رواية الاطلس "دمليج أسود" الفصل الثامن 8 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

الليل وأنت عَـلي چــا ويــن المروة
خلوها واحــد يجي لــوو انـتَ لــوو هــوه 🤎.

• ━━━━━━❪♣❫━━━━━━ •

ميلة راسي على جامة السيارة والافكار تعصف ذهني، ماعرف تهورت لو سويت الصح.. عقلي يكول سويتي الصح بس گلبي ميكول هيج خربت كل شغلي بلحظة عصبية..

نبهني السايق من سفط بداية الفرع اشرتله على البيت وسفط ببابه، انطيته الاجرة ونزلت اجر خيبتي ورايه.. اول ما فتت للبيت كفخ خشمي ريحة اكل ونانا تصيح بصوت مسموع..

-هاي انتِ مرايم؟؟

دخلت عليهه للمطبخ ابتسمت من شافتني وكالت..

-اليوم تأخرتي حبيبتي شعجب

-اي مو چان عدنه لود

-ها خوش يله روحي بدلي ملابسج هسة اصب العشا

هزيت راسي مبتسمة گوة ماريد احسسهه اني استقاليت لان اعرف راح تسأل عن السبب واخاف فد يوم الاطلس يحجي بالموضوع وتربط بيناتنه..

كعدت بغرفتي بدون لا ابدل ملابسي بقيت مطنكرة وروحي تلوب فايرة ماعرف شلون راح تصفى معقولة اكمل حياتي بهيج قهر؟

-هاا مريم شو كاعدة

انتبهت على صوتهه دخلت لغرفتي، كمت بسرعة كدامهه وطبيت للحمام ذبيت ملابسي بره ودخلت اسبح شويه اطفي ناري..

بعدما كملت لفلفت روحي بالمنشفة وطلعت بدلت بسرعة ورحت لنانا حتى اتعشى، متعودة كل يوم تسويلي لفة وتحط كدامي طاسة تبولة بسبب فقر الدم مالتي كلما اتخربط تنهبط عليه خطية..

-نانا بعد ماكدر اكلهه كرهتهه استغفر الله

-اششش ولا كلمة يله اكليهه كلهه كدامي اذا توكعين بالشغل منو يفيدج انوب يكومون يصيحوج المايعة

اكلتهه كوة راح انفجر هنا بعد ماتحمل..

-نانا احس اريد ابجي

-لا لا ليش

-من وره طوطي الچلب

-نانا: اللتقيتوو؟؟؟

-مريم: لاعع بس اكرهه واموت منه

-نانا: اخخ مريم لشوكت ابقى اكلج عيشي حياتج وانسي

-نانا شبيچ ليش هو اني احبه حتى انساه تره اسمي مربوط بأسمه المقرف

-اقصد عيشي حياتج انتِ مو تعينتي ومرتاحة طبه وطلعه وصديقات بعد شتسوين بي عوفي ماما الزلم ما يجي منهم الا وجع الراس

-اي والله خصوصاً المحيط الاطلسي عبارة عن وجع راس

ضحكت وبدت تاكل ويايه وتنكت حتى اضحك، اباوعلهه شكد حلوة نانا جميلة خلقة واخلاق جمالهه مميز وهادئ لون بشرتهه السمرة الطوخ ضايفلهه فد جاذبية خاصة بس رغم جمالهه واهتمامهه بنفسهه.. متعوبة وسنين التعب والخدمة واضحة على ايديهه الخشنة وملامحهه المرغوبة..

-مريم: نانا نسهر على فلم اليوم؟

-نانا: ودوامج خاف تشلعين گلبي الصبح وما تكعدين

-لا لا باجر ما اداوم اخذت اجازة

-ليش

-هيج اريد ارتاح هاا شكلتي نتابع؟

-نانا: يله نتابع شكو بيهه

كمت طيارة غسلت المواعين وحضرت حبشكلات ناكلهن ويه الفلم، صارت الساعة عشرة طلعت فلم وكعدنه نتابع بينما احنه منسجمات سمعنه صوت قفل الباب يفتح، جفلت وفتحت عيوني..

-نانا: معقولة الاطلس؟؟

بعد جملتهه فوراً سمعنه صوته يصيحلهه ركض ركض ذبيت كلشي من ايدي وهربت لغرفتي وقفلت الباب عليه گلبي يرعد..

بعد دقيقتين ذبيت نفس وقررت افتح الباب واتجسس شعنده جاي هو يمته يجي بهيج وقت متأخر..

طلعت من الغرفة اتمشى على اطراف اصابيعي مديت راسي من الممر الي يفصل غرفتي عن الصالة واشوف نانا كاعده على القنفه وهو كاعد كبالهه ثنينهم ساكتين..

بقى هيج فترة ونانا صافنة عليه وحاطه ايدهه جوه حنچهه..

-نانا: شبيك امي راح تبقى ساكت هيج ليش ضايج

-ما ضايج

جاوبهه بصوت كله ضيق وزعل، كامتله وكعدت بصفه حطت ايدهه وره ظهره وكالت وهي تطبطب عليه..

-سولفلي ماما

ذب نفس وجرهه عليه حط راسه بحضنهه وصارت تمسح على شعره، باس ايدهه وكال..

-شلونچ حبيبتي

-زينه يا عيوني انتَ شلونك شبيك متضايق

-مابيه شي بس الشغل متعبني

-ميخالف وليدي چا شلون غير تشد حيلك حتى ترفع راس ابوك خطية ابوك فنى عمره يحاول يحافظ على اسمكم

-ادري بس لعبت روحي

حجاهه وكام من حضنهه وكعد على حيله ضميت روحي وره الحايط خفت يلمحني وجذبني حديثه من كال..

-اني رجاال اداررري تجيبولي تصاميم وصور وتعال قيم وتعال اختاار اني شمفهمنييي هاا شمفهمنيي بهذا الخررططط

-نانا: ياا هاي شبيك

-لان لعبت روححي كرهت عيشتي من وراهم يعني دارس وتعبان على روحي عندي ماجستير بعلوم الرياضيات يجيبولي تصاميم وسوالف خريطه!!

-اي غير شغلكم هذا

-انييي اداري اداري شغلي ادارة وحساباات هنا اللعب لععب! مافتهم بغير سوالف خو روحو لعمرررر لو لـ عليي مو همه عدهم نظرة فنية شكو تجوني!!!

-وانتَ مزعوج من شنو هسة

- يجيني عمرررر يكول تعااال ضلععييي شوف هذا التصميم شلووونه ويكهكهلي ويه الموظفااات ويلعب جوولة

-ياا يااا هاي شبيك ماما واذا هسة

-مايصيرر نانناا ما يصيررر هذا مكان عمممل مكااان محترررم هذا مو نادي ليلي يروحله ويلم ***** ويضحكن وياااه ذني بنات مرباياات ومؤدبااات

-ولك عمر عنده سوالف ادبسزية؟؟؟

-لا

-لااا تجذب هسة كلت انتَ!!

-والله لا شبيچ بس عصبت منه ومتنرفز

-ليش متنرفز شكو شصاير بيناتكم؟

-اظنه يحب

-صدك والله؟؟

-اي

-وشبيك مزعوج

-لانه چللب ويلعب بأعصابنه رحناله اني وحمزة گلناله بووية اذا تحب احجي لا تظل تم*** بروسنه وتدلل كال لاا وين احب وهو لاعب فلك ويه الموظفات اليشتغلون بقسمي

-ههههه شعليك بي ولك تغار على عمر

-اييي اغار عليه چاا مو صاحبييي

-ياا ولك تخبلت انتَ شبيك شبيك

-خلي يسولف يعني هسة من واحد بينه يحب مو نحجي للشله مو كلهم كلتلهم اني تزوجت هو ليش يضمضم ويصدمنه بعدين

-اطلس خلي براحته هو رجال جبير عاقل ودارس ويفتهم لا تضغطون على بعض بحجة احنه شلة ولازم كلنه نفضفض ونحجي لبعض كلشي

كام منهه ضايج وصار يلف ويدور يلف ويدور بالصالة ضميت روحي اكثر وبعد ما رجعت امد راسي ماريد ابين..

-نانا: بعد شبيك؟

-اليوم تعاركت ويه موظفة تشتغل جوايه

-صدك؟؟!!

-اي

-ليش ولك شبيك انت مو هيج؟؟

-خطهها مجعمررر عنجوقييي احتاج مجههر حتى اقررراه شعليه اني اذا هي مو كفوءة بعملهه ليش اجت وقدمت يمنه!!!

-اهوو ردينه على العصبية تعال اكعد يمي وسولف على كيفك لا تعصب مو زين عليك مو زين

ماسمعت غير صوت زجاج يتطشر، مديت راسي اشوفه دافر الطاولة الزجاجية ومتفلشة تفليش، لزمته نانا تهدأ بي وتكوله هي تنظف المكان ولا يعصب ولا يضوج..

تنرفزت اكثر منه وكرهته زيادة شنو هالحركات شبيك ايع شجاك جاينه مثل الثور الهايج، عفتهم ورحت لغرفتي نمت بفراشي وكلت طز بي خلي يعيط منا لباجر..

فزيت الصبح على صوت موبايلي يدك اخذته اشوف شكو منو هذا يتصل من الصباحيات، قريت الاسم "ريتاج"..

-الو

-ريتاج: هلو مريم ها وينج

-مريم: شنو ويني ما اداوم استقاليت

-ريتاج: صدك عود؟؟؟

-مريم: اي ليش ما دريتي

-ريتاج: لا منار كلتلي اتصل بيج واسألج ليش تأخرتي

-مريم: اني اصلاً ذبيت استقالتي كدامهه شبيهه منار

سديت الاتصال ويه ريتاج ودكيت على منار بسرعة جاوبتني..

-مريم: منار شنو تكولين وين صرت اني استقاليت بطلت منكم

-منار: لا حبي المسيو ما وقع على استقالتج

عدلت كعدتي بسرعة وسحبت كذلتي وره اذني..

-شنو شنو شلون ما وقع استقالتي يعني شنو؟؟

-يعني ما انقبلت استقالتج ولازم تداومين لحدما يوقعهه مسيو اطلس

-لاااا عفية صدك عود شنو هااي شبي هذا ميوقع شجااه

-منار: لازم اروح مريم وصل المسيو يله باي

سديته وياهه وذبيت تلفوني ميته قهر هسة اني كيفت خلصت من چهرتك السزز ترجعني يمك شكو؟؟؟؟

كمت كوة اسحل بروحي لبست نفس لبس البارحة وشال شمرته على راسي ردت اعكده واسكت بس كلت فشلة من الناس حطيتله دبوس وطلعت..

وصلت للشركة مطفية كوة امشي سلمو عليه الي بالبوابة والله صايرين مؤدبين شكو شعجب، اخذت المصعد وصعدت فوك مبوزة دخلت للغرفة واستقبلتني ريتاج بحماس عكسي..

سألتني شكو بس غيرت الموضوع وبديت اشتغل من وره خشمي اجيب واشمر بالملفات سبحان الغيرني البارحة جنت شحلاتني شبيه اليوم ما طايقة المكان..

اجتنه منار تكول اكو اجتماع ضروري راح ينعقد ضجت وطنكرت ماكوم..

-ريتاج: مريم شبيچ شنو هاي تصرفات الزعاطيط كوميي

-ماكوم ماا عود ليش ما بطلني اني ماريد ياختي مااريددد

-ريتاج: دكومي كومي دافرة نعمتج كومي

سحلتني سحل وياهه كوة للغرفة سلمت هي واني دخلت ساكتة اخذتلي مقعد وضليت اتصفن مثل ابو صابر..

نوّر طوطي الهيبة الاجتماع وبدو يهذرون بسوالف تعبانة مثلهم الاجتماع كله اني بغير عالم سارحة ماحسيت اله على طرقات اصابعه على المكتب ينبهني اصحى..

رجعت وياهم على الخط بس ما اباوعله مدا اكدر اطيقه شسوي مو بيدي، كمل الاجتماع وكملت اليوم واني بالمكتب طلعت للبيت ومارست الروتين العادي نمت وكعدت ثاني يوم على امل موقع على استقالتي وهم ما وقع!!

مشى ثالث يوم ورابع يوم وخامس وسادس واني اداوم بدون نفس ويوميه يصير عندي امل جديد واكول بطلوني بس ماكو قافل راسه المجعمر!!

اليوم العاشر داومت ما طايقة الدنيا صرت وجه بوجه ويه تينا وضحى عبرتهن بدون لا انتبه لوجودهن هنه صاحنلي..

-تينا: ولج ام صماخخ

-مريم: ها ها

-تينا: وينج صارلج كم يوم مبومة بوجوهنه لا سلام لا كلام شكو شبيچ

-مريم: منتظرة الاطلس يوقع استقالتي

شهگن ثنينهن وتينا صلت صلاة المسيح بطريقة سريعة..

-تينا: يا امنا العذراء!! استقاليتي؟؟

-مريم: اي

-ضحى: ولج ليشش منو حاصله يشتغل هناا ليش تستقيلين؟؟

-مريم: تعاركت ويه المحيط

-تينا: يا محيط؟؟

-مريم: الاطلس يعني منو غيره

-ضحى: انجبي لا تجذبين

-مريم: وعيون امي تعاركت وياه وقدمت استقالة بس مدا يقبلهه ماعرف شبي

-تينا: سولفيلي شصار كلبي راح يوكف

كعدنه بالكافتيريا سولفتلهن وهنه مصفصفات وفاتحات عيونهن عبالك دا اسولفلهن مسلسل، بس كملت استلمني رزايل وتكرص..

-ضحى: غبية غبية غبيةةة

-تينا: مطية هم شجاچ انفجرتي بوجهه شبيجج

-مريم: لانه مستفز ومزعج وغثيث ومقرففف

-تينا: اشششش صوتج اجو هو وشلته

سكتت فوراً من انتبهتلهم يدخلون اخذولهم طاولة وكعدو حولهه، طلبو اكل وتينا تراقب بيهم وتكول..

-غريب

-ضحى: شنو الغريب

-تينا: الاطلس نازل بدون جاكيته الرسمي

اللتفتت ضحى وعقچت وجهها هزت راسهه وكالت..

-ضحى: فعلاً غريب

-تينا: تحسون متعارك ويه نورسين؟

-مريم: شكو ليش اجه هالشي ببالج

-تينا: شمدريني لان وضعه مخربط باعي حتى شعره ممرتبه

-ضحى: ووجهه اصفر لا لا بي شي المحيط

-مريم: قزرقط مابي

-تينا: ههههههه خرب بيج والله دباعي بس اللتفتي وشوفي حاله

-مريم: عساه ميهمني

-ضحى: حرام انقهرت والله تحسو ذبلان

ماتحملت درت وجهي اباوعله تمايزته فعلاً تعبان كلش عبالك مريض لان ايده بيهه رجفة قوية لدرجة بطل المي يركص بيده گوة فتحه..

-مريم: عزه شبي

-تينا: مو كتلج باعي وضعه سودة عليه

بقيت اباوعله نسيت روحي اشوف جماعته مهتمين بي كلش ومسلم فتحله بطل العصير وعمر قدم الماعون عليه وهمسله شي بأذنه اجذب اذا اكول ما قلقت مهما يكون هو انسان وواضح كلش تعبان ومريض..

بينما اني صافنه عليه مثل البهيمة رفع عينه يباوعلي صرت مثل التايهه لا البيه ادير عيني ولا اتحرك، هو الي كسر عينه وكمل اكله وكام..

-تينا: متحمسة كلش للسفرة دا احسبلهه يوم يوم

-ضحى: حتى اني مرايم تجين مو؟

-مريم: وين

-تينا: سفرة عيد راس السنة كل سنة الشركة تسوي سفرة والكل يروح الكلل بدون استثناء

-مريم: وين يرحون

-ضحى: حسب القرعة ذيج السنة رحنه على البحر واجرنه كابينات هناك بس فد تونسنه يا مريم رغم الجو بارد ثلجج بس متعة كلش كلش

-مريم: شكد حلوو زين ليش يسوون سفرة شعجب هاي كل الشركات هيج؟

-تينا: طبعاً طبعاً اكيد كل مكان عمل لازم بالسنة على الاقل فد سفرتين احنه نختار عيد راس السنة لان بالاساس ينطونه عطلة الشركة ومناك نمدلنه فد يومين نضرب عصفورين بحجر

-ضحى: مريم مو متجين حبابه تفوتج هاي السفرة تفتح نصيب ههههه

-تينا: والرب صح مستحيل نروح اذا مارجعن ثنين مخطوبات هاي كل سنة

-مريم: ماطلعت سفرة هاي هههه

-تينا: والله شبيچ منتشاقه خولة المكروهة الي انفصلت هي هناك صادت خطيبهه

-مريم: لا بنات اني اطمح اكون مبطلة منا لذاك الوقت

-تينا: ام صمااخ شنو مبطلة لا تكرهيني بيج

-ضحى: مريم افتحي عقلج حبابه تره زهگتيني

-تينا: عود وره السفرة قدمي استقاله دحصليلج رجل شبيچ يحظي مصخمة

-مريم: يااا ماريد رجل ليش شيجي من الزلم غير وجع الگلب والراس

-تينا: صدقتي والله اووف گلبي يوجعني يارب انتَ العالم مافي القلوب اجمعني ويه حمزاوي بهاي السفرة، اعثر وهو يلزمني، اوكع بحضنه، اوكع كباله، اوكع على راسه يارب يارب المهم ننجمع سوه

-ضحى: الخبال شلون يصير بعد عايشة بالمسلسلات خية انتِ

-مريم: اصلاً عيشتكم المدينة كلهه تشبه المسلسلات والافلام

-تينا: بنات احلى شي متجي مرته لهاي السفرة اوووي حبيبته تضوج من البرد ومزاجهه ينگلب

-مريم: ليش لازم تروح؟

-ضحى: اي دا اكولج الكل يروح بس غدير مرت حمزة متقصر تدز خواتهه نيابة عنهه يراقبون زوجهه

-مريم: باع حظي

-تينا: لطشة لطشةةة

-مريم: بس حقهه تعرف اكو بنات مثل تينا يحطن عينهن عليه

كلتهه وغمزت وتعالي يا تينا جري ايدي وعضيهه حييل شاغت روحي كمت ارفس بمكاني واعيط بالكتمة..

-مريم: حقيررة ولج ااخخخ راح اموتت

-تينا: تستاهلين تستاهلين

-ضحى: ماجذبت مرايم تره صدك حاطه عينج على حمزة

-تينا: غبرات اتشاقه اني بس مكرشة عليه لا اكثر ثانياً ديني ميسمح اتزوج مسلم لو ادك روحي بالصوندة غير امي تشك راسي بالطبرر اذا سويتهه

-مريم: لعد كافي تبنين احلام خاف تتحول للصدك تينا وفعلاً تكومين تحبي وتتعلقين بي

-تينا: عود صدك؟

-ضحى: رب الصدك

-تينا: عود اشوف شلون احل السالفة المهم بنات جاي وفد من فرنسا من البارحة واليوم راح يشهدون على جلسة تصوير الكولكشن الجديد تحبون نروح نشوف؟؟

-مريم: يعني بكيفنه ندخل؟ مو كالو محد يدخل للاستوديو غير اليشتغلون بي

-ضحى: مو تينا اختهه عارضة هناك وهي دائماً تدخلنه

-مريم: تينا عندج اختتت تشتغل هناا؟؟؟؟

-تينا: شوف هاي عندي بعد اخت تشتغل بقسم التصميم ومختوووبة من المدير المساعد

-مريم: الله الله وهم حلوات مثلج؟؟

-تينا: احلى مني تعالي امشي نروح نشوفهن

كمت وياهه ودخلنه نتسحب للاستوديو مشايفته من قبل بس الي اعرفه علي هناك رئيس المصورين والجلسات المهمة هو يصورهه، اتصلت تينا بأختهه ووگفنه ننتظرهه تجي وفعلاً اجت وانبهرت بجمالهه واثارتهه..

لبسهه فاضح اكثر من تينا كالت بسبب شغلهه يتطلب هالشي، ما دققت هواي ودخلنه وياهه للاستوديو وانصدمت صدمة عمري من الشفته..

مكان ضخم جداً وبااارد كلش بارد عبالك داخله ثلاجة واشوف البنات البي او مثلما يسموهن عارضات كلهن مشلتحات ولبسهن يخزي صرت بنص هدومي وتفشلت نيابة عنهن، ماتحملت سحبت ضحى استفسر عن الموضوع..

-ضحى: يضطرن يلبسن هيج حتى يصورون فقط جسمهن اثناء العرض

-مريم: يمة صخام الصخمني باعي الخزي ولج ضحاوي

-ضحى: متعودات هنا خية هنه ياخذوهن اختصاص هالشي وتره اغلبهن اجنبيات

هزيت راسي وبقيت اباوع لمحت علي چان يحجي ويه واحد ويأشر بيده منفعل شويه واجه على العارضه الي نايمة على فراش ومطشر عليه ريش ماعرف لشنو مسوي بس حسب كلام تينا حتى تطلع الصور حلوة..

-علي: يله گلب انطيني سبايبي لوك

بدت تسوي حركات كش منهه جسمي وعلي ياخذ بالصور وما ملحك ويشجعهه ويحجي ومنفعل وكل شويه واحد جاي يعدل مكياجهه ويهوسون شعرهه..

بيني وبينكم كلش ما عجبتني الوضعية مادري بالاعلانات تكون بهالطريقة وليش بنية تقبل على نفسهه تشتغل هيج شغل مستهتر؟

بقينه كاعدين واجت اخت تينا وبيدهه كاسات حسب مافهمت كوكتيل وبي نسبة مشروب ماقبلت اشرب وتسائلت بيني وبين نفسي ليش يقدمون هيج هنا بس ماعلقت ولا انطيت رأيي..

-تينا: تاتيانا صورة من راح يفتتح الاعلان هالسنة؟

-تاتيانا: بما ان كولكشن جديد موسيو محمد يريد ابنه الوريث يكون الوجه الاعلاني بس حسب ماسمعت موسيو الاطلس رافض هالشي وما مقتنع

-تينا: اويليييي يعرف حمودات شلون يستغل جمال ابنه

-ضحى: خطية بنات تره مسيو اطلس مو هيج ستايله هو مو عارض ليش كل هالضغط عليه تره هو هم بشر

-تينا: والله صحيح مدا افهم ليش حمودات يضغط على ابنه بهالطريقه

-مريم: وبرأيكم راح يقبل يكون الوجه الاعلاني؟

-تاتيانا: لا بيبي مو الوجه الاعلاني فقط صورة وحدة تنعرضله ببداية الايفنت تجذب المستثمرين يدخلون ويشوفون شكو ماكو

-مريم: يكدرون يجيبون أي عارض ليش الا الاطلس؟

كامت تاتيانا شويه ورجعت بيدهه مجلات هواي، وزعتهن بيناتنه البنات وكالت..

-تاتيانا: شوفو هيج اقصد يكون فقط بأول صفحة شوفو هسة هذا موسيو علي هنا بهذا الكوليكشن وهنا موسيو عمر وعلي سوه وهنا موسيو مسلم.. متطلع صورهم بره ولا احد يشوفهه فقط للايفنت حتى يكون جذاب احد ورثة العائلة يكون بالواجهه حتى يبرزون نفسهم

ميلت حلگي مافتهم بهالسوالف بس شفت ضحى وتينا أيدو الفكرة وكالو عنهه "سبايسي" كلبت بالمجلات وفعلاً شفت صورهم صدك جذابة وضايفة لمسة مملوحة للمجلة تسائلت اذا هاي المجلة تنباع وجاوبت تاتيانا وهي تفتح شعرهه وتهوسه..

-تاتيانا: لا مستحيل كلتلكم صورهم متطلع بمجلة هاي المجلة النه بالشركة وحتى من يجون المستثمرين يشوفون بعيونهم ترتيب الصور الي انعرضت بالايفنت وينجذبون لان اكو بيهم ميحضرون الايفنت

-ضحى: بس مو كل الشركات يستخدمون هالطريقة بالعرض مرايم

-تينا: بين قوسين همه مو عارضين

هزيت راسي متفهمة وبقيت كاعده، راحت تاتيانا وبده دورهه ياخذولهه صور ضحكت واني اباوع لحركاتهه وعلي متحمس كلش وياهه ويحرك بشعرهه حتى يطير وياخذ اللقطة..

ثواني ودخلو مجموعة من الزلم وياهم اربع نسوان شكلهم اجنبي، همست تينا ان ذولة همه المستثمرين الفرنسيين الجايين علمود المجموعة الشتوية، دخلو وياهم الاطلس ومسلم وحمزة..

احنه كاعدات على جهة واضح ما انتبهو علينه من دخلو، مافهمت شي كل كلامهم فرنسي حتى الولد من يجاوبوهم كله فرنسي ويحجون بطلاقة عجبني هالشي وصار عندي طموح اتعلم فرنسي او انكليزي واحجي بهالطلاقة مثلهم..

-الاطلس: Ceci est incroyable

كالهه وهو يأشر على تاتيانا مافهمت باوعت لـ تينا المتحمسة وطايرة من الفرح اشرتلهه شكال همستلي..

-تينا: كال بالفرنسي ان اختي مدهشة

فرحتلهه خصوصاً الوياه كامو يدردمون مبين فعلاً عجبتهم، بقيت اباوعله وضعه مو بس تعبان وانما هلكان وكوة يمشي على اعصابه يجامل ويبتسم ويعلق وياهم..

انتبهت لحمزة يأشرله يكعد واضح هو يريد يكمل بداله بس الاطلس ماقبل واكلهم وشربهم بالمجاملات وطبعاً كله بلغة ما افهمهه بس تينا وضحى يلقطن كم جملة ويترجمولي..

جابولهم ضيافة وهمه على الواكف بس هالمرة مشروب كحولي صافي بدون كوكتيل، قدمو للجنة الواكفة كلهم اخذو وصلو للاطلس واشر بيده وكال "ميرسي"..

-تينا: امممم حسيته راح ياخذ مجاملة

-ضحى: لا هو ميشرب معروف

-مريم: صدك؟

-ضحى: اي لا هو ولا حمزة ميشربون ابد

-مريم: شلون عرفتي؟

-تينا: معروفين بكل حفلة وبكل مناسبة ميشربون نهائياً ويجيبولهم لو مي لو كوكتيل بدون كحول

-مريم: ههههه لو بس اعرف شلون تنتبهن على هالشغلات

-تينا: لان يتكرر الموقف هواي لهيج الكل ينتبه وصار ببالنه بس الظاهر ذولة قدموله خجلو من الفرنسيين كالو فشلة منقدم لأبننا هههه

هزيت راسي بهدوء وكملت اتابعلهم وهمه يأشرون على العارضه ويحجون بيهه، شهكت ضحى وابتسمت كرصتهه شكو فوراً كالت..

-ضحى: بنات احتمال ياخذون كل المجموعة الشتوية هالسنة يااااي حماس

-تينا: اويليييي بعد منو گدك يالاطلسس هذا ضمان شغل سنة

ما علقت واستمريت اتابعهم الاطلس جان واضح عليه فرحان وحمزة ومسلم يتناقشون وياهم والضحكة تارسه وجههم، ابتسمت على وضعهم ضجت من الكعدة وكلتلهن نرجع بس تينا لطشت الا تبقى ويه اختهه وفرحانة بيهه..

-ضحاوي نرجع احنه؟ شوفي حتى المستثمرين راحو يله حبابه خلينه نروح

-ضحى: اوكي حبي يله نكوم

طلعنه من الاستوديو وضلينه نفتر بممرات الشركة اعترف صايرة اني كلش كسولة وميهمني الشغل اريده بس يطردني وهو لازگلي ومكرهني الدنيا..

رجعت للمكتب مالتي اتحلطم شافتني ريتاج وتسائلت وين جنت سولفتلهه شسويت فرحت كلش وعادت جملة تينا من كالت هذا ربح جبير وضمان عظيم..

اثناء حديثنه تعده اطلس رايح للمكتب مالته، شويه وكمت وراه طلبت من منار اللتقي بي كالت ميكدر هسة..

-كوليله احتاجه ضروري

هزت راسهه وكامتله شويه وكالت تفضلي، طرقت الباب ودخلت عليه امثل الهدوء بس داخلي فاير..

-مساء الخير استاذ

مجاوبني بقى على وضعه ساند راسه على الكرسي مالته وماد رجليه على الميز متمدد بس على شكل كعدة..

-مريم: اعتذر اجيت بوقت مو مناسب بس..

-احجي مريم

-استاذ اني اجيت اسألك على استقالتي ليش لحد الان مانقبلت

-بكيفي

-استااذ تره ميصير هيج اني ماريد اشتغل هنا بعد

-طيب

-طيب يعني اروح بعد ما اداوم مو

-لا

-استاذ شنو هااي ميصير هيج

ردت ادك رجل بالكاع من القهر ماعرف شسوي بي هذا الكتلة من الجليد، بقى مستريح على وضعه بدون لا يحرك ساكن..

-مريم: استاذ تره احتاج الاستقالة ماكدر اشتغل بعد اني مريضة

-شبيچ

-مريضة اءء مريضة

-مرضج شنو؟

يحجي بهدوء ورايح لسابع عالم شكد مزعج وغثة!!

-عندي فقر دم حاد وادوخ هواي ماتحمل تعب

-اممم

-وهسة شلون

-نخليج ترتاحين ومانشغلج هواي

-هفففففففف

نفخت ميته من الحركة مال اصفگه راشديات ازورك وجهه شكد مستفزز شلع باب گلبي!

-استاذ رجاءً

-مريم اني تعبان ماكدر اتناقش هسة

-ماريد اداوم هنا ماريد اريد ابطل

-جيد دفعي التعويض المادي وبطلي

-يا تعويض؟

-اقري العقد مالتج

تذكرت العقد الوقعت عليه اذا ابطل لازم ادفع تعويض مادي للشركة كرهت الشركة اكثر وطوطي وياهه!

-استاذ دا اكولك اني مريضه!

اخيراً كعد على حيله بس عيونه تحجي التعب الي ديعاني منه، مسح على لحيته وكال بطريقة هادئة اشبه بالاعتذار..

-الاطلس: انتِ زعلانة مو تردين تبطلين

كتفت ايدي وغضبت ملامحي عسى ولعل يبطلني بسبب اسلوبي..

-ما ما اريد ابطل اني مريضة

-مريم كتلج نراعي مرضج وما نجهدچ بالعمل

-وشنو حاطيني هنا تصفنون عليه

-مو نصفن عليج تشتغلين بس مو بطريقة تتعبج وتأذيج

-ما ما اريد ابطل

تأفأف وكام من مكانه تقدم عليه وهو يحجي بطريقة اشبه بالهمس..

-مريم ارجوچ ماكدر اتناقش اكثر

-مريم: اي هو بطلني ما راح تتناقش اكثر

-ما ابطلج

-تبطلني!

-ما ابطل وديلا

-ما الا تبطلني استاذ ميصير هاي تره مو حالة

-اي حالة بكيفي اوظف وبكيفي ابطل كله بيدي

-اروح لاستاذ حمزة هو يبطلني

-هه اي روحي يله

-اروح والله اروح

-اي دروحي خلصيني منج

-مريم: استاذ انتَ گوة طايقني هي گووة

-منو گال گوة طايقج؟!

-اكبر دليل تعاركت ويايه بسبب خطي وهزأتني وقهرتني بكلامك انكسر گلبي وتهشم

-سلامة گلبچ

-انتَ هنتني هواي كدام منار حتى لو جنت موظفة جواك ميصير هيج تعاملني ميصيرر

متت كمت ارجف من العصبية والقهر واأشر بأصبعي وعيوني انترست دموع بس ماريدهن يوگعن گدامه..

-انتِ هم تجاوزتي مريم لو نسيتي؟

-بس انتَ بديت ويايه ميصير ياخي ميصير هيج والله تعبت نفسيتي صارلي ايام احس بالاهانة من اشوف منار تمنيت الكاع تنشك وتبلعني

مجاوب طلع جكارة من جاكيته وحطهه بحلگه اني شفته هيج لو تسودنت خزرته بقهر ونزلت دمعة غبيه من عيني مسحتهه بسرعة وهو جر نفس من جكارته وزفره بوجهي بكل حقارة..

ضيگ عيونه وسحب نفس ثاني واني باهته اراقب حقارته واحس دخان الجكارة صار بـ ريتي سد عليه الهوا، صرت ادور على النفس اختنكت خصوصاً من ذب النفس الثاني قريب مني واستنشقته..

غصيت بي احس طعم دخان صار بحلكي وصرت اكح بقوة اريد هوا ماكو هوا ما جاي اتنفس ماكدر اتنفس، تركته وردت اطلع بره الغرفة واني اكح بكل قوتي راح اتقيء اكح وابجي واجر بالنفس..

-مريم؟؟ مريم شبيچ مريممم

حسيت بيده تجرني ويروح على الشباك يفتحه ويصيح براسي..

-جري نفس مريم جررري نفس

فتحت حلكي اللقط الهوا وانتبهت للفضاء من الشباك اخترعت من تذكرت احنه فوك الغيوم كمت ارجف وابتعدت من الشباك بسرعة..

-وين تعالي ولج تعالي لا تموتين عليه تعااليي

جرني مرة ثانية محاوطني ومطلع راسي من الشباك متت بدمي راح اموت هذا يريد يذبني مناا لو شنو حتى الخنكة راحت عزه بعينج مريم عززه راح يموتني هالرجال..

-مريم: رجعععنييي ولككك راح اموووتت ماريد اموتتتت

دفعت ايده ودخلت راسي جوه تخبلت وصرت اعيط دخلت منار للغرفة وهو جاحظ عيونه عليه ميدري شيسوي..

-منار: شصاير مريم؟؟ انتِ بخير ولج شكوو

-مريم: لاا منار لااا مو بخير اريد ارجع لاهلييي اريد اميييي

-الاطلس: مريم اهدأي على بختج يمعودة

-مريم: كللله من وراااك شنو هاي شنو هالافلام الهندية الدتصير ويايه عوفنيييي

-منار: مريم مريم اصحي على نفسج مررريم

-مريم: صاحية اني صاحيةةة وخري عني منار خليني اطلع من هالمكان

دفعتهه عني وطلعت من المكتب مالته كلني ارجف عصبية وخوف وتعب وغربة، تعبت من الوضع تعبت من كلشي ياربي بس اريد ارجع لاهلي..

دخلت للمكتب مالتي غلست على اسئلة ريتاج وحطيت راسي على الميز غفيت على هذا الوضع وما صحيت الا على صوت ضحك فوك راسي..

-اي اي جايبيچ هنا تنامين آنسة مريم

فزيت على حيلي اشوف عمر وريتاج واستاذ مسلم فوك راسي من الفشلة ماعرفت وين اضم روحي..

-مريم: لا لا مانمت ما جنت نايمة بس ريحت راسي شويه

ضحك عمر وهو يباوع على ساعته ويكول..

-ريحتي راسج ساعتين ونص

-مريم: ليش ساعة بيش!؟

-مسلم: بالسبعة ونص

-مريم: لا مستحيل اني ما نويت انام والله صدكوني

-عمر: عادي عادي تصير بأرقى العوائل

-مسلم: معناهه ما كملتي الشغل مو؟

-مريم: هسة هسة اكمله والله هسة مارجع للبيت الا اكمله وعد

ابتسم مسلم وكال عادي اعوفه على باجر بس الخجل والمستحه اخذتني كلهم فوك راسي حسيت بتقصيري وكلت الا اكمله اليوم..

-عمر: يله اني ابقى وياچ هم عندي شغل لا تخافين اني بالمكتب اذا احتاجيتي شي تعاليلي

-ماشي استاذ

عافوني وريتاج كالت تبقى ويايه تساعدني بس ماقبلت وكلتلهه رجعي للبيت، اتصلت بـ نانا وكلتلهه اتأخر وبقيت اشتغل نسيت روحي، باوعت للساعة شفتهه بالتسعة الشركة تصفر جنس مخلوق مابيهه موحشة كلش..

كمت اخذ استراحة طلعت بسكت وعصير حاطته بجنطتي ورحت افتر بالممرات اكل واستكشف الشركة المظلمة ضحكت من تخيلت يطلعلي جني يطفرني ويخليني اعيط مثل المخابيل..

-ها بوية

نزيت نزة تسوه عمري كله حطيت ايدي على گلبي وبلعت العافية وياهه البسكت..

-يمة استاذ متت خوف

-عمر: شو تفترين عيوني

-اي مو كلت اخذ استراحة تعبت

-عمر: هاا خوش يله نرجع للبيت عوفي على باجر الباقي

-لا استاذ ماعوفه استحي من استاذ مسلم شيكول عليه صارلي ثلاث ايام اشتغل بنفس الشي ولسه ما كملته

-لا معليج بمسلم اني احاچي

-عندي بس ملفين بقو اكملهن واطلع انتَ روح براحتك استاذ

-لا شلون اعوفج وحدج مايصير

ما علقت ترخصت منه ورحت للمكتب مالتي حسيت بي يمشي ورايه شنو راح يجي يمي؟

دخلت جوه وكعدت على الكرسي هو بقى واكف بالباب مادخل جوه لزم موبايله وصار يتصفح بي واني اشتغل، كلما ارفع راسي اشوفه على وضعيته انكسر خاطري خطية اكيد تعب من الوكفة..

اجاله اتصال واضح من علي بقى يتشاقه ويضحك غص من الضحك وكل شويه يباوعلي ويأشر بيده شلون اليعتذر ابادله ابتسامة واكمل، شويه وكال..

-عمر: مريم يله هدي من ايدج لازم اروح بداعة امج

هزيت راسي بلا مناقشة ماردت اعطله اكثر طلعنه سوه وحسيت بأحد يمشي ورانه اللتفتت واذا اللكاه الاطلس!

باوعت لعمر متفاجأة هو هم اندار يشوف وكال..

-عمر: ها ضلع شو اليوم من وكت

-الاطلس: تعبان باجر اكمل

-عمر: حقك حقك

طبطب على ظهره وتمشو ويه بعض واني وراهم، حسب الفهمته الاطلس يطلع اخر واحد من الشركة يعني مو نفسنه بس ابد ما لاحظت هالشي طوال الايام الي اني اشتغل هنا..

صعدت وياهم للمصعد ورجليه ترعش اني وحدي ويه زلم ثنين غربة وصاعده بالمصعد وين اكو اكثر من هيج تعاسة؟

-عمر: هاي شني

وكف المصعد وانفتح على الطابق 40 رجعنه دسناه وهم وكف على نفس الطابق كررنا الفعل وهم وكف، اشر الاطلس حتى نطلع خاف يعصي بينه، طلعنه وراه والوجوه مستغربة..

-عمر: يجوز عطل

-الاطلس: اي يجوز

رفع موبايله واتصل بواحد كمل مكالمته بسرعة وكال وهو يباوعلنه..

-الاطلس: كالو الفجر يجون يشوفون سالفته قبل لا يوصلون الموظفين

هزينه روسنه واني رحت اخذ المصعد الثاني اشرلي عمر ميشتغل وكال لازم ننزل الدرج..

-مريم: ننزل 40 طابق!!

-الاطلس: عندج غير حل؟

مجاوبته ورحت انزل قبلهم وهمه ورايه اسمعهم يبسبسون مادري على شنو توترت شكو شبيهم شديحوكون وحدهم يمة خاف يتآمرون عليه والله العب بيهم طوبة ادبسزززية تستفردون بيه وحدي!!

-الاطلس: مريم

درت بس عيوني عليه بدون جواب هو تقدم عليه وصار مقابيلي، مسح قطرات العرق الي على جبينه وكال بتعب واضح..

-الاطلس: انتِ زينة؟

-مريم: مادري

-اني اسف على تصرف اليوم چان تصرف غبي چنت مزعوج من اسلوبج و..

-مريم: وحاولت تخنكني؟ لو تريد تذبني من الشباك

فتح عيونه وعمر وياه، كال بسرعة..

-الاطلس: شنوو انتِ شجاي تحجين بابا شنو اخنكج شنو اذبج من الشباچ مريم صدك عبالج اريد اذيج؟؟

حذب ادري مو هاي نيته بس حابه اللعب بأعصابه..

-مريم: اي ماكو غير نية

-الاطلس: والعباس ابو فاضل لا بس انتِ استفزيتيني

-عمر: شصاير شباب شكو

-مريم: استفزك وتحاول تخنكني بدخان الجكارة؟

-الاطلس: مادري بيج عندج ربو شنو اشم كفه ايدي اني!!

-ماعندي ربو بس حساسية ماتحمل الدخان

-الاطلس: اني اسف واعتذر منج ماجنت ادري بهذا الشي مريم

-لا جنت تدري

-الاطلس: والحسين الشهيد مادري منين راح اعرف بهيج شي ليش تأذيني مريم!!

-عمر: اطلس شكوو مريم شبيكم على شنو تحجون

-مريم: ماكو شي استاذ عمر شغلة تافهه

عفتهم واريد انزل وحسيت بأيد الاطلس تسحبني من متني، شهكت ورفعت عيوني اباوعله..

-عمر: هيوو محجبه البت ولكك

-الاطلس: ليش تعانديني؟؟ انتِ شنو تستمتعين من تشوفيني ضايج لو مزعوج!!

-مريم: ايدي هدني استااذ تره اني محجبه!

-عمر: اطلس احترم حجابهه ياخي هد البنية اطلسس

سحبه عمر وهو ماقبل شدني عليه اكثر خلاني انضرب بصدره فتحت عيوني احاول اجمع فكري واتخيل الديصير بس عقلي صفر..

-الاطلس: لا توجعين گلبي مريم كافي

-مريم: اني شدا اسويلك شبيك!!

-عمر: شبيك خوية شنو تخبلتت

-الاطلس: ليش تهربين مني شبيه اني بشنو اختلف عن الباقين!؟

-مريم: شنووو

-الاطلس: تحجين وياهم كلهم ومن توصليلي يصير عندج مرض مفاجئ تكرهيني وما تطيقيني وانتِ تشوفين تعاملي ونعومتي وياچ كل هذا ما مكفيچ مريم!! شتردين اكثر!!

-عمر: خوية شو دهد البت عيب بابا ما يجوز اطلس

-مريم: انتَ شتريد بالضبط؟

هدني وشمر ايدي حيل وكال بنتره..

-ما رايد منج شي

عبرني ونزل الدرج سريع بقيت بمكاني ممستوعبه هذا شبي معقولة عنده مرض نفسي لو شسالفة؟ اجه ببالي اكول يمكن يغار عليه بس هو اليغار هيج چنه ثور خلع ايدي خلع..

ما حچى عمر ونزل وراه، كملنه الدرج وهمه كل شويه يوكفون يجر نفس الاطلس ويكمل نزول وضعه شكد ما اكول تعبان يمكن ماكدر افسر وجهه صاير مو بس اصفر متحول لمادري يا لون ومتعرق وايده ترجفف..

-عمر: ضلعي ارتاح اكعد هنا

-لا لا خلي ننزل

-اطلس انتَ مو بخير ارتاح خوية لا تتعب نفسك

-مريم: شبي؟ استاذ انتَ زين؟

-عمر: اطلس؟ شو عاين عليه اطلس وينهه ادويتك؟؟؟

اشر على حلگه ووگع على باية درج وكعد عليهه اخترعت هبدته جانت قوية، فوراً اتصل عمر بواحد من الولد حتى يجون..

-عمر: علاجك وين؟؟ اطلس ويننه علاجك؟؟؟

اشر على جيبه وبلحظة سريعة لحظة مخيفة ومرعبة ايده انعوجت ليوره ورجليّه انطبگو سوه انجنيت من المنظر صرت اعيط بعمر وهو يدور بجيوب اطلس عن شي..

-مريم: يمةةة استااذ شبيكك استاااذ عزه بعيني صخام ولطام بوجهييي

-عمر: ماكووو ماكو ادويه اطلسس شو عاين عليه لاااا

جسمه كله صار يتلوى وعبونه تتگلب، عض على اسنانه بقوة وعمر فتح حلگه حييل راح يشگه جسمي صار يرعش ماعرفت شسوي عمر صاح بيه..

-كضي ايده حييل كضيهه مرريم لا تهددديهه

لزمتهه وماكدرت اقاوم عبالك لازمه حجارة من القوة، صار ينتفض بمكانه بطريقة همجية مرعبة تخبلت كمت اللطم ماعرفت شسوي عبالك روحه دتطلع..

-عمر: ولججج ايددده لزميههاا زييين مريييم ايددده راح تنلوووي

-مريم: مدا اسيطررر والله ماسيطرر عليه قوووي سوودة بوجهي مااكدرر

-كعدي على فخاذه ثبتي ركباتج على فخاذه وضغطي على ايده بقوتج مررريم

-عزززه شنو اكعد على فخاذه صدك تحجيي

-ولج يللللللللللة

عاط بيه صوت رادت تغيب روحي بس تماسكت، ماعندي الجرأة اسوي الگاله فـ وگفت على فخاذه وكتله يعوف ايده ثواني ماكدرت اتوازن ووكعت بسبب رعشة جسمه القوية..

-عمر: تعالييي لزمي لسانه لا يعضضه اني اتحكم بجسمه تعاااالي

-اي اي اجيت والله اجيت

بسرعه رحت اضغط على خدوده حتى ميعض لسانه اشوف حالته وعيوني تصب ماعرفت شسوي حسيت روحي عاجزه، باوعت لعمر كعد على فخاذه وضغط على ايده بنفس الطريقه الشرحلي بيهه..

استمر الوضع دقايق ياله كامت تقل رعشته شويه شويه بالتدريج الى ان اختفت وفقد الوعي، ذب نفس منهك عمر وكام عنه بقى راس اطلس بحضني..

-مريم: شنو صار

-عمر: نوبة صرع

-مريم: شنو نوبة صرع؟ اطلس عنده صرع؟؟؟

-اي

هديت راسه وكمت اوكف بمكاني هاي اول مرة اعرف عنده صرع ولهدرجة قوي الي احس اديه ماتن من وره رعشة جسمه..

-عمر: حسيت راح تزوره اليوم من وجهه چان اصفر وتعبان

-مريم: لعد ليش ما اخذتو للطبيب؟؟ ليش خليتو حالته توصل لهدرجة؟؟!

-عمر: ما يفيد العلاج مالته بس يأخرهه شوي بس تبقى تجيله خصوصاً من يعصب لو يتوتر تتفاقم حالته وما يكدر يسيطر على روحه بعد

-يعني بسببي هسة وكع؟؟

-مادري بعد

بقينه كاعدين على الدرج ننتظر مساعدة احد وعمر شرحلي عن حالته وكال ان محد يعرف بهذا الشي غيرهم وغير اهله اطلس يتخبل اذا احد ثاني عرف يشوف هالشي عيب والناس تنمرت عليه هواي من جان صغير..

-مريم: ليش يتنمرون ليش؟؟؟ هذا مرض تره

-عمر: بعد جهله من چنه بالمدرسة شبع تنمر خطية

-تجيله النوبات هناك؟

-اي تكررت كم مرة من جان صغير تجيله بالسبوع مرتين ثلاثة وبأوقات متفاوته هسة من كبر قلت صارت تجي بالشهر مرة او بالشهرين مرة وهكذا..

-مريم: شنو چانو يكولون؟

-عمر: يصيحوله المنتول لو المرعوص ويضحكون عليه ويتنمرون مرة من المرات اتذكر وكع بحمامات المدرسة چان رابع ابتدائي والكل صافن عليه محد تدخل ولا احد ساعده

-وتالي؟؟

-عض لسانه بوكتهه والدماية طلعت نافورة من حلگه بقى ما يكدر يحجي شهر الدكتور كال الله سلمه وما انكطم لسانه

-سودة عليه

-هواي عانى من الصرع كلش هواي

مسحت دموعي وبقيت اباوعله شكله ما مبين مريض ولا مبين يعاني من مشاكل الي يشوفه يكول الله شلون حياة مثالية عنده ومرتاح فلوس وجاه والدنيا كلهه جوه رجليه بس ممكن كل هالشغلات مو بعينه والسبب مرضه..

-مريم: زوجته تدري؟

ماعرف ليش سألت هيج سؤال تندمت عليه خصوصاً بعدما عمر ضحك وكال..

-عمر: لا ماتدري

-ليش تضحك؟

-عمر: هيج

-برأيك هذا احد الاسباب ميقبل يتزوج؟ شوف طبعاً اني سمعت بي ماعنده علاقة ويه زوجته واصلاً ما راد يتزوج صدكني لا تحسبه فضول او شي بس مجرد استغراب

-عمر: لا عادي واساساً مادري يجوز هذا سبب من الاسباب

كام من جانبي ونزل الدرجات كال تأخرو وهو راح يشوف وين صارو، تركني وحدي بصف الاطلس نايم مثل الطفل الجبير رغم زعلي وضوجتي منه بس ماكدرت مانقهر عليه..

فكرت اصحي طلعت عطر من جنطتي واجيت اريد اشممه بس ما لحكت لان فتح عيونه وصفن بالسكف..

اللتزمت الصمت ماحجيت وهو على وضعه، بعد دقيقتين همس بتعب..

-عمر؟

-مريم: راح جوه يشوف اصدقائك وين صارو

من سمع صوتي عصر عيونه حيل واندار على جهة الحايط، بقى جامد لحظات وكام بسرعة من مكانه بس بصعوبة كلش..

-اساعدك استاذ؟ تعال استند عليه

ماقبل بس ما خليته اجيت ولزمت ايده وحطيتهه على كتفي، كال بصوت ناصي كوة سمعته..

-احتاج حمام

-هاا اي اي يله ننزل بهذا الطابق اكو حمامات

نزلته على كيفي كلش وكل شويه يوكف ويلزم معدته عبالك راح يتقيء استعجلته حتى يروح للحمام وفعلاً دخلته للحمام ووكفت اني بالباب فوراً راح على المغسلة وفرغ كلشي بمعدته..

ابتعدت وسديت الباب حتى مينحرج مني، وكفت انتظره وداخلي ميته قهر شنو هاي مجنت ادري بالمحيط الاطلسي مريض امداك ليش ماحجيت..

بعد فترة طلع من الحمام وضعه هواي احسن نشف حلگه بالكلينس البيده وذبهه بالسطلة يتصرف بـ روية وميخلي عينه بعيني..

-استاذ؟

وكف بمكانه بدون لا يدور وجهه عليه، رحتله وصرت مقابيله..

-مريم: استاذ اعتذر يمكن حالتك تدهورت بسببي

-اي بسببج

-اسفة بس انتَ تجيبهه لروحك شدعوة عليك

ضحك بجزع ومسح وجهه وهمس كلمة ما سمعتهه..

-مريم: لازم تبطلني حتى تخلص

-ما اخلص ما اخلص

-اخلص مني استاذ والله راح ترتاح

-چا اذا رحتي من منو اسمع كلمة استاذ بعد

-خليهم يعدلون حلوگهم ويصيحولك استاذ شبيهم خابصينه موسيوو وموسيوو

-واذا رحتي بعد منو تشل گلبي بلسانهه

-عادي خولة لسانهه چان طويل عود رجعهه

-هههه مريم اويلي يا مريم

-مريم: استاذ اويلي يا استاذ عوفني اعتقني ياخي اعتقنييي

-ماعوفج للموت ماعوفج

-هااا هو بكيفك

-اي بكيفي

-ماا اشو اله تعوفني ماريدك

ضحك بصوت عالي واني انتبهت لچفصتي، تقرب مني وكال بغمزة..

-ليش اني ببالج

-ايعع لا طبعاً

-هااا

-استاذ ما اقصد والله بس شوف هو مو هيج الموضوع بس اءء

-شنو

-اسمك استاذ يسويلي جالي

-اسمي؟

-والقران بس اسمك بي طن تنمر

عقچ وجهه بدون لا يجاوبني، فرحت وبداخلي ميته وناسة..

-استاااذ

-نعم

-اوووستاااذ

-ها كولي

-استاذ عوفني اريد ابطل

-ماعوفج وعلي

-الا تعوفني الاا

-ماعوفج لا تحاولين

-اي لييييش

-بكيفي

-اهووو لطش

-ولج شنو هاللسان

-انتَ تعيب عليه هواي

-تستاهلين

ضحكت وضميت فمي بيدي ابتسم ابتسامة واسعة وكال..

-ابقي مريم ولزمي لسانج بعد ما نتعارك وعد

-ماا

-والعباس ما نتعارك وهاي حلفت بعد شتردين

-عود ليش متقبل تبطلني

-حتى نسوگ عليج

-ياااااا

-ههههه خوش تشتغلين ماعوفج

-اريد اترك ماحب شركتكم

-حبيهه مريم حبيهه

-ماحبهه اكرهها

-حاولي تتقبليهه لخاطر تينا

-استاذ خليني ابطل مو اني خطية

-والله اني الخطية

حچاهه وسند ظهره على الحايط، تقربت منه وكلت بطريقة مايعة تلعب الروح..

-استاذ

-ها عيني

-استاذ انتو هنا شايفين رواحكم على مادري شنو

-مو اتفقنا تكضين لسانج

-ويعع وهاي دارسين زاعجتني اضوج منهه

-منو؟

-نورسين ماحبهه استاذ غاثتنه وغاثة كل بنات الشركة شلون طايقهه انتَ

-شعليج بيهه ام لسان

-اي صح معليه بيهه

تركته ورحت اريد اروح للدرج واجه ورايه نزلنه الدرج سوه على كيفنه الى ان وصلنه للطابق 18 وتلاكينه ويه جماعته انخبصو بي خبص وحمزة تخبل من شافه وصار يلوم بروحه ويكول..

-حمزة: من دون الايام طلعت قبلك اليوم بس والله خابرتني غدير تبجي وتنوح زعلانة

-الاطلس: عادي حبيب براحتك عمر ما قصر

-مريم: احم اءء واني اروح البيت بعد من رخصتكم

-الاطلس: لا اوكفي نوصلج احنه بطريقنه

-لا استاذ تسلم اني اروح

ماخليته يحجي وفلتت بسرعة طلعت اتمركض واضحك فرحانة فرحااانة ماتوقعت الموضوع راح يصير بهذي السرعة ولا توقعت هالكد راح يونسني ويفرحني ويغير كل مزاجي..

وصلت للبيت ونانا استقبلتني وكالعادة استلمت رئيس الشركة تحجي عليه وتذم بي لان خلاني اتأخر بالشغل..

تعشيت وياهه وسهرنه على فلم وكعدنه نسولف لحدما صارت بالثنتين بالليل باجر عطلة واخذنه راحتنه، رحت للفراش حتى انام مطفية واجاني اشعار على موبايلي..

رفعته وانتبهت رسالة من رقم غريب اول مافتحتهه عرفتهه من "الاطلس" ضحكت منتعشة روحي فرحانة وسعيدة والكاع مسايعتني همست بداخلي بخبث "اجيبك للدرب گتلك اجيبك"........

يتبع ♠️💸....

• ━━━━━━❪♣❫━━━━━━ •

ها هلو عيني هلوو 🙈😁

اسفة علو التأخير بس ما هلي ما انزللكم برتوت وضغطت على نفسي وكتبته 🥹🫶🏻
ارائكم تعليقاتكم توقعاتكم تصويتاتكمم 😻💕