رواية الاصداف الفصل الثالث وثلاثون 33 - بقلم بمبش

bmbsh_beme

ضرغام.... لزمت شعرها وحجيت عليمن هيج تنترين هاااا

ضحى... ردها بقوة.... ما انتر ما اريد اروح ادرس وخلاص عوف شعري دتأذيني

شفت عيونها غوركت اجت تبجي عفتها وطلعت
رحت لأهلي اسياد طلعنه اني ويه للكافي دخنت ناركيلا وما رجعت للبيت لليل الا حسيت اعصابي بردت

اني اختي ما اريد اضربها اذا شفتها قويه وتحجي بقوه اذا ضربتها اكسرها واخليها تضعف وبعدين اذا تتزوج الرجال راح يستضعفها واني ما اريد شخص يستضعف خواتي

ريماس من شفت حارث شكد فقير وافقت انطيها
وضحى صوجي اني تعصبت ولزمت شعرها
وكلش مقهور على هالشي السويته

البنيه اذا، شافت دلال مراح يجي يوم ترفع صوتها على امها او ابوها او اخوها لأن راح يوكف بعينها دلالهم اذا انضربت راح تكره الشخص. اليضربها وما تهتم اذا رفعت صوتها عليه
واذا، انطيتها الثقه مراح تخونها البنيه من تخنكها وما تثق بيها راح تغلط وهالشي اكبر غلط البنيه رب العالمين اللي هوا اكبر الكل وصى بيها البنيه شي كل ثمين بالبيت اللي يكول بنيتي شمعة بيتي لا تصدكون انو كلامة مبالغة البنية شمعة البيت

واني المفروض ما اتصرف، وياها هيج إني ابوها مو بس اخوها....

مريت للمحل اشترتيلها تشكيلة مال حلويات وقرطاسية للمدرسه هي تحب هيج اشياء
اخذتهن ورحت للبيت

جانت امي تنتضر رجعتي دتقره قرأن بست راسها وحجيت.... الله يساعدج يمه

رحت لغرفة ضحى طبيت جانت كاعده تقره باوعتلي من شافتني وكفت دنكت راسها وكالت....

ضحى... اسفه

تقربت منها خليت العلاكه على صفحه لزكت وجها بأيديه الأثنين ورفعت راسها وحجيت...

ضرغام... راسج ما اريد بيوم تنزلي لا كدامي ولا كدام غيري راسج يبقى مرفوع شو باعيلي

رفعت عيونها حمر من البجي

حجيت..... ليش بأجيه يا عيوني والله ساعة عصبية

ضحى.... اني ما ابجي منك هوا شعندي غيرك

رحت كعدت يم جنطتها والدفاتر اللي جانت كاعد تكتب بيهن وحجيت

ضرغام... تعالي هنا كعدي يمي... اجت كعدت يمي

باوعتلها وحجيت

ضرغام... كولي ليش تبجين

ضحى... ما اريد اروح ادرس

ضرغام... يعني تتركين دراستج

ضحى.... لا ما اتركها بس على بيت اهل صديقك ما اروح ادرس

ضرغام بتركيز.... ليش شنو السبب

ضحى... اكو بنيه هناك تكاونت اني وياها وبعد ما اريد اداوم

ضرغام... اني ما اكدر احجي ويه البنيه بس باجر اخذج انتي وامي وتتفاهمن وياها

ضحى... اني ما اريد اتفاهم وياها واصلا ريام مدري شلون صايره تشرح واني جاي افتهم على شرح المدرسات اللي بمدرستي ما احتاج ريام بوقت اللي اروح لريام وما استفاد من شرحها شي ادرس بالبيت

بقيت مركز بحجيها ما اعرف شنو جاي احس بحجيها

ضحى... تشيل الكتب تخليهم بالجنطه وتحجي.... لا تباوع هيج اني اريد اتكئ على نفسي خويه شكد تونست من جنت اروحلهم وادرس وشكد خوش ناس بس ما بقى داعي تدرسني ريام

رديتلها....

ضرغام.... هاذهوا وليدي باجر اكول لاسياد انطيهم خبر يكول لريام بعد ضحى ما تجي تدرس

اشوفها دنكت راسها وكالت.... خوما زعلت مني

حجيت واني اخذ العلاكه من وراها...

ضرغام... اكو واحد يزعل من بنيته وشمعة بيته شوفي شنو اشترتيلج... وانطيتها العلاكه

اخذتها فتحتها شافت الحلويات وكالت تسلم من شافت القرطاسية كمزت باستني وحضنتني وكالت بفرحه

ضحى.... شكرا شكرا شكرا

ورجعت تقلب بالقرطاسية وتحجي... يايي شكد حلوات باجر اخذهم وياي اشوفهم لصديقاتي

بست راسها وعفتها وطلعت امي نايمه رحت لغرفتي نمت كعدت رحت لشغلي وفورا بعد رجعتي نمت ما كعدت للمغرب

تعشيت وطلعت لاسياد شافني وسكت

كتلها شبيك صرت اخرس اشونك ولك

ضحك وكال... هههههه زين انتي اشونك

ضرغام... زين اكلك اليوم اجيت اخذك نتعلل ابيتنه لأن الأهل يضل بالهم من اتعلل برا

خله ايده على كتفي وكال...

اسياد... يلا امشي نروح نتعشه وناخذ شغلات للناركيلا وابات يمكم باجر نطلع للدوام سويه

رديتله....
ضرغام... هلا بيك ضلعي بس اني اكلت واجيت بس تعال تعشة عدنة اشون مركة حمص

اسياد... صار بيها حمص خل انطي خبر للأهل لعد

راح ديطب للبيت تذكرت وحجيت...

ضرغام... اكلك اسياد ضحى بعد ما تجي تدرس انطي خبر للأهل

اسياد... عقد حواجبه وكال... ليش

ضرغام.... هسه دروح من ترجع نحجي

كتله هيج حتى اغلس عالموضوع ما اريد افتح وياه مواضيع تخص اهلي ما احب هالشي

رحنا للبيت طب اسياد للاستقبال واني رحت لامي حجيت وياها ووصيتها تكول لضحى تحمي الحمص وتقلي دجاج المسلوك

رحت للاستقبال امي دكت الباب اخذت منها العشه وتعللنه والصبح طلعنا للشغل

مرت سنتين وضحى ساءت حالتها. كل فترة تزيد تنتر وتصيح ودائما اصيح عليها وارزلها بس ما اضربها
مرتين وازتني وضربتها راشدي لأن فد مره صوتها يصير عالي بوجهي وتغلط

مسكتلها اشتراك لامتحانها الوزاري للثالث لان طلع تنسيبها بغير منطقة تمتحن

خلصت الامتحانات واجت نتيجتها واللي صدمني وصدم امي من طبت ضحى للهول وراحت تريد تطب لغرفتها امي حجت

امي... ها يمه شطلعتي جيبي الكرت اشوفه درجاتج

ضحى اجت يم امي انطتها الكرت وراحت دتطب لغرفتها امي صاحت

امي. هاي شنو ولج اشون

باوعت لامي وحجيت شكو يمه

ردتلي... اختك راسبه

باوعت ضحى طبت لغرفتها صحت... ضحىىىىى

طلعت باوعتلي وكالت

ضحى.... هااا

ضرغام... شنو هاي وليدي ليش الرسوب شكو

ضحى... شنو شكو واحد يطلع راسب شكوو اسئلة صعبة

امي... ولج كل سنة ما ترضين غير ب90واذا اخذتي، 80تكضيها تبجين ليش يمه هاي عود انتي

ضحى... بنتر وصياح اني اكره الدراسه وما اريدها خوش

ركضت يمها بحركة سريعة ولزمتها من شعرها وحجيت... شو تصيحين على امي مو جاي نحجي وياج بهداوه

بجت صاحت.... ما اريد المدرسة ما اريدهاااا

ضرغام.... يطبج طوب لا تردين

امي... يمه عوفها ملخت شعرها عوفهاا يمه لخاطري يا وليدي

عفت شعرها امي حضنتها وتطبطب على ضهرها وتحجي معليج منه معليج لا تنقهرين ما تريدين الدراسة طز بيها بس لا تبجين

باوعت لامي واني اعصابي نار وحجيت... مستقبلها هذا شنو تعوفها
اشرتلي امي بمعنى اهدء

عفتها حاضنه ضحى وطلعت منطقتنه بطارفها اكو شط رحت لهناك كعدت ادخن والدنيا طالعه من عيني اختي ليش هيج وشنو السبب ما ادري ليش تكره الدراسه او ليش هالسنة بالذات طلعت راسبة

ما رجعت للبيت ضايج من امي ما يصير امي تدافعلها بوقت اللي ترفع بي صوتها عليه اني اعتبرها بنيتي مو اختي

بقيت يم البحيرة سويت تلفوني صامت طلعت كعدت بسيارتي وبقيت ادخن خلصت الباكيت ما اخذت عيوني نوم للصبح

طلعت كبل للشغل خابرت باوعت تلفوني يمكن 30مكالمه اذا مو اكثر

واسياد هم متصل

وصلت الشغل، شافني اسياد اجه عليه يمشي وكال...

اسياد... وينك يمعود قلقتنه ايمت تبطل هذا طبعك

ما رديتله خابرت امي كبل جاوبتني وكالت

امي. الووو وينك يا يمه

ضرغام... بالشغل لا يضل بالج

امي... قلقتنه ما نايمة لهسه بالي يمك واختك مريضه

ضرغام... هسه جايكم

امي... لا لا تعوف شغلك هسه اني اخذها لهذا المستوصف القريب علينه صخونه بس

ضرغام.... هسه اجيكم اصبري لا تطلعين بمكان

امي... اني هسه راح اطلع لا تعوف شغلك يلا مع السلامة وسدت الخط بوجهي

ما اعرف شسوي كلما ضحى جاي تكبر العائلة تكثر مشاكلها وريماس بالشهر لو تجي لو ما تجي لأن ابيتها وزوجها يشتغل ما تكدر تعوف البيت
مرات اودي امي وضحى يشوفوها وسجى كلما تكبر تحلى

وضرغام هم كبران

من خلصت شغلي رجعت للبيت سألت امي على ضحى كالت صخونه خفيفه انطاها علاج

رحت عليها جانت نايمة بست راسها ورحت لغرفتي مغفل ما نايم بس خليت راسي عالمخده نمت

كعدت باوعت الغرفه ضلمه الدنيا ليل

طلعت غسلت وصليت وضحى يم امي كاعده تسولف وتضحك من شفتها تضحك شوية ارتاحت نفسيتي امي من شافتني

باوعت لضحى وكالت... سوي لاخوج عشا يمه

اني ما اريد احجي وياها اريد اسويلها جرت اذن

رديت لأمي... ما اريد لا تسوون شي

امي... يمه من الضهر شلون مو جوعان

ضرغام...اذا انتي تطبخين أكل

امي... ليش شبي طبخ اختك ما بيها شي يمه صارت زينه

رديت..ما جوعان اكلج يمه

امي باوعت لضحى وكالت...

امي... كومي احمي لاخوج العشه

ضحى... صار

كعدت يم امي وحجيت... تروحين باجر لريماس اخذكم باجر استلم راتبي

امي... يا وليدي كلبي صاير مثل النار عليها صايره حتى ما تخابر

ضرغام... لعد باجر من اروح للدوامي استلم الراتب تحضرو من ارجع اخذكم

شوية واجت ضحى خلت الصينية كدامي

اني عفت الأكل ووكفت باوعت لأمي وحجيت...

ضرغام... اني طالع افول السيارة بانزين

ضحى... مو سويتلك العشة تعشة وروح

حتى ما باوعتلها ولا رديت

مشيت وصلت ل باب الهول وسمعتها كالت...

ضحى... ضرغام

ما رديتلها عفتها وطلعت غثتني حيل ابد ما يوم ضوجتها لو قهرتها وعاملتها بسوء بس هي ما احترمتني

طلعت فولت السيارة بانزين ورحت يم اسياد شويه ورجعت طبيت للغرفة تمددت على صفحة صار باب الغرفة وراي اندك الباب ...

ضرغام... درت وجهي للباب وحجيت... منوو

ضحى.... فتحت الباب وكالت... اني

درت وجهي ومنطي للباب ضهري رجعت كالتلي

ضحى... زعلان مني اسفة

لا رد

ضحى... لتبقى تسوي هيج رد

لا رد

ضحى... مو كتلك اسفه بعد ما اعيدها

هي كل مره تكول هيج وترجع تعيدها

ما رديتلها بقت تحجي الا شافت ما مني امل ارد عليها راحت واني نمت

الصبح كعدت كاتلنب الجوع طلعت للمطعم تريكت ورحت للدوام استلمت الراتب
تسوكت بخمسين الف لريماس لأن شغل حارث مو شي وحالتهم مو كلش اني كل شهر اشتريلهم مسواك بحدود الخمسين لحوم على اجبان والبان وخضراوات وفواكه وانطيها خمسين

رجعت للبيت دكيت هورن ونزلت للبيت امي حانت تلبس جواربها وضحى تعدل شالها طلعت للغرفة سبحت وبدلت ونزلت

امي وصحى جاي يحضرن الاقفال مال البيت

اخذت المفاتيح والاقفال وكلت لامي اني اقفل روحو كدامي

قفلت الابواب وطلعت بالطريق ضحى كالت...

ضحى... ضرغام هاي المنطقة شسمها

ما رديتلها

شكد حاولت تحجي وياي ما اردلها واتجاهلها

وصلنه الانبار ريماس طارت بينه تلكتنه وسجى خالو وخالو طبينه جوه جان حارث بعده ما جاي من الشغل

كاعدين وامي كالت لريماس

امي.. شو لا تخابرين لا تسألين

ريماس... يمه ضرغام متعبني هالفترة اخر مره تخربط وديته طلع كلبة ضعيف كلش هسه نخاف عليه من الهوى الهاب

وتعرفين سجى تغار منه تضل تكاونه وهذا كلبة ضعيف

سجى كاعده بحضني كالت.. لا اني ما اكاونه بس لمن يصير وكح

كلنه ضحكنه على سوالفها

بقينة عدهم للمغرب ورجعنا

ضحى بقيت اسبوع ما احاجيها كاعد بالاستقبال

اجت ضحى باوعتلي وكالت

ضحى... حتبقى هيج

لا رد

ضحى... شلون تبقى زعلان اني لا ليلي ليل ولا نعاري نهار لأن انت زعلان مني

ضرغام.... كملتي

ضحى... ضرغام كافي هيج تعاملني تريد تعاقبني هاي عاقبتني صارلي اسبوع معاقبة كافي عاد

ضرغام... طبعج صاير ابد ميعجبني

ضحى... وعد ضرغام وعد بعد اذا اسوي هيج لا تحجي وياي ابد

ضرغام... نشوف

ضحى... يعني رضيت اي هذا هوا انت رضيت

اجت باستني وكالت عمري انتي ابويه مو بس اخويه

وراها بيومين صار عرس لصديقي رحت حضرته
وثاني يوم امي كالت اجو خطابة لضحى انت جنت بشغلك واجت جارتنه واختها خطبوها لابنهم رديتلها...

بكلمتين... ضحى بعدها صغيره

امي... خوش يمه

بليل من رجعت من التعليله امي صدقت جانت تقرا قرأن وكالت... يمه اريد احجي وياك بموضوع

ضرغام... اي احجي.

امي... ضحى تقبل

ضرغام... بشنو تقبل

امي... ضحى تقبل بهذوله اللي اجو خطبو

ضرغام... يمه شنو تقبل وليش اخذتي شورها، هي مال زواج حتى تاخذين شورها

امي... اختك مدري شبيها واصلا تكول انتو لا تتدخلون لا انتي ولا ضرغام واني رايده هالشي

عقدت حواجبي ورديت..

ضرغام..... ترا ضحى شكد دا ادللها دا تزيد اني اعرف اشون اتعامل وياها

امي.... يمه ميفيد ضربتها حتى بوجهي تصيح

ضرغام... خاف بيها شي عوفيها اني احاجيها

رحت دكيت، باب غرفتها صاحتت... خيررر شتريدون

رديتلها...

ضرغام... خويه فتحي الباب خل نحجي ما نريد شي نريد نشوفج

فتحتلي الباب جانت دتبجي باوعتلها وحجيت.... هاي شنو هاي الدموع بنيتي تبجي لعد اني وين تعالي

رحت كعدت وصحتلها تكعد يمي احت كعدت وكالت..

ضحى... شتريد

ضرغام... ضحى احجيلي

ضحى... ما بيه شي

ضرغام.. لعد ليش هيج تتصرفين ويانا. اذيناج بدون قصد

ضحى..بجت وكالت... لا

تقربت يمها مسكت ايديها وحجيت

ضرغام...اعتبريني صديق مو اخ واحجيلي احد مأذيج ما معقولة امي تأذيج ضايجه من عدنه احجي وكولي ضايجه وما اريدكم

ضحى... لا مو هيج

ضرغام... لعد شكو مو مرمرتي كلبي غاليتي انتي

ضحى... ماكو شي لا توكفون بقسمتي

ما اعرف انخلطت عليه اعصاب على قهر على خوفي عليها تمالكت اعصابي وحجيت...

ضرغام... تحبينه هذا اللي اجه خطبج

ضحى... والله ولا اعرفه

.............................. part 35............................

رواية الاصداف

بقلمي الكاتبة bmbsh_beme.

........................................................................

ضرغام.. لعد شكو الا اكو. شي احجي ولتخافين وانطيج كلمة ما احاجيج شي بس احجي

ضحى... كلشي ماكو اني ما احبكم وما اريدكم اريد اتزوج

ضرغام...شنو احجي وشنو اوصف عن كلامها اللي كالته احسه خناجر وصابت كلبي اختي وبنيتي تكول هيج كأنو مو نفسها ضحى الاعرفها الحنينه
خذلتني رغم محبتي تجاهها
باوعتلها بعيوني اللي مليانه تعب وقهر وحجيت

ضرغام... متحبينه اقبلها منج بس بعدج صغيره عالزواج

ضحى.. مو صغيره اني

ضرغام... بس اني ما اريد انطيج

ضحى... اكتل روحي

ضرغام... تسوينها

ضحى... اسويها اي يا تنطوني يا اكتل روحي اني ما اريدكم افتهمني ما اريدكم ولا اريد عيشتكم كأنو عايشة بكبر لا عندي اخت وياي لا عندي اخ انت مكضيها بشغلك ما سائل علينه ابويه من راح ما بقالي احد تريدني ما اتزوج حتى اخدمك انت وامي

ضرغام... اذا توافقين بهاي القسمه بعد ما اللج حجي وياي ف انتي تريدين تختارين هاي القسمه تردين تختارين اخوج

رجعت كلت عسه ولعل تفتهم قصدي انو بعدها صغيره ومو مال زواج

ضرغام... ومن تصيرين 18تجيج قسمه زينه وانطيج

حجيت واني متأكد من جوابها حيكون طبعا راح تختار، اهلها وما تختار، هاي القسمه بس اللي صار مو هيج صار العكس صار الشي اللي مجنت متوقعه هو ردها واللي جان اكثر كلام طول عمري ما انساه

ضحى.... لا احاجيك ولا اصل بيتك

مجنت بيوم اتوقع ميبقى بيه حيل اشيل نفسي واليوم احس حيلي انهد جنت اشوف ضحى بأعلى المراتب شايلة شهادتها وتبتسم بفخر بس اختي فضلت زواجها عليه وعلى امي

ردت اوكف ما كدرت سندي نفسي ووكفت لحيلي باوعتلها جانت مدنكه وحجيت

ضرغام.....ضحى اللي اعرفها ضيعتها اللي كبالي مو اختي وتدللين دامج خاطره ابيتي التردينه يصير

طلعت من الغرفه رحت لأمي وحجيت...

ضرغام... انطيهم خبر موافقين

وطلعت من البيت رحت للمكان اللي ارتاحله رحت للشط بقيت كاعد ادخن وانفض التتن بالمي

شي خانكني مثل خنكتي بموت ابوي
سويت جهازي صامت وبقيت يم الشط للصبح

ما رحت لشغلي طلعت لاربيل يومين واني عيوني حمرا اغفه واكعد اغفه واكعد ما انام

وره يومين رجعت للبيت دكيت الباب
خلال دقايق انفتح الباب امي بس شافتني حضنتني وصاحت... يمه وليدي كلت راح مني وليدي وينك وينك

طبيت للبيت ضحى ماكو عرفت بغرفتها باوعت لامي وحجيت

ضرغام... ما غيرت رأيها

امي.. لا اصلا فرحانه وطايره

ضرغام... اها فرحانه والله خوش

امي رادت تسويلي اكل ما ردت رحت نمت بليل امي كالت باجر يجون يعقدون ونسوان عمامك يجون

ثاني يوم اجو نسوان عمامي ما

-

ما جايين عمامي بس نسوانهم واجت ريماس اجو اهل العريس سلمنه عليهم طبو

واجه شيخ العقد كعدنه بالاستقبال اني وعمي ابو حواسم والعريس وابوه واخو ونسوان ما اعرفهن

شوية وكالو خل تجي البنيه طبت ضحى لابسة ابيض اختنكت من شفتها يمكن لوما الناس الكاعده ابجي عليها وعالشي اللي جاي تسوي بنفسها عقدلهم الشيخ وكال ابو العريس

الحجي... اذا ماكو اشكال نجي نزفهم اسبوع الجاي

رديتله...ماكو اشكال حجي بنيتي بأمانتكم اني من هي وصغيرة لحد هذا عمرها مدللها ما اريد بيوم اسمع احد محاجيها لأن بعدين تصير ما حلوه بيناتنه عشرة عمر احنا وياكم جيران واهل انتو

رد الحجي... انتو منا وبينا وبنيتكم بنيته وحالها حال بناتي

راحو اهل العريس وهوسة ومشغلات الديجي البنات عفتهم ورحت يم اسياد لأن بعده بدوامه.

شافني وكال... ها مو مجاز شجابك
ضرغام... اجيت يمك شوية

اسياد باوع للمنتسب وكال استكانتين جاي ورجع حجه وياي ... هلا بيك تعال احجيلي شعجب اخذت اجازه

ضرغام..... الاهل بيتهم هوسه كرايبنه عدنه واجيت اصفي راسي

اسياد... هلا بضلعي اني هم اريدك بموضوع

ضرغام... احجي

اسياد... مبين جادحات وايراتك بعدين نحجي

اني هم غلست خليها غير مره اشوفه شيريد هسه مالي واهس

شوية بقيت يمه وامي خابرتني كالت طفو الديجي والهوسه طشت وحتى نسوان عمامك راحو اعرفك تضوج من الهوسه وطلعت

رديتلها... شويه واجي
بقيت يم اسياد تقريبا ساعه وشربت الجاي ورجعت للبيت بليل اجه حارث

كاعدين نتعلل كالتلي ريماس...

ريماس... شبيكم خويه شسالفة ليش هيج مكلوبة بينكم بالبيت

ضرغام... سدي الموضوع

ريماس... شسد الموضوع ترا خويه تكدر تلغي كلشي مو شرط اللي كلشي برضاتها وانت ما اللك رضى يعني قابل ما تكدر تحجي وياها

ضرغام... امي اخ من لسان امي ما تكدر

ريماس... ليش اني مو منكم وبيكم واذا كالتلي امي

اجت سجى كعدت يمي وكالت...

سجى... خالو انطيني موبايلك

فتحت تلفوني وانطيتها اياه ورديت لريماس

ضرغام... مو هيج خويه بس ما اريد اغثج

ريماس.. شنو خويه مشي كلامك عليها ليش تخلي كلمتها الماشيه

ضرغام... افااا عليج محد يمشي كلمته عليه اني خيرتها وهي اختارت ولو اسويها شغلة معاند اسويها واكسر راسها بس خيرتها واختارت

ريماس... شخيرتها

ضرغام.. اذا، توافق بهاي القسمه ما احجي وياها بعد وهي اختارت قسمتها

ريماس... ما اعرف، شكول بس يجي يوم تتراضون

رديتلها ب... الله كريم تهون

بقينة نتعلل شقة وضحك وسوالف حارث وريماس والجهال راحو، ينامون تعبانين من الطريق وضحى كاعده تباوع بتلفونها واني هم كمت دروح لغرفتي وصلت باب الاستقبال وحجت امي...

امي... يمه اسبوع الجاي يجون يزفون ماكو داعي لزعلك من اختك تراضو

امي ما تدري اني خيرتها اللي تعرفه انو اني قبلت انطيها

رديتلها...خلي يزفونها من الصالون واذا، زفوها من البيت الا اهجم العرس على روسهم وطلعت من الاستقبال

متمدد وافكر اني ليش ما اخليهم يزفونها من البيت بنيه وبنفسها هالشي ما اريد اغثها بشي

ثاني يوم الضهر تغدينا وكاعدين نشرب جاي حجه حارث

حارث... ريماس ليش ما تأجلين روحتنه للسوك

ريماس... ابو سجى وين اضل أأجل بيها اريد اخذلها هدوم واني جيت وجيت

حارث... الانبار شكبرها ما بيها هدوم وهنا اكو، هدوم

ريماس ضحكت وكالت... اي ما بيها

حارث ضحك وكال.. والله عليج سوالف

ريماس... لعد شعبالك

حارث باوع لامي وكال...

حارث...عمه مريتي مو حليانه
ريماس...ايييي حارثثثث

حارث... هههه ليش تستحين شوفيها عمه مو سمنانه وصايرلها زنود صايره مال كرط

ضرغام.... تنحنحت لأن نسو اني كاعد وحجيت.... ولك حارث اخوها شكبرة شضخمه كبالك ما تشوفه

حارث... هاي ضرغام هم شفته ضرغام، شلون مريتي مو مال كرط،

ضرغام... اخذت، الكوشه ضربته بيها وحجيت...ولك غير صاير ما تستحي وكلنه نضحك

رادو يروحون للسوك وسجى تبجي تريد تروح وريماس ما تقبل تاخذها تكول تبزعني اني اشتري على قياسها اعرف قياساتها

كلت لسجى

ضرغام.. سجى تجين نروح نشتري حلويات وعصاير ونفتر ناخذ ضرغام هم ويانه عوفي امج تروح للسوك ما طيبه السوك

سجى... ما عليه اذا تاخذ ضرغام ما اجي

امي... لا ضرغام يبقى يمي شيودي مريض اخاف عليه

اخذت سجى ورحنا افترينا اشتريتلها حلويات وطايره مشغلين اغاني ونفتر يم المدينه

رادت تنزل بالمنتزه مال الالعاب نزلنه من السيارة اخذت منها علاكة الحلويات لأن العلاكه بكدها هي ناعمة

وطبينه للمنتزه ما خليت لعبة ما صعدتها
مصعدها بالمرجوحه وواكف كبالها لا توكع اجت بنيه جايبه اختها صعدتها بالمرجوحه ووكفت يمي ما اتذكر شحجينه بس سألتني على اسمها وجاوبتها اسمها سجى وسألتني اذا بنتي

وجاوبتها لا

وبقينه نسولف شوية وراحت اهلها صاحوها واني اخذت سجى وطلعنا الدنيا مغربت

بالطريق مشغلها اغاني وهي ما بطل حلكها اكل الف عافيه الاطفال كلها تحب الحلويات مشتغلة اغنية هيلي دن دن وهي تاكل وتركص

سمعت صوت تلفوني يتصل نصيت المسجل وجاوبت

الووو ها يمه

امي... الحكناااا ولك الحكنا اختك مدعومه

ذبيت تلفوني بدون ما اشوف اذا الخط انسد لو لا وشخطت السياره واني ما اعرغ اشون اندل طريقي واشون جاي اسوق مرتين ردت اندعم

وصلت الجسر واني ما اعرف اروح للبيت لو اروح للمستشفى ويا مستشفى يجوز ما بالمستشفى

دكيت مرتين امي متجاوب انوب قلقت بالاكثر

بقيت ادك الا جاوبتني ضحى كالت

ضحى... الووو وينك امي هم تخربطت الحكنه

فريت السياره ورحت للبيت سجى خافت واني القلق عندي الف

وصلت البيت نزلت ركض طبيت للبيت وسجى طبت وراي باوعت ضحى يم امي جاي تهفلها

ركضت عليها سندتها دا اشيلها كالت

امي... لا يمه اكدر امشي وخرت عني وعدلت شيلتها كالت... امشي خل نروح لمستشفى... فلان....

اخذتها وطلعنا بالطريق خابرت عمي كلتله ضحى بقت وحدها بالبيت روح اخذها.

حنزللكم التكملة هسه مو انزلها وتكولون بارت قصير 😂😂😂بعدين اخليكم بالخلاط واعملكم عصير كرز حتكون التكملة نصف بارت لان هنا كتبت بارت ونص احبكم كرزاتي نفر نفر