الامارة الفصل الخامس وستون 65 - بقلم 𝐙 𝐇 𝐑 𝐀

#الامارة

بقلمي: زهراء السلامي 💎

لتنسون التصويت + التعليق بين الفقرات + متابعة لحسابي 💙.

عيونچ تضيع سلفنا، احنه الچنه معدلين.. ♥️

━━━━━━ ♛ ━━━━━━

-اجيتك اريدك انتَ ترجعلي زوجي، اريدك تساعدني ارجع زوجي الوعدني ميعوفني للموت يا الامـير علي

صفن بوجهي صفنة مطولة وعيونه تصعد وتنزل تراقب دموعي الجبيرة الدتنزل بغزارة، حرك راسه محتار وذب حسرة عالية بدون لا يحجي شي..

-تَـمني: راح تساعدني لو لا؟

-استغفرالله ربي واتوب اليه

-لا تستغفر وجاوبني راح تساعدني لو لا!

-المشكلة ماعرف اساعدج! ما جاي اعرف شنو المطلوب مني؟ شلون اكدر اساعدج وشلون ارجعلج زلمتج وانا ماعرفه!

-تعرفه تره

-عايني يا بت الناس انا لا يعجبني اضوجچ ولا اضوج نفسي اريدج بس تفهمين انا ماعرفج! والعباس ماعرفج ماعرف منين طلعتيلي انتِ

-بس اني اعرفك

-وانا ماعرفج!

-عادي نتعرف من جديد

-شنهاي!

-اي شكو بيها لو اني ماعجب ذوقك الجديد؟

-اااااخ دخيلك يا علي

-جاوب

-خالو نزلي جوه

-جاوب!

-خايبة ماريد اجاوب

-جاوب!

-ولج!

-جاوب!

-تَـمني!!

-ما انزل الا تجاوب!

-شجاوب غير افهم على شني!

-اعجبك لو لا؟

-ولج بابا عيب والله عيب

-جاوب

-خ** بيه اييي تعجبيني ايي ارتاحيتي؟؟

-يلا لعد خلينا نتزوج مرة ثانية

-يا بوووووية

-عادي ما اطلب مهر جديد لا تخاف بس خلينا نتزوج

-انتِ صاحية بنيتي؟

-اي

-والله اشك بهالشي

-على كيفك داده تره انتَ المو صاحي وناسيني معناها العلة بيك!

-خوشن ناسي انا شتسوين بواحد ناسي؟

-اريده معليك انتَ

-شتسوين بي!!

-احبه

-وهو مايعرفج خاطر يحبج

-كذاب

-عايني تَـمني انتِ مبين عليج بت حبابة وفقيرة و..

-وحلوة واجنن ومخبلتك چنت كله اذكرك بي كله بس انطيني فرصة خلينا نتقرب من بعض صدگني راح تتذكرني ثق بيه اميييير

تقربت عليه اكثر واني اهمس اخر كلماتي همس، صرت لازكة بي لدرجة رجلي طخت برجله وهو ما ابتعد مني.. جازفت بروحي وبردة فعله اكثر ورفعت ايدي على كيف وحطيتها على خده اتلمس لحيته، توقعته راح ينفر مني بس ما سواها وظل يباوع لعيوني وهالشي شجعني اكمل..

-امير انتَ احسن انسان دخل لحياتي، علقتني بيك وخليتني احبك هواي.. احبك لدرجة من مرضت لليوم اني لا ليلي ليل ولا نهاري نهار كلما احط راسي على مخدتي دموعي تنزل من وحدها واني اتذكر ايامنا وشلون چنه عايشين سوه

تنهد وغمض عيونه يحرك راسه بـ "لا" المشكلة نافي ومدا يقتنع ردات فعله وملامحه كلها تأكد هو ممقتنع بالاگوله بس اهم شي مدا ينكر ويعصب عليّ مثل قبل..

-چنت تدلعني نوومه وامنية وتومه وتمنه وفهاوي.. چنت تحبني من اكول اسمك وتضحك من تحجي ويايه بشي وما افتهم عليك.. احب من تصغر عيونك من تبتسملي وتباوعلي بعيون كلها حب، امير انتَ تحبني لدرجة تحاربنا من كل الجهات وما عفتني بقيت ويايه وسندتني وعوضتني على كلشي تعيس عشته

-ما اذكر

-بس اني اتذكر، المهم اني اتذكر واني اعرفك منو هالشي كافي والله

-وليش ترضين على نفسج تعيشين ويه زلمة ما يعرفج ولا يتذكرج؟

-لان اعرف هذا الگلب ذايب بيه حتى لو عقلك نساني

دست على گلبه بأصبعي ونزل عيونه يباوعله، رجع نظراته عليَّ وگال بهدوء واضح جداً بصعوبة مسيطر عليه..

-انتِ تكولين تحبيني صح؟

-حسب

-يعني شني

-يعني من تكون حباب ويايه احبك ومن تزعلني اكرهك

ضحك خفيف مستغرب من حركاتي واني اكول جملتي الاخيرة وماهتميت اني متعودة احجي وياه بهالاسلوب وبنبرة الدلع هاي..

-والله مادري شگلچ

-لا تكول بس ارجع اميري الحباب

-ولج سودنتيني بعلي سودنتيني

-عادي امير القديم جان متعود ويحب هالسوادين

-شني امير قديم وامير جديد تره ماكو هيج سالفة خوية!

-اكو اكو معليك انتَ

-اشش ماكو

-لا تأشأشني تره والله ازاعلك

ضحك مرة ثانية بس هالمرة بنفاذ صبر وفرك وجهه، ظل يذب حسرة وره حسرة ويستغفر على كيفه وهم ما اهتميت لان مبين الافندي عاجبه الوضع ومتونس على وگفتي گدامه ونسى الحرام والحلال واستشرافه وظل ياخذ وينطي ويايه واحنه واكفين وجه بوجه..

-بس تصير زين راح نتزاعل على تصرفاتك هسة!

-شني؟؟

-ليش واكف ويه بنية غريبة متتذكرها مو عيب عليك؟

-هو انا؟؟ انتِ اللاطشة بيه وتنوحين فوك راسي

-اي غير رجلي

-خ** على رجلج منيين صرت ولج

-معليك معليك انتَ زوجي حبيبي وراح يجي يوم وتتذكر وتعض اصابع الندم على الديصير بيناتنا هسة

-ليش بوية اعض اصبع الندم؟!

-لان نوميتك واكفة گبالك وما تداهرت وياهة

-نوميتي ياهي هاي

-اني

-لا صدگ!

-متصدگ مو؟ هاك شوف صورنا هاك

طلعت موبايلي من الجنطة وفتحته دا اشوفه وما قبل، لزم ايدي اللازمة بيها التلفون حيل وعصرها..

-تَـمني

-خليني أراويك الصور

-تَـمني سمعيني

-بس خلينـ..

-تَـمني انتِ عاشگتني؟

-اي

-تحبيني وتدورين راحتي؟

-اكيد اي والله

-چا عوفيني

سهم وحطه بنص گلبي ويه ما نطق هالكلمتين، بهتت وعجزت اتحرك احس براسي خدر وضغطي صفر، اخذ كل حيلي من اردف بنبرة مو هادئة..

-ماريد اضوجچ ولا اجرحچ واعصب عليج بس والله العظيم گوة كاض روحي ومتحكم بأعصابي مبين عليج بت ناعمة وما تتحمل ينكسر خاطرها

-لـ.. لعد ليش تكسر خاطري

-تَـمني لا تبجين دخيل بخت الحسين لا تبجين

لزم راسه يعصره بين ايده متوجع وانطاني ظهره، حاولت اسيطر على دموعي وما ابجي بس فشلت والله فشلت ضميت وجهي بين ايدي ابجي بوجعع گلبي الوجع البي يذبح، صرت اشهگ بصوت وگنبصت بالكاع اكعد محتاجة اسند طولي لا اوكع من الدرج..

-الامـير علي: دخيلك يا علي

-حـ.. حرام.. عـ.. حرام عليك

-والحسين انتِ بت يتمناها كل زلمة العيبة مو بيج وعلي بس انا تعبان.. تعبان وما جاي اكدر اتذكر شي تبهذلت وياكم تبهذللت

**

"تـــالة"
سمعت صوت بچي تَـمني عالي جاي من فوگ، متت خوف عليها وركضت اصعد الدرج الحديد شفتها مگنبصة بالگاع والامير واكف كبالها بس وجهه مطعون طعنن وايده ترجف مال واحد تلفانة اعصابه..

وكفت على اخر باية القريبة منهم لان مستحيل اكدر اخطي خطوة داخل المخزن ما اكفي، وكفت احجي ويه تَـمني من بعيد حتى تكوم وتجيني والامير بقى يسولف وياهة بصوت عصبي وعالي..

-الامـير علي: ماا اتذكر حتى روحيي! هذاا وجهي من اعاينله بالمراية ماا اعرف نفسيي لا تلوميني عبن ما اتذكرج!! ما اتذكركم ما اتذكر اخوتيي الصغار يمته كبروا؟؟ ولج حبيبة! جانت حبيبة تلعب بالساحة وترجع مطينه وتركض تلبد بحضني تخاف من سلوى لا تكتلها! يمته صارت بهالعمر وتزوجت وتطلگت يمته؟؟

دمعت عيوني على حيرته وايده الترجف وهي تمسح بوجهه وشعره ولحيته ويفتر بنفس الدائرة الواكف بيها كل شوية ينطي تَـمني ظهره وانوب يرجع يباوعلها ويذب حسرات، بقى على هالحال الصعب حتى من گال بحرگة والغصة تارسة صوته..

-صارلي شگددد انتظر اتصال من ليث وضرغام تالي يجوني يگلون اصدقائك ماتوا؟؟؟ ماتووا!!! ماتووا وما حضرت فاتحتهم ماا ودعتهمم ماا چنت وياااهم!!!

بنفس اللحظة دموعه كامت تنزل وضم وجهه ينطينا ظهره، تگطع گلبي على منظره ومنظر تَـمني مو احسن منه، مجرد شوفتهم بهالحال خلتني اأيس من الدنيا ويأست اكثر من كال بتعب..

-محد يحس.. محد يحس بالوجع والتعب الهلكني وانا اشوف كلشي تغير، بين يوم وليلة كللشي تغير لا انا انا ولا اهلي هم اهلي! كلشيي مو نفسه وتردوني اصدگ واتقبل هالتغيير چن ما صار شي!

-تالة: امير اني اعرف الدتمر بي صعب بس تَـمني هم تعبت، انتَ اكيد متتذكرها بس هي شنو ذنبها؟

-مالها ذنببببببببب

فزيت من عاطها بوجهي بعصبية مخيفة، هسة عرفت العصبية الجانت تَـمني تحجي بيها وتكول عنه يتخبل طلع صدك يتخبل..

-مالهاا ذنببب واناا جاي اگلهاا لا تبقى تبني احلااام واوهاام ويه زلمةة ما يتذكر نفسه!!!

-تالة: تتذكـ....

-اگدر اللعب عليهااا اكدرر اگلها اتذكررج واتونس ويااهة البت حلووة وتجيب التاايه بس مالها ذنبب ينضحك عليهااا حراااام

-تالة: تمام.. تمام هذا هو اهدأ اني راح اخذها هسة انتَ بس اهدأ

مشيت خطوة اضافية اكمل طريقي للداخل وگوة دحست روحي يمها المشكلة المواد الانشائية الموجودة هنا سادات المكان سد ومدا يخلينا نتحرك بأريحية، نصيت يمها ولزمتها من ايدها اگومها بس متقبل تكوم ما سكنت ولا انكطع بچيها جسمها يرجف وتبجي على حظها..

-تالة: كومي تَـمني كومي يا عمري خلينا نطلع منا

-تَـمني: خـ.. خلـ.. خليني.. خليني

استغفر الامير يلطم على رجله عصبي بس حسيت عصبيته مو منها ومن بچيها حسيته مقهور عليها وعلى نفسه لانه ميتذكرها، جبرتها تكوم وگوة جريتها جر ونزلتها الدرج انهد حيلي متقبل تتحرك نابتة بمكانها علما نزلتها اني روحي فاحطة..

-تالة: تَـمني لا تبجين خلص خلي راح يجي يوم ويتذكرج والله صدگيني راح يعرفج وتذكري كلامي

طلعتها من المحل مالته وشفت علي النور واكف بالباب ويهز براسه مقهور من شافها شلون تبجي، ما حجيت وياه شي مجرد رفعت ايدي اودعه ومشيتها اعبرها الشارع حتى نروح للسايق، تمشي وتبجي بنحييب دمر كل امل جان بگلبي والزاد وضعنا سوء هو وگعتها! برمشة عين ماعرف شلون داست على قيطان حذائها الرياضي وعثرت..

-تالة: يمممةة

صحت ممرود گلبي من وگعت على ركباتها وسندت روحها بيدها الثنين بنص الشارع.. الشارع انخبص كلها تصيح الله واسم الله واجوا زلم يردون يساعدوها لانها وكعت وبعد حيل ماعدها حتى تكوم البچي اذاها واخذ كل قوتها شكد ردت اكومها بس ماكو مدا تشوف بعيونها وبقت منصية راسها وتهتز چتافاتها بالبچي..

-تالة: تَـمني كومي انفضحناا تَـمنييي

-تَـمني: عوفـ.. عوفي.. عوفيني تـ...

-ما اعوفچ هنا!! امشي تَـمني حرام عليج الدتسوي بنفسج حرااام

تقدمن نسوان ثنين ويايه تگابلن يساعدني عليها وانتبهت لـ علي النور اجه يركض من بعيد يشوف شنو صاير همزين من انتبه علينا وعيونه ظلت ورانه من طلعنا وكدر يشوفنا..

-علي النور: شصايرر سلامات سلامات.. شوي خوي وخر بلا زحمة.. شني السالفة خوية ليش تكض بيها وخررر

-الرجال: البت طاحت

-علي النور: وشني تريد تشيلها انتَ؟؟ وخر خوية رحم الله والديك

وخر الرجال بسرعة وباقي الزلم هم ابتعدوا والحمدلله من تَـمني استجابت لصوت علي النور وكدرت تسند روحها تكوم، سودة عليّ چف ايدها مزلغ وبنطرونها مدمور ومحكوك ووجهها هم صاير بي دم ماعرف منين اجه..

-علي النور: انتظروا دقايق لا ترحون هسة اجيب امير

-تالة: لا لا وين تجيبه يمعود اصلاً هو السبب بحالتها هاي احنه نروح السايق واگفلنا على الشارع الثاني

-علي النور: يا سايق وهي بهالحال لا ما يصير، اوگفي بس دقيقة هنا انتظريني

عافنا وراح يركض على جهة المحل، بينما رتبت حال تَـمني ومسحت دموعها واخذت جنطتها من ايدها اني شلتها شفت علي الكرار يطلع من المحل يركض..

-تالة: عزا هذا منين طلع!

اجه يهرول بأتجاهنا وبدون سلام ولا كلام اشرلي بيده وكال..

-يلا يلا امشن للسيارة يلا

-تالة: وعلي النور؟

-نور بقى ويه امير يلا تالة امشي

هزيت راسي ومشيت واخذت تَـمني ويايه مثل اللعابة اني احركها منا ومنا تعبتني، وصلنا لسيارته وركبتها بالكراسي الوره واني كعدت وياهة هم وهو بكرسي السايق..

حرك السيارة كرار واني جريت من كدامي كلينس امسح وجه تَـمني وايدها وانفض بنطرونها وارتب وضعها لا تشوفها امي هيج وتتخبل..

-علي الكرار: اووووف شنو هالحالة استغفر الله ربي واتوب اليه

-تالة: تعبت المسكينة

-علي الكـرار: مو گلنا لا تروح

-تالة: وهيج تظل لا متزوجة ولا مطلگة؟ انتو شنو على گلوبكم محد تأذه غيرها وانلعب بأحواله!

-علي الكـرار: تره انا...

-تالة: بس حاضرين تگولون لا تتقربين منه ولا تحجين وياه وعوفي ومعليج بي بس الى متى؟؟ الى متى تبقى هيج لشوكت! تره الامير صارله بهالحالة اشهرر!!

-شبيچ اكلتيني وشربتني ما جاي اگول هالحجي بس لخاطره هو عايني لحالها!! شوفي وضعها هذا عاجبچ؟ شنو استفادت من راحتله فهميني!

-استفادت لان گللها ماريدج وعوفيني وهذا الراح تسوي!

-تَـمني: تالة

-تالة: اششش سكتي انتِ!

-علي الكـرار: هو بكيفج تعوفه!!

-تالة: اي بكيفيي

-علي الكـرار: تره زلمتهاا شني هي هيته الرجال مريض وما يتذكرها قابل هو متعمد

-تالة: كلكم متعرفون هالمسكينة شنو دتعيش محدد بيكم يهتم حايرين بس بأبنكم!

-علي الكـرار: عبن ابننا المريض! اخوي المريض وفقد عقله بين ليلة وضحاها حسبالج هالشي هين؟؟

سكتت مجاوبته اصلاً ماعندي طاقة اتناقش واحس كلشي احجي واگوله مابي فائدة بس اتعب روحي، مقهورة ومحترگ گلبي على بت خالتي الي انمردت مرد بمرض زوجها ومنو يلزمها يگللها عيشي حياتج طبيعي مثل ما هو عايشها همه ميدرون ديدمروها بهالحجي وكل يوم للصبح تظل تبجي ومتغمضلها عين!

رجعنا للبيت كرار وبالباب راد يوكفني ويحجي ويايه بس مالي واهس، تشكرت منه وكتله يتصل بالسايق يگله حتى يرجع نسيته هالمسكين وعفناه مصلوب بسيارته ينتظرنا..

-علي الكـرار: تالة اوكفي!

-تالة: كرار خليني ارجع تَـمني جوه

-تَـمني: اني اروح مابيه شي

فلتت نفسها من ايدي ومشت للبيت تمشي بخطوات بطيئة مكسورة وراسها منزلته، گلبي يفووور من اشوفها بهالوضع ماتحمل اتأذه واتگطع عليها..

-علي الكـرار: كلشي راح يتحسن تالة لا تظلين متشائمة

-تالة: ان شاء الله

-شبيچ كوة تحاچيني چن انا السبب بوضعهم

-مو سبب احد الصار بس اني تعبانة شوية

-سلامتج من التعب

-شكراً

-تالة شسالفة!

-علي اعذرني بس وضعي النفسي ممستقر، اعرف انتَ مالك ذنب بكلشي ديصير بس الدنيا بهذلتنا وكفختنا من كل جهة

-كولي الحمدلله والشكر يمعودة وضعنا احسن من هواي بشر

هزيت راسي مؤيدة وهمست "الحمدلله" تنهدت اخفف من تعبي والحزن العشعش بگلبي ورفعت عيوني عليه من گال..

-انا وياچ.. اقصد يعني وياكم كلكم أي شي تحتاجوه لا تترددون وتطلبونه تالة

-شكراً متقصرون والله

-صيري سباعية وصبري بت خالتج على مصيبتها لا تصيرين انتِ والدنيا عليها وتشجعيها تعوف زلمتها

-كرار تره اني اعز الامير كلش وزواجه من تَـمني چان احلى شي اشهده بس لكل انسان طاقة وهم يجي يوم يبزع ويمل ويريد يكمل حياته

-وانا؟

-شنو انتَ

-هم راح يجي يوم تبزعين وتملين من وضعنا وتكملين حياتج؟

-كرار..

-لا خلص لا تجاوبين.. انسي سؤالي ولا تجاوبي

-لا كرار راح اجاوب، لا اني ما راح يجي يوم وامل بس بنفس الوقت ماريدك تتأمل

-گتلج لا تجاوبين!

-لا تضيع عمرك وتظل تنتظرني لاني اعرف امي شنو واعرفها لو قفلت مستحيل راح تغير رأيها

-يتغير يتغير لا تخافين راح يجي يوم ويتغير

-ميتغير واكدر احلفلك هسة! كرار لا تضيع عمرك تنتظر وهم كمل حياتك و.. كمل حياتك وتزوج بنية على ذوق امك وخليها تفرح بيك

-انتَ مخبلة؟؟ كتلج لا تتشائمين شبيچ هيج سلبية ماعرفتج هالشكل انا!

-الله وياك

-تاالة اووكفي مو احاچيييچ.. تااالة

عفته وهرولت للبيت وطبگت باب الحوش ورايه بقوة، نزلت دموعي مكسور گلبي بس بسرعة سكتت روحي ودخلت اكو وحدة حالها اتعس مني كاعدة جوه الليل مدا تنامه من حزنها...

**

-للوااه للواه يا فرخي للواه.. للواه للواه يا وليدي للواه

-ما نام هالصلف

-عيونه مفتحهن اكبر من عيونك العمص

-ابا الحسن علي: خايبة ماكو هيج جاهل صلف وعينه گوية

-ليلة: فديته ابن امه

-اريد اناااام تعبت تعبتت

-اسكت ياهو گلك سوي سوايتك وخلف اذا ما تتحمل

-سكتي ليلة لا اگوملج

-شتسويلي بله؟؟؟

-بس سكتي لخاطر الكعبة

-ما اسكت

-نعله علا روحج

كمزت اطفر من شال المخدة وشمرها عليَّ بعلي لو صارت على ظهري تفصخه مو مخدة طابوگة منطتنا عمتي رسمية..

-ليلة: امشي فرخي امشي نطلع ونعوف ابوك ما يحبنا هذا

-تعالي وين رايحين

-نروح يم سبأ وعلي التقي عاد ذولاك يحبونا

-الزلمة راجع من الواجب تعبان تعاي

-راجع من الواجب وراح يگابل اموري ويكعد بس يشوفه

-ليلة لا تتنحسين وتعالي حدي نامي

-مانريدك خوية هي كوة

-تجين وانطيج شي؟

-شني تنطيني

-اهديج هدية

-عليك علي؟

-اي تعاي

-والله يا حسيون اذا طلعت تقشمر عليَّ اتطلگ منك

-لا اقشمرج شني تعالي وشوفي بعينج

صفنت عليه افكر واقرر اروحله لو لا؟ خاف اروحله ويكول هاي ماعدها كرامة وتفضل الهدية على مبادئها؟ عمي والله حيرة..

-ما اجي كرامتي ما تسمحلي انتَ ردت تطگني

-انا؟؟

-اي چا مو ضربتني بهاي الطابوگة

-ههههههههه حگچ عليّ وهسة تعاي خاطر اراضيچ ام كرامة

تنازلت وحطيت اموري العنون بكاروكه ورحت اكعد بصف ابا الحسن على الجرباية، دگ چم مرة على گلبه بأيده بمعنى حطي راسج هنا بس ما رضيت وانطيته ظهري..

-شو انطيتيني گفاچ

-تأدب عيب

-شني عيب چا ياهي يومية تنام بـ...

صميت حلگه بيدي ما راضية يكمل عبن اعرف لسانه شطوله وراح يدلعه عليَّ، ضحك بصوت عالي ووخر ايدي من حلگه وكال..

-يلا ماحجي ماحجي

-ابو لسانين

-نتعلم منج خوية

-ههههههه اكرهك لا تحاجيني هيج

-ليش خيتي

-اسكت يلا مو اختك انا

-اختي ونص

-خوا الخواك وضيم اللفاك

ضحك بكل صوته وشبگني بين ايده وغصب نيمني بصفه، كزبر كل جسمي من شمني بشعري وباسني على كيفه.. كمشت بفانيلته الداخلية من وره وهمست..

-نام انتَ مو نعسان

-طارت النعسة

-اموري كاعد تره

-واذا

-اكعد راحة حسننن

ضربت ايده البدت تحارش وكمت اريد اوخر منه وما رضى رجع جرني وكال..

-خلص راح اصير عاقل بس لا تكومين

-شني هديتي يلا

-دقيقة

مد ايده للجرار اليم راسه وظل يبحوش بي بدون لا يشيل عيونه عني، توترت من نظراته التاكل وتشرب بيه، ابا الحسن بدون لا يحتاج يحجي شي اكدر اقرا عشگ ليلة المتداخل بعروگ عيونه..

-ليلة: احم شني شجايب وصارلك ساعة تدور

-كضيته

كالها وطلع من الجرار علبة مجلدة بجلاد هدايا لونه احمر، ابتسمت متحمسة ومادري شماله گلبي ينبض اريد اشوف شجايبلي وشنو المناسبة..

-هاچ

-شنو هاي؟

-فتحي

گعدت على حيلي بين ايده وصرت افتح بالجلاد بس على كيفي حرامات حلو لا يخرب يفيدني بعدين، ظليت اشيل اللزاگ منه شوي شوي وهذا كاعد ويتأفأف..

-شگي ليلة

-لا ولك يفيدنا

-شگي لا اشگ زيجي بشني يفيدنا ولج

-شكد نحس هالزلمة

شگيت الجلاد بضعف حماسي گبل شوي وشهگت من شفته علبة موبايل جديد!

-حسيوووووووون شنووو هذاااا

-والله زين ما يتسودن الفرخ على هالصوت

-عوف الفرخ عوفه هذا شني جايبلي موبايل جديد؟؟

-عجبچ حبيبتي

-ولك يشششگ

-الحمدلله من عجبچ

-ضلعي شنو هااي والله ولا ادري بيك رومانسي

-اعجبچ انا

-وانا حسبالي مشتري لصاحبتك الجاي تخوني وياهة

-لا شني اخونچ ليش منو توصل لاظفرچ واعاين عليها

-لا بله

-والله

-خوش زلمة عفية عليك

-اعجبچ

-زين واذا خنتني بعدين؟

-ما اخونچ ليلة شني متنسية على خيانة انتِ

-يعني مادري اگول محامي وحليو ولسانه طويل البنيات يحبن هالصفات

-البنيات يحبن يعني انتَ منهن صح؟

-لا مو شرط

-ولج بنات الدنيا كلهنن حبني وانتِ لا شسوي بروحي وتحبيني من خ** بروحيي

-لا لا ميخالف شبيك هو شني الحب ينوكل ينشرب خيولي المهم متونسين وعلاقتنا حلوة هذا كافي

-اهمداج

-بعد روحي

-هسة عجبج الموبايل لو اجيبلج غيره؟

-لا حلو شني غيره اريدن هذا بس شنو المناسبة؟

-هدية ولادتچ لاموري

-لا بله

-اي شبيچ

-چا فرخي ما تجيبله هدية شمعنى؟

-فرخچ جبتله ذبيحة شتردين اجيبله بعد

-لا تچذب علي الدر جاب مو انتَ

-والعباس حتى انا ذبحتله عقيقة بيوم طهوره

-هاا اي سودة عليَّ ردت اسويله حفلة بطهوره بس صار بسرعة بسرعة

-اعوضكم والله بس انتِ جاي تشوفين وضعنا شلونه

-اي صح جاي اشوف.. يلا ما يهم عادي

-ليلة

-ها

-انتِ ما زعلانة عبن ما سويتي عرس؟

-اي والله

-ما تجامل هالبت

-اي زعلانة چا شني اريدن حالي حال البنات اللبس بدلة وارگص واترعن قابل وحد

-زين شنو الحل شنو نسوي خاطر ما نخليها بنفسچ؟

-بعرس رهيفة راح اللبس بدلة بس مو بيضة فشلة منها واريد اروح صالون هم

-صار بعيني

-واريدك تحجزلنا فندق مثل العرسان

-خادم

-ونسافر؟ لو زودتها؟

-لا نسافر شكو بيها بس خلي اموري شوي يكبر خاطر تسيطرين عليه

-صدگ حساني تاخذنا لو بس تريد تسكتني

-لا وداعة امي اخذچ وبعيني حگچ هذا

-والله؟

-والله

-زين وين نروح

-انتِ وين تردينا نروح؟

-بنفسي اروح لايران بس عاجبتني تركيا هم فـ محتارة

-شنو رأيج نروح للرضا سلام الله عليه اول؟

-احسن يعني؟

-اي خاطر افرچ بيها فر ما اخلي مچان يعتب علينا

-اي اي اريد

-هذا هو چا حضري نفسج على العطلة

-بشرفك؟؟

-اي

-حسن العطلة ما بقالها شي صدگ تاخذنا؟؟

ضحك بزعانة روحه گدما حلف وشبگني مرة ثانية وحط راسه على صدري، ابتسمت فرحانة وكلني حماس ومن الفرحة مال الموبايل والسفرة غفيت واموري وابوه غفوا وياي..

حسيت من عز نومتي المريحة على صوت اموري ينوص بكاروكه، درت وجهي على جهة ابا الحسن ما لكيته بصفي والغرفة هم مظلمها هاي شكد نمت وما حاسة على روحي..

كمت من الفراش ورحت لابني شلته بين ايدي اهزهزه بس ما سكت مبين جوعان، رجعت على الفراش رضعته ونزعته الحفاظة وگمطته ونزلت بي جوه وره ما لبست حجابي وصايتي..

-ليلة: ذول وينهم شو البيت فارغ

ناص امير بأيدي ضايج ويتعارك بيده يريد يطلعهم من الگماط ولك هالگدوتك وما شاء الله هيج قوي چا لو كبرت شتسوي بينا..

-ليلة: كافي ولك.. هاا؟ اسكت لا اكفخك..

بچى بصوت عالي ويعصر بوجهه ما راضي ضحكت على حركاته الحلوة من فدوة لوجهه اروح، بسته بخدوده المعكمشات وحبيت عيونه العسلية على ابوه ونزلت اروح لغرفة عمتي رسمية ولگيتها هي وسبأ وعبق وحبيبة كلهن هنا..

-ليلة: ها ولچن شو هنا

-رسمية: هاي عليمن ولچن ولچ لويلوو

-على البنيات مالج غرض عمة لا تحطين روحج

-چا انا مو بت ولج؟؟

-ليلة: هاا هاا تردين نتعارك بهالمغربية؟

-رسمية: اصص سكتي لسانها شطوله ياهو يگدرلها بت نويصر

-ليلة: عمة هسة شتسون هنا ما افتهمت

-عبق: خالة جبرتنا نتعلم حياكة

-ليلة: شني؟؟

-رسمية: هدي هاذ من ايدج وتعاي تعلمي وياهن احسن من كعدتج بلا فايدة

-ليلة: سودة عليّ هاي منزلتهن من فوك وهاي جايبتها من بيتها خاطر تعلميهن حياكة عمة

-رسمية: اي وشكو احسن من النگ فوگ روس زلامهن

-حبيبة: بس انا ماعندي زلمة يمة

-رسمية: يصير عندج يصير

-ليلة: عمة خلينا نشرب چاي راسي دايخ انا، تعاي وخلينا نحش بالوادم

-رسمية: لا حرام كعدي

-ليلة: بس بهالسوالف تستحرمين من يومية كاضتنا وترزلين بينا ما تكولين حرام

عضت عمتي على اصبعها حييل واندارت عليهن تدردم عليَّ وتگلهن ياهو يگدر للسانها شطوله..

-رسمية: ما تصيرين مثل هالفقيرة سبأ حسها ما ينسمع بالبيت حبابة وسكينة مو مثلج صوتها يلعلع ومشكلة فرخها بخصرها ما تهده

-ليلة: اي سبأ احسن مني چا هستوچ دريتي

ضحكن البنات وحتى هي ضحكت وظلت تهز براسها وتهمس "اويلي منج" ضحكت عبن متعودة على هالمداهر يومية واتونس بي لا اضوج ولا اشيل بگلبي وهي نفس الشي، رحت يمها وحطيت اموري بيدها وكلت..

-عمة انا راح اطلع لبيت وحدي مو حالة هاي

-رسمية: شني ولج شني شني ما سمعت؟؟

-حبيبة: يمعودة ليلة سكتي لا يصير بيها شي

-ليلة: لا صدگ شني اريد استقر اريد نرتاح اريد انطي مساحة لفرخي يزحف ويركض براحته

-رسمية: شيركض ولج وهو بعده چنه گملة!

-ليلة: اقصد بالمستقبل عمة، ثانياً لا تكولين على امير گملة خطية يزعل

-رسمية: حفيدي وبكيفي!!

-خوش چا ابا الحسن زلمتي واريد اخذه واطلع من البيت وهم بكيفي

-اخذذذذي روووحوو اخذذذي ماريدكم كلكمم ماريدكمم

-ها؟

-روحو يمة شوفوا حياتكم رووحو چنها العيشة ويه رسمية صارت ما تعجب ومحد يريدها كلمن اخذله مرة ويريد يعوف امه وحيدها ويطلع من البيت

-ليلة: خوش راح نطلع احنه

-رسمية: وداعة الله يمة روحي ارتاحي بعيد، روحي حگچ هذا بعد محد يريد رسمية كلهم باعوها

حطت الطفل يمها على الفراش وكضت اطراف شيلتها ومسحت بيها عيونها من الدموع الچذبية، متت ضحك على سوالفها والبنات فاطسات خو عبق وجهها صار احمر من گدما حاصرة ضحكتها..

-ليلة: صدگ چذب عمة الخير والبركة انتِ ما راح اطلع منا چا بعد بوجه من اصبح وامسي واتعارك واتداهر كل يوم

-رسمية: لا يمة روحوا اذا تردون حتى انتِ سبيئة گولي لتقي طلعوا وعوفوا رسمية وحدها تاكل غداها وعشاها ويه البزازين

-ليلة: لا لا باقية انا اذا سبأ تطلع ما يهمني براحتها بس انا ابقى خاطر تكعدين ويه اموري الصبح من اروح للدوام

-رسمية: اي مو مربييية عندج!!

-ليلة: يا عمة يا بعد گلبي وين اكو منج انتِ بعلي احنه بدونج نضيع لو شتكولن بنات؟

-عبق: اي والله

-سبأ: واذا علينا انا وتقي فـ انا مرتاحة وين ما تقي يكون مرتاح

-حبيبة: ها يوم رضيتي هسة؟

-رسمية: اي يعني مادري مو انا ماريد اصير ثگيلة عليكم

-ليلة: عادي عادي تعودنا

گامت تريد تكتلني وشردت اطلع من الغرفة وكل البنات طلعن وراي وهي وياهن، ركضت للمطبخ اسوي چاي اسكتها بي وحطيت كعك وكيك بالماعون ورحتلهن، كعدنا كلنا سوه وطلعن ابرار وشمس من غرفهن واللتمينا ناكل ونسولف بأمور عشوائية..

-رسمية: هذا يا علي منهم بالمطبخ جاي يبحوش مثل البزازين؟

-حبيبة: اظن علي الدر

-رسمية: لا لا مو نصبته

-ابرار: يجوز حق؟

-عبق: لا حق ويه تقي وكرار طالعين

-رسمية: هذا جاي يتسحب مثل الحرامي ماكو غير علي السور! وووولك سووووووور... سوووور ليش ما تجاوب ولك سووويرر

-حبيبة: يجوز مو هو

-رسمية: لا هو ادري بي.. علي السور!!

-علي السور: مو انا هذا مو انا

-رسمية: تجي لا اگوملك

-علي السور: انا علي الكرار مو سور

-رسمية: جايتك

-علي السور: اهوووووو جاي جاي ما يخلون الواحد براحته بهالبيت الا اطلع منا واخلص منكم

طب للصالة مطنگر بس شني عطره يفحفح من وييين شميته والكشخة على اخر حباية طالع چنه تركي..

-رسمية: چنك طالع؟!

-علي السور: اي عندج مانع ام علي؟

-رسمية: وين مولي

-علي السور: والله حلوة هاي شو جديدة صايرة تسألينا وين طالعين

نصت تريد تشيل نعالها تكتله وصاح من مچانه ضايج..

-رااايح اشوف رهف

-رسمية: شعندك رايحلها هو كل يوم

-وين كل يوم حرام عليج خايبة خافي الله

-اي هواي تروحلها قابل جاي اچذب

-يمة!

-لا لا خلص روح شعليه بيك انا

رفع ايده بوداع وعافنا وراد يطلع بس شكله مقهور من تصرف امه وما اللومه عمتي رسمية لازم تستوعب سور ونور مو جهالها الصغار بعد وسور راح يتزوج ضروري تنطي مساحته الخاصة..

-حبيبة: علي السور

وگف بمچانه من صاحتله ورجع اللتفت علينا، ابتسمنا كلنا ومن ضمننا عمتي من كالت حبيبة..

-اليوم طالع كلش حلو

-علي السور: صدگ؟

-حبيبة: والله تخبل لو شتگولن بنات

-ابرار: فدشي

-شمس: العطر كلش حلو

-عبق: مرتب كللش

-سبأ: رهف راح تفرح هواي بجيتك

-ليلة: دللها ابن عمي تستاهل رهيفة

هز راسه يضحك بحماس وراح للمطبخ ورجع شايل بيده بوكيه ورد لونه احمر ووردي وعلاگة مال هدايا بس ما عرفنا شبيها، تقرب من عدنا وكال بفرحة..

-جبتلها ذني شوفن حلوات؟

-شمس: الله كللش حلوات والله ذواق

-رسمية: حلوات يمة بالعافية عليها

حنت نظراتنا لعمتي وسور كبرت ابتسامته وراح باس ايد امه وراسها فرحان عبنها علقت ويانه..

-علي السور: الله لا يحرمني منج يا الغالية

-رسمية: زينة رهيفة وياك

-علي السور: كلللش زينة

-ابرار: ما تسولفلنا چا شبيك هم يعجبنا نتونس على ونستكم

-علي السور: هههههه مادري شسولف

-حبيبة: خلوا بنات اخوي متسرسح على دلعها وياه

-علي السور: ولج حبيبة شني تتسنطين علينا من نسولف انتِ

-حبيبة: لا عيوني بس اعرف رهف شني

بقى يضحك وودعنا وراحلها واخذناه محتوى من طلع، گعدنا نسولف بي وبشخصيته شكد تغيرت من يوم خطب لليوم ومو بس احنه ملاحظين حتى عمو علي وكلش فرحان بهالشي بس عمتي رسمية احسها مقهورة عبنها تريده يبقى سور وليدها العنون بعيونها وتعامله مثل الطفل هو ونور..

اذن المغرب وتفرقنا ورجعنا مرة ثانية علمود العشا، ام الجهال كل شوية رايحة تشوف فرخها وترجع للطاوة والحوامل كاعدات يگصصن زلاطة وبتيتة وحبيبة واكفة على السنك تغسل بالمواعين التتوصخ..

-عبق: هاي الباب يجوز اجه علي الحق

حطت شال على راسها وركضت فتحت باب المطبخ وطلعت للساحة شوي ورجعت بس ما طب وياهة علي الحـق..

-حبيبة: ها وينه؟

-عبق: مو هو هذا علي السور رجع

-حبيبة: شعجب

-عبق: مادري بس وجهه چان كلش ضايج

-سبأ: الله يستر!...

**

"رهـــف"
كملت اخر لمسات مكياجي ونزلت ركض للمطبخ اشوف الاكل لا يحترك بالفرن، اليوم عزمت علي السور على العشا ومن الصبح لسه انا اركض وارتب واعدل واسوي بعشانا وعشا ابوي واخوتي..

بشلعان الروح ياله ابوي رضى يجينا للبيت خاطر يشوفني، كلما اگله يكول ذاك اليوم شافج بالباب كافي وعلي السور ما يقبل يريد يجي دائماً وهيج مشلوع گلبي..

اندگت باب الحوش ولبست عباه على راسي وطلعت اركض افتحها، ابتسمت من شفته بوجهي وشايل بيده بوكيه ورد يجنن..

-علي السور: السلام على وردة بيتي المستقبلية

-ههههه عليكم السلام تفضل سور تفضل

طب للساحة وحط البوكيه بيدي وبالايد الثانية انطاني علاكة هدية، ماكدرت ابقي واكف هنا هواي عبن اخوتي على غفلة يجون وخاف يسمعوه حجاية تغث فـ بساع طببته للاستقبال وقفلت الباب ورانه..

-علي السور: يا علي شو انقفلت الباب

ضحكت بدلع وكعدت بالقنفة الگباله وكلت بهدوء..

-امي كالت خاطر سامر ما يجي

-اممم.. تعاي كعدي يمي شني مشمورة هناك

-لا خليني مرتاحة

-تجين لو انا اجيچ؟

-اففف جاية جاية

ضحك ومدلي ايده، حطيت ايدي بين ايده بس كللش مستحية ماتوقعت لهاي الدرجة راح اخجل منه واستحي عبن من گبل اعرفه شخصيته فكاهية وما عنده رسميات بس تفاجأت من انخطبنا وتعرفت عليه اكثر شخصيته كللش حلوة وتنحب..

-علي السور: ماكو هيج گزازه تره

-هاا هاا بدينا

-ابدي ونص چا ترديني اشوفن هالچكليت وما ابوسه

باسني من خدي وشمني حييل، اقشعر جسمي وبساع وخرت منه من نزل يريدني يبوسني برگبتي..

-هم شردت

-لا سور ماتحمل

-شني ما تتحملين

-مادري بس.. بس مادري

-ههههه تموعين

-اسكت عاد

ضحكت وضربت چتفه على كيفي وكض چف ايدي يرجعه يخلي على چتفه، ابتسمت وعيوني نصيتهم مستحية من كمية الحب والاعجاب التارسة ملامحه..

-رفعي عيونج رهفتي

-علي السور

-عيونه

همسها وباس چف ايدي وجرني من خصري يلزگني بي غصب، ضحكت على كيفي واستقريت حده بدون لا اوخر وگلبت شعري كله على جهته، جاي احس بأنفاسه تضرب خدودي واصابعه تخلل بين خصلات شعري..

-علي السور: مثل خيوط الليل لمن يزاعله الگمر

-شعري؟

-ومثل ذنوب العاشگ الما راضي يتوب

-الله

-شدعوة هالكثر حلوة

-تحبني سور

-هذا هم سؤال ينسأل؟

-جاوبني

-شو مادري شمالني استحي اجاوب

-هههههههه شلون بيك انتَ

ضحك على ضحكتي وعدل گعدته يسند ظهره على التخم، دور عيونه بالاستقبال مالتنا وگال..

-شنو اسم الصبغ مالتكم؟

-شمدريني

-والكلوبات منين اشتريتوهم؟

-ماعرف والله

-والثريات؟

-ياا شجاك

-والقنفات؟

-يبووو كل هالاسئلة بس حتى ما تجاوب سؤالي

-لا لا اجاوب چا ليش

-اي؟

-احبچ اي اذا ما احبچ شكو خطبتج

-شكثر تحبني

-بكد حبي لفراقد

ما استحملنا وثنينا ضحكنا بكل صوتنا بس گطعناها بساع من اندگت باب الاستقبال..

-علي السور: بس لا رجع ابوج

-لا هاي امي دگتها خاطر تنبهنا صوتنا عالي

-وانتِ شني قريتي عقلها

-لا بس امي واعرف سوالفها

-يجوز

-اي هسة تحبني يعني؟

-اموت عليج

-يعني اذا طلبت منك شي تسوي؟

-عيوني الج

-والله؟

-اذا مكدور عليه ما ابخل عليج

-شو گبل شوي عيوني الج وهسة غيرت چلامك ليش

-مو حسب الطلب يا گلبي اكو ماكدرله وماريد يخيب ظنچ بيه

-تگدر لطلبي سور

-چا امريني

غمضت عيوني مقهورة ومكسور گلبي بس ما باليد حيلة، اخذت نفس عميق وهمست بخوف گووة كدرت اطلع الچلمة..

-اريدك تحجي ويه عمي علي خاطر يتنازل ويطلع اخوي سالم من السجن

-شنو

-سور هو اخوي وانا ماكدر اتزوج وافرح بدونه

-واذا ما طلعناه ما تتزوجين؟

-علي السور افهمني

-افهمج من تفهميني ليش تردين اخوج يطلع وانتِ بعمرج ما شايفة خيره

-يبقى اخوي

-لا تقنعيني

-يعني ما راح تحاچي ابوك

-جاوبيني واجاوبچ

-سور ليش صعب انتَ

-انا صعب؟؟ انا؟ رهف احجيلي بالخط العريض شني السالفة

-ابوي السالفة سور! ابوي رضى على زواجنا بشرط اقنعك تحاچي ابوك وتتنازلون على ثاركم ويه اخوتي

-شو صاروا "اخوتي"!

-تتنازلون عن سجن سالم و.. واحم.. و

-وشنو؟؟

-وتنسون ثاركم ويه سيف وترضون يرجع من السفر

-من كل عقلچ!!

-والله هذا ابوي مو انا صدگني

-يعني اذا ما سوينا اليريده يجبرنا نفسخ الخطوبة!!

-حباب افهمني

-ماريد افهم!! ماريد افهم وماكدر افهم رهف! انا مو الامـير علي وچلمتي التمشي ولا علي الدر وبدر خاطر ابوي ياخذ بحچيي ولا تقي وعلي الحق وعقلي يوزن بلد ولا كرار وابا الحسن واكل ابوي واشربه بلساني انا علي السور! علي السور وبس!

-لا تحجي على نفسك سور

-ما احجي بس هذا الواقع رهف! انتِ ذبيتي روحج على الزلمة الغلطط لو تردين زلمة تتزوجي على مصلحة خاطر يطلع اخوتج فـ انا مافيدج بشي!

-صدگني مو انا الاريد ابوي والعباس ابووي ليش مو راضي تقتنع

-ابوچ استغلالي يجازف بحياة بناته لخاطر مصلحته وانتن مطاوعاته!

-يعني شنو بيدي؟؟ جاوبني شنو بيدي شسوي؟ لا انا الاكدر اكسر چلامه وابقى عايشة وياه ولا انا الگادرة انهزم من وحشيته واتزوج بعيد عنه!

-مال اخوتچ يطلعون فـ هاي گطنة وشيليها من اذانچ رهف انا لو اطر روحي نصين ابوي ما يقتنع لا تعلگين امالچ بيه

-يعني ما تريدنا نتزوج!

-اتزوجچ بدون شروط تهز كرامتنا وكرامة ابوي ونسوان بيتي

-سور لا تفهمني غلط انا اريدك بس ابـ...

-ابوچ! افتهمت ابوچ من طرگاعة اللفته وخلصتنه منه

-وين رايح سوورر

-هديني خليني اولي

سمعت صوت غفار جاي من الصالة وخفت اتناقش ويه سور زايد ويتكامشون سوه هنا، خليته يروح زعلان وبدون عشا وانا رجعت للاستقبال قفلت على روحي وطگيت من البچي.. متت قهر من امي گالتلي امس شرط ابوي شنو والله لو اعرف شرطه هذا گبل لا انخطب لـ علي السور واتعرف عليه فلا ارضى بهالزواج بس همه لعبوها صح! خلوني انخطب خاطر اتعلق بي واتورط هالورطة!

**

"عـــبق"
شگد چنت متحمسة وفرحانة لليوم بس كل مزاجي انگلب بسبب البارحة بالليل، تفاجأت من عرفت بـ علي الحـق رايح لسلوى بالسجن ومحاچيها والحقيرة بعدها مُصرة وتكول ممتندمة على كلشي سويته وكل واحد بيكم يستاهل العاشه..

حرگت گلبي يكول حق وضعها بالضيم وكبرانة فوگ عمرها عشر سنين وبعدها صلفة، سألته ليش رحت وشحصلت من شفتها وجاوبني ما رحت لسواد عيونها ردتها تعترف ويامن چانت تتعاون ويساعدها غير ولد مسعود وعماته حتى نلگفهم ونطيح حظهم بس مجاوبته وظلت بس تضحك مثل المخابيل وتگله..

"مرتك وامها لعبوا بيهن طوبة بالشماعية"

شطت ومعدتي گامت تفوور من القهر خصوصاً من كملتها عليه وكالت الرسالة الي على اساس اني كتبتها بخط ايدي بيوم الي انحطفت بي فعلاً اني كاتبتها ومدا تقبل تعترف منو كتبها نيابة عني بس حق يكول مو صعبة تكدر توديها لأي خطاط وتاخذ دفتر من دفاتري وينسخ خطي نسخ بدون لا يبين اكو اختلاف..

تنرفزز هالمرة تنرفز! حسب كلام علي الحـق يكول ما تأثرت ولا انقهرت بأي شي سوته بس شاف عيونها شلون دمعت من گللها الثلاثاء الي هو اليوم يكون تخرج حبيبة من الجامعة، يكول بلعت غصتها ونزلت عيونها وكالت "الله يوفقها وين متكون وماكو يوم نستها من دعائها"..

نفضت عقلي من اخبار البارحة التعيسة ونويت ارجع انعش نفسي باليوم، اليوم تخرج حبيبتنا وبهجة البيت والكل الكل الكل بدون استثناء فرحان وطاير من السعادة علمودها وعمو علي كال يروح هو وخالة رسمية لجامعتها حتى تشوفهم وهي تشمر قبعة التخرج واخوانها كلهم گالو نروح احنه هم..

فرحت من علي الحـق كال اروح وياه علمود مناك ونطلع للدكتور نتطمن على الطفل، لفيت شالي عدل وشلت البلشر دا اريد احط وتذكرت الهوسة السواها الي حق قبل كم يوم سوالي عرس وطلع الطلعة كلها من عيني..

-علي الحـق: اللهم صل على محمد وال محمد قبق جاهزة گبلي؟؟

-عبق: اي عيني شعبالك لعد

-صلي على محمد

-اللهم صل على محمد وال محمد

-بعد مرة

-هههه شبيك اللهم صل على محمد وآل محمد

-اللهم صل على محمد وآل محمد بطنچ كبرانة شوي

-اوووي فدوة امي هم تكول بس شو اني مدا اشوف فرق

-لا اكو اكو

ابتسمت فرحانة ومسحت عليها بچف ايدي، كملت تبديل وشلت جنطتي دا اللبسها ونزيت من حسيت بعلي الحـق يشيلني ويبوسني من خدي حييل ويكول..

-بطة وشايلة بطة

-وراح تترس بيتنا كتاكيت

گلتها واني مبتسمة، من حملت لليوم لازم يغنيلي "بطة وشايلة بطة وراح تترس بيتنا كتاكيت" مادري هو اخترعها لو هي موجودة من زمان..

-والله زين حفظتيها

-چا شلون

-اروح فدوة للچا انا ام بطتيي

-اكلك علي انتَ ليش مُصر اني حامل ببنية؟

-عبن گلبي حاس

-واذا جان ولد

-ان شاء الله بت

-واذا ولد؟

-خاطر اذبه بالزبل

-علي شساااالفة

-لا والله اتشاقه بالعكس كلشي يجي من الله يا محلاه

نزلني من ايده ومشط شعره وطلعنا بعدما تطمنت على امي وشفتها نايمة، طلعنا بوجهنا للجامعة مال حبيبة وضحكت ممصدگة من شفت الكل هنا.. كل الولد وزوجاتهم وحتى تَـمني وتالة موجودات بس واكفات ويه سبأ وعلي التقي مو ويه الامير..

-عبق: الله همزين من الكل اجه شكد حلووو

-تَـمني: ماتوقع اكو احد يريد يفوت تخرج حبيبة

هزيت راسي مبتسمة ودرت وجهي اباوعلها من بعيد كلش واكفة على المدرج بين زملائها، لابسة روب التخرج ولازمة بيدها قبعتها وواكفة تنتظر المصور وهو يوجههم على وضعيات للصور..

-علي التـقي: ما اظنها شافتنا ما دارت وجهها لجهتنا

مشى بأتجاهها هو وسور ونور ويأشرولها بيدهم حتى تلتفت وماكو، خبصوا ارواحهم يهوسون ويطفرون وهي بغير عالم..

-علي الحـق: والله شريفة اخيتي ما دارت حتى وجهها

-عبق: شيخة الشيخات بعد

اخيراً ومن بعد عناء طويل وعلي النور ظل يصيح "هاا شيخ ولك شييخ عاين هنا" ياله حبيبة اللتفت لأتجاهنا وفوراً فتحت عيونها مصدومة ما متوقعتنا نجي..

نوّر وجهها بضحكة تجنن وضمته بين ايدها فرحانة، اللتفتت على صديقاتها وصارت تأشر علينا واقرا شفايفها دتگوللهن "اهلي"، "ذولة اهلي" ، "اجوا اهلي"..

-علي الحـق: بعد روحي روحج

همسها علي الحـق بينه وبين نفسه وهو يتأمل اخته من بعيد وسوالها بيده "هلو"، ظليت ادور بوجوه اخوانها وابوها وامها اشوفهم كلهم يضحكون فرحانين بيها وهي طايرة من السعادة بشوفتهم.. حاطة ايدها على گلبها وتحجي ويه صديقاتها كأنها تريد تصيح بعلو صوتها كدام الكل ذولة اهلي واجوني.. يا جمالج يا حبيبة ويا جمال گلبج اليوسع للكل..

شفت صديقتها حور واكفة من الجهة الثانية وبصفها اخوها حاكم هم واكف يباوعون للخريجين وثنينهم مبتسمين ويراقبوهم شوكت يتم رمي القبعات..

-تَـمني: شلون اجواء حلوة

-ليلة: وعيون ذاك الواحد احلى

-تَـمني: منو؟

-ليلة: امير يعني منو!

-تَـمني: شبي ما فهمت

ضحكت من ليلة غمت گصتها حيل تلطم وتَـمني بعدها ما مفتهمة شكو، عبالي بس اني انتبهت لعيون الامير وهي تركض وره تَـمني ويراقبها من بعيد بدون لا يتقرب.. يباوعلها بنظرات فضولية واحس احس احس ذني نظرات اعجاب هم لان اصلاً تَـمني طالعة تخبل اليوم بفستانها الماروني وشالها الاوف وايت..

-عبق: امير يباوعلج تَـمني

-تَـمني: كذابة!

-عبق: والله كل ساع يدورج بعيونه ويتلفت عليج

-سبأ: وبهالمناسبة الحلوة تَـمني وتالة تجون لبيت عمي على الغده اليوم مو؟

-تالة: عدكم عزيمة؟

-عبق: اي طبعاً عزيمة تخرج حبيبة عمو علي مسوي وعازم الكل بدون استثناء

-تَـمني: اي گلتلي خالة رسمية وعزمتنا بس احنه منروح

-تالة: ليييش تَـمني

-تَـمني: عدنا امتحانات تالة منلحك

-عبق: هسة شكد راح تطولون قابل يلا يمعودات سهلوها وتعالو

-تَـمني: لا والله عذرونا ان شاء الله على الجايات

هزيت راسي ساكتة وما لحيت زايد لان عرفت ليش متريد تجي كله حتى متتواجه ويه الامـير علي ويتأذون ثنينهم لان نظراته هسة ممفهومة شنو بالضبط وحقها من متريد تحازف بمشاعرها..

اللتهينا بتخرج حبيبة وشهدنا نجاحها لاخر دقيقة، شفناها وهي تشمر قبعتها بحماس وفرح وشفناها من نزلت للمدرج وحضنت ابوها واخوتها واحد واحد ودموعها شلال ينزلن من عيونها..

-شيخ علي: ليش تبجين بوية ياهو وياهة شيختي

-حبيبة: محد وياي يا روح شيختك، الله لا يحرمني منك يا هيبتي ولا منكم يا رفعة راسي

-علي الدر: بنيتنا واخيتنا وتاج راسنا انتِ

ابتسمت ومسحت دموعها الليلو ووكفت حتى تاخذ صورة وياهم كلهم، ما شاء الله اللهم صل على محمد وال محمد وكفوا كلهم عشرتهم صف واحد وحيدر على الكرسي وحبيبة وخالة رسمية حطوهن بنصهم واخذوا صور بعدسة وايد كال المصور حتى الكل يبين..

الانظار كلها عليهم واشوف منو يتعده منهم يأشرون عليهم ويبتسمون على منظرهم شكد حلو ويأسر العين، كملوا تصويرهم ووگف عمو علي يسولف ويه حبيبة على فدشي بصوت ناصي تخيلته ديحچيلها هو شكد فرحان وفخور بيها لانها جانت مبتسمة ولازمة ايده ورفعتها تبوسها بس بعدين كامت تبجي مهضومة واضح جاب طاري سلوى..

-تالة: يا روحي الله عوضها بأب حنون يسوه الف سلوى

-عبق: اي والله ماكو مثله عمو علي

نقلنا ونستنا وفرحنا للبيت وسوينالها عرس.. والله عرس هوسات وهلاهل وابا الحسن شايلها على چتافه ويهوس بيها وعلي السور لابس قبعتها ويدبچ وعمو علي قرالها هوسة تجنن، رفع بشته وايده وگال بصوت مسموع للكل..

-شيخ علي: هلا بالزين والغالي.. هلا ببهجة عيالي..

-الولد كلهم: اييييييه

-هلا ببت گلبي واخت رجالي..

-الولد كلهم: ايييييه

-بنجاحچ يا بوية اللتمينا.. بنجاحچ يا بوية اللتمينا..

وكلهم يرددون وياه ويدبچون بالكاع دبچة خفيفة وحبيبة بس تمسح بدموعها وتضحك، الاجواء تخبل صار هوااي بيتنا يفتقد هالفرحة واللمة والاحلى هو من علي الحـق راح جاب امي وانضمت النا وكعدنا كلنا نتغده سوه من ذبيحة تخرج حبيبة..

للعصر الولد طلعوا كلمن لشغله واني رحت للدكتورة، طمنتني على الطفل وكالت كلشي تمام بس جنس الطفل ماعرفته شنو ما مبين.. رجعنا لبيت عمو علي بعدما رجعت من الطبيبة واللتمينا على عشا هالمرة..

-حبيبة: والله مكان تَـمني وتالة خالي

-سبأ: ما رضوا يجون

-حبيبة: انطيني موبايلي رفل نتصل عليهن

دگت عليهن وفتحت سبيكر وصارن عبالك كاعدات ويانه، كعدنا كلنا البنات الشابات بغرفة حبيبة وتَـمني وتالة ويانة على اتصال وجانت كعدة من العمر كلها ضحك وفرفشة ووناسة..

تمنيت ابات يمهم اليوم بس گلبي ما هلي اعوف علي الحـق وحده خطية چنه يتيم واكفلي بباب الغرفة وبتوسل بعيونه حتى نرجع للبيت.. ضحكت على شكله واستسلمت وكمت وياه نرجع سوه حتى اتحضر لدوام باجر..

**

"حـــبيبة"
لو اشكر الله على نعمة وجود اهلي منا لباجر اكون مقصرة، انا ماعندي بس اهل انا عندي عزوة وسند وعكاز لايامي الصعبة.. شكد انهضمت اليوم على وحشة امي بس نويت اعوض مچانها بگلبي وبالبيت بأمي رسمية واخوتي والناس اليحبوني من صدگ..

تأخر الوكت ياله تفرقنا هذا الرجع لبيته وهذاك الراح لغرفته وذيج الرجعت لزلمتها وبقيت انا وحدي بغرفتي، تنهدت مبتسمة وتعبانة بنفس الوقت اريد بس انام بس ماكدر بدون لا ارتب الغرفة واللملم البيت ما دام الكل راح حتى باجر يخف الشغل علينا..

گمت اشيل بگلاصات العصير واحطهم بالصينية ولميت كواغد النساتل حطيتهم بچيس وبأثناء ما انا مشغولة اعزل بغرفتي اندگت الباب عليّ..

-تفضل

انفتح الباب على كيفه كلش وابتسمت من شفت وجه ابوي البشوش يضحكلي ويكول..

-شيخ علي: بس لا نايمة بنيتي

-حتى لو نايمة اكعدلك

ضحك خفيف وطب للغرفة، طبگ الباب وراه وتمشى وگف يم الميز مالتي وصار يوزع عيونه مستغرب وهو يشوف الهوسة مال الغرفة..

-حبيبة: لا تنصدم البنيات چانن يمي فوگ

-هاا مو اگول كل هذا اكلته حبيبة

-ههههه لا عاد بوية اشايفني

-غصن بان اشوفنچ يا بعد الكل

-تعال بابا لا تظل واكف تفضل هنا

-اي والله رجليناتي توجعني

-سلامتك افركهم الك؟

-لا بوية لا تعبين رويحتج

-افاا وانا بنيتك لا تكول هيج تمدد على فراشي تمدد حبيبي

ابتسم وسوه مثلما كلت بس ما تمدد بكل جسمه بس كعد ومد رجله على الجرباية وانا كعدت بصفه ادوسله بأيدي وامرغ اصابع رجله..

-شيخ علي: اااخ الله يرزقج الجنة يا بنيتي

-بوجودك ان شاء الله

-صعبة الجنة على امثالنا بوية

-لا تكول هيج شيخ علي، والعباس انتَ احسن رجال شافته عيوني

-الجنة تحب الفقراء، تحب الناس البسيطة مو الناس التحكم على حياة البشر وتفصل الوادم فصولة تكسر الظهر

-بس انتَ ما تظلم احد والكل يشهدلك

-حتى لو ما نكدر نحكم، محد يعرف المضموم والحكم الصح غير رب العالمين

-حتى لو ما رحت للجنة بوية انا اشفعلك

گلتها بثقة تضحك وغمزت اداهره، ضحك وگرص خدي بين اصابعه وكال..

-مو خاف تشفعين لزلمتج وجهالچ وتنسين ابوج

-شني بوية كل عقلك ابيعك لخاطر زلمة وجهال؟ يرحون فدوة لنعالك والله

-نشوف عود

-بوية اصلاً وينه الزلمة ووينهم الجهال انا باقية يمك هنا ما اروح لمچان

-لا ما ارضى بهالشي انا هم يعجبني اشوفن وليداتج وبنياتج كدام عيني ويترسون بيتي بوكاحتهم

-الله كريم بوية

-اكيد الله كريم بس الله هم يريدج تتقبلين الفكرة خاطر تخوضيها

-ان شاء الله خير

-واذا كتلج جايچ خاطب حبيبة

-لا بوية لا فدوة ابدد ما متحضرة

-يا بوية اسمعي مني وشوفي خاطر ما تتندمين

-مو..

-سمعي وانطيني جوابچ

-تفضل بوية

-الخاطبچ خوش زلمة ومشهودتله شهامته ومروته، ما شاء الله دكتور ومتعين صح ماعنده بيت بعده بس جاي يشتغل على روحه وان شاء الله يصير عنده

-اذا انوي اتزوج فـ من شروطي بوية يكون عنده بيت، ماريد اعيد نفس المشاكل العشتها ويه خوات منتصر

-حگج بهاي

-اي فـ يعني ما موافقة انا

-خوب نشرط عليه بيت

-واذا ما رضى؟

-لا انا اگلج دكتور حاكم راح يرضى

-دكتور حاكم!!!!

-اي

-دكتور حاكم صديق الامير؟؟

-اي شبيچ بوية انخبصتي

-بابا حاكم خاطب!

-شني؟؟

-خاطب الزلمة خاطب وراح يتزوج!

-معقولة؟ بس هو ما گال خاطب

-والله اخته گالتلي خاطب وراح يتزوج بس يجوز هسة فصخ مادري والله

-حتى لو فاصخ چا غير يكول لو هي هيتة

-مو يجوز ما حچى عبني مطلگة

-واذا مطلگة؟ هالشي يمنعه يصارحنا من البداية ويكول جنت خاطب وفصخت؟

-مادري بعد

-لا خلص عوفي يولي

-براحتك

سكتنا ثنينا واحتل الصمت الغرفة، انصدمت بالبداية من گال حاكم الخاطبني وحتى جرأة ما صارت عندي واسئلة شوكت طلبني فـ غلست على الموضوع بكبره ما دامه راح يرفض..

ثاني يوم انتظرته يحاچيني ويگلي رفضه بس ما سواها، اليوم الوراه هم انتظرت وهم ما حچى واليوم الوراه هم نفس الشي..

وره چم يوم صارت گعدة بين ابوي ومسعود وكل الولد حضروها، محد رضى يسولفلنا شنو الموضوع الا من رجعوا وانصدمنا من عرفنا صار بيناتهم اتفاق خاطر تكمل خطبة علي السور ورهف!

ابوها شارط الا ابوي يتنازل عن سالم وتنسد سالفة سيف ويرجعونه للعراق وابوي بثنينهن ما رضى بس من بعد حديث طوييل دار بيناتهم ابوي گاله يتنازل عن واحد منهم وشرط ابوي يختار منو منهم ووگع الاختيار على سيف.. گاللهم يرجع بس بشرط بعيد عن محافظتنا ومسعود قبل بهالشي..

امي بالبداية عصبت كلش بس كالت يجوز راد يرجعه خاطر اذا يموت لانه مريض سرطان فـ يندفن بالعراق يمهم، يبقى ابنهم ومحترگة گلوبهم عليه وابوي وافقها الرأي وكال هذا السبب هو رضى يرجع..

علي السور متفاجئ وما مصدك ابوي سمعله وسوه گعدة كاملة لخاطره وطبعاً چانت بوجود شيوخ من عشاير ثانية شهود، گضى اليوم كله يتصفن ويحس روحه بحلم معقولة ابوي اخذه على محمل الجد وسوه هيج شي جبير علموده!

-حبيبة: چا مو ابنه شبيك انتَ

-علي السور: ولج ما مصدك وعلي بعدني منثول

-علي النور: اي وعلي حتى ابو شادي الزبنطوطي ما مصدك

-علي السور: عاين شلون ابوي يحترمني هاي عبن خطبت انتَ هم اخطب خاطر تصير زلمة

-علي النور: ما اخطب ماريد

-علي السور: ليش ولك مو كافي صياعة

-علي النور: عود اخطب من يحن علينا اخوها

-علي السور:هاا عود عاشگ؟ هسة هم يطلع زلمة ولاعب عليك

-علي النور: انچبببب

-علي السور: عايني بعده مقهور على القط القطيته بي

-علي النور: كل هاي سوالفك اطلعهن كدام رهف اخليها تزوع بوجهك

-علي السور: ولك لاااا وينك تعاااال

ضحكت على خبالهم وعفتهم ورجعت للمطبخ اكمل العشا ويه البنات، مشى چم يوم من حياتنا ماكو شي جديد، ليلة شايلة فرخها وتفتر بي وتلعبه وسبأ كاضة معدتها وتلعب نفسها من كلشي وحامها كللش زاد من عبرت شهر الرابع لليوم وعبق تجينا كل چم يوم وشمس وابرار كلمن حايرة بحياتها..

نزلت من فوگ وبيدي اموري العنون وبالايد الثانية فطومة بت علي الدر چنت اللاعبهم واغير جو وياهم ملل وماكو شي اسوي..

-رسمية: وينج حبيبة تعاي، الشعبانية بعدلها چم يوم وابو علي يريدنا نسوي مولد بس محتارة شوكت نسوي وحويدر يريد يسافر؟

-حبيبة: يمة سويها عگب باجر واليوم وباجر نحضر خاطر نلحك

-هاا؟

-والله

-شمس: عمة المن تردين تعزمين

-رسمية: هو كلهن حبايبنا

-ابرار: حتى الزلم؟

-رسمية: لا الزلم شكو عود ابو علي يسوي بغير يوم

اتفقنا على يوم الحفلة وبدينا بالتجهيزات، اول يوم جان مخصص النا احنه طلعنا نشتري بي النحتاجه من ملابس وسوالف ثانية واليوم الوراه جان للبيت، وكعنا بي دك جلف وغسل هلكنا بي..

-ابرار: تَـمني وتالة راح يجون مو؟

-حبيبة: اي يجن گالن

كملنا كلشي ركض ركض ولحد ثاني يوم احنه ملتهيات بتجهيز البيت والاكل تعبناا تعب حتى الحفلة ما حسينا بيها من بدت الناس تجي، طبن هواي نسوان ماعرفهن بس ما تدخلت اكيد من جماعة امي رسمية اذا هي ياهي تشوفها تصاحبها وتطببها بيتها، ركضنا البنات كلمن لغرفتها تتجهز وتبدل ونزلنا نگابل الناس..

رغم التعب والهوسة مال اليومين الفاتوا بس الحفلة چانت كللش حلوة، ذكر اهل البيت والمواليد القرتهن الملا والحماس الي بصوتها يخبل حييّت المكان وخلت الكل يتونس ويعيش الاجواء..

-حبيبة: بنات گومن نتساعد ونوزع الضيافة

-تَـمني: اجي وياچ اني

اجت وياي والباقيات اللتهن كلمن بشي، وزعنا الضيافة ووراهة العشا وشوي شوي بدت النسوان تخف وتطلع لبيوتها فـ قررت نكعد انا والبنات بالمطبخ نجر نفس وناكللنا لگمة لان من الصبح ما ماكلين شي..

-حبيبة: رهف وين اختج؟

-رهف: فوك كالت تريد تغير نفنوفها جاي يحز ببطنها

هزيت راسي وعفت الباقيات كاعدات بالمطبخ ورحت للصالة، شفتها مكلوبة كلاب الفراش الچانن كاعدات عليه النسوان بعده بالكاع وينرادله تعزيل وكنس بس ماهتميت خليني اكل والله كريم وراهة..

-تَـمني: يلا حبيبة وينج

-حبيبة: يلا اجيـ...

گطعت حچايتي فازة ويه صوت الردمة القووووية الطاحت من فوگ ليجوه! اللتفتت اشوف شنو هذا وشهگت من غمج روحي من شفتها سبأ!! سبأ طاحت من فوگ محجر الدرج ليجوه ومباشررة لنص الصالة!!

-رهف: يممممة اختيييي!!!

صاحت رهف بكل صوتي وركضت عليها تشوفها اما انا.. فـ انا ماحجي على حالي رجلي جمدت بمچانها ماكدر احركها وبس اباوع بعيوني شلون مرة اخوي طايحة لا حس ولا نفس يطلع منها واختها تدگ وتلطم على راسها وتصيح..

-رهف: يممة اختييي ما جاي تتحرك اختييي ولج يممااااا.......

يتبع 👑....

━━━━━━ ♛ ━━━━━━