رواية الاصداف الفصل الخامس والعشرون 25 - بقلم بمبش

لحظات صغيره تصنع ذكريات كبيرة
Little moments, making memories

........................................................................

اخذت القلم ووقعت وخليت القلم كدام هيثم

هيثم باوعلي وحجه بترجي ... هيلين

رديتله..... اعتقني

وقع هيثم وطلع وطلعنه هيثم مبين مدري شبي من وقع احواله تخربطت

وصلنه يم ابويه وباسم وابو باسم

ابويه.. ها كملتو

هزيت راسي بمعنى اي

ابويه باوع لأبو باسم وكاله

احنه صداقتنه تبقى اثنينهم ما تراهمو وما الهم قسمة يكملون حياتهم سويه مو تنكطعون من عدنه

ابو باسم... افا عليك ابو هيلين شنو ننكطع منكم بس اذا النفس ينكطع يبعدني عن صديق عمري

ابويه.... كل الهلا بيكم ايمت ما تجون

تسالمو وهيثم محتقن كال... بويه اني رايح كدامكم

راح هيثم واحنه هم طلعنه ابويه خابر انسام
وانسام كاله هسه دقايق اني يمكم باوعتله عبر شاخط راد يندعم

اجه انسام وبابا كاله

انسام روحلنه عالمعرض خل اخذ لبنيتي سيارة تتعلم سواقه عالأقل من تروح وترجع لدوامها وتصير سيارة جوه ايدنه

ردله انسام.... عمي سيارتكم هاي قصده على سيارته
وايمت ما تحتاجوها اخذوها

ابويه... لا بويه تعيش انت ما مخلي قصره

انسام.... طكت الوصخه صار بيها سياره

معرف شعور كلش غريب شنو ما ادري

وصلنه المعرض وبابا كال اختاري ما ليه واهس شي شفت سيارة حجمها كلش صغير يعني لعائلتنه تكفي

كلش كلش صغيره جنها تشبة سيارة اسمها ميني كوبر

كتله اريدها لون اسود

وطلعنه لأن بس اختاريتها ابويه كال باجر نجي اني وانسام نجيبها ونجيب المستمسكات اللازمه والفلوس

رجعنه بابا كال لأنسام نزلني بفلان مكان يم ابو المراجيح وروحو لأن سيارة النقل على جيه

رحنه وصلنه ابويه ومشينه حجه انسام وعرفته مقهور عليه ويشفق عليه واني ما احب هالشي

انسام... هيلين شرأيج نمر لمطعم مرتب نتغده

هيلين... تسلم ما جوعانه كثرت عالريوك

. انسام.. يم ابو المرطبات

هيلين... تسلم اشتري اللك اني ما اشتهي شي

انسام.... هيلين كافي على شنو مقهوره

هيلين... ممقهوره

انسام... اختي اللي تربت كدامي ما اعرف شبيها احجي شنو الغاثج

هيلين... ما اعرف شعور غريب بكلبي تفكيري مشوش
عيوني غوركت للحضه ردت ابجي بس سيطرت على دموعي ورجعت تمالكت نفسي

انسام... هيلين شوفي نفسج اشون صايره المفروض تفرحين يولي خلصتي منهم

سكتنه اثنينه رجعنه للبيت امي تلكتني وأيه عدنه
طبينه جوه وكفت اغسل عالسنك امي واكفه عالحشيه

وسهام تسوي بيذنجان وأيه كاعده عالميز

امي.. تقلب الحشيه عالنار وحجت... ها كملتو لو تأجلتو

هيلين... لا كملنا

أيه... يعني تطلكتو

هيلين... اي

سهام... يمعوده ارتاحت

غسلت ايديه وطبيت جوه وأيه وياي معافتني
رحنه لغرفتي شلحت شالي وشويه اخذت نفس أيه كالت اني انزل جوه وانتي بدلي وتعالي كتلها ماشي

أيه نزلت واني بدلت ونزلت وراها كضينه اليوم واني الشعور اللي بداخلي ما اختفه شعور كلش غريب خربط مشاعري

ابويه جا بسياره مال نقل جايب المرجوحه طببوها للحديقه كعدت توب ويه ترتيب الحديقه

بليل تعشينه شيخ محشي وتعللنه ف حسيت كلهم ديشفقون عليه مردت احسسهم مقهوره حتى يبطلون شفقه كلت لأبويه

هيلين... بابا باجر من تجيب السياره جيب حبشكلات مال زرع دنزرع ورد بالحديقه

امي... ها اختاريتي

هيلين.. اي اختاريت وبعدين تعالو ليش ما حجيتولي

سهام... رادو يسووها مفاجأة

أيه... دقيقة دقيقة شنو من سياره

هيلين... عدلت الياخه مال البلوز وحجيت بثقه.... احم احم اليوم ابويه اخذني للمعرض اختاريتلي سياره

ايه... لا صدك هالشي يستاهل كشخه اكشخي بعد

اني رجعت عدلت الياخه مال البلوز وكلهم ضحكو وباركولي

ايه ردنه منها تبات ما قبلت
طلعت للغرفه دنام شغلت المكيف واتمددت اريد التهي ف شغلت تلفوني وكعدت اباوع لزواج مصلحه براء 3مرات اتصلت عليه بس كلت هسه بس احجي وياها أبجي

باوعت للمسلسل اجاني اشعار من براء

ترا ضل بالي اذا موجوده جاوبي
وشويه واجاني اتصال خرجت من المسلسل واتمددت على ضهري وخليت السماعات وحجيت

هيلين... الووو

براء... ها وينج خربب حضج شلون بيج لمن صخامي موجوده ليش ما تردين

براء من احجي وياها احسها أماني ومن افضفضلها ابجي بس شويه ارتاح

هيلين... براء

براء... هاا خير

هيلين... براء هاذهوا فقدته وفقدت صوته صار اسوء شي اتمناه ليش هيج اريده وبجيت

براء... يروحي لا تبجين

هيلين بغصه... اخخخخ كله صوجي كله صوجي ليش من البدايه اهتميت بي تخيلي بعد ما اشوفه ولا يشوفني وانكطع كلشي بيناتنه

براء... ترا جنتي شمعة وطفاج هوا ضيع حبج يا روحي لتبجين

هيلين... بجيت بصوت شبه عالي.. براء اني ما احبه ليش هيج دا يصير بيه خايفه اكون حبيته

براء... لا متحبينه لتخافين بس لأن تعودتي على وجوده وفجأة اختفى زين سؤال

هيلين... اشهك.. ايي

براء... بس مشتاكه لصوته وقربه

هيلين.. ما ما اريد ما اريد قربه بس مخنوكه شي خانكني براء احس ضلمته ضميري ديأنبني

براء... ليش تخليني اغلط عليج هسه حبيبي اذاج اذاج لو وحده غيرج جان من زمان عافته ميستاهلج

هيلين... بس كام يبجي ويكلي احبج

براء.... الحب مو بس كلام الحب افعال وهوا شخص يحب التملك يعني يملكج ويخليج حيشاج مثل العبده عنده ايمت ميريد يضربج ويهينج الحب يتطلب الثقه والأهتمام هذوله اولوية الحب

الشخص اللي ميكلج احبج ويقدملج اهتمام ويثق بيج حتحبي وتكولين يستاهل حبي هيثم شيستاهل

هيلين... براء مخنوكه حجيت هيج وزدت بالبجي وهيه تبجي وياي اخر شي براء ضاجت كالت دقيقه سدي الخط

سديت الخط ما طولت واجاني اتصال منها

جاوبتها

هيلين..احجي وصوتي مخنوك.. وين رحتي

براء... جبتلج السند

انسام... شبيج هيلين ليش باچيه

هيلين... كلبي يوجعني... وبچيت

انسام... خويه ليش اكو احد قاهرج

براء... ديأنبها ضميرها لأن اتطلكت من هيثم وهيثم كايللها احبج وتكول معرف ليش مخنوكه

انسام... هيلين اسمعيني وركزي وياي تمام

هيلين... تمام

انسام... جان يضربج

هيلين... هواي وميثق بيه

انسام... زين هنا الربط كله ميثق بيج تعرفين ليش

دريتله... ليش

حجه... لأن كل شخص يشوفج بعين طبعه
يعني هسه اني اختي وانتي وبراء لو اعوفكم بنص عشر رجال راح اعرف متخيبن ثقتي ليش لأن اني ما اخون ف اشوف الناس متخون صدكي واعتقدي مدام ميثق بيج هوا هم مينوثق بي

كلت بكلبي خان الثقه خانها من بداية زواجنه

انسام.. فليش تقهرين نفسج عليه ولج اليحبج ميأذيج ولا ينزل دموعج على شنو يأنبج ضميرج تتذكرين بيوم اجيت اخذج رجعت لكيته باچي من عيونه انقهرتي عليه وكلتي روح ما اجي

وراها شو اذاج شو ضربج المفروض يخليج بعيونه العنده مثلج شيريد من الدنيا بعد اني حبيت براء لأن اختيارج انتي واعرف اخيتارج حلو ورزن وماشالله شوفيها هسه محتله كلبي

براء كالت... انجب مو وكت غزل

انسام... اني اعلمج صايره تتجاوزين خل بس نتواجه واني اعلمج

براء... هااااا انساممم

انسام... اتشاقه ليش دائما تاخذين كلامي بالجد

ابتسمت على حبهم وثقتهم براء دائما تكلي انسام سندج لأن يعتبرني اخته

انسام... اي هيلين مخنوكه صح

هيلين.. كلش

انسام... هيلين ليش ما ترجعين لشغلج هيج تتناسين

هيلين... حرجع اكيد

انسام... زين اكلج

هيلين.. كول

انسام... رادو يخلون دكتور بغرفتج وبراء تخبلت هههه رتبت الغرفه المتروكه وانطتها للدكتور ورجعت غلطت غرفتج

هيلين... والايجار

انسام... افااا عليج اخوج موجود

هيلين... انت من حالك دافع فلوس الايجار..

انسام... الفلوس ما تغله عليج

براء... احم احم

انسام... اشتغلت الغيره

براء... هههه

هيلين... اني حروح انام تصبحون. على خير

انسام.. وين تروحين ابقي

براء... وين رايحه شكد صارلنه ما حاجين

هيلين.... ارتاحت نفسيتي على حجيكم وغفلت

سلمت عليهم وسديت الخط بس سديته صرت ابجي بصوت عالي ما اعرف شنو جرالي بقيت لأذان الفجر اني ابجي كمت توضيت وصليت شويه ارتاحيت ونمت

كعدت حيلل الساعه ب2رحت غسلت وصليت ونزلت جوه . متغدين برياني ما صارلي نفس أكل شي شربت چاي شويه يصفي راسي

ابويه رايح علمود يجيب السياره ويه حسام

كعدت ويه امي وسهام واحجي وياهن واتراسل ويه براء للعصر اجه ابويه وحسام العصر امي تلكتهم

هوا وحسام طببو السياره للكراج ما ليه واهس شي
وحتى السيارة مفرحت بيها احس كلشي بحياتي بدون طعم

ما طلعت صعدت بغرفتي تمددت وغمضت ما ادري ايمت غفيت كعدت على اذان المغرب جسمي خمول

وبطني وضهري موتوني نزلت جوه ديصلون مغرب والجو بارد والصوبات احسها تخنك طلعت للحديقه

كعدت بالمرجوحه واحس جسمي تعبان رغم ما اشتغلت شي امي اجت صاحتلي كالت تعالي تعشي كتلها ما جوعانه

شويه وأجه ابويه واكف اباب المطبخ ويحاجيني...

ابويه... يلا كومي تعشي

هيلين.. ألف عافيه تعشو اني ما جوعانه

ابويه... امج تكول لا ريوك ولا غده يلا تحركي

هيلين... ما جوعانه
. ابويه... اني رايح وما اتعشه الا تجين انتضرج وطب للبيت

كلبي ما ينطيني ابويه ما يتعشه نزلت من للمرجوحه طبيت للبيت احس بخنكه للبيت من كد ما دافي

طفيت المكيف وكعدت يمهم

جاي اتعشه وياهم واندك بابنه طلع بابا اسمع صوت بيت عمي طببهم ابويه للهول ردنه منهم تعالو تعشو كالو ما جوعانين حسام كال اني من الريوك شنو عشاكم

امي برياني الغده ومقليات

رفعت عيني صارت بعين حسام نزلت عيني وكملت أكل وهوا بويايييي شكبر حلكه شلون ما يختنك ما ادري

كلت بكلبي شبيج هيلين عينج على أكله خل. ياكل الرجال

اقلب بالتمن وكل شويه اكل لكمه وصافنه بالصحن

صحاني من صفنتي سهام وهيه تكلي يولييي شبيج

باوعتلها وحجيت... شبيه كلشي ما بيه

سهام...الصفنه بس للجحش

اباوع ابويه يضحك وامي تضحك وحسام ابتسم ابتسامه خفيفه شكد تفشلت كدام حسام

حجيت... بقلة صبر وصكيت على اسناني... سوهامممم

رد حسام كال... سهام اربع حروف مو خمسه

هيلين.. حوسامممم

وياكلون ويضحكون عليه رد ابويه كال... الواو منين جبتي بابا شنو ما عنده اهل واتبنيتي

حسام..... سووهااام ما تناوشيني كلاص الميه

ابويه... هههههه حوسامم لا تقلد على بنتي

أيه...يبووو يهيلين لو ساكته احسلج

ويضحكون اني لكيتها حجه كتلهم... صوج الياكل وياكم ورحت باتجاه المغسل وامي تكللهم... ما خليتوها تاكل قشمرتوها

غسلت ورحت للمطبخ خليت الجاي ورحت كعدت يم ايه جانت تراسل حبيبها حجيت بهمس... حجيتي وياه مو كلتي راح احاجي هاي شكد صارلج

أيه... ولج اششش صوتج

عرفتها تريد تغلس كلت هسه احاجيها بالمطبخ هاي متسمع كلام ومراهقه ينضحك عليها بسرعه

كملو أكل كمت لميت الأكل وأيه تعاوني رحت للمطبخ حضرت الجاي وديتلهم وواكفه اغسل اماعين العشه وهيه يمي

باوعتلها وحجيت... ليش تغلسين اني لمصلحتج

ايه... يحبني بس حاليا ميكدر يجي يخطبني

هيلين... لو نيته صافيه يجي يخطبج من زمان زين من كتلج حاجي حاجيتي

ايه... اي حاجيته وكتله كال هاذهوا بعد كلشي بيناتنه انتهى مدام متثقين بيه هيلين ما اكدر بلياه ضليت الوب

هيلين... واشون رجعتو

توها دتحجي وعمي صاحلها كال تعالي شيلي الاستكانات كالت اكمل واجيج

كتلها خوش اني علما امسح الكاونتر

راحت أيه واني بديت امسح الكاونتر طب انسام كال..... هيلين اكلج..

هيلين... اي كول

انسام... تعرفين هاي البنيه شغل الفيديو باوعت ساره دتركص بعرسي

انسام... هاي منو

هيلين... شجاب ال

بعد ما كملت وقاطعتني ايه كالت شجاي تتبشبشون

انسام اشرلي بمعنى اسكتي
سكتت

رحنه يمهم وروحي لاجت شجاب ساره على تلفونه وليش ديسألني عنها الف فكره اجت ببالي مره اكول بس لا عجبته ورادها وحيخون براء كبل اكللها اذا فكر يخون براء

وبعدين اكول خاف تراسلو هوا وياها وهيج عنده الفيديو مالتها.لأن الفيديو بنيه مصورتها صح صوت الهوسه والاغاني بس التصوير بالهول ووحدها بالفيديو

كاعدين نتعلل وحجه ابويه
ابويه..... كال تعليم. السياقة على حسام لأن انسام ميكدر يعوف شغله

حسام... تدلل عمي
كلت بكلبي الا المغرور

رجعت امي كالت ليش ما رحت كلية ضباط مو انت شكد هويتها وردتها

رد عمي كاللها... البارحه حسمنه للنهائي وكال كلية ضباط
واني اريدله العسكريه اكول احسن أمان الضباط لكلشي يتعرضون

ردله ابويه... ابو حسام كلية الضباط احسن بس ليش وقسم الانت بي

مرت عمي... شلع كلب ابوه علما سوه تحويل تبهذلنه عالواسطات

ابويه... ابني اذا هيج خليها ادخلها بهاي الشركه مال التعليم

رد حسام... عمي الشركه بيها زلم يعلمون سواقه مو نسوان واني كل يوم اعلمها ساعه ساعتين ما تاخذ من وقتي

رديت اني... لعد الشركه احسن واذا زلم عادي هوا يومين ثلاثه اتعلم مو هواي

حسام... بنتر.. منو كالج السواقه يومين ثلاثه اذا تعلمتيها بأسبوع زين

باوعتله بنضره مو عاجبني كلامه وحجيت.... واذا تعلمتها بيومين شتخسر

حسام.. اذا وراها بيومين تعلمتي ازين شاربي

عصبني قابل اني ما افتهم رديتله... تحضر لعد على وجهك بدون شوارب

الكل ضحكو وهوا ضحك ضحكه مصطنعه

حجه... نشوف منو يزين شاربه هوا اني ما تعلمتها بيومين

هيلين... هاي انت عميي اني اختلف

هيثم هم من يتشاقه بثكل ورزانه بكلشي ثكيل بس هيثم مشايف نفسه هذا شايف نفسه هههههه بس صراحة مو بحلاة الرجال اللي مخلوط رزانه وثكل ويتشاقه ويضحك احسه احلا بهواي

ثاني يوم العصر كلش حلو الجو اجه حسام جنه بالهول وكف اباب المطبخ وكال... يلا نطلع

هيلين... خل بس اغير ملابسي

هز راسه بمعنى اي واني طلعت لبست بنطرون كيلوت عريض وتيشيرت

ولفيت الشال ونزلت جان مدنك عالفون وامي كالت البسيلج شحاطه تكرمون البوتين يضايقج

هيلين... لا يمه البوتين احسن

حسام... لبسي شحاطه تكرمون ترا بالسياره ما طالعين نفتر ونتونس

باوعتله بطرف عيني ورحت لبست البوتين بالقصد وطلعنه يم الباب

صعد حسام بمكان السايق واني كعدت يمه

صار يعلمني السواقه تدوسين هالشي وتسوين هالشي واذا ردت ترجعين بك هالشي واني مركزه وياه بسرعه حفضتهن

هوا يسولف واني مركزه وياه اخذ نفس اندار باوع لعيوني ورجع باوع لكدام كال... راح اسوق لنهاية وانتي تعلمي

هيلين... تمام

ساق لنهاية الفرع ورجع ديور السياره ورجعنه للفرع

تحول حسام واني تحولت بمكان السايق باوعت بوتيني تكرمون شثكله شلون راح اسوق حجيت

هيلين... حسام بس اطب للبيت اغير بوتيني

حسام..... انتي عاندتي ولبستي بوتين العناد ما يفيدج انتي جيتي اعلمج سواقه مو تعلميني العناد وتحركين اعصابي اشلحي بوتينج وابقي حافيه احسن

شكد تفشلت هوا هاي عنادي دوم مفشلني شلحت البوتين تكرمون مسكت الستيرن وحسام كال
حسام... دوسي البانزين بس عالكيف

ولا تستخدمين غير رجل اليمين اليسار ابد. متجين يمها

هيلين... واشون اذا ردت امسك سطاب

حسام... تعوفين البانزين وتدوسين السطاب ميصير انتي ودايسه عالسبانزين تدوسين اسطاب

هيلين... تمام

دست بانزين وصرخت السياره كمزت ومشت سريع كال حسام

شيلي رجلج

ودوسيها عالكيف كتله تمام

وصلت لراس الفرع وعلمني ديورت ورجعنه بنفس الفرع حجه حسام

ناس ما شيفين بنيه تسوق لو شنو

باوعت شباب صغار واكفين يباوعون

بقيت اروح وأرجع لحد ما تعبت وحسام وكف يم الباب كال افتحي الباب اطبب السياره

نزلت فتحت الباب طبب السياره للكراج ونزل كال
... اني رايح باجر هم اجي تتعلمين انوب لان بعدج ما ضبطتيها

هيلين... تمام هوا راح واني سديت الباب وطبيت للبيت وانكضه اليوم عادي ثاني يوم هم علمني عالسواقه وبعدين كالي
حسام... مستعده تطببيها للكراج

هيلين... هااا خاف ادعمها

حسام... لعد خليها باجر

كتله تمام

ثالث يوم علمني السواقه وكدرت. اطببها للكراج

رابع يوم كال

حسام... هيلين شتكولين نطلع عالشارع

هيلين... تمام

طلعت اسوق وهوا يمي كاعد كال روحي لهذاك الشارع لان فارغ

توترت وكلش خايفه الشارع فارغ قليل سيارات تمر بي

ديورت ورحت للشارع

لهنا وينتهي البارت لا تنسون التصويت....

رواية الأصداف

بقلمي الكاتبة.. ♕bmbsh_beme♕