الامارة الفصل الحادي وخمسون 51 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

اثاري فلان لـ فلانةة
طرف ثـــالث طلعت انــه!.. 🥀

━━━━━━ ♛ ━━━━━━

مشت الساعة والساعتين والثلاث ساعات والامير علي ما رجع! بديت انهار واتعب وافقد الامل برجعته ظليت اراوح بمكاني اروح واجي وافكر اتصل بأهله؟ ابلغ واحد من اخوته يجيني؟ بس وين يجون وشكد يحتاجلهم وقت ياله يوصلون.. ظل عقلي يجيب ويودي افكار كل ساع تجي على بالي فكرة سلبية وابعدها من بالي واستغفر ربي.. كل دقيقة دتمر احسها تاخذ سنة من عمري حيلي باد وطاقتي نفذت اتهسترت والخبلني بالزايد وخله گلبي يوگع هو من اندگت عليَّ الباب واجاني صوت رجال نسخخة من صوت بسام زوج خالتي..

-يا اهل البيت! يا اهل البيت منو هنا؟

تمشيت للباب ووكفت يمها بدون لا اجاوب، گلبي يدگ بجنون وايدي عرگت بشكل كامت تزحلگ صرت افرك بيها متوترة وكاتمة حتى النفس..

-يا اهل البيت! خوية سيارتكم صايرة بالطريق نريد نطلع مدا نكدر..

زفرت نفس مرتاحة من ميزت صوته بشكل اوضح هذا عنده شوية بحة مال رجال جبير مستحيل يكون بسام.. نزيت من ضرب الباب بشكل اقوى عزا راح يكسرها علينا شبي هذا!

ظليت افرك بيدي محتارة شسوي ماعرف وين رحت يا الامير وعفتني بهالحال، رجعت للشباك اشوف بلكت رجع بس للاسف ماله اثر وفعلاً انتبهت لسيارته صايرة عائق بطريق سيارة ثانية كاتلها الوصخ مبين مركونة هنا صارلها سنة ومحد بحالها..

-شلون قضية هاي.. يا اهل البيييت

توترت ونرفزني صوته ما سكت توقعته يروح من ميسمع جواب بس استمر يدگ ببابنا ممهتم راح يصيرله عشر دقايق هو على هالوكفة يمكن الجيران كلها سمعته، نويت اجاوبه من وره الباب بدون لا افتحها..

-تَـمني: تفضل

-عمي هاي الباجيرو اللؤلؤي الكم؟

-اي النا

-سادة طريق سيارتي بلا امر عليكم حركوها منا

-تمام عمو بس تكدر تنتظر شوية بينما يرجع زوجي لان اني ماعرف اسوق

-لا عمي شنتظر صارلي بالساعة ونص انتظركم واني عندي شغل

-مو زوجي مو هنا منو يحركها؟ انطيك السويچ تحركها انتَ؟

-لا ما اتورط اني رجال يا دوب اشوف بعيوني مالي خلگ يصير لسيارتكم شي وتوكع براسي

نفخت هوا ضايجة مبين عليه حجي جبير ومن ذولة النقناقيين هواي يدردم، حرت شلون اقنعه ينتظر الامير بلكي هو هسة على رجعة بس خبلني وصدگ استفزني من كال..

-امشي انتِ طلعيها

-ماعرف اسوق اني

-شسويلكم شوفيلج چارة

-عمو شنو اشوفلي چارة ماعرف اسوق تريدني اضرب السيارة؟

-اي هي مو سيارتكم؟

-اي بس خوما اضربها انتظر فدوة دقايق ويرجع زوجي

-ما انتظر راح تبدي المباراة

دگيت رجلي بالكاع شايطة ورحت للغرفة لبست شالي ودورت على شي اللبسه فوك ملابسي وشفت عباية الراس حطيتها على اكتافي لبستها واخذت تلفوني والسويچ ورجعت للباب، فتحتها على كيفي ومديت بس عيوني اشوف شلون هيئته اخاف اطلع خصوصاً وره ما الامير نبه عليَّ ما افتح الباب لاحد..

-ها عمو راح تنزلين لو شلون؟

-انزل

حچيتها من وره خشمي ورحت قبله قفلت باب الشقة ونزلت وهو ورايه يمشي ويدردم علينا بزعني علما وصلت للطابق الارضي اني روحي طافرة ما سد حلگه ولا تعب..

-بله هاي وگفة هاي! هاي سفطة؟ منو يسفط سيارته هيج ما تگليلي منووو

-عمو تره سيارتك مبين صارلها دهر هنا مركونة ومطالع بيها

-اي واليوم عجبني اطلع بيها

-اعرف عمو وحقك بس هسة شلون راح احرك السيارة واني ماعرف اسوق هاك البصمة انتَ حركها

-لا معليه اني شوفيلج أي واحد من الشارع يحركها الج

دورت بعيوني بلكي اللگه احد بس شو ما ارتاحيت نويت اني احركها وشيصير خلي يصير، فتحت السيارة بالبصمة وصعدت بكرسي السايق صافنة مثل المطي ماعرف البريك من البانزين وهذا واكف فوك راسي ينگنگ زرف دماغي..

-ها عموو بشري شصار وياچ

-عمو ياهو منهن البانزين؟

-شنووووو

جفلت من گالها نطت عيونه وفچه طلع ليكدام من الصدمة، بلعت ريگي وابتسمتله مجاملة ولزمت موبايلي بحثت على اليوتيوب الفرق بين البانزين والبريك كل هذا والشايب واكف كبالي يفر بيده..

-والله يا الله بنتي بعمرج مهكرة السيارات شبيچ عمي شجاچ

غلست عليه وبقيت ويه اليوتيوب عرفت شنو لازم اسوي وسميت بأسم الله وشغلت السيارة، ترددت لثانية بس قويت نفسي وهستوني دا اريد ادوس بانزين وشفت عاصف ينزل من العمارة ووياه بنية يضحكون سوه نزلت نفسي كلش على الكشن ماريده يشوفني بس للاسف لمحني من بعيد ووگف بمكانه يباوع وعاكد حاجبه مستغرب..

-تَـمني: خرب حظي هذا كلما نجي لبغداد نلگاه

عاف البنية الواكفة بصفه وتقدم بأتجاهي، ارتبكت واصابعي كامت ترجف لزمت تلفوني طلعت رقم اول شخص يجي على بالي من يغيب الامير طلعت رقم علي التـقي خاف يصير ميصير فوراً اتصل بي..

-عاصف: خير حجي خو ماكو شي؟

-السيارة صايرة بطريقي واريد اطلع

حسيت بـ عاصف يباوعلي سويت روحي مدا اشوفه وملتهية بالسكان، بقيت مغلسة عليه لحدما اجه يم الجامة مالتي وضربها بأصبعه ضربات خفيفة يجذب انتباهي..

-طلعي انا احركها

بقيت اباوع ليكدام ولا كأنه موجود عود مدا اسمعك ولا اشوفك بعد عيني، ضرب على الجامة اقوى وگال بصوت اعلى..

-تسمعيني؟؟ طلعي انا احرك السيارة مبين ما تعرفين

-اعرف

نترتها مزعوجة وغيرت الگير ودست بانزين اطلعها من مكانها وهاي جانت اغبى حركة اسويها..

-تَـمني: يمة يممة ثكيلة هاي عزا بعيني مدا توكف شلووون اوكفهااا ولك تعااال علمني شلوون

-عاصف: دوسي برررريك دوسي برييك برجلج

بيني وبين الحاوية مال الزبالة شعررة تخبلت گلبي راح يوكف طلعت مني عيطة قوية ودست البريك بكل قوتي اوكفها و.. ووكفت! صدگ وكفت السيارة وكلشي ما صارلي لا دعمت احد ولا موتت نفسي هه ويكولون عني فاهية اليوم الا اخبص امير من يرجع واخلي يشتريلي سيارة..

ابتسمت فرحانة بهذا الانجاز ودست بانزين ناوية اسفطها عدل بس خفت لا اطب بالحايط فـ عفتها بمكانها ونزلت..

-عاصف: چان طبيتي بالزبل

-بس ما طبيت

-جيبي اسفطها عدل

-لا ماكو داعي شكراً

-چا تعوفيها هيج بنص الشارع

-الرجال: المهم سوت مجال لسيارتي عاشت ايدج عمي

عافنه وراح لسيارته وبنفس اللحظة لگف عاصف من ايدي البصمة وركب سيارة الامير، رحت وراه اضرب بالجامة واعيط بي..

-منو سمحلك تاخذ البصمة من ايدي؟؟

ما اهتملي وشخط بالسيارة يحركها ركضت اوخر منه مخترعة خفت يدوسني هذا مو امان بس ظلت عيني على السيارة خاف ياخذها ويشرد بيها بس همزين مسواها مجرد عدل سفطتها ونزل..

-عاصف: تهي بهي زلم تالي وكت تنزل نسوانها تحرك سياراتهم

-محد نزلني حتى احرك السيارة!

-چا ليش انتِ نازلة الهيبة وين؟

-الهيبة نايم وميدري بكل الصار مردت اكسر نومته ونزلت بداله

-نايم؟

-اي

-نايم؟

-اي شبيك

-هههههههههه

ضحكته مستفزة رغم ملامحه بعيدة كل البعد عن الاستفزاز شكله من ذولة الهادئن الفقرة الياكلون عشاهم بس حركاته وعقله عكس هالصفات تماماً.. مديت چف ايدي اله حتى يحط بيها البصمة وفعلاً شمرها بداخلها بدون لا يخلي اصابعه تطخني..

-شكراً

-انتبهي على نفسج وقفلي البوب عليج بينما يرجع زلمتج

-لا الامير بالبيت نايم مطالع

باوعلي صفح مبتسم تك خد، هز راسه بـ اي وگال..

-تره من شوي تلاگيت وياه يم التقاطع

-شنو

-هو مريض؟

-منو امير؟ لا لا

-مادري شكله چان غريب

-مدا افهم عليك

-چان يسولف ويه روحه من شفته حسبالي جاي يحجي بالموبايل طلع ماكو شي لا بيده ولا بأذنه

بلعت ريگي باهتة من كلامه وما علقت بكلمة، هز راسه شلون المتحسف وحط ايده بجيب دشداشته يردف مستغرب..

-چان يمشي وانرگع بزلمة جبير جاي يمشي ويه بنياته الشابات والزلمة حسباله امير جاي يتحارش بنساوينه رادت تگب عركة شكبرها لوما انا متدخل ومعتذر من الرجال

-انتَ صدگ تحجي؟!

-اي والله اذا ما تصدكيني سأليه

-مستحيل هالشي يطلع من امير اصلاً هو راح للاسواق شعليه بالرجال!

-هههههه خوش

-ليش تضحك؟؟

-تره گال رايح لصاحبه ومناك يطلع للامام الكاظم

-مستحيل!!

-ليش مستحيل اميرچ النايم طالع لصاحبه وين المشكلة؟

-عيب عليك تكذب!

-احترمي نفسج لچ ما جاي تحاجين جاهل!

ماهتميتله وعفته ودخلت العمارة محروگ دمي، اجه ورايه يصعد ومبين رايح لشقتهم لان همه بصفنا ضبط بس ما اجت وياه البنية رجع وحده.. توترت من حسيت بي يصعد الدرج خلفي مباشرةً ماحبيت يباوعلي من وره فـ حاولت اصعد بسرعة ومن صدمتي وفهاوتي عثرت بالعباية وردت اوكع لوما مكمشة بالمحجر مال الدرج..

-عاصف: كل هذا من الصدمة

حچاهة مستهزأ وكمل يصعد الدرج قبلي، ظليت واكفة بمكاني منطيته اذن الطرشة ما راح اصدگ هالكذاب الحقير شنو امير راح لصديقه وشلون يروح يزور بدون لا ينطيني خبر ويعوفني وحدي بالشقة مستحيل يسويها.. كملت طريقي هادئة وقبل لا ادخل للشقة گال..

-هاا صح من تلاگينا نسيت اگلچ حاچيت الامير وسألته عليج عبن شفتكم من وصلتوا العصر گتله لا تعوفها وحدها بالشقة تستاحش اخذها وياك خطية

منطيته ظهري اسوي روحي دا افتح قفل الباب بس اذني وياه منتظرته يكمل كلامه بس سكت.. سكت لفترة قبل لا يگول بضحكة حرگت گلبي..

-گالي ادعبل انتَ وياهة

-كذاااب!

اللتفتت عليه ارجفف من القهر احس راسي راح ينفجر من الصدمة مستحيل هالشي حقيقي احلفف عليه ديكذب والله احلف!

-لا تَـمني ما جاي اچذب بس شكلچ ما تعرفين الامـير علي بعدج

-انتَ وين تريد توصل؟؟

-اريد اطلعج من الاحلام الوردية العايشتها وياه، ماريدج تنصدمين من يطيح قناع وجهه ويطلع الوجه الحقيقي

ضوجنيي بما يكفي وما ناقصني اسمع مغثة اكثر من السمعتها، فتحت قفل الشقة ودخلت بس قبل لا اطبگ الباب واعوفه وحده استوقفني شي گاله بصوت مسموع مبين يريد يسمعني..

-مو كل امير امير تَـمني.. اميرچ مخبل كتل اخوه وكسر گلب عياله

دخل لشقته يضحك متشمت، طبگت الباب صايبتني قشعريرة احس حتى شعر راسي خدر، قفلت الباب ورايه ورحت للغرفة تمددت على الجرباية وغمضت عيوني اداري الهبوط الصار عندي ووجع راسي القوي..

بقيت مغمضة عيوني وافكر بكلام عاصف واكذبه، كلما اتخيل ممكن الامير يحجي عليَّ كدام احد انهار گلبي يعصرني واتعب كللش اتعب.. ماعندي طاقة اكوم من الفراش صفرت بمكاني حاولت اغفى كون يارب اكعد واللگاه يمي بس ما غفيت ماكدرت انام وبقيت اتگلب بالفراش وانتظره يرجع..

ساعتين ونص مرت فوگ الثلاث ساعات الي انتظرته بيهن الساعة راح تدگ الـ 12 بالليل وهو ما رجع تخبلت عقلي ينرادله شوية ويشخط، مليت وتعبت وقررت اتصل بـ علي التـقي او ابا الحسن ميهم أي واحد منهم يشوفلي چارة..

دگيت على تقي وانتظرته يرد بس ماكو ويه ما قربت تخلص الدگة جاوبت التلفون سبأ..

-تَـمني: هلو سبأ اكولج تقي موجود يمج؟

-سبأ: لا والله طلع ويه صاحبه ونسى موبايلاته هنا

-شجاهم ويه الموبايلات ذولة.. ماشي حبي شكراً مع السلامة

-صاير وياكم شي تَـمني؟

-لا حبيبتي بس ردت علي التـقي بشغلة تخص الشقة وامير كال هو مرتبها على ايده ويندل كلشي

-ها چا خوش بس يرجع اگله

-تمام حبي

سديته منها ورحت على ابا الحسن دگيتله وما طول ثواني وجاوب..

-الوو تَـمني انتم وين؟؟

-هلو ابا الحسن احنه ببغداد

-ادري بس امير وين صار شكد ادگ عليه وما يشيله؟

كمت اشوف تلفونه بعده على الشحن ومفول، انتبهتله مسوي صامت ومحترك حرك اتصالات من اخوانه وجماعته وامه..

-تلفونه صامت وهو عافه هنا وطلع من المغرب ولحد الان مرجع

-هاا

-ابا الحسن هو نزل للاسواق يجيب چاي واغراض ويرجع ولحد الان ما بيّن والله ظل بالي عليه

-خاف صارتله شغلة وراح؟

-لا لا هو كال بس للاسواق اروح وارجع بس هسة لاكيت عاصف ويكول شافه من جان طالع وعلى اساس گايله راح يروح لصديقه ويزور مناك

-وعافچ بالشقة؟!

-اي

-هاي شني هاي

-والله شو ظل بالـ... اوكف يمكن صوت الباب هذا اتوقع رجع

-چا شوفي وگليله يدگلي

-ماشي ماشي

سديته منه وركضت للصالة وشفته هستوه ديدخل من الباب منزل راسه ولابس شفقة رياضية سودة ماعرف ليش.. استغربت من سمعته يحچي بشي وقطع كلامه من اللتفت ناحيتي وفجأة جفل بمكانه فاتح عيونه مصدوم عبالك شاف جني لدرجة تفرقت شفايفه عن بعض..

-امير وين جنت ليش تأخرت هيج

بقى جافل على وضعه فاتح عيونه ويباوعلي من فوك ليجوه، استغربت من نظراته ونزلت عيوني اباوع لملابسي هو صح اني لبست قميصه ووحدة من برموداته الي يعوفهن هنا بس لان سبحت وماعندي ملابس شي طبيعي ما ارجع اللبس نفس الجنت لابسته..

-شنو شبيك

-شتسوين هنا انتِ؟

حچاهة بنبرة مختلفة كللش مختلفة حتى صوته متغير وهالشي زيّد قلقي ورحت اتقرب منه، لزمت ايده بين ايدي وهو نزل عيونه عليهن ورفع نظراته الي يباوع لوجهي بنظرات فضولية كلش..

-شبيك حبيبي صاير شي؟

-لا

همسها وجر ايده من ايدي بنفضة خفيفة ووخر مني عاكد حاجبه، انطاني ظهره يفرك وجهه ويستغفر بهمس ثواني ورجع اللتفتلي وكال..

-تَـمني

-ها

-انتِ هنا

-اي لعد وين

-يا علي

-شبيك امير

-نسيتج.. نسيت جايبج وياي

-يااا

-وعلي.. والله العظيم مادري.. مادري چن خايلي اجيت وحدي ونسيتج حبيبتي عفتج كل هالفترة وحدج انا!

-اي وظل بالي صراحة

-اسف حبيبتي اسف يروحي

سحبني من ايدي يحضني وبوس راسي وايدي يتعذر مني، رفعت عيوني اباوعله وشفت ملامحه ضايج ومقهور شلون نساني وبنفس الوقت مبين عليه مريض چف ايده كلش حار من لمسته وحضنه نفس الشي مال واحد مصخن..

-عادي امير تصير

-والزهرة مادري يجوز عبن متعود اجي وحدي نسيت.. مادري تَـمني ثقي بالله مادري

-عادي بس.. احم.. مشفت احد اليوم من طلعت؟

-رحت لصاحبي ومناك طلعنا نزور

-والله؟

-اي والله

-شفت احد قبل لا تروح لصاحبك؟ واحد من اخوتك لو ولد عمك؟

-شفت عاصف

-اهااا

-اي ليش تسألين؟

-سلامتك.. اني رايحة انام تعبانة

-تَـمني اوكفي

-لا امير ماكدر اسولف ماعندي طاقة محتاجة انام

هديت ايده ورحت للغرفة ونمت على فراشي وغطيت روحي، گلبي معصور لدرجة ماكدر احجي شي هسة محتاجة انام ومن اكعد اسولفله شفت عاصف وكلشي.. غمضت عيوني بسرعة من حسيته دخل للغرفة ونزع قميصه ونام بصفي.. حسيت بأيده الحارات كلش من حضنوني من وره وحسيت بي من باس راسي ومسح على شعري ويشمه..

غفيت على هالوضع وكعدت الصبح هو بصفي بس مفتح عيونه وصافن بالسگف، كمت من الجرباية بدون لا اگله صباح الخير ورحت للحمام غسلت وجهي ورتبت نفسي وطلعت لكيته كاعد بالصالة وبيده الريموت يگلب بالتلفزيون..

-نوومه مشتهي بيض

حچاهة وعينه على التلفزيون يتابع اخبار، چتفت ايدي وكملت طريقي لحدما صرت بنص الصالة وسديت التلفزيون بجسمي..

-تَـمني: وين راحت صباح الخير نوومه؟

ضحك يهز براسه، مغط ايده وگال بحنيته المتعودة عليها..

-صباح الخير حبيبة گلبي

-امير اريد احجي وياك بشي

-احجي

-البارحة من طلعت اجه حجي دگ الباب علينا و.....

سولفتله كلشي صار، بالبداية جان طبيعي ويهز براسه يستمعلي بس من وصلت لـ عاصف وگتله حچى ويايه انتفض نفضه فاز من مكانه متخبل! وجهه انگلب احمر دمم وايده ظلت ترجف من الغيرة كوة كملتله احداث البارحة بدون لا اجيب طاري جملة عاصف الگالها "مو كل امير امير..." لان هو هسة وراح اموت خوف فاتح عيونه عليَّ مخنزر عبالك گتله طببت عاصف لشقتنا..

-لاااا عاوز تطببي؟؟ لو جايبته وعازمته على چاي فرد نوب؟؟؟

-يعني هم حاچي عليَّ گدام ابن عمك وهم ضايج؟

-ما حجييييت مااا حجيييت تتوقعين انااا احجييي؟؟؟ ولج تصدگين هالزمااال وتچذبينيييي

-امير اهدأ شبيك دتخوفني

-خ** على الخلللف امير!!!

فتحت عيوني مصدومة هاي اول مرة بحياته يغلط على اهله او يقلل منهم، انقهرت منه ما راضية على عصبيته وكمت اعوفه ورحت للمطبخ وبقيت هنا وهو لا اجه ولا حاچاني بعد..

للظهر صاحلي وما جاوبته، ظل يكرر اسمي كم مرة ومن شافني ما رحتله هو اجاني للمطبخ تنهد وحط علاگة على الكاونتر كفخت ريحة الكباب منها تشهي الميتشهى واني منا بدون ريوك وميتة جوع احس روحي خرطت..

-ليش ما تجاوبين امنية

برطمت مهضومة وانطيته ظهري، حسيت بي يتقدم وصار ورايه مباشرة ولزمني من متوني يديرني عليه باس گصتي وخدودي وگال..

-اذا منتظرة مني اعتذار فـ تحلمين

-امير!!

-يا بعد امير

-تره عطت بوجهي اليوم معقولة مانتبهت على نفسك وعصبيتك شبيك متگولي شبيك؟

-صح انا بالغت

-اي والله كلش بالغت

-چان لازم اعزم عاصف ويانه على الغدة فشلة منه

-امييييير

-تَـمني تسكتين لا اروح اشعل صفحته امشي نتغده ولا تضوجينه امشي

-استغفر الله هو شسوه الرجال؟

-امشي انعل ابو الرجال لابو اليلفي امشييي

جرني من ايدي معصب يربي بعده معصب وقضى اليوم كله عصبي بس ديحاول يتحكم بأعصابه حتى من طلعنا كل شوية خازرله واحد ويريد يتعارك تعبني وطلع الطلعة كلها من عيني ما عولت شوكت نرجع للبيت حتى انام..

رجعنا للشقة وبوجهنا نمنا حتى مسألته شلون نطلع للمطار باجر واحنه ما ماخذين جنط او احتياجاتنه مالي خلگ لا يگب بوجهي.. فزيت نص الليل على صوت دگ باب الشقة بشكل همجي درت وجهي للامير لگيته ماكو انتفضت من مكاني وكمت بسرعة ادوره بالشقة بس ماهو..

-اميير وينك امييير

رحت للغرفة الثانية ادور عنه بس الشقة تصيح بوجهي فارغة محد غيري موجود وصوت الباب مستمر يندك بشكل يفجع.. گلبي ظل يوجعني يربي شديصير وينه هذا الرجال! استسلمت وتقربت من الباب على كيفي وصحت من مكاني..

-منووو

-اناا اناا افتحوا الباب

-يااا امير

فتحت الباب بسرعة من سمعت صوته جاي من بره امير شمطلعه بنص الليل وليش ما اخذ المفتاح وياه..

-شنو امير وين جنت؟

-طلعت

-وين؟

-هاا؟

-وين طلعت

-هيج.. هنا.. هنا

-وين هنا؟

ما جاوبني وعبرني يكمل طريقه للغرفة فكيت حلكي ممصدكة تصرفاته، رحت وراه شفته ديمدد على الفراش ومثل ما حط راسه على المخدة غفه! غفه بهالسرعة عبالك دگمة وداسها.. بالبداية كلت يمكن جان يمشي وهو نايم وما حاس على روحه وغلست عن الموضوع بس يا ريتني ممغلسة ويا ريتني حاچية وما ساكتة ولا الي صارلنا وراهة....

كعدنا ثاني يوم الصبح وسألته عن الصار واستغربت من كال يتذكر ونزل حتى يذب الزبالة وصعد، اوكي وجهة نظر منطقية والطمنني اكثر هو وضعه اليوم هوااايه احسن فاش ومابي شي، بوسني وظل يعتذر عن عصبيته البارحة وشالني ويفتر بيه ويضحكني ويشاقيني متغير مية وثمانين درجة، بالثمانية طلعنا ويه الحملة والطريق كله يضحك فرحان ويسولف عن جمال مكة والمدينة لان هو رايح مرتين للعمرة قبل هالمرة..

-امير لعد وملابسنا شلون؟

-مناك نشتري كلشي عدهم هناك

-ماشي بكيفك

-تعالي خلينا نتصل بأهلي نودعهم

-يلا....

**

"لـــيلة"
گاعدة جوه ويه عمتي رسمية من اتصلوا الامير وتَـمني يودعونه راح يرحون للعمرة، وبنص محادثتنا وياهم طب ابا الحسن للبيت ناطة شياطينه وما طايق بشر عبرنا وراح للدرج يريد يصعد..

-رسمية: وداعة الله يمة انتبهوا على نفسكم الله وياكم... وين ابا الحسن وين؟

وگف على الباية الثالثة واندار لـ عمتي وگال بهدوء عكس ملامحه المعصبة..

-شلونچ يوم

-زين من سألت وينك صارلك چم يوم ما تبيّن؟

-عندي شغل وملتهي

-شغليش يخليك تبات بره البيت؟

-شغل مهم.. محتاجة شي يمة؟

-محتاجتك يوم اريد اسولف وياك مشتاگة لحسك بالبيت

-حگچ عليّ مقصر وياچ انا

نزل من الدرج راحلها وبوس ايدها وجبرته يكعد وياهة شوية، اباوعله صفح بدون لا ادور وجهي مفتشلة احط عيني بعينه وهو هم ولا عاين لوجهي ولا چني كاعدة..

-رسمية: شو ما بشرتني بحمل مريتك ولك شني تضم على امك؟

-ابا الحسن علي: شنو

-رسمية: اسولف على حمل ليلة مريتك

-ابا الحسن: ليلة حامل؟؟؟

-رسمية: لا صدگ؟ چا ما گلتيله؟

-ليلة: احم.. لا ما لحكت عمة

رفعت عيوني اعاين لوجهه مصدوم وجاحظ عيونه، ضحكت امه وضربت على فخذه وكالت..

-راح تصير اب يا بعد امك

جرت وجهه تبوس خدوده وتباركله وتصفگ بيدها وتهوسلنا، توترت من ابتسملها هاي الابتسامة اعرفها مال چذب ومجاملة خصوصاً من بوس امه وكام من مكانه وكال..

-ليلة لحگيني

-رسمية: ههههه لحگي يمة لحگي

ترخص من امه وصعد قبلي فوك، اشرتلي عمتي اروح وراه بس مترددة وخايفة ماعرف شنو راح تكون ردة فعله فوگ، قويت نفسي وصعدت الدرج وبوجهي رحت لغرفتنا فكيت الباب ولگيته كاعد على الجرباية وحاط راسه بين ايديناته ثنينهن..

ظليت واكفة بالباب وهو يذب حسرات قوية وحدة وره الثانية، ظل فترة على هالحال كاض راسه بيده گبل لا يعدل گعدته ويعاين لوجهي ويكول ببرود فضيع..

-انتِ صدگ حامل لو هاي هم چذبة منج؟

-حامل

-وليش ما گتيلي؟!

-عبن ما اشوفك

-طبعاً ما تشوفيني ليلة.. طبعاً ما تشوفيني

ضحك متلوع ووگف على حيله، ذب حسرة شگت صدره من قوتها وگال بعصبية گوة كاتمها..

-تدرين وين جنت كل هالفترة ليلة؟ تدرين؟؟!

-لا

-اي طبعاً ما تدرين حگچ

-ابا الحسن..

-جنت اطمطم خيااااسچ كضييييت طيحان حظججج گشطته گشططط وطميته!!!

-ابا الحسن جيب القران الكريم احلفلك عليه جيبه احلفلك واثبتلك هاي مو صوري وهاي مفبركة والله العظيم مفبركة شلون تريدني اثبتلك شلووون فهمنييي

كض صدره يفرح بي تعبان بس ماهتميت وماردت اأجلها اكثر وتكبر بالزايد ونويت اللتزم بوصية تَـمني واسولفله من الالف للياء، وگفت گباله وسولفتله كلشيي ما اهتميت بعصبيته ولا بخزرته راح يبلعني ولا برجفته ووكفت بكل جرأة اسولف، حلفت بمية يمين ومية امام وجبت القران حطيته بيدي وحلفت عليه وما اكتفيت حطيت ايدي على بطني احلف وداعة هالطفل كل چلمة طلعت مني صحيحة وما زيدت ولا نقصت حرف..

-ليلة: ابا الحسن انا انظلمتتت والله العظيم انظلمت وانلعب بيه وبحالي مادري شتكول عني ماادري وبكيفك تكول غبية من ما حسيت؟؟ تكول ماعندي عقل؟؟ تكول ثولة ومطية بكيفك كوول لان انا انظلمت وداعة ابني البعده ما شاف ضوه شمس انظلمتت

انهد حيلي شكد ما بررت تعبت كلش وضميت وجهي ابجي بقلة حيلة، هرول لاتجاهي گاز على اسنانه بكل قوته وكضني من زندي بحقد احس مرد اللحم ويه العظم ايدي انشلت من لزمته شكد قوية، قربني منه وگال بخزرة..

-لااا تحلفين بالطفل خاطر تبرأين نفسج من خياسج!!

-بعدك ما مصدگني موو؟؟ بعدك؟؟

-سكتييي لا اللطچ على حلگچ اكسررر سنونچ سكتييييي

دفعني على الحايط بقوة انضرب بي متني توجعت كلش بس هم بلعتها وسكتت خفت احجي لا يسويها صدگ عصبيته ما تبشر بخير خفت يفقد اعصابه ويكتلني...

-والله لوما خوفي من الله الا اطلع افااده واعلسه بسنوني!!

ضرب ع الميز بقوة انرجت الاغراض الموجودات عليه ووكعت شيشة عطر بالكاع تكسرت، ضرب الميز مرة ثانية شايطه روحه وعاط..

-مثل الجررريدي كضيتته فااارة بيدي صاار يتبچبچ ويتووسل اعوفنه وووولج فرررخ بطول زرري شاربه مملوط كعد جوه رجليي يبوس بيها تفرفح روحه من الخووووف ويعترف بكلشيي سواه!! ليلة هذاااا يستغلجج وساكتتله هذااا؟؟؟؟؟

-انتَ عرفت ناظم؟

-من *** بناظظظم وبالخلللف نااظم وبيييج الخااافت من هال***** ابن ال**** صاحب ال*****.... ولج يبتزززج وساكتة كل هالوووكت ليييييش؟؟؟؟ ماعندج **** زلمة يدافعلج؟؟

-خفت.. والله خفت

-بت العااااار تخافيييين واحنه موجودين؟؟؟ بعلييي اخسفه خسسسف لووو گايلتلي من البداية انعععل والديه واكعد شيخهمم على عگااله!!!

-خفت ما تصدكوني

-وهسة من فضحچ تردينه نصدگ؟؟؟؟ ولج ليييلة انتِ نعلتي شرررفي تعرفين شنووو يعني طيحتي حظظي وطينتي راااسي؟؟؟

-حسن انتَ تعرفني مظلومة وتأكدت بنفسك هو اعترف بلسانه انا بريئة والصور ما متشكلة على جسمي بس وجهي ليش بعدك معصب

-عاين الصلفة!! عااااين الگباااحة عاااين والحسين ما تستحين انتِ ومااعندح ذرررة مستحة

-شتريدني اكول فهمنيي؟؟

صفگ ايد بأيد ووخر مني محتار ظل يروح يمين ويسار وياكل بروحه، تعبت من الوكفة وتعبت من الوضع ماعرف شلون راح تصفى وشنو تاليتها..

-ابا الحسن انتَ تعبت اگعد خلينا نسولف على كيفنا واشرحلك الصار من البداية بس لا تعصب

چن الگلته استفزه لانه انتفض من مكانه واندار بكل جسمه عليَّ وبدون سابق انذار وبدون أي مقدمات رفع اصبعه يوجهه ناحيتي وگال بنتر..

-عيني بعينج واحلفج بأعز ماعندج تجاوبين بدون چذب!

-شنو

-ليش ما رضيتي تگليلي على الصار وياچ؟! لا تگليلي خايفة لا ما اصدكج ومن هالكلاواات ديربااالج تجذبين ليلة دير بالج!!

-جنت غبية وخفت

-ليلة احجيي الصدگ!!!

-ابا الحسن خفتتت اييي خفت!! والله خفت منك ومن ردة فعلك وچنت خايفة لا تخليني امام الامر الواقع ويكون حَلك هو اتزوجك وتساعدني وانا ماريد هالشي

رخت عظام فچه وتغيرت علومه، صفن ثواني وحط ايده على صدره چن مختنگ وفتح حلگه يتنفس بقوة، يشهق ويزفر بصوت عالي يلهث بطريقة تخوف.. متت خوف عليه ركضت اريد اشوف شبي ودفعني عنه وگال بحسرة مشمأزة روحه..

-حرامات... حرامات على گلبي وعلى سنين عمري حرامات

-انا ماردت اتز....

-حرامات.. بالعباس حرام وجودج بحياتي حرام.. حرررام على العمر الضيعته واناا انتظررج واتمناج حرااااام

شهگت فازة من شال الفازة الموجودة على الطاولة وشمرها بالكاع واندار على الميز تواليت شمر العطور الموجودة عليه ودولكة المي وكلشيي شاله وشمره وصار يشيل ويكسر بالاثاث مال الغرفة ويصيح متسودن..

عطت مخترعة ووكفت على جهة ضامة وجهي بأيد وجسمي بالايد الثانية خايفة لا يلوحني شي، على اثر صوته صعدن رفل و عمتي رسمية شافته بهالحال وتخبلت كضته تريد تتحكم بي ما تكدر انضرب عقله وصار ما يشوف گدامه ركضله علي الكرار اجه يصعد وحاول يقيّد حركته ويهدأه بس ماكو فائدة فلت نفسه من ايد كرار واندار عليَّ يصيح...

-ووولج تتحملين الخوووف والفضيييحة!! تفضلين الموووت على زواجچ منييي؟؟؟؟ حرررراماتتتت عليَّ يممممة حررراامات

-رسمية: يمة سودة بوجهي يممة وليدي شبيك حبيبي شبييك حسونن

-علي الكـرار: خووية صلي على محمد ابا الحسنن لا تدفع حسسن اااخ ايدي حسسن ولك انطي مجال

-ابا الحسن علي: طلعوووهها منااا طللعهااا كرراررر ماريد اشووووفن وجههااا

-علي الكـرار: طلعي لييلة طلعيي منا خوية طلعيي

جرتني رفل من ايدي غصب تنزلني، طلعت من الغرفة وشفت عبق وسلوى وابرار وشمس واكفات ومخطوف لونهن، عبرتهن كلهن ونزلت ويه رفل جوه لغرفة عمتي رسمية اكل بروحي واسمع بصوته انشخط من الصياح راح ينجلط ويوكف گلبه من القهر والمشكلة افتهمني غلطط والله افتهمني غلط..

-رفل والله افتهمني غلط انا ما قصدت اضوجه

-رفل: خلص حبيبتي اهدي مو زين عليج

-ما خلاني اكمل بساع اخذني بصياحه وكسر الغرفة علينا

-رفل: ليلة كافي يا يمة كافي انتِ حامل مو زين عليج ارتاحي هسة يهدأ وترجعون تسولفون على كيفكم

خنست بحضنها ارجف وافكر بي عيوني يابسة دمعة ما جاي تنزل من الصدمة.. شوي ورفل سألتني عن الصار بس مالي عين اسولف لاختي مفتشلة وخجلانة بالي وعقلي كله ظل فوك..

اجتني عبق واجن باقي البنات يصبروني وانا بس اهز براسي على الصامت، لليل طلع هو من البيت ونزلت عمتي كعدت وياي تريد تفتهم الصار وجذبت عليها كلتلها سالفة تافهة وانا استفزيت ابا الحسن وگب عليّ هيج..

-رسمية: ليلة لا تجذبين عليّ شني هالسالفة التافهة الخلته يحلف لو رجع وشافج بوجهه يطردج بالشارع؟!

-ليلة: هو هيج كال!

-اي! شصاير يمة سولفي احجي شكوو لا تربطين ايديناتي احجي خليني اعرف شتصرف

سكتت محتارة بالزايد ماعرف شسوي اسولفلهم على سواد وجهي لو اسولفلهم على غبائي الخلى الرجال المتسودن بيه ينفر مني ويكره وجودي ببيته..

-ابرار: لا تخافين عمة يوم يومين يهدا ويرجع، عادي همه ذوله الزلم هم تجيهم ساعات عصبية ينفجرون بيها

تأملت يطلع كلامها صح بس للاسف.. مرت اليوم واليومين والثلاثة والاسبوع والاسبوعين وابا الحسن علي نافر مني لدرجة ما يعاين لوجهي.. يطلع من الصباحيات وما يرجع الا قريب الفجر وما يصعد لغرفتنا ولا يتدنه عليها ينام كله بغرفة علي الكـرار وهالشي بنى فجوة عملاقة بعلاقتنا وما اظنها بيوم تنسد..

**

-حنين: حبيبتي سلميلي على الامير هوايه وانتبهي على نفسج

-تَـمني: يوصل حبيبتي خالة

-تالة: توتة مو تنسين تدعيلي اريد يم الكعبة تكمشين بالستارة وتدعيلي حبابة

-تَـمني: ميخليني امير اتقدم تالة ازدحام كتل كتل الكل جاي يعتمر هسة علمود قبل شهر رمضان بس تدللين احاول اوصل لاقرب نقطة وادعيلج

-تالة: حبيبتي فدوة لوجهج الحلو

دزتلي بوسة بالهوا وسدت الكامرا ويانه، تنهدت مشتاقتلها كلش بس فرحانة بنفس الوقت، فرحانة لانها سعيدة ومرتاحة والامير مداريها مثل المي بالصينية.. ولا انسى من خابرتها البارحة وكالت بفرحة من كل گلبها "تالة اني دا اعيش احلى ايام عمري ياريتها متخلص"..

-حنين: شبيچ مبوزة تالة

-مشتاقة لتوتة

-ميخالف ماما كله كم يوم وترجع

-اي

-شبيچ امي صارلج كم يوم متغيرة صاير وياچ شي؟

-لا

-تلاوي سولفي لامج حبيبتي شبيچ

-بس متعصبين؟

-ما اعصب

-ادري غباء مني بس مشتاقة لابوية

-اممم

-لا تعصبين ماما بس ماعرف ليش صارله كم يوم على بالي ولا عبالج دا احجي هيج حتى تاخذيني ازوره لا والله وره السواه اني ماريد اشوفه بعد بس هم.. مشتاقتله

-طبيعي بنتي يبقى ابوج

-اي

-وهسة كومي خلينا نسوي گهوة ونشرب سوه نغير مزاجنا

-لا.. خلينا نروح نشوف بيت حبيبة وعبق حبابة

-لا كعدي فشلة

-حبابة ماما فدوة لوجهج والله ضوجة

-ولج المن رايحين اذا تَـمني مو هناك

-عادي لعد الباقين شبيهم مو صرنا اهل وياهم

ظليت اللح عليها هوايه ياله اخيراً قبلت ورحت ابدل ملابسي طايرة من الفرح، اخييراً راح نروح صار شكد مشايفتهم.. كشخت احلى كشخة وتمكيجت ورتبت شعري ونفسي وطلعنا سوه والحلو ميبعدون عنه غير شارعين..

استقبلونا احلى واحسن استقبال وام امير جانت كلش فرحانة بشوفتنا وعاتبت امي ليش منزورهم، كعدت وياهم شوية بالاستقبال وكلت لـ ماما رايحة اشوف عبق الي اكيد حايرة بأمتحاناتها..

صعدتلها فوك وبنفس الملگه الحلو مال ام امير تلگتني، كعدت يمها شوية نسولف واجن يمنا سبأ وشمس وتسائلت عن ليلة ورفل وينهن..

-شمس: ليش ما تدرين بيهن رجعن لبيت اهلهن؟

-تالة: رفل ترجع طبيعي بس ليلة ليش؟؟

-عبق: تعبانة ووحامها مأذيها كالت تريد تروح لبيت اهلها كم يوم ترتاح وتشوف امها وابا الحسن ما عارض

-تالة: وابوهن خوما ضوجهن بشي؟

-شمس: لا زين تكول رفل بس بالبداية عصب وضاج بس سكت وراهة

هزيت راسي متفهمة ودرت عيني على سبأ، احسها متغيرة هالفترة وحليانة ماعرف شدتسوي واستحيت اسئلها..

-عبق: اوگفو انزل اجيب شي نشربه

-سبأ: كعدي خية انتِ جاي تدرسين انزل انا

-تالة: اجي وياچ

نزلنا سوه للمطبخ مشتاقة افتر ببيتهم الجبير البي ريحة عجايز، ماعرف ليش بي ريحة عجايز بس يمكن ريحة الحنية هاي مال شيخ علي تارسة حيطان البيت واتخيل ريحة العجايز هيج..

-سبأ: نسوي چاي لو شربت؟

-تالة: بكيفج اني اصلاً ماشتهي

-لا لا نسوي چاي وناكل كيك امس علي الكـرار جابه وياه كلش طيب

ويه جملتها انفتحت باب المطبخ ودخلوا سور ونور وعلي الكرار وراهم يرزل بيهم وهمه يضحكون ممهتمين.. وگفوا ثلاثتهم بمكانهم من شافوني هنا وعلي السور الوحيد بيناتهم ابتسملي ابتسامة واسعة وكال..

-السلام عليكم

-تالة: عليكم السلام

-علي السور: شلونچ خوية شنو اخبارج؟

-تالة: الحمدلله بخير انتَ شلونك

وگف يسلم عليَّ ويسأل عن اوضاعي واوضاع امي ونور سلم ووكف بصفه هادئ شكله مريض لان وجهه اصفر اما علي الكـرار فـ مجرد ما گال "السلام عليكم" وعبرنا وطلع من المطبخ ما باوع لخلقتي..

-علي النور: يلا بعد براحتكم، سور هم ياله نلحگ امشي

-علي السور: اهووو دولي انتَ

-علي النور: انچبب انتَ وعدتني

-علي السور: هو صوچي اواعد زعاطيط

-علي النور: دكل تبننن

كفخه على راسه وطلع من المطبخ وركض سور وراه يريد يضربه، ضحكت سبأ على حركاتهم وكالت بعدما فرغ المطبخ منهم..

-وعلي فد يونسون همه ملح وبهارات البيت

-تالة: اي تَـمني تكول

-انتِ لو تشوفينهم من يجي تقي هههههههه كل واحد يكعدله من جهة يتوسلون بي وياريت لو اعرف على شنو كله يحجون بالالغاز وعلي الحق من يشوفهم قريبين على تقي يطردهم ويكتلهم عبنه يغار

-يااا يغار على تقي؟

ضحكت تهز براسها وكملت وهي تنصي النار على قوري الچاي..

-خية بهالبيت الولد صايرين احزاب كلمن عنده ثنائي يدافعله وقريب منه

-اممم.. و.. وكرار قريب على منو؟

-كرار حبيب وصاحب الكل ما يفضل احد على احد بس اشوفنه اغلب وقته ويه علي التـقي وعلي الحق طلعاتهم ووناستهم كله سوه بس اوكات يميل ويه سور ونور بعد حسب مزاجه

هزيت راسي مبتسمة وعكست عيني على الصالة شفته كاعد على القنفة وديگلب بتلفونه، تنهدت مقهورة من تذكرت اخر موقف صار بيناتنه لحد هاللحظة حاز بخاطري وضايجة من نفسي وتصرفي وضايجة اكثر لان احسه حاقد عليَّ وكارهني..

-سبأ: انا راح اودي الچاي للنسوان وانتِ صيحي البنيات ينزلن يشربن جوه

طلعت قبلها من المطبخ وعبرت الصالة بدون لا اوكف واحجي وياه، صعدت فوك صحت للبنات ونزلنا سوه ورحنا كلنا للاستقبال نشرب چاي وناكل كيك..

-تالة بهمس: اكولج عبق لعد سلاوي بلاوي وين؟

-عبق: رايحة تزور حبيبة

-حنين: شفت كل البنات عدى ابرار وينها مشتاقتلها؟

-رسمية: بعد روحي، برورة شوي تعبانة وبالغرفة نايمة

-حنين: الله يساعدها ثگل حملها ما بقى شي على ولادتها يمكن مو؟

-رسمية: اي صلوات بشهرها كله چم يوم وينور وليد علي الدر

-حنين: يا فدوة حبيبتي حامل بولد؟

-رسمية: والله مادري شو كلما تسوي سونار الفرخ كاعد على مقعده ما يبين بس الدكتورة كالتلها على حجمه اظنه ولد

قضينا باقي الكعدة بالسوالف ومحسينا بالوقت، عبق شوية وترخصت لان باجر عدها امتحان ومو مال تلتهي فـ بقيت ويه شمس وسبأ اسولف.. اتوالم ويه شمس واحب گعدتها وناسة خصوصاً من تحجي بزوجها ومن تعلم سبأ على شغلات المتزوجات اتونس خرب عرضي شكد رعنة..

-شمس: سبأ صدگ تذكرت اول امس اشتريت عطر كللش حلو بس شو بدر ما حبه خايبة غير متت قهر امس رشيت منه والزلمة راد يذب من راسه لعبانة روحه تاخذينه انتِ؟

-سبأ: خايبة تنطينياه خاطر تقي يذب من راسه لو شني

متت ضحك وشمس ضربت على رجل سبأ تضحك، هزت راسها بـ لا وكالت..

-لاا ولج خوب الزلم اذواق يجوز تقي يحبه عليج تعاي شمي اذا ما تردينه اذبه

-تالة: اذا عاجبج ليش تذبي خو رشي من ميكون موجود؟

-شمس: لا ماحب استخدم شي ما يعجب علي البـدر طلع من عيني بعد

-سبأ: جيبي اشمنه

-شمس: گومن لغرفتي احسن.. امشي تالة لا تظلين هنا

هزيت راسي وگمت وياهن ومثل كل مرة من ادخل لغرفة شمس احس روحي تنشرح اويليي على العطر وعلى الترتيب والنزاكة والنظافة الغرفة تصرخ اني نظيفة وصاحبتي كلها انوثة على كولة تَـمني ما اللوم علي البـدر ليش لهدرجة يحبها ومتعلق بيها غير من وره ترتيبها وغنجها ودلعها عليه بكل ركن من الغرفة الها بصمة خاصة بيها ما شاء الله..

-سبأ: الله يخبببل هذا تالة شمي

-تالة: صدگ يجنن حبيته كلش ريحته فراولة

-شمس: بدري ما يحب هاي العطور يضوج منهن وانا عكسه احبهن

انطت العطر لـ سبأ ووكفنا نسولف على امور عشوائية واكثر وحدة تسأل بينا هي سبأ، حرفياً على كلشي سألت شمس شلون عطر غرفتج هيج وكل شكد لازم نغير الفرشة وشنو اسم المعطر ومنين تشترين ملابسج وووو... ما خلت سؤال يعتب عليها وشمس تجاوبها بحب لان واضح سبأ تريد تتعلم حتى تجذب زوجها وتحببه بيها ودتبذل قصارى جهدها..

بديت استحي من حجي المتزوجات فـ قررت ارجع اكعد يم امي علما يكملن ويجن، طلعت من الغرفة وسافرت نظراتي للمكان الچان كاعد بي علي الكـرار وجذب انتباهي تارك تلفوناته ثنينهن على يدة القنفة ويه بصمة سيارته.. بلعت ريگي وظليت اباوعلهن وبداخلي فكرة بس ماعرف شكد نسبة نجاحها..

قررت اسويها وشيصير خلي يصير، باوعت منا ومناك اتأكد ماكو احد وطلعت تلفوني من جيبي ووخرت الگفر وطلعت السيم كارت ورحت يم تلفونه.. شلت الموبايل بيدي وقارنته بتلفوني نفسه بالضبط حتى نفس اللون ونوعية الجهاز بس الخلفية تختلف شفته حاط خلفية ايفون العادية فـ غيرت خلفيتي وحطيت موبايلي بدال تلفونه ومالته رجعته بجيبي وركضت للاستقبال اكعد ويه النسوان..

كعدت وبداخلي اتمنى تنجح هالفكرة يارب ينتبه من ارجع للبيت حتى يضطر يجي النا يجيبه ومناك تصيرلي فرصة ابررله سوء التفاهم اليخزي الصار بيناتنا.. صراحة ماعرف يا موقف لازم ابررله بالضبط، موقف العرس من تكاتل ويه الزلم لو موقف من عطت عليه وفشلته من وكعت الكهوة على صدري..

تنهدت مختنگة وعيني ظلت على باب الاستقبال، رجعن البنات يمنا ورجعت السوالف امي محست على نفسها وكعدت هواي حتى اذان المغرب محد انتبهله الا من سبأ كالت..

-عمة صارت 8:30 راح يرجعون الولد وما مسويات عشا بعدنا

-رسمية: ياا سودة بوجهي وما مصليات كومن كومن نصلي لا تفوتنا

ترخصت امي وكالت نرجع نصلي ببيتنا بس خالة رسمية حلفت منطلع بدون عشا واني قبلت واستغربت شعجب تقبل بس چنها ماما هم دتحس بالضوجة واحنه وحدنا هنا لا نعرف احد ولا صديقات كاعدات بين اربع حيطان ونتأمل زيارة تَـمني كل كم يوم لبيتنا..

بعدنا كاعدين على المصلاية هستونا كملنا صلاة وفزيت على صوت عياط بنية جاي من الصالة، طلعت خالة رسمية تركض تشوف شكو وكلنا لحگناها.. شفنا حيدر كاعد على الكرسي المتحرك وامه واكفة ايدها وره ظهرها والايد الثانية على بطنها وتبجي وتصيح..

-حيدر: حبوبة امييي حبووبة

-رسمية: يمة اسم الله شبيچ يمة ولج ابررار شبيچ

-ابرار: وجعع عمة وجعععع راح امووت وووجع

-حيدر: هسة اخذج للطبيب يوم

گالها ولزم الكرسي بيده ثنينهن شلون اليريد يكوم وتذكر هو ميكدر يمشي، انكسر گلبي على موقفه وعلى نظرات عيونه الذبلت مهضوم ومستحي بنفس الوقت، بلع ريگه مكسور ومشى بعجلات الكرسي مالته وكال بصوت مبين حابس بي الغصة..

-حيدر: هسة اتصل بعمي ابا الحسن هو ياخذج

-رسمية: يلا بينما اللبسها عباتها امشي يمة امشي

اخذتها خالة رسمية لغرفتها وراحت امي وياهن تساعدها لبسوها حجاب وعباية وصوت ابرار رج البيت رج من العياط تطلگ من الوجع، دقايق قليلة واجه ابا الحسن علي ممفتهم شكو بس من شاف وضع ابرار عرف دتجيب فـ طلع قبلهن يحضر السيارة لان علي الدر مو هنا ببغداد واجب..

-رسمية: شمسه خابري سلوى ترجع بساع وتلاكينا بالمستشفى تعينني

-حنين: ماكو داعي ام علي اني موجودة اجي وياج

-رسمية: مو خاف زحمة عليج ام تالة

-لا ابد ماكو زحمة الله يسهل عليها ان شاء الله

مشوها يطلعوها ورادت تروح وياهن شمس ورسمية ما قبلت تخاف عليها لا تتعب لان هم حامل، قبل لا تطلع امي اللتفتت عليَّ وگالت بتحذير..

-انتبهي على نفسج ماما تالة وابقي ويه البنات لا تكعدين وحدج

-تالة: حاضر

هزت راسها وطلعت بس حسيتها ممرتاحة وظلت تتلفت تباوعلي، كعدنا البنات بالصالة ويه حيدر الخانس ومنزل عيونه على حضنه يباوع لرجله وراحت سبأ تجيب قران حتى نقرالها سورة مريم لتسهيل الولادة..

استمرينا هيج بين النقرا قران وبين نتصفن وصارت دقيقة تجر دقيقة وابرار بعدها بالمستشفى كلما نتصل من تلفون شمس تكول خالة رسمية ادعولها عدها ولادة بس متعسرة كلش.. للعشرة بالليل رجعوا الولد وعلي البدر گبله طلع للمستشفى يلحگهن..

بده يتأخر الوقت وقلقنا عليها بديت انعس وماكدر انام ظل بالي ويه تلفوني الي لسه ما رجع كرار وجابه، اخوته رجعوا الا هو ما اجه معقولة لهدرجة يتأخر بالطلعة؟

-شمس: هاي عمتي تتصل...

-حيدر: يا الله

-شمس: ها عمة... صدگ؟؟؟ الحمدلله.. الحمدلله على سلامتها..

-سبأ: جابت؟؟

-شمس: اي اي الحمدلله جابت

-حيدر: ياا علي الحمدلله والشكرر الحمدلله

ضحك فرحان ورأساً طلع تلفونه واتصل على سور حتى ياخذه للمستشفى لان وعدوه من تجيب امه ياخذوه، دقايق ودخلوا سور ونور يهلهلون ويهزون چتف ومتت ضحك من نور هز رگبته مثل السبرنگ وگال..

-وهلااا بيها هلااا بيها والصاايغ تراچيها وهلاا بيها هلاا بيهاا

-حيدر: شني شمالهم ذولة

-علي السور: خايب اجتك اخت تشگ الراس شگ

-حيدر: امي جابت بت؟؟؟

-علي النور: ولك ايي وتكول امي بيضة ودبدوبة تخبل اللهم صل على محمد وال محمد

فرحته صارت اضعاف طاار حيدر بمكانه خطية يريد بس يگوم ويروحلهم، سحلوه سور ونور يطلعون وياهم للمستشفى وشمس كالت ناكل لگمة ونروح ننام لان تأخر الوقت..

-تالة: اني ماشتهي بنات

-شمس: ليش بدر جاب عشا

-لا والله ماريد

-براحتج بعد، چا نامي ويه عبق احسنلج واريحلچ

-تالة: مو خاف يدخل علي الحـق للغرفة وميدري اني موجودة؟

-سبأ: لا حق وتقي ودر ثلاثتهم واجب مو هنا

هزيت راسي وصعدت يمها بس ما لگيتها بالغرفة كعدت شوية انتظرها وبديت اغفي من النعاس وعبق ماكو، كمت من مكاني افتر بالغرفة انتظر رجعة كرار حتى اخذ تلفوني والتعب ذبحني اريد بس انام، باوعت للساعة راح تصير 1:30 بالليل والافندي ماكو شنو الموضوع هذا وين يروح بنصاص الليالي؟

طلعت من غرفة عبق اروح للحمام وسمعت صوتها جاي من وحدة من الغرف شلون التهذي، خفت وظليت اتبع صوتها لحدما وصلت يم باب الغرفة وفتحت الباب على كيفي وانهبطتت..

-عبببق

-ها

ذبيت نفس مخترعة يمة هاي شدتسوي، نايمة على الجرباية ورافعة رجل على تاج السرير والرجل الثانية حاطتها على ميز الكومدي فوك التيبل لامب، ناثرة شعرها على الفراش وشايلة الكتاب بأيد والايد الثانية لازمة حبل وتفر بي..

-خرعتيني عبق عبالي بيج شي

-لا دا ادرس

-چنتي تهذين

-ادري

-يعني انتِ هيج تقرين؟

-اي

-ملگيتج بالغرفة واجيت ادورج هاي غرفة منو كاعدة بيها؟

-غرفة علي الحـق احب ادرس هنا احس احفظ اسرع

-هاا غرفة الحبيب موو

-ههههه ولي لج

ضحكت وطلعت اعوفها براحتها تدرس على طريقتها الغريبة، رجعت لغرفتها ومليت اكثر من الانتظار اريد تلفوني شنو هاي ضجت انوب تلفون كرار بي رمز وكلشي مدا اكدر اسوي بي..

تصالفت شوية وتجرأت ونزلت جوه لان جوعانة انمردت روحي من الجوع اريد أي شي اكله، تمشيت للمطبخ على كيفي وفتحت الثلاجة طلعت منها جبن مثلثات وكعدت على الكرسي اكله خالي وعيني على الساعة الدتمشي ابطئ من السلحفاة..

اكلت وشربت مي واكلت وراهة تفاحة وعلي الكرار ما رجع! بده الانتظار يصير مزعج بس كلت يمكن رايح للمستشفى لأبرار وطلعت غلطانة لان قريب لا تصير 2 بالليل انفتحت باب المطبخ ودخل منها يدندن بشي مسلطن على الاخر بدون لا ينتبه لوجودي..

-كرار

اللتفت لاتجاهي وتفاجأ من شافني كاعدة، عدل وگفته المايلة وتقرب شوية صار مقابيلي مباشرةً حط ايده بجيب البنطرون وكال..

-نعم

-شلونها ابرار ان شاء الله زينة؟

-شبيها ابرار؟

-غير جابت

-ابرار جابت؟!

-اي يعني مچنت بالمستشفى انتَ؟

-لا

-هاا لعد وين جنت لهالوقت؟

-شعليج

صدمني نترها بوجهي مزعوج وعافني وراد يطلع من المطبخ..

-لحظة!

-خير تالة؟

-انتَ شبيك تحاچيني من طرف خشمك شدعوة عليك

-تالة جنت طالع ومتونس ومزاجي حلو لا تجيبيلي مشكلة وتلزگيها بيه مالي خلگ

-اجيبلك مشكلة؟ ليش عيني اشايفني؟!

-تصبحين على خير

-كرار دا احجي وياك!

-شتردين؟؟ احجي شتريدين تالة!

-شبيك انتَ شنو هالاسلوب المحلو!

تنهد يفرك وجهه وغير نبرة صوته للطافة وقهرني بالزايد لان حسيته گوة عليه ديحجي ويايه على كيفه..

-تفصلي خيتي ليش كاعدة هنا تنتظريني خير ان شاء الله؟

-انتظرك؟ تره هواي مصدگ نفسك انتَ!

-چا شمكعدج هنا بنصاص الليالي المن تنتظرين؟

-منو يكول دا انتظرك الك؟ يمكن احد ثاني؟

حسيت چفصت من جحظ عيونه وفتح حلگه بنفس الوقت، دار وجهه على جهة الصالة ورجع باوعلي وگال..

-احجي شعندج سولفي

-منو سمحلك تاخذ تلفوني؟

-خير؟؟

-تلفوني عندك رجعلياه

-شصخم بموبايلج انا؟؟ لو هاي هم بلية جديدة؟؟؟

-شبيك كرار شبييك

-اششش صوتج لا يعلي لا يسمع ابوي وتلفيلنا سالفة بهالليل

-انتَ صدگ تحجي! تره تلفوني الايفون يمك!

ما جاوبني ومد ايده بجيبه يطلع تلفوناته ثنينهن، لزم الايفون وضوه الشاشة كتب الرمز بي ويطلعله غلط كتبه مرة ثانية ويطلعله هم غلط..

-تالة: اكتب 1979

كتب الرقم وفوراً انفتح التلفون ورفع عيونه يباوعلي، چتفت ايدي لصدري وگلت بأنزعاج..

-شفت؟

-شيسوي هذا يمي مادري بي والله

-يعني ما انتبهت عليه معقولة؟

-لا والله مو انا استعمل الثاني اكثر شي

-حلو، لعد بالبداية افتهم قبل لا تنتر وتعصب وهسة رجعلي التلفون

قدملي التلفون اخذته من ايده وانطيته مالته، ضحكت مستهزأة وكلت واني افر بيدي اريد استفزه..

-ههههه يكول شعندج منتظرتني عشتو

-اي المن منتظرة بهالليل؟

-شعليك

-هم صدگ انا شكو حاط روحي

عافني وطلع من المطبخ ضجت اكثر لان للمرة المية ما حچينا بسبب غبائي واستفزازي الماله داعي وهيج خطتي بائت بالفشل الذرييع وصار لازم اكمل حياتي وهذا الانسان يكرهني وميطيق حتى يحجي ويايه و...

-لا تظلين وحدج هنا وصعدي فوگ

فزيت من شفته واكف بباب المطبخ بدون لا يدخل وحچى ويايه مناك، رفعت راسي عن تلفوني مستغربة اباوعله بدون لا اجاوب..

-صعدي الوكت تأخر

-واذا؟

-ما يصلح البيت كله زلم لا تظلين وحدج هنا ماريد تجيچ حچاية

-منو يحجي عليَّ ماكو احد اصلاً

-ابوي نايم بغرفته ما راح يرضى على كعدتج هنا وحيدج

-عادي اني...

-لوو بس افتهم ليش تعاندن ارتاح!

-منو احنه؟

-شني؟

-كلت "تعاندن" منو قصدك بيها؟

-انتِ

-اني وحدة وانتَ حجيت بجمع مؤنث سالم ليش؟

-شمدريني هي صارت بعد

-مبين هواي تحجي ويه بنات كرار

-هاااااا اكيد هاي مصيبة جديدة تردين تورطيني بيها مو!

-انتَ شبيك شنو سالفتك ليش محسسني بس اريد اورطك واريد اضوجك؟

-افعالج تدل على هذا الشي! انا مالي خلگ مشاكل ملييت وبزعت روحي لعبت ام روحي من اتهاماتج والمواقف التفشل الجاي تحطيني بيها تالة!

-اعرف وحقك

فتح حلگه ديحجي بعد وسكت فجأة من جاوبته هالشكل، صفن خانس وملامحه العصبية تغيرت من تقدمت عليه واردفت بهدوء واحترام..

-اني اسفة على المواقف السخيفة الحطيتك بيها صدگني ما قصدت اني بس اخاف لا امي تفهمني غلط.. فكرت واهتميت بنظرة امي على حسابك وقهرتك مني وانتَ متستاهل ماكو مثل احترامك ورزانتك ويايه اني اسفة كرار اتمنى تقبل اعتذاري

-ها؟..

-اسفة

-يعني شني

-يعني اسفة

-وانا هم

-انتَ هم اسف؟ بس ليش؟

-مادري والله

-ههههه لعد ليش تعتذر

-شمدريني كلت اكولها على الواهس

-ماشي اعتذارك مقبول

-ليش انا شمسويلج؟

-مادري غير انتَ دتعتذر

-خلص سحبتها مو اسف هو انا متكفخ تكفخ انوب اعتذر وين صايرة هاي

-تمام

ابتسمت ممتنة لانه رجع على طبيعته وهو رجعلي الابتسامة يهز براسه، وخرت شعري عن وجهي وكلت بنفس الهدوء..

-تره مچنت انتظر احد لا عبالك

-ادري

-اي ماردتك تفكر بيه بطريقة محلوة

-مافكر لا تخافين

-اممم.. صدگ مبروك على الترقية

-الله يبارك بيج بس شمعرفج؟

-خالة رسمية گلتلنا اليوم

-بعد هاي سوالف امي

ابتسمت وسوه نفس الشي رجعلي الابتسامة، توترت من وكفتي ومن نظراته وحسيت بوجهي صار حار كلش اريد اشرد واريد ابقى اسولف وياه بنفس الوقت ماعرف بشنو احس من اوكف يمه بس شعور يجنن واتمناه ميروح..

-تالة: يلا بعد تصبح على خير

-انتِ من اهله

بقى على وكفته بباب المطبخ واني الي عبرته اطلع، تقربنا من بعض لدرجة ردت اطخ بي بس هو استوعب ووخر بالوقت الضائع وابتعد مني كم خطوة وگال بأستعجال..

-تالة

-نعم

-ارجع اوصلج للدوام سنة اللخ؟

ابتسمت وعضيت على شفتي اخفيها ما توقعته مفكر بالدوام ولا بتوصلينا بس ماكدرت اخفي ابتسامتي اكثر من كال بطريقة يبرر لروحه..

-اوصلچ خاطر ابوگ منج مسلسلات حلوة

-يعني انتَ تسمعني من احجي لـ تَـمني على مسلسلة؟

-لا يعني... لا.. ههههههه

ضحك يغطي عيونه بچف ايده بحركة لطيفة مال واحد مستحي، ضحكت وياه وهزيت راسي وهمست بصوت ناصي لا يسمعونا النايمين..

-يحتاج ارجع اتلوگ لامي بلكت تقنع

-قنعيها

همسها بنفس نبرتي وابتسامته مزينة وجهه الملتحي، بلعت ريگي وسديت حلكي ماريد احجي بعد لا افضح نفسي بشي غبي ميصير استخف لازم اتحكم بنفسي واثگل.. رفعت ايدي بحركة باي وكملت طريقي للدرج واستوقفني صوته من گال بصوت وصلني..

-تالة اذا تقدملچ زلمة هاويچ توافقين؟!.....

**

-انتبه لنفسك لا تخليني ادوس وياك بالحچي عيبب هالتصرفات عيب بگد امك انا!!

-بگد امي وكل البلا بيج ضاحكة على الدنيا كلها بوجهج الحلو

-اشششش صوتك نصيي ولك

-ليش تخافين لا يسمعوني النايمين بالبيت؟

-انچببب وخلصني كول شتريد فضنيي

-اريد فلوس

-اسبوع الفات دزيتلك هو كل يوم؟!

-محتاج شغلي ما جاي يجيب وحالنا بالضيم اريد فلوس

-واذا ما انطيتك؟؟

-افضحج واخزيج اخلي طاري اسمج على كل لسان

-اياا ارعن يا ناكر الجميل!

-سمعيني ولا تظلين تلوصين بالحجي! والعباس افضحج وما يوكف بوجهي اكبر عگال اعترف بكلشي واگلهم انتِ السبب بكل الجاي يعيشونه اهل هالبيت اخلي شيخ علي يذبحج عكس القبلة بيده!

-هاي شبيك حبيبي انتَ ليش هيج جاي تسوي يا عمري

-لا تاخذيني بالحبيات والغراميات بعلي اگلهم انتِ الجاي تلعبين بعقل مرة الامير وسودنتيها وانتِ الوديتي عبق لذيج المستشفى وانتِ التردين تسحرين علي الحـق وتگلبي على مرته خاطر يعوفها وانتِ الجاي تطببينه على مرة الامير وتسهلين دربنا خاطر نفضحها بين اهل البيت ويگولون عدها سوالف زلم! كلشيي عندي ضدج وبالدليل فـ هسة احترمي نفسج وجيبيلي الفلوس وصيري خوش ادمية

-انطيك بشرط!

-هاا وبعدج تتشرطين؟!

-اي.. كلشي تريده يوصل حدر رجليك بشرط تسوي الاگلك عليه بالحرف.....

**

"حـــبيبة"
كاعدة على السرير امشط شعر التوأم الصغار رقية وسكينة وافكر بـ بنية علي الدر "فاطمة" فدوة لگلبها تجنن ما شاء الله عليها، ابوي ومرة ابوي طايرين بيها طيور وابرار كل ساع تعاين لوجهها وتضحك ما مصدگة جابت بت حسبالها حامل بولد، ظالين احنه وياهة كل ساع نخابر على ابوها ونغوره سودة عليَّ لليوم ما شافها صار عمر الطفلة اسبوع وهو ببغداد يلوب يريد بس يرجع وما جاي يكدر من وره الشغل..

رجعت ويه البنيات من گامت سكينة تطلع بره الغرفة وبقت رقية يمي، نزلت عيوني اعاين لوجهها حاطة اصبعها بحلگها خجلانة واشرتلي على شعرها تگول بعفوية..

-اريدن گرون

-حبيبة: مو كليتيلي تردين گصايب؟

-چا ليش سكينة سويتيلها گرون

-عبن سكينة طلبت گرون انتِ ردتي گصايب نفس عمة هدية

-اووع ماريد غيرت رأيي

ضحكت واشرت على عيوني بأصبعي وجريتها اگعدها گبالي افل گصايبها واسويلها گرون.. تنهدت امشط بشعرها متحسرة على حالي هذا وضعي ما تغير من يوم تزوجت منتصر لليوم انا اللوب بالبيت واضيع وكتي بالشغل وبين بناته ماريد افكر بمشاعري اله اريد بس تمر هالچم يوم على خير وارجع لاهلي اطلب الطلاگ..

-رقية: شكراً ماما

تفاجأت من باست خدي وصاحتلي "ماما" ولا ارادي ابتسمت على لطافتها بس الي غيّب ابتسامتي هو دخول منتصر للغرفة مبين هاي رجعته من الدوام..

-السلام عليكم

-عليكم السلام

-شلونچ عنون

-بخير الحمدلله

-رقية: بابا بابا شوف حبيبة شنو سوتلي

-يا جمالج يا بابا

شالها من الكاع يبوس بيها ويكض بشعرها ويتغزل، ابتسمت على منظرها شلون فرحانة بيهن وتهز براسها خاطر يتحركون..

-منتصر: چا وينها سكينة؟

-رقية: راحت يم عمة

-منتصر: زين گلتي لعمة حبيبة شكراً؟

-رقية: اي اي

-عفية ببنيتي

نزلها من ايده وهي راحت تركض تطلع من الغرفة برجليناتها الصغار، ابتسمت على منظرها تخبل شكد احب هالبنيات ومتعلقة بيهن وافرح من اشوفهن فرحانات لو متونسات..

-منتصر: هواي جاي اتعبج ويه البنيات

-لا عادي

-شكراً حبيبة لانچ مهتمتلهن صار هواي ما شايف بناتي هيج نظيفات ومرتبات

-ما سويت شي

هز راسه وكعد على الجرباية، كمت من حسيته صار قريب مني ورحت للميز الهي بروحي..

-حبيبة

-نعم

-لشوكت نظل على هالحال؟

-يا حال؟

-خلينا نتفاهم حبيبة ما يصير هالوضع

-ما جاي افتهم عليك

-انتِ بجهة وانا بجهة، ما يصير هيج احنه متزوجين

-منتصر انا گتلك كله چم يوم ونتطلگ لو نسيت؟

-ليش ما ترضين تنطيني فرصة ليش تردين تدمرين حياتج بيدج ليش؟؟

-راح نرجع على نفس الاسطوانة جاي اگلك ما راح تدمر حياتي وانا رايدة اتطلگ

-حبيبة ماريد هالشي يأثر على علاقتي بيج وبأهلج ماعندي غيركم انا ليش ما تصدكين سويت كل هالشي عبني اعزج واخاف عليج؟

-يا ابن عمي مصدگة وانا ممنونة منك ساعدتني وهذا هو شكراً صار وكت تلتفت لنفسك وحياتك وتتزوج البت التريدها وانا بنفسي اروح اخطبلك رهف ولا تخاف لا راح تخرب علاقتك بيه ولا بأخوتي

-اااااااخ شيقنعها يالحمزة

-انتَ مو عندك شغل؟ روح لا تبطى

گام من مكانه ضايج ومثل ما طلع اليوم الصبح راح بنفس الهدوم ونفس الضيج، ما اعرف شيريد بالضبط هالزلمة حيرني وخلاني اضرب اخماس بأسداس.. ساعات احسه يريدني ويريد رهف بنفس الوكت لا جاي يقتنع يعوفني ولا يقتنع ينسى رهف الي كلما يسولف وياي اشوفها بعيونه واسمع اسمها بحسرته..

نزلت دموعي مهضومة على نفسي، انقهر من روحي عبني جنت عمية كل هالسنين وما راضية اشوف الحقيقة جنت افسر كل نظرة منه حب وكل اهتمام عشگ.. چنت مغمضة جفوني واناظر بعيون گلبي...

تمددت على فراشي اريح نفسي من جبل الهَم التارس صدري تعبت من هالحال، تعبت اعيش ويه الاحبه جوه سگف واحد واجاهد خاطر ما اللين واعاين بعيونه.. تنهدت وهستوها غمضت عيني جاي اغفى وفزيت على صوت فتح باب غرفتي، شلت راسي شفت صفا واكفة وبيدها شايلة نجانة عجين جبيرة ولافة شال على خصرها تشيل بي دشداشتها..

-هاا نايمة؟

-لا هيج متمددة

-تعالي ساعدينا بالخبز تكدرين؟

-اي اكدر، جاية

ابتسمت واني احجيها وهي رجعتلي الابتسامة وطلعت گبلي، كمت ولبست ربطة لفيتها بشكل عكسي على راسي خاطر شعري ما يتلف من حرارة التنور وطلعت وراهة شفت هدية وزينب كاعدات يكرزن حب ويتابعن مسلسل..

-زينب: اكو بعض الناس هواي جاي يتنعوصون لعبوا ارواحنا

-هدية: اي والله

-زينب: حسبالهم بعدهم ببيت ابوهم

-هدية: ههههههه عاوزهم راشدي يصحيهم

غلست عليهن ما مهتمة ولو متأكدة انا المقصودة بالحجي بس مالي خلگ راسي يوجعني ومالي واهس اتعارك، صعدت للسطح ويه صفا ووگفنا نشنگ العجين ونحطه فوك صينية الطحين..

-صفا: مادري بيج تخبزين

-ما اخبز، گبل چنت اوكف ويه عبق اشنگلها العجين بس ماعرف اخبز وهاي اول مرة راح اجرب

-چا انتبهي لـ لهيب التنور

هزيت راسي واخذت العجينة افردها على المخدة، فتحت غطا التنور وسميت بأسم الله ومديت ايدي لزكت العجينة وطلعتها بساع خايفة لا يلوحني نار..

-صفا: ههههه صاكة بمچانچ مبين اول مرة

-اي والله

-لا هسة تتعلمين ما ينرادله شي عايني

سوت وحدة گدامي ومدت ايدها بنص التنور وولا انچوت عجبتني، وكفت اراقبها شلون تخبز واساعدها وعلى وكفتنا صعدت هدية ووياهة سكينة..

-هدية: هاا شجاي تسون

-صفا: تعاي عايني لـ حبيبة شون تخبز ما شاء الله بساع تعلمت

-هدية: شينرادله هو

-صفا: مو هي ما تعرف

-هدية: شو اشوف بس گبلها نزعي الربطة طالعة تضحكين ههههه

جرت الربطة من راسي وهم ما اهتميت تحير شتسوي حتى تغثني، اخذت عجينة كدامها وفردتها على المخدة وفتحت غطا التنور وبعدني جاي امد ايدي خاطر اللزك العجينة جوه وما حسيت الا على دفعة قوووية اجتني من وره وگعتني فوك التنور وراسي يطب بنصه ويلفحني لهيب النار.......

يتبع 👑....

━━━━━━ ♛ ━━━━━━

الامـير علي ينرادله علامة استفهام شكبرها من هسة اگوللكم❓

حبيبة المسكينة شكدد مقهورة عليها 😩

ليلة وابا الحسن بحث اخر صراحة هالثنائي احبببه والهم خانة خاصة بگلبي ماتحمل زعلهم ✋🏻

اخيراً احبكم هواايه وشكراً على تفاعلكم وحبكم للقصة ممتنة امتنان عظيييم 🫂🤍♥️♥️♥️