الامارة الفصل السادس وأربعون 46 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

اليحبك من صدگ لجلك يضحي الروح
وما ينسى المحبة البينك وبينه.. ✋🏻💖

━━━━━━ ♛ ━━━━━━

"عـــبق"
انطفى تلفوني وروحي انطفت وياه متت من التوتر والخوف وركضت على الشاحنة ادورها، نفشت الغرفة نفش بس الشاحنة مختفية عزا العزااج يا عبق على هالورطة متوازية تدزين هيج رسالة وموبايلج موشل شحن شنو هالغباء!!

طلعت من الغرفة ادور بأغراض حبيبة على شاحنتها لكيتها وبسرعة شكلتها وحطيته على الشحن، وگفت يمه انتظره ينفتح وشلعع گلبي ماكو مو راضي يفتح الشاشة تسودن عليَّ.. حرت ماعرف شسوي حبيبة مو هنا حتى اتصل منها ولا ليلة طالعات فـ ماعندي غير تَـمني..

طلعت من غرفة حبيبة لغرفة تَـمني وبعدني واكفة بالباب وسمعت صوت ضحك جاي منها يبووو الامير يمها جوه ولو اموت ما ادگ الباب وهو هنا استحي منه.. دخت ودخنت عصبت من روحي لان تصرفت هالتصرف الغبي المتهور ونويت انزل لـ سلوى بلكت تقبل تنطيني موبايلها بس اتصل بي وافهمه.. نزلتلها وبعدني ما فتحت حلگي اطلبه منها وعاطت بيه متخبلة..

-بعدج ما جاهزة؟؟؟ بعلييي اعوفج عبق وحيدج هناا والله ما اخذج!

-لا لا جاهزة والله بس صايتي بقت فوك هسة اجيبها.. خالة عادي تنطيني تلفونج

-ليشش؟؟

-مو.. مو اريد اتصل بأحد

-وشبي موبايلج الخايس؟؟

-انطفى شحنه ومزعج تلفوني ميشحن بسرعة يشلع الگلب

-ما انطيج ولي

-خالة حبابة الله يخليج ما اطول دقايق الموضوع كلش ضروري

-المن تردين تتصلين؟

-علي الحـق

-ولي ما انطي

-خالة مو ا...

-مااا انطي ولييي بررره

انتفضت مخلوسة من صوتها المزعج وعضيت على لساني اتحكم بي مو مال اتعارك هسة ميصير عبق تحملي ميخالف ما ظل شي، اساساً تعرفيها نحسة ولو تشوفني دا اموت ومحتاجة اتصل بالإسعاف هم متنطيني على شنو اعصب هسة؟..

استسلمت وطلعت من الغرفة شفت سبأ واكفة بالصالة دتمسح بالبراد من خوفي وجزعي ما سألتها ليش ما مبدلة وليش بعدج هنا، عفتها وصعدت فوگ اركض لتلفوني جريت نفس من شفته انفتح بس بعدها الاشارة ما رجعتله يلا ميخالف بينما اللبس الصاية هنه راجعات..

كملت تبديل ورجعت للتلفون صاير بي ٢٪؜ ميخالف هم نعمة بقى بس ترجع الاشارة ويطلع من غيبوبته.. شلعته من الشحن ونزلت جوه اسمع صوت سلوى جاي من الحديقة تعربد عليّ خرب حظيي معناها تَـمني راح تروح وحدها ويه زوجها واني لازم اروح ويه هالحقيرة!

كلت يا الله وصعدت السيارة وهمزين الديوصلنا علي السور عاد متحجي كدامه لو ترزل، لزمت موبايلي وسميت بأسم الله متأملة رجعت الاشارات وارتاحيت من شفتهن موجودات وبسرعة بدون تردد اتصلت بـ علي الحـق..

ادك وميشيله ادك وماكو انهاريت فوك الخمس مرات اتصلت وهو ماكو، عفت الاتصال وفتحت الواتس اب واشوف الرساائل والتهديدات مالته يمممة گلبي وگع ما مخلي حجاية ما كاتبها مغرد عليَّ تغريد من العيار الثقيل انوب ماكدر اجاوب ماعندي نت هنا وظليت اتلاطم على الصامت..

-عبق: علي السور عندك نت بتلفونك؟

-سلوى: شتسوين بي؟؟؟

-علي السور: انتِ شكو حطيتي روحج؟ كالت علي السور انتِ علي السور؟

-سلوى: لا بس شني شتسوي بالنت لو هيج ما تتحمل تعيش بدونه

-علي السور: مالج غرض وطبگي على صفحة سلاوي، لا عبق ماعندي نت ليش محتاجة شي؟

-عبق: اي والله تكدر تتصل على حق مدا يجاوبني يمكن نزل واجب بس شو ظل بالي

-سلوى: واذا واجب شون تردي يجاوب سور؟؟

-علي السور: هم حطت روحها!!

-عبق: اني بس دا اكول من يشوف هوايه متصلين راح يرجع يتصل لان عباله صاير شي

-سلوى: وتردين تخوفي وهو هناك وحيده؟؟

-علي السور: خية شهالملحة؟ هو قحط الاتصال؟ هاي هسة نتصل عليه شينرادلها

هزيت راسي ابلع بريكي وعيوني على ايده الشايله التلفون، اتصل عليه مرتين وميجاوب هلكت صارت الافكار تاخذني وتجيبني خاف صار بي شي يربي..

وصلنا للقاعة وبالباب طلبوا ياخذون تلفوناتنا بالامانات كلتلهم تلفوني انطفى واريدله شاحنة وكالو ماعدهم هنا بس امانات، سلمناهن ودخلنا جوه للقاعة ماعرف شصار ما صار بالعرس بالي كله وياه ظليت كاعدة بمكاني وانطي حلول وافكار شنو اتصرف من يجي يعاتبني او خليني اكول من يجي يتعارك ويايه..

نص ساعة مرت على گعدتي وقررت اطلع اتصل مرة ثانية من تلفون حبيبة، لزمتني سلوى متخليني اطلع تخبلت عليَّ حطت دوبها من دوبي گووة تملصت منها وگلتلها طالعة اتصل بـ حق بالي يمه..

هدتني تتحلفلي بس ما اهتميتلها اخذت الكارت تلفون حبيبة مال امانات ولبست عباية فوك راسي وطلعت من القاعة شفت كومة زلم واكفين بالبوابة، عبرتهم ممهتمة وانركعت بواحد تعذر مني وبالغلط داس على طرف عبايتي رادت تنفتح وتلاحكت لنفسي سديتها زين وهرولت ابتعد عنه اكمل طريقي للامانات..

-عبق: حبيبتي بلا زحمة انطيني الموبايل

قدمتلها الكارت اخذته وانطتني التلفون، قتحت الرمز ودخلت على اسمه واتصلت بي، ما طول بالرنة الاولى وجاوب متعصب..

-الووو

-عبق: علي الحـق اني عبق

-هاااا اتصلتي خاطر تترزلين؟؟؟

-لا! اتصلت حتى متاخذ فكرة مو حلوة عني وتتخيل عندي رجال غيرك كتبت الرسالة لان جنت معصبة منك وردت اغثك بس والله ماعندي احد والقران

-انااا اعلمج يااا عبق انااا الج لوماا اربيج من جدديد ما يطلع اسمي علي!!

-تربيني شنو؟؟ متربية احسن تربية ببيت اهلي ممحتاجة تربية احد!

-وااضح من رسالتج واااضح متربية زييين

-علي الحـق كتلك السبب ليش كتبت هيج! ثانياً انتَ ليش نشط ومتجاوبني؟ ولييش تفتح الصور ومتكتب شي؟!

-جنت بصخااااام شغغغل واتصل بيه اللواء الفگرري على الواتس اب طبعاااً يطلعلج نشططط!!

-خو جان كتبتلي

-عبببببق لا تخبلينييييي احييير بيججج لو بالنعععل والقنااادر الورطونيي بيهممممم

-لا تعيط افتهمت!!

-ولج بسس خلينيي ارررجع واكضججج انا اعلمج يااا عبق اناا تلعبين هييج ويااااي

-شبيك حق لا تزودها تره انتَ لاعب لعب ببغداد والله يعلم منو عندك غيري وباقي تلعب عليّ!

-ووووولج مااااعندددي غيررررج مااااعنددددي وحگ رااس الحسين ونحره مااعنددي غيررررج شوووكت تثقين بيييه وتبطلين شَك!!! اشايفتني **** ومن وحدة لوحدة؟؟؟ اشاااايفة عليَّ ومنيييي

-انتَ ملعب

-وياااچ مو ويه غيرج!! عبني احبببج واحبب اتونس ويااج اذا مو ويااج اللعب واتملعب ويامن؟؟؟ اروح للساقطااات التارسات الملاهي؟؟ اعوفج واروحلهن؟؟؟

-طبعاً لا

-چا بالحلال ما يعجبج ولا بالحرام شوكت تقتنعين ماعندي وحدة ثانية وتبطلين شَك؟؟

-اني هم ماعندي غيرك والله والرسالة الكتبتها بس ردت اضوجك

-اسوووويج وصلتيننن لو شكيت عندج!! واناا اعلمج على هالرسالة عببق ورااس ابوي ما امشيهاا واطيح حظج عليها!!

-علي الحـق دا اگلك ماعندي شي وكتبتها بس حتـ...

-بعدددين نسولف بعددين اجاني نداء رووحي

-ماشي عندي هواي حجي وياك اني هم ولازم نحط النقاط على الحروف ماتحمل هالعيشة بعد مليت

-نحطط ال**** على ال****&&&&

طبكت التلفون بوجهه من فلت لسانه وبده يفشر ورغم وضعنا المأساوي بس ضحكت والله ضحكت من القهر و على غباء رسالتي وضحكت على عصبيته، استوعبت المنتظرني منه وتنهدت يربي هذا ميمشيها والله راح يطلعها من عيني خصوصاً من كال اطيح حظج يعنيها مو مال شقى حچاهة تهديده يخوف شلون بيه..

رجعت التلفون للبنية ونويت اكمل العرس اليوم واخليها وره الله هي مليوصة مليوصة والرجال العندي حامي اعرفه زين الله يستر شراح يسوي.. رجعت للقاعة وقررت انسى الصار المهم عرفت ليش تأخر من شافهن وهسة خليني اتونس واغير جو ولا اظل اكل بروحي.. بس چني ما مسموحلي اتونس بهالدنيا لان الچان منتظرني شي اكبر من ان يستوعبه عقلي.....

**

"تَـمني"
كملت اخر لمسات مكياجي بوجوده گاعد ورايه على الچرباية يتفرج عليَّ مبتسم وكأنه ديتأمل شي لوحة من لوحاته، كلما تصير عيني بعينه بالمراية اضحك وانزل راسي وهو يبتسم ويسأل نفس السؤال بكل مرة..

-شني

-امير لا تباوعلي هيج

-ليش چا

-مادري يعني... مادري

-چا خليج ما تدرين وخليني ابقى اعاين

ضحكت ونزلت الفرشة من ايدي واللتفتت عليه، حاطة ايدي بالعكس على الميز وجسمي مقدمته، ميلت راسي مستحية وسألته بتردد..

-هاا شنو رأيك؟

-عيني باردة عليج

-حلوة

-احلى من احلى شي شافته عيني

-لا لا يعني اوصفني شلونه فستاني وشلونه مكياجي وشعري؟

-حلو

-بسسس؟؟؟؟

-اي يعني جاي اگلج حلو كلش حلوو

-بس حلو؟؟

-چا مو كلت احلى من احلى شي شافته عيني هو طلابة

-اوكي امير ماشي تمام

-شسالفة شكلت انا

-لا ولشي سلامتك عيني يلا راح اروح اني باي

-وين باي هو غير انا اوصلج

-لا اروح ويه سلاوي بلاوي

-ليش

-انتَ اكيد عندك شغل منريد نزعجك شيخ المستقبل

گلبت شعري كله على جهة وحدة ودرت وجهي دا اطلع واستوقفني من گال..

-هاي شني هاي

-شنو

-شنو هالجمال شني هالترتيب شو افتري.. اللهم صل على محمد وال محمد

-شنو هسة ياله انتبهت

-اي ولج الضوه يم الميز مو قوي هسة شفتج زين.. قل اعوذ برب الفلق اللهم صل على محمد وال محمد ماكو هيج حِسن ولج منين جايبته كله

-ههههه امير

-والعباس شني هاي لا لا اغارن انا نزعي النفنوف

-لا اموري والله بنفسي اللبسه حرامات ضامته بالكنتور

-لا نوومه لا كلش مبين جسمج طالعة تجدحين ما ارضى

-صدگ لهدرجة طالعة حلوة؟

-ولج يا حلوة غير تملخين چن حورية من الجنة اللهم صل على محمد وال محمد

-هههههه اي هوايه اهتميت بنفسي يلا يلا خلينا نطلع

-يلا باي

-لا هاي شنو مو انتَ توصلني؟

-چا مو تردين ترحين ويه سلاوي بلاوي

-لا اوووي ماريد انتَ اخذني يلا

اخذت صايتي والشال وتوجهت للباب اطلع فرحانة وفجأة انسحبت من ايدي جرني يرجعني يخليني اوكف يمه..

-اوكفي تَـمني

-ها

حضني بين ايده مبتسم ويتأمل وجهي وفستاني، لابسة الفستان الي هو اشتراه الي من بغداد، فستان ماروني بدون ردان ونازل منه كله دناديش كرستالات صغار من يم الصدر لحد نهاية الفستان.. ابتسمت وحطيت ايدي على صدره خجلانة من باسني على خدي وحنچي لان حاطة حمرة وضحكت من دغدغني بشواربه يمررهن على بشرتي يداهرني..

-جبن عرب وحليب هوايش

-اميييير

-يا بعده

-ردت تگلي شي انتَ بس شو محچيت؟

هز راسه باقي على ابتسامته وهدني من ايده، عكدت حاجبي مستفهمة من راح لمجر الي يم راسه وطلع منه علبة مقدفة جبيرة مال ذهب وجابها يتقدم بأتجاهي.. رفع عيونه الي وغمزلي بتلاعب يتحارش بنظراته..

-شني هالكيك

-ههههه كافي عاد

ضحك ويايه وفتح العلبة البين ايده ولا ارادي اختفت ابتسامتي من شفت المضمون، شهگت بدون صوت ورفعت عيني عليه اتأكد صدگ هذا لو يلعب عليَّ، ضحك اكثر وجرني من ايدي بطريقة عنيفة خلاني انضرب بجسمه قوي ولزمني من متوني يتحكم بوگفتي وطلعه من العلبة يلبسنياه على راسي..

-تَـمني: كذاب

-والحمزة

-كذاب كذاب

-وعلي

-اميييييييييير

-اذني اريدها

-اميييير جايبلي تااااج

-تستاهلينه

-لا لا حبااب صدگ عوود

-تَـمني حاطه براسج وتگولين صدگ عود؟ چا لو بس مواعدج بي شتسوين

-لا لا والله مصدومة عزا بعينننك ولك سويتهاا

-خايبة شنهااااي

-لا لا اسفة والله العظيم

بسته على خده بسرعة اعتذر وركضت على المراية اباوع لروحي، يجننن التاج يجننن ماتوقعت ولا واحد بالمية ممكن يجيبه الي ولا اصلاً حاطه ببالي اشتري لنفسي رغم اكدر اشتري لنفسي وعندي الامكانية بسبب ورث نعمة بس نهائياً ما فكرت بالموضوع..

-عجبچ؟

-يخبل امير شكراً من كل گلبي

-تدللين يا راحة امير

-ربي يوفقك ويرزقك من اوسع ابوابه يا شيخ الشيوخ

-بعد روحي عسى ربي يرزقني خاطر ما اقصر وياچ واعيشچ العيشة التستاهليها

هزيت راسي عيوني مدمعة احس اريد ابجي كومة مشاعر صارت بداخلي ومو لان جابلي هيجي هدية بس يوم بعد يوم دا يثبتلي واتأكد ان الامـير علي رجال حقيقي وهذا الرجال هو رجالي اني مالتي كله من راسه لاصبع رجله الصغير الي.. بلعت غصتي وبدون تردد وبدون لا افكر هرولت وذبيت روحي بحضنه، حضنته بكل قوتي ومن كل گلبي حضن تمنيته يطبع بعقله وتوصله مشاعري القوية الصادقة..

-لو ادري هيج يومية جايبلچ فد وصلة ذهب

حچاهة بالضحك ونزل يطبع قبلة على على شعري، ضحكت بين دموعي على جملته ورفعت راسي اله باقية على وضعي ما ابتعدت عنه، نزل وجهه الي يتأمل وجهي مبتسم ويوخر الشعر النزل على عيوني..

-انتَ ما جبتلي بس تاج انتَ انطيت لبنية يتيمة ومكسورة الحياة

تغيرت ابتسامته من المرح للحنية ورفع ايده يمسح دموعي البدت تنزل ممهتمة لمكياجي ولا لكشختي..

-لا تبجين ابوي انتِ

-تذكر من سألتني ليش دائماً اكرر جملة "لا تعوفني امير"

-اتذكر

-لان تَـمني من دونك تضيع والله تضيع

-تَـمني ما تضيع وياي لو بدوني عبنها سباعية ونچرة لا تستهينين بروحچ

كبرت ابتسامتي ورجعت احضنه مرتاحة راحة الدنيا، مسح على ظهري بأيد ومسد على شعري بالايد الثانية ورجع گال بضحكة مكر..

-كل هذا من وره التاج؟ زين من انطيتيني كلمة السر خاطر اعرف يمته احصل هيج حضن بين فترة والثانية

-ههههه كل يوم انطيك هيج حضن واقوى بعد

-يااا علي ابن ابي طالب

-يحفظك علي اموري

-يا بعد راسي وراس العشيرة

ضحكت من كل گلبي وهديته ابتعد عنه شوية، رحت للميز رتبت مكياجي وشعري والتاج على راسي واضحك ويه روحي فرحانة ياا الله شكد مصدومة من هالهدية ما توقعتها ولا چانت ببالي..

-ها خايبة شو بس انتِ تضحكين ما تسويلنا فد استكان همجينو يسوينا سعيدين؟

-ههههه الكبتشينو ميشربوا بالاستكان امير

-معيدي لا تعتبين عليَّ

ضحكت اكثر ورحت للغلاية اسويله كابتشينو، سويته وابتسامتي من الاذن للاذن ما غابت، راده بالمي مو بالحليب فـ سويته مثل ميعجبه وكعد على على الكرسي ينتظرني..

-وهذا احلى واطيب كبتشينو راح يسويك مو بس سعيد راح يخليك ترفرف من السعادة

-يا الله

كعد يشربه على كيفه واني كعدت بصفه انتظره يكمل حتى نطلع، كمل نص الكوب بهدوء قبل لا يگول بنبرة جدية..

-باجر سفرة حيدر اكيد افتهمتي؟

-اي خطية الله يسهل عليهم

-احم..

-هاا خير

-احم.. احم.. جاي انظف بلعومي سوالي شحطة هالهمجينو

-امممم

-احم احم والله شحطة صارت احممم

-امير

-احم ها

-احجي امير طلعها

-شني هي

-التريد تگوله

ضحك ينزل راسه مستسلم وگال بدون مقدمات..

-نوومه راح اروحن وياهم

انصدمت بس عضيت على لساني ماريد اعلق خفت يبين من صوتي ضجت ويحس عليَّ، العلاج الدا اخذه كلش ديأثر عليَّ واقل شي يضوجني ويغثني وماريده ينتبه لتقلبات مزاجي السريعة..

-ادري بروحي ما ارتاح اذا ماشوف علاجه شون ماشي لا اكدر اشتغل ولا اعيش طبيعي، حويدر وليدي وعزيزي ماريدن اعوفه وحده يتوجع ويتبهذل بين المستشفيات والدكاتره

-بس علي السور راح يروح ودر وبدر هم يعني مو وحده

-در اسبوعين وبدر اسبوع ما رضوا ينطونهم اجازة اطول وسور ما يدبرها وحده عودين ابا الحسن يروح بس انا اريدن اروح بمچانه

-تروح من بداية السفرة لنهايتها لو من يرجعون التوأم؟

-من بدايتها

هزيت راسي ماعرف شكول لو اللح عليه منا لباجر وانگ براسه ميقتنع ولا يعوف حيدر وحده فـ نويت اختصر المحادثة واخلي يسوي اليريده..

-الله وياكم وانتبه على نفسك زين

-بعيني

-صعبة عليَّ روحتك بس بعد انتَ مترتاح اذا متروح

-اي وعلي

-بس قبلها اريد اگولك على شي صار فترة طويلة اأجله

-شنو

-تتذكر دكتور محسن الي بجامعتي ببغداد؟ مرته صارلها فترة طويلة تراسلني تريد تلتقي بيه دتشكيلي من زوجها وتصرفاته وياهة تكول عنه يقارنها ببنات ويضربها ويعنفها ودتتأذه كلش بسبب هالشي

-الله يساعدها بس انتِ شعليج؟

-هااا

-انتِ شعليج تجيچ تشكيلچ منه؟

صفنت صفنة المطي من سألني نسيت هذا داهية وميخفي عليه شي هاي عود اني مردت اذكر ان يقارنها بيه ويحجي بحبه وعشقه الي كدامها، احس تورطت هسة وماعرف شجاوب..

-مادري يعني هي رادت تشكيلي لان عرفته گرايبي

-لا مو مبرر هذا خوب تشكي لخالتج مرة جبيرة وتفتهم انتِ شعليج

-مادري بعد

-ما ارضى تلتقين بيها تَـمني ولا اقبل تطلعن سوه واذا صار ما صار واجت لهنا ورادت تشوفج تجي بشرط لبيتنا وامي تكون كاعدة وياكم

-صار

كمل وحط الكوب بصفه وگام، لبس شماغه وعگاله والعباية شالها بيده لان عنده گعدة ويه ابوه وابو كربله وياه يروح ونزلنا سوه ايد بأيد..

صاح من الدرج يا الله وكملنا طريقنا، شفت سبأ بالصالة جوه وتفاجأت من شفتها ممبدلة، عافنا امير براحتنا وطلع قبلي للسيارة واني رحت اشوف شبيها وليش متجي..

-سبأ: مالي واهس

-لا يمعودة تعالي نغير جو والله ونسة

-روحي وتونسي بدالي

-حبابة تعالي لخاطري

ظليت هوايه احجي وياهة وتوقعت لان ماعدها شي تلبسه متقبل تجي بس قفلت متريد تطلع من البيت تكول بيت عمها صمد ميحبوها ومتريد تنحط بموقف محرج، عفتها براحتها وودعتها ولبست صايتي فوك الفستان والشال عدلته وغطيت وجهي بشال ثاني وطلعت للامير ركبت السيارة..

-الامـير علي: تَـمني انتبهي لا يصوروج

-لا كالت حبيبة يآخذون التلفونات

-اقصد كامرات المصورة لا تجين بوجهها وين ما تشوفيها اشردي

-تمام

مطرني بتوصيات هوايه لحدما وصلنا للقاعة، نزل قبلي يفتحلي الباب لان ما اسيطر انزل وحدي محتاجة مساعدته الفستان طويل طالع من جوه الصاية ووجهي متغطي ما اشوف، كمشت بأيده ونزلت على كيفي رفعت شوية الشال من وجهي ونزله بسرعة يهمس..

-زلم هنا زلممم

-ما اشوف امير اخاف اوكع

-ما تطيحين وانتِ وياي

هزيت راسي ومشيت وياه خطوتين بعدنا ما عابرين مكان السيارة وسمعت صوت شهكة مدري عيطة تطلع منه..

-شنو

-هاااي شلابسة!!

-شنو شلابسة

-ولج هااي مبينات زنودج وصدررج من الصاية

-يعني شنو

-خفيفة الصاية خفيفة تبين بالشمس خررب تَـمني شون تطلعين هيج وشون ما انتبهت انا

-والله مادري اني لابستها كم مرة كدامك متكول عليها شي

-يجوز تكونين لابسة جواهة ردن موش مصلخ

-اي

-يااا علي شون هسة شون تطلعين هيج تَـمني طبي للسيارة طبي

فتحلي الباب وصعدت مرة ثانية وبالصعدة زلگ كعبي وردت اوكع ولوما هو ورايه وكامشني جان تفلگحت وانمطلت.. انهبطت من الوكعة واحس روحي راحت وهو ظل لازمني حيل ويكول..

-كاضچ انا كاضچ ما طحتي

-اي اي

-راح ارجعچ للبيت خاطر تبدلين

-لا ما اللحگ هو شبقى من العرس حتى اروح وارجع

-چا شون

-رجعني للبيت ما احضر العرس

-چا وكشختچ

-عادي شسويلها

اختنكت من وجهي مغطيته صح الجو يخبل بس معت والوكعة اثرت بيه هبطتني، حسيت بي يمد ايده ويرفع الشال شوية عني يخليني اتنفس..

-محترة

-اي

-البنيات كلهن هنا متأكدة تردين ترجعين للبيت؟

-اي لعد خوما هيج اطلع

-چؤ

ذب حسرة ضايج وعرفته ضايج عليَّ لان البنات راح يتونسن ويحضرن العرس واني لا، ابتسمت ساكتة ماعندي تعليق وتوقعته راح يرجعني للبيت بس استغربت من شفت عينه راحت على العباية مالته..

-امير

-اصطبري

جر العباية الفارشها على الكشنات الوره وفتحها زين وحطها على اكتافي، ضحكت ممصدگة تصرفه شلون راح اطلع ولابسة عباية زلم شيكولون الناس عليَّ..

-امير الناس راح يضحكون

-وليش يضحكون بوية؟

-اي لعد مرة ولابسة عباية مال زلم شيكولون عليَّ

-يكولون هاي تابعتلي واخو خيته اليفكر تزوغ عينه ويعاينلچ

ضحكت من كل گلبي وخزرني حتى اسكت بس مدا اكدر اسيطر على نفسي، بقيت مبتسمة واضحك بيني وبين روحي ونزلني مرة ثانية لافني بعبايته لف ولازم ايدي حيل يمشيني للقاعة وكل النمر من يمه يسلمون عليه ويجاوبهم بكلمتين..

-هلا هلا

-تَـمني بهمس: جاوبهم عيب

-مو جاي اجاوب

-شنو بس هلا فشلة باوعلهم شلون مهتمين بيك

مجاوبني لحدما وصلني لباب القاعة ضمني بجسمه يغطيني عن العيون وجاوبني بصوت ناصي كلش..

-لو ما اجاوب هم محد يحجي عليّ انا جاي امشي ووياي حرمة ومن اظل واكف واسلم وابوس بالوادم راح اخلي الزلم تتورج عليها

-اممم وجهة نظر

-يلا حبيبي محتاجة شي

-سلامتك، بس امير انتَ شلون تروح للكعدة بدون عباية لو ترجع تجيب من البيت؟

-لا ما اللحگ اروح وارجع تأخرت

-لعد شلون

-ادبرها لا تهتمين

-يلا اصلاً احس العباية مو مهمة

ضحك نافي براسه وبقى واكف لحدما دخلت وسلمت تلفوني للامانات، دخلت للقاعة وشفت بالباب واكفة مرة عمهم صمد ام العروسة سلمت عليها وشفت عيونها صارت على العباية الي على چتافي وظلت توزع ابتسامات..

ترخصت منها حتى اروح انزع وارتب نفسي بالمنزع بس وكفت بمكاني مستحية من تلگتني عمة زهرة وفراقد سوه يهلهلن ويهوسنلي بالباب ووگعن بيه دگ بوس.. شفت سلوى تباوعلي من بعيد وتفر بيدها وخالة رسمية تأشر عليَّ وتحجي للبصفها عني ومبتسمة..

ترخصت مرة ثانية وشردت ابدل وارتب نفسي اصلاً اني تأخرت والحضور تارسين القاعة، سفطت اغراضي وحطيتهن بالجنطة الجايبتها والعباية كلش على كيفي وياهة سفطتها بترتيب وضميتها بالجنطة خاف يصير بيها شي عيب من الامير..

طلعت من المنزع وويه طلعتي بدت الملا وگامن البنات يرگصن العروسة وجرني وياهن لنص الصالة كلنا نركص سوه، تونست كلللش والاجواء كلها تجنن العروسة تخبل فرفوشة وما كعدت على الكوشة، سمعت تعليقات تسم الگلب من سلوى عليها تحجي لان العروس فرحانة وتوزع ابتسامات عبالك ممصدگة تزوجت..

-ليلة: صارت التفرح يعني ما مصدگة تزوجت؟

-سلوى: اي چا شني ماكو حياء شو احنه من تزوجنا عيوننا ما نرفعها على زلامنا بنات هالوكت صايرات كلش

-رفل: ليش انتِ وين سويتي عرس وتردين ترفعين عيونج على زلمتج؟

-سلوى: قصدي ما چنت خفييييفة

-تَـمني: والله خليها تتونس هو يوم بالعمر قابل كل يوم وحدة تتزوج

-سلوى: عاين ياهي حجت الخفيفة المايعة

-تَـمني: احترمي نفسج ولا تخليني اتجاوز كدام الناس!

-سلوى: ااااخ اااخ حريمات عليك يالامير تصير هاي من نصيبك بس بعد هو هذا حظك شنكدر نكول تورطت

-تَـمني: والله داده المتورط التحجين عنه يحبني ويحترمني ومقدرني وممخلي شيي بنفسي

-رفل: واضح من التاج الي على راسج ولج شنيي هاي هذا هو جابه الج؟؟

-تَـمني: ههههه اي فديته الشيخ

-سلوى: هه قحططط ههههه قحططط شكد سعره يطلع هو طگطوگة

-تَـمني: اي گولي لعمو علي يجيبلج منه دامه طگطوگة

-سلوى: ما يعجبني انا مو هيلگ وخفييفة اتباهى بالعندي چن ما شايفة

-تَـمني: اي اني احب اتباهى وابين حب رجلي الي انتِ ليش مغثوثة

-سلوى: ما شايفة وشافت

-ليلة: تَـمني اظن شفتج لابسة عباته من طبيتي للقاعة صدك هاي عباته لو متوهمة انا؟

-تَـمني: لا صدگ

-سلوى: هههههههههه مو اگلجن تورط تعب الزلمة وهو يستر بيها تعب صار ينزع عباته ويحطها عليها

ملحگت اجاوبها لان صاحتلي خالة رسمية حتى اسلم على نسوان واغلبهن سألن اذا اكو شي بالطريق لو لا وخالة تجاوب..

-لا والله ماكو بس ان شاء الله ناوين همه

ابتسمت اتشكر النسوان على دعائهن الي وترخصت منهن ارجع لمكاني وانصدمت من سمعت سلوى تحجي للنسوان عني! كعدت بمكاني جامدة فاتحة عيوني مذهولة على جرأتهن، يبعدن عني بكرسيين وسلوى منطتني ظهرها ممنتبهلي وكاعدات ويگصن بيه..

-سلوى: بعد شنسوي خذاها

-لا تهتمين ام حبيبة كله شهر شهرين ويتزوج عليها اذا بطنها ما شالت شيسوي بيها

-سلوى: لا اظن ما يطلكها بس زواج ثاني اي يتزوج واصلاً هو رايد لا عبالج يظل على هاي

-اكيد يتزوج چا شيخ وامير وشكبر اسمه تاليها يبقى ويه ارملة ما تخلف

-سلوى: شبيچ خذاها يتونس بيها چم يوم ويعوفها للكراب ابن زلمتي واعرفه عدل لا يحبها ولا شي

بزعتتت روحي بزززعت من هالحجي مليت تعبت هلكت! كمت من مكاني مختنكة ادور بعيوني واگلب بيهن ماريد تنزل دموع القهر كدام احد، تنفست شوية ارتاح واسترجعت طاقتي بس الي حرگني حرگ من اندارت سلوى عليَّ وشافتني يمها ضحكت وكالت بكل صلافة..

-اجت بت شيخ محمد خية اجت ضرتچ

ضحكة ضحكك وره جملتها وصارت تصفك بمكانها متحمسة، عفتها وظليت ادور عليها وينها بت شيخ محمد وينها؟؟ بقيت كاعدة وعيوني تركض كل مكان وچان اللمحها! اللمحها من بعيد ويه امها واكفة ولازمة عبايتها بيدها وخالة رسمية واكفة بصفهن تضحك وتباوع للبنية من فوووووگ ليجوه..

-سلوى: شحلاتها چنها گمر عاينيلها زين خاطر تتعودين كله چم يوم وتلگيها ببيتج وغرفتج

-تَـمني: تحلمين حبيبتي تحلميييين

-سلوى: نشوف عود

-تَـمني: نشوف

-رفل: ها حب شو كاعدة ما تجين ويانه تركصين

-تَـمني: اجيت

نزلت لجنطتي طلعت عباية الامـير علي من الجنطة ولبستها على چتافي وگمت من مكاني، منين اجتني هالجرأة وشفكرت وشنو اجه على بالي مادري بس كل همي اريد اغث شكو مسمومة هنا واخش بعينهن واثبتلهن رجلي شلون يحبني ويغار عليَّ!

-رفل: ها شني راح تطلعين؟

-لا خلينا نركص

ضحكت ضحكة رنانة وره جملتي وبديت اركص من مكاني الواكفة بي لحدما وصلت لنص القاعة ما وكفت عن الركص ولا ثانية.. وكفت بنص البنات العباية على چتافي وگابلت تالة المصدومة وتضحك واتمايل وياهة ممهتمة لنظرات النسوان الفضولية ولا لخزرة سلوى الراح تطلع عيونها من وجهها!

تغني الملا وصوت الدي جي عالي واحنه مولعيها هنا، خجلت من سوولي مجال البنات حتى اصير بالوسط ورفل وعبق دفعوني هناك صارت الانظار كلها عليَّ والبنات حواليه يركصون والملا تغني كل شوية لوحدة بدت من العروسة وصارت تتسلسل للبنات واكفة حبيبة يمها وتنطيها اسماء بناتنا تسويلهن گفلات لحدما وصلتني، ضحكت بالسماعة وكالت..

-الملا: هاي راح تضوج بنات عمه هاي.. الگفلة راح تضوج بنات عمه... واموري رايد رادته وعايف بنات ولايته.. وتَـمني يا حلقوومة اسمها علچ بسنونه..

ضحكت بصوت عالي وصرت افتر بالقاعة متقصدة اروح يم سلوى والحياية الحچن عليَّ وخالة رسمية وبت شيخ محمد، وكفت يم خالة رسمية اضحك واكول ببرود..

-تَـمني: شلونچ خالاتي مشفتج من طلعت اليوم حتى اموري سأل عنج

-رسمية: هلا يمة اي طلعنا گبلكم.. هاي شني امير جايبلج هالتاج الحلو؟

-هههههه اي خالة اليوم جابه الي حلو؟ شنو رأج بي

-رسمية: ايي كلش حلو بالعافية حبوبة

اللتفتت على مرة شيخ محمد واردفت بأبتسامة..

-رسمية: هاي مرة الامير علي عيني ام زينب

-ام زينب: فدوة ما شاء الله، شلونچ حبيبتي؟

-تَـمني: بخير الله يسلمج.. زنوبة تعالي ويانه ليش كاعدة وحدج

جريتها من ايدها اگومها وصدق او لا تصدق طلعت البنية قممة باللطافة والادب حتى من تحجي حبابة، ضحكت بخجل تغطي حلگها من سألتني على العباية مال الامير وكالت لايگتلي ومطلعتني شيخة..

-تَـمني: ههههه لا يمعودة شيخة البيت حبيبة

-زينب: انتِ هم شيخة ما دامچ مرة الشيخ..

**

"ســـبأ"
كاعدة وحدي بالبيت اتصفن مادري شسوي تعبت من الشغل وتعبت من الغربة، مشتاگة لرهيفة اختي ما اجتني ولا وصلت اكيد ابوي واخوتي مانعيها والله يعلم شني جاي تعيشه هسة..

ضجت وقررت اكوم اخذلي جولة ثانية على البيت اشوف شنو وصخ اعزله، طبيت للاستقبال والديوان يلمعون رحت لغرفة عمة رسمية نظيفة رحت للمطبخ كلشي مابي ولا ماعون وين اولي خايبين شسوي اذا كلشي مرتب..

رفعت راسي للدرج اعاين خليني اروحن للبيتونة انظفها اكيد ينرادلها تعزيل، صعدت درج الطابق الثاني وهاي اول مرة اصعد هنا شفت ثلاث بوب مادري ياهي منهن للبيتونة فتحت الباب الاول طلع مخزن فراشات ومتكترات ونظيف ما يحتاجله شي سديت الباب ورحت للغرفة الثانية..

لويت اليدة بس شو ثگيلة وما تنفتح بسهولة ظليت امعچل بيها هواي ياله انفتحت، دفعت الباب على كيفي ووگفت بمچاني من شفتها عبارة عن اوراق.. غرفة جبيرة كلها اوراق مال رسم متناثرة كل مكان واللوان طايحة بالكاع وشخابيط على الحايط مال رسومات بس ما مفهومة اظنه نوع من انواع الفن.. على وگفتي هاي استوعبت هذا مرسم الامـير علي..

صار عندي فضول اطبن واعاين للوحاته انا اعرفه رسام بس ماتوقعت لهدرجة! رسماته خرافية تخبل راسم عن كلشي طبيعة ووجوه وشخابيط مطلع بيهن رسمة لعيون تجنن..

اخذني الواهس وصرت اگلب بالرسمات وحدة وره الثانية ولا ارادي شهكت مبتسمة من شفت رسمة لـ تَـمني، رسمة لوجهها وعيونها مغمضة چن نايمة ووحدة وهي كاعدة ورسمة وهي متمددة، وهي صافنة، وهي بنص خضار، وهي خجلانة وضامة وجهها، وهي جاي تضحك هواايه هوااي رسمات الها وكلهن موقع جواهن اسمه وكاتب "الروح والراحة" بخط حلو..

روحي رفرفت فرحانة انا معليه والكشرة شاكة وجهي رجعت الاوراق لمكانهن على الميز وكضيت مجلد ثاني اتفرج على رسماته بس غابت ابتسامتي من شفته راسم بت مبوشة بس عيونها الخضر مبينة ورموشها طويلة وكثيفة وبيدها جهال ثنين كاضة كل واحد من جهة..

گلبت الورقة وشفته راسمها مرة ثانية كاعدة هالمرة على دچة درج منزلة راسها ووراهة طفل كاض عباتها وطفل يم رجليها كاعد، صرت اگلب بالرسمات وتتكرر نفس الصورة ونفس الجهال ونفس البت ومادري ليش خفت شوي چن ناسخ الرسمات نسخ من گدما مكررهن..

نزلت المجلد من ايدي وافتريت اعاين لغير رسمات معلگهن على الحايط ببرواز انيق، انتبهتله هم مكرر رسمة زلمة بهواي من لوحاته كل لوحة مرت عليّ شفته راسمه او راسم عيون بزاوية صغيرة..

نصيت اشيل الطايحات بالكاع وشفتهن لنفس الزلمة شني السالفة الامير ليش يكرر برسماته؟.. فوگ العشر رسمات كلهن للزلمة صار عندي فضول وظليت اعاين لوجهه بلچن اعرفه بس ما كدرت اشبه عليه ولا ربطت منو ممكن يكون الا من شفت بوحدة من الرسمات مكتوب جوه.. "ضرغام"..

كضيتها بيدي اعاينلها وشفت الزلمة بس هالمرة واگف يم دراجة نارية هاي الضخمة ومنتچي عليها يضحك، حطيتها من ايدي وكضيت غيرها شفته هم راسم دراجة نارية وغيرها وغيرها وغيرها صارت الرسمات الجاية كلهن لدراجات نارية وصورة الرجال المكتوب جوه صورته "ضرغام"..

سامعة بهالاسم انا، اي والله سامعته من عمتي رسمية اظن، همستها بيني وبين روحي وظليت كاعدة بالمرسم فرشت وكعدت ما جاي اكدر اطلع چن طبيت لعالم ثاني كله اللوان ورسمات حلوة مليانه قصص..

-شتسوين هنا؟!

نزيت مخترعة وطاحن الرسمات من ايدي، بلعت ريگي ووكفت بمچاني منزلة عيوني گلبي يددگ بقوة واحس الدنيا صارت تدور بيه من الفشلة والخوف..

-علي التقي: سبأ انتِ ليش هنا

كرر سؤاله وتقدم يطب للمرسم، رفعت راسي اعاين لوجهه وضاعت علومي من صارت عيني بعينه تهت بيهن ولساني انبلع ناسية انا ما لابسه عباه ولا حجاب وواكفة گدامه بدشداشة خفيفة..

-انا.. ا.. انا

-هذا مرسم الامير ما يرضى احد يطب هنا

-مادري والله انا مادري بس اجيت.. اجيت خاطر اعزل شفته هوسة

-لا بوية ما يحتاج اموري ما يحب واحد يطب هنا تعاي خلينا نطلع

هزيت راسي اي وركضت بساع كدامه اطلع، نزلت الدرج مثل المسودنة وشردت لغرفتي جريت شال لبسته ولفلفت روحي بالعباه، بينما طب للغرفة وراي هستوني جاي اتغشى..

-السلام عليكم

سلم وطب للغرفة وبوجهه طب للحمام، كعدت على الجرباية افرك بيدي بعدني مستحية شون شافني بمرسم اخوه هسة شيكول عليّ شكد فضولية.. طلع من الحمام نازع قميصه العسكري وباقي بالبنطرون يفتر..

-علي التقي: سمعت صوت طگطگة جاي من فوك استغربت حسبالي رايحين كلكم للعرس

سكتت ما جاوبته وظليت منزلة عيوني وابوگ بنظرات منه، وكف گبالي منطيني ظهره كدام الميز مادري شيسوي وانا فهيت اعاينله خرب بعيوني شكد صلفة وخرب بگلبي شكد يحبك..

-ها بت عمي

انتفضت ونزلت عيوني عنه بساع، ثواني ورجعت رفعتهن معصور گلبي من شفته يضحك عليّ، اندارلي يتچي ظهره على الميز وچتف ايده الضخمة لصدره يا بوية عاين العضلات.. لا لا عيب ما يصير اعاين ما يصيير..

-علي التـقي: راح تبقين مگبعة هيج كلما اطبن عليج

-اي

-طلعي عينج خايبة

-لا

-طلعيها شني كاعدتلي هيج چنچ الاعور الدجال

-ماريدن

-عساچ لا تردين ظلي هيج ظليي منگبة حتى بالبيت

بلعت ريك مهضومة صايرة على اقل شي ابجي وانقهر واكثر واحد اتحسس منه هو كلشي يگوله احسه جاي يهيني لو يعيب على وجهي، تحسر ضايج وتمشى للكنتور يطلع منه تراك..

-امي بالعرس انتِ ويامن باقية؟

-محد

اللتفت جافل يعاينلي، رفع حاجبه صافن عليَّ ثواني گبل لا يكول..

-وحدج باقية بالبيت؟؟

-اي

-ليش؟!

-عبن.. عبن..

-عبن شني

-عبن ماريدن اروح

-اي ليش ما تردين ترحين؟

-مادري

-انطيني جواب مقنع سبأ!

بده يعصب ونبرة صوته تغيرت حسيته شاك بيه جاي احوكن شي وباقية وحيدي وما اللومه مرة صار بيناتنا موقف حقير واكيد بعده يفكر بيه اريد اضرهم..

-بيت عمي صمد ما يحبوني وماريدن اروح لعرسهم

-ياهو ما يحبج منهم؟

-ولدهم

-انعل ابوهم شعليج بولدهم انتِ؟؟

-اكيد امهم راح تبلغهم اجيت انا ويعصبون

-ويعصبون؟؟ انتِ مو بت عمهم لو شني؟!

-بت عمهم

-چا خلياكلون نعل ويحترمون رواحهم! امشي بدلي خليني اخذج

-لا انا ماريدن چنت جاي اعزل البيت والله

-امشي بدلي سبأ

-ماريـ...

-گوووومي

حچاهة بين اسنانه خازرني طفرت من الجرباية اراوح بمكاني وين اولي وشلبس وشلحگ العرس راح يخلص واصلاً ماعندي ملابس مناسبة..

-عاين انتَ تعبان اسبح ونام وارتاح و...

-تبدلين لو اخذج بدشداشتچ الخضرة؟

شهكت زالغة خدي عمت عيني انتبه للدشداشة انوب شون لون لابسة اخضر وانا منا فحمة شون طالعة بيها اكيد افشل..

-هاا؟؟ راح تبدلين لو شلون؟!

-ماعندي لبس

-هااا هسة صار ماعندج لبس

-والله ما جايبه لبس مناسبات من بيتنا

-خوش سهلة هاي

عافني وطلع من الغرفة رحت وراه شفته طب لغرفة حبيبة، تمشيت اشوف شعنده وفاجأني من فتح كنتورها يدور بهدومها، ركضت عليه وسديت الكنتور بكل حيلي ما راضية..

-لا ماا يصير لا

-شني ما يصير

-ما يصير تلعب بهدومها ما ارضى عليها

-انتِ شعليج

گالها وتقدم عليّ يفتح الكنتور مرة ثانية، بلعت ريگي منحرجة عبنه تقرب مني كلش خفت اطخ بجسمه سفطت روحي ويه الكنتور وجاوبته گوة من الخجل ما جاي اعرف اسولف..

-حبيبة.. حبيبة احم.. حبيبة بت.. بت عمي

-وهي اختي

-اي بس.. بس هاي.. ما يصير

-شني ما يصير؟

بدون لا احس رفعت ايدي احطها على صدره امنعه يتقرب اكثر جسمي صار يرعش من فوگ ليجوه يتقدم وانا ارجع ليوره متت حرت وين اروحن شلت رجلي وطبيت بنص الكنتور الي تعلگ بي صاياتها وجببها، ضحك تك خد ودفعني بي اكثر وطب بنص جسمه وراي..

رجلي بادت راح اطيح النفس يخرخش بصدري وعيني ما نزلت من عينه التضحك، شهكت اتنفس سريع من مد ايده على شالي يجره من راسي وطيحه بالكنتور وهمس بأبتسامة..

-خوش مچان هذا دافي

بلعت ريگي راح اموتن وحگ زينب گلبي راح يوكف، غمضت عيوني مستسلمة من مد ايده يسندها على الكنتور من جوه صار قريب مني كللش ما اكدر حتى اتحرك..

-علي التقي: والله نيالج يا حبيبة على هيج كنتور بعلي ضيم شو احنه غرفنا ليگول گن دجاج كاتلتنا الحصرة

صوتي مبلوع واختض لدرجة تخيلت الهدوم جاي تتحرك من رجفتي، فتحت عيوني اعاين لرگبته من تنهد يذب حسرة وهمس بيني وبينه صوت كزبرني..

-اذا تستنكفين تلبسين من هدوم حبيبة هسة نطلع نشتريلج نفنوف

-شني

-نطلع نشتريلج نفنوف على ذوقج

استجمعت قوتي وحاولت اجرأ نفسي ورفعت عيني لعينه، متمتت گبل لا طلعت مني جملة..

-لا انتَ تعبان هستوك جاي روح نام اصلاً انا جاي اعزل البيت ما يصير اعوفه واطلع

-انا مو تعبان بس راح اتعب من اشوفچ باقية هنا وحيدج تنظفين والبنيات بالعرس يتونسون

سكتت اعاين لعيونه الذبلانة من التعب مبين مهدود حيله عمت عيني ما يهون عليّ اشوفه بهالحال لو بيدي اشيل التعب منك واديره بگلبي يا تقي..

-صرتي وحدة من بنات البيت وحالج من حالهن تحضرين اعراسنا ومناسباتنا

-بس...

-لا تكولين بسسس

نترها بخشونة وكض متني بأيده يحذرني، هزيت راسي اي وردت انزل عيوني وما خلاني كض حنچي بأيده ورفع وجهي اله خبطت بطني من حركته وعيوني صارت تحرگني ما جاي اكدر ارمش..

تقرب من وجهي كلش صار ما يفصلنا شي گلبي طاح بين رجلي من حسيته يريد يسوي شي وفززه صوت موبايله يدگ بجيبه، بدون لا يرمش طلع من الكنتور وجرني وياه يطلعني ووگفني على جهة خاطر يجاوب موبايله..

وكفت يابسة لا البيه اطلع من الغرفة ولا البيه ابقى، حچه بموبايله ثواني وسده ورجع يدور بالكنتور طلع منه فستان بيجي طويل وگال..

-ما نلحگ نطلع للسوگ لبسي هذا اظنه حلو عليج

حطه بيدي وراح للميز مالتها صار يدور بالمجرات لحدما لگه جنطة مكياجها جابها وحطها بيدي واردف..

-هاي اصباغ مادري شني للوجه اذا تردين هم.. يلا يلا لا نتأخر

طلع گبلي من الغرفة وفات لغرفته، رحت وراه اركض ناوية اللبس الفستان واروحن ماطوله عاجبه، اخذته للحمام مال غرفتي وبدلت هنا وفتحت جنطة المكياج مادري شحط ماعرف امكيج هاي رهيفة جانت تلبخلي گبل..

عصرت عقلي اتذكر شون تحطلي وشني اول ووكفت اللبخ بوجهي بساع بساع بس والله طلع حلو مادري انا ماعندي ذوق والله مادري بس مو وكتها لازم اكمل وما اخلي يتأخر.. مشطت شعري على المراية ما ينرادله شسوار ومدري شنهي من الله سرح الحمدلله..

لفيت روحي بالعباه وطلعتله شفته واكف لابس دشداشة سودة ويلوب گلبي خمشني خفت لا صاير شي لان لوبته مو طبيعية انوب لابس اسود سترك ربي..

-صاير شي؟

رفع عيونه يعاينلي اشوف عيونه صايرات دممم مال واحد حابس دموعه، ردت اطيح من طولي بعلي جفلت اعاينله بدون صوت اخافن اسأل وهو ظل يباوع لوجهي ساكت..

-تقي اهلي بيهم شي

گوة طلعت من حلگي وبساع هز راسه بـ "لا" بلع ريگه ودار وجهه عني يمسح عيونه وگال..

-ماكو شي.. يلا سبأ خلنطلع

طلع گبلي من الغرفة وانا لفيت شال على راسي وتبوشت بي ولبست حذاء عادي مو اله حلو عبن الفستان طويل يسحل ما يبين، طلعت وراه اهرول وركبت السيارة وطلع بينا الطريق كله يمسح بعيونه ما يبجي بدموع احسه مستحي مني وانا ظل بالي يمه شبي وشنو الصار؟؟

وصلني للقاعة ونزلني للباب لان زلم كومة واكفين بالبوابة ما لحكت اگله مع السلامة وهرول لسيارته وشخطها يطلع، تحسرت ملچوم گلبي شبيك يا رويحتي شصاير وياك..

دعيت الله يهدي باله ويريح گلبه وطبيت للقاعة، خطيت خطوتي مستغربة ومستحية بس ما طولت بالخجل عبن تلگوني حبيبة وليلة من الباب وصفنت فاتحة عيوني مبتسمة من شفت تَـمني لابسة عباة زلمتها وتتمايل بين النساوين...

**

"حــبيبة"
خلص العرس على خير بس الزلم ما خلونا نحضر الزفة مادري ليش ابوي قفل مو شلون ما چان وشكله عصبييي غادي نار، احترمنا نفسنا ومحد حضرت الزفة ورجعنا للبيت كلمن لغرفتها اخذت صور هواي ودزيتهم لمنتصر شافهم وعلقلي..

"حلوة"

ابتسمت ببرود على تعليقه اصلاً تعودت عليه من انخطبنا لليوم هو هيج ومن اسئله ليش هو هيج بارد يجاوبني هو يستحي وما يريد يستعجل بعلاقتنا وانا محترمة هالشي ومتقبلته ما دامه وياي..

نمت ليلتي وثاني يوم من الصبح گعدنا ودعنا ابرار وحيدر والباقين الراح يسافرون، تَـمني ما نزلت وبقت فوگ توقعتها نايمة وما راح تودع زلمتها بس بعدين افتهمت توادعوا فوگ وما تتحمل تشوفه وهو يطلع من البيت..

-ليلة: يوم منى ابا الحسن يسافر دخييلك ربي ما تاخذه يسافرله چم يوم يتونس ويغير جو ويه جماعته خاطر يعوفني

-حبيبة: عجيبة انتِ والعباس عجيبة

-عبق: عوفكم من السفر هسة بنات علي الحـق متحلفلي وناوي الا يطيح حظي شسوي؟؟

-ليلة: شمصخمة ولج

بلعت ريگها متوترة وبدت تسولفلنا دكيت صدري بكل قوتي مصدوومة شني هااي تريد تموت وما جربت تتحارش بهيج سالفة الا ويه علي الحـق!!

-ليلة: ياااا ثوووولة ياااا مطية يااااا زماالة يا ما تفتهمينن

-عبق: شسوي بنات ماعرف شلون هيج سويت

-حبيبة: وانا اگولن ليش منفس وما يتحچى حتى من امي تتصل بي يريد بس يخلص دوامه ويرجع يگللها عندي شغل مهم

-ليلة: هالشغل المهم يربي بي عبق

-عبق: عزا العزاني اي والله

-ليلة: اي خية شبيچ هنه راشدي راشديين يصحيچ بيهن ما راح ياخذ روحج تره

-عبق: ليلة شبييييج

-ليلة: عم دهده عم دهده عبق راح تنسحل خوش سحلة عم دهده عم دهده

نصبنا عليها وهي ظالة تطگطگ خايفة سودة عليًَ يومين هي بالضيم حتى دوامها ضربته وهو خوش عاند وياهة حتى اتصال ما يتصل بيها وقافل عليها الا ينتقم منها.. صراحة خايفة لا يفقد عليها من يشوفها ويتجاوز اخافن من حق لو عصب يتسودن ومحد يگدرله..

باليوم الثالث رحت للجامعة من الصبح ويه تَـمني الما نزلت الموبايل من اذانها تسولف ويه الامير، تضحك وتتغنج وتتدلع چنه گدامها وكل جملة والثانية صاحت..

-امييييير

-علي الكـرار: استغفر الله

-حبيبة: ها خير

-علي الكـرار: الا اتزوج واضغطكم انا اعلمكم

-حبيبة: تزوج خوية بقت عليك

-علي الكـرار: على طاري الزواج حبيبة شبيها ليلة امس؟

-شني شبيها

-مادري اظنها مريضة

-لا كلشي مابيها

-ها

-ليش حسبالك مريضة؟

-مادري بالليل سمعت صوت واحد يتقيء من المطبخ خفت لا تكون امي تخربطت طلعت اشوفن وچان اللگاهة ليلة مايعة روحها ووجهها اصفر

-صدگ؟؟؟

-اي والله گلتلها راح اصيحن ابا الحسن بس ما رضت وحلفتني بداعة امي ما احچيله

-تَـمني: غريب! زين ليلة شتسوي بالليل وحدها؟

اللتفتت على تَـمني السدت موبايلها وانتبهت ويانه، حرك چتافاته كرار وگال..

-مادري انا هم استغربت وسألتها بوكتها كلت خاف محتاجة شي بس كالت جانت نازلة تشوف رفل

-حبيبة: هاااا اي صح رفل مو تنام بغرفة امي رسمية اكيد راحتلها

-تَـمني: اي صح

وصلنا للجامعة ونزلنا كلمن لقسمها، ركضت بخطوات سريعة اخافن ما اللحك على الامتحان اليوم طلعنا متأخر وانوب هذا امتحان نهاية السنة مو لعب..

طبيت للقاعة وابتسمت من شفت حور كاعدة هم، امتحانات نهاية السنة يسوون سطر مرحلة ثالثة وبصفنا مرحلة ثانية يعني بين سطر وسطر صايرين وحور متبعد عني الا بكرسيين..

اللتفتت عليها اسلم وسوتلي بيدها "هلو" وجانت كلش متحمسة ضحكت وهمستلها "شكو" وجاوبتني بنفس الهمسة..

-اخوية خطب البارحة

تفاجأت بس ما خليت هالشي يبين عليَّ وابتسمت اهز براسي ساكتة، صاحوا الدكاترة كلمن يكعد بمكانه لان راح تتوزع الاسئلة، امتحنت والحمدلله غير الدرجة الكاملة ما ارضى ما خليت سؤال يعتب عليَّ كله جاوبته..

طلعت من الامتحان اطلع اغراضي من اللوكر وكملت بنفس الوقت حور، اجتني تضحك وبيدها جنطتها جاي ترجع اقلامها..

-حبيبة: بشري شلونچ بالامتحان

-حور: كللش زينة بس شايلة هم امتحان باجر مدا افتهم المادة حبيبة شسوي

-مالج غرض انا قنعت ابوي اليوم اجيكم خاطر ادرسج

-صدددك والله؟؟؟ زين وانتِ شلون بأمتحانج

-انا مضبطة المادة بس اراجع، يلا يلا ما دام تَـمني رجعت للبيت گبلي هم ياله نلحك نطلع خاطر ما نضيع وكت

هزت راسها اي وطلعنا سوه هي ركبت سيارة اخوها وانا رجعت ويه علي النور الضاربله دالغة وشارد بتفكيره..

-حبيبة: خير ان شاء الله نور شبيك

-مابيه شي

-شكلك مو طبيعي

-لا ماكو شي، ابوي گالي ابلغج اليوم ما ترحين لبيت حور ما يرضى

-هاي ليييش مو امس قنعته؟

-مادري ما رضى بعد

-والبت شون تنجح اذا ما اقريها

-مادري حبيبة رهمنها من يمچن

-نور شبيك ليش ضايج؟

تحسر يمسح على وجهه متكدر، نفخ هوا وعلگ المسجل على قصيدة تحجي على الخوة وگال..

-گلبي طاگ على سور وحويدر

-ان شاء الله يرجعون بالسلامة

-ما جاي يمشي يومي حبيبة بالعباس ما جاي يمشي

-ميخالف يروحي چا شنسوي غير مسافرين علاج

-والله لوما الامتحانات اللحگهم وطزز باليبعدني عنهم

-كله چم امتحان بقى لا تضيع مستقبلك اهتم بي سور ما يرضى ترسب تره يزاعلك

ضحك وره جملتي وهز راسه اي، نزلني لبيتنا وهو راح يفتح محل علي السور يكول خطية مصدر رزقه يبقى مسدود، طبيت للبيت سلمت على امي ومرة ابوي وكعدت وياهن وصعدت فوك اشوفن تَـمني شعجب رجعت على وكت وويامن..

دگيت باب غرفتها ما جاوبت دكيت مرة ثانية هم ما جاوبت، توقعتها نايمة وقررت اعوفها لولا ليلة طلعت من غرفتها وگالت..

-حبيبة تَـمني مو طبيعية

-شبيها

-تعاي

جرتني لغرفتها طببتني وانصدمت من شفت فراش ممدود بالكاع وعليه بطانية وبطانية على الجرباية شني هاي؟ ليلة وابا الحسن كلمن ينام بمكان؟؟

-ليلة: تَـمني من دخلت جان كلشي مابيها شو طبت للغرفة طلعت عيونها تتگلب وتضحك ويه الهوا حتى عمتي حست وسألتها خاف بيها شي وهي ظلت تجاوب مابيه شي وصعدت لغرفتها

-صخام!

-شني

-اكلت شي من رجعت من الدوام؟؟

-لا

-متأكدة ليلة؟؟

-لا مادري يعني ما انتبهت بس كلشي ما اكلنا احنه

عفت ليلة وچفتت على غرفة تَـمني همزين ما قافلة الباب، طبيت بس شفتها مظلمة الغرفة نايمة ومغطية روحها.. تقربت من يمها اعاين لوجهها مابي شي كعدت يمها انا وليلة قررنا ما نطلع نشوف يمكن تهذي بس ما حجت بشي نص ساعة احنه كاعدات على الصامت كلشي ما صدر منها حتى حركة چن ميتة مو نايمة..

-ليلة بهمس: نايمة حبيبة

-اي

-خلينا نطلع

-خوش گومي

طلعنا من غرفتها ونويت فد ساعتين وارجعلها اتأكد منها، فتحت موبايلي اشوف خاف منتصر مراسلني لو متصل بس ماكو شي، دزيت لـ حور ماكدر اجي وخطية حسيت البت انقهرت بس عذرتني من گلتلها ابوي ما يرضى..

العصر كعدت تَـمني كلشي مابيها سألناها شبيچ وليش جنتي تضحكين وكالت جانت تسولف ويه الامير وفرحانة صح استغربت بس مشيتها وما لحيت كلت اذا تكرر الموضوع مرة ثانية ابلغ الامير..

طلعت للسوك ويه امي اكمل جهازي ما بقى شي على عرسي وره الامتحانات مباشرةً ما اللحگ بعد، كلشي خلصناه ركض بركض وايام الامتحانات تمشي كلما يتقرب يوم العرس كلما يكبر توتري وتكبر فرحتي..

ما بقى الا امتحانين والحمدلله ابوي سمحلي اروح ادرس حور خطية هالمادة عكرة عدها بس ما رضى الا يوكفلي واحد من اخوتي بباب حوشهم ينتظرني وما يروح.. نزلت ببيتهم وتلگتني حور من الباب فرحانة وتگمز عبني اجيت، سلمت عليها واخذتني لامها سلمت وصعدنا لغرفتها فوك..

-حور: اخذي راحتج اخوتي مو بالبيت

وصدگ كلامها محد بالبيت غيرنا لا سمعنا صوت زلمة ولا شفنا خياله اخذت راحتي كلش وراحت مني الخوفة ودرستها، كملت ونزلت اودعها وبعدنا بالباب ورجع حاكم نزل من سيارته ووياه بت بس مو بت ضيييم دخيل علي على هالجمال شني طول شني شكل شني حِسن شايلة انا بت وظليت فاكة حلگي عليها..

-حاكم: مرحبا

-حور: هلوو شلونكم

سلمت عليهم بحرارة وبقوا يسولفون وحيدهم همه والبت، حسيت بروحي ثگيلة ترخصت وطلعت ومع هذا ما عافتني حور وطلعت وراي للباب.. اكيد هاي خطيبته الله يسعده وياهة مبينة حلوة وحبابة..

رجعت ويه نور للبيت ومن الباب سمعت صوت مصايح جاي، ركضت اشوفن شكو لكيت امي عيونها راح تطلع من وجهها وابوي وجهه صاير ازررگ وليلة تدور بالوجوه وتضرب على وجهها..

-حبيبة: شصاير؟؟ شبيكم!!

-سلوى: سوودة بوجهي سووودة بوجهي عمتت عيني صخاام الصخمني صخاام

-حبيبة: شنيي شبيچ يوم شصايررر

ما جاوبتني وبقت تلوب وتلطم بمكانها، كضت ايد ابوي ووگعت على ركباتها تبوس بيدها وتبجي وتتوسل..

-امسحها بوجهي شيخ عليي دخيلك لاا تسوي شي بداعة ولدك لاا تسوي شي

نتر ابوي ايده منها وطلع من البيت ولحگه علي النور ما مفتهم شي وانا مادري شصاير ماعرف شنو السالفة شبيهم وليش محد جاي يجاوبني!!

-حبيبة: لييلة احجي ولج فهمينيي شكووو

-ليلة: مصيبة حبيبة مصيببة

-حبيبة: هسة غير تحجيييي

جرتني من ايدي واخذتني على صفحة تحجي وترجف ما ثبتت ايدها زوعتني العافية..

-ليلة: عبق ماكو حبيبة ماكوو عبق هربت!

-شني

-عاينييي

حطت بيدي ورقة بيضة مبينة مشگوگة من دفتر، مكتوب بـ خط عبق رسالة محتواها..

"مليت من هالعيشة مدا اتحمل كل هالضغط وتعب من كل الجهات، ردتك تسندني وتعوضني المُر العشته بس صرت انتَ والزمان عليَّ وصلت بيك تهدد تعذبني وتريدني ابقى انتظر هالاهانة والقهر؟.. انساني علي الحـق واسفة لان عيشتك بوهم كل هالمدة بس مدا اكدر اتقبل الوضع اتمنى متدور عليَّ لان مراح تلگاني اني راح اسافر ويه انسان يحبني ويستحقني ويجوز من تقرا هالرسالة اصلاً اني اكون خارج العراق... اسفة"...

يتبع 👑.....

━━━━━━ ♛ ━━━━━━

عبق.... ⁉️