رواية الاصداف الفصل الثالث عشر 13 - بقلم بمبش

بقلمي.. الكاتبة (bmbsh_be

«««صلوا على سيدنا محمد اجرا لي ولكم»»»

(اللهم صلي وسلم على سيدنا محمد)
............................ .................................

وهما بقوا ياكلون ما بيهم الكالي ابقي اكلي جنت عند اهلي اذا اكلت قليل ليش وليش وبابا حتى حلويات يروح يشتريلي وأمي تفحص حرارتي وسهام تكلي نسوي حلويات وناكل حتى براء ام بطن جانت اذا ما اكل ما تاكل

جنت مكضيتها نوم عند اهلي واكول ما شبعانه نوم ومرات اذا امي كالتلي سوي هالشي اكاون واتزعل هسه حسيت بقيمة اهلي

غسلت وتوضيت وصليت ضهر فاتتني الصلاة خلصت صلاة وجانت شوية حارة وخرت شالي من راسي ودنكت اباوع على ايديه وأدعي ربي

ملتهيه ادعي ما احس الا يوسف واكف كبالي ويباوع عليه

كبل رفعت شالي وكلت... متدك الباب اشون تطب بدون متدك الباب

شمدريني انتي بغرفة الحجيه اسف

عفته واجيت دا اطلع كال

افنان تضل تحجي لامي تريد شعرها يصير بطول شعرج عبالي تريد تطول شعرها طلعت تريد تكصه

دنكت بقهر وطلعت ميدري جاي شعري طويل وكصيته رحت جاي يلمون الأكل وأفنان من ضمنهم. شعجب تبقى هنا هيه ويوسف

عاونتهم لمينه الأكل وكملنه وكلهم نامو نومت الضهر
لان كعدو. من الصبح اني جنت ما أنام من جنت عند اهلي بس هنا نعست لأن كاعده من الصبح

تعاونه اني وساره غسلنه الاماعين نور وافنان كلمن طلعتلها حجه وراحن

حجت ساره... عوفي الاماعين والحكي رجلج تلكين الحيه يمه هسه..

شسويلها يعني خليها

كملنه الأماعين وطلعت جان هيثم فارش فراش بالأرض ونايم تمددت عالخت ونمت كعدت على صوت جهال باسم مدري شجايبهم علينه

كعدت بعده ممأذن عصر وهيثم نايم توضيت وكعدت اقره قرأن

كعد هيثم باوعلي ورجع غمض بس مبين منايم
شويه وأذن كمت صليت وحسيت عليه هوا هم كعد خلصت صلاة وهوا طلع من الحمام

كعدت قلبت شويه بتلفوني راسلت ماما وبراء وأيه ونزلت جوه بيت باسم هم موجودين هم كضيناها شغل وطبخ تعشو وكلمن طلع نام وبقينه على هذا الروتين لحد ما خلص الأسبوع

وهيثم على طبعه نفسه ساعه وكت ضايج وينام وحده واني لا اشتغل بشي يخصه ولا اسمع كلامه بشي

حتى يطلب من افنان وساره ونور.. افنان بيتهم يم بيت عيالي بس من تريد تنام تروح لبيتهم ويوسف نفس الرنه ساعه وكت بالاستقبال ويه هيثم

كعدت على دكة الباب الصبح باوعت الساعه ب9وهيثم مموجود كلت منوووو حجت عمتي.... الساعه ب9يلا اطلعي لشغلج راح تعفنين بغرفتج حبيبة حجت هيج وصوت خطواتها راحت

كمت بملل وعيوني نعسانه البارحه سهرت اراسل بنو
سبحت وذبيت شالي على راسي ونزلت لحد هسه هيثم مشاف شعري من اخر مره لمن كصه حتى بالغرفة اخجل من شعري لأن احس طالعه وجه ولد رغم
ساره كالتلي كلش حلو عليج لأن عيونج كبار وصاحبة شفايف منفوخه

ف اضل لافه شالي ومن اشوفه يتمدد بفراشه اشلح الشال وانام

نزلت جوه الحجيه كاعده تباوع للشيخ بالتلفزيون شيخ مال فتوه وتفسير احلام

وهيثم مموجود بشغله ميرجع لل12ويوسف مموجود يجوز بمدرسته لأن العرفته هوا طالب

نور وأفنان كاعدات عالدرج يتبشبشن وام هيثم ماكو
طبيت للمطبخ ساره بالمطبخ وكاعده تكطف الخضرا كتلها

لعد ام هيثم وين

قصدج امي

اي امج

اشون تكولين ام هيثم كولي امي كولي عمتي

ديلا عمتي وين توها جانت فوك

اي طلعت كعدتج وراحت تشتري ملح وبهارات وهاي الشغلات مال الطبخ

صبيلج جاي مدام حار توني صبيت للحجيه

صبيتلي جاي وطلعتلي لبن وكعدت يمها اكل وانسولف كتلها شنو هيثم ما كمل شغله علمود نطلع

ساره... ليش ما كالج

شيكلي

جان ديصبغ البيت

ليش مو مكمله

لا مو مكمل باقيله الصبغ جان ديصبغه
وهيه الارض مالته تجاوز ف الحكومه هدمت البيوت التجاوز وبيتكم من ضمنهن متشوفين كص شعرج هوا بيوم الكص شعرج جانو ديهدمون بيته طلع قهره براسج

ليش ما كتيلي

شفتج مقهوره ما ردت اقهرج بالزايد

وتالي شلون هسه

شنو شلون كال حنبقه هنا

يعني حعيش وياكم

اي

صخام الصخمني

شبيج حبيبة ما ينعاش ويانه

حتى ريوك ما تريكت طلعت لغرفتي واني افكر شلون ابقى هنا اني شغلي ما اكدر اشتغل هنا اني التهي بي لو التهي بشغلهم اللي ليل نهار كرف وهم لو احد يستاهل اعوف شغلي لخاطره هاي كضيت اسبوع زواجي شغل احس كضيت سنه عدهم مو اسبوع

طلبت رقمه وخابرته دك جاوب كال.... ها خيررر

خيراتت ايمت تطلعني ابيت وحدي

شتريدين بيت وحدج يعني

اي عمو مو كال لابويه اسبوع ويعزلون وبنيتكم تكمل شغلها هم

اي ابويه كال هيج وعلى اساس نطلع بس البيت انهدم وما عندي ولا فلس دبني بيت جديد

اني اريد اطلع من هنا

لازم اني بكيفج امشي

مشكلتك اني ما ابقه هنا دقيقه وديني لاهلي احسن شسالفه ما بيكم واحد كد الكلمه

شو تحجين بصيغه رجال وشنو هذا الت... الزايد بس خل يخلص شغلي واجي حسابج يمي دشوف منو المو كد الكلمه

شتسوي مثلا تكص شعري هوا شبقه منه ديحجي وسديت الخط بوجهه

حسيت خوفه بكلبي اول مره اخاف من شخص خايفه صدك يجي يكمل شعري ويكصه يلا كال اخلص شغل واجي الى ما يخلص شغله تهده اعصابه

نزلت جوه كمت اعاون البنات واشتغل وياهن افنان كالت

ترا مجاي تنضفين الأماعين عيني شنو هاي

مرديتلها

شو دفعت كتفي وكالت.... هييي مو دا احجي وياججج....

باوعتلها وكلت... خيررر شدخلج انضفهن او لا صكيت على سنوني.... ديربالج تمدين ايدج عليه خوشش ودفعتها هيه تزحلكت ووكعت على ايدها

وكامت تصرخ وتبجي وتصيح خابرووو هيثممم عليها هاي مالها رداددد

جابولها الجهال الموبايل اخذتو وكامت راحت للهول خابرت هيثم تبجي ومدري شتحجي وترطن رطن هيه تحجي عالسريع

مدرتلها بال كمت اغسل بالاماعين اجت اخت افنان الصغيره كالت لنور جيبي لفاف(باندج) لافنان دتلف ايدها

يوه شكد تكبر الموضوع دزولها باندج نص ساعه اني على فد وكفه بالمطبخ انضف وامسح ومن ما اشتغل تجي ام هيثم على راسي تدك وتحجي وتبسمر

جاي امسح بالكاونتر وما احس الا وانجريت من شعري ونفس هيثم يم وجهي يخوف من اعصابه كال

شو هذا الاسبوع انجلبتي من محد حجه وياججج هاااااا هوا يحجي واني اريد اخلص نفسي من ايده ما اكدر باوعت افنان يم باب المطبخ مضمده ايدها وتبجي وتشهك

جرني لطابق الثاني من شعري واني جوه ايده ابجي اذاني لأن شعري قصير احس فروة راسي حتنشلع

عوفف شعري الله يوفقك جرني الدرج وهوا لازم شعري رافعني عن الارض بسبب ضخامته عبالك شايل حاجه صغيره بيده ويصيح..... شنووو اني وتجيني مره تريد تمشي كلامهااا عليه هااااااا

عوف شعري والله هيه حقيره هيج تكلك اني محاجيتها والله بس دفعتها وهيه سوتها قصه

طببني للغرفة سد الباب وكال.... وعندج لسان تحجين ولججج شنووو من بشر انتي شهالمتانة وجه هاي هااااا

دفعني وكعني بالارض وهوا محتقن داس بقدمه على ايديه حسيت اصابعي تكسرن

شلح الحزام وصار يضرب ويصيح ما عنديي مره تشتغل اني لو ترفع صوتها عليه وتسترجل ويضرب

اريد احمي وجهي ما اكدر حتى على وجهي ضربني

احس الحزام نار وتضرب بوجهي تعبت واني اناشد احد يخلصني منه لحد ما تعبت واني اون وهوا يضرب كأنو مجرمه جوه ايدو وحتى المجرم مو هيج عقابو حسيت الغرفه صارت ضلمه

وكلبي حسيته راح غمضت وما عاد اعرف شصار حسيت على برودة بجسمي باوعت دم يم وجهي بالارض خفت بالكوه حركت جسمي وبرودة الارض بجسمي

انوب الجو بارد بالكوه تحركت اني وكاعده اخذت ريمونت التدفئة من فوك التخت وعليته باوعت للساعه ب2
سندت نفسي دا اوكف حسيت شي بأصابعي يجرح
باوعت اضافري شي مكسر وشي ممكسر والمكسرات طاكات دم تقربت للمرايه

اخذت قصاصه اضافر وايدي ترجف واني اكص اضافري اللي بقو وابجي بابا وين جبتني والله بنتك متأذيه تعبتتت

باوعت للمرايا حلكي طاك دم بسبب ضربة الحزام

اخذت ملابس وطبيت للحمام اسبح واباوع لجسمي اللي صاير يخوف بسبب الضرب

احس الميه توجع جسمي. لهالدرجه أذاني بضربه لخاطر حبيبته زين اني شنو ذنبي اني انجبرت عليه ليش يضربني لخاطرها ويكسرني هيج

طلعت نشفت شعري وخابرت ماما
اول ما دك جاوبتني

ها ماما اشونج

بجيت... أأأ مو زينه

ليش تبجين ماما...

دا اجاوبها وطب هيثم انخرط كلبي حيضربني اكيد
جر التلفون من ايدي وكال

هلا عمتي اخباركم اموركم

دومكم

والله الحمدلله

لا ما بيها شي تبجي مشتاقتلكم

صار صار اسبوع الجاي اجيبها واجي تشوفونها

انشاءلله

يلا سالمين بعدين نتخابر لأن معزومين ودا نروح

حجه هالكلمات وسد الخط

باوعلي دنكت راسي خايفه
حسيته رفع ايده خفت ورفعت ايديه حميت نفسي

ذب التلفون عالتخت وكال ما اضربج دا اذب التلفون شبيج خايفه هيج مني هلكد اني اخوف... حجيت

طول عمري ابويه ما مخليني انام جوعانه
وانت صار اسبوع عندك انام جوعانه
ابويه مضاربني ابد
بس انت ضربتني وانتقمت مني
اني تزوجت حتى استقر مو حتى انضرب وانهان
شنو ذنبي انجبرت اتزوجك وانت تحب غيري شنو ذنبي تحبها واني على ذمتك
والله ما اذيتها وانت اجيت ضربت بدون متفهم الموضوع شنو
اني اريد ارجع لدوامي

حجه.... بس حتى لو نعزل ما تداومين اني ما عندي مره تشتغل خوشش خليها ترجيه بأذنج

خفت اي خفت اعانده ويرجع يضربني
فكرت حياخذني اسبوع الجاي لاهلي وعود وما ارجع وياه ابقى يم اهلي واتطلك منه وانعل ابو العالم لابو حجيهم

قطع سلسلة افكاري وهوا يكول
انتي متعرفين شصار بروحتكم من يمنه اني خطبتج برضاتي وبدون رضاتي وجان زواجي منج لمصلحتج وعلمودج

شنو هوا الشي اللي علمودي

يجي يوم تعرفين ما اريد اتطرق لهذا الموضوع اسف على ضربج بس انتي جبرتيني

حجيت بتعب.. شراح يصلح اعتذارك
حيرجع شعري
لو اضافري لو يعالج هاي الكدمات الصارت بجسمي
حجيت هيج ورحت تمددت بفراشي وسويت نفسي نايمه

محد طلع ولا احد اجه يمي لليل اني بفراشي
حسيت عليه طب للغرفه فرشله ونام
مكالو هاي من الريوك مماكله شي

بقيت اتقلب بفراشي لل 3الفجر وقتت تلفوني على صلاة الفجر وغفيت

كعدت على صوت تلفوني طفيت المنبه
طلعت للحمام
ورجعت لغرفتي غسلت وتوضيت
وطلعت لبست شال الصلاة وفرشت السجاده صليت وكملت صلاة ودعيت

ربي بجاه محمد خلصني منهم خليني ارجع لأهلي هاي اسبوع وهيج تعبت عدهم اذا ابقى شهر ينهوني ذوله ناس بلا ضمير وگأنو من اجينه نتونس عدهم جانو غير اشخاص وانقلبو كلهم اني شنو ذنبي افني عمري ويه هيج شخص وويه اهله اللي محساسبيني حالي حال بناتهم

كملت دعاء خفيت اللون الازرق اللي بوجهي بسبب الضرب خفيته بالمكياج

وطلعت كلهم نايمين اريد التهي اريد انسى وجع كلبي
عزلت الهول وكملته وطلعت للمطبخ نضيف بس بي شكم صحن غسلتهم وطلعت للحديقه جسمي يأذيني بس مو مثل وجع كلبي

هسه تكولون تبالغ بس الوجع ميحس بي غير راعيه

بابا معلمني شلون ارتب الحديقه وهما حديقتهم ميعتنون بيها جبت المقص وبديت ارتب بالحديقه صارت تجنن رشيتها وشطفت الحوش وكراج السياره

باوعت سيارة هيثم بالكراج
غسلتها جانت كلها تراب جنها جانت بالوحل

طبيت للبيت مرتب كله رتبت الاستقبال وكملتها وحسيت جوعانه عصافير بطني تزقزق بس حلكي ما يتقبل الأكل

مثل الشخص المعدته متسممه تريد تاكل بس نفسك متتقبل الأكل

طبيت للمطبخ فتحت الثلاجه تذكرت من مره اجيت استحيت افتحها جنت غريبه

طلعت حليب فورته وكصكصت جبن واتريكت مو كلش اكل الخبز فما اكلت خبز

الحجيه كعدت شافتني بالمطبخ كالت حبيبة طلعيلي دهن الحر بين ما اغسل واجي

طلعت دهن الحر وطلعتلها خبز حميته عالطباخ وسويتلها الجاي وكعدت انتضرها هيه بالكوه تمشي

شويه واجت كعدت يمي كالت... انتي مرتبة الحديقه

رديت... ايي وكمت جبت الاستكان والشكر وحضرتهن كعدت يمها ننتضر الجاي يفور حجت الحجيه

ليش يمه هيج مأذايه افنان

حجيت... جنت جاي اغسل بالاماعين واني ممتعوده اغسل اماعين جبيرة وجاي اغسل بالجدوره جدورتكم كلش كبار وتعبانه النهار كله اشتغل وما نضفت الجدر زين ممنتبها عليه اذا نضف او لا من التعب

واتكاونه اني وافنان كامت دفعتني ودفعتها هيه وكعت نفسها وسوت قصة

فار الجاي نزلته وكمت اصبلها كالت... خلي خاشوكه وحده شكر ما اكدر عالحلو حبيبةبيه سكري

عندج العافيه انشالله حجيت هيج وصبيتلها جاي وانطيتهيا وكعدت تاكل وتحجي

افنان مكاره وحياله مثل عماتها وانتي مكاسبه رجلج اكسبي احنه هنا كلنه ملاحضينكم حتى عمج بس ميكدر يحجي وياه ملاحضين زعلكم من بعض منكدر نحجي لسبب مااا

هوا زوجج انتي مو زوج افنان هيه النهار كله تشتغل بمكانج رغم تشتغل بدون نضافه بس تحسينها تسابق خواتو علمود هيه تشتغل انتي اللج الحق بي مو هيه ومع الوقت تكسبي يا عيني بس اطلعي من حقه اغسلي ملابسه حضريله الاكل

بنيتي شوفي اني هنا صحيح عمت ام هيثم بس كأنو هيه عمتي ما اليه كلمه هنا من مات الحجي لهسه وهيثم بس يعرف يتكاون ويه امه علمودي

هيثم اني ربيته اعرفه شكد حنين بعكس اخوته باسم وقاسم.. قاسم متعرفي بس من يكمل هاي السنه يجي. لان يدرس بسكن بالجامعه

بس هيثم الوسطاني جان محد يداري غيري
هيثم حنين ولعلمج انتي ضغطتي عليه مو قليله ينهدم بيته

حجيه حقج صح كل كلامج بس مو يضربني لخاطرها قابل اني مو بشر بعدني عروس عندو
هيج يسوي شسوالها ضربها صيح عليها لا شي اكيد على كولتج الحنين داراها بجفوفه الحنينه وراضاها حجيه باليرضه عليج لا تجيبولي طاري بعد اني بس نروح اسبوع الجاي ابقى يم اهلي وما ارجع

حجت الحجيه... ما اللج غير بيت رجلج هذا سندج وعزج

والله لا سند ولا عز شو صار كسرتي ومذلتي

الله كريم انشالله تتصافون

الله كريم

بقينه اني وياها كاعدات هيه تسولفلي عالحجي اشون توفه واشون عانت وانذلت واشون ابو هيثم خلاها يمه وداراها

لحد ما الكل كعدو

كاعده الحجيه يمي بالمطبخ واني وساره نحضر بالريوك وهيه تنصح بيه رجلج ورجلج دوخوني عبالك رئيس جبير بالبيت

سمعنه صوت هيثم يسأل..... منو غاسل السياره وكلها كالتله مو اني... كال لعد هاي ساره يجوز تريد فلوس هالغاسلتها ههههه

طب هيثم كال.... سوسو عاشت ايديج عالسياره

ردت الحجيه.... هاي مريتك كعدت الصبحيه منضفه سيارتك ومرتبة البيت وحتى الحديقه شغل ايدها

ما رد عافنه وطلع حضرنه ريوك تريكو واني والحجيه كاعدات وهيه تحجي وياي حسيتها أمي

كملنه ريوك ولمينه وغسلت الاماعين ساره راحت لخوالها العرفته اسبوع هيج تضل عدهم

وافنان ونور كاعدات كالعاده عالتلفونات وام هيثم تباوع للمسلسل وابوهيثم مموجود شغله بالبساتين ابد ميعوفهن كل يوم ميجي للمغرب للبيت وجان يوم جمعه هيثم ما طلع اباوعله عينه على أفنان

درت عيني منهم واسولف ويه الحجيه كال هيثم

نور من ايدينج كيكه معدله
هههههه عود مستحي تكول افنان سويلي كيكه من هاي المحتركه

افنان... عاد هيه مره وحده احتركت ولزمتوها عليه

الحجيه...حبيبه ايمت سويتي كيكه هيه مره واحتركت ما بيوم ضكنه من ايدج كيكه ما محروكه

نور... اني ما اسوي شي تعبانه خل هيلين تسويلك كيكه

حجت الحجيه كومي حبيبة سوي لرجلج كيك هذا روحه بالكيك يحبه واهم شي خليله عليه ككو هوا يحبه
كلت بكلبي ولا استحه يدور كيك هسه شلون اني ما اعرف

همست للحجيه... حجيه ما اعرف
افنان... هيه التمن شلون تسوي انوب كيك
ضجت من كلامها وكلت لنور
تعالي علميني وين مواد الكيك

رحت ويه نور علمتني على مواد الكيك وراحت

هسه اني شورطني وكلت اسوي كيك واني كلشي ما اعرف ربي استرنه كون كيكه معدله فتحت نت وطبيت يوتيوب وبحثت... عمل كعك بالكاكاو

لهنا وينتهي البارت +تصويتكم عمري

رواية الأصداف

بقلم الكاتبة ♕bmbsh_beme♕

.......................................................................