رواية الاطلس "دمليج أسود" الفصل الاول 1 - بقلم 𝐙 𝐇 𝐑 𝐀

#الاطلس (دمليج أسود) ♠️🔥

بقلمي: زهراء السلامي

الغلاف الي متت بجماله وفخامته واختلافه اكيد تصميم المصممة المبدعة رانيا ♥️🔥

ملاك هادئ الاطباع، حَسُن الوجه من رآه يتخيل انه نزل من احدى السماوات السبع ليجلس في افخم الغرف المتمركزة في افخم القصور.. مُزين حيطانها بأبهى النقشات المغربية التي تخطف الانفاس وتأسر الأعين لتُهيم بجمال هيكلة الغرفة المعمارية..

دورت عيوني بالمكان بخجل معقولة اني راح اعيش هنا؟ شنو هالمكان الفخم شنو هالتخطيط والترتيب الهندسي للغرفة، ممتخيلة بحياتي ادخل لهيجي بيت مو انوب اعيش بي..

تمايزت فستان عرسي الناعم والبرگع اللماع الي مغطي شعري واكتافي، تلمست مجوهراتي الالماس الي مزينه ايدي ورقبتي واخيراً وقعت انظاري على خاتم عرسي..

قاطع تأملاتي صوت دخولها عليه لتاخذ مكان بجانبي على السرير وتكعد براحة..

-آآآه يَـ بنتي الحلوه هذا مكانج

-نانا

-يَـ روح نانا

-اني خايفة و.. وماعرف شلون اتصرف

ابتسمت ابتسامة بشوشة مريحة وربتت على كف ايدي الحاضن كفي الثاني بتوتر.. نزلت عيوني اراقب اصابيعي المزينه بالحنة المغربية الخفيفه وابتسم من اسمع "نانا" تكول..

-تزوجتي يَـ بنتي، اووه لو تعرفين چنة منو صرتي..

عضت على شفتهه السفليه وغمضت عيونهه وكأنهه تتخيل شي، ابتسمت متحمسة لكن فوراً نزلت راسي على استحياء من شفتهه ترمقني بنظرات ماكرة..

-هواميييير ذولة هواميررر يعني لو مشوا رجوا الگاع رج من جواهم، يكسرون اكبر راس لو اندگ بيهم

جذبتني الكلمة وفتحت عيوني انتظرها تكمل، اردفت بنبرة حالمة..

-شنو طول، شنو هيبه، شنو رزة، شنو جسم، عضلات، عيون حادة تشبه الذيابة، سمار غامق يخبل عطره ينشم على بعد امتار بزاف راقي يَـ بنتي..

-هههه نانا شنو هاي

-والله بدون مجاملة هو ابني واني ربيته لو احچي منا لباچر عن حُسنه وجماله وترتيبه اكون مقصره

تقربت من عندي وهمست بصوت خافت..

-بدون لا احد يگلچ راح تعرفين وصل بسبب عطره وگولي نانا ما كالت

نظرتلهه مدهوشة معقولة؟ شنو هالعطر الفواح لدرجة اشمه على بعد امتار، والي زاد استغرابي اخته كالت نفس الشي عنه ووصفت تميُز عطره..

-حَ تكولين بنفسِك من تشوفي نتا احسن حاجة وقعات ليا فحياتي، نتا الانسان لي كنت ديما كنتمنى

ذبت نفس ورجعت على اللهجة العراقية وكملت بأبتسامة..

-افرحي كله الچ هذا يعيني تدرين كم بنت وگعت بشباكه لا وحده ولا ثنين ولا عشرة وهو اختارچ انتِ من دون الكل اخيراً المدلل خطب وصارت عنده عروسه

قلبي راح يطلع من صدري من التوتر والحماس والرهبة، اني وين چنت ووين صرت وهو اختارني من دون كل البنات حتى اكون زوجته وهياني كاعده انتظر وصوله..

انطرقت باب الغرفة سمحتلهم نانا بالدخول، دخلت المنظفة منزلة راسهه وتكول..

-السيد على وصول..

-نانا: هلا بي

اندارت عليه وكالت بصيغة حماسيه..

-يلا يلا وصل بسرعه تعالي اعدل مكياجچ

انخبصت وياهه وصرت ادور حول نفسي متوترة، وكفتني نانا وكالت بصيغة محذرة..

-أي شي يصير تتصلين عليه ماشي؟

-يعني شنو يصير؟

-يعني.. احم.. اسمعيني اكعدي احجي وياچ

تخيلت تريد تحجيلي عن ليلة العرس وشنو يصير نزلت راسي خجلانه وكلت بصوت خافت..

-امي فهمتني نانا

-لا.. سمعيني انتِ تعرفين مقولتنه العراقية من نكول "كل حلو بي لولة"

-اي..؟

فصل عقلي عنهه من سمعت صوت رجال جاي من بره، فتحت عيوني ما مصدگة الحلم اصبح حقيقة حكايات امي واني طفلة تحققت، اني فعلاً تزوجت ابن هالبيت، نانا ابتسمت واشرتلي براسهه..

-وصل؟؟

-سمعتي صوته ليش متفاجأة

نسيت موضوع الي رادت تحجي ويايه بي وياريتني عرفت من البدايه ولا الي صار بحياتي من بعد هاللحظة..

تركتني وطلعت بره الغرفة، واني واكفه بمكاني ومشدده على البرگع بأيدي عفسته بدون لا احس، تأخرو وزاد قلقي قررت اتسمع بلكي اللقط صوت نانا..

حطيت اذني على الباب وركزت مسامعي كان واضح كلام عشوائي وصوت رجال خشن يحجي وصوت نانا تحجي وياه..

-نانا: شنو تكول انتَ؟؟!

-ماريدهه هذا الأكوله

-شلون!! عروستك كاعده تنتظرك بالغرفة وين رايح وين

-كلت ماريدهه شنو لهدرجة كلامي ما مفهوم؟ شو دا احجي عراقي!

-لا لا مستحيل.. تكسر البنت بيوم عرسهه

-انطيهه التريده وخليهه تطلع

-وينننننن رايحححح وينننننن على الاقل اعرف اسمهها!!!

-ما اريد

-تعال يمي شلون تعوفهه هيج شنو هالبرود العندك وين ناوي توصل فهمني!!!

-اهلهه باعوهه جارية جوه رجليه وبكيفي شنو اسوي بكيفي محد اله حق يفتح حلگه لو تصم حلگهه وتسوي الاريده لو اذبحهه وادفنهه بحديقة البيت، هي اساساً زايده على اهلهه

-كافي حرام

-اخر مرة اكرر وصدكيني هذا فضل مني، هي اجت لغاية انطيهه غايتهه وخليهه تروح ما عايزني اللفي بنات ليل اهلهم بايعيهم بسعر قندرة من قنادري!

ابتعدت عن الباب گلبي ينبض بقوة وراسي يدور، شنو ميريدني؟ وشنو يريد ينطيني؟ شديصير ويايه بهالقصر الغريب؟..

روحي شاطت من كلامه ورحت اركض على الموبايل ادگ على ابويه دگ كم مرة ياله جاوب..

-الو بابا

-ها بنتي

-بابا اني خايفه اريد امي

-امچ نايمة شنو تردين منهه

-بابا زوجي ميريدني وديحچي كلام عيب بحقنه ويكول لـ نانا رجعوهه لاهلهه

-بعدين بعدين ماكدر احجي هسة

-بابا الله يخليك لتعوفني خايفه، ماكدر ابقى هنا الله يخليك هذا مبين مخبل اخاف يسويلي شي

-خلصصص بنتي لا تلحين

-بابا الله يخليك الله لتعوفنيييي

سد الاتصال بوجهي موتت روحي من البچي كعدت على السرير انتظر رجوع نانا بس اختفت جسمي ينتفض من الخوف وصرت اتعثر بفستان عرسي، فكرت اطلع افتر بالبيت ادورهه بس ترددت يشوفني احد ويفكروني حرامية..

اثناء دوراني حول نفسي بالغرفة بحيرة انفتحت عليه الباب، اللتفتت اشوف منو واذا اللگه زلم ثنين طوال لابسين اسود من فوك ليجوه وينظرولي بأبتسامة ماكرة خبيثه..

-اوهووو فاتت المدلل هيج عروس

-اشلونك يَـ حلوا

حطيت ايدي على قلبي راح يوگف ابتعدت خطوتين ودورت على صوت بأوتاري الصوتيه لكن اختفى من الخوف.. تقربو ثنينهم عليه، واحد منهم قفل الباب واندار وهو يكول باللهجة العراقية..

-خوش هدية انطانه الوريث المدلل

ضحك الثاني بمكر وهو يطلع جگارة من جيبه ويشعلهه..

-فريسه ليومين......

يتبع 🤑....

في أساطير القـتام
أطلسٌ متهور وتائِه يسيرُ نحو الظلام
خطواتٌ مُهلِكة يخطوها بإنسجـام
سيرٌ كالعقارب تحت الرُكام
تتحرك مُدركةً الوقت لكن بِشرود
مُثيرة للتساؤلات والتعقيد تسيـّرُ ثانيةً ثانية
بكُـل برود

مُحاربةٌ عذبة وذكية سقطت قُسرًا في هذا القاع
لتغرق في .. الأطلـس ... بلا إنتهاء
من الأكابر الاثريـاء ، المُنَعميّن غير الاشقياء
دمليجٌ أسود يُحيط بـ غفلةٍ و عناء
لكنهُ .. متهورٌ عَنيد ، غير مُتأني مليئٌ بالتعقيد
لا يخشى أي شيءٍ إلا القليل
فمـا السبيـّل ؟
وكيف ستكون نهاية هذهِ الأساطير ؟
الأطلس " دمليج أسود " أهيَّ العشق أم التضليل ..... ؟

كالعادة لازم كلمات المبدعة شهد الحسناوي تشارك في رواياتي 😍♥️

***
بداية جديدة مع رواية جديدة ان شاء الله 😎
قصة تحمل في طياتها الكثيررر من الالغاز والغموض
والشسمه الرومانسيه 🌚
قصة دارت احداثهه بين ابطال من اصول عراقية عايشين في المغرب العربي، بالنسبة الي هالقصة تعتبر من اجمل ما راح تكتب ايدي ان شاء الله 😩🔥

يُبا هالقصة غيرررر والله غييييير 🥲🔥 ذولة هوامـــــير منو يكدر يحجي وياهم راح نشهد حرب من نوع اخر حرب طواحين هوائية مو بشر عاديين 😆
فـ الي يحب يقراهه ويانه خلي يتوقع كلشي ويجي بباله كلشي 😜🙊

ان شاء الله نبدي بيهه بعدما نختم قزح 107 الي شارفت على الانتهاء 😎✌🏻 حفظوا "الاطلس (دمليج اسود)" عندكم بالمكتبه اذا تحبون لان تفووووووتكم قصة مميزة جداً واحداث غير مألوفه 👊🏻

سؤال 🙈 برأيكم شنو معناة اسم القصة هالمرة ولشنو يرمز وشنو سبب اختياري اله 🙊🔥 (ماطلع سؤال هذا حسيت روحي دا امتحنكم 🙂)