الامارة الفصل الخمسون 50 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

الي أخترع جُملة "حُط عينك بعيني"
ما چان ماره عَليّه عيون مثل عيونك. ♥️

━━━━━━ ♛ ━━━━━━

اجاني شعور مميت اريد ابوس خده بس اخاف يحس، شجعت روحي وكلت لا ما اظن يفز وقربت وجهي منه وبست خده بوسة خفيفة، ضحكت على كيفي ما مصدگة سويتها والصار حقيقة.. تحمست كلش واحس نبض گلبي صعد لراسي من الفرحة، قررت اتجرأ اكثر واسوي البخاطري فـ بلعت ريگي وتقربت زايد صرت اشوف كل جزء من وجهه.. ابتسمت طايرة من السعادة ومديت نفسي عليه كلش وبعدني جاي اسوي الخطوة وجفلت طايح گلبي من فتح عيونه وكض وجهي بين ايده..

-شجاي تسوين؟؟

-سبأ: و.. و.. ولاشي

فاجأني من فز من مكانه وگام على حيله وصار يدور بعيونه على جسمي و ايدي ما افتهمت ليش هيج جاي يسوي وشنو سبب هالردة الفعل وانا هم من الفشلة خنست ورجعت تمددت على الفراش وغطيت جسمي ووجهي بالبطانية..

وصلتني صوت حسراته وكدرت اميز تحرك بالغرفة وراح للحمام بسبب فتحه للباب، ذبيت نفس خجلاانة وغاطة بهدومي شجاني وشبيه تسودنت واستخفيت شبيه صدك جذب..

وخرت البطانية من وجهي ومديت نفسي على كل الفراش افتح ايدي ثنينهن احسني متحنطة الفستان ضاب على جسمي وجنت نايمة على ظهري ما تحركت من مچاني جنت اخاف لا اطخ بي عذبت نفسي بنفسي..

جريت مخدته حطيتها على وجهي اخنك روحي بيها عقاب على السويته كلما اتذكر شون لگفني وشلون فز مخترع وهو يشوفني بوجهه اريد اموت من الخزي گبر لفني شكد خفيفة وما استحي گبررر اليگبررج سبأ!!

اختنگت وشمرت المخدة عن وجهي، اخذت شهيق وزفير اسولف ويه روحي واچذب عليها ماكو شي وعادي اكيد هو ما اجه بباله وما عرف چنت جاي اريد ابوسه.. هزيت راسي مقتنعة وگمت اكعد على حيلي اتحضر خاطر بس يطلع من الحمام اطب بداله..

كعدت وسندت ظهري على تاج الجرباية ارتب بشعري وروحي ماريده يطلع ويشوفني مرعبلة، هفيت على وجهي وشلت مخدته ارجعها لمكانها وانخلست فازة من شفت مسدس محطوط على جهة راسه ومبين جان جوه مخدته!

ما لحكت افكر زايد وتشتت تركيزي من طلع من الحمام ينشف بالخاولي الصغير، شمره على الميز وراح لميز التواليت فتح المجر وطلع منه باكيت جكاير جديد.. رجعت عيني على المسدس وفجأة... بلعت ريگي متبسمرة بمكاني من اجت براسي فكرة وبديت اربط ويتوضحلي ليش موجود هالمسدس جوه راسه..

-اليوم اظن اروح لبغداد بالليل بس بعدني ما مرتب وضعي

فركت صدري ساكتة وعيوني مركزة بالسلاح حسيت بأذاناتي ورگبتي نار صايرات من القهر وچنه هو هم انتبه لان بحركة سريعة هرول للجرباية واخذ المسدس وحطه بالمجر الي يم راسه..

-علي التـقي: نسيت اضمه امس

-ها

-اي حطيته هنا عبن عندي.. عندي..

سكت يزفر نفس بجزع ما يعرف شيكول چن عقله صفر وولا فكرة گمزت بعقله تنقذ الموقف مع العلم علي التـقي كلشش ذكي ويكدر يألف أي چذبة وراح اصدگها بدون لا يحتاج يبذل جهد بس چن الله سبحانه راد يبينلي هو شون يشوفني..

عفته وكمت من الجرباية اروح للحمام سمعته يصيح بأسمي مرتين بس ما رجعت ولا گتله "ها" الخنگة البيه ما تخليني افتح حلگي مو انوب احجي واتجاوب وياه.. قفلت باب الحمام عليَّ وكعدت على الدچة احرر دموعي ابچي بدون صوت ابچي على حظي الخايس الخلاني بهيج موقف وهيج عائلة وهيج قسمة..

حظي خلاني اتزوج زلمة اعشگنه بس هو ما يعشگني، ما يحبني ولا يثق بيه لدرجة فز من نومه اليوم يدور بيدي وحواليه لا يكون بيدي شي وجاي اريد اسويله سالفة وهو نايم.. ما يثق لدرجة يبيّت مسدس جوه راسه ما دامني وياه بالغرفة يخاف على نفسه مني!

امسح بدموعي ويرجعن ينزلن تعبت منهن تعبتت من هالماي المالح الجاي يطيح من عيوني كلما ضجت، تعبت من هالضعف والخوف والذِل.. كمت للمغسلة اريد اغسل وصدفة عيوني صارت على المراية وانصدمت بوجهي، المسكارا سايلة والكحل نازل لخدودي والرموش عين طايحة منهن وعين باقيات شكلي چن سحارة اخوف واليذبح هو شافني بهالوجه شافنييي..

غسلت وجهي ابجي بالسكتة لا يطلع صوتي وانفضح، ظليت افرك بي لحدما طلعلي جلد ثاني وطلعت من الحمام وجفلت من شفته بوجهي واكف بنفس مكانه العفته بي وبدون سابق انذار گال..

-انا ابيّت سلاح جوه راسي للحذر متعود من گبل

حچاهة بنبرة واحد جاي يبرر وانتبهت لعيونه التعلگت بوجهي ما طاحت يريد يشرف ردة فعلي، حسيت بشعور غريب وهاي اول مرة بحياتي احس بي.. هاي اول مرة شخص يهتم لشنو جاي افكر واجه يبررلي اوول مرة بحياتي كلها احد يهتم لمشاعري!

-بس نسيت انا بعد مو عزابي وما يصلح ابيته جوه راسي.. عايني سبأ خاف تتكرر وتلگي هنا انتِ ضمي بالمجر خوش؟

-عوفه وين ما يعجبك

حچيتها ببرود ورحت للكنتور اطلع هدوم، گلبي صار يدگ حييل وبطني مغصتني من اجه يوگف وراي ضبط وظل يكول..

-لا شون ما يصير هذا مو مچانه المناسب وامس انا نسيته هناك

بقيت منطيته ظهري وكوة مسيطرة على روحي لا ابتسم لو استخف گدامه من الفرحة ما جاي استحمل احس اريد ابچي والدموع كوة كاضتها، كلش تأثرت شلون ظل واكف وراي وينتظرني اجاوبه ويلح حتى يفهمني ما يصير يعوفه هناك من حسني ضجت وتحسست.. مادري شي طبيعي اتأثر وافرح لو لان انا مدمغة وين ماروح ومحد يهتملي حسيت بشعور حلو..

-علي التـقي: ما راح اروح لبغداد اليوم بطلت

-اي

-اي عبن حبيبة راح تجي الصبح تتريك يمنا عود نزلي لا تظلين وحدج هنا

اخذت دشداشة من الكنتور وعفته واكف وراي وتوجهت للحمام، فتحت الباب وگلت بنفس البرود..

-لا ماريد

-لا شنو ما تردين البنات كلهن راح ينزلن چا انتِ وحد

-اي وحد

-شني وحد شنو تفرقين عنهن؟

-انا بت مسعود

گلتها وطبيت للحمام وقفلت الباب وراي، انصدمت من نفسي شون كدرت ادوس على گلبي اليوجعني واتجاهله هيج بس لازم.. لو جانت اختي رهف وياي چان نصحتني هيج اسوي انا متأكدة راح تجبرني ارجع كرامتي واحترامي واتقوى..

كملت سبح وبدلت هدومي بالحمام وشوي طولت علما مشطت هنا وتعطرت ما جنت اعرف منين اجاني هالعطر بس لگيته گبل چم يوم على الميز مالتي حاطينه واكيد هاي حبيبة اعرف بسوالفها جايبتلي عطور ومكياجات وكلهن حاطتهن على الميز شفتها بعيني بيوم الطبت لغرفتي تتختل تخاف لا اشوفها ما تدري لمحتها وهي تطلع بس غلست..

حطيت شوي مرطب لايدي بلچن تتحسن الجروح والتصبغات تخف وحطيت حمرة خفيفة وطلعت من الحمام وبنفس اللحظة هو طلع من الغرفة.. حطيت ايدي على گلبي مصدومة واضحك چان هنا طول ما انا بالحمام ما نزل ومن طلعت ياله راح! يا بختچ يا سبأ..

قررت ما انزل جوه ماريد اغير كلمتي وياه حتى لو بطني تزرفت من الجوع ميخالف هسة اصبر روحي بنستلة واسكت.. طلعت من الكنتور نستلة ككو اكلتها وانوب روحي انمردت ونفسي كامت تلعب بس هم ما تنازلت وكمت جاي اذب الكاغد بالزبل واندكت باب الغرفة، شمرته بساع وركضت اكعد على الجرباية وكلت..

-تفضل

الكشرة شگت وجهي من مدت راسها من الباب عروستنا حبيبة، ركضت عليها فرحانة وجريتها ابوسها واحضنها وخبصتها خبص بالهلاهل والگفلات..

-حبيبة: ههههه بعد روحي سبأ

-سبأ: والله هسة نور الدار ولج شلتي البيت كله وطلعتي وعلي

-حبيبة: هااا؟ چا شبيچ ما تنزلين تشوفيني

-وعلي ولا ادري بيج هنا يمته وصلتي؟

-هسة من شوي شعجب ما سمعتي صوت هلاهل عماتي خبصن الدنيا سودة عليّ

-لا وين اسمع غرفتنا دفن هنا.. شلونچ انتِ شنو اخبارج شو وجهج اصفر يا رويحتي خو مابيج شي؟؟

-لا ماكو شي تعاي يلا حطوا الريوك

هزيت راسي مبتسمة ولبست شال ونزلت وياهة جوه وصدگ شفت الكل ملتم هنا عماتي ومرة عمي صمد وخوات منتصر، الضحك والسوالف تارسة البيت كلهم كاعدين على سفرة وحدة جاي يتريكون..

-تَـمني: حبيبة تعالي يمنا تعالي

اشرتلها تَـمني بأيدها فرحانة وجرتني حبيبة حتى نروح نكعد يمها وصدمتني هدية اخت منتصر من ضربت ايد تَـمني عود بالشقة وسحبت ايد حبيبة بقوة وكالت بضحكة تصنع..

-لاا خليها ويه زلمتها تكعد

محد انتبه لحركتها غيري وغير تَـمني وحبيبة ظلينا وحدة تعاين للثانية مستغربات واستغرابنا مو لان جرت حبيبة تريدها تكعد ويه زلمتها بس متفاجأت شون ضربت ايد تَـمني تنزلها بهالطريقة..

-حبيبة: على الغدة اكعد يمچن وانام على خوانيگچن حتى ابات هنا اليوم

-تَـمني: هلا بيج حبي

-هدية: شني وين تباتين؟

-حبيبة: ببيت اهلي

-زينب: هو اكو عروس تبات ببيت اهلها ثاني يوم عرسها؟

-حبيبة: منتصر ماعنده مشكلة بهالشي

-هدية: هو شني منتصر يـ...

خزرتهن صفا وقاطعت اختها تكول..

-صفا: دام زلمتها راضي احنه شعلينا بكيفج بت عمي بكيفج

وصدگ سكتن محد علقت بيهن بس هدية المسمومة ظلت تعاين لحبيبة وتطحر ضايجة وما راضية بس حبيبة ولا دارتلها بال وراحت تكعد يم منتصر تسولف وتضحك ويه اخوانها..

-علي السور: ايييي هسة رجعت عافية البيت شمالج ولج تزوجتي وعفتينا

-علي النور: غير هذا خذاها من عدنا ما يستحي

-منتصر: هاا ولك هاي عليّ!

-شيخ علي: ههههه يا ولد بطلوا مداهر ويه ابن عمكم

-منتصر: عمي ولدك من خطبت اختهم لليوم شايلين سيف عليّ ويتعاركون وياي چن ماخذ روحهم

-علي الحـق: چا حبيبة روحنا وروح البيت لا تظل تمخرط

-منتصر: الله يطيح حظك هاي وانا اكبر منك

-علي الحـق: اكبر مني واهينك يلا شراح تسوي؟

-منتصر: ادوسك وادوس رتبتك بس خليني اكمل ريوگ

-علي الحـق: بيك زيج من ابا الحسن يطير شاربك اللزگ

ضحكوا كلهم وانتبهت هذا طبعهم ويه منتصر چن واحد منهم وبيهم يضحكون ويحششون على بعض ويعيبون ومحد بيهم يزعل من الثاني..

كملنا ريوگ وگعدوا الزلم كلهم يسولفون ومنطلقين ويه بعض عدى ابا الحسن گضاها ساكت وبس يتصفن الكل انتبه عليه وبكل مرة احد يسأل شبي الامير يبررله ويگلهم گعد اليوم ماله خلگ وتعبان..

-زهرة: چا ليلة ما تكومين تشوفين زلمتج شبي ليش يمة عايفته هيج على الاقل سويله استكان حليبة يسند طوله سودة عليّ

هزت راسها ليلة وكامت تريد تروح للمطبخ وگال ابا الحسن من مكانه..

-ابا الحسن علي: مابيه شي كعدي

-ابتسام: ليش يوم حليب شوي يفيدك ويرجع اللون لوجهك

-ماشتهي.. من رخصتكم انا طالع

-شيخ علي: وين بوية مو كاعدين

-ابا الحسن علي: كتلك بوية عندي شغل اليوم

-شيخ علي: وما يتأجل؟!

-ابا الحسن: لا

-شيخ علي: اگعد ابا الحسن

-عندي شغل ابوي

-اكعد زحمة من زلمة اختك!

-ابا الحسن: منتصر مو غريب ويتفهم وضعي.. من رخصتكم

ما خلى عمي يحجي كلمة ثانية وطلع من الصالة بخطوات سريعة، شفت وجه عمي ينگلب ضايج متحلفله وعمتي رسمية صفگت ايد بأيد متنرفزة، شوية وگام الامير وراه بس ما استرخص من احد سواها چن رايح للطرمة بس تَـمني كالت طلع من البيت وما حچى خاطر ما يزعل عمي..

لليل احنه على گعدتنا الزلم راحوا للديوان واحنه ويه حبيبة وباقي النسوان بالصالة نسولف بس عمتي رسمية راحت لغرفتها مادري شتسوي واستغلنها الحاقدات فرصة وصارت وحدة تشمر على الثانية وكل شوي فراقد ناطة وگايلة..

-فراقد: احنه نعرف الاصول العروس ما تجي تزور اهلها الا بيوم الثالث شعجب اجيتي اليوم حبوبة؟

-هدية: خالة بهالزمن صار محد يهتم للاصول

-حبيبة: اشتاگيت لاهلي واجيت ازورهم ماشوف بيها شي

-صفا: هو بعد عاداتنا انداست وراحت من وره جيل هالوكت ومياعتهم

-رفل: خية عود انتِ اهتمي بالاصول ورجعي عاداتكم

-صفا: انا جاي احاچي حبيبة انتِ شعليج تدخلين؟!

-رفل: بت عمي وبكيفي

-هدية: حبيبة بت عمنا همات لا حسبالج

-رفل: اي مبين عليجن

-حبيبة: والله مال چاي هسة لو شتكولن عمة؟

-زهرة: اي والله

-هدية: حبيبة جاي نسولف شبيچ تقاطعين

-حبيبة: عبن سالفتجن مو وكتها حبيبتي خليها بعدين

-صفا: ههههههه لا صدگ!

-حبيبة: وداعة عيونج

-صفا: نعرف يمته وكتها ويمته لا واحنه حچينا ويه رفل الحاطة خشمها بكلشي!

-رفل: احط خشمي وعيني هم شحارگ دمچ؟

-صفا: حارگ دمي؟ والله مصدگة روحج هو كلچ خلگ وحدة مطرودة من بيت ابوها ولفوها بيت عمها لا عبالج ما ندري!

-رفل: ههههههه لااا حرامات شوف كشفتي سري

-تَـمني: بنات صلوا على النبي

-هدية: لا لا اوكفي انتن شجابچن اصلاً لبيت عمي علي هاا؟؟ شجابچن انتِ واختج شو بليلة ويوم افتهمنا بـ ليلة تزوجت ابا الحسن لا سوت مهر ولا عرس لييش؟؟؟

-ليلة: هيوووو انتِ شكو؟؟ شكوو شكووو حاطة خشمج بحياتي! انا ما سويت عرس خاطر انتِ وشكولچ ما تحضرن بي وتخربنه بسمچن!

-زينب: شكد ما تستحننن! فلاا ينگدرلچن يا بنات منصور!

-ابتسام: ووجععع شبيجن انچبلتن طايحات الحظ ماكو احترام لا لجبير ولا صغير! والله محد چانت صاگرتچن غير اختي غزوة! الله يذذكرج بالخير يا غزوة وين رحتي وعفتي زيد وعبيد يبسمر ويخرب بكيفه

-فراقد: شقصدج عيني؟

-ابتسام: سلامتج عيني ام فرقد سلامتج

سكت الكل من طلعت عمتي رسمية بأزار الصلاة وبيدها قران، صدقت وباست القران وكالت..

-صوت صار عالي خير ان شاء الله؟

-زهرة: هههه لا البنيات كاعدات يتشاقن ويسولفن سوه.. يلا يمة كومن صلن اذن الوذان

تفرقنا هاي الصعدت لغرفتها وذيج الفرشت سجادة ووكفت تصلي بالصالة وهيج مضى اليوم الي المفروض يكون كله فرح وسرور بس خوات منتصر ما يتوالمن ويه بنات عمي منصور ومن يوم يومهن مكافش ووحدة تكره الثانية وواكفة للثانية عظم بالبلعوم..

نزلنا نسوي العشا وفرشنا السفرة عازلين الزلم عن النسوان الحمدلله بوكت العشا محد تنفست لو حاولت تضوج الثانية لان عمتي رسمية كاعدة ويخافن منها..

-سلوى: يلا كومن شيلن السفرة.. عبق ليلة سبأ گومن

هزيت راسي وكمت والبنات كلهن كامن سوه نتساعد، حطيت القوري على النار ووكفت انتظره يصير وچان تجيني حبيبة شايلة بيدها موبايلها بس وجهها مخطوف لونه حطته بيدي وكالت گوة..

-امچ هاي

-سبأ: شبيها؟؟

-تريد تحاچيچ ودگت عليّ

خفت واخذته من ايدها وطلعت للطرمة خاطر شوية هدوء، حطيته على اذني وهستوني كلت الوو واجاني صوت اخوي سلطان..

-سبأ: سلطان؟ شني شبيها امي؟

-سلطان: مابيها مابيها انا دكيت من موبايلها وخليتها تحجي ويه حبيبة خاطر ما تشك بشي

-ليش هيج سويت

-زيد جايچ وره البيت طلعيله بساع

-سبأ: شنو اطلعله شلون يجي هنا والكل موجود

-سلطان: ياهو موجود؟؟

-عمي والولد ومنتصر كلهم هنا

-اهوووو دبريها من يمج طلعيله يحجي وياچ حچايتين ويخلص

-لا لا ما اجازف بروحي هو انا هسة وماعندي تواصل وياكم وتقي بعده شاك بيه الله يخليك لا تخليني بموقف محرج وياهم

-خ** بتقييي وبيييج طلعيييي ولا تظلين تاكلين *****

غمضت عيوني ارجف شسوي وشلون اقنعه، شفت من شفت علي النور يطلع من باب الديوان يحجي بالموبايل وركضت اختل روحي وره الدنگة الموجودة بالطرمة وهمست..

-دقيقة اوكف انتظر

-سلطان: شنتظر ولج؟؟؟

سكتت ما جاوبته خفت يسمعني علي النور وظليت اسمع لغلط ومسبات سلطان ومتحملة ما خلى فشار ما فشره عليَّ حتى على ابوي وامي غلط ويفشر عليهم.. تحسرت صاكة بمچاني ما تزحزت لان نور ظل يفتر بالطرمة ومبين منفعل ويه المكالمة الجاي يحجي بيها..

-علي النور: يعني شني؟؟ ما جاي افتهم!... صدگ تحجين انتِ؟؟ بابا جاي اگلج اجي اخطب ليش معاندة؟؟... شبيچ تبجين؟؟ انعل ابووه اي اي اجيب ابوي واخطبج سهلة ما ينرادلها شي شسالفة تره انا تخرجت وعدنا خير من الله!!

سكت شوي يسمع للطرف الثاني ثواني وعلت نبرة صوته ضحك وگال مستهزأ..

-هاااا افتهمت انتم من ذوله الجماعة ماا تنطون لابن الجنوب خوش خوش افتهمت هذا هو الله يسعدج... افتهمت لا تعبين نفسج الله وياچ

سد الاتصال منها معصبب كلللش معصب اول مرة اشوف علي النور جَدي وعصبي وروحه طافرة لدرجة عاط بصوت مكتوم وشال موبايله ورگعه بالحايط فلشه تفلش..

عافه طايح بالكاع وطلع من البيت متكدر وضايج، ضجت عليه ما يستاهل علي النور نسمة بالبيت ما فد يوم ضوج احد لو زعل احد وظيفته بس يضحك ويتشاقه ويتدلل على امه وحبيبة ويبوس بيهن..

رجعت ويه سلطان النزل عليَّ نزلة ونص واعرفه ما راح يخليني براحتي وراح يجبرني احاچي زيد لو يسببلي مشكلة فـ نويت اقنعه يجي وقت ثاني على الاقل ما يكونون الولد هنا..

-سلطان: انا اعلمج سبأ اناا اعلمج زوجناچ خاطر نستفاد وكلشييي ما شفنا منج

-يا خوية والله الولد هنا ليش ما جاي تفهمني

-انچبييي خلص كافي لا تتبچبچين عليّ! اليوم يرجعلج زيد الفجر بنفس المچان طلعيله ولا تخلي ملطوع بالباب لا اللزگج بالكاع افتهمتي لو لا!!

-بس...

-انعل والديج لو فكيتي حلكج بعد سبببأ!!

-هذا هو فهمت

-كولي صار بت المطي!

-صار صار

سديته منه ورجعت للبيت اركض رجعت الموبايل لـ حبيبة وكعدت وكعدت ويه الباقين.. كاعدة على نار اشوفن الساعة عبرت الوحدة بالليل ولحد هسة محد بيهن راحت شلون لو صار الفجر وهنه بعدهن هنا؟

-فراقد: ياا خيات الوكت تأخر ولا حسينه

-زهرة: اي والله، ام علي يكدر واحد من الويلاد ياخذنا؟

-رسمية: اي غصباً عليهم

ضحكن وگامن طلعن من البيت واخيرراً البيت فرغ، صعدت لغرفتي اركض واكل بأظافري محتارة شون راح اطلع وتقي بطبعه يسهر ما ينام من وكت، كعدت فترة وحدي وحسيت بخطوات رجله تقترب من الغرفة ركضت طبيت للحمام وقفلت الباب عليَّ ادعي كون ياربي نام يارب ما يسهر اليوم وصدگ الحمدلله والشكر من طلعت من الحمام شفته حاط راسه على المخدة ومبين هستوه بده يغفي..

طلعت امشي على اطراف اصابعي وكعدت على الكرسي ما رحت للجرباية خاف يحس ويفز، دقايق بقيت كاعدة واعاينله من بعيد ومن تأكدت غفى للاخير قررت اگوم واطلع من الغرفة اظن زيد اجه هم ياله راح يأذن الفجر..

حطيت الشال على راسي وطلعت من الغرفة امشي على كيفي كلش، الطابق الثاني مظلم الكل بغرفه واكيد رايحين بسابع حلم بس انا طالعة مثل الحرامي اتبوگ تبوگ خاطر ما انشاف..

نزلت الدرج على خفة رجلي وركضت لباب المنور، تشجنت وخفت كلش لا تطلع صوت عبنها حديد.. سميت بأسم الله ولويت اليدة وطگ حس حديدتها بيدي يااا علي غير رادت تغيب روحي من الخوف.. من الخرعة ماعرفت شسوي فتحت الباب كلها وطلعت للمنور اهرول واتلفت على الباب اخاف لا حس عليّ احد وراح يطلع ويلگفوني هنا..

ضربت ظهري ويه الحايط اختل روحي بين العتيگ المشمور هنا وعيني للباب.. انتظرت دقايق وانا على هالوضع وهمزين محد اجه اظن ما سمعوا الحمدلله الله ستر عليَّ.. صليت على محمد وطلعت خاطر اكمل طريقي رحت لنهاية المنور ووكفت هنا وحدي انتظر زيد يجي وراصة على سنوني واظافري داچتهن بيدي اخافن لا انلگف ويطيح حظي..

مشى الوكت وتعبت من الوكفة وزيد ماكو ما بيّن، شبه ايست وردت ارجع بس تراجعت من شفت ايدين كمشت بحايط المنور من فوك وثواني وصعد على الحايط زيد وطفر هنا صار يمي..

-زيد: اااخ يا علي تزلغت رجلي

-سبأ: اششش صوتك شبيك

-خوش خوش.. هاچ اخذي من ايدي

-شنو هذا؟

-هاي ابرة...

بس كال ابرة شهكت ولطمت وجهي، خزرني وگرصني من زندي ونتر بهمس..

-لا تكعدين تلطميلي هسة احنه بورطة!!

-الورطة شعليها بالابرة زيد!

-راح تدچيها بگلب، ببطن، بخشم، براس شيخ علي وتطبين لغرفته!

-لا لا لا زيد لاا مستحيل اسويها

-سكتيي انتِ المرة الفاتت خربتي شغلنا وعلي هالمرة ابوي ما يرحمج لو ما سويتيها!

-المرة الفاتت لگفني علي التـقي وهالمرة هم راح يلگفني ويذبحني والله يذبحني وما يعوفني عايشة

-غبية ما راح تكتلينه! راح تخدري بس خدرري خاطر تكدرين تبوكين منه السندات والفلوس!

-زيد ليش هيج يا خوية لييش والله ابوي عنده خير من الله ليش يريد يبوگ اخوه مو حرام!

-يا خير الذبه ببطن النسوان والساقطات؟؟ يا خير سببأ ابوج طيح حظنا! ابووج مفلسس احنه بورطة نحتاج هاي الفلوس لا يجونا الديانة وينعلون شرف شرفنا

-زيد عليك العباس اقنعه خلي يدبر الفلوس من أي واحد ثاني بداعة امي عندك عووفوا عمي علي والله ما يستاهل عوفووه

-سبأ هالحجي مابي فايدة ابوي ما زوجچ لسواد عيونج هو انطاچ لابن عدوه خاطر تتممين هالسالفة وخاطر تقنعين علي التـقي يساعدنا ويشيل عنه چم تهمة بمعارفه وواسطاته گال ابوي تقي يعرف ناس واصلين بالدولة ويمون عليهم

-علي التـقي يساعدكم انسى خوية انتم بانين اوهام واحلام على الزلمة الغلط

-مو غلط تقي احسنهم واكثرهم ليونة ماعنده تعصب وسهل عكس اخوته الينگطون سَم

-لاا زيد لاا تره تقي مو نفس ما متخيلين هو شخصيته يسايس ويماشي بس عود حسبالك يقتنع ويسويلك التريده؟ مستحييل!

-هنا يجي دورج تقنعي شمالج ثولة؟؟ چا المن زوجناچ احنه!

لطمت على وجهي حيل وزلغته بأظافري من القهر احس بروحي تفور من جوه وصدري غِده نار..

-ما يحبني ماا يحبني مااا يحبني ماا يحب اختك ما يريدها لا تجبروني انزل من عينه اكثر زييد بداعتي خلوني عايشة اخدم وانذل وانكتل ويطيح حظي بس لا تخلوني اأذي بيت عمي احلفك بستر زينب عوفوني

-چا تفضلين بيت عمج على بيت ابوج الكبرچ وعلفچ وسترچ؟؟ هاا ولج؟؟ تفضلين العارات على اهلج يا ****؟؟؟

-اي

-بت الـ.....

لزمني من شفايفي حييل ونبت اظافره بيهن وهو اظافره بيهن طول ما يگصهم دايماً احس بروحي شاغت.. بچيت بالسكتة متوجعة وفلتت نفسي من ايده احط ايدي على حلكي المدمى..

-تسويها لا انا اروح هسة واكتل عمچ علي خلااص واريحنا منه؟؟؟

-لا لاا حباب لا

-چا سوي مثلما علمناچ وربيناچ لا نسحلچ من بيتهم من شعرچ وتعرفينا نسويها!!

شهكت بدون حِس ووخرت من طريقه خاطر يرجع يطفر من الحايط على راحته ويخليني وحدي بضيمي.. طلعت من المنور ورجعت للبيت اضرب اخماس بأسداس وكارتونة الابرة شايلتها بيدي، حرورة قهر بگلبي توجع المرة الفاتت تمنيت اموت من جبروني اخدر عمي واخذ سنداته واملاكه وفلوسه لسه بعدني اتذكر جابولي ابرتين وحدة اضربها بي والثانية بـ سلوى خاطر ما يحسون ثنينهم واتمم الموضوع بدون لا يحسون..

مسحت دموعي بأيدي النظيفة وجريت كلينس من الصالة ومسحت حلگي ووجهي وايدي الثانية متدمرات بالدم بس حتى الدم ماعندي نفس اغسله، ضميت الكارتونه بصدري وصعدت الدرج على كيفي وبوجهي رحت لحمام الصالة الفوك غسلت وجهي وبقيت هنا شوي لحدما الشهگة خفت مني وطلعت متوجهة لغرفتي..

نزعت الشال من راسي وفتحت باب الغرفة طالعة روحي وچان انصدم واتبسمر بمكاني من شفت علي التـقي واكف على حيله گبالي يفرك بعيونه..

-علي التـقي: هاا وين چنتي

تثاوب وهو يگولها منعس ومادري شصار بيه من شفته بهالحال احس بگلبي انمرد مرد وگوة كضيت روحي من گال..

-حسبالي راح تنامين بره

-ليش

-مادري.. چنچ ضايجة

-لا

-ما ضايجة؟

-لا

هز راسه ساكت وفرك وجهه بيده، مغط نفسه يرفع ايده فوگ ونزلهم يتنهد ويحرك براسه يطگ رگبته..

-راح ترجع تنام؟

-اي والله تعبان

-چا ليش واكف هنا؟

صفن بوجهي وانا صفنت بوجهه، حك شعره من وره يضحك وعافني وطب للحمام كا افتهمت شبي وماعندي طاقة اكعد افكر شلون بيه وشلون راح احل هالسالفة..

-سبأ

رفعت راسي اعاين لاتجاه الحمام واكف بالباب مثل ما طب طلع ما طول ثواني..

-سبأ اليوم صار موقف بيناتنا وانا.. انا صراحة جاي ياكل ويشرب وياي

-يا موقف؟

-من لگيتي مسدسي جوه راسي حسيتج ضجتي و...

-تقي

-ها

بلعت ريگ يذبح جرح زردومي تجرح من كدما ناشف، تايهة وماعرف شسوي وشكول ارفع عيوني اعاين بوجهه وارجع انزله مستحية شلون راح اقنعه يساعد ابوي واخوتي والله ماعندي الجرأة..

-اريدن.. اريدن منك شي

-كولي؟

-احم.. سمعت انتَ هاي.. انتَ عندك معارف وواسطات قوية وناس تشتغل بالدولة صح؟

باوعتله بعين مكسورة وشفته باقي واكف على طوله يعاين عليَّ ما حرك جسمه ولا فتح حلگه وجاوب واستمر على صمته وانا من شفته هيج بعد ماتحملت شهكت بحس عالي ودموعي صارت تنزل مطر من عيوني.. غطيت وجهي ابجي من كل گلبي مختنكة ومكسورة ماعرف شسوي وشنو لازم اسوي..

-سبأ شبيچ؟؟ ليش تبجين شصاير؟!

-انا.. اناا..

-على كيفج تنفسي، شو عايني لوجهي على كيفج عليش البجي فهميني

كض زندي بأيد يشجعني احجي والايد الثانية لزم ايدي ثنينهن يقيدهن.. عصرت عيوني احرر باقي الدموع وبدون لا افكر وبدون لا اوعي على نفسي كلت..

-ابوي يريد يبوگ ابوك

-شنو؟

ضربت جسمي رجفة قوية جسمي كله كزبر بطريقة توجع، فتحت عيوني ارعش اسناني تطاگگ ويه بعض رصيت عليهن حييل اثبتهن وما انطيت لنفسي فرصة افكر زايد اخاف لا اغير رأيي ويتملكني الخوف وما اعترف.. بلعت ريگي وفتحت حلكي واعترف بكلشي! كلشي صار كلشي امرني بي زيد حچيته هسة بهاي الدقيقة وهاي الساعة اعترفت بالجبل النايم على صدري من اول مرة لگفني بيها تقي وانجبرت ادچ الابرة بيه خاطر اثبتله انا ما ردت اكتل ابوه والابرة ما تموت كلشيي حجيت وما خليته يبات بصدري وشيصير خلي يصير!

-علي التـقي: كل هذا صار اليوم؟!

-اي ايي

-هسة؟؟ يعني هسة من نزلتي زيد چان هنا؟!!

-اي والله اي ويشهد الله ما نقصت حرف كلشي گاله اجيت وصبيته بأذنك هسة

فاتح عيونه مبحلگ بوجهي مصدوم، بچيت اكثر من هد وجهي ووخر مني انطاني گفاه وجاي اشوفن عضلات ظهره شلون مقبوضة وشاد على نفسه..

-تقي ابوي مو خوش انسان والله مو خوش بشر لا هو ولا اخواني.. همه السبب بدمارنا انا ورهف وحتى امي.. امي من الضيم هيج صارت ومن خيانات ابوي الها خبلها بسوالفه خلاها حاقدة وكارهه للدنيا كلها تتسودن لو تشوف مرة مرتاحة ويه زلمتها وعايشة حياة كريمة وعكس هالشي علينا احنه بناتها..

سكتت من اللتفتلي بحركة سريعة باقي على جحظة عيونه، هز راسه بـ اي چم مرة وگال بدون أي مقدمات..

-انا اجيبلج السندات والفلوس واخذج لبيت ابوج خاطر توديهم لاهلج

-صدگ تحجي!!

-اي!

-تقي شون وعمـ...

-مالج غرض سوي الكتلج عليه وخلص

-بس...

-لا تبسبسين سبأ كتلج اخذج لاهلج ووديلهم اليردونه وگليلهم تممتي الخطة خدرتي ابوي وسلوى وكدرتي تطبين لغرفتهم وبالنسبة الي گليلهم بعدني ما لحكت اقنع علي التـقي خاطر يساعدكم بس راح اقنعه واسوي كل التردونه

-لا لا لا ماسويها لا تقي ما اضر عمي ماا اريد اأذيكم احبكم انا والله احبكم وكل السويته گبل چنت مجبورة عليه

-هسة انا كتلج انتِ ما تحبينه؟ كتلج سوي الابوج يريده وعوفي الباقي عليَّ

-يعني انتَ مصدگ انا احبكم؟

رخت اچتافاته وغمض عيونه بتعب، گلبي وجعني من حركاته حسيته بزع مني فـ سكتت وظليت ابچي وامسح بعيوني بسكات..

-سبأ

نطق اسمي بحسرة جزع خلاني غصب ارفع عيوني اعاينله، تقدم عليَّ چم خطوة صار گبالي بالضبط، ركز عينه بعيني وصديت وجهي عنه وما سمحلي جرني من فچي عليه بخفة يجبرني اثبت نظراتي على عيونه الداكنة، زفر نفس خفيف وگال بهدوء عجيب..

-سبأ انا ادري انتِ مالج ذنب وادري انظلمتي من ربيتي بعائلة وحشية ولا تلوميني من تكون عندي ردة فعل منج انتِ لو بدالي تتصرفين مثلي واكثر، الحذر واجب وانا لازم....

-بس انا ماريدن اأذيكم وداعة عيوني الجاي تعاين لوجهك انا مستحيل اسويلكم شي مو زين

-ادري.. عرفت هالشي وواضح

ابتسم وهو يگول هالجملة الصغيرة ومسح دمعتي الطاحت بأبهامه، گلبي صار ببطني من التوتر لمسته تخلي شعر راسي يوكف وكلشي بيه يتخربط، تعبت مهدود حيلي حسيتني راح أطيح من جرني من فچي على رهاوة ايده وباسني على راسي..

-سبأ: راح اموت وخر

دفعته عني ارجف رجيف من فوك ليجوه، شهكت لاطمة حلكي من انتبهت لروحي حجيتها بصوت عالي وگتله "راح اموت وخر!" صخام الصخمني الزلمة انصدم ومن الصدمة فك عيونه وضحك بنفس الوكت وانا من الفشلة تمنيت اذب روحي من الشباچ..

-قصدي.. قصدي تعبت اريد انامن

-هههه اي نامي

-اي.. لا تعيدها بعد عيب

-هههههههه صار

انطيته ظهري ورحت للفراش اغمغم بروحي واعض بأصبعي ااااخ مال اگطمك وارتاح منك يا اغبر يا اثول ولج سبأ مو عقل عندج حجارة بعليي شايلين عقلج وحاطين بمچانه حجارة من صچيچة بگلبج كون!

-هههههههه تدني ولج

-لا تضحك شبيك ما تستحي انتَ؟

-لا ههههه

نمت بمكاني وانطيته ظهري اريد ابجي شنو هالخزي الجاي احط روحي بي تذكرت تَـمني من كالتلي تصير مطي ويه زلمتها من يحاچيها اظن انعديت منها..

**

-اييي راح نبقى هيج يومية تعبانة ونعسانة وجوعانة ومن تصخمين و**** بالامتحان تجين تبجين يمي مو؟؟

-مو

-وجعووو گومي اقري خلصيني

-انتَ اقرا

-شقرا ****؟؟؟

-اطلععع برررره

شلت مخدتي وشمرتها عليه عود متأثرة بالمسلسلات وعبالي راح يرجع يشمرها عليَّ ويضحك بس شو هذا خزرني وشال المخدة واجاني يريد يخنگني بيها..

-علي الحـقققق راااح امووووت هدنيي

-اعتذري

-مااا اعتذر هدني

-اعتذرري لا اشعل صفحتج اعتذري

-مو اسففة

همست "مو" بصوت ناصي ووصلتله بس كلمة اسفة، وخر مني وشمر المخدة يرجعها على الجرباية معصب وكعد على الكرسي گبالي مترندح عليه متچي ظهره وفاتح رجليه ليگول سفينة..

-غصباً عليج تعتذرين

-عبق: ديلا يلاا

-علي الحـق: احجي عدل وكومي اقري

-ماريد اقرا لا تلح وياي

-عايني قبق اذا جبتي معدل تافه مثلج لا تجيين تبجين يمي بعلي اشگ حلگج!

-انتَ شبييك شايش عليَّ اليوم؟؟ شساامع

دگ تلفونه بنفس اللحظة خزرني واشرلي بأصبعه حتى اسكت هذا شبي متخبل اليوم وضايج..

-علي الحـق: نعم؟!... مو ببغداد انا... حلها من يمك اي... شني ما تگدر ليش؟!.... هذا سرمد يمك مو؟! سرمد الارعن سرمد؟؟ گله يگول سيدي علي الحـق بس يجي لبغداد يشگ حلگك عرض وطول والزهررة! بالعباس ابو فاضل رووحه اطلعها انا اعلمه هالخنيث... اسكت اسكت لا تدافعله لا يلوحك طشاره.. يلا روح رووح روووح

طبگ الموبايل يدردم ويفشر على "سرمد" الي اكييد واحد يشتغل وياهم والله يعلم شمسوي او يجوز هالمسكين ممسوي شي بس حظه تعيس والمأمور مالته علي الحـق..

-علي الحق: طايح الحظ سربوت

-تره سديت التلفون خاف نسيت

-شنوو؟؟؟

-ماكول غير الله يساعدك سرمد

-بسطااالي بعين سرمدد لا تكولين اسممه!!

-هو اسم شدعوة عليك

-سكتيي ودرسي يلاا كدامي يلااا فتحي الكتاب

-هاي شبيك حق تره والله بديت ازعل اذا انتَ ضايج من دوامك اني شكو تطلعها بيه!!

-عبق اناا روحي واصلة للسگف طرونيي ارربع وصل اليوم لا تصيرين انتِ وياااهم ضددي

-هسة اني شحجيت؟

-سكتي عببق سكتيييي

-علي الحـق حباب اذا راح تبقى بهاي العصبية ارجع لغرفتك اني البيه مكفيني

-هاااا حتى انتِ صرتي تشمرين بيه؟؟ حتى انتِ؟!!

-وين شمرتك يمعود هو كتلك ارجع لغرفتك شبيك مكبر الموضوع

لطم رجله بقووة عصبي ناار وصراحة قلقني شبي هيج وشموصله لهاي المرحلة، تنهدت محتارة ونويت اسئله شبيك حتى لو ينفجر بوجهي على الاقل خليني افتهم شصاير..

-شبيك علي

-شبيه؟؟ يعني مبين بيه شي مو؟؟؟

-صراحة اي

-هههههه طبعاً يبين عببق طبعاااً طببببعاااااً

-صوتك اخترق الجدران على كيفك

-ولج لواء حسين العاار ابن ستييين عار نقلني! تدرين وين شمرني؟؟؟ تدريييييين؟؟؟؟

-لا مادري

-نقلني بأسگططط مچان بالعررراق ولج مچان حرررام يكون موجود على الخريطة حرااام

-ليش نقلك؟

-لانه نگسسسس

-علي اكيد نقلك لسبب

-اي اكو سبب!

-وشنو هو؟

-عبن عايشين سفردحي هناك ماكو ضباط بيهم حظ يضبوهم شمرني خاطر انا ارتب وضعيتهم

-اي خو هالشي زين

-وين الزين؟؟؟؟

-معناها يشوفك ضابط كفوء وحچايتك قوية ومسموعة سبع ومتخاف من شي

-ههههههه اي اي قنعيني بهالحجي قنعينيي

-علي الحـق باوع للموضوع من جهة ثانية، لا تكول لواء حسين نقلك لانه يكرهك گول نقلك لانه يشوفك ضابط شاطر وتكدر تسيطر على وضعية مكان تعبان.. راح تغير من هالمكان وتضيفله شي مهم وهو الامان

رفع عيونه يباوعلي صفح واعرف نظرته هاي شنو معناها، يعني هو ديسمعلي بس ممقتنع كلش ولازم ابذل جهد اكبر..

-بس انتَ نقلك لو اكو واحد وياك؟

-خير من الله

-اهااا حلو يعني نقلتك مو عقوبة

-ليش انا كتلج عقوبة؟؟

-لا لا اقصد نقلك هناك مو لان يكرهك او يضوج منك ويريد يأذيك بالعكس نقل وياك ضباط هوايه واكيد استنگاهم هو وين الزين الزين

ذب حسرة قوية وبهالحسرة حسيته فش شوية وخفت عصبيته، رفع عيونه يباوعلي بشكل طبيعي وگال..

-دوختچ انا حبيبتي اهتمي بدراستج هسة طلعي كتابج واقريلچ شوي ولا تزعليني منج امتحاناتج بعدلها چم يوم

-اي بعدين اقرا

-ليش بعدين هسة شعندج؟

-اريد انظف

-خ** بالتنظيف اقررري ولج

-اي اي بس لازم انظف الصالة

طفرت من الجرباية اشرد من الغرفة وقبل لا اللحگ اطلع من الباب لگفني من بطني وشالني على ظهره واخذني للجرباية شمرني عليها وخزرني واشر على جنطتي وگال..

-جيبي الكيميا!!

-شنو كيميا؟

-عببق!!

-تاكل تشرب هاي الكيميا شو اول مرة اسمع بيها

-عبق ليش متغيرة؟!

-شلون يعني

-ليش ما ترضين تدرسين؟!

-لان تعبانة واريد انام

-كومي ولج

جرني من ياختي يكعدني بالغصب وجر اللحاف مني شمره بالكاع، خزرته ضايجة من حركته شكدد اتخبل من يكشفني هيج ويشمر اللحاف..

-شنو هالتصرفات علي الحـق تره انيي دارسة!

-يعني مضبطة المواد؟!

-اي!

-هااا؟؟

-اي شبيك مضبطتهن واعرف كلشي معليك راح اجيب معدل عالي ان شاء الله

-خوش جيبي الكتاب اسألج

-هااا

ضحك تك خد وراح للجنطة طلع منه كتاب الاحياء وطفر بثكل جسمه على الجرباية كعد بصفي، حمحم بصوته ولزم تشيرته من يم الرگبه ونزعه وشمره بالكاع..

-هاي شنوووو خاف تيهت وعبالك الدراسة عدنا عملي؟؟

-حبي صورة وصوت وحركات خاطر يظل ببالج الموضوع

-علي الحـق!!

-عرفيلي الوراثة

-شنوو

-عرفيلي الوراثة يلا

-اءء.. الوراثة هي.. هي.. يمممة هاي شدتسوووي

-جاي اطلع موبايلي من جيبي شبيچ

-علي الحـق عوفني حباب اني ادرس والله وحدي

-ما هي الوراثة المندلية

-هاا؟ الوراثة المندلية هي.. هي الوراثة الـ.. الشسمها الـ.. هاي الـ.. احم اوكف اعرفها اوووكف

-ما هي اعضاء التكاثر؟

-عليي عوف الوراثة بداعة امك عوفها اسألني بشي ثاني

-ما هي مراحل تكوين الجنين؟

-علي الحقققق

-ما هي اعضاء الـ....

-ماااا حافظةةةة

-هاا وبعدين تجيبين معدل تافه وتكليلي علي وديني كلية اهلية تره من هسة غير الحكومي ما تداومين!

-اي اي خوش

-وهسة انتِ راح ترسبين؟ عبنچ ما تجاوبيني بس هو هم الصوچ بيه ينراد اشرحلج وانا مقصر ادري

-لا لاا شنو تشرحلي لااا

-الانسان عنده اعضاء بشرية والزلمة يختلف عن النثية بالهرمونات والـ....

طفرت اسد حلگه بيدي ومن الارتباك والسرعة كعدت على رجله ما حاسة على روحي، شفت عيونه تتغير نظرتها ولون البؤبؤ هم تغير مال خبث وقبل لا اللحك اكوم منه جر ايدي يوخرها عن حلگه ولزمني يبوسني ويترعن..

-اختننننكت

-بالجير حسبي حسابج أي سؤال ما تجاوبيني عليه تنباسين

-هو بكيفككك

-يلاااا جاوبي ما هي مكونات الجهاز التكاثري لدودة الارض؟

-عمت عينيي حتى الدودة لحگتها

-جاوبي الج خمس ثواني.. واحد.. ثنين.. ثلاثة..

-لا لا اوكف احم اوكف.. اءء شوف اوكف.. زوج من المبايض الصغيرة تقع في الحلقة الجسمية و.. و.. اءء...

-غلططط تعاي ولج

-لا لا حباب اعرففف

ما انطاني مجال ولزمني گطعني ملخني تملخ خبلني بحركاته خلاني اطفر بمكاني وكوة شردت من ايده وركضت احصر نفسي يم الكنتور..

-باوع اوكف انتظر شبيك انتَ شايش خلينا نتفاهم

-اريد مراحل تكوين الجنين في نبتة من ذوات الفلقتين؟

-يبوووو اندار على النبات

-جاوبي الج ثلاث ثواني.. واحد.. ثنين..

-علي الحـق شنوو سالفتك ويه التكاثر شبييك

-هاي بسامير الج

-بسامير شلون

-اريد جنين

-اتوقع حضرتك متيه تره انتَ رجال؟

-ما هو التكاثر الـ....

-تعال بوس وخلصني

-اييي هيج ومن البداية ليش تشلعين گلبي

لزمني من متوني وبعده ديريد يبدي حركة وانتفتحت علينا باب الغرفة على وسعها وطلت منها خالة رسمية، من الصدمة منعرف شنسوي وهو من التوتر لزمني وباسني على راسي وگال..

-علي الحق: تحبين الكعبة حبيبتي

-رسمية: شني ولك؟؟

-يعني جاي اكول خاطر تنتبه على نفسها ولا تضغط عليها

-رسمية: وين الربط؟

-يمة!

-خوش خوش هي شمسوية ام رسمية وما تريدها تضغط على رويحتها؟؟

-علي الحـق: احم.. يوم شبيچ شفق راسها يوجعها

-وانتَ حبيتها هسة خاطر تطيب مو؟

-اي

-ولك حوويق شعندك بغرفة الفرخة؟؟ ولج هذا دائماً يجيچ لو هاي بس اليوم؟؟

-عبق: لا لا خالة بس اليوم

-خوش چا اطلع.. اطلع يمة اطلع راويني عرض چتافك

-علي الحـق: يمة انتبهي عليها تره مريضة

-رسمية: اطلع ما راح نمص دمها اطلع

-علي الحـق: خوش.. غسق عود حفظي زين حفظي تره ما اوديج كلية اهلية من هسة اگلج

-عبق: افتهمتتت

-رسمية: هاي شني

-علي الحـق: شفتيها يوم؟ شفتي شون تعلي صوتها عليَّ بس كله صوچچ انتِ ما منطتها مجال تخليها تصيح على وليدج ابو عيون تمساحية

رصت على اسنانها خالة رسمية وجرته من ايده حييل وطلعته تضرب على ظهره المصلخ وتدردم علينا وهو يضحكك ممهتم ولا كأن لگفتنا بوضع مثل هذا..

-رسمية: بزرة هالوكت ينخاف منكم

طلعوا من الغرفة واني رجعت للجرباية بعدها الرجفة بيه وعيني كل شوية تصير على الباب خاف يرجعلي وهم تلگفنا خالة رسمية، لزمت كتابي وقررت احارب نفسي ونفسيتي واقرا من بعد الصار بيه والعشته احس الدنيا كلها طالعة من عيني وماريد غير امي اريد انام جوه جناحها واشبع من عطرها.. شوكت تصيرين احسن وترجعيلي يا يمة وتريحين گلبي..

ضغطت على نفسي هواي وما هديت الكتاب الا ويه صلاة المغرب كمت توضيت وصليت ورجعت اقرا واحفظ ماريد اتخجل وما اجاوب بالامتحانات عندي هواي شامتين بأذني سمعت عمة زهرة تحجي ويه خالج رسمية وتگللها ما راح ادبرها وكا انجح بس دا اضيع وكت..

لليل كلش تشتت تركيزي على صوت رسالة اجتني على الموبايل، گمت ملصته من الشحن وشفت الرسالة من علي الحـق كاتبلي..

"بدلي ونزليلي للطارمة بعد خمس دقايق"

عكدت حاجبي مستغربة وين يريد ياخذني بهالليل، كتبتله بسرعة..

"راح نطلع؟"

شاف الرسالة وما جاوب ظل بالي، لبست صاية فوك ملابسي ولفيت شال على السريع ونزلت الدرج، الوقت متأخر والكل نايم بهيج ساعة عبرت الصالة وتوجهت للطرمة طلعت من باب المطبخ وشفت علي الحـق واكفلي وبيده جكاره يدخن..

-ها حق صاير شي؟

-امشي

-وين؟

-امشي ومالج غرض

سحبني من ايدي على كيفه وطلعنا من البيت سوه، طلع بصمة سيارته من جيبه وفتح القفل واشرلي ادخل سويت كل اليريده بدون لا اسأل وين يريد ياخذني وشبي وماعرف ليش هيج سويت بس اعرف عندي ثقة بهذا الرجال لدرجة لو شمرت روحي بالنار راح يكمز بنص النار ويطلعني..

حرك السيارة وساق شوية على هالهدوء، باقي يدخن ويزفر الدخان من الشباج والهوا يلعب بالسيارة ويه ريحة دخان جكارته الاكرهها بس تقبلتها نوعاً ما بسببه..

-شو خانس عگروگ

-انتظرك انتَ تحجي

-ما عندج فضول تعرفين وين رايحين؟

-لا

-ها؟

-والله

هز راسه مبتسم وبرزت اسنانه البيضة كلش ويه اضوية الشارع الخفيفة، ابتسمت على ابتسامته وتچيت راسي على الكرسي اتنهد براحة وسرحت بالشباك اباوع للشارع..

-عايني عليّ

-شنو؟

-خلي عيونج عليّ وسولفي وياي مشتاگلچ

-ماعندي شي اگوله

-فتحي الچكمچة جبتلج سوالف وحبشكلات تونسي بيهن

-مبين طريقنا طويل

-اي.. يجوز نلاگي الامير وتَـمني هم هناك

-صدگ؟

-اي اظن امير كال راح بجيب تَـمني ويلحگنا

-حلوو تحمست

-وما سألتي وين ماخدج؟

-وين ماخذني؟

-مالج غرض

-اهوووووو

-هههههههه

ضحكت وياه وكعدت اكل بالنمنات اكل وانطي ونسولف او بالاحرى هو يسولفلي عن شغله وعن زواجنا القريب، ابتسمت من عرفته محضر كلشي ويريد يسويلي عرسي بأحلى قاعة موجودة عدنا ومن هسة حجز فندق علمود الزفة ومن گتله ليش مستعجل يگلي من الحماس اريد باجر نتزوج..

غفيت والچبس بيدي بدون لا احس وكعدت مرة ثانية على وجع گرصة زنبور بخدي تموت وجع، فتحت عيوني وشفته هستوه ديمد اصابعه يريد يگرصني مرة ثانية وبطل من شافني كعدت..

-خدي خدر

-لوما السبالات الترست السيارة حسبالي ميتة والله

-دفعته عني امثل الضوجة وعدلت حجابي اباوع للمكان السافطين عنده باوعت للشارع احسه مو غريب عبالك جايته من قبل بس مو كلش دا اتذكر.. نزلت من السيارة ادور عيوني وفجأة شهگت من استوعبت احنه بـ..

-احنه ببغداد؟؟

-اي

-جبتني لشقتكم ببغداد!!

-اممم

-امي! امي بشقتكم مو؟؟

ابتسم يهز براسه اي من الفرحة والمفاجئة رجلي صارت ترجف كوة واكفة عليها، باوعتله بعيون مدمعة وقبل لا يسمحلي انطق بشي اخذ ايدي بين ايده وكال..

-امشي نصعد نشوف عمتي

وكعت دموعي ورحت وياه امشي سريع واصعد الدرج مثل المخبلة وهو ورايه يصيح على كيفج ولا تستعجلين.. علما وصلت لباب شقتهم اني نفسي مكطوع وگلبي من كدما ينبض كام يوجعني..

-على كيفج عطر ليش مستعجلة

-يلا افتح الباب حباب اريد اشوفها

-اوكفي گبل لا تشوفيها اريد افهمج على چم شغلة

-امي بيها شي؟؟؟

-لا لا بس عبق امج تغيرت يعني ملامحها كبرت وتعبت عن اخر مرك شفتيها بيها ويجوز حتى ما تتذكرج زين

-علي الحـق افتح الباب اريد اشوفها شلون ما جانت

-انا بس ماريدج تنصدمين واخلي هالشي يأثر على نفسيتج

هزيت راسي بـ لا واشرتله على الباب، اخذ نفس عميق وفتح الباب وهو يكول..

-محد يدري جبتچ هنا لو امي وابوي يفتهمون يطيحون حظنا

فتحلي الباب وطبيت بحذائي ادور عليها ادور على ريحتها الي لليوم بخشمي ما نسيتها، عبرت الصالة ورحت للغرفة الخاصة بالامير دخلت بيها ادور على حِس امي بس ماكو ماهي.. طلعت منها وركضت للغرفة الثانية وهم امي ماكو..

-وينها؟؟؟

-مادري يجوز بالحمام

طلعنا سوه من الغرفة وبعدني ما عابرة الممر وشفت باب الحمام ينفتح وتطلع منها مرة سمرة قصيرة ضعيفة كللش كأنها هيكل عظمي شعرها قصير كلش متروس شيب وخفيف لدرجة يخوف.. لا لا هاي مو امي هاي مو شذى الجميلة الجان ابوية يتغزل بجمالها وشعرها الاسود الطويل ورشاقتها..

-يمة

رفعت راسها تباوع بأتجاهي بملامح باردة جامدة مابيها ذرة حياة، الهالات الجوه عيونها تكسر الگلب وخدها المنخسف من الضعف ذبحني.. بچيت على وگفتي عاجزة ماعرف شنو لازم اسوي اروح احضنها لو اعرفها على نفسي لان واضح هي بغير عالم هسة من نظرات عيونها التايهة اكدر اللاحظ امي مو امي..

-علي الحـق: عمة جبتلج عبق بنيتج گبل چم يوم سألتيني عنها تتذكرين؟

رمشت بعيونها كم مرة محتارة، تباوع لـ علي الحـق وترجع تباوعلي ضايعة وضيعتني وياهة ما تحملت اشوف امي كدامي وابقى صافنة حاولت اسيطر على نفسي واخليها تتعرف عليًَ اول واروح اسلم بس ماكدر اريدها اريد احضنها..

تقدمت عليها بخطوات سريعة وشمرت روحي بحضنها، كمشت بچتافها ودفنت وجهي بصدرها اشهگ وابچي اسولف وياهة واعاتبها واشكيلها الجرالي بدموعي قبل لساني..

-وين رحتي وعفتيني يمةة وين رحتي وعفتي بنتج الوحيدة.. ماما شفت الضيم والظلم وره ما عفتيني انذليت وانلعب بحالي والله انلعب بحالي

رجلي خانتني ووكعت بالكاع ووكعتها ويايه، بقيت حاضنتها ما اخليها توخر وهي هم باقية جامدة متتحرك ولا بعدتني منها، انهاريت بجي من حسيت بأيدها تصير على ظهري كأنها دتطبطب عليه حضنتها اكثرر لحدما حسيت بعظم ضلوعها من الضعف رايحة امي ورايحة روحها..

بقيت بحضنها فترة طويلة لا هي كامت ولا اني ردت ابقى بحضنها واشبع منها واشم ريحتها الترجعني طفلة صغيرة، غمضت عيوني وحسيت بروحي جاي اغفى وفزيت على صوت ناصي يكول..

-عبق امج نامت

استغربت ووخرت منه اباوعلها متچية ظهرها على الحايط وساندة راسها عليه وغافية بمكانها بالكاع يم باب الحمام واني بحضنها، انكسر گلبي من شفتها بهالحال وباوعت لـ علي الحـق بعيوني التحرگني وهمست..

-لا نگعدها راح اشيلها للغرفة

-انا اشيلها انتِ ما تكدرين

-لا اكدر

كمت منها وحطيت ايدي جوه جسمها ورفعتها، رفعتها بسهولة وهالشي اذاني اكثر عمت عيني عليج يا يمة شباقي بيج وشنو عشتي بالشماعية وشنو شفتي لدرجة اني كل هالوقت بحضنج وانتِ متتحركين جامدة من الخوف..

اخذتها لوحدة من الغرف ونزلتها على الفراش وتمددت بصفها، هالمرة اني سحبتها لحضني وحطيت راسها على صدري امسح على شعرها المتگطع وعلي الحق طلع من الغرفة يخلينا براحتنا..

غمضت عيوني وشكد ردت انام بس ولا كدرت دموعي ما سكنت ووجع گلبي على امي ولا هدأ.. رفعت عيني للساعة من سمعت صوت اذان الفجر جاي من جامع قريب منا شفته صار وقت الصلاة واني ما حاسة، نيمت امي على المخدة على كيفي ونزعت الصاية والشال وكمت للحمام غسلت وتوضيت استعداد للصلاة..

طلعت من الحمام بوجهي للصالة ادور على علي الحـق سودة عليّ شفته نايم على القنفة بملابسه وحذائه ما نازعه، ابتسمت على وضعه ورحت للغرفة جبت غطا ورجعت اغطي.. صار شوية من الغطا على وجهه خفت عليه يختنگ ورحت اوخره وهو حس عليَّ فتح عيونه فاز ويسأل..

-شبيچ؟ محتاجة شي؟

-لا اجيت اغطيك ليش نايم هنا

-عادي

گالها ورجع الغطا على وجهه يريد ينام، ابتسمت ووخرت الغطا عنه وكلت بصوت ناصي..

-لا تختنگ حبيبي

-فدوة الچ حبيبتي

-ههههههه اويلي منك ومن سوالفك

ابتسم وبعده مغمض عيونه، رتبت حاجبه بأصبعي ومسدت على مكان لحيته وهمست بنبرة كلها امتنان..

-شكراً علي الحـق

-على شنو

حچاهة وفتح عيونه يباوعلي بعيونه المينعرف لونهن شنو عيونه المحد سحلني ووگعني چفي على وجهي غيرهن..

-شكراً لانك جبتني اشوف امي

-اممم

-شكراً من كل گلبي متعرف شكد جنت محتاجة اشوفها وره الصار

هز راسه ونهض نفسه على ايده، جرني من ايدي ينزلني لمستواه وكعدت على ركباتي حتى ما اتعب، مسح على شعري بيده ولف خصلات على اصابعه ويباوع لعيوني ساكت..

-اني عشت كم يوم بهذاك المكان ومدا اتحمل احس راح اتخبل لعد امي شتكول

-وداعة عيونج يا عبق ما انساها لو يبقى اخر يوم بعمري ما اتعب ولا امل وابقى ادور على السوه بيج هيج وانعل والديه بيدي

هزيت راسي بثقة متأكدة ما راح ينسى الموضوع ويخلي يعبر عبور الكرام واعرفه گدها وراح ينهي هالمهزلة..

-نسيت اگلچ عرفنا صاحب السيارة الدعم سيارة منتصر بيوم الزفة

-صدگ؟ منو؟

-غفار الچلب

-عزا بعينه!

-العار دعمهم وشلع ما ندري وين انهزم اليوم الصبح ابوي راح لبيت مسعود المسعور وگاله ماريد منك شي غير تجيبلي راس ابنك غفار وانا اخذ حگي منه

-معقولة يذبحه؟؟

-ياريت بس ادري بأبوي ما يسويها يخاف الله يريدنا انا وامير ناخذه چم يوم ونطلع لسفرة

-اكيد قصدك سفرة للسما

-لو بيدي اي وعلي اسفره هناك بس شيخلصني من ابوي

-علي الحـق فكر بينا قبل لا تخطي أي خطوة

-ان شاء الله حبيبتي

-شكراً عمري

-وشسوي بيها هاي

-شنو هي

-هاي الشكراً شو ناشفة وتلعب الروح

ضحكت مفتهمة قصده وبسته على خده اتشكر منه وهو انتهزها فرصة جرني من ايدي ونيمني بصفه على القنفة الصغيرة لو اتحرگ انگلب منها..

-اريد اصلي وخر لا تلهيني

-قصدج انا شيطان؟

-رحم الله من عرف نفسه

-ايا بت الحلو!

-يلا وخر لا تكعد امي وتشوفنا هيج

-تدرين امج شگالت من عرفتني خطيبج؟

-يعني هي تتذكرني؟؟

-بيوم الزرتها جانت تتذكرج وسألتني عنج وبوكتها كلتلها انتِ مخطوبة وراح تتزوجين ولو تعرفين شسوت

-شسوت؟

-هلهلت

-صدگ عود؟

-اي هلهلت وصفكت فرحانة ومن عرفتني خطيبج فرحت اكثر وكالت اخذها بعباتها وماريدنها بعد لا تجيبها الي انا مأمنة عليها وياك حتى لو تريد تخلف منها ثمنطعش فرخ انا راضية ومقتنعة وماعندي مشكلة

-شكد حذاب

-هههههههههههه احبج قبق احبببج انا

-ههههه واني احبك...

**

-يعني بعد ما حچيتوا؟

-لا

-تَـمني: وشلون بيكم هسة شلون راح تشرحيله الصار؟

-ليلة: مادري تَـمني انا روحي طالعة وهذاك معصب عليَّ وما جاي يلفي للبيت شسوي وشبيدي ما تگليلي شبيدي

-حسب مافتهمت من الامير ابا الحسن مصدگچ بس ديدور على ناظم حتى يطيح حظه

-شون يدور عليه وهو ما يعرف شي عنه؟

-اني هم سألته هالسؤال وگال مالج غرض

-كون يفطسه تفطس بجاه علي

-ان شاء الله

طلعت من غرفتها الحابسة روحها بيها ومتقبل تطلع ورحت لغرفتي، تنهدت تعبانة ومقهورة على وضعها متستاهل ليلة ولا ابا الحسن يستاهل يعيش بكل هالتعاسة..

رتبت غرفتي وغيرت الفرشة وعطرتها ودخلت للحمام اغسله واسبح فد مرة قبل لا يجي الامير، كملت ترتيب نفسي وطلعت والبخار طلع ويايه تارس الغرفة سديت الباب بسرعة ورحت للكنتور اطلعلي ملابس ودخل امير للغرفة..

-السلام عليكم

-عليكم السلام الله يساعدك

-بعد عيني

بوسني على خدودي ثنينهن وكعد على الجرباية ينزع جواريبه، لفيت نفسي بالبرنص عدل وكعدت بصفه على الجرباية اسولف وياه عن يومه وشنو سوه واذا تعبان او لا..

-متعشي؟

-اي كليت

-وين شو مگتلي متعشي

-ليش مسويتلي عشا انتِ؟

-لا

-چا شكو بعد

-يعني جنت منتظر مني اسويلك عشا؟

-اي غير هيج

-ليش عود

-چا غير الزلمة من يرجع من الشغل تعبان يلگه ام بيته محضرتله عشا ينسي التعب؟

-اي بس انتَ متعشي

-اي بس انتِ ما تدرين بيه متعشي؟

-اي بس طلعت متعشي

-واذا جنت ما متعشي؟

-بس انتَ متعشي

-اعرف ابوي بس واذا جنت ما متعشي شتسوين وانتِ ما مسوية عشا؟

-ما اسوي شي لان رجعت متعشي

-هههههههههههههههه خرب راسج امنية

-هههههه لا تلوفها عليَّ عيني اموري لا عبالك احس بتأنيب الضمير

-ادري بيج لا احساس ولا ضمير

-حرام عليك شيخ المستقبل

-ااااخ اشتعل الشيخ واشتعل بخته

-اسم الله عليك عنوني

-ياهو هذا عنونچ؟

-انتَ

-اناا عنونچ؟؟؟

-اي لعد شبيك

-لازم هازه كاروكي بعد گلبي؟

-لا بس ان شاء الله تهز كاروك ابننا

-انتِ حامل؟؟؟؟

فز من مكانه طااير فاتح عيونه على وسعها والابتسامة شاكة وجهه من الاذن للاذن.. انصدمت من الموقف وانحرجت كلش احس بگلبي انعصر ماعرف شگول وشنو اجاوبه، لزم ايدي وكرر بفرحة ترست الغرفة ترس..

-انتِ حامل تَـمني؟؟

-لا

طلعت من حلكي بغصة كوة سيطرت عليها حتى متطلع واصرخ من البجي هنا كدامه، ذبلت ملامحه واختفت ابتسامته حمحم كم مرة بصوته وكال وره ما ابتسم مرة ثانية بحنية..

-جبتلج شي وياي

بلعت ريگي مفتشلة بعدني ممتخطية الموقف بس ارتاحيت شوية من غير الموضوع، طلع من جيبه چكليته غلافها اصفر ومرسوم عليها بقرة بس شفتها تذكرت موقف وچنه هو تذكر نفس الموقف لانه غمز وكال..

-بيمن ذكرتج؟

-مادري

-عليج علي!

گالها وشمرها بالقميص مالتي، طلعتها بسرعة اضحك ورجعتها بيده وكلت بهدوء..

-صير حباب وبطل هالسوالف

-وعلي ولا ابطل لليوم طعم الچكليته بسني

-اييعع

-ايع شني غير جانت اطيب چكليته اكلها بحياتي

ضحكت بس مو ضحكة حقيقية بعدني متأثرة من الموقف واحس بصدري مخنوگ امير صار ينتبه وبباله موضوع الاطفال ديشوف اخوانه نسوانهم صارن حامل وهو ديكبر بالعمر واهله يحجون براسه يومية ويسألوا شوكت يصير عدكم طفل اووف ياربي سهلها عليَّ وارزقني بطفل يگر عيوننا..

نمنا هالليلة بدون لا نفتح الموضوع وبقينا نسولف بأمور عشوائية، ثاني يوم من الصبح كعدني امير وكال عازمني على ريوك اليوم استغربت مو من عوايده يعزمني على ريوكات شعجب اجه على باله هسة..

كمت بدلت وتجهزت وطلعنا سوه بس ما اخذني لمطعم اخذني على طريق المحكمة، درت وجهي عليه جافلة واحس بگلبي انقبض خايفة الافكار بدت تتلاطم براسي ولساني انشل مدا اكدر احجي خصوصاً من سفط بكراج قريب من المحكمة واشرلي ننزل..

-شبيچ؟

-لـ.. ليش اجينا هنا

-عدنا شغل بالمحكمة نزلي تَـمني

-امير شبيك ليش جايبني للمحكمة؟؟

-ماعرف شگلچ صراحة

-شنو كول!

-تَـمني انا هالوضع صعب عليَّ وما جاي استحمله

-يا وضع شبيك؟؟

-وضعنا.. اهلي وكل الاعرفهم كلوا وجهي وانا صراحة تعبت وبعد ماعندي طاقة اتمنى تتفهمين هالشي

-راح تطلگني؟؟

-تَـمني..

-انتَ مو كتلي متعوفني؟؟ انتَ وعدتني للموت تبقى ويايه؟؟ بهالسهولة بعتني امير!! بهالسهوولة هاي لان ماجيب اطفال موو؟؟ جاوبنيييي

-خايبة انتِ مسودنة؟ ولج جبتج هنا خاطر نعقد محكمة!

-شنووو

-نعقد محكمة نعقد خاطر نصير زوج وزوجة بالقانون

-كذاب

-والحسين الشهيد

-كذاب دتكذب حتى انزل وياك

-ولج ليش اجذب نزلي نزلي كدامي نزلي

-اذا اجينا حتى نعقد شنو هالاسطوانة الكلتها قبل شوية المن هاي؟

-جنت اتشاقه واصلاً حجيت هيج خاف تسويلج سالفة وتگليلي ما نعقد خاطر اخصمها من البداية

-صدك تحجي انتَ!!

-اي صدگ نزلي يلا

صفنت مصدومة وهو بقى يضحك نزلت من السيارة باهته بعدها الرجفة بيه مدا اصدك الموقف الصار شكد جان يخوف حسيت دمي يبس وگلبي راد يوكف من القهر مجنت اعرف لهدرجة اني اخاف اخسره واخاف ينفصل عني ويغيب من حياتي..

قبل لا ندخل للمحكمة طلع عباية راس من السيارة وحطها على راسي، لزم ايدي وگال بلطف..

-بس بينما نعقد ابقي لابستها

هزيت راسي مبتسمة مع العلم اعرف راح اتبهذل بيها بس سكتت ما دامها رغبته ماكو مشكلة ما راح اموت، دخلنا المحكمة سوه وعرفت ليش رادني اللبس عباية راس شاف هوايه من معارفه هناك وحسب ما افتهمت اصدقاء ابا الحسن علي ذولة وصاروا اصدقاء مشتركين ويه امير..

على وگفتنا اجه ابو كربله سلم عليَّ منزل عينه ما رفعها الي ابد واجه ابا الحسن وعلي التقي هم شهود، قدم ابا الحسن ملف لامير وگاله جهز كلشي بقى بس ندخل للقاضي حتى يسألنا على موافقتنا..

طول ما اني واكفة احس بمعدتي تفور ونفسي تلعب عبالك هسة راح اتزوج امير ولا كأن راح يصيو سنة على زواجنا.. دقايق وگالو ندخل للقاضي لزمت ايد امير ودخلنا عليه وكعد يسألني اذا اني موافقة لو لا ووينهم اهلي وامي وابوية ليش مو ويايه وظل يلح شوية بس جان حباب ملحته بدون ضغط..

انطيت موافقتي وامير انطه موافقته بسهولة تامة وبدون أي عراقيل الحمدلله وهيج صرنا زوج وزوجة رسمياً بالشرع وبالقانون.. طلعت من المحكمة وياه طايررة من الفرح احسني خفيفة وسعيدة مو شلون مجان سعادتي مدا اكدر اوصفها خصوصاً من وكفنا على جهة وعلي الاقي شمر علينا شوية جكليت وصلى على محمد وابا الحسن احه يبارك لتوأمه وابو كربله كل شوية يهلهل بالهمسة ويهز چتف..

ركبت السيارة ويه امير ايدي بأيده الطريق كله لحدما نزل عزمني بمطعم صار هو ريوك هو غده، كعدنا سوه نسولف ونضحك وماخذين راحتنا لان المطعم مو مزدحم واحنه كاعدين بطاولة صايرة ختلة..

عشت احلى اللحظات وياه وتمنيت متخلص كملنا اكلنا وگمنا عبالي راح يرجعني للبيت بس فاجأني من كال راح نروح لبغداد نغير جو ماطول عندي عطلة، هزيت راسي فرحانة وابتسمت خجلانة من كال بمكر..

-ردتي تتسودنين من كتلج نزلي للمحكمة ولا ادري بيج هيج تحبيني

غمز يداهرني وضغط على چف ايدي الصاير بين ايده، احس بوجهي ولع خجلانة من اردف بخباثة..

-ها ولج فهاوي طلعتي تحبيني

-هههههه

-اللهم صل على محمد وآل محمد تضحك البت چنها بشارة خير

-اي

-اي شني؟

-شنو

-عليمن اي

-اميييير

-ولج احجيها مو افادي ورم

-شكول شبيك

-تحبيني تَـمني؟

-امم

-شني امم احجي ولج

-احم..

-اي يا الله

-احم احم

-علي وياچ

-هههههه اميييير

-خرب روحه لامير

-اسم الله عليك حبيبي

-يا علي صارت بيها حبيبي لو انا سمعت غلط؟؟

-لا مسمعت غلط

-يعني شني؟

-يعني احبك.. واي گلبي راد يوگف من گتلي نزلي للمحكمة خفت تعوفني واكمل هالعمر بدونك

-يا بعد امير وبعد كل اليحبونه

-امير لا تعـ..

-ماعوفج امنية ولا تعيدين هالحجاية بعد بداعتي.. اتشائم منها وگلبي يكضني

-تمام ماعيدها

-كوليها بعد

-تمام ماعيدها

-لا ولج مو هاي

-لعد؟

-گبل شوي كلتيها

-امير لا تعوفني؟

-خرررب ولج لاا خلص خلص ماريدن خايبة شعلتي شرفي بفهاوتج

-ههههههه قصدك احبك

-ما دامج تعرفيها شبيچ تخبثين وياي

-لان احبك

-اااااخ يا گلبي

-ههههههه احبك اميري

-يابوووووي يا بعد امير

ضحكت من كل گلبي وكملت طريق بغداد وياه لحدما نزلنا للشقة حرامات جانوا عبق وعلي الحق هنا قبل بيوم وطلعوا من الصبح وعلساس ام عبق هم هنا بس وينها..

-لعد وينها ام عبق؟

-اخذها حق لدار اعادة تأهيل

-يااا لا خطية امير خاف ترجع تنتكس حالتها؟

-لا مكان مرتب كلش وجابلها ممرضة خاصة تهتم بيها بس بينما تسترد عافيتها ويتزوجون هو وعبق خاطر يجيبوها يمهم

-هاا زين لعد

-نامي ارتاحي شوي عندي بعد مفاحأة

-الله شنوو هي؟؟

-مفاجأة بعدين تعرفين

-حباب حبااب كول تره ما انام

-تَـمني لا تخربيها

-حباب متخرب والله عود اسوي روحي متفاجأة

ضحك وجرني من خصري يطبع بوسة على خدي، حضني على وگفتنا وحسيت بي من اخذ نفس عميق من شعري يشمه ويزفره بهدوء ويهمس "اويلي يا علي"..

-كول حبيبي

-اشتعلنا يا علي

-ههههههه امير

ابتعد مني شوية وسند ظهره على الميز الموجود بالغرفة، جرني من ايدي ناحيته خلاني اوكف بصفه وكال بأبتسامة..

-عازمچ على عمرة

-عمرة قصدك عمرة بيت الله؟؟

-اي

-كذااااب

-اهووو

-لا لا مو كذاب لا يممماااي ممصدكة صدك والله امير؟؟؟

-وداعتج ان شاء الله عگب باجر نطلع ويه حملة من بغداد حجزتها وحرصت كون الحملة تجمع المذهبين بيها شيخ شيعي وشيخ سني خاطر خاف اكو احكام مختلفة بيناتنا ما تحتارين

-الله لا يحرمني منك

-ولا منج يا رويحتي

حضنته ممتنة اتشكر منه ولو ابقى اتشكر منه لاخر عمري احسني مقصرة، بسته على خده فرحانة ورجعلي البوسة واموت اخرى طبعاً........

قبل لا ننام اشتهيت كابتشينو وخطية راد ينزل يشتريلي وگتله عود من نكعد يروح يجيبلنا هسة تعبانين واريد بس انام.. غفينا وحسيت على صوت اذان المغرب ارتاحيت من تذكرت احنه صلينا صلاة الظهر والعصر بالطريق معناها ما فاتنا شي..

كعدت امير من النوم وكال مصدع كلش وفص عينه اليسار يوجعه، قلقت عليه ومرغتله راسه شوية بس مقبل وكال هسة من يسبح ويشرب جاي يصير زين، فات قبلي يسبح وطلع صلى وگال ينزل يشتري كابتشينو الي وچاي من السوبرماركات..

-تَـمني موبايلي طافي راح اعوفه على الشحن واطلع بساع قفلي الباب وراي ولا تفتحيها لبشر

-اوكي عيني

ودعته للباب وقفلت الباب وراه اصلاً هو ما راح يتأخر السوبرماركت كلش قريب على عمارتهم ميحتاجله خمس دقايق، امنت هو ماخذ وباه مفتاح وفتت للحمام اسبح حتى اصلي وراهة..

اخذت راحتي بالحمام وبقيت جوه المي الحار مرتاحة ولوما خايفة وقت الصلاة يفوتني جان نمت بالحمام من وره حرورة المي يجنن، لفلفت روحي وطلعت من الحمام كل عقلي امير رجع ورحت للغرفة اصيحله..

-امير؟ اميير وينك

افتريت بالشقة ادور عليه ماله اثر رحت للباب شفتها بعدها مقفولة استغربت شسالفة هذا وينه المحل، ماهتميت ورحت ابدل واصلي كملت صلاتي وامير ماكو مارجع ظل بالي ممعقولة كل هذا علمود يشتري كم حاجة من ابو الاسواق..

رحت اباوع من شباك الصالة وتبسمرت بمكاني ما تحركت ولا تزحزحت، گلبي يفز ويه كل رجال يعبر الشارع عبالي هو ويخيب املي من اللگاه غيره.. لا تلفونه ماخذه حتى اتصل ويرتاح گلبي ولا اني الاكدر اطلع ادوره باقية هيج واكفة واتأمل يرجع..

مشت الساعة والساعتين والثلاث ساعات والامير علي ما رجع! بديت انهار واتعب وافقد الامل برجعته ظليت اراوح بمكاني اروح واجي وافكر اتصل بأهله؟ ابلغ واحد من اخوته يجيني؟ بس وين يجون وشكد يحتاجلهم وقت ياله يوصلون.. ظل عقلي يجيب ويودي افكار كل ساع تجي على بالي فكرة سلبية وابعدها من بالي واستغفر ربي.. كل دقيقة دتمر احسها تاخذ سنة من عمري حيلي باد وطاقتي نفذت اتهسترت والخبلني بالزايد وخله گلبي يوگع هو من اندگت عليَّ الباب و..........

يتبع 👑....

━━━━━━ ♛ ━━━━━━

سبأ وعلي التقي احبهمممم 🥹♥️♥️♥️

عبق اللطيفة وعلي الحق العصبي وشايش 🙂😂

الامـير علي... ماعندي شي اگوله 🥹