رواية الاطلس "دمليج أسود" الفصل الثاني والعشرون 22 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

يا جمالاً ليس لهُ اربعون ♥️

• ━━━━━━❪♣❫━━━━━━ •

ماكدر اشوف من مكاني منو اندارو الولد يشوفون واذا عمر يشهگ بصوت فاتح عيونه وعلي جمد بمكانه..

-حصة: شفييييك شصاااير

دخل للبيت مغضب عاكد الحاحب الوجه يخوف من الدمارات المنتشرة شعره مخربط ودكم قميصه مفتحة صدره احمر مورم، شكله مخيف واعصابه ترجف علي باوع لعمر وتسائلو بالنظرات..

-عمر: خالي..

-علي: خالو شنو مسوي حادث؟؟

-حصة: محمد شصايرر اطلس في شي؟؟

ما جاوبهم بيده علاكة ورقية جبيرة ترجف بيده من العصبية، باوعتله خالة بقلق وكالت بصوت خوفنه اكثر..

-حصة: حبيبي محمد شبيك يروحي

بقى واكف بمكانه يدور بعيونه عمر حمحم وكال بأبتسامة..

-خالي خير ان شاء الله؟

خزره عمو بحدة عمر عدل وگفته ووزع نظراته علينه وعلى خالة، حمحم علي وكال..

-علي: خالي محتاج شي احنه طالعين للولد

-حصة: روحو يمة حفظكم الله

هزو روسهم وطلعو بعدما رمقونه بنظرات شك كأن ديكولون احنه هم مستغربين من وضعه، اما عمو محمد فـ بقى بمكانه على نفس وضعه وخالة راحت تمسح على صدره وتبسبسله..

رفع عينه يباوعلي استحيت وخرت عيوني عن العلاكة البيده انتبهلي مبگگة عيوني فوراً هدأت ملامحه ذب نفس وكال بصوت تعبان..

-هاي بدلة سارة

-حصة: حبيبي ليش انت رحت تجيبهه

عيونهه مغورگة دموع ومبرطمة من تحجي، همستلي دعاء نعوفهم وهو عمو من وحده صعد فوك وخالة بس تضحك بهستيريا خجلانة ودتغطي الموقف الغريب الصار عافتنه وراحت للمطبخ..

-دعاء: مريم شبي عمج؟

-مريم: مادري علمي علمج

هزت راسهه ورحنه للغرفة الكاعدين بيهه اهلي امي واكفة تعدل بـ شال بسملة وترزل بيهه..

-ام مريم: ضمي شعرج يمه حرام

-بسملة: ماما يطلع من كيفه والله

-دعاء: لبسي كاب، اكلجن عود ليش العرس مختلط هسة لو جان بس نسوان والله نتشلتح ونتمكيج ونلبس اليعجبنه

-مريم: كلشي عدهم مختلط هنا

-بسملة: حرامات عود ردت اردح اني فشلة كدام الزلم

-ام مريم: بس كعدن وسكتن لا تخزنه وتخلن ابوجن يطلع العرس من عيوننا

-مريم: بنات اذا ترعنت گرصوني

-دعاء: اني هم حبابات غمزولي عضولي شفة

-بسملة: ولا يهمچن لا توصن حريصة املخچن تملخ اليوم

طلعت منهم اضحك ورحت لغرفة سارة محد موجود البنات بالغرفة الجوة يتمكيجن بس جنطة الفندق موجودة بزاوية الغرفة متكترة..

كعدت على السرير اللعب بموبايلي شوية واجتني بسملة تمشي على اطراف اصابعهه وبيدهه جنطة مدرسية..

-بسملة: زين من لكيتج وحدج

-مريم: ها حبي

-بسملة: شوفي هاي

طبكت الباب وراهه وقفلتهه وكفت على حيلي اتابع لحركاتهه الخبيثة عاكدة حاجبهه وتضحك "هيهيهيهي" وتسوي حركات شعوذة بيدهه..

-هاي شبيچ تخبلتي شكو

-بسملة: دتعالي تعالي خية تعالي

جرتني كعدتنه على السرير ولزمت الجنطة تفتحهه وتحطهه بوجهي، دورت بيهه وشهكت شهكة من اعماق گلبي من المنظر الشفته..

-ولللج بسملة هااي شنووو

-بسملة: اعضاء بشرية اريد اتاجر بيهن بس امانة لتكولين لاحد

كفختهه على راسهه والصدمة بعدهه محتلتني، جريت سفطة منهن فلوس دولارات كومة الجنطة معباية متلله..

-بسملة: هذا مهرج مرايم

-مريم: سويتيهه؟؟؟

-بسملة: اي مو كتلج اخذ حقج من ابوية وهاي فلوسج رجعتلج

-شلون اخذتيهن؟ شلون جبتيهن ابوية ما حس؟؟

-اخذتهن صار شهر حاطتهن على گلبي وابوية من ذاك اليوم لليوم هو يدورهن تخبل نبش البيت نبش ومن حسيت الجنطة راح يندلهه وديتهه لبيت جيرانه وضميتهه بمخزنهم المتروك فوگ بدون لا يحسون ادري جازفت بس الحمد لله عدت على خير

-شلون لكيتي مكان الفلوس يعني ما حاطهن بـ بنك؟

-باع هاي ابوية شكول بنك ضامهن بالبيت جوه سيراميكة مكسورة بالكاع بغرفتهم اني مادري بوجودهن ومحد يدري بس امي قبل فترة اكتشفت مكانهن وكلتلي وهي ساعدتني بهاي العملية الخطرة ودعاء تراقبنله الطريق

-هههههههه ولجن كفوو

-وفلوس مهر نورة هم اريد اخذهن بس خفت يحس كلت على المرة الجاية ارتبلي خطة

-فديتججج فدددي بسملة

-اي اي تضيعن بدوني

ضحكت وحضنتهه ابوسهه فرحانة كلش متهمني الفلوس ولا يهمني شي بس ماعرف ليش فرحانة يمكن لان عرفت شنو من خوات عندي ومنو بظهري..

-بسملة: لو تشوفين شصار بي والقران شوية وينجلط علك السكر والضغط عنده راد يموت يصيح ويرهج بينه تدمرنه بذيج الفترة تهمنه احنه ضاماتهن بس من فتش كل مكان وما لگاهن وگع اكثر وكلش مرض

-مريم: واني اكول ابوية شبي هادئ واجه يسلم عليه ويتبوسم بوجهي

-بسملة: يمكن بباله انتِ تعوضي لو عيالج

-مريم: زين ترجعيهن مو؟ يعني وره ما تمر فترة لان اني ممحتاجتهن هسة

-لج لاااا ارجعهن شنو هذا مهرج اخذي وضمي بالبنك يجي يوم يفيدج

-مريم: ادري بس كارهته احس هذا سعري نسيتي اشتروني شراية من ابوية بفلوس هذا المهر

-بسملة: والمزرعة هم مو تنسيهه بس لا لتفكرين هيج انتِ حالج حال كل البنات شنو فرقج عنهن كل بنية من حقهه المهر

هزيت راسي اي وبقيت كاعدة وصافنة عليهن، اخخ يالطمع يوصل ابو يبيع بناته وشرفه علمود كم فلس..

عافتني وكامت تطلع شلت الجنطة وضميتهه بكنتور سارة الفارغ قفلته وحطيت المفتاح بيدي، طلعت من الغرفة اروح لـ نانا اشوف وينهه دورت عليهه بالغرفة ما لكيتلهه اثر..

وكفت بغرفتهه دكيت عليهه اتسمع لموبايلهه ما سمعت الرنة هنا، شوية وجاوبتني..

-نانا: هلو مريومة

-ها نانات وينج انتِ مو بالبيت؟

-نانا: لا رحت للصالون ليش

-هيج بس ردت اشوفج اشتاقيتلج

-هههه چنتي الحلوا كنبغيك

-گلبي نانات شبيچ احسچ تعبانة؟

-ااه مريم تعبت من الهوسة العرس كله وكع على راسي شفتي بعينج ما اكعد

-الله يساعدج حبي

سكتت شوية هادئة ذبت نفس وكالت..

-نانا: محتاجتك حدايا توحشتك مريم

-مريم: واني يمج وين رايحة قابل تعالي للبيت شبعي مني شوف يله عوفي الصالونات تخبلين كلشي متحتاجين لو ترديلچ رجل

-نانا: هههههههههههه الله يسعدج مرايم على كدما تضحكيني

-مريم: والله شبيچ بلكت واحد يخطبج بالعرس خلينه نخلص

-نانا: يلا الله وايدج اذا عندج رجل منا مناك دلي عليا ههههههه

-تدللين

ضحكنه وسدينه الاتصال، بقيت اباوع للعلاكة الورقية الي بيهه بدلة سارة حاطهه عمو محمد على فراش نانا خطية هالمرة ولا ترتاح حتى البدلة جايبيهه هنا حتى هي تلبس سارة..

**

-جاي اگلكم اجه الوجه ما يتفسر

-علي: ياخي كمت اتراجف كلت يابو الحسن استر علينه هالليلة

-الاطلس: انتو متأكدين؟؟ يعني ابوي لهدرجة جان معصب؟؟

-عمر: يا معصب ولك شكله مال واحد راجع من حرب خسرانة

طلع حمزة من المنزع يعدل بـ ردن السترة وكال بهدوء رزن..

-حمزة: شنو الموضوع اطلس عندك معلومة؟

-الاطلس: لا والله تفاجأت حالي من حالكم

-مسلم: حمزاوي عدلي الرباط، اكلك اطلس لا تروح تشوفه خاف تگب بيناتكم

-عمر: اني ويه مسلم عوفه وحده خلي يهدأ لا تتقرب منه

-علي: اخر مرة تقربت منه وهو بهذا الحال جبرك تتزوج هالمرة يمكن يريدك تخلف

-الاطلس: هواي جاي يضغط عليه بخصوص هالسالفة بزعت روحي

-حمزة: گللهم اني عقيم

-الاطلس: شكد ادبسز

-علي: بس تره تنجح والله شبيك گلهم ما نريد فرخ هسة خليني مستمتع بزواجي

-الاطلس: هه اي شلون مستمتع

-مسلم: اششششش بلا طاقة سلبية اليوم عرسي بشرفكم لحد يخربه عليه

-حمزة: يوم العمر هذا سنين واني منتظر ازفك بيدي حبيبي خوية

-مسلم: گلبي اخيي والفرحة زادت عرسك وعرسي بنفس اليوم

-حمزة: روح اخوك اروحلك فدوة

-مسلم: سندي وعكازتي

-الاطلس: تره لعبت رواحنه كافي واحد يتغزل بالثاني

-علي: اي بعلي، اكلك اخي الچلب

-عمر: ها العار

-علي: احبك بس مو هواي احب ذيج الوحدة اكثر

-عمر: اسحگلك سبعتالاف نعال فدوة لوجهك الخايس

ضحكو سوه وحمزة يفر بيده وواكف على المراية يرتب هندامه، وكف الاطلس بصفه وبدو يتهامسون..

-حمزة: اليوم فرصتك

-الاطلس: اشوف شسوي

-لا تخسرهه اطلس ما يجيك يوم احسن من هذا حاول تقنعهه انتَ رايدهه وما تردون تطلكون ياخي ثنينكم تحبون بعض شنو هالعناد

-الاطلس: هي ما تحبني

اندار عليه حمزة مبحلق عيونه، اردف اطلس بنبرة يحاول يسيطر على الحزن الي بأوتاره الصوتية..

-ما تتقبل أي شي مني حتى من نتشاقة بين بعض فوراً تكلب وجهه عليه وتذكرني بالصار قبل

-حمزة: تهون حبيبي سهلهه تسهل اسعى انتَ وربي يعينك

-الاطلس: ان شاء الله

-علي: لك هلااااا اليوم للصبح للصببحح اليوم يومك يا بطل

-حمزة: علي لا تستخف احترمو رواحكم خلي يمر هاليوم على خير

-عمر: اكلك انتَ شبيك منفس ولا تكول اليوم عرسك

-حمزة: اسكت لا تزيد هَمي

-عمر: يا هَم صدك جذب

-الاطلس: شبيك حمزاوي شو ضايج

-حمزة: ما ضايج اكلك لو تروح تشوف التجهيزات بالبيت خاف محتاجين شي استحي اروح اني خاف البنات ما ياخذون راحتهم

هز راسه الاطلس وطلع من المحل، كام عمر من الكرسي وتقدم على حمزة المتوتر..

-عمر: هههه الي يشوفك يكول اول زواج اله شبيك خييّ

-حمزة: اسكت نار بصدري شلون راح تفض مادري

-علي: خيرك ولك اني حسيت ما تكدر تحجي كدام الاطلس معناهه السالفة داچة

-حمزة: ماعرف شلون اتصرف شباب حاير كلش

-مسلم: هي شنيه شيرادلهه

-حمزة: شكد عار ولي هناك اني وين وتفكيرك وين

-علي: اءء احم اني هم فهمتك هيج

-حمزة: ادبسزية مو بيدكم

-عمر: انتَ متوتر لان سارة تصير اخت غدير وتحس بغرابة ولعبان نفس لان راح تتزوجون صح؟

-حمزة: مو لعبان نفس بس... مادري مادري ولكم شنو هاي الخربطة

-مسلم: خااب طيرر غرابة وخربطة هو انتَ كاتل روحك عليهه وميت على اسمهه تالي من تردون تتزوجون كمت تتنعوص

-حمزة: مسلمممم

-علي: اوكفو شنو شنووو

-عمر: لا صدك؟؟ ولك حمزة تحب سارة انتَ لا يا كلب

-حمزة: لا تظلون تاكلون تبن حبيتهه بفترة خطوبتنه

-علي: سبحااان الله بأسبوعين حبيتهه الله الله على الجذب

-عمر: يمكن صدك عليوي لا نظلمه

-حمزة: علي، عمر مو موضوعنه هذا هسة وانتَ مسلم حسابك بعدين اطرك نصين بس اصبرلي

-مسلم: هسة اني شحچاني اشتعل عمر

-عمر: ابن الـ.... الحبابة شبيك وياي

-علي: هسة فضوهه حميزان تحب سارونة الحاتة لو لا

-حمزة: اشگ حلگككك علييي

-علي: اسفين خوية ما تعرفني ماكدر اكض لساني

-عمر: الزبدة هسة انتَ ضايج لان راح تتزوج سارة؟

-حمزة: ولكم لان جنت متزوج اختهه شبيكم انتو

-علي: افتهمك حقك وشعورك طبيعي بس لا تخلي هالشي يأثر على علاقتكم انتَ تحب سارة مثل ما افتهمنه هسة وعاجبتك واليوم هي تصير زوجتك لا تضيع اللحظة بخوف وتوتر الي جاي تحس بي طبيعي خطوبتكم صارت بسرعة كلشي مافتهمتو من بعض

-عمر: بغض النظر عن خطوبتكم السريعة لا تضيع اليوم خايف من مشاعرهه تجاهك انطي لنفسك فرصة عيش الفرحة

-حمزة: عود صايرين ناصحين ويتفلسفون زوج الجواريب

-علي: وعلي نعجبك اااخخ لو اليوم عرسي وعلي اللعب جولة

**

هوسة بهوسة اهلهم المعزومين بدو يوصلون وكل شوية احد صايح لـ نانا شكد انقهرت وتنرفزت بنفس الوقت كأن ماكو مساعدة غيرهه بهذا البيت اليوم عرس اختهه وهم يشغلوهه شنو هالظلم!

رحت للغرفة الي يتجهزن بيهه العرايس وشفت اسيل دتلبس بدلتهه، لمعت عيوني من منظرهه عروسة جميلة بكل ما تعنيه الكلمة، اختارت بدلة منفوشة من التول اللامع مع صدر لامع بكريستالات ناعمة واكمام من التول..

ابتسمت من انتبهتلي صافنة عليهه اشرتلهه بيدي طالعة تخبلين هزت راسهه والابتسامة تزيد على وجهها الحلو، اللتفتت ادور سارة مالهه اثر سألت عنهه كالو داخلة بالحمام هسة..

-غدير: يللللة خلصينه طلعي شنو عصيتي

تدگ بباب الحمام وتتأفأف، طلع الكل من الغرفة بقينه اني وغدير تباوعلي بنظرات لعبانة نفسهه وتفر بيدهه..

-شنو هاللبس التافه

-مريم: لبس تافه؟

-غدير: اقصد عدنه عرس شنو هيج لابسة افتهمنه محجبة وشريفة بس لا تعيشين الدور زايد گوة تريد العالم يحجون علينه

-مريم: مدا افهم شدخل الحجاب والشرف وحچي العالم عليكم بفستاني غدير راجعي دكتور عيون يكون افضل

دتريد تجاوبني ودخلن دعاء وبسملة للغرفة وبنفس اللحظة طلعت سارة من الحمام، اول ما شفناهه محد كدرت تغطي انهبارهه بمنظر سارة..

-دعاء: واااااااووووو

-مريم: سااارة شنو هاي ولج شهالجمال

-بسملة: اجمل عروسة تشوفهه عيوني وحق هو الله

ابتسمت سارة مجاملة ووكفت على المراية ترتب البركع على راسهه، ما كدرت اشيل عيوني عنهه عبارة عن جمرة حمرة موقدة بالنار مبرگعيهه بفستان ابيض مخصر من فوك وينزل ذيل مثل حوريات البحر، اكمامه طويلة ورقبته عالية، نازك مابي شغل هواي بس جمالهه طغى على الفستان وعلى كلشي موجود..

شكد ما احجي واكول سارة جميلة ماكدر اشرح كفاية حرفياً احلى عروسة تشوفهه عيوني بدون مبالغة..

-غدير: شدعوة عيني شدعوة شكو كل هالردة الفعل خلف الله على المكياج لبخوهه لبخ

-مريم: لا بالعكس مكياجهه ناعم كلش ونازك واحلى شي اخذتي بنصيحتي وما غطيتي النمش الي بوجهج كله

-بسملة: تخبل تخبل تخبل تخبل شنو هالجمال اووف الله يساعدك حمزة

-غدير: شنووووو شبيججج انتِ شكووو شهالخرررط اصلاً منيلهه حلوووة ولا حلوووة تخزي اصلاً مكياجهه مو حلوو لو شايفاتني بعرسي لعد شتكولن هه رايحات على سارة ام النمش يتغزلن بيهه

بسملة جفلت من ردة فعل غدير الهمجية كلبت وجهي عنهه ممهتمة لكلامهه ولا لغيرتهه الي خلتهه ترجف ورحت لسارة اعدل التاج على راسهه وارتب الكذلة النازلة على عيونهه..

-مريم بهمس: شكد ماكول طالعة حلوة احس مقصرة

-سارة: حلاة عيونج مريومتي

-مريم: معليج بغدير سريوة لا تخليهه تأثر عليج دباعي الجسم باعي الطول باعي الجمال اويليي

اتغزل بيهه واخليهه تدور حول نفسهه تضحك على كلامي وغزلي وترجع تباوع لروحهه بالمراية وتكول بهدوئهه المعتاد..

-سارة: اول مرة راح اكول اني صدك طالعة حلوة ومغرمة بشكلي

-مريم: اويليي على گلبك حمزة

ضربتني على متوني خازرتني، ثواني واشوف غدير ناطه يمنه تضحك مستهزأة وتكول..

-غدير: لعد لو تشوفيني بعرسي شتكولين هه شجاب الثوم للحلقوم

-بسملة: يعني انتِ الثوم مو؟

-غدير: سااااارة الثووووم

-مريم: افييييش يابة يا ثوم يا بصل دكولي فراولة كولي كرز دخيل الله جمالهه يبچي

-غدير: ههه هههه ههههههه لا لا منيله ههههه ولا حلوة اصلاً ابدد مو حلوة ابددد اوكفي شوفيني بعرسي شوفينييي

-دعاء: خية كلمن جمالهه شكل شسالفة

-غدير: باعن بااعن

مدت موبايلهه كدامنه تراوينه صور عرسهه ماكدر اجذب صدك طالعة تخبل والفرحة بعيونهه واضحة عكس سارة بس حمزة شكله مبوز حتى ممبتسم بالصور بس كم صورة وابتسامته مصطنعة..

-بسملة: سراوي احلى

-غدير: اييييي لان ماعندج ذوووووق

-بسملة: قابلة بذوقي سارة تشگ شگ

-دعاء: اتفق شعرج يموت سارة خو التسريحة تجنن كلش احسنتِ الاختيار من اختاريتيهه مرفوعة

-غدير: انيييي كلتلهم هيج يسوون ترره وخري اصلاً مو حلوة اني شلون اختاريتلج هيج تسريحة تعالي نفتحهه ذبي شعرج على چتافچ

-مريم: الله بعد احلى اتخيلج تموتين لو شعرج مفتوح

-غدير: كااافيييي ولا كلمةة امشوو الكل يطلع بررره امشووو

-سارة: لا ماريدهن يطلعن صيحو رقية لتبقى وحدهه خلونه نتونس ونسولف هنا

-غدير: لا ماكو متصيحون احد خلي تجي الماكيرا تعدل مكياجچ وتمسح منه يخزي

-مريم: ميحتاج بس لان الجو حار بالغرفة ليش مفاتحين التكييف؟

-غدير: خررربااان

تركناهه وحدهه واجت بسملة تهمسلنه..

-بسملة: احلف عليهه هي معطلة التكييف حتى يخرب مكياج سارة وتتعذب

-سارة: لا مو عطلان بس متقبل نفتحه وكتلنه الحر ياهو اليجي يسألهه تگله عطلان تعاركت وياهه وتصايحنه وما فاد بيهه

-دعاء: راح اموت ولجن راح اطگ

دخلت الماكيرا تعدل بمكياج سارة لازمة قلم اللاينر بيدهه ودتعدل رسمة عيونهه وبرمشة عين وگعت غدير عليهن وتخربطت عيون سارة..

-غدير: اسفة ياا ياا ما اقصد اني اسفة

-بسملة: باع عيونههاا عزه

خطية الكحلة كلهه تخربطت ووصل اللاينر لگصتهه وفوك جفن عينهه شكد انقهرت من تصرف غدير الي واضح وضوح الشمس جان متعمد..

-سارة: خرب مكياجي خرب

عيونهه دمعت راح تبجي تخبلت عليهه وغدير بس واكفة وتسوي حركات بوجهها عود مقهورة اوف راح اموت، باوعت للساعة بـ 4:25 العصر والولد يدخلون 4:30 بقينه بمكانه نتلاطم متلحك تعدل نفسهه..

-سارة: خلي يولي ميهمني راح امسحه كله ماريد المكياج ماريده

-دعاء: ولج لااا بس تعدله الج البنية

كالت البنية يطول لان راح تمسح عيونهه كلهه وتعيد مكياجهن، ماقبلت سارة وكفت تمسح الي بكصتهه وعافت الي على جفونهه وكالت بصوت يهتز مهضومة..

-سارة: خلي هيج صار زين ميحتاج امسحه

-بسملة: ولجن چنچ اخنتون واصل اللاينر لاذاناتچ

-غدير: بعد شنسوي هذا الموجود يله صارت بـ 4:30 لا تعطلينه سارة

-مريم: لا خليهه براحتهه حتى لو تعطلنه رايحة اشوف الولد اكوللهم انطونه شوية وقت

-سارة: لا مريم لا حبابة استحي من حمزة والله

-غدير: دگعدددي وسكتي شتكوليلهم هاا خرب مكياج الخاتون ويردون يعدلو الهه

-مريم: اي هيج اگلهم

كلتهه وطلعت ادور على الاطلس ماكو غيره يساعدني هسة، سألت عنه نانا كالت طلع بشغلة شوية ويرجع دكيت رجل بالكاع متنرفزة صعدت فوك ادور على عمر وشفت حمزة واكف بباب غرفة سارة يفرك بيده وملامحه قلقة..

-حمزة انتَ هنا

رفع راسه عليه عدل وگفته ودگم السترة مالته، ابتسم يهز براسه..

-مريم: منتظر سارة يمكن مو؟

-حمزة: اي كالت خالتي حصة المصورة اجت ولازم ناخذ صور

-مسلم واسيل وين؟

-هو جاي ياخذولهم صور واحنه وراهم

-هاا، حمزة تكدر تنتظر بعد شوية خطية سارة تخربط مكياجهه وميتة من الخوف والبچي المسكينة وكلش ديضغطون عليهه

-تبجي عيونهه علمود مكياج؟ يابة انعل ابو المكياج لابو اليضغط عليهه الهه كل الوقت مريم خليهه براحتهه

-صدك والله؟؟ بس نص ساعة وعد بالخمسة هي يمك

-كليلهه للعشرة بالليل اوكف انتظرهه بس لا تبجي، طمنيهه لا معصب اني ولا ضايج

-شكراً الك حمزة تسلم والله

تركته دا اروح ورجع صاحني، اللتفتت عليه..

-مريم: نعم

نزل راسه ورجع رفعه بلع ريگ وگال بهمس خجلان..

-حاچيهه شوية.. هي تحبچ وتعزچ حاولي تهدأيهه سحبي خوفهه وقلقهه ولا تخلين احد يعكر مزاجهه امانة

-بعيني

رجعت مكيفة والضحكة تارسة وجهي يمة الحب يمة يخاف على مزاجهه يا بعد گلبي شكد حلوين وراهمين ويه بعض..

رجعتلهن وبلغتهن غدير ماتت من القهر بس سارة رادت تبجي من الفرح وبسملة تنطط بيناتنه تردح لسارة وتهوسلهه انوب اجت رقية وتگابلن ودعاء تهوس بشالهه..

-دعاء: خدهه طماطة لا تكول محمرة

-بسملة: هو الرادهه هو التمناهه بنت الشيخ لابن الشيخ جبناهه ولجن سمعني الهلااااهل

نهلهل ونصفگلهه شوية ودخلت اسيل خلصت جلستهم التصوير اخذتهه بسملة تهوس بيهه وترگصهه ومن كملت سارة مكياجهه هم أخذناهه نرگصهه وغدير راح تموت وجهها رغم المكياج الحاطته راح ينفجر وتغير لونه..

-دعاء: مرايم يله عيب صارت 5:10

-مريم: اوووي شعليج هو روميو كال ابقى انتظرهه للعشرة بالليل

-غدير: ايييي مو هو الخادم مالتچننن

-مريم: لا مو الخادم حشاه هو رجل حماتي وحلوتي وجميلتي واحلى العرايس سارونتي

-بسملة: طاطاطاطا ولجن اريد ادبچ لحد ما تطيح رجليه احنه الولد موش اهل البنية

متنه من الضحك وسارة فرحانة كلش كلش واسيل ماسولف على فرحتهه من كدما رگصنه خفت عليهه لا يصير بالطفل شي..

اثناء ردحنه ودبچنه دخلت نانا علينه فاكة عيونهه وتزلغ بخدودهه..

-نانا: المعازيم وصلوو وانتو هنا ترگصووون

عدلنه البنات لاخر مرة وطلعنه من الغرفة بالمناسبة عقد القران صار الصبح والعرس هسة العصر وراح يكون بالبيت ما قبلو يصير بقاعة والاطلس وحمزة كلش حرصو يكون بيناتنه ومحد يفتهم بي ماعرف السبب الاصلي بس محد عارض..

بعدنه بالباب وصارو العرسان گدامنه حمزة ومسلم منطينه ظهرهم يسولفون، ووياهم الاطلس واكف صارت عيني بعينه ابتسملي رجعتله الابتسامة من شفت لابس سترة زيتوني تشبه لون فستاني مادري صدفة لو متعمد..

-الاطلس: حبيبتي سارة

تقدم عليهه لزم ايدهه بوسهم وباسهه على راسهه واندار على اسيل سوه نفس الشي لزمهن من ايدهن مبتسم وتقدم على الشباب عيوني ماكدرت اوخرهه من حمزة واني اشوف شلون وجهه انگلب احمر من شاف سارة ويبلع بريگه متوتر..

وصاهم الاطلس على البنات مسلم يتجاوب وياه وحمزة ساكت وبس يهز براسه، مد ايده الترعش يريد يلزم ايدين سارة كلنه لاحظنه رجفته وخواتي بس يكهكهن السفيهات..

اخذو العرايس والبنات الباقيات راحو وراهم ردت انضم للشلة واطلس اجاني عاق حركتي..

-الاطلس: مساء الخير مدامتي

-مريم: صرت مدامتك

-الاطلس: چنتي آنستي وهسة احنه متزوجين بمعنى مدامتي

ابتسمت احب هالعبارات من يستخدمهن، خفيت ضحكتي من كال..

-شلون جمال هذا أسرتي عيوني

-شكراً

جر ايدي رفعهه وخلاني ادور حول روحي ضحكت خجلانة من كال..

-جميلة كـ حجر اللماس هرب من عقد ثمين

-يعني اني جوهرة

-اغلى من الجوهرة انتِ ما تتقيمين بـ ثمن

ضميت شفايفي لداخل فمي ماعرفت شجاوبه عبرته داريد اعوفه واروح وحسيت بي جرني من وره يحضني رجفت كلني ردت ابتعد بس شدني بقوة طبع قبلة على خدي وهمس قريب اذني..

-بالي يمچ يالخذيتي وتيهتيني

-اطلس

-مشتاقلج مرمر مشتاق لكلشي يخصج شحلاتج من چنتي تجيني للمكتب وتلعبين بگلبي تعوفيني الوب على نظرة من عيونج

-احم اكلك

-كولي عيني كولي

وخرته عني اضحك هذا شبي اليوم عباله عرسنه، غلست على كلامه ووكفت مكتفة ايدي..

-مريم: مقلدني باللبس

-صدفة

-اها صدفة صدكتك

-بكيفج تصدكيني او لا

-ما راح تبرر

-لا لان ما مسوي شي غلط وانتِ تعرفين لوني المفضل زيتوني كولي انتِ لابسته لاني احبه

حجاهه بغمزة گلبت عيوني ممهتمة وحاصرة ضحكتي، حط ايده بوحدة من جيوب بنطرونه وكال..

-مرمر

-ها

-صيري حبابة اليوم ولا تفحطيني

-اني الك اله امرمر گلبك

-احلى من يمرمر گلبي

-ههههههه خوش لعد

ضحك بصوت وحاوطني من خصري بأيد ومشى بيه دفعت ايده ورجع يريد يرجعهه وهم اوخرهه ضلينه هيج الى ان وصلنه للصالة المزينيهه بأحلى انواع الزينة مسويهه قاعة منزلية مريحة..

العرس هادئ ولطيف كلش محد طلع حسه او صار شي مخربط بالعكس الكل فرحان عدى عمر طبعاً ما شفته العرس كله وكل اليجي يسأل عنه..

عمو محمد هادئ عكس اليوم الصبح من شفته، يوزع ابتسامات ويسولف ويه ابو حمزة، تسائلو عن عمتهم ام التوأم ليش ما اجت وعمو محمد كال باجر تجي لانهه مريضة ومتتحمل طريق..

تركت اطلس وطلعت ويه خواتي وامي للحديقة هم مزينيهه بطريقة تجنن كلش الاجواء تونس..

-ام مريم: ما شاء الله ربي ينطيهم ويرضيهم بيتهم قصر

-بسملة: اي والله كلما ادخل للبيت انبهر ادري ميصير بس ما شاء الله يذكروني بالمسلسلات المصرية

-دعاء: خلونه نرجع نتونس جوه شعدنه هنا

-بسملة: لا اريد افتر مرايم فرينه الحديقة

-مريم: حدايق ثنين عدهم امامية وخلفية

اخذت بسملة ويايه ورحنه نفتر بالحديقة فارغات ثنينهن الكل جوه، اخذتهه لحديقة البيهه النسر من شافته كامت تلطم خايفة خبثت عليهه وادفعهه على القفص وهي تصيح بالخنسة..

-ولججج مريم اخااااف.. وللجج وللج.. خرب إن.. خرررب ولججج راح يعضنييييي

النسر يتحرك من يشوفهه قريبه عليه ويجي يتقدم وهي تعيط وتضرب على القفص وتضرب بيه متت من الضحك بس غابت ضحكتي من مدت ايدي ودخلتهه بالقفص واجه يريد يعضني..

-مريم: بسملللةة مو هيييج ولج هذاا ياكللل اصبعااااي

-لا ما ياكل اصبعج

اللتفتنه على مصدر الصوت وابتعدنه عن بعض نلهث خوف، عدلت نفسي وبسملة واكفة تسب بيه بالهمسة..

-مريم: عمر انتَ هنا توقعناك جوه

-عمر: لا جنت بشغلة هسة رجعت، شنو جاي تلعبن ويه الطير؟

-مريم: ههه اي هاي بسملة طلعتني تريد تلزمه

-بسملة: ليش تجذبين وين اريد اللزمه انتِ تدفعيني عليه موتيني خوف گلبي وگع ببطني

-مريم بهمس: الغسل دسكتي

-بسملة بهمس: مريم الجذابة ام الجذب المعطبة

-عمر: انتبهو على نفسكم، من رخصتكم

فر يريد يرجع وبسملة لزمت ايدي تريد تعضهه عطت بسرعة..

-مريم: استاذ عمرر

اللتفت علينه وجهه مغيم شاحب صوته هادئ خالي من أي حماس معتاد، نزلت راسي ماعرفت شحجي گلبي مردني مرد شكد صعبة حاضر عرس الي يحبهه وميكدر يحجي او يعبر عن حزنه..

-مريم: شلونك استاذ

-عمر: مثل ما جاي تشوفين

-مريم: ربي يعوضك بالاحسن ثق واعتقد الله ميبعد عنك شي عبث كله بي صالح

هز راسه ساكت عصر عيونه بأصابعه ورجع يمثل المرح..

-عمر: خليني ارجع جوه لا يألفون عليه قصص

-بسملة: اصلاً ألفو

درت اباوعلهه وهو هم وجه انظاره عليهه، ابتسمت واردفت خجلانة..

-بسملة: سمعت وحدة هاي الي بگصتهه خطوط هواي وعدهه شامة جبيرة بحنچهه

-عمر: بنت خال امي هاي شبيهه؟

-بسملة: ياا كعدت تألف وتكول عميران يحب سويرة وخذاهه حمزاوي منه

-عمر: صدك!!!

-مريم: متأكدة انتِ بسملة؟؟

-بسملة: والله العظيم وكعدت تباوع لسارة وتضرب على رجليهه تلطم تكول اويلي على گليبك عمر

-عمر: اي والله اويلي على گلببك عمر

-مريم: استااذ مو وكتهه هسة تره هالاشاعات مو حلوة ليروح يفهم غلط حمزة

-عمر: اني احاچي حمزة وافهمه لا تخافون

-بسملة: تحاچي تگله احب مرتكك!!

-عمر: وشكو هسة

-مريم: استغفر الله استاااذ

-بسملة: اوووع شهاللعبان نفس اوووع

-عمر: شبيچ احنه اصدقاء راح يتفهم الوضع لا تعوعوين

-بسملة: لعبت روحي اوووع مريم امشي نرجع

يضحك يداهرهه وهي مصدگة من كل عقلهه ردت اگوللهه ديتشاقه واشرلي ماحجي..

-عمر: شبيچ بسم الله الرحمن الرحيم شو ما عاجبچ

-بسملة: اسمي بسملة مو بسم الله الرحمن الرحيم هاي واحد! ثانياً استاذ انتو مادري شلونكم واحد يحب مرت الثاني ولج مرررريم جاي تشوفييين

-مريم: بسملة شبيچ تخبلتي استاذ من رخصتك

-عمر: اوكفي اوكفي انتِ مصدگة اني احب سارة؟؟

-بسملة: اي مبين من خلقتك

-مريم: بسسسملة لسااانج

-بسملة: تنرفزت اسفة

-عمر: مبين من خلقتي شنو شبي وجهي

-بسملة: راح تموت من القهر شوف استاذ خليني احاچيك اذا صدك تحب سارة انساهه متفيدك لان راهمة لحمزة اني اصلاً ما ارضى تخرب عرسهم والله عشتو شنو هالسوالف وين جنت قبل لا يخطبهه حمزة

گرصتهه وجريتهه امشيهه ويايه تمشي وتدردم وتأشر بيدهه وتحجي على عمر الطريق كله وهو يمشي ورانه ويضحك..

-بسملة: اووع اوووع ولج شنو هاي جاي تشوفين مريمم خاف يطلع واحد غير اطلس يحبج انوب يبووو علينه احتركت الدنياا

-مريم بهمس: بسملة لج يتشاقة وياچ يجذب عليج شبيچ

ماهتمت اندارت عليه وتقدمت صارت گباله خزرتهه ورحت اخذهه هاي ام لسان مستحيل تسكت وانوب شطولهه ماكدرلهه بدفعة تطيرني..

-بسملة: شوف استاذ تعال خليني افهمك فد سالفة

-عمر: اي تفضلي آنستي

-بسملة: عوف آنستي هسة جاي احجي بجدية لا تتنعوص

-مريم: بسسسسملة

-عمر: ههههه حاضرين

-بسملة: بيني وبينك وهاي اختي شاهدة همات اذا تحب سارونة روح حاچيهه يمكن تطلع هم تحبك ويخرب العرس شبيك تلحلح

-عمر: مو هستوج تگليلي اووووووع لان احبهه

-بسملة: شنسوي غير گلبك هذا خوية شبيدنه بعد

-مريم: بسملة وعيون امي اجي اكفشچ كااافي تعالي

-عمر: دصبري علينه انتِ خليني اتفاهم ويه بسم الله الرحمن الرحيم

-بسملة: هسة شكلت

-عمر: خوش فكرة يمكن هي هم عاشگتني

-مريم: استاذ عمر شبيك انتَ عيبب ياخي عيبب

-عمر: العشگ عيب؟ لا مريم لا ماحبيتهه منج

-بسملة: ولا اني حبيتك ولا حبيت سالفتك كلهه امشي روح حاچيهه وخلصنه

-عمر: خوش راح احاچيهه

-بسملة: خوش يله مرايم نروح

ملخت ايدهه تملخ بالتگرص ودخلنه للبيت رزلتهه رزالة غسل ولبس وهي ممهتمة وكفت تاكل كيكة وتهز براسهه..

-بسومة يا حبيبتي ميصير هيج تسوين شلون تحجين ويه رجال غريب بهاي الطريقة وماخذة راحتج عيب يا اختي

-بسملة: شوفي مرايم اني لساني ماكدر اللزمه انوب يجيني هذا المسودن يكول يحب سارونة الصاكة لااا والف لااا اني اريدهه لحمزة اريد اشوف گلب غدير يتشعوط ويحترك

-لعد شلون تكوليله روح حاچيهه واعترفلهه وماعرف شنو

-مو ادري راح ترفضه منو تعوف هذا الحات المحتحت حمزمز علمود هذا صلبوخي عمر خلي يتقبل الواقع مالته وينچب

-ولج انتِ وين والرجال وين بسملة لتحجين بشي انتِ جاهلته

-يحب مرت صاااحبه

-هو يحب اسيل!!

-دهرر فرررني وفر ابوي

-اي وانتِ كاعدة تنصحين بي وترجعين ليوره تحرگين گلبه اكثر

دگت صدرهه خلت العالم تباوع علينه وكالت بهمس محروك گلبهه..

-ولج يحب سارررة واسيييل هذا المسربت حاط عينه على ثنينهنن عمت عينننك صلبوخي

-لج غبية هو ميحب سارة يحب اسيل صارله سنيين

-جذذذذذب

-وعيون امي قصته تبچي المطي من القهر

-لج سولفيلي عمت عيني عليك

هزيت راسي هادئة وحچيتلهه مختصر مفيد تأثرت كلش وعيونهه دمعت مسحتهن بسرعة واشوفهه تدور بعيونهه..

-عليمن تدورين؟

-المصلبخ وينه

-لج المصلبخ شنو متستحين

-اي اقصد عمر وينه خطية متت قهر خاف صدك يروح يصارح اسيل ويضوج اكثر

-لا ميصارحهه مو غبي هو لو يريد يصارح چان اول ماعرف بعلاقتهه بمسلم يحجيلهه عن مشاعره

سكتنه من اجت مرة تسولف ويايه وتسأل عني كل اليشوفني يتعجب ويكول نفس الجملة "هااا انتِ مرت الاطلس ما تخيلناچ هيج" وينظرولي من فوگ ليجوه..

راحت ضوجتي من تركزت نظراتي على العرسان حمزة مو بس فرحان طاير فرح وواضحة الفرحة بعيونه شكد ديحاول يخفيهه بس مدا يكدر يسيطر كل شوية يلزم ايدين سارة ويأشر للمصورة تصورهم لقطات ضحكت على خجل سارة مارفعت عيونهه عليه ولا مرة..

شفتهه تباوعلي اشرتلي اروحلهه تمشيت على كيفي فستاني طويل يخبخب رحت يمهه لزمت ايدهه ترجف رجيف من فوك ليجوه همستلي بيني وبينهه..

-سارة: مريم بس يباوعلي

-مريم: ههههه حقه والله

-لا ولج حمزة مو هيج شبي اليوم وترني

-مريم: صرتي مرته بعد شيخلصج

-شلون يعني

-مريم: امداني وامداج خوش

-شنو ليش

-الله يطيح حظنه فوك ما هو طايح

-ولج شكو احجي توترت شسوي

-شتسوين يعني شمدريني شنو لازم تسوين

-انتِ شسويتي بعرسج؟

-دكيت ولطمت وتصخمت وتلطمت شسويت يعني

-صدك؟

-افففف ساارة لتخليني اعلي صوتي

-سارة: اكلج ابقي يمي حبابه اقنعي اطلس تجون ويانه للفندق فدوة

-لا خلي غدير تروح وياكم ههههه

-لا لا عليج الله لا عمي ماريد احد بس فكوني منهه

-الله ولج سارة تزوجتي بعد

-شبيچ مهيلگة انتِ

-شمدريني استهترت من وره طوطي

-عزه عزه مريم طخ خصري والله بيده طخني

تهمس وتكمز بمكانهه راح تموت متت من الضحك واتوقع حمزة يسمعهه لان اختنگ بضحكته اشرتلهه تسكت بس ماكو فايدة عاضة شفتهه وترافس برجليهه على كيف..

-مريم: متتعلمين من اسيل باعيهم شحلاتهم هي ومسلم انتِ ظلي فاهية

-ولج تزوجو عن حب

-اي واذا تلحلحي شوية سارة شبيچ جامدة بمكانج

-مريم بداعة امج لتعوفيني وينهه صرصور اختفت اريد رقية ويانه خليهه تنام بغرفتنه

-مريم: هلو هلو اي مو هو لعب

-سارة: هسة اگول لحمزة اني اعلمج

اندارت عليه هو مسوي روحه ملتهي بالعصير حجت بصوت مسموع عود حتى تسمعني..

-حمزاوي يصير رقية تجي ويانة للفندق؟

-يصير ليش ما يصير

-اييي حباب احجزلنه غرفة ام ثلاث أسرة

-حمزة: شنسوي بثلاث أسرة؟؟

-الي والك ولصرصور

-تردين رقية تنام ويانه بنفس الغرفة!!

رافع حاجبه ويحجي وياهه خجلت ونزلت عيونهه عفتهه دا اروح تفشلت هاي خزتنه بس ما خلتني ضغطت على ايدي وكالت..

-سارة: مو شوف اني ماكدر وحدي البدلة متنزع لازم رقية ويايه

-اني اساعدج

مبين فلتت منه الحجاية لان فوراً عض شفته، شهكت سارة واندارت تلطم بصمت راح تموت علية هالبنية ماكدرت اللزم روحي بعد راح انفجر ضحك همزين من اجتني نانا..

جرتني تكعدني بصف اطلس الي باله سارح وموبايله بيده ماعرف ليش احسه يتجنبني حتى ميباوع عليه ومن اروح عنه ميكول وين چنتي او وين رايحة..

-اطلس

-همم

همهم بهدوء وعيونه بالموبايل ما حجيت شفته ملتهي وممنطيني اهمية بس چنه حس عليه ضجت رجع موبايله بجيب السترة وميّل راسه للكرسي مالتي وهمس..

-عيون اطلس

رفعت راسي عليه شفته قريب كلش نزلت عيوني وكلت واني اللعب بفصوص الردن مالتي..

-شبيك ساكت

-الاطلس: مابيه شي

-انتَ ضايج من شي؟

-لا

ينقر بأصبعه على فخذه دليل على توتره رجعت ارفع نظراتي اله هستوني دا احجي وگام مني عبست وجهي انزعجت من تصرفه وانزعجت اكثر من دخلت نورسين للبيت بلبسهه المغري "كالعادة" وراحت تسلم عليه وعلى عمو محمد وباقي البنات تحضن وتبوس وتتماوع كدام اطلس شكد انقرفت..

عافهه اطلس وصعد فوك حالي كله تخربط گلبي نط من صدري من شفت نورسين تصعد وراه ماكدرت اكعد بمكاني كمت مهرولة اروح وراهم ومن التوتر احس جاي امشي على دگات گلبي..

وگفت بباب غرفته مردوده ماكدر اشوف شي بس اسمع صوتهه جوه وياه دارت بيناتهم محادثة عادية مبين اطلس متفاجئ من دخولهه لغرفته وهي تجاوبه بلطف..

-نورسين: انزعجت لان اجيت اطلس؟

-الاطلس: لا بالعكس ليش انزعج

-يمكن متريد مرتك تشوفني

-لا ماعندي مشكلة وهي هم متفهمة احنه اصدقاء

-ليش ضجت من دخلت غرفتك؟ اني متعودة كلما اجي ادخل هنا ونكعد بالساعات سوه شنو تغير

-نورسين هاي غرفة مريم هم لازم تراعين هذا الشي هي مرة ويمكن ما ترضى مرة ثانية تطب لغرفتهه ويه زوجهه وحدهم

-اطلس ليش محسسني دنسوي شي غلط شبيك

اختفى صوتهم شكد تمنيت اشوف شنو صار بس ماكو داعي اشوف نبرة صوت نورسين العالية شرحت الموقف الي حصل بيناتهم..

-نورسين: شبييييك

-الاطلس: نوره اني كتلج هالشغلات بطليهه ما يصير اني متزوج

-يعني لان حضنتك ميصير؟؟ تنتفض وتدفعني بهالطريقة لان ردت ابوس خدك!!

-نورسين لا تصعبين الموضوع عليج كتلج خلي صداقتنه تكون خالية من هاي الشغلات

-علمود مرتكك مووو!!

-وانتِ كل كلمة والثانية صحتي مرتك ومرتك؟

-لان انتَ تغيرت عليه من اول يوم داومت مريم وياك بالشركة صرت متتقبل أي شي مني!! منو قبل جان ينام يمي ويلعب بشعري منووو

-على كيفج انام يمچ شنو؟؟ يا يوم سويتهه لا تألفين علينه قصص وتصدكيهه نورسين!

-ما اقصد بهالطريقة بس كومة نمنه على نفس الفراش وهنااا بفراشك هذا غفينه الليل كله بصف بعض ما جنت تضوج ولا تتنرفز مني

-چنه جهاااال بابا جهااال جهااال تجيبين ايام من چنه جهال لهسة؟؟

-انتَ صديقي واعز انسان على گلبي

حجتهه وبچت بصوت ماكدر اسمع كلشي بوضوح الموسيقى عالية بالبيت دتغطي على معظم محادثتهم..

-الاطلس: نوره لا تبجين وانتِ صديقتي وعزيزة على گلبي بس اني متزوج اختلف الوضع هسة عن قبل

-كله من وراهه اخذتك منيي

-الاطلس: ياريتهه تاخذني

-نورسين: شنوووو

-ياريتهه تاخذني وتقبلني تعبتني ووجعت گلبي ببعدهه

-هسة جاي تشكيلي من مرتك؟!!

-هههههه نوره كافي عاد لا تدللين عليه شبيچ مسحي دموعج ولج لا تضوجيني منج

-ترجع ويايه نفس قبل وما اضوجك بعد

-ماكدر يالحمزة يالكائنات يالارض يا السمااء مااكدر

-بسببهه موو تخاف من مرتككك!!

-ما اخاف منهه اني احترمهه!!

-اطلس اني ماعندي مشكلة بزواجك بالعكس فرحانة لان استقريت ولكيت شريكة حياتك بس مصدومة من جفائك وبُعدك عني تتهرب مني وتنز من اللمسك لمسة عادية

راح صوتهم لزكت اذني بالباب يحجي بصوت هادئ مبين مدا اسمع شيكول اووف، رجعت علت نبرة صوتهه وصرخت..

-شكد اكررره الزواج اكررهه!

ضحك بصوت وكال يتمازح وياهه..

-الاطلس: من تتزوجين انسان تحبي راح تتغير نظرتج يله يله هسة روحي لا تصيرلنه سالفة ولج خبلة هرموناتج طاگة عليه هالكم يوم

-بااوع هذا الاقصده عبالك دنسوي شي غلط لو عيب شكد دتنرفزني

عفتهم ورحت اوكف على جهة ما ابين حسيت نورسن راح تطلع من الغرفة وفعلاً ثواني ونزلت بقيت بمكاني واكفة انتظر اطلس هم يطلع بس ما طلع..

رحت لغرفة سارة اعدل نفسي وافكر بكلامهم، فرحت من عرفته صدهه عنه وماقبل تحضنه نفس قبل وفرحت اكثر من گال "ما اخاف منهه اني احترمهه"..

ماحسيت على روحي وكفت كدام المراية اطفي حمرة وجهي مشتعل نار هفيتلي لحدما هفت الحمار وكفت اريد افتح الباب وسمعت صوت تبسبس زلم..

فتحت الباب على كيفي كلش بدون لا اطلع صوت ومديت بس عيوني اشوف خاف رجال غريب بس ارتاحيت من شفتهم اطلس وحمزة واكفين على بعد قريب غرفة اطلس..

عكدت حاجبي على منظر اطلس واكف منزل راسه وحمزة كدامه حاط ايده بجيوبه وصافن عليه..

سولفو بالهمسات ماسمعت شي من حديثهم الا من عله صوت حمزة يحجي بعصبية..

-ولك شتحجي اطلللس تخبلت انتَ!! سارة مو بس بعيونييي سارة بنص گلبي احطهه واقفل ضلوعي عليهه احسسهه بنقص شنوو ليش اكو اشررف واطهر منهه

-اني وانتَ هيج نكول بس العالم بره خبلووهه تخبلللت البت راح تفقد عقلهه البارحة الليل كله تبجي بالحمام هناا بهذا الحمام..

يأشر على الحمام الي بالممر، اردف بلوعة..

-اسمع شهگاتهه وروحي تتگطع ما تحس بلوعتي واني اشوف اختي بهذا الحال وماكو بيدي شي دست على غيرتي وكرامتي واجيت اطلب منك هذا الطلب وحقك شتكول عليه حقك

-احط تبن بحلوگ الناس احط اصابعي بعيون أي واحد يشكك بشرفهه وعفتهه

حچى حمزة يسكته واني اسمعلهم وصافنة ممستوعبة الموضوع كله تناقشو هوايه على الباب وحچو عن شخصية سارة المهزوزة وشلون تخاف من كلشي وفعلاً لاحظت هذا الشي من اول مرة اللتقيت بيهه حسيت ضعفهه ما جاي من عبث..

خلص العرس على خير اخيراً تعبت حيل وبچينه هواي خصوصاً من سارة ودعت اهلهه وكعت على صدر اطلس وموتت روحهه من البجي..

طلعو البنات من البيت سكتاوي وتوجهو للفندق، خواتي وامي دخلو لغرفتهم والمساعدات يروشن بالبيت ينظفنه ويرتبنه، صعدت فوك اخذت ملابس وفتت لحمام سارة اسبح..

طولت بالحمام تعبانة محتاجة استرخي، واني بالحمام راجعت كل الاحداث الصارت اليوم ورتبتهم ببالي طلعت بدلت ولفيت شعري بالخاولي..

وكفت على الميز افكر بيهن ومبتسمة ان شاء الله ميشوفن غير السعادة سارة واسيل يستاهلن كل خير، حطيت مرطب لايدي ورشيت عطر واخذت المشط كعدت على السرير اريد اشيل المنشفة من شعري وانفتحت الباب عليه..

-مريم: يا ستاااار استر

-اخترعتي؟

-غير تدك الباب شبيك هو هيج

عدلت المنشفة على راسي وحطيت ايدي على گلبي انضم دقاته ضحك واشر بحواجبه على الباب..

-الاطلس: يله عيني يله

-شنو وين يله

-امشي لغرفتي

-هلوو شعندي بغرفتك

-مريم كلاواتچ مو عليه امشي للغرفة مثل الحبابة ولا تفحطيني

-هواي تفحط استاذ

-يله كدامي

-ماا

-مريم تعالي احنه اتفقنه

-ماا

-لا تخليني اتصرف غير تصرف مريم!!

-يعني شتسوي مثلاً؟ سد الباب عيني خليني انام نعسانة

-هاا هيج تردين السالفة تصير

-يا سالفة

بدون مقدمات اجه عليه حط ايد جوه رجليه وايد جوه خصري وشالني من الچرباية بخفة ايده شهكت اعيط بي وهو ماكو ممهتم يريد يطلعني من الغرفة واني ارافس بيده..

-ولك اطلسسسس يبووو يبوووو عليج يمريم يبووو يمصخمة يمريم

وكف بباب غرفة سارة يضحك..

-صوتج لو تردين الكل يجي يشوف هذا المشهد الرومانسي

-مشهد رومانسيي؟؟؟ وينهه الرومانسية ولكم يبوووووو

-اي اي صيحي فدوة لصوتج

-اطلس شبيك تخبلت ولك نزلني ولك عزه العزاني ليجي احد ويشوفنه وين اضم روحي بعد

-بگلبي ضمي روحچ

-ايععع

-بعينج اني اعلمج اليوم

-ولك ولك اوكف اوكف اطلس خليني استعد اوكفف

وكف بنص الممر يباوع لوجهي ويوزع نظراته على ملامحي واني اخذ شهيق وزفير انفخه بوجهه..

-تنين مو مرة متزوج شبييج رحمة لجدچ

-اوكف شبيك اخاف يجي احد نزلني اني امشي

-ادري بيج جذابة

-والله امشي اني طوطي لتضوجني

-امشي لج حسچ ما اسمعه اني اعلمج

-هاي شنوو تبرز مراجلك عليييياا

-اي صيحي اعلى دخيلك يا علي مال امي تطلع هسة وتشوفنه تظل تهلهل يومين

-هسة انتَ ليش واكف هنا امشي ودينه للغرفة يللله

-بوسيني اول

-عشتوو يريدني ابوسه المحيط الاطلسي

-چا المحيط ما يستاهل

-ودينه للغرفة بشرفك لتخلي خالة تشوفنه والله نصير علچ بحلگهه

هز راسه يمشي على بيض يحقر ويايه واني ارافس بيده واوكع بروحي واضرب على صدره كلما اعلي صوتي يكول..

-اروح فدوة لصوتج

-ولك زاحف كافي امشي وديني

-ليش حاطه هذا الخرگة على راسج وخريهه جاي اشم ريحة حلوة هاي ريحة شامبو لو شنو؟

-اهوووو بدينه بالكلاوات

-لهدرجة تشوفين روحج خايسة مريم ما تصدكين ريحتج حلوة

-اطلسسسس بطل سوالفك اخذني للصخااام لگبررك

على اثر صوتي طلعت خالة ويا يابة يا بوية على الموقف شكد بشع من الفشلة ماعرفت وين اضم وجهي اجيت ودحست وجهي بصدره ما اسمع بس صوتهه المتحمس والـ "وااي" مالتهه..

-حصة: واااااي يا روووحي شنو هذااا شنو هالجمال واااي

-الاطلس: حبيبتي يمة ادعيلنه بالذرية الصالحة

-مريم بهمس: الله ياخذك

-حصة: ان شاء الله يااارب يارب انتَ سميع الدعاء ارزق وليدي وچنتي الحلوة ولد يفز الگلب بشوفته

-الاطلس: ان شاء الله يمة ادعيلنه نخلف حمزة

-مريم: اني اعلمك اطلس وديني للغرفة اختنكت

-الاطلس: حبيبتي لهدرجة ما تكدرين تفارقين ريحتي دافنة وجهچ بصدري يمة هاي سوالفهه نقطة ضعفي ادعيلنه بالذرية الصالحة

-حصة: فدوة وفدوة وفدوة وفدوة والف فدوووة اروحلكم وااي يا جمالكم وينه محمد يجي ويشوف ويفرح گلبه

-الاطلس: اذا تردين اخذيلنه صورة حبي

-مريم: راح تجلطنييي خالة حبابة خلصيني منه راح يموتني هالرجال والله راح انجلط منه

-حصة بغمزة: تنجلطين من جماله مو چذي

فكيت حلگي عليهه وهو يضحك وياهه ويغمز ويلمز شنو هالناس الغريبة، اخيراً اخذني لغرفته طبگ الباب علينه وابتسم بخبث..

-نزلني يله

-اي على الفراش انزلج بعيني

-وخررر ممنوع تتحرك نزلني هناا لا والله اكلب الدنيا عليك

-تره هذا الفراش مو بعيد صبري على رزقج حبيبي

حاولت اتملص منه اريد يختل توازنه ماكو وتد ميتحرك وكلما جايله يشد عليه بيده اكثر ويستهتر..

-اطلس اذا ما نزلتني اتصرف غير تصرف وعيون امي

-شتسوين مثلاً؟

-اندددمك

-هاا والله

-ايي والله بكيفك انتَ بعد

-هههه يله ندميني اريد اندم

حديت سنوني وخزرته متت من النرفزة من ضحكته ونظراته مال ادبسزية ذبيت نفس مستسلمة وقربت وجهي على وجهه بهدوء تفاجأ من حركتي ولانت ملامحه..

-اطلس

-هممم

-شبيك ويايه

-شسويت

بلع ريگه يحجي بهمس نفس همساتي برطمت شفايفي ونزلت عيوني..

-نزلني اطلس تعبت

-من شنو تعبتي ما سويتلج شي

-مو رجليه معلگه جمد الدم بيهن

-هاا اسف والله مو قصدي

ميلني يريد ينزلني للكاع وجريته من رگبته وعضيته عضة مووت ضغطت على رقبته بأسناني بكل قوتي حفرتهه حفر عاط بصوت عالي متوجع..

-لج اخخخخخخ

-تستااااهل كتلك اندمك

-اخخخ بت الـ.... اااخخخخ انعل..... اوووووف

-تستاهل

كشر وجهه ولزم مكان العضة مسح عليهه ووخر ايده فتحت عيوني مصدومة من اثر العضة محفورة رگبته حفر..

-اخخ دم يطلع منهه هو هيج مريم

-مو انتَ تعاند وياي

-بله تسممت ومتت!!

-شنو چلب اني وتتسمم!!

-انگسسس

-انيييي انگس من الچلب اطللللس

-عضتچ انگس ولج ما يصير تعضين هيج مو زينن

-وشيصير بيك قابل راح تموت

-تره عضة الانسان اخطر من عضة الچلب او أي حيوان للمعلومة

-ومنين جبت هالمعلومة عيني من كتاب الرياضيات الي مگابله وكاعد

-بحثي عنهه ولا تضلين تتفلسفين

شفته كلش ضاج وتعكر مزاجه ظل ضاغط على مكان العضة بكلينكس ومكشول ماتخيلته هيج راح يتأذه مصدومة بروحي خصوصاً من شفت الدم وصار لونهه ازرك واثر اسناني بعده موجود..

-الاطلس: شلون مكان طايح حظه تعض بي

-اطلس شبيك هي عضة

-والعالم شتكول شلون اروح هيج باجر للدوام فوكاهه جاي وفد للشركة

-وشكو هسة

-عود صدك تحجين انتِ!؟

-اي عادي واذا قابل شيفكرون

-يفكرون بسوالف طايح حضهه مثل عملتج هسة!!

-هسة شبيك خليهم يفكرون شعليك بيهم

-هم اصير حديث الساعة وهم يطلعون اشاعات مالهه صحة وهم كلشي ما محصل منج بس هاي عضة الچلب لاااا مريم الوضع صاير لا يطاق

-شبيك

-انتِ خلصيهه عليه شبيك وشبيك

نزلت راسي من باوعلي گالب وجهه ذب نفس متنرفز، رفعت راسي مرة ثانية وكلت بهدوء..

-اطلس اسفة بس انتَ لحيت كتلك نزلني وماقبلت

-وتعضيني هناا

يأشر على رگبته صدك لو اجي للواقع مكان العضة غلط ونشاز يفشل، سكتت وهو راح للميز مالته يباوع للمراية للمكان ويستغفر، عدلت المنشفة على راسي ورحتله..

-اطلس

-امممم

-شنسوي هسة بالعضة

-شتردينه نسوي يعني

-احطلك مكياج عليهه؟

-اخخ مريم ااخخ

-لا لا مو مكياج.. اممم..

مديتله ايدي واردفت بأبتسامة..

-هاك عضني مثل ما عضيتك

ركز انظاره عليه مذبل عيونه بطريقة لا بله تقربت عليه اكثر وحطيت ايدي على حلگه..

-هاك هاك عضهه

ضحك ومسح وجهه، هز راسه يائس وهمس..

-مريم اويليي يا مريم

-هاك يله حتى متضوج

-دوخري

-ما الا تعضهه

-ولج وخري هاي الي الله گدرچ عليهه

بقت ايدي معلگه من كل عقلي، سحبهه عليه وفتح حلگه يريد يعضهه غمضت عيوني حيل متت وجع قبل لا يعض اصلاً وفجأة حسيت بنغزات شاربه على ايدي باس معصم ايدي بدل لا يعضه..

-تنباس هاي الايد ما تنعض يالمرمرة گلبي

-مو اني وجعتك

-گلبي ما ينطيني اوجعچ

ابتسمت ساكتة رجع سحب ايديناتي ثنينهن وباس بطنهن وظهرهن نزلهن بهدوء بقى صافن بعيوني وكال بأبتسامة مداعبة..

-روحي عني لا ارتكب بيج جريمة بعد ماتحمل راح اموت

طفرت منه اركض على السرير خفت من كلمته وهو يضحك بعلو صوته ويفر بيده، اجه يكعد بصفي على السرير وصافن عليه..

-اطلس

-عيوني

-دور وجهك اريد امشط شعري

-خاف راح تنزعين واني مادري

-اي اشيل المنشفة من شعري

-مريم

-ها

-انچبي ومشطي بلا لغوة زايدة

-مو عيب عليك تغلط عليه!!

-چا فحطتي گلبي شكو ادور وجهي تره بيناتنه عقد شرعي خاف ما تدرين!

-اي مو استحي

-تستحين تراويني شعرج؟؟

-اي

ضحك وتقدم يريد يجر الخاولي من شعري ماقبلت وچلبت بي جذب لا مستحية منه ولا ابد بس خفت يشوف كفشتي وعطوبي الناطه ويعيب عليه..

-يلا عيني وخري المنشفة.. ولج وخرريهه

يجر بيهه واني مچلبة گبعت روحي بيهه وارافس ماريده يوخرهه، يضحك ويجرجر واني اتوسل يروح بس ما گدرتله وخرهه من شعري غصب وجرني عليه..

-تعالي اني امشطلچ

-ماااااااا

-وجعاا شبيچ

-ماعرف الا اني امشط اطلس حباب عوفني

-تعالي وصيري حبابة لا اعضچ

سكتت مستسلمة وبداخلي اللطم بصمت شعري بصعوبة يتمشط يبوو عليج مريم راح يسويچ ميز تنمر ويعيب عليج يارب بس اليوم خلي شعري يتمشط سريع يارب بس اليوم والله بس اليوم هاي الشغلة الوحيدة اطلبهه منك لا تفشلني گدام المحيط..

راح جاب مشط وكعدني كدامه فتح رجليه يريدني اكعد بنصهن ماقبلت ضربته على فخذه وخزرته..

-تأدب

-اي چا شلون اسيطر

-لتسيطر جيب اني امشط

-لا تعالي

كعدني مقابيله بس يحقر ويلطشني بي لطش استحيت من قربنه كلما ازحف كدام يرجع يجرني وهيج قضيناهه..

يمشط شعري بهدوء عكسي اخبص الدنيا واظل اجرجر بي اشلع فروة راسي، ابتسمت حسيته يدغدغني مو يمشطلي..

-شلون شعر حلو هذا

-لتچذب

-هاا ليش اجذب

-اي احسك تستهزأ

-ليش شنو شعرج مو حلو؟ ما تحبين شعرج؟

-لا يخبل شبي اصلاً جمالي كله بشعري

-اي صدك حلو

ابتسمت على اطرائه ماحب شعري شالع گلبي خصوصاً العطوب التطلع مكرهتني الدنيا..

-الاطلس: ليل دامس

-يعني كلش اسود مو؟

-اممم

سكت يكمل تمشيط على كيفه كلش وكل شوية يوكف يتلمسه ويرجع يكمل، همست دعاء بيني وبين نفسي ضحك وكال..

-الاطلس: جاي تبسبسين شنو تحجين عليه؟

-اقره دعاء

-شنو هذا الدعاء؟

-دعاء اقراه كلما امشط شعري

-شنو هو وشيسوي

-هو دعاء صغيروني خاص مروي عن الامام جعفر الصادق (ع) يقراه الشخص كلما يمشط شعره او الرجل من يمشط لحيته الي يقراه الله يذهب عنه الامراض ويكتب له الرزق

-هاي شنو هاي

-اي والله تعلمته من زمان

-شنو نكول؟

-تقره سورة القدر مرة وحدة "انا انزلناه في ليلة القدر.." وراهه تكول "اللهم سرح عني الهموم والغموم ووحشة الصدور"

-بس؟

-اي بس هذا

-اممم لطيف، زين شفتي عليه نتيجة؟

انداريت عليه مبتسمة هزيت راسي اي وكممت حلگي اضحك..

-احسك ما تؤمن بيهن ذني الشغلات او عندك شك لان دائماً تسألني عن النتيجة؟

-مو ما اؤمن بيهن بس ماعندي معلومات عنهن جاي اعرف من خلالج واحب اعرف شفتي نتيجة على كلشي تسوي او لا

-كلشي بهاي الدنيا يحتاج ايمان اطلس اذا ماعندك ايمان وثقة ويقين ان هذا الدعاء او هذي السورة من القران راح تساعدك ممكن متشوف نتيجة ترضيك

-جربت سورة "ص" وشفت نتيجة ترضيني

-لعد اللتزم بهذا الدعاء وشوف نتيجة احلى بعد

هز راسه موافق، فرحت بردة فعله احلى شي يميّز الاطلس ماعنده عناد او يستهزأ برأي احد يحترم افكاري ويتقبلهن ويحاول يطبقهن ودا افرح اكثر من يشوف نتيجة للفعل الي علمته عليه ويشاركني بي، قاطع افكاري من سمعته يكول بصوت مطروب..

-يا ويل حالي من نظرة العيون الكحيلة ويا ويل قلبي من همس شفايفها الحمر

بقيت منطيته ظهري خجلانة ما تجاوبت وياه لحدما كمل ولم شعري اخذته من عنده وشلته بطريقة كبه عالية طلعت زعانف منا ومنا وكعدت عدل..

-ها مريم

-ها

-تردين شي؟ محتاجة شي؟

-لا شكراً

-احم.. يعني غطا زايد او مخدة شوفي المخاد خاف ما تعجبج

لزمت مخدته طبطبت عليهه مبين مريحة كلش..

-لا تجنن حبيتهه

-لا مو هاي شوفي الوراهه

-ليش هاي عجبتني

-لا شوفي الوراهه

اخذت الوراهه ماحبيتهه عالية هزيت راسي لا وحضنت الي عجبتني..

-لا هاي احلى

ابتسم منحرج حك طرف خشمه وكال بخجل..

-مو هاي مخدتي وماكدر انام على غيرهه

-مو عجبتني

-بعيني باجر اجيبلج مثلهه بس هسة ماكدر كتلج ما انام على غيرهه

-هاا مادري اسفة هاك

-ترديهه يعني هيج عجبتج؟

-اي كلش احس راح انام خوش نومة عليهه وارتاح

-خلص اخذيهه نامي عليهه ارتاحي

-لا مو انتَ خطية

-لا لا عادي اخذيهه

ابتسمت ورجعتهه ردت اتمدد بس هو كبالي هسة شلون راح ننام والله حيرة، طلع موبايله يتصفح بي سألته بسرعة..

-ساعة بيش؟

-بالـ 1:30

-مبين عليك نعست؟

-لا ما انام هسة وانتِ؟

-ما نعسانة

ابتسم وكام من مكانه سريع نزع تيشيرته كدامي دگ گلبي متوترة من راد ينزع البجامة صحت بسرعة..

-شنو هاي شبييك شنو جاي تسوي

-امشي نسبح

-شنوووو

-نسبح سوه امشي

-عزه العزانييي تخبلت انتَ

-شبيچ واذا امشي انتِ مو ما نعسانة

-اطلس شبيك استخفيت شنو هالسخافة!

-يا سخافة شكلت اني اريد نسبح وين المشكلة

-اسكت شكد عيب شبيك يااا

-بكيفج يابة ما تردين تسبحين براحتج اليشوفج يكول شطالب منهه

فاكة حلگي عليه شنو هذا نايم وجاي يحجي لو شبي بالضبط، راح للكنتور مالته سحب شورت وراح للحمام ثواني وطلع لابس الشورت الي طلعه من الكنتور وحاط منشفة جبيرة على صدره وراح للباب يريد يطلع بره الغرفة..

-هاي وين

-الاطلس: اروح اسبح

-وشبي حمامك؟؟

-شسوي بحمامي اريد اسبح سباحة natation, swimming, Baden بعد بيا لغة اكولهه

-هاااااا واني اكول شنو تسبح يمة وكف گلبي كلت شبي هذا الرجال

ضحك يفر بيده وراد يطلع من الغرفة صحته اوگفه..

-يعجبني اسبح وياك

-چا ما تحجين سويتيني فاسق بالبداية عبالك كايلج تعالي نتفستق

-افف اسكت يله جايه بس اكلك خاف فشلة احد يكعد؟

-لا الكل ينام هيج وقت

-اخذ حجابي؟

-اي وبدلي ملابسج اللبسي شي خفيف

-شلبس؟

وكف صافن عليه راح للجنطة مالتي بعدهه موجودة بزاوية غرفته راح يبحوش بيهه وطلعلي منهه فستان نوم قصير اسود انطاه الي وكال..

-لبسي هذا

-يا فاسققق شنو هذا مو عيب عليك

-ههههه عمي لبسي أي شي عسى ما عباية امي بس تعالي

طلعت برموده وتيشيريت خفيفات من الجنطة مالتي ورحت ابدلهن لبست فوكاهن صاية وطلعنه سوه لازم ايدي ويتمشى بيه على كيف..

-اطلس استحي

-ليش حبيبي

-اخاف احد يكعد امي، ابوية لو خواتي هسة يكولون بتنه استخفت

-لا معليج اقفل الباب علينه حتى محد يجي

-ها اوكي بس مو تصير فاسق

-دمشي نايمين بنفس الغرفة وتصيح لا تصير فاسق

-مو هذا مي وسباحة خاف ياخذك الواهس وتحس روحك جاك واني روز

ضحك بصوت عالي وطلعني للحديقة الخلفية الي بيهه النسر بس من الجهة الثانية منشوفه، شال الغطا عن المسبح شكبره عملاق ولونه ازرك طوخ يخوف ويرهب..

-الاطلس: يله تعالي

-هاااا

-تعالي مرمرتي

-مو.. مو.. شسمة

-شنو شسمة

-اخاف طوطي

-تخافين؟؟!

-اي ما سابحة من قبل

-هاا ميخالف تعالي وياي

-لا اخاف ما اثق بيك

-مريم شدخل الثقة قابل اريدج تموتين

-اي

-لج خبلة غير اموت وراج

كالهه وتقرب عليه حط ايده على خدي توترت وخرت ايده عن خدي ووكفت مچتفة ايدي..

-لا انتَ انزل واني اكعد بس امد رجليناتي بالمي

-ماشي براحتج

چيت بسرعة بالمي وصار يسبح سريع، نزعت الصاية والشال وكعدت على الدچة مديت بس رجليه بالمي بارد منعش بقيت اللعب بي برجليه واشوفه يسبح يروح ويجي بقينه هيج فترة لحدما تعب واجه يمي..

يلهث تعبان ثبت ايدناته ثنينهن على الدچة واني بنصهن صايرة، وخر شعره النازل على عيونه وكال بتعب..

-ها مليتي؟

-بالعكس صافنة عليك

-اها حلووو

-چنك سمچة تلبط

-استغفررر الله

-ههههه تدري اطلس بيتكم رهيب

-رهيب بطريقة مو زينة؟

-لا يا ليش بالعكس رهيب بطريقة خيالية ما شاء الله كلشي هنا مثالي ويدل على الترف

-اممم

-متحب بيتكم؟

-لا

-لاحظت من عرفت بيك طالع بيت وحدك

-اي

-بيتكم حلو بس...

-بس؟

-مليان اسرار

عكد حاجبه وضحك بخفة، عدل وگفته وتقرب يمي اكثر حط وحده من ايده على رجلي والايد الثانية على الدچة..

-اسرار؟

-مريم: اي احس كل واحد بيكم هنا عنده سر

-لا بله

-احساسي هيج يكول واحساسي ابد ميخيب

-امممم لطيف وبرأيج اني شنو سري يا ام الاحساس؟

-انتَ وراك سالفة عويصة ودتأذيك مدا تكدر تحجيهه وتشاركهه ويه بشر

-هاي شنو هاي

-متأكدة من هالشي لان هذي.... (حطيت ايدي على وجهه وعلى وجناته بالتحديد) هذي الملامح التعيسة تشرح شي مؤلم نظراتك وابتسامتك الحزينة ما جاية من عبث

صفن بعيوني ما حچى بقى يتنفس سريع اثر سباحته وعيونه متمركزة على ملامحي، تقرب مني اكثر وبلع ريگ..

-وبعد؟

-مادري بس وراك شي اطلس وراح يجي يوم تشاركه ورغم السويته بيه راح اسمعلك

-وما تعوفيني؟

-اول وتالي اعوفك اني لتتأمل زايد

ضحك وضغط على رجليه بيده، نزل عيونه لحضني يباوع للرسمة الي على البرمودة ورجع رفع راسه من كلت..

-اطلس تتذكر من اسيل غركت من چنه مسافرين؟

-اي

-ليش ما ساعدتهه انتَ؟ خصوصاً وانتَ تعاملهه نفس خواتك وتحبهه نفس الحب تقريباً وتغار عليهه، ليش سمحت لـ عمر وعلي يدخلون ينقذوهه وبعدين دخل مسلم؟

-انتِ شنو احساسچ يكول يا ام الاحساس؟

-شوف هالمرة مو اني حللت هاي دعيوة اختي من سولفتلهه على زواج مسلم واسيل بالسر هيج كالت

-شكالت بله

-كالت انتَ سويت هيج عناد بـ مسلم ردت تحرگ گلبه بالغيرة من خليت علي وعمر يرحون يجيبوهه بدون لا تدخل

رفع حاجبه وتغيرت ملامحه ضحك ضحكة مسموعة وكال..

-هاي شنو هاي ولچن

-يعني صدك؟؟؟

-اسيل ذيج الفترة جانت حزينة مادري بيهه اني حامل شكد حاولت اسولف وياهه رغم زعلان عليهه وما طايق شوفتهه بسبب زواجهه بالسر بس ما تركتهه وحدهه، لاحظتهه تتهرب من مسلم ورنت فكرة براسي ان هو مزعلهه وخايفة من شي من غركت ردت يحترگ گلبه من يشوف غيره يروح ينقذهه اني ما يغار مني بس عمر وعلي يشتعل شعل بسببهم، اضافةً بقيت واكف ما اتدخل لان النوبة جانت راح تزورني واذا ادخل للماي البارد احتمال تجيني كدام الكل وتنلاص

-اثاري انتو هم عدكم كيد عشتو

-وانتن مو عقل شايلات طرگاعة لكلشي عدچن قصة وتفسير

ضحكت اصفگ بيدي واحرك بحواجبي مشيطنة وهو بس يفر بيده، جر خشمه بأيده من المي الدخل بي وكال وره ما كح..

-ما تنزلين وياي شوي؟

-لا اخاف

-اني وياچ ماعوفج

-اخاف تغدرني

-هههههههههههههه ماغدرج تعالي

-اوكف شكو حاصرني بين ايدك متستحي

-بوية عوفي المستحى تعالي هسة

طلع يصعد درجات المسبح وجرني من ايدي وحاوطني حيل چلبت بي اخاف مرعوبة لحدما دخلني بالمي مغمضة عيوني، رخه ايده على جسمي شوية متت خوف گلبي راد يوكف صرت اعيط بالهمسة..

-راح امووت اطلس راحح اموووت ولك اطلللس طلعني راح اموووت

-قضيتي شهرين الصلاة العليج والعشرة ايام صوم؟

-اي اي قضيتهن والله قضيتهن

-چا عادي واذا متي گبل للجنة

-عززززه

-ههههههههههههههههه ما تموتين مريم اهدي

-اخاف وربي والله العظيم والحسين واليسوع ومريم وعيسى والنبي محمد وعلي ابن ابي طالب عليك ام البنين طلعني بداعة امك بداعة اختك بداعة جوارينكم

-هههههههههههههه ما اطلعج وعلي

-اطلس لا تطلعني بس لا تعوفني فدوة اخاف والله اخاف صخام الصخمج يمصخمة يمريم

-خرب لا تحركين رجليج لا ياخذج الماي

-ماحرك ماحرك شورطني بيك انييي

-لا تخافين اني يمج

-متعوفيني مو متعوفيني؟؟ حباب متعوفني؟؟

-ماعوفج وعلي

-اطلس اذا عفتني اغرگ اموتك اذبحك ادعي عليك واني بالجنة اكول ربي دخل الشمر للجنة ولتدخل المحيط الاطلسي

-عود عبالج لو رحتي للجنة اعوفج؟ وعلي ابقى العمر كله اصلي واصوم بس حتى اللحگچ

-جذاب متسويهه

-اسويهه واسوي ابوهه

-تسويهه حتى بس تجيني للجنة

-اسوي المستحيل حتى ابقى وياچ مريم

عيني بعينه التوتر يقره الف راح يوكف گلبي قربنه وترني اضعاف وانفاسه وكلماته الهادئة والصدق الي بعيونه اذاني، قرب وجهه على وجهي رجفت اطرافي ودرت وجهي عنه لبعيد..

-طلعني منا ماريد اسبح

-بس شوية جربي الشعور كلش حلو

هزيت راسي اي وصار يسبحني شوية الشعور يجنن صرت اضحك مثل المخابيل وهو مبتسم طول الوقت من يشوفني اضحك..

راد يعوفني اغامر وحدي وچلبت بي حيل متوسلة بنظراتي ابتسم وتقرب خطف قُبلة سريعة مني خزرته وهو ضحك..

-الاطلس: ضحكتج تنعش يومي

-متستحي انتَ

-صيري حبابة مريم

-من يوم يومي حبابة انتَ صير حباب

-مرمر

-هااااع

-خرب حظ الرومانسية شنو من بشر انتِ

-اطلس حباب لتسوي هيج

-شمسوي اني

-راح نتطلگ خلال سنة لا نتأمل زايد

هز راسه هادئ عيونه ما بعدهن عني شدني عليه وهمس بأذني..

-خليني اشبع منج ولا تحرميني لو يوم واحد اريد استغله واني بحضنچ

-لا.. اطلس لتسوي هيج بس توجع گلبك وتتعذب

-عذابي ووجع گلبي وانتِ بين ايديه اهون عليه من عذابي وانتِ بعيدة

حركت راسي لا ما قابلة، ماهتملي نزل وجهه عليه وحضني حيل وكف جسمي دا اريد ادفعه عني ونزينه ثنينه على صوت قوي كلش صار بالحديقة..

-شنو هاي سمعت؟؟ اكو احد هنا مو؟؟

-طلعي من الماي بسرعة

دفعني للدرجات يريدني اطلع بس قبلهه جر الصاية يلبسني ويستر جسمي لازگة الملابس عليه تنكعت الصاية بس ماهتم طلعني من المي وطلع ورايه حط الشال على راسي..

-اطلس انتَ مو كلت محد اكو؟؟

-مادري يمكن واحد من العمال اجه

ما لحكت اجاوبه رجع صار الصوت اقوى عبالك صوت حديدة تضرب بحديدة ثانية الصوت جاي من يم قفص النسر وكفني بمكاني وكال مستعجل وهو يلف المنشفة على صدره..

-لا تجين وراية ماشي ابقي هنا

-وين رايح شنو هاي تعوفني وحدي هنا حباب لتروح

-بس اشوف شنو وارجع مريم ما اتأخر

-اخذني وياك ابقى بظهرك ما اراوي نفسي حباب

ذب نفس محتار جرني وره ظهره والصوت كلما جايله يزيد ويزيد الى ان وصلنه للمكان المنشود واتفاجئ من اشوف عمو محمد واكف بيده حديدة طويلة ويضرب بيهه القفص خله الطير يثور ويطير بهمجية بداخل القفص..

-مريم: شصاير اطلس؟

همستهه بيني وبينه ما جاوبني اشرلي اعوفه واروح جوه بس ماكدرت رجليه جمدو من منظر عمو شكله نفس اليوم الصبح من اجه للبيت متخبل..

-الاطلس: روحي مريم رووحي

هزيت راسي اي ورحت اتسحب للمطبخ وطفرت على صوت ضرب الحديدة بالقفص وعلى عياطه..

-محمد: يا خسااااااارة..

وكفت اباوعله يبس دمي من صار يضرب بقوة اكبر ويصيح بصوت اعلى..

-يا خسااااارة تعبيييي وشغلييييي وعيشتيييييي وكلشيييي سويته يا خسااااااارة يا خساااااااارة

ويضرب حيييل على القفص والطير راح ينجن ركض عليه اطلس يلزم ابوه يهدأه من عصبيته بس انقلب كلشي ضده دفعه عمو على القفص بقوة نبتت حدايد القفص بظهر اطلس عاط متألم بس عمو ماهتم..

-يا خسااااارة تربيتييي الك ولللك هيج تبيعنيييي هيج تبيع ابووووك

-يابة بس على كيفك اهدأ ما صار شي والله ما صار شي تعال وياي نسولف على كيف

-كلله بسببكك انتَ السبب بكلشييي كلل عذابيي منككك انتَ

لزمه من رقبته يخنگه جحظت عيوني رحت اركض على عمو اجره من قميصه ماكدر اللحلحه واطلس يصارع النفس ويحاول يفك نفسه من ايدين ابوه القوية..

صرت اعيط من الخوف وابجي اتوسل بي يعوفه بس هيهات ولا كأني موجودة، ما جان عندي حل ثاني وگفت وراه وجريت عمو من رقبته ونبتت اظافري بيهن وصرت اجرح بي..

ترك الاطلس واندار عليه خازرني ارتعبت من نظراته بس كلشي ما سوالي عافني وحط راسه بين ايده ويعصر بي حيل..

رجع اطلس لوعيه يلهث يلقط انفاسه بصعوبة، اشرلي اروح واعوفه ماقبلت ما اجازف خاف هم يخنگه..

-الاطلس: روحي مريم روووحي

-يمووتك

-ما يموتني روووحي

استسلمت ورحت اوكف بالباب الخلفي، راحله اطلس جر عمو الي روحه فايرة الوجه مگلوب گلاب يخرع كعده على الكراسي البره وگنبص كدام ابوه يمسح على ايده ويهمسله كلمات..

عمو وضعه شكد ما اكول صعب ماكدر اشرح، الصار مادخل عقلي حسيت روحي شخطت..

اندار اطلس يأشرلي بعيونه اروح هزيت راسي اي ورحت للمطبخ اركض دا اروح لغرفة خالة احچيلهه وصارن بوجهي خالة حصة وغدير وجههن يتلاطم ووجه خالة صاير احمر دم وخدودهه مورمة مال واحد مشبعهه راشديات....

يتبع ♠️💸...

• ━━━━━━❪♣❫━━━━━━ •

شلونهم الحلوين 🥹♥️ مشتاقين هوايه هوايه 🫂

سولفولي توقعاتكم 😻