الأشيب الفصل الرابع وثلاثون 34 - بقلم سارة الحسن

﷽

الكاتبة:
"سـارة الحـسن"

-لا تنسون التصويت والتعليق بيـن الفقــــرات
+متابعة الحساب itsara_kh

Instagram: itsara.kh
Telegram: itsara105

..

لحظات مثــــل الحلم ، وشوشة وضجة قوية بعقلي قبل مسمعي .. بينما كانت الضحكة مرسومة على وجهي أتلاشت بلمح البصر وأني أشوف تعابير سيماف الليّ تغيّرت وهي تكلم زياف أتصال ، ما أعرف شنو كللها ورُفعت عينها عليَّ مجاوبتة بعدم أهتمام
سيماف: شنكدر نكول غيـر الله يرحمة
- غلقتة منه وأنـي عيني عليها أنتظرها تنطق وتحجي وتكول منو الليّ مات وهي هيـج ما مهتمة.! وتكلمت بدون ما اسأل
سيماف: عُثمان صار فترة مريض بمرض كورونا والفجر ميت

أنخفضت أنفاسي ، خُفق كلبي بقوة ، غوشت الرؤية عندي بسبب دموعي الليّ تجمعت بعيوني ، دنكت راسي وأحس روحي لابت ما أعرف شسوي .. مسدت على كتفي بعدها لمتني بحُضنها
سيماف: تذكري الليّ سواه بيج ولا تبجين أو تنقهرين ما يستاهل
- بس هيهات أكــدر ، شهگت بقوة وصارت دموعي تتسابق على خدي ، تشبثت بيها محاولة أشرحلها شعوري
مورفو: ما ردت يموت ، لخاطر الزينات الليّ سواها إليّ أتمنيت ينعدل ويعيش حياة جديدة يرتاح بيها

شكد كنت أتمنى ولا زلت أتمنى كدر يعيش حياتة مثل البقية ، شيصير لو أتعالج مِـنْ أمراضة النفسية؟ شيصير لو ما تقرب مني بطريقة قذرة؟ هدم حياتة بأيدة ، مات وترك وراه أنسانة مُهشمة متعذبة بذكرياتها البشعة وياها .. أنطُفت فرحتي وخَيم الحزن على روحي ، أبتعدت عن سيماف وطلبت منها تعوفني وحدي .. رغم الضيوف موجودين وصايرة خبصة بس ما كدرت أستمر وياهم وأنتهت حفلتي حتى قبل لا تبدأ .. أنحشرت بزاوية عايشة حزني وسط دموعي ونحيبي على الليّ دمر حياتي .. لو غيري كان فرح بس أني ما كدرت وما هان عليَّ خبر موتة ما كدرت أنكر عشرة وتعب وزينات كثيرة .. ما أعرف شكد مُضى مِـنْ الوقت وهدأت مِـنْ سمعت صوت الأشيب يدك الباب ويكلمني بهدوء حتى أفتحلة ، نهضت مِـنْ مكاني فاتحتلة الباب ، أرتميت بحُضنة ذابة حزني عليه ، لمني بين أديه مقبل راسي وهمس
الأشيب: أني أحير شسوي وشحجي حتى أشوف ضحكتج لا تحركين روحي بدموعج مورفو

ما كان عندي كلام ولا مُبرر ولا عُذر ، وبنفس الوقت ما كدرت أسكت لمـا حسيت عيوني جَفت وخلص دمعها.! وطول هذه الفترة هو لامني بحُضنة يتوسلني حتى أسكُت ويحاول يهونها عليَّ بس شي مو بأيدي لو ما بجيت أنفجر وأموت .. خالة نسرين قامت بواجب الضيوف وأعتذرت منهم بعدها ماكو حفلة وحجت السبب الحقيقي "صار عندنا حالة وفاة مِـنْ أقارب مورفو" .. بدل المُباركت صارت تعزيات ، بس أني ما طلعت بعد وما حَبيت أحد يشوفني بهذه الحالة حتى خالاتـي .. عشت أيام تعيسة بخبر وفاتة رجعلي ذكريات سيئة بصعوبة تجاوزتها .. ومع ذلك كنت أحاول أبين أني بخير وأجبر نفسي على الضحكة لكـن الأشيب فاهمني ما تعبُر عليه ضحكتي المُزيفة .. ورجع يعاني مِـنْ جديد وصارلي دكتور نفسي للمرة الثانية ، بعـد أكثر مِـنْ أسبوعين تعايشت مع الوضع وقررت ابدأ حياة جديدة متجردة مِـنْ الذكريات المؤلمة ، أحتضنت كف فَـدار معتذرة منه
مورفو: أسفة لأن دا أعذبك وياية وطفت فرحتك بسببي
الأشيب: شفايدة راحتي وفرحتي وأنتِ متعذبة وحزينة؟ شفايدة حياتي كلها أذا مو أنتِ بيها.!
مورفو: ما راح تتعب مني؟
الأشيب: أنحسب عار وناقص على الزلم لو تعبت منج ومن دلالج ، بعد الحياة الليّ عشتيها مستعد أفنيلج عُمري حتى ترتاحين أنتِ ، أني حالف أعوضج عن كُـل الليّ راح وأعيشج الحياة الليّ تحبينها مثل ما تحبين وتتمنين ، بس آمريني مِـنْ أيدج هاي لأيدج هاي

طبع بوساتة على كف أيدي الأيمن بعدها على الأيسر ، وأحس كلبي رفرف بكلامة وهذا الليّ صار فعلاً ، خلق مني أنسانة جديدة مِـنْ كثر الدلال محد يتحملني غيره .. كُـل الأشياء الليّ أريدها مُجرد ما أنطقها تتنفذ إلا الأشياء الغلط كان يقنعني بكل ودّ وتفاهم هذا الشي غلط .. بعد أيام كُنا منجمعين ببيت أهلة وحديث الولد كان على الشُغل الأمر الليّ خلاني أستذكر شخص ، نهضت مِـنْ مكاني كاعدة بجانب فَـدار أتكلم وياه بهمس
مورفو: فَـدار هذا الليّ أسمه عمي عبد وين صُفى بي الدهر؟
الأشيب: شجابة على بالج؟
مورفو: إجة وحبيت أعرف
الأشيب: معفــن بالسجن ، ولا تفكرين بيهم ما أريد عقلج يتلوث بهيج ناس زبايل

مُضت الأيام هادئة ومن شافني أتحسنت رحنا سفرة للشمال كم يوم وكانت سفرة سريعة لأن عزيز خُبصنا يريد يخطُب ولازم الأشيب موجود ، مِـنْ رجعنا وتجهزنا بعد أيام حتى نروح لأهــل قَبس أعترض الأشيب على ملابسي
الأشيب: مورفو حبيبتي الدلال شي والأستهتار شي ثاني لا تخبطين
- صُفنت بوجهة وهو أشر على فُستاني القصير شوي
الأشيب: غيري لخاطري
مورفو: هسه تكول غيري؟ ليـش منين أجيب غيرة؟
الأشيب: أي شي حبيبي هو أنتِ بكل حالاتج حلوة

توجه للكنتور صار يطلع ملابس ويشوفني ويقنعني الليّ بأيده أحلى مِـنْ الليّ لابستة وكان دائماً يعترض على ملابسي لأن قصيرة لحد ما غيرني وخلاني تلقائياً ومن ذاتي ما أشتري أي شي قصير.. كانت حفلة بسيطة بس تجنن وجمال ونزاكة قَبس موضوع ثانـي ، كان الفرح واضح بعيونها وفرحة عزيز مو أقــل منها بحيث الضحكة ما فاركت وجهة
مورفو: الف مبروك عزوز
عزيز: الله يبـــارك بيــــج الضلعة ، بس ما أنصحج تكليلي عزوز كدام قَبـس لأن خبلة أكثـر منج
مورفو: بدأت رحمة الله شراح يخلصنا

ضحكنا وعشنا أجواء الحفلة بحذافيرها وياهم ، طول الحفلة وهو مهتم ومركز بيها وفاصل عن العالم المُحيط .. يعدل بشعرها بفُستانها حتى مِـنْ أكلت الكيكة وبُقى أثار بسيطة على شفتها هو الليّ مسحها وعدلها إلها وهي حتى أنفاسها قاطعتها مِـنْ الخجل ، وردة كانت بجانبي لافة أيدها على ذراعي
وردة: الله شو عزيزان طلع رومانسي
مورفو: كُـل الزلم يم نسوانهم رومانسين

ضحكت وهي تميل راسها على كتفي
وردة: هسه شيصير لو هذا عقدنا أنـي ومروان
- ما أعرف شلون فلت لساني وفضحت السر
مورفو: مروان منطي خَبـر لعزيز راح يتقدملج
- شهگت وردة بصدمة جذبت أنتباه الكُــل ، كرصتها مِـنْ أيدها بقوة لأن فضحتنا
مورفو: وجــع وجــع تخزينا
وردة: عليج الله تحجين صدك لو تلعبين بمشاعري؟
مورفو: ألعب بمشاعرج بس أسكتي

خلصت الحفلة كلها تحلف بيه وأني أريد ألطشها بس ما تلطشت بعد وهددتها حتى تسكُت
مورفو: الشوكة والله اذا حجيتي أكول للأشيب يرفض مروان وأخليج بحسرتة
وردة: يلوكلج دور زوجة الأخ الحية

بالشافعات يلا سيطرت على نفسها بس الضحكة ما فاركت وجهها ، وبعد أيام مِـنْ سمعت هو متكلم مع الولد وطالبها على سنة الله ورسول ، دخلت الغُرفة تطفر مِـنْ الفرح وتحير شتسوي حتى تعبر عن بهجتها
مورفو: أثكلي لج أثكلي
وردة: ليش أثكل يعني وأنـي كنت أنتظر هذا اليوم على نار؟ مِـنْ حقي أعبر وأعيش فرحتي بأدق تفاصيلها ، أضحك ، أهوس ، أكمز ، أعيط كُلشي أسوي فهو مِـنْ حقي .. ليش نبقى متقيدين حتى لا نسمع كلمة او حتى محد يكول بحقنا هذا الشخص مو ثكيل؟ بالعكس مو مِـنْ حق أحد يلوم أحد بفرحتة أتركوا الناس تعيش أفراحها براحة
- تقربت حضنتها مبتسمة
مورفو: أتشاقة وياج مِـنْ حقج تسوين الليّ تردينا زوجة مروان الحوت

ضحكت بصوت عالي وألتمن البنات يمها بالغُرفة وهي طايرة طايرة .. مِـنْ صاحتلها خالة نسرين حتى تسمع رأيها صارت تتمنطق وتخربط بالكلام
وردة: وصليلهم جوابي أنُ وردة ما موافقة
نسرين: هـا.! أي هاهي براحتج
وردة: غير تلحين عليَّ وتقنعيني ست نسرين عيني

ضحكت خالة نسرين وبُقت تشاقة وياها وتقشمر عليها لمـا سمعت موافقتها .. ونفس فكرة عزيز وقَبس صارت مع وردة ومروان ، عقد قِران وحفلة بسيطة بنفس اليـوم .. وردة طلعت فعلاً وردة بفُستانها الوردي الفاتح وتسريحة شعرها الليّ نازل مغطي نص ظهرها بطريقة متموجة تبهج العين مِـنْ الجمال .. كانت تدمع عيوني مِـنْ فرحتي بيهن ومن أشوفهن كيف فرحانات ، باركتلها وما كدرت بدون ما أتغزل بجمالها
مورفو: اليوم فعلاً طالعة وردة مو شوكة
وردة: الشوكة وردت بفضل مروان
مورفو: بعدج شفتهمتي منه؟
وردة: يكفيني أصير بأسمة حتى تورد ورود روحي
مورفو: مِـنْ حقج ما أكــدر أحجي

وبيومها أكثر وحدة ركصت هي .. كانت فرحانة لنفسها أكثر مِـنْ فرحنا بيها ، بس وردة مو وردة مِـنْ دخل مروان ، أحمرت خدودها خجل وما كدرت تخلي عينها بعينه ، قَـبل جبينها وكعد بجانبها وصارن زوجات عمامة يباركلة وهو يتكلم ويضحك وياهن ، كان واضح عليه مرتبك شوية لكن يحاول يخفي ويتصرف طبيعي .. بعد ما أنهوا كُـل طقوس الحفلة طلب مروان نشغل أغنية هادئة
مروان: فَـد أغنية مثقفين هادئين نركص عليها أني وعروستي
- أتعالت أصوات ضحك الكُل إلا وردة رُفعت راسها عليه بصدمة ورُفضت تركص وياه ، بس هو ما أهتملها ونهض مِـنْ مكانة مادلها أيده حتى تنهض وياه
مروان: أميرتي الحلوة ممكن؟

ما كدرت ترفض بعد هذا الأسلوب والكلام الحلو ، أنرسمت على وجهها البسمة ونهض وياه ، أحتضن خصرها بينما كفوف أديها متوسدة صدرة وصارو يتمايلون مع الأغنية .. أنـي كاعدة بجانب سيماف واتمايل على الواهس فرحانتلهم
مورفو: شفتكم بعرسكم كلت هذولة أحلى أثنين تشوفهم عيني ، بعدها شفت عزيز وغبس كلت لا هذولة أحلى ، بس هسه اكول مروان ووردة أحلى أثنين خَلص ما تقبل نقاش
سيماف: بكل حفلة تسوين تحديث أنتِ
مورفو: أي بس الحقيقة الثابتة الليّ ما تتقبل أي تحديث هي "أحلى أثنين بنظري ونظركم أني وفَــدار"

بُقيت أصبغ وأمدح بينا وهي تضحك لحد ما خلصوا رقصتهم بعدها أخذو صور وطلع مروان ، بُقت الحفلة بناتية ومحد قَصر بالرقص . كانت الأجواء خيالية تُحفة شي لا يوصف وفرحتي طاغية على كلبي وروحي وياهم .. مِـنْ رجعت لبيتنا أول ما دخلت أنداريت على الأشيب أتكلم بجدية
مورفو: خلِ نعيـد عرسنا
الأشيب: صـار
مورفو: دا أحجي صدك فَـدار لا تسلكلي
- تقرب مني مسد على خدي بحنية
الأشيب: والله صدك أحجي ، تردين عرس باجر اسويلج عرس جديد
مورفو: والعباس أنتَ خوش زلمة ، خلِ نشوف فديوات عرسنا وهاهي

أبتسم وأومأ بقبول ، بعد ما غيرنا ملابسنا وجهزت بعض الأكلات الخفيفة كعدنا نشوف فديو عرسنا وعايشين فرحتة وتفاصيلة مِـنْ جديد .. بعد أيام قرر عزيز يستعجل بالزواج ومحد عرف السبب وكان عرسهم يجنن بكل تفاصيلة ، ما لحكنا نرتاح وصار عرس مروان ووردة الليّ نزلت بصُباحية العرس تركض على الدرج وتنادي على أمها ، طلعت خالة نسرين مفجوعة
نسرين: أسم الله أسم الله شكو شبيج؟
وردة: تأخرت عن الصالون تأخرت راح يروح مروان ويعوفني
نسرين: هي هذه سالفة؟ وين يروح يعني؟

نزلت وراها دينا تضحك وعرفنا هي الليّ مكعدتها وكايلتلها الوقت متأخــر بينما الساعة بعدها بـ7 .. بُقت وردة تتصفن بعدها أستقرت عيونها عليَّ متسائلة
وردة: مِـنْ بعدها الغبشة شعندج يمنا أنتِ؟
مورفو: إجيت أواسي أمي نسرين على غيابج
وردة: شوفي هو أنـي صح راح أتزوج بس هذا ما يعني تنفردين وتاخذين راحتج مع أمي
مورفو: حجي يفيدج حياتي

بُقيت ألعب بأعصابها وهي تگمز مِـنْ القهر لما تدخلت خالة نسرين وحلت الأمـور وأقنعت عقلها الطفولي زواجها ما يغير معزتها.. بعدها راحن للصالون وقَبـس ورحيق وياها إما أني فَـ فعلاً كنت جاية حتى أبقى يم خالة نسرين .. لحد ما صار وقت الحفلة الليّ كانت بقاعة إجة الأشيب ياخذني حتى يوصلني ، أول ما صعدت السيارة سحب أيدي مقبلها ويباوعلي بحُب
الأشيب: حبيبي بكل مُناسبة جمالة يغطي على الكُل
مورفو: حتى أحلى مِـنْ العروسة؟
الأشيب: العروس وأهل العروس
مورفو: أذا سمعتك وردة تشمر نفسها كدام السيارة والله

ضحك وبُقى الطريق كُله يتغزل بيه ، وصلني ورجع يم أمة لأن عندهم ما يصير يحضرون عرس بنتهم .. كُـل التفاصيل كانت حلوة وأحلى شي هي وردة الليّ طالعة أميرة فعلاً
مورفو: الله وردة طالعة أحلى مِـنْ الورد
وردة: الله يورد حياتج
مورفو: موردة بأشيبي
وردة: أريـد أتفل عليج
مورفو: لا تستخدمين سوالفي وياية

بُقيت بجانبها عيوننا على البنات الليّ أبدعوا بالرقص وسط القاعة، مِـنْ دخل مروان ندستني مِـنْ رجلي
وردة: إجة إجة كومي
مورفو: عزة تطرديني علمود زوجج؟
وردة: صح أنتِ غالية بس هذا أبو الجهال يمعودة

نظرتلها بنظرات حقد ونهضت مِـنْ يمها ، مروان كانت فرحتة طاغية على فرحة وردة مبتهج بشكل ملحوظ ، وهُم الوحيدين الليّ ما رقصوا بهدوء وأنما أبدعوا وتعبوا مِـنْ كثر ما هزوا
سيماف: بس هذولة يفتهمون
مورفو: شوفي هسه أني حبيتهم مع بعض وركصهم يجنن بس أني لو فدعوس يركص هيج يمكن أطلكة
سيماف: دعوفيهم جابوا حياتهم ضيم بضيم ويداومون بنص الضيم خليهم شوية يفرحون قابل شمسوين هو ركص

بُقت عيوننا مبتهجة بجمالهم وتفاصيلهم الحلوة بعدها ودعناهم ووصلناهم زفة لبيتهم .. رجعنا يم خالة نسرين الليّ عيونها مورمة مِـنْ كُثر البجي هي وخالة سهاد ، أحتضنتها أبوس بوجهها
مورفو: مو عنـدج أني بنيتج ليش تبجين
نسرين: ما بعمري مفاركتها مادري شلون راح أتعود على غيابها
مورفو: بس تشتاقين لهوستها نروح نجيبها إلج لا تبجين

كانت مستصعبة فكرة أبتعاد وردة لأن رحيق مِـنْ تزوجت عاشت معاها بنفس البيت ما حست بفراق البنت بعد الزواج ، لكن وردة أثرت بيها لأن خابصة البيت بسوالفها وضجتها 24 ساعــة .. وبهذهِ الفتـرة كثرت مُناسباتنا وأعراسنا لأن حضرنا عرس دنيا ودينا وخالاتي مخلصاتها دموع كيف كُـل بناتهن تزوجن بفترة وحــدة .. بعد مُدة بشرتنا سيماف بحملها بطفلها الأول والكل كان فرحان لأن ما عندنا غير تبارك الليّ صارت كبيرة وما تسمحلنا نلاعبها مثل الأطفال .. أنقضت فترة حملها على خير وأنرزقت ببنت ، كُنا وياها بالمُستشفى أني وخالة نسرين والأشيب وزياف وخالة سيماف ، مِـنْ أنطوه البنت أذن بأذنها بعدها قبلها بهدوء مبتسم وطاير مِـنْ الفرح بيها
زياف: روجــدا حبيبة بابا
الأشيب: تتربى بعزك ودلالك حزام ظهري
- بهذه اللحظة حسيته يريد يحضن الأشيب مِـنْ الفرح ما يعرف شيسوي وشيتصرف ، الأسم ما كان الليّ متفقين عليه بس زياف حَب يفاجئ سيماف بي لأن "روجــدا أسم أمها" ، دخلنا عليها بعد ما خلوها بغُرفة وحدها تحمدنالها على السلامة طلبت مِـنْ زياف ينطيها بنتها ، كعد بجانبها والطفلة بحُضنه
زياف: أسمها "روجـدا" على أسم أمنا

فاضت مشاعر سيماف وعبرت عن فرحها بدموعها ، كان يكللها "أمنا" لأنّ هي الليّ ربته هو وأخوه الليّ توفى بالصُغر .. كنت طايرة مِـنْ الفرح بيها أحب الأطفال بشكل لا يوصف وكل يوم بالليل أخلــي فَـدار ياخذني عليهم وما كان يكول لا لأنّ يحب زياف أكثـر مِـنْ روحة .. شايلتها بحُضني ورحت كعدت بجانب الأشيب أهمس بيني وبينه
مورفو: شوبي خلِ نجيب مثلها
الأشيب: تدللين هسه نطلع لأبو الأسواق ناخذ منها
مورفو: مدا أشاقة عليك الله خلِ نجيب وحدة شوفها شكد حلوة
الأشيب: مِـنْ تكبرين حبيبي

يبقى يستفزني ويكلي بعدج طفلة مو مال أطفال وأني أكمز بس مِـنْ توصل للصدك اني مقتنعة أكمـل دراستي بالأول
الأشيب: مِـنْ تحنين على الأطفال نجي ناخذ روجدا إلعبي عليها ونرجعها
زياف: مو أحْنـا حبايب فَـدار ليش تخاربنا؟ لعبة بنتي تلعب بيها بنتك؟
الأشيب: أني وياك روح بروح وجهالك جهالي
زياف: كوم أخذها وروح والله ما أكـول لا

كانت أيام تجنن ، عشت تفاصيل طفولتها لأن دائماً يمها وتعلقت بيها هواية بذيج الفترة ، بعــــــــــد سنـــــــــــة تقريبـــاً صار حمل جماعي وردة وقبس وسيماف للمرة الثاني ودينا ودنيا .. بحيث خالاتي أنصدمن مِـنْ الأخبـار المتتالية
نسرين: يُمة على حظجن هو هيج كالوا؟ لو ماكو لو كلجن وقت واحد؟

أني الوحيدة الليّ كانت فرحتي أضعاف فرحتهم ، لأن راح يصير عندنا هواية أطفال .. وحتى ولادتهن كانت قريبة مِـنْ بعض فترات تترواح مِـنْ عشرين لأربعين يوم بين أطفالهم .. سيماف أنرزقت ببنت ثانية وكان أسمها "روجيـــن" وفرحة زياف ما تنعطي لأحد ، مِـنْ تكلمت خالة سيماف وكالت "كانت متوقعة زياف يضوج لأن إجتة بنت ثانية مو ولد" كان جوابة
زياف: يا محلىٰ البنات يا محلاهن ، أتمنى لو يجني بعد أربعة بنات

إمــا وردة أنرزقت بولد وبالمُستشفى أتعاركت هي ومروان على الأسم لأن هو يريد شي وهي شي
مروان: مروان أبو شاهين ما أصير غير هيج
وردة: وردة أم إليـاس ما أقبل أصير أم غيره
مروان: والله أتبرع بي أذا صار أسمة غير شاهين
وردة: وأذا صار أسمة غير إلياس والله أشمره بالشط

تقدمت أخذتة مِـن حُضن خالة نسرين ، وأنداريت على الأشيب
مورفو: لا تتبرعون ولا تشمرون بالشط ، راح ناخذة أحْنـا طفل وبدون تعب مو فَـدار؟
الأشيب: أيّ والله يسون فَضل

طلع مروان حت يكمل بيان الطفل وبُقت وردة تبجي وتحجي مع الأشيب بقهر تريدة يقنع مروان يقبل بأسم إلياس بس الأشيب حاول يهديها ويقنعها أنّ الأسمين حلوين وأذا هذا ما صار إلياس الثاني راح يكون هيج وهواية كلام تكلمة معاها لما أقنعها .. أشرتلي تريدة ، خليتة بحُضنها تباوعلة مبتسمة لما رجع مروان واحد يباوع للثاني صفح وهي تريد تسمعة أنُ قبلت تسمي شاهين صارت تلاعبة بصوت مسموع
وردة: حبيبي شاهين الليّ طالع يموت على أمه
مروان: قصـدج إلياس
- رُفعت راسها عليه وهو شمر البيان بحُضنها يحجي بمكابر
مروان: صار أسمة إلياس مو لخاطرج بس حتى لا تشمرينه بالشط أعرف عقلج طگة ونص

ضحكت بفرح وهو أبتسم لضحكتها كرصها مِـنْ خدها وباس أصابعة .. دار وجهة الأشيب عنهم ونظراتة جبرتني أضحك بصوت عالـي إلفتت أنتباهم كُلهم
مروان: يابة مرتي هي شنـــو.!

محد جاوبة وغيروا الموضوع ، بنفس اليوم طلعت وردة للبيت وأكيـد يم خالة نسرين ، أجت قَبس الليّ كرشها واصل لخشمها حامل بتوأم كعدت يم وردة متسائلة
قَبس: شلونة شعور الولادة؟ يوجع لو شنو الوضع؟
وردة: ولج عيني مِـنْ كالوا "ألم الولادة يعادل كَسر 42 عظمة بالجسد" ما صدكتهم إلا مِـنْ صار عندي ولادة حسيت بألم ما ينوصف ولا ينجرع ما أعرف شلون بعدني عايشة

وبقت تحجي وتحجي وتعظم بالألم الليّ حست بي وكلنا مركزين وياها وهي تشرح بذمة وضمير لحد ما فززتنا قَبس مِـنْ عاطت متألمة ، أيدها على بطنها وصارت تلوب وتكول صار عندها ألم ، إجــن خالاتي يتراكضن عليها وعرفن وردة دا تحجيلها عن ألم الولادة وحاولن يهدن قَبس
نسرين: كولي يا الله يُمة هذا الألم مِـنْ الخوف ماكو شي ربنا الليّ يسهل أمرنا
- عصرت أيد خالتي وتحجي بصعوبة مِـنْ الألم
قَبس: راح أمـوت خالة والله ألم قوي

كُلها ثواني وصارت تصرخ ووضح على ملامحها مدى الألـم ، بُقيت جامدة بمكاني وصرت أتخيـل نفسي بمكانها وأذا صرت حامـل هيج راح يصير بيه؟! البيت أنخبص بيها وأتصلوا على عزيز طيروا عقلة خلوه يسوي مسافة الطريق 10 دقايق بدل النصف ساعة .. أخذها وطلع بيها للمُستشفى بعد فترة أتصل وكال
عزيز: ماكـو شي شوية تقلصات وهي مِـنْ الأساس ما داخلة شهرها بعــدها
سهاد: وقَبس شلونها هسه؟
عزيز: زينة الحَمـدُ لله راح نرجع للبيت هسه

بعد فترة رجعوا ودخلت غبس مبتسمة بفشلة ، خالة سهاد ماكدرت تلزم نفسها رُفعت أديها وغمتها
سُهاد: طاح حظج يَـالجبانة يَـالفاهية ، ما شايفة هيج مَرة خوافة
قَبس: شسوي خالة قابل الولادة شوية والله خفت
عزيز: الحَمـدُ لله عدت على خير ، وخلِ الشوگة تلزم لسانها

وأكيد وردة سمعتة وصارت تدردم عليهم وهي بالغُرفة بس صوتها مسموع .. بُقت يمنا 40 يوم لحد ما صارت تسيطر على أبنها وتعرف تتعامل وياه يلا رجعت لبيتها ، راحت بالليل ثاني يوم الظُهر جابتة ورجعت يم خالة نسرين تبجي
وردة: ما أكدرلة يُمة ، ما أعرفة شيريد ساعة أحجي وياه وأتوسل بي أكلة بس فهمني شبيك؟ جوعان؟ عطشان؟ نعسان؟ ما يرد عبالك أحجـي ويا الحايط تعب نفسيتي هو وأبوه
مروان: أبوه يدخل الجنة مِـنْ ورة ظلمج

هُمَ متناگرين ووردة تبجي مِـنْ كُـل عقلها والبقية ميتين مِـنْ الضحك عليهم وبقت هيج يوم ببيتها ويومين يم خالة نسرين لحد ما تعودت وأستقرت .. إمــا قَبس أنتهى شهرها وما صار عندها ولادة لهذا السبب أحتاجت عملية قيصرية و الحَمـدُ لله أجوا أطفالها بصحة جيدة .. وأيضاً بُقت يم خالة نسرين وسهاد الليّ كانت طايرة بيهم وليل ونهار مخليتهم يمها تهتم بيهم مِـنْ فرحتها
سُهاد: شكد ما عزيز غالي على كلبي هذولة صاروا أعـز
عزيز: يُمة لا تغرج الشوارب ترة أني أضرب مِـنْ وردة هم أغار

سحبت راسة تبوس بي مثل الطفل وبُقت حاضنتة تبجي وتضحك بنفس الوقت .. عزيز أنرزق بولد وبنت كانت ألقابهم الليّ نستنا حتى إسمائهم الحقيقة "شمشوم ومشمشة" .. رغم هُمَ توأم لكن مو متماثلين لأن أجناس مُختلفة ، بس بيناتهم شبه كبير الليّ يشوفهم راح يعرف أو يشُك هُمَ توأم .. شمشوم كان فقير عكس مشمشة أم لسان محـد يكدر يندك بيها وعزيز طاير بيها
عزيز: هــــذه لَبـوة أبوها

مُضت الأيام والسنوات نحن عايشين بين فترة مُستقرة وفترة متزعزعة بسبب المشاكل وأكثـر المشاكل الليّ نواجهها هي بسبب شغُل الأشيب ، وكنت ليل ونهار أدعيّ ربي يُحفظة ويبعد عنه السوء لأن ما عنـدي غيرة لكـن هذا شُغلة ما أكدر أناقشة بيّ
مورفو: فدعوسي أكُلك شي بس خليك ريلاكس
الأشيب: كولـي الله اليستر
مورفو: شنو رأيك تترك شغلك؟
الأشيب: وشلون نعيش؟ منو يصرف علينا؟
مورفو: أنتَ أفتح جمبـر لبلبي وأني أبيع گُبة
الأشيب: أصير فَـدار أبو اللبلبي وأنتِ مورفو أم الگُبة مو؟
مورفو: أهـم شي نعيش عيشة شريفة
الأشيب: حتى زحمة أكلج أحتفظي بأفكارج لنفسج ، أمحيهن مِـنْ راسج بنياتي حبيبتي

رُفعت راسي عليه مغيمة وهو ضحك مقبل جبيني
الأشيب: أعرفج خايفة عليَّ بس كُلشي بأيد ربنا ، أذا إجـة يومي حتى لو ضام روحي هنا يمج بالبيت هم راح أموت ، لا تبقين خايفة بنياتي حبيبتي ما يصير غير الليّ كاتبة ربنا

عدلت كعدتي طابعة بوساتي على عيونة و كُـل تفاصيل وجهة ، أحتضنت راسة على كلبي أحس أريد أدخلة بي وأقفل عليه .. ومُضت الأيام ملتهين بين دوامي ودوامة كُنا نهون على بعض تعبنا .. بـ أيـام شتـوية ومطــر قـوي كلش، كاعدة على حافــة الشباك العريضـة ولافـه نفسـي بـغطوة خفيفة اباوع للجـوّ الليّ يعشقة گلبـي ، سمعت صوت خطـواتة وهـو يمشـي بأتجاهـيّ وشايل بأيدة گـوب حليـب دافـي، تقـرب كعـد كدامي قدملي الگـوب ونتـر بية
الأشيب: حظـج أطيحة أذا كلتـي بعد أريد العب بالمطر
مورفو: لا تطلعها من عيني فَـدار

الأشيب: ولـچ مرمرتـي گلبـي بـعنادج

مورفو: هاي شبيك وياية؟! انـي مريضة وانتَ ترزل بية

الأشيب: خايف عليك وليدي شوف حالتك شلون صايرة، مو تدري بيه كلشي ولا أذيتـك

مورفو: عادي اهم شي فرحت شوية وما بقت بنفسي

الأشيب: هاي اخر مرة مورفو وحق قمر بني هاشم اذاناتج اشلعها اذا كلتـي اريد اطلع

مورفو: شلعهن حتـى بعد ما اسمع وما اسمع كلامك

-رفـع حاجبة ما عجبة كلامي وكال
::-اتعلم لغة الأشارة واحجي وياج بـ الأشارة وغصباً عليج تسمعين كلامي

مورفو: يعنـي طرشة وماخلصت منك شبييييييك فدعووووس

ضحك وأشرلي أتقرب منه
الأشيب: تعالي يَـا روح فدعوس
- تحركت مِـنْ مكانـي كعدت بـحضنة سانده ظهري على صدرة وهو طبع بوسة على راسـي ورفع ايده يتحسس گصتـي
الأشيب: زين ما مصخنة

مورفو: مابية شي والله بس شوية كحه

الأشيب: يول طير الشوك مو احنه نعرف وره الكحه شيصير

مورفو: ميصير ميصير بـس لا تفاولها علينه

-ضحك وكرصني من خدي بقوة وبقينة كاعدين فترة طويلة بـ الشباك نباوع للمطر ونحجي بـ مواضيع عادية، رفعـت راسي عليه وحجيت بجدية
::-زين هو الجو رومانسي ومطر واضائة خافتة ليش متتغزل بيه؟!

الأشيب: هـو انتِ تنطين مجال اتغزل بيج من الصبح لهسه كل ما اجيج اكلج احبج تكحين بوجهـي وتطيرين ابو الغزل من راسي

مورفو: لازم يصير عندك سرعه بديهيه حبيبي، اكح منا واكطع سلسلة أفكارك وترجع ترتبها بسرعه وتكمل غزلك

الأشيب: صار ع الجايات

-ابتسمت ودفعت نفسي بحضنه وهو شدد حضنته عليه، حسيت انفاسه قريبة من أذنـي وهمس
::-عطــرچ اطيب من القَفــو

مورفو: شنو القَفــو؟!

الأشيب: ريحة الأرض الندبة، من تمطر ع أرض جافة وراها راح تصير ريحة المطر ترد الروح

-ابتسمت ورجعت رفعت راسي تلاگـت نضراتنـه غمضت عيوني وهو طبع بوسات خفيفه ع عيوني، بعدنـه ما عشنه اللحظه زين وصرت اكح وهو يطبطب ع ظهري بخفه لـما سكتت

-انداريت عليه لامه شفايفـي داخل حلكي وگوة كاتمة ضحكتـي، ضيگ عيونه عليه وكال
::-وعلـي مال دفرة هسه اطيرج لـ بيت نسرينو، شهل چـنة العطل هاي

مورفو: المريض ماعليه حرج فدعوس

الأشيب: وليش ماعليه حرج عـود؟!

-بعدني ما نطقت سبقني وكال
::-لأن ميكدر يصعد الدرج مووووو؟! حفظناهن لـ هل كلاوات

مورفو: شبيك عصبي قلبي هاي لان كطعت عليك اللحظه الرومانسية

الأشيب: لأن كحتج تزرف افادي

مورفو: اووووي حبيبي ضايج ع فراشتك

الأشيب: فراشة من سوك مريدي

مورفو: هههههههههههههه يييححححح هاي شبيك عليه اليوم

الأشيب: تخاربنة مورفو

مورفو: وشلون نتصالح؟!

الأشيب: تشربين العلاج الي جبتة

-گمت من مكاني وشمرت لغطوة عن اكتافي وجاوبتة
::-يلا امشي راح اشرب السم الهاري لـ خاطرك

نهض واكف بجانبي واني صفنت عليَّ حتى أستغرب
الأشيب: شبيـج؟!

مورفو: نسيتها هاي حبيبه هاري بوتر شنو جان اسمها؟!

بحلق عيونة مصدوم ورُفع أيدة متحسس گصتي مرة ثانية
الأشيب: وعلـي عرفتج گمتـي تهلوسين

-دفعت ايده ولزمت گصتي وعطت
::-ولــچ يمااااااااااا

الأشيب: وجعه بكلبي ولـچ شبيج

مورفو: ما مصخنه اني ليش داهلوس

-رفع اديه اثنيهن ويمسح ع شعري وكال
::-تعالـي يروحي تعالـي حالتـج صعبة انتِ

سحبني وياه للمطبخ طلعت الشراب مِـنْ الثلاجة شربت منه ورجعتة واني علامات القرف على وجهي لأن ما ينجرع مِـنْ المرورة، غسلنا اسنانة ورحت للغرفة غيرت ملابسي بشي خفيف ونمت بمكاني ، الأشيب كـ العادة يبقى يفتـر يقفل البوب ويطفـي الأضوية يلا يجي، مِـنْ شافنـي ما تكلم شي فتح الكنتور وسحب تشيرت عريض شمره عليَّ
الأشيب: ألبسي هذا

مورفو: مقدرش يبااااشاااااا

الأشيب: البسي وبدون لغوة يلا

مورفو: اختنك ماكدر اعذرني

-خزرني ونتر بيه
::-ليش تخليني اتخبل عليج بهل ليل صبااااا

-سحبت التشيرت بقوة وكلبت خلقتي وادردم
::-صاااار بيهااااا صبااااا نكدر نحجي بعد

الأشيب: بطلي عناد من اكلج ع شي سوي وانتِ ساكته

مورفو: لا بالله وتريد تعدم رأي

-نام بـ مكانه وجاوبنـي بهدوء
::-لا مو اعدم رأيـج بس خايف عليج، انتِ مريضه ومن جهه جو بارد ماريدج تبردين وتتمرضين اكثر

-ما جاوبتة لبست التشيرت ونمت منطيته ظهري وبقيت اباوع بـ تلفوني شوية ووصلتنـي رسالة منه
::-زعلان الحلو؟!

-مجاوبتة ورجع دز
::-شلون نراضيك حبيبي؟!

-انداريت عليه خزرته وجاوبتة
::-لا تبقى تزعجني اريد اناااااام

الأشيب: من حاجي وياج انتِ

-رفعت تلفوني بوجهه وصحت
::-لعــد هاي شنووو؟!

الأشيب: داحجي ويه بنياتي ماعليج بينه

مورفو: لا بـ الله واني منو لعد؟!

الأشيب: انتِ صبا العرمة

مورفو: فدعوووووووس

-ابتسم ورفع نفسه صار قريب مني وهمس
::-يبـعد عينـي ونظـرها

-گلبت خلقتـي عليه ودرت وجهي عنه سحبني بحضنه وكال بضحكه
::-كافي تدلل عليه طير الشوك

مورفو: اذا ما دلل عليك عليمن لعد؟!

الأشيب: مو مشتاقلك حبيبي

مورفو: ماريدك قلبي

الأشيب: ههههههه مترديني وقلبج شنو هاي يول؟!

مورفو: اي هو اني احبك بس ماريدك افهمنـي عليك الله

-بقـى يضحك ويشاقيني لـما راضاني، ثانــي يوم الصبـح هو يريد يروح للدوام، كعدت بوقت سويت ريوك وتريكنا وبعدها طلعنا وصلنـي لبيت أهلة وهو راح لدوام ، دخلت للبيت بعدهم نايمين بس روار كاعد بالصالة مِـنْ شافني ضحك
روار: هــــــا الملونة

مورفو: هــا روار المغــوار

روار: تقهرين يوميه انتِ وجنطتج جايتنه من الصبح ليكول وحده مهججها رجلها

مورفو: بـ الضيم حالتـي مو بـ الله

روار: حالتــج تبجي المطي

مورفو: استغفر الله مو تايبة وحالفه احترمك ليش تخليني اكلك بجتك

روار: هههههه ذيل الچلب ما ينعدل

-كعدت ع الكرويتة تنهدت وجاوبته
::-حيييييل وين رجعتني بهاي حجايتك

روار: لأيام روميو وجوليت

مورفو: هههههههههههه روميو وجوليت من سوك مريدي

روار: يلا يلا ذكريات حلوه عادي

مورفو: شعندك كاعد من الصبح

روار: غيـر دوام

مورفو: متريك لو اسويلك ريـوك؟!

روار: سوي ما كول لا

-گمت للمطبخ اسويله ريوك وهو راح يغير ملابسه ويرجع، مرت ربع ساعه تقريباً ونزل كاشخ وكف كدامي وكال
::-معذب قلوب البنات

مورفو: حلوة الثقة بالنفس بس انت طلعتها من ماعونها

روار: شمعرفج انتِ استايلج شياب

مورفو: بعـد قلبـي لو كل الشياب مثل فَـداري لو ميراد

-هز ايده وكعد ياكل كعدت كدامه وسألته
::-شوكت تتزوج؟!

روار: كاعد ع كلبج؟!

مورفو: لا صدك شوكت؟!

روار: من تتخرج

مورفو: هـي منـي؟!

روار: الي اريد اتزوجها

-ضحكت بحماس وحجيت
::-كووووول والله يعني صدك اكو وحده بحياتك

روار: هنه هوايه اكو بحياتي بس هاي زحفت وكعدت اباب گلبـي

مورفو: صاير ظريف عود؟!

روار: غير انتِ ثولة لو عندي اكدر اضمها عليج مثلاً

مورفو: شوكت يصير عندك لـعد؟!

روار: الله كريم هي تجي

گمل اكل وطلع للدوام، وانـي عزلت المواعين وصعدت لغرفتنا كملت نومتـي، كعدت الظهر على صوت قبس تدك بالباب ، نهضت من مكاني فتحت الباب وصفنت عليها وهي أبتسمت
قَبس: اذا شبعتي نوم انزلي تغدي ويانه

مورفو: شلونج

قبس: ههههه زينه وانتِ

مورفو: اغسل وانزل

-بقت تضحك واني غسلت ونزلت متجمعين كلهم ينتظروني، اول ما شافنـي شمشوم ابن عزيز اجه يركض عليه يضحك
::-ففـو

-شلته بحضني ابوس بي
::-يعيـون ففـو انتَ

-تقدمت بوست نسرينو وسهاد وكعدت يمهن وشمشوم بقى بحضني واخته التؤام مشمشه كاعده بحضن قبس وتخزر بينه هزيت ايدي وحجيت ويه قَـبس
::-هاي مشمشه طالعه ع امها

رحيق: شبيها امها؟!

مورفو: حيه أليفـه

قَـبس: لو بس اعغف شبيج ويايه يا عيني

مورفو: صيري حبابه غبوسة

متعلمة أصيحلها "غَبس الحية" رغُم هي ماكو شخص ألطف منها بكل الدنيا ، حبابة وخلوقة ولسانها يقطر عسل بس أحب أشاقيها .. وهي تتقبل كُـل كلمة مني برحابة صدر تضحك وتسكت ، كملنا اكل وساعدتهن بالمواعين ولأن شتاء فَماكو ظهرية، وكفت اباوع على خالة نسرين داتلبس ربطتها تريد تطلع تأدي واجب
مورفو: ربطتج حلوة يمة

نسرين: كدامج يمة ما تغلى عليج

مورفو: مبينه اصليه هاي بيش اخذتيها؟!

نسرينو: بـ35 هاي جبناها من كربلاء

مورفو: يييححححح ربطه بـ35 شدعوة

نسرين: هو الشي الزين غالي يمة

مورفو: زين انتِ مو كلتي كدامج يلا نزعيها خل ابيعها ع خالة سهاد بـ25

نسرين: هههههه اني انطيج الـ25

مورفو: لا ما احس بـ لذتهن لأن مو بتعبي

بقيت اشاقيها وهي تضحك وبعدها طلعت، ومرت اليومين هيـج اني معطلة عطلة نص السنة ، بالأيام الليّ ينزل بيها الأشيب ارجع لبيتنا ومن يروح للدوام ابقى يم أهلة ، ودوامة كان يومين بيومين بهذه فترة وكل فترة يتغيّر ما مستقر .. بيـوم اللي رجـع الأشيب كنت كاعدة بالمطبخ وسمعت هورن سيارتك ، والعادة الليّ ما يجي يوم وابطلها طلعت اركض حتـى أستقبلة، فتـح الباب الخارجـي ودخل مِـنْ شافني ضحك
الأشيب: مو كايل لا تركضين
مورفو: مقدرش يباشا فد مشتاقتلك

-تقرب مني طبع بوسه ع راسي بقوة وهمس
::-والمشتعل نار عليج شلون بي؟!

مورفو: يطفي ناره

-ضحك وحضني من اكتافي مدخلني ويا للبيت وكال
::-مشتاقتلك حبيبي السربوت

مورفو: مو بكدي والله اني مشتاقتلك هلكد

حجيتها وفتحت ايدي مِـنْ جهة وحدة مثل الحضن أوضحلة كمية الأشتياق ضحك وضربني على راسي بخفة أيدة ، دخل سلم على أمة وخالتة والموجودين وصعد لغرفتنا يغير ملابس واني امشي وراه وين ميروح واحجي وياه دخل للحمام واني وكفت برة واحجي بصوت عالي حتـى يسمعني ، فترة وطلع لابس بس بجامة والغرفة باردة خزرته ونترت بي
مورفو: تريد تتمرض انتَ لو شنـــو؟
- كُـل ما أخزرة ينفجر مِـنْ الضحك على شكلي ، طلع تيشيرت لبسة وسمعني كــلام
الأشيب: مو أني مناعتي مثل ذيج الوحــدة

مورفو: هو انتَ ماخذ عافيتي

الأشيب: نفداج اني وعافيتي طير گلبي

-وكف كدام المرايا يمشط شعرة حضنته من وره ابتسم وكال
::-لا تتحرشين استري ع نفسج لـما نرجع لبيتنه

مورفو: ميصير احضنك يعني

-كمل تمشيط واندار عليه مقربني منه كلش وهو الصار يتحرش وكال
::-رب اليصير احضني وبوسي براحتج

حضنت وجهة بين كفوف ايدي ورفعت نفسي أناثر بوساتي بهدوء على ملامحة الليّ أحبها أعبرلة عن مدى أشتياقي وهو غمـض عيونة ، أستمريت على هذا المنوال لما فززني مِـنْ قبلني بـقوة وياها شمه قوية ، رفع راسه يباوعلي مبتسم تحسه أرتوى
الأشيب: أويلــــي هسه يلا ردت روحي

مورفو: ما اتفقنه هيج فَـداري

الأشيب: ما كتلج اتحرشي بيه فراشتـي

ضحكت وبقيت أتدلع عليه وأغازلة وهو غامرني بحُبة وحنانة ، مطيرني بين الغيوم بدلالة .. نزلنا للصالة تعشينا وياهم ورجعنا لبيتنا ، بالليل سوينا أجواء هادئة وتابعنا فلم والفلم عدنا يصير أربع ساعات بدل الـساعتين ، ثانـي يـوم مشى طبيعي وكان عندنا روحة لـمركز تجميل ورة الظهر، انداريت على الأشيب واني كوة فاتحة عيوني
مورفو: راح انام شوية أشيبـي

الأشيب: مو تردين تروحين للمركز؟!

مورفو: بعد وكت خل انام شوية حباب وكعدني نروح

الأشيب: ماشي نامي

بس غمضت عيـوني غفيت، ماعرف شكد مر وقت وحسيت على الأشيب يكعد بيه
الأشيب: يلا حبيبي تأخرنا
- هزيت راسي بـ اي ورجعت غفيت دقايق وفزيت على عيطتة
الأشيب: ولـــــــج مورفـــــــو.!

-فتحت عيوني بسرعة وجاوبتة
::-كاعده كاعده

الأشيب: شوفي الساعه بيش

-باوعت ع ساعه جانت بـ3 واحنه موعدنه بـ3 طفرت من مكاني مخروعه
::-عزااااا هاي ليش ما كعدتنيييييي

الأشيب: من الـ2 اكعد وتكولين اي وكمت وكلشي ماكو

مورفو: عزاااا لااااا فَـدار راح موعدنه

الأشيب: البسي اي شي وخل نروح بعد وكت

ركضت للحمام مدري شلون غلست ولبست على السريع وطلعنا متوجهين للمركز ، الطريق كله أدردم وهو مطول خُلك وياية ، مرة يجاوبني وساعة ساكت واحسة يكول بكلبة "اللهم طولج ياروح" .. مِـنْ وصلنا المركز تكلمنا الولد الليّ موجود بالرسبشن وطلب مِـنْ عندنا ننتظر ، ما كان أحـد موجود غير بنت كاعدة بزاوية وبأيدها كتاب تقرأ بي .. وهذهِ التأخيرة والصدفة الحلوة عرفتني على ألطف شخص مُمكن أعرفة الليّ هــي "سارة" مِـنْ بعد ما طلبت مُساعدتها بمساعدتنا ولأن عرفت أختها مِـنْ ضمن مادر المركز وهي بكل رحابة صدر وبكل أحترام لبت طلبنا .. مِـنْ بعد ذيج الصدفة صار بيناتنا تواصل وشوية شوية صارت علاقتنا أقوى ، كنت حيـل فرحانة بيها لأنّ أني بالعادة ما أختلط وما أحجي مع أحد ، حتى علاقاتي بالجامعة سطحية ، لكـن سارة ورغُم أختلاف شخصياتنا كدرنا ننسجم مع بعض .. كانت مِـنْ النوع الليّ ترتاحلها بسُرعة وتاخذ راحتك بالكلام وياها ، بأختصار كانت مثل "النسمة" لأي شخص يعرفها ويتقرب منها .. صرنا نتكلم هواية وصرت أحجيلها شلون تعرفت على الأشيب وكيف عشت حياتي بالماضي بالمُقابل هي كانت متكتمة على حياتها كُـل الليّ تشاركنياه أشياء سطحية ، مِـنْ بعد فترة معرفة أشهر صارت علاقتنا أقوى وطرحت عليه فكرة أكتب قُصتنا
سارة: ليش مــا تكتبين قُصتج؟

مورفو: الناس عايشة ضيم اكبر من ضيمي منو بحالي ويقرة قصتي

سارة: الضيم الي عشتي هم مو قليل، فكري بيها

مورفو: ماعرف اكول لأشيبـي واشوف، بس وين اكتبها؟!

سارة: ع برنامج اسمه الواتباد تعرفينه؟!

مورفو: سامعه بي بس ماعندي منه

سارة: نزلي وشوفي

مورفو: خاف شي مو زين والأشيب يعلكني بـ البنكة؟!

سارة: قصدج اني مو زينه وانطيج اشياء مو زينه؟!

مورفو: سارونة الغامضة كلشي اتوقع منج

أخذت نصيبي مِـنْ الجواب الليّ يسكتني

مورفو: لا لا راح انزله والله بس علميني عليه لأن ما اعرف

سارة: نزلي وتعالي اعلمج

-نزلتة وعلمتني عليه ونطتني قصص قريتهن وبعدها اقتنعت بـ الفكرة وكلتلها
::-اكلج اقتنعت بـ كتابة قصتي

سارة: راح اشوفلج كاتبة اتواصلي وياها وتكتبها الج

مورفو: لا انتِ اكتبيها

سارة: راح اضلمها اني احس ما راح انطيها حقها

مورفو: ميخالف لو انتِ لو ماريد والله

سارة: تمام بس شوفي اشيبج شيكول

مورفو: تمام

-بعدها رحت احجي ويه الأشيب بـ خصوص القصه هز راسه بـ لا وكال
::-لا شيلي الفكرة من بالج

مورفو: عليييييييك الله حبااااب

الأشيب: لا بابا

مورفو: محد راح يعرفنه شوبي منخلي اسمائنه وسارونه تعرف كلشي عنه وماراح تحجي علينه شي

الأشيب: لا مورفو سدي الموضوع

مورفو: ليش ليش اريد اكتبها شبيك ويايه معاديني

-باوعلي خازرني وكال
::-انهي النقاش لا تصير مو حلوه

-گمت من يمه ضايجة وبقيت اسبوعين اني احجي ويا وهو مره يلبسني ما يرد عليه ومره يخزرني ومره يضحك عليه

-اخير مره كاعدين بـ الليل وسألتـه
::-ما الله هداك عليه فدعوسي؟!

الأشيب: لا

مورفو: بس راح تبقى بنفسي

الأشيب: ما تستاهل تبقى بنفسج مورفو، ما رافضلج طلب اني بس هذا انسي

-سكتت عنه مقهوره، ثاني يوم الصبح كعدت بلاعيمي ملتهبه وحرارتي مرتفعه، وهو كاعد يم راسي يسويلي كمادات ويباوعلي مقهور وكال
::-شلون صرتي يروحي

مورفو: زينه شوية

-وخر الكمادات عني وطبع بوسه ع راسي وكال
::-انقهرتي لان ما خليتج تكتبين قصه

-ما جان ع بالي اصلا بس استغليت الموقف وهزيت راسي بـ اي وجاوبته
::-شوف شلون وكفت غصه بزردومي

الأشيب: انعل ابو القصه لبو اصلها ولج بابا شنو قصه وتتمرضين من وراها

مورفو: من اموت انت اكتب قصتنه

الأشيب: عمت عيني والله اذا اخليها بنفسج

-حسيت فراشات طارن بكلبي بس صرت اتمسكن
::-ماريد اسوي شي انت ما تحبه

الأشيب: وضعج هذا الوحيد الي ما احبه، شتردين تسوين سوي بس لا تتمرضين

-سويت نفسي مسكينه وفقيرة هزيت راسي وحجيت بحزن
::-راح اكتبها لعد

-ضحك وكال
::-براحتج ينظر عيني

مُضت يومين أني مريضة وأخذت هواية علاجات يلا صرت أحسن شوية ، تكلمت مع سارة بخصوص كتابة القُصة وصرت أسردلها كُلشي صار بالتفصيل .. بعد أيام صارحت الأشيب وكيف أستغليت المَرض حتى يقبل أكتب قُصتنا ، هز أيده يدردم
الأشيب: مستغلتني مِـنْ راسي لجدمي
مورفو: وين أنطي وجهي لعد فدعــوس

-استقبلها بروح رياضية والوضع طبيعي، مرة من المرات كاعده ضايجة والأشيب كاعد كدامي لازم ايدي ويحجي ويايه
::-ليش ضايج طير الشوك

مورفو: مادري

الأشيب: وين اكو فراشة تضوج ها؟! هذا الجمال حرام يضوج يروحي

-بقى يتغزل ويشاقة ويايه يريد يضحكني واني روحي بـخشمي ماعرف شلون رفعت ايدي وضربتة راشدي بقوة وعطت
::-فدعوووووس ضايجة

-بقـى صافن عليه مصدوم لأن ضربته واني حسيت ع نفسي ابتسمت بـفشلة ومسحت ع خده بهدوء واحجي ويا احاول انسي
::-ياعمري انت توجع ضربتي

-هو ساكت ويباوعلي رجعت ابوس بخده وامسد عليه وصرت لوگية اصلية بس اريده ينطق لو يحجي شي بس هو مستمر صافن عليه

-بعد فترة لزم خده وكال متعجب
::-هاي ضربتيني؟!

مورفو: والعباس هاي ايدي مو اني

الأشيب: وايدج منو مسؤول عنها؟!

مورفو: مو اني مو اني متلبسها جني

-كام من يمي وكال
::-خوش مورفو اني راح ازعل يم امي وانتِ ابقي وحدج بـ البيت

-اني منا ضايجه ومنا فشلانه ومنا يريد يطلع ويعوفني وعيوني طك بيها شلال صرت ابجي واحجي
::-لعد اني وين ازعل اذا انت تزعل مني؟!

-من شافني ابجي من كل عقلي رجع عليه وكال
::-ليش تبجين يروحي هاي اني يمج ما زعلان

مورفو: تريد تروح ع امك وتعوفني واني وين ارووووووح

الأشيب: تجين للأشيب اني كل اهلج طير گلبي

مورفو: وخر عني مو مال شقه

-سحبني لـ حضنه وكال
::-اويلي اويلي الصلافه فوكهااا يعني ضاربتني راشدي وزعلانه وكاعده تبجي

مورفو: اي ضايجه مادري بنفسي

الأشيب: ضايجه مو شاخطة

هو يحجي واني ازيد بالبجي خبلتة لـما سكتت بس احس ارتاحيت ورجعت اضحك ولا كأنُ اكو شي وهو يباوعلي صفح ويهز بأيدة .. إجة يـوم الجمعة وصارت اللمة الحلوة ببيت نسرينو، واكيد لازم كلنا نجتمع يمها كاعدين الولد على جهة عمران وفَـدار وعزيز ومروان وزياف وروار و أحْنـا البنات على جهة .. مِـنْ صار وقت الأكل أجتمعنا كلنا مع بعض واللمة ما تخلى مِـنْ سوالفنا الحلوة والشقة والضحك ، تكلم عزيز موجه كلامة لمروان
عزيز: الحَمـدُ لله على السلامة

مروان: الله يسلمك ولو هي دكه ذولاك العالم النواقيص

زياف: احد كلك صير زوج

مروان: هي مرة العلمت ماضرت خمو اريد اعيدها

روار: ليش شكو؟!

زياف: عدنه متهم بـ المركز لزمو لزمة اليد متلبس بجريمة وما يقبل يعترف، طب مروان عليه شبعه كتل وطلع وما حجه ولا حرف واني واكف بـ الباب اباوع عليهم كلت لـ مروان
::-شد عيونه

مروان: ليـش؟!

زياف: هسه تعرف ليش

-دخل مروان شد عيونه وطلع ودخلتله اني خليته يبجي من الكتل وحجه كل مصايبة من بداياته للحظه الي لزمنا بيها، بعدها طلعت من يمه رحت جبتله اكل ودخلت عليه فتحت عيونه واحجي ويا بقهر
::-ولك شمسوين بيك هذوله

-جان بس يباوع وما يكدر يحجي، جبت مي غسلت وجهه وفتحت اديه وخليت الأكل كدامه وهو وكع جفت ع الأكل ياكل ويدعيلي
::-الله يوفقك سيدي الله يفتحها بوجهك

-صرت ملاك بعينه وهو ما يدري اني نفسي الي مشبعه كتل، وبيوم المحكمه نزع تشيرته كدام القاضي واشتكى ع مروان عباله هو الي يطب عليه يكتله

-ولأن الضرب ممنوع نتعاقب اذا احد اشتكى علينه حتلو مجرم، بس همه ما يعترفون الا هيج، تالي القاضي يعرفنة وطمطم السالفه وكال بعد لا تعيدونها

مروان: بربكم اني منها عليها لو متعاقب

الأشيب: انت هم ما تقصر وياهم، تتذكر من جنت تاخذهم ابيتك تطلع حليب امهم من خشمهم يلا تاخذهم للمركز

مروان: ما اخذ بس مغتصبين الأطفال

روار: شسوي بيهم

مروان: اغتصبهم

-نتر بي عمران
::-لسانك ابن الخوش ادمي

-باوع علينه رفع اديه وكال
::-اعذرونه يابه كل احنه حبايب ان شاء الله مابيناتنه عيب

مورفو: عادي عادي كلنه خوات

الأشيب: قصدها كلنه اخوة خانها التعبير

-حجاها بطريقه من كل عقلة يبرر جفصتي والولد انفجرو من الضحك ومروان يكول لـ زياف
::-كوم اندك شواربنه صفر

زياف: ادك شواربك بنعال

مروان: هو العار اصفر احمر

زياف: لا اسمه مروان

وطول كعدتنا همه هيج و أحْنـا نضحك على سوالفهم ، ورة ما خلصت الهوسك تطشرو كلمن لبيتة ، واني شلت شمشوم بـحضني متكلمة مع قَـبس
مورفو: أكُلج أنطيناه اليوم

قَـبس: خاف يضوجكم

مورفو: خاف احنه نضوجة

قَـبس: كيفج اخذي بس اني ما مسؤولة على الغاح يصيغ

مورفو: عادي عادي اذا صار شي أشيبي يلزمه من رجله ويشمره عليكم عود تلكو

قَـبس: خل احضغلج جنطتة لعد

مورفو: تمام

أخذتة ورحت كعدت بجانب الأشيب الليّ كاعد بالصالة يم خالة نسرين
مورفو: راح يروح ويانة شمشوم

الأشيب: ودراستج؟!

مورفو: لو تفيد جان فادت اهل الگبور

نسرينو: فادتهم بالدنيا يُمة

الأشيب: مرمرت كلبي جنتج يمة

مورفو: شو نزلك دمعتين بعد، شمسويتلك

الأشيب: تحسسيني موجهج ع ساحه الاعدام من اكلج امشي ادرسي

مورفو: منو الي طلع الثالث ع دفعته بـ المرحله الاولى والـ7 بالمرحله الثانية؟!

الأشيب: أنتِ

مورفو: شتريد بعد؟!

الأشيب: وهاي السنه راح تطلعين الاولى بس من الأخير من كد ما ضاربه الوضع چلاق

مورفو: تعبت نفسيتي، والله اهج منك

الأشيب: وين تروحين من يتحمل خبالاتج

مورفو: نسرينو حبيبي تتحملني، مو يمة؟!

نسرينو: اكيد يمة شعندي غيرج

-باوعت ع الأشيب مبتسمه بـ انتصار وارفعله بحواجبي ضحك وهز ايده، لـما اجت قَـبس جايبة اغراض شمشوم وتمشي ورانه وتوصي سوي هيج ونطي هيج ولا تسوين هيج لـما صعدنه السيارة باوعلها الأشيب وكال
::-شو اخذي ابنج ما نريده بطلنه

قَـبس: لا لا اخذو بس غير اوصيها

مورفو: السوالف الحجيتيهن دزيهن برسايل لان ما استوعبتهن كلهن

-ضحك الأشيب وكال لـ قَـبس
::-الله عوضج بـ مشمشه مقدماً

قَـبس: ابو يمـان عينك عليه فدوة شو خوفتني من هاي الملونة

مورفو: امشي لج ليش تخليني اتجاوز عليج

رفعت ايد شمشوم هو يضحك فرحان على السيارة وسويتلها بيباي، كان عمر شمشوم سنتين ويفتهم كُلشي ولأن متعود مرات يقضي أغلب نهارة يمنا ما يضوج مِـنْ يجينا .. العصرية كلها نلعب اني وياه والأشيب هم يلاعبة وهو مستانس علينا ، فجأة كام ينوص مانعرف شبي واني مخليتة بـحضني واحجي وياه
مورفو: شمشوم حبيبي تريد عميات؟

يهز راسة بلا وينوص وبقيت احجي وياه تريد هيج لا تريد هيج لا وشايلتة وافتر بالبيت وانطي اشياء ويدفعهن ما يريدهن ، زهكت وتلفت أعصابي ما أعرفة شيريد ، شمرتة على الأشيب
مورفو: حيّر بي خبلني

الأشيب: اني كتلج جيبي

مورفو: مدري شبي بس ينوص راح ابجي وتر اعصابي والله

-سكت الأشيب ثواني وكال
::-هذا طالعه ريحته

مورفو: تشاااااااقة

الأشيب: الريحة سابع جار يشمها شلون ما حسيتي

مورفو: كوم رجعه لأمه شسويله اني

الأشيب: خطية غسليله انتِ

مورفو: لا عفية ماعرف والله خاف يصير بي شي

الأشيب: ولج شيصير بي يعني ترا جبير هو

مورفو: زين غسله انت ماتعرف؟!

الأشيب: منو كلج جنت اشتغل بحضانه اطفال

مورفو: مو جان عندك طفل بعمره

الأشيب: اي بس امه حايره بي مو اني

مورفو: ما معقولة ما غسلتله مرة كدامك

الأشيب: تاخذه وتروح للحمام شمدريني شسوي

مورفو: زين كوم ناخذه اني وياك ونروح للحمام ونسوف شلون تصفى

-شالة وكام ويايه، كل هذا وهو ما سكت بس ينوص، دخلنه للحمام ولعبنه بحاله طوبة يلا غسلناله وراها نيمته بـ الغرفه وطلعت شمرت نفسي ع الكرويتة كال الأشيب
::-حتـى ما تكولين اريد طفل بعد

مورفو: التوووووبة بعد ما صار نص نهار تعبت

الأشيب: هو احنه نرجع نعيش يم امي اذا اجاج طفل

مورفو: اي والله لو نجيبها يمنه

-لليل يلا كعد شمشوم وبين لعب واكل وضاج من عدنه وراها وكام يبجي يريد امه وفَـدار شايلة ويفتر بالبيت يسكت بي واني امشي وراهم شايله من جهه ملاعيب ومن جهه اكل وهو قفل ماما وماما

مورفو: شوف شمشوم حبيبي والله اني هم ماما وحلوة والعب وياك وهذا عمو فدعوس شايلك بعد شتريد

شمشوم: ماماااا

الأشيب: علمي علمي للطفل من هسه عمك فدعوس

مورفو: قصدي شوف هذا عمك فَـدار الغدار

-باوعلي صفح وبقى يفتر بـ شمشوم واخذه وطلع للحديقة شوية ورجع كال
::-حارة وهذا ساكت ع الحر

مورفو: رجعه لأمه منريده

الأشيب: امشي البسي شي بسرعه وجيبي اغراضه وتعالي نرجعة

-طفرت للغرفة لميت اغراضه وطلعت وراهم بعدنه بـ الطريق وكال
::-اتصلي ع اهله خل يطلعون ياخذونه

-اتصلت ع قَـبس ماردت اتصلت ع عزيز جاوبني ومبين جان نايم
::-ها مورفو

مورفو: اطلعولنه بـ الباب جبنالكم ابنكم

عزيز: هههههه ليش شبي

مورفو: يدور ع امه مدري اشايف منها

الأشيب: امه ترا شلوووون يعني

مورفو: شبيه اني وما يريدني خل يعتبرني امه

سمعت عزيز يضحك بعدها أعطاني خبر راح يطلع بالباب وغلقة ، أنداريت على الأشيب خازرتة ، كان مخلي شمشوم بحُضنة ويضحك
الأشيب: شكو تخزرين؟

مورفو: خمو بس انت تخرز لعد

-هز راسه يستغفر ويحجي ويه شمشوم
::-شوف عمك شلون عايش بالضيم

مورفو: انكسر كلبي عليك

الأشيب: اويلي صدك لو كالو الفقير ما يعيش

مورفو: بس انت عايش حبيبي

الأشيب: غير بـ الضيم

مورفو: بسيطه فَـدار اشوفك الضيـم شلون يصير

-بقينه متناكرين لـما وصلنه بيت نسرينو ونزل الأشيب ع عزيز واكف ينتضرنه بـ الباب وشمشوم بس شاف ابو عبالك عيد عنده طفر من حضن الأشيب ع عزيز هز ايده الأشيب وكال
::-ماخذينك للحرب ابن الكـو**

عزيز: رحم الله والديك

-سحب الجنطه مني نطاها لـ عزيز وكال
::-هاك هاك هو هم طالع عليك

بقـى عزيز يضحك ، ودعناه ورجعنا لبيتنا ، راح الأشيب يسوي نركيلة وأني لحكتة وكفت بجانبة
مورفو: وين المزة؟!

الأشيب: بطل العرك وين؟!

مورفو: يااااااا نسينه ما اخذنه من عزيز

الأشيب: هههههههههه الله يطيح صبغج

مورفو: زين لو سمحت ممكن كم نفس وياك

الأشيب: لا

مورفو: الله ما يحب البخيل فدعوس

الأشيب: اني وربي نتصافى ماعليج بينا

مورفو: خوش بسيطة فدعوس

-انداريت اريد اطلع سحبني من ايدي لحضنه مبتسم وكال
::-صايرة تهددين هوايه

مورفو: اي داعاملك بـ المثل منا وهيج

الأشيب: وشراح تسوين؟!

مورفو: انتَ متقبل تنطيني كم نفس من النركيله وتعرفني اني احبها، اني هم راح احرمك من اشياء تحبها

دنك راسة مقبل شفايفي بهدوء وأبتعد متسائل
الأشيب: اني احب هذن تكدرين تحرميني منهن؟!

مورفو: اي

-رجع طبع بوسه ثانية وكال
::-يلا احرميني

مورفو: مقابل كل بوسة نفس شتكول؟!

-طبع بوسه ثالثة وكال
::-متفقين

مورفو: هاي صارن 3 عليك

الأشيب: واذا انطيج النركيلة كلها الج شنو المقابل؟!

مورفو: اخذها واشرد بـ الغرفه ومتحصل شي

-انفجر من الضحك وابتعد عني يكمل وكال
::-منا لهنا خلفت بالاتفاق

مورفو: الدنيا للقوي والذكي حبيبي

-بقـى يضحك وكمل النركيلة واني اخذت حبشكلات وكعدنه بـ الصالة واني كل شوية اسوي نفسي احجي ويا بموضوع مهم واسحبها من ايده اخذ نفس وارجعها والأشيب مغلس

-مرة من المرات جنت داقره قصه ((ضغن الهرماس)) وشفت عبارة بيها مكتوب
::-الأسلام بدون حجاب مثل الصلاة بدون وضوء

وكفت عند هذهِ الجُملة ما أعرف ليش هلكد أثرت بيه .. هو ما كان يقارن وأنما يُشبه "شنو فائدة صلاتك وركوعك وسجودك وأنتَ بدون وضوء؟ راح تنقبل؟ أكيـــد لا ، والحُجاب كذلك أحـد فروض الإسلام الواجبة كيف أني مُسلمة وما ملتزمة بفروضي؟" .. كثير فكرت وتعمقت بهذهِ الجُملة الليّ غيرت تفكيري 180 درجة ، مِـنْ لحظتها قررت أتحجب وبنفس اللحظة أخذت شال أسود ورحت كعدت بجانب الأشيب متكلمة بدون مُقدمات أو تمهيدات
مورفو: أريــــد أتحجب

الأشيب: المرة الألف اسمع هاي الحجاية

مورفو: لا والله هل مره من صدك وعن قناعة هم

الأشيب: شنو الغير رأيج؟!

-حجيتله ع الكلام الي قريتة ابتسم وباوع للشال الي بيدي وكال
::-مُــنى حياتي هاي اللحظه

-ابتسمت وهو سحب الشال من ايدي لبسنيا شلون ما جان واني اضحك مستانسه حضن وجهي بين كفوف اديه طبع بوسه ع راسي وكال
::-گمـــر لابــس ليــل

-بقـى فترة طويلة يشرحلي ع الحجاب وقصص وروايات لـما صدك اقتنعت اقتناع تام بي وجنت حيل فرحانه، والأشيب جان عنده دفتر صغير يكتب بي التواريخ المميزة طلب مني اجيبه اله

-گمت جبتة اله وكعدت يمه اريد اشوف شيكتب ابتسمت من شفته كتب تاريخ اليوم الي تحجبت بي
::-أحَـب تاريخ لـ قلبي بعد مُــلتقاك (2023/7/11)

مورفو: لـهل درجة جنت حابني اتحجب

الأشيب: فوك ما تتصورين بس جنت انتظر هذا اليوم الي تجيني وتكولين راح اتحجب وبكامل قناعتج

-فرحتـي بـ الحجاب جانت ما تنوصف واحس بنفسي مسوية فد انجاز كلش عظيم وهو فعلاً عظيم من تعرف طريق الهدايا الصح والف الحمدلله

-"الحمد لله حبّاً، والحمد لله شكراً، والحمد لله يوماً وشهراً، والحمد لله عُمراً، والحمد لله في السرّاء والضراء، والحمد لله على ما قسمه الله لنا".

وهيج مُضت أيامنا تحت رحمة الرحمٰن .. بعد فترة اتصلت على سيماف جاوبتني وواضح على صوتها كانت تبجي
مورفو: شبيج سيماف

سيماف: مابيه شي بس زياف عاضته حيه

مورفو: حيه لو انتِ؟!

سيماف: انجبي مو وكتج ترا صدك

مورفو: وين لكته الحيه؟!

سيماف: طلع الصبح للبستان ويه اصدقائه ودايس عليها وعاضته

مورفو: وهسه وينه؟! شلون صار

سيماف: ماخذنه للمستشفى يكول زين بس لازم يبقى تحت المراقبة منا الباجر

مورفو: يلا ان شاء الله مابي شي

سيماف: ان شاء الله

بُقينا فترة نحجي وحاولت أغير مزاجها وأهوّن عليها ، بس غلقتة منها أتصلت على الأشيب الليّ كان بالدوام ، ما تأخـر وجاوبني بعد السلام سألني أذا محتاجة شي وكنت بحاجة السؤال عن زياف
مورفو: ردت أسألك على زياف كالت سيماف عاضتة حية

الأشيب: اي مابي شي زين لحد هسه

مورفو: رحت عليه لو لا؟!

الأشيب: اي رحت ورجعت ومروان باقي يمه

مورفو: شوكت ترجع انتَ؟!

الأشيب: هل يومين ان شاء الله

بعد حديث طويل وياه وكلام وغزل زاد طاقة روحي وكلبي ودعتة وبُقيت طول النهار ملتهية مع الأطفال ببيت خالة نسرين .. إجت تبارك كعدت يمنا تباوع لمشمشة بزعل
مورفو: شبيج تبارك؟

تبارك: مشمشه وكيحه وما تسمع الكلام

مشمشه: No No

تبارك: بلي وتصيحين ع ماما وقت الأكل واني زعلت منج

-بقت مشمشه تخزر بـ تبارك وتبارك تجاهلتها وهاي طريقه تعاملها وياهم تندمهم ع تصرفاتهم الغلط حتى بعد ما يعيدونها

مُضت مُدة زمنية مو قليلة ونهضت مشمشة تاركة ملاعيبها على الأرض ووكفت مقابيل تبارك تحجي وياها وتتودد إلها بس تبارك متجاهلتها ، مشمشة تلزم وجه تبارك تميلة في سبيل تباوعلة وتحجي وياها لكن تبارك كانت قافلة وبُقت متجاهلة مشمشة لما أنقهرت وصارت تبجي

-حضنتها تبارك وكالت
::-بعد نزعل ماما؟!

-هزت راسها مشمشه بـ لا رجعت كالت تبارك
::-بعد نصيح ع الاكل؟!

هم هزت راسها بـ لا بقت تبارك تحجي وياها وتعلم بيها كيف تحترم النعمة اولاً وتحترم أمها وما ترفع صوتها عليها ومشمشة تستمع وتهز راسة بأيجابية وتحلف لتبارك ما تصيح على أمها بعد ، تصالحن بعد هذا الحديث وكعدت تبارك تلعبهم لـ شمشوم ومشمشة و نـوح أخوها لتبارك أصغر طفل بالعائلة

-بـ الليل سويت اكل وكعدت اكل بـ المطبخ، دخل روار للبيت جان ستوه راجع كعد كدامي وسحب الماعون من كدامي وكال
::-صايرة شكبرج دبطلي اكل

مورفو: كول اريد اخذ اكلاتج لا تكول شكبرج

روار: ما يحتاج اكول هو انتِ فهمتيها

مورفو: شوكتت تتزوج اريد عرس

روار: زوجي الأشيب ويصير عدكم يوميه عرس

مورفو: بس انتَ عزابي فضها عاد

روار: لـما تتخرج

مورفو: هي منو خبصتني بيها

روار: بنية غير

مورفو: تتشاقه مو؟!

روار: لا والله هي وياج مرحله ثالثه بس تحليلات مو تخدير وصار سنه اني وياها كل ما اكللها شوكت تكول خل اتخرج واني كاعد وساكت

مورفو: خوب انخطبو وابقو لما تتخرج

روار: تكول اهلي ما ينطوني هسه

مورفو: يمااااا خاف تضحك عليك

روار: مستغلتني لان فقير مو؟!

مورفو: اي عــــــزة.!

روار: ورة محرم اروح اخطب الي قبلو قبلو والي ما قبلو اخذ منهم كلمه ورة ما تتخرج هي الي واذا طردوني بعد مادري

مورفو: أنهد عليهم

روار: همج انتِ

مورفو: لاااااا مااااا اسكت

روار: ادعيلي يقبلون

مورفو: راح ندعيلك اني وفراشاتي ولو ما اضمنهن يدعلك

-عكد حاجبه وكال
::-منو هذن

مورفو: جنياتي قصدي

هز أيدة وسكت ما علق ولا حاول يستفسر، ثاني يوم طلع زياف من المستشفى بس رجلة مورمة وما يكدر يمشي عليها لازم يستخدم عكازة يلا، واخذ اجازة وكعد بالبيت ، مِـنْ إجة الأشيب من الدوام بالليل رحنالهم حتـى نشوفة ، بعد سلام طويل وحار اني وسيماف والبقية كعدنا كلنا بالصالة كال زياف لـ فَـدار
زياف: دير بالك على نفسك يَـاخوية صارن ما يتأمنن هذن النسوان

الأشيب: اني مثل الدولفين صاير انام فاتح تك عين

زياف: شتسوي يَـاخوية الروح غالية

مورفو: راح ابجي عليكم

سيماف: هو شنو الي يتزوج حيه؟!

مورفو: العربيد

سيماف: يعني انتو هم تلدغون واويلي من لدغاتكم

زياف: تموتن ع لدغاتنه

-بقينه مفهين ما فهمنه قصده الا من ضربه الأشيب بالكوشة ونتر بي
::-مو نكول لا تجفص كدامهن

زياف: شسوي طلعت بعد

-بقينه اني وسيماف وحده صافنه بوجهه الخ تالي كامت سيماف للمطبخ واني وراها اول ما دخلت انفجرت من الضحك وكالت
::-عزاااااا طمسني بثيابي

مورفو: زوجج بايع المستحى

سيماف: اذا مصاحب مروان شيطلع مثلا سيد

مورفو: ورده صايره اضرب من مروان متعلمه منه

جهزنا أشياء خفيفة للكعدة لأن دائماً كعداتنا يمهم تطول كلش هواي .. هُمَ كاعـدين بجهة و أحْنـا بجهة ، روجــدا وروجيـن يلعبن يمنا بهدوء ، صحت على روجين الصغيرة
مورفو: أحبـج أم زلوف
روجين: حَبج بابا
مورفو: إلا محبة أبوج ما أريدها

-تأخر الوقت بـ الليل واحنه يمهم من كمنه نريد نطلع الأشيب طلع 5الاف من جيبة وخلاها بـ كلينكس ودنك سحب ايد زياف خلاها بيده وكال
::-اعذرنه من التقصير

زياف: عمي جيتكم كاااافية والله ما اخذ شي

الأشيب: والله ماترجع ابد

زياف: لا تفشلني بروح الحسين

الأشيب: بروح الحسين الا تاخذها

-اخذها زياف وكال
::-يلا ماتزود بيها جيس حفاظات

-اني وسيماف متنه من الضحك عليهم وع تصرفاتهم وشلون عايشين الدور، بعدها نريد نطلع وكال الأشيب لـ زياف
::-باجر اجيبلك قنفذ

زياف: اي والله تسوي فضل

سيماف: ديلا عيني يلا عود بسمار هذا

زياف: دانحجي بالخط العريض ونكول انتن حياية يا بسمار بعد

سيماف: حيه وكطعت نفسك عليها

زياف: ولچ سيماف بلشنا معاير؟

-ضحك الأشيب وكال
::-هاي شنو اول وتالي تطلعون ورانه للباب وتتعاركون بدل ما تضحكون

زياف: عمي الزم مرتك عن مرتي طلعت عينها

مورفو: جاهل هي جاهل واطلع عينها اني

زياف: لعد شكو مرتي جانت فقيرة

مورفو: بالوجه امرآيه وبالگفا سلاية

سيماف: هاي شبيج غير تفزعيلي

-سحبني الأشيب وكال لـ سيماف
::-حلو مشاكلكم بيناتكم احنه ماعلينه

صعدنا سيارتنا نضحك وهمه واحد يخزر بالثاني، وزياف بعدها رجلة مورمة بس احسن الحَمـدُ لله ، وبيوم جُمعة كان لازم ننجمع مثل كُـل الأسابيع الليّ مُضت .. كاعـد زياف ماد رجلة المورمة كدامة والبقية مندمجين مع بعض والكَل شبع تصنيف مِـنْ مروان خصوصاً زياف
عزيز: تعيش وتاكل غيرها بس في الوقت
مورفو: عزيز دير بالك من غبس

قَـبس: هم دخلت قَـبس بالموضوع شمسويتله اني ويديغ باله مني

مورفو: مو انتِ هم حيه

عزيز: هاي حيه أليـفة

قَـبس: عزيز تغيد تكحلها نوبة عميتها

مروان: هاي المصايب كلها من جوة راس الحية الجبيرة

روار: عمي سموها طير المصايب مو طير الشوك

عمران: البلبل الفتان يفتن ع الرايح والجاي

-انداريت ع الأشيب بسرعه وباوعتله بنضرات عود يحجون عليه وانت ساكت ضحك وكال
::-ونسة البيت هاي تروحولها فدوة

مروان: خوب نروح فدوة لنسوانه ليش دانروح للجزر

نسرينو: هاي ونسه بيتنه لا تحجون عليها

ورده: استغفر الله استغفر الله ولج تبااااااااارك ما فك الحصار عن لساني

تبارك: ميصير تصيحين خالة شلون نميزج عن عمو مروان بعد

نطقت كلامها بهدوء يجبرنا ننفجر مِـنْ الضحك على صدمة وفشلة وردة .. وهيج كانت كُـل لَمة مليانة بسوالفنا الحلوة وضحكاتنا الليّ ما تفارق وجوهنا ، مهما كان المزح بيناتنا ثگيل بس أبد محد يزعل مِـنْ الثانــي لأن نعرف نوايا وصفاء قلوب كُـل الليّ موجودين ..
وبعـد أيام وأشهر مُضت بين عسُر ويسُر ، بين فرح وحزن ، بين هدوء ومشاكل كان عنــــــــدي مُراجعة لِـدكتورة نسائية لأن أعاني مِـنْ بعض الخربطات الهرمونية الليّ مأثرة سلباً عليَّ ، طلبت مني أسوي تحليل قبل أيّ أجراء مُمكن تاخذة ، بس الليّ صار كان غيــر متوقع وصدمة إليّ ولخالة نسرين الليّ كانت معاي ، بعد ما أخذنه التحاليل ورجعنا للدكتورة أول ما قرتهن أبتسمت ، رُفعت راسها عليَّ وجهها مبتهج
الدكتورة: ألــف مبروك حبيبيتي أنتِ حامـــل

صُفنت بوجها مِـنْ صدمي هذا كان أخر خبر متوقعة أسمعة ، لا أرادياً خليت أيدي على بطني حسيتة راح يوكع وتسائلت بتأكيد
مورفو: صـدك والله؟ أنتِ متأكـــدة.!
- أكدتلي موضوع الحمل ومن الصدمة والفرحة ما عرفت شسوي وشتصرف ، حضنت راسي خالة نسرين تبجي وتبوس بية وكان الموقف مليان بالمشاعر الحلوة .. بعد عِدة أجراءات وتوصيات طلعنا من يم الدكتور حتى نرجع للبيت بس ما تحملت ودزيت مسج لأشيبي مبلغتة بالخبر ولأن أحْنـا متفقين ماكو أطفال إلا بعد تخرجي ما صدكني وتوقع مقلب ، أتصل مُباشرةً مِـنْ حلفت الموضوع حقيقي وكان صوتة متغيّر وكأنُ خانگتة العبرة
الأشيب: مورفو بروح أبوج أذا مقلب كولي
مورفو: والله مو مقلب فَـدار ، شوف صورة التحاليل الليّ دزيتها إلك
- دزيتلة الصور وبُقيت أنتظر ردة فعلة ، بس صدمني مِـنْ تكلم مخبوص
الأشيب: يــلا روحـي بعدين نحجي
مورفو: وين؟
الأشيب: مسافة الطريق أنــي يمج

غلقة بدون ما ينطيني مجال أتفاهم وياه وأعرف شكد جيتة صعبة بهذهِ الليل لكـن ما كدرت أمنعة ، بُقيت كاعدة بالصالة والدموع متجمعة بعيني مِـنْ الفرح ، خالة سهاد ونسرين ما نشفت دموعهن عبالك كُنا محرومين سنين وهسه صار عندنا ولا كأنُ كان القرار بأيدنا ونحن الليّ ما رايدين بالوقت الحـالي .. روار أول واحـد مِـنْ الولد يعرف لأن كان ويانة وفرحتة ما تنوصف تحسه أول مرة يصير عـم وطول الطريق يحجي بنفس الحجاية
روار: مورفو نريد ملونين مثلج حَسني الأنتاج
مورفو: هسه أسوي شُبيك لُبيك ويطلع ملون

صعب أوصف مشاعرنا بهذا اليوم ، بس الفرح والسعادة كانت غامرة قلوبنا كُلنا ، بعد فترة نص ساعة تقريباً سمعت صوت سيارة الأشيب كُلها أستغربت جيتة
سُهاد: هذا مو الأشيب لو سمعي بي شي؟
مورفو: أي أي إجــة يشوفني

طلعت أركض وأسمع أصوات ضحكهم وراية ، ما أهتمت وأول ما فتحت باب المُطبخ هو كان داخـل مِـنْ الباب الخارجي يمشي بخطوات سريعة ولأول مرة ما يكلي لا تركضين تحسه بس يريد يوصلني ، بس صرت قريبة منه لَمني بحُضنة رافعني عن الأرض شادني لكلبة بقوة ، عبرلي عن فرحتة بهذا الحُضن المليان حُب ولهفة ومشاعر .. أبتعد عني و كُـل ملامحة مبتهجة ، مسد بأطراف أصابعة على بطني بهدوء وضحك
الأشيب: روحـي أنتو والله روحــــي
مورفو: ما ضجت؟
الأشيب: يا ضوجة مورفو والله وروح أبني الفرحة الليّ بكلبي كلمات الدنيا ما توصفها

طول هذه الفترة أحْنـا مأجلين موضوع لأطفال علمود دراستي بس مِـنْ شفت فرحتة ولهفتة على الطفل تمنيت لو زمان معيشتة هذا الشعور .. بُقى حاير شنو يتكلم وشنو يتصرف ، سحبني مخليني كدامة ومنطي ظهرة للبيت حتى يغطيني عن أنظارهم بضخامتة ، صار يناثر بوساتة على وجهي وبعد كُـل بوسة كلمة غزل تخلي روحي ترفرف فـرح
الأشيب: بنياتي الحلوات يفداجن بروحة الأشيب
مورفو: منو كال بنية؟
الأشيب: ما أعرف بس أُمنية كلبي هذه بنية نُسخة منج

ضحكت بفرح وضميت وجهي بحُضنة ، بُقى محتويني لما أبتعدت وهو صار يعدل بحجابي يتكلم بحنية
الأشيب: يلا أدخلي جوة حبيبي وأنتبهي لنفسج ماكو ركض وتطفر مِـنْ الدرج ، وأكلي زين لأن صار بداخلج روح وهذهِ أمانة عندج
مورفو: ما راح تبقى؟
الأشيب: لا لازم أرجـع للدوام ، إجيت أشوفج

ما كدرت إلح عليه رغم شكد كنت أتمنى يبقى ، بس طلبت منه يدخل يسلم على أهلة لأن عرفوا بي إجة .. ما أعترض ودخل سلم عليهم والكُل باركلة وخالة نسرين حضنتة وصارت تبجي مرة ثانية مِـنْ فرحتها ، صار يقبل براسها وأديها
الأشيب: لا تبجين عزيزة روحي
نسرين: الحَمـدُ لله الليّ أعطاني عُمر أشوف أطفالك
الأشيب: وراح تهتمين بيهم وتكبريهم وتزوجيهم أن شاء الله
مورفو: ما أزوج فروخي أنـي
سُهاد: بعدة عقلج عقل فرخة منا لما تكبرين نرد عليج

خلتني أتصفن ما أعرف شرد عليها وروار أنفجر مِـنْ الضحك متشمت بيه .. بعدها أترخص منهم الأشيب حتى يرجع لدوامة ومن طلبوا منه يبقى وضحلهم إجة يشوفني ويرجع ما يكدر يبقى وسُهاد كانت حالفة تفشلنا كلنا بهذا اليوم
سُهاد: فضحتنا يا يُمة جاي مناك لهنا حتى تحضن هل بُرتقالية وترجع
- ضحك الأشيب وكرصني مِـنْ خديّ
الأشيب: شعندي غيــرها خالة

ودعهم وطلع وأني وياه وهو أمطرني بالتوصيات الليّ ما تخلص ، رجع لدوامة وأنـي بُقيت يم أهلة لما رجـع ، مُضت أول أيام سلامات بس مِـنْ شهر الرابع صار عندي بعض العرقلات بحملي وأنجبرت أبقى نايمة على ظهري ، تعبت بهذه الفترة حيــل لأن دوام مرحلة أخيرة وحمل بنفس الوقت ، كدر أشيبي يدبرها إلـي ويخلي روحتي للجامعة بس وقت الأمتحانات .. بهذا الشهر عرفنا جنس الطفل وكانت "بنيــــــة" .. طلعت مِـنْ يم الدكتورة كلبي يرفرف بس أريد أشوف الأشيب الليّ واكف برة ينتظرني ، لأن العيادة كانت مُزدحمة بالناس ماكدرت أعبر عن فرحتي بهذهِ اللحظة ، وكفت مقابيل الأشيب وأحس أريد أدخل بي مِـنْ قُربي وأصيح بهمس متجنبة أحـــد يسمعني
مورفو: راح تجــي بنتي فدعوس ، طلعت بنية
- بُقى بس يضحك ما يعرف يعبر عن شعوره وفرحتة
الأشيب: هنيالــي ببنياتي الحلوات
- مِـنْ صعدنا السيارة سحب أيدي مقبلها منتعش
الأشيب: أحس ربنا راضي علىٰ الشخص الليّ يرزقة بنات
مورفو: وأنتَ صار عندك بنات أثنين
الأشيب: الف الحَمـدُ لله

رجعنا لبيت أهلة وبشرناهم بالخبر ، خالة سُهاد صارت تهلل بينما خالة نسرين دمعت عيونها وصاحت بفرحة
نسرين: صلاوات على محمد راح تجي فراشة فَـدار
- أختفت ضحكتي مِـنْ سمعت أخير كلمتين "فراشة فَـدار" وبدون وعيّ مني عطت
مورفو: منو هذه فراشة فَـدار؟ لعد أنـي شنو؟! هاي أنتِ أمي وحاسبتني بنتج تالي ما تالي بس وصلت للصدك بعتيني وصرتي تحبين حفيدتج؟ وتعتبرينها هي فراشة أبنج؟ لعد وانــي يُمة.!

صرت أخبط ماي ودهن وهي تضحك ، حضني الأشيب مِـنْ أكتافي متكلم بصوت هامس
الأشيب: أنتِ فراشتي وبنياتي الأصل لا تضوجين

وبقىٰ يقنع بيه لما أقتنعت وتقبلت الفكرة .. روار مِـنْ سمع بالخبر ضحك وضرب كتف الأشيب بقوة تحسه متشمت بي
روار: الله يعينك خوية جنت بوحدة صرت بأثنين
الأشيب: البلاوي الحلوة هذه

وأحلى بلوة لأحلى وأحن أب بالدنيا .. عدت الأيام والأشهر وكل ما يقترب موعد الولادة يزيد خوفي وتوتري أكثر .. واجهت كثير كثير مشاكل بالأشهر الأخيرة مِـنْ الحمل ومحد كان يطمني على حالة بنتي الكــل كان يخوفني ويكول صحتها مو تمام ، رغُم إلتزامي بكل التعليمات والأدوية والأمور الواجب أنُ أتبعها .. لحـد ما إجة موعد ولادتـي ولأن صحة الجنين مو زينة كان لازم عملية قيصيرية .. مــــــــاتت بعد ما قضت ثلاث أيام بالخُدج بسبب عدم أكتمال رئاتها وبموتتها طُفت فرحة 9 أشهر .! خلال هذه الثلاث أيام اني ما شفتها و أول مرة يسمحولي أخليها بحُضني "كانت ميتة" وكانت المرة الأولى والأخيــــــرة .. كسرة كبيرة وموجعة إليّ وللأشيب ورغم حزنة وأنكسارة كان يحاول يهون فجعتي عليها
الأشيب: لا تأذين نفسج مورفو دام أنتِ بخير وصحتج تمام هاهي الحَمـدُ لله على كُـل حال

بس الأمــر ما كان بهذهِ السهولة ، عشت أيام وأسابيع وأشهر منطوية على نفسي عايشة حزني على بنتي ، كسرة الأشيب أضعاف كسرتي مِـنْ جهة هذه ثانية مرة يفقد أحد أطفالة ومن جهة روحة مفرفحة عليَّ بسبب الحزن المخيم على كلبي وروحي .. عَدت أيامنا وبفضل ربنا كدرت أتعايش مع الوضع وأحاول أرجع طبيعية أذا مو لخاطري لخاطر فَـدار الليّ باد حيلة علينا .. ليل ونهار أني أحمد ربي وأشُكره على البلاء قبل النِعَم ، إمـا الأشيب كُـل ما أحاول أني أهوّن عليه وأكلة ربنا راح يعوضنا يجاوبني نفس الجواب
الأشيب: أستحي أطلب مِـنْ ربي عَوض وهو معوضني بيج

مسدت على شواربة مبتسمة وكلبي يرفرف سعادة بكلامة
مورفو: ليش أنــي؟
الأشيب: ليـــــش أنتِ؟ لأن كلبج شايل حنية الدنيا ، لأن أنتِ وطن الأشيب بهيئة شخص ، حُضنج بيتي الليّ يحتويني بعد كُـل تعب ، أنتِ مأمني وسعادتي وملجأي وملاذي ، أنتِ الليّ ماخذة دور كُـل النساء بحياتي أذا أحتاجيت أم ، أخت ، زوجة ، حبيبة ، بنية كلهن أنتِ .. أنسانة قوية بطريقة مُختلفة مواجهة قساوة الدنيا بنقاء كلبها ، ليش أنتِ لأن أنتِ كُـل الدنيا عندي مرايــف ، ما كنتِ البدايـة بس أنتِ النهاية والخاتمة لكلبي ..

-ولهنـا نغلق باب قصة الأشيب

"أستودعكُم الله الــذي لا تَضيع وَدائعهُ"

• حسابي أنستا itsara.kh
• حساب مورفو its.morf0
• قناة التليكرام itsara105

- نلتقيكم بأبداع جَـديد في رواية "خلخال الغَجـر"