رواية الاطلس "دمليج أسود" الفصل الرابع عشر 14 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

قد يقول لَك أحدهُم " عيونّي "
فتشعر بأنك أجمل شخص في الكَون
لِفرط ما عيناه جَميلة 🤤🤎.

• ━━━━━━❪♣❫━━━━━━ •

-مريم: تمام

-الاطلس: شنو تمام؟

-فهمت مشاعرك شكراً الك

دفعته من صدره ووخرت عنه وهو على وگفته فاتح عيونه مدهوش من ردة فعلي، مانطيته اهمية ومشيت اعود ادراجي للمطعم صاحلي..

-مريم!!

اللتفتت عليه بهدوء وجاوبته بثقة ممزوجة بالعصبية..

-نعم؟

-الاطلس: شنو ردچ؟ شو عفتيني هيج

-ماعندي رد استاذ

-اوكفي تعالي يمي فهميني

تقدم عليه يريد يجرني وابتعدت عنه وحاطه ايدي حاجز بيناتنه..

-اولاً اطلب منك بكل احترام متلمسني! ثانياً ماعندي رد شكراً لمشاعرك الجياشة اقدرهه واحترمهه

-اي؟؟

-اي هذا هو

بلع ريگ وياه صدمته هز راسه ممصدك وكال بضحكة استهزاء..

-الاطلس: بس؟ هذا جوابچ؟

-لا جوابي عصبي وراح تشوفه غير مؤدب، راح نتعارك وممكن تطردني هم

-ميخالف تعاركي وياي احجي سوي التردي لا تظلين سااكتة وتحرگينيي

-افضل ماحجي، من رخصتك

-اوكفي اوكفي تعالي.. لان تقربت منج ضجتي مني صح؟؟ اني اعتذرلج واكلج هذا التصرف صلف ادري بي بس ماعرف شصار بيه نسيت روحي واني اعرفج محجبة وملتزمة مريم اعذريني

-اوكي

-مريم لا تبقين بهذا البروود سولفي شي لاسنيني!!

-ماا ارريدد!!!

-ليشش غير افتهم شنو البيه ما يعجب حضرتج؟!!

-استاذ انتَ شنو دتجبرني يعني؟!

-ما اجبررچ اريد افهم!

-شتفهم؟

-انتِ مرتبطة صح؟؟ داخلة بعلاقة؟ اكو احد بحياتج؟؟

-رجاءً هاي اسئلة شخصية مو لازم اجاوب عليهه

-مررررريم!!!

واكف بمكانه يتحرگن وجهها مطعون احمر وعيونه راح تنط، وگفت بكل برود اشوف حاله وبداخلي الافكار تتناطح..

-الاطلس: جنت حاس، حسيتچ تحبينن واكو واحد بحياتج!

-انتَ وحدك دتقولني وتتوقع شغلات فـ الافضل كلمن يروح بحال سبيله مع السلامة

تركته واكف ماكدرت ادوس وياه بالحجي اخاف يعصب زايد وينلزم مهما كان هو مريض وهاي حقارة مني..

رجعت للحديقة وصار بوجهي عمر الوجه ميتفسر الملامح مگلوبة، العيون ناطة مفول عصبية.. طخني بقوة وهو يتعده مني دفرني حيل تأذيت..

-مريم: آآيي

-عمر: اسف

حچاهه بصوت ضايج والحسرة بصوته ذابحته، بقت عيوني تركض وراه اتابعه الى ان غاب عن انظاري، قاطع عيوني التعبانة صوت واحد يحجي..

-كل سنة وانتِ سالمة آنسة مريم

-مريم: تسلم جوزيف وانتَ سالم يارب

-جوزيف: امم.. آنسة ممكن نحكي شوي

-اي تفضل اكيد

تعبانة كلش بس استحيت ارده، اشرلي على طاولة نريد نكعد عليهه وحدنه ماقبلت وگتله نوگف قريب يمهه ونسولف..

-جوزيف: احم.. مش عارف كيف احكي وشو بئول مريم ههه

-تفضل جوزيف قلقتني صاير شي؟

-جوزيف: انا كتير.. اممم يعني مش عارف كيف احكيكي بس انتِ بنت كتير ظريفة ولطيفة وستيلي (ستايلي) انا معجب بحجابك واناقتك المحتشمة و..

-شكراً استاذ جوزيف؟

-مريم انا كتير معجب فيكي وبدي نرتبط

صخام الصخم وجهج يمريم لو ميته وحاركيني وصالبيني ودافنيني ولا هاللحظة المشؤومة.. من الصدمة ماعرفت شنو اكول بقيت صافنة مثل الطرنه وهو يكمل يحجي بحبه وعشقه وتعلقه بيه من اول يوم شافني وشكد هو متمني نكون سوه..

-جوزيف: اليوم ميلادك وبشوفو انسب وئت للاعتراف حياتي

-عزه لاا جوزيف اوكف.. انتَ مو مسيحي؟!

-لا انا مسلم مية بالمية

-اني اسفة.. شوف اني اعتذر من عندك بس ما افكر بالارتباط اني..

-مرتبطة؟ انتِ حابه حدن هون؟

-لا لا شوف مو هيج بس..

-ما حبيتي شكلي؟ اسلوبي؟ نمط حياتي؟ حاكيني حياتي انا متفهم

-جوزيف اني بس ما افكر بالارتباط اني ماكدر لهذا الشي اعذرني اني اسفة

-بس انا معجب فيكي كتير فيني استنى

-لا اسفة ماكدر ارتبط مو ببالي هالشي اعذرني جوزيف

هز راسه وتعذر مني هواي كلمة لبناني وعشرة فرنسي، راد يصافحني حطيت ايدي على صدري متعذرة ما اللمس ايده ضحك وكال وهو يأشر بأصبعه عليه..

-جوزيف: بحب هيدا الشي كتير مينيون (كيوت بالفرنسي)

هزيت راسي وذبيت نفس امسح وجهي شنو هاليوم الغريب مصارحتين بنفس الوقت وواحد وره الثاني.. بعدني بمكاني وفززني صوت علي وراية واكف باوعتله ارجف خرب حظي بس لا هم جاي يصارح..

-تفضل استاذ

-علي: مريم شفتي عمر؟

-مريم: اي شفته قبل شويه راح وچان معصب

-علي: معصب؟

-اي كلش حتى طخني حيل دفعني

-منين راح؟؟

-مناك

اشرتله بأصبعي تشكر مني وراح، حطيت ايدي على گلبي اهدأ نبضاته ورحت للطاولة الكاعدات بيهه البنات، دعاء اشرتلي "شبيچ" همستلهه "بعدين نحجي" عيونهه تعلكت بيه واشوف القلق بيهن..

كملنه سهرتنه الغريبة وتوجهنه للفندق اول مادخلت الغرفة دعاء صاحت..

-دعاء: ريحة عطر رجالي!

-تينا: حتى اني شميت بس غالطت روحي

تقربت دعاء مني تشمشم بيه ضحكت وباوعتلي تينا غمزت وكالت..

-تينا: ها ولج مرايم

-مريم: شنو شبيكم قابل اتعطر عطر رجالي!

-دعاء: لا اكيد هاي يمكن من النراگيل صايرة بيج

حچتهه ودارت عليه كاتمة ضحكتهه، ماهتميت لسوالفهن واكدت..

-مريم: اي اكيد هو هيج

غلست تينا ورجعت تنزع ملابسهه..

-تينا: شو بعدكم بملابسكم؟

-دعاء: مو كلت لمريم اول منرجع اريد نشرب قهوة بالكوفي مال الفندق

ما خلتني احجي سحبتني بره ونزلنه للكوفي اول ما كعدت خبصتني بالاسئلة مستعجلة..

-مريم: اصبري خليني اجر نفس

-دعاء: احجيلي مريم وجهج ما عجبني احسج مو على بعضج ضوجچ بشي اطلس؟

-مريم: لا يضوجني شنو خيولي المحيط الاطلسي شحده

-لعد شبيچ شصار؟

-تشكرت منه

-اي؟

-اي وهو.. هو احم هيج يعني بقى يحجي هواي ويعبر عن مشاعره

-مشاعره؟

حچتهه بشك وعيونهه ناطه، ذبيت نفس وهمست بخجل واضح واني اهز براسي ممصدكة الصار..

-تقرب مني

-شنوووووووو

-اي الادبسز اييي

-جذابة جذابة ماصدك معقولة؟؟ ولج شبسررعة هي نص ساعة چنتو وحدكم

-تره هي بس بوسة على كيفج وين راح عقلج

-اي حتى لو غير قبلهه تمهيدات وفسوق

-ماكو فسوق اسكتي اني صوچي سولفتلج

-لا حبابه كملي مريم مجاي اصدك

-حتى اني دعيوة راح اموت ولج لزمني هيج وبسرعة بسرعة ما لحكت انطي راشدي

-دعاء: مانطيتي راشدي يعني؟؟ يا غبرة ليششش

-دفعته من كتفه حيل

-يعني تعور؟

-اي كلش قوية الدفعة جانت

-اي عفية

-وصار يحجيلي عن مشاعره وهو شكد تعلق بيه و..

-دعاء: هاي شنو حامي زلمتنه

-مريم: ياا ولج فلفل فلفل

-دعاء: خرب سبايسي على گولة تينا اي وبعد شصار؟

-ويكول لتعوفيني واني افرح من اشوفج و..

-دعاء: طبعاً يفرح شفايتله يصبح ويمسي بوجهج

-مريم: اي والله

-اي وبعد؟

-اي وبقى شكد يحجي كومة كومة وقرالي شعر مادري شنو ماتذكره زين بس هيج يسولف عن بياض سني ومادري شنو

-حرامات غير تحفظي مريم

-نسيت والله اني بيا حال دعاء

-دعاء: اي وبعدين

-بعدين كتله شكراً على اهتمامك وتركته ورحت

-جذابة

-وعيون امي

-وهيج خلاج تعوفي وترحين

-اي شحده عوزه بعد يلزمني اكسر ايده

-اي عفية عليج خيتي

-مريم: عيب بابا احنه محجبات واذا چان رجلي هو شمعرفه اني مرته وكاعد يتلمس ويبوس ماخذ راحته

-دعاء: اي والله شكد فاسق

-بس شنو دعيوة يلوب يلوب اشوف وجهه ما يتفسر بعد كام ينطي اللوان يشيل روحه ويرگعهه واني اباوعله ببرود وجموود

-لعد اني كلت تسرسحتي

-لا عشتو اتسرسح شنو هو صح غزله يخبل الچلب وتأثرت شوية بس ماكو ما اضعف ميصير

-اي كفو فدوة اروحلج عفية

تطرقنه لاحاديث اخرى نسيت اسولفلهه عن جوزيف، طلعنه من الكوفي للغرفة وبالي مشحون بطاقة سلبية عجيبة ماعرف منين مصدرهه يمكن هذا يسمو حقد؟

اخذ مني بوسة حقيرة واخذت الاريده منه، عرفت مشاعرك وعرفت شنو اني بالنسبة الك هذا الاريد اوصله من زماان.. اچذب اذا اگول الاطلس سهل ابد ما چان سهل شلع گلبي ما ينطي من روحه بأي شكل من الاشكال..

اربعة اشهر وياه اشتغل شفت الويل واشكال احداث ومشاكل وعركات اختصرتهه مريت بيهه وياه كل يوم نتشاوف بطريقة من الطرق ولازم يصير شي يضوجني بس المهم صدتك اخيراً ولينت قلبه الجلمود..

نمت على فراشي وتينا ودعاء يسولفن بالي سارح ببقية الاحداث القادمة شنو راح يصير؟ معقولة يبحوش وراية ويكتشفني مرته؟ معقولة يحقد عليه ويحاول يأذيني؟..

-تينا: مرايم جوزيف شعنده وياچ اليوم

درت وجهي اباوعلهن وتذكرت الموقف، ضميت وجهي بين ايديه استرجع الصار..

-دعاء: ها شبيچ

-مريم: اعترفلي

-تينا: لاااااااا معقووووول

-مريم: والله صرت شگدوتني تينا اني عبالي جوزيف مسيحي!

-تينا: لا مسلم، اوكفي احجيلنه الصار من البداية......

**

-انتِ متغيرة وياي اسيل

-اسيل: ما متغيرة

-مسلم: لا ابد بس البوز شبرين من احاچيچ كلمة وبس تزعلين وتطنگرين

-اسيل: هاااا يعني انتَ هيج تشوفني بس اتزعل واطنكر مووو

-مسلم: تفضل

-اسيل: مسلم روح ليشوفنه احد وتصير مصيبة

-طز ما يهمني شو انداري عليه

-ماريد

-اسيييل تره اكضج كدام الكل واديرج عليه وعلي

اللتفتت بسرعة عليه خفت يطبق اليكوله هذا ماعنده ستوب لا يخاف ولا يهتم بأحد..

-مسلم: هسة ردتلي روحي

-اسكت

-مسلم: اي اسكت وانتِ سولفي يبعد هلي

-اسيل: اشش كافي لتخليني اضحك

-ضحكي جعل محد غيرج يضحك

-مسلم انتَ تضحك عليه بهاي سوالفك بطلهه

ذب نفس وفرك وجهه، تعدو من يمنه زلم ثنين وكفت عدل وحجيت بصوت مسموع..

-اسيل: رقية راح تجي هسة راحت للحمام

-مسلم: وشعليه برقية اني اسيل لا تبزعيني!!

-اسيل: ليش مو خطيبتك

-اهووووو يا علي انلچم گلبي

-ليش ينلچم گلبك مو راح تعقدون اول منرجع

-انتِ بكيفج تسولفينن منو كال رايد رقية انيي كااافي كااافييي تتخيلين شغلات وتألفين قصص من وحدج وتضوجين روحج وتضوجيني!!

-اتصل بأبوك هو يسولفلك القصة الحقيقية

-عود ابوي يريد يخطبلي رقية؟؟؟ لو يموتني لو يطردني من البيت ويحرمني من الورث لو يسلبوني ويگصبوني ويذبوني للچلاب السود ماتزوج غيرج ديلااا

-مسلم كافي

ماتحملت دموعي خانوني مسلم ويييين واني ويين ابوه لو ابنه يموت روحه گدام عينه ميتنازل ويزوجه الي يريدهه..

-مسلم: كافي شني شو انتِ تهوبزين كتلج وعيونج العاشگهن ما اخذ غيرج لو يمطلوني ويدوسون بمصراني

-اسيل: وتغضب ابوك؟

-ما اغضبه اعرف شلون اقنعه

-ورقية؟؟؟

-الله يرزقهه برجال يحبهه ويقدرهه اني ما اناسبهه

-مسلم گلبي مشتعل تعبانة

-من شنو يحيلي

-اخاف والله

-تخافين من اهلي؟ اني اضمنلج ما يسوون شي وابوي راح يتنازل اليوم لو باجر بس يتنازل وراح نتزوج كدام الكل واحط اصابعي بعيون الگالو ما يرضى ابوك

-واختي؟

-انتِ تقنعيهه هاي بعد عليج

باوعتله منهارة التعب ماكل ملامحي اخاف احجي الديصير ويايه اخاف اصدم الكل، اخاف اهدم الحب الي بيناتنه اخاف من رقية واخاف اجرحهه..

حبيت وتعلقت مسلم قبل لا اعرف بيهه تحبه بيوم الحچتلي عن مشاعرهه طعنت صدري بمية سچين تمنيتني ميتة ولا سامعة احلامهه ومشاريعهه المستقبلية وياه..

**

-علي: عمت عين الزمن ما أنصف اوياي لو أدري أبد ما فاركتكم... أشتريت ألحزن بس يشهد المختار بعت الدنيا كلها وما بعتكم.. يبوووووو عمت عيني اي والله عمت عينيييييي

الوجوه مگلبة كلمن كاعد على سريره وسارح بعيد يفكر بمصيبته، عيون تعبانة وگلب ملچوم هالليلة ما ناسبت الاربعة الكاعدين بهاي الغرفة عدى علي طبعاً..

-علي: الوجوه ملطمة بس عوزكم ملايات شبيكم هيووو

-مسلم: علي تعبان اسكت

-علي: مو صوچكم صوچي اني مهتم بيكم وينه حمزاوي بس هو دواكم

محد جاوبه واستمر الثلاثي (اطلس، عمر، مسلم) يبحر بتفكيره لغير مرسى، گام علي طاگة روحه متنرفز..

-امشو نسهر

نظروله نظرة قاتلة من الغضب ماهتم كام يبدل ملابسه ويحجي..

-اي يله صارلنه هواي ما طالعين سوه شلون نادي اكو هنا جوزيف گلي عليه يله عميرر ولك عميرران

-عمر: علي بشرف امك عوفني بحالي

-علي: ماعوفك شبيك ولك گلبي ناغزني شصاير شني حب حياتك طلبت الطلاق

فز علي من اندكت باب غرفتهم، ركض نزع الجاكيت والبنطرون بقى بالقميص وطفر على فراشه يمثل النوم...

-اطلس: ما تفتح الباااب

-علي: هذا حمزاوي راح يشگگنه وعلي

كام عمر فتح لحمزة الباب ورجع لسريره، دخل حمزة بأيده الجاكيت ويمسح جبينه..

-حمزة: ها حبايب بعدكم سهرانين

-مسلم: علي يريدنه نطلع نسهر

خزرهم حمزة بحدة طفر علي من مكانه وكال بحرگة..

-والعبااس ابو فاضل جذااب هذا بكيفه يسولف شوف اني نايمم وين اطلع شوف حتى بلباسي نايمم اطلع باللباسسس!

-حمزة: انعل والديه اليطلع لا تخزونه اگرصووهه

-مسلم: اني ماعليه هذا علي

-علي: نااايم نااايم اشوخر ويني وين الطلعة لو كول انتَ رايد الطلعة وتذبهه براسي

-حمزة: انتَ، هو ما يهمني ممنووووع كائن من يكن يطلع منا لا تخلوني اتصرف غير تصرررف

-الاطلس: هو ياهو طالع شبيك حامي علينه

-حمزة: هسة كضيت واحد رايح يم صاحبته بوحدة من الغرف

-علي: عليك علييي؟؟؟ وشسويت؟؟؟

-حمزة: نعلت والديه تفلت بگصته وهي استحيت اتفل بگصتهه وشلته من ياخته اسحله مثل الطلي طلعته وياي

-عمر: قصرت

-حمزة: ادبسزية هتلية اني صوچي اجيبكم كل سنة واعيد الغلطة

-علي: على كيفك خيي تره احنه ما سوينه شي باع نايم باللباس

-حمزة: مو عليكم اسولف على ذاك فرفحني الزمال

كعد على سرير اطلس يمسح وجهه المطعون من العصبية، تمدد علي وكال..

-علي: حمزاوي غطيني

گام حمزة من كل عقله يغطي ويدثره والولد صافنين عليهم، رجع لمكانه ورد گال علي..

-عطشان اريد ماي بابا حمزة

-حمزة: ماعدكم ماي هنا شباب؟

-عمر: بالثلاجة

گام جابله كاسة وحطله مي وقدمهه اله، شرب وتشكر منه ورجع الكاسة..

-علي: حمزة ما تسولفلنه قصة

-حمزة: علي انخمد

-علي: بس قصيصة شني السالفة

-حمزة: استغغغفر الله ربي واتوب اليه

-علي: خايب هيج نتفه چم حچاية اضحك عليه بيهه بس اريد بيهه حب وسوالف فاسقة

طفر عمر گرصه من ايده حيل وهذاك عاط..

-علي: حمززززة عمرر گرصنييي

-حمزة: كااافي عمر شبيك ويه اخووك

-عمر: لعب روحي چنه طفل

-حمزة: مالك علاقة يله نامو اسولفلكم قصة

رغم ضوجتهم الواضحة طگو ضحك كلهم وتمددو بمكانهم، حچى عمر بمرح وهو يتذكر ايام قبل..

-عمر: شكد چنت تسولفلنه قصص قبل تتذكر حمزاوي

-حمزة: اي كل واحد شبعره ومن تباتون يمنه اقصلكم قصة

-الاطلس: اتذكر عمرنه 24 سنة وانتَ تسولفنله قصص من نلتم

-مسلم: اني لهذا عمري ههههههه

-عمر: تتذكرون قصة الكناري الاحمر

-علي: الله تتذكرون شباب الكناري الي ما يحب شكله والبلبل الحباهه

-مسلم: قصة تخبل جانت عيدهه حمزة

-عمر: خلي البنات يفتهمن حمزة سولفلنه قصة وعلي ينمطلن كدامنه يتمرغلن

-الاطلس: شيخصلنه لحد يحجي ولكم مالنه خلگ

-حمزة: انتم ما تستحون كل واحد شطوله واحدكم الشوارب تارسة وجهه غيركم عنده درزن زعاطيط وانتو بعدكم تدورون قصص

-علي: لا تقتل المتعة يا مسلم

-مسلم: حمزمز بعدهه روحنه طفولية چبدي

-الاطلس: عادي اني ماهتم تسولف لو لا اساساً حفظت القصة وراح اسولفهه لجهالي من يجون

-علي: منين يجون من فطر الحايط

-مسلم: خلص نويت خيي؟

-الاطلس: نعللل حمزة احجي يله

ضحك حمزة ومسح وجهه وبده يسردلهم القصة الشهيرة مالته، يحششون ويه كل حچاية وكل شوية علي يغمز ويكول..

-علي: فوت بالغميج حمزة بالغميج نريد

-مسلم: اشتعلت روحك يا غميج هنه عصافييير

-علي: چا العصافير ماعدهم غميج اكيد عدهم

كمل حمزة القصة بسرعة وطلع من غرفتهم بقو على تحشيشاتهم ونسو الصار من يلتمون ينسون اوجاعهم وواحد يطبطب على الثاني..

-علي: وعلي لو حمزة مرة اتزوجه

-مسلم: فديته اخوي

-علي: شبيهه اختك اطلس عود صدك تطلگت منه شبيهه ولك تره ما تفتهم مسودنه هاي

-الاطلس: شعليك ياخي حياتهه وبكيفهه

-علي: حرامات چا يروح من ادينه هسة لو چنت مرة

-عمر: علي جاي اشك بأمررك علييي

-مسلم: گلبي لازمني علي ايااااك

-علي: اتشاقة شبيكم بس گدما خوش زلمة اسولف هيج ما يستاهل يتمرمر بحياته ويتأذه

-مسلم: طول عمره مشتغل دفاع علينه وصايرلي ابو اكثر من ابوي

-عمر: هذا كله والفرق بيناتنه سنتين بس

-الاطلس: ماله علاقة العمر هو طبعه أبَوي مشاعر الابوة والحنية ظاهرة عنده

-علي: على شرف حمزة خلينه نروح نسهر

-عمر: اي يله

-مسلم: خوش بس مو تفضحونه نطلع نتسحب

-الاطلس: مالي واهس روحو وحدكم

-علي: رجلنه على رجلك

گامو سوه بدلو بسرعة وطلعو، اول ما دخلو النادي شافو الامة العربية متجمهرة بي نص جماعتهم الي بالشركة رايحين يستمتعون "بنظرهم"، حجزو طاولة وبدت السوالف تحلى....

**

"دعاء"
صارت الساعة عشرة ونص الصبح ولسة الاطلس والشلة مالته ما اجو، واكفين كلنه ننتظرهم نشيل رجل ونحط رجل، كل شوية واحد من الموظفين يروح يصيحلهم الى ان صارت بالـ 11 ياله اجو يتبخترون كأن ممسوين شي..

-حمزة: يله شباب عيني وينكم

-علي: هذا اطلس دوحس اصبعه خطية وگعدنه نفله

-حمزة بخزرة: اربعتكم تفلوه!

-عمر: چا غير صاحبنه

ما جاوبهم وطلعنه للسيارات، اليوم رايحين للغابات او هنا يكولون عنهه مزارع بس شنو من جمال وشنو من اشجار وزرع بيهه عيني ومتمد..

افترينه البنات سوه ومن وصلنه لنهر صغير تفرقنه اني ومرايم وحدنه نفتر ونعلق على كلشي نشوفه ونستمتع وحدنه..

-دعاء: مريم جعت اجيبلج شي وياي

-مريم: خاف اضيع راح اجي وياچ

-لا هذا وينه الاسواق شفته قبل شويه عبرناه

هزت راسهه ورحت اشتريلنه شي ناكله، فتت للاسواق وانركعت ببنية عاطت بوجهي بسرعة..

-عممممى

-دعاء: اليعميچ شبيچ شسويت هو بس طخيتج

عقچت وجهها نفسهه ام راس الاخضر التعاركت وياهه بالطريق..

-اوووع وخري بيئة

-دعاء: ولجج انتِ هييي تره طوختيهه شبيچ راح تموتين من الغيرة

-حبي ما اغار من هيج شكولات بزااف تقرف

-دعاء: شبيچ بنيتي انتِ عندج انفصام؟ لو مشاكل هرمونية؟

دفعتني من ايدي وعبرتني دخلت المحل متنرفزة وكفت اشوف شنو يبيع وافكر شاخذ، شفتهم يبيعون لفات دجاج ولحم حاطيهن بالبراد..

-دعاء: بلا زحمة هذا اللحم ذبح اسلامي؟

-واخا (نعم)

اجه واحد وكف بصفي وهمس..

-چذاب

-دعاء: هاه؟

-چذاب مو ذبح اسلامي

-دعاء: صدك؟ شمعرفك انتَ؟

-حافظهم بصم ذولة ال****

فتحت عيوني على وسعهه من فشر صفن بوجهي ثواني وكال بخجل متعذر..

-اسف زلة لسان

مجاوبته واخذت لفات جبن وعصير وكفت اريد ادفع واجه الرجال بيده باكيتين جكاير وبطل ببسي ودخل رجال ثاني للاسواق، توترت من شفته اطلس..

-الاطلس: وينك علاوي منتظريك

-علي: اي بس ادفع ماعندي تصريفه عندك؟

باوعلي اطلس وطلع فلوس من جيبه دفع وگال للي صاحله "علاوي" يطلع گدامه..

-الاطلس: شلونچ آنسة دعاء

-الحمد لله

-آنسة مريم مو وياچ؟

-لا عفتهه كاعدة واجيت اشتري اكل

مسح لحيته وبقى واكف بصفي انتظر الرجال يرجعلي باقي الفلوس، اخذتهن وترخصت من اطلس وطلعت رجعت اللتفتت من صاحني..

-دعاء: نعم؟

-الاطلس: آنسة ممكن اسألچ سؤال

-تفضل

تململ بوگفته وعيونه تزرزر منا ومناك، جلى حنجرته وگال بثقة..

-الاطلس: آنسة مريم مرتبطة؟

-دعاء: نعم؟؟؟

-مرتبطة مريم؟

-ليش تسأل شنو المناسبة؟

-آنسة دعاء الله يخليچ لا تلعبين وياي

عرفت قصده بمعنى لا تسوين روحج غبية اكيد مريم حچتلي عن الصار بيناتهم البارحة..

-الاطلس: سؤالي الوحيد هذا، اذا مرتبطة اروح بسلام وما اضوجهه

-دعاء: لا ممرتبطة

ابتسم منتصر ودار عيونه بالمكان، اردفت فوراً..

-دعاء: بس كتل عليهه

-نعم؟

-اقصد شكد يخطبووووهه شكدددد

-لطيف

-اي كلش هوايه وهي ترفضهم بس احس هالفترة راح تقتنع لان البارحة اجاهه اعتراف من واحد  يشتغل وياكم

رمش كم مرة يستوعب، عدل وگفته وسأل يمثل البرود..

-منو هذا؟

-مادري نسيت اسمه

-شلون شكله

-مادري مادري

-الاطلس: وهي اقتنعت؟ راح توافق ترتبط بي؟

-مادري والله تريد انتَ اسألهه

-مو تتهرب مني!!

حچاهه بجزع ميلت فمي وحركت اكتافي بطريقة ماعرف وترخصت منه..

رجعت لمريم كاعدة على الحشيش وتتصفن، حطيت الاكل بحضنهه وبدينه ناكل ونرجع للسوالف..

-مريم: سوت الخطابة واكفين طابور عليه ههههههه

-دعاء: واحنه محد مگلبنه ههههههههه

-مريم: خرب راح اموووت عزه بعينج دعيوة هو اطلس خطبني ورگصنه للصبح ممصدگات

-دعاء: همجج خية همجج ما شايفات هههههههههه

نضحك فاطسات ونحشش على ارواحنه، اتصلت امي علينه سولفنه وياهه وويه نانا وبسملة وگمنه نرجعلهم..

-الاطلس: وين صرتو؟!!

-مريم: شنو تأخرنه؟

-حمزة: اي والله كلش

لاحظت الكل واكف ومبين دينتظرونه، غطينه بهدومنه واطلس راح ينفجر عيونه على مريم خازرهه راح ياكلهه..

كملنه جولتنه ورحنه للنهر هناك انطلقنه فرحنه من شفناه ما متجمد بس حذرونه عميق وگالو يغرگ، دخلنه رجلينه بالمي يگصصص من البرودة بس ماهتمينه، مريم تعيط وتطفر من تشوف سمچات يجون يم رجليهه..

-عمر: هههه ما ياكلون ذولي مريم

-مريم: لا لا ماتحمل

طفرت بره النهر ودخل عمر رجليه ويانه، اجو رقية وسارة واسيل ومسلم على الواهس واعتلت اصواتنه ضحك ومسخرة..

دخلت اسيل تريد تسبح ومسلم لزمهه من ايدهه ينهيهه ماهتمت وخرت ايده وراحت تضحك وتشهگ من برودة المي هاي من كل عقلهه راح تجمد!

-عمر: اسيييييل لا تبتعدين تعالي الماي باارد

-اسيل: اعرف اسبحح اععرررف

-مسلم: اسيييييييييييييل

-رقية: اسييييل تعالييي رجعييي اسييل تجمدددين هسة

-الاطلس: هاي شنو وين راحت؟؟؟ يجمد الدم بجسمهه هسة!!

-حمزة: هاي شصاير شكووو

اسيل ابتعدت كلش وغطت راسهه بالمي وگع گلبي مريم تقدمت شوية ودخلت رجليهه ركض اطلس يريد يجرهه وسبقته تينا سحبتهه خايفة..

-تينا: لا لا انتِ تخافين خاف ياخذج الواهس وتمشين هواي

-دعاء: بنات المي ثلج شلون متحملة اسيل؟؟

صارت بلبلة عالية من الموظفين الباقين كلمن حچى حچايه ناس تحشش تذكرو فلم تايتنك وناس يكولون هاي مخبلة وناس يكولون متأثرة بالافلام..

-علي: اسيييييل لا تلعبين بأعصاااابنه طلعييييي

طلعت راسهه تضحك وتحرك بشعرهه اباوع لمسلم راح يموت طب لنص جسمه بالمي يريد يطلعهه وجسمه يطگطگ من برودة المي..

-مسلم: اسيلللللل طلعي لا تسوين هاي الحركاااات

ماهتمت ورجعت غطت راسهه بالمي ابتعدت اكثر، نزع عمر قميصه ونط بالنهر وراح يسبح سريع عليهه يريد يطلعهه، سوه مثله علي وراحو يغوصون ومسلم على وگفته متجمد عبالك عقله فصل..

ثواني ونزع البلوز يصل عليه يريد يكمل سباحة وحمزة عاط بي شلنه كلنه شل بخزرته..

-حمزة: مسلم ممنوع تدخل فهمممت

-مسلم: تمووووت!!

راح يسبح وحمزة واكف بمكانه يتحرگن ويستغفر، اسيل غطت ما طلعت راسهه بعد تخبلن مريم وتينا گابلن بعض يلطمن..

-مريم: ولكم مااتت غررركت خاف غررركت

-رقية ببكاء: جيبوووهه روووحوووو

-سارة: راح تجمد اطلسس حمزززة

-الاطلس: الولد وين تشوفوهم؟؟

غاب عمر وياهه وبس علي نلمح رجليه ومسلم وياه، عيوني تعبت من المراقبة وگلبي يدگ حيل، اللتفتت على مريم حاضنه تينا وواكفات على جهة واطلس واكف وره مريم شلون الحماية.. 

ماتوقعت عمق النهر لهدرجة تخيلت اول ميدخلون يلگوهه بس الظاهر راحت لغير اتجاه..

ثواني جانت بس شثگلهه مرت علينه الكل جامد بدمه، مريم وجهها انخطف اصفر ولزمت بطنهه رحت اركض عليهه اشوق شبيهه..

-مريم شبيجج

-مابيه شي ماكو شي

عاصرة بطنهه وعيونه متروسة دموع، ثواني ونشوف اطلس وضحى وموظفة ثانية وياهم، اطلس راد يلزم ايدهه وتردد جرهه من ردانهه وحچى بلهفة..

-شبيچ شبيچ

-مريم: ماكو شي ارجعو لأسييل

وكفت على حيلهه ومسحت عيونهه كالت صارت زينة بس اجتهه كرفة قوية، عكد حاجبه اطلس قلق بس ما لح وياهه..

-تينا: اجووو اجوووو دا اشوووف مسيو عمرررر

انفرجت اساريرنه رجعنه نركض نشوف طلع عمر وبيده اسيل يسحب بيهه وعلي ومسلم وراهم يسبحون، جرهه لليابسة وذبهه بالكاع نيموهه بشكل مصطح ويضغط على صدرهه حيل..

-رقية: ليششش تسوين هيج بروحج لييششش

-سارة: اسيل چان ماتت

يبچن واطلس حاضنهن ويسكت بيهن، عمر يضغط على صدرهه بشكل قاسي وحاير شلون يصحيهه، مسلم يلوب يمهه وميعرف شيسوي.. اجه ببالي شي بس استبعدته لكن هالشي ما اجه بس على بالي مريم همست بصوت خافت يرجف..

-مريم: حسيتهه تريد تنتحر

-دعاء: حتى اني

زاد بالضغط على صدرهه سنون عمر تتطاطگ من البرد جابو جاكيت لأسيل دثروهه وعمر لسه يريد يصحيهه، عيوني طلعت من محجرهه اول مرة اشهد هيج شي عبالك دخلت بحلم..

نزل عمر يريد يسويلهه قبلة الحياة ومسلم دفعه ميقبل وفزت اسيل اخيراً، طلع المي من حلگهه ورجعت لوعيهه فوراً جرتهه رقية تحضنهه وتلوم بيهه بنفس الوقت حضنهن مسلم سوه لصدره ومثبت حنچه على راس اسيل..

-مسلم: اخخخ منج اخخخخ راح تموتينه

-رقية: اسيل ليشش هيج سويتي متنه خوووف الله يااخذج

مجاوبتهم وبقت حاضنه رقية وساكته، تعذر من عدنه حمزة وطلب يبقون وحدهم العائلة هزينه روسنه والموظفين كلهم تفرقو..

-ضحى: برأيكم تصرفهه جان طبيعي؟

-تينا: لا هذا انتحار!

-دعاء: يعني حتى انتو حسيتو بهذا الشي؟

-مريم: عبالي بس اني لاحظت، عجيب خطية ليش هيج تسوي بروحهه

-تينا: اني منتبهه عليهه دائماً حزينة شكد حلوة هي بس حزينة

-مريم: الله يعلم شنو الموصلهه لهاي الحالة

-تينا: مسيو اطلس جاي بأتجاهنه

اللتفتنه عليه ومريم لزمت ايدي متوترة لاحظتهه تينا وعكدت حاجبهه وزاد الشك بملامحهه من اطلس كال..

-آنسة مريم ممكن احجي وياچ

بلعت ريك مريم وهزت راسهه، راحت وياه وتينا عينهه عليهم واللتزمت الصمت لكن اعرفهه هالداهية متمشي عليهه هالسوالف..

**

"مريم"
تمشينه سوه والهوا بااارد ثلج عيوني تدمع من الجو والهوا واحس بوجهي يتگصگص ويتجرح..

-الاطلس: شلون صرتي آنستي؟

-احسن

-اكيد؟

-اي

-طيب ممكن نحجي ويه..

-استاذ بردانة

حچيتهه وعيوني تدمع من وحدهه، اباوعله ذبلت عيونه وبلع ريگ، عيوني تعلگت بعيونه اريد اشوف شيسوي وليا درجة جَدي ويايه راح ينطيني جاكيته كدام الكل لو يتخذ غير اجراء..

-الاطلس: بردانة؟

-اي كلش

فوراً نزع جاكيته يريد يحطهه فوگاية دفعتهه بسرعة متفاجئة وگلت امثل واجامل..

-لا لا شيكولون علينه هسة

-ما يهمني لبسيهه لا تمرضين

-واذا احد سألني عنهه شكول

-كولي مالتي

-لا عيني ميصير هيج ماقبل اني

انطيته الجاكيت أصر اللبسهه ماقبلت حطهه بيده بدون لا يلبسهه وبقى بالبلوز، مشينه شويه ذب حسرة وگال..

-الاطلس: سؤال واحد وجاوبيني بصراحة

-اي تفضل

-منو اعترفلج البارحة؟

فتحت عيوني مصدومة هذا منين عرف؟؟

-الاطلس: لا تنكرين اعرف البارحة اعترفلج واحد وراي

-مريم: لا استاذ شنو هالحجي عيب تتهمني

-آنسة مريم!!

-حتى لو صدك ماحجي هذا الشي شخصي

-اي خوش لا تحجين بس جاوبيني وافقتي عليه؟

-مريم: راح اجاوب بس حتى ترتاح، لا ما وافقت

-عاوز توافقين

-عشتوو ليش عوود

-اخخخخ مررريم اخخخخ منج

-استاذ لتظل تأخأخ يمي انطيني مجال

-مجال وين حتى باجر اللگاج متزوجة

-اي بعد غير اجت قسمتي

-مريم!!!

-استاذ شتريد انتَ فهمني

فرك وجهه وزفر هوا قوي حط ايد على خصره وايد على جبينه يفركه، همس بصوت ناصي تخيلته خجلان منهه بس حچاهه..

-اريدج

-هاااا ومرتك؟؟

صفن بوجهي بدون تعابير اخذله فترة ساكت ويوزع نظراته على وجهي..

-مريم: انتَ دتخون زوجتك استاذ

-لا

-لعد هاي شتسميهه؟ الكل يعرفك متزوج وهسة تغار عليه وتارك زوجتك

-مريم هذاك شي وهذا شي

-اه صدك حلو خوش جواب ما شاء الله عليك

-لا تستهزأين بشي انتِ جاهلته

-اي ديلا علمني

-اني.. اني مامتزوج زواج حقيقي

گلبي دگ بسرعة باوعتله وعيوني تاكل عيونه من الفضول، حسيت نفسي واگفة على نار..

-شنو تقصد؟

-زواجنه على ورق ماكو شي يجمعنه نهائياً

-ليش؟

-هواي شغلات صارت ادت لهذا الزواج

-من هاي الشغلات؟

-آنسة مريم قصة طويلة كلش

-سولفلي مو تريدني؟ غير اعرف ماضيك يمكن طلعت تأذي زوجتك ومتعود تخونهه وتجرحهه وتكسر گلبهه

-اني حتى ما شايف شكلهه

-هههههههه اي صح صح

-والله

-اممم

-ماعرف أي شي ما فد يوم انجمعنه سوه بحديث لو حتى نظرة ماعرف شكلهه ولا حتى اسمهه

-ليش؟

-ماكو داعي

-ماكو داعي لشنو؟ تره انتو متزوجين!

-كتلج على ورق وهذا اتفاقي من البداية اني اعيش حياتي وهي كذلك، كتلج الموضوع عميق راسج راح يوجعج

-وجعلي راسي

-زواجي من مرتي...

ضحك وره كلمة "مرتي" وفرك وجهه وكمل..

-زواجي منهه كله عناد بيه وعقاب من ابوي لسبب شخصي صار ماردت البنية وگتله لا تزوجني راح اظلمهه ما اريدهه ولا راح اتدنالهه ضرب كلامي بعرض الحايط وغصب سواهه

-ليش هيج سوه ابوك؟

-يريد يكسرني بأي طريقة ويفرفح امي عليه

-شلون؟

ماقبل يجاوب تهرب من الاجابة وكمل على موضوع زواجه..

-انظلمت وياي البنت اتفق بس انطيتهه مساحتهه الخاصة انطيت خبر لمربيتي تكللهه شتريد تسوي بحياتهه هي حرة تدرس، تشتغل، تسافر او ترجع لاهلهه

گال "ترجع لأهلهه" بأستهزاء واضح، بلعت ريگ ماريد اعصب وافضح نفسي هنا جاوبته بهدوء..

-لهدرجة كارهه استاذ؟

-ما اكره البنية اني ماعرفهه حتى بس اكره الموقف الي جمعني بيهه

-شنو هالموقف الجبير الي خلاك متشوف مرتك ولا حتى يراودك فضول ناحيتهه

-ما تناسبني

-معقولة ما صارت فرصة اللتقيتو؟ او على الاقل انتَ حاولت تشوفهه؟

-لا

-اي ليش

-كتلج ما رايد البنية

-اي افتهمت بس ليش ما اللتقيت وياهه وفهمتهه هذا الشي؟

-ماكو داعي مربيتي حچت وياهه

-المفروض انتَ تحجي او على الاقل تنطي لنفسك فرصة يمكن تعجبك

-ما اريدهه تتعلق بيه، لو يترسوهه ذهب هم ما يرفلهه گلبي

-تتوقعهه لهدرجة بشعة؟

-لا! اساساً ما افكر بهاي الشغلات بكثر ما افكر واستذكر الموقف الي انحطيت بي

سكتت اباوعله واضح هذا الموقف چبير كلش مو نفس ما نانا وصلتلي من كالت عمو محمد زوج اطلس عقوبة لان چان دايح وابو نسوان.. الي دا اشوفه گدامي لا هو ابو نسوان ولا دايح؟!

-الاطلس: ها؟

-شنو ها

-اقتنعتي ماعندي علاقة بزوجتي وما جاي اخونهه

-هاي هم تعتبر خيانة خاف متدري

-الاطلس: والعباس ابو فاضل احلفلج هسة واقسم البت ما رايدهه ولا بيوم دنت نفسي عليهه لا جابرهه تبقى وياي ولا مزعلهه ومأذيهه بكلمة بس ماريدهه مريم ما جاي اتقبلهه مو من بيئتي ولا ذوقي كلش نختلف من السما للگاع!

-يمكن تعجبك شمعرفك انتَ

-ما تعجبني اعرف مريم ماريد احچي على البت كافي

-ليش؟

-ماريد احجي وره ظهرهه الله يستر عليهه ويخلصني

-تريد تخلص منهه؟

سكت مجاوب مجرد ذب نفس فهمت عليه، بلعت غصتي وهمست..

-البنية مو زينة؟

هم ميجاوب، تعبت نفسيتي ماتحملت انطيته ظهري وگلبي وجعني حيييل كل كلمة يحجيهه طلق حر ويصوب صدري، الحسرة شخطت بلعومي.. معناهه صدك متخيلني مو زينة اتذكر كلامه عني واللفاظه الحقيرة من يتهمني بشرفي وعن مكاني وبيئتي..

اتذكر نانا وهي تقنعه ميطلگني وتذكره بعمو محمد شلون راح يعاقبه ما جنت اعرفه لهدرجة مصمم ومامهتم ويريد يطلك..

-الاطلس: مريم

-نعم

-عاينيلي

انداريت عليه ملامح وجهي حاقدة وكارهه كلشي حواليه كارهته هو كله شخصياً..

-استاذ

-ها عيوني

-اذا صرنه سوه شنو تكول للناس

-احنه خلينه نصير سوه وطز بالناس

حچاهه بعيون لامعة مهتمة تراقب شفايفي، ابتسمت بصعوبة وانطيته جانبي الايمن..

-افكر عود

-مريم ليش تعلين گلبي

-استاذ انطيني وقت فدوة

ابتسم وهز براسه باوعتله شحلاته، شاب تتمنى ترتبط بي أي بنية عيونه صادقة ووجهه رغم طنگورته الدائمية مريح.. حبه واضح وتعلقه مثل الاطفال بس..

بس اني حاقدة وما جاي اكدر اتخلص من حقدي ناحيته اريد اندمه على كل كلمة! على كل دمعة نزلت من عيني بسببه! اريد اربي وافهمه البنية الرخيصة وبنت الليل الباعهه ابوهه منو!!

-اني راح ارجع استاذ من رخصتك

حرك راسه ساكت رجعت للبنات وبداخلي احمس اوف يالقهر بابا شسويت بيه ليش هيج مو اني بنتك شلون هلك گلبك تدمرني هالشكل وتشكك الناس بشرفي!

ماكو طعم لأي شي اسوي بقيت كاعدة ويه البنات شاردة، رادونه نتمشى سوه وافقت بس حتى اخلص من حنتهن، يمشن ويسولفن والضحك تارس المكان، فجأة توقفن بمكانهن..

ركزت على الي ديباوعوله وانصدمت نفس صدمتهن ذولة موظفين شركة شمسون! تقدمو علينه وعيونهم الحقيرة تاكل بينه تعدو بدون لا يحجون وكهكهاتهن يرنن بأذني..

شتت نظراتنه صوت جاي من وره صايرة ملاسنة بين حمزة وواحد منطي ظهره، ماكو ثواني وصاحو راح نرجع للفندق..

محد عارض وصعدنه السيارة بسرعة ماقبلو ننزل لحدما الكل يلتم، دخل اطلس للسيارة وبيده الموبايل يحجي مفرفح حسيته ابوه، دخل سارة وكعدهه على الكرسي وظل واكف بجانبهه..

-ضحى: اموت واعرف شنو بين شركة شمسون ومسيو محمد

صوت اطلس يسمع الكل واضح فقد من العصبية اشوفه يعيط بالموبايل وسارة ترجف ومكمشة بطارف جاكيته..

-الاطلس: ايييي ليييششش؟؟؟ كله من وراااك دمرتنااا دمااار يابة اني شايل ايدددي تريد حاچي حمزززة.. ماااتدخل مااا احاچي احدد احطه واكتله والله.. والله ماحجي مااحجي

طبگه بوجهه وكعد بصف سارة، استغربت شلون يحجي هيج كدام الموظفين بس مبين طالعة روحه.. اباوع لسارة وجهها مخطوف حضنت زند اخوهه وميلت راسهه عليه..

طبطب على ظهرهه ويهمس وياهه يحجي، صعدو الباقين وانطلقنه للفندق، مجرد نزلنه عثرت ببوابة السيارة ونورسين لزمت ايدي حيل..

-مريم: شكراً

-نورسين: انتبهي حبي

هزيت راسي وتوترت من اسلوبهه صوتهه يرجف چان، مانطيت للموضوع اهمية واخذت دعاء وتينا وصعدنه الغرفة..

-تينا: راح تصير مصيبة وگولن تينا ما كالت

-دعاء: يا ستار ليش هيج تكولين

-تينا: مجرمين ودخلو بيناتنه انتو متعرفون شمسون شنو يتكاتلون كدام الكل لا يهتمون لشرطة ولا لبشر المهم يسوون الي براسهم

زاد التوتر بالغرفة اجت ضحى وجابت بنت اخوهه وياهه وسولفتلنه عن الغرفة البصفنة غرفة "خوات اطلس"..

-ضحى: الرؤساء كلهم بالغرفة ويه البنات

-تينا: ليش معقولة علمود موضوع اسيل؟

-ضحى: مادري والله

-دعاء: قلقت على سارة خطية مبينة خايفة جانت بس من شنو؟

سولفتلهه تينا شصار بحفل الافتتاح دعاء كامت تزلغ بخدودهه، طالعة اشاعة على سارة ان هي وفاهد على علاقة واهلهه الي رافضين العلاقة وميقبلون ترتبط بي او يخطبهه..

اختنكت دعاء من الاجواء وكالت تريد تنزل ناكل شي جاعت، ماقبلت انزل وياهه راحت وحدهه، قلقت والف فكرة اجت براسي اخاف احد يعترضلهه او يضوجهه خفت تتيه ومتعرف مكان المطعم..

قررت انزل وراهه ماكدر اعوفهه وحدهه، تمشيت بالممر وعيوني واذاني على غرفة البنات صوت زلم طالع منهه مبين المناقشة احتدت..

غلست ورحت للمصعد نزيت بمكاني من سمعت صوت واحد وراية يصيح..

-مريم

اللتفتت بسرعة واذا اشوفه مالك! ابتسامة واسعة مرحبة مرسومة على ثغره تقدم عليه صار كدامي مدلي ايده يصافحني ويكول..

-سعيد بلقائچ آنسة مريم

-شكراً

حطيت ايدي على صدري متعذرة من مصافحته، فهم وبسرعة رجعهه بجيب بنطرونه.. دور عيونه بالممر وكال..

-خوش فندق حاجزيلكم طاگين شركة الاطلس

-مريم: اي حلو، العفو اني جنت دا انزل اختي منتظرتني و..

-مالك: اه اختج جاية وياچ؟

-اي

-حلو حلو

توترت من تصرفاته ترخصت منه وكملت للمصعد دا اريد ادوسه وصاح بصوت مسموع..

-زوجة الوريث الاول لسلاسل شركة الاطلس تشتغل موظفة عادية بشركة زوجهه...

الدم جمد بجسمي وتد ودگو برجليه ماكدرت اتحرك، ماكدرت اللتفت، ماكدرت اتنفس!

-مالك: اووه مريم حتى انتِ تلعبين على الاطلس يا مسكين نايم ورجليه بالشمس هههه

بلعت ريك وانداريت عليه حاولت قدر المستطاع اسيطر على نفسي وما ابين متوترة بس رجفة صوتي خانتني..

-مريم: شتريد اخي؟

-مالك: ليش مچذبة عليهم مريم شنو غايتج؟

-مريم: شدخلك

-معقولة زوجچ ما ميزچ؟ عمچ؟ والله عجيب هالشي

-استاذ مالك لا تدخل بشغلات متخصك رجاءً!

-اي ليش يمكن غايتنه وحدة ونفيد بعض

تقرب بخطواته عليه وگف گبالي مباشرةً، قهقه بخفة من شاف ملامحي المستغربة وكال وهو يحك مكان شاربه الكثيف..

-هاا ما راح تسولفين

-شعليك؟! شنو هالتدخل هذا عيب استاذ عيب!

-من زوجچ يعرفچ ويفشلچ كدام الكل ويطردچ اني بنظري هذا عيب اكبر

-شوف استاذ اني ما خايفة لا منك ولا منه واذا هذا كلامك عود دتحاول تهددني وماعرف شنو ابشرك ميفيد وياي

ابتسم تك خد وتمتم..

-يعني انتِ صدك زوجته

-چنت زوجته او لا هذا الشي ميخص احد ماشي؟

-ماشي

-من رخصتك

دخلت المصعد وانسد عليه راح اموت جسمي كله يرجف انگطع نفسي هذا مالك مو راحة راح يدمر كلشي، مسحت وجهي وعصرت راسي طواحين هوائية تفتر بي.. وفجأة طخت براسي فكرة خطفت لوني ووگفت نبض گلبي......

يتبع ♠️💸....

• ━━━━━━❪♣❫━━━━━━ •

ادللكم بالبرتوتات وانتو دللوني بالتصويت 😂🫶🏻🙊

احبكم واحب تفاعلكم شكراً على كل كلامكم الحلو وتقديركم لتعبي ان شاء الله نكون اني والاطلس "دمليج اسود" عند حسن ظنكم شباباتي 😻🫶🏻