رواية الاطلس "دمليج أسود" الفصل الثالث والعشرون 23 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

چانت صدفة.. وانخلقت لي بعدها حياة ✨

• ━━━━━━❪♣❫━━━━━━ •

اندار اطلس يأشرلي بعيونه اروح هزيت راسي اي ورحت للمطبخ اركض دا اروح لغرفة خالة احچيلهه وصارن بوجهي خالة حصة وغدير وجههن يتلاطم ووجه خالة صاير احمر دم وخدودهه مورمة مال واحد مشبعهه راشديات..

-مريم: خالة شصايرر اطلس بره.. عمو راد يموته خنگه..

بچت خالة حصة بقوة وصارت تضرب على وجهها ورجليهه غدير لزمتهه ودخلتهه الغرفة بقيت بمكاني مصعوقة شو عافو وحده بله تخبل عليه مرة ثانية وموته؟؟!

دخلت للغرفة وراهن كاعدة غدير على ركباتهه كدام امهه تصبر بيهه ويبچن ثنينهن مكابلات بعض وينوحن..

-مريم: خالة حبابة مو وكتهه هسة اطلس ليصير بي شييي

اجر بيدهه اكومهه متقبل تكوم مليت مو وكتهه هسة عفتهن ورحت اشوف نانا ماكو غيرهه تفزعله ركضت ركض اتعثر بخطواتي لغرفتهه بعدني على الدرج وشفت اطلس يرجع منزل راسه ووجهه متروس هم وغم..

-اطلس

رفع عينه من سمع صوتي ضغط على اسنانه بقوة وعصر مكان گصته نزلت بسرعة اهرول لزمت طرف المنشفة الي لافهه على جسمه اتسائل..

-شصاير اطلس انتَ بخير

ذب نفس عميق وتغيرت ملامحه الحزينة لأخرى مليانة شفقة على حالي، مسح على خدي بأبهامه وهمسلي بيني وبينه..

-ليش مو بالغرفة لو تردين تعوفيني وترجعين لغرفة سارة

-لا بس خفت عمو يرجع يأذيك

-تعالي نروح ننام

-عمو وين؟؟

-تعالي تعالي معليج بي

يجر بيدي وصعدني وياه للغرفة طبك علينه الباب وقفله شال المفتاح من الباب وحطه على الميز كل خطواته وحركاته هادئة بس رجفة ايده توضح توتره..

-اطلس ليش قفلت الباب؟

-احسن، حتى ترتاحين بنومج

-ليش اكو احد يدخل عليك؟

-اي اوقات امي تجي او المساعدات

هزيت راسي ساكتة راح للحمام فات اخذ ملابس واني رحت اخذلي ملابس بدلت بسرعة بدون لا اسبح انزعجت من مي المسبح بس ميخالف مو وكتهه هسة..

طلع من الحمام شعره يقطر نشفه بالمنشفة ووكف على الميز يتعطر ويمشط، اخذ عود اذان ينظف اذانه ذبهه بالسطلة وراح للثلاجة الي بغرفته طلع منهه بطلين مي فتح واحد وانطاني واحد..

-اطلس

-عيوني

-ليش ايدك ترجف؟ من تصرف عمو صح؟ ليش هيج سوه ليش خنگك سولفلي

-ههههه لا يابة بس اعصابي تلفت ابوي ثگيل، يله نامي لا تنعضين

سكتت هادئة بس يريد يغير الموضوع ويتهرب من اجوبتي، خلاني غصب انام على السرير واجه غطاني باللحاف مسح على شعري وابتسم..

-يله تدني

-شنووو

-اريد انام تعبان

-شنو وين تنام ماكو ماكو ممنوع

-چا شلون شبيچ مريم

-ماكو مننام على نفس السرير اطلس بأحلامك تنام بصفي

-لااا بله

-اييي والله

-احنه مو متزوجين!!

-واذا متزوجين

-چا غير المتزوجين ينامون بصف بعض

-اطلس هالسوالف مو عليه اني رضيت اجي بغرفتك انام وتنازلت تنازل عظيم عظيييم جداً باجر احجيهه لأولادي بالمستقبل واحجيلهم كلشيي سويته

-اي نسولفلهم سوه

-اففف وخر

-مرمر وين انام شبيچ

-تنام هنااك

اشرت على الشازلون الي كدام الجرباية ورجعت اشرت على القنفة الي بنهاية الغرفة واردفت..

-لو هناك، شوف ما شاء الله غرفتك تكول قلعة كلشي عندك اختارلك مكان ونام

-ويتكسر ظهري واتعلعل بنومي علمود حضرة جنابچ!

-اي لو بنت البادية ميحقلهه تنام على چرباية

كلتهه وحطيت ايديه ثنينهن جوه راسي، عفس وجهه وگام مني فتح باب الغرفة طلع ورجع وره شوية بيده فراش ولحاف مده بصف الجرباية وحطله مخده ونام عليه..

-الاطلس: بت البادية اللئيمة

-ابن المدينة المدلل

رفع راسه عليه ونزلت راسي عليه خازته وخازرني ضيگ عيونه وگال وهو يأشر بأصبعه..

-خليتچ تنامين على السرير اليوم وحدج بس والله يجي يوم انتِ تجيني وتنامين بصفي وشرط الا على صدري

-هههيييهيييي تحلم يا حبيبي تحلممم

ضحك على ضحكتي وكام طفى الضوه طلبت منه يفتح ضوه اللمبه خفيف ورجع لمكانه، حطيت راسي على المخدة حتى انام والله خوش فراش عليه المحيط الاطلسي، مشى وقت واحنه هادئين مديت بس عيوني اباوعله چان فاتح عيونه وسارح بالسگف..

بقيت صافنة عليه وهو ما منتبه بالي مشغول شنو صار بس استحي اللح عليه، ذبيت حسرة فوراً وجه انظاره عليه رجعت لمكاني بسرعة اللطم بصمت الحظ لگفني واني اباوعله وزدت باللطم من ضحك..

-شبيچ

-انتَ شبيك

-شسويت اني

-نام اطلس مو زين السهر على عيونك

-ما انام بعد وكت

-انتَ عندك دوام معقولة متنعس؟

-لا

-يعني صدك تنام بس اربعة ساعات باليوم؟

-اي

-اطلس

-هممم

-بالك سارح دتفكر بشي

-اي

-بشنو تفكر؟

رجعت امد راسي عليه هو على نومته ماغيرهه وعيونه متابعة بالسكف فوك، رفعت عيوني اباوع للمكان اليباوعله فارغ مابي شي، شتت نظراتي من كال بحسرة..

-افكر بأختي

-منو منهن؟

-سارونة

-شبيهه ليش

-اعرفهه تخاف..

سكت وذب حسرة قوية غمض عيونه وهز راسه نافي واردف..

-تفكير تافه اعرف بس اخاف عليهه اعرفهه ما رايدة هذا الزواج وانجبرت عليه

-تحب سارة كلش

-احب كل خواتي

-ماكدرت تفركش الزواج اطلس؟

حرك حواجبه بطريقة لا، هزيت راسي بدون لا احجي فاجأني من كال..

-الصار قبل شوية كله لان ابوي صارله يومين ما ماخذ علاجه

-علاج مال شنو؟

-نفسي

بلعت ريگ استمعله بتركيز، بلل شفايفه بلسانه واردف..

-ابوي مريض نفسي واوقات ما يسيطر على نفسه ويفقد اعصابه تتحول شخصيته ويسوي شغلات هو ينصدم من روحه من يرجع لوعيه

-يعني يفقد؟

-بالضبط

-شنو قصده من كال كل عذابي بسببك؟

ميل زاوية فمه وحول نظراته عليه رفع راسه بيده وثبته صار قريب مني..

-الاطلس: يحجي بشغلات غير مفهومة من تزوره الحالة

-يعنف خالة هم؟

عكد حاجبه وحرك راسه لا، اردفت فوراً..

-مريم: وجهها چان مورم مال واحد مأذيهه اطلس

-هي تأذي روحهه

-شنوو

-مريم الوضع معقد بس لا عبالج تسوي هالشي لان حابته او لان هي مخبلة بس هذا الحل الوحيد حتى ابوي يهدأ

-تضرب نفسهه حتى يهدأ؟؟

-اي، يخاف هواي من تسويهه تضرب على وجهها وعلى رجليهه كدامه يخاف ويبتعد لو يبطل افعاله

-افعاله شنو يعني؟

غمض عيونه كأن ديدور على كلمة مناسبة قرب نفسه عليه اكثر وهمس..

-افعال غريبة

-مؤذية الهه؟

-لا مؤذية اله

-حرت

-ادري احنه عائلة غريبة

-اطلس خفت

-اني يمچ لا تخافين

-لا خفت عليه مو منه ليش مياخذ علاجه بأنتظام

-ياخذ واني مراقب علاجه بس هاليومين غفلت عنه اللتهيت بالعرس وهو مغلس عليه

-بهالسرعة يروح مفعول الدوا سريع؟

-علاجه اشبه بالمهدأت و اي نعم كلش تساعده اصلاً يصير انسان ثاني

-ليش خنگك اطلس تدري چان متت

-بس ما متت

-يعني انتَ متعود على هالشي؟

-لا

-ليش احسك تجذب عليه

-نامي مريم لا تتعبين عيونج الاحبهن

-اطلس

-ها

-انتبه لنفسك ولتخلي عمو ينسى علاجه بعد

-بعيني

درت وجهي من شفته صافن عليه انطيته ظهري وغمضت عيوني وافكاري تعصف ذهني تعبتني، اتذكر بيوم الدخلت عليه بالمكتب وعمو جان فوگاه وگام اطلس متبهذل حاله وگال اجته النوبة احس مو النوبة جانت زايرته عمو محمد هم مأذي بس استحى يحجي..

**

"راح اموت" كلمتين توصف حالي الدقيق هسة ماعرف شسوي عصيت بالحمام راح تطلع روحي اعيد وازيد برسالة غدير وكلني ارجف، رفعت الموبايل للمرة المية اعيد قرائتهه واشهگ كأن اول مرة جاي اقراهه..

"غدير: الج ساعة سارة لا اكثر بس يصير اقل، هو طبعاً راح يصير اقل لان متأكدة حمزة ميتحمل بشاعتچ وقرفچ وحتى ميعجبه يلمسچ تلعب نفسه من ريحتج بس يله ميهم، باجر اخذ تقرير مفصل منج صيري حبابة"

لطمت على خدي شلون بيه ياربي شلون راح تصفى هاي متعوفني بحالي اني البدلة بعدني ما نزعتهه اختنكت بيهه والقيطان الوره متنفتح ما جاي اعرفلهن..

بقيت اعالج بيهه انگطع نفسي كعدت بالحمام انوح ماعندي الجرأة اطلب منه يجي يساعدني تلفت اعصابي كمت وكطعت الحبال الوره تزلغت ايدي بس ماهتميت گطعتهن لحدما تلفن وانتفتحت البدلة..

فتت اسبح وفرشت اسناني وطلعت لبست دشداشة النوم البيضة الجابتهه غدير ماكو غيرهه اساساً عرفتهه راح تلگه التراك الاحتياط الجبته ويايه وتطلعه رادت تحصرني بهاي الخزي..

لبستهه ولبست فوكاهه الروب عفت شعري مفتوح وطلعت من الحمام لا راشة عطر ولا مهتمة لشي بس اريد اخلص تعبت..

-حمزة: نعيماً

-تسلم

همستهه منزلة عيوني، ماعرفت شديسوي ولا عرفته بدل لو لا مالي عين ارفعهه واباوع لوجهه..

-حمزة: تعالي تعشي كناري اكيد جعتي

-لا

-هاا شعجب كلت متي جوع

-لا مو جوعانة اريد انام

-ماشي تعالي اكلي وننام

اجه عليه سحبني من ايدي وكعدني على الكرسي اخيراً رفعت راسي عليه مبدل لابس تراك نيلي، كعد مقابيلي يسويلي لفات ويقدمهن الي ماكدرت احط لگمة بحلگي نفسي تگلب من الخوف..

-اكلي كناري

-حمزة

باوع لوجهي نزلت عيوني بسرعة ابتسم ورفع وجهي عليه..

-كولي سارونة محتاجة شي؟

-اريد انام

حك طرف حاجبه وهز راسه كمل اللگمة الي بحلگه وگام كف الميز وطلب من اليشتغلون بالفندق ياخذو، راح للحمام گال بس يفرش اسنانه ويرجع رحت امشي برجلين راعشة للفراش..

تذكرت توصيات غدير من كالت نزعي الروب عيوني ماشوف بيهه بسبب الدموع الحابستهن والله احس جاي تنسحب روحي اتذكر الصار ويايه قبل معقولة راح ينعاد كله؟ تعبت ربي انتَ اعلم بالحال..

كعدت وغطيت نفسي بالفرشة انتظره يطلع شوية واجه نشف وجهه بالمنشفة واخذله مكان بجانبي، حط راسه على المخدة واشرلي..

-طفي الضوة كناري

طفيته لو احس طفت روحي كمت النفس كوة اجره من صارت الغرفة ظلمة ماتحملت حررت دموعي وخليتهم ينزلون كل خلية بجسمي تلفت من الخوف ذاكرتي استرجعت كلشي صار بذاك اليوم المشؤوم ماريد هالشي والله ماريده..

مرت دقايق على گعدتي ابچي بالخنسة ماشوف الغرفة هندس ظلام دامس احس بجسمه قريب مني بس مدا يسوي أي شي جسده هامد..

مرت دقايق اخرى وحمزة ما تحرك ولا حتى نطق حرف، ماتحملت الوضع فتحت ضوه موبايلي ووجهته عليه وانصدم من اشوفه منطيني ظهره ونايم!!

كممت حلگي بيدي اخفي شهگتي شنو هاي؟؟ عود صدك راح ينام صرت ابجي من الفرح الحمد لله يارب الحمد لله بس فوراً رسالة غدير رنت براسي من كتبت "حمزة ميعجبه يلمسچ تلعب نفسه من ريحتج" وكمت ابجي من القهر..

حضنت رجليه لصدري وبجيت لحدما نشفت عيوني نسيت روحي شهگتي علت وگلبي تعب مادري ابجي فرح لان ما صار شي لو ابجي حزن وتعاسة لان تلعب نفسه مني..

للصبح اني كاعدة ما غمضت عيني ويه كل حركة تصدر منه انز مفزوعة حصرت روحي بنهاية الجرباية من اندار عليه صار بوجهي مغمض عيونه ومبين نايم صدك مو تمثيل..

مسحت عيوني حرگوني وكمت للحمام اغسل واطفي ناري بقيت بالحمام كاعدة ماريد اطلع مر وقت هواي واني هنا گلبي دگ من انطرقت باب الحمام..

-سارونة

-هاا.. هاا حمزة هاا.. مـ.. محتاج شي

-اي احتاج الحمام

-اي اي لحظة اي هسة اطلع

غسلت وجهي بسرعة وهفيته بلكت الحمار يروح فتحت الباب وتذكرت اني نازعة الروب شكد استحيت طلعت بسرعة وركضت للفراش اغطي نفسي وهو دخل..

لبست الروب سريع سريع ورتبت شعري تكفش ما مشطته البارحة من سبحت رحت اكعد بنهاية الغرفة على كرسي علما طلع من الحمام مبدل ملابسه لقاط رسمي ومتأنق على اخر حباية..

-سارة: راح تطلع؟

-اي نطلع لو تردين نبقى هنا بكيفج

-لا خلينه نطلع، ابدل اني؟

-بكيفج تحبين تطلعين بروب النوم

-لا اكيد

ابتسم وكمت اخذت ملابسي بدلت بالحمام وطلعت حتى مادري وين رايحين وكفت انتظره يكمل لبس ساعته اندار عليه ابتسم وتقرب يمي..

-مكفش اليوم الكناري

سفط شعري وعدله، طلعلي كذلة يشتغل وهو مبتسم رتب لبسي وحرك راسه متحسر..

-شبيچ عبالك داخلة معركة

-مادري

-ان شاء الله اليوم بالليل طيارتنه نسافر

-لا ماريد اسافر

-ليش

-مو شي ضروري شابعة سفر

-ميخالف بس هاي اول سفرة النه سوه

مجاوبته نزلت عيوني على ايدي افرك بيهن..

-سارة انتِ زعلانة مني؟

-لا ليش

-البارحة هواي بچيتي

رعد گلبي باوعتله سريع وهو مركز عيونه عليه مسح دمعة معلگة برمشي وكال بأبتسامة..

-لا تخافين مني ما أذيج اني

-جنت كاعد؟

-ما نمت ولا ثانية

-سمعتني ابجي

-كل شهگة طلعت منچ شگت صدري

-اني اسفة ادري اني غبية وابجي بسرعة

-ليش ليش هيج تكولين

طگيت بجي ماعرف منين دتجيني الدموع مهضومة گلبي يوجعني وروحي محتركة، حچى بلهفة يمسح خدودي..

-سارة لا تبجين، ولج ليش تبجين شبيچ يا عروس تبجي ثاني يوم عرسهه

-ماعرف شبيه البارحة ابجي واليوم ابجي عكرت مزاجك اني

-لا بالعكس

فركت عيوني اباوعله ابتسم وكرص خشمي..

-ساكتة لو تبجين بالحالتين احب گعدتي وياچ

-ههههه حمزة اسكت منو جان يصيحلي بومة من جنت ابجي

-اي بعدج بومة عادي ماتغير شي

اضحك وابجي بنفس الوقت وهو يضحك ويايه ويمسح وجهي وخشمي بالكلينس..

-حمزة: يله كافي مو شفتيني منطيچ مجال والله بعد لو بچيتي

-مابچي بعد واذا بچيت رجعني لبيت اهلي عقوبة

-هلو هلووو

-اي شبيك حتى تخلص ومابجي بعد

عض على شفته وراح للميز اخذ شيشة العطر تعطر ويسولف..

-سارونة رايحين لبيت اهلج عازمينه على الريوك

-هاا صدك

-اي، سارة

حط العطر بالجنطة مالتنه واخذ شيشة العطر مالتي اجه يرشلي ابتعدت عنه فوراً مفزوعة گلبي انسحن وكمت ارجف شاف وضعي وعكد حاجبه..

-شبيچ انخطف لونج

-ليش ترشلي عطر

-مادري يعني كلت نروح لاهلج و....

صفن تلعثم الكلام بحلگه مسح على وجهه وكال بحيرة..

-ماعرف ليش هيج سويت صراحة

ما اهتميتله رحت اسد الجنطة ووگفتهه اخذت جنطتي اليدوية شلتهه بعصبية روحي تفور معناهه صدك كايل لغدير ريحتي مو طبية ومتعجبه لان كم مرة كررتهه عليه رغم هي تشتري نفسه بس حمزة يكوللهه الريحة بجسمج حلوة وسارة تخربهه شكد انجرحت راح اطگ وانفجر هنا..

-سارة شبيچ وين طالعة

-اريد اروح يله

-اوكفي شبيچ تعصبتي كله لان ردت ارشلچ عطر

-لا شنو السالفة شدخل؟؟

-مادري انتِ تحسستي من حركتي ومادري ليش سويتهه اصلاً بس ردت اكسر الحاجز الي بيناتنه

-حمزة كافي ميهمني يله خلينه نطلع

-سارة!!

رفعت راسي عليه خفت من نترته شكدما حمزة لطيف بس من يعصب يتغير مية وثمانين درجة حتى ابوية يخاف منه..

-اوكفي احاچيچ شبيچ تركضين خليني افتهم سبب ضوجتچ

-ماكو سبب اني تعبانة وبالغت بردة فعلي ادري

-سارة انتِ كارهتني؟!

-شنو

-كارهتني انتِ!!

سكتت مجاوبته اصلاً ماعندي جواب، تقرب مني ولزمني من متوني يحجي بهدوء بس نبرته مال واحد معصب ومقهور..

-اني تزوجتچ لان اخاف عليج من غدير اعرفهه ما راح تعوفج بحالج

-شبيهه غدير شنو قصدك

-لا تغشمين نفسج اعرف تهديدات غدير الج كلهن يمي مسجلات

فكيت عيوني على وسعهن بس ماحجيت كلت يمكن ديجر لساني بس طلعت غلطانة..

-هددتچ تتزوجيني حتى يصير عدنه طفل وتطلبين الطلاق وارجعلهه مو؟

-حمزة شنو هاي انتَ...

-احجيييي

-اي اي هيجي صار

-وانتِ بكل فهاااوة ما اجيتي وگلتيلي ليييش

-اخاف

-ولج منووو يكدرلج واني بظهرچ سااارة

-اخاف منهه اخاف عليك والله تأذي الكل حتى توصل لغايتهه

-هددتچ تفضحچ وتكول بينج وبين فاهد علاقة وعلساس فاهد عنده صور غير اخلاقية الج مو؟؟؟

-اي بس والقران وروح يوسف والله العلي العظيم ماعنده والله والله ماعنده ولو صدك عنده مو اني دازتله ورب السماوات السبعة حمزة صدكني اني ماعندي هاي الشغلات والله استحي.. اسـ.. استحي اباوع لنفسي بالمراية شلون اصور نفسي وافضح روحي

هز راسه متحلف وضام شفايفه بحلگه يرجف عصبية ووجهه انطعن احمر حط ايد على خصره وايد بجيب بنطرونه وواكف بس يهز براسه..

-شمعرفك بكل هذا الحجي

ما جاوبني راح يوكف كدام الميز وثبت ايده عليه نزل راسه يستغفر بهدوء، نار مشعولة بيه ما جاي تطفى تخبلت من موقفه الاخير مجاي اكدر اتخطاه..

-حمزة شو باوعلي

وجه نظراته الي ولسه على وگفته، تلعثم كلشي بيه وسألت سؤال شككتني بي غدير من سنييين..

-ليش رشيتلي عطر قبل شوية؟

-اخخ سارة

-كول ليش!!

-هيج حركة لا ارادية شبيچ لحيتي

-خوش حمزة خوش

اخذت الجنطة دا اطلع من الغرفة واجه يهرول لزمني من ايدي وحچى متوسل..

-سارة شبيچ انتِ شبييج

-مابيه شي اريد اروح يله نطلع

-ضايجة لان ردت احطلج عطر والله صارت لا ارادية من التوتر هيج سويت تصرفت بغباء

انظرله وكل نسمة بجسمي ترجف غمض عيونه وذب نفس همس بصوت خافت بصعوبة سمعته..

-احب عطرج

-شنو

-احب.. احب اشمه

بلمت وجهي مو فاهمة كلامه حركت راسي مستفهمة ذب نفس ومسح على لحيته..

-ماقصد شي بس احبه يعجبني واحب اشمه دائماً وهسة من توترت ماعرفت شنو اسوي ردت بس اللتهي واحم..

-اجيت ترشلي عطر؟

-اي

-حتى تشمه وتهدأ؟

غمض عيونه وجهه گام يتعرق ماعرف خجل لو ندم بلع ريگ وعض على شفته العلوية وحرك راسه اي، لو جان غير واحد چان كلت عنه يجذب ويلوفهه عليه بس حمزة ابد ميجذب وميحب هالصفة..

-وهذا السبب غدير جانت تشتري نفس عطري؟

-مادري

-لا تدري

-اي

-انتَ گايللهه احب عطر سارة؟!!

-لا لا مو هيج كل ما بالموضوع مرة جانت عدكم وهي متعطرة بعطرج كلتلهه ريحتج حلوة ومميزة تذكرني بـ........

صفن وقطع حديثه يتابع ردة فعلي بس ماعرف ليش ضحكت وضحكت من كل گلبي هم لدرجة حطيت ايدي على گلبي من گدما اختنكت..

-حمزة: ليش تضحكين

-هههههههههههه ههههههههههههه يذكرك بيه؟؟؟

-سارة لا تلحين

-هههههههههههههههههه عزه وغدير كرهتني حياتي سنين بسبب هالشي هههههههههه

-اسكتي كافي

-يا يااا اثاري انتَ الي مطلع هالسالفة عليه

-يا سالفة شبيچ

-شكو تكوللهه ريحتج حلوة متوازي!

-عادي يعني واذا اصلاً ما اجه ببالي ريحتج هيج، تذكرت احد ثاني

-هاا منو هذا الاحد

-فد وحدة

-صدك

-اي

-ها مادري اسفة بس يعني هيج العطر حلو حمزاوي

-يملخ

-الله صدك

-كلش حلو لا تفكرين تغيري ابد تميز بيج ومن اشمه تجين على بالي

-مو هسة كلت يجي غير شخص على بالك

-اهوووو سارة

لزمني يفرك راسي وشعري متت وجع وضحك يريدني بس اسكت بس انكطع نفسي متونسة فرحانة كلش ممصدكة الي جاي اسمعه غدير جذبت عليه هاي السنين كلهه اوف منج غدير..

وخرت عنه اضحك وهو مفرفح ويأشرلي سكتي عدلت شعري على المراية، مدلي ايده حتى اللزمه حطيت ايدي بنصهه وطلعنه من الفندق، ركبت سيارته والطريق هدوء محد حچى كلمة الا من هو كسره وكال..

-حمزة: كناري أي شي تسألج عنه غدير بخصوص ليلة البارحة كوليلهه حمزة ما يقبل احجي الموضوع خاص

-هاا

-اي مو تحجين وتكولين چنتي تبجين واني نمت

-مو خاف تكشفني

-لا ما تكشفچ بس امشي وياي ولا تچفصين

-خوش هذا هو

-سارونة اني وياچ وبظهرج اكسر راسه الي يهددچ ويوجع گلبج

ابتسمت اباوعله هزيت راسي وهمست..

-ادري بيك

-زواجي منج كله حتى احميچ وروح اخوي يوسف اخذيهه مني كلمة رجال ما اللمسچ وما اتقرب منج بدون رضاچ وما اضغط عليج بحچاية احسبينه اخوان وعايشين سوه واذا تكولين حرام اخوان شوفينه اصدقاء نفس قبل

هزيت راسي استمعله وخانسة وهو يحلف حلفان يكسر الظهر ان ميلمسني وغايته من الزواج هو بس حمايتي..

-جان كدرت ارفض هذا الزواج وما اكمله حتى لو استقيل من الشركة واطلع من البيت بس اعرف غدير راح تسويلهه سالفة جديدة وانتِ تكونين الضحية، ظلي وياي جوه جناحي وفنه الي يطخچ بعد

فرحت بكلامه وانتعشت روحي خصوصاً من كال وهو يغمز..

-شحلاتهه اصدقاء وعايشين سوه

-هسة همزين من تحب عطري

-اوووووف سارة بعد شيخلصني

-هههههههه هسة لو بس اعرف ليش تحبه يعني لييييش

-هيج من الله احبه

-متستحي مو عيب

-ولج اني شمسوي

-اي عيب تحب عطر اخت مرتك

-هااا

-طبعاً عيب وحقهه غدير من زعلت ميصير حمزاوي حتى لو چنه اصدقاء كلمتك غلط

سكت وكمل سياقة هز راسه وتأسف بصوت هامس..

-سارة: شكلت؟

-كلت اسف

-على شنو

-لان سببتلچ مشكلة ويه غدير بسبب حچايتي

-يااا لا عادي يمعود اني غدير كرهتني الدنيا بسببك

-واني شكو

-يا يا لو تعرف شتسوي بيه

-احجي سولفي

-لا هيج سوالف عادية

-احجي لا تخافين

-هي تغار عليك كلش جانت وهالشي مزعج

-ادري بيهه

-هسة مو غلط خليهه تغار بس مو من خواتهه شدعوة عاد

-راح نبقى نحجي بغدير؟

-لا معلينه بيهه

-اليوم نسافر والله اذا بومتي عليه

-لا ما ابوم بس انتَ ونسني ولا تضوجني وعوف عطري

-الا اكسررره ومحمدد

-تشتريلي غيره لان انتَ تحبه

-ههههههه بت اللذين

ضحكت ضحكاتي القديمة الاضحكهه من اكون وياه، من اكون ويه حمزة صديقي واخوية الحبيب مو من يكون زوجي..

-حمزة: ضحكة الرقاصة بطليهه

-ههههههههههههههههههههههههههههااااي ماكدر

-ولججج

-حمزة عوفني هسة بشنو ضارتك

-تلمين علينه أمة لا اله الا الله وتخلين الزلم تتفرج عليج

-وهسة شنو يعني

اندار يخزرني، باوعتله بلطف وسويت روحي بريئة عكد حاجبه معاجبه وفر بيده..

-حمزة: تكول شنو يعني الحمرة

-حمززززة

-اي والله مكيفة تريد الزلم تباوعلهه

-لا ماريد احد يباوعلي

-فنه اليباوعلج

-هههههه عشت الدور حمزاوي مسوي بيهه الرجل الغيور

-يلا ولي هناك لا تحجين بعد

-حمسه

-ههههههه لا تصيحيلي حمسه لا احمسچ

ضحكت بكل صوتي وهو يتحرگن ويعض على اصبعه بقينه هيج الى ان وصلنه لبيت اهلي..

**

"مريم"
فزيت على انفاس اطلس بأذني باسهه ولعب بشعري كلش نعسانة جنت ما وخرته عني وشوشلي شي بأذني ما لقطته ممستوعبة حسيته حلم رجعت غفيت..

حسيت على صوت المنبه مالته بالـ 6:30 شفته كاعد حتى ما نام طفاه وگام للحمام، طفرت بسرعة من السرير رحت اخذت ملابسي بالحمام البره سبحت وبدلت ورجعت للغرفة چان هو هستوه ديطلع من الحمام..

استحيت اباوعله انطيته ظهري وهو وكف بعيد يبدل ملابسه بس يبين بالمراية ورغم هذا ما رفعت عيوني، كمل لبس البنطرون والقميص واجه تقدم عليه..

-الاطلس: صباح المتزوجين

-صباح النور

-شلون نمتي البارحة

-زينه والله خوش مخدة عندك فد ارتاحيت عليهه

-اي واني ما نمت دقيقة

-يله فدوة الي

-سبع فدوات هم

ابتسمت ووكفت احط واقي كدام المراية، ردت افتح وياه حديث حسيته متضايق حتى ابتسامته باردة..

-اطلس مخدتك عزيزة عليك مبينه

-اممم

-هسة تكلي من الريش هاي وتفخفخ عليه

-اي من الريش

انداريت عليه فاتحة عيوني واضحك اخيراً ضحك خفيف وكال..

-والله شبيچ

-شعجب لعد ما گتلي وسويتلي بيهه انتَ امير وتنام على مخدة ريش

-هي مخدة شسالفة

-امممممم

-اي صدك بس الما شايف يحجي بفلوسه واملاكه

-صح صح انييييي الوريث الاول والوحيد لشركة الاطلسس اتزوووج بنت بااادية بنت فگررر انييييي

-اويلي يا مريم شجاب هاي على هاي

-اي هذا كلامك انتَ

-بس ما فخفخت بفلوسي حجيت عن نفسي شخصيتي اني

-وذكرت املاكك

-الله اكبرر الله اكبببر

-ديلا عيني يلا افتهمت عليك لتعصب

-القصدته بس حديثين نعمة اليحجون بفلوسهم بكل زمان ومكان الشايف والعنده من زمان ما يحجي وما يهتم لهاي التفاصيل

-اي وضحت الصورة يالوريث الاول والوحيد لاكبر شركات المغرب

ضحك من گلبه ووگف يلبس الرباط واني انتظر الواقي ينشف على وجهي، شد الرباط مالته وعقچ وجهه..

-شبيك

-العضة مالتج مبينه هسة شلون

انداريت عليه ومديت شفايفي متحسرة شكد فشلة صدك مبينة ومورمة صايرة بنفسجية طگعة شكبرهه شبيه مچلوبة اني..

-احم عندي حل

-تبوسيهه؟

-شنوو شكوو

-مادري شفتج لامة حلگج كلت هاي راح تبوسني بعد ما تتحمل

-روح روح مو مال واحد ينطيك حلول

-دتعالي احجيلي اشاقيچ

-شوف مرة شفت استاذ حمزة لابس فد شغلة هيجي ضامة رقبته

-شنو هي

-هيج شلون الربطة بيومهه ما لابس رباط چان فاتح القميص ومدخل الربطة بي لونهه نيلي بس فد كشخة وتخبل انتَ هم اللبس مثلهه

-اي ميخالف بس الوقت مو مناسب الهه حالياً مو وكتهه

-ميخالف حالات خاصة حالات خاصة

-خوش تعالي اختاريلي وحدة

راح لمجر الكومدي فتحه وشفت عنده كومة منهن بعد عيني عود دا اعلمه اني واشرحله خو كول اعرفهه ليش تتعب لساني..

-هاك اللبس هاي المارونية تخبل وانتَ قاطك اسود اويلييي

-يله تعالي لبسيني

-ماعرفلهه اني

-اني اعلمج تعالي

-خو انتَ اللبسهه شكو هالسوالف

-مو ايدج خير مرمر اريد اتبارك عندي اجتماع مهم اليوم

-للمرة المية ايدي متنطي مراد اخيي

-لا تكولين اخي حرام

-صدك نسيت مادري

-اي اني بعلچ يا بعلتي

-هاي شبيك شنو بعلچ وبعلتي

-ديلا لفي مريم لفي اشتغلي وانتِ ساكتة صيري امرأة صالحة انتِ مو تردين الجنة

-شكد تنرفز يوووه

ضحك وسحبني كعد على السرير ووگفني كباله يعلمني شلون اللفهه ويحجي بهدوء واني مركزة بكل حواسي..

-اي عفية هيج عاشت ايدج الحلوة

-اطلس اوكف هاي مخربطة منا عادي

-لا مو عادي سماح هاي لان اول مرة

-الله تجنن والله فد لايگتلك متأكدة راح تبدع اليوم بالاجتماع

-كعدي بوجهي خوش

-لو تموت حتى تحرجني كدامهم واظل امعمع وحدي

-ههههه لا ما احرجچ كعدي بوجهي مرمرتي خليني اتوفق

-عود افكر

-اذا تطلگنه منو بعد تكعد بوجهي وتمعمع

-جيب نورسين تكيف

-لا ما تكيف اني اريدج انتِ ماريد غيرج

-شوفلك بديل سريع

-ماريد بديل

لزم ايدية ثنينهن حطهن على صدره، قربني عليه كلش ويحجي بعيون كلهه صدق..

-مريم شسوي وتسامحيني تعبت انهد حيلي يا حيلي

-اطلس مو وكتهه راح نتأخر على الدوام

-طز بالدوام حاچيني لا تهربين مثل كل مرة

-السويته صعب أي بنية تتقبله، السويته وصاخة ودنائة عيب على الرجال يتصرف هيج تصرفات

-ادري ادري واني غلطان وحقج عليه اعرف اني اعتديت وتجاوزت حدودي اعرف كل هذا بس جل من لا يغلط

-بس مو هيج غلط، لو مكمل عليه شيصير اطلس؟ ترتكب زنا علمود بنية تغضب ربك وتكسر بنية بريئة بحجة اني اريدهه وماريدهه تروح لغيري اطلس شنو هالتفكير المريض

-بس انتِ مرتي مو زنا هذا

-بس مچنت تعرفني مرتك انتَ جنت عبالك اني بنية عادية تعرفت عليهه وتعلقت بيهه وبس

-مريم بس ما سويتهه ما كملت الموضوع اني..

-لان اني وگفتك والخدمني النوبة الاجتك والا انتَ ويه هذا جسمك وضخامة وقوتك چان خلصت عليه بدون لا يرفلك جفن

-اسف الف مرة اكولهه اني اسف بس لا تبتعدين

-الصار صار ميفيدك اسف بعد تحمل نتيجة غلطك

-تحملتهه هواي وسحلتيني واذيتيني بعد شنو تردين تسوين

-انتَ تعرف شنو اريد اسوي ليش دنعيد ونزيد بنفس الموضوع

جرني اكثر وگعدني على رجله غصباً عني فزيت منه مبتعدة وكف على حيله اجاني ودفعني على الحايط..

-اطلس شبييك شهالتصرفات

-مريم لاا تعيدين عليه سالفة الطلاق لا تخبلينيييي

-اوكي ماحجي بس وخر عنيي اختنكت

رفع ايدي يبس دمي راح انهار نويت بس يتقرب مني اعضه بس ما سواهه ابتعد يرجف اعصاب ووجهه فوراً تغير لونه بهتت والخفقان اخذني گلبي يركض ركض..

تچه نفس على الميز تعبان لا لا معناهه راح تزوره النوبة، رحت بسرعة اوگف بصفه بدون لا اللمسه..

-اطلس شبيك

-ماي.. اريد ماي

ركضت للثلاجة جبتله مي شربته شوية استعدل وضعه گعدته على القنفة اهفي لوجهه رغم الغرفة باردة بس ارتبكت غسلت وجهه بالمي وحطيت الباقي على شعره السرح امسح عليه..

-مو گتلك لنعيد بالموضوع ليش تأذي نفسك اطلس

سكت يتنفس بسرعة مرت ثواني ياله جاوبني ببطئ يلقط انفاسه بصعوبة..

-الاطلس: احجي بي لو ماحجي بي الموضوع ناخر عقلي وگلبي مريم ليل نهار افكر بي

-كافي ارتاح هسة

-الا اموت ياله ترتاحين

-متموت اش اسكت كافي

حضن ايدي على وجهه مابتعدت وضعه ميسمح جرني يحضني كلني وتمدد بمكانه كلش وضعه تغير وخفت عليه بقيت حاطه راسي على زنده وهو بس النفس يصعد وينزل عنده..

-اطلس راح اصيح لاحد

-لا لا

-اخاف تجيك النوبة

-ما تجي لا

-اكيد؟؟

-اكيد

-مو تجي وتكول من وره مريم

-ماتجي مريم

-ها همزين لعد يله وخر

گمزت من مكاني جرني بسرعة يحجي..

-وين وين لا تجيني لا ترحين

-مو كلت متجي

-لا يجوز تجي اني ما اعلم الغيب

-لتچذب عليه

-تجي تجي تعالي

-والله اذا ما اجت اخليهه غصب تجي

-تجي تجي تعالي يمي حضنيني حيل

-شكو احضنك ليش

-مو حتى ادفى

-وليش تريد تدفى هاك هاي بطانية

-اشتعل ابليسچ تعااالي ادفى بيج

غصب جرني ولمني شكد جذاب يلعب عليه بس ماردت اجازف واخلي يعصب لا صدك تجيله النوبة بقينه هيج هو يمسح على شعري واني نايمة متململة..

-بش بش طوطي

-طوطي بعينج

-شنو ما ناوية تزورنه اختنا النوبة

-خرب ليش ترديهه تجيني ولج

-مو مليت شبيك

-ما مليت اني متونس

-اطلس

-عيوني

-اسكت بلا حجي زايد

-شو انتِ صايرة ما محترمة

رفعت نفسي منه مضيگه عيوني وهو مخنزر اشوف وجهه استعدل شحلاته ويمثل المرض عليه..

-اطلوسي انتَ هواي تجذب عليه

-لان ما تجين الا بهاي الطريقة

-شلون تغير لون وجهك قبل شوية لو هذا هم تمثيل وغيرت لونك

-شنو سحلية واغير لوني

-شمدريني عيونك خضر يمكن اي بس اوكف هاي شنو

-شنو

-عيونك تغير لونهن شلون

-اي باللبس يتغير

-صارن اطوخ بس كلش حلوات الله باوع حتى رموشك طويلة اكلك انتو ليش الزلم رموشكم طوال

-يمكن لان شعرنه كثيف

-اني عندي رموش هواي بس مو طوال شلون اطولهن برأيك

-بس صيري حبابة وگصي لسانج يطولن من كيفهن

-يله عود وره منتطلگ اشوفلي طريقة

-ااااااااخخخخخخح گلبيييييي

-ها شبي

-البي انتِ انتِ

-محيط الاطلسي بطل سوالفك يعيوني

-مريم العذراء

-ها

-گومي لا ادفرچ

-ادفرني يله حتى هسة اروح للمحكمة اكوللهم يعنفني واخليهم غصب يطلگوني

-ااااااخخخخخ گلبي اشتعل گلبي

متت ضحك عليه كمت عنه اكمل لفة الشال وهو هم كام يرتب نفسه وسبح سباحة بالعطر واني اكول ليش هيج ريحته تفوح يمكن فوك الثلاثين بخة بخ على جسمه ويركز على اماكن النبض بأيده ورقبته..

وكف ساعة يرتب بهندامه وملابسه وشعره ولحيته واني بس صافنة يشلع الگلب شو اني اركض ركض من ابدل، اخيراً كمل وكال خلينه ننزل..

-مريم: اللهم صل على محمد وال محمد اخيراً

-شنو چنتي تنتظريني؟

-اي طبعاً استحي انزل وحدي

-چا غير تحجين حتى اتأخر اكثر

گلبت عيوني ونزلنه بعدنه على الدرج صبحنه عليهم وطكتنه خالة بهلهولة خزتني خزي عمو كاعد وغدير كاعدة ورقية كلهم بالصالة..

-الاطلس: حبيبتي امي العزيزة تعالي شبعي من ابنج تعالي

-حصة: ما اشبع ما اشبع

لزمته تمطگ بي لا الوضع فد مرة هنا، دورت عيوني ادور على اهلي وكأن رقية فهمت عليه فوراً كالت..

-رقية: بعدهم بالغرفة ما طلعو

-مريم: ها هسة اروح اشوفهم

دكيت باب الغرفة عليهم فتحتلي دعاء دخلت للغرفة كاعدة امي ترزل ببسملة لان شالعة گلبهه ومتسمع الكلمة..

-مريم: ماما شو دتحضرون اغراضكم وين رايحين

-راجعين لبيتنه حبيبتي

-مريم: بهالسرعة!!

-دعاء: حتى اني كلتلهه بس ابوية ميقبل نبقى اكثر

-مريم: هو وينه ابوية؟

-بسملة: طلع من الصبح يشوفلنه سيارة

-مريم: لااا هاي شنو ليش هيج ماما والله راح ابجييي لتروحون

-دعاء: شيقنع ابوية مريم

-ام مريم: ماما بناتي عيب كاعدين ببيت العالم هسة لو مأجرين فندق بره ميخالف فشلة شيكولون علينه خلص العرس ولازم نرجع بعد

-مريم: گعدو ببيت الاطلس اصلاً هو فارغ ابقو حبابين بس كم يوم فدوة فدوة

-ام مريم: لا يمة عيب ميصير فشلة من رجلچ

-مريم: والله كلشي ميحجي ولا يكول بالعكس هو كال باجر عود على اليوم اخذ دعاء ويايه للشركة حتى تشوفهه

-دعاء: الله صددك والله

-مريم: والله هو كال وحتى كال لو ابوية يقبل يلگالچ شغل بنفس المدينة الكاعدين بيهه انتو

-ام مريم: فدوة لگلبه ميقصر بس تعرفين ابوج من يعاند

-مريم: شنورأيكم اطلس يحجي وياه؟؟ ها ماما شتكولين والله هسة يخجل ويوافق

-بسملة: ايي ايي حتى لو نأجر بفندق نبقى بس كم يوم ماما ماشبعت من مرايم حبابة

-ام مريم: بكيفكم بعد بس ما نبقى هنا فشلة من الناس

-مريم: هذا هو راح احاچي، يله بنات امشو نتريك

طلعنه كلنه سوه للصالة خالة كالت دينتظرون سارة وحمزة لان معزومين على الريوك ما طولو شوية واجو، تسالمنه بحرارة سارة شكلهه جان مرتاح ووجهها يضحك فرحت كلش من شفتهه هيج عكس البارحة..

-سارة: ماما متت جوع اني البارحة ماتعشيت

-حصة: هاااو حمزاوي تنيم بنتي جوعانة

-حمزة: شلعت گلبي ما تاكل خالة

-غدير: هه هاي من اولهه وشلعتي گلبه

غلس الكل وگامو على الطاولة توزعنه عليهه واجت سارة تكعد يمي الكل يسولف ومنسجم عدى عمو ساكت ما نطق كلمة وجهه تعبااان كلش واطراف اصابعه صايرات زرگ همسله الاطلس شي وعمو بس يهز براسه..

-مريم: شلونچ سارونة طمنيني

-سارة: زينة اني وانتِ شلونج ولج شصار البارحة

-مريم: كلشي ما صار تعاركت ويه اخوج اليوم الصبح

-سارة: احنه هم تعاركنه

-مريم: ياااا

-سارة: بعدين اسولفلج بعدين بس تراضينه ما ضلينه زعلانين

-مريم: اي حتى احنه امدانه شكد قشمر

-سارة: يله شدو حيلكم نريد بيبي صغيرون يشبهچ

-مريم: اووي احنه شكو انتو العرسان يله نريد نشوف بيبي احمر يشبهج

-سارة: ههههههه اسكتي اسكتي لافتهه عليه

نبسبس ونضحك وغدير راح تاكلنه اكل عيونهه ما فارقت حمزة اليضحك ولا سارة المنسجمة ويايه الوقت كله تبولع بريگهه وتعدل بشعرهه..

كملنه ريوگنه سألنه على اسيل ومسلم كالو حجزو ليلتين بالفندق سارة تقربت مني وكالت بهمسة تضحك..

-سارة: ولج عشاق فد نوب همه

-مريم: فدوة شكد حلو

-سارة: غرفنه بصف بعض احنه بعدنه دندخل لغرفتنه ومسلم واسيل هم مسلم ماتحمل شالهه ودخلهه الغرفة كدامنه حمزة رزله ميت ضحك يفر بيده ويكول عنه مهيلگ

-يا عيني فرحانين ببعض، صدك سويرة شوكت تسافرون؟

-اليوم بالليل حجزلنه كلش خايفة

-ليش روحو تونسو

-اخاف مرايم ولج رايحين لمدينة الحب

-مدينة الحب شنو؟

-رايحين لفرنسا باريس

-اووووي ولج حماس

-تعالو ويانه مرايم

-احنه؟ شعدنه جاين لا عيني ماروح ويه اطلس لمكان ما اثق بي

-ديلا مريم حبابة تره أجل سفرتي وانتظركم لحدما تجون

-مريم: حبي روحي معليج بينه عود اذا صارت قسمة نرتبلنه سفرة ثانية سوه ان شاء الله تكونين حامل بوكتهه هيهيهيهي

-لج اششش

اضحك على حركاتهه شكد خجولة كلما اجيب طاري هيجي شي وجهها ينگلب احمر وتظل تباوع لحمزة حتى اذاناتهه تولع وتنصبغ..

اجت غدير مكتفه ايدهه اشرت لسارة تروح وراهه راحن واني كمت حتى اطلع ويه اطلس للدوام كال بعد شوية ممستعجلين رجعت اكعد انتظر سارة ترجع وفعلاً رجعت وجهها مگلوب..

-سارة: بدلت رأيي اريد اسافر

-ها شعجب

-اريد اخلص تعبت نفسيتي

-غدير ضوجتچ؟

هزت راسهه لا بس عرفتهه تجذب لان اجت غدير عيونهه راح تطگ وجسمهه ينتفض كلنه لاحظنه حالهه المنگلب كامت عليهه خالة تركض تشوف شبيهه بس ما لحكت توصل وكعت غدير بنص الصالة تبجي وترجف وتتقيء..

ركضو كلهم عليهه اطلس وامه يردون يرفعوهه وهي منتهية تعيط مفرفحة روحهه تقدم حمزة بس وكف بظهرهه تسائل عنهه سكتت اندارت عليه دموعهه تجري جرت ايده تريد تحضنه وسحبهه اطلس لصدره..

-الاطلس: امشي فوك

-غدير: ماااااااااريددددد مااااااريدددد هدوووونييييي باااباااا خلي يتركنيييييي ماااريدد

-الاطلس: تعالي ارتاحي حبيبتي غدددير لا تدفرين تعالي

-غدير: مااا ماااا ما ارووووح راح يسافرووون راح يرحوووون

-حصة: يا حسرتيي يا يمة غدير بسچ يماا بسسچ

الاطلس شالهه شيول وهي ترافس بيدهه ورجليهه وتبجي بجي مال وحدة ميتلهه ميت تصيح بأسم سارة بدون لا تحجي شي وراه كأن دتصيحلهه راحت سارة تريد تروح وصاح بيهه اطلس..

-لااا ابقي جوه

اخذهه فوك وراحت خالة تركض وراهم ولحگهم عمو رقية لحت على حمزة ياخذ سارة ويطلعون ماقبلت سارة بس لحينه عليهه تروح تكمل جنطة سفرهم..

ما اجه ببالي ولا واحد بالمية هاي هستيرية غدير المفاجأة كله لان سألت سارة شصار بيناتكم البارحة وسارة گلتلهه حمزة ميقبل احجي وهاي خصوصيتنه تخبلت وزاد الموضوع عليهه من عرفت راح يرحون شهر عسل..

اجت مساعدة تنضف المكان، امي وخواتي ما حچن حچاية الكل خانس حتى اني عبر وقت الدوام واطلس ما نازل، صارت بالتسعة وهم ما نزل بعده، راحت رقية تشوفهم ونزلت كالت اطلس يكول مريم لتداوم اليوم خليهه تبقى ويه امهه وخواتهه..

ما جادلت ولا سألت ليش كعدت ويه اهلي بالصالة شوية واندكت الباب اجت المساعدة تفتحهه وتذكرت نانا وين نانا؟

-مريم: رقية وين نانا؟

-رقية: راحت البارحة ويه اهلهه مو اجو للعرس هي رجعت وياهم

-مريم: يعني ترجع لو تروح للابد ليش ما گلتلي جان ودعتهه

-رقية: لا لا هو كم يوم وترجع

-ها الحمد لله والله خفت گلبي وجعني

واحنه نسولف دخلو التوأم علي وعمر ماتوقعت اشوفهم عبالي بالدوام، سلمو علينه وثنينهم سلمو على امي وگعدو..

-رقية: شعجب جايين التوأم

-عمر: راح تجي امي

-علي: غير نستقبل امنه

-عمر: حتى تشهدون المناحة الراح تصير بعينكم مريم عبالهه نبالغ

-مريم: لا والله بس شو غريب يعني تكولون انتَ لو تباوع امك تكوم تبجي يعني هي نظرة معقولة لهدرجة حساسة

-عمر: شوفي بعينج لا تستعجلين

ضحكت دعاء وياهه امي اندار علي عليهن وتحمحم..

-علي: اختي في الله دعاء شلونج البارحة ما شفتج بالعرس؟

-دعاء: لا موجودة جنت

-علي: مادري ماشفتج شفت اختكم الثالثة

اشر على بسملة ابتسمت وما جاوبته امي حجت..

-ام مريم: كلنه چنه كاعدات وليدي بس يمكن ما ركزت

-علي: اي اكيد صح ماركزت

-عمر: اي ما ركز ابد

نزلو اطلس واهله من فوگ سلمو على الولد ورجعو توزعو على التخم، گالو غدير نامت وهدأت سولفو شوية وكامت امي والبنات يدخلن للغرفة ينتظرون ابوية يجي ردت اروح وياهم واشرلي اطلس ابقى رحتله كعدت بصفه همست..

-ها

-الاطلس: شنو

-صحتلي انتَ

-اي گعدي يمي لا ترحين

-ليش

-خليني اشبع منج مو راح نتطلگ ااخخ گلبي

-هههههه اويلي من سوالفك

-اويلي منج وهدنتي حالي

-والله اني حبابة كلشي ممسوية

-مريم

-ها

-انتِ احلى شي صار بحياتي

همسهه بحس ناصي محد غيري يسمعهه ولعت خدودي نار وزع نظراته عليهن ابتسم وكمل..

-حسچ طرب لأذاني لا تسكتين ابد

-هواي تحچيني

-لان احب صوتج

نزلت عيوني ورجعت رفعتهه الوقت مو مناسب ووضعي مو مناسب، تقرب سوه روحه ديعدل گعدته وهمس..

-نظراتچ توجع گلبي مريم توجع گلبي هواي

-ليش

-اضعف گدامهن وما بيدي شي

-اكلك متروح للدوام؟ والاجتماع شلون

ابتسم من شافني غيرت الموضوع لزم ايدي وعصرهه بين ايده..

-هاي الايدين الي مصبرتني چا هم انعم الله تخلينه نلزمهن

-اطلس والاجتماع؟؟

-اجلته الوقت مو مناسب

هزيت راسي موافقته بسبسنه شوية عن حال غدير واندكت الباب، باوعت بأتجاهها اشوف منو واذا اشوف دخلت مرأة نسخة مستنسخة من عمو محمد طويلة وجسم مثالي لابسة فستان بنفسجي طوخ طويل على طولهه وذابة شال بعشوائية على راسهه المناظر الشمسية بيدهه والمساعدات يسحلن بجنط ثنين وراهه..

-محمد: نورت نورت ام عمر نورت

دخلت مبتسمة ابتسامة واسعة تحاضنو هي وعمو واندارت تحضن خالة وانوب راحت على الاطلس وولدهه واكفين على جهة ما تقربو ولا هي راحتلهم ولا حتى باوعت لوجههم انقهرت وانكسر گلبي لثانية بس غيرت رأيي..

اندارت اخيراً عليهم فتحت ايديهه وصاحت مهضومة..

-يمة وليداتييي التوم مالتييي بعد گلبييييي

راحو عليهه يحضنون ويبوسون وهي تبجي تبجي تبجي تبجي فرفحت روحهه تفرفح تنوح حضنت عمر تبجي بصوت عالي خلت امي وخواتي يطلعن من الغرفة يتراكضن يشوفن شصار انوب اندارت على علي وصارت تولول على صدره وهو بس ساكت ويهز براسه..

-اخخخ يا يمة يا وليدي اخخخ

-عمر: سلامتج من الاخ يمة

-يمة عمت عينيييييي چنك ابوك ااااخ يا گلبي ااااخ

كامت تبجي اكثر امي فكت حلگهه بطريقة "ياا" علي عوج حلگه وعمر حاضن امه ويسكتهه وعمو محمد واطلس بس يضحكون..

-محمد: يله عيني زهراء عوفي الولد خلينه نشوفج اشتاقينالج

-زهراء: ولك عوفنييي اشبع منهم شوووف عوفني

-علي: يمة الله يرحمج عبالنه متي صارلنه خمس سنين ما شايفيج

-زهراء: لا يا يمة وين متت هياتني گدامك

-عمر: اي جاي نشوف ما شاء الله وبكامل صحتج هم

-علي: هاي بسبب رحماتنه الج يمة ننسى انتي عايشة ودوم نترحملچ

-زهراء: اي اي يا يمة يا وليدي ولك تعااال يمي

اخذت وجهه وتحضنه لصدرهه وتدگ عليه من صدك متت ضحك وعمر يباوعلي يسويلي جاي تشوفين اهزله براسي اي واضحك..

-شكو

فزيت على صوت اطلس بصفي لزگ وعاگد حاجبه، حركتله راسي بمعنى شنو همس..

-شبيچ انتِ وعمر شنو بيناتكم؟؟

-هههه على امه حچالي شلون تبالغ

ابتسم وهز راسه حاوط خصري بأيد والايد الثاني لزمهه رفعتله تك حاجب وأشرله بوجهي خير همس بأذني..

-اشش ولا كلمة

-زهراء: يا الله ياااا الله شمسوية بحياتي اني ربييي ليش تحرمني من جهااالي ولدي شكبرهم صارو يمة يا يمةة يمة يا وليدددي اوووف راح اموت ربييي

-علي: يمة بس صلي على محمد هاج شربي ماي

-محمد: شسالفة زهراء ذولة ولدج شحلاتهم كدام عينج كعدي شبعي منهم شوف

سلامهه طول فوك النص ساعة وهذا الوقت كله تبچي وكل شوية صايحة نفس عيون ابوك وهذاك نفس طول ابوك وهذا نفس شعر ابوك وهذاك عنده نفس حزام ابوه..

-علي: حتى الحزززام يماااا

-زهراء: اييي عمت عيني نفسه نفسه عيناً

الكل فطس ضحك محد تحمل يسكت ويجامل اكثر امي غصت وكامت تكح ركضت دعاء تجيبلهه مي ورجعت اثاري ام الولد چانت تباوعلهه..

-زهراء: هاي منو ذني الجميلات

-حصة: البنات يصيرون ام مريم وخواتهه

-زهراء: منو مريم

-الاطلس: مرتي عمة هاي كدامج

مسحت خشمهه وعيونهه من الدموع وكمت مبتسمة رحتلهه اسلم عليهه بوستني وسلمت عليه بحرارة حطت ايدهه على حنچهه وكالت..

-زهراء: محجبة هم

-محمد: اي محجبة

-زهراء: شعجب الدايح خطب محجبة

-الاطلس: عممممة

-زهراء: والله شبيك انتَ وينك وين هيج حشمة يمة فدوة لالله شكد حلوة باع الوجه يبرگ باعوو هذا نور محمد لان لابسة حجاب باعو حتى اني وجهي بي نور محمد

-علي: اي يمة صحيح مية بالمية

ابتسمت اباوع لحجابهه نص ستاو رقبتهه طالعة وشعرهه هم بس هي مقتنعة بي، اندارت على علي وكالت متعجبة..

-زهراء: ياااه ياااه حتى انتَ ولك عاجبك الحجاب هاي شصاير من يمته

-عمر: بالجديد يمة بالجديد

-زهراء: اي يمة فدوة للمحجبة شحلاتهه متلبس بناتك حجاب ولك محمد

-محمد: ان شاء الله مريم تأثر عليهن

-زهراء: يمة فدوة لالله ولك اطلس هاي تخبل طاح حظك شلون لقطة

-الاطلس: اي عمة كافي تتغزلين بيهه

-زهراء: والله تبرج برج دباعي الايدين حصة

-حصة: اي ما شا الله تبارك الرحمن قل اعوذ برب الفلق

-زهراء: اللهم صل على محمد وال محمد شو اوكفي كدامي باعي ولج حتى خصرهه صغير

-الاطلس: عمةةة شبيچ هو هيييج

-عمر: يمة كافي شسالفة البت محجبة

-زهراء: شبيكم هاي فوگما امدح بيهه

-الاطلس: چا تمدحين بيهه هناا كدام ولدج

-زهراء: اخوانهه اخوانهه ان شاء الله

-ام مريم: رحم الله والديج حبيبتي ام عمر يوم زواج الولد ان شاء الله

-علي: امييييين يارب الله يسمع منج يا عمة.. اقصد خالة

-زهراء: يمة شكد حلوات بناتج حبيبتي ام مريم طالعات عليج جميلات، تعالن سلمن عليه تعالن شوو اشوف خصرچن

الواضح عدهه هوس بالخصر، اشر اطلس للولد حتى يكومون وياه وماقبلت امهم چلبت بيهم بس گوة انشلعو منهه كالو يرحون للشركة عدهم اجتماع مهم..

ودعتهم على الباب بالدموع والاحضان وعمو يهدأ بيهه وهي كل شوية متذكرة زوجهه المرحوم، امي ماتحملت تسكت وچطتهه..

-ام مريم: شكد وفية للمرحوم الله يرحمه

-زهراء: روحي خالد روووحي

-الله يرحمه ويصبرج

-اااخخ لج خية وينه الصبر راح الحيل وراه وراحت روحي عمت عيني عليك يخالد وين رحت وعفتني

انقهرت عليهه خطية شكد تحبه، خالة كلتلهه تروح حتى ترتاح وفعلاً راحت واني دخلت لغرفة خواتي اتصلت بأطلس وگتله يقنع ابوية گال سهلة..

فعلاً رجع بابا وطرنه فرح من گايل لأمي راح يبقون بعد فد اسبوعين هنا بس يأجرون بفندق بره، الفهمته اطلس عرض عليهم يكعدون ببيته ولح بس ابوية ماقبل وتفاجأت صراحة..

بقو يمنه لليل خالة ماقبلت يطلعون لحدما تعشو وراحو وخالة زهراء موتتنه ضحك كلش حيوية وتحب تسولف وتضحك وولدهه لازم يكونون لازكين بيهه، توسلو بيهه تروح وياهم لبيتهم وماقبلت كالت هي هنا مرتاحة وتريدهم يجون يكابلوهه ويكعدون افتهمت عمر راح يسافر لو تخبلت خلته يأجل سفرته ويكعد يمهه..

مرت الليلة على خير غدير ما شفتهه بعد واطلس وامه ما عافوهه ابد ماعرف شوكت دخل اطلس للغرفة جنت غافية وحسيت بي يبوسني من اذاني ويلعب بشعري ذب حسرات متتالية وهو على راسي ورجعت نمت، كعدت الصبح على المنبه لكيته نايم وغاط بنومته..

عفته نايم وكمت بدلت بسرعة ونزلت جوه ام الولد جانت كاعدة بالمطبخ تسولف ويه خالة حصة ديتريگون، صبحت عليهم وسألن عن اطلس كلتلهن بعد وكت خلي نايم هسة، شوية واجو الولد سلمو على امهم ورجع تكرر مشهد البكاء عجــيب!

-علي: احم مريم اختي في الله دعاء وينهه؟

-مريم: راحو البارحة

فز من مكانه شاهگ باوعلي وباوع لأمه وصاح..

-علي: شنوووو لييييييش

-مريم: لعد خوما يبقون هنا استاذ

-علي: وليش ما يبقون وشكو البيت جبير عمة حصة مو عيب عليج غير تخليهم يبقوون والله فلا عندج اصول صايرة انتِ

-حصة: وجعع همه ما رضو شلون شبيدي انا

-عمر: مع الاسف عليج عمة هو هيج الزلمة راح يوگف گلبه

-علي: اوووووف يالقهههر

-زهراء: شبيك ماما شبيك وليدي تعال سولف لامك

-علي: ولج يمة راحت راااحت شسولف بعد

-زهراء: ماتت؟

-علي: لا دخيللج شنو تموت عمت عينيي

-مريم: لا خالة اسم الله بس راحو اجرو بفندق علما يرجعون لمدينتهم

-علي: يعني بعدهم ما رجعو؟؟؟

-مريم: لا بعدهم بس طلعو من البيت

-عمر: هو هيج مريم غير تحچين وگفتي گلب الزلمة

-علي: يا علي دخيلك الحمد لله الحمد لله الف الحمد لله

-حصة: هااو شفيك انت شصاير

-علي: ما صاير عمة انتِ نامي مزاعلچ اني

-حصة: ولك ليش

-علي: اي خليتيهم يرحون عيبب ذولة خطار احطهم بنص عيني واغمض اخدمهم برموش عيوني هو هيج يطردون الخطار والله مع الاسف لو ادري ماخذهم لبيتي

-مريم: لا استاذ تسلم اطلس عرض عليهم يرحون لبيته وابوية ماقبل

-علي: لا لا عيب كلش عمر لازم ناخذهم لبيتنه

-عمر: اكعد ولك

-علي: يمة تعرفي عليهن شوفيهن سولفي وياهن تعالي لبيتنه وخليهم يجون يمنه

-مريم: لا اهلي ميقبلون صدگني

-عمر: عليوي كافي خلي العالم براحتهم

-زهراء: كلشي مافهمت والله شبي ابني تخبل شبيك ماما

-علي: مابيه شي حبيبتي يله اني اروح للدوام عمير تجي وياي

-عمر: اي جاي

-علي: مريم تعرفين اسم فندقهم؟

-مريم: اي بفندق الـ^^^^^^^

-علي: حلو حلو يله رايح اني

طلعو واني كمت اشوف اطلس شو طول بالنومة، رحتله للغرفة توقعت اللگاه نايم بس چان كاعد واكف ديتعطر صبحت عليه ابتسملي وطلعنه سوه للشركة..

وصلنه وكتله مندخل سوه بعدني ممستعدة وماريد بلبلة تصير اضوج، ما لح ويايه خلاني ادخل واجه وراية بعد كم دقيقة دخل للمكتب مالته واني هم سلمت على البنات وكعدنه نشتغل..

خابرت دعاء كلتلهه اروح عليهه حتى اجيبهه كالت ابوية بعده ماقبل خلي اطلس يقنعه وباجر تجي ضحكت كلت والله خوش صار عدنه خوش واسطة يكدر لأبوية..

كمتله اروح اشوفه سألت منار عنه كالت عنده جايين رؤساء بعض الشركات غريب داخلين للمكتب مالته ومو بقاعة الاجتماعات..

كعدت وياهه بالمكتب انتظر اخيراً طلعو منه وكمت ادخل عنده مخبوص كلش ويشتغل من شافني ذب شغله وكام بسرعة..

-مريم زين اجيتي

-ها محتاج شي

-اي هاج هاي استقالتج

-يا استقالة؟

-القدمتيهه قبل فترة قبلتهه

-شنوو!!

-انتِ مو تردين تبطلين؟

-لااا منو گلك اريد ابطل

-بس اني قبلتهه بعد

-اطلس شبيك ليش هيج تسوي منو عتب عليك!

-مريم الوضع مخربط ماريدج تداومين ماكدر اشرح زايد هسة

-اي شصاير فهمني

-ماريدج تداومين مريم ما مرتاح

-اطلس ليش هيج تسوي يعني هسة من عرفتني مرتك متقبل اشتغل بعد!

-لا لا مو هيج...

ذب نفس عميق وعصر جبينه بأصابعه حيل، نزل ايده وكال..

-ما مرتاح اكو شي غلط هسة اجو وفد من شركة شمسون يردون يتعاقدون ويانه يكولون ابوي دازهم

-وين المشكلة؟

-مريم شلون احنه وشركة شمسون عداوة!

-يمكن تصالح عمو وياهم

-لا لا مو هيج احنه وشركة شمسون من عمر عداوة شجابهم هسة وليش يردون الصلح بيناتنه ويردونه نتعاقد وليش ابوي موافق؟!

-مادري بس شدخل هالشي بيه؟

-ماريدج تداومين ماريد احد يعرف انتِ مرتي ولا اريد مالك يعرف اني عرفتج

-تخاف يهددوك بيه؟

-اي

-اطلس بس دتكول همه يردون الصلح

-لا اكو لعبة مريم ولعبة وصخة جاي تنلعب وره ظهرنه وعلى الاغلب ابوي غافل عنهه نحتاج حمزة حالياً بس ماريد اخرب سفرته انتظره يرجع واتناقش وياه..

-عمر وعلي ميفيدوك هسة؟

-اكيد طبعاً هو اريد اروح لعمر ونجيب علي

-اطلس بس ترجعني بعدين مو

-اي تدللين ارجعج بس خلي الوضع يستقر خليني ارتاح

هزيت راسي موافقة وطلعنه ثنينه من المكتب عبرنه الممر وصار بوجهنه مالك يتبختر بمشيته، شافنه سوه ابتسم ابتسامة واسعة وكال..

-مالك: صباح الخير

جاوبه اطلس من وره خشمه وعبره رحت وراه ماردت ارجع للمكتب خفت يجيني، حسيت بمالك يمشي ورانه..

-مالك: وين حمزة مسيو الاطلس؟

اندار اطلس عليه عاكد الحاجب والخشم مجنح راح ياكله، اشرله بوجهه شتريد ونتر..

-خير؟؟

-مالك: الخير كله بوجهك حبيبي بس جاي نسأل على حمزة محتاجه بسالفة

-الاطلس: حمزة بسفرة عمل

-هاا شعجب قبل اسبوعين رجع من سفرة عمل

-الاطلس: وانتَ شنو جاي تحقق وياي هسة؟

-مالك: ماشي مسلم وين

-الاطلس: انتَ شيخصك؟

مسيطر على اعصابه بصعوبة ويسأل يمثل البرود..

-مالك: لا بس نريد نعرف وينهم مشتاق للاخوان

-الاطلس: ما موجودين عزيزي الله وياك

-مالك: هم مجاز مسلم؟

-الاطلس: مسافر

-مالك: عجيب

-الاطلس: وين العجب؟

-مالك: اخوان ثنينهم بسفرة عمل سوه اول مرة صايرة

-الاطلس: ليش اكو قانون يمنع هالشي؟

-مالك: نعم، ابوك مانع هالشي

-الاطلس: بس ابوي مو هنا واني الرئيس لو عندك مشكلة ويه الرئيس الجديد عزيزي مالك؟ اذا عندك امشي تفضل لقاعة المناقشات نحل الموضوع اذا تحب

-مالك: لا ابد ماعندي مشكلة

ابتسم من كالهه وباوعلي اشر على الاطلس وكال بضحكة مشاكسة..

-مالك: حبيبچ عنده كارزما عالية

-الاطلس: اشكرك يله تفضل

-مالك: اسف اذا اخذت من وقتك

-الاطلس: هلا

عافنه مالك وراح للمصعد الطريق كله اطلس خازره لحدما انقفل باب المصعد عليه اللتقت عليه وهمس..

-مو كتلج اكو لعبة

-شنو سبب جية مالك هنا؟

هز راسه حاير ميعرف گلي اروح اكمل شغلي وهو راح لمكتب عمر، كمل الدوام عادي ورجعت وياه للبيت، يومين ورجعو حمزة وسارة والكل تعجب من هالشي وراهم بيوم رجعت نانا..

حطيت راسي على المخدة اطلس ما اجه لسه ماعرف وينه عبرت الساعة 12 وهو ماكو قلقت اتصلت بي ميجاوب عبرت الساعة بـ 1 وهم ماكو گلبي لعب كعدت على السرير انتظره يرجع بس مارجع هاي الليلة!

بالسبعة الصبح اتصل عليه وكال راح يسافر سفرة عمل ضرورية شكد حاولت اخذ منه راس خيط بس كلشي ما حچه، رحت لـ نانا كعدتهه من نومهه سولفتلهه وكالت حمزة هم راح يسافر وجاب سارة الصبح وعمر هم وياهم..

-مريم: نانا اكو شي؟ صاير شي؟؟؟

-نانا: لا لا يَـ بنتي سفرة عمل رايحين

-بس اطلس ما رجع للبيت البارحة

-يمكن بات ببيته

-بس ليش؟؟

حركت اكتافهه بطريقة ماعرف حسيت الموضوع مرتبط بسالفة مالك واحساسي ما غلط ابداً الصار بعدهه كأن حلم مو حقيقة دخلت بكابوس صرت اتمنى الايام القديمة ترجع كلشي تغير بين ليلة وضحاها.....

يتبع ♠️💸....

• ━━━━━━❪♣❫━━━━━━ •

توتر 🙂🥲