رواية الاطلس "دمليج أسود" الفصل السابع والعشرون 27 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

عزة نفسَي أهم مـَـن ڪَــلبي بــ هـَـواي
وكسـَرت خاطري تسَواك كلك
أطَخلك راس َ؟
أنــيَ النخل حَدري
يــآ حُـب
يــآ غزل
يــآ عشگ عذَري
مــن تَدوس ڪَــلبي اغـَفَرلك يجـَـوز
بَــس يم الكَرامة
أچفه شَري ✨

• ━━━━━━❪♣❫━━━━━━ •

"سارة"
نويت اسوي سهرة الي ولحمزة اغيرلنه جو حتى لو منتحاچى عسى هالسهرة تكون خير عليه، تركته بالغرفة كاعد يشتغل وطلعت للممر بعدني دا اعبره وسمعت صوت ضحك عالي..

مديت راسي للصالة وجفلت من المنظر ابتعدت بسرعة اگمز وضامة وجهي ومغمضة عيوني مسلم واسيل ويه بعض بوضع رومانسي ويضحكون..

على اثر ضحكاتهم اضحك فطست من الضحك قلت اماكن تجون للصالة المشتركة بيناتنه، اسمع اسيل تكول..

-ولك مسلممم امشي مو هنا

-مسلم: تعالي ماعوفج اليوم

-اسيل: ههههههه عوفنيي راح يكعد غيث يوووه

-مسلم: شلون جمال هذا قلبي الصغير لا يتحمل

-جمال عيونك يا عيوني

-احبج حب مخابيل.. تعالي اله املص راسج اليوم

-هههههههه آآييي مسلمممم راح اموت اختنكت لا يطلع احددد يمعود

ميخليهه تكوم اضحك وياهه على الواهس اختنگت طفرت من سمعتهه تگوم تشرد منه واني هم فلتت لغرفتنه والضحكة لازمتني كل شوية اتخيل المنظر وازيد بالضحك..

گوة سكتت روحي انتبهت لحمزة يباوعلي، نزع نظراته الطبيه وابتسم، حرك براسه بمعنى شبيچ اني شفته وتذكرت الموقف ورجعت افحط ضحك..

-حمزة: هههه ليش تضحكبن شبيچ؟

-هههههههههه هههههههههههههههه شكد فشلللة

-شكو ولج

-هههههههههه عيب عيب ماحجي عوفني

-تعالي شكو

كام يجي ناحيتي ضميت وجهي وادوره عنه حتى ميشوفني اضحك بس ماقبل دارني عليه اضحك ويضحك ويايه..

-حمزة: شبيچ ولج خبلة

-هههههههه وخر ماحجي ماكو شي

-اي هواي صدگتج

-حمزة اسكت استحي عيب اششش

-عيب؟

مسحت دموعي النزلو اثر الضحك ووكفت عدل كحيت من الغصة وهمست واني مكممة حلگي..

-اسيل و.. اسيل ومسلم بالصالة كاعدين

-اي؟

-اي يعني كاعدين هناك ههههههههههه

-هههههه واذا كاعدين احجي شبيچ

-حمزة اسكت وخر ماسولف

هز راسه وراح متوجه للباب وكال..

-رايح اشوفهم

-لا لا لا وين عيب وين تروح ليش تخرب عليهم

-اها؟

-اي احم.. جانو هيج يعني هاي

-هاا

-اي هو

-خوش

-اي فـ عوفهم

-نعوفهم ليش مانعوفهم

-يعني افتهمت عليه؟

-لا

-ههههههههههه شبييييك چانو بوضع رومانسي

-اهاااا

-اييييي

-حلووو وهذا الي ضحكچ؟

-ههههههه اي اي فرحانين چانو كلش حلوين

-اي الله يسعدهم

-اني بس صافنة قلة اماكن ليش يجون للصالة وهي مشتركة بيناتنه ههههههه شكد عيب

ابتسم بدون لا يجاوب ورجع يكعد على الفراش ورجع يشتغل بالحاسبة، رحت اكعد بصفه واتصفن..

-حمزة: انزعجتي من المنظر؟

-منظر مسلم واسيل؟ لا ابد بالعكس فرحت

-حلو

-اي حلو الحب وحلو من تتزوج عن حب

-صحيح

-اتمنى يبقون هيج يستاهلون بعض

-سارة شلونهه علاقتچ بغدير؟

بوزت من جاب طاريهه وانزعجت كلش ماكدرت اسيطر على عصبيتي عكس العادة وانفجرت..

-سارة: شبيك انتَ!!

-شنو؟

-ليش هواي صاير تسألني على غدير ملاحظ نفسك لو لا؟؟

-اني؟

-اييي صارلك فترة تسألني عنهه كل مرة اروح لبيت اهلي وارجع تسألني غدير شلونهه شسويتن شلون قضيتو وقتكم

-عندي فضول لا اكثر

-حمزة انتَ حنيت لغدير وتريد ترجعهه؟

ما جاوبني ورجع يشتغل بهدوء، طنگرت وكتفت ايدي بقينه على هذا الهدوء وكل شوية اباوعله منتظرته يحجي..

-حمزة: هسة ما گلتيلي شلونهه غدير؟

-ززززينه

-وعلاقتچن شلونهه؟

-عادية

-ما صارت بيناتچن مشاكل؟

-لا

-يعني علاقتچن حلوة هالفترة؟

-اي

-جيد

-اي جيد

ضحك مستهزأ هستوه ديحجي شي واتصل موبايله حاطه بيناتنه والمتصل جان "داليا" انطاهه رفض ورجع يشتغل ماحجيت ولا حاسبته..

-حمزة

-نعم

-نسهر؟

-لا

-نتابع فلم حلو نازل جديد

-لا اريد انام تعبان بس اكمل شغلي

-قبل شوية ردت تكول شي وقاطعت كلامك داليا من اتصلت

-اني ردت اكول شي؟

-اي والله ضحكت وردت تكول وسكتت

-ها اي ردت اسألج على رقية اختج شلونهه

-زينات كلنه ثلاثتنه زينات

-شبيچ مزعوجة؟

-هواي مهتم لخواتي شنو المناسبة؟

-من قبل اهتملچن ومن قبل اسأل غدير عنچن بأستمرار

-صدك

-طبعاً

هزيت راسي متفهمة وكمت امشط شعري كدام المراية وامسح مكياجي، بينما اني امسح الكحل من عيوني سمعته يهمس بصوت گدر يوصلني..

-حمزة: بس ما چانت تچذب عليه

اللتفتت بسرعة ناحيته وذبيت القطن من ايدي، تقربت منه وتسائلت..

-سارة: شنو؟

-هيج

-كلت ما چانت تچذب عليه منو هي؟

-غدير

-شلون يعني اشرحلي

سد الحاسبة وحطهه على الميز بصفه، نزع نظارته وگام يريد يروح للحمام..

-يعني من جنت اسئلهه عن احوالكم تحچيلي الحقيقة

-قصدك اني جاي اچذب عليك؟

-مادري شتشوفين انتِ؟

-لا ماجذب عليك احجيلك كلشي

-صحيح

-اي صدگني

-اي مصدگج

دخل للحمام وعافني رحت اكعد على الفراش وراسي يدور ماعرف على شنو ديحجي انتظرته دقايق وطلع ينشف بحلگه مفرش اسنانه..

-حمزة شنو تقصد بكلامك؟ حباب اشرحلي

تقرب مني وحضن خدي بكف ايده، صارله هوايه ممسوي هالحركة بسبب بعدنه عن بعض ابتسمت من صارت عينه بعيني بس غابت ابتسامتي من كال بجدية..

-غدير جاي تأذيج؟

-هاه؟

-غدير.. جاي تأذيج؟

-لا

-اها

-اي ماكو يعني عادي

-ماشي

وخر عني وراح للفراش نزع التيشرت بقى بالفانيلة الداخلية مثل عادته من ينام وجر اللحاف يتغطى، رحت عليه بسرعة كعدت بجانب جسمه وسحبت اللحاف منه..

-حمزة شبيك شو نمت

-نعسان سارة

-ليش سارة مو كناري؟

-نعسان بعدين نسولف

-متعودة على غدير اني حمزة عادي مو شي مهم نتناگر اي بس يعني..

فزيت من گعد على حيله وعيونه ناطه خازرني، سحبني من ايدي حيل وگعني بحضنه شهگت خايفة من تصرفه وزاد خوفي من نتر بين سنونه وهو يرفع ردن البدي مالتي ويأشر على الاثار بيدي..

-حمزة: هذا شنو؟؟؟

-هذا.. هذا مال..

-غدير خرمشتچ هنا مو؟؟

-حمزة..

-وهدا شنووو

جر ياخة البدي وفتحه على صدري خرمشة چبيرة كلش اتذكر من جرتني من ياختي وجرحتني متقصده بأظافرهه قبل اربعة ايام..

-شوف اني..

-وقبل عشرة ايام منو رفستچ ببطنچ لان شكت عبالهه انتِ حامل؟؟؟؟

-اسمعني..

-ما اسمععع سارة!! مااا اسمع شييي كل يوووم اسألج شلووونهه غدير وياچ شلونهه علاقتچن وتچذبين عليه تگليلي زييينة واني مثل الغبييي عبالي صدك زينة طلع مراويتج الووويل وانتِ متحملة وساكتة لييييش

-ماگدرلهه

-چا اني شنوووو هناااا شنووووو

-ماريد ازعلك

-من ما تحچيلي تزعليني وتحرگين گلبييي لشوكت تبقين ساكتة وتخافين ساارة تعبتينييي

-اسفة

-اخخخ يالقهههر اااااخخ

گام من الفراش يلوب بمكانه يروح ويجي مالي عين ارفع راسي واحط عيني بعينه ضرب على فخذه قوي وذب حسرة عالية..

-شوكت تتقوين سارة بس فهميني شوكت

-ما اتقوى اني غبية وماعندي شخصية

اجه عليه ملهوف لزم ايدي ثنينهن بين ايد وحدة والايد الثانية يمسح دموعي..

-لا تحجين على نفسج ما اسمح بهذا الشي، ولج تعبتيني راح اموت من وراج اسبوعين انتظرج تجين تعترفين غدير تأذيج كلشي جربت وياچ وما تنازلتي واجيتيني

رفعت عيوني عليه ماشوفه من الدموع، رجعت نزلتهن وهمست بغصة..

-استحي

-تستحين شنو ولج ليش تستحين

-استحي تعرفني ضعيفة وتضوج مني وترجعني لاهلي

ضحك خفيف وحرك راسه نافي كلامي، سحبني لحضنه يمسح على راسي ما حچه شي بس يجر حسرات..

-شسوي وياچ اني شلون بيه

-شمعرفك بكل هاي الشغلات منو يحچيلك؟

-عندي مصادري الخاصة

بقيت على صدره ورفعت بس راسي عليه، نزل عيونه وابتسم يتأمل وجهي..

-يعني هاي الاسبوعين انتَ مزاعلني لهذا السبب؟

-اي شكد بسمرتچ ردتج تجين تحجيلي كلت عسى ولعل يفيد وياچ بس ماكو مغلسة ولا يمهه

-ما مغلسة كلش زعلت من تركتني وخفت تطلگني

-هههه اطلگچ؟

-اي خفت ترجعني لغدير وتستفرد بيه وبعد محد يدافعلي

-افكر بهاي السالفة عود

-شنوو

دفعته بسرعة وصرت مقابيله ميل زاوية فمه وكال وهو يمطي ايده..

-اي يمكن صدك هذا الي راح يصير شنو فائدة وجودچ يمي اذا غدير بعدهه تأذيچ

-لا لا لا بعد متأذيني ما اسمحلهه والله

-ما اصدگ ما تگدريلهه

-اجي احچيلك كلشي والله العظيم كلشيي ما اضم عليك سالفة ابد وانتَ تاخذ حقي

-نشوف عود راح تتغيرين لو لا

-اتغير والله بس انطيني فرصة اخيرة راح احچيلك كلشي

-ماشي بس بعدني زعلان

-لا حباب لتزعل كافي

-لا ازعل شلون تخليهه تضربج ببطنچ وتطلع روحچ؟؟ ولچ متت من القهر شعوطت روحي من عرفت صار عندج نزيف واخذوچ للطبيب وما گلتيلي!

نصيت خجلانة فعلاً هذا الصار قبل عشرة ايام رحت لبيت اهلي مريضة عندي لعبان نفس ودوخة غدير سألتني شبيچ من گلتلهه هيج شفتهه ضاجت، ما اجه ببالي ولا تخيلت راح تفكر اني حامل..

رحت لغرفة رقية اكعد وياهه ونمت بالكاع على رجليهه اجت غدير عود دتكعد ويانه وداست ببطني حيييل متعمدة طلعت روحي حرفياً فوراً تقيأت وتخربطت رحت للحمام شفت كام ينزل دم رحت للطبيب گالو هاي الشهرية نزلت من وكت اثر الضربة ومابيه شي، بس غدير كل عقلهه اني سقطت متصدك اني مو حامل..

-سارة: اسفة حمزة ثق بيه كلشي احچيلك بعد

-ماشي

تمدد بمكانه واني واكفة اشرلي اروح انام بصفه گتله بس افرش وارجع، فعلاً بسرعة بسرعة فرشت اسناني وغسلت وجهي ورحت اطفر على الفراش فرحانة لان تصالحنه..

-حمسة

-هاا

-داليا شتصيرلك؟

-داليا سكرتيرتي؟

-اي

-كتلج سكرتيرتي

-هواي تتصل بيك

-اي علمود الشغل

-احلف

-والله العظيم

-احسهه تحبك

-هههههه لا يمعودة

-والله اني احس بهذا الشي وانتَ هم مبين تحبهه

دار وجهه عليه صرنه وجه بوجه فاتح عيونه متفاجأ من كلامي، قهقه خفيف وكال..

-من كل عقلچ؟

-اي

-واذا طلعت احبهه صدك شتسوين؟

-يعني تحبهه؟

-فرضاً كتلج اي شنو تسوين؟

-مادري بكيفك

-بكيفي؟

-اي حقك هذا

ابتسم وهز راسه اي، بقى السؤال يحوص بگلبي اريد اعرف صدك بيناتهم شي لو لا، عضيت على شفتي السفلية افكر شلون اصوغ السؤال واشوف عيون حمزة مثبتهن عليه ما دارهن، قاطع افكاري من همس..

-حمزة: ماكو شي بيني وبين داليا اني مديرهه وهي موظفة تشتغل عندي

-هاا والله؟

-وروح يوسف

-بس احسهه تحبك

-مادري عنهه

-عادي اذا تريد تحبهه حمزة لا عبالك ازعل

-بس اني احب

عكدت حاجبي متسائلة مادري بي يحب ولا شكيت بهيج شي، ابتسمت اشجعه يكمل بس ما حچى..

-سارة: صدك تحب؟

-اي

-منو هي تكدر تكول اسمهه؟

-لا ماكدر هسة بس احبهه هواي

-صدك؟

-ما تغارين سارة؟

-لا بالعكس اتمنالك السعادة

-بس اني اغار اذا حبيتي غيري

جمد فص عيني ماكدرت احول نظراتي عنه، بلعت ريگ متوترة من تلمس خدي ولعب بشعري..

-احرگه اليتقرب منچ وياخدج

-بس انتَ تحب؟

-عادي

-يعني تحب وتريدني هم يمك شلون هاي

-اي عادي الشرع حلل اربعة

ضحك وراهه ابتسمت على ضحكته واضح ديستهزأ بالموقف..

-سارة: حمزاوي

-عيوني

-يجي يوم تعرفني على التحبهه

-ادعيلي تحبني

-يعني هي متحبك؟

-لا

-ياا حرامات والله بس تعرف هذا الحب يتعب من طرف واحد

-يهد الحيل

-كلش اي الله يساعدك

-ويساعدچ

-كلش عندي فضول اتعرف عليهه

تأفأف متضجور سكتت بسرعة استحيت يمكن لحيت وياه، گلب عيونه وضرب خدي بأصبعه بخفة..

-نامي

-حبيبتك تشبه داليا؟

-هههه تروح وترجع على داليا

-بنفسي اعرف ليش مخلي هيج سكرتيرة تنرفز

-ليش شبيهه؟

-لبسهه مو حلو

-دمرتني بلبسهه

-هااا يعني لهدرجة تغريك؟

-شنو تغريني ولج طلع بلساني شعر واني اگلهه بطلي هذا اللبس بس مايفيد تحب تستعرض بجسمهه

-اطردهه ختولي

-ماكدر

-ليش؟

-لان وراهه سالفة هاي داليا

-تكدر تسولفلي؟

-اي

-اوكف خليني اكعد عدل

-لا نامي خلينه هيج

ارتبكت وجهه قريب مني كلش بس ما خليت هالشي يأثر عليه وفتحت عيوني مركزة وياه..

-بيناتنه هذا الكلام ماشي كناري؟

-اي اكيد اي

-داليا تشتغل لشركة شمسون

-جاااااسوسة؟؟؟؟

غمض عيونه حيل من صرخت بوجهه انتبهت لروحي وغطيت حلگي وهمست معتذرة..

-حمزة: على كيفج كناري

-اسفة، داليا جاسوسة لشمسون؟

-عندي شك بنسبة 80% اي، صارلهه اكثر من سنة تشتغل عندي صدتهه اكثر من مرة تحجي ويه مالك اساساً جانت تشتغل بشركتهم واجت قدمت عدنه

-زين شعجب شغلتهه؟

-لان من خلال داليا جاي نعرف حركة وخطوات شمسون وجاي تفيدنه

-شلون هيج يعني هي تحجيلكم؟

-لا بس من تجيني المكتب نشتغل سوه وتاخذنه السوالف احجيلهه عن شغلات وهمية وهي تزودني بمعلومات تخصهم هي ممكن متخيلة هاي المعلومات سخيفة او تافهه وأي احد ثاني راح يشوف هذا الشي بس كل معلومة تفيدنه ولازم ناخذهه بعين الاعتبار

-حمزة هي تحبك والله

-ولج كافي سكتي لعبت روحي من طاريهه

-شبيك اني شفتهه اعرفهه من عيونهه ومن طلعت من المكتب مالتك مبتسمة وفرحانة

-ماحبهه لو تموتين ديلا

-هههههه تحب حبيبتك المجهولة

-ما ابدلهه بالدنيا

-عرفني عليهه واضح تحبهه هواي

-اموت عليهه

-اتخيلهه حلوة

-احلى بنية شافتهه عيني

-فرحتلكم ربي يجمعكم ويه بعض

ذب حسرة وگام مني گعد على حيله منطيني ظهره، ابتسمت وغمضت عيوني حتى انام.. حسيت بي يطلع بره الغرفة واخذ الحاسبة وياه يمكن ما جايله نوم..

مشى وقت هوايه جفاني النوم من الفرحة كلش كيفت من عرفت سبب زعلته وحقه يزعل عليه اني اچذب عليه وما احچيله من غدير تأذيني..

سويت روحي نايمة من حسيت بالباب تنفتح خفت يشوفني كاعدة ويرزلني، احس بحركته خفيفة وهادئة حط الحاسبة على الميز وطفى الضوه الغرفة صارت ظلام دامس، اجه ينام بمكانه وهمس..

-استغفر الله لعنة الله على الشيطان

خنست حتى النفس قطعته من گال..

-سارة؟.. سارونه كاعدة؟.. كناري كاعد؟

مجاوبت، انگلب لجهتي وانفاسه ضربت وجهي ماعرفت شديسوي بس ماكدرت اجاوبه اخاف اترزل وهذا فخ..

-سارة.. حبيبتي

گلبي وگف من باس طرف انفي وضحك خفيف، تبسمرت وما حركت ساكن..

-سارونة اذا كاعدة كومي اريد احاچيچ

فخ هذا سارة والله فخ هسة يعيط عليج ويعاقبج، ما انطيته اهمية وبقيت امثل النوم، مسح على خدي وشعري وهمس..

-حلوتي

ذب حسرة عالية نبض قلبي توقف من طبع قبلة على شفايفي وهمس..

-احبچ

الصدمة الي احتلتني كانت كفيلة حتى تتوقف كل وظائفي الحيوية عن العمل، قسماً بالله احس اطرافي انشلت برد جسمي فجأة، نويت افتح عيوني بس بطلت من كال..

-احبچ حيييل احبچ.. ياربتچ تحسين بيه وتحسين بعذابي

تلمس خصري بخفة ووزع ايده على جسمي، اعرفه ضامن ما راح اكعد بسبب نومي الثگيل شدني عليه بدون لا يحرك جسمي هو تقرب..

-هم انعم الله، نبقى هيج راضي بس كون ما تكعدين

رجع طبع قبلة على وجهي بخفة حتى ما احس، كزبر كل جسمي من حسيت بي يشمني..

-شلون انسيچ العشتي؟ شلون اگدر اعوضچ الفات، شوكت نرتاح سارة شوكت سنيين اتمنى هاي اللحظة انتِ مرتي اتحلم بهذا اليوم بس ما دريت راح اتعذب هالكد واتعب

شال ايدي وحطهه على مكان گلبه، لوما الظلام چان انفضحت وانتبهلي كاعدة بس الظلام ستر عليه..

-مستعد نبقى هيج طول العمر المهم انتِ يمي ونحط راسنه على نفس المخدة ونتنفس نفس هوا الغرفة كافي عندي، لو بس تعرفين شكد احبچ ومتعلق بيج.. مرض صار حبچ نهش روحي

مشى بأصبعه من خدي لبقية وجهي، حضن رقبتي بكف ايده..

-بعمري ماحبيت غيرج ولا راح احب تبقين انتِ الاولى والاخيرة

سكت شوية يبوس بيدي ووجهي بلهفة هادئة، ضحك بخفة ماعرف ليش اخيراً كال..

-هههه مسودن اني وعلي كل يوم اعيد نفس الاسطوانة وانتِ نايمة بغير عالم ما تعرفين شكو ماكو

معناهه كل يوم يعيد نفس الشي واني مادري؟ گام مني وراح يفتح باب البلكونه الصدمة ما فارقتني احس گلبي راح يوگف والله العظيم.. مديت بس راسي اشوف شنو جاي يسوي ووصلتني ريحة الدخان مال جگارته حطيت ايدي على راسي اجمع الصار بس ماكو عقلي يقره ايررور..

**

"مريم"
فتحت عيوني الصبح على اثر لمسات سارة وهي تگعدني، فركت عيوني اباوع للساعة بالـ 11:30 الصبح اليوم ماكو دوام صباحي بسبب الحفل..

درت انظاري على سارة شفتهه مبتسمة وكاعدة على فراشي، رجعتلهه الابتسامة ومطيت نفسي..

-ليش مگعدتني هيج وقت ولج سويرة اريد انام بعد

-سارة: اني اجيت من الثمانية الصبح هنا كل شوية اريد اكعدج واكول لا خطية بس هسة بعد ماعندي صبر

-خير؟ صاير شي؟

-لا لا اليوم الحففففل الحفل اليوم الحفللللل

كامت مني تنطط فرحانة وراحت تركض على المراية مالتي، فتحت شعرهه تلعب بي وتضحك..

-مريم: اليوم متحمسة سارونة

-سارة: اي متحمسة للحفل ابوية يكول كلش مهم ولان راح يجون من مختلف دول العالم لازم كلنه نكون متأنقين وكاشخين احسن كشخة

-مريم: هاا خير ان شاء الله

كمت اخذت منشفة ورحت للحمام سبحت وطلعت ادور بعيوني الغرفة سارة ماكو، رحت للكنتور اطلعلي تراك وزفرت نفس متعب من لمحت عيوني ملابس الاطلس..

حتى البارحة ما اجه من بعدما طلعت من المكتب مالته هو طلع ماعرف وين وحتى للبيت ما رجع، نفضت الافكار من راسي وبدلت بسرعة ومشطت شعري، حطيت على راسي شال ونزلت..

ماكو احد البيت فارغ توقعت الكل طالع بس اكتشفت كلمن حاير بكشخته بالغرفة مالته، رحت للمطبخ سويتلي لفة اكلتهه گوة مكتئبة ومالي واهس شي..

كملت غسلت ورحت لغرفة رقية من سمعت صوت سارة اليوصوص طالع منهه، فتحت الباب واشوفهن مهوسات الغرفة وكاعدات يتناقشن على الاكسسوارات..

-رقية: صباح الخير

-مريم: صباح النور هاي شنو الهوسة

-سارة: تعالي اختاريلي اللبس هذا لو هذا؟؟

رفعت نوعين تراچي واحد نازل وواحد مدور صفنت افكر شنو تختار حرت ماعرفت شنو فستانهه بعدني دا اسألهه عن فستانهه وگمزت للمراية..

-سارة: اللبس النازلات احلى احس مو صرصور؟

-رقية: صح

ابتسمت وكعدت وياهن اختارلهن اكسسواراتهن الباقية، ركزت انظاري على سارة بيهه حماس عجيب وجهها يضوي والابتسامة ما فارقتهه كلما تصفن تضحك وحدهه وترجع تنشغل ويانه..

وكفت على المراية تعدل شعرهه وتتأمل شكلهه سوت بوز وتخوصرت..

-سارة: بنات اني حلوة؟

-مريم: اي لعد شبيچ

-سارة: لا لا يعني حلوة اني حلوة لدرجة حبيبي يشوفني احلى بنية تشوفهه عيونه؟

-رقية: اي عادي هو اليحب يشوف حبيبه احلى واحد

-مريم: اتفق ويه رقية بس شنو مناسبة هذا السؤال؟ ومنو حبيبج عيونييي

-سارة: لا لا هو بس سؤال عادي، باعن يعني كـ مثال مو صدك بس مثال هذا حمزة اني مو متزوجته؟ اي حمزة يعني تتخيلون يشوفني لهدرجة حلوة؟

-رقية: اي اصلاً من زمان چان يكول عنج حلوة ويصيحلج كناري

-سارة: ها صدك؟

-مريم: هههه سارة شبيچ مشوشة شصاير

-سارة: ولشي بس احسني مو حلوة باعن رموشي وحواجبي حمرات

-مريم: حبي هو جمالج برموشچ وحواجبچ اشوفهن كلش حلوات ومميزات

-رقية: بدون مجاملة حتى اني اشوفهن حلوات كلش

-سارة: زين يعني برأيكم حبيبي يحبهن؟

-رقية: ولج هو منووو حبيبج كتلتينه

-سارة: ولجن بالمستقبللل

-مريم: اه مادري اذا حمزة اي متأكدة يحبهن بس اذا غيره اصلاً ميهمني خيولي

-سارة: ههههه ليش

-مريم: لان ماشوفج الا ويه حمزة ومترهمين لغيره

-سارة: اممممم نشوف عود

-شتشوفين؟

عصرت عيوني حيل وامتعضت ملامحي من شفت غدير تدخل علينه مضيگة عيونهه وتباوع لسارة..

-سارة: اشوف اذا حبيبي راح يحب شكلي لو لا

-غدير: اهااا ومنو حبيبج؟

-مريم: بنات اسيل راح تجي للحفل؟

-رقية: اي اكيد اكيد اتصلت بيهه اليوم

-غدير: سارة منو حبيبج؟!

-سارة: بعد ما معلوم لسه

-غدير: هااا خوش

-سارة: بنات على طاري الحب شنو رأيكم نسافر لمدينة الحب؟

-غدير: وشنصخم بمدينة الحب؟؟؟

-سارة: نتونس ونترومس ههههه

-مريم: ههههه سارة طالعة عينج

-سارة: والله خلونه نسافر ضوجة

-غدير: انچبي وكعدي تريد تترومس الصهبة هو منو اله خلگ يباوع لوجهچ

-سارة: ميهمني اني اباوع لوجهي

-غدير: ولي ولي انتِ والنمش المسوي غزو بوجهج

-سارة: حلو وعاجبني اشوفه ضايفلي جمال خاص

-غدير: ههههههههه اي قنعي روحج بهذا الحجي

-سارة: ميخالف هو اني اريد اقنع روحي

-غدير: ولج شو صايرة تراددين!!

-سارة: مو ارادد بس بكيفي يا اختي انتِ متحبين شكلي اني احبه اختلاف اذواق

-مريم: كافي عركات من الصبح شجاكم! سارة اني اروح ابدل بغرفتي اذا تحتاجيني

-سارة: ماشي حبيبتي

رجعت لغرفتي توضيت وصليت، كملت وفتحت كنتوري اشوف شنو اللبس ماعرف عقلي مو وياي وحتى تنسيقات مجاي ترهم بعقلي، انتبهت على دگ الباب سمحتلهه بالدخول..

-اجيتي والله جابچ سارة تعالي اختاريلي شي اللبسه

هزت راسهه ووگفت تگلب بملابسي، طلعت فستان طويل محتشم بس قماشته ثگيله وراقية اشترته الي نانا قبل لا اطلس يعرفني زوجته..

طلعته من الكنتور مبهورة على جماله، ردن طويلة وبي رقبة، لونه بنفسجي دانتيل كله من فوك ليجوه، الفوك كله شغل فصوص ناعمة وينزل دانتيل سادة..

-مريم: حتى اني فكرت اللبسه بس كلت خاف مبالغ بي؟

-سارة: بالعكس كلش مناسب يله يله بدلي خلي ارهملج شال وحذاء

-مريم: ماشي

وكفت بالزاوية ابدل احتاجيت مساعدة قماشته كلش ثگيله ومسقولة صحتلهه تسدلي السحابة اجت وشفتهه مطلعه ربطة ستن اوف وايت ابتسمت على التنسيق تخيلته يطلع انيق كلش..

-سارة: خلي اشوفلج حذاء من رقية يناسبه لان انتِ ماعندج هيج لون

-مريم: مو نفس القياس اني ورقية

-وغدير؟

-لا لا بشرفج ماريد منهه

-معليج متكول لا متهتم هي

-هسة تعايرني

-يمعودة هو حذاء قحط

عافتني وراحت شوية ورجعت بيدهه حذاء كعب عالي من غدير، استغربت من كالت بسرعة انطته..

-سارة: شبيچ مصدومة تره غدير تنطي اغراضهه متهتم اصلاً كالت لترجع الحذاء خليهه تاخذه

-مريم: لا ارجعه ماريد اخذ شي من احد وهسة لوما متوازية ما اخذ، اكلج هذا شبي ليش ما اللبسه؟

-سارة: مريم ميرهم هذا لونه نيلي مو حلو عوفي معليج لبسي مال غدير

ماردت اللبسه بس انحرجت ولبسته، اجتنه رقية تشوف وين وصلنه باللبس فرحتني ردة فعلهه وانبهارهه بكشختي، تشكرت منهه ووگفت اتعطر بعطر هادئ كالعادة جريت مرطبي الخاص احط ورقية كالت..

-مريم اريد اعرف شنو السر بهذا المرطب مالتج؟

-سارة: بي سر؟ هو مرطب عادي حتى احنه عدنه من هذا النوع

-رقية: لا ولج بسملة گلتلي مرطب مريم يسوي الايدين تلمع ولونهه متوحد كالت اخذي السر منهه

-سارة: صدك مريومة؟

-مريم: اي صدك، شوفو اني استخدم أي نوع مرطب مو نوع معين تره بس اهم شي ميكون بي عطر قوي يعني مرطب يرطب الايد مو بس يترسهه ريحة

-رقية: زين؟

-مريم: واني شنو اسوي، اشتري كبسولات فيتامين E من الصيدلية احط فد اربعة او خمسة بعلبة المرطب وبعدين اخذ ملعقتين او ثلاثة كبيرة زيت اللوز وهم احطه بالمرطب وارجه زين وابقى استخدمه باليوم مرتين

-رقية: وشفتي نتيجة عليهن؟

-مريم: اي طبعاً اني من جنت ببيتنه جنت احوش الزرع تعرفون؟ اطلع واشتغل وايدي تتعب بس اني متعلمة على هذا الروتين صارلي سنين وابد ايدي متتأثر

-سارة: خلينه نسوي رقية

-رقية: اي اكيد، زين مريم عادي احط اكثر فيتامين E؟

-مريم: عادي بكيفج اصلاً تعرفين اني اوقات من ايدي كلش تتعب اجيب كبسولة فيتامين E واكسرهه بيدي وادلكهه بس بالزيت اليطلع من الكبسولة ايدي تبقى تلمع تخبل

-سارة: لازم اسويهه ولو اني بيضة بس ميخالف ميضر نصير بيضات اكثر ههههه

ضحكت وياهن وراحت رقية تكمل تجهيزهه، اجه ببالي اللبس السوار الهداه الي اطلس "دمليج الاسود" حرت مادري يرهم لو لا بس ماهتيمت لبسته شكله حلو وراقي..

كملت كلشي ووكفت اتأمل نفسي برضا مقتنعة بشكلي وفرحانة بي، مر وقت لا بأس بي وطلعت ويه السايق لمكان الحفل لازم نوصل قبل المعازيم..

فرحت اكثر بأطراء تينا وضحى على فستاني وبقيت وياهن كاعدة نسولف بالمكان وجماله، السوالف اخذتنه ما حسينه بالوقت يمشي اله من انترس المكان معازيم..

-مريم: اگلكم اجو اطلس واهله؟

-ضحى: من زمان وينج انتِ عيني وحتى اطلس جان يباوعلج طول الوقت وانتِ مطنشته

-مريم: مانتبهت والله تينا شعجب ما نبهتيني هالمرة

-تينا: مادري اني هم ما مركزة

دورت عليهم بعيوني شفتهم واكفين بعيد عنه وعلى جهة كلهم العائلة، متأنقين كأنهم احجار كريمة ثمينة يلمعون تحت الاضواء انيقين وواضحة عليهم الحياة المخملية الي عايشيهه..

كسرت عيني من اطلس دار وجهه ناحيتي همزين لحكت ما شافني اباوعله..

-تينا: مريم ليش مو وياهم انتِ؟

-مريم: لان بكل بساطة محد يعرفني زوجة الرئيس

-ضحى: غريب

-مريم: شنو الغريب؟

-تينا: غريب ان صارله فترة طويلة يعرفج زوجته وما اعترف بيج؟

-ضحى: ولا اهله زين ممكن هو يشوف الوقت مو مناسب اهله ليش ما صاحوچ؟

انعقد لساني من الموقف ضاعت الحروف ماعرفت بشنو ابرر وشنو اكول فعلاً ليش محد اجاني منهم؟

-مريم: مادري

-تينا: الوضع مو حلو صاير مريم ماحب تعيشين هيجي عيشة متستحقين انتِ

-مريم: هياتهن اجن سارة ورقية واسيل

عوجت حلگهه ضحى ضايجة من تصرفي اعرف تقصد الكبار لازم يعترفون بيه ويوگفوني وياهم بس ما خليت هالشي يسيطر عليه..

-سارة: يا جمالچ شطالعة مريومة

-مريم: انتِ شطالعة شنو هالفستان اليخبل

دارت حول نفسهه تضحك فرحانة متأنقة بفستان اسود سادة قماشته ثگيلة يمكن يسمو شامواه وصاير ربع ردن وحاطه فوگه شال هم ثخين ورافعة شعرهه كله بتسريحة بسيطة ولابسه تراچي طويلة..

انداريت على اسيل متقل اناقة رغم جايبة بالجديد بس صحتهه ممتازة ما شاء الله، ورقية هم طالعة جميلة حرفياً يسحرون العين بجمالهم، گعدن ويانه على الطاولة نسولف شوية وسألت عن حال ابن اسيل ما كدرت اروح اشوفهه وره ما جابت..

-اسيل: الحمد لله هو بخير تركته ويه المربية عادةً بلقيس تبقى وياه من اطلع بس بلقيسه ويانه اليوم

-مريم: صدك وينهه؟

-سارة: هسة شوية وتجي

-رقية: بنات امي تأشرلنه امشو نروح

-سارة: يله مريم امشي ويانه

-تينا: هاا حلو مريم يله روحي بسرعة

-مريم: لحظة، خالة حصة صاحتلي وياكم يعني؟

-رقية: لا بس امشي ويانه ليش كاعده هنا

-اسيل: مريومة ما تحتاجين عزيمة انتِ چنتهم

-مريم: لا ميخالف ابقى ويه صديقاتي هنا

-سارة: مرايم شبيچ؟

هزيت راسي مبتسمة تقربت على سارة وهمست..

-مابيه شي ابقى ويه تينا وضحى عيب اعوفهن خطية

هزت راسهه بدون لا تعلق وگامت تروح لحمزة تابعتهه بعيوني استقبلهه بأبتسامة ويحجي وياهه وهي تجاوبه بأبتسامة خجولة..

انعقچت مالي نفس لأي شي توقعت بس اني ملاحظة برود اطلس بخصوص اعلان زواجنه طلع حتى تينا وضحى منتبهات شكد حسيت روحي صغيرة ووضيعة..

-تينا: اجت الطاووس

حولنه انظارنه للبوابة وجان اشوف نورسين تدخل ويه ابوهه، استحقرت كلشي يخصهه مشيتهه، لبسهه المغري، شعرهه، من راحت تسلم على اطلس وحضنت كف ايده بين ايديهه لعبت نفسي وبأي لحظة راح انفجر..

-ضحى: تنرفزت واني معليه

-تينا: شكد مقرفة اموت منهه

الي هدأني شوية ظهور نانا اول مادخلت تدور بعيونهه ماعرف على شنو الابتسامة شقت طريقهه لوجهي من لاحظت دتدور عليه، مجرد شافتني لمعت عيونهه فرح واجت تحضن وتبوس بيه..

سلمت عليه بحرارة وكعدت ويايه على الطاولة الموجودين حوالينه ظلو يرمقونه بنظرات غريبة بس ماهتميت، كعدت فوك النص ساعة يمي متقبل تكوم كل دقيقة وكايلة..

-مرايم العبيطة مشتاقتلج

-مريم: اني اكثر نانا

-نانا: هيج يا امي تعوفيني وحدي ليش ما طمنتيني عليج

-مريم: نانا المهم هسة رجعت هاي شنو عيني شلون جمال هذا صغرانة عشرين سنة

ضحكت بصوت وضربتني على كتفي، ردتلي روحي بشوفتهه وارتاحيت، ما كامت الا من شفنه الاطلس واكف فوك روسنه..

-الاطلس: مساء الخير

-تينا، ضحى: مساء النور مسيو

وگفو يلقون عليه التحية كامت وياهن نانا وجرتني حتى اوكف بجانبهه، ما حجيت وياه وهو هم ما عبرني راحن تينا وضحى وتركونه وحدنه، ابتسم لـ نانا ولزم ايدهه طبع قبلة خفيفة عليهه وهمس..

-شلونچ عمري

-نانا: زينة انتَ شلونك حبيبي وليدي

-الاطلس: مو زين مشتاقتلج وانتِ گاطعة حرتي بأسيل ونسيتيني

يحجي بزعل ضحكت نانا ولزمته من ايده واشرت بعيونهه عليه..

-نانا: عوفني هسة شوف هذا الكيك

ابتسم وهز براسه اخيراً دار عيونه عليه ووخرهن بسرعة حمحم وعدل وگفته..

-شلونچ مرمر.. مريم؟

-بخير

-لطيف

-اكيد لطيف الحمد لله صحتي ممتازة ومرتاحة هم هالايام

-نانا: واضح سمنانه بس شكد حلوة صايرة

-مريم: اي ههههه انفخت نانا ماعرف ليش

-الاطلس: من الراحة اكيد

حولت انظاري عليه وجهه مطنگر ابتسمت وجاوبت ببساطة..

-لا مو هيج بس ماكو شغل واني من النوع اذا اكعد اسمن

-نانا: كثري گعدة حلوة بالسمن

-مريم: يااا غير تدللين

ضحكنه ثنينه وهو واكف كلمة ما نطق وجهه ميگصه السيف تركنه ورجع يسلم على الناس..

-نانا: معليج بي عود يبيع ثگل عليج

-مريم: ما طايقني ابو ريحة

-نانا: ههههههه طايقچ وميت بيج اني اعرفه زين

-بعد مادري والله يا نانا

-قبل لا ترجعين اجاني مرة تعبان كلش وزعلان على فراقچ يگلي نانا مايمكنش لهضرا تعبر على الحب الكبير لي كنحس بيه تجاهها

-مريم: اي هواي صدكت نانا الكلمات متعبر عن حبه تجاهي مو

-مريم ما كذب والله

-ادري بيج حبي يله روحيلهم عمو محمد وخالة حصة يباوعولج

-طيب

ابتسمت وجرتني من ايدي تصافحني هاي حركتهه، نزلت عيونهه لايدي وغابت ابتسامتهه..

-نانا: هذا شنو؟

-مريم: ها ما راويتج اني هذا دمليج اسود اطلس جابه الي بعيد زواجنه

-اطلس انطاه الج؟؟؟

-اي

-شعجب يعني.. تصميمه مميز

-اي كلش مميز كال صديقه ساعده بأختياره

تغير كل وضعهه بلعت ريگهه ونفسهه اعتلى جرت كلاص المي الي على الطاولة شربته وابتسمت مجاملة..

-اني اروح بعد حلو بالعافية حبيبتي

-نانا انتِ تعبانة؟

-اي دخت شوية

عافتني وراحت، كلمن رجع يكعد بمكانه من حچو بالسماعة راح يعرضون صور المجموعة الجديدة، رجعن صديقاتي بصفي نتناقش عن الصور وتينا شرحتلي عن ثيم المجموعة الخريفية..

قطعت كلامي من ظهرت صورة للاطلس على شاشة عملاقة متوسطة المكان فتحت حلگي ما مصدگة هو عارض هاي المجموعة!!

-تينا: سوو سبايسي

-مريم: شنو هاي بنات اطلس عارض هاي المجموعة؟؟

-تينا: ليش متدرين؟

-مريم: لاا ماعرف كلشي ماعرف اني شنو ديصير اطلس مو ميقبل يكون عارض؟؟

-ضحى: ما صار عارض بس هاي المجموعة مميزة ومسيو محمد راد مسيو الاطلس هو يعرضهه

-تينا: يفتهمون والله نسبة مبيعاتهم راح تطفر لان رئيس الشركة استفتح العرض خرب عقلك مسيو محمد شلون يشتغل

-ضحى: يعرف يستغل جمال ابنه عدل

ضجت اكثر ماعرف شبيه كلشي صاير يضوجني فكيت شوية من رحت اغسل وتوجهت للبوفيه اجيب عصير، ابتسمت من شفت عمر واگف يحجي ويه وحدة من الوفد..

-عمر: Excuse me، آنسة مريم؟

-مريم: اهلاً استاذ عمر

-عمر: توقعتج ما جاية ما شفتج

-مريم: حقك اي ما شاء الله المكان مزدحم

-عمر: اي اهم مجموعة هاي لدرجة اطلس عرضهه

-مريم: حتى انتَ عارضهه

باوعت لايده وللمحابس الهواي اللابسهن ابتسم وهز براسه اي، اخذ رشفة من العصير البيده وترخص مني يكمل طريقة مشى شوية شاف اسيل دتجي بأتجاهه عاد ادراجه الي وكال بسرعة..

-عمر: سولفي وياي

-شنو؟

-سولفي وياي.. هههه اي شلونهه بسملة؟

-مريم: بسملة؟ زينة بخير

-عمر: غير تجيبيهه مريم حرامات

-مريم: ياا شعليك بيهه

-عمر: تونسني هواي هالبنية روحهه حلوة...

اجت النه اسيل مبتسمة وكفت بصفنه وحجت موجهه كلامهه لعمر..

-هلو عمر شلونك

-عمر: يا هلا بأسيله تدرين ما شفتج

-اسيل: اي انتبهت من اول ما وصلت أشرلك بس انتَ ماكو ما منتبه علي شافني وانتَ ما شفتني وانتو واكفين بصف بعض هههه

-عمر: اي والله الشغل متعبني هالفترة تركيز ماعندي

ضميت حلگي اخفي ابتسامتي شكد جذاب بس زين يسوي جاي يتهرب منهه اكيد حتى ينساهه..

-عمر: اي مرايم بسم الله الرحمن الرحيم ما جبتيهه ليش؟

-مريم: يمكن لان هي عايشة بغير مدينة

-عمر: هههههههههههه مشتاقلهه وعلي

-مريم: نعم؟

-اسيل: مشتاق لاخت مريم شعجب

-عمر: حبابه كلش ولسانهه طويل احم

-اسيل: يعني بيناتكم علاقة؟

-مريم: لا طبعاً شسالفة اسيل اختي ماعدهه هاي السوالف

-عمر: لا اسيل شنو علاقة بس هي محبوبة وصرنه اصدقاء البارحة اتصلت بيهه

فكيت حلگي على الجذب اصلاً بسملة ماعدهه موبايل وهاي اسيل مصدكة..

-مريم: استاذ عوف بسملة

-عمر: يمكن اخطبهه

-مريم: عززززه

-اسيل: صدك والله؟

-عمر: يعني اكو هيج فكرة ببالي

خزرته بحدة باوعلي متوتر گام يچفص ميعرف شيحجي هيج تأثير اسيل قوي عليه..

-اسيل: البارحة عزمناكم على الغده ليش ما اجيتو؟

-عمر: شغل اسيل وعلي ما جاي اشوف دربي

-اسيل: هاا ماشي

-عمر: ضجتي؟

-اسيل: لا عادي براحتك معذور

-عمر: كلش جاي يتعبنه خالي تعرفين ايفنت وهوسة ياخذ كل طاقتنه

هزت راسهه مبوزة انتبهت عليهه ضايجة بس ما علقت عمر علق..

-عمر: مبين زعلتي اسيل اني اسف اجي غير وقت وعد

-اسيل: لا ما زعلانة لان ما اجيت بس زعلانة على كذبتك

ضحكت بزعل وجرت شعرهه لوره اذنهه، صفن عمر بوجهها واندار يكل جسمه عليهه..

-عمر: لا ماجذب

-اسيل: ماشي من رخصتكم

عافتنه وراحت ضرب وجهه حيل وذب نفس كتفت ايدي ورافعتله حاجبي مستنكرة تصرفاته الغبية..

-عمر: ادري اني مطي عليج العباس لا تزعلين مني

-ميريم: متصل ببسملة؟؟

-عمر: ماعرف شلون طلعت من حلكي ردت اكول دعاء وتذكرت دعاء مخطوبة لاخوي راح ابين جذاب

-وشنو خواتي حايط نصيص

-عمر: اسف والله ادري غلطان وعيب عليه

-مريم: انوب يريد يخطبهه عشتو

-عمر: يابة يا كلمة ردي مكانج انسي السالفة

-مريم: ماحبيت تصرفك كلش عيب بحقي وحق اختي

زفر وشرب العصير البيده كله، فرك وجهه ومدهه ناحيتي يراويني شي انتبهت لاصابعه ترعش..

-عمر: اني بيا حال مريم باعي حالي راح اخرط

-مريم: لهدرجة صاير تتوتر من وجودهه؟

-عمر: كلش، صار موقف غبي قبل فترة وعلي زاعلني اسبوع ما يحاچيني ماريد اكرر الموضوع واچفص وياهه ولو اني چفصت هواي وراحت زعلانة

-حتى اني انتبهت بس ليش زعلانة؟

-عرفتني اجذب البارحة عزمنه ابو حمزة على الغدة مسلم اتصل بيه كتله نايم واكيد وصللهه

-يااااا

-اي شلون سالفة هاي

-ميخالف بررللهه الموقف متأكدة راح تتفهم

-ما ابرر خلينه بعيدين احسن

-براحتك بعد

تركته ورجعت لمكاني اللتهيت رغم ضوجتي بس الحفل چان حلو ويونس صاحو بالسماعة رئيس الشركة راح يهدي اغنية لحبيبته، تينا ضربتني على كتفي وكالت بحماس..

-الج الج ولج الج هااي

-مريم: شنو؟؟ شمعرفج؟؟

-ضحى: شفنه اطلس يحجي ويه ابوه حماس

ماعرف شبيه كمت ارجف من الفرح والموقف شكد ماكول عنه حلو ماكدر اعبر، رغم ما اسمع اغاني وما اشجع بس فراشات صارت بداخلي من بدت المطربة تغني، الاغنية تحجي عن العيون..

وجهي ورد فرحة وامتنان وتينا تكرص بيه وتهمسلي "يحبج" كوة سيطرت على ابتسامتي استحي ارفع عيوني واباوعله بقيت اللهي روحي..

اخيراً رفعت عيني عليهم ما لكيت اطلس كاعد بس عمو محمد يهز براسه منسجم وفرحان كلش بالاغنية خالة حصة كاعدة بصفه وبصفهه نانا واسيل ومسلم..

-تينا: لا اختيار الاغنية غلط عيون مرايم سود

-ضحى: الاغنية كلهه غلط ومتعبر عن مريم!

ماجنت مركزة، ركزت ويه الكلمات فعلاً تحجي عن بنية عيونهه ملونة نبض گلبي بقوة ومعدتي كامت تگلب من ربطت الاغنية بعيون نورسين!

-مريم: اني راجعة للبيت بنات

-تينا: مريم وين اوكفي خلينه نفتهم

-مريم: كلش تعبانة ماكدر اكعد

كمت دا اروح وضحى جرتني تكعدني خازرتني وتحجي من بين سنونهه..

-ضحى: لا تهربين وتبينين روحج ضعيفة! كعدي هنا وواجهي هو المفروض يخجل من روحه مو انتِ!

عضيت على شفتي السفلية امنع دمعتي توكع فعلاً كلامهه صح رجعت اكعد بمكاني واباوع لمكانهم الكل منسجم ويه الاغنية وفرحان بيهه درت اباوع لاطلس شفته يوشوش لنورسين شي وهي مبتسمة شكد كرهته ولعبت نفسي منه!

كام عمو محمد وجر ايد خالة حصة ويغنيلهه وخالة طايرة طيور وحمزة وسارة هم عايشين جو ويه بعض ومسلم واسيل وكل الكبلات الي هنا..

ماعرف شلون كملت الحفل مثل السم صار عليه انتهيت وجهي طرگع من القهر تينا اخذتني للحمام تغسلي وتهدأني بس هيهات كل خلية بجسمي ترجف احسني بكابوس وماعرف شوكت اكعد..

طلعت اروح وشفت العائلة كلهم ديطلعون فرحانين ومكيفين شافتني سارة وصاحتلي اروح وياهم، بس الوگفني تصرف عمو محمد زرف گلبي من اشرلهه تعوفني وكال..

-ارجعي ويه السايق

الغصة ذبحتني ذبح عيوني كامت تجر دموع سارة اجت ملهوفة عليه تركتهه ورحت اهرول اخذت تكسي وانطلقت للمجهول..

ماعرف وين اروح الساعة بـ 11:00 بالليل والقاعة بعيدة عن بيت عيالي قررت اتصل بأهلي اروحلهم ولا اتحمل هاي الاهانة..

انطيته العنوان ما همني احد حتى لو الوقت متأخر والدنيا ليل المهم ما ابقى هنا، دكيت على امي ما شالته رجعت اتصلت بيهه جاوبتني بسملة حجيتلهه اني جايتكم وابجي منهارة انخبصت خبص ويايه تريد تفهم شبيه بس ماحجيت سديت الخط منهه..

السايق عيونه واذنه ويايه كل شوية يسألني شبيچ ما اجاوبه، تلفوني احترك نانا تتصل بيه وسارة ورقية بس ماكدر اشيله تعبانة وحتى الكلام ميطلع مني اتعلثم من احجي..

مشى السايق بيه عشر دقايق واجاني اتصال من ابوية، اتصال مليان بالانكسار والاهانة والرزايل يصيح بعلو صوته..

-ما تجيييين ما نريد بنية زعلانة تجينه

-مريم: مو زعلانة انييي مريضة واريد اجي يمكمم

-احمد: مو هذا الكتلتي روحج حتى ترجعيله ديلا اكليهه وابقي مانريدج اكسررر رجليج اذا عتبت باب بيتي

-كتلت روحي مو علموده بس حتى متكسر عيني!! راح اجي لأمي وخواااتي ميهمنيييي

-اكسرررهه لرجليج مريم ومحمدددد صيري خوش بنية ورجعي لبيت رجلج مانريدج احنه

طبگه بوجهي تخبلت ذبيت موبايلي ابجي مفرفحة روحي ماخليت السايق يرجعني كتله كمل الطريق حتى لو اروح اتعارك خلص طفح كيلي ماتحمل بعد ما استاهل كل هذا القهر يصير بيه..

رجع اتصل عليه ابوية ورجع يهدد ماعرف قره افكاري وعرف بعدني جايتهم، سديته منه وامي اتصلت بيه ترجف وتحجي..

-مريم لا تجين يمة سودة بوجهي ابوج قفل البوب علينه وحلف ما يفتحلج الباب

-مريم: حرررام عليكم والله حررررام

-شبيدي اني شبيددي

تحجي وتبجي واسمهه تلطم على شي ماعرف وجهها لو رجليهه خفت يصيرلهه شي هدأتهه وكلتلهه راح ارجع لعيالي بس هالليلة ماريد يصير بيهه شي..

كلت للسايق ياخذني لبيت عيالي ياربي ليش هيج ليش كلشي دينعاد ويايه نفس الضيم ونفس الكسرة ماتحمل بعد تعبت ربي عينني ونجيني من هالعذاب..

وصلت قريب الـ 12 للبيت نزلت البيت فارغ ماهتميت صعدت وبوجهي للغرفة اول ما فتت شفت اطلس واكف ديبدل ملابسه..

-الاطلس: وين چنتي؟

-بجهنم

ذبيت الجنطة من ايدي وكعدت على الفراش انزع حذائي، انقهرت من ما سألني ويامن راجعة بس عرفته عباله اجيت ويه سارة، تقرب مني مستغرب..

-شبيهن عيونج؟ باچية؟

-لا

-چا ليش حمر ووجهج احمر؟

-حساسية

-هاا سلامتج اخذي علاج

-ان شاء الله

احجي وياه گوة نزعت حذائي ورفعت راسي افل الربطة وشفته ديغير ملابسه لملابس طلعة وواكف ديبخ عطر..

-وين رايح؟؟

-طالع

-وييين؟؟؟

اللتفت عليه عاكد حاجبه ما عاجبه اسلوبي، ماهتميت رحت اركض عليه اخذت العطر منه وانتبهت لقميصه فاتح الازرار مو مال يلبس رباط معناهه مو طلعة عمل..

-ب 12 بالليل وين رايح اطلس بهذا اللبس والكشخة؟؟

-رايح اسهر

-نعم؟؟؟

-اسهر ويه جماعتي

-منو ذولة جماعتك مو هسة جنت وياهمم!

-انتِ شنو جاية تحاسبيني؟

-ايييي احاسبك وين رايح كوول وييين

-رايح مطعم

-مطعم بثنعشش بالليل؟؟؟

-اي

-من كل عقلك انتَ؟!

-نعم

حچاهه واندار للمراية فتح الزر الثالث من قميصه وعدل ياخته نااار واشتعلت بداخلي من رجع يتعطر مرة ثانية ويعدل شعره على المراية..

-منو رايح وياك؟؟

-اني والولد

-ونورسين اكيد

باوعلي بطرف عينه وما جاوب ما احتاجيت اعرف اكثر اكيد رايحة وياه، عفته ورحت اكعد على الفراش ارجع اللبس حذائي واعدل الربطة على المراية..

-شو جاي تلبسين؟

-اخذني وياك

-نعم؟؟

-اخذني وياك لهذا المطعم

-مريم كعدي راحة

-اريد اروح شبيك

-ما اخذج كعدي هنا

-لا اريد اروح

-ما اخذذذج كلت!!

-ماشي اروح ويه السايق

-وشمدليچ؟؟

-امشي وراك بالسيارة

-مرررريم ما ترحين لهذاك المكاننن

-ليش شبي مو تكول مطعم

-اييي بس مو مناسب الج

-شلون مو مناسب يعني هو مطعم ويقدمون بي اكل اني اصلاً جوعانة

-مرررررريم

-شبيك تعيط

-المطعم مو مطعم مطعم

-شلون يعني

-يعني اوووف ربي.. ما تجين وخلص

-ما اسكت الا تكولي ليش متقبل تاخذني

-ما يناسبج المكان.. ما يناسب البنات

-مو نورسين رجال

-شعليج بنورسين انتِ!

-لان كلامك مو مقنع

-ما يناسب البنات الي مثلج يله ارتاحيتي؟؟

-ما طلع مطعم هذا نادي ليلي حتى ما يناسبني

-تقريباً

-شنو!!

-اي تقريباً هيج شي

-هيج شي؟؟

-يعني يقدمون مشروبات واكو نسوان ويعني.. ما يناسبج انتِ شخصياً

-ويناسبك عادي

-مريم اني ما يهموني اروح بس اتونس وارجع

-مكان بي نسوان وشرب ومتروس حرام تروحله تتونس بي وترجع

-ما يهموني بشي اني اروح حتى استمتع

-تستمتع بالحرام!

-تره ما مسوي شي حرام لا اشرب ولا ازني مجرد اكعد ويه جماعتي ونغير جو

-لااا انتَ كلش مو طبيعيي

-لسانج مريم!!

-تروح لهيج مكان وتكول عادي يعني انتَ صدك تحجي لو بس تريد تغيضني كوول حتى افتهم

-اغيضچ شنو من زمان اني هيج ماتغير شي

-لا لا انتَ ما كايلي بهالشي من قبل

-تره هو مكان حاله حال المطاعم شسالفة

-مطعم؟ مكان بي شرب وزنا مطعم بنظرك؟

-اني شعليه بيهم والله تضحكين انتِ

-وانتَ تنرفز تدري لو لا! مكان بي كل هالسوالف الطايح حظهه وتكول عادي تروح هناك حتى تتونس وتغير جو شوية مو؟ باجر بجهنم كول لربك اني جنت اروح بس اتونس واغير جو ويه جماعتي استاذ اطلس

-مابيهه حرام شبيچ انتِ

-اي مو بكيفك الحلال والحرام صار

-سألت عنهه ماطول ما اشرب ولا ازني مابيهه حرمة

-هههههههههه صدك يعني؟

-اي شبيچ روحي سألي اذا تردين

-عزيزي من دون ما اسأل اعرف احكامي عدل، حكم شرعي واضح وضوح الشمس لا يجوز دخول الاماكن المشبوهه انتَ روح تثقف بدينك

-انتِ منين تجيبين هالفتاوي عيوني

-مادري والله يمكن لان اعرف ديني شنو واهتم بالحلال والحرام انتَ منين تجيب الفتاوي مالتك استاذ من سوگ الجمعة؟

-مريم بلا حجي زايد واستهزاء، ما اشرب ولا اسوي حرام وسويتيني فاسق ومنحط وراح اروح لجهنم

-اوكي يله عوفنه من الحلال والحرام بما انتَ "سائل" ماعرف منو وضاحك عليك، نجي للشغلة الثانية تريد تقنعني من تروح هناك متشرب كاس كاسين

-لا ما اشرب

-اببددد

-ابد لان اصلاً ما يصير اشرب كحول مرضي ما يساعد

-اه يعني مرضك ميساعد مو لان الخمر حرام

-الثنين مريم شبيچ واگفتلي على الدعسة

-ديلا ماشي امشي نطلع لا نتأخر

-وييين

-نروح للمطعم مالتك

-مو كتلج مكان ما يناسبجج

-عادي يمعود خليني اتونس وياكم

-مريم روحي عني گوة طايق روحي

-شجاك استاذ اريد اتونس شبيك ليش تحبسني هنا بين اربع حيطان اريد اتونس مثل نورسين

-مو اكيد نورسين تجي!!

-يله بعد احسن حتى تحير بيه بدالهه

سكت مغتاض لبس سترة فوك ملابسه واني واكفة مشعوطة روحي ما اصدك نهايتي ادخل لهيج مكان حرام كله بسبب اطلس..

راح للباب ورحت وراه دا اريد اطلع وصدني دفعني على الحايط وعاق حركتي من لزم ايدي ثنينهن..

-ما تجين ممنوع

-مااا

-كتلج ما تجين مررريم لا تخليني اتصرف غير تصررف

-اروح يعني ارووح

-مررريم كعدي راحة وروحي ناميييي

-ما

-عيديهه بعد مرة وحدة وشوفي شسوي

-ما

فتحت عيوني من لزمني من متوني باسني اختنكت وضليت ارافس وادفع بي مر وقت وهو لاطش، اخيراً حررني من ايده وخلاني اكح واللقط النفس، طلع وطبك الباب وراه..

رجليه ما حملوني وكعت بالكاع ارجف وامسح بحلگي درت عيوني على الباب وكمت بسرعة اطلع وراه نزلت الدرج بصعوبة اتعثر بخطواتي الفستان ثكيل وطويل لحدما وصلت للباب جان مختفي ما موجود وسيارته ماكو..

انهاريت رحت ادور السايق ما لكيته دورت بالبيت كله ماله اثر، سألت واحد من الحماية كال السايق راح لحالة طارئة طلع ويه مسيو الاطلس..

تخبلت رجعت للغرفة اعيط واملخ بروحي رايح يشووف ذيج الحقيرة اني اعلمك يا نذذل حرت ماعرف شسوي اتصل بأحد من جماعته بس استحي ساعة متأخرة شيكولون عليه..

رجعت للغرفة اللوب من الحرگة لساني احسه طرگع طلعت بطل مي شربته كله صكة وحدة جريت بعد واحد وشربته وراه وذبيتهن بالكاع، رحت اكعد على الچرباية..

دعيت الله يبرد گلبي وجع مو طبيعي جاي احس بي احس گلبي متحول لجمرة نار رايح يشوف نورسين ويتونس وياهه ربي انتَ اعلم بالحال بس بردني ماريد اشعر بهذا الوجع تعبت..

عبرت الساعة بالوحدة ياله كمت ابدل ملابسي عانيت بسحاب الفستان تعبني نزعته ذبيته بالكاع لبست تراك ورحت اكعد على الجرباية انتظر وصوله ثانية ثانية..

الوقت ميمشي هلكني هلاك احط ايدي على گلبي انضم دقاته اهدأه اجر نفس وازفر نفس عسى الهوا البارد يبرد داخلي..

وييين ياله سمعت صوت خطوات على الدرج باوعت للساعة عبرت الثنتين، بسرعة كمت اطفي الضوه عفت اللمبه مفتوحة ودخلت بالفراش وغطيت راسي امثل النوم..

دخل للغرفة يتسحب باوعته من فتحة اللحاف نزع ملابسه وفات يسبح تگطعت روحي كعدت على حيلي ومن العصبية حتى شفايفي ترجف، نص ساعة ضبط ياله طلع من الحمام لاف خصره بمنشفه من شافني كاعدة عكد حاجبه بس ماهتم راح يدورله على لبس..

-مريم: ها رجعت من وكت

-الاطلس: امم

-مريم: تونستو؟

-اي كلش

-هاا اكيد جايبين راقصات

-لا ماكو راقصات

-شعجب

اندار عليه يضحك فر بيده واخذ التراك من الكنتور وراح يريد يدخل للحمام يبدل..

-نورسين رگصتلكم؟!

اندار عليه خازرني بحقد ماعرف شلون حچيتهه كرهت روحي وره هالكلمتين شلون اتهمهها هيج اتهام بس النار البيه خلتني احجي شيش بيش..

-الاطلس: هواي صايرة تتمادين مريم

-سولفلي شسويتو

-ما سوينه شي تعشينه ورجعنه

-عشى بساعتين؟

-اي لمة اصدقاء

-ونورسين جاية؟؟

-هواي صايرة تسألين عنهه عوفي البت بحالهه

-ليشش عينيي

رجعت اوكف بوجهه دفعته من صدره وصرخت..

-ليييش اعوفهه بحالهه اطلللس

-شبيچ انتِ متخبلة عليه

-انتَ بسببك انتَ صايرر تلعب النفسسس

-لسااانج

لزمني من ايدي بقوة وعصرهه عصبيتي طغت على الموقف وصرت اعيط بصوت اعلى..

-ليشش تروح ويااااك لللييش

-مريم كاافي تعبت من تصرفاتج كااافي

-هسة تعبت مني لان شفت حضننن استقبلك بكل حببب من افترقنه هالكم شههر مووو

-هواي صايرة تخربطين انتِ

-ولك احجيييي راح اموووت شسويت من عفتك انييي شسويت

-شصخمتتتت گضيتهه بالمستشفيات يووومية متخربط وواكع يومية ملزوووم انتِ من جهة وابوي من جهة وامي من جهة كاافي اني هم بشررر حسو بييه

-ونورسين تروحلك للمستشفى جانت موو

-اني وووين وانتِ وين

-جاوبنييي جاوب بس هالسؤال واعوفك

-اي تروح وياي للمستشفى

-اي طبعاً ترد وحشتك وتجيك لبيتك وتلعبون سوه دعاابل

-نامي مريم انتِ تعبانة حبيبي

-وخررر لتلمسني مقررررف

-انتِ بنفسسسچ گلتي ما تحاسبيني وشنو اريد اسوي براحتييي ليش هسة جاية ومشتعلة بنار الغيرررة شنو معناة تصرفج هذااا!!

-ما اغار عليك سوي التريده بس مو كدام احد لا تتباهى بأفعالك احترم وجودي اطلس لا تهيني بهاي الطريقة

درت وجهي عنه بسرعة ونزلت دموعي بضعف، تركته ورحت انام بالفراش، دفنت وجهي بالمخدة ومتت بچي اضغط على وجهي حيل حتى ميسمع شهگاتي ليش تغارين مريم ميصير تغارين عليه طز بيهم..

بدل وطفى الضوه، فرش فراش جوايه ونام، بقيت ابجي فترة طويلة بالخنسة بدون لا يحس، وقت طويل مشى واني بوضع تعيس الخفقان دمرني مديت راسي اشوفه ماله حس اكيد نام..

-شلون صرتي؟

-يمممة

-اخترعتي؟

-معلييك

-خوش معليه ليش تصيحين وتحرگين دمچ

-اششش اسكت لا تحجي

-مسحي دموعج مو زين تبجين بالظلمة

-هو منو باااچي!!

-امي

-اي يمكن جاي تبجي روح شوفهه

-نامي مريم فحطتيني تفحط وعلي

-اشش لتحجي

-تغار وخابصتني ما اغار عليك وما اغار

-منين اغار لتألف من كيفك

-تغارين وتحبيني

-مصدك روحه ابو النسوان

-اني ابو نسوان رحم الله والديج

-ابو نسوان ونصصص

-خوش

-هه يزحف على نورسين الصفرة

-لا تتنمرين عليهه ولا تنابزوا بالالقاب لو هسة عادي

-اي استغفر الله بس عليك اتنمر عادي

-اي عادي بس شوفيلج غلط بيه اول ذاك الوكت تنمري

-هه انتَ هوووواي واثق من روحك تدري لو لا

-طبعاً ادري

-خوش خليني انام

-تحبيني

-‏ مااا احبك

-تحبيني وعلي

-مااااا احبك اسكتتتت

-لا تتوترين حتى لو تحبيني عادي حبيبي هو كم شهر ونتطلك شبيچ

-اي نتطلك واخلص منك وتخلص مني

-اتخيل هذا اليوم شكد راح يكون......

سكت ما كمل مديت راسي عليه وفزيت من حاوط وجهي كله بأيده وكال..

-نامي مريم

-انتَ نام وجيب موبايلك وينه

-شعليج بي

-اريد اللعب بي ضايجة

-عندج موبايل لعبي بي

-ماريد اريد اله مالتك

-مابي شحن لا تخلصي

-ميخالف اشحنه

ضحك وانطاني اعرف الرمز فتحته ورحت على اليوتيوب من كل عقلي اطلع فيديوات واتفرج..

تعبت كلش من گلبي وكمت لثلاجتنه ادور بيهه عصير ما لكيت سديتهه شفت اطلس غفى، حطيت شال على راسي ونزلت جوه اتسحب البيت اظلم مشعولة بي اضوية خفيفة عبرت الصالة ودا اروح للمطبخ وسمعت صوت همسات..

خفت وترددت اروح اكمل طريقي لو ارجع بس جازفت بروحي ومديت بس عيوني من الباب، جحظت عيوني رادت تطلع من محجرهه على المنظر الشفته..

عمو محمد واكف بظهر نانا وحاضنهه من خصرهه ويبوس بيهه ويتغزل، كممت حلگي ما مصدگة هالشي ما مصدگة هاي حقيقة..

-محمد: احبچ بلقيستي

-بلقيس: محمد روح لا تجي حصة

-محمد: لو يجون كل جهالي ماهتم ماعوفج اليوم

اندارت عليه وحطت ايدهه على صدره ابتسمت وهمستله بشي ما لقطته اذاني باسهه بخفة وهمس بصوت رجولي مسموع..

-عجبتچ الاغنية اليوم بالحفل؟

-اي حلوة

-هاي هديتهه لعيونج يا روحي هايم بعيونج اني بلقيس

-محمد لا يجي احد روح

-ماروح ما ارووح

-اششش صوتك حباب لا تحطني بموقف محرج ويه حصة

ماتركهه زاد بتصرفاته الوصخة وغزله المقرف، هزيت راسي لا ما مصدگة هالخيانة القذرة الي طلعت من نانا ويه زوج صديقتهه والتشتغل عدهه خالة حصة!!

يتبع ♠️💸....

• ━━━━━━❪♣❫━━━━━━ •

اهم شي التصويت قلبي دارو تعبي 🥹🩷