رواية الاطلس "دمليج أسود" الفصل الثاني عشر 12 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

زين أحاچيمن عليك؟
وأنتَ أقرب شي اعرفه ♥️!

• ━━━━━━❪♣❫━━━━━━ •

وكفت بمكاني ماعرف شسوي وين اروح وين انطي وجهي، ماكدر اطلع من المطبخ اكيد نلتقي بالطلعة صوته جاي من الصالة.. بقيت بمكاني اللطم بصمت الى ان صار صوته يقترب من المطبخ..

-نانا وينج گلبي

غمضت عيوني واني على وگفتي هذا هو انفضحتي يمريم راحت عليج عرفج الاطلس..

بلعت ريگ متوترة وادعي من كل گلبي مينتبهلي او تنعمي بصيرته وميشوفني، حسيت بخطواته تقترب اكثر الى ان دخل المطبخ..

-هاا.. اسف اخذي راحتج

يبست بمكاني ماكدرت انطق كلمة ولا كدرت اللتفت واواجهه، بقيت على وضعي منطيته ظهري ومواجهه الطباخ، مغطية راسي بالمنشفة ما شافني؟ ما انتبه؟ ما حاول يتعرف عليه؟ على الاقل يجي يروي فضوله ويشوف شكل مرته!

بس كل هالشغلات ما سواهه طلع من المطبخ بهدوء وكمل رحلته بالبحث عن نانا.. زارني احباط مؤلم گلبي انسحن وخنگتني العبرة ما اجه ببالي غير كلمة ليش؟

ليش هالجفاء وليش هذا العناد شكد چنت متمنية ميشوفني ومينتبهلي بس ليش دا اتأذه هسة ومتوجعة.. ضاق عندي النفس واخذت موبايلي وطلعت من المطبخ..

وكفت من لاحظته دخل لغرفة نانا، ركضت لغرفتي قبل لا يلمحني وذبيت روحي بالفراش وابحرت بأفكاري وتخيلاتي..

غمضت عيوني واهلكتني افكاري الى ان غفيت، كعدت الصبح شفت روحي متغطاية ونايمة عدل استغربت كمت بسرعة اشوف نانا واستغربت اكثر من شفتهه كاعدة بالصالة وتبجي..

-نانا شبيچ

من سمعت صوتي مسحت دموعهه وعدلت كعدتهه، ابتسمت تمثل البهجة وكالت بلطف..

-نانا: صباح اخير والنوير حبيبتي مرايم

-صباح النور نانا، شبيچ ليش چنتي تبجين؟

-نانا: عيارة زايدة

-عيارة شنو حشاچ نانات

كعدت بصفهه وگلتلي سبب بكائهه لان اطلس ميزورهه هواي وزعلانة عليه والبارحة من اجاهه عاتبته..

صفنت افكر هو هواي يجي يزورهه وهوايه يلتقون ممعقولة هذا السبب، تغابيت ومشيت السالفة وياهه وسألت..

-مريم: نانا منو غطاني؟

-اني

-هاا والله اخترعت عبالي الاطلس من اجه البارحة دخل عليه الغرفة

-لا انتِ مو ما تقبلين، هو البارحة سألني عنج وجاب هذا

كامت لنهاية الصالة على خانة الكتب وجرت ظرف، حطته بيدي وكالت..

-نانا: هاي فلوس خاف محتاجة يكول منتبه ما ماخذه شي من حساب المصرف الي سجله بأسمج

-اني كلتلكم ماريد شي منه ليش يعاند

-حتى لو يا امي هو يبقى زوجچ وهذا واجبه يصرف عليج

-ما محتاجة والله

-ميهم ضميهن حقج هذا وغصباً عليه ينطيج مصروف

هزيت راسي وكمت ابدل، حطيت الظرف على الميز مالتي ونويت ما اللعب بالفلوس اضمهن للحاجة..

تريكت بسرعة وطلعت من البيت ودعوات نانا تمطرني ابتسمت تذكرت امي واجه ببالي اتصل على ابوية، دكيت عليه كم مرة ما جاوب تركت رسالة اذكره يتصل بيه وذبيت موبايلي..

وصلت للشركة ومارست روتيني بيهه شغل بشغل واكيد ميخلو الشغل بدون نوحي اني ولهيب وكل شويه لاطمات بصمت من وره الخربطة..

-لهيب: تره مو حالة هاي مريم معقولة احنه بهذا الغباء

-مريم: والله يدوخ لعبت نفسي يوووه

-ريتاج: اشتغلن وسكتن شكد تنوحن

-لهيب: مريم روحي للمسيو خلي يعفينه من ذني الملفات والله هوسة كلش 

-ريتاج: اي اي مريم روحي كوليله حبابه اصلاً هذني مو شغلنه احنه شعلينه

-مريم: اني شعليه شكو حاطاتني حايط نصيص

-لهيب: مو هو يحووووبچ ويسمووعلچ

-مريم: لغسل عدلي حلگچ لا تتماوعين

-ريتاج: حبابة مريم هو حباب وياچ ولطيف

-مريم: منيله مسويني ميز تنمر ماا ماروح لو اموت

-لهيب: عاد احسن وياچ اني ماتحمل جماله حارق

-مريم: غير تكعد راحة وتبطل كلاوات

-ريتاج: هسة لو منار هنا چان هي راحت تگوله اساساً هو اكثر وحدة يرتاحلهه ويحبهه منار

-لهيب: مريم تروح ريتاج المرة الفاتت راحت

-مريم: خو انتِ روحي شمعنه اني

-لهيب: اني بعدني جديدة ماتحمل الرزالة گلبي يكوم يوجعني

عاندت ماقبلت اروح خاف يفشلني بس لهيب وريتاج دگو رجل الا اروح، گمت من الكرسي رجليه ترعش مفتشلة من طلبي خاف يخزيني ويرزلني بنزاكة ويطردني بره المكتب..

اخذت الملفات بيدي ورحت ازحف زحوف للمكتب مالته، قريت فاتحة لأم البنين تسهيل امر دخيلج يا ام البنين لا تفشليني ماريد اترزل ماتحمل لساني ماكدر اللزمه اخاف ارادد وازيد الطين بله..

شفت السكرتيرة البديلة مال منار كاعدة تشتغل ردت انطيهه الملفات واكوللهه تروح بدالي بس ماقبلت كالت هي متدخل بهاي الشغلات عذرتهه ودخلت اني عليه..

طرقت الباب ووكفت انتظره يجاوب، بقيت هواي واكفة بالباب مالته ورديت طرقتهه مرة ثانية ما جاوب باوعت للسكرتيرة كالت هو موجود بالمكتب ما طلع..

ردت اعود ادراجي بس كلت هاي اخر مرة اطرق الباب، دكيتهه وسمعت صوته يسمحلي بالدخول..

فتحت الباب عليه وانتبهت ردانه مشلهه ووجهه مبلل كأن چان يتوضا، نظرلي منتظرني احجي وهو ينزل رداناته، كلت بسرعة..

-مريم: مساء الخير استاذ

-الاطلس: مساء النور آنستي

-استاذ اءء.. اسفة.. اءء يمكن مشغول انتَ

-صحيح

عقچت وجهي ياااابة شكد صريح هالرجال، انتبه لوجهي المگلوب ابتسم وراح على المكتب مالته كعد على الكرسي وكال..

-الاطلس: تفضلي مريم

-احم اولاً استاذ تقبل الله صلاتك مقدماً

-اشكرچ، ثانياً؟

-استاذ عليك ام البنين لا تعصب ماشي؟

-حسب، شنو الموضوع يا آنسة؟

-استاذ هاي الفايلات حسابات ضخمة مجاي نكدر نسويهن تعبنه والله واحنه كل شويه غلطانات بيهه هنه بالاساس مو شغلنه يعني احنه معلينه بيهن والله بس استاذ مسلم دارج بالجدول لازم احنه نشتغلهن والله تعبنه استاذ انهلكنه هاي صار اسبوع نشتغل بيهن وميخلصن والله تعب

-المطلوب؟

-المطلوب تحولهن على غير قسم لأستاذ حازم وجماعته همه اكثر خبرة من عدنه ويفتهمون بالحسابات الضخمة والله تعبت حتى رقبتي كامت توجعني وگلبي هيج هيج يرعد اخاف يصير غلط

-گلبچ شيسوي؟

-هيج يرعد يرعد

-اممم

-هسة شنو استاذ شنسوي

-تكملون شغل

-ونبقى بهذا الوضع؟

-تعالي اشوفهم

تقدمت وحطيتهن كدامه، فتح الملفات وصار يدقق بيهن ويمشي عليهن القلم البيده، مركز كلش عيونه راح تطلع وتطبع بالملف..

-الاطلس: ذني بسيطات مريم ليش هيج تعبتو

-استاذ شوف هنا كلما جاي نقسم عليهن ميطلع الناتج صح وبكل مرة يطلع شكل بالحاسبة جربنه وبالماتلاب هم جربنه وكل مرة شكل

فتح حاسبته ودخل البيانات ماكو كعد دقيقتين وحل اول صفحة من الملف بالكامل وطلعت الحسابات صحيحة ومضبوطة.. ما راح اجذب صح اني اكرهه واموت منه بس ماكدر انكر انبهرت بسرعة العمل واتقانه..

نظرلي رافع تك حاجب بغرور ضميت ضحكتي مستحية ومفتشلة..

-الاطلس: ها مريم

-مريم: استاذ لعد تجيبنه الك

-الاطلس: عيني ابذلو جهد اكبر بالممارسة كلشي يصير سهل

-مريم: يعني نسويهن؟

-نعم

-استاذ مابيهه مجال

-عزيزتي أي مشكلة تعانون منهه تعالو سألوني ما اقصر وياكم

-زين علمنه شنو نوع البرنامج التستخدمه؟

-نفسه برنامجكم

-لعد شمعنه احنه مو هيج هذا لونه بنفسجي

-تعالي..

تقدمت اكثر وعلمني على الخطوات، قرب الكرسي مالته عليه انحرجت وتوترت ابتعدت بسرعة حس عليه وزاح الكرسي عني واشرلي اني اقترب..

وجهي اشتعل من الخجل كلش قريبين على بعض وكل ثانية هو يرفع راسه يباوعلي ويحجي ابد ماحطيت عينه بعيني حتى من يوجهلي السؤال..

-الاطلس: افتهمتي؟

-امم

-مريم

لاول مرة رفعت عيني عليه صرنه عين بعين ابتسم وبلع ريگ بنفس الوقت گلبي صار يدگ حيل عيوني لزكت ماكدرت اشيلهه، ميل راسه عليه وكال..

-ها عيني

-هاا.. هاا استاذ هاا

ضحك خفيف ورجع عيونه على الحاسبة اشتغل بعد وكمل شرح عقلي انمسح كمت ماكدر اجمع، ابتعدت عنه شوية وكلت..

-استاذ اوكف

-ها؟

-اروح اجيب دفتري واجي

تركته ورحت اهرول بره بشرت البنات ان راح يساعدنه وينطينه خطوات مختصرة ماتن فرح، رجعتله بسرعة وصرت اكتب كلشي يكوله..

-الاطلس: تمام هسة؟

-اييي شكراً ربي يفرحك مثل ما فرحتنه

-تدللون

اخذت الملفات وردت اطلع من الغرفة ورجعت من صاحني..

-الاطلس: اخذيهن لـ حازم هو يشتغلهن ويه جماعته

فتحت حلگي من الصدمة والفرحة لوما العيب اطفر بمكاني..

-مريم: صدكككك

-اي مريم

-عليك الله؟؟؟

-اي

من السعادة لو بيدي اروح ابوسه، مانتبهت تعابير الفرحة الي بوجهي واضحة لهدرجة الا من شفته يضحك..

-الاطلس: لهدرجة متعبتج الملفات مريم

-استاذ شتحجي هلكنه كلش تعبنه

-الله يساعدكم

-استاذ لعد ليش علمتني اذا مقرر نودي لاستاذ حازم من البداية

-حتى ما يصعب عليج شي وتتعلمين

ابتسمت ممتنة منه وردت ارجع اطلع وهم صاحني..

-مريم انتِ من وين؟

تبسمرت بمكاني صار عندي شلل نصفي من الخرعة، اللتفتت عليه وحچيت كوة بحس يرجف..

-مريم: شنـ.. شنو تقصد استاذ

-الاطلس: اصلچ شنو؟

-عراقية

حچيتهه وذبيت نفس مرتاحة خفت عبالي يقصد اني منين من المغرب..

-الاطلس: من يا محافظة؟

-النجف

-امممم

-اذا مستغرب من لهجتي احنه مو من جماعة الـ چا من صفحة الـ لعد

-امممم، لطيف

-يعني عادي ابوية يكول چا بس امي كله تكول لعد واحنه تعودنه على هالشي، امي بغدادية

-لطيف

ذبلت ملامحي من اسلوبه شبي هذا عبالك مستهزأ بينه مبتسم بسخرية شلون الخافي ضحكته، ماتحملت اسكت وكلت بصيغة منفعلة حماسية..

-مريم: استاذ تره اهل النجف وردة مال الله والله مو عبالك بس الگبور يمنه والله فد ناس طيبين وحبابين

-امممم

-والله اي، اكو ناس يكولون عنه دفانة بس احنه مو هيج بالعكس احنه عدنه الامام علي سلام الله عليه وعدنه مولات والكوفة وشط الكوفة وكلشي

-جيد، لطيف

-اني صح ما رايحة للعراق بس ابوية يسولفلنه ويحجي على اهل النجف وشلون حبابين واني كلني فخر لأني نجفية وابوية ميقبل نحجي بغير لهجتنه العراقية

هز براسه بدون لا يحجي، ضجت وتنرفزت منه طلعت بدون لا احجي شي ورحت اكعد على كرسي المكتب..

-ريتاج: هااا ولج تعالي سولفيلنه شصار

-مريم: كال اخذوهن لاستاذ حازم

طااارن من الفرح ولهيب كامت تركص بمكانهه وتكول..

-لهيب: مو كلتلكممم المسيوو ميرفض لمرايم طلببب

-ريتاج: صح بس مريم انتِ ليش زعلانة؟

-مريم: لان استهزأ بيه

-ريتاج: شلوون

-مريم: سألني انتِ من وين گتله اني نجفية بقى صافن بخلقتي وخلصهه اممم ولطيف ما لطيف ويضحك مستهزأ!!

-ريتاج: هههههه وليش ضايجة

-مريم: يستهزأ بيه ريتاااج

-لهيب: وليش يستهزأ يعني مافهمت

-مريم: مادري ظل يكول لطيف وهيج صافن بوجهي عبالك مادري منين گتله جايه

-ريتاج: ههههههههه خرب مرايم تره مسيو اطلس اصله من النجف

-صدك والله

-ريتاج: اي والله

-مريم: شمدريني اني توقعته يستهزأ

-ريتاج: لا ماتوقع بس يمكن حس بالانتماء

هزيت راسي ساكته ماتوقعته من النجف، اني المشكلة مافتهم باللهجات هواي بس الاعرفه الجنوب يكولون "چا" والوسط يكولون "لعد" الفرق الوحيد الاعرفه واميزه غير هالشي ماعرف..

صار وقت استراحة وقررنه ننزل للكافتيريا حتى اشوف تينا وضحى، اللتقينه وبدت السوالف والضحك تينا مطنكرة لان جايهه خاطب واهلهه يكولون خوش رجال وهي قافلة متقبل تتزوج..

حاولت ضحى تفنعهه ونصحتهه نصائح حلوة، حسيتهه نوعاً ما بدت تقتنع تلتقي بالرجال، كملنه اكلنه وگمنه نرجع كلمن لمكتبهه واجتنه موظفة..

-بنات لقاعة المناقشات موسيو حمزة بدو يانه نروح هونيك

توجهنه للقاعة شفنه اغلب الموظفين حاضرين هناك، الكراسي متكفي ناس كاعدة وناس واكفة..

-تينا: شنو الموضوع احد يعرف؟

سألت موظف وجاوبهه ان ميعرف شي، وگفنه ننتظر يجي استاذ حمزة الموظفين يتبسبسون ويه بعض ناس متحمسة وناس قلقانة بس كلشي مافهمت الى ان اجه استاذ عمر وياه استاذ مسلم..

فرحت بشوفتهم وحيونه بطريقتهم الحيوية الحلوة واكيد السلام ميخلو من ملاطفات عمر للموظفين والموظفات..

اجه وراهم استاذ علي ووگع دك محاضن وبوس ويه عمر متنه ضحك يتحاضنون وعلي يكول..

-علي: ولك ضلع ضلعي ميت من الشوگ اشتعل ابوك

-عمر: بعد روحي الاخو گلبي مفرفح عليك

-علي: والعباس ابو فاضل مانطيك بعد عمت عيني عليك خوية البيت ظلمة بدونك

ويرجع عمر يحضنه والضحك والسوالف مالتهم ملت المكان شكد ما صوتهم عالي واصللنه لآخر القاعة، تينا دمعت عيونهه وهي تشوفهم وضحى سولفت عن علاقتهم الاخوية القوية اكيد ممحتاجة احد يشرحلي دا اشوف هالشي بعيني..

اخيراً شرفو "الرئيس التنفيذي" مسيو اطلس وذراعه اليمين ونسيبه وصديقه الي ميتخلى عنه مسيو حمزة..

توسطو القاعة وبعد السلام حمزة بده يسولف ويتشكرنه على شغلنه ومجهودنه الواضح وحچى بنجاح الشركة لهذي السنة، كمل بمحاضرة حلوة وكلام مليان امتنان وشكر حبيت هذا الشي وحسيت بحجم الفخر الي بصوته بسببنه، طول الوقت مبتسمة وانظرله نظرات مليانة اعجاب بريء لشخصيته القوية ونبرة صوته الواثقة..

-حمزة: واكيد.. بعد كل عمل شاق شنو اكو؟....

ضحك الكل وضحكت على الواهس مادري شكو بس الاجواء حلوة، ضحك حمزة وكال..

-حمزة: سفرة رأس السنة!!

بده التصفيق والحماس وصوت الصفير والفرحة اعتلت وجوه الكل، فرحت على فرحهم وتينا وضحى گامن يگمزن من السعادة والحماس، ضحك عمر وصاح..

-عمر: ها شبااب هااا انتظرو هاي شكو بعدنه ماعرفنه وين رايحين

-علي: بله سطرنه الحمزة وحمزة كال ماخذيكم للگبور شلون بينه بعدين

الكل زاد بالضحك وناس تكول خلونه نروح للبحر وناس تكول نروح للغابات وناس يعددون مدن بالمغرب وصارت هوسة بس هوسة لطيفة ومليانة تفاؤل وايجابية..

عيني صارت على الاطلس كاعد بمكانه ومبتسم ويوزع بنظراته على الكل، رغم ابتسامته بس ملامحه الحزينة متتغير يوم بعد يوم دا اللاحظ الحزن الواضح بشكله واكيد هذا الحزن جاي من سبب.. قاطع نظراتي اله صوت حمزة وهو يضرب على الميز الي امامه..

-حمزة: شباب شباب احنه متعودين نمشي وره القرعة اذا طلعت للگبور چا شنسوي بعد كلمن ياخذ الچفن مالته ونروح

-جوزيف: ههههههههه مسيور ليه هيك يَـ عمي ليه

ضحك بصوت وكال وهو يهز راسه ويأشر بيده..

-حمزة: هاا نبدي بالقرعة؟

الكل صاح "اي" الصوت رج المكان رج صرت اضحك من لا وعي على الاجواء والحماس الموجود..

-عمر: منو يسحب؟؟ نريد ايد مباركة بشرفكم

-علي: تعال تعال اني اسحب تعال

-مسلم: بداعة امك اكعد انتَ، حمزة اخيك تره هذا مو بس ياخذنه للگبور هذا ياخذنه لجهنم گبل

-ريتاج: مسيو الاطلس خلي يسحب

-الاطلس: لا ما اسحب اني لو بيدي تكون سفرتنه لبيوتنه وكلمن يلف راسه وينام

ضحكو واعتلت الاصوات منو يسحب الى ان الكل قرر تينا تسحب كالو عنهه خير وايدهه مرزوقة، راحت على الاناء الزجاجي المليان ورق وصاحت بحماس..

-تينا: راح اسحبببب

-علي: سحبي يمعودة خنشوف وين راح نولي

فركت ايدهه ومدت ايدهه بالطاسه بعدما حركت الاوراق، سحبت ورقة وانطتهه لأستاذ حمزة حتى يفتحهه ويكوللنه وين..

الكل واكف على اعصابه ومتوتر وتينا بقت بصفه واكفة تنتظر النتيجة، فتح حمزة الورقة وقره البيهه وكال بحسرة..

-حمزة: لا لا مو خوش سالفة هاي

-علي: هاا بوية وينن للگبور طلعت؟؟ مو گلتلكمم لو اني ساحب عمت عيني عليك خوية

-عمر: هاا حمزاوي بشرر مو راح تموع روح البنات

-حمزة: وانتَ هيج تتراجف على البنات

-جميلة: هههه يله مسيو حمزة گول وين

-حمزة: ما راح تعجبكم شنو رأيكم نعيد القرعة؟

-الاطلس: لا لا ما يصير بشر وين طلعت للبيوت؟

-حمزة: مو ما راح تحبوهه شبيكم

-حازم: ميخالف شنسوي هاي قسمتنه

ذب حسرة قوية حمزة ويهز راسه بحسرة، بلعنه العافية من الخوف والتوتر واكو گامو يصيحون ماكو سفرة لان من ضمن القرعة اكو ورقة مكتوب بيهه "ماكو سفرة"..

-مسلم: هااا خوتي هااااا

صاح واحد من الموظفين يجاوبه..

-هاااا بووووية ما تسولف موسيو حمزة مو راح نسويهه على رواحتنه

ضحك حمزة وصاح بصوت عالي مليان حماس اول مرة اشوفه بهالوضع..

-حمزة: شباب رايحيننن لـ ماراكش!!!

هو كال هاي الجملة لو القاعة انكلبت ديسكو، رقص وتصفيق حار وصفير وعياط البنات وحماسهن ويطفرن بمكانهن، اباوع لـ تينا عيونهه تطلع قلوب وضحى تصفك بيدهه حيل وتصيح فرحانة..

-الاطلس: لااأ حرامات مو خوش سالفة هاي

-مسلم: الاخ هنا يريد يبقى نايم ببيته

-عمر: بوووياااااي ماراكش مرة وحدددة

-علي: اروح فدووة لايدناتج تينا شنو هالخبر اليرعط رعطط

-حمزة: شباااب شبااااب هدوووء شباااااب رجاءً

سكت الكل بس الفرحة لحد الان بالوجوه، رجعت تينا بصفنه وحمزة دك على الميز مرة ثانية وكال بتحذير وصوت ميخلو من الملاطفة واضح ديتحارش..

-حمزة: بشرفكم احترمو نفسكم هناك ههههههه

حچاهه والكل فرط ضحك مافهمت على شنو يضحكون لحدما رجع كال..

-حمزة: شبااااب بشرف خواتكم سيطرو على رواحكم

-علي: بداعة الهوهو لا تخزونا بين العربان هناااك

بعد الضحك والونسة وعمر كل شوية يتهامس ويه اطلس وهذاك يفرط ضحك وكوة يسيطر على نفسه ويضم فمه بيده حتى ميطلع صوته، ومسلم واضح دا يداهرهم لان حمزة شبعهم مخازر والضحكة گوة لازمهه..

تفرقنه وطلعنه بره القاعة تسائلت شوكت السفرة گالو بعد ثلاث ايام، من كل گلبي تمنيت اروح بس اكيد نانا ما راح تخليني وماكدر اكوللهه اخاف تعرف اني اشتغل هنا..

-مريم: بنات عود ليش استاذ حمزة كال للشباب هيج؟

ضحكت تينا بصوت عالي غصت وضحى طبطبت على ظهرهه وكالت بخجل..

-ضحى: ذيج السنة خزونه

-تينا: لعبو لعب حمزة كام يلطم بالهندي

-ضحى: راح أشرلج على ثنين بس لا تبينين مريم

هزيت راسي موافقة واشرت بعيونهه على الي كاعدين بصالة الانتظار چانو رجال ومرة من الموظفين باوعتلهه مستغربة وبدت تسولفلي الفضايح..

-ضحى: كامت تعيط عليه وطردته من الغرفة بنصاص الليالي وشمرت جنطته بره شلون بالافلام وتصيح ماريدك لو تصير وصي

-مريم: عزززه صدك عود بنااات

-تينا: تخزينه خززي بوكتهه ولج علني هيج بدون مستحى

-ضحى: وهسة رجعو حبايب

-مريم: وعلاقتهم هيج عادي معترفين بيهه كدام الكل بدون خجل

-تينا: شوف هاي اكلج كلشي سفردحي عدهم هسة يجون ويانه بالسفرة وتشوفين بعينج

-ضحى: اجالهم فصل من مسيو حمزة بس رجعو لان اهلهم يشتغلون بالشركة سنين وبالواسطات والشافعات قبل مسيو محمد يرجعهم بشرط يحترمون نفسهم

ضربت على خدي خفيف من الصدمة لعبت نفسي الموضوع كلش يفشل وواضح حمزة چان يبسمرهم ويبسمر الكل حتى يتأدب ويكعد راحة..

كملت شغلي وقبل لا نطلع للبيت رحنه اني وريتاج لمكتب اطلس نستفسر على كم شغلة، شرحلنه وكملنه بسرعة طلعنه من المكتب مالته متوجهات لغرفتنه وصار بوجهنه رجال..

-مرحبا يا آنسات

-ريتاج: اهلاً وسهلاً تفضل

-الرئيس موجود؟

-ريتاج: اي نعم

هز راسه وابتسم بوجهي ووجهها وراح لمكتب الاطلس، باوعت لـ ريتاج ضايجة..

-مريم: شعنده هذا هنا؟

-ريتاج: ماعرف حالي حالج

-مريم: همه مو شركة منافسة شكو جاينه؟

-ريتاج: قبل "مالك" چان يجي هنا من يكون مسيو محمد موجود بس ابد ميلتقي بالاطلس لان ميتوالمون

-مريم: بس هسة استاذ محمد مموجود خاف تصير مشكلة؟

-ريتاج: مادري والله امشي خلينه نرجع للبيت معلينه احنه

رحت وياهه ورتبت شغلاتي بس بالي كله بالغرفة صوت سنطه توقعت اسمع عياط او عركة بس ماكو خنسة..

-لهيب: بنات شنو رأيكم نشتري قهوة قبل لا نرجع

-ريتاج: لا عفية اني السايق بالباب ماكدر

-مريم: حتى اني امي متقبل اتأخر

حركت كتافهه ممهتمة وطلعت قبلنه، اخذت جنطتي وطلعت ويه ريتاج نتمشى على كيفنه بقيت اتلفت ورايه وريتاج تضحك عليه..

-ريتاج: مريم ماتوقع يتعاركون بالشركة

-مريم: اي صح

اخذنه المصعد وقبل لا ينسد انفتح مرة ثانية چان مالك! دخل ويانه بعدما سلم علينه للمرة الثانية ووزع ابتسامات بيناتنه نزلنه سوه الجو هادئ محد حچى..

طلعنه من المصعد نهرول بره واستوقفنه صوت مالك يكول بضحكة رزنه..

-هههه ما راح اكلكم بنات

جرتني ريتاج ممهتمة وطلعتنه بره الشركة لحدما وصلنه مگطوع نفسي اتذكر كلام تينا وضحى من گالن عنهم مافيات وساديه يخوفون..

-مالك: آنسة مريم سعيد بلقائچ للمرة الثانية

صوته اجه من جانبي الايمن، يبست بمكاني وحاولت امثل اني بخير..

-مريم: اهلاً بيك

-مالك: لقائنه الفات كان سوء تفاهم اكيد اني ماردت اخطفچ

اللتفتنه عليه اني وريتاج بحركة سريعة، ابتسامة ماكرة مرسومة على ثغره وعيونه مثبته عليه..

-مريم: اكيد متخطفني بيا زمن عايشين احنه

-مالك: سعيد بتفكيرچ

حچاهه وراح لسيارته، ما علقنه كلمن اخذت طريقهه وكملنه للبيت، شكد ما توترت ماكدرت اللتفت ماعرف شصار بيه شعور غريب..

وصلت للبيت فتحت الباب وشفت نانا واكفة بالحديقة الامامية، ابتسمت وكلت مداهرتهه..

-ها ناني شو واكفة هنا تنتظريني اليوم

-مريم

لاحظت ملامحهه الجامدة قلقت مو من عوايدهه تتلگلني بهالبرود..

-نانا صاير شي؟ اكو شي شبيچ؟؟

-تعالي

اشرتلي ودخلت للبيت مانتبهت لشي مركزة كل انظاري على نانا وتصرفاتهه الغريبة، تعديت الممر المؤدي للصالة وجفلت..

توقف الزمن وياه نبض گلبي.. فركت عيوني اتأكد من المنظر الكدامي، هذا مو وهم؟ مو طيف؟ مو حلم من الاحلام الاشوفهه كلما احط راسي على المخدة؟

فتحت حلگي اريد انطق بس ماخرج من فمي غير هوا حار، وگعت دمعة على خدي چوت روحي، بعد ثواني كدرت اهمس بفحيح مليان الم وجروح..

-دعاء..

ركضت عليه حبيبة روحي، بير اسراري، عيوني الماشوف الدنيا الا من خلالهه ركضت لحضني اختي تؤام روحي..

-دعاء: مرايم.. حبيبتي شلونچ يروحي گلبي مشتاقتلج عمرري

تبوس بيه وتتغزل بيه والدموع تنزل من عيونهه الحلوة، ماكدرت اهدهه چلبت بيهه حضنتهه اخاف تروح اخاف افز من هذا الحلم وتروح بعيد عني..

-دعاء: مريم.. ولج مرايم خليني اشوفچ

بصعوبة بعدتني عنهه وضحكتهه مزينة وجهها الترف، ماتحملت گرصتهه من خدودهه صاحت وقبل لا ترجعلي الكرصة عضيت ايدهه..

-دعاء: اااايييي مچلوووبة

-مريم: الله ياخذج

-دعاء: وياخذج وياي ان شاء الله

-مريم: اموت منج چلبة

-دعاء: اختي المرعبلة

-مريم: النحسة

-دعاء: الغثة

-مريم: لغسل لهلوجه

-دعاء: مشتاقتلج عوبة

حضنتهه مرة ثانية وما انشلعنه الا من نانا صاحت بضحك جزعانة..

-نانا: كاافي بنات ما شبعتو من بعض

-مريم: ولج نانا هاي توأم روحي الملطمة

-دعاء: مرايم المصخمة

وخرتهه عني وتسائلت بحيرة..

-مريم: وين ماما؟؟ خواتي وين؟؟ اجيتي وحدج لو شلون؟ منو جابج وشلون اندليتي البيت؟ و..

-دعاء: بسم الله اصبري انطيني مجال، تعالي امي بغرفة نانا متمددة تعبانة من الطريق

ركضت ركض لغرفة نانا دگات گلبي سابقتني، اول مافتحت الباب شفتهه كدامي متمدده ونايمة، رحت عليهه بستهه وحضنتهه وبجيت بحضنهه شوق وغربة، تمسح على راسي وتضحك فرحانة بشوفتي..

بعد سلام دام لاكثر من عشر دقايق اللتفتت شفت بسملة اختي الصغيرونة، بوستهه وشبعت منهه وعيوني تدور اختي الثالثة نورايتي..

-مريم: نور وين؟

-دعاء: هو ردت اگلج بس..

-مريم: شبيهه؟؟ بيهه شي؟؟ صاير شي دعااء

-بسملة: اسم الله ما صاير شي شبيچ

عكدت حاجبي محتارة بيهن، انداريت اباوع لـ نانا تقدمت عليه وهزت راسهه بطريقة ميخالف..

-دعاء: نور تزوجت

مي بارد ثلج ووگع على راسي كزبرت واحوالي كلهه تخربطت، ماكدرت انطق بكلمة كعدت على السرير وعيوني شخصت عقلي راح لبعيد حيل بعيد اجاني مغص قوي عصر معدتي عصر..

-مريم: باعهه

-دعاء: شنو؟

-مريم: ابوية باعهه؟

-بسملة: لا شنو باعهه

-مريم: شوكت تزوجت

-دعاء: صارلهه شهر ونص

-مريم: ليش تزوجت

باوعت لأمي معاتبة ابتسمت ماما وكعدت على حيلهه بوستني للمرة العاشرة وكالت بفرحة..

-تزوجت رجال كلش زين وحباب وهي مرتاحة وياه

-مريم: وشمعرفج

-دعاء: بقينه على تواصل وياهه مو مثلج گطعتي بينه يالگاطعة

حچتهه وضربتني على كتفي وضحكت، فتحت عيوني ممصدگة الدا اسمعه همه عبالهم اني كطعت بيهم؟؟ هيج ابوية فهمهم؟؟؟

-مريم: اني ماكطعت بيكم!! اني بچيت دمم على فراگكم بس انتن ولا وحدة اتصلت بيه وتطمنت عليه

فهمتهم كل الصار وان ردت اتواصل وياهم وابويه يحضرني ويرزلني امي بقت بس تبچي وتدك على رجليهه وتولول..

-دعاء: وهو يكول هي مرتاحة بعيدة عنكم ومتريد تحجي وياكم ممنوع احد يحاچيهه ويزعجهه

-بسملة: هددنه اذا نتصل بيج نتعاقب نور بزواجهه كتلت روحهه تريد تعزمج وتنطيج خبر وابوية ماقبل كال مريم راح تكسر گلبكم وترزلكم هي مرتاحة ومتريدنه بعد

-مريم: عمت عينيي لو سويتهه لو بعز الراحة ما انسى اهلي ما انساكم مستحيل

-نانا: مرايم على كيفج حبيبتي الفات مات وهسة اهلج حواليج اشبعي منهم وتونسي وياهم

هزيت راسي مأيدتهه ورجعت لحضن امي وخواتي، بقينه نسولف الليل كلهن تسائلن عن الاطلس بس مانطيهم جواب وافي احجي بي بسطحية ماريد اصدمهم بالحقيقة هسة..

-بنات امشو لغرفتي نانا تريد تنام

لزمت ايد بسملة من جهة ودعاء من الجهة الثانية، لحگتنه امي والفرحة غامرتهه وواضحة السعادة بعيونهه والراحة بشوفتي..

صلت على محمد من فريتهم البيت وبسملة تعجبت على جماله وترتيبه واختيار الاثاث الانيق والفخم بنفس الوقت..

-دعاء: مريم ذوق منو البيت يخبل يخبلل

-مريم: كله الاطلس هو مختار كلشي

-ام مريم: اول ما تزوجتي كعدتي وحدج امي؟

-مريم: من اول يوم اي

هزت راسهه متحسفة ومقهورة اكيد تعاتب روحهه لان ما سألو عليه، كملت جولة البيت وبسملة على كلشي صاحت "الله" "يجنن" "يخبل" وامي ترزل بيهه..

-ام مريم: ذكري الله بسملة ميصير هيج ماما

-بسملة: اي اي ما شاء الله والله ذوق عليك يا نسيبي يطگ بالكاع

-مريم: تنامون يمي بالغرفة لو تردون تنامون بغرفة الضيوف؟

-ام مريم: لا يمة فشلة رجلچ يجي لا يتبهذل ويطلع من غرفته احنه ننام وين ما چان

-مريم: ماما الاطلس مسافر ميجي لتخافين

-بسملة: شسالفة سفراته يومية مسافر هالزلمة

-مريم: هو رجل اعمال والسفر شي طبيعي عدهم

هزت راسهه امي وكالت ينامون ويايه، دخلن لغرفتي وبسملة صاحت..

-الله تجننننننن

-ام مريم: بسملة تالي!!!

-بسملة: ما شاء الله ما شاء الله اللهم صل على محمد وال محمد

-دعاء: حتى الغرفة ذوق اطلس؟

-مريم: كلشي بالبيت ذوقه

طفرت دعاء وياهه بسملة على الفراش وغاصن بي بسملة تضحك متحمسة واني اباوعلهن وامسح بعيوني سودة عليه خواتي فرحانات..

بهالليلة ما نمنه بقينه للصبح نسولف وطلعنه من الغرفة تركنه امي ترتاح وحدهه، سألت عن ابوية وين ودعاء جاوبت..

-دعاء: هو بس وصلنه ورجع كال عنده شغل

-مريم: شكد راح تبقون؟

-بسملة: مادري ما كال ابوية

-مريم: عوفكم من ابوية نور شسالفتهه شلون تزوجت احجولي كلشي!!

-دعاء: من انتقلنه كعدنه بأطراف المدينة ونور سجلت بمعهد تعليم لغة انكليزية والحظ حبهه استاذهه وخطبهه

-مريم: چذابات!!

-دعاء: والقران هو جزائري الجنسية مات عليهه وانتِ تعرفين نور وغنوجتهه ودلعهه وسوالفهه خطبهه ثلاث مرات وابوية ميقبل يرفض بالمرة الرابعة طلب مهر كلش عالي وزوج نور وافق وتزوجو

-بسملة: وهسة هي حامل

-مريم: عزه مدا اصدك شنو هالصدمة

-دعاء: صدمة النه كلنه والله بس المهم هي مرتاحة كلش وفرحانة بي تكول عبد القادر يحبني ويموت عليه شايلهه بالصلوات

-مريم: الحمد لله والشكر المهم هي مرتاحة، زين انتو على تواصل وياهه؟

-دعاء: اي كل يوم تخابرنه وتسولفلنه اخبارهه خصوصاً من انتقلو من منطقتنه

-مريم: وين عايشة هسة؟

-دعاء: بعيد عنه لان هو زوجهه مو منا كتلج

هزيت راسي متفهمة شرحتلي بعد عن زواجهه وتمنوني احضر بس ابوية موهمهم اني ماريدهم وماريد احد يتصل بيه، شرحت دعاء حاولت كذا مرة تسرق موبايل ابوية وتدگ عليه بس يلگفهه ويطيح حظهه ويعاقبهه المسكينة..

اغلب وقتي ساكتة ماعرف شلون راح اصدمهم بالخبر واگلهم الاطلس بحياته مشايفني ولا حاول يسأل عني.. الفرحة الي بعيون خواتي اذتني وماكدرت انطق بشي يزعلهن..

نامت بسملة على رجليه ودعاء تلح عليه اسولفلهه عن زواجي وعيشتي هنا وتعجبت من عرفت اني اشتغل بشركة واطب واطلع واعتبر امرأة مستقلة على گولتهه..

-دعاء: والاطلس عادي عنده؟؟ سولفيلي مرايم عليج الله شبيچ ساكته

-ميدري الاطلس

-دعاء: شلون ميدري تشتغلين وره ظهره؟

-اي

-دولي وين اكو هيج كلاوات

-والله شبيچ ميعرف اني اشتغل

-شلووون مينتبه عليج من تطبين وتطلعين؟؟

-اصلاً ماعندي تواصل وياه ولا اعرفه ولا يعرفني

جحظت عيونهه وانسردت اسولفلهه الصار ويه كل جملة احجيهه تگول..

-دعاء: چذابة!!

-مدا اچذب والله

-دعاء: عقلي وگف مريم راح يصيرلج ست اشهر متزوجة تره!!

-اي شسوي بعد

كملتلهه وهي تباوعلي وتبچي على حالي عبرت هواي شغلات ومنهه الاعتداء الي تعرضتله وكلام الاطلس عني واتهامه من يكول عني بنية رخيصة وبايعهه ابوهه..

الليل كله خلصته احجيلهه باقي التفاصيل بالأخص من توظفت وصارت تلطم على خدهه من گلتلهه حتى وره ما اشتغلت عنده ماعرفني ولا حتى شك بيه..

-دعاء: مريم هذا غبيي!! ولج شنو هالعقل معقولة ما شك بيج؟؟

-مريم: مو غبي بس ماتوقع مرته الي جايه من البادية الفقيرة الغبية البيئة تشتغل بهيج مكان وعمو محمد هواي ساعدني بهذا الشي

-دعاء: عجيب

-مريم: فعلاً عجيب ولولا عمو محمد مستحيل اكدر اكمل شغلي بدون لا يعرفني اطلس بس لعب بفايلي وغير بي هواي شغلات ومنهن لقبي تغير

-دعاء: يكدر يسوي هالشي؟ اقصد ميشكون بيج؟

-مريم: كلشي يكدر يسوي حل الموضوع بليلة وحدة والله وانطاني سي ڤي كامل عني اني انبهرت من شفته

-ليش ساعدج؟

-مريم: مادري

-تتوقعين اله غاية بهذا الشي؟

-مادري والله عقلي واگف مافكر بأي شي غير اريد اندم اطلس كارهته دعاء مدا اطيقه

-دعاء: گلتي هو يغار عليج اقصد على مريم الي تشتغل بالشركة وياه معناهه شنو؟

-مادري

-يعني تكونت عنده مشاعر تجاهچ؟ بس بهالسرعة؟

-مو سرعة حيصير اربعة اشهر اشتغل وياه مگابلته وگاعدة ليل نهار كل شغلي يتحول عنده بالطبة وبالطلعة اشوفه وحتى نسولف اثناء الشغل

-ههههه يا ملعونة

-اضافة نانا تكول هو يتعلق بسرعة

-خوش صفة هاي تفيدج، زين مريم تعالي سولفيلي ينطوج راتب؟ بس لا ينطوچ فلاسين ويستغلوج!!

-مريم: لا راتبهم زين صح مو نفس خريجين البكلوريوس بس زين، اول شهرين ما استلمت لحدما بديت بالشهر الثالث انطوني راتب

-يعني هاي سياستهم؟

-اي هيج گالن البنات

حركت راسهه متفهمه وأصرت عليه اكمللهه الصار، ماحسينه بالوقت الا من اجت امي وكالت وهي ترزلنه..

-بعدچن كاعدات ولچن صارت الخمسة شوكت تنامن!

-مريم: اني ما انام بعد راح اصلي واسويلكم ريوك واطلع للدوام حرامات مينطون اجازة هالفترة لان لود بالشغل

شجعوني اروح للدوام وارجعلهم وفعلاً مشت يومين واني متونسة احلى ونسة ويه اهلي، كلت لـ نانا متجيب طاري عند اطلس ان اهلي جايين واخذت وعد منهه متحجي واذا يريد يجي يشوفهه تبلغني قبل بوقت اني اخذ امي واخواتي ونطلع..

اني ودعاء كل يوم للصبح نسهر ضحك وتحشيشات ودعاء ومتحمسة على الاطلس تكمز وتكول..

-دعاء: والله يحبج عزه بعينج صدكيني يحبج

-مريم: لا مو لهدرجة بس اني اكلج يغار هواي كاتلني كتل ويهتم بيه هم

-دعاء: عليج الله عيدي شصار اليوم يمة گلبي انترس فراشاات

ضحكت وعدتلهه الموقف الصار بالمصعد، چنت مستعجلة ما بقى وقت على الاستراحة مالتنه راح تخلص واني بعدني مماكله، صعدت اركض للمصعد وهو چان واگف ديريد ينزل..

-الاطلس: الله الله على كيفج

-مريم: اسفة بس استاذ راح يخلص الوقت ما اللحك

-الاطلس: تلحكين على شنو

-موعد الغده مماكلة بعدني

-الاطلس: منو كلج تگضيهه سوالف ويه ريتاج

-استاذ يا سوالف غير واگعة على الملفات ودگ شغل

-اممم، اي صح صح

-والله العظيم جنت اشتغل ما سولفت اصلاً

-امم

-استااذ والله ماسولفت والله شبيك

ضحك وهز براسه حسيته ديستهزأ بيه طنگرت وغلست عنه بعد لا باوعتله ولا حجيت شي لحدما وصلنه لطابق الكافتيريا..

-الاطلس: مو تتأخرين

مجاوبته تمشيت اكمل طريقي عله صوته وكال..

-الاطلس: اذا تأخرتي خصم من الراتب وشرفي

هم مجاوبت حسيت بي يمشي وراية، وكال بنترة مال واحد ضايج..

-مريم!!

اللتفتت عليه ودموعي بعيوني هسة شكو ابچي الثولة شنو هاي عيارة لو هرمونات بس احس لازم ابچي يبووو مو وكتهه مريم..

-الاطلس: جاي تبچين!

-مريم. لااء

-چا هاي الدموع منين

-مو دموع حساسية بعيوني استاذ خلص وقت الغداا ما لحكت

وانفجرت ابچي مثل العوبة ابجي وامسح بدموعي وهو صافن وفاتح عيونه ممصدگ المشهد الغبي الصار هسة..

-الاطلس: من كل عقلج مريم تبجين

غطيت وجهي مفتشلة من روحي صرت اكرص بخدودي اريد اسكت مو وكتهه مريم خزيتي نفسج كدامه..

ذب حسرة قوية وگال اسمي بصوت مليان اعتذار وحنية خلاني ازيد بالبچي..

-الاطلس: مريم

مجاوبته، تحسر للمرة الثانية وذب نفس اعلى رجع گال بهمس..

-الاطلس: مريم ليش تبجين شو عايني عليه

وخرت ايدي فحطانة ادري بخلقتي صايرة خريطة هسة، غميت روحي ستين غمة من تعدو موظفين وضحكو عليه ليششش يضحكوون..

-الاطلس: روحو لشغلكم رجاءً!!

راحو واني مسحت عيوني وخدودي مشتعلات نار من التكرص بس على الاقل فادت بطلت ابچي..

-الاطلس: يابة طز بوقت الاستراحة روحي تغدي اخذي راحتج

-اتعاقب

-منو يعاقبج؟ اني مديرج واگلج روحي اكلي وارتاحي شكد ما تردين

-لا استاذ بس اشتري لفة واصعد ميحتاج

-مريم اني جاي اكلج ارتاحي

تقرب خطوتين مني مسحت اخر دمعة معلگة بخدي وباوعت عليه..

-مريم: شكراً استاذي

-تدللين

-احم.. اسفة لان بجيت بس ماعرف شبيه

-ولا يهمج

-شكراً

-العفو

همسهه ومد ايده بجيب السترة طلع منهه شي وقدمه ناحيتي توقعته كلينس بس تفاجأت من شفتهه چكليته، باوعتله وابتسمت عبالك اني طفلة ويضحك عليه بچكليته، بادلني الابتسامة وكال بهمسه..

-اخذيهه بس اسكتي ولا تبجين بعد فحطتيني

اخذتهه خجلانة وضليت اللعب بيهه ومنزلة راسي، نسيت لازم اروح اكل ونسيت الوقت..

-الاطلس: ما يلوگلچ الزعل مريم لا تبخلين علينه بضحكتچ

صرت بنص هدومي من الخجل، تقرب عليه اكثر وكال بهمسة..

-ضحكتچ تنعش يومي

ابتسمت وبقيت منصية ملاحظه نظراته الحارقة راح تخترقني، ذب نفس وكال وهو يعدل وگفته..

-راح ترحين للسفرة؟

-لا استاذ

-ها! ليش؟

-امي متقبل

-ماتكدرين تقنعيهه؟

-مادري بعد

-يعني اقصد السفرة حلوة وراح تريحج من ضغط العمل شوي

-امم صح

رفعت عيوني اباوعله انتبهت لنظراته على ايدي التلعب بالچكليته، ترخصت منه وكملت طريقي للكافتيريا وهذا كل الصار..

-دعاء: لج شكد حنون خرب وجهه الحلو

-مريم: صح هو حنون كلش

-دعاء: وزاحف هم چكليته وكذاا

-مريم: ههههه تدرين بس ويايه هيج اني متعجبة باقي الموظفات هم لطيف وياهن بس اني تختلف معاملته ويايه شكد ما مرمرت گلبه

-دعاء: المهم مهتم بيج وهذا النريده احنه، وهسة شلون صدك مترحين للسفرة

-مريم: اخاف نانا تربط اني رايحة ويه شركتهم وتصيرلي سالفة

-دعاء: بس گلتي بعد شركتين وياكم رايحة ليش متفكر انتِ ويه ذنيج الشركات

-بس ما رايحين لـ ماراكش رايحين لغير مكان

-دعاء: وهي شمعرفهه صدك تحجين مريم

-اخاف من المجازفة بهيج شغلات نانا مو سهلة دعاء فطنة وذكية تنتبه وتلاحظ

-دعاء: معليج اني اقنع امي وانتِ بس انطي خبر لـ نانا رايحة سفرة ويه شركتكم

-مريم: تجين ويايه؟

-دعاء: صدك عود؟؟

-مريم: اي عادي ضحى كالت تجيب بنت اخوهه وياهه

-دعاء: تتوقعين امي توافق؟

-مادري نحاول..

وفعلاً حاولنه وامي ماقبلت ولا اقتنعت بقيت الليل كله اقنعهه واتوسل بيهه الى ان اخيراً اعترفتلهه الاطلس راح يكون موجود ويايه بس حرصت على ماما متذكر هالشي كدام نانا عود مفاجأة ومن هاي الكلاوات..

-ام مريم: يله ميخالف روحن بس دعاء ويه مريم تبقين رجل على رجل صح فشلة من رجل اختج بس اخاف عليج ماما

-مريم: ماما بعيوني احطهه دعاوي لتخافين

سهرنه نحضر اغراضنه والحماس واصل عدنه مليون هاي اول مرة اسافر والي يحمس اكثر راح اسافر ويه اختي وصديقتي المقربة دعاء..

كعدت الصبح بسرعة بدلت ورحت اسويلنه ريوك، دعاء لبست فستان ثخين مورد من شفتهه تذكرت اليوم المشؤوم من ضحكن عليه البنات، ماريد ينعاد الموقف ويه اختي وينكسر خاطرهه..

-مريم: فستانج يجنن دعاوي بس شنو رأيج تلبسين نفسي

-دعاء: مو ماعندي

-مريم: انچبي كنتوري كله گدامج شنو ماعندج تعالي اختارلج قطعة حلوة

ابتسمت فرحانة وطلعتلهه بلوز داخلي وكوت طويل ماروني والياخة بيهه فرو من نفس اللون، انطيتهه بنطرون عريض تلبسه جواه ورهمتلهه شال طلعت تخببل اختي الصاكة..

لبسي يشبه ستايلهه هم بالطو طويل لجوه الركبه لونه اسود والفرو مالته بيجي وبنطرون اسود عريض جواه وكسرت السواد بشال بيجي من نفس مشتقة الفرو.. ابتسمت برضا واني اشوف لبسنه وطلعنه من البيت ايد بأيد ودعاء تسحل بالجنطة..

وصلنه للشركة ونشوف الكل متجهز ومتحمس الاجواء ولا اروع، شفت صديقاتي وطارو من الفرح من اللتقينه الكل عباله ما اجي مانطيت خبر لاحد ردتهه مفاجأة الهن..

عرفتهم على دعاء وگالو ميحتاج تكولين اختج من الشبه عرفناهه، تينا ودعاء توالمن ويه بعض بسرعة فرحت بهالشي..

-تينا: ما ظل شي راح ننطلق

-مريم: كم ساعة الطريق؟

-تينا: يعني تقريباً ثلاث ساعات اذا ماكو ثلوج بس انتو بعد دتشوفون الجو شكد بارد ونشرة الاخبار گالو اليوم تثلج الدنيا فـ اكيد راح يسقط اليوم والوقت يصير اطول

هزيت راسي ساكته وبطني موتتني تلويني، لوما دعاء ويايه ابطل ماروح بسبب الوجع لا يطاق بس ماردت اخرب فرحتهه وحماسهه...

**

-اسيييييييييل وينج اسييييلوووو

-اسيل: اجيت اجيت هاا

-رقية: ولج شنو اللبس تعالي ساعديني وين رحتي

-اسيل: جنت احضر جنطتي، تعالي شو اشوف شنو اخذتي

-رقية: اخذ بعد بلوزات لو كافي؟

صارت تبحوش بجنطتي الحضرتهه ورتبتلي الباقي، بدون اسيل كلشي ماعرف اسوي اقرب انسانة على گلبي وصديقتي المفضلة..

-اسيل: رقية بسرعة كملي ما ظل وقت

طلعت من غرفتي واني كملت تبديل ورحت لغرفة سارة چانت دتلبس الكوت مالتهه..

-رقية: ها سريوة اقتنعتي راح تجين

-سارة: غير غدير جبرتني راح تموتني هاي البنية

-رقية: تعالي خلينه نتونس شبيچ، وينج شو تعالي يمي

تقربت منهه وجريت روج احمر ورسمتلهه شفايفهه ضحكت من شافت روحهه بالمراية وكالت بحماس..

-سارة: غطيلي النمش هم حبابه

-رقية: دطيري هو احلى شي بيج النمش

-مااحبه مااحبه غطي فدوة الله يخليجج

فريت بيدي وعفتهه تتحلطم، كلما تطلع تصيحلي حتى احطلهه مكياج يخفي النمش الي بوجهها وتخليني اطوخلهه المسكارة حتى اخفي رموشهه الحمر واكيد هي متعرف تخلي مكياج واني المبتليه..

-حصة: بنااات يله لا تبطون راح يطلع اخوكمم عشان ترحون معاااه

-رقية: جايات جاايات

ركض نزلت واسيل تركض وبيدهه الجنطة نسيت جنطتي وطلبت من المساعدات يجيبوهه، نزلت سارة مبوزة وغدير واكفة جوة بجانب امي..

-حصة: يحليلكم حبايبي

-رقية: يله مع السلامة ماما ادعيلنه سارة متبوز علينه هناك

-غدير: شحدهه

سكتت سارة بدون متعلق وسلمت على امي وعبرت غدير واضحه عركتهن واصله للظالين، بعدنه واكفات دنريد نطلع وتقدمت غدير جرت القراصة من شعر سارة وفتحتلهه شعرهه ورتبته الهه..

-غدير: هيج احلى

-سارة: ماحب افتح شعري

-غدير: منا وجاي راح تحبين

حچتهه بتحدي وابتسامة نصر مرسومة على وجهها، كالعادة اللتزمت الصمت اختي وماعلقت، بقيت واكفة بصفهن وما اسمع غير شهگة قوية اجت من سارة..

-سارة: غديرر ليش گرصتيني؟!

-غدير: راح تصيرين حبابة سارة ومتشلعين گلبي فهمتي لو لا

اندارت عليه وخزرتني وكملت..

-غدير: وانتِ رقية مثلما اتفقنا أي غلط يصير....

ماكملت جملتهه مجرد ضحكت ضحكتهه الشريرة التنرفز، طلعنه من البيت نتحلطم شكدما جنت متحمسة كرهت حماسي وتذكرت الي لازم اسوي والبي طلبات غدير الي محد!! بالمعنى الحرفي محدد يكدر يوكف بوجهها!

تطلكت من حمزة بسهولة وسرعة فائقة عارض حمزة بشدة على طلاقهم بس هي دگت رجل الا تتطلگ.. ابوية وامي حاولو يقنعونهه تعقل وهي مصممة متريده ومثل ما ذكرت محد يكدر يوكف بوجهها مهما كان..

**

"دعاء"
ادور عيوني بالمكان يمكن راح اموت من الحماس والفرح، كل شوية مريم تباوعلي وتهمس "عمري" اضحك على نفسي وعلى تأثرهه شويه وراح تبجي عليه..

بقينه واكفين ببوابة الشركة ننتظر الرؤساء يوصلون، شوية وسفطت سياراتهم كدام الشركة.. عيوني تدور عليه اريد اشوفه بالواقع شلون شكله مريم متنطي لا حق ولا باطل من اسئلهه تكول ازرك ومصخم ويخزي..

اخيراً لمحته عرفته من طوله الفارع وسماره البارز، ضحكت وعيوني عليه طاح حظج مريم هذا ازرك ومصخم هسه هم عيب احجي بشكله يصير رجل اختي فشلة.. رجل هيبته ورزانته واضحة لابس كوت نفطي يوصل لجوه الورك، تحته بلوز ابو رگبه اسود وبنطرون اسود كتان..

تقدم من سيارته وبجانبه بنات ثلاثة مريم كالت ذني خواته، هم معايزات وحده تكول للثانية اني احلى منج بس احلاهن السمرة..

بقت عيني على المحيط الاطلسي مال مريم، يمشي برهااااوة عبالك مالك الدنيا والحبربش مالته وراه يمشون ويتلوگون، يتقدمله واحد بكبر ابوه لاوي رقبته وذال روحه يحجي وياه..

وگف على جهة والجماعة تحجي وياه وهو ساكت وبس يستمع، شويه واجو مجموعة شباب بس شافهم شفنه ضحكة سنه اخيراً..

راحو كلهم على السيارة الجبيرة الي راح نروح بيهه وصعدو سوه، حديت سنوني وجريت ايد مريم..

-دعاء: تعالي مريم

-مريم: شنو وين؟

-دعاء: نصعد بالسيارة يله تعبت

-مريم: بس منعرف بيا سيارة نصعد بعد ما گالو

-دعاء: نصعد بهااي

اشرت على السيارة الدخلو بيهه، مريم باوعتلي عاكدة حاجبهه ممفتهمه الوضع، ابتسمت بخبث الا اربيك يا الاطلس محد يتجرأ يلعب على اختي ويكسر گلبهه..

-دعاء: الاطلس بهاي السيارة امشي نركب احنه هم

-مريم: شنوو لا لا مستحيل ماريد اركب ويااه

-دعاء: اشو الا نركب هنا امشي وياي

-مريم: والله مااريد دعااء ولج عوفيني ماصعد وياه اتوتررر

-دعاء: غبررة شنو انتِ ما رايده رجلچ!!

-مريم: لا لا ماريده

-دعاء: بس اني اريده الچ امشيييي

جريتهه من ايديهه جر وهي جرت تينا ويانه وتينا تجر بضحى وبنت اخوهه لضحى، صعدتهه السيارة وهاي اختي انبلع وجهها بلع شكد ثولة وينهه الجانت تهوبز قبل لا نجي..

-مريم: خلينه نكعد وره دعاء اني تعبانة ماكدر اوكف هواي

-دعاء: اي تعالي نكعد هنا

سحبتهه حتى نكعد بالمقاعد الي وره المقعد الي كاعد بي الاطلس بس شو هاي اختي تبسمرت بمكانهه ومتقبل تتحرك..

-دعاء بهمس: امشيي نكعد وراه امشيي

-مريم: هسة جماعته يجون يگومونه ونتفشل دعاء كافي حبابه خلينه نكعد وره

-دعاء: شنو مسجلات بأسمهم المقاعد امشيي

دفعتهه على المقعد وكعدتهه گوة، تينا وضحى كعدو بالمقاعد الورانه والبنية الويه ضحى راحت بالنهاية، اباوع لمريم شحالهه احوالهه كلهه تخربطت قلقت بس ماتحملت غميتهه..

-دعاء: ثولة خلي يروح رجلج من ايدج

مجاوبت بقيت اباوع بعيوني المكان وادرس تفاصيل الكعدة، الاطلس كاعد گدامنه والكرسي البصفه فارغ.. لاحظت مانتبه لوجودنه ولا شافنه من صعدنه عيونه بالتلفون مارفعهن حتى من چنه ندردم..

دقايق ودخلت السيارة بنية شابة خرررب عرضهه على هالجمال، عود فرنسي مو بنية ملامح وشكل مال لعابات، ما احتاجيت وقت حتى اعرف هاي منو وهمست بحرگة..

-هاي نورسين!!

باوعت مريم وهزت راسهه "اي" وتچت راسهه على الجامة انكسرت على كسرتهه شكد دتحاول تمثل القوة واني اعرف مريم شكد قوية من قبل بس يبقى الموضوع يموت ويخنگ زوجهه كاعد كدامهه وراحت تكعد بصفه وحدة تشل من الجمال وتتماوع عليه وتدلل بكلامهه اووووف يا حرگة گلبي!!

دقايق ودخلو بعد ناس وتعبه الباص تقريباً، واني عيني على الرايح والجاي دخلن البنات خوات اطلس وياهن رجال شاب سمعت صاحتله وحدة منهن "حمزة"..

سلم على اطلس وسولفو على الواكف شوية ماكدر الرجال يكمل كلامه وسحبت نورسين الاطلس تحجي وياه وتراوي شي بتلفونهه شكد غير مؤدبة!

-الاطلس: اوكفي نورسين، حمزة الكراسي الوره الكم حب

-حمزة: عاشت ايدك

باوعلنه حمزة وابتسم بادلته الابتسامة وكلت بهدوء متوترة..

-دعاء: هذا مكانكم استاذ؟

-حمزة: لا لا استريحو

مشى ليوره وعيني عليهم، سألت مريم عنهم وسمتلي اسمائهم لاحظت رقية متوترة وفجأة حجت بصوت عالي وهي تأشر على كراسي..

-هنا هنا سارة گعدو اني واسيل نكعد وراكم

همست سارة شي وخزرت رقية صارت تخرمش بأيدهه ومبين تتوسل بعيونهه على شي مادري ليش حسيتهه متريد تكعد بجانب حمزة يمكن خجلانة منه او مستغربة گعدتهه بجانبه..

-رقية: يله اسيل يله خلينه نكعد هنا

اخذن مكان الهن وخطية سارة بقت واكفة تلطم بالخفية خطية انقهرت عليهه وواضح مو بس اني انتبهت حتى تينا وضحى لاحظو..

انتبهنه لتوتر حمزة رغم برودة الجو صار يمسح بجبينه المتعرق، حچه وياهه كلام مو واضح وهي بقت منزلة راسهه ومنطيته ظهرهه..

-مرايم.. مريم تعالي شرحيلي شبيهم ذولة

باوعتلهم وهزت اكتافهه بطريقة "ماعرف" بقو واكفين بمكانهم هواي ورقية تأشر لسارة تكعد وبقينه اني وتينا نراقبهم ونحلل سالفتهم، ماده بوزهه تينا عليه وتهمس..

-تينا: تتوقعين اكو مشكلة بيناتهم؟

-دعاء: مادري بس شوفي حمزة انحرج كلش

-تينا: هسة غير تكعد والله خطية باعي الرجال شلون توتر

هزيت راسي وشفته راح يريد يكعد غير مكان واخيراً سارة رفعت راسهه وصاحتله، رجع يشوف شبيهه ومادري شكالت بس مبينه خجلانة وجهها صاير طماطة واطرافهه ترجف..

-تينا: اكو شي والله

-دعاء: اني صح ماعرف شي عنهم بس والله حسيت

-تينا: ياا شوفي هو هسة ميريد يكعد بصفهه بس رقية شبيهه تريدهم الا سوه؟

عدلت گعدتي ومديت راسي ليوره اكثر حتى اسيطر واني احجي ويه تينا..

-دعاء: واخوهه شبي ميتدخل؟ شو ميدري بالدنيا طشت لو رشت

-تينا: هنه كله ويه حمزة البنات هاي صار سنين مسيو محمد يأمن بي كلش على بناته

غمضت عيوني متفهمه ورجعت لمكاني بعدما اخيراً كعدو سوه، ماعندي فضول بس يعجبني اعرف طبيعة حياتهم بما ان ذولة عيال اختي واختي فاهية ممهتمة على الاقل اني اغير من حالهه شويه..

-دعاء: مريم مريم

-هااااااا

-دعاء: شبيچ تره احنه مو بالبيت

-دعاء ندمتيني بالساعة الاجيت بيهه عوفي العالم بحالهم

-دعاء: ماشي، استاذ بلا زحمة استااذ

فزت مريم من مكانهه متخبله تلطم على خدودهه وتريد تسد حلگي، اللتفت اطلس علينه وفتح عيونه مدهوش من شاف مريم..

-الاطلس: آنسة مريم شنو هالصدفة الحلوة

-مريم: ههه هلو استاذ شلونك

-الاطلس: اتذكر گلتي ما تجين

-مريم: اي بس.. غيرت رأيي

-الاطلس: زين تسوين

ابتسم ودار عيونه عليه بادلته ابتسامة وگلت بأدب..

-دعاء: استاذ ممكن ترفعون التدفأة كلش باردة السيارة

-الاطلس: اكيد، انتِ تصيرين لمريم؟

-دعاء: اي اني اختهه دعاء

-الاطلس: اهلاً وسهلاً آنسة دعاء

رجع نظراته على مريم وزادت ابتسامته، گال بأدب ممزوج بالمشاكسة..

-الاطلس: لو فوتي هاي السفرة چان ندمتي طول عمرج

-مريم: استاذ انتَ مو ماردت تجي

-الاطلس: اي بس.. غيرت رأيي

كتمت ضحكتي من تقليده لـ حچاية مريم واكيد مريم ما راح تفوت هالشي بدون مترجعهه اله، همست بحياء..

-مريم: زين تسوي

ابتسملهه وبرزت سنونه البيض عيونه تسولف فرحته بشوفتهه راح ياكلهه اكل بنظراته، باوعتله وداخلي طاير طاااير اخيراً صدت الذيب صدته.. شدو الاحزمة هاي السفرة راح تكون طوووويلة وممتعة بنفس الوقت.....

يتبع ♠️💸...

• ━━━━━━❪♣❫━━━━━━ •

واني اتفق ويه دعاء 😁🔥🔥🔥
مو سفرة فلم هندي صارت راح يطلع المستخبييي 🙈😂♥️🔥

الاطلس حيرنه وتعب نفسيتنه دعترف ياخي خلينه نفتهم تحبهه معجب لو مشاعر عابرة تعبت نفسيتي 😤😁

شكررررراً على وصول الاطلس 1 مليون ممنونة وسعيدة بوجودكم وفرحانة لان حابين الرواية 🥹✨♥️
+
لتنسووون التصويت حبايبي الحلوين 🫶🏻✨