رواية الاطلس "دمليج أسود" الفصل السابع عشر 17 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

مرمرني الوكت احتويني ♥️

• ━━━━━━❪♣❫━━━━━━ •

-تينا: دعااء مريم واكعة غشيانة وتوون دعاء!!

فزيت من مكاني مرعوبة رحت اركض بالمعنى الحرفي للمصعد، بألف محمد يا علي وصلت للغرفة شفتهه بحال صعب واكعة على وجهها وخشمهه يخر دم وتون ما حاسة..

-دعاء: مررايم مرريم.. ولج مررريم

-تينا: متحس ماكو حاولت اصحيهه متسمعني

-دعاء: صيحيي احد يسااعدهه امشي ناخذهه للمستشفى تيناا

هزت راسهه وراحت بره تصيح احد بقيت ويه اختي الغشيانة بس انين الحمامات يطلع منهه، اضرب على خدودهه واصيح بأسمهه ارجف رجيف اباوع لوجهها صاير ابيض شاحب وشفايفهه الوردية مگلوبة بيض..

دقايق وشفت مسلم وعلي على روسنه استنجدت بيهم واعيط يساعدونه، علي صاح بيه حتى اسكت واني ما حاسة تخبلت على منظر اختي..

-علي: وخرري اشيلهه دعاااء شبيچ مچلبة بيهه

-دعاء: لا لا اني اشيلهه ويه تينا تعاالي تينا

-علي: وين تگدروون وخررري

-مسلم: انطي مجال آنسة دعاء خلي يشوف دربه

جسمي كله يرجف هزيت راسي اي وابتعدت عنهه رفعهه لصدره شالهه وطلع من الغرفة يهرول واحنه كلنه وراه..

اخذت تلفونهه ويايه شفت اشعار من الاطلس دازلهه رسالة كاتبلهه "مريم تعاليلي بساع" دست على اسمه اريد اتصل وطلب مني التلفون اكتب الرمز شلون واني ماعرف رمزهه..

وصلنه لصالة الفندق دنريد نطلع وشفت رجال وياه حمزة والبنات تفاجئ حمزة من منظرنه بس ما علق اشر بيده مستعجل واجرلنه تكسي صعدنه اني مسلم وعلي ومريم بحضني نيمهه علي..

-تينا: اجي ويااكم اريد اجي

-علي: لا تينا روحي مو وكتهه

هزت راسهه وابتعدت من السيارة، بنص الخبصة انتبهت حمزة اجر تكسي ورانه الرجال والبنات وياه استغربت من جيتهن بس ما تسائلت ولا اهتميت..

ادك على خدودهه اريدهه بس تصحى اريد اشوف عيونهه المكحلة الحلوة ادعي وابجي وعلي يصبرني..

-علي: مابيهه شي يمعودة ليش البجي

-دعاء: تعبانة جانت وماهتميت عفتهه وحدهه عمت عيني عليج

ما حچى لحدما وصلنه للمستشفى طلبو سدية واجو نيموهه وركضنه بيهه بالداخل وحمزة والبنات ورانه دخلو، يركضون بيهه بالطريق وحمزة يحجي وياهم يكوللهم خلي طبيبة تشوفهه فوراً..

طلبو يسوي اجراءات المستشفى ويدفع فلوس اول باوعتله مترددة اشرلي اروح وهو وكف طلع محفظته ويحجي وياهم..

-سارة: دعااء امشي شبيچ واكفة هنا

-دعاء: هاا هاا

-اسيل: البنية مصدومة عمري على كيفج ويه نفسج امشي ويانه امشي

جروني جر ماعرف وين اخذو مريم ضعت، رقية تحجي وتصبر بيه بس كلشي ماسمع منظر مريم مجاي يروح من بالي وجهها مال اموات چان..

وصلنه لغرفتهه الطبيب ما قبل ندخل كال لازم يفحصوهه طلبت بس اني ادخل وكوة قبلو، اشوفهم يحاولون يصحوهه بس ماكو فائدة رجفت اكثر من شدولهه مغذي..

-دكتور شبيهه اختي شبيهه

ما جاوب بقى يحاول يصحيهه الى ان فزت موجوعة كلش وتبجي مفرفحة روحهه لازمة بطنهه وتتلوى والدكتور يحجي وياهه ويضغط على بطنهه بقفازاته فوك ملابسهه..

يضغط على جانبهه الايمن ويسألهه اذا موجوعة لو لا وهي تهز راسهه اي وتبجي، ضغط على الجانب الايسر وهم سألهه وتبجي حار وياهه وطلب ياخذولهه سونار..

-مريم: لا لا مابيه شي لا ماريد ماريد

-دعاء: مريم كاافي عنااد شوفي حالج

-مريم: ولج رجاال يكشف عليه دعااء

طلبت منهم طبيبة بدال الطبيب وافقو بسرعة شوية واجت دكتورة اخذتلهه سونار وعاكدة حاجبهه منتبهه ويه الشاشة ومريم تشيل روحهه وتركعهه..

الدكتورة سورية تبتسم ويه مرايم وتشاقيهه عسى تنسى وجعهه بس هيهات..

-الدكتورة: في كيس.. عم شوف كيس كبير كتير

-دعاء: شنو كيس؟؟ شنو هذا؟؟

-الدكتورة: كيس مائي على الرحم.. لا هدول تنين..

بقت تسويلهه السونار ومنتبهه بكل دقة وتفاجأت من كالت شافت واحد ثالث صغير وياهن..

-مريم: راح اموووت راحح امووووووت

تبجي وتعيط راح اموت واني حرت ماعرف شسوي سألت الدكتورة شنو الاجراء اللازم ما جاوبتني اجه دكتورهه الاول وقره تقرير السونار وكال الوضع متطور عدهه ولازم تدخل جراحي..

هي سمعت لازم يسوولهه عملية وكامت تدك وتلطم متريد تتوسل بالدكتور تگله صرت زينة ومو موجوعة وهو قافل ماقبل يناقش هواي وطلب يحطولهه ابرة مهدأ بالمغذي ونامت..

طلعت من الغرفة اشوف كلهم واكفين ويلوبون وكعت عيني على سارة اجت ملهوفة تسألني بعدني دا اريد اسولف ودخلو اطلس وعمر يهرولون..

-اطلس: شكوو شصاااير شبيكممم وينهه سارة.. ساارة

تلفت يدور عليهه وحضنهه لصدره يتطمن ويهمسلهه وسارة مستغربة..

-عمر: ليش بالمستشفى شصايرر؟؟

-دعاء ببكاء: ليش متعرفون مريم تخربطت وتحتاج عملية

فگو عيونهم مصدومين عمر نفض راسه بسرعة وكال..

-عمر: لا گالولنه لحگو اخت الاطلس تخربطت واخذوهه للمستشفى

ثواني ورجع اطلس لوعيه اجه عليه يسأل متخبل عيونه ناطة ويرجف كله بجيت اكثر من شفت حالته لزمه الرجال الجاي ويانه ونتر..

-حازم: على كيفك ابني خبلت البنية!

-الاطلس: احجو عملية شنوو

-دعاء: عدهه اكياس على الرحم صايرة وكبار لازم يستأصلو

شهگن البنات والولد صفنو ما فاهمين، اطلس بقى على رجفته وتقدم عليه يسأل..

-يستأصلووون رحمهه!!!

-دعاء: لااا لااا الاكياس يشيلوهه

-رقية: يعني خطرر؟؟

-اسيل: اكيدد خطر على الرحم

-علي: اسييل شبيچ هاي بدال ما تهدأيهه!!

وكفت بس ابجي ماعرف شسوي عاجزة اسبح وادعي وانخي ام البنين تحفظهه وتطلعهه من العملية بالسلامة..

رجعلنه الدكتور واطلس وعمر وگفو يستفسرون منه اهتم الدكتور بحالتهه كلش بعد ما عرفه الاطلس على نفسه وعرفه من رجال الاعمال المعروفين، كال العملية راح تكون بالناظور بس ادعو يكون واحد من الاكياس ما مفجور لان اللمهه موضح هالشي هنا لازم يفتحون بطنهه ويوصل لرحمهه الفتح..

اخذتني الرجفة وادعي ربي واهل البيت ميكون شي خطير، رجعتلهه بالغرفة نايمة كعدت يمهه اللوب ماعرف شسوي سودة بوجهي اخيتي شنو بيدي شسويلج وتطيبين..

ما طولت شوية وردت كعدت على نفس الوجع تبجي وتملخ بشعرهه وتمرد بالشرشف بيدهه وتصيح..

-دعاااء اريد امييي مامااا وينج اوووووف

-دعاء: مريم حبابه تحملي حباابة

على اثر عياطهه دخلت سارة للغرفة تواسينه وتعدل بحجاب مريم لان اطلس يريد يفوت للغرفة..

-مريم: ماااريده مااريد اشوف احدد ماااريد ااااخخخخ يمممةةة

تعصر بطنهه وتضمضم وجهها اول مرة اشوف مريم بهذا الحال، دخل الاطلس وكف بباب الغرفة يباوعلهه وملامحه تقطر اسف وحزن..

-شلونهه؟

-دعاء: مثل متشوف

-الاطلس: مريم.. مريم عاينيلي

-مريم: طلعو بره حبابين طلعو..

تحجي تلهث وتلوب بروحهه، راحتله سارة جرته من ايده وطلعته بره بقينه بأنتظار الدكتور رجع وكال عمليتهه بعد ساعتين فكيت عيوني راح اكله من العصبية..

-دعاء: بعد ساعتين وتعوفوهه تلوووب!!!

تخبلت عليهم عيطت وكلبت الغرفة ومريم بس تبجي ما جاوبني بقى ساكت والممرضة ضربتهه ابرة مهدأة ورجعت نامت بس هذا الفالحين بي يضربوهه بالابر ويرجعون ليوره..

طلعتني الممرضة تكول خليهه ترتاح وحدهه حتى عود تطول نومتهه باوعتلهه مزعوجة هاي شنو شايفتني جاهلة ومافتهم؟ تطول نومتهه شنو..

طلعت يمهم وكفت واشوف الوجوه متكلبة وواكفين على جهة، فرك وجهه حمزة وباوع لساعته..

-حمزة: ساعة وراح ننطلق شلون بهاي الحالة

-علي: روح انتَ وحازم والبنات احنه باقين

-مسلم: ليش باقين؟

-الاطلس: چاا هاي البت من مسؤوليتنه!! مووظفة تشتغل عدنه لازم كلكم تبقوون بس شحجي عليكمم

-حمزة: صحيح امانة برگبتنه مريم انتو رجعو اني باقي وياهه

-عمر: لا شنو اني ابقى گلبي ما ينطيني اعوفهه

-الاطلس: خيرر خو ماكو شي؟؟!

-سارة: اطلس شبيك معصب شحچى الرجال

-عمر: عوفي سارونه الزلمة متسودن

-الاطلس: لا تلعب بأعصابي عمرر امشو ولو اني ابقى هنا وحدي

-علي: وعلي ماعوفكم لو وصل الخبر لخالي محمد يشوي على اذاناتنه البصل

-دعاء: العفو على التدخل بس روحو كلكم ممحتاجين احد ويانه

حچيتهه مزعوجة شنو باقين ويانه بس حتى ميحاسبهم محمد! وين الغيرة والحمية لعد..

-علي: فهمتيني غلط دعاء اني اسف اقصد مريم اعزهه وخايف عليهه وخالي يحب كل موظفي ويخاف عليهم

-دعاء: اي خوش

-حمزة: دعاء من واجبنه كلنه نبقى ونساندكم مريم موظفة عدنه وانتو نسوان وحدكم وبمدينة غريبة خاف تحتاجون شي ينقصكم شي

-حازم: صحيح بنتي كلام الشباب ما نعوفكم وحدكم محتارين

-الاطلس: حمزة انتَ ارجع ما يصير كلنه نبقى اخذ البنات امانة برگبتك وانتبه عليهن بالطريق زين لا تقصر وياهن

-حمزة: بعيوني

-مسلم: حمزة اني اوصل اسيل للفندق عندي سالفة وياهه

-الاطلس: خيرر؟؟؟ سالفتككك ما تنتظر؟؟؟

حچاهه بعلو صوته وخازر مسلم بعصبية، صفن مسلم ساكت وحمزة نتر بخفوت..

-حمزة: لا تفضحونه صوتكم

-مسلم: ليش اني حجيت! هو شبي انهد بيه هيجج شبيك محمل عليه!!!

-الاطلس: خلينه نرجع ونتفااهم لا تستعجل على رزقكك

-حمزة: كااافي لا تخزوونه

يخزر بيهم ويأشر بعيونه عليه وكفت على جهة واسمعهم يتناترون بين بعض، واضح مشكلة قوية صايرة بيناتهم اطلس يريد يلتهم مسلم بعيونه وواكف گوة على طوله..

اجت ممرضة تسألهم شسالفة واعتذر منهه حازم كال صاير سوء تفاهم هزت راسهه متفهمة وراحت..

-مسلم: هاي العصبية بس لان ردت اني ارجع اسيل؟؟

-الاطلس: ووليي عن وجههيي حمزة اخذ اخووك لا ابتلي بي هناا

-رقية: هاي شبيكم شكوو

-مسلم: ديلا تعال ابتلي بيه راويني عضلاتك

هجم عليه اطلس عته من ياخة قميصه ويهدد بي ومسلم يعت بالاطلس وهم يهدد وحمزة وحازم بيناتهم يفاككون، الاطلس ضربه على الحايط حيل ونتر بصوت مسموع وهو يأشر بأصبعه..

-الاطلس: تنچببب وتبقى وياي هناا ما ترجع وياااهم

-حمزة: طايحين الحظ كلت انچبوو وبلعو لساناتكم ادبسززية الا يسوولنه سالفة وتوصل لعمي محمد حتى يشگ روسكم شششگ

-مسلم: شنو هاي الغيررة القاتلة انتَ شعليكك لا تزودهه اطلسسس

-حازم: اطلس اكسر الشر وعوفهم شبيك ابني هيج تغار على خدامتكم

-الاطلس: خدامتنه لو خدااامتكم؟؟؟ مااااتدخلون بيناتنه ماااشي

اندهشت بكلامهم اسيل تصير خدامتهم؟!! ممبين هالشي ابداً اني توقعت تعود للاطلس لان اشوفه يهتم بيهه حالهه حال خواته..

اباوع للبنات كارصات سارة حاضنة اسيل الي دموعهه شلال وترجف ورقية واكفة يم الولد معصبة..

-رقية: اسيل مو خداامتنه اسيلل اختنه وصديقتنه مسيو حازم!!

-عمر: كافي روحو للفندق راح الوكت

-مسلم: انتَ انچببب لا تدددخل

-عمر: منو ينجب وللكككك

هستوهم ديتكامشون وحمزة عاط بعلو صوته خله الدكاترة واليمرون يلتفتون علينه..

-حمزة: حچاية ثانية وانعل والديكممم وحق هوو علي ابن طالبب

حچاهه وراح والبنات مثل الكتاكيت وراه يمشن وكارصات ويه بعض وحازم تبعهم، لحگهم مسلم شفت اطلس گام يفور اللتفت على عمر ونتر بأمر..

-الاطلس: امشي روح خاف ياخذهه لا تخلي

-عمر: ما اتدخل اني

-الاطلس: عمرر اني شطالب منككك روح ماكدر اعوف مريم هناا وحدهه

تأفأف عمر وگوة راح وراهم شفته يمشي سريع واني بس واكفة وصافنة عليهم ذولة شبيهم متخبلين واطلس ليش مبين يكره مسلم لهدرجة..

-علي: كل هالعركة علمود خدامة!

-الاطلس: معليك

-علي: لا عليه ثانياً شكو تدز اخوي يلحگهم شنو يشتغل عنددك

-الاطلس: علي لا تحجي وياااي علييي

-علي: احجي واحجيي شبيك متخبل انتَ شكوو افتهمنه ربت عندكم بس هي مو اختك لا تزودهه هي حرة!

فرك وجهه اطلس واكف بمكانه وصافن، اني بعيدة عنهم نوعاً ما بس صوتهم يوصلني بقيت مركزة بيهم وافكر وقطع افكاري من اجه عمر ايد وره وايد كدام..

-الاطلس: هاا شو رجعت؟ اسيل راحت ويه حمزة؟

-عمر: لا مسلم ما رضى

-الاطلس: انتَ غبييي شبيك انتَ شبيك مضروب على عقلك اني طلبت منك شي واحد بس عمر!!

-عمر: وشكووو حاشر نفسي بيناتهممم بكيفهمم شيسوون يسوون اني معليه لحد يدخلنييي

-علي: هيووو شبيكم شو تسولفون عبالك ماخذهه يغتصبهه شنو هالدراما الزايدة!

سكتو ثنينهم واحد منطي ظهره للثاني اشوف اطلس يفور فور رايح جاي وعمر ملامحه شكد ما اكول عنهن حزينة ماكدر افسر..

ابتعد اطلس عنه شوية وحچى بالموبايل مبين منفعل من حركاته سد التلفون ورجع يريد يدخل لمريم ما خليته وكتله هي نايمة..

بقينه بس احنه الاربعة (اني، اطلس، عمر وعلي) نتصفن بوجوه بعض كل شوية ارجع لمرايم اللكاهه بعدهه نايمة بس ونتهه تعلى وتزيد تگطع الگلب..

اجه الدكتور يفحصهه من كعدت وكال شوية ويدخلوهه عمليات، فعلاً ما طولو نص ساعة واخذوهه لصالة العمليات يخدروهه..

بقيت واكفة بالباب الوب لا حافظة رقم امي واتصل عليهه ولا موبايل مريم يفتح عندي ماعرف الرمز والغباء اخذني ما كلتلهه تفتحه الي من الخبصة..

واكفة واهمس يارب دخيلك باد حيلي رجليه متشيلني حطيت راسي بين ايديه واردد...

"يا كاشف الكرب عن وجه اخيك الحسين اكشف كربي بحق اخيك الحسين"

اتذكر مريم هواي ترددهه من تكون بشدة وبسرعة تنحل عدهه، اردد وابجي واتوسل برب العالمين وابا الفضل العباس يارب هاي البنية متعوبة ما شافت يوم حلو لا من حياتهه ويانه ولا هسة وره ماتزوجت..

-دعاء

رفعت راسي اشوف علي بوجهي گنبص گدامي وانطاني بطل مي فتحه وقدمه ناحيتي وحچى خجلان..

-اشربي ماي واهدي مريم قوية

هزيت راسي اي واخذت المي من ايده شربت وبقيت كاعدة، كعد بصفي ساكت واني ادعي بهمسة..

اطلس وعمر واكفين ماتحركو من مكانهم.. مشى الوقت هواي ماعرف شكد صارلهه بالعمليات ليش هالكد طولو يارب سترك..

-دعاء: طولو هواي مو؟؟

-علي: اي بعد عملية

-دعاء: خاف ماتت

-علي: لا اسم الله شنو هالفال

-اخاف ماتت والله ليش ميطلعون لعد ليش هيج تأخرو

-الاطلس: دعاء عليج الحسين كافي لا تفاولين عليهه شبيجج

-عمر: شبيك تصيح بالبنية خايفة على اختهه حقهه

-دعاء: صار شكد؟؟ ساعة بيش؟؟

-عمر: دخلوهه بالسبعة المغرب وهسة بالتسعة ونص

-دعاء: اريد اخابر امي محتاجة اميي

ابجي وضامة وجهي افرفح روحي رايحة الف فكرة وفكرة اجت براسي كمت اتخيل شغلات بشعة وازيد بالبجي والرجيف..

-علي: شبيچ دعاء على كيفج ويه روحج

-عمر: صلي على محمد يمعودة صدك جذب

-علي: لو صار بيهه شي يطلعون ينطونه خبر لا تخافين

-الاطلس: ادعي دعاء ادعيلهه احنه هم ندعي بس شنكول كولي علمينه؟؟

مسحت عيوني اتذكر دعوات شكول ماعرف هاي الشغلات اختصاص مريم كلشي تعرف..

-دعاء: اجه على بالي حديث الكساء

-علي: شنو هذا

-عمر: دعاء يعني؟

-دعاء: اي اي يشبه الدعاء بس اقراه بـ نية شفاء مرايم

-الاطلس: زين اي خلي نقراه يله

هزيت راسي وكلتلهم يطلعو على النت بحثه وبسرعة طلعه كلنه صرنه نقراه واني ارجف بعدنه هستونه كملناه وطلع الدكتور شهكت وكمت بسرعة اشوفه..

-دعاء: بشر دكتور؟؟

ابتسم وبشرنه العملية نجحت بالناظور وما اضطرو يفتحون بطنهه، صرت اضحك وابجي واشكر الله علي تقدم عليه وكال بضحكة..

-هذا حديث الكساء مالتج

ضحكت وهزيت براسي اي، وگفنه ننتظر يطلعوهه وطولو كلش هواي جزعنه لحدما جابوهه يردون ينقلوهه لغرفتهه...

**

-رقية بهمس: اسيل معليج بحازم يخربط تره شبيچ ليش تبجين

-سارة: اسيله انتِ اختنه وصديقتنه مالج علاقة بالولد همه يچفصون

-اسيل: لا اني خدامتكم

-سارة: اسكتي ولج كافي

-اسيل: خدامتكم واطلس ميطيقني!!

-سارة: ليش؟ صاير بيناتكم شي؟؟

بقت تبجي تكسر الگلب وتمسح بدموعهه الطريق كله حمزة بس يذب حسرات عالية وساكت الى ان وصلنه للفندق..

اللتفت علينه حمزة يحجي ويايه كوة يأشر على المصعد ويكول بوجه محتقن..

-روحو جهزو اغراضكم لا تتأخرن

-سارة: حمزة

بقى منصي بدون لا يباوعلي كال..

-نعم

-سارة: نكدر نحجي؟

-حمزة: لا ماعندي وقت

ترخص وعافني وراح تخبلت شلون قهر هذا هم ماكدرت اقنعه وهم خسرت صديق واخ مثل حمزة!

رحنه لغرفتنه جهزنه الجنط وطلعنه، راح نرجع لمدينتنه الطريق هدوء قاتل يذبح الكل باله ويه مريم الي بقت ويه الولد.. حمزة كاعد كدامي ويه حازم واني بصفي رقية واسيل ورانه..

-رقية: سارونه شلون نخفف عن اسيل؟

-مادري

-رقية: كلش زعلانة صارلهه فترة ملاحظتهه وصدك اطلس قاسي وياهه صاير ماعرف شبي ما جان هيج

-سارة: حتى اني مستغربة

-رقية: تتوقعين اكو شي ثاني؟

-اي اتوقع بس ما راح نعرف الايام تبين النه

هزت راسهه ساكتة لزمت ايدي وحضنت زندي حطت راسهه على كتفي وهمست بخفوت..

-رقية: سولفيلي شبي حمزة وياچ

الغصة اعتلت بلعومي من ذكرتني بالصار كرهت الدنيا بعد نظراته المصدومة وهو يباوعلي ممصدك هذا الكلام يطلع مني.. هاي الصلافة والجرأة تصرفي الادبسزز المقرف!!

-رقية: سوسو حاجيني

-سارة: تعبانة رقية اني لوصت هواي وياه

-سولفيلي

نتهامس بصوت ناصي ماريده يسمع، مديت راسي اشوفه ساكت ووجهه مستقيم ما اندار مثل عادته علينه واتطمن.. ذبيت نفس وبديت احجي لرقية شصار من اجانة بالكوخ بالليل..

اساس جية حمزة النه بالليل يتطمن علينه البنات من الباب بس من شاف وضعي مخربط قلق عليه سألني كم مرة شبيه وما اجاوبه شفته من غمز لرقية يسألهه ورقية تهز اكتافهه بطريقة ماعرف..

-حمزة: راح ابقى وياكم شوي نسولف مشتاقلچن بنات نعش

-رقية: اححح اي تعال تعال اقرالنه قصص

-حمزة: ماكو قصص جيبولي شي اكله جوعان

-رقية: هاي شكو خو روح اكل بييتكم شكو جاي لبيتنه

-حمزة: امشي جيبلي شي ولج جلفة

-سارة: اني راح اجيبلك

-حمزة: ايي هنا الادب هنا الاخلاق هنا الكرم

-رقية: بعد بسمر بسمر بيه واشعل گلبي

-حمزة: ولي عن وجهي لعبانة روحي منج حمضتي على گلبي السفرة كلهه

-رقية: عاااااا

هجمت عليه تريد تتعارك وياه اضحك واباوعلهم من يوم يومه يستفز رقية يكول احب من تعصب چنهه صرصور ينطط..

جبتله حلويات ماعدنه شي غيرهن حطيتهن كدامه سأل عن اسيل ورقية كلتله نايمة ماعرف ليش جذبت عليه بس اني ماعقلت..

-رقية: افف ضجت منك حمزاوي جاي تاكل اكلنه وتروح اروح للغرفة احسن

-حمزة: وضوجتهم خلصيني منج روحي

ضحكو ثنينهم وهي راحت للغرفة بقى كاعد بالقنفة المقابيلي وياكل چبس عين على الچبس وعين عليه..

-حمزة: اي؟

-سارة: شنو

-شبي الكناري اليوم

-مابيه شي

-لا تجذبين

-مابيه صدكني

سكت كمل اكل وكام يغسل ذب الجيس على الطاولة وراح كمت شلته اذبه بالزبالة ورجعت لمكاني..

-سراوي شنو هذا مزروف البوري مالتكم؟

-مال السنك بالمطبخ؟ اي مزروف

-لو حاچين

-يله متسوه باجر نرجع

مد ايده وتثاوب تعبان ضحكت وكتله يروح بس ماقبل كال شوية ونخلص منه..

-هههههه مو هيج شبيك انتَ

-حمزة: ادري بيجن تردن تصولن وتجولن وحدچن هنا

-لااااا ابد

-اي اي ابد

-حمزززة

ابتسم وكعد حط رجل على رجل طلع موبايله يتصفح بي واني الوب اباوعله وداخلي يرجف من الخوف والتوتر شلون راح ابدي وياه وشلون اقنعه..

-حمزة: ومن اكول بيج شي تكولين لا

حچاهه عينه على جهازه فزيت من صفنتي بسرعة وعدلت شعري، ذب موبايله وگال وهو يفرك عيونه..

-اسمعج

-مابيه شي

-احد مضوجچ؟ معترضلچ بشي؟ صاير شي سارة سولفيلي

هزيت راسي "لا" واطرافي تهتز اتمنى احجيلك واتمنى افضفض يمك مثل قبل بس فاهد ميعوفني راح يرجع يأذيكم ويبچينه دم عليكم..

-حمزة: ماشي خير ان شاء الله

-سارة: صليت؟

ضحك وباوع لساعته عقچ وجهه ورفع حاجب..

-يا صلاة بالوحدة ونص بالليل

-هاا اي صح

وخرت شعري لوره اذني وكمت اسحب برجليه كعدت بصفه شوية قريب باوعلي ساكت..

-حمزاوي

-نعم

-حمزة انتَ ليش متتزوج

-اتزوج؟

-اي يعني مو طلكت خوما تبقى هيج تزوج وكمل حياتك

-سارة بعدني ما كايل بسم الله ما صارلي شهرين مطلك يا زواج

-يعني مفكر بالزواج انتَ؟

-لا

-ابد ابد؟؟ حتى وره سنين متتزوج؟

-لا ماريد

-اي ليششش انتَ مو تحب الجهال مو تتمنى تصير ابو

-اي بس الله ما قاسملي الذرية

-لا قاسملك لان الاطباء كالو كلشي مابيك

-اي

-يعني تتزوج؟

-سارة هذا موضوع حساس انحرج احجي بي وياچ

-ليش مو اني صديقتك

-اي بس هذا الشي شخصي

-اسفة لحيت عليك

-لا عادي انتِ هم قلقانة عليه

-اي والله اتمنى تتزوج متستاهل تبقى هيج حزين ومكسور

ضحك ومسح وجهه ولحيته باوعلي وكال..

-وين تردين توصلين كناري؟

-نخطبلك

-هااا يعني ببالج وحدة

-هاااا

-اييي؟

-حمزة شوف شوف

جريت شعري وره اذني من الجهتين وزحفت يمه اكثر صرت كلش قريبة انتبهتله ارتبك وراد يبتعد عني بس قاطعته من كلت..

-حمزة باوعلي اني شنو اكول تزوج وكمل حياتك زواجك الاول جان تجربة فاشلة يمكن بنظرك اكيد راح تلكه وحدة تحبك وتبقى وياك

ذب نفس بصوت عالي توترت وايدي كامت ترجف مديتهه ببطئ حطيتهه على كتفه باوعلي عاكد حاجبه..

-سارة: هواي بنات يتمنوك

-شبيچ سارة؟

-احبك

فك عيونه على وسعهن وحلگه وياهن وجهه صار جمر ماعرف منين اجتني الجرأة وتقربت عليه اكثر صرنه وجه بوجه..

-تزوجني حمزة

بقى على وضعه ما رمشت عينه، شكد اشمأزيت من نفسي ومن تصرفي تقربت اكثر اريد ابوسه بخده وطفر من يمي بعيد ونتر..

-شبيججج

-سارة: شنو

-شبيجج تخبلتي انتِ!!

ينتر بهمس يخاف تسمعه رقية، عيوني وحدهه كامت تذب دموع غطيت وجهي وكعدت ابجي..

-لا لا انتِ مو سارة الاعرفهه!

-اسفة

-ولج ليشش هيج تسوين بروحج شنو تحبيني شنو ترديني اتزوجچ

-اسفة

-سولفيليي حاجينيي

تقرب يمي كعد على ركباته ويباوعلي ماكدرت احط عيني بعينه من الخوف تخيلته يكتلني لو يفضحني..

-سارة: اني ماعرف شبيه

-اني اكلج شبيچ استخفيتيي!!

-لا لا

-چا شتفسرين تصرفاتج؟؟

-يعني متتزوجني

-ياااا علييي ادركنيي سارة تخبلتي انتِ ولج اني رجل اختج!!

-بس انفصلتو

-واذا؟؟

-يعني عادي نتزوج

-انتِ شبيچ اوكفي اوكفي شو باعيلي زين خليني اشوف عيونج

باوعتله وحتى فص عيني احسه يرجف من الخجل والندم اكل بروحي كله من غدير دمرتني ودمرت ماضيي وحاضري ومستقبلي..

-منو ملقنچ هذا الكلام؟

-ما ملقنيني

-هذا مو اسلوبج ولا شخصيتج شنو احبك شوكت حبيتيني؟ من جنت متزوج اختج؟؟

-لا وراهه

-سبحان الله بشهر ونص حبيتيني وحليت بعيونج موو؟؟

-اي

ضرب القنفة بأيده بقوة طلع منهه تراب كام من مكانه يلوب يروح ويجي ويدردم عليه، شيحجي حقه شيكول حقه اني ادبسز وماستحي..

-حمزة: لا لا اكو ان اكو سالفة اني مادري بيهه احجي شكو شتردين سارة احجي

-ماكو شي

-شتردين من الزواج؟؟ انتِ مو ضده؟؟ مو ما ترضين تتزوجين طول عمرج؟؟

-اي بس انتَ

-شنو بس انتَ يا بنيةة اني طليق اختجج شلون الج نفس بيه؟!

سكتت وهو يرزل ويهزأ بيه لاول مرة ارجع واكول استاهل كلشي يصير بيه بس لازم اقنعه يتزوجني والله غدير مترحمني محد يكدرلهه محدد!! اعرف اهلي يوكفون ضدي علمودهه يصدگهه الكل ويچذبوني اني اعرف..

-سارة: حمزة

-اذا عندج حجاية بيهه حظ! حجاية تدافعين بيهه عن نفسج احجيهه ماعندج صوتج ماريد اسمعه فهمتي لو لا!!

سكتت منزلة راسي عافني ويريد يطلع ينافخ ميت حرگة وقهر، لحگته للباب اتوسل بي يبقى ماقبل رجع كرر عليه ويضغط احجيله منو جابرني احجي..

-محد شبيك بس گلبي هواك واريدك

-كاافي ولج لا تعيدين هذا الحجي كااافي عيييب

-ادري عيب بس شسوي

-سارة بس كليلي منو جابرج على هذا الشي؟؟ احد محاچيچ؟؟ انتِ عندج عداوة ويه غدير؟؟ تردين تحركين گلبهه من خلالي؟ تخليني اتزوجچ حتى تاخذين حقج منهه او شي؟؟ ولج احجيي لا تسكتينن

بقيت ملتزمة الصمت ومنصية راسي غدير عرفت تلعبهه صح حمزة لا يمكن يتخيل غدير جابرتني اتزوجه يعرفهه مهووسة ومخبلة بي وحتى من طلگهه كال اعرفهه متكدر تبقى بدوني وراح تطلب ترجع..

طلع من الكوخ وعافني بضيمي بجيت فرفحت روحي تقززت من نفسي شلون صلفة شلون جسرة اني شلون غبية وبلا شخصية!

-رقية: سارة تحجين صدك انتِ

-اي والله

-يعني ردتي تتقربين منه؟؟ يمة يا كلبي ماكدر اصدك

-ولا اني اصدك بس شسوي انتِ تعرفين غدير

-رقية: اعرفهه وراح تدمرنه

-سارة: بس نرجع احجي لامي كلشي

-رقية: هه عبالك راح تصدگنه اهلي يچذبون الكل ويصدكون غدير

-سارة: لعد شلون نكول لحمزة؟

-مادري اخاف منهه سارة متعوفنه الا تطلع ارواحنه

سكتنه ثنينه واني اعصر براسي من الافكار توجعت كلش وتعبت بنفس الوقت تمنيت اللزم حمزة واسولفله كلشي احجيله من اجاني فاهد احجيله عن الوجع البيه بس اعرف النتائج راح تكون مؤذية وتخليني اعيش بالندم طول عمري....

**

"دعاء"
طلعولنه مرايم تهذي وتون بوستهه وحضنتهه وهمه يجرون بيهه للغرفة اسمعهه تسولف ويه روحهه تسائلت عن وضعهه گالو بعده البنج ما فاك منهه ومتحس بينه..

اخيراً وصلنه للغرفة دخلت والدكتور اجه يتطمن عليهه رادو يدخلون الولد والدكتور سمحلهم لان عرف همه منو بس نبهنه البنج ما فك منهه مية بالمية، استحيت اگلهم اطلعو بس عرفتهم قلقانين عليهه ويردون يتأكدون بنفسهم هي بخير..

-الاطلس: الحمد لله على السلامة آنستي

تمتمت وحدهه وراهه عاطت..

-انچبببب

فتح عيونه مصدوم باوعتله منحرجة ونزلت احجي بأذنهه..

-دعاء: مرايم اششش شبيچ تخبلتي شنو تغلطين عليه

-مريم: وخرييييييي

-دعاء: شبيچ ولج هاي شنو تخبلت

الممرضة واكفة تشدلهه المغذي وتضحك گالت راح تطلع سوالفهه كلهه ومتكدرون تسيطرون على الوضع البنج ميفك منهه بسهولة عوفوهه وطلعو من الغرفة يكون افضل..

-دعاء: هاي كل المرضى هيج؟

-الممرضة: ايه بكن يفك منهم البنج بعد العملية بالعناية بنحطو هونيك لوئت كافي لكن مريم شكلو بيحبه البنج وحابب يصاحبه ههههه

تحجي الممرضة ومريم تعيط وساعة تبجي ساعة تغلط علينه وساعة تكول اريد امي..

-دعاء: وشلون نفكه منهه؟؟

-الممرضة: بيروح لحالو اذا بتحبو اطلعو لبره مشان ما تكشف شي مزعج وتسبب مشاكل

-مريم: مقرفينن الله ياخذكم كلككمم تلعبون النفس وانتَ المحيط الاطلسي الچلببب ابو ريححححاااا

-الاطلس: شنوو

-مريم: ما شايففف عطرر يسبح بي سباااحة حتى عود البنات يزحفن عليييككك انتَ ووجهك الازرررك

-دعاء: ما واعية على نفسهه والله دتخربط حچيهه مو صحيح صدگوني

فعلاً كلامهه چان خبط تخبط كلشي ومتطلعون منهه جملة مفيدة، ما جنت ادري بالبنج هيج يسوي فضايح، ضحك علي وكال بغمزة لاطلس..

-علي: ها ابو ريحة

-مريم: انجببببب

-دعاء: حبابين اطلعو فدوة

-عمر: اي شباب خلوهه ترتاح

-مريم: عممر

كالت اسمه وكامت تبجي اطلس تخبل علينه كمت ازلغ بخدودي واكرص بيهه بس اريدهه تصحى..

-مريم: الا ازوجك اختي عمممر لا تبجي اخخخ گلبي يوجعني عليك عمت عينيي

-عمر: لا تبجين مرايم

-مريم: ابجي ابجي

تبجي واني بقيت اللطم وحدي واكمز وعلي فوراً كال..

-علي: شنو شكو شنو بيناتكم ليش تبجي عليك؟؟

-دعاء: راح اصيح الدكتور ليش مجاي تسكت

-مريم: انچبيي وانتَ الثاني شعليك ولك ابو البناات حاط عينك على اختييي ولج دعيووة اطيح حظج اذا تزوجتي هذا السبايسيي عليي

-دعاء: صخااام ولطام بوجهي ان شاء الله ولججج سكتييي

-مريم: ادري بيج تحبي ادبسززز كلكم ادبسزززية اني اعلمكم وينه طووطي وينننه

-عمر: طوطي يمعود سولف وياهه

اطلس واكف مصدوم كلمة ما طلعت منه، تقرب يمهه وحچى بهدوء..

-ها مريم

-شبيك ويااي انتَ هااا شبيكك ليش متحبنيي شبيه شحلاتنيي

-الاطلس: امشو نطلع امشو

-دعاء: اي فدوة اطلعو

-مريم: نعااال مو احاچيكك الله ياااخذك كسرت گلبي تعبتنيي اووف اشهر واني ابجي عليك يا حقيرر مططي زماال

-الاطلس: وليش تبجين عليه شمسويلج اني

سكتت تعارك روحهه وتأشر بأيدهه بثگل كلت بداخلي هذا هو فضحت نفسهه وراح تحجي الاول والتالي تهذري بكلام خلصتهه تحجي بالاطلس بس الحمد لله ممفهوم شنو تكول..

-علي: ليش تحجي بيك هواي؟

ضحك اطلس مكيف وساكت وعمر يباوعلهم ويضحك كلت بس اطلع اروح اتعارك ويه الممرضة والدكتور شلون جابوهه وما فاك منهه المخدر راح تخزينه هاي..

-علي: احم من رخصتكم اطلع اني

سكتت مريم ارتاحيت الحمد لله خلصنه، طلعو وياه وبعدهم بالباب ومريم عاطت..

-ازوج عمر بسسمملة راح يحبهه تخبل تخبل راح تعجبك لتبجيي

تبجي وتحجي ضحك عمر وطلع ولحگو الولد كعدت وحدي وياهه ادك على رجليه واسمع لسوالفهه ساعة تتغزل بأطلس ساعة تكول عنه چلب ساعة تكول هو نذل وخسيس وساعة تكول هو يحبني والا اندمه..

-دعاء: مرايم تحبين اطلس؟

-عوووووووع

-دعاء: بس هو صاك

-الله اريد شاورما

-ههههه اجيبلج من تصحين

-اجتني الدودة

-شنو؟؟

-تاكلني الدودة تاكلني

-يا دودة

-الشهرية ااخخخ الله ياخذهه النعاله

ضحكت ضحك بحياتي ما ضاحكة هيج ومجرد ماتذكرت كلامهه من فضحتني اريد اطم روحي بقيت وياهه لحدما نامت وخنست بعد، تركتهه وطلعت ادور على الدكتور مالتهه ماتحملت نترت بوجهه ليش طلعوهه قبل لا يفك منهه البنج اعتذر مني وكال وكال حطوهه هواي وانتظروهه تصحى بس بقى بيهه شوية وظل يرطن براسي نرفزني اكثر..

تركته ورحت للولد شحالني اللوم بروحي وغايصه بهدومي مستحية كلش رجعت لمريم بالغرفة وبقيت كاعدة يمهه غفيت على الكرسي وفزيت على صوت وناتهه..

كمت اشوفهه واسمعهه تكول "حمام" كومتهه على كيفي وتحسست ملابسهه مبلله سودة عليه متحس على روحهه، ماسيطرت اشيلهه تريد توكع رجليهه متحملهه واني ماعندي طاقة اشيلهه قررت اصيحله وشنو يعني هو زوجهه..

رحت بره ادور عليه بعيوني محد منهم موجود، انتبهت عليه واكف بعيد چان يحجي بالتلفون من شافني اشرتله اجه ناحيتي..

-ها دعاء محتاجين شي؟

-اي اريد اخذهه للحمام بس مجاي اكدر اشيلهه

حچيتهه فشلانة هز راسه ودخل للغرفة شافهه نايمة راح عليهه واني ميتة بدمي اعرف مريم راح تلومني لان صحتله خصوصاً وهي بهذا الوضع.. همس بصوت خافت حست بين الوعي واللا وعي كالت..

-اطلس

-الاطلس: عيوني

-حمام.. دعاء.. اريد ابول

جرهه اطلس لصدره وشالهه على كيف باوعلي عاكد حاجبه غطيت بهدومي وكتله..

-متحس على روحهه وتدرر على ملابسهه من وره المغذي

هز راسه ساكت واخذهه للحمام نزلهه ببوابة الحمام وگلي اساعدهه وماعوفهه، هزيت راسي موافقة..

بعدما كملت صحتله ورجع شالهه بس هالمرة شايلهه ويباوع لوجهها وهي الونة مالتهه تكسر الگلب نزلهه على الفراش بهدوء وهمسلي اغطيهه عدل..

-دعاء: اعتذر ملابسك مو نظيفة صارت

-لا مو مشكلة

طلع واني هم طلعت وراه متكسرة وتعبانة، دك موبايله وراح بعيد عني يحجي بي كعدت على الكراسي البرة واشوف الممرضين يفترون يمكن ذولة الشفت الليلي الوقت فجر..

-ها شلونچ

وگف گلبي من كعد بجانبي على الكرسي بيده كوب قهوة، ما جاوبته ولا باوعتله لحدما مدلي الكوب وكال..

-علي: جبته الج

-ماريد شكراً

همستهه ووجهي مستقيم مالي عين اباوع لوجهه مريم فضحتني

-علي: شلونهه ام لسان ههههه

-نايمة

-علي: هو البنج يخليهه تتعب وتهذي بكلام مو حقيقي

-دعاء: اي اي صحيح مو حقيقي ابد

-اي

سكت ورجع قدملي الكوب باوعتله حچى ببأتسامة..

-اخذي دعاء

-تسلم

اخذته من ايده وشربت منه احس بي عيونه عليه اشتعلت نار راح اموت من الخجل شحجي عليج مريم شلون موقف حطيتيني بي..

-علي: انتِ دارسة دعاء؟

-اي

-شنو اختصاصج؟

-دارسة معهد فنون

-ها حلو تشتغلين؟

-لا

-شعجب

-ابوية ميقبل اني اشتغل

-بس مريم تشتغل

-اي مريم تختلف

هز راسه ساكت فرك لحيته وتنفس بصوت عالي تشنجت وتعبت نفسيتي..

-دعاء: تشبه اخوك كلش

-اي توأم

-شبه فضيع سبحان الله

ابتسم وهز براسه كمت على حيلي متحججة..

-اروح اصلي الفجر من رخصتك

ابتسم وهز براسه شردت بالغرفة اعيط بالهمسة واكمز بمكاني خرب حظي المصفط خررب..

**

"مريم"
راسي ثكيل تعبانة كلش ماكدر افتح عيوني جفوني نايمة ملزكة، قضيت الليل افزفز واون احس بألم واحس بدعاء تحجي ويايه بس ماكدر اجاوبهه..

اتذكر اطلس دخل عليه الغرفة وحسيته باسني براسي بس ما متأكدة صدك صار هالشي لو تحلمت..

-مريم..

صوته بأذني يهمس اشم ريحة عطره بس بالي مشوش هو هنا لو اتخيل، حركت عيوني وبعدني مغمضة حسيت بأنفاسه على خدودي يتقرب اييي هذا هنا شلت ايدي بثكل وانطيته راشدي قوي..

-اخخ نعله علاا

-ادبسزز طايح الحظ

حجيتهه بتعب حاقدة عليه من لا سبب بس اكرهه خيولي ابو ريحة، اسمعه يضحك ويحجي..

-هاي بعدج تحت تأثير البنج

-وخر

اخيراً فتحت عيوني اشوفه لازك بخلقتي ومبتسم عكمشت وجهي وهو عكد حاجبه..

-لو بس افتهم شبيچ وياي ارتاح

-وخر عني

-ليش زعلانة عليه شسويت

-وخررر

-صوتج ولج

-لتكول ولج!!

-ماكول يله لسانهه ثكيل وكوة تطلع الحجاية ومستلمتني

درت وجهي عنه مخنوكة وجع بگلبي منه منين مادري بس زعلانة عليه وضايجة كلش..

-الاطلس: شسويت اني شو عاينيلي

-ما سويت

-چا ليش زعلانة

-مادري

-يله تعالي انهضج حتى تاكلين

-وين دعيوة

-راحت تتمشى خطية تعبت

-وانتَ شعندك بغرفتي؟!

-اجيت اتطمن عليج

-شكرراً

-تنتر نتر ما يعجبهه ام لسان

مدلي ايده يساعدني، حاولت انهض روحي وحدي ماكدرت تأفأفت وانطيته ايدي كعدت على حيلي وقرب الصينية عليه يريد يوكلني..

-اريد دعاء

-هسة تجي

-هي توكلني

-ماشي

كام من مكانه يريد يطلع وتذكرت شي فوراً صحت..

-وينهه!

-الاطلس: هسة اصيحلهه

-لا لا وينهه الدفعتني؟؟

-منو دفعتج؟

-استاذ اني اندفعت ووكعت على وجهي..

لزمت خشمي بألم اتذكر من طگ بعده يوجعني، اردفت..

-طگ خشمي وغبت عن الوعي

-متأكدة من هالشي مريم؟

-اي متأكدة البنية لبنانية مادري سورية اول مرة اشوفهه

سكت يسمعلي وعدتله السالفة من البداية بالحرف شنو سويت حچيتله الى ان وصلت لرسالته كال..

-دزيتلج حتى تجيني احاچيچ

-شتحاچيني؟

-ردت اطلب منج تكعدين وراي بالطريق لو بصفي

-لا بله!

-مو وكتهه مريم هسة كملي شصار بعدين؟؟

-هو اجت فتحتلهه الباب وماتحملت ابقى واكفة تعبت ورحت اكعد ودفعتني من ظهري بقوة توجعت كلش وغبت عن الوعي

هز براسه ساكت ويتنفس سريع، ملامحه غاضبة والحاجب معكود الف سؤال وسؤال براسي وفجأة خطر ببالي مالك..

-مريم: استاذ من اجاني مالك كال يريدني اجيبله شفرة

-الاطلس: شفرة شنو؟

-لا لا اقصد شريحة كال اريد منج شريحة

-الاطلس: كال شي بعد؟!

-اي كال جيبيلي الشريحة وكلشي ما رايد منج

صفن ضايع تفتر عيونه بالفضاء ويهمس "شريحة" شكله ميعرف شنو الموضوع نفسي..

-مريم: يا شريحة استاذ؟

-الاطلس: مادري اني هم تهت

-اسأل استاذ حمزة يمكن يعرف

هز براسه وراد يطلع صحتله يجيني اريده يتصل بي كدامي..

-مريم: انتَ وكلني عفية كلش جعت وين تلگه دعاء

هز راسه موافق واجه يوكلني باله سارح وبس يتصفن، عضيت الخاشوكة حيل ماقبلت ياخذهه من حلكي ياله باوع لوجهي مستغرب..

-اذيتج؟

-لا بس شبيك سرحت

-لا هيج

-شبيك استاذ

-مادري تايه

-اتصل بأستاذ حمزة اسأله

وافقني من طلع موبايله گام يريد يتصل بي برة وگتله بعدني ما شبعت، حط الموبايل على اذنه واستمر يوكلني الى ان جاوبه حمزة..

-ها حمزاوي.. اي الحمد لله كلشي بخير.. مابيهه شي صاحية.. لا لا الحمد لله.. خواتي يمك؟.. تعبو من الطريق؟.. زين عاشت ايدك...

بقى حمزة يحجي وياه واطلس ساكت يستمعله الى ان اخيراً سأله..

-الاطلس: حمزة اسألك على سالفة.... لا اسمعني شركة شمسون عدهم شريحة يمنه يردوهه؟... مالك لو ابوه؟.. امم... اي لطيف... ماشي تمام هذا هو... هيج هيج مع السلامة

سد الاتصال وفوراً كال وهو يباوعلي..

-حتى حمزة ميعرف استغرب نفسي

-لعد شنو هاي الشريحة؟

-مادري بس لازم اعرف شنو

-استاذ لتورط روحك امانة ذولة يخوفون

-يخسون ولد زنا الـ****...

فتحت عيوني مصدومة من كلامه فرك وجهه وگال وهو يذب نفس..

-يستاهلون

-بس ميصير تكول عنهم ولد زنا

-لا يصير.. لان همه اصلاً ولد زنا

-صدك!

-اي اجو بالحرام ثنينهم كلمن من ام

-عززززه

-ابوهم اكبر خسيس وعينه على النسوان يغريهن فلوس ومجوهرات ويخلصهه عربدة وياهن

-يمة ياربي سترك عزه بعيني

-لا تتدنين الهم مريم ابد بغلاة امج لا تخليني خايف عليج وسمعي كلامي

-لا مستحيل شعندي وياهم

-مالك بالذات لا تنطي مجال

-انطاني رقم موبايله يريدني اتصل بي ويفهمني على الشريحة

-شنو؟؟؟ كل هذا صار وياكم ومن اسألج تكليلي نسيت!

-والله بالي مشوش جان وخفت

-لا تخافين ماطولني بظهرج لا تخافين مرمر

-اليسمعك يكول جونسينا

-لا اني الاطلس

حچاهه وابتسم بارزة سنونه، ضحكت على ابتسامته الواثقة ومسحت حلكي شبعانة..

-استاذ شنو معناة اسمك وليش سموك الاطلس؟

-اسمي اغريقي بالاصل بس بالعربي معناه الذيب الاسود

-صدكك؟؟

-اممم

-الله سبايسي

-ههههههههههههههههههه

ضحك بصوت عالي وكام يكعد على الكرسي الي بجانب السرير وطكطك اصابعه..

-زين ليش سموك هيج معقولة علمود اسم شركتكم؟

-اممم

-خطية

-ليش خطية؟

-يعني معزتك نفس معزة الشركة هههههههه

ضحك وضرب على رجله بقوة وهمس "ااخخ مريم ااخخ منج"..

-لا والله جديات جاوب

-جدي سماني الاطلس لان اجيت للدنيا جنت كلش اسمر مايل للسواد وخشن اعصابي قوية مو مال طفل هستوه مولود اضافة اهلي يشوفون يوم ولادتي خير لان جدي ربح اكبر صفقة النه بالشركة على مر السنوات وسماني الاطلس بأعتقاده اني محظوظ ومن هالسوالف..

-يعني اكو قصة وره اسمك حلوو

-اي واني اختصرتهه الج

-زين كلت جنت اسود من جنت صغير شلون انكلبت برونزي؟

ضحك وكال..

-الله رادني اصير برونزي

-بس حتى الاسود حلو

-كلشي من الله حلو

-صحيح ونعم بالله

-وانتِ؟

-شنو اني

-ليش سموج مريم

-هيج ابوية رادني مريم

-حلو

سكتنه ثنينه نتصفن لميت ايديه لحضني متناسية الالم ماريد افكر بي، قاطع جهادي النفسي واني انسى الوجع سؤاله الغريب..

-مريم انتِ ما تحبين عطري؟

-شنو

-ريحة عطري ما تحبيهه؟ تزعجچ؟

-لا ليش تسأل

-البارحة هواي حچيتي بعطري عبالك مزعوجة منه

وكف عقلي افكر شوكت حجيت بعطره؟ بس طريقته بالكلام عبالك صدك حاچيه..

-ما تحبي اغيره؟

-لا لا بالعكس يموووت

ابتسم واني عضيت لساني اليچفص امدانيي تعالي يا دعاء تعالي شوفي اختچ الچفصاية تعالي لزميهه وطيحي حظهه..

-استاذ اني ماقصد يموت يموت بس حلوة ريحته لطيفة

-لطيف

-ليش لطيف ليشش هسة اني شكلت

-ماكلت شي مريم

-كلت لطيف

-اذاً؟

-يعني ميعجبك كلامي

-لا غلطانة

سكتت منصية راسي اللعب بصوندة المغذي قهقه خفيف وكال بتلاعب..

-هالمرة لطيف بطريقة احبهه

مجاوبته بقيت منزلة عيوني وكاعدة على نار شوكت ترجع دعيوة اكيد يم علي تسولف اني اعلمج رجعيلي الا اطيح حظج واربيج..

-استاذ خواتك وين؟

-ويه حمزة رجعو

-ليش مارجعت وياهن خطية اكيد تاهن بدونك

ضحك بصوت وعدل گعدته بدون لا يجاوب..

-شنو كلت شي يضحك؟

-لا، بس هنه بخير ويه حمزة

-هاا

-خواتي اقرب من حمزة عليه

-ليش؟

-بعد حكمت الدنيا هيج

-تثق بي؟

-كلش اثق بحمزة اكثر من روحي

-هو كلش حباب واشوفه صاين البنات ويخاف عليهن

-من هنه صغار هو وياهن على الدعسة جان يوكل ويشرب وحتى ينوم حنون وگلبه طيب

-شكد حباب

-رقية وسارة يحبو ومتعلقات بي وغدير بعد تزوجته

-اي اشوف كلشي وصاحن حمزاوي ههههه

-الاطلس: اممم، ربينه ببيوت متفرقة

-مريم: وهذا السبب تكول خواتك اقرب لحمزة منك

-اي، اشوفهن بالشهر مرتين ثلاثة واوقات تجي فترات ابقى عشرة ايام يمهم وارجع لبيتي

-ليش عزلت بيت وحدك؟

ابتسم ساكت بس ابتسامته بيهه هواي حچي، تهرب من الجواب وگام..

-اشوف اختج وين شو طولت

طلع يدورهه وطول ياله رجع اجت دعاء شافتني كاعدة بوستني وحضنتني بس صوتهه يرجف خايفة بعدتهه عني وسألتهه ملهوفة..

-شبيچ دعاء شصاير

-ما صاير شي خفت عليج ولج شسويتي بينه البارحة

كعدت بجانبي ولزمت ايدي بقوة فركت وجهها وانطتني موبايلي..

-امي خابرتج مرتين وما جاوبت

-ليش مجاوبتي شجاچ

-مادري ما لحكت على المكالمة مرة جنت بالحمام ومرة بره وماعرف رمزج شلون ارجع اتصل

-يله زين ما جاوبتي ماريد اكوللهه سويت عملية

-ولج لااا احجي شلون

-لا يظل بالهه وتكول لنانا واكيد اطلس حجالهه موظفة عنده سوت عملية وبقى وياهه

-صح بس خاف كلشي يصير مرايم

-لا حبي اني زينة والله حتى اكدر امشي وحدي

هزت راسهه ساكتة اتصلت على امي دك مرتين وما جاوبت، رجعت كررت الاتصال وهم مجاوبت باوعت لدعاء قلقة.. اتصلت على نانا جاوبتني بسملة ترجف وتحجي..

-الوو

-مريم: بسملة شلونكم

-بسملة: مو زينين مريم مو زينين ابدد

-مريم: شصايرر؟؟؟

انسحب الموبايل من بسملة بقوة سمعت صوتهه تعيط وطبگو الخط بوجهي باوعت لدعاء سألتني شصاير مجاوبتهه رجعت اتصل يددك ومحد يشيله الى ان تحولت المكالمة لبريد صوتي يعني صاحب الرقم حضرني!!.....

يتبع ♠️💸....

• ━━━━━━❪♣❫━━━━━━ •

البنج وما اداراك ما البنج فاضح الاسرار وفاضح العالم 😂
والمشكلة من اكو واحد ميروح منه المخدر بسهولة (مثلي) ومثل مرايم 😆🤍
انتو هم عدكم فعاليات ويه البنج او احد تعرفو؟ 😁

طگولنه تصويت وكتبولي توقعاتكم.... 😉💛