الاطلس "دمليج أسود" الفصل السادس وأربعون 46 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

بارت مفترض يكون بارتين بس حبيت ادمجهم سوه لمتعة اكبر ♥️

الاطلس يكول:
ستبقى عيناكِ تربكني، مهما اعتدت رؤيتها ♥️

• ━━━━━━❪♣❫━━━━━━ •

دك عمو محمد لسارة حتى نطلعه، طلعنه دفعة وحدة وقفلنه الباب ورانه ركبنه وياه السيارة شفنه نانا وياه بس هو وجهه غاضب وما يتحاچى محد بينه فتحت حلگهه وسألت..

الطريق كله محمد من اتصال لاتصال حرگ الدنيا نانا تحجي عليه وتكول..

-انتَ السبب كلله منك انتَ!!

-محمد: شبيييدي اني كولي شبيددي

-رقية: فهمونه شصاير وينهم الولد

-نانا: ما نعرف اجهزتهم مغلقة شاف (رئيس) محمد اللگه حل!!

مشاحنات حادة صارت بينهه وبينه چفصت ببطنه تلوم بي وتدعي وتبجي وتفرفح وهو ساكت ويهز براسه، بقينه على هذا الحال الى ان وصلنه البيت فوت السيارة سفطهه بباب البيت مباشرة عكس العادة يحطهه بالكراج..

نزلنه البنات وحدة مكمشة بيد الثانية جاي نمشي ورقية داست على فستان بسملة من وره ومحمد يا علي وكعت على وجهها صاحت متألمة تجمعنه عليهه بس مو وكتهه كامت بسرعة ودخلت ويانه البيت..

استقبلونه خالة حصة وغدير مخطوف لونهن سألن شكو سولفتلهم نانا مختصر مفيد وتكابلن خالة حصة ونانا بچي وعويل زادن الرعب بالبيت والخوف سيطر علينه..

ماكدرت احجي شي ماعرف شكول الدموع بعيوني وحضنت خواتي لصدري واللهج بالدعاء ربي يرجع اطلس والولد سالمين يارب يا كريم..

-سارة: بابا الله يخليك اللگه الولد فدوة

-محمد: اي بابا اي ان شاء الله ما بيهم شي

دخل للمكتب مالته واحنه توزعنه على التخم بسملة حطت راسهه بحضني مسحت على راسهه بأصابع راعشة واهمس لروحي كلشي راح يكون بخير..

دعاء رجعت تجرب تتصل بعلي وماكو فائدة مرت ساعة ضبط احنه على هذا الحال انهياار! تعبنه واحس ظهري انقسم نصين من الكعدة..

سارة تلوب تروح وتجي ما كعدت ولا ارتاحت، صاحت بيهه امهه حتى تكعد بس ولا يمنه تاكل بأظافرهه وتطگ سن بسن..

-غدير: سارة كاااافي كعدي انتبهههي على الطفل

-سارة: ابووو الطفل ماكوو غدددير الله يعلم ويننهم هسسسة شنو جاي يصييير بيهمم

-حصة: يحسرتي على عيالي وين راحو

مشت الساعة بطييء اخذت حيلنه وياهه طلع عمو محمد من المكتب يصفگ ايد بأيد ركضنه عليه نتسائل بنظراتنه ذب نفس متعب وكال..

-فص ملح وذابو مالهم اثر

-نانا: خمستهممم!! خمستهمم مالهم اثررر محمممدددد

-غدير: انتِ هَيييي احترمي نفسج

-نانا: سكتتتيي انتِ البيه مكفينييي

-حصة: بسسس بسسسس شفيكم عيالنه مختفيين وانتم تتصايحون

-مريم: عمو شلون هيج وين راحو وين اختفو

-محمد: مادري شلون هيج صار مادري

-بسملة: معقولة انخطفو؟؟ بس شلون يخطفون خمس زلم!!

-غدير: العصابات كلشيي يسوون يخطفون عشيرة بأكملهه بدون لا احد يحس

-دعاء: عمو الله يخليك اللگاهم لا تعوفهم ماعدنه غيرك رجعهم النه

اختنكت ضاگ بيه النفس بچيت لحدما انفخ راسي رفعت ايدي ادعي ماعرفت شكول الكلام ضاع مني ادور وجهي على سارة منتهية واسيل حالهه اتعس، بسملة ورقية يبجن ودعاء تخربطت..

كعدت غدير تحجي ويه روحهه وفجأة صاحت وسط دموعهه..

-غدير: اخذني للدكتوور ورجعنني وكلشي جان تماام حچى ويايه وگلي هو ما يعووفني اشترالي عصير وسولفنه هواي داهرني وضحكني وييين رااح اخوية ويننن راح الاطللس

تعبنه من العياط ومن التساؤلات، جهرهر الجو وعبرت الصلاة ومحد حاس سارة تعبت من المشي كعدت على الدرج تتصفن..

فزينه على صوت عمو محمد يصيح من غرفة المكتب هرولنه اله خالة حصة فتحت الباب بدون لا تطرقهه وتوضحلنه كلامه شديكول..

-محمد: شلووون اخذوهم انتَ متأكد فييصل؟؟؟ ولك خمممس زلللم شلون كدرولللهم؟؟؟؟ شنووو؟؟ غدروووهم؟؟؟ منااا لليل اذا ولدي ما رجعووو احرگكم كلكممم بدون استثناء

سد الاتصال ويه حارسه الشخصي "فيصل" سألته نانا شكو ما جاوب باد حيله ووكع على الكرسي طك خشمه دم حرنه وياه وداخلنه ميتين خوف شنو هالمكالمة الي هزت الجبل محمد..

-حصة: تكلممم محمد لاعت چبوودنه من الخووف

-غدير: بابا شبيييك احجيلنه

-محمد: على الاغلب شمسون اخذوهم

دگت صدرهه سارة وشهكت غدير، بينما اني وخواتي اللتزمنه الصمت ننتظره يكمل ما جاي نفتهم..

-محمد: غدروهم غدر ماعرف شحاطين بمشروبهم منوميهم متعاركين وياهم مهدديهم بالسلاح مادري المهم اخذوهم فيصل يكول مالهم اثر لا همه ولا سياراتهم

-سارة: لاااا بابا مستحيل

-غدير بعياط: شيردوون من عدننه

--حصة: وليش شكيتو بشمسون بالذاات؟؟

-محمد: ما جاي تبرد نارهم حركة شمسون القذرة هاي تاركين اثر الهم حتى نميزهم

-نانا: اطلب الشرررطة طالما اكو اثر استعجل

-محمد: اثر ما يفيد الشرطة بشي اثر خاص بيناتنه احنه بس نفتهم على بعض

-سارة: ياريتهم ميتيييين ولا بيد شمسووون

-مريم: سااارة شنو هالحجي اسم الله عليهم

-سارة: ما يرجعوون الي يوكع بيدهم ما يرجعوو يذبحوو والله يذبحووو شفت بعيووني

غدير انهارت انهيار تام صارت تعيط وركضت على ابوهه تتوسل بي يرجعهم وخالة حصة تدك على راسهه ونانا تخبلت..

من الخوف العشته مادري عن شي فصلت عن الدنيا ذبذبات صارت براسي صوت سارة اخترق عقلي وخوفة عمو محمد زيدت الطين بله..

مرت اربعة وعشرين ساعة على هذا حالنه كلشي ما لگو تدخلت الشرطة ورادت تكبر السالفة لولا عمو محمد طلب يتكتمون على الموضوع..

لا نوم لا اكل لا راحة لا نعرف شنو صار ولا شنو راح يصير؟ الولد عايشين ميتين منعرف الحيرة اكلت روحي واخذت من حيلي..

اضطرينه ننقل سارة للمستشفى صفر سكرهه وضغطهه مرتفع لولا ستر الله چان مات الطفل ببطنهه، ظهري يموتني وجع مينحمل صعدت بغرفتي القديمة مددت على الفراش اول ما حطيت راسي على المخدة كفخت ريحة الاطلس بخشمي..

بچيت محترگة روحي حضنت مخدته واشم ريحته بيهه، گلبي يكول هو بخير بس خوفة عمو محمد تثبت العكس.. غفيت على وضعي من البجي هلكت وكعدت على صوت اذان، الغرفة ظلمة هندس ماعرف يا اذان هذا..

جريت موبايلي اشوف ساعة بيش ولاحظت ان هذا اذان الفجر كل هالوقت اني نايمة وما حاسة، نزلت جوه البيت فارغ خطيت خطواتي للحديقة ووكفت اباوع لقفص النسر..

كزبر جسمي من زارتني ذكرى سيئة، ذكرى يوم زواجي الاول يا ترى نفسهم الرادو يعتدون عليه ماخذين حبيبي؟

رفعت راسي للسما ادعي بگلب محروگ يارب ماعندي غيرك، دخلت جوه توضيت ووكفت اصلي، كملت صلاتي تركت المصلاية مفروشة ورحت لغرفة سارة نايمة والمغذي مشكل بيدهه وغدير نايمة بصفهه..

**

ظلام دامس يحيط بالمكان، رائحة نتنة وبرد قارص يصلب العظام، دقات قلب تنبض ببطئ، رئة تصارع لتلقط هواء نظيف، تعب وقلة حيلة مسيطرة على الاجساد الضخمة ما الذي يحدث يا ترى؟..

-اطللللللس تسمعننننيييييي

-ليش ما يجااااوب اطللللللللس

اسمع صوتهم بس ماكدر اجاوب طعم دماء بفمي واللم فضيع بـ لساني كأنه مبتور، صريع واگع جثة هامدة على ارض صلبة باردة تدگ بالعظم.. ايدي مربطة ببعض ورجليه كذلك..

جاهدت احجي ويطلع صوتي بس مختفي كأن اخرس حركت ايدي بصعوبة احاول افكهن بس ماكدرت وجع جسيم بأيدي ورجلي وضلع من اضلاعي..

صوت حمزة عالي جاي اكدر اميزه يصيح بأسمي تمنيت اجاوبه لكن هيهات اوتاري الصوتية منعت صوتي من الخروج..

فتحت عيوني جاحظهه من لقطت اذاني صوت علي يصيح بصوت رج داخلي يصيح بأسم توأمه واخوه، صوته ممزوج ببكاء حاارق يحرق الروح..

-اخوووووي ويييين عمررر جاوبنييي ويييينك

ويجاوبه صوت عالي مع صوت صفعة قوية تخرس فمه..

-ماااات اخوك ذبحنااااه وكلكم لاحگي هسسه لا تستعجلون

اهتز كياني رجفة قوية زارت عظامي وخسفة بگلبي قطعة من گلبي راح مات اخذو من عدنه بشربة ماي عمر مات رااح!..

يأست والجزع غلف روحي لا البيه اوكف لا الاكدر ادافع عن نفسي مربط وواكع بگاع ماعرف شنو تاليتنه منتظرين موتنا هذا هو خلصت خبزتنا بهالدنيا..

بقيت بهذا الحال الحزين فترة طويلة، روحي توجعني واطرافي يبست.. كلما اسمع صوت احد من جماعتي بره يفز گلبي لكن سرعان ما تشوط روحي من اسمعهم يعذبون بيهم..

حسيت على صوت فتح باب الغرفة الموجود بيهه، غرفة ظلمة ما بيهه نتفة نور دخل رجل ضخم الجثة مقنع بيده ضواية ماكدر اشوف شي منه بس عرفته مقنع، وگف بجانبي وذب عليه سطل ماي بارد ثلج شهكت مجرد طلع صوتي بده يعذب بيه..

رفسات على بوكسيات على ضربات على وجهي وجسمي حاولت احاربه بس ماكدرت افك ايدي، صحت متألم من ضربني بحزام جلد يجلد بيه شاغت روحي من رفسني على خاصرتي، تعب جسمي جاي احس بروحي تطلع واصابعي يتعوجون ما وكف عن تعذيبي الا من اغمى عليه..

ماعرف شكد مر من الوقت عيوني ماكدر افتحهم مورمة، انزف دم من كل جزء من جسمي، اوشكت روحي تغيب مرة ثانية حسيت بالنوبة راح تزورني قريباً بس تقاويت على نفسي خصوصاً من سمعت صوته المألوف يكول..

-شلوووون

-لازم نحصلهه وهاي الطريقة الوحيدة نضغط على شاف محمد!

-وتجيب الوريث!!

-اذببحه من الورريد للوريدد طززز بيهم

-لك بابا هذااا وريث يعني تنكلب الدنيااا عليهم شلون تجيبهم هنااا

-ما يهمني

-الاطلس وحمزة وريثين ابوهم!! ماتو؟؟ احد بيهم ماااات؟؟؟؟

-لا هذا مدلل ابوه ما تشوفه

مغمض عيوني صوته مميز وجاي احاول اربط وين سامعة، نسيت طار عقلي وتبخر كلشي مني لكن بـ لحظة سريعة ومفاجأة استرجعت ذاكرتي من تقرب مني نفس الشخص العذبني جرني من شعري وضرب راسي بالكاع بقوة وصاح..

-الشررررريحة ويييييييين....

**

"سارة"
عيوني ما ضاگت طعم النوم مثلت النوم عسى ولعل فعلاً يزورني بس ماكو فائدة، طلعت غدير من غرفتي بعدما تأكدت اني بخير تخاف على الطفل..

نمت على فراشي وبديت بنوبة بكاء مريرة على حالنه وين راحو وشيرجعهم بعد اذا شمسون ماخذيهم معناهه خلص ننساهم لليوم احلف همه الخطفوني قبل وهمه القتلو يوسف اني متأكدة بس ماكو دليل ضدهم ماعدنه..

دفنت راسي بالمخدة وصرخت بحس عالي افرغ الي بداخلي، حسيت بوجع صار اسفل بطني كمت اكعد على حيلي وحضنت بطني بين ايديه، مسحت دموعي ونزيت على صوت طبة صارت ورايه اللتفتت بسرعة وراحت روحي من شفت رجال مقنع واكف بباب بلكونتي..

كمت من مكاني ردت اصرخ لكن قطع صوتي من وجه سلاح عليه ونزع القناع عن وجهه، بجيت مرعوبة اكثر خايفة ومتأكدة هذا الرجل راح ينهيني..

-صوتج لا يطلع هسس واحد منج افرغ المسدس براسج

-شلون دخلت هنا

همستهه بين دموعي، تقرب عليه اكثر والسلاح مثبت عليه راح لباب غرفتي قفلهه علينه واشرلي على الفراش..

-تمددي هنا

-فاهد حباب لا فدوة

-تمدددي هنا كلت

-ماكدر ماكدر والله ماكدر حامل اني

-نامي على الفراش سارة!!

ينتر نتر بين سنونه رجف كلي من تقرب عليه وداس زناد السلاح ركض كعدت على الفراش وتمددت حاطة ايدي على بطني..

كعد بجانب جسمي على السرير ومشى اطراف اصابعه على ايدي ومتوني نزولاً لصدري وبطني..

-فاهد: بصعوبة صعدتلج الحماية تارسة بيتكم

-شلون اجيت

-ما يهم شلون المهم اني هنا يمج وشفتج و..

تقرب يشم بشعري وكال بصوت راخي..

-واشمچ

كزبر جسمي ردت اكوم من الفراش ورد سحبني بقسوة رجع السلاح وهالمرة حطه ببطني وكال..

-انتِ وابنج انهيكم بنفس اللحظة لا تلعبين وياي سارة وهذا...

رفع موبايله وحطه على اذنه وكال بصوت مستخف..

-ندز زلمنه يتونسون شوي ويه مرة اخوج يمكن اسمهه مريم؟ حرامات ما گدرولهه بيوم عرسهه

-شنو

-شرسة جانت ظلت بنفس صاحبي وجاي ينتظر بس اشارة مني

-شتريد من مريم ليش جاي شتريد

-ما نحب الي يلعب ويانه حبيبتي سارة

-اذا ابوية يعرف انتَ هنا ينهيك

-اوه والله؟

-فاهد شتريد

-ليش سارة ليش كسرتي گلبي

-شنو كسرت گلبك شسويت اني

-مو تعرفيني اريدج؟ مو تعرفين احبج ما طلبت منج شي غير ليلة وحدة بس وحدة بس!!

-حرام عليك

-ما فات الاوان نكدر نصلح كلشي لا تخافين انطيج فرصة ثانية

عكست عيني على باب غرفتي هو شافني هيج وضغط على بطني بالمسدس صحت بصوت مكتوم متوجعة ولزمني من متني بقسوة وشمرني ينيمني على الفراش..

ثبت ايدي بأيده شهكت مرعوبة حتى النفس انگطع عني من كال بعيون حمرة مدمعة..

-عوفي حمزة ونتزوج اني اربي ابنج لا تخافين يصير ابني وراح احبه واداري وما احسسه بنقص

-فاهد وخر عفية

-حمرتي بس هالفرصة انطيني والله راح ترتاحين راح تعيشين بسعادة راح اسامحج لان تزوجتي حمزة واني اطلكج منه بيدي لا لا ما اطلكج ما يحتاج

-شنو

-شنسوي بطلاك اخذج ونسافر ونعيش سوه هاا شگلتي؟؟

-حمزة وين

-بحححح حمزة بحححح راح اني عذبته بيددي اني طلعت روحه بيدددي

-مات

-راح اموته اوعدج ناخذ منه معلومات واذبحه مثل الخروف

-شلون دخلت هنا بدون لا احد يشوفك؟!! شنو جاي تسوون بالكامرات!!

-ههههههههههههههه تزوجيني سارة يله يله

-ولك وخرر

-صووتچ، حسافة استمتع بيج ذاك الچلب حمزة اخخخ يالقهر

ضغط على ايدي اكثر نبتهه بالفراش يحارب ويايه وساد حلگي بأيده الثانية راحت روحي من كال..

-المرة الفاتت جنت غبي وخليت غيري يتونس بيج بس هالمرة مستحيل!

شهكت واحس هالشهكة طلعت وياهه روحي هو الي دزهم يعتدون عليه واخذو اغلى شي عندي، دفعته عني وما رضى يعوفني طلع وصلة بيضة من جيبه حطهه على وجهي غمضت عيوني وبعد كلشي ما حسيت...

فزيت وراسي ذابحني من الالم، كمت بسرعة اتلفت بالغرفة كلشي على وضعه باوعت لنفسي ما متغير بيه شي ولا اكو اثر احد لامسني بس اثر عضة حافرة زندي، كمت اتأكد من نفسي وحطيت ايدي على گلبي وبچيت بفرح وخوف بنفس الوقت شلون تركني هيج شلون وهو چان ناويهه..

كمت من الفراش بعدما بديت استوعب الصار فتحت باب غرفتي ووصلني صوت الصريخ نزلت اهرول شفت نانا مكطعة روحهه ومريم واسيل متخبلات..

-سارة: شصااااير

-مريم: ما جاي اصددددگ شنو من گلب عدددكم

-سارة: ولج احجي شكوو

-دعاء: عرفنه الخاطفين الولد وساوموهم بالشريحة

-سارة: يا شريحة؟

صفنت ماعرف شديحجون وشنو يقصدون امي تعيط وتدك وتلطم وغدير منهارة وبقية البنات وضعهم اسوء ما جنت اعرف ابويه لازم على شركة شمسون لزمة مخليهم يتخبلون وكل الجاي يصير بسبب هاي الشريحة، ركضت نانا على مكتب ابوية تدك بالباب وتصيح عليه وتعايره..

-ابنك هذا محمد ابننننك شنو اغلى واعز من الولددد

-حصة: مصالحهم

نزلت دمعة من عيون امي مسحتهه بسرعة ووكفت على حيلهه كامت تصعد لغرفتهه ونانا على صريخة الوحدة انبح صوتهه وراح..

-رقية: انطوهم الشريحة وخلصووونه ليش ساكتتت باباا

تدك بباب المكتب وتصيح عليه ما خطر ببالي ولا واحد بالمية ابوية تنازل عن الولد مقابل الشريحة ميقبل ينطيهه!

-مريم: هذا قصدج نانا من گلتي الهوامير ما يهمهم ولد ولا تلد المهم مصالحهم تمشي وبس

جاوبتهه امي واكفة على الدرج جاي تنزل وبيدهه موبايلهه..

-حصة: البيزات عدهم اهم من العائلة، السُمعة، السعادة والولد مريم، محمد عنده استعداد يبيعنه كلنا حتى يمشي شغله وكالعادة دائماً الاطلس الضحية اول من يتنازل عنه

بچت ماما بحرگة وحضنت نانا، كعدت مريم بالكاع تبجي وتنوح راح صوتهه من البجي خواتهه حاوطوهه بينما اني عشت بصدمة ماكدرت اطلع منهه صدمة استمرت لـ 3 ايام متتالية..

**

"مريم"
جاي اعيش الضيم شكد شفت تعاسة وعشت تعب چذب مثل هاي المرة، زوجي منعرف بي عايش لو ميت زوج اختي وازواج صديقاتي مالهم اثر تمنيت انام واكعد واللگه هالكابوس منتهي..

عمة زهراء رجعت وامي وابوية ونور هم اجونه من افتهمو بالصار لح عليه ابوية ارجع وياهم وناخذ البنات بس ماكدر اعوفه روحي متنطيني..

عمو محمد ما طلع من غرفة المكتب طول هاي المدة بينما نورنا ضيف جديد وهو الجد "عبد الرحمن" ابو خالة حصة وجد البنات، استلم الموضوع وكال ما يرتاح ولا يهداله بال الا يلگه الولد..

انعزلنه على انفسنا محد بينه طلعت من غرفتهه حاطه راسي بحضن امي وادعي بگلب محروگ، نزلت دمعتي من تذكرت كلماته الحنونة، للمساته الجريئة اللطيفة، لحركاته المشاكسة ومداهراته..

-مريم: يا كاشف الكرب عن وجه اخيك الحسين اكشف كربي بحق اخيك الحسين

همستهه بيني وبين نفسي ونزلت دموعي، جفلت على صوت امي تكول بحماس..

-اييييي ايييييي شلون نسيتههاا شلووون

-مريم: شنو ماما شكوو

-ام مريم: يا كاشف الكرب 133 مرة شلون ما سويناهه ولجن كوومن

-مريم ببكاء: سويتهه والله ثلاث مرات بس ماكو فائدة

-بسملة: ميهم نعيدهه راح اصيح البنات نسويهه سوه

ركضت بسملة تصيح الباقين بس امي كالت نروح للصالة، اجه الكل بدون استثناء كعدنه نسبحهها وامي تشرحلهم..

-ام مريم: اصعب المشاكل والمصايب تحلهه هذي التسبيحة، اعقد الحالات، نتيجة فوورية تشوفين وره ما تخلصيهه بس لازم يكون عدكم ايمان ويقين مية بالمية وانتو تسبحون "يا كاشف الكرب عن وجه اخيك الحسين اكشف كربي بحق اخيك الحسين" تكوليهه 133 مرة

-غدير: عدنه ايمان عدننه يله نسويهه

بدينه نسويهه سوه وكلما نخربط نعيد ماعرف شنو دا اكول عقلي فاصل، كملنه ورقية كعدت بالباب تنتظرهم يرجعون بچت سارة من شافتهه وصاحت بيهه ترجع بس امي ما خلتهه..

كعدنه ننتظر وننتظر وننتظر وننتظر، وهاي صارلهم 3 ايام مختفين تعبنه وفقدنه الامل من شافتنه امي بهذا الحال كالت بصوت عالي..

-ماكو شي بعيد على الله واهل البيت خلي عدچن ايمان ثقو بالله راح يرجعون زلمكم وينورون هذا البيت وترجع لمتكم وجمعتكم!

هزت راسهه خالة حصة ورفعت ايدهه تدعي، حطيت ايدي وره ظهري وجع دمرني مكسور نصين، الوب بگعدتي اكوم واكعد ماعرف شسوي ويروح..

رحت للحمام اغسل وجهي وحسيت بدوخة ولعبان نفس قوي، انفاسي صارت بطيئة تعبت اريد بس اكعد حسيت بشي ينزل عليه ماعندي طاقة امشي كعدت بكاع الحمام وصحت بصوت واهن..

-بسملة.. ماما

ميطلع صوتي صرت ازحف ماعندي حيل اكوم لا اكل ولا نوم صار كم يوم وصلت قريب باب المطبخ وانلوت ايدي الساندة جسمي عليهه من الضعف حطيت راسي على الكاع اريد المكان يثبت بيه وبعد ماحسيت بغير الظلام يحاوطني...

حسيت على اثر شي بارد يمشي بعروق ايدي فتحت عيوني بصعوبة كأن ملزگات بصمغ مادري بروحي صارلي نايمة 9 ساعات، غواش الصورة امامي ثواني وبديت استرد نظري..

-ام مريم: حبيبتي امي الحمد لله على السلامة

ابتسمتلهه ودرت انظاري على سارة واكفة گبالي لزمت ايدي بقوة وكالت بفرحة مكسورة..

-مرايم الف مبروك انتِ حامل

للحظة نسيت كلشي وركزت على هالكلمتين "انتِ حامل" فتحت عيوني ممصدگة طرت طررت من الفرح الدنيا مسايعتني حضنتني امي تضحك وتباركلي واجن بسملة ودعاء هم زادو فرحتي، صرت اضحك واتلفت ادوره نسيت وكأن مساحة ومسحت ذاكرتي..

-مريم: وينه اطلس ماما يعرف؟؟ حبابين لحد يحجيله اني اسويله مفاجأة

سكتن كلهن وسارة رجع وجهها غيم، بلعت ريك وبلعت غصتي وياهه ضحكتي اطلس مو هنا اني وين والدنيا وين، برطمت بصعوبة سيطرت على نفسي حطيت ايدي على بطني وتچيت ظهري على المخدة وهمست مؤمنة..

-مريم: ربي يرجعلنه بابا بالسلامة

شهكت سارة بچي بصوت عالي باوعتلهه مستغربة، بسملة معبسة وامي ودعاء وحدة تباوع للثانية..

-مريم: شصاير؟.. اطلس شبيي عرفتو عنهم شي؟؟

-دعاء: اي عرفنه

-مريم: احچوو شبيكم شبيي الاطللس گلبي راح يوگف متحچننن

-سارة: مريم اهدأي لگو الولد بس اطلس لسه ما لگوله اثر

-مريم: شلون ليش ليش بس هو وينهم الباقين اكيد يعرفون شيي

-دعاء ببكاء: لا محد يعرف شي عن الثاني چانو بأماكن متفرقة

-مريم: ليش بس هو ليييش

-سارة: اهدأي مريم ابوية ما يعوفه طلعت فرقة كاملة يدورون عليه وجدو هم تدخلو معارفه وحتى ابو نورسين تدخل

فقدت اعصابي راسي راح ينفجر ماعرف شسوي ابچي اللطم ادعي اصرخ شنو بيدي شسوي، غطيت وجهي بين ايدي ابچي بحرگة البنات يحاولون يطمنوني بس گلبي نار راح اموت..

-دعاء: مريم مو زين عليج انتِ حامل ومهددة بالاسقاط الدكتور يكول لازم ترتاحين

-مريم: ليش هيج حظي لييش من ضحكتلي الدنيا اختفى رجلي

-ام مريم: بنتي لا تسوين هيج بروحج حبيبتي الله موجود وميعوفه ربچ الحافظ انتِ مؤمنة ادعيله ماما

-يارب يارب

سكتت اجر نفس نسيت اسأل عن باقي الولد من هول الخبر راح عن بالي..

-مريم: الولد وينهم شفتوهم شلونهم؟

-سارة: اي شفناهم حمزة عنده كسر بكتفه وايده وجسمه صاير خريطة من العذاب كلشي مجربين على اجسامهم ما تركو مكان يعتب عليهم ومسلم هم عنده كسر برجليه ثنينهن

تبچي وابچي وياهه درت على دعاء، حچت بفرحة ناقصة عبالك ممصدگة شافت علي..

-دعاء: علي بخير الحمد لله هم ما سلم من التعذيب بس ماعنده كسور بس عمر منتهي مريم عنده فطر بالجمجمة وكسر برجله وايده وطعنة بخاصرته وضعه كلش صعب من جابو گالو عنه ميت هذا منتهي بس سبحانه الي يرد الروح

همست "الحمد لله" بيني وبين روحي وسرحت افكر بحبيب روحي سودة عليه وينك وين ارضك وين سماك..

رجعنه للبيت والولد بقو يتعالجون بالمستشفى ما سألت عن أي شي لا شلون لگوهم ولا شصار مادري عن شي الا من سارة اجت تسولفلي عمو محمد حل السالفة ويمكن منطيهم الشريحة السحرية الخبصونه خبص بيهه..

نايمة بفراشي سارحة حتى دموعي نشفت ماكدر ابجي واريح گلبي بس القهر تارسني وكاسر گلبي، اذن المغرب كمت توضيت بلكت تطفى ناري ووكفت على مصلايتي رفعت ايدي ادعي ربي ينجي من ظلمهم ويرجعه الي ولطفلنه بالسلامة..

كعدت متربعة بعدني بأحرام الصلاة فتحت مفاتيح الجنان اريد اقره حديث الكساء وفززني صوت عالي اجه من جوه بس ما جان صوت عياط لو بچي مثلما تعلمت چان صوت هلاهل!

كمت بسرعة اركض اشوف شصاير واشوف نانا وخالة حصة وعمة زهراء يهلهلن والدموع بعيونهن، زهراء كامت تصفگ وتهوس..

-زهراء: كلللللووش صلوو على محمد صلووو على محمددد

مافهمت شي نزلت اباوع بالوجوه واشوف خوات اطلس ميتات بچي وخواتي فرحانات اجتني دعاء حضنتني بقوة وكالت..

-رجع الاطلس مريم رجععع لگووه

-مريم: شنو

-بسملة: لگو والله هسة اتصل ابوه علينه وكال لگوه ونقلو للمستشفى

گلبي فرفح نسيت شنو لازم اسوي بس اعوي خواتي يغمني ويضحكن واني مملخة روحي ماكدرت اسكت ولا ارتاح ما هدالي بال ودكيت رجل الا اروح للمستشفى..

بدلت بسرعة واجه عليه ابوية ما قبلو اروح علبو احتاج راحة ميعرفون راحتي هناك بشوفته، طلعنه بتكسي ابوية بايع سيارته اتصلت على عمي جاوبني بحس تعبااان كلش سألته وين اطلس ماقبل يدليني بس من شاف اصراري كال..

-محمد: بغرفة العمليات عمو

-شبيي عمو الله يخليك سولفلي راح اموت والله رحمو بحالي

-محمد: الاطلس بغيبوبة مريم ما صاحي

اختنك من كالهه حطيت ايدي على گلبي تگطعت تگطع من الداخل بعدما كمل..

-محمد: الدكتور كال سبب الغيبوبة هو النوبات المتكررة على الاغلب فوك الخمس مرات تكررت عنده نوبات الصرع من وره العذاب، تعب جسمه ودخل بغيبوبة..

-المهم عايش عمو

-لسانه يجري دم يجوز يحتاج خياط وهالشي يأثر على نطقه للكلام تدمر وليدي

بچه بحرگة وسد التلفون بوجهي ماهتميت لأي شي كاله ورحت ركض كدام غرفة العمليات نسيت روحي ونسيت كل الحواليه وكفت بالباب وادعي ربي وانخي ابا الفضل العباس..

وهيج مشى شهر ضبط اطلس ما صحى من الغيبوبة كل الولد كامو على حيلهم صح بعدهم تعبانين ومجبرين بس على الاقل كامو..

انكسرت فرحتي بخبر حملي وانكسر گلبي من ادخل اشوفه اكعد بجانبه اسولف وياه بس كلشي ماكو لا حس ولا نفس نايم والمغذي مشكل بيده وحاطين واير جاي من جهاز على جبينه..

اقراله حديث الكساء واقراله سورة "ص" كل خميس مثلما تعودنه، ادندن القصيدة الاحبهه والي حبهه هو على حبي "يغادر كل ملك" احط ايده بين ايدي واطلب منه يضغط على ايدي اذا يحس كل يوم اكررها وماكو شي ابجي احيان واحيان اخرى اهدأ نفسي واكول راح يرجع نفس قبل واحسن بس يحتاج وقت..

بس يا وقت ومشى ستة واربعين يوم اطلس نايم هالنومة، حرك اصبعه مرتين فرحنه وكيفنه عبالنه راح يصحى بس ماكو شي..

طلعت اشوف الدكتور بعدما الكل رجع لبيته بقيت ويه امي ونانا كاعدات بره صافنات، حجيت ويه الدكتور توسلت بي يلگالنه حل بس ما باليد حيلة كال اطلس محظوظ لان ما اضطرو يخيطون لسانه صفت سالفته بكسر ضلعين وساق وكتف وغيبوبة..

كعدت بره ممنوع ادخل عنده خلص وقت الزيارة احس بروحي عاجزة ماكو بيدي شي امي ونانا لحو عليه ارجع للبيت ماكدر اعوفه گلبي مينطيني اتخيل يصحى واني مو عنده اكيد راح يزعل..

ثاني يوم الصبح كلت بس اشوفه وارجع للبيت اسبح وابدل وارجع، دخلت عليه الغرفة غيرتله الفراش ومسحت وجهه ورقبته بالكلينس المبلل مشطت شعره ابتسمت واني امسح على لحيته الكثيفة..

-مريم: وينه عطرك وكشختك يابو ريحة راحت ذيچ الايام

عدلت حاجبه وبسته على خده حطيت ايده بين ايدي وذبيت نفس..

-كافي گوم عندي خبر حلو الك.. كوم يله

مسحت دمعتي وضغطت على ايده بللت شفايفي وهمست..

-محيطي اكعد كافي شنو هاي تنبل نوم

كحيت بقوة غصيت بلعابي ضليت اسعل بصوت عالي دكيت على صدري اهدأ الكحة وتشتت من حسيت بيده تضغط على ايدي، فزيت وصحت من لا وعي..

-اطللس تسمعني؟؟؟؟

رجع ضغط على ايدي بس بخفة اكثر صرت اضحك وابجي اعيط واكمز..

-افتح عيونك حبيبي افتحهنن اريد اشوفهن

حرك بس اصبع واحد وهدأ وراهه، ركضت بسرعة اخبرهم الدكتور فرح بهذا التطور خصوصاً وهو مرتين ضغط على ايدي وحدة وره الثانية..

خبر يسوه الدنيا صنع يومي ويوم الكل، كل عيالي اجو للمستشفى منتظري يكعد حتى نورسين اجت وما زعلت هالمرة ولا غرت الفرحة ما سايعتني كل شوية اللزم واحد واكول..

-لزم ايدي والله لزمهه وهيج ضغط عليهه قوي والله هيج سوه

-دعاء: الحمد لله يارب الحمد لله

يومين وفتح عيونه الحلوة وزادت سعادتنه الكاع متشيلني بعد احسني طايرة ممصدكة، طلعوه لغير غرفة وره ما رجع لوعيه بالكامل گابلته وكعدت ميحجي بس يباوع بعيونه ويبتسم ماتحمل اكوم اللزگه ببوسة يضحك بس بدون صوت ويهز براسه بطريقة "اويلي يا مريم اويلي"..

اسبوع وخرجو لبيتنه يحجي بالقطارة صوته مبحوح يكولون بسبب الصوندة واتوقع المشكلة من لسانه هم بس ما ضغطت عليه بأسئلتي..

ميخليني اعوفه كلما اريد اروح اكمل شغلي لو اسبح لو اللتهي عنه يضوج ويزعل ويدور وجهه عني مثل الجهال، اموت من الضحك على تصرفاته واكابله واكعد اهذي براسه اذكره بسوالفنه قبل واحچيله على سارة ولادتهه قربت وميتة خوف وناصبات عليهه البنات..

مر كم يوم واخيراً اجه يوم ولادة سارونة الحلوة ما درينه الا من حمزة اتصل بـ الاطلس كام وصور ابنه "يوسف" وهاي جانت اول مرة يطلع صوت اطلس طبيعي مثل قبل كال بفرحة..

-الاطلس: سارة جابت ولك؟؟

-حمزة: اي البارحة بالليل ولك باوع هذا ابني فحلي يوسف

-الاطلس: اشتعل ابوك يوسف اكبر عار ويستشرف بروسنه

-حمزة: لسانك رجع رشاشة ينرادله گص بالنعال مرة ثانية

-الاطلس: الله لا يعود ذيچ الايام كلت راح صوتي اشتعلت ابهاتهم

-حمزة: اشتعلو همه وابهاتهم خييّ راحو تراب

-الاطلس: الفضل لجدي عبد الرحمن

-حمزة: اي

-الاطلس: حمزة اني اعرفك زعلان من ابوي ومزاعل ابوك بس يبقون اهلنه وتعودنه عليهم اصلاً لو ابوي ما طلع طلعة خايسة استغرب

-بس مو لهدرجة اطلس!! شنو من گلب عدهم جلمود خوما جلموود! يابة انعل ابو الفلوس التخلينه نصير بهالوحشية والهمجية!!

-الاطلس: ما راح ترجع للشركة؟

-لو يموتون خليهم هيج تايهين

-تنحل ان شاء الله يله حير بأبنك هسة شوية ونجي احنه

-لا تجي ولك تعبان انتَ

-لا الحمد لله احسن بهواي اني اليوم اشيل جبيرة ايدي

-چا يله ننتظركم

سد وياه الاتصال وكفت على الميز دا امشط شعري واللتفتت عليه..

-مريم: تدري اطلس ماعرفت شلون انحلت سالفتكم وشصار بشركة شمسون تعاقبو؟

-قانونياً لا ما تعاقبو لان مستحيل احد يلزم عليهم لزمة عدهم ناس بالدولة تساندهم بس ابوي فرك اذاناتهم

-شلون بله

-يعني امور تتعلق بالشغل كسر خشم مالك شمسون وفاهد وابوهم وحتى اخوهم المسافر صارو طشار

-تمنيت يتحاكمون والله يستاهلون السجن

-تره ما يهمهم السجن ذولة عدهم ذبحي ولدهم ولا يخسرون فلس وخوش جدي لعب بيهم جولة گلب كل الشركات ضدهم بتعاونه ويه هوامير كبار خلاهم يتمنون السجن وما يحصلو معيشيهم برعب

-جدك رجل اعمال معروف بالخليج خالة حصة تكول ومبين يحبك هواي

-اي فعلاً يحبني ويعزني

-زين وسالفة الشريحة شنو؟

ذب نفس وفرك وجهه كام من الفراش بصعوبة وكال بحزن..

-الاطلس: بيهه دليل قتل يوسف اخو حمزة

-وشعليهم شمسون؟

-لان همه الي ذبحوه!! وابوي يعرف ولازمهه عليهم صار سنين وساكت يرهبهم ويستغل خوفهم لمصالحه لان الشريحة بيهه صوت وصورة لفاهد وابوه يحجون بمقتل يوسف واتفاقهم على العملية بالكامل

-يمة!! وابو حمزة يدري بهالشي؟!!!

-مادري هو مبين تفاجئ بس الغريب ما اخذ موقف من ابوي كملو شغلهم طبيعي

-زين حمزة ما راح يشتكي عليهم؟؟

-الاطلس: لا ماكو نتيجة

-اذا ماكو نتيجة ليش شمسون خايفين چانو

-دوخة راس مريم ما راح تفهمين عليه وابوي وابو حمزة ساكتين ثبتولنه ماكو نتيجة بس تتأذه مصالحنه

-عجيبين ميهمهم لا ولد ولا عائلة المهم مصالحهم وبس!!

-ومو بس هاي لازم على شمسون لزمات تكسر الظهر عنده دليل على تهربيهم مواد ممنوعة وتزويرهم لهواي سندات وارقام وهمية هواي هواي لازم عليهم ابوي

-واني اكول ذولة شبيهم خانسين حتى وره ما كتلت مالك من اجه خطبني

هز راسه واخذ منشفة وفات للحمام يسبح كعدت افكر معقولة اذا قدمو هاي الادلة للدولة ما راح يتخذون بيهم اجراء لعد شنو هالسلطة العدهم الحقراء! حزنت على حال حمزة ومسلم الله يساعدهم والله صدمة عمو محمد يعرف قاتل اخوهم كل هالسنين وعنده دليل ضدهم وساكت الله يصبرهم ويهون مصابهم..

طلع اطلس من الحمام بدلنه وطلعنه للمستشفى سوه واخذنه نانا ويانه، بالمناسبة اسيل الحمد لله تصالحت ويه مسلم ورجعت وياه بشروطهه كعدتله نانا ركبة ونص وطيحت حظه بالرزايل هزأته وخلته يكره الساعة الي شك بيهه بأسيل..

رجعت ببيت وحدهه قريب بيتنه اشترو واسيل مرتاحة وفرحانة برجعتهه فرحت على فرحتهه ودعيتلهم بالسعادة والفرحني اكثر مسلم وعمر تصافو ورجعو حبايب..

اول ما وصلنه لجناح الولادة شفنه باب سارة مزين ببالونات زرگة ونشرات تدل على ان هذي المرأة ولدت ولد..

انغمرت السعادة لروحي من شفتهه بوضع ممتاز والورد محاوطهه من كل جهة، اهلهه چانو عدهه عدى عمو محمد حسب الفهمته حمزة ميحجي وياه وميريدهم يتشاوفون..

شفت ابنهم يخبل ما شاء الله وچنه هم احمر على سارونة، بوسه اطلس وشماه طار بي يلزم ايده ويگلي..

-باعي شكدوتهه ايده نتفه

-هههه اي هستوه اجه للدنيا

-حمزة: الله يرزقكم هاي الفرحة واكبر ان شاء الله

-الاطلس: امييين الله يسمع منك

ودعناهم ورحنه لقسم الكسور شلنه جبيرة اطلس الوقت كله مبتسم ومن اسئله شبيك يكول ماكو شي..

-مريم: اووي اطلس احجي ليش تتبوسم الفضول كتلني

-حلو الطفل مريم

-اي طبعاً يخبل ابن سارة وحمزة شفت يمكن هم يطلع احمر على سارة

-يعجبني يصير عدنه طفل

خفيت ابتسامتي بعدني ما كتله بقى يتنهد ويكول..

-اذا صار عدنه طفل الا ادللة ما انيمه الا على گلبي

-عشتو واني وين اروح

-انتِ نامي من الجهة الثانية والله حلوة غير انوم طفلي على گلبي

-من هسة انحاز للطفل وعافني

-هو وينه مرمر لا تغارين هسة خلي يصير والله كريم

رجعنه لببيتنه راح اطلس بالغرفة يتمدد على الچرباية يتابع تلفزيون واني اسوي عشا، اليوم نانا مو ويانه بقت ويه سارة بالمستشفى حضرت الميز شعلت شموع معطرة وزعتهن بالمكان وصبيت العصير بالكاسات..

رحت ارتب نفسي اخذت بالختلة فستان من الغرفة وطلعت جنطة مكياجي حتى ميحس عليه من ابدل، دخلت لغرفة نانا بدلت بفستان اوف وايت قصير مفصخ شوية بس كلش حلو دققت اشوف بطني مبينه لو لا ماعرف وهواس صاير بيه لو فعلاً هي كبرانه، تمكيجت مكياج ثگيل عكس العادة وجريت عيوني بكحل وصلته لاذاناتي على كولة بسملة..

فتحت شعري وعفت عطوبي مثل ميحب هو شعري ويفي صح ينفش بس لطشته بزيت خليته يستقر شوية، تعطرت وطلعت للصالة كملت اخر التحضيرات على الميز وصحتله من مكاني..

-محيططي الاطلسيييي تعال تعشاااا

وكفت بصف الميز اكل بشفتي خجلانة شبيه مادري عبالك اول مرة طلع من الغرفة يمط بجسمه ويحجي بتعب..

-باجر لازم ارجع للدوام مو وكتـ........

سكت قاطع كلامه من شافني انرسمت ابتسامة على ثغره وتقرب عليه نظراته مبهورة، لزم ايدي ورفعهه يدورني حول نفسي ويكول..

-شلون جمال هذا يتعب الگلب

-هههه تعال نتعشى

جريت ايده كعد على الكرسي بس ما نزلت عيونه عني ابد طول فترة العشا ياكل ويتفرج عليه كأن ديتابع مسلسل مهم ويخاف يفوته حدث..

-سمنانة مرمر صايرة تجيبين العين

-اني سمنانة؟

-اي بس لا عبالج ما عاجبني لو مو حلو وعلي تمخلين

-حتى لو كلت مو حلو ميهمني

-هلووو

-اي طبعاً احب نفسي عادي

-اي عيني منو گدچ يحبچ الاطلس وكاتل روحه عليج

-اي يابة منو گدك تحبك مرايم بس ما كاتلة روحهه عليك تخاف على فدشي لا يتأذه

-وشنو هالشي عيوني

-فدشي عنوني نتفه

-وهو؟

-دكمل عشى يا گلبي

-شبعت سولفي شنو هاي النتفة

-احم اءء

-مرمر اذا مسوية مصيبة سولفي من هسة خلينه نتلاحگ للموضوع

-يااا شبيك شنو مصيبة

-كولي شبيچ حبيبي

-اطلوس

-عيونه

-تحبني؟

-اموت عليج

-اذا اجانه بيبي راح تحبه اكثر مني

-انتِ الاصل تبقين متربعة على عرش گلبي ما تتلحلحين

-ابد ما اتلحلح؟

-ولا نتفه

-حبيبي اني حامل

-خوش

-شنو خوش

-مريم چنچ ماعندج سالفة امشي نروح للغرفة ننام

-ولك يبووو

-شكو ولج

-حامل اني حاامل

-منين تحملين من زرف الحايط حبيبي

-والله حامل من اول اسبوع زواجنه

-جاي تنصبين عليه مو؟ نفس سالفة الطيار

-لا عيني لا سالفة الطيار حقيقية ليش عبالك ناصبة عليك

-ما جاي تفوت بعقلي ليش ما تقبلين تكولين اسمه؟

-لان تروح تطيح حظه ونبتلي هسة عوووفك من الطيار اطلس شبيك

-شبيه

-اني حاااامل هاي شوف شوفهه بطني مبينة باوع هاي النتفه هذا الطفل باوعله

وكفت بصفه لزك منطيته جانبي الايمن لزم خصري بين ايده وحط ايده على بطني ضيك عيونه وكال..

-هذا كرش مرمر عادي حبي تصير هاي الحالات عبالج حامل وهو كرش من الاساس ميخالف حلوة بكل حالاتج امشي للغرفة

-وخر والقران زاعلتك شنو من بشر انتَ

-يعني صدك انتِ حامل؟

-اي

تغيرت ملامحه مية وثمانين درجة نهض بسرعة من الكرسي وفتح حلگه وعيونه ضحكت على ردة فعله ونزيت من صاح..

-انتِ حااااامل؟؟؟؟ حامل يعني راح نصير اب وام؟؟؟؟

-اي اي اي والله اييي

-لا عليج العباس مريم لا تضحكين عليه وعلي ماتحمل

-ما اضحك عليك حامل اني اطلس

ضحك بصوت عاالي كلش وصار يدور بالمكان يروح ويجي يروح ويجي راح على الميز شال الشوكة حط بيهه بتيتاية وحطهه بحلگه ورجع يروح ويجي يروح ويجي انوب رجع شرب مي وهم يروح ويجي يروح ويجي اخيراً راح اخذ تفاحة عضهه ورجع يريد يروح ويجي يروح ويجي وعطت..

-هاي شبيك اطلس

-ولج انتِ حاااااملل

-چنك ما مقتنع يا بعد عيني شوف اخذني للمختبر و....

ما لحكت اكمل الجملة وركض عليه ملهوف حضني بقوة لدرجة طگ ظهري يضحك ما مصدك شالني يفرني ورجليه تلولح، يصيح بحماس وفرحة واضحة..

-انتِ حامل ولج مريم حامل راح نصير اهلللل راح اصير اااب

-هههههههه نزلني اطلس داخ الطفل

نزلني بسرعة ضحكته نعشت يومي فرحته تسوه الدنيا لزم ايدي يبوس بيهم ويبوس بوجهي ويهمس "الحمد لله" برطمت من شفت دموعه تنزل مسحهن بسرعة وغطه وجهه يضحك ويبجي..

-لهدرجة فرحت حبيبي

-فرحاان شنوو لج اني فوووك الغيم فوووك فووووك ماريد شي من الدنيا بعد الحمد لله ربي

-ماتوقعتك هيج تفرح لان احنه متفقين منريد اطفال بالبداية

جرني يحضني ويبوس بخدودي بعدني عنه وحط ايدي على صدره مسح عيونه صارن حمر بسرعة وكال بلهفة..

-من اول زواج النه متمني يصير عدنه طفل بس انتِ مترددة وخايفة حتى وره ما انحلت مشاكلنه بقيتي خايفة لدرجة اخذتي مانع ماردت اضوجچ ورضيت كلت اذا الله كاتبلنه يصير طفل اليوم لو بعد عشر سنين

-چنت خايفة وماريد اربط روحي بطفل ماعرف بشنو چنت افكر اطلس خفت تخذلني لو خفت تجي وحدة تاخذك مني ويرجع ابوك يحطك بموقف خبيث يخلينه ننفصل وتعوفني الشيطان استحوذ على فكري، بس من عرفت بنفسي حامل كل هالافكار تبخرت نسيت كلشي وردت هالطفل تمنيت من كل گلبي يثبت ببطني ويكمل فرحتي

-ماعوفكم للموت ماعوفكم

-قبل چانت ماعوفچ هسة صارت جمع شنو هاي عيني استاذ

-چا غير هذا خليفتي ووريثي

-اهووو اطلس بدينه بسوالف الوريث وماعرف شنو اسكت ماريده يعيش بهالطريقة خلي حُر طليق اريده يصير طيار

-يصير نعاال تحن على الطيار مريم لا تفحطيينه

-الا يصير طيار الا واني ادخله الكلية بيدي

-هسة خلي يجي ويتدلل شيصير خلي يصير الا اخلي اسعد طفل بالدنيا

-برأيك اني حامل بولد؟

-مادري أي شي ولد بنية هايشة ابو بريص المهم شي يجمعنه

مشاني وياه للغرفة ميحتاج يسولف بفرحته عيونه تحچي مدمعات والضحكة ما غابت عن وجهه، كعدنه على السرير احجيله كلشي وشلون عرفت حامل..

-الاطلس: ما عرفتي جنس الطفل؟

-لا بعد الدكتور تكول بنص الرابع يبين بس اطلس شتتمنى انتَ ادري ادري راح تكول شنو يجي من الله انعم الله بس بنفسي اعرف

-مادري مريم ما مفكر بهالشي من قبل ما يهمني ولد بنية المهم تمامة الخلقة

-اذا ولد هم تسمي حمزة؟

-لااا يابة

-هااا هاي شنو شو اختلفت على حمزة

-هو ما يرضى والله يكول خليني حمزة واحد مميز وسمي ابنك غير اسم

-اذا بنية اني اسميهه اريد والولد انتَ

-هذا هو اتفقنا

كملت ليلتنه بقبلة وحضن دافي واكيد لا تخلو من تحرشات اطلس، مشت ايامنا هادئة جداً مطمئنة حلوة وكلهه حياة وتفائل بقيت اراجع طبيبة اتأكد من سلامة طفلي والحمد لله كلشي بخير وماشي تمام..

بيوم اتصلت امي كالت تريد تجي توجب سارة على ولادتهه، انطيت خبر لعيالي ولبست ورحتهلهم استقبل اهلي هناك.. يوسف ابن سارة صاير يخبل متفح وجبير وبشرته بيييضة ثلج على امه وشعره ما ثابت لونه بس من امي شافته كالت هذا يطلع احمر على امه..

كعدت اسولف ويه امي تكول باعو بيتنه وراح يرجعون للبادية ضجت وانقهرت راح يرجعون بعاد وسبب بيعتهم البيت ابوية داخل بمشروع وخاسر كلشي اضطرو يبيعون البيت وينقلون..

كاعدات البنات كلنه نسولف ونضحك ومتونسات، غيوثي بحضن بسملة واسيل كاعدة بصفهه يلاعبنه وتقطع تفاحة وتنطي شيف، دخلو علي وعمر سلمو علينه رادو يطلعون واللفتنه كلنه على شهگة اسيل..

-عمر: شبيييج

ايدهه مشكوكة بالسچينة من دتقطع التفاحة كشولت وجهها متوجعة وهزت راسهه ماكو شي بس الي خلانه كلنه نحس بغرابة هي ردة فعل عمر المبالغ بيهه!

-عمر: شجاچ غير تنتبهينن زين من وجعتي نفسج هسة!!

طلع كلينسة من جيبه وقدمهه الهه وكف بصفهه يشوف الجرح وهي تبررله ما جانت منتبهه، الموضوع مينرادله كل هالردة الفعل صح البنية تألمت بس محد گام من مكانه وانخبص مثل خبصة عمر..

-علي: عمييير يله نطلع منا

جر اخوه من ايده وطلعه ما ركزنه بالموضوع وتطمنا على اسيل ورجعنه لسوالفنه، شوية واجت رقية تكول لبسملة يكومن يروحن بالحديقة..

**

-بسملة: صرصور مابيه حيل سوالفچ احجي شكو

-خنفسانة عمر يريد يحاچيج واكفلج يم شجرة الورد

-بسملة: شيسوي بيه؟!

-يمة شبيچ معصبة ولج امشي روحيله شوفي شبي

-ماريد

-بسملة بلا عناد رووحي

دفعتني حتى امشي رحت اشوف شيريد بدون نفس شفته واكف بجانب الشجرة وحاط ايده بجيب بنطرونه خفق گلبي بقوة ودگيته بالنعال حتى يسكت..

-نعم استاذ

-عمر: شو هادئة وخوش بنية اليوم

-من يوم يومي خوش بنية

-واني اشهد

حچاهه بأبتسامة ما رديتهه كتفت ايدي ودورت عيوني بالحديقة..

-بسملة: الجو حار كلش احتركت

-اها چنچ مليتي وترديني أدخل بالمفيد

-صراحة اي اريد الزبدة

-عمر: بسملة، اعرف الراح اكوله غريب ممكن بس لا تحسبي اعتراف او شي غلط لان اعرف نظرتكم بهاي المواضيع، اني اجيت بس انطيچ خبر اني كلش حاب اتقدم لحضرتچ اذا تقبلين بس انطيني اشارة ماريد احرجچ

-لا ماقبل

جحظت عيونه كأن جوابي صدمه ابتسم بأستغراب وكال..

-عمر: شنو؟

-ما اقبل ارفض

-يصير اعرف ليش

-لا حابة احتفظ بالسبب لنفسي

-احد متقدملج؟؟

-اعرف لشنو جاي تلمح ظافر خطب تره

-لا شوفي مو هيج..

-هيج لو مو هيج استاذ اني اسفة

-اذا علمود دراستج تكملين ماعندي أي مشكلة وشنو تردين اني حاضر

-ما مفكرة بالزواج اني اعتذر

-مو هسة عادي انتظر شهر شهرين سنة مو مشكلة

-اني اسفة عمر لا ما اقبل

-ليييش!!

-هيج بكيفي اني ماريد

-جاي اكلج دراستج وتكمليهه ببيت وحدج تكعدين مساعدات وطباخة اجيبلج كلشي تردين يوصلج تردين البيت قريب على بيت مريم براحتج واسيل هم هناك و..

-واسيل تجينه ونتونس سوه عصرونيات وعشيات وغديات وانتَ كلما تضوج دور وجهك باوعلهه شوية استمد طاقة افرح وتونس واشبع منهه وارجعلي

-شنو شدخل اسيل؟؟

-انتَ متريدني زوجة عمر تريدني بديل لأسيل تعبي فراغك العاطفي بيه لا اكثر

-لا لا ماكو هيج حجي

-اني مو غبية ولا قشمر شفت نظرتك الهه ورجفتك عليهه من انجرحت كلشي بيك بعده يحبهه ويتمناهه ما متخطي اسيل حتى تبدلهه بثانية

-بسملة ابدلج بأسيل من كل عقلچ انتِ لشوكت اعيد اسيل انتهت سالفتهه و..

-انتهت سالفتهه بعقلك بس ما انتهت بگلبك!!

-بگلبي هم ونسيتهه خلص راحت ومات حبهه

-مات بس ما دفنته وهذا اصعب شي

-يااا الله بسملللة شبيچ

-عمر اني ما اللومك الحب الاول صعب ينسي بس لازم تستوعب انتهت قصتكم قبل لا تبتدي، لا تكسر گلب بنية ثانية وتتزوج والاولى بعدهه ما انشلعت من گلبك كلما تسرح تتذكرهه وتبقى تقارنهه بزوجتك اني مو مناسبة الك استاذ عمر ولا انتَ مناسب الي، ربي يوفقك ويه غيري بس بعدما تنسى اسيل..

تركته على وگفته ورجعت ادخل للبيت گلبي تگطع الف وصلة لكن احياناً لازم نتخذ مواقف تجرحنه وتأذينه نتنازل عن حلم ممكن صعب التنازل عنه اليوم ونعيش اذيته شهر شهرين احسن مما نبقى طول العمر عايشين بضيم وعذاب..

**

"مريم"
طلعو اهلي يرجعون لمدينتهم رجعو الولد اللتمو بالصالة اشوف دعاء خاملة وتعبانة تكول بسبب العلاج تريد بس تنام صحصحت شوية على سوالف علي وهو يداهر عمر السارح منعرف شبي بس عود الولد يعوفو براحته؟ مستحيييل..

-علي: شباب چني ملبوس من توأمي العار

-الاطلس: لبسة النعال هم

-علي: وعلي حتى اني جاي احس ولك هيووو انتَ وجه البطة جاوب

-حمزة: ماكو رايح هذا غرگان

-مسلم: شسالفة ابو خالددد ما تجاوب

-الاطلس: علي اخوك لاحه توحد چنه

-علي: ولك جاوبني لا تفشلني بين الطليان

-رقية: احننه طليااان

-علي: اهوو حطت روحهه صرصور كومي ولج لا تخليني احط......

-الاطلس: شتحط؟؟

-علي: احط هذا نسيت اسمه هذا الـ.. الـ..

-دعاء: ورد ورد يحط بحلگهه

-علي: بعد روحي روحج اي هو ورد نسيت اسمه خرب اخوي

-رقية: ايي هم عبالي

-علي: راح اكوملج املخ.... الورد على راسج

-الاطلس: استقر عليوي معليك بخواتي

-غدير: اوووه شنو هاي شبيك عمر متحجي والله ضجت

-مريم: صدك شبي عمر اطلس شو گضيتوهه شقه وتاركي

-علي: چنه مضروب بوري الاخ

-حمزة: گلتهه اني بگلبي بس استحيت احجيهه

-رقية: اي انضرب بوري وفد بوري معددددل

-عمر: رقية احط....... الورد بحلگچ سدي بوزج وولي

-الاطلس: ولكم شنو گاضيهه تحطون ورد بحلك اختي اكلو نعلل

-علي: ناكل اخي ناكل ليش ما ناكل بس مالتي اريده سبايسي

-غدير: هسة غير نفتهم منو ضربته بوري!

-اسيل: صار عندي فضول اعرف يله عمر سولف

-حمزة: مثلما كالت ام غيث سولف ولك ظل بالنه

-عمر: ماكو انچبو كلشي ماكو

لحو عليه يحجي وهو قافل ما نطق بس الطنكورة واصلة للسماء وميتحچى عكس العادة، اجو الكبار انضمو ويانه يكعدون وحلت الكعدة..

كامت نانا تجيب حلويات وبالغلط چلب فستانهه بالكرسي ورجعت كعدت بمكانهه كلنه عبالنه داخت فز اطلس من مكانه يشوفهه وعمو محمد هم اللتفت عليهه ويه خالة حصة، بعدهه دتريد تكول مابيه شي وفاجأتنه غدير من كالت كدام الكلل..

-بس لا هم تطلع حامل

-محمد: غدددير!!!

-غدير: على كيفج ويه روحج بلقيسه مو زين حمل وره حمل

-الاطلس: غددددير صوتج ما اسمممعه!!

-حمزة: منو حامل

-عمر: من رخصتكم

-غدير: لاا عمر وين رايح لا يشكون بيك تطلع انتَ الابو

فااارو عمو محمد واطلس رادو يهجمون عليهه وكوة لزمت اطلس اسيطر عليه واحلفه بداعتي يعوفهه، وعمو محمد نفس الحالة خالة لازمته وتحلفه..

-غدير: يمكن متعرفون بس هاي الخدامة المغربية سقطت ابنهه عمره خمس اشهر قبل كم شهر خطية ما تمهلت بي بلقيس نعرفج خدامة بس محد يعرفج ساقطة و*****...

طفح الكيل دفعني اطلس على القنفة وكام لاخته صار بينه وبينهه حمزة يفاككهم كبرت العركة وحمت من غدير لحت صعدت فوك على الدرج وضحكت ضحكة رنانة وكالت..

-بلقيس ام الززلم

صعد اطلس البايات يريد يروحلهه وجرو علي وحمزة مد اصبعه يحذر اخته ويصيح بصوت شخط بلاعيمه..

-امووووووتج وعلييي اموووتج غددددير اشعععله شعععل اليحجي على نااانا

-محمد: كاااافي سدو الموضوع

-غدير: اووي حبيبتي بلقيس يخافون على سمعتج شوفي

-الاطلس: غددددير اني اعلمج بنت الكلللللب

شهكنه من عاطهه واندار على عمو محمد يكمل عليه..

-سدووو السالفة لييييشش ترضى احد يجيب سمعتهه وشررففهه على لسااانه اذا انتَ تقبل اني ماااقبل انعل وااالديه الي يأذي امييي بمقداار شعررره

-بلقيس: اطلس الله يخليك كافي

-غدير: اوووع تشوف هاي العاهـ*** امك اطلس مع الاسف

-الاطلس: امييي وتااااج راسج وراس كل الموجوددين ادوووس راسه بالقندددرة الي يجيب اسمهه على لسانه

-حمزة: اطلس اهدأ ماكو داعي تبررون بلقيس حُرة بحياتهه الهه حق تعيش وتتزوج وتخلف ماكو داعي تهلك روحك

-الاطلس: ولك شنو تتزوج وتخلف امييي هاي امييييي

محد ديربط ان هو يقصد امه الحقيقية لان متعود يكول عنهه امه وعبالهم من باب العاطفة ديححيهه لكن فاجئنه عمو محمد من كال بثقة وهو يكعد بمكانه ويحط رجل على رجل..

-محمد: فعلاً حمزة كلامك صح بلقيس حُرة بحياتهه الهه حق تتزوج وتخلف وتعيش مثلما تريد، واني من تزوجتهه هم حُر ومن خلفت منهه هم حُر

خنس صوت الكل لو نذب ابرة نسمعهه عيني على الاطلس الواكف يرجف من العصبية اندار على ابوه وعلى نانا الواكفة تبجي وتمسح عيونهه..

-محمد: الاطلس ابني وابن حبيبتي والي اختاريتهه من دون كل البنات حتى تكون شريكة حياتي ابن بلقيستي الي فنيت عمري ادور رضاهه واجدي حبهه..

لحظة صمت الصفنة والصدمة الي اعتلت وجوههم مؤلمة، صارو واحد يباوع بوجه الثاني والي كمل الصدمة اطلس من عاط بحرگة..

-بلقيس امي!! امي الي جابتني!! امي الي تحملت ضييم علمودي اختفت عن الانظار وعاشت خدااامة طول عمرهه تخدم الهواميرر حتى تبقى بجانبي وما تعوفني! امي الي جدي عبد الرحمن شرط على ابوي شرط ما يعلن زواجه من بلقيس حتى لا يسحب الاسهم من عنده ويحرمه من حصة واملاكهه، ابوي سجن امي سنييين وبنيين بسبب اتفاقية عقدهه الادهم ويه عبد الرحمن تبقى بلقيس مخفية وزواجهه بالسر من محمد!!

-مسلم: ما جاي افهم شي

-الاطلس: ولا اني واكتشفت هالشي متأخر كلش لو اعرف امي راح تبقى متزوجة ابوي بالسر چان هواي شغلات تغيرت على الاقل ما ابقى خايف يجي يوم ويعلن زواجه منهه وياخذهه اله ويستفرد بيهه

-حصة: اطلس

كالت اسمه بحس مبحوح مخنوك عيونهه تجري مكسورة خاطر، راح الهه اطلس بوس ايدهه وحضنهه لصدره..

-الاطلس: اني اعرف امي حصة ما رضت بكل هذا وصادقت بلقيس وصارتلهه اخت وربوني سوه صارتلي ام وحبيبة وشرط جدي عبد الرحمن محد يعرف بي غير ابوي

هدأنه وره كلامه عمو محمد اللتزم الصمت كذلك الكل سكت حتى غدير مصدومة راحت لغرفتهه وبعد ما طلعلهه حس ورجعت اندثرت سالفة بلقيس ام الاطلس ما تغير شي مجرد اهل بيتنه عرفو اما الخارج محد عرف بهذا الزواج..

صار الاطلس اكثر اريحية اشوفه فرحان بنانا ومتونس بيهه بس استغربت من ان لليوم يصيحلهه "نانا" حتى وره ما عرفو الحقيقة ومن اسئله يكول متعود ونانا متزعل بالعكس عدهه اهم شي يكون مرتاح..

غدير كملت علاجهه ويه الدكتور ايام تبقى نايمة بالمستشفى مترجع للبيت وهي طلبت هالشي، دخلت بشهر السادس بحملي تعبت بس اهم شي خلصت من النساوة، ماقبل اعرف جنس الطفل اريدهه مفاجأة من اجيب محد اقتنع بهالشي وامي تحجي عليه علمود الجهاز بس كلتلهه كلشي راح اجهزه ابيض واللوان تقبل للولد والبنات..

دعاء اشترتلي حذاء وردي وكالت حاسه اني حامل ببنية لان اعراضي خالة حصة تكول مال بنية، مشت الايام سريعة والهدوء غازي الاجواء الا من اجه اليوم الي فزت سارة من نومهه تصيح..

-ابنيييي وينه ابنيييييي شفتو ابنييي!؟؟؟؟

نزلت تهرول من فوك وجهها اصفر انهبطنه على هبطتهه وگلبنه البيت على ابنهه ما لگيناله اثر تخبلنه ما ظل واحد ماتصلنه بي اجه حمزة من شغله منتهي حاله ميتفسر صار يعيط بالكل ويلوم بينه شلون نغفل عنه وشلون طفل بعده رضيع يختفي بهالطريقة..

سارة انهارت فرفحت روحهه تدور مثل التايهه بالبيت كمزت دعاء وكالت كأنهه تذكرت شي، همستلي بيني وبينهه...

-دعاء: معقولة غدير اخذته!!

-مريم: غدير مو هنا نسيتي بمركز تأهيل مادري مستشفى نسيت اسمهه

رجعنه نلوم بأرواحنه تذكرت الحلم الي تحلمته بسارة هواي يشبه هذا الموقف گلبي خمشني رحت اهديهه بس ماكو فائدة ما ارتاحت بالعكس زادت بالبچي، بنص هوستنه وانفتحت باب البيت طلت منهه غدير وبيدهه ابن سارة!

-حمزة: يوسف

-غدير: هلااوو

-سارة: ابني هذا ابني حمزة غدير ماخذته الحمد لله ياارب الحمد لله لگيناه

-حمزة: شلون اخذتي غدير ليش ما انطيتينه خبر عبالنه انتِ بالمستشفى

-غدير: شبيكم اخذته الصبح هاي التنبل نايمة دهاكم صرعني صرع تعبني

انطت الطفل لابوه وصعدت فوك بقينه واحد يتصفن بوجه الثاني شلون طلعت هاي وليش اخذت الطفل والله عجيب!

سكتنه مغلسين عن الموضوع بس عصبية حمزة ما اختفت بس حاول شكد ما يكدر يبلعهه ويسكت لخاطر اطلس شرحله غدير دتمر بفترة صعبة وراح يرجعهه للمستشفى باجر..

بس ياريته رجعهه بساعتهه لان المصيبة الصارت گلبت احوالنه وعفستنه عفاس..

**

"سارة"
رضعت يوسف ونيمته بحضني ما نشفت دمعتي خايفة عليه وخفت اكثر من شفت غدير شايلته، مسحت وجهي وحطيته بالكاروك وتمددت اريح عيوني..

اندكت باب غرفتي ودخلت غدير تضحك وتعدل بشعرهه صابغته بالجديد، وضعهه ممتاز وحالتهه النفسية كلش زينة اتعجب من الدكتور يكول هي تعبانة وتحتاج مصح..

-غدير: يمممة الامومة تتعب سارونة

-سارة: اي صح بس حلوة

-لا لا متعجبني ماحب بس يله ميخالف اتحمل لخاطر حمزة

-شتتحملين؟

-يوسف اتحمله يله شوكت تنفصلون

-منو ينفصل؟

-انتِ وحمزة شبيچ

-انفصل؟؟

-اي مو هذا اتفاقنه سارة!

-غدير يا اتفاق شبيچ انتِ

-اتفاق تتزوجين حمزة تخلفين منه طفل وتولين من حياتنه!

-لا لا مستحيله انتِ شلون ترديني اعوف ابني

-تعوفي شكو عليه اني امه واربي واخاف عليه اكثر منج مو زين من صبرت هالكد وهسة ياله فتحت وياچ الموضوع

-غدير طلعي بره

-شنو؟؟!

-طلللعي بره

-صوووتج لا تصيحين

-طلعيي بره شنو من بشر انتِ مخبلللة شلون ترديني اعوف رجلي وابنيي

-اي اي مخبلة اني مخبلللة اريد حمزة ارريده راح تعوفيهم غصباً عليج بالطيب بالغصب تعووفيهم

-ما اتركهمم تحلميين

-غصباً عليييج سارة لا تخليني اموتج بيدددي

-طلعي ولج انتِ صاحية؟؟

-لااا مو صاحية سارة والله اذبحج بيدي والله

ما لحكت احجي وما حسيت الا بمخدة تنام على وجهي وغدير بثكل جسمهه كعدت عليه وثبتت ايدي برجليهه تضغط بالمخدة واسمعهه تبجي بصوت عالي وتهذي ظليت ارافس ضاع مني النفس شفت الموت بين عيوني راحت روحي وانتهيت..

بيني وبين الموت شعره لكن بقدرة قادر رجعتلي روحي، انرفعت غدير عني ماعرف شلون صرت اكح واصرخ اريد هوا اريد اللقط نفس، درت عيوني عليهه واذا اشوف حمزة شايلهه وهي ترافس بيده وتصيح..

-مااااريددد هدوووني هدوووونييي لازززم تموت سااارة لازم تموووت

شالهه شيول وطلعهه من الغرفة يتصايح وياهه ما جانت عندي فكرة جان واكف يتسمع علينه چان منتظر هذا اليوم ومتأكد من حصول هيج مشهد شي يوم وفعلاً صار وردت اخسر روحي بسبب جنون غدير بـ حمزة..

تدخلو اهلي لكن كالعادة ابوية انطه الحق لغدير وما لامهه ماعرف شلون يشوف الموضوع طبيعي لكن الي توضحلي ابوية مجنون بنفس الطريقة ويه نانا ومستعد يذبح ويأذي ويسفك دماء أي شخص يصير بطريقهم..

الاطلس عاش برعب ما كدر يبيت الموضوع ليلة فوراً حجز واخذهه وياه يعالجهه بالخارج، استغرقت فترة علاجهه اشهر عديدة الاطلس يروح ويجي عليهه ما كدر يبقى وياهه بسبب شغله وقرب ولادة مريم..

**

-وياااااي وياااااي

-ايييييي

-يله وااااحد ثنيييين ثلاااثة صفگووووله لحبيب عموووو

صفگنه بأقوى قوة نملكهه علمود الوريث الصغيروني "آدم" يقبل يشرب العلاج وميشلع گلبنه، غافله علي وحط الملعقة بحلگه هستوه ديبچي زعلان وعمو محمد صاح..

-الله طيببب طيببب موو ادم؟؟

بينما ادم قابله بزعل وبكاء شديد ولف ايده حول رقبتي بقوة، مسحت على شعره الكستنائي الناعم وهمستله..

-حبيبي زعلان الحلو

-ادم: مااامااا

-يا روح الماما هسة تصير زين وقوي لازم تشرب الدوه ادومي ماما

-عمر: اهوووو شكد اضوج من تنعوص الجهال بس هذا هذاا يتدلل عليه

شال غيث ابن اسيل يكعده على اكتافه ويلاعبه باوعلهم ادم بحقد ووكف يوسف مكتف ايده بطفولية كبال عمر..

-يوسف: وده (وجه) البطة

فطسنه ضحك وعمر نزل غيث من اكتافه وكتف ايده نفس طريقة يوسف وكال..

-ابو شعر الاحمر

-يوسف: اهبل (اخبل)

-حمزة: لك ايييي عفية بوليدي

گلب عيونه يوسف بغرور نموت ضحك على سوالفه من هو وصغير مليان حركات وللان مينطق الحروف عدلة عكس ادم، حط ايده على خصره وكال..

-يوسف: اني فهل (فحل) ابوي

-عمر: هههههههههه خرب عرضك حمزة ابنك ماخذ ثقتك وثقة الاطلس وثقة امة محمد كلهه

زاد الضحك بالمكان وادم بعده زعلان ومكمش بيه، نعم طفرت كذا سنة بسبب الروتين الطبيعي المريح الي مشينه عليه، اكيد تصير عدنه هفوات واحداث خنفشارية بس مو مثل قبل نسيطر عليهه ومنخليهه تكبر وتصير افلان هندية..

صار عندي ولد ومو الاطلس سماه نانا اختارت اسمه وتمالخو هي واطلس بنص المستشفى هو يريده "حمزة" ونانا دكت رجل الا ادم تسمو وطبعاً نانا الي ربحت وهسة ادومي بحضني قبل خمسة ايام جان عيد ميلاده وصار عمره اربع سنوات..

انفتحت باب البيت وظهر منهه الاسباني بكشخته المميزة والمعروفة والي يوم بعد يوم تزيد متنقص ووسامته تزيد، طفر ادم من حضني وراح يركض على الاطلس فاتحله ايده وركض لاحضانه..

-الاطلس: افيييييش وليدي الاسد

-ادم: انطوني.. انطوني.. انطوني دوه

يشهك ويحجي اطلس فتح عيونه وكال..

-هذا يا خـ.. خردلي انطاك دوه؟

-علي: اني الخردلي خوية بشحمه ولحمه

-ادم: اي هو هو

-الاطلس: بابا غير يردوك تصير زين ومثل البططل تكتل يوسف وغيث

-يوسف: هَييي

-علي: بره شلون زعط شياطين

-الاطلس: الله يرزقك نفسهم ونشوف لسانك بعدين

-علي: والعباس اتبره منه اسكت طوطي

-دعاء: عليييي هاي بعده ما اجه وتبريت منه ليش هيج ليش

حطت ايدهه على بطنهه المنفوخ دعاء حامل بشهرهه وبيهه بنية وميتة خوف كل شوية صاحت راح اجيب وعلي يطلگ وياهه..

-علي: ولكم خلي تجي بنيتي وانعل والديه اليكول احجزهه لابني الز... الزرافة

-حمزة: لساانك عليوي

-غدير: تعال يوسف هاك هاي الچكليته

راحلهه يوسف فرحان كعد بحضنهه عجيب شكد يحبهه ومتعلق بيهه، غدير بقت تروح وتجي للخارج علمود علاجهه اشوفهه هواي هواي احسن عن قبل صح اوقات تجيهه ساعات عصبية وتعلقهه بيوسف غريب مخليته يصيحلهه ماما بس هي زينة وهذا اهم شي..

اجه الاطلس كعد بجانبي حاط ادم بحضنه، قرب راسه مني وهمس بيني وبينه..

-شلونهه مرمرتي

-يعني

-هاا هاي ليش

-لان اليوم المدلل ماتصل بيه ابد

-وعلي من اجتماع للثاني مسؤوليتي كبرت والشركة كلهه وكعت على چتافي

-الله يساعدك حبيبي عمو محمد من طلع تقاعد يعرف عنده فحل يمشيله الشغل ههههههه

-هه هه هه

-هه هه هه امم شنو بعد جانو يصيحولك نسيت؟ اها تذكرت الدايح

-خلينه نرجع للبيت واراويج الدايح شيسوي

-عزه بعيني اتشاقه والله اتشاقه

-شصار على بسملة؟

-بعدهه معاندة سحلت ابن عمتك سحل كل اسبوع يدز امه تخطبله وهي راكبة راسهه

-عمر يحبهه وعلي خطية لا تكسر گلبه

-شسوي لعناد بسملة كلش عنودية

-المرة الجاية احنه نروح ويه عمتي عسى ولعل تقتنع اني حاس هالمرة راح تضبط

-ان شاء الله

-مرمر

-عيوني

-احبج

-اوووي صارلك شكد ما كايلهه

-ماكول الكلمة صح بس كل يوم احسسچ بيهه

-اشش ادم بحضنك

-شو ادعبل بابا هناك خلينه نشبع من امك

-عززه اطلس مو كدامهم فشلة

نتهامس بصوت ناصي نبسبس نزل ادم وراح يلعب ويه الجهال ورجع اطلس ملتفت عليه..

-مريم: ادم اخذ عيونك

-الاطلس: بس اخذ حنيتچ وحبچ، خوفچ وحرصچ هنيالي بيج مرمر محظوظ اني والعباس محظوظ

-ادري لازم تبوس ايدك وجه وگفه عليه

-ومنو گلج ماسويهه

درتله فاتحة عيوني واضحك همس بيني وبينه..

-مدامتي ام عيون كحيلة

-اطلس مو هنا مو هناا استحي والله يبوخ وجهي واصير حمرة

-صيري شحلاتج من تصيرين حمرة

ابتسمت وحسيت بالحماوة تحاوط خدودي قهقه بخفة واخذ ايدي بين ايده، تچه راسه على القنفة وعيونه ثبتهن عليه حركاته طبيعية ممكن للي يشوفنه، بس اني اعرف وصل لاعلى مراحل العشق والهيام..

-احبچ، احب ريحتچ، احب شكلچ، احب وجودچ واهمها احب الصدفة الجمعتني بيج واقدسهه

-من عثرت گدامك وانلوت ركبتي شاغت روحي وانتَ عبالك اتعاير واتنعوص

-لا ادري بيج تأذيتي صدك ما شفتيني مهتم بيج

-جنت طالع تخبل بيومهه بس كرهتك كره مو طبيعي

-اممم

-جنت لابس رسمي وطالع فول كشخة عيونك الخضر تلمع ويه الضوه باوعتلك من وره وكلت عمت عينه على هالخلقة شكد صاك

-هاا!!

-شبيك هاي من جنت اكرهك مو هسة

-لطيف

-شكد جنت اكرهك اطلس اووع اموت منك وفد انغث واندق من وجودك وهيج هيج كاعد على گلبي اتمنى انتفك تنتف

-حميتي

-اي هاي قبل تره مو هسة

-وهسة شنو؟

-مو هنا بالبيت نسولف

-ههههههه بت اللذين

-ايلاڤيوو بيبي

-ههههههههههههه واني احبج يا بعدهن كلهن

فزينه على صوت دعاء تعيط..

-يمممة يممممممممااا علليييييي

-علي: شكووو شكووو شصايرر ولييي على أمتيي

-دعاء: راح اجيب والله والله هالمرة صح صحححح

-مريم: دعيوة على كيفج بس تنفسي

-زهراء: يمة چنتي يمممة عمت عينييي نفس ولادتي بالتوأم هم غفلة وخالد اخذني للمستشفى

دمعت عيونهه هستوهه دتبجي ورقية صاحت..

-رقية: يباااوو احاا احوو احووو

-دعاء: احووو على روحج ولكم رااح اجيب

-عمر: دخيلك يا علي يابو الحسن يا علي

-حمزة: ذولة شبيهم صافنين ما تاخذوهه للمستشفى

-علي: اي اي يله الله اكبررر الله اكبببببر يا عررراق

-الاطلس: وسمممم وكتهه اخذ مرتك للمستشفى

-حصة: واااي يا حسرتييي راح تولد

-نانا: صدك جذذب شبيك علي متاخذهه

-علي: اي اي شلون اشيلهه عمير تعال ساعدني

-دعاء: يبوووووو على عمررري

-مريم: شلون يسااعدك صدك يبووو

-سارة: والله اتفق يبووو علي شبيييك

-عمر: اوكفو الكل اريده ياخذ شهييق نهييق راح تجيب مرت اخوي

-علي: اشتعلت انتَ واخوك وخر عن وجهييي

شالهه وطلعنه بيهه للمستشفى الكل توقع مثل قبل تطلك وماكو شي بس هالمرة فعلاً جان اكو شي ونورت "زهراء" للدنيا وزادت حياة اهلهه حياة، بعد قرابة اربع سنوات من العلاج اخيراً طلت علينه هالعنونه..

دموع علي ما وكفت حضن عمر وصارو يبجون ويه بعض واحد يهني الثاني بولادة دعاء حضنتهم امهم ونصبوهه مناحة الثلاثي وكالعادة تذكرت ابوهم وكعدت تسولف شلون صارت ولادتهه..

دعاء تعبت بولادتهه وتعسرت بس راح كل التعب من شافت بنتهه بقيت وياهه بالمستشفى وامي هم اجت وياهه ثاني يوم رخصوهه ورجعوهه لبيتهه ادم ببيت عيالي عفته رجعت اخذه ونروح لدعاء..

طلعت بالحديقة ادور عليه شفته يلعب ويه يوسف بالحديقة الخلفية، صحتله يجي ماقبل عاند ويايه تركته وتمشيت لقفص النسر ارجع منين ما اجيت وشفت اطلس واكف گباله يباوعله..

-هاي شوكت اجيت محيطي

-هسة

-ها زين اني ابات عند دعاء اليوم حبيبي

جرني من خصري وذبلت عيونه زعلان، دك جبيني على جبينه وكال بضوجة..

-يهلچ تعوفينه ام ادم

-بس هالليلة والله وارجع خطية اختي

-واني مو خطية

-نيم ادم على گلبك مثل كل يوم

-والجانب الثاني يبقى فارغ

-احضن مخدتي ونام شمشم بيهه وتخيلني بدالهه

ضحك وضحكت وياه نزل طبع قبلة وجر مني نفس..

-احبج مريم احبج وغلاوة امي

-واني احبك بس هالليلة انام بعيدة عنك

-شلون راح تخلص مادري

-اطلس لتبالغ مو تسافر وتعوفني

-اكون مضطر بس هسة انتِ الراح تعوفيني

-ماعوفك للموت ماعوفك

ضحك وحضني لصدره رفعت راسي اباوعله ابتسم وهمس بيني وبينه..

-فتحتي باب گلبي وگعدتي بي مرمر تربعتي وتشيختي وملكتي اضعف بعيونج واطرب على صوتج واسكر على ريحتچ اريدج توعديني مهما قست الدنيا علينه وخانتنه الايام ما نفترق للحظة نبقى ويه بعض للموت واذا مابيهه زحمة بفد گبر ندفن

-اوعدك بس مال گبر too much

-هاا too much كلتيلي

-اي ولتعيدهه بعد تره انكد عليك لتجيب طاري الموت

-النكد على گد المحبة مرمرتي

ضحكت وحضنته احتميت بصدره اضعف وماكدر اغازله بكلمات واعبر عن مشاعري بكل الاوقات يعرف الخجل يسيطر عليه يخليني براحتي شوكت ميعجبني اسمعه شي لطيف وبكل مرة ينطرب ويفرح ويبقى سعيد كأن ملك الدنيا..

-للابد راح ابقى اكول انتِ اعظم انتصاراتي

-احبك محيطي واحب شركة "الاطلس" لان خلتني اتعرف عليك، كرهتك وحقدت عليك بيهه، حبيتك وعشقتك بيهه تطورت علاقتنه وكبرت وزادت قطعة سكر وادم وريث هاي الشركة..

-صح شركة الاطلس سبب تعارفنه واحبهه لهذا السبب ومتحملهه

ابتسمت ونقشت بأصبعي على صدره مكان قلبه فوك الوشم الي داگه حرفه وحرف نانا "A B" نقشت اسمي واسم ادم فوكاهن..

-مريم: احب الدمليج الي زينت بي معصم ايدي بس كرهته لاسباب وهاي الاسباب نفسهه خلتك اليوم واكف كدامي بكل شموخ وثقة.. بين الشركة وهذا الدمليج علاقة غرام نهايتهه جانت حطام لفترة ورجعت انبنت بصبرنه وحبنه وتعلقنه، لكن اكدر اكول اني ممتنة الهن لان عرفوني على رجل حبيته وذبت بتفاصيله..

شددت ايدي حوله اكثر وتنهدت تنهيدة مريحة واردفت بحب..

-راح يجي يوم واسولف لآدم عن حب امه وابوه احچيله عن الاطلس "دمليج اسود" واحچيله شلون هالشركة والدمليج انطوني اعظم رجل بنظري خلاني اعيش اغرب قصة عشق ممكن أي بنية تعيشهه..

النهاية ♠️💸...

الاطلس "دمليج اسود"

• ━━━━━━❪♣❫━━━━━━ •

مشاعر مختلطة دنعيشهه، انتهت اجممل قصة وراح نودع اجمل ابطال 🥹♠️💸🤍

اعجز عن الوصف ومثل كل رواية اختمهه اعيش بيهه وصعب عليه افارگهه 🥹 بس هاي الدنيا ولازم نعوف الاطلس ومرمرته يعيشون حياتهم ويه ابنهم ادم 🤍

اشكركم وممتنة منكم على الوقت الي قضيتو ويانه واستمتعنه سوه وعشنه تفاصيل الرواية سوه واتمنى متكونون ضيعتو وقتكم واستفاديتو ولو بمقدار "نتفه" على گولة الاطلس 🥹😂💕

اللتمس منكم العذر على القفلات وسامحوني اذا اكو بعض المشاهد اثرت بيكم اتمنى تهدوني براءة ذمة ♥️

انطوني رأيكم بالرواية منتظرة تعليقاتكم بكل حب 🥹🤍

انتظرونه بقصة جديدة ان شاء الله مختلفة جذرياً عن الاطلس 😁🔥

تعالو انستا نجاوب على اسئلتكم 😍💛 (ملاحظة مغيرة الصورة تره 🌚)