رواية الاطلس "دمليج أسود" الفصل السادس والعشرون 26 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

باچر تمر  عگب باچر
وانه والشوگ وحجي الوادم خناچر
تنتظر باچر او باچر ✨

كاظم الرويعي

• ━━━━━━❪♣❫━━━━━━ •

دخان سگارة يتعالى ليحلق في فضاء المكان المزدحم، اطراف راعشة ودقات قلب تنبض نبضات بطيئة حزينة لتراقص وجع المشاعر، حسرات متتالية محملة بالهموم والاحزان، عيون تشرح معاناة الشباب الجالسين في هذا المجمع المليء بالنفوس الضعيفة، الدنيئة، الشهوانية وربما المريضة..

-آآه ملل كأبتوني شباب

جر دخان من جگارته وزفره بوجهي مغتاض، ضحك رغم وجع روحه وكال بغمزة..

-شرايد عليوي

-علي: ما رايد شي بطل تشرب من هذا السم راح تموت روحك

-عمر: شعليك انتَ روحي لو روحك!!

-الاطلس: كافي بلا لغوة راسي يوجعني

مسح وجهه وتقربت من عنده بنية كالعادة ما انطاهه وجه وبقى كاعد وياكل بروحه، ضحكت بغنج وكالت بدلال..

-كيراك داير موسيو (شلونك استاذ)

ما جاوبهه ولا اندار عليهه ضحك عمر وكال..

-عمر: روحي ما يفيدج هذا مغرور وشايف روحه

-البنية: واخا، سمو سميتك؟

-عمر: يسمو الاسباني عيوني الاسباني

زفر اطلس نفس واندار عليهه ضحكت بغنج وتلعب بشعرهه رجعت تسأله على اسمه الصريح وتتمايع، ضحك تك خد مستهزأ وطلع جگارة جر منهه نفس زفره بوجهها وانطاهه گفاه شعوطت متنرفزة فشرت بلهجتهم وراحت معصبة..

-علي: ههههههههه ما يطخ راسك ابد

-عمر: تلعب روحه من الرخيصة ماي عيني

-علي: لا تنسى هو متزوج هسة هم

-الاطلس: هه اممم

-عمر: اووي الامير الاسباني الحزين

-الاطلس: هواي تاكل تبن صاير عمر!!

-عمر: اسف اسف هاك امسح دموعك لا تبچي علينه

-الاطلس: مشتهي تنكتل؟؟

-علي: شبيكم ولكم صدك جذب كل يوم صايرين تتعاركون عين وصابتكم كافي ياخي بطلو هالعراك الماله داعي

-الاطلس: گول لأخوك يتأدب ويحترم نفسه

-عمر: مؤدب ومحترم نفسي من يوم يومي هيوو لك مدلل

-الاطلس: راح اطيح حظك واراويك شيسوي المدلل

گامو يردون يتضاربون وگب الصوت بالمكان صرت بيناتهم اهدأ الوضع والله يحبني من شفت مسلم يدخل علينه كل ظني راح يلطف الجو بس شعله بالزايد..

-مسلم: هااا هااا شصاير شباب شبيكم

-علي: مسلم اللحگ راح يتمالخون

-عمر: وخر عني ما اتمالخ بس خلي يروح مني

-الاطلس: خاب طير ياهو يمك انتَ!

-مسلم: لا شباب شسالفة شبيكم صارلكم فترة بس تتعاركون محد طايق الثاني صدك جذب

-علي: نحتاج حمزة بس وين يجينه بهذا المكان المعفن

-الاطلس: مكان اخوك هذا حبيبي يحب الامكان الجايفة

-عمر: اطللللس ليش تتحارررش

-مسلم: شبيكممم صدك جذذذب شنو زعاطيطط ما تستحون واحدكم شكبره يصيبر

-علي: كافي رحمة لابوكم كافي كرهت الطلعة كلهه بسببكم

-مسلم: لا كافي بعد ماكو عركات عليكم الله خلونه متونسين طلعاتنه صايرة بالگطارة بسبب مسؤولياتنه

گعدو مطنگرين واحد على الثاني يحشون بالجگاير وعاگدين الحاجب وجههم ما يگصه الطبر من الحقد محد بيهم حچى الا من كلت..

-علي: المتزوج ياب شعجب خلتك مرتك تطلع ويانه عادةً تتحجج بيهه وما تجي

-مسلم: لا مو لهدرجة بس انتو تمصخوهه تردون كل يوم دياحة ما يصير ياخي كبرنه على هاي الحياة صارت عدنه مسؤوليات، مرة وجهال

-عمر: بعده الجاهل ما اجه

-مسلم: ما ظل شي كله كم يوم وينوركم وليدي

-الاطلس: شلونهه اسيلة خوما تخليهه تشتغل وتتعب

-مسلم: زينة بس هي ما تكعد ياخي شكد اگلهه اجيبلج خدامة اجيبلج مساعدة ما ترضى

-الاطلس: مسلم لا ترضى تشتغل اسيل بطنهه واصل لخشمهه انتبه عليهه

-مسلم: بعيني احطهه ام غيث

-عمر: هه اي يابه ابو غيث بعد منو گدك

-مسلم: ههههه متحمس لشوفته

-عمر: ان شاء الله ما تشوفه

-علي: عمرررر!!!

-مسلم: شبيييك انتَ شنو هالحجي!

-عمر: اشاقيك شبيك

-علي: جيب جيببب السم جيبه وعلي بعد اذا شربت اطيح حظك كااافي

-عمر: شسالفة اشاقيكم لا تشدوهه

-علي: مسلم تره هذا طافي معليك بكلامه ما يحس شيكول

-عمر: لا احس

-الاطلس: علي اخذ اخوك لبيتكم خلي يرتاح

-عمر: لا اني مرتاح هنا روح انتَ لمرتك روووووح

-مسلم: شسالفته هذا شبي معصب شكو

-عمر: رووح شكو مگابلني وگاعد العنده مثل اسييل يعوفهه!!

-مسلم: زودتهه هواي عمر كللش هوواي

-عمر: بكيفي، ليش اسيل مو صديقتي عادي چنه نسولف ونگضي وقت ويه بعض بس بعد من تزوجتك انتَ منعتهه عني اي حقك هذا بعد هي مرتك وحبيبتك بس انتَ اخذتـ.........

صميت حلگه بيدي حييل وسحبته اطلس گام ورانه ومسلم بس صافن ما مستوعب هذا الحجي يطلع من عمر صاحبه الي يحبه..

لزمت اخوي صفگته راشديين اريده يحس ويرجع ويانه بس ماكو بغير عالم، اجاني اطلس متكهرب من وضع عمر الغريب وتصرفاته السخيفة..

-الاطلس: هذا شبي يخربط اخذه للبيت علي استر عليننه

-علي: اي اي رايحين امشي عمير نروح

-عمر: وديني لبيت اسيل

-الاطلس: انتَ شبيييك شسالفتككك ما تستحييي على دمككك

-علي: يخربطط وعليي يخربط اسيل منوو اسيل شنو اصلاً شعلي بيهه

-عمر: صديقتي هي اريد اشوفهه مشتاق اسولف وياهه مسلم الچلب حرمني منهه اتذكر من جانت.......

بجرة نفس الاطلس هجم على عمر بنص العالم ودگ وين اليوجعك دماه تدمي لزمته اسيطر عليه ماكدرت اطلس اضخم مني اجه مسلم يركض يريد يفاكك رغم مزعوج من عمر بس مايحب المشاكل..

-علي: والعباااس اخذه راح اخذه للبيت اطلللس فك عننه

تدخلت الناس يريدون العركة تخف بس ماكو كلما جايهه تكبر اكثر وتدخلو اصحاب المكان بألف واه ويلاه طلعتهم من المكان اخاف ياخذولنه صور وننفضح وتوصل السالفة لخالي يهطرنه هطر اذا يعرف بس الخدمنه المكان شبه مظلم والاضاءة خافته..

-مسلم: رايح اني

-علي: مسلم لا تزعل بروح امك

-مسلم: لا ما صار شي

-علي: اطلس عوفه اني اخذه للبيت ينام ويكعد كلشي ينسى كل حچيه چذب تره لا تصدك

-الاطلس: كض اخوك ولا تخلي ياكل نعل افتهمت لو لااا تره گووة مسيطر على روحي

-علي: هذا هو صار، يله عمر

-عمر: ها وين لأسيل نروح؟

-علي: امشيي انعل روحك امشيي

-عمر: انتَ هيوو المدلل الحزين مرتك شوكت ناوية ترجعلك لو تريدك تطلگهه هههههههه اطلس وحيد اطلس فريد اطلس حزين اطلس ينوح على مريييم

-الاطلس: عليييييييي اخذه لا تخبلنييييي

-علي: كاااافي هم تردون تتمالخون وخر اطلسس بداعة امك بستر خواتك وخرر

-عمر: ما اتمالخ ويه ذكور

-الاطلس: خليني ذكر ولا سرسري ابن شاارع

-عمر: هاا نسيت ومصروع هم خطية يومية ملزوم سودة عليه مرته عافته لانه مريض اكيد ماتريد واحد مصروع

هنا طفح كيلهم ثنينهم ماكدرت اكضهم واحد دمى الثاني شكد حاولت افاكك اريد اجر واحد عن الثاني ماكدرت كمت واتصلت بمسلم يرجع وراهه دكيت على حمزة ماكو غيره يحل السالفة..

عركة حامية وبيهه اضرار هواي رجع مسلم ما ابتعد هواي وفارگناهم عن بعض العركة باللسان صارت تعبو واحنه لازميهم حيل، الفشار والسب والمعاير ماله والي صار بقو هيج الى ان اجه حمزة..

طيح حظنه كلنه وهزأنه ورزلنه رزالة تسوه عمري وعمر امي هم، تلاسنو وياه اطلس وعمر توقعت راح يثور عليهم بس چان هادئ وحل النزاع بيناتهم وطلب مني اخذ عمر لبيتنه..

لزمته وطببته للسيارة غصب وحركت بساع حتى ماينزل، دگ رجل الا اخذه لأسيل دمرني دمار هالزلمة ما جاي يستوعب هي تزوجت وراح تجيب..

-علي: عميررر افهههم البت تزوجت غيييرك تزوجت مسلللم صاحبك اصحححى كااافي مصختههاا

-عمر: ماسوي شي بس اشوفهه

يحجي بلسان ثگيل تعبان مثبت راسه على الكرسي وشفايفه وگصته طاگات دم من العركة..

-علي: حبيبي ما يصير الوقت متأخر ومسلم راجع لبيتهم شلون لو شافك هناك شيكول شيفكر

-بس اشوفهه.. ماسوي.. شي

-عمر انتَ مو بوعيك لا تخرعهه وتتصرف تصرف حقير ويه البت لا تهبطهه

-ماسوي شي اخذني

-ما اخذك

-اخذني لو اروح وحدي

-علي: ماتروح اكسر رجليك

-عادي

-عممممر

-اروح من تنام

-اصبر انعل ****** صوچي اني منطيك مجال خليني اشوف مسلم وين

دگيت على مسلم افتهم بي وينه گال رايح يشوف صديقه ما يرجع هسة للبيت، كرهت عملتي وروحي جاي نخون صاحبنه حتى لو ما نسوي شي مجرد التفكير بالموضوع غلط وعيب علينه..

اخذته لبيت ابو حمزة واخذت بطل ماي غسلتله وجهها رشيتله عطر اخفي ريحة الكحول ورتبت وجهه وملابسه..

-عمر مو تچفص انتَ كلت بس تشوفهه بروح ابوك سيطر على نفسك

ساكت بس يهز براسه، نزلته وياي ودگيت جرسهم، باوعت الساعة بـ 11:30 بالليل العالم نايمة هسة وهذا اخوي الچلب يتمعشگ..

-علي: عمر كارهك كلش

-عمر: ادري

-شكد سافل ومنحط عينك على مرة متزوجة

-مافكر بيهه بسوء وروح ابوي

-اي صدگتك

جرني من خوانيگي يحجي وعيونه ذبلانة غمض عيونه بقوة ورجع فتحهم..

-عمر: احبهه حب طاهر بعمري ما نگستهه بأفكاري

-نگستهه هسة

-ليش

-رايح تشوفهه وتكول احبهه وهي متزوجة صاحبك!

-رجعني للبيت ماشوفهه ماريد بعد

-ارجعك والله؟

-اي و....

ما كمل كلامه وانفتحت الباب استغربت من شفت اسيل الي فتحت توقعت ابو حمزة، سلمت علينه وفرحت بشوفتنه..

-اسيل: عبالي مسلم اجه اكول شيجيبه هسة اليوم اوف عنده ههههه

-علي: لا احم..

-اسيل: مسلم مو هنا شباب هو كال راح يلتقي بيكم علساس؟

-علي: اي صح بس اجينه نشوف حمزاوي

-اسيل: حمزة هم مو هنا طلع قبل شوية

-عمر: اسيل شلونچ

-اسيل: بخير اني انتَ شلونك وينك صار شكد ماكو

-علي: ههههههه مريض مريض يله احنه نروح من رخصتج

-اسيل: ماشي راح ابلغ مسلم انتو اجيتو

ودعتهه وجاي نروح وسمعنه صوت عمي ابو حمزة يصيح بينه، حچى على اسيل شلون هي تفتح الباب بنص الليل وكالت عبالهه مسلم دخلت جوه تهرول ولح علينه نفوت جوه..

انحطيت بموقف محرج كلش عمر ما نطق حرف عيونه بالكاع ووجهه احمر اعرف اخوي من ينزل عيونه معناهه خجلان من عملته..

-ابو حمزة: يا هلا بالتوأم المشاكس

-علي: هلا بيك عمي، احنه اجينه نشوف حمزة ردناه بحچاية

-ابو حمزة: ليش احنه ما نعجبك عليوي

-علي: لا عمي على راسي انتَ بس السالفة تخص الشغل

-ابو حمزة: ها هسة شوية ويرجع، شلونك عمر شبيك شو عبالك تعبان

-عمر: اي

-علي: مريض كلش مريض على فراگ امي تعب

-ابو حمزة: الله يساعدكم يله كله كم يوم وترجع مو؟

-علي: اي باجر توصل

سولفنه شوية ودخلت اسيل بيدهه صينية قهوة گوة تمشي عثرت بباب الاستقبال ووگعت شوية گهوة بالكاع، گمز عليهه عمر كضيته من ايده بقوة وگعدته وثنينه صفننا من ابو حمزة نتر بيهه..

-شبيييچ عمية!!

-اسيل: اسفة عمو مانتبهت هسة انظف المكان

-عمر: شسالفة ابو حمزة شسوت هي!!

-ابو حمزة: الحمل متعبهه خطية روحي عمو روحي جيبي غير گهوة

-اسيل: حاضر

راحت وعمر يلوب روحه طلعت يباوع للمكان التوصخ ويرجع يباوع لأبو حمزة وهو يسولف عنهه..

-ابو حمزة: كسرت البيت تكسر ايدهه فاهية ما تلزم شي وهذاك مثل الطلي كلما حاچيته صاح بوية عوفهه حامل بوية لا تسخرهه بوية لا تضوجهه

-علي: اي عمو حقه هم مرته وما يرضى عليهه

-ابو حمزة: متزوجلي خدامة شكوو قلة نسوان

-عمر: على كيفك وياهه عمي اسيل ما تنعااب!!

-ابو حمزة: هههههه لا اقصد يعني شبيهه رقية بنت ابو الاطلس چا يعوف بنت العز وياخذلي وحدة ما نعرف گرعة ابوهه منين، فاهية وكلشي ما تعرف تسوي يومية متخربطة ويومية ناقلهه مستشفى

-عمر: تره حامل!! ثانياً سارة هم موجودة بالبيت ليش ما تعاونهه؟؟

-ابو حمزة: وتجيب سارة بت الخير والعز لأسيل؟؟

جاي يرده عمر ورجعت اسيل مبتسمة وبيدهه صينية، قدمتلنه وگعدت بالقنفة الكاعد عليهه عمر دارت نظراتهه عليه وحچت بنفس الهدوء المتعودين عليه منهه..

-اسيل: شلونك عمر

ابتسم وبقى منزل عيونه هز راسه ساكت، اباعلهه مكيفة بي من قبل علاقتهم قوية وهاي العلاقة للاسف كبرت بگلب اخوي وتحولت لغير شي اما اسيل بقت نفس مشاعر الصداقة والأخوة بگلبهه تجاهه..

-علي: شوكت ينور غيوثي اسيله كلنه متحمسين

-اسيل: ان شاء الله ما بقى شي

-عمر: احم.. شكد حامل انتِ؟

-اسيل: بعد يومين افوت بالتاسع، وطبعاً متعرف لانك گاطع

رفع راسه عليهه متعجب حچى بعصبية هادئة..

-عمر: اني گاطع!!

-اسيل: اي ماكو لا تجي لا تسأل حتى رسالة متطلع منك شبيك عيني منفس علينه

-عمر: انتِ لبستيني من تزوجتي

ضحكت بخفوت وابو حمزة يباوعلهه وگالب وجهه لاحظت استنكاره منهه واضح ما بالعهه، بقت تسولف ويه عمر وانطلقت مثل عادتهه اما هو بس ساكت ويسمعلهه عيني واذني وياهم اخاف يچفص اخوي وفعلاً چفص من گال..

-عمر: مشتاقلج كلش

-اسيل: تسلم والله كلنه مشتاقيلكم حتى غيوثي الصغيروني

-عمر: ما تجين لبيتنه اسيل

-اسيل: شنو؟

-علي: هههههههههههه بيت خالي محمد اسيل شبيچ چا مو بيتنه هذاك

-اسيل: هاا هاا اي اروح ان شاء الله باجر ازور بلقيسه مشتاقتلهه هواي

-ابو حمزة: ما صار اسبوع من رحتي گعدي وسكتي

-اسيل: عمو مشتاقتلهه والله ومسلم قبل ياخذني

-ابو حمزة: ماكو روحة باجر عدنه ظيوف وسارة راح تروح لأهلهه عود اسبوع الجاي انتِ روحي

سكتت اسيل الغصة ببلعومهه على حسب علمي سارة كل يوم تروح لاهلهه ومحد يعترض ليش بس اسيل ممنوع؟!

بعدنه نحجي بسارة ودخلت علينه سلمت بحرارة وكعدت ويه اسيل..

-سارة: اسيله باجر نروح لبيت اهلي سوه مو؟

-اسيل: هاا.. لا ماكدر اني اروح بعد عدنه ظيوف

-سارة: صدك؟ منو راح يجينه؟

-اسيل: مادري سألي عمو

-ابو حمزة: روحي بابا سارة براحتج بس اسيل ما تروح محتاجهه هنا

-سارة: عمو خلينه نروح سوه امي وخواتي منتظرين اسيل مشتاقيلهه

-ابو حمزة: هاا.. يله براحتج عمو هاي لخاطرچ راح اقبل

ماتحملت الوضع گمت وعمر كام وياي ما نطق حرف لحدما وصلنه لبيتنه فات لغرفته ونام...

**

"سارة"
استغربت جية الولد بس علي وصاني اكول لحمزة اجو علمود شغل وانتظرو هواي وما اجه، اخذت اسيل وياي للصالة مالتي وگعدنه على القنفات..

-سارة: اسيل عمو هم ما قبل ترحين ويايه مو

-اسيل: اي كالعادة

-سارة: تره راح اطگ ليش هيج يسوي حمزة حچى وياه توقعته راح يغير معاملته وياچ

-اسيل: سارة عادي اني ما متحسسة والله

-سارة: اني متحسسة اتخيلج تكرهيني بسببه يفرق بيناتنه هواي ماقبل بهذا الشي

-اسيل: سارونة انتِ بنت عز وبنت خير نافعتهم وواجب عليه يحترمج ويهيبچ اني شنو مقدمتله غير وجع الراس

-سارة: لا تحجين هيج اسيل محظوظين بيج حُب مسلم الج واهتمامه دليل كافي هو شكد يحترمج ويقدرج ويهتم لوجودج بحياته

ابتسمت تهز براسهه، سولفنه بمواضيع عديدة وتطرقنه للموضوع الماكل عقلي وراسي وراح اطگ واموت بسببه..

-اسيل: بعدكم!!

-سارة: اي والله اليوم راح يصيرله اسبوع ما يحاچيني

-اسيل: ليييش شنو السبب؟؟ لازم اكو سبب سارونة

-سارة: ميحجي مخبلنيي ماكو كلشي ميكول شكد احاول وياه شكد اريده يحجي وياي مادري شسوي ويرجع نفس قبل تعبت كلش

-اسيل: سارة راح اسألج سؤال ولا تحسبي فضول

-سألي گولي

-خاف حمزة يريدج زوجة وانتِ ما جاي تفهمين عليه؟

-قصدج يريدنه نتمم زواجنه؟؟

-اي

-لا لا لا مستحيل هو گلي ما اضغط عليج ولا اطلب منج هيج طلب اكثر من مرة اكدلي هالشي

-ميخالف ادري بس..

-بس شنو گولي لا تسكتين

-بس اكول يمكن مل من وضعكم او تعب من هالعلاقة الباردة

-شسوي اني ماعرف شلون اسوي علاقتنه حارة

-هههههه تحركي سارونة لا يروح منج حمزاوي

-اسيل حمزة هم مسولف لمسلم عن علاقتنه؟

-لا ابد ميحجون بهيج مواضيع ويه بعض همه

-ها شعجب توقعتهم اخوان ويسولفون لبعض

-لا حبيبة ما يحجون بعلاقاتهم الزوجية ويه بعض خو هم عدهم غيرة علينه وهالسوالف عيب تتسولف بين الرجال

-اي صح، زين شسوي اني اريده يحاچيني تعبت كلش

-سمعيني وطبقي الأكوله واخا؟

هزيت راسي اي وكعدت تسولفلي سحت من الخجل والخوف من كلامهه ما مستعدة لهيج خطوة بس مستعدة اسوي أي شي حتى حمزة يرجع نفس قبل وياي..

رحت لغرفتي سبحت بسرعة وطلعت ادور بملابسي شنو اللبس؟ اسيل كالت لازم اللبس شي مغري بس شلون بيه شيكول عني ماستحي على دمي..

نفضت الافكار من راسي واجت ببالي مريم شكد محتاجتهه شكد اتمنى اسولف وياهه هسة بس للأسف..

جريت فستان النوم الاسود الاشتريته من طلعنه نجهز بوقت الخطوبة الي غدير جبرتني اخذه اشوف هسة اجه وكته، لبسته وصفنت على نفسي بالمراية غطيت وجهي بأيدي اندب روحي شلون اوگف هيج كدامه شلووون..

ذبيت نفس وكملت امشط شعري، تركته مفتوح ووگفت اتمكيج تعطرت ووكفت اتفرج على روحي بالمراية للمرة المية، لبسي فضيحة بكل ما تعنيه الكلمة جسمي كله طالع مال بنات ميستحن..

عدلت الغرفة وفتحت شموع على جهة ماتذكر اسيل بعد شكالت اطفي الضوة لو افتحه؟ تركته مفتوح بس خففت الاضاءة وكعدت انتظره يرجع..

اكلت اظافري اكل من التوتر لدرجة حسيت بطعم الدم صار بحلگي توجعت بس ما ركزت كمت اغسل ايدي واكمز يحرگني كلش..

نشفت وعدلت شعري على مراية الحمام وطلعت وجان يوگف گلبي واني اشوف حمزة دخل وجاي ينزع سترته ويعلگهه..

اطرافي ترتعش ونفسي انگطع من اللتفت عليه وفتح عيونه مصدوم، بلعت ريگ وتقدمت عليه وكفت مقابيله مباشرة ونزلت راسي افرك بيدي، رفعت بس عيوني اشوفه بعده صافن عليه وعيونه جاحظهن..

-هلو

ما جاوبني عافني وراح للميز ينزع الساعة مالته والمحابس، وگفت وراه ارتب الكلام بعقلي ويطير مني استحي ماكدر اسوي هالشي اني مو هيج ماكدر لهاي التصرفات..

-حمزة جوعان؟ اجيبلك صحن فواكه لو تتعشى؟

-ما مشتهي

-هاا زين شنو رأيك نتابع فلم

-بكيفج

يحجي من طارف خشمه تملخت تملخ بس دست على نفسي ورحت افتح الشاشة علگت عليهه فلم وحضرت نمنمات حطيتهن على الميز وصبيتلنه عصاير وكعدت انتظره بينما هو يبدل، اخذ منشفة يريد يروح للحمام..

-سارة: مو سبحت قبل لا تطلع ليش تروح بعد؟

-اي بس.. اريد اسبح بعد

-تعال وره الفلم اسبح

-تابعي وحدج هسة

-حمزة شبيك تعال تابعه وياي

ذب نفس عميق واجه كعد بصفي، انطيته كلاص عصير وكعدنه نتابع الفلم، تندمت بكد شعر راسي على اختيار هذا الفلم رومانسي لدرجة كل شوية طالعة لقطة سخيفة بين الابطال واغط بهدومي..

خلصت اللقطة ورجعت طبيعية شوية ورجعت تكررت لقطة جديدة بطريقة سخيفة اكثر وهيج مشى الفلم گوة لازمة روحي ما ابچي من التوتر بس حمزة خانس حسه ما طلع واستحي ارفع عيني اشوفه شديسوي..

مر نص الفلم تقريباً وكلت بگلبي خليني اشوف شديسوي شو ماله حس، خطفت منه نظرة ورجعت اباوع للتلفزيون، رجعت اباوعله وعگدت حاجبي من شفت گلاص العصير على حاله ما شارب منه كمعة وسارح باله مو وياي ولا ويه الفلم..

انجرحت من تصرفه وكلت ما انزل روحي بعد شسوي شبيدي بعد، رديت اتابع الفلم وتذكرت كلام اسيل من كالت ينراد صبر وحمزة من الشخصيات الثگيلة لازم انطي مجال شوي..

طلعت لقطة تخزي بالفلم وبلحظة غبية لزمت ايده وحاوطت متنه ونمت على كتفه، غمضت عيوني گلبي راح يوگف بأي لحظة راح يسولف بأي لحظة راح يخطي خطوة بس كلشي ما سوه!

رفعت راسي لمستوى راسه وتقربت منه اكثر بقيت محاوطه زنده وهمست..

-حمزة شبيك.. حمزاوي

انتبه وياي ودار وجهه مقابيل وجهي صرنه عين بعين ابتسمت منحرجة واردفت بنفس الصوت الهامس..

-شو سارح بيمن تفكر

-بالشغل

-هاا بس عوف الشغل مو كاعدين نتابع فلم لو ما عجبك؟

-لا حلو

-صدك

-اي حلو

-شنو قصته عجبتك؟

-اي حلو

-هاا شعجب مو انتَ متحب الرعب

-اي بس حلو هذا

-اها

بلعت غصتي وبقيت ساكتة الفلم مابي ذرة رعب وهذا اكبر دليل هو مو وياي وباله شارد، شوية واتصل موبايله اسم "داليا" فوراً ذب الكلاص من ايده وجاوب بلهفة صار يضحك بصوت عالي كلش ويكرر "عاشت ايدج عيوني" "تعبتج اني" "هلو بيج" ويضحك فرحان ومرتاح..

ابتسمت وياه على الواهس ومن سد الاتصال سألته گال اتصلو بي بخصوص الشغل، عدلت گعدتي وزادت ابتسامتي..

-مبين خبر حلو جابولك تكدر تحچيلي؟

-ما راح تفهمين بس هو شي حلو

-هاا

گام مني للكنتور طلع جنطته مال عمل واخذ منهه اوراق صورهن كلهن ودزهن وهو مبتسم..

-حمزة

-ها

-شبيك وياي

-شنو

رفع عينه عليه وكعد على الفراش كمت اروحله وطفيت الفلم وكفت على بعد منه افرك بيدي واحجي..

-اني مزعلتك حمزاوي؟

-لا

-شبيك ليش هاملني صارلك اسبوع

-شمسويلچ؟

-ما مسوي شي هو هنا المشكلة ما جاي تسوي شي

تقدمت عليه لزمت ايده وكعدت بجانبه على السرير كل حركاتي اسويهن وكلني ارجف من فوگ ليجوه، تقربت منه اكثر صرت لزگ بصفه ورفعت نفسي حتى اوصل لمستواه..

-اذا مضوجتك بشي كول حمزة لا تستحي مني

-ما مسويتلي شي

مسحت على كف ايده بهدوء عيونه تتابع عيوني ووجهه فوراً بده يتعرق، دار عيونه عني ميباوعلي رجعت اسحب وجهه ناحيتي ورفعت ايدي على صدره..

-ادري اني شلعت گلبك حقك عليه

-لا لا

-حقك هذا لا عبالك راح ازعل واضوج

الرجفة الي بصوتي دليل كافي ووافي يفسر خوفي والرعب الجاي اعيشه كلشي بجسمي ناكر هالشي وميريده بس اتحمل هذا الغم ولا غمي من يرجعني لبيت اهلي واعيش ويه غدير..

-احب حياتي وياك اني ماريد نفترق ابد

-سارة اني رايح هسة شوية وارجع ماشي

-وين تروح

-عندي شغل ضروري راسلوني يردوني

-شغل بـ 12:30 بالليل؟

-اي مهم هذا الشغل يله انتِ نامي لا تنتظريني اتأخر ماشي

-اوگف وييين اوگف

گام ينزع بملابسه يريد يبدل لزمت القميص مالته بيدي مانطي ماهتم جر واحد ثاني يلبسه هم اخذته منه ورجع جر واحد واخذته تخبلت من تصرفاته..

-سارة بس انطيني مجال

-مانطيك الا تفهمني شبيك وياي

-مابيه شي ابوية ليش گوة تردينه نسوي مشكلة

-المشكلة صارلهه اسبوع حمزة ما جاي انام الليل بسببك لييش تعوفني اني شمسويتلك ليش كارهني

-منو يعوفچ سارة شبيچ حلمانه انتِ؟

-مادري انتَ كارهني حتى ما تباوع لوجهي لعبانة نفسك مني انتَ؟

-انتِ منين تجيبين هذا الحجي

-حباب اذا بيه شي گول لا تأذيني اكثر والله ماتحمل

-سارة لا تبچين مسحي دموعج

-انتَ متغير عليه

-مسحي دموعج حبابة

اجه عليه يمسح دموعي واخد القميص من ايدي توقعت راح يرجعه بالكنتور بس لبسه وتحضر يريد يطلع، خلص تأكدت شكوكي يريد يعوفني ومل مني تركته يروح بدون لا اضغط عليه وكعدت وحدي انحب وابچي نمت واني على هذا الحال..

كعدت الصبح هو مو يمي ومكان فراشه بعده مرتب معناهه حتى ما اجه ينام بصفي..

كمت حضرت ملابسي واخذت ويايه جنطة ناوية ابقى ببيت اهلي ما افرض نفسي عليه هو كفه ووفه خلي يكمل حياته ويه وحدة تستحقه..

اخذت اسيل ويايه وطلعنه ويه السايق، اليوم كله غدير دمرتني دمار تروح وتجي تعير بيه لان شافت جايبة جنطة چبيرة كلما تشوفني تضحك وتفر بيدهه وتكول..

-غدير: ها عافچ مو؟

-سارة: غدير روحي عني تعبانة

-غدير: هههههههههه تستاهلين عساچ وريتچ

-سارة: روحي عني عوفينيييي بحالييي

-غدير: اي اي حيل بيج ابچي حسي بناري

غمتني وتهز بخصرهه فرحانة، عافتني وراحت بقيت كاعدة بغرفتي ببيت اهلي لليل لا اكل ولا شرب وحمزة ماتصل بيه، اجه مسلم على اسيل ورجعهه للبيت سألتهه اذا حمزة اجه للبيت لو لا كالت اي موجود..

هلكت من البچي ونمت گعدت ساعة 2:00 بالليل كمت اشوف رقية رحت لغرفتهه لگيتهه نايمة اجت ببالي مريم رحت لغرفة اطلس فارغة نزلت جوه وسمعت صوت بالحديقة..

طلعت بره واذا اشوف الاطلس واگف گبال قفص النسر يدخن ويدندن، ابتسمت ووگفت بجانبه..

-انتَ هنا

بقى على وگفته بدون لا يجاوبني، طفى جگارته وشعل الثانية كملهه وشعل الثالثة، بقينه على هدوئنه ووگفتنه لحدما شعل السادسة ياله حجبت..

-سارة: رحت لغرفتك كل بالي مريم موجودة...

بلع ريگ وسحب نفس عميق من جگارته ونفخه على الطير، فرك وجهه بأيده وكح..

-سارة: متجاوبك؟

-لا

-حاولت تروحلهم؟

-اي

-ما طلعتلك؟

-لا

-الله يساعد گلبك

اللتزم الصمت وفرك وجهه ذب حسرة عالية مردت روحه وغمض عيونه حيل، اخوية تعبان حيل تعبان وجاي اشوف هذا الشي بصوته وحسراته وملامحه الحزينة..

-سارة: شنو الموضوع ليش ما تقبل ترجع؟ ليش عافتك بين ليلة وضحاها

-مادري

-اني متفهمة هي خافت وراحت بس ليش قاطعتنه كلنه اطلس صار اكثر من خمسة اشهر مريم رايحة بعيدة عنك!

-كافي سارة

-لا مو كافي شوف حالك باوع وضعك روح حاول وياهه حاچيهه عسى ولعل تقتنع وترجع

-سارة

عافني وراح يكعد على الكرسي حيله مهدود على فراگهه، وين چان اطلس ووين صار من تعرف على مريم شخصيته ونمط حياته كله تغير وهسة رجع نفس قبل يسهر ويطلع ورجعت شخصيته الصعبة المعقدة، رحت اكعد بجانبه اواسيه..

-ادري گلبك محترگ ادري تعبت على فراگهه بس لا تقبل بهذا الشي لا تعوفهه ولا تتنازل عنهه بهاي السهولة انتَ تحبهه اطلس تحبههاا

-شبيدي

-ليش صاير ما تاخذ علاجك اطلس نانا تشكي منك؟؟ علاجك شعليه؟؟

-ماعندي فكر انساه

-ماكو تنساه حلو وضعك هسة؟ النوبة حاي تزورك بالسبوع مرتين ليش تأذي نفسك ليييش

-ما مأذي نفسي سارة بس جاي انسه العلاج ما متقصد اعوفه

-والطبيب هم تنساه؟

-اروح باجر بس تعالي حاچيني انتِ ليش جاي تبجين؟

-لان مليت من هالعيشة مليت من كلشيي

-تعالي شبيچ

سحبني عليه يحضني ويمسح على راسي بچيت على صدره تايهه ماعرف شسوي شنو بيدي شلون اساعدهم وشلون اساعد نفسي..

-الاطلس: امي تكول انتِ زعلانة من حمزة صدك هالحجي؟

-هو زعلان مو اني

-يصير اعرف ليش؟

رفعت راسي اله مسحت عيوني وهزيت راسي اي، فرك ايدي بين ايده وباس بطنهن ابتسم يشجعني احجي جريت نفس وسولفتله الي بداخلي..

-سارة: احس حمزة يريد يعوفني

-شنو؟؟

-يمكن مل من عندي ماعرف بس متغير كلش

-شلون يعني متغير

-اسبوع صارله ميحجي ويايه ومن اريد افتح موضوع وياه يتحجج بالشغل ويعوفني ويكعد وحده يشتغل

-عدنه ضغط بالعمل هالفترة حبيبتي اني متأكد حمزة ماعنده نية يعوفچ

-لا يعوفني اني احس و.. احسه يحب

-يحب؟؟؟

-مادري گلبي يكول هو يحب

-ولج سارة من كل عقلچ انتِ؟ شو چنچ تسولفين على مراهق مو حمزة

-اي صح اني مادري شبيه المهم هو متغير عليه وعادي يمكن ضغوطات عمل او هو ضايج من شي بشغله مو؟ اكيد هيج مو بله؟

ما جاوبني دگ موبايله طلعه من جيبه وجاوب المتصل ثواني وگمز من الكرسي..

-الاطلس: شنوو وين؟!!.. جااي جاااي..

وعدني نكمل كلامنه من يرجع وراح يركض كمت وراه اشوف شكو واصيح بأسمه ميجاوبني قلقت وبقيت انتظره بالصالة جوه، جهجر الجو وهو ماكو ماحسيت على نفسي بعد غفيت بمكاني..

**

-ما اطلع ماا اطلع مااا اطلعع

-بسملة ماما لا تعاندين وتخلين ابوج يصيح

-بسملة: ماااريد اتزوووج انتو وعدتوني تسجلوني جامعة هالسنة حرام عليكم ماااريد اتزوج

-دعاء: يمة عوفيهه شبيچ وياهه متريد تتزوج مو غصب هو

-ام مريم: بس خليهه تطلع للناس خلي ابوهه يسكت لا يفضحنه

-بسملة: والله افضحكم واخزيكم هم واذا تجبروني اطلع الا اكفش روحي واملخ هدومي واطلعلهم هيج مثل المجديات

-نور: ماما كوليلهم ماعدنه بنات للزواج وتعالي شوفي ابني حمودي شبي يمكن مغص عنده

لطمت خدهه امي وطلعت للناس تتعذر منهم، رجعتلنه تدردم وتكول شلون بينه من يفتهم ابوية بسملة رفضت الناس الاجوهه خصوصاً والولد الخاطبهه ابن تاجر واغنياء شيخلصنه بعد..

-بسملة: خلي ابوية يجي يتفاهم ويايه معليج انتِ ماما

-ام مريم: شو دسكتي عني هسة، وينج نوره شو جيبي ابنج شبي هذا يبجي

لزمت محمد ابن اختي نور جايتنه نفسه صارلهه 33 يوم من جايبه وابنهه بس يبچي وزوجهه خطية ميت عليهه يومية يجي يزورهه بالليل بالخنسة بدون لا ابوية يعرف..

-نور: عبد القادر يريد يجي يشوف حمودي ماما حبابة مو ابوية يسويله سالفة ويتعارك وياه

-ام مريم: لا ابوج على جية هسة انطو صبر خلي يجيچ بالليل كلش

-نور: مو حالة هاي ليش ميقبل رجلي يجي يشوفني!

-دعاء: متعرفين ابوية شيريد حيّر العلماء

-نور: هسة مشتاقتله اريد اشوفه واشبع منه

-بسملة: دلزمي روحج شوية اثگلي لا تصيرين خفيفة على الرجال

-دعاء: بنات وينهه مرايم شو ماكو

كمت اشوف وينهه من الظهر مالهه اثر، رحتلهه للغرفة لگيتهه نايمة ومدثرة روحهه شلت الغطا منهه وصحت بيهه..

-ولجج دبة متكوميين بس نايمة

-مريم: وخررري نعسانة

-دعاء: كومي كومي بس اكل ونوم باعي شلون سمنانة

طفرت عليهه اكفش بشعرهه واعضعص بيدهه صايرة تخبل سمنانة بطريقة تجنن ترست جسمهه بس همزين ما مكرشة ولا ملكلكة جان امي طيحت حظهه عدهه اهم شي نبقى رشيقات..

بينما اني ملختهه بالعض والراشديات دخلت نور بيدهه حمودي وشعرهه مهووس والعيون طافية بسبب قلة النوم، كعدت على سريري وتثاوبت..

-نور: هاي شبيهه بس نايمة ولج مريم خاف حامل انتِ

-دعاء: اييييي تحمل من زرف الحايط

-مريم: ولن عن وجهي خلوني انام

-نور: شو خنشوف بطينچ خاف بيهه زعطوط

-مريم: ولج آآيي شبيچ مردتي بطني ماكو مو حامل وخرن

-نور: ههههههه حرامات لو حامل چان لگينه حجة ورجعناچ

-دعاء: اي هواي ابوية يقبل لوما يقطهم ميرجعهه لأطلس

-نور: تره مو حالة هاي مريم اتصلي برجلچ احچيله

-دعاء: مو اگلهه هاي صارلهه خمسة اشهر هنا الرجال عجز تعرفين نوره كم مرة اجه يتوسل يشوفهه وهي متقبل تطلعله؟؟

-نور: ميصير هيج مريم حاچي وفهمي متأكدة راح يتفهم

نحجي وياهه وهي ضامة وجهها بالمخدة ولا ادري بيهه گاعدة تبچي الا من اهتز جسمهه، جريت منهه المخدة انكسر گلبي من غطت وجهها بيدهه متخلينه نشوفهه..

گعدت بصفهه على الفراش اهدأهه ونور انضمت ويانه وبسملة من سمعت الصوت اجت كلنه حاوطناهه نسكتهه وهي بس تبجي المسكينة..

-مريم: بنات امانة لحد يحجي ويكول الله يخليكم لا تكسروني وتصغروني اكثر

-نور: وتبقين هيج؟

-مريم: احاول اقنع ابوية حتى لو انطي فلوس مهري

-بسملة: امووتچ شنو تنطي فلوس مهرچ هيج راح يتهمنه احنه سرقناه وراح يحقد عليج ويريد بعد وميرجعج

-دعاء: خلونه نغير الموضوع اي نور شوكت يجي رجلج؟

حولنه الموضوع على نور وتسولف بزوجهه وعيالهه نسمعلهه ومبتسمات فرحانات على راحتهه وفرحتهه اباوع لمريم خانسة وسرحانة من اتذكر التعاسة العاشتهه هاي الخمسة اشهر گلبي يگوم يوجعني..

**

"مريم"
اليوم يصيرلي خمسة اشهر وستة ايام ببيت اهلي، من يوم اجاني ابوية لبيت المزرعة مغيم وزعلان حطيت ايدي على گلبي وگلت الله يستر من جيته..

سرحت بالفضاء اتذكر تفاصيل ذاك اليوم ورجعت بيه الذاكرة، اول ما دخلته البيت اجت نانا سلمت عليه وقدمتله عصير، گعدت اسأله عن امي وخواتي وافرك بيدي مرتبكة..

-احمد: امچ وخواتچ زينات جاي خاطب على اختج دعاء ادعيلهه تصير

سكتت منزلة راسي ماحجيت شي دعيت بگلبي اذا دعاء تكون مقتنعة ان شاء الله تصير واذا لا تخرب وتتفركش..

-احمد: مرايم بابا اجيتچ بطلب اني

-تفضل

-احمد: تتذكرين مهرچ اكيد، اني ضامة الج بابا ما اللعب بي ابد بس هالفترة كلش محتاج و.. ويعني متضايق كلش

-زين؟

-طاب حرامي لبيتنه وبايگ فلوس مهرچ كلهن

-شلون وشوكت؟

-ماعرف حاير شلون راح وشلون اختفى مادري وهسة الديانة يردون فلوسهم وجاي يلحون عليه

-يا ديانة؟

-مو من اشتريت البيت هنا بالمدينة عوزت فلوس وتداينت مبلغ وقدره من واحد صاحبي وهسة يريد الفلوس

-شعجب ما دفعتله مهري

صفن بوجهي ساكت اخذ العصير شرب منه مسح حلگه وضحك ميعرف شيجاوب عرفت السالفة بيهه إن، فوراً غير موجة صوته..

-مو هذا مهرچ بنيتي شلون اللعب بي المهم هسة اني جايچ بطلب

-وهو

-محتاج فلوس اريدچ تتداينين من الاطلس اكيد ما يردچ هو

سكتت وهو ساكت ومبتسم بوجهي، عدلت گعدتي وسألت من باب الفضول..

-شكد المبلغ؟

-250 الف دولار

-ميتين وخمسين الف!!!

-اي بس كلش محتاج وما رضو ينطوني عيالچ

-يعني رحت تطلب منهم؟؟؟

-اي هاي رجعتي من عمچ سولفتله وانطاني فلاسين شنوو جاي اجدي منه اني!!

گمت بسرعة على الباب طبگتهه اخاف احد يسمعنه وننفضح..

-بابا الله يخليك لتسوي بيه هيج فدوة لتطلب فلوس من عيالي الله علييك

-اي انتِ طلبي شعندي اجيتج لعد

-لا بابا ما اتداين من رجلي اني استحي والله استحي مالي عين اطلب منه فلوس

-مريم عدهم خيييييير من الله نايمين على مال قاروون واذا انطونه شوية وساعدونه؟؟؟

-بس همه احرار ينطون او لا لتنزل نفسك الهم ولتنزلني من عيونهم عليك الله لليوم حماتي غدير تعايرني شلون طلبت بيه مهر هيج عالي تكول باعهه ابوهه بيع النه

-خليهه تاكل تبنن ليش ما تسوين انتِ قحطط الي انطو

-هسة موضوعنه مو المهر بابا اطلب من أي احد بس ابتعد من عيالي خليهم ينسون سالفة المهر

-شننوو مجدي منهم انييي اخذه دييين وارجعه بعدين عود

-لتنزل نفسك الهم گلتلهم مرة وما انطوك خلص حباب لتحطني بهيج موقف

-غصباااً عليج تحجين ويه رجلچ وينطيچ منطيهم مرة احنه ما منطين بزون

لطمت خدي من القهر رحت اتوسل بي ينصي صوته وهو يرعد رعيد بصوت عالي خفت يسمعون گوة نصى الموجة بس ينتر نتر ويأمرني اجيبله فلوس..

-مريم: ما اطلب منه بابا اعذرني

-شو قويان رااسچ انتِ احنه المن منطيچ الهم اذا هالفلاسين ما تكدرين تجيبيهن واكيد حساب بالمصرف ماعندج لان ما شفت اكو حساب بأسمج

سكتت ما اجاوبه هسة ياله استوعبت ليش عمي سوالي حساب المصرف بأسمه مو اسمي يمكن محسب لهاي الحالات..

-مريم: ماكدر بابا اخاف اطلس مينطيني ماريد اذل روحي اله

-مينطيچ مو؟؟؟ لعد حتى گعدة عنده ماكو امشييي

-بابا شبيك شلون هيج تسوي الناس احرار والله احرار ينطون مينطون بكيفهم

-ماكو بكيفهم منطيهم بنية من بناتي وتصيح بكيفهمم امشي وياي ماكو گعدة هنا

-شعليهه گعدتي هنا بطلبك باباااا

على اثر عياطنه دخلت نانا تركض اجت تريد تفتهم شكو خفت ابوية يفضحني ويحجي بالفلوس، معصب وفاير نار انرعبت من فكرة يصغرني ويجرحني كدامهم خصوصاً واني اشوف سارة ورقية دخلو وغدير وياهه وحتى ام الولد اجت..

-مريم: نانا ابوية خايف عليه ميقبل ابقى هنا اني راح اروح وياه ومن تهدأ الاوضاع ارجع 

-احمد: ماكوووو ما ترجعييين ابددد تهدأ الاوضاع شنوووو

-نانا: شبييك ابو مريم بيت زوجهه شلون تريد تاخذهه انتَ! عاد اصبرو خلي ترجع ام الاطلس انطوهه خبر هسة شوية وجاية

-احمد: مااا ننتظررر احد امشيييي مريم

-مريم: نانا حبابة اني اريد اروح اني اتصلت بي لان قلق عليه

-غدير: بعتي زوجچ بهالسهولة روحي طبچ مرض شنو نكعد نتوسل بيهه

-زهراء: غديرر شبيچ ما تستحينن

-احمد: اخلاق سزز امشي مررريم امشيييي

-غدير: هاا طلعلك لسان هه والله يا الله المجادي صارو يعلون صوتهم على اسيادهم

-مريم: غدددير ما اسمحححلچ تتجاوزييين انتبهي لكلامچ زييين واذا نسكتلج فـ نسكت بسبب اخلاقنه العالية وتربيتنه واحترام لأهلچ اما انتِ متستاهلين ذررة من الاحترام

-زهراء: يا جماعة صلو على محمد خلونه نكعد نتفاهم ابو مريم اعتذر منكم نيابة عن غدير ميخالف هاي جاهلة ما تفتهم

-احمد: جاهلة على روحهههاا الجاهل ما ينبز بين الكباار

-غدير: هههههههههههههه كبار شنوو هو انتو خلگ مجادية وكتلتو رواحكم حتى اخوية يناسبكم وهسة من صرنه بمحنة ومصيبة اجيت تاخذ بنتك خايف عليهه من بعتهه بفلووس ومزرعة ما خفت عليهه

-احمد: امشيي لججج العتب مو عليج العتب على ابووج الماعرف يربيچ

اعتلى الصراخ والهرجة وابوية يفرفح ويصيح اعرفه معصب مو من كلام غدير وانما ضوجته وعصبيته بسببي لان ما قبلت اساعده، انداريت عليه كل اطرافي ترجف منهارة من الموقف وحجيت بحس گوة طلع مني..

-مريم: راح اتصل بأطلس بس ابلغه واجي وياك بابا اخاف يظل باله

-احمد: ماااااكووو ما تتصلين امشيييي

-نانا: ابو مررريم زوجهها لازم يعرف مرته راح تطلع من البيت

-احمد: ماعندي حچي وياكممم امشيييي

يسحلني سحل من ايدي ويصيح بعلو صوته تمنيت اطلس يجي بس حتى يشوف راح اروح لو على الاقل خالة حصة هي تعرف تتفاهم ويه ابوية بس للاسف ثنينهم مموجودين..

طلعني يجر بيدي بقوة لحدما وصلت للباب سحبت ايدي سارة تحجي مهضومة..

-سارة: ليش مريم اتصلتي بأبوج احنه هنا بأمان، الاطلس يدري راح تروحين؟

هزيت راسي لا وطلعت وتركتهم وجوههم مگلبة واسمع غدير تصيح تكول انتهزت الفرصة وعفته بهيج موقف حرج، الطريق كله اني ابچي واتوسل بأبوية بس اتصل بأطلس ابلغه ما جايبه موبايلي اني بس ابوية قافل يمشي ويتوعدلي ويصيح عليه..

اخذني لبيتنه ويتفنن بالرزايل والاهاين سواني وحدة ادبسز وما استحي وحرام بيه التربية، تعاركت وياه وامي وكفت بوجهه وما قبلت على كلامه عافني واندار عليهه گبت بيناتهم عركة اكبر بعد..

وهاي صارلي خمسة اشهر هنا كاعدة بالضيم يومية يجيني بابا يقنعني احجي وياهم حتى ينطوه فلوس واني اكعد اشرحله ليش ماريد اطلب ويرجع يهين بيه ويصيح عليه..

-مريم: اذا تريد تكسيرر عيني وتذلني گدامهم خليني اجيبلك الفلوس انتَ متعرررف شنو عانيت اني وشنو الكلام السمعته بسبب مهرري لليوووم يعايروني بي

-احمد: طبببهم طوووب غصباً عليهم ينطوچ مهر

اتعب من المناقشة وياه واظل ارجف عصبية وقهر، لا الي عين ابرر لأطلس من ديجينه ويسأل عني شنو اگوله؟ ابوية يريدك تنطي مبلغ ضخم حتى يسدد ديونه؟ ميرجعني الك اله تنطي فلوس يعني يبيعني الك مرة ثانية ويكسرني كسرتين!

خلال هاي الخمسة اشهر الاطلس اجانه فوك العشرين مرة الطريق بين مدينتنه ومدينتهم طويل ويتعنى كل هالمسافة بس يريد يشوفني وبكل مرة يجي ما اطلعله كل مرة اتحججلي بسالفة ماعرف شحجي وشكول..

بالبداية يمكن الي حق شوية ابوية اخذني بسبب خوفه عليه بس هسة وضعهم رجع تمام وكل مشاكلهم انحلت..

لزمو الي هجمو على البيت وعلساس لزمو العدو المسؤول عن الجريمة واجاهم تعويض مادي واوضاعهم ممتازة زين اني شنو عذري بعد ليش باقية هنا وهالشي ديسببلي ازمة نفسية لازم احچيله على طلب ابوية ولو يموتوني ماسويهه..

بينما خواتي يحجون ومنسجمات ما سمعت منهن حچاية بالي سارح وافكر شنو الحل، اكول لأطلس ابوية ميرجعني اله بفلوس؟ بس راح احط عليه طمغة طول عمري هو لليوم اشوفه ما متخطي سالفة مهري واسلوب ابوية الرخيص من زوجني اله او بالاحرى باعني اله..

حسيت على صوت امي اجت تذب حسرات وتحجي بتعب..

-بسملة ابوج يريدج كوومي

گامت تروحله وكلنه وياهه واستلمنه غلط وصياح شلون بسملة ترفض تطلع للناس الاجو يخطبوهه، وهي ولا يمهه كاعدة على الكرسي تگشر برتقالة..

-احمد: ولللج بابا ليييشش خووش قسمة اجتچ شترردين انتِ احسن من هيججج

-بسملة: اريد ادرس

-احمد: خو تزوجي وادرسي يا بابا يا بنيتي

-بسملة: ماريد اتزوج اريد ادرس جامعة انتَ وعدتني وخلفت

-احمد: ما اخلف حبيبتي تدرسين جامعة والاختصاص الرايدته بس حرامات خوش قسمة هاي لا تزعليني منج

-بسملة: بابا اسويلك برتقالة؟

گام يلطم من برودهه وهي كاعدة ممهتمة كلنه نعرف ميسويلهه شي لان هي المدللة مالته بعد، تركناه يصيح وحده ويلوم امي واحنه رجعنه للغرفة..

-نور: برأيي لو ملتقية بالرجال يمكن يعجبچ على الاقل تخلصين من هذا البيت

-بسملة: لعع اريد اتزوج على حوووب

-مريم: يا والغسل شكول حب انتِ

-بسملة: اي اريد احبه ويحبني واشلع گلبه وافرفحه عليه مثل ما مرايم جاي تسوي بطوطي

-دعاء: حرام عليج بسملة شنو هالافكار

-بسملة: لا جاي اتشاقه مو صدك بس اريد واحد يحبني اكثر مما اني احبه شلون طوطي ومرايم

-نور: ومنو يكول يجيچ نفس الاطلس عيني؟

-بسملة: ميهمني بس اريده يحبني نفس ما طوطي يحب مرايم

-مريم: كاافي لعبتي نفسي هو وينه وشفايدة الحب هو بمدينة واني بمدينة، ثانياً ممنوع تصيحيله طوطي ماقبل

-بسملة: اوكي سيستر راح اصيحله الاسباني

-نور: ليش يصيحوله الاسباني؟

-مريم: يكولون ملامحه تشبه الاسبان بعد مادري

-دعاء: اييييي صح والله ما منتبهه اني صدك شكله اسباني

-بسملة: استقري دعيوة هو وين شايفين اسبان احنه يحظي

-دعاء: لا ليش اشوفهم بالتلفزيون صدك اطلس يشبههم مريم والله

-مريم: والله بحياتي ما شايفة اسباني ماكدر احكم

-نور: اوكفن نبحث

-بسملة: شوكت يصير عندي تلفون مثل الاوادم وابحث بكيفي

-دعاء: خلي يصير عندي تلفون اول وبعدين انتِ يشترولج

-مريم: تلفوني مفارقني صارله كومة وعادي عندي مو شي مهم

-نور: الله اييييييي يشبه الاسباااان شوفو بنات

مدينه روسنه كلنه نشوف ونباوع لوضعياتهم بالصور ملامحهم واجسامهم وسمارهم يمكن عارضين ازياء ذولة او ممثلين، ضحكت اي والله فعلاً شكله ينطيهم شوية..

-بسملة: مريم اطلس عنده هيج صور مو؟؟ يصور نفسهم بله بحثيلنه نوره

-مريم: بسملة تره هو رجل اعمال مو عارض ازياء!

-نور: يعني عنده هيج صور لو لا

-مريم: لا بنات مو هيج هو اصلاً ميقبل يصور بهاي الطريقة ابوه يتوسل بي وهو قافل

-بسملة: حرامات احسه يطلع نااااار بهيج وضعيات

-مريم: كافي سكتن

-دعاء: هااا هااا غرتي عليه

-مريم: لااا اششش يله سكتو

-بسملة: اللهم صل على محمد وال محمد مرايم استعجلو جيبولكم جاهل خوش انتاج انتاجه المحيط الاطلسي

-مريم: بسملة بس فكينيييي

-نور: مريم سؤال غبي نفسي، انتو بعدكم راح تطلگون لو هالسالفة طلعتيهه من راسچ؟

-مريم: نوره

-نور: ها

-مريم: انچبي وگومي لابنچ

-دعاء: لا شحدهه تطلگ منه خليهم يرجعون ولج مريم تره ترجعين لهذا البيت المقرف اذا انفصلتي من اطلوسچ

-مريم: هو وينه هسة لخاطر الله

-بسملة: احسج متندمة على كل لحظة شلعتي بيهه گلبه ومرمرتي

-مريم: لا ما متندمة يستاهل

-نور: هههههه هاي لو عبد القادر يبزع ويذبني ببيت اهلي

-مريم: ابد ميبزع ولا يمل بالعكس يتونس على عنادي وعصبيتي چان اوقات هو يتعمد يغثني حتى اعاند وياه ويجي يراضيني ويصير فاسق ويشلع گلبي

-بسملة: اللهم صبر كـ صبر طوطي على مرايم

حنيت واني اسولف عنه تذكرت الايام الحلوة القضيتهه بالشركة ومن رحنه للسفرة ومن تعرفت على خواته وصداقتي بسارة شكد مشتاقتلهم كلهم بدون استثناء حتى لغدير اشتاقيت..

ثاني يوم اني كاعدة بين خواتي الظهر ابچي ونتناقش شلون نلگه حل لموضوعي وشلون نقنع ابوية ارجع، اجت امي تهرول وتهمس بصوت خافت..

-مريم.. مرايم اجه الاطلس يريد يشوفج

دگ گلبي بقوة وتوترت صارله اسبوع ما جاي الله يعلم وين چان، مسحت على وجهي وحچيت برجفة..

-مريم: گوليله نايمة

هزت راسهه امي ساكتة عجزت تقنعني صارت تستسلم للامر الواقع وتعوفني براحتي..

-بسملة: لو ترحين تحچيله مريم وتخلصين من هالضيم

-مريم: يدفع

-نور: قصدج ينطي ابوية فلوس علمود يرجعچ؟

-مريم: اي

-دعاء: خلي يمعودة شتسوون لعد ماكو حل راح تبقون هيج طول العمر

-مريم: ماكدر انزل نفسي اكثر من هيج تعبت من هالعيشة اكيد راح يجي يوم يعايرني على هالشي حتى لو ميحچيهه بوجهي يگولهه بگلبه الى متى ابقى مكسورة جناح وياه فهموني بنات تعبت

-بسملة: حقچ وفاهميچ احنه الله يساعدج

-نور: سودة عليه شلون بيج شنو هالقهر

-دعاء: اني خايفة بس من ابوية لا يروح يگله ما ارجعلك مريم الا تنطيني فلوس

-مريم: لا مستحيل ميسويهه يخاف ابوية من الاطلس متشوفين طلب مني اني اروح احاچي

-بسملة: بس طلب من عمچ اول مرة

-مريم: عمي غير بس علاقة بابا بالاطلس ركيكة تتذكرون من اجيتولنه على مرتين شلون ميبقى بالبيت ويتهرب منه

-دعاء: اي اتذكر بس هسة شلون شنو الحل

-مريم: جاي افكر اكول لعمي يمكن يساعدني ويحل هاي السالفة بس خايفة

-دعاء: گلتيهه قبل ومن اجت ساعة الصدك بطلتي وگعدتي تخافين يفشلچ

-مريم: لان صدك يفشلني

-نور: انتِ چنته شنو يفشلچ

-مريم: لو يريدني ارجع صدك چان اجه ويه الاطلس مرة وحدة بس واخذوني غصباً ما على ابوية بس هو ميريد

-بسملة: دوخة بدوخة الله يساعدج لعبت نفسي اني انتِ شلون وصارلج خمسة اشهر على هالوضع

-دعاء: انوب سمنت من القهر هههههه

هنه يضحكن واني بائسة يائسة مالي نفس لشي بهاي الدنيا ليش ابوية مُصر كل مرة يكسرني ويخجلني ليش يستغلني ويخليني اعاني..

وجهنه انظارنه على الباب من سمعنه صوت رجال يرعد بالبيت، عرفته وميزته هذا صوت الاطلس گمت بسرعة وقفلت باب الغرفة عليه كعدت بالكاع وخواتي گعدو بصفي يفركن بيدي ويصبرني..

نزينه اربعتنه من اندگت باب الغرفة علينه بهمجية وصوته يعيط..

-مرررريم طلعييي بس احاچييييچ ليشششش تعذبينييييي لييييييش شسوووويت

-بسملة بهمس: سودة عليه مريم كومي

احرك راسي لا وعاضه على شفتي حابسة دموعي اسمع لكلامه وروحي توجعني تعبت من هالحالة شوكت نرتاح، اختفى صوته توقعته راح مسحت عيوني ووجهي واللتفتت على الباب من سمعت حسه بصوت خافت مكسور يكول..

-الاطلس: ظنيتج علاج لجروحي ردتچ ضماد وحطيتچ بنص روحي، فتحتلج گلبي بس كسرتي ضلوعي وتركتيني

توجعت حييييل على نبرة صوته حسيت بسچينة وصارت بنص گلبي، زادهه عليه من كال..

-بس اعاين بعيونچ مرمر لا توجعين گلبي

مجاوبته ورجع يعيط ويصيح بأسمي ويدگ بالباب بالعشر دقايق واني ساكتة وعيوني تصب دموع، اخيراً استسلم وراح رجعت امي ضايجة وتضرب أيد بأيد..

-شلون بيكم شلووون

-دعاء: ماما قنعي ابوية خليهه ترجعله كافي شنو هالعذاب

-ام مريم: منو دمرنه غير ابوچنن سودة بوجهي عليج يمة بنيتي

سكتت ما انطي ردة فعل حتى دموعي مسحتهن وبقيت منزلة راسي واسمع امي تصبر بيه..

مر اسبوع ثاني على هذا الوضع ورحت اتوسل بأبوية ارجع بس كم يوم افهمهم واتحجج بأي شي وارجع لأهلي بس ابوية جبل ميهزك ريح ولا اتأثر بالعكس گام يهين بيه ولأول مرة من سنتين ونص يمد ايده عليه وضربني بالحايط..

تدخلو خواتي وصارت عركة چبيرة كلش كلنه تأذينه وكلنه اخذنه نصيبنه من الكتلة حتى نور النفسة، لحد ما نمت اثر الراشدي يطن بأذني وجسمي كله يوجعني تكسرت تكسر ملخت روحي من البچي..

گعدت على سجادتي ابچي وادعي ربي ينجينه ويخلصنه هو اعلم بحالي لو شكد ما اشرح الوجع الي بگلبي محد راح يفهمني تجي ايام خواتي يلوموني ويكولون تحملي الاهانة شتسوين واوقات اسمعلهم وأيدهم من الجزع بس ارجع اتقوى بكلام امي واكعد واسكت..

گمت على سريري ابجي وروحي مفرفحة ذبيت كل حيلي بالاكل كلما اضوج اروح اكل الى ان احس راح اتقيء واروح اذبه كله.. بقيت بهاي التعاسة الى ان اجه يوم الجمعة وتغيرت الاحوال بطريقة استغربتهه...

**

-علاوي تبقى مزاعلني

-لا تحجي وياي عمير

-عمر: ادري بيه غلطان ادري وشتكول حقك اني مستنكف من روحي بسبب اخر سالفة سويتهه

-علي: اخر سالفة سويتهه خزيتني وخزيت نفسك وخنت صاحبك! تتوسل تروح تشوف مرته وانتَ سكران تروحلهه للبيت شنوو تسوي عمر شنوو!! لو ما چنت وياااك وهي طالعتلك وحدهه بالباب شنو چان سويت ويه البنية!!

-ما اسوي شي وروح ابوي لو اريد اسوي جان سويت من زمان ما انتظر من تزوجت وحبلت

-چا المن رايح المنننن

-مادري ما ابرر لروحي ولا للموقف الحقير السويته ادري غلطان من ساسي لراسي بس علي اعذر گلبي اعذرره انتَ اخوي

-ما اعذره عمر بالغلطط ما اعذر تخون صاحبك مسلم وعينك على مرته الحامل مااا اعذر!!

-بالعباس ابو فاضل عيني مو عليهه اصلاً استحي اباع بوجهها لا تكتشفني احبهه علي جنت مو بوعيي وندمان وكاره روحي بسبب تصرفي نسيتهه والله نسيتهه ما افكر بيهه بعد التوبة كافي لا تزيد ضيمي

-وعركاتك المالهه داعي ويه الاطلس؟

-تصافينه

-اي تصيحله المصروع وتكسر خاطره

-روح اسأله تصافينه وتصالحنه هم طنگر عليه اسبوع بس رجع صاحبي اصلاً احنه من قبل هواي نتداهر سوه مو جديدة علينه

-شكد صلف

-ادري بروحي يله صالحني

-روح عني هسة

-ماروح الا نتصالح

-رووح خليني اغسل المواعين واسويلنه اكل

-تعال صالحني

-عمر ولي عن وجهي

-ما اولي

-شنو من بشر انتَ هم غلطان وهم يريدني اصالحه

-اني اصالحك

هجم عليه يحضني ويبوس براسي ويحلف ميعيدهه ضحكت من گلبي على سوالفه صارله اسبوع مكرهه عيشته حتى اسيل اظن كرهها بسببي..

-علي: انساهه عمير البت راح تجيب جابت

-عمر: نسيتهه هذا هو

-علي: ادري مو سهل الموضوع بس تخطى حبيبي جابت اسيل صارلهه يرمين ونوّر ابنهم غيث دنيتهم همه يحبون بعض وزاد حبهم بهذا الطفل لا تهلك نفسك بشي مو الك

يحرك براسه ساكت احس بوجعه واحس بقهرته عمر مو بس اخوي عمر روحي الثانية كل دمعة توگع من عينه بالليل ويضم وجهه عني حتى ما اشوفه احسهه نار تچوي گلبي بس شبيدي عليه..

-علي: لا تعاير اطلس بمرضه حرام عليك تقلل ثقته بنفسه

-اطلس تقل ثقته بنفسه؟ خوية اطلس جامع ثقة العالم كلهه من گدما معجب بروحه

-هههههه هسة تعال شنو رأيك تتزوج حتى تنسى اسيل

-عمر: لا ماتزوج انتَ شنو شو سكتة سويتهه على دعاء ما تدري شصار

-علي: شصار؟

-عمر: انخطبت

-علي: شنوووو

-عمر: انخطبت وعرسهه الخميس انتَ وين نايم

-ولك شنوووووو

-وذيج المرة كاض ايدهه الزلمة

-واك شلوووووووون

-كااااض ايدهه عليييي الله يعلم شنو كااااض غير ايدهه بعددد

-ولككك عمتتت عينيييي كاض ايددد الاحبهااااا

-اي وراح يتزوجهه الخميس الجاي

-اسكتتتت گلبي راح يوگف عمرررر راح اموووووت

ذبيت كلشي من ايدي ورحت طاير للغرفة على موبايلي لزمته اريد اتصل بأمي وروحي رايحة گلبي تگطع ماعرف شنو جاي احس مشتعل شعل مخطوبة وراح تتزوج واني مادري..

-علي: الووو يمة وينج انتييي

-زهراء: ها حبيبي علاوي شلونك يمة

-علي: يمة هسسةة تجين هسسةة

-شنوو شبيك ماما مفرفحة روحك شبيك

-يمة دعااء دعااء راح تتزوج

-منو دعاء؟

-يمة دعااااء العاشگههاا دعاااء يمة لحگيلي راح اموووت وعلي

-عمر: على كيفك شبيك اهدأ

-علي: لا تحاچيني وخرر، يووم راح اجي عليج انتِ ببيت خالي؟؟؟

-زهراء: اي ولك بس وين نولي هسة

-علي: خطااابة نروح نخطبهه

-زهراء: انتَ كلت هي راح تتزوج يعني مخطوبة هسة البنية

-علي: ولك عمررر هي مخطوبة؟؟ عاقدة يعني؟؟؟

-عمر: لا لا بعدهه بس خطوبة كلام

-علي: چاااا شيكض منهاااا ابن النعاااال اني اعلمچ دعيوووة وعلي اللعب بيج طوبة اطلع روووحج وروح ابوي

-عمر: على كيفك لا تتهور

-علي: امشي نروح لأمي گوم نروحلهم نخطب

-عمر: علي جر نفس شهيق نهيق يله وياي

دفعته اركض على السويچ اخذته واريد اطلع من البيت ولزمني يضحك واني رايحة روحي جمر بعيوني احس كلما اتخيل راح تتزوج گلبي يتگطع..

-علي: انتَ ليش تضحك شنو اليضحك؟؟؟

-عمر: تريد تروح تخطب انتَ؟

-اييي طبعاً

-وتروح بهاي جرودك روح بدل تعطر اكشخ

-ما اللحگ خاف تتزوووج

-وهي موقتتهه تتزوج اليوم بابا عرسهه الخميس مو هسة وراح يصير هو عقد هو عرس

-اللحگ؟

-اي طبعاً روح بسرعة ولا تتهاون اسبح هم بيك ريحة طاوة

مثل المسودن سبحت وبدلت تعطرت واخذت المشط وياي بالسيارة امشط شعري وعمر وياي يضحك ويصفگ فرحان..

-عمر: هلا هلا خطابة رايحين خطااابة

الطريق لبيت خالي سويته خطوتين نزلت فكيت الباب عليهم اخترعن النسوان من وضعنه سولفتلهم بساع اطلس وخالي وحمزة هم چانو گاعدين وصارت فزعة..

-الاطلس: ولك تحبهها وساكت كل هالفترة من راح تتزوج البت ياله تندرت؟؟؟

-علي: مو وكتهه الرزايل اطلس بعدين بعدين رزلني واكتلني هم امشوو خطبوليي

-حمزة: نروح نخطبهه اله خالي كوم ويانه

-محمد: ما تناسبك علي

-علي: اريدهه اني ما يهمني احد

-محمد: حياتهم غير عنه ما يفيدوكم بناتهم ولدي

-الاطلس: جاي يگلك يحبههاا ورايدهه تره علي مو ابنك وتكسر ظهره نفسي خاف نسيت!!

سكت خالي وجر كوب الچاي يشرب منه، طگت روحي وصحت..

-علي: يمة رايح وحدددي اني

-زهراء: لا يمة شنو تروح وحدك، محمد احچيلك كلمة!!

-محمد: هو هيچ وين اكو هيج خطبة غير نسولف ويه العالم وننطيهم خبر

-حصة: من خطبنه مريم ما انطيناهم خبر رحنه بسرعة حتى همه تفاجأو

-حمزة: عمي مو مال ممطالة خلينه نروح نخطبله ونلزم خطيبهه نلعن والديه

-حصة: هااااو شفيكم همج

-زهراء: طبعاً يطيحون حظه هو منو ويخطب اليحبهه ابني محمد تجي لو ما تجي؟؟؟

-محمد: انطوني صبر ابدل

**

"سارة"
كلشي صار بسرعة عمة أصرت كلنه نروح حتى ينحرجون من عدنه وماعدهم حجة يرفضون علي، ابوية ماقبل كلش معارض هاي الخطبة وشكيت السبب متعلق بـ مريم..

عمتي ما اهتمت لكلام بابا وصاحت بيه اروح اتمكيج، صعدت فوك لغرفتي واتصلت على اسيل اتطمن عليهه صارلهه كم يوم من جابت "غيث" ونانا جاي تبقى يمهه ببيتنه تداريهه..

سديت الاتصال من دخلت غدير لغرفتي تحجي على علي شلون راح يخطب وحدة نفس دعاء..

-غدير: گوة خلصنه من ذيچ انوب جابولنه اختهه البيئة

ماهتميتلهه ولا جاوبت وگفت گدام المراية دا احط حمرة وانضربت ايدي تخربطت الحمرة ووصلت لخدي..

-سارة: غدددير شبيچ!!

-غدير: لا تحطين روج احمر شنو معرسه؟؟

-سارة: شعليج اني احبهه

-غدير: ممنوع تحطيهه مسحي بسرعة

عافتني وراحت تدردم وتغلط عليه بالهمس غلست عليهه وكملت مكياجي وطلعنه اني ورقية لسيارة حمزة، شوية وصعد وهم ما باوع لوجهي ولا حتى سولف ويايه..

الطريق كله عمر علگهه عالگ اغاني ويرگصون هو وعلي فرحانين وعمتي تهوسلهم، الطريق مو كلش طويل بس متعب..

اخيراً وصلنه لبيتهم كلمن سفط سيارته ونزل، وگفنه بالباب علي يرعش رعش من العصبية والغيرة متنه ضحك عمر وحمزة يحششون عليه وما ملحگين..

-حمزة: على كيفك ابوية لا يصير بيك شي

-عمر: خلي نار مشتعله بصدره بعد عيني

ضحكو ثنينهم ودرت اباوع لأطلس متوتر ويفرك بيده دگم بدلته الرسمية ولف السكارف على رقبته بشكل مرتب، كل هالحركات يسويهن بهدوء تام بس حافظه حركاته من يرتبك شيسوي ما اللومه اكيد باله كله عند مريم، راح يوگف گلبه بس لحتى يشوفهه ..

دگينه باب بيتهم ووگفنه فترة ننتظرهم يجون وغدير تحجي علينه لان جايين كومة وعمتي تسكت بيهه، وگف ابوية بالمقدمة وحمزة واطلس وعلي كلمن على جانب من جوانبه، تغيرت ملامحنه والوجوم طغى علينه من تأخرو بفتح الباب..

انمغصت وبلعت ريگ ناشف جرح زردومي من طلعت بسملة لابسة لبس مناسبات كأنهه چانت بحفلة وفكت عيونهه على وسعهن من شافتنه..

-علي: تأخرنه......

يتبع ♠️💸...

• ━━━━━━❪♣❫━━━━━━ •

توقعاتكم 🤍

رحم الله من قرأ سورة الفاتحة على روح بيبتي 🤍✨