رواية الاصداف الفصل الرابع والعشرون 24 - بقلم بمبش

روواية الأصداف

بقلمي الكاتبة.. ♕bmbsh_beme♕

رغم تعبانه كلش الله يشهد بس كلبي ما انطاني اخليكم بدون بارت بعد ما شفت لطقكم وياي ولو البارت قليله وحداثه بس حتى تتوضح البارتات الجايه

........................................................................

باوعتله جان كاعد من شافني وكف لحيله وباوعلي

هيثم بأهتمام... هلونه شلونج

اطكك اصابعي وكلني ارجف شفايفي  وايديه ما توقفت رجفتهم....

هيثم.. تقرب.... ليش متحجين

رجعت لوره وكأنو اريد انهزم منه

تقرب واني رجعت لوره لزكت بباب الاستقبال
تقرب مني وجرني وحجه

هيثم..تعالي هنا... وجرني كعد عالقنفات كعدت كباله واطكك اصابعي واحجي بدون ما التفتله

هيلين.. ليش اجيت

هيثم.. اجيت اشوفج واحجي وياج واشوف ليش تردين الطلاك

لا رد

هيثم.. لا تخافين احجي شكو بكلبج راح اسمعج للنهايه

لا رد

هيثم... مسك ايديه وكال... احجي لا تسكتين
باوع لأيديه وكال ليش ترجفين ما اسويلج شي ولا اجبرج على شي

هيلين... اريد اتطلك

هيثم... السبب..

هيلين.. واضح

هيثم... بس لو اي رجال بمكاني جان سوه السويته اني شفت الرساله وعميت من غيرتي والحقيقه انكشفت وافنان بعد ما الها طبه للبيت واساسا جاي ادور على بيت ايجار..

هيلين... هيثم ما النه رجعه طلكني وخلص

هيثم.. عصر ايديه بأيديه ودنك.... هيلين بعد ما اضربج

هيلين... انت واحد خاين وعباله الناس مثله انت اكثر من مره تضربني وترجع تكول بعد ما امد ايدي عليج هالكلام سمعته هواي اني انذليت عندك ما فهمتك ولا فهمت طبعك مراح اكول هذا مختل عقلي

هيثم... جان مدنك رفع عيونه وباوعلي... مختل

هيلين... اي مرات هيج احسك افنان جنت تحبها وبعدها صرت تريدني عمتي تحجي وياك تدفعك انت تجي تشبعني كتل شكيت بيه وبشرفي وضربتني

.... وخرت ايديه من ايدينه وخليت ايدي على كتفي مكان الجرح وعيوني مغوركه.... هذا جرحك للموت ما أنساه اليحب ما يأذي بهالطريقه وصلت الموت بسببك يمكن لوما استلحكوني جان بقيت انزف الا متت..

هيثم.... يأذيج الجرح

هيلين... مو مثل وجع كلبي عالشي الجازيتني بي

هيثم... هيلين اني حبيتج لأن شفتج صافيه يعني شفت صفات كلبج ونقائج افنان نزلت نفسها وكرامتها علمود تصير بذمتي وانتي شفتيني ممتقبلج ابتعدتي وبنفس الوكت جنتي قريبه مني ما مخليه قصره بشغلج
شفتج رغم صلابتج وقوتج تصرفاتج بريئة وعلى نيتج
صرت اشوفج احلا بنيه بدنياي
اني غلطت ومشيت بكلام امي وهالغلط اصلحه وما يكون خاطرج الا طيب

هيلين... تحبني

هيثم... مو بس احبج صرت قطعه من روحي من رحتي واني ضايع وعرفت قيمتج

هيلين... شطلب تنفذ

هيثم..  التردينه يصير وتأمرين أمر

هيلين... باوعت بعيونه وحجيت.... طلكني

هيثم وكف وحجه.... مبيها اي مجال فرصه بس

هيلين... انطيتك هواي فرص كافي اعتقني

باوعلي وعيونه مغوركه نزلت دمعته رفع ايده ترجف مسح دمعته وكال...التردينه يجرالج

هزيت راسي بمعني اي ودموعي تنزل احس بشي بيه مكسور عليه

هيثم... عادي احضنج لأخر مره

هزيت راسي بمعني أي واني مدنكه ودموعي تنزل شلال

تقرب  حضني وحجه.... تكدرين تطلكين مني بس متكدرين تبعديني عنج وابقى بضهرج شيصير وياج تلكيني موجود  هيلين اني حبيتج وتعلقت بيج احس يومي بدونج ماله طعم عيونج متروع من بالي وساعتهن ورموشج اللي لو بيدي احسبهن رمش رمش
وحاضني قوي واحس بي يمسح بدموعه

شويه هدء وخر عني تقرب باس كتفي ومسك وجهي مسح دموعي باس عيني اليسره ورجع عاليمنى وباس راسي وباس خدي اليمين وخدي اليسار باس انفي

وابتعد كال... مراح تبجين بعد هاي اخر دموع تنزل منج اني راح ابتعد وراح اكون وياج ابقى اشوفج من بعيد

مد ايده وكال يلا مع السلامه.. مديت ايدي سالمته وطلعت واني احس بعد اريد ابجي راحو ابويه والويلاد يمه سلمو عليه وراح

هيلين... يمه وين سهام

امي... راحت لغرفتها

رحت لسهام جانت  امدده رجليها ومخليه مخده ومخليه عليها قرأن ودتقره

تقربت خليت راسي بحضنها وغمضت عيوني امنع دموعي تنزل

سهام صدقت وسدت القرأن خلته على صفحه وصارت تمسح على راسي وحجت.... ها شحجيتو

فتحت عيوني مغوركات والدموع بعيوني تنتضر اطلق  صراحها... حكيت كصتي حتى عمتي متنتبه على دموعي

سهام... لا تكبتين ابچي وأحچي  اللي بكلبج

نزلت دموعي وحجيت... سهام راح نتطلك

سهام... انتي مو ردتي هالشي

اهيلين. ني رايده هالشي وما اتراجع عنه اني ما اعيش عنده بيئته تختلف عن البيئة الأني بيها يضربني ويعتذر ويكول بعد ما اضربج ويرجع يضرب معنده ثقه بيه كلمة امه تمشي عليه

سهام... يا روحي لعد ليش البچي

حجيت... سهام يبچي يبچي عليه يحبني بس طبعه مو بيده طبعه عم عليه

سهام...  خاف تحبينه

لا ما احبه بس احس صارله مكان بكلبي رغم أذاني بس تعودت عليه

سهام..... اذا تحبينه رجعيله وخلي شروط

هيلين... ما اكدر ما اكدر أذانييي.... وخليت ايدي على حلكي وأبچي على شنو دا ابچي ما اعرف بس غصه بكلبي

حسيت على نفسي متمدده على رجلين سهام وسهام خطيه رجليها روماتيز

تعدلت وكفت مسحت دموعي شويه هديت نفسي وسهام كالت

ليش كمتي ترا ما مضايقتني

هيلين... لا رجلينج هسه تعبو

سهام... وأخير كلتي رجلين جنتي اقدامج واقدامي وقدم واقدام عود لأن ام خشم صارت دكتوره

هيلين..ضحكت بتعب وحجيت... رجلين وخشم وهواي كلمات تعلمت منهم

دا اطلع وكتلها... تحتاجين شي

سهام... لا يروحي سلامتج بس جيبي فراشج وتعالي نامي هنا

رديتلها... تمام

رحت لغرفتي جبت مخدتي والغطه وتلفوني والسماعات ورحت يمها

سهام عدها تخت(چربايه) وغرفتها مخليه بيها فتل دواشك ميعجبها المكياج وهاي السوالف وكنتورها اللي من جدتي ذكرى متقبل تغيره تمددت واتغطيت

ومخنوكه مدري شبيه حچت سهام.... هيلين محمود سمنان شتكولين لكاله وحده

عرفتها تريد تغيرلي نفسيتي وتنسيني

رديتلها... لا هوا يحبج

سهام... ها هيج تكولين

هيلين... ايي

سهام... هلونه

هيلين... هااا..

سهام... لا تنقهرين ولا تبچين انتي قويه

ردت احسسها انو مبيه شي لأن اعرفها تضل مقهوره فكتلها... هههه ولج حتى نسيت بس اني لأن شفته يبچي

سهام.. ها خوش لعد نامي

هيلين... هههه شي اكيد انام مغفله عالنومه

غطيت راسي تغطيت وفتحت تلفوني دشوف براء مراسلتني شي باوعت النت اني مطفيته كلت بعد احسن غمضت عيوني وبقيت افكر وكلما اريد ابجي اسكت نفسي واغلس لحد ما نمت

كعدت صليت فجر وقريت قرأن ودعيت كون ما اواجه صعاب بعد تعبت

ومكدرت ارجع انام واريد التهي بشي

باوعت الحديقه ممداريها ابويه ليش ابويه يحب هالشي...  طلعت المقص وادوات التقليم وبديت بيها جبيره كلش وبديت ارتب بيها معرف للساعه شكد واهلي كعدو طلع ابويه كال... ها بابا شتسوين

حجيت واني اشتغل... اسوي الحديقه شكلها محلو

راح ابويه تريك هوا وامي وسهام وكالولي تريكي كتلهم ما اريد هسه الا اخلص اني من النوع من اشغل شغله لازم ما اعوفها من اعوفها واكعد ارتاح اتهدون(حيلي ينهد) واتكاسل اكمل

راحو تريكو شويه وأجو يعاونوني وعمتي سهام اجت يمنه بكرسي المتحرك ومتقبل تروح ترتاح شايله الأدوات ويمنه كلمه نحتاج شي ناخذه منها

كملنه الحديقه وامي سوت چاي
وكعدنه بيها ابويه كال.... المرجوحه بقت بهذاك البيت بلكي اروح اجيبها

امي.... لا تروح ولا تتعب نفسك هوا وين بقه البيت لهسه حتى تلكيها كتلك جيبها جيبهااا

شفتي شصار بينه بوكتها

هيلين... شبي البيت ليش

ابويه... بابا هدموه لأن تجاوز

صدمني من كالي هيج شكد انقهرت حرامات بيت شكبره

هيلين.... ميفيد الوضع ابد ميتصلح ويبقون هيج ميتغيرون

امي... هيلين لو شايفه شصار بينه ابوج ضل اسبوع ويه سهام مدخلينه مستشفى

وعمج هم شحاله من هدمو بيته شبعنه قهر

كل هالشي صار واني ما ادري وابويه تعب عليه البيت بس بعد راح..

ردت اغير الموضوع اني بلا شي كلبي صاير سكراب... زينه هاي المنطقه بس هذا البيت احد ساكن بي يبين وأشرت علي بيت كبالنه صاير يم بيتنه بس شنو يفصلنه الشارع والبيت بي شبابيك اثنين باتجاه حديقتنه يعني الجهة اليسار مال بيتهم صايره كبال حديقتنه اللي يوكف وره الشباك كأنو واكف بحوشنه

رد ابويه كال... لا مسكون بي ناس بس ناس هنا مثقفين ما يطلعون والعرفته ما عدهم رجال بالبيت

سهام... شلون نسوان وحدهن

ابويه... اي نسوان اثنين واطفال اثنين مدري ثلاثه

امي... بعصبيه... وانت شمدريك بيهن

ابويه ضحك

سهام.... هههه الغيره ابو هيلين شد راسك

ضحكو واني ضحكت وياهم رغم مالي واهس بس ما اريدهم ينتبهون

ابويه.... البيت اللي يم بيتهم من جهة اليمين جنت واكف ويه صاحبه يصيحوه ابو حواسم وكتله يمكن هذا البيت ما بي احد... كال لا بيت اختي هنا ساكنين اختي وبنت اختي وجهالهم بس يخافون وما يطلعون على احد واحنه فاتحين باب صغير من الحديقة مالتنه على حديقتهم علمود خاف يصير شي قريبين منهم

هيلين... وكل هذا البيت لاربع نفرات

ابويه... اي وبيت  ابو حواسم ما عدهم شباب بس ابو حواسم رجال بالبيت بس سكنهم قديم

اللي فهمته من ابويه البيت اللي يمنه لمره هيه وبنتها والبيت اليمها بيت اخوها وبيت اللي صاير على جهة اليسار بيت عمي لأن ويانه تجاوز

هيلين... اي زين محد مسلط علينه

ابويه كالي اي ورجع التفت لأمي كاللها باجر نطلع كلنه بالسياره نشتري مرجوحه وشوف شتردون من السوك

امي كالت.. اي علواه محتاجه مسواك
مر اليوم عادي بليل اجه الميه طلعت رشيت الحديقه ورجعت امي بالهول صاحتني رحت يمها واني اطكطك بسنوني من البرد... يمههه شبردها

هيلين... ها يمه

امي... شقررتو
. هيلين... نتطلك

امي.... خوش ورجلج هم هيج قرر يعني قبل يطلك

هيلين... اي قبل

امي... لعد ليش ما خابر واتفقتو على موعد الطلاك

هيلين... خل ابويه اليوم يخابره ويكله

امي... خوش راح اكله وانتي هم روحي اسبحي بمي حار لأن بردتي بره كتلها..

تمام تصبحين على خير

امي وانتي من اهل الخير

بستها ورحت بس غريبه ليش أمي متسألني شي

رحت للغرفة حضرت ملابسي وشغلت الصوبه  ورحت سبحت ورجعت ركض لغرفتي كعدت يم الصوبه رغم السبلت مشتغل بس بارده

مشطت شعري يم الصوبه ورحت للميز شغلت السشوار سشورت ورجعت يم الصوبه فتحت تلفوني وباوعت بنو شكد متصله عليه.

ادزيتلها.... وينج بنو

براء.. وينج ماكو من البارحه ضل بالي

هيلين... تعبانه شويه..

ليش سلامتح عمري

ما ادري بس نفسيتي زفت

ليش يا روحي احجيلي شصار

مصار شي وهيثم قبل يطلكني

براء.... واخيرااا كلللليش حتخلصين

هيلين.. ايي

براء... اسفه مو متشمته ترا اعرف هالشي من صالحج ولهالسبب هيج حجيت من فرحتي لأن مشتاكه نرجع مثل قبل ومنتفارك

هيلين.... لا تعتذرين قابل اني ما اعرف نيتج

براء... خوش ينرادلنه طلعه للمطعم عشويه زينه احنه والبنات شتكولين ايمت نطلع

معرف بس ما ليه واهس اطلع بكل مكان واريد اتطلك دا ارتاح اخاف يغير رأيه هيثم

رديتلها... مو هسه خليها بعدين

براء... خوش ايمت ترجعين للشغل ولج

هيلين... بنو ما ليه واهس شي حاليا خل بس شويه ترتاح نفسيتي

براء... تمام اكلج تصعدين اتصال ويه انسام مكالمه جماعيه

هيلين... لا روحي خابري معليج مني

براء... لا اني علمودج تغيرين جو

هيلين... لا ميحتاج

براء... هيليننن

هيلين... ها عيوني

براء... تابعي مسلسل زواج مصلحه طالعه جديده وتجنن ومتوفره عاليوتيوب تفطس ضحك تطلعج من الجو الانتي بي وتغير نفسيتج

هيلين... اليوم اشوفها

براء... ولج فتون تفطس ضحك

هيلين... يا فتون

براء... بطلة المسلسل..

هيلين... لعد اروح اشوفلي حلقة وانام

براء... روحي حب

هيلين.. باي عمري

براء.. بايات هلا يروحي

سديت الخط منها وخليت ايديه يم الصوبه اتدفه وتذكرت هيثم عيوني غوركن هفيت على عيوني حتى لا ابچي وفتحت اليوتيوب كتبت زواج مصلحة حلقة واحد

وكعدت اباوعلها تقريبا شفت 3حلقات جانت كوميديه بس ما ضحكت ما ليه واهس

ولمن رجعت البطله للبيت وشافت انو انغدرت من صاحبها بجيت عليها

نعست ونمت والصبح كعدتني امي كالت اكعدي دنروح للسوك

كعدت لبست العبايه والشال ما ليه واهس اكشخ واترتب وطلعة جاي يتريكون

امي كالت.. شبسرعه لبستي غير تاكلين

هيلين... ما جوعانه اريد بس چاي

ابويه... راح تخلصين هيج تعالي تريكي

هيلين.. بابا مجوعانه هسه من اجوع اكل

تريكو واني شربت جاي وكملت وطلعنه ابويه كال وني اروح اوكف تكسي بين ما تكملون

سهام.. اذا، علمودي ما اجي

امي... اذا ما تجين ما نروح

سهام..  رجليه مأذيتني
.
شكد ردنه منها كالت اروح لبيت ابو حسام على بيت عمي ف اخذنه تكسي وطلعنه

طلعنه للسوك اختارينه مرجوعه مرتبة وأمي تسوكت للبيت ورجعنه ابويه وكف يم الصيدليه وكال يلا هيلين خل نشوف كتفج اشون صار

هيلين... ميحتاج

ابويه... لا تتعبيني بابا يلا نزلي

نزلت وياه طبينه وابويه كال للمضمد المضمد كال الا افحصها وبعدين

اجيت اطلع كتفي استحيت مدري اشون فتحت العبايه وبابا كال للمضمد كص التيشرت من يم كتفها احسن

فكص التيشرت واني صرت بهدومي من الخجل شاف كتفي وبدل الضماد وانطاني علاج وكال يوميه تعقيم ولا تخلينه هواي يلامسه ماي

طلعنه بابا وكف يم ابو اللفات نزل شويه واجه
كال جبت لفات هيلين ما تريكت

رجعنه للبيت وامي راحت جابت عمتي
وكعدنه اكلنه لفات وبابا ملتهي يخابر ديشوف سياره تجيب المرجوحه

بليل بقيت اتابع الحلقه معرف كم حلقه وصلت باوعت الساعه ب3حيللل التهيت بيها

بقيت كلت ما تسوه انام باوعت للمسلسل للأذان طلعت. توضيت للصلاة ورجعت صليت كملت صلاتي وشكلت تلفوني عالشحن ونمت

ما كعدت لل1الضهر بس كعدت جسمي متدكدك من النوم طلعت سبحت ورجعت سشورت وصليت  ونزلت تريكت  وامي كاعده تسوي مكدوس هيه وسهام كعدت اعاونهن امي كالت...

امي... هيلين

هيلين... ها

امي... زوجج يكول خليها اسبوعين تفكر بلكي تغير رأيها

هيلين.. نترت وحجيت بصوت عالي... شنو افكر اني مفكره لا يجر طول وعرض ويماهي رأيي ما اغيره

امي دنكت وكالت هوا هيج راد

رديتلها... انتو الضاهر متردونييي وانتي حتى ما سألتيني على شي اني لو اموت احسلي اخلص منكم

امي كال اسم الله عليج وكامت تسوي بالمكدوس وتبچي وتحجي.... ما سألتج حتى لا تسولفين وتنقهرين وسهام سولفتلي واحنه نريدج يا يمه بس زوجج هيج راد قابل شنو راح يصير اذا بقيتي الاسبوعين وبعدها ما يبقاله حجه يا يمه ماكو داعي هيج تنترين

سهام باوعتلي بنضره وباوعت لأمي يعني قهرتيها

اعرفها انقهرت لأن صوجي مثل الثوله رفعت صوتي ونترت 

اني تقدمت يمها بستها ومسحت دموعها وحجيت..

يمه دموعج غاليه اسفه بس تعصبت بعد ما اعيدها لا. تزعلين

باستني وكالت... ما زعلانه وليدي بس انقهر من اشوفج هيج مكسوره

هيلين... خليها اسبوعين هاذهوا مثل ما كلتي نشوف حجته شنو

باوعت لسهام ابتسمتلي لأن راضيت امي وصلحت غلطي

مر الاسبوعين والوضع نفسه أكلي قليل وابقى مكتئبة

اجتني رساله عالواتس باوعت هيثم كاتب

هيثم... ها ما غيرتي رأيج

هيلين... لا

هيثم... خليها اسبوع انوب. فكري

هيلين.. هيثم باجر تخابر ابويه وتتفقون ايمت نتطلك

هيثم... اي هاذهوا

كتبتله باي شافها وما رد

وثاني يوم اتفقو على يوم الطلاك

ومر يومين وباجر طلاكي من هيثم او الافضل خلاصي وحريتي من هيثم

اجه عدنا بالبيت هوا وعمي وباسم 

وابويه كالي عود من ارمش على تلفونج اوكفي وره باب الاستقبال

رمش على تلفوني ورحت وره الباب

سمعت ابويه يكللهم  حتى لو تحجون وياها ما تقبل بنتي تعبانه حيل كافي ابو باسم خلينه نبقه بصداقتنه وما نخربها

ردله ابو باسم... التردوه يصير وغرفتها وكلشي يخصها اخليهم يجيبوه نهار

رد ابويه كاله... كلشي ما تريد عدها تسلم

وابويه كاله البنيه وره باب الاستقبال اوكف وره باب الاستقبال طلكها
لازم يطلكني محكمه وطلاك لسان

وره شويه
سمعته كال... هيلين

كتله.. ها

هيثم... انتي طالك طالك طالك

حسيت كلبي عصرني

طلع ابويه كال تحضري نروح للمحكمه

تحضرت وطلعنه هما بسيارتهم واني وأبويه بسيارة انسام

مشينه والطريق كله احس نفسي يروح ويرجع مخنوكه وابينلهم انو اني ماكو اقوى مني

وصلنه المحكمه نزلنه واباوعله ما اندارلي واني هم درت عيني ما اريد اشوفه كلبي ما ينطيني

رحنه للمحكمه طبينه كملنه الأجراءات بسرعه لأن ابويه محامي بالمحكمه وطبينه للقاضي طبينه بس اني وهيثم

بيناتنه مسافه كلش قليله ايديه كامت ترجف

حجه ويانه القاضي شكم كلام وكال هاذهوا انطاني الاوراق كالي وقعي

التوقيع حينهي كلشي بيناتنه

لهنا وينتهي البارت لا تنسون التصويت عمري لاڤيووو نفر نفر

صعوبة الشرح تجبرني عالصمت دائما
وقلبي مليان حچي والوكت يفرض عليه السكوت

رواية الأصداف

بقلمي الكاتبة.. ♕bmbsh_beme♕