تحميل رواية «الاطلس "دمليج أسود"» PDF

#الاطلس "دمليج أسود"

بقلمي: زهراء السلامي 💛

لتنسون التصويت رجاااءً ✋🏻♥️ + التعليق بين الفقرات + متابعة لحسابي 🌼.

عزة نفسَي أهم مـَـن ڪَــلبي بــ هـَـواي

وكسـَرت خاطري تسَواك كلك

أطَخلك راس َ؟

أنــيَ النخل حَدري

يــآ حُـب

يــآ غزل

يــآ عشگ عذَري

مــن تَدوس ڪَــلبي اغـَفَرلك يجـَـوز

بَــس يم الكَرامة

أچفه شَري

• ━━━━━━❪♣❫━━━━━━ •

"مريم"

روحي جاي تنسحب بلعت ريگ وياه غصتي وسميت بأسم الله بگلبي ونويت افتح الستوري، شنو يطلع اني راح اكون هادئة ومانطي ردة فعل انتهى كلشي بعد على شنو راح اموت روحي من الغيرة والقهر..

-دعاء: هاا؟

-مريم: راح افتحهه

دستهه بسرعة مغمضة عيوني حابسة دموعي، اخيراً فتحتهم ونصيت اركز بالموبايل..

-دعاء: مافهمت!

-مريم: اوكفي

قريت الخبر مرة ومرتين وثلاثة ما مستوعبة رجعت اقراه بصوت عالي..

"اعلنت شركة الاطلس على عرض مجموعتها الشتوية الجديدة تحت مسمى "Dreamer، حالمة" على ان يكون موعد الحفل 12/4 الموافق يوم الاثنين.."

-دعاء: عرض مجموعة جديدة؟؟

-مريم: اي

-دعاء: همه مو قبل كم شهر نزلو مجموعة جديدة مريم؟؟

-كل فصل ينزلون تصاميم جديدة

-وشبيج طايرة فرح

-هههههههههه ولشي ماكو شي

-دعاء: كل هاي الكشرة وماكو شي والله يا الله

ذبيت موبايلي وغطيت وجهي همست "الحمد لله" ونمت على فراشي ضحكت من كل گلبي على خبالي وخوفي شسويت اني ليش فرحانة هيج بعده زواجهم قائم كال ابو اطلس يصادف يوم 18..

-دعاء: مريم

-همممممم

-وجع چنهه هايشة كومي

-ها كمت ها

-علوشة يريد يجي يشوفني وكتله لا لتجي

-لييييش

-احس الوقت مو مناسب بس هو زعل وانقهر مني كلش

-ليش زعل وانقهر؟

-يكول انتِ متردين تشوفيني كلما اكلج اني جاي تطلعيلي عذر

-ليش دعاء حرام عليج هيج تعذبي، الرجال يحبج ومتمني شوفتج لتمللي

-ماريد مريم مالي نفس لشي

-سمعيني لج اذا علمودي دتخربين خطوبتج اموتج والله تره ماقبل على علي اني لتضوجي

-مو..

-ماكو مو اتصلي بي كوليله تعال نتشاوف مشتاقتلك لتسوين هيج دعاء انقهر وازعل عليج لتخربين فرحتج بسببي اني زينة والله وكلشي مابيه

-ماكدر مالي نفس بي

-انچبي هو شعلي!! لا تظلمين بختج علي خوش رجال واجه وتعنى وجاب اهله وكل ناسه وخطبج رغم همه ماعدهم هاي السوالف يردون حب وغرام وعلاقات ياله يتزوجون بس هو احترمج واحترم رغبتج واحترم حبكم واجه يخطب وهسة راح تتزوجون لتخربين كل هاي الشغلات علمود احد

-انتِ اختي

-وهو حبيبج وخطيبج تحبون بعض ومتمنين يوم عرسكم وتحلمون بي كومي اتصلي بي وغيرو جو سوه بشوفة بعض يله كومي

غصبتهه تتصل بي وتكوله يجيهه خطية طار من الفرح ما صدك گللهه مسافة الطريق وهو جاي، انقهرت على اختي تستحي تكمل تجهيز وتستحي تفرح بخطيبهه علمودي حتى اتصالاتهم بالقطارة طول الوقت مگابلتني وكاعدة حتى من انام تبقى كاعدة بصفي..

-كومي بدلي دعاء

-ليش هو بالبيت اني

-ان شاء الله تطلعيله بهاي الجرود؟

-تراك مرتب مرايم شبي

-دكومي كومي

طلعتلهه فستان قصير بي ردان من الكنتور شمرته عليهه وخليتهه تلبسه فتحتلهه شعرهه ومكيجتهه طلعت جديدة..

-دعاء: هسة يتخبل علية

-خلي يتخبل تونسو سوه هاي كلهه تبقى تنذكر وتسولفوهه لجهالكم بالمستقبل

-اكول لجهالي ابوكم واحد فاسق يقضي الكعدة كلهه يكرص ويتحارش بيه

نزلت راسهه بسرعة مستحية مبين طلعت الجملة منهه لا ارادي، ضحكت من كل گلبي وحضنتهه بقوة لصدري دعيتلهه بالسعادة وطلعنه نسوي حلويات حتى تقدمله من يجي..

ساعتين واندكت باب بيتنه باوعتلهه متعجبة شبسرعة وصل ضحكت بحماس وكالت..

-دعاء: يطير طيور من يجيني

راحت تركض تفتحله الباب واني وكفت اباوعلهم من شباك المطبخ فرحانة بيهم، فتحت عيوني على وسعهه من اول ما دخل باسهه وشالهه لحضنه متت ضحك على سوالفه لعب طوبة على الباب هاي بعدهم ما دخلو ودعاء گضتهه تصيح "علي فضتنه" "علاوي امشي جوه"..

تركتهم ورحت احضر ضيافة وكفت بالمطبخ انتظرهه ترجع بس شو هاي انبلعت ماكو نص ساعة وهي خانسة لا حس ولا صوت، اجتني بسملة تعلچ ولافة الشال على خصرهه..

-مريم: هاي شعندج؟

-بسملة: دا انظف ويه امي

-تنظفين ويه امي دقيقتين وتاخذيلج هزة ساعتين صح

-صح الصح

-اكلج شو علي اجه بس مالهم حس هاي صارله نص ساعة

-لا خية شنو نص ساعة كولي ساعة، ساعة ونص تره متطلع بعد اختنه حبسهه عنده

-عزه صخام بعيني صدك تحجين

-وحق الله

-زين شيسوون؟

-اظن يعلمهه قران

-لا بسملة لتستهزأين احجي عدل

-شمدريني مريم شيسوون يعني بلابل حب وكاعدين سوه شيسوون

-اي شيسوون والله عندي فضول صار

-تاخذله خيط حبي

-بسملللة

-دوخري هاي عود جانت متزوجة امداني شوكت اتزوج وارتاح

-ترتاحين شنو شو متستحين انتِ

-انشلع گلبي مرايم كاعدة بالاقسام الداخلية مثل المسودنات اريد اتزوج واحد من ذيج المدينة حتى ارتاح

-صدك على طاري الجامعة شلونچ؟ اني نسيت حبي اسفة عذريني

-لا عادي حب شسالفة انتِ بيا حال، اي الحمد لله ماشية الامور كاعدة بغرفة ويه صديقتي وحاصرة روحي بيهه ماطلع بس بالعطل اجي هنا عند اهلي

-اي مو اكول ماشوفج

-تعب تعب مريوم كلش تعب بس طبعاً شكراً لعمر سهلي المهمة خطية حتى هو لگالي الدار الي كاعدة بي اخت صديقه وصادقتهه

-اي فدوة لعينه شكد گلبه طيب، اتذكر من سألني شنو لونج المفضل

-جذااابة

-والله حتى يجيبلج فرشة على لونج التحبي

-اوووووي جذابة جذااابة

-ههههه والله العظيم هذا الصار

-واني اكووول ليش الفراش والحايط لونهم وردي فاااتح عزه بعينك يالمصلبخ خوش يدلل

-هم كالت المصلبخ!!

-افف انسى والله كلما اشوفه اتذكر عمر العار خطيب دانيا

-ايعع دانيا صديقتج وهذاك المصلبخ الخانهه؟؟

-اي اي الله ياخذه المقرف

-شجااب الثوم للحلقوم عمرنا غيرر كلش غير

-اي خوش خوش اروح ادرس عندي امتحان

راحت واني هم لفيت راسي ونمت علي ودعاء مطولين، كعدت المغرب على صوت امي ودعاء يتصايحن ركضت اشوف شكو واسمع امي تهد وتنثني عليهه..

-ام مريم: هذااا الاثر بحنچچ شنوووو دعااااااء

-دعاء: والله بالغلط صاارت بالغلطططط

-وللللج دعاااء اليوم اطيح حظج اليوووم

صعدت دعاء تشرد فوك وامي صعدت وراهه بالمكناسة وبسملة كاعدة تعلج وصافنة عليهن..

-ام مريم: تعااالي نزلي يميييي تعالي اشوفج زيييين

-دعاء: وعيوونج ما سوه شي والله والله ما سوه شي والله

-تعاااااالي اني اعلمج ما سوه شي موووو

-والقران الكريم ولج مرااايم لحكيلي

-مريم: ماما شبيچ عوفيهه تعالي خلينه نفهم شصاير

-ام مريم: يمة ورمت گلبي هاي البنية اني اعلمج دعيوة هالمرة شردتي مني المرة الجاية اكسر المكناسة على ظهرررج

-دعاء: يبووو كلشي ما صار والقران

-اي بعد حلفي حلفي يالجذابة

-مريم: لا ماما دعاء متجذب، تعالي نزلي فهمينه شكو

-دعاء: انطوني الامان وانزل

-مريم: اني انطيج الامان تعالي

نزلت ترحف زحوف وامي واكفة متحضرة تكتلهه اول ما نزلت ركضت وكفت وره ظهري وهمستلي..

-دعاء: مرايم فدوة حاميني

-مريم: شسويتو دعيوة صدك صاير شي غلط بيناتكم؟

-ام مريم: ما تشوفينن خدودهه وحنچههاااا

-دعاء: والله من لحيته اتحسس والله

-مريم: منيلج هاي الكلاوات

-دعاء: جيبو القران احلفلكم علي كلما يبوسني على خدي لو أي مكان مجرد لحيته تطخني يتحسس المكان ويصير احمر واظل احكه ويطركع هيج باعو حتى ايدي

مدت كف ايدهه فعلاً صاير احمر واثر حكة ابتسمت اعرف جلدهه حساس وكلشي ميتحمل..

-ام مريم: اييي وهو كاااعد ويمطگ بيج مووو

-دعاء: لا والله لا هي بوستين بس على خدي وحنچي بس بس بس

-ام مريم: ولج اني ابوج طوووولي ما شافه بالخطوبة وانتِ لعبتي ويه الرجال لعب يالخفيفةةة

-مريم: ماما شبيچ دتكولج ما صار شي هي بوستين

-بسملة: شسالفة ماي ماذر قبلتين ناشفتين لا تؤثر روحي دعاء انتِ في بر الامان

-ام مريم: انچبننن عاد انتن الادبسزيات من تردن تفزعن

-بسملة: اماه لا تصيرين اوڤر هي بوسايتين شحلاتهن منا ومنا قابل شمسوي الزلمة المسكين

-مريم: صراحة اتفق ويه بسوم ماما شبيچ شجاچ يعني ابويه ما باسج بالخطوبة

-ام مريم: حششششى ما شافني الخطوبة كلهه بليلة الدخلة ياله تشاوفنه

-دعاء: ايع وين عايشين

-ام مريم: عبن احنه محترماات مو خفيفات نفسچن امشيي ولي لو تموتين ما نروح لمدينتهم بعد عقوبة الج

-دعاء: لا لا لا فدوة ماما شبيييج دا اكولج ما صار شي والله العظيم راح ابچيييي

-مريم: شعدكم رايحات بعد؟

-دعاء: عمتي عزمتنه لبيتهم ومناك نطلع نجهز وياهه اختار الغرفة اليوم بلغني علاويتي

-ام مريم: تهييي بهييي علاويتهه الخفيفة الريشة

-دعاء: ماما ريلاكس بليز

-مريم: طگو المعدااان

-دعاء: اف اف دونت... اءء اءء انتو دونات

فطست وبسملة تفلت العلج من الضحك وامي تفر بيدهه وتغمغم بينه عافتنه وراحت..

-مريم: هالمرة دافعتلج المرة الثانية تأدبو دعاء

-دعاء: ياا ما صدگتيني مرايم! والله هذا الصار

-بسملة: يس يس دونات

-دعاء: اششش لتحجن علي ديعلمني انگلوزو الا اتعلم واصير طلقة بي

-مريم: عود عليميني والله نخزي منعرف انكليزي

-بسملة: لان بكل بساطة چنتن تشردن بمحاضرة الانكليزي بالمعهد غبرات

تفرقنه كلمن لمكان ومشت الايام دعاء هواي راحت للمدينة الساكن بيهه علي ويه امي عزموهم كم مرة والغريب ابوية يموت على علي وعمر كلش قريب عليهم وبيناتهم مكالمات وسوالف وضحك ومرة اجو ثنينهم وطلعو وياه صادقو..

التوأم عدهم طبع ينسجمون ويه الكل واعيد واكرر عدهم قبول مو طبيعي كل اليشوفهم لازم يحبهم ويتقبل وجودهم خصوصاً سوالفهم الي تفطس ضحك..

تحسنت احوالي هواي وتغيرت للاحسن استردت عافيتي وتناسيت موضوع الاطلس عبر حفل اطلاق المجموعة والكل واضح دينتظر زواج الاطلس، جبرت نفسي ما اتابع وحضرت صفحتهم على مواقع التواصل حتى ما اشوف واحرگ بروحي..

حددو موعد زواج علي ودعاء يوم 1/1 يوم عيد ميلادي فرحت بالتاريخ وحبيته لان تاريخ مميز انخبصنه كلنه نجهز وفرحانين بي، اخيراً اجه اليوم تختار بي دعاء بدلة العرس وينصبون اثاث بيتهه الباقي..

-مريم: دعاء راح تشترين بدلة عرسج مناك؟

-دعاء بحماس: ايي عمتي كالت كلشي عدهم احلى وافخم لان الطبقة المخملية يتسوگون مناك وفعلاً مريم من رحت شفت كلشي يجنن، وعلساس تريدني اختار البدلة وباقي شغلات العرس من محلات معينة تكون غالية وراقية

-بسملة: يع ماحبيت

-مريم: ليش؟

-بسملة: قصدهم احنه فگورة؟ اوكي سيستر ادري احنه فگورة بس مو يحچوهه بوجوهنه

-مريم: بسملة سكتي هاي فوگما يردولهه الزين همه شنو على گلوبهم يجيبولهه أي شي ويفضون السالفة بس غير يردون لاختي كلشي حلو ومرتب

-بسملة: ها والله صدك، بس هم يع ماحبيت ماطول غدير الحية راح تطلع وياكم

-مريم: نعمم!!

-دعاء: اي لان يكولون ذوقهه حلو كلش

-مريم: ايعععع اتبره منج دعااء هاي شنو مطلعيهه وياكم اني اعرفهه شنو هسة تشلع گلبج

-دعاء: يله انتِ طلعي وياي

-مريم: لا ماروح اني شعندي

-دعاء: معزومين كلنه على الغده عدهم شبيچ ياا

-مريم: لا لا شعليه اني روحي وحدج ويه امي

-بسملة. اتوقع سمعت دتكول كلنه معزومين لو اني سمعي بي شي؟

-مريم: ماااا ماروح

-دعاء: هاي لييش

-مريم: ماروح مااروح

-بسملة: هاي شبيهه الاخت

-مريم: هسة اشوف طوطي مااريد

-دعاء: لا ببيت علي راح نكون بس عمتي وعمر وهو واحنه موجودين حسب مافهمت

-مريم: واذا عزموهم واحت سحليته وياه؟؟

-دعاء: منو سحليته؟

-بسملة: اول حرف من اسمهه نورسين

-مريم: استغفر الله ربيي ماروح دعاء عوفيني لو تموتوني وتشرحوني وتذبوني بالزبالة بدون دفن هم ماروح خووووووش....

**

-زهراء: علاوي تعال وليدي

-علي: يمة عمير ما يرضى يفتحلي الباااااااب

-زهراء: عوف اخوك تعال يمي احاچيك

-ما يرضى يحاچينيييييي

-زهراء: دعوفه يا ماما

-علي: الا يحاچيني الااااا

-زهراء: دعوووف صخاااام وتعال

-عمر: انييي صخااااام

فتح الباب معصب وعاكد حاجبه..

-علي: هلو عمير مشتاقلك

-عمر: طير عن وجهي انتَ

-علي: اني اسف

-عمر: اسفك حطه بـ....... براسك

-زهراء: شبيكم يا امي

-عمر: اني مو ابنج اني صخام

-علي: اني صخام اني

-زهراء: اي حبيبي علي صخام مو انتَ تعال يروحي

-علي: يمممماااا!!

-زهراء: يبوووو چنكم جهال كافي تعالو ثنينكم احاچيكم

-علي: تعال تعال حبيبي تعال

جرجرته وياي للصالة كعد كالب وجهه..

-علي: يمة بعده مزاعلني حاچي

-زهراء: ليش مزاعل اخوك عمر

-عمر: لانه سرسري

-علي: تبت توبة نصوحة التوبة

-زهراء: شصاير؟

-عمر: اتفقت وياه نطلع صارلي اسبوووع ماخذ منه موعد وهو واعدني نروح سوه تالي عافني وراح يشوف خطيبتتته

-زهراء: ومعصب لان راح يشوف خطيبته؟

-عمر: متغير يمة متغييير من خطب لسه عافني وراح

-علي: ماعوفك اني ماعوفك تكي الثاني

-عمر: خلي دعاء تفيدك روحلهه حبيبي روح

-زهراء: ههههه ولك عمر تغار من مرت اخوك

-عمر: ما اغار بس هو چلب حتى يريد يعيش وحده النذل

-زهراء: حبيبي هاي سنة الحياة اكيد راح تفترقون بيوم

-علي: يمة ماعوفه اني بس غير انطي البت حقهه

-زهراء: وهذا الصح ماما عمر شبيك

-عمر: اي خلي ينطي حقهه روحلهه امشي ولي

-علي: هاك استلم

-زهراء: عمر شنو تريد انتَ شنو مشكلتك بالضبط؟

ما جاوب كام وكف بعيد منزل راسه ومكتف ايده، كامتله امي تسولف وياه ميقبل يحاجيهه..

-عمر: ماريدنه نفترق

-علي: ما راح نفترق اكابلك واكعد كل يوم

-عمر: جذاب

-علي: وعلي ابن ابي طالب صبح مسا اني يمك

-عمر: احلف

-علي: وروح ابوي ليش عبالك اذا تزوجت راح اعوفك ونبتعد

-عمر: لان هسة خطبت وانتَ بعيد چا لو تزوجت وطلعت شلون بيه اظل مگابل الحياطين

-زهراء: يا روحي وليدي الحلو زعلان على توأمه راح يفارقه

-عمر: طول عمرنه احنه سوه 32 سنة واحد مكابل الثاني واحد ينام بصف الثاني تالي بنهاية عمرنه يعوفني ويروح الچلب من هسة وحشته ماكله روحي

-زهراء: يله انتَ تزوج حتى متحس بوحشة

-عمر: ماريد اتزوج

-علي: عمير شبيك زعلان تره ابطل ماتزوج

-زهراء: لا شنو ما تتزوج حبيبي شجاكم هاي الدنيا هم يجي يوم وتتزوج عموري وتكمل حياتك وتعذر اخوك

-عمر: اي.. بس اني احبه هو اخوي

-علي: وعلي راح ابجي يوم بعد ماتزوج

-زهراء: ماما شنو ما تتزوج فكهه عمر حبيبي افرح لاخوك وادعيله بالسعادة والله يرزقك نفس فرحته واكثر بعد

حضنته امي ورحت چيتت بنصهم فك شوية من داهرته، ما اللومه اني وعمر روح وحدة بجسدين احس بوجعه حتى اني مقهور لان راح نفترق بس بعد هاي الدنيا..

-عمر: كافي وخرو خلونه نسولف بالعزيمة

-زهراء: فكرت نسويهه بمزرعتنه حلوة وجبيرة وراح نستمتع

-علي: خوش فكرة بس باردة كلش

-زهراء: تدفأة موجودة كل مكان

-عمر: منو راح يجي؟

-زهراء: عزمت اهل دعاء كلهم واعزم حصة واولادهه وحمزة واهله وبعد منو

-علي: يصير اعزم صاحبنه واهله هم؟

-عمر: خاف يتقيدون اهل خطيبتك؟

-علي: لا عادي حاچي لدعاء عنه

-عمر: ظافر؟

-علي: اي هو ظافر

-عمر: اي عادي اعزمه حتى اعزم اخته وامه هم اذا تريد

-علي: هذا هو چا راح اعزمهم

-زهراء: باجر اريد كلشي مثالي ماما ولدي رفعو راسي كدام اهل دعاء اريد تدللهه علاوي خليهه تتونس واياااك تزعلهه بشي لو تحاول تقلل منهه مثل ذاك اليوم اكسر راسك

-علي: يمة والله ما قصدت اقلل منهه عبالي تعرف تحجي انكليزي اشم گفه ايدي اني هي ما تعرف

-زهراء: لا تحسسهه بنقص امي تريد تعلمهه علمهه بس بطريقة غير مباشرة بدون لا تجرحهه حرام

-علي: صار بنص عيني دعاء احطهه

**

-بسملة: هههههههههههههه 

-دعاء: هههههههههههههههههههه

-نور: هههههههههههههااااايييي

-ام مريم: هههههههههه كافي ولجن

-بسملة: هههههههههه هههههههههههه ههههههههههه راح امووووووت

-دعاء: والقران فطستتتتتت

-مريم: انچبنننن

-بسملة: لو تموتوني وتشرحوني ماروح هههههههههه

-دعاء: لو تذبوني بالزبل ماروح خوووووش ههههههههه

-مريم: راح اموتچن صوووت ما اسمع فهمتن لو لا

-بسملة: طن طن طن طن راح نشوف ابو الطووط وسحليته

-مريم: بابااااا كول لبسملة صايرة مستهترة

-احمد: شبيچ بابا بسومة

-بسملة: مابيه شي حبيبي انتبه للطريق باباتي الحلو

-مريم: بابا هاي حقيرة تغثنيي صيح بيهه

-احمد: بسملة صيري حبابة بنيتي دكتورتنه الحلوة

-بسملة: حبيب گلبي غير تدلل انتَ بس مرايم تتنعوص شوية

-احمد: هههه حبيبة بابا

گولبت عيوني راح اطگ راح اموت من ابوية ودلاله لبسملة الحقيرة تحرك بحواجبهه بطريقة على عنادج جبناچ غصب وانكسر راسچ..

كاعدة على اعصابي گوة لازمة نفسي عقلي كله ويه الاطلس شلون راح اشوفه خايفة كلش من شوفته ويه نورسين راح انفجر من القهر وضجت اكثر من ابوية جبرني اروح وياهم وحطني بهذا الموقف المقرف..

وصلنه بعد ساعات لمزرعة بيت اهل علي نزلنه شفنه الكل هناك متجمع سلمت على سارة ورقية واسيل سلام حار بقت علاقتي بيهن قوية ما انقطعنه عن بعض وسلمت على الباقين وكعدت ادور بعيوني المكان..

-سارة: مسافر

فزيت على همسهه القريب مني انداريت عليهه بسرعة فاتحة عيوني ابتسمت وكالت..

-سارة: الاطلس مسافر مو هنا

-مريم: ها؟

-سارة: صارله اسبوعين بـ لندن

-هاا اي براحته

-اي علمود مجموعتنه الجديدة راح عدهم شغل علساس حمزة هم وياه يروح وبطل من تعبت اني

-شلونچ ويه الحمل سارونة؟

-زينة كلش صح اتعب بس فرحة حمزة تنسيني كل التعب متونسة مريم كلش كلش

-حياتي ربي يديمهه، زين وغدير؟

-متعرف بعدهه

-متعرف بيج حامل؟!!

-لا متعرف ضميت عليهه اخاف احجي

-حقج

ابتسمت وهزت راسهه، باوعت لبطنهه بعدهه ممبينه بس شوية سارة ذبلانة تعب الحمل مبين عليهه، بقيت كاعدة احوص بمكاني من خالة حصة ونانا كعدن يسولفن بسفرة الاطلس..

-مريم: سارونة

-ها

-اطلس... لا لا هيج انسي

-شنو كولي

-اطلس مسافر ويه ابوج؟

-لا رايح وحده هو واصدقاءه

-منو اصدقاءه؟؟؟

-ماعرفهم والله

-متعرفين ولا واحد؟

-يمكن بس نورسين اعرفهه منهم

-رايح ويه نورسين

-اممم

بلعت ريگ وانطيتهه جانبي الايمن گلبي راح يطلع من صدري من گدما ينبض غمضت عيوني بقوة وزفرت نفس اهدأ روحي ماريد افضح نفسي مريم اهدأي..

-دعاء: مريم تعالي شوية

كمت اروح اكعد بصفهه گرصت ايدي وهمست..

-ليش وجهج احمر؟

-اطلس مسافر ويه نورسين!

-صدك؟

-اي ليش ما كلتيلي دعاء معقولة علي ما حاچيلج؟؟

-لا والله اصلاً ما سألته انتِ مو متقبلين اسئله عنه تكولين خاف عباله انتِ موصيتني

-اي بس اكيد ابوية يعرف چان ما خلاني اجي وياكم

-صحيح حتى اني احس هيج، حبي معليج بيهم لتفكرين بي وتضوجين نفسج

-لا شنو افكر بي مخبلة

جذب اي مخبلة ودا افكر بي وجاي اموت واحترك من جوه اكص ايدي اذا ما سافرت وياه حتى تختار بدلة عرسهه من الخارج من ارقى المصممين العالميين متأكدة هذا السبب..

ذبيت نفس وكمت اكعد بغرفة وحدي صافنة على المزرعة بره اتأملهه واهدأ نفسي، قررت ما افكر وشيصير خلي يصير مريم ممنوع تفكرين بي بعد حرام خلص خيولي..

**

"بسملة"

سحسلتني دعاء اوكف اراقبلهه الاجواء تريد تكعد ويه علي وحدهم اخر مرة بالخطوبة قبل الزواج يردون يستمتعون ويعيشون ذكريات حلوة، قررو يكعدون وره المزرعة..

-دعاء: عليج الله انتبهي عدل بس يجي ابويه او احد دكي عليه تلفون امي يمج صح؟

-اي اي بس روحي ولتصيرين ادبسز ما بقى شي لعرسج

-ما اصير والله شبيكم بس نكعد نسولف

هزيت راسي وخلت وراحت، كعدت على كرسي موجود اتأمل المكان شوية وطلعت صديقتي فاتن واخوهه ظافر، فرحت كلش من عازميهه هي اخت صديق عمر التعرفت عليهه بالجامعة بس هي قسم ادارة..

-فاتن: ها شو كاعدة هنا وحدج

-بسملة: اشم هوا المزرعة تجنن

-فاتن: اي همزين من الولد عزمونه خلي نتونس

-ظافر: مرحبا يا آنسة

-بسملة: اهلاً استاذ

كمت وكفت بصف فاتن استحي من اخوهه هاي اول مرة اشوفه شكله حباب ومؤدب عكس التوأم الصلف ولا عبالك صديقهم..

-فاتن: بسومة هذا اخوية ظافر يشتغل بشركة الاطلس محاسب

-بسملة بهمس: ها هناك تعرفو عليه التوأم؟

-فاتن: لا لا چانو سوه بالمدرسة صديقهم من ايام الثانوي

درت عيوني اباوعله شفته صافن عليه مبتسم مجرد صارت عينه بعيني نزلهم وسوه روحه يباوع لحذاءه..

فاتن مو من الطبقة المخملية ناس على گد حالهم عايشين على راتب اخوهه وهي تكعد ويايه بالدار لان بيتهه بعيد عن الجامعة، حبيت شلون ظافر صديق التوأم رغم اختلاف الطبقات..

-فاتن: بسومة خلينه نفتر

-بسملة: لا اني لازم ابقى هنا ما ابتعد هواي

-ظافر: تخافين؟

-بسملة: شنو اني اخاف لا شنو اخاف بس ماكدر ابتعد هوايه اختي منتظرتني

-فاتن: هاا لعد خلينه نكعد هنا نسولف

كعدت بالكاع متربعة على الحشيش الميت ابتسمت وكعدت بصفهه بنفس الطريقة، رفعت راسي ظافر على وگفته مكتف ايده ووگفته صاير ورانه..

-بسملة بهمس: اكلج شبي اخوج؟

-فاتن: واكفلي حراسة المحروس

-صدك والله؟

-اي شبيچ يخاف عليه

-خايف عليج من شنو

-شمدريني دسكتي هاي سوالف امي طلعت السفرة من خشمي

-شجاهم شنو اول طيحتهه السفرة

-فاتن: شمدريني

-بسملة: هذا ابوية هو جرجرني يكول شعندج كاعدة بالبيت مثل الخنفسانة خاتلة بالمجاري

-فاتن: هههههههههههههههه خرب عرضج بسملة

-والله هاي من يضوجون مني يصيحولي الخنفسانة

-فاتن: لعد اني يصيحولي حية ام راسين لاني تستوسة

-بسملة: وربي مينلامون بس احلى تستوسة

ضحكنه بصوت عالي استحيت من شفت ظافر يضحك ويانه شلون خزي سمع محادثتنه، لزمت روحي اريد اسكت بس ماكدر اضحك على ضحكة فاتن الفضيحة تشوخر ويه كل ضحكة تضحكهه واني افطس..

-ظافر: هههههه ولج فاتن كافي

-فاتن: راح اموووت الخنفسانة وحية ام راسين ههههههههههه

-بسملة: هههههههههههههههه انفضحنه تخزينه ههههههه سكتييي

-ظافر: خرب سكتن ولجن فاتن شبيچ تشخرين خرب ولج

محد كدر يلزم نفسه انتهيت من الضحك كمت ابجي وفاتن مستمرة بضحكهه اباوع لظافر اختنك لازم بطنه ويهز براسه مأيس منهه..

-ضحكة خير ان شاء الله

سدت حلگهه فاتن بسرعة واني بلعت باقي ضحكتي ومسحت دموعي، وگف ظافر عدل وحمحم..

-ظافر: هلا عمر تفضل ويانه

-عمر: تضحكون؟

-ظافر: ههههه اي على سوالف البنات

-عمر: ها صايرة سوالف هم

-فاتن: اءء ظافر بسملة خلونه ندخل جوه

-ظافر: اي يله حبيبتي، من رخصتك عموري

-بسملة: وين عايفتني تعالي

-فاتن: امشي ندخل جوه

باوعت بالاتجاه الدعاء كلتلي رايحتله شفت غلط اكوم اخاف احد يروح يشوفهم وتنلاص..

-بسملة: لا اني راح ابقى هنا كاعدة اشم هوا

-فاتن: بكيفج

راحو هي واخوهه دار وجهه يباوع بأتجاهي وابتسم ما رديتله الابتسامة لان جسد ضخم غطى عليه وگف بوجهي متخصر بأيد والايد الثانية بجيبه..

-بسملة: استاذ؟

-عمر: الجو حلو

-بسملة: اي بس ممكن توخر عن الشمس چنت اتدفى بيهه

-عمر: ليش كاعدة هنا؟

-لان.. لان احم هاي اريد اشم هوا

-خوش

كعد على الكرسي الجنت كاعدة عليه حاط رجل على رجل، اللتفتت عليه گالبة وحهي رجله صايرة بخلقتي انتبه لنفسه ونزلهه وطلع جكارة من جيبه شعلهه وجر منهه نفس..

-عمر: متعودة تضحكين ويه الزلم بهاي الطريقة؟

-بسملة: خيرر؟؟؟

-عمر: هسة ويه ظافر هواي ماخذة راحتج

-شنو ماخذة راحتي اخيي احترم نفسك

-اظن محترم نفسي اني بس انتِ هواي ذابة ميانة كأنچ مو

-لا مو مو! اني دا اضحك ويه صديقتي شعليه بأخوهه

-واخوهه جان يضحك وياكم!!

-وشعلينه بيي

-بله احد اجه وشافكم بهذا الشكل شيفكر؟؟ ابوج لو اجه شيسوي؟؟

-ابويه ميفكر بيه بسوء ولا يظن ظنون وصخة!

-معليهه الظنون الوصخة بسملة تصرفج غلط اعترفي!

-وشعليك انتَ تصرفي غلط لو صح

-على گولتج شعلية اني شكو حارگ دمي ومتدخل بيج

بقى يدخن واني كمت اوكف بمكاني كتفت ايدي ضايجة من كلامه صح ادري غلط نضحك كدام ظافر هالشكل وكلامه طبيعي بس تحسست من عمر ماعرف ليش، انداريت عليه معصبة..

-بسملة: تره اني ماضحك ويه الزلم!!

-خوش

-ما اضحككك

-ماشي

-استاذ شنو مستهزأ بيه انتَ؟؟

-لا ليش استهزأ كلتيلي ما تضحكين خلص عفية عليج

نزل عيونه على جسمي وعصرهم حيل عكدت حاجبي اراقب وجهه عافسه وعاصر عيونه ما فتحهم..

-شبيك؟؟

-هيج

ابتعدت منه مغثوثة كلش ردت اتشكر منه على الغرفة السواهه الي حتى بهاي واهسي خرب وبعد ما اتشكر منه..

-عمر: عجبتج الغرفة؟

-اي

-بالعافية

-هلا

-فوكاهه

-شنو تريدني اكول؟

-يمكن شكراً راح تكون حلوة؟

انداريت عليه مسحت وجهي ونزلت عيوني عيب تصرفاتي مهما يكون..

-شكراً استاذ

رفعت انظاري اله مبتسم وهز براسه بمعنى العفو..

-ليش كاعد هنا استاذ عمر؟

-احسن

-ليش احسن

-بكيفي يعجبني اكعد هنا

-قلة اماكن اجيت تكعد يمي

-شعليج عجبني اكعد هنا

-اكلك انتَ شسالفتك شبيك تعصر عيونك كلما تباوعلي!

رجع كرر الحالة وضغط على عيونه بأصابعه، حرك راسه نافي التصرف وكام على حيله وكف گبالي مباشرة..

-شكد طولج؟

-نعم؟

-جاوبي شكد طولج شو طويلة كلش انتِ

-اكلك شنو هسة اجيت تتنمر؟!

-ليش اتنمر سؤال عادي خيتي

-طولي 176

-علييييي

-تره طولي يجنن

-فعلاً بس بعد تسع سانتيمات وتوصليلي

-مو هواي ماكو فرق بيناتنه اصلاً

تقربت اقدر طولنه ابتسم على حركتي واني ارفع رجليه صرت بطوله بالضبط..

-شكد طولك؟

-185

-علي اطول منك؟

-لا اني اطول بسانتيم

-مو انتو توأم؟

-عادي تصير اختلاف بالطول

-هاا انتو كلكم طوال تدري كلش طوال عمالقة خصوصاً حمزة واطلس شعجب

-اكيد چا غير نطلع على اهلنه امنه وابونا طوال اكيد نطلع هيج

-خالة حصة كلش طويلة وحمودات هم

-حمودات ههههههههههه

-اسفة اقصد عمو محمد بس زلة لسان هاي

-عادي عادي، نعم كلنه طوال كتلج ولد بنات

-اي لاحظت اسيل هم طويلة كلش

غابت ضحكته ورفع حاجبه مزعوج ماعرف ليش ذكرتهه هسة يمكن لان ضجت من علق على طولي اسيل بطولي تقريباً شو ميعيب عليهه..

-عمر: شدخل اسيل؟

-مادري بس اكول هي طويلة هم

-اي بس شعليهه ليش جبتيهه بالطاري

-لان اني وياهه نفس الطول تقريباً واجت ببالي صدگني ماقصد شي ثاني

-شي ثاني مثل شنو

-مثل يعني لان انتَ تحبهه.. اقصد يعني مادري مادري اني اسفة خلص انسى الموضوع

-بسملة اياچ تچفصين وتجيبين طاري اسيل كدامي من دون البنات كدام احد ارجوچ

-حاضر

-اسيل متزوجة ماريد اسببلهه مشاكل

-صح حقك

نزلت رجليه وكفت عدل وتمشيت بعيد عنه، باوعت لدعاء وين هي يا ترى وشدتسوي..

-عمر: واكفة حراسة لدعاء مو

-شمعرررفك

-لاني واكف لنفس السبب

-صدك تحجيي

ضحكت من گلبي وهو يضحك ويهز براسه اي خرب استغلونه ذولة لمصالحهم الشخصية..

-عمر: والله مال نعوفهم ونفلت شنو حرس حاطينه

-بسملة: اني اعلمهه دعيوة حتى ببيتنه توكفني حراسة تكول اذا اجه ابوية انطيني خبر

-اها واضح السالفة حامية

-شنو يعني

-لا هيج سلامتج

-شنو هااي والله الا اشلع گلبهه من انخطب

همستهه بيني وبين نفسي ودرت وجهي مكتفة ايدي، سمعت صوت ضحكته وراية ممتخيلة سمعني وحتى لو سمعني ميهمني مقررة اشلع گلبهه بخطوبتي..

-عمر وينه عليوي... بسملة!!!

انداريت على مصدر الصوت وفتحت عيوني، تخصرت وغضبت حواجبي..

-بسملة: الاطلس!!

-الاطلس: انتِ هنا؟؟ ليش شلون

-بسملة: انتَ مو مسافر؟!

-عمر: ااه يا له من لقاء

-الاطلس: رجعت اليوم انتِ ليش هنا؟ شنو اكو احد من اهلج بعد مريم جاية؟؟ جاية مريم؟؟

-بسملة: لاععع

-الاطلس: ليش؟!

-بسملة: ما عجبهه تجي مشغولة

-عمر: حلو حلو استمرو

-الاطلس: وتركتوهه بالببت وحدهه؟! لحظة منو جابكم شو ما شفت ابوج

-بسملة: اكيد طالع، اوكف انتَ شلون اجيت وليش اجيت هنا شمعنى؟

-الاطلس: يمكن لان هاي مزرعة بيت عمتي لو اني غلطان عمر

-عمر: مية بالمية صح

-الاطلس: ليش ما اجت مريم شنسوي بيج احنه

-بسملة: خير؟!!

-الاطلس: القصد من كلامي ليش انتِ هنا من دون خواتج؟

-بسملة: لا ما بينتهه هالشكل كأن دتطردني حضرتك

-الاطلس: نفس اللسان يا الله

-عمر: رشاشة بوشنكي

-بسملة: مريم مو هنا لان مشغولة استاذ

-الاطلس: بشنو

-بسملة: هاااو شعليك انتَ

-عمر: هلو عمة حصة

-الاطلس: ماشي براحتهه، عمر اجيت اسألك عندك ملابس زايدة هنا؟

-عمر: اوكف هسة اريد اسأل بسمك اللهم شي مريم وينهه ليش ما اجت يا ترى شنو عدهه وما اجت وشافتنه

-الاطلس: وانتَ شعليك بمريم!!

-عمر: مشتاقلهه هواي

-الاطلس: تشتااقلك جهنممم ابن الـ...... ابن عمتيي

-عمر: اعزهه بنص گلبي كاعدة

فزيت من لزمه من خوانيگه وانطاه بوكس على خلقته، ابتعدت حاطه ايدي على گلبي الاطلس صاير شعلة نار وعمر بقى يضحك ولازم فكه..

-عمر: اشاقيك وعلي شبيك

-الاطلس: انعل ابو شقاك الماصخ نفسك

-بسملة: شبيكممم

-الاطلس: مابينه شي ولا تحجين بمريم كدام أي بشر!!

-عمر: هاي شني هاي حاصرت البت من جميع الجهات

-الاطلس: شترررريد منهه شعليك بيهه

-عمر: اشاقيك اشاقيك ما جاوبتينه بسملة ليش مريم ما اجت

هستوه الاطلس ديجاوبه ويتعاركون وفلتت مني..

-بسملة: دتفكررر

-الاطلس: شنو؟

-بسملة: مريم هنا جاية تره بس دتفكر.. تفكر.. تفكر بهذاك

-الاطلس: منو هذاك؟؟؟

-عمر: اوكف خلينه نفهم منو هذاك؟!!

-بسملة: هذا الـ.. الـ.. شسمه نسيت اسمه

-الاطلس: منووووو

-بسملة: الطياار الطيااار

-عمر: يا طيار؟؟

كتفت ايدي من شفت وضعهم تغير راح ينفجرون ثنينهم والله وناسة..

-الاطلس: يا طيار بسملة!!

-بسملة: خطيب مرايم اختي طيار

-عمر: طيار؟؟؟

-بسملة: نعم اجل صحيح

-الاطلس: انخطبت

-بسملة: يس افكورس

-عمر: اوكفو خلونه نستوعب خطب مريم طيار

-الاطلس: بسملة انتِ شنو جاية تحرگين گلبي؟؟ ماكو هيج حجي هاي انتِ الفتيهه مووو

-بسملة: ألف شنو اخي روح اسئلهه بنفسك وهسة مريوم دتفكر بالرد

-الاطلس: يااا رد ولج ذاك اليوم تطلگنه

-بسملة: اي گلتهه تطلگتو بعد شكو

-عمر: بسملة لا تلعبين بأعصابنه صدك مريم مخطوبة

-بسملة: اوكف انتَ شدخلك تره هذا زوجهه السابق انتَ منو

-عمر: اني مالي علاقة واشتعلت شعععل ولك اطلللس مريم راح تتزوج

-الاطلس: منو هذا النعااال منين لگاهه!!

-بسملة: ليش شبيهه مريم ميخطبهه طيار اصلاً اول ما تطلكت منك بأسبوع خطبهه موووهندددس

-الاطلس: منين ديجون ذولة القناااادر

-عمر: وهيج بسااع طش خبر طلاقهه شنو واكفين بالباب منتظريهه!!

-الاطلس: احجيييي

-بسملة: اي لعد ليش اصلاً الخطابة واكفين طااابور عليهه من قبل

خفت كلش من اطلس حط ايده على گلبه وعصر راسه عمر لزم ايده يسنده وعت ايده منه واندار عليه..

-الاطلس: شلون خطبهه طيار؟ يعني وين شافهه؟ شنو صار واجه خطبهه شلووون

على اثر صوته طلعت اسيل وبيدهه ابنهه يبوو يبوو لا انفضحنه صرت امتمت ماعرف شحجي اسيل حطت غيوثي بيد عمر واجت تسلم على الاطلس سلم عليهه ببرود لزمته من ايده..

-اسيل: شبيك حبيبي

-الاطلس: ماكو شي ماكو.. اسيل حبيبتي طبي جوه هسة جايچ

هزت راسهه اي اخذت ابنهه ورجعت جوه، رد اللتفت عليه واني اللطم بعقلي احاا احوو..

-الاطلس: منين لگاهه بسملة بس سولفيلي بداعة امج روحي راح تطلع

-بسملة: وانتَ منين لگيتهه

-الاطلس: شنو؟؟

-بسملة: انتو من خطبتوهه منين لگيتوهه؟

-الاطلس: اني مادري هو ابوي...

-بسملة: اي نفس الشي اجو اهل الطيار وخطبوهه

-عمر: هي مقتنعة؟؟؟

-بسملة: دتفكر گلتلكم

بدون كلام عافنه ودخل جوه اطلس شايطة روحه غمضت عيوني بقوة انلاصت ورب الكعبة يارب متصير مشكلة بسبب غبائي يارب...

-عمر: ما جاي اصدك

-بسملة: ليش؟

رجع مكشول واندار انطاني ظهره توترت من تصرفه ماعرف ليش هيج يسوي شبي عبالك اكو شي ديچوي عيونه..

-بسملة: استاذ شنو سالفتك انتَ

اندار عليه معصب وعيونه مدمعة..

-هاي هم جنطة!

-شنو

-هاي جنطتج شنو هذا اللون

نزلت عيوني على جنطة الخصر اللابستهه ورجعت ارفع راسي عليه..

-شبيهه؟

-شنو سالفتج ويه الفسفوري يابة يحرگ العيون

حط ايده على عيونه ولزم جبينه يضغط عليه بقوة..

-ياااا انتَ تتحسس من هذا اللون

-يحرگ عيوني خرب روحج

-هاي شبيك تغلط على روحي

-منو تلبس جنطة فسفوري دخيل عليي

-اني

-عاد انتِ بكلشي غير عن العالم

-انتَ معصب لان مريم انخطبت اني شعليه ترزلني

-ولج شعليه بمريم بابا بطلي هذا اللون ينرفززز

-مينرفزني احبه لوني المفضل اخضر فسفوري

-ذوق خـ.... خردلي

-ذوق خردلي شنو

-بسم الله الرحمن الرحيم

-هاا

-ما جاي اصيحلج بس وخري هاي عن بطنج شبيچ شايلة جنطتج على بطنج وتفترين

-جنطة خصر هاي يووه شمفهمك انتَ

-اوكفي گلتي لونج المفضل اخضر فسفوري؟

-اي

-چا والوردي؟

-الوردي احبه باللبس والفراش وكذا بس اكسسوارات واحذية وجنط احب الفسفوري

-ذوق زر...... زرافة

-والله ما جاي افهم عليك كل شوية حچاية شكل روح عني مزاعلتك

-هههههههههههههه

-انوب يضحك

-حبيتهه هاي مزاعلتك

مجاوبته وتمشيت بالمكان وحدي درت اباوعله واكف بمكانه وحاط ايده على راسه فريت بيدي على المبالغة مالته وكملت طريقي اتمشى واباوع للزرع الميت تقريباً بس المنتوجات الشتوية طالعة وريحة المكان تجنن..

درت وجهي على صوت نباح الكلب مادري واوي خفت ونبض گلبي، اكيد عدهم كلب حراسة هنا نفس مزرعة الاطلس تذكرت شكله يخوف چان ضخم واسود..

-تفضلي

اللتفتت بسرعة حاطه ايدي على گلبي ابتسم بهدوء وكال..

-خرعتج؟

-اي لا عادي شنو هذا؟

-كابتشينو كلت يدفيچ شوي بارد الجو بس وخري جنطتج لخاطر السماوات

-بيهه شغلات مهمة خاف تنباگ

-تنباگ؟؟ منو يبوگهه خطيب اختج الطيار!!

-ايييي

-بس لو افتهم منين اجه هذا الز...... الزرافة

-صح صح هو كلش طويل

-اشتعلت روحه بهالمغربية

-بعدهه ظهرية حتى غده ما متغدين

گلب وجهه وراح يكعد بعيد على الكرسي، بقيت واكفة وحدي اشرب المشروب واسب بدعاء بالهمسة، ماتحملت انتظر اكثر اتصلت بيهه فوراً رفضته دقيقتين وشفتهه تهرول بأتجاهي..

-دعاء: هااااا

-بسملة: ابوية راح يطيح حظج

-دعاء: اجه؟؟ سأل عنيي ولج ليش ما كلتيلي ليييش

-شسوي مو بيدي اجه وكام يصيح وكلب الدنيا كال خليهه تجي الا اربيهه من اول وجديد

-دعاء: عزه بعيني عزه رحتي بيهه يدعيوة

-شسويتو ولج ورحتي بيهه

-والله كلشي ما سوينه بس نسولف شلون حظ فگر لج بسملة حبابة تعالي وياية حماية فدوة فدوة

-بسملة: مو بيدي دعاء شسوي اني هاي حتى متعيدين سوالفج السخيفة

-ماكو سخافة ماكو والله كلشي ما سوينه وينه علي وين راااح

اندارت شافت عمر كاعد يباوعلنه دكت على خدهه وجحظت عيونهه رجعت تباوعلي..

-دعاء: ابوية اجه وحچى عليه كدام عمررر

-اي

-تصخمت وتلطمت اني تفشلت كدام حمايه يبووو يا فشالتي

-علي: شصاير بنات

-دعاء: لا تحاچيني علييي لتحاچيني

-علي: شبيچ حبيبي، عمر شكو شصاير

-عمر: كلشي ما صار

-دعاء: اجه ابوية علي وراح يطيح حظي

-علي: صدك!!

-بسملة: طبعاً صدك

-عمر: تاخذين الاوسكار بالجذب بسملة

-بسملة: انيييي اجذب

-عمر: لا امي بس ألفتي قصة كاملة هسة انتِ وجنطتج الفسفوري وخليتي اختج تنجلط

-بسملة: اءء مو شسمه هي.. هي دعاء تأخرت

-عمر: بس ما صار شي تأخرت ويه خطيبهه كعدو يسولفون ويه بعض ما كفرو ليش تضوجيهم مو خطية

-علي: هسة صار شي لو لا؟!

-عمر: لا ما صار ارتاحو لا تخافون

انصدمت من كلامه اني دائماً اشاقي دعاء بهالطريقة اخوفهه شوية وبعدين اكوللهه جذب احب تعيش المتعة وشعور الراحة بعد الخوف بس ماتوقعت ردة فعل عمر راح تكون بكل هاي الجدية..

سكتنه ورجعنه جوه لزمت ايدين دعاء اهمسلهه..

-دعاوي ضجتي مني؟

-دعاء: لا متعودة عليج شكو

-مادري كلت خاف ضجتي بس احب اتشاقى وياچ

-اي اعرف حبي

-بس شو عمر عبالك ضاج وفشلني

-لا لتحطين ببالج عادي هو ميعرف علاقتنه

-استحيت

-شعجب

-مادري حتى اني مصدومة لان مستحية

-لتستحين ما سويتي شي غلط اني غلطانة لان تركتج بالبرد واكفة تنتظريني

-يمكن لان ذكرته بأسيل ضاج؟

-ذكرتي بأسيل؟؟

-اي حسيته انغث مني كلش

-لا عمر مو هيج ماتوقع ضاج منج

-انقهرت شو

-يااا وانتِ شبيچ مزودتهه

-مادري شبيه تعالي انطيني راشدي

-تعالي

كفختني احس رجعت لوعيي ضحكت واشرت بيدي..

-خيولي المصلبخ طز بي خلي يضوج

**

"مريم"

كعدنه سوه على الغدة نور كعدت بصفي تدردم على ابنهه مضوجهه بس يبجي وتكول متندمة لان اجت بسببه..

-نور: اجيت عناد بعبد القادر

-مريم: شوكت تبطلين هالسوالف نورة

-مريوم تزوجي واحد نفس عبدو وتفهمين عليه خانگني خنگ بالغيرة راح اموت

-چنت متزوجة واحد اتعس من عبدو مالتج بالغيرة بس ما متت

-ماتحمل ماتحملل

سكتت مابيه اناقش كعدنه ناكل وكمنه نشيل السفرة جايات مساعدات بس ردت اللتهي كعدت بالمطبخ وياهن اسمع لسوالفهن واشرب چاي، بقيت هنا كاعدة للعصر بينما كل النسوان متجمعات بغرفة الضيوف مالي نفس لشي، اجو البنات عندي يغيرولي جو واخذوني للصالة حاولت اضحك واخذ وانطي وياهن بس ماكو فائدة واضح دا امثل..

للعصر طلعن دعاء وامي وحصة وغدير واسيل سوه علمود جهاز دعاء بينما الباقين توزعو بأنحاء المزرعة، كعدت ويه سارة ورقية كاعدة تسولف بالموبايل..

-رقية: شنووو

-سارة: شبيچ

-رقية: جاي الاطلس واااو ولا ادري ما شفته توقعت راح يوصل باجر

فوراً اللتفتت عليه بسملة تبلع بريگهه وتفرك بيدهه، اشرتلهه شبيج ما حچت شي بقيت بالصالة ما طلعت بينما خواته راحو ركض عليه يسلمن..

-بسملة: اءء اء شعنده جاي

-مادري اهووو

-شنو شبيج

-ماريد اشوفه كارهته

-اي قبلي بالطيار

-يا طيار؟

-مريم شوفي راح اشرحلج بس حبابة....

قطعت كلامهه من رجعت سارة مبتسمة كعدت ويانه وكالت ببهجة واضحة..

-سارة: حبيبي راجع من الظهر سوالنه مفاجأة علساس باجر يجي هو

-بسملة: هو ميعرف احنه هنا سارة؟

-لا ميدري راح لبيتنه اول الحارس گايله احنه هنا مخلي وجاي

-بسملة: اها

الكعدة كلهه بسملة تلوب احسهه تريد تحجي وتبطل وبقينه هيج الى ان اذن المغرب واني كاعدة هنا ما طلعت ابد دزيت بسملة تكول لابوية نطلع منا رجعت تكول ابوية ما موجود طالع من الظهر بشغل شعوطت وكتهه يعوفنه ويروح!!

احتاجيت اروح حمام ابدل اخذت جنطتي ومديت راسي ادور خاف اكو احد من الولد، ارتاحيت من شفت الصالة فارغة ركضت ركض للحمام دخلت وقفلت الباب عليه..

بدلت ملابسي ورتبت وضعي باوعت لشالي صاير يلعب النفس عدلته وغسلت ايدي وبقيت كاعدة بالحمام اخاف اطلع..

معقولة جايب نورسين؟ لا شنو جايبهه جان سارة كالت.. لا خاف جايبهه وما كالت احتراماً الي؟ لا لا ميجيبهه الحية مستحيل..

طلعت اراقب الاوضاع وهم ركضت ركض للصالة الجنت كاعدة بيهه فارغة بسملة مو هنا وين ولت هاي! غلست وكعدت بركن الصالة وغطيت نفسي بغطوة بارد الجو كلش وبطني تگطعني من الوجع مو وكتج كلش تجين يالدودة..

تمددت على الفراش كعدة عربية حاطين بجهة وجهة ثانية تخم قنفات، طلعت موبايلي اگلب بي وسكنت بمكاني جمدت من دخل اطلس للصالة يهرول..

كتمت النفس وحطيت ايدي على حلگي خنگت روحي، دخل مستعجل حتى ما انتبه لوجودي يحجي بالموبايل بالفرنسي ومبين منفعل ويأشر بيده..

حرت اكوم لو ابقى ثبتت ايدي على الفراش ونهضت نفسي على كيف كعدت على حيلي تخيلت بأي ثانية راح يلتفت بس ولا شافني..

بقيت على گعدتي وبطني تنمرد من الوجع عاصرتهه ومركزة عيوني عليه، شو هذا صاير احلى؟ ليش صاير احلى؟ متغير بس بطريقة تجنن كأن سمن شوية اي احسه سمنان لو صاير اضخم؟ يمكن مكبر عضلاته؟ اي والله هذا السبب..

درت وجهي من توقعته راح يلتفت عليه بس هم ما شافني شنو الموضوع، رجعت اتأمله بالخفية واراقب حركاته المنفعلة..

اراقب كف ايده اليحركه وهو يحجي مزين بخاتم جديد ما شايفته من قبل واكيد الساعة مستحيل يتخلى عنهه، كاف ردانات قميصه القهوائي وفاتح اول زرين من عند الصدر..

فزيت فاكة عيوني على وسعهن من سد الموبايل واندار عليه، بلعت ريگ وبقيت على وضعي لا البيه اكوم ولا البيه اسوي روحي نايمة، ذب حسرة عالية وكال..

-شلونچ

فركت عيني بقوة وبقيت ساكتة بس ابلع بريگي..

-الاطلس: اي؟

-مريم: شنو

-راح تبقين صافنة عليه ما اكتفيتي؟

-اكتفي؟

-صار ساعة تتأمليني اظن هالشي كافي صار دوري

-دورك لشنو اصلاً انتَ منو واتأملك

-مادري اني منو

-اصلاً.. اصلاً اني جنت اريد انام وانتَ اجيت زعجتني

-اعتذر

-اعتذارك غير مقبول طيرت نوم عيني!

ضحك مستهزأ وحط ايد وحدة على خاصرته..

-الاطلس: اسفين آنسة مريم

-اروح احسن انتَ كمل مكالماتك المهمة

-ماشي

كمت شلت الغطوة وجنطتي ومشيت اطلع من الصالة اللتفتت عليه شفته على وگفته رحت بسرعة اكمل طريقي اركض ادورلي على غرفة دخلت لاول وحدة صارت بوجهي طبيت وطبكت الباب..

شفت فراش نمت عليه بسرعة بطني تموتني كلش مو وكتج كلللش دثرت نفسي اتلوه من الوجع، غمضت عيوني انسى الوجع وغفيت على وضعي، حسيت على وجع قوي فارت روحي صحت بصوت واهن لبسملة تجيني بس ميطلع حسي..

كمت بصعوبة من الفراش رجليه ترجف ماكدر اوكف عليهن، استسلمت للوجع ورجعت اتمدد حضنت المخدة لبطني بلكت ارتاح وانطيت ظهري للباب..

فتحت عيوني ويه فتحة الباب يارب بسملة اجتني يارب..

-بسملة وينج يا عوبة

-شبيچ

عصرت عيوني وبقيت منطية ظهري للباب..

-مريم: شجابك

-شبيچ مريضة؟

-معليك

خنس صوته راح ما انطيت اهمية مو بحاله هسة خليني بس اصير زينة واني اعلمه لا لحظة ما راح اعلمه اني ميخصني بي بعد..

انكلبت على جهته اشوف شعنده خانس وشهگت من شفته بدون قميص..

-مريم: هاااي شنووو

-شكو

-شنو شدتسوووي

-جاي ابدل

-وميعجبك تبدل الا هناا!!

-تره هاي غرفة عمر!

-هاي غرفة عمر؟؟؟

-اي ما تشوفين اثاث الغرفة

دورت عيوني بالغرفة فعلاً حتى صورة اله موجودة على الميز الي بجانب راسي بس من گدما مسطورة ومتوجعة مانتبهت..

-مادري بيهه غرفته

-اجيت ابدل قميصي توصخ

-اي ميهمني

-خوش

غمضت عيوني عصرتهن حيل حتى ما اشوفه فتحتهن وره كم دقيقة تخيلته خلص وفعلاً مخلص بس رجع لبس قميصه نفسه..

-الاطلس: شنو عاجبچ تبقين صافنة عليه اليوم؟

-محد صفن عليك اطلس روح بره

-شبيچ مرمر

حچاهه بهدوووء ولطف تقرب مني يسد الدكم ونزل على ركباته كدامي..

مانطيته وجه ودرتله گفاية كزبر جسمي من حسيت بي يتلمس ظهري بأصبعه درت عليه خازرته..

-مصخنة؟

-لا بس روح وعوفني

ماهتم تلمس وجهي وخدودي دفعت ايده بسرعة وكعدت على حيلي..

-شو تلمس!!

-واذا

-والحجااب؟؟؟

-حالات خاصة

-ماكو حالات خاصة وخر اطلس لعبانة روحي راح اتقيء

-اوه

-شنو

-يعني جان راح بالي بعيد لو صاير...

-اسكت اسكتتتت

-انتِ ومريضة تصيحين عفية حيل ما تنطيني شوية

قررت اكوم ما ابقى عنده هسة يشلع گلبي، كمت اسحل برجليه سحل وصلت للباب دا افتحهها وجرني من ردني..

-شتريد شتريد

-تعالي كعدي اني راح اطلع

-ماريد ابقى بغرفة عمر

-ابقي ارتاحي تعالي

مشاني للفراش ونيمني عليه عدل، غطاني باللحاف ودثرني انكتم نفسي من باس جبيني يبست حتى ما صحت بي يوخر من همس..

-راح اجيبلج شي دافي تشربي راح تصيرين احسن

-ماكو داعي

ابتسم بدون لا يحجي وطلع من الغرفة تركني وحدي، غطيت وجهي انضم انفاسي ووخرت الغطا من انفتحت الباب وهم هو الي دخل وبيده كوب..

-وين بسملة؟؟

-كاعدة تسولف ويه رقية

-ليش مو هي اجت اشتعلت روحج بسملة

-كعدي هسة شبيه اني ابزز؟

-اي تبزز

-كعدي عيوني

كعدت على حيلي بدون نفس حط الكوب بين ايديه وكعد مقابيلي، باوعتله گالبة وجهي بينما هو قابلني بأبتسامة..

-شو تتبوسم

-عاجبني ليش ممنوع؟

-اي ممنوع روح تبوسم هناك اني مريضة

-والمريض لازم نبجي گدامه

-اي!

-اوكفي احاول انزل دموع

-اطللسسسس

-لسان الحية شبيچ

-لتصيحلي لسان الحية

-ماشي ام العطوب

-عطوب؟؟ منيلي اصلاً ماعندي عطوب

-اكيد ماعندج

-تره ماعندي اسكت اوف روحي جاي تطلع

رجعت تمددت واحضن بطني غطيت وجهي مستحية ماريد احد يشوفني بهذا الوضع، وخر الغطا عن راسي وكال بطريقة يتطمن..

-ما چنتي هيج؟

-شنوو

-من تجيج الشهرية ما چنتي تتخربطين

-نعممم منو كال جايتني الصخمية!!

-كلشي يدل عليهه

-وانتَ شنو خبرة بيهه؟؟

-لا بس يمكن لاني دارس وعندي...

-نورسين؟؟ عندك نورسين طبعاً!

-اوف يا الله

-ادري ادري اطلس اعرفهه من تجيهه الشهرية تجي تگولك وتحچيلك مرة شفتهه بعيني

-وشسويلهه اني هي تحجي

-ماعدهه حياء!

-الدورة الشهرية مو عيب مرمر

-مو عيب بس اكو شي اسمه حياء اطلس متنحجي لياهو الچان اوو هلوو اني جايتني الدورة هلوو انتَ هم تجيك؟ لا طبعاً متجي لان انتَ رجال.. اووه فدوة جايتج الدورة اووي حياتي الله يساعدج كلش تتعب وكلش تهلك... يا عمري تعالي اسويلج مساج.. تحتاجين حمام دافي؟ تعالي افرك رجليج راح تخفف الوجع سودة عليه متوجعة...

احجي وهو صافن ومبتسم عبالك سينما وديتفرج عليهه، انطيته گفاية ودرت عليه بسرعة من طبطب على ظهري وهمس..

-تردين حمام دافي؟

-شنوووو

-او مساج مثلاً؟

-اسكت اسكتتت

-راح افرك رجليچ هسة يخف الوجع

-عزه العزاانيي

-هههههه ليش تستحين شبيچ

-وخر ماستحي هو شي علمي ميخجل تره!

-اي؟

-بس ماحب احجي لاحد بكيفي وخر

-مو يمج اني نامي ارتاحي

-روح حتى انام

-ماعوفج خاف تحتاجين شي

-ما احتاج ما احتاج

-شبيچ راح تبجين

-اطلس عوفني ماكدر احجي هسة بعدين نسولف روح

-منو كال اريد اسولف وياچ؟

-ها

-اصلاً مادري بيج هنا خوش صدفة هاي من شفتج

-اي صح صدكت

-هههه والله مادري بيج هنا رجعت من المطار گبل لبيتنه الحارس گال اهلي هنا واجيت

-واصدقائك وينهم؟

-منو اصدقائي

-السافرت وياهم

-ما سافرت ونسة مريم رحت عمل

-ويامن.. لا ماريد اعرف ميهمني اصلاً

-راح اكول بس مو لان هو يهمچ وانما اني اريد افتح وياچ موضوع مشتاق

-واني ما مشتاقة!

-ادري

-اي زين من تدري

-سافرت ويه حازم وكم واحد من جماعتي بعد

-بيهه الخير

درت عيوني للحايط والسؤال ياكل بروحي وعقلي بس لو اموت ما اتنزل واسئله نورسين شعدهه وياك..

-هواي غبتي

مجاوبته حسيت بأيده يحطهن على رجليه يعصرهن على كيف حولت انظاري عليهن، اردف..

-لازم ترجعين للدوام تدرين لو لا

-لا

-وهسة انطيتج خبر

-ميهمني سوي التريده ما ارجع

-مريم اني منطيج اجازة طول هاي الفترة بس اظن كافي خلصت الاجازة

-انتَ ناصب عليه لو تضحك لو تستهزأ لو عندك الوضع عادي لو فرحان لو متونس لو شنو بالضبط اتمنى تشرحلي

-انتِ شتشوفين؟

-اشوف الوضع عندك كلش عادي ومرتاح على الاخر

-لطيف

-اي طبعاً لطيف الله يمهلك ويزيدك سعادة

-شكراً اتمنالج المثل، بس من باجر لازم ترجعين تداومين

-لو تموت

-تدفعين التعويض المادي؟

-ادفعه

-ومنو يدفعه الج؟

-شعليك المهم ادفعه

-ليش ما تقبلين تداومين لا تربطين عملچ بحياتج الشخصية

-ما اربط! بس ماكدر مريضة

شهكت من لزم ايدي ثنينهن فوك الشرشف وثبتهن على الفراش وتقرب مني صار بوجهي مباشرة، جحظت عيوني على وسعهه ونفخت بوجهه غمض عيون وابتسم..

-الاطلس: ما نتعبج مرمر

-مااا

-لا تكولين ما

عضيت شفتي بسرعة وغمضت عيوني..

-مريم: اممممممممم

-الاطلس: لازم تداومين

-ما اداوم مريضة اني!!

-اتذكر خضنا هيج نقاش من قبل تتذكرين؟

-اي اتذكر

-وشنو چان ردي الج؟

-متعبوني

-وارجع اگلج ما اتعبج مريم انتبه عليج زين واني اداريچ

-ماريد احد يداريني مو طفلة اني وخر شكو لاطش بيه حرااام!!

دفعته مني بكل قوتي وخر بس بقى كاعد على السرير..

-راح ترجعين تداومين

-ما اداوم ادفع التعويض المادي واخلص!!

-يدفعه الج الطيار؟!!!

-شنو

-خطيبج الطيااار مررريم

نترهه بوجهي بصوت حاد گلبت عيوني فوك افكر يا خطيب ويا طيار..

-الاطلس: ما جاي اصدك بهالسرعة راح تتزوجين!!

-شعليك

-شنو شعليك يعني الكلام حقيقي؟؟ منين لگاچ هذا الطيار مررريم بسملة ما جانت تجذب عليه؟!!

-بسملة گلتلك؟

-ايييي

اشتعلت روحج بسملة على هالچذبة خطبني طيار مرة وحدة دكولي موظف دكولي مدرس دكولي كاسب شجابني على الطيار..

ترك ايدي وكام عني يلوب بالغرفة فايرة روحه حط ايده على راسه وينفخ مثل الظب..

-شلون اجاچ هذا ابن الكلببب منين لگاااج مررريم يخطبچ طيااار

-ليش شبيه وميخطبني طيار

-كلشييي بيج الي ممنوع احد ياخذج غيررري

-اوي اطلس شعليك بختشيبي الطيار عوفه

-مررررريم

-ها

-ترجعين تداومين واني اعلمج

-ما

فزيت من اجه عليه يهف بسرعة درت وجهي بالمخدة دفنته ولزمتهه من الجهتين خايفة، بس ما صار شي طلع وخلاني اكل روحي بروحي كمت الوب افتر بالغرفة وافكر بكلام بسملة الغبرة..

اخيراً رجعو امي ودعاء ماقبلت ابقى دقيقة وحدة فوراً رجعنه لمدينتنه كعدت بغرفتي افكر واللم فلوسي اجمعهن حتى ادفع التعويض المادي..

كل عمل بي عقد لازم نوقع عليه، الي يخلف شروط العقد ومن ضمن هاي الشروط هو اذا تبطل من العمل من كيفك تدفع تعويض مادي بثمن باهض يكسرون بي ظهرك..

باوعت لفلوسي متكفي حرت ماعرف شسوي، كمت اروح لابوية سألته عن مساعدة ووعدته ارجعله الفلوس عصب كلش وگام يعيط..

-احمد: شنووو تعويض ماادي ما يستحوون ذووولة

-بابا هاي نظام كل الشركات

-ولج بنتي هو رجلج جاان شلون ياخذ منج تعويض مااادي

-ام مريم: مبينه السالفة عناد حتى ترجع تشتغل عنده

-احمد: ماكو ترجع عنده شكد التعويض مريم؟؟

كتله على المبلغ فتح عيونه على وسعهن وضرب جبينه بقوة، رجع يرهج بينه ويصيح ويغلط ويسب صعد فوك شوية ورجع نزل متخبل..

-منين نجيب منييين

-مريم: ما بقى من الفلوس الاخذتهم منه ذيج المرة؟

-احمد: لاا دفعتهن للديانة كلهن وبعدني مطلوب

-بسملة: صدك جذب شلون هسة

-دعاء: اذا ما دفعتي التعويض شيصير مريم؟

-يسجنوني

-احمد: شنوووووو

-مريم: هذا شرط العقد هسة رجعت اقراه مرة ثانية

جبت العقد لابوية يقراه الهم والغم ترس بيتنه شكد انقهرت ماعندي طاقة لشي منقرفة من وضعي ومزعوجة على زعج اهلي، ايدينه مربطة حقدت وحسيت روحي بـ حلقة الاحداث بحياتي دتتكرر بطريقة مخيفة..

انحطيت بهذا الموقف قبل كذا شهر ورجعت انحطيت بي هسة وراح اضطر اداوم، لكن قررت احجي ويه استاذ حمزة هو يلگالي حل متأكدة ميهون عليه انكسر واتأذه..

ثاني يوم ابوية اخذني من الصبح ويه بسملة الطريق كله شبعتهه تكرص وعض أدبهه على كلامهه وچذبهه، ما تركتهه الا من وصلنه هي راحت لكليتهه ومناك تروح للدار الكاعدة بي واني اكمل الدوام شلون مچان واروح يمهه ابقى بس كم يوم علما تنحل سالفتي..

كعدت بالشركة طالعة روحي ما تحركت من المكتب الا من رحت لمكتب استاذ حمزة مجرد شافني وكف على حيله يسلم عليه..

-مريم: استاذ اجيتك بطلب واتمنى متردني

-حمزة: تفضلي اذا اكدر بعيوني

-اريدك تقبل استقالتي

-مريم سبق وكتلج اني مو مسؤولچ ماكدر اقبل الاستقالة ماكو فائدة

-بس تكدر تأثر على الاطلس استاذ ارجوك تفهمني

بلحظة ضعف نزلت دمعتي تمنيت ما ابجي وشكد حاولت اصمد بس ماكدرت غصة ببلعومي كتلتني..

-حمزة: مريم لا تبجين ما تهون علينه دموعج

-اذا متهون عليكم دموعي اقبلو استقالتي شيريد مني كافي تعبني خلي يعوفني شيريدد

-يريدج

-بس اني ماريده مو غصب هو!!

-ماشي حقج هذا هو راح اللگه حل

-استاذ اعتمد عليك بداعة ابنك الي بعده ما اجه تساعدني

-صار

طلعت من المكتب مالته صارت بوجهي داليا السكرتيرة عبرتهه بدون لا اسلم لا بالطبة سلمت ولا بالطلعة متطيقني هالبنية..

-داليا: شبيچ تبجين طردوچ

-مريم: ان شاااااء الله

دست المصعد واخذت الطابق مالتنه، انفتح المصعد بنص الطريق درت وجهي من شفتهه نورسين سلمت علية جاوبتهه ببرود ودست المصعد..

-نورسين: هاي شنو ما راح تصعدين؟

-لا اريد اطلع

-بعده ما خلص دوامكم شعجب

-استأذنت

-اوكي بيبي براحتج

بعدنه دننزل وهي داست طابق 44 طابق الاطلس بلعت ريك ناار حرگني صاعدتله بهاللبس وبهالعطر والشعر والمكياج والكشخة عبالك عرسهه!

وصلت للطابق الارضي طلعت بسرعة متوجهة للكوفي القريب من الشركة كعدت على طاولة وسرحت بأفكاري، مسحت عيوني من حسيت بدموعي تنزل خجلت من شفت الكرسون يباوعلي منتظرني اصيحله..

طلبت قهوة وكعدت انتظرهه، لزمت موبايلي اگلب بي ورفعت راسي على صوت رجال..

-صباح الخير

-مريم: فاهد

-فاهد: ممتاز تعرفيني

-فاهد لا تزعج الانسة

-مريم: استاذ مالك؟

-مالك: ما ناسيتني حلو

ضحكو ثنينهم واني مثل الطرنة اباوعلهم انزعجت من جرو كرسيين وكعدو گبالي عكدت حاجبي وكتفت ايدي لصدري..

-مالك: اعتذر على جرأتنه بس مستعجلين آنستي

-فاهد: شلونهه سارة

-مريم: نعم؟!

-مالك: فاهد احنه شجچينه!

-فاهد: بس اسأل عننهااا ما كفرررنا

عاطهه بعلو صوته بالكوفي الناس صارت تلتفت علينه، عصر مالك ايد اخو وعضله شفة..

-مالك: عذري مريم بس فاهد متوتر شوي

-فاهد: اختصر الموضوع خلينه نروح

-مالك: ماشي، آنسة مريم يمكن انتِ مستغربة وجودنه هنا بس...

-فاهد: الزبدددة اعبر للزبدة

-مالك: شبيك انتَ ما مؤدب!

-مريم: اني لازم اروح

-مالك: لحظة مريم

خزرته من جرني من ايدي تركهه بسرعة وابتسم..

-مالك: انتَ والاطلس انفصلتو؟

-مريم: شدخلك؟!

-فاهد: نعم؟؟؟

-مالك: فاهد شسالفة!!

-فاهد: ما تشوفهه تحجي معلگ ويانه

-مالك: شعليك انتَ كوم

اخذت جنطتي وتركتهم كاعدين هرولت بره امشي سريع بس اريد اوصل للشركة انگطع نفسي من الخوف..

-مررريم لحظة ثواني

صوت مالك يصيحني ارجع ماهتميت بقيت اهرول اطلع من الكوفي وكفت اريد اعبر الشارع وانتبهتله وكف بصفي..

-مالك: راح تستقيلين؟

-مريم: انتَ شمعرفك!!

-كلشي اعرف اني مريم

غمضت عيوني مزعوجة ومدقوقة منين دتوصله الاخبار..

-مريم: شتريد استاذ

-اريد اقدملج عرض مغري

-وهو؟

-عرض عمل تشتغلين ويانه وما تحتاجين تتكلفين وتتنقلين بين المدن بمدينتج تبقين والشغل من البيت

-شنو نوع هذا الشغل

-محاسبة شلون بشركة الاطلس

-شلون من البيت لعد؟

-نكعد بالكوفي نسولف؟

-لا اريد اروح خلصت استراحتي

تلفت بالمكان واني انتظر السير ينقطع حتى اعبر، ما شفت فاهد وياه الظاهر راح وبقى بس هو.. عبرت الشارعين وصلت لبوابة الشركة وهو لسه وراية بعدني دا افوت من الباب ووگفني صوته..

-مالك: آنسة مريم نكدر نزوركم اليوم بالبيت؟

-منو يزورنه

-اني واهلي

عكدت حاجبي مستغربة ابتسم نصف ابتسامة واردف..

-احاول اجيب امي هم اذا تحبين

-امك؟

-اريد اتزوجچ مريم

فغرت فاهي وعيوني نطت حسيت بصيخ نار وفات لفص عيني من الصدمة، كزبر جسمي والخوف سيطر عليه تركته واكف منتظر جوابي ودخلت اعبر باب الشركة بلعت لساني من انرطمت بجسد ضخم.........

يتبع ♠️💸....

• ━━━━━━❪♣❫━━━━━━ •

لتنسون التصويت عمري 🙉💋

حسيت بغرابة وانزعاج من مالك خطب مريم مادري انتو هم حسيتو لو متوقعين؟ 🥴

#الاطلس "دمليج أسود"

بقلمي: زهراء السلامي 💛

لتنسون التصويت رجاااءً ✋🏻♥️ + التعليق بين الفقرات + متابعة لحسابي 🌼.

لاتخليني

احبك انه ابن فلاح

يربات المدينة ارجوك لاتكرب 🔥

جبار رشيد

• ━━━━━━❪♣❫━━━━━━ •

كزبر جسمي والخوف سيطر عليه تركته واكف منتظر جوابي ودخلت اعبر باب الشركة بلعت لساني من انرطمت بجسد ضخم..

-شو في

-مريم: جوزيف اسفة اعتذر اذيتك؟

-جوزيف: لأ شو بيك مريم ليش هيك متوتره؟

-مابيه شي من رخصتك

كملت مشي اعبره واتلفت على الباب مالك بعده واكف منتظرني، وكفت بمكاني صافنة ليش مدا يتحرك شيريد هذا دورت عيوني بالمكان الكل يشتغل طبيعي وفجأة ظهر الاطلس من المصعد يمشي مستعجل للبوابة..

بلعت ريگ منهارة حطيت ايدي على راسي وتبسمرت بمكاني عبرني بدون لا ينتبه لوجودي من الاستعجال شبه يهرول، شتت نظراتي اله صوت حمزة يصيح..

-حمزة: الاطلس لحظة

اندار اطلس عليه يأشر بيده بطريقة منفعلة..

-الاطلس: بعدين حمزة بعدين

-حمزة: شبيك شصاير؟

يحجي بروية وهدوء حتى ميثيرون ضجة ورغم هذا الكل انتبه لتوتر الاطلس واستعجاله رجع يأشر بيده هو طالع بدون لا يحجي واختفى وره باب الشركة..

عيوني تركض وراه تارة وتارة اخرى ابحث على مالك ماله اثر، ذبيت نفس وتمشيت لحمزة الراح يحجي ويه احد الموظفين..

-استاذ حمزة حجيت ويه استاذ اطلس؟

-حمزة: هو ردت احاچي هسة وشفتي بعينج شلون طلع مستعجل

-ان شاء الله خير؟

-حمزة: اكيد ان شاء الله، بس يرجع افتح وياه الموضوع لا تخافين

-اخاف يعاند وميقبل

-احاول بكل جهدي ارتاحي آنسة مريم

ابتسمت شاكرة ورجعت اصعد فوك للمكتب، لهيب نازلة استراحة وريتاج مجازة اليوم كاعدة وحدي اتصفن وافكر بكلام مالك للان داخلي يهتز من كلامه ما جاي استوعب الموقف..

-مرحبا

رفعت عيوني على الصوت الناعم شفتهه نورسين واكفة بالباب وبيدهه جاكيتهه، دخلت بدون لا اسمحلهه حطت الجاكيت على الميز مال ريتاج ووكفت مقابيل طاولتي..

-شلونچ مريم

-بخير

-اطلس طلع مستعجل ظل بالي تعرفين السبب؟

-لا

-هاا توقعتج تعرفين او ممكن حچالچ

-ماعندي حچاية وياه

-nice

-محتاجة شي نورسين؟

-اي

-تفضلي

-اطلس متغير

-زين؟

-متغير هواي و.. وديذب اللوم عليه بخصوص موضوع زواجنه

مجاوبتهه هفت وجهها ورفعت شعرهه تشيله ذيل حصان، كعدت على طرف الميز وكملت..

-اني سويت كل الاگدرله بس مدا يصدگني عباله اني رايده اتزوجه

-وانتِ ما رايده تتزوجي؟

صفنت بوجهي وبلعت ريگهه، عيونهه الخضر لمعت وبدت تدمع ابتسمت وهزت راسهه بهدوء..

-نورسين: اتمنى

-مريم: تحبي؟

-هواي

-ليش ما ارتبطتي بي من قبل ليش الا هسة

-مينطيني مجال ماردت اخرب صداقتنه بأعترافي اله خفت منه وعليه خفت يعوفني ويبتعد

تحجي بهمس وصوت حزين، اخذت اتأمل نزاكتهه وجمالهه الصارخ وترافة ايدهه وترتيبهه ليش ما حبهه؟ ليش ما عجبته نورسين طاغية الجمال كلشي بيهه يخليك غصب تصفن عليهه..

-مريم: جان حاولتي

-ماكدر اساساً ميقتنع بيه مينظرلي غير على ان اني صديقته من الطفولة وبس

-بس ليش انتِ حلوة كلش

-اي بس مو بعيونه

كامت من الميز ومسحت عيونهه استغربت ليش دتحجي ويايه بهيج موضوع واستغربت اكثر من لطافتهه..

-نورسين: احسدچ مريم

-على شنو على حظي الحلو؟

ضحكت بخفة وهزت راسهه لا، شالت جاكيتهه وحركتلي بأيدهه "باي" وطلعت من المكتب.. زادت حيرتي وزيدت شعوري المريب بطني مغصتني من الاجواء شيردون مني ماريد شي بس اطلع منا واهرب من هذا العالم الغريب..

**

"احداث سردت باللهجة المغربية ترجمت للعراقية للسهولة"

"اسيل"

كلشي هنا يدعو للقلق بلقيس حاطة ايدهه على راسهه وسارحة لغير عالم كلما ترفع راسهه تشوفني كاعدة ودمعتي على خدي وابني بحضني تضرب على رجليهه وتولول على حالي..

-بلقيس: شلون بيج اسيل

-اسيل: راح تحچين لاطلس؟

-مادري والله مادري

-اسيل: حمزة حاچاه اكثر من مرة ومسلم يتعارك وياه بس ما يفيد تعبت منه بلقيس تعبت من تصرفاته وشلون يعاملني مثل الخدامة تعبت من نظراته الغريبة

-باقيس: اعميهه لعيونه واطفيهه هذا الشيبة القذرر

-اسيل: حرت شسوي ابقى على هذا الحال لو شلون

-بلقيس: الباب ينفتح! اطلس اجه لا تحجين شي...

دخل اطلس علينه ملهوف دور على بلقيس بعيونه مجرد شافهه راح كعد بجانبهه ولزم ايديهه..

-شبيچ شصاير؟؟؟

-نانا: مابيه شي حبيبي بس تعبت شوي

-من شنو تعبانة سولفيلي

يتلمس وجهها وايدهه ويقيس حرارتهه، بلقيس صايرة تتخربط وتوكع يهبط سكرهه وتغيب عن الوعي جانت تحجي وياه مكالمة واختفى صوتهه وسمع عيطتي وهذا سبب جيته المفاجأة..

-نانا: ليش تركت شغلك حبيبي

-رايح اسويلج شي تشربي

ما جاوبهه بخصوص الشغل كام للمطبخ رحت وراه اخذت البرتقالة من ايده ماقبل هو وكف يعصرهه ويسويلهه عصير..

-اسيل: شلونه شغلكم اطلس

-عادي

-مسلم يكول خسرتو هواي خلال هالفترة صحيح هالحجي

-صحيح

-شنو السبب؟

-بكيفنه

-بكيفكم تخسرون حلوة هاي

ضحكت وضربت متنه ابتسم بدون لا يعلق على موضوع الشغل، صب العصير بگلاص واندار عليه..

-الاطلس: روحي شوفي امي خاف هم تعبت

هزيت راسي ورحت اشوفهه متحسن حالهه ومتمددة على القنفة، ثواني واجه الاطلس كعد وحط رجليهه بحضنه ولزم الكلاص يشربهه..

-نانا: اني اشرب ماما

-تضوجين اذا اشربج

-لا بس انتَ ارجع لشغلك لا تتعطل

-معليج شربي طز بكلشي

شربهه العصير ويمسح على فمهه بالكلينس كلما تتوقف عن الشرب، يسحب ايدهه يقبلهم ويبتسم بوجهها ويشاقيهه تركتهم ورحت ارتب المطبخ..

حاطه غيث بالكاروك المتنقل واشتغل بهدوء كل شوية امد راسي اتابع شديسوون اشوف بلقيس غاصة من الضحك وكل دقيقة تعيط لان يعضهه لو يگرصهه لو يبوسهه بقوة يوجعهه..

-نانا: اااخخ ايدي تزرفت ولك على كيفك

-الاطلس: ارفسچ وعلي

-نانا: شو بهالداوة اليوم ما متحمس من تگولهه

-تعبان نانا

-سلامتك يا روحي ريته بيه التعب

-اسم الله عليج بأبوي ولا بيج

-اطلس كم مرة گتلك ما يصير تدعي على ابوك حرام حبيبي اهم شي بر الوالدين

هز راسه موافق كلامهه رجعت راسي جوه اشوف ابني وگمزت بمكاني على صوت دگ باب البيت بطريقة همجية..

شلت ابني بسرعة خايفة ووكفت بباب المطبخ اشوف شصاير ومثل ما توقعت جاي محمد وعيونه تجدح نار..

-محمد: اطلللللللس

دفر الباب وكلشي گدامه ودخل لنص الصالة يهرول شاف بلقيس كاعدة ومنطيته ظهرهه ما معبرته حط ايده على صدره وذب نفس..

-محمد: بلقيس

-الاطلس: نعم؟؟

-محمد: انتَ وييييين

-الاطلس: هنا

-محمد: وينك ابني وينك يا وليدي ليش هيج صاير متماهل بالعمل بابا اطلس

تغيرت نبرة صوته فجأة وصار اهدأ، هم ما جاوبه الاطلس وكعد بجانب بلقيس مغلس على ابوه..

-محمد: اطلس جاوبني

-اجاوبك على شنو

-محمد: انتَ.. انتَ شنو جاي تسوي ليش هيج وليدي مو انتَ فحلي واني شاد ظهري بيك ماعندي غيرك اني حبيبي ابوية انتَ

-الاطلس: كلشي ما مسوي

-محمد: هووو هنا السبب هنا كلشييي ما جاي تسوي اطلللس انتَ سافرت لـ لندن لو لاا!!!

-لا

-اسبوعينن انتَ وينننن جنت!!

-هنا كاعد ببيتي وساكت

-شنو تلعب عليه شنو جاي تسوووي!!!

-اكرر ما جاي اسوي شي

ذب نفس محمد وصار يتلفت بمكانه حاير يصفگ ايد بأيد واطلس بارد ثلج ما تحرك ولا تلحلح..

-محمد: انتَ بايع مجموعتنه الجديدة لشركة ^^^^^^

-اي

-وينهه الرسوم وين العقد؟؟

-موجود كله لا تخاف

-محمد: السؤال الاخطر بشكد بعت!

-يعني..

-يعني؟؟؟

حك شاربه اطلس وحط رجل على رجل، انطه محمد الرقم الي باع بي التصاميم والبضاعة كلهه وماشوف غير عيون محمد نطت وحاله انقلب رأساً على عقب..

-محمد: شسوووويتتتتتتتتت

-الاطلس: بعت

-محمد: واني اكوووول أرون (ابو نورسين) اتصل بيه مفرررفح ويلوم بيه معصصصب وصاير ناار انتَ شنو ناوي تسوووي ابنييي تعرف خلال هاي الشهرين خسرنااا مليونين دولاااار بسبب تماهلك وعصبيتك وعنااادك الماله داااعي

-ما معصب

-اطللللللس كوم حاچينيي شتررريد انتَ

-كلشي ما رايد تره انتَ جاي لبيتي

-تعال ابني تعال احاچيك تعال يمي

سحبه من ايده گومه يوگفه بصفه وكفت بلقيس بجانب ابنهه ولفت ايدهه على زنده تحسباً لأي ردة فعل عنيفة راح تصدر..

-محمد: اني اعرف بيك معصب وضايج مني ومتنرفز حقك وليدي انتَ حقك وذاك الصوب بس ما يصير هالحجي يا عيوني يا حبيبي يا بابا ابو نورسين قبل چان منافس النه وبصعوبة كسبناه وصرنه شركاء لا تدمر كلشي اطلس لا تدخل حياتك الشخصية بالعمل!!

-ابو نورسين اني دخلته شريك ويانه يمكن نسيت انتَ خليني اذكرك، من ورطتنه وجبرتنه نتعاقد ويه شمسون وگتلك اجيبلك شريك اقوى چنت مأيس أرون يقبل بالشراكة وسويتهه وجبته بنفسي وقنعته بس ما كفاك هذا الشي...

-باوع ابني مو هيج...

-ما كفاك وردت تزيد هاي الشراكة من خلال الاولاد اتزوج بنت أرون والي هي صديقة طفولتي نورسين رغم انتَ تعرفني متزوج وتعرف احب مرتي وتعرف ما ابدلهه بنسوان الدنيا بس حطيتني بموقف خسيسس وحصرتني بزاوية انعميت بيهه على عيوني ووافقت على شرطك!

ضحك مستهزأ ومحمد يفور يفور وجهه گام ينطي اللوان والعرق يتصبب من جبينه..

-الاطلس: وافقت بشرطك الحقير لكن انقلبت الطاولة ضدك ونورسين ما قبلت بهذا الزواج

-محمد: انتَ السببب انتَ لعبت علية!!!

-الاطلس: وانتَ شعليك لعبت عليك لعبت عليهه شدخلك؟

-بلقيس: اطلس فهمني

-الاطلس: اتفاق بيني وبين نورسين نانا شبيكم انتو

-محمد: بلقيس ابنج من وافق على الزواج وعلى شرطي يعرف صديقته راح توگف وياه!! اتفق ويه نورسين ترفض الزواج وهي الي تعاند ابوهه وتدگ رجل ما تقبل بالاطلس شفتي لعبة ابنج الوووصخة يلعب على ابوووه

-بلقيس: بس ما جاي اشوف لعبة

-محمد: يتآمر ضدي مو لعبة؟!

-بلقيس: لا هذا اتفاق، انتَ شرطت عليه شرط يتزوج نورسين اذا نورسين ما رضت بأبنك شنو تجبروهه؟

-محمد: هي ترررريد بس تخاااف من الاطلس تخاف يتخلى عنهه!!

-بلقيس: لا ما تخاف هي اجت للاطلس وگلتله ما اقبل اكون زوجة ثانية وابني چان واضح وياهه وگللهه من البداية ما اطلگ مريم لان يحبهها بس نورسين ما عجبهه الوضع بعد براحتهه

-محمد: بس طلگ!!!

-بلقيس: ونورسين لسه ما موافقة بعد شبيده الاطلس

-محمد: هو متفق وياااهه مخليهه ما ترضى بهذا الزواج جابرهه تحبه وتتمناه بس تخاف منه!!

-بلقيس: انتَ مالك حق بهذا الحجي تخاف من الاطلس تحب الاطلس تريد تتزوج الاطلس انتَ معليك! العليك ابنك ما خلف بالوعد وقبل على زواج نورسين بس هي ما تريده!

-محمد: انتِ شنووو صافة وياااه

-بلقيس: ههههههه طبعاً

جرت اطلس تبوسه من خده وتشمه واردفت..

-بلقيس: فدوة لهالعقل حبيبي وليدي الوسيم

-الاطلس: نانا شلعتي خدي

رجع يكعد على القنفة حاط رجل على رجل وكال بكل هدوء..

-الاطلس: طول عمرك تلوف المواضيع عليه وتطلعني خسران، تهددني بأمي، بمريم، بدراستي، بالشركة بس اليوم اگلك شتريد تاخذ اخذ كله كدامك ما يهمني شي

مد ايده على تچوة القنفة واردف..

-مريم وراحت اخذتهه مني، دراستي وكملتهه، الشركة طز ما تهمني ولا راح تهمني مستعد اخسرك كل يوم ملاييين وما يبرد ناري وامي.. امي هاي گدام عيني خنشوف شنو تكدر تسوي

بلقيس اللتفتت عليه فاتحة عيونهه واني مصدومة من بروده، شلون يقدمله بلقيس على طبق من ذهب شنو الاطلس تخبل؟!

-محمد: انتَ شتريد كول جاوبني شنو تريد احجي

-الاطلس: ما رايد شي

-محمد: تريد مريم صح؟ جاي تسوي كل هذا لان حرمتك من مريم

ما جاوبه سحب كلينس يمسح وجهه ومحمد ينتظره يرد..

-محمد: هسة نروح نرجعهه الك هسة نروح لاهلهه ونجيبهه بملابسهه

-الاطلس:‏ ما ترجع

-محمد: شنو ما ترجع ندفعلهم مهرر نصم حلگ ابوهه بي غصباً عليه يقبل ينطيهه!!

-بلقيس: هي مو سلعععةةة محمددد مريم بنت انسانة من لحم ودم، عدهه احساس ومشاعر وكرااامة

-محمد: اي اي نرجعهه بأي طريقة تحبون مو مشكلة

-الاطلس: ماريد

-محمد: لا ليش؟ ليش ماتريد انتَ تحبهه ليش حبيبي مو تريدهه انتَ كوم يله كووم نروحلهم

-الاطلس: مابيه اناقش هسة روح للشركة يابة عندكم اجتماع مهم جاي وفد

-محمد: اطللس كووم انتَ شنو تريدد اني حاااضر بس لا تكسر بالشركة لااا تضيع تعبنااا

-الاطلس: تعبان

حط راسه بحضن نانا وجر ايدهه خلاهن على شعره..

-الاطلس: نانا لعبي بشعري

ضحكت بلقيس وصارت تلعب بشعره وتبوسه بخده، محمد صار عبارة عن جمرة نار وطلع من البيت مشعوط يسب ويفشر ويغلط على نفسه وعلى الشركة..

-نانا: اطلس فهمتي شصاير شلون اتفقت ويه نورسين بهذا الخصوص؟

-الاطلس: اول ما ابوي حاچى ابوهه اجتني تبچي وتطلب مني امنع هذا الزواج، اجتني للمكتب ما راضية وكارهه تكون زوجة ثانية گلتلهه الحل الوحيد انتِ تبقين مصممة ما ترضين واني اروح احچي ويه ابوج نحل السالفة

-اسيل: ورحت لابوهه؟

-الاطلس: رحت وگتله نورسين ما قابلة بيه وما تشوفني غير صديق ابوهه اعتذر مني وكال ما اجبر بنتي على شي وماكو نصيب بيناتكم، انحلت السالفة وفضت بس ابوي العزيز راجع محاچي أرون وخلاه يطمع بينه ويطمع يكبرون الشركة من خلالنه

-نانا: وهنا نورسين طلبت منك تطلگ مريم صح؟

-الاطلس: صحيح وگلتلهه ما اطلگهه وما اتخلى عن مريم ما عجبهه الكلام وحسيت ضاجت وانقهرت بس اكيد ما راح اكسر بمريم واخسرهه علمود صفقة عمل بس بعد عرفتو الصار وابوي ما خلانه نتهنى..

**

"مريم"

للمغرب اني كاعدة على اعصابي انتظر الساعة تمشي بس اريد يخلص الدوام تعبت، بطني توجعني رجعت وبردت بس مابيه اكوم من المكتب..

لفت نظري عبور الاطلس من امام الباب، فركت وجهي بقوة ونزلت راسي اسنده على الطاولة واتذكر كلام مالك وگلبي يدگ، رفعت راسي على صوت منار تكول..

-مريم مسيو الاطلس يطلبج

بهجة صارت بداخلي فرحت وحسيت اجه الفرج، كمت بسرعة من مكاني متوجهة للمكتب مالته طرقت الباب سمحلي بالدخول كاعد على الكرسي ومنصي على ملف يقراه، اول ما وكفت امامه كام يوكف على حيله..

-مريم: طلبتني

-الاطلس: صحيح

-تفضل

-طالبة من حمزة استقالة؟

-اي

-ليش رحتي لحمزة ليش ما اجيتيني

-لان اعرف بيك متوافق وماعندي طاقة اناقشك

-لطيف

-انتَ ضايج لان رحت لحمزة وما اجيتك؟ هذا سبب ضوجتك؟؟

-اي

-ماشي هسة اجيتك اريد استقالة راح توافق عليهه يا ترى

رمش كم مرة رمشات ثقيلة بعيون متعبة، حاجبه معكود وملامحه مزعوجة ذب حسرة عالية وجر ورقة بيضة واجه يتقدم ناحيتي..

-تفضلي

-شنو هاي

-كتبي استقالتج

اخذتهه منه متفاجأة كعدت على القنفة كتبتهه سريع وانطيتهه بيده توقعت راح يحقر ويايه ويعوفني معلگة لكن سوه العكس تماماً فوراً وقعهه!

-تفضلي

-قبلت الاستقالة؟

-مو تريدين استقالة انتِ

-اي صح

-وهاي قبلتهه اتمنالج التوفيق

اخذتهه من ايده بكل بساطة بكل هدوء بدون أي توسلات ولا مماطلات ولا حتى محاولة وحدة مني للتفسير ولا محاولة منه للتبرير والتمسك الكدامي مو الاطلس الي اعرفه والي حبني الكدامي انسان ثاني تماماً..

شكد ما اكول كرهته وما اريد ابقى متواجدة قريب منه بس ما اجذب حسيت بالانكسار والخذلان بهاي اللحظات..

-شكراً

-الاطلس: شكراً الج

درت وجهي متوجهة للباب كل خلية بجسمي رافضة وقانعة بنفس الوقت حسيت هاي النهاية وهاي الهاوية الي راح نسقط منهه وكلمن يروح بطريق..

-مريم

اللتفتت عليه وبقيت واكفة قريب الباب، ذاب گلبي من گال..

-احبچ

خفق گلبي بقوة بس ما بينت ولا راح ابين ما راح اخضع ولا انكسر كافي ذل واهانة لكن بلحظة ضعف تغيرت ملامحي من نطق بهدوء وهو يتقرب مني..

-وغلاوة امي، وتضحياتهه، رباتهه، وحليبهه الطاهر المغصوب الرضعت منه بعمري وحياتي كلهه ما حبيت ولا راح احب بنية مثل ما حبيتج مرمر

بللت شفايفي متوترة ولزمت ايدي الثانية بقوة اخفف من رجفتهه واطمنهه كلشي راح يكون بخير..

-الاطلس: ابقى على وعدي وياچ ما ابدلچ بحور العين، تبقين انتِ الاولى والثانية والثالثة والاخيرة، تبقين ملكة على عرش گلبي

-اطلس احنه انفصلنه

-صح وانحرمت منج، فقدانچ اكبر خساراتي

-راح تربح بزواج نورسين اتمنالكم السعادة

-مريم اويلي يمريم

-كلت شي غلط؟

-انتِ مخبلة لو شنو فهميني

-شبيك شكلت اني

-اتزوج نورسين شنو انتِ من كل عقلچ اقبل بغيرچ؟ غيرج تحط راسهه على المخدة بصفي واللعب بشعرهه! غيرج اصبح وامسي عليهه؟؟

-بس هذا اتفاقك ويه ابوك

-طز بي! طز بالاتفاق سلمت استقالتي اول يوم طلعتي بي من بيتي وكسرتي ظهري ذبيت استقالتي هنا على هذا المكتب وابوي ما قبل بيهه ومن يومهه اني لاعب بالشغل لعب...

مسح على وجهه بأيدين راعشة ورجع يكعد على المكتب مالته مسح على لحيته وگال..

-روحي لبيتج مريم ارتاحي تعبتي مني، بس يصير اطلب منج طلب؟

-شنو

-تروي بموضوع.. بموضوع خطبتچ من هذا النعال

-نعم؟

-الطيار!!

ما رديت عليه وطلعت من المكتب اخذت جنطتي وطلعت گبل لدار بسملة..

الطريق كله عقلي ما وگف من التفكير تعبت هلكت هلاك، وصلت للدار استوقفتني مرة تسأل اني منو گلتلهه اجيت ويه اختي الصبح ما قبلت تدخلني الا ادفع اجار الليلة هسة..

من الثوالة حتى ما كلتلهه دفعت الصبح انطيتهه ودخلت جوه بوجهي للغرفة لكيت بسملة نايمة على بطنهه ونافشة شعرهه على الفراش..

-بسملة: ااه اخيراً وصلتي متت جوع

-مريم: منتظرتني على العشا؟

-بسملة: لسه بدون غده اني يله نطلب؟

-بكيفج

طلبت اكل الي والهه ولفاتن صديقتهه اخذت ملابسي ودخلت اسبح طلعت لكيتهن كاعدات يربتن بالسفرة.. اكلت لكمتين وياهن وكمت انام مصدعة..

حطيت راسي على المخدة وسحبت موبايلي شفتهه بالـ 9 بالليل بعد وكت مو مال نوم، گلبت بجهازي شوية وطارت عيني على الاشعار الوصلني من رقم غريب كاتب..

"راح اتصل"

غمضت عيوني متنرفزة ما طايقة روحي اعرفه هذا الرقم مال مالك!! اتصل بسرعة عليه انطيته رفض رجع اتصل هم انطيته رفض دزلي رسالة..

"مهم آنسة مريم ارجوچ"

اتصل جاوبته هالمرة بلا نفس..

-مالك: اخيراً جاوبتي

-تفضل؟

-هههههه يابة شكد جافة ما تطلع منج حچاية حلوة

-انتَ متصل حتى احجي وياك حلو لو متصل علمود شي مهم؟

-شي مهم، مريم شگلتي على موضوعنه ما رديتيلي خبر

-ما موافقة

-شنو؟؟

-ما موافقة

-ليش!! انتِ حتى ما انطيتينه مجال

-ما مستعدة لهاي الخطوة

-ميخالف راح تكونين مستعدة بس انطينه مجال اجي اتقدملج ونطول فترة الخطوبة ها شگلتي؟

-استاذ گتلك ما اريد اتزوج ولا ببالي الموضوع

درت وجهي من سمعت صوت طگة بسملة واكفة فوك راسي وفاكة عيونهه تطگ اصبعتين بالهوا..

-مالك: راح انطيج وقت تفكرين وارجع اخذ منج الجواب

-مع السلامة

سديته بوجهه قبل لا يجاوب ودرت على بسملة خازرتهه..

-بسملة: هذا الطيار؟؟

-انتِ چنچ چذبتي الچذبة وصدگتيهه

-منو هذا منو احجي

-معليج لتدخلين بسومة

-خاطب جديد وااو بهالسرعة

-بسملة خلص سدي الموضوع ماريد احجي بالسالفة

-شبيچ ليش هيج متضايقة صار شي بينج وبين الاطلس اليوم؟

-اي

-شنو سولفيلي

هزيت راسي موافقة وبديت اسولفلهه الصار من البداية من خطبني مالك لحد اخر موقف بيني وبين الاطلس..

-بسملة: ناوية تكولين للاطلس عن مالك؟

-لا ما اكدر غلط اذا احجي

-ليش؟

-اني سلمت استقالتي خلص كلشي انتهى باجر راجعة لبيتنه واذا كلت للاطلس عن مالك معناهه دا ابينله انتَ بعدك مهم بالنسبة الي ودا انطيك خبر اجاني خاطب، بس.. بنفس الوقت احس لازم احچيله

-ليش

-لان شمسون مو زينين بسملة ارهاب كل شغلهم من جوة الجوة الكل يعرف بهذا الشي وهمه عداوة مو بس ويه شركة الاطلس ويه كل الشركات يخوفون

-بس لو تقبلين بي عناد بأطلس

-واتزوج مجرم؟! شهالغباء!

-بس انتِ متعرفين بي مجرم لو لا يمكن الاطلس يجذب عليج

-وحمزة هم يجذب؟ اني من اول يوم داومت الكل حذرني من شمسون كل الموظفين گالو شمسون خط احمر لحد يتقرب منهم

-والله مادري يا خية وهسة مالك برأيج يسكت عنج لو يجيب اهله ويجي؟

-مادري تهت وتعبت من كل هذا والله تعبت

حطيت راسي على المخدة وغمضت عيوني، اخذني النوم وفززني كابوس مرعب ويه اذان الفجر مسحت وجهي بأيدين راجفة صرت اتلفت بالغرفة خايفة احس بعدني بالحلم..

ماكدرت ارجع انام بقيت للصبح كاعدة انتظرت ابوية اجاني من الغبشة ودعت بسملة وخليت ورجعت وياه، يومين مرو الاوضاع هادئة والحلم ما جاي يروح من بالي كلما اصفن اتذكره..

-دعاء: مرايم ساعديني بالجنط حبابة

-اي حبي اجيت

كعدت بالكاع اللملم اغراض دعاء راح ناخذ جهازهه ما بقى لعرسهه اقل الاسبوعين، اشوف الفرحة بوجهها والبهجة وانسى همومي..

-دعاء: مريوم شبيچ سارحة

-دعاء حلمت حلم من يومين ماخذ كل عقلي

-خير ان شاء الله سولفيلي

-كأنما اني ببيتنه هنا وسارة اجتني تركض وتصيح ابني اخذ....

سكتت فازة من انفتحت باب غرفتنه انبلع لساني من الخرعة عقلي ويه الحلم بعدني وخرعني دخول امي..

-ام مريم: مريم جاين خطار

-دعاء: منو ذولة

-ام مريم: مرة، كومي مرايم قدميلهه شي

اللتفتت على دعاء اتسائل اشرتلي كومي ورحنه للمطبخ سوه رتبنه الضيافة وحطيتهه على الميز، وكفت انتظر امي الى ان طلعت من الاستقبال مبوزة..

-مريم: ماما منو هاي؟؟

سألت وگلبي راح يطلع من صدري من الخوف يارب مو همه يارب..

-ام مريم: ما حچت بس تريد تشوفچ چنهه تعرفچ روحي بدلي وتعالي سلمي

-دعاء: خطابة يعني

-مريم: ما اطلع ماما

-ام مريم: مو خطابة ما گالت خطابة

-مريم: ميهمني ما اطلع

-ام مريم: عيب بنيتي بس سلمي عليهه وطلعي فشلة شگول مريم متقبل تطلع تخاف انتِ خطابة

-دعاء: كلام امي صح مرايم واذا تخافين تكون خطابة اني راح ادخل وياچ نسلم سوه ونطلع

بعد تقنيعات وكلام هواي قبلت اطلع بس اسلم واقدم الضيافة، التردد كتلني دخلت عيوني لازكتهن بالكاع ماعندي الجرأة ارفع راسي..

حطيت الصينية على الطاولة ورفعت عيوني للمرة الكاعدة مقابيلي، ابتسمت تك خد وجرت خصلة من شعرهه ترجعه وره..

-شلونچ مريم

-مريم: بخير الحمد لله

سحبت كلينس مسحت حمرتهه الحمرة كلهه من شفايفهه وجرت كلاص العصير تشرب منه، حركاتهه مستفزة وجهت انظاري على امي ما عاجبهه وگوة طايقة المرة..

-اني اصير زوجة شمسون ام مالك

بهتت مصعوقة يعني جاب امه! حسب علمي امه ممعترفة بي ومتريده وهي اصلاً ممتزوجة ابوه ونابذة ابنهه بس شجابهه هسة؟..

-اجيت اخطب لابني الوحيد مالك وهو اختار مريم من دون البنات

-ام مريم: خير ان شاء الله

خليت وكمت من الاستقبال اطلع ودعاء طلعت ويايه متنرفزة كلش ومعصبة هم، اشرتلهه شبيچ حركت بيدهه بعدين ولزگنه اذننا بالباب..

-ام مالك: صراحة ابني مو بباله زواج واستغربت من اتصل بيه گلي اريدج تخطبيلي

-ام مريم: ما عايش وياچ؟

-ام مالك: لا اني ما عايشة بالمغرب اصلاً ورجعت علمود اخطبله

عربيتهه مكسرة كلماتهه مو صحيحة من تحجي، سولفت ويه امي شوية وطلعت من بيتنه، لحظة صمت صارت امي ما نطقت حرف ظلت كاعدة بالاستقبال وحدهه لزمت سبحتهه وقضتهه صفنات..

طلعنه اني ودعاء للمطبخ نرتبه ونسولف بالموضوع..

-دعاء: حلوة وصغيرة امه

-مريم: وتشبهله هواي

-دعاء: ماتذكر شكله بس مريم ما مرتاحة شنو جاي يصير

-شنو قصدج

-شنو اعداء شركة الاطلس جاين يخطبوج شنو هاللعب

-ماعرف دعاء

-هاي الخطوبة مو لالله وكولي ما كلت

-قصدج استغلال؟

-اي استغلال وعناد بالاطلس مو حباً او اعجاب بيچ

-حتى اني احس

-الله يجيرنه من شرهم

سكتت حاطة ايدي على گلبي ميتة خوف من ردة فعل ابوية، ماكو داعي اصلاً احجي شنو صار من ابوية افتهم هيج ناس خاطبيني طار من الفرح لدرجة صار يصيح..

-الحمدددد لله رب العالمين هذا تعويض ربج ام مريم تعوويض رب العالمين ما راد تبقى بنتي مكسورة وعوضهه بالاحسن

-ام مريم: خلينه نشوف رأي مريم احمد لنستعجل

-احمد: اكيد اكيد وينهه مرايم تعالي مرررريم

-ام مريم: احمد مو هسة اسأل على الناس شوف الرجال شلونه لا تستعجل

-احمد: صح اي لازم

اسمع صوته الحماسي واني بالغرفة الهم ترس روحي كعدت على فراشي مكسورة خاطر گلبي يوجعني وعقلي وتفكيري كله ليش خطبني من دون كل البنات، شيردون مني ذولة الغثيثين..

-دعاء: الله يساعدج

-مريم: ماريد احجي بالموضوع دعاء

تمددت بمكاني واعصر بعيوني ماريد دمعتي تنزل، اجاني اشعار على موبايلي جريته اشوف چان من مالك كاتب..

"اريد اشوفچ"

ما جاوبته رجع دزلي..

"مريم عنودية كلش انتِ"

زفرت نفس وغمضت عيوني، وجع قوي بگلبي ونغزات وزاد الوجع من راسلتني سارة تكول الاطلس وابوه تعاركو عركة جبيرة كلش وطلع من البيت محد يعرف سبب العركة شنو خفت يكون افتهم بمالك..

ذبيت موبايلي وكمت لزمت مصلايتي وكعدت اصلي صلاة الليل ادعي ربي يدليني على الطريق الصح، نمت الليلة وكعدت الصبح مارست الروتين الصباحي سويت غدة ويه امي تغدينه ورحت اتمدد على فراشي العصر..

-دعاء: علي سألني عنج مريم

-شعجب

-مادري بس سأل وكال مشتاقيلهه وفاقدين وجودهه ويانه

-خوما گلتيله على سالفة مالك؟

-لا ما حجيت بس سألني عن هذا الطيار مادري شسمه گتله بعدهه دتفكر

-مريم: اطلس دازه يسألج

-شمعرفچ؟

-مريم: لان من البارحة يدزلي ويتصل بيه احس افتهم بمالك اجه يخطبني

-لا استبعد لان لو اطلس يعرف مالك خاطبج يسويهه دماية ميظل بارد وكاعد ومعتمد بس على الاتصالات والرسائل

-هم صح

قطعنه حديثنه من دخلت امي تكول..

-اسيل هنا بنات

-دعاء: اسيل؟ شجابهه

عكدت حاجبي مستفهمة ما جاوبتنه خلت وطلعت بره الغرفة، كمت بسرعة اطلع دگات گلبي تسابق خطواتي قلقت وخفت من جيتهه، اول ما فتحت باب الاستقبال صارت بوجهي واكفة على جهة صافنة على الشباك..

-مريم: هلو اسيل

-اسيل: هلو، اسف حبيبتي اجيت بدون موعد

-مريم: لا حبي براحتج البيت بيتج

-اسيل: يمكن مستغربة وجودي صح؟

-صراحة اي

-مريم محد يعرف بيه اني هنا حتى مسلم من جابني ميعرف السبب گتله مشتاقة لمريم واريد اشوفهه

-قلقتيني اسيل

-سمعت بيج انخطبتي صح هذا الكلام؟

-هاا

-طيار او ماعرف شنو يشتغل صحيح لو بس اشاعات؟

غمضت عيوني خرب هاي واصل الحجي للكل شلون فشلة والله لو ابوية يعرف يشوي على اذاناتي البصل..

-اسيل: اسفة على تطفلي مريم بس اريد اكلج شي واحد بس وانتِ حرة بعد هذا الكلام شنو تسوين راجع الج وربي يوفقج

-كولي اسيل شصاير

-اطلس يحبج مريم، والله العظيم وراس ابني يحبج ويموت عليج هو ميدري اني هنا ولو يعرف يزاعلني وميحاچيني العمر كله، بس تعبت مريم تعبت من المشاكل البارحة گبت عركة طاحنة بينه وبين ابوه صارت بالايدين بوكسيات وتهديدات تعبت واني اشوف ابن اختي بهذا الحال

-شنو

-اطلس اخوية وابوية وحبيبي محد غيره وگفلي وسندني، عاملني مثل خواته وحن عليه مثلهن واكثر بعد يحبني هواي ويعزني حتى من تزوجت بالسر ما هان عليه انهان وابقى متزوجة بالخفية راد يزفني بيده ويطلعني من باب بيته وسواهه وما كسرني

-اسيل گلتي ابن اختج انتِ ما فهمت هاي

-جايتچ بالحجي، بلقيس اختي الجبيرة مثلما تعرفين اخذهه محمد بعمر صغير تعيش وياهم وتربي اولاده راحت بلقيس واني ماعرفهه بعدني ما مولودة وره سنييين ياله صرت واجيت للدنيا اجيت بغلطة وياريتني ما اجيت لهاي الدنيا الغبرة

-ليش

-تعبت وشفت ضيم عمري ست سنوات ابوية يتحارش بيه مريم هو عنده هذا الطبع حتى ويه بلقيس، يتلمس جسمي ويتجاوز ويعلمني على شغلات غريبة ما جنت افطنلهن لحد هسة هذا عمري تزوجت وكمت استوعب خطورة الموضوع

-لا!!

-كلما تجينه بلقيس تجيب الاطلس وياهه يلعب ويايه ويشيلني على ظهره چان مراهق بعده هستوه طالع شاربه يگعدني گباله يظفرلي شعري لو يغنيلي لو يشيلني ويفتر بيه بالبيت..

چنت طفلة كتومة ابوية يهددني اذا احجي لبلقيس يعاقبني ويذبني بالبحر وبعد محد يلگاني، الاطلس بعد ميشوفني وميلعبني ابقى بالبحر واموت هناك من الظلام..

-مريم: شنو من گلب عنده

-اي هيج ربيت ومع ذلك بلقيسه چانت تجيني تعلمني ممنوع تخلين احد يلمسچ، ممنوع تكعدين بحضن ابوية ممنوع وممنوع وممنوع.. واذا احد سوالج فلان شي تتصلين بيه من رقم امي وعلمتني شلون استخدم الموبايل بقت ويايه على الدعسة بس جنت اخاف من ابوي يذبني بالبحر واسكت ما احجيلهه

-عجيب!!

-الى ان صار عمري ثمان سنوات والاطلس اكتشف ابوية يتحارش بيه شافه بعيونه ووصل الكلام لبلقيس وصارت عركة جبيرة لليوم ترن صداهه بأذني، ماطولهه عليج اخذتني بلقيس اعيش عندهه بس الخوف اكل گلبهه

-ليش؟ وليش ما اخذتج من البداية اذا تكولين ابوج متحرش؟

-تخاف من محمد، تحاف يستخدمني نقطة ضعف الهه ويلعب بيه بكيفه الاطلس كافي عليهه متكدر تاخذ نقطة ضعف ثانية

-ما جاي افهم اسيل فهميني شنو الاطلس نقطة ضعف ليش

-الاطلس يصير ابن بلقيس مريم

عقلي ضرب صدمة ما بعدهه صدمة! حسيت انطتني راشدي قوي فرت وجهي بي وتلتها راشديات اقوى من حچتلي شنو چان يعيشه الاطلس وشنو المر بي..

حچتلي كلشي من يكعدو بقفص النسر وهو طفل وينهش بجسمه! محمد ينتقم من نانا من خلال الاطلس يعذبه! محمد يعتدي على نانا گدام عيون الاطلس! يطردو بالشتوية الباردة بره البيت ويبقى لليل يتمرض ويتخربط ويوكع وممنوع احد يساعده!

ممنوع يصيح لـ نانا "يمة" ولازم حصة تكون امه كدام الناس، ارهبو وخوفو من الصغر لو عرفت الناس نانا امك ناخذهه منك ونحرمك منهه متشوفهه طول العمر، هددو وهددو وهددو وزرعو الرعب بگلبه من صغره..

الادهم چان يعوف النسر يتمشى بالحديقة عمدن حتى يخاف الاطلس وميطلع وهو السبب بمرضه! تخبلت انجنيت عيوني صارت تجري دم مو دمع وره السمعته..

-اسيل: الادهم دمر الاطلس مريم شكد ما احجي بلقيس تكول قليل على الضيم الشافه اني صراحة ما اتذكر ما لحكت عليه بس بلقيس داااائماً تحجيلي من تشوف اطلس يتعب او ينهد حيله ترفع ايدهه للسما وتدعي الله يبرد گلبه وينطي حياة يستحقهه

-ومحمد وين شلون يسمح لابوه يعذب ابنه بهالطريقة!

-چان يقبل بهذا الشي غيرة وحقد محمد يغار من الاطلس هواي يغار من حب بلقيس لابنهه ويستغل هذا الحب لمصالحه شخصية تعرفين مريم كم اتفاق بأتفاق الاطلس اضطر يعقد ويه ابوه بس حتى يحافظ على امه؟

-لا اسيل كافي الله يخليج

-زواجكم چان اتفاق بس حتى بلقيس ما تتضرر! دراسته وشغله وحياته وسفراته وكلشييي كلشييي بحياته حتى طلاقكم كان تحت التهديد والا اطلس ميبيعچ مستحيل لو يعرف يتنازل عن كلشي وميخسرج مريم اني اعرفه عدل ياما وياما اسمعه يحجي ويه بلقيس للصبح عن حبج وتعلقه بيج

مسحت عيوني وترجع تنزل الدموع واسيل مستمرة تحجي عن معاناته انفطر گلبي وجع مو طبيعي حسيت بي راسي راد ينفجر من الصدمات..

-اسيل: عانى من حرمان من طفولته لهذا كبره دتشوفين كشخته وجماله ولبسه واناقته والكارزما الشايلهه كدام النس كله تمثيل هو بداخله طفل مهشم مكسور يتعلق بالكلمة الطيبة يتعلق بالناس الحنونة ويحب يعاشرهم عانى من مشاكل وصراعات عائلية چان هو ضحيتهه بكل مرة

-وخواته هم عاشو هاي المعاناة؟؟

-لا لان البنات من حصة وحصة غنية ووراهه ظهر ابوهه ما يسمح بنته تعيش بتعاسة وچان ويه محمد على الدعسة صح رضى ببنته تتزوج على ضرة بس هو يعرف محد يگدر يمسهه بسوء وغصباً ما على الادهم ومحمد يحترموهه ويحترمون اولادهه

-لو حصة عدهه ولد يمكن كلشي چان تغير

-لا! لان محمد يريد الاطلس ويحب الاطلس گالهه بنفسه لو عندي عشر ولد يبقى الاطلس اولهم وافضلهم لان من بلقيس يحب الاطلس على حبه لأختي لدرجة اوقات يصفن بوجهه ويگله الله يحبني ابني اجه نسخة من امه حتى من اشتاق لامك اباوع بعيونك وارتاح

-ما منتبهه على الشبه من قبل

-انتبهي، مريم اليوم اني اجيتچ بنفسي احچيلج هذا الكلام لان لا يمكن الاطلس يطلع هاي الاسرار لأي بشر خوفاً على بلقيس

-ليش ما حچالي معقولة ميثق بيه

-الموضوع ممتعلق بالثقة بس ميكدر يضمن ابوه، محمد مريض نفسي مهووس مجنون بأختي مستعد ينفي الدنيا بس حتى تبقى وياه بلقيسه، الاطلس حفظهه وحاوطهه بحنانه وحبه خوفاً عليهه من محمد ومن جد البنات ابو حصة عايش بالخليج هم ما يسمح تتلوث سمعته وسمعة بنته مريم والله الموضوع معقد وكلش عميق، بس الاطلس جاي يحارب هواميــــر كبار كلش وحده هو لحاله ماكو احد وياه كل التعاسة والبشاعة والمرورة والمرض جاي يعيشه ويحاربه وحده..

دام حديثنه لساعات ما سكتنه الا من اتصل عليهه مسلم وگال هو منتظرهه بره، ودعتني وراحت عافتني بضيمي الافكار تاكل عقلي وتنخر گلبي..

رجع ابوية بالليل وصدمني بقراره من كال مالك خوش رجال واجه يقنعني اقبل واوافق، نظرتله نظرة مطولة افهم فكرته عن هالزواج او ربحه بهذا الزواج تركته وكمت لفراشي حطيت راسي ونمت..

مشت الايام وابوية ماكل گلبي كل يوم يصيح راح يوافق وراح يرجعلهم خبر واني افهمه ما موافقة وماريد اتزوج، مالك استمر يدزلي رسائل واني اغلس عليه..

الى ان اجه يوم عرس دعاء ويوم عيد ميلادي بنفس اليوم، نسيت كل هاي الاحداث وقررت اعيش المتعة بزواج اختي..

قبل بيوم رحنه لمدينتهم اجرنه فندق واستقرينه بي لان العرس راح يكون هنا والسبب دعاء متتحمل مسافات طويلة وتتخربط بالطريق، علي اقترح يختصرون الموضوع ويكون العرس بنفس المدينة والغريب ابوية قبل وما عارض..

طلعنه للصالون اني وخواتي وخوات الاطلس واسيل كلشي چان يجنن ووناسة فرحنه واستمتعنه ولعبنه لعب بالصالون لدرجة الموجودين صارو يسألون على لهجتنه وحماسنه..

-سارة: احنه عراقيين

أهلو وسهلو بينه وتلگونه ملگه حلو وهواي اهتمت بينه ام الصالون، ماعرف لان عبالهه احنه ضيوف لو لان جيب علي ثگيل...

لعابتي طلعت من اميرات ديزني تخبل عيوني ما كدرت اشيلهم عنهه جمالهه سحرني وسحر كل الموجودين واهمها سحر علي الي ماتحمل ودگ رجل الا يفوت للصالون يشوفهه قبل العرس..

شكد ردت حاولت وياه بس الرجال قافل ولهفته خلتني افرح وغصباً عني اقنع دعاء وام الصالون ندخله ونخلي يشوفهه، اخيراً دخلناه عيوني صارت تمطر دموع من المنظر، كلماته واللحن الي بصوته ولمعة عيونه وهو يراقب ملامحهه بهجته ورجفة حسه وهو يتلفظ بأسمهه، ما انسى الجملة الي گالهه اول ما طبع قبلة على ايدهه..

-علي: وإني واقع بكِ، عامداً ، قاصداً، مغرماً وعاشقاً

-دعاء: علي

-علي: احبچ يا احسن اختيارياتي

-واني احبك حبيبي

من السرسحة سارة وكعت عليه وبسملة من الجهة الثانية ورقية فاكة حلكهه عليهم والي بالصالون رغم ما مبينين احنه واكفين على جهة بس اكو مادات روسهن يباوعن ويبسبسن مكيفات..

-علي: من اول صدفة صارت بيناتنه، من اول مرة لزمتي جاكيتي وعبرتچ الشارع چنت اعرف ومتيقن ما راح تروحين من بالي وفعلاً ما غبتي ولا لحظة

باس اطراف اصابعهه وهي تباوعله منتظرته يكمل..

-چانت نيتي وياچ مو عشگ دعاء خليني اكون سرسري لاخر مرة بحياتي واعترفلج نيتي تعارف وونسة وبس، لكن من اجيت واعترفتلج باوعت لعيونج وذبت بيهن ردت اكثر ردت اعرفج، ردت اللمس هاي الايدين، ردت ابوس (باسهه على خدهه) ابوس هالكد واعيش شعور النشوة وانتِ بين ايديه..

-دعاء: ماعرف شكول بس اني اعلمك بعدين

-علي: اي استاهل تعلميني بس عود بعدين نتفاهم على الطريقة

-دعاء: علييي

-علي: خلينه نكمل دعاء ماكو وقت بعدين نتعارك حبيبي

بوس ايديهه ثنينهن ورجع يتغزل بيهه بصوت هامس محد يسمعه غيرهه، اباوع لاختي شفايفهه ترجف من الخجل والخوف وعيون علي ما فارقتهه، علت نبرة صوته من كال..

-علي: من اعترفتلج وشفت ردة فعلج وبرودج تجاهي انكسرت حسيت بشعور الرفض وما ابشعه من شعور، حاولت ارجع اتقرب منج وصديتيني بكل مرة مُصرة ما نكون علاقة ولا حتى تعارف ضجت وأيست منج وكلت هذا هو مو من نصيبك علي

-دعاء: تخليت عني بهالسهولة

-ما تخليت بس انتظرت الوقت المناسب، دعاء صعب اتقدم لبنية بهالسرعة بنية لا اعرفهه ولا تعرفني مجرد نظرات بيناتنه وما متأكد هي حابتني لو بس هيج اعجاب الفكرة صعبة بالنسبة الي حتى لو تشوفيهه غلط هاي عقليتي بس..

ذب نفس وابتسم، ردتله الابتسامة بتردد وعضت على طرف شفتهه من التوتر سويت نفس حركتهه والبنات كلنه منتظراته يكمل..

-علي: بس من عمر اجاني بذاك اليوم وگال دعاء انخطبت، ماحچيلچ يا دعاء شصار بيه نار كبره واشتعلت بنص صدري تخبلت فقدت عقلي اول مرة بحياتي احس اني فقدت شي وراح مني بسبب غبائي، چنت مستعد اروح لبيتج وابوس ايدين ابوج حتى يرضى بيه ويقنعچ حتى توافقين عليه

-شلون وخطيبي وين يروح

-انعل والديه قندرتچ!!

-يوووه شبيك هاي وهو مجهول

-خرب روحي شكد احبج اشتعلوووو ذولاك الجماعة

-هههه لهدرجة علي

-واكثر يا روحه لعلي دعاء اني احبج حب خله دمعتي تطيح على خدي وكل خلية بجسمي رجفت من عرفت بيج انخطبتي اجيتج امشي على دگات گلبي مو اسوق بسيارتي اجيت وخطبتج ونذرت نذر وبحياتي ما ناذر ولا اعترف بالنذورات بس سامع بيهن، نذرت لو صرتي الي اكفل ثلاثين يتيم من العراق

بچت دعاء وحضنته بقوة بادلهه الحضن يبوس بكتفهه واحنه بعد الدموع ما گدرنه نوگفهن..

-علي: حتى لو عمير چذب عليه لا عبالج زعلت منه بالعكس رحت ابوسه بين عيونه وتشكرت منه لان انطاني اجمل هدية انطاني دفعة وخلاني اتغلب على خوفي واجيت وخطبت معشوگتي الاحبهه واليوم زفوهه الي وعلى عناد جماعتي لبست قاط ابيض بس لانچ تحبي

ضحكت بصوت وكممت فمهه دعاء شرطت على علي يلبس بدلة رسمية لونهه ابيض ماقبل واعترض وكال هذا الموديل قديم واصدقاءه يتنمرون عليه بس سواهه لان هي تريد وما كسر بخاطرهه..

نزيت على گرصة سارة لخاصرتي شهگت بالخنسة وانداريت خازرتهه..

-سارة بهمس: اسفة بس گزگزت اريد حمزة

-مريم: بعدين بعدين

-بسملة بهمس: عمي اني احتاج حمزة هسة

-سارة: اموتج بسملة اكلج بسنوني

-رقية: انچبن خلونه نشوف

-علي: ممكن؟؟

-مريم: اي اي طبعاً ممكن كملو

-علي: شنو طبعاً ممكن نريد نختلي وحدنه انطونه مجال مرايم شسالفة

-سارة: لا ماكو ممنوع خالة ام مريم نبهتنه ممنوع نخليكم وحدكم

-بسملة: هسة مو زين خليناك تشوفهه

-رقية: صارلك ساعة تسولف هسة استحيت عليوي كمل گدامنه يله

-علي: راح اجيچ رقية

-رقية: لا لا اسفة معليه اني

-بسملة: يله عيني دورو وجوهكم يستحون

-علي: بس خلي يخلص العرس واني اعلمچن انتن الثنين

-دعاء: علاوي شبيك ويه البنات

-علي: يروحلج تسعتالاف فدوة علاوي انعل روح البنات شعليه بيهن خليني وياچ وبس

رادن يحجن ثنيهن وسارة خزرتهن وگرصت كل وحدة من ايد وعضتلهن شفة يسكتن، المشكلة من گدما خجلانة اني مدا انطي ردة فعل عبالك ديعترفلي الي وعايشة اللحظة..

اخيراً طلعنه من الصالون للقاعة، العرس نساء فقط وبده الردح والخبال، عرس دعاوي صار ضخم كلش سووا بقاعة راقية فصالهه ملكي وكلشي چان مثالي واضح الترف على اصحاب العرس..

جماعتهم هواي كلش واحنه جماعتنه هم عزمنه من جيراننه القديمين الكل اجه على گولة امي اكو ناس اجت مو لشي بس حتى يشوفون منو اخذت دعاء وشلون ببطاقة عرسهه ذاكرين العرس بهاي القاعة الراقية..

دخل علي ورقصو سلو خففو الاضواء وقضيتهه گاعدة وانوح ويه بسملة وامي، كل لحظة امي تقره المعوذات وتنفخ عليهم خصوصاً من خلصت الرقصة وعلي رفع دعاء يشيلهه ويدور بيهه بنص القاعة..

ضحكت من گلبي على فرحتهم والحب الواضح بيناتهم وعلى حماسه كأن ربح جوهرة ثمينة ومحد حصلهه غيره..

بالعشرة ونص بالليل خلص العرس واستعدينه نطلع للزفة، زفة عراقية بحتة دورت على مزيل المكياج مالتي ما لگيته صحت اذا وحدة جايبة ومحد عنده جريت كلينس وبالمي وكفت امسح..

من الاستعجال وعياط امي حتى اجي عفت المسح على النص وطلعت وياهن ضليت اكل بروحي صحت ببسملة اسئلهه خاف مبين مكياجي كالت لا ممسوح..

-مريم: شبيچ بسوم وجهج اصفر؟؟

-بسملة: تعبانة مرايم كلش ماعرف شبيه

-يااا شبيچ

-بطني تلويني راح اتقيء

-مريم: مستبردة هاي شوف الحظ، امشي طلعي ويه سارة... سارونة وينج سااارة

-سارة: ها حبي

-اخذي بسملة وياكم بالسيارة حبابة كلش مريضة

-سارة: خليهه تروح ويه رقية هي رايحة لسيارتنه اني ابقى وياچ خاف تحتاجين شي

ابتسمت وهزيت براسي، طلعت دعاء مغطين وجهها وراسهه ودخلناهه بصعوبة للسيارة علي شرط هو يزف نفسه بسيارته المزينة بورد احمر يجنن، كعدت اختي بالسيارة گوة لازمة ذيل بدلتي واغطي بجسمي بالفروة اللابستهه تندمت ما جبت صاية ويابه..

-مريم: دعاء نروح لبيتكم لو للفندق؟

وخرت الغطا من وجهها عيونهه دم حمر من البچي والوداع الصار بيناتنه، اشرت على علي وكالت بحس مبحوح..

-دعاء: لبيتنه كلت لعلي ما انزف بفندق

-مو كال ميقبل احد يدخل لبيتكم؟

-لا قنعته اريد ببيتنه نروح

هزيت راسي موافقتهه كملت ترتيبهه وطلعت راسي من جوه وانضربت بسقف السيارة شاطت روحي دخت والدنيا افترت بيه ماشوف بعيوني الدموع اخذتني وخشمي احسه اشتعل نار..

-الله الله الله شبييج هاي منو

حطيت ايدي على وجهي ووخرت من السيارة ما انتبهت عليه دعاء من انضربت چانت حايرة تعدل ببدلتهه سدو باب السيارة واني بقيت مثل الطرنة واكفة..

-هاي منو المن هاي ولكم

-مريم: عمررر هاي اني مريم

-عمر: مرايم هاي شبيچ شو وخري ايدج عن وجهج شبيهه عيونج؟؟

بعدت ايدي شاف وجهي وفتح عيونه ضحك وكال..

-عمر: يمعودة على بختج كل هالبچي لان اختج تزوجت تره ما راحت لغير قارة شوكت ما يعجبكم تجون تنورون

-مريم: لا انضرب راسي بالسيارة راح اموت من الوجع، عمر شفت بسملة وين؟؟

-عمر: ويه رقية صعدت بسيارة حمزة

-وسارة وين؟؟ صعدت وياهم

-لا ماكو ما شفتهه

تركته وشلت بدلتي ارجع للقاعة اكيد دتنتظرني جوه، فتت للقاعة شفتهه واكفة تحجي ويه بنية تأشرلهه على ايدهه..

-مريم: سارة شو بعدج هنا؟

-ضاعت سوارتي مريم هنا ماعرف وين وكعت حموت قهر

-سوار غالي؟

-اي هدية من حمزة على خبر حملي

عيونهه مدمعة والدموع ترستهن انخبصت وياهه ندور وام القاعة تفتر ويانه، كلنالهه بس نطلع للزفة ونرجع ندور كالت ممنوع القاعة تتقفل بعد ومحد يدخل..

-سارة: امشي عوفيهه لتروح عليج زفة اختج

-مريم: والسوار؟

-اكول لحمزة يلگالي حل امشي نطلع

اخذت ايدهه امشيهه على كيفي لابسة كعب عالي وهي حامل رزلتهه وبكل فهاوة تگلي بدلتهه طويلة ولازم كعب، طلعنه بباب القاعة بعدهم محد متحرك بعدهم ديتحضرون والموزيقا والردح مشتغل بره منسمع اروحانه من الهوسة..

-ساااارة ذيج سيارة حمزززة مووو

-سارة: ايي هي ايي يله امشي

مشينه نطگ سن بسن من البرد الشارع مبلل هستوهه ماطرة الجو يگص گص خشمي تجرح والدخان البارد يطلع من افواهنه جمدت..

-سارة امشييي ليش واكفة

جريتهه من ايدهه امشيهه وهي متبسمرة وتباوع بأتجاه واحد، عصبت منهه وصحت بيهه بعد مرة اندارت عليه وجهها مخطوف وتأشر..

-هذاك فاهد

فتحت عيوني توجعني من البچي والضربة ماكدر اركز بعدني مسطورة، ما شفت ملامحه بعيد كلش ممبين شلون شافته، سحبتني من ايدي وكالت بتوتر..

-امشييي نروح امشييي فدوة امشي

دگ موبايلي بنفس اللحظة رفعته شفت امي متصله جاوبتهه گالت هي كاعدة بسيارة عمر وتريدني اروحلهه، سديته منهه وسارة تلوب طلعت گدامي تهرول لسيارة حمزة..

لاحظت شي واني اسد الاتصال من امي جايني اشعارين، رجعت فتحت التلفون شفتهن ثنينهن من مالك كاتب..

"جميلة طالعة تسحرين الانظار"

"باچر نجيكم نتفاهم على المهر اريد اشوفچ عود"

وتد ودگو برجليه من الصدمة يجون يتفاهمون على المهر شنو؟؟؟ ابوية رجعلهم خبرر اني موافقة تخبلت گلبي راح ينشلع من صدري من الخوف والتوتر والقهر!!

-مرررريم يلللله

شتت خوفي صوت صاحني ماعرف منو بالضبط ماركزت، امشي مثل المكبسلة دايخة اثر الضربة واثر رسالة مالك دا اعبر للشارع الثاني وشهكت متبسمرة بمكاني من اجت سيارة طايرة عليه وضرب بريك قوي..

-شبيييييييييك ما تشوووووووف

نبضي وگف من الصدمة نزل السايق يشوفني وتقدم عليه يريد يلزمني من متني وما حسيت الا بأيد قوية تدفعه وينتر..

-روح مابيهه شي رووح

رفعت راسي شفته الاطلس واكف يتلاسن ويه الرجال بالمغربي هذاك لطش الا يشوف شبيه والمحيط ميقبل يخلي يتقرب مني، جريت جاكيت اطلس من جوه استنجد بي واهمس..

-وين اروح

-شبيج يروحي مرمر تأذيتي؟؟ اكو شي يوجعچ حاچيني؟؟

-هااا اني مادري هو اجه هو

-عاينيلي مريم ركزي وياي بيج شي؟؟

-لا لا

-تعالي وياي تعالي

راد يجرني من ايدي ما خليته انتبه على تشتتي وعكد حاجبه مستغرب، هزيت راسي ارجف برد..

-مريم: وين وين اروح وين

-روحي لعمر امشي حبيبي.. عمرررر

ركضت ركض انلوت رجليه مرتين واني اروح للسيارة ماهتميت، دخلت افرك بيدي وراسي وامسح على خدودي لاحظت دا ابچي بدون لا احس..

-ام مريم: شبيچ يااا ولج ليش تبچين

تحجي وتبجي على دعاء واني ابجي من الضربة والصدمة ودعاء كلهن نفس الوقت، مو زفة صارت ضيم وظلايم حاطه ايدي على راسي راح ينفجر وامي بس تبچي..

اخيراً شوية فكيناهه من وكفو بنص الشارع يرقصون الولد ضحكت من كلبي ما شايفين هيجي شي احنه شي غريب علينه ما حاضرة زفة من قبل وماعرف المراسيم..

عمر شعل الجو اغاني وتفحيط والولد وياه لعبو على علي وخلو يفرفح اخذو سيارته وخلو يركض وراهم متنه ضحك انتهيت، رجعو وگفو بنص الشارع وتبادلو سيارات اجت بسملة تكعد ويانه ورقية وياهه وعلگنهه ويه عمر..

بنص الطريق بسملة كامت تصيح وترجف وگف عمر بنص الشارع واندار عليهه مصدوم حرنه شبيهه بس تعيط راح اتقيء ماتحمل بعد..

نزلتهه وامي وعمر نزلو ويانه كل السيارات وگفو يشوفون شصار وهي دمرتنه ودمرت روحهه بالاستفراغ فرفحت تبجي وتتقيء..

-بسملة: راح اخلصص راح اذووب

-مريم: شنو تذوبين ولج ليش تبجييين

-بسملة: الله يااااخذكم كله من ورااااكم سيارة عمررر لعبت روحييي

-عمر: اهوووو شعليه عمررر بكلشي حاطي

-ام مريم: لا يمة ما تقصد بس هي تهلوس مريضة

-بسملة: ما اهلوس مااا اهلوس سيارته كلهه عطرر معدتي فطستت

ورجعت تتقيء اكثر فحطت بچي وتدردم علينه وعلى عمر وهذا شايط بس ميحجي لان امي ويانه يستحي منهه..

-عمر: يابة يله السبب مني ومن سيارتي هسة احرگهه الج بس لاا تبچييين ليش تبچين

-بسملة: وره ما تقيأت تريد تحرگهه

-ام مريم: بسملة شبييج

-بسملة: تعبااانة

-مريم: هسة ترتاحين حبيبتي هاا نرجع لو بعدج

-بسملة: ما ارجع بهاي السيارة المااركة

تأشر على عمر ضرب وجهه وعض على اصبعه گوة لازم نفسه ميحجي وامي تقنع بيهه وماكو قفلت راسهه المجعمر..

-بسملة: اروح ويه فاتن صديقتي ماريد سيارتك

-عمر: شنو ترحين ويه فاتن عررف ولف!

-ام مريم: منو فاتن بسملة

-مريم: صديقتهه خوش بنية حبابة واخوهه هم حباب اخذهه ونروح وياهم بس خليهه تسكت ماما انفضحنه

-عمر: ماكوو ما تروحون مكان هسة اشوفلكم سيارة ثانية

-بسملة: اريد فاتنننن

-رقية: بسمك اللهم تصعدددين لو اجيچ

-ام مريم: ياا بسمك اللهم شنو هاي بعد

-بسملة: ماصعد هناا ماتحممل

الهورنات خبصتنه خبص مدا اشوف سيارة عرف كلهم من اصدقائهم شافونه تأخرنه عافونه وراحو بقينه احنه وسيارة اخو فاتن هم وگف يشوف شكو ونزل ويه اخته، واحنه نقنع ببسملة تصعد تكول ماتحمل اذب من راسي السيارة ماركة ومتروسة عطر مادري شلون صارت سيارة ماركة بس بعد بسملة وسوالفهه..

-عمر: ربي اريد منك الصبر

-ظافر: اذا تحبون تصعدون وياي

-عمر: لا حبيبي تسلم ماكو داعي

-ام مريم بنتر: بسملة امشي نصعد كافي

-بسملة: ولج يمة انتِ شبيچ دباعي شلون ارجف راح تطلع روحي ماصعد بهاي الماركة ماصعدد

-ظافر: شنو هي الماركة؟

-بسملة: هاي السيارة متروسة عطر

-عمر: اهوي السيارة افتح الجام والله

-مريم: بسممملة امشي نصعد تفشلنه

-بسملة: اتقيء بسيارته اي يله امشو

-عمر: يابة تقيئي بحضنييي خووش

-بسملة: اي اي هسة

شفت وضعهه صعب وجهها اصفر وكومة تقيأت راحت روحهه مو مال نصعدهه بنفس السيارة، تقربت على عمر اطلب منه يحجي ويه ظافر نصعد بسيارتهم او يتصل بحمزة بس شو هذا گلب الدنيا وجهها راح ينفجر من العصبية، همس بيني وبينه بنتر..

-عمر: ما تصعدون ويه ظافر هسة اتصل بحمزة يرجعلكم ماشي!!

-مريم: ماشي بس شبيك معصب انتَ

-عمر: ما معصب منو كال معصب بس بسملة خبصتني

-شبيك عمر مريضة تره

-ادري ادري

سكت من دك موبايله الحظ الفگر الاطلس اتصل بي وراح يرجعلنه يبووو يا حظج يمريم ما طلعت زفة هاي لطام بعيني، ما كدرت اجادل بسملة متخربطة وامي متفشلة وعمر صاير كبريت واكف ويوزع خزرات..

رجع الاطلس بسيارته همزين خالة حصة وياه صعدنه الثلاثي وره ومشى بينه نلحگ على الزفة، خنست ما طلع حسي ولا تنفست رفعت بس عيوني اشوف من المراية الامامية ولاحظته يباوعلي منهه فوراً كسرت عيني على الجامة..

اخيراً وصلنه لبيت علي ودعاء الف ما شاء الله هاي اول مرة اجي اشوفه مو بيت ڤيلا، الواجهة تخطف الانفاس بيت ملوك والداخل بعد ارقى واحلى كلشي فخم وكلشي راقي البيت چبيير ورغم دخلنه قريب 12 بالليل بس نفه حيل نفه وكله شبابيك كبار مغلفات بتول..

نزلت اختي لبيتهه ووصيتهه تفوت برجلهه اليمنى وتسمي بالله، ما دخل الكل لداخل البيت بقو بره بسياراتهم بس كم شخص نزل ويانه، فوتناهه لغرفتهه وگعدناهه على السرير وامي استلمتهه موادع ونصايح وبچي..

-بسملة: يمة ساح مكياجهه على كيفج حبابة راح اموت من التعب خلينه نروح

-مريم: يله ماما منتظرينه جوه فشلة وبسملة كلش تعبانة

-دعاء: راح تباتون مو؟؟ حبابين لحد يروح فدوة

-بسملة: حصة ما قبلت نروح حلفت نبقى بييتهم بس مرايم متقبل

-دعاء: مريم زين بس باتي هنا يمي ببيتي حبابة

-مريم: ماشي حبي اشوف وضعي لتخافين دعيوة هاي وتزوجتي حبيبج انتبهي لنفسج حبي

همستهه واني ابوسهه ضحكت ورجف كل جسمهه من دخل علي للغرفة، وصته امي وحلفته بروح ابوه يدير باله عليهه اشر على عيونه وكال..

-بعيوني دعاء وام دعاء وخوات دعاء وابو دعاء

تشكرت منه امي وودعنه اختي للمرة المية ووصيتهه تبقي تلفونهه يمهه وأي شي غلط يصير تتصل بيه، ماكدرت ما اتذكر الصار بيه بيوم عرسي مو بيدي اخاف عليهه..

طلعنه من غرفة عصافير الحب وتركناهم وحدهم يقضون ليلة العمر سوه، وگفنه بالصالة الجبيرة مال بيتهم نتناقش ويه ام عمر أصرت كلنه نبات هنا بهذا البيت حسب كلامهه عادات عدهم طرف العروسة يباتون ببيت العرسان ما سامعة بهاي العادة لان بعرسي ما صار هيج..

قررنه نبات بس هالليلة هنا نرد الوحشة عن دعاء راسلتهه انطيهه خبر خطية هواي ارتاحت وكيفت..

دخل عمر للبيت بيده علاگة انطاهه لامي وكال هذا خافض حرارة لبسملة ودوه لعبان نفس، وصانه نسويلهه كمادات ومنغطيهه بالليل..

-ام مريم: فدوة لطولك حبيبي هواي تزحمت

-عمر: لا خالة تدللون

دلانه على غرفة حتى ناخذ راحتنه بيهه وطلع كال يروح لبيته، امه چلبت بي يبقى بس ما رضى..

-ولك يمة ترد وحشة اخوك ابقى هنا بس اليوم

-عمر: لا يوم الولد يبقون عندي كلهم

-چا خوش يله يمة وداعة الله

ودعته وطلع رحت للغرفة الي دلونه عليهه ابتسمت من شفت الاثاث والترتيب وابتسمت على سوالف بسملة وهي تكول لامي..

-بسملة: صح مريضة ومالي خلگ بس راضية على عليوي اني خوش مدلل اختي

-مريم: حباب علي ويحبهه هواي

-ام مريم: الله يسعدهم ويمهلهم بنيتي الحلوة صارت عروس

مسحت دموعهه من اتصل ابوية يتطمن علينه شرحتله امي كلشي وسدته، ردت افتح وياهه موضوع مالك وشفت الوضع مو مناسب بسملة رجعت تخربطت وامي حارت بيهه، نزعت شالي والفروة البيضة بقيت بفستاني الاحمر المنفوش من جوه بتول..

مددتهه على الفراش ورحت اجيبلهه مي واسويلهه كمادات، رجعت اللبس الفروة والشال حطيته على راسي بعشوائية وطلعت ادور على مطبخهم، وصلت طلعت المي من الثلاجة وصبيته بگلاص رجعت البطل اضمه وعطت مخترعة من سمعت صوته..

-شلونچ مريم

انداريت عليه حاطه ايدي على گلبي صار بيه رعاشي من الهبطة ابتسم وتقرب مني سد باب الثلاجة وكال..

-خرعتچ؟

-اي يمة انهبطت شبيك اطلس عبالي جني!

-لا ماكو جن هنا لا تخافين، شلون صرتي تأذيتي من الحادث؟

-لا ما طختني السيارة

-بس انهبطتي شفت وجهچ تغير لونه رغم المكياج

شدد على كلمة مكياج ورفع حاجبه، كتفت ايدي وگلبت عيوني..

-الاطلس: مو ملتزمة وما تحطين مكياج لو بالاعراس حلال

-حنت مستعجلة ومسحته بالكلينس نسيت اجيب ويايه مزيل فـ ما راح كله، لحظة اني ليش دا ابررلك؟

-هسة بعدين نتناقش بهذا الخصوص مدام

-مدام؟

-امم عندج مانع؟

-اني مو مدام اني آنسة يا استاذ

-مريم انتِ معصبة مني

-لا ممعصبة

-عصبيتج مفضوحة ما تكدرين تخفيهه وحقج تضوجين مني

-اخي ما ضايجة منك اني من رخصتك

رحت دا اطلع وجرني من ايدي نترت ايدي منه وخزرته..

-شلون تتجرأ!

-بس اوكفي اريد احجي وياچ

-وتجرني من ايدي؟؟

-اعتذر على جرة ايدج بعد ما اللمسج بس خلينه نحجي

-نحجي بشنو ماكو كلام بيناتنه

-انتِ ضايجة لان طلگتچ

-هههه شنو

-ضايجة وزعلانة عبالج تخليت عنج بهاي السهولة مريم بس اني ما اتخلى عن الاحبه ولا اتركه للموت

-گتلك ما ضايجة ولا زعلانه لا تألف عليه مشاعر

-طيب صدگتچ لا تعصبين

اخذت الكلاص وردت اطلع من المطبخ وطبگ الباب علينه وقفلهه، وگفت خازرته بدون مينطيني مجال احجي كال..

-ما تخليت عنج مريم ولا راح اسويهه بيوم

-اطلس ميهمني كلامك هذا افتح الباب

-طلگتچ لسبب، كلشي جاي اسوي لسبب اريدج ترتاحين اريد تستردين كرامتج الي تكولين اني سحگتهه ودستهه

-انتَ شدتحجي؟!

-اشهر قضيناهه سوه يوم زينة وياي ويوم كارهتني، يوم تبچين من تتذكرين الصار ويوم تضحكين وياي وترديني هاي مو عيشة محد يقبل بيهه واهم شي اني ماقبلهه عليج

-والله زين من تدري

-ادري، عشتي بحرب نفسية وياي طول الايام الفاتت ادري من تحطين راسج على المخدة ضميرچ يأنبچ تلومين نفسج شلون ضحكت وياه، شلون سولفت وياه، شلون شاف دمعتي، شلون اكلنه سوه، شلون خليته يلمسني، شلون خليته يبوسني.. شلون وهو هايني ودايس على كرامتي ودمرني ودمر حاضري ومستقبلي!

ركزت انظاري عليه وهو يحجي فعلاً كل هاي المشاعر چنت احس بيهه كأن ديقره عقلي والي بداخلي..

-تردين تحبيني وتردين تسامحيني بس عزة نفسچ وكرامتچ توجعچ، كلما بديتي تميلين هربتي ورجعتي تفكرين بالطلاق تخافين يجي يوم ارجع اعايرچ بالصار قبل مو؟

مجاوبته اللتزمت الصمت بينما هو كمل بنفس النبرة الهادئة الواثقة..

-خفيتي عني موضوع ابوچ يريد فلوس حتى يرجعچ خمسة اشهر انتِ عنده تخافين تواجهيني ما گلتيلي بالسبب الاصلي لزعلتچ متخوفة استهزأ بيچ وارجع اعيد اسطوانة ابوچ باعچ الي؟

-اني..

-ماعندج ثقة بيه تخافين يجي يوم اگلچ اني هنتچ وانتِ سامحتيني وبقيتي وياي، ردت اعتدي عليج وتقبلتي الفكرة، تخافين يرجع بجي يوم واگلچ ابوچ باعچ الي ودفعت بيج مهر ومزرعة.. تخافين يصير بيناتنه اطفال وتطلع هاي الشغلات گدامهم وترجعين تعيشين بنفس التعاسة والندامة صح لو لا مريم!

-صحيح

ابتسم لان جاوبته وهز راسه متفهم ذب نفس عميق وگال..

-اني مو ملاك اغلط وعندي هفوات، ممكن عندي هفوات لا تغتفر، اذيتچ وتعبتچ وياي بس حاولت اصلح الاگدر عليه، حطيتچ بمواقف ما تنحسدين عليهه عيشتچ شعور الغيرة والقهر وانتِ تشوفين نورسين تطب وتطلع لمكتبي الله يعلم بشنو تفكرين من تشوفيهه عندي

-ما افكر لتخاف

-چذابة مريم خلينه نبقى صريحين ويه بعض ونرتاح

-اطلس شتريد مني!!

درت وجهي عنه ماحب يشوف دموعي اكره نفسي من اضعف عصرت عيوني بقوة امنع نزولهن..

-مريم ماكو كلمة أسف ممكن تبرد گلبچ بس اريدج تعرفين كلشي سويته حتى انتِ ترتاحين وبس! تنازلت وطلگتچ علمودج لان اني متأكد راح نبقى بنفس الدوامة طول العمر وماكو شي راح يتغير وحتى اذا تغير راح تجي لحظة عصبية تتذكرين كل الفات وتكرهيني..

تقرب مني اكثر صار بظهري مباشرة ما انطيته اهمية ولا درتله وجهي، اردف بلطف..

-طلگتچ حتى ترجعين كرامتج، وترجع قوتچ، ترجعين مريم الواثقة الي تحط عينهه بعين اكبر واحد وما تخاف من احد، ماردت تبقين مكسورة ومهزوزة وتبچين بالختلات من تتذكرين زواجنه وتكولين كسرني.. ربحتي عليه وسويتي البراسچ اخذتي حقچ وخليتيني اطلگچ وعفتيني متعذب طلگتچ وعشت الضيم وراج لخاطرچ لخاطر تستردين نفسچ وحقچ هذا..

اللتفتت عليه وركزت انظاري على ملامحه الحزينة..

-عشت اسوء ايام حياتي بعد انفصالنه، كل يوم احط راسي على المخدة اكل بروحي واللوم نفسي شلون انطاني گلبي ونطقتهه تعرفين شنو حسيت من گلت "انتِ طالق"؟

-شنو

-سودت الدنيا بعيني كرهت نفسي وكرهت المحيط، كرهت لأني اضطر اعيش هاي المعاناة بس لان ابوي مريض نفسي، اضطر اخسر الاحبهم يوم بعد يوم بس حتى يرضى ويعوف امي مريم!!

نطق "يعوف امي" بحدة ونزلت دمعته مسحهه فوراً وضحك مستهزأ على وضعه انطاني ظهره بسرعة ونزل راسه وضغط على عيونه، رجع اندار عليه من هدأ وضعه..

-هواي قدمت تنازلات مو ضعف ولا جبن مني بس اني اعرف ابوي شنو واعرف شنو يكدر يسوي، بس طفح الكيل طز شيريد يسوي براحته حتى لو يريد يقصف روحي

-اطلس ابوك طاغوت

ضحك بوجع، بلوعة روح وهز راسه هزات عشوائية ماعرف موافق كلامي او لا، جر خشمه كذا مرة ومسح على لحيته وشاربه ووگف عدل بعدما دگم السترة، نزل راسه ورجع رفعه تقدم عليه خطوتين صار مقابيلي مباشرة..

-ابوي يلزمني من ايدي التوجعني بس اجه الوقت اوگفه عند حده، اخسر الدنيا كلهه وما اخسرچ مريم يربطني بيج شي اكبر واعمق من المحبة، أعجز عن وصف مشاعري المعقدة بس اگدر اكول كلشي بيه ملك الچ لعبي وتغني وطربي وضحكي على دگات گلبي هي الچ مو لغيرج وراح يبقن الج سواء قبلتي او لا..

انربط لساني وضاعت الكلمات من فمي من تقرب مني اكثر لدرجة عطره تمازج ويه ملابسي..

-احبچ غصباً على شارب ابوچ وابوي، وعشيرتي ومدينتي وعاداتي وتقاليدي الربيت عليهن مرمر

اجه ببالي مالك وكلامه خفت وانخطف لوني بس الگدامي ما خلاني اكمل تفكير حط ايده على جهة من الحايط الساندة ظهري عليه شافني اباوعلهه خازرتهه ضحك ووخرهه وگف عدل..

-عمية عيوني ما تشوف غير عيونچ ما تهز طولي احلى بنية ولا يلتفت گلبي لغيرچ، استحوذتيني تلبستي بيه مثل الجنية

غطيت فمي اضحك ماكدرت اللزم نفسي الجملة ضحكتني، لانت ملامحه واردف..

-اني اسف لأني احبچ بطريقة ما ترضيچ، طريقة يمكن مو واضحة طريقة تعبچ وتهلكچ من الداخل، حبيتچ حيييل مرمر وتعلقت بيج مثل الطفل اليتعلق بأمه، بس للاسف نسيت اني ماعندي حظ

همسهه بكسرة خاطر، شهگت حاطه ايدي على گلبي من نزل على ركبة وحدة وطلع من جيب سترته علبة، فتحهه وصار بوجهي خاتم اللماس..

-طلگتچ لهاي اللحظة، طلگتچ حتى انزل على ركبتي مثل الافلام واعيشچ هذا الشعور الي تحبو انتو البنات، طلگتچ حتى ترجعيلي وانتِ رافعة راسج ماخذه حقچ ومستردة كرامتچ، اجي واتعنى بنفسي اجيب اهلي وناسي وامشي الدنيا كلهه عليج واخذج غصباً ما على اكبر راس، اجي اخطب نفس البنت البدوية بنت الفلاح الي بغبائي ضيعتهه من ايدي، طلگتچ حتى تطلبين المهر الي انتِ رايدته وادفعه واني الممنون والمشكور، طلگتچ حتى ازفچ واطلعچ بيدي من بيت ابوچ واصيح بعلو صوتي اخذت العاشگهه والميت على طيفهه، طلگتچ حتى تدوسين بيتي وتنوري بنورچ تطبين بالبدلة البيضة حالج حال كل البنات وادخل وياچ واگلچ الليلة انولدت والليلة ربحت بيچ.. وهسة اجيت بنفس اليوم الاعترفتلج بي بحبي بيوم ميلادج حتى اكول..

گلبي راح يوگف من شال المحبس من العلبة ورفعه قريب وجهي كال بلهفة وشوق، بحماس وخوف، بتردد وبهجة..

-تقبلين تتزوجيني آنستي ام عيون كحيلة؟.....

يتبع ♠️💸.....

• ━━━━━━❪♣❫━━━━━━ •

قفلتين عرض زواج شسالفة!! 😭😂🔥

لو چنتي مريم شنو راح يكون موقفچ وكلام الاطلس شرأيچ بي؟

عن نفسي اشوف فعلاً الحل الوحيد ان الاطلس يطلگهه حتى يعدل اغلاطه ويرجع كرامتهه... بس يا ترى ام راس اليابس مالتنه راح تقتنع لو لاااا 😀

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

اللي ما يجيك بلهفة لا تلهف عليه

شبيك تنطي الماي للشابع مطر ♥️!

• ━━━━━━❪♣❫━━━━━━ •

-تقبلين تتزوجيني آنستي ام عيون الكحيلة؟

عيونه الخضر تلمع ويه اضوية المطبخ، دگات گلبي تدگ ببلعومي نفسي اعتلى حسيت واگفة على بسامير ودا اتحاكم هسة لازم انطي جوابي بسرعة، تشتت نظراتي من شفت احد ديحاول يفتح باب المطبخ خنسنه ثنينه ومن راحو ياله ذبيت النفس، اردف اطلس بتردد وصوت بي رجفة..

-مريم 86 يوم عشتهه بعيد عنچ ادري كلشي سويته غلط بس اني ما معصوم جل من لا يخطأ كلشي سويته لخاطرچ بس لان احبچ

مركز انظاره علية راح يخترق عقلي، عيونه تزرزر مثل الاطفال الصغار الي طلبو لعبة وخايفين من الرفض، حطيت ايدي على گلبي انضم دقاته الهمجية وضحكت ماتحملت ابقى صامدة اكثر من هيج..

-تضحكين؟

زدت بالضحك بسفاهه بقى صافن عليه ميعرف شيكول وشنو يعبر توتر والعرق بده يتجمع على جبينه بلع ريگ وبلل شفايفه راد يكمل كلام وفاجأته من مديتله ايدي اليمنه ومكممة فمي باليسرة..

-لبسني المحبس

-شنوو

-لبسنييي

-عليج عليي؟؟؟

-ايي ايي لبسنيي

-موافقة؟؟ مووووافقةة!!!

-صوتك فضحتنه هههههه اي ولك لبسنيي لتفضحنه

سحب ايدي من ردني بسرعة لبسني الخاتم بأصابع ترجف من التوتر، شهگت من گام على حيله وجر وجهي يبوسني بقوة حاولت ادفعه واعيط ميقبل يوخر فرفحت روحي اختنگت وادفع بجسمه گوة شلعته مني امسح بحلگي وخازرته..

-مريم: اطللللس اني محجبببة

-حالات خاااصة والعباس حالات خااصة

-وخر وخرر متحترم حجابي وخررر ماريد بطلت بعد

-احترمه واحطه بنص عيني تعااالي ولج

شالني يرفعني من الكاع يفرني بالمطبخ واني ارافس واعيط بالخنسة واگرص بي واعضعضه ما هدني گمت اللطم واطلس يضحك بصوت عااالي منتعشة روحه وفرحان..

-والقراان اذا ما نزلتني ابطل عليك احتررمنيي

نزلني ومستمر يضحك بحماس ضحكة ما اشوفهه دائماُ بسبب ملامحه الحزينة، كتفت ايدي مبوزة واباوعله..

-مريم: ما ما ماتزوجك بعد

-لبستي المحبس بعد ما يصيررر امشي ويااي

-وين ماخذني ياا هد ايدي حجاابي رااح هتكت سترري

هد ايدي بسرعة وضحك خجلان..

-ها اسف اسف ماحسيت جريتج، تعالي وياي لا تشلعين گلبي

-وين ماخذني بنصاص الليالي اطلس لتفضحنه

-نروح نعقد امشيي

-نعقد شنو يااا عزه بعيني تصخمت وتلطمت

-تمشين وياي لو اشيلچ!!

-لا اوكف شنو نروح نعقد غير تروح لابوية لو تريد تشربتني ماكوو لا اقبل مستحييل

-مريم بداعة امج بس حتى اكدر اكضچ شعلتي ابو ابوي امشي ويااي

-دهر دهرنني اطلس لتخبلنيي

ضرب الحايط بيده متنرفز ومشعوط وكفت مكتفة اباوعله معصب وضايج من كل عقله..

-مريم: اجي لاهلج وامشي الدنيا عليج وهو يريدنه نعقد بالسر

-اجي لاهلج وامشي الدنيا عليج بس اريد اخذ راحتي وياچ هسة ان شاء الله ترديني افوت هاي الليلة هيج!

-لاا بله وشتريد تسوي عيني

-طالعة تشگ شگ وتگول شتريد تسوي عمت عينييي لان خليتج هيج تطلعين

-يااا تره احنه بعدنه مطلگين شكو متدخل بيه!

-لابسة احمر حتى تجذب الثيران!!

-غيرتك طفيهه تره اكرهها

-مريم امشي نعقد ننطي خبر لامج واني اتصل بأبوج وابلغه

-اطلس تره اني مختوبة

-نعم؟؟؟

-اي اي مختوبة شبيك لازم تتفاهم ويه ختيبي هم

-منو هذا المطططي انوووب

-صوتك عالي

-منو هذااا مو كتلج ما تقبلين بالنعال الطياار

-مالك خطبني اطلس

فكت عگدة حاجبه ولانت ملامحه العصبية بشكل سريع، بهت حرفياً بهت ما حرك ساكن ظل صافن وعيونه ماتحركت..

-اطلس شبيك

-مالك

-اي اجه وخطبني هذا الحجي قبل عرس دعاء واجت امه تزورنه بالبيت وطلبتني من اهلي ومالك حچى ويه ابوية و..

-مالك مالك؟؟ مالك شمسون؟؟؟

-اي شبيك

-يابن الچلبة يابن ال******* الـ********* الـ...........

فتحت حلگي مترتين على الغلط والفشار النزل بيهم عليه اول مرة اشوفه يفشر بهالاريحية ونزل بقواذف وقنابل، فزيت من ضرب على الحايط الساندة ظهري عليه خزرني وكال..

-هذا ابن الكللللب شوكت حاااچاااچ

-كتلك قبل عرس دعاء

-وسااااكتة حضرتج؟؟؟ شلوون مريم تسكتين عن هيج شييي

-ماعرف المن اكول انتَ ما احاچيك وخفت احجي لأي واحد من جماعتك ويوصلك الخبر بس هسة اشوف لازم احجي اطلس خايفة ابوية يجبرني

-لو يموووت ابن الوصخة وهااي المرة الجابهه مو امه يا فهيمة!!

-بس تشبهله

-امه ما موجووودة مالهه اثر هو بنفسه ما يعرف امه منو مرريم

-خايفة باجر راح يجونه يحجون بالمهر وابوية موافق

-على جثتيييي ياخذذج

عافني وفتح باب المطبخ طلع مستعجل رحت وراه مرعوبة لا يسويلنه كارثة بهالليل ما لحكت عليه طلع من البيت ركب سيارته وطار بيهه، ركضت لغرفتنه شفت بسملة نايمة وامي كاعدة تنتظرني معصبة..

-ام مريم: وين رحتي؟؟ دورت عليج البيت كله ما لكيتج!!

-ماما جنت بالمطبخ واطلس اجه وحچينه شويه وشسمه كتله على مالك و

-چنتي ويه اطلس بالمطبخ؟؟ هذا السبب مقفولة الباب؟؟؟

-اطلس متخبل طلع من البيت خايفة يصيرله شي يمكن راح يتعارك ويه مالك

-هاي شنو ولج ليشش

-مو كتلج حچيتله عن خطبة مالك راح اتصل بواحد من الولد يلحگو

هزت راسهه امي موافقتني رحت على موبايلي اول اسم صار بوجهي عمر، دكيت عليه بلغته كلشي وكال راح يحل السالفة..

-مريم: يارب يتصلون على حمزة

-ام مريم: ان شاء الله خير حبيبتي بنيتي لا تخافين

-والله راح يوگف گلبي عمت عينيي ليش حجيت بله صارله شي يمة گلبي

حطيت ايدي على گلبي حتى النفس ضاع مني الخفقان اخذني شكد ما قوي احس بصدري يهتز ويه دگات گلبي، لزمت ايدي امي تفركهه وتهدأني وتحسست المحبس اللابسته..

-هذا منيلج المحبس مرايم

-نور وين ماما رجعت؟؟

-اي رجلهه اخذهه حتى الزفة ما حضرتهه

-اووف لو موجودة يجي عبد القادر ياخذنه

-وين ياخذنه؟

-يرجعنه للبيت اقنع ابوية ميستقبل شمسون باجر بالتلفون ميسمعني ويحضرني اعرفه

-اهدأي بنتي ماكو شي ان شاء الله ارتاحي تعالي نامي

-ماكدر انام ماكدر

-مريم شنو هذا المحبس بأيدج منين؟

-مو وكتهه ماما فدوة

سكتت بس ما عاجبهه كعدت على السرير وبحضني تلفوني انتظر رد عمر او اتصال من أي واحد من الولد، طالت السالفة امي غفت بمكانهه واسمع ونات بسملة صارت نار من الصخونة..

ساعة مرت على طلعة الاطلس ومحد من الولد خابرني ولا يجاوب اتصالاتي، كمت للمطبخ اخذت طاسة وحطيت بيهه مي اسوي لبسملة كمادات، الساعة عبرت الـ 1:30..

رجعت للغرفة احط الوصلة على راس اختي بلكت تفك الصخونة سودة عليه ترجف وتون، عين على بسملة وعين على موبايلي هلكت هلاك نوم ميجيني وعقلي ما وگف من التفكير..

اجه ببالي اتصل بوحدة من البنات بس كلت اتصل على حمزة اخر مرة اذا ما جاوب اشوف سارة، دكيت دگة مطولة اخيراً جاوبني..

-استاذ حمزة انتو ووين

-حمزة: راجعين للبيت مريم لا يظل بالج

-اطلس وياكم؟؟

-اي هذا جبته وياي

-شصار الله يخليك لتضم عليه

-ما صار لا تخافين فضينه السالفة، مع السلامة

طبگه بوجهي يبس ريگي مرعوبة رجعت اتصل على عمر جهازه مغلق، ما خطر ببالي ولا واحد بالمية راحو لمالك وطيحو حظه بالكتل!!

نمت ليلتي عين مفتوحة وعين مسدودة موبايلي على صدري ما ذبيته ولا ثانية، غفيت لدقايق وحسيت بأمي تصحيني تكول ابوية اجه علينه..

-ماما ساعة بيش؟

-بالعشرة الصبح مرايم يله كومي

باوعت للساعة بجهازي فعلاً بالعشرة بسملة مو بفراشهه والفراشات مرتبة، كمت لبست حجابي عدل وطلعت للصالة شفت دعاء كاعدة وبصفهه علي لازم ايد ومحاوط كتفهه بأيده الثانية..

مجرد شافتني كامت تجيلي حضنتني وباركتلهه باوعت لوجهها اتطمن عليهه تشع نور وراحة وجمال ابتسمت على ابتسامتهه الفرحة بعيونهه والسعادة تنفض من وجهها..

-مريم: تريگتي؟

-دعاء: اي كلنه اكلنه بس امي ماقبلت نگعدج تكول الليل كله ما نمتي

-لو مگعدتني دعيوة حرامات

-تعالي تعالي

جرتني للمطبخ وفتحت الثلاجة طلعت منهه اجبان ومعجنات وهواي شغلات تجيب وتحطه على الميز مال الطعام..

-مريم: گعدي انتِ عروس اني اطلع واكل

-تصدگين هذا ابوية جابه الريوگ

-صدك!!

-والله العظيم من الصبح اجه محمل اشكال وانواع ريوگات اشكال اجبان ومربى ومعجنات وبيض وكلشي تشتهي عيونج

-مدا اصدك تطلع من ابوية

-الحمد لله مرايم رفع راسي عمتي ظلت شكد تمدح وتتشكر وتكول تزحمتو وعلي هم هواي تشكر من بابا

-الحمد لله يارب

كعدت وياهه على الطاولة هي تسولفلي شصار الصبح واني صافنة على ابتسامتهه وعلى حركاتهه وخجلهه من تذكر "علي" مدتلي ايدهه تراويني سوار لابسته ذهب بفصوص حمر..

-دعاء: هدية صباحيتي من حبيب گلبي

-يا روحي مهناية

-وهاي الكلادة عمتي لبستني وهذا الخاتم كالت من عمر هدية

فرحت على حبهم الهه وحماسهم بوجودهه بيناتهم كامت واشرت على المطبخ كله وكالت..

-حلو صح مريوم

-يجنن عاش ذوقج وان شاء الله متشوفين غير الراحة والاستقرار

-مريم شبيچ

-شنو حبي

-احسچ زعلانة احد ضوجچ بشي؟

-اي البارحة الاطلس عرف بمالك خطبني

-يمممة وشصار

-مادري محد ديجاوبني و.. واحم

مديتلهه ايدي وركزت اباوع لردة فعلهه مافهمت عليه..

-دعاء: شنو شبيهه ايدج

-باعي

-دعاء: شنو هذا

-محبس!!

-اي؟

-ولج بااعي

-اي حلو يخبل منيلج هذا اللماس؟

-ايييي ولج بااعي زين

-من سارة؟

-غبييية البارحة الاطلس خطبني!!

-چذاااااااابة

-اششش صوتج

-لا لا لا والله؟؟؟؟

-اييي ولج اييي هنا بمطبخكم خطبني

-عزه العزززاج مريم غير تحجييين

-اي مو دا اكلج هسة

-من البارحة لازم تگليلي شلون سكتي

-ياا وشلون اجي اگلج وانتِ ويه علاويتچ

-ميهم دگي علينه الباب لج عيني شنو هالخبر اليجنن الف الف الف مبروووك

صرخت مبروك بصوت عالي وحضنتني لزگت بيه لزگ تهوس وتضحك وتهلهل بصوت ناصي، دخلت بسملة للمطبخ تصيحلي حتى نروح وشافت دعاء..

-بسملة: شكو دعاء حامل؟

-دعاء: لج لاا مرايم انخطبتتت

-بسملة: من مالك الغثة ادري

جرت ايدي دعاءتحطهه بوجه بسملة تراويهه الخاتم وتحجي بحماس..

-دعاء: الاطلس خطبهه البارحة ومريم وافقتتت

-بسملة: هلاااااااا ولكم طگووو طگووووو كللللوووووشششش

-زهراء: هههه هلاهل وفرح شصاير

نزلت ايدي بسرعة من دخلت عمة زهراء مبتسمة وكاشخة على اخر حباية..

-مريم: عمة فرحانين لدعاء ودنباركلهه

-زهراء: اروح فدوة لچنتي الحلقومة

جرت دعاء تبوسهه وحضنتهه لصدرهه متقبل تبعدهه عنهه تمسح على راسهه وتجر حنچهه تبتسم بوجهها..

-زهراء: الله يرزقكم بالذرية الصالحة حبيبتي بنيتي

تشكرنه منهه وكعدت اكل شوية، ودعنه دعاء وانطلقنه لمدينتنه لا شفت اطلس بعد ولا شافني..

**

"سارة"

انتقلنه نعيش ببيت حمزة صار شهر بس بعده البيت ما مرتب مثل ما اريد، دا اتعب هواي بس ميهم فرحانة ومتونسة صار عندي بيت وحدي واثثته مثل ما اريد واني وحمزة النه خصوصيتنه وماخذة راحتي باللبس وكلشي..

لكن من رجعت من عرس علي ودعاء البارحة كل هالوناسة والفرحة الي بداخلي تبخرت، خفت احس مكتوبلي اعيش بتعاسة ابدية كلما اكول نسيت وخلص الفات مات واني هسة متزوجة وحامل ومرتاحة يجي شي يذكرني بالماضي..

كعدت الصبح متأخرة گمت سبحت وبدلت قررت ارتب البيت واتناسى شوفة فاهد البارحة، ماعرف هو فعلاً اجه لو اني تخيلته سألت رقية واسيل گالو ما شافو واكيد حمزة ما شافه چان ما سكت اووف يارب احفظ عقلي من الجنون..

رحت للمطبخ اشوف شنو دتسوي غده المساعدة الجابهه الي حمزة وصاه تكون طباخة ماهرة لان ولا طكة بالطبخ اني، كشفت الجدورة وفحفحت الريحة..

-عاشت ايدج حبيبتي تعالي هسة ساعديني نكمل ترتيب المخزن

اخذتهه ويايه ننظف وننظم المكان ما حسينه بالوقت يمشي الا من سمعت تغريده وهو يصيحلي..

-كنااري.. وينهه كناري

-هنااا حبيبي اجيت اجيت

نفضت ايدي ونزلت شعري ذبيته على چتافي مثل ميحب باوعتلي المساعدة ضحكت واشرتلي بأصبعهه "اوكي" عود طالعة حلوة..

-حمزة: هاي شنو

-سارة: روح روح هسة تتوصخ اني جايتك

طلعت وياه بره المخزن تأكد من المساعدة ما اجت ورانه ونزل يقبلني، ابتعد مني مبتسم رديتله الابتسامة وحطيت ايدي على صدره..

-جاي من وكت

-لا وكتي هذا بس انتِ ناسيتني

-والله انشغلت شوف البيت ينرادله هواي ترتيب

-مو گتلچ اجيبلچ مساعدين وعمال يرتبون كلشي بس راسچ يابس سارونة

-احب اسوي بيدي اريد استمتع

-استمتعي بس انتبهي على يوسف الصغير

-بعيوني يوسف وابو يوسف

راح يبدل واني صبيت الغده وكعدنه ناكل ونسولف مثل العادة، احچيله شنو سويت بيومي من اول ما افتح عيوني لحدما انام وهو نفس الشي يشاركني كلشي وهذا احلى شي اشوفه بعلاقتنه..

-شوكت نعرف ولد لو بنية سارة

-بعد اني هسة حامل بنص الثالث كالت الدكتورة لنص الرابع او الخامس ياله يبين

-متحمس اعرف شنو جنس الطفل

-شنو تتمنى حمزاوي

-مو كتلج كلشي من الله حلو

-بس انتَ تريد ولد

-لو قرد هم راضي

-ههههه حمزة استغفر الله شنو قرد حرام عليك

-اشاقيچ گلبي، بس والله كلشي من الله حلو يجي يوسف تجي ليان كلشي حلو

-اريد ليان اني يارب بنية

-يله يابة يارب بنية

-حمزاوي سؤال بس اتمنى متضوج ولا تتحسس

-ماضوج منج كولي

-حجيت ويه غدير؟

ذب الخاشوكة وذب وياهه نفس، رفع عيونه عليه مبتسم وحرك راسه اي..

-حمزة: حاچيتهه

-ملتزمة بالعلاج لو تضحك علينه؟

-ملتزمة البارحة شفتهه بالعرس وحچيت وياهه نسيت اگلج

-هاي شنو ليش تحجي وياهه واني مو يمك!

-حبي صارت بوجهي استحيت شفتهه تباوعلي ومبتسمة كلت اسلم عليهه واسأل عن علاجهه

-وشكالت؟

-حلفت ملتزمة بالعلاج وماعدهه أي مشاكل

-الحمد لله

ارتاحيت غدير راح يصيرلهه شهرين ملتزمة بالعلاج بعدما فتحنه الموضوع ويه الاطلس قنعهه ترجع للدكتور وتكمل رحلة علاجهه، حمزة متابعهه اول بأول صح اضوج وانقهر من يحاچيهه بس بكل مرة اكون موجودة وياه من يفتح وياهه موضوع العلاج سواء مكالمة او بالواقع بس ما اخليهه تشوفني او تحس بيه..

كام يغسل شلت المواعين حطيتهم بالسنك ورحت وياه للغرفة يتمدد وكالعادة انام على صدره يلعب بشعري ونبقى نسولف لحدما ينام..

-حمزاوي البارحة طلعت بالليل ليش؟

-رحنه ربينه مالك ورجعنه

كمت بسرعة كعدت على حيلي استمعله وهو اردف..

-النذل خاطب مريم

-مالك خاطب مريم؟؟؟

-اي ويريد ياخذ اهله ويروح يتقدملهه رسمي، البارحة اتصل بيه عمر مفرفح

-عمر مفرفح ليش؟

-هههههه يغار عليهه خرب عرضك عمر

-عاد عمر يغار على الرايحة والجاية

-والعباس احلى طبع بي غيرته حلوة فزعته ويه كل بناتنه

-صحيح لسه اتذكر من مرة واحد بالجامعة تحارش بيه اجه طيح حضه يگله شلون تتجرأ وتتحارش بخطيبتي

-شنووووو

-هااا

-كال خطيبتي؟؟؟

-اي هاي قبل قبل

-شنو قبلل ولج ما صار هواي متخرجة من الجامعة انتِ

-اي شعليك جنت متزوج اختي انتَ

-اهوووو سارة

-حمزة لتكبر الموضوع اصلاً لولا عمر جان متت من الخوف والله اتذكر تخربطت بيومهه واشترالي بطل عصير

-اخخخ الله واشترالج عصييير

-اي اي وكرواسون وگلي لا تخافين اني بظهرج واعمي عين التعاينلچ

-اشتتتتعل هو وظهره

-هاي بدال ما تفرح

-ما افرح لاا

-تره حتى لرقية واكف بالجامعة صگارهم عبالهم خطيبهه هههههههه

-خرب غيرته خاطب نص بنات العالم

-تره هو ما حچى ولا رقية حجت بس مرة راح لجامعتهه يشوف اصدقاءه وراحت تسلم عليه وطلعو عليهم اشاعة عاد انتَ متعرف الجامعة شلونهم

-اعرفهم عدل

-المهم كملي شصار

-اي اتصل بيه ورحت وراه خابرت مسلم عرفنه الاطلس هاد على بيت شمسون ربج وصلنه قبله بيوتنه اقرب، بس شفناه سفط سيارته لزمناه نسمع شكو اني سمعت مالك خاطب مريم نار وشبت بضلوعي

-اهووو عاد كلكم هسة غرتو

-ولج مرت ابن خالتي يخطبوهه واسكت عمت عيني

-طليقته تره

-ماكو طليقته مرته هاي

-اي اي كمل

-سألنه الحرس مالك موجود كالو لا طالع عاد احنه نعرف وين يديح هذا المسربت رحنه للنادي اليسهر بي ويطفى بي على الاخر من الشرب واستلمناه وين اليوجعك جماعته وياه وهم لزمناهم خبزناهم

يحجي متحمس وفرحان متت ضحك عليه حمزة مو شخصيته هاي ولا شخصيته يتباهى ان كتل واحد بس هالمرة روحه شايطة منهم..

-سارة: كمل كمل شصار بعد

-گوة شلعت الاطلس منه تخبل الزلمة فقد عقله كلت هذا هو صاحبي تسودن عيونه نطت وروحه راحت

-حلو حلو كمللل

-سارة هاي مو قصة صدك صار تره

-اي ادري

-چا ليش متحمسة عبالك جاي اقرالج قصة

-مو سردك حلو كمل حباب

-المهم، دماية صارتلج عمر المخبل بعد اتدخل واللعب بيهه يابو سميرة

-لك كفوووو

-هسة غير تخلينه نكمل

-كمل الك المايك

-ماحجيلج صارتلج ناس فوك ناس حاط ايدي على گلبي خايف يوصل الحجي ويطلع ولو هذا المكان ما تطلع منه سالفة الي يصير بي يبقى بي ويندفن ولد شمسون قمة بالانحطاط والقذارة كلنه نعرف مالك شيدور وشيحب وخطبته لمريم مو حباً بيهه عنده غاية وهي يكسر خشم الاطلس ويضغط على عمي محمد

-وتالي؟؟

-تالي حمت السالفة مو مال ابقى اتفرج وذولة جماعتي الهتلية تخبلو فضيت السالفة بكم راشدي على كم چلاق على كم تفلة على كم سبة مرتبة واخذتهم وطلعنه

-اوووووي احبككك

بسته بخده حيل شلعته شلع..

-حمزة: تعالي بوسيني بعد منا

-هههههههه احبببك

بسته بعد وهو مكيف متت عليه من يحجي ممتعودة على هذا اسلوبه الاكشني وفرحانة بي..

-سارة: حمسه والله مو اصدقائك همه ولدك صدگني ولدك

-اي لانهم مزعطة ومكرهيني الدنيا بس احبهم الادبسزية

-حبيبي حبيبي اموت عليك

-شو اليوم مبذرة كناري بالحب

-اروحلك فدوووة گلبي ابو جهالي ههههههه

ضحك من كل گلبه ورجعني لحضنه، وخرت عنه بسرعة من تذكرت..

-سارة: اكلك وشصار بعدين خاف هم يخطبهه هذا المقرف

-شحده عمي محمد تدخل بس سارة الاطلس ما يدري اني حجيت ديربالج يطلع الحجي

-لا ماكول بس شنو حجيت وياه؟

-گتله اذا مالك تزوج مريم تنسى ابنك يعوف الشركة وتنهدم على روسنه هو الاطلس صارله شهرين شايل ايده وهالكد خسرنه چا لو عافنه وراح والحسين يطيح حظنه

-مستغلين اخوية مووو

-مستغلين عقله اي وهو يعرف هواي مرتبلنه امور وممشيلنه شغلات عنده قبول، متكلم، وجميل والنسوان تخرب على هالسوالف

-شعليهن النسوان

-لان شغلنه مجوهرات ومتعلق بالنسوان يا مرتي الحلوة

-اهااا فهمت وابوية شكال بله؟

-كال اني احل السالفة بعد ماعرف شنو سوه

-خاف ميكدرلهم؟

-هلووو هذا منو ما يكدرلهم؟

-بابا

-سكتي سارة سكتي غير يسووهه على رواحتهم لو تدخل عمي محمد

-ليش يا ترى

-لان شمسون يتدعون محمد لازم عليهم لزمة وخانگهم بيهه بعد الله اعلم شنو هاي اللزمة

-اويلي احب بابا

-ديلا خليني انام تعبت

-تعبتك حبيبي

-ولج انتِ من دون الكل تعبج راحة تعالي يمي تعالييي..

جرني عليه وبده بسوالفه الرومانسية وغزله الحلو ولمساته الجميلة...

**

-ما اقبل

-احمد: ولج ليييييش

-مريم: ماريد اتزوج مااريد

-احمد: خوش ناس خووش رجال شبيچ انتِ متخبلة

-ما اريد بابا واكيد ما راح تغصبني لان تعرف زواج الاكراه باطل!!

-احمد: جايين العالممم شردلهم خبررر

-انتَ اصلاً ليش انطيتهم موافقتي؟؟؟

-ما خابرتهم ولا رديت موافقتج من وحدهم كالو راح يجون اليوم

-هيج من الله كالو راح نجي بدون لا تبينلهم احنه موافقين؟؟

-احمد: وروح امي وابوي ما حجيت ولا انطيت موافقة همه كالو راح يجون نسولف سوه وهذا هو

سكتت خفت اگله مالك البارحة مراسلني وكايل راح يجون علمود يتناقشون بالمهر خفت ابوية يچلب ويركب راسه اكثر ويجبرني اتزوجه..

حرت وانشلع گلبي اطلس ما اتصل بعد ولا يرد على اتصالاتي ولا واحد من الولد انطى خبر، ضاگت بيه الدنيا وكعدت ادعي ربي يمرر اليوم على خير..

صار العصر ومحد اجه منهم ابوية يلوب بالبيت وكل شوية عايط بينه متوتر، وحدي بالبيت محد يمي بسملة بقت عدهه دوام ودعاء تزوجت ونور ببيتهه تعبت وانهد حيلي..

بقيت على تواصل ويه بسملة خطية ما عافتني ولا ثانية من دخلت جامعة ابوية اشترالهه موبايل، شركنه دعاء ويانه عافت خطارهه وكعدت بغرفتهه ونور هم شركناهه، يهدأن بيه ويصبرن بس احس روحي طافية ماعندي طاقة لشي..

-نور: راح اجيكم اني مرايم هسة بس انتظر عبدو يكعد والله اجيكم لتبچين

-مريم: كعدي ببيتج نور لتسببيلچ مشاكل ويه رجلچ بسببي

-دعاء: نوره حبابة مو مال عركات جديدة رجلچ خوش رجال لا تضغطين عليه

-نور: اي حبيبي عنده شغل هالفترة بس اني اعرف اذا اگله اروح يقبل

-بسملة: گعدي عوفي الرجال خلونه حايرين بمرايم

اذن اذان المغرب وما حاسة بروحي ظلمت الدنيا سديت الاتصال وياهن من سمعت امي تصيح تريدني اروحلهه رجليه متحملني اكيد وصلو، طلعت من الغرفة بطني ماغصتني راح اتقي..

-ها ماما

-ام مريم: تعالي شيلي الضيافة

-شنو

-تعالي ضمي الضيافة لا تترطب المعجنات

-شلون والخطار؟

-چنهم ما راح يجون ضميهن امي

هزيت راسي اي من لا وعي عافتني امي وطلعت من الاستقبال تركتني وحدي، بيدي موبايلي فتحت رسالة مالك الدزهه البارحة اتأكد شكاتب قريت الرسالة مرة وثنين وعشرة هو كاتب بالضبط "باجر اجيكم حتى نحجي بالمهر اريد اشوفج عود"..

نفضت عقلي من الافكار وشلت الضيافة ارجعهه بالمطبخ، ابوية نااار كبريت صاير يصيح ويتعارك ويه ظله ويحجي عليهم شلون ضحكو علينه وشلون خذلو وما اجو..

اليوم كله اذني وعقلي وروحي تعلگت بالباب اخاف تندگ بأي ثانية بس ما اندگت! اندگت ثاني يوم لغرض اخر غرض خلاني ابچي من الفرح واطير واني بمكاني من الوناسة..

محد گلي ولا احد انطاني خبر ماعرف شنو الغاية يمكن ما رادوني انكسر او اتوقع شي ويطلع العكس، چنت بغرفتي بـ 3:30 الظهر بالضبط حاطه زيت لشعري وسمعت صوت هوسة اجت من بره..

استغربت منو اجه وليش امي ما كالت جاينه احد ليش ما صاحتني؟ فتحت الباب امد راسي بس الصالة فارغة والصوت جاي من الاستقبال..

كمت اتمشى اطلع اشوف شنو مديت بس عيني اباوع من الفتحة الصغيرة ما مطبوكة الباب عدل واشوف كومة زلم فكيت عيوني روحي جاي تنسحب مني اجو جماعة شمسون اجو!!

رحت اهرول اتعثر بخطواتي اصعد فوك لغرفة امي وابوية فتحت الشباك اشوف منه، وخرت البردة گلبي يفور لكن طفت فورتي والنار البگلبي واني اشوف..

عشرات الرجال يعبرون باب بيتنه ويدخلون جوه والاطلس متقدمهم وعمو محمد كذلك، عمر وحمزة وعلي ومسلم كلهم واكفين بصفه وزلم هواي هواي كلش حتى ابو حمزة واستاذ حازم وكل الناس المهمة الاعرفهم جايين يطلع عددهم فوك الـ 30 نفر!!

غطيت حلگي وغصيت بضحكتي مدا اصدگ عيوني ما اصدگ الجاي اشوفه، بقيت اتأمل الاطلس واگف بطوله الفارغ متأنق على اخر حباية، راسم ابتسامة واسعة على وجهه ويرحب بالموجودين ويدخلهم من الباب..

كل واحد يعبر يظل دقيقتين يحجي ويه عمو محمد والاطلس والولد حسيتهم ما راح يخلصون الا من شفت ابوية يدخل اخر واحد ويطبك الباب وراهم..

مسحت عيوني راح يوكف گلبي من الفرح نزلت اركض لامي ادورهه مالهه اثر رحت اتصل بيهه جاوبتني تلهث..

-ماما انتِ وين؟؟

-بالمخزن اني انتِ وين

-اجيتج اجيت

رحتلهه بالمخزن شفتهه مخبوصة تطلع بالصواني الجديدة الضامتهن ودافنتهن بقاع الهامور، سويت روحي ثگيله وعلساس كلشي ماعرف بصعوبة سيطرت على ابتسامتي..

-ماما منو اجه؟

-الاطلس وابو وجماعتهم كلهم يله مريم يله ساعديني ما مسويه ضيافة تكفي شلون بينه جايبين المغرب كلهه

-شو ما كلتيلي الاطلس راح يجي؟

رفعت راسهه ونظرتلي نظرة مطولة ابتسمت ولزمتني من متني..

-خفت يكونون جايين لسبب ثاني وانتِ عبالج الج خفت ينكسر خاطرچ حبيبتي بنيتي

هزيت راسي متفهمة ورحت وياهه للمطبخ نرتب الضيافة، مسوية كيك بيت بس اكيد ميكفي نحتاج نطلع بعد، اثناء ما اني وامي نرتب الصواني اجانه ابوية وجهه اصفر ومتوتر..

-ام مريم: احمد شبيك

-احمد: ولج ذولة شكد جايين هدو علينه فد هده وين نگعدهم افتحلهم بوابة الصالة؟

-ام مريم: اي نبقى بالمطبخ احنه، بس شنو سبب جيتهم عرفت؟

-احمد: چنهم جايين يخطبون مريم

عضيت لساني ويه جملته وهو طلع وعافنه اندارت عليه امي تباوع لأيدي اليمنه ورافعة حاجبهه مبتسمة..

-ام مريم: المحبس الشفته بيدج بعرس دعاء من المحيط الاطلسي

-ماما

-جاوبي

-اي منه هو گلي راح اجيب الدنيا واجي اخطبج بس والله عبالي يبالغ

ضحكت امي بفرح ووناسة بفخر ورفعة راس حضنتني وهلهلت بصوت خافت بيني وبينهه، بقينه بالمطبخ نسمع لصوت عمو محمد القوي الرزن ميوصللنه بالضبط شنو ديكول بس واضح كلامه مهم لان الكل سكت..

بعد دقايق من كلامه سكت ما سمعت غير "اجينه نخطب كريمتكم" بس هذا الوصلني لان حچاهه بصوت عالي واثق، رجعلنه ابوية ملامحه جامدة..

-ام مريم: هاا احمد شصار

-احمد: جايين يطلبون مريم

-ام مريم: يااا ما شاء الله الحمد لله يارب

-احمد: هاي بس خطبة وجاب الدنيا كلهه لعد بالعرس شيسوي

ابوية مغثوث وضايج واعرف السبب شمسون من البارحة ما فك ولا ابتسم حس بالاهانة والاستصغار..

-احمد: شگلهم هسة يردون المهر باجر

-ام مريم: غير تفكر البنية شنو يردون المهر باجر

-احمد: دفضوهه شنو هالمطمطة هو رجلهه واجه يرجعهه وجاب الدنيا كلهه وياه بعد شتريدن اكثر

-مريم: بس حقي افكر

-احمد بنتر: مرررايم كافي بابا كااافي

-مريم: بابا اريد افكر شبيكم انتو

طلع من عدنه متنرفز وطالعة روحه الظاهر گللهم البنية تريد تفكر لان سمعت صارت بلبلة واصواتهم اعتلت، ربع ساعة گعدو بس قدمنالهم الضيافة وطلعو..

طلعت من المطبخ بوجهي لغرفتي شفت اربعة مكالمات فائته من "الاطلس" وديدك بالخامسة، جاوبته..

-الو

-الاطلس: مريم شنو هذا التصرف

-شنو يا تصرف

-شنو اريد افكر احنه مو اتفقنه

-اطلس اريد افكر شسالفة انطوني مجال

-وين اتحمل اني يبوووو على حظي

وخرت الموبايل ميتة ضحك على صوته وسوالفه، رجعته من كال..

-والعباس مريم لو بطلتي عليه ماكو اگلب الدنيااا

-على كيفك عيني

-وعلي اسويهه اخطفچ من بيت ابوج خليني اشوف منو يوكفني

-اطلس انطيني وقت افكر يا عيني احسني مترددة

-مررريم اويلي يا مرريم

-باي اروح امي تصيحلي

سديته وكمت اسمع لرعيد ابوية يهدد راح يرجعلهم خبر احنه موافقين حتى تفض السالفة، شكد تنرفزت ومتت بدمي بس ما حجيت خليت امي تتفاهم وياه..

وهيجي شلعت گلبه شهر ضبط احنه ما مرجعين جواب الاطلس تخبل ليل نهار يتصل بيه وما اجاوبه اجت خالة حصة واجت ام الولد واجت غدير وسارة ورقية كلهن يقنعوني، ادري حقارة مني وادري دا اطوخهه بس اريد ارجع اعتباري ماريدهم يكولون ما صدگو ورجعتله..

-دعاء: اي بس مو شهر ونص مريم!!

-مريم: اوادمي واعرفهم عدل دعاء

-نور: احسن خليهه ترجع حقهه محد عاشت معاناتهه لنظل نتفلسف بكيفنه

-مريم: اعرف غدير شنو هي الطلعت عليه سمعة اول ماتزوجت اخوهه ابوية باعني وهي جذبت ووصلت للاطلس اني مو خوش بنية ويمكن ما اطلع بنت ابوية جذبت چذبات بكد راسهه واكبر علبو الجيران گلولي هي مو خوش ومن جوه الجوه، خليهه هي تجي تتوسل حتى اقبل بأخوهه وهاي مرتين تجي وبنفسهه تحجي تريدني ارجع

-بسملة: لج اييي ربيهه هاي الحية ربيهه

-دعاء: بس غريب تطلع منهه هاي الطلعات

-مريم: الاطلس حبي اخوهه يطلب منهه تتنازل وتكسر راسهه شوية يعرفهه سوسة والهه ايد بخراب زواجنه من البداية

-نور: عفية عليج عفية اريدج قوية رجعتي كرامتج وراح ترجعين مرفوعة راس كفو

-مريم: بس نورسين بقت اااخ راح اموت من وراهه شلون اخلص مادري

-دعاء: خلصتي منهه حبي بس هالسنة ويسقط عقدهم يفكون الشراكة علوش گلي والاطلس مبتعد عنهه كلش ولا يتقرب منهه ولا تهمه بشي

-مريم: ان شاء الله يبقون هيج، اني مو حقيرة بنات ولا اريد اخرب صداقتهم بس خلص كافي طوخت وزادت عيب وحرام

-بسملة: ثانياً هو متزوج وغصباً عليهه تستوعب هالشي هاي السحلية

اخيراً اجه اليوم رجعتلهم جواب اني موافقة لكن عندي شروط، وطبعاً قبل لا يجون ابوية أمر..

-احمد: تطلبون مهر 70 الف دولار

-ام مريم: لااااا احمد زودتهه كلش

-احمد: يستاهلون منو گله يطلگ

-بنتك گلتله يطلگ!!

-احمد: وليش كسر گلب بنتي طبعاً يطلگهه مو زين جاي نرجعهه اله

-مريم: بابا اني اريد اطلب مهري هالمرة

-احمد: مريم گلت تطلبون سبعععين

-مريم: اذا تطلب هذا المهر ما اتزوج

-احمد: شو انتِ بكيفج صايرة تأمرين وتنهينن

-مريم: بابا والله ثم والله اذا جبرتني على مهر معين قسماً بالله ما اقبل انزوج اطلع اگلهم اني رافضة

-احمد: ام مررريم لزمي بنتج وعلميههااا

-ام مريم: احمد كاافي تعرفهه عنودية وتسوي البراسهه

-احمد: اكسره لهذا الراااس تمشي كلمتهه عليه امشيي ولي لغرفتج بت الفگررر

رحت لغرفتي اطحن بروحي تمنيت املخ شعري من كمية الضغط الدا احس بيهه، نص ساعة واجتني امي تكول قنعت ابوج وخليته يسكت..

-مريم: شلوون

-ام مريم: گتله اني اوگف ويه مريم واطردهم مانطيهم بنتي

-وشكال؟؟

-سمعتي رعيده بس بقيت مصممة على رأيي والله اسويهه مريم ما اخلي ابوچ يكسرچ مرة ثانية

-هسة قبل لو لا؟

-كال سوي التردي

-شبيچ دمعتج بعينج ماما غثچ صح

-متعودة هذا حال اليتيمة مرايم كاعدة بالغربة وماعندي احد غيركم ابلعهه واسكت الحمد لله على كل حال

زاد قهري على امي وضجت على ضوجتهه، اجت خالة حصة وجابت كل البنات والعمة ونانا واسيل وياهم وكعدو واتفقنه على المهر..

-حصة: شنوو

-زهراء: شنو هذا المهر؟؟

-غدير: اهوو بدينه بهالسوالف

-سارة: غدير شبيچ شبيكم يا جماعة هي حرة!

-حصة: مهرچ قران ذهب وحجة بيت الله مريم بسس؟؟

-مريم: اي خالة

-غدير: سوالف البنت الطيوبة المتدينة الما تهمهه الفلوس بطلوهن رجاءً

-ام مريم: شنو هذا الحجي غدير خالة مو عيب والله حرنه وياكم

-زهراء: لا لا ام مريم عذرينه بالعكس مريم تأمر امر بس مو من مقامهه هيج مهر بسيط القران على راسي بس هي تستحق اكثر والمهر حقهه الكامل

-ام مريم: ام عمر المهر لشنو غير تكمل احتياجاتهه مريم عدهه كلشي ما محتاجة واني مجهزتهه جهاز كامل

ابتسمت واني اباوع لامي ما مجهزتلي شي بس متأكدة مستعدة تداين حتى تجهزني بس لا يمكن اسمح بهذا الشي عندي فلوس ضامتهم من رواتبي نويت اجهز نفسي بيهن واكول علساس اهلي جهزوني كدام عيالي..

زادت الثرثات على المهر ولانه كلش قليل بنظرهم بس ماريد مهر فعلاً ما محتاجته اصلاً ماردت اطلب بس امي كالت ميصير هذا حق كل بنية، اجه ببالي قران ذهب وگلتهه هيج ومتأكدة لو ابوية يعرف يتخبل..

اخيراً رضو بالمهر واقتنعو وخالة حصة اصرت يجيبولي كلشي حسب الاصول هدية منهم مو اله بفلوس مهري تشكرت امي وبدينه نحجي بشروطي، خليت امي تحچيلهم..

-ام مريم: ام اطلس نريدلهه بيت وحد لان تعرفون بيت العيال وحدة متاخذ راحتهه وباجر عگبة يصير عدهم جهال هم تريد مكانهه الخاص و..

-حصة: بدون ما تكملين ام مريم تم بيت الاطلس موجود سياح نياح يطرد فيه الخيل تأثثه مثل ما تبي من اول ويديد هو وصاني وگالي اوصل هذا الكلام، كلشي تبي مريم حاضر وتم تآمر وتدلل

-ام مريم: تسلمون والله متقصرون، ومريم متريد عرس

-غدير: ليش مو علساس هالهوسة كلهه علمود عرس والله دوختونه

-زهراء: غدير احترمي!!

-ام مريم: هي متريد ميعجبهه تكول من بيت ابوية ياخذني هذا يكفي عندي

كملت امي باقي شروط من ضمنهه اذا اريد اشتغل بالمستقبل ميمنعني واذا اريد اكمل دراسة واخذ البكلوريوس يقبل وحچت باقي الشروط البسيطة الاطلس قبل عليهن كلهن بدون استثناء وبالليل من راحو دزلي رسالة يداهرني بيهه كاتب..

"لو تطلبين اروح للعراق مشي هم اسويهه المهم تصيريلي"

ضحكت وفرحت بهذا الحب وقدرته وحطيته بنص عيني، قدرت رجعلي كرامتي واحترم مشاعري اعترف بأغلاطه وما برر قبح افعاله بالعكس نبذهن واعترف وندم عليهن، ممكن هذا الشي ميرجعلي كرامتي كلهه بس سويت الاكدر عليه واهم شي خلصت من شمسون لان لو تمت خطبتي من مالك المجرم هاي كارثة!

**

-اكلج رقية ليش ما گلتي لغدير تجي ويانه

-رقية: وين تقبل بس نايمة اربعة وعشرين ساعة نايمة

-سارة: من وره العلاج يخليهه تنام يصير عدهه خمول

-اكلج ما تعبتي صار ساعة نفتر لا يأثر عليج المشي ويصير للبيبي شي

-لا اسم الله عليه ميصيرله شي بس نكمل هذا المحل ونروح نكعد

دخلنه اختاريت فستان لمهر اطلس ومريم وطلعنه نكعد بكوفي، حمزة ويايه على الدعسة كل خمس دقايق يتصل هاي اول مرة بحياتي اطلع وحدي اني ورقية ما عجبه الموضوع بس امي قنعته حتى اغير جو..

-رقية: سويرة خبصنه حمزاوي كافي والله وترني

-شعليج متصل بيج لو بيه

-مو اني وياچ تعبت

-دكومي كومي ماريد اكعد خلينه ناخذ الكهوة ونطلع نشربهه بالطريق

اخذت القهوة takeaway وطلعنه اني ورقية نتمشى بالطرقات الجو بعده بارد كلش ونتراجف من الهوا يگص بعضامنه.. واني امشي واشرب بالقهوة وگفنه صوت صفير اجه من ورانه..

اللتفتت ادور منين اجه ما شفت احد رقية طنكرت وكالت..

-خيولون ذولة الادبسزية لتلتفتين سارة

ايدتهه وكملنه طريقنه مشي ما رجعنه ويه السايق السوك قريب على بيتي وحابة نتمشى، دخلت لأفرع تختصرلنه الطريق تعبت كلش ووكفت اجر النفس ورجع تكرر الصفير..

-حمرتي

وگفت كل اعضائي من سمعت صوته المألوف، حطيت ايدي على بطني من الهبطة احس الطفل راح ينشلع مني، رقية اندارت وجحظت عيونهه وهي تشوفه ماكدر اللتفت ماكدر اخاف والله اخاف راح تموع روحي..

-رقية: امشي سارة امشييي

-لا سارة لا تمشين اللتفتي عليه

ما انطيته اهمية جريت ايد رقية وسرعت خطواتي بس اريد اطلع للشارع العام اريد اشوف الناس اريد اوصل..

-سااارة اللتفتييي علللليه

هرولت مسرعة خطواتي ورقية شايلة الاكياس كلهه وتهرول ويايه، طلعت موبايلهه تتصل بأحد وصرخنه مفزوعات من جر موبايلهه من اذنهه ورطمه بالحايط..

-فاهد: بيمنننن متصللللة

-سارة: فاهد شتريد شترريد

-فاهد: ليش ما تحاچيني ليييش

-وين احاچيك شبيك انتَ

ارجف واحجي اطك سن بسن رقية تسحسل بيدي واني جامدة بمكاني، نزل عيونه يباوع لبطني ورفعهن لوجهي..

-فاهد: انتِ حامل

-رقية: شكوووو وانتَ منو شتريد منههاا

-فاهد: من منو حامل شلون

-سارة بهمس: رقية امشي هذا مخبل

تركناه ورانه وكملنه خطواتنه بألف وا ويلاه وصلنه للشارع العام وهو لسه ورانه يتبعنه كلما اللتفت اشوفه ملامحه واجمة وصايبة ذهول كأن خبر حملي صعقه..

وصلت للشارع مالتنه واختفى ما بين بعد ركضنه ركض لداخل بيتي دخلنه وقفلت الباب..

-رقية: شيريد منج هذا المقررف شبي لااطش

-سارة: هاي ثالث مرة اشوفه ورايه مرة بعرس علي ومرة اني وحمزة طالعين وهسة هاي المرة

-وليش ما گلتي لحمزة؟؟

-گتله والله گتله بس كلما يلتفت ميشوفه عبالي اتخيل عبالي جذب من عقلي ديتهيألي بس حمزة ميسكت يكوم ويدور وميهداله بال وهيج گاضيهه صارلنه شكد

-سارة شلون هذا يخوف ولج هذا سايكوو

-ادري بي بس شبي عبالك مصدوم من شافني حامل

-انوب يكلج شلون ومن منو يخرع هذا مو طبيعي

-ياربي خلصني منه ياارب

-اتصلي بحمزة بلغي بسرعة

-اي اي

اتصلت بحمزة فوراً وبلغته بكلشي حتى بالمحادثة الدارت بيناتنه تخبل وقامت القيامة بيومهه رجعلي مدمى من فوك ليجوه داخل بحرب طاحنة هو وفاهد بس ما راح تفض ميفيد العراك متفيد كل هاي السوالف ناوين علينه نية گشرة!!

**

-دعااااء البرگع عدل لو لاا

-دعاء: عدل والله عدل ولج عدددل

-بسملة: لعبت نفسي شكدما عدتي هالسؤال مريم

-مريم: مادري ضوجني احسني مثل المخابيل

-سارة: تخبلين تخبلييين الله يساعد اطلس اليوم

-مريم: ااخ يمة اشش لحد تكول اسمه بطني تكوم توجعني

-نور: هلا هلا اليوم يومك يالاطلس

-مريم: يبووو عليجن سكتنن

-رقية: بعد هذا هو الاطلس ما راح نشوفه فص ملح وذاب

-سارة: تلفونه يغلقه بالليل ويستلم مريم

-مريم: سكتنننن راح اموت شنو هالرعب الله لا يوفقچن

-سارة: ديلا يلا لتبالغين مرايم قحط

-نور: اني ادري شكد غبرة اختي

-دعاء: دوخرن علاوي يتصل

-مريم: وين موليه ولج وييين تعوفيني راح يجوون

-دعاء: يا غبية اكعد وياچ بسيارة الزفة بس ادعي ما اتقيء عليج

-مريم: نور انتِ هم لزگو سيارتكم بسيارتنه حبابات فدوة

-نور: والله لوما العيب اخلي عبد القادر يزفكم

وكفت اعدل البرگع للمرة المية واباوع لروحي بالمراية، اي نعم اليوم عرسي بين المهر والعرس اسبوع ضبط ما شفت راسي من رجليه حتى الاطلس ما اللتقيت بي امي تكول خلي يصير اشتياق وتتحمسون على شوفة بعض بالعرس بس ليش هسة ما اشتهي اشوف وجهه وراح اموع من التوتر..

ماردت شي زايد لا عرس ولا حفلة ولا خبصة، زفة بيت تكفيني بدلة بيضة مخصرة على جسمي بسيطة بردان تول تسريحة شعر مفتوحة ومكياج ناعم ترابي وبرگع هالشي اكثر من كافي بالنسبة الي..

ماردت شي مبالغ بي، فكرة وحدة مستحوذة عقلي وهي فكرة يجون جماعة شمسون يخربون العرس خصوصاً بعدما عرفت الاطلس واصدقائه رايحين كاتلين مالك خفت يسويلنه مصيبة..

-رقية: كلللللللوووش وصل وصلووو

رجعت دعاء تهف بموبايلهه وبسملة تهز رقبة ام الركب اجتني مو گد هالسوالف والله شجاني وطيحت حظي بيدي لو مچبوبة وكاعدة مو اشرفلي..

-زهراء: اجه العريييس والكذلة تهفيييله

دخل الاطلس عليه غطيت بهدومي شبيه خجلانة شبيه راح اموت مريم بطلي عيارة وصيري ادمية بس وين وكل هالناس حواليه واليوم عرسي الحقيقي!

محرد باسني على راسي حتى ما حچى شي مستعجل الاخ لا خلاهم يهوسون ولا خلاهم يركصون..

-الاطلس: بعدين بعدين يله خلونه نطلع

-حصة: هاااو شفيك يمة خلينه نردح شوي

-الاطلس: يمة ردحي ببيتج مستعجل اني

-نانا: لا لا خلونه نحس بطعم العرس شبيك اطلس

-حصة: اي والله شفيك

-الاطلس: ولج نانا ولج يمة لا تفحطني تره اجيچن

يحچي بين سنونه راح يموت وهنه لزمنه الا يوكلني كيك والا يشربني عصير، وكل شوية صايحات يله يله خلونه نكعد ناكل كيك لو خلونه نسولف شوية لو..

-نانا: يااا هاي اسيلة تعبت ما تتحمل طريق

-اسيل: شنو يمته تعبت كلشي مابيه

-نانا: تعبت تعبت خلونه بعد شوية ننتظر

-الاطلس: نانا والعباس راح اجيچ ليييش تمرمرن گلبي مو كافية عليه مريم

-مريم: نعممممم

-الاطلس: لا لا منو كال انتِ مريم اني اقصد مريم هذيج

-مريم: ومنو مريم هذيج؟؟

-الاطلس: ولكم امشو نطلع بعددين نتناقش على يا مريم

گام بسرعة واللتهى يلبسني الكبوس ويضم وجهي خبص امي خبص لتخلين وجهها يبين وضمي صدرهه وايدهه حلوة بيضة تجذب ومصبغة ماروني ضميهه وهذا شنو لابسته خليهه تنزعه..

-مريم: يوووه شبيك شنو انزع بعد

-الاطلس: هذا شنو هذا ماحبه مو حلو

-مريم: كعب حذاء هذا حذاء اخيي

-الاطلس: لا تكولين اخي

-مريم: كعب هذا خطيبيي

-الاطلس: مو خطيبج رجلچ!!

-اهوو وخر بطلت ضجت

-سارة: لا لا دخيلج اطلس اكعد راحة

-الاطلس: شسوي حلوة واخاف من عيون السريرية

-حصة بهمس: هو انتَ اكبر سرسري ودايح

هي عبالهه محد سمعهه وحجتهه بهمس بس كل الموجودين سمعو شكالت وطگينه ضحك، زفر نفس متنرفز وامه تضرب على حلگهه عود التوبة وماعيدهه..

طلعوني من بيت ابوية الاطلس لازم ايدي يمشيني، وكف ابوية يودعني ووصه اطلس عليه مثل كل اب، تشكرو منه كلهم دمعت من الاطلس گال..

-بعيوني احطهه وغلاوة امي الماعندي اعز منهه

-احمد: بدون ما تحلف مصدگك تره مرايم عزيزة

بوسه للمرة الثانية ابوية فرحان كلش ومن البارحة يكول رفعة راس الاطلس ثبت حبه لمريم واحترامه الي، طلعوني بزفة ضخمة حيل سدو الشارع سد صعدت السيارة اطاطگ جريت ايدين دعاء اريدهه وياي وغدرتني ماقبلت تصعد تريد تروح ويه رجلهه لااا عافوني وحدي الحقيرات..

بعد هرجة ورقص وخبصة بالباب اجه العريس والكذلة تهفيله ركب السيارة وياي، سيارة مظللة كدرت ارفع الكبوس عن وجهي والسايق تفصلنه عنه فاصل..

-اخيراً مرمر

-اسكت

-هاي شكو

-اسكت لتحجي

-صدك جذب خرب حظي حتى بعرسنه!

-اطلس بطني توجعني اوووف راح اموت

-لا لا دخيلج لا مو وكتهه خرب مو وكتهه

-هي شنو المو وكتهه شبيك بالك وصخ!!

-شمدريني كلتي بطني توجعني مريم بس هالليلة صيري حبابة، لا لا شنو بس هالليلة فد شهر ابقي حبابة

-شهههر!!

-شهر ماطلعج من الغرفة وعلي

-يبوووو عليج يمريم تصخمتي وتلطمتي

-اي بس هاي الحاضرة بيهه تصيحين يبوو

-اكلك باوع شنو رأيك بالبداية نروح لحديقة عامة هيج بيهه خضار وحشيش ونتونس

-حديقة شنسوي بيهه وشنسوي بحشيشهه شنو طليان احنه

-حباب ماريد اروح لفندق

-ماكو نروح للفندق حجزت اسبوع مانطلع منه

-حرام عليك ليش هيج ليييش

-بس اصبريلي اني اعلمج

-اكلك اوكف هذا ليش السايق مدا يمشي

رفع صوته يصيح بصوت عالي كلش..

-الاطلس: ولك عمررر العااار جاي تتسمع علينه

-عمر: منو بحالك انتَ ولك هذا المسجل ما يشتغل وعلي ما ازفكم اليوم

-الاطلس: شنسوي للمسجل انعل ابو

-عمر: واكعد اسمع لفسوقكم اوووع

-الاطلس: صوچي اني خليتك تزفني وينه حمزة ينقذنه

-عمر: عوفه حمزة حاير بالحب دايخة وتعبانة اهمده حظي اي والله تفوو على حظي الخـ.... الخردلي

-الاطلس: فضنه حرك عمر لا تتفهى

-عمر: ماسوق الا يشتغل المسجل

-الاطلس: شغل بلوتوث وين عايش انتَ

-هو هذا الصخام ما جاي يصير

ابتسمت فرحانة اي راح نتأخر شوية باوعلي الاطلس عاوص عيونه، ميل جسمه عليه يقرب وجهه من وجهي..

-اطلس شبيك

-اريد اعاينلچ زين مشتاقلج انعل ابو البعد

-وشلون تشوفني وانت لاطش بوجهي

-اشوف معليج اشوف

-يووه استحي

-احبج احبججج

-عمر: اهوووووو شو دنلصمو هسة

-الاطلس: اذذذنك عمر اللصمهه

-عمر: اذب بيهه شمع شسوي انتو گرصو رواحتكم شوية

-مريم بهمس: اسكت عيب حباب عمر راح...

ما خلاني اكمل الجملة وتقرب يبوسني شلع روحي شلع گلبي راح يطلع من صدري ينبض بهمجية كل اطرافي رخت حسيت بروحي طايرة مشاعر مختلطة جميلة ومخيفة حاوطتني.. ابتعد شوية يلقط انفاسه وباوع بعيوني مبتسم..

-شعجب

-اسكت

-بادلتيني

-اسكت حباب

-احبج مرمر

-اني هم

-شنو

-شنو

-شگلتي؟؟

-كلت اسكت حباب

-قبلهه شگلتيييي

-اشششش حباب لتفضحنه اسكت

-ولج گلتي اني هم انتِ هم شنوو

-هيج ولشي انسى ولكم طلعوني منااا

-ما اطلعج والله الا تحجين

هجم عليه حاصرني بين ايده ميخليني اتحرك لا البيه اعيط ولا البيه افتح السيارة وانزل، شتت تركيزي من اعتلك المسجل عند عمر وحرك السيارة درت عيوني على اطلس اباوعله صرنه وجه بوجه..

-اءء شسمه اطلس تره ما كلت شي

-ما گلتي شي مو

-اي

-مرمرتي گلبي يمرمر

ضحكت مكممة حلگي جر راسي سندني على صدره وحاوط كف ايدي بكف ايده، قرب ايدي لشفايفه طبع قبلة عليهن وضحك مغمض عيونه..

-شبيك تضحك

-خايف احسد روحي والله

-اووي لتحجي هيج استحي

-مو عليج تره

-لازم يخربهه لااازم

-لا اتشاقه اي عليج خايف احسد روحي على هاي السعادة بحياتي ما فرحت گدما فرحت اليوم

-ان شاء الله دوم

-وياچ حبيبي

-اطلس اريد انام

-شنو تنامين وكتهه مريم

-والله نعسانة والطريق طويل حباب اريد اغفى شوية

-اااخ مريم ااخ

-هسة انام لو لا

-نامي يروحي بنص گلبي نامي

جر راسي على صدره وخلاني اتمدد شوية ضحكت على روحي وكتهه النعسة تجيني والله اخزي، رفعت راسي عليه وهمست..

-شكراً على تفهمك

-نامي بسرعة

-هاي ليش

-لان ما راح اخليج تنامين اليوم

دحست وجهي بصدره وضربت على كتفه ضربات خفيفة متتالية لزم ايدي عاصرهه حيل مجرد غمضت عيوني غفيت ما حسيت الا على نغزات شاربه على شفايفي وخدي..

-مرمرتي

-همم

-كومي حبيبي راح نوصل

كمت بسرعة فازة ادور عيوني بالسيارة واباوعله، نسيت حاطه مكياج فركت عيوني ونزلتهن باوعت لايدي متصخمة واطلس يفر براسه يأسان ويضحك خفيف..

-نسيت مكياجي شبيه ثولة

-حرمتيني من الزفة بله اكو عروس تنام بزفتهه

-اي مو طريق طويل تعبت بس صدك حرمتك؟

-اي بس فدوة الج

-شلون حرمتك قصدك رادو ينزلوك ترقصون ويه الولد

-اي

-اني اسفة ليش ما كعدتني والله انقهرت ليش هيج اطلس

-يمعودة اتشاقه وياچ فدوة الج الزفة وصاحب الزفة

-صدك

-رب الصدك

-مكياجي عدل لو تصخم؟

-كلج مصخمة حبيبي

-كول والله

بدون لا يحجي طلع تلفونه وفتح الكامره الامامية حطهه بوجهي فكيت حلگي على شكلي التاج معووج، المكياج مخربط الحمرة رايحة الكحلة سايلة هاي وعود شتا هو..

-چني سعلوة

-صح

-امنا الغولة

-هههههههههههههههههه تعالي اعدلچ لا تصيرين ميز للبنات

-عدلني بسرعة بسرعة

اخذ كلنس وطلع بطل مي حاطه بصفه بلل الكلينسه وصار يمسحلي الكحل السايح ابتسمت على تركيزه مثبتني بيده حتى ما اتحرك ويمسح على كيفه، بينما هو منشغل يرتبني صفنت اتأمل شكله مثل قبل..

المعروف العروسة وخواتهه وصديقاتهه يرتبون شكلهه ويعدلون مكياجهه قبل لا يشوفهه عريسهه بس هنا العريس الي هو الاطلس ديرتب عروسته حتى تكون اجمل ما يكون ومتتخجل كدام احد..

عدل شعري والتاج على راسي والبركع، تلمس خصلات شعري ورفع عيونه عليه مبتسم..

-ام العطوب

-يوووووه

-والعباس اموت عليه

نصى يبوس خصلات شعري وتفسق شويه وصعد يقبل خدودي وغير اماكن دفعته من تذكرت الحمرة ممسوحة استحيت احجي بس كلتهه..

-مريم: اطلس اريد احط حمرة بعد

-اي وينهه؟

-بجنطتي موجودة بس ماكدر اسيطر السيارة تمشي سريع

بسرعة مد راسه فتح الفاصل بينه وبين عمر وكال..

-عمر خفف شوية عيوني

فعلاً عمر خفف واني طلعت الحمرة من الجنطة واخذت موبايله حتى اشوف روحي، بقيت جنطتي مفتوحة وبحضني مبين منهه باكيت البسكت امي انطتني خاف اتخربط بالطريق، طلعه وفتحه انطاني وحدة..

-اكلي لا تدوخين

-شكراً

-اجيبج عصير شي منا خاف تعبتي

-وتوكف الزفة

-اوكف ابوهه هم

مثل المطي دمعت عيوني ردت ابجي ماتحملت ابقى كاعدة مثل الصنم چيتت عليه حضنته من رقبته بقوة حاوط خصري يبادلني الحضنة وكال..

-هاي كله لان اريد اوكف الزفة عمي اوكفلج الدنيا تك رجل بس بشرط كل يوم هيج تحضنيني وتتنفسين على رگبتي

-كافي لتصير فاسق عيب

ضحكنه ثنينه وجرني حط راسي على صدره اكلت البسكت وهو ساكن ما نطق، رفعت راسي اشوف شديسوي نزل عيونه عليه ومد ابهامه يمسح طرف شفتي..

-الحمرة شوية ملطخة

-اطلس انتَ شكد حباب

-ادري بروحي

-الغرور يابة الغرور، اكلك ما طلعت زفة هاي طلعت روحي وما وصلنه

-عود انتِ هم حاسبة هاي زفة

فزينه ثنينه على صوت هورن عالي كلش اجه من جانب اطلس غطيت وجهي بالبركع وفتح الجامة يشوف منو واذا نلگاه علي يدك هورنات ويركص ودعاء تهوس..

-الاطلس: وسمممممم

-علي: وزقنبوووت بگلبببك هلااا هلااا

يرجف اصبعتين ودعاء تصفك وياه مصعدين بسملة وياهم وهم عالگتهه، وخرت الكبوس شوية عن وجهي ومديت نفسي على اطلس اباوعلهن..

-علي: ايييي بوية الللعب من هسة بالحضننن

وخرت بسرعة فشلانة انوب اجت سيارة مسلم حاصرتنه من الجهة الثانية وصف ورانه حمزة ولعبو لعب شعلو الدنيا شعل طگاگات نارية وهورنات وفرقة كاملة جايبين ضحكت من گلبي وباوعت لاطلس اگله..

-اييييي هاي زفة واحلى زفة هم

عطت من صار عمر يلعب بالسيارة منا ومنا انخضينه اطلس يصيح عليه وهو ولا يمه وگفو بنص الشارع وجرو اطلس وياهم مديت راسي اشوف عمر شاله على چتافه ويهوسوله فرحتهم بگلبي والزيد فرحتي من انفتحت باب السيارة عليه واجتني دعاء وبسملة وسارة ورقية يكعدون ويايه..

-رقية: ولج وينن نكفييي كلنه

-بسملة: نندحس وينه عمر خلي يطلع قبل لا يجي اطلس

-سارة: الله وناااسة

-دعاء: علي راح ينجلط وين نورر

فتحت الباب تدورهه وبسملة تكول..

-بسملة: عوفي رجلهه يغااار

-نور: هاي منو رجلهه يغار ولجن وخررن سوولي مجال

-مريم: بدلتي راحت بين الرجلين

-رقية: بسملة نور احنه نصعد بالكراسي الوره يله چيتن

فطسنه ضحك من چيتن وره السيارة مضللة وماخذات راحتنه نور حامل وكامت تصيح ابني راح يطلع من حلگي من الضحك..

-سارة: عزه عزه اجه الاطلس راح يطيح حضنه

فتح الباب علينه وصاح..

-ولكم اخذتو عروستيي

-سارة: روح رووح متريدك كافي طلابة

-الاطلس: تطلعن لو شلون

-عمر: روح ويه عليوي امشيييي

حرك السيارة وطلع بينه وهو يعيط انتهينه غصيت دعاء كامت تبجي من الضحك وزيدت ضحكتنه سارة من كالت..

-لازم هاي العادات يخبثون على العريس اذا نوصل قريب بيت العرسان العريس ينزل وتبقى العروسة ويه حبايبهه

-نور: شلون عادات حلوة وتونس

-دعاء: ايي سووهه ويه علي نزلو وصعدن عمتي واسيل وسارة ويايه فحط علي من القهر

دقايق معدودة ووكفت السيارة بس الطرب والهورنات بعدهن مشتعلة ورانة، مديت راسي اباوع من الجامة شفت المكان مألوف هذا مو فندق ولا بيت عمو محمد هذا بيت الاطلس جابوني اله..

-مريم: گلبيييي سواهه

-سارة: شنو سوه شكو

-مريم: گتله ماريد انزف بفندق وعاند گال الا بفندق طلع بس يداهرني

-رقية: اوووي سوو رومانتك

لبسني البنات الكبوس عدل وفتحن الباب شفت اطلس واكفلي ببوابة السيارة لزمني من ايدي يسندني حتى انزل وما اتعثر، خواتي ويايه دخلو وامي وسارة واسيل ورقية وحتى غدير الكل دخل للبيت يطببوني للغرفة..

كعدت على السرير اتراعش كمشت بأيدين دعاء ماريدهه تروح والبنات ناصبات عليه فطسني من الخوف..

-بسملة: بس بطلن هالعيارة ارتاح اني يمة خلينه نطلع راح يموت نسيبي يريد يجي

-ام مريم: مرايم انتبهي لروحج ماما حبيبتي بنيتي

حضنتني وبوستني بس ما بچت وخرتهه عني مبوزة..

-مريم: شو ما بچيتي عليه مثل دعاء

-ام مريم: دولي هو يومية

-بسملة: صدقتي ماي ماذر ذاك اليوم تطلگتي ما لحگنه نتعلق بيج

-مريم: ولي انتِ خنفسانة

-رقية: الله لكيت بت عمي

-بسملة: شقصدج ولج

-سارة: قصدهه هي صرصور وانتَ خنفسانة

-بسملة: لك اهلين ببنت عمي

-رقية: تؤبري ئلبي ان شاء الله

-غدير: التفاهه واصلة لاعلى المراحل عدچن

-رقية: اهووو امشي بسملة نكمل تفاهتنه بره، ايه احكيلي عن ابن عمك كيفو منيح

طلعن يكملن التفاهه بره والباقين هم عافوني وطلعو، من الخبصة والخوف حتى ما سألت اهلي راح يرجعون لو يبقون، الي يشوفني يضحك عليه عبالك اول مرة اتزوج بس هو فعلاً اول زواج الي!!

دخل الاطلس للغرفة وكفت بسرعة على حيلي گوة مسيطرة على توازني ما اوكع، بلعت ريك وبصعوبة طلع حسي..

-مريم: اريد اريد انام

-الاطلس: هالكلاوات مو عليه ماكو نوم

-نعسانة والله

-روحي سبحي هسة تصصحين

-ماكدر ماريد انتَ روح اسبح

-ماشي

نزع بباب الحمام ودخل يسبح تركني وحدي واكفة چني مجدية، رحت على جنطتي فتحتهه شفت الحقيرات حاطاتلي دشداشة نوم والله مو دشداشة هاي تفضح اكثر مما تستر انفضحتي يا مريم..

اخذتهه ورحت للحمام الي بالصالة دخلت نزعت بدلتي بسرعة خرطت ما شلعت گلبي مثل ما يكولن باقي العرايس..

سبحت وبدلت باوعت لروحي بالمراية وتمايزت لبسي ولطمت بصمت شنو هالخزي عاد دعاء تزوجت واستهترت هي حطتلي هالدشداشة، فرشت اسناني ومشطت شعري بالحمام وحطيت مكياج خفيف كلش تعطرت ورطبت جسمي من الرجفة الي بيدي وكعت شيشة العطر مني بالكاع وتفلشت..

-يممممة هاي مااركة الغسل غسلج بسملة كله من وراج

كعدت انوح عليهه كابلتهه وكعدت شلون قهر رجعت لعقلي ووعيي من اندكت عليه الباب..

-مريم: منوووووو

ما جاوبوني گبر يعني منو غيره كمت اتحلطم باوعت لروحي بالمراية لمرة اخيرة خلص شبيه مهيلگة شجاچ مرايم وينهه قوتچ لتصيرين فاهية يالفاهية..

طلعت اجرجر بالدشداشة اضم المخازي بس شضم عمت عينج.... لا كافي ادعي شسالفة مصختهه..

فتحت باب الغرفة وتبسمرت بمكاني، فتحت عيوني وحلگي مبهورة من الاجواء، الغرفة منورة بأضوية خفيفة وشموع مفتوحة بشمعدنات موزعة كل مكان بالغرفة وريحة الغرفة تجننن..

اللتفت عليه الاطلس مبتسم وهو ديفتح اخر شمعة واشرلي ادخل اروحله..

-عجبچ؟

-يجنن حلو كلش

-جوعانة اكيد؟

-لا نعسانة

-جيد حتى اني

شهگت من رفعني من الكاع موديني للسرير.. گلبي يرعد وروحي وردت، فراشات صارت ببطني وكزبر جسمي كلشي بجسمي رفض بُعده ردت اعيش كل لحظة كل شعور كل لمسة كل همسة وفعلاً عشتهه خجلت وسحت وذبت ويه كلامه وافعاله..

ما خفت ابد ولا ترددت ولا للحظة اكدر اكول جنت سعيدة ويه كل لحظة، يعتذر مني متخوف من ردة فعلي كل دقيقة يعيد "مريم وگفيني" "احبچ" "ماريد أذيچ" "لا تقبلين" استغرب من كلامه ليش هيج يكول وبنفس الوقت ماكدرت اعبر مستحية، تملكني الخوف والخجل والحب بنفس الوقت..

عشت ليلة العمر ويا محلاهه من ليلة تخطيت كلشي وعبرته ماردت شي يعكر مزاجي ويعكر فرحتي واندماجي، گلبي يرفرف مثل جنح طير اوشك على الطيران، عيوني لمعت برغبة، بلحظة ضعف، بلحظة مليئة برائحة الحب والشوق همستهه بأذنه من لا وعي..

-احبك

ابتعد مني بسرعة ماخذله صفنة بوجهي رمش كم مرة يستوعب وقبل لا يسأل هزيت راسي اي وعدتهه..

-احبك اطلس

-كلتي احبك؟

-اي اريد انام تصبح على خير

دفنت وجهي بالمخدة اتحاشى نظراته بس مستحيل المحيط الاطلسي يعبرهه وانتقم اشد الانتقام، انتقام الحب مثلما البعض يسمي..

نمت هاي الليلة مثل الطفلة الصغيرة مرتاحة بحضن شخص تحبه وحاسة بالامان، يلعب بشعرهه ويداعب خدهه، يشاقيهه ويلاعبهه بين حين واخر الى ان تغفى ويبقى الليل كله يتأملهه..

فتحت عيوني مرة ثانية الصبح الاطلس نايم وصاير بوجهي مباشرة، ابتسمت ومسحت على لحيته المرتبة بست طرف انفه وتذكرت ليلة البارحة وشنو چفصت گدامه..

طفرت بسرعة اكعد على حيلي حاطه ايدي على راسي شيخلصنييي بعد لو گاصة لساني ولا حاچيتهه راح يذكرني بيهه كل يوم ويفشلني، انداريت اباوعله وابتسمت على منظره فدوة لوجهك والله احبه شحلاته يخبل..

انچبي مريم شبيچ مهيلگة شبييج كمت من الفراش اخذت منشفة ونويت اسبح بحمام الصالة طلعت امشي على اطراف اصابيعي ماريد يحس ويكعد، فتحت باب الحمام بهدوء وجذبني صوت بكاء! بكاء قوي كلش وصريخ غريب جاي من غرفة من الغرف!!

يتبع ♠️💸....

• ━━━━━━❪♣❫━━━━━━ •

اللهم صل على محمد وال محمد، اودعناكم اخوان 🌝🌚

تعالو انستاااااا 🙈

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

يچذبني

و اچذّبه

و بالعشگ نحلف

و فنَّه الگال احبك دون ما يرجف 😁

ايهاب الظالمي

• ━━━━━━❪♣❫━━━━━━ •

توجهت لمصدر الصوت كلما جايله يعلى ويتوضح اكثر، فتحت باب الغرفة وشفتهه فاتحة باب الحمام وصوت بكاء قوي يطلع منه..

استعجلت خطواتي اكثر وشفتهه نانا ما جاي تصيح جاي تتهوع وتتقيئ وتبجي بنفس الوقت!

-نانا شبييج

اشرتلي بيدهه طلعي من الحمام حتى ما اشوفهه بس ماكدرت اعوفهه ذبلانة ورايحة روحهه باقية بدشداشة قصيرة خفيفة رغم برودة الجو وساندة ايديهه على مقعد الحمام وتذب من راسهه..

-مريم: رايحة اكعد الاطلس ناخذج للمستشفى

-لاا لااا مرايم لااا

تبجي بصوت عالي وتتوسل ما اصيحله كامت بسرعة للمغسلة غسلت حلكهه ووجهها واندارت عليه..

-نانا: اني زينة حبيبتي بس البارحة خربطت بالاكل وتقيأت

-متوجعة؟

-اي معدتي توجعني، عوفج مني شلونهه عروستي الحلوة

ابتسمت على بسمتهه تركتهه ورحت اجيبلهه روب تلبسه فوك ملابسهه وطلعتهه من الحمام..

-مريم: اني زينة، نانا على الاغلب انتِ مستبردة ملابسج خفيفة

-اي هو هيج بس مو تحجين لاطلس خطية تقلقي خلي مستمتع وياچ

كرصت ايدي بخفة ورجعت لملامحهه المفرفشة، غطيت بهدومي وولعت خدودي من اردفت..

-صباحية عرس مباركة حبيبتي واضحة الراحة على وجهج والجمال

-شكراً نانا

-شبيچ مريوم شو مو على بعضج كأنچ تجامليني

-مستحية كلش كلش

غطيت وجهي وكعدت على سريرهه ضحكت واجت تكعد بصفي لزمت ايدي وخرتهه عن وجهي..

-نانا: ليش مستحية ما سويتي شي غلط

-البارحة گتله احبك وخجلانة

-يوووي حبيبتيي اكيد طار من الفرح وليدي اكيد

-اي كلش فرح بس اني متت فشلة مادري شبيه ما لزمت روحي

-وليش تلزمين روحج اصلاً لو ما حاچيتهه ازعل عليج لذة الحب من نسولف بي ونعترف بمشاعرنه للي نحبه بالحلال

-وانتِ نانا شصار على الچنتي تحبي

-مرايم كتلج جنت صغيرة مو حب مجرد اعجاب

-ما شفتي بعد؟

-لا ما شفته

-وما حبيتي وراه؟

سكتت صافنة بوجهي تهربت من الجواب وكامت تحط مرطب لايدهه..

-نانا: كومي سبحي قبل لا يكعد اطلسي حتى تفطرون سوه

-نانات ليش تتهربين دسولفيلي مو اني سولفتلج

-ملعونة شسولف

-شمدريني صايرة فضولية اني اوع

ضحكت بصوت ورجعت بصفي تكعد، اندارت عليه بنص جسمهه وكالت وهي تگلب بعيونهه المكان..

-نانا: اي حبيت

-والله؟؟

-اي

-وينه هسة؟

-موجود

-ما ناوي يتزوجچ هههههه

ضحكت نانا هواي على جملتي وهزت راسهه لا، ذبت نفس وكملت..

-مرايم اوقات لازم ندوس على گلبنه لخاطر كرامتنه اكيد جاي تفهميني صح؟

-اي افهمچ

-الاحبه اذاني هواي ودمر ماضيي ومستقبلي جردني من كلشي، هذا الهوا الطلق حرمني منه بدافع الحب والغيرة بس حبيته شلون وليش ماعرف غريب من وحدة تحب سجانهه

تسولف بغصة اعرفهه تقصد عمو محمد يمكن عبالهه اني جاهلة عن موضوعهم وانطلقت تحجي ويايه..

-نانا: بس بعد صارت وحبيته بكل غباء وضعف

اباوع لعيونهه ولاحظت الشبه العجيب بينهه وبين اطلس نفس الذبة بس الاطلس لون عيونه اطوخ حتى الانف الطويل المنحوت نفس الشي وذبة الحواجب عجيب ما انتبهت من قبل على هذا الشي..

-مريم: هو يعرفج تحبي؟

-لا ما يعرف ولا راح يعرف

-ليش؟

-لان اذا حجيت بحبي راح اضعف اكثر وراح اخذل شخص احبه ودفع عمره فده الي بس حتى يحافظ على كرامتي ومكانتي ما اضيع هذا الشخص الي احبه اكثر من روحي على حساب حب حياتي

-نانا...

فزيت من سمعت صوت طرق باب غرفتهه وصوت الاطلس وراه، كمت بسرعة من مكاني افتر بالغرفة..

-مريم: وين اروح وين ارووح نانا

-نانا: ياا ولج شبيچ

-كوليله مو هنا مريم مو هنا اجاني يدور عليه ماريده ماريد

-الاطلس: نانا كاعدة انتِ؟

-نانا: اي اي ماما اوكف

اندارت عليه حطت ايد فوك ايد وتهز براسهه..

-نانا: شلون بيج انتِ ناوية تشلعين گلبه

-مريم: نانا استحي والله عزه بعيني كوليله مريم مو هنا

نحجي بالهمسات نخاف يوصله الحجي، هزت راسهه موافقتني وراحت تفتحله الباب وكفت بزاوية قريب الباب اكدر اشوفه من فتحة الحاشية وهي سدت الباب بجسمهه حتى ميدخل غرفتهه..

-الاطلس: مريم هنا؟

-نانا: شوف شوف لا صبح عليه لا سأل عليه رأساً سأل على حبيبة گلبه

-الاطلس: صباح الخير حبيبتي

بوسهه وراد يدخل ما خلته صدته وكالت..

-وين جاي ابدل

-الاطلس: مريم هنا مو؟

-شعليك بيهه

-مرررريم تعاليي وينننج

-شبيك تخبلت ابني جاي تسبح هنا بحمامي

-ليش بحمامج؟؟؟

-لان حمام الصالة تكول الدوش ميشتغل عدل واجتني

-حلفي

-هاي شبيك اطلس

-كعدت الصبح ما لكيتهه ليش تهرب مني؟

-ما تهرب ماما شبيك مخطوف لونك

-نانا البارحة صار شي.. شي مادري اني ما قصدت بس صار بعد

-نانا: شصار شبيك

-ردة فعل صارت عندي قوية كلش ضغطت عليهه و.. ويمكن مريم خافت منه وهربت الصبح بس ما قصدت اسويهه ما چنت ادري اني...

-اطلس مريم ما ذكرت هيج شي انتَ تتخيل

-صدك؟؟ بداعتي ما حجت؟؟

-لا والله ما حجت كعدت تسولف ويايه البنية موردة تخبل كلشي مابيهه

-يعني من هربت مو هذا السبب؟

-وين هربت حبيبي كتلك دوش الحمام ما يشتغل واحت تستخدم حمامي

-زين انتِ حاچيهه بعد افتهمي منهه شوفي اكو شي غلط شي ما عجبهه او ضغطت عليهه حاچيهه نانا ولحي عليهه لا تضم عليج شي

-لا تخاف اني اتصرف

-يعني هسة مريم جاي تسبح مابيهه شي؟؟

-والله مابيهه شي تعال نسوي فطور سوه حتى من تجي تفرح بأهتمامك

-يله امشي

طلعو من الغرفة ثنينهم اخذت افكر وصافنة اريد اعرف شنو الغلط السواه البارحة مدا يجي ببالي، بالعكس لا ضغط عليه ولا حتى ضوجني او زعجني.. اخذت الافكار تتناطح براسي وما خطر ببالي الاطلس عنده حالة نفسية بخصوص هذا الموضوع بسبب ابوه وهمجيته ويه نانا..

فتت لحمام نانا سبحت بي ولفيت جسمي ببرنص قصير، لميت شعري بمنشفة وطلعت متوجهة للمطبخ شفته واكف يسولف ويه نانا بالهمسات وهي مبين دتهدأ بي..

-صباح الخير

اندار عليه بسرعة لمعت عيونه مثل الاطفال من يشوفون لعبتهم المفضلة، دائماً اشبه لهفته بالطفل لان البراءة الي تصير بعيونه كلش تشبههم..

-الاطلس: صباح النور صباح العسل، صباح الحب والغزل

دفعته نانا عليه تضحك وانطتنه ظهرهه، جرني من خصري استحيت من طبع على خدي قبلة، دفعته من صدره..

-اطلس جوعانة

-اممم

-اي اي جوعانة

ابتعد مني وجهه انگلب بلع ريگ وكعد على الكرسي حتى ناكل رحت اكعد مقابيله اشرتلي نانا حتى اكعد بصفه حولت مكاني وهو كلمة ما نطق اكل بهدوء حتى ما اللتفت عليه..

نانا حاولت تكسر الجو وتسولف شوية من شافت اطلس ميتجاوب سوتلهه لفة وكامت تطلع تعوفنه وحدنه..

-مريم: انتَ سويت الريوك؟

-اي

-عاشت ايدك

اندار عليه بدون لا يعلق ابتسمت واني اراقب ملامحه الحزينة حرت شلون اعبر بس اني جبانة وخوافة خجلي ديسيطر عليه لازم اتغلب عليه..

كملنه ريوك ورجعت للغرفة ابدل ملابسي بعدني دا اللبس القميص ودخل عليه الغرفة دار وجهه خلاني براحتي كملت ورحت للميز اللعب بالعطور..

-مريم: البوم معزومين عند اهلك على الغدة مو؟

-اي

-راح نروح مو؟

-بكيفج

-هي عزيمة اكيد لازم نروح

-اذا مالج واهس عادي اكلهم يأجلون الموضوع

-لا عيب لازم نروح

ما جاوب راح للكنتور يطلع ملابسه وتوجه للحمام يسبح دكيت رجلي بالكاع اوف شلون بينه، خليت وطلعت لـ نانا كاعدة بالصالة تتفرج تلفزيون..

-مريم: نانا نقذيني فدوة

-نانا: يا ستار شبيچ مريم

-مريم: اطلس حزين ماعرف شسوي واغير جوه اني سمعت كلامكم من چنتو تتناقشون والله كلشي ما سوه لا ضجت ولا انزعجت ليش هيج يفكر

-عنده اسبابه حبيبتي، انتِ هم ليني وياه شوية لا تظلين متقيدة ونافرة

-لا ابد ما متقيدة ولا نافرة

-كلش متقيدة انتِ مريم واضح هالشي عليج تغلبي على خوفج وخجلچ تره اطلس خوش رجال يحبج هواي ويحترمج ويحترم خوفچ وترددچ منه بس هم اجه دورچ تثبتيله حبچ

-والله احبه واموت عليه

-اي بينيله خلي يشوف هذا الحب

-شسوي وابين؟

-مريوم لا تمثلين بحبج خلي عفوي خلي يعرف انتِ صدك تحبي وما مجبورة على تصرف معين

-ماشي صح لازم

عفتهه ورجعت للغرفة مشطت بسرعة وكمت افتر وافكر، وكفت بمكاني من طلع من الحمام ينشف راسه بالمنشفة طلعت من الغرفة اخلي ياخذ راحته انتظرت شوية ورجعت ادخل ديلبس البدي..

-مريم: الله اليوم مو رسمي

-مليته

-تخبل بهذا اللبس البسيط

-بالكاجول احلى؟

-هه هه عود شنو دتفشلني

-لا والله بس اسمه كاجول

-اي ادري تره اسمه هيج بس ماحب اتفيك مثلكم

ضحك وهز براسه موافقني، تقدمت بخطواتي وكفت بصفه بالضبط لزمت زنده من عضلاته وعصرتهن..

-مكبر عضلاتك مبين ملتزم بالجم

-اي اروح بالليل من ماكدر انام

-ايع

-شنو

-ماحب الرجال المعضل

-منو ما تحب المعضل مريم لخاطر الله

-اني ماحب اضوج

-هاي ليش

-لان تصير بعد احلى

رفعلي حاجبه بطريقة لا بله، گبر عود دا اغازل اني؟ خليني اطم روحي احسن..

رجعت خطوات وراه صرت، امخمخ واجمع كلام براسي من اصير وياه استثول كلشي يطير من بالي من التوتر..

-مريم: اممم احب هذا

-شنو هو؟

-هذا اللون حلو عليك

-كل الالوان حلوة عليه

-افف اسحب كلامي

-اكلج شبيچ اليوم؟

-مابيه شي بس مادري احس... هذا شوف

مديتله اصبعي اتحجج بأي شي حتى افتح موضوع باوع لاصبعي شافه طالعة الشعفورة ومتعور صاير احمر..

-يوجعني

-حبيبتي ليش هيج لو گاصة الشعفورة بالمقرضة

-مقرضة؟

-اي

-اسمهه مگراضة اطلس

-شنو الفرق

-صح ماكو فرق اكلك باوع شنو رأيك نلعب لعبة

-انوب نلعب

-اي مو اصبعي يوجع لهيني شبيك

-اويلي يا علي

-اوكف قبل لا نلعب رايحة لنانا وارجعلك لحظة

تركته وطلعت اركض لـ نانا طايرة چيتت بصفهه على القنفة نززتهه اخترعت المرة..

-نانا: ياا الله شصايرر

-مريم: نانا نقضيني

-يا شبيچ يمة

-ماعرف شسولف خرب حظي لساني الشطوله وين راح مادري

-دوري عليه منا مناك

-لا ماريد ادوره لان اذا اللگاه راح انكد عليه واتعارك واني ماريد اضوجه اكثر

-ما يضوج من تعاركي معليج روحي نكدي عليه والرومانسية تجي وراهه

-صدك؟

-اي صدك روحي حبيبتي

-نانا باعي شنو راح اسوي اني رايحة اسوي صحن فواكه صح ميستاهل المحيط بس ميخالف ومناك نسولف شوية ونغير جو شتكولين؟

-وشيسوي بصحن الفواكه

-شمدريني امي من يزعل ابوية تراضي بماعون فواكه

-مريم روحي لرجلچ عوفي الفواكه امشي كومي

-والله اروح بس المشكلة من اشوفه اصير عوبة واكره نفسي من استعوب

-دگومي گومي لا تستعوبين

-يله كايمة ادعيلي

رفعت ايدهه وجرت ياخة دشداشتهه عود تدعي ضحكت على سوالفهه ورجعت لغرفتي، بعده واكف ديمشط شعره وراهه لبس ساعته..

-الاطلس: لو بس افتهم شنو سالفتج ارتاح كل ساعة هاربة لمكان

حكيت شعري ورحت اوكف وراه بحركة مفاجأة وسخيفة تجرأت وحضنته من الخلف، مديت بس عيوني اباوع لملامحه من المراية شكله استغرب وفوراً لف وكف مقابيلي وحاوطني بيده..

-مريم: احم شسمه شلونك

ابتسم بدون لا يرد رفع ايدي حطهن على صدره وهمس بيني وبينه..

-مريم انتِ زينة؟

-اي

-امانة جاوبي لا تجاملين ولا تجذبين عليه اكو شي تردين تشاركيني بي؟

-اي

-شنو كولي

-استحي

-لا تستحين احجي كلشي عندج سولفي بدون مستحى وخوف

-اني.. احم اني استحي من البارحة گتلك هذيج الكلمة

-يا كلمة؟

-هذيج ال.. هذيج

-ياهي هواي سولفنه البارحة

-مو هي مميزة متشبه الباقيات

عض على شفته ورفع عيونه للسكف شلون الديفكر باوعت لوجهه مستحية هاي من شوكت اخجل منه والله عجيبة..

-الاطلس: ما جاي اتذكر

-احبك

-شنو

-الكلمة هي احبك و.. وهم اكلك احبك

-واني اموت عليج

-باوع محيطي اني عندي مشكلة استحي من الرومانسيات لدرجة ما اتابع مسلسلات ولا افلام رومانسية لان اعيش الدور زايد

-عيشي الدور وياي وين المشكلة

-ها يعني اعيش

-طبعاً اكيد لان احنه ما جاي نمثل

-اوكي، احم اكلك هسة لازم اگول حبيبي وگلبي ومن هالمسلته؟

-بكيفج

-يصير لو تضوج؟ شو اني اضوج

-لا ما اضوج

-لا بس احسك تضوج مو من هذا النوع مال حبچيات وغراميات

-لا كلش من هذا النوع اني

-مو لعبان نفس شنو كل شوية اكلك حبيبي وگلبي وهالخرط

-مو خرط ليش خرط

-والله تمسلت حبيبي اووي گلبي حياتييي بيبي هه هه بيبي او ماي گود ايلاڤيووو

-هههههههههه

-اي والله باوع حتى انتَ دتضحك دتشوف شكد لعبان نفس وقرف

-ما جاي اشوف أي لعبان نفس

-اهوو اسكت مو استحي يبووو على حظج مريم

-هاا يعني انتِ تردين تكولين بس تستحين

-اي

-زين شنو رأيح نتساعد؟

-شلون بله

-العافية بالتداريج كل يوم گولي كلمة

-بس مرة باليوم اگولهه ماشي؟

-خرب حظي شكد جلفة

-شنو جلفة؟

-يعني بخيلة!

-والله صعبة حيل صعبة

-براحتج حبيبي لا تضغطين على نفسج مو ضروري تكوليهه

-متزعل؟

-ما ازعل

-اكيد؟

-اكيد الاكيد

-شكراً لتفهمك

-اتفاهم بهذا الشي بس بغيرهه لا مستحيل...

فوراً رفعني من الكاع للسرير ضحكت خجلانة من تصرفاته وجرأته، قضينه وقت العشاق سوه بكل دقيقة يضحكني لو يدغدني لو يعضني لو يداعبني ويلاطفني لو.... ما حسينه بالوقت الا من دگ موبايله..

-الاطلس: اشتعلت روحكم

-مريم: كوم كوم شوف منو

اخذه يباوعله وشمره بعيد ورجع عليه، بعدته عني اتسائل..

-منو اتصل بيك؟

-ابو نورسين

-ليييييش

-يا علي شبيچ انفجرتي بوجهي

ابتعدت كعدت على حيلي ولميت نفسي..

-مريم: شعنده وياك شيريد!!!

-على الشغل مرمر عادي وين المشكلة

-ماكو ماكوو ليش يتصل بيك انتَ بالذات

-چا بيمن يتصل

-بأي واحد من جماعتك بحمزة مثلاً!

-بس هو شغله وياي حمزة شنو دخله؟

-عندي احسااس هذا مو ابو نورسين

-چا منو ما شفتي اسمه مسجله "ارون"

-اييي يمكن هي نورسين متصلة بيك من رقم ابوهه

-لا مريم شسالفة شنو غايتهه من هالتصرف

-ليش ما جاوبته؟؟

-لان اني وياچ ترديني اعوفج واحير بالشغل

-تحير بالشغل لو خاف تطلع نورة مالتك

-نوره شنو ماعندي أي علاقة بيهه مريم ليش گوة تلزگين البنية بيه

-اطلس بداعتيي احلف ماعندك علاقة بيهه

-وداعتج ماعندي علاقة بيهه

-ومن تجيك للشركة شلون؟؟

-تجيني على گد الشغل فقط ماعدنه أي شي ثاني حتى ما نحجي بشي ثاني

-وهي متحسسة من هالبعد؟

-اي كلش ومتضايقة حتى تبچي

-طبهه طوووب

-شعلينه بيهه هسة تعالي يمي

-ماريد اجي ضجت

-ضجتي من الاتصال؟

-اي

-بيمن احلفلج هذا ارون؟ تردين اتصل بي

-لا مصدگتك

غصة اعتلت بلعومي ميته حرگة صايرة اتخبل من طاريهه اتعب كلش ماحب شعور الغيرة يحرگ صاحبه بس مو بيدي صرت اتحسس منهه اضعاف وره ما عرفتهه تحبه وتتمنى تتزوجه اتذكر تصرفاتهه وياه ونظراتهه الوصخة اله وتفسرلي نظراتهه اله مو بريئة تخبلني اكثر..

-مرمر كلشي يروحلج فدوة بس لا تضوجين

-اطلس ماكدر اتعب

-من شنو؟

-منهه اتعب منهه

-ولج ليش ترجفين لا تخبليني

ارجف عصبية درت وجهي عنه اسيطر على نفسي كام بسرعة جرني لصدره يهدأني ويهمسلي ويحلف ويتكفر ماعنده شي وياهه وماله علاقة بيهه، مددني بصفه يمسح على راسي وشاد على جسمي..

-مريم: بالغت اسفة

-ما بالغتي حقج حبيبتي

-اني.. اني احبك واغار اريدك الي وبس

-يابة اني الج ومو لغيرج

-اموت منهه ماتحمل وجودهه اكرهها حتى لو لطيفة ويايه ماحبهه ماحب وجودهه

-لا تحبين هذا هو التردي يجرالچ

مسح وجهي وباس خدودي مبتسم شدني اله اكثر ورفعني نصير وجه بوجه..

-الاطلس: شحلاتچ من تغارين

-ما اغار

-اصلاً شنو الغيرة؟ شنو هذا المصطلح تدرين اوقات اسأل خواتج عنه لان ماعرفه شنو

-ليييش تقلدنييي

-لان احبج واحب شلون تحجين تدرين اوقات من اصفن اتذكر كلامج واضحك وحدي مثل المسودن

-ههههه شلون

-يعني اتذكر من چنت اريد اللزم ايدج وتصيحين استاااذ اني محجبة احترم حجابي، لو من نسولف وتذبين ميانة بساع وتكولين اسمك بي طن تنمر، لو من اسمعج تصيحيلي المحيط الاطلسي

-واني هم كلما اشتاقلك ارجع اتذكر كلامك بيني وبين روحي اوقات اكعد اكتب مواقفنه حتى ما انساهن وكلت اراويهن لزوجي الثاني من اتزوج حتى يغار منك

-نعم؟؟؟

-اي شبيك هاي من جنت افكر اتزوج غيرك

-خيررر؟؟؟

-اطلس تره علساس اني مستحيل اكمل وياك خلينه نكون صريحين حتى جنت ناوية اسوي عرس ويه زوجي ونروح نسافر شهر عسل لفرنسا

-شهر نعععل تسافرين ويه الطيار مالتج؟؟ يكعدج بصفه من يطير الطياارة!!!

-الله اي احس الاجواء روعة راح تكون

-كومي كوومي مرمرتي حالي واحوالي راح تجلطيني

-شبيك to much اطلس

-اي اي ظلي انتِ بهاي السوالف حفظيلج كلمتين ومشيهن عليه

كام من الفراش من كل عقله ضايج ومنفس اخذ المنشفة ورجع للحمام ضحكت منتعشة روحي فرحانة رجعتله شعور الغيرة اووف شكد شعور متعب ويعور الگلب..

باوعت للساعة بـ 1 الظهر راح علينه الوقت كله من وره سوالفه، سبحت وصليت وبدلت بسرعة لبست قفطان اوف وايت عرايسي هدية من دعاء هي اشترته الي يجنن شكله..

طلعنه لبيت عيالي ويه نانا، اول ما فتت من الباب استقبلتنه هلاهل خالة حصة وعمة زهراء والبنات، سلمت عليهم كلهم موجودين بدون استثناء فرحت كلش من شفت دعاء وبسملة هنا..

-مريم: بسوم شجابج

-بسملة: ماعندي محاضرات وعلي ودعاء جابوني حتى اتغده وياكم

توزعنه على التخم نسولف واستلمني البنات كلهن سولفيلنه واحچيلنه صرت حمرة من غمزات رقية ومطلات بسملة واسيل على بعض..

-مريم: ماكو وخرن متستحن انتن

-سارة: صح عيب بنات سدو اذانكم سولفيلي الي ولدعاء واسيل

-دعاء: اي اي يله

-مريم: باع الهيلگ وخري ولج وانتِ سويرة ما رحتي سونار تعرفين جنس الطفل لو بعدج؟

-سارة: اسبوع الجاي اروح تجين وياي؟

-مريم: اي اجي اكيد احب هاي اللحظات بس خاف حمزة يطردني ويفشلني

-سارة: ياا عيني معليج مو بكيفه

-عمر: يعني ما نتغده اليوم مو متنه جوووع

-رقية: بعد وكت شبيك

-علي: اني ادري شبي هذا جوعي صاير

-عمر: دوود ببطني شعليكم انتو

-الاطلس: اني طالع هسة يله حمزة

-سارة، مريم: وييييين؟؟؟؟

-حمزة: يا ستار شبيچن

-غدير: اووووع بيئة

ما اهتميت لغدير كمت بسرعة وكفت بصف اطلس اسأله بالهمسة بيني وبينه..

-وين رايح

-الاطلس: عندي شغلة ويه حمزة هنا شوية وراجع

-ويهلك تعوفني

-هاا

-تعوفني حبيبي

-شنو

-شبسرعة راح ترجع للشغل واني ابقى اتصفن وحدي

رمش رمشات ثقيلة متفاجئ من تصرفي والله الغيرة تقتل راح اموت وعقلي وگلبي يكول رايح يشوف ابو نورسين ومتأكدة هي هم موجودة حتى تشوف اطلس!

-الاطلس: لا ماروح بطلت

-صدك

-اي طز بالشغل (عله صوته) حمزة ماروح اني

-حمزة: مو الرجال منتظرنه

-الاطلس: روح وحدك تعبان ماكدر اروح وياك

كعد بسرعة على القنفة قبل لا يجاوبه حمزة طرت فرح ورحت اكعد بصفه لزم ايدي بين ايده ودور وجهه لأتحاهي..

-مريم: ايلافيو

-الاطلس: هههههههههههههههههههههههه

على اثر ضحكته العالية ضحكت وياه مكممة فمي رفعت عيوني شفت عمر وعلي ومسلم والبنات كلهن وحتى عمة زهراء فاكين حلوگهم علينه..

-الاطلس: سينما كدامكم؟

-زهراء: حبايبي شكد حلوين ربي يحفظكم

-علي: والله حظوظ دباع الكعدة باع الحال باع الضحكة

-دعاء: شنو قصدك عينيي؟

-علي: هيج حبي ولشي سلامتج

-عمر: من اگلهم حظي زر.... زرافة محد يصدك

-علي: اني مصدك حبيبي لا تجهد نفسك

-مسلم: اوووف يا الله

-الاطلس: وسممم شبيكم راح تكتلوني بمكاني من عيونكم الصلفة

-مريم بهمس: اگلك حبيبي

-الاطلس بهمس: مريم عليج الحسين مو هنا گوة كاض روحي

-مريم: هاي شبيك شو اجاني واهس للرومانسية

-الاطلس: چا امشي نصعد فوك

-لا بطلت راح الواهس

-الاطلس: بالبيت نرجعه مو هسة

-مريم: صدك على طاري الفوك تذكرت اني نسيت كم شغلة هنا بغرفتك شرأيك نصعد نجيبهن قبل الغدة ثگيلات ماكدر اشيلهن وحدي

-امشي

گمنه سوه دنريد نصعد الدرج وعمة زهراء ضحكت بصوت عالي وعمر ذبله حسرة وعلي صفك بيده ومسلم لطم على رجله وسارة فطست ضحك ودعاء لطمت وبسملة انمطلت ورقية تهز رقبة..

-الاطلس: هاي شصاير هنا خو ماكو شي؟؟

-عمر: ماكو حبيبي ماكو بس حظ صاحبك خردلي

-علي: راجع للبيت اني امشي دعاء

-دعاء: يااا شعدنه بالبيت

-زهراء: ههههههههه اكعد راحة علي

-مسلم: وين خالتي حصة عنكم

-مريم بهمس: اطلس ذولة شبيهم؟

-الاطلس: حواوين

-عمر: يمة خطبيلي

-زهراء: يووم منى هذا حبيبي

-رقية: ومنو هاي تعيسة الحظ الراح تكون مرتك عمر

-عمر: جاي افكر بفاتن

-بسملة: اييع ممنوع تخطب صديقتي

-عمر: والله حلوة هاي شعليج انتِ

-اسيل: صدك تريد تخطب عمر؟

-مسلم: شعليج اسيل؟!!

-اسيل: وشگلت اني؟؟؟

-مسلم: خلص انسي السالفة

-اسيل: والله يا الله

-زهراء: هاي شبيكم يمة صلو على محمد

-اسيل: كلشي ما بينه حبيبتي خالة من رخصتكم

كامت تروح للمطبخ، بقيت واكفة على الدرج اتابعهه بعيوني تروح وحسيت اطلس يجرني من ايدي وياه ونروح وره اسيل..

-مريم: شبيهه؟

-الاطلس: مادري اني منتبه عليهه متغيرة صارلهه كم يوم ومن اسئلهه ما تجاوب، اريدج انتِ تسأليهه اعرفهه ما تحجيلي لحي عليهه الى ان تسولفلج ماشي؟

-مريم: ماشي

دخلت للمطبخ شفتهه واكفة وحدهه ساندة ظهرهه على الكاونتر وصافنة، رحت اخذلي مي من الثلاجة وتعمدت اضحك واندار عليهه..

-مريم: شكد فشلة حسيت غلط گومتنه هيج سوه كدامكم مو بله؟

-اسيل: لا عادي

-ها همزين، اكلج وينه غيوثي؟

-عند بلقيس بالغرفة تنيمه

-حبيبي كبران كلش ما شاء الله

ابتسمت بدون أي تعليق رحت اوكف بصفهه مسحت على ايدهه نزلت عيونهه تباوع لايدي ابتسمت وكلت..

-مريم: شبيهه الجميلة السمرة زعلانة؟

-اسيل: مابيه شي

-هو اي مابيج شي اكيد بس انتِ تعرفين اني موجودة شوكت ما احتاجيتيني اسيله

-اسيل: مريم اني ومسلم علاقتنه مو تمام

فوراً حچتهه وبچت، انخبصت وياهه كعدتهه على الكرسي واخذت نوبة بكاء طويلة ومريرة ماكدرت اسكتهه تحجي بالمغربي بس مافتهم شتكول لان تبجي وتشهك ضاعت الكلمات..

-مريم: اسيله اخترعتي لغة جديدة والله

ردت اللاطفهه واخليهه تبطل بجي وفعلاً سكتت وصارت تضحك بوجع..

-مريم: سولفيلي شبيچ

-اسيل: ابوه متعبني هواي متعبني

-مريم: شسوه ابوه؟؟

-يعاملني مثل الخدامة بالضبط كدام مسلم ميحجي ولا يهيني بس من نبقى وحدنه يدوس عليه وعلى كرامتي يلاعب غيوثي ويصيحله حفيدي ابن الخدامة المغربية

-ليييش

-هو بعد يحقر ويايه لو من اني واشتغل يفتح عصير يشرب منه ويذب الباقي بالكاع ويأشرلي بيده تعالي مسحي المكان

-عزه بعينه شبي هذا مخبل

-يسوي سوالف متتسولف والله وهاي غير عن نظراته الوصخة هواي يباوع لجسمي ويظل ياخذله صفنات مرة دخل عليه الغرفة من جنت ارضع غيث اجه يصيح عليه ما تستحين هيج ترضعين الطفل غطي نفسج

-هم بغرفتج وهم يدخل عليج وهم يرزلج شنو هالجرأة!

-شسولف مريم وشحجي

-ومسلم ميعرف بهذا الشي؟

-يعرف ابوه يحقر وياي بس ميدري يباوع لجسمي

-ليش متحجيله؟

-لان معمي على گلبه هسة مريم راح يموت من غيرته لدرجة صاير ما ينام وياي بنفس الغرفة

-يغار من ابوه عليج؟؟

-لا من عمر

-شنو

-اي مسلم يكول بينج وبينه شي والشك غازي گلبه، قبل فترة گبت عركة كبيرة بزاف على سبب تافه وسخييف واصلاً عمر ماله علاقة مسلم بكيفه تهجم عليه وكفت افاككهم باعي ايدي

مدتلي ايدهه تراويني جرح عميق فتحت عيوني مصدومة من كملت..

-اسيل: وكفت افاككهم وانجرحت بالميز هنا انحفرت ايدي صرت بين مسلم وعمر ومسلم تخبل يكول تفزعيله ولمستي صدر عمر متعمدة

-لاااا شنو هاي

-راح اموت اختنكت ضجت وزعلت ورحت اكعد ببيت بلقيس واجاني يتوسل ويحلف ميشك بعد

-وهسة بعده يشك؟

-لا ما يبين الشك مالته بس غيرته راح تحرگنه كلنه صاير ما يباوع لوجهي حتى ما يحچي وياي

-ليش ساكتة؟ احجي لاطلس خلي يحل مشكلتكم

-استحي وضع اطلس كان صعب بالايام الفاتو ما ردت ازيد همه

-تحبين اني احچيله؟

-مادري اخاف

-ما اضغط عليج اني بس اريد اگلچ لازم تلگين حل ومتبقين بهذا الوضع تره الغيرة تحرگ صاحبهه احجيلج عن تجربة

-راح احچي لاطلس اني

-زين تسوين

-بس مو اليوم خليني ارتاح كم يوم ابقى هنا وبعدين نلگه حل

-بكيفج بعد يله لتزعلين گومي حبيبتي مسلم يحبج ومتأكدة ما راح يقبل على تصرفات ابوه وراح يلگه حل لموضوع الشك

هزت راسهه ومسحت عيونهه وكامت وياي، انمردت عليهه مسكينة هاي البنية تقهرني واضح بعدهه متعرف عمر فعلاً يحبهه وماعندي شك لو صار انفصال لا سمح الله بينهه وبين مسلم عمر يتقدملهه ويتزوجهه..

رجعنه للصالة انتظرنه حمزة علما رجع وصبو الغدة كعدنه ناكل وسوالف التوأم كلهه حيوية ماليه المكان..

كملنه الغدة كعدنه توزعنه على التخم نشرب چاي، عمو محمد كعد ويانه وخالة حصة كالعادة بجانبه..

-محمد: يا اهلاً وسهلاً بيج عمو مريم نورتي بيتج

انحرجت فجأة حچاهه بين احاديث الكل نظرتله مبتسمه وهزيت راسي ممتنة، اردف..

-محمد: اظلم دارچ بدونچ حبيبتي عمو

-مريم: تسلم عمو

-حصة: والله صح ظلمت دنيانه كلنه صج مكانج اله وحشة مو چذي بلقيسه

ابتسمت نانا ساكتة وجهها اصفر وواضح عليهه تعبانة من شي، جاوبت بهدوء..

-بلقيس: آه (اي) توحشناكي مريم التيتيزة (الجميلة)

-مريم: حبيباتي نانا وخالة الله لا يخلي مكانكم

-علي: احم اي

-محمد: ها خير

-علي: چنكم لحيتو بالرسميات

-حمزة: اكره اكولهه بس اتفق

-مسلم: الجو صاير ينرفز والوجوه كذلك

توجهت الانظار كلهه على مسلم مستغربين من جملته دار عيونه على عمر وضحك ضحكة مستفزة..

-مسلم: خانس عمر

-عمر: وشتريدني اكول؟

-مسلم: مادري يعني يمكن حاب تنطي رأيك

-عمر: بخصوص؟!

يتناترون ثنينهم واحد ما متحمل الثاني محد حچه ولا علق حتى عمو محمد ساكت وصافن عليهم..

-مسلم: مو احنه متعودين علي يحجي لازم تكمل كلامه والعكس صحيح هالمرة ما سويتوهه

-علي: شسالفة مسلم شتريد انتَ؟

-مسلم: ما رايد شي عيوني على كيفك لا تهد علينه

-حمزة: خلونه نسد السالفة شباب مو وكتهه

-مسلم: اشوف عمر ضايج وصافن على شي كلت احچيه!!

-الاطلس: هاي شبيكم

-عمر: والله اني مابيه شي بس الاخ هنا چنه شادهه شوي

-مسلم: ما شادهه اكل نعععل

-عمر: هاي شبيييك متخبل انتَ

-حمزة: شباب شسالفة

-مسلم: ماكو سالفة ماكوو وخررر من كدامي

كام يريد يعبر من جهة عمر وطخه متعمد بأيده، دفعه عمر وصاح..

-عمر: شبيك انتَ شتريدد

-مسلم: شكو تدفففعع

كممت حلگي من مسلم انطه بوكس لعمر بمكانه، طفر الكل ناس ابتعدت وناس تقربت عليهم اطلس صاح بمسلم بعده ممكمل رزالته وهجم عمر جر مسلم من خوانيگه ولاح اطلس تعورت عينه..

-حصة: وااااي يا حسرررتي

-حمزة: شبااااب شبيكم تخبلتووو

-مسلم: ابن النعاااال الساقط الـ*********

-عمر: لا تغلط على ابوووووووي

لزمه ودگ كتل تماطلو بالكاع وعمة زهراء تبجي وتلطم على وجهها وتصيح وترزل بمسلم شلون يأذي ابنهه ويغلط على زوجهه..

-زهراء: عمت عينييي حتى الميت ما خلص من شركم

صارت حلبة مصارعة عمر فوك مسلم والباقين يفاككون وعمو محمد كاعد كلمة ما نطق، اللتفتت على شهگة بسملة تحاوط ايدي خايفة من جهة ودعاء من الجهة الثانية..

-دعاء: علي تعور علييي انتبه حباب

علي صار بنصهم ونص البوكسيات تصير بي، حمزة والاطلس بضخامتهم وجثالتهم ما كدرولهم واحد محمل على الثاني وما طايق الثاني وديطلعون حرگتهم ببعض هسة..

حمت العركة لدرجة الكل تعور اطلس جفنه كام ينزف دم من الضربة وانشك البدي مالته من الياخة من ديفاككهم، تخبلنه البنات نعيط بيهم بس نريدهم يوكفون محد ديسيطر على الوضع..

-الاطلس: سرا**** والعباس اطيح حظه الما يوكف عدددل ويحترم نفسسسسه

اخيراً وگفو عن العرك وابتعدو يلهثون، حمزة موجر نار من وره اخو لزمه من متونه يمنعه من أي حركة وعلي حاضن عمر خايف عليه..

-الاطلس: ولد شواررع شنو بيت لو حضيرة حيوااانات ادبسزززية هيج تتمالخون مثل البهااايم كدام النسوووان

-مسلم: ماعندي شي اني خلص ماكو شي امشي اسيل نرجع للبيت

-اسيل: بس اتفقنه احنه مسلم

حچتهه بهدوء وخوف بنفس الوقت ماعرف شبي هذا ثار وضرب الطاولة برجله بقوة حاشيتهه شگت رجل نانا من يم الركبة..

صاحت نانا متألمة، ثار اطلس وعمو محمد طفر من مكانه، لزمه عمو من ياخته وعاط بي..

-مسلم: ابن الكلللللب

انطاه راشدي قوي فر وجهه ودفعه على محجر الدرج لزم اطلس ابوه چتفه من وره ويهمس بأذنه شي وركضت خالة حصة تحاوط ايده حتى ميرتكب شي جريمة ممكن..

-محمد: انعلل والددديك على والدد والديك اذا تجاوزت مرة ثانية هاااي رجلك اكسررههاا وابو فاضللللل لو صاير لبلقيس شييي

-نانا: شاف محمد مابيه شي والله

-مسلم: عمييي ماريد شي غير اخذ مرتتيي واطلع مناا

-الاطلس: چا هيج تضرب ناناا بله صار بيهه شيييي

عافهم وراح على نانا نزل لرجليهه يشوف شبيهه ما حجت ولا علقت تأشر بيدهه مابيه شي بدون لا تنطق..

-مسلم: اريد مرررتي واطلع منااا وبسسس

-حمزة: مسلم اطلع اني اجيبهه وياي

-اسيل: ماريد ارجع اني متفقة وياه ابقى هنا كم يوم وهو وافق ليش گلبت مسلم شبيك

-مسلم: بكيفي ماريد تبقين هنااا بكيفيي

-محمد: وسممم بكيفك شنو جاي تگلك ما تريد ترجععع تبقى هنا غصباً ما على راسكك

-مسلم: شنو مناسبة تبقى هناا انتو منوو ماكو لا صلة دم ولا قرابة ليييش باقية هنا

-محمد: بيتهه وبيت اختهه لو عندك اعتراض حضرتتك؟!!

-نانا: اسيل تريد تبقى مسلم خليهه ترتاح كم يوم اخذهه وياي لبيت اطلس

-مسلم: لا تخبلوووني كلتلكم تجي ويااي

-غدير: اي روحي شبيچ اوع شعندج لازگة يمنه

بچت اسيل متت قهر عليهه واطلس تخبل خزر غدير حتى تسكت عضت شفتهه وانطته نظرة بريئة..

-اسيل: اوگف اجيب غيث واجي

-الاطلس: ماكو تجيبين غيث انتَ هيووو شبيك خابص روحك جاي تگلك تريد تبقى هنا ترتاح ومتفقة وياك على أي اساس غيرت رأيك

-اسيل: اطلس حباب اني..

-محمد: عمو لا تبچين احنه اهلج واكسر راسه الينزل دمعتج

راحتلهه نانا تعرج برجلهه حضنت اسيل لصدرهه تهدأهه وهذا مسلم متخبل مو مسلم الهادئ الرزن الي نعرفه اصلاً غير واحد، حمزة لزمه يحجي بأذنه وهذا معمي على عيونه راح على اسيل يجر بيدهه ويصيح الا ترجع وياي..

حمت العركة مرة ثانية والولد كلهم گبو من جرهه من ايدهه بقوة لدرجة انخلعت ايدهه صاحت متوجعة تعيط من الالم..

-نانا: مجننووون شبيك وياااهه شترريد منهه جاي نگلك كم يوووم وترجع عليهه بس هسة تحلللم ارجعهه الك

-غدير: على كيفج عيني بلقيس تره مرته ومن حقه ياخذهه شبيكم گابين كلكم

-محمد: لا تحچيييين غدير صووتچ ما اسمعه!! حمزة اخذ اخوووك خلي يهدأ

جر حمزة اخو يطلعه وياه سارة وكفت حايرة متعرف وين تروح اشرتلهه امهه تروح وره زوجهه وطلعت وراهم، اللتفت عمي بسرعة على عمر الواگف على اعصابه وما گال حرف بعدما فاككو من مسلم..

-محمد: تعال ورايه انتَ

-عمر: اني؟

-محمد: اييي انتَ!!

راح للمكتب قبله وعمر وجه انظاره لأمه وعلي راحت امه تركض وره عمي للمكتب وكام عمر بهدوء يتمشى وراهم..

-الاطلس: شنو جاي يصير؟؟!

-نانا: ماعرف ناخذ اسيل للمستشفى؟

-اسيل: لا ماريد ما محتاجة

لح عليهه اطلس ياخذهه ماقبلت وعارضت دخلت لغرفة وراحت وراهه نانا بينما احنه بقينه واكفين حايرين شنو سالفة مسلم وليش هيج گب فجأة..

-غدير: يووه تعبنه من المشاكل

-رقية: مسكينة اسيل

-الاطلس: مريم نرجع للبيت؟

-مريم: ناخذ نانا واسيل ويانه؟

-اي هسة رايح اشوفهن

راح للغرفة وراهن ودعاء شددت على ايدي وتهمس..

-دعاء: مسلم عرف عمر يحب اسيل؟

-مريم: الظاهر هيج

-دعاء: علي نرجع احنه هم؟

-علي: لا انتظر عمر ما طلع

-دعاء: علي لو نروح احسن

-علي: ماعوف اخوي دعاء!!

تركنه وراح يوكف بباب المكتب ينتظر عمر وامه يطلعون يفرك بيده ويلوب بمكانه، رجع اطلس وحيد واضح نانا فضلت تبقى هنا ويه اسيل..

ودعت دعاء والبنات واخذت بسملة ويايه وطلعنه نوصلهه لدارهه واحنه نروح لبيتنه، جفن اطلس ينزف حط كلينس عليه متنرفز وينافخ لزمت ايده اهدأه باوعلي ورجع يركز بالطريق..

وصلنه لبيتنه راح للحمام يغسل واني بدلت ودورت على علبة الاسعافات الاولية ماتذكر وين حاطيهه، لكيتهه اخيراً جبتهه وكعدت على السرير علما طلع، اول مانفتحت باب الحمام كمت بسرعة اروح ناحيته..

-شو اشوف عيونك اطلس

-مابيهه شي غسلتهه

-بعدهه تنزف خليني اشوف حباب وخر ايدك

كعدته بصفي على السرير وتقربت عليه كلش اشوف عيونه حتى البؤبؤ مشخوط قلقت وخفت عليه، عقمتهه وخفت يدخل كحول بعيونه بصعوبة كملت وحطيت فوكاهه قطنة..

-توجعك يروحي

-لا راح الوجع هسة

-گلبي سودة عليه

-والعباس سودة عليه اني

-حبيب روحي

-ان شاء الله كل يوم هيج تتعور عيني

-اسم الله لتدعي هيج شبيك اطلس

اخذ ايدي يطبع قبلات خفيفة عليهم ابتسمت وحضنته بهدوء احط راسي على صدره..

-مريم: خفت عليك كلش

-اسف حبيبي خربت عزيمة عرسنا اكيد ضجتي

-لا ابد ما ضجت بس خفت عليك من شفت جفنك ينزف تخبلت كلت راحت عيونه الحلوة

-تروحلج فدوة العيون وصاحبهه

-گلبي گام يدگ حيل حيل هيج حسيته راح يطلع من صدري

-سلامة گلبچ

رفعت انظاري اله حچاهه بصوت راخي، اشرلي اصعدله شوية رفعت راسي وضحكت بعلو صوتي من عضني وبدت سوالفه......

**

"سارة"

ليلة كئيبة، من بعد مشكلة مسلم وعمر الصارت بعد ما رحت لاهلي، مسلم يتردد لبيتنه يطلب من حمزة يروح وياه علمود يرجع اسيل، يرحون ثنينهم ويرجعون ايد وره وايد كدام متقبل ترجع زعلانة ومقهورة من تصرفه..

واضح الاطلس عرف بمشكلتهه وقوت نفسهه بي وابوية هم تدخل والكل انگلب ضد مسلم..

بطني بينت وغدير عرفت بيه حامل والعجيبة كلشي ما سوت بالعكس فرحت، خفت من فرحتهه وحطيت ايدي على گلبي حمزة هم خاف وتوتر من ردة فعلهه الهادئة بس قررنه مننطي الموضوع اهمية ونتوكل على الله ومنفكر زايد..

دگ جرس بيتي راحت تفتح الباب المساعدة بدون لا تشوف من الكامرا، نزلت رجليه من الطاولة وحطيت فنجان القهوة على جهة وعيوني استقرت على الباب اشوف منو اجه..

وكفت على حيلي متفاجأة من شفتهه غدير جاية وبيدهه علبة حلويات، دخلت سلمت عليه بحرارة وحب وكعدت بجانبي على القنفة..

-غدير: اول مرة اجي للبيت وره ما غيرتي اثاثه قبل چان احلى

-سارة: بعد اختلاف اذواق

-اي صح صح، وينه حمزة؟

-بالدوام

-شوكت يجي

-على جية هسة هو

-هاا زين هاي جبتلج حلويات كالت امي نساتج على حلو

-سارة: عاشت ايدج ليش تعبتي نفسج

-لابني جبته مو الج ههههههه

مجاوبتهه طلعت علبة ادوية من جنطتهه وشربت علاجهه غمضت عيونهه اعرف العلاج يهدأهه كلش ويخليهه تخدر نوعاً ما وتحتاج تنام..

-سارة: شعجب اخذتي علاجچ هنا خاف تنعسين

-عادي انام يمكم لو عدكم مانع؟

-لا البيت بيتج براحتج

-وين غرفتج؟ لو نفسهه غرفتي القديمة كعدتي بيهه

-سارة: لا غيرتهه

-اريد اشوفهه

-بعدين هسة كعدي خلينه نسولف

-شبيچ متقبلين اشوف غرفتج خاف مهوستهه ادري بيج مرعبلة

-لا بس بعدين نروح من يجي حمزة

-ديلا بعد احسن

بلعتهه وسكتت حمزة محذرني ما اسمح لاي احد يدخل غرفتنه مهما كان ما گلي ليش بس حذرني اكثر من مرة..

-غدير: هاج اكلي حلويات

-سارة: ماشتهي نفسي تلعب

-من وره الكهوة شبيچ مخبلة تشربين كهوة مو زين على الطفل!!

-الدكتورة گلتلي فنجان باليوم ميأثر

-لا ممنوع تشربين كهوة بعد بطليهه مو زين على البيبي

-ان شاء الله

-ما عرفتي ولد لو بنية؟ مو رحتي البارحة للسونار ويه مرت اخوج العوبة

-سارة: غدير شبيچ انتِ شنو عوبة!!

-غدير: يووه اموت منهه ما اطيقهه

-سارة: مريم ما مأذية احد ولا تدخل بأحد كاعدة ببيتهه وساكتة

-ديلا كافي تدافعيلهه كوليلي جنس الطفل شنو

-ما عرفناه كاعد الطفل على مقعده

-ليش شبي ميتحرك اريد اعرف عندي فضول

-شسوي شبيدي اني ظلت الدكتورة تطبطب على بطني ماكو ميتحرك

تقربت تلمست بطني بسرعة تتحسسهه ابتسمت ورفعت عيونهه لوجهي وتكول بلهفة..

-غدير: جبيرة بطنج مبين الطفل صحته زينة

-اي الدكتورة كالت جبير

-حبيبي ماما ابني الحلو

-يمكن بنية

-ميهم نفس الشي المهم الي

دا اجاوبهه وسمعت صوت قفل الباب ينفتح، اخيراً طل حمزة وصل دخل مستغرب جية غدير بس فوراً غير ملامحه والقى التحية علينه..

-غدير: هلو حمزة شلونك

-بخير انتِ شلونچ غدير

-زينة كلش زينة صرت

-سارة: حمزة راح اصب العشا اني بينما تبدل

-غدير: اجي اساعدج

ثنينه اني وحمزة بقينه واحد يباوع للثاني غدير تمد ايدهه على شي بالبيت وتساعد شنو هالمعجزة هاي!

اجت ورايه والمساعدة هم ويانه كملنه ترتيب الميز غدير بس واكفة ما مدت ايدهه على شي اعرفهه من قبل هي هيج..

-غدير: رايحة اصيح لحمزة

-سارة: لا غدير هو يجي وحده

-غدير: الاكل يبرد اصيحله حتى يستعجل

-حبي عوفي براحته جاي يسبح هسة

-هههههه وتغارين عليه حبي اني شايفة كلشي تره جان رجلي شبيچ

-شبيچ شنو هاللعبان نفس لتحجين بهالطريقة قرف تره!

-ليش مو جان رجلي لو نسيتي بسرعة

-كاافي عاد غدير لا تزوديهه

ضحكت ضحكة رنانة واخذتلهه مقعد على الميز، فرت من العصبية جريتلي كرسي وكعدت مقابيلهه شوية واجه حمزة شعره مبلل ومبدل لتراك البيت، غدير ما شلعت عيونهه عنه طول الوقت تباوعله ومبتسمة العشا كله..

-غدير: احب كلش من تلبس تراكات رياضية تلوگ لجسمك الضخم

-حمزة: تسلمين

-غدير: حمزة شلونه شغلكم بس لا جاي يتعبوك

-لا زين

-اي انتبه لروحك فدوة لتجهد نفسك

كمت من العشا لعبت نفسي صدك انزعجت مدا افهم شنو قصتهه هاي البنية شتريد بالضبط، من باب زوجتني رجلهه بالقوة والغصب والا تحبي والا تحملين منه وهسة من حبيته وحامل منه گعدت تتغزل وتسولف بي كدامي تعبت نفسيتي منهه..

كعدت بغرفتي ونمت بفراشي بالي بقى يمهم بس مالي نفس اكعد واكابلهه، الساعة اصلاً متأخرة واني منعسة لفيت راسي ونمت وشيصير خلي يصير..

اقل الساعة وكعدت على اثر حلم، كمت اغسل وجهي مشتعل نار باوعت للساعة صايرة بـ 1:15 بالليل وحمزة مو بالغرفة وينه؟؟؟

طلعت ادوره واثناء ما اني امشي بأنحاء البيت سمعت صوت غدير جاي من المطبخ، صوتهه هادئ كلش وتعبان عبالك وحدة بيهه النوم عرفت هذا اثر العلاج الاخذته خدرهه..

-تعبتك اني

-حمزة: ماكو تعب

-غدير: اني لان احب گهوتك طلبتهه منك

-تدللين

-حمزاوي حليان هيج الحب يحلي

-غدير هسة اجيبلج الكهوة للصالة اذا تحبين

-لا ماحب اريد ابقى هنا اسولف وياك

-مبين عليج تعبانة

-اي لمني بحضنك

شهكت مكممة حلگي مديت عيوني اشوفهه تقربت منه تريد تحضنه ابتعد منهه بسرعة لازمهه من متونهه وينتر..

-غدير!! شنو هاي التصرفات

-طول عمرك راح تبقى هيج حمزة ما راح تتغير ابدد

-اتغير لشنو ليش اني شمسويلج؟!

-دااائماً راح تبقى ساااارة كل مرة ساااارة ساااارة سااااااارة ساااااارة

شالت الدلة مال الكهوة ورگعتهه بالحايط تخبلت اتهسترت صارت تعيط وتبجي بعلو صوتهه وحمزة واكف ما انطى ردة فعل كأنه متعود على هذا الوضع من قبل..

-غدير: انتَ ما حبيتني بعمرررك وحياااتك متحبنييي بس انييي غبية انيييي السبب اني سويت هيج بروحي كله منيييي

-استغفر الله

-شوووف حتى هسة تغيرت اكثررر قبل من جنت اصيح تحضني وتسكتني هسة ما تلمسنيييييي

-لاني متزوج وما يصير احنه منفصلين استوعبي هذا الشي غددير

-متزوووج اختي المنسوووخة الحمرة المقرفة الحبيتهه سنييييين رغم اني احلى منهه بكلشيي بس بعمرك ما شفتنييي بعمرك ما حبيتنيي

-صوتج لا تكعد صوووتج

-خليهه تكعد خليهه ياااارب يوم الاشوفه ميتة يااارب محترك وجهها وروحهه تحترك اريدهه تموت ربيييي اريدهه.....

هجم عليهه يسد بحلگهه خازرهه وجسمه كله يرجف عصبية وينتر..

-لا تدعين عليههاااا

حطيت ايدي على بطني ميتة خوف ابتعدت ساندة ظهري على الحايط اسمع ومنهارة ماكو بيدي شي وماعرف شنو لازم اسوي..

-غدير: دائماً هي تتفوق عليه بكلشي من يوم يومهه هي احسن مني واهدأ وارزن واعقل وبريئة وحبابة ومسكينة!!

-انتِ الى متى تبقين تقارنين روحج بيهه ما تملين!!!

-ما امل لااا لان هي سرقت گلبك وعقلك هي السبب بتعاستي كله من وراهه هي

-غلطااانة محد السبب بتعاستچ غير نفسج انتِ سويتي هيج بينه انتِ دمرتي حياتنه ثنينه ورغم كل الصار ما غثيتچ بكلمة وصرتلج زوج وسند!

-ههههههه زوج؟؟ زوج؟؟؟ لا حباب لا عفية صدك عوود حمزة جنت تتهرب وتسوي روحك نايم حتى متسهر وياي!! تشتغل بره الغرفة وتبقى سهران وحدك بس حتى متتقربلي نسيت لو اذكرك؟؟؟

-بس ما قصرت وياچ بأي شي لا تنكرين غدير! حتى طلاقنه انتِ طلبتي وانتِ ردتي ما ردت اطلگ

-اي صح اني ردته لان كلما اباوع بعيونك اشوووفهه!! اشوف انعكاس صورة سااارة بعيونك اشووف حبك وخوفك ولهفتك عليهه سبع سنين احنه متزوجين ما نسيتهه ولا كدرت تنساهه

-اكو يوم جبت طاري سارة كدامج؟؟ اكو يوم قارنتج بيهه؟؟ كطعت عن بيت اهلج سنننة ضبط ماروحلهم حتى ما اضعف من اشوفهه!!

-باوع انتَ تحبهه والله تحبههاا

-اريد افتهم شغلة وحدة انتِ وين تردين توصلين؟؟

-اريد اعرف ليش ما حبيتني سارة بشنو احسن مني؟ جاوبني بس جاوبني هذا السؤال والله اعوفك واروح

-مادري حبيتهه اول ما وعيت على الدنيا احبهه واريدهه واتمناهه الي بس ما صارت وانتهت السالفة بس انتِ دورتي الدنيا وگلبتيهه علينه وجمعتيني بيهه

-بس اني حبيتك بجنون ليش ابد ما حبيتني

-غدير المشاعر مو بيدنه حبي لسارة مو بيدي والله العظيم مو بيدي استوعبي الفكرة

-ما استوعب ماكدر اكره اختييي اكررههااا

-كرهيهه ما يهمني ولا يهمهه بس لا تأذيهه ولا تتقربين منهه خليج بعيدة عنهه مثلما هي بعيدة عنج

-كلت دمرت حياتك

-شنو

-انتَ كلت دمرتي حياتي

-لا انسي ما كلت هيج انتِ تعبانة

-لا انتَ كلتهه كلت دمرتي حياتنه احنه الثنين

-غدير خلص سدي الموضوع روحي نامي

-متندم لان تزوجتني حمزة؟

-شنو مناسبة هذا النقاش لا نحجي بالماضي خلص راح وانتهى

-تزوجتني غصب عنك بس لان ابوية طلب منك

-روحي نامي غددير هاي اخر مرة اعيدهه!!

بقيت واكفة بمكاني الى ان شفته طلع من المطبخ تبسمر بمكانه مصدوم من شافني هنا، بدون كلام جر ايدي وياه ودخلني لغرفتنه وطبگهه علينه..

-حمزة

-سارة اختج مو بوعيهه ماخذة العلاج وتعبانة ابقي هنا بس اروح انيمهه بفراشهه وارجعلج ماشي؟

ما لحكت احجي فتح الباب وطلع بسرعة دقيقتين ورجعلي يلهث ويمسح على وجهه، كعدت على السرير منطيته ظهري واسمع لحسراته العالية..

-سارة: شنو قصدهه غدير اشوف اختي بعيونك؟

-اختج مو بوعيهه كتلج

-احجي

اللتفتت عليه ملامحه مزعوجة ومتضايق كلش ضغط على اسنانه بقوة وزفر نفس عالي وراهه..

-سارة: ابوية شعليه بزواجكم؟

-ابوج طلب مني اتزوج غدير

-شنو!

هز راسه وكعد بجانبي على السرير، مشابك ايده بين بعض وحاطهن بحضنه بلع ريگ وكمل..

-من قبل چنتي اقرب انسانة لگلبي، اخاف عليج واحب اقضي وقت وياچ، ما چنت احبچ حب عاطفي بوكتهه ولا ببالي هيج افكار چنتي طفلة.. الى ان بديتي تكبرين وتشبين صرتي اقرب الي من قبل بسبب يوسف اعماركم مقاربة وچنتي كل يوم تجينه

-اي اتذكر

-جنت كل ما اشوفچ افرح، افرح حيل وارتاح، احس ملاك نزل من السما واجه يكعد بجانبي، يسولف وياي نضحك سوه ونتداهر تشاركني حياتهه وروتينهه وكلشي يخصهه..

-وبعدين؟

-بعدين سافرت ورحت ادرس جامعة بالخارج رجعت لكيتج بنية شابة تملك جمال مميز كلشي بيج جذبني وحبيته، عشقتچ وصرت ادور ظلچ تشتاق روحي لشوفتج واتعمد اروح لبيت خالتي حصة حتى نلتقي وهيج قوت علاقتنه ورجعنه اصدقاء

-اتذكر هاي الشغلات

-بس الوكت عكس وياي واكتشفت اختج غدير تحبني ابتعدت عنهه وتهربت منهه بس جنت بكل مرة اللگاهه بوجهي تحاول تتقرب مني وتسولف وياي وتبينلي حبهه..

اكثر من مرة وضحتلهه اني احبج الج ما حچيتهه بلساني بس أي انسان طبيعي راح يستوعب وفعلاً استوعبت بس صارت تزيد وياي وتتقرب اكثر صارت قريبة على امي وابوي وحبوهه..

تركتكم ورجعت سافرت اخذ الماستر جنت ارجع بالعطل حتى اشوف اهلي واشوفج الج بالذات.. بس الدنيا سارة الدنيا حقيرة كسرت ظهري واخذت اخوي الصغير مني دمرتني وسلبت احلى شي عندي اخذته

واخذتچ مني صار الي صار ماريد اذكر تفاصيل حتى ما اوجع گلبچ بس رغم هذا ما تركتچ..

كلت لامي اريدج تخطبيهه الي وماريد غيرهه مرة امي عصبت وگلبت الدنيا عليه شلون تاخذ وحدة....

-سارة: مكسورة

-حمزة: بس بعمري ما شفتج مكسورة سارة وما همني هذا الشي ولا درتله بال اعرفج اطهر من الطهارة بنفسهه واكص لسانه اليحجي عليج

-خالتي هواي عيرتني

-ما رضيت على هذا الشي وجنت اتعارك وياهه لدرجة اطلع من البيت ضايگ صدري محتاج اشوفچ اريدج اريد اللزم ايدج واكلج اني وياچ وماعوفج بس بكل مرة ما تقبلين تشوفيني

-لا مو صحيح جنت تجي واشوفك

-اجي شوكت سارة؟ من تنامين اجي بالخنسة ويه الاطلس ندخل عليج سنة ضبط انتِ عايشة بغير عالم مو ويانه ما تردين بشر يمج

-خطبت غدير بهاي الفترة انتَ

-صحيح وخطبتي الغدير صارت بالاكراه ما رضيت ولا اقتنعت بيهه امي كالت اخطبلك غدير أصريت ودكيت رجل ما اخذهه لو يموتوني غير سارة ماريد لو ابقى عزابي طول عمري.. تدخل ابوي وهددني يغضب عليه وخلاني اترك الشغل عنده بالشركة وما طخيت راس بس ابوج تدخل..

-ابوية؟؟

-اي، اجاني بنفسه وطلب مني اتزوج غدير

-مستحححيل

سرح وغمض عيونه كأن ديستذكر الموقف وشگد المه الموضوع..

-حولت وظيفتي عند ابوچ وبيوم چنت بالدوام مثل أي يوم عادي اجه يسولف ويايه طبيعي مثل كل مرة وفجأة كال بغصة..

-محمد: غدير منتهيه لا تاكل ولا تشرب ولا تنام بس تبجي منهارة

-حمزة: ليش شصاير

سكت ثواني يفكر بجملة صح يكولهه بس مستحيل يكدر يلگه مهما يكون هو اب وجاي يشهد انهيار بنته امام عيونه..

-محمد: لان افتهمت بيك تريد تخطب سارة

سكتت مانطيت ردة فعل استحيت من نفسي ومنه نزلت راسي حاير عمي محمد ميعرف اني احب سارة لكن يعرف ببالي هيج مشروع..

-محمد: اجيتك بنفسي اني وشيبتي ومن حبي الك وامنية حياتي تكون نسيبي اهديلك غدير هدية، يمكن تستغرب ما عشنه هيج تفاصيل احنه وما متعودين عليهه بس من حبي الك حمزة اهديلك بنتي اتمنى ما تردني

انصدمت هدية شنو؟ وين كاعدين احنه اصلاً اول مرة اسمع اكو هيج شي مال واحد يهدي بنته، چان مكسور ولاوي رقبته ماتحملت اشوف رجل خالتي "عمي محمد" بهذا الوضع عمي محمد الي ما ينزل راسه لاحد ولا يهمه احد اجه بنفسه يهديلي بنته..

-عمي اعذرني

الكلمتين الوحيدة الكدرت تطلع من حلگي هز راسه متفهم عافني وطلع تخيلت راح يكرهني او يطردني من شركته بس ما ضغط عليه وتقبل رفضي بس امي..

امي عادتني وابوي عاداني اكثر الكل عافني ونبذني اقرب شخص على گلبي الاطلس وچان مسافر بهاي الفترة سفرة عمل وطول بيهه ماعرفت شلون اتصرف تهت وضعت..

مشت الايام هيج وبيوم واني كاعد هنا ببيتي وبهاي الغرفة بالتحديد جاي اشتغل ودخلت عليه امي ملهوفة تدك وتلطم وتكول..

-الحگ بنت خالتك انتحرت

كل عقلي انتِ انتحرتي فزيت اركض مثل المخبل للمستشفى الكالو عليهه تخبلت عقل ما ظل براسي وصلت للمستشفى فحطان شفت خالتي حصة تبجي وعمي منهار وبلقيس موجودة وحتى الاطلس جاي..

-حمزة: شنو صار سارة شبيهه

-الاطلس: مو سارة غدير

صدمة الي قبل الكل وكفت عاجز شنو بيدي شنو لازم اسوي اباوع لاطلس ما يعرف بالسالفة واضح اهله ضمو عليه سبب انتحارهه ميعرف بيهه تحبني وهيج متعلقة بيه، رجعت لبيتي بعدما تأكدنه هي بخير وسوولهه غسيل معدة، اجت امي تلومني وتكول..

-كل هذا برگبتك حمزة كل وجع تحس بي غدير برگبتك انت يما بسك عاد خلاص بسك عناد البنت تحبك لا تصير اناني

-حمزة: يمة افهمي ماريد اتزوجهه اظلمهه وياي تعيش بتعاسة حرام اتزوج بنية اني احب وعاشگ وافكر بأختها افتهمو الله يخليكم

-واختها ما تبييك ما تبي تتزوج تظل چذي عمرك صك الـ 27 سنة متى تتنازل وترضى اخطبلك

-لو يصير عمري اربعين سنة ابقى انتظر سارة تتحسن واخطبهه

-الراح ما يرد حمزة استوعب عااد يما لا تهلك روحك سارة ما تناسبك البنت معيوبة لا تظلم نفسك معاها

-لا تكولين معيوووبة الصار مو ذنبههااا

-ما يهم ذنبها ولا مو ذنبها النتيجة وحدة ليش تتزوج بنت مو بنت!

زاد الضغط من الكل اجت خالتي حصة وفتحت وياي الموضوع تبجي من الخجل ما تعرف شتسولف وعمي محمد مكسور ظهره على بنته، ابوي من جهة وامي من جهة ثانية انحصرت بزاوية حقيرة وصعبة وتنازلت عن حلمي وحب حياتي وتزوجت اختهه..

كل يوم اشوفج واكل بروحي اتعذب افرفح وماكو بيدي شي، سنة ضبط اني وغدير متزوجين واني ما متمم زواجي منهه ماكدر مالي نفس بيهه وهي تحاول كل يوم ما ملت ولا ضاجت..

صعبة الفكرة جانت وأذتني عشت اكتأب بس بعد ماكو فائدة الصار صار وانتهى الموضوع سارة مو الي اختها زوجتي حرام اظل افكر بيهه..

غدير مرضت على بعدي عنهه وجفافي وياهه وتعبت حرت شسوي گلبي محترگ وما جاي تبرد ناري، رحت احاچي طبيب غدير النفسي مختصر كلامه چان..

"مشكلة غدير نفسية لازم تتعالج تقرب منهه وانطيهه الحب والحنان والدفو الي مثل حالتهه يوصلون للجنون اذا ما تلاحگولهم"

وهيج تنازلت وتممت زواجي منهه وبقيت اراجع طبيبهه واشوف وضعهه يتحسن كلما اكون اقرب عليهه، لنت وياهه واحسنت اليها ما حسستهه ما احبهه بالعكس جنت وياهه احلى من العسل كلام وحب وغزل بس حتى أدي واجبي كـ زوج وما اظلمهه وياي..

بس بقت تغار منچ وتكرهچ تحاول تشوه صورتچ كدامي وهيج مشت حياتي باردة مابيهه دفو الى ان اجه اليوم الي طلبت مني غدير اتزوجچ..

-سارة: انتَ ماقبلت تتزوجني وماردتني حتى غدير ماقبلت تطلگهه ليش؟

-لان عرفتهه لعبة منهه وعرفت غايتهه تأذيج لا اكثر اضافة اعرفج ما ترديني وتخيلت وصلت بيج المواصيل كرهتيني بسبب غدير ما ردت اعيشچ شعور الغصب نفس الشعور العشته

-اهلي جبروني

-اعرف بهذا الشي واني اسف سارة على كل الايام التعيسة العشتيهه

-لتعتذر ما سويت شي غلط انتَ هم مو بيدك الصار..

تچيت راسي على كتفه وحضنت زنده بيدي غم اجتاح گلبي توجعت على اختي ووضعهه وتوجعت على حمزة وعلى حبه الي اندفن كل هاي السنين..

كمت نمت بفراشي منطيته ظهري هاي الليلة عكس الليالي السابقة، ما ضغط عليه ولا حاچاني تركني لحالي ماكدرت انام ولا دقيقة واتوقع هو هم ما كدر ينام..

كمت من فراشي ضايق صدري طلعت من غرفتي اتمشى بالبيت انكسر واهسي بكلشي موجود هنا، شلون الي نفس واختي جانت عايشة هنا وتفتر وتكعد وتاكل وتشرب بمكاني ونفس وضعي..

اختنكت كلش وفتحت باب البلكون ارتاحيت بالهوا البارد اخذ شهيق قوي وازفر بهدوء برد داخلي..

-شو گاعدة؟

اللتفتت شفتهه غدير واكفة وعيونهه حمر مال وحدة باچية هواي..

-سارة: ماكدرت انام انتِ ليش سهرانة؟

-متضايقة من وره العشا

-تحبين اسويلج نعناع تشربي بلكت ترتاحين؟

-لا لو اشرب دمچ هم ما ارتاح

-شنو

رجف گلبي من تقدمت عليه وكفت مقابيلي مباشرة، رمشت كم مرة وابلع بريگي، تتقدم عليه وارجع ليوره صار سياج البلكون وره ظهري مباشرة..

-اكرهچ سارة اموت منج

-غديرررر شبيچ

تعمدت اصيح بصوت عالي بلكت حمزة يسمع بس شيوصل الصوت بعيد عن الغرفة..

-غدير: اخذتي مني كلشي شنو تردين ليش اني شمسويتلج

-غدير حبابة شو وخري شبيچ

شهكت طالعة روحي من تقربت عليه لدرجة لزكت بيه سياج البلكون حفر ظهري ناصي والرعب ترس گلبي، ضربت بطني ببطنهه المسفوط وكالت بعبرة..

-غدير: المفروض الي ببطنج يكون ببطني اني بس اخذتي مني

-حبابة حبابة وخري فدوة

-اريده احبه

-اي اي هو ابنج وابني هم والله راح اوكع غدير... لا لا حبابه لاااااا شبيچ راح اوكع فدوة فدوة غدددير لاا حبابة راح اموووت الله يخليج ابني شنو ذنبه يموووت شنو ذنبه.......

يتبع ♠️💸 ...

• ━━━━━━❪♣❫━━━━━━ •

توقعاتكم ♥️

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

والله لـَ خاطرك قررت أحب اشياء ،

عشت طول عمري مامقتنع بيها 🥹♥️

• ━━━━━━❪♣❫━━━━━━ •

-سارة: اي اي هو ابنج وابني هم والله راح اوكع غدير... لا لا حبابه لاااااا شبيچ راح اوكع فدوة فدوة غدددير لاا حبابة راح اموووت الله يخليج ابني شنو ذنبه يموووت شنو ذنبه

-غدير: شبيچ تبچين؟

-سارة: راح اووگعع والله راح اوووگع

-ما توكعين لا تخافين لازمتج

-غدير شتردين منييي شتردييين حبابة روحي والله ما مسويتلج شي اني

-بسببج حمزة يكرهني شسوي ويحبني شسوي علميني

-شنو لا لا لا والله ما يكرهج ابد ولا يكرهج غدير راح اوكع والله كوة مثبته نفسيي الطفل يموت تردين الطفل يمووت

-ما توووكعين كتلج

-تردينه نسولف؟؟ يله خليني اعلمج حتى حمزة يحبج يللله بس خلينه نوكف هناك حبابة

ضحكت تك خد وجرتني من سياج البلكون ودفعتني على الحايط بقوة ظهري احسه صار نصين..

-غدير: عود شنو تضحكين عليه؟

-سارة: ما جاي افتهم شنو تردين

-كل هذا وما فهمتي شنو اريد شكد غبية

تلفت اعصابي ارجف من فوك ليجوة ماعندي طاقة اجاوبهه ولا عندي طاقة اللاسن، العشته مرعب شفت الموت بعيوني ما خفت على روحي بگد ما خفت على طفلي لا يصير بي شي..

-غدير: شبيچ صفنتي!!

-سارة: غدير يمكن راح اسقط

-شنوو

لزمت ايدي بسرعة تعصرهه وفاتحة عيونهه نظرتلهه نظرة خوف انخبصت خبص نصت تريد تشيلني ودفعت ايدهه..

-سارة: لا اكدر امشي.. اريد اروح لغرفتي

-امشي اخذذج امشيي نروح للمستشفى لا يمووت الطفل

-هسة اكعد حمزة شوية وخري

-اني اكعده انيي

راحت تريد تروح وجريتهه من ايدهه اهز راسي لا، ما لحت عليه تركتهه على حالهه المريب ورحت اهرول لغرفتي، ماعرف شلون طلعت ببالي هاي الجذبة "جاي اسقط" بس ردت اخلص منهه..

اول ما دخلت الغرفة رحت على حمزة اكعده بأصابع راعشة، بصعوبة سيطرت على دموعي ماريد افزعه، اخيراً حس فرك عيونه وكال بصوت مليان نوم..

-حمزة: ها كناري

-حمزاوي كوم اريد احاچيك

فز بسرعة مخروع وخر الغطه عنه وفتح الضوه واجاني..

-شبيچ حبي شصاير؟؟ متوجعة؟؟

-حمزة...

كلت اسمه وانفجرت بكاء لازمة بطني وابجي بحس عالي، انهبط عليه وانخطف لونه حار شبيه وشنو يسوي بلا كلام جر جاكيته وجاكيتي وشالني يطلعني من الغرفة ما حجيت شي اني اريد اطلع اريد اهرب من غدير..

-غدير: هااا شبيهه شبييههه

-حمزة: لازمة بطنهه وتبجي فتحيلي الباب غدير

ركضت غدير تفتح الباب طلع حمزة يهرول بيه صعدني السيارة راد يسد الباب عليه ولزمت ايده اهمس بوسط دموعي..

-لتخلي غدير تجي ويانه

-شنو ليش؟

هزيتله راسي لا بدون لا انطق واضح وصلتله الفكرة، راح لغدير الجاية بأتجاهنه يحجي وياهه، ما طول بالحديث رجع للسيارة وانطلق بيه..

-حمزة: حبيبتي شبيچ بس سولفيلي دمي نشف

-ردت اموت حمزة ردت اموت

بچيت من تذكرت الموقف تخبل كام ميشوف بعيونه من بديت اسولفله الصار من البداية، ضرب على الستيرن هواي ويصيح محروك دمه وگلبه ويه كل صرخة يصرخهه روحي تروح واموت خوف..

-انتبببه راح نسوي حاادث حمزة فدوووة

-ولج دمررررتني هالبنية دمرررتني شسوووي بروحييي

-ماعرف شنسوي شلون نحافظ على طفلنه منهه والله اخاف اكعد وياهه وحدنه تدري حتى الحلويات الجابتهن خفت اكل منهن

-ماعرف شبيدي اني سااارة شبيدي اذا ابووج ما يرضى احد يتدخل بيهه وعايفهه على حل شعرهه ياابة بنتك مرريضة يا ناااس البنت مريضة تحتاج رعاية مختلفة بس جيبي اليفهم

-وهسة شلون

-مادري راح احجي ويه الاطلس واشوف شنو يكدر يسوي

-سودة عليه حبيبي اخوية ولا ارتاح

-بعد حظه هذا سارة حظظه وحظناا

-حمزة اخذني لبيت اهلي اريد امي

-وغدير؟

-ماعرف شنسوي وياهه نعوفهه ببيتنه؟

-لا لا مستحيل اعوفهه وحدهه هناك، سارة اني راح اخذج لبيت عمتج زهراء ابقي يمهه هاي الليلة وغدير ارجعهه لبيت اهلج ماشي؟

-ماشي

فعلاً اخذني لبيت عمتي دك على عمر يطلعله خطية انهبط الرجال عباله حمزة بي شي طلع يفتحلنه الباب بملابسه الداخلية ويفرك بعيونه..

-حمزة: هاي شبييك هو هيج تطلع

-عمر: وشمدريني جايب سارة اشم گفة ايدي شبيكم شصاير، هلو سارة شلونچ

-حمزة: فوت يمعوود

-عمر: ليش محسسني طالع كما خلقني ربي؟

-حمزة: عمر شسالفة

-عمر: خوش اوكفو استغفر الله هم نزل وهم يدبچ

راح يدردم جوه اللتفت عليه حمزة يهديني ويوعدني كلشي راح يكون بخير، كلشي ماكدرت اجاوبه بس اهز براسي ودعني من رجع عمر وعمتي اجت وياه خليت ودخلت لبيتهم..

-زهراء: سارونة خير شصاير

-سارة: ما صاير شي عمة بس حمزة صار عنده شغل فجأة وبيت اهلي بعيد كال اجيبج هنا اقرب

-عمر: شغل شنو؟

-سارة: ماعرف ما كال

-زهراء: يا هلا ومسهلا نوّر البيت بجيتچ حبيبتي

-سارة: اسفة عمة الوقت متأخر هبطتكم خصوصاً انتَ عمر

-عمر: لا يابة شنو السالفة عين غطا وعين فراش

كعدت بالصالة شوية وعمتي مطرتني اسئلة مبين ممصدكين حمزة عنده شغل، گوة تملصت منهم ورحت انام بغرفة الضيوف مجرد حطيت راسي على المخدة سرحت افكر وغفيت على هالوضع...

**

"بسملة"

مطر والجو بارد تعبانة من المحاضرات ومن لغوة الطلاب، ساندة راسي على كتف فاتن وصافنة على الخارج اراقب قطرات المطر وصوت الرعد يرهج بينه..

-فاتن: اخاف من الرعد اني بسووم

-بسملة: ميلوحچ شي كعدي وسكتي

-فاتن: خلينه نكعد جوه بالكافتريا نشرب كوفي حبابه اخاف

-اريد اطلع فاتن تعبانة كلش مو مال نكعد ونتگهوا

-اويلي يا عنادج، لحظة ذيج مو رقية حماة خواتج؟؟

وخرت راسي منهه ادور بعيوني صدك هاي رقية شجابهه هنا يمنه، اشرتلهه بيدي هلو من بعيد ما شافتني ظليت أشرلهه وكمت وكفت بمكاني صرت قرقوز انطط ياله انتبهت عليه واجت ناحيتنه..

-رقية: بونجووور

-بسملة: يا هلا بصرصور بس وينج وين البونجور دنيا ظهر هسة

-رقية: هسة ياله كعدت اني واجيت للجامعة

-فاتن: شعجب عدنه رقية؟

-رقية: اجيت اشوف صديق عمر هنا عندي مشكلة بفايلي وكالو هو هنا يشتغل

-بسملة: عفية هالعمر يعرف امة محمد كلهه

-رقية: كارثة بالعلاقات عمر لان محبوب ولسان

-بسملة: تندلين الرجال تعرفين اسمه؟

-رقية: لا منتظرة عمر يجي خوما اروح وحدي استحي

رفعت الموبايل تتصل بي واضح كللهه ثواني ويوصل لان شفناه بوجهنه بأقل من دقيقة..

-عمر: مساء الخير

ردينه عليه التحية سأل عن احوالنه واخذ رقية وراحو..

-فاتن: شحلاته

-بسملة: يعجبچ؟

-فاتن بضحك: لا ولج بس اقصد حلوين كلهم لاحظت من رحنه لمزرعتهم ولد بنات كلهم حلوين ما شاء الله

-بسملة: لان اهلهم حلوين تدرين عمر وعلي نسخة من ابوهم

-صدك وينه؟

-ميت بس شفت صورته ام عمر راوتني الشبه بيناتهم مخيف تكولين ابوهم توأمهم الثالث

-الله صاك ثالث نيالهه امهم

ضحكنه ثنينه وتذكرت من عمر كال يريد يخطب فاتن ابتسمت واني اباوعلهه فاتن جميلة ونازكة بس ماعرف توافق لو لا بعيداً عن ابن عمهه، فرق العمر بيناتهم هم كلش هواي..

-بسملة: فاتن اني اكبر منج بسنتين صح؟

-سنتين وخمس اشهر صح

-حرامات لو مسجلة جامعة من وكت اني جان ما صرت صديقتج

-حقيرة ليش هيج هاي فوكما تكولين همزين صرنه صديقات

-لا حلوة زيادة انتِ دتكسرين عليه

سولفنه بعد وفاتن تنتظر مكالمة من اخوهه قريب العشر دقايق ورجعو رقية وعمر نشوفهم يسولفون من بعيد رقية منفعلة بالحجي وعمر يأشرلهه على شي ليكدام..

-فاتن: راح يتزوجون ذولة الثنين وكولي ما كلت

-بسملة: لاا ولج رقية اصغر مني بعد مستحيل توافق

-ليش عود عادي

-لا اني اعرفهه اصلاً هي جانت تحب ابن خالتهه وتزوج خطية

-يااا خططية صدك عود

-اي والله عود فد يوم اسولفلج قصتهه بس خليني استأذن منهه ولو هسة حجيت نص السالفة اني وفضحتهه بس ميخالف

سكتنه من اجو ثنينهم رقية وكفت گبالنه وكالت..

-رقية: ها بنات كملت اني تعالو نشرب شي من الكافتيريا

-بسملة: ومحاضراتج؟

-رقية: عندي محاضرة بالـ 1:30 بعد وكت

-بسملة: لا احنه منتظرين اخو فاتن نريد نرجع للدار

-عمر: نعم؟؟

اللتفتنه على عمر الواكف يحجي بالموبايل سده بسرعة وتقرب علينه..

-عمر: وين ترحون بسملة؟

-بسملة: نرجع للدار

-عمر: وظافر شعلي بيكم؟

-فاتن: هو جاي وراح يرجعنه وياه بالطريق

-رقية: ياا على شنو خطية يتعذب هسة عموري ياخذنه

-عمر: وين اخذج انتِ روحي لمحاضرتج

-رقية: ماريد احضر مابيه حيل

-عمر: امشي رقية لا تتهاونين بدراستج

-فاتن بهمس: يحبهه وكولي ما كلت

-بسملة بهمس: هو هذا اسلوبه ويه كل بناتهم شبيچ انتِ

-رقية: ديلا اني لعد راح اروح باي

-عمر: انتبهي على نفسج حبيبتي

كرصتني فاتن وكالت بهمس مليان حماس..

-فاتن: باعي يگلهه حبيبتي سمعتيي

-لج هو هيج اسلوبه لان رقية صغيرة هيج يحاچوهه

-تره مو صغيرة البنية بالجامعة

-فرق جبير بيناتهم هذا السبب

-عمر: هسة منو راح يرجعچ بسملة؟

-بسملة: ويه ظافر ارجع

حك خده وانطاني ظهره يلعب بالموبايل رجعت فاتن تتصل بأخوهه هواي تأخر تعبنه من الانتظار..

-فاتن: وصل واكفلنه بره يله بسوم

-بسملة: مع السلامة استاذ

-عمر: هلا

درت جسمي عليه مستنكرة بروده ماهتملي وعبرني يمشي گدامنه كملنه طريقنه للبوابة مجرد شافه ظافر نزل من السيارة تحاضن ويه عمر وتسالمو سلام حار مبين صداقتهم قوية..

-ظافر: مشتاقلك هواي وينك ياخي ما تبين

-عمر: شغل

-ظافر: احنه نشتغل بنفس المكان عمير بس حتى بالدوام ماشوفك ما تطلع من المكتب

-ولك شغل شغل والعباس شغل

-راح احاول اصدك ولو احسك جذاب

-طبك مرض

-طاح حظك

ضحكو ثنينهم وعافونه واكفات نضرب صفنات، راح ظافر يصعد بالسيارة ونزل عمر يحجي وياه من الجامة شوية واشر لفاتن تصعد وياه بدوني..

-فاتن: يله بسوم

-ظافر: لا عمر راح ياخذهه تروح لبيت اختهه

-بسملة: اني اروح لبيت اختي؟

-عمر: اي

-بسملة: صدك؟ شو ماتصلت عليه

-بس گلتلي الي يله لا نتأخر عليهم

ودعت فاتن ورحت اركب وياه بالسيارة، ترددت اصعد لو ما اصعد وتوترت من نظراته يباوعلي عبالك لازم عليه لزمة..

-بسملة: اوكف ثواني

رحت بعيد عنه اتصلت بدعاء واكتشفت صدك تريدني اتغده عدهم بس ما نست تتصل بيه النادرة شلون عزيمة هاي مادري..

ركبت ويه عمر بسيارته الطريق هدووء كلش محد حچه بينه، الكسر حاجز الهدوء بعد كم دقيقة هو من كال..

-عمر: دائماً ظافر يوصلكم؟

-لا مو دائماً لان شقته بعيدة عن جامعتنه

-شلون ترجعون للدار؟

-نتمشى مو بعيد هو

-فاتن شعجب كاعدة وياچ بالدار واخوهه عنده شقة هنا؟

-لان كتلك بعيدة وهي متتحمل طريق بسرعة تتخربط

-هاا

-هواي تسأل عليهم تريد تناسبهم ههههههه

ابتسم بدون لا يعلق وجاوب تلفونه الخبصنه بالاتصالات، ضجت على ضوجته وهو يحجي بالتلفون انقهرت من عصبيته واضح كلش متأذي..

-عمر: اني شعليه علي هو من وحده سواله هوسة... ولك اصلاً مو يمه اني شبيك انتَ... وروح ابوي لا حوله ولا گرباه وحده تخبل وتعارك وياي شنو تريدني اشوف واحد يتجاوز عليه وعلى ابوي وابقى اتفرج؟...

سكت شوية يسمع للطرف المقابل، درت اباوعله انتبهت خده بي حمار مبين داخل بعركة جديدة ويه مسلم..

-عمر: اتحداه يكول اباوع لمرته ولك اني اسيل ما اخطفلهه نظرة حتى ما تحس وما اسويلهه مشاكل منيلك هاي الكلاوات مال اني صافن عليهه... ولي علي ولي عن خلقتي ما طايق روحي... چا تجذب اخوووك وتصدك ذاك ال*******..... مو صوچك طير يله

سد الاتصال ينافخ ومتنرفز كلش يضرب على الستيرن ويفشر بالانكليزي وغير لغات يمكن عباله مافتهم مثل خواتي..

-بسملة: احم استاذ

-نعممم!!

-شبيك بس دا اكول انتبه للطريق لتسوق سريع

زفر نفس قوي وخفف السرعة الجو متوتر كل دقيقة يذبله فد سبه على واحد منفس وملامحه غاضبة، بعد دقايق بالازدحام هدأ وكال..

-بسملة

-ها

-اني اسف لان نترت بوجهج

-عادي ما صار شي انتَ معصب

-اوف يا الله

-استاذ ولو تدخل بس على طاري خطوبتك لفاتن تره...

-خطوبتي لفاتن؟

-اي مو كلت انتَ تريد تخطبهه فاتن تحب ابن عمهه ويريد يتقدملهه كلت اگلك خاف تنقهر اذا ترفضك

-تره مو ببالي البنية

-لعد انتِ كلت لامك خطبيلي فاتن

-حچيتهه هيج بس كدام مسلم اريد اخلص من شكه

-ياا وانتَ عبالك من تكول اريد اخطب راح ينسى موضوعك ويه اسيل؟

-اولاً ماكو موضوع بيني وبين اسيل ليش محد جاي يصدك!! ثانياً اريده يعتق البنت وبسسس

-يعتقهه من شنو هي شكتلك منه؟

-لا طبعاً بس تسولف لامي وامي مثل الحبابة تجي تحجيلي تخليني اشوط من القهر

-بسملة: خطية اسيل مسكينة

-عمر: كافي بسملة

-هاا ذكرتك بيهه اسفة

-شنو ذكرتيني بيهه يابة البت تزوجت وانتهى كافي تلزگوهه بيه

-ماشي

سكتت ما متعودة عليه هيج معصب وصراحة قلقني وخفت يسوي بينه حادث، درت وجهي للجامة اباوع للطريق واشوف المطر ينزل فتحلي الجامة درت عليه شفته مبتسم..

-عمر: چنچ تحبين المطر

-اي كلش احبه

طلعت كف ايدي شوية من السيارة اتحسس القطرات تنزل عليهه انداريت عليه وكلت..

-خاف تتبلل سيارتك

-عادي فدوة

-هسة فدوة وبعدين تكول بسملة بللت سيارتي

-ههههه ماكول لا، لبسج خفيف بارد الجو

-هسة برد الصبح طلعت حلو الطقس

-اي بسبب المطر برد انتبهي لا تمرضين وراج دراسة

-صح والله عندي امتحان باجر وفد شايلة هم

-شلونچ ويه الدراسة

-ممتازة صح صعبة بس اني شاطرة عمي هي گوة

-كفووو

-اليوم انطاني الدكتور درجة اخر امتحان اعلى وحدة اني بالقاعة

-عفية هاي طلعتي صدك شاطرة عبالي تتفيكين عليه

-لا شنو اتفيك دائماً اطلع من الاوائل اني كل سنة اني وخواتي كلنه شاطرات ونبهات

-اي تعاملت ويه مريم فعلاً شاطرة وتتعلم بساع

هزيت راسي فرحانة ومفتخرة بينه احب اتفاخر بدرجاتي مو غرور بس اشوفه انجاز لان اتعب هواي بالدراسة واحب اكون ناجحة ومميزة..

-عمر: برأيچ اتزوج؟

-بسملة: مافهمت

-اتزوج اني اخطب؟

-حتى تخلص من مسلم وشكه بيك؟ لا اكيد

-ليش

-لان راح تظلم البنية الي تتزوجهه ولا عبالك زواجك راح تطفي نار غيرته بالعكس تشعلهه بالزايد ويروح باله بعيد

-بعيد وين بعد

-ممكن يكول اتخذ الزواج غطاء اله حتى ياخذ راحته بعد

-خرب عرررضه

-اوكف تره مسلم ما كال هاي اني احس هيج يفكر

-شلون ورطة هااي

-هونهه تهون عمر شبيك

-شهون وصديقي متهمني عندي علاقة ويه زوجته!

-بس مرايم تكول مسلم كلش متفهم وماعنده غيرة زايدة ولا شك شعجب هيج صار

-كلنه مستغربين

-خاف اكو احد كاعد يوز براسه عليك عمر

-يوزه عليه منو

-ماعرف بس واضح احد يعرف بحبك لاسيل وديستغل هالشي حتى يفرق مسلم عن اسيل

-حتى اتزوجهه

سكتت ورجعت ادور وجهي للجامة يعني فكرة الزواج بباله ويمكن هو يتمناهه تنفصل عنه حتى ياخذهه، بقينه على هذا الهدوء لحدما وصلني لبيت دعاء ماقبل ينزل راح واني دخلت لبيت اختي...

**

"مريم"

اليوم صار اسبوعين على زواجي حرفياً عايشة بالعسل حب وغرام ورومانسية وجمال ولطافة وكلشي حلو واكيد طبعاً متخلو علاقتنه من العركات والنكد والغيرة المالهه داعي..

كلشي جان صار مثالي لولا اسيل وزعلتهه من مسلم كسرت خاطري وفرحتي مالي نفس افرح واشوفهه بهذا الوضع الحزين تبجي وابنهه بحضنهه يلوع..

اتوقع اكو شي متعلق بغدير هم اطلس ما حچى بس قبل كم يوم اجه حمزة عدنه وبقو الليل كله يتناقشون واجه اطلس ينام مهموم مغموم ما نطق حرف..

ما سافرنه شهر عسل اجلنه الموضوع علما تنحل مشكلة اسيل، اطلس يستحي مني وكل يوم يعتذرلي عن تأخير سفرتنه ويوعدني يعوضني بالاحسن عجزت افهمه اني ما زعلانة ولا ضايجة حقه بكلشي يسوي مهما يكون اسيل بحسبة اخته يحبهه هواي ومتأذي على وضعهه..

من الصبح نويت اعزل البيت تعزيلة مرتبة نانا تعبانة مدا تطلع من غرفتهه ولا تعوف اسيل ثانية واني متكاسلة كلشي مدا اسوي تعلمت على البربخة بس خلص مصختهه..

اتفقت ويه نانا تاخذ اسيل تفرفهه شوية وتغيرلهه جو وافقت فكرتي وعرضت عليه اجي وياهن بس مالي واهس..

ودعت حبيبي الصبح راح للشغل ونانا واسيل هم طلعو واني لميت شعري كبة عالية وطگيت دشداشة امي المگطمزة (القصيرة) جايبتهه وياي مال تنظيف هاي ماكدر بدونهه وبديت اجلف بالبيت واعزل..

صارت بـ 3 العصر نسيت روحي لا ريوك ولا غدة لولا مكالمة اطلس يذكرني اكل چان راح من بالي..

-الاطلس: مرمر لا تتعبيني

-والله ماشتهي صدكني

-بعدج تشتغلين لج بابا كافي ما تتعبين انتِ

-اطلس البيت وصخ خوما نكعد على الوصاخة

-للمرة الالف اكلج اجيبلج مساعدة ليش تجيبين التعب لروحج

-ياا ماريد مساعدة ياخي شسالفة شبيه مگرمة

-لا تكولين ياخي

-ماريد مساعدة يا زوجي شبيه مگرمة

-مو اله تكونين مگرمة تساعدج على الاقل وتخفف عنج

-حبيبي اني مرتاحة لا يظل بالك

-ماشي يروحي الله ينطيج العافية، اكلي لا تنسين تره اجيچ

-ما اكل ما اشتهي

-والله اجيچ مريم لا تعاندين

-ههههه ما ما

سديته منه اضحك وهو يضحك ورحت اسويلي بتيتة وبيض لفيتلي لفة وكوب چاي وكعدت اكل، كملت غسلت المواعين ورجعت امسح اثاث الصالة عدنه مكتبة ضخمة كلش وهواي تلم تراب مليانة كتب رياضيات بعد العبقري مالتي يموت على الرياضيات..

طلعت كتاب كتاب امسحهن وارجع ارتبهن من اول وجديد من بين الكتب سحبت كتاب ووكعت منه ورقة مانتبهت عليهه الا من ردت اكوم، رفعتهه من الكاع اشوف شنو هي ولاحظت هاي رسالة وواضح رسالة حب من عمو محمد لـ نانا..

ابتسمت من قريت اول سطر مليان غزل استحيت اكمل الباقي عيب عليه رجعت الورقة وكمت..

اندك جرس بيتي رحت افتح الباب صحت منو ما اجاني صوت احد غلست ورجعت للبيت، ردو ردود يدكون الجرس صحت من مكاني منو اجاني صوت مرة، رحت افتح الباب وبهتت من شفتهن "غدير" و "نورسين" وياهه..

-نورسين: اوه وااو

-غدير: هلو مريم

من الصدمة انربط لساني ماعرف افكر بملابسي لو افكر ببهذلتي لو افكر اجاوبهن لو افكر ادخلهن جوه..

-مريم: اهلاً وسهلاً

-غدير: شنو راح تخلينه واكفات على الباب

-مريم: لا تفضلو

دخلن ثنينهن ونورسين تطگ بكعبهه على ارضيتنه المرمر، عطرهن يفوح وكشختهن على اخر حباية رحت امشي وراهن الى ان دخلن الصالة واستقرن يكعدن على التخم..

-غدير: وينه فراشكم ليش الارضية مكشوفة؟

-مريم: شلته قبل شوية اغسله

-غدير: تغسلي؟؟

-مريم: اي هو جنت انظف البيت من رخصتكم هسة ارجع

رحت اتمشى للغرفة على الاقل ابدل واترتب بس ما لحكت وكفت على صوت غدير تكول..

-مريم تره عيب تعوفين ضيوفچ هالشكل!

-مريم: لا شنو اعوفكم بس ابدل ملابسي وارجع جنت اشتغل مو لائق اكعد كدامكم بملابس ممرتبة

-نورسين: حلوة بكل حالاتج تعالي خلينه نشوفج

-غدير: تعالي تعالي عوفي اللبس

انحرجت ورحت اكعد مقابيلهن حطيت كوشة بحضني اخفي طگعة المي المبلله الصايرة على الدشداشة ابتسمت نورسين من شافت حركتي وحطت رجل على رجل..

-نورسين: سخون الحال عدكم

-مريم: اي صح حارة، مو نانا صايرة هالفترة تبرد ومتتحمل

نزعت جاكيتهه وطلع التشلتح حتى بعز البرد لازم لبسهه قصير ودلع، طالعة اكتافهه وصدرهه ورجليهه لحد نص الفخذ واضحات..

-نورسين: مبروك زواجكم ما صارتلي فرصة اجي هسة ياله فضيت

-مريم: الله يبارك بيج يوم الالج

-نورسين: ههههههههه ان شاء الله ليش لا

ابتسمت مجاملة وشتت نظراتي عنهه غدير من ضحكت وحطت رجل على رجل..

-غدير: هسة ما فهمنه ليش انتِ تشتغلين وينهه خدامتج؟

-مريم: ماعندي مساعدات

-غدير: شلون ماعندج لعد بلقيس وين

ضحكت وره جملتهه ضحكة مستفزة تمنيت اشيل الفازة الكدامي وارگعهه بوجهها..

-مريم: نانا مربية رجلي وبحسبة امه مو خدامة غدير

-غدير: اه صح صح يله انتِ متحتاجين متعودة على الخدمة والشغل والكراب

-مريم: صح متعودة احسن من گعدتي لا شغلة ولا مشغلة

-نورسين: انتِ صدك فلاحة مريم؟

-غدير: اي مو كتلج شبيچ حبي تنسين

-نورسين: هههههه كيوت

-مريم: شنو حابين تشربون؟

بصعوبة مسيطرة على اعصابي لوما العيب وكاعدات ببيتي الا اطردهن شنو هالقلة الادب وين يردن يوصلن..

-نورسين: اشرب قهوة سادة

-غدير: واني اريد عصير

كمت للمطبخ احس امشي على راسي شكدما يوجعني وراح يطگ من بوخة العصبية، سويت الكهوة وفتحت قوطية عصير حطيتهه لغدير ورحت اقدملهن، اخذن الضيافة عفتهن ورحت لغرفتي حتى ابدل لو اموت ما ابقى كاعدة هيج..

دخلت للغرفة هستوني دا انزع وسمعت صوت صياح من الصالة، بقيت بملابسي وركضت بره اشوف غدير تعيط..

-ايعع ايييع شنو هذا العصيرر

-مريم: شبي؟

-غدير: طعمه مقررف المواد الحافظة تلعب النفففس شبيچ متعرفين تسوين فريش؟؟

فكيت حلگي على كلامهه وعلى تفاهتهه نورسين حطت الكهوة على الطاولة وكامت توكف..

-نورسين: مريم احنه اجينه من دون موعد واضح انتِ ما مستعدة تستقبلين خطار

-مريم: چان المفروض تنطوني خبر اي هذا المنطق، بس مو ما مستعدة استقبل خطار نورسين

-غدير: باع البهذلة مالتهه وتكول مستعدة استقبل خطار انتِ جاي تشوفين لبسج وشعرج؟؟

-مريم: جنت انظف غدير ترديني انظظف واني لابسة بدلة!

-نورسين: اي بيب بس مو هيج شلابسة انتِ ههههه

-مريم: فوكاهه؟؟ كاعدين ببيتي وتعيبون عليه شنو هالقلة احترام هاي

-غدير: اوووع بيئة امشي نورسين نطلع الله يساعد اخوية شلون مكابلهه وكاعد

-نورسين: مريم اني اسفة ما قصدت اضوجچ قبل شوية بس لبسچ ضحكني ما اقصد اساءة ابد بكلامي

-مريم: انتن.....

قاطعتني غدير من كالت وهي تفر بيدهه..

-غدير: بت فگر شتتوقعين منهه نوره امشي حبي نطلع قبل لا تعدينه بفگورهه

-مريم: اذا انتِ هيج ما عاجبچ تكعدين وياي تفضلي برة ليش تزعجين نفسج حبيبتي وتغثيهه؟

حميت راح اتخبل كلني ارجف من العصبية، رحت اهرول للباب اطردهن واول ما فتحتهه صار بوجهي اطلس..

-اطلس

ابتسم ودخل للبيت جرني من خصري وداعب طرف انفي بأنفه..

-اكلت مرمرتي لو بعدهه

-غدير: اطلس!

رفع راسه على اثر صوتهه شاف بس غدير واكفة دتجي بأتجاهنه ونورسين بعدهه كاعدة بالصالة..

-الاطلس: هلا غديرة شلون صدفة حلوة هاي

-غدير: شلونك عمري

بوسته ولزمت ايده تدخله للبيت وياهه وخر ايده من خصري وجرني ندخل، بعده بباب الصالة ووكف من شاف نورسين عدنه هي هم مبين تفاجأت بشوفته بس تفاجأهه چان بفرحة لدرجة اجت تريد تسلم عليه وتبوسه كدامي!!!

بعدهه عنه بطريقة لطيفة عبست بوجهه ماهتم وراح يكعد على القنفة وجرني وياه يكعدني بجانبه..

-الاطلس: يا اهلاً، مرمر ما گلتلي جايينه ضيوف

-نورسين: مرمر؟ خوش لقب

-غدير: اطلس مرتك طردتنه

غابت ابتسامة اطلس وباوعلي ما حجيت شي مالي نفس اباوعلهن حتى، ضحكت نورسين مجاملة وكالت بلطف مصطنع..

-نورسين: ههه هي بس شوية عصبت غدير حقهه يعني مو مشكلة عادي ما زعلنه اخذنه الموضوع بروح رياضية

-مريم: ههه ولا اني زعلت من عيبتو على ملابسي وشكلي وضيافتي عادي اخذت الموضوع بروح رياضية

-الاطلس: اها حلو

-غدير: احنه اجينه نوجبهه نورة جايبتلكم هدية مال زواجكم بس مرتك حساسة

-الاطلس: شكراً نورسين هديتج واصلة

-غدير: بس؟؟ بس شكراً نورسين هديتج واصلة؟؟؟

-نورسين: اطلس كأن انتَ ما طايقنه هسة

-الاطلس: لا بس تعبان شوي اجيت للبيت ارتاح اريد اشبع من مرتي وانام

فتحت عيونهه نورسين وغدير لو اطخهه تنفجر وجهها صار احمر ولعت، لزم ايدي اطلس وكال بهمس مسموع..

-الاطلس: شحلاتج بهذا اللبس

-مريم: ههههه مبهذلة حبيبي وين الحلى

-الاطلس: لو تلبسين چيس زبالة هم تاخذين گلبي

-غدير: احممم نورة هديتج وينهه؟؟

-نورسين: مادري

اللتفتت عليهه غدير خازرتهه رجعتلهه النظرة نورسين وكامت..

-نورسين: sorry الهدية بالباب تركتهه بس بالي شرد، عندي شغل اني لازم اروح مبروك مرة ثانية اتمنالكم السعادة

-مريم: تسلمين

طلعت بسرعة وغدير بقت تباوعلنه بحقد راح تبلعني كامت وراهه وبقى اطلس كاعد بمكانه ما راح وراهن يودعهن..

-مريم: وعيون امي طردتهن لان عيبن عليه واستلمني اصلاً هنه...

-الاطلس: وليش جاي تبررين؟

-لان هنه چذبن ما كالن ليش طردتهن واصلاً ما قللت ادبي وياهن بأي شكل من الاشكال

-هذا هو راحن ليش ضايجة

-لان چذبتتت ذيج السحلية

-منو السحلية؟

-نورسين الروسية!! اوووفف راح اموت ولك عيني ما شفتهه انتَ شلون تباوعلي عبالك شايفة شي مقزز وتكلي ملابسج يضحكنن خلي ملابسي تضحك ولا اتشلتج ويشوفني الزين والمو زين

-اويلي يابة اشتعلت روحج على هذا الجمال

-شنووو

-كل يوم اخليهن يجن ويعصبنج حتى اشوفج بهذا الحال

-يا حال اطلس شوف اني وين وانتَ وين راح امووت راح انفجرر.. هاي شنو عززه شبيك يبوو اطلس ما سابحة والله جنت انظف توصخت لا وين ماخذني وييين..

شالني ياخذني للغرفة واني ارافس واعيط كل عصبيتي راحت من بده بسوالفه ومداهرته ماكدرت ما اطخ راس واميل نسيت الصار وقضيت احلى وقت وياه..

ثاني يوم العصر خالة حصة اتصلت كالت راح تسوي كعدة اليوم بالليل بمناسبة زواجي بجيت دكيت ولطمت انمطلت ولبطت بمكاني اعيط..

-لعددد هسة خااالة تكوووول ماعنددددي ملاببببس

-الاطلس: هاي شبيچ تلبطين

-حظظظي الزبااالة شوكت يصير بي خيرررر

-صدك تحجين

-ماعندي ملابس مااعندي اروح مجرودددة اخلي اختك تضحك عليه؟؟؟

-مريم الكنتور يصيح الغوث

-ماعندددي مااعندي ملابس هسة خالة تحجييي هسة ياله تكول بيوم العزيمة العصر

-ولج شبيچ تلطمين تردينه نطلع؟؟ امشي نطلع نشتريلج ملابس

-واجتمااااعك

-أجله والله أجله

-جذااب جاي وفدد شلون تأجله

-اشوفلي چارة وياهم انتِ اهم حبيبتي

- كومي مريم رفستيني رفس ببطني

انتبهت صدك جنت ارفس بي وما حاسة، كعدت على حيلي خجلانة وخرت عطوبي من وجهي وابتسمت..

-اذيتك؟

-لا بس طلعن مصاريني عادي

-تستاااهل

-ليش وولج

-منو گلك متشتريلي ملابس فوكاهه حايرلي بالوفد

-مريم انتِ بيج شي حبي؟ جاي اكلج راح نطلع وطز بالوفد

-لا تحاجينييييي فاير دميييي

-هاي شبيهه متسودنة عليه

-من وره سحليتك الصفررة باوع اطلس اني مو مخبلة وما اغار ولا اهتم بس هاي الصفرة لتجيبلي طاريهه اتخبل اموت ولك اموووت

-هو منو جايب طاريهه

-محد

-بعد شكو؟ يله كومي بدلي حتى نلحك نشتريلج شي

-ماشي

بدلت بسرعة ورحت لـ نانا اتطمن عليهه وعلى اسيل مفتشلة من همجيتي وعصبيتي على اتفه الاسباب واسخفهها، عرضت عليهن يجن ويانه ماقبلت نانا واسيل هم ما رادت..

رحت ويه اطلس للسوك واشتريت على ذوقه فستان چويتي جريء تعجبت من اختار هيج شي بس من رحت اگدره عرفت ليش اختاره برز جسمي وبياضي صدك طلعت اخبل عشقت نفسي بي، دخل وياي للمنزع كمت اگمز ضحك وهمس..

-صوتج لا يطلع

-شلون تدخل ويايه شلون فشلة

-ابو المحل صاحبي معليج، شو تعالي اشوفج

-يجنن اطلس مو بله

-بزاف

-والله يخبل اريده

-ماشي بساع اخذي حتى نشوفلج شي لعزيمة اليوم

-عزيمة اليوم، لعد هذا شنو المن

-ان شاء الله تردين تلبسين هيج شي كدام الناس؟؟؟؟

-صوتك فضحتنه، اي شبيك هو بس نسوان احنه

-مريم صدك تحجين انتِ باعي جسمج!!

-عادي عادي بس نساء لتصير معقد محيطي

-ما تلبسين هيج لبس ما ناخذه امشي نشوف غيره

-فدوة فدوة اذا تحبني ناخذه حباب والله حبيته يخبل يجنن يموت يملخ

-لان يملخ ممنوع تلبسي هذا مال اني وياچ بالغرفة شنو لابسته كدام الدنيا كلهه

-لا اطلس مو لهدرجة شبيك

فعلاً الفستان مو لهدرجة رخيص عادي بس لان ممتعودة اللبس هيج لبس وهو هم متعلم عليه بالمناسبات اختار شغلات مستورة هذا السبب متفاجئ..

-اخذه حبيبي مو؟ اخذه يروحي؟ كلبي انتَ احبك اموت عليك اخذه اخذه؟؟

-مريم اويلي يمريم

-هاك بوس ايدي وخليني اخذه

-امشي لج تنطيني ايدهه، اخذي واني اعلمج بعدين

طلع من المنزع طرت فرح نزعته ودفعنه فلوسه رهمتله حذاء ورجعت للبيت طايرة بيهن، راويتهن لنانا واسيل كامت تصوفر..

-اسيل: الله شنو هذا بزاف روعة

-مريم: مو بله؟ نانا انتِ شرأيج

-نانا: بزاف زوينة راح تطلعين مرايم

فرحت على اطرائهن ورحت لغرفتي اسبح وارتب نفسي اطلس قضى الوقت كله على الحاسبة يشتغل من البيت، ساعدني بالفستان وحتى شسور شعري ويايه متت ضحك على تصرفاته وهو يجر شعري ويكول..

-الاطلس: العطوب هاي شلون تنسفط

-مريم: متنسفط ثانياً اسمهن عطوب مو العطوب الله يخليك

-كعدي ام العطوب

-اطلس استعجل بسرعة راح الوقت عليه

-اسف حبي هاي اول مرة اشتغل كوافيرة

-اوووي تخبل يلوگلك تره

-مريم تنلصمين لو اجيچ

-هاي شبيك ميصير نشاقيك شجاك

-ما رحتي صالون وخلصتيني لو الا تمرمرين گلبي

-اطلس انتَ مو زوج صالح تدري لو لا

-اي صح مو زوج صالح واني عايف شغلي وكاعد اسرح شعرهه للخانم

-اكلك حبيبي شو مان عليه انتَ تره اريدك تسوي كيرلي وراهه

-مرررريم

-والله شبيك ماريده يبقى سرح

-وليش هسة ياله تحجين ضيعتي علينه الووقت

-مو شوف لازم اول شي تسرحه بعدين تلفه هو هيج التكنيك باوع راح اسوي خصلة اعلمك وانتَ كمل

-والعباس لو جماعتي يشوفوني يسووني ميز تنمر سنة ضبط

-ليش ما استاهل اني محيطي

-تستاهلين يابة والله تستاهلين اني اعلمج اليوم

-اطلس دتقلقني شنو راح تتحول اليوم لو شنو

ضحك وكمل يسويلي شعري الف چوية انچويت كل شوية نازة، ماعرف اسوي شعري وحدي هاي من قبل بسملة تكعد تشسورلي وتلفلي وهسة نستغل اطلس..

-الاطلس: تفضل

انطرقت الباب ودخلت نانا فتحت حلگهه على حالنه وضحكت بصوت عالي كلش..

-نانا: والله وكت اطلس صاير كوافير

-الاطلس: شفتي نانا شسوت بيه هاي ام لسان

-مريم: نانا تره بسرعة يتعلم خوش ربيتي ذكي

-نانا: اطلس تسويلنه شعرنه اني واسيل ما نعرف شلون

-مريم: اي اي تعالو كلشي يعرف يسوي

-الاطلس: هو اني صوچي جاي اساعدج عايف شغلي وملتهي وياچ تالي تسوني مسخرة شو دوخرن

كام عني يرجع للحاسبة، نانا راحت تراضي رحت وياهه نتنعوص عليه ونضوجه لحدما خليناه يضحك..

-مريم: اييي الحمد لله ضحك يله تعال كمل شعري حباب

-الاطلس: مرررريم راح اجيچ

-مريم: لا لا اتشاقة بعد هذا هو اني اخلصه وحدي

كملت شعري سويت كيرليات كبار وكملت مكياجي، لبست الحذاء ووكفت اباوع لروحي بالمراية اتمايز نفسي راضية ومقتنعة بأطلالتلي، انتبهت على اطلس من المراية عيونه عليه يباوعلي اللتفتت عليه بسرعة نزل عيونه يضحك..

-مريم: شو تباوع

-هيج

-خو كول طالعة حلوة

-ماكول هسة

-لعد شوكت

-من ترجعين

-يعني ما طالعة حلوة؟

ابتسم واشرلي تعالي ماقبلت اروح خزرني وعاندت اكثر، انرعبت من كام عليه هو فطس ضحك من شاف ملامحي وخوفي.. دفعني على الباب ولعب طوبة خرب مكياجي وشعري بسوالفه ومداهرته..

-مريم: تأخرت والله لازم اطلع حباب روح كمل شغلك

-هواي على گلبي كل هالجمال رحمي بحالنه يبنية

-ههههههه حلوة طالعة مو

-لا

-اهووووو

-گمر اربطعش وعلي اويلي عليك يا گلبي

جرني من خصري ورفع ايديه حطهن على صدره، تلمس خدودي بأصبعه قرصهن بخفه وحط ايده وره راسي يباوع لوجهي..

-الاطلس: نار الغيرة كتلتني مريم لا تطلعين هيج

-اللبس صاية شلون اطلع هيج

-حتى من توصلين لا تنزعيهه

-لا لعد ليش مبدلة اني تره اني عروس

-اوووف يابة

-احم احس استحيت شويه

-اناني اني اناااني ماريد يشوفج غيري

-ادري بيك اناني بس لازم اترتب واصير حلوة شلون لعد

-روحي بالدشداشة مال ذاك اليوم تخبل

-ايعع چني سليمة طالعة بيهه

-احلى سليمة

-هههه لهدرجة تشوفني حلوة

-احلى من الحلاة بنفسهه اعجز اوصف الصورة الي بعيوني وهي تعاينلچ

وخر الكذلة من عيوني وكال بلوعة..

-عيونج اويلي يَـ عيونج

-شبيهن

-غرگت بعيونچ واني طبعي ثگيل

ولعت خدودي من طبع قبلة خفيفة على طرف انفي وهمس..

-حبيني عليج العباس حبيني

-احبك والله

ضحك بصوت عالي وضحكت وياه مكممة فمي وخر ايدي من حلگي وكال..

-يا بلوة گلبي الحلوة يام عيون كحيلة

غصيت من شفته رجع يريد يبدي بحركة كوة شلعت روحي منه وشردت لغرفة نانا..

-نانا اوكفو انتظروني حبابات بس اعدل شعري

-اسيل: ههههههه اطلس لزمج

-مريم: شنو لا وين لزمني بس اني خربطته من لبست الشال

-نانا: اي صح صح

تهربت منهن ورجعت للغرفة همزين اطلس فات يسبح حتى اخذ راحتي ادري بي ميعوفني، بسرعة لبست الصاية والشال وطلعت اكعد بالصالة ننتظره..

اجه شافنه متحضرات هو وصلنه، كعدت مغطية ىجهي بطرف الشال واسيل تضحك على حركتي واطلس يغم بيهه..

-الاطلس: تضحك الرعنة

-اسيل: لا والله ما اضحك بس متوازية مرايم چان تمكيجتي ببيت خالة حصة

-مريم: مو خاف جايين الخطار باعي تأخرنه احنه كله بسبب بعض النااااسس

-الاطلس: تسكتين لو أخرچ بعد

-مريم: ماا

اللتفت عليه بسرعة وابتسامة ماكرة مرسومة على ثغره غطيت حلكي بسرعة وتوسلتله بعيوني يغلس ضحك بصوت مسموع خله نانا واسيل يضحكون هم وميدرون شنو السالفة..

وصلنه لبيت عيالي ومثلما توقعت واصلين المعازيم اغلبهه وجوه جديدة ما شايفتهه من قبل والباقي اقاربهم، من الباب استقبلتني هلاهل خالة حصة وهلاهل النسوان تلتها..

دام السلام لاكثر من ربع ساعة حلگي كام يوجعني من كدما بوست نسوان، بعض الوجوه اتذكرهه من عرس سارة واسيل ونفس الانطباع ما غيرو بوزن بوجهي وسلمن ببرود قاتل والبعض الاخر مطروني مجاملات لطيفة..

نزعت الصاية والشال نانا اخذتهم مني وكعدت متوسطة المكان، شوية غرابة وتوتر حسيت كل العيون عليه اكلوني بنظراتهم، دورت عيوني بالصالة حاطين بوفيه مفتوح للعشا والحلويات ومزينين الصالة بطريقة حلوة كلش كأن عرس واكيد الطابع واللمسة الخليجية واضحة..

النسوان تبسبس بين بعض وكل شوية وحدة سائلة عن سبب انفصالنه وليش رجعنه لبعض خالة حصة اكتفت بقول "صار سوء تفاهم وانحل الحمد لله"..

-هاي خالاتي

-حصة: نوره يا هلااا

دخلت نورسين كالعادة تخطف الانفاس بوسط الصالة لمعت عيون النسوان والبعض فرح بشوفتهه والبعض الاخر استغرب من وجود هيج جميلة اجنبية بوسطنه..

-حصة: هذي نورسين بنت المليونير الروسي أرون يصير شريك زوجي بالشركة

زاد الحماس بالمكان خصوصاً بعدما نزلت سارة من فوك وياهه رقية ودعاء كيفن من شافوني وصلت سلمت عليهن وكعدن وياي، شوية واجت بسملة من المطبخ فرحت اضعاف بشوفتهه..

-بسملة: قبل لا تسألين دعاء مسويتني ذيلهه وين متروح تاخذني

بعد ضحكات وسوالف حلوة كمنه نتعشى، كلشي جان يجنن ومثالي تونست كلش هواي، كعدنه على جهة وحدنه وحطيت ايدي على بطن سارة اتحسس الطفل وهو يتحرك نگمز بالهمسة من نحس بي وسارة ميتة ضحك علينه چان بقت گعدتنه حلوة لوما تدخل المتتسمى غدير!

-غدير: هاي شبيچن انتن تبسبسن

-رقية: تعالي غدير تحسسي الطفل كاعد يركل بسارة

كامت بسرعة دفعت ايدي عن بطن سارة كدام عيون بعض النسوان وحطت ايدهه بمكاني ضحكت بصوت عالي كلش كل الموجودين اللتفتو من سمعوهه صاحت بحماس..

-موجوود الطفل مووجود جاي احس بي

-بسملة: طبعاً موجود خية لعد هاي بطنهه شنو نافختهه

-غدير: ما يخصچ انتِ، سارة شلونهه صحته زين البيبي؟؟

-سارة: اي زين

-نورسين: حبيبي الله يكومج بالسلامة وتقر عينج بشوفته ما عرفتي جنس الطفل لسه؟

ابتسمت سارة وهزت راسهه كلنه تفاجأنه ما كالتلنه رجعت تسوي سونار مرة ثانية..

-سارة: يوسف راح ينور الدنيا

انخبصت الصالة خبص تبريكات ودعوات الهه ولطفلهه، هدأنه اصواتنه حتى النسوان متسمع فرحنه ضعف فرحتهه من رقية سألت..

-رقية: احچيلنه ردة فعل حمزة شلون جانت

-سارة: حمزة من عرف حامل بولد تخبل بنات تخخبل كام يعيط ونزل يسجد سجدة شكر والله اليوم كله قضاه يبچي ويمسح بعيونه

-مريم: يمة يا عيني اتخيل فرحته اوووي

-سارة: بنص گلبي دموعه حبيبي وفرح اكثر من اصريت نسمي يوسف، اني من قبل مواعدة يوسف الله يرحمه اذا تزوجت وصار عندي طفل اسمي على اسمه وهو هم اذا صارت عنده طفلة يسميهه سارة

غصت بآخر الجملة ومسحت عيونهه صارت لحظة صمت بيناتنه احنه البنات ماعرفت منو يوسف واستحيت اسأل جان بقيت ماعرفه لولا غدير تكول بحقد..

-غدير: قصدج يوسف اخو حمزة الذبحتي؟

-سارة: ما ذبحت احد اني غدير!!

-اسيل: بنات حبابات صوتكم

-غدير: امشي لج من يحجون الاسياد الخدم تنطم

-نورسين: غديرة stop please

-غدير: نوره اني اعرف اوادمي شنو هاي راس الحية هي واختهه وحدة لافت على ابوي والثانية على ابن خالتي خليهن ياكلن تبن ويطلعن من بيتنه

جاحظة عيوني على صلافتهه صح صوتهه مو عالي وماكو غيرنه الشلة نسمعهه بس قلة ادب وحقارة تخجل اسيل كدامنه..

-اسيل: ما لفينه على احد احنه غدير مسلم حبني وخطبني ما سوينه شي حرام

-غدير: اي وخنتي ويه عمر

شهگنه كلنه ونورسين فتحت عيونهه ممصدگة اسيل تخبلت ابنهه بحضنهه وصارت تتلفت علينه، تجمعت الدموع بعيونهه وهمست بصوت مكسور..

-اسيل: وراس ابني ما خنته ولا فكرت بغيره احبه واحترمه حرام عليج تتهمينه هيج اتهامات

-نورسين: غدير صدك عود؟؟ عمر واسيل؟؟؟

-بسملة: جاي تكلج لاا ماكو هيج حجي شبيچن انتن بس تردن سالفة تسولفن بيهه

-سارة: بنات كافي لا تفضحوونه رجاءً غدير احترمي نفسج كافي!

-غدير: طلع لسانج يالحمرة متقوية بحمزة مو اني الج لوما اكصلج هاللسان ما يطلع اسمي غدير

-مريم: بنات عيب صدك تحجون تره ناس موجودين بله سمعونه شيكولون علينه

-غدير: يااااا نسيتج اني شوف ما مبينه شنو حبي اخيراً اشتريتي حذاء؟

-مريم: شنو؟

علت صوتهه وحجت بنبرة مستفزة تمنيت اسويهه وصلتين من العصبية..

-مريم: حذائي بگتي وخمطتي اشوفج لابسة حذاء جديد اخوية تصدق عليج وجابلج واحد؟

-مريم: غدير كافي عاد احترمي نفسج هواي زودتيهه

-غدير: نوره هاي الفگور تدرين باگت حذائي وخلت اخوية يجذب عليه ويكول ذبه بالزبل

-نورسين: افف صدك والله

-حصة: شفيكم تتساسرون غدير بسسسكم

حجت بين سنونهه تنتر بينه غدير صوتهه عالي فشلناهه كدام المعازيم ضحكت غدير وهمست بيني وبينهه..

-تعالي وياي اراويج الحذاء يا حرامية

راحت تصعد فوك فولت عصبية كمت اروح وراهه والبنات كلهم اجو ويانه دخلت لغرفتهه واكفة وبيدهه الحذاء بس شفته تذكرت شي وتمنيت الكاع تنشك وتبلعني..

-غدير: لكيته بجرار الميز الي يم راسج چنتنه الحلوة الحرامية

جفلت كل اطرافي جمدت تذكرت وين ضميته، ايييي شلته من الكنتور وحطيته هناك حتى ميتلف الحذاء ونسيت وين حطيته بعد من غيرت مكانه ما فتحت الجرار من دورنه لان الجرار مهمل وكلشي منحط بي ما اجه ببالي ادور بي ضاق نفسي من الموقف وحسيت بحجم غبائي وفهاوتي حرت ماعرفت شلون اطمطم السالفة..

-نورسين: no way وخليتي اطلس يجذب على اخته وانتِ ضامة حذائهه عندج صدك تحجين

-غدير: شفتو حذاء ما سلم منهه شلون نأمن بيهه وهي بوسطنه ماعرف

-مريم: لحظة لحظة شبيجن اكلتني وشربتني

-غدير: سارقة حذائي وتكول اكلتني وشربتني

-دعاء: تره تفشلين غدير شبيچ كاتلة نفسج هو حذاء قحط عمي اجيبلج عشرة غيره

-بسملة: اي والله، لو خاف ماعندج ميخالف انطيج من مصروفي

-غدير: اني صرت افشل لان اختجن باگت حذائي؟ صدك بيئة

-مريم: منو كال بگته؟ شو بكيفج تحجين انتِ اولاً اطلس شمر حذاء بالزبل صحيح واطلس ميجذب بعد بكيفج تردين تطلعين اخوج جذاب او تتهمي بعد راجع الج بس رجلييي ميجذب اوك حبيبتي؟

-غدير: وهذا شنو البيدي تره امي لگته بجرارج من عزلت غراضكم خاف عبالج اني اجذب روحي سأليهه

-مريم: اي دا اكولكم اخذته ولبسته صح جان مو مريح وكعبه مكسور بس يله مشالي اليوم، ثانياً اني ضميته بالكنتور حتى ميتلف ولو هو صاير اسود بس هم عادي يبقى امانة، ثالثاً حبيبتي اتوقع اطلس هو الضمه هناك عباله حذائي اكيد ما خطر بباله اخته النرجسية الكشخة الي تحجي بالهاااي كلااس تلبس هيج حذاء

-غدير: هم ذبيتيهه براس اطلس يعني

-مريم: يا الله اني ضميته او اطلس ثنينه واحد حبيبي اساساً منفرق عن بعض ارتاحي غدير هذا حذائج ورجعلج ولو اطلس اشترالج ثنين بداله احلى واغلى بس انتِ كأنچ تحنين على العتيگ

طلعت من الغرفة وعفتهن اغلي غلي شكد اكره من احجي بهذا الاسلوب بس غدير متجي الا بهيج كلام لازم تتفشل ياله تسكت بس والله احس اني الي تفشلت ووجهي صار شكدودته كدام البنات..

دخلت للغرفة القديمة مالتي فتحت الجرار اشوفه فارغ اووف شجاني ونسيت گلب اعمى عندي يا مريم يا غبية ما تورطتي الا ويه غدير ولسان غدير..

كعدت على السرير اتصلت بأطلس حچيتله كلشي صار تنرفز وضاج من تصرفاتنه كدام الناس وشلون تعاركنه على هيج شي تافه..

-مريم: وعيون امي ما تعاركت اني والله صدكني هي خلتني هيج احجي راح اموت اطلس تخبلت نورسين واكفة والبنات كلهن صافنات عليه

-مريم ما تسوه انسي السالفة ختولي

-تسوه والله ما شفت نورسين شلون تباوعلي عبالك صدك اني بايگتهه قحط ابوگ حذااء

-شبيچ حبيبي ليش تبجين طز بالحذاء وطز بالموقف اني اتصرف خلص عوفيهه عليه

-اني اسفة لان كلت انتَ ضميته هناك

-لا زين سويتي خلص يا روحي عوفي الموضوع عليه اني احل المشكلة بس لا تبجين وتحرگين گلبي بدموعج

كحيت وغصيت بدموعي من حنيته گبر وكتهه هسة شبيه ماكدر اوكف بچي بس والله انهضمت راح اموت من الفشلة..

-كاافي بچي مريم ولج كافي اشتعلت روحي جاي اني سدي الموبايل

دا اجاوبه وطبك الخط بوجهي كعدت انوح وحدي فترة واندكت باب الغرفة دخلن خواتي عليه يصبرني مبين من طلعت من غرفة غدير هنه تمالخن وياهه..

-بسملة: النذلة منو هي وتتهمج سرقتي حذائهه المعفن المقررفة الزبالة

-دعاء: مسحت بيهه الكاع اني مرايم لا تبجين ولو ما فشيت گلبي بيهه سارة ماقبلت نكمل عركتنه امهه صاحتنه

-مريم: كله من وره غبائي شلون نسيت حطيته هنا

-بسملة: حبي نسيتي هذا هو شكو يعني مو انسانة متنسين عادي تصير والله بس ذيج حاقدة وبت فگر وكتلت روحهه على حذاء اجرب مثل وجهها

-مريم: كافي نشيل غيبتهه سكتن اموت منهه الحقيرة

-دعاء: باع حظي تكول لنشيل غيبتهه وهي تغلط عليهه والله مسخرة كومن كومن خالة حصة تريدنه

كمت امسح دموعي واعدل مكياجي رتبت شعري ونزلت اغتاضيت واني اشوف غدير ونورسين كاعدات كأن ما صار شي يضحكن سوه ومتونسات..

كعدت بين صديقات خالة حصة سألوني ليش صايرة حمرة وسألو عن الحذاء وشنو الموضوع الصار قبل شوية وليش غدير تعيط ابتسمت مستحية ماعرف شكول، خالة جاوبتهن..

-هههه سوالف بنات ما تسوه

ايدوهه قسم والقسم الثاني سكتن ما مهتمات، جرت ايدي وحدة هم لهجتهه خليجية خبط ماعرفت اميز من يا دولة، ابتسمت وكالت..

-ابي البشارة

-مريم: شنو خالة؟

-البشارة ابيهه عندي بشارة الك

-مريم: بشارة شنو؟

-حصة: ام حاتم تكلمي عاد بطيتي چبودنه

-ههههه زوجة ولدك حامل حصة باين عليها

-حصة: من صجچ ام حااااتم؟؟؟

-ام حاتم: والله طاعي عيونها واضح

-مريم بهمس: شنو هاي اخذت سونار لعيوني لو شسالفة خالة

-حصة: لأ يما لأ ام حاتم تحس بالحامل عدهه وهواس فيهم

-مريم: منجمة؟

-ام حاتم: لا ما اقره مستقبل بس الحوامل احس فيهم كذا يعني هبة من ربي

-مريم: خالة لا ماتوقع حامل صارلي اسبوعين متزوجة

-ام حاتم: حامل وراح تبشريني من تتأكدين

كامت تروح والنسوان بدن يطلعن وياهه خالة باركتلي وكالت بضحكة مشاكسة..

-حصة: حامل يملعونة ههههههه الدايح راح يصير اب

ابتسمت بدون لا اعلق بس ادري بروحي ومتأكدة مو حامل ماخذين احتياط شسالفة هاي كاشف لو شنو، فرغ البيت تقريباً وتأخر الوقت كلش بقينه بس احنه الاهلية اجه الاطلس سلم علينه واشرلي..

-الاطلس: الولد راح يجون مريم، بنات

كمنه اني وخواتي نلبس صايات ونمسح المكياج، بعدني دا اريد امسح مكياجي واجتني رسالة من الاطلس كاتب..

"ظلي بملابسج ونزليلي للحديقة يم المسبح"

ابتسمت ورجعت فتحت شعري لبست بس الصاية وحطيت الشال على راسي، نزلت جوه للحديقة شفته كاعد على الكرسي منتظرني، اول ما رحتله جرني عليه حضني بقوة ودفن وجهه بشعري..

-احبچ

-احم اي هههههههه

-هم ضحكت يا بوية شلون بينه

-اسفة والله ماكدر اسيطر على نفسي صايرة سفيهه

بعد وجهه من شعري مبتسم وركز يباوع لعيوني..

-شبيهه عيون فراشتي حزينة

-من وره الصار كلش تأذيت

-انسي مرمرتي، حاجيت غدير وفهمتهه كلشي

-هاي شبسرعة حجيت وياهه

-من صعدتي فوك ما طولت وياهه دقيقة اساساً جانت خايفة من شي ماعرف شنو هو صار شي بالعزيمة؟

-مريم: لا هو بس العركة صارت

-اممم لطيف

-كلش تفشلت

-مسحيهه بوجهي اني اعتذر منج نيابة عن اختي عذريهه مريم جاي تمر بفترة صعبة

-لخاطرك انسى الموضوع كله مو بس اعذرهه

ابتسم ونزل يقبلني بطريقة مفاجأة جريت نفس عميق ووخرته مني خايفة احد يجي يشوفنه..

-بنفسي نكملهه براحة

-اطلس عيب مو هنا

-اليوم نبات هنا مرمر

-ليش

-احتاج ارتاح شوي

-شبيك مبين تعبان شصاير؟

ابتسم بدون لا يعلق رجع يحضني ويحاوطني بحنان ميلت راسي على صدره اسمع لدگات گلبه المضطربة طرب لاذني، ما لحيت وياه بموضوع البيتوتة مبين عليه تعبان واجت ببالي النوبة ممكن راح تزوره واستحى يصارحني..

-تحب اجيبلك شي تاكله من جوه طاسة

-طاسة بعينج، وبكيفج

-يعني ما ماكل شوف مبين عليك تعبان، تعال اكعد هنا تعال حبيبي ارتاح لا تتعب اكثر من الوكفة

-مريم

-ها

-لا تعامليني هيج اترجاچ

حچاهه بكسرة وخجل عضيت على شفتي متندمة على اسلوبي هزيت راسي اي وقابلني بأبتسامة، اخذ ايدي طبع قبلة عليهه وحررني اروح..

كعد على الكرسي ومسح قطرات العرق المتجمعة على جبينه رغم برودة الجو ورحت ادخل جوه اجيبله شي ياكله، لفيت شالي عدل واللقيت نظرة على النسر نايم ولام جناحاته صايرة اضوج منه من عرفت چان يكعدون اطلس هنا بصغره..

بقيت اتذكر كلام اسيل عن الماضي مال اطلس وارجع اتلفت اباوع للنسر، بعدني دا اخطي خطوة اريد ادخل لباب المطبخ الخلفي ووگفني منظر هز گلبي وكياني كله تخربطت حالي واحوالي من شفت..

عمر واكف يحط كوب مي على السنك وتقدمت نورسين وبحركة سريعة جرته تقبله بطريقة مقرفة مشمأزة، جمدت اطرافي ماكدرت اتحرك لا البيه ادخل ولا البيه اطلع، ابتعدت عنه وهمست بينهه وبينه..

-اريدك عمر.....

يتبع ♠️💸...

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

مره كتلي الدنيا شنهي

وكتلك انت ♥️

بأهر جنديل

• ━━━━━━❪♣❫━━━━━━ •

"بسملة"

غيوثي يبجي واسيل تبجي وياه حايرة بحياتهه ومتعرف شلون راح تنحل مشكلتهه ويه مسلم، عجزت اقنعهه تنسى والوكت يحلهه بس ماكو ولا تنقتنع..

-بسملة: كومي غسلي وجهج يمعودة مو الطفل يفرفح وياچ

-رقية: اسيله حبابه كافي مو زين عليج حتى حليبج صار حار يأذي الطفل

-اسيل: ماكدر ارتاح مااكدر بنات ما سمعتو غدير شلون اتهمتني اني عندي علاقة ويه عمر!!

-رقية: ليش جديدة عليج سوالف غدير اسيل

ما جاوبتنه وكامت حطت ابنهه بالكاروك وراحت تطلع بره الغرفة، بچه غيث طگت بلاعيمه متت قهر بقيت عنده ورقية كالت..

-روحي وراهه بسملة فدوة اني ابقى عند غيث اسكته متعلم عليه

هزيت راسي ورحت وره اسيل اشوف شتريد تسوي، خفت عليهه وضعهه مو طبيعي ومبين راح تسوي شي غبي، شفتهه تروح للصالة الصغيرة..

-بسملة: عليمن تدورين اسيل؟ مسلم ما اجه

-اريد عمر

-شتسوين بي

-احجيله كلشي خلي هو يلگالي حل بسملة سمعتي صارت على كل لساان!!

-اهدي يا عيني ليش هالبجي منو يحجي عليج ويا لسان هذا كولي لاطلس وعمو محمد يكصو

-اريد عمر بسملة لازم احجيله، هو راح يتفهمني هو صديقي من قبل

رحت وياهه ندور عليه سألنه علي ودعاء الكاعدين يضحكون ويبسبسون علي كال بالمطبخ راح يشرب مي..

مشت اسيل تروحله ووكفنه ثنينه من طلعت نورسين من الحمام وبوجهها للمطبخ جانت شبه تهرول ومعمي على عيونهه لدرجة ما شافتنه واحنه وراهه على بعد امتار..

ما اهتمينه كملنه طريقنه نروح لعمر ووگفنه مشهد شكدما اكول عنه مقزز اكون مقصرة منظر حرگ عيوني وبوخ وجهي..

نورسين هجمت هجوم على الرجال واللتهمته حرفياً! مشهد طول ثواني معدودة بس احساسه كأن صارله ساعات كزبر جلدي من ابتعدت عنه بمقدار سانتيمين وكالت..

-عمر اريدك

فكينه حلوگنه اني واسيل متقززات بينما هو اخذله صفنة مرتبة بوجهها ماعرف عجبه الوضع لو لا لان ما اللتفت علينه وشفنه وجهه رغم احنه واكفات گدام باب المطبخ ساداته سد بأجسامنه!

اخيراً استوعب وبعدهه عنه بحركة سريعة وكال بصوت متفاجئ..

-شنو الموضوع؟.... oh my

-نورسين: ادري فاجأتك بس اشوف هذا افضل وقت اصارحك و...

-عمر: اوكفي لحظة شتصارحين شبيچ بنيتي انتِ شاربة شي؟؟ بوعيچ؟؟؟

يحجي بعصبية منفعل بينما هي قابلته بضحكة مايعة اعيد واكول احنه واكفات بالباب بس محد انتبه علينه هو صح عمر منطينه ظهره بس نورسين معقولة ما شافتنه؟؟

-نورسين: شبيك عمر

-عمر: انتِ الشبيج نورسين تخبلتي؟؟!

ضحك وراهه بصوت عالي يمسح لحيته وينفض ايده من المي دار عيونه على الباب ولقطنه واكفات فاكات حلوگنه فك عيونه علينه وبهت يوزع نظراته بيني وبين اسيل..

-نورسين: شبيك عمر شنو هاي ردة الفعل الغريبة

-عمر: نورسين وخري عن وجهي

عافهه واكفة مصدومة واجه ناحيتنه عبر من الباب بدون لا ينطق حرف واحد وطلع من المطبخ بينما هي وجهت انظارهه علينه وفتحت ايدهه ثنينهن مستغربة بكل وقاحة وجرأة!

لعبت نفسي شعوطت واشتعلت من هاي السحلية شتريد ساعة الاطلس وساعة عمر شتريد منهم وين تريد توصل؟؟؟

-اسيل: نورسين انتِ وعمر؟

ملامحهه مزعوجة كلش گلبت عيونهه وعبرتنه راحت تطلع بره المطبخ انداريت على اسيل ونترت بهمس..

-بسملة: شفتي اللعبان نفس لو بس اني شفته؟؟

-اسيل: شفت ومصدومة مستحييل عمر عنده علاقة ويه نورسين بسملة اني اعرفه

-شلون صلافة عيوني تحرگني لزك المشهد براسي لعبت نفسيي اشتعلت روحج نورسين

-اسيل: امشي بسملة نحجي وياه على موضوعي لو نسيتيني

-بسملة: انتظري انطينه صبر خليني استوعب المشهد

-اسيل: انتِ استوعبي هنا واني اروحله

عافتني وراحت بقيت واكفة متحجرة بمكاني بحياتي ما شفت هيج اعتراف صلف وجريء شلون متقبلة نفسهه ومتعايشة ويه روحهه؟؟

-بسملة انتِ هنا

ظهرت مريم من الباب الثاني للمطبخ واجت عليه..

-بسملة: مريم فاتچ منظر يلعب النفففس

-مريم: اششش شفت ولج معقولة الشفته حقيقي؟؟

-سارة: شنو حقيقي

اجت سارة حاطه ايدهه على بطنهه ودخلت للمطبخ راحت تاخذ كاسة مي تشربهه وتباوعلنه..

-مريم: هيج دنحجي على نور اختي تذكرناهه هسة

-سارة: ها، يله حبي اني راح اروح لبيتي تطلعون ويانه مرايم؟

-مريم: لا نبات هنا اليوم اطلس يكول

-بسملة: اريد ارجع للدار مريم ما ابقى هنا

-مريم: ليش مو اتفقنه تباتين ببيتي اليوم ماطول باجر عطلة عندج

-بسملة: بس راح تبقين هنا وماريد اظل

-مريم: حبي ابقي لخاطري دعاوي هم راح تبات اكيد

-بسملة: اذا دعاء تبات ابقى

-مريم: لئيمة واني شبيه متبقين ويايه

-بسملة: انتِ تغيرتي صار اهتمامج كله اطلس خليكم براحتكم بعدين اخبصكم

ضحكت كوة مالهه نفس والله وره الصار اشك احد يكدر يضحك، اخذت اكل من الثلاجة وراحت تطلع بره وسارة هم راحت بينما اني بقيت كاعدة بالمطبخ اتصفن..

ذبيت نفس وفركت عيوني خلص خليني اروح اشوف شصار ويه اسيل، رجعت للصالة نورسين مالهه وجود واسيل شفتهه كاعدة وايديهه بحضنهه تفرك بيهن وماخذتلهه صفنة على عمر السارح، رحت اكعد بصفهه وهمست..

-بسملة: ما حاچيتي؟

-اسيل بهمس: لا استحي المنظر ما جاي يروح من بالي

-حتى اني خرب حظي

-خلص باجر احجي وياه خليني اغلس اليوم

وافقتهه الرأي وكعدنه صافنات عليه طلعو حمزة وسارة وخالة حصة هم صعدت تنام ونانا فاتت لغرفتهه، بينما دعاء قررت تبات من عرفت مريم راح تبقى..

كسرت عيني اباوع لام عمر كاعدة تباوعلي ومضيگة عيونهه من صارت عيني بعينهه ابتسمت ابتسامة الهه معنى عضيت لساني من الخزي يبووو لكفتني اباوع لابنهه شكد عيب هسة تفسرهه غير شكل..

**

"مريم"

قررت اتناسى الموقف واللتهي ويه اطلس كعد ياكل وصافن عليه كل شوية يسألني شبيچ وماكدر اجاوب لساني انبلع..

-مريم: اطلس سؤال فضولي

-جواب

-نورسين حبت من قبل؟

غمض عيونه وضحك هلكان هز براسه يائس وكال..

-اخخ من نورسين شوكت نخلص من طاريهه

-لتفهمني غلط مجرد سؤال عادي

-اممم

-ما جاوبتني

-اي حبت

-صدك؟!؟

-اي شبيچ مستغربة

-شلون تحب معقولة حبت؟ زين منو هو

-بالفترة السافرت ادرس بيهه من رجعت جانت هستوهه منفصلة منه اجنبي هو مو عراقي

-صدك تحجي

-اي

-وهذا السبب چنت تكول انتَ ونورسين مو بعلاقة وهي متحبك؟

-اي طبعاً بس جيبي اليقتنع

-مبين عليهه جانت تحبه لو بس تسلاية ومضيعة وقت؟

-ماعرف جنت مسافر وما جابتلي طاري هي مرتبطة بيوم، عرفت من غدير مرة فلتتهه بالاتصال

-شعجب ما كلتلك

-يجوز تستحي مني والله اعلم

-سألتهه انتَ؟

-لا ما نتطرق لهيج احاديث

-زين شلونهه علاقتهه ويه اصدقائك؟ اقصد الشلة اني

-يعني عادية

-هم يحبوهه؟ اقصد نفس ما انتَ صادقتهه وقريب منهه بحساب صديقة طفولتك هي

-صح هي جانت وياي من الصغر بس الولد مو قريبين عليهه حمزة ما يتقرب منهه مو ستايله ومسلم عادي ما يهتم والتوأم ما يرغبولهه

-التوأم ميحبوهه؟؟

-ابد

-شنو السبب

-دائماً رويسية چانو من قبل خصوصاً هي وعلي ياابة شكد جانو يتعاركون

-اها

غيرت الموضوع كمل اكل وكمنه ندخل البيت اظلم كلمن رايح لمخدعه، اخذت ملابس بيت من رقية وصعدنه فوك لغرفتنه نزعت الصاية وبدلت بسرعة ونمت على الفراش..

-تعال طوطي

ضحك بتعب ومسح وجهه نام على الفراش وگرصني من زندي بخفة كلش مابي حيل..

-مريم: ما توجعت

هز راسه وسحب ايدي بخفة اكثر ما حسسته بضعفه ورحت انام على صدره مثل كل يوم رفعت راسي عليه اشوفه مغمض عيونه ووجهه باهت اصفر والعرق ينزل من جبينه للمخدة..

-مريم

-ها عيني

-اريد ماي

طفرت بسرعة اجيب مي من جوة ثلاجة غرفتنه فارغة جبت دولكة مي ورجعتله شفته شايل مخدته وواكف..

-مريم: ها وين

-رايح انام عند نانا

-هاي ليش؟ اطلس ما راح احجي ولا ازعجك

مسح على خدي وشعري وكال بتعب..

-لا حبي احتاج اروح عدهه

-خليهه هي تجي هنا لتطلع من الغرفة ابقى انتَ واني اروح

-لا حبيبي

سكتت ما لحيت وضعه ميسمح رحت اكعد على السرير بدون لا اجاوبه، لاحظته يباوعلي ويذب حسرات رفعت عيوني عليه اجه بأتجاهي يمشي ببطئ كلش..

نزل نفسه عليه ورفع وجهي من عند ذقني باس طرف انفي وهمس بتعب جزعان..

-لا تزعلين عليه

-ما ازعل روح براحتك

-بس ارتاح مريم

-اي اكيد براحتك ماعندي مشكلة والله اساعدك لو تنزل وحدك

اشرلي بيده وحدي وراح يطلع من الغرفة وياه مخدته، نمت بمكانه وحضنت مخدتي افكر بي تمنيت يتقبل يبقى عندي من تجي النوبة بس اعرفه يستحي ويتفشل منهه..

مرت ساعة ماكدرت اغفى افكر بأطلس وبعمر ونورسين بنفس الوقت، اخذت موبايلي راسلته ما جاوب دكيت عليه دكة وحدة وسديته حتى اذا كاعد هو يرجع يتصل بيه بس ماتصل..

راسلت بسملة اشوفهه نامت لو بعد واكتشفت بعدهه كاعدة، طلبت منهه تجي هنا عندي وراسلت دعاء هم لكيتهه سهرانة وطلبت منهه نفس الطلب..

دقيقة وثنينهن اجن عندي كمزت دعاء على السرير تسأل عن اطلس بينما بسملة بعده وجهها اصفر من الصار قبل شوية هواي تأثرت ضجت عليهه تلوثت عيونهه بهيج منظر..

-مريم: اطلس راح عند نانا ينام

-دعاء: هههه عقوبة مو هاي نفسي طلعتي هم اعاقب علي ينام بالصالة من يزعجني

-مريم: هسة عوفي هاي السالفة، بسومة شبيچ حبي

-بسملة: ماريد ابقى هنا متضايقة

-دعاء: ليش متضايقة

-بسملة: مو مكاني ممتعودة ابقى بره البيت او الدار

-مريم: رقية نامت لو بعدهه كاعدة؟

-بسملة: نامت

غيرنه الموضوع احجي أي شي بس اريد اطلعهه من هالصدمة ماعرف شبيهه اختي هيج متأثرة عبالك شافت شبح ووجهها مخطوف..

مر وقت لا بأس بي واحنه من موضوع لموضوع نعست بسملة وكالت راح تروح تنام وبقينه اني ودعاء سهرانات نسولف..

**

"بسملة"

تظاهرت النعس كدام خواتي مخنوكة ماريد ابقى بهذا البيت تعبانة كلش من لا سبب يمكن انطگيت عين بهاي العزيمة من جمالي كلتلهه لدعاء ماريد اكشخ بس بعد لحت عليه..

نزلت جوه نايمات بغرفة اسيل اني ورقية بعدني على الدرج وسمعت صوت بسبسة جاية من الصالة، نزلت الدرجات وضيگت عيوني نظري ضعيف والضوة مخنفس ناصي متبين ملامح بس واضح رجال ومرة كاعدين، كملت نزول الدرج ولگفتهم ذولة عمر واسيل!

-اسيل: بسملة تعالي

بقيت واكفة بمكاني ما تقدمت كامت فتحت ضوه لمبه توضحتلي الصورة اوضح اشرتلي بيدهه اروحلهم تنازلت وخطيت خطوتين واخذتلي مقعد على كرسي بعيد عنهم..

-اسيل: بسملة شبيچ

-بسملة: ليش صحتيلي؟

اشرتلي بيدهه "شبيچ" هزيتلهه براسي ماكو شي غلست واندارت على عمر تكمل كلامهه الجانت تحجي بي..

-اسيل: اني اسفة مرة ثانية لان خليتك تجي بهالليل والطريق طويل و..

-عمر: مو مشكلة

-اسيل: عمر ارجوك اتمنى نلگه حل تعبت نفسيتي انتَ صديقي قبل لا ارتبط بمسلم توكفلي بالصغيرة قبل الجبيرة اريدك تساعدني بهذا الموضوع

-عمر: شبيدي اسيل كلشي سويت وحجيت حلفت وقسمت ماعندي علاقة بيج بس رجلچ قافل تعبني

-اسيل: لو بس اعرف منو مطلع علينه هاي الاشاعة ارتاح تعرف اليوم غدير تعيرني كدام الكل اني خنت زوجي شوف الموضوع وين واصل

-عمر: معقولة هي غدير مطلعة هالاشاعة؟

-اسيل: لا مستحيل شنو غايتهه وشتحصل

-بسملة: احم اسيل

اللتفتت عليه انحرجت من شفت عمر يباوعلي اشرتلهه راح اروح انام شنو فائدة كعدتي هنا بس اسيل نترت بضوجة..

-اسيل: بسووم شبيچ متتحملين بس شوي انتظريني

-بسملة: اسيل شنو فائدة وجودي هنا حبي

-اسيل: تردين تنامين نعسانة؟

-لا ما نعسانة بس..

-اسيل: لعد شبيچ تتشردين

-عمر: اني اعرف ليش تتشرد

حولنه نظراتنه اله رافع حاجبه ومبتسم تك خد، ضحك مستهزأ وحرك راسه يائس..

-عمر: زين من تجمعنه احنه الثلاثة حتى اوضح شغلة

-اسيل: شنو كول

-عمر: الشي الي شفتو اليوم اني مالي علاقة بي، ماكو أي شي بيني وبين نورسين لا من قريب ولا من بعيد وحالي حالكم مستغرب من التصرف وحقج بسملة متضايقة ومزعوجة مني جاي اشوف ما تباعيلي ولا رفعتي عينج بعيني من گعدتي لسه

-بسملة: لا شعليه بيك انتَ حُر

-عمر: مو سالفة اني حُر او لا بس هي مسألة ذوق هيج مشاهد ما لازم تكون بالعلن وحقكم اذا تضايقتو بنات اني متفهم هذا الشي

-اسيل: عمر صدكني اني اعرفك زين واعرف اخلاقك شنو بس تفاجأت من التصرف ما جنت ادري بيك تحب نورسين او بيناتكم شي

-عمر. اسيل ماكو شي بيني وبينهه اساساً ما نلتقي الا نادر

-بسملة: لعد ليش باستك!!

نترتهه مزعوجة من ركز عيونه عليه انتبهت على روحي ونصيت الموجة..

-بسملة: احم اقصد يعني...

-عمر: مادري ليش هيج تصرفت بسملة ثقي بيه ماكو شي بيني وبينهه ولا راح يصير

-بسملة: يمكن تحبك

-عمر: لا ما تحبني بس تريد تتونس على الاغلب او ممكن تريد تثير غيرة اطلس

-بسملة: وصخة!!!

-اسيل: فعلاً وصخة شتريد هاي وليش الا الك اجتك؟؟

-عمر: لاني العزابي الوحيد بالشلة

-اسيل: اوكف فهمني شغلة من كالت "اريدك عمر" شنو قصدهه!؟

ميل زاوية فمه بطريقة ماعرف بس طبعاً يعرف واني واسيل هم وصلتلنه الفكرة تريد علاقة متكاملة بالحرام الحلوة واضح من قبلتهه العنيفة!

-اسيل: تدري فار دمي شكد جنت احبهه بس ضجت من تصرفهه ونزلت من عيني

-عمر: اني من اول ماحبهه

-بسملة: خو كوللهه كول ماحبج وخليهه تولي عنك ايعع تلعب النفس السحلية شكد صلفة وادبسزز شنو هالجرأة مدا اصدك اكو بنية بهاي القذارة

-عمر: بس اعصابج

ضحكت اسيل وهو هم قهقه بخفة باوعتلهم گالبة وجهي ما مهتمة لنبرة صوتي وعصبيتي اموت منهه من مريم سولفتلنه عنهه لليوم ما اطيقهه..

-بسملة: اروح انام اشرفلي

-عمر: بسملة

-نعم!

-عمر: لا عمي بطلنه، تصبحين على خير

-بسملة: كول شتريد

-عمر: جاي اسألج انتِ واسيل صدگتوني؟

-اسيل: ياا طبعاً نصدگك عموري شگاعد تكول انتَ

-عمر: وانتِ؟

-بسملة: تصبح على خير

تركته ورحت للغرفة شكو يريد ياخذ رأيي اني منو وشدخلني عسى ما صادقهه ولعب وياهه طوبة شعليه طبهم مرض..

**

"مريم"

كعدت الصبح متأملة اللگه اطلس بجانبي بس تذكرت نام عند نانا، طلعت من الغرفة بسرعة انزل اشوفه طرقت باب غرفتهه ودخلت شفتهه نايمة وحدهه وفراش اطلس ملموم ومركون على جنب..

صعدت لغرفتي واتصلت بي جاوبني بسرعة مستعجل صبح عليه وكال شوية ويرجع يخابرني وهالشوية جرت للثنتين الظهر وهو ماكو..

كاعدة لا اكل ولا شرب منتظرته يرجع يطمني بس طول هواي طول، نزلت لـ نانا بعدهه نايمة صايرة شكد تنام ودائماً تعبانة طلعت للمطبخ شفت خالة حصة واكفة ويه المساعدات علمود الغده تعلمهن..

-خالة دعاء طلعت مو؟

-حصة: اي من شوي راحت هي وبسملة سألو عنچ گلتلهم نايمة مو چذي؟

-مريم: لا ما نمت منتظرة الاطلس يرجع

-حصة: لأ ما يرجع الحين محمد گال يتأخرون طلعو للمصنع

-مريم: بس ما اتصل بيه اطلس

-حصة: مافي اشارة هناك محمد من امس بالليل خبرني

-مريم: هاا ماشي اروح اشوف اسيل اني

-حصة: اسيل مو هني طلعت ويه رقية للسوك وغدير مع صاحباتهه

-لعد منو هنا؟

-مافي احد غيري وغير بلقيس نايمة

طلعت اكعد بالصالة انتظر نانا تكعد حتى نرجع لبيتنه على الاقل نرتاح وناخذ راحتنه بس ما كعدت للخمسة هي نايمة شنو السالفة؟؟

اتصل بأطلس ميجاوب ماكو اشارة ادزله رسائل هم ماكو، كمت اللوب بالصالة وهيج بقيت لليل على هذا الوضع طكت روحي لحدما رجعن اسيل ورقية اللتهيت وياهن شوية..

للـ 11 بالليل ياله رجعو عمو واطلس هلكان هلاااااك وجهه رصاصي صاير من التعب والعرك ماكل وجهه، انهبطت وكف گلبي على وضعه رحت اركض عليه لزمت ايده بعدني ما حاچيه وحصة كالت بخوف..

-يمة وليدي شفييك

-الاطلس: تعبان شوي، وينهه نانا؟

-حصة: بحجرتهه

-مريم: شبيك اطلس

-الاطلس: مابيه شي حبيبي

گرص خدي بخفة وابتسم بتعب وراح لغرفة نانا، رحت اريد اروح وراه وقفل الباب عليهم بقيت واكفة بالباب قلقانه وضايجة..

صعدت فوك وطبكت باب غرفتي عليه بقووة افرغ حرگتي بيهه، كعدت على السرير وفتحت موبايلي اشوف يمكن مراسلني بس ماكو شي، قررت ما انام هالليلة واني بهذا القلق كمت واتصلت على نانا..

-هلو نانا انتِ كاعدة؟

-نانا: اي حبيبتي محتاجة شي؟

-اطلس يمج؟ شبي مبين تعبان؟؟

-نانا: اي نايم تعبان بزاف يحتاج يرتاح

-نانا ليش قفل الباب عليكم اريد اشوفه فدوة

-لا خلي هسة براحته اني اطمنج عليه

-النوبة ما زارته البارحة؟

-لا تعذب هواي

-حبابة بس تجيله انطيني خبر راح انتظرج

-ماشي

سديته وكعدت للفجر انتظر منهه رد غفيت على وضعي هذا وكعدت الصبح وكلشي ما اجاني على التلفون، تكرر الصار البارحة هم اطلس طلع وهو بهذا الوضع التعيس عمو محمد ميرحمه!!

تخبلت شنو هالقسوة ديشوف ابنه روحه دتطلع ولا يهمه الوضع اهم شي يمشيله شغله عجيب امر هالرجال عبالك الاطلس عدوه مو ابنه..

رجع متأخر بالليل كلش وهم بوجهه راح لغرفة نانا سبقته ووگفت بالباب اصده ماخلي يفوت، ذب نفس وتقرب باسني على كيف وابتعد يفرك وجهه، كال بوجع..

-مريم اسف راح ابقى هنا اليوم

-متبقى ماقبل

-مرمر احتاج ارتاااح

-تعال يمي ليش تتهرب شبيك حبيبي سولفلي حباب والله متت

-ماكدر.. مابيه حيل اسولف مريم

بعدني بأيدين بايدة ماعندة ذرة طاقة كوة واكف على طوله، حضنته بسرعة وحطيت راسي على صدره..

-حباب تعال فوك يمي

-مريم

-اخاف ابقى وحدي تعال

-فهميني مريم

-افهمك والله حباب تعال اريدك مشتاقتلك

-ماكدر مااااكدر ماعندي حيل

-استند عليه اخذ من حيلي

وخرت راسي عن صدره نفسه عالي متت قهر دموعي كامت تنزل على حاله شكد ديتعذب مسح دموعي بأبهامه الراجف وكال بنفس متقطع..

-ساعديني اصعد

طرت فرح بسرعة اخذت ايده وسندته على كتفي وصعدته ويايه فوك دخلته الغرفة ونيمته على السرير نزعته حذائه وجواريبه وغطيت رجليه، رجت اكعد قريب جسمه ونزعته الرباط وفتحت دكم قميصه..

-كافي

-مريم: متريد تبدل؟

-لا

-ماشي عندك علاج انطيك؟

-اي حبة بجيبي هنا

اشر بعيونه على جيب بنطرونه دورت بي طلعت شريط حب وفلوس وخرتهن على جهة وطلعتله حبه يشربهه، غمض عيونه وراهه وضحك..

-الاطلس: كما تدين تدان

-مريم: شنو؟

-راح امسلت لا تضحكين

-ههههه ليش تمسلت

-تذكرين الحبة الي انطيتهه الج؟

-من اجيت ببيتنه؟؟

-اي

-مريم: هاي نفسهها؟

-اممم

-مريم: ليش تاخذهه كل العدهم صرع يشربون من هاي الحبة؟

-هئ

ضحكت على الـ "هئ" مالته عود قصده "لا" هزيت راسي وما لحيت بالاسئلة المتعبة..

-مريم: صارلك يومين تاخذهه هذا السبب تنزل عند نانا؟؟

ضحك بين النايم والكاعد وهز راسه اي، كال..

-مو بس هذا السبب

-متريد تجيك النوبة كدامي

-مريم تنرعبين مني مخيفة

-معليك اريد اخاف

-ام لسان طلعي بره مابيه حيل تلزمين عليه لزمات

-اني اعلمك اليوم اصبرلي

-لا بشرفج سكتي

غمض عيونه وصار يحرك راسه فوك المخدة، بعد ربع ساعة تقريباً ضحك بجزع ضحكت وياه بدت مفعول الحبة تظهر، غطى وجهه وجسمه كله وخرت الغطه عن وجهه ونزيت من صاح..

-ولجججج

-بمة شبيك

-وخري

-مو تختنك بالغطا اطلس

رجع ينام مرت دقائق اخرى وفتح عيونه صاح "اخخخ رجلي" ولزمهه..

-مريم: متوجع حبيبي

-اخخخ تعبت

-سودة عليه

-انچبي

-هاي شبيك

-ام العطوب

-هاا بديت تمسلت

شهكت من انطاني لطمة على حلگي من قوتهه خدرت شفايفي فكيت عيوني عليه ممصدكة حركته لزمت ايده وصحت..

-ليييييش تضربنيي

-احبهه

-شنو هييي

يأشر على وجهي عرفت شيقصد عضيت اصبعه عاط متوجع وضحك وراهه..

-الاطلس: مچلوبة

-اطلس اني اعلمك باجر! حلكي كام يوجعني حرام عليك

-تعالي هسة اخلي يصير زين

-وخر فاسق ما صدكت عاد

-مرمر

-هاااا

-وسم

-بگلب... بگلب شسمه هذاك

-الطيار

-عوف الطيار اطلسي

-اشتعلت صفحته الا العن والديه

-شلون وانتَ متعرف اسمه

-ما تنطيني اسمه عبالج ما اعرفه والعباس انبشه واطلعه بس صبريلي

-اطلس

-عيوونه

ابتسمت وثبتت ايدي جوه حنچي وثبتتهن على صدره، رفعت راسي اتمايزه يفتح ويسد بعيونه بتثاقل مشيت اصابعي على لحيته وخدوده نزولاً لأذاناته وجريت وحدة منهن حيل عاط..

-الاطلس: خرب بأبووچ

-شنوووو

-ابوج السبب كله من وراه اموت منه

-تغلط على ابوية اطلسس؟؟؟؟

-لا

-لعد هسة شكلت؟

-اسف نسيت

-شنو نسيت

-نانا

-نانا شعليهه؟

سكت مغمض عيونه عصبت منه ونظرتله بنظرة حاقدة..

-مرمر

-خيررر

-احبج

-واني اموت منك

-جذابة وعلي

-لا ماجذب زعلت عليك وبعد ما حاچيك وراح اروح لبيت اهلي

-لا لا ليش مريم ليش

لزم ايدي برخاوة عيونه مطفية ودايخ كلش يتلعثم بحچايته..

-مريم: لان ضربتني زعلت عليك

-ما اذيج اني احبج ما اذيج وعد مو مثل ابوي اني مريم مو مثله

-شنو ابوك

-ما اذيج لا ترحين ما اللمسج بعد ولا اطخچ والله

-اطلس اهدأ

رجع سكت مرت ثواني قليلة وفرك عيونه بلحظة سريعة اصابع ايده تعوجت وصاح..

-اااخخخخ يابة

انعفست ملامح وجهه وانگلب على جهتي بالفراش لازم ايده ويون انرعبت عليه رحت اكعد بصف راسه اشوف شبي بس ميقبل يوخر وجهه من المخدة دافنه دفن ولام ايده لصدره..

-اطلس متوجع؟؟ شو بس باوعلي حباب

ما جاوب، لف على جهته بالفراش ورجع تمدد على ظهره، ايده ردت طبيعية مثل قبل وجر الغطا يغطي نفسه عدل..

-الاطلس: غطيني

-بردان حبيبي؟

-لا غطيني

-مغطيتك عدل اطلس

-بعد غطيني لا يجيني راح يجي صوته بأذني

عاكد حاجبه ومغمض عيونه بقوة انتفض راسه بطريقة سريعة انهبطت على حاله وخفت اضعاف للحظة قررت اروح اصيح لنانا اخاف مو گدهه اني بس تراجعت عن قراري من كال..

-لا لا لا

-مريم: شنو اطلس شبيك

-لا ماريد

حرت هو نايم لو بسبب الحبة بده يهلوس شو طول اني ماتذكر طولت هالكد لو يمكن اني ماتذكر شنو حجيت بالكامل وره ما مشه المفعول بكل جسمي..

هلوساته علت مافهم شيكول بس لكفت كم كلمة يكول "اني حباب" "جدو حباب" "عاقل" "لا احبهه"..

-اطلس

-ايدي توجعني ايدددددي

يصيح وصار يبچي!! فتحت عيوني استوعب لازم ايده ويصيح..

-توجع ااااخ

لزمت ايده اشوف خاف تعوجت بس كلشي ما بيهه عدله، صوته عالي كلش لدرجة اندكت باب الغرفة علينه رحت اشوف منو وبهتت من شفتهه غدير واكفة وبعيونهه النوم..

-غدير: شصاير؟؟ شبيكم شنو هالصوت

-مريم: ماكو شي غدير

-اطلس شبي؟ شو وخري

دفعتني ودخلت للغرفة شافت اخوهه عاكد حاجبه ويون ونات متألم ولازم ايده لصدره، وجهه متروس دموع وعركان انجنت غدير ودفرتني بقوة وكعت بالكاع وعاطت..

-شسووويتي بأخوووية

-مريم: مااا سويت شيييي راح تجيله النوووبة

-غدير: يهلوووس يا نوبة هاااي حقيرررة

-مريم: طلعيي غدير انتِ شيخصچ

-غدير: راح يموت شنو منطيته ولج نذذذلة

كمت بسرعة ظهري وجعني بس ماهتميت تركت غدير واكفة بجانب اطلس صافنة وماكلتهه الحيرة ونزلت لـ نانا دخلت لغرفتهه بسرعة وجفلت من شفت عمو محمد عدهه..

نانا كاعدة على السرير منزلة راسهه وهو واكف بصفهه فزو ثنينهم من شافوني رادت تحجي نانا وتبرر بس ما سمحتلهه كلتلهه فوراً..

-اطلس مو بخير نانا لحكيلي

كامت تركض تطلع وياي وعمو محمد هم راد يجي ونانا ما خلته، صعدنه للغرفة غدير بعدهه واكفة تصيح بأسمه تريد تكعده وترجف..

-نانا: غدير انتِ ليش هنا؟؟

-غدير: شبي اخوية بلقيس

-نانا: روحي بره مابي شي

جرتهه بقسوة وقوة فكت عيونهه غدير من جرأة نانا بس ولا اهتمت ولا انهزت طردتهه بره الغرفة وقفلت علينه الباب احنه الثلاثة، هرولت لاطلس لزمت ايده تسولف وياه بهدوء..

-نانا: حبيبي، ماما وليدي شبيك اطلسي الحلو

يهلوس بكلام ممفهوم بس چنهه نانا تفتهم عليه حضنته بقوة وتمسح على شعره وتغنيله بصوت حنون وكفت بصفهم ماعرف شسوي تعامله مثل الطفل الصغير تناغيله وتلاعبه وتسولف وياه..

-نانا: خوفتني عليك يا حلو

-الاطلس: يمة

-نانا: مو هنا امك مو هنا حصة مو هنا

-الاطلس: ايدي توجعني

-نانا: ميخالف هسة ابوسهه وتصير زينة

باستهه وباست وجهه فركت ايده شوية سكت وفكت عگدة حواجبه..

-الاطلس: اكلهه

-نانا: ما ياكلهه اني موجودة

-الاطلس: اكل ايدي

-اكتله الك بس لا تزعل

-تعبت باردة

-ادفيك بروحي امي وليدي

-عفتيني

-ما عفتك اني حبيبي

حچتهه وبچت مهضومة حضنته بقوة تبجي مكسورة خاطر ورجع يبجي وياهه حطيت ايدي على حلگي صافنة عليهم يعاتبهه وضام وجهه برقبتهه يكولهه..

-عفتيني اتوجع

-ماعوفك والله ماعوفك هنا اني حبيبي

-اكل ايدي النسر ورجلي اكلهن اخخ

رفع ايده كأن ديراويهه بدون لا يوخر وجهه عن رقبتهه ركزت انظاري على ايده اكو اثر نگرشات هسة ياله استوعبت ذني مال شنو، هاي اثار النسر من چان ياكل بيده!!..

-نانا: نام حبيبي

-تعبان ايدي

-صارت زينة حبيبي بستهه بعد

ما جاوبهه جان كلت غفى لان بقى فترة ساكت بس رجع كال..

-احبهه..

-نانا: منو

-مريم

-نانا: ههههه وهي تحبك

-لا تخليهه تروح

-نانا: ما تروح فنهه

ضحكت وسط دموعي، باوعتلي نانا وعضتلي شفه وهمست..

-نانا: يحبج ام لسان

-مريم: اني ماحبه

-نانا: هههه اويلي يا مريم

-الاطلس: نامي يمي يمة

رفعت عيونهه عليه بسرعة مرتبكة سويت روحي ملتهية اعدل الفراش من شافتني ما منتبهه وياهم تمددت بجانبه وحضنت راسه لصدرهه تمسح عليه، غفى بعد على هذا الوضع ما حچه شي..

-نانا: من صغره يحب ينام على صدري

-مريم: لانج حنينة عليه

باست راسه وشددت على راسه تحضنه اقوى..

-نانا: احبه ابني هذا اني ربيته

-وهو يحبج ومتعلق بيج

-ادري بي حبيب روحي

-احسه يحبج اكثر من خالة حصة

-لا تبقى حصة امه مستحيل يحبني اكثر منهه

-اي، نانا ما اجته النوبة؟

-تعذب هالمرة تماهل بعلاجه فرحان بيج ههههه

-بسببي مياخذ علاجه؟

-اي

-ليش؟؟؟

-لان يخلي يضعف ويرخي جسمه ببعض الاحيان والدايح ميريد يضيعله لحظه

ضحكت مداهرتني ابتسمت خجلانة، جبت فراش مديته بصف السرير ونمت واني اسمع لصوت نانا الحنون تقره اناشيد وتناغي..

كعدت الصبح ثنينهم مموجودين كمت اغسل ونزلت اول ما دخلت للمطبخ نانا كالت بحماس كأنه ربحت جائزة..

-نانا: اجته النوبة الصبح وهو بخير هسة

-مريم: بالغرفة لو وين؟

-نانا: لا نزل هنا اسويله ريوك وانشمر سودة عليه

-اوف انشلع گلبه

-المهم اجت وخلص منهه هسة هو نايم بغرفتي لازم يرتاح شوية

-تريگ يعني؟

-لا ما لحگ

-اخذله ريوك واروحله؟

-لا تعبان خاف ما يكعد

-ميخالف المهم احاول

سويتله ريوك بسرعة واخذته بصينية، فتحت الباب الغرفة مظلمة على الاخر والاطلس غاط بنوم عميق، كعدت بصفه امسح على راسه اشوف خاف بي حرارة ارتاحيت من شفته بخير..

ظليت اتردد للغرفة لحد الليل ياله صحى ورجع لحيله، اول ما فتت للغرفة ابتسم من شافني واشرلي بيده تعالي.. رحتله اكعد بصفه واخترعت من جرني يمدني عليه..

-اطلسسسس

-مشتاقلج لسان الحية

-شلون صرت

-ما مشتاقلتلي؟

-شلون صرت

-شبيچ مريم

كعد على حيله بسرعة رجع شعره ليوره وبلع ريگ متوتر..

-الاطلس: سويت شي يزعجچ البارحة؟

-اي

رمش رمشات ثقيلة وفرك رقبته ذب نفس وكال بخفوت..

-الاطلس: كتلج ماريدج تشوفيني بهذا الحال بس انتِ لحيتي عليه

-اطلس البارحة لطمتني على حلگي

-شلون؟

-هيج

لطمت حلكي بيدي فتح عيونه مخترع من الصوت وضحك وهو يكول..

-تقصدين لطمتج بالمعنى الحرفي لو بس حچاية؟

-لا لا لطمتني هيج مو هسة مثلتهه الك وانوب هسة هم توجعت خرب

-اسفين عيني مدام مريم

-ماكو اسفك ميفيد شكد تأذيت البارحة حتى بجيت من القهر تمد ايدك على زوجتك وتقلل من قيمتهه اريد اروح لاهلي

-صدك تحجين؟؟؟

-اي لعد تمد ايدك عليه واسكتلك؟ لا والله ولا اكعد ولا اسكت ولا اقبل

-مريم اني اسف عذريني والعباس مو بوعيي تعرفين هاي الحبة شتسوي بالحال تدمرني

-ماكو كل هالسوالف متفيد وديني لاهلي ماكعد يمك دقيقة

-كتلج لا تجين ولا تشوفيني بهذا الوضعع وانتِ تعرفين كلش زين اني مريض صرع ليش جاي تتحججين حتى تعوفيني!

-اطلس شبيك عصبت دا اتشاقه

نفسه عالي يلهث معصب وضايج كلش ابتسمت اهدأه غمض عيونه وزفر نفس سحبني يحاوطني بيده وطبع بوسة على كتفي..

-الاطلس: وجعتچ البارحة؟

-اي

-اني اسف

باس المكان الضربني عليه بس ما رجع طبيعي بعده حزين ومتضايق..

-مريم: چنت اتشاقة وياك حتى ماتوجعت ولا حسيت بس هيج اريد اداهرك احب من تعصب

-عادةً ما اهلوس لهدرجة بس لان تعبان كلش هالمرة هيج صار بيه

-سودة عليه بيه ولا بيك

-اسم الله عليج يروحي

-اكلك شوكت نرجع لبيتنه

-نرجع هسة اذا تردين؟

-بيك حيل لو نأجلهه لباجر

-اذا تكدرين تأجليهه لباجر اكو ممنون

-هذا هو باجر نرجع

-مريم البارحة حجيت هواي اني هلوسات لا اكثر

-نمت بحضن نانا هم

-متعود احب اشم ريحتهه وانام

-ادري كالت

-من جنت طفل اخذ قطعة من ملابسهه احضنهن وانام احس بالامان

-جدك چان يكره نانا؟

-اي الادهم هواي اذاهه

-بس انتَ تدافعلهه اكيد

-شكد اكلت كتل بسبب دفاعي عنهه

ضحك بلوعة، بقيت نايمة على صدره ما حجيت شي واضح ميريدنه نحجي بالصار البارحة..

رجعنه لبيتنه مرت ايامنه هادئة ولطيفة تخلو من المشاكل وبيوم رحنه لبيت عيالي على غدة ماردت اروح عندي الام ببطني كلش متوجعة بس استحيت ارد خالتي..

كعدنه وره الغدة نشرب چاي بسملة جاية وگالبة وجهها ما رادت تجي ودعاء سحسلتهه من اسئلهه شبيج زعلانة تكول ممجاوبة زين بآخر امتحان وضايجة بسببه، علي انطه استكان لدعاء وهمسلهه شي توقعته كال "احبج" بسبب ضحكة دعاء والخجل الي لون وجهها..

-عمر: ااااخ يا حظي الخردلي

-علي: انلصم شكو اذنك ويانه

-عمر: وياكم؟ ليش انتو منو بوية اني اعلمك الا اتزوج واحرگ گلبك

-علي: عمير انتَ بس تزوج وعلي الا ارگصلك رگص معدان

-زهراء: واوصل الطين لچتافي يللله عمر تلحلح

-محمد: اي خالو ما تتزوج وتفرحنه

-حصة: واااي وناسة نخطبلك عموري؟

-الاطلس: عمر انوي والباقي عليه عرسك من بابه لمحاربه على حساب حمزة

-حمزة: الله يطييييح حظك خايبين مو حمزة حايط نصيص

-سارة: يوووه حمزة شبيك صاير بخيل يستاهل عمر والله لوما متزوجتك الا اوافق عليه

شهگنه على چفصتهه وحمزة خزرهه خزرة خله استكان الچاي يوكع من ايدهه..

-سارة: اءء اءءء اقصد احم اقصد ازوجه رقية والله

-رقية: عزه بعيني

-حمزة: سااارة

عض على اصبعه وهي كامت تخيط وتخربط فطسنه ضحك عليهه عدى حمزة واطلس الكاعدين يخزرون بيهه حتى تسكت اخيراً ضربت على حلگهه وكالت..

-سارة: ماحجي بعد التوبة ان شاء الله عمرك كله متتزوج عمر

-عمر: رحم الله والديج

-زهراء: هههههه لا نخطبله اكو عروس ببالي الك عموري

-عمر: لو عورة لو طنطل ماكو غيرهه

-زهراء: حلوة كلش حلوة

-حصة: منو هذي صار عندي فضول اعرفها

-عمر: يمة عليج العباس سكتي ماريد اتزوج

-زهراء: ديلا يلا، مبين عليج تعبانة مرايم شنو رأيچ ترتاحين فوگ بغرفتچ قبل سفرتكم الطريق متعب

-مريم: سفرتنه؟

انداريت على الاطلس شفته خازرهه ويعضلهه شفه حتى تسكت ضحكت وحركتله براسي..

-مريم: يا سفرة هاي؟

-الاطلس: اخخ عمة ليش خربتي المفاجأة

-زهراء: يااا غير تحجون هي مفاجأة اني شمدريني

-مريم: اطلس فهمني

-حمزة: هههه ضاج بعد ما يحجي

-سارة: راح نسافر مريوم كلنه لان هالسنة محد راح ويه سفرة الشركة بسبب المشاكل ونوينه كل العائلة نسافر سوه انتو ترحون شهر عسل وحدكم واحنه وحدنه

-مريم: صدك هيج الله

-دعاء: اي اي والله

-بسملة بهمس: والله اني حظي الخردلي مو حظ عمر

-عمر: سمعناج عمو، المهم اني حجزت وكلشي تمام طيارتنه باجر ساعة بالـ 12 بالليل

-محمد: لو حاجزهه بالـ 2 بالليل فد مرة خالو عموري

-عمر: خالي والعباس ما لكيت حجز اقرب

تحمست كلش للسفرة وفرحت اضعاف لان الكل راح يجي ويانه كمت اصعد فوك لغرفتي القديمة.. كعدت على السرير واجن دعاء وبسملة وياي..

-بسملة: بنات اريد ارجع اني منو ياخذني

-مريم: تسافرين ويانه بسملة؟

-بسملة: هههههههههااااايييي شو عيدي عيدي

-دعاء: والله فكرة تعالي بسوم ويانه

-بسملة: هيهيييي مو كاعدات بأوربا احنه اجي وياكم هيج وحدي بدون امي وابوية لاا وهواي ابوية راح يقبل اجي وياكم

-مريم: اطلس يقنعه

-بسملة: مرايم تخبلتي وين ابوية يقبل لتحرجين الرجال

-دعاء: علي هم يحجي وياه، بسملة احنه خواتج امي وابوية يأمنون عليج ويانه يله ماطول عندج عطلة هالفترة

-بسملة: عندي دوام باجر وعگبة هم العطلة تبدي بعد يومين

-مريم: خلينه ننطي خبر لابوية عسى ولعل يوافق حتى نلحگ نحجزلچ

-بسملة: باعن اذا ابوية وافق اگص ايدي اصلاً احس بغرابة اجي وياكم والله استحي

-دعاء: ليش شكو هسة

-بسملة: كلكم متزوجين وكبلات اني شعندي رايحة

-مريم: رقية موجودة هي مو صديقتج

-دعاء: وعمر عزابي هههههههههههه

-مريم: انچبي دعاء

-بسملة: اتفق انچبي دعاء

-دعاء: گبر دا اتشاقة

-بسملة: هسة ابوية شلون يقتنع

-مريم: كتلج اطلس يحاچي وانتِ هم اتصلي بي ذبيلج دمعتين وتنعوصي عود زعلتي هسة يوافق

-بسملة: تهي بهي فلم هندي وربي

-دعاء: لتصيرين سخيفة بسملة شنو فلم هندي، اني دا افكر ناخذ امي ويانه هم

-مريم: ايييييي امي هم اي حبابات خليهه تجي فدوة

-دعاء: برأيج يقبل ابوية؟

اتفقنه ان نشمر الموضوع على اطلس هو يقنع ابوية وعلي هم يتصل بي ويحاول وياه اذا ابوية قفل، اني اعرف اذا امي وبسملة اجو ويانه راح نتونس اضعاف مضاعفة..

صحت لاطلس يجيني للغرفة نزلن خواتي بسملة أصرت ترجع للدار اعرف بيهه تستحي تبقى..

-الاطلس: ها گلبي

حاوطت رقبته بيدي طايرة من الوناسة حضنته وكلت..

-مسويلي مفاااجأة

-اي بس عمتي خربتهه

-وين راح نروح؟

-معليج تعرفين بعدين

-زين راح نبقى ويه اهلك لو همه بمكان واحنه بمكان

-لا طبعاً ما نبقى وياهم نفترق بس نوصل

-يصير اطلب منك طلب

-عيوني الج

-انتَ تريد وناستي صح

-طبعاً

-اريد نبقى ويه اهلك اني متأكدة راح نقضي وقت يجنن سوه وراح ارتاح وافرح اكثر

-بس اريد نبقى وحدنه اني

دگ انفي بأنفه وقربني منه، هزيت راسي اي وكملت..

-راح نبقى وحدنه هواي بس اطلس اريد ويه اهلك علمود شي

-شنو هو

-اريد امي وبسملة يجون ويانه ممكن؟

-ممكن ليش مو ممكن

-بس ابوية نحتاج نقنعه واجيت اطلب منك انتَ تعرض عليه والله امي هي تدفع التذكرة وتدفع مصاريفهه هي وبسملة بس نريدك تقنع ابوية

-مرمر من كل عقلچ اخلي عمتي تدفع تذكرة وماعرف شنو قحط هالسوالف عيب عليج لا تعيديهه

-اطلس اعرفك كريم واعرف نفسك طيبة بس امي متقبل لنحرجهه

-بعدين نتناقش بهذا الموضوع خليني اتصل بأبوج هسة

هزيت راسي اي وكعدت بصفه على السرير اكل بأظافري من اول رنة ابوية جاوب صوت سماعة اطلس عالية واسمع شلون يأهل ويسهل بي وفرحان بأتصاله..

بدون مماطلة اطلس طرح عليه فكرة السفرة ومثلما توقعت ابوية ما اقتنع ورفض رفض قطعي بقى اطلس يسولف وياه ويگله هنه ويانه وبرگبتنه ومنعوفهن ووو.. كومة حچي حتى عرض على ابوية هو يجي وياهن للسفرة عزيمة من اطلس وكل مصاريف سفرتهم على حسابه وهم ماقبل..

-احمد: اني عندي شغل ماكدر اعوفه وما ينطوني اجازة ماكدر والله اعذرنه اطلس

-الاطلس: طيب انتَ ابقى بس بسملة وعمتي يجون ويانه گتلك بعيوني احطهم

-احمد: مو.. زحمة مو مال يروحن وحدهن و..

-الاطلس: وحدهن واحنه موجودين اني وعلي مو نسابتك عمي

-احمد: اي والنعممم منكم نسابتي ورفعة راس

-الاطلس: چا هذا هو ليش مكبر السالفة انتَ ابقى كمل شغلك وعمتي وبسملة يجون ويانه يتونسن ويغيرن جو

-والله ما راهمة والله

-ما اضغط عليك بعد بس بسملة كلش بنفسهه وشفتهه مقهورة من عرفت بينه راح نسافر خطية نكسر بخاطرهه وهي طالبة طبية وضغط عليهه قوي بالدراسة خليهه تنفه عن نفسهه شوية

سكت ابوية فترة لزكت روحي بالسماعة ما اسمعله حس، باوعلي اطلس وهز براسه بطريقة لا تقلقين، نصى السماعة حتى ما اسمع انقهرت من حركته وخزرته ضحك وغمزلي بعيونه يداهرني..

-مريم بهمس: لييش تنصي السماعة

حط اصبعه السبابة على شفايفة بمعنى سكتي، كعدت مبوزة وهو رجع يسولف ويه ابوية ثواني وسد الخط وياه ذب نفس وكال..

-الاطلس: حاولت بس شسوي

-مريم:‏ ماقبل مو اني اعرف ابوية مستحيل يوافق اذا احنه چنه نحط صبغ اظافر بالبيت يكول تقلدن الاوربيات امشو مسحو عيب

-بس ما خليتي بنفسج حطيتي بعرسج

-انقهرت اطلس احس طفت فرحتي

-لا يروحي لا تنقهرين شبيدنه احنه اذا ابوج وافق على السفرة

-مو اختي خطية سودة عليه بسملة مگرودة اريد اونسهه وافرحهه

-اي ونسيهه هناك وفرحيهه

-شلون وابوية قافل اطلس بس تدري انتَ سويت.....

درت وجهي اباوع لوجهه مبتسم صفنت اتذكر شنو كال وشهكت..

-مريم: كلت ونسيهه وفرحيهه هناك؟؟؟

-اممم

-شلون وابوية ما قبل؟؟

-منو كال ما قبل

-يعني قبللل!؟؟؟

-هههه اي

-جذااااب كول والله احلف بداعة امك

-وداعة امي قبل

-يمممة گلبي حبيبي يروحييي عمررري احبك والله احبببك حبيبي انتَ فدووة اروحلك

حضنته من رقبته خنگته خنگ ابوس بي واطفر فرحانة ممصدگة ابوية قبل ما دا اصدك شلون اطلس گدرله وغير شخصيته بهالسرعة..

-الاطلس: هاي كله لان قنعت ابوج چا حبچ كلاوات مريم

-لا والله مو كلاوات ولك اني احببك يبووو عليج يمريم

-هم لطمت

-ما اللطم بعد ولا اللطم شكراً الك شكراً كلش هواي

-ماريد شكراً اريد بوسة

ضحكت من جرني يبوسني ويداعب خدودي، دگ جبيني بجيبنه واخذ نفس مني..

-فرحتج عندي تسوه الدنيا والي بيهه

-اروح اكول لبسملة واتصل بأمي هم

-ماشي بس مرمر موضوع الفلوس لا تفتحي مرة ثانية هسة راح احجزلهم واذا امچ انحرجت لو لحت على فلوس التذاكر او السفرة كوليلهه منج انتِ ضامة فلوس وجاي تصرفين عليهن

هزيت راسي اي وابتسمت ممتنة، عفته ورحت اتصل ببسملة وامي طارن فرح حبيباتي ومثلما توقعت امي حلفتني هي تدفع فلوس التذاكر بس قنعتهه بكلام اطلس عود اني جاي اصرف عليهن قبلت..

رجعنه لبيتنه واللتهيت احضر جنطتي كل شوية اسئله وين رايحين وشنو راح نسوي وشنو اخذ وشنو اللبس ماقبل اخذ أي شي كال كلشي نشتري مناك حتى منثگل..

وافقته ونمت بأحضانه بالليل للصبح نسولف ونترومس على گولة دعاء، فرحة بگلبي راح اطير اتونس بأبسط شي يسوي الي واطلس يعرف يدلل وحنون بشكل..

كعدت الصبح لكيته مسويلي ريوك، تريگنه سوه نانا واسيل ابد ما بينو اعرفهن حتى يخلونه براحتنه.. للظهر طلع هو يكمل كم شغلة واني رتبت غرفتي البيت كله مرتب يلمع..

اخيراً اجه موعد سفرتنه طلعنه متوجهين للمطار ومناك تلاگينه ويه الباقين شفت امي طرت فرح حضنتني ممصدگة ابوية قبل واقتنع تسافر ويانه كعدت تسولفلي وتسولف لدعاء ابوية شكد فرحان من يوم عرسي لسه صاير لين وهادئ وماعنده عصبية..

اجه موعد طيارتنه وگمنه متوجهين للطائرة رهبة صارت بداخلي وكمشت بأيدين اطلس بقوة همسلي يهديني لحدما صعدنه للطيارة الكراسي عريضة وكبار تجنن والمكان بس النه انترس بينه تقريباً وتفصلنه عن الجهة الثانية فاصل..

حچو بالسماعة راح ننطلق انطو تعليمات وكالو ربطو الاحزمة وبده الاكشن..

-دعاء: اريد انزل نزلوني نزلوووني ماااريد ابقى

-علي: دعاء شبيچ حبي

-دعاء: كله من وراك انتَ السبب انتَ!! من رحنه شهر عسل كتلك اخااف وبعد ما اسافر بطيارة شلون ضحكت عليه واخذتني مرة ثااااانية

تعيط بصوت عالي زوعتنه العافية من الخوف امي تطاطگ وغدير هم اصفرت بس ماحجت ومسلم اندار يباوع لاسيل وهي مطنكرة متنطي مجال وبسملة كاعدة بصف رقية اندارت على دعاء تكول..

-بسملة: دعاء لا تفضحينه كدام الطبقة المخملية

-علي: طبقة قندرية مو مخملية ولج دعااااء ايدي لا تعضيهه اشتعلو جماعتي

لزمت زند اطلس مغمضة عيوني خوف ورعب وفشلة بنفس الوقت، انفضحنه وانشهرنه بسبب دعاء وعياطهه الكاعدين كدامنه صارو يلتفتون، امي كامت تريد تروحلهه والمضيفة صاحت ممنوع احد يوكف وامي تجاوبهه..

-ام مريم: ياااا عمت عيني واعوف بنيتي خايفة معليج انتِ ام گلب الثخين

-حمزة: اخوان شنو الموضوع

-غدير بخوف: تخزينه

-نانا: راح استفرغ ماتحمل بعد اطلس

رفع ايده عمو محمد يصيح لمضيفة..

-محمد: ممكن عصير ليمون راح تتقيء هنا المدام

-حصة بنتر: قصدك آنسة!!

-الاطلس: نانا بس شوي تحملي يابة ما طلع اقلاع هذا

-عمر: والعباس تفشلون همزين ما يفتهمون لهجتنه ذولة

-مريم: طز ولك اطلس صوچك جبتني شنو من گلب عندك تشوفني خايفة وتتمضحك؟؟ مع الاسف عليك مو زوج صالح انتَ

-الاطلس: هاي شوكت ضحكت؟؟ يابة ما طلعت سفرة هاي

-مسلم: اسيل انتِ زينة؟

-اسيل: دير وجهك معليك

-بسملة: يمة يمة يمة عزه بعينييييي ولكم شنو هذا اقلااااع لو شنوووو

-ام مريم: دخيلج يا ام البنين راح يوكع بينه الطيارة والله

-دعاء: عليييي راح اجيب والله راح اجيبببب نزلوووني

-علي: ليش انتِ حامل وراح تجيبين

-رقية: يمااا خايفة

-علي: كلهه خافت هسة انچبو وگعدو بمكانكم خزيتونه

-عمر: والزهرة نفشل

-حمزة: شباب صوتكم اترجاكم

بنفس اللحظة نانا تقيأت بالكيس البيدهه، اللتفتت عليهه اشوف ونفسي كامت تلعب من الصوت وذبيت من راسي وراهه اتقيء اطلس كام يلطم بصمت ميعرف بيمن يحير..

-الاطلس: اشتعلو جماعتي علي راح اشگك نصين

-علي: هاا شصار اخي في الله عمير جاي تشوف؟

-عمر: چنه صار زواع جماعي خوية

صاحت وحدة باللهجة المغربية تكول للي بصفهه راح تتقيء، نانا سمعتهه ورجعت تتقيء اكثر..

-عمر: نعم انهُ تقيء جماعي

-محمد: وين صار الليمون؟؟؟

-بسملة: هذا بعده يقلع بينه لو استقرينه راح اموت خرب عرضك شلون طيار فاشل

-رقية: لا ولج قلعنه من زمان بس قيادته للطيارة مو رزنة

عمر: هذا اكيد الزر... الزرافة الخطب مريم

-الاطلس: شنوووووووو

-مريم: اكعدد مو هو

-الاطلس: شمعرفج انتِ؟؟ عمر سمعت شنو اسمه؟؟

-عمر: اي بس ماتذكر گلبي يكول هذا خطيب مريم

-ام مريم: يا خطيب هذا؟

-بسملة: ماما مو يمج السالفة نامي يروحي

-علي: اكلك اخي شكو تشگني نصين روح شك خطيب مرتك

-مريم: دهر دهرچ بسملة

-بسملة: عوفو الطيار بحاله تزوج تره شبيكم

-عمر: بوية الجذب بوية

-بسملة: اي اي تزوج ومرته اسمهه غنى

-علي: بنت ام غنى جيرانكم؟؟

-بسملة: هاااا

-مريم: الغسل يغسلچ يبسملة

-الاطلس: انتو شنو ناصبين علينه؟؟

-دعاء: ليش ننصب عليكم تره تزوج غنى جيراننه شبيكم عجبته وخطبهه

-عمر: غنى ام نعال الفسفوري برره

-بسملة: والله بس الماعنده ذووق ميعجبه الفسفوري

-عمر: راضي بذوقي

-حمزة: اخوان رجاااءً صوتكم ما طلعت سالفة هاي!

-عمر: بسمك اللهم هنا وتريد اصواتنه ناصية

-بسملة: واني شدخلني انتَ فتحت موضوع الطيار خطيب مريم

-الاطلس: هم كالت نعااال مريم

-مريم: ما اسمحلك تحجي على خطيبي اطلس!

-الاطلس: خلينه نوصل ونشوف شلون ما تسمحيلي

-مريم: جذب اسمحلك طاح حظه خيولي

-بسملة: يمة شصار

-عمر: مطبة هوائية

-علي: لا بعد يا مطبة هاي هيج خلل صار يمكن بالطائرة

-دعاء: عزه بعينيي عزه العزااني راح نموت راح نووكع ولج يممة

-مريم: دعاء شبيچ ما راح نموت حبابة سكتي لتخوفينه

-سارة: بنات كافي اريد انام تعبانة

-رقية: وانتِ ما جبتي نومج الا هنا عفية گلب شكد ثخين

المضيفة صافنة علينه كلامنه سريع ومتفهم شنحجي رغم اصواتنه عالية بس محد اهتم چنهم متعودين ياخذون راحتهم هيج بالسفر، رغم الخوف وتوتر الاجواء بس اكدر اصنف طريق هاي السفرة من احلى جمعاتنه تونسنه ونسة وضحكنه ضحك گلنه وراه يا ستار..

عمر وعلي نصبو على دعاء وهاي اختي وجهها انبلع تبجي وتعيط كلما تصير مطبة هوائية ورقية وبسملة وحدة تعيب على اللخ وتمالخن بنص الطيارة وحمزة قضى الطريق كله يكول "صوتكم رجاءً"..

اخيراً وصلنه قريب الفجر الدنيا ظلمة جوهم ابرد من عدنه گمنه نطگ سن بسن، اجرنه سيارات واخذونه للفندق الحاجزي النه الولد اول ما حطينه راسنه نمنه وكعدنه الظهر متأخر..

-مريم: ماريد اكوووووووم

-الاطلس: مريم احنه حايين ننام لو شنو كومي ولج

-تعبانة كلش متكسرة

-من وره الطريق كومي حبيبتي

سحسلني من الفراش وشمرني بالحمام كوة الا تغسلين وتفرشين اسنانج وتتوضين وتصلين، كملت كلشي وكمت ابدل واتسائل..

-اتفقت ويه الباقين مو؟

-الاطلس: لا نطلع وحدنه هسة

-ليش حرامات خو سوه

-چنچ مليتيني مريم

-لا بس احب من نروح ويه الباقين نتونس خاف وحدنه نضوج

-شوفي ونستي وحكمي

-ماشي نشوف

طلعنه سوه لمنتجع ومن صدك تونست كلش صرت اضحك للهوا واطلس على ضحكتي يضحك، فرني فر وكعدنه نتغده بمطعم ورجعنه نفتر تعبت بس ماريد ارجع اريد اتونس اكثر..

قضينه اول ثلاث ايام كله وحدنه امي ماقبلت تطلع هي وبسملة ويانه شكد لحيت وتوسلت بيهن ما رضن وبعد اصلاً ما شفتهم طلعاتنه عكسية دتصير، باليوم الرابع اتفقنه كلنه نروح نتغده سوه بمطعم ومناك نطلع لمكان جبلي..

**

"بسملة"

كملنه غدة وامي جرتني من ايدي تسولف بهمس..

-بسومة ماما عوفي دعاء وعلي براحتهم احنه نتمشى وحدنه

-بسملة: اي حتى اني كلت بس دعاء متقبل تعوفنه

-ميخالف من نروح للجبال مناك اني اكلهم يرحون ياخذون راحتهم

-ماشي

وصلنه للمكان ظلينه نفتر بي، جبال شااهقة عملاقة مغطية قممهه بثلوج شتوية، البرد قارص لدرجة يدگ بالعظم، شددت اللفاف على وجهي ودحست روحي لازكة بأمي..

-رقية: بسملة امشي نروح ويه عمر ومسلم

-بسملة: لا ماروح اني ابقى ويه امي

-رقية: ولج تعالي شبيچ

عضتلي شفة عكدت حاجبي مستفهمة وباوعت لامي، ماما اشرتلهم لا بسملة متروح واجت رقية تتقرب علينه..

-رقية: خالة حبابة هاي خطية ناخذ اسيل ويانه ومناك هي مسلم يبقون وحدهم ويسولفون ويتصافون

-بسملة: ايييي خوش خطة

-رقية: اي يله تعالي

-بسملة: لا مالي واهس اني اخذي سارة

-راحت ويه حمزاوي ماكو غيرج

-مريم وين؟

-اففف بسملة كومي خالة فدوة خليهه تجي ويانه

-بسملة: ماماتي كومي انتِ هم

-ام مريم: امشي

اخذت امي ويانه لازمة ايدهه ونمشي هواي مشي بالمكان واغلبه مرتفعات نصعد وننزل، عمر ومسلم يمشون كدامنه محد يحجي ويه الثاني بس هيج جايين سوه واحنه البنات وراهم، بعدنه ما ماشين نص ساعة وامي كالت تعبت وتريد تكعد..

كعدت وياهه بمكان ورقية كامت تتذمر اكلت راسي ونخلت گلبي نخل تريدنه نكمل الخطة اللتفتت على امي استأذن منهه ماقبلت نبقى وحدنه ويه عمر رقية فوراً كالت..

-رقية: خالة اني وياهه ما راح نبتعد منا

بقت تقنع بيهه كوة وافقت وشرطت منبتعد ويبقى تلفوني بيدي ليش هي وينهه الاشارة حتى تتصل عليه بس المهم وافقت، مشينه اني ورقية شوية ابتعدنه عن مكان امي ومناك سرسحنه اسيل ويه مسلم واحنه بقينه ويه المصلبخ..

-رقية: عمر اشتريلنه شي دافي نشربه متت برد

توقفنه عند كوفي مفتحي بين الجبال اشترالنه مشروب ساخن وكملنه مشي..

-رقية: عموري برأيك راح يتصالحون؟

-عمر: مادري بعد

-بسملة بهمس: رقية هاي فكرة عمر؟

-عمر: اي فكرتي

هزيت راسي بدون لا اباوعله اللتفتت على مكان امي صرت بعيدة قلقت لا يظل بالهه عليه..

-عمر: ما راح ناكلج بسملة

-بسملة: شنو

-عمر: كل دقيقة وملتفته وترجفين تره ما نبلع اوادم

-بسملة: دا ارجف من البرد تره!

-عمر: هه اي واضح من البرد

-بسملة: انتَ شنو مشكلتك؟

-عمر: انتِ شنو مشكلتج شبيچ منفسة!!

-رقية: هاي شبيكم

-بسملة: لحظة رقية، اني منفسة من شنو؟؟

-عمر: مادري عنج صار ساعة احجي وياچ واسألج شنو تشربين ما تجاوبيني مغلسة عليه ومن رقية تسألج بساع تجاوبيهه

-بسملة: يمته حاچيتني انتَ؟؟

-عمر: رقية مو سألتهه اني؟؟؟

-رقية: صراحة اي بسملة وحاچاچ اكثر من مرة بس انتِ ما تجاوبين

-بسملة: ما منتبهه والله

-عمر: خوش عود

-بسملة: والله العظيم ما منتبهه شبيك عمر شعندي وياك اني

-عمر: كولي لنفسج صار اربعة ايام احنه هنا نظرة ما تنظريلي وتتهربين مني كلما افوت من يمج لزگتي بأمج عبالك راح اخطفج!

-نعم؟؟ هاي شوكت شو انتَ كمت تتخيل وتفسر من كيفك

-ما اتخيل اني منتبه وملاحظ تعاملج البارد من اخر موقف صار واني حلفتلج وقسمت ماكو شي بيني وبينهه بس انتِ راكبة راسج وما تستوعبين!!

-بسملة: هاي شبيك واني شعليه بدارسين عسى ما تزوجتو اني شيخصني طبكم مرررض فوك مرررض

-احترمي نفسسسج بسملة ولا تتجاوزين!!

-اوك يطبهه مرض بس هي المريضة الغبية الرخييصة لعبانة نفسي لتذكرني

-عمر: بااعي انتِ مغثوثة من الموقف وجاي تطلعين حرگتج بيه اني شيخصني

-رقية: هاي شبيكم يا موقف شبيهه نورسين؟؟

-عمر: بسملة وحق الله وحق هاي نعمة الله ماكو شي بيني وبينهه هي تجرأت وسوت ذيج الحركة وما قبلت عليهه ولا راح اقبل!

-لتبررلي ميهمني عمر انتَ حُر بس اني مصدومة لانك تحن وتون على فلانة (تقصد اسيل) وشفتك بذاك المنظر مجرد انصدمت لا اكثر

-عمر: هم كالت تحن وتون على فلانة بابا فلانة تزوجت وخلفت وانتهت سالفتهه!!

-رقية: والله كلشي ما جاي افتهم منو فلانة وشبيكم معصبين انتو؟؟

-بسملة: هسة انتَ ليش ضايج ليش تريدني الا اصدگك؟

-عمر: لان هاي سمعة وما اقبل احد يذب عليه تهم ويكول ملعب وابو نسوان!

-رقية: ولكم شكوو

-بسملة: ولشي رقية نقاش عادي صار بيني وبين عمر قبل فترة وهسة رجع يفتح الموضوع

-رقية: جمدنه يمعودين مو وكت نقاشات خلونه نكمل طريقنه

عدنه ادراجنه نرجع لامي، الطريق كله افكر عقلي تعب وكام يوجعني حقه يضوج ويريد يبيض صفحته كدامي بس اني شبيه گلبي محترگ ومتضايقة، عصرت عيوني من تذكرت الموقف وسبيت نورسين جوه انفاسي..

-بسملة: اكلك

اللتفت عليه بدون لا ينطي ردة فعل باوعتلي رقية منتظرتني احجي، بلعت ريك وجريت اللفاف اغطي حلكي..

-بسملة: رجعت حجت وياك؟

-عمر: منو

-بسملة: السحلية الصفرة يعني منو

-عمر: اي حاچتني

-بسملة: گبر طمهه شهالرخص شتريد هاااي!!

-عمر: بعدين امشي جمدتو من البرد

رقية تنگ براسي تسألني شكو اضطريت اخترعلي جذبة صدكتهه بسرعة وسكتت، وصلنه لامي كامت ويانه تمشينه سوه والوب اريد اعرف شنو صار وشنو جاوبهه عمر ونورسين شتريد منهم..

ظلمت الدنيا ورجعنه للفندق عصافير الحب كلمن اخذ حبيبته وراحو لعشهم يكملون رومانسيتهم بينما اني وامي رحنه للغرفة نرتاح..

تذكرت اسيل ماعرف شصار بيهه كمت اروح لغرفة رقية سألتهه شكو ماكو وقهرتني من كالت ما تصالحو..

طلعت من غرفتهه خايبة امالي بالطريق استوقفني مسلم واكف يتناكر ويه عمر وينتر..

-مسلم: تعمدت تجيبهه وياك حتى تختلون سوه بس اني ما سمحتلك وخربت عليك!!

-عمر: مططي انتَ بس فهمني انتَ مطي؟؟ لو شنو بالضبط؟

-مسلم: انجب لا تخليني اسب ابووك

-انتَ سبه وشوف اشگ حلگك والعبااس ابو فاضل!

بقيت واكفة بمكاني اشوفهم شبيهم خفت تكب اكثر على الاقل انطي خبر لمريم تكول للاطلس، بس هدأت العركة وكلمن راح بطريق..

-بسملة: شبيكم

-عمر: عار

-بسملة: شبي هذا يتعارك ويه ذبان وجهه

-عمر: زودهه هواي كرهني روحي

ميلت زاوية فمي زعلانة على وضعهم مسلم واضح اكو احد ديلعب بعقله مبينة السالفة لان على ساعة يگب ويتهجم على عمر من لا سبب..

-بسملة: تصبح على خير استاذ

-عمر: بسملة لحظة

-ها تفضل

-اريد احجي وياچ بموضوع.. بس.. بس ماعرف شلون راح تتقبلي

-كول قلقتني

هستوه فتح حلگه يحجي واللتفتنه ثنينه على صوت عياط عالي جاي من غرفة من الغرف صوت بنية مألوف تصرخ بصوت رج جدران الفندق رجج.....

يتبع ♠️💸...

• ━━━━━━❪♣❫━━━━━━ •

توقعاتاتكم 🫣🔥🔥

#الاطلس "دمليج أسود"

بقلمي: زهراء السلامي 💛

لتنسون التصويت + التعليق بين الفقرات + متابعة لحسابي 🌼.

• ━━━━━━❪♣❫━━━━━━ •

-ما جاي اصدك تفكيرج غدير!!

-غدير: وجع شبيچ نطيتي عليه هاي فوكما اريد مصلحتج

-رقية: تشوهين سمعة البنية وتتهميهه بشرفهه علساس هي خاينة زوجهه ويه ابن عمتنه! مو حرام عليج ما جاي تشوفين حالة اسيل تكطع الگلب!!

-غدير: عوبة سويتهه علمودج انتِ تاخذين مسلم انتِ مو تحبي؟

-ماا احبه مسلم تزوج صديقتي وخلف منهه طفل ويحبهه ويموت عليهه حرام عليج حرررام

-انجبي لا تصيرين غبرة هو يحبج بس توازه بأسيل لان حملهه واضطر يعلن زواجه منهه

-غدير تره مسلم يعشق اسيل عشق مخبل بيهه شنو يحبني شنو توازه!

-انلصمي ولا تصيرين فاهية تقربي منه هاي فرصتج

-ماريده والله لو يصبو ذهب هم ما اخذه رجل صديقتي روح بروح مو بس صديقتي اختي اسيله تعرفين شنو يعني اختي شلون ترديني اخذ رجلهه؟؟

-مو سارة اخذت رجلي شنو الفرق؟!!

-انتِ جبرتيهه وكل الديصير بيج من ايدج ما انسى شلون ورطتي سارة تتزوج حمزة جانت تبجي دممم ما تريده بس خليتي الكل ينكلب ضدهه وغصبتوهه عليه!

-موضوعنه مو سارة هسة خلينه نسولف بيج ومسلم

-وعمر شنو تاليته؟؟ تشوهين بالرجال وتكولين عنده علاقة ويه مرت صديقه وين تردين توصلين

-رجال شايل عيبه محد يحجي عليه

-لا مستحححيلة انتِ!!

-صوتج لا تعلي لا اطيح حظج

-فهميني شنو غايتج؟؟

-اسيل تتطلك من مسلم ويتزوجچ

-واني ماريده!

-غصباً عليج تتزوجي لا تصيرين مثلي تنامين كل يوم ودمعتج على خدج حبيبج بحضن وحدة ثانيةةة

-اني اريد هيج عاجبتني حياتي ونسيت مسلم والله نسيته

-ميهم هسة لازم اسيل ومسلم ينفصلون ويتزوجچ اريد نخلص منهن ذني الحياية هي واختهه

-ما فكرتي بعمر شبيج انتِ مو تحبين عمر شنو سالفتج

-احبه طبعاً ابن عمتي شلون ماحبه

-لعد شلون هيج تأذي وتكسرين ظهره بهاي الاشاعات

-ما اكسر ظهره كتلج الرجال ما ينعاب!

-ليش الا عمر؟ شلون اجتچ فكرة تلزگين اسيل بي؟

-لان يحبهه

-شنوو

-اي يحبهه ثولات سمعته مرة يحجي لعلي عنهه ويتحسر عليهه

-وانتِ تتجسسين عليهم؟!

-لا سمعته صدفة

-وشنو الفائدة مسلم يطلك اسيله منا عمر يخطبهه مناك وهي تقبل بي عناد بمسلم

-لا ميسويهه عمر لان هسه هي مو بباله

-وشمعرفج؟ مو هسة كلتي يحبهه غدير

-چااان يحبهه هسة تغيرت رغبته

-شلون؟

-غدير: عمتي زهراء تريد تخطبله ذيچ الچلبة

-رقية: منو هاي؟

-غدير: بسملة اخت مريم ودعاء

-صدددك؟؟!

-اي من يوم خطبة دعاء وعلي گلتلي عاجبتهه الثورة بسملة

-رقية: دكتورة بسملة!!

-حامض على بوزهه تاخذ عمر بنت الفگر وحدة اخذت اخوية والثانية اخذت علي والثالثة تريد تلف على عمر!

-تره خوش بنات شبيچ غدير

-طمممع ماخذاتهم على طمعع وهسة ثبتوهه ببسملة عمر املاكه تغطي عين الشمممس الحقيرات يعرفن يصيدن هوامير

-رقية: هه والله تضحكين

-ليش ولج

-تره اسيل لو تطلكت من مسلم عمر يتزوجهه واذا تكولين ميريدهه راح يتزوج بسملة وانتِ ثنينهن مترديهن شنو الفائدة

-هههههههههه لا حبي عمر ما راح يتزوج ثنينهن لان ببساطة نورسين تحبه وراح يتزوجون

-لاااااا غدير لاااا زودتيهه كلش شنو نورسين تحبه هاي من شوكت؟!

-بالجديد اكتشفت هالشي

-قصدج انتِ جبرتيهه

-لا والله وراس حمزة وحبه ومعزته ما جبرتهه ولا حتى ضغطت عليهه بس هي تريده شسويلهه وتريد علاقة وياه

-علاقة؟!!

-اي خو نعرف نورسين اوپن وعدهه سوابق متهتم لسوالف الشرف ما شرف

-وعمر يحبهه؟؟

-لا بس راح يحبهه وتشوفين

-رقية: عمر يحب بسملة؟

سكتت عاوجة حلگهه ضحكت متحمسة اصفگ بيدي عركتهم اليوم عركة حبايب چانت يخبلون ولايكين لبعض، دك موبايل غدير عرفتهه نورسين من اسلوبهن..

-غدير: حبي شعليه اني انتِ حاولي وياه، تماوعي سوي سوالفج المعروفة اكيد يلين تعالي باجر راح نتعشى بمطعم ^^^^^^..

سدت الاتصال منهه واندارت عليه..

-غدير: عمر حاجز غرفة وحده صح؟

-رقية: اي بس ليش؟

-هيج معليج انتِ

-تدرين غدير كل عقلي نورسين تحب الاطلس قبل لان تصرفاتهه تثبت هذا الشي بس عجيب اطلس مينتبه ابد

-لان من قبل هيج تصرفاتهه وياه مو جديدة عليه اضافة نورة انتهت سالفتهه ويه الاطلس خليهه بلكت تضبط علاقتهه بعمر اني متأكدة راح....

سكتت من سمعنه صوت عالي اجه من برة صوت وحدة تعيط، طلعنه بسرعة نشوف شكو وچان نلگه اسيل تعيط..

-بلقييس بلقيسسس لحكولييي

ركضنه ركض لداخل غرفتهن شفت بسملة وعمر دخلو قبلنه، ندور على بلقيس ماهي صوت اسيل ديطلع من الحمام..

-عمر: اسيييل نطب؟؟

تعيط وتبجي ما بقينه واكفات نتفرج دخلنه الحمام وصدمنه المنظر، نانا بشرتهه متحولة للون الازرق كاعدة بالكاع والدم محاوطهه من كل جهة..

-اسيل: عممممر فدوة تعال سااعدني

دخل عمر للحمام شاف نانا بهذا الوضع جحضت عيونه، تقرب عليهه بسرعة يريد يشيلهه ميكدر الدم تارس المكان ونانا طويلة وجثلة..

شالهه بصعوبة وطلعنه من الغرفة واسيل مستمرة تبجي، بسملة شالت غيث وطلعت تركض تدك الباب على غرفة الاطلس، طلع اطلس من الغرفة بس ماد راسه ومغطي جسمه بالباب..

-بسملة: اطلس نانا نانا تخربطت كلهه دم

-الاطلس: شنوو شبيهه؟؟

-بسملة: مادري شبيهه مادري

ما لحكت تكمل طبك الباب بوجهها اقل العشر ثواني وطلع يركض ركض من الغرفة ويلبس بقميصه..

على اثر صوتنه طلعو كل اهلنه من الغرف وياهم ناس غربة من الغرف الثانية يشوفون شكو عرفو عدنه مصيبة تعاطفو ويانه وسألونه اذا نحتاج شي يساعدونه ماهتميتلهم تركنه حمزة يتجامل وياهم ونزلنه جوه..

عمر طلع قبلنه بتكسي وياه اسيل وغدير واحنه الباقين اجرنه تكسي افتهمنه يا مستشفى ماخذيهه وانطلقنه وراهم بقيت ويه اطلس ومريم وسارة ويانه..

وصلنه للمستشفى نقلوهه طوارئ دخلوهه واحنه بقينه بره، اقل الدقيقة ودخلو امي وابوية، ابوي عيونه شاخصة ووجهه اصفر شاحب مخطوف لونه، فتح ايده ثنينهن وصاح بصوت عالي كلش فاقد..

-محمد: شصاااار شبيههاااا ولك اطلللس شبيههاا بلقققيسسس

-الاطلس: مادري والله مادري دخلوهه للطوارئ

تخربطت اسيل لزمهه عمر يسندهه ودخل مسلم طاير شافهم بهذا الحال تخبل راد يثور ويبدي بعركة واطلس دفعه من صدره بقوة ونتر..

-الاطلس: اطيح حظظظك لو فكيت حلگك

سكت مسلم غلس عن حركة عمر واخذ اسيل منه كعدهه بحضنه يمسح على وجهها ويسولف وياهه حتى تصحى، يفرك بصدرهه وايدهه والمسكينة فاقدة..

-غدير بهمس: يمة يالعيارة

-رقية: شنو من گلب عندج غدير

-غدير: منو گلج عندي گلب

سكتت عنهه وحرنه بـ نانا ابوية ارتفع ضغطه من العصبية لزمه اطلس يهدأه بس ماكو محد ديكدرله امي ساكتة وواكفة على جهة بس تبجي وغدير تنتر بحقد..

-غدير: شدعوووة هي خدامة شبيكم خبصتونه واذا تخربطت

ما حسينه الا براشدي اجه من ابوية فر وجهها فر لدرجة طبعت اثار اصابعه على خدهه، شهگنه من الموقف شكد جان جريء وغريب والاغرب من ابوية كال..

-اگصصه لسانچ بنت الكلللب هاي الخدامة تشررفج وتشوف الخلفچ

نزلت دموع غدير مقهورة من ابوية حطت ايدهه على وجهها وردته..

-غدير: محد تجي بمكان اميي طزز بيهه عساهه بهالحال وارده!!

تهجم يريد يكتلهه وجرنهه مريم وسارة بعيد يهدأن الجو، ابوية يرعد رعد يرجف عصبية وخوف متحجرة الدموع بعيونه ويضرب على ظهر اطلس حييل ويأشرله على باب الطوارئ..

-محمد: ولك بلقييس هنا بلقيييس

الاطلس يجاوبه بنفس مقطوع وحال اتعس..

-الاطلس: ادري يابه والله ادري بس اهدأ

انفتحت باب الطوارئ طلع الدكتور يكول نانا حامل خمس اشهر والطفل صارله عشرين يوم ميت!!!

صدمة ما بعدهه صدمة كلام هزني وهز كل الموجودين، فتح عيونه اطلس ما مصدك السمعته اذانه بينما ابوية بهت وجمد بمكانه امي لطمت خدهه بقوة وغدير جحظت عيونهه..

-غدير: حامل شلووون؟؟؟؟

-حصة: يا حسرتيي يا حسرررتي

-الاطلس: لا لا لا اكيد اكو غلط اكيددد

اكدلنه الدكتور نانا حامل وصارت عدهه مضاعفات قوية ونزيف لان الطفل صارله هواي ميت ببطنهه وراح يحولوهه للعمليات، طلب زوجهه يحجي وياه وقبل لا احد ينطق امي صاحت..

-حصة: محمددد روح حل السالفة!!!

راح ابوية يمشي وعيونه شاخصة وره الدكتور يملي اوراق او ماعرف شنو لحظة صمت صارت محد نطق اطلس ابتعد راح يكعد على كرسي بايد حيله ومريم كعدت بصفه تفرك بيده..

-سارة: شلون حامل ما جاي افتهم

-غدير: عمت عينهه بهالعمر وتدور هالسوالف

-حصة: بسچ غدير انكتمي عاد

-رقية: ماما فهمينه؟؟ عوفج من كلشي شلون تحمل اصلاً ليش هي شكد عمرهه؟؟؟

-سارة: 48 سنة يمكن؟

-رقية: والله ما جاي افتهم

بعد لحظات رجع ابوية يبلع بريگه ويباوع لاطلس متوتر وواضحة عليه الربكة..

-محمد: راح ياخذوهه لغرفة العمليات مابيهه شي ان شاء الله هي بخير والله بخير

محد جاوبه كعدنه ساكتين ننتظر أي خبر من الدكتور بقينه على حالنه قرابة 20 دقيقة ورجع الدكتور يكول كملو العملية ونانا بخير بس تحتاج راحة لان المضاعفات اذتهه..

**

"مريم"

ما اسولف على حال اطلس طول ما احنه كاعدين ننتظر يطلعون نانا من غرفة العمليات لاوي رقبته ومنزل راسه ما رفعه ابد، لاحظت اصبعه بده يتعوج ونفسه اعتلى لزمت ايده بين ايدي اضغط عليهه بس ما قبل جر ايده مني وكام..

حتى وره ما كالو نانا بخير وتكدرون تدخلون تشوفوهه ماقبل يروح، بقى واكف بره رغم الباقين كلهم دخلو عليهه يتطمنون اله هو واني..

-مريم: اطلس امشي نشوفهه

-بعدين

-اكيد راح تسأل عنك تعال

ما جاوب وكف على جهة منزل راسه ويفرك جبينه سكتت بدون لا اللح عليه وكعدت على الكراسي البره، لحظات وطلعو من غرفتهه رحت اتقرب اوكف بجانب سارة، سدت التلفون من حمزة تطمنه ماكو داعي يجي وعمو محمد فوراً كال..

-محمد: هذا الموضوع يبقى هنا ويندفن هنا!!

-غدير: قصدك موضوع حمل بلقيس الساقطة؟

ثار عمو عليهه وراد يكتلهه ولزموه عمر ومسلم مد اصبعهه الهه محذر وكال بتحلف قاسي..

-غدير لا تخليني اكررهچ عيشتچ اكسر راس الي يحاول يستفزني حتى لو چانت بنتي

جره عمر بصعوبة يتعارك معارك وياهم ميقبل يرجع بس من شاف اطلس گام تقرب ووكف ويانه ساكت وصافن على عمو حسيته تردد او خاف ماعرف شنو بالضبط لان تغير بسرعة ونتر..

-محمد: امشو نرجع

راحو كلهم يمشون وراه خالة حصة ما نطقت حرف بس دموعهه تحجي حرگة گلبهه وقهرهه، اللتفتت على اطلس لزمت ايده وابتسمت..

-مريم: تروح تشوفهه ويايه؟

-لا

عافني ورجع يكعد بنفس مكانه، تركته ودخلت لغرفة نانا مغمضة عيونهه بس منايمة مجرد طبگت الباب ورايه فزت وكعدت على حيلهه تدور..

-مريم: الحمد لله على سلامتج نانا

-اطلس وين؟؟

-بره كاعد

-مريم قنعي يجيني اشوفه

عيونهه متروسة دموع والغصة شاخطة بلعومهه، ابتسمت وتقربت اللزم ايدهه مسحت دموعهه بالايد الثانية وكالت بشهكة فطرت گلبي..

-والله العظيم مو بالحرام والله اني بريئة كلشي جاي يصير غصباً عني بس حتى يعوف ابني وما يأذي

-نانا لتبجين اعرف كلشي لا تبررين وتتعبين نفسج

-شنو تعرفين

كعدت على سريرهه وذبيت نفس هزيت راسي ونصيت صوتي اهمس بيني وبينهه كأن خايفة احد يسمعنه..

-اعرف انتِ وعمو محمد متزوجين والاطلس ابنج

فتحت عيونهه الخضر على وسعهن فص عينهه راح يطلع من مكانه بلعت ريك وصارت تدور الحرف تريد تسولف تبرر لكن ما طلع من فمهه غير الهوا الحار..

-لتحجين نانا ولا تصعبين الموضوع على نفسج وعلى الاطلس تفاهمو بهدوء وفهمي على كلشي، هو يحبج ومتفهم متأكدة ما راح يزعل عليج هو بس متفاجئ لا اكثر

-تفشل فشلته اني

بجت بحرگة وذبت راسهه على صدري حضنتهه امسح على ظهرهه وهي تكول بحسرة..

-نانا: كسرت عينه وخزيته كدام اخوانه شنو راح يكولون هاي اليدافعلهه ويحبهه وما يقبل عليهه حبلت بالحرام

-نانا انتِ ما حملتي بالحرام كولي انتِ زوجة عمو محمد ليش ساكتة!

-مو بيدي مو بيدنه كلنه الموضوع صعب

-كلشي بيدنه اطلس بظهرج منو يكدر يأذيچ؟

-يأذوه اله يتكالبون عليه اعرفهم مريم ذولة هواميررر تعرفين شنو يعني هواميرر؟؟؟

تذكرت يوم عرسي وتذكرت الموقف حچتهه بنفس النبرة وبنفس الرهبة نفس حركة الايد وهي تضرب على الفراش الكاعدة عليه، اردفت بشوغة..

-ما يهتمون لولد ولا تلد! المهم نفسهم ومصالحهم وبسس عدهم استعداد يشهدون ذبح اولادهم كدام عيونهم المهم ما تتأثر مصالحهم يسجنون اليحبوهه ويعذبون طفلهه بـ حجة الحب والعشق

-اطلس مو هيج نانا

-لان اني ربيته!! اني زرعت بي خوفة من ابوه من صغره كل يووم كل يوووم مريم اگله اطلس انتَ ما تشبه ابوك! انتَ تحبه وتسنده تباري وتداري توكفله طول وعكازة من يكبر بس انتَ ما تشبهه ما تشبه وحشيته وهمجيته

-يهذي بهاي الجملة هواي من ينام

-يا جملة؟

-"اني مو مثل ابوي"

-تدمرت نفسيته كل كسرة يعيشهه ارجع ارممهه وبصعوبة كل طاقتي صبيتهه على ابني ردته يكون انسان طبيعي خالي من الامراض ماردته يتأثر بمحيطه

-بس تأثر وهواي جاي يتعذب

-شبيدي مرايم شبيدي عجزت ما خليت شي ما جربته، تقويت وانكسرت هربت وحاولت انتحر بس ماكو فائدة محمد ربطني بـ "دمليج اسود" مثل سواد روحه

-دمليج اسود؟

-مهري كان دمليج اسود مرصع بحجر العقيق الاسود

-اطلس انطاني هيجي شي بعيد زواجنه؟

-نانا: اعرف، حركة مدروسة من محمد يذكرني بالماضي

-يا ماضي؟

-تتذكرين من كلتيلي اطلس يكول اختارلج الدمليج بمساعدة صديق؟

-اي طبعاً

-هذا الصديق محمد هو الطرح فكرة الهدية على الاطلس

-بس ليش؟؟

-تهديد مبطن ما يفهمه غيري

-شنو هذا التهديد؟؟

-كأن يكول الاطلس الي واني اتحكم بيكم مثل لعبة الشطرنج خليته يهدي حبيبته نفس هديتي الج نفس مهرچ الشبعتي عذاب من وراه

-وينه دمليجچ نانا موجود

-لا اخيراً تخلصت منه شوفي

قدمتلي ايدهه ركزت انظاري على مكان معصمهه المحفور بي طسة على شكل دائرة داير مداير المعصم، اردفت بدموع حزينة..

-دمليج اخذ روحي، حياتي، سعادتي وحتى تعاستي حملني غصب عني وسوه الي يريده بيه كلما اعانده بشي يضغط على ايدي بقووة شوفي هذا الاثر جاي تشوفين؟؟

-اي اشوف

-ما يخليني انزع السوار من ايدي كلما اعانده او ازعله يضغط على ايدي يحفر السوار بيدي تشوط روحي وتفرفح جان يكول هذا الاثر يبقى طول العمر خاف تقررين تنزعي شي يوم وعبالج تخلصين مني هذا الاثر يذكرج بيه، دمليج سميك وثخين يدوسه بيدي حييل يدك بعظمي لدرجة تعوج السوار صار هو ومعصمي واحد

-اطلس يعرف بهذا الشي؟؟ ليش جابلي نفسه شنو قصده من هالتصرف

-ما يعرف شي اطلس تخلصت من الدمليج قبل لا يوعى ويكبر

-وينه هسة السوار؟؟

ضحكت بلوعة ومسحت عيونهه نزلت ردن قميصهه وكالت..

-نانا: قفل قفص النسر

-شنو قفل النسر شبي؟ 

-الدمليج هو قفل قفص النسر

-شلون يعني فهميني

اختنكت بدموعهه متعرف شتحجي دموعهه تنزل عشرة عشرة، حجت بشهكة قوية بصعوبة لقطت الكلمات وفهمتهه..

-ذوب دمليج الاسود وضافله ذهب اكثر وحوله قفل لقفص النسر الي يكعدون بي ابني ويعذبو! يقفلون باب القفص عليه بنفس الدمليج الي محمد اشتراني بي وربطه بيدي مثل الكلبشات

-وحفر عليه "دمليج اسود" على القفل حفر مو؟ اني شفته اني شفت حافرين هاي الكلمتين!

-اي

ضاعت الكلمات والحروف عقلي تعب واني افكر بوحشية وتفكير هذا الرجل المريض، شغلات متخطر على البال فقط الناس المرضى تفكر بيهن، يربط شي بشي متفوته فايته يسوي أي شي بس حتى يحصل نانا..

-مريم: راح اصيح لاطلس نانا برريله موقفج خلي يعرف انتِ تحبي وما خذلتي

-اي صيحي وتعالي لا تطلعين مريم

-ماشي

طلعت اصيحله ما عاند وبسرعة اجه دخل للغرفة ملهوف بس يحاول يطفي لهفته يمثل البرود والجمود ومن داخله محترق كعد على سريرهه بقيت واكفة على جنب بينما هو منزل راسه ما رفعه..

جرت ايده وحطتهه على صدرهه وكالت ببكاء مكتوم بصعوبة طلعت الكلمات المهمومة من فمهه..

-وعيونك وغلاوتك عندي اقسملك بالله العظيم ما صار هذا الحمل بأرادتي كلشي چان غصب عني حتى...

-نانا لا تحجين

هز راسه لا وحط راسه على صدرهه وشهك بحس عالي، اكتافه تهتز وصوته اختفى يبچي بحرگة وضيم، بكسرة خاطر وروح، كتم انفاسه بصعوبة حتى ما يطلع صوت بكائه بس ماكدر يسيطر على نفسه مجرد حضنت راسه طلع حسه..

ذب كل تعبه وكل همه عليهه بچو ثنينهم هواي انهد حيلهم، درت جسمي اريد اطلع اعوفهم براحتهم ولاحظت حركة نانا وهي تأشر بيدهه ابقي..

وكفت على جهة صرت بظهر اطلس مر وقت لا بأس بي ياله وخر من حضنهه واخذ ايدهه يبوسهم ويمسح دموعه بأصابعهه..

-نانا: صدگتني؟

اخذ نفس عميق يسيطر على نفسه ودموعه بس الكسرة الي بصوته وحسرته بحبس الدموع واضحة..

-الاطلس: اجذب الدنيا واصدكج

مسح عيونهه وخدودهه وحتى خشمهه بأيده ممهتم طلع كلينس من جيب سترته ورتب حالهه..

-الاطلس: من نرجع نسولف هسة ارتاحي

-نانا: ما چنت موجود انتَ

-بعدين نانا

توقعته ديأشر عليه ماكدر اشوف وجهه بس من نظرة نانا الي عرفت، حركت راسهه نافية وكملت..

-چان كاطع العلاج بوكتهه وانتَ مو بالبيت ما كدرت اتصل بيك واحچيلك خفت اضوجك واقهرك ماكو بيدك شي بس راح تعصب وتتعب وتتعاركون ويطلع حرگته بيك بلعت الموضوع وسكتت

-چنتي تعرفين نفسج حامل؟

هزت راسهه "اي" مسحت دمعة نزلت من عينهه وكالت..

-عرفت من جنت بالشهر الثالث خفت احجي وتمنيت يوكع واخلص منه ردت اروح اجهضه وحدي وخفت من عذاب ربي

-مات الطفل

-ما جنت اعرف بهذا الشي

-خلص حبيبتي انسي عدت على خير

-ابوك....

سكتهه بسرعة من حط ايده على حلگهه همس بين سنونه شي ونانا هزت راسهه لا ودفعت ايده..

-مريم تعرف اطلس

اللتفت عليه متفاجأ باهته ملامحه وعيونه دم حمر من البجي ابتسمت وهزيت براسي تقربت من عنده وحطيت ايدي على كتفه وكلت مداهرته..

-مريم: لو چنت بوضع احسن چان نكدت عليك لان ضميت عليه

-الاطلس: مريم

-مريم: لتحجي هسة خلينه ناخذ نانا للفندق ترتاح رخصهه الدكتور

-نانا: طلعوني منا

كام يساعدهه تبدل وترتب نفسهه وطلع يجيب الدكتور، رجع وياه ونانا طلبت من الاطلس يطلع وبدت تناقشه بخصوص حالتهه بلهجتهه المغربية طبعاً..

شرحتله كلام دكتورتهه خصوصاً وعادتها الشهرية تجيهه بالسنة مرة فقط، اكدلهه الدكتور هالحالات تصير والي بعمر نانا يصير عدهم حمل ولازم تنتبه مرة ثانية وتهتم لنفسهه..

كملنه ورجع اطلس بكرسي متكدر تمشي تعبانة كلش الدكتور كال طبيعي هالشي بسبب عمرهه، اخذنه تكسي ورجعنه للفندق بس اطلس ما رجع طبيعي تعبان بشكل وميحط عينه بعيني مفتشل او زعلان ماعرف..

نام على الفراش منطيني ظهره تمددت بجانبه ودنيت روحي عليه، حضنته من خصره وثبتت راسي على ظهره وهمست..

-حبيبي

-احم هاا

طلع حسه ناصي مخنوك نهضت روحي بسرعة اشوفه وجهه احمر ماقبل اشوفه ورفع الغطا يغطي راسه..

-اطلسي هون على نفسك..

ما تجاوب ويايه رجعت لمكاني ونمت نفس قبل شوية بست كتفه وداعبته بأنفي، حضنته اكثر وغمضت عيوني بلكت انام.. مر فترة على هدوئنه وحسيت على صوت تنهيدة عالية صدرت منه..

-مرمر كاعدة؟

-اي

اندار لجهتي صرنه وجه بوجه، ضوه الغرفة مخنفس بس اللمبه مفتوحة كدرت اشوف خشمه احمر كلش جريته بيدي على كيف وبست اصابعي، ابتسم ع حركتي وكال..

-اني اسف لاني اثير الشفقة

-لتكول هيج انتَ انسان والي دتعيشه طبيعي

-اتحمل كلشي مريم بس من يجي الموضوع لامي...

غص ونزلت دمعة من عيونه دفن راسه بصدري واجهش بالبكاء مثل الاطفال تعلقه بـ نانا، كمل بصوت مبحوح..

-ماكدر اللزم روحي اموت ولا تنضر امي

-بالعافية عليهه هيج ولد

-لو انطيهه روحي ما اوفي دينهه

وخر وجهه من صدري ورجعنه صرنه وجه بوجه، حضن خدي بكف ايده وتلمس طرف انفي بأبهامه..

-افرح على فرحتهه واتعب على تعبهه وتنزل دموعي ويه دموعهه، ينكسر خاطري على خاطرهه امي دنيتي ماضيي وحاضري ومستقبلي

-اممم تحبهه اكثر مني مو

ابتسم ورفع حواجبه بطريقة "لا" وكال..

-لا حب كـ حب الام ولا امان كـ امان الام ولا حضن كـ حضنها

-راح احسدهه اسكت

-ياريت الناس كلهه امي

-سولفلي عليهه

-عشتي وياهه هواي معقولة ما عرفتيهه؟

-اريد اعرفهه واشوفهه من خلالك

-شوكت عرفتي اني ابن نانا؟

-قبل لا نتزوج اكتشفت

-شلون

-مالك علاقة المهم عرفت

-وشنو ردة فعلج ضجتي؟

-لا بالعكس توضحتلي الصورة وصارت الامور اكثر منطقية

-شنو قصدج

-حبك لـ نانا يختلف عن حبك لخالة حصة، اعرف تحب حصة وتموت عليهه بس نانا غير حتى نظرتك الهه غير لهفتكم على بعض ومداهراتكم دعواتهه الك وحبهه وحرصهه ودموعهه التذبهم عليك بيهه حنية وريحة ام

-امي حصة هم ماقصرت وياي وصارتلي ام

-اي صحيح، سولفلي عليهه يله

-مريم حياتي معقدة لدرجة اني ما افهمهه احير منين ابدي ومنين انتهي

-جدك ليش يكعدك بالقفص؟

-هاي شنو حتى هاي تعرفيهه؟!

-كلشي اعرف ولا تسألني منين حباب

-جدي يكعدني عناد بيهه يحرگ گلبهه عليه مريض نفسي ويستمتع من يشوفني ابچي واصيح من الخوف والوجع

-ياربي

-صار يضوج من النسر بده يتعرف عليه وما يتقرب مني ويأذيني صرنه صحبة اسولف وياه ويسمعلي

-اشوفك اوقات تلزمه بيدك متخاف منه

-ربيت وياه بعد صار اخوي

-هههههههه متكرهه؟

-لا هو حيوان ومفترس ماعنده عقل يكول هذا طفل وهذا ما يصير أذي بس هذا الحيوان تعلم عليه وصار يكعد كبالي بدون لا يسوي شي بس جيبي الحيوان البشري الي يتعلم

-عجيب جدك عجيب!!

-يضوج ويتنرفز من النسر ما ينگر بيه كام يبتكر طرق تعذيب اخري مثل الماي البارد، يطلعني بالحديقة نص يوم واوقات يخليني انام بره.. من اعاند وابجي يلوي اذاني ويكول بصوته المزعج..

"اذا طلع حسك اذبك للچلاب تاكلك"

عدنه كلاب حراسة قبل كبار وضخمات يهددني بيهن، يهيني ويجرح بالحجي جنت ارجع من المدرسة ويستقبلني من الباب يكول "رجع ابن الخدامة المغربية" يتفل عليه وعلى امي ويفشر علينه..

عشت طفولة تعيسة لدرجة ماريد اسولف بيهه واتذكرهه اتعب حيل اتعب وينهد حيلي من تجي لقطات ببالي، انام احلم بي اكعد اتذكره.. صوت جدي بأذني وهو يصيح وبيده عكازته من خشب الجوز وراسيتهه النحاسية و.....

سكت وبلع ريگه غمض عيونه بقوة وهز راسه لا ضحك متألم وكال..

-هواي حجي مريم وتصرفات تسم الگلب ما راح تتحملين خليهه بالكلب تجرح ولا تطلع وتذبح..

-كلشي راح وانتهى حبيبي صرت رجال ومحد يكدر يأذيك حافظت على امك وعلى نفسك واهتميت بخواتك وما كسرت بخاطر خالة حصة وصرتلهه ابن بار

-مو كافي هالشي مو كافي

-كافي لو مو كافي المهم انتهى، اني يمك وشوكت ميعجبك تسولفلي كلني أذان صاغية

ابتسم وجر راسي يحضني خنسنه ثنينه تمنيته يحجي اكثر ويشاركني بس ابد ما جاب طاري بعد صح عرفت كلشي من اسيل بس اريده هو يفضفضلي لكن توضحلي شخصيته كتومة وما يحب احد يشفق عليه..

**

"دعاء"

بيدي شريط اختبار الحمل كلني لهفة اعرف النتيجة، علي واكف بجانبي وحاط راسه ويايه دائماً يكرر يتمنى يصير اب وحلمه تجي بنية ويسميهه "زهراء" على اسم امه..

-ها دعاء شو ما جاي يطلع؟؟

-ماعرف شو كلشي ما ظهر علاوي

-عطلان؟

-اي يجوز تجيبلي غيره حبيبي؟

-لا امشي نسوي تحليل دم

ايدته وبدلت طلعنه نسأل على مختبر او مستشفى الوقت ظهر ومتفقين نطلع كلنه سوه نتغده بمطعم بس علي ميصبر بعد من شافني اتقيء الصبح وگتله متأخرة عليه الشهرية..

-علاوي

-روح علاوي

-اخاف ماطلع حامل

-مو حامل مو حامل هذا هو ليش تخافين حبيبتي

-ماريدك تزعل

-ما راح ازعل يله امشي دعوتي

رحنه للمختبر طلبت اسوي تحليل حمل سحبو مني دم وكعدنه ننتظر مرت فترة ياله طلعت المحللة بيدهه النتيجة تقدمت علينه وسولفت ويه علي شي ما انطى ردة فعل، كمتله بسرعة وكلت بخوف ممزوج بلهفة..

-هاا كول

-مو حامل

-صدك تحجي

-اي

-ياربي

-ولج ليش تبجين

-عبالي حامل اريد اصير حامل

-ميخالف حبيبتي الله كريم بعدنه هستونه تزوجنه لاحكين على الجهال

مسح دموعي النزلو وابتسم وهو يمسح على حجابي..

-دعاء: ما زعلت انتَ؟

-لا ابد

-بس اني زعلت

-هسة نراضيج بحلويات

ضحكت ومسحت عيوني وخشمي لزم ايدي بقوة ولفهه على زنده وتمشينه بره المختبر، وكف فجأة وكال..

-حبي نشوف دكتورة نسائية نسألهه ليش گاطعتچ

-دعاء: ماشي بكيفك

رحنه نحجز عند دكتورة ما تأخرنه بسرعة دخلتنه أصريت علي يدخل ويايه ما قبلت بالبداية بس لان عرفت ماحجي لغتهم قبلت..

سألتني كم سؤال وعلي يترجملي شوية وكالت صعدي على السدية تاخذلي سونار، هادئة كلشي متحجي فصلتني عنه بستارة كملت وكلتلي كومي..

مسحت بطني بالكلينس ورحت وراهه كعدت على الكرسي مالتهه وبدت تسأل هواي وعلي يجاوبهه بنص تساؤلاتهه انعفس وتوتر لحيت عليه يحجيلي بس ماقبل، وگف گلبي من تغيرت نبرة صوته كأن ديتوسل ماعرف شبي..

طلعنه منهه واني ازن واون عليه يحجيلي شكله ما عجبني مع العلم كام يضحك ويداهرني عادي نفس قبل..

-علي احجيلي شصار تره اني ما انسى!!

زفر نفس وسحب سحاب جاكيته كله، حط ايده بجيوبه وكال بهدوء..

-ما يصير عندج حمل هسة دعاء

-شنو يعني؟؟

-يعني لازم تتعالجين

-من شنو شبيه اني

-عندج تكيس چبير على المبايض وهذا سبب كل مشاكلج وجع بطنج وتأخر الدورة عندج

-والحمل؟؟؟

-وما يسوي عندج حمل

-يعني ما اصير حامل بعد

-لا تبجين دعاء شبييج

كام يبجي ويايه وكفنه ننوح بنص الشارع حضني يمسح على راسي ويكول بصوته الحنون..

-لا تبجين لخاطري حبيبة گلبي والله مابيج شي

-وانتَ ليش تبجي

-خرب حظي ماكدر اشوفج تبجين كاافي ولج

-اريد اصير ام اريدك تصير اب

-حبي نصير الموضوع ما ينرادله بجي الدكتورة كالت لازم تتعالجين وتلتزمين بالعلاج وبس

-واصير حامل؟

-ان شاء الله

-يله خلينه نجيب علاج

-مو هسة من نرجع نبدي نراجع وكالت لازم اني هم اسوي تحاليل حتى اذا عندي مشكلة نعالج سوه

-يارب يارب

-لا تبجين دعوة ولج ماتحمل گلبي رهيف خرب اخوي

-الا اكول لعمر تغلط عليه

-گليله عادي اخوان ونتصافى بيناتنه

ابتسمت وهزيت راسي بس التفكير موتني كلما اصفن اتخيل ما راح اصير ام بحياتي واكعد ابجي وانوح وعلي يدمع ويايه ابتلى بيه..

طلعنه بوجهنه للمطعم وهناك شفنه الباقين بس شو الوجوه مگلبة، كعدت على الطاولة وهمست..

-دعاء: شبيهم؟

-علي: مادري معقولة صاير شي البارحة؟

-دعاء: يجوز، اسأل عمر بله

اشر لـ عمر وتقرب بجسمه فقط بقى كاعد على الكرسي سأله شصاير وعمر اشرله بعدين..

-دعاء: يا ستار، وينهه مريم اختي شو ما اجت

-علي: عمير مريم واطلس وين

-عمر: ما شفتهم

طلبنه الاكل بس مو غده صار زقوم عمو محمد منفس وكل شوية ناتر بواحد وخالة حصة متحجي وياه مبين واصلة للظالين عدهم..

-غدير: شنو هالكأبة شبيكم!

-حمزة: بلقيس شلونهه شصار وياهه البارحة؟

-علي: ليش شبيهه؟

شرحلنه حمزة كلشي وشلون تخربطت واخذوهه مستشفى احنه مندري لان بغير طابق ما حسينه على شي، رجع حمزة يكرر موجه السؤال لحصة هالمرة ما حجت شي اشرت على سارة وكالت..

-سارونة لا تكثرين اكل تتعبين

-سارة: اي ماما حاضر

من شفناهم مغلسين بعد محد حچى، كملنه غده وطلعنه لمكان سياحي الاجواءلا تطاق الكل متوتر وغدير كل شوية تباوع لابوهه وتخزره وتبسبس بينهه وبين امهه..

-غدير: خلونه نروح لمطعم (اسم المطعم) عاجبني نتعشى هناك

وافقوهه الرأي ورحنه للمطعم انفرجت اساريري من شفت مريم واطلس ووياهم نانا هم جاية بس مبين عليهه تعبانة، سلمت عليهه بحرارة حسيت بأختي مو بخير سألتهه هواي ولحيت عليهه تحجيلي ماقبلت..

كعدنه ناكل بهدوء والكل يسأل على نانا وشلون صارت وهي تجاوب ومنصية راسهه ما رفعته، بقينه على هالحال الهادئ الى ان لاحظت تخربط حال بسملة وجهها صار اصفر وشحبت ايدهه لزمت رقية حيل وعضتلهه شفه عود اسكتي..

**

-لعبان نفس

-رقية: شبيچ بسومة ضايجة

-بسملة: امي طيحت حظي البارحة لان عرفت حجيت ويه عمر بالليل وكفختني

-رقية: شحچيتو؟

-بسملة: هيج بس شفته هو ومسلم يتمالخون ظل بالي

ضحكت وصفكت بيدهه بحماس، تقربت عليه تضرب چتفهه بچتفي وتحرك بحواجبهه..

-رقية: هاا بسملة هااا

-بسملة: وعلّا؟

-رقية: اويلي يمة اويلي يابة

-بسملة: شبيچ حبي مصخنة؟

-بسملة: كلتي امج كتلتج البارحة لان حاچيتي عموري

-اي انطتني راشدي گبر هسة لو حاچيه وياه حجي بي خير على الاقل يسوه الراشدي

-وانتِ شكو حچيتيلهه؟

-حتى انكتل

-صدك عووود!

-اي مو باعي اني اخاف تجي فد حية تستوسة وتسوي عليه سالفة تطلعلهه اشاعة لو تريد تضرني على الاقل امي تعرف وتفزعلي

-حلوو خليني اتبع هالاسلوب

-خوش اسلوب صح تنكتلين هواي وتترزلين وتطيح حظج بس ميخالف تمون

-بسملة بعد ماتحمل اني ماكدر اسكت اكثر واضم عليج شي

تباوع لعمر كاعد بالطاولة الثانية ديقره المنيو مال الطعام يختار وملتهي بي، باوعتله وبنفس اللحظة رفع عيونه عليه كسرت عيني بسرعة على رقية وگرصتهه حيل..

-بسملة: غبيية شبيچ هسة عباله اباوعله 

-ليش انتِ ما تردين تباوعيله علينه بسملة عليينه

-رقية تره صايرة غبية اني ما اللگفهه دخلت كلية واستمطيت عقلي يتعب مابيه افكر

-بسملة عمر يريد يخطبج

-منو عمر

-عمر عمر عمرناا

-عمرچ منو

-لج هذا عمرنا الصاك هذا توأم علي

-رقية تمسلت لا تمسلتين

-ما امسلت البارحة غدير گلتلي وربي هو كايل لامه خطبيلي بسملة من خطوبة علي ودعاء انتِ عاجبته

-صدك تحجين!!

-وعمتي تريد تخطبج اله كلش ببالهه

-يمة

-شكو شبيچ

-لج البارحة البارحة الباارحة

-رقية: شكو البارحة؟؟

-البارحة كلي عندي موضوع مهم وياچ وما لحك يكمل اسيل صاحت وركضنه لغرفتهه

-اعتراف والله اكيد ديعترفلج

-تتوقعين؟؟

-اي طبعاً مو بس اتوقع متأكدددة

-رقية سكتي لا مستحيل عيب اش ماحب هالسوالف

-هي صارت حمرة وتكول ماحب هالسوالف هههههه والله احسن ما اختار عمر

عضيتلهه شفة متوترة وارجف تخربطت احوالي من شفت دعاء تباوعلي وتسوي بيدهه شكو، همست لرقية..

-بسملة: كافي رقية سكتي حبابة

-يله ماشي راح اسكت شكو ماكو شدتسوين

-ولشي

-هسة لو امج تقبل نبقى بنفس الغرفة وربي وناسة فول

-اي

-بسملة شبيچ جمدتي هذا التوتر والخوف كله من عمر ههههههه

-ما جاي افتهم شي

-ليش

-عمر يحب رقية گلبه مو فارغ شلون يخطبني؟؟

-قصدج اسيل

-لا مو هي

-بسملة لا تجذبين عرفت كلشي اللغازكم مو عليه

-المهم هسة شلون معقولة نساهه؟

-اي اكيد نساهه لا تظلين تفكرين بيهه وتغارين منهه يمعودة

-اغار شنو دسكتي

بقت تداهر بيه وتخبث ويايه واني بالضيم شبيه انعفست مادري بس احساس غريب حاوطني ماعرف افسره هو فرحة لو خوف لو شنو، كمنه نتمشى بالمنتجع الخاص بالمطعم اني ورقية وشفنه من بعيد غدير واكفة بجانب نانا..

-رقية: افف لااا

-شنو شبيچ

عافتني تركض الهم رحت وراهه ووكفني صوت عمر يصيح ويه مسلم وره ماعرفت وين اروح، قررت اغلس على عمر واروح للبنات قبل لا انكتل مرة ثانية من امي..

-غدير: البقية بحياتج بلقيس حرامات ما تمهلتي بالطفل

-نانا: غدير كافي عتقيني

-غدير: بس يا ترى منو الاب؟ ماعرف والله حيرة هواي خدم زلم عدنه

-رقية: غدير شبييج انتِ والله لو ابوية يسمعج يموتج

-غدير: ابوج راح ويه حبيبة گلبه وزوجته راح ويه امنا! اما هاي الحثالة بقت هنا تدورلهه رجال يستر عليهه

حطيت ايدي على صدري مصدومة من وقاحة هالبنية شنو من قابلية عدهه ماعرف، نانا واكفة وحدهه وغدير كبالهه تعد وتصف ورقية تصرخ بالهمسة حتى محد ينتبه..

رادت تكبر السالفة من اجه الاطلس فوراً غدير انلصمت ووكفت عاقلة ولا كأن صار شي بس طبعاً هو ما سكت من شاف نانا تبجي مكسورة خاطر سوه تحقيق ويانه كلنه بس محد حچه..

طلعنه كلنه من المنتجع متنرفزين ولعبانة نفسنه من هالحية ويانه اجت، كملت الليلة من اللتفتنه كلنه على صوت بنية تتماوع بحچايتهه..

-الاطلس: نورسين؟؟؟

-نورسين: شلون صدفة واااو

-مريم: صدفة كلتيلي!

-نورسين: هههه لا امزح اعرفكم هنا غدورة گلتلي

-غدير: فدوة احلى من نورنه عبالي ما تجين

-نورسين: معقولة افوت شوفتچ

-بسملة بهمس: والله مادري عدكم السفر هيج زلاطة

-دعاء بهمس: عبالك وره البيت

-مريم: خلونه نرجع اطلس تعبت كلش

-نورسين: وين عمر ما شوفه وياكم؟

-علي: شتسوين بعمر؟؟!

-نورسين: شبيك علي تعيط عليه

-الاطلس: شباب شنو الموضوع صوتكم

-مريم: عوف صوتهم اطلس خلي نرجع احنه

-نورسين: ما جاوبتو وينه عموري

-غدير: بقى بالمنتجع جان بالحمامات يغسل

-علي: لا عمر رجع للفندق واحنه كلنه راجعين امشي دعاء!!

جر دعاء وياه وكف تكسي وصاحلي وامي نروح وياهم بينما همه بقو واكفين ماعرف شنو دار بيناتهم..

اول ما وصلنه الفندق شفنه عمر كاعد بصالة الفندق يشرب قهوة هرول عليه علي وكال وهو يلهث كأن احد ديركض وراه..

-علي: نورسين هنا عمر!!

-عمر: وشنو يعني

-علي: ليش اجت شتريد؟؟؟

-عمر: انتَ شبيك معصب شعليه اني

-علي: اجت علمودك واضحة لان خبصتنه عمر وين وعمر وين

-عمر: اكلك عليوي راسي يوجعني وطاگة روحي ما صار ساعة من تعاركت ويه مسلم لا تخليني اخبزك وراه

-علي: عمر مو وكت سوالفك البنية مو طبيعية شتريد منك شنو غايتهه؟؟

حسيت على ايد امي تجرني حتى نروح لغرفتنه انداريت عليهه وهمست..

-بسملة: لا اريد احجي ويه دعاء روحي انتِ

فرت بيدهه وراحت تصعد كل شوية تلتفت تباوعلي وتهز براسهه وتسويلي اني اعلمج شمرتلهه بوسة بالهوا خزرتني على حركتي واني هم انتبهت لروحي شنو هالرعونية..

-علي: عمر بروح ابوك انتبه منهه تره هاي مو راحة لافت على اطلس واجتك هسة انتبببه عمر

-عمر: ان شاء الله

-علي: مو بس ان شاء الله تعال تعال يمي اذا اكو شي بيناتكم احجي ولك لا تكسرنه عميرر تره ابوهه راح يرجع منااافس

-عمر: انتَ شبيك ماعندي شي وياهه ثانياً تحجي هنا كدام البنات والله فلا تستحي صاير

-علي: اني اريد كدامهن حتى تتفشل وتتخزه وتوخر عن البنية ما تناسبك

-عمر: تره طگت روحي ياهو الاجه وحط خشمه بحياتي منو گلك اني احب لو معجب بيهه ليش اني معبرهه! علي لا تخلينه ندووس بالحجي

ثار وصارو يتناترون بصوت خافت خوفاً احد من الموجودين ينتبه، اشرت لدعاء تجيني اول ما وكفت بصفي كلتلهه..

-دعاء من باجر احنه منطلع وياكم بعد

-دعاء: ليش؟؟

-مادري امي تكول

-دعاء: بعدين نتناقش مو هسة

سكتنه من ظهرت ام عمر من المصعد تذب بشالهه حول رقبتهه برهاوة، شافت ولدهه معصبين دكت صدرهه وكالت..

-شبيهم توأمي شصاير ماما

-عمر: ما صاير شي حبي

كام عمر يسلم عليهه ويبوسهه اليوم ما طلعت ويانه بقت بالفندق والواضح ما شافهه، راحلهه علي هم بوسهه تركت دعاء وياهم وتوجهت للمصعد اصعد وشفت الشلة الباقين يجون ركزت انظاري عليهم علما يوصلني المصعد وشفت رقية تأشرلي تعالي..

رحتلهه بعدهه دتحجي وظهرت نورسين ويه غدير يضحكن ومكمشات ايد بأيد، بس شافت عمر هدت ايد غدير وابتسمت بفرحة..

-نورسين: هاي عمر

بينما عمر قابلهه بنظرة استغراب باوعتله امه وعكدت حاجبهه من اجت نورسين تبوسهه وتسلم عليهه الحية تتلوك لامه..

-زهراء: نورة انتِ هنا ولا ادري جاية

-نورسين: اليوم وصلت العصر وحجزت هنا بفندقكم

-زهراء: يا هلا والله خوش ونسة حتى نطلع كلنه سوه

-نورسين: هههه اكيد راح نستمتع

رمقت عمر بنظرة وراهه باوعت للاطلس الواكف جامد ومريم محاوطة زنده بأيدهه..

-الاطلس: شعجب اجيتي؟

-نورسين: ضوجة وحدي كاعدة باباتي مسافر وانتَ ماكو بالشركة ولا واحد من الشلة موجود

دارت عيونهه على عمر تقصده بالحجي الكل لاحظ توددهه اله حتى ام التوأم نفسهه، طلع عمر علبة علچ من جيبه اكل واحد وكال..

-تصبحون على خير

-نورسين: حتى اني تعبت تصبحون على خير

راحت وراه تستعجل بخطواتهه، هد اطلس ايد مريم ومشى وراهم سريع وصاح بصوت مسموع..

-نورسين!!

تقدم عليهه بخطوات جبيرة وحجى وياهه شي منسمع يتهامسون درت عيوني على مريم اشوفهه انكلبت حمرة عضت على شفتهه بقوة تسيطر على اعصابهه..

رجع اطلس وياه نورسين وبقو على بسبستهم هو اني معليه وراح اطگ الله يساعد مريم، علت نبرة صوت دارسين وكالت بضحكة..

-نورسين: اطلس گتلك ماكو شي بيني وبينه شبيك معصب عليه

-الاطلس: ما معصب مجرد سؤال

-نورسين: ههههه بيبي من يمته وجاي تسأل عن علاقاتي العاطفية

-مريم: اي اطلس من يمته وجاي تسأل عن "علاقاتهه العاطفية"!؟

-الاطلس: شنو السالفة سؤال عادي نوره وهمسته بيني وبينج ليش تردين الكل يسمع

-مريم: نوره عذري رجلي لان يتدخل بحياتج العاطفية!

-نورسين: اوه لا طبعاً ما عندي مشكلة يتدلل عليه اطلس يسأل الي يريده

صوتهه ماااايع يلعب النفس الموقف مقزز ومريم راح تنفجر، حمزة وسارة تسرسحو يرجعون ونانا واسيل هم راحو وام الولد كذلك..

-نورسين: اني احب عمر

-علي: ههههههههههههههههههههههههه نكتة الموسم

-الاطلس: شنوو تحبين عمر؟!!!

-نورسين: اي يعجبني

-غدير: اوووي شكد حلو وبيناتكم علاقة؟

-نورسين: اممم يعني مادري نكول يمكن

-الاطلس: شنو انتِ عود صدك تحجين؟!

-نورسين: اي صدك شبيك بيب

-الاطلس: ما كلتيلي من قبل انتِ تحبين عمر؟

-نورسين: لان هسة ياله استوعبت الموضوع غرت عليه من عرفت امه تريد تخطبله

-مريم: تتهنون

عافتهم واكفين وصعدت وجهها ميتفسر كالبة هذا على ذاك، اطلس ترك نورسين وراح وراهه يصيح بيهه يريدهه توكف ومريم مطنشته..

**

"مريم"

ناااار كبره وكبت بروحي راح اموت راح انفجر اتمنى اللزم اطلس ونورسين وانتفهم تنتف من العصبية والرجفة اجاني خفقان قوي دمرني كعدت على السرير بالغرفة وجريت حجابي نزعته وذبيته بالكاع..

دخل اطلس للغرفة هادئ نزع سترته وسارح اني شفته هيج لو تخبلت حبست عصبيتي بصدري ما حجيت كمت فتت للحمام اسبح وبعد ماتحملت انفجرت بجي كعدت جوه الدوش لامه رجلية لصدري وابجي بقهر.. يغار عليهه وعصب من عرفهه تحب عمر يا ريتني ميتة ولا شايفة نظرته وجحظت عيونه..

سكتت من سمعت صوت طرق باب الحمام، مجاوبت ورجع يدكهه اقوى..

-مريم

-جاي اسبح

-اي فتحي الباب

-جااااي اسبببح شنو افتح الباب

-تفتحيهه لو اكسر الباب

-اطلس شبيييك

كمزت من الكاع من شفته يتمعچل بالباب يريد يكسرهه، گبل جريت المنشفة لفيت نفسي وفتحت الباب خازرته..

-الاطلس: ليش عيونج حمر؟

-من المي

-من شوكت تصير حمر من المي؟

-معليك لتدخل شتريد؟!

-مريم اني اعرف ليش انتِ معصبة خليني ابرر موقفي

-شنو تبرر على شنو

-على الصار جوه شفتج عصبتي و...

-لا ما عصبت غرت على صديقتك لان تحب صديقك وين المشكلة؟

-لاا مو هيج والله

-هيج لو مو هيج شفت كلشي عادي براحتك

سديت الباب بوجهه ورجع فتحهه ودفعني بالحمام..

-هاي شبيك اطللس

-ما غرت عليهه بس تفاجأت لا اكثر

-تفاجأت وانتَ فتحت عيونك هيييييج

مثلت شلون فتح عيونه صفن عليه وضحك..

-شو تضحك؟؟

-تخوفين وعلي

-اي وخر عني لا يلوحك شي

-مرمر بطلي هالسوالف حتى بشهر العسل تنكدين

-شهر نعل!!

-والله العظيم ما غرت عليهه بيمن احلف وتصدكين

-عادي حبي غار هسة شكو اني هم اغار على اصدقائي

-ليش منيلج اصدقاء انتِ!

-راح اكون اصدقاء ولدد حتى تحس بيه!!

-انصدمت من نورسين وعمممر تفاجأت شلون تصير بينهم علاقة عمر ما يحب نورسين ولا يطيق شوفتهه ونورسين بنت شريك النه بس هالسنة سنة الجاية يرجع منافس وارتباطهم راح تسببلنه مشاكل!! فهمممتي سبب فتح عيووني وعصبيتي!!

-لا

-اووويلي يا مريم

-ليش هي مو صديقتك؟ شنو الفرق خو صداقتكم هم خطرة بحساب ابوهه جان منافس الكم قبل

-بس اني حريص ما انطيهه أي معلومة عن عملنه والصداقة تختلف عن الارتباط والزواج تصير نصفه الثاني ويشاركهه كلشي يخصه

-ما اقتنع

-حبيبتي گلبي يا روحي انتِ وغلاوة امي ما اغار عليهه وما تهمني جان غرت عليهه من صاحبت صديقي قبل فترة

-شنووو انتَ مو كلت حبيبهه ذاك الاجنبي وانفصلت منه؟؟

-اي لان ماردت اشوه سمعتهه وتكولين هاي من واحد لواحد!

-عزه بعيني صدك صاحبت صديقك اطلس؟؟

-اي

-منو منهم؟!

-فؤاد صاحب مصنع الـ^^^^^^

-يمة يمة يمة تدور كله هوامير

-لان ما يصير تتزوج واحد عادي ابوهه ما يخليهه المهم مو موضوعنه هسة هذا اني ماا اغار على نورسين كل ما بالموضوع ما مقتنع بعلاقتهه ويه عمر واني متأكد علي وحمزة ومسلم هم يوافقوني الرأي!

-سؤال ولتكول لحيتي

-شنو جواب

-ليش ابوك رادك تتزوجهه رغم كلت بس هالسنة شركاء انتو

-لان بزواجي منهه راح تدوم شراكتنه طول العمر اني فصلت الشراكة عنهم علمودج انتِ گلبت الشركة كلهه وخسرنه ملايين بسبب عملتي بس تسوين وما اشوفهه خسارة لان ربحتج بالنهاية

-بعدني زعلانة روح مو تضحك عليه بكلمتين

-اني اعرف شلون اراضيح

عطت بي من قفل باب الحمام علينه كمت اكمز بمكاني ما انطاني مجال حتى حلگي سده حتى ما اعيط، جرني و..........

ثاني يوم بقيت مغثوثة منهه شفتهه كاعدة ويانه على الريوك بس شكلهه مزعوجة وضايجة ما ادري بـ عمر ردهه البارحة وتفاجأت من رقية كعدت تسولف لبسملة الصار ولاني كاعدة بصفهن اسمع..

-رقية: والله ولج طردهه

-بسملة: جذب هاي شوكت راحتله الجربة لغرفته!!

-رقية: بالليل كلش سمعتهه تحاچي غدير بالموبايل ماكدرت اكعد واسكت والله وفتحت باب غرفتنه شوية وصرت اتجسس عليهم

-بسملة: وما شافوچ؟

-رقية: لااع حرصت محد يشوفني اصلاً غدير هم وكفت تتسنط ويايه لج عموري حتى للغرفة ما دخلهه

-بسملة: كولي والله

-رقية: وحق الله وكفت بالباب تحجي وياه هواي بقو يسولفون وعمر يگلهه ما نناسب بعض وما مفكر بالارتباط ومن هالكلاوات

-بسملة: اكلج رقية وانتِ ليش هيج ضايجة منهه مو چنتو تحبوهه؟

-رقية: ما حبيت تصرفهه ويه عمر بيني وبينج بسملة اني اعرف نوره تحب اطلس من قبل صح هو ميعرف بس احنه مو اغبياء ونلاحظ شنو معناهه لفت على ابن عمته وتريد ترتبط بي كلش ضجت منهه اريدج انتِ تصيرين مرت عمر

اسمعهن وفاكة حلگي اباوع لبسملة كرصت رقية حيل وتأشرلهه تسكت وذيج منطلقة، اخيراً ولله الحمد خلصنه من موضوع نورسين وفكت ياخة عن عمر بس هالليلة بقت بالفندق ورجعت تسافر للمغرب..

ما طولت سفرتنه تعبت نفسيتي من وحدي بطني توجعني وتغيير الجو اذاني كلش لا نوم ولا اكل بس اتصفن، صار موقف عكر مزاجي وكرهني بالسفرة وزاد كأبتي..

چنه رايحين لمكان جبلي وسمعت غدير تحجي على امي وبسملة شلون اجن ويانه ولزگن روحهن وياكلن ويشربن كله ببلاش متت قهر من شفت عمة زهراء وخالة حصة كاعدات صح ردنهه وما قبلن على كلامهه بس حسيت بالاهانة..

ندمت ولمت نفسي شلون تصرفت من كيفي وجبت امي وبسملة ويانه بدون عزيمة بحساب اني طلبت يجون ويمكن حرجت اطلس ويه اهله، تأذيت ونفسيتي تعبت ماتحمل اسمع احد يحجي على امي وابقى ساكتة بس هالمرة اضطريت ابلعهه واسكت..

ما فاتحت خواتي بالموضوع ولا امي ماردت اضوجهن وازعلهن حطيتهه بگلبي وكعدت وسكتت، تعلمت درس بهالسفرة ما اذب روحي على احد ولا اخلي امي واختي بهيج موقف ممكن امي اجت بـ نية صافية متعرف راح يحجون عليهه بس اني عرفت وهذا كافي..

رجعنه للمغرب وطريق الرجعة كان يشبه طريق الروحة ضحك ووناسة عدايه طبعاً مالي نفس لشي، ما حسست اطلس بزعلي بس انتبه ولح عليه احچي شصاير تحججت بسالفة نورسين عود بعدهه ببالي وخطية كعد يحلفلي ميحبهه وميهتملهه ابتسمت وحطيت راسي على كتفه وغطت بنوم عميق..

وصلنه بخير وسلامة وكلمن راح لبيته بسملة رجعت ويه امي لمدينتهم بما ان عطلتهه ما خلصت، مشت ايامنه هادئة عادية مابيهه شي يذكر نانا استرجعت صحتهه وعمو محمد بقى يتردد عليهه كل يوم يجي يبقى واكف بباب البيت يتمناهه تفتح بس يريد يشوفهه وهي معاندة..

وبيوم كعدت الصبح وطخت ببالي فكرة كمت بدلت وكشخت على اخر حباية واخذت السايق وطلعت متوجهة للمكان المنشود..

اول ما وصلت وخطيت خطوتي لداخل المكان استرجعتني الذكريات الحلوة، تذكرت اول يوم داومت بشركة "الاطلس" وتذكرت نظرات الكل وهمه مزعوجين من فستاني المورد، ضحكت بيني وبين نفسي مكممة فكي وعبرت البوابة..

سلمت على الموجودين لكن انحرجت من نظراتهم يبتسمون بوجهي ويبسبسون بين بعض ماعرف شسالفة، رحت للمصعد دسته وضغطت على طابق 14 اول ما نزلت واستنشقت عطر المكان المميز ابتسمت، توجهت لمكتب تينا وضحى وكفت مغطية نفسي بالحايط ومديت بس راسي شفتهن ملتهيات بالشغل وتينا تدردم وضحى بس تهز براسهه..

-مريم: بسبس

رفعن روسهن على مصدر الصوت هنه شافني وطارن فرح تسالمنه وتحاضننه حضن حار دافي مليان حب وصداقة حقيقية، انخبصن خبص بيه جرتني تينا تكعدني على الكرسي وكالت..

-تينا: ما توقعتج تجيين مرايم مشتاقتلج موووت

-مريم: اي صح مشتاقاتلي ولا وحدة عرفت تجيني للبيت تزورني

-ضحى: اووه مريم تعرفين نستحي من الـ مسيو مو اللتقينه بيج بالمطعم اول ما تزوجتو

-مريم: اي بس اريد ببيتي تجوني ونتونس تبقون للعشا واسويلكم اكل طيب

-تينا: سباايسي اي اي نجي بس عزمينه عزيمة مرتية مو بس حجي

-ضحى: ولج تينا عيب من مسيو اطلس شيكول علينه رايحات لبيته

-مريم: لعد هو مو بيتي هم شبيچ ضحيو

-ضحى: استحي والله

-مريم: اشش ماكو تستحين تعالن نورو بيتي

اتفقنه على عزيمة بعد كم يوم ودعتهن وصعدت لطابق 44 اول ما وصلت رحت ازور صديقاتي بالمكتب وفاجأتني منار من كالت..

-مبروووك مبروووك شايفين كل الخير ان شاء الله

-مريم: على شنو مبروك؟

-لهيب: على زواجچ من مسيو الاطلس اكيييد

-مريم: هااه؟

-ريتاج: شبيچ ولج مو تزوجتو قبل فترة لو احنه غلطانات

-مريم: شمعرفكم

-منار: هااا!!! مرايم نزلو مباركة للمسيو بحساب الشركة والكل فرحلكم ما مصدكين تزوجتو

ابتسمت ارد على تبريكاتهن وتذكرت اني الثولة مسويه بلوك لحساب الشركة ماعرف شكو ماكو، تركتهن وتمشيت بالقسم مشتاقة لايام زمان، كل اليشوفني يباركلي ويهنيني على الزواج اكو عتبو عليه ليش ما عزمتهم بالعرس كلتلهم عرس مختصر جان وفضيتهه..

عدت ادراجي اروح لمكتب اطلس ومنار كالت طالع بأجتماع انقهرت من ما شفته اساساً الجية كلهه علموده، طلعت من الشركة نويت اشتري كهوة من الكوفي القريب احب كهوتهم وصيت ووكفت ادفع فلوس وخرعني صوت واحد بجانبي يكول..

-اخيراً شفناج

-مريم: ياربي وكفت گلبي استاذ

-مالك: مو قصدي اخرعج

-مريم: شنو انتَ عايش بهذا الكوفي

-مالك: هههههههه لا بس احب كهوتهم

ما جاوبته اخذت الكهوة وطلعت بسرعة تبعني احسه يمشي وراية قلقت واللتفتت عليه اشوفه مبتسم ومثبت عيونه عليه..

-مالك: مشتاقين لزوجچ ما ينشاف صاير

مجاوبته وكملت طريقي اخذت تكسي وطرت للبيت، لليل رجع اطلس وكعدنه نتعشى سولفتله اجيته للشركة وما لكيته بقى الوقت كله صافن عليه ويسألني..

-شكو ماكو

-مريم: ماكو شي كتلك شسويت اليوم بس حرامات انقهرت من ما شفتك

-اممم

-اي وانتَ شلونه اجتماعك؟

-لطيف

-بطريقة حلوة لو مو حلوة؟

-حلوة

-هاا الحمد لله

-بعد شسويتي اليوم؟

-كلشي ما سويت والله حتى العشا نانا سوته

-لطيف

-شبيك حبيبي

-مابيه

كام من العشا وراح للغرفة كعد على الحاسبة واني رحت للميز ارتب شعري وارش عطر، درت عليه اسولفله عن فلم تابعته المغرب بقى يشتغل واني اهذي براسه..

-مريم: اطلس شبيك متجاوب مو احجي وياك

-الاطلس: شگلتي؟

-گلت سارة مسوية كعدة ببيتهه اسبوع الجاي وعزمتني اني وخواتي

-اي حلو

-وراح نروح برأيك اللبس فستان لو رسمي؟

-بكيفج

-احس الفستان احلى شنو رسمي قابل رايحة شركة

-امم

-محيطي برأيك اللبس الاسود لو الاحمر

-بكيفج

انهضمت من بروده شبي وياي تعمدت اسئله على الفستان لان متأكدة راح يختار الاحمر بس حتى ما اختار!

-اطلس شبيك حاچيني ضايج من شي؟

-لا

-لعد شبيك گوة تحجي ويايه

-مريم اليوم بس رحتي للشركة؟

-اي والله

-بس؟

-اي بس

-غريب اني شفتج تطلعين من الكوفي ويه مالك

فتحت عيوني وحلكي متذكرة شنو ردت اكول صار شكد اعصر عقلي اريد اتذكر شنو نسيت وهسة هو نبهني، متت خوف وماعرفت شلون احجي بعد كمت امعاس..

-مريم: اييييي هذا الردت اكوله والله نسيت اي رحت للكوفي

-ومالك؟

-مادري عنه اجه اشتره وطلع

-وما حچيتو شي

-لا باوع شصار خرعني هو بالبداية واني كتله شنو انتَ عايش هنا بهذا الكوفي لان كم مرة هاي دا اصادفه هناك

-اي؟؟؟

-اي وبس

-بس؟

-بس هذا هاا وكال مشتاقين لرجلچ ما جاي نشوفه

-وليش سكتي!!!

-شنو اطلس شبيك

-شلوون تسكتين عن هيج شي مررريم

-والله نسيت احجي صدكني

-نسيتي لو غلستييي

-اغلس ليش شبيك حبيبي ليش كل هالعصبية

-مرررريم تردين تموتتتيني انتِ راح اتخخخبل من وراج

كمت بسرعة اوكف بمكاني عبست ملامحي بس حاولت كلش احافظ هدوئي..

-تتخبل من ورايه ليش شمسويتلك اني؟

-ليش تضميييين عليه لييييش

-اضم شنوو اطلس شبيييك

-ضميتي عليه سالفة ابووي كل يووم يجي هناا وهسة ضميتي سالفة مالك

-ابوك اني شيخصني نانا تطلب مني ماحجيلك وتحلفني! وسالفة مالك اني معليه بي قابل اني كتله تعال نشرب كهوة سوه

-لاااا عاوز گليله حبي گلييله روحو تگهوو وتونسوو وطلعوو وطبووو

-اطلس شنو هالغيرة المالهه دااعي

-غيرة شنوو رجال يريدج وعينه عليييج وشفتكم تطلعون من كوفي سوه وسألتج الففف مرة شسويتي بيومج وما ذكرتيلي هالموقف الا من حاصرتج واني فتحت السالفة

-نسيت وعيون امي نسيتت لان اصلاً مو ببالي اطلس يا يوم ضميت عليك شي اني كلشيي اسولفلك كلشيي والله ولا اسكت بس هسة نسيت

وكف يم الميز سند نفسه ونزل راسه يلقط انفاسه اصابع ايده بدو يتعوجون متت خوف رحت اسنده عليه وكعدته على السرير..

-ليش هيج تسوي بروحك اطلس راح تموتني

-وانتِ راح تخبليني

-الخبال اهون من الموت عيوني

-مريم انچبي

-احترم نفسك يالمدلل

-اني اعلمج اليوم بت البادية بس خلي اصير زين

-هه اروح انام يم نانا ما انام عند رجال يشك بيه

كمت عنه وجرني من ايدي غمض عيونه بقوة وذب نفس واستغفر بنفس الوقت..

-ما اشك بيج بس اخاف عليج

-شنو يسوولي قابل طوطي شبيك مكبر السالفة

-مريم راح اجنزچ لا تختبرين صبري

-هههههه شبيك شجاك متتحمل حچاية

-كلشي يصير تشاركيني مريم لا تضمين، اتفه الاشياء ممكن تسبب كوارث انتبهي حبيبتي

-ماشي تأمر

-اسف لان خوفتچ

-عادي اخذ حقي بعدين انكد عليك

-دكومي طفي الضوة

-ماا

-شنو ولججج

شردت منه بس ما لحكت حتى وهو تعبان ما اكدرله، اخيراً اجه يوم عزيمة تينا وضحى كلش تونسنه ماعن خجل من اجه الاطلس بالليل ميعرفن شنو يصيحوله اطلس لو مسيو ضحك على خجلهن وعافنه وراح للغرفة..

مشى كم يوم واجت عزيمة سارة ما شاء الله عزيمة وره عزيمة، الكعدة بس بنات شابات حضرنه تونست كلش وغيرت جو والي حلى الكعدة غدير مموجودة طالعة ويه الاطلس بموعد دكتور كدامنه كالو دكتور تجميل بس اكيد عرفت يقصد دكتور نفسي..

-بسملة: يوووه الوقت كلش تأخر اكول ليش نعست اني

-سارة: دكعدي باجر عطلة

-رقية: والله صح كعدي خلينه نتونس

سوالف وضحك وانوب كعدنه نحجي بمشاكلنه ما حسينه بالوقت باوعت للساعة شفتهه بالـ 1 بالليل استغربت اطلس ماتصل بيه..

-مريم: اگلكم شو چنهم زلمنه نسونه

-دعاء: اي والله شعجب مو من عوايد علي

-اسيل: حتى اني متفاجأة شعجب مسلم ما زعجني برسائل الاعتذار اليوم

-سارة: مو همه طالعين سوه اكيد ينسونه اوكفو اتصل بحمزة

دكت على حمزة يرن وميشيله كررت الاتصال وهم يرن وميشيله، عكدت حواجبهه مستغربه ورجعت اتصلت للمرة الثالثة وانغلق جهازه!

ما انتظرتهه تحجي دكيت على الاطلس وطلعلي الجهاز مغلق، دكينه على عمر يدددك وميشيل وعلي ومسلم كذلك محد بيهم يجاوب..

قلقت كلش ورجف داخلي سارة اصفر لونهه واسيل وكفت بمكانهه وتكول..

-شبيهم ليش محد يجاوب؟؟

-دعاء: معقولة عدهم اجتماع؟

-مريم: اطلس ميغلق موبايله الا اذا عنده اجتماع بس مستحيل عنده اجتماع بالوحدة بالليل!

-سارة: جاي يخونونه؟

-رقية: باع هاي ولج يا خيانة

-مريم: راح اتصل بعمو محمد عسى ولعل يعرف شي

دكيت على عمو هم جهازه مغلق ايدي ترعش ونفسي اعتلى خفت حيل خفت افكار سودة صارت بعقلي ماعرفت شتصرف واشوف البنات خايفات، مرت نص ساعة ورجعنه كررنه الاتصال وهالمرة كلهم اجهزتهم انغلقت حتى جهاز عمر..

اتصلت اسيل بنانا متجاوب ذبت تلفونهه بقهر وكالت..

-اكيد تاركه موبايلهه بالغرفة وهي بالصالة مريم امشي نرجع للبيت

-مريم: اي يله

-سارة: بنات فدوة ابقو هنا عندي لا تعوفوني وحدي

صرخت رقية من اندك الجرس كلنه اخترعنه بس فرحنه اكيد ذولة الولد رجعو، رحت ويه دعاء نفتح الباب بس ماكو احد كأن احد دك الجرس وشرد..

رجعت لسارة وكلنه نطلع الكامرات نشوف منهن، مشينه التسجيل وقبل لا يجي وقت دك الجرس كأن انضربت الكامرا! احد لعب بأعداداتهه وكلشي ما طلع..

-اسيل: بنااات شنو جاااي يصير

-مريم: ليش منتصل بخالة حصة اكيد عمو عدهه

من هول الموقف والغباء نسيناهه، ام الولد مسافرة بس خالة حصة موجودة، دكينه عليهه وجاوبت بصوت كله نوم سألناهه عن عمو كالت مو بالبيت تخبلنه..

واني احجي ويه خالة دكت نانا عليه خط ثاني، جاوبتهه بسرعة وحجيتلهه كلشي كالت عمو محمد جان عدهه بس ما خلته يفوت وكلشي مابي..

هوسة بهوسة وخبصة ثواني واتصل عمو علينه حجيناله وكال راح يجينه كلنه ياخذنه لبيتهم، حضرنه نفسنه ووكفنه ننتظره وحدة لازكة بالثانية منعرف شنو منتظرنه منعرف وينهم رجالنه منعرف شنو راح يصير وره هالوكفة هل راح ننجمع بيهم مرة ثانية لو غابو للابد........

يتبع ♠️💸....

• ━━━━━━❪♣❫━━━━━━ •

#الاطلس "دمليج أسود"

بقلمي: زهراء السلامي 💛

ملاحظة: ما ردت انزل البارت بأول ايام محرم احتراماً لهذهِ الايام الحزينة والاحداث غير مناسبة.. عذراً سيدي يا ابا عبد الله (😔) لكن نزلته بطلب منكم حتى منتأخر اكثر 🥹🎀!

• ━━━━━━❪♣❫━━━━━━ •

اصوات عالية، أقدام تركض هنا وهناك، عيون تترصد كل شيء بـ نظام جدولي ثابت.. اگدر افسر الاجواء بالفوضى! بينما على جهة واگفات سبع بنات حلگهن ما سدنه بالغيبة والنميمة..

-اني مدا افهم همَّ على شنو مستعجلين بالضبط؟

-صح والله حتى اني تسائلت

-يمكن هي حامل؟

-انچبي اسيل!!

-اسيل: عزه نسيت اسفة اسفة

-دعاء: خلي امي تسمعچ تموتچ والله وتموت بسملة وراچ 

-سارة: البارحة اني وحمزاوي الليل كله نفكر بيهم شلون فجأة حددوا الموعد ورادوا العرس باچر! زين ليش؟ بسملة بعد ما تخرجت بنات السالفة بيها إن وگولن كناري ما گالت

-دعاء: اكره اگولها بس حتى اني احس مرايم شنو احساسچ اطربينا

-اسيل: لا لا مريم لا تگولين احساسچ ميخيب ابد خاف تصدمينا ببسملة وتطلع صدگ حامل

-غدير: دولي انتِ مو كلها نفسچ وتحمل بوقت الخطوبة!

-اسيل: غدييير

-غدير: ما چذبت تره

-رقية: وان كانت حامل انتن متعرفن شي اسمه "حُب"؟ ممتعرفات عليه لو اعرفكم على بعض؟

-نور: حب شنو ماعدنا هالخرط احنه والله امي تدوس بمصارينها تطلع الطفل من حلگهاا

-غدير: حتى لو چانت حامل لا تلوموها خطوبتهم طويلة وعمر تعب شسالفة هاي فوگما انتظرها كل هالوقت بس انتن مو شكول نعمة بنات احمد!!

-نور: منوو مو شكوول نعمممة وللللچ

-سارة: انيي اني مو شكول نعمة انيي بس لحد تتعارك

-مريم: هسة غير ينچبن

تحولت كل انظارهن عليَّ تأفأفت مزعوجة اني منا نفسيتي تعبانة من الايام الفاتت ومنا بسملة حددت عرس مفاجئ ومنا ذني يرطنن ما سدن حلوگهن دكافيي!!

-دعاء: نسمعچ خية

-رقية: اسيل سكتييي

-اسيل: والله مچنت راح اگول بسملة حامل والله

-مريم: بنات بسملة مو حامل واياكم تفتحون هالموضوع وياهة تتخبل علينا والله وتسويها سالفة شرف وتقذفون بيَّ وهالخرط مالتها

-نور: مريم اللفاضچ تخزي صايرة شبيچ

-مريم: نفسيتي تعبانة ولچن حسن بيَّ

-سارة: احس بيچ وحتى اني تعبانة

-غدير: اسكتو لسه ما تخطيت

-رقية: يله الصار صار وخلص فضت السالفة وراحت لتگلبوها مناحة وسولفي مريم شبيها بسملة وليش طلبت تتزواج ويه عمر هسة؟

-اسيل: تتزواج! شنو عصافير!!

-مريم: علساس انتِ متعرفين رقية

-رقية: اعرف وكلتلهن من الحب رادوا يتزوجون سريع ويفضون سالفتهم

-مريم: جزء من كلامچ صح والجزء الثاني عمر راح يستقر بره المغرب وراد بسملة تسافر وياه

-شنوووووووو

كل البنات صاحوا مرة وحدة وبصوت عالي زرف طبلة اذني، غمضت عيوني اعصرهن من هالصوت المزعج وكملت..

-مريم: اي اي للاسف عمر راح يعوفنا

-رقية: ااااخ گلبييي

-اسيل: يمة رااااسي

-دعاء: ولچننن معدتي راح اتقيء وربيي

-سارة: راح امووووت صدگ مرايمم؟؟؟

-غدير: يعني فوگ ضيمنااا الافندي راح يعوفنا ويرووح مستحيل

-رقية: والله العظيم ماكدر اعيش بدون عمر والله لا استطيععع

-نور: خلي تسمعچ بسملة

-رقية: باع هاي غير عرضت عليها نصير ضراير وچنها بدت تفكر بالموضوع

-غدير: والمسكين ياخذ صرصور وخنفسانة وين ينيمچن بالمجاري؟؟

-دعاء: بنات بلا تحشيش شبيكم الوضع ميساعد واني اگول علاوي شبي ميتحچى صارله فترة اني عبالي موضوع آدم ويوسف مأثر بي وما لحيت وياه

-مريم: على سفر عمر متأثر الاطلس گلي الشلة كلهم متأذين على فراقه بس راح يسافر عند صديقه بالخارج يريد يوسع عمله

-سارة: يستاهل ربي يوفقه

صعدنا فوگ نعوف الفريق ينظف بالبيت خلصت حنة بسملة البسيطة وچانت هنا ببيت عيالي بطلب من خالة حصة.. الليل كله نحش ونكرز حب وكرزات واني كتابي والايباد بيدي نسيت افرحكم اخيراً رجعت اكمل جامعة بفضل الله ثم الاطلس طبعاً..

هو الي شجعني اخطي هالخطوة ونانا وياه تأيده هو يدرسني خطية يسهر ويايه للصبح يقريني بدون لا يمل او يبزع بالعكس أشوفه مكيّف لان حضرة جناب الاطلس يموت على شي اسمه دراسة وارقام ورياضيات ياكل المعادلات اكللل..

اقترح عليَّ اذا احب اكمل بالخارج تفاجأت بالبداية بس حسيته گالها وايده على گلبه خايف اقبل ونفترق فـ اني بدوري خففت عنه هذا الخوف وگتله ماريد اسافر وافضل اكمل هنا.. بمرور سنين زواجنا صار تعلقه بيَّ فضيع لدرجة اوقات يخوفني بس اعذره وما ابينله..

ايام تجي يگعدني من النوم بوقت الفجر بس حتى نسولف شوية ويگول احبچ وانتِ اجمل شي بحياتي ونرجع ننام، بأول ايام قلقت وشاركت نانا بالموضوع بس ريحتني من گالت هذا طبعه من زمان بس چان ما ماخذ ميانة وياچ ويستحي منچ وهسة طلع شخصيته الحقيقية الكاملة وهالشي ديفرحني رغم يگعدني من النوم واني اتتتتخبل من احد يگعدني من النوم بس ما عصبت منه ولا مرة..

ذبيت الايباد من ايدي من انضمت النا بسملة بس ما ذكرت موضوع سفر عمر لان بالاساس مو هسة راح يسافرون گالو فد ست اشهر وره زواجهم علما يستقرون شوية وبسملة تتعود على الحياة الزوجية..

-بسملة: شيجيب باااااچرر ولچنننننن

-رقية: ايا ادبسز

-بسملة: انچبي انتِ مو تردين تصيرين ضرتي؟

-رقية: مو حباً بعمر بس اريد نبقى سوه اني وياچ عابت

-سارة: حبيبتي بسومة ان شاء الله ما بقى شي وتكونين ويه عمر بغرفة وحدة

-بسملة: اااااخ گلبيي شيصبرررني

-دعاء: بنات هاي شافطة شبيچ خزيتينا

-بسملة: لعد رجعولي موبايلي ماگدر انام الا على صوت زلمتي ابو خالد

-رقية: ايععع كرنج وخري

-مريم: گلت تلفون ماكو بسملة شبيكم متتحملون هاي صار بس ثلاث ايام ما حاچين ويه بعض انتِ من جهة تنوحين وعمر من جهة يلح على الاطلس صرعه صرع... شوفي شوفي اكيد ديدگ عليَّ يگلي عمر اكل راسه

طلعت موبايلي الي يدگ وشفت فعلاً الاطلس ديتصل، جاوبت بسرعة ومثلما توقعت ديگولي انطي لبسملة تلفونها وعتقيني من عمر راح يموت..

-بسملة: اي درجعي موبايلي شبيچ

-مريم: تحلميين خلي يصير اشتياق

-بسملة: يا اشتياق غير اذا اشوف عمر هسة اغتصـ.... اغتاله

-اسيل: اوي شلون لطافة

-دعاء: اني جاي اشوف كلشي الا اللطافة

-نور: جاي اشوف قلة ادب وطيحان صبغ

-سارة: بنات خلونه نرقص شوية حبابات

ورقية ما گالت لا طفرت فتحت الدي جي على اعلى شي ووين الاغاني الردح فتحتهن والبنات تگابلن وذبن لحم بعدنا كلنا ببدلاتنا ولاول مرة اوافق على اغاني وما اگللهم طفوه ماردت اخرب فرحتهن وهنه كلهن موافقات ويسمعن..

بسملة فرحانة ومتحمسة ومحفور على گصتها "اني احب عمر واريد اتزوجه هسة" واني والبنات فرحانات على فرحها، طبعاً الحنة المفروض ببيتنا بس لان المسافة طويلة والزفة راح تشلع گلوبنا والجو مو كلش بارد اهلي اجو هنا بعزيمة من عمو محمد گال البيت بيتكم وماكو فرق بيتنا عن بيت ابوها وابوية مثل الحباب وافق علمود يتملص من المصاريف طبعاً..

ثاني يوم الصبح كلنا طلعنا سوه للصالون بسملة خانم ما قبلت تجيب صالون للبيت عود عبالها عمر راح يوصلها للقاعة وفرصة حتى تشوفه بس هيهااات اتفقنا ويه حمزة هو يجينا وياخذنا سوه وما اسولفلكم على وجهها شلون صار شوية وتگوم تبچي..

اخيراً وصلنا للقاعة المعازيم واصلين قبلنا ويا يااابة شگد ناس موجودين يمكن ام التوأم عازمة المغرب كلها وتريد تشاركهم فرحتها بزواج ابنها..

رتبت بسملة ودعاء ويايه بالمنزع واخيراً شفناها متوترة وترجف لاول مرة ااااه كم لبثنا لهذهِ اللحظة نشوف بسملة خايفة من شي!

-بسملة: بناات خايفة خايفة اخخ گلبي ااخخ معدتي اااخ يمة ااخ بوية

-دعاء: ما اصدگ بسملة خايفة!

-شنو بسملة خايفة؟ ما اصدگ

اللتفتنا على صوت امي واگفة بباب المنزع وتضحك على حال بسملة، مستمتعة على الوضع اخيراً بعد طول انتظار لگينه شي يخوف هاي البنية..

-بسملة: يمة لتكيفين ما خايفة بس توترت وهسة اصير مثل الحصان من اشوف ابو خويلد

ضحكنا كلنا وعدلنا البرگع على راسها ننزله على وجهها الحلو، ما گدرت ما ادمع واني اشوف ملاكي بهذا الجمال.. بنية طويلة، رشيقة بفستان ابيض مخصر على جسدها المثالي وتسريحة شعر مرفوع قليل منه والباقي كيرلي مفتوح على اكتافها العارية ومكياج نيود بگليتر ناعم يناسب تماماً لون بشرتها..

عيونها تلمع حُب ولهفة، شوق و وَله، ما گدرت تكتمه وهي توگف ببداية الدرج تنتظر عريسها المتلهف والمتأنق واگف بنهاية الدرج ورافع راسه بس يريد يلمح طيفها..

عمر واگف منتظرها على نار يشيل رجل ويحط رجل والمصورة كل شوية تنبهه يوگف عدل علمود ميخرب التصوير وهو يهز راسه اي وانوب يرجع يلوب..

اخيراً انفتحت الموسيقى الخاصة وصار وقت تنزل بسملة من الدرج، بيدها بوكيه ورد احمر وتنزل برشاقة وخطوات متقنة الى ان وصلت لعريسها..

وهاي كانت النظرة الاولى الهم بعد غياب اربعة ايام بدون لا مكالمات ولا نظرات وما اعرف شلون اعبر عن ابتسامة عمر الواسعة برزت اسنانه البيض ولا عن ملامح وجهه المتأثرة بشوفتها..

رفع البرگع عن وجهها يتأمل بعيونها لحظات لتبادله بسملة نفس النظرات الرغيدة، باسها من جبينها بوسة مطولة وهمسلها شي محد سمعه غيرها خلاها تبتسم وتلف ايدها على ذراعه..

تمشو للكوشة ايد بأيد وعمر كل ثانية يدير وجهه يباوعلها ويكمل طريقة وماعرف شنو ديگول الطريق كله شفايفه تتحرك وبسملة مبتسمة ما غابت بسمتها الحلوة..

وصلو لوسط القاعة وتغيرت الموسيقى لأغنية رومانسية، رقصو ويه بعض سلو والعيون تتحاضن محد وخر عيونه عن الثاني ومحد حچى شي بيناتهم.. الحُب ملى المكان وكل المعازيم تسائلو عن كمية الطاقة والمشاعر الدتطلع من العريسين واكيد السؤال الي تكرر اكثر من مرة هو.. "تزوجوا عن حب مو؟"..

خلصت اغنية وبدت ثانية وبدت ثالثة وهمه ما وقفوا رقص، المصورة تأشرلهم كافي وهمه ممهتمين الى ان المصورة اشرتلي اني اصعد انببهم وعمة زهراء دخلت ووخرت بسملة عن عمر وصارت بنصهم وتضحك بصوت عالي..

-زهراء بضحك: كااافي شبيكم هو شبببع

-عمر: يمة وخري لا احرگ القااعة

-بسملة: اهووو خالة لتصيرين العمة التستوسة

-عمر: ولچ بسملة احترمي نفسچ

-بسملة: روح لامك خليها تفيدك لعد

-عمر: طبعاً اروح لامي چا اگابلچ واگعد

-زهراء: هيچ صارت بسملة!

-عمر: شفتيها يمة مو اگلچ عنها متغيرة ورافعة خشمها علينا

-بسملة: هاا اني رافعة خشمي عليك مو؟ خوش لعد خنشوف وين تنام اليوم بما ان رافعة خشمي

-عمر: احم.. يمة ميخالف مسحيها بلحيتي عذرينا بس اليوم تعرفيني عريس جديد ومتلهف

-زهراء: ايا ادبسزية

طبعاً كل محادثتهم بالضحك وام الولد روحها رياضية كلش مثل متعرفون وهي وبسملة صديقات مقربات كلش كلش كلش يمكن تحب بسملة اكثر مما تحب عمر وعلاقتهن ولا تگولون بيناتهن فرق عمر ولازم رسميات هنه ابد ماكو هيچ بيناتهن..

-زهراء: لوما عرسچ الا اكفشچ بس اضمها الچ من ترجعين من شهر العسل عود

-بسملة: باوع عمرر خو سمعت وشفت بعيينك شوفها شوفها شلون معاديتني

-عمر: تستاهلين

-زهراء: عفية بوليدي اليفزع لأمه

-بسملة: اخذي وليدچ ماريده بعد

ضحكت العمة وجرت خد بسملة تبوسه وبسملة سوت نفس الشي تحضانن حضن حار وزهراء مطرتهم بالدعوات والكلام الحلو وعمر واگف متخصر معاجبته الحركات..

-عمر: بعد بعد شنو عدچن فعاليات طلعنها كلها هسة گدام العالم

كملوا فقرات العرس اخيراً وهم رجعوا يرقصون وعمة زهراء تطب بنص الرقصة تخربها تداهر بسملة تالي بسملة عافت عمر وصارت ترگص ويه عمة بنص القاعة موتتنا ضحك..

وقت العرس اكثر من ست ساعات بس والله ولا حسينا من كمية الفرح والوناسة العشناها طلع عمر وبدت فعالياتنا كلشي چان مثالي ويخبل وفرحة عمة زهراء وطاقتها الايجابية توزعت على كل المعازيم والكل صار يرقص ويعيش اجواء الاحتفال حتى امي تخيلوا!!

امي رگصوهة وبسملة ورقية ما قصرن ورغم هذا ماگدرنا نوگف دموع امي كل شوية لازمة بسملة تبوسها وتدعيلها بالسعادة والراحة والذرية الصالحة..

باوعت للساعة عبرت الـ 11 بالليل صاحو بالسماعة الي تريد تلبس حجاب خليها تلبس لان راح يفوت العريس وجماعته، لبسنا بسملة شال على راسها وجاكيت خفيف يغطي صدرها وجزأها العلوي كملت منها وبديت اللبس شالي بعدني دا امسح مكياجي ومنسمع غير الدنيا احترگت..

الاضوية خففوها واستبدلوا الاضوية البيضاء والصفراء الناصعة بأضوية بنفسجية خافتة وما احچيلكم شنو صار وشنو شفت، حرفياً دخلو كللل جماعة عمر كلللهم بدون استثناء ومن ضمنهم الاطلس والولد الباقين واخذولكم القاعة رگص ذهاااباً وايااباً حرفيااً شعلوا الجو شععل..

النساء تكترنا على صفحة نسويلهم مجال عرفت خففوا الاضوية بطلب من واحد من ولدنا حتى وجوهنا متنشاف بوضوح وهمه ياخذون راحتهم وفعلااً لعبووو لععب القاعة چبيرة واصواتهم خشنة وصوت الدي جي عاالي واصوات الضحك والوناسة والگولات ترست المكان، اعرف جزء من اصدقائه لانهم اصدقاء الاطلس بس الجزء الاكبر لا ما عرفتهم واغلبهم واضح مغاربة بسبب لهجتهم..

ضحكت من قلبي على الگفلة الگالوها رغم مو عراقيين همه بس گالوها نفسنا بالضبط، كل الزلم يصيحون بصوت واحد وتصفيق حار والاجسام للگاع للگاع هز چتف ورقبة وشايلين عمر ويهوسون بي..

حتى دموعي طارت عود محضرتهن للزفة ابچي على العوبة بسملة هسة اريد اسكت من الضحك واخفي ابتسامتي ماگدر انوب رقية ترعنت وتريد تطب بيناتهم ونانا تجر بيها وتگرص حتى تبقى..

-مريم: ااااآيييي نانااا

-نانا: يمة يمة اسفة يَـ بنتي عبالي زند رقية هذا

-مريم: يمة زورگت هسة ابنچ يخبصني

-نانا: يخاف على جميلته حقه

ابتسمت على كلامها امرغ زندي مو گرصة شلعت لحمي شلع ااخ الله يساعد الاطلس من ينسمط براشدي منچ من يضوجچ..

لگفت آدم شايله الاطلس على اكتافه يهوس بي ويضحك حبيب گلبي متونس ويسوي لـ يوسف هلو بأيده بينما يوسف هم ابوه شايله على اكتافه ويرگصه..

مر الوقت بسرعة ما حسينا الا وصاحو صارت بـ 12:30 بالليل معقوولة؟؟ ومع ذلك محد وگف رقص بالعكس زادوا ورادوا بعد متت تعب صرت اشيل رجل واحط رجل وعيوني تحرگني من الرموش الحاطتهم والمسكارا، وگفت على جهة واخذت كلينسة من وحدة من الطاولات امسح جوه عيني خاف سالت ونزيت على ايدين قوية تجرني من خصري تحاوطني بتملك..

-هههه خرعتني

ما جاوب بكلمات نصى نفسه يقبلني على خدي قُبلة مطولة وانفاسه اللاهثة تضرب وجهي، راقبت المكان خفت احد يشوفنا بس الكل ملتهي يرگص وبالاساس احنه واگفين بمكان شبه مظلم..

-الاطلس: احبچ

-هههههههههه

-اي هو بس هذا محصله منچ

-اطلس خاف اشتاقيت لعرسنا وحاب تجدد

-ليش لا

عضيت شفتي مفتشلة من دارني عليه وشدد على خصري يتحكم بحركتي ميخليني افلت، دفعني على حايط يتحارش غطيت بهدومي اخاف احد يجي..

-خاف احد يجي حبيبي

-محد يجي

-واذا احد اجه؟

-عادي واذا

-طووطيي

-بس گولي خاف كامرات القاعة تلقطنا ونصير ترند

-هه هه هه متعبر عليَّ هاي سوالفك بعد

ضحك بصوت يضرب انفه بأنفي، ابتسمت على حركته احاوط رقبته وامسح على شعره من وره..

-مريم: چنت اباوعلك ما رگصت ابد

-ماعرف ارگص للاسف بس رگصت ادم اسقاط فرض لا اكثر

-باچر عندي امتحان

-بس نرجع اقريچ

-ماريد ماا

-لتگولين ما

-ما

-تره ابوسـ....

-ما

ضحكت من جرني يبوسني بس مو بوسة انتقام گمت اعيط وهو يضحك ممهتم..

-صخاام الصخم حالچ مريم راح ازوررگ

-تستاهلين حاطه حمرة مووو

-مو حمرة گلوس ثانياً شلون شفته بهالظلمة

-شفايفچ تلمع من بعيد يالمتدينة يا ام الاطلس احترم حجابي، اطلس اني محجبة، اطلس هتكت ستري، اطلس...

-اي اي افتهمنا اطلسسسسس

-لسان الحية رجعي بحلگچ لا ارجعه بطريـ...

-اششش يبووو يبوووو انفضحناا شبيك

ابتسم ياخذ الكلينسة من ايدي يمسح الظلال من عيوني ويشلع الرموش ويمسح المسكارا  بس ما راحت، سحبني من ايدي على كيف ياخذني للحمامات يبللها ويمسحلي على مهله ومركز بكل حواسه..

-ردتي تطلعين للزفة هيچ وتشوفچ الثيران الهائجة بره من عمت عيني

-لا اكيد امسحه

-متحتاجين مكياج حبيبي من بعيد تضوين

-عرس اختي شلون لعد

ابتسم يكمل مسح المكياج يمكن استخدم فوگ العشرين كلينسه ويجلف بوجهي خاف اكو شي بعد، اباوع لوجهي ما راح كله والمسكارا تلوصت غسلت بالصابون وگتله اجيب مزيل من جنطتي ماقبل وبقى يمسح..

-الاطلس: اتوقع راح

-مريم: اي راح

عدل حجابي يضم مقدمة شعري ويتأكد من ملابسي خاف بيهن شي مغري، هز راسه راضي وحضن وجهي بكفوف ايده يطبع قبلة ناعمة على شفايفي..

-احبچ من كل گلبي مرمرتي

-شحدك لو حبيتني من نص گلبك

-مريم اويلي يا مريم

-اطلس اريد اگلك شي

-انتِ حامل

-شنووو

-احساسي يگول انتِ حامل

-لا يمعود منيلي حامل

-چذابة

-والله مو حامل عزه مو دا اخذ مانع

-توقعت حامل

-شبيك ليش عبالك ضجت

-ما ضجت بس اشاقيچ يله خلينه نطلع

-اطلس شبيك

-شنو حبيبي

-احنه متفقين منجيب اخ لآدم الا يكبر شوية بس ليش احسك متمني طفل ثاني؟

-لا مادري

-اذا تريد بيبي عنون چان گتلي

-ماردت اضغط عليچ اشوفچ تعبانة هالفترة

-اي، بسبب الصار بس احس نحتاج حس جديد ويانه بالبيت

لمعت عيونه الخضر بطريقة تجنن واكتفى بالصمت ينتظرني اكمل كلامي..

-مريم: خلينا نسوي طفل ثاني

-الاطلس: صدگ تحچين؟؟

-اي

-مرمر مو وكت سوالفچ هسة لا تضحكين عليَّ

-اطلس لهدرجة متمني طفل ثاني ومتحچي ليش ما صارحتني

-شفت الوضع مو مناسب وردتها تطلع منچ حتى تكونين مستعدة اله

بست خده وحاوطت ذراعه اسند راسي على زنده وطلعنا من الحمامات ايد بأيد، الدكتورة حذرتني اكثر من مرة ممكن يصير حمل هالفترة ولازم اخذ حذري چنت خايفة وارجف بكل مرة وكل شهر اسوي تحليل حمل واجر نفس من يطلع سالب بس هسة راح اتركها على الله وان شاء الله يصير عند ادم اخ لو اخت..

**

"بسملة"

بين الرقص والعرس والزفة والتعب الي تعبته لدرجة ما احس برجلي بعد رغم ما لابسة كعب كلش عالي وصلنا اخيراً للفندق بـ 2:30 بالليل هلكانة هلااك ماگدر حتى احچي..

گاعدة من الستة الصبح لسه اريد بس مخدة وانام، نزعت البرگع من راسي والماشات بشعري كتلني..

-عمر: نشيل الماشات لو انزعچ البدلة

-نزعني البدلة يمعووود اختنگتتت

ضحك يفتحلي السحاب ويجرها ينزلها وفل الكورسيه الي ينبلس جواها مع العلم جسمي رشيق بس الي باعلنا البدلة أصر اللبسه وياهة حتى تطلع البدلة احلى وكلامه صح بس عمت عينه راح اموت ماگدرت اتنفس بعد..

-بسملة: اااااه اخيراً

ابتسم عمر من صرت اخذ شهيق وزفير اتنفس بعمق ومغطية جسمي بشرشف، باس كتفي كم مرة ومن شافني توترت گام وگال راح يسبح ويرجع، الحماوة صعدت لراسي وگلبي راح يوگف يمة شلون بيَّ ولچ يمااا وين رحتي وعفتينييي..

لبست روب نوم انتظره بس اريده يطلع حتى افلت واطب اسبح، ما طول خمس دقايق وطلع لاف منشفة على خصرة وينشف شعره بمنشفة ثانية.. بدون كلام زايد دفعته ودرعمت افوت للحمام واقفل الباب ورايه اخذ نفس..

-يله بسملة شهييق نهييق شههيق نههيق انتِ متزوجة حبيبچ شبيچ طاح حظچ ليش متوترة هو بس شوفة وجهه عافية..

صبرت نفسي وفتحت الدوش بسرعة وتذكرت الماشات خرب ما وخرتهن من شعري وتارستني تررس ام الصالون، راسي عنجر من وراهن اشيل بيهن وما ملحگه فحطت هاي واني ذابة نص شعري على اكتافي بس شعري ثخين وحطتلي كومة ماشات..

عصى التاج براسي مدا يطلع ملخت شعري تملخ وماكو الماشة عاصية بماشتين ومتشابكات ويه بعض گمت انوح جزعانة والحمام حار كله بخار صرت اللطم..

بعد مرور فترة اندگ عليَّ باب الحمام صرت ارعش من فوگ ليجوه وانلصم صوتي اول تالي انييي الدكتورة بسمملة على سن ورمحح يروح صوتي من دهر فررني وفر ابووي..

-بسملة: احم اءء نعم.. نعمممم

-عمر: انتِ بخير حبي؟

-بسملة: لاااع

-عمر: شبيچ بسملة شصاير؟

-عمر طلگني بطلتتت

-خرب شبيچ ولچ

-ولك طلگنييييي

-فتحي الباب واطلگچ اني اعلمچ بسملة

-لا تهددد

-فتحي البااب لا اكسررهاا

-عمر راح اموت شبيك يمة

-فتحي الباب خليني افتهم شبيييچ

لبست روبي وباوعت لروحي بالمراية شعري مكفش ومسكارتي سالت هاي ام الصالون مو گالت ضد المي؟ شوف لازم ارجع ارزلها واخذ فلوسي متستاهـ...

-عمر: راح اكسررر الباب بسمللللة

-لا لا راح افتحها شبيك

فتحتها ومديت بس راسي شاف شعري وفتح عيونه مصدوم..

-شبيچ شنو چنتي بمعركة!

-اي اي ابقى اضحك عليَّ واستهزأ

ضحك خفيف ودفع الباب ودخل ويايه، نزلت عيوني خجلانة من وضعي عروس وهذا شكلها گبر طمچ بسملة هاي واني محضرة نفسي وحلفت الا اللعب لعب من اشوفه تاليتچ هسة كارصة مثل الخنفسانة بالمجاري مستحية!

-شبيچ حبيبي

رفع وجهي بثنين ايده ومسح شوية من مسكارتي السايلة، باوعتله بعيون دامعة وظهرت انوثتي المدفونة بوادي الوقواق ومديت شفتي السفلى زعلانة على حالي..

-ليش زعلاني بسمتي؟

-باوع حالي افشل

-معقولة؟ بسملة تحچي على روحها؟

-لا قصدت انتَ تفشل

ضحك يبوس گصتي وتقرب يشيل باقي الماشات من شعري، يشيل ماشة ويبوسني بمكان، يعدل خصلة ويهمسلي بكلمات سحلتني سحل.. ما حسيت الا وهو مكمل شعري ويفتح الدوش، بلعت ريگي وگلبي ينبض بقوة اباوعله وانفاسي عالية، طبگ الباب يقفلها علينا اندار عليَّ سحبني عليه و.......

**

"مريم"

ذبيت شالي وتركت شعري مثل ما هو تسريحة عالية بسيطة وخصل ناعمة قليلة نازلة على وجهي، آدم نيمته والاطلس راح يشوف نانا لان اجه عمو محمد ويانه والسبب بالضبط شنو ما عرفته بس شفت عيونه تضحك وفرحان الزفة كلها عيونه ما وگعت منها واكيد السبب لان نانا تقبلت الفستان الي اشتراه الها لعرس عمر ولبسته..

اكثر من مرة اشوفه يتقرب من عدنا بالقاعة يتغزل بيها ممهتم لوجود احد بس ارتاحيت من شفت خالة حصة بعيدة وممنتبهة، نانا لليوم تخجل من عنده ووجهه يصير احمر وتبينله هي ممهتمة بس عيونها.. عيونها تسولف..

بدلت لدشداشة نوم حلوة وحطيت بس مسكارا وحمرة انتظر الاطلس يجي يدرسني، بعد مرور اكثر من نص ساعة ما رجع وقلقت، لبست روب وطلعت اشوف شكو بس البيت فارغ والصوت جاي من الحديقة، مديت راسي شفت عمو محمد والاطلس يتعاركون ونانا بيناتهم تفاكك وتعيط بيهم..

-نانا: كاااافي جهاال انتو جهههاال

-محمد: لااا يصير بطرريقي اطلسس اعرف بيمن اعاقبببك واكسر ظههرك لا تتحداااني ابننك رجعته هالمرررة المرة الجاااية اخلي بيد ولد الحَسوووم وتعرفهم انتَ!!!

انخمش گلبي من تذكرت الصار وزارتني رعشة بعظامي خفت اكثر من الاطلس ظل يعيط بخبال وعيونه ناطه...

-الاطلس: لا تهدددنيييييي والله اذبببحك بيددددي لو صاااار لأبني شييي

-نانا: اطلسس ابوك ما ماخذ علاااجه واجه هنا حتى انطي العلاااج اطللس انتَ العاااقل اسكتت ماما شبييك انتَ متعرف ابووك

-محمد: قصدج اني مخبببل؟؟ هيج صارررت بلقيسسس ماخذتني على گد عقلييي وتشوفيتي مخبببل

-نانا: يبووووو على بلقيس ولك لاااا

هدأ الاطلس من شاف ابوه تغيرت وتيرة انفاسه اكيد علگ عنده الضغط، لزمه يسنده ويگعده على كرسي ونانا ركضت تتعداني تجيبله مي من جوه.. الوقت الوحيد الي مناخذ بتهديدات عمو ولا نهتم لعصبيته ولو فشر علينا هم منضوج ولا ننغث هو من مياخذ علاجه لان يكون مو بوعيه وكل كلامه فارغ وميعنيه الا بحالات نادرة والاطلس اكثر من مرة شرحلي هالشي لذلك تعلمت على الوضع..

دخلت جوه لغرفة آدم بوسته ونيمته على ايدي شوية اشبع منه واشم ريحته الطفولية الحلوة، شوية ورحت لغرفتي نزعت الروب وگعدت على السرير انتظر شوكت تخلص العركة علما ينطوه العلاج، مرت نص ساعة اضافية ياله رجع الاطلس هلكان وگالب وجهه..

-شبيك

-الاطلس: شوكت نخلص من هالوضع مادري

-ميخالف حبيبي ابوك هذا

-كله صوچچ مرمر انتِ طلعتي عينهم خليتيهم يطلعون سوه كم مرة تعلموا انوب صار يجي للبيت حتى تنطي العلاج بنفسها!

-ياا اطلس شعليَّ اني ثانياً ذولة امك وابوك مو جهالك وواگفلهم عظم بالبلعوم

-اضرب من الجهال بعد!

-لتبالغ يمعود خليهم براحتهم نانا چبيرة وتعرف مصلحتها لتزعلها منك اهم شي بر الوالدين

-استغفر الله، جيبي الكتاب خليني ادرسچ

-اني كملت البارحة قريت انتَ نام مبين عليك تعبان و وراك اجتماع باچر

-ميخالف خليني اراجعلچ

ابتسمت وانطيته الكتاب، نزع قميصه بقى بس بالبنطرون وتمدد على ظهره يقره المادة بعيونه، اخذتلي صفنة ابو صابر عليه بينما هو مشغول وگعدت اتأمل وجهه الحلو وسماره البارز لو عضلاته والوشوم القليلة الي على جسمه لو عيونه الخضر التسحرني وانفه المدبب الاسباني وحلگه الـ...

-لا تصفنين عليَّ ادري بروحي حلو

-احم مچنت صافنة عليك اصلاً دا اباوع لغلاف كتابي

-لو تصفنين بكتابچ بگد ما تصفنين عليَّ چان طلعتي الأولى على الدفعة

-بطل غرورك اطلسسسس

-تعالي تعالي لسان الحية شو تعالي يمي

عضيت على شفتي السفلية من جرني من شحمة اذني على كيف يأنبني، مدلي الكتاب يراويني شنو مكتوب ويحچي بحرگة..

-هيچ تنحل هاي المسألة مريم؟! هيچ يحلون بـ ديموڤر؟؟

-آآآآييي اذاني شبيك اي هيچ يحلوها

-عمي الله يساعد گلبك يا ديموڤر على هاي الاهانة همزين متت وما شهدت هذا الخرط مال مريم

-شگد تبالغ طوطي هد اذني توجعت

هد اذني بسرعة هو چذب ما توجعت بس اكره من يسويلي هيچ ويسويها بس من ينشلع گلبه مني واحسه يريد يدچني يطلع حرگته بشحمة اذني لو يعضها لو يجرها على كيف لو ينقر عليها يصير طنين مزعج بأذني..

-الاطلس: هاي عود دارسة بت البادية

-ديلا يابن المدينة راوينا قدراتك الرياضياتية

وما گال لا لزمني وطيح حظي بالدراسة طلع روحي عبر الفجر وحسيته لو بيده يفتح راسي ويحشي المعلومة بي ويظل يعيد ويسقل ويعلم ويدرس ويفهم واني مثل الثولة كل شوية اخذلي صفنة عليه من يسوي حركة مغرية..

-الاطلس: هم صفنت

-مريم: لا ما لا ما صفنت تره بس دا افكر بشسمه بـ ادم

-عوفي ادم نايم اللتهي بدراستچ

-يوووه وجهك يربك اطلس همزين ما حققت حلمك وصرت استاذ جامعي چان الطالبات يعوفن المادة ويفكن حلگهن عليك

-مع الاسف چنت اطمح لهذا الشي بس بعد القدر

-تطمح الطالبات يعوفن المادة ويفكن حلگهن عليييك؟؟؟؟

-بالضبط

-روح وخر ماريد تدرسني بعد روووح خليهن يفيدنك

-مرمر اتقبل نكدچ بكل وقت وبكل روح رياضية بس هسة راح تگعدين عدل وتنتبهين عليَّ واني اشرح لا املص اذاناتچ ملصص

-شگد عنيف صاير طاسة

صرخت من جرني من اذني يرجعني اگعد بصفه ويحط راسي بالكتاب ويرجع يشرحلي متت تعب راح اغفى وهو مستمر ولا يحس ولا يتعب..

-نعستي يروحي؟

-امممممممممممممم

-هاي شبيچ

-اطلس تعبانة راح انام

-نامي شوية ارتاحي

-اي حباب

ما صدگت حطيت راسي على المخدة وغفيت، حسيت الصبح عليه يگعدني يمسح على خدودي، فتحت عيني شفته كاشخ ومبدل والعطر يفحفح كالعادة وكله نشاط وحيوية..

-صح النوم اميرتي

-هلاااا وخر ما شبعت نوم مو وكت رومانسيتك

ضحك يگرص خدي ويعضني منه طفرت متوجعة..

-گومي سويت ريوگ اكلي بسرعة حتى اللحگ اراجعلچ

ما قبلت اگوم بعد وقت للامتحان بالعشرة الصبح شكو مگعدني من الثمانية شگد بطران ابو ريحة، ما قبل يتركني شالني شيول ياخذني للحمام ويفتحلي الدوش وطببني جواه اني وملابسي تنگعت واضطريت اصحصح واسبح وابدل..

تريگت بسرعة واخذني للجامعة وهو راح للشركة كملت امتحاني وكملت الامتحانات الي وراه بمساعدة الاطلس للصبح يبقى يدرسني والحمد لله درجاتي كلش حلوة وكلما اراوي درجاتي يمطرني بكلمات المدح والثناء يحسسني اني عبقرية واني بالحقيقة بدونه مستحيل اكمل طريقي بس طبعاً ما اصارحه بهالشي لا يطير للسما من الغرور..

مرت فترة سريعة بعد زواج عمر وبسملة وهمه لسه مسافرين ميقبلون يرجعون وهسة احنه گاعدين ببيت عيالي وخابرنا بسملة كامرا وكالعادة متحچي شي غير تسولف شگد مشتاقتلنا ومتمنية نكون وياهة ويقاطعها صوت عمر يگول..

-عمر: دسكتي اني ما صدگت اخلص من هالخايسين لازگين بيَّ ما يخلوني اتنفس

-الاطلس: منو لازگ بيك ولك وجه البطة

-علي: عميرر ما مشتاقلي الله يااخذك!!... لا اسم الله عليك الله ياخذني الي

-عمر: ولك انتَ الوحيد مشتاقله وعلي اموت عليك ضلعي الثابت

-علي: انچب راح ابچي وروح امي

-زهراء: هم حلف بروحي!!

-علي: يمة شبيچ هاي فوگما احلف بروحچ الغالية

-سارة: هسة عمر بسملة ما گلتولنه شوكت ترجعون؟

-عمر: مادري مادري دعوفونااا

عبست سارة مزعوجة ضحك حمزة وحاوط كتفها بلطف..

-حمزة: ميخالف كناري عوفي متحمس

-سارة: لا لا هو تغير علينا من تزوج اني ملاحظة

-حمزة: وخلي يتغير ليش مهتمة؟

-سارة: مو اني احبه

-حمزة: شنوو؟؟؟؟

-سارة: اءء اقصد.. اءء احبه احبه يعني احبه مو هذا الحب احبه بس يعني احم..

-حمزة: سكتي سارة سكتيي الا يجي يوم تجلطيني وروحها لأمي

-سارة: هسة اني شگلت غير عموري ابن عمتي شبيك حمزاوي

-حمزة: عسى ماكو عموري ونخلصص

-علي: حميزة ليش تدعي على اخووي!!

-عمر: شنوو هذا منو يدعي عليَّ ولكمم يعني مسافر وما خلصت من اشتعل حظي الخرددلي

-زهراء: ههههه عموري ماما شمسوي بالبنات وهيچ متعلقات بيك ويحبنك

-عمر: خالي كلشي ما مسوي هو اني انحب هي گوة

-علي: عمر ضاغطهمم

-عمر: ابووس بنيتك على هالحچاية

-علي: ياهي منهن؟

-عمر: هسة هي وينها الثانية وتسولف بيها خنشوفها حلوة جگمة من هسة اگلك اذا حلوة محجوزة لأبني

صحنا البنات كلنا بصوت واحد...

-بسمممملة حاااااامل؟؟؟؟؟

-بسملة: لااااع طاحظچن ماعدچن غير هالسالفة

-مريم: عدلي اللفاضچ بسوم

-بسملة: اسفين عيوني نعتذر جداً وراح نسد الاتصال حتى نروح ناكل باااي نحبكم عود

سدينا الاتصال منهم والكل غير گعدته يكمل بشنو چان ملتهي قبل شوية واني ماكو غير فكرة وحدة مستحوذة عقلي هالفترة تآكل وتشرب ويايه، تجرأت وحمحمت حتى الكل ينتبه عليَّ وفعلاً لاحظت عيون الجميع تتوجه الي..

-مريم: عندي سؤال طبعاً هذا الاستاذ سألنا بمادة علم النفس البارحة وحبيت اسألكم انتو هم

-سارة: مرايم تدرسين علم النفس؟ ليش؟

-الاطلس: مادة ثانوية ممتازة خليها تطور نفسها من خلالها

-مريم: اي احم.. نرجع لسؤالي اذا انطرح عليكم تسوون قصة حياتكم كتاب توافقون؟

-علي: طبعاً اوافق غير حياتي تشگ شگ

-مريم: وتحچي كل تفاصيل حياتك؟

-علي: اكيد لا شكو شعليهم بحياتي هذا يا فضولي يريد يقره حياتي والله يا الله

-الاطلس: هستوك گلت حياتك تشگ شگ

-علي: اي يذكرولي رؤوس اقلام بيها مجال الكتاب يحتاجله واحد سبايسي ينكه الاحداث شوية

-مريم: شگد اتفق وياك علي

-علي: الي يذكرني يذكر عمير هم ضروري يكتب عنه حياته تشگ ستين شگة

-زهراء: التوأم المملوح شلون يذكرون واحد ويعوفون الثاني

-علي: اروحلچ فدوة ام عمير

-مريم: وانتِ سارة؟

افتهمت عليَّ رأساً ابتسمت وگالت بحماس..

-سارة: صراحة اني عادي ماهتم صح اكو امور ماحب اذكرها بيني وبين نفسي بس اتوقع اذا كتبتهن وشاركتهن بدون لا احد يعرفني هالشي هواي راح يخفف عني

-دعاء: حبيت تفكيرچ سارة

-مريم: احم احم الاطلس وحمزة انتو شتگولون؟

-حمزة: ماشوف حياتي تستحق تكون كتاب

درت عيوني على الاطلس گاعد وحاط رجل على رجل وساند ظهره على كرسي التخم گعدته گعدة واحد واثق من روحه مثل عادته مسيطر ووين ميروح عبالك يملك المكان لو بس احصل ربع ثقته ياربي اكون بخير..

-الاطلس: شنو الغاية من سؤالچ مريم؟

مضيق عيونه ومركزهن عليَّ چنه افتهم الفلم خرب شگد ذكي هالرجال ولا تنضم عليه سالفة..

-مريم: هيچ گتلكم سؤال عادي

ما جاوب لان خالة حصة فوراً غيرت مجرى الحديث من دخلت للصالة وبيدها ماعون كيك، نزلت عيوني على حلقتي افرها على اصبعي والاطلس گام يغير مكانه ويگعد بصفي..

-شبيها مرمرتي

-مريم بهمس: اريد اسوي قصتنا كتاب

-شنو!

-اطلس لتتفاجأ بس يعجبني هالشي وهواي انطلبت من صديقتي وهي شبه موافقة

-اني بيها ومتنجح؟ ليش چنتو شاكين بفشلها مع الاسف عليكم مريم انتِ وصديقتچ جاي تصدموني

-عوف صديقتي وركز ويايه اريدها كتاب

-سويها

-عزه بهالسرعة قبلت

-حبي ماشوف بيها مشكلة اني اثق بيج

-اءءءء

-ها خير

-اريد اضيف هووايه مواقف منعتني احطها والله يا اطلس لو اجيتني وگتلي هذا اي وهذا لا اگلب الدنيا

-ليش اني اعرف شمخليه بيها من الاساس حتى ادور وراچ هسة؟

-اممم وحتى موقف مالك شمسون المشرف ويايه؟

-هذا بالذاات ما تذكري مريم وعلي اتبره منچ

-اطلس لتنكر الرجال موقفه يجنن حرام عليك تظلمه حرام!

-بعد دچي بيَّ دچي خل تشبع السچين

-معليك معليك الا اضيفه

-الاطلس: الله اكبررر

ضحكت مكممة فمي الاطلس يشوف دم سنونه ولا يسمع اسم مالك من الاول چنت شاكه بي يغار منه غيرة عمياء لدرجة يختنگ من يشوفه يمكن لان مالك شخصية وحضوره دائماً طاغي بالمكان؟ خو اخر فترة والمواقف الجمعتني بـ مالك وكلامه ويايه خلى الاطلس ينجن عليَّ يشيل روحه ويرگعها وآدم يزيدها من يسألني على عمو الحلو اللابس اسود يقصد بي مالك..

-مريم: اطلللس تحمست تحمستتتتتت عندي كومة سوالف حلووة

-سارة: على شنو تحمستي مرايم قبل؟؟؟

-مريم: اي ايييي ولج اييي

-حمزة: على شنو متفقات ذني الثنين؟

-الاطلس: على طياح حظنا

-حمزة: مو اني اگول اكو شي بي خير يطلع منهن

-سارة: حمزاووي

-حمزة: عيونه وروحه وحياته

-الاطلس: اشششش لعبت نفسي وخر مناك

-مريم: اطلوس شعليك بيهم

ابتسم من مسحت على ايده ارجع انتباهه ويايه عرفته متنرفز لان ذكرت مالك حتى شكله تغير، اشرلي بعيونه اكمل شنو اريد واني ما گلت لا..

-اريد اسافر

-من تنجحين

-زين وبعد اريد اللتقي بصديقاتي

-ميخالف من تنجحين

-واريد اشتري ملابس

-من تنجحين

-واريد اشتري ملابس لآدم

-من تنجحين

-واريد...

-من تنجحين

-اطللللس

-اشاقيچ گلبي انتِ بس أمري شنو محتاجة يوصل لرجليچ

-اريد اني اطلع

-صار

-احبك

-ما سمعت

-احبك

-شو اذاني بيها شي يمكن ما جاي اسمع

-هههههه احبك ابو ريحة احبك يا عوض ربي الأحبه

-واني هايم بيچ يالمعوضتني عن الدنيا والبيها...

**

"سارة"

عيوني چانت ويه مريم والاطلس ابتسامتهم من الاذن للاذن وواحد تايه بوجه الثاني، كل يوم اشوف حبهم يزيد ولهفتهم لبعض تزيد والكل يلاحظ هالشي من عيونهم.. صدگ لو گالو اذا العيون تحدثت بلغاتها قالت مقالاً لم يقله خطيبُ...

-حمزة: عيونچ عليَّ

-سارة: ههههه اخوية ومرته شبيك حتى منهم تغار

-لا بس احب عيونچ واحب اصفن بيهن

-بسببك تركت المسكارا والصبغ صرت احب رموشي وعيوني وحواجبي الحمر گمت احب النجوم المحاوطة وجهي ورقبتي

-اگلچ حبي الوقت كلش مو مناسب لهاي السوالف گوة لازم روحي هسة

ضحكت بصوت عالي دافنة وجهي بزنده ونسمع صوت الاطلس يأفأف مزعوج من حركاتنا، ضحكت اكثر احبه من يسوي هالحركات ومريم تبقى تسولف وياه يعوفنا بحالنا..

-حمزة: راح يموت من الغيرة راح يموت ما گدرت تنساني وتتخطاني لليوم اطلس؟ مو تزوجت كافي

-الاطلس: هو منو بحالك اسكت ودور وجهك هناك ماريد اشوفه

-مسلم: عزيزي ضروري التخطي والتشافي من مرحلة الانكسار والخذلان هاي لا تخلون الماضي يصير حاجز بيناتكم خلص ما صارت قسمة بعد شبيدنا

-الاطلس: ولكمم لا تحچون هيچ تلعب رووحي

مسلم لزمه من صفحة وحمزة من صفحة وعلي من صفحة انوب اتصلو على عمر حتى متروح عليه الونسة وهذاك هم ربط فيشة بالمداهر والاطلس گاعد مبوز و ميحچي ومريم مكيفة على الوضع..

شتت تركيزي عمة زهراء من اشرت على غدير وتبسبس ويه امي، الكل دار عيونه متوجه على غدير الخانسة، زرزرت بعيونها بيناتنا كلنا وللغرابة الشديدة ما حچت شي ولا نطقت من يوم تقدملها ابن صديق ابوية لسه هي بوضع الصامت ما سوت ولا مشكلة حتى يوسف احسها مالها خلگه تگب شوية بس من نفتح موضوع الخطبة وتلف راسها وتنام وره العياط..

-زهراء: اي غدورة ما رديتي جواب بعدچ؟

-غدير: جواب لشنو عمة؟؟؟؟؟

-زهراء: يمة اسم الله الرحمن ولشي يمة ولشي حبيبتي انسي

-الاطلس: حبيبتي الناس منتظرين جواب

نزلت عيونها متقبل تجاوب نفخ الاطلس وگام يطلع للشركة، مجرد طلع الاطلس منا هي دارت عيونها تباوع لحمزة واعرف بالضبط شنو منتظرة منه.. منتظره ردة فعله!

لكن مثل العادة بقى على هدوئه يگشر البرتقالة لـ يوسف الواگف گدامنا وبصفه آدم وغيث ويسولف وياهم بالهمسة..

-يوسف: بابا هذا ادم هم يريد برتكالة

-حمزة: يتدلل آدم حبيبي

-آدم: بابا اني اريد هاي

أشر على الرمانة ابتسم حمزة يهز راسه موافق، آدم وغيث ابن مسلم ثنينهم يصيحون لحمزة بابا رغم محد وجههم على  هذا الشي بس يحبون يقلدون يوسف بكلشي حتى لبسهم يردو نفسه وهالشي كلشش كيوت ولطيف دائماً كلهم مطقمين نفس الملابس..

-يوسف: هذا مو ابوك ابوي!!

-ادم: ابووي

-يوسف: لااا ابوي اني انيي

-ادم: مااا

-يوسف: لا تدول (تگول) ما هاي مال بنات انتَ فهل (فحل)

-ادم: ماما تگول ما وهي مو بنية هي ماما

-غيث: يا غبي ماما بنية متشوف عدها شعر

-ادم: ماما مرمر ماما مالتي مو مالتك

-غيث: اي اي ادري اثكت (اسكت)

-يوسف: روهو هناك لا تدوخوني

نسمعلهم وميتين ضحك شخصياتهم متناقضة جداً ثلاثتهم واحد ميشبه الثاني، يوسف ابني شخصيته قيادية رغم لسه ميلفظ الحروف صحيحة بس هو لازم يكون الصح بكلشي حتى لو غلطان.. آدم ابن الاطلس نسخة مستنسخة من ابوه ميتقبل الهزيمة وعنده ثقة بروحه عجيبببببة.. اما غيث فـ هادئ وجداً ذكي اوقات نستغرب على ذكائه ونباهته وكلشي يسولف لأبوه يعني لو اللبس گدامه بجامة حمرة يروح يگول لأبو اليوم سارة لبست بجامة حمرة وهذا السبب حمزة ميخليني اخذ راحتي باللبس من يكون موجود..

گامت غدير تروح للصالة الثانية وبنفس اللحظة اجت لحمزة رسالة، موبايله بصفي شفتها رسالة منها كاتبتله..

"حمزة ممكن تجي شوية اريد احچي وياك بموضوع"

هو ما انتبه للرسالة وبقى يسولف ويه الولد ويفاكك بيناتهم يگللهم بـ جدية عبالك ديحچي ويه شباب كبار ويفتهمون عليه..

-حمزة: اولاً ممنوع احد ينعت الثاني غبي هاي الكلمة عيب بابا وانتو سباع وخوش ولد وتسمعون الكلمة تمام؟

-الولد: تمام

-حمزة: ثانياً اني ابوكم كلكم وكلكم تگدرون تصيحولي بابا ومنو يريد شي او يحتاج شي يجيني تمام؟

-الولد: تمام

-يوسف: افففف انتَ ابوي انييي

-حمزة: يوسف عيب وليدي ادم وغيث وزهورة اخوتك ولازم تحبهم كلهم

هز راسه مستسلم هو كلش يحبهم وصديقه المقرب آدم وميقبل عليه بس يغار على ابوه غيرة مفرطة ويريد حمزة اله وبس وطبعاً ما چنت اعرف متعلم هالسالفة من غدير هي تحچي براسه وتعلمه يگول هالحچي مرة سمعتها تلقنه بحديقة بيتنا..

-حمزة: ثالثاً هذي البرتقالة كلكم راح تتقاسموها والرمانة هم تمام؟

-الولد: تمام

-حمزة: يوسف انطي لآدم تفاحة من ماعونك عفية بـ بطلي

انطى يوسف شيف تفاحة لآدم وابتسامة واسعة مرسومة على وجهه، طلب حمزة من آدم ينطي كرز من ماعونه لـ غيث والثاني سواها بأبتسامة اكبر وطلب من غيث ينطيهم من الموزة المقطعة وسوه هالشي بـ حُب وهو يگول..

-غيث: اني اكبر واحد بيكم ولازم كلنا نصير حبابين ونحب بعض مو بابا حمزة؟

-حمزة: صح عفية بوليدي

-سارة: حمزاوي اجاك اشعار على موبايلك

انطيته اسوي روحي ما شفت الرسالة، قراهة وفوراً رفع راسه يباوعلي وبدون تردد همسلي..

-هاي غدير

-صدگ؟

-تريد تحچي ويايه بموضوع

-هاا روح شوف شتريد

هز راسه وگام يشوفها متأكدة شنو راح تطلب منه وطلع احساسي صح، چانت دتسأله على رأيه بخطبتها كل خاطب يجيها تسأل حمزة اول واحد ومن تشوفه يشجعها تكمل حياتها تتخبل وتظل تصيح وتگلب الدنيا مثل هسة..

-غدير بعياط: راااااح تخبلنيييي انتَ رااااااااح تخبلنيييييييييييي

ركضنا كلنا للصالة الثانية شفناها تصيح وتضرب على وجهها لزمها حمزة يقيّد ايديها حتى متأذي روحها وتزيد بالضرب انوب صارت تضرب على صدره بقوة وتخرمش رقبته بأظافرها..

-غدير: الا امووووتك ياااله ارتااااااااح لو اموتهاااا الهاااا اموتكمم والله امووووتكمممممم

ركضن امي عليها وعمتي ونانا تگابلن يردن يجرنها وولا وحدة گدرت، غدير من متاخذ علاجها تتخبل وتصير قوتها مال عشر زلم ميگدرولها..

-حمزة: غددددير شبيچ تخبلتيييي

-غدير: اييييي مخبلة اني مخخخبلللة مخببببببلة كله من وراااااك انتَ خبلتني انتَ انتَ!!!

وتضرب بكل قوتها على صدره وكلما يلزموها تفلت منهم وترجع عليه تخرمشه رقبته صارت خريطة، وگفت مصدومة اول مرة تأذي حمزة ليا مرحلة وصلت لدرجة تمنته يموت!

اخيراً تدخلوا علي ومسلم چانو واگفين على جهة متأملين حمزة والبنات يگدرولها بس حتى علي ومسلم ما گدرو يسيطرون عليها وصارت تخرمش بوجههم لدرجة شخطت عين مسلم من الطول للطول والجرح گام يصب دم..

البيت انگلب گلاااب بسببها مريم واگفة على جهة تسبح بشي ماعرف شتگول ودعاء وياهة ورقية واگفة تبچي متعرف شتسوي، تذكرت ابرة المهدئ بس اتذكر من زمااان امتنعت عنها لانها متحتاجها بس يارب يكون عدها وحدة هسة..

صعدت لغرفتها ادور بعلاجاتها نفشت الغرفة نفش بس ما لگيت صرت ارعش من الصوت الصار جوه عيااط الزلم وياهة مرعب، نزلت جوه شفت الاطلس موجود اكيد اتصلوا بي مچتفها ولازگها بالحايط مقيدها حتى متتحرك، حرفياً ينتفض نفضض من قوة جسمها لدرجة وجهه صار اصفر خفنا عليه تضربه بمكان غلط وتجيله النوبة..

تقدمت امي تركض من المطبخ وبيدها ابرة انطتها لحمزة وسرعان ما تقدم على غدير وضربها بجسمها، اخذت فترة ياله رخى جسمها وقلت حركتها الى ان خربت ووگعت بيدين الاطلس المبتلي بمرضها وبكل نوبة هلع وعصبية تزورها..

شالها ياخذها لغرفتها كلمة ما حچى والكل اللتزم الهدوء صار فترة طويلة جداً جداً غدير ما فاقدة اعصابها بهاي الطريقة بس يمكن هسة من شافت سالفة الخاطب راح تصير صدگ وابوية متلهف حتى يتم هالزواج بسبب مواصفات الرجال الممتازة صح مو عراقي وارمل هو وعنده بنات ثنين بس مو چبير عمره يطلع اصغر من حمزة ومتمكن مادياً وثقافياً بس كل هالشغلات متهم غدير.. غدير تريد حمزة وبس!

بعد هالموقف الصعب قررنا كلمن يرجع لبيته، مريم أصرت عليَّ اجي لبيتها علمود ادم ويوسف يلعبون سوه مالي واهس بس ما رفضت احسن مما يطلبون يلعبون بغير مكان وينعاد الصار بينا قبل..

وصلني حمزة لبيتها وگعدت وياهة بالصالة نسولف على غدير شرحتلها الموقف وليش هيچ صاير بيها والسبب كله لان صارلها فترة تاركة العلاج لانه يأذي معدتها بس صارت اتعس من قبل ولازم نرجع نقنعها تاخذه من جديد..

-مريم: عوفچ من غدير هسة انتِ شبيچ؟

-سارة: مابيه شي

-مريم: لتچذبين عليَّ اعرفچ زين ليش كل شوية تسرحين وحدچ شصاير سارة

سكتت اشرب من العصير وهي بقت صافنة عليَّ تنتظرني احچي شي..

-سارة: شفت فاهد البارحة

-شلوون؟؟ ووين؟؟؟

-چنت بالسوگ اني ورقية ومرينا للشركة نشوف حمزة وشفته ديطلع من مطعم بصف الشركة

-وشسوه؟؟

-ولشي

-ولشي؟

-اي ولشي

-معقولة خاف ما شافچ

-شافني بس ماهتم

-صدگ عود

-والله يعني عبر مني حتى وعبالك ما شافني رغم هو شافني وصدگيني مريم گمت ارجف من فوگ ليجوه متت من الخوف بس فاهد كلشي ما سوه ابد ولشي ولا كأني موجودة

-غريب

-غريب ومخيف صح؟

-صح لان احنه بآخر مرة شفناهم چانت نظراته عليچ ما شالهم وتعارك ويه حمزة من تخربطتي تتذكرين؟ زين ليش هسة متجاهلچ وممهتم؟؟

-مادري يارب نكون دنبالغ وماكو شي والله ملينا مريم ملينااا

-يارب اهدي حبيبتي لتخافين ان شاء الله ماكو شي

-اني بس اخاف على حمزة كل تفكيري وياه شلون فاهد تركنا بيومها بدون اضرار شلون وهمه كومة واحنه بس ثلاثة!

-گتله للاطلس شگد نبهته ذولة ما راح نخلص منهم! ذولة شؤوم علينا مافيات نفس ما تينا گالت وشغلهم من جوه الجوه يغدروچ غدر ودائماً يحضرون بالوقت الي نكون بي بأضعف حالاتنا ويستغلون نقاط ضعفنا ضدنا!

-مثلما سوه مالك بيكم!!!

-لا سارة هاي غير

-انتِ ليش مستقتلة تدافعيله مريم تره الاطلس متخبل والافكار دتودي يمين وشمال حتى شكى لحمزة راح يموت

-افكار مثل شنو؟؟

-ماعرف ان.. ماعرف مريم بس انتبهي لنفسچ ولتحچين ويه مالك ابد بعد

-تره الرجال بحاله وممهتم بيَّ ولا اني مهتمة وحتى بعد لا شفته ولا شافني بس الاطلس يبالغ سارة ليروح بالچ بعيد وتفكرين بشغلات سيئة تجاهي حبابة

-ياا يمعودة ماعرفچ قابل اني واعرف بأخوية يغار من الهوا لو طخچ بس شنسوي هو هيچ من قبل

-اني بس ما انسى معروف مالك شلون ساعد ابني وطلعنا من الموت شنو مو بعين الاطلس هاي لو حقده على شمسون عماه وبعد ميشوف بعيونه!

-مريم ادري بمالك يختلف عن فاهد من السما للگاع بس يبقون ولد شمسون!!

-ادري

-راسي راح يطگ تعبت

-شربي عصير حبي وارتاحي اني اروح اشوف الجهال شديسوون

وافقتها الرأي اريح راسي على القنفة اغمض عيوني وهي راحت للحديقة الخلفية تشوف الجهال، فتحت عيوني على صوت رنة جرس الباب.. انتظرت مريم ترجع تفتحها بس تأخرت وجرس الباب لسه يرن..

گمت حتى افتحها واشيل بشعري ذيل حصان، باوعت من العين السحرية ويبست كل اطرافي من ضربت عقلي ذكرى سريعة من شفته.. اي شفته.. هذا هو.. هسة تذكرت وين شايفته وشلون وشوكت.. هو نفسه.. چان موجود باليوم المشؤوم بيوم قتل يوسف اخو حمزة بيوم الفقدت بي اعز ما عندي چان من ضمن الخطفونا چان وياهم تذكرت وجهه!! هذا ابن شمسون الثالث!!

گلبي ينبض بقوة احسه راح يوگف الكلمات ضاعت من فمي مريم ما رجعت وزاد قلقلي واني وحدي والجرس يرن ما وگف ماعرف ليش سويتها.. ماعرف ليش فتحت الباب بس يمكن لانها مو اول مرة نتلاگه؟ فتحت الباب وفتحت ذكريات الماضي وياهة ليقابلني طوله الواضح وصوته الهادئ وهو يگول بأبتسامة تعني الكثـــير....

-تستقبلون ضيوف؟......

النهــــاية 😬

𓈓𓈓

نعم نعم انها النهاية هناااا بس ان شاء الله بداية لمكان جديد وشخصيات جديدة وحياة جديدة ومختلفة كليااً عن هنا حياة عبارة عن اكشن و حُببب صعب وطاح طيح كض اخوك لا يطييح 🙈

حرفياً الابطال والبطلات هناك هووت وبنص قلبييي 😮‍💨♥️🔥

بداية جديدة مع "أبناء الحَســــوم" نزل مقتطف تخصهم وحرفيااً عمره خسارة الي ميقراها اللهم اني بلغت 🫦🔥

ضيفوها بالمكتبة اذا تحبون ان شاء الله نبدي بيها هالايام الجاية 💋

𓈓𓈓

عندي حچي هواي تحملوني 😒♥️

وهسة جبتلكم مفاجأة احلى بعددد 🙈 وهو تحويل رواية الاطلس "دمليج أسود" الى كتاب ورقيي ان شاء الله 🥹🔥

صراحة بسبب كثرة الطلب على الرواية ودار دراويش اول ما نزلت القصة رادوها و أصرووا تنطبع عدهم والحمدلله تم الامر 🤍

نجي لمعلومات الكتاب:

الكتاب بي احداث جديددة اي اي اي وكلشي مبهم بهذا البارت راح تلگون تفسيره بالكتاب الصااااك جداً ومن گدما معجبة بالاحداث الجديدة كل شوية اروح اقراهن واعيش الجوو 😂😍😍

راح تتوضحلكم الصورة ليش سارة فتحت لأبن شمسون الثالث الباب وشلون جازفت بروحها وبـ مريم وشنو سالفة مالك ومريم ووووو😮‍💨🔥

والكتاب برأيي احلى من الواتباد بهوااااي لان بوقت نزول الاطلس هوايه تعرضنا لمضايقات وازعاجات وتوقفت اكثر من مرة واني مرضت كلُلششش واكو احداث ما انذكرت وعبرناهن بسبب وضعي والابطال بس هسة لا لا لاا الحمدلله جبت الموافقة وكتبته على كيييف كيفييي

ادري اكو راح يكولون ليش ما ضفتوهن بالقصة او بالبارت الاضافي بس للاسف الاحداث عشوائية يعني ما مركزة فقط بنهاية القصة لا بكل مكان محشى 🫂

وملاحظة اخرى: الاحداث العبرناهم مو عبالكم علمود الكتاب لان چنت ممقررة اضيفهم اصلاً و صدقاً چانت ختام واكتفينا وابطالنا اكتفوا وما رادوا ينذكر زايد واني مرضت وماگدرت اكتب بعد بس هسة بمرور الوقت كلشي تغير ولو مرايم وسارة وبقية البنات رادن شيي نسووووي 😂🫦🔥

اضااافة.. صارت احداث غريبة بالجديد وعاشوها ابطالنا واكو مشاهد ماقبلوا تنذكر وجبتهن گووة وكتبتهن بالكتاب 🤣

ومن ضمنهن شخصيات ما قبلوا نكتب عنها مثل الابن الثالث لشمسون ومشاهد تخص أبناء الحسوم الصواريخ 🫦 موجودة بالكتاب وظهور احم هذاك الواحد الي الكل راح يكرش عليه اي 🌚😂

تلگون كتاب الاطلس "دمليج أسود" في دار دراويش على الانستا وهذا حسابي الانستا اذا تردون انززلكم تغشوشات عن الكتاب وان شاء الله اول ميتوفر اني ابلغكم على الستوري 🙈🤍

اختكم وصديقتكم زهراء السلامي "زازا" تحبكم وااايد واااايد 💋💋

#الاطلس "دمليج أسود"

بقلمي: زهراء السلامي 💛

لتنسون التصويت رجاااءً ✋🏻♥️ + التعليق بين الفقرات + متابعة لحسابي 🌼.

عزة نفسَي أهم مـَـن ڪَــلبي بــ هـَـواي

وكسـَرت خاطري تسَواك كلك

أطَخلك راس َ؟

أنــيَ النخل حَدري

يــآ حُـب

يــآ غزل

يــآ عشگ عذَري

مــن تَدوس ڪَــلبي اغـَفَرلك يجـَـوز

بَــس يم الكَرامة

أچفه شَري

• ━━━━━━❪♣❫━━━━━━ •

"مريم"

روحي جاي تنسحب بلعت ريگ وياه غصتي وسميت بأسم الله بگلبي ونويت افتح الستوري، شنو يطلع اني راح اكون هادئة ومانطي ردة فعل انتهى كلشي بعد على شنو راح اموت روحي من الغيرة والقهر..

-دعاء: هاا؟

-مريم: راح افتحهه

دستهه بسرعة مغمضة عيوني حابسة دموعي، اخيراً فتحتهم ونصيت اركز بالموبايل..

-دعاء: مافهمت!

-مريم: اوكفي

قريت الخبر مرة ومرتين وثلاثة ما مستوعبة رجعت اقراه بصوت عالي..

"اعلنت شركة الاطلس على عرض مجموعتها الشتوية الجديدة تحت مسمى "Dreamer، حالمة" على ان يكون موعد الحفل 12/4 الموافق يوم الاثنين.."

-دعاء: عرض مجموعة جديدة؟؟

-مريم: اي

-دعاء: همه مو قبل كم شهر نزلو مجموعة جديدة مريم؟؟

-كل فصل ينزلون تصاميم جديدة

-وشبيج طايرة فرح

-هههههههههه ولشي ماكو شي

-دعاء: كل هاي الكشرة وماكو شي والله يا الله

ذبيت موبايلي وغطيت وجهي همست "الحمد لله" ونمت على فراشي ضحكت من كل گلبي على خبالي وخوفي شسويت اني ليش فرحانة هيج بعده زواجهم قائم كال ابو اطلس يصادف يوم 18..

-دعاء: مريم

-همممممم

-وجع چنهه هايشة كومي

-ها كمت ها

-علوشة يريد يجي يشوفني وكتله لا لتجي

-لييييش

-احس الوقت مو مناسب بس هو زعل وانقهر مني كلش

-ليش زعل وانقهر؟

-يكول انتِ متردين تشوفيني كلما اكلج اني جاي تطلعيلي عذر

-ليش دعاء حرام عليج هيج تعذبي، الرجال يحبج ومتمني شوفتج لتمللي

-ماريد مريم مالي نفس لشي

-سمعيني لج اذا علمودي دتخربين خطوبتج اموتج والله تره ماقبل على علي اني لتضوجي

-مو..

-ماكو مو اتصلي بي كوليله تعال نتشاوف مشتاقتلك لتسوين هيج دعاء انقهر وازعل عليج لتخربين فرحتج بسببي اني زينة والله وكلشي مابيه

-ماكدر مالي نفس بي

-انچبي هو شعلي!! لا تظلمين بختج علي خوش رجال واجه وتعنى وجاب اهله وكل ناسه وخطبج رغم همه ماعدهم هاي السوالف يردون حب وغرام وعلاقات ياله يتزوجون بس هو احترمج واحترم رغبتج واحترم حبكم واجه يخطب وهسة راح تتزوجون لتخربين كل هاي الشغلات علمود احد

-انتِ اختي

-وهو حبيبج وخطيبج تحبون بعض ومتمنين يوم عرسكم وتحلمون بي كومي اتصلي بي وغيرو جو سوه بشوفة بعض يله كومي

غصبتهه تتصل بي وتكوله يجيهه خطية طار من الفرح ما صدك گللهه مسافة الطريق وهو جاي، انقهرت على اختي تستحي تكمل تجهيز وتستحي تفرح بخطيبهه علمودي حتى اتصالاتهم بالقطارة طول الوقت مگابلتني وكاعدة حتى من انام تبقى كاعدة بصفي..

-كومي بدلي دعاء

-ليش هو بالبيت اني

-ان شاء الله تطلعيله بهاي الجرود؟

-تراك مرتب مرايم شبي

-دكومي كومي

طلعتلهه فستان قصير بي ردان من الكنتور شمرته عليهه وخليتهه تلبسه فتحتلهه شعرهه ومكيجتهه طلعت جديدة..

-دعاء: هسة يتخبل علية

-خلي يتخبل تونسو سوه هاي كلهه تبقى تنذكر وتسولفوهه لجهالكم بالمستقبل

-اكول لجهالي ابوكم واحد فاسق يقضي الكعدة كلهه يكرص ويتحارش بيه

نزلت راسهه بسرعة مستحية مبين طلعت الجملة منهه لا ارادي، ضحكت من كل گلبي وحضنتهه بقوة لصدري دعيتلهه بالسعادة وطلعنه نسوي حلويات حتى تقدمله من يجي..

ساعتين واندكت باب بيتنه باوعتلهه متعجبة شبسرعة وصل ضحكت بحماس وكالت..

-دعاء: يطير طيور من يجيني

راحت تركض تفتحله الباب واني وكفت اباوعلهم من شباك المطبخ فرحانة بيهم، فتحت عيوني على وسعهه من اول ما دخل باسهه وشالهه لحضنه متت ضحك على سوالفه لعب طوبة على الباب هاي بعدهم ما دخلو ودعاء گضتهه تصيح "علي فضتنه" "علاوي امشي جوه"..

تركتهم ورحت احضر ضيافة وكفت بالمطبخ انتظرهه ترجع بس شو هاي انبلعت ماكو نص ساعة وهي خانسة لا حس ولا صوت، اجتني بسملة تعلچ ولافة الشال على خصرهه..

-مريم: هاي شعندج؟

-بسملة: دا انظف ويه امي

-تنظفين ويه امي دقيقتين وتاخذيلج هزة ساعتين صح

-صح الصح

-اكلج شو علي اجه بس مالهم حس هاي صارله نص ساعة

-لا خية شنو نص ساعة كولي ساعة، ساعة ونص تره متطلع بعد اختنه حبسهه عنده

-عزه صخام بعيني صدك تحجين

-وحق الله

-زين شيسوون؟

-اظن يعلمهه قران

-لا بسملة لتستهزأين احجي عدل

-شمدريني مريم شيسوون يعني بلابل حب وكاعدين سوه شيسوون

-اي شيسوون والله عندي فضول صار

-تاخذله خيط حبي

-بسملللة

-دوخري هاي عود جانت متزوجة امداني شوكت اتزوج وارتاح

-ترتاحين شنو شو متستحين انتِ

-انشلع گلبي مرايم كاعدة بالاقسام الداخلية مثل المسودنات اريد اتزوج واحد من ذيج المدينة حتى ارتاح

-صدك على طاري الجامعة شلونچ؟ اني نسيت حبي اسفة عذريني

-لا عادي حب شسالفة انتِ بيا حال، اي الحمد لله ماشية الامور كاعدة بغرفة ويه صديقتي وحاصرة روحي بيهه ماطلع بس بالعطل اجي هنا عند اهلي

-اي مو اكول ماشوفج

-تعب تعب مريوم كلش تعب بس طبعاً شكراً لعمر سهلي المهمة خطية حتى هو لگالي الدار الي كاعدة بي اخت صديقه وصادقتهه

-اي فدوة لعينه شكد گلبه طيب، اتذكر من سألني شنو لونج المفضل

-جذااابة

-والله حتى يجيبلج فرشة على لونج التحبي

-اوووووي جذابة جذااابة

-ههههه والله العظيم هذا الصار

-واني اكووول ليش الفراش والحايط لونهم وردي فاااتح عزه بعينك يالمصلبخ خوش يدلل

-هم كالت المصلبخ!!

-افف انسى والله كلما اشوفه اتذكر عمر العار خطيب دانيا

-ايعع دانيا صديقتج وهذاك المصلبخ الخانهه؟؟

-اي اي الله ياخذه المقرف

-شجااب الثوم للحلقوم عمرنا غيرر كلش غير

-اي خوش خوش اروح ادرس عندي امتحان

راحت واني هم لفيت راسي ونمت علي ودعاء مطولين، كعدت المغرب على صوت امي ودعاء يتصايحن ركضت اشوف شكو واسمع امي تهد وتنثني عليهه..

-ام مريم: هذااا الاثر بحنچچ شنوووو دعااااااء

-دعاء: والله بالغلط صاارت بالغلطططط

-وللللج دعاااء اليوم اطيح حظج اليوووم

صعدت دعاء تشرد فوك وامي صعدت وراهه بالمكناسة وبسملة كاعدة تعلج وصافنة عليهن..

-ام مريم: تعااالي نزلي يميييي تعالي اشوفج زيييين

-دعاء: وعيوونج ما سوه شي والله والله ما سوه شي والله

-تعاااااالي اني اعلمج ما سوه شي موووو

-والقران الكريم ولج مرااايم لحكيلي

-مريم: ماما شبيچ عوفيهه تعالي خلينه نفهم شصاير

-ام مريم: يمة ورمت گلبي هاي البنية اني اعلمج دعيوة هالمرة شردتي مني المرة الجاية اكسر المكناسة على ظهرررج

-دعاء: يبووو كلشي ما صار والقران

-اي بعد حلفي حلفي يالجذابة

-مريم: لا ماما دعاء متجذب، تعالي نزلي فهمينه شكو

-دعاء: انطوني الامان وانزل

-مريم: اني انطيج الامان تعالي

نزلت ترحف زحوف وامي واكفة متحضرة تكتلهه اول ما نزلت ركضت وكفت وره ظهري وهمستلي..

-دعاء: مرايم فدوة حاميني

-مريم: شسويتو دعيوة صدك صاير شي غلط بيناتكم؟

-ام مريم: ما تشوفينن خدودهه وحنچههاااا

-دعاء: والله من لحيته اتحسس والله

-مريم: منيلج هاي الكلاوات

-دعاء: جيبو القران احلفلكم علي كلما يبوسني على خدي لو أي مكان مجرد لحيته تطخني يتحسس المكان ويصير احمر واظل احكه ويطركع هيج باعو حتى ايدي

مدت كف ايدهه فعلاً صاير احمر واثر حكة ابتسمت اعرف جلدهه حساس وكلشي ميتحمل..

-ام مريم: اييي وهو كاااعد ويمطگ بيج مووو

-دعاء: لا والله لا هي بوستين بس على خدي وحنچي بس بس بس

-ام مريم: ولج اني ابوج طوووولي ما شافه بالخطوبة وانتِ لعبتي ويه الرجال لعب يالخفيفةةة

-مريم: ماما شبيچ دتكولج ما صار شي هي بوستين

-بسملة: شسالفة ماي ماذر قبلتين ناشفتين لا تؤثر روحي دعاء انتِ في بر الامان

-ام مريم: انچبننن عاد انتن الادبسزيات من تردن تفزعن

-بسملة: اماه لا تصيرين اوڤر هي بوسايتين شحلاتهن منا ومنا قابل شمسوي الزلمة المسكين

-مريم: صراحة اتفق ويه بسوم ماما شبيچ شجاچ يعني ابويه ما باسج بالخطوبة

-ام مريم: حششششى ما شافني الخطوبة كلهه بليلة الدخلة ياله تشاوفنه

-دعاء: ايع وين عايشين

-ام مريم: عبن احنه محترماات مو خفيفات نفسچن امشيي ولي لو تموتين ما نروح لمدينتهم بعد عقوبة الج

-دعاء: لا لا لا فدوة ماما شبيييج دا اكولج ما صار شي والله العظيم راح ابچيييي

-مريم: شعدكم رايحات بعد؟

-دعاء: عمتي عزمتنه لبيتهم ومناك نطلع نجهز وياهه اختار الغرفة اليوم بلغني علاويتي

-ام مريم: تهييي بهييي علاويتهه الخفيفة الريشة

-دعاء: ماما ريلاكس بليز

-مريم: طگو المعدااان

-دعاء: اف اف دونت... اءء اءء انتو دونات

فطست وبسملة تفلت العلج من الضحك وامي تفر بيدهه وتغمغم بينه عافتنه وراحت..

-مريم: هالمرة دافعتلج المرة الثانية تأدبو دعاء

-دعاء: ياا ما صدگتيني مرايم! والله هذا الصار

-بسملة: يس يس دونات

-دعاء: اششش لتحجن علي ديعلمني انگلوزو الا اتعلم واصير طلقة بي

-مريم: عود عليميني والله نخزي منعرف انكليزي

-بسملة: لان بكل بساطة چنتن تشردن بمحاضرة الانكليزي بالمعهد غبرات

تفرقنه كلمن لمكان ومشت الايام دعاء هواي راحت للمدينة الساكن بيهه علي ويه امي عزموهم كم مرة والغريب ابوية يموت على علي وعمر كلش قريب عليهم وبيناتهم مكالمات وسوالف وضحك ومرة اجو ثنينهم وطلعو وياه صادقو..

التوأم عدهم طبع ينسجمون ويه الكل واعيد واكرر عدهم قبول مو طبيعي كل اليشوفهم لازم يحبهم ويتقبل وجودهم خصوصاً سوالفهم الي تفطس ضحك..

تحسنت احوالي هواي وتغيرت للاحسن استردت عافيتي وتناسيت موضوع الاطلس عبر حفل اطلاق المجموعة والكل واضح دينتظر زواج الاطلس، جبرت نفسي ما اتابع وحضرت صفحتهم على مواقع التواصل حتى ما اشوف واحرگ بروحي..

حددو موعد زواج علي ودعاء يوم 1/1 يوم عيد ميلادي فرحت بالتاريخ وحبيته لان تاريخ مميز انخبصنه كلنه نجهز وفرحانين بي، اخيراً اجه اليوم تختار بي دعاء بدلة العرس وينصبون اثاث بيتهه الباقي..

-مريم: دعاء راح تشترين بدلة عرسج مناك؟

-دعاء بحماس: ايي عمتي كالت كلشي عدهم احلى وافخم لان الطبقة المخملية يتسوگون مناك وفعلاً مريم من رحت شفت كلشي يجنن، وعلساس تريدني اختار البدلة وباقي شغلات العرس من محلات معينة تكون غالية وراقية

-بسملة: يع ماحبيت

-مريم: ليش؟

-بسملة: قصدهم احنه فگورة؟ اوكي سيستر ادري احنه فگورة بس مو يحچوهه بوجوهنه

-مريم: بسملة سكتي هاي فوگما يردولهه الزين همه شنو على گلوبهم يجيبولهه أي شي ويفضون السالفة بس غير يردون لاختي كلشي حلو ومرتب

-بسملة: ها والله صدك، بس هم يع ماحبيت ماطول غدير الحية راح تطلع وياكم

-مريم: نعمم!!

-دعاء: اي لان يكولون ذوقهه حلو كلش

-مريم: ايعععع اتبره منج دعااء هاي شنو مطلعيهه وياكم اني اعرفهه شنو هسة تشلع گلبج

-دعاء: يله انتِ طلعي وياي

-مريم: لا ماروح اني شعندي

-دعاء: معزومين كلنه على الغده عدهم شبيچ ياا

-مريم: لا لا شعليه اني روحي وحدج ويه امي

-بسملة. اتوقع سمعت دتكول كلنه معزومين لو اني سمعي بي شي؟

-مريم: ماااا ماروح

-دعاء: هاي لييش

-مريم: ماروح مااروح

-بسملة: هاي شبيهه الاخت

-مريم: هسة اشوف طوطي مااريد

-دعاء: لا ببيت علي راح نكون بس عمتي وعمر وهو واحنه موجودين حسب مافهمت

-مريم: واذا عزموهم واحت سحليته وياه؟؟

-دعاء: منو سحليته؟

-بسملة: اول حرف من اسمهه نورسين

-مريم: استغفر الله ربيي ماروح دعاء عوفيني لو تموتوني وتشرحوني وتذبوني بالزبالة بدون دفن هم ماروح خووووووش....

**

-زهراء: علاوي تعال وليدي

-علي: يمة عمير ما يرضى يفتحلي الباااااااب

-زهراء: عوف اخوك تعال يمي احاچيك

-ما يرضى يحاچينيييييي

-زهراء: دعوفه يا ماما

-علي: الا يحاچيني الااااا

-زهراء: دعوووف صخاااام وتعال

-عمر: انييي صخااااام

فتح الباب معصب وعاكد حاجبه..

-علي: هلو عمير مشتاقلك

-عمر: طير عن وجهي انتَ

-علي: اني اسف

-عمر: اسفك حطه بـ....... براسك

-زهراء: شبيكم يا امي

-عمر: اني مو ابنج اني صخام

-علي: اني صخام اني

-زهراء: اي حبيبي علي صخام مو انتَ تعال يروحي

-علي: يمممماااا!!

-زهراء: يبوووو چنكم جهال كافي تعالو ثنينكم احاچيكم

-علي: تعال تعال حبيبي تعال

جرجرته وياي للصالة كعد كالب وجهه..

-علي: يمة بعده مزاعلني حاچي

-زهراء: ليش مزاعل اخوك عمر

-عمر: لانه سرسري

-علي: تبت توبة نصوحة التوبة

-زهراء: شصاير؟

-عمر: اتفقت وياه نطلع صارلي اسبوووع ماخذ منه موعد وهو واعدني نروح سوه تالي عافني وراح يشوف خطيبتتته

-زهراء: ومعصب لان راح يشوف خطيبته؟

-عمر: متغير يمة متغييير من خطب لسه عافني وراح

-علي: ماعوفك اني ماعوفك تكي الثاني

-عمر: خلي دعاء تفيدك روحلهه حبيبي روح

-زهراء: ههههه ولك عمر تغار من مرت اخوك

-عمر: ما اغار بس هو چلب حتى يريد يعيش وحده النذل

-زهراء: حبيبي هاي سنة الحياة اكيد راح تفترقون بيوم

-علي: يمة ماعوفه اني بس غير انطي البت حقهه

-زهراء: وهذا الصح ماما عمر شبيك

-عمر: اي خلي ينطي حقهه روحلهه امشي ولي

-علي: هاك استلم

-زهراء: عمر شنو تريد انتَ شنو مشكلتك بالضبط؟

ما جاوب كام وكف بعيد منزل راسه ومكتف ايده، كامتله امي تسولف وياه ميقبل يحاجيهه..

-عمر: ماريدنه نفترق

-علي: ما راح نفترق اكابلك واكعد كل يوم

-عمر: جذاب

-علي: وعلي ابن ابي طالب صبح مسا اني يمك

-عمر: احلف

-علي: وروح ابوي ليش عبالك اذا تزوجت راح اعوفك ونبتعد

-عمر: لان هسة خطبت وانتَ بعيد چا لو تزوجت وطلعت شلون بيه اظل مگابل الحياطين

-زهراء: يا روحي وليدي الحلو زعلان على توأمه راح يفارقه

-عمر: طول عمرنه احنه سوه 32 سنة واحد مكابل الثاني واحد ينام بصف الثاني تالي بنهاية عمرنه يعوفني ويروح الچلب من هسة وحشته ماكله روحي

-زهراء: يله انتَ تزوج حتى متحس بوحشة

-عمر: ماريد اتزوج

-علي: عمير شبيك زعلان تره ابطل ماتزوج

-زهراء: لا شنو ما تتزوج حبيبي شجاكم هاي الدنيا هم يجي يوم وتتزوج عموري وتكمل حياتك وتعذر اخوك

-عمر: اي.. بس اني احبه هو اخوي

-علي: وعلي راح ابجي يوم بعد ماتزوج

-زهراء: ماما شنو ما تتزوج فكهه عمر حبيبي افرح لاخوك وادعيله بالسعادة والله يرزقك نفس فرحته واكثر بعد

حضنته امي ورحت چيتت بنصهم فك شوية من داهرته، ما اللومه اني وعمر روح وحدة بجسدين احس بوجعه حتى اني مقهور لان راح نفترق بس بعد هاي الدنيا..

-عمر: كافي وخرو خلونه نسولف بالعزيمة

-زهراء: فكرت نسويهه بمزرعتنه حلوة وجبيرة وراح نستمتع

-علي: خوش فكرة بس باردة كلش

-زهراء: تدفأة موجودة كل مكان

-عمر: منو راح يجي؟

-زهراء: عزمت اهل دعاء كلهم واعزم حصة واولادهه وحمزة واهله وبعد منو

-علي: يصير اعزم صاحبنه واهله هم؟

-عمر: خاف يتقيدون اهل خطيبتك؟

-علي: لا عادي حاچي لدعاء عنه

-عمر: ظافر؟

-علي: اي هو ظافر

-عمر: اي عادي اعزمه حتى اعزم اخته وامه هم اذا تريد

-علي: هذا هو چا راح اعزمهم

-زهراء: باجر اريد كلشي مثالي ماما ولدي رفعو راسي كدام اهل دعاء اريد تدللهه علاوي خليهه تتونس واياااك تزعلهه بشي لو تحاول تقلل منهه مثل ذاك اليوم اكسر راسك

-علي: يمة والله ما قصدت اقلل منهه عبالي تعرف تحجي انكليزي اشم گفه ايدي اني هي ما تعرف

-زهراء: لا تحسسهه بنقص امي تريد تعلمهه علمهه بس بطريقة غير مباشرة بدون لا تجرحهه حرام

-علي: صار بنص عيني دعاء احطهه

**

-بسملة: هههههههههههههه

-دعاء: هههههههههههههههههههه

-نور: هههههههههههههااااايييي

-ام مريم: هههههههههه كافي ولجن

-بسملة: هههههههههه هههههههههههه ههههههههههه راح امووووووت

-دعاء: والقران فطستتتتتت

-مريم: انچبنننن

-بسملة: لو تموتوني وتشرحوني ماروح هههههههههه

-دعاء: لو تذبوني بالزبل ماروح خوووووش ههههههههه

-مريم: راح اموتچن صوووت ما اسمع فهمتن لو لا

-بسملة: طن طن طن طن راح نشوف ابو الطووط وسحليته

-مريم: بابااااا كول لبسملة صايرة مستهترة

-احمد: شبيچ بابا بسومة

-بسملة: مابيه شي حبيبي انتبه للطريق باباتي الحلو

-مريم: بابا هاي حقيرة تغثنيي صيح بيهه

-احمد: بسملة صيري حبابة بنيتي دكتورتنه الحلوة

-بسملة: حبيب گلبي غير تدلل انتَ بس مرايم تتنعوص شوية

-احمد: هههه حبيبة بابا

گولبت عيوني راح اطگ راح اموت من ابوية ودلاله لبسملة الحقيرة تحرك بحواجبهه بطريقة على عنادج جبناچ غصب وانكسر راسچ..

كاعدة على اعصابي گوة لازمة نفسي عقلي كله ويه الاطلس شلون راح اشوفه خايفة كلش من شوفته ويه نورسين راح انفجر من القهر وضجت اكثر من ابوية جبرني اروح وياهم وحطني بهذا الموقف المقرف..

وصلنه بعد ساعات لمزرعة بيت اهل علي نزلنه شفنه الكل هناك متجمع سلمت على سارة ورقية واسيل سلام حار بقت علاقتي بيهن قوية ما انقطعنه عن بعض وسلمت على الباقين وكعدت ادور بعيوني المكان..

-سارة: مسافر

فزيت على همسهه القريب مني انداريت عليهه بسرعة فاتحة عيوني ابتسمت وكالت..

-سارة: الاطلس مسافر مو هنا

-مريم: ها؟

-سارة: صارله اسبوعين بـ لندن

-هاا اي براحته

-اي علمود مجموعتنه الجديدة راح عدهم شغل علساس حمزة هم وياه يروح وبطل من تعبت اني

-شلونچ ويه الحمل سارونة؟

-زينة كلش صح اتعب بس فرحة حمزة تنسيني كل التعب متونسة مريم كلش كلش

-حياتي ربي يديمهه، زين وغدير؟

-متعرف بعدهه

-متعرف بيج حامل؟!!

-لا متعرف ضميت عليهه اخاف احجي

-حقج

ابتسمت وهزت راسهه، باوعت لبطنهه بعدهه ممبينه بس شوية سارة ذبلانة تعب الحمل مبين عليهه، بقيت كاعدة احوص بمكاني من خالة حصة ونانا كعدن يسولفن بسفرة الاطلس..

-مريم: سارونة

-ها

-اطلس... لا لا هيج انسي

-شنو كولي

-اطلس مسافر ويه ابوج؟

-لا رايح وحده هو واصدقاءه

-منو اصدقاءه؟؟؟

-ماعرفهم والله

-متعرفين ولا واحد؟

-يمكن بس نورسين اعرفهه منهم

-رايح ويه نورسين

-اممم

بلعت ريگ وانطيتهه جانبي الايمن گلبي راح يطلع من صدري من گدما ينبض غمضت عيوني بقوة وزفرت نفس اهدأ روحي ماريد افضح نفسي مريم اهدأي..

-دعاء: مريم تعالي شوية

كمت اروح اكعد بصفهه گرصت ايدي وهمست..

-ليش وجهج احمر؟

-اطلس مسافر ويه نورسين!

-صدك؟

-اي ليش ما كلتيلي دعاء معقولة علي ما حاچيلج؟؟

-لا والله اصلاً ما سألته انتِ مو متقبلين اسئله عنه تكولين خاف عباله انتِ موصيتني

-اي بس اكيد ابوية يعرف چان ما خلاني اجي وياكم

-صحيح حتى اني احس هيج، حبي معليج بيهم لتفكرين بي وتضوجين نفسج

-لا شنو افكر بي مخبلة

جذب اي مخبلة ودا افكر بي وجاي اموت واحترك من جوه اكص ايدي اذا ما سافرت وياه حتى تختار بدلة عرسهه من الخارج من ارقى المصممين العالميين متأكدة هذا السبب..

ذبيت نفس وكمت اكعد بغرفة وحدي صافنة على المزرعة بره اتأملهه واهدأ نفسي، قررت ما افكر وشيصير خلي يصير مريم ممنوع تفكرين بي بعد حرام خلص خيولي..

**

"بسملة"

سحسلتني دعاء اوكف اراقبلهه الاجواء تريد تكعد ويه علي وحدهم اخر مرة بالخطوبة قبل الزواج يردون يستمتعون ويعيشون ذكريات حلوة، قررو يكعدون وره المزرعة..

-دعاء: عليج الله انتبهي عدل بس يجي ابويه او احد دكي عليه تلفون امي يمج صح؟

-اي اي بس روحي ولتصيرين ادبسز ما بقى شي لعرسج

-ما اصير والله شبيكم بس نكعد نسولف

هزيت راسي وخلت وراحت، كعدت على كرسي موجود اتأمل المكان شوية وطلعت صديقتي فاتن واخوهه ظافر، فرحت كلش من عازميهه هي اخت صديق عمر التعرفت عليهه بالجامعة بس هي قسم ادارة..

-فاتن: ها شو كاعدة هنا وحدج

-بسملة: اشم هوا المزرعة تجنن

-فاتن: اي همزين من الولد عزمونه خلي نتونس

-ظافر: مرحبا يا آنسة

-بسملة: اهلاً استاذ

كمت وكفت بصف فاتن استحي من اخوهه هاي اول مرة اشوفه شكله حباب ومؤدب عكس التوأم الصلف ولا عبالك صديقهم..

-فاتن: بسومة هذا اخوية ظافر يشتغل بشركة الاطلس محاسب

-بسملة بهمس: ها هناك تعرفو عليه التوأم؟

-فاتن: لا لا چانو سوه بالمدرسة صديقهم من ايام الثانوي

درت عيوني اباوعله شفته صافن عليه مبتسم مجرد صارت عينه بعيني نزلهم وسوه روحه يباوع لحذاءه..

فاتن مو من الطبقة المخملية ناس على گد حالهم عايشين على راتب اخوهه وهي تكعد ويايه بالدار لان بيتهه بعيد عن الجامعة، حبيت شلون ظافر صديق التوأم رغم اختلاف الطبقات..

-فاتن: بسومة خلينه نفتر

-بسملة: لا اني لازم ابقى هنا ما ابتعد هواي

-ظافر: تخافين؟

-بسملة: شنو اني اخاف لا شنو اخاف بس ماكدر ابتعد هوايه اختي منتظرتني

-فاتن: هاا لعد خلينه نكعد هنا نسولف

كعدت بالكاع متربعة على الحشيش الميت ابتسمت وكعدت بصفهه بنفس الطريقة، رفعت راسي ظافر على وگفته مكتف ايده ووگفته صاير ورانه..

-بسملة بهمس: اكلج شبي اخوج؟

-فاتن: واكفلي حراسة المحروس

-صدك والله؟

-اي شبيچ يخاف عليه

-خايف عليج من شنو

-شمدريني دسكتي هاي سوالف امي طلعت السفرة من خشمي

-شجاهم شنو اول طيحتهه السفرة

-فاتن: شمدريني

-بسملة: هذا ابوية هو جرجرني يكول شعندج كاعدة بالبيت مثل الخنفسانة خاتلة بالمجاري

-فاتن: هههههههههههههههه خرب عرضج بسملة

-والله هاي من يضوجون مني يصيحولي الخنفسانة

-فاتن: لعد اني يصيحولي حية ام راسين لاني تستوسة

-بسملة: وربي مينلامون بس احلى تستوسة

ضحكنه بصوت عالي استحيت من شفت ظافر يضحك ويانه شلون خزي سمع محادثتنه، لزمت روحي اريد اسكت بس ماكدر اضحك على ضحكة فاتن الفضيحة تشوخر ويه كل ضحكة تضحكهه واني افطس..

-ظافر: هههههه ولج فاتن كافي

-فاتن: راح اموووت الخنفسانة وحية ام راسين ههههههههههه

-بسملة: هههههههههههههههه انفضحنه تخزينه ههههههه سكتييي