رواية الاطلس "دمليج أسود" الفصل السادس عشر 16 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

اجيتك والسلف نايـم
على رويسات اصابيعي ♥️

مظفر النواب

• ━━━━━━❪♣❫━━━━━━ •

انطاني راشدي وكعت على وجهي بالكاع اريد اكوم وكعد على رجليه وقيد ايدي ونزل على وجهي يحجي ويلفح نار..

-كتلج بس هاي الليلة لا تعاندددين

-شتريد مني راح اموت بيدك كااافي

-ما تموتين ماخليج تموتين

يشم بيه حيل ويريد يتقرب من وجهي يبوسني واحاربه احرك بوجهي ماخلي يسيطر شال ايدي وركعهه بالكاع بقوة عطت شايغة روحي..

-لاااا تلعبين ووووياااي سااارة

-ماااا اللعب مااا اللعب اتركنييي حباب بداعة امك فاهد عوفني

-بس يوم ليلة وحدة بس ليلة والله ما اطلب بعد بس نسولف سوه بس سووالف شبيچ سارة

يحجي ويلهث تخبلت روحي راحت راح اتقيء معدتي گلبت واني اتخيل واتذكر..

-هاا شگلتي؟؟ بس هاي الليلة بس نسولف ويه بعض ما اسوي شي

-شتسوولف وليش الا اني ليشششش

-مادري مادري لا تحجيننن كافي

كام عني يفرك بوجهه ويفتر بالغرفة شال المزهرية الموجودة على الميز ورگعهه بالحايط فلشهه، عاط بصوت عالي يسب ويفشر على حمزة واطلس واني لازمة ايدي اللوب وواكفة خاتلة بزاوية الغرفة..

-خطبتج!!! ليش ماينطوونييي

-ماريدك

همستهه وكعدت بالكاع ركض عليه يبوس بيدي ويتوسل اقبل اروحله بس هاي الليلة نقضيهه سوه..

-تزوجي الي تردي بس تعاليلي هاي الليلة بس اليوم

-اني مو بنت لييييل اتركنييي

-لا لا بنت ليل شنو سارة لا تكسرين خاطري بس اليوم واعوفج بعد

-اسأل اهلي

حچيتهه بس اريده يعوفني، خزرني حيل وكام رجع يفتر ويلعب بالزنجيل الي بيده، يفرفره ومخنزر حطيت ايدي على حلگي مفرفحة..

-فاهد: ليشششش تبچييييين

زدت بالبچي ومغطية وجهي ارجف تهت ضعت وحدي احتجايت سند اسند روحي عليه لشوكت ابقى بهذا العذاب..

-فاهد: اندمج والله اندمكمممم كلكم!!!

-لا لا عوف اهلي عوفهممم

-اليوم اعوفج بس ما راح اعوفج العمر كله اربطچ بيه!! واذا حچيتي لبشر عن حديثنه والصار انهييييچ وانهيهم وانتِ تعرفيني منوو وشنوو

صاحهه بصوت عالي وشال قفازاته من الگاع، شد على رباطه وعدل جاكيته وطلع من الكوخ وطبك الباب وراه، انهاريت دكيت لطمت ملخت روحي تملخ وين انطي وجهي وين اضم روحي شيردون مني ذولة المخابيل المرضى النفسيين شيردون..

**

"مريم"
بكل صلافة اجه كعد بجانبنه ابتعدنه اني ودعاء ثنينه وهو ضحك من شافنه مزعوجات..

-مالك: ريلاكس ليش كل هذا التوتر

-مريم: يا توتر استاذ انتَ اجيت كعدت ويانه من كيفك

-مالك: آنسة مريم ممكن تهدأين جاي اللاحظج كلش مرتبكة

-مريم: ههههههه ماعرف منين تشوف انتَ بالضبط استاذ، المهم ان شاء الله خير كعدتك ويانه؟

-مالك: ما كلت للاطلس انتِ زوجته

سكتت مجاوبته، طگطگ اصابعه انتبهت لاسوار فضة يخرخش بيده..

-مالك: لا تخافين اني مو نذل اهدي وبلعي ريگچ

باوعتلي دعاء متنرفزة لزمت ايدهه اهدأهه وامثل البرود واني داخلي نار مشتعلة، وين يريد يوصل هذا وشرايد..

-مريم: بس اريد افتهم بشنو اكدر اخدمك؟

-مالك: ما محتاج منج خدمة حالياً بس ردت اسلم عليج

تأفأفت طالعة روحي هذا يريد يسولف واني لعبانة نفسي، عدلت حجابي واشوف دعاء خازرته وتبلع بريگهه من العصبية وزع نظراته بيناتنه وكال وهو يحط رجل على رجل..

-مالك: عجيب ما تسائلتي شلون عرفتچ زوجة الاطلس؟

هم مانطيته مجال ولا جاوبته، ضحك خفيف وكال وهو يعدل ساعته..

-لاحظت اكو كيميا بيناتكم من اول يوم اللتقيت بيج

باوعتله مضيگة عيوني تمنيت اگله بطل كلاواتك وگوم بس ماحچيتهه اساساً ما احتاجيت فهمني بسرعة وضحك..

-امزح امزح.. وصلولي حجي الاطلس معجب بيج وعيونه تركض وراج

-منو وصلك؟

-مالك: العصفورة، تصدكين صار عندي فضول قاتل منو هذي البلورة التضوي الي خطفت انفاسي اول ما شافتهه عيني بالحفل..

سكت ثواني واردف يتصنع الخيبة..

-تالي طلعت زوجة عدوي اللدود

-دعاء: خير؟؟

ضحك ورجع كال..

-وصلني الحفل كله الاطلس ما رفع عينه عنج وانتِ ما منتبهه، من طلعتي بره لقطتچ عيني تقدمت بخطوة ردت اتأكد بنفسي صدق الكلام وبعد ماكو داعي احجي بيانبيع الغيرة الي تفجرت من الاطلس.. وهنا گلت بينگوووو

سكتت افكر هذا حتى جواسيس حاط على اطلس ويتابعه على الدعسة، تذكرت بحفل الافتتاح من حضني وراد يمشي بيه واطلس تخبل وتعارك وياه، قلقت اكثر منه بس هم ما بينت..

-مالك: بحوشت شويه عليج واكتشفت الحقيقة بس تدرين عحبني ذكائج

-مريم: لطيف..

ابتسم تك خد وعيونه مثبتهن عليه، اباوعله شكله مريح ما يوحي ان هو مجرم او سفاح عكس فاهد سبحان الله يخوف شكله..

-مالك: عرفتي وين تشتغلين مريم احييچ على عقلچ

-شنو وين مشتغلة اني تره هي شركة عادية أي واحد بدالي يكدر يشتغل

-بس اختاريتي مكان حساس.. والحلو لاعبة بأسمج مزورته بس يا ترى شلون سويتي كل هاي الشغلات وحدج؟ لازم فد واحد ثگيل مساعدج بيهن..

سوه بأصابعه حركة عود واحد متروس فلوس، گلبت وجهي ودعاء نترت..

-دعاء: مريم امشي خلينه نرووح

-مالك: ليش مو جاي نسولف صحبان عادي

-مريم: ممكن تختصر وين تريد توصل استاذ؟

-مالك: للشريحة

-مريم: شنو؟؟

-مالك: جيبلي الشريحة وكلشي ما رايد منج بعد

-مريم: يا شريحة شدتحجي انتَ!

-مالك: شريحة مهمة كلش محد يكدر ياخذهه غيرج هذا رقمي تواصلي وياي افهمج كلشي

حط كارت بجانبي وقاطع نظراته الحارقة وجود شخص فوك روسنه، رفعت عيني شفته فاهد واكف متهندم وديلبس كفوفه القماش..

-مالك: نتلاگه غير وقت آنساتنه الحلوات، يله فاهد

عبرونه وراحو ذبيت نفس ودعاء انفجرت تدردم وتغلط عليهم وتسب بيهم، ماكدرت انطق كلمة هذا مبين ناويله على نية وما راح يعوفني بحالي..

-دعاء: احجي للاطلس كلشي فهمتي!!

-مريم: اشوف

-دعاء: مرايم اصحي على نفسج حبيبتي اني مو وياچ دائماً بس نرجع اني راح ابتعد وارجع ويه اهلي انتِ تبقين وحدج اريد أمن مريم حباابة

-مريم: لتخافين دعاء ميصير شي ان شاء الله وراح ابلغ اطلس اللتقيت بمالك

-دعاء: برأيج شبيهه الشريحة؟

-مريم: ماعرف دعاوي ذولة رعب تينا تكول معروفين بغسيل الاموال وتهريب بس ماكو دليل عليهم لسه

ذبت نفس وهزت راسهه مهمومة، برد الجو وگلنه نرجع للكوخ نكعد بعدنه بالباب وصادفنه سارة دتطلع من كوخهم..

-دعاء: حبي انتِ بخير؟

رفعت راسهه مرعوبة الدموع ماكله وجهها ولونهه مخطوف، مسحت عيونهه بسرعة وهزت راسهه هزات متتالية..

-سارة: ما جنت اعرف انتو باقين هنا

-مريم: ولا احنه ندري بيج هنا عبالنه الكل راح

لمت شعرهه المفتوح وابتسمت تهز راسهه "لا" بادلناهه الابتسامة ودعاء كالت..

-شنو رأيج تجين ويانه تكعدين تغيرين جو

ما كالت لا دخلت ويانه للكوخ وكعدنه على القنفات ودعاء جابتلنه حلويات اشترتهم من الطريق، تاكل وتسولف..

-دعاء: سارة اسمج مو؟

-سارة: اي وانتو مريم ودعاء صح؟

-مريم: اي.. سارة شبيچ ليش چنتي تبجين؟ مريضة حبيبتي؟

-سارة: ههههه لا لا مابيه شي بس اني ابجي هواي

-مريم: يااا تبجين هواي شنو يعني موهبة لو شنو الموضوع

رغم الحزن الواضح بوجهها ضحكت ضحكة عالية كلش ضحكنة اني ودعاء على ضحكتهه، غطت وجهها خجلانة وماحجت شي بعد..

-دعاء: ضحكتج تخبل خية شبيچ استحيتي

-سارة: ضحكة الرقاصة على گولة خواتي

-مريم: تعرفين شوكت يرجعون سارة؟

-سارة: لا والله هسة اني قلقت على اطلس ليش طلع وياهم منتهي مريض كلش والصخونة تدك بي

-مريم: ليش راح لعد طبعاً هواي يضغط على روحه اني منتبهه

-سارة: تعود

-دعاء: يعني اكو احد يضغط عليه لو هو من نفسه

خزرت دعاء حتى تسكت شنو هالفضول، انتبهت سارة ابتسمت وكالت بهدوء..

-اي بابا يريد كلشي مثالي ومعتمد على اطلس وحمزة اعتماد كلي

فتحت حلگهه تريد دعاء بعد تسأل وحمحمت اقاطعهه..

-مريم: بس هو جَدي بعمله وشاطر كلش

سولفنه بمواضيع اخرى بس حسيت سارة وضعهه مو تمام تفرك بيدهه هواي وتتلفت هواي وكل شوية تفل شعرهه وترجع تشده دليل على ارتباكهه او خوف عدهه..

للعصر رجعو وهي طلعت من يمنه، رجعو البنات بيدهم غدانه وگعدو يسولفون وين راحو وشسوو واحنه نستمع ومتونسات على حچيهن..

لليل الكل لازم يطلع محد يبقى سارة اصرت تبقى وشفت رقية تبسبس ويه اسيل ما حطيت ببالي وعبرتهن صعدت السيارة..

چان عشاء مزعج وممل لا اطلس موجود ولا حمزة ولا سارة بس الباقين كلهم هنا صارت بي هواي شغلات مو حلوة خصوصاً المطعم يقدم مشروبات كحولية والشباب اتخبلو..

-دعاء: شوكت نرجع لعبت نفسي فوكاهه حمزة مو هنا ويضبهم

-مريم: لا تباعين معليج بيهم

-ضحى: لازم بكل سفرة يصير شي يعكر علينه

سم صار علينه هذا العشى شفت مناظر تقزز كلش انقهرت وانقرفت من الوضعية حتى استحي احجي شنو شفت.. رجعنه للسيارات احنه البنات مو مال نبقى وياهم وانتظرنه لحدما اجو..

رجعنه للكوخ بوقت متأخر كلش عبرت 11:30 بالليل هلكانين تعب بس بالي كله ويه ابو ريحة يكولون تخربط ومدا يكدر يوگف على حيله اخذو للمستوصف القريب منا ورجعو يسحل بروحه سحل..

عبرت الساعة 1:00 واني كاعدة اكل بروحي اريد اتطمن عليه واحچيله شفت مالك اليوم خاف يألفون عليه قصة قبل احجي وتوصله معلومة اللتقيت بعدوه وتصيرلي سالفة..

رحت على موبايلي دزيتله رسالة..

"استاذ شلونك"

ما وصلت غميت روحي وتذكرت ماكو اشارة هنا، كمت من مكاني لبست الجاكيت فوك التراك مالتي وشال لفيته على راسي وطلعت اتسحب..

اتحجج بسالفة واگوللهم اريد اطلس وبالباب احچيله كلشي، الكوخ مالتهم يبعد عن مالتنه مسافة، الدنيا ليل والهوا يگص گصصص اطگطگ واتلفت المكان مظلم واصوات حيوانات او طيور ماعرف شنو بالضبط واضحات..

امشي واقره بأرقام الاكواخ الى ان وصلت لكوخ رقم 14 نسيت شنو رقم مالتهم 14 لو 24 يبوو شلون ورطة هاي شبيچ مريم شنو هالتلطلط خو باجر سولفيله لو البيچ ميخليچ..

وگفت اسوي آلا بالا برتقالا قالي عمي احسب من واحد للعشرة واحد ثنين ثلاثة اربعة خمسة...

قطعت من سمعت صوت جاي ليكدام متت جمدت اكيد هذا الجني مال البارحة لحگني لهنا.. صرت اتنفس سريع واتراعش بمكاني صار صوت اقوى شلون الواحد ديمشي على ورق شجر..

-منو هنااا

تقدمت وحچيتهه بصوت مسموع نزيت من شفته عمر مد راسه من وحدة من الاشجار منتچي بظهره عليهه، حطيت ايدي على گلبي راح اموت ماكدرت اتنفس بعد..

-استاذ عمر

تقدمت عليه ولاحظته يمسح عيونه وذب قوطية چانت بيده بعيد، مسح وجهه وخشمه عيونه صايرات فصوص مرجان احمر قاتم، گال بأبتسامة..

-ها مريم

-مريم: مادري بيك كاعد هنا اخترعت

-اي ما جايني نوم

-انتَ بخير؟

سألت بسرعة لان وضعه يقهر، حرك راسه "اي" ومسح وجهه وعيونه حيل جر نفس قوي ولفلف روحه بالجاكيت..

-عمر: ها حبيّبة شعندج هنا

ابتسمت من كال هيج مستحية، عدلت الشال على راسي وكلت بخجل..

-لا هيج اجيت اتمشى لان ما جايني نوم

-اطلس نايم بس اذا تردين اگعده الج

جفلت مصموم حلگي لا البيه ادافع عن نفسي ولا البيه اسكت، ثواني ورجعت لوعيي كلت بسرعة..

-لا لا استاذ شسوي بأطلس اني اجيت لان...

-هو هم مشتاقلج تره وراد يشوفچ بس حيله ما ساعده

انلصمت على حلگي، يحجي وباقي على گعدته منطيني ظهره، صرت الوب بمكاني ماعرف شحجي، دار وجهه يباوعلي وكمل بأبتسامة..

-اعرف انتو بعلاقة مريم

-لاااا شنو بعلاقة استاذ فاهم غلط انتَ لاا بس الموضوع...

-عمر: اي ادري مو علاقة بس وليدنه يحبج

-اني.. ماعرف...

-هههههه يابة شكد تستحين عادي الوضع طبيعي انتِ ما مسوية شي غلط

-والقران كلت اجي من الباب بس احاچي وارجع وعيون امي ما ادخل جوه والله مو هيج اني والله ابد

-عمر: ادري ادري تعلميني بيج

-شكد عيب اكيد فهمتني غلط

-لا فهمتج صح اعرف اخلاقج شنو خابصني بيج الافندي

-صدك

-رب الصدك ليكول عاشگ ملاك

غمز بعينه وكال مداهرني..

-هو صدك انتِ ملاك

فتحت عيوني على وسعهه وهو طگ بالضحك، رجع مسح عيونه وكال..

-اشاقيكم احب اثير غيرته

-يعني اطلس هو حچالك؟

-لا اني الي انتبهت

-شلون؟

-من اول اجتماع لاحظت اهتمامه بيج كلت يمكن لان محجبة وصار عنده فضول ناحيتج بس طلعت غلطان

-سولفلي

-تعالي

طبطب على المكان الي بجانبه تراب وعليه حشيش شوية وورق شجر متناثر، كعدت على بعد منه وكال..

-عمر: وهاي الشغلة هم يحبهه بيج

-شنو قصدك؟

-يگلي عمر ما تنطيني مجال ما تخليني اكضهه موتتني راح اموت بيهه مرمرتني

ضحكت وكممت حلگي سايحة من الخجل، فرك وجهه للمرة العاشرة يمكن وكال..

-يموتني اذا يعرف حاچيلچ بس تستحقون كل خير

-شلون لاحظت انتَ

-كتلج نظراته تسولف اني نبه بهاي السوالف استاذ بيهن، كلما اتقرب منج يظل يكمز عباله بيناتنه شي

-ياا

-سألني عنج يريد يجر لساني عود واني هم ماقصرت لعبت عليه شوي

-ليش

-اول مرة اشوفه بهذا الوضع يغار على بنت غريبة ويشوط من احجي بيج

اللتزمت الصمت ماعرفت شنو اجاوب، مط ايده وكال..

-عمر: اطلس ما يحب النسوان

-شنو؟؟

-عمر: لا يروح بالج بعيد اقصد ما يسوي علاقات وهذا السبب خلاني استغرب تصرفاته وحبيت اللعب وياه

-هاا

-ههههههه هو اني علاقتي ويه كل بنية ميانة بس هو حط دوبه من دوبج ليش تحاجي مريم ليش تركض وره مريم عبالك عجبة

-اي ملاحظة عليك

بقى يباوعلي واني مبتسمة نزلت راسي كلش مستحية من هذا الحديث..

-عمر: حلوين

-شكراً، بس استاذ اني ما رجعتله خبر مترددة

-لا ليش اطلس خوش اطلس

-مادري استحي

-هو ما يستحي عادي تتكاسرون

-ههههههههه

ابتسم ابتسامة حزينة وظل ساكت اشوف عينه بالكاع ويذب حسرات عالية تشك الگلب، خجلت من كعدتي وياه هستوني قررت اكوم كال..

-لقد تركتني ام عمروٍ ومُقلَتي هَمُول، وقلبي لا تُفِيق بَلابِلُه.. تَطاولَ هذا الليلُ حتى كأنَّما إذا ما مَضى تُثنَى عليهِ أوائِلُه..

-تقره شعر؟

-لا بس اجه ببالي هسة مو اني مألفه

-استاذ شعجب كاعد هنا باردة

-ماكدر انام مريم مااكدر

حچاهه بغصة گوة طلعت من حلگه، فرك صدره وبلع ريگ متألم استحيت اعوفه واستحيت ابقى كاعدة على أي اساس اني هنا كاعدة وياه واليشوفنه شيكول..

-مريم: ربي يفرج همك استاذ

ابتسم وباوعلي، ميل راسه لجانبه الايمن وكال بعيون تلمع..

-ادعيلي مرايم عسى ربي يبرد گلبي

-ان شاء الله وانتَ هم ادعي الله كريم مينسى احد

-چا ليش احسه ناسيني

-لا استاذ لتكول هيج الله كريم ويه عباده ويحب العبد يلح وياه بالدعاء

-ادعي بس ما يستحيب

-الله سبحانه يعرف شياخذ ويعرف شوكت ينطي ودائماً ينطي الافضل

-ماريد غيرهه

افتهمت الموضوع يخص بنية، عدلت گعدتي وكلت بلطف..

-ادعي ولح على رب العالمين واني متأكدة راح يجي يوم ويستجيب

-شكد مريحة مريم محظوظين بيج

ابتسمتله وهو كمل..

-من اول يوم اللتقيت بيج حسيت بالراحة چن اعرفچ من زمان

-تسلم استاذ

بقينه ساكتين فترة واني افرفر بعيوني المكان، هز راسه وكال بنفس قوي..

-اااااخ ااااخخ

-هون على نفسك استاذ

-عمر: شلون وهي عاشگة غيري

ماعرفت شلون اواسيه انقهرت حيل وتأذيت گلبي وجعني واني اشوف وضعه الصعب، قررت اكوم خلص خلي ياخذ راحته ويخفف عن نفسه بنفسه بلكت يرتاح..

-استاذ اعوفك براحتك تصبح على خير

هز راسه ساكت، كمت من مكاني وانفتح باب كوخ يبعد عنه شوية باوعت بأتجاهه وشفت مسلم يطلع منه يضحك وملفلف بنية بجاكيته وتضحك وياه..

عكدت حاجبي مستفهمة الجاي اشوفه هاي شنو؟؟ هاي اسيل؟؟؟ ضميت روحي ماردتهم يشوفوني شفت مسلم رايح لغير عالم وهي وياه يضحكون بصوت ناصي ويبسبسون ودخلو بين الاشجار..

باوعت لعمر وجهه انگلب لونه عيونه احتقنت واوضاعه تخربطت لااا ياربي عمر يحب اسيل!!

رجعت عليه اشوف وضعه يبچي الصخر دموعه تنزل هزتني هزز امي دائماً تكول دمعة الرجال غالية وما تنزل اله من ينفطر گلبه..

بقيت واكفة بمكاني حايرة عين على عمر وعين على الطريق ارجعله لو اكمل طريقي، تحسرت بصوت عالي وسمعته يكول..

-عمر: روحي لأطلس مريم

-شنو؟

-راح يفرح بشوفتچ روحيله

-لا استاذ ميحتاج

اللتفت عليه وضعه ميبشر بخير ابتسم مجاملة وكال وهو يأشر على باب الكوخ مالتهم..

-البيت فارغ كلهم طالعين

-مادري بس اني..

-اعرف انتِ شنو مريم روحي حاچي عيوني كلش مريض راح يرتاح بشوفتج

ماحبيت الموقف وفكرت هواي ياله هزيت راسي موافقة، رحت لكوخهم دكيت الباب ما جاوب دكيت بعد ما اجاني رد دفعت الباب شفتهه مفتوحة باوعت لعمر بعيد عني وعايش بضيمه قررت ادخل جوه..

خطيت خطوة داخل البيت واقنع بروحي هو رجلي وحلال مدا اسوي شي حرام عادي لا عيب ولا حرام الله يشوف ويعرف نيتي بس احي اشوفه واتطمن عليه واطلع..

فصال كوخهم يختلف الاضوية مفتوحة بس مخنفسة مشمورة على القنفة بالصالة بطانية متلفلة، فتحت وحدة من الغرف فراغة بس ريحة العطر الرجالي يعط منهه ضحكت وسديت الباب..

رحت للغرفة الثانية وذبيت نفس، طرقت الباب على كيفي ما جاوب دكيتهه اقوى وسمعته يكول بحس تعبان..

-تفضل

حطيت ايدي على گلبي وداخلي يرجف شنو هذا الغباء شدا اسوي بروحي خاف يفكر غير تفكير لكن بسرعة ارجع اقنع نفسي واكول هو زوجي..

فتت للغرفة على كيفي ظلمة بس ضوه خفيف داخل من الشباك اكدر اشوف وضعيته، نايم على ظهره بدون قميص فاتح ايديه ثنينهن ومغطي نفسه للنص..

دورت بعيوني الغرفة طاسة بصف راسه على الميز ووصلة مبلله بيهه وادوية هواي بجانبهن..

-عمر

ما جاوبت، رجع كرر بصوت غافي نعسان..

-زمال

غطيت حلگي اخفي ضحكتي وواكفة بعيد عنه، فرك وجهه حيل وانگلب على بطنه تمتم بكلام ما مفهوم ومبين غفى..

تقربت عليه واحس بحرارة عبالك فاتحين صوبة بعيدة قلقت وتقربت اكثر حطيت ايدي قريب ظهره وحسيت بالحرارة مالته يچوووي، ردت اعوفه واطلع بس گلبي ما انطاني شكد ما حار خفت يشمر قررت اگعده وشيصير خلي يصير..

-استاذ اطلس... استاذ.. استاذ..

ادف على كتفه فوك البطانية بيدي اريد اصحي وماكو ميحس، عليت صوتي وضغطت على كتفه اكثر..

-اطلس كوم انتَ مصخن اطلسس

-هممم

-مريم: كوم انتَ مصخن كوم عيني

-وخر ولك

-مريم: كووم

-شنو

-كووووم ياااا

رفع راسه يباوع من الجهة الثانية يدور على مصدر الصوت ماحجيت رجع حط راسه على المخدة وغفه..

-اطلسسس

-منو

-حور العين

-ههههه الله

-كوووم

-شسمج حوريتي

-كووم استاذ

طفر من مكانه واندار عليه عيونه ذبلانة ووجهه وشفايفه حمر دم فرك وجهه بأيده ويرجع يباوعلي انوب يفرك عيونه وهم يباوعلي..

-الاطلس: اني وين

-بالجنة

-صدك؟

-اي

-منو انتِ

-استاذ شبيك

-مريم؟؟

-اي

-انتِ موجودة لو جاي اتخيلج بالجنة

ضحكت ميته ضحك عبالك مكبسل لعد هذا شكد مصخن..

-موجودة

رجع نام ميحس على روحه تأفأفت وهزيته من كتفه نفس قبل شوية..

-استاذ اكعد لا تشمر

-وينهه الطوبة

-شنو؟؟

-اشمر الطوبة

-هههههه تشمر انتَ انتَ

-وخري ام لسان حتى هنا لاحكتني

-يااا مو صوچك والله

-كولي والله اني موجودة

-والله اني موجودة

-شو

مد ايده يريد يلزمني ودفعتهه حيل فك عيونه وكعد على حيله..

-مريم!!

-اي شبيك

-انتِ هنا؟؟ شجابچ؟

يحچي كوة عيونه طافية ويرجف، مجاوبته رحت على الادوية ادور على خافض حرارة ماعرفتلهن گوة اسوي روحي دكتورة واتفشل..

-استاذ ياهو منهن خافض حرارة؟

-انتِ

-شنو

-بوسيني هسة اصير زين

-ايععع شبيك شو اكعد لتنام مو زين

-تعالي يمي

-مريم: استاذ احترم نفسكككك

-الاطلس: اني محجبة

حچاهه مستهزأ يقلدني ضحكت هذا ديهذي محاس على روحه..

-اطلس

-روحه

-اشش يله

رحت على الكمادات غطستهن بالمي صاير ثلج من وره الجو، حطيتهن على راسه وضغط اسنانه حيل وشالهن شمرهن بالكاع..

-اخخخخ

-مريم: لازم غير حتى تصير زين

-انتِ تردين تموتيني

-لا اريد انزل حرارتك انتَ دتهذي هسة نام معليك

حط راسه على المخده ورجعت اسويله كمادات كل شوية يريد يشيلهن ويدردم عليه ويغلط على جماعته، اندليت خافض الحرارة بعدما قريت كل الادوية وشربته دفع ايدي وكال..

-طعم بول

-وانتَ شمعرفك بطعمه

-اعرف كلشي

-استقر وليدي

ما جاوب ورجع راسه على المخدة لزم ايدي ردت اجرهه وماقبل حطهه على صدره ويمسح بيهه، رفعهه باسهه وابتسم..

-استاذ تأدب

-حالات خاصة

-تره ايدي ما تنطي مراد

-اني مريض مرمر

-واذا

-تحبيني مريم

-لا

-ليش

-مادري

-شنو ما يعجبج بيه

-تدري هاي ثالث مرة تسألني هذا السؤال

ما جاوب وغفى، بقيت كل شوية اقيس حرارته وعيني على الباب اخاف احد يجي وانفضح، مشى الوقت بدت حرارته تنزل ارتاحيت وجريت نفس..

كمت من عنده اريد اروح وسحبني من ايدي عليه وصارت الافلام الهندية الي تنتظرهن دعاء وگعني على صدره وحضني..

-مريم: يبووووووووو

-وجعوو

-صخام الصخمج يمريم گووووم

-مو مريض

دفعته بكل قوتي واضرب بي حيل وهو جبل ماكو ميتحرك ضابني وجسمي يكزبر من اطخ جلد صدره..

-استااذ والقرااان الكريم اعيط افضحككك

خفف شد ايده عني ووخر يضحك كمت عنه مفرفحة روحي اتنفس بسرعة معصبة راح انفجر..

-مريض ويخبث

-الاطلس: من تعيطين شتكولين؟

-اكول ديعتدي عليه!!

-خوش حتى نتزوج

-دهر دهرررني

-اي شبيچ چا غير نطمطم السالفة

-اشوف رجع لسانك صرت زين

-بفضل الله ثم فضلج

-استاذ جديات احجي عيب هاي التصرفات احترم...

-حجابي اي اي ادري محترم حجابج بس ماكدرت اكض روحي

-كضهه!!

-هههههه شحلاتج

عدلت الحجاب على راسي وعيونه عليه انتبهت هو بدون قميص من شافني خازرته ضحك وغطه نفسه بالبطانية..

-الاطلس: شسوينه قبل شوي

-شسوينه؟؟

-مادري شو حنچچ احمر

استغربت اشر عليه وكال بغمزة..

-بستچ عليه ولج؟

-لاااااا طبعاً لاااااا

-جذابة

-والقران وعيون امي لااا شنو انتَ شتحجي

-اشاقيچ بابا كافي فحطتيني

-بس انتَ لعبت جولة

-صدك

-اي حجيت بيه كومة وكلت عني اخبل وميت بيه وعبالك اني حور عين

يسمعني ومبتسم حاط راسه على المخدة واني كاعدة شوية بعد عنه، بقيت اجذب واسفط حچي اريد اشوف شيسوي وهو ساكت ويسمعلي..

-الاطلس: والله خوش اسولف

-اتشاقة تره

-ادري بيج چذابة

-اهوووو استاذ شبيك انتَ

ضحك مرتاح وگعد على حيله تچى ظهره على تاج السرير..

-جوعان

-وشسويلك

-هسة شلون تخليني احجي حچاية

-اي گولهه

-حتى اليبوو مالتج توصل لأمي

-يبوووو

ضحك بصوت واني ضحكت غطيت راسي بيدي وهو كال..

-هواي تصرفين "يبو" و "عزة"

-عزه صدك

ضحك وكفخني على راسي صفنت عليه مصدومة من حركته ضحك اكثر ومط ايده وذب نفس..

-جوعاااان

-متروح تااكل ثانياً منو سمحلك تمد ايدك عليه وتكفخني!!

-كفخة حب هاي مرمرتي

-ماااريدهااا

-خوش كومي سويلي شي اكله

-لا بله!

-كومي مريم ما تشوفيني مريض

-هو بيتكم شبي

-شوفي بالصالة يمكن جايبلي عشى حمزاوي

كمت للصالة وفعلاً شفت كيس بي اكل لفات ثنين وقوطية ببسي ومقبلات، من شفتهن جعت وبطني لوتني بس سكتت واخذتهن اله..

-مريم: من اكلك مدلل تستهزأ

-منعل اني تعالي جيبي

حطيته بحضنه وطلع لفة فتحهه من الچيس وقدمهه ناحيتي..

-تفضلي آنستي

-لا اني متعشية

-ميخالف اكلي شوي جامليني

-هذا اكلك عيني

-ما اكل بدونج وعلي

ضحكت واخذتهه منه عضيت منهه وهو هم عض من اللفه الثانية فتح قوطية الببسي وقدمهه ناحيتي شربت منهه وحطيتهه بيدي شو هذا اخذهه وهم شرب منهه..

-اطلس: عسل

-اهوووو رجعنه

-حسرة بگلبي احچيلي حچاية شكد نحسة

-انييي نحسة!!

-لا هذا اني

-اي مو اكول

-اممم

كمل لفته وفتح المقبلات حط بالخاشوكة يريد يوكلني كلش استحيت وتوترت دفعت ايده خجلانة وهزيت راسي "لا"..

-ماشتهي

-يله هالمرة سماح لا تموتين عليه من المستحى

اكلت ربع لفتي وانطيته ماريد بعد كملهه هو واكل كل صحن المقبلات ما شاء الله شهيته مفتوحة وياكل هواي.. شرب القوطية مال ببسي كلهه وكال..

-آنستي اكو چبس بالصالة جيبي بلا امر عليج

فتحت عيني اباوعله مدهوشة ممبين عليه ياكل هواي، رحت جبتله الجبس شكبره كعد ياكله واني بس صافنة عليه كلما اريد اروح ويسألني شي يلهيني الى ان حسيته رجع عوش تعبان..

مسح ايده بالكلينس ما غسل ونام بمكانه غمض عينه متألم قلقت وانخبصت بي شوية ورجع احسن، ابتسم وذب نفس عالي..

-شعجب اجيتيني اشتاقيتي مرمرتي

-لا

-چا شعندج

-اجيت اگلك على شي صار ويايه اليوم

-همم؟

-اليوم اجه مالك

بلع ريگ وحرك راسه يشجعني اكمل..

-مريم: اي

-الاطلس: اي؟؟

-مادري شيريد صراحة

-شكال؟؟ حچى وياچ اذااچ؟؟ سوالج شي؟؟؟

-لا لا بس حچى ان هو يدري بيك معجب بيه ومنتبه على نظراتك وحچى بطريقة تضوج عني

-شگال؟؟؟؟

نترهه نتر وخازرني شبي هذا راح ياكلني..

-مريم: مادري نسيت

-احجي شكال!!

-والله نسيت مچنت شايلة دفتري واسجل

-اخخخخ مررريم

-شبيك هاي فوكما اجيت اگولك

-مرمرتينيي مرريم شالعة گلبيي

-شسويت

-مااالك ممنوع تحاچي فهمتي لو لا!!

-اي خوش لتعيط

-مرررريم!!

-اي والله شبيك تصيح ما احجي وياه بعد

صفگ ايد بأيد حاير حط ايده على لحيته يفكر وسرح بالبعيد..

-شنو بيناتكم ليش لهدرجة يكرهك شو ممبين عليه حقير شكله حباب ولطيف

خزرني خزرة قوية تنرفزت ونترت..

-شو تخزرني!!

-انتِ شنو تردين تجلطيني ترديني امووت؟؟

-هسة شكلت اني

-لا ابد بس كاعدة تتحارشين بي كدامي

-وين تحارشت هو بس كلت عنه لطيف وينحب

-ينحببب!!!

-لا لا ماكلت ينحب نسيت شكلت اهووو انتَ توترني

-اي اي اني اوترج اي صح

-هسة اني بس اسأل شنو بينكم

-معليج لا تدخلين ولا تبحوشين ماشي؟

-ماشي شبيك معصب

كمت اريد اروح وجر ايدي حيل عصبت من حركته بس ما لحكت احجي فوراً كال..

-وين رايحة ويين

-ارجع انام الوقت تأخر.. استاذ هد ايدي شبيك

-اني اوصلج

-لا انتَ مريض نام

-لا لا مابيه شي

كام وگف يلبس قميصه درت وجهي عنه بعده واكف بمكانه وغمض عيونه حيل متوجع، رحت بسرعة اوكف كدامه..

-شبيك شبيك

-اخخ يمة

-شبيك اطلس شبيك

-اخذيني للفراش

استند عليه ويمشي گوة ايده وحدهه گامت تنعوج متت خوف كمت ابجي من الرعب خفت تجيله النوبة واحنه وحدنه..

-استااذ راح اصيح لأحدد

-لا مابيه شي عادي تصير هاي الحالات

-مو خاف تجيك النوبة

نيمته على الفراش واحجي وارجف..

-لا تبجين مابيه شي

-مو خاف..

-لا ما تجي اصبري بس شوي خليني ارتاح وارجعج

-لا شلون متكدر تمشي خليني اروح واصيحلك احد

-مرمر مابيه شي تصير هاي الحالات عندي ما تجي هسة النوبة

-اخاااف

-هههه زين اني يروحي

جر ايدي وباسهه وحطهه على خده جسمي كله ينتفض خوف وقلق وتوتر..

-كول والله متجي

-والله ما تجي

-استاذ عمر كاعد بره اخلي هو يوصلني؟

هز راسه اي وضم وجهه بالمخده يتلوى من الوجع، حرت ماعرف شسوي بقيت كاعدة وياه وهمس بخفوت..

-روحي مريم

-خاف يصيرلك شي

-ما يصير روحي عيوني

هزيت راسي وطلعت شفت عمر على گعدته رحتله بسرعة احچيله عن اطلس گال هاي الحالة دائماً تصيرله مو لازم اقلق بس اني شيصبرني.. 

باقي گاعد بمكانه اباوعله ومقهورة كلش من شاف مسلم واسيل لسه هو هذا وضعه، گلبي ما انطاني اعوفه واروح كلش اعز عمر وانظرله بنظرة اخ شكد ما طيب وروحه حلوة گلبي تگطع گعدت بعيد عنه شوية وسكتت وهو ساكت بس يمسح بعيونه..

-مريم: استاذ هونهه تهون

-عمر: عاشگة صاحبي

-مريم: اني اسفة نيابة عن الكل

-ما يفيد الاسف مريم ما يفيد

حچاهه ورجعت نزلت دمعة من عيونه، فتح قوطية موجودة بصفه ماعرفتهه شنو بس دگ گلبي من قريتهه مشروب كحولي ليش هيج يسوي بنفسه ليشش..

-استاذ محد يستاهل تبچيله!

مسح دموعه بكم الجاكيت وكال وهو يضحك بالجذب..

-عمر: هسة تكولين شني هالخيخة يبچي على مرة

-لا حشاك هذا معناه حبك حقيقي وچبير

ذب نفس عالي وكال وصوته مخنوگ خنگ..

-وروح ابوي عاشگهه وهايم بيهه

سكتت اسمع لحسراته عالية، جر نفس وكمل..

-چنت خاطب قبل تسع سنوات

تفاجأت مادري بي چان خاطب، اردف بصوت مهموم..

-خطوبة تقليدية ابوهه وابوي تعاقدو علمود الشغل وگالو نقوي بعض بخطوبة اولادنه رادو يخطبوهه لعلي اعترض علي وتعارك وطلع من البيت زعلان وماكو غيري..

وافقت كلت يله چا شسوي البت ما ناقصة ادب واخلاق وجمال، خطبنه واثاري البت تحبني وهي الگايله لأبوهه خلي نخطب وهو مبسمر ابوي وعاجبته الفكرة..

خطبنه وقبس ميته بيه جنت انقهر من اشوف حبهه انقهر من روحي ليش ما ابادلهه هذا الحب جنت زعطوط صغير كله عمري 22 سنة لحدما مشت الايام وتعلقت بيهه بس ما حبيتهه احب وجودهه واحب سوالفهه بس اكو شي ناقص بگلبي..

قرب موعد عرسنه وهي طايرة بيه كتلج كلش حبتني لو تشتري جواريب تجي تركض تراويني عمر اشتريت جواريب شوف.. روحهه طفولية ومرحة تحب الحياة لحدما اجه اليوم المشؤوم..

طلعت ويه امهه يشوفون بدلات العرس ما ظل على العرس اقل الشهر، اختارت ودگت عليه تبشرني فرحت على فرحتهه وصيتهه ترجع للبيت وتنتبه للطريق گلبي جان حاسني بذيچ الليلة..

جاي تعبر الشارع ودعمتهه سيارة نقلوهه مستشفى امهه ماتت بلحظتهه وهي صار عدهه نزيف بالدماغ يومين وراحت لحكت امهه، قبس ماتت وطفت فرحتهه بنية مثل الوردة مليانة حب وايجابية وانطفت شمعتهه بهاي الدنيا..

-مريم: سودة بوجهي الله يرحمهه يمة الله يساعدك

-انهاريت لا اكل لا شرب تعبت وراهه بس لليوم اكول ما عشگتهه بس توجعت على فراگهه وعلى شبابهه فگدتهه هواي وبجيت عليهه ايام وليالي..

مشت الايام وعبرت سنتين اني وضعي مو تمام وين ماروح اتخيلهه انام احلم بيهه اصفن اتذكرهه تعبت حيل تعبت، علي يكول انتَ عاشگهه وما تحس بروحك يمكن حبيتهه بس مو مثل ما حبيت اسيل..

گال اسمهه وعصر عيونه حيل فرك صدره وذب نفس تعبان شرب من القوطية هواي وحطهه على جهة عصر گصته وجهه صاير احمر وعيونه ذبلانة..

-عمر: ابوي توفى وتعبت اكثر على فراگه امي عافتنه وراحت تعيش بغير مدينة ماتحملت فقده وماتريد تبقى ويانه تكول تشبهون ابوكم وتذكروني بي بس تصير عينهه بعيني تدگ وتلطم تكول ماخذ شمرة عين ابوك..

المهم مشت سنوية ابوي واني التعب هاد حيلي، ماكو مكان ينفس عني ويوخر ضوجتي غير بيت خالي محمد.. اني وعلي صارت روحنه بذاك البيت هو يروح ويه بنات خالي واطلس من يجي يسولف وياهم ويغير جو واني بس اكعد واتصفن..

اشوف اسيل تروح وتجي تروش بالبيت مثل الفراشة، كل شوية جايتني محتاج شي عمر تريد شي عمر.. عمر تعال ساعدني.. عمر تعال ما اللوح هذا تعال انتَ طويل.. عمر تعال عاوني.. عمر تعال اللعبك حزازير..

-مريم: هي تقربت منك

-تريد تنسيني مصابي كلما اصفن وارجع للحزن اللگاهه بوجهي وتضحك بروحهه الحلوة، تحير شتجيب كدامي صارت حتى للمطبخ تصيحلي وهي تطبخ اسيل روحهه بالطبخ بارعة بي..

صرت اطبخ وياهه من كل عقلي تضوگني واضوگهه مشت ايامنه حلوة تخبل اروح لبيت خالي بس حتى اشوفهه اخذ طاقة منهه وارجع اكمل شغلي الى ان شفتهم..

دگ وجهه حيل بأيده نزيت ولميت ايديه لحضني اشوف كل حاله انگلب وگام يلوب، شرب باقي القوطية وشمرهه وفتح وحدة جديدة..

-مريم: استاذ الله يخليك كافي

-عوفيني مريم بلكت تطفى نار گلبي

شرب منهه هواي وحطهه بيده يرجف ويحجي من القهر كمل..

-شفت نظرات بينهه وبين مسلم عاينت عليهم مستغرب شنو جاي يصير اني واسيل صارلنه سنين سوه اصدقاء ماكو مرة گلتلي هي عدهه شي ويه مسلم..

بقت عيوني تركض وراهم اريد افتهم وروحي تلوب فاير راح اموت شفته طب لغرفتهه وقفل الباب عليهم هو قفل الباب لو قفل روحي رحت مثل المخبل ادگ بالباب واصيح عليهم يطلعون طلع مسلم مخترع..

-مسلم: شكووو شصايررر

-عمر: شنو ليش بغرفة اسيل انتَ؟؟

-مسلم: عندي موضوع وياهه شبيك تخبلت

بلعت ريگ عيني على اسيل واگفة مرعوبة ومخطوف لونهه، من هاي اللحظة انتبهت لنظراتهه وشلون تستنجد بي مني!

انضرب عقلي عفتهم ورحت لبيتي الليل ما نمته ادور النوم ما احصله ماحسيت بروحي غير واني ادك عليهه ردت اسمع صوتهه سولفت وياهه شوي وبنص حديثنه اندك باب غرفتهه تهربت مني وقفلت الخط..

الشيطان لعب بعقلي شكيت مسلم اجاهه دكيت مرة ثانية جهازهه مغلق، غالطت روحي وكلت لا شلون يجيهه مسلم بنصاص الليالي همه ما عايشين سوه..

بس طلعت غلطان كرهت روحي وكرهت الدنيا كلشي صار اسود بعيوني واني اشوف تعلقهم ببعض بعيوني شفته.. بعيووني شفته يبوسهه ويحضنهه ويلعب بشعرهه..

يأشر على عيونه ويحجي مفرفحة روحه، تعبت مجرد ما سمعت الله يساعده هو..

-عمر: سحبت نفسي بهدوء وما بينتلهه اني عاشگهه ورايدهه مسلم درى بيه عرفت بعلاقتهم وطلب مني اصير حارسهم هههههههههههههههه تخيلي انييي احرس حبيبتي والبت المسودن بيهه تتباوس وتتحاضن ويه حبيبهه بالسر ههههههههههههههههههه

يضحك ويغصغص شرب القوطية الثالثة وشمرهه بعيد وغطى وجهه بس چتافه تتحرك، من الحسرة الصارت ببلعومي كمت ابجي وياه اتذكر الصار بيه والتعاسة العشتهه وابجي..

-مريم: الله يساعد گلبك

-والله بعيوني اشوفهم يتغازلون، يستنجد بيه مسلم يكلي اخيك عمر اذا اجه احد بس نبهني اغمززلي، ويليي يا نار گلبي احبهه واستحي اصارحهه اخاف عليهه من نفسي تاليتهه تروح لغيرري اخخخ يالقهر ااااخ

-استاذ انتَ لو مصارحهه ليش تهاونت

هز راسه بطريقة ماعرف ويعض على شفته مقهور وميت من الغيرة راح ينفجر جسمي يرجف عصبية وحزن، باوعت للكوخ الطلعو منه اسيل ومسلم وباوعت لمكان عمر ليش كاعد هنا ويحرك بدمه ليش ينتظرهم وهو يعرف ديصير شي بيناتهم ليششش!!!

-مريم: استاذ اطلس يعرف بعلاقتهم؟

حرك راسه لا وبعدين كال..

-مادري

-تتوقعه يعرف؟

-مادري مادري

-وشلون استاذ تبقى بهذا الوضع انتَ

-چا شسوي گليلي

-مادري والله بس لازم تلگه حل

-شنو الحل اصارحهه وافشل روحي؟؟

-انساهه

-هههههههههههه مريم شنسى

-حاول انتَ لازم تحاول

-ماخليت بنية تعتب عليه صاحبت ورحت واجيت صرت اشرب مثل المخبل اريدد انساهه اريد اطلعهه من راسي بس مااكدر كلما اصفن اتخيلهه بحضنه واموت ولج گلبي يحترگ حرررگ

-بس هذا مو حل ميصير تلتجأ للحرام وتسوي منكر وتطلب من الله يساعدك ويعينك

-بس ردت انسى

-تنسى وانتَ تسوي علاقات محرمة؟ لو تنسى من تشرب؟؟

-مادري

-استاذ انتَ رجال لازم تلملم نفسك وتلگه حل لمشكلتك شلون بله باجر مسلم واسيل تزوجوا شيصير بحالك!

فتح عيونه يباوعلي نظراته مطفية من السم الديشربه، هز راسه هوايه بطريقة لا ويمسح وجهه وشعره..

-لا لا ما يتزوجون لا

-بله تزوجوا!!

سكت يباوعلي عيونه ضايعة صار يدور حول نفسه وهو كاعد عرفت ديدور على قوطيه يفتحهه ويريد يشرب بعد، ماتحملت نترت بصوت خافت..

-لتبقى تشرب ماكو فائدة منه!!

هز راسه "لا" وكام عافني وراح ماعندي شك راح يشتريله بعد ضجت منه وعليه الانسان بيده يدمر نفسه وبيده ينهضهه..

تمشيت للكوخ مالتنه امشي واتلفت اخاف من هذا المكان وحظنه هاي الليلة الثانية دنبات بي.. وصلت قريب البوابة وعطت مرعوبة من انفتح باب كوخ سارة ورقية..

-اسم الله.. منو هاي؟؟

-استاذ حمزة اني مريم اسفة بس اخترعت

تقرب مني يلبس الجاكيت مالته عدل، ابتسم وكال بهدوء..

-محتاجة شي مريم ليش طالعة بهيج وقت متأخر؟

-بس تمشيت ردت اشم هوا

هز براسه ونصحني ادخل كال خاف اخترع، عافني وراح صفنت على كوخ البنات شعنده يمهن خاف سارة صار بيهه شي؟..

**

"رقية"
البارحة حمزة سهر ويانة انتبه لوضع سارة الغريب ماكدرنه ناخذ منهه راس خيط بس تتصفن وساكتة، عفتهم وحدهم ودخلت للغرفة انتظر اسيل وين ولت هاي كالت شوية وترجع وما رجعت بعد..

سأل عنهه حمزة وكتله نايمة بقيت اني انتظر لحدما غفيت وكعدت الصبح هي بوجهي فرحانة وتطفر على الجرباية..

-رقية: هاا خبال وينج البارحة

-اسيل: موجودة حبي بس انتِ نمتي من وكت

-من وكت بالثنتين بالليل!!

-يووه رقية اسكتي يله يله راح نطلع نتريك ونرجع لفندقنه

هزيت راسي وكمت سبحت ولبسنه نفس ملابسنه عفننا بيهن صارلنه يومين محد مبدل، دخلت للسيارة كعدت بصف سارة السارحة..

انتبهت لحمزة مطنكر وكالب وجهه لا صبح عليهه ولا حچى وياهه كاعد وحده واجت وحدة من الموظفات اللوگيات تزحف عليه تنرفزت..

-رقية: ها بشري شصار البارحة؟

ذبت نفس مجاوبتني، نغزتهه واكرص بيدهه خايفة كلش لا نرجع وغدير تكتشف ما صار تقدم بيناتهم..

-رقية: سارة شصار البارحة سولفيلي راح اتقيء من الخوف

-سارة: ما صار

-رقية: لعد شبي حمزاوي ميحاچيچ؟!

-مزاعلني

-ليش؟؟

نزلت دموعهه بالخنسة ودارت جسمهه عليه وجهه مطركع من القهر وهاملة نفسهه لا كلتلي حطيلي مسكارة تغطي رموشهه ولا رسمت حواجبهه، مسحت وجهها بزعل وهمست تحجي...

-كتله احبك واريدك تتزوجني...

**
"مريم"
مزعوجة كلش بطني توجعني ممرودة روحي، لاحظت دعاء قوت علاقتهه بـ علي هو شقايچي ويداهر ويسولف ويه البنات خفت عليهه ماريدهه تتعلق وينكسر گلبهه ميناسبونه ذولة غير عنه..

وصلنه للفندق واللتهينه نحضر اغراضنه واني الوب هم وجع وهم قلق ياربي شبيه معقولة كل هاي المشاعر بسبب عمر البارحة من سولفلي عن حبه لأسيل؟

نزلن البنات وبقيت وحدي بالغرفة افتر واحط بالجنطة الغسول والشامبو والمشط افتريت بعد ادور على باقي الشغلات واندكت باب الغرفة..

حطيت شالي على راسي وفتحت الباب ماكو احد ماهتميت سديت الباب ورجعت ارتب، ردت اندكت اقوى هالمرة وبنفس اللحظة بطني كرفتني متت من الوجع وكعت بالكاع اريد اوكف على رجليه ماكدرت..

اخذتلي دقايق اهدأ نفسي اخذ شهيق وزفير وانتبهت لموبايلي اجاني اشعار اخذته من السرير وشفت رسالة من اطلس كاتب..

"مريم تعاليلي بساع"

دگ گلبي وكمت بصعوبة فتحت الباب وصارت بوجهي وحدة ما شايفتهه من قبل يمكن تشتغل هنا..

-مدام فيني ساعدك بشي؟

-مريم: لا تسلمين بس انتِ الي دگيتي الباب

احجي كوة روحي تشوغ عاصرة بطني راح تطلع روحي من الالم، عفت الباب مفتوحة ورجعت اريد اكعد على السرير وماحسيت غير على دفعة قوية اجت على ظهري وگعتني بالگاع طگ خشمي وصارت الدنيا سودة.......

يتبع ♠️💸...

• ━━━━━━❪♣❫━━━━━━ •

توتر وشعور غريب كُلش اخوان 😬🔥

لتنسون التصوووويت عمريني 🕊️🤍
وتعالو لحسابي الانستا ننتناقش سوه 😩🤍