الاصداف الفصل السبعون 70 - بقلم بمبش

رواية الاصداف

بقلمي الكاتبة.. bmbsh_beme

في جمال عيُونك إنهزم قلبي كثيراً .♡

هيلين... ايي

براء... عمتج جانت تنده ضرغام تكله يمه تعال لا تغرك جان رايح يسبح للبعيد بس عمتج من صاحتله ما ادري اشون سمعها ورجع بقه يسبح لحد ما وصل عمتج طلع من الميه ملابسه مبلله مسح على ملابسه مرتين
نشفت ملابسه وكف يم عمتج يضحك وياها وفزيت من الحلم

هيلين.... ما اعرف بتفسير الأحلام اني

براء... اني راح افسره وادزلج التفسير

هيلين... تمام

سديته من يمها بقيت بالحديقه ادعي لل6اندك الباب

طلعت عمتي فتحت الباب ابو حواسم كال دنروح للمحكمه

وكفت بسرعه وحجيت....

هيلين.... اني هم اجي

عمتي... يمه وين تجين انتي

رحت يم عمتي لزمت ايدها وحجيت بتوسل...

هيلين... عفيه عمه خل اجي وياكم امانة برقبتج تاخذيني وياج اريد اشوف ضرغام واحضر المحاكمه

ابو حواسم... روحي لبسي بسرعه وامشي يلا

رحت بسرعه لبست عباتي ولبست نقاب لأن اعرف ضرغام اذا شافني بنص الزلم الا يتخبل المحاكمه كلها زلم

طلعت عمتي دتشيل المستمسكات تخليهم بالجنطه ولسانها ما توقف من الدعاء

ضحى اجت ويانه يحتاجون شهادتها والاطفال خليناهم ابيت ابو حواسم

الطريق كله اني ابجي وادعي ربي يضهر الحق ربي ابد ميضيع حق احد وكلمن راح ياخذ جزاته

وصلنه للمحكمه نزلت من السيارة واحس كلبي يدك براسي

ما اعرف اشون راح اقاوم اشوف ضرغام وهو ينحكم

طبينه للمحكمه كعدت يم عمتي واشخاص هم جايين.

بقينه ننتضر شوية وطببو ضرغام واسياد

اول ما باوعت بس شفت ايدينه مكلبشه درت عيني دنكت راسي ودموعي نزلت

عمتي جانت هادئة بس تدعي واهل المرحوم اجو كم شخص من اهله ما اعرفهم بس عمتي كالت ذوله اهله

اريد ارفع عيني واباوعله مره ثانيه بس ما كدرت كلبي ما ينطيني اشوفه

طب القاضي بدو يحجون ما اعرف الحوار اشون يتفسر كله بس راح اكتب نبذه عنه حتى تعرفون المحاكمه شنو جانت
المحاميه محامي اسياد كال...

محامي اسياد... سيدي القاضي المقتول صارله هواي على وفاته والقضيه انغلقت لأن اهل المقتول سحبو دعوتهم

محامي ضرغام.... سيدي القاضي سحب الدعوه جان لأسباب واولها اهل المقتول تم تهديدهم

القاضي طلب شاهد انو تم تهديدهم شخص رفع ايده انطاه اذن القاضي

راح بالمكان اللي يوكفون بي الشهود وكال..

سيدي القاضي اني اخو المرحوم اجانه تهديد وبسبب التهديد وخوفنه على عوائلنه سحبنه الدعوه

محامي اسياد... سيدي القاضي الدعوه انغلقت لكن المدعي عليه ضرغام جان عنده عداوه مع المقتول

ضحى وكفت لحيلها وكالت... كذابببب

القاضي ضرب الطرقه وصاح

القاضي... هدوءءءءء

ضحى كامت تبجي وتكول اسمحولي اشهد

سمحلها القاضي راحت بمكان التشهد بي وكالت...

ضحى... سيدي القاضي كل اللي جاي ينكال افتراء اني

بجت تريد تحجي ما تكدر

محامي ضرغام.... نحتاج شهادتج حاولي تكونين قوية وتتكلمين كلشي

ضحى.... اسياد جان يريدني انسان مهووس بالأذيه اني لأن تزوجت غيره هو دز شخص يقتل زوجي الشخص حتى وجها جان مفتوح ومخيط

محامي ضرغام... سيدي القاضي الرجل اللي تكلمت عنه ضحى هو احد اصحاب اسياد واكو شهود على صداقة اسياد بهذا الرجال

محامي اسياد.... سيدي القاضي اخت المتهم راح يكون كلامها زور لأن من المؤكد تدافع عن اخوها

القاضي.... اللي قتل المرحوم اعترافه شنو

محامي اسياد.... سيدي القاضي الرجل المتهم مختفي مما يعني ماكو اي دليل بأنه اسياد وره جريمة القتل

محامي ضرغام.... سيدي القاضي القضيه من وقت طويل جانت ورقة ومطوية بس ضرغام بعد ما سمع اخته تتحدث بالحادثه وعرف اسياد وره القتل اجه وقدم شكوى لو كان ضرغام القاتل ما اجه وقدم دعوه واعاد فتح قضية القتل

ضرغام واكف بشموخ بدون اي خوف ورد فعل يباوع للقاضي حتى ما التفت علينه

صاح القاضي.... رفعت الجلسه وتأجلت الجلسه بعد شهر

طلعنه عمتي تبجي وضحى. تبجي واني ابجي

رجعنه بالطريق القهر محفور بكلوبنه كال ابو حواسم...

ابو حواسم....كولو الحمدلله تأجلت الجلسه لأن راح نلكه القاتل مدام الجلسه تأجلت لوما تإجلت الجلسه جان انحكم ضرغام

رجعنه للبيت وكضينه الشهر احنه على أمل يلكون القاتل

اني بديت بشهر الثاني بطني احس بدت تثقل وتعبت كلش لعبان النفس اذاني

خلص الشهر لو خلص كلوبنه ورواحنه خلصت كل يوم احضن ملابسه وانام على عطره لو نزلت بالبيت اخلي من عطره اضل احلم بي طالع.من السجن كل يوم ابجي كل يوم احس بتعب وضيكه بصدري بعده ما فرح بطفله بعد ما ذبح ذبيحة طفله ابجي والعصه بكلبي ابجي بصوت عاليي هسا حاره بالسجن هسا بارده هسا السجن مو نضيف وضرغام كلش نضيف هسا مياكل شي طيب هسا ميسبح براحته هسا مينام مرتاح

ابو حواسم قبل اسبوع راح للديوانيه وما رجع حتى اخباره انقطعت انفقد وام حواسم ميته قهر واحنه نفس القهر

اجه موعد الجلسه اجه حسام اخذنه للمحكمه

اني هم لبست النقاب بالطريق تذكرت لمن اسياد ضربني بالمركز وحجيت لضحى كتلها حتى يعرفونه انسان مو طبيعي ومهووس بالأذيه

وصلنه للمحكمه جابوهم ضرغام لحيته طويلة وعيونه ذبلانه رغم وكفته بشموخ وقوه وعدم خوف عكس اسياد اللي بس نكوله بخ يبجي

حجه محامي ضرغام.... سيدي القاضي تسمحلي

انطاه القاضي السماح كال..

محامي ضرغام... سيدي القاضي عم المتهم ضرغام راح للديوانيه حتى يدور على المتهم بالقتل فلان الفلاني بس انفقد قبل اسبوع وهالشي يوضح

المتهم ضرغام ما الا ايد بالقتل لأن اللي مفقود هو عم ضرغام

محامي اسياد.... سيدي القاضي المتهم اسياد ما الا اي سبب بهالشي لأن اي ادله ماكو يمكن يكون هالشي خطه منهم

دار حوار بينهم المحامي اللي موكلينه علمود ضرغام ضرنه ما فادنه المحامي وكع اللوم كله على ضرغام وصارت الادله كلها ضد ضرغام

لحد ما انطو الأذن لضحى...

ضحى... سيدي القاضي اسياد انسان مهووس بالقتل والأذيه اسياد نقيب معروف لكن للأسف قليل يعرف حقيقته اسياد بأحد الأيام جان اكو بنيه مهزومه من عيالها بسبب اذيتهم بعد ما صارت بالمركز اللي بي النقيبببب اسياد

اسياد ضاربها واكو شهود على هالشي رغم المرأءة ما تنضرب وهي مجان عليها اي تهمه وضربها واذاها

نزلت من منصة الشهود ضحى وصعد اخو المرحوم كال....

اخو المرحوم... سيدي القاضي اني بعد ما شهدت الجلسه الفاتت اجاني تهديد ولحسن الحظ سجلت التسجيل

اسياد وجهة ينطي الوان من الخوف

اجه شخص جايب كيس فتح الكيس قلب بالتلفون وشغل التسجيل رجال صوته ضخم يحجي....

التسجيل.... اذا اسياد انسجن تموت بليلة ضلمه

هنا عم الهدوء بعد ما انفتح الباب وطب ابو حواسم يمشي بفخر ويمشي وراه منتسب لازم شخص مخيط وجهة ومكلبش

عرفت لزموه دعيت يعترف ولو هو شكله مخلينه يعترف لأن مبين ضاربينه

صارت هوسه شوية وبعدين وكفوه بمنصة الشهود وبده يحجي

سيدي القاضي اني ما ليه دخل اني سويت هالشي لخاطر اعيش اطفالي

القاضي.... تكلم كلشي بهدوء وفهمنه

سيدي اني

باوع لاسياد بخوف ورجع كال...

سيدي اذا اعترفت بشي عائلتي كلها راح تنقتل

القاضي... عائلتك راح تكون تحت حماية الدولة

... سيدي اني ما ليه اي دخل بس اسياد عرض عليه مبلغ 5ملايين مقابل اقتل المرحوم اني حالتي تعبانه سيدي سامحوني سيدي

كام يصيح ويبجي كال القاضي... هدوءءءءءء

سكتو الكل حجه القاضي....

القاضي....وفق الماده....... ووفق الماده.... ووفق الماده..... حكم على اسياد بالسجن ل20سنه

وحكم على فلان الفلان بالأعدام

حكم على اللي قتل المرحوم بالأعدام

واعلن براءة المتهم ضرغام

عمتي هلهلت بالكوه سكتوها

طلع القاضي وطلعو المتهمين واخيراً ضهر الحق وزهق الباطل واسياد واللي قتل المرحوم اخذو جزاتهم اسياد هو شعره بي شيب وانوب انحكم 20سنه راح يموت بالسجن والأعمار بيد الله

اني الفرحه ما سايعتني الف الحمدلله والشكر يا ربي

بدو يفكون كلبشات ضرغام كلهم التمو عليه يبوسون بي ويباركوله اني ما تقربت اباوعلهم من بعيد اشوفه عيونه تدورلي شافني ابتسملي بتعب

اعرف من اتقرب منه ما الزم نفسي واحضنه غمض عيونه وفتحهن تعجبت اشون عرفني

طلعوه واني عيني عليه راحو. هو وعمي

واحنه رجعنه ويه حسام للبيت

عمتي بدت تحضر وتخابر وتعزم بعمام ضرغام باجر عالغده

خابرنه ابو حواسم كال رايحين لحمام السوك وبعدين نطلع للحلاق

البيت امتلا ولد عمام ضرغام اثنين هنا لأن حضرو المحاكمه صارو يجون ضباط ومنتسبين الاستقبال ما فرغت
للعصر سمعنه صوت هورنات كالو اجه ضرغام صوت الطلقات. الهوسات كأنو عرس تلكو ضرغام طب للحوش باوعتله صفنت عليه

لابس دشداشه وعكال انصدمت بشكله كلش حلو الدشداشه لون ابيض ولحيته وشواربه محددهن وهو صاحب اكتاف الا تجنن عليه الدشداشه

طبو للاستقبال وضحى كالت...

ضحى.... طالع جنه عريس اخويه

ابتسمت التفتت عليه وكالت...

ضحى... ما تروحين تتحضرين وتلبسين غير انتي عروسته

هيلين... مو هسا هاي الهوسه ما راح تفض لل12بليل

ضحى... هم صحيح يلا خل ندزلهم الجاي

بدينه جاي وماي لل10بليل تكسرنه تكسر اني متت تعب اجه ابن عم ضرغام كال لضحى...

ضحاوي صبي عشر استكانات بقو بس 7زلم دا يشربون الجاي ويروحون ضرغام هم دا يطلع يرتاح تعبان

ضحى خزرتني وكالت....

ضحى.... جم مره كتلج روحي ايمت تلحكين

هزيت راسي بفرحه وطلعت لغرفتي فتحت باب الغرفه وشغلت البنكه حتى يتغير جو الغرفه

اخذت ملابسي ورحت للحمام سبحت وخليت عطور وترتيبات وطلعت للغرفه شسورت شعري بسرعه وخليتله عطر ركضت لباب الغرفه سديته طفيت البنكه وشغلت المكيف خليت عطر بالغرفه وبسرعه بدلت الفرشه خليت فرشه لون احمر واني لبست احمر خليت حمره لون احمر
عندي صبغةمال شعر مؤقت لون احمر من اغسله يروح خليت على اطراف شعري

صار اطراف شعري احمر وشفايفي احمر والبدله احمر والغرفه احمر اجواءها تجنن

طلعت الصبغ حتى اخلي صبغ احمر انفتح باب الغرفه

رجعت الصبغ للجرار والتفتت

ضرغام واكف كبالي ويباوعلي بهيام اول مشافني فتح ايدينه يعني تعالي بحضني

عيوني غوركت مشيت بخطواتي اتقدم بأتجاه ضرغام
اول ما صرت يمه حضنته وبجيت وهو حاضني ويشم بشعري حاضني بقوه كأنو راح ياخذوني من عنده وخايف احد ياخذني

ضرغام..... اني بحلم لو حقيقه انتي بحضني

باوعتله لزمت وجهه بكفوف ايديه وحجيت...

هيلين.....ممصدكه انتي يمي غمضت عيوني وبسته بخفه وابتعدت....

مشيت اصابعي على ملامح وجهة وحجيت...

هيلين.... طول بعادك عني ملامحك ما راحت من بالي كل يوم اشوفك بأحلامي فراكك صعب اني بدونك ما بيه روح اتعب بدونك احبككك حجيت ودموعي نزلت

لزم خصري بكفوف ايدينه وقرب باس دمعتي اللي على خدي وكال....

ضرغام.... اني هناك وبالي كله يمج اكول هسا تهمل نفسها افكر بيج ليل ونهار ولج جنت ميتت وبشوفتج عشت

هزيت راسي وحجيت... والله لوما الطفل اللي ابطني حتى اكل ما اكل وانت بعيد عني

قربني منه ولف ايدينه عليه بعد شعري خله راسه بركبتي وهمس.... اشتاقيت لعطرج

انفاسه برقبتي جلدي كزبر لزمت وجهه وبتسه بقيت ابوس بوجهة بعيونه والعب بلحيته وهو مغمض ولازمني بكل قوته

ثاني يوم الصبح حسيت ايدينه على بطني والغرفه حاره فتحت عيوني باوعت مكشفه وايد ضرغام على بطني ويسولف ويه الطفل اني جفلت وخجلت

جريت الغطه تغطيت وحجيت..

هيلين... انت ما تستحي

ضرغام... ليش

هيلين.... اسون تكشفني

ضحك وكال....

غير انتي حقي ومالتي

هيلين.....يووه ضرغام بدينه

ضرغام..... هههه لا هسا نبدي بده يدغدغني واني تخبلت اضحك واريد ابجي

حضني وكال ...

ضرغام.. صايرلج كرش
عقدت حواجبي.... منيلي الكرش

لزم بطني وكال... ههههه بطنج شكداتها

هيلين.... هاي الحمل مو كرش محد غير ابو كرش

كال اشوفج منو ابو كرش ديطلع بطنه كتله.... لا لا والله انت حتى عضلات بطنك مقسمه

ضحكنه

ثاني يوم ذبحنه ذبيحتين وحده علمود حملي ووحده علمود ضرغام طلع من السجن

مرت الأيام براء جابت

واني طلع ابطني بنيه

مرت الأيام ولادتي كلش جانت سهلة
اجه الببوني الصغنوني

وعيالي طايرين بيها وضرغام فرحان بي

بعد مرور سنه ونص ......

هيلين..... ول ماما لا توكعين

ضرغام.... عوفيها تلعب

هيلين..... اي وبعدين من توكع تكلي ليش ما منتبها عليها

ضرغام... دخلي توكع الا ابتلي بيج

هيلين.... ول ماما ريماس تعالي ابوج صار يريد يبتلي شوية اللخ يكول اذا صارلها شي افصلكم

كرص خدي وكال.... افصلج انتي ههههه

هيلين... شكد ادبسززز

ضرغام... والله انتي نيتج سزز اني ما قصدي شي

اجت ريماس تحبي عليه شلتها بستها والاعب بيها وكاعدين

اجاني اتصال من امي...

جاوبت... هيلين... هلا يمه

امي.... ضرغام يمج

هيلين... اي

امي... انطيني اياه

هيلين... تمام..

انطيته لضرغام كال...

ضرغام... هلا بيج حجيه... انتي اشونج... تمام.... ليش.... بس هيلين ما ليه رضى تجيكم وهذا القشمر عدكم..... ما. ليه رضى لا.....شنو دا تطبخون غده
.....لا اني ادبرها .... هلا بيج

سد الخط عاقد حواجبه

طببت اصبعي بصفحته خزرني

هيلين... شبي الحلو ضايج

ضرغام.... سدي حلكج

هيلين.... هااااا

ضرغام..... اييييي

هيلين... شتريد امي

ضرغام.... تريدج تروحين تعاونينها لأن صديق ابوج جاي

هيلين... ابو باسم

كلت هيج لأن بس بيت ابو باسم يجون علينه

باوعلي بخزره وكال.... اي بيت ابو باسم

من خوفي كتله... خطيه امي اشون منو يعاونها حان دزت على ايه

ضرغام... بيت عمج رايحين لخوالهم

هيلين... وتالي امي وين تكدر عالشغل وحدها

ضرغام....امج تكولين تعاوني بالطبخ هسا اوصيلها اكل جاهز صديقي يودي

جريت كف ايده وعضيته

ضرغام.... خربببب تالييييي اني ضايج ليش تكفريني

هيلين... اي اي اكفر وشوف شسويلك

حضني وكال... اشاقيج حياتي

ضحكنه اثنينه

مره بليل كاعدين وضرغام يتغزل ..

ضرغام.... عيونج ورموشج احبهننن

هيلين... واني

ضرغام.... كلج احبج

ضرغام... شفايفجج حواجبج ملامحج مميزه ملامحج وبراءتج ما شايفهن بغير بنيه انتي احلا بنت بالدنيه احلا بنت بعيوني عيوني مليانه بيج وبحبج لو شكد ما نعيش سوه احس بهاللحضه انتي اجيتي يمي ما اصدك ارجع لدوامي حتى اشوف عيونج اللي متفارك بالي وين ما اروح

ابتسمتله حجه والبحه اللي بصوته تجنن وهو نعسان... كولييي احبككك

هيلين... احبككك واعشقككك واموت عليك

هيلين... سارة حامل وافنان سمعت حامل بتوءم كلش فرحت اقنان وهيثم استقرو نور انخطبت الحجيه المصلاويه كل فترة ياخذني ضرغام لعدهم نزورهم فاطمه طلعت بنيه حبابه بمعنى الكلمه كل فترة زوجها يجيبها صارت صاحبتي بس مرات اغار اذا اشوف ضرغام موجود لمن تجي ضرغام بسبب غيرتي صار ما يكعد ويانه من تجي فاطمه يطلع مو بيدي اغار عليه احس هو ملكي وحدي وما اريد غيري يشاركني بي ريماس عيونها نفس عيوني وباقي ملامحها ماخذتها من ضرغام حتى سمارها على ضرغام كلش بشوشه وتنحب كلمن يشوفها يحبها

عاشو احلا حياة هيلين وضرغام حياتهم بيها زعل وغيرة بس بيناتنهم حب وهالحب مستحيل يكسر الحب تضحية الحب تقبل الشخص بمل حالاته الحب اذا صار غلط من طرف ميتكرر الحب شي كلش حلو الحب موجود بقلوب الأنقياء فقط هواي يكولون ماكو شي اسمه حب هذا اقناع نفس للأشخاص اللي ما حبو وراح يجي يوم يحبون الحب موجود والرسول عليه الصلاة والسلام حب الحب تضحيه ووفاء واهتمام الحب ما يخلى من الغيرة ومن الحزن ومن التعب القليل من الاشخاص اللي يوفون بحبهم ولهالسبب من نقره رواية حب نشوف هالشي نادر

لهنا وتنتهي رحلتنة مع رواية الأصداف وابطالها للكاتبة bmbsh_beme

انتضروني برواية جديدة. اسمها... الضباب الرقيق
حاخذ ريست اسبوع وابدي انزلها عمري انتو

كرزاتي تصويتكم واللي ممصوت يرجع، ويصوت احبكممم نفر نفر وشكر خاص اللي وكفو وياي ودافعولي وشجعوني كلش احبكم

انستا تبعي... wraa444

في جمال عيُونك إنهزم قلبي كثيراً .♡

♡♡♡♡♡♡♡♡♡♡♡♡♡♡♡♡♡♡♡♡♡♡♡♡