاايفة كللش خايفة لا اكو مصيبة جديدة والامير ينجبر يسوي شي يمرد گلبي مرة ثانية..

يبس دمي من شفت رهف واكفة ووجهها مصبوغ احمر ومتت بدمي من شفتها وگعت على رجلين الامير وگالت فحطانة..

-اللحگ يا الامير اللحگ سبأ بت عمك راح يذبحووها

لطمت حبيبة على صدرها وليلة ظلت تتلفت خايفة وخالة رسمية انخبصت خبص لزمت رهف تكومها من مكانها تريد تفتهم شصار بس البنية مذهولة وترجف وتلطم على وجهها وتصيح..

-لحگوووو لااا تظلون صاافنيين اختي راح تمووووت

-الامـير علي: ابا الحسنن خابر ابوي بسااع.. تقييي وينننك تقييي علي التـقييييي

ركض تقي يطلع من غرفته بدون قميص مبين چان نايم ورايح بسابع حلم، عبرنا يهرول وجحظ عيونه من شاف رهف واكفة بهالحال..

-الامـير علي: اللبس واللحگنا بسااااااع

ركض يرجع لغرفته وعلي الحق صعد مرة ثانية يلبس قميص فوك فانيلته الداخلية وابا الحسن نفس الوضع، الدنيا ظهر وعطلة الكل متأخر بالنوم، ركض الامير ويه علي الكرار لباب المطبخ ينتظرون البقية علما يرجعون ورهف واكفة وجسمها ينتفض وبس تبجي..

نزلنا البنات نواسيها وبنزلتنا نزلوا الولد من فوك، شهكت من شفت سلاح بيد تقي وحق وابا الحسن كلمن شايل بيده سلاح وركضوا بره البيت، قبل لا يطلع الامير اللتفت على سور ونور وعاط بيهم..

-ابقوا هنا انتم لا تجون

-علي السور: نجي والعباس

-الامير علي: ابقوووا هنااا حاموا النساوييين

-ابا الحسن علي: در وبدر موو هنا وينهم؟؟ يمة وين الولد؟؟

-رسمية: طالعين بشغل رووحوا انتم همه يلحگونكم

طلعوا الولد كلهم ورهف ومنتصر راحوا وياهم، بعدهم ما عابرين باب الحوش ودخلوا در وبدر ووياهم عمو علي عيونهم تدور ميعرفون شصاير وبدون لا يسألون بس شافوا رهف واگفة افتهموا السالفة تخص بيت مسعود، صاح بيهم شيخ علي ينتظرون ثواني بينما ينزع عگاله وبشته بس الامير ما قبل وراد يطلع ورجع عاط بي ابوه..

-لاااا ترحون وحدكمممم انتظروووني

وگفوا يلوبون وبيدهم الاسلحة ودخلوا در وبدر جابوا رشاشات ظليت ارجف بايگة هوا من شفتهن وشفت شيخ علي يطلع وياخذ ولده وياه..

-رسمية: اسم الله الرحمن دخيلك يا علي دخيلك يا ابو الحسن استرها ويانه واحفظ وليداتنا

-حبيبة: شنو هالصوت جاي تسمعون؟؟

-عبق: صوت عركة بالشارع!

ويه حچاية عبق حسينا بصووت قوي كللش اجه من فوك السطح شلون صوت ردمه قوية ووراهة صار صوت اطلاق نار صلي مخابيل طلقة وره طلقة وصوت زلم تتصايح فوگ سطحنا، عطنا مفجوعات وسلوى صارت تلم بحبيبة لجسمها وتصيح..

-ولجنننن شصااار شنو جاااي يصييييير

-علي السور: فوتنن جووه فوتننن

-علي النور: حييييدر حوووويدر ارجععع حوووويدرررر

ركض لحيدر يسحله بالكرسي وطببنا سور لغرفة ابرار جوه وعاط بينا..

-لحدد تطلع منااا هدوا عليناا الچلااب

-حبيبة: يمة اخوتي اخوووتي بقوا برره ما لحگوا يوصلوون

طلعت خالة مغلسة على توصيات سور وهذا ما قبل تخبل علينا يدفع بيها جوه ميخليها تطلع ولا يخلي وحدة تعبر باب الغرفة، ما اهتمت خالة رسمية ولزمته من ايده تتعارك وياه وعيونها ناطة اول مرة اشوفها بهالشكل والقوة، صوتها انبح وهي تصيح..

-اخووووتك ولللك اخوووتك هدددني

فلتت نفسها من بين ايده وطلعت تركض وتلطم على وجهها من شافت بدر يدخل للبيت و چتفه متصاوب، ركضت شمس تعبر سور وتعيط بأسم بدر وتبچي بچي خمش گلوبنا..

-علي البدر: مابيه شييي طبن جوه يممة

-شمس: خليني اشوفك اوگفف لا تدفعع

-علي البدر: ووولج يمة اخذيييهاا

مدا افتهم شنو الموضوع ولا احد ديعرف شنو صار! علي البـدر اجه وچتفه متصاوب برصاصة وميعرف منو الي ضربه من بعيد! دخلنا بحالة هلع بالبيت والاجواء كلما جايها تسوء.. حرب قامت اصوات قوية تصدر من بره وصوت كأنما ماطور دراجة نارية يگوم بالحديقة مالتنا.. حبسونا بالغرفة كلنا وگعدنا وحدة حاضنة الثانية وسور واكف بالباب يمنع أي وحدة تطلع..

-شجااااابچ انتِ وكتهااا

سمعنا صوته يعيط من يم الباب وصوت مرة خشن يتداخل ويه صوته فوراً عرفناها فراقد جايه وبهيجي اجواء!.. دخلها سور علينا ومن الباب استلمتنا تلطم وفتحت شيلتها مصدومة ووجهها اصفر صاير..

-خايباات شني جاي يصيير شني مجززرة خوما مجزرة

وگفن خالة رسمية وحبيبة يفتهمن منها وانصدمنا كلنا من عرفنا عمو علي والولد ما لحگوا يوصلون لبيت مسعود لان بيت مسعود واصدقاء ولده هجموا علينا بدراجات نارية واسلحة..

-فراقد: الساقطة الخايسة سبأ گايلة لاهلها تقي متحارش ومكضكض بيها

-رسمية: شنييي ولج شلوون يمته هاي؟؟؟

-فراقد: بالعباس مادري سمعت وليدهم سامر يسولف ويهدد وسليطين هجم على تقي وافتهمت شوي من السالفة

دفعتها خالة رسمية عنها وركضت لـ علي السور تبلغه يفتح الباب بس تفاجأنا من ما لگيناه واكف هنا لا هو ولا نور موجودين بالبيت وصوت عيااط مجانين جاي من بوابة المطبخ وزلم يتصايحون..

-زيد: المخانيييييث ولد الزناااا الااا ننعل شرررفكم اليووم ونشوف ياهو يوگفناا

وصوت مألوف يتصايح وياه ميزته حبيبة وكالت هذا منتصر يجاوبه ومبين مال واحد ديتعارك..

-منتصر: وووولك هيييييييد انععل ابوووك لابووو امك لووو داست رجلك هالبيتت زيييييد

رجفة خوف وقلق ووحدة تتلفت على الثانية بضياع، بالنا ويه الولد ميتين خوف عليهم محد منهم بين وصوت الزلم الديجي من بره ومن الديوان منعرف تابع المن..

ثواني وصرخت مشلولة بمكاني ويه صوت طلقات وحدة وره الثانية اجت من المطبخ وصوت منتصر اختفى يمممة غير روحنا راحت وحبيبة انهارت ركضت تطلع بدون حجاب مثل المخبلة وامها تلزم بيها وتتعارك وياهة تريد ترجعها وهي متقبل..

-هدددديني يمممممماا

-سلوى: ووولج مخبلللة وين رايحة وووين

-حبيبة: منتصررر مااكوو اختفى صوته ويييين منتصرر يووم هدينيي بس اشوفه

چتفتها امها وشمس ودفعنها لحمام الغرفة وقفلوا الباب عليها، ظلت حبيبة تصرخ من جوه وتكسر وتضرب بباب الحمام وامها تبجي وتدور بعيونها متعرف شتسوي..

-عبق: وين راحوا الولد خالة ويين حبابة خلي احد يطلع يطمننا

-فراقد: ياهي تطلع ولج الدنياا مكلوبة شنيي ما رايدات شرفناا

گلبي ينبض بجنون واطرافي بعد ما احس بيها، ظليت اروح واجي بالغرفة وادعي يارب تعدي على خير يارب ميصير شي مو زين يارب إحفظ الولد..

ضميت وجهي بيدي مختنگة ضايق نفسي من كرر زيد كلامه يعيط من المطبخ ويگول بنبرة حاقدة حقيرة..

-هيييهييييي تلعبووون ويه ولد مسعود مااا يطلع اسمي زيدد لوما دنستت شرفكم وكشفت على نسوانكم يا ولدد الچلبب

-رسمية: هذاا ياااهو يريد يدوس بيتنااا ياااهو يريد يكشف على بنياتيي

عاطت من جوه ولفت شيلتها وطلعت من الغرفة، ركضن وراهة فراقد وابرار يوكفنها وما قبلت دفعتهن وعاطت بينا..

-رسمية: صعدن للطابق الثانيي بساااع

جفلنا من سمعنا صوت منتصر يجاوب زيد صرنا وحدة تباوع للثانية مرتاحات معناها هو بخير ومبي شي، ركضت ليلة تبشر حبيبة وامها مقبلت واشرتلها تطلع.. طلعنا نركض كلنا وفراقد ويانه سلوى ما قبلت تصعد وبقت ويه حبيبة وشمس بغرفة ابرار، صعدنا وقفلن الباب ورانه وتوزعنا قسم بغرفتي وقسم بغرفة عبق وقفلنا البيبان علينا..

اجت فراقد لغرفتي وعكدت شيلتها تدعي الله يعديها على خير، ركضت على تلفوني واتصلت على الامير البطرانة مادري شحس بس احتاجيت اتطمن عليه وللاسف ماكو منه جواب تلفونه يدك وميشيله..

-تَـمني: خالة امير ميجاوب

-فراقد: لااا عوزه يجاوب؟؟ تردي كاض عاصف من زيجه ويگله اعذرني ثواني اجاوب مريتي وارجع اكتلك؟؟

-لا مو هيج بس..

-بس شنيي؟؟ گووي گلبج ولج لاا تظلين فاهية سندي زلمتج رجلج شيييخ يحتاج مرة حووك مرة عينها صللفة وگلبها جلد عييب تتفهين عيييب!!

انصدمت من عاطت بوجهي ترزلني بس سكتت مجاوبتها هسة اني بيا حال وتكول صيري مرة حوك مو والله گلبي راح يوكف من الخوف..

ربع ساعة مرت من الرعب الحقيقي، گلبي وراسي وعقلي ميتحمل الديصير هووسة وفوضى وحديقة البيت انترست زلم غربة واصوات الولد جوه توصل لهنا لغرفتي وفراقد واكفة وتلوب وتلطم على رجليها..

-فراقد: ابقي هنا لا تطلعين انزل اشوف بلچن الوضع هده

-يا هده خالة دتسمعين العياط انتِ؟؟

-گعدي ما عليج انتِ

طلعت وعافتني وحدي بالغرفة وتأخرت بعد ما رجعت، الف فكرة وفكرة اجت براسي والوسواس نخر گلبي خايفة لا يكون صار شي جوه وبقت وياهم..

فتحت باب غرفتي على كيفي وعبرت صالة الطابق الثاني ناوية بس امد راسي من المحجر اشوف منا ووكع كلبي من شفت شايلين علي الحـق مغمي عليه والامير سابح بدمه دشداشته البيضة صايرة حمرة وشعره مخربط ووجهه عرگاان..

انتهييت وبعد ما اشوف بعيوني، ركضت مثل المخبلة انزل اريد اتطمن عليه ماطول ماكو زلم غربة هنا وبعدني على نص الدرج وانتبهلي دا اجيله.. اجاني يهرول وصاح بيه صوت نززني..

-رجعييييي فووووووووووگ

-امير.. مو...

-صعدددددددي فوووووگ صعدددددي

دفعني على الدرج وقبل لا اوگع على ظهري لزمني من متوني حييل ورفعني يصعدني فوگ ورجليه لو تدوس الباية لو تلولح بالهوا، اخذتني الرجفة مخترعة من عصبيته وروحه الطافرة وخفت اكثر من دخلني لغرفتنا وشال المفتاح من الباب يقفلها عليه من بره..

-لااا امير لاا تقفلها ما انزل والله

-تَـمنيييي ما جاي نلعب ممنوع تطلعيييين لو الدنياا تحترك

-مو.. اخاف اخاف عليك والله اخاف

-لووو شفتيني مطبررر ومگصب مااا تطلعين مناااا

يعيط بوجهي واني من الرهبة بس اهز براسي اي وگلبي يدگ بهمجية راح انجلط، طبگ الباب وتخبلت من نسى وقفلها عليَّ ظليت اعيط بي يفتحها بس اختفى حتى صوت خطوته مينسمع بعد..

كعدت بالغرفة اللوب وافرك بيدي ماعرف شنو تاليتها وشنو راح يصير شلون راح تصفى، وكفت يم الشباك اشوف منا بس شنو ينشاف وشنو ينعاف الحديقة محتركة وناس لازمة خوانيگ ناس وتتعارك..

دقيقة تجر دقيقة وساعة تجر ساعة واني واكفة هنا اللوب واحمس بروحي غيير احد يجيني يطمني! غير اعرف انحلت لو لا لان الحديقة شبه فرغت وبقوا كم رجال.. كتبت رسالة لـ عبق اسئلها شصار واكو تطورات لو لا ودزتلي متعرف شي حابسيهن بالغرفة وميقبلون وحدة تنزل، خفت اگوللها شفت علي الحـق غايب عن الوعي من نزلت لا تخترع البنية وتظل تلوب عليه ومتگدر تنزل تشوفه..

**

"سبــأ"
گلبي يدگ بطيء واصارع خاطر اجرن نفس وابقى عايشة، جسمي ورم من الطگ الخله جلدي يتگصگص وعيني اليمنى انطفت ما جاي اكدر اعاين بيها.. ادور عيوني بحيطان الترك الاظلم بين براميل النفط والعتيگ ودموعي تصب، مادري صارلي چم ساعة هنا محبوسة امي ختلتني هنا عن اخوتي وابوي لا يذبحوني وهاي اول مرة اشوف امي مهتمة بيه وخايفة لا يصيرلي شي..

اسمع لصوت بچي رهف جاي من بره وتدگ الباب عليَّ على كيفها وتسألني عن حالي، مسحت على وجهي اوخر الدم عنه وجاوبتها بحس مبحوح..

-عايشة انا

-رهف: اجه شيخ عصام وتدخل يحل السالفة لا تخافين يا عوينتي راح تنحل وعلي تنحل

-فضحوني رهف

-لا لا والله محد يدري ابوي ما فهم احد واصلاً محد من الغرب يدري السالفة بيها بت حسبالهم عركة عادية مثل العادة

-رهف

-هاا

-امي وين

-بالصالة واكفة تتسمع على الزلم بلچن تفض

-روحي تسمعي لا تبقين وياي وسولفيلي كلشي يصير

-اي خوش.. انتبهي على نفسج حبابة

تحسرت وسندت ظهري على الحايط ونزيت متوجعة ضلوعي تون عليَّ وجع مو طبيعي ياكل بجسمي.. شكد مكتولة من اهلي وشكثر ماكلة طگ واهانات منهم بس مثل هالمرة ما عشت ظليت ويه كل راشدي ورفسة ادعي ربي ياخذ روحي ويخلصني من الوجع والعذاب..

بعد مرور فترة مو قليلة من الوقت رجعتلي رهف دگت الباب عليّ وهمست تحط حلگها بالباب..

-سبأ كاعدة؟

-اي اي بشري انحلت؟؟

-يردوها دم سبأ

-يممممة

-وعلي ابوي حلف ما يهيد الا يوصل الدم للرچاب

-سووودة بوجهي

-صوتج ولج لا تصيحين تردين تنذبحين انتِ!!

-سولفيلي شني حلتها شون بينا لو كتلولنا واحد

-ما يكتلون بس احنه ناخذ واحد منهم وهسة راح سلطان كتب على حايط بيتهم مطلوب ثار بالاحمر

-صخام الصخم الحالي شسوويت انا شسوييت

-علي الحـق تصاوب ونقلوه مستشفى وبدر هماتين سمعت متصاوب والدنيا محترگة ببيت عمي علي زيد وعاصف متحلفين ما يعدوها الهم ومادري شني ناصبيلهم

-دخيلك علي شون راح تفض!!!

-مادري خية انتِ هسة ارتاحي وخليني اجيبلج شي تاكلينه الوكت تأخر

-ماريد سم عساني بالمووت ان شاء الله

-انچبي ولا تحجين حجي زايد هسة راجعتلج

راحت رهف وعافتني اللوبن خايفة وگلبي غادي نار اعرف ابوي ما يمشيها ولا يعديها هو يتمناها بالروح يتطالب ويه عمي علي وانا جبتله الطلابة على ماعون ذهب..

غمضت عيني اريحهن ورجعتلي رهف فتحت الباب على كيفها وانطتني لفة وطلعت، عفت الاكل ما جسته ما الي نفس عقلي وگلبي كله وياه بشنو جاي يفكر هسة؟ راح يعذرني من يعرف انجبرت اگول اسمه لابوي واخوتي لو يبقى حاقد عليَّ؟

مسحت دموعي واتلمس اثر چويات ايدي واتذكر شون جبروني احجي وعلي شفت الموت يا تقي وما ذكرت اسمك الا من حسيت بروحي تريد تطلع من چووني بأيديناتي ووصلت بيهم يردون يحرگون صدري ماعرف شلون طلع اسمك من حلگي وجبتك بالطاري..

شرحتلهم وگلتلهم لاگيته صدفة جاي عنده شغل وشافني هناك وسلم عليّ من بعيد ولگفنا سامر، حلفتلهم چذب وگلتلهم لا سولفت وياه ولا سولف وياي ولا عاينلي بس سامر النذل بقى يذب على النار حطب وگال شفتهم يسولفون..

تنهدت اذبن راسي على البرميل اسنده وغمضت عيوني، مادري شون خذاني النوم وفزيت الفجر على صوت الچيلات صليي، نزيت مخترعة اعاين للسما لونها تغير اثر البارود والنار وريحة الدخان تخنگ.. صوت اخوتي يهددون ويتعاركون من جوه البيت وصوتهم من بره يرعد ويرهب..

تحسرت افكر ببيت عمي علي شني حالهم هسة وشني الخوف الجاي تعيشه نسوانهم.. گعدت انتظر اخوتي يوصلولي ويذبحوني بمچاني وظليت على هالحال دقيقة دقيقة انتظر موتي البطيء.. طلع الصبح وانا على كعدتي، سمعت اذان الظهر ومحد اجاني غير رهف وهيج مضى اليوم وانا على هالكعدة حالي بالضيم محتاجة تواليت محتاجة اغسل واخافن اطلع..

ثاني يوم اجتني رهف تلهث، فزيت مخترعة من شفتها بس ريحتني من كالت ابوي واخوتي بالديوان اكدر اطلع للحمام وارجع هنا.. كمت بساع رحت للحمام سبحت شون ما جان وطلعت ملفلفة روحي وكعدت بين براميل النفط..

-رهف: راح اجيبلج بطانية اوكفي

-ماريد تعاي فهميني ابوي واخوتي معقولة ما سألو عني؟؟ شون اقتنعوا يخلوني عايشة؟

-ولج سكتي لو تعرفين على شني ناوين

-شني كولي

-مو كتلج شيخ عصام تدخل فـ ظل يضغط على ابوي يگله فهمني على شني كل هالمشاكل اكو سبب مقنع؟ وابوي ظل يمطمط يجيبها منا ويوديها منا لحدما طلع الشيخ من البيت

-اي؟؟

-بس الشيخ ما هاد ولا سكت كاض سامر وبالحجي جار لسانه وافتهم السالفة سالفة بت ورجع على ابوي

-عمتت عينييي انفضحتت

-ولج لااا ابوي من شاف شيخ عصام ما يسكت وفضولي فضها وياه وگاله واحد من ولد علي تورج بالغلط على نساويني وانا ما ارضاها

-زين؟؟

-شيخ عصام ما رضى بهالوضع وگاله انا احلك السالفة ونرجع حگك وكرامتك وعلى اساس باچر راح تصير الكعدة

-وانا؟؟

-انتِ شني

-ليش ابوي واخوتي ما اجوني غريب رهف ما اظنهم يفوتوها هيج

-مادري سبأ امي هم حاطة ايدها على گلبها وطاريچ ما تجيبه كدام ابوي وهو همات ما سأل عنج بعد

سكتت مادري شگول ماعندي تعليق، كلما جاي يمر الوكت كلما وجع جسمي يزيد وحرگ ايدي يبطبط، رجعتلي رهف جابتلي بطانيتين ثخينات ومرهم للحروق وطلعت تركض تخاف لا يتفطن واحد من اخوتي ويجون يخلصون عليّ..

الوكت ما يمر بألف حسرة والف دخيل ضلعچ يا الزهرة طلعت شمس صبح يوم الگعدة، كعدت وايدي على گلبي وجسمي يرجفف اطگن سن بسن واحس بنار مشتعلة بيه وبردانة بنفس الوكت.. النفس صار يخرخش بصدري وگحة قوية صارت عندي وگوة كاتمتها لا يسمعوني..

فزيت على صوت فتح الباب ورجعتلي رهف ترجف وجسمها يختض، كمت ع حيلي اكح وعاينت لعيونها المدمعات، گبل لا اسئلها شكو حضنتني وكالت بضحكة فرح..

-يردوون يسووها وحدة بوحدة سبأ ينطوچ وياخذون حبيبة لـ غفار بمچانچ!

شهگت من نص گلبي فاكة عيوني دفعتها عني ودكيت على وجهي ورجلي فاحطة..

-شنيي ولج المن ينطووني

-يزوجوچ لواحد من ولد عمو علي بس بشرط ينطون مرة وياخذون مرة وماكو غير حبيبة تجي بدالج هذا چان حل شيخ عصام

-يمة گلبي

-اي ولج الحمدالله بس كون ابوج يرضى ما جاي يقتنع وقافل

-ولج رهفف ياهو ياخذني لو صارت صدگ؟؟

-شمدريني يجوز لـ بدر مادري

-بس بدرر متزوج!!

-اي بس سمعت امي تكول مريته ما تخلف وسلوى مفلفلة تريد تزوجه وحدة ثانية

-لا لاا رهف لاا بجاه علي لاا ما اريدن بدر ما اتزوج والعباس ما اتزوجه

-خاب انچبي صحلها زلمة كالت اعور سكتي خليني اروح افتهم شلون نهوها

-رهفف اوكفي عايني گليلها لامي سبأ تكول ذبحوني ولا تزوجوني

-سببببأ

-خايبة استاهل استااهل ذبحوني دخيلج رهيفة عساچ الجنة قنعي امي دخيللج

-سكتييي سبأ لا تضوجيني منج

-رهف روحي تأكديلي فدوة اندارلج

-خووش خوش

عافتني وركضت تطلع من الترك عايفتني بضيمي، روحي انخمشت ودموعي تصب شسوي بروحي لو صدگ فضت هشكل ونهايتي لـ علي البـدر يا سواد وجهي ويه شمس ويا كسرة گلبي بـ علي التـقي..

مرت فترة انا كاعدة وافرك بيدي والافكار تروح وتجي براسي، كمزت من مكاني من انفتحت الباب عليّ ورجعتلي رهف وجهها ما يضحك مثل گبل شوي شو هسة مكلوب وصاير اصفر..

-شبيچ

-ولاشي گومي منا امي تريدج

-رهف شصاير؟؟

-كومي سبأ

-عليج العباس تسولفيلي ولا تضمين عليّ

كضيت ايدها اتوسل بيها واشوفن عيونها تطاير، گلبي وجعني وخفت لا يكون صاير شي چبير..

-ولج احجيييي

-سبأ ابوي رفض يزوجچ لـ بدر عبنه متزوج و.. و..

-اي؟؟؟

-صارت هوسة وضجة بالديوان وابوي معند ما ينطيج الا لعزابي وعلي التقي الوحيد اليناسب عمرج و...

-ولج احجيي دمي يبسسس

-تقي رفض يتزوجچ

شهگت بوجع چن صخرة وضربتها بنص صدري، اختنگت وضاگ بيه النفس صفنت بعيونها المكسورة وصفنت بعيوني المهضومة.. صديت وجهي عنها لا تطيح دمعتي گدامها واتفشل ضعف فشلتي وكضيت ايدها اسند روحي اطلع وياهة من الترك..

اخذتني لامي بغرفتها وبدون لا اعاين بعيونها شمرت روحي بحضنها وهاي اول مرة اسويها، حضنتها وبجيت بجي عمررر عصرت متونها بيدي ادفن وجهي بصدرها اريد اختفي هنا وما يلوگلي اثر اريد اخلص من هالدنيا بلچن ارتاح..

-صابرين: لا تبجين سبأ كومي مو بت صابرين اليدللون بيها

-رهف: يمة بس..

-صابرين: اششش سكتي انتِ، اخذي اختج وخليها تبدل وتاكللها لگمة بينما احجي ويه ابوج

جرتني رهف عن امي غصب عني وصعدتني لغرفتنا، بدلتلي هدومي وأخذتني للحمام تغسل وجهي ونزلت تجيبلي لگمة اكلها وانا باقية هنا اتصفن بالحيطان وگلبي ينزف دم..

دقايق مشت وفزيت مخترعة على صوت صياح رج البيت رررج عاينت للباب متحضرة على أي دقيقة يطبون ابوي واخوتي ويذبحوني ويخلصون من عارهم بس محد اجه.. محد اجه غير رهف طبت للغرفة تركض وتحجي مستعجلة..

-كومي سبأ لبسي عباتج بساع

-ليش

-كوومي راح يعقدولج على تقي كومي

-ما اعقد

-كومي ولج الدنيا محتركة جوه

-ما يهمني

-سبببببأ

عتتني من ايدي تلبسني شال وعباه ونزلتني تركض على الدرج وانا وراهة، مالي نفس شي ولا الي واهس كعدت بالصالة واشوفن اخوتي يروشون كل ساع واحد بيهم يتعده مني يخزرني ويضرب على رجله متحسف..

-عاصف: هااي تاليتهااا ننطي لبيت علييي العاارات

-زيد: كللله من وره ابوي لو ما حاچييي وگايل تورجوا على بنيته جان ما انجبرنا ننطي!!

-غفار: يلا اجت من صالحي صارت وحدة بوحدة

-سلطان: على كيفك وليدي تره شيخ علي ما انطاك بنيته ولا جاوبنا وابوك هم ما ضغط عليه بالسالفة يعني اذا ينطي لو ما ينطي براحته بعد!

-غفار: غصباً عليه ينطي! راح يتفشل ويه شيخ عصام اذا ما رضى ينطيني لان الما ينطي بس الخايف لا بنيته تكون معيوبة وشيخ علي ما يخلي لزمة على روحه وراح يزوجني حبيبة انا متأكد

حچاهة بضحكة شاكة وجهه فرحان واجه كعد على القنفة نافخ نفسه، فرت ايدها رهف عليه وگالت من وره خشمها تهمسلي..

-عفية وادم ما يحلون مشاكلهم بس بالزواجات همج يسدون حلوگهم بالنسوان

-زيد: شتبسبسين بت القندرة؟؟

-رهف: اسولف بجمالك

-زيد: تستهزأين ولج؟؟؟

-رهف: ليش لهدرجة تشوف روحك تلعب الروح؟

-زيد: انچبي غير اجيب التايهات من بعيد

-غفار: انچب چنك چعب استكان

بقوا يتداهرون وواحد يحجي على الثاني لحدما اجه ابوي وصاح اسمي، وكفت بمچاني منزلة راسي وتقدم هو عليّ ما كدرت اعاين بعيونه خايفة منه لا يسويلي شي وبقيت منصية..

-مسعود: انتِ عار عليّ و ما تستاهلين تعيشين! زايد مني مطول خلگ وگاومت بيت علي لخاطرچ

-صابرين: گاومهم بدددم ولا تنطي بنيتك!!

-مسعود: بحالها انا؟؟ بس طلبت بيها مهر خسف ظهورهم! رووحي تزوجي خليني اخلص منج انطيتچ لچلب عبنچ زايدة على گلبي رووحي من عابت هالوجه الاچلح

نزلت دموعي مكسورة اكثر من چلامه ونبرته وشهكت جافلة من كضني من زندي يعصره بين ايده يجبرني ارفع راسي واعاين بعيونه..

-بس خليها ببالچ انا ما زوجتچ لسواد عيونج! انا رايد استرچ واطم عارچ ويه زلمة يتحمل نتيجة افعاله غصبباً عليه!

-عاصف: ليش لحيت على علي التـقي؟؟ ليش الا هو ردته ياخذها؟!

دگ گلبي بقوة من جابوا طاري اسمه ودرت عيني على عاصف اليحجي بأستهزاء..

-مسعود: مالك غرض انتَ لا تدخل!

-صابرين: انا اگلك ليش راد تقي بالتحديد عبنه ضابط خاطر يتستر على خياسكم ويطمطمها من تحتاجوه!!

غلس عليها ابوي ما يجاوب وهيج عرفت وتأكدت چلام امي صح وصدك هاي نية ابوي، سحلني ابوي من ايدي وگفني بباب الديوان وخزرني ينتر..

-راح تعقدون لا تظلين تتعيقلين وتطوليها!

-سلطان: تره الزلمة واكف على طريف هسه يبطل عليج

-صابرين: ما ابريلك الذمة ولاا راضية يا مسعود على هالزواج!!

-مسعود: عساج لا رضيتي

-صابرين: انتَ تعرف بنيتك ما سوت الغلط! لاا تظلم بختنا وتزوجها لأبن عدونا!!

-سلطان: ولا احنه مقتنعين بالفكرة يمما سكتيي واوكفي غاد ولا تحطين روحج بسوالف الزلم!

دفعوا امي على جهة وطبوا ابوي واخوتي للديوان خاطر العقد وامي واكفة تسب وتقسم على اخوتي، تصفك ايد بأيد وتعض بأصابعها وتغمغم بيه..

-صابرين: راح تنذلين ذذذذلة وكولي ما كلت!!

-رهف: اليسمعج يگول سبأ عايشة هنا متريشة

-صابرين: انچبي يبقى بيت ابوها! مو بيت عدوان يدورون الزلة والغلطة عليها!

-مسعود: ياا نساوين راح يبدي السيد بالعقد!

صاح ابوي من جوه الديوان وانا گلبي طاح بين رجلي، اريد اثبت بمچاني واكعد عدل ماكدر اللوب وروحي تلوب وكلبي وعقلي كله طاير احس بروحي نايمة و اتحلم والجاي يصير كله مو حقيقي..

ريگ وره ريگ ابلع يبس حلگي ويه السيد وهو يعقدلي على علي التـقي الما طلع حسه من جوه، تحسرت طالعة الدنيا من عيني مابيه حتى اجاوب وانطي الوكالة بس كوة حچيتها جرت على روحي وگلت..

-نعم انتَ وكيلي

صفگت امي على رجليها وصدرها ونزعت شالها وشمرته بالكاع مقهورة ورهف ظلت ساكتة وتعاين عليَّ، غمضت عيونها تذب نفس وهزت راسها تواسيني بطريقتها، نزلت عيوني مهضومة على روحي يعني مكتوبلتج الذلة يا سبأ طول عمرج مكتوبلج تنسمح بكرامتج الكيعان وتبقين عالة على كل بشر يتگرب منج..

تنهدت ادور بعيوني بين امي ورهف ماعرف شني الخطوة الجاية وما لحكت افكر هواي عبن گبت بالديوان واعتلت الاصوات..

-صابرين: هاي شكو؟؟

-رهف: مادري

مدينا اذاننا نتسمع واجانه صوت غفار يصيح ويضرب على الطاولة بيده حيل..

-انتممممم تضحكووووون علينااااااا

-شيخ علي: نضحك عليك شني؟؟ جاي اگلك البت متزوجة شنيي تريدد اطلگها من زلمتها وانطيك!

-غفار: چذااااب انتَ واااحد چذاااااب استحي على شيبااتك ولا تجذذذب علي!!!

-الامـير علي: وعِلّي بگلبببك ولك طايح الحظ!! اعرف ويامن تسوولف انلصممم يلا وولي هنااك ماريد اعاين لچهرتك

-غفار: بالعبااس اليووم لو ااانا لو انتمم

ركضت رهف تعاين من باب المطبخ تشوف غفار طلع يركض وركضوا وراه باقي اخوتي والامير وتقي وشيخ علي وشيخ عصام كلها وراه تركض خايفين من خبال غفار لا يسوي شي بـ حبيبة والله يستر شني راح يصير..

**

-يعني تصاوبت وشفت الموت بعيونك وبعدك تسوي سوالف مينلبس عليها ثوب؟ والله ماعرف شنو من بشر انتَ

-علي الحـق: ااااااااخ بت العگروگ على كيفج هو هيج تدوسين بجرحي

-عبق: اسكت ماريد احجي وياك

-تحجين وغصباً عليج

-عبق: عود شنوو تجبرني؟؟؟

-اي!

عصبني بالزايد واني منا متفحم گلبي ضغطت على جرحه بالشاش عود دا اللفه وخليته يرافس ويفشر متوجع اييي حيل بيك حييل حتى تتأدب ومتظل تلعب بذيلك..

-وووووولج ااااااااااخ شنييي من بشر انتِ خايبة لا ذمة ولا ضمير وعليي

-اني الماعندي ذمة وضمير مو؟؟ اني؟؟ ليش منو جايب صاحبته وكعدت تتماوع وتذب بدموع التماسيح وتتنعوص بصوتها وتفتح بقميصها؟؟ منووووو

-اذني اريدها اولاً ثانياً سوزان مو صاحبتي

-لااا تكول اسمها اسكت اييع ايييع تلعب نفسي اسكتت

-قبق

-اسمي عببق لا تصيحلي قبق!!

-عنق

-كتلك عبق!!

-شفق

-اهوووووو

شمرت المعقم وعفته وكمت اريد اطلع ونهض نفسه وجرني من ايدي بقوة خلاني اوكع على صدره غصب يلزك وجهي بوجهه، غمض عيونه متوجع من ثگلي عليه لان الجرح صاير بخاصرته بس ما قبل يوخرني ولا اني وخرت گلبي نار..

-هدني علي الحـق!

-ما اهدچ.. صبر ثواني بس استوعب الوجع

سكتت شوية لان شكله متألم ونهضت روحي اوخر منه بس ماقبل وظل مشدد على ايدي، انحرجت من قربنا هو متمدد ومغمض عيونه مركز ويه الوجع واني ساندة عكس على چربايته والايد الثانية حاطتها على بطنه..

-علي

-ثواني عبق

-متوجع كلش علي؟

بلع ريگه عاكد حاجبه قلقت عليه وعلى كعدتي مديت راسي اشوف الشاش المغطي الجرح شوية صاير بي دم..

-علي جرحك دينزف

-فدوة الج

-هو شنو فدوة الي شحصل اذا توجعت

-هسة انچبي مو جاي نتغزل

-عود هو ديصير رومانسي

-احبج قبقي لا تطلعين من غرفتي زعلانة

-صعب

-شبيچ ولج چنچ مشتهية عركة وانا بهالوضع؟

-ممشتهية عركة اني ولا اريد اتعارك وياك اريدك بس تفهمني سوزان ليش اجت هنا؟ شجابها من بغداد لبيتك لا وانوب اجت تسأل عنك بالاسم!

-عگروگ

-لا تظل تسويلي عگروگ وبطة وتتمسكن ومدري شنو جاوب سؤالي!

-عبق اجيبها الج من الاخير؟

-ايي

-سوزان تريد رجل

-اللهم صللللل على محمددددد وال محمدددددد

-اي والعباس تريد رجل وموبايلي صرعته صرع وروحي شوفي بعينج ولا اتصال جاوبت الا امس من دكت وبالغلط فتحته

-بالغلط فتحته؟؟؟

-وداعة امي بالغلط ومن سمعت صوتي تعبان سألتني شبيك گلتلها مريض وهااا اها لا سولفت وياهة ولا انطيتها تفاصيل ولا صخام بوجهج كلشي ماكو

-طبعااً تجي وطبعاً عبالها بيك مجال علي الحـق! انتَ تلبس حلقتك من تروح لبغداد لو لا؟؟

-هااا؟

-تلبس حلقتك لو لااا

-لا تصيحين ولج انطيني مجال اجاوب انا رجال متضرر هسة لا تستغلين هالشي لصالحج

-والقران الا استغله واروح لفندقها واتعارك وياهة!!

-روحي

-كول والله؟؟

-والعباس روحي تعاركي ياهو مالتي

-حق لا تخبلنييي

-هو انتِ مسودنة من گاعج انا شكو

-عفية بشر شكد مستفز

تعاركت وياه بأيدي بس اريد اوخر منه وهو معند لازمني بكل قوته ويضحك ويداهر بيه ويجر وجهي يبوس بيه ويگول متحمس..

-هذا المستفز بچاچ دم من گالولج هو بالمستشفى متصاوب

-لا ما بجيت دم

-صح بس بچيتي بچي معزايات ولا تجذبين عليّ امي گالتلي گابلتي غرفة العمليات وكعدتي تبجين بالكاع ما ترضين تكومين

انعصر گلبي من ذكرني العشناه اليومين الفاتوا گلبي مات من شفته سابح بدمه حسيت بروحي تريد تطلع من صدري ويه صوت اخوانه الحايرين بي وابوه يصيح بأسمه وامه تلطم فوك راسه، علي البـدر هم تصاوب بس انضرب بچتفه وما فقد الوعي بس حق چانت اصابته اقوى صارت قريب خاصرته وكسرتله ضلع..

-هاا شو سكتي

-لا نحجي بالصار المهم انتَ هسة زين وبصحة وعافية الحمدلله

-وما احصل منج شي لسلامتي؟

-شتريد يعني

-مادري انتِ وكرمج

-علي اكعد راحة

-ماكدر اكعد اكدر انام؟

-علي الحـقققق

-هههههه وللج امووت عليج قبببق

عصر خدودي وجرني عليه يبوسني ويتحارش بيه بسخافة يممة وجهي اشتعل من لمساته وحركاته اريد بس افلت ورغم وضعه الصعب بس ماكدرله..

-لا لا حباب شبيك حقق شبيك تره عيييب

-العيب الوحيد هو دشداشتج هنا قبق

-هاا هم رجعنا على الدشداشة؟؟

-قبق خلي ملابسج كلهن كودري اخرب واتكهرب عليه

ضحكت صافنة على تفكيره اول مرة اشوف بشر هيج يعشق الكودري وانوب صفنني بالزايد من گرصني بخصري وغمز يگول..

-خلي حتى الشسمه كودري

-نعم؟؟؟

-شبيچ قصدي على التراكات شسالفة

-عليي توب من سوالفك عليي

-اموت على رب علي

-يلا اني رايـ....

گطعت جملتي جافلة وهو هم فتح عيونه وفز من مكانه على صوت رجال يصيح بخباااال اجه من جهة الحديقة، طفرت من يمه اركض للشباك وظل يعيط عليّ ميخليني افتح البردة اشوف..

-بس اشوف منو

-لااا تفتحيننننن گلتتت

گام كوة يستند على تاج الجرباية والميز مديتله ايدي اساعده ما قبل وكام وحده ايده على خاصرته ويمشي كوة، راح للشباك يفتحه يشوف بس الصوت صار قريب كلش وكأنه جاي من الصالة الجوه..

-خاف واحد من اخوتك؟؟

-لا تنزلين

هرول بخطوات شبه سريعة وطلع من الغرفة بس ماكدرت ابقى فوك خفت عليه يصيرله شي مثل قبل كم يوم، انتظرته علما نزل وركضت لمحجر الدرج شفت تَـمني واكفة وياهة تالة وليلة وجههن اصفر وجاحظات عيونهن يباوعن لشي..

وجهت نظراتي للاتجاه اليباوعن عليه ولطمت صدري مصدومة من شفت غفار يصيح مثل المجنون وعاصف مقيد ايده والامير علي يتعارك ويدفع بي وتقي من جهة وخالة رسمية وسلوى متخبلات وشيخ علي يصيح بي ومسعود واكف بباب البيت بس يتفرج..

-غفار: الله لاااا يوفقكمممم وووولكممم انااااا تزوووجون الاحبهاااا اناااا ياخذوون الرايدهاااا منيييي

-شيخ علي: غفاااار البت تزوووجت ماا تستحي انتَ!!

-غفار: جيبوووهااااا وووولكم چذابييييييين جيبوووهااااا

-الامـير علي: ااطلعععع لا ابتلييي بيييك اطلعععع لك سرررسريي

-غفار: تففففف على غيرررتكم وشرفكممم تففف على شرررفك وعرضك ووولك شيخ عليي اشتتتعلت رووحك مثلما شعلتتت روووحي

-علي الحـق: كضوووا ونعلوا والديه هالسربووتت

فلت روحه منهم محد ديگدرله وهو طويل وجثل وركض لغرفة سلوى وكأنه يعرف حبيبة كاعدة هناك، لزمه الامير من خوانيگه يسحبه وركض غفار على باب الغرفة وانتفضنا كلنا على صوت طلقة اجت من مسدس علي التـقي ضرب الحايط البصفهم يهدد بيها..

-علي التقي: حركة وحددة وانيم چييلة بگلبك!

-غفار: انتَ زلمة سويها!

ما اهتم لـ تقي وچفت على الغرفة يفتح الباب وقبل لا يلحگ يخطي خطوة وجه تقي المسدس عليه وضرب طلقتين رن صوتهن المخيف بالبيت خلتنا نزوع العافية..

-مسعود: ابنيييييييي وللللك غففااااار

-علي التـقي: انااا حذرت بس اببنك عاار ونااقص غيررة وناقص الغييرة حرامات عليه يعيش!

ركضوا على غفار ابوه واخوته وولد عمو علي واكفين من بعيد يباوعوله، تخبل مسعود ورج البيت بصياحه وتهديداته ووعيده بس عمو علي ما انهز ولا اهتمله بقى واكف ساند جسمه على عوچيته ورافع حاجبه بتحدي..

ركضوا بي اخوته ياخذوه للمستشفى بس مدا اعرف شصار بي مات لو عاش مادري! كل الاعرفه البيت قامت قيامته ومسعود تهجم على عمو علي يريد يتعارك وياه ويتطاول والامير وكف بوجه ابوه ودفع مسعود عنه بقسوة انسان كاره..

-الامـير علي: اخذ چلاابك واطلع مناا!

-مسعود: ثاااري وياكم صار ثاارين ووولد عليي مووتكم على ايددي!!

-الامـير علي: وعلي والسماني علي لوو عتبت رجلييك باب هالبيت احشهاا حشش واطلعك مناا مگرم!!

صياح وهرجة ووعيد ومشامر حچي يكسر الظهر صار قبل لا يطلع مسعود من البيت يلحگ ولده الآخذوا غفار للمستشفى، اول ما طلع مسعود من البيت ركضوا اخوان حبيبة لغرفة سلوى يتطمنون عليها ونزلنا احنه هم نركض نشوفها، لگينه البنية صاكة بمكانها وجهها اصفر ومبين عليها مخلوسة بس متبين وبقت تطمن ابوها واخوانها هي مابيها شي..

-حبيبة: مابيه شي بوية والعباس كلشي مابيه

-رسمية: الحمدلله اسم الله عليج بنيتي حبيبتي عزيزتي انتِ

-شيخ علي: وين باقي الولد؟؟

-الامـير علي: لا تخاف عليهم بوية هسة اطلع اشوفهم

-شيخ علي: اميير كض اخوتك ولمهم اليوم محد يطلع من البيت!

-علي التـقي: شني تريدنا نخاف ونتختل مثل النثاية من وره ولد مسعود العار؟؟؟

-رسمية: من ذبحت ابنه ما فكررت ولك ويين عقلك وووين تقي!!

-علي التـقي: ما ذبحته ضربته طلقة برجله عرج ما يصيبه!

-شيخ علي: زين تسوي

مسحت حبيبة على وجهها وزفرت نفس ترخي اكتافها، حضنها علي التـقي لجسمه وباس راسها يطمنها..

-لا تخافين حبيبتي مالهم شي يمنا

-حبيبة: اخاف يرجعون ينتقمون لاخوهم

-شيخ علي: ينتقمون لاخوهم شني؟؟ بووية داسوا بيتنا وتهجموا على بنيتنا!! زين ما كتلناه بمچانه! شنيي ماعدنه غيرة ماعدنه شرف؟؟؟

-علي الحق: دوسة بيت تعتبر لا تخافون محد يسترجي يرجع علينا واذا رجعوا بعلي اذبحه بيدي وارجعه لابوه وصل وصل!!!

رجفت خالة رسمية وجرته من ياخة قميصه المفتوح ونترت بوجهه فاحطة..

-علي الحـق هيييد ولا تتسودن! سمعوني ياا ولد هالسالفة تنطمم هنا وتنسي!! لا تجيبولنا مشاكل!!

-علي التـقي: يووم غفار تجاوز علينا ومسعود راضي بتصرفات ابنه وما حاول يوگفه!

-رسمية: تقي حگك واخذته كاافي عاد كااافي خلونا نرتاح صار ثلاث ايام لا ليلنا لييل ولا نهارنا نهار تعبنا

سكت الكل وشيخ علي هم ما علق زايد شكله تعبان ومهبوط من الصار وخله وطلع من الغرفة وولده لحگوه بقينا بس البنات ويه حبيبة كاعدات..

-حبيبة: بنات والله مابيه شي شمالچن

-رفل: روحي فرفحت عليج خايبة انا انحصرت بغرفة عمة رسمية جنت نايمة وفزيت على الصوت وما رضن اطلع

-حبيبة: حسيت راح يصير هيج شي من يفتهمون بس ما ظنيته يطب عليّ الغرفة

-تَـمني: الحمدلله من عدت على خير

-تالة: يلا بنات هاي امي دتتصل عليَّ تكول طلعيلي

-تَـمني: وين حبي خو ابقي يمي

-تالة: وين يمعودة هي ماما شادة حزامها عليَّ وكوة خلتني اجي اليوم

ودعتنا تالة وطلعت وحبيبة دگ عليها منتصر واصرت علينا وعلى امها وخالة رسمية محد تجيبله طاري عن الصار هسة الا اذا ابوها حب يسولفله..

ويه الليل طلعت من الغرفة مهدود حيلي تعبانة والرجفة بعدها بعظامي، رحت للمطبخ اسوي عشا ويه ابرار الي شايلة هم سفر ابنها وتخاف بسبب الاوضاع راح يضطرون يأجلون السفر ويتأخر علاجه مع العلم الدكتور اكد عليهم ميصير يتأخر علاج حيدر..

-عبق: لا تخافين ابرار اكيد راح تسافرون ان شاء الله ،الولد مستحيل يعوفوكم حتى لو علي الدر ما انطوه اجازة

-ابرار: خايبة هم استحي منهم شني ذنبهم متهجولين ويانه

-شنو متهجولين يمعودة غير ابن اخوهم حيدوري

هزت راسها ساكتة وبقت تشتغل على الصامت، انضمت ويانه تَـمني تساعدنا وشكد توسلنا بأبرار حتى ترتاح وتكعد بس ما قبلت تكول الشغل يلهيها..

-ابرار: چا ليلة وينهي؟

-تَـمني: متخربطة شوية ورفل وشمس يمها بالغرفة

-ابرار: شجاها؟

-عبق:‏ مادري هم صايرة متحجي ليلة عود سكوتية وكذا

ويه سوالفنا وتحشيشنا على ليلة اندكت باب المطبخ بقسوة كأنما احد ديضربها بمحبس او مفتاح، عرفته واحد من الولد فـ لبسنا شالاتنا وصاح علي التـقي من الباب..

-يا الله

-ابرار: تفضل خوية

فتح الباب شايل بيده جنطة ملونة برسمات ورد كبار اصفر واحمر وعبر باب المطبخ يمشي وحده، سلم علينا وردينا عليه السلام بالنا ويه غفار وهستونه دنريد نسأله وقاطعنا من صاح من مكانه..

-ووينج يمعوودة

دار وجهه على باب المطبخ وكلنا توجهت انظارنا لهناك، ثواني وانصدمنا من دخلت سبأ مغشاية بعبايتها ومبينة تك عين منها..

-تَـمني: سبأ!

دخلت البنية منصية راسها وملفلفة نفسها بالعباية تلفلف، هرولنا عليها نسلم ونسأل عن حالها بس ابد ما وخرت العباية من وجهها ولا زحزحتها..

-عبق: شلونچ سبأ مشتاقيلج

هزت راسها ساكتة وكأن لسانها مبلوع، زفر تقي نفس يباوعلها من بعيد وعاگد حاجبه كأن وجودها زاعجه كلش وواضح هالشي على ملامحه خصوصاً من اشر بيده على جهة الصالة وكال..

-غرفتي بالطابق الثاني تندليها اكيد

باوعنا وحدة للثانية مستغربات منتظرين أي شي يفسرلنا ليش تقي يريدها تصعد لغرفته وليش سبأ مدا تجاوبه وباقية على الصامت؟؟

-ابرار: خير ان شاء الله تقي خو ما صاير شي؟

هز براسه لا على كيفه ساكت واشر لـ سبأ تتقدم، هرولت بخطوات سريعة عليه واخذت جنطتها من ايده وركضت تكمل طريقها بينما هو بقى يباوعلها من بعيد وعاگد حواجبه..

-علي التـقي: انا وسبأ تزوجنا

بدون لا نحس شهگنا اني وابرار وتَـمني فتحت عيونها باهتة، ضحكت ابرار ضحكة وحدة ممصدگة وگالت..

-شسالفة تقي مو وكت شقه شبيها سبأ؟ خاف طلابة جديدة صارت ويه اهلها وجبتوها يمنا ويه رهف.. بس وينها رهف؟

-علي التـقي: سألتيني خوما صاير شي وجاوبتج! انا وسبأ تزوجنا

-تَـمني: شلون تتزوج بدون متاخذ رأينا!!

اللتفتنا كلنا عليها ومن ضمننا تقي، ظلت تدور عيونها بيناتنا مستحية واردفت تكمل بدون تفكير..

-اقصد يعني اني احبك... اقصد اقصد كلنا نحبك والقران قصدي كلنا نحبك والله

زلغت خدها ابرار واني ضميت ضحكتي جوه ايدي وتقي بقى ساكت ويباوعلها وهي تكمل..

-شوف اني قصدت احنه نحبك ونريدلك الخير يعني شلون اشرحها احنه نريد نشوفك فرحان وسعيد ونكون سعيدين الك وفرحانين وكلش متونسين ونفرح ونهلهل ونركص وهاي

گوة لازمة ضحكتي وتَـمني خطية وجهها گام ينطي اللوان من الخجل، هز راسه تقي متفهم وگال ببساطة وبدون مماطلة..

-شكراً تَـمني اعرف انتم تردولي الخير بس كلشي صار بسرعة، من رخصتكم

عافنا وطلع من المطبخ تاركنا بصدمتنا بهالخبر وعاف تَـمني تدبچ رجلها بالكاع مستحية وتلوم بروحها..

-تَـمني: يبوووو شكد فشلللة

-عبق: حصل خير حصل خير

-تَـمني: ماكول غير الف الحمدلله امير مو هنا جان شيخلصني

-ابرار: عوفن الامير ولجن صدگ تقي تزوج سبأ؟؟ زين شلون!!

**

"تَـمني"
هزيت راسي محتارة ماعرف شلون وشوكت وليش تزوجها والبنات هم بقن حايرات، بگعدتهم ويه بيت مسعود محد حچالنا شنو ممكن يصير وعلى شنو راح يتفقون وهذا سبب تفاجأنها و تفاجأت اكثر من عرفت خالة رسمية تعرف بالسالفة وعصبيتها واصلة للظالين اليحچي وياهة يترزل وتعيط عليه وتهججه منها..

حطينا العشا وشكد صحنا لـ سبأ تنزل بس مقبلت، اللتمينا كلنا على العشا عدى الامير وعمو وعلي الدر طالعين بس الباقين كلهم هنا ومحد سلم من عصبية خالة رسمية خصوصاً زوج المشاكل..

-علي السور: اويليييي شون كباب عروگ هذا يطگ طگتين

-علي النور: اي بعلي بس لو شوية مكسبيها اكثر

-رسمية: اكل واسكت

-علي النور: اي يمة بس جاي انطي رأيي

-رسمية: ياهو سألك عن رأيك؟؟

-علي النور: يعني مادري بس متعودين احنه ننطي ارائنا بالاكل

-رسمية: ما نريد رئيك بعد اكل وانچب

-علي السور: شبيكي امي مبين عليكي اليوم مش رايئى

-رسمية: انچب

-علي السور: شمالها الغالية الـ...

-رسمية: بطل لواگة واكل وانتَ ساكت

ظلت ترزل بيهم وهمه مستمرين عود غير يسكتون؟ ابددد انوب لطشوا حتى اشعار گاموا يشعرولها وحيدر دخل على الخط..

-حيدر: حبوبتي يا حلوة اللبن.. حبوبتي يا عاشگة اللبن.. حبوبتي يا شوربة عدس تحب الفراولة والكرز

-رسمية: اشش يلا كافي خلونا نتزقنب

-علي السور: يمة ما ارضى على زعلچ انا احس بگلبي يوجعني

-رسمية: استغفرالله ياربي

-علي النور: يوم انتِ طالعة اليوم حلوة وحبابة وترفة تشبهين الكبابة

-رسمية: لعنة الله على ابليسك سويتني كبابة

-علي السور: يمة انتَ كبابة وخبزاية وطرشي وحمصاية و...

-علي الحـق: وراح تنكتلون بنعالها اليابس وره هاللواگة

-علي السور: لاااه وعلي ماكو لواكة هاي امنا هاي الحبيبة هاي السلطانة وهاي الاميرة وهاي الشيـ...

-رسمية: گوم كرار جيب النعال

-علي السور: لا لا لا بطلت والله بطلنا

-علي البدر: هو شماله كرار شو ضاربله ركن وما جاي ياكل

-علي الكـرار: مابيه شي

-علي الحـق: لا بشرفك شبيك ولك مو من عوايدك تبقى هادئ هيج

-ابرار: هسة يگللكم اريد اتزوج وامي ما ترضى

ضحكنا كلنا ويه جملة ابرار الا هو ابتسم ساكت وقسم من خبزته يطمسها بالطماطة ياكلها، مچنت اعرف صار موقف بينه وبين تالة اليوم وهي دتطلع من بيتنا الا من صعدت فوك وشفت خمس مكالمات فائتة منها.. دگيت عليها بسرعة ظل بالي وفوراً جاوبتني..

-شبيچ تالة صاير شي؟

-لا اگلج تَـمني كرار بالبيت؟؟

-اي ليش؟

-مو صار احم.. صار موقف قبل شوية ويه كرار و.. واني خجلت منه

-شصار ولج؟؟

-تَـمني والله لا ارادي صارت وطلعت مني بطريقة كلللش بشعة

-احجي ولج شصار!!

-من طلعت من بيتكم دا افتح باب الحوش وصار بوجهي علي الكـرار

-وشنو يعني؟

-ابد تَـمني بس حظي دائماً فگر وياه واليوم رغم المصايب الفايخ مسويله اجواء باريسية، باعي واني دا اطلع من بابهم چان هو ديطب وشايل بيده كوب گهوة سفري ديشرب منه وبالغلط انطخيت بي وانكبت الكهوة عليَّ وعلى صدري وملابسي اشتعلت شععل!!

-اووووي شجاچ تالة

-ظليت اگمز من الحرارة وشكدما حارة كام صدري يطلع دخان وقميصي هم وهو من شافني هيج ظل ويايه طلع كلينس من جيبه وصار يمسحلي واني شايطة روحي وبالغلط...

-بالغلط شنو؟؟

-احم.. شافني متوجعة واطفر انخبص وصار يمسحلي وينفخ على رگبتي وصدري واخذه الواهس وبالغلط دخل ايده بياخة قميصي يمسح الجوه

-كذابة!!!

-بالغلط اقسم بالله مو قصده شي واصلاً هو مو يمي ولا منتبه ديمسح الكهوة مني بخبال وسريع سريع بس يريد ينشفها بس اني بذاك الوقت اخذتني الغيرة على نفسي وضجت من تصرفه ودفعت ايده حيل مني دفرتها وعطت بوجهه..

-شبيييك

-اسف اعتذر والعباس مادري

عكست عيني عنه ونويت امشيها لان واضح الانسان اليتعمد يتحارش من الي مو قصده ونيته صافية تجاهك بس الحظ الفگر منو شفتها واكفة تباوع للصار؟؟ امي!!

من شفت امي واكفة وفاتحة عيونها بخزر تباوعلي وتباوع لظهر كرار من وره واني اعرفها شادة حيلها ويانه وتضوج من يتقرب مني كرار وانوب شافتنا بهيجي موقف متت من الخوف وعطت بوجهه..

-انتَ متستحيي ووااحد قلييل ادب وشررف!!

-تاالة جاي اگلج مادري ودااعة امي مادري لهدرجة تتوقعيني خسيس واتحارش بيچ؟؟

-اي!! يوووووه وخر عن وجهي وخررر

دفعته من صدره بقوة توجع وعبرته وهو بقى يعيط ويبرر لروحه، ولج هلك نفسه وهو يبرر ويتعذر واني لابسته وكملت طريقي ويه امي مشيت وگلبي ممرور مرد عليه اني اعرفه مو نيته سوء واعرفه شكد محترم ومؤدب ويايه بس شسوي لامي تَـمني شسوي!!

-اووف تالة واني اكول شبي خطية كاعد على العشا كلمة ميحجي بس يضرب صفنات

-مادري شكول بس اني هم موقفي چان صعب وجان لازم ابين اني رافضة حركته قابل اني كاعدة بگلبه واعرفه مو قصده

-ولج انتِ دتكولين تعرفي زين ووكعت الكهوة هناك والرجال توتر وخاف عليج وظل يمسحلج وايده صارت بمكان غلط وهو اعتذرلج وبينتي انتِ ما قابلة بعد هالحركات مال تدفعي وترزلي وتمدين لسانج عليه شكو؟؟

-الامـير علي: ها ولج على ياهو مديتي لسانج هالمرة

اللتفتت على صوت الامير اجه من ورايه هستوه ديدخل للغرفة، عدلت گعدتي اضحك لان چنت متمددة على بطني ورافعة رجلي اللعب بيهن..

-باي تالة باجر نكمل

سديته منها وربعت رجليه على الجرباية ورتبت شعري المتهوس..

-تَـمني: هاي شنو شوكت اجيت شو مسمعت صوت الباب ينتفح

بقى مبتسم بدون لا يجاوبني، شمر شماغه على الجرباية ونزع دشداشته على الصامت مبين عليه شكد تعبان وهلكان وما اللومه صارله ثلاث ايام لا نوم ولا اكل مثل البشر ويظل الليل كله سهران يخاف لا ولد مسعود يسوولهم فد مكسورة ويهدون على بيتنا..

-تسبح؟

-اي

-تمام راح احضرلك ملابسك

حچيتها وكمت للكنتور وعاق طريقي من جرني من ايدي عليه وحاوط خصري، بلعت ريگي خجلانة من باسني على راسي وخدودي وحنچي و... توترت كلش ودفعته على كيفي من صدره اضحك بخفة وفلتت نفسي من ايده اشرد يم الكنتور..

-روح روح اسبح حتى اسويلك عشا

باوعلي مضيگ عيونه باقي كله على الساكت ميحجي ولا فتح حلگه، درت وجهي مغلسة على نظراته وطلعتله منشفة وكل احتياجاته وهو فات للحمام، من تأكدت بي دخل وطبگ الباب وراه ياله ذبيت نفس مرتاحة اوووف شلون بيه وشلون بخجلي وياه لشوكت ابقى هيج..

لبست شالي ونزلت جوه حتى احطله العشا لكيت الصالة فارغة والكل مبين بغرفته، طبيت للمطبخ وطبكت الباب ورايه ورحت للفرن اشوف باقي اكل من العشا لو لا، شفت باقي بورگاية وحدة وشوية زلاطة اي كافي لامير هاي طلابة شيريد اكثر اصلاً مو زين واحد يثگل من ينام..

حميت الخبزة وحطيت بيها البورگاية ضاعت بيها هاي شگدتوتها؟ ظليت افتر على شي احطه وياهة شفت خضرة ترست اللفة خضرة وزلاطة ولفيتها وطلعت قوطية ببسي من الثلاجة وحطيتهن بصينية وكعدت انتظره ينزل..

كاعدة واباوع على الصينية واللوب احس قليل؟ بس لا مو قليل اني اليوم اكلت بورگايتين وشبعت وهو راح ياكل وحدة مو زين عليه تصعد عنده الدهون ثانياً حاطة زلاطة وخضرة هاي كله اكل صحي اله احسن خلي يضعف شو احسه سمنان هالايام..

-اي سمنان لازم يضعف لازم هذا كافي الحمدلله نعمة كريم شكد يريد بعد

كاعدة واقنع بروحي عقلي استوعبها وتقبلها بس گلبي مقهور ومدا يتقبل، ماتحملت ابقى كاعدة وقررت اكوم اسويله بعد خطية.. فتحت المجمدة ووكفت اقرر شنو اسويله بعد وبنفس اللحظة هو دخل للمطبخ شعره مبلل وقميصه مفتح..

-ها ابوي تعشينا اليوم لا؟

-اي اي اكيد

اللتفتت عليه ناوية اخيره شنو اسويله عشا بس شفته باوع للفة وابتسم، جر خدي بين اصابعه وگال..

-مرة معدلة وعلي

شال اللفة ديريد يعض منها وركضت عليه جريتها من ايده مخبوصة..

-لا امير لا تاكل منها

-ليش

-مو.. مو هاي اريد اسويلك غير شي

-چا هاي شبيها

-مو شسمها احس.. احس مطيبة

-طيبة طيبة ما دامها من ايدج شحلاتها

-لا امير حباب

-جيبي تَـمني انا اريد اكلها

-لا فدوة حباب هاي شبيك اريد اسويلك غير شي

-ولج ماريد لا تضيعين وقتنا خليني اكل لگمة واجيج مشتاگلج

-لا اني ما اقبل الا اسويلك عشا ثاني ا..

قبل لا اكمل الجملة عض من اللفة ياكل، ضميت حلكي بأيدي اباوعله ياكل مبتسم ويحركلي بحواجبه عبالك مسوي انجاز من عاندني واكلها واني بالي كله ويه اللفة شلون من يكتشفها فارغة وبيها بورگاية وحدة رفيعة وصغيرة كلش ضايعة بوسط الخبزاية..

عض لگمة ثانية ياكل وعكد حاجبه مستغرب، مد عينه للفة يباوع بيها واحس وجهي صار هطوله من الفشلة عزا بعيني لكمتين شكبرهن عضهن وما وصل للبورگ.. استمر يگلب بيها وبعده هستوه ديريد يفتح اللفة يشوف شنو محشيتها خفت اتفشل زايد وبدون تفكير چلبت بيده وجريت وجهه الي وگلت بصوت ناصي مايع مستعجل..

-مشتاقتلك حبيبي

-شني

-صار هوايه مدا نشوف بعض

-لا لا شني گلتي گبل شوي؟

-مشتاقتلك؟

-لا الوراهة

-صار هوايه مدا نشوف بعض؟

-ووولج گبلها

-مشتاقتلك گلت

عض على شفته متحلف ومخنزر حسيته يريد يرگعني راشدي بس كوة لازم روحه، غمض عيونه وتحسر يگول شاد على اعصابه..

-گلتي حبيبي نوومه

-اني؟؟

-لا امي

-اي خالة دائماً تگلك حبيبي شنو الجديد

-وووولج تَـمنييييي

-هاااااا

-وجعاا سكتي سكتي حتى الچلمة **** بيها

-باوع امير احسك فشرت عليَّ فـ احس لازم ازعل؟

-زعلي بوية اناا اريدج تزعلين

-يلا راح ازعل

-امشي صعدي فوك كدامي

-خليني اسويلك عشا

-ماريد استغففر الله صعدي اليوم انتقم منجج

-يمممة تضربني؟؟

-صعدي صعدي

-لا لا ماروح وياك راح انام بغرفة حبيبة

شردت اركض وهو عاف اللفة واجه ورايه، ما لحكت احط رجلي على باية الدرج وشالني بمكاني خلاني اعيط واضحك مثل المخبلات، فتح عيونه ينبهني وعض على شفته يضحك ويگول..

-صوتج ولج لا تفضحينا

-هههههه صير حباب لعد

-صارلي عمر حباب كافي بزعت رواحنا نريد نستهتر

ضحكت وصعد بيه بايتين ووگف بمكانه من همست..

-اميييير

-ولج يبوووووي لا تمطين اسمي شعلتي روحه لامير

-تحبني اموري

-لا

-اميييير

-ههههههه شلون سؤال غبي هذا

-اميير

-خليني افكر

-يعني متحبني صح

-عمت عينج ولج لا تگوليني حچي ما گلته

-لا لا مبين متحبني انتَ

ضحك خفيف يهز راسه مأيس وتنهد وهو يگول بتعب..

-انتِ اول عشگ عرفه گلبي يا الملوعة گلبي

-صدگ

-روحي تعلعلت وتعلگت بيج من يوم لفيتچ وشلتچ بچيس الزبالة

-هههههه كذاب

-والحسين الشهيد

-چنت متأذية كلش بوكتها

-بيه ولا بيج

-اسم الله عليك اميري

-احبچ فهاوي

-اكيد هاي اثار سحر المحبة

-خايبة موش سحر محبة هذا ضيم وظلايم

-اممم

-وانتِ؟

-رسمية: تحبك تحبك چا شون ما تحبك

انتفضنا ثنينا ونزلني امير بسرعة من ايده واللتفت يشوف امه واكفة بباب غرفتها ومتخصرة تباوعلنا ومبتسمة بمكر..

-الامـير علي: احم.. يمة انتِ هنا

-رسمية: اي يبعد امك هنا مو تعرف احنه حوشنا صار حوش كاولية كلمن يريد يغازل مريته ويتسوفل يسويها على هالدرج

-الامـير علي: يمة شسالفة

-رسمية: ولكم انتم ما تستحوون ما تخجلون ما تكولون الوادم نايمة عدكم غرفة روحوا بيها وشتسوون سووا شنيي شو كلش زايعين المستحه ولد علي ينرادلكم تربية من اول وجديد!

ما صارلنا مجال نجاوبها ونزل ابا الحسن علي من فوگ شايل ليلة! يمة اني شفتهم هيج وطگييييت من الضحك والامير هم ضم وجهه فاحط ضحك وابا الحسن بسرعة نزل ليلة من ايده مصدوم من شافنا..

-رسمية: هلاا هلااااا ولد علي لاا ادب لاا اخلاق لا خجل لا حياء

-ليلة: عمة بالعباس ابو فاضل انا معليه هذا ابنج ما يستحي گتله ماريد اطلع وهو معند الا تطلعين وياي وجابني سحل من الفراش

-رسمية: اي مو انا اعرفهم وليداتي ادبسزية سرسرية ما ينطون عين

-تَـمني: والله صح خالة

اندارلي امير رافع حاجبه ويتحلفلي بنظراته، سويت روحي ما منتبهه بس دا اللاحظه عينه ما شالها مني حتى من دخلوا سور ونور الي طلعوا من العدم مادري وين چانو طالعين بنصاص الليالي عاد همزين خالة رسمية اللتهت ترزل بيهم واحنه فلتنا فوگ وابا الحسن لزم ليلة يتعارك وياهة بنص صالة الطابق الثاني لان وجهها اصفر ومضربة عن الطعام..

-ليلة: امير اخذ اخوك مني ماريدنه خايب اخذووه انا اتبرعلكم بي

-ابا الحسن علي: اليسمعج كاتل روحي عليج عووعع چنچ عنبة معچفة

تركناهم يتعاركون بالصالة ورجعنا لغرفتنا، دخل امير يفر بيده على وضعهم ويدردم عليهم بصوت ناصي..

-سوادين والچفل زينب سوادين ذول الثنين

-هههههه مادري شلون راح يكملون باقي حياتهم سوه

-هواي تبهذل ابا الحسن ومشلوع گلبه

-اممم

-بس عود حسبالج هو ضايج من وضعه وناوي يعوفها؟ لا وعلي هذا مخبل عقل ماكو براسه لو ليلة تدوس بگلبه هم يصيح احبها وعاشگها وكلشي منها حلو

-ليش انتَ لو بمكانه تعوفني؟

ضحك بدون لا يجاوب ونزع قميصه يشمر روحه على الچرباية، تقربت منه ووگفت فوك راسه متخصرة وكررت..

-امير جاوب

-شني

-انتَ لو بمكانه راح تعوفني؟

بقى يضحك ويستغفر ويمسح على لحيته، خنگتني العبرة وصعدت الغصة ببلعومي گوة بلعت ريكي وكررت سؤالي..

-تعوفني؟

-تَـمني نامي بوية

-جاوبني امير

-شني هاي ولج جاي تبجين؟

-جاوب جاوب!

-ولج مسودنة انتِ

-جاوبنيي تعوفني لو لا جاوب

-هههههههههه والزهرة صدمتيني

قهرني بالزايد من ضحك لدرجة وجهه صار احمر وقررت اسكت واعوف السالفة، من خلال هالموقف خفت وماعرف ليش خفت هيج يمكن خايفة لا اسمع جواب ميرضيني ويكسر گلبي فـ الاحسن اللف راسي وانام وما اللح زايد..

نزعت الشال وعفته ورحت لمكاني بالفراش تمددت وسحبت البطانية اغطي روحي وانطيته ظهري، زفرت نفس خفيف وغمضت عيوني وبدون لا اسيطر على نفسي دموعي بدت تنزل من العينين واهتز جسمي ببكاء صامت..

دقيقة دقيقتين وحسيت بشي صار يمشي على ظهري، صكيت بمكاني اركز بالحركة الدتصير على ظهري ومن خلال مسار الحركة استوعبت هاي اصابع الامير دترسم على ظهري شي كأنه لوحة..

-نمتي نوومه؟

مسحت دموعي وغمضت عيوني امثل النوم، رفع نفسه فوگايه وهمس يم اذني..

-دامها نايمة خليني استغلها واسوي كل البنفسي

ما فتحت عيوني حتى من باسني وصار يتلمس ويضحك بخبث، شوية ومل ذب حسرة ولزم شعري يفرده على المخدة مالته ويرتبه على كيفه خصلة خصلة ويصفه على المخدة عدل ويكوي بيده..

-حلو شعرها المضروبة اشتعلت صفحتها

ضحك وره ما گالها وطنگرت عليه بگلبي، حصرتني ضحكة من لزمني من خصري يديرني عليه ويكول..

-بت الاوادم حتى من تنام حارمتني من وجهها دايرته عني

حط راسه على المخدة الموجود عليها شعري وجر نفس عميق منه وزفره بهدوء، همهم بهدوء مرتاح وهمس بخفوت بيناتنا..

-امنيتي نامت زعلانة مني چَي ضحكت

سكت شوية يلعب بگذلتي قبل لا يكمل ويگول..

-ما تدري انا اضحك على سؤالها الغبي بس يلا شنسوي نصبر ونتحمل المصيبة اللفت على روسنا

يمممة النرفزة وصلت حدها عندي بس مو مال ابين روحي گاعدة واتعارك وياه هم تطير الهيبة فـ سويت شي ثاني يفيدني، تحركت بمكاني ومديت رجلي ورفسته من جوه حيل بكل قوتي اريح گلبي بي..

-ههههههههههه ولج ااااخ

حركت راسي على المخدة مغمضة عيوني وگلبت نفسي للجهة الثانية بس ما خلاني رجع گلبني عليه وحضني يضحك بصوت عالي عبالك متونس!

-ولج فهاوي حتى وانتَ نايمة عالة گلبي

-اريد اتزوج

حچيتها بصوت خافت اسوي روحي عود دا احچي بنومي واسمعه يضحك بكل صوته وكل نشاطه.. مسح على وجهي بأيده وهمس يجاريني..

-ها ولج ام الزلم چا مو متزوجة انتِ

-اممممم

-اي شكو بعد

-هممممممم

-هاي شني هايشة منيمها بصفي

-ما احب الامير واريد اتزوج ايطالي

-خ** بالإيطالي خووش!؟؟؟

-ايطالي حلو

-انچبييي انجبي يلا انجبييي

-هممم ايطالي

-سم بگلبه سكتي ولج

-اكره امير

-خ** بخلفة امير گعدي ولج لا اطلع كل ضيمي بيج

-امير ايع

-والله صدگ امير ايع والعباس صدگتي!

-ايع ايع

-ايع بعينج هاي صدگ نايمة لو ناصبة عليّ؟؟؟

-اعيش ويه خالة بمكان حلو واعوف امير خيولي

-ووولج تَـمني!!! بالعباس مصيبة انوب ما ينعرفلها نايمة كاعدة شو بالحالتين تحجي!

راح اموت من الضحك وافضح روحي انهاريت من صار يضرب على خدودي حتى اكوم وانوب كام جاب شوية مي ورشه بوجهي هنا بعد ما كدرت اقاوم وفتحت عيوني اسوي روحي فازة..

-تَـمني: هاا هاا شصاير

-صدك جنتي نايمة؟؟

-شنو

-عايني لا تلعبين وياي تَـمني چنتي نايمة لو تمثلين؟؟

-نايمة امير شسالفة شبيك

-چذابة والحسين

-لا تحلف اشش يلا اريد انام

-كعدي ولج

-ماا باي راح انام

غمضت عيوني مرة ثانية ومادري شلون صدگ غفيت وحسيت على مكان الامير بصفي فارغ، فزيت مخترعة من مكاني ادوره بالظلمة وسمعت صوت بسبسه جاية من جانب الجرباية.. ابتسمت من لگيته ديصلي صلاة الفجر ومبين هستوه كمل لانه لزم تلفونه يطلع منه دعاء يقراه وره صلاة الفجر كل يوم..

شي بداخلي رادني اروح اكعد يمه واسمعله وما حرمت نفسي وكمت من مكاني، انتبهتله رفع راسه الي ومبينه ملامحه بسبب ضوه التلفون شفت ابتسامة تنرسم على شفته وگال شي بس ماسمعته..

كعدت بصفه على السجادة اباوعله ثواني وبدون مقدمات سحبني من ايدي وكعدني بحضنه ولفني بأيده، كبرت ابتسامتي من باس خدي حسيت بخدودي تولع خجلانة خصوصاً من حط ايده على بطني يمسح عليها وهمس بصوت ناصي..

-ربي لا تذرني فرداً وأنت خير الوارثين، واجعل لي من لدنك ولياً يرثني في حياتي ويستغفر لي بعد موتي، واجعله خلفاً سوياً، ولا تجعل للشيطان فيه نصيباً، اللهم إني أستغفرك وأتوب إليك إنك أنت الغفور الرحيم..

سكت شوية وره ما كمل يدعي وبده يقرا ادعيته الباقية واسمعله يدعيلي ويذكر اسمي بكل شي يگوله ويدعي حتى لاطفاله المستقبليين الي لسه ما موجودين وكرر اكثر من مرة جملة خلتني ادمع..

-اللهم لا تذرني فرداً وانتَ خيرُ الوارثين.. اللهم ارزقني ذرية صالحة طاهرة من رحم زوجتي تَـمني

-امير

-عيونه

-لا تعوفني ابد

-ليش دائماً تكرريها؟

-مادري.. بس لا تعوفني ابد

-للموت ما اعوفچ امنية روحي

-واذا مگدرت اجيبلك اطفال هم تعوفني؟

-اطفال شني؟ كله رزق من ربچ ما صار عدنا هذا هو ما صار شني اول ناس ما تصير عدهم خلفة كافي انتِ بحياتي وبحضني انتِ طفلتي وام بيتي ما رايد غيرج

-بس انتَ شيخ ولازم يكون عندك اطفال حتى تورثهم لقب الامارة

-اخوتي عدهم جهال تَـمني يكفون ويوفون

-وانتَ تبقى تباوع للاطفال وتتحسر

-ما اتحسر ان شاء الله وربچ كريم

-انتَ شكد رجال زين

-وانتَ خوش بت

-اني تلوثت هوايه و...

سد حلگي بيده بسرعة ونزل يطبع قبلة خفيفة على خدي، غمضت عيوني هادئة من همس بصوت ناصي قريب اذني..

-گبل شوي سألتيني سؤال وضجتي من ضحكت وما جاوبتچ، تدرين ليش ضحكت تَـمني؟

-ليش

-عبني ضگت العلگم وانتِ حداي وما فكرت بلحظة اعوفنچ.. يا بت انا عاشگچ وگلبي لهذا اليوم يرجف لو صحتي بحسچ "امير"

ابتسمت اتنهد براحة وحطيت ايدي فوك ايده الحاضنتني وسندت راسي على صدره اريحه، محسيت على روحي من غفيت على هالوضعية بس عرفت هو شالني للجرباية لان كعدت الصبح اني بمكاني ومغطيني زين..

نزلت جوه بنشاطي وطاقتي والابتسامة مرسومة على وجهي اثر كلام الامير البارحة، شفت سلوى كاعدة ويه فراقد تشرب چاي والعمات هم هنا كاعدات ويحچن على سبأ وشلون تزوجها تقي وشلون گدر يجيبها غصباً ما على ابوها..

-فراقد: سببع ابن علي ستر على هالفقيرة

-سلوى: امس چانت ساقطة شو هسة فقيرة؟

-فراقد: مالج غرض انتِ.. تعاي تَـمني اكليلچ لگمة ويانه

-تَـمني: بالعافية خالة

-زهرة: ليش حبوبة؟ تعاي اكلي هاللفة من ايدي لا ترديني

-تَـمني: لا خالة ما احب هذا الجبن الف عافية عليكم

-زهرة: الله يعافيج گليبي

-ابتسام: اگلچن همه نزلوا العرسان لو بعدهم؟

-سلوى: عرسان؟ هههههههههههههههههههه

-فراقد: وصمخ شبيچ تضحكين

-سلوى: خيات تقي ما نام بغرفتها ولا داس مچان هي موجودة بي

-زهرة: ليش؟؟ چا مو تزوجها ليش هيج هامل البت؟

عفتهن يتناقشن عن السبب ورحت للمطبخ اسوي شي اكله، طلعت بيضة من الثلاجة ووكفت على المغسلة اطگها بالطاسة واخبطها..

-اااااخ ااااخ

اللتفتت اشوف منين طالعة هالحسرات وچان اللكاهة خالة رسمية دخلت للمطبخ وكعدت بالكاع وبيدها طاسة ستيل وصينية ستيل تريد تنظف خضرة..

-خيرچ خالة مبين عليج ضايجة؟

-رسمية: وين ما اوديها عوجة يا يمة

-الله كريم خالة كلشي بي صالح بهاي الدنيا

هزت راسها ساكتة واني بديت اگلي البيضة وطلعت خبزة من الخاولي الي تلف بي ابرار الخبز..

-تَـمني

-نعم

-ماكو شي منا منا

عرفت قصدها على الحمل فـ فوراً هزيت راسي لا وابتسمت اگول..

-الله كريم خالة

-اي ندري بالله كريم بس يمة ربچ هم گال اسعوني وانا اعين

-شنو قصدج؟

-ما ناوية ترحين طبيبة شي تشوفيلج چارة؟

-امير ميقبل

-هو بكيف امير؟؟ يمة ما يصير البطن تتأخر وما تشيل تره تشلع الافاد بعدين

-خالة بعد وكت ليش نستعجل على الاطفال اني بعدني صغيرة و..

-انتِ صغيرة بس الامير مو صغير الي بعمره هسة وليده بطوله

-اي بس هو..

-لا تگليلي هو تَـمني الامير وليدي وانا اعرفه عدل هو من يگلج ماريد ترحين طبيبة عبنه ما يريدج تتبهذلين بالعلاجات ويخاف لا ينكسر گلبج من چلام الطبيبة وياچ

صفنت بوجهها جافلة، عيوني غرغرت بدموعها من استوعبت وتذكرت هي تعرف بالصار ويايه وتعرف حملي الاول وكلام الدكتورة وتحذيرها اذا نزلته شبه مستحيل يصير عندي حمل مرة ثانية..

-احترگ البيض بنيتي

فزيت وانداريت على البيضة احتركت اطرافها وطلعت ريحتها، شلت الطاوة من النار وويه شيلتي للطاوة وگعن دموعي الجاهدت مينزلن.. انطيت خالة ظهري وبقيت اسوي روحي دا احط البيضة بالماعون واسمعها تكول ببطئ..

-اذكر مرة گلتيلي ما راح توگفين بوجه الامير ووجودچ يمه بس خاطر يحميچ

گلبي خمشني ويه كلامها ونبرة صوتها الي تغيرت، حاولت اسكت واسمعها للاخير بس ماتحملت صيخ نار وحطته بگلبي من اردفت..

-وگلتيلي ما عندج مانع اذا تزوج الامـير علي عليج وانا صراحة اريد ازوجه

-تزوجي؟؟

-اي، يمة تَـمني انا احبج ويشهد الله حاسبتج چن حبيبة بس من حگه وليدي يشوف بزرته وما يظل محروم وعينه على الـ...

-عينه على منو بالضبط؟ وليش محروم تره ما صارلنا سنة متزوجين خالة

-ليش تغير چلامچ تَـمني؟ يما انتِ مو گلتيلي ما تهتمين اذا تزوج

-وهسة اگلج اهتم وما اقبل بهالشي

-بس حگه هذا!

-حقه اني اجيبله الطفل مو غيري واذا الموضوع لهدرجة هامكم من اليوم ابدي اراجع دكتورة واحاول بموضوع الحمل!

-ليش تأذين روحج بنيتي توتة؟ لا تزعلين وحسبالج ازوجه خاطر تجي وحدة بدالج ويهملج لا وعلي ازوجه بت بس خاطر تحبل وتربي فروخه وانتِ تبقين مريته وحبيبته وام بيته و..

-خالة هو مو لعبة شنو ذنب البنية التجيبيها؟ حتى بس تحمل وتجيب وتربي؟

-شمالج ترضى والله

-بس اني ما ارضى واريد اني احمل واجيب واربي واتعب وبنفس الوقت اكون مرته وحبيبته وام بيته وكلشي حلو بحياته

-واذا ما صار عندج حمل؟؟

-بعد كله بيد الله خالاتي حبيبتي واموري بنفسه وبلسانه گلي لا اشيل هم ولا افكر بهالموضوع

روحي احترگت واحس بالدم صار يغلي بعروگي، اباوعلها تحجي ويايه بهدوء كأنها دتسولف بشي عادي وحاولت ابقى على هدوئي واحترمها وما ادوس بالحجي.. بس الي حرگ دمي وخلاني اعلي صوتي منهارة وارجف من فوگ ليجوه وعلى اثر صوتي دخل عمو علي وبقية الولد هو من گالت..

-رسمية: اذا چنتي تحبينه صدگ لا تخربين حياته وتفكرين بأنانية فكري بمصلحته ومستقبله الامير لازم يصير عنده ولد تَـمني لازم!!

-اني احب ابنچ خالة فوووگ ما تتصورين احببه وما راح اسمح لبشرر يفرقني عنه ويجيبلي علة يحطها بيناتنا حتى تاخده مني!! رضيتوووا او لاا على جثتي تطب مرة للامير علي واني موجودة بهالبيت! وعلى گص رگبتيي مرة غيري تحط عينها بعينه والعبااس التحلفون بي املصهنن!!!....

يتبع 👑....

━━━━━━ ♛ ━━━━━━

صارت بيها العباس ما عرفناچ نوومه 💪🏻🥵♥️

سبأ اوويليي يا سبأ شكد انقهرت عليها 😩

جايتنا احداث ان شاء الله تحتاج شهيييق زفيير قبل لا تقروها... 🦦♥️