الاطلس "دمليج أسود" الفصل السابع وأربعون 47 - بقلم 𝐙 𝐇 𝐑 𝐀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

انت بس العلمتني شلون احب روحي واحبك ♥️
سعود الخفاجي

• ━━━━━━❪♣❫━━━━━━ •

-احم احم السلام عليكم شلونكم شخباركم

-هلا عليكم السلام

-انجب شنو هاي صوتك شو عبالك ما عاجبك!

-علي: شنو ما عاجبني سلمت ورديت السلام كمل عمير ماكو وقت

-عمر: خوش راح اعيد

-علي: ماكو تعيد بنيتي تبجي فضنيي

-عمر: عمي اني جاي وكلني شغف..

-علي: شغف شنو شو تمسلت انتَ بابا

-عمر: ولك اقصد كلني شرف خرب

-احجي خلصنه كلك شرف لشنو تروح تجيبلي ماي لو تلبسني نعالي

-علي بلا تمسلت جاي اريد اخطب بنتك على سنة الله ورسوله

-شنووو ولك امشي لككك عااار اجه يخطب بنتي وجه السطل

-عليييي

-اسف تحمست، لا ما ننطيك بنيتنه دكتورة والف من يتمناهه الخطاطيب طابور واكفين بس يردون القرب من عدنه

-عمي واني مهندس وعندي خير من الله

-انجب لك تشترينه بفلوسكك!!

-غلط اكولهه صح؟

-رب الغلط طبعاً

-خوش لعد شنو اكول..

-حمزة: تسكت وبس ابو الاطلس يحجي

-عمر: حمزة زين من اجيت برأيك ماحجي شي؟

-حمزة: لا تفتح حلگك حتى سلام لا تسلم اكعد وانجب لا تچفص ابو الشغف

-عمر: خوش صار بس انتبهو زين اذا هالمرة ما انطوني وعلي اخطفهه

-مسلم: تخطف منو ولك

-يلللله شباب خلصوونه خلي نطلعع

واكفة على الدرج اسمعهم وميتة ضحك كاعدين بالصالة وعمر يجهز روحه المقابلة ابوية اليوم رايحين كلنه خطابة على بسملة الي شلعت گلبنه شلع..

عمر تعب واحسه زهگ هواي خطبهه مرت سنين واني ملاحظة حب اسيل انطفى بگلبه ممهتم الهه وكلشي عنده عادي خصوصاً قبل كم يوم من افتهمنه اسيل حامل جانت ردة فعله حلوة باركلهم وفرحلهم حاله من حالنه..

طلعنه كلنه رايحين زفافة لبسملة خانم عسى تقتنع، عمة زهراء شدت حيلهه بزعت روحهه وكالت بالضحك من الاخير اذا ماقبلت اختج اجرهه من كفشتهة واخذهه بالغصب..

الطريق طويل ومتعب الاطلس ما اجه ويانه مسافر واني باقية عند عيالي بغيابه، ادم ابني تعب وكل شوية يسألني على ابوه اتصلنه بي كام وكعدو يسولفون الطريق كله وناسيني عاد اطلس من يشوف ادم ينسى الدنيا والبيهه..

اخيرراً وصلنه نزلت اول وحدة رحت اريد ادك الباب واللتفتت على صوت عمر يصيحلي، رحتله اشوف شبي اشرلي نوكف على صفحة ومسح قطرات العرق المتجمعة على جبينه..

-عمر: ماعرف جيتي صح لو لا بس والله تعبت

-مريم: ادري بيك بس تعرف بسملة انتَ

-عمر: مريم انتَ اختهه بداعة ابنج حاچيهه وقنعيهه

-اي شلون

-گليلهه مريض وما جاي ياكل

-ما راح تهتم

-گليلهه صار عنده ضغط وسكر وطبگن

-عادي متهتم

-گليلهه انجلط وصار عنده نزيف داخلي بالدماغ وأثر على صحته ويمكن يموت

-عمرررر

-هاااا

-شبيك شهالحجي نزيف داخلي وواكف كدامي هنا!

-چا شلون

-مادري نشوف الله كريم

قبل لا يحجي تركته ورحت ادخل للبيت ملهوفة دعاء ما اجت ويانه بنتهه متتحمل طريق، فتحتلنه الباب امي اهلو وسهلو بينه ركضت لغرفة بسملة وادم ويايه اول ما فتت عليهه شفتهه مكابلة الكتب تدرس..

-مريم: عممممت عيننننج

-بسملة: ها هلو، اوووي گلبي ادومي تعال لخالتك

راحلهه تلاعبه وتنطي من الحلويات الي كبالهه، تخوصرت ووكفت كدامهه..

-مريم: بسملة شبييج لتكوليلي متدرين جايين احنه

-لا ادري تعالي مشتاقتلج

بوستني وحضنتني اباوعلهه كلشي ما لابسه ولا مجهزة نفسهه..

-مريم: شو ما مبدله؟

-مرايم من الاخبر مااريد اتزوج

-شنو متردين تتزوجين هو بكيفج

-اي

-افف بسملة ليش هيج ولج حرام عليج الرجال يحبج والله

-جذاب

-عوبه والله حاچاني گلي قنعيهه كلش تعذب من وراج

-اكلج مريم تعالي نسولف بوحدة وحدة

-اي يله

-عمر شنو عجبه بيه؟ وليش عاف كل هالبنات واجه خطبني اني بالذات غريب مو؟ هو شايف وعايف ولو يأشر على أي وحدة تقبل بي

-لان يحبج

-شلون حبني وليش

-شمدريني هو حتى اطلس من يسأله ميعرف شيجاوبه يگله مادري حبيتهه وحبيت لسانهه وحيويتهه وطاقتهه

-لا مو مقنع

-مقنع لو مو مقنع طلعي كدامه وخلي هو يسولفلج نظرته عنج الج حق بهذا الشي! طلبي شوفة شرعية وفضي السالفة

-ماريد اشوفه

-ليش تخافين يحن گلبج وتوافقين

-شنوووو

-بسملة اني اعرفج تحبي من زمااااان اعرف وهذا سبب منعت جيتچ عدنه بالبيت وصرنه اني ودعاء نجي نزورج بالدار بس حبي لا تبقين معلعله ومتأذية اجه الرجال وخطبج شتردين اكثر

-مادري مريم اني خايفة

-لا تخافين يعمري اطلبي شوفة شرعية وفكري عدل صدكيني اني وياچ بكل قراراتج

**

"بسملة"
طلعت مني مريم وتركتني ابدل وحدي لبست فستان ناعم وفتحت شعري مكيجت مكياج خفيف وطلعت للصالة شافتني ام عمر سلمت عليه سلام حار واول كلمة همستهه بيني وبينهه هي..

-ام عمر: وروح خالد يحبج

ابتسمت منزلة عيوني عود اسوي روحي مستحية، رفعت راسي وهمست بصوت ناصي اكثر..

-ام عمر: عمر خوش عمر حنون ويداري الي يحبه ويدللة يستحق تنطي فرصة

هاي اول مرة تحجي ويايه بهالطريقة خجلت منهه كلش بقيت بس اهز براسي شوية وطلع ابوية من الاستقبال صاحني بالغرفة يحجي ويايه..

-احمد: بسملة بابا بعد ماكو داعي نحجي بمواصفات عمر وشهاداته وشغله هاي صار كومة يخطبج وانتِ حرة بنتي يعجبج تخطين هاي الخطوة براحتج ما يعجبج هم براحتج، تردين تشوفي وتسولفون وحدكم حقج هذا

رفعت راسي متفاجأة ابويه يمته يقبل بهالسوالف بس اكيد امي قنعته بأسلوبهه، هزيت راسي موافقه ابتسم وكال..

-كومي لبسي حجابج بابا

طلع من الغرفة وتركني وحدي دخلتلي مريم واجت وياهه رقية ما شفتهه جانت كاعدة بالاستقبال سلمت عليهه وكعدت ترهملي شلبس..

استقريت اخيراً على صاية خليجية ملونه وشال رهمته وياهه طلعت للاستقبال دكيت الباب وسمعت ابوية يسمحلي بالدخول اول ما طبيت سلمت منزلة راسي صارلي شكدد ما شايفته كلش هواي حتى بولادة دعاء ما اللتقيت بي ولا مرة..

كعدت على جهة وسمعت ابوية يترخص يطلع بقت بس امي وام عمر كاعدات بالاستقبال وهو كام من مكانه وكعد على نفس القنفة الكاعدة عليهه اني بيناتنه نفر يكدر يكعد، همس بصوت خافت ميسمعه غيري..

-عمر: شو صايرة مؤدبة

رفعت راسي بسرعة ونترت بنفس الهمسة..

-بسملة: ليش ولك اشايفني

-يعني مو هاي شخصيتج لا لا ماحبيت

-عساك لا حبيت خووش

-وهوش يدوس بگلبچ شبيچ محملة عليه ولج

-باوع راح اعيط واللم الدنيا

-صوتج بسملة شبيچ خرب روحج

-شو تتجاوز! روح عني اصلاً اني ما احاچيك اهلي جبروني اطب هنا واحجي وياك توسلو بيه حتى انطيك فرصة

-استاهل تنطيني فرصة

تغيرت نبرة صوته وملامحه كذلك لانو، همس بصوت انصى بعد بصعوبة لقطته اذاني..

-بسملة صار اكثر من اربع سنوات اخطبج شبيچ معاندة

-بكيفي

-بس شعلتي كيفي وعلي ما استاهل كل هالحقد الشايلته

-اكلك عمر

-ها عيوني

-شو كلكم نفس الجمل دتعيدون ملاحظ؟

-يا جمل ومنو كلنه؟

-اتذكر مرايم جانت تكول اطلس يحجي نفس ذني الجمل مالتك ودعاء نفس الشي واسيل كالت مسلم هم وحمزة كذلك شنو عدكم كتاب مشترك لو شنو السالفة؟

-لا بس واحد يعلم الثاني معليج هاي اسرار شلتنه

-يعني حجي مسفط

-لا والعباااس مو حجي مسفط من گلبي طاالع

حجاهه بحرگة وصوت عالي امي باوعتلنه وخزرتني اني شكو مادري وام عمر تباوع لابنهه وتضحك..

-بسملة: ماشي صدكتك بس لتعيط يمعود

-تشوطين الواحد وتصيح لا تعيط

-عمر هسة شتريد انتَ

-احبج

-يمة اسم الله متستحي على دمك

انتفضت وكأن انتلت، بلعت ريك ودرت عيوني على امي حايرة بالسوالف..

-عمر: اكلهه احبج تكول ما تستحي على دمك شنو من بشر انتِ

-لا تسمع امي وامك اسكت

-تره الكل يعرف احبج حتى ابوج

-دهر فرنيي

-اعترفت اي چا شسوي كتله اعز بنتك شو استحيت اگله احبهه حسيتهه واكفة

-لاا يمعود لو كايلهه شسالفة

-لا عيب

-لو كايلهه چان سبك وطردك

-فلا تستحين انتِ شبعتيني اهاين ورزايل وساكتلج بس لان اريدج توافقين

-ما اوافق روح ماريدك

-انچبي بت الاوادممم والعباس حلفت اخطفج وروح ابوي

-باوع اني شابعة افلام هندية ومسلسلات كورية وتركية وكلشي وكلاشي متمشي عليه هاي السوالف

-هاا يعني ما تصدكين اخطفج؟!

يحجي بجدية من كل عقله صراحة ولاول مرة اكولهه خفت منه هذا الغبي لا يسويلنه طركاعة ويطيح حظنه..

-عمر صير حباب وبطل كلاوات الهنود

-وشبيهم الهنود احسن من عدنه

-ميلوگلنه

-بسملة طگني الشيب صرت عجوز باعي حالي طيحتي حظ حظي

-ههههههه اذا يصير عندك اطفال ميصيحولك بابا رأساً يصيحون جدو

-هه بايخة

-لا صدك هسة احجي هواي كبران انتَ وتعبان

-من وراج هديتي حيلي

-هاا

-وجعا

-هاي شبيك حتى ميعرف يصير رومانسي

-انتِ مو شكول رومانسية حتى خطبة ماخطب بعد

-ومنو كال كاتلة روحي عليك

-بسملة شايفة لر رفضتي وعلي ا....

-اشش كافي زوعتنه العافية ماطلعت خطبة هاي عبالك ماخذني للموت

-بسملة وافقي بداعة امج كافي شكد انذليت والله لو يفتهمون جماعتي

-اها وهاي الجملة هم معروفة والله احس صدك عدكم كتاب مشترك وتطلعون سوالف منه

-عوفي الكتاب، بسملة اني عاذرچ واذا عبالج احب غيرج والله ولا اكو هيج شي وروح ابوي وغلاوة علي اخوي وداعة امي هاي الكاعدة ماكو

-اخاف

-من شنوو حاچيني مو طگت روحي

-اخاف تتوهم انتَ متحب اسيل وبعدين تكسر گلبي

-كسري گلبي وعوفيني ساعتهه

-ياا هو لعب

-اي لعب اول وتالي حتى لو افكر بأسيل هي مو الي متزوجة وعايشة حياتهه واني احلفلج ما مفكر بيهه ولا تجي ببالي، طول الوقت افكر بيج شكلج ما جاي يفارگ خيالي

-لتجذب

-بيمن احلف بعد اوكفي اوكفي لحظة ستوب

-شنو

-خاف ساحرتني ولج لان السالفة مو طبيعية حتى اتحلم بيج

-يووه عمر لتجذب عليه

-والله اتحلم بيج سألي علي خرب روحج حبيت وحدة تشتغل ويانه لان تشبهج

-نعم؟؟ حبيتهه؟؟؟؟

-لا ولج مو حب حب بس اساعدهه دائماً وانطيهه اجايز وعلي تشبهج كلش حتى نفس اللسان

-شسمهه؟

-تولين

-خوش زين من كتلي اخلي مرايم تسأل عنهه

-تجذبيني ولج!!

-اي اجذبك ما اثق بالزلم اني

-عساچ لا ثقيتي منو بحالج هو

-والله شمدريني

-لا اني بحالج وافقي ولج انعل... انعل روحي

-وخر ضجت منك بس كاعد تغلط ولسانك وصخ

-نظفي الي

-بسملة: شنووووو

-ام عمر: ها ماما شو طولتو ههههه

-عمر: يمة خلينه جاي نتعارك.. اقصد نتعارف

-بسملة بهمس: اني اعلمك على صلافتك روح لو تموت ماقبل بيك

-عمر: يا صلافة ليش هو شكو

-بسملة: على سالفة اللسان مو عيب عليك!

-ليش شكلت اني واذا كتلج تنظفي وين المشكلة

-ايعع لعبت نفسي كافي لتعيدهه

-هاي شبيهه البت... هااااااا لا لا بسملة لااا هاي شنو ولج سرسرية

-عزه عزه

-ههههههههههه ولج وين راح بالج لا هاي بعدين نتطور خوما هسة فشلة عيب

كمت بسرعة عنه اركض اطلع بره اللطم لطمت على وجهي شافني مريم ورقية اجوني للغرفة سألو شكو من الفشلة كعدت اسولفلهم صار لطم جماعي..

-رقية: هو صح عمر سرسري بس مو لهدرجة احاا احووو احووو

-بسملة: ولچن طمني طموني خلوني اموت

-مريم: طاح حظج فشلتينه

لحدما طلعو اني اكل بروحي ما جاي اكدر اتخطه تعب عقلي وعشت اكتأب ليومين، اجه ابوية يسألني عن موافقتي ولازم نردلهم جواب بدون تفكير گلبي نطق مو لساني كلت بصوت ناصي..

-موافقة

وضميت راسي باللحاف ارافس، يومين ما طولو اجو اتفقو على المهر وثالث يوم عمر اصر نعقد سيد..

كلشي ما لحكت اسوي هذا المصلبخ مستعجل طاير طيور، اشتريت بدلة وحدة بس وحجزت صالون تجيني للبيت، عزمت كل صديقاتي بس طبعاً محد كدرت تجي شيجيبهن للبادية..

جهزت نفسي وبعدهه ام الصالون دتلف بشعري وكالو وصل العريس وياه السيد..

-بسملة: ياااا ولجن شبسرعة شبي مينطي صبر

-سارة: متلهف سودة عليه فرحان كلش

-مريم: اي لعد اربع سنين شتلته اختي العوبة

-بسملة: اي بس اتفقت وياه العرس وره التخرج

-رقية: خطية والله مسكين شيصبره لذاك الوقت

ما لحكنه نكمل سوالف صاحت امي راح يعقدون كمت اركض مراكض للصالة مريم گرصتني ونترت بين سنونهه..

-ثگلي شوية عبالك ما مصدكة شبيچ طايرة

-بسملة: ولج اريد اعقد

-دعاء: امشي على كيف رجفي شويه سوي روحج خايفة شجاچ

-بسملة: لا لا مو جوي هاي الكلاوات شكو ارجف اموت عليه واريده على شنو بعد

-نور: عوفيهه هاي متستحي روحي خية روحي

كعدت على الكرسي يعقدلنه ما اجذب صارت عندي رهبة وخوفة من سمعته يكرر بأسمي انطيت الوكالة واعتلت الهلاهل، اقل الربع ساعة وام عمر كالت راح يدخل عمر يشوف عروسته..

-ام مريم بضحك: يااا شبي مستعجل

عكدت حاجبي من عمتي صاحتلي بالاستقبال تريدني بشغلة كدام كل النسوان كمت ذبيت الشال من راسي ودخلت وراهه وبلحظة سريعة ايد قوية جرتني وطبكت علينه الباب..

-عمت عينننك

-عمر: لساانج راح ينكص

-هو هيج تخرعني وتخليني اموت

-هسة دخلينه نتغزل لو نعزل ونرجع لبيتنه

-ماكو تتغزل احترم نفسك ابوية ميقبل

-ابوج شنو بابا مع احتراماتي بس صرتي الي بعد فنه الياخذج مني

باوعتله بأستغراب شعور حلو كلش صار بداخلي خوفة ورهبة وفرحة وحب كلهن تجمعن، نصيت كلش خجلانة من جرني من خصري يقربني لجسمه نزل راسه لمستوايه ولطش وجهه بوجهي..

-عمر: شنو هالجمال

-جمال عيوني

-خرررب

-والله قصدت جمال عيونك والله

-يعني عيوني حلوة

-لا عاديات بس هاي للمجاملة نكولهه

-بس عيونج تسطر سطرة العباس

-اي خوش خوش

-بسملة راح ارفسچ

-اسفة راح اسكت بس لان خجلانة احس هيج ويعني ماعرف شلون اعبر...

-احبج بسمتي

-اي ادري كتلي

-وانتِ؟

-شمدريني

-بشنو حاسة هسة

-متوترة عمر كلش قريب عليه انتَ دا ارجف والله

-وبعد شتحسين؟

-رجليه ترجف

-وبعد؟

-گلبي يدگ حيل

-وبعد؟

-اگلك شو چنك جاي تشخص حالتي منو الدكتورة اني لو انتَ

ضحك ضحكة عالية لطمت خدي خازرته حتى يسكت بس ما لحكت انطق حتى لزم راسي من وره وقبلني قبلة طووويلة و.... استحي اكمل كافي عيب..

**

"مريم"
كلشي صار احلى بخطبة بسملة وعمر صارو كلهم حياة وطاقة، صح مستهترين ثنينهم وهواي يتختلون وعمر ياخذ راحته بس الحب واضح ومبين عليهم..

ما جنت اعرف ببسملة هالكد تغار خانگته خنگ للرجال متخلي يروح أي تجمع بي نساء شكد احاچيهه واگلهه هالغيرة مو زينة ومن اكمل نصايحي وياهه اغم روحي واتذكر غيرتي على الاطلس اي نعم لليوم اغار من السحلية الصفرة..

هي صح متزورنه الا نادر خصوصاً وره سفرتنه الاخيرة قبل اربع سنوات ونص وشلون عمر ردهه هي سحبت روحهه بس بعدهه صلفة وعينهه على اطلس وهالشي كاتلني كتل..

احاول ابين روحي ماكو شي وعادي وما غيرانة بس داخلي مفحم راح انجلط، عوفونه من دارسين اضوج من سيرتهه خلوني اسولفلكم على العصافير الكدامي الكناري والبلبل (سارة وحمزة)..

من تزوجو لليوم ما شفت حبهم قل او تغير بالعكس كل يوم واحد يحب اللاخ اكثر واكثر حمزة عيونه على سارة شتكول تم وتأمر واكثر شي احبه بي هو اهتمامه برقية عبالك اخته الصغيرة يداريهه ويحبهه ويفگدهه..

اي كاعدة اباوع على الحبايب كل شوية لازمتلي ثنين وافصخهم شسوي المحيط مسافر وهالمرة طولت سفرته مليت صار عندي جفاف عاطفي..

گلتلي خالة حصة اروح اشوف غدير واصيحلهه على الغدا، صعدت فوك ودكيت باب غرفتهه ما جاوبت، دكيته مرة ثانية هم مجاوبت خفت عليهه تكون متخربطة بسبب علاجاتهه فتت للغرفة المحظورة ممنوع احد يدخل عليهه الغرفة من الباب تحجي ويانه، دخلت وشفت اشياء خلت شعر راسي يوكف..

فراشهه مخربط والغرفة صايرة سوك هرج ملابس مشمرة وجنط واحذية، دخلت ادورهه بغرفة تبديل الملابس بس مالهه اثر عبرت ميزهه وجذبني شي..

شي صارله سنين مختفي شي فريد مينسي شكله بسبب تميزه، سوار فضي عبارة عن زناجيل متصلات ببعض وشمس من الالماس بالوسط متصلة بالزناجيل..

اخذته بيدي اتمايزه هذا سوار ضاع صارله سنين هذا سوار سارة الضيعته بعرس علي ودعاء!

رجف گلبي هذا وين وشلون اخذته غدير بدون لا سارة تحس وليش اخذته؟؟ خفت كلش والهم ترس گلبي خفت على سارة لا تكون غدير ناويتلهه على نية حتى وان كان السوار عند غدير صارله كل هالسنين بس ليش اخذته شنو المناسبة!

ذبيته بسرعة على الميز ودرت عيوني على فراشهه قطعة بيضة موجودة بجانب مخدتهه على السرير، تقربت اجرهه ماعرف ليش تدخلت وليش جريتهه واني منو واكعد ادور بغرفتهه وشلون اجتني الجرأة بس ماعرف سويتهه بعد..

رفعت القطعة البيضة ونشرتهه كدامي واكتشفت هاي فانيلة داخلية رجالية بيهه علامة خضرة من عند الرقبة، توترت وشمرتهه نفس مكانهه من سمعت قفل باب الحمام ينفتح اللتفتت بسرعة عليهه وجفلت من شفتهه واكفة ولافة شعرهه بالمنشفة..

-غدير: شتسوين بغرفتي؟

-اجيت اصيحلج غديره

-ليش چنتي شايله هاي بيدج

تأشر على الفانيلة ابتسمت متوترة شنو اكول تصرفي غلط بس حتى ماعندي مبرر..

-غدير: شتردين مني مريم؟

-ولشي والله بس اجيت اصيحلج

-غدير: اني مو مريضة والله

-ادري حبي ادري

عبس فمهه وعيونهه غركت بالدموع حجت بغصة..

-غدير: اني بس احبه واحب اشم ريحته

ربطت فوراً هاي فانيلة حمزة ماخذتهه، هزيت راسي ساكتة وتوجهت للباب اريد اطلع ووكفني صوتهه يكول..

-غدير: عادي كوليلهم ما يهمني

-مريم: شنو؟

-على السوار والفانيله ما يهمني

-السوار مال سارة هذا مو؟

-اممم

-ليش عندج؟

-ردت اسوي لسارة سحر وبطلت

-شنوو

وجهت عيونهه على الميز المحطوط عليه السوار ورجعت تباوعلي..

-غدير شنو سحر صدك تحجين؟

-اي

-شلون!!

-الموضوع براسي صارله سنين اخططله وكلما اريد ابدي بي اجمد واوكف ماكدر

-انتِ الاخذتي سوار سارة بعرس علي ودعاء؟ شلون سارة ما حست؟

-خرطته من ايدهه من جانت ملتهية ردت انطي لفاهد بس بطلت

-ليش بطلتي

-مادري

تحجي بدون نفس روحهه رايحة كعدت على فراشهه وسردت الاول والتالي يائسة بائسة..

-غدير: ماعرف ليش فاهد هيج يحبهه غريب

-ليش مانطيتي السوار؟

-ما شفته يستحق انطي شي يخص اختي هو يكره حمزة ويحاول يأذي

-ليش تعاونتي وياه من البداية؟

-ما تعاونت ويه احد مالي علاقة بفاهد لا من قريب ولا بعيد بس اعرفه مهووس بأختي وهذا كلشي

-والسحر؟

-ما سويته

-ليش

-مادري

-يمكن لان اقتنعتي لازم تتركيهم يعيشون حياتهم

-لا

-لعد؟

-يوسف مله حياتي مكفيني حبه

-تحبين يوسف ابنهم

-كلش

-غدير صدكيني الله راح يعوضج عن كلشي عشتي لا تفقدين الامل

-ما فاقدة الامل وشكراً لنصيحتج، اخذي السوار وياچ

-والفانيله؟

-لاااا هاي عوفيهه

خزرتني ونترت بوجهي خفت منهه تتغير مية وثمانين درجة ويه العلاج، تركتهه وطلعت من الغرفة بيدي سوار سارة رحت انطي الهه وقبل لا احجي أي شي كالت..

-سارة: چان عند غدير صح؟

-مريم: شمعنه اجت ببالج؟

-سارة: لان هذا السوار هدية من حمزة لخبر حملي بيوسف وتشوف نفسهه اولى بي وهي الي تستحقه

-مكسور گلبي عليهه رغم شكد اذتنه بس سارة محد يستحق يعيش الوحدة

هزت راسهه سارة ساكتة سكتت مثلهه ماعرف شحجي واحد يحير شنو يعبر، اجاني اتصال من امي رحت للاستقبال اسولف وياهه وانصدمت من كالت..

-مرايم روحي شوفي بسملة وين

-مريم: شبيهه بسملة؟؟

-روحي شوفيهه وين مريم اكيد كاعدة تترعن ويه خطيبهه

-ماما خطية خليهم براحتهم اليوم عمة زهراء اصرت تجي تتغده ويانه بسملة

-اي لان عمر رادهه تجي امشييي روحي شوفيهه وين بالخنسة روحي شوفي

-هاي شبيچ ماما صدك جذب ترديني اصير جاسوسة

-امشي مريم لا تشلعين گلبي تره اكول لدعاء بس خاف تفضحنه هاي

-خوش خوش ماشي

-ابقي وياي على الخط وروحي مريم!!

-اي ماما شبيچ

رحت ادور عليهم وكالعادة واكفين بالمطبخ عفية هالمطبخ كله مصايب، وكفت بالباب اباوعلهم من بعيد يسولفون عمر واكف كبالهه وهي منزلة راسهه تلعب بأظافرهه، رحت اريد اعوفهم وتقرب منهه يحاوطهه من خصرهه ابتسمت والضحكة حصرتني لا البيه اعوفهم ولا البيه اضحك..

تركتهم وصعدت لغرفتي طمنت امي كلشي بخير وسديت الموبايل، دكيت على الاطلس ما جاوب رجعت دكيت هم ميجاوب دزيتله رسالة هم ماكو، دكيت على المكتب وجاوبوني بـ رسالة..

"Busy"

ذبيت الموبايل مطنگرة وكعدت وحدي اتصفن شوية واجاني آدم يحوص..

-شبيك ماما

-ادم: غيث غثيث

-مريم: عيب ادم شهالحجي

-ادم: يعيب على اسمييي

صار يعيط ويبجي انصدمت من عصبيته الغريبة كمت عليه اشوف شبي وميخليني اللزمه..

-شبيك ادم حبيبي ماما ولك اوكف شبيك

-يكول عني مااااايئ

-مايئ شنو؟

-هو هو يكول هو

يبجي ويفرك بعيونه مهضوم لزمت ايده اهدأه ويشهگ متت من القهر شنو موصله لهاي الحالة..

-تعال حبيبي اكعد يمي نسولف سوه، يله ماماتي تعال هنا نلعب

مسح عيونه بسرعة وابتسم مدلي ايده حتى اللزمهه كزكزت عليه شلته بسرعة ابوس واجعص بي وادغدغه يضحك وگلبي يضحك وياه..

-ماما ماما ماما ماما ماما

-ها ها ها ها ها

-تعالي اشاورچ تعالي

ضحكت ومديتله اذاني لسانه شطوله همس بأذني واكيد ترسني تفال..

-اني احبج

-واني احبك حبيبي

-لا تعالي بعد شي اكول

-ها كول

بعده ما حاچي ودك الاطلس عليه تركته بسرعة وكمت فتحت الخط بعدني دا احجي وصدمني ادم من كال بعصبية وهو عاكد حاجبه..

-ادم: مرمر مرمرتي گلبي

-مريم: ولكك ابو لساان

فتح عيونه وكال وهو يرفع اكتافه..

-ادم: بااابا يكول اني شعليه

-اني اعلمك انتَ وابوك

-الاطلس: رحم الله والديج

غلست اسوي روحي مادري فاتحة الخط وكملت..

-مريم: ابوك شلع گلبي شلععع

-ادم: وكح زاعلي لو بس اني تزاعليني

-مريم: هو لازم ازاعله

-الاطلس: لا يا ابن الكلب

-مريم: تعال ماما معلينه بأبوك ما راح نجاوبه خلينه نتونس سوه

-ادم: اي اي راح اجيب كرزات

-مريم: شتسوي بيهن؟

-ادم: حتى نتونس مو كلتي انتِ

-مريم: وابوك؟

-ادم: مو زاعلتي ماما

-الاطلس: واني اكول منو ينحشهه عليه طلع هذا السربـ*** السبب انعل ابوك لابو الجابك

-مريم: ادددددم

-ادم: ها

-صيح نانا هم والبنات حتى نتونس كلنه سوه

-ادم: ونعصب بابا؟

-الاطلس: تفيييي عليك ابن المطي هو صوچي اسافر واعوف امك وياك

-مريم: لا ماما عيب تحجي على ابوك

-ادم: بس هو يزعلچ يخليچ تبچين قبل لا تنامين

-الاطلس: ايا چذاااب هاي شوكت خليني ارجع ادم والعباس الا اشلع اذاناتك

-مريم: صدك يبچيني؟

-ادم: اي اني اتذكر

-مريم: شوكت صارت؟

-ادم: جنت نايم يمج ماما شبيچ تنسين

-مريم: ولك ماتذكر شو تعال شنو چنت لابسة بوقتهه؟

-ادم: امممم يمكن الدشادشة الحمرة هاي البيهه ورد ابيض

-الاطلس: ابن النععااال حتى اللبس يتذكره ولج مريمممم

-مريم: يااا اي صدك تذكرت بس عيب ابني شنو هالحجي ميصير تسولف هالشكل

تخصر ووكف كدامي عاكد حاجبه ومعصب..

-ادم: بس بابا عادي من يزعلج مووووو

-الاطلس: عار ابن عار حفيد عار شكول عليك

راح انفجر من الضحك ماتحملت وغلقت التلفون كوة لزمت روحي ما اضحك حتى ارزل ادم هاي مو اول مرة يسويهه ينحشني على ابوه تصرفاته متعجبني من يسويهه شكد يحب ابوه بس يغار منه عليه..

-ادم: بعد ماعيدهه

-اذا عدتهه ازعل عليك واكول لأبوك ادم ميحبك

-ادم: لا لا احبه والله احبه اكثر منج

-شنووو ولكككك

-لا احبه احبكم انتو الثنين

-تحب منو اكثر اني لو بابا؟

حط اصبعه بحلگه ويدور بعيونه الحلوة المكان برطم شفايفه وكال بحيرة ممزوجة بالجدية..

-احب نانا..

كالهه وفلت ينزل جوه رحت وراه اركض وشفته يروح لـ نانا يحضنهه ويكعد بحضنهه سويتله بيدي اني اعلمك ابتسملي واشر على نانا يكول..

-ادم: نانا ما تخليچ

-بلقيس: شنو ماخليهه؟ ولج مرايم شبيچ ويه وليدي الحلو

-مريم: كلشي مابيه ناناا ووليدج الحلو اليوم مينام ويايه بالغرفة اخذي يمج

طفر من حضنهه حاير عيونه مدمعة واجاني حضن رجليه ورفع راسه وكال بطفولية..

-يمج انام

-ماكو يمي مو تحب نانا اكثر

رجع يباوع لـ نانا محتار ميتات ضحك عليه احنه وانضمت ويانه خالة حصة تتفرج علينه واحنه نداهره..

-نانا: تحبني اني لو مريم اكثر؟

-ادم: ثنينكم

-نانا: لا لازم وحدة

-ادم: انتِ ومريم

-مريم: لازم وحدة اختار

-حصة: وااااي شفيكم على الصبي عذبتو حاله

-نانا: لا اوكفي حصة يله ادم جاوب

-ادم: اني.. اني احبكم كلكم

-نانا: لا لا ميصير وحدة بس

-حصة: گطيعة شفيچ بلقيس وانا ويني ليش مو معاكم ادم اختار تحبني انا لو بلقيس لو مريم يلاا

-نانا: هاي شبيچ حصة دوختو الولد

-مريم: اتفق خالة ليش هيج تضغطين عليه

-حصة: هاااااو انا شعلي

ماقبل يجاوب عافنه وراح مطنگر للحديقة محد يمل وهو يلعب هاللعبة وياه وكل البيت يحبه ومتعلق بي بسبب لسانه وسوالفه..

رجعت لغرفتي اخذت موبايلي وتذكرت طفيته، فتحته وانتظرته يضوي ودخلت عليه دعاء منفسة ذبت روحهه على السرير ونفخت بقوة..

-شبيچ دعيوة

-دعاء: راح يجلطني هالرجال راح انجلط

-شمسوي؟

-دعاء: مريم اني حامل

-مريم: شنوووو

-اي حامل لج حامل خررب بعدهه زوزة عمرهه كم شهر شبسااع

-مريم: وشبيج انتِ ثولة

-دعاء: لا تره مو اني السبب على كيفج ويايه عيني باعي اني متعودة كل يوم اخذ......

-سارة: عجيببببب

-مريم: يا ستار شبيجن ولجن

دخلت سارة بدون لا تدك الباب الحاجب معكود وراح تنفجر كعدت على الچرباية وتربعت، نفخت هوا ووخرت الكذلة من وجهها..

-مريم: اي سولفي خية سولفي شبيچ انتِ الثانية

-سارة: بكلشي حاطة روحهه تره طكت روحي مريم لشوكت ابقى عايشة بهاللعبان نفس!!

-دعاء: اكيد غدير وياچ مو

-سارة: مستحوذة على ابني ماكدر اشوفه ممنوع اللمسه نومة لازم يمهه اكله لازم يمهه كلشي يمهه كلشيي ومن اكول لحمزة اريد ابني يكول خطية سارة عوفي ويه غدير

-مريم: وانتِ ضايجة لان يوسف مو يمچ لو لان حمزة يريده يربى عند غدير؟

-سارة: الثنين مريم تره اني مو بس لعابة وكاعدة عنده يتفرج عليه شوكت ميريد ويبوسني شوكت ميريد ويحضني ويشمشم بيه تره اني بني ادم!! اني ام!! اريد ابني اريد اربي واشبع منه مو نحاسة بس اريد ابني ولجن حتى دينساني ويستغرب مني غدير تزرع بعقله افكار غريبة

-دعاء: يستغرب منج شنو تره ابنج جبير ويعرف انتِ امه

-سارة: يا ولج هي تكوله اني امك سارة معليهه اني جبتك تأشرله على صرتهه وتكوله منا جابوك شگوهه وطلعوك مني

شهكت متفاجأة دا اجاوبهه واندكت الباب سمحتلهن بالدخول واجن الثلاثي المرح..

-اسيل: صرصور جيبيلي مي

-رقية: مو چنه جوه سوه

-اسيل: عطشت من صعدنه شبيچ

-رقية: وانتِ ماعندج رجلين؟

-اسيل: مو حامل اخاف على الببو

-سارة: رقية ولي جيبيلهه مي مالنه خلگ

-رقية: شنو هاي خدامة الكم خدااامة

-اسيل: كعدي ماريد، مريم دعاء شوفن اختچن عجزت واني افهم شبيهه ضايجة

-مريم: شبيچ بسملة شصاير ليش ضايجة؟

-بسملة: مابيه شي بنات

-سارة: لا مبين بيج عموري ضوجچ بشي؟

-بسملة: لا

-رقية: لعد منين المشكلة؟

-دعاء: يمكن زعلانة من سكرتيرة عمر المايعة مو؟

-بسملة: لا بنات ماكو شي

-مريم: على طاري المياعة اسيل ليش ابنج يصيح لابني "المايع"؟!!

-اسيل: شنو يعني مايئ؟

-رقية: تره اسيل متعرف لهاي المصطلحات مو زين من تحجي عراقي، لازم متعلمهه من مسلم هذا المسلوع غيث

-اسيل: اي شنو معناهه؟

-مريم: كلمة معناهه مو حلو تنگال للولد خطية كسر بخاطره منين متعلمهه غيث

-اسيل: والله علمي علمج هذا مسلم يومية مكعد الولد يسولف وياه ويعلمه على سوالفه المكسرة

-سارة: وانتِ يالفاهية ليش تقبلين؟

-اسيل: عمي يريده يربى مثل تربيتهم حسرة عليه افك حلگي

-رقية: اوووع هذا العجوز بعده

-سارة: صاير اتعس حبي

-مريم: خطية وليدي زعلان ومهضوم ليش شبي اسم ادم عليجن الله شنو الاسم مال مايعين كولن الصراحة؟

-دعاء: لا حلو لطيف

-اسيل: الغريب بالموضوع ليش غيرتوا الاسم بآخر لحظة مريم؟

-بسملة: فاتتچ ولادة مريم اسيل شجاچ وسافرتي

-اسيل: واللهِ متندمة لليوم بلقيسه تحجي بولادة مريم

ضحكت ضحكة عالية وغطيت وجهي استرجع يوم ولادتي بـ ادم حرفياً يوم مينسي ولا يروح من البال..

رجع بيه الزمن لـ قبل اربع سنوات وثمانية اشهر اجه آدم للدنيا، چنت انتظر يوم ولادتي دقيقة دقيقة الاطلس مكابلني وكاعد ميخليني حتى امشي على رجليه يشيلني ويفتر بيه ونانا تصيح..

-نانا: ماما ما يصير لازم تمشي شلون راح يجيهه الطلق اذا هي كاعدة وساكتة

-مريم: نانا ماكدر امشي باعيلي مورمة

جاوبتهه واني اكل باللفة، درت عيوني على الاطلس ساكت باله سارح ماعرف بشنو يفكر ربتت على كتفه وهمستله..

-اخذني للغرفة طوطي

هز راسه ساكت واخذني للغرفة نيمني على الفراش وگام يريد يبتعد عني، سحبته من ياخته وكعدت عدل مستغربة..

-اطلس شبيك؟

-الاطلس: مابيه شي

-مو على بعضك صاير شي؟

-لا ماكو شي بس تعبان كلش

شلت هم وكلت بگلبي الا الچان راح تجيله النوبة بس ليش تزوره وقبل اسبوعين اجت؟

-النوبة راح تزورك اطلوس؟

-لا، نامي حبيبي اني عندي شغل مهم

-يااااااا

-ها

-وين تروح وين اطلس راح اجيب تدري

-صدك؟؟؟؟

-احم اي بس قبلهه لازم تسولفلي شبيك

-راح تجيبين مريم؟؟؟

-اي اوكف بس لحظة شوية ينرادلي بعد

-طبخة وينرادلج بعد شوية مرمر لا تلعبين بأعصابي!

-هسة شبيك دسولف يا عيني

-خسرنه مشروع مهم كلش اليوم ومتضايق بسببه

-يااااا شجاكم

-بعد صارت

-ياااااا شجاكم غير تنتبهون

-شسوي بعد كلمن ياكل رزقه

-شجاكم اطلس والله حرامات

-اي والله

-اكيد يسوه ملايين شجاكم

-اي صح

-تؤ والله ضجت متكولي شجاكم

-دكااافي افتهمناا الا تفحطينه وتزوديهه عليه

-هاي شبيك تعيط بوجهي شجاك

-من وراج مريم اني طايح حظي وانتِ گضيتيهه عليه شجاك وشجاك

-اسفة بس هاي اثار الولادة

-صدك؟؟؟

-اي چنهه يمكن اجيب اليوم

-مريم اذا ما جبتي اليوم والعباس اشك بطنج واطلع حمزة

-هاي شبيك شجاك

-نامي نااامي

يغطي بوجهي بالمخدة وينومني متت ضحك صايرة فد تافهه وسخيفة ماعرف شبيه يمكن اثار ولادة، نام بصفي يمسح على ظهري ويدلكه بأيده يخفف من اوجاعي اللتفتت عليه وابتسمت..

-شكراً حبيبي

-تدلل مرمرتي

-كلش دا اتوجع تدري؟

-ادري حبيبتي الله يساعدج

-عود ليش مو انتو تحملون؟

-مادري حبي بعد ارادة الله

-هو انتو الزلم بس ضيم نشوف منكم گبررر

-شنوووو

-هاي اثار حمل اطلس احسني جاي امسلت هواي

-صح كلش هواي

-اطلس احس راح اجيب

-جيبي ولج بس جيبي مو فحطتينا

-وانتَ شعليك تفحط تره اني الحامل!

-انتِ الحامل واني الماكلهه

-نعم؟؟؟؟ لا لا لا خو ماكو شي شو مسوي عليه منيه هاي لان تفركلي ظهري كل يوم بالليل وتسويلي عشه وتشيلني وتفتر من اريد اتحرك؟؟ قحطططط

-لا حبي ابد

-لا لا جاوبني قحططططط

-صح قحط

-اي مو اكول هه عشتو عود مسوي عليه فضل هسة هو هه هه

-هه هه نامي مريم

-اكلك شو انتَ صاير هواي تتأمر ممنتبه لروحك؟؟؟

-مريم

-ها

-خلصنه اشهر الهرمونات فـ انچبي ونامي

-فوكاهه تتجاوز عليه؟ والله فلا انام يمك بعد اصلاً ما اجيك ولا اوصلك ولا اخليك تشوف حمزة العنوني اضمه وما انطي الك

-ليش تبجين مريم؟

-اسكت عني اطلس احسني موجوعة

-من شنو عيوني شبيچ جاي اشاقيچ يا حبيبتي

-مادري احس وجع وجع وجع

-قوي؟

-لا يعني هيج مادري

-اخذج للدكتور حبيبتي؟ كولي احجي لا تبجين ولج

-اريد اروح للحمام اخذني

-يله

كام بسرعة يريد ياخذني للحمام وحسيت بشي غريب كأني تدررت على الفراش، فكيت عيوني وهو وياي حتى نسيت الوجع الدا احس بي واحد صفن على الثاني..

-مريم: والعبااااس ما سويتهه على نفسي

-الاطلس: مريم شجاچ

-مريم: والله العظيم شالني الله وسطرني لو سويتهه ما سويت ما سويييت

-شجاچ يا حبيبتي

-اطلسس اخخ احس وجع

-ديلا يلا ميخالف عود تغير الموضوع اسوي روحي ما شفت

-ولك اطلللس وجعععع

-خلص حبي نسيت السالفة لا تلحين

-ولك عمت عيناااااييي وجعععع اااااخخخ

-صدك جذب شجاچ مرمر

گرصته بأيده حيل شعوطت روحه فتح عيونه مصدوم من غمضت عيوني بقوة احس روحي تريد تطلع راح اموت، انخبص بيه خبص صار يركض منا ومناك بالغرفة واني اعيط، يروح ويجي يروح ويجي يروح ويجي واني اعيط واملخ بروحي..

-اخذني للمستشفااااااا

-شلووون ويننن يا مستشفى؟؟؟

-يبوووووو على عمررررري

اضحك وابجي بنفس الوقت ماعرف شسوي بسبب وضعه ميعرف شيسوي كام يفتح الكنتور ويسده يروح للحمام ويرجع، طلعلي شال وشمره على وجهي وصاح..

-لبسي بسااااع

-مااااكدر متوجعة يمممماااا

عافني وراح يركض بره فكيت حلگي ما مصدكة هذا وين راح عزه بعيني صخام ولطام بوجهج يمريم راح تموتين ورجلج الفاهي يطارد هنا وهناك..

-ولكككك طااااااسةةةة

رجع ويه نانا المخبوصة وبعيونهه النوم اجولي ثنينهم تكابلو عليه ونانا تكول لازم ناخذهه للمستشفى الطفل راح يجي..

-الاطلس: يله نانا يللله شيليهه واني اجيب السيارة

-نانا: ولك وييين شلون اشيلهه انيي

-الاطلس: وخري شكد فاهية

دفعهه ونانا صافنة وتضحك عليه، شالني ياخذني للسيارة هدأت شوية دقايق ورجع عندي الوجع، وصلنه للمستشفى وشفت الامة العربية مگلوبة الكل موجود ماهتميت لشي روحي رايحة ممرودة مرد بس اريد اخلص..

ماتذكر شسويت بعد من اكشن خواتي سولفولي، يكولن لزمتي اطلس وطيحتي حظه بالغلط والسب لزمت ايده وملختهه بالعض والخراميش واعيط..

-يبووووووو عليج يمريم يبوووو كله من وراك اطللللس الله يااااخذك واخلص منك ابو ريحححة

-عمر: ميخالف خوية ميخالف تحمل

-حمزة: كلنه عشنه هذا الشعور الخايس ميخالف

-مريم: راح اموووووووت اريد اميييييي وينج ماما عمت عينيييي سودة بوجهههي باليوم الكتلت روحي على المحيططط وردته

لحدما دخلوني الغرفة اني اشيل روحي وارگعهه كمت اللطم وابجي وافرفح بألف واه ويلاه ياله جبت بالسلامة اخيرراً ونور وليدي الحلو للدنيا..

شعور ما اجمله من شعور، احساس اشبه بالفراشات تدغدغ قلبي من حطو على صدري، ملاك شديد البياض بشعر اسود كثيف نايم على صدري ويبجي بجيت لحدما شبعت ضحكت من گلبي من شفت هذا النتفه والسواه بيه..

شوية ودخل الاطلس عندي دخل عليه والدموع كامت تنزل سيل من عيونه اني شفته هيج وگابلته ابچي وياه، حط راسه على صدري يبجي ويحضن بيه ويحمد الله على سلامتي ويعتذرلي على تصرفاته قبل شوية..

وخر وجهه من صدري ومسح عيونه باس راسي وخدودي مسح على شعري بهدوء، استحيت من نظراته وكسرت عيوني عنه من دخلت الممرضة وبيدهه الطفل..

-مريم: متريد تشوف حمزاوي؟

هز راسه متلهف وفرحاان كلش فرحان طاير والدنيا ما سايعته اخذ الطفل من الممرضة يبوس بي ويقربه من صدره يباوعله ويخطف نظرات الي..

-الاطلس: ابيض ثلج وليدي

-عليه طالع عيني

-طبعاً عليج چا عليه الاچلح

ضحكت بصوت عالي رغم وجعي بس نسيت كلشي بوجودهم، الاحبهم يمي وبخير احس بسعادة مالهه حدود..

-اسيل: اووي يا عمري حتى عيونج دمعو

رجعت للواقع ومسحت عيوني ابتسمت انعاد عندي الشعور اول مرة شفت بي ابني، حسيت على دعاء وهي تكول بضحكة كلش عالية..

-دعاء: ماكو فلم احلى من فلم اطلس ونانا وهمه يختارون الاسم يابة شسووا

-مريم: اني مادري بشي انتو سولفتولي بوكتهه

-رقية: لسه اتذكر من كالو لاطلس مرايم ولدت اووف شسوه كام يبجي ويضحك ما مصدك كل الولد باركوله واكيد عمر ما خلاه بحاله كام يطك اصبع بالخنسة ويهزله رگبة يگله..

-عمر: لك هلاا بأبو حميزة بعد شيخلصنه منه هذا الخايس صار ابو وراح يكوم يفيك بروسنه

-علي: الف مبروك خوية يتربى بعزكم ودلالكم

-حمزة: ابو حمزة الغالي الف مبروك

باركوله وسلمو عليه وتحاضنو وكلشي حلو وتمام قبل لا تطلع نانا وهي حاطة ايدهه جوه حنچهه صافنة عليهم..

-نانا: حمزة منو؟ حمزة شنو؟ حمزة وين؟؟

-الاطلس: ابني اسمه حمزة نانا

-نانا: لا صدك تريد تسمي الولد حمزة؟؟

-الاطلس: اي طبعاً

-نانا: لو تموووووت حصة سمعي ابنج

-حصة: واااي حااامض على بوزك حمزة شنووو

-نانا: تسمو ادم ماكو غيره

-الاطلس: ادم شنو؟؟ ابني انييي اسمي ادم؟؟؟!

-نانا: اي نعم شنو رأيج حصة حلو مو؟

-حصة: يهههبل

-محمد: حلو ادم حبيته

-عمر بهمسة: هه حبيته لو حبيت بيبيته

-حمزة: حبه على حب بيبيته ميخالف ميخالف

-علي: ادم الفااهي هه هه يطلع زاهي هه هه

-عمر: ادم المكتول هه هه طول عمره منتول هه هه

-حمزة: ادم الاطلس لا لا ما حبيت كلش سمپل

-مسلم: ادم؟ هههههههههههههههه شتحسوون لخاطر الكعبة

-سارة: تره اسم نبي شلون تستهزأون هيج انتو

-الاطلس: لا اكيد ما نستهزأ بأسم النبي بس ما يرهم لابني يسمو ادم يابة اسمه حمزة وانتهى ما يصير تغيرون بكيفكم

-نانا: ادم يعني ادم!

-علي: لازم ادم چان حب حياتچ نانا

-محمد: شنو؟؟ منو حب حياتهه؟!!

-نانا: افففف

-الاطلس: اني مسمي حمزة حتى قبل لا ينولد

-نانا: ادمممم كلت اطلس وبلا عناد

-الاطلس: تره اني الحملت بي تسع اشهههر مو انتِ

-علي: شني

-عمر: عقلي صار ايررور

-الاطلس: اقصد اني التحملت امه تسع اشهر چا هذا مو بالحسبان!

-رقية: الا اكول لمريم هيج كلت

-الاطلس: لا ولج مو هيج اقصد بالعكس بعيوني ام حمزة احطهه

-علي: هههههههاااي صاگرته

-عمر: وانتَ حبيبي عليوي شنو ملاحظاتك على دعاء؟

-علي: شنو اني شعليه اصلاً ليش يكون عندي ملاحظات عليهه بالعكس اكو احسن من دعاء زوجة ونعم الزوجة اي وعلي

-سارة: وليش هيج متوتر؟

-عمر: جيد وبعد شنو خليني اسجل چان متوتر من يحجي

-علي: اكلو نععل شنو متوتر وليش اتوتر؟؟

-حمزة: ولك هاي المن توكل نعل؟؟!

-علي: لعمر لعمر وعلي لعمر

-عمر: اممم جيد ويوكلني نعل لانه متوتر خوش ملاحظات انطيتني اشكر جهودك

-علي: عمييير اكل خـ.........

-الاطلس: خلص انچبو خلوني حاير بأسم ابني ورضا امي

-نانا: رضا امك اكيد لازم تدوره

-الاطلس: نانا هذا اول ولد عندي بداعة كل عزيز عندج الثاني سمي ادم والثالث نوح

-نانا: حضرتك تستهزأ!!

-الاطلس: ابد حشى ولا استهزأ هذا هو الثاني ادم والثالث نوح اتفقنا هاا شباب انتو شهود هنا مو؟؟

-حمزة: سمي ادم اطلس حلو شبيك

-نانا: لا يمة سمي الي يعجبك اشاقيك

-الاطلس: نانا

-نانا: اتشاقى وياك حبيبي وليدي الحلو يله روح شوف حمزاوي وامه

ظل حاير ويتصفن ميعرف شيسوي نانا اصرت ان يسمي حمزة وعود چانت تتشاقى وياه بس مبين عليهه تريده ادم وبنفسهه الاسم تركهه ودخل لغرفة مريم شوية وطلع كال يروح يسوي اوراق الخروجية..

طلعنه من المستشفى وتوجهنه لبيتهم واكيد ابوية سوه وليمة غداء وذبح ذبايح على ولادة الوريث الجديد والصدمة هي من سماه الاطلس "آدم" وهيج صار الكل ينتظر الموسيو الصغير "آدم" يكبر ويستلم مكان ابوه..

-سارة: just like a fairy tale

-دعاء: هم رطنت علينه انكليزي اكلج حبي تره اني بعدني ثولة وكلشي ماعرف

-مريم: ما انسى من اطلس اجاني خجلان يريدنه نغير اسمه لـ آدم بس لان نانا تحب هالاسم عباله راح اعارض واعصب بس بالعكس حبيته اكثر

سولفنه شوية وتفرقنه بسملة بقت ضايجة ماعرفنه السبب شنو شكد بقينه نحاول وياهه بس خلص طنكرت شيفكهه بعد رجعت للدار واني نزلت لـ نانا اسوي وياهه عصرونية وانتظر استاذ اطلس يحن علينه ويتصل..

-نانا: شبيچ مطنكرة مرايم؟

-مريم: من وره الاستاذ طبعاً

-نانا: سولفي كولي شبي

-ماعندي سوالف بس مليت كلش احس بوحشة

-ميخالف امي تحملي هذا شغـ....

سكتت من دخل عمو محمد للمطبخ تقرب من الطاولة الي دنشتغل عليهه ووكف ينقر بأصبعه على الكرسي..

-محمد: بلقيس يمنه اليوم

-نانا: اجيت اعاون حصة

-محمد: بخصوص؟

-نانا: تريد تغير اثاث البيت وطلبت رأيي

تحجي وياه ومنزلة عيونهه تلف بالمعجنات بينما هو عيونه اكلتهه اكل ما شالهم واتوقع حتى ما رمش..

-مريم: من رخصتكم

-نانا: مرايم شوفي الفرن لا تروحين

هزيت راسي اي وكمت للفرن بعدني هستوني واكفة واجه عمو محمد وبسرعة كعد بمكاني واخذ التمر الي چنت افلسه وكمل يشتغل بدالي..

ابتسمت واني اسمعه يبسبس وياهه يمكن عبالهم ديتهامسون بس الصوت واصلني اسمعه يغازلهه وهي تجاوبه ببرود بينما هو محترگ على نظرة منهه..

-محمد: شميت ريحتح من باب البيت ورجليه جابتني للمطبخ اجيت امشي على دگات گلبي

-بلقيس: شدعوة

-محمد: واكثر، مشتاقلچ بلقيستي ليش كل هالبعد ليش تعذبيني

-بلقيس: محمد مو وكتهه

-چا شوكت وكتهه؟ ابقي اليوم لا تروحين

-اكيد تمزح؟

-بداعة اطلس تبقين بلقيس گلبي يريدج مشتاقلج محتاجچ لا تكسريني

-محمد

-عيونه وروحه وراحته واميرته وسلطانة گلبه

-محمد كافي لا تسمع مريم

-خلي الكل يسمع ما يهمني راح تبقين بلقيس؟؟ تبقين مو؟ عليج الله بداعة ابنج بداعة ادم ابقي بس اليوم

-ما اكدر محمد ما اكدر اطلس يزعل

-ما يصير شي مو زين انتِ تنامين بغرفة واني بغرفة بس نسهر ويه بعض سوالف بس

-ماكدر ماكدر

-اني احجي ويه الاطلس؟ هاا شگلتي؟

-محمد صوتك الله يخليك لا تفضحنه

اسمعهم وكاتمة الضحكة لزكت يم الفرن لا البيه اطلع ولا البيه ابقى واكفة، بقى يحجي وياهه هوايه ويتوسل بيهه اسمع نبرتهه الخجولة وهي بهالعمر تستحي من عنده وتتوتر اعرفهه تحبه وتنخبص من تشوفه بس تحارب حبهه ومتقبل تميل..

اخيراً اتفقو عمو يتصل بالاطلس ويطلب اذنه نانا تبقى واكيد راح يجي يتوسط عندي حتى اقنعه وصار مثل ميردون بدون لا احتاج اقنع الاطلس قبل من وحده بعدما نانا حچت وياه..

يمكن ما اشوف ضحكة وسعادة عمو محمد بس من يكون ويه بلقيسته، يتغير مية وثمانين درجة يتحول لطفل يداهر ويضحك ويشاقيهه بعيوني اشوفه كل شوية جارهه بمكان ويحارشهه..

اوقات اصفن على قابلية خالة حصة وشلون گلبهه متحمل واعجز افهم وجهة نظرهه بس هي متفهمة هي الزوجة الثانية وبلقيس حب حياته..

**

"بسملة"
رجعت للدار تعبانة كلش دخلت للحمام اسبح وذبيت ملابسي بالكاع ممهتمة، صفيت وحدي بالغرفة وره ما تخرجت فاتن قسمهه يختلف عني وتخرجهه صار قبلي..

طلعت من الحمام بدلت ملابسي وتركت شعري على اكتافي بدون لا امشط، رفعت ايدي اليمنى وركزت انظاري على حلقتي اخذتلي صفنة مرتبة عليهه وابتسمت مقهورة..

كعدت على حيلي اهدأ من نفسي واقنع روحي ميخالف ما صار شي عادي صارلنه فترة قليلة مخطوبين نتعود على بعض من خلال الايام..

ذبيت نفس مخنوكة ماتحملت ما ابجي شكد حاولت اسكت بس ماكو عيوني انفتحن گبر اني تاليتي تهمني هاي الشغلات وابجي عليهه جنت اعيب على مريم ودعاء ونور واكول غبيات وتافهات طلعت اتفه منهن..

شتت بكائي وقاطعه صوت طرق الباب، كمت لبست شال على راسي ووكفت وره الباب اصيح..

-منو؟؟؟

رجعت اندكت بطريقة اقوى قلقت وخفت افتحهه بس بعدين تذكرت اني كاعدة بدار وعدنه حرس بالباب..

فتحت الباب على كيف ومديت بس راسي وچان اشوفه واگف بالباب وبيده بوكيه ورد احمر چبير ياخذ العقل، شهگت ما مصدكة عيوني ولا مصدكة وجوده، رجعت لوعيي من دفع الباب بخفة ودخل مبتسم..

-كل عام وانتِ الخير بسمتي

-ما نسيت؟؟؟؟

-عمر: شلون انسى وتاريخ ميلادج داگه وشم على صدري

-چذاب

-صح جاي اجذب

-مو اكول متطلع منك تدكلي وشم

-مو ما احب الوشم

-ليش تجذب؟

-صح جاي اجذب

-عندك وشم برجلك اليسره

-وهيج مركزة برجلي اليسره انتِ؟

-اطلع بره

-ما اطلع وعلي

-تطلع عمر اني زعلانة عليك

-ليش ولج شصخمت

-هيج اني بس زعلانة احس مادري شعور يلعب النفس

-معقولة بسبب الورد؟ يمكن عندج حساسية منه

مجاوبته ورحت اكعد على الفراش راح اموت من الفرحة بس كالعادة الغبارة تشتغل عندي من اشوفه واكوم اچفص واللوص..

-عمر: ما جنت اعرف وجودي هيج يزعجچ اني اسف

-كلش يزعجني

-اعتذر اني رايح اعوفچ براحتج

-ليييش

-مو ما ترديني

-اي ماريدك

-خوش يله مع السلامة قفلي الباب ولا تفتحيهه لاحد عود

-اممم

-هاج هاي هديتج هم واسفين آنستي ضوجناچ

-عمر

-نعم

-طلگني

-بسملة

-ها

-انتِ طالقة

-اني طالقة شنو؟؟

-اي مو كلتي طلگني

-وتطلگ بهالسهولة؟؟؟

كمت اوكف بوجهه مخصرة باوع بعيوني وضحك..

-اي چا مو ترديني اطلگچ والله حرت وياچ

-امدانيي الف مرة خوش مو عيد ميلاد عزه صار عليه گبر لفنيي

-ولفني وياچ، ولفنه بفد گبر ونظل نتسامر سويه

ضحك وهو يكولهه وحاوط خصري بيده درت وجهي اضم ضحكتي عود بعدني ضايجة بس مستحيل يخليني اذا ميذبله قنبلة يخليني افطس..

-عمر: شحسيت من كلت طالقة؟ اكلج خاف انحسبت وتطلگنه

-يمكن انحسبت

-صدك تحجين؟

-اي يجوز عزه بعيني طلگتني عميرران!

-انشگيت شگ ياله اخذتج تالي اطلگج بهالبساطة شنو هالغباء كله من وراج طاح حظج

-اهوو شعليه اني عمر شعليه انتَ كلت انتِ طالقة بس احس متنحسب

-راح نغلس يله يله غلسي

-شلووون حرام ميصير وخر لازم اللبس منك حجاب

-اشگه والله بسملة لا تكرهيني الدنيا

-ونحصل حرام من وره تهورك؟

-برگبتي معليج

سكتت بدون لا اطولهه نزلت راسي كلش مستحية من لا سبب بس اتوتر من وجوده واكوم امعلس بالحجي والافعال، شد على خصري بقوة وقرب وجهي من وجهه بلعت ريك منزلة عيوني تنفسي زاد من حسيت بأنفاسه تضرب خدودي..

-بسملة

-همم

-باعيلي

-اكلك

-كولي

-لا بطلت ماكول

-رفعي عيونج

-ماكدر خرب وخر عمر حباب

دفعته مني ارجف رحت اوكف بزاوية الغرفة اهفي وجهي وامثل اني بخير، ضحك من گلبه وكال بطريقة مشاكسة كالعادة..

-بعدج ما تعودتي عليه وتستحين؟

-ما استحي تره اني

-ادري بيج

يحجي ويتقدم عليه توترت ورحت احول مكاني كعدت على السرير وسويت روحي طبيعية حطيت رجل على رجل وعدلت شعري المنفوش..

اجه كعد بصفي ومد ايده يتمطى درت وجهي اباوعله وبحركة سريعة لزمني وقضى عليه، معت سحت تسرسحت سلمتهه لا عاندت ولا رافست ولا فكيت حلگي وحچيت..

ابتعد عني يمسح على خدودي ويوخر شعري من وجهي باس خدي بقوة وكام يوكف يعدل سترته..

انتبهت لروحي وشفت كتفي طالع عدلت القميص بسرعة وكلت وبعدني ارجف..

-بسملة: قليل ادب

-اي ادري

-متستحي

-حقچ

-عيب عليك عيب!!

-اي يابة افتهمنه ما تتكرر بعد اسفين بس انتِ هم على كيفچ ويانه شبيچ خربتي عليه

مجاوبته كمت من مكاني ورحت للكنتور اللهي روحي، حسيت بي يوكف ورايه ارتبكت من صار بظهري مباشرة ولف ذراعاته على رقبتي نزلت عيوني اشوف واذا اللگاه ديلبسني كلادة..

دارني عليه ببطئ قابلته بأبتسامة خجولة باس خدي وايدي وحضن كف ايدي بـ كفه وكال بصوت هادئ راخي مليان حنية..

-كل سنة وانتِ حبيبتي وصديقتي وشريكة عمري واجمل شي صار بحياتي بسملة

-عمر

-عيوني

-راح اكول شي بس لا تعيب عليه حباب

-كولي

-احبك هوايه

زادت ابتسامته وحضني لصدره بقوة باس راسي وخدودي احمريت واصفريت من الخجل انخبص وياه مستسلمة لحبي..

-واني عاشگچ بسملة مو اليوم ولا البارحة من اربعة سنوات

-عبالي نسيت عيد ميلادي اليوم

-ما نسيت وادري بيج ضايجة لان محد ذكرچ اليوم ومحد عايدچ بس جانت وصية مني ردت افاجأچ واجيچ هنا نحتفل وحدنه بدون ازعاج من احد وتلطلط علي وتنمر حمزة وسخافة مسلم وزواع الاطلس

-ههههههه وشلون دخلت هنا ممنوع رجال يفوت؟

-عانيت صح بس شحلاتهه المعاناة لو الج

-احم ها زين حلو اكلك

-بس سكتي ادري بيج خجلانة لا تچفصين

هزيت راسي ساكتة واجه ببالي سؤال فضولي تافه..

-عمر شخبار صديقكم ظافر؟

عكد حاجبه وعبست ملامحه، گز على اسنانه وجاوب يمثل البرود..

-ليش تسألين عنه؟

-لان استحي اسأل فاتن عنه صراحة خاف تفهمني غلط

-اها؟ واني افهمج غلط عادي؟

-يعني انتَ فهمتني غلط عمير؟

-لو فاهمچ غلط اللزگچ بالگاع بس اعرف فضولچ الخايس

-اخخ با لسانك شطوله

-اخخ يا صلافتچ ووكاحتچ

-ديلا عمر هسة شگلنه دجاوب وين راح الرجال

-تزوج ظافر وسافر لاوربا ويه زوجته وهسة عنده طفل لا لا يجوز حامل بعدهه ما جابت

ضحك فطست ماتحملت اوكف ردت اوكع بالكاع من وره الچذب مالته، اعرف ظافر بعده هنا وبعده يشتغل وياهم بالشركة ولا متزوج ولا ابد اعرف اخباره من فاتن بس غيرة عمر سوته متزوج ومسافر ومرته حامل هم..

-شبيچ تضحكين؟

-سلامتك عموري سلامتك

قضينه الليلة سوه تحشيش وضحك ووناسة، حياتي كلهه تغيرت وره خطوبتي من عمر حسيت الدنيا وردية وكلشي حلو ومثالي صح شخصياتنه تتضارب احياناً بس هو واعي اكثر مني ويتنازل عن هواي امور بس حتى ميسبب مشكلة..

-عمر: اني اروح بعد حبي لا تتصل امج وتعاتبني

-تعاتبك؟

صفن وسوه حركة واحد حاير بوجهه ميل زاوية فمه وفر بيده..

-امي تعاتبك؟

-اي وتحلفني احافظ عليج وماخليج تستهرين

-صدك تحجي عزه امي خزتني عود صدك هيج كلتلك عمر؟؟

-اي شبيچ اتصلي بيهه وتأكدي بنفسج

-استهتر شنو اني شمسوية قابل هاي شبيچ يماااا

-استهتارج بالدراسة وحايرة بالزواج تردين تعرسين اليوم قبل باجر ليش ماعرفج اني

-لاااا انتَ منيلك هالحجي عمررر

-بسملة من الاخير اريد نهاية الشهر نتزوج فهمتي لو لا!

-هاا

-ماكو هاا اريد زواج لا تعلين گلبي

-اي هذا هو صار بس قنع اهلي

-انچبيييي

-هاي شبييك

-هذا الاستهتار التحجي عليه امج انجبي وحطي كتبج ودرسي تخرجي خلينه نتزوج مو عجزناا نريد نلحك نشوف فروخنه نفرح بيهم

-عمر شبيك وياي والله ازعل وانقهر تره

-بسملة شايفة لو اجيتي وگلتي راح أجل سنة بعد ماكو؟؟ اطلگچ وخلينه نشوف يا ابن الكلب يتزوجج

-ديلا طلگ علساس كاتلة روحي عليه اني بعيد ميلادي ويزعلني

-اوووف بسملة المشكلة احبههاا ماكدر ازعلهه

-اي بس زعلت شنو تهددني بالطلاق

-ماقصد وروح ابوي، بس أجلتي فترة من مرضت امج كافي غيرج هالسنة تخرجهن الا انتِ سويتي دراستج ثمان سنين

-سبع سنين عموري

-اني رايح باي

-لا لا اسفة شبيك متتحمل يا عيني

كعد على السرير بصفي معصب كلش ضحكت على وجهه وملامحه العابسة صح اني اجلت سنتين من مرضت امي وكعدت يمهه ما انطاني گلبي اعوفهه..

-عمر: باجر معزومين ببيت خالي محمد

-كل يومية عزيمة شسالفة ماروح عندي امتحان

-ترحين غصباً عليج

-ماروح

-عيب من امي حبيبتي منتظرة جيتچ على نار

-اتصل واعتذر منهه صدگني ماكدر

-عوفي امي واني شنو ما تردين تشوفيني

-مو اليوم تشاوفنه عمير

-اريد كل يوم ماشبع منج، شيصير لو نتزوج ونضرب دراستج بعرض الحايط؟

-ايييي يله

-اااااااخ گلبي

-لا لا اسفة لا ماكو زواج الا اتخرج ماكو

-لا ختولي الدراسة شبيچ اتشاقة وياچ اريد اتزوج اني

-ودراستي عمر لا مستحيل ماقبل

-تكمليهه ببيتنه واني اساعدج عود

-صدك؟

-اي

-يله لعد موافقة

-بسسمممللللة

-لا لا صدك جذب ولك اتشاقة وياك ههه ههه

ضحك من گلبه ولزمني ملخني بالتكرص والعض جعصني جعص وحركاته يتعمد يحرجني ويخجلني ما وخر الا من طردته من الغرفة وقفلت عليه الباب..

ظل يدك هوايه حتى افتحهه واني بس اضحك بسفاهه خفت لا يتهور الزلمة ويسويلنه مصيبة، خنس صوته وره فترة فتحت الباب شفته ماكو رجعت للغرفة وابتسمت من شفت اشعار منه كاتب..

"لو الف باب تقفليهه على روحچ تبقين الي، احبچ موت بسمك اللهم"

نمت والضحكة تارسة وجهي واتلمس القلادة الي لبسهه الي، ثاني يوم مرني للجامعة يباوعلي من بعيد وميجوز من سوالفه يشمرلي بوسة بالهوا عباله محد يشوفه بس صديقاتي عيونهن عليه ويخليهن يطافرن..

اخذني لبيت عيال مريم معزومين على الغده كل يوم عدهم عزيمة عجيبين، الطريق كله يغازلني ويسولف ويايه اباوع لعيونه تلمع حب ولهفة ولازم ايدي بقوة عبالك راح اطير من عنده، يرفعهه بين حينة واخرى يبوسهم بهدوء ويسولفلي على يومه..

وصلنه للبيت نزلت اشوف خواتي تسالمنه وكعدنه نسولف كالعادة بس حسيت دعاء مو على بعضهه ضايجة ومقهورة، سألتهه شبيچ بس تتهرب مريم هم مو على بعضهه قلقت كلش بس محد تحجي شبيهه..

انتبهت على حركة عمر يأشرلي على الاستقبال اروح وراه، كمت بسرعة اشوف شيريد دخلتلهه ظلمة كالعادة فتحت الاضوية وعمر دزلي رسالة عوفيهن مطفيات گلبي رعد بخوف وطفيت الضوه بس ممرتاحة..

رحت اكعد بالركن صايرة ختلة متعودين نكعد هنا ونسولف على راحتنه مننشاف بسهولة، افرك بيدي وگلبي يدك حيل ديصير شي واني ماعرف؟

فزيت على صوت قوي يضرب باب الاستقبال كمت بسرعة من مكاني وشهكت بخنسة من شفت علي ودعاء يدخلون بس مو دخولية عادية جانت دخولية خلتني اللطم بمكاني من الفسوق..

لا البيه احجي ولا البيه ابقى اكمل المشهد الحامي الديصير، فكيت عيوني على وسعهن ودرت وجهي اللطم احاا احوو احوووي شديصير ولك عمررر ليش جبتني هنا..

الغزل والسوالف صارت بفلس هو يعتذر منهه وهي تضحك بغنج من يلاطفهه شديصير ولكم لزكت روحي بالحايط ماريدهم يشوفوني واتفشل اكثر واسمع لسوالفهم..

-علي: اني اسف يروحي مو قصدي

-دعاء: وخر علوش زعلانة عليك اني شلون تعيط بوجهي

ضيكت عيوني ومديتهن اشوف شمصخم هذا ويه اختي! بس من شفت منظرهم رجعت ادور وجهي واللطم..

-علي: حقچ عليه، بس ضجت من گلتي تردين تشتغلين

-اي اريد اشتغل

-صار وتدللين وبعيوني اخذج وارجعج بيدي

-تضحك عليه

-وروح ابوي وتشتغلين وياي بعد شتردين

-علاوي صدك راح تقبل اشتغل؟

-اني ماقبل لان ماريدج تتعبين انتِ حامل وزهورة تتبهذل بس اذا رغبتج تدللين

-لا بطلت ماريد

-هههههههههههه ولج دمرتيني دمار انتِ خرب......

ايععععع يبووو عمر وينك، ثواني وكامو يكعدون سوه يسولفون عادي همزين ارتاحيت، كتبت رسالة بعدني ما دزيتهه لعمر وچفت واحد بالاستقبال شهك شهكة ردت اغيب من الوعي على الفشلة..

طفرو علي ودعاء ثنينهم وعمر يصيح..

-عمر: شنو هااي ايم سوري اسف اعتذر، اكزكيوزز موااا..

-علي: شبيك كاعدين وساكتين ليش محسسني شايف شي

-عمر: احم اي صح اي

-علي: عمرر بس انجب واطلععع

-عمر: بسملة وين؟؟ وخر عن وجهي انتَ

-علي: بسملة؟ مو هنا

صرت ازلغ بخدودي واعضعض بأصابعي لا تفضحني عمر لا تخزيني، بعدهم واكفين ودخلو حمزة وسارة ووياهم مريم، اباوع لدعاء ارتبكت وعلي كام يكمز ويعيط..

-علي: شكوووو امة محمد كلهه اجت شتردووون

-مريم: شنو شبيكم شصاير؟ بسملة وين دا ادور عليهه

-دعاء: مو هنا والله

-حمزة: ليش الكل متوتر صاير شي؟

-علي: والعباس ابو فاضل ماكو شي بس طلعو

-دعاء: احم من رخصتكم

طلعت تركض بره والباقين هم طلعو وعلي راح بقيت وحدي، شوية وطلعت اتراكض لغرفة مريم فوك شفت دعاء كاعدة تسولف وياهه ومنطلقات..

-بسملة: دعاء انتِ ورجلج عميااان؟؟؟

-دعاء: ياا ولج شنو عميان متستحين

سولفتلهن الصار ودعاء فاكة عيونهه حارت شتسوي تنصدم لو تضحك لو تضم وجهها لو تبرر، استلمتهه مريم تنمر وضحك واني وياهه وهي منطلقة تضحك الفطيرة..

-دعاء: بنات عوفوني هسة شلطشتو اوي، يله نطلع نحتفل بعيد ميلاد بسملة

-مريم: دعاااء ليش خربتي الموضوع عمر رادهه مفاجأة

-بسملة: صددددك هيج يريد يسويليي

-دعاء: اي صح

-مريم: اوووف دعاء بعدهه چماله شبيچ مستثولة انتِ

-دعاء: لج حتى اني حاسة على روحي من حملت بزوزة لسه فد ثولة صايرة وغبية الله يساعد علي عليه

-بسملة: ولجن صدك راد يفاجأني يمة بعد عمري حبيبي گلبي فدوووة لوجهه يممممااي

-مريم: وهاي انخطبت واستخفت

ضحكن ويه بعض واني بس اضحك ممصدكة دخلن سارة وبقية البنات واني اوزع ابتسامت لحدما طلعنه واحتفلنه سوه والكشرة ما فارقتني، اباوعله وروحي تغلي فرح وسعادة وحب وعشق..

تقربت مني مرايم وهمستلي بغمزة..

-تحبي بسوم مووو

-بسملة بهمس: احبه واموت عليه من زمان من اول مرة شفته گلبي دگ وحسيت بشعور عجيب توقعته شعور نفور وكره او ضوجة بس بمرور الايام اكتشفت مشاعري مرايم واكتشفت شكد اغار عليه وشكد احترك حرك من يذكرون اسيل كدامه لدرجة اوصل اريد ابجي بكل غباء

-مريم: ليش انتظرتي كل هالسنين تعذبتي وعذبتي وياچ

-لان جنت عبالي كل عقلي راح انساه اضحك على عقلي وگلبي اني نسيته وماحبه بس كلما يذكرون اسمه گلبي يفز واتوتر ههههه طلعت عاشگته للمصلبخ ولج مرايم...

**

"مريم"
اسمع لبسملة الجدية الي جانت تضحك على مشاعر الحب والعشق وتستهزأ بيهن وهسة هي كدامي تنتفض وعيونهه تلمع من تحجي بحبهه وكل لحظة تاخذلهه نظرة لعمر تباوعله وهو نفس الشي ومن تلتقي عيونهم يضحكون لو يغمزلهه..

ابتسمت واني ادور بعيوني بين العشاق حتى عمو محمد ما بطلت عيونه تراقب بلقيس وبقى على امل تحبه بينما خالة حصة متقبلة الفكرة وماشوفهه تغار مثل قبل..

الا اني كاعدة وبصفي ابني ادم شريكي وحبيبي مسافر صارله 37 يوم يتصل مرتين باليوم بس ومشغول بقية اليوم، احس بملل وفراغ عجيب اوقات ادم يمل وهو يسأل على ابوه ويبجي يريده اكعد ابجي وياه وانوح مثل الاطفال..

كملنه الاحتفال البسيط وكالو خلونه نروح لمتنزه نونس الجهال يلعبون، لبينه الفكرة والكبار رجعو للبيت بقينه الشباب، كعدت ادم على المرجوحة واللاعبه اباوع للمكان فارغ نوعاً ما بس احنه وكم عائلة موجودة ايام مدارس ومحد يجي..

-ادم: ماما وينه بابا

-مريم: مسافر بابا حبيبي ان شاء الله كم يوم ويجي

رجع يهذي بأبوه ويباوع لحمزة ومسلم وعلي وهمه يلاعبون اولادهم بس هو ابوه مموجود، انعصر گلبي عليه وحاولت اللاعبه كل الالعاب بس بقى يريد الاطلس..

مليت والحسرة ترست گلبي كعدت على مسطبة واتصلت عليه كام، جاوبني بس مبين عليه كاعد بسيارة سولفت وياه شوية وصورتله ادم وهو يلعب شوية حچينه وراح..

-حمزة: يله بنات راح نرجع

-سارة: ليش بعد وكت الاطفال يلعبون

-حمزة: لا يله عدنه شغل

جان يحجي وعبالك ممرتاح باوعنه وحدة للثانية مستغربات وكمنه كلمن بسيارته صعدنه، اني ويه عمر وبسملة وعمر من اتصال لاتصال ما هد الموبايل..

-مريم: عمر صاير شي؟

-عمر: لا ابد

-بسملة: شبيك متوتر عيني؟

-عمر: شفنه مالك بالحديقة الچنه بيهه

-مريم: مالك شمسون؟!!

-عمر: اي وجان بيده طفل ما شفتو انتو؟

-مريم: لا ما شفته مانتبهت بسملة شفتي انتِ؟

-بسملة: لا، هذا الطفل ابنه؟

-عمر: لا ما متزوج هو

-بسملة: زين عمر ليش متوترين انتو؟

-عمر: ما متوترين بس مانريد نتواجد وياهم بمكان واحد بعد، ماعرف تصادفنه لو همه يعرفون راح نكون بهاي الحديقة بكل الاحوال ما يهمنه نعوف المكان ونطلع

-مريم: بس همه تغيرو صار سنين مندري عنهم شي

ضحك عمر مستهزأ وكمل طريقه لدار بسملة وصلهه واني وداني لبيتنه، تعشينه وگبل سبحت ادم ونيمته واني هم نمت بفراشي انتظرت اطلس يتصل بس ماكو اليوم دكيت عليه ميجاوب انقهرت ونمت..

حسيت على شي يلعب بخشمي يدغدغني احك خشمي متوجعة وبقيت بين النايمة والكاعدة..

-مرمر.. مرمرتي بشبش.. ام العطوب.. ولج مرايم

-دوخرررر

-ام لسان كومي

-دوخر شكد لزكة

-ها هيج صارت مريم هذا استقبالج لـ بعلچ

فتحت عيوني على وسعهه من استوعبت اني مدا احلم وهذا الصوت حقيقة! درت عيوني عليه اشوفه بصفي متمدد وساند راسه على ايده ويباوعلي مبتسم..

-ابو رييييحة

-رحم الله والديج

-اطلس هذا انتَ؟؟ كول والله انتَ

-لا حبي خيالي هذا

-اي مو اكول

-مريم اويلي يا مرريم

-يمممة عزه بعيني صخام لطام بوجهج يمريم اطلسسس انتَ جااااي

-اذني اريدهه حبيبتي يا گلبي وروحي انتِ، اني هنا بس اصحي

-صحيت محيطي صحيتتت ولك يبوووووو

-يبوو على عمري وعمر الخلفني مريم التوبة اجيچ وانتِ نايمة بعد

-وانتَ شكو جاي هيج وقت عيونيييي

-كلت اجي واصحيچ على لمساتي وصوتي شوية رومانسية ومن هالسوالف

-اني شكول رومانسية يا اطلس شبيك انتَ شتحس

-والله صح شحس مادري دكومي كومي خليني احضنج واطيح حظج

-شنووووو

-تعااالي

-اوكف لحظة احتاج استوعب وجودك شبيك

-اخليج تستوعبين بس انطيني مجال..........

عشر دقايق واندكت الباب..

-ماما

-الاطلس: يبووووووو

-مريم: يا اطلس ادم بالباب شوفه حبيبي

-هو هذا هم حظي من نعله على حظي الخايس

-اكلك شو انتَ فد مرة صاير وين الكلاااس عيني موسيووو

-الاطلس: خليني اشوف الطفل واجي اعلمج منو الموسيووو

كام بسرعة شاف ادم يبجي بالباب شاله يبوس بي ويسولف وياه يهدأه، ادري بي سلم عليه وشافه قبل لا يجيني بس ادم هو شاف ابوه ودك رجل الا ينام بنصنه اليوم..

-الاطلس: تنام بغرفة نانا؟ نروح لنانا حلو حلو وننام يمهه وتقرالنه قصة ادومي بابا

-ادم: لا اريد ماما

-الاطلس: مو نانا هم ماما نفس الشي بس شكلهن يختلف

-ادم: شلون

-الاطلس: يعني ماما بيضة وعيونهه سود ونانا سمرة وعيونهه خضر عادي

-ادم: اي بس نانا مو ماما ونانا يجيهه جدو بالليل

-الاطلس: شلووووووون

-مريم: لا لا والله ميروحلهه اصلاً على مرتين صارت ونانا ماقبلت، تعال ماما ادم تعال نام يمي

اجه مكيف دحس روحه يمي فرد ايده ورجله مثل عادته واخذ السرير كله، الاطلس باوعلنه ورافع حاجبه..

-الاطلس: واني وين اروح؟

-ادم: هناك

يأشر على القنفة ويباوعلي ويرجع يباوع لابوه..

-ادم: بابا هاي نام عليهه حلو حلو تشبه الجرباية

-الاطلس: شلون

-ادم: الجرباية جبيرة ولونهه ابيض والقنفة صغيرة ولونهه بني عادي

طكينه ضحك عليه لسانه شطوله، راح اطلس ينام على القنفة وادم يباوعله مقهور، رفع عيونه عليه وهمسلي بأذني..

-ادم: يصير بابا ينام ويانه حبابة

-مريم: اي يصير بس شلون وانتَ الا تفتح ايدك ورجليك من تنام

كلب عيونه فوك شلون الديفكر ويسوي حركات بوجهه ورجع يهمسلي..

-ادم: اممممم راح اسدهن بس اليوم

-مريم: اتفقنا

راحله يتلوگله ويبوس بي وجابه ويانه على السرير، شوية وادم غفى رفعت عيوني على الاطلس اباوعله مركز نظراته علينه ومبتسم، همستله..

-مريم: مشتاقتلك

جاوبني بنفس الهمسة..

-الاطلس: مو بگدي، روحي مفرفحة عليكم

-مريم: شلونه شغلك؟

-ممتاز

-اسفة لان ادم اجه متعود من تسافر ينام يمي حتى لو اودي لفراشه يكعد ويريد يجيني

-على شنو تعتذرين ابني مثلما هو ابنج، بعيوني احطه هو وامه

-اني زعلانة عليك واريد انكد بس ادم شفعلك هالمرة

-اروح فدوة لادم وام ادم شتكولين حقج اني مقصر وياكم

-تخيلت راح تجي لعيد ميلاد بسملة اليوم وكل عقلي راح تفاجأني حتى كشخت على اخر حبابة

-مو زعلانة لشنو كاشخة

-لروحيييييي

خزرني وضحك بالخنسة اشرلي على ادم نايم عود نصي صوتج، درت وجهي عنه اللزم ضحكتي لتروح الهيبة بس مخلاني لزم حنچي من جوه وداره عليه..

رفع نفسه تقرب مني اكثر وطبع قبلة على گصتي وخدودي ونزل لاماكن اخرى..

-اطلس

-روحه وعمره وكل حياته، مريم احبج.. وعلي احبج

-هههههههه نام انت تعبان

-هو اني مو تعبان حظي التعبان، كلتها احبج تضحك البطرانه

-الله

ضحكت ورجع لمكانه مبتسم بس يتحسر لزم كف ايدي حطه بين كف ايده وضغط عليهه بقوة وهو يباوع للدمليج الاسود بيدي (السوار)..

-مريم: اعرف شكد دتتعب حبيبي ومقدرة هالشي صح صعبة عليه غيابك ودائماً مشغول بس اعرف گلبك وروحك ويايه

-كلشي الج ووياچ مرمر اغلط بأسمج من اسولف تدرين؟

-اي اي اضحك عليه بهالسوالف

-والله العظيم سكرتيرتي منار كله اصيحلهه مريم والفشلة البنية تستحي تعدل اسمهه ومشيتهه مريم

-هههههه اطلس صدك تحجي خو منار قديمة

-اي والله ماعرف شبيه كلهن مريم صارن وغصباً عليهن يتقبلن چا اكو احلى من مرمرتي

سحت من الخجل صرت امعمع ماعرف شجاوب وهو بس يضحك..

-الاطلس: سولفي بعد لا تسكتين

-شسولف

-أي شي، صوتچ طرب لأذني ام العطوب

-اتعبك بسوالفي انتَ تعبان نام حبيبي

-اني تعبان ويمچ راحتي، انتِ لگلبي ضماد ولروحي التعبانة دوه، شحلاته التعب لو منج ويا خسارة الوكت اليمضي واني مو يمج مرمر

-احبك

-حبيني مريم ولا تبطلين تحبيني بيوم لا تملين انتظاري من اسافر ولا تطول زعلتچ من نتزاعل، حبيني بكل روحچ وجروحچ وكد حبچ الي بگلبچ احبچ اضعاف اضعافه تبقين انتِ الاولى والثانية والاخيرة وكلشي املكه يروحلج فدوة

-ادم: بابااااا

-الاطلس بهمس: اشتعل ابوك، ها بابا

-ادم: اكلت اكلي ماما ونانا

ضحك الاطلس بقوة واني وياه ادم يحجي من ينام يذكرني بنور وبسملة خواتي قبل، نيمته وما خليت اطلس يحجي شي بعد اصلاً ميحتاج يسولف عيونه تحجي عن حبه واشتياقه ولهفته، بعد مرور دقايق همستله بمشاكسة خليته يضحك بقوة..

-مريم: وانتَ هم لتمشي هالسوالف عليه وتخليني ابقى احبك واملخ روحي عليك وانتَ تروح تصول وتجول ما نسيت نورسينن يالاطلسس

-الاطلس: يااابة ردينه على نورسين.......

النهاية ♥️

#الاطلس "دمليج اسود" ♠️💸

• ━━━━━━❪♣❫━━━━━━ •

هالمرة راح نسد الباب على ابطالنه ونلم چوالاتنه ونرجع للعراق 😔🫶🏻 مو تنسن شي لا تكولين نسيت مقشر ولا بجامة ولا شال كلشي تلمين ونطلع 😁

انتهت قصتنه ومشوارنا ويه وحدة من اجممممل القصص واقربها على قلبي احداثاً وابطالاً مميزين بكلشي وجميلين روح قبل شكل 😍
قصة ما امل من تكرارهه كلما اضوج اقره جزء من بارتاتهه وارجع اعيش الاجواء وياهم 🥹♥️
ان شاء الله البارت الاضافي نال اعجابكم ♥️ سويته طويل كُلش حتى تستمتعون

زواج بسملة بعد تخرجهه هذا شرط ابوهه قبل لا تنخطب وبالنسبة لغدير فـ بقت على حالهه بس استمرت على العلاج يكولون وبعدهه تجيهه فترات صعبة بس صراحة يوسف غيرهه للافضل

وهسة أي سؤال عدكم تعالو انستا او تلي اجاوبكم بلي اكدر عليه ان شاء الله وكلشي ما جبتله طاري او ما جاوبت عنه فـ طلب ممنوع يطلع 💋💕