رواية الاطلس "دمليج أسود" الفصل الثاني 2 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

• ━━━━━━❪♣❫━━━━━━ •

راسه مدفون بحضنهه يشتنشق عطرهه والراحة تتخلل بداخله، ايدين ناعمة تمسد على شعره بلطف وكلمات هامسة تطرب اذانه تخفف من اللامه، عكد حاجبه من تذكر الصار وياه البارحة وهمس بقهر..

-مادري شصار

-اششش كافي حبيبي انسى الموضوع

داعبت خده بهدوء وابتسمتله مطمنة، بعد قضاء اكثر من ساعتين في حجرها رفع عيونه ينظرلهه بنظرات حايرة، ابتسمت وقرصت خده برقة تشبه رقة روحهه..

-لا تعوفيني..

الكلمتين الوحيدة الي همسهه بعدما اخذ ايدهه وباسهم وحضنهم على جسمه بقوة، ضحكت وكالت من جر واحد من اصابعهه وعضهم حيل..

-اويلي منك

ابتسم ونهض نفسه عنهه، وگف على حيله ورتب هندامه الي تخربط، شد على ربطة عنقه الزرقاء ورتب ياخة بدلته النيلية الي زايدته وسامة وجاذبية، سحب شيشة عطر وبخ على ملابسه بطريقة جنونية الي يشوفه يكول هذا ما شايف عطر لكن هذي ميزته يعشق الروائح الواضحة..

اللتفت عليهه وابتسم على نظرات الحب الي مطرته بيهم، سحب ايدهه وباسهه للمرة المية خلال گعدتهم وهمس بكلمة تجمعهم همه الاثنين فقط وطلع من البيت والافكار والحيرة تعصف ذهنه...

ركب سيارته وتوجه للكوفي الي يلتقون بي دائماً، اول ما دخل شافو واستقبله صفير عمر..

-عمر: هاا خالييييي

-اطلس: نعالي احسن

-علي: يعني الموضوع يشگ شگ

-حمزة: شبيك ابو الشباب خوفتنه

طلع جكارة مثل عادته وشعلهه بدون لا يحجي، استلمو الشباب ضحك ومداهر وهو باله بعيد يفكر شلون راح تصفى..

-حمزة: اطلس شبيك شو عاين عليه

-علي: گلبي يلعب مراجيح من وراك شصاير

ذب نفس بدون ليجاوب احد وسحب بطل مي شربه دفعة وحدة..

-عمر: هسة غير ياكل نعل ويسولف

-اطلس: ابوي يريد يزوجني

لحظة صمت! محد علق ولا احد انطى رأيه.. صارو يتلفتون على بعض بدون لا يصدر احد همسة، مضت دقايق هادئة لحدما نز على اصوات ضحكهم الي رجت الكوفي رج..

-اطلس: سم وزقنبووت بگلبكم يا هتلية

ضحك علي بقوة وصار يرجف اصبعتين ويهز برقبته...

-علي: خااب الله حيوووو خالي محمد سويتهه وانتَ النچر

-حمزة: نكتة الموسم اطلس ماتشوفلنه خواتهه لأخوتك البعران

-عمر: اني اريد الصغيرة

-علي: شوفلي الوسطانية

-حمزة: اني متزوج حرامات

-علي: الشرع حلل اربعة خيي

يحجون بأستهزاء وفاطسين من الضحك..

-اطلس: شباب ما جاي اتشاقه

-عمر: خاب گممم انتَ مال زواج قندرة ما أمنهه يمك

-اطلس: تعال قنع ابوي

-عمر: عليك الحمزة وابو فاضل!!

-اطلس: اي والله مصمم

-علي: بداعة الهوهو؟؟

-اطلس: والعباس اييي فحطتونه ما جاي استظرف لحضراتكم

اجه الكرسون ياخذ طلباتهم لزمه علي من ايده وگال..

-علي: سمعت بالخبر

بقى الكرسون صافن بوجهه، جره اكثر ناحيتهم وحچه وهو فاتح عيونه..

-علي: اطلس راح يتزوج

-الكرسون: نعم؟

-عمر: عوف الزلمة علاوي

-علي: هاك خوية هاي بشارة زواج اخينه

-اطلس: راح تنداس علييي

انطاه بقشيش وراح الكرسون ميدري شنو السالفة، اللتفت عمر على اطلس وصار يضحك ويداهره عسى ولعل يغيرله جو..

-عمر: يله خوية شسالفة سويتهه معضلة هسة واذا ابوك يريد يزوجك عود كول للمسعدة اهلي جبروني اخذ بنت عمي

-علي: هههههههههههههههاااييي والله جبروني والله مو بيدي اني ميت عليج اتنفسج وهايم بيج بس اني ما استاهلج روحي كملي حياتج ويه غيري

-اطلس: شكد ولد كلب انتووو

-حمزة: يشاقوك وليدي اي وهسة شراح تسوي

-اطلس: تتزوجون وياي شباب

-علي: الله زواج جماعييي

-حمزة: قنادرر مگطعة وين راح بالك وييين

-علي: اتخيل الموضوع الا يشگ شگ

-حمزة: أطلس الزواج مو بهذا السوء هسة مو اني متزوج ومرتاح

-عمر: اتفق شبيك فاكهة حياتي لا تظل مبوز ماتسوه

-حمزة: ها علي بعده گلبك يلعب مراجيح

-علي: صار يلعب دولاب هوا خوية هذا خبر يهز شوارب اطلس يتزوج عمت عينيي راح صاك الشلة

-اطلس: رحم الله والديك على المواساة

-علي: ويهز غير شي بعدين على الواهس

-عمر: نهجم بيت الحنية علي اكرمنااا بسكوتك

ضحك حمزة ومط ايده كدام نفس حركات البنات، گال بمياعة وهو يرمش بعيونه..

-حمزة: سمعت بيك خطبتني البارحة

-علي: وانتَ موافق حمزة بيك مجال

ضحك بمياعة وكال...

-حمزة: ههه مادري سألو مرتي

-اطلس: اهييي راح يلطشون هيج حجيتهه استهزأ تره

-حمزة: بهالسرعة تنازلت اطلس هاي تاليتهه

-عمر: چا اني سمعت خطب مسلم وراك

-حمزة: اخخ گلبي من اولهه خيانة

-اطلس: ماتضحك بلا هالسخافة وعلي تلعب الروح

-حمزة: نشاقييييك هيووو هذا شيفك نونته بعد

-اطلس: وتالي شسوي

-عمر: التالي ويه نعالي تتزوج وتنچب

-علي: شبيك انتَ وين محصلهه تجيك وحدة تشك شك تخدمك وتحبك وتدللك وتنعلك هم فرد نوب

-حمزة: عوفنه من كل هالحجي بت منو راح تخطب؟.....

**

-افف يربي شنو هذا الملل لشوكت نبقى بهذا الوضع المقرف

-دعاء: حمدي ربج وشكري بسملة كافي تذمر

-بسملة: دعاوي عليج الله جاوبيني بصراحة انتِ راضية على عيشتنه؟

-دعاء: افف بسملة

-بسملة: طبعاً مراضية بس انتِ تقنعين روحچ گوة!

-دعاء: كافي دوختيني

تركت اختي المتذمرة الي ميعجبهه العجب اخر العنقود "بسملة" تتحلطم على عيشتنه وطلعت للصالة اشوف امي..

-دعاء: يوم ليش انتِ تكنسين

-شسوي اصيح لاختج ما تسمعني

-انطيني عنچ

-لا روحي شوفي الملابس على الحبل نشفو چنهه الدنيا غيمت راح تمطر

هزيت راسي مؤيدة وجريت شال صوف معلگ على الباب ودثرت روحي بي، الجو بده يبرد خصوصاً واحنه عايشين بأراضي زراعية وبمساحات واسعة..

طلعت اشوف الملابس ولاحظت لسة مبللين، شلتهم من الحبل بسرعة من حسيت بقطرات مطر وگعت على خدودي.. واثناء ما اني احطهم بالسلة سمعت صوت هورن سيارة..

توقعت اجه ابو لؤي جاي بـ سيارته البكم علمود يستلم الزرع مقابل فلوس من ابوية هذا مصدر رزقنا لكن الي شفته لا هو ابو لؤي ولا سيارة بكم..

عقدت حاجبي مستغربة من شفت سيارة فخمة لونهه اسود تلمع ويه قطرات المطر على مقدمتهه، قلة قليلة نشوف هيج سيارات بمنطقتنه او بالاحرى منشوف نهائياً..

استغربت اكثر من السيارة صارت تتقرب على بيتنه الى ان وصلو مقابيل باب بيتنه ونزل منهه رجال متهندم بـ قاط كشخة.. لمعت عيني دهشة لكن سرعان ما نزلتهم خجلانة من وقاحتي وقلة أدبي..

تقدم ناحيتي وسأل بجزع...

-العفو هذا بيت الحاج احمد؟

-دعاء: نعم

-اخيراً وصلنه شكراً آنستي

نظرتله نظرة خاطفة من صاحلي " آنستي" كان مبتسم وعيونه تقطر امتنان، ابتسمت ورجعت نظراتي للارض متناسية جملته الاخيرة.. ابتعد ورد للسيارة رجعت ارفع راسي واذا اشوفه يأشر على بيتنه ويكول..

-وصلنا

نزلو من السيارة نسوان ثنين ماعرف شلون اشرح او شلون اعبر عن كشختهم، يمكن جايين من الافلام الاجنبية بدون مبالغة، نساء عبارة عن عطر زجاجة فواحة تتمشى، وهذي قارورة العطر مغطاة بجاكيت فرو ناعم يشبه فرو الثعلب بنعومته واللوانه المميزة الي أسرت عيوني.. ارجع واكرر ما بالغت!

بالمناسبة اني اعشق الموضة وخواتي يكولون عندي نظرة ثاقبة وذوق حاد وراح اتميز بالمستقبل اذا انمي هذي الموهبة، افف مو وكتهه خلوني مركزة ويه سعاد حسني الي دتتقدم عليه..

-مرحبا

-دعاء: اهلاً وسهلاً

-هذا بيت احمد الـ^^^^^؟

-نعم وصلتو

ابتسمت مجاملة ومدت ايدهه تصافحني واثناء المصافحة تكول..

-امِك موجودة؟ ابيهه بكلمة راس

هزيت راسي ومن الغباء الي صابني بلحظتهه نسيت اگوللهه تفضلي، دخلت للبيت اركض لأمي بس شافتني لزگتني بخزرة..

-ولج وين الهدوم دعاء لازم تشلعن گلبي انتن!!!

-دعاء: يوم ولج يمااا

-وصماا بگلب العدو شكو

-ماما ماما ماماا اكو نسوان كشخة واكفات بره

-نسوان كشخة؟

-اي يوم من ذني الماركات

طلعت بسملة تهف وتركض ناحيتي..

-بسملة: شلون شلون ماركات

-دعاء: ذني امهات الاتكيت ومسويات بوز ببراطمهن چنهن سمچة وعطرهن يفحفح وراهن

-الام: دعاء مو وكت سوالفج ركض حضري الاستقبال

هرولت مثل المجنونة للاستقبال فتحت الاضوية وشفت الاستقبال صايرة مزبلة بسبب بسملة اكيد متحلى گعدتهه الا بالاستقبال..

بسرعة بسرعة نظفنه المكان بقوة بسملة الخارقة ضربت چقلبات وهي تتنقل بالمكان، واخيراً رشت عطر وطلعنه بره بعدما سمعنه صوتهم يتقربون من البوابة..

-بسملة: اكلج شيردون جاين

-دعاء: مادري والله

-بسملة: تخيلي يردون يشترون مزرعتنه

-دعاء: ياريت ابوية حفت رجليه وهو يدور على مشتري

-يارب يارب

لزگنه اذاناتنه بالبوابة وتسمعنه للحديث الي كان بعيد كل البُعد عن مخيلتنه وافكارنه ومخططاتنه للمستقبل، كان كلام يشبه قصص امي الوردية الي تخلينه نبتسم وبلحظة سريعة نرجع لواقعنه ونذب حسرة ونحمد الله على العدنه..

-بسملة: دعاء يردون يخطبون من عدنه!

-دعاء: هااا

-دتسمعين اكيد تسمعين ولج سمعي زين

ركزت مسامعي اكثر وهذا چان محور حديثهم..

-ما سمعنه عنكم الا كل طيب وصفولنه بيتكم وركزو على بيت ابو مريم وگالو عندكم بنات الله يحفظهم مزيونات ومستورات ومتربايات احسن تربية

-ام مريم: الله يسلمكم اهلاً وسهلاً بيكم

تدخلت وحدة وكالت بصوت متعجرف ونبرة غريبة..

-اجينه نخطب بنتكم لأخوية

-ام مريم: النه الشرف بس منو حضرتكم من بيت منو؟.. عذروني احنه بغربة ومو هواية نعرف ناس بالخصوص عراقيين

ردتهه بنفس الطريقة المتعجرفة وكالت بضحكة ما عجبتني..

-لا اني متأكدة زوجچ راح يعرفنه، احنه بيت ^^^^^ الاطلس مستحيل اكو احد بالمغرب ميعرفنه نعتبر من ارقى العوائل بالمغرب او بالاحرى من هوامير المغرب

اختفى صوت امي اكيد انصدمت نفس صدمتنه، كملت المرة الچبيرة الي لهجتهه واضح خليجية بس مغيرتهه للعراقية عن عمد..

-ويشرفنا نخطب منكم ام مريم لأبني وحيدي الوريث الاول والوحيد لأملاكنه.. ماريد بس نحجي بالفلوس لكن احنه ناس شارين ورايدين القرب منكم

-ام مريم: حبيبتي هلا بيكم، بس ماعرفت المن رايدين اني عندي اربعة بنات

-الام: الي چانت تشتغل بره

-ام مريم: دعاء؟ الي استقبلتكم

-لا لا...

**

"مريم"
بين ما اني منهمكة بتنظيف الزرع واشيل التالف الجو حلو مايل للبرودة شوية بس ما رحمتني زخات العرق الي تتساقط من جبيني، مسحت وجهي واستمريت بالشغل انفل شالي من راسي ورجعت شديته بطريقة اقوى وفجأة قاطع تركيزي صوت يصيح..

-مريم مريم مرررريم مراايمم

-هاا هاا شكو نور شصاير

-نور: امي تريدج

-مريم: متعرفين شتريد؟ بس خليني اكمل ما بقالي شي

-لا كالت خليهه تجي ضروري

دگ گلبي حيل ورحت اشوف امي شتريد خفت يكون بيهه شي ومحد من خواتي يعرف لعلاجهه، ركضت بكل ماعندي من قوة خطفت عيني سيارة فخمة سافطة قريب بيتنه وواگف بجانبهه شاب منطينه ظهره متهندم هندام ميناسب المكان..

دخلت للبيت وصارت بوجهي بسملة تهز برقبتهه وترجف اصبعتين على الخفيف..

-هو الرادهه هو التمناهه بت الشيخ لابن الشيخ جبناهه وهلا هلا هلا هلا

-مريم: وين امي بغرفتهه؟

-بسملة: لا ولج هلا هلا عيني ايييي حيل ولج حييل هزي دعاوي خنشوف خصرچ يميل

-دعاء: خبلة، مرايم جايلچ خطابة

اخذتلي صفنة طويلة على هذي الجملة، اني جايني خطابة؟ معقولة هالشي صحيح لو سمعت غلط..

-دعاء: مو وكت صفنة ابو صابر

-نور: شبيچ مريم يله الناس ينتظرون يردون يشوفوچ

-مريم: الي؟ يعني همه گالو يردون يشوفوني الي خاف دعاء ومخربطين

-دعاء: والله العظيم كالت اريد هاي الي جاي تحوش بره

-مريم: عزه العزاچ مريم ولكم شافوني بهذا الحال المصخم

-نور: يمعودة محد شافج والله

-دعاء: لعد شلون هسة يردون يخطبوهه الهه يالفهيمة

-بسملة: اي ولجن مو شافوهه تكرب كراب كالو ايي هاي تفيدنه ناخذهه خدامه ونسوگ عليهه مثل المطي

-مريم: نذلة

-نور: انچبو خلص امشي بدلي يله بساع

بعدني ما متحركة وجرتني دعاء من ايدي وعيونهه تشع من الفرحة وهي تهمس قريب مني..

-ولج مرايم يخبل

-مريم: منو

-دعاء: العريس شفته لج يخبل يخبل

ضحكت ورحت للغرفة وبسرعة البرق سبحت وطلعت ابدل ملابسي شعري مبلل عفته على چتافي، خفت ينفش ويفشلني شعري مو بشع بس بي ردة ويوصل لنص ظهري لازم اللطش بي دهن ياله يسفط خصوصاً الگذلة من تنط اطلع چني سعلوة..

طلعت متوجهه للاستقبال ونور كتلت روحهه حتى احط مكياج بس ماحبه، تحمحمت وطرقت الباب طرقات خفيفه متتالية، اجاني صوت امي..

-تفضلي ماما

فتحت الباب بهدوء ومعدتي لزمتني بطني خبطت وصار عندي جالي ويمكن اسهال راح اتقيء يبوو على حظج المزفت مريم..

-ما شا الله تبارك الرحمن عليچ يَـ بنيتي.. شنو هالزين شنو هالجمال

ابتسمت ورحت ادحس روحي بظهر امي، ماعرف بهيج اوقات وهيج مواقف شنو المفروض اسوي، عمري 24 سنة وهذا اول خاطب يجيني..

لحظات قليلة وطلبت مني الام اكعد بصفهه، سويت مثل متريد وبقيت منزلة عيوني منحرجة.. تلمست حنچي وگالت بحنية وهي ترفع راسي..

-راوينه هالعيون الكحيلة الحلوة

ابتسمت بوجهها وبقيت اباوعلهه، حچت الكاعدة بصفهه وهي مطنگرة..

-غدير: اكيد حاطه مسكارة يمة مو رموشهه هاي

-ام مريم: لا مرايم عيونهه مكحلة من الله

رجعت ابتسمت واحس خدودي ولعت نار، ضحكت الام وكالت بحماس..

-حصة: تبارك الرحمن فيها براءة عجيبة

-مريم: تسلمين خالة

-غدير: يمة ماعدنه وقت لهلسوالف يله بسرعة

هزت راسهه وبدت ام الولد بمرحلة التعريف واول جملة نطقتهه هي..

-ما ابي اتكلم عن ولدي وايد بس جَد جَد ما يتطوف

ضحكت بعفوية واسترسلت البنية الكاعده بصفهه بغرور..

-شنو هيبة، شنو رزة، شنو فخامة، طول عرض جسم جمال جمال جمال ترتيب نظافة اناقة عطره يفوح مستحيل وحدة تكدر تتخطاه

-حصة: هههه صج والله من اول ما يرد الكل يعرف بسبب عطره المميز فديته بكلشي غير وليدي

-ام مريم: الله يحفظه

-آمرو وتدللو يا ام مريم حبيبتي أمرو من الاف للمية الف شتبون احنه حاضرين محمد كال ما تردون الا وانتو جايبين الموافقة وصراحة ما اطوف مريم حبيتهه وايد

بقت ام الولد تحجي عن ابنهه وعن شهاداته وطموحاته وشغله وكفائته، ابتسمت واني اسمعلهه لهجتهه كلش حلوة تخبط خليجي وعراقي وواضح عليهه حبابة وفطيرة..

ختمو الكعدة برخصة حتى يطلعون، ابتسمت امي ورحبت بيهم واخذت معلومات كافيه ووافية اثناء توديعهم، تبادلو ارقام التلفونات واجتنه ماما الضحكة شاگه وجهه والعيون تلمع بفرح..

-دعاء: هاا ماما بشري

ضحكت امي وصفگت ايدهه فرحانه ومرتاحة وهي تنظرلي بعيون دامعة..

-كبرتي وصرتي عروس

-بسملة: كلللللووووووشششش ولكم جيبولي الشاااال

جرت الشال الي على كتف نور وربطته على خصرهه وصارت تهز بمكانهه مثل فيفي عبدو، ركضت دعاء جابت جدر من المطبخ وتدگ عليه ونور جابت صينية وخواشيك وامي تصفگ وياهن ويغنن..

-اختنا خوش اخت تستاهل الهوسة اختنا خوش اخت..

تهلهل امي وبسملة تهز ودعاء ونور يدگن واني واكفة بمكاني اضحك على خبالنه، بقينه بالفرحة لوقت متأخر الى ان رجع ابوية من الشغل هلكان تعب، اول مادخل للبيت نزع حذائه وتمدد على الكرويته الموجودة بالصالة.. استأذنه احنه البنات ورحنه نحظرله العشا وامي بقت عنده..

-بسملة: تتوقعون بابا يوافق؟

-نور: هلوو عاوز ميوافق منو يرفض هيج قسمة

-دعاء: اتفق تره الولد يموت

-مريم: صار عندي فضول اشوفه شلون شفتي

-دعاء: جان بره هو جاي وياهن

-نور: وشمعرفج هذا العريس؟

-دعاء: لان يملخ

-مريم: يوووه دعاء نحجي صدك احنه انتِ متأكدة لو هاي بس توقعات

-دعاء: مادري بس گلبي يكول هذا عريسنه وياريت يطلع هو تره ميتفوت مرايم

-بسملة: اوكفو هو شسمه؟ تخيلن يطلع اسمه جويسم

-نور: لا ماتوقع هيج صكوك اسمه جويسم

صحت بيهن واني مغضبة ملامحي..

-مريم: والله بالله تالله اذا ماطلع حلو نفس متكولون اللعب بيجن طوبة كافي لعبتو نفسيي

-دعاء بغمزة: هاا ولج

-بسملة: شابة ومن حقهه ليش شبيهه اختنه شو چنهه البخت المهم هسة نرجع شنو اسمه

-مريم: يا والغسل تصدكون مانتبهت

-نور: شوف الفاهية امشن وحدة تسأل امي

ومثل الشاطرة راحت الخنفسانة بسملة تمشي على اطراف اصابيعهه للصالة، بقت هناك فترة الى ان رجعتلنه وبيدهه تلفوني تهف بيدهه وتكول بحالمية..

-بسملة: اشتعل عمي

-نور: هااا ولج شفهمتي

-بسملة: لزمني ولچن راح اوگع من طولي

-مريم: خرب بسملة الغي بسرعة

-بسملة: عوبات ابوية موافق وراح يطير من الفرح شويه وانطي شالي يهزله خصر شوي خاف بقت بنفسه

-دعاء: ولج تأدبي!!

-بسملة: حاضر

-نور: وعرفتي اسم الولد؟؟؟

-بسملة: اخخخخخ لزمونيييي

-مريم: والقران بسملة راح ادگچ

-بسملة: اسمه.. طوطي

كلنه صفننه عليهه مستغربات الا دعاء فتحت حلگهه وكالت بصدمة..

-كل هالجمال الشفته وطلع اسمه طوطي!!!

-بسملة: لاااعع هذا الدلع مالته چا غير ندلع نسيبنا

-نور: اهووو شعلينه بدلعه نريد نعرف اسمه

ضحكت بسملة وكالت وهي تحرك حواجبهه بأعجاب واستهتار..

-اسمه "الاطــلس"

-نور: وااااااااووووو

-دعاء: يمةةةة الفخامة يمة الهيبةةةةة

اللتفتو بأنظارهم عليه وهنه ذايبات من الاسم، دفتني دعاء بعكسهه وكالت بغمزة..

-ها عيني شو ماكو تعليق

-مريم: اسمه الاطلس؟

-نور: اي شبيچ

-مريم: منو يسمي الاطلس!

-بسملة: دنچبي يموت

-مريم: معقولة لهدرجة متأثرين بالمحيط الاطلسي

-دعاء: اهوووو عاد بدت بسوالفهه حصلتلهه رجل كالت اعور

-مريم: لا لا مو هيج اقصد بس اسمه غريب شنو المعنى مالته

-بسملة: شدخلنه احنه المهم حلو وعجبني

-نور: وانتِ شعليج يعجبج

-بسملة: ليش متدرون ابوية كال مازوج أي وحدة من البنات الا بسملة توافق على الرجال

-دعاء: عود صدك

غمتهه بسملة وفرطنه من الضحك على براءة دعاء، تركتهن يسولفن بي ورحت اخذ صينية العشا لأبوية وامي واسمعه يحجي بفرحة غمرت وجهه..

-احمد: والله وامج وابوج راضين عليج مرايم وحصلتي هيج قسمة

منزلة راسي وكعدت على جهه خجلانة، فضلت السكوت خصوصاً بعدما اجتمعو خواتي حولي وابوية اردف بكلامه لكن هالمرة نبرته چان بيهه تحدي..

-احمد: اطلب بيج مهر خمسين الف دولار، دولار ينطح دولار!!

-الام: صدك تحجي احمد شنو هالمهر المبالغ بي منو يكول يقبلون

-احمد: اني شدخلني ايي لعد منطيهم بنية ادب واخلاق وتربية وجمال وحشمة بيهم خير يخطبون من غيرنه بهاي المواصفات

-حتى لو احمد بس عيب هسة يكولون طمعانين بينه

-احمد: هذا العندي عجبهم الف اهلاً ماعجبهم طبهم مرض!!

عقچت وجهها دعاء متضايقة وهي تنظرلي بنظرات متسائلة، ابوية ليش محسسنه هذا الزواج صفقة بيع وشراء خصوصاً بعدما كال وهو يلف الخبزة بالخضرة ويحطهه بحلگه.. 

-احمد: اكلهم يشترون گاعنه فرد نوب خليهم يخلصوني منهه واطلب منهم سعر ضعف سعرهه

-الام: احمد!!

-شبيچ ام مريم لازم نضمن مستقبلنه عدل ولج ذولة صماخااات كبااااار

-بسملة: بابا خاف ميقبلون ويبطلون على الخطبة

صفن ابوية بكلام اختي بسملة واخذله فترة ساكت، اخيراً نطق وهو ينظرلي..

-راح نعوف سالفة الگاع هسة والمهر نفسه ما نغيره

-دعاء: بابا

-ها بنيتي

-دعاء: شنو رأيك همه يحددون المهر انتَ مو تكول عنهم صماخات كبار معناهه مو بخلاء خلينه نطلع بالوجه الابيض وميشوفونه طماعين وطبعاً انتَ براحتك بعد..

-هاااا هيج

-ام مريم: واني اشوف كلام دعاوي عين العقل، محمد احنه ما ندور طمع ببناتنه احنه نريدلهن القسمة الزينة الي يرتاحن ويعيشن حياة كريمة وسعيدة منريد اكثر من هيج

سكت ابوية وسرح بأفكاره وطموحاته بهذا الزواج، ماقطع صفنته الا صوت طرق الباب استغرب بسبب الوقت المتأخر بس ماهتم وكام يفتحهه..

دقايق ورجع يأمرنا نفتح باب الاستقبال، سوينه مثل ميريد ورحنه للشباك نشوف منو چان وجه غريب ما مألوف علينه دخل وبيده جنطة مال ذولة رجال الاعمال..

غاب عن نظرنه تحولنه لشباك الاستقبال الصغير الي يفصل بينه وبين الصالة دائماً نتجسس على ضيوف ابوية منا، مديت راسي وامي ويايه ما كفو البقية يشوفون..

دار بيناتهم حديث ما مفهوم، امي راحت تجيب ضيافة واجت دعاء بمكانهه مدت راسهه تباوع ويايه..

-دعاء: بشبش شبي؟

-مريم: اششش مادري

-دعاء: شو مرتب مبين مو منا

-مريم: مادري اني هم حـ......

سكتت من توضحلي محور حديثهم الغريب، بدو يحجون عن حالة بابا المادية الضعيفة وعن حاجته للفلوس وابوية يقسم يسوي أي شي بس حتى يفك ديونه والرجال يصبر بأبوية ويكرر كلمة..

-سهلة حجي سهلة احاول اخفف عنك

-احمد: شلون يعني

-سهلة حجي ما يصعب علينه شي

ابتسم بطريقة ماريحتني، اللتفتت على دعاء مستغربة اريد احجي وانعقد لساني من انتبهت للرجال يفتح الجنطة وبرز منهه شدات من الدولارات وهو يكول...

-اني شراي وهذا سعر بناتك اربعتهم........

يتبع ♠️💸....

• ━━━━━━❪♣❫━━━━━━ •

بدينه بالمغثة؟ 🙂

عوفونه من المغثة هسة نزلت البارت اليوم لان فشلتوني بتفاعلكم البارحة ما شاء الله 😭😂💖
قلبي التصووويت اهم شي مو تنسوون 🫣