الامارة الفصل الخامس وأربعون 45 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

شكتب يا شعر يرهم على عيونك
شحلات الناس لو كلهم يشبهونك ♥️!

━━━━━━ ♛ ━━━━━━

"تَـمني"
كل خلية بجسمي ترجف، اباوع حولي انتبهت المطبخ انترس الكل دخل هنا يتفرج عليَّ واني منهارة اعيط واعلي صوتي على ام البيت، تعبت من الموقف شديت على اعصابي لدرجة راح اوكع من طولي.. عفت كل الواكفين وهرولت اطلع من المطبخ متغاضية عن صوت عمو علي وهو يسأل شصاير وشنو هالهوسة..

صعدت لغرفتي وطبكت الباب وقفلتها عليَّ، حطيت ايدي على گلبي انضم دگاته التعبانة ورحت للحمام اغسل وجهي بلكي ابرد وارتاح.. سچاچين! سچاچين ودچتهن بگلبي امه وهي ما حاسة، ويه كل جملة تحجيها احسها تضربني بگلبي حييل بدون رحمة تگطعني تگطع..

طلعت من الحمام وبوجهي للجرباية شمرت روحي عليها ودفنت وجهي بالمخدة ابجي من كل گلبي، اتذكر نظراتها الي وكلامها البارد وابجي بالزايد گلبي يوجعني منها والله گلبي يوجعنيي..

ماعرف شكد بقيت على هالحال ابجي واللوم بروحي، ساعة اكول ليش جاوبتها وليش عيطت بوجهها اكيد ديحجون عليَّ جوه ويكولون عني صلفة وساعة اكول سويت الصح وجان لازم اوكفها عند حدها حتى مترجع تفتح هالموضوع..

بين افكاري السلبية ورأيي المتقلب دگ تلفوني، جريته اشوف منو ووضعي صار اسوء من شفته الامير اكيد خالة رسمية خابرته وحچتله على كلشي!! جريت نفس عميق ومسحت دموعي الغسلت وجهي وحمحمت قبل لا افتح الاتصال واجاوب..

-الو

-الامـير علي: شلونچ نمنمه اگلج شفت هسة سمچ بالسوگ واشتهيته يعجبچ ناخذ لبيت خالتج ونتغده يمهم اليوم؟

صفنت فترة استوعب كلامه عود صدگ خابرني علمود يجيب سمچ ونتغده ببيت خالتي؟ هاي شعجب!!

-هاا تَـمني وينج

-وياك

-شبي صوتج؟

-مبي شي

-ليش مبحوح؟ شني هاي باچية؟؟

-لا امير بس كعدت الصبح منشولة شوية، المهم على السمچ شعجب تريد ناخذ لبيت خالتي؟

-شني قابل هاي اول مرة اخذلهم شي!

-لا لا ادري بيك دائماً تتسوگلهم بس مادري ليش سألت هسة.. اي براحتك جيب

-خوشن شكثر اجيب؟

-مادري انتَ اعرف بهالسوالف راح تجيب لاهلك هم؟

-چا شون اكيد.. يلا حبيبي محتاجة بعد شي؟

-سلامتك

-حضري نفسج شوي وجايچ خاطر اوديج

هزيت راسي بدون لا اجاوبه وكوة طلعت من حلكي كلمة "تمام" وسديت الاتصال، كمت من فراشي وبوجهي للحمام سبحت وبدلت واهتميت بنفسي على اخر حباية ونزلت مرة ثانية، ناوية اليحچي ويايه بموضوع زواجه اخش بعينه واوكف هالمهزلة وشيصير خلي يصير..

نزلت الدرج وشفتهم كلهم گاعدين يسولفون مثل عادتهم شيخ علي كاعد بصدر الصالة والكل محاوطه وياخذ وينطي وياه بالحجي.. طگ كعب شحاطتي الالبسها بالبيت بالكاع وتوجهت كل الانظار عليَّ توترت من عيونهم والهدوء الصار مريب بس حاولت امثل اني طبيعية ومابيه شي..

-تَـمني: السلام عليكم

-عليكم السلام

البعض جاوب والبعض دار وجهه يكمل كلامه ويه الي بصفه بس اهم شي عندي شيخ علي جاوبني وابتسم، رجعتله الابتسامة وبقيت واكفة مادري شسوي والف الحمدلله ما وكفت هوايه لان دقايق مرت وسمعت صوت الامير جاي من المطبخ يدردم على علي النور..

رحتله للمطبخ شفته محمل مسواگ كومة ديجيبله العلاليك علي النور من السيارة وامير يطببهن جوه..

-تَـمني: الله يساعدك

-هلا ابوي

رفع راسه الي شفته يباوع منا ومنا وجر وجهي باسني بسرعة ووخر، ابتسمت مورد وجهي ولهيت روحي اشيل المسواك من الكاع واحطه على السنك حتى اغسله..

-رسمية: هاا اجيت يمة

دخلن للمطبخ وياهة العمات سلمن على امير ووگفن يسولفن وياه، كل ساع اكول هسة خالة رسمية تشكيله مني وهسة تگله بس ما حچت شي بخصوص الصار ابد او على الاقل گدامي ما حجت..

-الامـير علي: نوومه يلا نطلع عندي شغل

-تَـمني: مو دا اغسل المسواك

-عوفي تجي وحدة غيرج تكمله

-رسمية: شني وين رايح؟

-عندي شغل بالحلة اليوم واخذ تَـمني لخالتها

-رسمية: هاا خير ان شاء الله

غسلت ايدي وصعدت فوك جبت جنطتي ونزلت اطلع لامير راح قبلي للسيارة، ركبت بصفه بكرسي الصدر وطلعنا لبيت خالتي قريب علينا مو بعيد..

-هاا خالوو

-ها

-شني مريضة؟ شو كاعدة على الصامت اليوم شعجب

-قصدك اني لغوية؟

-لا بس مو من عوايدج تسكتين

-يعني لغوية!

-لا بوية بس طاقتج اليوم تختلف عن كل يوم

-يعني لغوية وخفيفة؟؟

-استغفرالله ربيي واتوب اليييه شبيچ ولج

-مبيه شي وديني لبيت خالتي

-امس كاعدة بحضني وشحلاتج شبيچ اليوم؟ صار شي بغيابي؟؟

-مصار حبيبي بس وديني لبيت خالتي حباب

-يا علي ابن ابي طالب هاي ثاني حبيبي تطلع من حلگج

-اني كلت حبيبي؟ هاي شوكت؟ يمته؟ اصلاً ماكلت ولا ببالي لا تقولني شي مگلته امير

-خوشن المرة الجايه اسجل صوتج

-سجل خوشننن

-انتِ مو طبيعية اليوم وانا اعلمج بس خلينا نرجع الا اكعدلج ركبة ونص

سكتت عنه ودرت وجهي للجامة، فتح مولود عنك اذا سألوني وكعد يدندن وياهة، لزم ايدي يلعب بأصابعي وبحلقتي لحدما وصلنا لبيت خالتي، نزلت قبله وهو نزل السمچ الجابه الهم وكالعادة جايب مسواك واشكال اللوان وياه، ما كدرت ما ابتسم من شفت چيس الحلويات الي يجيبه لـ تالة..

-تَـمني: هسة تالة تطير فرح

ابتسم بدون لا يجاوب ورحت كدامه ادك الباب، فتحتلي خالة الباب تسالمنا سلام حار واندارت على امير تسلم عليه وشكدد تشكرت من عنده حتى وجهها انطعن احمر من الخجل، اكثر من مرة خالتي تعبر عن خجلها من امير او واحد من اخوته يتسوگ الهم وتحس بروحها ثگيله عليهم..

دخلنا سوه للبيت وكعدنا بالصالة، عفتها تسولف ويه الامير ورحت اجيبله مي وعصير ورجعت كعدت بصفه، جبت الطاولة الخشب الصغيرة حطيتها گدامه وصبيتله من العصير بالكلاص وحطيته بيده..

-حنين: شلونچ توتة مشتاقتلج ولج وين هالغيبة صايرة متجين

-تَـمني: مشتاقتلج اكثر والله خالة بس من وره الدوام مدا اكدر اطلع لاي مكان وملتهية كلش بالبيت

ابتسمت بآخر الجملة ووصلت الاشارة لخالتي، محبيت اگولها كدام الامير ان مدا اروح لبيت خالتي هو بسبب المصايب الدتصير ببيتهم استحي واخجل اگول اريد ازور خالتي اشوفها واگفة.. اوقات اتمنى عندي شوية من جرأة شمس لو الدنيا تحترك هم تروح لاهلها ومتهتم عدها يوم زيارة اهلها ولمتهم مقدس وممنوع احد يتدخل بي صغير كان او جبير..

شوية وطلع الامير حتى ناخذ راحتنا وخالتي گلتله يرجع على الغده من يكمل السمچ، هو اصلاً جان مقرر يتغده ويانه بس رادها تطلع من خالتي وميفرض نفسه..

-حنين: هاي تالة بعدها نايمة موو؟؟ ولج تاااالة

راحت تكعدها واني بقيت بالصالة طافي الشغف عندي وبالي وعقلي كله ويه فكرة وحدة.. سحلت خالتي تالة من شعرها وجابتها يمي وهاي كعدت مطفية وبس تضرب صفنات..

-حنين: امشي ولي غسلي ومشطي شعرج تخرعين

-تالة: احلى منج

-انجبي وولي يلا

-ماروح

-ترحين لا اكوملج تاالة

-ماا

-تعالي ولج ام لساان

كامتلها بالشحاطة وذيج طفرت للحمام تختل وتقفل الباب عليها واسمعها تتصايح وتلعلع من جوه..

-تالة: مضطهدتنييي شيصيرر وياهة تطلع حرگتها بييه

-حنين: انتِ طلعيي وخلشوفچ شلون اطلع حركتي بيج اني اعلممج

-تالة: عود اسمج حنين؟؟ والله انمسحت حنيتج مسحح من اجينا لهذا البيت الاغبرر

نفخت خالتي نفس تعبانة وعافت تويلان تفرغ طاقتها بالحمام مادري شتحجي وشنو تدردم وشبيها اصلاً بس واضح متعاركات البارحة وماعندي فضول اسأل عن سبب العركة حالياً..

-حنين: تَـمني شبيچ وين سرحانة

-مسرحانة.. خلينا نروح ننظف السمج

-انتِ تنظفين سمج؟؟؟

-اي

-معقولة دا اسمع صح انتِ تَـمني تلزمين السمچة وتنظفيها؟

-اي خالة ليش لعد

-هههههه الله يهديج خالة ماكول غيرها مبين العيشة ببيت عيالج غيرتج

-عادي خالة هو صح اني تلعب نفسي من ريحة الزفر بس بعد شنسوي غير امير يحب السمج

هزت راسها تضحك مادري على شنو هسة هي مستهزأة بيه لو عاجبها تغيري مادري..

-سبحان مغير الاحوال تذكرين بيوم العدنا سمچ تبقين فوگ بالغرفة متنزلين الا اكمل كلشي واصيحلج انتِ وتالة حتى تاكلون

-اممم اتذكر

رحت وياهة للمطبخ وبقت تضحك وتسولف ويايه بأمور عشوائية وكعدنا على الميز ننظف السمچات، بس شميت الريحة ردت اتقيء ومعدتي بدت تگلب..

-شنو شبيچ

-راح اتقيء

-ههههه كومي اني انظفه روحي بالصالة

-لا اريد اني

-روحي ماما اني اكمله وعود اگول لرجلج انتِ سويتي

-لا اني اريد اتعلم

-بكيفج بعد

گامت هي تضم المسواك واني بقيت كاعدة، الامير جايب سمچ صغار لزمت سمچة سمچة اگشرها واشيل القشور عنها هلكت اكو بيهن مينشالن شلعن گلبي واحتاجيت سچينة..

-هاي شدتسوين تَـمني!

-شنو

-دتشيلين الگشور بأظافرج؟؟

-لعد بشنو

-ماما لو نشيلهن بأظافرنا منا لبعد يومين منخلص جيبي سجينة وگشطي بيها يا امي

-اي هم دا اسوي

-ولج كله شيلي بالسجينة ومدي اصبعج نظفي مصارينها مو تنسين

-خالة اييييع

-هاا مو تردين تتعلمين

-احم.. اي اريد

-لعد يلا كعدي نظفي عدل

زفرت نفس وبديت اسوي مثلما تكول ومعدتي تكلب مدا اطيق الريحة، حاولت اتنفس من حلگي حتى ما اشتم وكملت سمچتين بس متت تعب..

-شو سنحتي

-اي كافي ذني، الباقي ضمي على غير مرة

-تردينا كلنا بهالسمچتين؟؟؟

-اي اني ما اكل عود بس انتو

-ولج هالسمچتين رجلچ يكرز بيهن

-لا خالة تره هو ميشتهي كافيات ذني كافيات

-كومي ولج اني اكمل تريد تفشلنا ويه الرجال

-خالة صدكيني امير مياكل هوايه البارحة حطيتله بورگاية وحدة على العشا وما كمل اللفة اصلاً

-سودة بوجهيي مسويتله بورگاية وحدة؟؟

-اي مو.. شسمها يعني...

-خطية مموته الرجال من الجوع شبيچ ماما عيب مو لهدرجة، تره رجلچ صلوات على محمد أكآل يحب يدوس من ياكل لا تخلي ينفر منج بسبب الاكل

-ليش ينفر

-لعد هو الرجال شيحب غير بطنه؟ ياما وياما نسوان جابن روس زلم خشنة من وره طبخهن واهتمامهن بأكلهم

-ولان يجيبن الهم جهال

-اي خو هاي شي طبيعي

-اريد اجيب لامير طفل

-ان شاء الله حبيبتي

-اريد خالة لازم احمل اني!!

-ان شاء الله توتة كله بيد الله بعد

-خلينا نروح لدكتورة اليوم نشوف وضعي وليش مصار عندي حمل

-ياا ماما صدك جذب تحجين ذاك اليوم تزوجتي شبسرعة تردين حمل

-امه تريد تزوجه

-صدك عود؟؟

-والله متت قهر اليوم تگولي اريد ازوجه لان امير لازم يصير عنده ولد

-شبيها مستعجلة حتى الواحد يضحك من يسمع كله ما صارلكم سنة متزوجين

-هي تعرف بحالتي خالة وحسيتها متأكدة مراح يصير عندي أطفال

-تَـمني الصار بيج مو بيدج صار حمل او ما صار كله بأمر الله

-واذا ما صار وتزوج؟؟؟

-يعني مادري بعد هو و...

-لا تگليلي هو وحبه وتعلقه بيج وماعرف شنو! خالة امه تنخر بالگلبب حتى لو ميريد يتزوج راح يتزوج بس حتى يخلص من الحجي!

-ماتوقع

-شنو قصدج

-ماتوقع زوجچ من النوع يهتم لحجي الناس واهله يعني كم موقف انحط بي اتخذ قرار شخصي ما تأثر بمحيطه

-اي وهسة خلينا نروح للدكتورة

-ميخالف حبيبتي بلغي وخلي هو ياخذنا

-لا لا ماريده يعرف حبابة بس اني وياچ

-لا تَـمني ما اقبل خلي يكون كلشي بعلمه احسن

-خالة امير مراح يخليني ارووح دكتورة اني اعرفه حبابة خلينا نروح حبابة حبابة حبابة حبابة فدوة لعينج حبااابة

-واذا افتهم بعدين وسوالج مشكلة؟

-ما راح يفتهم خليها ورايه ومعليج انتِ بس وديني والله گلبي يوجعني خالة حسي بيه

-اووووف تَـمني والله اكول بعد وكت

-لا مو بعد وكت بس اريد اتطمن اني ماريد شي ثاني

-تمام حبيبتي

-هاا نطلع هسة؟؟

-لا ولج وره الغده نروح بس استأذني من رجلچ كوليله راح اطلع

-اي اكيد ما اطلع بدون اذنه

گمت متحمسة احس ردتلي روحي عندي امل الدكتورة تطمني ويكون كلشي طبيعي واكدر احمل بسهولة يارب.. مشى الوقت بين خالتي وتالة والغده اني سويته وحتى السمج گليته بنفسي اريد انفخ روحي عليه اليوم..

وره صلاة الظهر اجه الامير وخجل خالتي مرة ثانية من رجع وجايب وياه علبة بقلاوة وككو، ضحكت من شفته ومن انتبهلي اضحك اشرلي "شنو" براسه.. تقربت منه اخذ العلب من ايده وهمست بضحكة..

-عايش دور النسيب الكريم اموري

ضحك وخفاها بسرعة لان خالتي كعدت تسولف وياه واني رحت احضر المواعين ويه تالة، اخذت السفرة واسمع خالة منطلقة بالسوالف اكلته وشربته..

حطينا الاكل وكعدنا حول السفرة الامير كلمة ما حچى وصرت اعرف طبعه من يلتقي بخالتي او بأي ضيف يجي على الاكل ميحجي بس اذا ينسأل احسه مياخذ راحته وينتبه على كلامه اكثر من كل وقت كدام الغربة..

-حنين: گلت عندك شغل اليوم بالحلة مو؟

-الامـير علي: صحيح

-تبات هناك لو ترجع؟ حتى اذا تبات عوفلنا توتة تبقى يمنه

-تَـمني: اي امير حباب

-الامـير علي: الله كريم

-تالة: الله كريم يعني تبات لو الله كريم يعني أيسوا؟

ضحكنا كلنا وهو من ضمننا حط لگمة بحلگة وگال..

-اذا ما لحكت ارجع اليوم خليها تبات مو مشكلة

-تالة: يحييى شيخ المستقبل

هي گالت هيج واريد اوكف من الضحك ماكدر، فطست والكل ظل يباوعلي وولا كدرت اوكف تذكرت من ابا الحسن يعيب عليه وصيحله شيخ العفطية والمشكلة امير يوافقه الرأي حتى ميضوج..

غصيت باللكمة وصرت اكح روحي راحت والضحكة طلعت من عيني، طفرت تالة تجيبلي مي وامير صار يضرب على ظهري ويصيح علمود المي وخالتي انخبصت ويايه حسيت عيوني راح تطلع والدموع بدت تنزل مطر منهن..

-الامير علي: جيبي الماي انطيني.. هاج شربي ماي شجاچ ابوي.. شربي تَـمني خلي تنزل اللكمة

شربت المي ارتاحيت شوية رفعت راسي اتنفس ومن شفت وجهه رجعت اضحك بسفاهة، فرت ايدها خالتي عليَّ تضحك وتالة هم انعدت مني تضحك وهو گوة لازم ضحكته وگضاهة عليَّ شبيچ وليش تضحكين..

-الامـير علي: يا علي هسة غير نفتهم

-تَـمني: ههههههههههههههههههههه انتَ شيخ المستقبل هههههههههههه

دفنت وجهي بچتفه اضحححك من كل گلبي وهو يهتز يضحك على الصامت، نزل وجهه الي يسوي روحه ديهمس بأذني وخلاني انتهي من گال بصوت محد غيري سمعه..

-خ** على الشيخ

طگيناها ضحكة ثنينا وتالة وخالتي يضحكون ويانه ميدرن على شنو، بعد ثواني من الضحك الهستيري الغبي گام امير من مكانه وگال..

-الحمدلله والشكر سفرة دايمة ان شاء الله عاشت ايدج عمة

-حنين: بالعافية بس مو اني سويت الغدة هذا طبخ تَـمني

اندار بسرعة عليَّ فاتح عيونه منبهر، وگفت من الضحك وابتسمت بين دموعي واشرت على السفرة بأصبعي ورجعت اشرت على روحي..

-تَـمني: هذا التحفة اجه من ايدين هاي

-الامـير علي: عاشت ايدين هاي على هالاكل المرتب

-تَـمني: ههههه الف عافية، اسويلك چاي؟

-هاا وبعد چاي تردين تشربينا؟

-لعد شلون اذا الك ما اسويلك چاي المن اسوي

گلتها بفرحة وكمت بسرعة اسويله قبل لا يجاوبني، حطيت القوري على النار وطلعت بقلاوة من العلبة ارتبها بالماعون وطلعت ككو هم.. رتبته كله بصينية علما صار الچاي صبيت استكان اله ولخالة ادري بـ تالة متشرب ورحت اقدمه..

اخذ الاستكان من ايدي بأبتسامة وهمس "عاشت ايدج" وحسيت بعيونه ما نزلها مني حتى من قدمت الچاي لخالة وكعدت على جهة، ظليت مستحية وابد ما باوعتله وگلبي ينبض بجنون فرحة وسعادة بگلبي وحب چبير اريد اقدمه اله بأي طريقة وابينه اله بأي فعل اسوي..

-الامـير علي: شون چاي طيب هذا

-حنين: اي والله عاشت ايده علي التـقي جابه النا قبل اسبوع

ابتسم الامير يهز براسه ساكت واني بلعت ضحكتي، مفتهمت خالتي قصده متدري هو ديمدحني بطريقة غير مباشرة وهي راح بالها لطعم الچاي..

-الامـير علي: مرتاحين ان شاء الله هنا عمة؟ محتاجين شي؟ ناقصكم شي؟

-حنين: الف الحمد الله وليدي مستورة

-الامير علي: شلونه دوامج وضعج مستقر؟

-حنين: لاا الحمدلله احسن من دوامي ببغداد بهواي رحم الله والديكم شيخ علي مقصر بشي وهيألي مكان مرتب على عرفه وهواي مهتميلي ومداريني

-الامـير علي: بالخدمة عمة.. يلا انا اترخص هم ياله اطلع على ضوا الشمس

ودعته خالتي للباب وقبل لا يطلع جريته من ايده ارجعه حتى احجي وياه وعافتنا خالتي ودخلت جوه..

-تَـمني: امير اريد اطلع ويه خالة اليوم عادي؟

-وين ترحون؟

-يعني نفتر

-اي وين

-للسوگ ولمشاوير ثانية

-وين هالمشاوير

-اميري اماكن يعني بعدنا ممثبتين بس گلت ابلغك حتى يكون عندك علم

-خلي سور يجي وياكم

-لاا امير خالة متقبل

-ليش؟

-يبقى سور رجال غريب وتالة شابة خالة متقبل تندمج وياهم

رفعلي حاجبه يباوعلي حاصرته الضحكة، احس تفشلت وره جملتي لان تالة ما شاء الله ضحكها وسوالفها وعايشة حياتها سواء موجودين الولد او لا..

-امييير يلا حباب

-چا خلي نور يروح وياكم

-وشنو فرق سور عن نور؟ لو لان واحد عنده شوارب والثاني ماعنده!

-ما اسمحلج تحجين على شوارب نور جاي يربيهن كله چم يوم ويوگف عليهن الصگر

-ههههههه والله مدا احجي عليهن بس دا اگولك ماكو فرق ثنينهم زلم

-چا خلي...

-خلص ما اطلع

-بعد احسن

-امييييير

-خوشن طلعي بس لا تحطيلي هاي الالوان على وجهج بعلي ما ارحمچ!

-يعني تضربني؟

-تَـمني!!

-خلص خلص ما راح اخلي شبيك

-لبسي عباه

-ماعرفلها

-تعلمي

-ماا

-تَـمني تره ما تطلعين!

-يبووو ماريد اروح بعد شنو هاي ذليتني امير

عفته وردت ادخل جوه وجرني من ايدي يرجعني لمكاني ويضحك، حضني بين ايده وگال وره ما باس طرف خشمي..

-امنية اغارن عليج شبيدي

-راح اللبس عباية اسلامية

-عفية بمريتي

-واحط بس مسكارا وحمرة خفيفة وبلشر

-چفصتي بيها

-امير شوية هيجي شويونه نتفاية بس هيج عنونه

-لا شويونه ولا هوايونه ماكو تَـمني هالاصباغ كلهن حرام بوية الدنيا فانية شمالچن انتن

-خوشن

-هههههههه خرب راسج ما يعجبها شي

-بس انتَ تعجبني

-ياااااااا علييي!!!

-هاا هاا شكو تره قصدت كلامك يعجبني والله

-اي صح صح

-والله شبيك كلامك حلو وصح الدنيا فانية واحنه غافلين

-اي صح اي

-امييير

-يا بعد راس امير

ضحك وهو يگولها وحضني لصدره حييبل كسر ضلوعي، ضحكت على ضحكته وبادلته حضن دافي اسند راسي عليه مغمضة عيوني واتنهد براحة..

-احبچ فهاوي

-ادري

-طاح حظج فهاوي

-وحظ اليطيح بحظها

گلتها وفلتت من ايده اركض ارجع للبيت وهو اجاني يركض ويصيح..

-وووولج تعالييي

-باااي امير بااااي يا شيخ المستقبل

سديت الباب ورايه وقفلتها ومديت عيوني اباوعله من الفتحة الصغيرة اشوفه مبتسم ويدردم عليَّ ويعض بأصبعه، وگف يم الباب ودگها خفيف وگال بعجرفة عود يسوي روحه معصب ميدري دا اشوفه منا..

-هاي چلمتچ تتحاسبين عليها تَـمني بس تأخرت خليني ارجع وعلي الا اطگچ

ضحكت اضم حلگي بيدي وسويت وگلت بصوت عود خايفة..

-لا امير حباب اخاف

مديت عيوني اشوفه گوة لازم روحه من الضحك وجاوبتي بنفس الصوت المعصب..

-انا اعلمچ اليوم

-اخاف شبيك مقصدت تره

-قصدتي لو لا انا الچ

-هفف يلا روح هسة عود بالليل اضربتي تأخرت انتَ

غطى عيونه ووجهه بيده يضحك على الصامت بس جسمه يهتز وعافني وطلع، بقيت على ابتسامتي ورحت للصالة كعدت ويه خالتي شوية علما صار العصر وطلعنا للسوگ حتى ما اطلع كذابة اخذنا كم حاجة وتوجهنا للدكتورة..

سألتني شنو عندي وليش جايه وشرحتلها اريد اچيك وضعي حتى احمل، هزت راسها مبتسمة وگلتلي امدد على السدية علمود السونار..

بدت تسويلي سونار وتباوع للشاشة مركزة بدون لا تحجي شي، توترت وخفت گوة كاعدة على اعصابي ماتحملت تكمل السونار وسألتها واني بمكاني..

-ها دكتورة بشري؟؟

-الدكتورة: وضعج طبيعي تَـمني

-تَـمني: صدگ؟؟

-ممبين عندي أي مشاكل مبايضچ نشطة ما شاء الله واحتمال كبير يصير حمل

-گولي والله؟؟؟؟

ضحكت وهزت راسها بـ اي وشالت السونار عن بطني وانطتني كلينس امسح الجل عني، كمت من مكاني بسرعة اضحك فرحانة واباوع لخالتي الي حسيتها قلقة صح مبتسمة بس مو ابتسامة حقيقية..

-الدكتورة: اذا چنتي تردين اطفال فـ ممكن يصير وبدون لا تحتاجين لعلاجات بس اذا تردين شي يعجل الحمل فـ اكدر اكتبلج على كم علاج ننشط بي المبايض

-تَـمني: اي دكتورة اريد

-الدكتورة: تمام

-حنين: دقيقة دكتورة من رخصتج.. تَـمني اجهضت طفل من قبل

-الدكتورة: شنو سبب الاجهاض؟

-حنين: رحمها صغير

چانت الدكتورة منزلة راسها على الورقة دتكتبلي علاج وبعد كلام خالتي فوراً رفعته تباوعلي، من نظرتها هاي انخمش گلبي وانخمش اكثر من سألت..

-يعني رحم طفولي؟

-تَـمني: اي

-حنين: ما بيّن عندج دكتورة؟ معناها كبر صح؟

-الدكتورة: لا ما يبين بالسونار العادي لازم اشعة ملونة او سونار للرحم.. راح اكتبلج سونار ملون عند زميلي ما يبعد هواي منا سوي ورجعيلي

هزيت راسي اي وگلبي يطگطگ خايفة، رحنا اني وخالتي وتالة حجزنا عند السونار الملون وطلع رجال مو مرة بس الي تحرك الجهاز على بطني مرة هو بس يقرا بالشاشة..

خلال طلعتي يمكن عشر مرات امير اتصل بيه ويراسل كل شوية يسأل انتو وين وانتبهي على نفسج ولابسه حلقتج لو لا وخليج ويه خالتج وووو.. بس من دخلت للسونار الثاني كمت ما اجاوبه واللتهيت اصبر بروحي وادعي كون ياربي ماكو شي ويريح گلبي..

نمت على السدية والبنية تمشي الجهاز على بطني وابو السونار تفصلني عنه بردة مغطيني ميكدر يشوفني ابد، بقت هواايه تلح بالسونار وتضغط حيل احس اسفل بطني راح ينزرف بس كلمة ما حجيت ولا نبهتها من گد التشنج..

-حنين: بشر دكتور؟

-ثواني حجية

طول السونار اكثر من ذاك ضعف الوقت واني وخالتي وتالة على نااار گاعدات، بعد دقايق من الصبر المميت رجعت سألت خالتي وزرف گلبي من گال..

-رحمها صغير

-حنين: يعني ميصير عدها حمل؟؟

-الدكتور: خليها ترجع لدكتورتها تفهمها

اشرتلي خالتي اكوم وبسرعة حاسبناه ورجعنا للدكتورة، ما خليت دعوة ما دعيتها حاطة ايدي على بطني ادعي وارجف لحدما وصلنا للدكتورك فوراً دخلتنا رغم قبلنا چان اكو مراجعات.. اخذت السونار مالتي تقراه وهزت براسها اي وگالت..

-فعلاً رحمها طفولي

ويه حچايتها نزلت دموعي، رفعت عيونها عن السونار تباوعلي وشفت بنظراتها اليأس.. غصيت بدموعي منهارة ودرت وجهي منهن اجت تالة تحضنني تصبرني وخالتي تسولف ويه الدكتورة مكسورة..

-يعني ماكو امل دكتورة؟

-الدكتورة: لا ليش تَـمني.. حبيبتي تَـمني عاينيلي انا ما كلت ما يصير عندج اطفال ربج كريم

مسحت دموعي بيدي وهدأت نفسي، بلعت ريكي وگوة حجيت..

-تَـمني: يعني يصير؟

-ماكو شي بعيد عن رب العالمين، انا راح اكتبلج علاج تلتزمين بي وان شاء الله خير

-يعني هالشهر احمل؟

-لا خوب مو بهالسرعة يحتاجلچ وكت

-شهر ونص؟

-لا

-شهرين؟

ضحكت الدكتورة واشرتلي اگعد كدامها، سويت مثل متريد احس بروحي مكوكة وين ميأشرولي اروح وشنو يگلولي بس اهز براسي..

-الدكتورة: عايني وياي وحتى ما اچذب عليج انتِ عندج رحم طفولي وهذا النوع صعب بي الحمل بس مو مستحيل يعني يجوز تحبلين بس ما يثبت برحمچ الطفل ويطيح

-تَـمني: احافظ عليه والله

-الدكتورة: هههههه يا حبيبتي اكيد راح تحافظين عليه بس رحمچ ما يتحمل

-شلون اخلي يتحمل علميني فدوة

-حالياً انتِ مبايضچ ما شاء الله قوية واحتمال جبير يصير عندج حمل بس حتى لو صار نسبة ٩٥٪؜ ما يثبت ويطيح فـ تحامي ولا تفكرين تسوين هالفترة كلها

-زين

-راح اكتبلج علاج تلتزمين بي كلش زين ما تضيعين يوم تَـمني انتبهي.. هذا العلاج شوي قوي يجوز يغير من مزاجچ ويسوي خلل بوزنچ بس تحملي

-اي اتحمل عادي

-هذا جيبي من الصيدلية ورجعيلي

-دكتورة وره هالعلاج تصير حامل بسرعة لو هم ياخذ وقت؟

-نصيحة لا تفكرين بالحمل منا لفد سنة لان حتى لو حملتي يطيح الطفل

-سنة!

-او ممكن اكثر بعد حسب استجابتچ للعلاج

-دكتورة حبابة ماكدر اتأخر سنة اريد شي سرييع

-والله يا حبيبتي مو بيدي والمشكلة ماكو شي مضمون يعني ممكن يكبر رحمچ شوية وبه العلاجات والمنشطات وممكن ما نستفاد شي

-حنين: ان شاء الله يكبر امي تَـمني خلي ايمانج بالله جبير

-تَـمني: ان شاء الله

گمت جبت العلاج ورجعتلها علمتني عليه ونبهتني على كم شغلة اسويها واعشاب اشربها وطلعت منها، قررت امحي شكو ذرة شَك ان ممكن انحرم من الاطفال ونويت اسلم امري لرب العالمين هو يعرف سنو عظت وبشنو مريت ومستحيل يعوفني وحدي..

بتت هالليلة ببيت خالتي واحس روحي طگت عقلي مدا يوكف من التفكير كلما انسى ارجع اباوع لعلاكة العلاجات واتذكر وتنمرد روحي.. افكر معقولة خالة رسمية راح تعوفنا بحالنا؟ معقولة راح تصبر سنة او اكثر الامير ميصير عنده اطفال؟ والله ماعرف..

ثاني يوم ما رجعني الامير اجاني تقي ديريد يطلع لبغداد وامير گايله يرجعني وبالسيارة جانت وياه حبيبة، سلمت عليهم وسألتني حبيبة ليش وجهي اصفر وتحججت بقلة النوم..

-تَـمني: طمنيني شلونه منتصر رجع من السفر لو بعده؟

-حبيبة: هو زين بس شيرجعه راح دورة بمصر وگال شوي تطول

-بس انتو على تواصل مو؟

-اي نتواصل كل يوم

حچتها بأبتسامة وباوعت لـ تقي لگلب عيونه معاجبه، ضحكت على منظره واجت ببالي سبأ..

-شلونها سبأ تقي؟

-مادري عنها

-حبيبة: چا غير مرتك هي شلون ما تدري عنها

-علي التـقي: حابسة روحها بغرفتي وقافلتها على روحها! شلت گلبي امس اريد اجيبلي سلااب اللبسنه ذلتني ذذل ياله طببتني وراحت حتلت بالحمام چن راح اخذ روحها

-تَـمني: هههههه خطية تقي شبيك وياهة

-خوية ماعندي شي وياهة والعباس بس مادري شمالها الفرخة ما تتحچى

-حبيبة: ارجع راضيها تره سبأ وردة لا تضوجها ما تستاهل

-شايل عليها سيف؟؟؟؟

-تَـمني: لا بس شايله علينا

ضحك يمسح على وجهه يتنهد ويحرك براسه تعبان، وصلنا للبيت وبطبتنا سمعنا هلاهل جايات من الصالة استعجلنا بخطوتنا اني وحبيبة وشفنا خالة رسمية وفراقد يهلهلن ويهوسن وشمس تضحك وتبجي بنفس الوقت..

-حبيبة: بشررن شطلع؟؟؟

-شمس بدموع: حامل انا حامل

طرنااا من الفرح طرت طرت طرررت يمكن لو اني حامل ما افرح هيجي بس يمكن لان اعرف شمس شكد عانت بسبب هالموضوع وانشلع گلبها من حچيهم، رحنا عليها اني وحبيبة نحضنها ونباركلها وفرحنا اضعاف مضاعفة من گالت وهي تمسح بدموعها..

-الطبيبة تگول اكو كيسين حمل يعني بيه توأم

-فراقد: كلللللللوووووش سبببع ابن علي سبببببع

هوسة وضحكة وفرحة غمرت البيت خصوصاً من اجه علي البدر، طلبت شمس محد يبلغه وتريد هي تفاجأه دخلوا للغرفة بوقت احنه دنسوي العشا وعفنا العشا على النار وركضنا على صوت عياط رجال متخبل من السعادة يصيح من الصالة..

-علي البـدر: الله اكبرررررر الحمدلله يااارب الففف الحمدلله دخييييل اسمك ياا علي ما فشلتني

جرته امه تبوسه وتحضنه وحتى سلوى راحلها بوسها وحضنها ورجع على شمس حضنها وشالها يفتر بيها گدامنا ويهوس بيها فرحان وهي تضحك مادري تبجي ماعرف شنو مشاعرها خطية..

-رسمية: خايبين شني هالاستهتار شمالهم ولدي زاعوا المستحه!

-فراقد: ماكو احد خلي فرحان بمريته

مسحت طرف عيني من دموعها وبقيت اتفرج عليهم وعلى فرحتهم، لليل كلش رجعوا الولد من شغلهم ومن ضمنهم الامير بشروهم شمس حامل لمعت عيونهم بسعادة وكلهم مدوا ايدهم بجيوبهم وانطوا لشمس فلوس ماعرفت ليش هيجي سووا بس ابرار گلتلي هي هم من حملت بـ حيدر عمو علي والولد الكبار انطوها فلوس بشارة الحمل..

**

"سبـــأ"
مادة راسي من باب الغرفة واسمع لهوستهم فرحانة، شموسة حامل فدوة لگلبها تستاهل كل خير ربي يتمم عليها.. تعبت من الوكفة وگعدت بمچاني متونسة على سوالفهم، سبحان الله ابوي وعمي علي اخوان بس يختلفون من السما للگاع بيتنا مليان هم وغم وبيت عمي علي يروش ناس طابة طالعة عليهم وعايشين حياتهم ما شاء الله عليهم..

فزيت من مچاني ويه ما سمعت صوت رجلين تصعد الدرج وركض طبيت للغرفة وقفلتها عليَّ، وكفت افرك بيدي متوترة ماعرف شسوي من جابني لبيتهم لليوم اخافن انزل وقافلة على روحي الباب ما مستعدة انكسر مرتين واكيد محد راضي على هالزواج خصوصاً تقي كاره ولعبانة روحه..

نزيت انلوت يدة الباب چن واحد يريد يفوت وعرفته هو بدون لا يحجي حفظت حتى طريقة فتحه للباب يچفت من يريد يفتحها.. دگ الباب على كيفه وگال..

-فتحي الباب

ما جاوبته بقيت ساكتة اعاين للباب بدون لا افتحه، شوية ودك الباب بطريقة اقوى ونتر..

-فتحي ما راح اكلچ!!... فتحي سبأ اريدن احضر جنطتي نازل واجب!

ركضت على عباتي وشالي لفيته بسرعة ورحت افتحله الباب ورجعت على الجرباية اكعد وضامة وجهي عنه.. طب للغرفة ينفخ ضايج وما حاچاني بشي راح على كنتوره يطلع منه ملابس ويحطهم على الچرباية.. طلع بدلته العسكرية وعلگها على باب الكنتور واللتفت يدور على شي..

شفته عاين عليَّ ومادري شصارلي بطني كامت تخبط ولفلفت روحي بالعباه زين بقيت مطلعة تك عين اعاين منها، تقرب مني بخطوات بطيئة خلاني اجمد بمچاني ماكدر اتحرك بعد.. گطعت النفس وكل جزء من جسمي صار يرجف من گعد على ركباته گباله انا على الجرباية وهو بالكاع..

غمضت عيوني اتنفس سريع اريدن انظم دگات گلبي راح اموتن خصوصاً من گال بصوت ناصي..

-شوي من رخصتج

نزلت عيوني اعاينله شفته يباع على چف رجلي الطالع من العباه، زلغت خدي وضميتها بساع ارعشش.. عيوني انترست دمع من فطنت صفن على رجلي المجرحة والمخشنة من المشي بين الزرع..

-سبأ جنطتي جوه الجرباية من جهتچ اريد اخذها

بقيت مغطية وجهي ابجي بالسكتة مستحية ومقهوورة راح اموتن من القهر گلبي جاي يتكطع هو ما يريدني انوب شافني بهالشكل مادري بشنو جاي يفكر هسة وشني يدور براسه.. جمدت رجلي وجسمي ما يخليني اتحرك الخدر ترسني ولو ازيح شوي اموت وجع..

-استغفر الله شون سالفة هاااااي

گام متكدر عبن ما وخرت واخد بدلته العسكرية وطلع من الغرفة، بجيت اكثر مهضومة ومكسورة خاطر والله ما نويت اعاند وابقى كاعدة بس كلها اللتمت عليَّ.. بقى بره ما رجع شكد انتظرته يجي خاطر ياخذ اغراضه بس ما اجه بعد..

مشت الساعة والساعتين وصار نص الليل وتقي ماكو، اجولي البنات يسألون على اخباري وجابتلي حبيبة ماعون فواكه بس ماعندي الجرأة اسئلها عنه، طلعن يخلني براحتي وانا بقيت اتگله ماعرف شسوي، عاينت للملابس الحاطهم على الجرباية مبين ذن يريد ياخذن ونويت انا احضرله الجنطة..

نصيت ادور جوه الجرباية بنفس المكان الجنت كاعدة بي وشفت جنطة صغيرة جريتها وبديت اترسها شغلاته، سفطت الملابس وصفيتهن بالبداية وشفته مطلع حذاء رياضي هم لفيته بچيس لكيته بغرفته وحطيته بالجنطة.. تذكرت هو ضابط يجوز يحتاج ادوات حلاقة رحت لحمامه واخذت المواسة ومعجون مدري شني كله جبته وحطيته..

عاينت للجنطة وانقهرت لو ادري بيك عندك واجب والله ما اطلعك هيج انزل اسويلك كليجة واطبخلك واجمدلك مروكات واسويلك كلشي تريده يا نظر عيني..

عاينت للساعة عبرت الثنتين بالليل وسمعت صوت حس رجلين يم الغرفة، ركضت للفراش نمت وغطيت روحي بالبطانية ثواني وانفتحن باب الغرفة وطب تقي.. كلما يگبل عليَّ روحي ترفرف واحس بروحي بحلم خصوصاً من اشم عطره التارس المخدة النايمة عليها ما اصدك انا بواقع..

رفعت شوي من البطانية اعاينله وفزيت شاهگة بحس ناصي من شفته نزع تشيرته وشمره بالگاع، شكد ردت ارجع البطانية على وجهي بس عيوني صلفة بس وداعة امي صلفة بس وياه وبعمري ما معاينه على زلمة غيره..

فتح باب الحمام وسمعت صوت الدوش چن جاي يسبح، غمضت عيوني اريد انام بس وين اكدر وهو هنا حتى نوم ما يجيني.. شوي وطلع لاف منشفة على خصره صخنت وظليت اكل بشفتي مستحية ومادري شسوي.. ضميت وجهي من حسيته يريد يلبس هدومه وبقيت مغطيته لحدما خطف خياله من گدامي..

وخرت الغطا شوي كلش من وجهي وفزيت من شفته يعاين عليَّ ويلبس بحزام بنطرونه العسكري، انتفضت خايفة انتبه بيه گاعدة بس تأكدت ما ملاحظ عبن الغرفة ضواها خفيف وما ابين بس ليش جاي يعاينلي؟؟

اندار على ميزه يتعطر ويلبس ساعته ورجع يعاين عليَّ! گلبي ظل يرگص هسة انت ليش فرحانة؟؟ شني شسوالي وهيج مكيفة هي نظرة وحسباله نايمة لا اروح بأحلامي بعيد..

رجع للميز تعطر مرة ثانية ومشط شعره واندار للجنطة يعاين عليها ويرفع عيونه يعاين على جسمي وهيج افتهمت سبب نظراته عبن شافني محضرتله الجنطة مو حباً بيه يتفرج عليّ..

مسح على وجهه ومشط شواربه على المراية وذب حسرة، طلع من جيبه فلوس حسبهم ورجعهم لجيبه وشال الجنطة وطلع من الغرفة.. ما انتبهتله من حطلي فلوس على الميز الا من كعدت الصبح شفتهم موجودات هناك حطيت ايدي على گلبي يريد ينفجر من الفرح بس ما كضيتهم ولا تدنيت يمهم..

طبيت للحمام سبحت وبدلت ملابسي وبطلعتي من الحمام اجتني سلوى تعربد عليَّ وتسبني وتسب اهلي تريدني انزل انظف واكرب جوه، ما حجيت وحگها ماطولني هنا لازم انظف گلتلها بس تنطيني دقايق امشط شعري وانزل بس شو هاي انچلبت عليَّ وعتنتي من شعري بكل قوتها تسحلني بره الغرفة..

-سبأ: ااااخ لاا تطگين هدديني لااا تطگين كتلج ناازلة والله نازلة

-عبق: شنو شديصير هنا؟؟ خالة لييش دتضربيها شبيييج

-سلوى: انچبييي انتِ وولي للسطح نظفيي

-عبق: خالة حرام عليج هديهاا

-سلوى: بالعباااس احطج فوكاهة ىادوس بثرببچ عبييقة انا واصلة وياااي لهناا عليج شعررره بعد واحطج واكتلج بمچاانچ!!

-ليلة: شني شكو شهالهوسة؟

طلعت ليلة من غرفتها تفرك بعيونها عافتني سلوى واندارت عليها تهوس على راسها وتغلط عليها وتطعن بشرفها..

-سلوى: المطلطات المگلگلاات امهات الزززلم خذيتوووا ولدناا بالحيلة ىاللعب بنات الشواررع

-ليلة: اي يلا ولي هسة

-سلوى: شحجييي عليج وشجاوبج ليلة الملسوونة المسودنة ام الزلم الخايسسة

-ليلة: خلصتي؟ يلا نزلي مانريدج هنا

-سلوى: طبعاااً ما ترديني اسوفن خياااسج

-تَـمني: شسالفة!! شنو هالصوت شبيكم

-سلوى: هههههههههههااااي طلعت الفاهية الفايخة من غرفتهاا طلعتتت

-تَـمني: لعد منين ترديني اطلع يمه؟ من غرفتج؟!

-سلوى: اياااا ساقطة يااا بت الچلاااب السحارييين

-تَـمني: لااا تتجاوزين سلوووى تره كلنا عدنا لسانات ونعرف نجاوب!

-سلوى: جاوبي اناا اريدج تجاوبين ام السحوورة ام الزلم اليطبولها نص الليل

-تَـمني: عمتتتت عينج وولج اني الزلم تطبلي بنص الليل؟؟ والله لو اللزمج اموووتج بيددي

-سلوى: هههييههيييي منى گلبيي الامير يعرفج على حقيقتج ويطلكج ويطردج منااا مثل الچلبات السايبة

-سبأ: وينها حبيبة بنات خليها تجي تشوف

-سلوى: تردين حبيبة؟؟؟ اييي تعااالي ولج

كضتني من شعري تجرني وتطكني على وجهي بجيت ميتة قهر تخبلت عليّ تسودنت، هجمن تَـمني من جهة وليلة من جهة عليها يطگنها ويتحارشن بيها وصعدت تَـمني على ظهر سلوى تغطي عيونها وليلة تضرب وين اليوجعها وهاي انهارت طاحت بالكاع تسب وتفشر علينا والبنات يضحكن متفقات عليها مكيفات طلعن ضيم گلبهن بيها..

محد تدخل ولا احد صعد حتى شمس وابرار مالهن علاقة جوه ولا وصلن فوك وسلوى غدتلكم خرگة الدشداشة تمزگت على جسمها وشعرها انكفش وحالها بالضيم صارت كوة تجر النفس.. گوة فلتت نفسها من ايدهن وصاحت من مچانها ترجف من العصبية..

-بعلييي ما افوتها وبهذا الحااال اجيبن شيخ علي اشوفت شسون چناينه!!

-ليلة: صدگ والله!!

-سلوى: والعباس الچفل زينب!!

-تَـمني: شااالچ ان شاء الله العباس وخلصنا منج

-سلوى: نشوف تَـمني نشوووف انا اعلمجن بنات البارات والملاهيي لوما خليت رجولتجن يطلگنچن من يشوفنيي

-ليلة: يطلگونا عبن دشداشتج مزگة ومكفوش شعرج؟

-سلوى: اييي

-ليلة: چا خوش

كضت زيج دشداشتها ومزگتها وكضت زيجي ومزگته وصارت تكفش بشعري وشعرها وشعر تَـمني وكضت ياخة تراك تَـمني وهم مزگته وصارت تلطم على وجهها لحدما صار احمر وصاحت..

-يبوووووووو لحگوووني لحگوووووني راح تموتنييييييي وينك يااا شيخ علييييي اللحگنييييي سلوى ولتنيييييي

-تَـمني: ااااه راسييي اااااه گلبي راح يوگف گلبييي

-ليلة: والزهرة اطبن على شيخ علي وبنص ديوانه اصيحن طاح ابني الوهمي الحامل بي!

-سلوى: يمممة يممممة منجننن الحياية يممممة

-ليلة: ولج تَـمني هاي انتِ هم طاح فرخج؟؟ ولج يمممة سودة بوجهيي يمممة راحوا وليداتنا راااحوا الشايلين اسممك يا شيخ عليي

-سلوى: عود حسبالجن تخوفنييي هسة؟؟؟

-تَـمني: اي

-سلوى: ما خفت!!

-ليلة: لاا شوف حرامات يلا نحاول في وقت لاحق

-سلوى: تهيي بهيي زوج فروخ حسبالهن يگدروليي

-ليلة: ولج يا سلوى ضامتلج شييي بس الله اليدري بي

-سلوى: شني هو

-ليلة: خليها بعدين جايتج وبعد انتِ تعرفيني عدل من احجي گول وفعل معروفة على مستوى العشيرة مسوودنة وعقل ماكو براسي لا يخوفني عگاال ولا يخوفني سلاح

-سلوى: روحي روحي ولي ما تخوفيني

-ليلة: ولج انا لييلة افرچ فرررر بمچانچ تتحديني؟؟ چا انا اعلمج يا سليوة البين

سكتت سلوى تدور بعيونها بيناتنا حسيتها باگت هوا واظن بسبب كلنا نعرف ليلة ما تهتم لاحد وما تشيل اكبر زلمة من گاعه، شردت عافتنا وحدنا تلملم بدشداشتها وتسب وتفشر علينا وتتوعد اله تحجي لشيخ علي..

متت خوف لا صدك تحجيله واروحن بيها انا منا كوة طايقيني مو انوب تشكيله مني بس ليلة وتَـمني ما اهتمن وولا انهزن كلمن طبت لغرفتها تكمل نومتها ورحنا انا وعبق ننظف هي السطح واني كفيت البيت الجوه كله عبن حبيبة مو هنا عدها دوام بالجامعة اليوم..

مرت اسبوعين من حياتي ضگت بيهن السم وشفت الذل والاهانة على اصولها، تذكرت حچي امي من گالت ترحيلهم يذلون بيج ويهينوج والذلة ببيت الابو تختلف عن باقي البيوت.. محد يريدني هنا ومحد طايق وجودي حتى عماتي يكرهني وما يتگربن صوبي..

لولا حبيبة والبنات چان انجلطت من القهر بس هنه شوية مصبراتني ومهوناتها عليَّ، كل يوم بالليل اكعد بغرفتي واظل ابجي وحدي للفجر ومن الصبح تجيني سلوى حتى انظف حتى لو البيت يلمع توصخه وتخليني انظفه غصباً عليَّ وبدون لا افتح حلگي..

**

"حـــبيبة"
طلعت من الجامعة وبوجهي للمستشفى خاطر احجز مچان التطبيق لازم من وكت، چان طبقت بالمستوصف بس ابوي ما يرضى واصلاً صارلي شكد تاركة الشغل هناك ما اروحن فـ رحت للمستشفى..

اخذني السايق واجه وياي علي النور حتى ما ابقى وحدي افتر بس مادري المن اجه وياي راسه بالموبايل يراسل ويضحك مادري شعنده، رحت على قسم التحليلات وظلوا يشمرون بيه منا ومنا شلعوا گلبي.. هسة باقي الجامعات گالو همه يسجلولنا بس مادري شجاهم جامعتي انا لازم اروحن..

-تمام بس جيبيلي الفايلات باجر لمى باجر اني مجاز

تبسمرت بمچاني من سمعت صوته المألوف ورايه، مادري ليش توترت هيج وتخربطت احوالي ظليت دايرتله ظهري ما بينت روحي بلچن ما يلمحني بس للاسف شاف نور ورايه وصاح بأسمه..

-علي النور: دكتور حاكم يا هلاا

-حاكم: هلو حبيبي شلونك شلون الصحة

تصافحوا يتباوسون سوه ووگفوا على جهة يسولفون اظنه ما انتبهلي الا من سأل نور عن سبب وجوده بالمستشفى..

-حاكم: خير ان شاء الله خوما بيك شي؟

-علي النور: لا والله اجيت اسجل اختي تريد تطبق يمكم

-حاكم: هااا

-اي والله وحايرين مانعرف المن نروح لو شون العام همه الجامعة تچفلوهم بس هالسنة مادري شمالهم

-مو مشكلة اني موجود وبالخدمة

-ما تقصر دكتور فدوة اندارلك

-هي اختك يا قسم ماتذكر؟ يمكن تخدير؟

گلبت عيوني اضحك عودين هو ناسي انا شدرس شون ينسى واخته بنفس قسمي وكل يوم اشوفها وتشوفني؟

-علي النور: لا اختي تحليلات

-اها اي صح نسيت اعذرني، يلا على العموم خلينا نروح نسجلها

-علي النور: صار.. يلا بوية

اشرلي بيده امشي وراهم وهمه گدامي عود هم صاير زلمة هذا ابو راس.. تمشينا شوي واسمعلهم يسولفون بأمور عشوائية لحدما جابوا طاري اخت حاكم حور بالحديث واللتقت علي النور عليّ وحاكم وياه وهاي اول مرة يسويها..

-علي النور: چا اذا اخت الدكتور عدها مشاكل بالمواد اختي موجودة تساعدها، تكدرين خوية لو عندج دراسة؟

-حبيبة: لا عادي

-علي النور: هذا هو جيبها واختي تدرسها

-حاكم: مو خاف زحمة عليها

-حبيبة: ماكو زحمة

-حاكم: منحب نتعبها

-حبيبة: ماكو تعب خوية

-حاكم: امممم

-علي النور: عادي المساعدة حلوة وهي شاطرة كلش تطلع من الاوائل كل سنة

-حاكم: اذا هيج تكدر المحروسة اختك تجي لبيتنا؟ لان والدتي مريضة وحور متعوفها بس الصبح علمود الجامعك مترهم هم تطلع العصر او بالليل

-هاا لا مو تعرف دكتور احنه..

-ادري تخافون عليها واساساً احنه مو بالبيت لا اني ولا اخوية وهي من تجي تصعد لغرفة حور او بالاستقبال وبراحتهن

-خليني اشوف شيكول ابوي والله كريم

-حلو، وصلنا تفضلوا

باوعت للباب لگيت مكتوب عليه مدير قسم التحليلات، عاينت لـ نور مستغربة ليش جابنا للمدير هو معليه بس جاوب تساؤلاتي واستغرابي حاكم من كال..

-يصير صديقي وراح يساعدكم

دخلنا عليه واستقبلنا استقبال حار لان عرف حاكم وگعدنا وفهمنا شنو نسوي ووين نروح، بگعدتي وانتباهي ويه المدير منتصر خبصني بالرسائل والاتصالات خبلني تلفوني حرگه كلشي ما افتهمت بالي ظل يمه..

-علي النور: جاوبي موبايلج انا كاعد هنا

هزيت راسي اي وطلعت اجاوب الاتصال متصل كامرا، فتحت الخط وجهي ينطي اللوان خايفة صاير وياه شي بس صدمني من شفت وجهه يضحك وكاض بيده دشداشة لونها احمر..

-شونج حبيبة شخبارج

-زينة انا انتَ شلونك

-بخير بخير.. اگلج هاي حلوة الدشداشة؟ تعجبج؟

-هااا

-الدشداشة حلوة؟.. الوو حبيبة تسمعيني؟؟

-اي اسمعك، حلوة اي عجبتني عاشت ايدك حياتي

-خوش راح اخذها الج وعايني لهذا هم يعجبج؟؟

شال بيده دلة كهوة كلش حلوة وعجبتني بس حسيت الوقت مو مناسب خصوصاً من طلعوا حاكم ونور من غرفة المدير وبقوا يعاينون عليَّ..

-حبيبة: منتصر بعد شوي اتصل بيك انا بالمستشفى هسة

-ليش؟؟ خو ماكو شي

-لا جايه خاطر التطبيق

-چا طبقي يمي بالمستوصف شعندج بالمستشفى عنون

-بعدين اسولفلك يلا اروحن انا

-الله وياچ

سديته منه وعلي النور خبصني يأشرلي وكتها هسة، هزيت راسي اتعذر وطلعت وياه من المستشفى مادري شصار ما صار عود من نصير وحدنا اسئله..

-حبيبة: شگال المدير

-گال باجر تنفتح الاستمارة بس ماكدر انا اخذج عبن عندي امتحان فـ شوفي سور

-خوش

رجعت للبيت حاچيت منتصر شوي ما نطول بالحديث كللش قليل نسولف اصلاً من چنه ما مخطوبين نحجي ونشوف بعض اكثر بس راضية.. المهم احنه لبعض ونهايتنا سوه راضية بهذا البعد والتغيير..

نمت ليلتي من وكت لان باجر عرس بت عمو صمد زهراء ولازم اللحك اروح للمستشفى وللصالون بنفس الوكت، كعدت الصبح وركض ركض اروح منا واجي منا اخافن اتأخر وانوب سور غدر بيه وصبح مرريض كلش ما يكدر يرفع ايده.. رحت لابوي اتوسل بي اروح وحدي اسجل بس شيقنعه شيخ علي قفل عليَّ..

-بوية والله راح اتأخر هسة شني جبيرة تره انا

-عندج تسع اخوة وتاليها ترحين تسجلين وحدج؟ وينهم ذول العارات المخانيث وووولكم يااا ولددد

-رسمية: ما همه طالعين

-خابريهم يجي واحد ياخذها

-رسمية: شيرجعهم در وتقي وحق ببغداد واجب والامير وياهم والباقين كلمن بشغل

-سلوى: علي خليها تروح وحدها السايق وياهة ما عليها شي ان شاء الله

-شيخ علي: انا اخذج امشي

-حبيبة: بوية شيوديك انتَ

-امشي بوية امشي

شال عوچيته وطلعنا للمستشفى سوه وچنه موقتها شفنا حاكم واكف بقسم التحليلات يحاچي ممرضة بس شاف ابوي انخبص بي خبص وهو صار يفتر بينا وياخذنا بس هم انشلع گلبنا وطولنا وابوي هواي تعب فـ كعد وحاكم كمل كلشي..

-شيخ علي: تعبناك عمي

-لا بالخدمة هلا بيكم، هاي الاستمارة بس باقي تاخذها بنتك للطابق الثاني عند وحدة اسمها ايمان تسلمها

-شيخ علي: هاا خوش حجي، يلا بوية نروح

-حبيبة: تعبت انتَ بوية انا اروحن

توسلت بي بعيوني يبقى كاعد ورحت بساع صعدت المصعد بس جانت طافية الكهرباء فـ رحت على الدرج، صعدت اول باية وخطف جسم حاكم گبلي يصعد واشرلي بيده تعالي وراي.. ارتبكت خطوتي وترددت شوي بس رحت وراه وظليت امشي مباشرةً وراه لحدما وصلنا لغرفة وطالع منها سرة ناس مصطفة..

-هنا

اسرلي اوكف وياهم انتظر وسويت مثل ما يكول، هسة صار وراي وانا كدامه وكف ويانه بالسره ينتظر.. وگفنا فترة ننتظر على الصامت الكدامي واكفة تسولف ويه الكدامها واحنه نضرب صفنات..

-مبروك الخطوبة

انخلست ويه صوته الناصي وبقيت ساكتة ثواني گبل لا اجاوب..

-الله يبارك بيك

-دكتور منتصر يستاهل خوش رجال

-صحيح

-خطوبتكم تقليدي لو حب؟

فاجأني بسؤاله المباشر سألني بدون أي مقدمات، تحركت بمكاني شوية گبل لا اجاوب..

-تقليدي

-اهااا يعني ابن العم لبنت العم

-اي

-متنطون لغربة؟

اللتفتت نص اللتفاته عليه بدون لا اعاين لوجهه ورجعت اوكف عدل بمكاني..

-ننطي عادي

-اممم..

-حور اذا عدها مشاكل بفهم المواد انا...

-ليش طردتوا امي حبيبة؟

جحظت عيوني واللتفتت عليه بكل جسمي اعاينله، صار كلش قريب مني وما عجبني الوضع ولا هو ابتعد طلعت شوي من السرة وسألته..

-طردنا امك؟؟

-اي طردتوها

-ياهو طردها؟؟

-امچ لان كالت تشبهلج هواي، امي طلعت من بيتكم زعلانة ومقهورة وذبت الصوچ بيه وحقها

-والله مادري انا يعني.. مادري حاكم صدگني

-طلعت تلوم بيه وتكول هاي الكاتب نفسك عليها!

بهتت بوجهه واستغربت من نبرته حچاهة بحرگة مال زلمة مشتعل دمه، بلع ريگه من شافني سكتت وبساع غير طريقة كلامه واردف..

-گلتلها اني اعرفهم خوش ناس واعرف ابوها واخوتها حبابين واخلاقهم عالية

-انا اعتذر نيابة عن امي

-حصل خير

-من رخصتك دكتور

-وين رايحة؟؟

-انزل لابوي

-والاستمارة؟

-اعوفها لغير وكت مو مشكلة

عفته ومشيت مبتعدة عنه احس بشعور مو حلو كلش شكد عيب من امه انطردت من بيتنا هالشكل وانا اگول ليش ما طولت دقايق وطلعت، حسيت بموبايلي يرج بجنطتي طلعته وشفت المتصل "امي" بس ما لحكت اجاوب عبن خلصت الدگة..

-جاوبي لا يظل باله!

انداريتله شفته يمشي وراي وايده بجيوب اللاب كوت، ما جاوبته وكملت طريقي وهو بقى وراي وموبايلي مستمر يدگ وهالمرة صدگ منتصر چان يتصل..

-حاكم: حبيبة

-تأخرت على ابوي دكتور لازم ا...

-حبيبة لحظة!

انتفضت من جرني من سير الجنطة بخفة حتى اوكف انداريتله مخنزرة ورحعلي الخزرة فوكاهة يعني!

-شتريد؟

-مو بحالج اني تعالي اجه واحد اعرفه اكدر ادخلج بدون لا ننتظر بالسرة

-ماريدن

-امشيي

-ماريدن شنيي گوة

-تستاهلين لعد البهذلة باجر بدوني

-واني راضية بيها!

-انتِ اشايفة نفسج؟؟ ليش هالكد مغرورة؟؟

-بكيفي

-بعمري وحياتي مشايف هيج بنية شايفة نفسها ورافعة خشمها للعلالي!! ندري بيج حلوة بس لاا تنغرين بوجهج تره نهايته للتراب!

-ههههههه شدخل وجهي صدك تحجي؟! گول انتَ ما هامك غير وجهي وتفكر بي!

-افكر بي؟؟ هههههههههه لا تضحكيني حبيبة لا تضحكيني تره مو لهدرجة حلوة انتِ على كيفج

-خوية هسة كتلك انا حلوة؟ شو انتَ جبت هالسالفة بالنص!

-خلص انسيها طلعت من حلگي انسيهااا

-خوش

عفته وكملت طريقي وتذكرت الواسطة العنده والله لوما الموقف الصار بيناتنا هسة اروح اگضي السالفة ولا ينشلع گلبي باجر، رجعت لابوي لگيته يسولف ويه زلمة اشرتله من بعيد كملت وگاملي اجاني.. سولفتله خفت اتأخر وما كملت الاستمارة وگتله نرجع للبيت خاز اتحضر للعرس بس شني عقلي تشوش كللش تشوش وحسيتني متقيدة مادري شبيه بس محادثة حاكم اثرت بيه بشكل زعجني...

**

-ماشي انتبه على نفسك

-لا تلبسين مشلح وتتهيلگين بالرگص تره اسأل امي

-عبق: الا اللبس

-قبق كعدي راحة واصلة لخشمي هنا مو مال عناد

-ليش شبيك شصاير؟

-رگعت عسكري بعقوبة ومتندم

-ليش حق خطية

-خيوليي ابن ال**** طايح الحظ فاهي اغبر يشلع الكلب!

-يعني انطيته عقوبة لانه فاهي؟؟

-اي

-صدگ تحجي علي!!

-اي فاهي تحيته بايدة ومرعبل لحيته طالعة ما مزين وريحته تلعب الروح وچم مروة منبه انا يهتمون بنفسهم ليش نتحمل الجيفة عبق ليش؟؟

-والله مادري شكول يعني انتَ هسة عاقبته ومتندم ليش

-عبن كلت هذا هم عنده عائلة وجاي تعبان مو مال قطع راتب بس تدرين؟ لا يستاهل العقوبة خاطر يتربى!

-اي بعد بكيفك مادري

-بس مو مال عقوبة مادري اظن تهورت

-اي اني هم اكول

-لا عنق انتِ ما شامة ريحته احوووووووي يا ابو فاضل استرنا ما تنطاق

-اي بعد براحتك

-بس چني زودتها؟

-احس اي

-لا لا شفق ما تفتهمين بالعسكرية انتِ لازم اعلمه

-صحيح

-بس...

-علي كااافي عاقبته وخلص تحمل عذاب الضمير!

-ديلا صوريلي روحج

-شصورلك؟؟

-چهرتچ قابل شتصوريلي بس طبعاً اذا حابة تصوريلي ماكول لا

-اهوووو اتأدب كافي راح اروح خالة رسمية تصيحلي

-شلابسة ولج ما شوفتيني

-بعدين بعدين

سديته منه ونزلت اركض خبصوني يردون يرحون واني بعدني ما مكملة، طلعوا وجبات وراحن البنات قبلنا ويه خالة رسمية واني كلتلهم اروح ويه سلوى وتَـمني وركضت اكمل بسرعة.. گمت اروح منا واجي منا ممقررة شلبس بعدني ما مثبتة على فستان بس بالاخير اختاريت فستان لونه بنفسجي طوخ من فوك عدل وجوه منفوش بنفشة بسيطة..

رتبت شعري والمكياج واخذت كومة صور ودزيتهن لـ علي الحق ولبست الصاية والشال، انتظرته يشوفهن ومبين عندي نشط بس ما دخل على محادثتي وگلبي گام يلعب والف شيطان صار يلعب بگلبي..

انتظرت دقيقة ودقيقتين وثلاث دقايق وما فتحهن ولا شاف، تخبلت وظليت اكل بروحي وافكر شبي ليش ما فتحهن وهو نشط وليش ما جاوب؟ شنو ديسوي وشنو الماخذ باله؟؟ انهاريت ساعة اكول ديحجي ويه وحدة وساعة اكول هاي سوزان وساعة اكول يمكن انشغل واللتهى واعذره وساعة احجي عليه واتحلفله..

جريت نفس من فتح الصور اخيرراً بس انوب شافهن وما علق! بقيت بالمحادثة ما طلعت واصبر بروحي هسة يجاوب وهسة يكتبلي شي حلو بس ابد كلشيي ماكو.. الغيرة ذبحتني تعبت هالكم دقيقة تعبتني كللش واستنزفت طاقتي ومادري شجاني وبشنو فكرت وردت ارجعها اله واحرگ گلبه وكتبت..

"شنو رأيك حبيبي هشومي شطالعة؟ عليك الله مو كيكة"

كتبتها ودزيتها بدون تفكير وانتظرته يشوفها عود اريد احرگ بگلبه، ثواني وشافها وفوراً دگ عليَّ كامره ضحكت منتصرة بس الحظ خلى تلفوني يخلص شحن وينطفي بنفس اللحظة الدگ عليَّ بيها وانلاصتتت......

يتبع 👑...

━━━━━━ ♛ ━━━━━━

🌝