رواية الغرور والندم الفصل الأول 1 - بقلم قمر الليل

اني اسمي يوسف واني ارتكبت هلبا اخطاء في حياتي تكبرت و اذيت و كسرت بخاطر غيري وكله بسبب الغرور لكن بعدين اندمت ندم العمر.

اسمي يوسف اني الوسطي بين خوتي عندي اخت اكبر مني و ثلاثة بنات اصغر لما كنت في الابتدائي توفى بوي الله يرحمه بحادث سيارة كنا نسكنو مع حوش جدي بو بوي بدت تصير مشاكل هلبا مع حوش جدي بحكم جداي و عماتي كانو يكرهو امي و خواتي وبدت يتفاخرو فينا بعد موت بوي كل يوم مشاكل يوم ضاربين اختي الصغيرة يوم مطلعين على اختي الكبيرة كلام يوم مخنبيني وخلو امي تخدم جداي زي الشغالة وصلت بيهم الدرجة انهم في يوم خشو لشقتنا و حنى مهناش و خدو

كل شي في الثلاجة و خربو المطبخ هكي فساد لما روحنا امي قالت خلاص اني معاش نتحمل اكثر مشى امي كلمت خالي و قالتله خالي كان ماسك الورث متاع بو امي مشى باع اراضي و حاجات تبع الورث واعطي لامي حصتها قاللها اطلعي يا اختي من حوشهم و فوتيهم تو تعيشي معززه في حوشك امي ما قلتش على قصة الورثه لعمامي اخدت الفلوس ومشت شرت حوش حدا خوالي و حولنا جدي بو بوي دار مشكلة في البداية قال كيف تحولو وتخلونا اني وجدتكم منو بينا قتله يا جدي

كانك حق تحبنا ما تخليش عزوزتك ادير فينا كل هذا العبيتر و انت ساكت قال راهو كان تطلعو مش حا تورتو من ورث بوكم قلنالا ما نبو شي منك وطلعنا من حوش جدي وانتقلنا لحوشنا الجديد فيلا مشاءالله بحكم امي طلعلها ورث كويس المنطقة الجدية اللي سكنا فيها كانت منطقة هادية و كويسة وخوالي كلهم ساكنين بحدانا ولقينا بحدانا مدرسة خاصة كبيرة مشينا سجلنا فيها و بالصدفة كانت بداية العام الدراسي اني وليت ولد مغرور بعد ما ولت حالتنا كويسة من

الورث بديت نشبح في روحي انسان متفوق في كل النواحي و مازيني حد لما انتقلنا للمدرسة الجديدة درت اصدقاء فيها غالبيتهم منافقين زيني

ونحب نتفاخر قدامهم المهم فيه يوم واحنى طالعين في المرواح انخبطت بالغلط في ولد طحت نضت دفيته قتله خيرك شن قصتك اعمى هو كان اكبر مني وجهاما ضربني وفات اني قعدت نتحزز عليه قتله كانك راجل تعالالي غدوى الصبح قدام المدرسة ثاني يوم جيت للمكان اللي بنتعارك فيه معاه وجبت موس معاي وهو جي وكيف بنتعاركو على فوتت اختي الكبيرة رانيا قالت شن فيه يا يوسف هو الولد وقف قال هذا خوك قالت ايه هو تغيرت معالم وجها وقف قدامي واعتذر وامشى اني استغربت قلت خيره هذا في الاستراحه كلمت الأولاد عليه قتلهم تعرفوه قالو ايه اسمه كريم وهو صح صحيح و ما يقده حد لكن في حاله و نيه شوية اني في المروح زدت سألت اختي عليه قتلها يا رانيا تعرفيه كريم هذا مني قالتلي ايه زميلي في الصف

ولد كويس في حاله و ممتاز قتلها ااه باهي غير باعدي من عليه مش مستريحله اني قالتلي نعرف مصلحتي مش لين تقولي المهم فاتت الايام واني بديت نحس في كريم بدي يقرب مني كانّه يبي يكون صديقي لكن اني مغرور ومتكبر فته وماعدلتش عليه هو اكبر مني بسنتين واني نقرا ساعتها ثاني إعدادي وهو أوله ثانوي يوم واحنى مروحين لاحظته مروح على رجليه وخش للشارع اللي بحدانا يعني طلع يسكن في مربعنا اني طبعاً زي ما قتلكم فايته المهم واحد من الايام طق علينا الباب فتحت لقيت ……