رواية الاطلس "دمليج أسود" الفصل التاسع والعشرون 29 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

الى احدهم، انت جميعهم 🙈♥️...

• ━━━━━━❪♣❫━━━━━━ •

-عمر شبيييك!

ما جاوبني ركض بره على سيارته مديت راسي جوه من سمعت صوت عياط بنية وبرمشة عين طلعت اسيل شايلة ابنهه صاك بأيدهه ومقطوع النفس..

-مريم: غييث شبي اسييل شصايرر

متكدر تحجي بس تبجي وطلعت تركض لسيارة عمر ووراهه طلعو اطلس وسارة ونانا، اندار عليه اطلس وكال..

-رايح للمستشفى

-مريم: علمود ابن اسيل؟؟ جاية وياكم بس انتظرني حباب مو تروح

هز راسه وفتت جوه اهرول شفت وجوه الباقين شاحبة محد ينطق بس خالة حصة تولول وتنوح..

ما حجيت شي رحت اصعد بايات الدرج بايتين بايتين فوراً نزعت السترة بقيت بالتنورة وشمرت فوكاية صاية ونزلت جوه..

اول ما طلعت للحديقة واطلس لمحني حرك سيارته ركضت اصعد وياه وحاطة ايدي على گلبي انداريت عليه اريد افتهم بس وجهه ميتفسر كأن الطفل مات!

-اسيل ليش ما صعدت وياك شبي غيث اطلس حباب لتخوفني احجي

-مادري مادري

-دخلت وهمه على هذا الوضع لو شنو؟؟

-جان بيد عمر من طبيت ما لحكت اسلم وعمر صاح الطفل بي شي ويصارع النفس

-سودة عليه شصار بالطفل

الطريق كله قضيته ادعي واسبح ميكون بي شي، اتصل اطلس على عمر كلشي ميفهم منه سد الخط وفوراً اتصل على علي يلحكهم للمستشفى..

-مريم: ومسلم متتصل بي؟

ضرب جبينه متذكر ودگ على مسلم ما گله شصاير يمكن حتى ميستعجل بالسياقة بس گله غيوثي مصخن واخذناه للدكتور..

يسوق اطلس ويلعن بالطريق ويلعن بلي اختار هذا البيت على بعد المسافة بينه وبين المدينة يسوق ويعيط..

-الواحد يمووووت ياله يوصل للمستشفى اشتتتتعللت روحه الي بنى هذا البيييت والي خلانه نسكن بي

بألف محمد يا علي ياله وصلنه للمستشفى اعرف اكو مستوصف قريب عليهم بس ليش ما راحوله لكن من نزلت من السيارة وشفت شكل غيث كلت مستحيل راح يكدرون يسووله شي المستوصف..

الطفل ازرررگ حتى نفس مابي مسبل ومغمض عيونه سارة شايلته وتبجي واسيل تدگ وتلطم وعمر من كد ما مدهوش ميعرف وين يروح..

-الاطلس: امشووو مو وكتهه امشي اسييل كلشيي مابي والله كلشي مابي

-اسيل: ابنييي ابنيييي

حضنهه لصدره ويمشيهه وعيونهه على ابنهه تريده، ركضنه بي جوه الاطباء والممرضين انخبصو بي خبص بأذني سمعت وحدة تكول "الطفل ميت"..

اجه الدكتور يريد يستفسر شصار وشوصل الطفل لهذي الحالة وسارة حجت..

-سارة: چنه.. چنه اني واسيل ببيت اهلي وعمر لازم غيث يلعبه وياكل عنب شال عنبة وانطاهه لغيوثي.. و.. وغيث يمكن بلعهه واختنگ

-الاطلس: شنووو شلون تنطي طفل بهذا العمر اكل عممممر

ما جادل الدكتور دخل للغرفة البيهه الطفل واسيل واكعة بالكاع تبچي وتبَچي احوالهه رحت اواسيهه وهي كاعدة بين ايدين نانا الوضعهه مزري على مصيبة اختهه..

ثواني ودخل علي شفته من بعيد يدور بس لمحنه اجه يهرول عيونه شاخصة يريد يفتهم شكو مجرد شاف عمر راحله لزمه من متونه وسأله..

-علي: شصار

-عمر: ما كتلته.. ما ردت اكتله.. جنت اللعبه وروح ابوي اللعبه.. ماريده يموووت علي ماريده يمووووت والله ماريده يمووت

-علي: عمر اهدأ.. اهدأ ولك ما صار شي كلشي مابي الطفل

راحلهم اطلس يهدأ عمر ويسولفون وياه حتى بچي گام يبجي على الطفل ويصيح..

-عمر: والله مااردته يمووت صدكوني ماااريده يموت احبه اني والله احبه

-علي: ادري والله ندري

-الاطلس: عمر جر نفس مابي شي الطفل بس اهدأ يمعود

-عمر: لا لا كله بسببي اني دعيت عليهم بس والله من حرگة گلبي ربيييي ماريده يموت ربيي من عمري على عمر غيث

-الاطلس: كاافي عمر لا تخبل امه ما تشوف حالهه

-علي: تعال وياي شو تعال نروح نرتاح بره

-عمر: ماروح مكان الا اشوفه زين هدددني

-مريم: عوفه علي يمعودين عوفو خلي يكعد ويانه ويتطمن

-سارة: اسيل تعبانة كافي حبابين

-الاطلس: تعال نكعد هنا واهدأ يا حبيبي ندري انتَ تحب غيث تعال يمي

جره گعده وياه على الكراسي وراح علي يكعد بصفهم ويمسح على ظهر اخو المنهار اقل الخمس دقايق وطلو علينه حمزة ومسلم مجرد اسيل شافت زوجهه راحت تركض حضنته وتبچي بقهر..

مسلم باهت ميعرف شسالفة وحمزة نفس الوضع انعاد سيناريو البكاء والعويل من سارة شرحت للولد الصار حمزة ما حچى شي بس مسلم تدمر دمار وجهه كله تغير غيم عليه الهم ومنشوف غير دموعه تنزل حضنه حمزة يهدأه واسيل بين ايدين مسلم..

ترك حمزة الثنائي بوضعهم المزري واجه لاطلس يسأله اذا الدكتور طلع لو لا..

-الاطلس: لا ماكو لسه ما طلع

-نانا: روح اطلس شوفلنه دكتور ثانييي هذا ما يففهم

-عمر: اني اني اروح

-حمزة: عمر، بلقيس الله يخليكم لا تزيدون الوضع على اسيل، اهدأو وسيطرو على نفسكم

بنفس الوقت طلع الدكتور من الغرفة وخبرنه الطفل بي نفس بس كلش قليل ولازم يحولو عملية لكن نسبة نجاحهه مو عالية لان الطفل كلش صغير والعنبة داخلة بقصباته الهوائية، فوراً بدون تفكير مسلم وافق وراح يوقع الاوراق ودخلو غيوثي لغرفة العمليات..

اباوع للاجواء تموت قهر شكد تأذيت وتوجعت دموعي ما وگفو واني اشوف حال اسيل تعبت على تعبهه ابنهه واول فرحتهه ما صارلهه شهر من جابته هيج يصير بي وتشوفه يموت كدام عيونهه..

ادور وجهي على عمر حالة يبچي الصخر عيونه محتقنة حمرة وبس شفايفه تتحرك ماعرف يدعي او يسبح ماعرف كل ثانية يصعد راسه ويهمس "يارب" ويرجع يمسح دموعه بالخنسة..

اثناء ما اني اراقب الكل فززني من عمر اجاني مهرول ويحجي سريع..

-عمر: حديث الكسااء مريم حديث الكساااء

-علي: اي اي حديث الكساء خلونه نقراه اكيد راح يفيدنه

-الاطلس: منين نحصله شباب

-مريم: من الكوكل بس كتبو حديث الكساء يطلعلكم

والله صدك كلمن لزم موبايله وبحثه وصارو يدعون واني وياهم، الكل بدون استثناء حتى اسيل الما فاهمة شكو خليناهه تقراه..

انتبهت لعمر طول اكثر واحد بيناتنه ابتسمت من اجه يهمسلي..

-يصير اقراه اكثر من مرة؟

-مريم: اكيد يصير

-عمر: راح اقراه خمس مرات

-مريم: براحتك بس تعال اعلمك شغلة

تقرب مني كلش ومركز بوجهي استحيت ودرت عيوني على اطلس شفته يباوعلنه وياكل بشفته غيران بس مو وكتهه هسة..

-مريم: من تقره الدعاء وتوصل لمقطع "يا عَلِيٌّ وَالَّذِي بَعَثَنِي بِالحَقِّ نبياً وَاصطَفانِي بِالرِّسالَةِ نَجياً ما ذُكِرَ خَبَرُنا هذا فِي مَحفَلٍ مِن مَحافِلِ أهلِ الأرضِ وَفِيهِ جَمعٌ مِن شِيعَتِنا وَمُحِبِّينا، وَفِيهِم مَهمُومٌ إلاّ وَفَرَّجَ اللهُ هَمَّهُ وَلا مَغمُومٌ إلاّ وَكَشَفَ اللهُ غَمَّهُ وَلا طالِبُ حاجَةٍ إلاّ وَقَضى اللهُ حاجَتَهُ.." هنا تطلب من رب العالمين غيث يكوم بالسلامة

هز راسه اي وراح بعيد يقراه وحده اتوقع قراه اكثر من خمس مرات لان بقينه كاعدين فوك الساعة وهو بس يقره ويدعي..

-الاطلس: شنو انطيتي يقره؟

-مريم: هو حديث الكساء بس يمكن ديعيده

-الاطلس: مريم صار ساعة وما صار شي قلقت كلش

-مريم: ان شاء الله خير حبيبي لتخاف

مانتبهت شلون طلعت من حلكي واصلاً ماركزت بس هو صفن عليه وبقى جامد، عيونه على وجهي مادري بيه كلتهه اصلاً ولا ببالي ما نطق شي وبقى الوقت كله يباوعلي..

-سارة: متت خوف حمزززة خاف الطفل بي شي

-حمزة: سارة صوتج الله يخليج

-سارة: ها اسفة بس ليش تأخرو

-حمزة: مادري حالي من حالكم تعالي

صاحلهه راحتله باوعت عليهم يحجي وياهه همس ويمسح على خدودهه يمكن ديكوللهه لتبجي بعد لان هيج الظاهر من هزة راسهه..

مرت ساعة ونص من دخلو غيث للعمليات وعمر ما بطل يقره حديث الكساء ما اللتفتت علينه الا من انفتحت باب غرفة العمليات وطلع منهه الدكتور نزع كمامته كلنه رحنه نركض عليه..

ابتسم الدكتور على لهفتنه ومي بارد نزل على قلوبنه من كال الطفل بخير ورجع يتنفس طبيعي بس يحتاج يبقى هنا كم يوم علما يسترد صحته..

طرنه من السعادة وصارت دموع الفرح تنزل من عيوننه عكس قبل شوية نتحمد لاهله على سلامته واسيل اجتني تحضني وتتشكر مني لان خليتهم يقرون حديث الكساء..

-مريم: هههه حبيبتي بس مو اني اخترعته هو الدعاء موجود كل مكان

-حمزة: بس انتِ نبهتينه عليه شكراً الج آنسة مريم

-مريم: تدللون

ارتاحينه شوية وجرينه نفس عمر راح يتعذر من مسلم واحلى شي بمسلم هو هادئ ومو من النوع خابص روحه ويسويله سالفة بالعكس حضنه وگله هذا قضاء وقدر..

-عمر: مادري ما يصير يوكلون الجهال والله مادري

-علي: هم عقل هذا عمير شلون توكل جاهل منيله سنون وياكل

-الاطلس: باع هذا الفهيم الثاني ما يحتاج سنون ياكل بس بعده صغير

-حمزة: شسالفة شباب شبيكم وليتو الزلمة طبعاً ما يجي بباله ما شايف جهال من قبل ومو باله الموضوع

-نانا: ميخالف حبيبي عموري لا تزعل بس انتبه مرة ثانية

هز راسه اي وحمزة كال لازم نرجع للبيت ميصير نبقى هنا كلنه، فعلاً رجعنه وبقى هو ويه اخو واسيل وهكذا مرت خمسة ايام متوترة ياله طلعو الطفل..

هواي تغير عمر وره هالحادثة علي يسولف يكول صار اكثر هدوء وهواي يتصفن ما داوم اخذ اجازة اسبوع ومن سألت علي عنه كال مريض كلش وامه باقية وياهم بالبيت..

-مريم: علي اتوقع عباله نظن ان هو متعمد

-علي: اي هذا الصار بالبيت شال القران يحلفلي عليه هو ما متقصد

-مريم: سودة عليه يا عيني

-الاطلس: منو عينج؟

تقرب من عدنه وحجاهه بهمس، ضحك علي وغمز بعيونه..

-علي: احنه بالشركة حبيب كض غيرتك شوية

-الاطلس: شبيكم شو واكفين هنا خو ماكو شي؟

-مريم: لا استاذ كلشي ماكو

-علي: هو استاذ واني علي؟ شنو هالظلم مريم هيج اني مو بعينج

-مريم: لا مو هو مغرور وشايف نفسه

-علي: وعلي صح اتفق وياچ

-الاطلس: اني لا مغرور ولا شايف نفسي اني...

حچينه ويه بعض اني وعلي بهمس..

-مريم، علي: اني عندي ثقة عالية بنفسي

-الاطلس: شنو ناصبين عليه انتو امشو كلمن يروح لشغله وبطلو هالبربرة الزايدة

-مريم: وديني لبيت اهلي

-الاطلس: نعم؟!

-علي: اي اي بده الاكشن

-الاطلس: شسويت اني مريم شبيچ ما تتحملين حچايتين

-مريم: اريد اروح احضر لمهر اختي شبيك اطلس

-علي: اني اني اخذج برموش عيوني اخذج شيجيب الخميس يا علي

-مريم: ما بقى شي كله ثلاث ايام وتعقدون بس..

-علي: بس؟؟ شنو بس احجي احجي

-مريم: خلينه نحجي وحدنه ممكن استاذ اطلس تعوفنه شوية

-الاطلس: لا بله؟!

-علي: دعوفنه ياخي خلينه نسولف ولي يله ولي بعدين تعال

-الاطلس: لو تموتون مريم لا تخبليني شتردون تحجون وما تخلوني اسمع

-مريم: يمممة تعالو ثنينكم بس اريد مكان هادئ وميثير الشك

-علي: تعالو لمكتبي

-مريم: لا مكتبك ابو الشك كله سبايسي كاعدات بي

-علي: سبايسي منو

-الاطلس: عارضاتك، امشو لمكتبي

-علي: اوكفو منيلي عارضات بالمكتب لا تاكلون نعل

-مريم: يااااا

-الاطلس: راح افرك حلگك عليي

-علي: اسف اسف مريم اعتذر زلة لسان ماقصدج الج اقصد اطلس ياكل نعل

-الاطلس: علي راح...

-مريم: لتتعاركون هنا عود بالبيت علي تعاللنه ونتفاهم

-الاطلس: اي يله ولي تعالي عمري هذا شنو كاعدة تحجين وياه الارعن

يأشرلي بعيونه امشي وياه ضحكت على مداهرهم لحدما عفتهم همه واحد يذب على الثاني، صعدت المصعد ورحت لمكتبي بعدني هستوني بديت اشتغل واجتني منار ومثلما توقعت تكول..

-مسيو اطلس يريدج مريم

-لهيب: مو كأن صاير هواي يصيحلج مريم؟

-ريتاج: لا حتى اني يصيحني هواي هو الي شغلهه مرتب يصيحلهه دائماً

-لهيب: خوش بسمار ريتاج

-مريم: بنات ماروح اني شو تعبانة ريتاج روحي بدالي فدوة

-ريتاج: مو صاحلج بالاسم

-اذا سأل كوليله مريم تعبانة ومريضة جايهه خفقان

هزت راسهه وكامتله بقت عنده فترة واني نسيت رجعت اشتغل، ربع ساعة ورجعت..

-ريتاج: سأل عنج مريم وكال كوليلهه ماعدهه غير العافية وحسابهه بعدين

-مريم: يمممة حسابي بعدين شنو

-لهيب: يعني انعلستي مرايم

-مريم: يووه ليش انعلس يعني وحدة ميجيهه خفقان شبي هذا معقد

-لهيب: ماسمحلج تحجين على كراشي

-مريم: كراشچ بعينننج

-لهيب: ما ما من الاول كايلتلكم احبه وماقبل عليه يخبل مسيو اطلس بس عيونه عالم ثاني

-مريم: اييي تزوجوا خلونه نخلص

-ريتاج: ههههه ومرته وين تروح

-مريم: هه هه هه هه هه

-لهيب: ههههههههههه اخليهه تقبل بزواجنه وتشهد عليه

-مريم: ديلا يلا اشتغلن

-لهيب: ريتاج شلبس بدلة بالعرس اوف وايت لو بيضة كاملة

-مريم: شسالفة لهيب!!

-لهيب: اتشاقة والله اتشاقة عزه خليني اسكت لا يسمعني

-ريتاج: خلي يسمعج حتى تصير قصة حب بيناتكم وتتسهل المهمة

-مريم: بنات هذا شلون يصير اففففف تنرفزت تعالن شوفنهه جمدت حاسبتي

-لهيب: ياا ليش

-مريم: مادري تعالي شوفي وعوفي اطلس

-لهيب: الميانة العند مريم ويه الرئيس تخبل

-مريم: الله مال كهوة بنات اجيبلكم؟

-ريتاج: والخفقان؟

-مريم: لا لا صرت زينة رايحة اجيبلكم كهوة بين ما لهيب تشتغل بالحاسبة

رحت انزل للكافتيريا وصيت ثلاثة قهوة ووكفت اسولف ويه ضحى هم شفتهه نازلة تجيب چاي، اخذتنه السوالف على تينا وسوالفهه ويه زوجهه خطية راح تجلطه بلبسهه..

صعدنه سوه كلمن لطابقهه ورحت للمكتب انطيت البنات الكهوة وكعدت اكمل شغلي، حسيت بشي يرج بجنطتي مديت ايدي وطلعت تلفوني اشوفه چان المتصل "طوطي" ثواني وماشوف غير اطلس دخل للمكتب مالتنه وصار بوجهي..

-الاطلس: مساء الخير

وكفن البنات يردون التحية واشرلهن يتفضلن ويه ابتسامة قلقة مرسومة على وجهه، انتبهت لروحي كاعدة خفت يشكن بيه وكفت بسرعة وابتسمت بوجهه..

-مريم: اهلاً استاذ

-الاطلس: اهلاً بيج آنستي، كالو عنج مريضة؟

-مريم: هاا اي اجاني خفقان

-الاطلس: اها

بلل شفايفه ومسح وجهه ويباوع لكوب الكهوة مالتي، ابتسم مجاملة وكال وهو يوزع نظراته عليه وعلى البنات..

-والعدهه خفقان تشرب قهوة؟

-مريم: مو.. مو الدكتور گلي

-الاطلس: اها لطيف

-مريم: اي اي الدكتور نصحني بس يصير عندج خفقان شربي كهوة

ريتاج تباوعلي فاكة عيونهه انوب ادور على لهيب تعضلي شفة وتسويلي سكتي، بلعت ريك وعدلت حجابي وكملت..

-مريم: استاذ انتَ جاينه محتاج شغل؟

-الاطلس: شنو اسم دكتورج مريم؟

-مريم: ليش استاذ؟

-الاطلس: حتى نقيم عليه دعوة ونمزق شهادة الطب على راسه

-مريم: لا استاذ شسالفة تره يفتهم كلش

-الاطلس: اممم فهمت

-مريم: نعم نعم حتى خواتي يزورو

ماكدر يخفي ابتسامته تقرب من المكتب مالتي توترت من اخذ كوب الكهوة ورشف منه كمعة..

-الاطلس: خوش كهوة عجبتني تسمحيلي اشربهه؟

صرت چني طلي عين عليه وعين على البنات دخت..

-مريم: اشربهه بالعافية

-الاطلس: شنو جاي تشتغلين مريم؟

-مريم: هذا استاذ

-بله اشوف

مدلي ايده ياخذ الملف اشرلي بأصبعه اطلع من وره الطاولة واجي اوكف بصفه، منطي ظهره للبنات مقابل طاولتي اضطريت اوكف نفسه واني دا انطي الملف تلمس ايدي وابتسم خفت اسحبهه بسرعة والبنات يحسون غلست سويت الموضوع عادي..

-جيد عاشت ايدج

اخذ قلم من سلة الاقلام مالتي وستيكر ونزل الملف على المكتب وكتب شي، تركته ورجعت اوكف وره الطاولة، جريت رداناتي اغطي ايدي واوزع عيوني على أي شي ماريد نتواجه..

-الاطلس: بعد مريم سولفيلي على دكتورج حاب اراجع عنده

حچاهه بمكر ورجع يشرب قهوة وكعد على ميز المكتب مالتي اباوع البنات ساحن خجل واعجاب واني تمنيت افگس عيونه شنو هالاحراجات شبي هذا..

-مريم: اسم الله عليك استاذ شنو عندك خفقان انتَ حتى تزوره؟

-الاطلس: لا بس مرتي عدهه اوقات يزورهه

-مريم: هاااا الله يشافيهه

-الاطلس: كلش تتعب منه واني اتعب على تعبهه ويه كل دگة من گلبهه تاخذ ثلثين حيلي

ابتسمت ونزلت راسي عجيب هالبشر ماعنده ستوب ميهتم لبني ادم ضارب ريتاج ولهيب بعرض الحايط وهنه گاضياتهه بس يتصفنن..

-مريم: اني اسفة لان يروح ثلثين حيلك على زوجتك استاذ

-الاطلس: لا ليش تعتذرين تستاهل مدامتي

-مريم: الله.. الله.. الله يحفظكم لبعض

همستهه گوة طلعت مني ضحك بهدوء وكال..

-علي صوتج مريم خلي توصل لابواب السما.. شكراً على الكهوة آنستي

حچاهه بأبتسامة واخذ كوب الكهوة وطلع من المكتب، بقيت منصية راسي ماريد اشوف ردة فعل البنات بس صوت لهيب جان مليان انفعال..

-لهيب: ياااااي هاي شنوو صار مريم

-مريم: شنو صار كلشي ما صار لهيب لتبالغين

-لهيب: شلون ما ابالغ مسيو اطلس وزوجته صارو ويه بعض؟؟ يعني سمعتو انتو مو سمعتنه

-ريتاج: اي حتى اني تفاجأت وواضح يحبهه هم وهواي

-مريم: اي اكيد يحبهه بنات غير مرته

-لهيب: عجيب والله تدرون كالو عنهه خطية مو جميلة وهو احلى بهواي

-مريم: اهووووو رجعنه لهاي السوالف منو كال مو حلوة اصلاً كلش حلوة تخبل اني اضمنلكم هالشي

-ريتاج: ههههه مريم تروح وتجي تدافع للبنات ومناصرة الهن

-مريم: طبعاً طبعاً لعد شلون

-لهيب: شكد حبيت من اجانه ياريت يكررهه بس بنات شعجب اجه؟

-ريتاج: يمكن يسأل عن مريم لان كتله مريضة

-مريم: لا ماتوقع يمكن راد شي ثاني ومن شاف الكهوة نسى

-ريتاج: اصلاً مسيو اطلس ميحب الكهوة

-مريم: صدك!

-ريتاج: اي يكرهها بس يشربهه مجاملة ويه ضيوفه

-مريم: يله بنات نرجع للشغل حبابات عوفو الاستاذ

رجعنه نشتغل وتذكرت الملف الكتب عليه فتحته اشوف يمكن كاتب ملاحظة على شغلي اول ما وكعت عيني على الرسالة ابتسمت، كاتب..

"انتبهي لموبايلج وجاوبي اتصالاتي فوراً، وگع گلبي من ريتاج كالت عنج متخربطة راح يجي يوم وتوموتيني مرمر.. احبج"

سديت الملف وكملت، حتى استراحة غده مانزلت صايرة فاهية بالشغل كلش ومدا اللحك عكس ريتاج تركض ركض بكلشي، كعدت ارتاح شوية واتصلت على امي وخواتي وطلعت بسكت من جنطتي اكل واشوف اخر اخبار دعاء..

-دعاء: اشتريت الفستان البارحة مريم يخبلللل خليت امه تختارلي ذوقهه رهيب

-مريم: حبيبتي الف عافية دعاوي شنو لونه؟

-ذهبي كله وبالكتف بي فصوص ناعمة لونهن اسود كلش راح تنبهرين بي من تشوفي

فرحت على فرحتهه وتحمست ليوم المهر الي راح يصير ببيتنه حددو يوم الخميس حتى الجمعة عطلة للكل ومننخبص تمنيت احضر تجهيزهه بس ما صارت فرصة اطلس ياخذني وميقبل اروح ويه السايق وحدي..

رجعت لشغلي وقاطعني دخول جميلة المكتب بس شفتهه ضحكت متأكدة راح تذبلي حچاية مستحيل تشوفني ومتضوجني بشي..

-جميلة: شو ما نزلتي ويانه بالبريك؟

-مريم: مشغولة كلش ما جاي اللحك للشغل

-جميلة: اي اي صح لو حتى المسؤول يشوفج جادة بالعمل ويزيد راتبج حبتين

-مريم: اي اطمح لهذا الشي

-جميلة: اي اوكي براحتج بعد

وكفت تباوع للمكتب مالتنه وعينهه على طاولتي تحير شتطلع سوالف والله حافظة سوالفهه على كولة ريتاج تغار من كل بنات هاي الغرفة لان قريبات على مكتب الاطلس..

-جميلة: ايوو تاكلين بالمكتب مريم شنو هالوصاخة

-مريم: هو بسكت حبي ما ماكلة سمج

-جميلة: even though مقزز تره

-مريم: عادي مكتبي واحب اقززه شويه

-مريم: خلي يجي الرئيس ويشوف هاي القذارة الله يساعده

-مريم: هلا بي

غلست عنهه وكملت شغل اندارت توكف وراية تبحوش ماعرف على شنو حتى على سطلة الزبل تباوع عجيب فضولهه..

-جميلة: مريومة ما معتازين احد وياكم هنا؟

-مريم: مادري ماتوقع

-اريد اشتغل وياكم هنا فدوة

-ماتوقع محتاجين لان جانت ويانه وحدة رابعة وطلعوهه باعي مكتبهه فارغ

-حاچي الموسيو لخاطري

-لا اني معليه تردين احجي ويه منار

-منار زفرة ماحبهه انتِ حبابة

-لتحجين على منار جميلة وارجع واكول اني ماتدخل بهاي السوالف

گلبت وجهها وهمست "لئيمة" وطلعت من المكتب، اي بعدني اعاني ويه الموظفين هنا ومو كلهم ديتقبلوني بس اتغاضى عنهم وما اندك بيهم خليهم نارهم تاكل حطبهم شعليه..

اجاني اشعار على موبايلي من "غدير" كاتبتلي..

"مريم محتاجة حذائي اللبستي بالايفنت جان ما اخذته بس عندي موعد ويرهم ويه لبسي ما اللحك اطلع اشتري"

"مريم: اسفة تأخرت بس راح من بالي اول ما ارجع انطي الج"

-مساء الخير مريم

رفعت راسي شفته دخل بأبتسامة مرسومة على ثغره رديتله السلام واجه تقرب حط بوكس على المكتب مالتي..

-مسلم: هذا الاطلس دزه الج ما شافج نازلة ووصاني اصعدلج اكل هو طالع لاجتماع غداء مهم

-مريم: عاشت ايدك استاذ تزحمت

-مسلم: لا ابد ماكو زحمة

-شلونهم اسيل غيوثي ان شاء الله احسن؟

-لا بخير ونعمة الحمد لله بس اسيله بعدهه تعبانة شوية من الصار وجاي تتخطى

-خطية حبيبتي متستاهل شگد جميلة شكل وروح

-مسلم بأبتسامة: فعلاً

-استاذ اجتماع اطلس يطول اقصد يرجع هنا علمود ارجع وياه للبيت

-اتوقع اي لان عمي محمد وياه

-وابو نورسين مو

هز براسه اي وطلع من المكتب، اخذت موبايلي وكتبتله رسالة..

"شكراً على الغدة"

ما جاوب بسرعة مرت دقايق ياله كتبلي..

"بالخدمة اني حبيبي"

ذبيت موبايلي ورجعت لعملي وعقلي وياه ما ارتاحيت الا من شفته يعبر مكتبنه الساعة بالستة المغرب، كملت كلشي وكمت ارجع وياه للبيت سألته عن الاجتماع مالته وجوابه فقط جان..

-چان زين

هزيت راسي بدون لا انطق شي بعد لحدما وصلنه البيت شفنه التوأم عدنه وسارة وحمزة وحتى مسلم واسيل كلهم جايين على العشا..

سلمت على عمر بحرارة ابتسم على ملگاي وسأل عن احوالي شكله مو مريض فرحت بهذا الشي..

-مسلم: هاا يا عالم ما ناكل مو متنه جوع

-حصة: وااااي يوعان چبيدي ثواني ويجهز الاكل تعال عطني هذا البزر اللعبه

انطوهه غيوثي شايلته وتفتر، دورت عيوني على نانا وسألت عنهه عمو محمد جاوب بنرفزة..

-محمد: بالمطبخ

-مريم: ها خطية خليني اروح اساعدهه

-حصة: لا ماكو داعي حبيبتي المساعدات حوالينهه بس هذي بلقيس ما تعرف تكعد

-محمد: يمكن لان اكو بعض الناس اوامرهم هواي

حسيته بسمار لخالة حصة جاوبته بضحكة خجولة فقط ورجعت تلعب ويه الطفل، درت اباوع لاطلس مزعوج كلش وبأي لحظة راح ينفجر..

-الاطلس: يمة شگلنه ليش تتعبيهه

-غدير: شسالفة اطلس شبيك ويه امي هي نانا ماتعرف تكعد متعودة على الخدمة شنو الجديد؟

-الاطلس: الجديد ان نانا كبرت ومو مال تعععب وجهد!!!

باوع لابوه خازره عمو محمد ما حچى حك طرف حاجبه وما باوع لاطلس حتى..

-حمزة: حتى ببيتنه ما تكعد شكد نخجل من تساعدنه بالبيت ذهب هذي المرة

-غدير: ذهب شنو حمزة تره شغلهه هذا عايشة ويانه صارلهه سنين تاكل وتشرب ومرتاحة عايشة عيشة ملوك

-الاطلس: نانا مو خدامة غدير وهاي عيشة الملوك التحجين بيهه تستحقهه

-غدير: لا خدامة وخدامة انتَ كبرت راسهه اطلس اعذرني

-الاطلس: غدير لا تتجاووزين نانا مربيتنه شلون نسيتي تعبهه وسهرهه عليج!!

-حصة: هاااو شفيكم يا جماعة

-غدير: اوكفي يمة، نانا ربتني على عيني وراسي خلص دورهه كبرنه وصرنه مسؤولين عن ارواحنه شعدهه كاعدة هنا وزوجت اختهه لابن خالتنه!

-مسلم: شدخل هذا الموضوع بأسيل غدير لا تتمادين!

-الاطلس: لا لا خليهه السواد عمى گلبهه ونست تعب وسهر مرة ربتهه سنييين

-غدير: تره To much صاير انتَ اطلس يا حبيبي ابوية دفعلهه فلوس هالتربية والتعب لتخليهه تمن علينه بوقتهه الثمين

-الاطلس: غدددير سدي الموضوع لا نتناقش الكلام وياچ ضايع

-غدير: ههههه والله عجيبين هي منو نانا اصلاً...

-محمد: غدير!!!

صاح بصوت فززنه كلنه خزر غدير خزره خلاهه تصم حلگهه ومتحجي بعد، الوضع متوتر ما حبيت ابقى صعدت فوك لغرفتي تذكرت حذاء غدير بعدني ما رجعته فتحت الكنتور ادوره ما لكيته بحوشت كل مكان ماله اثر..

طلعت اوكف على محجر الدرج واشرت لاطلس يصعدلي، كام اجه يشوف شكو بسرعة سألته..

-اطلس شفت حذاء لونه اوف وايت هنا بالكنتور؟

-الاطلس: لا ليش

-مو مالتي هذا مال غدير لبسته بالحفل واختفى

-لااا مريم ليش تلبسين منهه!!

-ليش

-ليش تلبسين من احد لا تعيدين هالسالفة بعد محتاجة شي نطلع للسوك نشتريلج لا تاخذين لبس من وحدة

-ماشي بس هسة وينه اختفى

ما جاوبني راح ينفش بالكنتور يدوره واني رحت اشوف جوه الجرباية وجوه الميز طگت روحي وما لكيته كمت ارجف اعصاب واطلس متنرفز من غدير قبل شوية وزودتهه عليه بالحذاء..

-الاطلس: عوفي نشتريلهه غيره بس لا تحجين

-مريم: مو اليوم راسلتني كلتلي تريده

-شوكت راسلتج؟

-من جنت بالدوام

زفر نفس وفرك وجهه اعصابي تلفت رجعنه ندور نفشنه الغرفة نفش ما لكينه الحذاء كعدت على الفراش مهدود حيلي وين راح كل يوم اشوفه واكول اخذه الهه وانسى شكد غبية اني..

-الاطلس: غلسي باجر نجيبلهه واحد لا تخافين

حركت راسي موافقته دقيقة مرت واندكت باب غرفتنه فتحهه اطلس وجان نشوف غدير بوجهنه..

-غدير: اسفة على المقاطعة بس اجيت اخذ الشوز مالتي

-مريم: هااا

-الاطلس: بعدين عود وره العشا امشو ننزل

-غدير: احتاجه اطلس باجر عندي موعد ويه صديقاتي يله مريم ما اخركم بس انطيني الحذاء واروح

-مريم: وصخ خليني اغسله الج

-غدير: ميخالف اني اغسله جاي اكلكم مستعجلة شبيكم

-مريم: غدير اغسله واجيبه الج وعد

فتحت عيونهه جاحظتهن ضحكت ضحكة عالية وكالت..

-غدير: مضيعته لو عجبچ وتردين تبوگي؟

-الاطلس: غدددير

-مريم: بس اغسله عيب انطي وهو وصخ شبيچ غدير

-غدير: اني قابلة بس كولي انتِ تردين الحذاء وما تقبلين ترجعيي

-الاطلس: هو حذاء!! كلتلج تغسسسله وترجعه

-غدير: بله اشوفه وينه

-الاطلس: يااا علييي شنو الموضوع غدير

-غدير: وين الحذاء اريد اشوفه حقي هذا

-الاطلس: گلتي لونه ابيض؟

-غدير: اي اوف وايت

-الاطلس: ذبيته بالزبل

-مريم: شنووو

-الاطلس: شفته وصخ وقديم وذبيته ماحب مرتي تلبس لبس قديم

-غدير: نعم؟!!

-الاطلس: اسف مادري بي الج ومريم ماتعرف ذبيته اشتريلج غيره عود

-غدير: الحذاء مو قددديم بس كول مرتك قذرته!!

-الاطلس: فدوة الهه

-مريم: اطلس..

-الاطلس: يله حبيبتي ننزل نتعشى وغدير باجر اجيبلج حذاء لا تزعلين

جر ايدي وايد غدير ونزلنه جوه وهو راح بوجهه للمطبخ، غدير بقت تلفحني بنار وخازرتني طول الوقت واني مغلسة على نظراتهه، ابتسمت من كعدت سارة بصفي وحجت بهمس..

-سارة: شبيج ضايجة

-مريم: من موقف قبل شوية شلون غدير حجت على نانا

-سارة: هاي كل مرة تصير عركة بيناتهم علمود نانا

-مريم: صدك؟ زين ليش غدير متحبهه؟

-سارة: استغفر الله دائماً تعيد وتكرر نانا راسمة على ابوية وتريد تاخذه من امي

سكتت واجه ببالي الموقف الشفته بين عمو ونانا بالمطبخ، ذبيت نفس وهمستلهه..

-وانتِ شتكولين؟

-سارة: لا طبعاً نانا مو هيج وهي ربتنه واطلس يموت عليهه متأكدة لو شك بهيج شي ميسمح بي ميقبل على امي هو

-مريم: ها

الجو متوتر الوقت كله اسيل ساكتة ومبين كوة طايقة الكعدة لاحظتهه من تلاسنو غدير واطلس رادت تدخل كذا مرة ومسلم يأشرلهه تسكت..

-سارة: امشي نشوف وين صار العشه راح تموع روحي

كمت وياهه للمطبخ وشفت اطلس واكف يساعد نانا ابتسمت رغم اكو مساعدات عدهم بس مبين يحب يقضي وقت وياهه..

-الاطلس: ها خير

-سارة: متنه جوع متنه

-نانا: هسة حبيبتي هسة يروحي شوية ونصب بس تكمل روزلين

-الاطلس: نانا هاي شنو شو عايني عليه

-نانا: شنو شبيك

-شو شو اشوف

-نانا: ولك خرعتني شكو

-شنو هالعيون الحلوة

ضحكت بصوت وضربته على متنه ضحكنه وياهم وهو يحضن ويبوس بيهه..

-الاطلس: ارفسچ اني وعلي

-نانا: وخر ولك ااايي ولك ااخخخ ليش تعض

يعض بچتفهه وحاضنهه شكد عجبني المشهد كعدت على الميز بالمطبخ اشوفهم وهمه يتلاطفون كعدت ويايه سارة مركزات بيهم..

-الاطلس: اكلج بلقيس انتِ صايرة ما تستحين

-نانا: ادبسز ماستحي شنو ما مؤدب

-والله ما تستحين لا تسألين عني لا تكولين شلونه ابني حايرة تسوين خلطات لوجهج تبيضين بروحج

-بلقيس: عمت عيني لو مسوية خلطات هو ذاك اليوم برشت خيارة للزلاطة زادت وحطيتهه بوجهي

-ادري بيج ادري مو عليه سوالفج هاي

-نانا: يوووه روح عني اطلس لا تزهگني

-مو اكلج مو خوش نانا صايرة اني صوچي جاي اساعدچ

-روح روح ماريدك

-بس اني اريدج

-روح ما احاچيك

-ماكو الا تحاچيني

-روح يله ولي

-ماروح وعلي ماروووح

حضنهه وهي تضرب ببطنه توخره عنهه وتضحك، حسينه على صوت حمحمة حصة واكفة بباب المطبخ متخوصرة..

-حصة: كأن اكو واحد نسى امه

-الاطلس: الروح والرية انتِ شلون انساچ

-حصة: مابي مابي روح زعلانة عليك

-الاطلس: تعالن لا تظلن تتنعوصن تره اخذ مرتي واطلع من البيت

-بلقيس: تاخذني وياك

-حصة: هاااوو وانا ليش ما تاخذوني

-الاطلس: ماكو ما اخذ عجايز وياي خليني اگابل هذا الوجه الحسن واكعد اجر نفس منچن شوي

يأشر عليه وهنه فاطسات ضحك، استحيت من تحولت الانظار عليه حتى المساعدات يباعولي ويضحكون..

-حصة: اقبل اعوفكم بشرط تجيبولنه ولي العهد

-الاطلس: مو بعينيييي بس قنعو هاي الحلوة واني في رسم الخدمة

-مريم بهمس: اطلسسسس

-الاطلس: ها شفتو بس حاضرة تمد لسانهه مثل الحياية

-نانا: لا تحجي على مريم ماقبل

-حصة: بلقيس لا تكدرين وليدي

-بلقيس: اخذي الج اخذي خلصيني شبعني عض

-حصة: هاااوو وشفيك ما تعضني

-الاطلس: يا بووووية تعالن تعالن شلون ويه عجوزاتي اني

حضن كله وحدة من طرف ويداهر بيهن، ميفرق بين وحدة والثانية شنو يسوي لحصة نانا تريد يسويلهه وشنو يسوي لنانا لازم يسوي لحصة هم لا تزعل عليه..

طلعنه اني وسارة من اجت عمة زهراء وانضمت وياهم رجعنه للصالة احنه وعلي اجاني..

-علي: مريم يصير نحجي هسة؟

-مريم: ها ماشي بس خليني اصيح لاطلس

وافقني الرأي رحت صحتله ورجعنه سوه دخلوني للصالة الصغيرة كعد علي متوتر ويفرك بيده..

-علي: ها مريم كولي مو دمي نشف

-الاطلس: ليش جايني احساس دعاء مبطلة على علي

-علي: لا دخيلك يابو فاضل صدكك مبطلة مريم؟؟؟

-مريم: لا لا مو لهدرجة بس شوف علي الموضوع صراحة اني ماردت احجي وياك بي ردت اطلس هو يحاچيك

-الاطلس: هاي شوكت معقولة اني ناسي؟

-مريم: لا لان اصلاً ماحجيتلك والسبب انتَ احتمال تكون نفسه

-الاطلس: اممم كملي كملي نشوف شنو السالفة

قاطع كلامه من دخل عمر الصالة..

-عمر: هاي شكو شبيك عليوي

-علي: تعال تعال عمير تعال شوف اخوك مبطلة عليه الحب

-عمر: لااااا بشرف امممك

-مريم: اهووو تره ممبطلة شبيكم بس يمكن تبطل

-علي: لااا لااا عليج الحمزة شمصخم اني عمر ذكرني سويت شي غلط اني انسى فوايني

-عمر: هسة غير ينجب ويخلينه نفتهم السالفة

-الاطلس: انتَ شجابك اصلاً حديث خاص روح بابا روح وليدي

-عمر: يا نعال خاص راح يجي حمزة هم صحتله حسيت السالفة جبيرة

-مريم: عززه لا يمعودين عيب استحي لا لا انسو الموضوع

-علي: وعلي ما تكومين قبل لا تحجين

-حمزة: ها شباب شصاير

-الاطلس: طركاعة جديدة من علي عادي لا جديد

-حمزة: علي راح تتزوج وبعدك على طراگيعك كاافي ولك لعبت روحي اظل اعلم بيك واطمطم وراك

-علي: ولك تعال يمكن ما اتزوج عمت عيني

-حمزة: لااه هاي ليش

ضميت وجهي راح اموت من الخجل حس عليه اطلس وهمسلي..

-بعدين نسولف اني وياچ مريم وافهمه الموضوع امشي نطلع

-علي: ويين وييين كلت والعباس ما تكوم الا تحجي

-الاطلس: شتحجي وانتو مثل الشمورة واكفين فوك راسهه امشو بره

-عمر: اطلس بعدين غار على مرتك مو وكتهه الموضوع واضح حساس

-مريم: راح احجي افف شوف علي انتَ خطبت اختي ومثلما تعرف ميحتاج نسأل عنكم وابوية شفته فوراً رجعلكم موافقته لان يتخيلك نفس اخلاق اطلس ونفس تربيته

-الاطلس: اي فدوة يرحولي

-حمزة: استقر، كملي مريم

-مريم: اي بس احم.. شوف دعاء متحب الرجال يفوت مطاعم وهالسوالف يعني.. اممم شلون اشرح

-عمر: نايت كلاب افتهمنه ماكو داعي تشرحين

-مريم: اي وحلفت اذا انتَ من هذا النوع متقبل تتزوجك لو چان بينكم وبين العرس ساعة

-حمزة: اي حقهه

-مريم: اي فـ يعني اني اجيت هنا ولان اعزك واشوفك مثل اخوية كلت انطيك خبر ليش حرامات تخرب زواج كامل علمود شي حرام متحصل بي لا دنيا ولا اخرة

-علي: لا لا لا لا منيلي مطاعم ما مطاعم ولا يمهن اني وحتى لو عندي التوبة ولا اروح بعد

-حمزة: اي خوش

-علي: وروح ابوي ماروح بعد شبيك حميزة ما مصدك وهسة احلف كدامكم كلكم وكلمة رجال ما تعتب رجليه هيج اماكن بعد

-الاطلس: مو هستوك كلت انتَ مو يمهن ولا گربهن

-علي: يعني اذا ردت بالمستقبل اروح شبييييك اطلس

-حمزة: نعم نعم

سكتنه من اجن سارة ورقية شافونه متجمعين ضحك حمزة وكال..

-ها خوش كملت السبحة

-سارة: شنو ليش متجمعين هنا

-عمر: صار العشا؟

-رقية: لا بعد ديصبون

-علي: نرجع لموضوعنه، مريم والعباس ابو فاضل ما تعتب رجليه هاي الاماكن سواء جنت اروح لو ماروح صدكيني وهاي كلمتي كدام الكل واذا اكسرهه اني مو زلمة

ابتسمت من رقية كعدت بيني وبين اطلس دحست روحهه دحس..

-رقية: شنو شنو احجولنه

اجه ببالي شي اتذكر مرة سارة كلتلي رقية هواي تتهاون بصلاتهه وشفتهه فرصة ماطولنه كاعدين..

-مريم: رقية چنه نحجي عن الشغلات الحرام النسويهه واحنه ما حاسين

-رقية: مثل شنو؟

-مريم: شنو رأيج نسولف وحدنه اني وياچ وسارة

-عمر: واحنه شنو ولد البطة السودة

-الاطلس: امشي لك شعليك حاط روحك

-علي: اني اريد اسمع معليك

-مريم: ماشي شوفو كل الموجودين اني مو هنا ناصحة او شي بس دائماً فكرو وراكم اخرة وراكم شبر واربعة اصابع قبر بس انتَ بي متفيدك لا فلوس ولا سمعة ولا جاه، راح يجي وقت تعض اصابعك ندم على كل عمل حرام قمت بي بهاي الدنيا واستاهنيت بي

سكت الكل حسيتهم مستمعين لكلامي فـ كملت..

-هواي من عدنه نستهين بالصلاة وهاي ابسط عمل ممكن نقوم بي ابسط عبادة نقدمهه لرب العالمين صديقاتي بالمعهد يكولون نتكاسل او ماعدنه وقت زين انتِ ماعندج ىقت للاكل؟ للشغل؟ للتلفزيون للتلفون لكعدة العائلة للشغل للطلعات للونسة للدراسة...

تعرفون الي يترك الصلاة كأن هدم دينه، دين كامل قائم على الصلاة يا ويله اليروح لربه وهو ميصلي شيكول وشنو يبرر لرب العالمين شنو العذر الي ينطي؟ وسواء بررت او لا انتَ راح تتحاسب على تقصيرك..

الدنيا دار فناء مكان عبور ويا حظه الي استغل هذا الدار عدل حتى يبني دار الاخرة الي هو راح نبقى بي طول العمر بعد ماكو لا موت ورانه ولا اخرة تخوفنه احنه تحاسبنه بعد..

ليش منستغل هاي الدنيا بشي يفيدنه، منحرم نفسنه من المتعة والونسة بس منرتكب شي محرم بنفس الوقت، اكو هواي بدائل للمتعة المحرمة بالدين..

جنت خجلانة واني احجي ومنزلة عيوني رفعت راسي شفتهم كلهم يباوعون لجهة وحمزة ميتسم بيناتهم..

-حمزة: شكراً على هذا الحديث مريم ونشكر تربية اهلج

-مريم: تسلم استاذ

-علي: مريم اني ماروح لهاي الاماكن بطلت كولي لدعاء لا تشيل هم لخاطرهه ابطل واضحي عن ونستي

-مريم: لتبطل لخاطر احد بطل لخاطر ربك حتى يعوضك عن الشي الفقدته بنظرك، "من يتقِ الله يجعل له مخرج و يرزقه من حيث لا يحتسب"

هز راسه موافق وكام فرحان طلع من الصالة وعمر الي ما نطق كلمة هم طلع ولحكهم حمزة والبنات، كمت اروح وراهم واطلس جرني يكعدني بصفه..

-ها اطلس

سحب ايدي وباسهه وجه وگفه استغربت تصرفه ابتسمت واشرتله بعيوني شنو..

-الاطلس: كلامج مؤثر شكراً لان تتركين بصمة حلوة وين ما تكعدين

-مريم: برأيك رقية راح تلتزم بالصلاة؟

-ان شاء الله وره كلامج هذا اني خليتيني اخرط العافية

-ههههه اي خلي تفيدك قوة شخصيتك بعدين

-تره اصلي واصوم متدين اني مريم لا تظلميني

-اطلس هذا مو تدين هذا واجب عليك تقوم بي التدين من تسوي شي اكثر من الواجب المطلوب

-هااا هيج

-اي وانتَ مطاعمك وحدهن يمكن يشمروك بقعر جهنم بسببهن

-ولج سائل سااائل والله

-بس دليني على هذا الشيخ الي انطاك هيج حكم صدك ميفتهم هذا

-وانتِ منين جبتي حكمج عيني

كولبت عيوني واخذت تلفونه اول ماكتبت حكم دخول الاماكن المشبوهه بالكوكل طلعلي الحكم لجميع المذاهب صفن بالتلفون وراهه رفع عيونه لوجهي..

-اممم لطيف

-اي ابو لطيف ثاني مرة اعرف المن تسأل وممنوع ترجع تدخل هاي الاماكن لتغضب الله اطلس والله ازعل من اشوف هيج شغلات تصدر منك

-صار

-توعدني؟

-وعد

فرحت بقناعته وكمنه نتعشى، مشى اليوم حلو بين مداهرات اطلس المتخلص طول الليل وبين تحضيري لجنطتي من اروح لاهلي..

-الاطلس: ممنوع تباتين ترجعين وياي

-مريم: ماااا احنه اتفقنه

-ماكو اتفقنه ترجعين وياي

-حررام عليك الوعد كالحلفان وانتَ وعدتني ابقى عند اهلي كم يوم

-لا غيرت رأيي

-هو بكككككيفك

-چا بكييييفج

-اي لان همه اهلييي

-وانتِ مرررتي

-هااا هسسسة صرت مرتك موو

-كعدي وسكتي ماكو تباتين

كام يطلع تراكاتي من الجنطة رجعت حطيتهن، رجع طلعهن ورجعت حطيتهن..

-مريم لا تعاندددين

-ماا ماااا مااااا ابات اريد اباااات

-ماكو تباتين شعندج بايته حتى تحشين بيه ويه خواتج

-ماحش بيك حرام ماشيل غيبتك

-هسة حرام وبعد يومين تجين تكليلي ابريلي الذمة حجيت عليك فدوة سامحني انتَ مو تحبني

-ماسويهه بعد اريد ابات عند اهلي

-ما تباتين ماكدر على فراگچ

جرني من خصري عليه دفعته ضايجة..

-وخر وخر مو صوچك صوچي اني باقية عندك اروح انام بغرفة نانا

-اي ميخالف بس ماكو بيتوتة

-ابات وعلى عنادك

-وعلي حتى للحفلة ما اخذج تره

-شنو عيني شنو هذا المديل الجديد اووووستاذ اطلس

-هسة انتِ ليش تردين تباتين غير افتهم

-مشتاقة لاهلي

انطيته ظهري مكتفة ايدي وگالبة وجهي..

-اي شوفيهم بالحفلة مو رايحين

-اريد ابقى بعد

-شنو الغاية؟

-اهلي اشتاقلهم شنو انتَ متشتاق لاهلك؟؟ لا طبعاً متشتاق لان عايش وياهم

-زين نروح بس نبات بفندق

-هاي ليش بيت اهلي موجود اروح فنادق حتى امي تزعل مني

-حتى نبقى سوه

-تعال انتَ ابقى ببيت اهلي

-ما ابقى خلص انسي

-يعني لو تحرمني من البيتوتة كلهه لو متقبل تبات ببيت اهلي!

-ما ابقى ببيت اهلج انتِ روحي باتي شكد ما تردين بكيفج

-اطللللس

-نعم

-شبيك انتَ تتزعل عليه

-ما متزعل شوفيني عادي

-اطللسسسسس

-نعم

-اهووو انتَ شبيك

-شبيه حبيبتي شترديني ادك واللطم لو اجرچ من شعرج واكعدج هنا يمي

-تجرني من شعري شنو!

-انتِ شنو تردين مريم من الاخر

-ابات عند اهلي بس ماكدر بالفندق امي متقبل وراح تزعل هي من هسة وتكول احس رجلچ ميحبنه

-اني ماحب ابوج

-لتحجي على ابوية!

-يابة خوش ماحجي عليه مو ماحبه ما استلطفه وانتهى ماريد يحملني منية بايت بييته ما محتاج اروح فندق لو ارجع لبيتي قحط

عافني وراح لفراشه غطه راسه وكل جسمه ونام انقهرت بس ماحجيت كملت جنطتي ورحت اكعد على السرير احط مرطب وامشط شعري..

-مريم: اففف عطوبي موتني

-لا تمشطين هيج شلعتي شعرج

-زهكتتت

-تعالي انطيني المشط

-لا اني امشط

-فروة راسج شلعتيهه تعالي

نزلت اكعد كدامه على الفراش وهو صار يمشطلي..

-اطلس انتَ متمشط جاي تسوي مساج عطوبي ميرهم وياهن هيج

-شنو عطوب؟

انداريت عليه اضحك..

-صدك متعرف شنو عطوب؟

-لا ما سامع بيهه

-ذني عطوب

جريتله الشعر الطاير والصغير بمقدمة راسي ابتسم وتلمسهن..

-الاطلس: خوش لقب هذا ام العطوب

-مو العطوب عطوب

-نفس الشي كعدي عدل ام العطوب

-لتصيحلي ام العطوووب

-كعدي مريم هه تريد تبات ببيت اهلهه

-اي ابات

-فنننچ

-يبووووو رجعنه.....

**

"سارة"
اول ما رجعنه للبيت حمزة ومسلم طلعو بشغل رحت لغرفتي بس بدلت ملابسي ورحت اشوف اسيل شنو دتسوي..

دكيت باب غرفتهه مجاوبت توقعتهه رايحة للمطبخ تسوي عشا لعمي لازم كل يوم الا هي تسويله عشا حتى لو نرجع بالوحدة بالليل هلكانات يبقى ينتظرهه ترجع تسويله اكل..

كملت طريقي للمطبخ واجتني رسالة من حمزة كاتب..

"شوية وراجع محتاجة شي؟"

ابتسمت ووكفت اراسله بباب المطبخ واسمع صوت عمي يحاجي اسيل، مانتبهت لحديثهم الا من علت نبرة صوته وصار ينتر وياهه بالحجي قررت ما افوت اريد اشوف وين راح يوصل بتوبيخه لاسيل واكول كلشي لحمزة هو يتصرف ويه ابوه ويلگالهه حل..

-ابو حمزة: هذا شبي ابنج مصوفر

-اسيل: ما رجع لونه من العملية لسه

-ابو حمزة: ام مهملة عديمة احساااس اكو وحدة تعوف ابنهه بيد الرايح والجاااي بله ميت الطفل وين تنطين وجهج

-اسيل: عمو حصل خير الحمد لله غيث مابي شي

-ابو حمزة: سمعييي تره هذا الوريث انتبهي عليه زين ذاك حمزة غاسل ايدي منه مبين ما يخلف وذاب الصوچ بغدير حتى ما تنمس رجولته

-اسيل: لا عمو كلشي قسمة ونصيب بعدهم ما صار ست اشهر من متزوجين

-ابو حمزة: وتزوج غدير سبع سنين وييينه ابنه؟؟ ابنه هسة لازم يكون بطووله

-اسيل: اتوقع هو وسارة ممقررين يسوون طفل هسة احسللهم خليهم يستقرون يطلعون يتونسون

-دسكتي سكتتتي يطلع ويتونس تره مو جااهل ولا مراهق جبييير حمزة باجر خلي تفوته السنين ويظل يعض اصابعه ندم على الخلفة بس تلگي ساكت اكيد منه الصوچ

جمدت بمكاني نار واشتعلت بصدري من كلامه رحت لغرفتي اللوب كلني ارجف ابوه يشكك بي كدام چنته شنو من بشر هذا..

مرت ربع ساعة واجه حمزة سلم عليه شافني ضايجة سأل شبيچ بس ماكدرت احچيله اكيد راح ينجرح خصوصاً كلنه نعرف حمزة تحاليله نظيفة ومابي أي علة اكثر من مرة كررو التحاليل والدكتور يأكد الخلل من غدير چان، الصوچ كله مني ومن اختي شلون حظ عليك حمزاوي..

-حمزة: هاي شبيچ كناري ليش ضايجة

-اني.. اني رايحة اجيب غيوثي نلعب وياه

تركته ورحت لاسيل شفت عمي بالمطبخ دياكل ما سلمت عليه اخذت غيث ورحت..

-اسيل: ها سارونة

-سارة: حمزة يريد يشوف غيوثي

-ابو حمزة: هه اي بس هذا الفالح بي

ما انطيته اهمية اجت اسيل انطتني الممية وهمستلي..

-لتضوجين سارة عمي جبير وصاير نقانقي

-سارة: نقناقي قصدج اي اعرف

تمشت ويايه بره المطبخ صاحلهه عمي تشيل مواعينه حجت من مكانهه..

-اسيل: جاية عمو، سارة زين من اخذتي غيث اليوم خطية مسلم صارله كم يوم يلح عليه على سهرة

-سارة: اخذو راحتكم راح اعوفه يمنه وانيمه عندي هم

-لا يمعودة شوية ورجعي يضوجچ تره

بوسته واخذته شايلته من بطنه اضحك وياه واللعب بيده ودخلت غرفتي، حمزة بس شافه طار فرح اخذه من ايدي يلعبه ويناغيله..

-حمزة: حبيبي.. وليدي بابا حبيب الروح.. وينه ابوك وينه مال هيج خلفة ابوك

-سارة: ههههه هاي ليش

-خيولي متعافي يجي يگلي تعبنه غيث الليل كله ما ننام من صريخه

-سارة: اوووي ليش هو اكو احلى من صوت الطفل بالبيت

-والله صح سوه حياة ببيتنه جان ميت

ويه كل كلمة يحجيهه يبوسه لو يشمه، منظرهم حلو يستحق حمزة يكون اب راح يكون اب مثالي..

بعد فترة من اللعب ويه غيث كام للحمام يسبح واني بقيت ويه الطفل اشربه ممه واحاول انيمه، طلع من الحمام بدل ورجع دخل تارك الباب مفتوح..

كمت اوكف بباب الحمام شفته يفرش اسنانه، ماعرف شلون افتح وياه الموضوع شنو اگله ابوك يشكك بيك ويشوفك مو رجال؟

-حمزاوي

-اممم

-حمزة الجهال حلوين كلش مو

-اي

رفع راسه عليه مبتسم ويأشرلي طلعي ماهتميت وبقيت واكفة وشايلة غيث..

-اني اموت على الجهال شنو رأيك.. شنو رأيك نتبنى طفل؟

رفع راسه يباوعلي بنظرات ملولة استحيت ونزلت راسي..

-حمزة: اذا تحبين الجهال هلكد خلفي

ضحك من حچاهه وطلع من الحمام ينشف حلگه، راح للفراش يتمدد واشرلي اروحله..

-سارة: لا مادبرهه

-نحاول ندبرهه سوه

سحب ايدي باسهم وباقي على ابتسامته توترت وجهي اشتعل اعرفه جاي يداهرني ويتشاقى ميعنيهه بس استحيت..

-حمزة: جاي يبجي هذا العنون شلون تسكتي

-تاخذه لاهله؟

-لا عيب اروح اني انتِ روحي

-ماشي بس مو تنام خلينه نسهر على فلم اليوم

-زين بس مو تتأخرين باجر ورايه اجتماع الصبح

اخذت الطفل لغرفة اسيل وكفت ببابهم مستحية اباوع من فتحة الباب الجوه الغرفة ظلمة يمكن نايمين او ديقضون وقت سوه، بقيت واكفة واهز بـ غيث ساكت بالخمس دقايق اخيراً تنازلت وطرقت الباب..

بسرعة فتحتلي اسيل وكعت عيوني على ملابسهه مغرية وهي طالعة تجنن متمكيجة وفاتحة شعرهه وريحة عطرهه يفحفح، ابتسمت من لاحظت الغرفة مظلمتهه وضوه الشموع الخفيف منطي جو حلو بالغرفة..

-اسيل: تعبكم مو حبيبي وليدي تعبت عمو وخالة

-سارة: لا ما تعبنه بس كام يبجي

انطيتهه ابنهه ورجعت لغرفتنه بدون كلام رحت للكنتور طلعت ملابس واخذت منشفة وجنطة مكياجي ودخلت للحمام، سبحت وبدلت بسرعة ووكفت اتمكيج واهمس لروحي..

-سارة: يله سارة صيري سباعية..

امدح بروحي وارتب شعري ومكياجي، لبست دشداشة نوم مثل اسيل ما مقتنعة بشكلي بس ميخالف شيصير خلي يصير، رشيت عطر كومة سبحت سبوح وطلعت من الحمام..

اول ما طلعت من الحمام طلع ويايه البخار، حاضنه المنشفة لصدري ومنزلة عيوني رفعتهن شفت حمزة ملتهي بتلفونه..

-سارة: شنو تسوي؟

-حمزة: اراقب الاسهم، يله نتابع فلـ....

رفع عيونه وانگطمت الحچاية بحلگه، عكس عينه فوراً وعدل نومته على الفراش جر الريموت وصار يلهي روحه بالنمنمات الحاطتهن على الميز الي بجانب راسه..

-حمزة: احم.. تردين نتابع شنو هندي؟

-انتَ متحب الهندي

-عادي عادي اي شي بس بسرعة

رحت اكعد بصفه وطلعت فلم هندي، جريت چبس من الميز فتحته وانطيته..

-لا مفرش

-عادي اني افرش مرة وثنين وثلاثة قبل لا انام هاك اكل

اخذه مني وكل حركاته ميباوعلي كأن ما موجودة بصفه، كعدنه نتابع وهو كل شوية كايم يا يفتح الشباك يا يروح يدخن يا يكول اجته رسالة وهو جذب ما جايته رسالة انقهرت من الوضع شلون يريدنه نتقدم اذا هو ما جاي يبذل جهد..

رجع كعد اخيراً وصار يتابع ويايه حقيقي، احس بي كل شوية يباوعلي لو يباوع على رجليه لو على شعري واني مغلسة..

-سارة

-ها

درت وجهي عليه ضاعت الكلمات منه صار يمسح بوجهه وبس يضحك ويحرك براسه لا..

-حمزة: ولج ليش هيج ليش

-شنو ليش شسويت

-والعباس حرام عليج

-حرام؟

-طالعة.. طالعة...

حك طرف حاجبه ورجع يضحك كام من الفراش وهو ديكوم بالغلط عصر ايدي الحاطتهه بيناتنه..

-سارة: آآآييي

-هااا شبيچ شنو توجعتي؟؟ دست ايدج؟؟

-اي مردتهه آآيي توجع

-اسف ما انتبهت ما شفتهه شو انطيني

انطيته ايدي وصار يفركهه بين ايده ويبوسهه، مسحت عيوني دمعت شوية وخفت تسيل الكحلة..

-سارة

-ها كول

-بعد لا تلبسين هيج كدامي

-هذا لبسي من قبل ببيت اهلي

-اي.. اي بس هنا غير عن بيت اهلج

-عادي اصلاً كل البنات هيج يلبسون

-اي بس لا تلبسين حبابة اترجاچ

-لهدرجة مو حلو!

-حلو حلو بالعكس حيل حلو وگلبي.. گلبي ما يتحمل كل هذا الجمال

-باوع هذا الممثل اموت على.....

ما خلاني اكمل كلامي وجر وجهي عليه يقبلني، روحي ماعرف شنو صار بيهه او بشنو حسيت بهاي الثواني او الدقايق، تعجز الحروف عن تكوين جملة مفيدة تشرح عن مشاعري وعن اللحظة الحلوة المرعبة العشتهه..

تحولت القبلة لشي ثاني تحولت لشي اكبر واعظم، تحولت لشعور مخيف لكن مخملي لطيف.. توقعت راح يكون كابووس بس ما جان هيج ابداً باللحظات الاولى حمزة عرف شلون يسحب خوفي بحركاته الرزنة وكلماته الناعمة الي طربت اذاني..

-احبج.. متمني هاي اللحظة من سنيييين...

جر الكلمة الاخير بتعب واني هادئة ما خلاني اغمض عيوني ولا ثانية يمكن توقعني راح اتخيل الصار وياي قبل والعشته وفعلاً هذا الي صار انرعبت وخفت وحتى بجيت ابتعد مني يهدأني ويهمسلي بكلمات مطمئنة..

-سارة حبيبتي اني وياچ لا تبجين ماكو شي ما صار شي

-اخاف

مسح الدموع من عيوني وباسهن وخر شعري عن وجهي وهمس بلطف..

-ما اذيج حبيبتي.. احبج اني ما اسوي شي يضوجچ اسف

-حمزة

-عيوني وروحي وراحتي

سكتت منزلة راسي ابتسم وافتهم عليه ورجع يكمل البدينه بي، رغم الصارلي قبل وشعور الاغتصاب التعيس والاذية العشتهه لكن خلاني حمزة هاي الليلة اعيش شعور جملة.. "كنت اعيب الحب ومن عاب ابتلى"......

يتبع ♠️💸....

• ━━━━━━❪♣❫━━━━━━ •

التصووويت حبيباتي 🙈🌱

احم الله بالخير 🌚