رواية الاطلس "دمليج أسود" الفصل الثالث عشر 13 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

فّياليّت عّيني بلُقيّ عّينك دائِمة . 🤍

• ━━━━━━❪♣❫━━━━━━ •

-جوعانة؟ تاكلين من هذا البسكت؟

بلعت ريگ وهزيت راسي "لا" دگات گلبي تنبض براسي متشنجة وخايفة، اللعب بأصابيعي وعاضة على شفتي حيل واستذكر كلام غدير بأذني، قطع تفكيري صوته يحجي بهدوءه المعتاد..

-سراوي

-سارة: نعم

همستهه همس مفتشلة اباوع لوجهه مدا اكدر اباوع بوجه ابن خالتي الاقرب الي من روحي احبه ومابدله بكنوز الدنيا بس.. بس شلون اتزوجه؟ اتزوج زوج اختي؟؟ شلون صعبة يا ناس والله صعبة، حسيت بي يحط البسكت بحضني ويفتحلي بطل العصير..

-سارة: حمزة والله تلعب نفسي ماكدر اكل

-حمزة: ابوية تلعب نفسج لان ما متريگة

جبرني احط بسكته بحلگي واشرب شوية من العصير، يتابع حركاتي بدقة ومنتبه لكل تفاصيلي.. من اول ما عرفته هذا حمزة ماتغير يحبنه ويحافظ علينه وحاطنه بنص گلبه..

-هسة تصيرين زينة ويروح اللعبان نفس

هزيت راسي وهو اللتفت على رقية واسيل..

-حمزة: شلونكم بنات خوما تعبتو؟

-رقية: لا زينات

-حمزة: اسيله تحتاجين حباية؟

-اسيل: اي والله نفسي تلعب راح اتقيء بحضن رقية

-رقية: عوعع الله ياخذج حمزة حباب لحك علينه لا تتلفني

طلع من جنطته الصغيرة البيهه فلوس ومستمسكاته شريط حبوب، انطاهن للبنات ورجع انطاني وحدة فتحهه بيدي وفتحلي بطل المي..

-حمزة: شربيهه هسة ترتاحين

اخذتهه وتچيت راسي على الكرسي اريحه، رجع استقر بمكانه وطلع موبايله مادري شيسوي بي..

-سارة: حمزاوي

-ها عيني

-متتعب من لطافتك

ضحك وعيونه بالموبايل مجاوب وبقى ملتهي بي..

-سارة: بيك خوف وحنية ابو شلون تكدر تبقى مهتم لهدرجة

-حمزة: طبع هذا سارة مو شي مكتسب

-سارة: حمزة ذب الموبايل شبيك مو زين

-حمزة: ثواني

-اللبس نظارتك ياخي كم مرة الدكتور كال لا تباوع لشاشة بدونهه

-اي لحظة

-اهوو اللبسهم وكمل

تأفأف ضايج وطلعهن من جيبه، ضحكت عليه وبقيت متچيه راسي اتأمل شكله.. اوف غدير ليش هيج تسوين بينه ليش دمرتينه ودمرتي روحج شلون ترديني اتزوج زوجچ التحبي وتموتين على اسمه ولج شلوون..

-حمزة: كملتي صفنتج

شرگت بـ لعابي ودرت وجهي عنه، غصيت وصرت اگح بقوة وهو يطبطب على ظهري..

-اسم الله، شبيچ سارحه وينه بالج

-سارة: احم.. افكر بيك اكول هذا ميتعب من الشغل

-حمزة: يابة شكد تفكرين بيه عوفيني بابا خليني براحتي

-سارة: ماشي

سديت حلگي خجلانة وبقيت اللعب بأيديه، قهقه حمزة بخفة وكال..

-حمزة: زعل الكناري

-سارة: مازعلت

-هههه سارة اعرفج اكثر من روحج بس اني احجي هيج لمصلحتج بطلي تفكرين بالناس هواي تتعبين ويوجعچ راسچ

-اي صح

-شو عايني عليه

باوعتله ابتسم ورجعتله الابتسامة، حك خشمه وكال..

-حمزة: شلون صرتي؟

-زينه راح اللعبان نفس

-الحمد لله

-رقية: احم احم احممم

-حمزة: ها صرصور

-رقية: يعني اني صرصور وسارة كناااري مو حق هذاا

-حمزة: بطلي غيرة بطليهه

-رقية: والله ولا ابطل انتَ تحب سارة اكثر مني

-حمزة: افااا هيج صارت رقية

-رقية: اي والله تحبهه اكثر مني دائماً تفضلهه عليه

-حمزة: اوصلي لهدوء ولطافة سارة واحبج مثلهه

-رقية: وهم تتغزل بعيوني مثلما تتغزل بعيونهه

مادة راسهه فوكانه وتحرك حواجبهه بخباثة، ضحك حمزة وراد يكفخهه وخرت راسهه وكالت..

-رقية: هسة تكول انتِ اوصلي لجمال عيون سارة واتغزل بيج

-حمزة: بوية شلون بينه ويه الغيرة شلوون

-اسيل: رقية كعدي راحة كافي

-حمزة: دخيل جدچ اخذيهه منا شلون بيه اگابلهه السفرة كلهه

-اسيل: حمزة انتَ منطيهه عين هي كلهه خلگ صرصور دوسوهه وعبرو

-رقية: يا چلللللبة

طگينه ضحك ورقية هجمت على اسيل تبسط بيهه واسيل ميته ضحك وتصيح "اسفة" باوعلي حمزة يفر بيده..

-مسودنه اختج

-سارة: توك دريت..

**

"دعاء"
انطلقنه بالعشرة ونص وهسة مضت ساعة سريعة بالطريق والاجواء جانت اكثر من روعة، وناسة والي كاعدين بالسيارة الكل منسجم وواضحة علاقتهم قوية.. اجه صوت يجننن من وره واحد يغني انداريت اشوف بس ماكدرت اللمحه..

يدندن وكل شوية واحد مقاطعه ويخلي يضحك ويرجع يغني والكل انسجم وتناغم وياه، دفيت مريم على كتفهه وحاولت اضحكهه..

-دعاء: شبيچ شبيچ كومي شوفي العالم شلون فرحانة

-مريم: دعاء اني تعبانة

-دعاء: شنو شبيچ

-مريم: احس راح اموت دعاء

-يمة اختيي ولج شبيججج

-راح اموت اوصيج عندي صلاة وصوم حبابه صلولي

-ولج مرررريممممم

عله صوتي الكل صار يباوعلنه اللتفت الاطلس علينه وياه نورسين وانخبصت خبص بيهه مايعه روحهه والوجه اصفررر كركم كأن دتطلع روحهه..

-دعاء: عزه بعيني عززه ولج مرررريم

-مريم: راح اموت دعاء بعد ماتحمل مااتحمل رجعوني للبيت

-الاطلس: مريم شو عايني عليه مرريم

كام من كرسيه واجه علينه، تقدمو بعد زلم ثنين وتينا وضحى هم اجو صرنه فرجة..

-الاطلس: مريم شو بس عايني عليه بس اشوف عيونج شووو

-مريم: اطلس راح اموووت

-الاطلس: دعاء عاونيني شوي

جريتهه من ايدهه اكعدهه اريد اصحيهه ماكو بس تولول وتبجي وتعض على شفايفهه..

-الاطلس: حمزة كول للسايق ياخذنه لاقرب مستشفى

-تينا: يمة اسم الرب عليج حبيبتي شجاچ

-ضحى: اول ما صعدنه هي تعبانة وسألتهه شبيچ ماقبلت تحجي

-الاطلس: ليش تتعبين روحج هيج يا عيني

يضرب على خدودهه بأصابعه يريد يصحيهه وهي تبجي سودة بوجهي اختي شصار بيج يروحي، طلعت مي اشربهه وصار واحد فوك راسي يحجي لبناني مافهمت شديكول بالي مو وياه..

-الاطلس: شنو يوجعج مريم؟؟ مريم اصحي وياي شو بس باعيلي

-مريم: بطني راح اموت راح اموت

الدموع تجر من عيونهه ووجهها ميتفسر شفايفهه بيض وروحهه طالعة..

-الاطلس: يمكن اللتهاب الزائدة الدودية؟

-حمزة: صح اي لان وجهها اصفر..

-جوزيف: استفرغت الآنسة؟

-دعاء: مادري لا لا ما اتقيأت

-الاطلس: خليهه تبقى صاحية لا تفقد الوعي انتبهي زين

-دعاء: ماعرف شلون مدا تقبل تكعد شوف بعينك

-الاطلس: ضربي على خدودهه شمميهه عطر خليهه تبقى كاعده

-دعاء: مريمم حبابه اكعدي راح اموت شكد فگر اني شكد فگررر

-الاطلس: سويلي مجال سحبيهه عليه خليهه تتنفس

بدلت بأماكنه صرت اني على جهة الشباك حاولت افتحه بس كالو مينفتح بس الورانه والكدامنه ينفتحون..

-الاطلس: بنات شيلوهه خلوهه تكعد بمكان تينا لو بمكاني حتى نفتح الشباك

-تينا: خاف نوكعهه مسيو

-الاطلس: خرب حظ الفهاوة وخررن

كمت اللطم من شفته نهضهه وسندهه على صدره لو تعرف مريم تعزيني وتصخمني تطلع حرگتهه بيه، شالهه خفيف وراد حمزة يعاونه وعطت..

-دعاء: لا لا ماكو داعي استاذ اطلس مكفي

هز براسه واستلمهه اطلس على الاقل هذا رجلهه لو تعرف حمزة هم شالهه تذبحتي على القبلة، نزلهه على الكرسي وفتح الشبابيك وصار يهفيلهه..

ايده حاضنه خدهه ويهمس وياهه بصوت ناصي ماعرف شديكول هذا يارب متصحى وتشوفه بهذا الوضع..

-الاطلس: مريم شلون صرتي؟ مريم تسمعيني.. مريم..؟

غابت عن الوعي زلغت خدودي واهزهه وادعي تكعد، صاح واحد من الولد الوره..

-شصاار اخوان شكوو شبيهه مريمم

ضحكت وحدة وكالت بضحكة مال ادبسزيات متت بدمي من سمعتهه..

-يمكن حامل ههههههه

-الاطلس: شنوو هاللغوووة هاااي

-عمر: بعد السقووط شلون يصيرر احمررر اصفررر

-اسفة موسيو جاي اتشاقة

-عمر: احتفظي بشقاچ لروحچ!!

احتركت حرك انشويت من كلامهن ردت اجاوب بس حايرة بأختي بعدين استلمهن، تنرفزت اكثر خصوصاً من وحدة كالت بمياعة مصطنعة..

-شمدرينه موسيو عبالنه متزوجة

-مسلم: كلنا نعرف مريم ما متزوجة كلاواتچن بطلنهاا

انلصمن على حلگهن بعد حچايه ما حچن، فرحت بدفاعهم وعرفت الله سبحان وتعالى ميعوف المظلوم حتى لو هو غايب عن الوعي اكو الي يدافعله ويلصم الحلوگ..

-الاطلس: ها عيني زينه انتِ؟

اخيراً صحت تتنفس سريع تدور الهوا.. استقر وضعهه شوية وعاطت..

-مريم: دعاء الله ياااااخذجججج

-الاطلس: رجع لسانهه هي بخير

-دعاء: وجعه بگلب دعاء مريم انتِ زينه؟؟

-مريم: اوووف بطني راح اموت دعاااء تعاليلي اطيح حظجج

-الاطلس: بعدين طيحي حظهه، خوفتينه عليج يمعودة

فتحت عيونهه مدمعه بقت تباوعله ووجهها حسيته رجع لونه نوعاً ما، الكل محاوطهه وتينا تبجي وضحى ترجف وزعت نظراتهه عليهم وغطت وجهها وهمست..

-مريم: اءء اءء.. بطني توجعني

-الاطلس: راح نروح للمستشفى

-مريم: لا لا ماكو داعي صدكوني صرت احسن

-حمزة: اكيد؟؟ مريم لا تخوفينه عليج

-مريم: صرت زينه والله

اعرفهه تجذب تخاف من المستشفى مريم من يوم يومهه تكره وتخاف من المستشفى، باوعت لأطلس ونزلت عيونهه بسرعة..

-الاطلس: ارتاحي بس نوصل نشوفلج طبيب

هزت راسهه وبقت منصيته، حچو وياهه الباقين وهي بس تهز براسهه انتبهت لأطلس عينه مانزلت منهه ابتسمت رغم الخوف والرجفة الي بجسمي لگفتك يالاطلس..

بعدما ابتعد الكل بقى هو ونورسين وحمزة والبنات فوك راسهه ويتبسبسون، دنگ عليهه اطلس وهمس..

-الاطلس: لا تخوفينه عليج مريم

-مريم: ماشي

رجع لمكانه واشوف نورسين تتماوع بحچيهه صوتهه عالي يوصل يمنه..

-نورسين: مابيهه شي عيني لا تخاف شبيك

ماعرف شجاوبهه صوته ناصي كلش رجعت جاوبته..

-نورسين: اي عادي يمكن جايتهه الدورة

شهكت من صلافتهه تنرفزت منهه كلش باوعت لاختي خانسة بس وجهها يسولف التعب البيهه..

-دعاء: مريم شلون صرتي

-احسن

همست بخفوت بيني وبينهه..

-دعاء: عليج الشهرية؟

-مريم: لا

-لعد شبيچ

-مادري دعاوي بطني كلش كامت توجعني اجتني كرفة قوية مردت روحي بس هسة احسن

-دعاء: يعني راح الوجع هيج بسرعة؟

-مريم: ما راح بس خف

هزيت راسي ورجعنه لمكاناتنه وتحولن تينا وضحى لمكانهن، ابتسمت على اهتمام الكل بمريم كل شويه يجي استاذ حمزة يسأل عنهه يروح يجي غير واحد يروح وتجي بنية وهكذا قضينه الطريق..

بده الثلج يتساقط والجو كلش برد بما ان فاتحين شباك، كالت مريم سدو خاف نبرد، مشينه اكثر من نص ساعة واللتفت اطلس عليهه..

-الاطلس: شلون صرتي؟

-مريم: احسن

-الاطلس: محتاجة شي؟

-لا تسلم

-الاطلس: اكلتي شي؟

-نورسين: بيبي خليهه براحتهه

-مريم: لا ما اكلت

ابتسمت منتصرة ما انطه لنورسين وجه وجر كيكة وعصير من الجنطة مالته وحطهن بيد مريم..

-الاطلس: اكلي عيني

-ماريد استاذ ماشتهي

-اكلي لا تفحطيني

حچاهه بشقه، ضحكت وياه ونزلت عيونهه اباوع لنورسين عيونهه صارت بگصتهه دولي شكو تغارين من رجال ومرته..

-دعاء: استاذ شكراً لشهامتك

ابتسم بدون لا يعلق ورجع لمكانه، فتحت الكيكة لمريم وكلت بصوت شويه عالي تعمدته يسمع..

-دعاء: مريم طلع صدك لطيف

-مريم: اششش دعاء شبيچ

-دعاء: هههههه شبيچ صرتي حمرة ياااا

-مريم: وسم شبيچ تعيطين راح تنكتلين دعاء

ضحكت ورجعت لمكاني فرحانة كلش خصوصاً من رجعت اجواء السيارة حلوة ووناسة بعدما مريم صارت احسن والدم رجع لوجهها..

اخيراً نزلنه استراحة گالو راح نتغده والي يريد يروح للحمامات او يصلي ياخذ راحته، رحنه البنات للحمامات وسمعت مجموعة كدامنه يكهكهن ويباوعن لـ مريم..

-دعاء: ذني شبيهن البومات؟

-مريم: خيولن امشي معليج بيهن

-دعاء: دخلينه نفتهم شسالفة

-مريم: هنه تافهات وسخيفات على كلشي يضحكن

تنرفزت ومريم واضحة نرفزتهه، حجت تينا ان افضل شي نتاجهلهن لان هنه صاحبات مشاكل ايدتهه مريم وذكرتني بالمشكلة الصارت ويه خولة قبل فترة ذني نفسهن البنات الي چانن وياهه ووحدة منهن الي اتهمت مريم حامل..

-مريم: دعاء لزمي اغراضي ادخل للحمام واطلع مو توكعين شي بالكاع يجوز مو طاهرة

هزيت راسي وشلت شالهه وجواريبهه والكوت مالتهه وهي دخلت للحمام، اباوع للبنات يبسبسن ويحجن مانطيتهن اهمية وبقيت واكفة انتظر مريم تطلع..

-سوتج حارسهه ههههه

-دعاء: الله

-ها خيرج

-دعاء: اني من الصبح كاعدة مشتهية مشكلة وانتِ اجيتي بوجهي بكيفج تردينه نتعارك لو تكفين خيرج شرچ وتكملين طريقچ!!

-اشايفات روحچن انتن

-دعاء: من حقنه نشوف ارواحنه اني واختي شو جمال وكمال وحشمة وادب وموتي قهر ديلا

-خيولن هالسوالف حفظناهه

-دعاء: اي راجعي درسچ ماكو ضرر

-اختج تتماوع على الرؤساء وتتخربط بحضنهم وتمثل المرض كله بس حتى واحد منهم يلتفتلهه عووع عووع بيييئة

-دعاء: والله ماكو بيئة غيرج عايفة الدنيا كلهه ودوبچ من دوب اختي

-مريم: دعاء عوفيهننن دعااااء

طلعت من الحمام وراحت تغسل ايديهه سويت مثل متريد والنرفزة واصلة عندي للسگف تمنيت اللزمهن وادك راس براس..

-ها حبي بشري خوما وگع الطفل هههههههه

اللتفتت مريم عليهن بكل جسمهه وفكت عيونهه، كملت الثانية بنفس الاسلوب الرديء..

-ندري بيج حامل بس طمنينه ابنج وكع لا لو يوكع بلكت تخلصين من هالفضيحة

-مريم: حقييييررررةةة منو الحااااامل ولججج منوووووو

هجمت عليهن ولزمت وحدة من شعرهه تعت بي، تخبلت عليهن ورحت اتعارك ويه الثانية.. على اثر صوتنه اجت تينا وفزعت ويانه واجن بعد بنات ماعرف منين..

مريم لزمت ايد وحدة منهن وعضتهه حييل ذيج عاطت وضربت مرايم على وجهها.. رحت دفعتهه على المغاسل فشرت علينه ورجعت تريد تهجم..

-هاي شصااايررر

دخلت مرة وقورة الكل وگف بس اني بعدني اتعارك جرتني مريم الهه وهمست حتى ابطل عراك..

-دعاء: خليني اربيهنننن ولج خلينييي

-اي ربيهن حبيبتي بس مو هنا بالشااارع!!!

عاطتهه المرة الوقورة، خزرتني فتحت حلگهه تلفح نار وضربت الحايط بيدهه..

-انتن جهال؟؟؟ احجن جهاااال؟؟؟ موظفااات شركة هذي اخلاقچنننن

-تينا: مدام البنات تهجمو على مريم

-دعاء: وطعنو بشرف اختي كلشي ولا قذف المحصناات يا مدااام

-اي بس مو هيج تنحل الامور كلشي بالهداوة

-مريم: مدام اني ماسمح لأي وحدة تتهمني بشرفي

-تينا: وهنه حچن هيج لانهه لابسة حجاب محاربات حجابهه يكولن كل التلبس حجاب سوالفهه من جوه الجوه

صارن يبررن الحقيرات ويچذبونه علت الاصوات والمرة عاطت بينه كلنه وطلعت راحن وياهه المقرفات وكهكهاتهن واصلتلي..

-دعاء: شلون طايقاتهم ذني يلعبن النفس

-تينا: اووه ذني محد خلصان منهن شكد يترزلن بس ميكدرون يفصلوهن هاي ام راس الاخضر تصير حبيبة مدير وبيناتهم بلاوي

-دعاء: هه حبيبة المدير وتحجي بالشرف

-مريم: كافي اختنگت من سيرتهن خلوني اتوضا

وكفت تتوضا وتينا لزمت اغراضي ويه اغراض مريم توضيت وياهه وطلعنه كلنه سوه للمصلى، شفنه ضحى واكفة تصلي انتبهت للمصلى مابي ترب ندست مريم بهمس..

-ماكو تربة

-مريم: جيبيلنه حجارة من بره

أيدتهه وجبت حصوايتين مسطحات، وگفنه نصلي واشوف ضحى وكم بنية عيونهن علينه.. كعدنه بين صلاة الظهر والعصر نسبح تسبيحة الزهراء وضحى ابتسمت وكعدت بصف مريم..

كملنه صلاتنه وطلعنه للمطعم القريب واخذته طاولة نكعد عليهه جانت قريبة من طاولة الاطلس اختاريتهه بالعمدني..

طلبنه غده واشوف ضحى تلوب الى ان ماتحملت بعد وكالت..

-مريم ممكن سؤال فضولي؟

-مريم: تفضلي حبي

-ضحى: ماقصد شي بكلامي بس يعني من باب ازود معلوماتي وفضول لا اكثر

-مريم: كولي ضحاوي

-ضحى: ليش تصلون على حجارة؟

-مريم: مو ماكو ترب هنا واحنه مجايبات ويانه نسينه

-ضحى: اي اقصد عليهه هاي الحجارة من التراب ليش تعبدوهه شنو الغاية منهه؟

-مريم: هههه منعبدهه حبي بس عدنه قاعدة ان متصلح الصلاة الا السجود على الارض او ما انبت منها ميصير نسجد على سجادة او قطعة قماش او أي شي مصنوع من صنع الانسان

تقدمت وحدة من البنات وگعدت بصف ضحى وتسائلت بحيرة..

-يعني انتو من كيفكم اخترعتو هذا الشي؟

-مريم: لا اكيد، بالسيرة النبوية انذكر ان النبي عنده قطعة من السعف يشيلهه وياه ويضعهه على مكان الي يصلي بي هذا موجود ومذكور في صحيح البخاري وتكدرين تتأكدين بنفسج يعني مابيهه اشكال من الطرفين

-ضحى: زين؟ بس انتو شنو هاي الحجارة

-مريم: التربة، سووهه تبركاً بتربة الامام الحسين وبيهه ثواب الي يسجد على تربة كربلاء وسووهه للسهولة واساساً التراب من الارض فـ يصح السجود عليه

-ضحى: حلو هالشي حبيت

-دعاء: حتى اني حبيت خوش معلومة مريوم

-تينا: كلش واو

كالتهه بالشقة، ضحكنه على تينا واسلوبهه مبينه كلشي ممفتهمة ودتحجيهه على الواهس.. وصل الاكل وضحى بقت تستفسر عن هواي شغلات تخص المذهب الشيعي وحلوة اسئلتهه مثقفة..

مريم تجاوبهه ببساطة بالشغلات الي تعرفهه ومن توصل لشي متعرفه تكول ببراءة "ماعرف" او ماعندي معلومة بخصوص هذا الموضوع..

-ها آنسات حلتلكم السوالف؟

-ضحى: مسيو حمزة ما حسينه بالوقت والله

-حمزة: يله نريد نتوكل

طلبنه نروح للحمامات نترتب ونصعد السيارة، كملنه وطلعنه ايد بأيد اححح اي شفتك.. الاطلس واكف وبيده الموبايل قريب السيارة..

-دعاء: روحي احجي وياه

-مريم: ياا شكو احجي وياه شبيچ دعاء ليش مهيلگه

-دعاء: اشكيله من البنات الهاجموچ هو مو مديرج!

-مريم: خيولن ماريد اكبر الموضوع استحي شنو اگوله تهموني اني حامل!

-دعاء: على كيفج بنيتي تره هو رجلچ شبيچ نسيتي

-مريم: اييي بس هو ميعرف اني مرته بنيتيي

ضجت منهه وبقيت واكفه مطنگرة بمكاني، فجأة مريم لزمت بطنهه للمرة الثانية وعفصت وجهها متألمة..

-شبيچ؟؟؟ هم توجعتي؟؟

-مريم: اخخ اي ماعرف شبيه دعاوي

-شبيكم؟ مريم هم تعبتي؟؟

رفعت عيوني واذا اشوف ابو الطوط گدامنه القلق ماكل ملامحه وعيونه تاكل بمرايمي..

-مريم: لا استاذ اني زينة

-الاطلس: بس نوصل نشوفلج طبيب ضروري

-مريم: اي ان شاء الله

تركت ايدهه وهمستلهه تروح للسيارة واني اللحگهه، سوت مثل ما كلت وانتبهتله راح وراهه.. فرحت واني اشوفه لاحگهه رحت امشي وراهم واسمعه يسولف وياهه ورجع يسئلهه على صحتهه وبعدهه گال..

-الاطلس: حلوة معلوماتج

-مريم: هاا؟

-الاطلس: سمعتج وانتِ تشرحين لـ ضحى عن التربة

-مريم: صوتي هيج چان عالي؟

-چنتي كلش منفعلة وكلنه انتبهنه عليج

-عزه شكد فشلة هاي دومي مخزيه روحي بالمناقشات على گولة امي تصعديلچ منبر

-بس معلومة قيمة ما جنت اعرف ليش نسجد على تربة ولا اجه ببالي ابحث عن الموضوع

-مريم: هو بي بعد روايات عن النبي بس ماردت ادوخ البنات وانطيتهم رواية تجمع المذهبين

-خطوة ذكية

-اكيد لازم اقنعهه بشي موجود عدهم هم

وصلو لبوابة السيارة ووگفو على صفحة يكملون نقاشهم واني واكفة وره مريم اتسمع عليهم خرب شكد حلوين..

-الاطلس: عندج ثقافة دينية منو علمج؟

-مريم: جان عدنه شيخ ليبي جيراننه وعلمني على هوايه شغلات چنت دائماً اروحله اهتم بي وانظف مكانه خطية زوجته متوفية وماعنده اطفال

يسمعلهه ومبتسم صافن على حلگهه واختي انطلقت تسولف بمغامراتهه..

-مريم: كلما اروحله اشوف كتب كومة حواليه هيج اطنان هو جان يدرس بالحوزة بالنجف ومن يسافر فد افقده وكلما يقره شي مهم او شي يفيدني يعلمني ويكول تفيدج للزمن

-الاطلس: وفادتچ

-طبعاً اكيد، هو صح نسيت هواي شغلات للاسف بس احاول استذكر الاكدر عليه

-وينه هذا الشيخ بعده موجود؟

-لا مات الله يرحمه، مات بين كتبه خطية

-الله يرحمه

طلعت من السيارة الغثة نورسين مدت راسهه وشافتهم واكفين سوه اجت نبصت بيناتهم..

-نورسين: ها عيني شو واكف هنا

-الاطلس: اي جاي اتناقش

-نورسين: شنو تتناقشون شاركوني؟

-مريم: نحجي عن التربة

-نورسين: ها وشنو تتناقشون عنهه هي حجارة ويصلون عليهه شنو المهم البيهه؟

-الاطلس: تحتاجين مريم تنطيج دروس نورسين اكيد راح تستفادين

حچاهه مبتسم ويوزع عيونه على مريم وعليهه، ضحكت نورسين وكالت بمياعه..

-نورسين: كيوت اوكي اشوف وقتي عود

-دعاء: احمم مرايم شنو ما ناوين تصعدون السيارة يبعد گلبي

-الاطلس: اي تفضلو بنات

دخلنه جوه واشوف مريم مبتسمة ما مأثرة بيهه نورسين بكثر ما اثرت بيهه جملة الاطلس من قصف نورسين..

مشت السيارة بعدما كمل العدد الجو بره كلش برد والسيارة صارت خنگة من التدفأة، تعبنه من الكعدة والطريق صار خطر السايق يخاف السيارة تزلگ..

**

"رقية"
متت خوف كاعدة على اعصابي لازمة اسيل حيل وعيني على الطريق، السيارة كل شوية تزلگ والوضع توتر صرت انوح وابجي..

-رقية: ولج اني شجابني متواززية

-اسيل: رقية اهدي ماكو شي هذا السايق زين

-رقية: يا زين ولج راح نسوي حادث شوفي شلون يمشيي

-اسيل: رقية كافي ترعبيني انوب

رفعت راسي من شفت مسلم مد راسه علينه، عدلت كعدتي بسرعة ورتبت روحي تخربطت من الخوف..

-مسلم: ها بنات شبيكم؟

-اسيل: رقية خايفة

-مسلم: لا رقية ما تسوه عيوني

-رقية: اي صحيح اصلاً ماخفت هاي اسيل تبچي

-اسيل: وين بجيت اني

-رقية: دباعي الدموع والعيون حمر صدك جذب

-مسلم: شبيچ اسيله عيونج حمر

-اسيل: عندي حساسية من البرودة ليش شنو انتو متعرفون!

-مسلم: هاا؟ لا والله مادري نسيت

-اسيل: لو يهمك چان عرفت

حچتهه مبوزه وكتفت ايديهه ودارت وجهها على الجامة، فطست ضحك على سوالفهه كاعدة تنكد على الرجال، باوعت لمسلم ذبلت ملامحه وبقى يباوعلهه دگيت على راسية الكرسي وكلت بضحكة..

-رقية: مسيلم معليك بيهه هاي نكدية حتى ويايه هيج

-مسلم: اسيل.. اسيله.. اسيل

افأفت بدون لتجاوبه، ندستهه متنرفزة شبيهه هاي تخبلت كدامه..

-رقية بهمس: اسيل شبيچ عبالك حبيبچ عيب ميصير هيج تسوين وياه

عدلت كعدتهه بسرعة وسحبت شعرهه لوره اذنهه ودارت نظراتهه عليه..

-اسيل: نعم

-مسلم: شبيچ وياي اسيل ما تتحملين كلمة صايرة

-اسيل: مابيه شي والله بس تعبانة شويه.. شو رقية كتفچ اريد انام

حطت راسهه على كتفي وغمضت عيونهه، لاحظت مسلم لسه ماد راسه علينه ذب حسرة ورجع لمكانه ماعرف ليش اسيل تعامله بكل هاي القسوة الوحيد من دون الكل..

دقايق واجت لأسيل رسالة على موبايلهه، رفعت تلفونهه وضمته عني متقبل اشوف بس شفت ابتسامتهه الي انرسمت على وجهها..

-خليني اشوف هاي من منوو

-اسيل: من اختي حبيبتي

هزيت راسي وهي هم ذبت تلفونهه بدون لتجاوب، مديت راسي اشوف العصافير الكدامي الكناري والنسر كاعدين ويتبسبسون..

-سارة: جمدت بعد ماكدر احجي اششش

-حمزة: هههههه ههههههههههههه

بس يضحك وهي كارصة بكرسيهه وترجف اعرفهه اختي خوافة وبعد اكثر مني، صارت تتلاطم وتعيط بصوت ناصي كرصت ايد حمزة من التيشيرت وحچت وهي خازرته..

-سارة: گوله خلي يسوق عددل

ضحك ممهتم وهي شبعته تكرص وهو ولا يمه، عاطت بصوت عالي سارة متنرفزة..

-اطلسس اطلسسسس

اللتفت الاسباني عليهه عاكد حاجبه متفاجئ من نبرتهه العالية، اشرت سارة على حمزة وكالت..

-سارة: ميقبل يحاچي السايق حباب انتَ حاچيي خلي يخففف

عاط عمر من وره روحه واصلة لخشمه من لا سبب..

-عمر: بعد شنيي يمشي على بيضضض

-سارة: اففف شعليك اخاااف حمززززة

-حمزة: ولج فضحتينه شبيچ ويانه عالم

-سارة: الله يخليك خلي يخفف فدوة الله يخليك

تحجي گوة من الرجفة يمته سارة يطلع صوتهه هي دودة من الهدوء والخجل بس هسة طلع جبار الي بداخلهه، البنات ايدوهه وحچت وحدة لابسة حجاب ليكدام..

-مريم: استاذ اي فدوة خلي يخفف راح نموت هناا ممستعجلين على موتنه احنه تره

-جميلة: موسيووو خلي يخفف فدووة لوجهك اروح

-الاطلس: بنات ما يصير جاي يسوق بأعتدال شنو تعلمو بشغله بعد؟

-نورسين: اطلسسس بليزز خلي يخفف تعبت نفسياً

-علي: يابة ذبوني مناا عليكم الحمزززة ماريد اروح بعد كافي ولجن اكعدن راحححة لا تبزعنه

-حمزة: ولك عليووي

-علي: وعلي مو سالفة هاااي

سكتنه خايفات منحجي وهاي سارة ترجف شحالهه الى ان حمزة حچى ويه السايق يخفف وصار الطريق بعد اطول..

متنه ياله وصلنه للمكان المنشود ومجرد ما بدت البنايات تبين طرنه من الفرح والحماس، بعد جولة بسيطة بالسيارة وصلنه للفندق الي مأجري الكل نزل وصارت هوسة بصالة الفندق..

-حمزة: شباب بنات الحمد لله على سلامتكم جميعاً، الغرفة ثنائية وثلاثية ورباعية اختارو الي يعجبكم.. الشباب بالطابق الاول والثاني والبنات بالطابق الثالث والرابع والخامس

صاحو الشباب معترضين ومنزعجين ليش يعزلون البنات عنهم، حمزة ضحك وكال بغمزة ماكرة..

-شباب شنو هاي عيني ماتفقنه هيج اكعدو راحة

-علي: هسة ليش ليش تكطع عنه المي والهواا ليشش

-مسلم: گلبي نغنزني من هالسفرة عرفت راح تصير طركاعة

-الهوووااا موسيو حمزة هووواا هووواا انكطع الهوووااا

-حمزة: كافي عااد يله كلمن لغرفته

حچى واحد من الموظفين لازم گلبه ويحجي..

-مسيو اطلس تدخل احكيلك شي كلمة

ضحك بدون ليجاوبه وتفرقنه كلمن لغرفته، صرنه اني واسيل وسارة بغرفة اول ما دخلنه سارة ذبت روحهه على الفراش وذبت نفس تعبانة..

-سارة: اكره نفسي

-رقية: هاا سراوي بدينه

ضمت وجهها بالمخدة وبقت ترفس بمكانهه، كعدت اسيل على الفراش وفتحت شعرهه ووجهها مطنكر والدمعة بعينهه ياااا ذني شبيهن!!

**

"مريم"
دعاء كتلتني كتل الا ناخذ الغرفة الي بجانب خوات اطلس تنازلت ودخلت وياهه الغرفة ثلاثية اني ودعاء وتينا استقرينه بيهه..

-تينا: بنات يله جهزو نفسكم خلونه نطلع

-مريم: خلينه نجر نفس تينا

-دعاء: لا فشلة كالو بالخمسة الالتقاء لا نأخرهم

وافقتهم الرأي وگمت بس غسلت وبقينه بملابسنه طلعنه من الغرفة متوجهات لصالة الفندق وصارت بوجهي نورسين..

ماهتميتلهه ورحت اكعد على القنفات دقايق معدودة والكل اللتم حچالنه حمزة عن جدولنه ووين راح نروح وشنسوي طلعنه للسوك اول شي بطلب من البنات والولد نسحسل بيهم كل شوية متذمرين وواحد ينگ واحنه ممهتمات..

مشى اليوم الاول حلو ومتعب بنفس الوقت، اجه اليوم الثاني ورجعنه للسوك والولد نصبوهه عرك وواحد يحجي على الثاني.. كملنه تسوق وتوجهنه لفندق، الجو يگص گص من البرد نطگ سن بسن دعاء تمشي وتدعي عليه لان جبتهه واني ارزل بيهه..

-مريم: حل بيج حلل اي عساچ تبردين اكثر واكثر بهذلتيني ولطشتيني لطش بالرجال بله شيكول عليه

-دعاء: مرررته شيكول انتِ مررررته

-اوووف منج دعاء اوففف

-دمشي اسرع راح اتجمد بمكاني

صعدنه السيارة ما اشتريت شي مالي واهس وبطني توجعني ما صرت احسن ولا قبلت اروح للدكتور چذبت وگلتلهم ممتوجعة والعكس صحيح طبعاً..

وصلنه الفندق بس نزلو غراضهم وتوجهنه نتعشى، اليوم ليلة راس السنة وواضح عدهم طقوس خاصة، اخذونه لمطعم گعدته بره والخضار محاوطنه من كل الجهات ما حسينه بالبرد كلش جايبين صوبات نفطية جبيرة ومحاوطة المطعم..

الاجواء ولا اروع والعشا چان طيب ولمة صديقات ضحى وتينا وحدة تداهر الثانية وانسجمت ويه جميلة للمرة الاولى واكيد ريتاج ولهيب حوالينه..

بينما احنه دنسولف وانفتحت موسيقى هادئة دعاء كالت وهي تضحك..

-تخيلو يكومون الناس ويركصون سوه

بس ما صار هالشي تغيرت الموسيقى فوراً وتحولت لموسيقى عيد ميلاد! باوعت حواليه ادور بعيوني مستغربة حالي حال الكل..

-تينا: الله عيد ميلاد غااادة

-مريم: منو غادة؟

-تينا: تشتغل ويانه تصير سكرتيرة مسيو حمزة اوووي هو كل سنة يحتفل بعيد ميلادهه ويجيبلهه كيكة يا عمرري

بدو يغنولهه اغنية عيد الميلاد وهي متفاجأة وفرحانة كلش خطية هي چبيرة بالعمر وتينا تكول ممتزوجة ولا عدهه احد، جابو كيكتهه وحمزة واكف بجانبهه يغني وياهم..

نفخت شمعتهه وتشكرت من حمزة جرته من وجهه وباست خده خطية شكلهه يقهر ومثل المطي ردت ابجي عليهه بس ما لحكت لان رجعت الاغنية انعادت ورجعو يغنوهه بس هالمرة الي!

فتحت عيوني وحلگي سوه، تقدم كرسون بيده كيكة وشمعة رقم 25 ومكتوب عليهه..

"كل عام وانتِ بخير مرمر"

غطيت حلگي ميته من الضحك والفرح باوعت لـ دعاء مصدومة نفسي وكل صديقاتي هم ماعرف منو مسويلي هالمفاجأة..

-عمر: هاي شنو عيد ميلاد مريم هم كل عام وانتِ بألف الف خير مرايم الحاتة

ضحكت وضميت وجهي خجلانة الكل صار يتمنالي الخير متت من المستحى ماعرفت شنو اجاوبهم، اجه ببالي شخص واحد گتله على يوم ميلادي وهو.. الاطلس!

تقدم عليه بخطوات رزنة وابتسامة صادقة مرسومة على ثغره عدل هندامه وكال بصوت مليان لطافة..

-الاطلس: كل عام وانتِ بخير آنستي

-مريم: تسلم استاذ وانتَ بخير

قاطع نظراتنه تينا من كالت خلونه نقطع الكيكة، قطعتهه ودعاء تگرص بيه تغمز وتلمز وتهمس بأذني بمكر..

-دعاء: روحي تشكري منه مرمر روحييي

-مريم: اششش عوفيني ولج استحيي

-روحي عيب امشي مرمرته گومييي

-عزه دعاء ولج عوفيني يبوو عليج

-دعاء: اذا صار شي منا مناك سولفيلي عود مو تضمضمين

-ياا شيصير يعني شو دوخري

-بووسة گرصة حضنه عضضه

-يا ادبسززز

اهمس وازلغ بخدودي وهي تگومني، اخيراً تنازلت وكمت ارجف لنهاية المطعم راح، اكثر من مرة ردت اتراجع ودعاء تشجعني اكمل طريقي..

وصلتله چان ديحجي بالموبايل من شافني وصلت عنده غلقه وضمه بجيبه، ابتسم مشجعني اكمل طريقي ناحيته وكفت على بعد عنه ونصيت مستحية..

-استاذ شنو هالمفاجأة

-الاطلس: تستاهليهه

-هو باجر عيد ميلادي مو اليوم

-ادري بس ماردت اسببلج احراج لان باجر راح تتحول الانظار كلهه بس عليج وتخجلين اكثر

هزيت راسي وبقيت اللعب بأطراف الشال، عدل وگفته وتحمحم..

-الاطلس: المطعم هذا كلش حلو هاي ثالث مرة اجي

-مريم: صدك

-اي

-مريم: اممم

-اي

-اممم

-الاطلس: هههههه راح تخلصيهه امم عليه

-ماعرف شكول بس شكراً على المفاجأة كلش فرحت

-تستاهليهه مريم تستاهليهه

-اممم

-ماتسولفين خايبة تشنجت من وراج

-ههههه استاذ استحي شسولف

-تشكريني بعد هم راضي

-ههههه شكراً

ضحك وحك شعره وكال..

-العفو

تمشيت ليكدام وهو مشى ويايه عبرنه المطعم ودخلنه لحديقته وتفاجأت من شفت نهر فرحت ورحت اتقدم اكثر وهو خلفي يمشي..

-استاذ هذا شكد حلو

-اي مو كتلج

-يخبل كلش احب الطبيعة ماراكش تجنن هاي اول مرة اجي

-اممم

-تخبل والله من شفتهه كلت هاي وين چنت عنهه

-تدرين بيهه هواي جن ماراكش

-صخاام الصخمني صدككك

-اي معروفة

-لا لا استاذ صدك

-والله شبيچ

-شفت جني هنا فد مرة؟؟

-اي شفت

-وين

-رحنه لمكان اني وجماعتي وطلعت الجنانوه علينه

-صدك استاذ لو تقشمر عليه حباب تره اني ماتحمل اموت خوف گلبي يوكف والله

-سلامة گلبج

-شكراً بس عن المبالغة صدك يوكف

-سلامته

حچاهه بصوت راخي وتقدم وگف گدامي ضبط، درت وجهي عنه اباوع النهر واتلفت حواليه ماكو احد مادري شعجب..

-مريم: ليش محد اكو؟

-مادري

-مكان يخبل لازم يكون مزدحم

-امم

-استاذ يله اني ارجع واجيب اختي وصديقاتي خطية خليهن يتونسن

عبرته وجر ايدي عليه رجعني اوكف بمكاني وكال..

-لا اوكفي بعد شوي

-ياا ليش

-خلينه نستمتع وحدنه

-هههه لا هاي انانية ماقبل بيهه

جرني عليه اكثر گلبي وگع بحضني من الصدمة، صرت قريبة منه كلش وعيوني تعلكت بعيونه..

-الاطلس: بس اني اقبل بيهه

-مريم: شنو هي

-الانانية

-هاا

-اي

-استاذ احم شوف هذا النهر يخبل موو

-مو

-كلش يجنن ومريح للعين

-صحيح

يمة هذا شبي عزه بعيني شتصرف هسة عيونه لاطشة ويوزع نظراته بوجهي ويدرس ملامحي..

-مريم: يااا استاذ تذكرت اي دعاء اختي كالت ما اتأخر عليهه شوف خطية اكيد منتظرتني هسة

فلتت من ايده ومشيت سريع اريد اروح وماحسيت الا ايده القوية تجرني من متني وايد ثانية تسحب وجهي شهگت كاتمة انفاسي من قبلني...

ماتحملت الصدمة ولا تحملت الموقف دفعته من صدره بقوة وضربته على كتفه وعطت..

-مريم: شبيككككككك

فتح عيونه عليه يلهث كأن چان يحارب كزبرت ونفسي كامت تلعب من الخوف عطت مرة ثانية مفرفحة..

-شنو هذا اللعبااان نفسسسس شلون تتجرأ تلمسنييييييييي

-مريم.. مريم بغلاة امج لا تهربين مني مريمم

رحت اركض وهو ورايه رجع جرني عليه تخبلت خفت يبوسني مرة ثانية دفعته من صدره بطريقة اقوى بس ماكدرت اقاومه ايده قوية نبتهه بمتوني وجرني عليه..

سحب راسي من وره ودگ گصتي بگصته هستوني دا اعيط وحچى بنفس الانفاس اللاهثة..

-اني اسف على جسارتي واسف لان تخطيت حدودي واسف على تجاوزي عليج اني اعترف بصلافتي وتصرفي الوقح بس اسمعيني مريم وانطيني فرصة

-يعني تعرف بروحك صلف

ذب نفس وراد يقربني اكثر ماقبلت واكتفيت بهذا القرب، جسمي يرجف وانفاسي تركض ركض نيضات گلبي راح تتوقف بأي ثانية..

-تعبت مريم.. تعبت منج تعبت

ذب حسرة وجر نفس قوي وراهه حسيته ديشمني كزبر جسمي وجمدت اطرافي..

-انام انتِ ببالي.. اكعد ببالي.. اشتغل ببالي.. ابتعد ببالي.. اتقرب ببالي.. اشرد منچ الچ كافيي عتقينيي

-شسويت اني شسويت انتَ مچلب بيه عوفنيي

-ماكدر حاولت اكثر من مرة بس بكل مرة اللگاني واگف بباب مكتبچ واراقبج من تشتغلين.. اتعمد اأخرچ بالشغل حتى اشبع منج شوف اشم ريحتج الهادئة الما تظهر لكل واحد بس الي، يدگ گلبي وتتخربط احوالي اريد اسيطر على روحي وما ابين بس.. بس ماكدر

-استاذ..

-بعز تعاستي من تجيني افرح، ضحكتج اخخخ يا ضحكتج تضيگ بيه الدنيا وتتوسع بشوفة بياض سنچ..

اسمعله والرعشة ماخذتني نفسي گطعته وهو يسولف مصدومة ماعرف بشنو اعبر وشنو لازم اكول..

-مريم انطيني فرصة خليچ يمي لا تروحين خليني ابقى بهاي السعادة لا تسلبيهه مني

قربني عليه اكثر ميفصلنه غير خمس شهگات من انفاسه..

-الاطلس: فحطتيني وشلعتي گلبي شلع من مكانه مرمرتي

-استاذ

-عيون الاستاذ

-شبيك

دفعته عني والنرفزة واصله حدهه ويايه كارهته وكارهه نفسي لان سمحتلهه تسمع لكلامه، تذكرت كل المضى واكثر ما ألمني وقززني منه هو علاقته وخيانته مو لمرته الي هي اني! خيانته لنورسين..

-انتَ مرتبط بنورسين استاااذ شنو متعلم كل بنية تحجي وياهه هذا الحجي لو شنوو بالضبط؟؟

-شنو؟؟

-شنو شنوو نورسين المسكينة شنوو ذنبهه تلعب عليهه وتتغزل بغيرهه؟!!

-يا نورسين شكو شعليه بيهه اني

-مو حبيبتككك وحببب وغراااام وهياااام بيناتكم وتجيك لتوالي الليل للمكتب وتبقىى وياااك وتكولك بيبيييي تعال نسهههر اليوممم وتعااال يمييي اذا تعبااان بيبيييي

-اوكفي لحظة هاي شبيچ بكيفج ترهمين العالم

-شنو بكيفي الكل يعرفكم مرتبطين!!

-وغلاوة امي وعيونهه الماحب أي شي بهاي الدنيا بگدهه اني ونورسين ما مرتبطين!! نورسين صديقتي من الطفولة ربينه سوه وكبرنه سوه انتِ شنو جاي تحجين!

-والاشاعات؟؟ وكلام الناس؟؟

-طززز بالناس اني شعليه بيهم جاي اكلج بنفسييي اني ما مرتبط بأي بنية هاي حياتي كلها عمري 32 سنة بحيااتي ما حبيت بنية ولا حتى صاحبت للونسة!!

-استاذ بس..

-لا بس ولا هالخرط مريم لا تصدكين كلشي الناس ماعدهه غير الگال وگلت! واذا ما تصدكيني ذيچ نورسين روحي سأليهه علاقتج ويه اطلس شنوو

-هاا مو مادري اني بس انتَ احسك.. مادري احس تحبون بعض

-احبهه شنو بابا اكلج صديقتي من اني وطفل صارلنه سنين ويه بعض واحبهه كـ صديقة واخت وغير هالشي ماكو بيناتنه

ردت اتهمه اتهام ثاني واذكره بزواجه وسكتت مو وكتهه لازم يكون الوقت مناسب وميكون معصب اريده يحجي كلشي..

-استاذ

-اخخخ مريم اااخخ شلعتي گلبي وشعلتيني شععل

-اي اني شعليه شمعرفني ممرتبط بنورسين

-تعاليي سألينييي

-تره انتَ مديري يعني تخيل اجي اسألك وتگولي انتِ شعليج والله اگلب الدنيا ونتعارك

ضحك بقوة اول مرة اشوف ضحكته الحيوية، رد سحبني عليه حاولت ابتعد وشدني بين ايده، نزل وجهه عليه عيوني كامت تلفح نار من الخجل والمشاعر الغريبة..

-اي تعالي چان تعاركنه

-هاا!!

-اي شبيچ نكسب شوفتج واراضيچ بطريقتي

-لا لا استاذ ميصير هيج هدني يبووو عزه بعينج مررريم يبووو

-اي عفيه اي هههههههه

دفعني على العامود المثبته عليه المظلة ضرب ظهري بيهه هذا شبي تخبل عليه صح رجلي بس استحي شنو ماعنده عيب هذا..

-استاذ هدنيي تره اني محجبببة

-ادري بيج محجبة

-احترررم حجابي استااااذ

-محترمه شوفي كاضج من ردانج

-ولاطشنيي بيك ميصير هيج استاذ حررام حررام

-اي صيحي بعد خليهم يسمعون ويشوفونه هيج

-صخام تريد تخزيني انتَ!!

-اي

-والله اصير على كل لسان استاذ حرام عليك

-حتى تصيرين الي وبعد خلي ابن امه يفكر بيج وياخذج مني

ماتحملت ضحكت خرب بـ بليسه غزله حلو هذا، تذكرت بسرعة ورجعت انكد واطنگر..

-استاذ هسة شتريد مني

-تبقين وياي وما تحرميني منج.. ما تهربين ولا تروحين لغيري دنيتي ظلمة بدونج مريم

-ليش تجذب هذا الگمر شعلاته ضاوي الدنيا

-الدنيا گمرية بس احتاج عيونج حتى اشوف دربي مرمر

-امم.. اءء.. مادري.. راح اجي لابسة مناظر شمسية باجر عناد بيك

-ههههههههههه لبسي حتى اجرهن وابوسج كدام الكل

-والحجاااااااب

-ميخالف هاي حالات خاصة مريم انطينه فنتگ

-اي وندخل نار جهنم لان حضرة جناب استاذ اطلس ميكدر يلزم روحه!!

-هسة انتِ شبيچ معصبة

-من ورااااك

بقى على ابتسامته وذب نفس عالي هز راسه وكال بصوت كله حب ورغبة..

-اريد اصيح بعالي صوتي هاي البت الي واعمي عين التعاينلهه

-استاذ رجاءً...

-رغم صلابتي وملامحي الحزينة، شريط حياتي الحقير ومرضي المرير گلبي تخشن من الظلم والطغيان بس لان الج.. لان وتمرمر بيچ مرمرتي........

يتبع ♠️💸......

• ━━━━━━❪♣❫━━━━━━ •

ها شلونكممم 😭💕💕💕💕💕

بارت عبارة عن فراشاااات 🦋🦋🦋🦋💕💕💕

ابهروني بتوقعاتكم الجاية تحليلاتكم للاحداث كُـلشي وكلاشي 🙊💕

حسابي الانستا 💕