رواية الاصداف الفصل الثاني عشر 12 - بقلم بمبش

بقلمي الكاتبة (bmbsh_beme)
الاصداف

وقال بصوتٍ خافِت في السجود : إني ضائع لا تترُكنّي يا الله .

وكعدت مترهيه عود اني طبخت التمن احس نفسي مسويه فد انجاز عضيم

تونه سمينه دناكل وجان يكمز باسم يهوععع ويتفل التمن وكلها انخبصت بي هذا الينطي ميه وهذا اليطبطب على ضهره وهذا اليصيح شبيك تالي كال... التمننن ليششش هيج

يمه كلبي شبيهن تمناتي غير يخبلن

كال منو طبخ التمن

نور وعمتي باوعن عليه

باسم.. باوع عليه وكال... انتي طبختي

هزيت راسي.. ايي شبي

ضوكي واحجي ما كذبت خبر شلت الخاشوكه وضكت التمن الملح يتكركط بحلكي بالكوه بلعت اللكمه كمت أتمتم معرف شكول الكل كامت تضوك التمن وتتفل وتتهوع واني من الخجل ردت ابجي

حجه هيثم... ما بيجججج خيرر تسوينننن تمنننن ولي من كبالي ولييييي

طلعت من يمهم وابجي يعني ما اعرف شسوي وعمتي سكتت ما كالت اول مره تطبخ هسه شمدريني اني اشون اعالج تمن الفاهي

كعدت بغرفتي. ابجي واندك باب الغرفه  شي اكيد اجاني المتخلف ما كفاه صيح عليه كدامهم

فتحت الباب ساره

ياااا هاي شبيج ليش تبجين.....

رديت... والله ما اعرف شسوي صار فاهي وخليتله ملح

ساره... تعالي ههههه والله معرف اضحك لو ابجي

تعالي اعلمج باعي مسحي دموعج يلا مسحيها

.... وين هيثم

كاعد يغمس الخبز بالمركه وياكل هههههه

انتي ابقي ضحكي واني ابجي

لا حبيبتي بعد ما اضحك بس باعيلي

اي

التمن من تخليله الميه مالته لازم تضوكين ملوحته

واذا جان التمن بعده ممستوي وشفتي فاهي اخلطي مي وملح وفرغي المي فوك التمن ونهاية الميه لا تفرغيها حتى لا ينزل الملح بس ملوحته

اصلا بعد ما اطبخ

هههههه يلا امشي اكلي هسه

ما اكل روحي انتي اكلي الف عافيه اني اريد انام

شتنامين امشي تغدي

ما جوعانه روحي حبابه اريد انام

راحت ساره واني نمت حسيت على هيثم اخذ المخده باوعت شال مخدته وطلع بطانية ودوشك من الكنتور وفرشهن ونام

ليش هيج ديسوي اني ما رايده قربه مني بس دا احس ناقصني شي ويسوي هيج او يمكن لأن ما يحبني يحب غير وحده زين ليش تزوجني لعد ليش يحبها واني على ذمته بقيت افكر لحد ما نمت صبح صباح جديد كعدت على اتصال بنو. ب6يا هاي شتريد هسه جاوبتها

صباحووووو

يا صباحو شعندج تتصلين

شفتج ما خابرتي كلت اخابرج يابه مبارك جوازتج..

الله يباركلج مو بعد وكت اهلي وبيت عمو من البارحه باركولي

امبلا والله حقج عليه خابرتج دا اكعدج علمود اباركلج لأن اختي اجت علينه وزعلانه وهوسه بيتنه

دروحي درجع انام

شتنامين مو كلتي هيثم شغله يوميه الصبح سويله ريوك وحضريله ملابسه

بنو ابقي وياي عالخط... طلعت بالممر وكعدت عالدرج الينزل عالهول حتى لا احد يسمعني همست.. اي شغله يوميه الصبح بس شدخلني بيه

شنو شدخلج بي هاي كل عقلج لازم تردين يرجعج على امج ههههههه

بنو اني بعدني يومين عدهم تعبت تخيلي البارحه وكفت عالسنك اطبخ

شنو هاي غير تطلعين الاسبوع

ذوله ما عدهم اسبوع وفوك كل هذا هيثم ما متقبلني
وحتى ينام بالارض يفرشله وينام

يعني ما تقرب عليج

بلي تقرب بس مجبور  تعرفين ليش وبعدها صار ينام وحده بنو  الرجال ما متقبلني تخيلي البارحه علمود التمن رزلني كدام الكل

بعدني عروس اني  وهيج سوه بيه وهاي عده الشغل لعد الى ما تطلع السبعه شيسوون ولج النسوان تجي تباركلي حتى ما طلعت عليهن

بنو.... طبعا. اجه ابالي حجي بس استغفر الله.. والله قهرتيني شهالناس شلون راح تتأقلمين وياهم

معرف معرف حايره وما اعرف شراح يجرالي

شوفي اللي حيجرالج راح تتعذبين عندو

واهلو

اهلو هم راح يعذبوج بس راح يجي يوم يحبج ويصير بضهرج

اريده يطلكني

يطلكج بعدج عروس شتكول العالم هيلين فكري شويه باعيلي

وين اشوفج

هههه اسمعيني

جاي احجي وياها  وشفت الحجيه طلعت للحمام......... اسمعج احجي

هيلين دللي بس لا تطلعين عينو

هاي اشون

يعني باعيلي داري احسن مداراه وقبل ليكعد كعدي سبحي واترتبي وانتضري يكعد سويله ريوك وحضريله ملابس

هيلين... اي ويطمع براسي

لا ما يطمع يولي انتي دللي بس شنو ابقي بعيده عنو حتى يعرف عندج كرامه حيجي يوم يفكدج ويحس بقيمتج

هيلين... يمعوده دولي شمداراه شصخام. ما اريد يعرف قيمتي

براء... بكيفج بس اذا بقيتي بحكم اهله راح ياكلوج اكل عالاقل اذا حبج يصيرلج سند

هيلين.... لا يحبني ولا اريد يحبني وشحد اليندك بيه اسبوع لا ومو اسبوع ست ايام ونطلع ابيت وحدنه وارجع على شغلي وكلشي يستمر

براء... براحتج اني نصحتج هسه حبي حروح وراي دوام

ولج لا تحمسيني والله اشتاقيت لدوامي

عمريييي ما بقالج ست ايام وتداومين

الله كريم يلا  اخذي راحتج

تمام باي

باي... سديته من يمها ورجعت لفراشي باوعتله كاعد يراسل واتس بس منو ما انتبهت

تمددت بفراشي دنام لا بنو تريدني ادلل بي واكعد قبله لازم اكعد ب خمسه هههه غفيت سمعت صوته

... اكعدي حضريلي ملابس الى ما اسبح

انت حضرلك شبيك انت متحضر لنفسك... ما حسيت الا وانجريت من شعري جرني وكعني من فوك التخت ويحجي وهوا صاك على سنونه كلمه وحده ما اريد خوشش واذا طلعت وملابسي ما محضره شوفي شسوي.. حجه هيج وعافني وطب للحمام

تهي بهي يدورله ملابس ويدور خدمه شنو خدامته اني وكت الشغل هيلين ووكت الحب حبيبته اكيد جان يراسلها الصبح لأن كضاها يتمضحك ولا يكول

اني مرتي على ذمتي هاي تتسمه خيانه اصلا فما يستاهل اشتغل شي

غمضت مكدرت انام ضليت اتقلب بفراشي ماكو ميجيني نوم  طاح حضك هيثم ما تخلي واحد ينطمر كمت من فراشي ارفع بشعري

طلع من الحمام لاف الخاولي على خصره

باوعلي وكال... ملابسي وين

بالكنتور

يعني الأفهمه من كلامج  ما طلعتيهن

صيحت.. اكولك انت شكالولك عليه خدامهههه شو تزوجتني وما معترف بيه بس بالشغل تردونييييي ما اريد قربك مني بس عالاقل عاملني معاملة زوجة مو معاملة مال خدمممممم

كلت هيج لو كفرت اجه لزم شعري وكال... هاااا يعني تراددين وتعلين صوتج زيننن شكالولجججج عليه مكرننننن ومرتي هيج تسوي وهيج ترفع صوتها عليه

ع عوف شعري ملخته

اعوف شعرج

اي عوفه... صيحتت... وخرررررر

لا تصيحين راح اجرم بيج

دوخرررر عنييييي عوف شعري يا نذلللللل

نذلللل هااااااا بسيطهههه الضاهر انتي مالج ردادددد

وخر عني فتح كنتوره احس احتريت من العصبيه
واختنكت مع انو الغرفه كلش بارده

لبس شورت

وفتح الجكمجه طلع مكص.... كتله.....

ه ه هايي شدتسوي

شدا اسوي هسه تشوفين شدا اسوي

اجه عليه هوا ضخم لزم شعري واني ارافس جوه ايده حيكص شعري ابجي واصيح

الله يخليك عوف شعري والله والله كلشي اسوي بس عوف شعري

ما يرد لازم ايديه ويكص بشعري واني ابجي احس روحي دتروح شعري قطعه من روحي احبه اسمع صوت المكص الحاد وهوا يكص شعري
ما عافني الا وحسيت راسي صار خفيف

باوعلي وكال..... شنو انوب تحبين اخرب احجييييي

ع عوفني الله يوفقك

عافني وراح للكنتور يلبس كعدت بالارض وابجي كرفصت وحضنت رجليه هوا لبس وباوعلي كال....صوتج انوب اذا انرفع بوجهي لو طولتي لسانج اخلي طلقة براسج وميرفلي جفن  حجه هيج وطلع

يا ناس عروس عروس بعدي ليش هيج يسوي شهكت وبجيت والارضيه مال الغرفه ثلج خليت راسي على اقدامي وابجي خايفه خايفه اصير كبال المرايه واشوف شعري من اني وصغيره مهتمه بي وخلطات ووصفات والله حرام عليه يسوي هيج صرختت انت وحشششش مو بشر وحششش الله لا يوفقك عسه حوبتي ما تتعداك

اخابر اهلي هسه اقهرهم ابويه كبل يموت

كمت امشي عالارض واحس بردوتها تخرط بكلبي
تقربت للمرايا شعري لكتوفي وصاير خصل لكتفي وخصل لاذاني باوعت لشعري المتناثر بالأرض واجيت كعدت واشيل بشعري واخلي على راسي وأبجي

بقيت ابجي لحد ما تعبت خليت راسي عالتخت ودموعي تجري

اندك باب الغرفه كلت... منو...

ساره اني حبيبه.. كالت هيج... وفتحت. الباب وفاتت

شافت شعري وشهكت يمههه هاي شنو هاي شمسويه

ما رديت

اجت كعدت يمي وهزتني من كتوفي.... هايي ليش كاصه شعرج تخبلتي

حجيت... هيثم اخوججج الله ياخذه هوا هيج سوه

خلت ايدها على حلكي وكالت.. لتدعين حركة كلب كومي كومي اشوف اشون اعدل شعرج واحجيلي ليش هيج سوه..

عوفيني وروحي

دكومي وربي اكلوج وشربوج افنان ونور  لأن لهسه منازله يكولن مخوتنه للساعه ب7

كومي لا تخليهن هيج يحجن خل نرتب شعرج كومي

كمت كعدتني كبال المرايا وبدت تكص بشعري وتعدل كملت شعري وكالت... باعي شلون عدلته اللج... باوعت. شعري صاير  لأذاني صرختت... هاييي ليش ساره

ولجج هشش صوتج وربي شعرج من وره كلو مكصوص لاذانج بس شكم خصله باقيات لكتفج

ما وكفت بجي شعري احبه اباوع لشكلي المقرف

شعري لأذاني طلعت ولد مو بنيه

ساره... ولج عوبه بس خلي حمره لون احمر الا يطلع يخبل صار كاريه شعرج يجننن... ساره كلش زينه

طلعتلي ملابس وكعدت وكالت طبي سبحي وطلعي دسشور شعرج

تمام

طبيت سبحت طلعت لكيتها شايله شعري وذابته وماسحه الميز هم جان كله شعر من كصت شعري ومحضره السشوار

كالتلي... تعالي كعدي تعالي بدت تسشور بشعري وتحجي... صدك الله لا يوفقه على هيج سوايه عاميته الحيه

هيلين... منو الحيه

ساره... لا هيج

هيلين... احجي ساره لا تغثيني بالزايد اعرفه يحب بس كليلي منو

ساره... اسفه والله جفصت

هيلين... احجي

ساره... قصدي على افنان مو هيه تحبه

هيلين... معناها هيه هاي اليحبها

بس شمدريج انتي

ادري بي يحبها

ساره... يحبها ولو يعرف حقيقتها يكرها

ليش

ولج مو خوش ادميه اول. شي ايدها طويله تبوك
اكثر من احنه بيت عمها وتمد ايدها على فلوسنه لو شافت قطعه ذهب تشيلها وما تكول حرام عيب

ساكته واستمعلها ما ليه واهس احجي

شوفي مره بنت عمي قتيبة متعرفيها يجي يوم تتعرفون كالتلي ايدها طويله وتبوك كتلها لا مستحيل
كالتلي جربيها

اني ما جذبت خبر خليت خمستالاف عالكاونتر وافنان جانت يمي بس ما خليتها تنتبه الخمستالاف اليه ومخليتها تنتبه من خليتها  كتلها كملي غسل الاستكانات اروح اجيب الماسحه حتى نخلص ونشطف المطبخ

المهم طلعت وختلت وره الباب واباعلها باوعت يمنه يسره شافت ماكو احد شالت الخمستالاف وخلتها بصدرها
انصدمت بس كلت ما اتهمها خل ادورلها كدامها يجوز البنيه ضمتها دتنطيني اياها 

رحت يمها كعدت اسولف شويه وكتلها ابقي هنا خل ادزلنه على حلويات كالتلي....اي والله وخل يجيبون جبس حاد ...اجيت لمكان الخمسه كلت اعوذ بالله من الشيطان الرجيم وين الخمسه

ساره...يا خمسه

معرف وينها بس لا شالوها الجهال 

كالتلي... عليش هين ترمينها طول ما تعرفين بالجهال رايحه جايه شوف منو منهم شالها وطلع

هيلين... توصل لهالدرجه

ساره... خليني بضيمي ترا كلهم طالعين على امي بس اني على ابويه كلهم مو خوش اوادم بس جده وهيثم  وابويه زينين نور وأمي يلي هيه أمي وحملت بيه تسع شهور وجابتني مرات اكول تكرهني  بس الله يحملهن وحتى باسم وقاسم طالعين عليها

اهلججج

اي اهلي  امي ونور وباسم وقاسم هيلين خليني ساكته ما اريد احجي البكلبي وافتح جروح

آلله كريم

جاي نحجي طبت افنان وتحجي... وين تلفون هيثم

ساره... شتسوين بتلفونه دازج عليه

لا ما دازني بس شفته ما شايله وجيت اخذه.. باوعتلي وكالت... ياااااا عوععع شني هاي خيه شطالعه احد يلعب بنفسه هيج طالعه جنج ولد ههههههه ولج مقشمره روحج

ساره... تدرين هيثم كصلها اياه هيج هوا يحب  وهوا بيده كصلها اياه

شو هاي احسها راح تطك مدري شجالها حجت... جذب كولي والله

ساره.. والله وداعت كل غالي

عافتنه وطلعت بدون حتى متحجي

ساره... شفتني هيج تعاملي وياها

ترا خطيه تحبه ليش هيج سويتي

لا خطيه ولا شي شفتي شلون كامت تتشمت بيج وتتمضحك ولج جان ما يحبها ولا يتقبلها بس هيه ضلت تتمسكن وتتدلع  الا خلتو يحبها

كتلها لعد ليش خطبني

سكتت ما حجت..

لا تسكتين لعد ليش خطبني

يجي يوم وهيثم يحجيلج يلا اني اترخص خلصي وتعالي... عافتني ونزلت تتهرب ما ارتاح الا اعرف ليش خطبني والسالفه بيها أنه مدام ساره تهربت

باوعت للمرايا تحسرت  على شعري كمت  لفيت شالي ونزلت افنان عايشه عدهم يمكن ساعه وكت موجوده باوعت هيثم مرايح موجود بالاستقبال هوا وابوه

بيت باسم ومرته رايحين شافتني عمتي كعدت كالت

طلعي غسلي المغاسل مغسل اليم التواليت تكرمون ما غاسلاتو اغسلي

بدون ما احجي واكول جوعانه لو شي من قهري على شعري عفتها ورحت للمطبخ اخذت اغراض الغسل وادورلي كفوف لأن اخاف اضافري يتكسرن

وماكو دورت الا تعبت تالي كلت لنور

اريد كفوف

كفوف بهالحر حبيبة

لا كفوف مال غسل

شتسوين بيهن..

اخاف اضافيري يتكسرن

ههه والله بطرانه روحي اغسلي واسكتي ردت افنان.. اي والله ناس بطرانه

ما رديتلهن وردت اتلافى المشاكل اخذت المستلزمات ورحت غسلت المغسل ورجعت طبيت شافتني عمتي كالت

مدام شايله المستلزمات مال الغسل اغسلي مغسل الحمام ومغسل الفوك

يربييي شلون وياهم بعدني ما متزقنبه... حجت ساره.... يمه خل نتريك خطيه ما تريكت وبعدين ننضف

عمتي... سوده عليه ما تكوليلي يا يمه ما متريكه ديلا تريكي وفد نوب تهيري(تحضري) للشغل

هاي من اجيت شغل شغل شغل تعبتت

طبيت للمطبخ اكلت ويه ساره بس احس اللكمه توكف ببلعومي منضر شعري بعيوني شلون انطاه كلبه عيوني غوركن وحسيت كلبي معصور ويوجعني
اكو هواي يتمنون يكصون شعرهم وهسه يكولون تبالغ الا والله شي يوجع الكلب للشخص الشعره غالي عليه

اكلت شويه وكمت اخذت المستلزمات وبديت اغسل بدون واهس اغسل طلعت فوك وبديت اغسل المغسل اجت نور تركض

نور... عوفي عوفي بسرعه غسلي ايدينج وامشي وياي

وين شبيج مدا تشوفيني طامسه بالشغل

امشي غسلي وخلي مكياج شي ونزلي نسوان جايات يباركولج ورادو يشوفوج

وشسويلهم عليش اخلي مكياج خل انزل اسلم وارجع

نور... ولج دمشي... جاي تحجي واجت ساره باوعت لنور وكالت

ساره.... تريدين يشوفنها ويكولن مدللينها ما يشغلونها

رجعت كلت... ماكو داعي انزل وعلى شنو يباركن ليش اني هم محسوبه عروس... رجعت نور كالت... ليش تراج احسن زهاب زهبنالج (جهاز)
وسياكج (مهرج) مليونين عدا الذهب وافخم وارقى صالون وغرفت هيثم كلش فخمه وغاليه

دنكت اغسل المغسل وكلت لنور.... تعيريني بيهن عساهن بالحرك كلهن

نور... يااا شجالج تدعين هينالج والله

سكتتت ما حجيت اخاف لا هيثم يرجع يكملي شعري لأن اذا احجي هسه اسوي هوسه

عفتهن وكملت شغلي خلصت ونزلت شايله السطل مال المستلزمات والنسوان بالهول يباوعن ويتبشبشن

مدرتلهن بال اساسا هيه كم يوم واطلع من هنا واخلص
.

طبيت للمطبخ وكلمن يكلي اشتغلي هالشي لحد ما صارت وقت الغدا وفرغنه الغدا  كعدت يم هيثم حتى لا ينتبهون بيناتنه  شي هسه من يحسن امو واختو راح يبدن يتسألن ويدوخن راسي

كعدت يمه جان يأكل بادي بالأكل ماشالله ابو كرش
معنده كرش بس مدام يحب الاكل لازم اسمي ابو كرش

أكلت بس مو هواي ما ليه نفس الأكل هوا ولا دار بال الحجيه كالت...اكلي يمه لا بس تتصفنين

ساره...حبوبه حتى ريوك ما تريكت مدري شبيها

الحجيه...اكلي يمه بعدين تكعين ونبتلي بيج

كلت بكلبي هوا اني ما اهم واحد بيكم خايفه لا تبتلي بيه علواه اموت ولا جايه بنصكم شو من جيت لهسه ما شفت الخير ولا ارتاحيت

عفتهم وكمت من الاكل نفسي ما تريد الاكل

لهنا وينتهي البارت+تصويتكم عمري

بقلمي...الكاتبة (bmbsh _beme)

الاصداف