الامارة الفصل الرابع وستون 64 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

المشكلة عيونك هنّه هنّه
چا وين وديت المَحنّة ؟ ♥️

━━━━━━ ♛ ━━━━━━

"حــبيبة"
طاح گلبي من شفت غفار بوجهي ومن الخوف رهف كضت ايدي لدرجة نبتت اظافرها بيه، صديت عيوني عنه ودعيت بگلبي كون ما سمع الحچيناه..

-غفار: يا هلاا ما صدكت من كالت امي حبيبة دايسة دارنا الا من سمعت صوتج جاي من غرفة اختي

-رهف: غفار..

-غفار: سكتي انتِ!!

جريت رهف اضمها وره ظهري البت يابسة من الخوف وعيونها متروسة دموع، اشرتله بيدي بحركة وخر وكلت بهدوء..

-شوي من رخصتك اريد اطلع

-غفار: وين تطلعين

-انزل جوه لابوي واخوتي

-اوكفي رايدج بچلمة

-غفار وخر عن طريقي اريد اطلع!

-انتِ شبيچ؟؟ شنو هالغرور والتكبر يمته تبطلين هالتصرفات!

-اذا ماريد احجي وياك صرت مغرورة؟

-مغرورة ونص! شايفة روحج على العالم على شنوو؟ هاي وانتِ مطلگة ومحترگة هم!

حچيه قاسي بس والله ولا اثر بيه لان اعرف نفسيته شكد دنيئة وحقيرة، ما اهتميتله وعدلت جنطتي الي على چتفي وجريت ايد رهف وياي اريد اجتازه واطلع بس ما رضى وكف بالباب يسدها علينا..

-غفار: ما قصدت الگلته حبيبة

-وخر

-انتِ تعصبيني!! انتِ بهذا برودج تستفزيني شمسويلج وكل هالحقد بكلبج عليَّ؟!

-خوية وخر عن طريقي! مو حالة هااي ماريد احجي وياك مارريد زيح هيج خلينا نطلع من الغرفة!

-انتِ مو مال احترااام

كضني من ايدي ولواها حييل، صرخت متوجعة وصم حلگي بيده ودفعني لزكني ويه الحايط متت بدمي عصبية وخوف بنفس الوقت.. رجف گلبي ويه صوت صياح رهف وشلون النذل رفسها برجله من اجت تفزعلي..

-رهف: حراام عليك وخرر يا الما تخاف الله وخررر

-غفار: وخري لا تنطگين انتِ!!

رفسها برجله مرة ثانية وطيحها بالكاع خلاني اشووط من القهر، كامت بسرعة وبقت تتعارك وياه بيدها وتجره مني وهو قافل لازمني بكل قوته ويضغط على وجهي بالحايط احس خشمي راح يطگ..

-رهف: توخرر لا اذبحك بيددي غفاار

-غفار: ههههه تهدديني بقلم كحل؟

-رهف: احطه بعينك والله!!!

رخت ايده مني شوي چنه يريد يكتلها واستغليت هالفرصة وفلتت نفسي منه ودست على رجله بكعب حذائي شاغت روحه..

-حبيبة: حقيير نذذل ماعندك شررف! انا اعلمك اخلي ابوي واخوتي يتصرفون وياك يا زبااااالة

كضيت رهف وركضت اهرول اطلع من غرفتها وحسيت بي يجرني من شالي من وره راد ينزعه من راسي، اللتفتت بكل جسمي عليه ارجف غضب تمنيت اذبحه بيدي واشرب من دمه..

-حبيبة: هدددني ووولك

-غفار: اوكفي اووكفي لا ترحين ما عندي شي وياچ انا بس اريد احاچيچ!

-حبيبة: وانا ماااريد

-غفار: لا تصيحين حبيبة صوتج يوصل!

-هذا الاريده انا شيل ايدك من حجابي لا افضحكم واشهركم وعلي

-وما تخافين على سمعتج وانتِ مطلگة؟؟؟

-مطلگة واشرفك واشرف عشرة من امثالك لا عبالك تستفزني هالچلمة

-عايني حالج عاينيي الله گلبها بيج امج مسجونة ووجهج محترگ ومطلگة دگ بلاوي على راسج وبعدها رجليج ما لايحة الكاع

-حبيبة: مطلكة، محتركة، امي مسجونة وبعدك تركض وراي! احترم نفسك وعوفني غفار لا والعباس ابو فاضل اشهرك شهيرة واخلي سيرتك على كل لسان!

-غفار: ياهو يصدكج وانتِ حرمة؟ تحجين عليّ چلمة تنردلج اضعاف وسمعتج تصير بين الرجلين

-رهف: حبيبة عوفي مالج غرض لا تجاوبي

-حبيبة: عود حسبالك اخاف من تحجي هيج؟؟ لا والله بالعكس عبن اعرف شنو نيتك انتَ متعمد تأذيني وتسويلك سالفة خاطر تورطني وياك هالدروب مو عليَّ حفظت سوالفكم!

-غفار: ولج ماكو هيج صلافة! ترباية شيخ علي وسلوى ما اعتب عليج

ما تعبت نفسي وجاوبته بعد عفته وطلعت من غرفة رهف اركض وامشي رهف كدامي خاف يسويلها شي.. وصلنا لممر درجهم جاي نريد نعبره وشهگت من انشنطت ايدي وانجريت بحركة عنيفة قوية من غفار..

-حبيبة: عوفـ...

-غفار: احبج اناا احبج ليش ما جاي تفهمينن ولج سودنتيني يمته تحنين عليَّ وتصيرين الي حبيبة!!

-حبيبة: بأحلاامك هد ايدي

عتيت ايدي منه وركضت ويه رهف ننزل الدرج واسمعه يصيح بصوت مو كلش عالي..

-غفار: ما قصدت اضوجچ وينج حبيبة لا ترحين خليني افهمجج لاا ترحييييين

طلعت مثل المخبلة من بيتهم اخاف على روحي منهم اساساً اني اجيت هنا وابوي ما راضي گوة قبل وكال ما اتأخر دقايق وارجع للسيارة علي الكرار كاعد ينتظرني هناك..

طبگت رهف باب المطبخ ورانه وطلعت وياي للساحة، ودعتها بباب الحوش وگبل لا اطلع كضت ايدي وعيونها مدمعة، نزلت دمعتها مقهورة وكالت بحسرة..

-انا اسفة حبيبة، اسفة لان بكل مرة تجين لبيتنا تطلعين وانتِ خايفة

-مو ذنبج رهيفة لا تهتمين، يلا مع السلامة

-حبيبة اوكفي

وكفت بس عيني على الباب گلبي مقموت خايفة لا يطلع غفار من جديد ونتلاگه وتصير مشكلة جديدة..

-رهف: انا راح ارفض علي السور واعتبري الموضوع ما صار من اساسه

-حبيبة: ليش

-ماريد اخليج بموقف مو حلو ويه اخوج وحگچ خايفة عليه مني انا راح احل السالفة لا تهتمين وانسي الصار امانة

-رهف..

-حبيبة امانة الله ورسوله احلفج اذا اجاني نصيب بالايام الجاية لا تذكريني بعلاقتي القديمة ويه منتصر ولا تعيريني بيها بيوم اريد اعيش بعيد عنه وعن طاري اسمه انا كارهته والله ماريده ولا مفكرة بي بعد..

صفنت ماعرف شجاوبها، البت تبجي وتتلفت للباب تخاف لا اخوها يرجع مسحت دموعها من خدودها وهمست بصوت ناصي بيني وبينها..

-يشهد الله وراس سبأ الماعندي اعز منها منتصر لمسة لايدي ما لامسني والصار بس رسايل مو اكثر وهو التقربلي ووهمني وخلاني اتعلق بي واطيح والله العظيم متندمة ندم عمري واكبر غلطة بحياتي جانت من فكرت بي

-رهف غفار يجوز سمعنا من چنه نحجي؟؟

-لا ما اظن.. لو سمعنا چان طگني گدامج وما اللتهى بيج اتطمني

-واذا طلع سامع ومنتظرني اطلع ويستفرد بيج؟؟

-حبيبة لا يظل بالج عليّ كتلج ما سمع اخوي وانا اعرفه شنو ما ينتظر او يتردد اذا راد يسويلي شي

دگيت رجلي بالكاع محتارة ووجع خشمي ينخر بگلبي، ظليت اراواح بمچاني اعاين لباب الحوش وارجع عيوني على رهف المبتسمة بين دموعها وتحرك بيدها حتى اروح..

-رهف: يلا روحي حبي لا يظل بالهم

-حبيبة: اووووف رهف الله ياخذ عدووچ

-شني ولج شسويت

-ليش احبچ هالكثر لييش

جريتها لصدري حضنتها وچن البت چانت منتظرة هالحضن لانها انفجرت تبچي على چتفي، گلبي تگطع عليها وعلى اخوي العاشگها.. احسني واكفة بين نارين نار خوفي على اخوي لا يتورط ببت ما تحبه ونار خايفة لا اظلمها واخش بخطيتها..

تنهدت افكر بحياتي وشلون انگلبت من تزوجت منتصر لليوم، غلطت من تزوجته وغلطة الشاطر بألف بس لو نجي للواقع فـ كلنا نغلط وكلنا عدنا ماضي بس الله ساترنا ومحد يدري بالمصايب النسويها لولا ستر رب العالمين چان ناس اكلت ناس.. ذبيت حسرة عالية خاتمة طواحين افكاري، اذا هو رب العالمين يسامح ويغفر ويستر الوادم احنه البشر شنو كاعدين نحاسب؟!

-حبيبة: رهف لا تظلمين اخوي وياچ احلفج بداعة امج

وخرت من حضني تباوعلي وجهها صاير خريطة من الدموع، تنهدت مبتسمة ومسحت خدودها بيدي..

-حبيبة: علي السور ذهب مصفى وراح تشوفين بعينج شلون زلمة كفو هو، صح يحب يضحك ويحشش ويگمز منا ومنا بس رجال ونعم منه لا تغرچ شخصيته ويانه

-شنو قصدج

-قصدي يستاهل ينعشگ ويعيش احلى ايامه ويه البت الهاويها لا تحرمي من هالشي

-يعني...

-ما راح اگله على منتصر ولا على أي شي صار بالماضي وان شاء الله يكون منتهي بس الاريده منج ما تفشليني وياه وتخليني اعض اصبع الندم

-لاا وداعة امي مستحيل افشلج والله احطه بعيوني لا توصين حريصة

-اعرفج سباعية ووكحة چا ما هواچ اخوي المسودن سور يخرب على الصلفات

ضحكت وغطت وجهها وفجأة صارت چتافها تهتز تبچي بنفس الوقت، مسحت على راسها وزندها وكلت بنبرة مستعجلة..

-ابجي هناك خايبة خليني اروح لا يرجعلنا اخوج الخبل

-الله وياچ حبيبتي

ودعتني للباب بدموعها وكل شوي تضحك وترجع تبجي ما تنعرف مشاعرها شنو، سويتلها بيدي باي وطلعت اركض لـ علي الكـرار وركبت السيارة..

-علي الكرار: تأخرتي حبيبة! الف سالفة وسالفة اجت براسي

-مابيه شي جنت احاچي رهيفة

-اتفقوا على المهر؟

-مادري والله كلشي ما ينسمع من ديوانهم بعيد

-چا يلا اوصلج للبيت وارجعلهم

-لا ترجعني للبيت فدوة مخنوگة

-چا وين تردين اخذج

-لأي مكان بس مو للبيت امي رسمية راح تموتنيي من يوم خطب علي السور لليوم هي شايلة سيف وتفتر علينا وترزل

-علي الكـرار: حگها خايبة انا هم انصدمت ولا ادري بـ سويّر عينه على رهف

-امم.. اخذني لبيت خالة تَـمني اروح اشوف البنيات مشتاقتلهن

-احم.. هاا رايحة تشوفين تالة

-لا

-چا؟؟

-رايحة اشوف تَـمني والساحلتك

طنگر ضايج وكفخني على راسي، ضحكت على حرگته وخليته ياخذني وهو الممنون لا والحلو من وصلني لبابهم ما رضى يروح وكال..

-حبيبة انا اظل واكفلج هنا خاف تحتاجين شي

-تره اطول جوه انا

-اي ادري ميخالف

-وشني واكف هنا ناطور

-حبيبة نززلي لا تنكفخين مرة ثانية

-اهوووووو

نزلت من السيارة وطبگت الباب حيل، ضحكت من صاح عليَّ يرزل شلون ركعت باب سيارته هيج بس عفته يصيح ورحت ادگ جرس بيتهم، شوي وفتح الجامة مال السيارة وگال..

-ها تأخرو؟

-هستوني دكيتها ما لحگن يطلعن بعدهن

-هاا

-يلا سد الجامة

-لا خليها حارة

ما جاي اكدر اكض روحي صايرة سفيهة وعلى كلشي اضحك، اباوعله شلون منتظرهم يفتحون اكثر مني كاعد على نار وعيونه ملزوكة بالباب.. ثواني وانفتحت باب الحوش بس الفتحتها بقت جوه ما مدت راسها فـ انا گبل طبيت للبيت وعفت هالمسكين خايب امله بره..

-حبيبة: السلام عليكم

-تالة: عليكم السلام هلوو حبيبة شلونچ

-بخير الحمد انتِ شلونچ يروحي مشتاقين

-وينج يا الكاطعة لا تجين لا تمرين لا تسألين

-حبيبة: وانتِ شبيچ ما تجينا هاي كل يوم العصر من نلتم اكول هسة تجينه تالة وتكمل السبحة

-وين يمعودة علساس متعرفين امي

-يمعودة شني السالفة

-تعاي تعاي تفضلي جاية وحدج مو؟

-اي خطية كرار جابني

-هااااا

-اييييي

-امم.. يلا لعد امشي ندخل جوه

ابتسمت على توترها بس ما حسستها انتبهت لعيونها الطايرة على باب الحوش.. طبيت وياهة للبيت وسلمت على تَـمني وخالتها ومثل گبل خالتها تلگتني ذاك الملگه..

كعدت وياهن شوي وسولفت ويه تالة امها بس تَـمني جانت هادئة ما تشارك هواي الا من گمنا سوه للمطبخ نسوي كابتشينو..

-حبيبة: يلا عاد تَـمني سولفي ما متعودة عليج هيج انا

-تَـمني: ماعرف بشنو تردين اسولف

-حبيبة: أي شي يعني مثلاً شنو راح تلبسين بالعقد؟

-تالة: كرار راح يتزوج؟؟؟

-حبيبة: ههههههههه لا ولج شبيج فززتيني

-تَـمني: اووووف تالة خزيتينا

-حبيبة: لا يمعودة عادي، چا ما افتهمني بـ علي السور خطب وراح يتزوج

-تَـمني: سور؟! شعجب هو مو كرار اكبر منه وبعده ممتزوج

-حبيبة: اي صارت فجأة وانجلطت امي

-تَـمني: خالة رسمية انجلطت؟؟

-حبيبة: ولج لاا اسم الله عليها بس هذا تعبير مجازي

-تَـمني: ليش المن خطب؟

-حبيبة: ما راح تصدكون

-تالة: هسة غير تكول منو

-حبيبة: رهف

-تالة + تَـمني: رهف بت عمكم مسعود؟!!!!!

-حبيبة: اي

-تَـمني: شنو هالصدمة!! معقولة؟؟

-حبيبة: اي والعباس صدمة من صدمة ولو تشوفن شصاير ببيتنا صار يومين امي مهلهلة على الكل حتى ابوي ما يتدنه عليها لان بقت حباية وتطلب الطلاگ

-تالة: ما قابلة برهف مو

-حبيبة: ابددد وكضت سور هزأته تهزأ بالرزايل تگله انتَ لا عندك ذوق ولا فلوس خاطر تتزوج

-تَـمني: ولج هو أحنه مصدومات الله يساعد خالة خصوصاً وهي متطيق بيت مسعود خطية هي سبأ يمها والبنية راح تموت من كدما تضغط عليها

-حبيبة: لا لا بنات رهف امي رسمية ما تطيقها سودة عليّ عاد سبأ اشوى الا رهف يبوو شكد تضوج منها عبنها وكحة

-تالة: ليلة هم وكحة بس خالة رسمية تحبها شمعنى تضوج من رهف؟

-حبيبة: لا ليلة عزيزتها من گبل لا يتزوجها ابا الحسن تموت عليها بس رهف تكرهها كره ما صاير ولا داير وهيج صايرين هي وابوي وسور كل ساع وگبتلج هوسة

-تَـمني: يعني من طلعت من البيت خالة رسمية جانت ضايجة من خطبة علي السور واحنه مندري؟

-حبيبة: اي وبيومها چانو رايحين طالبيها الامير مسولف ويه ابوي وگايله سور هاوي رهف ورايحين خاطبيله بس جانت شبه متأكدة مسعود وولده راح يرفضون والصدمة جانت من رضوا وانطوا

-تالة: الله والله اكشن صاير ببيتكم

-حبيبة: لا هو انا شردت من المشاكل اريد راسي يستقر

-تَـمني: يا الله هسة شلون حبيبة شلون صفت؟

-حبيبة: امي راكبة راسها رهف ما تطب بيتها واذا سور يريد يتزوجها يطلعها بيت وحدها المهم ما يتلاگن كل يوم الصبح

-تَـمني: خدمتها بهالشرط هي هههههه

-حبيبة: لا والله ما اظن عبن رهف مكيفة تريد تكعد ويانه لخاطر سبأ

-تالة: ياا اي هنه خوات صح

اخذنا سوالفنا ويه صينية الكابتشينو للصالة خالة تَـمني عافتنا براحتنا نسولف وهي راحت لغرفتها، دكيت على كرار اتأكد بعده واكف لو لا وهمزين كال ابوي متصل بي ورايحله معناها اكدر اطول براحتي هنا..

-تالة: شوكت العقد ما حددتوا؟

-حبيبة: اظن الجمعة

-تالة: ياا تَـمني ما راح نكدر نحضر حرامات

-حبيبة: ليش عود

-تَـمني: خالتي عدها معاملة ببغداد يوم الخميس وراح نروح وياهة نبقى كم يوم نقضي العطلة بيها

-حبيبة: صح تمنيت تحضرين العقد بس زين تسوين طلعي وغيري جو شعندج كاعدة بين اربع حيطان

-تَـمني: والله ميعجبني اروح ولا ببالي بس خالتي متقبل ابقى هنا وحدي

-حبيبة: اخذيها نصيحة من اخت لا تحبسين روحج تَـمني وطلعي وعيشي حياتج طبيعي مثلما هو عايشها ماريد امرد افادچ بس الامير ما معلوم يمته ترجعله الذاكرة لا تعذبين نفسج طول ما هو هيج اصلاً هو ما يرضى بهالشي ومتأكدة لو هو بذاكرته القديمة مستحييل يرضى على وضعج

-تَـمني: الله كريم

-حبيبة: يلا انا اروح بعد الوكت تأخر

چلبن بيه خاطر ابقى وانا هم يعجبني ابقى بعد بس غير امي رسمية تگطعني هو انا اجيت من دون علمها واكيد راح تستلمني بالرزايل اول ما ارجع وتطلع حرگتها بيه..

طلعتني تالة تودعني للباب وحسيتها طلعت خاطر تشوف كرار وما غلطت والله، جمدت رجليها وعيونها تعلكت بسيارته وهو هم اول ما شافها نزل بساع ووكف بمچانه..

-علي الكـرار: السلـ.. السلام عليكم

-تالة: عليكم السلام

-علي الكـرار: شلونكم

-تالة: بخير، انتو شلونكم

-علي الكرار: والله مو بخير

-حبيبة: احمممم احمممم

-علي الكـرار: شمالج مريض لو حرام اذا مرضت

-تالة: سلامتك متشوف شر

هز راسه متحسر بدون لا يجاوبها ورجع طب للسيارة، ودعتها وداع اخير وطبيت للسيارة كعدت بكرسي الصدر والطريق كله اسمع صوت حسراته العالية وهمساته وهو يدندن..

-الشر لو منچ راضين بي
يا الغايب وجرحك ناسي بگلبي

ضجت على اخوي المو راضية تضحكله الدنيا وظليت ساكتة وادعيله بگلبي كون ربي يصيح براس ام تالة وترضى تجمعهم ولا تخليهم يسوون شي وره ظهورنا..

وصلت للبيت ورجعت اسمع مواويل الرزايل والدعاوي ا بيت مسعود يمممة گلبي انفخ والله وتعبت، مكابلة امي وكاعدة اواسيها على الجاي تعيشه وبقينا على هالحال ثلاث ايام.. ثلاث ايام احنه نعيد ونزيد ونسمع لنفس الاسطوانة تتكرر لدرجة بزعناا..

حسيت الصبح على صوت موبايلي يدگ، فتحت تك عين اشوف منو اليتصل هيج وكت وفزيت مخلوسة من شفت المتصل "حاكم"! طفرت من الجرباية اوكف على رجليه واعاين للموبايل والتردد يقرا عندي الف ماعرف اجاوبه لو اغلس..

-حبيبة: راح اجاوب.. الله يستر ان شاء الله ماكو شي اي اجاوب.. الو؟

-حاكم: صباح الخير ست حبيبة

-حبيبة: صباح النور اهلاً دكتور

-اعتذر اذا متصل بوقت غير مناسب بس محتاجج بخدمة بلا امر عليج

-تفضل؟

-حور شوية تعبانة وصارلها ساعة تبجي وتنوح تريدج وامي كلش خايفة عليها اكدر اجي عليج اجيبچ لبيتنا تشوفيها او اذا تكدرين أي احد من اهلج يجيبج؟

-شبيها حور؟؟

-هي تحچيلج افضل

-حاكم خوفتني شبيها اختك؟؟

-تعالي حبيبة وتعرفين

-تمام تمام هسة اكول لابوي

سديته منه وركضت انزل اشوف ابوي، صح مستغربة من تصرف حاكم هاي اول مرة يسويها ويتصل بيه من حور تبجي لان اصلاً حور حساسة كلش ودائماً تبجي بس مبين الوضع هسة ما ينسكت عنه..

دكيت باب غرفته وسمحلي ادخل، سولفتله مختصر مفيد بس ما كتله حاكم اتصل كتله هي حور دكتلي ووضعها صعب وتريدني ولازم اروح اواسيها وانا صديقتها المفضلة وماعدها غيري وخطية يتيمة وغريبة عن المحافظة وماعدها احد ودگتلي بالذات خاطر اروحلها ووووو... دگيتله اليتيمة ورووح روحي طلعت ياله اقتنع وشرط الا هو ياخذني..

-حبيبة: يا بعد روحيي بوية انتظرني بس خمس دقايق ابدل وانزل

صعدت فوك اركض غسلت وجهي وفرشت اسناني ولبست صاية وشال لفيته شلون مچان ونزلت لابوي لگيته واكف ويفرك بعيونه..

-حبيبة: خلصت انا

-شيخ علي: اليوم رهف تطلع تشتري الذهب ترحين وياهم؟

-حبيبة: لا امي رسمية حلفت اذا اروح تتبرى مني

فر بيده ما عاجبه وطلعنا سوه لبيت دكتور حاكم، الطريق كله گلبي يدگ ومتوتررة كلش اخاف لا بيها شي وحاكم ما يحجي بس لا اكيد هو راح يكون حريص اكثر عليها..

-شيخ علي: يلا بوية

نزلت ونزل وياي، صعدت درجات بيتهم ودكيت باب الحوش وما طول ثواني وفتحها حاكم بس چنه ما شاف ابوي الواگف وراي لان الابتسامة المرسومة على وجهه الف علامة استفهام بيها شاگة وجهها من الاذن للاذن..

-حاكم: يا اهلاً وسهلاً

-شيخ علي: هلا بيك عمي

وكعت ابتسامته بساع وعض على شفته، بلع ريگه وطلع من باب الحوش يروح لابوي خاطر يسلم عليه وانا اختصرت الوقت وطبيت جوه، استقبلتني ام حور وجهها صاير احمر مبين زالغته ووضعها يخوف..

-حبيبة: اسم الله خالة شصاير؟؟

-حور حابسة روحها بالغرفة متقبل تطلع ماما حبيبة فدوة لعينج قنعيها

هزيت راسي وصعدت وياهة لغرفة حور، دكيت الباب عليها وما جاوبت دكيتها مرة اللخ وكلتلها انا حبيبة ياله جاوبت وبساع فتحت الباب وطببتني جوه..

-حبيبة: حووور شنو هالحال؟؟؟؟

ذبت روحها بحضني تبجي بصوت عاالي بچي مرد گلبي، بعدني مصدومة من منظرها وشعرها المكفش ووجهها المجروح شكلها مكتولة بس مو كتلة طبيعية لاا كتلة زورگتها لان حتى زندها بي زراگ مال حزام..

-حور: حبيبة تعبت تعبتتت

-حبيبة: بس فهميني خية على كيفج منو مسوي بيج هيج؟؟

-حسام اخووية حسام ضربني

-صخاام الصخمني ليش ولج؟؟

بجت مرة اللخ ما ترضى تحجي شكد حاولت وضغطت عليها بس ابدد قافلة مو شلون ما چان حيرتني بالزايد..

-فهميني حاكم وين چان عنج؟؟

-بالدوام خفارة ميدري هو وامي هم ما حچتله

-يعني ميدري بحسام كاتلچ لحد هسة؟

-اي

-ليش ما تحچيله؟ شمنتظرة!

-حبيبة امي تموت والله حسام متغير علينا كللش حتى ورث ابوي الله يرحمه يريد يقسمه ويهجولنا بالشارع

-استغفرالله يا ربي

-اول مرة يمد ايده عليَّ بحياته كلها ممسويها والله جان ماكو اطيب من گلبه بس منعرف شبيي صارله سنة متخبل علينا

-والله مادري شكول

رجعت تبجي وتضم بوجهها، سحبتها لحضني امسح على وظهرها واسمعها تشهگ بروح ملچومة.. سودة عليَّ وينها وين الكتل هاي چنها نستلة شمالهم الاخوان متخبلين على خواتهم شو انا اخوتي يفدوني بروحهم..

ما كدرت اعوفها واطلع وبقيت وياهة لحدما حسيتها غفت، كمت عدلت نومتها وغطيتها وطلعت موبايلي من جيبي اشوف چم مرة ابوي متصل بيه بس الغريبة ولا مرة داگلي..

رجعت الموبايل لجيبي ورحت اطفي اضوية الغرفة خاطر ما تزعجها، وانا امشي حسيتني دست على شي نزلت عيوني اشوف وانتبهت طايح گلاص گزاز بالكاع وبصفه موبايل حور مشمور..

شلتهن ثنينهن احطهم على ميزها وبلمستي ضوه موبايلها بيدي، ما اهتميت ونزلته على الميز بس جذبني اشعار جايها من واحد كاتبة اسمه بالانكليزي بس طويل وحاطة وياه قلوب حمر..

الفضول اشتغل عندي والف تساؤل اجه براسي بس ما تجرأت وقريت الاشعارات الا من شفت اخر الاسم مكتوب "Noor".. كضيت الموبايل بيدي اقرا الاسم وشهكت من شفته اسم اخوي! اسم اخوي علي النور وكاتبلها رسالة محتواها هو!

"والله گلبي جاي يتگطع بس كلشي بيناتنا انتهى حور ماريد اسببلچ مشاكل اكثر، انا مستعد انتظرج العمر كله بس لا تأذين نفسج وتورطين روحج ويه اخوچ خلي تواصلنا ينگطع هالفترة خاطر ما تجيچ مصيبة واياچ تتصرفين تصرف غبي لو ترجعين تفتحين الموضوع وياه وهو عصبي انتظري چم يوم وسولفي لا تتهورين.. احبچ"

**

"ســـبأ"
بكبر صدمتي بالجاي يصير انا فرحانة، فرحانة واحسني طايررة من السعادة كل شوي اتصل بـ علي التـقي واگمز على راسه والزلمة متعجب من الشخصية الخفيفة الطلعت فجأة والمشكلة هو بالواجب وشغل الدنيا كله فوك راسه وانا البطرانة اخابره على سوالف تافهة..

-علي التـقي: لو ادري بزواج رهف وسور هيج يفرحج جان من زمان خليته يخطبها حتى لو ما يريدها اغصبه

-سبأ: ههههههه تقي ما مصدكة والله ماعرف وين انطي وجهي من الفرح

-علي التـقي: وين ترحين يمعودة محتاج وجهج انا

-هههههههههههههههههه

-عساها دوم

-احم.. تقي عندي طلب بس اذا ما ترضى عادي والله مو اله اصلاً مو لازم صدگني

-كولي شعندج

-عادي اطلع ويه رهف من تشتري الذهب؟

-اممممم

-ها ما ترضى؟ خلص ماروح عادي

-ولج هو انا لحكت اجاوب

-چا مو كلت امم؟

-ليش اممم جواب؟

-اي غير

-وشنو تفسريها؟

-مادري يعني حسب الموقف

-هههههههه يا حلاتج يا سبأ روحي بوية طلعي واشتريلج شي وياهة

-صدگ والله؟؟

-اي حبي اخذي فلوس من القاصة تعرفين الرمز مو؟

-اي اعرفه بس ابد ما فاتحتها والله

-ادري بيج، اخذي فلوس منها واشتري الي يعجبج من الصايغ واخذيلج هم نفنوف وهالسوالف مال بنات اذا تحبين

-بعد حيلي الله لا يحرمني منك

-ولا منج حبيبتي

-احبك تقي والله هواي احبك

-جايك جاي.. احبج اكثر يلا انا لازم اروح حبيبتي

-الله وياك عيني

سديته منه وبقيت باقي اليوم بغرفتي لان عمتي رسمية ما طايقة تشوف وجهي واخاف لا تسمعني شي يضوج..

كلشي ما لحگنا نسوي والوضع متكهرب بين عمي علي وعمتي رسمية وحتى للسوك ما رضت تطلع ويه رهف خاطر تشتريلها الذهب ونفنوف العقد، طلعت انا وابرار وياهة واشترينالها كل احتياجاتها وعيوني ما فارگت وجهها المشتاگتله، الفرحة البيه ما انطيها لبشر وين چنت محسبتلها هاي رهف اخيتي وقطعة من روحي تصير مرة حماي واكدر اشوفها كل يوم وما اظل أتحسر عليها؟ يا بختي!

-ابرار: بنات الذهب بقى رهف اشتري اكثر شي ذهب بفلوس مهرج ما اوصيچ لا تحيرين بالخرگ والجرود كلهن يروحن وزلمتج بعدين ما يقصر وياچ بس الذهب زينة وخزينة وكله الج يظل

-رهف: خوش

طبينا للصايغ الاول بس كلشي ما عجبها فـ طلعنا لغيره وهم كلشي ما جذبها مع العلم الذهب يخبل وانا حرت شنو اخذ بس رهف من گبل تشلع گلب امي من تشتري حاجة انا كلشي الجان يعجبني وارضى بي..

اخيراً دخلنا لصايغ وعجبها شي اخذت تخم كامل وابرار اخذت مدالية وياهة عجبتها وانا ظليت محتارة شنو اخذ شو كلشي حلو بس المشكلة خاف انا اشوفنه حلو وعلي التقي ما يعجبه ويحجي على ذوقي؟

-رهف: سبأ شنو منتظرة؟

-سبأ: ماعرف شأختار اخذيلي على ذوقج

-رهف: لا انتِ اختاري

-سبأ: خية ذوقي مو حلو خاف ما يعجب تقي

-رهف: ما دامه يحبج لازم يحب ذوقج هم انتِ اختاري يلا

-سبأ: مو...

-رهف: اششش يلا اشري على قطعة خلي الصايغ ينزلها

شفت ابرار تضحك وتضم حلگها بعباتها حگها والله تشوفني لا هده ولا سده واختي الصغيرة ترزل بيه..

-سبأ: اشوفن هذا؟

-رهف: نزله بلا زحمة

نزله الصايغ وحطه كدامي، عبارة عن كلادة وسوار كال يسمونه نص تخم، ظليت اگلبه بيدي واعاين لرهف مترددة ابتسمت ابرار وكالت..

-اذا ما عجبج مو لازم تاخذينه سبأ

-سبأ: اي اي ما عجبني اريدن ذاك

-الصايغ: صار

جابلي الثاني هم كلادة وسوار بس شكله يخبل متت عليه صايرة الكلادة زنجيل ومشكل بي كله ورود صغار والسوار نفس الشكل.. احتاريت اكثر وخفت اخذه ويعيبون عليَّ ويكولون عني مرعبلة وماعرف اشتري يا ربي شون بيه..

-رهف: ها خية

-سبأ: اكلج هذا حلو يعني؟

-رهف: مالي غرض عجبج اخذي ما عجبج نشوف غيره

-سبأ: شبيچ نحيسة دجاوبي، ابرار هذا حلو لو لا؟

-ابرار: حـ...

-رهف: لا ابرار لا تجاوبيها! خليها هي تقرر

-ابرار: لا رهف عادي واذا شجعناها تاخذه ما دامه حلو

ما جاوبتها رهف وكضتني من ايدي وهمست بصوت ما يسمعه غيرنا..

-رهف: تعلمي شلون تختارين وابني شخصيتج خيتي تره تظلين هيج طول العمر اذا ما تجرأتي واخذتي قرار وحيدج هسة!

-سبأ: مو..

-رهف: ماكو مو شوفي اذا عجبج اخذي ما عجبج رجعي اذا تظلين تاخذين رأي الكل عمرج ما راح تشترين لان مستحيل الكل يتفق على ذوق واحد وراح تبقين بهالحيرة

هزيت راسي بس بقيت خايفة لچن خلص لازم اتخذ قرار..

-سبأ: اريده بلا زحمة

-ابرار: وزنه النا خوية نشوف چم مثقال

-الصايغ: بخدمتكم.. خيتي هذا 13 مثقال وحبايتين تقريباً

-سبأ: هاا خاف هواي؟

-رهف بهمس: شكد منطيج زلمتج؟

-ما انطاني كال اخذي من القاصة التحتاجي

-ابرار: يا خية چا شكو ما دامه ما حددلج سعر اخذي تره كلش حلو

-سبأ: مو خطية

-رهف: ااخ گلبي

-سبأ: لا لا خلص راح اخذه

ضحك الصايغ يهز راسه صخام هذا شلون سمعنه واحنه نتهامس بيناتنا، عاملته ابرار على ذهبنا ونززلنا من السعر وحطهن بعلب حلوة وانطاهم النا..

شلت الذهب مالتي وبگلبي طايرة من الفرح متحمسة يجي تقي ويشوفني لابسته هذا اول ذهب يشتري الي تقي من بعد الحلقة وللموت ما ابيعه ولا اتصرف بي راح اضمه لبنيتي بالمستقبل اذا صار عندي بت طبعاً..

-ابرار: بنيات منو تريد تروح وياي للتواليت؟

-رهف: انا ماريد متوضاية

-سبأ: انا هم

-ابرار: چا خوش انا رايحة وانتن افترن قريب منا لا تروحن بعيد خاطر اللگاچن بساع وما ينشلع گلبي

-رهف: صار

راحت ابرار وبقينا انا ورهف نفتر شوي هي اشترت بعد اغراض وشنو تاخذ لروحها تگلي اشتري بس حسيت صرفت هواي ومفتشلة لا ينحجي عليّ..

-رهف: سبأ جاي تحسسيني چنتي بت فگر تره من اول انتِ بت عز وخير وطبيعي تشترين الي يناسبج

-سبأ: بس من چنت ببيت ابوي ما يرضى اشتري الي يناسبني وحسرة علينا الطلعة

-رهف: بس هسة انتِ تزوجتي وزلمتج والنعم منه ادمي ويحبج ليش تظلين عايشة نفس عيشتج ببيت ابوي وما تطورين؟ حبي نفسچ وانسي حياتج الراحت انتِ هسة مرته لـ تقي مو بت مسعود!

سكتت افكر بچلامها وافترينا بعد بالسوگ، وكفت رهف تتعامل على تراك الي وبينما هي ملتهية واكفة تختار اللون المناسب شفت منتصر ابن عمي جاي بأتجاهنا..

-سبأ: هذا شيسوي هنا منـ...

-منتصر: رهف!!!

نزت رهف مخترعة وذبت التراك من ايدها، كضتني من ايدي حيل وجرتني ومشت بينا سريع..

-سبأ: رهف ايدي شبيچ تجرين هيج

-امشي بسرعة امشي

-منتصر: رهفف مو احاجيج!! رهف اوكفي رهففف!!

-سبأ: شيريد منتصر ولج اوكفي شوفي الزلمة شبي

-رهف: ماريد احجي ويااه امشيي

ما لحگنا نعبر للجهة الثانية لان منتصر هرول گبلنا ووگف بوجهنا وجهه مگلوب وحواجبه معگودة مبين ضايج من شي بسبب نبرة صوته التنتر بهمس..

-منتصر: انا مو احجي وياچ؟!! ليش تعبريني وتركضين؟!

-رهف: شتريد؟؟ ماريد اوكف وياك بالشارع الوادم شتكول علينا هسة؟

-منتصر: الوادم؟؟ لو خايفة واحد من بيت عمي علي يشوفج واكفة وياي!

-رهف: ههههههه واذا شافوني؟ ابن عمي واجه يسولف وياي بشارع شني قابل شجاي نسوي

-منتصر: چا ليش ما وكفتي من البداية ليش انهزمتي؟

-رهف: منتصر اختصر شتريد؟

-منتصر: صدك السمعته؟؟ صدك واحد من ولد عمي خاطبج؟!

-رهف: اي وهسة روح لا تسويلي مصيبة ابرار ويانه راح تفهم وگفتك غير شكل

-منتصر: خليها تفهم!! خليهااا شني رهف انتِ ناوية تنتقمين مني بهالطريقة؟؟ هم تتزوجين وتطلگين خاطر تحرگين كلبي!!

-سبأ: شنو جاي يصير رهف شبيكم؟؟

-رهف: اتزوج واتطلگ؟ يممة اسم الله الرحمن عليّ ليش خوية انا اذا ناوية اتطلگ ما اتزوج من البداية

-منتصر: وهيج تنسين كلشي؟؟ كلشي چان بيناتنا!!

-سبأ: رهفف انفضحنا رهفف شنو جاي يصير؟؟

-رهف: فضيحته على روحه! ليش انا شنو بيني وبينك؟؟ هاا فهمني شنو؟؟

-منتصر: عشگ

-رهف: اووع على هيج عشگ وينك وين العشگ انتَ ليش تعرف تحب غير نفسك ومصلحتك؟؟

-منتصر: انا ادري بيج ما تقصدين هالحجي وبعدج مجروحة من زواجي بس وداعتج چنت مجبـ...

-رهف: مجبور اي خوش افتهمت جنت مجبور وانا ما مجبورة هسة وراح اتزوج زلمة يحبني وشاريني بغالي

-منتصر: اشتريج بماي عيوني رهفف هسة اروح اخطبج من ابوج هسسة بس لا تلعبين بأعصابي!!

-رهف: ماي عيونك عوفه لبناتك محد يستاهله غيرهن وعوف سوالف الحب مو دربك هذا.. يلا سبأ

-منتصر: اوكفييي

شهكت من جرها من ايدها حيل يوكفها، عتت ايدها منه مخنزرة ونترت بي بصوت ناصي كللش..

-والعباس يا منتصر اذا اعترضت طريقي بعد ادمرك! كل يوم اندم اكثر واكثر عبني ضيعت وكتي ويه زلمة نفسك! ويوم بعد يوم جاي اكتشف كل الحسيته وياك چان وهم!

-منتصر: وهم؟؟ والله چذابة والزهرة چذابة!!

-وهم عبن لو چنت احبك ولو شووي چان ما فرحت بخطوبتي هالشكل! چان ما اشتريت الذهب والنفنوف وگلبي يرعد فرح وحماس يمته يجي يوم العقد واللبسهم لزلمة يستاهل!

نترت حچاياتها بوجهه نتر وعافته مبحلگ عيونه وجرتني نكمل طريقنا، فزيت عاصرة عيوني ميتة بدمي على صوته العالي اجه من ورانه يصيح بين الناس ما مهتم..

-منتصر: انااا اعرف شلون اخررب هالخطبة اناا اعلمج نهايتج ومرجوعچ الييي فهمتيييييي

-سبأ: رهف!!

-رهف: عوفي يهايط وحده امشي نرجع لابرار

-سبأ: فهميني سالفتكم رهيفة!

-وعد اسولفلج بس نرجع هسة ماكدر ذيج ابرار

سكتت من شفت ابرار جاية بأتجاهنا، كملنا فرة السوك بس بعد كلشي ما اشترينا محد بينا الها واهس وابرار كضت الوكت كله تسأل شبيجن وشصاير وياجن ونجاوبها بچلمة "تعبنا"..

رجعت ويه رهف لبيت اهلي همزين ابوي واخوتي طالعين اكدر ابقى شوي، سلمت على امي وجاوبتني من طرف خشمها ولا چن صارلي شكد ما شايفتها بس عادي تعودت عليها..

-صابرين: هاا تاليها سويتيها رهيفة مووو راح تعقدين على ابن رسمية!

-رهف: اعقد على ابن رسمية لو على منتصر بكيفج انتِ اختاري

-صابرين: شنو ولج؟؟؟

-رهف: هسة واحنه بالسوك اخت منتصر خطبتني لاخوها

-صابرين: تحجين صدك لو تضحكين عليّ؟؟

-رهف: لا صدگ فـ اختاري يوم بس اظنج راح تفضلين ابن رسمية

ظلت امي ساكتة وفاكة حلگها ماتعرف شتكول، عافتها رهف وصعدت فوك ورحت وراهة ومن الباب استلمتها.. بالبداية ما رضت تحجيلي وظلت تضيع الموضوع بس بالاخير جبرتها تسولف وصدمتني! انصدمت من عرفتها جانت تحب منتصر وبيناتهم تواصل بالرسايل من موبايل امي صارلهم فترة وبيناتهم عشگ وتخطيط للزواج هم!

-رهف: والله يا سبأ هو التقرب مني وهو التواصل وياي وهو التوسل خاطر اجاوبه وهو الوهمني راح يخطبني وهو كلشيي هو وانا مثل الغبية صدگته وعلگت امالي بي بس حتى اخلص من هالبيت

-سبأ: وهسة؟؟

-هسة مسحته وداعتج وداعة خوتنا مسحته من عقلي وگلبي ودست عليه هم ما اطيق اسمع حروف اسمه وما جاي افكر غير بخطوبتي هسة وفرحانة بيها اريد اعيشها بكل تفاصيلها واتونس

تنهدت مادري شكول خفت جاي تنسى منتصر بـ علي السور وحزت بگلبي، سور اعزه هواي ماريده يتبهذل وبنفس الوكت اخيتي مجروحة واخاف يجيها يوم تصحى على نفسها وتندم ليش تزوجت غير زلمة..

مشت الايام تركض ركض واجه يوم العقد، من الصبح رحت لبيت اهلي لان العقد هنا راح يصير والحمدلله ابوي ما طردني من شافني بس سلامه جان بارد وكوة عليه..

لبست رهف سيت مهر ابيض وهي مكيجت روحها عاد اختي ما شاء الله جمالها رباني ما تحتاج جهد حطت مكياج فضي بسيط وعافت شعرها القصير مفتوح.. دمعت عيوني من شفتها واكفة تتمايز روحها ع المراية وتبتسم فرحانة جاي احس بفرحتها حقيقية مو تمثيل عبن الضحكة ما غابت من وجهها..

دقايق وصعدتلنا حبيبة مبتسمة كالت راح يبدي السيد العقد ولازم رهف تنزل، هزت راسها اي وحطت الشال الابيض فوك راسها ونزلت وانا وحبيبة وياهة كلمن تمشي على جهة..

نزلت ورگعنها ابرار وعبق بهلهولة وانا وياهن اهلهل، امي واكفة على جهة ما عاجبها وعمتي رسمية كاعدة على القنفة ما كامت، ليلة وشمس ما جايات علمود جهالهن وتَـمني ببغداد فـ بس احنه هنا..

كعدت رهف على الكرسي خاطر يعقدلها الشيخ وظلت تفرك بأصابعها متوترة ضحكت على منظرها اول مرة اشوف اختي بهالشكل متوترة بس فرحانة بنفس الوقت..

-رسمية: فتحي ايدج لا تتصخم حياتج فتحيها

-صابرين: مبين جاي تدعين بگلبج خاطر تتصخم حياتها موو؟؟

-رسمية: يحوز

-صابرين: ولج رسمية انتِ فد وحدددة

-رسمية: هاي عليمن ولج؟؟ تره هسة اخرب كلشي ونبطل

-حبيبة: يمة!!

-رسمية: والله چا خليها تسكت وتحمد ربها

-صابرين: راح اسكت بس لخاطرج حبيبة محد يستاهل الحشيمة والاحترام غيرج هنا

-حبيبة: مسحيها بوجهي عمة

سكت الكل من بده السيد يعقد والحمدلله تم كلشي على خير، عقدت اختي رهف على زلمتها وصارت حليلة علي السور.. باركنالها كلنا حتى عمتي رسمية باركتلها صح گوة عليها بس المهم باركت وما لبستها..

بسرعة بسرعة صعدناها فوك خاطر تبدل وتلبس النفنوف حتى يطب سور يشوفها وهاي اختي انخبصت لزمتها الرجفة وظلت تروح وتجي بمچانها متوترة..

-رهف: احس متندمة اشتريت هذا الفستان ولج سبأ انا شكلت لروحي؟؟

-سبأ: يلا خية اشتريتي بعد شتسوين

-رهف: ما طگيتيني من خذيته شبييج

-حبيبة: ليش شبي بنات ما جاي افتهم

-رهف: باعي شلون گصيير

-حبيبة: لا عادي يمعودة يلا بساع سور خبصني بالاتصالات

استسلمت رهف لعنادها من دگت رجل بالسوگ الا تشتري هالنفنوف واضطرت تلبسه بس شنيي طلع ياكل ويشرب عليها، يخبل من صدگ يخببل لونه ازبري وقصير وردنه هم كصيرة انا بت وظليت فاكة حلكي عليها شكد لايگلها..

-رهف: يلا كملت انا

-حبيبة: هو يصعدلج لا تنزلين

-رهف: شنووو؟؟

-حبيبة: مادري والله انا هم مستغربة امي تكول خلي هو يصعدلها لا تنزل

-سبأ: اوكفي رايحة اتأكد

نزلت اسأل شنو السالفة وعمتي گلبت وجهها وانطتني گفاها، عدلت الشيلة الي على راسها وكالت من طرف خشمها..

-خلي هو يصعد لا تنزل ماريدن اشوفهم سوه

-سبأ: بس عمة..

-رسمية: سكتي وروحي بلغي اختج لا تترعن وياه بعدهم مخطوبين ما ندري شيصير بعدين

انهضمت من اسلوبها المتعالي همزين امي مو بالصالة سمعت حسها من المطبخ، درت وجهي لابرار وعبق وثنينهن شفت الزعل والفشلة بعيونهن..

-سبأ: تمام عمة

-رسمية: وانتِ لا تظلين تصعدين وتنزلين هواي حامل مو زين على الجاهل

هزيت راسي وصعدت لرهف بلغتها نفس حچي حبيبة گبل شوي بدون لا اذكر الگالته عمتي جوه بس رهف مستحيل تعبر عليها وحست اكو شي..

-رهف: ليش يصعدلي هنا؟ عيب بعده هاي اول شوفة نتشاوف وره العقد خلي كدامكم احسن

-سبأ: لا رهف خليكم هنا

-رهف: اي ليش؟؟

-سبأ: احسن

-رهف: وانا ما يعجبني يلا بنات خلونا ننزل

-سبأ: رهف شبيچ جاي اگلج ابقي هنا!

-رهف: راح تحجين البگلبج سبأ لو شلون؟؟

-سبأ: اوووووف عمتي ما ترضى ماا تقبل!

-ليش

-حبيبة: رهف لا تزعلين مني امي تحبج هواي بس انطيها مجال تستوعب خطوبتكم، هي بعدها مقهورة عبن سور ما تزوج على ذوقها جانت هي تريد تخطبله

-رهف: لا امج ضايجة عبنه خطبني الي انا بالتحديد

سكتت حبيبة مستحية وانا هم سكتت وتكترت على صفحة ماعرف شكول، هزت راسها رهف وكالت..

-وهسة هي ما تريدني انزل خاطر ما تشوفنا واحنه سوه خوش..

راحت للمراية ترتيب شعرها واخذت حمرتها تجددها، جرت شيشة العطر تتعطر من جديد واندارت علينا وكالت بأبتسامة..

-امشن ننزل يلا

-حبيبة: رهف..

-رهف: حبيبة انا اريد عمتي رسمية تحبني مثلما انا احبها واريدها تتقبل زواجي من ابنها وتفرحلنا هم فـ يلا نزلن وانا اجي وراجن

ضحكت حبيبة تهز براسها مأيسة ونزلت وانا لبست شالي وعباتي ونزلت وراهة، ويه نزلتنا من الدرج وصلن عماتي عمة غزوة وعمة ابتسام ووياهن جاية رفل، وكفن بالباب يردحن ويهوسن مكيفات..

-غزوة: اللهم صل على محمد وال محمد مهلة رسمية بوليدج ان شاء الله سبع سعادات

-ابتسام: اي والله مهنااية، عذرينا خية تأخرنا عبن الطريق ازدحام كلش

كعدن يسولفن شوي علما نزلت رهف، غصت عمتي من شافتها ورادت تنجلط بس ما ححت شي عبن العمات كاعدات وامي هم موجودة تعرف لو حجت شي تگب عركة..

-رفل: ولج الله شنووو هاي رهف

ابتسمت رهف وافترت تسلم على عماتي ورجعت تكعد على كرسيها، دقايق قليلة وگالو راح يطب سور وتلگيناه بالهلاهل وعمة ابتسام وابرار خبصن الدنيا بالگفلات والهوسات..

-صابرين: عليش الهلاهل احنه حزانة لو ماكو احترام!

-ابتسام: ياا خية نسيت والله يلا ميخالف هي فرحة مرة بالعمر

سكتت امي مطنگرة بس فكت من علي السور راح حب راس امه واجه حب راسها، انصدمت من حركته وحتى امي ظلت صافنة ما توقعته راح يحترمها او يعبرها بس الحمدلله ما فشلها كدام الباقين وهالشي خلى امي تنگلب مية وثمانين درجة..

-صابرين: ههههه هلا بيك يمة تحب الكعبة ان شاء الله

متت ضحك على ردة فعلها وجهها صار احمر وعرگت مستحية مسكينة تتحسر على الاحترام بهالبيت اخوتي وابوي ما معبريها چن وجودها بس تخدمهم وتكربلهم ما اذكر شي يوم ابوي سمعها حجاية حلوة لو رضاها بهدية..

-ابرار: عاين لعروستك سور شني السالفة ههههههه

ضحك يمسح على وجهه العرگان من الخجل، صدگ من اول ما طب لحد هسة ما رفع عينه على رهف وعاين لوجهها.. شجعناه كلنا بالگفلات والهوسات بس كله على كيفنا نخاف لا يسمعونا الزلم ويجي ابوي يعلسنا..

الكل چان فرحان وعلي السور طااير من السعادة وره ما تجرأ وعاين لرهف عيونه بعد ما شالهن ولا زاحهم حتى رمشة ما رمش وكل ساع وگايل..

-علي السور: حسبالك مو حقيقية وعلي

ورهف تضحك بصوت ناصي وتنزل عيونها، الاجواء زادت حماس من ابرار فتحت شاشة البلازما وعلكت عليها شي وعلته على اعلى شي.. امي زلغت خدها ما راضية بس عمتي ابتسام طبعها سبورتية وكالتلها اذا ابوي حچى علينا هي تبررله..

-رسمية: شني هالسخافة طفوه

-عبق: ليش خالة والله حلو

-رسمية: سكتي نستحرم احنه

-ابتسام: الذنوب عليّ رسمية مالج غرض تعاي رهوفة تعاي عماتي

گوموا رهف يرگصوها وعلي السور بس صافن، والله كل ساع اكول راح يرمش لو يتعب بس ماكوو فصل اختي تفضيل من فووك ليجوه دايخ ومتونس على تمايلها، عاد رهف شكدما وكحة وصلفة بس اذا تريد تتنعوص وتتغنج تعرف شلون والاهم تعرف شلون تجذب العيون عليها..

گومت عمة ابتسام سور ويه رهوفة وعمتي رسمية شاطت، كل ساعة ونافخة متضجورة وحتى غم شفتها تغم رهف بالخفيف وللاسف رهف شافتها من سوت هيج، بس اكيد رهف ما راح تمشيها اختي اعرفها عدل استاذة بالتحديات..

مادري شنو گاللها سور وهي ضحكت ضحكة رنانة وگلبت شعرها كله على جهة وحدة والمسكين وجهه مصبوغ احمر وواكف چن جماد ما تحرك بس عيونه تفتر على رهف التتمايل بين ايده وتضحك ووتميوع..

**

"رفــــل"
بالعباس هذا احلى عقد احضره بحياتي، رهيفة لعبت لعب بالدلع والتماوع سودنت علي السور وهذا خطية ما شايف هيج سوالف كاتله الضيم والجفاف العاطفي واصل لراسه تيه دربه وما يعرف وين ينطي وجهه بعد..

-غزوة: هههه متونس يا بعد گلبي

-علي السور بهمس: سكتي عمة راح اتصلخ من الفرحة

متت ضحك على حچايته وضحكت عمة غزوة وعضتله شفه خاطر يسكت، شجعناه يبوس رهوفة وما صدگ كضها وحجملها بخدها حجامة..

-رهف: ااخ

-علي السور: سكتي ولا تتنعوصين

-رهف: هاا!

-علي السور: اي جيبي الخد الثاني خطية نعوفه يتيم

كضها وباسها بعد من الخد الثاني نفس البوسة القوية، ابتسمت رهف ونزلت عيونها عود مستحية..

-رفل: هاا عصفورة ما تردين زلمتج يلبسج الذهب

-رهف: غير هو يلبسني بس اظنه ما مهتملي

-علي السور: افااا وانا ابن ابوي شون ما اهتملج يممةةة وين الذهب

-رسمية: وصممة التصمك هذا عد ابرار

-علي السور: يوم اجلي الرزايل بعدين لا تفشلينا

-رسمية: انا اعلمكم ثنينكم اطبگكم واغسلكم بالرزايل سوه يا الريّش يا الينفخون عليكم تطيروون

-رهف: تمونين حبيبتي عمة على العين وعلى الراس

-رسمية: ايي خوش

-رهف: علي السور شوف عمتي خاف محتاجة شي حبيبي

-علي السور: هاا

-ابرار بهمس: يمة صارت بيها حبيبي

-رفل بهمس: ملعبة هالفرخة تعجبني

-عبق بهمس: دسكتن خليهم متونسين

-حبيبة: يا ونس خايبة سور راح يطيح من طوله ما متعود على دلع نسوان گضى عمره يرزلون بي

-رفل: سودة عليَّ يلا بلچن رهف تعوضه

-عبق: تعوضه تعوضه باعوها شلون فرحانة وراح تطير

-حبيبة: الله يسمع منج ان شاء الله

كمل العقد على خير وكلمن رجع لبيته، طبيت لغرفة امي لگيتها هستوها راجعة من بيت عمي علي چانت عد ليلة..

-ام رفل: ها يمة رجعتي

-رفل: اي يوم، يلا انا رايحة اسبح وانام كلش تعبت اليوم

-وينج ما سولفتيلي شصار

-سكتي فاتچ العقد فاتج

گمزت على جربايتها وكعدت اسولفها وهي گضتها عليَّ يااا وشلوون وفدووة والله يحفظهم.. كملت سوالفي وياهة وصعدت لغرفتي فوك، البيت يصيح بوجوهنا من يوم رجعت ليلة لبيت عمي علي لسه چنت متونسة وياهة وهسة رجعت لوحدي..

سبحت وبدلت هدومي وتمددت على چربايتي، هستوها جاي تغفى عيني واجاني اشعار على الموبايل رفعته اشوف منو ولگيته من "ام العبي" مكتوب..

"السلام عليكم عباتچ جهزت اذا تردين تستلميها دگيلي"

ضحكت من قريت الجملة وعدلت كعدتي، وخرت شعري المبلل من وجهي وكتبت..

"لا ماريدها تعبانة"

"يخسى التعب وانا يمچ"

"نعم؟!"

"قصدت يخسى التعب واهلچ يمچ"

"اي مو اكول"

"اگلچ"

"امم"

"زينت شواربي اليوم"

ضميت وجهي فاطسة ضحك وضحكت اكثر من رجع كتب..

"هاا وينج جاي اكلج ام العبي حفت شواربها اليوم"

"بالعافية"

"لعنة الله على ابليسج مسويتني ام عبي!"

"شسويلك احسن ما أسجلك ابو كربله بموبايلي"

"چا شبي ابو كربله لازم ما يعجبچ وتردين ابو بغداد!"

"هاي شلون عرفت؟"

"هااا!!!!"

"يلا راح انام اني"

"اشتعلت روحك امير ليش شالعة گلبي انتِ؟؟"

"لا تشعل بروح ابن عمي ما ارضى عليه، يلا سولفلي على العباية شنو اخبارها؟"

"والله لو يدري امير مسوي انا عباه چان لبسني عباه ودزني لفراقد"

"هاا هاا تذكرت سمعت فراقد تريد ترجع صدگ هالحجي؟"

"اي جاية لشيخ علي ومتوسلة وطاردها ما راضي"

"احسن.. المهم راح تسولفلي على امير لو انام؟"

"مابي شي نعال نامي نامت عليج هايشة"

"تدعي عليَّ وتريدني احجي وياك زين مو؟"

"چا والشوارب الگصيتهم خايبة والعباس لخاطرج بترتهم"

"مع السلامة"

"رفل لا لا وينج عندي اخبار على امير"

"لا تصيحلي رفل احترم نفسك"

"چا شصيحلج ام عيون"

"استغفر الله!"

"فگست عيونج شكد حلوات"

عصبت منه ورأساً حضرته، شمرت موبايلي على الميز ونمت عدل ومثل كل يوم اتندم كللش لان جاي احچي وياه بس والله جاي أسويها خاطر اعرف اخبار الامير منه.. كل المستجدات يمي وانا الاطمن اهله عليه والكل حسباله جاي اجيب الاخبار من امير وهو يسولفلي ما يدرون ابو كربله كل يوم ينطيني تقرير عنه..

الندم جاي يسيطر عليَّ عبنه جاي يتعلق بيه وانا نفس الشي كل يوم لازم يحاچيني حتى لو ماكو شي جديد يخص الامير لازم يسولف وياي بأي شي ثاني وهالشي غلط!!

غلط لان گبل اسبوعين گال يريد يدز امه تخطبني گلبي بيومها ظل يرعد رعييد من الخوف والتوتر والفرحة ما فهمت ليش فرحت بوكتها خصوصاً وانا مستحيل ارتبط بزلمة نفسه كلشي بي ما يعجبني لا شكل ولا شخصية ولا نمط عيشة.. خفت ارضى بي واتندم وخفت اورط روحي فـ رفضته وگتله هالموضوع ما ينفتح بعد وصدگ ما فتحه بس ظل يذبلي حچي ويسولفلي شكد معجب بيه وانا باقية على قراري ومستحيل اغيره!..

**

"تَـمني"
رجعت من بغداد ورجع الدوام ورجعت حياتنا الروتينية لا جديد في حياتنا غير افتهمت بخالة رسمية صاير عدها فضول عجيب تجاه رهف، حبيبة وسبأ يكولن كل يوم لازم تسأل علي السور عنها وتكعد وياه بالساعة والثنين يسولفون بيها وتكعد تسمعله بكل حماس.. ضحكت من حبيبة كالت عبالك عدهم مسلسل يومية يكعدون سوه ويحجون بحبيبة گلبه ويضغطون علي النور وعلي الكرار لان ميقبل سور يسمعون شي يخص خطيبته..

فرحت بهالانجاز خطية رهف تستاهل كل الخير وعرفت ان هي كلش سعيدة ويه علي السور، صح ميطلعون ابد لان ابوها ميقبل الا يتزوجون بس باقين على تواصل بالتلفون هو مشتري الها هدية..

كعدت على المسطبة بالجامعة انتظر تالة تجيني وشفتها من بعيد تمشي وحدها، بعدها ما وصلتني وانتبهت لـ وديان تجي بأتجاهه وسولفت وياهة شوية.. يممممة شكد اندقيت مجرد اشوف طولها اتنرفز واكره حياتي!

مرت خمس دقايق وعافتها تالة واجتني، خزرتها ضايجة وقبل لا اللحگ ارزلها كالت وهي تبرر لروحها..

-سألتني على الجدول والله لان صارلها كم يوم ممداومة

-شعدها ممداومة؟؟؟

-راح تتزوج

-كذابة!!!

-والله كالت جايها خاطب واللتهت تجهز

-يمممة گلبي!!

-شبيچ تَـمني؟؟

-ولج خاف.. خاف امير ااخ احس راح انجلطط

-لا يمعودة صدگ چذب مستحيل

-لا لا لازم اشوفه اليوم لازم احجي وياه امشي

-وييين

-امشي نروحله

-وين نروح والسايق؟؟

-هو نروح ويه السايق اگله ياخذني لمحل امير

-امير عنده محل؟

-ولج ايييي مال قوالب وبورك ومادري شنو امشي

-ياا نسيت صح

طلعت وياهة من الجامعة اركض وگلبي يركض گدامي، صعدت لسيارة السايق الصاير يوصلنا من انتقلت لبيت خالتي لليوم وانطيته عنوان محل امير.. بالبداية الرجال استغرب بس ما حچى واخذنا..

-تَـمني: تالة شلونهن ملابسي

-يعني عادي مرتبات

-عندج مراية؟

-اي هاج

طلعتلي مراية واخذت جنطتها ابحوش بيها اشوف شنو مكياج جايبة، شفت عدها بس تنت لونه احمر طوخ وكحلة اخذتهن وكعدت املغط روحي بالسيارة.. لو الامير القديم يشوفني هيج والله ينجلط يكره المكياح بره البيت وكوة يقبل بس كحلة اخلي لان متعودة عليها ومتوكع من عيني غيرها مستحييل يقبل ومخبلني بهالشي..

-تَـمني: شلوني؟

-تالة: ولا غلطة

هزيت راسي راضية ورجعت الاغراض بجنطتها، ربع ساعة ووصلنا لمكان محله اخيراً، هاي اول مرة اجي لهنا واستغربت من شفته كله زلم.. شارع عبارة عن زلم وبي كم مرة ينعدن على الاصابع..

-تالة: تَـمني اتوقع احنه بالمكان الغلط

-تَـمني: لا، ابقي هنا تالة انتظريني

-لا عشتوو انزل وياچ

-لا تالة شوفي المكان مو مناسب

-انزل والله

تأفأفت بوجهها ونزلت وهي ويايه، كلت للسايق ينتظرنا بينما احجي ويه زوجي وارجع..

-تالة: شوفي شلون رجع الدم لوجهه من گلتيله رايحة لزوجي عبالك مادري وين منزلنا

-اششش امشي يلا

تمشينا لمحله صاير بالوسط، وگفنا بالباب ما دخلنا من شفنا ابو كربله واكف وعلي النور موجود هم وبعد زلم ثنين وامير كاعد على كرسي وكباله مكتب ومحطوط فوگاه دفتر چبير وملتهي يقرا بي..

-ابو كربله: خوي اظنه موجود بالمجر يمك

-الامـير علي: لا شلته اليوم بس نسيـ...

قطع كلامه ما كمل الكلمة وظل يدور على الشي النسى وين وداه، بوكفتي واني اراقبه من بعيد انتبهت لوجهه بده يعصب وعگد حواجبه، ظل يدور بحرگة كأن نسيانه وين وداه زعجه لان علي النور بسرعة تقدم عليه وكال..

-انا ادوره امير خلي

-الامير علي: لا لا انا حاطه هنا! انا متأكد

-ابو كربله: اي خوية يجوز شلته انا وما حاس اعذرني هسة ادوره الك

اللتهوا كلهم يدورون والزلم واكفين ينتظروهم، ضربتني تالة بعكسها وهمست..

-اتوقع اجينا بوقت غلط

-تَـمني: لا.. السلام عليكم

سلمت بصوت مسموع ودخلت للمحل كلهم اللتفتوا عليَّ عدى الامير بقى يدور بالجرارات وحاط كل تركيزه بيهن عبالك عنده امتحان ذاكرة مهم ولازم ينجح بي..

جاوب ابو كربله وطلع والزلم الوياه هم طلعوا من المحل يعوفونا وحدنا بينما علي النور ظل بس مبحلق عيونه علينا متفاجىء من وجودنا..

-الامـير علي: لگيته!! لگيت دفتر الحسابات لگيته

رفعه فرحان وشمره بقوة على الميز مخلف صوت قوي نتيجة ارتطام الدفتر بالميز وگال بحماس بدون لا ينتبهلي..

-گلتلكم ما نسيته گلتلكم شنيي هيته هي وانسى ما انسى انا

-علي النور: ههههه الحمدلله

ابتسمت على فرحته ودرت وجهي لتالة لگيتها هم مبتسمة، اخيراً انتبه لوجودنا وفوراً رفع حاجبه مستغرب..

-تَـمني: هلو

-الامـير علي: تفضلي؟

-تَـمني: اجيت اريد احجي وياك بموضوع

-خير ان شاء الله؟

-عندي مشكلة والكل گال روحي للامير هو يحلها

-انا؟

-علي النور: اي اي خوية انتَ اكيد

-الامـير علي: خوشن.. بس المچان مو مناسب الچ خيتي خليها بـ...

-تَـمني: خيتك؟!

-علي النور: دخيلك يا علي راح تعلگ

-تالة: تَـمني على كيفج داده

-تَـمني: تمام تمام.. اخييي امير اريد احجي وياك هسة اني بورطة واحتاج رجاااال مينسى يساعدني!

-الامـير علي: اسمعچ

-تَـمني: اريد نحجي على انفراد

-الامـير علي: نور اطلع بلا امر عليك

هز راسه علي النور مبتسم، مشى بأتجاهي وقبل لا يطلع من المحل همسلي بفرحة..

-كون يبقى ما يتذكر خاطر يظل محترمني هيج

-تَـمني: لا دقيقة شلون تطلع اخوك لعد وبت خالتي وين تروح؟ احتاجك بموضوع خاص ماريد احد يسمع

-علي النور: اموري عنده مخزن هنا بس شوي صغير

-تَـمني: ممتاز!

-الامـير علي: شني ممتاز المخزن چن گن دجاج

-تَـمني: منتأخر يلا منتظرتك

اشرلي نور على المخزن صاير طابق ثاني متصل بدرج حديد صغير، صعدت فوك وصدگ المخزن صغير كللش ومتروس مواد انشائية وقوالب قديمة مشمرات والتراب ماكلهن..

هزيت راسي راضية بهذا القليل وبقيت انتظره فترة، خفت ميصعد ويكعد يستشرف براسي لان المخزن هيج حجمه گوة يكفي نفرين وانوب سگفه ناصي شوية وينطبگ عليَّ..

عدلت جنطتي على چتفي ونويت انزل لان صارلي هواي واكفة وأيست يجي بس تراجعت بسرعة من شفت ظل جسم طويل صار على الدرج ديصعد.. نبض گلبي بقوة من شفت وجهه وتلاگت عيوننا من بعيد، بقى واكف على الدرج ما دخل المخزن وحاچاني مناك..

-تفضلي

-تعال شيخي شلون احجي هيج

-المچان صغير ماريد اضايقچ

-لا ما اتضايق عادي

نفخ هوا ومسح گصته البده يتجمع عليها العرق، شكله متوترر كلش وحتى من صعد ما حط عينه بعيني ابد بقى منزل راسه ويحجي ويايه..

-تَـمني: اول شي شكراً لانك فرغتلي من وقتك مبين چنت مشغول

-جسر للطيبين

ابتسمت على عبارته الاخذتني بعييد كللش بعيد اخذتني لبدايتنا ولبداية تعارفنا وزواجنا، اخذتني من جان الامير يحب تَـمني ويسوي المستحيل حتى يبقى وياهة ويستمر زواجهم..

-تَـمني: عندي مشكلة وماعرف شنو حلها رحت لخالة رسمية الي هي امك وكالت انخي الامـير علي ميرجعچ للبيت بدون لا يحل مشكلتج

-ان شاء الله بس شني مشكلتج

-اول شي مبروك تستاهل كل الخير

رفع عيونه يباوعلي متسائل، حرك راسه مستفسر وگال..

-على شنو؟

-سمعت راح تتزوج

-انا؟؟

-اي

-لا ماكو هيج حجي

-ها اسفة عبالي راح تتزوج سمعت هيج اشاعة

-لا لا

-هاا اوكي لعد نرجع لمشكلتي؟

-اي

رجع دنگ راسه وانطاني صفحته حتى يسمعني، حمحمت وتعمدت اتقرب منه حتى اكدر اباوعله زين واشبع عيوني من شوفة وجهه، خنگتني العبرة من شفت طالعله شيب بلحيته ووجهه مسمر بـ سمار التعب، غمضت عيوني امنع دموعي توكع وهمست بصوت ناصي..

-اني متزوجة من رجال يعشقني واعشقه وچنت عايشة وياه احلى حياة رغم الظروف التحطينا بس مرتاحة وسعيدة، چنه دنجهز حتى نطلع لبيت وحدنا ونستقر ونبني حياة جديدة النا ولاولادنا بالمستقبل بس.. بس بين ليلة ويوم گعد زوجي من النوم ميتذكرني

فز جسمه ورفع عيونه عليَّ متفاجئ، نزلت دمعتي التچوي خدي وهمست بصوت انصى..

-اجيتك اريدك انتَ ترجعلي زوجي، اريدك تساعدني ارجع زوجي الوعدني ميعوفني للموت يا الامـير علي.......

يتبع 👑....

━━━━━━ ♛ ━━━━━━

🥹♥️♥️♥️