رواية الاطلس "دمليج أسود" الفصل السابع 7 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

كنت عابراً ما الذي ابقاك فيني ♥️

• ━━━━━━❪♣❫━━━━━━ •

سحبوني وياهن حتى نروح وماسمع غير صوت صرخة هزت جدران الشركة هزز خلتنه نبلع العافية يبس دم جسمي واخذتني الرجفة ثواني وضحى خربت ووكعت علينه..

دخل عمو محمد بصوت يرعد وزلم ثنين ضخام واكفين وراه، مانتبهت شصار اللتهيت ويه ضحى نصحيهه مدا اكدر اسيطر واكعة عليه وكوة سانده روحي..

اخيراً بدت تصحصح ولسه تصيح دايخة وماكدر اوكف، اخذتهه تينا تكعدهه واني بقيت اتابع شصار وشنو راح يصير..

-محمد: شكوووووو شصايررر هناااا حمززززة!!!

حمزة كلمة ما حچه وبقى على وضعه ويه الاطلس والشباب محاوطي، اخيراً وصلت الاسعاف واسعفو ومحمد باقي بمكانه يفور فوران وجهه راح ينفجر من العصبية..

حمزة راد يروح ويه اطلس للمستشفى وجره محمد ماقبل، اشر لعمر وعلي يرحون وياه وصاح بحمزة..

-محمد: انتَ حسابك بعدين!!

اندار منطي ظهره وراح لـ فاهد الواكف ووجهه صاير خريطة والدماية تقطر من ذقنه خزره محمد خزرة اني الواكفة بعيدة متت خوف..

-محمد: شتسوي بشركتي؟!

-فاهد: اجيت اسلم

-محمد: وعليكم السلام..

حچاهه وانطاه راشدي فر وجه فاهد فررر، شهكت مكممة حلكي مدا اصدك الصار عيوني خانتني وغوشت..

بقى فاهد واكف بمكانه ما مصدك وتعال يا محمد اتفل عليه وادفعه وگعه بالكاع، كال وهو يباوعله بأحتقار..

-محمد: روح سلملي على ابوك.. يا حشرة

تركه بصدمته وطلع ووياه زلامه وحمزة لحكهم بره الشركة ماعندي شك راحو للمستشفى حتى يتطمنون على اطلس..

**

"رقية"
كاعدة اكلب بموبايلي وسارة حاطه راسهه بحضني وتكلب بموبايلهه، الدنيا سلام وهدوء وامان قبل لا تدخل علينه غدير تتحلطم..

-وين صار ما تكلولي ووووينه

-سارة: غدو انطي الرجال فكة

-غدير: ولا كلمة اني محترك دمي وراح اموت وهاي تتفلسف براسي

-رقية: مو فلسفة خية بس صدك خلي يتنفس ويعع مل منج مگابلته وكاعدة

غمتني وكامت على تلفونهه تتصل بي وينطيهه رفض الى ان غلق جهازه هي تخبلت وصارت تبجي ومن القهر تعالي ورگعي موبايلج بالحايط..

-غدير: ليييييششششش شسوووويتتتتت انيييي

-رقية: يمة تخبلت البنية

-غدير: ولجن راح اموتتت شنو هسة غير افتهم اني شمسوية ويعاقبنيي

-سارة: ما مسوية ولج يمكن الرجال مشغول

ماحجت شي راحت على المراية وصارت تلعب بشعرها وتكول..

-غدير: تحسون مل مني؟ اغير شكلي؟ اصبغ شعري اسوي فلر لو تاتو لحواجبي شتكولون بنات؟

-رقية: شوف احنه وين وهي وين

تركتهم ونزلت جوه اشوف امي اباوعلهه شاده راسهه وتون من الوجع، كعدت يم رجليهه بدون لا احجي وهي تدردم تدردم تدردم تدردم ماخلت واحد بحاله يا شايلة حمزة يا شايلة مسلم يا راكعة عمر يا دايسة على علي..

-يماااا شبيچ

-حصة: اخخخ اخخخ يالقهررر اااخخخ

-رقية: شنو هسة غير افتهم

-حصة: اخوج الكاطع غاضبة عليه اني غاااضبة عليه دنيا واخرة

-ياا عزة شكو تغضبين عليه هو شمسوي ليش احنه شايفي

-هو ما نشوفه لا يكول ازور امي اجي احب ريولهه احب راسهه اتطمن عليهه اوووف يا خسارة التعب والتربية

-تره نانا ربته مو انتِ

-حتى لو حتتتى لو ابقى امه اناااا

رجعت تولول وتدردم قاطعت هذيانهه الخدامة تكول اجه ابوية ووياه الاطلس..

-حصة: يا بعععد عينيي يبعد طواييف اهليي وليدددي وحيدددي

-رقية: منو الغضبت عليه قبل شوية

-ساعة عصبية ياربي ماغضب عليه ماغضب اسحب دعوتي ياربي سامحني

دخلو علينه ابوية ونانا وجايين الولد كلهم مساندين اخوية اطلس كوة يمشي، شهكت امي وكامت تركض عليه وتتسائل عن حالته..

-محمد: مابي شي حصة فكيته من عركة

-حصة: اووف منك اوووف ولك شوكت تكبر شوكت تجوز من سوالفك زوجناك وبعدك مستهتر

-عمر: عمة على كيفج كلنه تعاركنه ويه ذاك المنحط

-محمد: ولااااا كلمة!!!

سكتو كلهم وابوية امرهم يكوفون كلهم كدامه وهو راح اخذله مقعد على التخم، حط رجل على رجل وفرك وجهه..

-محمد: شسوي بيكم ما تكلولي

-حصة: محمد فهمنه شصاير

-محمد: يعني شنحصل لو مصوريكم وناشرين العركة على مواقع التواصل والجرايد جاوبونيييي؟؟

-مسلم: عمي افتهم مني...

محمد: خبلتوونييي كلكمم نفس الطينة كلكممم ولكم اسمنه راح يصير بالكاع من وراكم ومن وره غبائكم وتهوركم!!

-علي: محد صورنه عمي

-محمد: وانتَ شمعرفك لو عين على العركة وعين تراقب خاف واحد يصورك

-حصة: محمد فهمنا!!

شرحلنه ابويه مختصر مفيد ميكدر كل دقيقة يسكت وياخذ نفس مبين تعبان ومهبوط على الاطلس، اثناء حديثه نزلو غدير وسارة غدير ركضت على حمزة متخبلة تكلب بي وتعيط بخوف..

-شبيكك حمزة شصايرر ليش هيج مدمى متأذي حبيبي؟؟ راح اموت جاوبنيي شبيككك ماما بابا شبي حمزززة

-محمد: مابي شي اوكفي على صفحة بنيتي

-غدير: شنو اوكفي على صفحة بابا باوع الدم الي بوجهه وملابسه مزگة

-محمد: غدير!!!

عاط بيهه وهي تتحلطم متقبل تعوفه گوة حمزة بعدهه عنه وهمس شي بأذنهه هي هزت راسهه ووكفت بصفي اني وسارة..

-محمد: منو بده بالعركة؟

خمستهم ساكتين ومنزلين راسهم، كرر ابوية السؤال بحدة وهم محد جاوب..

-محمد: الي ما يعترف ويكول منو بده العركة كلكم تتعاقبون فصل عام من الشركة تحلمون تشمون ريحتهه بعد

تقدم حمزة وحچه بهدوءه المعتاد..

-حمزة: اني بديت العركة

-الاطلس: لااا جذاااب اني بديتهه ليش تجذب حمززة

-علي: تاكلون خ** اني بديت العركةة وعمر شاهد

-محمد: وتالي!!

-حمزة: شباب من رخصتكم ماريد احد يدافعلي اني بديت العركة وما ندمان والمرة الجاية اكسر رگبته وادوس خشمه العالي

-محمد: وبكل صلافة تحجيهه كدامي؟! فوك شينك قوة عينك؟؟

علت نبرة صوت حمزة وحچه بحرگة..

-چاا اخلي يجيب اسم شرفناا وعرضناا كدام اليسوه والما يسووه والله انعل والديه عمي اعذرني لو تطردني من البيت هم ما اسكت

-الاطلس: ولا اني اسكتت انعل ابوه على امه العااار هذا ابن الزنااا ولكمم اني يجيبون طاري اختيي وعلى لسان واحد وصخخ مثل فااهدد

-محمد: شنو شنو منو يا اخت!

-مسلم: عمي انتَ ما فهمت السالفة من اولهه رأساً بديت بينه رزايل وعقوبات

-عمر: جاب طاري سارة ويكول لحمزة اخذهه من عيونك لان يعرف حمزة متعلق بالبنات ويشوفهن بناته

شهكنه وابوية وجهه بعد ميتفسر كام ينطي اللوان..

-حمزة: اشلع لسانه الي يجيب طاريهه كدام بشرر شنو ماعدهه زلم ماعدهه اخوة اذا اطلس ما جان موجود كلنه اخوتهه وكلنه بظهرهه!!

-علي: بعدين يهددناااا يا سااارة يا الشركةة وين احنه عايشيننن ويننن بحظيرة غنممم

-مسلم: ويحجي على شرفنا وبناتنه حتى الخدم ما عافهم بحالهم ويعاير بينه وبـ نانا مربية الاطلسس

-الاطلس: اني قصرررت ما شربت من دممه انعل والديه اليحجي على الربتنييي

-محمد: كااااافي

صاح صوت سكت الكل بس وجوههم مطعونة طعن وحالتهم حالة، كام على حمزة ووكف بوجهه جره من ياخته كدامنه كلنه وكال بتعب..

-محمد: يجيبون طاري سارة

-حمزة: اي 

-محمد: ليش حمزة لييييييش

-حمزة: فجأة اجانه يتبختر ويخرط راح اخذ الشركة وسارة وغصباً عليكم

-محمد: اني امنتك على الشررركة والولددد حمزززة اني امنتككك

-غدير: باباا على كيفك وياااه شنو ابتلى بالولد هو

-محمد: اسكتي غدير

-حمزة: عمي اني كد الوعد والامانة بس فاهد من دخل اني جنت جاي اطلع ومن سمعته يهوبز كدام الموظفين ما تحملت كظيته وطيحت حظه

-محمد: ولك ساررة هاي سااارة

-حمزة: ادررررري سارة ادررررري عميييي لا تخبلنييييي

هده ابوي واحنه كلنه صافنين على كلامهم واللغازهم كلنه صرنه نباوع لسارة الي وججها مبلوع ومايعة روحهه..

-الاطلس: يابه انتَ بس انطينه اشارة والله نخسف بيهم الكاع انطينه مجاااال

-محمد: لا لا اتركوهم لحد يتجادل وياهم همه يملون ويرحون

-عمر: ونخلي يجي لشركتنه يصول ويجول ويضرب چقلمبات بيناتنه وعلي ابن ابي طااالب ما ارضى بهالشي

-محمد: عمر كافي لا نظل نتناقش زايد بهذا الموضوع يله توكلو لبيوتكم

تركهم بابا وصعد فوك لغرفته، اجت امي على اطلس تريد تطمن كللهه مابي شي وخلاهه تلحك ابوية..

-غدير: الله ياااخذكم كله من وراكم حمزة تأذه انتو شنو من شي ما محصلين منكم شي غير البلااا والطيحان حظ

-الاطلس: غدير شبيچ تخبلتييي

-غدير: طبعاً انتَ مدلل ابوووك ميحجي وياك شي بس حاط حمزة ويهزأ بيي

-حمزة: غدير ولا كلمة

-غدير: مو..

-حمزة: ولااا كلمة كلت!!

لصمت حلكهه بيدهه حيل ووكفت على صفحة تباوعله وفايرة روحهه واني عيني على سارة المسكينة اكيد ماتت من الخوف..

-علي: اني رايح للبيت شباب محتاجين شي؟

-عمر: لاحگك اني اخذني بسيارتك ايدي انفسخت

-علي: وشلون راح تصمم يبعد امك

-عمر: بـ***** بيمن اصمم يعني باليسرة

-الاطلس: ادبسززية امشو بره تفشرون كدام البنات

-حمزة: طايحين حظ

-مسلم: الحمد لله ما فشرت ولا طلعلي حس

-حمزة: انتَ انجب

تفرقو كلمن بمكان واحنه كعدنه نتصفن وسارة كالعادة هادئة ما طلعلهه حس..

**

"مريم"
عيني ماغفت هالليلة القلق نخر عظامي نخر راح اموت اريد اعرف شصار يارب محد تأذه يارب..

بقيت كاعدة بالصالة ورة ما نانا طلعت اتصل بيهه مسلم وخبرهه ان اطلس بالمستشفى وهاي صارلهه ساعتين ونص ماكو..

علكت التلفزيون على القران وكاعدة واكل بأظافري صارت الساعة 2 بالليل ياله رجعت نانا طمنتني ان مابيهم شي بس عمر انفسخت ايده وحمزة صار جرح عميق بخده احتاج خياطات..

مثل ما ذكرت رغم هذا مانمت وطلعت فوراً للدوام فتت من باب الشركة كلشي طبيعي وكأن شيءً لم يكن..

صعدت لقسمي وكعدت على كرسي المكتب ما كمت اليوم كله لحدما طلعت للبيت وهكذا مشه اسبوع على هالوضعية لا اني اشوف احد ولا احد يشوفني..

يوم الثامن رجعت لحياتي الطبيعية نوعاً ما كلشي هنا ميعجبني هاي مو حياتي ولا نمط عيشتي ولا اسلوبي حتى كلامهم يختلف عني واحس بالنقص وعمري ماحسيت بالنقص بس غصب حسسوني بهالشي بسبب نظراتهم وكلامهم عني..

كلش تأذيت من نزلت اليوم على الغده وسمعت شله تحجي من تعدو مني وصاحولي "البيئة" وعيبو عليه واسمع كهكات البنات والشباب يضحكون ماتحملت وطكت روحي ردت اتعارك لولا استاذ علي جان موجود وسمعهم..

طيح حظهم بالرزايل ولعب بيهم فلك وعاقب الكل ماكو استراحة غداء اله وخلاهم يرجعون لشغلهم، ابتسمتله ممتنه غمزلي وعفس ارنبة خشمه وكال..

-جميلة بكل حالاتج لا تتأثرين بهاي الحثالة

هزيت راسي وكملت طريقي للكافتيريا اكلت ويه تينا وضحى وهنه يسولفن على اخر عركة صارت انتبهت وياهن كالن ان صايرة مشكلة كلش جبيرة وشركة شمسون رافعين دعوة ضد الاطلس وحسب مافهمت اكو شركة هم متضامنة ويه شمسون وصايرة لخه على الاطلس وجماعته..

-ضحى: اعلى ما بخيلهم يركبو مسيو حمزة راح يمسح بيهم الكاع

-تينا: كلش اتفق ذوله الصبيان اشايفين رواحهم تره لعبو رواحنه يومية مسويلنه سالفة

-ضحى: خيولون عوع يلعبون الروح خصوصاً هذا فاهد رب الفساد والاستهتار ماكو بنية تسلم منه

-تينا: مقرف سادي

ما شاركت بالحديث كلش متضايقة لازم ارجع شغفي وتقبلي للمكان ميصير من اول سالفة اريد انسحب..

كمت ارجع لشغلي صار بوجهي الاطلس، اول ما شافني عگد حاجبه..

-آنسة مريم؟

-مريم: نعم استاذ

-خوما بيج شي صارلج اسبوع ما مبينه

صفنت بوجهه ماتوقعت راح يلاحظ اختفائي، ابتسمت وحجيت بتعب بسبب قلة النوم والاكتأب الصايبني..

-لا استاذ اني موجودة بس ماطلع من المكتب

-الاطلس: اها، لا تجهدين نفسج بالشغل مو زين عيونج ذبلانة

-مو من الشغل عيوني ذبلانة

تعمدت احجي كدامه وارجع واكول اذا اله ما افضفض وهو زوجي غصباً عنه يسمعلي المن احجي..

-استاذ كلش خايفة اني من كل الي ديصير

تمشى وهو يأشرلي امشي وياه يكمل طريقه للمكتب مالته، بقيت اهذي براسه الى ان دخل للمكتب كعد على الكرسي وبقى يباوعلي ويستمع، الاطلس مستمع ممتاز وميقاطع الشخص لو يموت..

-الاطلس: انتِ شهدتي الصار قبل كم يوم؟

-اي شفت ومتت خوف استاذ كالو انتَ تأذيت واستاذ عمر انفسخت ايده والباقين انجرحو

-لا احنه بخير

-هاي دائماً هيج عركات اكو ؟

-لا

-والله خفت مو حالة هاي

تأفأفت ومن كيفي جريتلي كرسي وكعدت اني اريد اجلطه واعصبه كلش مزعوجة منه خصوصاً واني لسه ما رجعت حقي بس تفاجأت من ابتسم بدون لا يعلق..

-استاذ يعني فرضاً فرضاً هذا شمشون رجع يريد يأذيك شتسوي

-ما يرجع

-ورجع؟

-ما يرجع مريم ارتاحي

-تره اني خايفة گلبي راح يوگف مخترعة كلش

-سلامة گلبچ

-استاذ يعني هسة انتَ مابيك شي؟

-لا

-عود صدك شو وجهك اصفر

-مابيه شي عزيزتي

هلو شو صارت بيهه عزيزتي عيب احترم نفسك..

-ها زين لعد طمنتني

توسعت ابتسامته اكثر وغمض عيونه ممتن مني، كممت فمي مثل عادتي ماكدرت اسيطر وضحكت، رفع تك حاجب وكال..

-شو تضحكين عيني

-ههههه ماكو شي

-ان شاء الله ماكو شي

-اممم كملت شغلك

باوعلي بنظرة ذبلانة شلون الي ديكول لا بله..

-مريم: يوووه اخذني الواهس صح

-الاطلس: ههههه براحتج عيني براحتج

-استاذ ممكن سؤال

-تفضلي

-استاذ شوف بس مو تزعل خلينه نحجي الصراحة تره.....

قطع كلامي فتح الباب ووحدة مدت راسهه منه وكالت بلكنة فرنسية..

-بونجور

باوعت للاطلس ابتسم واشر بيده تدخل وياريتهه مادخلت لان فوراً ربطت هي منو، بنية طويلة ممشوقة القوام لابسة لبس فاضح وشعرهه الاشقر شايلته نافورة ملامحهه اجنبية مية بالمية وكأن ماكو دم عربي يمشي بعروقهه..

تقدمت على الاطلس وهو وكف يسلم عليهه من بعيد دزتله بوسات بالهوا واني فاكة حلگي عليهم، ابتسم وكال..

-تفضلي نورسين

-نورسين: بيبي شكد مشتاقة

كعدت وهو ما علق واخذله مكان بجانبهه حسيت روحي غير مرغوب بيهه عفتهم وطلعت متعصبة بدون لا استأذن منه، رحت للمكتب مالتي ميته حرگة ميتةة راح انفجر شنو هذا الاستهتار تجيب عشيقتك هنا على الاقل احترم الناسس واحترم انتَ متزووج كدام العالم!!

ذبيت روحي على الشغل ماخلي شي يضوجني لو يلعب بعقلي، اسمع لـ خولة المكروهه تحجي وتهذي براسي وتدردم بس ماعرف على شنو بالي مو وياهه..

-ريتاج: طلعت المزيونة

-خولة: نورسين؟ شعجب ما طولو هالمرة هههههههه

-ريتاج: ولج عيب عززه

-خولة: والله كل مرة شيشلعهم تظل يمه نهار كامل لحد نهاية الدوام ياله تروح بس يجوز هالمرة تعبانة سودة عليه مو مال جهد خبنو السالفة خبن هههههه

-مريم: شلون يعني

حچت خولة عن الي بالهه وشكد ما اني معصبة ومقهورة بس ماتحملت وكلت واني اقنع روحي..

-مريم: حبيبتي خولة انتِ چنتي وياهم بالغرفة؟

-خولة: شنو؟؟

-مريم: انتِ دتحجين بشي حرام تدرين لو لا

-خولة: لا بله

-مريم: اي لان دتقذفين بنية بشي هي يجوز ما سوته

-ريتاج: صحيح

-خولة: دطيري لعد شعدهه وياه بالغرفة اربع ساعات شنو يسوون ختمة قران

-مريم: مهما كان حبي بس ميجوز تتهمين من كيفج وتكولين جانو يسوون شي حرام انتِ محاسبة على كلامج هذا ويمكن ترجعلج بعدين ويجي شخص يتهمچ اتهام مو حلو

-خولة: وانتِ شبيچ راح تموتين شعليج باباا

-ريتاج: خولة دتنصحج مريم لا تهجمت عليج ولا تجاوزت

-خولة: انتِ اكرمينه بسكوتج فهمتي اريد افتهم انتِ مريم شحارگ حمامچ؟؟؟ شعليجججج؟؟؟

صوتهه عالي كلش نرفزني رغم جنت احجي وياهه بكل هدوء..

-مريم: لان عدتي نفس السالفة قبل كم يوم ويه استاذ مسلم من دخلت عليه بنية وطولت رجعتي عدتي هالشغلة وقذفتيهه وبعدين عرفنه ان چانو يشتغلون على تصميم جديد ورغم هذا ما سحبتي كلامج وبقيتي تكولين هي جذابة

-خولة: غير يكعد النبيي بطلي استشراف بروسنه مررريم بطليي

-مريم: انتِ شبيچ شسالفتج يعني صار الي يأمر بالمعروف يستشرف؟!!

-خولة: اويلي منجن امهات الحجاب والشرررف مبرگعات رواحجن بالحجاب ومن جوه مليانات خياسس

-مريم: احترمي نفسج خولة اني ممتجاوزة عليج ليش كل هالاتهامات!!

-ريتاج: بنات الله يخليكم على كيفكم لحد يسمع

-خولة: ريتاااج انتِ طلعي منهه لا تخليني اطبك عليج

سكتت ريتاج وطلعت خولة من الغرفة متوجهه للبيت متت من القهر لصمتني على حلگي هالحقيرة شكد مسمومة من اول ما تعينت هي تبسمر بيه وتتهمني بشغلات..

ذبيت نفس وكمت للحمامات اغسل وجهي لازم اطلع للبيت ماريد نانا تنتبه على الزعل الي بعيوني، بالطريق هم شفتهه وذبتلهه كلمة كدام ثلاث بنات واكفات بباب وحدة من الغرف..

-خولة: جايه بـ ثوب جديتي 

ضحكن البنات ضحكة جماعية ماهتميت يمكن مو عليه دتحجي غبيت نفسي وكملت طريقي..

-حبي اذا ماعندج فلوس اني اداينج بشرفج بدلي هاي الفساتين تره تفشلييييين

-مريم: هاي وياي؟

حجت وحدة بصفهه..

-طبعاً وياچ بابا شنو هالذوق الزبالة جايتنه بفستان مورد تره هاي شركة شررركة مو رايحة تجدين

-مريم: احترمييي نفسج انتِ منو وتحجين ويايه بهالطريقة!

-خولة: ههههه بنات عوفو الشريفة خاف تتهمنه بشرفنه لان ما لابسات حجاب

-اي هي معروفة محد يحجي بالشرف غير الفاقده هههههه

-مريم: ولجن شنو هالحقارة والدنائة انتو متستحون!!

-خولة: لا بله هاي اقوه شي عندج حبي

حجت الثالثة وهي تبرد اظافرهه..

-حبي اذا تردين تطلعين للسوك اخذي وحدة من صديقاتج وياچ حرامات تدفعين فلوس لهاي الجرود

-تدرين هنا يصيحولج المجدية من وره الدشاديش الي تلبسيهم هههه

-خولة: مو هي شرررريفة ومحججججبة لازم تشتري شي طويل وعريض سودة عليه

-مريم: بسسس عاااد بسسسس انتن والله متستحن وقليلات ادددب

طلع رجال من الغرفة الي واكفات ببابهه وباوعلي عاكد حاجبه ومعصب..

-الرجال: شكووو شبيچ انتِ؟؟

-مريم: استاذ انتَ شنو متسمعهن!!

-الرجال: يله يله كافيي كلمن على شغلهه وانتِ روحي لشغلج موظفات تالي وكت

رجعن البنات الثلاثة وبقت خولة وره ظهري كوة سيطرت على دموعي والله ولا ابجي كدامهه والله ظلم اربعة على وحدة..

-خولة: بت الشوارع الشركة تتعذرج حبي روحي جدي قريب التقاطعات عسى واحد يحن گلبه عليج وياخذج بس مو تتنازلين بسرعة شويه اثگلي ههههه

طفح كيلي اللتفتت عليه وعطت بصوت شگ بلاعيمي من البحة والغصة..

-طايحة الحظظظ ولج غير بنت شوارع انتِ وما مترباية!!!

-خولة: عفنه التربية الجن بنات الليل

عافتني وراحت للمصعد، ماكدرت اتحمل اكثر دموعي صارت تنزل ماسيطرت على نفسي اكره نفسي من ابجي واكره ضعفي بس ماكدر بعد صارلي شهر هنا شفت الويل منهم..

رحت للحمامات شفت بي بنات ماردت ابجي كدامهم طلعت اوكف بزاوية وره زريعة جبيرة وصرت ابجي بالهمسة، الشركة دتطفي اضويتهه معناهه ماكو احد مضى وقت واني ابجي منهارة ظليت اكرص بروحي حتى اسكت بس ماكو فائدة وكعت بالكاع ولميت رجليه لصدري وبجيت لحدما انغسل گلبي بدموعي..

-شو هيدا

سمعت صوت رجال توترت ماكدرت ارفع راسي استحيت، رمقته بنظرة جانبية سريعة شفته جوزيف اللبناني تسائل عن حالي وليش ابجي وراد يكومني ماقبلت من المستحة كتله اني زينة واريد ابقى وحدي..

-تمام براحتك

تركني وراح انوب صرت انوح يبوو عليج يا مريم كافي لململي روحج انتِ مو هيج فاهية وام دميعة بس والله صعبة شكد تأذيت ليش تينا وضحى مكلولي على فساتيني ليش مدحوهن اذا هنه هيجي..

مادري شكد صارلي كاعدة هنا واناشغ اكيد الكل طلع همزين حتى ما انفضح، مسحت عيوني وفجأة عقلي الغبي رجعلي ذكريات اول يوم زواجي وبديت بنوبة بكاء جديدة..

-هاي شني هاي ياهي التبجي

يبوو يبوو لا منو اجه ضميت روحي وره الزريعة وحسيت بي يمد راسه يباوعلي..

-مريم؟؟؟؟

بقيت ضامة وجهي اكيد حالتي حالة وصايرة مطي من البجي..

-ها استاذ

-ليش تبجين منو وياچ مريم؟؟؟

-مـ.. ماكو.. احد.. استاذ

اشاهگ متطلع الحجايه مني ومتنفهم..

-تعالي طلعي منا تعالي.. شو تعالي

مد ايده يريد يجرني ماخليته وطلعت من وحدي وبقيت كاعده بمكاني، مد ايده يريد يمسح دموعي وجريت وجهي عنه بسرعة..

-اسف نسيت

-عمر؟

يبووو يا حظج يا مريم انوب اجه الثاني هذا هو انفضحت اني راح اصير علچ بحلوگهم..

اجه كدامي گنبص نفس عمر وبلحظه سريعة مد ايده وجر ايدي عن وجهي انتفضت وهو فوراً كال..

-شبيچ مريم تبجين؟

-عمر: مادري خوية لكيتهه لابده وره الزريعة تنوح وتبجي وتلطم بس عوزهه ملاية وتشك زيجهه

-الاطلس: منو وياچ مريم حاچيني

-مريم: محد استاذ محد

ثنينهم كاعدين كدامي ولاطشين بيه صرت زركة من الخجل مو بس حمرة مابيه اوخر ايدي عن وجهي اعرف المخاطين والدموع تارستني..

-الاطلس: تعالي كومي وياي غسلي وجهج كومي مريم

كمت بسرعة ورحت للحمامات الاضوية مطفية راح عمر يفتح الميزانية ودخل ويايه الاطلس للحمام بقى واكف بالبال..

-مريم: استاذ مابيه شي صدكني

-الاطلس: لا بيج

-مريم: صدكني ماكو شي

-الاطلس: سمعت صوتج تتعاركين بس ماحبيت اتدخل

اللتفتت عليه مصدومة اذا سمعنه ليش ما اجه رزلنه..

-الاطلس: تجاوزو عليج؟

هزيت راسي اي ورجعت ابجي كدامه مثل الطلي كلما اتذكر كلامهن گلبي يعصرني عصررر راح اموت..

-يصيحولي.. يصـ.. يصيحولي مجدية

-يخسون هذا يا مرعبل يحجي عليج

-كل الشركة كتلك اني مو حبابين محد حباب هنا

-الاطلس: مريم لا تبجين ارجوچ

تقدم عليه اكثر وصوته يقطر حنية الچلب واني بواري وانفتحت من عيوني بچيت مال سبع سنين ليكدام..

-يعيبون عليه ويكولون عني بيئة لان اللبس حجاب وينهه الحرية لعد مو يكولون لكل شخص حرية شخصية

-غصباً عليهم تلبسين الحجاب هذا الشي راجع الج

دخل عمر للحمام هم وسمعني احجي هيج صار نااار وحتى فشار فشر عليهم..

-عمر: ادبسزية هتلية والله اشگهم نصين لا تبجين مريم

-مريم: حقراء كلش شايفين الناس عبيد جوه رجليهم

-عمر: اعمي عين البچتچ مريم اني اربيهم

-الاطلس: يله مريم مسحي دموعج محد يسوه تبچيله

رفعت عيوني اباوعله هاي نفس جملة نانا دائماً تكولهه الي "محد يسوه تبچيله"..

-مريم: شكراً اساتذة

ضحكو ثنينهم واني غسلت وجهي ومسحته وطلعت من الحمام وياهم، بقى عمر معصب بس الاطلس طول الوقت مبتسم بحزن صعدنه المصعد سوه والاطلس كال..

-ما مسموح لكائن من يكن ينتقص من موظف النه بالشركة راح اتخذ اجراء بحقهم مريم

-عمر: انعل والديهم مو بس تاخذ اجراء

هز راسه ومشينه بره المصعد للبوابة، اللتفت عليه عمر وكال..

-امشي اوصلج للبيت

-مريم: هاا لا لا لا ماكو داعي

-عمر: امشي بوية الدنيا ليل انتِ عندج سايق؟

-مريم: لا اروح مشي لو اخذ تكسي

-عمر: امشي وياي مريم لا تعاندين

-الاطلس: اذا تحبين تركبين وياي؟

-عمر: عاشت ايدك اي يمكن تخافين تركبين وياي وحدج روحي ويه الاطلس نورسين وياه بالسيارة

غضبت ملامحي وتشركت منهم وعفتهم اخذت تكسي وگبل للبيت بدون لا اكل ولا اشرب ولا اسوي شي حطيت راسي ونمت..

ثاني يوم كعدت متأخر بما ان عطلة، كعدت طول اليوم بغرفتي حالتي حالة وتعبانة نفسياً وجسدياً ما بطلت احاول اتصل بأهلي بس كالعادة ماكو جواب..

العصر اجتني نانا تستفسر عن حالتي جذبت عليهه وكلتلهه مريضة خطية انخبصت تجيب وتدثرني وكل شويه جايبتلي شوربة شكل وتوكلني..

-نانا ممكن سؤال

-كولي حبيبتي

-الاطلس ما شايفني؟

-نانا: لا مو انتِ ما ترضين تطلعين كدامه

-مريم: لا اقصد قبل لا نتزوج ما شافني؟ مو كالو شاف صورتي

حركت راسهه نافية وكالت..

-نانا: لا ما شافج

-مريم: شلوون بس اهلي كالو شافني وانعجب بشكلي هم هي حصة كلتلنه

-نانا: حسب علمي يَـ بنتي لا ما شايفج الاطلس هو اسمج ما يعرفه

-اسمي ميعرفه؟؟؟؟

-اي ولا مرة سألني عنج اوقات اضغط عليه اريد اسولف بيج ما يرضى ويسكتني

-اسمي اسمي؟؟؟ نانا اسمييي ميعرفه؟؟؟

-اي والله شبيچ

فكيت حلكي مصدومة مبهورة مدهوشة! معقولة هذا الشي حقيقي؟؟ معقولة ما صارله فضول يعرف اسمي او امه تذكرني كدامه او حتى لو ابوه؟؟ هالشي حتى بقصص امي الخيال ما سمعت بيهه!

-مريم: ما اصدك

-ههههه ليش ولج

-زين ما شاف عقد زواجنه؟؟؟

-نانا: لا ابوه تولى كلشي هو ما خطى خطوة يخص هذا الزواج وانتِ شفتي لا اجه ولا سأل ولا استفسر حتى

-شنو هالبرود الفضيع نانا مدا اكدر اصدك

-هو بارد وماعنده فضول بخصوص أي شي مهما كان وهالشي كلش ديسببله مشاكل ويه ابوه يگله انتَ لا ابالي وما تهتم لاحد

-مريم: وهالشي صحيح تره!

-بس هذا طبع مريم وصعب ابو طبع يجوز من طبعه

سكتت ماعلقت اجت ببالي نورسين اريد اسألهه بس ماعرف شلون اكدر اصوغ الموضوع..

-زين نانا هو هم عنده وحدة بباله تعرفين هو شاب وحلو اكيد مصادق

-مادري

-ناناااا لتجذبيييين

-يااا هاي شبيهه متستحين

-احم.. اقصد يعني كولي الحقيقة ما ازعل والله تره هو حر بحياته

-مادري والله صدكيني

-احس عنده

سوت حركة بحلكهه بمعنى ماعرف، قضيت بقية اليوم افكر وارتب الخطوات براسي مدا اقتنع ان هو ميعرفني او ما شايف اسمي بس مع ذلك لازم ابعد الافكار السلبية واشوفلي چارة ويه وضعي وما ابقى هيج..

كمت لكنتوري ودورت على احلى لبسه عندي، طلعت سترة رسمية لونهه اسود واخذت تنورة حلوة سودة لبستهن سوه وفرحت بيهن كلش طلعت كشخة، فكرت شنو اللبس جوه السترة وكلت اللبس بدي اسود والربطة اخذهه لون فاقع مثل ماروني او وردي شنو رأيكم؟..

لبست الملابس ورحت اراوي نانا تعجبت عليه وهالشي فرحني اكثر، اجت رهمتلي ربطة ماروني وحذاء يناسب اللبس وكالت..

-شكد حلووه طالعة

-صدك والله ناناتي مو مجاملة؟

-لا لا كلش حلو وصبغي اظافرج هم بلون الربطة

-لا ناني حرام اكعدي

ضحكت ودفعتني من متني، حضرت ملابسي سبحت ونمت الليلة وابتسامة رضا مرسومة على وجهي، كعدت الصبح وبدلت بسرعة رشيت عطر هادئ ميشمه بس الي يلطش بيه حطيت واقي ومرطب شفه ورطبت ايدي ووجهي وطلعت..

ببوابة الشركة صارت بوجهي تينا من شافتني فتحت عيونهه مبهورة بملابسي..

-تينا: واااو وواااوو سبايسيييي

-مريم: حلوووو

-تينا: يخخخخخبل يخبل يخبل متتت عليه متت

-مريم: كلت بعد ما اللبس فساتيني القديمة مو مناسبات للشركة

-تينا: تردين الصراحة اي احسن قرار تتخذي، اللبسي شي رسمي احلى وارتب

-لعد ليش ما كلتيلي من قبل

-تينا: لان انتِ كيوته ببساطتج وماردت تكولين يردون يغيروني احنه حبيناج وصادقناج مثل ما انتِ

ابتسمت وهزيت براسي، تفرقنه عن بعض وكلمن راحت لشغلهه، اول مادخلت للغرفة شفت خولة واكفه وكبالهه صندوق دتحط بي اغراض..

-مريم: صباح الخير

-ريتاج: هلا صباح النور

مانطيت اهمية لخولة وكعدت على الكرسي مالتي، انتبهت لعيونهه اكلتني اكل وريتاج هم تباوعلي توقعت علمود ستايلي الجديد بس طلعت غلطانة..

-خولة: چلبه حقيرة

رفعت عيوني جانت تدردم وتعبي بالصندوق اغراض، باوعت لريتاج وباوعتلي بحزن..

-خولة: اي اي ظلي مثلي انتِ عود زعلانة عليه

-ريتاج: والله زعلانة عليج خولة

-مريم بهمس: ريتاج شصاير؟

-خولة: انفصلت بسببج يا عااار!!

-مريم: نعم؟؟؟

-خولة: ب**** اجتنه من الشارع وحطت المسؤولين جوه اباطهه

-مريم: احترمي نفسج انتِ شنو هاللسان ايعع متبري منج

-خولة: والله مال اللزمج وانتفج وانتف هاي الخرگة فوك راسج!!

دا اجاوبهه وجفلت من شفت اطلس واكف بباب غرفتنه وياه منار، صوت خولة عالي وهي تهد وتنثني عليه ماردت اجاوب بقيت ساكته وهي تحجي وتعبي بأغراضهه..

-خولة: گبر اي والله گبور فگر لاطي وخابصتنه هو مو صوچچ صوچ الاطلس لفه وحدة مثلج ساقطة ومنحطة...

-الاطلس: كملتي؟

نزت واندارت تباوعله فوراً كامت تبجي يمة شكد حية..

-مسيو هي تجاوزت عليه وتطاولت والله

-الاطلس: هي تطاولت عليج على أي اساس تطاولين عليه؟

-مريم: استاذ تره اني متطاولت هي سبتني وغلطت عليه وريتاج شاهدة

-ريتاج: اي استاذ

-خولة: لا لا جذاباتت

-الاطلس: اطلعي بره خولة

-خولة: بس استاذ...

-الاطلس: ما راح اعيد كلامي!!

انلصمت وشالت غراضهه وطلعت بره الغرفة او بره الشركة كشكل عام، مافرحت ولا جانت عندي مشاعر حزن بنفس الوقت بس ارتاحيت لان ما راح اسمع صوتهه وكلامهه السم بعد..

-مريم: استاذ اني اعتذر بس...

-الاطلس: لحكيني للمكتب مريم

باوعتلي منار وزلغت خدهه يبوو يعني اكيد مصيبة منتظرتني، راح قبلي للمكتب واني تمشيت ويه منار وهي تصبر بيه..

-منار: اليوم اربعة انفصلو من الشركة بسببچ

-مريم: اربعة!!

-منار: اي خولة وثلاث بنات يشتغلون بقسم المونتاج

-مريم: خاف اني هم راح انطرد مناار

-منار: مادري والله بس المسيو اجه اليوم منفس كلش وعصبي صاير نار وراح رزلهم بأحترام وفصلهم كلهم مع تعويض مادي لسنين الخدمة

بلعت ريك وطرقت باب المكتب مالته رجليه ترعش، سمحلي بالدخول جان كاعد على الكرسي مالته..

-تفضلي آنسة مريم

خطيت خطواتي للداخل واللعب بأصابعي ذبيت نفس من وكفت كبال المكتب مالته، وكف على حيله وكام تمشى امامي نازع السترة باقي بالبلوز الاسود ابو الرقبة وبنطرون كتان زيتوني..

بقيت منزله راسي والافكار تتناطح بذهني هلكتني، وكف بُعد متر عني وكال بعدما ذب نفس..

-شلونچ اليوم

رفعت عيوني عليه كوة وحجيت واني لازمة بطني..

-زينه

-الاطلس: شبيچ؟ مريضة؟

-لا لا مابيه شي

-مثل ما شفتي انفصلت خولة بسبب تطاولهه عليج

-اممم

-مريم غير مسموح احد يتطاول على زميله بالعمل ويتنمر عليه اليوم صار اجتماع وصوتت اللجنة بفصلهم اربعتهم

-استاذ اخاف حرام عليه

-ليش حرام؟

-قطعت رزقهم بسبيي

ابتسم بدون لا يجاوب، جر كلاص محطوط على المكتب مالته وصب بي مي قدمه ناحيتي وكال بصوت لطيف..

-الاطلس: شربي ماي واستريحي

-شكراً مو عطشانة

رجعه على المكتب بعدما كال وهو يلوف يكعد بمكانه..

-ما انفصلو بسبب اخر مشكلة فقط تسببو بعدة مشاكل واللجنة من زمان قررت نقلهم بس اخر موقف كانت الحاسمة وعمر أصر ينفصلون

ابتسمت ورفعت عيوني اباوعله، انتبه لأبتسامتي وعكد حاجبه متسائل..

-مريم: شكراً الكم

-الاطلس: اممم، لطيف

ماعرفت شنو سالفة لطيف وليش هواي يكولهه، اشرلي بيده وكال..

-تفضلي لشغلج

هزيت راسي وطلعت من المكتب فرحت بتصرفهم هذا الشي حلو وحسيت ان فعلاً الرؤوساء هنا يهتمون بموظفيهم وراحتهم..

رجعت للمكتب مالتي شوية واجه عمر وكف بالباب كتف ايده وكال..

-شلونچ مرايم

باوعناله اني وريتاج مستغربات فوراً عدل جملته وهو يكول..

-اخذني الواهس، شلونچ مريم ان شاء الله بخير

-بخير استاذ تسلم

تقدم اكثر ووكف كبال المكتب مالتي، ثبت ايده عليه ونصه يمي..

-أي مشكلة تواجهيهه هنا لا تترددين بالشكوى احجي ولا تخلين احد يتجاوز وياكل حقج

هزيت راسي مبتسمة عافني وراح اجت ريتاج تتسائل شكو حجيتلهه الصار البارحة خطية انصدمت بقت شكد تواسيني وتحجي على خولة وجماعتهه وكالت ان هنه اصلاً مشكلچيات وماعدهن اخلاق..

طش الخبر بالشركة وكثرت الاقاويل واني مغلسة ماحجيت اي شي ولا بررت الموضوع، مشت ايام واني ملاحظة الاطلس يوم مهتم بينه الموظفين ويوم مغلس على الكل ودائماً حاط دوبه من دوب عمر ماعرف هذا شقه بيناتهم لو شنو لان عمر يضحك..

جابو بديل لخولة والاطلس وصاهم عليه تينا اجتني تضحك فحطانة وهي تكول..

-تينا: الاطلس كايل للكل انتِ حساسة وديرو بالكم عليهه

-مريم: جذذذذب

-ضحى: والله حتى احنه واصللنه الخبر متت ضحك

-تينا: بسبب اخر موقف صار طلب الكل يحسن اخلاقه ورزلنه رزالة مرتبة غسل بينه الشركة

-ضحى: عمر وعلي هم رزلونه على الواهس من واحد منهم اعترض وكال احنه منوظف محجبات شمعنه وظفتو مريم

-مريم: عزه بعيني صايرة حديث الساعة

-تينا: لا حبي حجابج صاير حديث الساعة اكو معترضين ومعاجبهم

-ضحى: احسن خليهم يغيرون هاي القوانين تره مو حلو شنو هاي ميوظفون محجبات عود شمعنه

عضيت لكمة من اللفة البيدي وداخلي فرحانة كلش حلو هالشي وحلو اهتمامهم بهذا الموضوع انطيهم لايك..

طارت عيني عليهم چانو الشلة كاعدين ياكلون مقابيلنه هاي المرة الثانية ياكلون هنا خلال هاي الشهر ونص اني مداومة.. كسرت عيني من انتبهت للاطلس يباوعلي وابتسمت..

رجعت اباوعله شفته لسه يباوعلي من صرنه عين بعين ابتسم ابتسامة تجنن امداك، رجع ويه جماعته من علي حچه واني بسرعة كمت اكمل شغلي..

اللتقينه مرة ثانية بالمصعد سلم عليه رديتله السلام لزكت روحي بالزاوية وهو واكف على بُعد عني..

-الاطلس: شلونچ آنستي

-مريم: زينة مسيو

اللتفت بسرعة يباوعلي ضحكت وكممت حلكي ضحك ويايه وكال بطريقة متلاعبة اول مرة يحجي بيهه..

-الاطلس: حلوة بحلگچ

-مريم: لا عوع ماحب اعوج بحلگي

ضحك بدون لا يرد وسمعته يهمس "اوف من لسانج اوف" تعديته ورحت للمكتب مالتي ميته ضحك بداخلي دخلت للمكتب منتظرته يتعده من بابنه وفعلاً تعده وبصفه عمر ومسلم..

-عمر: اوكفو شباب

دخل للمكتب مالتي وطلب مني سوالف تخص الشغل عمر روحه حلوة يحب يضحك ويداهر هواي وحتى اوقات يتحرش بحچاياته چنت انزعج بس البنات كالو هو طبعه هيج..

-عمر: مو تكتبين بخط مجعمر احتاج مجهر حتى اقره

-مريم: استاذ والله خطي هو هيج عنجوقي

-عمر: هههههههههههه خرب بليسج ام عنجوقي اكتبي زين ولج موتيني

-مريم. احاول والله

-عمر: مو تخلين غيرج تكتب تره اعرف خطج حفظته

-لا شلون اخليهن هو شغلي

-عمر: اي عود اشوف واذا ما كتبتي عقوبة خمس ايام تشتغلين ويايه بالمكتب

-الاطلس: عمر؟؟!!

-عمر: ها بوية

-مسلم: صارلنه ساعة ننتظرك وانتَ كاعد تكهكه وتتماوع

غمزله وعمر يضحك ميت ضحك ومسلم وياه الا الاطلس صافن بدون ملامح، تركوني وراحو واني بديت اشتغل..

مشت الايام وقوت علاقتي ويه عمر وعلي بس الاطلس چنت ماعرف شلون اتصرف وياه ساعة اضحك واتخبل يمه واچفص وساعة اگلب وجهي واتهرب منه..

اني مو من النوع اصادق بس القصد قوت علاقتي بعمر وعلي بالشغل شغلي كله يتحول لعمر ويتدقق من قبله، صار يتردد لمكتبنه هواي وريتاج تتسرسح افتهمت بيهه مكرشة عليه..

-ريتاج: مسيو تكدر تفهمني القصد من هذا

مدتله فايل افتهمت عليهه الشيطانة تريده بس يحجي وياهه، ضحكت وهو انتبهلي غمز وكال..

-عمر: شو تضحكين

-مريم: لا ولشي بس تذكرت شغلة

-عمر: يصير تشاركينه

حچاهه وعيونه على الملف يدقق بي، صرت امعمع ماعرف شكول تذكرت شغله قديمة وحجيت..

-تذكرت خواتي

-عمر: اممم؟

-مريم: نور وبسملة خواتي كلش حركات ونشيطات فـ مرة ديلعبن وامي حاطه صحن فواكه على الميز هذا الماعون غالي كلش

-عمر: وشصار؟

ضحكت اكثر على اهتمامه واصغائه حتى ريتاج اندمجت ويايه..

-اني بوكتهه جنت انظف قريب منه وهنه يركضن بسملة طخت بي ووكع بالكاع اني خفت عبالي اني السبب مجنت مركزه واجت امي متخبلة تكول منو وكعه بسملة كالت مررريم مرررريم وكعته مرررريم

-عمر: يا نذلة

-مريم: اي والله نذلة الحقيرة تالي اجه ابوية بهالاثناء وشافنه وحصلتلي عودة مرتبة منه ههههه متت من الوجع واني احلف ما منتبهه ومادري بي ههههه

بقى يباوعلي مبتسم وريتاج تضحك على ضحكتي، مسحت وجهي وعيوني كامت تدمع من تذكرت خواتي..

-عمر: وانتِ قبلتي بالعودة؟

-مريم: ايي لان مادري عبالي صدك اني الوكعته ورحت بست ايدين ابوية وامي واعتذرت منهم وكلتلهم التوبة بوكتهه امي هم عاقبتني خلتني اغسل السطح اربع مرات وره بعض ههههههه

-عمر: ههههه يابة ماطلع ماعون

-مريم: والله شنو هاي هسة هو ماعون

-ريتاج: شكد بريئة مريم قبلتي بالعودة هاي لو اني جان تخبلت وطلعت لساني

-مريم: ياا ولج اني فاهية مو مال اطلع لساني وهم استحي كدام اهلي عيب

حچه عمر وبعدهه عينه بالملف..

-عمر: مو فاهية وانما بارّه

-مريم: لا مو معصومة هم اوقات اعصب واتعارك وميعجبني بس ابوية عصبي واخاف منه

حطيت ايدي على حلكي وريتاج ميته ضحك مادري على شنو، اثناء حديثنه الشيق واني نسيت روحي منطلقة اسولفلهم على اهلي وخواتي دخل الاطلس مغندب..

-الاطلس: مريم هاي بعدج تحجين؟!

-مريم: شنو استاذ

-الاطلس: ضحكج واصلني للمكتب رجاءً هذا مكان محترم انتبهي لنفسج!!

-عمر: شدعوة مو ضحكة هذا هاون الي يوصلك للمكتب

-الاطلس: حضرتك تستهزأ؟!

-عمر: هههههه شبيك حبيب ليش ضايج

-الاطلس: لان ما تشتغلون كاعدين تسولفون عن اهاليكم وكت تعارف هسة؟؟!

-عمر: عادي جاي نشتغل ونسولف ما اشوف بيهه مشكلة!!

ثنينهم ينترون بكلامهم والعصبية صارت فول، بقيت ساكته ماتدخلت وريتاج همستلي شي بأذني ماسمعتهه بسبب عيطة اطلس..

-الاطلس: عوفن المساسررر وكملن شغغغل

تركنه ورجع للمكتب مالته تنرفزت من اسلوبه الفض بس ما حجيت ولا بينت على وجهي، عمر اعتذر من عدنه وطلع يروح يشوفه شبي..

وره يومين واني بالمكتب اتصلت بيه نانا تسألني شنو اريد عشى ضحكت على سوالفهه كل يوم تعيد نفس السالفة بس اليوم تأخرت ياله اتصلت..

-الاطلس: مريم!

-مريم: نعم استاذ نعم

-مو كلنه اجتماع؟ انتِ وين؟

-مريم: استاذ اسفة بس امي خابرتني واخذني الوقت

-وكتهه مريم وكتهه؟

عافني وراح لغرفة الاجتماعات رحت اركض وراه اول ما فتت تبسبسو عمر وعلي ويه بعض ضحك علي وهو يباوعلي، ظليت اباوعلهم والاطلس هم وفجأة عاط بيه..

-الببااااااب سديهه وراج

سديتهه وكلني ارجف هذا شبي متخبل، غمزله مسلم بمعنى شبيك وهو غلس عنه بدون ليجاوبه، بهذا الاجتماع جانو كل الرؤوساء موجودين جان نقاش عام بخصوص كلشي موجود بالشركة لذلك كعدنه بغرفة الاجتماعات الضخمة..

-الاطلس: علي وين صور الكولكشن الجديد؟

-علي: موجودات بالمكتب اجيبهن؟

-الاطلس: لا ابقى خلي احد ثاني يجيبهن

سخر واحد يجيبهن وهو بقى يستمع، استمرو يتناقشون والموظفين كلهم يشاركون الا اني ساكته رغم صرت اعرف شلون يشتغلون بس ماحب اتدخل..

-مسلم: مريم تتفقين؟؟

عرفت يردون يحچوني هزيت راسي وكلت بصوت ناصي..

-نعم استاذ

فجأة صاح الاطلس بصوت عالي متنرفز كل الموظفين بقو يتبسبسون هذا اليكول متعارك ويه حبيبته وذاك اليكول صاير شي بالشركة وذاك اليكول جايهم تهديد..

انتبهت لعمر يأشرلي ماعرفت شيقصد ثواني واجتني رسالة على موبايلي فتحته جان من رقم غريب وكاتب..

"مريم بلا امر عليج جيبي الملفات الي موجودة بمكتبي لون الملف اخضر... اني عمر"

سجلت رقمه بجهازي بسرعة وكمت اجيب الملفات وماسمع غير الاطلس عاط بيه..

-شنو هذا الاستهتاااااار كل شويه واحد كايم وواحد كاعد وناس طابه وطالعه!!!

جمدت بمكاني اشوف كل الانظار صارت عليه ماعرفت وين اودي وجهي من الفشلة انيلع لساني، عمر انقذني من كال..

-عمر: اني طلبت منهه تجيب ملفات من مكتبي

-الاطلس: وشلون گلتلهه تخاطرتو بالافكاار؟؟!

-عمر: هم ينرادلهه دزيتلهه مسج

كل الشلة اللتفتو يباوعوله وعلامات الاستفهام على روسهم، مدا اعرف شنو الغلط الي سواه عمر والي خلاهم كلهم يكلبون وجوههم..

-مريم: استاذ اروح؟

ضحكو الي كاعدين بصفي تنرفزت اكثر باوعلي الاطلس كاش وجهه واشرلي اروح..

طلعت متخبلة من القاعة شنو الموضوع شكوو هذا كالب وجهه عليه شنو هااللعبان نفس!

انتهى هذا الاجتماع برزالة جماعية لكل الموظفين طيح حظنه اطلس وكال متهاونين بالعمل هو فعلاً لازم الاعلان ينزل قبل خمسة ايام ولحد الان ماكو شي..

رجعت للبيت شايطه روحي حجيت لـ نانا شصار وكامت تحجي على المدير الي هو "الاطلس"..

-نانا: وهذا شبي شنو عبده اله انتِ؟!!

-مريم: شمدريني نانا كلش تنرفزت هو جان حباب شبي انچلب مادري

-نانا: خيولي لا تحجين وياه ولا تدنيله مو كتلج ترحين تشتغلين ويه الاطلس انتِ دگيتي رجل اله بغير شركة

-لا نانا ماريد خليني مرتاحة

ثاني يوم داومت وطلبت منار مني ومن ريتاج والمساعدة الجديدة نساعدهه اجو عمر وعلي يحجون وياهه وسلمو عليه وبقو يسولفون بشغلات عشوائية واشوف علي طول الوقت صافن عليه..

طلع الاطلس من الغرفة وتفاجأ بوجودهم ووجودي اشرلهم شكو وعلي حچى بموضوع يخص العمل وهمه على الواكف وغمزله..

-الاطلس: خو انتَ عندك سالفة وعمر شعنده جاي؟؟

-عمر: اجيت اراويك مجموع الحسابات مفوله ياخي

اخذ الاطلس الملف من ايده بعصبية وصار يقره بي ذب نفس وشمره على مكتب منار..

-شنو هذا اللعبان نفس!!

نترهه ودخل جوه، علي باوع لأخو نظرات ما فهمتهه بس همه اكيد افتهمو على بعض تركونه ورجعو لشغلهم، بعدني دا اكعد ودك موبايل منار مال المكتب..

-منار: معصب معصببب

-مريم: روحيله بمعودة

اخذت مجموعة الملفات وراحتله للمكتب اني كمت والبنات كمنه نحضر اغراضنه نريد نرجع للبيت، هلكت اليوم حطيت جنطتي على چتفي ورحت للمصعد ادوسه واجتني منار تركض..

-ها منار

-منار: مسيو اطلس يطلبج مريم

-مريم: اني ليش؟

-تعالي وشوفي بنفسج

تحجي وملامحهه قلقة، رحت وياهه للمكتب دكيت الباب ودخلت شفته كاعد وكباله الملفات نازع السترة وكاف ردان قميصه..

-الاطلس: هاااا الآنسة جاي تطلع لبيتهه؟؟؟

-مريم: نعم استاذ لان خلص الدوام

-الاطلس: هذا خطج؟؟

شمر ملف ناحيتي بطريقة فضه تغاضيت عن طريقته وشلته اشوفه، هزيت راسي وبعدني دا احجي وصاح بيه صوت خله عيوني تطلع..

-هذا هممم خططط؟؟؟؟ شلون خطططط مرعبببببل انتِ شبيچ؟؟؟ ما تكليلي شبيجججج هذا خط محااااسبة متخرجة!!! لو اجيب طفل عمره خمس سنين هم خطه اوضح واحلى!!

-مريم: استاذ بس انتَ دائماً تستلم ملفات مني وتعرف خطي ما فد مرة نبهتني عليه

-الاطلس: وهسسسةةةة انبهج!!! ترجععععين لمكتبج وتعيدين الملفات كلهنننن وعوفي الخووواره

-مريم: استاذ رجاءً شنو هالاسلوب!!

-الاطلس: بلا حجي زايد آنسة مريم اخذي الملفات وامشي عدلي عليهن ماااعدنه وقت ماااعدنه اجلي طلعتج ويه مادري منووو وكملي شغلججج

-مريم: استاذ ميصير هيج والله اني بالساعات كعدت اكتب بيهن وهسة تريدني اعيدهن باجر اعيدهن والله

-الاطلس: مررريم لييييش تلاسنينن لييييش

كام وكف كبالي واشوف منار ترجف، اباوعله عيونه ناطه ووجهه مصبوغ انفاسه تلفح نار من الغضب..

-استاذ اعتذر ما راح اعيدهن هسة والله امي يظل بالهه عليه

-واني كلت هسة

-مريم: باجر اعيدهن باجر والله

-كلت هسةةة!!!

تقرب مني كلش وينتر بوجهي ماتحملت الوضع تخبلت عليه طفح كيلي من اسلوبه الخشن المقرف انطاني الملفات بيدي خازرني ما اخذتهن من ايده دفعتهن وكلت..

-ما راح اسويهن

-تعانديني مريم!!

-مليت من اسلوبك المتعجررف ومن غرورك استااذ اني مو عبدتك وبكيفك تتحكم بيه اني موووظفة هنا وهاي الملفات مو شغليي هذا زايد فضل مني دا اساعد سكرتيرتك اني وريتاج ولهيب بقينه نشتغل تسعة ساعااات متواصلةةة انكسر ظهرناا كله لخاطر مناار متترزل منك ولا تأذيهه بكلمة!!

-منار: مريم

-رجاءً مناار، ثانياً اني ليش اكعد اعيد شغل من جديد على أي اسااس هذا استاذ عمرر اشتغل وياه صارلي شههرر اسلوبه وكلامه احلى من العسسل يحترمنه ويخاف علينه وميقبل نتعب ارواحنه انتَ شبيكك شايف روحك وشايل خشمك على موظفيك

لزمتني منار حتى اسكت واني ماكدرت اسيطر على نفسي عيونه راح تطلع وهو مصدوم من صوتي واسلوبي، كملت بصوت اعلى..

-بعمررري ما قبلت بالذذذل ولا راح اقببل بي!! واهم شي ما اقبلها من انسان مغرررور نفسسسسك..

تركته وطلعت من المكتب وهو كلمة ما نطق رحت ركض على المكتب مالتي طلعت ورقة بيضه وكتبت بيهه استقالتي وذبيتهه على الميز وطلعت......

يتبع ♠️💸...

• ━━━━━━❪♣❫━━━━━━ •

رأيكم بتصرف مريم؟ واذا انتو بمكانهه هم تذبون استقالة؟ 🙃

شبابزز على الاغلب باجر ماكو برتوت حرامات ردت اللتزم بالتنزيل اليومي بس الاغلب يعرف لازم اخذ ريست لرقبتي ماريد يتحول الموضوع لشي سيء لا سمح الله 😐

كتبولي توقعاتكمم ولتنسون التصويت الكيوت ⭐️♥️