رواية الاصداف الفصل الرابع وثلاثون 34 - بقلم بمبش

بقلمي الكاتبة
bmbsh_beme

كلت عود امشي لحبابي وراهم
لكيت الواشي صاحبهم وراهم
مشو جدامي وانه امشي وراهم
..عثرت وسمعهم يشتمون بيه🥺💔

..................

عمري للي يكول صارت قصتين بقصة لا حبايبي. جاي اكتبلكم قصة بطل الرواية حتى لا تتخربط عليكم ما احجيلكم اللي يصير بالحاضر

..................

وصلنه المستشفى وامي ما بطلت بجي سألنه عليهم دلونه رحنا نركض وامي تركض وتدعي

وصلنا الصالة مال العمليات جان اكو زلم اثنين وصلناهم سلمت عليهم وطلعو الدكاترة

باوعتلهم وحجيت...

ضرغام... اشونهم خوما متأذين

رد الدكتور... حالتهم خطرة

ضرغام... نكدر نشوفهم

الدكتور... اي تكدرون بس الافضل الكم ما تشوفونهم

ضرغام... ليش

الدكتور...لأن كلش متأذين

باوعلي واحد من الزلم الواكفين وكال
.. انفجرت عبوه بالسوك اكو ناس تكطعو تكطع بس لان بعيدين اذيتهم صارت بسبب الضربة والشضايا الرجال رhله ماكو والمره وسكت

من كال هيج وسكت اني باوعتله وكلت شبيها احجيي

الرجال... المره ضاربتها شضية جبيره ببطنها

واكف ومصدوم باللي جاي اسمعه

الرجال... الانفجار صار الفجر ما عرفنه معلوماتهم الى قبل ساعة على تلفون اللي بجنطة. المره اخذنا الرقم وخابرناكم

ضرغام... مشكورين ما قصرتو

امي تخربطت اسعفوها الدكاتره واني راسي يريد ينفجر خابرني عمي حجيتله وكتله ادعيلهم

بقينه لل2بليل وكالو ريماس نزيفها مجاي يتوقف

امي ما حجيتلها لان كبل تنجلط

بقيت الوب لل 3 الفجر اجو الدكاتره يركضون طبو لصالة ريماس بقو بالصالة لل5 الفجر طلع الدكتور وكال..

البقية بحياتكم المريضة توفت بسبب النزيف مكدرنه، نسيطر علية الضهر والبطن مفتوحه بسبب الشضيه وهالشي اده للنزيف القوي والمستمر مما ادى لوفاتها

رديتله... حياتكم الباقيه

راد يمشي باوعتله وحجيت...

ضرغام... اكدر اشوفها

الدكتور... اي عادي تفضل

طبيت للصالة جانو الدكاتره والدكتورات يشيلون الاجهزه عنها

وكفت وكتفت ايديه واباوعلها مغطين جسمها ووجها مشكوك بشضية بقيت واكف اباوعلها لحد ما شالو الاحهزة الدكاترة وطلعو رحت كعدت يمها

باوعت وجهه شاحب وشفايفها لونهن ابيض من النزيف

لزمت ايدها باردة ثلج وكلها جروح باوعتلها وحجيت بحركة كلب وصوتي رايح مبحوح..

ضرغام... ما عندي اخوه ولا عندي خوات غيرج وتالي تخليتي عني زين اني يطبني مرض جهالج شلون بيهم شكد كالج حارث ما نروح عاندتي الا تروحين هاي تالي روحتج رحتي وما رجعتي

غوركت عيوني عفتها بالصالة وطلعت واني اشون اكول لأمي ما ادري

رحت طبيت للغرفة جانت كاعده تصلي كعدت عالكرسي امي سلمت واندارت عليه با عتلي حجيت

ضرغام... يمه... بعد ما كملت امي كالت... ماتت موو

هزيت راسي ب اي

اباوع لأمي رجعت التفتت وكامت تصلي عرفتها مصدومه

انتضرها تخلص صلاة وطبت الدكتوره كالت منو اهل حارث

اهل حارث لهسه ما اجو ميكدرون يطلعون بليل وساكنين بالديوانية بعيدين كلش عنا

طلعت بسرعه باوعت للدكتور دنكت راسها وكالت حارث توفه البقية بحياتكم

ما رديتلها طبيت لأمي جانت لهسه دتصلي كعدت يمها انتضرها تخلص صلاة امي خلصت صلاة باوعتلي وكالت هاي يمه

رديتلها.. حارث هم توفه

امي ما ردتلي هم رجعت تصلي يعني ممعقوله هيج صبورة خابرت عمي انطيتهم خبر وامي تصلي تقريبا ساعه امي تصلي خلصت صلاة

ووكفت تلم عباتها لان جانت فارشتها وتصلي

باوعتلها وحجيت...

ضرغام... يمه خوما بيج شي

امي... لا

ضرغام.... ابجي لا تحبسين بكلبج مو زين عليج

امي.... على شنو ابجي

ضرغام... على ريماس

امي... شبيها ريماس توفت غير

ضرغام.... عرفتها مصدومه

بقيت يومين الفاتحه وامي ما حركت ساكن يا تصلي يا تقرا قرأن
ب يوم الثالث بليل سمعته تبجي رحت يمها كعدت باوعتلها وحجيت...

ضرغام.... يمه لا تبجين فدوه لعمرج ما اريد اشوف دموعج

امي... ابنها يوميه الليل كله يبجي وسجى تبجي اليوم من تعب البجي نامو بنيتي الجبيره راحت دومها متعوبة عافت دراستها وربتك من انت وصغير وتزوجت حارث واجاها ضرغام مريض تعبها الطفل فرفح هاي يومين بنتي هسه جوه التراب بنتي تخاف شلون هسه بيها يا يمه اخيتك راحت يا يمه وتبجي

تقربت عليها حضنت راسها وحجيت... راحت وهي مأمنه بيج انتي راح تكونين ام لجهالها عوفي البجي واستعدي لطفلين دخلو حياتنه وراح يكونون سعادتنه لا تبجين تعذبينها ترا

ابتعدت كعدت كبالها اني ادخن وهي تبجي والجهال يم ضحى

جان البيت مبي روح ابد كلنه على صرنه على روتين الأكل القليل والسكوت لحد عشر ايام وشوية بده يستعدل جو البيت لحد مصار شهر على وفاتها

امي كالت راح يجون ياخذون اختك رديتلها... خل يجون ياخذونها سكته بسكته واذا يريدون هوسه ياخذونها من الصالون

ردت امي كالت... يمه اهل العريس هم كال سكته بسكته علمود ريماس توفت

رديتلها... اي بيها الخير.

وره اسبوع اجو ياخذونها كاعدين بالاستقبال وكالو صيحوها علمود ناخذها طلعت من الاستقبال جانت بالهول لابسة عباية سودة باوعتلي رادت احجي وياها

اني باوعت لامي وكلت... يلا يردوها

امي سلمت عليها وحضنتها وتبجي وتبوس بيها
وتكول... بنيتي اثنينهم راحو وحده للكبور والثانيه لبيت رجلها

اجت رادت تسلم عليه عفتها ورحت للاستقبال

اخذوها وراحو وامي تبجي وسجى تبجي وضرغام يبجي اني طلعت للحديقة ادخن واشوف كبال عيوني اشوف عائلتنه خلصت

وراها بشهر خابرتني امي كالت بيت عمك عدنه تعال

اني اخذت اذن من دوامي ورحت للبيت

طبيت للاستقبال سلمت وكعدت ابو حارث وام حارث

قدمنالهم الجاي وكعدنه نسولف رادو يروحون كال عمي....

عمي... يلا وين الجهال

عقدت حواجبي وباوعتله... تريد تاخذهم

عمي.. اي اخذهم يومين ثلاثه وارجعهم
سجى مسكت رجلي وكالت...

سجى... ما اروح اني ما اريدكم انت تكتلوني
وكامت تبجي

باوعت لعمي وحجيت... ما يريدون يجون

عمي... شنو بكيف هاي العجيه جيبوهم لا تعصبوني

تقربت لزمته من ياخته وحجيت

ضرغام... البينه مكفينه واني تحجي بنتر وما تريد نعصبك منو انت يعني وايمت اعترفتو بيهم مو جان حارث بحاجة الفلس وانتو ربع ما تنطوه وجهاله واكعيلهم كتل

عمي بخوف... شبيك تعصبت ما قصدي شي بس نشتاكلهم

ضرغام عفته وحجيت... تشتاكلهم تجي عدنه تضل يوم يومين اسبوع شكد متريد تشبع منهمم شوف

عمي... خوش لعد يلا مسلمين عليكم

سلمنه عليهم راحو وسجى ماسكه رجلي من شافت سيارتهم مشت سيبت رجلي وكالت

سجى... الحمدلله خلصت منهم

ابتسمت على سوالفها طبينه جوه امي كالت

امي... يمه ما نعزم اختك باجر خميس نعزمها

رديتلها..... ما نعزمها وهي ما تجي اصلا حتى اذا تعزمينها

امي... ليش

ضرغام... ما يحتاج احجيلج بس ما تجي واذا رادت تجي ف اني اطلع من البيت واستقبلي بنتج

كلت هيج احسن ما اكضيها مصايح ما اريد اقهر امي

امي... يمه شكو اعصابك يا وليدي

ضرغام... خابريها واسأليها

سجى دائما تكول اريد امي وابوي ومرات ضرغام يسمعها ويكوم يبجي

وره يومين امي كالت مدام هيج السالفة بعد حتى مخابره ما اخابرها رديتلها...

ضرغام... شنو من سالفة

امي... حجتلي اختك كلشي

بليل تعشيت وخابرني اسياد كال جايك كتله هلا بيك

اجه اسياد طببته للاستقبال كعدنه نسولف اسياد كال...

اسياد... ضرغام اريد احاجيك بموضوع اخر مره دا احجي وياك وصارت وفات المرحومه ف كلت أءجلها  على غير يوم بس اني ما بقه عندي صبر واجيت احجي وياك الموضوع بخصوص ضحى

ضرغام... إني جنت شاك الا اكو شي وهسه راح تبين

رديتله....

ضرغام... اي احجي

لهنا وينتهي البارت تصويتكم عمري